ምሳልያተ፡ ሰሎሞን፡

EnglishGǝʿǝz Created XML record from Ethio authority google spreadsheet Added keywords Updated title added text

Text of the EOTC printed Bible

Chapter 1 ምሳሌያተ፡ ሰሎሞን፡ ወልደ፡ ዳዊት፡ ዘነግሠ፡ ለእስራኤል፡ በኢየሩሳሌም። ለአእምሮ፡ ጥበብ፡ ወተግሣፅ፡ ወለአእምሮ፡ ቃለ፡ ጥበብ። ወለተወክፎ፡ መይጠ፡ ቃል፡ ወለአእምሮ፡ ጽድቅ፡ ዘበአማን። ወለአርትዖ፡ ፍትሕ፡ ከመ፡ የሀቦሙ፡ ጥበበ፡ ለየዋሃን፡ ለሕፃናት፡ ወለወራዙት፡ ተዐውቆ፡ ወአእምሮ። ዘንተ፡ እምከመ፡ ሰምዐ፡ ጠቢብ፡ ይዌስከ፡ ጥበበ። ወዘሰ፡ አጥረየ፡ ሐዳፈ፡ የአምር፡ ምሳሌ፡ ወሥውረ፡ ነገረ፡ ነገረ፡ ጠቢባን፡ በቅጽበት። ቀዳሚሃ፡ ለጥበብ፡ ፈሪሀ፡ እግዚአብሔር፡ ወአእምሮ፡ ሠናይት፡ ለኵሉ፡ ዘይገብራ፡ ፈሪሀ፡ እግዚአብሔር፡ ቀዳሜ፡ ተዐውቆ፡ ጥበበ፡ ወተግሣፀ፡ ይሜንኑ፡ ረሲዓን። ስማዕ፡ ወልድየ፡ ሕገገ፡ አቡከ፡ ወኢትትኀየይ፡ ትእዛዘ፡ እምከ። አክሊለ፡ ክብር፡ ትነሥእ፡ ለርእስከ፡ ወባዝግና፡ ወርቅ፡ ለክሳድከ። ኦ፡ ወልድየ፡ ኢያስሕቱከ፡ ሰብእ፡ ረሲዓን፡ ወኢትፍቅድ፡ እመ፡ አስተብቊዑከ፡ እንዘ፡ ይብሉ፡ ነዓ፡ ተሳተፍ፡ ምስሌነ፡ ደመ። ወንድፍን፡ ውስተ፡ ምድር፡ ብእሴ፡ ጻድቀ፡ በዓመፃ። ወነኀጦ፡ ከመ፡ ገሃነም፡ ሕያዎ፡ ወንስዓር፡ እምድር፡ ዝክሮ። ወጥሪቶ፡ ብዙኀ፡ ናስተጋብእ፡ ወንምላእ፡ አብያቲነ፡ በርበሮ። ወአንተኒ፡ ኅበር፡ ምስሌነ፡ ወአሐዱ፡ ቊናማት፡ ይኩነነ፡ ለኵልነ፡ ወመስነቅት፡ አሐቲ፡ ትኩነነ። ኢትሑር፡ ወልድየ፡ ምስሌሆሙ፡ ፍኖተ። አግኅሥ፡ እገሪከ፡ እምአሠሮሙ፡ እስመ፡ ለእከይ፡ ይረውፃ፡ እገሪሆሙ፡ ወያፈጥና፡ ለከዒወ፡ ደም። እስመ፡ አኮ፡ በከ፡ ዘይረብቡ፡ መሥገርተ፡ ለሰብእ። እሙንቱሰ፡ እለ፡ ቀቲለ፡ ለመዱ፡ ይዘግቡ፡ ሎሙ፡ እከየ፡ ወድቀቶሙ፡ ለሰብእ፡ ኃጥአን፡ እኩይ። ዝ፡ ፍናው፡ ውእቱ፡ ለኵሎሙ፡ እለ፡ ይፌጽም፡ ኃጣውአ፡ ኃጢአት፡ ወትዕግልት፡ ነፍሶሙ፡ ታኃጒል። ጥበብ፡ በፍናው፡ ትሴባሕ፡ ወበመራኅብት፡ ትሁብ፡ ቃላ። ወውስተ፡ አርእስተ፡ ጥቅም፡ ትሰበክ፡ ወውስተ፡ አናቅጺሆሙ፡ ለኃያላን፡ ትፀመድ፡ ወውስተ፡ አናቅጸ፡ ሀገር፡ ጥቡዐ፡ ትብል። መጠነ፡ መዋዕል፡ የዋሃን፡ ቦሙ፡ ጽድቅ፡ ወኢይትኃፈሩ። እስከ፡ ማእዜኑ፡ ረሲዓን፡ ታፈቅሩ፡ ስሕተተ፡ ዓብዳንሰ፡ ፈታውያነ፡ ጽእለት፡ እሙንቱ፡ ወረሲዓነ፡ ከዊኖሙ፡ ጸልኡ፡ አእምሮ፡ ወርሱሐነ፡ ኮኑ፡ ለእለ፡ ይዘልፍዎሙ፡ ለምንት፡ ትመይጡ፡ ዘለፋየ። ወናሁ፡ አነ፡ እነግረክሙ፡ እስትንፋሰ፡ ቃልየ፡ ወእሜህረክሙ፡ ነገረ፡ ዚአየ። እስመ፡ ጸዋዕኩ፡ ወኢያውሣእክሙኒ፡ ሰፋሕኩ፡ እደውየ፡ ወኢያጽማእክሙኒ። ወአብዛኅኩ፡ ነገረ፡ ወኢተሰጠውክሙኒ፡ ወምኑነ፡ ረሰይክሙ፡ ትእዛዝየ፡ ወዘለፋየኒ፡ ኢነጸርክሙ። ወአነሂ፡ በኃጒልክሙ፡ አስሕቅ፡ ወእትፌሣሕ፡ ሶበ፡ ይመጽአክሙ፡ ግብተ፡ ተሠርዎ። ወሶበ፡ ይመጽአክሙ፡ ግብተ፡ ሀከከ፡ ወሙስናሂ፡ ከማሁ፡ ሶበ፡ ይመጽአክሙ፡ ለአሥግሮሙ፡ ወሶበ፡ ይመጽአክሙ፡ ምንዳቤ፡ ወተፄውዎ፡ ሀሎኩ፡ ህየ። ወሶበ፡ ትጼውዑኒ፡ አነሂ፡ ኢይሰምዐክሙ፡ የኃሥሡኒ፡ እኩያን፡ ወኢይረክቡኒ። እስመ፡ ጸልእዋ፡ ለጥበብ፡ ቃለ፡ እግዚአብሔርኒ፡ ይስምዑ፡ ኢፈቀዱ። ወኢፈቀዱ፡ ይነጽሩ፡ ዘዚአየ፡ ምክረ፡ ወያስተራኵሱ፡ ኵሎ፡ ዘዚአየ፡ ዘለፋ። እንከሰኬ፡ ይብልዑ፡ ፍሬ፡ ምግባሮሙ፡ ወበዘዚአሆሙ፡ ኃጢአት፡ ይጽገቡ። እስመ፡ ኢተመይጦቶሙ፡ ለዓብዳን፡ ትቀትሎሙ፡ እምእንተ፡ ገፍዑ፡ ደቂቅ፡ ይትቀተሉ፡ ወሐተታሆሙ፡ ለረሲዓን፡ ትቀትሎሙ። ወዘሰ፡ ኪያየ፡ ይሄሉ፡ በተስፋ፡ ወየዓርፍ፡ ዘእንበለ፡ ድንጋፄ፡ እምኵሉ፡ እኩይ።

Chapter 2 ወልድየ፡ ለእመ፡ ተወከፍከ፡ ቃለ፡ ትእዛዝ፡ ዘዚአየ፡ ወኀባ፡ እከ፡ በልብከ። ትሰምዕ፡ ዕዝንከ፡ ጥበበ፡ ወትሁብ፡ ልብከ፡ ለአእምሮ፡ ወታቀርብ፡ ለተግሣፅ፡ ልበከ። ወለእመኒ፡ ለጥበብ፡ ጸዋዕከ፡ ወለአእምሮ፡ ወሀብከ፡ ቃለከ፡ ወለለብዎ፡ ኃሠሥከ፡ በዓቢይ፡ ግብር። ወለእመኒ፡ ኃሠሥካ፡ ከመ፡ ብሩር፡ ወከመ፡ መድፍን፡ ፈተንካ። አሜሃ፡ ተአምር፡ ፈሪሀ፡ እግዚአብሄር፡ ወጠይቆ፡ እግዚአብሔር፡ ትረክብ። እስመ፡ እግዚአብሔር፡ ይሁብ፡ ጥበበ፡ ወእምቅድመ፡ ገጹ፡ ለብዎ፡ ወአእምሮ። ወይዘግብ፡ ሎሙ፡ ለእለ፡ ይገብሩ፡ መድኃኒተ፡ ወቃውም፡ ለፍኖቶሙ፡ ከመ፡ ፍኖተ፡ ጽድቅ፡ ወፍኖተ፡ እለ፡ ይፈርህዎ፡ የዓቅብ። አሜሃ፡ ተአምር፡ ፍትሐ፡ ወጽድቀ፡ ወታረትዕ፡ መንኰራኵረ፡ ሠናያተ። እስመ፡ እመ፡ መጽአት፡ ጥበብ፡ ውስተ፡ ሕሊና፡ ዚአከ፡ ወአእምሮ፡ ለነፍሰ፡ ዚአከ፡ ሠናይተ፡ ኮነት። በምክር፡ ሠናይ፡ ተዓቅበከ፡ ወበሕሊና፡ ጽድቅ፡ ትከድነከ። ከመ፡ ታድኅንከ፡ እምፎኖት፡ እኪት፡ ወእምብእሲ፡ ዘኢይነብብ፡ ወኢምንተኒ፡ ህልወ፡ ቃለ። ወይ፡ ሎሙ፡ ለእለ፡ የኀድጉ፡ ፍናወ፡ ርቱዓተ፡ ከመ፡ ይሑሩ፡ በፍናወ፡ ጽልመት። ወእለ፡ ይትፌሥሑ፡ ብእኩይ፡ ወእለ፡ ይትኃሠዩ፡ በሚጠተ፡ እኪት። እለ፡ ፍናዊሆሙ፡ መብእስ፡ ወደጋን፡ መንኰራኵሮሙ፡ ከመ፡ ያርኅቁከ፡ እምፍኖት፡ ርትዕ፡ ወነኪር፡ እምፍኖተ፡ አእምሮተ፡ ጽድቅ። ወልድየ፡ ኢትርከብከ፡ ምክር፡ እኪት፡ እንተ፡ ታኃድግ፡ ተምህርተ፡ በውርዙትከ። ወልድየ፡ ዕቀብ፡ ቃልየ፡ ከመ፡ ይባልሕከ፡ እምብእሲት፡ እኪት፡ ወነኪርት፡ እንተ፡ ቃላ፡ ትምይንት፡ ዘኃደገት፡ ምታ፡ ዘንእሳ፡ ወሥርዓተ፡ እግዚአብሔር፡ እንተ፡ ረስዓት። ወአንበረት፡ ኀበ፡ ሞት፡ ወኀበ፡ ሶኦል፡ ወምስለ፡ ኃያላን፡ እምድር፡ አርትዓት፡ መንኰራኵራ። ኵሎሙ፡ እለ፡ የሐውሩ፡ ባቲ፡ ኢይትመየጡ፡ ወኢይረክቡ፡ ፍናወ፡ ርቱዓተ፡ ወኢይትረከቡ፡ በዓመተ፡ ሕይወት። ሶበሰ፡ የሐውሩ፡ ፍናወ፡ ርቱዓተ፡ እምረከቡ፡ ፍናወ፡ ጽድቅ፡ ልሙፃተ፡ ኄራነ፡ ይከውኑ፡ እለ፡ ይነብሩ፡ ዲበ፡ ምድር፡ ወየዋሃን፡ ይተርፉ፡ ውስቴታ። እስመ፡ ራትዓን፡ የኃድርዋ፡ ለምድር፡ ወጻድቃን፡ ይተርፉ፡ ውስቴታ። ፍናወ፡ ረሲዓን፡ እምድር፡ ይሤረዋ፡ ወዓማፅያንሰ፡ ይሰደዱ፡ እምውስቴታ።

Chapter 3 ወልድየ፡ ሕገገ፡ ዚአየ፡ ኢትርሳዕ፡ ወቃላትየ፡ ይዕቀብ፡ ልብከ። ኑኀ፡ መዋዕል፡ ወዓመታተ፡ ሕይወት፡ ወሰላም፡ ይትዌሰኩከ። ምጽዋት፡ ወሃይማኖት፡ ኢይርኃቀ፡ እንቆ፡ ውስተ፡ ክዳድከ፡ ወጸሐፎ፡ በጽሌ፡ ልብከ። ወትረክብ፡ ሞገሰ፡ ሐሊ፡ ሠናየ፡ በቅድመ፡ እግዚአብሔር፡ ወሰብእ። ሀሉ፡ ተወኪለከ፡ በእግዚአብሔር፡ በኵሉ፡ ልብከ፡ ወበጥበብከ፡ ኢትትዓበይ። በኵሉ፡ ፍናዊከ፡ አክብራ፡ ከመ፡ ታርትዕ፡ ፍናዊከ። ኢትኩን፡ ጠቢበ፡ ዘበርእስከ፡ አላ፡ ፍርሆ፡ ለእግዚአብሔር፡ ወተገኀሥ፡ እምኵሉ፡ እኩይ። ወሶቤሃ፡ ፈውሰ፡ ይከውነከ፡ ለሥጋከ፡ ወሥራየ፡ ለአዕፅምቲከ። አክብሮ፡ ለእግዚአብሔር፡ እምዘ፡ በጽድቅ፡ ጥሪትከ፡ ወአብእ፡ ሎቱ፡ ቀዳሜ፡ ማእረርከ፡ ወእምፍሬ፡ ጽድቅከ። ከመ፡ ይስፍፋ፡ መዛግብቲከ፡ ብዙኀ፡ ሥርናየ፡ ወወይነ፡ ማኅበብቲከ፡ ይስፍፍ። ወልድየ፡ ኢትትአንተል፡ ተግሣፀ፡ እግዚአብሔር፡ ወኢትድክም፡ እምኀቤሁ፡ በተዛልፎቱ። እስመ፡ ዘአፍቀረ፡ ይጌሥፅ፡ እግዚአብሔር፡ ከመ፡ አብ፡ ዘይሠምር፡ ወልዶ፡ ወይቀሥፍ፡ ኵሎሙ፡ ውሉዶ፡ ዘኢይትዌከፉ። ብፁዕ፡ ብእሲ፡ ዘይረክባ፡ ለጥበብ፡ ወኢ፡ መዋቲ፡ ዘአእመረ፡ ሐኒከ። ይኄይስ፡ ኪያሃ፡ ተገብሮ፡ እምተገብሮ፡ ወርቅ፡ ወብሩር፡ ወእምብዙኅ፡ መዛግብት። ክብርት፡ ይእቲ፡ እምዕንቊ፡ በብዙኅ፡ ሤጡ፡ ወኢይትቃወማ፡ ምንትኒ፡ እኩይ። ሠናይት፡ ሀገሪት፡ ይእቲ፡ ለኵሎሙ፡ እለ፡ ይቀርብዋ፡ ወኵሉ፡ ክብር፡ ኢኮነ፡ መጠና፡ ኑኀ፡ መዋዕል፡ ወዓመተ፡ ሕይወት፡ ውስተ፡ የማና። ውስተ፡ ጸጋማ፡ ክብር፡ ወብዕል፡ ወእምአፉሃ፡ ይወጽእ፡ ጽድቀ፡ ሕገ፡ ወምጽዋተ፡ በልሳና፡ ትለብስ፡ ፍናዊሃ፡ ፍናወ፡ ሕይወት፡ ወኵሉ፡ አሠራ፡ በሰላም። ዕፅ፡ ሕይወት፡ ይእቲ፡ ለኵሎሙ፡ እለ፡ ይትመረጐዝዋ፡ ወለእለ፡ ይትአመኑ፡ ባቲ፡ ዘበእግዚአብሔር፡ ፅኑዕ። እግዚአብሔር፡ በጥበብ፡ ሣረራ፡ ለምድር፡ ወአስተዳለወ፡ ሰማያተ፡ በአእምሮ። ወበተዓውቆቱ፡ ቀላያት፡ ነቅዑ፡ ወደመናትኒ፡ ያውኅዙ፡ ጠላተ። ወልድየ፡ ኢትትሀከይ፡ ዕቀብ፡ ምክርየ፡ ወሕሊናየ፡ ከመ፡ ትሕየው፡ ነፍስከ። ወሞገሰ፡ ይከውነከ፡ ውስተ፡ ክዳድከ፡ ወይከውን፡ ፈውሰ፡ ለሥጋከ፡ ወሥራየ፡ ለአዕፅምቲከ፡ ከመ፡ ትሑር፡ ጥቡዐ፡ በሰላም፡ በኵሉ፡ ፍናዊከ። ወእገሪከ፡ ኢይትዓቀፉ፡ እመሂ፡ ትነብር፡ ኢትፍራህ። ወእመኒ፡ ሰከብከ፡ ሐዋዘ፡ ትነውም፡ ወኢተፈርህ፡ ዘይመጽአከ፡ ሀከከ፡ ወመራደ፡ ረሲዓን፡ ዘይመጽእ። እስመ፡ እግዚአብሔር፡ ይሁሉ፡ ምስሌከ፡ ውስተ፡ ኵሉ፡ ፍናዊከ፡ ወያቀውሞን፡ ለእገሪከ፡ ከመ፡ ኢያንቀልቅላ። ወኢትትሀከይ፡ ገቢረ፡ ሠናይ፡ ለፅኑስ፡ መጠነ፡ ቦ፡ ውስተ፡ እዴከ፡ ርድኦ። ወኢትበል፡ ሑር፡ ወግባእ፡ ጌሠመ፡ እሁበከ፡ እንዘ፡ ትክል፡ ገቢረ፡ ሠናይ፡ እስመ፡ ኢተአምር፡ ዘትወልድ፡ ሳኒታ። ወዓዲ፡ ኢተሐሊ፡ እኩየ፡ ላዕለ፡ ዓርክከ፡ ዘየኃድር፡ ወይትዌከል፡ ብከ፡ ወኢትፍቅድ፡ ተጻልኦ፡ ምስለ፡ ሰብእ፡ በከ፡ እመ፡ አልቦ፡ ዘይገብር፡ እኩየ፡ ላዕሌከ። ኢትጥሪ፡ ዝንጓጔ፡ በኀበ፡ ሰብእ፡ እኩያን፡ ከመ፡ ኢትኩን፡ ከማሆሙ። ወኢትቅናእ፡ በፍናዊሆሙ፡ እስመ፡ ርስ፡ ውእቱ፡ በኀበ፡ እግዚአብሔር፡ ኵሉ፡ ኃጥእ፡ ወምስለ፡ ጻድቃን፡ ኢይዴመር። ወርገመ፡ እግዚአብሔር፡ ውስተ፡ አብያተ፡ ረሲዓን። ወውስተ፡ አብያተ፡ ጻድቃን፡ በረከተ፡ እግዚአብሔር፡ ወለዕቡያን፡ ይትቃወሞሙ፡ ንዴት። ወለትሑታን፡ ይሁቦሙ፡ ክብረ፡ ወክብረ፡ ይወርሱ፡ ጠቢባን። ወረሲዓንሰ፡ አዕበዩ፡ ኃሣረ።

