##### edition Mercer (gez) — Text of transcribed by Kefela Ghebre and proofread by Ran HaCohen for Bibla Veteris Testamenti Etiopica
=== chapter 1 ===
[Chapter 1]
1 ቃለ፡ መክብብ፡ ወልደ፡ ዳዊት፡ ንጉሠ፡ እስራኤል፡ በኢየሩሳሌም።
2 ከንቱ፡ ከንቱ፡ ይቤ፡ መክብብ፡ ከንቱ፡ ከንቱ፡ ኵሉ፡ ከንቱ።
3 ምንት፡ ፍድፋዱ፡ ለሰብእ፡ በኵሉ፡ ጻማሁ፡ ዘይጻሙ፡ እምታሕተ፡ ፀሓይ።
4 ትውልድ፡ የሐልፍ፡ ወትውልድ፡ ይመጽእ፡ ወምድርሰ፡ ለዓለም፡ ትቀውምወ።
5 ይሠርቅ፡ ፀሓይ፡ ወየዐርብ፡ ፀሓይ፡ ወውስተ፡ መከኑ፡ ይገብእ፡ እንዘ፡ ይሠርቅ፡ ውእቱ፡ ህየ።
6 ይገብእ፡ በይምን፡ ወየአውድ፡ መንገለ፡ ሰሜን፡ አውደ፡ የአውድ፡ ወየሐውር፡ መንፈስ፡ ወበኡደቱ፡ ይገብእ፡ መንፌስ።
7 ኵሉ፡ ወሓይዝት፡ የሐውራ፡ ውስተ፡ ባሕር፡ ወባሕር፡ ኢኮነት፡ እንተ፡ ትመልእ፡ ውስተ፡ መካን፡ ውእደ፡ የሐውሩ፡ አፍላግ፡ ህየ፡ ካዕበ፡ ይትመየጡ፡ በሐዊር።
8 ኵሉ፡ ቃል፡ ዘበ፡ ሕማም፡ ኢይክል፡ ብእሲ፡ ለተናግሮ፡ ኢይጸግብ፡ ዓይን፡ በርእይ፡ ወኢይመልእ፡ እዝን፡ በአጽምኦ።
9 ምንት፡ ዘተገብረ፡ ውእቱ፡ ዘተገብረ፡ ምንት፡ ዘኮነ፡ ውእቱ፡ ዘከመ፡ ኮነ፡ ወአልቦ፡ ምንትኒ፡ ዘተገብረ፡ እምታሕተ፡ ፀሓይ።
10 ዘይነብብ፡ ወይብል፡ ናሁዝ። ሐዲስ፡ ውእቱ፡ ናሁ፡ ተገብረ፡ እምዓለም፡ ዘኮነ፡ እምቅድሜነ።
11 አልቦ፡ ዝክረ፡ ለቀደምት፡ ወለእለ፡ ደኃርትኒ፡ ተገብሩ፡ አልቦሙ፡ ዝክረ፡ ምሳሌ፡ ዘይትገበር፡ በደኃርት።
12 አነ፡ መክብብ፡ ኮንኩ፡ ንጉሠ፡ ላዕለ፡ እስራኤል፡ በኢየሩሳሌም።
13 ወውሀብኩ፡ ልብየ፡ ለኃሢሠ፡ ወለፈቲን፡ በጥበብ፡ በእንተ፡ ኵሉ፡ ዘተገብረ፡ እምታሕተ፡ ሰማይ፡ እስመ፡ ስራሕ፡ እኩየ፡ ወሀቦ፡ እግዚኣ፡ ብሔር፡ ለውሉደ፡ ሰብእ፡ ከመ፡ ይስርሑ፡ ቦቱ።
14 ርኢኩ፡ ኵሎ፡ ፍጥረተ፡ ዘተገብረ፡ መትሕተ፡ ፀሓይ፡ ወናሁ፡ ኵሉ፡ ከንቱ፡ ወከመ፡ እስትንፋስ፡ መንፈስ።
15 ጠዋይ፡ ኢይትከሀል፡ ረቲዕ፡ ወኅጹጽ፡ ኢይትከሀል፡ ተኆልቆ።
16 ተናገርኩ፡ አነ፡ በልብየ፡ በብሂል፡ ናሁ፡ አነ፡ ተዐበይኩ፡ ወአፈድፈድኩ፡ ጥበበ፡ ዲበ፡ ኵሉ፡ እምእለ፡ ኮኑ፡ እምቅድሜየ፡ በኢየሩሳሌም፡ ወልብየኒ፡ ርእየት፡ ብዙኅ፡ ጥበበ፡ ወአእምሮ።
17 ወሀብኩ፡ ልብየ፡ ለአእምሮ፡ ወጥበብ፡ ምሳሌ፡ ወትምህርተ፡ አእመርኩ፡ እስመ፡ ዝኒ፡ ውእቱ፡ ፍትወተ፡ መንፈስ።
18 እስመ፡ በብዝኀ፡ ጥበብ፡ ብዝኀ፡ አእምሮ፡ ወዘአፈድፈደ፡ አእምሮ፡ አፈድፈደ፡ ሕማመ።
=== chapter 2 ===
[Chapter 2]
1 እቤ፡ አነ፡ በልብየ፡ ነዓ፡ አምከርከ፡ በፍሥሐ፡ ወርኢ፡ በሠናይ፡ ወናሁ፡ ዝኒ፡ ከንቱ።
2 ወለሰሐቅ፡ እብሎ፡ አፅፍጠ፡ አስፍጠ፡ ወለፍሥሐ፡ ምንት፡ ውእቱ፡ ዝግብር።
3 ወመከርኩ፡ እምልብየ፡ ወሰሐቦ፡ ከመ፡ ወይን፡ ለሥጋየ፡ ወልብየ፡ መርሐኒ፡ ጥበብ፡ ወዝሂ፡ እኂዝ፡ በፍሥሐ፡ እስከ፡ ሶበ፡ እሬኢ፡ ምንት፡ ሠናይ፡ ለውሉደ፡ ሰብእ፡ ዘይገብሩ፡ እምታሕተ፡ ፀሓይ፡ በኆልቈ፡ መዋዕለ፡ ሕይወቶሙ።
4 አዕበይኩ፡ ምግባርየ፡ ሐነጽኩ፡ ሊተ፡ አብያተ፡ ወተከልኩ፡ ሊተ፡ አዕጸዳተ፡ ወይን።
5 ወገበርኩ፡ ሊተ፡ አዕጻዳተ፡ ሐምል፡ ወገነታተ፡ ወተከልኩ፡ ውስቴቶሙ፡ ዕፀ፡ ዘኵሎ፡ ፍሬ።
6 ገበርኩ፡ ሊተ፡ ምሕጻበተ፡ ማያት፡ ከመ፡ እስቂ፡ እምኔሆሙ፡ ኦመ፡ ወዕፀ፡ ዘይፈሪ።
7 ወአጥረይኩ፡ አግብርተ፡ ወአእማተ፡ ወልደ፡ ቤት፡ አጥረይኩ፡ ወጥሪተ፡ ኖሎት፡ ወአልህምተ፡ ወመራዕየ፡ አባግዕ፡ ብዙኀ፡ አጥረይኩ፡ እምኵሎሙ፡ እለ፡ ኮኑ፡ እምቅድምየ፡ በኢየሩሳሌም።
8 አስተጋባእኩ፡ ሊተ፡ ብሩረ፡ ወወርቀ፡ መጥሪተ፡ መንግሥት፡ ወበሐውርት፡ ገበርኩ፡ ሊተ፡ ኀላያነ፡ ወኀላይያተ፡ ወፍግዐ፡ ምስለ፡ ውሉደ፡ ሰብእ፡ መዘርተ፡ ወመዘርየነ።
9 ዐበይኩ፡ ወአፈድፈድኩ፡ እምኵሎሙ፡ እለ፡ ኮኑ፡ እምቅድሜየ፡ በኢየሩሳሌም፡ ወጥበብየኒ፡ ቆመተኒ።
10 ወኵሎ፡ ዘሰአለተኒ፡ አዕይንትየ። ኢተመቈስኩ፡ ወኢከላእኩ፡ ልብየ፡ እምኵሉ፡ ፍሥሐ፡ እስመ፡ ልብየ፡ ተፈሥሐ፡ እምኵሉ፡ ጻማየ፡ ወዝ፡ ኮነ፡ መክፈልትየ፡ እምኵሉ፡ ስራኅየ።
11 ወነጸርኩ፡ አነ፡ ዲበ፡ ኵሉ፡ ጥሪትየ፡ ዘገብራ፡ እደዊየ፡ ወበሥራሕ፡ ዘሠራኅኩ፡ ለገቢር፡ ወናሁ፡ ኵሉ፡ ከንቱ፡ ወፍትወተ፡ መንፈስ፡ ወአልቦ፡ ፈድፋደ፡ እምታሕተ፡ ፀሓይ።
12 ወነጸርኩ፡ አነ፡ ከመ፡ እርአይ፡ ጥበበ፡ ወተሠፍጠ፡ ወእበደ፡ መኑ፡ ብእሲ፡ ዘይተሉ፡ ድኅሬሃ፡ ለምክር፡ ኵሉ፡ ምሳሌ፡ ዘገብረ፡ ላቲ።
13 ወርእኩ፡ አነ፡ ከመቦ፡ ፍድፍድና፡ ጠቢብ፡ እምአብድ፡ ከመ፡ ፈድፋድ፡ ብርሃን፡ እምጽልመት።
14 ለጠቢብ፡ አዕይንቲሁ፡ ዲበ፡ ርእሱ፡ ወአብድሰ፡ ውስተ፡ ጽልመት፡ የሐውር፡ ወአእመርኩ፡ አነ፡ ከመ፡ አሐዱ፡ ድድቅ፡ ይዳድቆሙ፡ ለክልኤሆው።
15 ወእቤ፡ አነ፡ በልብየ፡ ከመ፡ ይዳድቆ፡ ለአብድ፡ ከማሁ፡ ሊተኒ፡ ይዴድቀኒ፡ ወለምንት፡ ጠበብኩ፡ አነ፡ አሜሃ፡ በከ፡ አፈድፈድኩ፡ ነቢበ፡ በልብየ፡ እስመ፡ ዝኒ፡ ከንቱ፡ አብድ፡ በከ፡ ያፈደፍድ፡ ነቢበ፡ እስመ።
16 እስመ፡ አልቦ፡ ዝክረ፡ ለጠቢብ፡ ምስለ፡ አብድ፡ ለዓለም፡ እስመ፡ ናሁ፡ መዋዕል፡ ይመጽአ፡ ወኵሉ፡ ይትረሳዕ፡ ወእፎ፡ ይመውት፡ ጠቢብ፡ ምስለ፡ አብድ።
17 ወጸላእኩ፡ ኵሎ፡ ሕይወተ፡ እስመ፡ እኩይ፡ ላዕሌየ፡ ፍጥረት፡ ዘተገብረ፡ መትሕተ፡ ፀሓይ፡ እስመ፡ ኵሎ፡ ከንቱ፡ ወፍትወተ፡ መንፈስ።
18 ወጸላእኩ፡ አነ፡ ኵሎ፡ ሥራኅየ፡ ዘአነ፡ እሠርሕ፡ እመትሕተ፡ ፀሓይ፡ እስመ፡ አሐድጎ፡ ለሰብእ፡ እምድኅሬየ፡ ዘይትወለድ።
19 ወመኑ፡ ያአምር፡ እመ፡ ጠቢበ፡ ይከውን፡ ወእመ፡ አብድ፡ ወእመ፡ ይሠለጥ፡ በኵሉ፡ ሥራሕየ፡ ዘሠራሕኩ፡ ወዘጠበብኩ፡ እመትሕተ፡ ፀሓይ፡ ወዝኒ፡ ከንቱ።
20 ወተመየጥኩ፡ አነ፡ ከመ፡ እተዋገዘ፡ ለልብየ፡ በኵሉ፡ ሥራኀ፡ ዘሠራሕኩ፡ እመትሕተ፡ ፀሓይ።
21 እሰመ፡ ሰብእ፡ ዘኢሠርሕ፡ ሎቱ፡ በጥበብ፡ ወበአእምሮ፡ ወበጽንዕ፡ ወብእሲ፡ ዘኢሠርሕ፡ ቦቱ፡ ይሁብ፡ ርእሶ፡ ለመክፈልቱ፡ ወዝኒ፡ ከንቱ፡ ወእኩይ፡ ዐቢይ።
22 እስመ፡ ይከውኖ፡ ለብእሲ፡ በኵሉ፡ ጻማሁ፡ ወፍትወተ፡ ልቡ፡ ዘውእቱ፡ ይሰርሕ፡ እመትሕተ፡ ፀሓይ።
23 እስመ፡ ኵሎን፡ መዋዕሊሁ፡ ሕማም፡ ወመዐት፡ ወንታፌ፡ ሎቱ፡ ወበሌ፡ ሊትኒ፡ ኢትነውም፡ ልቡ፡ ወዝኒ፡ ከንቱ፡ ውእቱ።
24 አልቦ፡ ሠናየ፡ ለሰብእ፡ ዘእንበለ፡ ዘበልዐ፡ ወሰትየ፡ ወዘያርእያ፡ ሠናየ፡ ለነፍሱ፡ ወዘኒ፡ ርኢኩ፡ ከመ፡ እምእደ፡ አግዚኣ፡ ብሔር፡ ውእቱ።
25 መኑ፡ ውእቱ፡ ዘይበልዕ፡ ወይሰቲ፡ ዘእንበሌሁ።
26 እስመ፡ ለሰብእ፡ ኄር፡ ቅድመ፡ ገጹ፡ ወሀበ፡ ጥበበ፡ ወአእምሮ፡ ወፍሥሐ፡ ወለዘሰ፡ ይኤብስ፡ ወሀበ፡ ሥራሐ፡ ከመ፡ ይወስክ፡ ወከመ፡ ያስተጋብእ፡ ከመ፡ የሀብ፡ ለኄር፡ ቅድመ፡ ገጸ፡ አግዚኣ፡ ብሔር፡ እስመ፡ ዝኒ፡ ከንቱ፡ ወፍትወተ፡ መንፈስ።
=== chapter 3 ===
[Chapter 3]
1 ቦለኵሉ፡ ዘመን፡ ወጊዜ፡ ለኵሉ፡ ምግባር፡ ዘታሕተ፡ ፀሓይ።
2 ጊዜ፡ ለወሊድ፡ ወጊዜ፡ ለመዊት፡ ጊዜ፡ ለተኪል፡ ወጊዜ፡ ለመሊኅ፡ ዘተከሉ።
3 ጊዜ፡ ለቀቲል፡ ወጊዜ፡ ለፈውሶ፡ ጊዜ፡ ለነሢት፡ ወጊዜ፡ ለሐኒጽ።
4 ጊዜ፡ ለበኪይ፡ ወጊዜ፡ ለስሒቅ፡ ጊዜ፡ ለላሕዎ፡ ወጊዜ፡ ለዘፊን።
5 ጊዜ፡ ለወርዎ፡ እብን፡ ወጊዜ፡ ለአስተጋብኦ፡ እብን፡ ጊዜ፡ ለተሐቅፎ፡ ወጊዜ፡ ለተራሕቆ፡ እምሑቃፌ።
6 ጊዜ፡ ለኅሢሥ፡ ወጊዜ፡ ለሐጉል፡ ጊዜ፡ ለዐቂብ፡ ወጊዜ፡ ለአውፅኦ።
7 ጊዜ፡ ለሠጢጥ፡ ወጊዜ፡ ለረፊእ፡ ጊዜ፡ ለአርምሞ፡ ወጊዜ፡ ለተናግሮ።
8 ጊዜ፡ ለአፍቅሮ፡ ወጊዜ፡ ለጸሊእ፡ ጊዜ፡ ለጸልእ፡ ወጌዜ፡ ለሰላም።
9 ምንተ፡ ፈድፋዱ፡ ለዘ፡ ይገብር፡ በዘ፡ ውእቱ፡ ይሠርሕ።
10 ርኢኩ፡ ኵሎ፡ ሥሩኅ፡ ዘወሀቦ፡ እግዚአ፡ ብሔር፡ ለውሉደ፡ ሰብእ፡ ሥራሐ፡ ከመ፡ ይሥርሑ፡ ቦቱ።
11 ኵሎ፡ ዘገብረ፡ ሠናየ፡ በጊዜሁ፡ ወኵሎ፡ ኅቡረ፡ ወሀበ፡ ለዓለም፡ ውስተ፡ ልቦሙ፡ ከመ፡ ኢይርከብ፡ ሰብእ፡ ግብረ፡ ዘገብረ፡ እግዚኣ፡ ብሔር፡ እምጥንቱ፡ እስከ፡ ተፍጻሜቱ።
12 አእመርኩ፡ ከመ፡ አልቦ፡ ሠናየ፡ ውስቴቶሙ፡ ዘእንበለ፡ ተፈሥሐ፡ ወገቢረ፡ ሠናይ፡ በሕይወቱ።
13 ወኵሉ፡ ሰብእ፡ ዘበልዐ፡ ወሰትየ፡ ወርእየ፡ ሠናየ፡ እምኵሉ፡ ጻማሁ፡ ዝሀብተ፡ እግዚአ፡ ብሔር፡ ውእቱ።
