##### edition  (gez) — Text of the EOTC printed Bible
=== chapter 1 ===
[Chapter 1]
1 ወኮነ፡ ወርኀ፡ ሴኬሉ፡ አመ፡ ዕሥራ፡ ዓመት፡ እንዘ፡ ሀሎኩ፡ በማእከለ፡ ሀገር።
2 መጽአ፡ ሐናኒ፡ አሐዱ፡ እምአኀዊነ፡ ምስለ፡ ሰብአ፡ ይሁዳ፡ ወተስእልክዎሙ፡ በእንተ፡ አይሁድ፡ ወእለ፡ ተርፉ፡ እምነ፡ ፄዋ፡ ወበእንተ፡ ኢየሩሳሌም።
3 ወይቤሉኒ፡ እለሰ፡ ድኅኑ፡ ወእለ፡ ተርፉ፡ እምእለ፡ ተፄወዉ፡ ህየ፡ ውስተ፡ ውእቱ፡ ብሔር፡ በዓቢይ፡ ሕማም፡ ወበብዙኅ፡ ተጽናስ፡ ወአረፋቲሃኒ፡ ለኢየሩሳሌም፡ ተነሥታ፡ ወአናቅጺሃኒ፡ ውዕያ፡ በእሳት።
4 ወእምዝ፡ ሶበ፡ ሰማዕኩ፡ ዘንተ፡ ነገረ፡ በከይኩ፡ ወነበርኩ፡ ብዙኀ፡ መዋዕለ፡ እንዘ፡ እላሁ፡ ወእጼሊ፡ ወእጸውም፡ ቅድመ፡ አምላከ፡ ሰማይ፡ ወምድር።
5 ወእቤ፡ ሐሰ፡ ለከ፡ እግዚኦ፡ አምላከ፡ ሰማይ፡ ወምድር፡ ዓቢይ፡ ወኃያል፡ ወግሩም፡ ዘተዓቅብ፡ ኪዳነከ፡ ወምሕረተከ፡ ለእለ፡ ያፈቅሩከ፡ ወለእለ፡ የዓቅቡ፡ ትእዛዘከ።
6 ወይኩና፡ ክሡታተ፡ ዕዠኒከ፡ ወአዕይንቲከ፡ ከመ፡ ትርአይ፡ ወትስማዕ፡ ጸሎጸ፡ ገብርከ፡ እንተ፡ ጸለይኩ፡ ዮም፡ በዛቲ፡ ዕለት፡ መዓልተኒ፡ ወሌሊተኒ፡ በእንተ፡ ደቂቀ፡ እስራኤል፡ አግብርቲከ፡ ወንትጋነይ፡ ለከ፡ በእንተ፡ ኃጢአቶሙ፡ ለደቂቀ፡ እስራኤል፡ ዘአበሱ፡ ለከ፡ ወአነሂ፡ ወቤተ፡ አቡየ፡ አበስነ፡ ለከ፡ ወክሕድናከ።
7 ወኢዐቀብነ፡ ትእዛዘከ፡ ወኵነኔከ፡ ወሕገ፡ ዘአዘዝኮ፡ ለሙሴ፡ ቊልዔከ።
8 ተዘከርኬ፡ ቃለከ፡ ዘአዘዝኮ፡ ለሙሴ፡ ቊልዔከ፡ እንዘ፡ ትብል፡ እምከመ፡ ዓለውክሙኒ፡ አዘርወክሙ፡ አነኒ፡ ውስተ፡ ኵሉ፡ በሐውርተ፡ አሕዛብ።
9 ወእመሰ፡ ተመየጥክሙ፡ ኀቤየ፡ ወዓቀብክሙ፡ ትእዛዝየ፡ ወገበርክምዎ፡ እመኒ፡ እስመ፡ አናጽፈ፡ ምድር፡ ተዘረውክሙ፡ አመጽአክሙ፡ እምህየ፡ ወአስተጋብአክሙ፡ ውስተ፡ ዝንቱ፡ ብሔር፡ ዘኃረይኩ፡ ከመ፡ ይኅድር፡ ስምየ፡ ውስቴቱ።
10 እስመ፡ አግብርቲከ፡ እሙንቱ፡ ወሕዝብከ፡ እለ፡ ቤዘውከ፡ በኃይልከ፡ ዓቢይ፡ ወበእዴከ፡ ጽንዕት፡ ሐሰ፡ ለከ፡ አግዚኦ።
11 ወዕዛኒከ፡ ያጽምዓ፡ ጸሎቶ፡ ለገብርከ፡ ወጸሎቶሙ፡ ለአግብርቲከ፡ እለ፡ ይፈቅዱ፡ ይፍርሁ፡ ስመከ፡ ወርድኦ፡ ለገብርከ፡ ወፈኑ፡ ሎቱ፡ ሣህለከ፡ በቅድመ፡ ዝንቱ፡ ንጉሥ፡ አንሰ፡ ሕፅው፡ ወአነ፡ አሰትዮ።
=== chapter 2 ===
[Chapter 2]
1 ወኮነ፡ በወርኀ፡ ኔሳን፡ አመ፡ ዕሥራ፡ ዓመተ፡ መንግሥቱ፡ ለአርተሰስታ፡ ንጉሥ፡ ወሀሎ፡ ቅድሜሁ፡ ወይን፡ ወነሣእኩ፡ ውእተ፡ ወይነ፡ ወመጠውክዎ፡ ለንጉሥ፡ ወአልቦ፡ ባዕድ፡ በቅድሜሁ።
2 ወይቤለኒ፡ ንጉሥ፡ በእፎ፡ ዮም፡ ትኩዝ፡ ገጽከ፡ እንዘ፡ ኢኮንከ፡ ድውየ፡ እስመ፡ እኩይ፡ ውስተ፡ ልብከ፡ ወፈድፋደ፡ ፈራህኩ፡ ጥቀ።
3 ወእቤሎ፡ ለንጉሥ፡ ሕየው፡ ንጉሥ፡ ለዓለም፡ በእፎ፡ ኢይቴክዝ፡ ገጽየ፡ አመ፡ ሀገር፡ ቤተ፡ ዝኅሮሙ፡ ለአበውየ፡ ማሰነት፡ ወአናቅጺሃኒ፡ ውዕያ፡ በእሳት።
4 ወይቤለኒ፡ ንጉሥ፡ በእንተ፡ ምንት፡ ተኀሥሥ፡ አንተ፡ ዘንተ፡ ወጸለይኩ፡ ኀበ፡ አምላከ፡ ሰማይ፡ ወምድር።
5 ወእቤሎ፡ ለንጉሥ፡ እመ፡ ትፈቅድ፡ ንጉሥ፡ ይትፈሣሕ፡ ገጽየ፡ በቅድሜከ፡ ፈንወኒ፡ ብሔረ፡ ይሁዳ፡ ሀገረ፡ ዝኅሮሙ፡ ለአበውየ፡ ወአሐንጽ።
6 ወይቤለኒ፡ ንጉሥ፡ ወንግሥትኒ፡ እንተ፡ ትነብር፡ በገቦሁ፡ እስከ፡ ማእዜ፡ እንከ፡ ትትመየጥ፡ ወማእዜ፡ ተአቱ፡ ወተፈሣሕኩ፡ በቅድመ፡ ንጉሥ፡ ወወሀብክዎ፡ ዕድሜ፡ ወፈነወኒ።
7 ወእቤሎ፡ ለንጉሥ፡ እመሰ፡ ትፈቅዲ፡ ንጉሥ፡ ሀበኒ፡ መጻሕፍተ፡ ዘእወስድ፡ ኀበ፡ መላእክተ፡ ማዕዶተ፡ ተከዚ፡ ከመ፡ ያብጹሑኒ፡ እሙንቱ፡ እስከ፡ ብሔረ፡ ይሁዳ።
8 ወጸሐፈ፡ ሊተ፡ መጽሐፈ፡ ኀበ፡ አሳፍ፡ ዓቃቤ፡ ዓፀደ፡ ቀምሑ፡ ለንጉሥ፡ ከመ፡ የሀበኒ፡ ዕፅወ፡ በዘእጠፍር፡ አናቅጺሃ፡ ወአረፍተ፡ ሀገርኒ፡ ወለውእቱ፡ ቤት፡ ኀበ፡ እበውእ፡ አነ፡ ወወሀበኒ፡ ንጉሥ፡ ኵሎ፡ በእደ፡ እግዚአብሔር፡ ቡርክት።
9 ወሖርኩ፡ ኀበ፡ መላእክተ፡ ማዕዶተ፡ ተከዚ፡ ወመጠውክዎሙ፡ መጻሕፍተ፡ ንጉሥ፡ ወፈነወ፡ ንጉሥ፡ ምስሌየ፡ መላእክተ፡ ኃይል፡ ወአፍራሰኒ።
10 ወሰምዐ፡ ሰንባላጥ፡ ሐሮናዊ፡ ወጦብያ፡ ገብረ፡ አሞናዊ፡ ወኢሐወዞሙ፡ እስመ፡ መጽአ፡ ብእሲ፡ ዘይገብር፡ ሠናየ፡ ለደቂቀ፡ እስራኤል።
11 ወበጻሕኩ፡ ኢየሩሳሌም፡ ወነበርኩ፡ ህየ፡ ሠሉሰ፡ መዋዕለ።
12 ወእምዝ፡ ጌሥኩ፡ በሌሊት፡ አነ፡ ወእደው፡ ኅዳጣን፡ ሀለዉ፡ ምስሌየ፡ ወኢነገርኩ፡ ለሰብእ፡ ዘወደየ፡ እግዚአብሔር፡ ውስተ፡ ልብየ፡ ዘከመ፡ እገብር፡ ለእስራኤል፡ ወአልቦ፡ ኀቤየ፡ እንስሳ፡ ዘእንበለ፡ ዘእፄዓን፡ ለልየ።
13 ወወፃዕኩ፡ በአንቀጸ፡ ጉሁኤል፡ በሌሊት፡ ዘመንገለ፡ ማዕዶተ፡ ገጸ፡ ነቅዕ፡ ወኀበ፡ ቈጽለ፡ በለስ፡ ወመንገለ፡ ገጸ፡ አንቀጽ፡ ኀበ፡ ይክዕዉ፡ እዳወ፡ ወሖረኩ፡ ጥቃ፡ አረፍታ፡ ለኢየሩሳሌም፡ እንተ፡ ነሠቱ፡ ወበጻሕኩ፡ መንገለ፡ አንቀጽ፡ ዘአውዓዩ፡ በእሳት።
14 ወፈለስኩ፡ እንተ፡ አንቀጸ፡ ሔና፡ ኀበ፡ ምጥማቀ፡ ንጉሥ፡ ወኃጣእኩ፡ እንተ፡ አኃልፍ፡ እንስሳየ፡ ዘእፄዓን።
15 ወእምዝ፡ ዐረጉ፡ እንተ፡ ጥቃ፡ ፈለግ፡ ሌሊተ፡ ወሖርኩ፡ እንተ፡ አረፍተ፡ ገቦ፡ እስከ፡ በጻሕኩ፡ አንቀጸ፡ ቈላ፡ ወሶበ፡ ተመየጥኩ፡ ኢርእዩኒ፡ ሰብእ።
16 ወመዓቅብትኒ፡ ኢያእመሩኒ፡ እንዘ፡ አሐውር፡ ወእንዘ፡ እገብር፡ አነ፡ ወኢነገርክዎሙ፡ ኢ፡ ለአይሁድ፡ ወኢ፡ ለካህናት፡ ኢ፡ ለዓበይት፡ ወኢ፡ ለዓቀብት፡ ወለእለ፡ ተርፉ፡ እለ፡ ይገብሩ፡ ግብረ፡ ወእስከ፡ ይእቲ፡ አሚር፡ ኢነገርኩ።
17 ወድኅረ፡ እቤሎሙ፡ ናሁ፡ ርእዩ፡ ሕማመነ፡ ዘውስቴቱ፡ ሀሎነ፡ ዘከመ፡ ማሰነት፡ ኢየሩሳሌም፡ ወዘከመ፡ አውዓዩ፡ አናቅጺሃ፡ በእሳት፡ ንዑ፡ ንሕንጽ፡ አረፋቲሃ፡ ለኢየሩሳሌም፡ ከመ፡ ኢንኩን፡ መስትታነ።
18 ወነገርክዎሙ፡ ዘከመ፡ ረድአተኒ፡ እዴሁ፡ ለእግዚአብሔር፡ ቡርክት፡ ወቃለ፡ ንጉሥኒ፡ ዘይቤለኒ፡ ወእቤሎሙ፡ ተንሥኡ፡ ንሕንጽ፡ ወጸንዖሙ፡ እዴሆሙ፡ ለሠናይ።
19 ወሰምዑ፡ ሰንባለጥ፡ ሐሮናዊ፡ ወጦብያ፡ ገብረ፡ አሞናዊ፡ ወጌሰም፡ ዓረባዊ፡ ወሰሐቁ፡ ላዕሌነ፡ ወአስተሐቀሩነ፡ ወመጽኡ፡ ኀቤነ፡ ወይቤሉነ፡ ምንትኑዝ፡ ነገር፡ ዘትገብሩ፡ አንትሙ፡ ዘኢአዘዘ፡ ንጉሥ፡ ቦኑ፡ አንትሙ፡ ተዓልዉ፡ ንጉሠ።
20 ወነገርክዎሙ፡ ቃልየ፡ ወእቤሎሙ፡ አምላከ፡ ሰማይ፡ ይረድአነ፡ ወንሕነ፡ አግብርቲሁ፡ ንትነሣእ፡ ወነሐንጽ፡ ሎቱ፡ አንትሙሰ፡ አልብክሙ፡ ክፍል፡ ወጽድቅ፡ ወዝክር፡ በኢየሩሳሌም።
=== chapter 3 ===
[Chapter 3]
1 ወተንሥአ፡ ኤሌሱብ፡ ካህን፡ ዓቢይ፡ ወአኃዊሁኒ፡ ካህናት፡ ወሐነፁ፡ አንቀጸ፡ ጲሩጳጥቄ፡ ወእሙንቱ፡ ቀደስዋ፡ ወአቀሙ፡ ኆኃቲሃ፡ እስከ፡ ማኅፈድ፡ ወቀደሱ፡ እስከ፡ ማኅፈደ፡ ሐናናኤል።
2 ወበገቦሆሙ፡ ሰብአ፡ ደቂቀ፡ ኢያሪኮ፡ ወበገቦሆሙ፡ ደቂቀ፡ ዝኩር፡ ወልደ፡ አምሪ።
3 ወአንቀጸ፡ ኤክቴኤራን፡ ሐነጹ፡ ደቂቀ፡ አስንሓ፡ ወእሙንቱ፡ ጠፈርዋ፡ ወአቀሙ፡ ኆኃቲሃ፡ ወወደዩ፡ ወዓፁቲሃ፡ ወመናሥግቲሃ።
4 ወአኀዘ፡ እምገቦሆሙ፡ ሚራሞት፡ ወልደ፡ ኡርያ፡ ወልደ፡ ቆስ፡ ወበገቦሆሙ፡ አኀዙ፡ ሜሱላም፡ ወልደ፡ በራክያ፡ ወልደ፡ ሜሳ፡ ወዛብኤል፡ ወበገቦሆሙ፡ አኀዘ፡ ሳዶቅ፡ ወልደ፡ በሐና።
5 ወበገቦሆሙ፡ ሰብአ፡ ቴቆሐውያን፡ ወአድሮሔም፡ ወባሕቱ፡ ኢያብኡ፡ ክሳውዲሆሙ፡ ውስተ፡ ቅኔ።
6 ወአንቀጸ፡ ያስናይ፡ አኀዙ፡ እለ፡ ኢዮዳዕ፡ ወልደ፡ ፋሴሐ፡ ወሜሱላም፡ ወልደ፡ ቤሶድያ፡ ወእሙንቱ፡ ጠፈርዋ፡ ወወደዩ፡ መዓፁቲሃ፡ ወመናሥግቲሃ፡ ወኆኃቲሃ፡ አቀሙ።
7 ወበገቦሆሙ፡ አኀዙ፡ ሜልጥያ፡ ገባኦናዊ፡ ወያዴን፡ ማሮናዊ፡ ሰብአ፡ ገባኦን፡ ወመጼፋ፡ ወሴኬሴዕ፡ ወፈትሐት፡ ወአቤር፡ ወናሐር።
8 ወበገቦሆሙ፡ አኀዙ፡ ኡዝኤል፡ ወልደ፡ ሐሬሕያ፡ ወድሩፌም፡ ወበገቦሆሙ፡ አኀዙ፡ እለ፡ ሐናንያ፡ ወልደ፡ ኢዮኤቄም፡ ወአብጽሕዎ፡ ኀበ፡ ኢየሩሳሌም፡ እስከ፡ አረፍተ፡ መርኅብ።
9 ወበገቦሆሙ፡ አኀዘ፡ ረፋያ፡ ወልደ፡ ሑር፡ መልአከ፡ መንፈቀ፡ ዓውዳ፡ ለኢየሩሳሌም።