Chapter 4 ስምዑ፡ ውሉድየ፡ ተግሣፀ፡ አብ፡ ይኩን፡ ብዙኀ፡ መዋዕለ፡ ሕይወትክሙ። ወአምጽኡ፡ በአእምሮ፡ ሕሊና፡ እስመ፡ ሠናየ፡ ጸጋ፡ እጼግወክሙ፡ ወሕገገ፡ ዚአየ፡ ኢትኅድጉ። እስመ፡ ኮንኩ፡ አነሂ፡ ወልደ፡ ሰማዔ፡ አብ፡ ወእትፈቀር፡ በገጸ፡ እምየ። እንዘ፡ ይሜህሩኒ፡ ወይብሉኒ፡ ይባእ፡ ቃለ፡ ዚአነ፡ ውስተ፡ ልብከ፡ ዕቀብ፡ ትእዛዛቲነ። ወኢትርሳዕ፡ ወኢትትሀየይ፡ ንባበ፡ አፉነ፡ ወኢትኅድጋ። ወአጥሪ፡ አእምሮ፡ ወትትዌከፈከ፡ አፍቅራ። ወተዓቅበከ፡ ዑዳ፡ ወታሌዕለከ። ስማዕ፡ ወልድየ፡ ወተወከፍ፡ ንባበ፡ ዚአየ፡ ከመ፡ ይብዝኀ፡ ዓመታተ፡ ሕይወትከ፡ ወከመ፡ ይኩን፡ ፍናወ፡ ሕይወትከ፡ ብዙኀ። እስመ፡ ፍኖተ፡ ጥበብ፡ አሜህረከ፡ ወአፀንዓከ፡ ዲበ፡ መንኰራኵ፡ ርቱዕ። እመሂ፡ ተሐውር፡ ኢይትዐፀው፡ አሠርከ፡ ወእመሂ፡ ሮፅከ፡ ኢትደክም፡ ወተወክፎ፡ ቃለ፡ ዚአየ፡ ኢትኅድግ። ዕቀባ፡ ለርእስከ፡ ወኢትኀድጋ፡ ለሕይወትከ። ፍኖተ፡ ረሲዓን፡ ኢትኪድ፡ ወኢትቅናእ፡ በፍናወ፡ ኃጥአን፡ ወመካነ፡ እንተ፡ ኀበ፡ ግእዙ፡ ኢትሑር፡ ህየ፡ ተገኀሥ፡ እምኔሆሙ፡ ወተመየጥ። እስመ፡ ኢይነውሙ፡ እመ፡ ኢገብሩ፡ አኩየ፡ ተመሥጠ፡ ንዋም፡ እምአዕይንቲሆሙ። ወኢይነውሙ፡ እመ፡ ኢደወዩ፡ እለ፡ ይበልዑ፡ ወብልዐ፡ ኃጢአት፡ ወበወይነ፡ ዓመፃ፡ ይሰክሩ። ወፍኖተ፡ ጻድቃንሰ፡ ከመ፡ ብርሃን፡ ይበርህ፡ የሐውሩ፡ ወያበርሁ፡ እስከ፡ ሶበ፡ ታረትዕ፡ ዕለት። ወፍኖተ፡ ኃጥንሰ፡ ጽልመት፡ ወኢየአምሩ፡ ከመ፡ ይትዓቀፉ። ወልድየ፡ ንባበ፡ ዚአየ፡ ነፅር፡ ወቃለ፡ ዚአየ፡ ያጽምእ፡ ዕዝንከ፡ ከመ፡ ኢይንጽፋ፡ ዓዘቃቲከ። ዕቀቦን፡ ውስተ፡ ልበከ፡ እስመ፡ ሕይወት፡ ውእቶን፡ ለእለ፡ ይረክብዎን፡ ወለኵሉ፡ ዘሥጋ። ወበኵሉ፡ ተዓቅቦ፡ ዕቀብ፡ ልበከ፡ እምዝንቱ፡ ፍኖት፡ እስመ፡ ውእቱ፡ ነቅዐ፡ ሕይወት። ወእርኅቅ፡ እምኔከ፡ አፈ፡ እኩየ፡ ወከናፍረ፡ ዓመፃ፡ አንኅአርኅቆ፡ እምኔከ። ወዕይንቲከኒ፡ ርቱዐ፡ ይርአያ፡ ወቀራንብቲከ፡ ይቅጽባ፡ ጽድቀ። ርቱዐ፡ መንኰራኵረ፡ ግበር፡ ለእገሪከ፡ ወፍናዊከ፡ አርትዕ። ወኢትትገኀሥ፡ ኢ፡ ለየማን፡ ወኢ፡ ለጸጋም፡ አግኅሥ፡ እገሪከ፡ እምፎኖት፡ እኪት፡ እስመ፡ ፍናወ፡ ዘየማን፡ ያፈቅር፡ እግዚአብሔር። ጣዋያት፡ እማንቱ፡ እለ፡ በጸጋም፡ ወውእቱ፡ ርቱዐ፡ መንኰራኵረ፡ ይገብር፡ ለእገሪከ፡ ወሑረትከኒ፡ በሰላም፡ ያሤኒ።

Chapter 5 ወልድየ፡ ጥበበ፡ ዚአየ፡ ነጽር፡ ወንባበ፡ ዚአየ፡ ያጽምእ፡ ዕዝንከ፡ ከመ፡ ትዕቀብከ፡ በሕሊና፡ ሠናይት። ወአእምር፡ እምከናፍርየ፡ ዘእኤዝዘከ። ኢትነፅር፡ ብእሲተ፡ እኪተ፡ እስመ፡ መዓር፡ ይውኅዝ፡ እምከናፍረ፡ ብእሲት፡ ዘማ፡ እንተ፡ ለጊዜሁ፡ ያመዓርዕሮ፡ ለጒርዔከ። ወእምድኅሬሁሰ፡ ዘይመርር፡ እምሐሞት፡ ትረክብ፡ ወስሑል፡ ፈድፋደ፡ እመጥባሕት፡ ዘክልኤ፡ አፉሁ። ወኀበ፡ ዕበድ፡ እገሪሃ፡ ያወርዱ፡ ወሑረታ፡ ያበውእ፡ ውስተ፡ ሞት፡ ወሲኦል። ወአሠራ፡ ኢይትሐወስ፡ እመካነ፡ ኃጢአት፡ ወውስተ፡ ፍናወ፡ ሕይወት፡ ኢይቀርብ፡ ወእቡስ፡ መንኰራኵራ፡ ወአኮ፡ ዘይትዐወቅ። ወይእዜኒ፡ ወልድየ፡ ስምዐኒ፡ ወምኑነ፡ ኢትረሲ፡ ንባበ፡ ዚአየ። ርኁቀ፡ ረሲ፡ እምኔሃ፡ ፍኖተከ፡ ወኢትቅረብ፡ ኀበ፡ ኆኅተ፡ ቤታ። ከመ፡ ኢትወስክ፡ ለባዕድ፡ ሕይወተከ፡ መንብረተከ፡ ለእለ፡ ዘእንበለ፡ ምሕረት። ከመ፡ ኢይጽገቡ፡ ነኪራን፡ ኃይለከ፡ ወፃማ፡ ዚአከ፡ ቤተ፡ ባዕድ፡ ኢይባእ። ወትኔስሕ፡ ድኅረ፡ አመ፡ ደክመ፡ ሥጋ፡ ነፍስከ። ወትብል፡ እፎ፡ ጸላእኩ፡ ትምህርተ፡ እምንእስየ፡ ወእምተግሣፅ፡ ተግኅሠ፡ ዕዝንየ። ወኢሰማዕኩ፡ ቃለ፡ ዘይሜህሩኒ፡ ወይጌሥፁኒ፡ ወኢያፅማእኩ፡ በእዝንየ። ዘእንበለ፡ ንስቲት፡ ኮንኩ፡ ውስተ፡ ኵሉ፡ እኩይ። ማእከለ፡ ማኅበር፡ ወእንግልጋ፡ ስተይ፡ ማየ፡ እምቀሱትከ፡ ወእምነቅዐ፡ ዐዘቅትከ፡ ወየኀዛ፡ ማያት፡ እምዐዘቅትከ፡ ወውስተ፡ መራኅብቲከ፡ ይሑራ፡ ማያቲከ። ወትኩን፡ ለከ፡ ለባሕቲትከ፡ ወአልቦ፡ ነኪር፡ ዘይነሥአከ፡ ወዓዘቅት፡ ማይከ፡ ትኩን፡ ለከ። ወተፈሣሕ፡ ምስለ፡ ብእሲተ፡ ንእስከ። በፍቅረ፡ ኃየል፡ ወዕዋል፡ ተፋቀር፡ ምስለ፡ ብእሲትከ። ሞገሰ፡ ፍቅራ፡ ያረውየከ፡ እንቲአከ፡ ትኩንከ፡ ለከ፡ ወተሀሉ፡ ምስሌከ፡ በኵሉ፡ ጊዜ። በዛቲ፡ ፍቅር፡ እንዘ፡ ትትፋቀር፡ ብዙኀ፡ ትከውን፡ ወኵለንታከ፡ ኢየሀሉ፡ ኀበ፡ ነኪርት። ወኢታውትር፡ እዴከ፡ ኀበ፡ እንተ፡ ኢኮነት፡ እንቲአከ። እስመ፡ ቅድመ፡ አዕይንተ፡ እግዚአብሔር፡ ውእቱ፡ ፍናወ፡ ብእሲ፡ ወውስተ፡ ኵሉ፡ መንኰራኵሪሁ፡ ያስተሐይጽ። ኃጢአት፡ ያሤግር፡ ብእሴ፡ ወበኀብለ፡ ኃጢአት፡ ኵሉ፡ ይትሐሰል። ዝንቱ፡ ይመውት፡ ምስለ፡ ዓብዳን፡ ወእምብዝኀ፡ ዕበዱ፡ ተገድፈ፡ ሕይወቱ፡ ወተኀጒለ፡ ብእንተ፡ ዕበዱ።

Chapter 6 ወልድየ፡ እመ፡ ተኀበይኮ፡ ለዓርክከ፡ ትሁብ፡ እዴከ፡ ለእድው። ወሥገርት፡ ጽኑዕ፡ ውስተ፡ ከናፍሪሁ፡ ለብእሲ፡ ወይትኃጐል፡ በከናፍረ፡ አፉሁ። ግበር፡ ወልድየ፡ ዘአነ፡ እኤዝዘከ፡ ወኄረዓል፡ እስመ፡ እመጻእከ፡ ውስተ፡ እደው፡ እኩያን፡ በእንተ፡ ዓርክከ፡ ኩን፡ ኢተሀካዬ፡ ወወሀኮ፡ ለዓርክከ፡ ዘተሀበይኮ። ወኢተሀቦን፡ ንዋመ፡ ለአዕይንቲከ፡ ወኢድቃሰ፡ ለቀራንብቲከ። ከመ፡ ትድኃን፡ ከመ፡ ወይጠል፡ እመሥገርት፡ ወከመ፡ ዖፍ፡ እመጽፈርት። ተመየጥ፡ ኀበ፡ ቃሕም፡ ኦ፡ ሀካይ፡ ወኢትኩን፡ ሀካየ፡ ወቅናእ፡ ርእየከ፡ ፍናዊሁ፡ ወኩን፡ ጠቢበ፡ እምኔሁ። ወውእቱ፡ እንዘ፡ ወፍር፡ አልቦ፡ ወዘሂ፡ አልቦ፡ ዘያጌብሮ፡ ወእንዘ፡ እግዚእ፡ አልቦ፡ ያስተጋብእ፡ በሐጋይ፡ ሲሳዮ፡ ብዙኀ፡ አመ፡ ማእረር፡ ወይትጌበር፡ ዘያነብር። አው፡ ሑር፡ ኀበ፡ ንኅብ፡ ወአእምር፡ ከመ፡ መስተገብርት፡ ይእቲ፡ ወትግብርታሂ፡ ከመ፡ ሠናየ፡ ትገብር፡ እንተ፡ ፃማሃ፡ ነገሥት፡ ዓብዳን፡ ይነሥኡ፡ ለሕይወት፡ እንተ፡ ትትፈቅድ፡ ይእቲ፡ በኀበ፡ ኵሉ፡ ወክብርት፡ ይእቲ፡ ወበኃይል፡ ጽብስት፡ ወበግብራሰ፡ ጽንዕት። ጥበበ፡ አክቢራ፡ አስተርአየት፡ እስከ፡ ማእዜኑ፡ ሀካይ፡ ትሰክብ፡ ወማእዜ፡ እምንዋምከ፡ ትነቅሕ። ሕቀ፡ ትነውም፡ ወሕቀ፡ ትነብር፡ ሕቀ፡ ትዴቅስ፡ ወሕቀ፡ ታስተጋብእ፡ እዴከ፡ ዲበ፡ እንግድዓከ። ወእምዝ፡ ይመጽእከ፡ ግብተ፡ ከመ፡ እኩይ፡ ሐዋርያ፡ ንዴት፡ ወተፅናስ፡ ከመ፡ ኄር፡ ረዋጺ። ወእመሰ፡ ኢኮንከ፡ ሀካየ፡ ይመጽአከ፡ ከመ፡ ነቅዕ፡ ማእረርከ፡ ወንዴትሰ፡ ከመ፡ እኩይ፡ ረዋጺ፡ ለሊሁ፡ ይርኅቅ፡ እምኔከ። ብእሲ፡ ዓብድ፡ ወዓማፂ፡ የሐውር፡ ፍናወ፡ ዘኢኮና፡ ኄራተ፡ ወውእቱ፡ ይቀጽብ፡ በዓይን፡ ወያኤምር፡ በእግር፡ ወያኤምር፡ በቅጽበተ፡ አፃብዕ። ወዕሉት፡ ልብ፡ ትሔሊ፡ እኩየ፡ በኵሉ፡ ጊዜ፡ ዘከመዝ፡ ያመጽእ፡ ሀከከ፡ ላዕለ፡ ሀገር። ወእንቲአሁ፡ ይመጽእ፡ ግብተ፡ ሕጒለት፡ ወዝብጠት፡ ወቅጥቃጤ፡ ዘኢየሐዩ። እስመ፡ ይትፌሣሕ፡ በኵሉ፡ ዘይጸልእ፡ እግዚአብሔር፡ ወይትቀጠቀጥ፡ በእንተ፡ ርኵሰ፡ ነፍሱ። ናሁ፡ ስሱ፡ ዘይጸልእ፡ እግዚአብሔር፡ ወሳብዖምሰ፡ ሰቆራረ፡ ነፍሱ። ዓይነ፡ ጸአሌ፡ ወልሳነ፡ ዓማፄ፡ ወእደ፡ ዘይክዑ፡ ደመ፡ ጻድቅ። ወልበ፡ እንተ፡ ትወልድ፡ እኩየ፡ ሕሊና፡ ወአእጋረ፡ እለ፡ ይትወላወላ፡ ለገቢረ፡ እከይ። ወዘያነድድ፡ ስምዐ፡ ዓማፂ፡ ወይፌኑ፡ ጋእዘ፡ ማእከለ፡ አኀው። ዕቀብ፡ ወልድየ፡ ሕገገ፡ አቡከ፡ ወኢትትኀየይ፡ ትእዛዘ፡ እምከ። ደዮ፡ ውስተ፡ ልብከ፡ በኵሉ፡ ጊዜ፡ ወጠብልሎ፡ ውስተ፡ ክሳድከ። ወሶበኒ፡ ተሐውር፡ ንሥኦ፡ ምስሌከ፡ ወየሀሉ፡ ወሶበኒ፡ ትነውም፡ የዓቅበከ፡ ወሶበኒ፡ ትትነሣእ፡ ይትናገረከ። እስመ፡ ማኅቶት፡ ትእዛዘ፡ ወሕግ፡ ብርሃን፡ ወፍኖተ፡ ሕይወት፡ ተግሣፅ፡ ወትምህርት። ወልድየ፡ ዕቀብ፡ ትእዛዝየ፡ ከመ፡ ትዕቀብከ፡ እምብእሲተ፡ ብእሲ፡ ወእምውዴተ፡ ልሳን፡ እኩይ። ኢይማዕከ፡ ሥነ፡ ፍትወታ፡ ወኢትሠገር፡ በአዕይንቲሃ፡ ወኢትትመሠጥ፡ በቀራንብቲሃ። ፍቅራ፡ ለዘማ፡ እስከ፡ አሐቲ፡ ኅብስት፡ ወብእስትሰ፡ ለእይው፡ ክቡራን፡ ታኀጒል፡ ነፍሶሙ፡ ወታሤግር። መኑ፡ ዘየዓቊር፡ እሳተ፡ ውስተ፡ ኅፅኑ፡ ወአልባሲሁ፡ ኢይውዕያ። ወመኑ፡ ዘየሐውር፡ ዲበ፡ አፍሐመ፡ እሳት፡ ወእገሪሁ፡ ኢይውዕያ። ከማሁ፡ ዘይበውእ፡ ቤተ፡ ብእሲተ፡ ብእሲ፡ ኢይነጽሕ፡ ወኵሉ፡ ዘይለክፋ። አኮ፡ መንክር፡ እመ፡ ተእኀዘ፡ ሰራቂ፡ ዘይሰርቅ፡ እስመ፡ ይሰርቅ፡ ከመ፡ ያጽግብ፡ ነፍሶ፡ ርኅብተ። ወለእመ፡ ተእኅዘ፡ ይፈዲ፡ ምስብዒተ፡ ወኵሎ፡ ጥሪቶ፡ ይሁብ፡ ከመ፡ ያድኅን፡ ነፍሶ። ወመሐዝሰ፡ በንዴተ፡ አእምሮ፡ ኀጒለ፡ ነፍሱ፡ ይትጌበር። ሕማመ፡ ወኀሣረ፡ ይጼውዕ፡ ወጽእለቱ፡ ኢይደመሰስ፡ ለዓለመ፡ ዓለም። እስመ፡ ምሉዕ፡ ምታ፡ ቅንአተ፡ ወመዓተ፡ ወኢይምሕሮ፡ በዕለተ፡ ኵነኔ። ወኢይትዌለጥ፡ በምንትኒ፡ ባዛ፡ ጽልእ፡ ወኢይትዓረቆ፡ ወብዙኅ፡ ሀብት።

Chapter 7 ወልድየ፡ ዕቀብ፡ ነገረ፡ ዚአየ፡ ወትእዛዘ፡ ዚአየ፡ ይባእ፡ ኀቤከ። ወልድየ፡ አክብሮ፡ ለእግዚአብሔር፡ ወትጸንዕ፡ እምኵሉ፡ ወዘእንበሌሁሰ፡ ኢትፍራህ፡ ባዕደ፡ እስመ፡ አልቦ፡ ዘይቀትለከ፡ ወአልቦ፡ ዘያሐይወከ። ወልድየ፡ ትእዛዘ፡ ዚአየ፡ ዕቀብ፡ ወተሐዩ፡ ወንባበ፡ ዚአየ፡ ዕቀብ፡ ከመ፡ ብንተ፡ ዓይንከ። ደዮ፡ ውስተ፡ አፃብዒከ፡ ወጸሐፎ፡ ውስተ፡ ራኅበ፡ ልብከ። በላ፡ ለጥበብ፡ እኅተ፡ ዚአየ፡ አንቲ፡ ወለአእምሮ፡ ሀገሪተከ፡ ረስያ። ከመ፡ ትዕቀብከ፡ እምብእሲት፡ ነኪርት፡ ወእኪት፡ ወእም፡ ነገረ፡ ዘርቅ፡ አምጽአት፡ ብከ። እስመ፡ እመስኮተ፡ ቤታ፡ ውስተ፡ መራኅብት፡ ትሔውጽ። እመቦ፡ ዘርእየት፡ እምዓብዳን፡ ውሉድ፡ ወሬዛ፡ ነዳየ፡ አእምሮ፡ ዘየሐውር፡ ውስተ፡ ፍናወ፡ ማዕዘንተ፡ ቤታ፡ (ትጼውዖ፡ ወትብሎ)። ወይትናገር፡ በጽልመት፡ ሠርከ፡ ሶበ፡ ይከውን፡ ጽማዌ፡ ወጽልመተ፡ ሌሊት። ወሶቤሃ፡ ትዳደቆ፡ እንተ፡ ባቲ፡ ትርሢተ፡ ዝሙት፡ እንተ፡ ትሬሲ፡ ታሥርር፡ ልበ፡ ወራዙት። ሥርርት፡ ይእቲ፡ ወምርዕት፡ ወሥርውት፡ ወበቤታኒ፡ ኢያዓርፉ፡ እገሪሃ። ወምዕረ፡ ኅዳጠ፡ አፍኣ፡ ታንጎጉ፡ ወምዕረ፡ ኅዳጠ፡ ውስተ፡ መራኅብት፡ ወውስተ፡ ማዕዘንት፡ ትጸንሕ። ወአኀዘቶ፡ ወሰዓመቶ፡ ወዘእንበለ፡ ኃፍረት፡ በገጽ፡ ትብሎ። መሥዋዕተ፡ ሰላምየ፡ ውእቱ፡ ም፡ ብፅዓትየ፡ እሁብ። በዝንተ፡ ዝንቱ፡ መጻእኩ፡ እትቀበልከ፡ ወእንዘ፡ አፈቅር፡ ገጸ፡ ዚአከ፡ ረከብኩከ። በቀጠንት፡ ገለድኩ፡ ምስካብየ፡ ወዘርቤታተ፡ ነጸፍኩ፡ ዘእምግብፅ፡ ነስነስኩ፡ ምስካብየ፡ በመጽርይ፡ ወቤትየኒ፡ በቀናንሞስ፡ ነዓ፡ ናስተሐውዝ፡ በተሳዕሞ፡ እስከ፡ ነግህ። ወናንገርግር፡ በተፋቅሮ፡ እስመ፡ ኢሀሎ፡ ምትየ፡ ውስተ፡ ቤቱ። ወሖረ፡ ርኁቀ፡ ብሔረ፡ ዕቊረ፡ ወርቅ፡ ነሢኦ፡ ውስተ፡ እዴሁ፡ ወመዋዕል፡ ብዙኅ፡ እመ፡ ገብአ፡ ውስተ፡ ቤቱ። ወአስሐተቶ፡ በብዙኅ፡ ነገር፡ ወበመሥገርተ፡ ከናፍሪሃ፡ ሰሐበቶ። ወተለዋ፡ ደኒኖ፡ ከመ፡ ላሕም፡ ዘየሐውር፡ ለተጠብሖ፡ ወከመ፡ ከልብ፡ ለተአስሮ። ወከመ፡ ኃየል፡ ዘተነድፈ፡ ወተሐይጰ፡ ከብዶ፡ ወይጔጒእ፡ ከመ፡ ዖፍ፡ ለመሥገርት። ወኢየአምር፡ ከመ፡ በነፍሱ፡ ይረውፅ። ወይእዜኒ፡ ስምዐኒ፡ ወልድየ፡ ወአጽምእ፡ ቃለ፡ አፉየ። ወኢይትመየጥ፡ ለወብከ፡ ውስተ፡ ፍናዊሃ፡ ወኢትስሐት፡ ውስተ፡ አሠራ። ወብዙኃነ፡ አስሒታ፡ አቊሰለት፡ ወአልቦሙ፡ ኊልቊ፡ ለእለ፡ አስሐተቶሙ። ፍናወ፡ ሲኦል፡ ቤታ፡ እለ፡ ያወርዱ፡ ውስተ፡ መዛግብቲሁ፡ ለሞት።