14 አእመርኩ፡ ከመ፡ ኵሉ፡ ዘገብረ፡ እግዚኣ፡ ብሔር፡ ውእቱ፡ ይሄሉ፡ ለዓለም፡ ወውእቶሙ፡ ኢይትከሀል፡ ወስኮ፡ ወእምውስቴቶሙ፡ ኢይትከሀል፡ ነቲግ፡ ወእግዚኣ፡ ብሔር፡ ገብረ፡ ከመ፡ ይፍርሁ፡ እምቅድመ፡ ገጹ።
15 ወዘተገብረ፡ ናሁ፡ ሀሎ፡ ወኵሉ፡ ዘእምተገብረ፡ ናሁ፡ ተገብረ፡ ወእግዚኣ፡ ብሔር፡ የኀሥሥ፡ ለዘ፡ ይስድድ።
16 ወዲዲ፡ ርኢኩ፡ ዘእምታሕተ፡ ፀሓይ፡ በመካነ፡ ጻድቅ፡ ህየ፡ ረሲዕ፡ ወበመካነ፡ ረሲዕ፡ ህየ፡ ጻድቅ፡ በህየ።
17 ወእቤ፡ አነ፡ በልብየ፡ ኅቡረ፡ ጻድቅ፡ ወረሲዕ፡ ይኳንን፡ እግዚኣ፡ ብሔር፡ እስመ፡ ጊዜ፡ ለኵሉ፡ ምግባር፡ ወበኵሉ፡ ግብር፡ ወበህየ።
18 አቤ፡ አነ፡ በልብየ፡ በእንተ፡ ነገረ፡ ውእቱ፡ ውሉደ፡ ሰብእ፡ ከመ፡ ይኳንኖሙ፡ እግዚኣ፡ ብሔር፡ ወከመ፡ ያርኢ፡ ከመ፡ እንስሳ፡ እሙንቱ፡
19 ወሎሙ፡ ድድቅ፡ ለውሉደ፡ ሰብእ፡ ወድድቅ፡ እንስሳ፡ አሐዱ፡ ድድቅ፡ ሎሙ፡ ከመ፡ ሞተዝ፡ ከማሁ፡ ሞቱ፡ ለዝ፡ ወአሐዱ፡ መንፈስ፡ ለኵሎሙ፡ ወምንት፡ ፈድፈደ፡ ሰብእ፡ እም፡ እንስሳ፡ ወኢምንተኒ፡ እስመ፡ ኵሉ፡ ከንቱ።
20 ኵሉ፡ ዘየሐውር፡ ውስተ፡ አሐዱ፡ መካን፡ ኵሉ፡ ኮነ፡ እመሬት፡ ወኵሉ፡ ይገብእ፡ ውስተ፡ መሬት።
21 መኑ፡ ያአምር፡ መንፈስ፡ ለውሉድ፡ ሰብእ፡ እመ፡ ያዐርግ፡ ውእቱ፡ ላዕለ፡ ወመንፈስ፡ እንስሳ፡ እመ፡ ይወርድ፡ ውእቱ። ታሕተ፡ ውስተ፡ ምድር።
22 ወርኢኩ፡ ከመ፡ አልቦ፡ ሠናየ፡ ዘእንበለ፡ ዘተፈሥሐ፡ ሰብእ፡ በተግባሩ፡ እስመ፡ ውእቱ፡ መክፈልቱ፡ መኑ፡ ያመጽኦ፡ ከመ፡ ይርአይ፡ ዘይከውን፡ እምድኅሬሁ።
=== chapter 4 ===
[Chapter 4]
1 ወተመየጥኩ፡ አነ፡ ወርኢኩ፡ ኵሎ፡ ኅቡረ፡ ትእግልተ፡ ዘይትገበር፡ መትሕተ፡ ፀሓይ፡ ወናሁ፡ አንብዕ፡ ለእለ፡ ይትኤገልዎሙ፡ ወአልቦ፡ ዘይናዝዞሙ፡ እምእደ፡ ይትዔገልዎሙ፡ ወኃይል፡ አልቦሙ፡ ለዘይናዝዝዎሙ።
2 ወአስተኀየስክዎሙ፡ አነ፡ ኅቡረ፡ ለእለ፡ ሞቱ፡ እሉ፡ ወድኡ፡ ሞቱ፡ እምሕያዋን፡ እሉ፡ እሙንቱ፡ ሕያዋን፡ እስከ፡ ዮም።
3 ወእምእሉ፡ ክልኤሆሙ፡ ይኄይስ፡ ዓዲ፡ ኢተፈጥሮ፡ ዘኢያኣምር፡ ኵሎ፡ ገቢረ፡ እከይ፡ ዘተገብረ፡ መትሕተ፡ ፀሓይ።
4 ወርኢኩ፡ አነ፡ ኵሎ፡ ሥራሐ፡ ኅቡረ፡ ወኵሎ፡ ኅይለ፡ ምግባር፡ ከመ፡ ውእቱ፡ ቅንእ፡ ለብእሲ፡ አምኀበ፡ ቢጹ፡ ወዝኒ፡ ከንቱ፡ ወፍትወተ፡ መንፈስ።
5 አብድ፡ ሐቀፈ፡ እዴሁ፡ ወበልዐ፡ ሥጋሁ።
6 ሠናይ፡ ምልአ፡ እድ፡ በዕረፍት፡ እምነ፡ ክልኤ፡ ዘበዐመፃ፡ ወፍትወተ፡ መንፈስ።
7 ወተመየጥኩ፡ አነ፡ ወርኢኩ፡ ከንቶ፡ መትሕተ፡ ፀሓይ።
8 ሀሎ፡ አሐዱ፡ ወአልቦ፡ ካልእ፡ ወውሉድ፡ ወእኈ፡ አልቦቱ፡ ወአልቦ፡ ፍጻሜ፡ ለኵሉ፡ ስራሑ፡ ወዐይኑሂ፡ ኢይመልእ፡ ብዕለ፡ ወለመኑ፡ አነ፡ እሠርሕ፡ ወእቄቅያ፡ ለነፍስየ፡ እምፍግዕ፡ ወዝኒ፡ ከንቱ፡ ወሥራሕ፡ እኩይ፡ ውእቱ።
9 ይኄይሱ፡ ክልኤቱ፡ እምአሐዱ፡ እለ፡ ቦሙ፡ ዐስበ፡ ሠናየ፡ በጸማሆሙ።
10 እስመ፡ እመ፡ ወድቀ፡ አሐዱ፡ ያነሥኦ፡ ካልኤ፡ ወአሌ፡ ሎቱ፡ ለአሐዱ፡ ለእመ፡ ወድቀ፡ ወአልቦ፡ ካልእ፡ ዘያነሥኦ።
11 እስመ፡ እመ፡ ኖሙ፡ ክልኤሆሙ፡ ይመውቁ፡ ወአሐዱሰ፡ እፎ፡ ይትማወቅ።
12 ወእመ፡ ተፀንዐ፡ አሐዱ፡ ክልኤሆሙ፡ ይትቀውምዎ፡ ወፈትል፡ ሥሉስ፡ ፍጡነ፡ ኢይትበተክ።
13 ይኄይስ፡ ቅኑይ፡ ነዳይ፡ ወጠቢብ፡ እምንጉሥ፡ ልሂቅ፡ ወአብድ፡ ዘኢያአመረ፡ ለነጽሮ፡ ዓዲ።
14 ከመ፡ እምቤተ፡ ሞቅሕ፡ ይወፅእ፡ ለነጊሥ፡ እስመ፡ በመንግሥቱ፡ ኮነ፡ ነዳየ።
15 ወርኢኩ፡ ኵሎ፡ ኅቡረ፡ እለ፡ ሕያዋን፡ እለ፡ ያንሶስዉ፡ መትሕተ፡ ፀሓይ፡ ምሳሌ፡ ወሬዛ፡ ካልእ፡ ይትነሣእ፡ ህየንቴሁ።
16 አልቦ፡ ፍጻሜ፡ ለኵሉ፡ ሕዝብ፡ ለኵሎሙ፡ እለ፡ ኮኑ፡ እምቅድሜሁ፡ እሰመ፡ ደኃርትኒ፡ ኢይትፌሥሑ፡ ቦቱ፡ እስመ፡ ዝኒ፡ ከንቱ፡ ወፍትወተ፡ መንፈስ።
17 ዕቀብ፡ እገሪከ፡ ሶበ፡ ተሐውር፡ ኀበ፡ እግዚኣ፡ ብሔር፡ ወቅረብ፡ ለሰሚዕ፡ እምነ፡ ሀብቶሙ፡ ለአብዳን፡ መሥዋዕተከ፡ እስመ፡ ኢኮኑ፡ ማእምራነ፡ ለገቢረ፡ ሠናይ።
=== chapter 5 ===
[Chapter 5]
1 ኢትጐጒእ፡ በአፉከ፡ ወልብከ፡ ኢይጐጒእ፡ ለአውፅኦ፡ ቃል፡ እምቅድመ፡ ገጸ፡ እግዚኣ፡ ብሔር፡ እስመ፡ አግዚኣ፡ ብሔር፡ ውስተ፡ ሰማይ፡ ላዕለ፡ ወአንተሰ፡ ውስተ፡ ምድር፡ በእንተ፡ ዝንቱ፡ ይኩን፡ ነገርክ፡ ኅዳጠ።
2 እስመ፡ ይመጽእ፡ ሕልም፡ በብዙኅ፡ መከራ፡ ወቃለ፡ እበድ፡ በብዝኀ፡ ነገር።
3 እምከመ፡ ጸለይከ፡ ጸሎተ፡ ለእግዚኣ፡ ብሔር፡ ኢታጐንዲ፡ ውሂቦተ፡ እስመ፡ አልቦ፡ ፈቃዶ፡ ለአብዳን፡ አንተሰ፡ በከመ፡ ፀለይከ፡ ሀብ።
4 ይኄይስ፡ ኢጸልዮተከ፡ እምጸልዮተከ፡ ወኢውሂብ።
5 ኢተሀብ፡ አፉከ፡ ለአበሳ፡ ሥጋከ፡ ወኢትበል፡ በቅድመ፡ ገጹ፡ ለእግዚኣ፡ ብሔር፡ በኢያእምሮ፡ ውእቱ፡ ከመ፡ ኢይትመዐዕ፡ እግዚኣ፡ ብሔር፡ በእንተ፡ ቃልከ፡ ወያማስን፡ ግብረ፡ እደዊከ።
6 እስመ፡ በብዝኀ፡ ሕልም፡ ወከንቱ፡ ወንበብ፡ ብዙኅ፡ ወኅቡረ፡ እግዚኣ፡ ብሔር፡ ፍራህ።
7 እመ፡ ትእግልተ፡ ነዳይ፡ ወሀይደ፡ ፍታሕ፡ ጽድቀ፡ ርኢከ፡ በብሔር፡ ኢታንክር፡ በምግባር፡ እስመ፡ ልዑል፡ መልዕልተ፡ ልዑል፡ የዐቅብ፡ ወልዑላ፡ ዲቤሆሙ።
8 ወፈድፋደ፡ ምድር፡ ላዕለ፡ ኵሉ፡ ውእቱ፡ ንጉሥ፡ ዲበ፡ ወፍረ፡ ሐረስት።
9 ዘያፈቅር፡ ብሩር፡ ኢይጸግብ፡ ብሩረ፡ ወዘሂ፡ አፍቀረ፡ ብዙኀ፡ እክለ፡ ወዝኒ፡ ከንቱ።
10 በብዝኅ፡ ጥሪት፡ ብዙኀ፡ እለ፡ ይበለዕዋ፡ ወምንተ፡ ጽንዑ፡ ለዘ፡ ይቀርባ፡ እስመ፡ ይኴንን፡ እሰከ፡ ርእየ፡ ዐይን።
11 ጥዑም፡ ንዋም፡ ለገብር፡ እመ፡ ኅዳጥ፡ ወእመ፡ ብዙኀ፡ በልዐ፡ ወለዘ፡ አብዝኀ፡ በሊዐ፡ አልቦ፡ ዘየኅድጎ፡ ይኑም።
12 ቦ፡ ደዌ፡ ዘርኢኩ፡ በመትሕተ፡ ፀሓይ፡ ብዕል፡ ዘይትዓቀብ፡ በኀበ፡ ዘአጥረዮ፡ ለእከይ።
13 ወይትሐጐል፡ ውእቱ፡ ብዕል፡ በንታፌ፡ እኩይ፡ ወወለደ፡ ወልደ፡ ወአልቦ፡ ውስተ፡ እዴሁ፡ ወኢምንተኒ።
14 በከመ፡ ወፅአ፡ እምከርሠ፡ እሙ፡ ዕራቁ፡ ይትመየጥ፡ ለገቢእ፡ ከመ፡ መጽአ፡ ወአልቦ፡ ዘይነሥእ፡ እምጻማሁ፡ ከመ፡ ይሖር፡ ምስሌሁ።
15 ወዝኒ፡ እኩይ፡ ደዌ፡ ውእቱ፡ እስመ፡ በከመ፡ መጽአ፡ ከማሁ፡ የሐውር፡ ወምንተ፡ ፍድፋዴሁ፡ ዘይጸሙ፡ ለነፍሱ።
16 እስመ፡ ኵሉ፡ መዋዕሊሁ፡ ውስተ፡ ጽልመት፡ ወላሕ፡ ወበቊጥዓ፡ ብዙኅ፡ ወዴ፡ ወሐዘን።
17 ወባሕቱ፡ ናሁ፡ ዘርኢኩ፡ አነ፡ ኄርት፡ ዘይአቲ፡ ሠናይት፡ በሊዕ፡ ወሰቲይ፡ ወርኢየ፡ ፍግዕ፡ በኵሉ፡ ሥራሑ፡ ዘሠርሐ፡ በመትሕተ፡ ፀሓይ፡ ኆልቈ፡ መዋዕለ፡ ሕይወት፡ ዘወሀቦ፡ እግዚአብሔር፡ እስመ፡ ውእቱ፡ መክፈልቱ።
18 ወኵሎ፡ ሰብእ፡ ዘወሀቦ፡ እግዚአብሔር፡ ብዕለ፡ ወጥሪተ፡ ወአሠለጦ፡ ከመ፡ ይብላዕ፡ እምውስቴቱ፡ ወይንሣእ፡ መክፈልቶ፡ ወከመ፡ ይትፈሣሕ፡ እምጻማሁ፡ ዝሀብተ፡ እግዚአ፡ ብሔር፡ ውእቱ።
19 እስመ፡ አኮ፡ ብዘኀ፡ ዘይዜከር፡ መዋዕለ፡ ሕይወቱ፡ እስመ፡ እግዚኣ፡ ብሔር፡ ያሠርሐ፡ በፍትወተ፡ ልቡ።
=== chapter 6 ===
[Chapter 6]
1 ቦእኩየ፡ ዘርኢኩ፡ እምታሕተ፡ ፀሓይ፡ ወብዝኅት፡ ይእቲ፡ ላዕለ፡ ሰብእ።
2 ብእሲ፡ ዘወሀቦ፡ እግዚኣ፡ ብሔር፡ ብዕለ፡ ወጥሪተ፡ ወክብረ፡ ወአልቦ፡ ዘይከልኣ፡ ለነፍሱ፡ እምኵሉ፡ ዘፈተወት፡ ወኢያስለጦ፡ እግዚኣ፡ ብሒር፡ ከመ፡ ይብላዕ፡ እምኔሁ፡ እስመ፡ ብእሲ፡ ነግድ፡ ይበልዖ፡ ወዝኒ፡ ከንቱ፡ ውእቱ፡ ወደዌ፡ እኪት።
3 ለእመ፡ ወለደ፡ ብአሲ፡ ምእተ፡ ወዓመታተ፡ ብዙኀ፡ ሐይወ፡ ወብዙኀ፡ ኮነ፡ መዋዕለ፡ ዓመቲሁ፡ ወነፍሱሂ፡ ኢትጸግብ፡ እምሠናያት፡ ወግንዘቱኒ፡ ኢኮኖ፡ እቤ፡ ይኄይስ፡ እምኔሁ፡ ዳህጸ።
4 እስመ፡ በከንቱ፡ መጽአ፡ ወውስተ፡ ጽልመት፡ የሐውር፡ ወበጽልመት፡ ስሙ፡ ይትከደን።
5 ወፀሓይኒ፡ ኢርእየ፡ ወኢያእመረ፡ ዕረፍቱ፡ ለዝ፡ እምዝ።
6 ወሶበ፡ ሐይወ፡ ዐሠርተ፡ ምእተ፡ ምሕዋረ፡ ዓመት፡ ወሠናይት፡ ኢርእየ፡ አኮሁ፡ ውስተ፡ መካን፡ አሐዱ፡ የሐውር፡ ኵሉ።
7 ኵሉ፡ ሥራሑ፡ ለሰብእ፡ ውስተ፡ አፉሁ፡ ወነፍሱሰ፡ ኢትመልእ።
8 ምንት፡ ፍድፋዴሁ፡ ለጠቢብ፡ እምአብድ፡ በእንተ፡ ነዳይ፡ ያአምር፡ ሐዊረ፡ ቅድመ፡ ሕይወት።
9 ይኄይስ፡ ርእይ፡ በዓይን፡ እምሐዊር፡ በነፍስ፡ ወዝኒ፡ ከንቱ፡ ወፍትወተ፡ መንፈስ።
10 ኵሉ፡ ዘኮነ፡ ናሁ፡ ተሠምየ፡ ስሙ፡ ወተአምረ፡ ዘውእቱ፡ ሰብእ፡ ወኢይክል፡ ተጋእዞ፡ ምስለ፡ ዘይጸንዕ፡ እምኔሁ።