10 ወበገቦሆሙ፡ አኀዘ፡ ይዱሄል፡ ወልደ፡ ኤርሞታ፡ መንገለ፡ አንፃረ፡ ቤቱ፡ ወእምድኅሬሆሙ፡ አኀዘ፡ ሐጡስ፡ ወልደ፡ አስብንብሔም።
11 ወዳግመ፡ አኀዙ፡ ሚልክያ፡ ወልደ፡ ኤሩም፡ ወአሱብ፡ ወልደ፡ ፈሐትሞአብ፡ እስከ፡ ማሕፈደ፡ ናቱሪም።
12 ወእምኀቤሆሙ፡ አኀዘ፡ ሳሎም፡ ወልደ፡ አሎኤስ፡ መልአከ፡ መንፈቀ፡ ዓውዳ፡ ለኢየሩሳሌም፡ ውእቱኒ፡ ወአዋልዲሁኒ።
13 ወአንቀጸ፡ ዘፍኖተ፡ ቈላ፡ አኀዙ፡ ይሕንጹ፡ ሐኑን፡ ወእለ፡ ይነብሩ፡ ዘናን፡ ወእሙንቱ፡ ሐነፅዋ፡ ወአቀሙ፡ ኆኃቲሃ፡ ወመዓፁቲሃ፡ ወመናሥግቲሃ፡ ወዓሠርቱ፡ ምእት፡ በእመት፡ ይእቲ፡ አረፍት፡ እስከ፡ አንቀጸ፡ ምክዓወ፡ ሐመድ።
14 ወእምውእቱ፡ አንቀጽ፡ አኀዘ፡ ሚልክያ፡ ወልደ፡ ራኬብ፡ መልአከ፡ ዓውድ፡ ዘቤተ፡ ሐሪም፡ ውእቱኒ፡ ወአኃዊሁኒ፡ ወደቂቁኒ፡ ጠፈርዋ፡ ወአቀሙ፡ ኆኃቲሃ፡ ወመዓፁቲሃ፡ ወመናሥግቲሃ።
15 ወአረፍተ፡ ምጥማቃት፡ ነቅዕ፡ ዘገነተ፡ ንጉሥ፡ አኀዙ፡ ሰሎም፡ ወልደ፡ ኮል፡ ወሆዜ፡ መልአከ፡ ዓውድ፡ ዘመጼዋ፡ ውእቱኒ፡ ወእሙንቱ፡ የሐንጹ፡ ወይጠፍሩ፡ ወአቀሙ፡ ኆኃቲሃ፡ ወመዓፁቲሃ፡ ወመናሥግቲሃ፡ ወአረፍተ፡ ምጥማቃተ፡ ነቅዕ፡ ዘገነተ፡ ንጉሥ፡ እስከ፡ መንገለ፡ መዓርገ፡ ዘያወርድ፡ አምሀገረ፡ ዳዊት።
16 ወእምድኅሬሁ፡ አኀዘ፡ ነሕምያ፡ ወልደ፡ አዛቡሓ፡ መልአከ፡ መንፈቀ፡ ዓውድ፡ ዘቤሶር፡ እስከ፡ ቅድመ፡ መቃብረ፡ ዳዊት፡ ወእስከ፡ ምጥማቃት፡ እንተ፡ ገብሩ፡ ወእስከ፡ ቤተ፡ ኃያላን።
17 ወእምድኅሬሁ፡ አኀዙ፡ ሌዋውያን፡ ወሬሁም፡ ወልደ፡ ባኒ፡ ወእምድኅሬሁ፡ አኀዘ፡ አሰብያ፡ መልአከ፡ መንፈቀ፡ ዓውድ፡ ዘቂዓላ፡ ወአድያሚሃ።
18 ወእምድኅሬሁ፡ አኀዘ፡ ምስለ፡ አኃዊሆሙ፡ በዋይ፡ ወልደ፡ ኤንሐዳድ፡ መልአከ፡ መንፈቀ፡ ዓውድ፡ ዘቂዓላ።
19 ወእምድኅሬሁ፡ አኀዘ፡ አዙር፡ ዮሴዕ፡ መልአከ፡ መሴፋ፡ እምኀበ፡ ደገሙ፡ ውጥኖ፡ ወመስፈርተ፡ መዓዝን፡ ወመዓዝኒሁ፡ ዘመንገለ፡ ማዕዘንቱ።
20 ወእምኀቤሁ፡ አኀዘ፡ ባሮክ፡ ወልደ፡ ዘቡር፡ ወመጠነ፡ ዳግመ፡ ሎቱ፡ እምነ፡ ማዕዘንቱ፡ እስከ፡ ኆኅተ፡ ቤተ፡ ኤሌሴብ፡ ዓቢይ፡ ካህን።
21 ወእምኀቤሁ፡ አኀዘ፡ መራሞት፡ ወልደ፡ ኡርያ፡ ወልደ፡ ሐቁዘ፡ ወደገሙ፡ መጥኖ፡ እምኆኅተ፡ ቤተ፡ ኤሌሴብ፡ እስከ፡ ኀልቀ፡ ቤቱ።
22 ወእምድኅሬሁ፡ አኀዙ፡ ካህናት፡ ሰብአ፡ አኬክር።
23 ወእምኀቤሁ፡ አኀዙ፡ ብንያም፡ ወአሱብኒ፡ በቅድመ፡ ቤቶሙ፡ ወእምድኅሬሁ፡ አኀዘ፡ አዛርያ፡ ወልደ፡ ማዓስያ፡ ወልደ፡ ኀናንያ።
24 ወእምኀቤሁ፡ አኀዘ፡ ባኒ፡ ወልደ፡ ሔናዲድ፡ ወደገሙ፡ መጥኖ፡ እምቤተ፡ አዛርያ፡ እስከ፡ ማዕዘንቱ፡ ወእስከ፡ ገጽ፡ ቅሩበ፡ ቤቶሙ።
25 ፋልል፡ ወልደ፡ አውዛያ፡ አንፃረ፡ ማዕዘንት፡ ወማኅፈድ፡ ዘያወጽዕ፡ እምነ፡ ቤቱ፡ ለንጉሥ፡ ዘላዕላይ፡ ዓፀድ፡ ዘዕቁብ፡ ወእምኀቤሁ፡ አኀዘ፡ ፋዴሃ፡ ወልደ፡ ፎሮስ።
26 ወሰብአ፡ ናታኒም፡ እለ፡ ይነብሩ፡ ውስተ፡ አፌል፡ እስከ፡ ቅድመ፡ አንቀጸ፡ ማይ፡ ጽባሐዊ፡ ወእምነ፡ ማኅፈድ፡ ዘአምአፍኣ።
27 ወእምህየ፡ አኀዙ፡ ሰብአ፡ ቶቆሔም፡ ወመጠኑ፡ ሎሙ፡ ዳግመ፡ እምአንፃረ፡ ማኅፈድ፡ ዘእምህየ፡ ዘየዓቢ፡ እስከ፡ አረፍተ፡ አፌል፡ እምላዕሉ፡ አንቀጸ፡ አፍራስ።
28 ወእምህየ፡ አኀዙ፡ ካህናት፡ ወኵሉ፡ ብእሲ፡ በበ፡ አንፃረ፡ ደወለ፡ ቤቱ።
29 ወእምህየ፡ አኀዘ፡ ሳዶቅ፡ ወልደ፡ ሔሜር፡ አንፃረ፡ ደወለ፡ ቤቱ፡ ወእምዝ፡ አኃዘ፡ ሳምያ፡ ወልደ፡ አኬንያ፡ ዓቃቤ፡ አንቀጽ፡ ጽባሐዊ።
30 ወእምኀቤሁ፡ አኀዙ፡ ሐናንያ፡ ወልደ፡ ሰሌምያ፡ ወሐኑን፡ ወልደ፡ ሴሌፍ፡ ሳድስ፡ ወደገመ፡ መጥኖ፡ ወእምህየ፡ አኀዘ፡ ሜሱላም፡ ወልደ፡ በራክያ፡ መጋቤ፡ ሙዳየ፡ ምጽዋት።
31 ወእምህየ፡ አኀዘ፡ ሚልክያ፡ ወልደ፡ ሰራፊ፡ እስከ፡ ቤተ፡ ታኒም፡ ወሰብአ፡ ሮጳሊ፡ አንጻረ፡ አንቀጸ፡ ምሕዋጽ፡ እስከ፡ ዐቀበ፡ ገጽ።
32 ወእስከ፡ መንፈቀ፡ መዓርገ፡ አንቀጸ፡ ጲሩጳጥቄ፡ አኀዙ፡ ነህብት፡ ወሰብአ፡ ሮጳሊ።
=== chapter 4 ===
[Chapter 4]
1 ወሶበ፡ ሰምዐ፡ ሰንባላጥ፡ ከመ፡ ሐነጽነ፡ አረፍተ፡ ተምዐ፡ ፈድፋደ፡ ወኢሐወዞ፡ ወሰሐቶሙ፡ ለአይሁድ።
2 ወይቤ፡ በቀቅድመ፡ አኀዊሁ፡ ወበኃይለ፡ ሳምሮን፡ ምንት፡ ውእቱ፡ ኃይሎሙ፡ ለእሉ፡ ዓብዳን፡ አይሁድ፡ እለ፡ የሐንጹ፡ ሀገሮሙ፡ የኀድጉኑ፡ ሎሙ፡ ወይሠውዑኑ፡ ወይፌጽሙ፡ ወይሄልዉኑ፡ አእባን፡ እምድኅረ፡ ውዕዩ፡ እሙንቱ።
3 ወመጽአ፡ ጦብያ፡ አሞናዊ፡ ኀቤሁ፡ ወተባሃሉ፡ እመኒ፡ ሐነፁ፡ አኮኑ፡ የዐርጉ፡ ቈናጽል፡ ወይነሥቱ፡ እብነ፡ አረፋቲሆሙ።
4 ስማዕ፡ አምላክነ፡ ዘከመ፡ ኮነ፡ ጽእለተ፡ ወሚጥ፡ ሎሙ፡ ጽእለቶሙ፡ ላዕለ፡ ርእሶሙ፡ ወአኅሥሮሙ፡ በብሔረ፡ ተፄውዎቶሙ።
5 ወኢተሠውር፡ ሎሙ፡ ኃጢአቶሙ፡ እምቅድሜከ፡ ወኢትደምስስ፡ እስመ፡ ተቈጥዑ፡ በቅድሜሆሙ፡ ለእለ፡ የሐንጹ።
6 ወሐነጽነ፡ አረፍተ፡ ወተዋደደ፡ ኵሉ፡ አረፍተ፡ እስከ፡ ማእከላ፡ ወሀሎ፡ ልበ፡ ሕዝብ፡ ለገቢር።
7 ወሶበ፡ ሰምዑ፡ ሰንባላጥ፡ ወጦብያ፡ ወሰብአ፡ ዓረብ፡ ወአሞናውያን፡ ወአዛጦናውያን፡ ከመ፡ ዐርገ፡ ኑኃ፡ ለአረፍተ፡ ኢየሩሳሌም፡ አኀዙ፡ ይትቃተሉ፡ ወተምዑ፡ ፈድፋደ፡ በተላኵዮ፡ ወኢሐወዞሙ።
8 ወእምዝ፡ መጽኡ፡ ወተጋብኡ፡ ኵሎሙ፡ ኅቡረ፡ በገቢረ፡ ባእስ፡ ከመ፡ ይትቃተልዋ፡ ለኢየሩሳሌም።
9 ወጸለይነ፡ ኀበ፡ አምላክነ፡ ወአንበርነ፡ መዓቅበ፡ ሎሙ፡ መዓልተ፡ ወሌሊተ፡ ቅድመ፡ ገጾሙ።
10 ወይቤ፡ ይሁዳ፡ ደክመ፡ ኃይለ፡ ፀወርት፡ ወግብረ፡ ጽቡር፡ ብዙኅ፡ ወንሕነኒ፡ ኢንክል፡ ሐኒጸ፡ አረፍት።
11 ወይቤሉ፡ ፀርነ፡ ኢያእምሩ፡ ወኢይርአዩ፡ እስከ፡ ንበውእ፡ ማእከሎሙ፡ ወንቀትሎሙ፡ ወንረግዞሙ፡ ወናፀርዕ፡ ግብሮሙ።
12 ወእምዝ፡ ሶበ፡ መጽኡ፡ አይሁድ፡ እለ፡ ይነብሩ፡ ምስሌሆሙ፡ ወይቤሉነ፡ ዓሠርተ፡ ጊዜያተ፡ ከመ፡ ንትጋባእ፡ ኵልነ፡ እምኵሉ፡ በሐውርቲነ፡ ዘዓውዶሙ።
13 ወአቀምኩ፡ መንገለ፡ ታሕታይ፡ መካን፡ እምድኅረ፡ አረፍተ፡ ምሥዋር፡ ወህየ፡ አቀምክዎሙ፡ ለሕዝብ፡ በበነገዶሙ፡ ምስለ፡ ንዋየ፡ ሐቅሎሙ፡ ዘሂ፡ በኵናት፡ ወዘሂ፡ በሐፅ።
14 ወእምዝ፡ ሶበ፡ ርኢክዎሙ፡ ተንሣእኩ፡ ወእቤሎሙ፡ ለዓበይቶሙ፡ ወለእለሂ፡ ይቴሐትዎሙ፡ ወለእለ፡ ተርፉ፡ ሕዝብ፡ ኢትፍርሁኬ፡ እምገጾሙ፡ አላ፡ ተዘከርዎ፡ ለአምላክነ፡ ዓቢይ፡ ወግሩም፡ ወተቃተሉ፡ እንበይነ፡ አኀዊክሙ፡ ወደቂቅክሙ፡ ወአዋልዲክሙ፡ ወአንስቲያክሙ፡ ወአብያቲክሙ።
15 ወእምዝ፡ ሶበ፡ ሰምዑ፡ ፀርነ፡ ከመ፡ አእመርናሆሙ፡ ወሜጠ፡ እግዚአብሔር፡ ምክሮሙ፡ ወተመየጥነ፡ ኵልነ፡ ኀበ፡ አረፍት፡ ወገባእነ፡ ብእሲ፡ ብእሲ፡ ውስተ፡ ግብርነ።
16 ወእምይእቲ፡ ዕለት፡ መንፈቅነ፡ ንትቀነይ፡ ለግብር፡ ወመንፈቅነ፡ ለንዋየ፡ ሐቅልነ፡ ወነበርነ፡ እንዘ፡ ነዓቅብ፡ ፍጽመ፡ ወከዋላ፡ ወቦ፡ ሕዝብ፡ ዘበወልታ፡ ወኵናት፡ ወቦ፡ ዘበሐፅ፡ ወዘቀስት፡ ወቦ፡ ዘበድርዕ።
17 ወመላእክትሰ፡ ኵሎሙ፡ ድኅሬሆሙ፡ ለሰብአ፡ ይሁዳ፡ ወእለ፡ የሐንጹ፡ አረፍተ፡ ወእለ፡ ይፀውሩ፡ በኬሴል፡ ይፀውሩ፡ ወይገብሩ፡ በአሐቲ፡ እደዊሆሙ፡ ይትቀነዩ፡ ግብረ፡ ወበአሐቲ፡ እደዊሆሙ፡ ንዋየ፡ ሐቅሎሙ።
18 ወነደቅትኒ፡ ኵሎሙ፡ ቅኑታን፡ ሰይፎሙ፡ ውስተ፡ ሐቌሆሙ፡ ወይነድቁ፡ ወነፋሔ፡ ቀርንሰ፡ ሀሎ፡ ኀቤየ።
19 ወእቤሎሙ፡ ለዓበይት፡ ወለመላእክት፡ ወለኵሉ፡ ሕዝብ፡ ዝንቱ፡ ግብርነ፡ ዓቢይ፡ ውእቱ፡ ወብዙኅ፡ ንሕነሰ፡ ኢንጻፈቅ፡ ወንትራኃቅ፡ ብእሲ፡ ብእሲ፡ እምካልኡ።
20 ወኀበ፡ ሰማዕከሙ፡ ቃለ፡ ቀርን፡ ህየ፡ ንዑ፡ ኀቤየ፡ ወተጋብኡ፡ ወአምላክነ፡ ይጸብአ፡ ለነ።
21 ወንሕነሰ፡ ንግበር፡ ግብረነ፡ ወመንፈቅነ፡ ንንሣእ፡ ንዋየ፡ ሐቅል፡ ዘሂ፡ ኵናት፡ ወወልታ፡ ወዘሂ፡ ሐፅ፡ ወቀስት፡ እምጊዜ፡ የዓርግ፡ ጎህ፡ እስከ፡ ጊዜ፡ ይወጽኡ፡ ከዋክብት።
22 ወአዘዝክዎሙ፡ ለሕዝብ፡ ይእተ፡ አሚረ፡ ከመ፡ ይቢቱ፡ ማእከለ፡ ኢየሩሳሌም፡ ምስለ፡ አግብርቲሆሙ፡ ወእቤሎሙ፡ ሌሊተ፡ ሐልዉ፡ ወመዓልተ፡ ተቀነዩ፡ ግብረክሙ።
