##### edition edEOTC (gez) — This text is from the standard EOTC printed Bible edition
=== chapter 1 ===
[Chapter 1]
1 ዝነገረ፡ መጽሐፍ፡ ዘጸሐፈ፡ ባሮክ፡ ወልደ፡ ኔርዩ፡ ወልደ፡ ማሴው፡ ወልደ፡ ሴዴቅዩ፡ ወልደ፡ አሳድዩ፡ ወልደ፡ ኬልቅዩ፡ ባቢሎን።
2 በመዓት፡ ኃምስ፡ በሰቡዑ፡ ለሠርቅ፡ አመ፡ ነሥእዋ፡ ፋርስ፡ ለኢየሩሳሌም፡ ወአውዐይዋ፡ በእሳት።
3 ወአንበበ፡ ባሮክ፡ ዘመጽሐፈ፡ በእዝነ፡ ኢኮንያስ፡ ወልደ፡ ኢዮአቄም፡ ንጉሠ፡ ይሁዳ፡ ወበእዝነ፡ ኵሉ፡ ሕዝበ፡ ዘመጽአ፡ ኀበ፡ መጽሐፍ።
4 ወበእዝነ፡ ኃያላን፡ ወደቂቀ፡ ነገሥት፡ ወበእዝነ፡ ሊቃናት፡ ወበእዝነ፡ ሕዝብ፡ እምዓቢይ፡ እስከ፡ ንኡስ፡ ኵሎሙ፡ እለ፡ የኀድሩ፡ ባቢሎን፡ መልዕልተ፡ ፈለገ፡ ሶዲ።
5 ወበከዩ፡ ወጾሙ፡ ወጸለዩ፡ በቅድመ፡ እግዚአብሔር።
6 ወአስተጋብኡ፡ ብሩረ፡ ብእሲ፡ ብእሲ፡ በከመ፡ ክሂሎቱ።
7 ወፈነውዎ፡ ኢየሩሳሌም፡ ኀበ፡ ኢዮአቄም፡ ወልደ፡ ሕልቅያ፡ ወልደ፡ ሱሉም፡ ካህን፡ ወኀበ፡ ካህናት፡ ወኀበ፡ ኵሉ፡ ሕዝበ፡ ዘሀለዉ፡ ምስሌሁ፡ ኢየሩሳሌም።
8 አመ፡ ነሥኡ፡ ንዋየ፡ ቤተ፡ እግዚአብሔር፡ ዘተሀይደ፡ እምኀቤተ፡ መቅደስ፡ ከመ፡ ይሚጥዎ፡ ኀበ፡ ምድረ፡ ይሁዳ፡ በዐሥሩ፡ ለወርኀ፡ ሲባን፡ ለንዋየ፡ ዘብሩር፡ ዘገብረ፡ ሴዴቅያስ፡ ወልደ፡ ኢዮስያስ፡ ንጉሠ፡ ይሁዳ።
9 እምድኅረ፡ ነሥኦሙ፡ ናቡከደነፆር፡ ንጉሠ፡ ባቢሎን፡ ለኢኮንያስ፡ ወለመኳንንት፡ ወለፂውዋን፡ ወለከሀልያን፡ ወለሕዝበ፡ ምድር፡ እምኢየሩሳሌም፡ ወወሰዶሙ፡ ባቢሎን።
10 ወይቤሉ፡ ናሁ፡ ፈነውነ፡ ለክሙ፡ ብሩረ፡ ወቦቱ፡ ተሣየጡ፡ ለመሥዋዕት፡ በእንተ፡ ኃጢአት፡ ወዕጣነሂ፡ ወግበሩ፡ መና፡ ወአዕርጉ፡ በምሥዋዓ፡ እግዚአብሔር፡ አምላክነ።
11 ወጸልዩ፡ በእንተ፡ ሕይወተ፡ ናቡከደነፆር፡ ንጉሠ፡ ባቢሎን፡ ወበእንተ፡ ሕይወተ፡ ብልጣሶር፡ ወልዱ፡ ከመ፡ ይኩን፡ መዋዕሊሆሙ፡ ከመ፡ መዋዕለ፡ ሰማይ፡ ዲበ፡ ምድር።
12 ወየሀበነ፡ እግዚአብሔር፡ ኃይለ፡ ወያብርህ፡ አዕይንተነ፡ ወንሕየው፡ በታሕተ፡ ጽላሎቱ፡ ለናብከደነፆር፡ ንጉሠ፡ ባቢሎን፡ ወበታሕተ፡ ጽላሎቱ፡ ለብልጣሶር፡ ወልዱ፡ ወከመ፡ ንትቀነይ፡ ሎሙ፡ ለብዙኅ፡ መዋዕል፡ ወከመ፡ ንርከብ፡ ሞገሰ፡ በቅድመ፡ ገጾሙ።
