Book of Ezra (Ezra 1)

EnglishGǝʿǝz Created XML record from Ethio authority google spreadsheet added text

Text of the EOTC printed Bible

Chapter 1 አመ፡ ቀዳሚ፡ ዓመተ፡ መንግሥቱ፡ ለቂሮስ፡ ንጉሠ፡ ፋርስ፡ እምዘኀልቀ፡ ቃለ፡ እግዚአብሔር፡ እምአፈ፡ ኤርምያስ፡ አንሥአ፡ እግዚአብሔር፡ መንፈሰ፡ ቂሮስ፡ ንጉሠ፡ ፋርስ፡ ወአዘዘ፡ በቃሉ፡ ለኵሉ፡ መንግሥቱ፡ ወዓዲ፡ ጸሐፈ፡ እንዘ፡ ይብል። ከመዝ፡ ይቤ፡ ቂሮስ፡ ንጉሠ፡ ፋርስ፡ ኵሎ፡ መንግሥተ፡ ምድር፡ ወሀበኒ፡ እግዚአብሔር፡ እግዚአ፡ ሰማይ፡ ወውእቱ፡ አሕለየኒ፡ ዘከመ፡ አሐንፅ፡ ሎቱ፡ ቤተ፡ በኢየሩሳሌም፡ ዘይሁዳ። መኑ፡ እምውስተ፡ ኵሉ፡ አሕዛብ፡ እግዚአብሔር፡ የሃሉ፡ ምስሌሁ፡ ከመ፡ ይዕርግ፡ ኢየሩሳሌም፡ ዘይሁዳ፡ ወይሕንፅ፡ ቤተ፡ እግዚአብሔር፡ አምላከ፡ እስራኤል፡ ወውእቱ፡ እግዚአብሔር፡ ዘውስተ፡ ኢየሩሳሌም። ወኵሎሙ፡ እለ፡ ተርፉ፡ ውስተ፡ ኵሉ፡ በሐውርት፡ እለ፡ ለሊሁ፡ አፍለሰ፡ ህየ፡ ወይትራድእዎ፡ ምስሌሆሙ፡ እምውስተ፡ ሰብአ፡ ብሔር፡ በወርቅ፡ ወበብሩር፡ ወበንዋይ፡ ወበእንስሳ፡ ወባዕደኒ፡ ዘፈቀዱ፡ ለቤተ፡ እግዚአብሔር፡ ዘኢየሩሳሌም። ወተንሥኡ፡ መላእክተ፡ አበወ፡ ይሁዳ፡ ወብንያም፡ ወካህናትኒ፡ ወሌዋውያን፡ ወኵሎሙ፡ እለ፡ ወደየ፡ ሎሙ፡ እግዚአብሔር፡ ውስተ፡ ልቦሙ፡ ከመ፡ ይዕርጉ፡ ወይሕንፁ፡ ቤተ፡ እግዚአብሔር፡ በኢየሩሳሌም። ወኵሎሙ፡ እለ፡ ዓውዶሙ፡ ይርድእዎሙ፡ ምስሌሆሙ፡ በንዋየ፡ ወርቅ፡ ወብሩር፡ ወእንስሳ፡ ወባዕደኒ፡ ዘአስተአደሙ፡ በፈቃዶሙ። ወንጉሥኒ፡ ቂሮስ፡ አውፅአ፡ ንዋየ፡ ቤተ፡ እግዚአብሔር፡ ዘነሥኦ፡ ናቡደከነፆር፡ እም፡ ኢየሩሳሌም፡ ወአብኦ፡ ውስተ፡ ቤተ፡ አምላኩ። ወአውፅአ፡ ቂሮስ፡ ንጉሠ፡ ፋርስ፡ ላዕለ፡ እደ፡ ሚትሪዳጡ፡ ወልደ፡ ገስባሬኑ፡ ወጸሐፈ፡ ወወሀቦ፡ ለሲሳብሳር፡ መልአከ፡ ይሁዳ። ወእሉ፡ ኊልቈ፡ መዋፅሕት፡ ዘወርቅ፡ ሠላሳ፡ ወመዋፅሕት፡ ዘብሩር፡ ዓሠርቱ፡ ምእት፡ ወአፅሕልት፡ ዕሥራ፡ ወተስዓቱ። ወጽዋዓት፡ ዘወርቅ፡ ሠላሳ፡ ወዘብሩር፡ አርባዕቱ፡ ምእት፡ ወዓሠርቱ፡ ወካልአን፡ ዓሠርቱ፡ ምእት። ወኵሉ፡ ንዋይ፡ ዘወርቅኒ፡ ወዘብሩርኒ፡ ኃምሳ፡ ምእት፡ ወአርባዕቱ፡ ምእት፡ ዘ፡ ኵሎ፡ አዕረገ፡ ሲሳብሳር፡ ምስለ፡ እለ፡ ዓርጉፄዋ፡ እምባቢሎን፡ ኢየሩሳሌም።