23 ወአንሰ፡ ወእኀውየ፡ ወደቂቅየ፡ ወሰብአ፡ መዓቅብ፡ እለ፡ እምድኅሬየ፡ ሀለዉ፡ ኢንፈትሕ፡ አልባሰነ፡ ወሶበኒ፡ ነሐውር፡ ኀበ፡ ቤተ፡ ማይ፡ ርሡያኒነ፡ ነሐውር፡ ምስለ፡ የዋየ፡ ሐቅልነ።
=== chapter 5 ===
[Chapter 5]
1 ወኮነ፡ ዓቢይ፡ ገዓር፡ ውስተ፡ ሕዝብ፡ ወኀበ፡ አንስቲያሆሙ፡ ወኀበ፡ ቢጾሙ፡ አይሁድ።
2 ቦ፡ እለ፡ ይቤሉ፡ ደቂቅነ፡ ወአዋልዲነ፡ እንዘ፡ ብዙኃን፡ ንሕነ፡ ንንሣእ፡ ለነ፡ ስንቀ፡ ዘንበልዕ፡ ከመ፡ ንሕየው።
3 ወቦ፡ እለ፡ ይቤሉ፡ እምኔነ፡ ገራውሂነ፡ ወአብያቲነ፡ ወዓፀደ፡ ወይንነ፡ አኂዘነ፡ ንሣየጥ፡ ለነ፡ ስንቀነ፡ ዘየአክለነ፡ ዘንበልዕ።
4 ወቦ፡ እሉ፡ ይቤሉ፡ እምኔነ፡ ተለቃሕነ፡ ብሩረ፡ ለጸባሕት፡ ዘና፡ ገብእ፡ ለንጉሥ፡ ገራውሂነ፡ ወዓፀደ፡ ወይንነ፡ ወአብያቲነ።
5 ወይእዜኒ፡ ነፍሰ፡ አኃዊነ፡ ከመ፡ ነፍስነ፡ ወውሉዶሙኒ፡ ከመ፡ ውሉድነ፡ ወናሁ፡ ይትገፍዑ፡ ደቂቅነ፡ ወአዋልዲነ፡ ወይቀነዩ፡ ወእንዘ፡ ይትገፍዑ፡ ኢንክል፡ አድኅኖቶሙ፡ ወዓበይት፡ ይነሥኡ፡ ገራውሂነ፡ ወዓፀደ፡ ወይንነ።
6 ወፈድፋደ፡ ተከዝኩ፡ ሶበ፡ ሰማዕኩ፡ ዘንተ፡ ነገረ።
7 ወሶበ፡ ሰማዕኩ፡ ገዓሮሙ፡ አኀዘንኩ፡ ልብየ፡ ወተላኰይክዎሙ፡ ለዓበይቶሙ፡ ወለመላእክቲሆሙ፡ ወእቤሎሙ፡ በእፎ፡ ትንሥኡ፡ ዘቢጽክሙ፡ አግብኡ፡ ሎሙ።
8 ወእምዝ፡ አንገለግነ፡ ዓቢየ፡ እንግልጋ፡ ወንቤሎሙ፡ ንሕነ፡ ተሣየጥናሆሙ፡ ለቢጽነ፡ አይሁድ፡ እለ፡ ተሠይጡ፡ ኀበ፡ አሕዛብ፡ በፈቃድነ፡ ወአንትሙ፡ ትሠይጡ፡ ቢጸክሙ፡ ወአርመሙ፡ ወኃጥኡ፡ ቃለ፡ እንተ፡ ያወሥኡ።
9 ወእቤሎሙ፡ አኮ፡ ሠናይ፡ ዝንቱ፡ ነገር፡ ዘትገብሩ፡ አንትሙ፡ አኮኑ፡ በፈሪሀ፡ እግዚአብሔር፡ ዘተሐውሩ፡ እምነ፡ ጽእለቶሙ፡ ለአሕዛብ፡ ፀርነ።
10 ወእነሂ፡ ወአኃውየ፡ ወደቂቅየ፡ ዘንነሥዕ፡ ወርቀ፡ ወእክለ፡ ወሥርናየ፡ ነኀድግ።
11 ወእቤሎሙ፡ አንትሙኒ፡ ኢትትፈደዩ፡ አግብኡ፡ ሎሙ፡ ገራውሂሆሙ፡ ወወይኖሙ፡ ወዓፀደ፡ ቅብዖሙ፡ ወቤዝዉ፡ ሎሙ፡ አብያቲሆሙ፡ ወአውፅኡ፡ ሎሙ፡ አንስቲያሆሙ።
12 ወይቤሉ፡ ኦሆ፡ ናገብእ፡ ሎሙ፡ በከመ፡ አዘዝከነ፡ ከማሁ፡ ንገብር፡ ወኢንነሥእ፡ እምኔሆሙ፡ ወኢምንትኒ፡ ወጸዋዕክዎሙ፡ ለካህናት፡ ወአምሐልክዎሙ፡ ከመ፡ ይግበሩ፡ ዘንተ፡ ነገረ።
13 ወነገፍኩ፡ ጽንፈ፡ ልብስየ፡ ወእቤሎሙ፡ ከመዝ፡ ለይንግፎ፡ እግዚአብሔር፡ ለኵሉ፡ ብእሲ፡ ዘኢገብረ፡ ዘንተ፡ ነገረ፡ ይፃዕ፡ እምቤቱ፡ ወእምፃማሁ፡ ወንጉፈ፡ ይኩን፡ ወይቤሉ፡ ኵሎሙ፡ ማኅበረ፡ አሕዛብ፡ አሜን።
14 ወሰብሕዎ፡ ለእግዚአብሔር፡ ወገብሩ፡ ሕዝብ፡ ዘንተ፡ ነገረ።
15 ወእምአመ፡ ተሠየምኩ፡ ሎሙ፡ መልአከ፡ በብሔረ፡ ይሁዳ፡ እንዘ፡ ዕሥራ፡ ዓመቱ፡ ለአርተሰስታ፡ እስከ፡ አመ፡ ኮነ፡ ሎቱ፡ ሠላሳ፡ ወክልኤቱ፡ ዓመት፡ ወኮነ፡ ዓሰርቱ፡ ወክልኤቱ፡ ዓመት፡ ወአነ፡ ወአኀውየ፡ እምአመ፡ ኮነ፡ ኢበላዕነ፡ እምነ፡ አሕዛብ፡ እክለ፡ ምኵናን፡ ወትዕግልት።
16 ወመኳንንትሰ፡ ቀደምት፡ ዘኮኑ፡ እምቅድሜየ፡ አክበዱ፡ ላዕሌሆሙ፡ ወሄድዎሙ፡ ወነሥኡ፡ እምኔሆሙ፡ እክለ፡ ወወይነ፡ ወወርቀኒ፡ ህየንተ፡ አሐዱ፡ በበ፡ አርባዓ፡ ዲዲርክሙ፡ ብሩር፡ ወደቂቆሙኒ፡ ተሠልጡ፡ ላዕሌሆሙ፡ ለሕዝብ፡ ወሄድዎሙ፡ ወአንሰ፡ ኢገበርኩ፡ ከማሆሙ፡ እስመ፡ ፈራህኩ፡ እምእግዚአብሔር።
17 ወእመኒ፡ ገብሩ፡ ዘንተ፡ አረፍተ፡ አልቦ፡ ዘአክበድኩ፡ ላዕሌሆሙ፡ ወገራህተኒ፡ ኢያጥረይኩ፡ ወኵሎሙ፡ ደቂቅየ፡ ጉቡአን፡ ህየ፡ ውስተ፡ ግብር፡ ወኵሎሙ፡ መላእክት፡ ለግብር።
18 ወየአከሉ፡ እለ፡ ተጋብኡ፡ ህየ፡ እምውስተ፡ አሕዛብ፡ እለ፡ ዓውድ፡ ምእት፡ ወኃምሳ፡ ብእሲ፡ እለ፡ ይሴሰዩ፡ ውስተ፡ ማእድየ።
19 ወዘይትገብር፡ ሲሳይነ፡ ዘለለ፡ ዕለት፡ ላሕም፡ አሐዱ፡ ወስድስቱ፡ አባግዕ፡ ስቡሐት፡ ወሐርጌ፡ ይትገበር፡ ሊተ፡ ወወይነ፡ ለለዓሡር፡ መዋዕል፡ ንሰፍር፡ ሎሙ፡ ለኵሎሙ፡ ወእንዘ፡ መጠነዝ፡ ፃዕፃዑ፡ ኢኀሠሥኩ፡ በትግልት፡ እንሥኦሙ፡ እክለ፡ ለሲሳይ፡ እስመ፡ ክቡድ፡ ቅኔሆሙ፡ ለእሉ፡ ሕዝብ።
20 ተዘከረኒ፡ እግዚኦ፡ በሠናይ፡ ኵሎ፡ ዘገበርኩ፡ ለዝንቱ፡ ሕዝብ።
=== chapter 6 ===
[Chapter 6]
1 ወእምዝ፡ ሶበ፡ ሰምዑ፡ ሰናበላጥ፡ ወጦብያ፡ ወጌሰም፡ ዓረባዊ፡ ወኵሎሙ፡ ፀርነ፡ ከመ፡ ተሐንፀት፡ አረፍታ፡ ወኢተርፈ፡ ንሡት፡ ላዕሌሃ፡ ተቀጽዑ፡ ወኢተርፈት፡ ነፍሶሙ፡ ላዕሌሆሙ፡ ወይእተ፡ አሚረ፡ ዓዲ፡ ኢያቀምነ፡ ኆኅተ፡ ዘአናቅጺሃ።
2 ወለአኩ፡ ኀቤየ፡ ሰንባላጥ፡ ወጌሰም፡ እንዘ፡ ይብሉ፡ ንዑ፡ ናንገልግ፡ በሐቅለ፡ ኦኖ፡ ውስተ፡ አሐዱ፡ ዓፀድ፡ እሙንቱሰ፡ ተማከሩ፡ ምክረ፡ እኩየ፡ ይግበሩ፡ ላዕሌየ።
3 ወለአኩ፡ ኀቤሆሙ፡ አነኒ፡ ሐዋርያተ፡ እንዘ፡ እብል፡ እስመ፡ ዓቢይ፡ ግብር፡ ዘእገብር፡ አነ፡ ኢይክል፡ ይእዜ፡ ወሪደ፡ ኀቤክሙ፡ ከመ፡ ኢይጸራዕ፡ ግብር፡ ወእምከመ፡ ፈጸምኩ፡ እወርድ፡ ኀቤክሙ።
4 ወዘንተ፡ ነገረ፡ አርባዕተ፡ ጊዜያተ፡ ለአኩ፡ ኀቤየ፡ ወአነኒ፡ ከማሁ፡ ለአኩ፡ ኀቤሆሙ።
5 ወለአከ፡ ኀቤየ፡ ኃምሳየ፡ ሰንባላጥ፡ ወልዶ፡ ወፈነወ፡ መጽሐፈ፡ ምስሌሁ፡ እንተ፡ ኢኮነት፡ ኅትምተ።
6 ወከመዝ፡ ትብል፡ ይእቲ፡ መጽሐፍ፡ ተሰምዐ፡ በውስተ፡ አሕዛብ፡ ከመ፡ ተማከርክሙ፡ ምስለ፡ አይሁድ፡ ከመ፡ ትግበሩ፡ ማዕሌተ፡ ወእንበይነ፡ ዝንቱ፡ ተሐንጽ፡ አንተ፡ ይእተ፡ አረፍተ፡ ከመ፡ ያንግሡከ፡ ሎሙ።
7 ወምስለዝኒ፡ አቀምከ፡ ነቢያተ፡ ከመ፡ ይስብኩ፡ ለከ፡ በኢየሩሳሌም፡ ወይበሉ፡ ነግሠ፡ በይሁዳ፡ ወይእዜኒ፡ ንዑ፡ ንትማከር፡ ኅቡረ፡ ወእመ፡ አኮ፡ ንልአክ፡ ኀበ፡ ንጉሥ፡ ዘንተ፡ ነገረ።
8 ወእምዝ፡ ለአኩ፡ ኀቤሁ፡ እንዘ፡ እብል፡ አኮ፡ ከመዝ፡ ነገሩ፡ ዘከመ፡ ትብል፡ አንተ፡ ዘትፈጥር፡ እምልብከ።
9 ኵልክሙ፡ ትጌርሙነ፡ እንዘ፡ ትብሉ፡ ናደክሞሙ፡ እደዊሆሙ፡ ወንከልኦሙ፡ ዘንተ፡ ግብረ፡ ገቢረ፡ ወይእዜኒ፡ አጽናዕኩ፡ እደውየ።
10 ወቦእኩ፡ አነ፡ ቤተ፡ ሴሜይ፡ ወልደ፡ ደላያ፡ ወልደ፡ ሜሔጣቤል፡ እስመ፡ ውእቱ፡ ሕጽው፡ ወእሙንቱ፡ ይብሉ፡ ንባእ፡ ቤተ፡ እግዚአብሔር፡ ወንዕፅዋ፡ ለኆኅተ፡ ቤተ፡ መቅደስ፡ ወኢናርኁ፡ ኆኅተ፡ ላዕሌሃ፡ ወናሁ፡ ይመጽኡ፡ ሌሊተ፡ ላዕሌከ፡ ወይቀትሉከ።
11 ወእምዝ፡ እቤሎሙ፡ መኑ፡ ብእሲ፡ ዘከማየ፡ ዘጐየ፡ ወቦአ፡ ውስተ፡ ቤት፡ ወአምሠጠ፡ ወሐይወ፡ ወአንሰ፡ ኢይበውእ።
12 ወናሁ፡ አእመርኩ፡ ከመ፡ ኢፈነወ፡ እግዚአብሔር፡ ላዕሌየ፡ እስመ፡ ተነበዩ፡ ነቢያት፡ ቃለ፡ ላዕሌየ።
13 ወጦብያ፡ ወሰንባላጥ፡ ዐሰቡ፡ ሰብአ፡ ላዕሌየ፡ ከመ፡ እፍርሆሙ፡ ወእግበር፡ ፈቃዶሙ፡ ወእጌጊ፡ ወእግበር፡ ስመ፡ እኩየ፡ ሊተ፡ ከመ፡ አኅሥር፡ ርእስየ።
14 ተዘከሮሙ፡ እግዚኦ፡ ለጦብያ፡ ወለሰንባላጥ፡ ኵሎ፡ ዘከመ፡ ገብሩ፡ ላዕሌየ፡ ዮም፡ ወለኑዓድያ፡ ነቢይት፡ ወለእለ፡ ተርፉ፡ ነቢያት፡ እለ፡ ኮኑ፡ ይጌርሙኒ።
15 ወፈጸምነ፡ አረፍተ፡ አመ፡ ዓሡሩ፡ ለጽልመተ፡ አይሉል፡ በኃምሳ፡ ወክልኤቱ፡ መዋዕል።
16 ወኮነ፡ ሶበ፡ ሰምዑ፡ ፀርነ፡ ፈርሁ፡ ኵሎሙ፡ አሕዛብ፡ እለ፡ ዓውድነ፡ ወፈድፋደ፡ ፈርሁ፡ ወገረሞሙ፡ ለዓይኖሙ፡ ወአእመሩ፡ ከመ፡ እምኀበ፡ አምላክነ፡ ዝንቱ፡ ግብር፡ ወተፈጸመ፡ ይእተ፡ አሚረ።
17 ወበእማንቱ፡ መዋዕል፡ ያበዝኁ፡ መጻሕፍተ፡ ኀበ፡ ጦብያ፡ እለ፡ የሐውሩ፡ ብዙኃን፡ ዓበይተ፡ አይሁድ፡ ወዘጦብያሂ፡ ያመጽኡ፡ ላዕሌሆሙ።
18 እስመ፡ ብዙኃን፡ እምሰብአ፡ አይሁድ፡ ተማሐሉ፡ ምስሌሆሙ፡ እስመ፡ ሐሙሁ፡ ውእቱ፡ ለሴኬንያ፡ ወልደ፡ አራሔ፡ ወዮሐናን፡ ወልዱ፡ አውሰበ፡ ለወለተ፡ ሜሱላም፡ ወልይ፡ በራክያ።
19 ወሠናይቶኒ፡ ኮኑ፡ ይነግሩ፡ በቅድሜየ፡ ወያስተሐውሩ፡ ወነቢበ፡ ዚአሁ፡ ያመጽኡ፡ ኀቤየ፡ ወነገረ፡ ዚአየ፡ ይወስዱ፡ ኀቤሁ፡ ወፈነወ፡ ጦብያ፡ መጻሕፍተ፡ ይጌርሙኒ።
=== chapter 7 ===
[Chapter 7]
1 ወኮነ፡ እምድኅረ፡ ተሐንጸ፡ አረፍት፡ ወአቀምኩ፡ ኆኅተ፡ ወሤምኩ፡ ዓፀውተ፡ ወመዘምራነ፡ ወሌዋውያነ።