11 እስመ፡ ቦ፡ ነገር፡ ብዙኅ፡ ዘያበዝኅ፡ ከንቶ።
=== chapter 7 ===
[Chapter 7]
1 ምንተ፡ ፈድፋዱ፡ ለሰብእ፡ መኑ፡ ውእቱ፡ ዘያአምር፡ ምንት፡ ውእቱ፡ ሠናይ፡ ለሰብእ፡ በሕይወቱ፡ እንዘ፡ ይኄልቍ፡ መዋዕለ፡ ሕይወቱ፡ ከንቱ፡ ወገብሮን፡ በጽላሎት፡ መኑ፡ ያየድዖ፡ ለሰብአ፡ ዘይከውን፡ እምድኅሬሁ፡ በመትሕተ፡ ፀሓይ።
2 ይኄይስ፡ ስም፡ ሠናይ፡ እምቅብእ፡ መዐዛ፡ ወዕለተ፡ ሞት፡ እምዕለተ፡ ልደት።
3 ይኄይስ፡ ሐዊረ፡ ቤተ፡ ላሕ፡ እምሐዊረ፡ ቤተ፡ ግዝእ፡ እስመ፡ ውእቱዝ፡ ደኃሪቱ፡ ለኵሉ፡ ሰብእ፡ ወዘሕያው፡ የሀብ፡ ሠናየ፡ ውስተ፡ ልቡ።
4 ይኄይስ፡ መዐት፡ እምሥሂቅ፡ እስመ፡ በእከየ፡ ገጽ፡ ትሤኒ፡ ልብ።
5 ልበ፡ ጠቢባን፡ ውስተ፡ ቤተ፡ ላሕ፡ ወልበ፡ አብዳን፡ ውስተ፡ ቤተ፡ ፍሥሐ።
6 ይኄይስ፡ ሰሚዐ፡ ተግሣጸ፡ ጥቡበ፡ እምብእሲ፡ ዘይሰምዕ፡ ማኅሌተ፡ አብድ።
7 ከመ፡ ቃለ፡ አሥዋክ፡ ታሕተ፡ ጽሀርት፡ ከማሁ፡ ሰሐቆሙ፡ ለአብዳን፡ ወዝኒ፡ ከንቱ።
8 እስመ፡ ትእግልት፡ ያንጎግዎ፡ ለጠቢብ፡ ወያሐጕል፡ ትፍሥሕተ፡ ልቡ።
9 ይኄይስ፡ ደኃሪት፡ ቃል፡ እምቀዳሚሁ፡ ይኄይስ፡ መስተዓግስ፡ እምዕቡየ፡ መንፈስ።
10 ኢትጐጕእ፡ በመንፈስከ፡ ለተምዕዖ፡ እስመ፡ መዐት፡ ውስተ፡ ሕፅነ፡ አብዳን፡ ተዐርፍ።
11 ኢትበል፡ ምንተ፡ ኮነ፡ እስመ፡ መዋዕለ፡ ትከት፡ ይኄይስ፡ እምእላንቱ፡ እስመ፡ አኮ፡ በጥበብ፡ ዘተስእልከ፡ በእንተዝ።
12 ሠናይ፡ ጥበብ፡ ምስለ፡ ዑቃቤ፡ ወፈድፋደ፡ ምስለ፡ እለ፡ ይሬእዩ፡ ፀሓየ።
13 እስመ፡ ጽላሎታ፡ ለጥበብ፡ ከመ፡ ጽላሎታ፡ ለብሩር፡ ወፈድፋደ፡ አእምሮ፡ ለጥበብ፡ ወታሐይዎ፡ ለዘ፡ አጥረያ።
14 ርኢ፡ ተግበሮ፡ ለእግዚኣ፡ ብሔር፡ መኑ፡ ውእቱ፡ ዘይክል፡ አሠንዮቶ፡ ለዘ፡ እግዚኣ፡ ብሔር፡ አጥወዮ።
15 በመዋዕል፡ ሠናይ፡ ሕየው፡ በፍሥሐ፡ ወርኢ፡ በዕለት፡ እኪት፡ ወዝኒ፡ ናሁ፡ ምስለዝ፡ ውእቱ፡ ገብረ፡ እግዚኣ፡ ብሔር፡ በእንተ፡ ነገር፡ ከመ፡ ኢይርከብ፡ ሰብእ፡ ዘእምድኅሬሁ፡ ወኢምንተ።
16 ኵሎ፡ ኅቡረ፡ ርኢኩ፡ በመዋዕለ፡ ሥራሕየ፡ ቦጸድቅ፡ ዘይትሐጐል፡ በጽድቁ፡ ወቦረሲዐ፡ ዘይሄሉ፡ በእከዩ።
17 ወኢትኩን፡ ጻደቀ፡ ፈድፋደ፡ ወኢትጠበብ፡ ፈድፋደ፡ ከመ፡ ኢትጌጊ።
18 ወኢትኅጣእ፡ ፈድፋደ፡ ወኢትኩን፡ ድሩከ፡ ከመ፡ ኢትሙት፡ ዘእንበለ፡ ጊዜከ።
19 ይኄይስ፡ ሀልዎተከ፡ በዝ፡ ወእምዝኒ፡ ኢታርኵስ፡ እዴከ፡ እስመ፡ ዘይፈርሆ፡ ለእግዚኣ፡ ብሔር፡ ይወፅእ፡ እምኵሉ።
20 ጥበብ፡ ትረድኦ፡ ለጠቢብ፡ እምዐሠርቱ፡ መኳንንተ፡ እለ፡ ሀለዉ፡ ውስተ፡ ሀገር።
21 እስመ፡ አልቦ፡ ሰብእ፡ ጻድቀ፡ ውስተ፡ ምድር፡ ዘይገብር፡ ሠናየ፡ ወኢይኤብስ።
22 ወውስተ፡ ኵሉ፡ ነገር፡ ዘይትናገሩ፡ ኢትሰድ፡ ልበከ፡ ከመ፡ ኢትስማዕ፡ ገብርከ፡ እንዘ፡ ይረግመከ።
23 እስመ፡ ብዙኀ፡ ይትሜአከከ፡ ወበፍናው፡ ብዙኅ፡ ያአክያ፡ ለልብከ፡ እስመ፡ ከመ፡ አንተኒ፡ ረገምክ፡ ባዕደ።
24 ዘንተ፡ ኵሎ፡ አመከርኩ፡ በጥበብ፡ አቤ፡ እጠበብ፡ ወይእቲ፡ ርሕቅት፡ እምኔየ።
25 ርኁቀ፡ እንዘ፡ ሀለወት፡ ወዕመቀ፡ ዕሙቅ፡ መኑ፡ ይረክባ።
26 ኦድኩ፡ አነ፡ ወልብየ፡ በአእምሮ፡ ወከመ፡ አሐሊ፡ ወእኅሥሣ፡ ለጥበብ፡ ወለሐሳብ፡ ወከመ፡ አእምር፡ ለረሲዓን፡ እበዶሙ፡ ወአጽህቆ፡ ወስፍጠታተ።
27 ወእርከባ፡ አነ፡ መራር፡ እሞት፡ ብእሲት፡ እንተ፡ ይእቲ፡ መሣግር፡ ወመርበብት፡ ልባ፡ ማእሰር፡ ውስተ፡ እዴሃ፡ ኄር፡ በቅድመ፡ እግዚኣ፡ ብሔር፡ ዘይትባበላሕ፡ እምኔሃ፡ ወዘይኤብስ፡ ይስገር፡ ባቲ።
28 ናሁ፡ ዘንተ፡ ረከብኩ፡ ይቤ፡ መክብብ፡ አሐተ፡ እምአሐቲ፡ ለረኪበ፡ ሕሊና።
29 ዘኀሠሠት፡ ነፍስየ፡ ወኢረኩበኩ፡ ወብእሲ፡ አሐደ፡ እምዐሠርቱ፡ ምእት፡ ረከብኩ፡ ወብእሲት፡ እምእሉ፡ ኵሎሙ፡ ኢረከብኩ።
30 ባሕቱ፡ ናሁ፡ ዘንተ፡ ረከብኩ፡ ዘገብረ፡ እግዚኣ፡ ብሔር፡ ወበጊዜሁ፡ ብእሲ፡ ራትዕ፡ ወእሙንቱ፡ የኀሡ፡ ሕሊና፡ ብዙኀ፡ መኑ፡ ያአምሮሙ፡ ለጠቢባን፡ ወመኑ፡ ያአምሮ፡ ፍካሬ፡ ቃሎሙ።
=== chapter 8 ===
[Chapter 8]
1 ጥበቡ፡ ለብእሲ፡ ያበርህ፡ ገጾ፡ ወዘአልቦ፡ ኃፍረተ፡ ውስተ፡ ገጹ፡ ይጸላእ።
2 አፈ፡ ንጉሥ፡ ዕቀብ፡ ወለቃለ፡ ማሐላ።
3 ኢትጐጕእ፡ ወእምቅድመ፡ ገጹ፡ ኅልፍ፡ ኢትቁም፡ በነገር፡ እኩይ፡ እስመ፡ ኵሉ፡ ዘፈቀደ፡ ይገብር።
4 ወከመ፡ ንጉሥ፡ ስሉጥ፡ ይትናገር፡ ወመኑ፡ ይብሎ፡ ምንተ፡ ገበርከ።
5 ዘየዐቅብ፡ ትእዛዘ፡ ኢያአምር፡ ቃለ፡ እከይ፡ ወጊዜሁ፡ ለፍትሕ፡ ያአምር፡ ልበ፡ ጠቢብ።
6 እስመ፡ ለኵሉ፡ ግብር፡ ቦ፡ ጊዜ፡ ፍትሕ፡ እስመ፡ አእምሮቱ፡ ለብእሲ፡ ጽኑዕ፡ ላዕሌሁ።
7 እስመ፡ አልቦ፡ ዘያአምር፡ ምንተ፡ ዘይከውን፡ እስመ፡ ዘይከውን፡ መኑ፡ ዘይነግሮ።
8 አልቦ፡ ዘይሤልጥ፡ በመንፈሱ፡ ለከሊዓ፡ መንፈስ፡ ኅቡረ፡ ወአልቦ፡ ዘይሤልጥ፡ በዕለተ፡ ሞቱ፡ ወአልቦ፡ መልዕክት፡ በዕለተ፡ ቀትል፡ ወኢታድኅን፡ ረሢዓ፡ ዘኀቤሃ።
9 ወኵሉ፡ ኅቡረ፡ ዘንተ፡ ርኢኩ፡ ወወሀብኩ፡ ልብየ፡ ውስተ፡ ኵሉ፡ ፍጥረት፡ ዘተፈጥረ፡ በመትሕተ፡ ፀሓይ፡ ዘመጠነ፡ ተሠልጠ፡ ሰብእ፡ ለአእክዮተ፡ ሰብእ።
10 አሜሃ፡ ርኢኩ፡ ረሢዓነ፡ እንዘ፡ ይበውዑ፡ ውስተ፡ መቃብር፡ ቅዱስ፡ ወዘእምቅዱሳን፡ ሖሩ፡ ወተወደሱ፡ በውስተ፡ ሀገር፡ እስመ፡ ከመዝ፡ ገብሩ፡ ወዝኒ፡ ከንቱ።
11 እስመ፡ አልቦ፡ ዘይከውን፡ ቅስተ፡ እምእለ፡ ይገብሩ፡ አኩየ፡ በፍጡን፡ በእንተዝ፡ አእረፈ፡ ልበ፡ ውሉደ፡ ሰብእ፡ ቦሙ፡ ለገቢረ፡ እከይ።
12 ዘአበሰ፡ ገብረ፡ ኃጢአተ፡ እምትከት፡ ወእምቅድሜሁ፡ እስመ፡ አነ፡ ኣአምር፡ ከመ፡ ቦሙ፡ ሠናይ፡ ለእለ፡ ይፈርህዎ፡ ለእግዚአ፡ ብሔር፡ ከመ፡ ይፍርሁ፡ እምቅድመ፡ ገጹ።
13 ወአልቦ፡ ሠናይት፡ ለረሢዕ፡ ወኢይነውኅ፡ መዋዕለ፡ ጽላሎቱ፡ ለዘኢይፈርህ፡ እምቅድመ፡ ገጹ፡ ለእግዚአብሔር።
14 ቦከንቱ፡ ዘተገብረ፡ ውስተ፡ ምድር፡ እስመ፡ ቦጻድቃን፡ ዘይበጽሕ፡ ላዕሌሆሙ፡ ግብረ፡ ረሢዓን፡ ወቦ፡ ረሢዓን፡ ዘይበጽሕ፡ ላዕሌሆሙ፡ ግብረ፡ ጸድቃን፡ ወእቤ፡ ዝኒ፡ ከንቱ፡ ውእቱ።
15 ወወደስክዋ፡ አነ፡ ለኵላ፡ ፍግዕ፡ እስመ፡ አልቦ፡ ሠናይ፡ ለሰብእ፡ እምታሕተ፡ ፀሓይ፡ ዘእንበለ፡ ዘበልዓ፡ ወሰትየ፡ ወተፈሥሐ፡ ወውእቱ፡ ዘሎቱ፡ አምፃማሁ፡ በመዋዕለ፡ ሕይወቱ፡ ዘወሀቦ፡ እግዚአብሔር፡ እምታሕተ፡ ፀሓይ።
16 በከመ፡ ወሀብኩ፡ ልብየ፡ ለአእምሮ፡ ጥበብ፡ ወከመ፡ እርአይ፡ ሥራሐ፡ ዘተገብረ፡ ዲበ፡ ምድር፡ እስመ፡ በዕለትኒ፡ ወበሌሊትኒ፡ ንዋም፡ ውስተ፡ አዕይንቲሁ፡ ዘይሬኢ፡ አልቦ።
17 ወርኢኩ፡ ኵሎ፡ ግብሮ፡ ለእግዚአብሔር፡ ከመ፡ ኢይክል፡ ሰብእ፡ ረኪበ፡ ኅቡረ፡ ዘተገብረ፡ በመትሕተ፡ ፀሓይ፡ እመ፡ ሚመጠነ፡ ኅሠሠ፡ ሰብእ፡ ኢይክል፡ ረኪበ፡ ወእመ፡ ሚመጠነ፡ ይቤ፡ ጠቢብ፡ ከመ፡ ያእምር፡ ኢይክል፡ ረኪበ፡ እስመ፡ ኅቡረ፡ ዘንተ፡ ኵሎ፡ ወሀብኩ፡ ልብየ፡ ወልብየ፡ ኅቡረ፡ ዘንተ፡ ኵሎ፡ ርእየት።
=== chapter 9 ===
[Chapter 9]
1 ከመ፡ ጻድቃን፡ ወጠበብት፡ ወምግባሮሙ፡ ውስተ፡ እደ፡ እግዚአብሔር፡ ፍቅረ፡ ወጸልአ፡ አልቦ፡ ዘያአምር፡ ሰብእ፡ ኵሉ፡ ቅድመ፡ ገጾሙ።
2 ወከንቱ፡ ውስተ፡ ኵሉ፡ አሐዱ፡ ድድቁ፡ ለጸድቅ፡ ወለረሲዕ፡ ለኄር፡ ወለእኩይ፡ ለንጹሕ፡ ወለርሱሕ፡ ለዘ፡ ይሠውዕ፡ ወለዘ፡ ኢይሠውዕ፡ ከመ፡ ኄር፡ ወለዘሂ፡ የኃጥእ፡ ከመ፡ ዘይምሕል፡ ወከመ፡ ዘሂ፡ ይፈርህ፡ ማሕላ።
3 ዝክቱ፡ በኵሉ፡ ዘተገብረ፡ መትሕተ፡ ፀሓይ፡ እስመ፡ አሐዱ፡ ድድቁ፡ ለኵሉ፡ ወልቦሙ፡ ለውሉደ፡ ሰብእ፡ ፈጸመ፡ እከየ፡ ወበሁከተ፡ ልቦሙ፡ ሕይወቶሙ፡ ወእምድኅሬሆሙ፡ ኀበ፡ ምውታን።
4 እስመ፡ መኑ፡ ውእቱ፡ ዘይሳተፍ፡ ምስለ፡ ኵሉ፡ ሕያዋን፡ በተስፋ፡ ከመ፡ ከልብ፡ ሕያው፡ ውእቱ፡ ይኄይስ፡ እምአንበሳ፡ ምዉት።
5 እስመ፡ ሕያዋን፡ ያአምሩ፡ ከመ፡ ይመውቱ፡ ወምውታንሰ፡ ኢያእሙሩ፡ ወኢምንተ፡ ወአልቦው፡ እንከ፡ ዐስበ፡ እስመ፡ ተረስዐ፡ ዝክሮሙ።
6 ወፍቅሮሙኒ፡ ወጽልኦሙኒ፡ ወቅንአቶሙኒ፡ ናሁ፡ ተሐጕለ፡ ወመክፈልት፡ አልቦሙ፡ እንከ፡ ውስተ፡ ዓለም፡ በኵሉ፡ ዘተገብረ፡ መትሕተ፡ ፀሓይ።
7 ነዓ፡ ብላዕ፡ በፍሥሐ፡ ኅብስተከ፡ ወስተይ፡ በልብከ፡ ኄር፡ ወይነከ፡ እስመ፡ ሠምረ፡ እግዚአብሔር፡ ምግበሪከ።
8 በኵሉ፡ ጊዜ፡ ይኩን፡ ኦልባሲከ፡ ንጹሐ፡ ወቅብዕ፡ አምርእስከ፡ ኢይርኀቅ።