Chapter 2 ወእሉ፡ እሙንቱ፡ ደቂቀ፡ ብሔር፡ እለ፡ ዓርጉ፡ ኢየሩሳሌም፡ ወገብኡ፡ እምኀበ፡ ተፄወው፡ ወፈለሱ፡ እለ፡ አፍለሶሙ፡ ናቡከደነፆር፡ ንጉሠ፡ ባቢሎን፡ ውስተ፡ ባቢሎን፡ ወተመይጡ፡ ኢየሩሳሌም። ወሰብአ፡ ይሁዳኒ፡ አተዉ፡ ውስተ፡ አህጉሪሆሙ፡ እለ፡ ወፅኡ፡ ምስለ፡ ዘሩባቤል፡ ኢዮስስ፡ ወነሕምያ፡ ወሶራያ፡ ወሮሐልያ፡ ወመርዶክዮስ፡ ወበልሳን፡ ወመሴፋር፡ ወመጉይ፡ ወሬሁም፡ ወበዓና፡ ወኮነ፡ ኊልቆሙ፡ ለሰብአ፡ እስራኤል። ደቂቀ፡ ፋሩአስ፡ ዕሥራ፡ ምእት፡ ወአሐዱ፡ ምእት፡ ወሰብዓ፡ ወክልኤቱ። ወደቂቀ፡ ሰፋትያ፡ ሠለስቱ፡ ምእት፡ ወሰብዓ፡ ወክልኤቱ። ወደቂቀ፡ ኤራ፡ ሰብዓቱ፡ ምእት፡ ወሰብዓ፡ ወኃምስቱ። ወደቂቀ፡ ፈሐትሞአብ፡ እለ፡ እምትውልደ፡ ያሱኤ፡ ወዮአብ፡ ዕሥራ፡ ምእት፡ ወሰመንቱ፡ ምእት፡ ዓሠርቱ፡ ወክልኤቱ። ደቂቀ፡ ኤላም፡ ዓሠርቱ፡ ምእት፡ ወክልኤቱ፡ ምእት፡ ኃምሳ፡ ወአርባዕቱ። ወደቂቀ፡ ዛቱዕ፡ ተስዓቱ፡ ምእት፡ ወአርባዓ፡ ወኃምስቱ። ወደቂቀ፡ ዛኬ፡ ሰብዓቱ፡ ምእት፡ ወስሳ። ደቂቀ፡ ባኑ፡ ስድስቱ፡ ምእት፡ ወአርባዓ፡ ወክልኤቱ። ደቂቀ፡ ባቤ፡ ስድስቱ፡ ምእት፡ ወዕሥራ፡ ወክልኤቱ። ወደቂቀ፡ አዜጌድ፡ ዓሠርቱ፡ ምእት፡ ወክልኤቱ፡ ምእት፡ ዕሥራ፡ ወክልኤቱ። ደቂቀ፡ አዶኒቃም፡ ስድስቱ፡ ምእት፡ ስሳ፡ ወስድስቱ። ወደቂቀ፡ ቤጋዊ፡ ዕሥራ፡ ምእት፡ ወኃምሳ፡ ወስድስቱ። ደቂቀ፡ አዴን፡ አርባዕቱ፡ ምእት፡ ወኃምሳ፡ ወአርባዕቱ። ደቂቀ፡ አጤር፡ ዘሕዝቅያ፡ ተስዓ፡ ወሰመንቱ። ደቂቀ፡ ቤሳይ፡ ሠለስቱ፡ ምእት፡ ወዕሥራ፡ ወሠለስቱ። ደቂቀ፡ ኡራ፡ ምእት፡ ወዓሠርቱ፡ ወክልኤቱ። ደቂቀ፡ ሐሱም፡ ክልኤቱ፡ ምእት፡ ወዕሥራ፡ ወሠለስቱ። ደቂቀ፡ ጋቤር፡ ተስዓ፡ ወኃምስቱ። ደቂቀ፡ ቤተ፡ ልሔም፡ ምእት፡ ዕሥራ፡ ወሠለስቱ። ደቂቀ፡ ናጡፋ፡ ኃምሳ፡ ወስድስቱ። ደቂቀ፡ አናቶት፡ ምእት፡ ወዕሥራ፡ ወሰመንቱ። ደቂቀ፡ አስሙት፡ አርባዓ፡ ወክልኤቱ። ደቂቀ፡ ቀርያታርም፡ ቃፌር፡ ወቢሮት፡ ሰብዓቱ፡ ምእት፡ ወአርባዓ፡ ወሠለስቱ። ወደቂቀ፡ ሐርማ፡ ወጋባእ፡ ስድስቱ፡ ምእት፡ ዕሥራ፡ ወአሐዱ። ወሰብአ፡ መኪማስ፡ ምእት፡ ዕሥራ፡ ወክልኤቱ። ሰብአ፡ ቤቴል፡ ወኤአ፡ ክልኤቱ፡ ምእት፡ ዕሥራ፡ ወሠለስቱ። ወደቂቀ፡ ናቡ፡ ሐምሳ፡ ወክልኤቱ። ደቂቀ፡ መጌባስ፡ ምእት፡ ወሐምሳ፡ ወስድስቱ። ደቂቀ፡ ኤሪም፡ ዓሠርቱ፡ ምእት፡ ወክልኤቱ፡ ምእት፡ ሐምሳ፡ ወአርባዕቱ። ደቂቀ፡ አላም፡ ሠለስቱ፡ ምእት፡ ወዕሥራ። ወደቂቀ፡ ሎጥ፡ ኀዲድ፡ ወሐኖን፡ ወደቂቀ፡ ሐዲድ፡ ወሐኖን፡ ሰብዐቱ፡ ምእት፡ ዕሥራ፡ ወሐምስቱ። ደቂቀ፡ ኢያሪኮ፡ ሠለስቱ፡ ምእት፡ አርባዓ፡ ወሐምስቱ። ደቂቀ፡ ሲአናህ፡ ሠላሳ፡ ምእት፡ ወስድስቱ፡ ምእት፡ ወሠላሳ። ወካህናትኒ፡ ደቂቀ፡ ኢየሐዶ፡ እለ፡ እምቤተ፡ ኢዮስስ፡ ተስዓቱ፡ ምእት፡ ሰብዓ፡ ወሠለስቱ። ወደቂቀ፡ ኤሜር፡ ዓሠርቱ፡ ምእት፡ ሐምሳ፡ ወክልኤቱ። ደቂቀ፡ ፋሲሆር፡ ዓሠርቱ፡ ምእት፡ ወክልኤቱ፡ ምእት፡ አርባዓ፡ ወሰብዓቱ። ወደቂቀ፡ ኤረም፡ ዓሠርቱ፡ ምእት፡ ዓሠርቱ፡ ወሰብዓቱ። ወሌዋውያንሰ፡ ደቂቀ፡ ኢዮስስ፡ ወቀዳምሄል፡ እምደቂቀ፡ ሁድያ፡ ሰብዓ፡ ወአርባዕቱ። ወእለ፡ ይዜምሩ፡ ደቂቀ፡ አሳፍ፡ ምእት፡ ወዕሥራ፡ ወሰመንቱ። ወደቂቀ፡ ሱዓሪም፡ ደቂቀ፡ ሱላም፡ ደቂቀ፡ አጤር፡ ደቂቀ፡ ጤልሞን፡ ደቂቀ፡ ዓቁብ፡ ደቂቀ፡ አጤጣ፡ ደቂቀ፡ ሰበዊይ፡ ኵሎሙ፡ ምእት፡ ወሠላሳ፡ ወተስዓቱ። ሰብአ፡ ናታኒም፡ ደቂቀ፡ ሲካ፡ ደቂቀ፡ አሱፌ፡ ወደቂቀ፡ ጠቢዖት። ደቂቀ፡ ቃዴስ፡ ደቂቀ፡ ስሔል፡ ደቂቀ፡ ፋዶን። ደቂቀ፡ ለቡና፡ ደቂቀ፡ አጋባ፡ ደቂቀ፡ ዓቁብ። ደቂቀ፡ አጋብ፡ ደቂቀ፡ ስላሚ፡ ደቂቀ፡ ሐናን። ደቂቀ፡ ጋዱል፡ ደቂቀ፡ ጋሐር፡ ደቂቀ፡ ራድ። ደቂቀ፡ ራሶን፡ ደቂቀ፡ ኒቆዳ፡ ደቂቀ፡ ጋሴም። ደቂቀ፡ አዝያት፡ ደቂቀ፡ ፋሂስ፡ ደቂቀ፡ ባሲ። ደቂቀ፡ አሲና፡ ደቂቀ፡ ሚናሚን፡ ደቂቀ፡ ናፌሶን። ደቂቀ፡ ብቊበቊ፡ ደቂቀ፡ አቁፋ፡ ደቂቀ፡ ሐሩር። ደቂቀ፡ ባስሎት፡ ደቂቀ፡ ማሁድ፡ ደቂቀ፡ ኦሪስ። ደቂቀ፡ ብርቊስ፡ ደቂቀ፡ የሲሰራ፡ ደቂቀ፡ ቴማ። ደቂቀ፡ ንስያ፡ ደቂቀ፡ አጡፋ። ደቂቀ፡ አግብርቲሁ፡ ለሰሎሞን፡ ደቂቀ፡ ሳጢ፡ ደቂቀ፡ አስፌርታ፡ ደቂቀ፡ ፋዱርሐ። ደቂቀ፡ ኢያሄል፡ ደቂቀ፡ ደርቆን፡ ደቂቀ፡ ጌዴል። ደቂቀ፡ ሴፋትያ፡ ደቂቀ፡ አጤል፡ ደቂቀ፡ ፎኬርት፡ ደቂቀ፡ ሐጺባይም፡ ደቂቀ፡ አሚ። ኵሎሙ፡ እለ፡ ናታናውያን፡ ወደቂቀ፡ አብደሴልማ፡ ሠለስቱ፡ ምእት፡ ወተስዓ፡ ወክልኤቱ። ወእሉ፡ እሙንቱ፡ እለ፡ ዓርጉ፡ እምተልመላ፡ ተላርሳ፡ ወኪሩብ፡ ወሔዳያን፡ ወኔሜር፡ ወአበዩ፡ አይድዖ፡ ቤተ፡ አበዊሆሙ፡ ወዘመዶሙ፡ እንዘ፡ እምእስራኤል፡ እሙንቱ። ደቂቀ፡ ዳላያ፡ ደቂቀ፡ ጦብያ፡ ደቂቀ፡ ኒቆዳ፡ ስድስቱ፡ ምእት፡ ሐምሳ፡ ወክልኤቱ። ወእምነ፡ ትውልደ፡ ካህናት፡ ደቂቀ፡ ላብያ፡ ደቂቀ፡ አቆስ፡ ደቂቀ፡ ቤርዜሊ፡ ዘአውሰበ፡ ብእሲተ፡ እምአዋልደ፡ ቤርዜሊ፡ ገለአዳዊ፡ ወተሰምየ፡ በስሞሙ። ወፈቀዱ፡ ይጽሐፍዎሙ፡ ውስተ፡ ሰብአ፡ ሜቶሔሴም፡ ወኢረከብዎሙ፡ ወሠዐርዎሙ፡ እምክህነቶሙ። ወኣሙ፡ ሐቴርስታ፡ ከመ፡ ኢይብልዑ፡ እምነ፡ ቅዱሰ፡ ቅዱሳን፡ እስከ፡ አመ፡ ይሠየም፡ ሊቀ፡ ካህናት፡ ዘይለብስ፡ ዲሎሶነ፡ ዘይሠረርዖሙ፡ ለፍጹማን። ወኵሉ፡ ማኅበሮሙ፡ አርባዕተ፡ እልፍ፡ ወዕሥራ፡ ምእት፡ ሠለስቱ፡ ምእት፡ ወስሳ፡ እንበለ፡ አግብርቲሆሙ፡ ወአእማቲሆሙ። ወእሙንቱኒ፡ ሰብዓ፡ ምእት፡ ወሠለስቱ፡ ምእት፡ ሠላሳ፡ ወስድስቱ። ወመዘምራን፡ ወመዘምራትሂ፡ ክልኤቱ፡ ምእት። ወአፍራሲሆሙ፡ ሰብዓቱ፡ ምእት፡ ሠላሳ፡ ወስድስቱ፡ ወአብቅሊሆሙ፡ ክልኤቱ፡ ምእት፡ ወአርባዓ፡ ወሐምስቱ። ወአግማሊሆሙ፡ አርባዕቱ፡ ምእት፡ ሠላሳ፡ ወሐምስቱ፡ ወአእዱጊሆሙ፡ ስሳ፡ ምእት፡ ወሰብዐቱ፡ ምእት፡ ወዕሥራ። ወእምነ፡ መላእክተ፡ አበዊሆሙ፡ ሶበ፡ በጽሑ፡ ቤተ፡ እግዚአብሔር፡ ዘኢየሩሳሌም፡ በዕዑ፡ ለቤተ፡ እግዚአብሔር፡ በዘይገብርዎ። ወበአምጣነ፡ ይክሉ፡ አብኡ፡ ለመዝገብ፡ ለፃእፃኣ፡ ግብር፡ ወርቀ፡ ንጡፈ፡ ምናነ፡ ስድስ፡ እልፈ፡ ወዓሠርተ፡ ምእተ፡ ወብሩረ፡ ምናነ፡ ሐምሳ፡ ምእተ፡ ወአልባሰ፡ ካህናት፡ ምእተ። ወነበሩ፡ ካህናት፡ ወሌዋውያን፡ ወሕዝብኒ፡ ወመዘምራንኒ፡ ወዓፀውት፡ ወናታናውያን፡ በበአህጉሪሆሙ፡ ወእስራኤልኒ፡ ውስተ፡ አህጉሪሆሙ።

Chapter 3 ወሶበ፡ በጽሐ፡ ሳብዕ፡ ወርኅ፡ ሀለዉ፡ እስራኤል፡ ውስተ፡ አህጉሪሆሙ፡ ወእምዝ፡ ተጋብኡ፡ ሕዝብ፡ ውስተ፡ ኢየሩሳሌም፡ ኅቡረ፡ ከመ፡ አሐዱ፡ ብእሲ። ወተንሥአ፡ ኢዮስስ፡ ወልደ፡ ኢዮሴዴቅ፡ ወአኃዊሁ፡ ካህናት፡ ወዘሩባቤል፡ ወልደ፡ ሰላትያል፡ ወአኃዊሁ፡ ወሐነጹ፡ ምሥዋዐ፡ አምላከ፡ እስራኤል፡ ከመ፡ ይግበሩ፡ መሥዋዕተ፡ ውስቴቱ፡ በከመ፡ ጽሑፍ፡ ውስተ፡ ኦሪተ፡ ሙሴ፡ ብእሴ፡ እግዚአብሔር። ወሐነጽዋ፡ ለምሥዋዕ፡ በከመ፡ ሥርዓቱ፡ እስመ፡ ፍርሃት፡ ላዕሌሆሙ፡ ኀደረ፡ እምነ፡ አሕዛበ፡ ምድር፡ ወአዕረጉ፡ መሥዋዕተ፡ ውስቴቱ፡ ለእግዚአብሔር፡ ዘነግህኒ፡ ወዘሠርክኒ። ወገበሩ፡ በዓለ፡ መጸለት፡ ዘከመ፡ ጽሑፍ፡ ወመሥዋዕተኒ፡ ዘበበኊልቈ፡ ዕለት፡ በከመ፡ ሥርዓተ፡ ሕዝብ፡ በበመዋዕሊሁ፡ ለለዕለቱ። ወእምድኅረ፡ ዝንቱ፡ መሥዋዕተ፡ ዘልፍ፡ ዘለለ፡ ሠርቀ፡ ወርኅ፡ ወዘለለ፡ በዓላተ፡ እግዚአብሔር፡ ኵሎሙ፡ ቅዱሳን፡ ወዘኵሉ፡ በበፈቃዱ፡ በጽዐ፡ ለእግዚአብሔር። ወእምርእሰ፡ ሳብዕ፡ ወርኅ፡ አኀዙ፡ ያብኡ፡ መሥዋዕተ፡ ለእግዚአብሔር፡ ወቤተ፡ እግዚአብሔርሰ፡ ኢተሣረረት። ወወሀቡ፡ ወርቀ፡ ለፀረብት፡ ወለወቀርት፡ ወመብልዐኒ፡ ወመስቴ፡ ወቅብዐኒ፡ ለሰብአ፡ ጢሮስ፡ ወለሲዶና፡ ከመ፡ ያምጽኡ፡ ሎሙ፡ ዕፀወ፡ ቄድሮስ፡ እምነ፡ ሊባኖስ፡ ኀበ፡ ባሕረ፡ ኢዮጴ፡ ወእምህየ፡ ይትመየጡ፡ በትእዛዘ፡ ቂሮስ፡ ንጉሠ፡ ፋርስ፡ ላዕሌሆሙ። ወበበክልኤቱ፡ ዓመት፡ እምዘ፡ በጽሑ፡ ኢየሩሳሌም፡ ውስተ፡ ቤተ፡ እግዚአብሔር፡ በካልእ፡ ወርኅ፡ አኃዘ፡ ዘሩባቤል፡ ወልደ፡ ሰላትያል፡ ወኢዮስስ፡ ወልደ፡ ኢዮሴዴቅ፡ ወእለኒ፡ ተርፉ፡ አኃዊሆሙ፡ ካህናት፡ ወሌዋውያን፡ ወኵሎሙ፡ እለ፡ አተዉ፡ ኢየሩሳሌም፡ እምኀበ፡ ተፄወዉ፡ ወሤምዎሙ፡ ለሌዋውያን፡ እለ፡ እምዕሥራ፡ ዓም፡ ወላዕሉ፡ ላዕለ፡ ግብረ፡ ቤተ፡ እግዚአብሔር። ወቆመ፡ ኢዮስስ፡ ወደቂቁ፡ ወአኃዊሁኒ፡ ቀዳምያል፡ ወደቂቁ፡ ወደቂቀ፡ ይሁዳኒ፡ ላዕለ፡ ግብር፡ እለ፡ ይገብሩ፡ ቤተ፡ እግዚአብሔር፡ ወደቂቀ፡ ኢንሐዳድ፡ ወደቂቆሙኒ፡ ወአኀዊሆሙኒ፡ ሌዋውያን። ወሣረሩ፡ ከመ፡ ይሕንፁ፡ ቤተ፡ እግዚአብሔር፡ ወካህናትኒ፡ ቆሙ፡ ልቡሳኒሆሙ፡ ምስለ፡ አቅርንት፡ ወሌዋውያንሰ፡ ደቂቀ፡ አሳፍ፡ በጸናጽል፡ ይሴብሕዎ፡ ለእግዚአብሔር፡ ሶበ፡ ይሣረሩ፡ ቤተ፡ እግዚአብሔር፡ በትምንርተ፡ ዳዊት፡ ንጉሠ፡ እስራኤል። ወአውሥኡ፡ ወሰብሕዎ፡ ለእግዚአብሔር፡ ወአእኰትዎ፡ እንዘ፡ ይብሉ፡ እስመ፡ ኄር፡ ውእቱ፡ ወለዓለም፡ ምሕረቱ፡ ላዕለ፡ እስራኤል፡ ወይብሉ፡ ኵሎሙ፡ ሕዝብ፡ በቃል፡ ዓቢይ፡ ወይሴብሕዎ፡ ለእግዚአብሔር፡ ሶበ፡ ይሣርሩ፡ ቤተ፡ እግዚአብሔር። ወብዙኀን፡ እምውስተ፡ ካህናት፡ ወሌዋውያን፡ ወመላእክተ፡ አበዊሆሙ፡ ወሊቃውንትኒ፡ እለ፡ የአምርዎ፡ ለውእቱ፡ ቤት፡ ዘትካት፡ ሶበ፡ ሣረርዎ፡ ወርእይዎ፡ ለውእቱ፡ ቤት፡ በዓይኖሙ፡ ይበክዩ፡ በዓቢይ፡ ቃል፡ ወብዙኀን፡ በይባቤ፡ ይጸርሑ፡ እንዘ፡ ያነብቡ። ወአልቦ፡ እምውስተ፡ ሕዝብ፡ እለ፡ የአምሩ፡ ቃለ፡ ይባቤ፡ ወፍሥሓ፡ እምነ፡ ጽራሐ፡ ብካዮሙ፡ እስመ፡ ይጸርሑ፡ ሕዝብ፡ በዓቢይ፡ ቃል፡ ወይሰማዕ፡ እምርኁቅ።