13 ወጸልዩ፡ ለነሂ፡ ኀበ፡ እግዚአብሔር፡ አምላክነ፡ እስመ፡ አበስነ፡ ሎቱ፡ ለአምላክነ፡ እስመ፡ ኢተመይጠት፡ መዐት፡ ለእግዚአብሔር፡ ወመቅሠፍቱ፡ እምኔነ፡ እስከዛ፡ ዕለት።
14 ወአንብብዋ፡ ለዛ፡ መጽሐፍ፡ ዘፈነውነ፡ ኀቤክሙ፡ ከመ፡ ትንግርዎ፡ በቤተ፡ እግዚአብሔር፡ በዕለተ፡ በዓል፡ ወበዕለት፡ ዘመፍትው።
15 ወበሉ፡ ጽድቅ፡ ለእግዚአብሔር፡ አምላክነ፡ ወለነሰ፡ ኃፍረት፡ ለገጽነ፡ በከመ፡ ኮነት፡ ዛቲ፡ ዕለት፡ ለሰብአ፡ ይሁዳ፡ ወእለ፡ ይነብሩ፡ ኢየሩሳሌም።
16 ወለሥነትነ፡ ወለመላእክቲነ፡ ወለካህናቲነ፡ ወለነቢያቲነ፡ ወለአበዊነ።
17 እስመ፡ አበስነ፡ በቅድመ፡ እግዚአብሔር፡ አምላክነ።
18 ወኢተአመኖ፡ ወኢሰማዕነ፡ ቃለ፡ እግዚአብሔር፡ አምላክነ፡ ወኢሖርነ፡ በትዕዛዘ፡ እግዚአብሔር፡ አምላክነ፡ ዘወሀበነ።
19 እምአመ፡ አውፅኦሙ፡ ለአበዊነ፡ እምድረ፡ ግብጽ፡ እስከዛ፡ ዕለት፡ ዐለውናሁ፡ ለእግዚአብሔር፡ አምላክነ፡ ወርኅቅነ፡ እምኔሁ፡ ከመ፡ ኢንስማዕ፡ ቃሎ።
20 ወረከበነ፡ ዝእኩይ፡ ወመርገም፡ ዘአዘዞ፡ እግዚአብሔር፡ ለሙሴ፡ ገብሩ፡ በዕለት፡ ዘአውፅኦሙ፡ ለአበዊነ፡ እምድረ፡ ግብጽ፡ ከመ፡ የሀበነ፡ ምድረ፡ እንተ፡ ታውኅዝ፡ ሐሊበ፡ ወመዐረ፡ በከመ፡ ዛቲ፡ ዕለት።
21 ወኢሰማዕነ፡ ቃለ፡ እግዚአብሔር፡ አምላክነ፡ በከመ፡ ቃለ፡ ነቢያት፡ ዘፈነዎሙ፡ ኀቤነ።
22 ወሖርነ፡ ፩፩፡ በከመ፡ ፈቃደ፡ ልብነ፡ እኩይ፡ እንዘ፡ ንትቀነይ፡ ለአማልክተ፡ ነኪር፡ ከመ፡ ንግበር፡ እኩየ፡ በቅድመ፡ አዕይንቲሁ፡ ለእግዚአብሔር፡ አምላክነ።
=== chapter 2 ===
[Chapter 2]
1 ወአቀመ፡ አምላክነ፡ ቃሎ፡ ዘነበበ፡ በላዕሌነ፡ ወበላዕለ፡ መሳፍንቲነ፡ ዘኰነንዎ፡ ለእስራኤል፡ ወበላዕለ፡ ነገሥታቲነ፡ ወላዕለ፡ መኳንንቲ፡ ወላዕለ፡ ኵሉ፡ እስራኤል፡ ወይሁዳ።
2 ከመ፡ ያመጽእ፡ ላዕሌነ፡ ኵሎ፡ እኩየ፡ ዘኢኮነ፡ በታሕተ፡ ሰማይ፡ በከመ፡ ገብረ፡ በኢየሩሳሌም፡ በከመ፡ ጽሑፍ፡ ውስተ፡ ኦሪተ፡ ሙሴ።
3 ወበልዐ፡ ሰብእ፡ ሥጋ፡ ደቂቁ፡ ወአዋልዲሁ።
4 ወመጠዎሙ፡ ውስተ፡ እዴሆሙ፡ ለኵሎሙ፡ ነገሥት፡ እለ፡ ዐውድነ፡ ለኃሣር፡ ወለተመንድቦ፡ በኀበ፡ ኵሎሙ፡ አሕዛብ፡ እለ፡ በዐውድነ፡ ኀበ፡ ዘረዎሙ፡ እግዚአብሔር፡ ህየ።
5 ወኮነ፡ ታሕተ፡ ወአኮ፡ ላዕለ፡ እስመ፡ አበስነ፡ ለእግዚአብሔር፡ አምላክነ፡ እንዘ፡ ኢንትኤዘዝ፡ ለቃሉ።