9 ወርኢ፡ ሕይወተ፡ ምስለ፡ ብእሲትከ፡ እንተ፡ አፍቀርከ፡ ኵሎ፡ መዋፅለ፡ ሕይወትከ፡ እለ፡ ተውህባከ፡ እምታሕተ፡ ፀሓይ፡ ኵሎ፡ መዋዕለ፡ መዋዕል፡ እለ፡ ኮና፡ ለከ፡ እስመ፡ ውእቱ፡ መክፈልትከ፡ በሕይወትከ፡ ወበሥራኅከ፡ ዘትሰርኅ፡ መትሕተ፡ ፀሓይ።
10 ኵሎ፡ ዘትክል፡ እዴከ፡ ለገቢር፡ መጠነ፡ ኃይልከ፡ ግበር፡ እስመ፡ አልቦ፡ ግብር፡ ወህሊና፡ መጥበብ፡ ወአእምሮ፡ ውስተ፡ ገሃነም፡ ኀበ፡ ተሐውር፡ አንተ፡ ህየ።
11 ተመየጥኩ፡ ወርኢኩ፡ መትሕተ፡ ፀሓይ፡ ከመ፡ አኮ፡ ለቀሊላን፡ ረዊፅ፡ ወአኮ፡ ለጽኑዓን፡ ቀትል፡ ወአኮ፡ ለጠቢባን፡ እክል፡ ወአኮ፡ ለማእምራን፡ ብፅል፡ ወአኮ፡ ለእለ፡ ይሌብዉ፡ ጸጋ፡ እስመ፡ ጊዜ፡ ወድድቅ፡ ይዳድቆሙ፡ ለኵሎሙ።
12 እስመ፡ ኢያአምሩ፡ ጊዜሁ፡ ከመ፡ ዓሣት፡ እለ፡ ይሠገሩ፡ በመርበብት፡ እኩይ፡ ወከመ፡ አዕዋፍ፡ ዘይትኣኃዙ፡ በመሥገርት፡ ወከማሁ፡ ይሠገሩ፡ ውሉደ፡ ሰብእ፡ በጊዜ፡ እኩይ፡ ሶበ፡ ይወድቅ፡ ዲቤሆሙ፡ ግብተ።
13 ወናሁ፡ ዘንተኒ፡ ርኢኩ፡ ጥበበ፡ መትሕተ፡ ፀሓይ፡ ወዓባይ፡ ይእቲ፡ በኀቤየ።
14 ሀገር፡ ንስቲት፡ ወሰብእ፡ እለ፡ ውስቴታ፡ ኅዳጣን፡ ወአመ፡ መጽአ፡ ላዕሌሃ፡ ንጉሥ፡ ዐቢይ፡ ወዓገታ፡ ወየሐንጽ፡ ላዕሌሃ፡ ጥቅመ፡ ዓቢየ።
15 ረከበ፡ በውስቴታ፡ ብእሴ፡ ነዳየ፡ ወጠቢበ፡ ወያድኅን፡ ሀገረ፡ ውእቱ፡ ነዳይ፡ በጥበቡ፡ ወአልቦ፡ ዘተዘከሮ፡ ሰብእ፡ ኅቡረ፡ ለውእቱ፡ ብእሲ።
16 ወእቤ፡ አነ፡ ትኄይስ፡ ጥበብ፡ እምኀይል፡ ወጥበቡ፡ ለነዳይ፡ እንተ፡ ትትሜነን፡ ወነገሩ፡ ኢኮኑ፡ እለ፡ ይሰምዑ።
17 ነገረ፡ ጠበብት፡ በዕረፍት፡ ይሰማዕ፡ እምነ፡ ጽራኆሙ፡ ለእለ፡ ይኴንኑ፡ በእበድ።
18 ትኄይስ፡ ጥበብ፡ እምንዋየ፡ ሐቅል፡ ወእንዘ፡ የኃጥእ፡ አሐደ፡ የሐጕል፡ በረከተ፡ ብዙኃ።
=== chapter 10 ===
[Chapter 10]
1 ጽንጽንያ፡ ምውት፡ ያማስን፡ አፈወ፡ ቅብእ፡ ጥዑም፡ ይከብር፡ ንስቲት፡ ጥበብ፡ እምነ፡ ክብር፡ ዐቢይ፡ በእበድ።
2 ልበ፡ ጠቢብ፡ ውስተ፡ የማኑ፡ ወልቡ፡ ለአብድ፡ ውስተ፡ ፀጋሙ።
3 ወሶበ፡ የሐውር፡ አብድ፡ በፍኖት፡ ልቡ፡ የሐጾ፡ ወዘይኄሊ፡ ኵሎ፡ አብድ፡ ውእቱ።
4 እመ፡ መንፈሱ፡ ለዘ፡ ይሤለጥ፡ ዐርገ፡ ላዕሌከ፡ መካነከ፡ ኢትሕድግ፡ እስመ፡ ፈውስ፡ ያሐድግ፡ ኃጣይአ፡ ዐቢየ።
5 በእኩይ፡ ዘርኢኩ፡ መትሕተ፡ ፀሓይ፡ ከመ፡ ዘበኢያእምሮ፡ ወፅአ፡ ቅድመ፡ ይሴለጥ።
6 ተውህበ፡ አብድ፡ ለሉዓሌ፡ ዐቢይ፡ ወአብዕልት፡ መትሕተ፡ ይነብሩ።
7 ርኢኩ፡ እግብርት፡ ዲበ፡ አፍራስ፡ ወመኴንንት፡ እንዘ፡ የሐውሩ፡ ዲበ፡ ምድር፡ ከመ፡ አግብርት።
8 ዘይከሪ፡ ግበ፡ ውስቴቱ፡ ይወድቅ፡ ወዘይነሥት፡ ፀቈነ፡ ይነስኮ፡ አርዌ፡ ምድር።
9 ዘያስተፌልስ፡ እብነ፡ የሐምም፡ ቦሙ፡ ወዘይሤርጽ፡ ዕፀ፡ ይትመነደብ፡ ቦሙ።
10 አመ፡ ተመልኀ፡ ሐፂኑ፡ ወውእቱኒ፡ ግጾ፡ አስተዋለወለ፡ ወኀይል፡ ታኄይል፡ ወፍድፍድናሁ፡ ለጽኑዕ፡ ጥበብ።
11 እመ፡ ነሰከ፡ እርዌ፡ ምድር፡ ወኢፈወሰ፡ ረቃዪ፡ አልቦ፡ ዘይበቍዕ፡ ዘይረቂ።
12 ንባቡ፡ አፉሁ፡ ለጠቢብ፡ ሞገስ፡ ወከናፍሪሁ፡ ለአብድ፡ ያሰጥማሁ።
13 ቀዳሚ፡ ንባበ፡ አፉሁ፡ ዕበድ፡ ወደኃሪተ፡ አፉሁ፡ ፀዋግ።
14 አብድ፡ ያበዝኅ፡ ነገረ፡ ኢያአምር፡ ብእሲ፡ ምንተ፡ ዘኮነ፡ ወምንተ፡ ዘይከውን፡ እስመ፡ እምድኅሬሁ፡ መኑ፡ ይዜንዎ።
15 ፃማሁ፡ ለእብድ፡ ያሐምሞ፡ እስመ፡ ኢያአምር፡ ሐዊረ፡ ውስተ፡ ሀገር።
16 አሌ፡ ለኪ፡ ሀገር፡ እንተ፡ ንጉሥኪ፡ ወሬዛ፡ ወመኳንንትኪ፡ በነግህ፡ ይበልዑ።
17 ብፅዕት፡ እንቲ፡ ምድር፡ እንተ፡ ንጉሥኪ፡ ወልደ፡ አግዓዚ፡ ወመኳንንትኪ፡ በጊዜ፡ ይበልዑ፡ በኃይል፡ ወኢይትኃፈሩ።
18 በሐኬት፡ በጽርዓተ፡ እደው፡ ይወድቅ፡ ቤተ፡ ወያወጽሕ፡ ቤት፡ በእድው፡ ሐካያን።
19 ለሰሐቅ፡ ይሬስይዎ፡ ኅብስተ፡ ወወይን፡ ያስተፌሥሕ፡ ሕያዋነ፡ ለወርቅ፡ ይትኤዘዝ፡ ኵሉ፡ ኅቡረ።
20 ወአንተኒ፡ በህሊናከ፡ ንጉሠ፡ ኢትርግም፡ ወበውሳጢተ፡ ቤትከ፡ በዑላነ፡ ኢትርግም፡ እስመ፡ ዖፈ፡ ሰማይ፡ ያወፅእ፡ ቃለከ፡ ወዘቦ፡ ክንፍ፡ ይዜኑ፡ ንባበከ።
=== chapter 11 ===
[Chapter 11]
1 ፈኑ፡ ኅብስተከ፡ ውስተ፡ ገጸ፡ ማይ፡ እስመ፡ በብዙኅ፡ መዋዕል፡ ትረክቦ።
2 ሀብ፡ መክፈልተ፡ ለስብዐቱ፡ ወለሰማንቱ፡ እስመ፡ ኢታአምር፡ ዘይከውን፡ እኩይ፡ ውስተ፡ ምድር።
3 እመ፡ መልአት፡ ደመና፡ ዝናመ፡ ውስተ፡ ምድር፡ ይክዑ፡ ወእመ፡ ወድቀ፡ ዕፅ፡ እመኒ፡ ደቡበ፡ ወእመኒ፡ ሰሜነ፡ ወእደ፡ ወድቀ፡ ዕፅ፡ ህየ፡ ይሄሉ።
4 ዘየዐቅብ፡ ነፋሰ፡ ኢይዘርእ፡ ወዘይኔጽር፡ ደመናተ፡ ኢየዐጽድ።
5 እስመ፡ አልቦ፡ ዘያአምር፡ ምንት፡ ውእቱ፡ ፍኖተ፡ መንፈስ፡ ከመ፡ አዕፅምት፡ ውስተ፡ ከርሠ፡ ፅንስት፡ ከማሁ፡ ኢታአምር፡ ግብሮ፡ ለእግዚአብሔር፡ መጠነ፡ ገብረ፡ ኅቡረ፡ ከሎ።
6 በነግህ፡ ዝራእ፡ ዘርአከ፡ ወበምሴትኒ፡ ኢይኅድግ፡ እዴከ፡ እስመ፡ ኢታአምር፡ ዘይከውን፡ እመዝ፡ ውስተዝ፡ ወእመ፡ ክልኤሆሙ፡ ኅቡረ፡ ሠናይ።
7 ጥዑም፡ ብርሃን፡ ወሠናይ፡ ለአዕይንት፡ ለርኢየ፡ ኅብረ፡ ፀሓይ።
8 እስመ፡ እመኒ፡ ዓመታተ፡ ብዙኀ፡ ሐይወ፡ ሰብእ፡ በኵሎን፡ ይትፌሣሕ፡ ወይዜከር፡ መዋዕል፡ ጽልመት፡ ከመ፡ ብዙኃተ፡ ይከውና፡ ኵሉ፡ ዘይመጽእ፡ ከንቶ።
9 ተፈሣሕ፡ ብአሲ፡ በውርዙትከ፡ ወትሠኒ፡ ልበከ፡ በመዋዕለ፡ ውርዙትከ፡ ወሖር፡ በፍኖተ፡ ልብከ፡ ዘበንጹሕ፡ ወኢበርኢየ፡ ዐይንከ፡ ወአእምር፡ ከመ፡ በእንተዝ፡ ኵሉ፡ ዘያቀርበከ፡ እግዚኣ፡ ብሔር፡ ለኵነኔ።
10 ወአርሕቅ፡ መዐተ፡ እምልብከ፡ ወአግሕስ፡ እከየ፡ እምሥጋከ፡ እስመ፡ ውርዙት፡ ወኢያእምሮ፡ ከንቱ።
=== chapter 12 ===
[Chapter 12]
1 ተዘከሮ፡ ለፈጣሪከ፡ በመዋዕለ፡ ውርዙትከ፡ ዘእንበለ፡ ይምጻእ፡ መዋዕል፡ እኩይ፡ ወይበጽሕ፡ ዓመታተ፡ በእለ፡ ትብል፡ ኢኮነኒ፡ ቦቶን፡ ፈቃድየ።
2 ዘእንበለ፡ ይጽልም፡ ፀሓይ፡ ወብርሃነ፡ ወርኅ፡ ወከዋክብት፡ ወዘእንበለ፡ ይትመየጡ፡ ደመናት፡ ድኅረ፡ ዝናማት።
3 አመ፡ ዕለተ፡ ያንቀለቅሉ፡ ዐቃቢያነ፡ ቤት፡ ይትዐወለዉ፡ ሰብእ፡ ኀየልት፡ ወተፀርዓ፡ እለ፡ የሐርጻ፡ እስመ፡ ውሕዳ፡ ወይጸልማ፡ እለ፡ ይሬእያ፡ በጸዳል።
4 ወየዐፅዉ፡ ኆኃተ፡ በምሥያጣት፡ በድውይ፡ ቃል፡ እንተ፡ ተሐርጽ፡ ወትትነሣእ፡ በቃለ፡ ዖፍ፡ ወያሐስራ፡ ኵሎን፡ አዋልደ፡ ማኅሌት።
5 እስመ፡ እመልዕልት፡ ይሬእዩ፡ ወድንጋፄ፡ ውስተ፡ ፍኖት፡ ወይጸጊ፡ ከርካዕ፡ ወይገዝፍ፡ አንበጣ፡ ወይትፈረዘዝ፡ ቈልሕ፡ እስመ፡ ኆረ፡ ብእሲ፡ ውስተ፡ ቤተ፡ ዓለሙ፡ ወኦዱ፡ ጸጐ፡ እለ፡ የሐብሉ።
6 እስከ፡ ሶበ፡ እንበለ፡ ይትገፋዕ፡ ሕብሩ፡ ለብሩር፡ ወተቀጥቀጠ፡ አስተርእዮቱ፡ ለወርቅ፡ ወይትቀጠቀጥ፡ መሳብክ፡ ውስተ፡ ዐዘቅት፡ ወያንኰረኵር፡ መንኰራኵር፡ ውስተ፡ ዐዘቅት።
7 ወይገብእ፡ መሬት፡ ውስተ፡ ምድር፡ ከመ፡ ሀሎ፡ ወመንፈስ፡ ይገብእ፡ ኀበ፡ አግዚኣ፡ ብሔር፡ ዘወሀቦ።
8 ከንቱ፡ ከንቱ፡ ይቤ፡ መኩበብ፡ ኵሉ፡ ከንቱ።
9 ወፈድፋደ፡ እስመ፡ ኮነ፡ መክብብ፡ ጠቢበ፡ ወእስመ፡ ይሜህር፡ አእምሮ፡ ኵሎ፡ ሰብአ፡ ወእዝን፡ ይፈትን፡ ሰርጐ፡ ምስል።
10 ብዙኀ፡ ኀሠሠ፡ መክብብ፡ ከመ፡ ይርከብ፡ ነገረ፡ ፈቃድ፡ ወጽሑፍ፡ ርትዐ፡ ንበበ፡ ጽድቅ።
11 ነገረ፡ ጠቢባን፡ ከመ፡ መድጕጽ፡ ላህም፡ ወከመ፡ ቅትራት፡ ርሡን፡ እለ፡ እምኀበ፡ ትምህርት፡ ተውህቡ፡ እምአሐዱ፡ ኖላዊ።
12 ወፈድፋደ፡ እምውስቴቶሙ፡ ወልድየ፡ ኢትግበር፡ መጻሕፍተ፡ ብዙኀ፡ ዘአልቦ፡ ፍጻሜ፡ ወትምህርት፡ ብዙኅ፡ ጻማ፡ ለሥጋ።
13 ንበበ፡ ኵሉ፡ ነገር፡ ስማዕ፡ ወእግዚኣ፡ ብሔር፡ ፍራህ፡ ወትእዛዘቲሁ፡ ዕቀብ፡ እስመዝ፡ ውእቱ፡ ኵሉ፡ ብእሲ።
14 እስመ፡ ኵሉ፡ ፍጥረት፡ የዐቅብ፡ እግዚኣ፡ ብሔር፡ ለኵሉ፡ ዘኢያስተርአየ፡ እመ፡ ሠናየ፡ ወእመ፡ እኩየ። ፡ ስባሔ፡ ስባሔያት፡ ዘይሰመይ፡ ሰርድስሪን፡ ተፈጸመ፡ ቃለ፡ መክብብ፡ ወልደ፡ ዳዊት።
##### edition EOTCed (gez) — Text of the EOTC printed Bible
=== chapter 1 ===
[Chapter 1]
1 ቃለ፡ ሰሎሞን፡ መክብብ፡ ወልደ፡ ዳዊት፡ ንጉሠ፡ እስራኤል፡ በኢየሩሳሌም።
2 ከንቱ፡ ከንቱ፡ ይቤ፡ መክብብ፡ ኵሉ፡ ከንቱ።
3 ምንት፡ ፍድፋዴሁ፡ ለሰብእ፡ በኵሉ፡ ፃማሁ፡ ዘይፃሙ፡ እምታሕተ፡ ፀሐይ።