Chapter 8 አንተሰ፡ ጥበበ፡ ስብከ፡ ከመ፡ አእምሮ፡ ታውሥእከ። እስመ፡ ውስተ፡ ጽንፈ፡ ነዋኃት፡ ይእቲ፡ ወማእከለ፡ ፍናው፡ ቆመት፡ ወውስተ፡ አናቅጾሙ፡ ለኃያላን፡ ትጸንሕ። ወበውስተ፡ ፍነው፡ ትሴባሕ፡ ኪያክሙ፡ ሰብእ፡ አስተበቊዕ፡ ወእነግር፡ ቃለ፡ ዚኣየ፡ ለውሉደ፡ ሰብእ። አእምሩ፡ የዋሃን፡ ተጠብቦ፡ ወዓብዳን፡ አጥርዩ፡ ልበ። ስምዑኒ፡ እስመ፡ መፍትወ፡ አየድዕ፡ ወአወፅእ፡ እምከናፍርየ፡ ርቱዐ። እስመ፡ ጽድቀ፡ ትሜህር፡ ጒርዔየ፡ ወርኩሳት፡ በቅድሜየ፡ ከናፍረ፡ ሐሰት። ወጽድቅ፡ ኵሉ፡ ቃለ፡ አፉየ፡ ወአልቦ፡ እምውስቴቶሙ፡ ጠዋይ፡ ወማዕቅፍ። ኵሉ፡ ርቱዕ፡ በቅድሜሆሙ፡ ለእለ፡ የአምሩ፡ ወርቱዕ፡ ለእለ፡ ይረክቡ፡ ልቡና። ንሥኡ፡ ትምህርተ፡ እምብሩር፡ ወአእምሮ፡ እምቀርቅ፡ ፍቱን፡ ወተወከፉ፡ ተዓውቆ፡ እምወርቅ፡ ጽሩይ። እስመ፡ ትኄይስ፡ ጥበብ፡ እምዕንቊ፡ ዘብዙኅ፡ ሤጡ፡ ወኵሉ፡ ክብር፡ ኢመጠና፡ ላቲ። አነ፡ ጥበብ፡ አኅደርኩ፡ ምክረ፡ ወአእምሮ፡ ወሕሊና፡ አነ፡ ጸዋዕኩ። ፈራሄ፡ እግዚአብሔር፡ ይጸልእ፡ ዓመፃ፡ ጽልአ፡ ወትዕቢተ፡ ወፍናወ፡ እኩያተ፡ ጸላእኩ። ወዓዲ፡ ጸላእኩ፡ ጠዋያተ፡ ፍናወ፡ እኩያን፡ ሊተ፡ ምክር፡ ወእዘዝ፡ ሊተ፡ አእምሮ፡ ወሊተ፡ ጽንዕ። ብየ፡ ነገሥት፡ ይነግሡ፡ ወኃያላን፡ ይጽሕፉ፡ ጽድቀ። ብየ፡ ዓቢያን፡ ይከብሩ፡ ወመኳንንት፡ ይእኅዙ፡ ምድረ። አነ፡ እለ፡ ያፈቅሩኒ፡ አፈቅር፡ ወእለ፡ የኀሥሡ፡ ኪያየ፡ ይረክቡ፡ ሞገሰ። ክብር፡ ወብዕል፡ ኀቤየ፡ ሀሎ፡ ወጥሪት፡ ብዙኅ፡ ወጽድቅ፡ ይኄይስ፡ ኪያሃ፡ ኀሪይ፡ እምወርቅ፡ ወእምዕንቊ፡ ክቡር። ወፍሬ፡ ዚአየ፡ ይኄይስ፡ እምብሩር፡ ጽሩይ። ወውስተ፡ ፍናወ፡ ጽድቅ፡ አንሶሱ፡ ወማእከለ፡ አሠረ፡ ጽድቅ፡ እትመያየጥ። ከመ፡ እከፍሎሙ፡ ጥሪተ፡ ለእለ፡ የአምሩኒ፡ ወመዛግብቲሆሙ፡ እምላእ፡ ተድላ። እመ፡ ነገርኩክሙ፡ እንተ፡ ጸብሐት፡ ዘይከውን፡ ወዓዲ፡ እዜከር፡ ዘእምዓለም፡ ኊልቈ። እግዚአብሔር፡ ፈጠረኒ፡ ቀዳሜ፡ ኵሉ፡ ተግባሩ፡ እምቅድመ፡ ይሣርር፡ ዓለመ። ወዘእንበለ፡ ይግበር፡ ምድረ፡ ወዘእንበለ፡ ይግበር፡ ቀላያተ፡ ወዘእንበለ፡ ይፃኡ፡ አንቅዕተ፡ ማያት። ወዘእንበለ፡ አድባር፡ ይተከሉ፡ (ይጠዓጥዑ)፡ ወእምቅድመ፡ አውግር፡ ወለደኒ። ወእምቅድመ፡ ይግበር፡ በሐውርተ፡ ወአጽናፈ፡ ዘይትኅደር፡ እምሰማይ። አመ፡ ያስተዴሉ፡ ሰማያተ፡ ሀሎኩ፡ ወአመ፡ ያጸንዕ፡ መንበረ፡ ዚአሁ፡ ላዕለ፡ ነፋሳት። ወአመ፡ ጽኑዐ፡ ይገብር፡ በመልዕልተ፡ ደመናት፡ ወአመ፡ ያፀንዕ፡ አንብሮ፡ አንቅዕተ፡ ማያት። ወአመ፡ ያነብር፡ ወሰነ፡ ለባሕር፡ ወማያት፡ ኢይፃኡ፡ እምአፈ፡ ዚአሁ። ወአመ፡ ጽኑዐ፡ ይገብር፡ ወሠረታተ፡ ምድር፡ ሀሎኩ፡ ምስሌሁ፡ እንዘ፡ አስተዋድድ። አነ፡ ይእቲ፡ እንተ፡ እትፌሣሕ፡ እንተ፡ ጽብሐት፡ ወእትኃሠይ፡ በበገጹ፡ በኵሉ፡ ጊዜ፡ ወአመ፡ ይትፌሣሕ፡ ዓለመ፡ ፈጺሞ፡ ወፍሥሓየኒ፡ በደቂቀ፡ እጓለ፡ እመሕያው። ወይእዜኒ፡ ወልድየ፡ ስምዓኒ፡ ብፁዓን፡ እለ፡ የዓቅቡ፡ ፍኖትየ። ስምዑ፡ ጥበበ፡ ወጥበቡ፡ ወኢትትፈፀሙ፡ ብፁዕ፡ ብእሲ፡ ዘይሰምዓኒ፡ ቃልየ። ወብፁዕ፡ ዘየዓቅብ፡ ፍኖትየ፡ ወይተግህ፡ ውስተ፡ አናቅጸ፡ ዚአየ፡ እንተ፡ ጸብሐት፡ ወዘየዓቅብ፡ ራግዛተ፡ ሙባእየ። እስመ፡ ፍናውየ፡ ፍናወ፡ ሕይወት፡ ዘረከበኒ፡ ረከበ፡ ሕይወተ፡ ወይዴላው፡ ፈቃዱ፡ በኀበ፡ እግዚአብሔር። ወእለሰ፡ ይኤብሱ፡ ላዕሌየ፡ ይጌግዩ፡ ላዕለ፡ ነፍሶሙ፡ ወእለ፡ ይጸልኡኒ፡ ያፈቅሩ፡ ሞተ።

Chapter 9 ጥበብ፡ ሐነፀት፡ ላቲ፡ ቤተ፡ ወአቀመት፡ ሰብዓተ፡ አዕማደ። ዘብሐት፡ ዘዚአሃ፡ ጥብሐ፡ ወቶስሐት፡ ውስተ፡ ስያሓ፡ ዘዚአሃ፡ ወይነ። ወፈነወት፡ ዘዚአሃ፡ አግብርተ፡ እንዘ፡ ትጼውዕ፡ በነዋኅ፡ ስብከት። እንዘ፡ ትብል፡ ዘዓብድ፡ ውእቱ፡ ይግኀሥ፡ ኀቤየ፡ ወለእለሂ፡ የሐዖሙ፡ አእምሮ። ትቤ፡ ንዑ፡ ብልዑ፡ ኅብስትየ፡ ወስትዩ፡ ወይንየ፡ ዘቀዳሕኩ፡ ለክሙ። ወኀድግዋ፡ ለዕበድ፡ ወኅሡ፡ አእምሮ፡ ከመ፡ ትሕየዉ። አርትዑ፡ አእምሮ፡ በጠይቆ፡ ወዘይሜህሮሙ፡ ለእኩያን፡ ይነሥእ፡ ሎቱ፡ ኃሣረ። ወዘይጌሥፆ፡ ለረሲዕ፡ የሐይስ፡ ርእሶ። ኢትዝልፎሙ፡ ለዓብዳን፡ ከመ፡ ኢይጽልኡከ። ዝልፎ፡ ለጠቢብ፡ ወያፈቅረከ፡ ዓብድሰ፡ ይጸልአከ፡ ሀቦ፡ ለጠቢብ፡ ምክንያተ፡ ወያፈደፍድ፡ ጥበበ፡ አምሮ፡ ለጠቢብ፡ ወይዌስክ፡ ተወክፎ። ቀዳሚሃ፡ ለጥበብ፡ ፈሪሀ፡ እግዚአብሄር፡ ወምክረ፡ ቅዱሳን፡ አእምሮ፡ ወአእምሮ፡ ሕግሰ፡ ለልብ፡ ኄር፡ ውእቱ። በዝ፡ ሥርዓት፡ ብዙኀመዋዕለ፡ ተሐዩ፡ ወይትዌስካከ፡ ዓመታተ፡ ሕይወት። ወልድየ፡ እመ፡ ጠቢበ፡ ኮንከ፡ ለርእስከ፡ ጠቢበ፡ ትከውን፡ ለቢጽከ፡ ወእመሰ፡ እኩየ፡ ኮንከ፡ ለባሕቲትከ፡ ትቀድሕ፡ እኪቶ። ዘያስተዳሉ፡ ሐሰተ፡ ይመስል፡ ከመ፡ ዘያስተዳሉ፡ ነፋሳተ፡ ወውእቱ፡ ከመ፡ ዘይዴግን፡ ዖፈ፡ ዘይሠርር። ወኀደገ፡ ፍናወ፡ ዓፀደ፡ ወይኑ፡ ወመንኰራኵረ፡ ወፍሬ፡ ዚአሁ፡ ረስዐ፡ ወየሐውር፡ ውስተ፡ በድው፡ ገዳመ፡ ወውስተ፡ ምድር፡ እንተ፡ ተሠርዓት፡ ለጽምእ፡ ወያስተጋብእ፡ በእዴሁ፡ ዘኢይፈሪ፡ ወኢይበቊል። ብእሲት፡ ዓብድ፡ ወመግዝእት፡ ጽንስተ፡ ኅብስት፡ ትከውን፡ እንተ፡ ኢተአምር፡ ኀፊረ፡ ምንተኒ፡ ወነበረት፡ ውስተ፡ አንቀጸ፡ ቤታ። ወውስተ፡ መንበራ፡ ገሃደ፡ ወውስተ፡ መርኅብ፡ ትጼውዕ፡ ኃላፍያነ፡ ፍኖት፡ እለ፡ ያረትዑ፡ ፍኖቶሙ። እለ፡ እምውስቴቶሙ፡ ዓብድ፡ ይቀርብ፡ ሐቤሃ፡ ወለዘሂ፡ የሐፅዖ፡ አእምሮ፡ ትኤዝዞ። ወትቤሎ፡ ኅብስተ፡ ኅቡአ፡ አስተሐዊዘከ፡ ግሥሥ፡ ወማየ፡ ስርቅ፡ መዓርዒረ፡ ስተይ። ወውእቱሰ፡ ኢየአምር፡ ከመ፡ እምኃያላን፡ በኀቤሃ፡ ይትኀጐሉ፡ ወመጽፈርተ፡ ሲኦል፡ ይትረከብ፡ ውስተ፡ ቤታ። ወባሕቱ፡ ቅንጽ፡ ወኢትጐንዲ፡ ውስተ፡ መካና፡ ወኢታውትር፡ ዓይነከ፡ ኀቤሃ፡ ከመ፡ ትትዓደው፡ ፈለገ፡ ነኪር። ወእማየ፡ ነኪር፡ ረኀቅ፡ ወእምዓዘቅተ፡ ነኪር፡ ኢትስተይ፡ ከመ፡ ብዙኀ፡ መዋዕለ፡ ትሕየው፡ ወይትወሰካከ፡ ዓመታተ፡ ሕይወት።

Chapter 10 ወልድ፡ ጠቢብ፡ ያስተፌሥሕ፡ አባሁ፡ ወወልድ፡ ዓብድ፡ ያኃዝና፡ ለእሙ። ኢይበቊዕ፡ መዛግብት፡ ለኃጥአን፡ ጽድቅሰ፡ ታድኅን፡ እሞት። ኢያስተፄንስ፡ እግዚአብሔር፡ ነፍሰ፡ ጻድቅተ፡ ወሕይወተ፡ ረሲዓንሰ፡ ያአትት፡ እምድር። እድ፡ ሀካይ፡ ብእሴ፡ ያቴሕት፡ ወእደ፡ ጽኑዕ፡ ብእሴ፡ ያብዕል። ወልድ፡ ምሁር፡ ጠቢበ፡ ይከውን፡ ወዓብድሰ፡ ላእከ፡ ይሬሲ፡ ርእሶ፡ ድኅነ፡ እመርቄ፡ ወልድ፡ ጠቢብ። ወልድ፡ ጠቢብ፡ ይትጌበር፡ በማእረር፡ ወወልድሰ፡ ዓብድ፡ ይነውም፡ በማእረር፡ ነሣኤ፡ ነፍስ፡ ይከውን፡ በውስተ፡ ዓውድ፡ ወልድ፡ ኃጥእ። በረከተ፡ እግዚአብሔር፡ ውስተ፡ ርእሰ፡ ጻድቃን፡ አፈረሲዓንሰ፡ ይፌጽም፡ ላህ፡ ግብተ። ዝክረ፡ ጻድቃን፡ ምስለ፡ ውዳሴ፡ ወስመ፡ ረሲዓንሰ፡ ይጠፍእ። ልብ፡ ጠቢብ፡ ይትዌከፍ፡ ትእዛዘ፡ ወዘኢይትዔገሥ፡ በከናፍሪሁ፡ በማዕቅፍ፡ ይወድቅ። ወዘየሐውር፡ በየዋሃት፡ የሐውር፡ እሙነ፡ ወዘይትሀወክ፡ ፍናዊሁ፡ ይትከሠት። ዘይትቃጸብ፡ በአዕይንቲሁ፡ ለእከይ፡ ያስተጋብእ፡ ለሰብእ፡ ኃዘነ፡ ወዘሰ፡ ይዘልፍ፡ ገሃደ፡ ሰላመ፡ ይገብር። ነቅዐ፡ ሕይወት፡ ውስተ፡ አፈ፡ ጻድቃን፡ ወለአፈ፡ ረሲዓን፡ ይከድኖ፡ ኃጒል። ጽልአ፡ ያነሥእ፡ መዓት፡ ወለኵሎሙ፡ እለ፡ ይትገአዙ፡ ይከድኖሙ፡ ፍቅር። ብእሲ፡ ጠቢብ፡ እምከናፍሪሁ፡ ያወጽእ፡ ጥበበ፡ በበትር፡ ይዘብጥ፡ (ይዘበጥ)፡ ብእሲ፡ ዘእንበለ፡ ልብ። ጠቢብ፡ የኃብእ፡ አእምሮ፡ ወአፍ፡ ጒጒእ፡ ይቀርብ፡ ለቅጥቃጤ። ጥሪቶሙ፡ ለአብዕልት፡ ሀገር፡ ጽንዕት፡ ወቅጥቃጤሆሙ፡ ለረሲዓን፡ ንዴተ፡ አእምሮ። ግብረ፡ ጻድቃን፡ ሕይወተ፡ ይገብር፡ ወፍሬ፡ ረሲዓን፡ ኀጢአት። ፍናወ፡ ሕይወት፡ የዓቅብ፡ ተግሣፅ፡ በተግሣፅ፡ ዘኢይዘለፍ፡ ይስሕት። ከናፍር፡ ልሙጻት፡ ይከድና፡ ጽልአ፡ ወእለሰ፡ ያወጽኡ፡ ጽእለተ፡ ዓብዳን፡ እሙንቱ። እምብዝኀ፡ ነገር፡ ኢያመስጥ፡ ኃጥእ፡ እምኃጢአት፡ ወዘይምህከሰ፡ በከናፍሪሁ፡ ማእምረ፡ ይከውን። ብሩር፡ ርሱን፡ ልሳነ፡ ጻድቅ፡ ወልበ፡ ረሲዓንሰ፡ የሐፅፅ። ከናፍረ፡ ጻድቃን፡ የአምራ፡ ነዋኀ፡ ወዓብዳንሰ፡ በንዴተ፡ አእምሮ፡ ይመውቱ። በረከተ፡ እግዚአብሔር፡ ላዕለ፡ ርእሰ፡ ጻድቃን፡ ይእቲ፡ ታብዕል፡ ወኢታመጽእ፡ ኀዘነ፡ ውስተ፡ ልብ። ወስተ፡ ሐጒል፡ ይትመየጥ፡ ረሲዕ፡ ፍትወቱ፡ ለጻድቅ፡ ሥምረት፡ በኀበ፡ እግዚአብሔር። በኅልፈተ፡ ዓውሎ፡ ይማስን፡ ረሲዕ፡ ጻድቅሰ፡ ተግኂሦ፡ ለዓለም፡ ይድኅን። ከመ፡ ቆዕ፡ ከንቱ፡ ለስነን፡ ወጢስ፡ ለዓይን፡ ከማሁ፡ ኃጢአት፡ ለእለ፡ አጥረይዋ። ፈሪሀ፡ እግዚአብሔር፡ ያነውኅ፡ መዋዕለ፡ ወዓመተ፡ ረሲዓንሰ፡ ይውኅድ። ትጐነዲ፡ ትፍሥሕት፡ ምስለ፡ ጻድቃን፡ ተስፋሆሙሰ፡ ለረሲዓን፡ ትትኀጐል። ፅንዑ፡ ለኄር፡ ፈሪሀ፡ እግዚአብሔር፡ ወቀቅጥቃጤ፡ ለእለ፡ ይገብሩ፡ እኩየ። ጻድቅ፡ ለዓለም፡ ኢይኤብስ፡ ወረሲዓንሰ፡ ኢየኀድሩ፡ ውስተ፡ ምድር። አፈ፡ ጻድቃን፡ ይነብብ፡ ጥበበ፡ ወልሳነ፡ ዓማፅያን፡ ይትኀጐል። ከናፍረ፡ ጻድቃን፡ ያውኅዛ፡ ሞገሰ፡ ወአፈ፡ ረሲዓንሰ፡ ይትከላእ፡ እምአእምሮ።

