##### edition  (gez) — Text of the EOTC printed Bible
=== chapter 1 ===
[Chapter 1]
1 በካልእ፡ ዓመት፡ እምዘነግሠ፡ አርጤክስስ፡ ዓቢይ፡ አመ፡ ቀዳሚ፡ ዘኔሳን፡ ርእየ፡ ሕልመ፡ መርዶክዮስ፡ ዘኢያኤሩ፡ ዘሴምዩ፡ ዘቄስዩ፡ እምነገደ፡ ብንያም፡ ብእሲ፡ አይሁዳዊ።
2 ወይነብር፡ ውስተ፡ ሀገረ፡ ሱሳ፡ ወዓቢይ፡ ብእሲሁ፡ ወይነብር፡ በዓፀደ፡ ቤተ፡ ንጉሥ።
3 ወእምነ፡ ፄዋ፡ ውእቱ፡ ዘፄወዎ፡ ናቡከደነፆር፡ ንጉሠ፡ ባቢሎን፡ እምነ፡ ኢየሩሳሌም፡ ምስለ፡ ኢኮንያን፡ ንጉሠ፡ ይሁዳ።
4 ወዝንቱ፡ ውእቱ፡ ሕልሙ፡ ወናሁ፡ ቃል፡ ወሁከት፡ ወድልቅልቅ፡ ወነጐድጓድ፡ ወጒጒዓ፡ ላዕለ፡ ምድር።
5 ወናሁ፡ ክልኤቱ፡ አክይስት፡ ዓበይት፡ ድልዋን፡ መጽኡ፡ ክልኤሆሙ፡ ይትጋደሉ፡ ወኮነ፡ ቃሎሙ፡ ዓቢየ።
6 ወበቃለ፡ ዚአሆሙ፡ ተደለዉ፡ አሕዛብ፡ ለፀብዕ፡ ከመ፡ ይጽብዕዎሙ፡ ለሕዝብ፡ ጻድቃን።
7 ወናሁ፡ ዕለተ፡ ጽልመት፡ ወቆባር፡ ወሥቃይ፡ ወምንዳቤ፡ ወሕማም፡ ወሁከት፡ ዓቢይ፡ ውስተ፡ ምድር።
8 ወተሀውኩ፡ ጻድቃን፡ ወኵሎሙ፡ ሕዝብ፡ ፈርሁ፡ እምነ፡ እኪቶሙ፡ ወተደለዉ፡ ለተኀጒሎ።
9 ወጸርሑ፡ ኀበ፡ እግዚአብሔር፡ ወእምነ፡ ጽራሖሙ፡ ኮነ፡ ንስቲት፡ ነቅዕ፡ ዘሕይወት፡ ወነቅዐ፡ ዐቢይ፡ ፈለግ፡ ዘብዙኅ፡ ማዩ።
10 ወብርሃነ፡ ፀሐይ፡ ሠረቀ፡ ላዕሌሃ፡ ወትሑታን፡ ተለዓሉ፡ ወበልዕዎሙ፡ ለክቡራን።
11 ወተንሥአ፡ መርዶክዮስ፡ ርኢዮ፡ ዘንተ፡ ሕልመ፡ እስመ፡ እግዚአብሔር፡ ፈቀደ፡ ይግበር፡ ወዐቀቦ፡ ውስተ፡ ልቡ፡ ወፈቀደ፡ ያእምር፡ ኵሎ፡ ነገሮ፡ በሌሊት።
12 ወነበረ፡ መርዶክዮስ፡ ውስተ፡ ዓፀድ፡ ምስለ፡ ገቦታ፡ ወታራ፡ ክልኤቱ፡ ሕዕዋኒሁ፡ ለንጉሥ፡ እለ፡ የዐቅቡ፡ ዓፀደ፡ ወሀገረ።
13 ወሰምዐ፡ ምክሮሙ፡ ዘይሔልዩ፡ ወአእመረ፡ ወጠየቀ፡ ከመ፡ አስተዳለዉ፡ ማዕሌተ፡ ይቅትልዎ፡ ለአርጤክስስ፡ ንጉሥ፡ ወነገሮ፡ ለንጉሥ፡ በእንቲአኮሙ።
14 ወሐተቶሙ፡ ንጉሥ፡ ለክልኤሆሙ፡ ሕጽዋኒሁ፡ ወአምኑ፡ ወተኰነኑ።
15 ወጸሐፎ፡ ንጉሥ፡ ለዝንቱ፡ ነገር፡ ውስተ፡ ተዝካረ፡ ኖብያት፡ ወመርክድዮስኒ፡ ጸሐፎ።
16 ወአዘዞ፡ ንጉሥ፡ ለመርዶክዮስ፡ ይፀመድ፡ ውስተ፡ ዓፀድ፡ ወፈተቶ፡ በበይነ፡ ዝንቱ።
17 ወሐማሰ፡ እስመ፡ ልደቱ፡ አግያዊ፡ ክቡር፡ ውእቱ፡ ወየቀውም፡ ቅድመ፡ ንጉሥ፡ ወይፈቅድ፡ ይግበር፡ እኪተ፡ ላዕለ፡ መርዶክዮስ፡ ወላዕለ፡ ሕዝቡ፡ በእንተ፡ እልክቱ፡ ክልኤቱ፡ ሕፅዋኒሁ፡ ለንጉሥ።
=== chapter 2 ===
[Chapter 2]
1 ወእምድኅረ፡ ዝንቱ፡ ነገር፡ በመዋዕሊሁ፡ ለአርጤክስስ፡ ወውእቱ፡ አርጤክስስ፡ ዘነግሰ፡ ላዕለ፡ ምእት፡ ዕሥራ፡ ወሰብዓቱ፡ በሐውርት፡ እምነ፡ ብሔረ፡ ህንደኬ፡ እስከ፡ ብሔረ፡ ኢትዮጵያ።
2 ወበውእቱ፡ መዋዕል፡ አመ፡ ነግሠ፡ በሱሳ፡ ሀገር፡ በሣልስ፡ ዓም፡ እምዘነግሠ፡ ገብረ፡ በዓለ፡ ለአግብርቲሁ፡ ወለአዕርክቲሁ።
3 ወበእንተ፡ እለ፡ ተርፉ፡ አሕዛብ፡ ለፋርስ፡ ወለሜዶን፡ ወለክቡራኒሆሙ፡ ወለመላእክተ፡ ሠራዊት።
4 ወእምድኅረ፡ ዝንቱ፡ አርአዮሙ፡ ብዕለ፡ መንግሥቱ፡ ወክብረ፡ ትፍሥሕቱ፡ ወብዕሉ፡ በምእት፡ ወሰማንያ፡ ዕለት።
5 ወሶበ፡ ተፈጸመ፡ መዋዕለ፡ መርዓ፡ ገብረ፡ ንጉሥ፡ በዓለ፡ ዳግመ፡ ለአሕዛብ፡ እለ፡ ተርፉ፡ ውስተ፡ ሀገር፡ ወበዓፀደ፡ ንጉሥ፡ ሰዱሰ፡ መዋዕለ፡ ወሰኑየ።
6 ወሥርግው፡ በሜላት፡ ወበአጌ፡ ንጹሕ፡ ወዕውድ፡ በሜላት፡ ውስተ፡ አሕባለ፡ ቢሦስ፡ በሕልቀተ፡ ወርቅ፡ ወብሩር፡ ላዕለ፡ አዕማደ፡ እብን፡ ዘጵርንሶ፡ ወዓራታት፡ ዘወርቅ፡ ወዘብሩር፡ ወጽፍጹፍ፡ በእብን፡ ዘኅብረ፡ መረግድ፡ ወበዕንቈ፡ ጴኔኖን፡ ወበእብነ፡ ጳሪኑ፡ ወጥቀ፡ ሠናይ፡ ጸፍጸፉ፡ ዘዘዚአሁ፡ ኅብሩ፡ አሠሩ፡ ወእንተ፡ ዓውዱ፡ ጽጌ፡ ረዳ፡ ሥሩዕ።
7 ወጽዋዓትኒ፡ ዘወርቅ፡ ወዘብሩር፡ ወዘዕንቈ፡ አትራቂኖን፡ ወዘቂልቅያን፡ ድልወቱ፡ በሐሳበ፡ ሠለስቱ፡ እልፍ፡ መክሊት፡ ወወይኑ፡ ብዙኅ፡ ወዘሠናይ፡ መዓዛሁ፡ ዘይሰቲ፡ ውእቱ፡ ንጉሥ።
8 ወበዓሉሰ፡ አኮ፡ በሕገ፡ ቀዳሚ፡ ዘገብረ፡ አላ፡ በከመ፡ ፈቀደ፡ ውእቱ፡ ንጉሥ፡ አዘዞሙ፡ ለመገብቱ፡ ይግበሩ፡ ፈቃደ፡ ዚአሁ፡ ወፈቃደ፡ ሰብእ።
9 ወአስጢንኒ፡ ንግሥት፡ ገብረት፡ በዓለ፡ ለአንስት፡ እለ፡ ውስተ፡ ቤተ፡ መንግሥታ፡ እምኀበ፡ አርጤክስስ፡ ንጉሥ።
10 ወበሳብዕት፡ ዕለት፡ ሶበ፡ ተፈሥሐ፡ ንጉሥ፡ ይቤሎሙ፡ ለሐማ፡ ወለባዛና፡ ወለታራ፡ ወለቡላዜ፡ ወለዘትወልታ፡ ወለዘአበጦ፡ ወለተራባ፡ ወለሰብዓቱ፡ ሕጽዋኒሁ፡ ለንጉሥ፡ እለ፡ ይትለአክዎ፡ ከመ፡ ያምጽእዋ፡ ለንግሥት፡ ወያንግሥዋ፡ ወያሠርግውዋ፡ አክሊለ፡ ወያርእይዋ፡ ለኵሎሙ፡ መላእክተ፡ አሕዛብ፡ ሥና፡ እስመ፡ ሠናይት፡ ይእቲ።
11 ወአበየት፡ ሰሚዖቶ፡ አስጢን፡ ንግሥት፡ ወኢፈቀደት፡ ትምጻእ፡ ምስለ፡ ሕጽዋኒሁ፡ ወተከዘ፡ ንጉሥ፡ ወተምዐ።
12 ወነገሮሙ፡ ለአዕርክቲሁ፡ ዘከመ፡ ትቤ፡ አስጢን፡ ወይቤሎሙ፡ ግበሩ፡ እንከሰ፡ ሕጎ፡ ወኵነኔሁ።
13 ወመጽኡ፡ ኀቤሁ፡ አርቂስዮስ፡ ወሰርስቲዮስ፡ ወማሌሲዓር፡ ወመላእክቲሁ፡ ዘፋርስ፡ ወሜዶን፡ እለ፡ ቅሩባን፡ ኀበ፡ ንጉሥ፡ ወእለ፡ ይነብሩ፡ እቱተ፡ ምስለ፡ ንጉሥ።
14 ወነገርዎ፡ ለንጉሥ፡ ሕጎሙ፡ ዘከመ፡ ይሬስይዋ፡ ለአስጢን፡ ንግሥት፡ እስመ፡ ኢገብረት፡ በከመ፡ አዘዞሙ፡ ንጉሥ፡ ለሕጽዋን።
15 ወይቤሎሙ፡ ሜኬዎስ፡ ለንጉሥ፡ ወለመላእክቲሁ፡ አኮ፡ ላዕለ፡ ንጉሥ፡ ባሕቲቱ፡ ዘአበሰት፡ አስጢን፡ ንግሥት፡ አላ፡ ላዕለ፡ ኵሎሙ፡ መላእክት፡ ወላዕለ፡ መገብተ፡ ንጉሥ።
16 ወነገሮሙ፡ ቃላ፡ ለንግሥት፡ ዘከመ፡ አበየቶ፡ ለንጉሥ።
17 ወሶበ፡ ዛቲ፡ ዮም፡ አበየቶ፡ ለንጉሥ፡ አርጤክስስ፡ ከማሁ፡ እምዮምኒ፡ አንስቲያሆሙ፡ ለመኳንንተ፡ ፋርስ፡ ወሜዶን፡ ሰሚዖን፡ ዘንተ፡ ኵሎን፡ ዘከመ፡ ተዋሥአቶ፡ ለንጉሥ፡ ከማሁ፡ ይትሀበላ፡ እማንቱኒ፡ አምታቲሆን፡ ወያስታሐቅራ።