6 ለእግዚአብሔር፡ አምላክነ፡ ጽድቅ፡ ለነሰ፡ ወለአበዊነ፡ ኃፍረተ፡ ገጽ፡ በከመ፡ ዛቲ፡ ዕለት።
7 እስመ፡ ነበበ፡ እግዚአብሔር፡ ላዕሌነ፡ ኵሎ፡ እኩየ፡ ዘበጽሐ፡ ዲቤነ።
8 ወኢጸለይነ፡ ቅድመ፡ ገጹ፡ ለእግዚአብሔር፡ አምላክነ፡ ከመ፡ ንትመየጥ፡ ብእሲ፡ ብእሲ፡ እምፍኖተ፡ ልብነ፡ እኩይ።
9 ወነቅሐ፡ እግዚአብሔር፡ ለምንዳቤ፡ ወአምጽአ፡ ላዕሌነ፡ እስመ፡ ጻድቅ፡ እግዚአብሔር፡ በኵሉ፡ ግብሩ፡ ዘአዘዘ፡ በላዕሌነ።
10 ወኢሰማዕነ፡ ቃሎ፡ ከመ፡ ንሑር፡ በትእዛዛቲሁ፡ ለእግዚአብሔር፡ ዘወሀበ፡ ቅድመ፡ ገጽነ።
11 ወይእዜኒ፡ እግዚኦ፡ አምላከ፡ እስራኤል፡ ዘአውፃእከ፡ ሕዝበከ፡ እምድረ፡ ግብጽ፡ በእድ፡ ጽንዕት፡ ወበትእምርት፡ ወበመንክር፡ ወበኃይል፡ ዐቢይ፡ ወበመዝራዕት፡ ልዑል፡ ወረሰይከ፡ ለከ፡ ስመ፡ በከመ፡ ዛቲ፡ ዕለት።
12 አበስነ፡ ወገበርነ፡ እኩየ፡ ሕሡመ፡ ገበርነ፡ እግዚኦ፡ አምላክነ፡ በኵሉ፡ ጽድቅ።
13 አቊርር፡ መዐተከ፡ እምኔነ፡ እስመ፡ ኅዳጥ፡ ተረፍነ፡ በውስተ፡ አሕዛብ፡ ኀበ፡ ዘሮከነ፡ ህየ።
14 ስማዕ፡ እግዚኦ፡ ስእለተነ፡ ወጸሎትነ፡ ወአድኅነነ፡ በእንተ፡ ስምከ፡ ወሀበነ፡ ንርከብ፡ ሞገሰ፡ ቅድመ፡ ገጾሙ፡ ለእለ፡ ፄወዉነ።
15 ከመ፡ ታእምር፡ ኵላ፡ ምድር፡ ከመ፡ አንተ፡ ውእቱ፡ እግዚአብሔር፡ አምላክነ፡ እስመ፡ ተጸውዐ፡ ስምከ፡ በላዕለ፡ እስራኤል፡ ወበላዕለ፡ ዘመዱ።
16 ነጽር፡ እግዚኦ፡ እምቤተ፡ መቅደስከ፡ ወአጽምዕ፡ እዝነከ፡ እግዚኦ፡ ኀቤነ፡ ወስምዐነ።
17 ክሥት፡ አዕይንተከ፡ ወርኢ፡ እስመ፡ አኮ፡ ሙታን፡ እለ፡ ውስተ፡ ሲኦል፡ እለ፡ መንፈሶሙ፡ ወፅአት፡ እምከርሦሙ፡ ዘይሴብሑከ፡ ወይገንዩ፡ ለከ፡ እግዚኦ።
18 ዳእሙ፡ ነፍስ፡ ትክዝት፡ በብዝኀ፡ ምንዳቤ፡ ዘተሐውር፡ ኅዝንታ፡ ወሕምምታ፡ ወአዕይንት፡ ዘለከዋ፡ ወነፍስ፡ ርኅብት፡ የአኵታከ፡ ወይገንያ፡ ለጽድቅከ፡ እግዚኦ።
19 እስመ፡ አኮ፡ በከመ፡ ጽድቆሙ፡ ለአበዊነ፡ ወነገሥታቲነ፡ ዘሰአልነ፡ ምሕረተ፡ በቅድመ፡ ገጽከ፡ እግዚኦ፡ አምላክነ።
20 እስመ፡ ፈኖከ፡ መዐተከ፡ ወመቅሠፍተከ፡ ላዕሌነ፡ በከመ፡ ነበብከ፡ በእደ፡ አግብርቲከ፡ ነቢያት።
21 ከመ፡ ዝ፡ ይቤ፡ እግዚአብሔር፡ አድንኑ፡ መትከፍተክሙ፡ ወተቀነዩ፡ ለንጉሠ፡ ባቢሎን፡ ወትነብሩ፡ ውስተ፡ ምድር፡ እንተ፡ ወሀብክዎሙ፡ ለአበዊክሙ።