Chapter 11 መዳልወ፡ ዓመፃ፡ ርኩስ፡ በኀበ፡ እግዚአብሔር፡ መዳልወ፡ ጻድቅሰ፡ ኅሩይ፡ ውእቱ። ኀበ፡ ሀሎ፡ ጽእለት፡ ህየ፡ ሀሎ፡ ኃሣር፡ አፈ፡ የዋሃንሰ፡ ይትሜሀር፡ ጥበበ። ተፈጻሜቶሙ፡ ለጻድቃን፡ ትመርሖሙ፡ ወዕቅዐቶሙሰ፡ ለረሲዓን፡ ትፄውዎሙ። ኢይበቊዕ፡ ናዋይ፡ በዕለተ፡ መዓት፡ ወጽድቅሰ፡ ታድኅን፡ እሞት፡ መዊቶ፡ ጻድቅ፡ ኀደገ፡ ንስሐ፡ ጉቡአን፡ በእድ፡ ይከውን፡ ወሰሐቀ፡ ሞቱ፡ ለረሲዕ። ወጽድቁ፡ ለንጹሕ፡ ያረትዕ፡ ፍኖቶ፡ ወኃጢአትሰ፡ ትወርድ፡ ዲበ፡ ረሲዓን። ጽድቆሙ፡ ለራትዓን፡ ሰብእ፡ ትባልሖሙ፡ ወበኢያእምሮቶሙ፡ ይትአኀዙ፡ ኃጥአን። መዊቶ፡ ብእሲ፡ ጻድቅ፡ ኢየኀጒል፡ ተስፋሁ፡ ትምክሕቶሙሰ፡ ለረሲዓን፡ ትጠፍእ። ጻድቅሰ፡ እማዕገት፡ ያመሥጥ፡ ወቤዛ፡ ዚአሁ፡ ይትወሀብ፡ ረሲዕ። ውስተ፡ አፈ፡ ረሲዓን፡ መሥገርት፡ ለሀገር፡ ወተዓውቆ፡ ጽድቅሰ፡ ፍኖት፡ ሠናይት። በኂሩተ፡ ጻድቃን፡ ትረትዕ፡ ሀገር፡ ወበኃጒሎሙ፡ ለረሲዓን፡ ትትፌሣሕ። በበረከቶሙ፡ ለራትዓን፡ ትትሌዓል፡ ሀገር፡ ወበአፉሆሙ፡ ለረሲዓን፡ ትትገፈታዕ። ይሜንኑ፡ ሰብአ፡ ሀገር፡ ነዳየ፡ ጠቢበ፡ ወብእሲሰ፡ ጠቢብ፡ ጽማዌ፡ ያመጽእ። ብእሲ፡ ዘክልኤ፡ ልሳኑ፡ ይከሥት፡ ምክረ፡ ማኅበር፡ ወምእመነ፡ እስትንፋስሰ፡ የኀብእ፡ ምክረ። እለ፡ አልቦሙ፡ ኃዳፍ፡ ይትነገፉ፡ ከመ፡ ቈጽል፡ መድኃኒት፡ በብዙኅ፡ ምክር፡ ይሄሉ። እኩይ፡ የአኪ፡ ሶበ፡ ይዴመር፡ ምስለ፡ ጻድቅ፡ ወይጸልእ፡ ድምፀ፡ ዑቃቤ። ብእሲት፡ ኄርት፡ ታነሥእ፡ ክብረ፡ ለምታ፡ ብእሲትሰ፡ እንተ፡ ትጸልእ፡ ጽድቀ፡ መንበረ፡ ኃሣር፡ ይእቲ። ሀካይያን፡ እምብዕል፡ ይነድዩ፡ ወፅኑዓንሰ፡ ይዴግኑ፡ ብዕለ። ለነፍሱ፡ ይገብር፡ ሠናየ፡ ብእሲ፡ መሐሪ፡ ወያማስን፡ ሥጋሁ፡ ዘኢይምሕር። ረሲዕ፡ ይገብር፡ ምግባረ፡ ዓመፃ፡ ወለዘርአ፡ ጻድቃንሰ፡ ዐስብ፡ ህልው። ወልደ፡ ጻድቅ፡ ይትወለድ፡ ለሕይወት፡ ወልደተ፡ ረሲዓንሰ፡ ለሞት። ርኩሳት፡ በኀበ፡ እግዚአብሔር፡ ፍናው፡ ጠዋያት፡ ወኅሩያን፡ በቅድሜሁ፡ ኵሎሙ፡ እለ፡ ንጹሐን፡ በፍኖቶሙ። እደ፡ በእድ፡ ዘይእኅዝ፡ በግፍዕ፡ ኢይድኅን፡ እምኃጢአት፡ ወዘይዘርእሰ፡ ጽድቀ፡ ዐስበ፡ መሀይምናን፡ ይነሥእ። ከመ፡ ውዕቦ፡ ወርቅ፡ ውስተ፡ ጽንፈ፡ አንፈ፡ ሐራውያ፡ ኅሡም፡ ከማሁ፡ ላህያ፡ ለብእሲት፡ እኪት። ፍኖተ፡ ጽድቅ፡ ኵሉ፡ ሠናይ፡ ተስፋሆሙሰ፡ ለረሲዓን፡ ይትኀጐል። ቦ፡ እላ፡ ዘዚአሆሙ፡ ይዘርኡ፡ ወያፈደፍዱ፡ ወቦ፡ እለ፡ እንዘ፡ ያስተጋብኡ፡ የሐፅፁ። ወኵላ፡ ነፍስ፡ እንተ፡ ትትባረክ፡ ስፍሕት፡ ወብእሲሰ፡ መዓትም፡ ሕ ዘያበዝኅ፡ ሥርናዮ፡ የኃድጎ፡ ለአሕዛብ፡ ወይረግምዎ፡ ነዳያን፡ ወበረከት፡ ውስተ፡ ርእሱ፡ ለዘይምሕር፡ ወይሁብ። ዘይሔሊ፡ ሠናየ፡ ይፈቅድ፡ ክብረ፡ ሠናየ፡ ወዘሰ፡ የኃሥሣ፡ ለእኪት፡ ትረክቦ። ዘይትወከል፡ በብዕሉ፡ ውእቱ፡ ይወድቅ፡ ወዘይትዌከፎሙሰ፡ ለጻድቃን፡ ይሠርዕ። ዘኢየዓውቅ፡ ቤቶ፡ ይወርሶ፡ ነፋስ፡ ወይትቀነይ፡ ዓብድ፡ ለጠቢብ። እምፍሬ፡ ጽድቅ፡ ይወጽእ፡ ዕፀ፡ ሕይወት፡ ወይሴስላ፡ ግብተ፡ ነፍሳተ፡ ዓማፅያን። ወሶበ፡ ጻድቅ፡ እምዕፁብ፡ ይድኅን፡ ረሲዕ፡ ወኃጥእ፡ ወዓማፂ፡ በአይቴ፡ ያስተርኢ።

Chapter 12 ዘያፈቅር፡ ተግሣፀ፡ ያፈቅር፡ አእምሮ፡ ወዘይጸልእሰ፡ ተግሣፀ፡ ዓብድ፡ ውእቱ። ይኄይስ፡ ዘረከበ፡ ሞገሰ፡ በኀበ፡ እግዚአብሔር፡ ወብእሲስ፡ ዓማፂ፡ ይትኄየይ። ዘኢያረትዕ፡ ሰብእ፡ እምዓመፃ፡ ይትኀጐል፡ ወሥርወ፡ ጻድቃንሰ፡ ኢይትመሐው። ብእሲት፡ አዛዝ፡ አክሊል፡ ለምታ፡ ወከመ፡ ዕፄ፡ ለዕፅ፡ ከማሁ፡ ብእሲት፡ እኪተ፡ ምግባር፡ ታኀጒል፡ ልበ፡ ብእሲ። ሕሊናሆሙ፡ ለጻድቃን፡ ፍትሕ፡ ወይሔድፉ፡ ረሲዓን፡ ሕብለ። ነገረ፡ ረሲዓን፡ ጒሕሉት፡ ወአፈ፡ ረሲዓንሰ፡ ታድኅኖሙ። ኀበ፡ ተመይጠ፡ ረሲዕ፡ ይማስን፡ አብያተ፡ ጻድቃንሰ፡ ይሄልዉ። አፈ፡ ጠቢብ፡ ይትዌደስ፡ በኀበ፡ ኵሉ፡ ሰብእ፡ ወእዩየ፡ ልብሰ፡ ይትሜነን። ይኄይስ፡ ብእሲ፡ ዘበኃሣሩ፡ ይትቀነይ፡ እምነ፡ ዘያነብር፡ ክብረ፡ ሎቱ፡ ወይትፈአም፡ ኅብስተ። ይምሕር፡ ጻድቅ፡ ነፍሰ፡ እንስሳሁ፡ ወምሕረቶሙሰ፡ ለረሲዓን፡ ኢ፡ ምጽዋት። ዘይትጌበራ፡ ለምድር፡ ያበዝኅ፡ ኅብስተ፡ ወዘሰ፡ ይዴግን፡ ጽርዓተ፡ ያስተጋብእ፡ ንዴተ፡ እስመ፡ ውእቱ፡ ነዳየ፡ አእምሮ። ዝ፡ ውእቱ፡ ምዑዝ፡ ለመትልወ፡ ወይን፡ ወበኀይለ፡ ዚአሁ፡ የኃድግ፡ ኃሣረ። ፍትወተ፡ ረሲዓን፡ እኪት፡ ወሥርዎሙሰ፡ ለኄራን፡ ውስተ፡ ጽንዕ። በኃጢአተ፡ ከናፍሪሁ፡ ይወድቅ፡ ኃጥእ፡ ውስተ፡ መሥገርት፡ ወያመሥጥ፡ እምኔሁ፡ ጻድቅ። ዘይኔጽር፡ ሰፉሐ፡ ይትሜሀር፡ ወዘሰ፡ ይዳደቅ፡ በአናቅጽ፡ ያመነድብ፡ ነፍሳተ። እምፍሬ፡ አፉሁ፡ ነፍሰ፡ ብእሲ፡ ይመልእ፡ በረከተ፡ ወዕሤተ፡ ከናፍሪሁ፡ ይትወሀብ፡ ሎቱ። ፍኖተ፡ ዓብዳን፡ ርቱዕ፡ በቅድሜሆሙ፡ ወይሰምዕ፡ ምክረ፡ ዕዝነ፡ ጠቢብ። ዓብድ፡ እንተ፡ ጸብሐት፡ ይነግር፡ መዓቶ፡ ማእምርሰ፡ የኀብእ፡ ኃሣሮ። እንተ፡ ታስተርኢ፡ ሃይማኖተ፡ ይነግር፡ ብእሲ፡ ጻድቅ፡ ወሰማዕተ፡ እኩያንሰ፡ ሕብል። እለሰ፡ ይከውኑ፡ ስምዐ፡ በሐሰት፡ ይቀትሉ፡ በመጥባሕት፡ እስመ፡ ንቡር፡ ውስተ፡ አፉሆሙ፡ መጥባሕት፡ ወልሳነ፡ ጠቢባንሰ፡ ይፌውስ፡ ዘቈስለ። ከናፍረ፡ ጻድቃን፡ ያረትዓ፡ ስምዐ፡ ወሰማዕት፡ ጒጒዕ፡ በልሳን፡ እኩይ። ሕብል፡ ውስተ፡ ልቡ፡ ለዘይሔሊ፡ እኩየ፡ ወእለሰ፡ ይፈቅዱ፡ ሰላመ፡ ይትፌሥሑ። ኢያሠምሮ፡ ለጻድቃን፡ ምንትኒ፡ እኩይ፡ ወረሲዓንሰ፡ ያበዝኁ፡ እከየ። ምኑናት፡ በኀበ፡ እግዚአብሔር፡ ከናፍረ፡ ሐሰት፡ ወዘይገብርሰ፡ ሃይማኖተ፡ ሥሙር፡ በኀቤሁ። ብእሲ፡ ማእምር፡ መንበረ፡ ጥበብ፡ ወልበ፡ ዓብዳንሰ፡ ይዳደቅ፡ መርገመ። እደ፡ ኅሩያን፡ ይእኅዝ፡ ፍጡነ፡ ወሕቡላንሰ፡ ይከውኑ፡ ለፂዋዌ። መደንግፅ፡ ቃል፡ የሀውከ፡ ልበ፡ ብእሲ፡ ጻድቅ፡ ወዜና፡ ሠናይሰ፡ ያስተፌሥሕ፡ ልበ፡ ብእሲ፡ ጠቢብ። ማእምረ፡ ርእሱ፡ ጻድቅ፡ ውእቱ፡ ለርእሱ፡ ወግዕዞሙሰ፡ ለረሲዓን፡ አኮ፡ አዳም። ለአላ፡ ይኤብሱ፡ ይዴግኖሙ፡ እኩይ፡ ወፍኖቶሙሰ፡ ለረሲዓን፡ ታስሕቶሙ። ይዳደቅ፡ ሕብል፡ ለአስግሮ፡ ጥሪት፡ ወክቡር፡ ብእሲ፡ ንጹሕ። ውስተ፡ ፍናወ፡ ጽድቅ፡ ሕይወት፡ ወእለሰ፡ ይዜከሩ፡ እኩየ፡ ውስተ፡ ሞት፡ ይሄልዉ።

Chapter 13 ወልድ፡ ማእምር፡ ሰማዔ፡ አብ፡ ይከውን፡ ወወልድሰ፡ ዘኢይሰምዕ፡ ይከውን፡ ለኀጒል። ወእምፍሬ፡ ጽድቁ፡ ይበልዕ፡ ኄር፡ ወነፍሰ፡ ዓማፅያንሰ፡ ይትኀጐል፡ ቆዖሙ። ዘየዓቅብ፡ አፉሁ፡ ይትመኀፀና፡ ለነፍሱ፡ ወጒጒእሰ፡ በከናፍሪሁ፡ ያወድቅ፡ ርእሶ። ኵሉ፡ ዘኢይትቀነይ፡ ውስተ፡ ፍትወት፡ ሀሎ፡ ወእዴሆሙ፡ ለኄራን፡ ያስተሐምም። ቃለ፡ ዓማፂ፡ ይጸልእ፡ ጽድቀ፡ ወረሲዕሰ፡ የኀፍር፡ ወኢይመጽእ፡ ገሃደ። ጽድቅ፡ ተዓቅቦሙ፡ ለየዋሃን፡ በፍኖት፡ ለረሲዓንሰ፡ እቡሰ፡ ይሬስዮሙ፡ ኃጢአት። ቦ፡ እለ፡ ያሌዕሉ፡ ርእሶሙ፡ እንዘ፡ ምንትኒ፡ አልቦሙ፡ ወቦ፡ እለ፡ ያቴሕቱ፡ ርእሶሙ፡ እንዘ፡ ብዙኅ፡ ብዕሎሙ። ቤዛ፡ ነፍሱ፡ ለብእሲ፡ ጥሪተ፡ ብዕሉ፡ ወነዳይሰ፡ ኢይትቃወም፡ መዓተ። ብርሃን፡ ለጻድቃን፡ በኵሉ፡ ጊዜ፡ ወብርሃነ፡ ረሲዓንሰ፡ ትጠፍእ። ነፍሳተ፡ ሕቡላን፡ ይስሕታ፡ በኃጢአት፡ ወጻድቃንሰ፡ ይምሕሩ፡ ወይመጸውቱ። እኩይ፡ ዘምስለ፡ ጽእለቱ፡ ይገብር፡ እኩየ፡ ወእለሰ፡ የአምሩ፡ ርእሶሙ፡ ጠቢባን፡ እሙንቱ። አጥርዮ፡ ዘይጐጒእ፡ በኃጢአት፡ ውኁደ፡ ይከውን፡ በደኃሪቱ፡ ወዘሰ፡ ያሥተጋብእ፡ ለርእሱ፡ በጽድቅ፡ ይፈደፍድ፡ ሎቱ፡ ጻድቅኒ፡ ይምሕር፡ ወይሌቅሕ። ይኄይስ፡ ዘይዌጥን፡ ይርዳእ፡ ነፍሶ፡ እምነ፡ ዘይብዕል፡ ወያጸንዕ፡ ለተስፋ። ዕፅ፡ ሕይወት፡ ይእቲ፡ ፍኖት፡ ሠናይት። ዘያሰትት፡ ግብረ፡ እግዚአብሔር፡ ውእቱኒ፡ ያሰትቶ፡ ወዘሰ፡ ይፈርህ፡ ትእዛዞ፡ የሐዩ፡ ቦቱ። ለወልድ፡ ሕቡል፡ አልቦቱ፡ ምንትኒ፡ ሠናይ፡ ለገብርሰ፡ ጠቢብ፡ ሠናየ፡ ይከውን፡ ምግባሩ፡ ወይረትዕ፡ ፍኖቱ። ሕገ፡ ጠቢብ፡ ነቅዐ፡ ሕይወት፡ ወዘእንበለ፡ ልብሰ፡ በአበሳ፡ ይመውት። አእምሮ፡ ሠናይ፡ ይሁብ፡ ጥበበ፡ ወሞገሰ፡ ወፍናዊሆሙሰ፡ ለኀዩያን፡ ውስተ፡ ኀጒል። ኵሉ፡ ማእምር፡ ይገብር፡ በምክር፡ ወዐብድሰ፡ አሥረረ፡ እከየ፡ ዚአሁ። ላእክ፡ ዐብድ፡ ይወድቅ፡ ውስተ፡ እኪት፡ ወሐዋርያሰ፡ ጠቢብ፡ ያድኅን፡ ርእሶ። ንዴተ፡ ወኃሣረ፡ ያሴስል፡ ትምህርት፡ ወዘየዓቅብሰ፡ ተግሣፀ፡ ይከብር። ፍትወተ፡ ኄራን፡ ያጥዒ፡ ነፍሰ፡ ወምግባረ፡ ረሲዓንሰ፡ ርኁቅ፡ እምአእምሮ። ዘይደመር፡ ምስለ፡ ጠቢብ፡ ጠቢበ፡ ይከውን፡ ወዘሰ፡ ያንዘሃልል፡ ምስለ፡ ዓብዳን፡ ዐብደ፡ ይከውን። ለእለ፡ ይኤብሱ፡ ይዴግኖሙ፡ እኩይ፡ ወለጻድቃንሰ፡ ይረክቦሙ፡ ሠናይ። ኄር፡ ብእሲ፡ ይሬኢ፡ ውሉደ፡ ውሉድ፡ ወይዘገብ፡ ለጻድቃን፡ ብዕለ፡ ረሲዓን። ጻድቃን፡ ይሄልዉ፡ በብዕል፡ ዓመታተ፡ ብዙኀ፡ ወዓማፅያንሰ፡ ይትኀጐሉ፡ ፍጡነ። ዘይምሀከ፡ በትሮ፡ ጸልአ፡ ወልዶ፡ ወዘያፈቅርሰ፡ ወልዶ፡ ወትረ፡ ይጌሥፅ። ጻድቅሰ፡ እንዘ፡ ይበልዕ፡ ይመልእ፡ ነፍሶ፡ ነፍሰ፡ ረሲዓንሰ፡ ፅኑስ።