4 ትውልድ፡ የኃልፍ፡ ትውልድ፡ ይመጽእ፡ ወምድርሰ፡ ለዓለም፡ ትቀውም።
5 ይሠርቅ፡ ፀሐይ፡ ወየዐርብ፡ ፀሐይ፡ ወውስተ፡ መካኑ፡ ይገብእ፡ እንዘ፡ ይሠርቅ፡ ውእቱ፡ ህየ፡ ይገብእ፡ በይምን፡ ወየዐውድ፡ መንገለ፡ ሰሜን።
6 ዓውደ፡ የዓውድ፡ ወየሐውር፡ መንፈስ፡ ወበዑደቱ፡ ይገብእ፡ መንፈስ።
7 ወኵሎሙ፡ ውሒዛት፡ የሐውሩ፡ ውስተ፡ ባሕር፡ ወባሕርኒ፡ ኢኮነት፡ እንተ፡ ትመልእ፡ ውስተ፡ መካና።
8 ወእደ፡ የሐውሩ፡ አፍላግ፡ ህየ፡ ካዕበ፡ ይትመየጡ፡ ለሐዊር።
9 ኵሉ፡ ቃል፡ ዘበሕማም፡ ኢይክል፡ ብእሲ፡ ለተናግሮ፡ ወኢይጸግብ፡ ዓይን፡ በርእይ፡ ወኢይመልእ፡ ዕዝን፡ በአጽምኦ።
10 ወምንት፡ ውእቱ፡ ገብረ፡ እምዘተገብረ፡ ወምንት፡ ውእቱ፡ ዘኮነ፡ እምዘኮነ፡ ወአልቦ፡ ምንትኒ፡ ዘተገብረ፡ በመትሕተ፡ ፀሐይ።
11 ዘይነብብ፡ ወይብል፡ ናሁ፡ ዝ፡ ሐዲስ፡ ውእቱ፡ ወናሁ፡ ተገብረ፡ ዓለም፡ እምዓለም፡ ዘኮነ፡ እምቅድሜነ።
12 አልቦሙ፡ ዝክር፡ ለቀደምት፡ ምስለ፡ ደኃርት፡ ወለእለ፡ ደኃርትኒ፡ ምስለ፡ ዘይትገበር፡ በደኃርት።
13 አነ፡ መክብብ፡ ኮንኩ፡ ንጉሠ፡ እስራኤል፡ በኢየሩሳሌም።
14 ወወሀብኩ፡ ልብየ፡ ለኃሢሥ፡ ወለፈቲን፡ በጥበብ፡ በእንተ፡ ኵሉ፡ ዘተገብረ፡ መትሕተ፡ ፀሐይ፡ እስመ፡ ሥራኀ፡ እኩየ፡ ወሀበ፡ እግዚአብሔር፡ ለውሉደ፡ ሰብእ፡ ከመ፡ ይሥርኁ፡ ቦቱ።
15 ርኢኩ፡ ኵሎ፡ ፍጥረተ፡ ዘተገብረ፡ በመትሕተ፡ ፀሐይ፡ ወናሁ፡ ኵሉ፡ ከንቱ፡ ወፍትወተ፡ መንፈስ።
16 ጠዋይ፡ ኢይክል፡ ረቲዐ፡ ወሕፁፅ፡ ኢይክል፡ ተኈልቆ።
17 ተናገርኩ፡ አነ፡ በልብየ፡ በብሂል፡ ወናሁ፡ አፈድፈድኩ፡ ወአዕበይኩ፡ ጥበበ፡ እምእለ፡ ኮኑ፡ እምቅድሜየ፡ በኢየሩሳሌም፡ ወልብየ፡ ርእየት፡ ብዙኀ፡ ጥበበ፡ ወአእምሮ።
18 ወወሀብኩ፡ ልብየ፡ ለአእምሮ፡ ወለጥበብ፡ ጥበበ፡ ወአእምሮ፡ ወምሳሌ፡ ወትምህርተ፡ አእመርኩ፡ እስመ፡ ዝኒ፡ ከንቱ፡ ወፍትወተ፡ መንፈስ።
19 እስመ፡ በብዝኀ፡ ጥብ፡ ብዙኅ፡ ኀዘን፡ ወዘአፈድፈደ፡ አእምሮ፡ አፈድፈደ፡ ሕማመ።
=== chapter 2 ===
[Chapter 2]
1 እቤ፡ አነ፡ በልብየ፡ ነዓ፡ እምክርከ፡ በፍሥሓ፡ ወርኢ፡ በሠናይ፡ ወናሁ፡ እቤ፡ ዝኒ፡ ከንቱ፡ ወፍትወተ፡ መንፈስ።
2 ለሰሐው፡ እብሎ፡ አስፍጦ፡ ወለፍሥሓ፡ ምንት፡ ውእቱዝ፡ ግብር።
3 ወመከርኩ፡ እምልብየ፡ ጥበብ፡ ሰሐበቶ፡ ከመ፡ ወይን፡ ለሥጋየ፡ ወልብየ፡ መሀረኒ፡ ጥበበ፡ ወዝኒ፡ እኂዝ፡ ለፍሥሓ፡ እስከ፡ ሶበ፡ እሬኢ፡ ምንት፡ ውእቱ፡ ሠናይ፡ ለውሉደ፡ ሰበእ፡ ዘይገብሩ፡ እምታሕተ፡ ፀሐይ፡ በኊልቈ፡ መዋዕለ፡ ሕይወቶሙ።
4 አንሰ፡ መክብብ፡ አዕበይኩ፡ ምግባርየ፡ ወሐነጽኩ፡ ሊተ፡ አብያተ፡ ወተከልኩ፡ አዕፃዳተ፡ ወይን።
5 ወገበርኩ፡ ሊተ፡ አዕፃዳተ፡ ሐምል፡ ወገነታተ፡ ወተከልኩ፡ ውስቴቶሙ፡ ኵሎ፡ ዕፀወ፡ ዘይፈርዩ፡ በበዖታሆሙ፡ ወኵሉ፡ ዘኢይፈሪ።
6 ወገበርኩ፡ ሊተ፡ ምዕቃለ፡ ማያት፡ ከመ፡ እሥቂ፡ እምኔሆሙ፡ ኦመ፡ ወዕፀ፡ ዘይፈሪ፡ ገራህተ፡ ወገራውህ፡ አጥረይኩ።
7 አግብርተ፡ ወአእማተ፡ ወልደ፡ ቤት፡ አጥረይኩ፡ ጥሪተ፡ ወኖሎተ፡ አልሕምት፡ ወመራዕየ፡ አባግዕ፡ ብዙኀ፡ አጥረይኩ፡ እምኵሎሙ፡ እለ፡ ኮኑ፡ እምቅድሜየ፡ በኢየሩሳሌም።
8 ወአስተጋባእኩ፡ ብዙኀ፡ ብሩረ፡ ወወርቀ፡ ወጥሪተ፡ መንግሥት፡ ወበሐውርተ፡ ኀለይተ፡ ወኀላይያነ፡ ወፍግዐ፡ ምስለ፡ ውሉደ፡ ሰብእ።
9 መዘርተ፡ ወመዛርያነ፡ አዕበይኩ፡ ወአፈድፈድኩ፡ እምእለ፡ ኮኑ፡ እምቅድሜየ፡ በኢየሩሳሌም፡ ወጥበብየኒ፡ ቆመተኒ።
10 ኵሎ፡ ዘሰአላ፡ አዕይንትየ፡ ኢተመቈስኩ፡ ወኢከላእክዎ፡ ለልብየ፡ እምኵሉ፡ ፍሥሓ፡ እስመ፡ ልብየ፡ ተፈሥሐ፡ በኵሉ፡ ፃማየ፡ ወዝንቱ፡ ኮነ፡ መክፈልትየ፡ እምኵሉ፡ ሥራኅየ።
11 ወነፀርኩ፡ ዲበ፡ ኵሉ፡ ጥሪትየ፡ ዘገብራ፡ እደውየ፡ ወበሥራኅየ፡ ዘሠራዕኩ፡ ለገቢር፡ ወናሁ፡ ኵሉ፡ ከንቱ፡ ወፍትወተ፡ መንፈስ፡ ወአልቦ፡ ፍድፋዴ፡ እምታሕተ፡ ፀሐይ።
12 ወነፀርኩ፡ አነ፡ ከመ፡ እርአይ፡ ጥበበ፡ ወተሰፍጦ፡ ወዕበደ፡ መኑ፡ ብእሲ፡ ዘይተሉ፡ ድኅሬሃ፡ ለምክር፡ ወኵሎ፡ ምሳሌ፡ ዘገብረ፡ ላቲ።
13 ወርኢኩ፡ አነ፡ ከመቦ፡ ፍድፍድና፡ ለጠቢብ፡ እምዐብድ፡ ከመ፡ ፍድፋዴ፡ ብርሃን፡ እምጽልመት።
14 እስመ፡ ለጠቢብ፡ ዐዕይንቲሁ፡ ዲበ፡ ርእሱ፡ ወዐብድሰ፡ ውስተ፡ ጽልመት፡ የሐውር፡ ወአእመርኩ፡ አነ፡ ከመ፡ አሐዱ፡ ድድቅ፡ ይዳደቆሙ፡ ለክልኤሆሙ።
15 ወሶቤሃ፡ አነ፡ እቤ፡ በልብየ፡ በከመ፡ ይዳደቆ፡ ለዐብድ፡ ከማሁ፡ ሊተኒ፡ ይዳደቀኒ፡ ወለምንት፡ ጠበብኩ፡ አነ፡ አሜሃ፡ በከ፡ አፈድፈድኩ፡ ነቢበ፡ እስመ፡ ዝኒ፡ ከንቱ።
16 እስመ፡ አልቦ፡ ዝክር፡ ለጠቢብ፡ ምስለ፡ ዐብድ፡ ለዓለም፡ እስመ፡ ናሁ፡ መዋዕል፡ ይመጽእ፡ ወኵሉ፡ ይትረሳዕ፡ ወእፎ፡ ይመውት፡ ጠቢብ፡ ምስለ፡ ዐብድ።
17 ወጸላእኩ፡ ኵሎ፡ ህይወትየ፡ እስመ፡ እምእኩይ፡ ፍጥረት፡ ላዕሌየ፡ ሀሎ፡ ዘተገብረ፡ መትሕተ፡ ፀሐይ፡ እስመ፡ ኵሉ፡ ከንቱ፡ ወፍትወተ፡ መንፈስ።
18 ጸላእኩ፡ አነ፡ ኵሎ፡ ሥራኅየ፡ ዘአነ፡ እሠርኅ፡ እምታሕተ፡ ፀሐይ፡ እስመ፡ አኀድጎ፡ ለሰብእ፡ ዘይትወለድ፡ እምድኅሬየ።
19 ወመኑ፡ የአምር፡ እመ፡ ጠቢበ፡ ይከውን፡ ወእመ፡ አኮ፡ ዐብድ፡ ወእመ፡ አኮ፡ ይሤለጥ፡ በኵሉ፡ ዘሥራኅየ፡ ዘሠራኅኩ፡ ወተጠበብኩ፡ እምታሕተ፡ ፀሐይ፡ ወዝኒ፡ ከንቱ፡ ወፍትወተ፡ መንፈስ።
20 ወተመየጥኩ፡ አነ፡ ከመ፡ እትዋገዞ፡ ለልብየ፡ በኵሉ፡ ሥራኅየ፡ ዘሠራኅኩ፡ እምታሕተ፡ ፀሐይ።
21 እስመ፡ ቦ፡ ሰብእ፡ ዘይሠርኅ፡ ሎቱ፡ በጥበብ፡ ወአእምሮ፡ በጽኑዕ፡ ወበምክር፡ ወለብእሲ፡ ዘኢሠርኀ፡ ቦቱ፡ ይሁብ፡ መክፈልቶ፡ ወዝኒ፡ ከንቱ፡ ወእኩይ፡ ዓቢይ።
22 እስመ፡ ኢይከውኖ፡ ለብእሲ፡ በኵሉ፡ ፃማሁ፡ ወፍትወተ፡ ልቡ፡ ዘውእቱ፡ ይሠርኅ፡ እምታሕተ፡ ፀሐይ።
23 እስመ፡ ኵሉ፡ መዋዕሊሁ፡ ሕማም፡ ወመዓት፡ ወንታፌ፡ ሎቱ፡ ወበሌሊትኒ፡ ኢይነውም፡ ልቡ፡ ወዝኒ፡ ከንቱ፡ ውእቱ፡ ወፍትወተ፡ መንፈስ።
24 ወአልቦ፡ ሠናይ፡ ለሰብእ፡ ዘእንበለ፡ ዘበልዐ፡ ወሰትየ፡ ወዘያሬእያ፡ ሠናየ፡ ለነፍሱ፡ ወዝኒ፡ ዘርኢኩ፡ አነ፡ ከመ፡ እምእደ፡ እግዚአብሔር፡ ውእቱ።
25 ወመኑ፡ ውእቱ፡ ዘይበልዕ፡ ወይሰቲ፡ ዘእንበሌሁ።
26 እስመ፡ ለብእሲ፡ ኄር፡ ቅድመ፡ ገጹ፡ ወሀቦ፡ ጥበበ፡ ወአእምሮ፡ ወፍሥሐ።
27 ወለዘሰ፡ ይኤብስ፡ ወሀቦ፡ ሥራኀ፡ ከመ፡ ይወስክ፡ ወያስተጋብእ፡ ብዕለ፡ ከመ፡ የሀብ፡ ለኄር፡ ዘሀሎ፡ ቅድመ፡ ገጹ፡ ለእግዚአብሔር፡ ወዝኒ፡ ከንቱ፡ ወፍትወተ፡ መንፈስ።
=== chapter 3 ===
[Chapter 3]
1 ቦ፡ ለኩሉ፡ ዘመን፡ ወቦ፡ ጊዜ፡ ለኵሉ፡ ምግባር፡ እምታሕተ፡ ፀሐይ።
2 ጊዜ፡ ለጸኒስ፡ ወጊዜ፡ ለወሊድ።
3 ጊዜ፡ ለሕይወት፡ ወጊዜ፡ ለመዊት፡ ጊዜ፡ ለተኪል፡ ወጊዜ፡ ለመሊኅ፡ ዘተከሉ፡ ጊዜ፡ ለአቊስሎ፡ ወጊዜ፡ ለፈውሶ፡ ጊዜ፡ ለሐኒፅ፡ ወጊዜ፡ ለነሢት።
4 ጊዜ፡ ለብካይ፡ ወጊዜ፡ ለሰሐቅ፡ ጊዜ፡ ላህዎ፡ ወጊዜ፡ ለዘፊን።
5 ጊዜ፡ ለወርዎ፡ እብን፡ ወጊዜ፡ ለአስተጋብኦ፡ እብን፡ ጊዜ፡ ለተሐቅፎ፡ ወጊዜ፡ ለተራኅቆ፡ እምተሐቅፎ።
6 ጊዜ፡ ለኃሢሥ፡ ወጊዜ፡ ለኀጒል፡ ጊዜ፡ ለአቂብ፡ ወጊዜ፡ ለአውፅኦ።
7 ጊዜ፡ ለሰጢጥ፡ ወጊዜ፡ ለረፊእ፡ ጊዜ፡ ለአርምሞ፡ ወጊዜ፡ ለተናግሮ።
8 ጊዜ፡ ለአፍቅሮ፡ ወጊዜ፡ ለጽልእ፡ ጊዜ፡ ለጸብእ፡ ወጊዜ፡ ለሰላም።
9 ምንት፡ ፍድፋዴሁ፡ ለዘይገብር፡ በዘውእቱ፡ ይሠርኅ።
10 ርኢኩ፡ ኵሎ፡ ሥራኀ፡ ዘወሀበ፡ እግዚአብሄር፡ ለውሉደ፡ ሰብእ፡ ሥራኀ፡ ከመ፡ ይሥርኁ፡ ቦቱ።
11 ኵሉ፡ ሠናይ፡ ዘገብረ፡ በጊዜሁ፡ ወኵሎ፡ ኅቡረ፡ ወሀቦ፡ ለዓለም፡ ውስተ፡ ልቡ፡ ከመ፡ ኢይርከብ፡ ሰብእ፡ ግብረ፡ ዘገብረ፡ እግዚአብሔር፡ እምጥንቱ፡ እስከ፡ ተፍጻሜቱ።
12 አእመርኩ፡ ከመ፡ አልቦ፡ ሠናይ፡ እምውስቴቶሙ፡ ዘእንበለ፡ ዘተፈሥሐ፡ ወገብረ፡ ሠናየ፡ በሕይወቱ።
13 ወኵሉ፡ ዘበልዐ፡ ወሰትየ፡ ወርእየ፡ ሠናየ፡ እምኵሉ፡ ፃማሁ፡ ዝኒ፡ ሀብተ፡ እግዚአብሔር፡ ውእቱ።
14 አእመርኩ፡ ከመ፡ ኵሉ፡ ዘገብረ፡ እግዚአብሔር፡ ውእቱ፡ ይሄሉ፡ ለዓለም፡ ወእምውስቴቶሙ፡ ኢይትከሃል፡ ወስኮ፡ ወእምውስቴቶሙ፡ ኢይትከሃል፡ ነቲግ፡ ወእግዚአብሔር፡ ገብረ፡ ከመ፡ ይፍርሁ፡ እምቅድመ፡ ገጹ።
15 ወዘተገብረ፡ ናሁ፡ ውእቱ፡ ሀሎ፡ ወኵሉ፡ እምዘተገብረ፡ ናሁ፡ ተገብረ፡ ወእግዚአብሔር፡ የኀሥሦ፡ ለዘይሰድዶ።