2 ወአዘዝምዎሙ፡ ለሐናኒ፡ ወለሐናንያ፡ እኁየ፡ መልአከ፡ ሀገር፡ በኢየሩሳሌም፡ እስመ፡ ውእቱ፡ ራትዕ፡ ወክልኤሆሙ፡ ፈራህያነ፡ እግዚአብሔር፡ እሙንቱ፡ ወእምነ፡ ብዙኀን፡ ይኄይሱ።
3 ወእቤሎ፡ ዑቁ፡ ኢታርኅዉ፡ አናቅጺሃ፡ ለኢየሩሳሌም፡ እስከ፡ ሙቀተ፡ ፀሐይ፡ መዓልተ፡ ዕፅዉ፡ ወቀትሩ፡ ኆኅቲሃ፡ ወመዓቅብትኒ፡ ሌሊተ፡ ይዑዱ፡ ውስተ፡ ኢየሩሳሌም፡ ብእሲ፡ ብእሲ፡ በበዕብሬቱ፡ ወእደው፡ እለ፡ አስባብ፡ ኵሎሙ፡ በቅድመ፡ አብያቲሆሙ፡ ይቢቱ፡ ወያፅንዑ፡ ዓቂበ።
4 እስመ፡ ዓባይ፡ ይእቲ፡ ሀገር፡ ወረኀብ፡ ወሕብዝሰ፡ እለ፡ ይነብሩ፡ ውስቴታ፡ ኅዳጣን፡ ወአልቦ፡ ዘሐነጹ፡ አብያተ፡ ዓዲ፡ ውስቴታ።
5 ወወደየ፡ እግዚአብሔር፡ ውስተ፡ ልብየ፡ ወአስተጋባእክዎሙ፡ ለኵሎሙ፡ ሕዝብ፡ ወለዓበይቶሙ፡ ወለመላእክቲሆሙ፡ ለኆልቆ፡ ወአንገለግነ፡ ወረከብነ፡ መጽሐፈ፡ ዘኊልቈ፡ ቀደምትኒ፡ ወዘዓርጉ።
6 ወይብል፡ መጽሐፉ፡ እሉ፡ እሙንቱ፡ ሰብአ፡ ብሔር፡ ፈላስያን፡ እለ፡ ዓርጉ፡ እምኀበ፡ ተፄወዉ፡ እለ፡ አፍለሶሙ፡ ናቡከደነፆር፡ ንጉሠ፡ ባቢሎን፡ ወአተዉ፡ ኢሩሳሌም፡ ወይሁዳ፡ ብሔሮሙ።
7 ወኵሎሙ፡ እለ፡ አተዉ፡ ውስተ፡ አህጉሪሆሙ፡ ምስለ፡ ዘሩባቤል፡ ወምስለ፡ ኢዮስስ፡ ወነሕምያ፡ ወአዛርያ፡ ወረዓምያ፡ ወሔሚኔስ፡ ወመርዶክስ፡ ወበልስማ፡ ወመስፈራት፡ ወደምጣይ፡ ወነሐም፡ ወብዕና፡ ወመፍስር፡ ወበጋይ፡ እሉ፡ ኊልቈ፡ እደው፡ እምነ፡ ሕዝበ፡ እስራኤል።
8 ደቂቁ፡ ለፋሮስ፡ ዕሥራ፡ ምእት፡ ወአርባዕቱ፡ ምእት፡ ሰብዓ፡ ወክልኤቱ።
9 ወደቂቀ፡ ሰፋጥያ፡ ሠለስቱ፡ ምእት፡ ሰብዐ፡ ወክልኤቱ።
10 ወደቂቀ፡ ኤራ፡ ስድስቱ፡ ምእት፡ ሐምሳ፡ ወክልኤቱ።
11 ደቂቀ፡ ፈሐትሞአብ፡ እምትውልደ፡ ኢዮስስ፡ ወዘዮባብ፡ ዕሥራ፡ ምእት፡ ወሰመንቱ፡ ምእት፡ ዐሠርቱ፡ ወሰመንቱ።
12 ወደቂቀ፡ ኤላም፡ ዐሠርቱ፡ ምእት፡ ወድልኤቱ፡ ምእት፡ ሐምሳ፡ ወአርባዕቱ።
13 ደቂቀ፡ ዘቱይ፡ ሰመንቱ፡ ምእት፡ አርባዓ፡ ወኃምስቱ።
14 ደቂቀ፡ ዘካይ፡ ሰብዓቱ፡ ምእት፡ ወስሳ።
15 ደቂቀ፡ በኑይ፡ ስድስቱ፡ ምእት፡ አርባዓ፡ ወሰመንቱ።
16 ደቂቀ፡ ቤቢ፡ ስድስቱ፡ ምእት፡ ዕሥራ፡ ወሰመንቱ።
17 ደቂቀ፡ አስጊድ፡ ዕሥራ፡ ምእት፡ ወሠለስቱ፡ ምእት፡ ዕሥራ፡ ወክልኤቱ።
18 ደቂቀ፡ አዶኒቃም፡ ስድስቱ፡ ምእት፡ ስሳ፡ ወሰብዓቱ።
19 ደቂቀ፡ ቤጌዋ፡ ዕሥራ፡ ምእት፡ ስሳ፡ ወሰብዓቱ።
20 ደቂቀ፡ ኤዴን፡ ስድስቱ፡ ምእት፡ ኃምሳ፡ ወኃምስቱ።
21 ደቂቀ፡ አጤር፡ ዘሕዝቅያስ፡ ተስዓ፡ ወሰመንቱ።
22 ደቂቀ፡ ሔሴም፡ ሠለስቱ፡ ምእት፡ ዕሥራ፡ ወሰመንቱ።
23 ደቂቀ፡ ቤሳይ፡ ሠለስቱ፡ ምእት፡ ዕሥራ፡ ወአርባዕቱ።
24 ደቂቀ፡ ሐሪፍ፡ ምእት፡ ዓሠርቱ፡ ወክልኤቱ።
25 ደቂቀ፡ ገባኦን፡ ተስዓ፡ ወኃምስቱ።
26 ሰብአ፡ ቤተ፡ ልሔም፡ ወኔጣፍያ፡ ምእት፡ ሰማንያ፡ ወሰመንቱ።
27 ሰብአ፡ አናቶት፡ ምእት፡ ዕሥራ፡ ወሰመንቱ።
28 ሰብአ፡ ቤተ፡ አዝሞት፡ አርባዓ፡ ወክልኤቱ።
29 ሰብአ፡ ቀርያታርም፡ ወቃፌር፡ ወቢሮት፡ ወቃፌራ፡ ሰብዓቱ፡ ምእት፡ አርባዓ፡ ወሠለስቱ።
30 ሰብአ፡ ሐራማ፡ ወገቢዓ፡ ስድስቱ፡ ምእት፡ ዕሥራ፡ ወአሐዱ።
31 ሰብአ፡ መኬማስ፡ ምእት፡ ዕሥራ፡ ወክልኤቱ።
32 ሰብአ፡ ቤቴል፡ ወአይ፡ ምእት፡ ዕሥራ፡ ወሠለስቱ።
33 ሰብአ፡ ናብያ፡ ምእት፡ ኃምሳ፡ ወክልኤቱ።
34 ሰብአ፡ ኤላም፡ ዓሠርቱ፡ ምእት፡ ወክልኤቱ፡ ምእት፡ ኃምሳ፡ ወአርባዕቱ።
35 ደቂቀ፡ ኤራም፡ ሠለስቱ፡ ምእት፡ ወዕሥራ።
36 ደቂቀ፡ ኢያሪኮ፡ ሠለስቱ፡ ምእት፡ አርባዓ፡ ወኃምስቱ።
37 ደቂቀ፡ ሎድ፡ ወሐዲድ፡ ወሐኖ፡ ሰብዐቱ፡ ምእት፡ ዕሥራ፡ ወአሐዱ።
38 ደቂቀ፡ ሴናዓ፡ ሠላሳ፡ ምእት፡ ወተስዓቱ፡ ምእት፡ ወሠላሳ።
39 ወካህናትኒ፡ ደቂቀ፡ ዮዳሔ፡ ውስተ፡ ቤተ፡ ዮሴዕ፡ ተስዓቱ፡ ምእት፡ ሰብዓ፡ ወሠለስቱ።
40 ደቂቀ፡ ኤሜር፡ ዓሠርቱ፡ ምእት፡ ኃምሳ፡ ወክልኤቱ።
41 ወደቂቀ፡ ፋስኮር፡ ዓሠርቱ፡ ምእት፡ ወክልኤቱ፡ ምእት፡ አርባዓ፡ ወሰብዓቱ።
42 ደቂቀ፡ ሐራም፡ ዓሠርቱ፡ ምእት፡ ዓሠርቱ፡ ወሰብዓቱ።
43 ወሌዋውያንሰ፡ ደቂቀ፡ ዮሴዕ፡ ዘቀዳምያል፡ እሉ፡ ደቂቀ፡ ኤዱያ፡ ሰብዓ፡ ወአርባዕቱ።
44 ወእለ፡ ይዜምሩ፡ ደቂቀ፡ አሳፍ፡ ምእት፡ አርባዓ፡ ወሰመንቱ።
45 ወዐፀውትኒ፡ ደቂቀ፡ ሰሎምያ፡ ደቂቀ፡ አጤር፡ ደቂቀ፡ ጤልማና፡ ደቂቀ፡ አቁብ፡ ደቂቀ፡ ሐጤጣ፡ ደቂቀ፡ ሳቤ፡ ምእት፡ አርባዓ፡ ወሰመንቱ።
46 ወሰብአ፡ ናታኒም፡ ደቂቀ፡ ሴዓ፡ ደቂቀ፡ ሐሱፋ፡ ደቂቀ፡ ጠብዓት።
47 ደቂቀ፡ ቂሮስ፡ ደቂቀ፡ አስያ፡ ደቂቀ፡ ፋዶን።
48 ደቂቀ፡ ዕብና፡ ደቂቀ፡ አንጋብ፡ ደቂቀ፡ ሰልማይ።
49 ደቂቀ፡ ሐናን፡ ደቂቀ፡ ጋዴል፡ ደቂቀ፡ ጋኤር።
50 ደቂቀ፡ ረአያ፡ ደቂቀ፡ ረአሶን፡ ደቂቀ፡ ሬጼን፡ ደቂቀ፡ ኒቆዳ።
51 ደቂቀ፡ ጌዜም፡ ደቂቀ፡ ኡዚ፡ ደቂቀ፡ ፋሴሃ።
52 ደቂቀ፡ ቤሳይ፡ ደቂቀ፡ መዑኒም፡ ደቂቀ፡ ፋሴሲም።
53 ደቂቀ፡ በቅቡቅ፡ ደቂቀ፡ ሐቁፋ፡ ደቂቀ፡ ሐሩር።
54 ደቂቀ፡ በስሎት፡ ደቂቀ፡ ሜዳ፡ ደቂቀ፡ ሐርሳ።
55 ደቂቀ፡ ቡርቁስ፡ ደቂቀ፡ ሲሳራ፡ ደቂቀ፡ ታማህ።
56 ደቂቀ፡ ነሰያ፡ ደቂቀ፡ ሐጢፍ።
57 ደቂቀ፡ አግብርቲሁ፡ ለሰሎሞን፡ ደቂቀ፡ ስጠይ፡ ደቂቀ፡ ሰፋሪት፡ ደቂቀ፡ ፈሪዳ።
58 ደቂቀ፡ ያዕላ፡ ደቂቀ፡ ደርቁን፡ ደቂቀ፡ ጋዴል።
59 ደቂቀ፡ ሰፋጥያ፡ ደቂቀ፡ ሐጢ፡ ደቂቀ፡ ፈክርጥ፡ ደቂቀ፡ ሰማይም፡ ደቂቀ፡ አሞን።
60 ኵሎሙ፡ ሰብአ፡ ናታኒም፡ ወደቂቀ፡ አግብርቲሁ፡ ሰለሎሞን፡ ሠለስቱ፡ ምእት፡ ተስዓ፡ ወክልኤቱ።
61 ወእሉ፡ እሙንቱ፡ እለ፡ ዐርጉ፡ እምነ፡ ቴልሜል፡ ወታሬስ፡ ወኪሩብ፡ ወአዳን፡ ወኤሜር፡ ወአበዩ፡ ነጊረ፡ ቤተ፡ አበዊሆሙ፡ ለእመ፡ እምውስተ፡ እስራኤል፡ ውእቱ፡ ዘርኦሙ።
62 ደቂቀ፡ ደልያ፡ ደቂቀ፡ ጦብያ፡ ደቂቀ፡ ቆዕ፡ ስድስቱ፡ ምእት፡ አርባዓ፡ ወክልኤቱ።
63 ወእምውስተ፡ ካህናት፡ ደቂቀ፡ ኤብያ፡ ደቂቀ፡ ዑቆስ፡ ደቂቀ፡ ቤርዜሊ፡ እስመ፡ ነሥአ፡ እምአዋልደ፡ ቤርዜሊ፡ ገለአዳዊ፡ አንስተ፡ ወተሰምየ፡ በስሞን።
64 ወእሉ፡ ኀሠሡ፡ መጽሐፎሙ፡ በዘተኈለቁ፡ ዘከመ፡ ተሠርዑ፡ ወኀጥእዋ፡ ወእንበይነ፡ ዝንቱ፡ ሠዐርዎሙ፡ እምክህነቶሙ።
65 ወአዘዘ፡ ሐቴርስታ፡ ከመ፡ ኢይብልዑ፡ እምነ፡ ቅዱስ፡ ዘቅዱሳን፡ እስከ፡ አመ፡ ይሠየም፡ ካህን፡ ዘይለብስ፡ ዲሎሶነ።
66 ወኮነ፡ ኵሉ፡ ማኅበሮሙ፡ ድሙር፡ ወመክብቡ፡ አርባዕቱ፡ እልፍ፡ ወዕሥራ፡ ምእት፡ ወሠለስቱ፡ ምእት፡ ወስሳ፡ ዘእንበለ፡ አግብርቲሆሙ፡ ወአእማቲሆሙ።
67 ወእሙንቱኒ፡ ሰብዓ፡ ምእት፡ ወሠለስቱ፡ ምእት፡ ሠላሳ፡ ወሰብዓቱ፡ ወኵሎሙ፡ መዘምራን፡ ወመዘምራት፡ ክልኤቱ፡ ምእት፡ አርባዓ፡ ወኃምስቱ።
68 ወአፍራሲሆሙ፡ ሰብዓቱ፡ ምእት፡ ሠላሳ፡ ወስድስቱ፡ ወአብቅልቲሆሙ፡ ክልኤቱ፡ ምእት፡ አርባዓ፡ ወኃምስቱ።
69 ወአግማሊሆሙ፡ አርባዕቱ፡ ምእት፡ ሠላሳ፡ ወኃምስቱ፡ ወአእዱጊሆሙ፡ ስሳ፡ ምእት፡ ወሰብዓቱ፡ ምእት፡ ወዕሥራ።
70 ወእምአርእስተ፡ አበው፡ ወሀቡ፡ ለመልእክት፡ ወሐቴርስታ፡ ወሀበ፡ ለመዝገብ፡ ወርቀ፡ ደራኅመ፡ ዓሠርተ፡ ምእተ፡ ወፍያላተ፡ ኃምሳ፡ ወአልባሳተ፡ ካህናት፡ ኃምስተ፡ ምእተ፡ ወሠላሳ።
71 ወለግብር፡ እምነ፡ አርእስተ፡ አበው፡ አብኡ፡ ለመዝገበ፡ መልእክት፡ ክልኤተ፡ እልፈ፡ ወርቀ፡ ደራኅመ፡ ወዕሥራ፡ ምእተ፡ ወክልኤተ፡ ምእተ፡ ምናናተ፡ ብሩር።
72 ወባዕዳንኒ፡ ሕዝብ፡ እለ፡ ተርፉ፡ ከማሁ፡ አብኡ፡ ክልኤተ፡ እልፈ፡ ወርቀ፡ ደራኅመ፡ ወዕሥራ፡ ምእተ፡ ምናናተ፡ ብሩር፡ ወአልባሳተኒ፡ ለግብረ፡ ክህነት፡ ስሳ፡ ወሰብዓተ።
73 ወነበሩ፡ ካህናት፡ ወሌዋውያን፡ ወዓፀውት፡ ወመዘምራን፡ ወሕዝብኒ፡ ወሰብአ፡ ናታኒምኒ፡ ወኵሎሙ፡ እስራኤል፡ ውስተ፡ አህጉሪሆሙ።
=== chapter 8 ===
[Chapter 8]
1 ወበጽሐ፡ ሳብዕ፡ ወርኅ፡ ወአንገለጉ፡ ኵሎሙ፡ ደቂቀ፡ እስራኤል፡ ወኵሎሙ፡ ሕዝብ፡ ተጋባኡ፡ ኅቡረ፡ እምኵሉ፡ በሐውርቲሆሙ፡ ውስተ፡ አሐዱ፡ መርኅብ፡ ቅድመ፡ አንቀጸ፡ ማይ፡ ወይቤልዎ፡ ለእዝራ፡ ጸሐፊ፡ ከመ፡ ያምጽእ፡ መጽሐፈ፡ ኦሪተ፡ ሙሴ፡ ዘአዘዞሙ፡ እግዚአብሄር፡ ለእስራኤል።