18 እመሰ፡ ፈቀደ፡ ንጉሥ፡ የአዝዝ፡ በቤተ፡ መንግሥቱ፡ ይጽሐፍዎ፡ ለዝንቱ፡ ሕግ፡ ለፋርስ፡ ወሜዶን፡ ዘከመ፡ ይገብርዋ፡ ለይእቲ፡ ወኢትባእ፡ እንከ፡ ይእቲ፡ ንግሥት፡ ኀቤሁ፡ ወመንግሥታኒ፡ የሀብ፡ ንጉሥ፡ ለካልእት፡ ብእሲት፡ እንተ፡ ትኄይስ።
19 ወይስምዕዎ፡ ለዝንቱ፡ ሕግ፡ ዘገብረ፡ ንጉሥ፡ በመንግሥቱ፡ ወእምዝ፡ እንከ፡ ኵሎን፡ አንስት፡ ያከብራ፡ አምታቲሆን፡ ባዕለኒ፡ ወነዳየኒ።
20 ወአደሞ፡ ለንጉሥ፡ ዝንቱ፡ ነገር፡ ወለመላእክቲሁ፡ ወገብረ፡ ንጉሥ፡ በከመ፡ ይቤ፡ ሜኬዎስ።
21 ወለአከ፡ ንጉሥ፡ ውስተ፡ ኵሉ፡ መንግሥቱ፡ ለለበሐውርቲሆሙ፡ በከመ፡ ዝንቱ፡ ቃል፡ ከመ፡ ይፍርሃሆሙ፡ አንስቲያሆሙ፡ በውስተ፡ አብያቲሆሙ።
=== chapter 3 ===
[Chapter 3]
1 ወእምድኅረ፡ ዝንቱ፡ ነገር፡ ረስዓ፡ ንጉሥ፡ ወኢተዘከራ፡ እንከ፡ ለአስጢን፡ እስመ፡ ይዜክር፡ ላቲ፡ ዘከመ፡ ተዋሥአቶ።
2 ወእምድኅረ፡ ኰነና፡ ይቤልዎ፡ ደቁ፡ ለንጉሥ፡ ይኅሥሡ፡ ሎቱ፡ ለንጉሥ፡ አዋልደ፡ ደናግለ፡ እለ፡ ሠናይ፡ ራእዮን።
3 ወይሢም፡ ንጉሥ፡ ውስተ፡ ኵሉ፡ በሐውርተ፡ መንግሥቱ፡ መላእከተ፡ ወመሳፍንተ፡ ወይኅረዩ፡ ሎቱ፡ አዋልደ፡ ደናግለ፡ እለ፡ ሠናይ፡ ራእዮን፡ በሱሳ፡ ሀገር፡ በውስተ፡ አብያተ፡ አንስት፡ ወያወፍይዎ፡ ለሕፅወ፡ ንጉሥ፡ ወየሀቦን፡ ቅብዖን፡ ወኵሎ፡ መፍቅዶን።
4 ወእንተ፡ አደመቶ፡ እምኔሆን፡ ለንጉሥ፡ ብእሲቱ፡ ይእቲ፡ ወትንግሥ፡ ምስሌሁ፡ ህየንተ፡ አስጢን፡ ወአደሞ፡ ዝንቱ፡ ነገር፡ ለንጉሥ፡ ወገብረ፡ ከማሁ።
5 ወሀሎ፡ አሐዱ፡ ብእሲ፡ አይሁዳዊ፡ በውስተ፡ ሱሳ፡ ሀገር፡ ወስሙ፡ መርዶክዮስ፡ ወልደ፡ ኢያኤሩ፡ ዘሴምዩ፡ ዘቄስዩ፡ ዘእምነገደ፡ ብንያም።
6 ወተፄወወ፡ እምኢየሩሳሌም፡ ወዘፄወዎ፡ ናቡከደነፆር፡ ንጉሠ፡ ባቢሎን።
7 ወቦቱ፡ ወለት፡ እንተ፡ ሐፀና፡ ወለተ፡ አሚናዳብ፡ እኁሁ፡ ለአቡሁ፡ ወስማ፡ አስቴር፡ ወእምድኅረ፡ ወፅአት፡ እምአዝማዲሃ፡ ሐፀና፡ ላቲ፡ ትኩኖ፡ ወለቶ፡ ወይእቲ፡ ወለት፡ ሠናይት፡ ራእያ።
8 ወሶበ፡ አዘዘ፡ ንጉሥ፡ አስተጋብኡ፡ ሎቱ፡ ብዙኀተ፡ አዋልደ፡ ውስተ፡ ሱሳ፡ ሀገር፡ ኀበ፡ ጋይ፡ ዓቃቤ፡ አንስት።
9 ወአደመቶ፡ ይእቲ፡ ወለት፡ ወረከበት፡ ሞገሰ፡ በቅድሜሁ፡ ወአፍጠነ፡ ውሂቦታ፡ ቅብዐ፡ ወመክፈልተ፡ ወሰቡዐ፡ አዋልደ፡ እለ፡ ይትለአካሃ፡ እምቤተ፡ ንጉሥ፡ ወሠናየ፡ ዓቀባሃ፡ በውስተ፡ ቤተ፡ አንስት።
10 ወኢነገረት፡ አስቴር፡ አዝማዲሃ፡ ወኢ፡ ብሔራ፡ እስመ፡ መርዶክዮስ፡ አዘዛ፡ ከመ፡ ኢታይድዕ።
11 ወኵሎ፡ አሚረ፡ ይመጽእ፡ መርዶክዮስ፡ ኀበ፡ ዓፀደ፡ አንስት፡ ከመ፡ ይስማዕ፡ ዜናሃ፡ ለአስቴር፡ ዘከመ፡ ሀለወት።
12 ወአመ፡ በጽሐ፡ ጊዜሆን፡ ለእልኩ፡ አዋልድ፡ ከመ፡ ይባኣ፡ ኀበ፡ ንጉሥ፡ እስመ፡ መጠነዝ፡ መዋዕለ፡ ይነብራ፡ እንዘ፡ ይትሔረሳ፡ ወይሤነያ፡ ስድስተ፡ አውራኀ፡ እንዘ፡ ይትቀብዓ፡ ቅብዐ፡ ዕፍረት፡ ወስድስተ፡ አውራኀ፡ በአፈዋት፡ ወበቅብዐ፡ አንስት።
13 ወእምዝ፡ ሶበ፡ ተፈጸመ፡ ዓሠርቱ፡ ወክልኤቱ፡ አውራኅ፡ ይእተ፡ አሚረ፡ ይበውኣ፡ ኀበ፡ ንጉሥ፡ ወእንተ፡ ውእቱ፡ ፈቀደ፡ ያመጽኡ፡ ሎቱ፡ እምቤተ፡ አንስት።
14 ወፍና፡ ሠርክ፡ ትበውእ፡ ወጸቢሖ፡ ትገብእ፡ ቤተ፡ አንስት፡ ኀበ፡ ጋይ፡ ሕፅወ፡ ንጉሥ፡ ዓቃቤ፡ አንስት፡ ወኢትደግም፡ እንከ፡ በዊአ፡ ኀበ፡ ንጉሥ፡ ለእመ፡ ለሊሁ፡ ኢጸውዓ።
15 ወአመ፡ በጽሐ፡ መዋዕለ፡ ዕብሬታ፡ ለአስቴር፡ ወለተ፡ አሚናዳብ፡ እኅወ፡ አቡሁ፡ ለመርዶክዮስ፡ ከመ፡ ትባእ፡ ኀበ፡ ንጉሥ፡ ገብረት፡ ኵሎ፡ በከመ፡ አዘዘ፡ ዝክቱ፡ ሕፅው፡ ዓቃቤ፡ አንስት፡ እስመ፡ ባቲ፡ ሞገስ፡ ለአስቴር፡ በኀበ፡ ኵሎሙ፡ እለ፡ ይሬእይዋ።
16 ወቦአት፡ አስቴር፡ ኀበ፡ አርጤክስስ፡ ንጉሥ፡ በዓሠርቱ፡ ወክልኤቱ፡ አውራኅ፡ በወርኀ፡ አዳር፡ በሰብዓቱ፡ ዓም፡ ዘመንግሥቱ።
17 ወአደመቶ፡ አስቴር፡ ለንጉሥ፡ ወረከበት፡ ሞገሰ፡ ፈድፋደ፡ እምነ፡ ኵሎን፡ ደናግል፡ ወአሠርገዋ፡ እክሊለ፡ አንስት።
18 ወገብረ፡ ንጉሥ፡ በዓለ፡ ለአፅርክቲሁ፡ ወለሠራዊቱ፡ ሰቡዐ፡ መዋዕለ፡ ወአዕበዮ፡ ለመርዐ፡ አስቴር፡ ወገብረ፡ ኵሎ፡ ኅዳጋቲሃ፡ ውስተ፡ ኵሉ፡ ደወለ፡ መንግሥቱ።
19 ወመርዶክዮስ፡ ይፀመድ፡ ውስተ፡ ዓፀደ፡ ንጉሥ።
20 ወአስቴር፡ ኢያይድዐት፡ ብሔራ፡ እስመ፡ ከማሁ፡ አዘዛ፡ ከመ፡ ትፍራህ፡ እግዚአብሔርሃ፡ ወትግበር፡ ትእዛዞ፡ በከመ፡ ሀለወት፡ ምስሌሁ፡ ወአስቴርኒ፡ ኢኃደገት፡ ሕጋ።
21 ወተከዙ፡ ሕዕዋኒሁ፡ ለንጉሥ፡ ሊቃነ፡ ዓቀብተ፡ ርእሱ፡ እስመ፡ ዓብየ፡ መርዶክዮስ፡ ወፈቀዱ፡ ይቅትልዎ፡ ለአርጤክስስ፡ ንጉሥ።
22 ወሰምዐ፡ መርዶክዮስ፡ ወነገራ፡ ለአስቴር፡ ወይእቲ፡ አይድዓቶ፡ ለንጉሥ፡ ምክሮሙ።
23 ወሶበ፡ ሐተቶሙ፡ ለእልክቱ፡ ክልኤቱ፡ ሕፅዋኒሁ፡ አምኑ፡ ወሰቀሎሙ፡ ወእምዝ፡ አዘዘ፡ ንጉሥ፡ ይጽሐፍዎ፡ ለዝንቱ፡ ውስተ፡ ኖብያተ፡ መንግሥቱ፡ ለተዝካር፡ በእንተ፡ አኰቴተ፡ ለመርዶክዮስ።
=== chapter 4 ===
[Chapter 4]
1 ወእምድኅረ፡ ዝንቱ፡ አዕበዮ፡ ንጉሥ፡ አርጤክስስ፡ ለሐማ፡ እስመ፡ ልደቱ፡ አግያዊ፡ ወአንበሮ፡ ላዕለ፡ እምኵሎሙ፡ አዕርክቲሁ።
2 ወይሰግዱ፡ ሎቱ፡ ኵሎሙ፡ እለ፡ ውስተ፡ ዓፀድ፡ እስመ፡ ከማሁ፡ ይግበሩ፡ አዘዘ፡ ንጉሥ፡ ወመርዶክዮስ፡ ባሕቲቱ፡ ኢይሰግድ፡ ሎቱ።
3 ወይቤልዎ፡ እለ፡ ውስተ፡ ዓፀደ፡ ቤተ፡ ንጉሥ፡ አንተ፡ መርዶክዮስ፡ ለምንት፡ ኢትትኤዘዝ፡ ለቃለ፡ ንጉሥ።
4 ወኵሎ፡ አሚረ፡ ይብልዎ፡ ከመዝ፡ ወየአቢ፡ ሰሚዖቶሙ፡ ወነገርዎ፡ ለሐማ፡ ከመ፡ የአቢ፡ ትእዛዘ፡ ንጉሥ፡ መርዶክዮስ፡ ወነገርዎ፡ ከመ፡ አይሁዳዊ፡ ውእቱ።