Chapter 14 ጠባባት፡ አንስት፡ ሐነፃ፡ አብያተ፡ ወዐብዳትሰ፡ ነሠታ፡ አብያቲሆን፡ በእደዊሆን። ዘየሐውር፡ ፍኖተ፡ ርቱዐ፡ ይፈርሆ፡ ለእግዚአብሔር፡ ወዘሰ፡ ያጠዊ፡ ፍኖቶ፡ ይትሜነን። እምአፈ፡ ዐብዳን፡ ይወፅእ፡ በትረ፡ ጽእለት፡ ወከናፍረ፡ ጠቢባንሰ፡ ተዓቅቦሙ። ወእደ፡ አልቦ፡ አልሕምት፡ ምጽንጋዕ፡ ንጹሕ፡ ወእደሰ፡ ብዙኅ፡ እክል፡ ይትዓወቅ፡ እምኃይለ፡ ላሕሙ። ስምዐ፡ መሃይምናን፡ ኢይሔሱ፡ ወያነድድ፡ ነፍሰ፡ ሰማዕተ፡ ሐሰት። ተኃሥሣ፡ ለጥበብ፡ በኀበ፡ እኩያን፡ ወኢትረክባ፡ ወአእምሮሰ፡ በኀበ፡ ጠቢባን፡ ቀሊል። ኵሉ፡ ርቱዕ፡ በቅድሜሁ፡ ለብእሲ፡ ዐብድ፡ ወወልታ፡ አእምሮ፡ ከናፍረ፡ ጠቢባን። ጥበብ፡ ለማእምራን፡ ተአምር፡ ፍኖቶሙ፡ ወለእለ፡ ዘእንበለ፡ ልብሰ፡ ውስተ፡ ስሒት፡ ይከውን፡ ፍኖቶሙ። አብያቲሆሙ፡ ለኃጥአን፡ ይፈድዩ፡ ለንጹሐን፡ ወአብያተ፡ ጻድቃንሰ፡ ሥሙር። ልበ፡ ብእሲ፡ ማእምር፡ ኀዘን፡ ለነፍሱ፡ ወሶበሂ፡ ይትፌሣሕ፡ ኢይትሐወሶ፡ ጽልእ። አብያተ፡ ረሲዐን፡ ይማስኑ፡ ወማኅደረ፡ ራትዓንሰ፡ ይቀውም። ቦ፡ ፍኖት፡ እንተ፡ ትመስል፡ ርትዕተ፡ በኀበ፡ ሰብእ፡ ወደ፡ ኃሪታሰ፡ ታበጽሕ፡ ውስተ፡ ማዕምቅተ፡ ሲኦል። ውስተ፡ ፍሥሓ፡ ኢይዴመር፡ ኃዘን፡ ደኃሪታሰ፡ ለፍሥሓ፡ ውስተ፡ ላህ፡ ትገብእ። እምፍኖተ፡ ዚአሁ፡ ይመልእ፡ ዕቡየ፡ ልብ፡ ወብእሲ፡ ኄር፡ እምሕሊናሁ፡ ይመልእ፡ በረከተ። የዋህ፡ የአምን፡ ኵሎ፡ ነገረ፡ ማእምር፡ ባሕቱ፡ ይገብእ፡ ውስተ፡ ንስሓ። ጠቢብ፡ ፈሪሖ፡ ተግኅሠ፡ እምአኩይ፡ ወዐብድሰ፡ ተአሚኖ፡ ርእሶ፡ ይጸመር፡ ምስለ፡ ዐብዳን። መዓትም፡ ይገብር፡ ዘእንበለ፡ ምክር፡ ብእሲሰ፡ ጠቢብ፡ ብዙኀ፡ ይትዔገሥ። ይትካፈሉ፡ ዓብዳን፡ እከየ፡ ማእምራንሰ፡ ይእኅዝዎ፡ ለጠይቆ። ይድኅፁ፡ እኩያን፡ በቅድመ፡ ኄራን፡ ወረሲዓንሰ፡ ይትቀነዩ፡ በኆኅተ፡ ጻድቃን። አዕርክተ፡ አብዕልት፡ ይጸልኡ፡ አዕርክተ፡ ነዳያን፡ አዕርክተ፡ አብዕልትሰ፡ ብዙኀን። ዘይሜንኖ፡ ለነዳይ፡ ይነዲ፡ ወዘይምሕሮሰ፡ ለፅኑስ፡ ብፁዕ፡ ውእቱ። ስሑታን፡ ይሔልዩ፡ እከየ፡ ወሣህለ፡ ወጽድቀ፡ ይሔልዩ፡ ኄራን፡ ወኢየአምሩ፡ ሣህለ፡ ወምሕረተ፡ ጸረብተ፡ እኪት። ምሕረት፡ ባሕቱ፡ ወሃይማኖት፡ ኀበ፡ ጸረብት፡ ኄራን፡ በኵሉ፡ ሕሊና፡ ትሩፍ፡ ውእቱ፡ ወላህይሰ፡ ዘኢየሐምም፡ ፅኑስ፡ ውእቱ። አክሊሎሙ፡ ለጠቢባን፡ ማእምር፡ ወመምህሮሙ፡ ለዐብዳን፡ እኩይ። ያድኅን፡ ነፍሶ፡ እምእኩይ፡ ሰማዕት፡ ማእምር፡ ወያነድድ፡ ባሕቱ፡ በሐሰት፡ ሰማዕት፡ መዓምዕ። በፍርሃተ፡ እግዚአብሔር፡ ተስፋ፡ ኃያል፡ ወየኀድግ፡ ለደቂቁ፡ ጽንዐ። ትእዛዘ፡ እግዚአብሔር፡ ነቅዐ፡ ሕይወት፡ ወይሬሲ፡ ከመ፡ ይትገኃሡ፡ እመሥገርተ፡ ሞት። በብዝኀ፡ አሕዛብ፡ ክብሩ፡ ለንጉሥ፡ ወበውኅደተ፡ አሕዛብ፡ ድቀቱ፡ ለመኰንን። ብእሲ፡ ነዊኅ፡ መንፈስ፡ ወርኂበ፡ ልብ፡ ጠቢበ፡ ይከውን። ብእሲ፡ መስተዐግሥ፡ ብዙኀ፡ ጠቢበ፡ ይከውን፡ ወኅፀፀ፡ ነፍስሰ፡ ፅኑስ፡ ዓብድ፡ ውእቱ። አራቂ፡ ብእሲ፡ መፈውሰ፡ ልብ፡ ከመ፡ ነቀዝ፡ ለአዕፅምት፡ ቅንአት፡ ወትዝኅርት፡ እኩይ፡ ለልብ፡ ማእምር። ዘይትዔገል፡ ነዳየ፡ ይዌህኮ፡ ለፈጣሪሁ፡ ወዘያከብሮሰ፡ ይምሕር፡ ነዳየ። በእከዩ፡ ይትአተት፡ ረሲዕ፡ ወዘይትአመንሰ፡ ኂሩቶ፡ ጻድቅ፡ ውእቱ። ውስተ፡ ልበ፡ ኄር፡ ተዓርፍ፡ ጥበብ፡ ወውስተ፡ ልበ፡ ዐብድሰ፡ ኢትትአመር። ጽድቅ፡ ታሌዕል፡ ሕዝበ፡ ወያሐፅፅ፡ ኃጢአት፡ ሕዝባ። ሥሙር፡ ለንጉሥ፡ ላእክ፡ ማእምር፡ ወበተዓቅቦቱ፡ ያርኅቅ፡ ኃሣረ፡ እምነፍሱ፡ ወመዓት፡ ታኃጒል፡ ጠቢባነ።

Chapter 15 በነገር፡ ዘይትጋነይ፡ ይመይጥ፡ መዓተ፡ ባሕቱ፡ ቃል፡ ማኅዘኒ፡ ያነሥዕ፡ ጋእዘ። ልበ፡ ጠቢባን፡ ሠናየ፡ ተአምር፡ ወአፈ፡ ዐብዳንሰ፡ ይዜኑ፡ እኩየ። ውስተ፡ ኵሉ፡ መካን፡ አዕይንቲሁ፡ ለእግዚአብሔር፡ ወያስተሐይፅ፡ እኩያነ፡ ወኄራነ። መፈውሰ፡ ልሳን፡ ዕፀ፡ ሕይወት፡ ውእቱ፡ ወዘሰ፡ የዓቅብ፡ ይመልእ፡ መንፈሰ። ወልድ፡ ዓብድ፡ ያስተአኪ፡ ተግሣፀ፡ አብ፡ ወዘሰ፡ የዓቅብ፡ ተግሣፀ፡ ጠቢብ፡ ውእቱ። ወእደ፡ ትበዝኅ፡ ጽድቅ፡ ኃይል፡ ብዙኅ፡ ወረሲዓንሰ፡ እምሥርዎሙ፡ እምድር፡ ይሤረዉ። ከናፍረ፡ ጠበብት፡ እሡር፡ በአእምሮ፡ ወልበ፡ ዐብዳንሰ፡ አኮ፡ ጽኑዕ። መሥዋዕተ፡ ረሲዓንሰ፡ ርኩስ፡ በኀበ፡ እግዚአብሔር፡ ወጸሎተ፡ ኄራንሰ፡ ሥሙር፡ በኀቤሁ። ርኩስ፡ በኀበ፡ እግዚአብሔር፡ ፍኖተ፡ ረሲዓን፡ ወለእለሰ፡ ይዴግንዋ፡ ለጽድቅ፡ ያፈቅሮሙ፡ እግዚአብሔር። ትእምርተ፡ የዋሃን፡ ትትዓወቅ፡ በኀበ፡ እለ፡ የኀልፉ፡ ወእለሰ፡ ይጸልኡ፡ ዝልፈተ፡ ይመውቱ፡ በእኩይ። ገሃነም፡ ወሞት፡ ክሡታን፡ በኀበ፡ እግዚአብሔር፡ እፎ፡ እንከ፡ ልበ፡ ሰብእኒ። ኢያፈቅር፡ ዓብድ፡ እለ፡ ይጌሥፅዎ፡ ወምስለ፡ ጠቢባን፡ ኢይትናገር። ልብ፡ እምከመ፡ ትትፌሣሕ፡ ትበርህ፡ ገጽ፡ ወእመሰ፡ ተኀዝን፡ ትዴምን። ልብ፡ ርትዕት፡ ተኃሥሥ፡ አእምሮ፡ አፈ፡ ዓብዳንሰ፡ የኃሥሥ፡ እከየ፡ ኵሎ፡ መዋዕለ። አዕንተ፡ እኩያን፡ ይሴፈዋ፡ እኩየ፡ ወኄራንሰ፡ ያረምሙ፡ በኵሉ፡ ጊዜ። ትኄይስ፡ ንስቲት፡ መክፈልት፡ ዘበፍርሃተ፡ እግዚአብሔር፡ እመዛግብት፡ ዓበይት፡ ዘበኢፈሪህ። ይኄይስ፡ ፍተ፡ ሐምል፡ ፍቅር፡ ዘቦቱ፡ እምላሕም፡ መግዝዕ፡ ዘቦቱ፡ ጽልእ። ብእሲ፡ መዓትም፡ ያስተዴሉ፡ ጋእዘ፡ ወመስተዓግሥሂ፡ ብእሲ፡ እንተ፡ ኮነትኒ፡ ያጠፍእ፡ ወረሲዕሰ፡ ያነሥእ፡ ጥቀ፡ ጽልእ። ፍናወ፡ ሃካይያን፡ ንጹፍ፡ አሥዋክ፡ ወዘጽኑዓንሰ፡ መጽያሕት። ወልድ፡ ጠቢብ፡ ያስተፌሥሕ፡ አባሁ፡ ወወልድ፡ ዓብድ፡ ያጼእል፡ እሞ። ፍናወ፡ ዓብድ፡ ነዳየ፡ አእምሮ፡ ጠዋያት፡ ወብእሲሰ፡ ጠቢብ፡ አርቲዖ፡ የሐውር። ያጠርዩ፡ ሕሊና፡ እለ፡ ያከብሩ፡ ማኅበረ፡ ወውስተ፡ ልበ፡ መካርያን፡ ትነብር፡ ምክር። ወኢይሰምዓ፡ ላቲ፡ እኩይ፡ ወአልቦ፡ ዘይብል፡ ጥዑም፡ ወሠናይ፡ ለማኅበር። ፍናወ፡ ሕይወት፡ ሕሊናሁ፡ ለጠቢብ፡ ከመ፡ ተግኂሦ፡ እም፡ ሲኦል፡ ይድኅን። አብያተ፡ ጸአልያን፡ ያንኅል፡ እግዚአብሔር፡ ወያጸንዕ፡ ወሰነ፡ መበለት። ምኑን፡ በኀበ፡ እግዚአብሔር፡ ሐልዮ፡ ዓመፃ፡ ወለንጹሐንሰ፡ ነገሮሙ፡ አዳም። ያኃጒል፡ ርእሶ፡ ዘሕልያነ፡ ይነሥእ፡ ወዘይጸልእሰ፡ ነሢአ፡ ሕልያን፡ ይድኅን። በምጽዋት፡ በሃይማኖት፡ ይሠረይ፡ ኃጢአት፡ ወበፈሪሃ፡ እግዚአብሔር፡ ይትገኃሥ፡ ኵሉ፡ እኩይ። ልበ፡ ጻድቃን፡ ይትሜሀር፡ ሃይማኖተ፡ ወአፈ፡ ረሲዓንሰ፡ ያወሥእ፡ እኩያተ። ሥሙራት፡ በኀበ፡ እግዚአብሔር፡ ፍናወ፡ ሰብእ፡ ጻድቃን፡ ወበእንቲአሆሙ፡ ጸላእትኒ፡ አዕርክተ፡ ይከውኑ። ነዋኀ፡ ይርኅቅ፡ እግዚአብሔር፡ እምረሲዓን፡ ወጸሎተ፡ ጻድቃንሰ፡ ይሰምዕ፡ ይኄይስ፡ ኅዳጥ፡ ኅብስት፡ ምስለ፡ ጽድቅ፡ እምብዙኅ፡ ፍሬ፡ ዘምስለ፡ ዓመፃ። ልበ፡ ብእሲ፡ ኄር፡ ይሔሊ፡ ጽድቀ፡ ከመ፡ እምኀበ፡ እግዚአብሔር፡ ይረትዕ፡ ኣሠሩ፡ ዓይን፡ ዘይኔጽር፡ ሠናየ፡ ያስተፌሥሕ፡ ልበ፡ ወዜና፡ ኂሩት፡ ያጠልል፡ አዕፅምትየ። ዘይሰምዕ፡ ዘለፋ፡ ጠቢብ፡ ምስለ፡ ጠቢባን፡ ይዴመር። ወዘይትከላእ፡ እምተግሣፅ፡ ይጸልእ፡ ርእሶ፡ ዘያፈቅርሰ፡ ተግሣፀ፡ ያፈቅር፡ ርእሶ።

Chapter 16 ፈሪሀ፡ እግዚአብሔር፡ አእምሮ፡ ሠናይ፡ ወጥበብ፡ ቀዳሚት፡ ክብርት፡ ይእቲ፡ ለዘያወሥኣ፡ ላቲ፡ ወትተልዎሙ፡ ለየዋሃን፡ ክብር። ኵሉ፡ ምግባሩ፡ ለትሑት፡ ሥሙር፡ በኀበ፡ እግዚአብሔር፡ ወረሲዓንሰ፡ ይትኀጐሉ፡ በዕለት፡ እኪት። ርኩስ፡ በኀበ፡ እግዚአብሔር፡ ዕቡየ፡ ልብ፡ እደ፡ በእድ፡ ዘይእኅዝ፡ በዓመፃ፡ ኢይነጽሕ። ቀዳሚት፡ ፍኖት፡ ኄርት፡ ገቢረ፡ ጽድቅ፡ ሥሙር፡ በኀበ፡ እግዚአብሔር፡ ጥቀ፡ እምዘቢሐ፡ መሥዋዕት። ዘየኃሥሦ፡ ለእግዚአብሔር፡ ይረክብ፡ አእምሮ፡ በጽድቅ። ወእለሰ፡ ርትዐ፡ የኃሥሡ፡ ይረክቡ፡ ሰላመ። ኵሉ፡ ምግባሩ፡ ለእግዚአብሔር፡ ዘምስለ፡ ጽድቅ። ይትዓቀብ፡ ረሲዕ፡ ለዕለት፡ እኪት። ሰገል፡ ውስተ፡ አፈ፡ ንጉሥ፡ ወበፍትሕ፡ ኢይጌጊ፡ አፉሁ። ከመ፡ ለጽሊጸ፡ ልሳነ፡ መዳልው፡ ፍትሕ፡ እግዚአብሔር፡ ወምግባሩሂ፡ አእባነ፡ ቊናማት። ምኑን፡ በኀበ፡ እግዚአብሔር፡ መዳልወ፡ ዓመፃ፡ ወምኑን፡ በኀበ፡ ንጉሥ፡ ዘይገብር፡ እኩየ፡ ወምስለ፡ ጽድቅ፡ ይነብር፡ መንበረ፡ ምኵናን። ሥሙር፡ በኀበ፡ ንጉሥ፡ ከናፍረ፡ ጽድቅ፡ ወነገረ፡ ርቱዐ፡ ያፈቅር፡ እግዚአብሔር። መዓተ፡ ንጉሥ፡ ከመ፡ መልአከ፡ ሞት፡ ወብእሲሰ፡ ጠቢብ፡ ይዬውሆ። ከመ፡ ብርሃነ፡ ፀሐይ፡ ገጸ፡ ንጉሥ፡ ወበእለ፡ ኢያሠምርዎሰ፡ ከመ፡ ደመና፡ ምሴት። አጥርዮታ፡ ለጥበብ፡ ይትበደር፡ እምወርቅ፡ ወአጥርዮታ፡ ለአእምሮ፡ ይኄይስ፡ እምብሩር። ፍናወ፡ ሕይወት፡ ያግኅሣ፡ እምእኩይ፡ ወኑኀ፡ መዋዕል፡ ፍናወ፡ ጽድቅ። ዘይትዌከፍ፡ ትምህርተ፡ ውስተ፡ ሠናይ፡ ይሄሉ፡ ወዘየዓቅብሂ፡ ተግሣፀ፡ ይጠበብ። ፍናዊሁ፡ ይትመኃፀና፡ ለነፍሱ፡ ወዘያፈቅር፡ ሕይወቶ፡ ይዕቀብ፡ አፉሁ። እምቅድመ፡ ባእስ፡ ይቀድም፡ ጽኢል፡ ወእምቅድመ፡ ድቀት፡ አእምሮ፡ እኩይ። ይኄይስ፡ ዓራቄ፡ መዓት፡ ዘበአትሕቶ፡ እምዘይትካፈል፡ በርበረ፡ ምስለ፡ ጸአልያን። ማእምር፡ ዘበምግባሩ፡ ረካቢሆን፡ ለኄራት፡ ወዘይትዌከልሰ፡ ብእግዚአብሔር፡ ብፁዕ። ለጠቢብ፡ ማእምረ፡ ይሰምይዎ፡ ወለጥዑመ፡ ቃል፡ ፈድፋደ፡ ይጼውዕዎ። ነቅዐ፡ ሕይወት፡ ሕሊና፡ ሠናይት፡ ለእለ፡ አጥረይዋ፡ ወትምህርተ፡ ዐብዳንሰ፡ እኪት። ልበ፡ ጠቢብ፡ ይትአመር፡ እምአፉሁ፡ ወውስተ፡ ከናፍሪሁ፡ ይለብስ፡ ተዓውቆ። ጸቃውዓ፡ መዓር፡ ነገር፡ ሠናይ፡ ወመዓርዒሮን፡ ፈውሰ፡ ነፍሶ። ቦ፡ ፍናው፡ ዘይመስላሁ፡ ለብእሲ፡ ርቱዓተ፡ ወጽንፎንኒ፡ ይኔጽራ፡ ማዕምቅተ፡ ሲኦል። ብእሲ፡ በኅማሙ፡ የሐምም፡ ለርእሱ፡ ወይትኄየል፡ በርእሱ፡ ኃጒል፡ ወባሕቱ፡ ጠዋይ፡ ውስተ፡ አፉሁ፡ ይለብስ፡ ኀጒለ። ብእሲ፡ ዓብድ፡ ይከሪ፡ ለርእሱ፡ እከየ፡ ወውስተ፡ ከናፍሪሁ፡ ይዘግብ፡ እሳተ። ብእሲ፡ ጠዋይ፡ ይልእክ፡ እከየ፡ ወማኅቶተ፡ ሐብል፡ ታውዕዮሙ፡ ለእኩያን፡ ወትሌሊ፡ አዕርክተ። ብእሲ፡ እኩይ፡ የሐብል፡ አዕርክተ፡ ወይወስዶሙ፡ ፍናወ፡ እለ፡ ኢኮና፡ ኄራተ። ዘያወትር፡ በአዕይንቲሁ፡ ይሔሊ፡ ጠዋየ፡ ወዘያቤይድ፡ በከናፍሪሁ፡ ኵሎ፡ እኩየ፡ ዘእቶነ፡ እከይ፡ ውእቱ። አክሊለ፡ ምክሕ፡ ርሥዕ፡ ሠናይ፡ ወውስተ፡ ፍናወ፡ ጽድቅ፡ ይትረከብ። ይኄይሰ፡ ብእሲ፡ ዕጉሥ፡ እምኃያል፡ ወብእሲ፡ ዘጥበብ፡ ቦቱ፡ እምወፍር፡ ዓቢይ። ዘይሤለጥ፡ በመንፈሱ፡ እምዘይመልክ፡ ሀገረ፡ ወዘይትዔገሥ፡ መዓተ፡ ይኄይስ፡ እምዘ፡ ያስተጋብእ፡ ሀገረ። ለብእሲ፡ ዓማፂ፡ ውስተ፡ ኅፅኑ፡ ይገብእ፡ ኵሉ፡ ዓመፃሁ፡ ወእምኀበ፡ እግዚአብሔር፡ ኵሉ፡ ጻድቅ።