2 ወአምጽአ፡ እዝራ፡ ካህን፡ ኦሪተ፡ ቅድመ፡ ማሕበረ፡ እዶሙ፡ ወአንስቶሙ፡ ወኵሎሙ፡ ጠቢባኒሆሙ፡ ለሰሚዕ፡ አመ፡ ርእሰ፡ ሳብዕ፡ ወርኅ።
3 ወአንበበ፡ ቅድመ፡ መርኅብ፡ ዘኀበ፡ አንቀጸ፡ ማይ፡ እምጊዜ፡ ይሠርቅ፡ ፀሐይ፡ እስከ፡ ቀትር፡ ቅድመ፡ እዶሙ፡ ወአንስቶሙ፡ ወማእምራኒሆሙ፡ ወያፀምኡ፡ ኵሎሙ፡ ሕዝብ፡ መጽሐፈ፡ ሕገ፡ ኦሪቶሙ።
4 ወቆመ፡ እዝራ፡ ጸሐፊ፡ ላዕለ፡ መከየድ፡ ዘዕፅ፡ ዘገብሩ፡ ሎቱ፡ ለተናግሮ፡ ወቆሙ፡ ምስሌሁ፡ በየማኑ፡ መቲትያ፡ ወመስያ፡ ወሐናንያ፡ አርያ፡ ወሕልቅያ፡ ወመዓስያ፡ ወበጸጋሙ፡ ፈድያ፡ ወሚሳኤል፡ ወሚልክያ፡ ወሐሱም፡ ወሐስበዳና፡ ወዘካርያስ፡ ወሜሱላም።
5 ወከሠተ፡ እዝራ፡ ይእተ፡ መጽሐፈ፡ በቅድመ፡ ኵሎሙ፡ ሕዝብ፡ እስመ፡ ውእቱ፡ ይኴንኖሙ፡ ለሕዝብ፡ ወእምዝ፡ ሶበ፡ ከሠተ፡ ቆሙ፡ ኵሎሙ፡ ሕዝብ።
6 ወባረኮ፡ እዝራ፡ ለእግዚአብሔር፡ ዓቢይ፡ አምላክ፡ ወአውሥኡ፡ ኵሎሙ፡ ሕዝብ፡ ወይቤሉ፡ አሜን፡ አሜን፡ ወአንሥኡ፡ እደዊሆሙ፡ ወደነኑ፡ ወሰገዱ፡ ለእግዚአብሔር፡ በገጾሙ፡ ውስተ፡ ምድር።
7 ወኢዮስስ፡ ወስራብያ፡ ወያሚን፡ ወዓቁብ፡ ወሰብታ፡ ወሑድያ፡ ወማዓስያ፡ ወቀሌጣ፡ ወአዛርያ፡ ወኢዮዛባድ፡ ወሐናን፡ ወፌልእያ፡ ወሌዋውያን፡ መጠይቃን፡ ለሕዝብ፡ መጽሐፈ፡ ወሕዝብኒ፡ ኅቡረ፡ ቆሙ።
8 ወአንበቡ፡ መጽሐፈ፡ ሕጉ፡ ለእግዚአብሔር፡ መፌሮስ፡ ወሤም፡ ወሴኬም፡ ወያጤይቁ፡ በዘተጽሕፈ።
9 ወይቤ፡ ነሕምያ፡ ዘውእቱ፡ ሐቴርስታ፡ ወእዝራ፡ ካህን፡ ወጸሐፊ፡ ወሌዋውያን፡ ወቦ፡ እለ፡ ያጤይቅዎሙ፡ ለሕዝብ።
10 ወይቤልዎሙ፡ ለኵሉ፡ ሕዝብ፡ ዮምሰ፡ ዕለት፡ ቅድስት፡ ይእቲ፡ ለእግዚአብሔር፡ አምላክነ፡ ኢትብክዩ፡ ወኢትላህዉ፡ እስመ፡ በከዩ፡ ኵሎሙ፡ ሕዝብ፡ ሶበ፡ ሰምዑ፡ ቃለ፡ ኦሪቶሙ።
11 ወይቤልዎሙ፡ ሑሩ፡ ብልዑ፡ ወስትዩ፡ ጥዑማተ፡ ወፈነዉ፡ ክፍሎሙ፡ ለእለ፡ አልቦሙ፡ እስመ፡ ቅድስት፡ ይእቲ፡ ዛቲ፡ ዕለት፡ እስመ፡ በዓሉ፡ ለእግዚአብሔር፡ ውእቱ፡ ወኢታውድቁ፡ ልበክሙ፡ እስመ፡ እግዚአብሔር፡ ውእቱ፡ ኃይልነ።
12 ወሌዋውያንሰ፡ ያሥተራምሙ፡ ወይቤልዎሙ፡ ለሕዝብ፡ ኅድጉ፡ ወኢታውድቁ፡ ልበክሙ፡ እስመ፡ ዕለት፡ ቅድስት፡ ይእቲ።
13 ወሖሩ፡ ኵሎሙ፡ ሕዝብ፡ ይብልዑ፡ ወይስተዩ፡ ወይፈንዉ፡ ክፍለ፡ ለቢጾሙ፡ ወገብሩ፡ ዓቢየ፡ ትፍሥኅተ፡ እስመ፡ ሰምዑ፡ ቃለ፡ ወጠየቁ፡ ዘአንበቡ፡ ሎሙ።
14 ወበሳኒታ፡ ተጋብኡ፡ መላእክተ፡ አበዊሆሙ፡ ለኵሎሙ፡ ሕዝብ፡ ካህናትኒ፡ ወሌዋውያንኒ፡ ኀበ፡ እዝራ፡ ጸሐፊ፡ ከመ፡ ያጠይቆሙ፡ ኵሎ፡ ቃለ፡ ኦሪት።
15 ወረከቡ፡ ጽሑፈ፡ ውስተ፡ ኦሪት፡ ዘአዘዘ፡ እግዚአብሔር፡ በእደ፡ ሙሴ፡ ከመ፡ ይንበሩ፡ ደቂቀ፡ እስራኤል፡ በመጸለት፡ በበዓል፡ በሳብዕ፡ ወርኅ፡ ወከመ፡ ያስምዑ፡ ቃለ፡ ወያስተሐልፉ፡ ነገረ፡ በኵሉ፡ በሐውርቲሆሙ፡ ወበኢየሩሳሌም።
16 ወይቤሎሙ፡ እዝራ፡ ፃኡ፡ ደብረ፡ ወአምጽኡ፡ ቈጽለ፡ ሜርሰንስ፡ ወቈጽለ፡ በቀልታት፡ ወቈጽለ፡ ዘይት፡ ወቈጽለ፡ ቄጵሮስ፡ ወቈጽለ፡ ዕፅ፡ ቊጹል፡ ለገቢረ፡ መጸለት፡ በከመ፡ ጽሑፍ።
17 ወወፈሩ፡ ሕዝብ፡ ወአምጽኡ፡ ወገብሩ፡ መጸለተ፡ ኵሎሙ፡ ውስተ፡ አንሕስቲሆሙ፡ ወአዕፃዳቲሆሙ፡ ወውስተ፡ ዓፀደ፡ ቤተ፡ እግዚአብሔር፡ ወውስተ፡ መርኅበ፡ አንቀጸ፡ ማይኒ፡ ወበመርኅበ፡ አንቀጸ፡ ኤፍሬምኒ።
18 ወገብሩ፡ ኵሎሙ፡ ሕዝብ፡ መጸለተ፡ እለ፡ አተዉ፡ እምኀበ፡ ተፄወዉ፡ ወነበሩ፡ ውስተ፡ መጸለት፡ እስመ፡ ኢገብሩ፡ ከማሁ፡ ደቂቀ፡ እስራኤል፡ እምአመ፡ መዋዕለ፡ ዮሴዕ፡ ወልደ፡ ነዌ፡ እስከ፡ ይእቲ፡ አሚር፡ ወገብሩ፡ ዓቢየ፡ ትፍሥሕተ፡ ኵሎሙ።
19 ወአንበበ፡ ሎሙ፡ ሕገ፡ እግዚአብሔር፡ እንተ፡ ጸብሐት፡ እምቀዳሚት፡ ዕለት፡ እስከ፡ ደኃሪት፡ ዕለት፡ ወገብሩ፡ በዓለ፡ ሰቡዐ፡ መዋዕለ፡ ወአመ፡ ሳምንት፡ ዕለት፡ ወፅኡ፡ በከመ፡ ሥርዓቶሙ።
=== chapter 9 ===
[Chapter 9]
1 ወአመ፡ ተሱዑ፡ ለጽልመተ፡ ውእቱ፡ ወርኅ፡ ተጋብኡ፡ ደቂቀ፡ እስራኤል፡ ወጾሙ፡ ወለሰብሱ፡ ሠቀ፡ ወወደዩ፡ ሐመደ፡ ዲበ፡ ርእሶሙ።
2 ወተፈልጡ፡ ደቂቀ፡ እስራኤል፡ እምኵሉ፡ ሕዝብ፡ ነኪር፡ ወቆሙ፡ ወተጋነዩ፡ በእንተ፡ ጌጋዮሙ፡ ወበእንተ፡ ኃጢአተ፡ አበዊሆሙ።
3 ወቆሙ፡ ኵሎሙ፡ በበምቅዋሞሙ፡ ወአንበቡ፡ ሎሙ፡ ሕገ፡ እግዚአብሔር፡ አምላኮሙ፡ ወተጋነዩ፡ ለእግዚአብሔር፡ ወሰገዱ።
4 ወቆሙ፡ ኀበ፡ መዓርጎሙ፡ ለሌዋውያን፡ ኢዮስስ፡ ወደቂቀ፡ ቀዳምያል፡ ሴኬንያ፡ ወልደ፡ ሰራብያ፡ ወልደ፡ ኮነኒ፡ ወጸርሑ፡ ኀበ፡ እግዚአብሔር፡ አምላኮሙ፡ በዓቢይ፡ ቃል።
5 ወይቤልዎሙ፡ ኢዮስስ፡ ወቀዳምያል፡ ለሌዋውያን፡ ተንሥኡ፡ ወባርክዎ፡ ለእግዚአብሔር፡ አምላክነ፡ ለዓለም፡ ወባርኩ፡ ስመ፡ ስብሐቲሁ፡ ወአዕብይዎ፡ በኵሉ፡ በረከት፡ ወስብሐት።
6 ወይቤ፡ እዝራ፡ አንተ፡ ውእቱ፡ ባሕቲትከ፡ እግዚአብሔር፡ ወአንተ፡ ገበርከ፡ ሰማየ፡ ሰማያት፡ ወኵሎ፡ ኃይሎሙ፡ ወምድረኒ፡ ወኵሎ፡ ዘውስቴታ፡ ወባሕረኒ፡ ወኵሎ፡ ዘውስቴታ፡ ወአንተ፡ ታሐዩ፡ ኵሎ፡ ነፍሰ፡ ወለከ፡ ይሰግዱ፡ ኵሎሙ፡ መላእክተ፡ ሰማይ።
7 አንተ፡ እግዚአብሔር፡ ባሕቲትከ፡ አምላከ፡ ወአንተ፡ ዘኀረይኮ፡ ለአብርሃም፡ ወአውፃእካሁ፡ እምነ፡ ምድረ፡ ከላውዴዎን፡ ወሰመይከ፡ ስሞ፡ አብርሃም።
8 ወረከብከ፡ ልቦ፡ ምእመነ፡ በቅድሜከ፡ ወተካየድከ፡ ኪዳነ፡ ከመ፡ ተሀቦ፡ ምድረ፡ ከናኔዎን፡ ወኬጤዎን፡ ወአሞሬዎን፡ ወፌርዜዎን፡ ወኢያቡሴዎን፡ ወጌርጌሴዎን፡ ወኤዌዎን፡ ሎቱ፡ ወለዘርኡ፡ ወኣምከ፡ ሎቱ፡ ቃለከ፡ እስመ፡ ጻድቅ፡ አንተ።
9 ወርኢክ፡ ሕማሞሙ፡ ለአበዊነ፡ በብሔረ፡ ግብጽ፡ ወሰማዕከ፡ ገዓሮሙ፡ በባሕረ፡ ኤርትራ።
10 ወገበርከ፡ ተአምረ፡ ወመንክረ፡ ላዕለ፡ ግብጽ፡ ወላዕለ፡ ፈርዖን፡ ወላዕለ፡ ኵሉ፡ ሰብኡ፡ ወላዕለ፡ ኵሉ፡ ሕዝበ፡ ብሔሩ፡ እስመ፡ አመክርካሆሙ፡ ከመ፡ ተዓበዩ፡ ላዕሌሆሙ፡ ወገበርከ፡ ለከ፡ እመ፡ እስከ፡ ዮም፡ ወእስከ፡ ዛቲ፡ ዕለት።
11 ወነፈቀ፡ ባሕረ፡ በቅድሜሆሙ፡ ወኀለፉ፡ እንተ፡ ማእከለ፡ ባሕር፡ ውስተ፡ ፍኖተ፡ የብስ፡ ወለእለኒ፡ ዴገንዎሙ፡ አሥጠምኮሙ፡ ውስተ፡ ቀላይ፡ ከመ፡ እብን፡ ውስተ፡ ማይ፡ ብዙኅ።
12 ወመራሕኮሙ፡ በዓምደ፡ ደመና፡ መዓልተ፡ ወበዓምደ፡ እሳት፡ ሌሊተ፡ ከመ፡ ታብርህ፡ ሎሙ፡ ወታርእዮሙ፡ ፍኖተ፡ እንተ፡ ባቲ፡ የሐውሩ።
13 ወወረድከ፡ ውስተ፡ ደብረ፡ ሲና፡ ወተናገርኮሙ፡ እምሰማይ፡ ወወሀብኮሙ፡ ኵነኔ፡ ጽድቅከ፡ ወሕገከ፡ ርቱዐ፡ ወትእዛዘ፡ ወሥርዓተ፡ ሠናየ።
14 ወአርአይኮሙ፡ ሰንበተከ፡ ቅድስተ፡ ወአዘዝኮሙ፡ በእደ፡ ሙሴ፡ ገብርከ፡ ትእዛዘ፡ ወሕገ፡ ወሥርዓተ።
15 ወወሀብኮሙ፡ ኅብስተ፡ እምሰማይ፡ ሲሳዮሙ፡ ወማየኒ፡ እምውስተ፡ ኰኵሕ፡ አውፃእከ፡ ሎሙ፡ ሶበ፡ ጸምኡ፡ ወትቤሎሙ፡ ይባኡ፡ ይረስዋ፡ ለይእቲ፡ ምድር፡ እንተ፡ ባቲ፡ ሰፋሕከ፡ እዴከ፡ ከመ፡ ተሀቦሙ።
16 ወውእቶሙኒ፡ ወአበዊነ፡ አግዘፉ፡ ክሳዶሙ፡ ወኢሰምዑ፡ ቃለከ።
17 ወኢተመይጡከ፡ ወኢያጽምኡከ፡ ወኢተዘከሩ፡ ስብሐቲከ፡ ዘገበርከ፡ ሎሙ፡ ወአግዘፉ፡ ክሳዶሙ፡ ወሤሙ፡ ሎሙ፡ አርእስተ፡ ከመ፡ ይግብኡ፡ ብሔረ፡ ግብጽ፡ ውስተ፡ ቅኔሆሙ፡ ወአንተ፡ እግዚአብሔር፡ መሐሪ፡ ወመስተሣህል፡ ጒንዱየ፡ መዓት፡ ወብዙኀ፡ ምሕረት፡ ኢኀደጋሆሙ።
18 ወዓዲ፡ ገብሩ፡ ሎሙ፡ ላሕም፡ ዘስብኮ፡ ወይቤሉ፡ እሉ፡ እሙንቱ፡ አማልክቲነ፡ እለ፡ አውፅኡነ፡ እምነ፡ ምድረ፡ ግብጽ፡ ወፈድፋደ፡ አምፅዑከ።
19 ወአንተሰ፡ እስመ፡ ብዙኅ፡ ምሕረትከ፡ ኢገደፍኮሙ፡ በገዳም፡ መዓልተኒ፡ ኢያሰሰልከ፡ ዓምደ፡ ደመና፡ እምኔሆሙ፡ በዘቦቱ፡ መራሕኮሙ፡ ወሌሊተኒ፡ በዓምደ፡ እሳት፡ አብራህከ፡ ሎሙ፡ ወአርአይኮሙ፡ ፍኖተ፡ እንተ፡ ባቲ፡ የሐውሩ።
20 ወወሀብኮሙ፡ መንፈሰከ፡ ቡሩከ፡ ያጥብዞሙ፡ ወኢያኅጣእኮሙ፡ መና፡ እምአፉሆሙ፡ ወወሀብኮሙ፡ ማየ፡ ለጽምኦሙ።
21 ወሴሰይኮሙ፡ አርባዐ፡ ዓመተ፡ በገዳም፡ ወኢያኅጣእኮሙ፡ ወአልባሲሆሙኒ፡ ኢበልየ፡ ወእገሪሆሙኒ፡ ኢነቅዐ።