5 ወሶበ፡ አእመረ፡ ሐማ፡ ከመ፡ ኢይሰግድ፡ ሎቱ፡ መርዶክዮስ፡ ተምዐ፡ ጥቀ።
6 ወፈቀደ፡ ያጥፍኦሙ፡ ለኵሎሙ፡ አይሁድ፡ እለ፡ ደወለ፡ መንግሥቱ፡ ለአርጤክስስ።
7 ወገብረ፡ ከመዝ፡ በዓሠርቱ፡ ወክልኤቱ፡ ዓመት፡ እምዘ፡ ነግሠ፡ አርጤክስስ፡ ወአስተዓፀወ፡ ዕለተ፡ እምዕለት፡ ወወርኀ፡ እምወርኅ፡ ከመ፡ ያጥፍኦሙ፡ ለዘመደ፡ መርዶክዮስ፡ በአሐቲ፡ ዕለት፡ ወወረደ፡ ዕፁ፡ ላዕለ፡ ዐሡሩ፡ ወረቡዑ፡ ለሠርቀ፡ ወርኀ፡ አዳር።
8 ወነገሮ፡ ለአርጤክስስ፡ ወይቤሎ፡ ሀሎ፡ ሕዝብ፡ ዓላዊ፡ እም፡ ውስተ፡ ኵሉ፡ አሕዛበ፡ መንግሥትከ፡ ወሕጎሙኒ፡ ካልእ፡ እምነ፡ ኵሉ፡ አሕዛብ፡ ወኢይትኤዘዙ፡ ለሕገ፡ ንጉሥ፡ ወኢኮነ፡ ርቱዐ፡ ይኅድጎሙ፡ ንጉሥ።
9 እመሰ፡ ፈቀደ፡ ንጉሥ፡ የአዝዝ፡ ያጥፍእዎሙ፡ ወናሁ፡ አነ፡ እጽሕፍ፡ ወአበውእ፡ አልፈ፡ መካልየ፡ ብሩር፡ ለመዝገበ፡ ንጉሥ።
10 ወአውፅአ፡ ንጉሥ፡ ሕልቀቶ፡ ወመጠዎ፡ ውስተ፡ እዴሁ፡ ለሐማ፡ ከመ፡ ይኅትም፡ ሶበ፡ ጸሐፈ፡ በእንተ፡ አይሁድ።
11 ወይቤሎ፡ ንጉሥ፡ ለሐማ፡ ወርቅሰ፡ ይኩንከ፡ ለከ፡ ሕዝበሰ፡ ግበር፡ ዘከመ፡ ፈቀድከ።
12 ወጸውዐ፡ ንጉሥ፡ ጸሐፍተ፡ በቀዳሚ፡ ወርኅ፡ አመ፡ ዓሡሩ፡ ወሠሉሱ፡ ለሠርቅ፡ ወጸሐፉ፡ በከመ፡ አዘዞሙ፡ ሐማ፡ ለመላእክት፡ ወለመሳፍንት፡ ዘኵሉ፡ በሐውርት፡ እምነ፡ ህንደኬ፡ እስከ፡ ኢትዮጵያ፡ ለምእት፡ ዕሥራ፡ ወሰብዓቱ፡ በሐውርት፡ ለለምልክና፡ አሕዛቢሆሙ፡ በበነገረ፡ በሐውርቲሆሙ፡ በቃለ፡ አርጤክስስ፡ ንጉሥ።
13 ወፈነወ፡ ምስለ፡ ሐዋርያት፡ ውስተ፡ ደወለ፡ መንግሥቱ፡ ለአርጤክስስ፡ ከመ፡ ያጥፍእዎሙ፡ ለዘመደ፡ አይሁድ፡ በአሐቲ፡ ዕለት፡ በወርኀ፡ አዳር፡ አመ፡ ዓሡሩ፡ ወሰኑዩ፡ ወይበርብርዎሙ፡ ንዋዮሙ።
14 ወከመዝ፡ ይብሉ፡ መጻሕፍቲሁ፡ ለንጉሥ፡ አርጤክስስ፡ ዘእምነ፡ ህንደኬ፡ እስከ፡ ኢትዮጵያ፡ ለምእት፡ ዕሥራ፡ ወሰብዓቱ፡ በሐውርት፡ ለመላእክት፡ ወለመሳፍንት፡ ወለሥዩማን፡ ከመዝ፡ ጸሐፈ።
15 ወብዙኃነ፡ አሕዛበ፡ ኰኒንየ፡ ወኵሎ፡ በሐውርተ፡ አግሪርየ፡ ፈቀድኩ፡ አኮ፡ በጽንዐ፡ መንግሥትየ፡ ዘአዓቢ፡ ርእስየ፡ አላ፡ በጽምው፡ ወበየዋሃት፡ ለዝሉፉ፡ አስተናቢርየ፡ ኵሎ፡ ዘሊተ፡ ይትኤዘዝ፡ ወይትኴነን፡ ዘእንበለ፡ ድንጋፄ፡ ሠሪዕየ፡ ኵሎ፡ በከመ፡ መንግሥትየ፡ ሥሩፅ፡ ወኅዱእ።
16 ወትብጻሕ፡ እስከ፡ አጽናፈ፡ በሐውርት፡ ወእሔድስ፡ ሰላመ፡ ዘእምኀቤየ፡ ወዘእምኀበ፡ ኵሉ፡ ሰብእ፡ ይትፈቅር።
17 ወኦሆ፡ ብሂልየ፡ ለመማክርትየ፡ በዘእክል፡ ሠሪዖቶ፡ ለዝንቱ፡ ለዝሉፉ፡ በንጹሕ፡ መጻእኩ፡ አሠኒ፡ በልብየ፡ ዘእንበለ፡ ንስሓ።
18 ወበአማን፡ ተልእከ፡ በንጹሕ፡ ዘእምታሕቴየ፡ ሐማ፡ ዘመርሐነ፡ ወአይድዓነ፡ ከመ፡ በኵሉ፡ በሐውርት፡ ወበኵሉ፡ አሕዛብ፡ ዘውስተ፡ ኵሉ፡ ዓለም፡ ተደመረ፡ ሕዝብ፡ ዘእኩይ፡ ሕጉ፡ ወዘኢይትኤዘዝ፡ ለትእዛዘ፡ ንጉሥ፡ ዘልፈ፡ እምነ፡ ኵሉ፡ አሕዛብ፡ ወየእቢ፡ ሥርዓተ፡ ዚአነ፡ ወሕግነ።
19 ወረከብናሁ፡ ለዝንቱ፡ ሕዝብ፡ ፍሉጥ፡ እንተ፡ ባሕቲቱ፡ ካልእ፡ ሕጉ፡ እምነ፡ ኵሉ፡ ሰብእ፡ ወዘነኪር፡ ወውሉጥ፡ ወውፁእ፡ እምሕገ፡ ዚአነ፡ ወይገብሩ፡ እኪተ፡ በግእዞሙ፡ ወረሰይዋ፡ ለመንግሥትነ፡ ከመ፡ ወኢምንት።
20 ወናሁ፡ አዘዝነ፡ በእንተ፡ ዘጸሐፍነ፡ ለክሙ፡ በመጻሕፍቲሁ፡ ለሐማ፡ ዘተሠይመ፡ ላዕለ፡ ኵሉ፡ ዘውእቱ፡ እምታሕተ፡ አቡነ፡ ከመ፡ ያጥፍእዎሙ፡ ለኰሎሙ፡ ምስለ፡ አንስቲያሆሙ፡ ወደቂቆሙ፡ በመጥባሕተ፡ ፀሮሙ፡ እንዘ፡ ኢትምሕክዎሙ፡ ወኢትምሕርዎሙ፡ አመ፡ ሠርቀ፡ ዐሡሩ፡ ወረቡዑ፡ ለወርኀ፡ አዳር፡ በዛቲ፡ ዓመት።
21 ወከመዝ፡ ታወርድዎሙ፡ ለንኡሶሙ፡ ወለዓቢዮሙ፡ ውስተ፡ ሲኦል፡ በአሐቲ፡ ዕለት፡ ወአልቦ፡ ዘታተርፉ፡ እምኔሆሙ፡ ከመ፡ ያዕርፋ፡ እንከ፡ በሐውርቲነ፡ እምነ፡ ግብሮሙ፡ ለዝሉፉ።
22 ወአርአይዎሙ፡ በለኆሳስ፡ መጻሕፍቲሁ፡ ወሤመ፡ ውስተ፡ በሐውርቲሆሙ፡ ወአዘዘ፡ ለኵሉ፡ አሕዛብ፡ ከመ፡ ይኩኑ፡ ለውእቱ፡ ዕለት፡ ወይጐጕዑ።
23 በውስተ፡ ሱሳኒ፡ ይግበሩ፡ ከማሁ፡ ንጉሥ፡ ወሐማ፡ ያጸምኡ፡ ወተሀውከት፡ ኵላ፡ ሀገር።
=== chapter 5 ===
[Chapter 5]
1 ወሶበ፡ አእመረ፡ መርዶክዮስ፡ ዘከመ፡ ኮነ፡ ሰጠጠ፡ አልባሲሁ፡ ወለብሰ፡ ሠቀ፡ ወወደየ፡ ሐመደ፡ ዲበ፡ ርእሱ፡ ወሮፀ፡ ውስተ፡ መርኅበ፡ ሀገር፡ እንዘ፡ ይጸርሕ፡ በዓቢይ፡ ቃል፡ ወይብል፡ ትቀትሉኑ፡ ሕዝበ፡ ዘእንበለ፡ አበሳ።
2 ወበጽሐ፡ ኀበ፡ ኆኅተ፡ ንጉሥ፡ ወቆመ፡ እስመ፡ ኢይከውኖ፡ በዊእ፡ ውስተ፡ ዓፀደ፡ ንጉሥ፡ እንዘ፡ ሠቀ፡ ይለብስ፡ ወሐመድ፡ ዲበ፡ ርእሱ።
3 ወበኵሉ፡ በሐውርት፡ ኀበ፡ ተፈነዉ፡ መጻሕፍት፡ ኮነ፡ ጽራሕ፡ ወብካይ፡ ወዓቢይ፡ ላህ፡ ወአይሁድሰ፡ ሠቀ፡ ወሐመደ፡ ነጻፉ፡ ኵሎሙ።
4 ወቦኡ፡ ሕጽዋኒሃ፡ ወአዋልዲሃ፡ ለንግሥት፡ ወአይድዕዋ፡ ወደንገፀት፡ ሶበ፡ ሰምዓት፡ ዘንተ፡ ወፈነወት፡ አልባሰ፡ ለመርዶክዮስ፡ ዘይለብስ፡ ወከመ፡ ያእትት፡ ሠቀ፡ ወአበየ፡ ኀዲገ፡ ሠቅ።
5 ወጸውዓቶ፡ አስቴር፡ ለአክራትዮስ፡ ሕጽው፡ ዘይቀውም፡ ቅድሜሃ፡ ወለአከቶ፡ ይስማዕ፡ ጥዩቀ፡ ነገረ፡ በኀበ፡ መርዶክዮስ።
6 ወነገሮ፡ መርዶክዮስ፡ ዘከመ፡ ኮነ፡ ወዘከመ፡ ይቤሎ፡ ሐማ፡ ለንጉሥ፡ እልፈ፡ መካልየ፡ አበውእ፡ ውስተ፡ መዝገቡ፡ ለንጉሥ፡ ከመ፡ ይቅትሎሙ፡ ለአይሁድ።
7 ወቃለ፡ ነገረ፡ ለዛቲ፡ መጽሐፍ፡ ዘአንበሩ፡ ውስተ፡ ሱሳ፡ ከመ፡ ይቅትልዎሙ።
8 ወወሀባ፡ አርአያሃ፡ ያርእያ፡ ለአስቴር፡ ወይቤሎ፡ በላ፡ ትባእ፡ ኀበ፡ ንጉሥ፡ ወትስአሎ፡ ወታስተብቊዖ፡ በእንተ፡ ሕዝባ፡ ተዘከሪ፡ መዋዕለ፡ ምንዳቤኪ፡ ዘተሐፀንኪ፡ ውስተ፡ እዴየ፡ እስመ፡ ሐማ፡ ዘእምታሕተ፡ ንጉሥ፡ አዘዘ፡ ይቅትለነ፡ ወሰአሊ፡ ኀበ፡ እግዚአብሔር፡ እግዚእ፡ ወንግሪዮ፡ ለንጉሥ፡ ወአድኅንነ፡ እሞት።
9 ወቦአ፡ አክራትዮስ፡ ወነገራ፡ ለአስቴር፡ ዘንተ፡ ኵሎ፡ ነገረ።