16 ወዓዲ፡ ቦ፡ ዘርኢኩ፡ እምታሕተ፡ ፀሐይ፡ በመካነ፡ ጻድቅ፡ ህየ፡ ረሲዕ፡ ወበመካነ፡ ረሲዕ፡ ህየ፡ ጻድቅ።
17 ወበህየ፡ አነ፡ እቤ፡ በልብየ፡ ኅቡረ፡ ጻድቀ፡ ወረሲዐ፡ ይኴንን፡ እግዚአብሔር፡ እስመ፡ ቦ፡ ጊዜ፡ ለኵሉ፡ ምግባር።
18 ወበህየ፡ እቤ፡ አነ፡ በልብየ፡ በእንተ፡ ነገረ፡ ውሉደ፡ ሰብእ፡ ከመ፡ ይኴንኖሙ፡ እግዚአብሔር፡ ወከመዝ፡ ርኢኩ፡ ከመ፡ እንስሳ፡ እሙንቱ።
19 ወሎሙኒ፡ ጽድቅ፡ ለውሉደ፡ ሰብእ፡ ወድድቅ፡ ለእንስሳ፡ አሐዱ፡ ጽድቅ፡ ሎሙ፡ ከመ፡ ሞት፡ ዝ፡ ከማሁ፡ ሞቱ፡ ለዝ፡ ወአሐዱ፡ መንፈስ፡ ለኵሎሙ፡ ምንት፡ ፍድፋዴሁ፡ ለሰብእ፡ እም፡ እንስሳ፡ ወኢምንትኒ፡ እስመ፡ ኵሉ፡ ከንቱ።
20 ኵሉ፡ የሐውር፡ ውስተ፡ አሐዱ፡ መካን፡ ኵሉ፡ ኮነ፡ እመሬት፡ ወኵሉ፡ ይገብእ፡ ውስተ፡ መሬት።
21 መኑ፡ የአምር፡ መንፈሰ፡ ውሉደ፡ ሰብእ፡ ከመ፡ የዐርግ፡ ላዕለ፡ ወመንፈሰ፡ እንስሳ፡ ከመ፡ ይወርድ፡ ታሕተ፡ ውስተ፡ ምድር።
22 ወርኢኩ፡ ከመ፡ አልቦ፡ ሠናይ፡ ዘእንበለ፡ ዘተፈሥሐ፡ ሰብእ፡ በተግባሩ፡ እስመ፡ ውእቱ፡ መክፈልቱ፡ ወመኑ፡ ያመጽኦ፡ ከመ፡ ይርአይ፡ ዘይከውን፡ እምድኅሬሁ።
=== chapter 4 ===
[Chapter 4]
1 ወተመየጥኩ፡ አነ፡ ወርኢኩ፡ ኵሎ፡ ኅቡረ፡ ትዕግልተ፡ ዘይትገበር፡ እምታሕተ፡ ሰማይ።
2 ወናሁ፡ አንብዕ፡ ላዕለ፡ እለ፡ ይትዔገልዎሙ፡ ወአልቦ፡ ዘይናዝዞሙ፡ እምእለ፡ ይትዔገልዎሙ፡ በኃይል።
3 ወአስተኃየስክዎሙ፡ አነ፡ ለእለ፡ ሞቱ፡ ኅቡረ፡ እለ፡ ወድኡ፡ ሞተ፡ እምሕያዋን፡ ወእለ፡ እሙንቱ፡ ሕያዋን፡ እስከ፡ ይእዜ።
4 ወእምክልኤሆሙ፡ ይኄይስ፡ ዳሕፅ፡ ወዓዲ፡ ኢተፈጥሮ፡ ዘኢየአምር፡ ኵሎ፡ ገቢረ፡ እከይ፡ ዘተገብረ፡ መትሕተ፡ ፀሐይ።
5 ወርኢኩ፡ አነ፡ ኵሎ፡ ሥራኀ፡ ኅቡረ፡ ወኵሎ፡ ኃይለ፡ ምግባር፡ ከመ፡ ውእቱ፡ ቅንእ፡ ለብእሲ፡ እምኀበ፡ ቢጹ፡ ወዝኒ፡ ከንቱ፡ ወፍትወተ፡ መንፈስ።
6 ዐብድ፡ ሐቀፈ፡ እዴሁ፡ ወበልዐ፡ ሥጋሁ።
7 ሠናይ፡ ምልአ፡ እደ፡ በጽድቅ፡ እምነ፡ ክልኤቱ፡ ሕፍን፡ ዘበዓመፃ፡ ወዝኒ፡ ከንቱ፡ ወፍትወተ፡ መንፈስ።
8 ወተመየጥኩ፡ አነ፡ ወርኢኩ፡ ከንቶ፡ መትሕተ፡ ፀሐይ።
9 ወሀሎ፡ አሐዱ፡ ወአልቦ፡ ካልእ፡ ወልድ፡ ወእኊ፡ አልቦ፡ ወአልቦ፡ ፍጻሜ፡ ለኵሉ፡ ሥራሑ፡ ወዓይኑሂ፡ ኢይመልእ፡ ብዕለ፡ ወኢይቤ፡ ለመኑ፡ እሠርኅ፡ አነ፡ ወእቄቅያ፡ ለነፍስየ፡ እምብዕል፡ ወዝኒ፡ ከንቱ፡ ወሥራኅ፡ እኩይ፡ ውእቱ።
10 ይኄይሱ፡ ክልኤቱ፡ እምአሐዱ፡ እለ፡ ቦሙ፡ ዐስብ፡ ሠናይ፡ በፃማሆሙ።
11 እስመ፡ እመ፡ ወድቀ፡ አሐዱ፡ ያነሥኦ፡ ካልኡ፡ አሌ፡ ሎቱ፡ ለአሐዱ፡ እመ፡ ወድቀ፡ አልቦ፡ ካልእ፡ ዘያነሥኦ።
12 እስመ፡ እመ፡ ኖሙ፡ ክልኤሆሙ፡ ይትማወቁ፡ ወአሐዱሰ፡ እፎ፡ ይትማወቅ።
13 ወእመ፡ ፀንዐ፡ ክልኤሆሙ፡ ይትቃወምዎ፡ ወፈትል፡ ሥሉስ፡ ፍጡነ፡ ኢይትበተክ።
14 ይኄይስ፡ ቅኑይ፡ ነዳይ፡ ወጠቢብ፡ እምንጉሥ፡ ልሂቅ፡ ወዐብድ፡ ዘኢየአምር፡ ለነጽሮ፡ ከመ፡ እምቤተ፡ ሞቅሕ፡ ይወጽእ፡ ለነጊሥ፡ እስመ፡ በመንግሥቱ፡ ኮነ፡ ነዳየ።
15 ወርኢኩ፡ አነ፡ ኵሎ፡ ኅቡረ፡ እለ፡ ሕያዋን፡ እለ፡ ያንሶስዉ፡ መትሕተ፡ ፀሐይ፡ ምሳሌ፡ ወሬዛ፡ ካልእ፡ ህየንቴሁ፡ ይትነሣእ።
16 ወአልቦ፡ ፍጻሜ፡ ለኵሉ፡ ሕዝብ፡ ለኵሎሙ፡ እለ፡ ኮኑ፡ እምቅድሜሁ፡ እስመ፡ ደኃርትኒ፡ ኢይትፌሥሑ፡ ቦቱ፡ እስመ፡ ዝኒ፡ ከንቱ፡ ወፍትወተ፡ መንፈስ።
=== chapter 5 ===
[Chapter 5]
1 ዕቀብ፡ እገሪከ፡ ሶበ፡ ተሐውር፡ ውስተ፡ ቤተ፡ እግዚአብሔር፡ ወቅረብ፡ ለሰሚዐ፡ ትምህርቶሙ፡ ለጠቢባን፡ ዓዲ፡ ተዓቀብ፡ እምነ፡ ሀብቶሙ፡ ለዓብዳን፡ መሥዋዕተ፡ እስመ፡ ኢኮኑ፡ ማእምራን፡ ለገቢረ፡ ሠናይ።
2 ወዓዲ፡ ተዓቀብ፡ ከመ፡ ኢትጐጒዕ፡ በአፉከ፡ ወበልብከሂ፡ ኢትጐጒዕ፡ ለአውጽኦ፡ ቃል፡ ቅድመ፡ ገጸ፡ እግዚአብሔር፡ እስመ፡ እግዚአብሔር፡ ውስተ፡ ሰማይ፡ ላዕለ፡ ወአንተሰ፡ ውስተ፡ ምድር፡ ታሕተ፡ ወበእንተዝ፡ ይኩን፡ ነገርከ፡ ኅዳጠ።
3 እስመ፡ ይመጽእ፡ ሕልም፡ በብዙኅ፡ መከራ፡ ወቃለ፡ ዕበድ፡ በብዙኅ፡ ነገር።
4 እምከመ፡ ጸለይከ፡ ጸሎተ፡ ኢታጐንዲ፡ ውኂቦታ፡ እስመ፡ ኢኮነ፡ ፈቃዱ፡ አንተሰ፡ በከመ፡ ጸለይከ፡ ጸሎተ፡ ሀብ።
5 ይኄይስ፡ ኢጸልዮትከ፡ እምጸልዮትከ፡ ዘበኢውሂብ።
6 ኢተሀብ፡ አፉከ፡ ለአበሳ፡ ሥጋከ፡ ወኢትበል፡ በቅድመ፡ እግዚአብሔር፡ በኢያእምሮ፡ ውእቱ፡ ከመ፡ ኢይትመዓፅ፡ እግዚአብሔር፡ ላዕሌከ፡ በእንተ፡ ቃልከ፡ ወኢያማስን፡ ግብረ፡ አደዊከ።
7 እስመ፡ ብዙኅ፡ ሕልም፡ ከንቱ፡ ወንባብኒ፡ ብዙኅ፡ ከንቱ፡ ወኅቡረ፡ እግዚአብሔር፡ ፍራህ፡ ከመ፡ ቀዳሚ።
8 እመ፡ ትዕግልተ፡ ነዳይ፡ ወሀይደ፡ ርኢከ፡ በብሔር፡ ፍታሕ፡ ጽድቀ፡ ወኢታንክር፡ በምግባሩ፡ እስመ፡ ልዑል፡ መልዕልተ፡ ልዑላን፡ የዓቅበከ፡ ወልዑል፡ ዲቤሆሙ፡ ፈድፋደ፡ እምድር፡ ወላዕለ፡ ኵሉ፡ ውእቱ።
9 ወንጉሥ፡ ዲበ፡ ወፍረ፡ ሐረስት።
10 ዘያፈቅር፡ ብሩረ፡ ኢይጸግብ፡ ፍሩረ፡ ወዘኒ፡ አፍቀረ፡ ብዙኀ፡ እክለ፡ ወዝኒ፡ ከንቱ፡ ውእቱ።
11 እስመ፡ ለብዙኅ፡ ጥሪት፡ ብዙኃን፡ ይበልዕዎ፡ ወምንት፡ ጽንዑ፡ ለዘይቀርብ፡ ዘእንበለ፡ ርእየ፡ ዓይን።
12 ጥዑም፡ ንዋሙ፡ ለገብር፡ ለእመ፡ ኅዳጠ፡ በልዐ፡ ወለእመ፡ ብዙኀ፡ በልዐ፡ ወለዘአብዝኀሰ፡ ብዕለ፡ አልቦ፡ ዘየኃድጎ፡ ይኑም።
13 ቦ፡ ደዌ፡ እንተ፡ ርኢኩ፡ መትሕተ፡ ፀሐይ፡ ብዕል፡ ዘይትዓቀብ፡ በኀበ፡ ዘአጥረዩ፡ በእከይ።
14 ወይትኀጐል፡ ውእቱ፡ ብዕል፡ በንታፌ፡ እኩይ፡ ወወለደ፡ ወልደ፡ አልቦ፡ ውስተ፡ እዴሁ፡ ወኢምንትኒ።
15 በከመ፡ ወፅአ፡ እምከርሠ፡ እሙ፡ ዕራቆ፡ ይትመየጥ፡ ለገቢእ፡ በከመ፡ ወፅአ፡ ወአልቦ፡ ዘይነሥእ፡ እምፃማሁ፡ ከመ፡ ይሑር፡ ምስሌሁ።
16 ወዝኒ፡ እኩይ፡ ደዌ፡ ውእቱ፡ እስመ፡ በከመ፡ ወፅአ፡ ከማሁ፡ የሐውር።
17 ምንት፡ ፍድፋዴሁ፡ ለዘይፃሙ፡ ለነፍሱ፡ እስመ፡ ኵሎን፡ መዋዕሊሁ፡ ውስተ፡ ጽልመት፡ ወላህ፡ ወቊጥዓ፡ ብዙኅ፡ ወደዌ፡ ወኀዘን።
18 ወባሕቱ፡ ናሁ፡ ዘርኢኩ፡ አነ፡ ኄርት፡ ዘይእቲ፡ ሠናይት፡ በልዕ፡ ወሰትይ፡ ወርእየ፡ ፍግዕ፡ በኵሉ፡ ሥራኁ፡ ዘሠርኀ፡ መትሕተ፡ ፀሐይ፡ በኊልቈ፡ መዋዕሊሁ፡ ዘወሀቦ፡ እግዚአብሔር፡ እስመ፡ ውእቱ፡ መክፈልቱ።
19 ወኵሉ፡ ሰብእ፡ ዘወሀቦ፡ እግዚአብሔር፡ ብዕለ፡ ወጥሪተ፡ ወአሥለጠ፡ ቦቱ፡ ከመ፡ ይብላዕ፡ እምውስቴቱ፡ ወይንሣእ፡ መክፈልቶ፡ ወይትፈሣሕ፡ እምፃማሁ፡ ዝኒ፡ ሀብተ፡ እግዚአብሔር፡ ውእቱ።
20 እስመ፡ አኮ፡ ብዙኀ፡ ዘይዜከር፡ በኵሉ፡ መዋዕለ፡ ሕይወቱ፡ እስመ፡ እግዚአብሔር፡ ያሠርኆ፡ በፍትወተ፡ ልቡ።
=== chapter 6 ===
[Chapter 6]
1 ቦ፡ እኩይ፡ ዘርኢኩ፡ እምታሕተ፡ ፀሐይ፡ ወብዝኅት፡ ይእቲ፡ በላዕለ፡ ኵሉ፡ ሰብእ።
2 ብእሲ፡ ዘወሀቦ፡ እግዚአብሔር፡ ብዕለ፡ ወጥሪተ፡ ወክብረ፡ ወአልቦ፡ ዘይከልኣ፡ ለነፍሱ፡ እምኵሉ፡ ዘፈተወት፡ ወኢያሥለጦ፡ እግዚአብሔር፡ ከመ፡ ይባላዕ፡ እምኔሁ፡ እስመ፡ ብእሲ፡ ነግድ፡ ይበልዖ፡ ወዝኒ፡ ከንቱ፡ ውእቱ፡ ወደዌ፡ እኪት።
3 ወለእመ፡ ወለደ፡ ብእሴ፡ ምእተ፡ ወብዙኀ፡ ዓመታተ፡ ኀይወ፡ ወብዙኀ፡ ኮነ፡ መዋዕለ፡ ዓመታቲሁ፡ ወነፍሱሂ፡ ኢትጸግብ፡ እምሠናይት፡ ወግንዘቱሂ፡ ኢኮኖ፡ እቤ፡ አነ፡ ይኄይስ፡ እምኔሁ፡ ዳሕፅ።
4 እስመ፡ በከንቱ፡ መጽአ፡ ወውስተ፡ ጽልመት፡ የሐውር፡ ወበጽልመት፡ ስሙ፡ ይትከደን።
5 ወፀሐየኒ፡ ኢርእየ፡ ወኢያእመረ፡ ዕረፍቱ፡ ለዝ፡ እምዝ።
6 ወሶበ፡ ሐይወ፡ ዓሠርተ፡ ምእተ፡ ምሕዋረ፡ ዓመት፡ ወሠናይተ፡ ኢርእየ፡ አኮኑ፡ ውስተ፡ መካን፡ አሐዱ፡ ኵሉ፡ የሐውር።
7 ወኵሉ፡ ሥራኁለሰብእ፡ በአፉሁ፡ ወነፍሱሰ፡ ኢትመልእ፡ ብዕለ።
8 ምንት፡ ፍድፋዴሁ፡ ለጠቢብ፡ እምዐብድ፡ በእንተ፡ ምንት፡ ነዳይ፡ የአምር፡ ሐዊረ፡ ቅድመ፡ ሕይወት።
9 ይኄይስ፡ ርእይ፡ በዓይን፡ እምኀዊር፡ በነፍስ፡ ወዝኒ፡ ከንቱ፡ ወፍትወተ፡ ነፍስ።
10 ኵሉ፡ ዘኮነ፡ ናሁ፡ ተሰምየ፡ ስሙ፡ ወተአምረ፡ ከመ፡ ውእቱ፡ ሰብእ፡ ወኢይክል፡ ተጋእዞ፡ ምስለ፡ ዘይፀንዕ፡ እምኔሁ።
11 እስመቦ፡ ከንቶ፡ ነገረ፡ ዘያበዝኅ፡ ምንት፡ ፍድፋዴሁ፡ ለሰብእ።
12 መኑ፡ ውእቱ፡ ዘየአምር፡ ምንት፡ ውእቱ፡ ሠናይ፡ ለሰብእ፡ በሕይወቱ፡ እንዘ፡ ኊልቈ፡ መዋዕለ፡ ሕይወቱ፡ ከንቱ፡ ወግብሩ፡ ከመ፡ ጽላሎት፡ መኑ፡ ያየድዖ፡ ለሰብእ፡ ዘይከውን፡ እምድኅሬሁ፡ በታሕተ፡ ፀሐይ።