22 ወእመ፡ ኢሰማዕክሙ፡ ቃለ፡ እግዚአብሔር፡ ወኢተቀነይክሙ፡ ለንጉሠ፡ ባቢሎን።
23 የኀልቅ፡ እምነ፡ አህጉረ፡ ይሁዳ፡ ወእምአፍአሃ፡ ለኢየሩሳሌም፡ ቃለ፡ ትፍሥሕት፡ ወኃሤት፡ ቃለ፡ መርዓዊ፡ ወመርዓት፡ ወይከውን፡ ኵሉ፡ ምድር፡ በድወ፡ እምእለ፡ የኀድርዎ።
24 ወኢሰማዕነ፡ ቃለከ፡ ወኢተቀነይነ፡ ለንጉሠ፡ ባቢሎን።
25 ወናሁ፡ ገደፍዎሙ፡ ውስተ፡ ዋዕየ፡ መዓልት፡ ወቊረ፡ ሌሊት፡ ተፄወውነ፡ ወሞትነ፡ እኩየ፡ ሞተ፡ በረኃብ፡ ወበኵናት።
26 ወሐነጽከ፡ መቅደስ፡ ዘበውስቴቱ፡ ተጸውዐ፡ ስምከ፡ በከመ፡ ዛቲ፡ ዕለት፡ በእንተ፡ ኀጢአቶሙ፡ ለቤተ፡ እስራኤል፡ ወለቤተ፡ ይሁዳ።
27 ወገበርከ፡ ላዕሌነ፡ እግዚኦ፡ አምላክነ፡ በከመ፡ ኵሉ፡ ኂሩትከ፡ ወበከመ፡ ኵሉ፡ ሣህልከ፡ ዐቢይ።
28 በከመ፡ ነበብከ፡ በእደ፡ ሙሴ፡ ቊልዔከ፡ በዕለት፡ እንተ፡ ባቲ፡ አዘዝኮ፡ ይጽሐፍ፡ ሕገከ፡ በቅድመ፡ ደቂቀ፡ እስራኤል፡ እንዘ፡ ትትብል።
29 ለእመ፡ ኢሰማዕክሙ፡ ቃልየ፡ አማነ፡ ዛቲ፡ ብዝኀክሙ፡ ትትመየጥ፡ ለኅዳጥ፡ በማእከለ፡ አሕዛብ፡ እለ፡ ኀቤሆሙ፡ እዘርወክሙ።
30 ወአእመርክዎሙ፡ ከመ፡ ኢይሰምዑኒ፡ እስመ፡ ሕዝብ፡ ጽኑዓነ፡ ክሳድ፡ እሙንቱ።
31 ወየአምሩ፡ ከመ፡ አነ፡ ውእቱ፡ እግዚአብሔር፡ አምላኮሙ።
32 ወይሴብሑኒ፡ በብሔር፡ ኀበ፡ አፍለስክዎሙ፡ ወይዜከሩ፡ ስምየ።
33 ወይትመየጡ፡ እምጽኑዕ፡ ልቦሙ፡ ወእምእኩይ፡ ምግባሮሙ፡ ወይዜከሩ፡ ፍኖተ፡ አበዊሆሙ፡ እለ፡ አበሱ፡ ቅድመ፡ እግዚአብሔር።
34 ወአገብኦሙ፡ ብሔረ፡ ኀበ፡ መሐልኩ፡ ለአበዊሆሙ፡ ለአብርሃም፡ ወለይስሐቅ፡ ወለያዕቆብ፡ ወይኴንንዋ፡ ወአበዝኆሙ፡ ወኢይውሕዱ።
35 ወእሠርዕ፡ ሎሙ፡ ሥርዓተ፡ ዘለዓለም፡ ከመ፡ እኩኖሙ፡ አምላኮሙ፡ ወእሙንቱኒ፡ ይከውኑኒ፡ ሕዝብየ።
=== chapter 3 ===
[Chapter 3]
1 እግዚኦ፡ ዘትነግሥ፡ ለኵሉ፡ አምላከ፡ እስራኤል፡ ነፍስ፡ ኅዝንት፡ ወመንፈስ፡ ትክዝት፡ ጸርሐት፡ ኀቤከ።
2 ስማዕ፡ እግዚኦ፡ ወተሠሀል፡ እስመ፡ አበስነ፡ ቅድሜከ።
3 እስመ፡ አንተ፡ ዘትነብር፡ ለዓለም፡ ወንሕነሰ፡ ንትሐጐል፡ ለዝሉፉ።
4 እግዚኦ፡ ዘትነግሥ፡ ለኵሉ፡ አምላከ፡ እስራኤል፡ ስማዕ፡ ይእዜ፡ ጸሎተ፡ ሙታን፡ እስራኤል፡ ወዘደቂቆሙ፡ እለ፡ ጌገዩ፡ በቅድሜከ፡ ወኢሰምዑ፡ ቃለ፡ አምላኮሙ፡ ወተለወነ፡ እኩይ።