Chapter 17 ይኄይስ፡ ፍት፡ ጥዑም፡ ምስለ፡ ሰላም፡ እምቤት፡ ዘምሉእ፡ ብዙኀ፡ ሠናያተ፡ ወእምዘ፡ ዓመፃ፡ ጥብሕ፡ ምስለ፡ ጋእዝ። ገብር፡ ጠቢብ፡ ይሜብል፡ አጋእዝተ፡ ዐብዳነ፡ ወምስለ፡ እኃው፡ ይትካፈል፡ ርስተ። በከመ፡ ይትፈተን፡ ወርቅ፡ ወብሩር፡ በከውር፡ ከማሁ፡ ኅሩያነ፡ ልብ፡ በኀበ፡ እግዚአብሔር። እኩየ፡ ያሠምዕ፡ ልሳኖሙ፡ ለእለ፡ ዘእንበለ፡ ሕግ፡ ጻድቅሰ፡ ኢይኔፅር፡ ከናፍረ፡ ሐሰት። ለምእመን፡ ኵሉ፡ ዘበዓለም፡ ንዋዩ፡ ወለዘኢምእመንሰ፡ ኢፀሪቅ፡ ሎቱ። ዘይስሕቆ፡ ለነዳይ፡ ይዌህኮ፡ ለፈጣሪሁ፡ ወዘይትፌሣሕ፡ ላዕለ፡ ዘይትኀጐል፡ ኢይድኅን፡ ወዘይምሕርሰ፡ ይትሜሐር። አክሊሎሙ፡ ለአእሩግ፡ ውሉደ፡ ውሉድ፡ ወምክሖሙ፡ ለውሉድ፡ አበዊሆሙ። ኢይትዋደዶ፡ ለዐብድ፡ ከናፍረ፡ ወሃይምንት፡ ወኢጻድቅ፡ ከናፍረ፡ ሐሰት። ዓስበ፡ ሞገስ፡ ትምህርት፡ ለእለ፡ አጥረይዋ፡ ኀበ፡ ተመይጠ፡ ታሤኒ፡ ፍኖቶ። ዘየኀብእ፡ አበሳሁ፡ ይፈቅድ፡ ዕርቀ፡ ወዘይጸልእሰ፡ ኀቢአ፡ ይሌሊ፡ አዕርክተ፡ ወሰብአ፡ ቤት። የኃዝን፡ ትምክሕት፡ ልበ፡ ጠቢብ፡ ወዐብድሰ፡ ተቀሢፎ፡ ኢይትዓወቆ፡ ቅሥፈቱ። ቅስተ፡ ያነሥእ፡ ኵሉ፡ እኩይ፡ ወእግዚአብሔር፡ ይፌኑ፡ መልአኮ፡ ዘእንበለ፡ ምሕረት፡ ቦቱ። ይወድቅ፡ ብእሲ፡ ማእምር፡ ውስተ፡ ትካዝ፡ ወዐብዳንሰ፡ ይሔልዩ፡ እኩየ። ዘየዓሢ፡ እኩየ፡ ህየንተ፡ ሠናይ፡ ኢያንቀለቅል፡ እኩይ፡ እምነ፡ ቤቱ። ዐፂወ፡ ማይ፡ ቀዳሜ፡ ጽልእ፡ ወመኰንና፡ ለንዴት፡ ጋእዝ፡ ወባእስ፡ ሥልጣነ፡ ነገር፡ ይሁብ፡ ቀዳሜ፡ ጽድቅ። ዘከመ፡ ጻድቅ፡ ይኰንኖ፡ ለኃጥእ፡ ወዘከመ፡ ኃጥእ፡ ለጻድቅ፡ ርኩስ፡ ምኑን፡ በኀበ፡ እግዚአብሔር። ለምንት፡ ጥሪት፡ ለዐብድ፡ አጥርዮታ፡ ለጥበብ፡ ዘእንበለ፡ ልብ፡ ኢይትከሀል። ዘያነውኅ፡ ቤቶ፡ የኃሥሥ፡ ቅጥቃጤ፡ ለርእሱ፡ ወዘያስተዓፅብ፡ ለተምህሮ፡ ይወድቅ፡ ውስተ፡ አኪት። በኵሉ፡ ጊዜ፡ አጥሪ፡ ዓርከ፡ ወአኃወ፡ በምንዳቤ፡ በቋፅያነ፡ ይከውኑ፡ እስመ፡ በእንተዝ፡ ይትወለዱ። ብእሲ፡ ዓብድ፡ ይጠፍሕ፡ እዴሁ፡ ወይትኀሠይ፡ በርእሱ፡ ከመ፡ ዘይትሀበይ፡ ህቢተ፡ ለዐርኩ። መፍቀሬ፡ ጋእዝ፡ ይትፌሣሕ፡ በባእስ፡ ወጽኑዐ፡ ልብሰ፡ ኢይዳደቅ፡ ሠናየ። ብእሲ፡ መያጤ፡ ልሳን፡ ይወድቅ፡ ውስተ፡ እኪት፡ ወልበ፡ ዐብድሰ፡ ኃዘን፡ ለዘአጥረያ። ኢይትፌሣሕ፡ አብ፡ በወልድ፡ ዘእንበለ፡ ትምህርት፡ ወልድ፡ ጠቢብ፡ ያስተፌሥሕ፡ እሞ። ልብ፡ ፍሥሕት፡ ሠናየ፡ ትገብር፡ ብእሲ፡ ኃዛኒ፡ ያየብስ፡ አዕፅምቲሁ። ዘይነሥእ፡ ሕልያነ፡ ውስተ፡ ኅፅኑ፡ በዓመፃ፡ ኢያረትዕ፡ ፍትሐ፡ ወረሲዕሰ፡ ይትገኀሥ፡ እምፍናወ፡ ጻድቃን። ገጹ፡ ማእምር፡ ለብእሲ፡ ጠቢብ፡ ወአዕይንቲሁ፡ ለዓብድ፡ ውስተ፡ ከተማ፡ ምድር፡ አዕይንቲሁሰ፡ ለጠቢብ፡ ዲበ፡ ርእሱ። መዓት፡ ለአብ፡ ዐብድ፡ ውሉድ፡ ወኃዘን፡ ለእንተ፡ ወለደቶ። አኅሥሮቱ፡ ለጻድቅ፡ ብእሲ፡ አኮ፡ ሠናይ፡ ወአኮ፡ ሠናይ፡ ለመኳንንተ፡ ጽድቅ፡ ሐቢል። ዘይምህክ፡ አውፅኦ፡ ቃለ፡ ንቁጸ፡ ማእምር፡ ውእቱ፡ ወመስተዓግሥ፡ ብእሲ፡ ጠቢብ። ዓብድ፡ ለእመ፡ ተሰአለ፡ ጥበበ፡ ይከውኖ፡ በአርምሞሰ፡ ወበተሐክሞ፡ ይመስል፡ ጠቢበ።

Chapter 18 ምክንያተ፡ የኃሥሥ፡ ብእሲ፡ ዘይፈቅድ፡ ይትፈለጥ፡ እምአዕርክቲሁ፡ ወበኵሉ፡ ጊዜ፡ ዝንጓጔ፡ ይከውን። ኢይፈቅድ፡ ጥበበ፡ ነዳየ፡ አእምሮ፡ ወባሕቱ፡ ይመልኮ፡ ዕበድ። ሶበ፡ መጽአ፡ ረሲዕ፡ ውስተ፡ ዕመቀ፡ እከያት፡ ይትኄየይ፡ ወያመጽእ፡ ኃሣረ፡ ወዝንጓጔ። ማይ፡ ዕሙቅ፡ ውስተ፡ ልበ፡ ብእሲ፡ ጠቢብ፡ ወፈለግ፡ ዘይፈለፍል፡ ነቅዐ፡ ሕይወት። አንክሮ፡ ገጸ፡ ረሲዓን፡ አኮ፡ ሠናይ፡ ወአኮ፡ አዳም፡ አግኅሦ፡ ጽድቅ፡ በፍትሕ። ከናፍሪሁ፡ ለዐብድ፡ ያበጽሖ፡ ውስተ፡ እከይ፡ ወአፉሁ፡ ለጒጒዕ፡ ይጼውዕ፡ ሞተ፡ ለርእሱ። አፉሁ፡ ለዐብድ፡ ቅጥቃጤሁ፡ ወከናፍሪሁ፡ መሥገርተ፡ ነፍሱ። ሀካይያን፡ ያበዝኁ፡ ፍርሃተ፡ ወመንፈሰ፡ ሰብእሰ፡ ፅኑሳን፡ ይርኅብ። ዘኢይፌውስ፡ ርእሶ፡ በምግባሪሁ፡ እኁሁ፡ ውእቱ፡ ለዘርእሶ፡ ይበልዕ። ዓቢይ፡ ኃይል፡ ስመ፡ እግዚአብሔር፡ ወኪያሁ፡ በዴግኖ፡ ጻድቃን፡ ይትሌዓሉ። ጥሪቱ፡ ለብእሲ፡ ባዕል፡ ሀገር፡ ጽንዕት፡ ወበክብራ፡ ዓቢየ፡ ትጼልል። ዘእንበለ፡ ቅጥቃጤ፡ ይትዔበይ፡ ልበ፡ ብእሲ፡ ወዘእንበለ፡ ክብር፡ ይቴሐት። ዘይነብብ፡ ቃለ፡ ዘእንበለ፡ ይስማዕ፡ ዐብድ፡ ውእቱ፡ ወሎቱ፡ ይደሉ፡ ምናኔ። መዓተ፡ ንጉሥ፡ ያኃሥዕ፡ ገብር፡ ጠቢብ፡ ለሕፁፀ፡ ነፍስሰ፡ ብእሲ፡ መኑ፡ ይክሎ። ልበ፡ ብእሲ፡ ጠቢብ፡ ያጠሪ፡ አእምሮ፡ ወዕዝነ፡ ጠቢባን፡ የኃሥሥ፡ ቃለ፡ ተግሣፅ። ሀብት፡ ብእሴ፡ ያሌዕል፡ ወምስለ፡ መኳንንት፡ ያነብሮ። ጻድቅ፡ መስተዋድየ፡ ርእሱ፡ እምቅድመ፡ ነገር፡ ወበዘአምጽአ፡ እድው፡ ይዘልፍ። ጋእዝ፡ ያኅድግ፡ ዕፃ፡ ወማእከለ፡ ፅኑዓን፡ ይፈልጥ። ወካሕደ፡ ያኀድግ፡ አርማሚ፡ ወበኀበ፡ መኳንንት፡ ይሠርዕ። እኁ፡ ምስለ፡ እኁ፡ ዘይትራዳእ፡ ከመ፡ ሀገር፡ ጽንዕት፡ ወልዕልት፡ ወጽኑዕ፡ ከመ፡ መሠረት፡ ሡርርት። እምፍሬ፡ አፉሁ፡ ይመልእ፡ ብእሲ፡ ከረሦ፡ ወእምፍሬ፡ ከናፍሪሁ፡ ይጸግብ። ሞት፡ ወሕይወት፡ ውስተ፡ እደ፡ ልሳን፡ ወእለሰ፡ ያጸንዕዋ፡ ይበልዑ፡ ፍሬሃ። ዘረከበ፡ ብእሲተ፡ ኄርተ፡ ረከበ፡ ሞገሰ፡ ወነሥአ፡ እምኀበ፡ እግዚአብሔር፡ ውኅዋኄ። ዘያወፅአ፡ ብእሲተ፡ ኄርተ፡ አውፅአ፡ ሠናያተ፡ ወዘያነብርሰ፡ ብእሲተ፡ ዘማዊተ፡ ዐብድ፡ ወረሲዕ፡ ውእቱ።

Chapter 19 ዕበዱ፡ ለብእሲ፡ ያጠፍእ፡ ፍናዊሁ፡ ወለእግዚአብሔር፡ ያስተጋፍዖ፡ በልቡ። ባዕል፡ ይዌስክ፡ አዕርክተ፡ ብዙኀነ፡ ወነዳይሰ፡ ኪያሁኒ፡ ዘቦ፡ የኃጥእ። ሰማዕተ፡ ሐሰት፡ ርኩስ፡ ውእቱ፡ ወዘየኃሥሥ፡ በግፍዕ፡ ኢያመስጥ። ወብዙኃን፡ ይትለአኩ፡ በቅድመ፡ ነገሥት፡ ወባሕቱ፡ ጽድቁ፡ ወሀብቱ፡ ለብእሲ፡ እምኀበ፡ እግዚአብሔር። ወኵሉ፡ እኩይ፡ ይከውን፡ ዝንጓጔ፡ ብእሲ፡ ኵሉ፡ ዘአኃወ፡ ነዳያነ፡ ይጸልእ፡ እምታአኅኃሁ፡ ርኁቅ፡ ውእቱ። ሕሊና፡ ሠናይት፡ ለእለ፡ አጥረይዋ፡ ትቀርብ፡ ወብእሲ፡ ጠቢብ፡ ይረክባ። ዘብዙኅ፡ እከዩ፡ ይፌጽም፡ እከየ፡ ወዘያስዖዝዝ፡ ነገረ፡ ኢይድኅን። ዘአጥረያ፡ ለጥበብ፡ ያፈቅር፡ ነፍሶ፡ ወዘያፈቅር፡ አእምሮ፡ ይረክብ፡ ኄረ። ሰማዕተ፡ ኀሰት፡ ኢይድኅን፡ እምኵነኔ፡ ወዘያስተውዕያ፡ ለእከይ፡ ይተኃጐል፡ ባቲ። ኢይደልዎ፡ ለዐብድ፡ ተድላ፡ ወለእመ፡ ገብረ፡ ኵነኔ፡ ዘምስለ፡ ጽእለት፡ ትኄየል። ወሐሪ፡ ብእሲ፡ ይትዔገሥ፡ ወትምክሕተ፡ ምሕረቱ፡ ይትቃወሞሙ፡ ለኃጥአን። መዓተ፡ ንጉሥ፡ ከመ፡ ጣሕረ፡ አንበሳ፡ ወከመ፡ ጠል፡ ዘይወርድ፡ ዲበ፡ ሣዕር፡ ከማሁ፡ ውእቱ፡ ውኅዋኄሁ። ኃፍረት፡ ለአብ፡ ዐብድ፡ ወልድ፡ ወኢኮነ፡ ንጹሐ፡ ጸሎት፡ ምስለ፡ ዐስበ፡ ከልአት። አብያተ፡ ወንዋየ፡ ይከፍሉ፡ አበው፡ ለውሉዶሙ፡ ወባሕቱ፡ በኀበ፡ እግዚአብሔር፡ ትትዋደዶ፡ ብእሲት፡ ለብእሲሃ። ምምዓ፡ ይእኅዞ፡ ለብእሲ፡ ፅኑስ፡ ወነፍስ፡ ዘኢይትቀነይ፡ ይርኅብ። ዘየዓቅብ፡ ተግሣፀ፡ ወትእዛዘ፡ ይትመኀፀን፡ ነፍሶ፡ ወዘያሰትትሰ፡ ፍናዊሁ፡ ይትኃጐል። ይሌቅሖ፡ ለእግዚአብሔር፡ ዘይምሕር፡ ነዳየ፡ ወበከመ፡ ሀብቱ፡ ይፈድዮ። ዝብጥ፡ ወልደከ፡ ከመ፡ ይኩንከ፡ ለተስፋ፡ ወለተጽእሎሰ፡ ኢታልዕል፡ እዴከ። ብእሲ፡ እኩይ፡ ብዙኀ፡ ያኃጒል፡ ወእመሰ፡ ዓቢይ፡ ሕቡል፡ ነፍሶሂ፡ ይዌስክ። ስማዕ፡ ወልድየ፡ ተግሣፀ፡ አቡከ፡ ከመ፡ ትኩን፡ ጠቢበ፡ በደኃሪትከ። ብዙኅ፡ ሕሊና፡ ውስተ፡ ልበ፡ ብእሲ፡ መምክር፡ ወምክሩሰ፡ ለእግዚአብሔር፡ ይሄሉ፡ ለዓለም። ፍሬሁ፡ ለብእሲ፡ ምጽዋት፡ ይኄይስ፡ ነዳይ፡ ጻድቅ፡ እምባዕል፡ ሐሳዊ። ፈሪሀ፡ እግዚአብሔር፡ ሕይወተ፡ ብእሲ፡ ዘኢይፈርህሰ፡ የኃድር፡ ውስተ፡ መካን፡ ኀበ፡ ኢያስተርኢ፡ አእምሮ። የኀብእ፡ ሀካይ፡ እዴሁ፡ ውስተ፡ ኅፅኑ፡ ወኀበ፡ አፉሁ፡ ኢያቀርብ። ሕቡል፡ እንዘ፡ ይትቀሠፍ፡ ዐብድ፡ ጠቢበ፡ ይከውን፡ ወእመሰ፡ ዘለፍኮ፡ ለብእሲ፡ ጠቢብ፡ ይሔሊ፡ አእምሮ። ዘያኀሥር፡ አባሁ፡ ወእሞ፡ ይትከላእ፡ ወይትኀፈር፡ ወምኑነ፡ ይከውን። ወልድ፡ ዘይትከላእ፡ እምዓቂበ፡ ትምህርተ፡ አብ፡ ይትሜሀር፡ ቃለ፡ እኩየ። ዘይትሄበይ፡ ዐብደ፡ ወልደ፡ ያጼእል፡ ፍትሐ፡ ወለአፈረሲዐን፡ ይውኅጦ፡ እኩይ፡ ኵነኔ። ወይጸንሕ፡ ሎሙ፡ መቅሠፍት፡ ለእኩያን፡ ወኵነኔ፡ ከማሁ፡ ለዐብዳን።