=== chapter 7 ===
[Chapter 7]
1 ይኄይስ፡ ስም፡ ሠናይ፡ እምቅብዐ፡ መዐዛ፡ ወዕለተ፡ ሞት፡ እምዕለተ፡ ልደት።
2 ይኄይስ፡ ሐዊረ፡ ቤተ፡ ላህ፡ እምኀዊረ፡ ቤተ፡ ግዕዝ፡ እስመ፡ ውእቱዝ፡ ደኃሪቱ፡ ለኵሉ፡ ሰብእ፡ ወዘሕያው፡ የሀብ፡ ሠናየ፡ ውስተ፡ ልቡ።
3 ይኄይስ፡ መዓት፡ እምሰሐቅ፡ እስመ፡ በአእክዮ፡ ገጽ፡ ይሤኒ፡ ልብ።
4 ልበ፡ ጠቢባን፡ ውስተ፡ ቤተ፡ ላህ፡ ወልበ፡ ዐብዳንሰ፡ ውስተ፡ ቤተ፡ ፍሥሓ።
5 ይኄይስ፡ ሰሚዐ፡ ተግሣፀ፡ ጠቢብ፡ እምብእሲ፡ ዘይሰምዕ፡ ማኅሌተ፡ ዐብድ።
6 ከመ፡ ቃለ፡ አሥዋክ፡ ታሕተ፡ ጽሕርት፡ ከማሁ፡ ሰሐቆሙ፡ ለዐብዳን፡ ወዝኒ፡ ከንቱ፡ ውእቱ።
7 እስመ፡ ትዕግልት፡ ያንጐግዎ፡ ለጠቢብ፡ ወያኃጒል፡ ትግዕሥተ፡ ልቡ።
8 ይኄይስ፡ ደኃሪ፡ ቃል፡ እምቀዳሚሁ፡ ወይኄይስ፡ መስተዓግስሥ፡ እምዕቡየ፡ መንፈስ።
9 ኢትጐጒዕ፡ በመንፈስከ፡ ለተምዖ፡ እስመ፡ መዓት፡ ውስተ፡ ኅፅነ፡ ዐብዳን፡ ተዐርፍ።
10 ኢትበል፡ ምንተ፡ ኮነ፡ እስመ፡ መዋዕለ፡ ትካት፡ ይኄይስ፡ እምእላንቱ፡ እስመ፡ አኮ፡ በጥበብ፡ ዘተስእልከ።
11 ወበእንተዝ፡ ሠናይ፡ ጥበብ፡ ምስለ፡ ዑቃቤ፡ ወፈድፋደሰ፡ ለእለ፡ ይሬእዩ፡ ፀሐየ።
12 እስመ፡ ጽላሎታ፡ ለጥበብ፡ ይኄይስ፡ እምጽላሎታ፡ ለብሩር፡ ወፈድፋደሰ፡ አእምሮታ፡ ለጥበብ፡ ወታሐይዎ፡ ለዘአጥረያ።
13 ርኢ፡ ተግባሮ፡ ለእግዚአብሔር፡ ወመኑ፡ ውእቱ፡ ዘይክል፡ አርትዖቶ፡ ለዘእግዚአብሔር፡ አጥወዮ።
14 በመዋዕለ፡ ሠናይ፡ ሕየው፡ በፍሥሓ፡ ወርኢ፡ በዕለት፡ እኪት፡ ዝኒ፡ ናሁ፡ ወምሰሉ፡ ለዘውእቱ፡ ገብረ፡ እግዚአብሔር።
15 በእንተ፡ ነገረ፡ ውሉደ፡ ሰብእ፡ ከመ፡ ኢይርከብ፡ ሰብእ፡ ዘእምድኅሬሁ፡ ወኢምንትኒ፡ ኵሎ፡ ኅቡረ፡ ርኢኩ፡ በመዋዕለ፡ ሥራኅየ፡ ቦ፡ ጻድቅ፡ ዘይትኃጐል፡ በጽድቁ፡ ወቦ፡ ረሲዕ፡ ዘይሄሉ፡ በእከዩ።
16 ኢትኩን፡ ጻድቀ፡ ፈድፋደ፡ ወኢትጠበብ፡ ፈድፋደ፡ ከመ፡ ኢትጌጊ፡ ወኢትኅጣእ፡ ፈድፋደ።
17 ወኢትኩን፡ ድሩከ፡ ከመ፡ ኢትሙት፡ ዘእንበለ፡ ጊዜሁ።
18 ይኄይስ፡ ሀልዎትከ፡ በዝ፡ እምዝ፡ ወኢታርኵስ፡ እዴከ፡ ፍርሆ፡ ለእግዚአብሔር፡ እስመ፡ ዘይፈርሆ፡ ለእግዚአብሔር፡ ይወፅእ፡ እምኵሉ።
19 ጥበብ፡ ትረድኦ፡ ለጠቢብ፡ እምዓሠርቱ፡ ምእት፡ መኳንንት፡ እለ፡ ሀለዉ፡ ውስተ፡ ሀገር።
20 እስመ፡ አልቦ፡ ሰብእ፡ ጻድቅ፡ ውስተ፡ ምድር፡ ዘይገብር፡ ሠናየ፡ ወኢይኤብስ።
21 ወውስተ፡ ኵሉ፡ ነገር፡ ዘይትናገሩ፡ ኢትሰድ፡ ልበከ፡ ከመ፡ ኢትስማዕ፡ ገብርከ፡ እንዘ፡ ይረግመከ፡ እስመ፡ ብዙኀ፡ ይትመዓዓከ፡ ልብካ፡ ወበፍናው፡ ብዙኅ፡ የአክያ፡ ለልብከ፡ ከመ፡ አንተኒ፡ ረገምከ፡ ባዕደ።
22 ወዘንተ፡ ኵሎ፡ አምከርኩከ፡ በጥበብ፡ ወእቤ፡ እጠበብ።
23 ወይእቲ፡ ርኅቅት፡ እምኔየ፡ ርኁቀ፡ እንዘ፡ ሀለወት፡ ወዕመቀ፡ ዕመቅ፡ መኑ፡ ይረክባ።
24 ዖድኩ፡ አነ፡ በልብ፡ ለአእምሮ፡ ከመ፡ አሐሊ፡ ወእኅሥሣ፡ ለጥበብ፡ ወለሐሳብ፡ ወከመ፡ አእምር፡ ለረሲዓን፡ ዕበዶሙ፡ ወአጽሕቆ፡ ስሕተታት።
25 ወእረከብ፡ ኪያሃ፡ አነ፡ መራረ፡ እሞት፡ ብእሲት፡ እንተ፡ ይእቲ፡ መሥገርት፡ ወመርበብት፡ ልባ፡ ወማእሰር፡ ውስተ፡ እዴሃ፡ ኄር፡ በቅድመ፡ እግዚአብሔር፡ ዘይትባላሕ፡ እምኔሃ፡ ወዘይኤብስሰ፡ ይሠገር፡ ባቲ።
26 ናሁ፡ ዘንተ፡ ረከብኩ፡ ይቤ፡ መክብብ፡ አሐተ፡ እምአሐቲ፡ ለረኪበ፡ ሕሊና፡ ዘኀሠሠት፡ ነፍስየ።
27 ወኢረከብኩ፡ ወብእሴሰ፡ አሐደ፡ እምዓሠርቱ፡ ምእት፡ ረከብኩ፡ ወብእሲተሰ፡ እምውስተ፡ ዝኵሉ፡ ኢረከብኩ።
28 ባሕቱ፡ ናሁ፡ ዘንተ፡ ረከብኩ፡ ዘገብረ፡ እግዚአብሔር፡ በጊዜሁ፡ ብእሴ፡ ራትዐ፡ ወውእቱ፡ የኃሥሥ፡ ሕሊና፡ ብዙኀ።
=== chapter 8 ===
[Chapter 8]
1 መኑ፡ የአምኖሙ፡ ለጠቢባን፡ ወመኑ፡ የአምር፡ ፈክሮ፡ ቃሎሙ፡ ጥበቡ፡ ለብእሲ፡ ያበርህ፡ ገጾ፡ ወዘአልቦ፡ ኀፍረት፡ ውስተ፡ ገጹ፡ ይጸላእ።
2 ወልድየ፡ አፈ፡ ንጉሥ፡ ዕቀብ፡ ወለቃለ፡ መሐላ፡ ኢትጐጒዕ።
3 እምቅድመ፡ ገጹ፡ ኅልፍ፡ ወኢትቁም፡ በነገር፡ እኩይ፡ እስመ፡ ኵሎ፡ ዘፈቀደ፡ ይገብር።
4 ወከመ፡ ንጉሥ፡ ሥሉጠ፡ ይትናገር፡ ወመኑ፡ ይብሎ፡ ምንተ፡ ገበርከ።
5 ዘየዓቅብ፡ ትእዛዞ፡ ኢየአምር፡ ቃለ፡ እኩየ፡ ወጊዜሁ፡ ለፍትሕ፡ የአምር፡ ልበ፡ ጠቢብ።
6 እስመ፡ ለኵሉ፡ ግብር፡ ቦ፡ ጊዜ፡ ወፍትሕ፡ እስመ፡ አእምሮቱ፡ ለብእሲ፡ ጽኑዕ፡ ላዕሌሁ።
7 እስመ፡ አልቦ፡ ዘየአምር፡ ምንተ፡ ዘኮነ፡ ወዘይከውንሂ፡ መኑ፡ ይነግር።
8 ወአልቦ፡ ብእሲ፡ ዘይሤለጥ፡ በመንፈሱ፡ ለከሊአ፡ መንፈስ፡ ኅቡረ፡ ወአልቦ፡ ዘይሤለጥ፡ በዕለተ፡ ሞት፡ ወአልቦ፡ መልእክት፡ በዕለተ፡ ቀትል፡ ወኢታድኅን፡ ረሲዓነ፡ ዘኀቤሃ።
9 ኵሎ፡ ኅቡረ፡ ርኢኩ፡ ወወሀብኩ፡ ልብየ፡ ውስተ፡ ኵሉ፡ ዘፍጥረት፡ ዘተፈጥረ፡ መትሕተ፡ ፀሐይ፡ ዘመጠነ፡ ተሠልጠ፡ ሰብእ፡ ለአእክዮተ፡ ሰብእ።
10 አሜሃ፡ ርኢኩ፡ ረሲዓነ፡ ውስተ፡ መቃብር፡ ቅዱስ፡ እንዘ፡ ይበውኡ፡ ወዘእምቅዱሳን፡ ሖሩ፡ ወተወደሱ፡ በውስተ፡ ሀገር፡ እስመ፡ ከመዝ፡ ገብሩ፡ ዝኒ፡ ከንቱ።
11 እስመ፡ አልቦ፡ ዘይከውን፡ ቅስት፡ እምእለ፡ ገብሩ፡ እኩየ፡ በፍጡን፡ በእንተ፡ ዝንቱ፡ አዕረፈ፡ ልበ፡ ውሉደ፡ ሰብእ፡ ቦሙ፡ ለገቢረ፡ እከይ፡ ዘአበሰ፡ ወገብረ፡ ኃጢአተ፡ እምትካት፡ ወእምቅድሜሁ።
12 እስመ፡ አአምር፡ አነ፡ ከመ፡ ቦ፡ ሠናይት፡ ለእለ፡ ይፈርህዎ፡ ለእግዚአብሔር፡ ከመ፡ ይፍርሁ፡ እምቅድመ፡ ገጹ።
13 ወአልቦ፡ ሠናይት፡ ለረሲዕ፡ ወኢነውኅ፡ መዋዕለ፡ ጽላሎቱ፡ ዘኢይፈርህ፡ እምቅድመ፡ ገጹ፡ ለእግዚአብሔር።
14 ወቦ፡ ከንቱ፡ ዘተገብረ፡ መትሕተ፡ ፀሐይ፡ ውስተ፡ ምድር፡ እስመቦ፡ ጻድቃን፡ ዘይበጽሕ፡ ላዕሌሆሙ፡ ግብረ፡ ረሲዓን፡ ወቦ፡ ረሲዓን፡ ዘይበጽሕ፡ ላዕሌሆሙ፡ ግብረ፡ ጻድቃን፡ ወእቤ፡ ዝኒ፡ ከንቱ።
15 ወወደስክዋ፡ አነ፡ ለኵላ፡ ፍግዕ፡ እስመ፡ አልቦ፡ ሠናይ፡ ለሰብእ፡ እምታኅተ፡ ፀሐይ፡ ዘእንበለ፡ ዘበልዐ፡ ወሰትየ፡ ወተፈሥሐ፡ ወውእቱሰ፡ ዘሎቱ፡ እምፃማሁ፡ በመዋዕለ፡ ሕይወቱ፡ ዘወሀቦ፡ እግዚአብሔር፡ እምታሕተ፡ ፀሐይ።
16 እስመ፡ ወሀብኩ፡ ልብየ፡ ለአእምሮ፡ ጥበብ፡ ወከመ፡ እርአይ፡ ሥራኀ፡ ዘተገብረ፡ ዲበ፡ ምድር፡ እስመ፡ በመዓልትኒ፡ ወበሌሊትኒ፡ ንዋም፡ ውስተ፡ አዕይንቲሁ፡ ዘይሬኢ፡ አልቦ።
17 ወርኢኩ፡ ኵሎ፡ ግብሮ፡ ለእግዚአብሔር፡ ከመ፡ ኢይክል፡ ሰብእ፡ ረኪበ፡ ኅቡረ፡ ዘተገብረ፡ መትሕተ፡ ፀሐይ፡ እመ፡ ሚ፡ መጠነ፡ ይቤ፡ ጠቢብ፡ ከመ፡ ያእምር፡ ኢይክል፡ ሰብእ፡ ረኪበ፡ ወእመሚ፡ መጠነ፡ ኃሠሠ፡ ኢይክል፡ ሰብእ፡ ረኪበ።
=== chapter 9 ===
[Chapter 9]
1 እስመ፡ ኅቡረ፡ ዘንተ፡ ኵሎ፡ ወሀብኩ፡ ልብየ፡ ወልብየ፡ ዘንተ፡ ኵሎ፡ ርእየት፡ ከመ፡ ለጻድቃን፡ ወለጠቢባን፡ ምግባሮሙ፡ ውስተ፡ እደ፡ እግዚአብሔር፡ ፍቅረ፡ ወጽልአ፡ አልቦ፡ ዘየአምር፡ ሰብእ፡ ኵሉ፡ ቅድመ፡ ገጾሙ፡ ወከንቱ፡ ውእቱ፡ ውስተ፡ ኵሉ።
2 ወአሐዱ፡ ድድቁ፡ ለጻድቅ፡ ወለረሲዕ፡ ለኄር፡ ወለእኩይ፡ ለርኩስ፡ ወለንጹሕ፡ ለዘይሠውዕ፡ ወለዘኢይሠውዕ፡ ለኄር፡ ወለዘሂ፡ የኃጥእ፡ ለዘይምሕል፡ ወለዘሂ፡ ይፈርህ፡ መሐላ።
3 ዝክቱ፡ በኵሉ፡ ዘተገብረ፡ መትሕተ፡ ፀሐይ፡ እስመ፡ አሐዱ፡ ድድቁ፡ ለኵሉ፡ ወልቦሙ፡ ለውሉደ፡ ሰብእ፡ ትፌጽም፡ እኩየ፡ ወበሁከተ፡ ልቦሙ፡ ሕይወቶሙ፡ ወእምድኅሬሆሙ፡ ኀበ፡ ምውታን።
4 እስመ፡ መኑ፡ ውእቱ፡ ዘይሳተፍ፡ ምስለ፡ ሕያዋን፡ በተስፋ፡ ከልብ፡ ሕያው፡ ይኄይስ፡ እምአንበሳ፡ ምውት።
5 እስመ፡ ሕያዋን፡ የአምሩ፡ ከመ፡ ይመውቱ፡ ወሙታንሰ፡ ኢየአምሩ፡ ወኢምንትኒ፡ ወአልቦሙ፡ እንከ፡ ዓስብ።
6 እስመዝክሮሙ፡ ወፍቅሮሙ፡ ወጽልኦሙኒ፡ ወቅንአቶሙኒ፡ ናሁ፡ ተኃጒለ፡ ወመክፈልት፡ አልቦሙ፡ እንከ፡ ውስተ፡ ዓለም፡ በኵሉ፡ ዘተገብረ፡ መትሕተ፡ ፀሐይ።
7 ነዓ፡ ብላዕ፡ በፍሥሓ፡ ኅብስተከ፡ ወስተይ፡ በልብ፡ ኄር፡ ወይነከ፡ እስመ፡ እግዚአብሔር፡ ሠምረ፡ ምግባሪከ።
8 በኵሉ፡ ጊዜ፡ ይኩን፡ ንጹሐ፡ አልባሲከ፡ ወቀቅብዕ፡ እምርእስከ፡ ኢይርኃቅ።
9 ወርኢ፡ ሕይወተ፡ ምስለ፡ ብእሲትከ፡ እንተ፡ አፍቀርካ፡ ኵሎ፡ መዋዕለ፡ ሕይወትከ፡ እለ፡ ተውህባከ፡ እምታሕተ፡ ፀሐይ፡ ኵሎ፡ መዋዕለ፡ እለ፡ ኮና፡ ለከ፡ እስመ፡ ውእቱ፡ መክፈልትከ፡ በሕይወትከ።