5 ኢትዘከርኒ፡ ኀጢአተ፡ አበዊነ፡ ተዘከር፡ እዴከ፡ ወስመከ፡ በዝ፡ መዋዕል።
6 እስመ፡ አንተ፡ እግዚአብሔር፡ አምላክነ፡ ወንሴብሐከ፡ እግዚኦ።
7 እስመ፡ በእንተ፡ ዝንቱ፡ ወደይከ፡ ፍርህተከ፡ ውስተ፡ ልብነ፡ ከመ፡ ንጸውዕ፡ ስመከ፡ ወንሰብሕከ፡ በኀበ፡ አፍለሱነ።
8 ወናሁ፡ ንሕነ፡ ይእዜ፡ ውስተ፡ ፄዋዌ፡ ኀበ፡ ዘሮከነ፡ ለኀሣር፡ ወለመርገም፡ ወለፍዳ፡ በከመ፡ ኵሉ፡ እከዮሙ፡ ለአበዊነ፡ እለ፡ ርኅቁ፡ እምኔከ፡ እግዚኦ፡ አምላክነ።
9 ስማዕ፡ እስራኤል፡ ትእዛዘ፡ ሕይወት፡ ወአጽምዕ፡ ምክረ፡ ጥበብ።
10 ምንት፡ ውእቱ፡ እስራኤል፡ ወለምንት፡ ውስተ፡ ብሔረ፡ ፀር፡ ሀሎ።
11 ወበልየ፡ በብሔረ፡ ነኪር፡ ወረኵሰ፡ ምስለ፡ አብድንት፡ ወተኈለቈ፡ ምስለ፡ እለ፡ ውስተ፡ ሲኦል።
12 ወኀደገ፡ ነቅዐ፡ ሕይወት።
13 ሶበሁ፡ ሖርከ፡ ፍኖተ፡ እግዚአብሔር፡ እምነበርከ፡ ለዓለም፡ በሰላም።
14 ተመሀር፡ አይቴ፡ ውእቱ፡ ጥበብ፡ ወአይቴ፡ ውእቱ፡ ኀይል፡ አይቴ፡ ምክር፡ ወአእምሮ፡ ወአይቴ፡ ውእቱ፡ ሐይው፡ ለነዋኅ፡ መዋእል፡ ወአይቴ፡ ውእቱ፡ ብርሃነ፡ አዕይንት፡ ወሰላም።
15 መኑ፡ ረከበ፡ ብሔራ፡ ወመኑ፡ ቦአ፡ ውስተ፡ መዛግብቲሃ።
16 አይቴ፡ እሙንቱ፡ መላእክተ፡ አሕዛብ፡ እለ፡ ቀነይዎሙ፡ ለአራዊተ፡ ገዳም።
17 ወይትዋነይዎሙ፡ አዕዋፈ፡ ሰማይ፡ ወእለ፡ ይዘግቡ፡ ብሩረ፡ ወወርቀ፡ ዘቦቱ፡ ይትአመኑ፡ ሰብእ፡ ወአልቦኑ፡ እንከ፡ ወሰን፡ ለአጥርዮቶሙ።
18 እስመ፡ እለ፡ ይነድቁ፡ ብሩረ፡ ይተግሁ፡ ወአልቦ፡ እከ፡ ፈጠራ፡ ለግብሮሙ።
19 ኀልቁ፡ ወወረዱ፡ ሲኦለ፡ ወተንሥኡ፡ ህየንቴሆሙ፡ ካኣን።
20 ወርእዩ፡ ብርሃነ፡ ንኡሳን፡ ወነበሩ፡ ውስተ፡ ምድሮሙ፡ ወለፍኖተ፡ ጥበብሰ፡ ኢያእመሩ።
21 ወአሠራሂ፡ ኢረከቡ፡ ወኢተወክፍዋ፡ ደቂቆሙ፡ ወርኅቁ፡ እምፍኖቶሙ።
22 ወኢሰምዑ፡ ከነዓን፡ ወርእዩ፡ ቴሞና።
23 ወደቂቀ፡ አጋራሂ፡ እለ፡ ኀሥሣዋ፡ ለጥበብ፡ ዲበ፡ ምድር፡ ነጋድያነ፡ መርያን፡ ወቴማን፡ እለ፡ ይዛውዑ፡ ባቲ፡ ወእለ፡ የኀሥሥዋ፡ ለአእምሮ፡ ወለፍኖተ፡ ጥበብሰ፡ ኢያእመርዋ፡ ወኢሂ፡ ተዘከሩ፡ አሠራ።
24 እስራኤል፡ እፎ፡ ዐቢይ፡ ቤተ፡ እግዚአብሔር፡ ወነዋኅ፡ ብሔሩ።
25 ዐቢይ፡ ውእቱ፡ ወአልቦ፡ ማኅለቅት፡ ወላዕሉሂ፡ አልቦ፡ መስፈርት።