10 ወትቤሎ፡ አስቴር፡ ለአክራትዮስ፡ ሑር፡ ኀበ፡ መርዶክዮስ፡ ወበሎ፡ ኵሉ፡ አሕዛብ፡ የአምራ፡ ለዛቲ፡ መንግሥት፡ ከመ፡ ዘቦአ፡ ኀበ፡ ንጉሥ፡ ውስተ፡ ውሣጤ፡ ዓፀድ፡ እመኒ፡ ብእሲ፡ ወእመኒ፡ ብእሲት፡ ዘኢጸውዕዋ፡ አልቦ፡ ሕይወት፡ እመ፡ ኢለከፎ፡ ንጉሥ፡ በበትሩ፡ እንተ፡ ወርቅ፡ ዳእሙ፡ ውእቱ፡ ዘየሐዩ፡ ወኪያ፡ የኒ፡ ኢጸውዓኒ፡ እባእ፡ ኀበ፡ ንጉሥ፡ ሠሉሰ፡ መዋዕለ፡ ዮም።
11 ወአይድዖ፡ አክራትዮስ፡ ለመርዶክዮስ፡ ዘትቤሎ፡ አስቴር።
12 ወይቤሎ፡ መርዶክዮስ፡ ለአክራትዮስ፡ ሑር፡ በላ፡ ኢትበሊ፡ አስቴር፡ ከመዝ፡ አሐዩ፡ አነ፡ ባሕቲትየ፡ እምነ፡ ኵሉ፡ አይሁድ፡ በበይነ፡ መንግሥትየ፡ እመ፡ ተጸመምኪ፡ ዮም።
13 ለአይሁድሰ፡ እንተ፡ ባዕድኒ፡ ይሤርዎሙ፡ ወኢያድኅኖሙ፡ አንቲሰ፡ ወቤተ፡ አቡኪ፡ ትጠፍኡ፡ ወመኑ፡ የአምሮ፡ ዮጊ፡ ለዝንቱ፡ መዋዕለ፡ ንግሥኪ።
14 ወአግብአቶ፡ አስቴር፡ ለዝንቱ፡ ዘመጽአ፡ ኀቤሃ፡ እምኀበ፡ መርዶክዮስ፡ እንዘ፡ ትብል፡ ሑር፡ አስተጋብኦሙ፡ ለአይሁድ፡ እለ፡ ውስተ፡ ሱሳ፡ ወጹሙ፡ ሊተ፡ ወኢትብልዑ፡ ወኢትስተዩ፡ እስከ፡ ሠሉስ፡ ዕለት፡ መዓልተ፡ ወሌሊተ፡ እነኒ፡ ወአዋልድየ፡ ንጸውም፡ ወእምዝ፡ እበውእ፡ ኀበ፡ ንጉሥ፡ ወእመ፡ አኮ፡ እመውት፡ ሞተ።
15 ወሖረ፡ መርዶክዮስ፡ ወገብረ፡ ኵሎ፡ ዘአዘዘቶ፡ አስቴር።
16 ወሰአለ፡ ኀበ፡ እግዚአብሔር፡ እንዘ፡ ይዜከር፡ ኵሎ፡ ዘገብረ፡ እግዚአብሔር።
17 ወይቤ፡ እግዚኦ፡ ንጉሥ፡ ዘኵሎ፡ ትመልክ፡ ዘበሥልጣንከ፡ ኵሎ፡ ገበርከ፡ ወአልቦ፡ ዘይትቃወመከ፡ ለእመ፡ ፈቀድከ፡ ታድኅኖሙ፡ ለእስራኤል።
18 እስመ፡ አንተ፡ ገበርከ፡ ሰማየ፡ ወምድረ፡ ወኵሎ፡ መድምመ፡ ዘታሕተ፡ ሰማይ።
19 ወእግዚእ፡ አንተ፡ ለኵሉ፡ ወአልቦ፡ ዘይትቃወመከ፡ እግዚኦ።
20 ወአንተ፡ ተአምር፡ ኵሎ፡ እግዚኦ፡ ከመ፡ አኮ፡ በአስተሐቅሮ፡ ወአኮ፡ በትዕቢት፡ ወአኮ፡ በአዕብዮ፡ ርእስ፡ ዘገበርክዎ፡ ለዝንቱ፡ አላ፡ ከመ፡ ኢይስግድ፡ ለሐማ፡ ዕቡድ።
21 እምአብደርኩ፡ አስዓም፡ እገሪሁ፡ ከመ፡ ይሕየዉ፡ እስራኤል፡ አላ፡ ገበርክዎ፡ ለዝንቱ፡ ከመ፡ ኢይረሲ፡ ክብረ፡ እጓለ፡ እመሕያው፡ ላዕለ፡ እምክብረ፡ እግዚአብሔር፡ ወኢይሰግድ፡ ለመኑሂ፡ ዘእንበለ፡ ለከ፡ እግዚእየ፡ ወኢገበርክዎ፡ በትዕቢት፡ ለዝንቱ።
22 ወይእዜኒ፡ እግዚኦ፡ እግዚአብሔር፡ ንጉሥ፡ አምላከ፡ አብርሃም፡ መሀክ፡ ሕዝበከ፡ እስመ፡ ቆሙ፡ ላዕሌነ፡ ያማስኑነ፡ ወፈቀዱ፡ ያጥፍኡ፡ ቀዳሚተ፡ ርስተከ።
23 ወኢትትዓወር፡ እግዚኦ፡ መክፈልተከ፡ እንተ፡ ቤዘውከ፡ እምነ፡ ምድረ፡ ግብፅ።
24 ወስማዕ፡ ጸሎተነ፡ ወተሣሃል፡ ሕዝበከ፡ ወሚጦ፡ ለላህነ፡ ውስተ፡ ትፍሥሕት፡ ከመ፡ በሕይወትነ፡ ንሰብሕ፡ ስመከ፡ እግዚኦ፡ ወኢታማስን፡ ተስፋሆሙ፡ ለእለ፡ ይሴፈዉከ።
25 ወገዓሩ፡ ኵሉ፡ እስራኤል፡ ወጸርሑ፡ በዓቢይ፡ ቃል፡ በኃይሎሙ፡ እስመ፡ በጽሖሙ፡ ሞት፡ ቅድመ፡ አዕይንቲሆሙ።
26 ወአስቴርኒ፡ አማኅፀነት፡ ነፍሳ፡ ኀበ፡ እግዚአብሔር፡ እስመ፡ ውስተ፡ ፍርሀተ፡ ሞት፡ በጽሐት።
27 ወአሰሰለት፡ አልባሰ፡ ክብራ፡ ዘትለብሰ፡ ወለብሰት፡ አልባሰ፡ ሕማም፡ ወላህ፡ ወህየንተ፡ መዓዛ፡ ትፍሥሕት፡ መሬተ፡ ወሐመደ፡ መልአት፡ ውስተ፡ ርእሳ፡ ወአሕመመት፡ ሥጋሃ፡ ጥቀ፡ ወውስተ፡ መካን፡ ሠርጓ፡ ዘክብሶ፡ ሥዕርታ፡ ወደየት፡ መሬተ።
28 ወሰአለት፡ ኀበ፡ እግዚአብሔር፡ አምላከ፡ እስራኤል፡ ወትቤ፡ እግዚኦ፡ አምላክነ፡ አንተ፡ ውእቱ፡ ባሕቲትከ፡ ረዳኢ፡ ርድአኒ፡ ለባሕታዊት፡ ዘአልብየ፡ ረዳኢ፡ ዘእንበሌከ፡ እስመ፡ በጽሐኒ፡ ሞት፡ ውስተ፡ እዴከ።
29 ወአንሰ፡ ሰማዕኩ፡ እምንእስየ፡ እምኀበ፡ ሕዝበ፡ አበውየ፡ ከመ፡ አንተ፡ እግዚኦ፡ ነሣእኮሙ፡ ለእስራኤል፡ እምነ፡ ኵሉ፡ አሕዛብ፡ ወለአበዊነሂ፡ እምኵሉ፡ አዝማዲሆሙ፡ ከመ፡ ይኩኑ፡ ርስተከ፡ ለዓለም፡ ወይእዜኒ፡ ገበርከ፡ ሎሙ፡ ኵሎ፡ ዘከመ፡ ትቤ።
30 ወአበስነ፡ በቅድሜከ፡ ወአግባእከነ፡ ውስተ፡ እደ፡ ፀርነ፡ እስመ፡ ሰባሕነ፡ አማልክቲሆሙ፡ ለአሕዛብ፡ ጻድቅ፡ አንተ፡ እግዚኦ።
31 ወይእዜኒ፡ ኢኃደጉነ፡ በመሪር፡ ቀነዩነ፡ እለ፡ አንሥኡ፡ እደዊሆሙ፡ ዲበ፡ አማልክቲሆሙ።
32 ከመ፡ ያሰስሉ፡ ሥርዓተ፡ አፉከ፡ ወያማስኑ፡ ርስተከ፡ ወይፈፅሙ፡ አፉሆሙ፡ ለእለ፡ ይሴብሑከ፡ ወያጥፍኡ፡ ሥርዓተ፡ ቤትከ፡ ወምሥዋዒከ።
33 ወይከሥቱ፡ አፈ፡ አሕዛብ፡ ለአድልዎ፡ ለከንቱ፡ ወይሰብሑ፡ ስሞ፡ ለንጉሥ፡ ዘሥጋ፡ ለዓለም።
34 ወኢትመጥዎሙ፡ እግዚኦ፡ ለእለ፡ ሀለዉ፡ በዘአቀምከ፡ ወኢይስሐቁነ፡ በድቀትነ፡ አላ፡ ሚጣ፡ ለምክሮሙ፡ ላዕለ፡ ርእሶሙ፡ ወአኅሥሮ፡ ለዘቆመ፡ ላዕሌነ።
35 ተዘከረነ፡ እግዚኦ፡ በመዋዕለ፡ ምንዳቤነ፡ ወኪያየኒ፡ አፅንዓኒ፡ ንጉሠ፡ አማልክተ፡ ዘአንተ፡ አጽናዕከ፡ ኵሎ፡ ርእሰ።
36 ወደይ፡ ቃለ፡ ሠናየ፡ ውስተ፡ አፉየ፡ በቅድሜሁ፡ ለአንበሳ፡ ወሚጦ፡ ለልቡ፡ ከመ፡ ይጽብዖ፡ ለዘይጸብዓነ፡ ለዝሉፉ፡ ወለእለ፡ ኀብሩ፡ ምስሌሁ።
37 ወኪያነሰ፡ አድኅነነ፡ በእዴከ፡ ወርድአኒ፡ ሊተ፡ ለባሕታዊት፡ እንተ፡ አልብየ፡ ረዳኢ፡ መኑሂ፡ ዘእንበሌከ፡ እግዚኦ።
38 እጸልእ፡ ክብሮሙ፡ ለኃጥአን፡ ወአስቈርር፡ ምስካቦሙ፡ ለቈላፋን፡ ወዘኵሉ፡ ነኪር።
39 አንተ፡ ተአምር፡ ምንዳቤየ፡ ከመ፡ ኢይኤድመኒ፡ ሠርጐ፡ ክብርየ፡ ዘውስተ፡ ርእስየ፡ ዘቦቱ፡ አስተርኢ፡ በመዋዕለ፡ ክብርየ፡ ወአስቈርሮ፡ ከመ፡ ፀርቀ፡ ትክቶ፡ ወኢይሠረገዎ፡ ለመዋዕለ፡ ዕረፍትየ፡ ወክብርየ።
40 ወኢበልዓት፡ አመትከ፡ ማእደ፡ ሐማ፡ ወኢያስተኤድማስቴሁ፡ ለንጉሥ፡ ወኢሰተይኩ፡ እምነ፡ ሞጻሕቶሙ።
41 ወኢተፈሥሐት፡ ቦሙ፡ አመትከ፡ እምአመ፡ ቦእኩ፡ እስከ፡ ይእዜ፡ ዘእንበለ፡ ብከ፡ እግዚኦ፡ አምላከ፡ አብርሃም፡ እግዚኦ፡ ዘኵሎ፡ ትክል።