Chapter 20 እኩይ፡ ወይን፡ ለጸአሊ፡ ወለሰካሪ፡ ወኵሉ፡ ዘያስተፋንዎ፡ ለጽዋዕ፡ ኢኮነ፡ ጠቢበ፡ ወኵሉ፡ ዐብድ፡ ዘከመዝ፡ ይዴመር። ኢየሐፅፅ፡ መዓተ፡ ንጉሥ፡ እመዓተ፡ አንበሳ፡ ወዘየሀውኮሰ፡ ይኤብስ፡ ላዕለ፡ ነፍሱ። ክብሩ፡ ለብእሲ፡ ተከልኦ፡ እምጽእለት፡ ወኵሉ፡ ዐብድ፡ ዘከመዝ፡ ይጸመር። እንዘ፡ ይዘነጒግዎ፡ ሀካይ፡ ኢየኃፍር፡ ይስእል፡ በማእረር፡ ወአልቦ፡ ዘይሁቦ፡ ከማሁ፡ ዘይትሌቃሕ፡ ሥርናየ፡ እንዘ፡ ቦውስተ፡ ክምሩ። ማይ፡ ዕሙቅ፡ ውስተ፡ ልበ፡ ብእሲ፡ መምክር፡ ወብእሲ፡ ጠቢብ፡ ይዘልሖ። ዓቢይ፡ ወክቡር፡ ብእሲ፡ ወሐሪ፡ ወለብእሲ፡ ምእመን፡ በሥራሕ፡ ተረክቦቱ። ዘየሐውር፡ ንጹሐ፡ ውስተ፡ ሕገ፡ እግዚአብሔር፡ ብፁዓነ፡ ይሬስዮሙ፡ ለውሉዱ። ወሶበ፡ ጻድቅ፡ ንጉሥ፡ ይነብር፡ ዲበ፡ መንበሩ፡ ቅድመ፡ አዕይንቲሁ፡ ኢይትቃወሞ፡ ምንትኒ፡ እኩይ። መኑ፡ ዘይትሜካሕ፡ ልብ፡ ንጹሕ፡ ዘቦ፡ ወመኑ፡ ያስተርኢ፡ ንጹሐ፡ ከዊኖ፡ እምኃጢአት። ዘየሐሚ፡ አባሁ፡ ወእሞ፡ ይጠፍእ፡ ብርሃኑ፡ ወበእንተ፡ አዕይንቲሁ፡ ይኔጽር፡ ጽልመተ። መክፈልተ፡ ዘይጔጒእ፡ አቅዲሞ፡ በደኃሪቱ፡ ኢይትባረክ። ኢትበል፡ እትቤቀሎሙ፡ ለጸላእትየ፡ አላ፡ ተሰፈዎ፡ ለእግዚአብሔር፡ ከመ፡ ይርዳእከ። መዳልው፡ ዓቢይ፡ ወንኡስ፡ ወመሣፍርት፡ ክልኤቱ፡ ርኩሳን፡ በኀበ፡ እግዚአብሔር፡ ኵሎሙ፡ ወዘይገብሮሙ፡ በምግባሪሁ፡ ይትዓቀፍ። ለወሬዛ፡ ጻድቅ፡ ርቱዕ፡ ፍኖቱ። ዕዝን፡ ዘይሰምዕ፡ ወዓይን፡ ዘይሬኢ፡ ግብረ፡ እግዚአብሔር፡ ኵሎሙ። ኢታፍቅር፡ ሐምየ፡ ከመ፡ ኢትትአተት፡ ወኢትኑም፡ ከመ፡ ኢትንዲ፡ ክሥት፡ አዕይንቲከ፡ ወጽግብ፡ ኅብስተ። ምኑናን፡ በኀበ፡ እግዚአብሔር፡ ክልኤቱ፡ መዳልው፡ መዳልው፡ ሰራቂ፡ አኮ፡ ሠናይ፡ በቅድሜሁ። እምኀበ፡ እግዚአብሔር፡ ይረትዕ፡ አሠሩ፡ ለብእሲ፡ ወመዋቲሰ፡ እፎ፡ የአምር፡ ፍናዊሁ። መሥገርቱ፡ ለብእሲ፡ ጒጉዕ፡ ዘእምዚአሁ፡ ይቄድሶ፡ እስመ፡ እምድኅረ፡ በፅዐ፡ ንስሐ፡ ይከውኖ። መሥኤሆሙ፡ ለረሲዓን፡ ንጉሥ፡ ጠቢብ፡ ወይወዲ፡ ሎሙ፡ መንኰራኵረ። ብርሃነ፡ እግዚአብሔር፡ እስትንፋሰ፡ ብእሲ። ዘከመ፡ ማኅቶት፡ ይፈትን፡ መዛግብተ፡ ከማሁ፡ ጠቢብ፡ ንጉሥ፡ ይፈትን፡ መዛግብተ፡ ከርሥ። ምጽዋተ፡ ወጽድቀ፡ ይዕቀብ፡ ንጉሥ፡ ወይሜግቡ፡ በጽድቅ፡ መንበሮ። ሠርጐሆሙ፡ ለወራዙት፡ ጥበብ፡ ወክብሮሙ፡ ለልሂቃን፡ ሲበት። ምማቴ፡ ወግኅሠት፡ ይዳደቆሙ፡ ለእኩያን፡ ወዝብጠት፡ ውስተ፡ መዛግብተ፡ ከርሥ።

Chapter 21 ከመ፡ ውሒዘ፡ ማይ፡ ከማሁ፡ ልበ፡ ንጉሥ፡ ውስተ፡ እደ፡ እግዚአብሔር፡ ኀበ፡ ፈቀደ፡ ይመይጣ፡ ወህየ፡ ትመሲ። ኵሉ፡ ብእሲ፡ ያስተርኢ፡ ለርእሱ፡ ጻድቀ፡ ወያረትዕ፡ እግዚአብሔር፡ አልባበ። ገቢረ፡ ጽድቅ፡ ህልው፡ ወሥሙር፡ በኀበ፡ እግዚአብሔር፡ ፈድፋደ፡ እምዘቢሐ፡ መሥዋዕት። ዓቢይ፡ ሕሊና፡ ኢጐጒዖ፡ ልብ፡ ለጽእለት፡ ወብርሃኖሙ፡ ለረሲዓን፡ ኃጢአት። ዘይትቀነይ፡ መዝገበ፡ ልሳነ፡ ሐሰት፡ ከንቶ፡ ይዴግን፡ ወያበጽሖ፡ ውስተ፡ መሥገርተ፡ ሞት። ሥራዌ፡ ረሲዓን፡ ይትነገድ፡ እምርኁቅ፡ እስመ፡ ኢይፈቅዱ፡ ይግበሩ፡ ጽድቀ። ለዕልዋን፡ ዕልወ፡ ፍኖተ፡ ይፌኑ፡ ሎሙ፡ እግዚአብሔር፡ እስመ፡ ርቱዕ፡ ወንጹሕ፡ ምግባሩ። ይኄይስ፡ ነቢር፡ ውስተ፡ ማዕዘንት፡ ዘኢኮነ፡ ጥፉረ፡ እምነ፡ ቢር፡ ምስለ፡ ብእሲት፡ መግዝእት፡ ውስተ፡ ቤት፡ ምሩግ። ነፍሰ፡ ረሲዓን፡ ኢትትመሐር፡ ወኢ፡ በኀበ፡ አሐዱሂ፡ ሰብእ። እንዘ፡ የኃሥር፡ ጸዋግ፡ ማእምረ፡ ይከውን፡ የዋህ፡ ወዘይጤቅስ፡ ጥበበ፡ ይትዌከፍ፡ አእምሮ። ኢየአምር፡ ጥበበ፡ ልበ፡ ረሲዓን፡ ወየአክዮሙ፡ ለረሲዓን፡ እከይ። ዘይፌፅም፡ ዕዘኒሁ፡ ከመ፡ ኢይስማዕ፡ ነዳያነ፡ ውእቱኒ፡ ይጼውእ፡ ወአልቦ፡ ዘይሰምዖ። ሀብት፡ ዘበጽሚት፡ ይገፍዕ፡ መዓተ፡ ወዘሰ፡ ይምህክ፡ ሀብተ፡ ያነሥእ፡ ጽኑዐ፡ መዓተ። ፍሥሐ፡ ጻድቃን፡ ገቢረ፡ ፍትሕ፡ ወጻድቅ፡ ባሕቱ፡ ርኩስ፡ በኀበ፡ እኩያነ፡ ምግባር። ብእሲ፡ ዘይስሕት፡ እምፍኖተ፡ ጽድቅ፡ ውስተ፡ ማሕበረ፡ ረሲዓን፡ የዓርፍ። ብእሲ፡ ጽኑዕ፡ ያፈቅር፡ ፍሥሐ፡ ወዘያፈቅር፡ ወይነ፡ ወቅብዐ፡ ኢይብዕል። ምኑን፡ ኃጥእ፡ በኀበ፡ ጻድቅ፡ ወቤዛሁ፡ ለጻድቅ፡ ይትወሀብ፡ ረሲዕ። ይኄይስ፡ ነቢር፡ ውስተ፡ ገዳም፡ እምነቢር፡ ምስለ፡ ብእሲት፡ መግዝእት፡ ወነባቢት፡ ወመዓትምት። መዝገብ፡ መፍትው፡ ውስተ፡ አፈ፡ ጠቢባን፡ ዐብዳንሰ፡ ሰብእ፡ የኃጥእዎ። ዘይዴግን፡ ፍኖተ፡ ጽድቅ፡ ወሕይወት፡ ይረክብ፡ ክብረ፡ ወሕይወተ። ለሀገር፡ ጽንዕት፡ ቦአ፡ ጠቢብ፡ ወነሠተ፡ ጽንዐ፡ በዘይትዌከሉ፡ ረሲዓን። ዘየዐቅብ፡ አፉሁ፡ ወልሳኖ፡ ይትመኀፀና፡ ለነፍሱ፡ እምንዳቤ። ጒጒዕ፡ ወመግዝእ፡ ወነባቢ፡ ብድብድ፡ ስሙ፡ ወዘይዜክርሰ፡ እከየ፡ ኃጥእ፡ ውእቱ። ፍትወት፡ ይቀትላሁ፡ ለሀካይ፡ እስመ፡ ኢይፈቅድ፡ እደዊሁ፡ ይግበራ፡ ምንተኒ። ረሲዕ፡ ይፈቅድ፡ ወይፈቱ፡ ኵላ፡ ዕለተ፡ ፍትወተ፡ እኪተ፡ ጻድቅሰ፡ ይምሕር፡ ወይመጸውት፡ ኵሎ፡ አእሚሮ። መሥዋዕተ፡ ረሲዓን፡ ምኑን፡ በኀበ፡ እግዚአብሔር፡ እስመ፡ በእከይ፡ ያቀርብዎ። ሰማዕተ፡ ሐሰት፡ ይትኃጐል፡ ወብእሲሰ፡ ሰማዒ፡ ዕቁበ፡ ይትናገር። ረሲዕ፡ ብእሲ፡ ዘእንበለ፡ ኃፍረት፡ ይትቃወም፡ ለገጽ፡ ወራትዕሰ፡ ይጤይቅ፡ ፍኖቶ። አልቦ፡ ጥበብ፡ ወአልቦ፡ እዘዝ፡ በኀበ፡ ዐብድ፡ ወአልቦ፡ ምክር፡ በኀበ፡ ረሲዕ። ፈረሰ፡ ያስተዳልዉ፡ ለዕለተ፡ ጸብእ፡ ረድኤትሰ፡ እምኀበ፡ እግዚአብሔር፡ ይከውን።

Chapter 22 ይኄይስ፡ ስም፡ ሠናይ፡ እምበዙኅ፡ ብዕል፡ ወእምብሩር፡ ወወርቅ፡ ሞገስ፡ አዳም። ባዕል፡ ወነዳይ፡ ይትራከቡ፡ ኅቡረ፡ ወክልኤሆሙ፡ እግዚአብሔር፡ ገብረ። ማእምር፡ ርእዮ፡ እንዘ፡ ይትኴነን፡ እኩይ፡ ኅዩል፡ ይትጌሠፅ፡ ወዐብዳንሰ፡ እንዘ፡ የኀልፉ፡ ኀሥሩ። ትወልዳ፡ ለጥበብ፡ ፈሪሀ፡ እግዚአብሔር፡ ለክብር፡ ወለብዕል፡ ወለሕይወት። አሜከላ፡ ወመሣግር፡ ውስተ፡ ፍናው፡ ጠዋያት፡ ወዘየዐቅብሰ፡ ነፍሶ፡ ያድኅን፡ ወያመስጦን። አብዕልት፡ ነዳያነ፡ ይኴንኑ፡ ወአግብርት፡ ለአጋእዚቲሆሙ፡ ይሌቅሑ። ወዘይዘርእ፡ ሕብለ፡ የአርር፡ እከየ፡ ወመቅሠፍተ፡ ምግባሪሁ፡ ይፌጽም። ብእሴ፡ ፍሡሐ፡ ወሀቤ፡ ይፈቅር፡ እግዚአብሔር፡ ወከንቶ፡ ምግባሪሁ፡ ይጸልእ። ዘይምሕርሰ፡ ነዳየ፡ ውእቱ፡ በልዐ፡ እስመ፡ ኅብስቶ፡ ወሀበ፡ ለምስኪናን፡ ወአኮ፡ ለባዕል፡ ዘይፈዲ፡ ለዘወሀቦ። መዊዐ፡ ወክብረ፡ ይረክብ፡ ዘወሀበ፡ ሕልያነ፡ ወባሕቱ፡ ነፍሶ፡ ያአትት፡ ዘነሥአ። አውጽእ፡ እምእንግልጋ፡ ቀታሌ፡ ወይትልዎ፡ ሞት፡ እስመ፡ ሶበ፡ ይነብር፡ ውስተ፡ እንግልጋ፡ ኵሎ፡ ያኅሠርሥር። ያፈቅር፡ እግዚአብሔር፡ የዋሃተ፡ ልብ፡ ወኅሩያን፡ በኀቤሁ፡ ኵሎሙ፡ ንጹሐን፡ ወበከናፍሪሁ፡ ይሬኢ፡ ንጉሥ። አዕይንተ፡ እግዚአብሔር፡ የዓቅባ፡ አእምሮ፡ ወይሜንን፡ ቃለ፡ ጥበብ፡ ኃጥእ። ያመከኒ፡ ሀካይ፡ ሶበ፡ ይልእክዎ፡ ወይብል፡ ሀሎ፡ አንበሳ፡ ውስተ፡ ፍኖት፡ ወውስተ፡ መራኅብት፡ ቀትል። ግብ፡ ዕሙቅ፡ አፈ፡ ዐማፂ፡ ወዘተጸልአ፡ በኀበ፡ እግዚአብሔር፡ ይወድቅ፡ ውስቴቱ። በፍናው፡ እኩያት፡ ቅድሜሁ፡ ለብእሲ፡ ወኢያፈቅር፡ ይትገኀሥ፡ እምኔሆን፡ ወተግኅሦሰ፡ መፍትው፡ እምፍኖት፡ ጸዋግ፡ ወእኪት። ኢያእምሮ፡ አልዓለቶ፡ ለልበ፡ ወሬዛ፡ እስር፡ በትር፡ ወመቅሠፍት፡ ርኅቀ፡ እምኔሁ። ዘይትዔገሎ፡ ለነዳይ፡ ብዙኀ፡ ይሬሲ፡ ጥሪቶ፡ ወይሁብ፡ ለባዕል፡ በተጽናሱ፡ ወአኮ፡ ለነዳይ። ኀበ፡ ቃለ፡ ጠቢባን፡ አቅርብ፡ ዕዝነከ፡ ለአፅምኦ፡ ወስማዕ፡ ቃለ፡ ዚአየ፡ ወልበከ፡ አቅርብ፡ ከመ፡ ሠናየ፡ ታእምር። ወእመ፡ ወደይኮሙ፡ ውስተ፡ ልብከ፡ ያስተፌሥሑከ፡ ኅቡረ፡ በከናፍሪከ፡ ከመ፡ ይኩን፡ በኀበ፡ እግዚአብሔር፡ ተስፋከ፡ ፈድፋደ፡ ወያኤምረከ፡ ፍኖቶ። ናሁ፡ ጸሐፍኩ፡ ለከ፡ ትሥልስተ፡ ለምክር፡ ወለአእምሮ፡ ወአንተ፡ ጸሐፎን፡ ለርእስከ፡ ውስተ፡ ራኅበ፡ ልብከ። እሜህረከ፡ ህልወ፡ ቃለ፡ አእምሮ፡ ኄረ፡ ከመ፡ ትስማዕ፡ ወከመ፡ ታውሥእ፡ ቃለ፡ ጽድቅ፡ ለእለ፡ ይሴአሉከ። ኢትትዓገሎ፡ ለነዳይ፡ እስመ፡ ምስኪን፡ ውእቱ፡ ወኢትመንን፡ ድውየ፡ በአናቅጽ። እስመ፡ እግዚአብሔር፡ ይፈትሕ፡ ኵነኔሁ፡ ወይባልሖ፡ እም፡ እንቲአከ፡ ነፍስ፡ እንተ፡ ኢትሰረቅ፡ ወይትቤቀል፡ ሎቱ። ኢትኩን፡ መጽመሮ፡ ለብእሲ፡ መዓትም፡ ወምስለ፡ ዐርክ፡ መግዝእ፡ ኢትኀድር፡ ከመ፡ ኢትትመሀር፡ ፍኖቶ። ወትነሥኣ፡ መሥገርተ፡ ለነፍስከ፡ ወኢተሀብ፡ እዴከ፡ ለህቢት፡ በኀፊረ፡ ገጽ፡ እመ፡ አልብከ፡ ዘትፈዲ፡ ወይነሥአከ፡ ክዳነከ፡ ዘታሕተ፡ ገቦከ። ወኢትንሥት፡ ሥርዐተ፡ ዘለዓለም፡ ዘአንበሩ፡ አበዊከ። ጥዩቅ፡ ብእሲ፡ ወበሊኅ፡ በምግባሩ፡ ለነገሥት፡ ሀለዎ፡ ይቅርብ፡ ወኢይቀውም፡ ለሰብእ፡ ፅኑሳን።

Chapter 23 ለእመ፡ ነበርከ፡ ትደረር፡ ውስተ፡ ማእደ፡ መኳንንት፡ አእምሮ፡ አእምር፡ ዘአቅረቡ፡ ለከ። ወተመጠው፡ በእዴከ፡ ወአእምር፡ ከመ፡ ዘከማሁ፡ ሀለወከ፡ ታስተዳሉ። ወእመሰ፡ ነዳይ፡ አንተ፡ ኢትፍቱ፡ መባልዕቲሁ፡ ወዝ፡ ውእቱ፡ ኅብስተ፡ ሐሰት። ወኢትትአከል፡ ምስለ፡ ባዕል፡ እንዘ፡ ነዳይ፡ አንተ፡ ወበሕሊናከ፡ ረኃቅ። ለእመ፡ አውተርከ፡ ዓይነከ፡ ኀቤሁ፡ ኢትረክቦ፡ ወእደ፡ ያስተርኢ፡ አልቦ፡ እስመ፡ ተደለወ፡ ሎቱ፡ ክንፈ፡ ንስር፡ ወያገብእ፡ ውስተ፡ ቤት፡ ዘይቀውም። ኢትደረር፡ ምስለ፡ ብእሲ፡ መታሒ፡ ወኢትፍቱ፡ መባልዕቲሁ፡ ከመ፡ ዘይውኅጥ፡ ሣዕረ፡ ከማሁ፡ ይበልዕ፡ ወይሰቲ። ወኀቤከኒ፡ ኢታብኦ፡ ወኢትብላዕ፡ ኅብስተ፡ ምስሌሁ፡ ብላዕ፡ ወስተይ፡ ይብለከ፡ ወልቡሰ፡ ኢሀሎ፡ ምስሌከ። ይቀይዕ፡ ወያቅያዓይዕ፡ ወያማስን፡ ነገረከ፡ ሠናየ። ውስተ፡ ዕዝነ፡ ዐብድ፡ አልቦ፡ ዘትነግር፡ ከመ፡ ኢይመንን፡ ነገረከ፡ ሠናየ፡ ጠቢበ። ወኢታፍልስ፡ ደወለ፡ ገራህት፡ ዘአንበሩ፡ አበዊከ። ወውስተ፡ ጥሪተ፡ እጓለ፡ ማውታ፡ ኢትባእ፡ እስመ፡ ዘይባልሖሙ፡ እግዚአብሔር፡ አዚዝ፡ ውእቱ፡ ወይትኳነን፡ ኵነኔሆሙ፡ ምስሌከ። ሀብ፡ ለተግሣፅ፡ ልበከ፡ ወዕዝነከ፡ አስተዳሉ፡ ለቃለ፡ አእምሮ። ኢትትኀየይ፡ ገሥፆ፡ ደቂቅከ፡ እስመ፡ እመ፡ ዘበጥኮሙ፡ በበትር፡ ኢይመውቱ። አንተ፡ ትዘብጦሙ፡ በበትር፡ ወነፍሶሙ፡ ትባልሕ፡ እሞት። ወልድየ፡ እመ፡ ጠቢባ፡ ኮነ፡ ልብከ፡ ያስተፌሥሕ፡ እንቲአየ፡ ልበ። ወእመ፡ ነበረት፡ ቃልየ፡ በከናፍሪከ፡ ለከናፍረ፡ ዚአየ፡ ርቱዓተ፡ ይከውና። ኢትቅናእ፡ ልብከ፡ ላዕለ፡ ኃጥአን፡ አላ፡ በፍርሃተ፡ እግዚአብሔር፡ ሀሉ፡ በኵሉ፡ ጊዜ። ወለእመ፡ ዐቀብኮን፡ ይከውናከ፡ ትዝምደ፡ ወተስፋከ፡ ኢይትአተት። ስማዕ፡ ወልድየ፡ ወጠቢበ፡ ኩን፡ ወአርትዕ፡ ኅሊና፡ ልብከ። ወኢትኩን፡ ሰታዬ፡ ወይን፡ ወኢትኩን፡ ተሣያጤ፡ ሥጋ፡ ሐኖት። ወኵሉ፡ ሰታዪ፡ ወዘማዊ፡ ይነድድ፡ ወይለብስ፡ ስጡጠ፡ አጽርቅተ፡ ወኵሉ፡ ነዋሚ። ስማዕ፡ ወልድየ፡ ነገረ፡ አቡከ፡ ዘወለደከ፡ ወኢታስተአክያ፡ ለእምከ፡ ለእመ፡ ረስዓት። ሠናየ፡ ያልህቅ፡ አብ፡ ጻድቅ፡ ወበወልድ፡ ጠቢብ፡ ትትፌሣሕ፡ ነፍሱ። ወይትፌሥሑ፡ ብከ፡ አቡከ፡ ወእምከ፡ ወትትኃሠይ፡ እንተ፡ ወለደተከ። ሀበኒ፡ ወልድየ፡ ልበከ፡ ወአዕይንቲከኒ፡ ፍናወ፡ ዚአየ፡ ይዕቀባ። ፅዕድ፡ ስቊርት፡ ዘማዊት፡ ወዓዘቅት፡ ዐባብ፡ ነኪርት። ዘሖረ፡ ኀቤሃ፡ ፍጡነ፡ ይትኃጐል፡ ወኵሉ፡ ጸዋግ፡ የኃልቅ። ወልድየ፡ ለመኑ፡ ወይሌ፡ ወለመኑ፡ ሀከክ፡ ወለመኑ፡ ባእስ፡ ወለመኑ፡ ጋእዝ፡ ወለመኑ፡ ኵነኔ፡ ወለመኑ፡ ቅጥቃጤ፡ በከንቱ፡ ወለመኑ፡ ስጉዳት፡ አዕይንቲሁ። አኮኑ፡ ለእለ፡ ይጐነድዩ፡ ውስተ፡ ስታየ፡ ወይን፡ ወአኮኑ፡ ለእለ፡ ይተልዉ፡ አሠረ፡ ወይን። ወእደ፡ ይከውን፡ ሰንቢል፡ ኢትስክሩ፡ ወይነ፡ አላ፡ ተናገሩ፡ ምስለ፡ ሰብእ፡ ጻድቃን፡ ወተናገሩ፡ በነሶሳው። እመ፡ ውስተ፡ ፍያላት፡ ወጽዋዓት፡ ወሀብከ፡ ዓይነከ፡ ተሐውር፡ ድኅረ፡ ዕራቀከ፡ ከመ፡ ናሕስ። ወደኃሪተከ፡ ከመ፡ ንስከተ፡ አርዌ፡ ምድር፡ ትሰፍሕ፡ ወከመ፡ ዘእምቃግሥት፡ ይስሕቦ፡ ኅምዙ። ወአዕይንቲከ፡ ይኔጽራ፡ ነኪራተ፡ ወውእተ፡ ጊዜ፡ ይነብብ፡ አፉከ፡ ጠዋየ። ወትሰክብ፡ ከመ፡ ዘውስተ፡ ልበ፡ ናሕር፡ ወከመ፡ ዘየኃድፍ፡ ውስተ፡ ብዙኅ፡ ሞገድ። ወትብል፡ ዘበጡኒ፡ ወኢሐመምኩ፡ ወዓዲ፡ ትብል፡ ተሣለቁ፡ ላዕሌየ፡ ወአንሰ፡ ኢያእመርኩ፡ ማእዜ፡ ነግህ፡ ይከውን፡ ከመ፡ እምጻእ፡ ወእኅሥሥ፡ ምስለ፡ እለ፡ አሐውር።