26 ህየ፡ ሀለዉ፡ ዘይሰመዩ፡ ያርብሐውያን፡ እለ፡ እምትካት፡ ነዋኃን፡ ቆሞሙ፡ ወእለ፡ የአምሩ፡ ቀትለ።
27 ኢኀረዮሙ፡ እግዚአብሔር፡ ለእሉ፡ ወኢወሀቦሙ፡ ፍኖተ፡ ተግሣጽ።
28 ወማሰኑ፡ እስመ፡ አልቦሙ፡ ጥበብ፡ ጠፍኡ፡ በተኀብሎቶሙ።
29 መኑ፡ ዘዐርገ፡ ሰማየ፡ ወነሥኣ፡ ወአውረዳ፡ እምነ፡ ደመናት።
30 መኑ፡ ዐደወ፡ ባሕረ፡ ወረከባ፡ ወአምጽኣ፡ በወርቅ፡ ቀይሕ።
31 ወአልቦ፡ ዘየአምር፡ ፍኖታ፡ ወዘይኄልዮ፡ ለአሠራ።
32 ዘኵሎ፡ የአምር፡ የአምራ፡ ወረከባ፡ በጥበቡ፡ ዘፈጠራ፡ ለምድር፡ ለዓለም፡ ወዘመልኣ፡ አባግዓ፡ ወእንስሳ።
33 ወይፌኑ፡ ብርሃኖ፡ ወየሐውር፡ ዘይጼውዖ፡ ወይትኤዘዞ፡ በፍርሃት።
34 ወከዋክብትኒ፡ ያበርሁ፡ በጊዜሆሙ፡ ወይትፌሥሑ።
35 ወይጼውዖሙ፡ ወይብሉ፡ መጻእነ።
36 ውእቱ፡ አምላክነ፡ እስመ፡ አልቦ፡ ባዕድ፡ ዘይመስል፡ ኪያሁ።
37 ውእቱ፡ ረከባ፡ ለኵላ፡ ፍኖተ፡ ጥበብ፡ ወወሀቦ፡ ለያዕቆብ፡ ቊልዔሁ፡ ወለእስራኤል፡ ፍቁሩ።
38 ወእም፡ ዝ፡ አስተርአየ፡ ዲበ፡ ምድር፡ ወኮነ፡ ከመ፡ ሰብእ።
=== chapter 4 ===
[Chapter 4]
1 ዝ፡ ውእቱ፡ መጽሐፈ፡ ትእዛዙ፡ ለእግዚአብሔር፡ ወሕግ፡ ዘለዓለም፡ ኵሎሙ፡ እለ፡ የዐቅብዋ፡ የሐይዉ፡ ወእለሰ፡ የኀድግዋ፡ ይመውቱ።
2 ተመየጥ፡ ያዕቆብ፡ አኀዝ፡ ወሑር፡ በብርሃና።
3 ኢተሀብ፡ ለባዕድ፡ ክብረከ፡ ዘይኄይሰከ፡ ለካልእ፡ ሕዝብ።
4 ብፁዓን፡ ንሕነ፡ እስራኤል፡ እስመ፡ ተዐውቀ፡ ሥምረቱ፡ ለአምላክነ፡ ላዕሌነ።
5 ተአመኑ፡ ሕዝብየ፡ ወተዘከሩ፡ እስራኤልኒ።
6 ተሣየጥኩክሙ፡ ለሕዝብ፡ አኮ፡ ለሐጕል፡ ዳእሙ፡ እስመ፡ አምዐዕክምዎ፡ ለእግዚአብሔር፡ ገባእክሙ፡ ለፀርክሙ።
7 ወወሐክምዎ፡ ለፈጣሪክሙ፡ ወሦዕክሙ፡ ለአጋንንት፡ ወአኮ፡ ለእግዚአብሔር።
8 ወረሳዕክምዎ፡ ለአምላክክሙ፡ ዘሐፀነክሙ፡ ለዓለም፡ ወአተከዝክምዋ፡ ለሐፃኒትክሙ፡ ኢየሩሳሌም።
9 ሶበ፡ ርእየት፡ መቅሠፍተ፡ እግዚአብሔር፡ ዘመጽአክሙ፡ ትቤ፡ ስምዑ፡ ፈላስያነ፡ ጽዮን፡ እስመ፡ አምጽአ፡ ሊተ፡ እግዚአብሔር፡ ዐቢየ፡ ላሐ።
10 ሶበ፡ ርኢኩ፡ ተፄውዎ፡ ደቂቅየ፡ ወአዋልድየ፡ ዘአምጽአ፡ ሎሙ፡ ዘለዓለም።
11 እስመ፡ ሐፀንክዎሙ፡ በትፍሥሕት፡ ወባሕቱ፡ አስተፋነውክዎሙ፡ ምስለ፡ ብካይ፡ ወላሕ።