10 ወበሥራኅከ፡ ዘትሠርኅ፡ እምታሕተ፡ ፀሐይ፡ ኵሎ፡ ዘትክል፡ እዴከ፡ ለገቢር፡ መጠነ፡ ኃይልከ፡ ግበር፡ እስመ፡ አልቦ፡ ግብር፡ ወሕሊና፡ ወጥበብ፡ ወአእምሮ፡ ውስተ፡ ገሃነም፡ ኀበ፡ ተሐውር፡ አንተ፡ ህየ።
11 ወተመየጥኩ፡ ወርኢኩ፡ መትሕተ፡ ፀሐይ፡ ከመ፡ አኮ፡ ለቀሊላን፡ ረዊዕ፡ ወአኮ፡ ለጽኑዓን፡ ቀትል፡ ወአኮ፡ ለጠቢባን፡ እክል፡ ወአኮ፡ ለማእምራን፡ ብዕል፡ ወአኮ፡ ለእለ፡ ይሴብዉ፡ ጸጋ፡ እስመ፡ ጊዜ፡ ወድድቅ፡ ይዳደቆሙ፡ ለኵሎሙ።
12 እስመ፡ ኢየአምር፡ ሰብእ፡ ጊዜሁ፡ ከመ፡ ዓሣት፡ እለ፡ ይሠገሩ፡ በመርበብት፡ እኩይ፡ ወከመ፡ አዕዋፍ፡ ዘይትአኀዙ፡ በመሥገርት፡ ከማሁ፡ ይሠገሩ፡ ውሉደ፡ ሰብእ፡ በጊዜ፡ እኩይ፡ ሶበ፡ ይወድቅ፡ ዲቤሆሙ፡ ግብተ።
13 ወናሁ፡ ዘንተኒ፡ ርኢኩ፡ ጥበበ፡ መትሕተ፡ ፀሐይ።
14 ወዓባይ፡ ይእቲ፡ በኀቤየ፡ ሀገር፡ ነወስቲት፡ ወሰብእ፡ እለ፡ ውስቴታ፡ ኅዳጣን፡ ወአመ፡ መጽአ፡ ላዕሌሃ፡ ንጉሥ፡ ዓቢይ፡ ወዓገታ፡ ወየሐንጽ፡ ላዕሌሃ፡ ጥቅመ፡ ዓቢየ።
15 ወረከበ፡ በውስቴታ፡ ብእሴ፡ ጠቢበ፡ ወነዳየ፡ ወያድኅን፡ ሀገረ፡ ውእቱ፡ በጥበቡ፡ ወአልቦ፡ ዘተዘከሮ፡ ሰብእ፡ ኅቡረ፡ ለውእቱ፡ ብእሲ።
16 ወእቤ፡ አነ፡ ትኄይስ፡ ጥበብ፡ እምኃይል፡ ወጥበቡ፡ ለነዳይ፡ እንተ፡ ትትሜነን፡ ወነገሮሂ፡ ኢኮኑ፡ እለ፡ ይሰምዕዎ።
17 ወለነገረ፡ ጠቢባን፡ በዕረፍት፡ ይሰምዕዎ፡ እምነ፡ ጽራሖሙ፡ ለእለ፡ ይኴንኑ፡ በዕበድ።
18 ትኄይስ፡ ጥበብ፡ እምንዋየ፡ ሐቅል፡ ዘየኃጥእ፡ አሐደ፡ ያኃጒል፡ ብዙኀ።
=== chapter 10 ===
[Chapter 10]
1 ጽንጽንያ፡ ከልብ፡ ምውት፡ ያማስን፡ አፈወ፡ ቅብዕ፡ ጥዑመ፡ ትከብር፡ ንስቲት፡ ጥበብ፡ እምነ፡ ክብር፡ ዓቢይ፡ በዕበድ።
2 ልቡ፡ ለጠቢብ፡ ውስተ፡ የማኑ፡ ወልቡ፡ ለዐብድ፡ ውስተ፡ ጸጋሙ።
3 ወሶበ፡ የሐውር፡ ዐብድ፡ ብዕበደ፡ ልቡ፡ ወበፍትወተ፡ ልቡ፡ የሐፅዖ፡ አእምሮ፡ ወዘይሔሊ፡ ኵሎ፡ ዐብድ፡ ውእቱ።
4 እስመ፡ መንፈሱ፡ ለዘይሤልጥ፡ ዐርገ፡ ላዕሌከ፡ መካነከ፡ ኢትኅድግ፡ እስመ፡ ፈውስ፡ ያኃድግ፡ ኃጣውአ፡ ዓቢየ።
5 ቦ፡ እኩይ፡ ዘርኢኩ፡ መትሕተ፡ ፀሐይ።
6 ከመ፡ ዘበኢያእምሮ፡ ወጽአ፡ እምቅድመ፡ ይሠልጥ፡ ተውህበ፡ ዐብድ፡ ለሉዓሌ፡ ዓቢይ፡ ወአብዕልት፡ መትሕተ፡ ይነብሩ።
7 ወርኢኩ፡ አግብርተ፡ ዲበ፡ አፍራስ፡ ወመኳንንት፡ እንዘ፡ የሐውሩ፡ በእግር፡ ከመ፡ አግብርት።
8 ዘይከሪ፡ ግበ፡ ለቢጹ፡ ይወድቅ፡ ውስቴቱ፡ ወዘይነሥት፡ ጸቈነ፡ ይነስኮ፡ አርዌ፡ ምድር።
9 ወዘያስተፋልስ፡ እብነ፡ የሐምም፡ ቦቱ፡ ወዘይሤዕር፡ ዕፀ፡ ይትመነደብ፡ ቦቱ።
10 እመ፡ ተመልሐ፡ ሐፂኑ፡ ወውእቱኒ፡ ገጸ፡ አስተወላወለ፡ ወወኃይል፡ ታኄይል፡ ወፍድፍድናሁ፡ ለጽኑዕ፡ ጥበብ።
11 እመ፡ ነሰኮ፡ አርዌ፡ ምድር፡ ወኢረቀዮ፡ ወኢፈወሶ፡ ረቃዪ፡ አልቦ፡ ዘይበቊዕ፡ ዘይረቂ።
12 ንባበ፡ አፉሁ፡ ለጠቢብ፡ ሞገሱ፡ ወከናፍሪሁ፡ ለዐብድ፡ ያሠጥማሁ።
13 ቀዳሚ፡ ንባበ፡ አፉሁ፡ ዕበድ፡ ወደኃሪታ፡ ጸዋግ።
14 ዐብድሰ፡ ያበዝኅ፡ ነገረ፡ ወኢየአምር፡ ብእሲ፡ ምንተ፡ ዘኮነ፡ ወምንተ፡ ዘይከውን፡ እስመ፡ እምድኅሬሁ፡ መኑ፡ ይዜንዎ።
15 ናሁ፡ ፃማሁ፡ ያሐምሞ፡ ለዐብድ፡ እስመ፡ ኢየአምር፡ ሐዊረ፡ ውስተ፡ ሀገር።
16 አሌ፡ ለኪ፡ ኦ፡ ሀገር፡ እንተ፡ ንጉሥኪ፡ ወሬዛ፡ ወመኳንንትኪ፡ ይበልዑ፡ በነግህ።
17 ብፅዕት፡ አንቲ፡ ምድር፡ እንተ፡ ንጉሥኪ፡ ወልደ፡ አግአዚ፡ ወመኳንንትኪ፡ በጊዜ፡ ይበልዑ፡ በኃይል፡ ወኢይትኀፈሩ፡ በሀኬት።
18 ወበጽርዓተ፡ እደው፡ ያወጽሕ፡ ቤት።
19 እደው፡ ዐብዳን፡ ለሰሐቅ፡ ይሬስዎ፡ ኅብስተ፡ ወይን፡ ያስተፌሥሕ፡ ሕያዋነ፡ ወለወርቅ፡ ኵሉ፡ ይትኤዘዝ፡ ኅቡረ።
20 አንተኒ፡ በሕሊናከ፡ ንጉሠ፡ ኢትርግም፡ ወበውሣጤ፡ ቤትከ፡ ኢትርግም፡ ብዑላነ፡ እስመ፡ ዖፈ፡ ሰማይ፡ ያወጽእ፡ ነገረከ፡ ወዘቦ፡ ክንፍ፡ ይዜኑ፡ ንባበከ።
=== chapter 11 ===
[Chapter 11]
1 ፈኑ፡ ኅብስተከ፡ ውስተ፡ ገጸ፡ ማይ፡ እስመ፡ በብዙኅ፡ መዋዕል፡ ትረክቦ።
2 ሀብ፡ መክፈልተከ፡ ለሰብዓቱ፡ ወለሰመንቱ፡ እስመ፡ ኢተአምር፡ ዘይከውን፡ እኩየ፡ ውስተ፡ ምድር።
3 እመ፡ መልአ፡ ደመና፡ ይክዑ፡ ዝናመ፡ ውስተ፡ ምድር፡ ወለእመ፡ ወድቀ፡ ዕፅ፡ ደቡበ፡ ወእመኒ፡ ሰሜነ፡ ወእደ፡ ወድቀ፡ ዕፅ፡ ህየ፡ ይሄሉ።
4 ዘየዓቅብ፡ ነፋሰ፡ ኢይዘርእ፡ ወዘይኔጽር፡ ደመናተ፡ ኢየዓፅድ።
5 እስመ፡ አልቦ፡ ዘየአምር፡ ምንት፡ ውእቱ፡ ፍኖተ፡ መንፈስ፡ ከመ፡ አዕፅምት፡ ውስተ፡ ከርሠ፡ ጽንስት፡ ከማሁ፡ ኢይትአመር፡ ግበሩ፡ ለእግዚአብሔር፡ መጠነ፡ ገብረ፡ ኵሎ፡ ኅቡረ።
6 በነግህ፡ ዝራእ፡ ዘርአከ፡ ወበምሴትኒ፡ ኢትኅድግ፡ እዴከ፡ እስመ፡ ኢተአምር፡ አይ፡ ዘይከውን፡ እምዝ፡ ወእምዝ፡ ወእመ፡ ክልኤሆሙሰ፡ ኅቡረ፡ ሠናይ።
7 ጥዑም፡ ብርሃን፡ ወሠናይ፡ ለአዕይንት፡ ለርእየ፡ ኅብረ፡ ፀሐይ።
8 እስመ፡ እመኒ፡ ዓመታተ፡ ብዙኀ፡ ሐይወ፡ ሰብእ፡ ወበኵሎን፡ ይትፌሣሕ፡ ወኢይዜከር፡ መዋዕለ፡ ጽልመት፡ ከመ፡ ብዙኃተ፡ ይከውና፡ ኵሉ፡ ዘይመጽእ፡ ከንቱ፡ ተፈሣሕ፡ ኦ፡ ብእሲ፡ በውርዙትከ።
9 ወትሠኒ፡ ልብከ፡ በመዋዕለ፡ ውርዙትከ፡ ወሑር፡ በፍኖተ፡ ልብከ፡ ዘበንጽሕ፡ ወኢበርእየ፡ ዓይንከወአእምር፡ ከመ፡ በእንተዝ፡ ኵሉ፡ ያቀርበከ፡ እግዚአብሔር፡ ለኵነኔ።
10 ወአርኅቅ፡ መዓተ፡ እምልብከ፡ ወአግኅሥ፡ እከየ፡ እምሥጋከ፡ እስመ፡ ውርዙት፡ ወጸሊመ፡ ሥሥዕርት፡ በኢያእምሮ፡ ከንቱ፡ ውእቱ።
=== chapter 12 ===
[Chapter 12]
1 ተዘከሮ፡ ለፈጣሪከ፡ በመዋዕለ፡ ውርዙትከ፡ ዘእንበለ፡ ይምጻእከ፡ መዋዕል፡ እኩይ፡ ወይብጽሓ፡ ዓመታት፡ በዕለተ፡ ትብል፡ ኢኮነኒ፡ ዘንተ፡ ፈቃድየ።
2 ዘእንበለ፡ ይጽልም፡ ፀሐይ፡ ወብርሃነ፡ ወርኅ፡ ወከዋክብት፡ ወዘእንበለ፡ ይትመየጡ፡ ደመናት፡ ድኅረ፡ ዝናማት።
3 አመ፡ ዕለተ፡ ያንቀለቅሉ፡ ዓቃብያነ፡ ቤት፡ ወይትዓለዉ፡ ሰብእ፡ ኀላይያት፡ ወተፀርዓ፡ እለ፡ የሐርፃ፡ እስመ፡ ድኩማት፡ እማንቱ፡ ወይጽልማ፡ እለ፡ ይሬእያ፡ በጸዳል።
4 ወይትዐፀው፡ ኆኅት፡ በምሥያጣት፡ በድውይ፡ ቃል፡ እንተ፡ ተሐርፅ፡ ወትትነሣእ፡ በቃለ፡ ዖፍ፡ ወየኃሥራ፡ ኵሎን፡ አዋልደ፡ ማኅሌት።
5 እስመ፡ እመልዕልት፡ ይሬእዩ፡ ድንጋፄ፡ በውስተ፡ ፍኖት፡ ወይጸጊ፡ ከርካዕ፡ ወይገዝፍ፡ አንቦጣ፡ ወይትፈረዘዝ፡ ቊልሕ፡ አመ፡ ሖረ፡ ብእሲ፡ ውስተ፡ ቤተ፡ ዓለሙ፡ ወዓዲ፡ ጽጐ፡ እለ፡ ይላህዉ።
6 ዘእንበለ፡ ይትገፈታእ፡ ኅብሩ፡ ለብሩር፡ ወይትዌለጥ፡ አስተርእዮቱ፡ ለወርቅ፡ ወይትቀጠቀጥ፡ መስብክት፡ ውስተ፡ ዓዘቅት።
7 ወኀልቃ፡ አዕይንት፡ እለ፡ ያንቀዓድዋ፡ ውስተ፡ መስኮት፡ ወይትዓፀዋ፡ አናቅጸ፡ መራኅብት፡ በእንተ፡ ድንጋፄ፡ ቃላት፡ እለ፡ ይኬልሑ፡ ይትነሥኡ፡ እምቃለ፡ ጸላኢ።
8 ወይሌ፡ ላዕለ፡ ኵሉ፡ ደቂቀ፡ አዳም፡ ወይሬእዩ፡ ኀበ፡ ላዕሉ፡ ወይከውን፡ ፍርሃት፡ ውስተ፡ ፍናዋት፡ ወያስተርኢ፡ እሳት፡ ጊዜ፡ ይፈቅድ፡ ተልዕሎተ።
9 ወይደምፅ፡ ሰቆቃው፡ ውስተ፡ መራኅብት፡ እምቅድመ፡ ይትወለጥ፡ ኅቡረ፡ ብሩር፡ ወይማስን፡ ሥነ፡ ወርቅ፡ ወያንኰረኵር፡ መንኰራኵር፡ ለኢያንኰርኵሮ፡ ውስተ፡ ዐዘቅት።
10 ወይገብእ፡ መሬት፡ ውስተ፡ መሬት፡ ከመ፡ ሀሎ፡ ወመንፈስ፡ ይገብእ፡ ኀበ፡ እግዚአብሔር፡ ዘወሀቦ፡ ወይሁብ፡ አውሥኦ፡ በእንተ፡ ኵሉ፡ ዘገብረ፡ ሊተ፡ አመ፡ ነበረ፡ በሥጋ፡ እመ፡ ኮነ፡ ሠናየ፡ አው፡ እኩየ።
11 ከንቱ፡ ከንቱ፡ ይቤ፡ መክብብ፡ ኵሉ፡ ከንቱ።
12 ወፈድፋደ፡ እስመ፡ ኮነ፡ መክብብ፡ ጠቢብ፡ እስመ፡ ይሜህር፡ አእምሮ፡ ኵሎ፡ ሰብአ፡ ወይፈትን፡ ሠርጐ፡ ምስል።
13 ኃሠሠ፡ መክብብ፡ ከመ፡ ይርከብ፡ ነገረ፡ ፈቃዱ፡ ወጸሐፈ፡ ርትዐ፡ ወነበበ፡ ጽድቀ።
14 ወነገረ፡ ጠቢባን፡ ከመ፡ መድጐጸ፡ ላሕም፡ ወከመ፡ ቅትራት፡ ርሱን፡ እለ፡ እምኀበ፡ ትምህርት፡ ተውህቡ፡ እምአሐዱ፡ ኖላዊ።
15 ወፈድፋደሰ፡ እምውስቴቶሙ፡ ወልድየ፡ ኢትግበር፡ መጻሕፍተ፡ ብዙኀ፡ ዘአልቦ፡ ፍጻሜ፡ ወትምህርት፡ ብዙኅ፡ ፃማ፡ ለሥጋ።
16 ንባበ፡ ኵሉ፡ ነገር፡ ስማዕ፡ ወእግዚአብሔር፡ ፍራሕ፡ ወትእዛዛቲሁ፡ ዕቀብ፡ እስመ፡ ዘውእቱ፡ ኵሉ፡ ሰብእ።
17 እስመ፡ ኵሎ፡ ፍጥረተ፡ ያቀርብ፡ እግዚአብሔር፡ ለኵነኔ፡ ኵሉ፡ ዘያስተርኢ፡ ወዘኢያስተርኢ፡ እመኒ፡ ሠናይ፡ ወእመኒ፡ እኩይ፡ ውእቱ።