Chapter 24 ወልድየ፡ ኢትትቀሐው፡ ምስለ፡ ሰብእ፡ እኩያን፡ ወኢትፍቱ፡ ሀልዎ፡ ምስሌሆሙ። እስመ፡ ሐሰተ፡ ይትሜሀር፡ ልቦሙ፡ ወሕመሜ፡ ይትናገር፡ አፉሆሙ። ምስለ፡ ጥበብ፡ ይትሐነጽ፡ ቤት፡ ወምስለ፡ አእምሮ፡ ይትነሣእ። ወምስለ፡ ጠይቆ፡ ይመልእ፡ መዛግብተ፡ ኵሉ፡ ክብር፡ ወብዕል፡ ሠናይ። ይኄይስ፡ ጠቢብ፡ እምጽኑዕ፡ ወብእሲ፡ ዘቦ፡ አእምሮ፡ እምወፍር፡ ዓቢይ። በሕዳፌ፡ ይከውን፡ ጸብእ፡ ወረድኤትሰ፡ ዘምስለ፡ ልብ፡ መካሪት። ጥበብ፡ ወአእምሮ፡ ሠናይ፡ ውስተ፡ አንቀጸ፡ ጠበብት፡ ይትረከብ፡ ወጠበብት፡ ኢይትገኀሡ፡ እምቃለ፡ እግዚአብሔር፡ አላ፡ ይሄልዉ፡ በማኅበር። ለዐብዳን፡ ይዳደቆሙ፡ ሞት። ይመውት፡ ዓብድ፡ በኃጣውእ። ርኵሱ፡ ለብእሲ፡ ቀታሊ፡ ያጠልቆ፡ በዕለት፡ እኪት። ወበዕለተ፡ ምንዳቤ፡ እስመ፡ የኃልቅ፡ አድኅን፡ እለ፡ ይሰሐቡ፡ ውስተ፡ ሞት፡ ወተሣይጦ፡ ዘይትቀተል፡ ኢትምሃክ። ወእመሰ፡ ትቤ፡ ኢየአምሮ፡ ለዝ፡ አእምር፡ ከመ፡ እግዚአብሔር፡ የአምር፡ ልበ፡ ኵሉ፡ ወዘገብረ፡ እስታንፋሰ፡ ለኵሉ፡ ውእቱ፡ የአምር፡ ኵሎ፡ ወይፈድዮ፡ ለኵሉ፡ በከመ፡ ምግባሩ። ብላዕ፡ መዓረ፡ ወልድየ፡ እስመ፡ ሠናይ፡ ዐቃውዕ፡ ከመ፡ ያምዓርዕሮ፡ ለጒርዔከ። ከማሁ፡ ተመሀር፡ ጥበበ፡ ወአእምሮ፡ ለእመ፡ ረከብከ፡ ወይነ፡ ሠናየ፡ ይከውን፡ ሞትከ፡ ወተስፋከ፡ ኢየኀድገከ። ወኢታብእ፡ ረሲዓነ፡ ውስተ፡ መካነ፡ ጻድቃን፡ ወኢትስማሐት፡ በጽጋበ፡ ከርሥከ። ስብዐ፡ ይወድቅ፡ ጻድቅ፡ ወስብዐ፡ ይትነሣእ፡ ወረሲዓንሰ፡ ይደውዩ፡ በእኩይ። ለእመ፡ ወድቀ፡ ጸላኢከ፡ ኢትትፈሣሕ፡ ቦቱ፡ ወበተዓቅፎቱ፡ ኢትትዓበይ። እስመ፡ ይሬኢ፡ እግዚአብሔር፡ ወኢይኤድሞ፡ ወይመይጥ፡ መዓቶ፡ እምኔሁ። ኢትትፈሣሕ፡ በገበርተ፡ እክይ፡ ወኢትቅናእ፡ ላዕለ፡ እኩያን። እስመ፡ ኢይከውን፡ ዘመን፡ ለእኩያን፡ ወብርሃነ፡ ረሲዓን፡ ይጠፍእ። ወልድየ፡ ፍርሆ፡ ለእግዚአብሔር፡ ወለንጉሥኒ፡ ወኢበአሐዱ፡ እምኔሆሙ፡ ኢትትዓበይ። እስመ፡ እሙንቱ፡ ግብተ፡ ይትቤቀልዎሙ፡ ለረሲዓን፡ ወኵነኔ፡ ክልኤሆሙ፡ መኑ፡ የአምር። ቃለ፡ ዘየዓቅብ፡ ወልድ፡ ርኁቅ፡ ውእቱ፡ እምተኀጒሎ፡ ወዘሰ፡ ይትዌከፎ፡ ሎቱኒ፡ ይትዌከፎ። ምንትኒ፡ ሐሰት፡ እምልሳን፡ ንጉሥ፡ ኢይትበሀል፡ ወአልቦ፡ ኀሰት፡ እምልሳኑ፡ ዘይወፅእ። ወጥባሕተ፡ ቃለ፡ ንጉሥ፡ ወአኮ፡ እንተ፡ አባል፡ ለዘተውህበት፡ ትቀጥቅጦ። ወእመሰ፡ ተስሕለት፡ ሰይፈ፡ መዓቱ፡ ምስለ፡ ሥረዊሁ፡ ሰብአ፡ ታኀልቅ፡ ወአፅምተ፡ ሰብእ፡ ታኀቂ፡ ወታውዒ፡ ከመ፡ ነበልባል፡ እስመ፡ አመ፡ ኢይትበላዕ፡ እምእጒለ፡ አንስርት። ወልድየ፡ ዘዚአየ፡ ነገረ፡ ፍራህ፡ ወተወከፎ፡ ወነስሕ፡ ዘንተ፡ እቤ፡ ለእለ፡ አምኑ፡ በእግዚአብሔር፡ ወፈጸምኩ። እስመ፡ አነ፡ ዐብድ፡ እምኵሉ፡ ወጥበበ፡ ሰብእኒ፡ ኢሀሎ፡ ኀቤየ። ወእግዚአብሔር፡ ወሀበኒ፡ ጥበበ፡ ወአእምሮ፡ ቅዱሳን፡ አእመርኩ።

Chapter 25 መኑ፡ ዘዐርገ፡ ውስተ፡ ሰማይ፡ ወወረደ፡ ወመኑ፡ አስተጋብአ፡ ነፋሳተ፡ ውስተ፡ ኅፅኑ፡ ወመኑ፡ ዓቈረ፡ ማያተ፡ በልብሱ። ወመኑ፡ አኀዘ፡ ኵሎ፡ አጽናፈ፡ ምድር፡ መኑ፡ ስሙ፡ ወመኑ፡ ስመ፡ አቡሁ፡ ከመ፡ ታእምሩ፡ ኵሎ። ነገረ፡ እግዚአብሔር፡ ርሱን፡ ወይትቃወም፡ ሎሙ፡ ለእለ፡ ይፈርህዎ። ወኢትወስክ፡ ውስተ፡ ነገሩ፡ ከመ፡ ኢይዝልፍከ፡ ወሐሳዌ፡ ኢትኩን። ክልኤተ፡ ነገረ፡ እስእል፡ እምኀቤከ፡ እግዚእየ፡ ወኢትክልአኒ፡ ጸጋከ፡ ዘእንበለ፡ እሙት። ከንቶ፡ ነገረ፡ ወሐሰተ፡ አርኅቅ፡ እምኔየ፡ ብዕለ፡ ወንዴተ፡ ኢተሀበኒ፡ አላ፡ ሥራዕ፡ ሊተ፡ ዘይትፈቀድ፡ ወዘየአክለኒ። ከመ፡ አእኪልየ፡ ሐሳዌ፡ ኢይኩን፡ ወኢይበል፡ መኑ፡ እግዚአብሔር፡ ወእመ፡ አኮ፡ ነዲይየ፡ ኢይስርቅ፡ ወኢይምሐል፡ በስመ፡ እግዚአብሔር፡ በሐሰት። ወኢታግብእ፡ ገብረ፡ ውስተ፡ እደ፡ አግዚኡ፡ ከመ፡ እመቦ፡ ዘረገመከ፡ ኢትማስን። ወልድ፡ እኩይ፡ ይረግም፡ አባሁ፡ ወእሞሂ፡ ይባርክ። ወልድ፡ እኩይ፡ ጽድቀ፡ ርእሱ፡ ይፈትሕ፡ ወፀአቶሂ፡ ኢይጤይቅ። ለወልድ፡ እኩይ፡ አዕይንተ፡ ዕበይ፡ ቦቱ፡ ወቀራንብቲዑኒ፡ ያሌዕል። ወልድ፡ እኩይ፡ ስነነ፡ መጥባሕት፡ ቦቱ፡ ወጥረሲሁ፡ መከርክር፡ ከመ፡ ያኅልቅ፡ ነዳያነ፡ እምድር፡ ወምስኪናኒሆሙ፡ እምሰብእ። ዘንተ፡ አየድዓክሙ፡ ለጠቢባን፡ ከመ፡ ታእምሩ፡ ኀፊረ፡ ገጽ፡ ለፍትሕ፡ አኮ፡ ሠናይ። ዘይብሎ፡ ለረሲዕ፡ ጻድቅ፡ ውእቱ፡ ርጉመ፡ ይከውን፡ በሕዝብ፡ ወጽሉአ፡ በአሕዛብ። ወእለሰ፡ ይዘልፉ፡ በጽድቅ፡ ያሤንዩ፡ አስተርእዮ፡ ወላዕሌሆሙ፡ ትመጽእ፡ በረከት፡ ሠናይት። ከናፍር፡ ያወሥኣ፡ እለ፡ ያፈቅራ፡ ነገረ፡ ጥበብ። አስተዳሉ፡ ለመንገድከ፡ ምግባሪከ፡ ወተደለው፡ ውስተወፍር፡ ወትሉ፡ ድኅሬየ፡ ወታነሥእ፡ ቤተከ። ወኢትኩን፡ ስምዐ፡ በሐሰት፡ ላዕለ፡ ሰብአ፡ ብሔርከ፡ ወኢትጌጊ፡ በከናፍሪከ። ወኢትበል፡ በከመ፡ ረሰየኒ፡ እሰ፡ ሬስ፡ ወእፈድዮ፡ በከመ፡ ገፍዐኒ። ውስተ፡ ገራህተ፡ ብእሲ፡ ዐብድ፡ ኀለፍኩ፡ ወውስተ፡ ዐፀደ፡ ወይነ፡ ብእሲ፡ ነዳየ፡ አእምሮ፡ ሖርኩ። ናሁ፡ በቈለ፡ ላዕሌሁ፡ ሦከ፡ ወየዐብር፡ ሣዕሩ፡ ፍጹመ፡ ወይከውን፡ በድወ፡ ወፀቈነ፡ እበኒሁ፡ ይንኅል። ድኅረ፡ አነ፡ ነሳሕኩ፡ ወነጸርኩ፡ እኅረይ፡ ተግሣፀ። ሕቀ፡ ድቃስ፡ ወሕቀ፡ ንዋም፡ ወሕቀ፡ አስተጋብኦ፡ እድዲበ፡ እንግድዓ። ወእመ፡ ዘንተ፡ ትገብር፡ ትመጽእ፡ እንዘ፡ ትትቄደም፡ ከመ፡ እኩይ፡ ሐዋርያ፡ ንዴት፡ ወተጽናስ፡ ከመ፡ ኄር፡ ረዋጺ።

Chapter 26 ለዓለቅት፡ ሠላስ፡ አዋልድ፡ ላቲ፡ ተፋቅሮ፡ እለ፡ ይትፋቀራ፡ ወሠለስቲሆን፡ እለ፡ ኢይጸግባ፡ ወራብዕቶንሰ፡ ስእንት፡ ብሂለ፡ ኮንየ። ሲኦል፡ ወፍቅረ፡ ብእሲት፡ ወገሃነም፡ ምድር፡ እንተ፡ ኢተመልእ፡ ማየ፡ ወማይ፡ ወእሳት፡ ኢይብል፡ ኮንየ። ዓይን፡ ዘይስሕቅ፡ አባሁወዘያስተአኪ፡ ርስዓ፡ እሙ፡ ይመልሕዎ፡ ቋዓት፡ እምግቡ፡ ወይበልዕዎን፡ እጒለ፡ አንስርት፡ ለአዕይንቲሁ። ሠለስቱ፡ እሙንቱ፡ ዘኢይክል፡ አእምሮሙ፡ ወራብዖሙሰ፡ ኢይጤየቅ። አሠረ፡ ነስር፡ ዘይሠርር፡ ወፍኖተ፡ አርዌ፡ ምድር፡ ዲበ፡ ኰኵሕ፡ ወአሠረ፡ ሐመር፡ ዲበ፡ ሞገድ፡ እንዘ፡ ተሐውር፡ ወፍናወ፡ ብእሲ፡ በውርዙቱ። ወከመዝ፡ ውእቱ፡ ፍኖታ፡ ለብእሲት፡ እንተ፡ መሐዝ፡ እንተ፡ ገቢራ፡ ትትሐጸብ፡ ወአልቦ፡ እንከሰ፡ ዘገብረት፡ እኩየ። በእንተ፡ ሠለስቱ፡ ነገር፡ ታድለቀልቅ፡ ምድር፡ ወራብዖሙሰ፡ ኢትክል፡ ፀዊረ። ገብር፡ እመ፡ ነግሠ፡ ወዐብድ፡ ለእመ፡ ጸግበ፡ እክለ። ወአመት፡ እመ፡ አውፅአት፡ እግዝእታ፡ ወጽእልት፡ ብእእሲት፡ እመ፡ አድምዐት፡ ብእሴ፡ ኄረ። ወአርባዕቱ፡ ሕፁፃን፡ ውስተ፡ ምድር፡ ወእሉ፡ እሙንቱ፡ ጠቢባነ፡ ጠበብት። ሰኳዕት፡ እለ፡ አልቦሙ፡ ኃይል፡ ወያስተዳልዉ፡ በማእረር፡ ሲሳዮሙ። ወግሔያት፡ ሕዝብ፡ ዘኢኮኑ፡ ፅኑዓነ፡ እለ፡ ረሰዩ፡ ውስተ፡ ግበበ፡ ኰኵሕ፡ አብያቲሆሙ። ወዘእንበለ፡ መንግሥት፡ ውእቱ፡ አንበጣ፡ ዘየሐውር፡ በአሐዱ፡ ትእዛዝ፡ ኅቡረ። ወላጽቂት፡ ዘበእደዊሁ፡ የሐውር፡ እንዘ፡ ጽቡስ፡ ውእቱ፡ የኀድር፡ ውስተ፡ አብያተ፡ ነገሥት። ሠለስቱ፡ እሙንቱ፡ ዘአዳመ፡ የሐውሩ፡ ወራብዕሰ፡ ዘሠናይ፡ ፍናዊሁ። እጓለ፡ አንበሳ፡ ዘይፀንዕ፡ እምእንስሳ፡ ኢይትመየጥ፡ ወኢደነግፅ፡ እምእንስሳ። ዶርሆ፡ ተባዕት፡ ዘየሐውር፡ ኀበ፡ አንስት፡ እንዘ፡ ያስተናፍስ፡ ከነፊሁ፡ ወበሐኵ፡ እንዘ፡ ይሜብል፡ ላዕለ፡ መርዔት፡ ወንጉሥ፡ እንዘ፡ ይጌሥፅ፡ ሕዝቦ። ለእመ፡ መጠውከ፡ ርእሰከ፡ ለተፈርንሶ፡ ወሰፋሕከ፡ እዴከ፡ ለጋእዝ፡ ተኀሥር። ሕልብ፡ ሐሊበ፡ ወይከውነከ፡ ለስደ፡ ወለእመ፡ አጸርከ፡ አንፈከ፡ ይወጽእ፡ ደም፡ ወለእመ፡ ሰሐብከ፡ ነገረ፡ ይመጽእ፡ ጋእዝ፡ ወኵነኔ። ቃለ፡ ዚአየ፡ ተየድአ፡ በኀበ፡ እግዚአብሔር፡ ንጉሥ፡ ፌማ፡ ውእቱ፡ ዘመሀረቶ፡ እሙ። ኦ፡ ወልድየ፡ ተዐቀብ፡ ምንት፡ ቃለ፡ እግዚአብሔር። ወኵርየ፡ ለከ፡ እብለከ፡ ወልድየ፡ ሚወልደ፡ ከርሥየ፡ ወሚ፡ ወልደ፡ ጸሎተ፡ ዚአየ። ኢተሃባ፡ ለብእሲት፡ ብዕለ፡ ዚአከ፡ ወልበከ፡ ከመ፡ ኢትነስሕ፡ ድኅረ፡ ወኢትግበር፡ ዘኢይደሉ፡ ለንጉሥ፡ ወለእግዚአብሔር። ወኰንን፡ ኵሎ፡ ሰብአ፡ በጽድቅ፡ ወምስለ፡ ምክር፡ ኵሎ፡ ግበር፡ ወምስለ፡ ምክር፡ ወይነ፡ ስተይ። ወባሕቱ፡ መኳንንት፡ መዓትማን፡ ወይነ፡ ኢይሰተዩ፡ ከመ፡ በስታይ፡ ኢይርስፅዋ፡ ለጥበብ፡ ወኢይክሉ፡ አርትዖ፡ ፍትሕ፡ ለድኩማን። ሀብዎሙ፡ ወይነ፡ ለኅዙናን፡ ወይስተዩ፡ ወይነ፡ ትኩዛን፡ ከመ፡ ይርስዕዋ፡ ለኀዘን፡ ወሕማመኒ፡ ኢይዝክሩ፡ እንከ። ክሥት፡ አፉከ፡ በቃለ፡ እግዚአብሔር፡ ወኰንን፡ ኵሎ፡ ሕያዋነ። ክሥት፡ አፉከ፡ ወኰንን፡ በጽድቅ፡ ፍታሕ፡ ለነዳይ፡ ወለሕሙም።