12 አልቦ፡ ዘይትፌሣሕ፡ በእንቲኣየ፡ ለመበለት፡ ወለግድፍት፡ በኀበ፡ ብዙኃን፡ ትክዝት፡ አነ፡ በእንተ፡ ኀጢአቶሙ፡ ለደቂቅየ፡ እስመ፡ ርኅቁ፡ እምሕገ፡ እግዚአብሔር።
13 ወለጽድቁሰ፡ ኢያእመርዋ፡ ወኢያንሶሰዎ፡ በፍኖተ፡ ትእዛዙ፡ ለእግዚአብሔር፡ ወኢበአሠረ፡ ተግሣጽ፡ ቦኡ፡ ውስተ፡ ጽድቁ።
14 ይምጽኡ፡ ፈላስያነ፡ ጽዮን፡ ወይዘከሩ፡ ፄዋ፡ ደቂቅየ፡ ወአዋልድየ፡ ዘአምጽአ፡ ላዕሌሆሙ፡ ዘለዓለም።
15 እስመ፡ አምጽአ፡ ላዕሌሆሙ፡ ሕዝበ፡ እምርኁቅ፡ ሕዝብ፡ ዘኢየኀፍር፡ ወዘካልእ፡ ልሳን፡ እስመ፡ ኢያክበሩ፡ አረጋዌ፡ ወኢመሐርዎሙ፡ ለሕፃናት።
16 ወመሠጡ፡ ፍቁራኒሃ፡ ለመበለት፡ ወአተከዝዋ፡ ለአሐቲ፡ እምአዋልድ።
17 አንሰ፡ ባሕቱ፡ በምንት፡ እረድአክሙ።
18 እስመ፡ ውእቱ፡ ዘአምጽአ፡ ላዕሌክሙ፡ እኩየ፡ ያወፅአክሙ፡ እምእደ፡ ጸላእትክሙ።
19 አንሶስዉ፡ ደቂቅ፡ አንሶስዉ፡ እስመ፡ አንሰ፡ ኅድግት፡ ወምዝብርት።
20 አውፃእኩ፡ ልብሰ፡ ሰላምየ፡ ወለበስኩ፡ ሠቀ፡ ሕማምየ፡ ወእጸርሕ፡ ኀበ፡ ዘለዓለም፡ በመዋዕልየ።
21 ተአመኑ፡ ደቂቅየ፡ ጽርሑ፡ ኀበ፡ አምላክ፡ ወያወፅአክሙ፡ እምልክናሆሙ፡ ወእምእዴሆሙ፡ ለጸላእትክሙ።
22 እስመ፡ አነ፡ ተሰፈውኩ፡ እምኀበ፡ ዘለዓለም፡ አድኅኖተክሙ፡ ወመጽአ፡ ላዕሌየ፡ ትፍሥሕት፡ እምቅዱስ፡ በእንተ፡ ምሕረት፡ ዘትመጽእ፡ ላዕሌክሙ፡ እምዘልዓለም፡ መድኃኒነ።
23 እስመ፡ አውፃእኩክሙ፡ ምስለ፡ ላሕ፡ ወብካይ፡ ወባሕቱ፡ ይመይጥ፡ ሊተ፡ እግዚአብሔር፡ ኪያክሙ፡ ምስለ፡ ትፍሥሕት፡ ወኀሤት፡ ዘለዓለም።
24 እስመ፡ በከመ፡ ርእያ፡ ይእዜ፡ አግዋሪሃ፡ ለጽዮን፡ ተፄውዎተክሙ፡ ከማሁ፡ ይሬእያ፡ ፍጡነ፡ መድኀኒትክሙ፡ እምኀበ፡ እግዚአብሔር፡ እንተ፡ ትመጽአክሙ፡ በክብር፡ ዐቢይ፡ ወብርሃን፡ ዘለዓለም።
25 ደቂቅየ፡ በትዕግሥት፡ ተወክፉ፡ መቅሠፍተ፡ እንተ፡ መጽአትክሙ፡ እምኀበ፡ እግዚአብሔር፡ እስመ፡ ሰደድከ፡ ጸላኢከ፡ ወፍጡነ፡ ትሬኢ፡ ድቀቶ፡ ወተዐርግ፡ መልዕልተ፡ ርእሱ።
26 ልሑዳንየ፡ አንሶስዉ፡ ፍኖተ፡ መብእስ፡ ወመሠጥዎሙ፡ ጸላእት፡ ከመ፡ መርዔት፡ ዘተሐብለይዎ።
27 ተአመኑ፡ ደቂቅየ፡ ወጽርሑ፡ ኀበ፡ አምላክ፡ እስመ፡ ውእቱ፡ ዘወሰደክሙ፡ ይዜከረክሙ።
28 እስመ፡ በከመ፡ ኮነ፡ ፈቃድክሙ፡ ከመ፡ ትርኅቁ፡ እምእግዚአብሔር፡ ከማሁ፡ ዕሥረ፡ ድኅረ፡ ተመየጥክሙ፡ ተኀሥሥዎ።