22 ወአግባእከ፡ ነገሥተ፡ ወአሕዛበ፡ ወከፈልኮሙ፡ ወወረሱ፡ ምድረ፡ ሴዎን፡ ንጉሠ፡ ሐሴቦን፡ ወምድረ፡ ዓግ፡ ንጉሠ፡ ባሳን።
23 ወአብዛኅከ፡ ውሉዶሙ፡ ከመ፡ ኮከበ፡ ሰማይ፡ ወአባእኮሙ፡ ምድረ፡ እንተ፡ ትቤሎሙ፡ ለአበዊሆሙ፡ ወወረስዋ።
24 ወቀጥቀጥዶሙ፡ ለእለ፡ ይነብሩ፡ ውስተ፡ ምድረ፡ ከነአን፡ ቅድሜሆሙ፡ ወአባእኮሙ፡ ውስተ፡ እደዊሆሙ፡ ለነገሥቶሙ፡ ወለአሕዛበ፡ ብሔሮሙ፡ ዘከመ፡ ይሬስይዎሙ፡ ከመ፡ አደኮሙ፡ በቅድሜሆሙ።
25 ወነሥኡ፡ አህጉረ፡ ዓበይተ፡ ወወረሱ፡ አብያተ፡ ዘምሉእ፡ ኵሎ፡ በረከተ፡ ወዓዘቅተ፡ ውቅሮ፡ ወዐፀደ፡ ወይን፡ ወዘቅብዕ፡ ወኵሎ፡ ዕፅወ፡ ቀምሕ፡ ዘይትበላዕ፡ ወበልዑ፡ ወጸግቡ፡ ወሰብሑ፡ ወፈግዑ፡ በበረከትከ፡ ዓቢይ።
26 ወባሕቱ፡ ዐለዉከ፡ ወኀደጉከ፡ ወገደፉ፡ ሕገከ፡ ወአግብእዎ፡ ድኅረ፡ ዘባኖሙ፡ ወቀተሉ፡ ነቢያቲከ፡ እለ፡ ገሠፅኮሙ፡ ወአስምዑ፡ ላዕሌሆሙ፡ ከመ፡ ይግብኡ፡ ኀቤከ፡ ወብዙኀ፡ ፈድፋደ፡ አምፅዑከ።
27 ወአግባእኮሙ፡ ውስተ፡ እደ፡ እለ፡ ይሣቅይዎሙ፡ ወአሕመምዎሙ፡ ወሶበ፡ ተመንደቡ፡ ገዓሩ፡ ኀቤከ፡ ወአንተኒ፡ ሰማዕኮሙ፡ እምሰማይ፡ ወበዓቢይ፡ ምሕረትከ፡ ወወሀብኮሙ፡ መድኃኒተ፡ ወአድኃንኮሙ፡ እምእደ፡ እለ፡ ይሣቅይዎሙ።
28 ወሶበ፡ አዕረፉ፡ ተመይጡ፡ ወገብሩ፡ እኩየ፡ በቅድሜከ፡ ወኀደጎሙ፡ ውስተ፡ እደ፡ ፀሮሙ፡ ወሣቀይዎሙ፡ ወካዕበ፡ ገዓሩ፡ ኀቤከ፡ ወሰማዕኮሙ፡ እምሰማይ፡ ወአድኀንኮሙ፡ በብዝኀ፡ ምሕረትከ።
29 ወአስማዕከ፡ ላዕሌሆሙ፡ ከመ፡ ይትመየጡ፡ ውስተ፡ ሕግከ፡ ወኢሰምዑከ፡ ወአበሱ፡ በትእዛዝከ፡ ወበኵነኔከ፡ ዘገበርኮ፡ ለእጓለ፡ እመሕያው፡ በዘቦቱ፡ የሐይዉ፡ ወመጠዉ፡ ዘባኖሙ፡ ወዓለዉከ፡ ወአግዘፉ፡ ክሳዶሙ፡ ወአበዩከ።
30 ወተዓገሥኮሙ፡ ዓመታተ፡ ብዙኀ፡ ወአስማዕከ፡ ላዕሌሆሙ፡ በመንፈስከ፡ በእደ፡ ነቢያቲከ፡ ወኢያፅምኡከ፡ ወአግባእኮሙ፡ ውስተ፡ አሕዛበ፡ ምድር።
31 ወአንተሰ፡ በብዝኀ፡ ምሕረትከ፡ ኢገበርከ፡ ላዕሌሆሙ፡ በዘታጠፍኦሙ፡ ወእኅደጋሆሙ፡ እስመ፡ ኃያል፡ አንተ፡ መሐሪ፡ ወመስተሣህል።
32 ወይእዜኒ፡ አምላክነ፡ ፅኑዕ፡ ወኃያል፡ ወዓቢይ፡ ወግሩም፡ ዘየዐቅብ፡ ኪዳኖ፡ ወምሕረቶ፡ ኢይኩን፡ ኅዳጠ፡ በቅድሜከ፡ ዝንቱ፡ ኵሉ፡ ሕማም፡ እንተ፡ ረከበነ፡ ለነ፡ ወለነገሥትነ፡ ወለመኳንንቲነ፡ ወለካህናቲነ፡ ወለነቢያቲነ፡ ወለአበዊነ፡ ወለኵሉ፡ ሕዝብነ፡ እምአመ፡ መዋዕሊሆሙ፡ ለነገሥተ፡ አሶር፡ እስከ፡ ዮም፡ ወእስከ፡ ዛቲ፡ ዕለት።
33 ወአንተ፡ ጻድቅ፡ በኵሉ፡ ጊዜ፡ ዘአምጻእከ፡ ላዕሌነ፡ እስመ፡ ርቱዕ፡ ግብርከ፡ ወንሕነ፡ አበስነ።
34 ወነገሥትነኒ፡ ወመላእክቲነ፡ ወካህናቲነኒ፡ ወአበዊነ፡ ኢገብሩ፡ ሕገከ፡ ወኢያጽምኡ፡ ትእዛዝከ፡ ወስምዓከ፡ ዘአስማዕከ፡ ላዕሌሆሙ።
35 ወእሙንቱኒ፡ እለ፡ ወሀብኮሙ፡ በመንግሥትከ፡ ወበብዝኀ፡ ምሕረትከ፡ ምድረ፡ ረኀብተ፡ ወሥብሕተ፡ ወሀብኮሙ፡ ወኢተቀንዩ፡ ለከ፡ ወኢተመይጡ፡ እምእከየ፡ ምግባሮሙ።
36 ናሁ፡ ተቀነይነ፡ ዮም፡ ወምድርኒ፡ እንተ፡ ወሀብኮሙ፡ ለአበዊነ፡ ከመ፡ ይብልዑ፡ ፍሬሃ፡ ወሠናያቲሃ፡ ወገብአት፡ ለነገሥት፡ እለ፡ ፈነውከ፡ ላዕሌነ፡ በኃጢአትነ።
37 ወኰነኑኒ፡ ርእሰነኒ፡ ወእንስሳነኒ፡ በከመ፡ ፈቀዱ፡ ወብዙኀ፡ አሕመሙነ።
38 ወምስለ፡ ዝንቱ፡ ኵሉ፡ ንሕነ፡ አጽናዕነ፡ ሃይማኖተነ፡ ወጸሐፉ፡ ወኀተሙ፡ መላእክቲነ፡ ወሌዋውያኒነ፡ ወካህናቲነ።
=== chapter 10 ===
[Chapter 10]
1 ወእሉ፡ እለ፡ ተኀትሙ፡ ነሕምያ፡ ሐቴርስታ፡ ወልደ፡ ሐካልያ፡ ወሶዶቅያ።
2 ወአርያ፡ ወአዛርያ፡ ወኤርምያ።
3 ወፋሲሑር፡ ወአማርያ፡ ወሚልክያ።
4 ወሐጡስ፡ ወሰባንያ፡ ወመሉክ።
5 ወሐሪም፡ ወሚራሞት፡ ወአብድያ።
6 ወዳንኤል፡ ወገንቶን፡ ወባሩካ።
7 ወሜሱላም፡ ወአብድያ፡ ወሚንያሚን።
8 መዓዝያ፡ በልጋይ፡ ሰማያ።
9 ወእሉ፡ ካህናት፡ ወሌዋውያን፡ ኢዮስስ፡ ወልደ፡ አዛንያ፡ ወባንዩ፡ ዘእምደቂቀ፡ ሔናድድ፡ ወቀዳምኤል።
10 ወአኃዊሁኒ፡ ሰባንያ፡ ወሐድያ፡ ወቀሊጣ፡ ወፌልያ፡ ወሐናን።
11 ወሚካእ፡ ወሬሆብ፡ ወሐሳብያ።
12 ዘኩር፡ ሳሬብያ፡ ወሰባንያ።
13 ወሐድያ፡ ወባኒ፡ ወበነኑ።
14 ወመላእክተ፡ ሕዝብ፡ ፋሮስ፡ ወፈሐትሞአብ፡ ወኤላም፡ ወዛቱያ፡ ወባኒ።
15 ቡኒ፡ ወአዝያጋድ፡ ወቤባይ።
16 ወአዶንያ፡ ወበገዋይ፡ ወእዲን።
17 ወአጠር፡ ወሕዝቅያ፡ ወአዙር።
18 ወአሐዲያ፡ ወሐሱም፡ ወቤሳይ።
19 ወአሬፍ፡ ወአናቶት፡ ወኖባይ።
20 መጣፊአስ፡ ወሜሱላም፡ ወኤዜር።
21 ወሜሴዜኤል፡ ወሳዶቅ፡ ወያዱዓ።
22 ወፈላጥያ፡ ወሐናን፡ ወአናያ።
23 ወሆሴዕ፡ ወሐናንያ፡ ወሐሱብ።
24 ወአሎኤስ፡ ወፈሊሃ፡ ወሶቤቅ።
25 ወሬሑም፡ ወሐሰብና፡ ወማስያ።
26 ወአሕያ፡ ወሐናን፡ ወአናን።
27 ወመሉክ፡ ወሔራም፡ ወባዕና።
28 ወእለኒ፡ ተርፉ፡ ሕዝብ፡ ወካህናት፡ ወሌዋውያን፡ ወዓፀውት፡ ወመዘምራን፡ ወሰብአ፡ ናታኒም፡ እለ፡ ተፈልጡ፡ እምሕዝበ፡ ምድር፡ ዘይበውኡ፡ ውስተ፡ ሕገ፡ እግዚአብሐየር፡ ወአንስቶሙ፡ ወደቂቆሙኒ፡ ወአዋልድሆሙኒ፡ ወኵሉ፡ ጠቢብ፡ ዘየአምር።
29 ወዘያስተጻንዑ፡ አኀዊሆሙ፡ ዓበይቶሙ፡ ተራገሙ፡ ወተማሐሉ፡ ወቦኡ፡ ኪዳነ፡ ከመ፡ ይሑሩ፡ በሕገ፡ እግዚአብሔር፡ ዘተውህበ፡ ውስተ፡ እዴሁ፡ ለሙሴ፡ ገብረ፡ እግዚአብሔር፡ ከመ፡ ይዕቀቡ፡ ወከመ፡ ይግበሩ፡ ኵሎ፡ ዘአዘዙነ፡ ወኵነኔሁ።
30 ኢናስተዋስብ፡ አዋልዲነ፡ ለአሕዛበ፡ ብሔር፡ ወከመ፡ ኢናስተዋስብ፡ አዋልዲሆሙ፡ ምስለ፡ ደቂቅነ።
31 ወአሕዛበ፡ ብሔርኒ፡ እለ፡ ይመጽኡ፡ ለነጊድ፡ ወያአትዉ፡ ኵሎ፡ ሤጠ፡ በዕለተ፡ ሰንበት፡ ከመ፡ ኢንሣየጥ፡ እምኔሆሙ፡ ወበፅለት፡ ቅድስት፡ ወበሰናብት፡ ወበዓመተ፡ ኅድገት፡ ሳብዒት፡ ከመ፡ ኢንትፈደይ፡ ፍዳ፡ ኵሉ፡ እድ።
32 ወናቅም፡ ሥርዓተ፡ ከመ፡ ነሀብ፡ ሣልስተ፡ እዴሁ፡ ለሰቅል፡ ለለዓመት፡ ለተግባረ፡ ቤተ፡ አምላክነ።
33 ወለኅብስት፡ ዘይሠርዑ፡ ቅድሜሁ፡ ወለመሥዋዕተ፡ ዘልፍ፡ ወለቊርባነ፡ ዘልፍ፡ ወለሰንበታትኒ፡ ወለአስሕርትኒ፡ ወለበዓላትኒ፡ ወለቅድሳትኒ፡ ወለዘበበይነ፡ ኃጢአትኒ፡ በዘቦቱ፡ ያስተሠርዩ፡ ለእስራኤል፡ ወለግብረ፡ ቤተ፡ አምላክነ።
34 ወተዓፀውነ፡ ዘያእቱ፡ እምኔነ፡ ላዕለ፡ ቊርባን፡ ዕፀወ፡ ሠናያተ፡ ካህናትኒ፡ ወሌዋውያንኒ፡ ወሕዝብኒ፡ ዘይፀውር፡ ለቤተ፡ አምላክነ፡ ወለአብያተ፡ አበዊነ፡ ለለዓመት፡ ዘያነድዱ፡ ለምሥዋዐ፡ እግዚአብሔር፡ አምላክነ፡ በከመ፡ ጽሑፍ፡ ውስተ፡ ኦሪት።
35 ወከመ፡ ናብእ፡ እምነ፡ ቀዳሜ፡ እክለ፡ ምድርነ፡ ወቀዳሜ፡ ፍሬ፡ ኵሉ፡ ቀምሐ፡ ዕፅነ፡ ለለዓመት፡ ለቤተ፡ እግዚአብሔር።
36 ወበኵረ፡ ውሉድነ፡ ወዘእንስሳነ፡ በከመ፡ ጽሑፍ፡ ውስተ፡ ኦሪት፡ ወበኵረ፡ አልሕምቲነ፡ ወዘመራዕየ፡ አባግዒነ፡ ከመ፡ ናብእ፡ ለቤተ፡ አምላክነ፡ ለካህናት፡ እለ፡ ይትቀነዩ፡ ለቤተ፡ አምላክነ።
37 ወቀዳሜ፡ ሥርናይነ፡ ወፍሬ፡ ኵሉ፡ ዕፀዊነ፡ ወወይንነ፡ ወቅብዕነ፡ ናብእ፡ ለካህናት፡ ኀበ፡ ቤተ፡ ምጽዋት፡ ለቤተ፡ እግዚአብሔር፡ ወዓሥራተ፡ ምድርነ፡ ሌዋውያን፡ ወለሊሆሙ፡ ሌዋውያን፡ ይትመጠዉ፡ ዓሥራተ፡ በኵሉ፡ አህጉሪነ፡ ለግብርነ።
38 ወለካህን፡ ወልደ፡ አሮን፡ ምስለ፡ ሌዋውያን፡ ምስለ፡ ውእቱ፡ ዐሥራቲሁ፡ ወሌዋውያንሰ፡ ያዓርጉ፡ ዓሥራተ፡ ዓሥራት፡ ለቤተ፡ አምላክነ፡ ውስተ፡ ሙዳየ፡ ምጽዋት፡ ዘቤተ፡ አምላክነ።
39 እስመ፡ ኀበ፡ ሙዳየ፡ ምጽዋት፡ ያበውኡ፡ ደቂቀ፡ እስራኤል፡ ወደቂቀ፡ ሌዊ፡ ቀዳሜ፡ ሥርናይ፡ ወወይን፡ ወቅብዕ፡ ወህየ፡ ሀሎ፡ ናዋየ፡ ቅድሳት፡ ወካህናትኒ፡ ወእለ፡ ይትቀነዩ፡ ወዓፀውትኒ፡ ወመዘምራንኒ፡ ከመ፡ ኢንኅድግ፡ ቤተ፡ አምላክነ።
=== chapter 11 ===
[Chapter 11]
1 ወነበሩ፡ መላእክተ፡ ሕዝብ፡ ውስተ፡ ኢየሩሳሌም፡ ወእለ፡ ተርፉ፡ ሕዝብ፡ ተዓፀዉ፡ ከመ፡ ያምጽኡ፡ አሐደ፡ እምነ፡ ዓሠርቱ፡ እድ፡ ይንበሩ፡ ውስተ፡ ኢየሩሳሌም፡ ሀገር፡ ቅድስት፡ ወተስዓቱ፡ እድ፡ ውስተ፡ አህጉሪሆሙ።
2 ወባረኩ፡ ሕዝበ፡ ወኵሎሙ፡ እደወ፡ እለ፡ በፈቃዶሙ፡ ነበሩ፡ በኢየሩሳሌም።