42 ስማዕ፡ ጸሎቶሙ፡ ለቅቡፃን፡ ወአድኅነነ፡ እምእደ፡ እለ፡ አኅሠሙ፡ ላዕሌነ፡ ወአድኅነኒ፡ ሊተ፡ እምእንተ፡ እፈርህ።
=== chapter 6 ===
[Chapter 6]
1 ወእምዝ፡ አመ፡ ሣልስት፡ ዕለት፡ ሶበ፡ አኅለቀት፡ ጸልዮ፡ አሰሰት፡ አልባሲሃ፡ ወለብሰት፡ አልባሰ፡ ክብራ፡ ወኮነት፡ ግርምተ፡ ወጸውዓቶ፡ ለእግዚአብሔር፡ መድኅን፡ ዘውእቱ፡ ኵሎ፡ ይሬኢ።
2 ወነሥአት፡ ክልኤ፡ አዋልዲሃ፡ ሰአሐቲሰ፡ ትምሕካ፡ እስመ፡ ታፈቅራ፡ ወካልእታ፡ ትፀውር፡ አልባሲሃ፡ ወትተልዋ፡ ይእቲሰ፡ ተሠነየት፡ በኵሉ፡ ወተሠርገወት፡ ወተረሠየት፡ ወኮነ፡ ገጻ፡ ፍሡሐ፡ ከመ፡ ዘተሐውር፡ ኀበ፡ አዕርክቲሃ፡ ወልባሰ፡ ኅዙን፡ እምፍርሀት፡ ሞት፡ ወቦአት፡ ኵሎ፡ ኆኅተ፡ ወበጽሐት፡ ኀበ፡ ንጉሥ፡ ወውእቱሰ፡ ይነብር፡ ዲበ፡ መንበረ፡ መንግሥቱ።
3 ወልቡሰ፡ ውእቱ፡ አልባሰ፡ ግርማሁ፡ ወኵለንታሁ፡ በወርቅ፡ ወበዕንቊ፡ ዘብዙኅ፡ ሤጡ፡ ወግሩም፡ ውእቱ፡ ጥቀ፡ ወተመይጠ፡ ገጹ፡ ምስለ፡ ውእቱ፡ ክብሩ፡ ወነጸራ፡ በመዓት፡ ወፈርሀት፡ ንግሥት፡ ወመጽለወት፡ ወተንተነት፡ ወእስመከት፡ ላዕለ፡ ርእሰ፡ ወለታ፡ እንተ፡ ተሐውር፡ ቅድሜሃ።
4 ወሜጠ፡ እግዚአብሔር፡ መንፈሰ፡ ለንጉሥ፡ ውስተ፡ የዋሃት፡ ወተዓገሣ፡ ወተንሥአ፡ እመንበሩ፡ ወሰሐባ፡ ወአንበራ፡ ውስተ፡ ሕጽኑ፡ ወአኀዘ፡ ይዬውሃ፡ በቃል፡ ሠናይ፡ ወይቤላ፡ ምንተ፡ ኮንኪ፡ አስቴር፡ አነ፡ እኁኪ፡ ከመ፡ ኢትሙቲ፡ እስመ፡ እኩይ፡ ሕገ፡ ብሔርነ።
5 ወአንሥአ፡ በትሮ፡ እንተ፡ ወርቅ፡ ወአንበረ፡ ውስተ፡ ክሳዳ፡ ወሐቀፋ፡ ወይቤላ፡ ንግርኒ፡ ወትቤሎ፡ ሶበ፡ ርኢኩካ፡ እግዚእየ፡ ከመ፡ መልአከ፡ እግዚአብሔር፡ ደንገፀኒ፡ ልብየ፡ እምፍርሃተ፡ ክብርከኅ፡ እስመ፡ መድምም፡ አንተ፡ እግዚኦ፡ ወገጽከኒ፡ ምሉእ፡ ሞገሰ።
6 ወእንዘ፡ ትትናገር፡ ደንገፀት፡ ወመጽለወት፡ ወወድቀት፡ በገጸ፡ ወደንገፀ፡ ንጉሥ፡ ወኵሉ፡ ሰብኡ፡ ወአኀዙ፡ ይዬውህዋ።
7 ወይቤላ፡ ንጉሥ፡ ምንተ፡ ትፈቅዲ፡ አስቴር፡ ወበእንተ፡ ምንት፡ ዘታስተበቊዕኒ፡ እስከ፡ መንፈቀ፡ መንግሥትየ፡ ንሥኢለኪ፡ ይኩንኪ።
8 ወትቤሎ፡ አስቴር፡ እስመ፡ ዕለተ፡ በዓል፡ ብየ፡ እመሰ፡ ፈቀድከ፡ ንጉሥ፡ ትምጻእ፡ ውስተ፡ በዓልየ፡ ዘእገብር፡ ዮም፡ አንተ፡ ወሐማ።
9 ወይቤ፡ ንጉሥ፡ ጸውዕዎ፡ ለሐማ፡ ፍጡነ፡ ከመ፡ እግበር፡ ዘትቤለኒ፡ አስቴር፡ ወሖሩ፡ ክልኤሆሙ፡ ውስተ፡ በዓል፡ ዘገብረት፡ አስቴር።
10 ወበውስተ፡ በዓለወኒ፡ ይቤላ፡ ንጌሥ፡ ለአስቴር፡ ምንተ፡ ትፈቅዲ፡ አስቴር፡ ንግሥት፡ ዘአስተብቋዕክኒ፡ እግበር፡ ለኪ።
11 ወትቤሎ፡ ስእለትየሰ፡ ዘአስተበቊዓከ፡ አመ፡ ረከብኩ፡ ሞገሰ፡ በቅድመ፡ አዕይንቲከ፡ ኦንጉሥ፡ ከመ፡ ትምጻእ፡ አንተ፡ ወሐማ፡ ጌሠመ፡ ውስተ፡ በዓል፡ ዘአገብር፡ ለክሙ፡ ወጌሠመ፡ እገብሮ።
12 ወወፅአ፡ ሐማ፡ እምኀበ፡ ፍሡሐ፡ ገጽ፡ እንዘ፡ ይትኀሠይ፡ ወእንዘ፡ ይወዕእ፡ ሶበ፡ ርእዮ፡ ሐማ፡ ለመርዶክዮስ፡ አይሁዳዊ፡ ውስተ፡ ዓፀድ፡ ተምዐ፡ ጥቀ።
13 ወሖረ፡ ቤቶ፡ ወጸውዖሙ፡ ለአዕርክቲሁ፡ ወለሱዛራ፡ ብእሲቱ።
14 ወአርአዮሙ፡ ብዕሎ፡ ወክብሮ፡ ወዘከመ፡ አዕበዮ፡ በውስተ፡ መንግሥቱ።
15 ወይቤሎሙ፡ ሐማ፡ ኢጸውዓት፡ ንግሥት፡ ምስለ፡ ንጉሥ፡ ወኢመነሂ፡ ውስተ፡ በዓል፡ እንበለ፡ ንጉሥ፡ ወኪያየለ፡ ጸውዓተኒ።
16 ወባሕቱ፡ ሊተሰ፡ ኢይሔውዘኒ፡ ዝንቱ፡ ሶበ፡ ርኢክዎ፡ ለመርዶክዮስ፡ አይሁዳዊ፡ ውስተ፡ ዓፀድ።
17 ወትቤሎ፡ ሱዛራ፡ ብእሲቱ፡ ወአዕርክቲሁ፡ ሰይግዝሙ፡ ዕፀ፡ ዘሐምሳ፡ መእመት፡ ቆሙ፡ ወበጽባሕ፡ ንግሮ፡ ለንጉሥ፡ ወይሰቀል፡ ቦቱ፡ መርዶክዮስ፡ ወአንተሰ፡ ባእ፡ ውስተ፡ በዓል፡ እስለ፡ ንጉሥ፡ ወተፈሣሕ።
18 ወአደሞ፡ ለሐማ፡ ዝንቱ፡ ነገር፡ ወአስተዳለወ፡ ዕፀ።
=== chapter 7 ===
[Chapter 7]
1 ወአንፈጸ፡ እግዚአብሔር፡ ንዋመ፡ እምኔሁ፡ ለንጉሥ፡ በይእቲ፡ ሌሊት፡ ወይቤሎ፡ ለጸሐፊሁ፡ ያምጽእ፡ ሎቱ፡ መጻሕፍተ፡ ተዝካር፡ ዘኖብያት፡ ዘመዋዕለ፡ ትካት፡ ወያንብቡ፡ ሎቱ፡ ዘውስተ፡ መጻሕፍት።
2 ወእምዝ፡ ረከቡ፡ ውስተ፡ መጽሐፍ፡ ኀበ፡ ጸሐፉ፡ በእንተ፡ መርዶክዮስ፡ ዘከመ፡ ዜነዎ፡ ለንጉሥ፡ በእንተ፡ ክልኤቱ፡ ሕፅዋኒሁ፡ ለንጉሥ፡ እለ፡ የዓቅብዎ፡ ለንጉሥ፡ ወፈቀዱ፡ ይቅትልዎ፡ ለአርጤክስስ፡ ንጉሥ።
3 ወይቤ፡ ንጉሥ፡ ኦይ፡ ክብር፡ ወጸጋ፡ ዘገበርነ፡ ሎቱ፡ ለመርዶክዮስ፡ ወይቤልዎ፡ ደቁ፡ ለንጉሥ፡ አልቦ፡ ዘገበርነ፡ ሎቱ፡ ለመርዶክዮስ፡ እግዚኦ።
4 ወእንዘ፡ ይትናገር፡ ንጉሥ፡ በእንተ፡ አኰቴቱ፡ ለመርዶክዮስ፡ መጽሐ፡ ሐማ፡ ውስተ፡ ዓፀድ፡ ወይቤ፡ ንጉሥ፡ መኑ፡ ዝዘውስተ፡ ዓፀድ፡ ወይቤልዎ፡ ሐማ።
5 ወእምዝ፡ ቦአ፡ ሐማ፡ ይንግሮ፡ ለንጉሥ፡ ከመ፡ ይስቅሎ፡ ለመርዶክዮስ፡ ውስተ፡ ዕፅ፡ ዘአስተዳለወ።
6 ወይቤልዎ፡ ደቁ፡ ለንጉሥ፡ ናሁ፡ ሐማ፡ ይቀውም፡ ውስተ፡ ዓፀድ፡ ወይቤሎሙ፡ ንጉሥ፡ ጸውዕዎ።
7 ወይቤሎ፡ ንጉሥ፡ ለሐማ፡ ምንተ፡ እግበር፡ ሎቱ፡ ለብእሲ፡ ዘአነ፡ እፈቅድ፡ አክብሮ፡ ወይቤ፡ ሐማ፡ በልቡ፡ መነ፡ ይፈቅድ፡ ንጉሥ፡ ያክብር፡ ዘእንበለ፡ ኪያየ፡ ወይቤሎ፡ ለንጉሥ፡ ለብእሲ፡ ዘይፈቅድ፡ ንጉሥ፡ ያክብሮ፡ ያምጽኡ፡ ሎቱ፡ ደቂቀ፡ ንጉሥ፡ ሜላተ፡ ዘይለብስ፡ ንጉሥ፡ ወፈረሰ፡ ዘይፄዓን፡ ንጉሥ።
8 ወየሀበዎ፡ ለአሐዱ፡ እምአዕርክቲሁ፡ ለንጉሥ፡ እለ፡ ክቡራን፡ ወያልብስዎ፡ ለውእቱ፡ ብእሲ፡ ዘአክበሮ፡ ንጉሥ፡ ወያጽዕንዎ፡ ዲበ፡ ፈረሱ፡ ወይሰብከ፡ ሎቱ፡ አዋዲ፡ ውስተ፡ መርኅበ፡ ሀገር፡ እንዘ፡ ይብል፡ ከመዝ፡ ይከውን፡ ሎቱ፡ ለብእሲ፡ ዘንጉሥ፡ አክበሮ።
9 ወይቤሎ፡ ንጉሥ፡ ለሐማ፡ ሠናየ፡ ትቤ፡ ግብር፡ ከማሁ፡ ለመርዶክዮስ፡ አይሁዳዊ፡ ዘይጸመድ፡ ውስተ፡ ዓፀድ፡ ወኢትኅድግ፡ አሐተ፡ ቃለ፡ እምዘነበብከ።