29 እስመ፡ ውእቱ፡ ዘአምጽአ፡ ለክሙ፡ እኩየ፡ ለሊሁ፡ ያመጽእ፡ ለክ፡ ዳግመ፡ ትፍሥሕተ፡ ዘለዓለም፡ ምስለ፡ መድኀኒትክሙ።
30 ተአመኒ፡ ኢየሩሳሌም፡ ያተፌሥሐኪ፡ ዘሰመየኪ።
31 ወየኀሥሩ፡ እለ፡ ሣቀዩኪ፡ ወእለ፡ ተፈሥሑ፡ በድቀትኪ።
32 የኀሥራ፡ አህጉር፡ እለ፡ ቀነያ፡ ደቂቅኪ፡ ወእለ፡ ተመጠዉ፡ ውሉደኪ።
33 በከመ፡ ተፈሥሐት፡ በሙስናኪ፡ ወተኀሥየት፡ በድቀትኪ፡ ከማሁ፡ ትቴክዝ፡ በጥፍአታ።
34 ወእገዝም፡ እምኀቤሃ፡ ብዝኀ፡ ትፍሥሕታ፡ ወፍሥሓሃ፡ ይገብእ፡ ኀበ፡ ላሕ።
35 እስመ፡ ይመጽኣ፡ እሳት፡ እምዘለዓለም፡ ለነዋኅ፡ መዋዕል፡ ወትከውን፡ ማኅደረ፡ አጋንንት፡ ለብዙኅ፡ አዝማን።
36 ነጽሪ፡ ኢየሩሳሌም፡ መንገለ፡ ጽባሕ፡ ወርእዪ፡ ፍሥሐ፡ ዘመጽአ፡ ለኪ፡ እምኀበ፡ አምላክኪ።
37 ናሁ፡ መጽኡ፡ ደቂቅኪ፡ ወተጋብኡ፡ እለ፡ ፈነውኪ፡ እምጽባሕ፡ እስከ፡ ዐረብ፡ በቃሉ፡ ለቅዱስ፡ ወይትፌሥሑ፡ በስብሐተ፡ እግዚአብሔር።
=== chapter 5 ===
[Chapter 5]
1 አእትቲ፡ ኢየሩሳሌም፡ አልባሰ፡ ላሕኪ፡ ወሕማመኪ፡ ወልበሲ፡ ትርሲተ፡ ክብርኪ፡ ዘእምኀበ፡ እግዚአብሔር፡ ለዓለም።
2 ወተዐፀፊ፡ ዐፅፈ፡ ጽድቅ፡ ዘእምኀበ፡ እግዚአብሔር፡ ወተቀጸሊ፡ ቀጸላኪ፡ ውስተ፡ ርእስኪ፡ ዘስብሐቲሁ፡ ቅዱስ።
3 እስመ፡ እግዚአብሔር፡ ያርኢ፡ ለኵሉ፡ ዘታሕተ፡ ሰማይ፡ ብርሃነኪ።
4 ወይሰመይ፡ ስምኪ፡ ለዓለም፡ በኀበ፡ እግዚአብሔር፡ ጽድቅ፡ ወሰላም፡ ወክብር፡ ወፍርሃተ፡ እግዚአብሔር።
5 ተንሥኢ፡ ኢየሩሳሌም፡ ወቁሚ፡ መልዕልተ፡ ወነጽሪ፡ መንገለ፡ ጽባሕ፡ ወርእዪ፡ ከመ፡ ተጋብኡ፡ ደቂቅኪ፡ እምኀበ፡ ምዕራበ፡ ፀሐይ፡ ወእስከነ፡ ጽባሕ፡ በቃሉ፡ ለቅዱስ፡ ወይትፌሥሑ፡ በዝክረ፡ እግዚአብሔር።
6 ወፅኡ፡ እምኀቤኪ፡ ወወሰድዎሙ፡ ፀሮሙ፡ በእግሮሙ፡ ወያመጽኦሙ፡ እግዚአብሔር፡ ኀቤኪ፡ እንዘ፡ ይጸውርዎሙ፡ በክብር፡ ከመ፡ መንበረ፡ ንጉሥ።
7 ወአዘዘ፡ እግዚአብሔር፡ ይተሐት፡ ኵሉ፡ አድባር፡ ነዋኃት፡ ወአውግር፡ ዘለዓለም፡ ወይምላእ፡ ኵሉ፡ ማዕምቅ፡ ወይዕሪ፡ ምድር፡ ከመ፡ ይሑር፡ እስራኤል፡ መጽያሕተ፡ በስብሐተ፡ እግዚአብሔር።
8 ወይጼልሎሙ፡ ኵሉ፡ ዖም፡ ወኵሉ፡ ዕፅ፡ ሠናየ፡ መዐዛ፡ ለእስራኤል፡ በትአዛዘ፡ እግዚአብሔር።
9 እስመ፡ ያመጽኦሙ፡ እግዚአብሔር፡ ለእስራኤል፡ በፍሥሓ፡ ወበብርሃነ፡ ስብሐቲሁ፡ ወበምሕረቱ፡ ወበጽድቁ፡ ዘእምኔሁ፡ ይእቲ።