3 ወእሉ፡ እሙንቱ፡ መላእክተ፡ አበዊሆሙ፡ እለ፡ ነበሩ፡ ኢየሩሳሌም፡ ወውስተ፡ አህጉረ፡ ይሁዳ፡ ነበሩ፡ ኵሎሙ፡ እስራኤል፡ በበደወለ፡ ብሔሮሙ፡ መካህናት፡ ወሌዋውያን፡ ወናታናውያን፡ ወደቂቀ፡ አግብርቲሁ፡ ለሰሎሞን።
4 ወበኢየሩሳሌም፡ ነበሩ፡ እምውስተ፡ ደቂቀ፡ ይሁዳ፡ ወእምውስተ፡ ደቂቀ፡ ብንያም፡ ፋቲሓ፡ ወልደ፡ አዜብ፡ ወልደ፡ ዘካርያ፡ ወልደ፡ ሰማርያ፡ ወልደ፡ ሰፋጥያ፡ ወልደ፡ ማሴሌል፡ እምነ፡ ደቂቀ፡ ፋሬስ።
5 ወማዓስያ፡ ወልደ፡ ባሩክ፡ ወልደ፡ ኮልሆዜ፡ ወልደ፡ ዖዝያ፡ ወልደ፡ ዓዳያ፡ ወልደ፡ ዮያሪብ፡ ወልደ፡ ዘካርያ፡ ወልደ፡ ሰሎኒ።
6 እሉ፡ እሙንቱ፡ ኵሎሙ፡ ደቂቀ፡ ፋሬስ፡ እለ፡ ይነብሩ፡ ኢየሩሳሌም፡ አርባዕቱ፡ ምእት፡ ስሳ፡ ወሰመንቱ፡ እደው፡ ጽኑዓን።
7 ወእሉኒ፡ ደቂቀ፡ ብንያም፡ ሴሎ፡ ወልደ፡ ሜሱላም፡ ወልደ፡ ዮሐድ፡ ወልደ፡ ፋዳያ፡ ወልደ፡ ቆላያ፡ ወልደ፡ ማዓስያ፡ ወልደ፡ አትያል፡ ወልደ፡ ይሳዕያ።
8 ወእምድኅሬሁ፡ ጌቤወሴል፡ ተስዓቱ፡ ምእት፡ ዕሥራ፡ ወሰመንቱ።
9 ወኢዮኤል፡ ወልደ፡ ዘክሪ፡ ወውእቱ፡ መስፍኖሙ፡ ወይሁዳ፡ ወልደ፡ ሰኑዋ፡ መኰንን፡ ዘእምታሕቴሁ፡ ላዕለ፡ ሀገር።
10 ወእምካህናት፡ ይዳዕያ፡ ወልደ፡ ዮያሬብ፡ ወያኪን።
11 ወሳርያ፡ ወልደ፡ ሕልቅያ፡ ወልደ፡ ሜሱላም፡ ወልደ፡ ሳዶቅ፡ ወልደ፡ ማርት፡ ወልደ፡ አኬጡብ፡ መጋቤ፡ ቤተ፡ እግዚአብሔር።
12 ወአኃዊሆሙኒ፡ ይገብሩ፡ ግብረ፡ ቤተ፡ እግዚአብሔር፡ ሰመንቱ፡ ምእት፡ ወዕሥራ፡ ወክልኤቱ፡ ወዓዳያ፡ ወልደ፡ ይሮሐም፡ ወልደ፡ ፈላልያ፡ ወልደ፡ አማሲ፡ ወልደ፡ ዘካርያ፡ ወልደ፡ ፋስሑር፡ ወልደ፡ ሜልክያ።
13 ወአኃዊሁ፡ መላእክተ፡ በሐውርቲሆሙ፡ ክልኤቱ፡ ምእት፡ አርባዓ፡ ወክልኤቱ፡ ወሐማስያ፡ ወልደ፡ አዛርኤል፡ ወልደ፡ አሐዚ፡ ወልደ፡ ሜሱላሙት፡ ወልደ፡ ኤሜር።
14 ወአኀዊሁኒ፡ እለ፡ ይክሉ፡ ተቃትሎ፡ ምእት፡ ዕሥራ፡ ወሰመንቱ፡ ወመስፍኖሙ፡ ዘብዲሄል፡ ወልደ፡ ሐጊዶሌም።
15 ወእምነ፡ ሌዋውያን፡ ሰማያ፡ ወልደ፡ ሐሱብ፡ ወልደ፡ አዝሪቃ፡ ወልደ፡ ሐሰብያ፡ ወልደ፡ ቡኒ።
16 ወሰብታይ፡ ወኢዮዛብድ፡ ላዕለ፡ ግብር፡ ዘአፍኣ፡ ለቤተ፡ እግዚአብሔር፡ እመላእክተ፡ አበዊሆሙ፡ ሌዋውያን።
17 ወማታንያ፡ ወልደ፡ ሚካ፡ ወልደ፡ ዘባዲ፡ ወልደ፡ አሳፍ፡ መልአከ፡ ሐተሔላ፡ ዘይዜምር፡ በጊዜ፡ ፌላቴፌላህ፡ ወቦቄቦቂያ፡ ካዕብ፡ እምአኃዊሁ፡ ወአብዳ፡ ወልደ፡ ሰሚዓ፡ ወልደ፡ ጌላል፡ ወልደ፡ ይዱቱን።
18 ኵሎሙ፡ ሌዋውያን፡ ውስተ፡ ሀገር፡ ቅድስት፡ ክልኤቱ፡ ምእት፡ ሰማንያ፡ ወአርባዕቱ።
19 ወዓፀውተኒ፡ ዓቁብ፡ ወጤልሞን፡ ወአኃዊሆሙ፡ ዓቀብተ፡ አናቅጽ፡ ምእት፡ ሰብዓ፡ ወክልኤቱ።
20 ወእለ፡ ተርፉ፡ እስራኤል፡ ካህናት፡ ወሌዋውያን፡ ውስተ፡ ኵሉ፡ አህጉረ፡ ይሁዳ፡ ብእሲ፡ ብእሲ፡ ውስተ፡ ርስቱ።
21 ወናታናውያን፡ የኀድሩ፡ በኦፌል፡ ወሲሓ፡ ወጊሰፋ፡ ላዕለ፡ ናታኒም።
22 ወመልአከ፡ ሌዋውያን፡ በኢየሩሳሌም፡ ዑዚ፡ ወልደ፡ ባኒ፡ ወልደ፡ ሐሳብያ፡ ወልደ፡ ማታንያ፡ ወልደ፡ ሚካ፡ ወእምነ፡ ደቂቀ፡ አሳፍ፡ እለ፡ ይዜምሩ፡ ቅድመ፡ ግብረ፡ ቤተ፡ እግዚአብሔር፡ እስመ፡ ከማሁ፡ አዘዘ፡ ንጉሥ፡ ላዕሌሆሙ።
23 ወኤማን፡ ላዕለ፡ መዘምራን፡ ወባል፡ እንተ፡ ጸብሐት።
24 ወጳትያ፡ ወልደ፡ ባስያዛብኤል፡ እምደቂቀ፡ ዛራ፡ ወልደ፡ ይሁዳ፡ ዘቅድመ፡ ንጉሥ፡ ለኵሉ፡ ነገረ፡ ሕዝብ፡ ወለኵሉ፡ አህጉሪሆሙ፡ ዘውስተ፡ ሐቅል።
25 ወእምነ፡ ደቂቀ፡ ይሁዳ፡ እለ፡ ይነብሩ፡ ቅርያታርቦክ፡ ወአዋልዲሃ፡ ወዴቦን፡ ወአዋልዲሃ፡ ወቃጽብኤል፡ ወአዋልዲሃ።
26 ወበኢዮስስ፡ ወበሞላዳ፡ ወበቤተ፡ ፋሌጥ።
27 ወበሐጸርሱአል፡ ወቤርሳቤህ፡ ወውስተ፡ አህጉሪሆሙ።
28 ወበጼቅላቅ፡ ወበመኮና፡ ወበውስተ፡ አህጉሪሆሙኒ።
29 ወበዓይነሬሞን፡ ወበጼረአህ፡ ወበየርሙት።
30 ወዛናህ፡ ወአዳላም፡ ወአዋልዲሃ፡ ወለኪስ፡ ወአዋልዲሃ፡ ወአዜቃ፡ ወአዋልዲሃ፡ ወየኀድሩ፡ እምቤርሳቤህ፡ እስከ፡ ቈላተ፡ ሄኖም።
31 ወደቂቀ፡ ብንያም፡ ወበጌባ፡ ወበማኬማስ፡ ወበአያል፡ ወበበቴል፡ ወአዋልዲሃ።
32 ወአናቶት፡ ወበኖብ፡ ወበአናንያ።
33 በሐጸር፡ ወበራማ፡ ወበጌታይም።
34 በሐዲድ፡ በጼቡኤም፡ በነብላት።
35 ወሎድ፡ ወበአውኖ፡ ወበጌሐሪስም።
36 ወእምነ፡ ሌዋውያን፡ እመክፈልተ፡ ይሁዳ፡ ዘብንያም።
=== chapter 12 ===
[Chapter 12]
1 ወለሊሆሙ፡ ካህናት፡ ወሌዋውያን፡ እለ፡ ዐርጉ፡ ምስለ፡ ዘሩባቤል፡ ወልደ፡ ሰላትያል፡ ወኢዮስስ፡ ወሰራሕያ፡ ወኤርምያስ፡ ወኤዝራም።
2 ወአማርያ፡ ወመሉክ፡ ወሐጡስ።
3 ወሴኬንያ፡ ወሬሁም፡ ወሜሬሞት።
4 ወአዶ፡ ወጌንቶን፡ ወአብያ።
5 ወሚያሚን፡ ወመዓድያ፡ ወቤልጋ።
6 ወሰማዕያ፡ ወዮያሪብ፡ ወይዳዕያ።
7 ወሳሎም፡ ወአሞቅ፡ ወሔልቅያ። ወኤዳዕያ፡ እሉ፡ መሰፍንቲሆሙ፡ ለካህናት፡ ወአኃዊሆሙኒ፡ በመዋዕለ፡ ኢዮስስ።
8 ወሌዋውያን፡ እሉ፡ ኢዮስስ፡ ወበኑያ፡ ወቀዳምያል፡ ወሰራብያል፡ ወይሁዳ፡ ወማታንያ፡ ለሊሁኒ፡ ምስለ፡ አኃዊሁ፡ ሥዩማን፡ ላዕለ፡ ማኅሌት።
9 ወበቅቡቅያ፡ ወኡኒ፡ ወአኃዊሆሙኒ፡ ያበውኡ፡ ዕብሬተ፡ በበዕድሜሆሙ።
10 ወኢዮስስ፡ ወለዶ፡ ለኢዮአቄም፡ ወኢዮአቄም፡ ወለዶ፡ ለኤልያሴብ፡ ወኤልያሴብ፡ ወለዶ፡ ለዮሐዳ።
11 ወዮሐዳ፡ ወለዶ፡ ለዮናታን፡ ወዮናታን፡ ወለዶ፡ ለይዱዕ።
12 ወመዋዕሊሁ፡ ለኢዮአቄም፡ አኃዊሁኒ፡ ካህናት፡ ኮኑ፡ መላእክተ፡ በሐውርቲሆሙ፡ ለሰራያ፡ መራያ፡ ለኤርምያስ፡ ሐናንያ።
13 ወለእዝራ፡ ሜሱላም፡ ወለአማርያ፡ ዮሐናን።
14 ለማሉክ፡ ዮናታን፡ ለሴብንያ፡ ዮሴፍ።
15 ለሐሬም፡ አድና፡ ለመራዮን፡ ሔልቃይ።
16 ለኢዶ፡ ዘካርያ፡ ለጌንቶን፡ ሜሱላም።
17 ለአብያ፡ ዘክሪ፡ ለሚንያሚን፡ ወለሙዓድያ፡ ፈሊጣይ።
18 ለበልጋ፡ ሳሙዓ፡ ለሰማዕያ፡ ዮናታን።
19 ለዮያሪብ፡ መትናይ፡ ለዮዳዕያ፡ ኡዚ።
20 ለሳላይ፡ ቀላይ፡ ለአሞቅ፡ ኤቤር።
21 ለሔልቅያ፡ ሐሳብያ፡ ለኤዳዕያ፡ ናትናኤል።
22 ሌዋውያን፡ በመዋዕለ፡ ኤልያሴብ፡ ወዮሐዳ፡ ወዮሐናን፡ ወያዱዓ፡ ጽሑፋን፡ መላእክተ፡ በሐውርቲሆሙ፡ ወካህናትኒ፡ መበንግሥተ፡ ዳርዮስ፡ ፋርሳዊ።
23 ወደቂቀ፡ ሌዊ፡ መላእክተ፡ በሐውርቲሆሙ፡ ጽሑፋን፡ ውስተ፡ መጽሐፈ፡ ኖብያት፡ በመዋዕለ፡ ዮሐናን፡ ወልደ፡ ኤልያሴብ።
24 ወመላእክተ፡ ሌዋውያን፡ አሳብያ፡ ወሰርብያ፡ ወኢዮስስ፡ ወደቂቀ፡ ቀዳምያል፡ ወአኃዊሆሙ፡ ቅድሜሁ፡ ያነብቡ፡ ወይሴብሑ፡ በመዝሙረ፡ ዳዊት፡ ብእሴ፡ እግዚአብሔር፡ በበዕብሬቶሙ።
25 ማታንያ፡ ወበቅቡቅያ፡ ወዖባድያ፡ ወሜሱላም፡ ወጤልሞን፡ ወዓቁብ፡ ዓፀውተ፡ ኃዋኅው፡ ወዓቀብተ፡ መድረክ፡ ዘአንቀጽ።
26 እሉ፡ በመዋዕለ፡ ኢዮአቄም፡ ወልደ፡ ኢዮስስ፡ ወልደ፡ ኢዮሴዴቅ፡ በመዋዕለ፡ ነሕምያ፡ መስፍን፡ ወእዝራ፡ ካህን፡ ወጸሐፊ።
27 ወአመ፡ መድቅሓ፡ ለኢየሩሳሌም፡ ኀሠሥዎሙ፡ ለካህናት፡ ወለሌዋውያን፡ ውስተ፡ በሐውርቲሆሙ፡ ከመ፡ ያምጽእዎሙ፡ ኢየሩሳሌም፡ ከመ፡ ይግበሩ፡ መድቅሐ፡ ወትፍሥሕተ፡ በተውኔት፡ ወበማኅሌት፡ ወበጸናጽል፡ ወበመዝሙር፡ ወበመሰንቆ።
28 ወተጋብኡ፡ ደቂቀ፡ መዘምራን፡ እምነ፡ አድዋለ፡ ብሔሮሙ፡ ዘኢሩዳሌም፡ ወእምነ፡ አህጉር።
29 ወእምቤተ፡ በልጋይ፡ ወእምአሕቃላተ፡ ጌባዕ፡ ወአዝማዊት፡ እስመ፡ ሐነጹ፡ ሎሙ፡ አህጉረ፡ እለ፡ ይዜምሩ፡ ዓውደ፡ ኢየሩሳሌም።
30 ወአንጽሑ፡ ርእሶሙ፡ ካህናት፡ ወሌዋውያን፡ ወአንጽሕዎሙ፡ ለሕዝብኒ፡ ወለዓፀውትኒ፡ ወለአረፍትኒ።
31 ወአዕረግዎሙ፡ ለመላእክተ፡ ይሁዳ፡ መልዕልተ፡ አረፍት፡ ወአቀምኩ፡ ክልኤተ፡ ግናያተ፡ ዓበይተ፡ ወዑደተ፡ የማን፡ እመ፡ ልዕልተ፡ አረፍት፡ ዘአንቀጸ፡ ሐሴፎት።
32 ወሖረ፡ ሆሴዕ፡ ወተለዎሙ፡ ወመንፈቀ፡ መላእክተ፡ ይሁዳ።
33 ወአዛርያ፡ ወእዝራ፡ ወሜሱላም፡ ወይሁዳ፡ ወብንያም፡ ወሰማዕያ፡ ወኤርምያ።
34 ወእምቂቀ፡ ካህናት፡ ምስለ፡ መጥቅዕ፡ ዘካርያስ፡ ወልደ፡ ዮናታን፡ ወልደ፡ ሰማዓያ፡ ወልደ፡ ማታንያ፡ ወልደ፡ ሚካያ፡ ወልደ፡ ዝኩር፡ ወልደ፡ አሳፍ።