10 ወነሥአ፡ ሐማ፡ አልባሰ፡ ወፈረሰ፡ ወአልበሶ፡ ለመርዶክዮስ፡ ወአፅዓኖ፡ ዲበ፡ ፈረስ፡ ወአዖዶ፡ ውስተ፡ መርኅበ፡ ሀገር፡ ወሰበከ፡ እንዘ፡ ይብል፡ ከመዝ፡ ይሬሲ፡ ለኵሉ፡ ብእሲ፡ ዘፈቀደ፡ ንጉሥ፡ ያክብሮ።
11 ወእምዝ፡ ገብአ፡ መርዶክዮስ፡ ውስተ፡ ዓፀድ፡ ወሐማኒ፡ አተወ፡ ቤቶ፡ እንዘ፡ ያቴሕት፡ ርእሶ።
12 ወነገራ፡ ለሱዛራ፡ ብእሲቱ፡ ወለአርካኒሁ፡ ወይቤልዎ፡ አዕርክቲሁ፡ ወብእሲቱ፡ እመሰ፡ ለመርዶክዮስ፡ ዘእምዘመደ፡ አይሁድ፡ ተትሕትከ፡ ሎቱ፡ ቅድሜሁ፡ ወደቀ፡ ወኢትክል፡ መዊዖቶ፡ እስመ፡ እግዚአብሔር፡ ምስሌሁ።
13 ወአንጐጒእዎ፡ ለሐማ፡ ውስተ፡ በዓል፡ ዘገብረት፡ አስቴር።
=== chapter 8 ===
[Chapter 8]
1 ወቦኡ፡ ንጉሥ፡ ወሐማ፡ ይምስሑ፡ ምስለ፡ ንግሥት።
2 ወይቤላ፡ ንጉሥ፡ ለአስቴር፡ አመ፡ ሳኒታ፡ በዓል፡ ምንተ፡ ከንኪ፡ አስቴር፡ ወምንት፡ ውእቱ፡ ዘታስተበቊዕኒ፡ ሶበሰ፡ ፈቀድኪ፡ መንፈቀ፡ መንግሥትየ፡ እምወሀብኩኪ።
3 ወአውሥአቶ፡ ወትቤሎ፡ እመሰ፡ ረከብኩ፡ ሞገሰ፡ በቅድሜከ፡ ንጉሥ፡ ይትወሀባ፡ ለነፍስየ፡ ስእለታ።
4 ወለቃልየኒ፡ አስተብቊዖታ፡ እስመ፡ ተሠየጥነ፡ አነ፡ ወሕዝብየ፡ ወኮነ፡ ለሞት፡ ወለተበርብሮ፡ ወለቅንየት፡ ንሕነ፡ ወውሉድነ፡ ወአርመምኩ፡ እስመ፡ ኢይደልዎ፡ ለመስተዋድይ፡ ይባእ፡ ውስተ፡ ዓፀደ፡ ንጉሥ።
5 ወይቤ፡ ንጉሥ፡ መኑ፡ ውእቱ፡ ዝንቱ፡ ዘተሀበለ፡ ይግበር፡ ዘንተ፡ ግብረ።
6 ወትቤ፡ አስቴር፡ ብእሲ፡ ጸላኢነ፡ ሐማ፡ ወሶበ፡ ሰምዐ፡ ሐማ፡ ፈርሀ፡ እምነ፡ ንጉሥ፡ ወእምነ፡ ንግሥት።
7 ወተንሥአ፡ ንጉሥ፡ እምኀበ፡ ይሰቲ፡ ወቦአ፡ ውስተ፡ ገነት፡ ወሐማሰ፡ አስተብቊዓ፡ ለንግሥት፡ እስመ፡ አእመረ፡ ከመ፡ በጽሐቶ፡ እኪት።
8 ወገብአ፡ ንጉሥ፡ እምነ፡ ገነቱ፡ ወሐማሰ፡ ወድቀ፡ ውስተ፡ ዓራት፡ ወይትጋነይ፡ ላቲ፡ ለንግስት፡ ወይቤሎ፡ ንጉሥ፡ ትትዔገለኒኑ፡ ብእሲትየ፡ በቤትየ፡ ወሶበ፡ ሰብዐ፡ ሐማ፡ ጸልመ፡ ገጹ።
9 ወይቤሎ፡ ቡግታን፡ አሐዱ፡ እምሕዕዋኒሁ፡ ለንጉሥ፡ ሀለወ፡ ዕፅ፡ ዘአስተዳለዎ፡ ለመርዶክዮስ፡ ዘአይድዐ፡ በእንተ፡ ንጉሥ፡ ዕፅሰ፡ ትኩል፡ ውስተ፡ ቤተ፡ ሐማ፡ ዘሐምሳ፡ በእመት፡ ኑኁ፡ ወይቤ፡ ንጉሥ፡ ይስቅልዎ፡ ቦቱ።
10 ወሰቀልዎ፡ ዲበ፡ ውእቱ፡ ዕፅ፡ ዘአስተዳለወ፡ ለመርዶክዮስ፡ ወእምዝ፡ ኀደገ፡ ንጉሥ፡ መዓቶ።
=== chapter 9 ===
[Chapter 9]
1 ወበይእቲ፡ ዕለት፡ ጸገዋ፡ ንጉሥ፡ አርጤክስስ፡ ለአስቴር፡ ኵሎ፡ ንዋዮ፡ ለሐማ፡ መስተዋድይ፡ ወፀውዖ፡ ንጉሥ፡ ለመርዶክዮስ፡ ወአይድዓቶ፡ አስቴር፡ ለንጉሥ፡ ከመ፡ በቤቱ፡ ልህቀት።
2 ወነሥአ፡ ንጉሥ፡ ህልቀቶ፡ እንተ፡ ነሥአ፡ እምእደ፡ ሐማ፡ ወወሀቦ፡ ለመርዶክዮስ፡ ወሤመቶ፡ አስቴር፡ ለመርዶክዮስ፡ ላዕለ፡ ኵሉ፡ ዘሐማ።
3 ወእምዝ፡ ዳግመ፡ ነበበቶ፡ ለንጉሥ፡ ወአስተብቊዓቶ፡ ወሰገደት፡ ታሕተ፡ እገሪሁ፡ ከመ፡ ይኅድግ፡ ኵሎ፡ እኪተ፡ ዘገብረ፡ ሐማ፡ ላዕለ፡ አይሁድ።
4 ወአንሥአ፡ ንጉሥ፡ በትሮ፡ ዘወርቅ፡ ወአንበረ፡ ዲበ፡ ርእሳ፡ ለአስቴር፡ ወተንሥአት፡ ወቆመት፡ ቅድመ፡ ንጉሥ።
5 ወትቤሎ፡ አስቴር፡ ለእመ፡ ትፈቅደኒ፡ ወረከብኩ፡ ሞገሰ፡ በቅድሜሁ፡ ለአክ፡ ያምጽኡ፡ መጽሐፈ፡ ዘጸሐፈ፡ ሐማ፡ ከመይቅትልዎሙ፡ ለአይሁድ፡ ውስተ፡ መንግሥትከ።
6 ወእፎ፡ እክል፡ ርእዮተ፡ እኪቶሙ፡ ለሕዝብየ፡ ወእፎ፡ እክል፡ ሐይወ፡ እምድኅረ፡ ሞቶሙ፡ ለሕዝብየ።
7 ወይቤላ፡ ንጉሥ፡ ለአስቴር፡ ናሁ፡ ኵሎ፡ ንዋዮ፡ ለሐማ፡ ወሀብኩኪ፡ ወጸገውኩኪ፡ ወኪያሁ፡ ሰቀልኩ፡ ዲበ፡ ዕፅ፡ እስመ፡ አንሥአ፡ እዴሁ፡ ላዕለ፡ አይሁድ፡ ምንተ፡ ትፈቅዲ፡ ይጽሐፉ።
8 ንሥኢ፡ ህልቀትየ፡ ወይኅትሙ፡ እንከሰ፡ በማኅተምየ፡ ዘከመ፡ ትፈቅዲ፡ እስመ፡ ኵሉ፡ ዘተጽሕፈ፡ በትእዛዘ፡ ንጉሥ፡ ተኀትመ፡ በማኅተመ፡ ንጉሥ፡ አልቦ፡ ዘየአቢ።
9 ወጸውዑ፡ ጸሐፍተ፡ በቀዳሚ፡ ወርኀ፡ ኔሳን፡ አመ፡ ዓሠርቱ፡ ወሠለስቱ፡ ዓመት፡ ወጸሐፉ፡ ለአይሁድ፡ ዘከመ፡ አዘዞሙ፡ ንጉሥ፡ ለመንግሥቱ፡ ወለመኳንንቱ፡ ወለመሳፍንቱ፡ እምነ፡ ህንደኬ፡ እስከ፡ ኢትዮጵያ፡ በበበሐውርቲሁ፡ ወበበነገረ፡ ብሔሮሙ።
10 ወጸሐፉ፡ በቃለ፡ ንጉሥ፡ ወኀተሙ፡ በማኅተሙ፡ ወፈነዉ፡ መጻሕፍቲሁ፡ ምስለ፡ ሐዋርያት።
11 ወከመዝ፡ አዘዞሙ፡ ይግበሩ፡ በስሙ፡ ለኵሉ፡ አህጉር፡ ወይርድእዎሙ፡ ወይዕቀብዎሙ፡ እምእደ፡ ፀሮሙ፡ ወእምእለ፡ ይቀውሙ፡ ላዕሌሆሙ፡ በከመ፡ ይፈቅዱ፡ እሙንቱ።
12 በይእቲ፡ ዕለት፡ በኵሉ፡ መንግሥቱ፡ ለአከ፡ አርጤክስስ፡ አመ፡ ዓሡሩ፡ ወሠሉሱ፡ ለወርኀ፡ አዳር፡ ዘዓሠርቱ፡ ወክልኤቱ፡ አውራኅ።
=== chapter 10 ===
[Chapter 10]
1 ኀበ፡ ተጽሕፋ፡ እማንቱ፡ መጻሕፍተ፡ ንጉሥ፡ ዓቢይ፡ አርጤክስስ፡ ለብሔረ፡ ህንደኬ፡ ወለብሔረ፡ ኢትዮጵያ፡ ለምእት፡ ዕሥራ፡ ወሰብዓቱ፡ በሐውርት፡ ወለመሳፍንት፡ ወለመኳንንት።
2 ላዕለ፡ መልእክተ፡ ዚአነ፡ ይግበሩ፡ ትፍሥሕተ፡ ለክሙ፡ ብዙኀን፡ በአፈድፍዶ፡ እለ፡ ይበቊዕዎሙ፡ በአስተምህሮ፡ ወበአፍጥኖ፡ ሢመት፡ አብዝኁ፡ ትዕቢተ።
3 ወአኮ፡ ላዕለ፡ እለ፡ ይትኴነኑ፡ ለነ፡ በእንቲአሆሙ፡ ዘይፈቅዱ፡ ያሕስሙ፡ ላዕሌሆሙ፡ ወጽጋቦሙ፡ ኢይክሉ፡ ፀዊረ፡ አላ፡ ላዕለ፡ እለ፡ ይበቊዕዎሙ፡ ይሔልዩ፡ ከመ፡ ይትመየንዎሙ።
4 ወአኮ፡ አኰቴተ፡ ሰብእ፡ ዘይክሕዱ፡ ባሕቲቶ፡ ዓዲ፡ ከመ፡ ሐዲሳነ፡ ብዕል፡ ያሌዕሉ፡ ርእሶሙ፡ በትዕቢተ፡ ወለእግዚአብሔር፡ ዘኵሎ፡ ይሬኢ፡ ዘልፈ፡ ወእግዚአብሔር፡ ጸላኤ፡ እኪት፡ ይመስሎሙ፡ ዘያመሥጡ፡ እምኵነኔሁ።
5 ወመብዝኅጾሙ፡ ባሕቱ፡ ለብዙኃን፡ እለ፡ ይትኴነኑ፡ ወሥሩዓን፡ እለ፡ ተአመናሆሙ፡ ይትኰነኑ፡ በተአኅዎ፡ ከመ፡ ይትለ፡ አኩነ፡ እሙንቱ፡ ተሳተፉ፡ ላዕለ፡ ደም፡ ንጽሕ፡ ወሠርዑ፡ ላዕሌሆሙ፡ ሕማመ፡ ዕፁበ፡ በሐልዮ፡ እኩይ።
6 ወበሐስዎ፡ ምክር፡ ኀይጦሙ፡ መንግሥተ፡ እንተ፡ ትነብር፡ በየዋሃት፡ ወበኅድአት።
7 ወባሕቱ፡ በሐልዮ፡ ይከውን፡ ወአኮ፡ ከመ፡ ናፈድፍድ፡ እምነ፡ ዘቅድሜነ፡ ወዘከመ፡ ተወፈይነ፡ ሕጎ፡ ከማሁ፡ ሀለውነ።
8 ወእምድኅረ፡ ዝንቱ፡ ባሕቱ፡ ነኃሥሥ፡ ዘተገብረ፡ ዘእንበለ፡ ሕግ፡ እስመ፡ ረከቡ፡ ክብረ፡ ዘኢይደልዎሙ፡ እለ፡ ኢይክሉ፡ ርቱዐ፡ ኰንኖ።
9 ወሐላይነ፡ እምድኅረ፡ ዝንቱ፡ በዘትነብር፡ መንግሥትነ፡ እንበለ፡ ሀውክ፡ ወበዘይረትዕ፡ ንብረተ፡ አሕዛብ፡ ወዘሰ፡ ያስተርኢ፡ ዘልፈ፡ ንኴንን፡ በየዋሃት።
10 ወከመ፡ ሐማሰ፡ ወልደ፡ አመዶቱ፡ ውፁዕ፡ ውእቱ፡ እምጽድቅ፡ ወእምቅድመ፡ ፋርስ፡ ርኁቀ፡ ኮነ፡ ብዙኀ፡ እምኂሩትነ፡ ወኮነ፡ ነኪረ፡ እንዘ፡ ንቡር፡ ውስቴትነ።
11 ረኪቦ፡ ውእቱኒ፡ እንተ፡ ላዕለ፡ ሕዝብ፡ ሢመተ፡ ወምሕረተ፡ ወፈድፋደሰ፡ ሢመተ፡ ረከበ፡ እስከ፡ አቡነ፡ ንብሎ፡ ወመድግመ፡ መንግሥትነ፡ ወምስለ፡ መንበርነ፡ ረኪቦ።
12 ዓዲ፡ ኢአከሎ፡ ዝንቱ፡ አላ፡ አዕበየ፡ ተዓብዮ፡ ወሐለየ፡ ያውዕአነ፡ እመንግሥትነ፡ ወይትማልአነ፡ ነፍሰነ።
13 ወለመርዶክዮስ፡ ዘበኵሉ፡ ይበቊዓነ፡ ወይፌውሰነ፡ ወያሠልጥ፡ ለነ፡ ወለአስቴርኒ፡ ሱታፌ፡ መንግሥትነ፡ ዘእንበለ፡ ኂስ፡ ምስለ፡ ኵሉ፡ ሕዝቦሙ፡ በብዙኅ፡ ተመይኖ፡ ወበአስተጣዕሞ፡ ነገር፡ ስእነ፡ ያማስኖሙ።
14 ወበበይነ፡ ዝንቱ፡ ነገር፡ እስመ፡ በየዋሃት፡ ንነብር፡ ረከብነ፡ መንግሥተ፡ ፋርስ፡ ወውእቱሰ፡ ፈቀደ፡ ያፍልስ፡ በሕገ፡ መቄዶንያ።
15 ወንሕነ፡ ባሕቱ፡ ለእለ፡ ፈቀደ፡ ያማስኖሙ፡ ለአይሁድ፡ ረከብናሆሙ፡ ከመ፡ አኮ፡ በእከዮሙ፡ አላ፡ በጽድቅ፡ ንብረተ፡ ሕጎሙ።
16 ወአማን፡ ውሉደ፡ እግዚአብሔር፡ ልዑል፡ ወዓቢይ፡ ወሕያው፡ እግዚአብሔር፡ ዘያስተዳሉ፡ ለነ፡ ወለእለ፡ እምቅድሜነ፡ መንግሥተ፡ ወለነኒ፡ በከመ፡ ልብነ።
17 ወሠናየ፡ ባሕቱ፡ ትገብሩ፡ ለእመ፡ ኢሰማዕክሙ፡ ትእዛዘ፡ ሐማ፡ ወልደ፡ አመዶቱ፡ ወቃለ፡ መጽሐፍ፡ ዘፈነወ።
18 እስመ፡ ለሊሁ፡ ውእቱ፡ ሐለዩ፡ ለዝንቱ፡ ግብር፡ በቅድመ፡ አንቀጸ፡ ሱሳ፡ ሀገር፡ ተፀልበ፡ ምስለ፡ ኵሉ፡ ሰብኡ፡ እስመ፡ ፍዳሁ፡ ዘኵሎ፡ ይመልክ፡ እግዚአብሔር፡ ፍጡነ፡ ፈደዮ፡ ፎነኔሁ።
19 ወአርእይዋ፡ ለዛቲ፡ መጽሐፍ፡ ሰፊሐክሙ፡ በኵሉ፡ መካን፡ ገሃደ፡ ወኅድግዎሙ፡ ለአይሁድ፡ ይንበሩ፡ በከመ፡ ሕጎሙ።
20 ወርድእዎሙ፡ በመዋዕለ፡ ምንዳቤሆሙ፡ ዘአጠቅዎሙ፡ ቀዲሙ፡ አመ፡ ዓሠሩ፡ ወሠሉሱ፡ ለሠርቀ፡ አዳር፡ ዘዓሠርቱ፡ ወክልኤቱ፡ እውራኅ፡ እምይእቲ፡ ዕለት፡ እስከ፡ ዛቲ፡ ሰዓት።
21 ዘእምኵሉ፡ ይጸንዕ፡ እግዚአብሔር፡ ህየንተ፡ ሙስናሆሙ፡ ለሕዝብ፡ ኅሩያኅ፡ ገብረ፡ ሎሙ፡ ትፍሥሕተ።
22 ወአንትሙኒ፡ ከመ፡ ስሙይ፡ በበዓላቲክሙ፡ በእሙር፡ ወፍሉጥ፡ ዕለት፡ ግበሩ፡ ከማሁ።
23 ወይእዜኒ፡ እምድኅረ፡ ዝንቱ፡ ሕይወት፡ ይከውን፡ ለእለ፡ ይፈቅዱ፡ ሠናየ፡ ለፋርስ፡ ወለእለ፡ ኪያነ፡ ይፈቅዱ፡ ይዕልዉ፡ ተዝካረ፡ ሙስናሆሙ።
24 ወኵሉ፡ ብሔር፡ አው፡ ሀገር፡ በኵለሄ፡ ዘኢገብረ፡ ከመዝ፡ በኲናት፡ ወበእሳት፡ የኀልቅ፡ በመዓት፡ ወአኮ፡ ለሰብእ፡ ባሕቲቶሙ፡ ዘይከውን፡ ሙስና፡ አላ፡ ለአራዊትኒ፡ ወለአዕዋፍኒ፡ ለዝሉፉ፡ ዘይከውን።
25 ወአርአይዋ፡ ለዛቲ፡ መጽሐፍ፡ ገሃደ፡ ይስፍሕዋ፡ ወያርእይዋ፡ ወይኩን፡ ድልዋነ፡ ኵሎሙ፡ አይሁድ፡ በይእቲ፡ ዕለት፡ ከመ፡ ይቅትሉ፡ ፀሮሙ።
26 ወወፅኡ፡ እለ፡ ይፄዓኑ፡ አፍራሰ፡ እንዘ፡ ይጔጒኡ፡ ከመ፡ ይግበሩ፡ ትእዛዘ፡ ንጉሥ፡ ወተሠይመ፡ ዝንቱ፡ ትእዛዝ፡ ውስተ፡ ሱሳ፡ ሀገር።
27 ወወፅአ፡ መርዶክዮስ፡ እንዘ፡ ልቡስ፡ አልባሰ፡ መንግሥት፡ ዘበአክሊለ፡ ወርቅ፡ ወጽንብል፡ ሢራየ፡ ሜላት፡ ወርእዩ፡ እለ፡ ሀለዉ፡ ውስተ፡ ሱሳ፡ ወተፈሥሑ።
28 ወለአይሁድሰ፡ ኮነ፡ ብርሃን፡ ወትፍሥሕት፡ በበሀገሩ፡ ወበበብሔሩ፡ በኀበ፡ ተሠይመ፡ ውእቱ፡ ትእዛዝ፡ ወኀበ፡ ተረክበ፡ ውእቱ፡ መጽሐፍ፡ ዘፍሥሓ፡ ወዘጽጋብ፡ ለአይሁድ፡ ወዕረፍት፡ ወኀሤት።
29 ወብዙኀን፡ እለ፡ አምኑ፡ አሕዛብ፡ ወእለ፡ ተገዝሩ፡ ወተሐረሙ፡ በእንተ፡ ፍርሀቶሙ፡ ለአይሁድ።
=== chapter 11 ===
[Chapter 11]
1 እስመ፡ ዓሠርቱ፡ ወክልኤቱ፡ አውራኅ፡ አመ፡ ዓሡሩ፡ ወሠሉሱ፡ ለወርኀ፡ አዳር፡ በጽሐ፡ መጽሐፍ፡ ዘጸሐፈ፡ ንጉሥ።
2 በይእቲ፡ ዕለት፡ ተኀጒሉ፡ እለ፡ ቆሙ፡ ላዕለ፡ አይሁድ፡ ወአልቦ፡ እንከ፡ ዘተቃተሎሙ፡ ለአይሁድ፡ እስመ፡ ፈርህዎሙ።
3 ወመላእክተ፡ አሕዛብኒ፡ ወመገብትኒ፡ ወጸሐፍትኒ፡ ወዓበይተ፡ ንጉሥኒ፡ ያከብርዎሙ፡ ለአይሁድ፡ በእንተ፡ ፍርሀተ፡ መርዶክዮስ።
4 ወይትሔዘቡ፡ እስመ፡ በመጽሐፈ፡ ንጉሥ፡ ተሠይመ፡ በኵሉ፡ መንግሥቱ።
5 ወበሱሳ፡ ሀገር፡ ቀተሉ፡ አይሁድ፡ ኃምስተ፡ ምእተ፡ ወሰብዓ፡ ወሠለስተ።
6 ወጎራንሂ፡ ወደላፎን፡ ወፋስጋ፡ ወፈርደንታ፡ ወቤርያ፡ ወሰርበካ፡ ወመርሶን፡ ወአሮፍዮን፡ ወኤርሴዎን፡ ወዘቦቲታን፡ ደቂቀ፡ ሐማ፡ ወልደ፡ አመዶቱ፡ ቡግያዊ፡ ጸላኢሆሙ፡ ለአይሁድ፡ ለዐሠርቲሆሙ፡ አኃዝዎሙ፡ ወሰቀልዎሙ፡ ወበርበሩ፡ ንዋዮሙ፡ በይእቲ፡ ዕለት።
7 ወዜነውዎ፡ ለንጉሥ፡ ሀኍቈ፡ ሰብእ፡ ዘሞተ፡ በሱሳ፡ ሀገር።
8 ወይቤላ፡ ንጉሥ፡ ለአስቴር፡ ቀተሉ፡ አይሁድ፡ በሱሳ፡ ሀገር፡ ኃምስተ፡ ምእተ፡ ወሰብዓ፡ ወሠለስተ፡ እደወ።
9 ወእፎ፡ እንጋ፡ ይገብሩ፡ በአድያም፡ ምንተ፡ እንከ፡ ታስተበቊዒ፡ በቅድሜየ፡ እግበር፡ ለኪ።
10 ወትቤሎ፡ አስቴር፡ ለንጉሥ፡ ሀቦሙ፡ ለአይሁድ፡ ከማሁ፡ ይግበሩ፡ እንተ፡ ጌሠም፡ ወይስቅሉ፡ ዓሠርቲሆሙ፡ ደቂቀ፡ ሐማ፡ ወአዝዝ፡ ከማሁ፡ ይግበሩ።
11 ወአዘዞሙ፡ ለአይሁድ፡ እለ፡ ሀለዉ፡ ውስተ፡ ሀገር፡ ይስቅሉ፡ ሥጋሆሙ፡ ለደቂቀ፡ ሐማ።