35 ወአኃዊሁ፡ ሰማዓያ፡ ወአዛርኤል፡ ወማዕላይ፡ ወጊለላይ፡ ወመዓይ፡ ወናትናኤል፡ ወይሁዳ፡ ወሐናኒ፡ ይሴብሑ፡ በንዋየ፡ መዝሙረ፡ ዳዊት፡ ብእሴ፡ እግዚአብሔር፡ ወእዝራ፡ ጸሐፊ፡ ቅድሜሆሙ፡ ኀበ፡ አንቀጸ፡ ዓይነ፡ ማይ።
36 ወቅድሜሆሙ፡ ዐርገ፡ ላዕለ፡ መዓርገ፡ ሀገረ፡ ዳዊት፡ መልዕልተ፡ አረፍት፡ ዘቤተ፡ ዳዊት፡ እስከ፡ አንቀጸ፡ ማይ፡ ጽባሐዊ።
37 ወካልእ፡ ግናያት፡ እለ፡ የሐውሩ፡ ጸጋመ፡ ወአነ፡ ድኅሬሆሙ፡ ወመንፈቀ፡ ሕዝብ፡ እምላዕለ፡ አረፍት፡ ዘመልዕልተ፡ ማኅፈደ፡ እቶናውያን፡ ወእስከ፡ አረፍተ፡ መርኅብ።
38 ወእምላዕለ፡ አንቀጸ፡ ኤፍሬም፡ ወማኅፈደ፡ አናንኤል፡ ወማኅፈደ፡ ሐሜአት፡ ወአንቀጽ፡ ካልእ፡ ወኀበ፡ አንቀጸ፡ አክቲያራን፡ እስከ፡ አንቀጽ፡ ዘጵሩጳጥቄ፡ ወቆሙ፡ በአንቀጸ፡ ሐማጣራ።
39 ወአቀሙ፡ ክልኤተ፡ ግናያተ፡ በቤተ፡ እግዚአብሔር፡ ወአነ፡ ወመንፈቀ፡ መላእክት፡ ምስሌየ።
40 ወካህናት፡ ኢልያቄም፡ ወማዓስያ፡ ወሚንያሚን፡ ወሚካያ፡ ወኤልዮዔናይ፡ ወዘካርያ፡ ወሐናንያ፡ በመጥቅዕ።
41 ወማዓስያ፡ ወስማዕያ፡ ወኤልየዜር፡ ወዑዚ፡ ወዮሐናን፡ ወሚልክያ፡ ወኤላም፡ ወኤዝር፡ ወሴምዑ፡ መዘምራን፡ ወይዝረእያ፡ መልአክ።
42 ወሦዑ፡ ይእተ፡ አሚረ፡ መሥዋዕተ፡ ዓቢየ፡ ወተፈሥሑ፡ እስመ፡ እግዚአብሔር፡ አስተፍሥሖሙ፡ ፈድፋደ፡ ወተፈሥሓ፡ አንስቶሙ፡ ወደቂቆሙ፡ ወተሰምዐ፡ ትፍሥሕቶሙ፡ በኢየሩሳሌም፡ እስከ፡ ርኁቅ።
43 ወሤሙ፡ ይእተ፡ አሚረ፡ እደወ፡ እለ፡ የዐቅቡ፡ መዛግብተ፡ ሙዳየ፡ ምጽዋት፡ ዘመባእ፡ ዘቀዳምያት፡ ወዘዓሥራት።
44 ወዘኒ፡ አስተጋብኡ፡ መላእክተ፡ አህጉር፡ ክፍሎሙ፡ ለካህናት፡ ወለሌዋውያን፡ እስመ፡ ተፈሥሑ፡ በይሁዳ፡ ካህናት፡ ወሌዋውያን።
45 ወእሉ፡ ይቀውሙ፡ ወየዐቅቡ፡ ሥርዓተ፡ አምላኮሙ፡ ወሥርዓተ፡ ንጽሖሙ፡ ወመዘምራንኒ፡ ወዓፀውትኒ፡ ከመ፡ ትእዛዘ፡ ዳዊት፡ ወሰሎሞን፡ ወልዱ።
46 እስመ፡ በመዋዕለ፡ ዳዊት፡ አሳፍ፡ ይቀውም፡ እስመ፡ ሊቆሙ፡ ለመዘምራን፡ ውእቱ፡ ወያነብቡ፡ ወይሴብሑ፡ ለእግዚአብሔር።
47 ወኵሎሙ፡ እስራኤል፡ በመዋዕለ፡ ዘሩባቤል፡ ወበመዋዕለ፡ ነሕምያ፡ መዘምራንኒ፡ ወዓፀውትኒ፡ ኵሎ፡ አሚረ፡ ይትባረዩ፡ ዘምሮ፡ ወይባረክዎሙ፡ ለሌዋውያን፡ ወሌዋውያንኒ፡ ይቄድስዎሙ፡ ለደቂቀ፡ አሮን።
=== chapter 13 ===
[Chapter 13]
1 ወይእተ፡ አሚረ፡ አንበቡ፡ ኦሪተ፡ ሙሴ፡ ወአስምዕዎሙ፡ ለሕዝብ፡ ወረከቡ፡ ኀበ፡ ይብል፡ አሞናዊ፡ ወሞአባዊ፡ ኢይባእ፡ ቤተ፡ እግዚአብሔር፡ እስከ፡ ለዓለም።
2 እስመ፡ ኢተቀበልዎሙ፡ ለደቂቀ፡ እስራኤል፡ በእክል፡ ወበማይ፡ ወዐሰብዎ፡ ለበዐለም፡ ከመ፡ ይርግሞሙ፡ ወሜጠ፡ እግዚአብሔር፡ መርገሞ፡ ወባረኮሙ።
3 ወሶበ፡ ሰምዑ፡ ኦሪተ፡ ሰደዱ፡ ኵሎ፡ ዘተደመረ፡ ውስተ፡ እስራኤል።
4 ወእምቅድመ፡ ዝንቱ፡ ኤልያሴብኒ፡ ካህን፡ ዓቃቤ፡ ሙዳየ፡ ምጽዋት፡ ዘቤተ፡ አምላክነ፡ ቅሩብ፡ ለጦብያ፡ ወገብረ፡ ሎቱ፡ ሙዳየ፡ ምጽዋት፡ ዓቢየ።
5 ወህየ፡ ሀለዉ፡ እምቅድመ፡ ያብኡ፡ መሐና፡ ወስኂነ፡ ወንዋየኒ፡ ወዓሥራተ፡ ሥርናይ፡ ወወይን፡ ወቅብዕ፡ ምርካቦሙ፡ ለሌዋውያን፡ ወለመዘምራን፡ ወለዓፀውት፡ ወቀዳምያተ፡ ለካህናት።
6 ወበዝ፡ ኵሉ፡ ኢሀሎኩ፡ በኢየሩሳሌም፡ እስመ፡ በሠላሳ፡ ወክልኤቱ፡ ዓመተ፡ መንግሥቱ፡ ለአርተሰስታ፡ ንጉሠ፡ ባቢሎን፡ ሖረኩ፡ ኀበ፡ ወሶበ፡ ፈጸምኩ፡ መዋዕለ፡ አስተበዋሕክዎ፡ ለንጉሥ፡ ወገባእኩ፡ እምንጉሥ፡ ውስተ፡ ኢየሩሳሌም።
7 ወጠየቁ፡ ዘገብረ፡ ኤልያሴብ፡ እኩየ፡ ለጦብያ፡ ወገብረ፡ ሎቱ፡ ሙዳየ፡ ምጽዋት፡ በዓፀደ፡ ቤተ፡ እግዚአብሔር።
8 ወፈድፋደ፡ አምፅዐኒ፡ ወኢአደመኒ፡ ወእምዝ፡ ገፍታዕኩ፡ ኵሎ፡ ንዋየ፡ ቤተ፡ ጦብያ፡ አፍኣ፡ እምኀበ፡ ሙዳየ፡ ምጽዋት።
9 ወእቤሎሙ፡ ያዕርቁ፡ ኵሎ፡ መዛግብተ፡ ወአግባእኩ፡ ኵሎ፡ ንዋየ፡ ቤተ፡ እግዚአብሔር፡ ወመሐና፡ ወስኂነ።
10 ወአእመርኩ፡ ከመ፡ ኢወሀብዎሙ፡ ክፍሎሙ፡ ለሌዋውያን፡ ወኵሎሙ፡ ሰብእ፡ ተኀጥኡ፡ ውስተ፡ አዕፃዳቲሆሙ፡ እስመ፡ ሌዋውያን፡ ወመዘምራን፡ ይገብሩ፡ ግብረ፡ ዓቢየ።
11 ወተላኰይክዎሙ፡ ለመላእክት፡ ወእቤሎሙ፡ እፎ፡ ተኀድጉ፡ ቤተ፡ እግዚአብሔር፡ ወእምዝ፡ አስተጋባእክዎሙ፡ ወአቀምክዎሙ፡ በበሢመቶሙ።
12 ወኵሎሙ፡ ይሁዳ፡ አብኡ፡ ዓሥራተ፡ ሥርናይ፡ ወወይን፡ ወቅብዕ፡ ለመዝገብ።
13 ወላዕለ፡ መዝገብ፡ ሥዩማን፡ ሰላምያ፡ ካህን፡ ወሳዶቅ፡ ጸሐፊ፡ ወፋዴሃ፡ እምውስተ፡ ሌዋውያን፡ ወምስሌሆሙ፡ አናን፡ ወልደ፡ ዝኩር፡ ወልደ፡ ማታንያ፡ አምንዎሙ፡ ከመ፡ እሙንቱ፡ ያስተካፍልዎሙ፡ ለአኃዊሆሙ።
14 ተዘከረኒ፡ እግዚኦ፡ በዝንቱ፡ ወኢትደምስስ፡ ሊተ፡ ሣህልየ፡ ዘገበርኩ፡ በቤተ፡ እግዚአብሔር፡ ወበዐቂቦቱ።
15 ወበእማንቱ፡ መዋዕል፡ ርኢኩ፡ ይሁዳ፡ እንዘ፡ ያከይዱ፡ እክለ፡ ወወይነ፡ በዕለተ፡ ሰንበት፡ ወይጐንኩ፡ ከላስስተ፡ ወይጽዕኑ፡ ላዕለ፡ አእዱግ፡ ወይነኒ፡ ወአብላሰኒ፡ ወአስካለኒ፡ ወኵሎ፡ ፆረ፡ ያአትዉ፡ ኢየሩሳሌም፡ በዕለተ፡ ሰንበት፡ ወአስማዕኩ፡ ላዕሌሆሙ፡ እስመ፡ ይሣየጡ፡ እንዘ፡ ሊቃውንቲሆሙ፡ ይነብሩ።
16 ወነበሩ፡ ህየ፡ ወአምጽኡ፡ ዓሣኒ፡ ወባዕደኒ፡ ኵሎ፡ ተግባሮሙ፡ ወሤጡ፡ በሰንበት፡ ለደቂቀ፡ ይሁዳ፡ በኢየሩሳሌም።
17 ወተላኰይክዎሙ፡ ለመላእክተ፡ ይሁዳ፡ ወለዓበይቶሙ፡ ወእቤሎሙ፡ ምንትኑ፡ ዝንቱ፡ ነገር፡ እኩይ፡ ዘትገብሩ፡ አንትሙ፡ ወትጌምኑ፡ በዕለተ፡ ሰንበት።
18 አኮኑ፡ ከመዝ፡ ገብሩ፡ አበዊነ፡ ወአምጽአ፡ እግዚአብሔር፡ ላዕሌሆሙ፡ ወላዕሌነኒ፡ ኵላ፡ ዛቲ፡ እኪተ፡ ወላዕለ፡ ዛቲ፡ ሀገር፡ ወአንትሙኒ፡ ትዌስኩ፡ መንሱተ፡ ላዕለ፡ እስራኤል፡ ወታጌምኑ፡ ሰንበተ።
19 ወእምዝ፡ ሶበ፡ አቀሙ፡ ኆኅቲሃ፡ ለኢየሩሳሌም፡ እምዝድመ፡ ትባእ፡ ሰንበት፡ አዘዝክዎሙ፡ ይዕፅዉ፡ ኆኃቲሃ፡ ወእቤሎሙ፡ ኢታርኅዉ፡ እስከ፡ የኀልፍ፡ ሰንበት፡ ወእምወራዙት፡ አዕቀብኩ፡ ኆኃቲሃ፡ ከመ፡ አልቦ፡ ዘያበውኡ፡ ፆረ፡ በዕለተ፡ ሰንበት።
20 እስመ፡ ይነብሩ፡ ኵሎሙ፡ ሮጲሌም፡ ወገብሩ፡ ምሥያጠ፡ አፍኣ፡ እምኢየሩሳሌም፡ ምዕረ፡ ወካዕበ።
21 ወተላኰይክዎሙ፡ ወእቤሎሙ፡ ለምንት፡ ትነብሩ፡ እንተ፡ ገጸ፡ አረፍት፡ አፍኣ፡ ለእመኬ፡ ደገምክሙ፡ እምዮም፡ አነሥእ፡ እዴየ፡ ላዕሌክሙ፡ ወኢመጽኡ፡ ውእተ፡ አሚረ፡ በሰንበት።
22 ወእቤሎሙ፡ ለሌዋውያን፡ እለ፡ ያነጽሑ፡ ርእሶሙ፡ እለ፡ መጽኡ፡ ይዕቀቡ፡ አናቅጸ፡ ወይቀድሱ፡ ዕለተ፡ ሰንበት፡ ወእቤ፡ ተዘከረኒ፡ እግዚኦ፡ ወመሀከኒ፡ በከመ፡ ብዝኀ፡ ምሕረትከ።
23 ወይእተ፡ አሚረ፡ ፈከብኩ፡ እምውስተ፡ አይሁድ፡ እለ፡ አውሰቡ፡ አንስተ፡ አዛጦን፡ ወአሞናውያን፡ ወሞአባውያን።
24 ወመንፈቀ፡ ደቂቆሙ፡ ነገረ፡ አዛጦን፡ ይትናገሩ፡ ወኢየአምሩ፡ ነገረ፡ ይሁዳ፡ ወቦ፡ በልሳነ፡ ሕዝብ፡ ወአሕዛብ፡ ወተማዕክዎሙ፡ ወረገምክዎሙ፡ ወቀሠፍኩ፡ እምውስቴቶሙ፡ እደወ፡ ወነጸይክዎሙ።
25 ወአምሐልክዎሙ፡ በእግዚአብሔር፡ ከመ፡ ኢያስተዋስቡ፡ አዋልዶሙ፡ ለደቂቀ፡ እልክቱ፡ ወኢ፡ አዋልደ፡ እልክቱ፡ ለደቂቆሙ።
26 አኮኑ፡ ላዕለ፡ እሉ፡ ከመዝ፡ አበሰ፡ ሰሎሞን፡ ንጉሠ፡ እስራኤል፡ ወበኵሉ፡ አሕዛብ፡ አልቦ፡ ዘከማሁ፡ ንጉሥ፡ ወአፍቀሮ፡ እግዚአብሔር፡ ወወሀቦ፡ መንግሥተ፡ ላዕለ፡ ኵሉ፡ እስራኤል፡ ወአስሐታሁ፡ አንስት፡ ነኪራት።
27 ወከማሁኬ፡ ለክሙኒ፡ ወኢይሰማዕ፡ እንዘ፡ ትገብርዋ፡ ለዛቲ፡ እኪት፡ ወእንዘ፡ ተዓልውዎ፡ ለአምላክነ፡ ወታወስቡ፡ አንስተ፡ ነኪራተ።
28 ወእምነ፡ ደቂቀ፡ ዮዳሔ፡ ወልደ፡ ኤልያሴብ፡ ካህን፡ ዐቢይ፡ ተሐመዎ፡ ብእሲ፡ ለሰንበላጥ፡ አሆሮናዊ፡ ወሰደድክዎ፡ እምኔየ።
29 ተዘከሮሙ፡ እግዚኦ፡ እስመ፡ ተሐምዉ፡ ካህናት፡ እንዘ፡ እሙንቱ፡ በሕገ፡ ካህናት፡ ወሌዋውያን።
30 ወአንጻሕክዎሙ፡ እምኵሉ፡ ነኪር፡ ወሠራዕክዎሙ፡ ለካህናት፡ ወለሌዋውያን፡ በበዕብሬቶሙ።
31 ወመባኦሙኒ፡ ለእለ፡ ይፀውሩ፡ ዕፀ፡ በበዕድሜ፡ መዋዕሊሆሙ፡ ተዘከረነ፡ እግዚኦ፡ አምላክነ፡ በሠናይ።