12 ወተጋብኡ፡ አይሁድ፡ ውስተ፡ ሱሳ፡ ሀገር፡ አመ፡ ዓሡሩ፡ ወረቡዑ፡ ለሠርቀ፡ አዳር፡ ወቀተሉ፡ ሠለስተ፡ ምእተ፡ እደወ፡ ወአልቦ፡ ዘበርበሩ።
13 ወእለ፡ ተርፉ፡ አይሁድ፡ እለ፡ ይትቀነዩ፡ ወነገሥትኒ፡ ተጋብኡ፡ እሙንቱ፡ በበይናቲሆሙ፡ ተራድኡ፡ ወባሕቱ፡ አልቦ፡ ዘበርበሩ፡ ወአዕረፉ፡ እምነ፡ ቀትሎሙ፡ ወዘቀተሉሰ፡ አመ፡ ዓሡሩ፡ ወረቡዑ፡ ለሠርቀ፡ አዳር፡ እልፍ፡ ወኃምሳ፡ ምእት፡ ወአልቦ፡ ዘበርበሩ።
14 ወአዕረፉ፡ እንከ፡ አመ፡ ዓሡሩ፡ ወረቡዑ፡ ለውእቱ፡ ወርኅ፡ ወረሰማይ፡ ለይእቲ፡ ዕለት፡ በዓለ፡ ከመ፡ ይዕርፉ፡ ምስለ፡ ትፍሥሕት፡ ወጽጋብ።
15 ወአይሁድሰ፡ እለ፡ ውስተ፡ ሱሳ፡ ሀገር፡ ተጋብኡ፡ አመ፡ ዓሡሩ፡ ወረቡዑ፡ ለሠርቀ፡ አዳር፡ ወኢያዕረፉ፡ ይእተ፡ አሚረ፡ ወአመ፡ ዓሡሩ፡ ወኃሙሱ፡ ገብሩ፡ በዓለ፡ ወትፍሥሕተ።
16 ወበበይነ፡ ዝንቱ፡ ነገር፡ አይሁድ፡ እለ፡ ተዘርዉ፡ ውስተ፡ ኵሉ፡ በሐውርት፡ ይገብርዋ፡ ሠናይተ፡ ለይእቲ፡ ዕለት፡ አመ፡ ዓሡሩ፡ ወረቡዑ፡ ዘጽጋብ፡ እንዘ፡ ይፌንዉ፡ ፍተ፡ ለቢጾሙ፡ ወለጎሮሙ፡ ወለእለ፡ ይነብሩ፡ ውስተ፡ ደብረ፡ አህጉር፡ ወአመ፡ ዓሡር፡ ወኃምስ፡ ገብሩ፡ ላቲ፡ ትፍሥሕተ፡ ሠናየ፡ እንዘ፡ እሙንቱ፡ ይፌንዉ፡ ክፍለ፡ ለቢጾሙ፡ ወለጎሮሙ።
17 ወጸሐፎ፡ መርዶክዮስ፡ ለዝንቱ፡ ነገር፡ ውስተ፡ መጽሐፍ፡ ወፈነዎ፡ ለአይሁድ፡ እለ፡ ውስተ፡ መንግሥቱ፡ ለአርጤክስስ፡ ለቅሩባን፡ ወለርኁቃን፡ ከመ፡ ይግበርዎን፡ ለእላንቱ፡ መዋዕል፡ በዓለ፡ አመ፡ ዓሡሩ፡ ወረቡዑ፡ ወአመ፡ ዓሡሩ፡ ወኃሙሱ፡ ለወርኀ፡ አዳር።
18 እስመ፡ በእማንቱ፡ መዋዕል፡ አዕረፉ፡ አይሁድ፡ እምነ፡ ፀሮሙ፡ ወጸላኢሆሙ፡ በወርኅ፡ ዘቦቱ፡ ገብኡ፡ እምነ፡ ላህ፡ ውስተ፡ ትፍሥሕት፡ ወእምነ፡ ሕማም፡ ውስተ፡ ዕለት፡ ሠናይት፡ ዘውእቱ፡ አዳር፡ ወገብርዎን፡ በኵሉ፡ መዋዕሊሆሙ፡ ከብካበ፡ ወጽጋበ፡ ወይጼግዉ፡ ለምስኪኖሙ፡ ወለዘተአኀዎሙ።
19 ወተወክፉ፡ አይሁድ፡ በከመ፡ ጸሐፈ፡ ሎሙ፡ መርዶክዮስ።
20 ዘከመ፡ ቀተሎሙ፡ ሐማ፡ ወልደ፡ አመዶቱ፡ ዘእምነ፡ መቈዶንያ፡ በከመ፡ ሐሰበ፡ ወአስተቃሰመ፡ ለአማስኖቶሙ።
21 ወዘከመ፡ ቦአ፡ ኀበ፡ ንጉሥ፡ ወሰአሎ፡ ከመ፡ ይስቅሎ፡ ለመርዶክዮስ፡ ወኵሎ፡ ዘሐለየ፡ ከመ፡ ይግበር፡ እኩየ፡ ላዕለ፡ አይሁድ፡ ገብአ፡ ላዕለ፡ ርእሱ፡ ወተሰቅለ፡ ውእቱ፡ ወደቂቁ።
22 ወበበይነ፡ ዝንቱ፡ ተሰምያ፡ እማንቱ፡ መዋዕል፡ ድኂን፡ በእንተ፡ ዘተዓፅዋ፡ እስመ፡ በነገሮሙ፡ ይሰምይዎን፡ ድኂነ፡ በእንተ፡ ቃለ፡ ዛቲ፡ መጽሐፍ፡ ወበእንተ፡ ኵሉ፡ ዘተረከበ፡ ውስቴታ፡ ወኵሎ፡ ዘኮነ፡ ላዕሌሆሙ።
23 ወበዘጸሐፉ፡ ተወክፉ፡ አይሁድ፡ ሎሙ፡ ወለዘርኦሙ፡ ወለዘይዴመር፡ ምስሌሆሙ፡ ወከመ፡ ኢይፍልሱ፡ እምዝንቱ፡ ወእላንቱ፡ መዋዕል፡ ተዝካረ፡ ይትገበራ፡ ለዓለመ፡ ዓለም፡ በበአህጉር፡ ወበበበሐውርት፡ ወነገድ።
24 ወበእማንቱ፡ መዋዕል፡ ይትገበራ፡ ተዝካረ፡ ለዝሉፉ፡ እስመ፡ ቦቶን፡ ድኅኑ፡ ከመ፡ ኢይደምሰስ፡ ተዝካሮሙ፡ ለዓለም።
25 ወጸሐፈት፡ አስቴር፡ ወለተ፡ አሚናዳብ፡ ወመርዶክዮስ፡ አይሁዳዊ፡ ኵሎ፡ ዘገብሩ፡ ወአጽንዑ፡ መጽሐፈ፡ መድኃኒት።
26 ወመርዶክዮስ፡ ወአስቴር፡ ንግሥት፡ አሕረምዎን፡ ሎሙ፡ ለርእሶሙ፡ አሜሁ፡ ወመሐሉ፡ በሕይወቶሙ፡ ወበምክሮሙ።
27 ወአስቴርኒ፡ በዋላ፡ ለዓለም፡ ወተጽሕፈ፡ ለዝክር።
=== chapter 12 ===
[Chapter 12]
1 ወጸሐፈ፡ ንጉሥኒ፡ ውስተ፡ መንግሥቱ፡ ለዘበምድር፡ ወለዘበብሔር።
2 ወላዕለ፡ ጽንዑ፡ ወላዕለ፡ ስብሐቲሁ፡ ወላዕለ፡ ብዕሉ፡ ወክብሩ፡ ወመንግሥቱ፡ ዘታሕቴሁ፡ ናሁ፡ ልኩዕ፡ ውስተ፡ መጽሐፈ፡ ፋርስ፡ ወሜዶን፡ ለተዝካር።
3 ወመርዶክዮስ፡ ባሕቲቱ፡ የዓቅብ፡ መንግሥተ፡ ንጉሥ፡ አርጤክስስ፡ ዓቢይ፡ ውእቱ፡ ወመንግሥቱኒ፡ ከቡር፡ ውእቱ፡ በኀበ፡ አይሁድ፡ ወይትፈቀድ፡ ወይነግር፡ ንብረታ፡ ለኵሉ፡ ሕዝብ፡ በትውልዶሙ።
4 ወይቤ፡ መርዶክዮስ፡ እምነ፡ እግዚአብሔር፡ ኮነ፡ ዝንቱ፡ ነገር።
5 ተዘከርኩ፡ በእንተ፡ ሕልም፡ ዘርኢኩ፡ በበይነ፡ ዝንቱ፡ ነገር፡ እስመ፡ ኢኀለፈ፡ ዕድሜሁ፡ ለውእቱ፡ ሕልም።
6 እንታክቲ፡ ንስቲት፡ ነቅዐ፡ ማይ፡ እንተኮነት፡ ፈለገ፡ ወኮነ፡ ብርሃነ፡ ፀሐይ፡ ወማይ፡ ብዙኅ፡ አስቴር፡ ይእቲ፡ እንተ፡ አውሰባ፡ ንጉሥ፡ ወረሰያ፡ ንግሥተ።
7 ወእልክቱሰ፡ ክልኤቱ፡ አክይስት፡ አነ፡ ወሐማ፡ ንሕነ።
8 ወአሕዛብኒ፡ እለ፡ ተጋብኡ፡ ከመ፡ ያማስኑ፡ ስሞሙ፡ ለአይሁድ።
9 ወሕዝበ፡ ዚእየ፡ እስራኤል፡ እሙንቱ፡ እለ፡ አውየዉ፡ ኀበ፡ እግዚአብሔር፡ ወድኅኑ፡ ወአድኀኖሙ፡ እግዚአብሔር፡ ለሕዝቡ፡ ወአድኃነነ፡ እግዚአብሔር፡ እምኵሉ፡ እኩይ።
10 ወገብረ፡ እግዚአብሔር፡ ዓቢየ፡ ተአምረ፡ ወመንክረ፡ ወመድምመ፡ ዘኢኮነ፡ ከማሁ፡ በውስተ፡ አሕዛብ።
11 ወበበይነ፡ ዝንቱ፡ ክልኤተ፡ ክፍለ፡ ገብረ፡ አሐዱ፡ ለሕዝበ፡ እግዚአብሔር፡ ወአሐደ፡ ለካልእ፡ አሕዛብ።
12 ወበጽሕ፡ እልክቱ፡ ክልኤቱ፡ ክፍል፡ በሰዓት፡ ወበጊዜ፡ ወበዕለተ፡ ደይን፡ በቅድመ፡ እግዚአብሔር፡ ወላዕለ፡ ኵሉ፡ አሕዛብ።
13 ወተዘከሮሙ፡ እግዚአብሔር፡ ለሕዝቡ፡ ወአንጽሐ፡ ርስቶ።
14 ወኮና፡ እማንቱ፡ መዋዕል፡ በወርኀ፡ አዳር፡ አመ፡ ዓሡሩ፡ ወረቡዑ፡ ወአመ፡ ዐሡሩ፡ ወኃሙሱ፡ ለሠርቀ፡ ውእቱ፡ ወርኅ፡ እንዘ፡ ይትጋብኡ፡ በትፍሥሕት፡ ቅድመ፡ እግዚአብሔር፡ በትውልዶሙ፡ ለዓለም፡ ውስተ፡ እስራኤል፡ ሕዝቡ።
=== chapter 13 ===
[Chapter 13]
1 ወአመ፡ ራብዕት፡ ዓመተ፡ መንግሥቱ፡ ለጰጠሎሜዎስ፡ ወቀለዮጳጥራ፡ ካህን፡ አብዶስ፡ እግዚአብሔር፡ ይቤ፡ ርእሰ፡ ካህን፡ ርኢኩ፡ ወይጽሕፍ፡ ካህን፡ ወሌዋዊ።
2 ወጰጠሎሜዎስ፡ ወልዱ፡ ይትወፈይ፡ መጽሐፈ፡ እንተ፡ ባቲ፡ ድኂን፡ እንተ፡ ይቤሎ፡ ሀለወት።
3 ወተርጐማ፡ ለሲማኮስ፡ ጰጠሎማዊ፡ ዘእምነ፡ ዘኢየሩሳሌም።