Chapter 4 ወሰምዑ፡ ፀረ፡ ይሁዳ፡ ወብንያም፡ ከመ፡ ደቂቆሙ፡ ለፈላስያን፡ የሐንጹ፡ ቤተ፡ እግዚአብሔር፡ አምላከ፡ እስራኤል። ወሖሩ፡ ኀበ፡ ዘሩባቤል፡ ወኀበ፡ መላእክተ፡ አበዊሆሙ፡ ወይቤልዎሙ፡ ንሕነኒ፡ ነሐንጽ፡ ምስሌክሙ፡ እስመ፡ ንሕነ፡ ከመክሙ፡ ነኃሥሥ፡ ለአምላክክሙ፡ ወሎቱ፡ ንሰምዕ፡ ንሕነኒ፡ እምአመ፡ አሴፋሐዶን፡ ንጉሠ፡ ፋርስ፡ ዘአምጽአነ፡ ዝየ። ወይቤሎዎሙ፡ ዘሩባቤል፡ ወኢዮስስ፡ ወእለ፡ ትርፉ፡ መላእክተ፡ አበዊሆሙ፡ ለእስራኤል፡ ኢኮነ፡ ለነ፡ ወለክሙ፡ ዘነሐንጽ፡ ቤተ፡ አምላክነ፡ ንሕነሰ፡ ነሐንጽ፡ ለሊነ፡ ለርእስነ፡ ለእግዚአብሔር፡ አምላክነ፡ በከመ፡ አዘዘነ፡ ቂሮስ፡ ንጉሠ፡ ፋርስ። ወአሕዛብ፡ ብሔርሰ፡ አኃዙ፡ ይክልእዎሙ፡ ለሕዝበ፡ ይሁዳ፡ ወአዕርዕዎሙ፡ ሕንፃ። ወየዓስቡ፡ ላዕሌሆሙ፡ ከመ፡ ያኅድግዎሙ፡ ምክሮሙ፡ በኵሉ፡ መዋዕለ፡ ቂሮስ፡ ንጉሠ፡ ፍርስ፡ እስከ፡ መንግሥተ፡ ዳርዮስ፡ ንጉሠ፡ ፋርስ። ወበመንግሥተ፡ አህሳዊሮስ፡ አመ፡ ቀዳሚ፡ መንግሥቱ፡ ጸሐፉ፡ መጽሐፈ፡ ላዕለ፡ እለ፡ ይነብሩ፡ ውስተ፡ ይሁዳ፡ ወውስተ፡ ኢየሩሳሌም። ወበመዋዕለ፡ አርተሰስታ፡ ጸሐፉ፡ በሴሌም፡ ሚትሪዳጡ፡ ወጣበሄል፡ ወእለ፡ ተርፉ፡ አግብርቲሆሙ፡ መጽሐፈ፡ ለአርተሰስታ፡ ንጉሠ፡ ፋርስ፡ ዘትርጓሜሁ፡ አረማዊ። ሬሁም፡ ብኤልጥኤም፡ ወሴሜሳይ፡ ጸሐፊ፡ ጸሐፉ፡ አሐተ፡ መጥሐፈ፡ ውዴት፡ ላዕለ፡ ኢየሩሳሌም፡ ወፈነዉ፡ ኀበ፡ አርተሰስታ፡ ንጉሥ። እንዘ፡ ይብሉ፡ ንሕነሰ፡ ከመዝ፡ ንብል፡ ሬሁም፡ ብኤልጥኤም፡ ወሴሜሳይ፡ ጸሐፊ፡ ወእለ፡ ተርፉ፡ አግብርተ፡ አጋእዝቲነ፡ ዲናውያን፡ ወአፈርስካውያን፡ ወጠርፈላውያን፡ ወአፈራሳውያን፡ አርክውያን፡ ባቢሎናውያን፡ ሱሰናኪውያን፡ ወዓለሜውያን፡ ወደሑያን፡ እሙንቱ። ወእለ፡ ተርፉ፡ አሕዛብ፡ እለ፡ አፍለሰ፡ አሴናፍር፡ ዓቢይ፡ ወክቡር፡ ወአንበሮሙ፡ ውስተ፡ አህጉረ፡ ሰማሮን፡ ወእለኒ፡ ማዕዶተ፡ ፈለግ። ወከመዝ፡ ትብል፡ መጽሐፍ፡ እንተ፡ ጸሐፉ፡ ሎቱ፡ ለአርተሰስታ፡ ንጉሥ፡ ንሕነ፡ አግብርቲከ፡ ሰብአ፡ ማዕዶተ፡ ፈለግ። ከመ፡ ታእምር፡ እግዚኦሙ፡ ንጉሥ፡ አይሁድ፡ እለ፡ ዓርጉ፡ እምኔከ፡ መንገሌነ፡ ወመጽኡ፡ ኢየሩሳሌም፡ ሀገር፡ ዓላዊት፡ ወእኪት፡ ከመ፡ ይሕንጽዋ፡ ወያሕይዉ፡ አረፋቲሃ፡ ወያንሥኡ፡ ወሠረታቲሃ። ወይእዜኒ፡ ከመ፡ ታእምር፡ እግዚኦሙ፡ ንጉሥ፡ እምከመ፡ ተሓንፀት፡ ይእቲ፡ ሀገር፡ ወቆመ፡ አረፋቲሃ፡ አልብከ፡ ጸባሕት፡ ወኢያገብኡ፡ ለከ፡ እስመ፡ ዓላዊተ፡ መንግሥት፡ ይዕቲ። ወለነሰ፡ ኢይከውን፡ ንርአይ፡ እንዘ፡ ያስተሐቅሩ፡ ንጉሠ፡ ወበበይነ፡ ዝንቱ፡ ለአከነ፡ ታእምር፡ እግዚኦሙ፡ ንጉሥ። ወከመ፡ ትኅሥሥ፡ ውስተ፡ መጻሕፍተ፡ ኖብያት፡ ዘአበዊከ፡ ወትረክብ፡ ወተአምር፡ እንከ፡ ከመ፡ ይእቲ፡ ሀገር፡ ማዕሌት፡ ይእቲ፡ ወታሐስም፡ ላዕለ፡ ነገሥት፡ ወላዕለ፡ በሐውርት፡ ወምኅጥአ፡ አግብርት፡ ማእከላ፡ እምትካት፡ ወእምፍጥረት፡ ወበበይነ፡ ዝንቱ፡ ትስማን፡ ይእቲ፡ ሀገር። ሐዋርያ፡ ዘፈነውክሙ፡ በጽሐ፡ ኀቤየ። ወአዘዝኩ፡ ይኅሥሡ፡ ውስተ፡ መጽሐፈ፡ ኖብያት፡ ወረከብነ፡ ከመ፡ ይእቲ፡ ወፀር፡ ይእቲ፡ ወተኃጥእ፡ ዘይበውኣ። ወነገሥትኒ፡ ፅኑዓን፡ ነገሥት፡ ቢየሩሳሌም፡ ወኰነኑ፡ ኵሎ፡ ብሔረ፡ ዘማዕዶተ፡ ፈለግ፡ ወይሁብዎሙ፡ ጸባሕተ፡ ወጋዳ። ወይእዜኒ፡ ከልእዎሙ፡ ለእሙንቱ፡ እደው፡ ኢይሕንጽዋ፡ ለይእቲ፡ ሀገር፡ እምይእዜሰ፡ ዕቀብዎሙ። ወዑቁ፡ ኢታስሕትዎሙ፡ በበይነ፡ ዝንቱ፡ ግብር፡ ከመ፡ ኢይብዛኅ፡ ሙስናሃ፡ ወኢያሕስሙ፡ ላዕለ፡ ነገሥት። ወሶበ፡ በጽሐ፡ ሐዋርያ፡ አርተሰስታ፡ አንበበ፡ በቅድመ፡ ሬሁም፡ ብኤልጥኤም፡ ወሴሜሳይ፡ ጸሐፊ፡ ወአግብርተ፡ አጋእዝቲሆሙ፡ እለ፡ ምስሌሆሙ፡ ወሖሩ፡ ፍጡነ፡ ውስተ፡ ኢየሩሳሌም፡ ወውስተ፡ ይሁዳ፡ በአፍራስ፡ ወአኅደግዎሙ፡ በኃይል። ወእምዝ፡ ተፀርዐ፡ ሕንጻ፡ ቤተ፡ እግዚአብሔር፡ ዘኢየሩዳሌም፡ ወነበሩ፡ ጽሩዓነ፡ እስመ፡ አመ፡ ክልኤቱ፡ ዓመተ፡ መንግሥቱ፡ ለዳርዮስ፡ ንጉሠ፡ ፋርስ።

Chapter 5 ወተነበዩ፡ ሐጌ፡ ወዘካርያስ፡ ወልደ፡ ሐዶ፡ ነቢይ፡ ላዕለ፡ አይሁድ፡ እለ፡ ውስተ፡ ይሁዳ፡ ወኢሩሳሌም፡ በስመ፡ አምላከ፡ እስራኤል፡ ተነበዩ፡ ሎሙ። ወውእተ፡ አሚረ፡ ተንሥኡ፡ ዘሩባቤል፡ ወልደ፡ ሰላትያል፡ ወኢዮስስ፡ ወልደ፡ ኢዮሴዴቅ፡ ወአኀዙ፡ ይሕንጽ፡ ቤተ፡ እግዚአብሔር፡ በኢየሩሳሌም፡ ወሀለዉ፡ ምስሌሆሙ፡ ነቢያተ፡ እስራኤል፡ ዘይረድእዎሙ። ወእምዝ፡ መጽኡ፡ ኀቤሆሙ፡ ውእተ፡ አሚረ፡ ታንትናይ፡ መልአከ፡ ማዕዶተ፡ ፈለግ፡ ወአስተርቡዝና፡ ወአግብርተ፡ አጋእዝቲሆሙ፡ ወከመዝ፡ ይቤልዎሙ፡ መኑ፡ አዘዘክሙ፡ ትሕንጽዎ፡ ለዝንቱ፡ ቤት፡ ወመኑ፡ ወሀበክሙ፡ በዘትገብርዎ። ወተስእልዎሙ፡ አስማቲሆሙ፡ ወይቤልዎሙ፡ መኑ፡ አንትሙ፡ እደው፡ እለ፡ ተሐንጽዋ፡ ለዛቲ፡ ሀገር። እስመ፡ እግዚአብሔር፡ ተሣሃሎሙ፡ ወነጸሮሙ፡ ለፄዋ፡ ይሁዳ፡ ወኢከልእዎሙ፡ እስከ፡ ገብአት፡ መልእክት፡ እምኀበ፡ ዳርዮስ፡ ወኢያዕርእዎሙ፡ ወእምዝ፡ ለአኩ፡ ሐዋርያ፡ በበይነ፡ ውእቱ፡ ነገር። ወይጠይቁ፡ በመጽሐፍ፡ እንተ፡ ፈነዉ፡ ታንትናይ፡ መልአክ፡ ማዕዶተ፡ ፈለግ፡ ወአስተርቡዝና፡ ወአግብርተ፡ አጋአዝቲሆሙ፡ አፈርስካውያን፡ እለ፡ ማዕዶተ፡ ፈለግ፡ ወፈነዉ፡ መጽሐፈ፡ ለዳርዮስ፡ ንጉሥ። ወዝንቱ፡ ቃል፡ ጽሑፍ፡ ውእቱ፡ በመጽሐፍ፡ ዘይብል፡ ሰላም፡ ለዳርዮስ፡ ንጉሥ። ከመ፡ ታእምር፡ ኵሎ፡ እግዚኦሙ፡ ንጉሥ፡ ሖርነ፡ ብሔረ፡ ይሁዳ፡ ኀበ፡ ቤተ፡ አምላክ፡ ዓቢይ፡ ወረከብነ፡ እንዘ፡ የሐንጹ፡ በእብን፡ ሠናይ፡ ወበመሠረት፡ ዘዕዕ፡ ነኪር፡ ዘይወድዩ፡ ውስተ፡ አረፍቱ፡ ወይፈጥን፡ ውእቱ፡ ግብር፡ ውስተ፡ እደዊሆሙ። ወተስእልናሆሙ፡ ለሊቃውንቲሆሙ፡ ወንቤሎሙ፡ መነአዘዘክሙ፡ ትሕንፁ፡ ወመኑ፡ ወሀብክሙ፡ በዘትገብሩ። ወአስማቲሆሙ፡ ሐተተናሆሙ፡ ከመ፡ ንጽሐፍ፡ ለከ፡ ከመ፡ ታእምር፡ አስማቲሆሙ፡ ለእሙንቱ፡ እደው፡ ወዘመላእክቲሆሙ። ወዘንተ፡ ቃለ፡ አውሥኡነ፡ እንዘ፡ ይብሉ፡ ንሕነ፡ አግብርተ፡ እግዚአብሔር፡ አምላከ፡ ሰማይ፡ ወምድር፡ ወነሐንፅ፡ ዘንተ፡ ቤተ፡ ዘትካት፡ ተሐንጸ፡ እምቅድመ፡ ብዙኅ፡ ዓመት፡ ወሐነፀ፡ ንጉሠ፡ እስራኤል፡ ዓቢይ፡ ወነደቀ፡ ሎሙ። ወሶበ፡ አምፅዕዎ፡ አበዊነ፡ ለአምላክ፡ ሰማይ፡ አግብኦሙ፡ ውስተ፡ እዴሁ፡ ለናቡከደነፆር፡ ንጉሠ፡ ባቢሎን፡ ወቤተኒ፡ ነሠተ፡ ወሕዝበኒ፡ አፍለሰ፡ ውስተ፡ ባቢሎን። ወአመ፡ ቀዳሚት፡ ዓመተ፡ መንግሥቱ፡ ለቂሮስ፡ ንጉሥ፡ አዘዘ፡ ይሕንፅዎ፡ ለውእቱ፡ ቤተ፡ እግዚአብሔር። ወንዋየኒ፡ ዘቤ፡ እግዚአብሔር፡ ዘወርቅ፡ ወዘብሩር፡ ዘአውጽአ፡ ናቡደከነፆር፡ እምነ፡ ውእቱ፡ ቤት፡ ዘኢየሩሳሌም፡ ወአንበሮ፡ ውስተ፡ ጽርሐ፡ መንግሥቱ፡ ነሥአ፡ ቂሮስ፡ እምጽርሐ፡ መንግሥቱ፡ ወወሀቦ፡ ለሲስባሳር፡ ዓቃቤ፡ መዝገቡ፡ ወመጋቢሁ። ወይቤሎ፡ ንሣእ፡ ዘንተ፡ ንዋየ፡ ወሑር፡ ወአንበሮ፡ ውስተ፡ ቤት፡ ዘኢየሩሳሌም፡ ውስተ፡ መካኑ። ወእምዝ፡ መድአ፡ ሲስባሳር፡ ወለሊሁ፡ ሣረረ፡ ቤተ፡ እግዚአብሔር፡ ዘኢየሩሳሌም፡ ወእምይእቲ፡ አሚር፡ እስከ፡ ይእዜ፡ የሐንፅዎ፡ ወኢተፈጸመ። ወይእዜኒ፡ እመ፡ ፈቀደ፡ ንጉሥ፡ ይኅሥሥ፡ ውስተ፡ ቤተ፡ መዛግብት፡ በንጉሠ፡ ባቢሎን፡ ከመ፡ ታእምር፡ ከመ፡ ቂሮስ፡ ንጉሥ፡ አዘዘ፡ ይሕንፅዎ፡ ለዝንቱ፡ ቤተ፡ እግዚአብሔር፡ ዘኢየሩሳሌም፡ ወአእሚረከ፡ እግዚኦሙ፡ ንጉሥ፡ ዘከመ፡ ትፈቅድ፡ ለአከ፡ ለነ።

Chapter 6 ወእምዝ፡ አዘዘ፡ ዳርዮስ፡ ንጉሥ፡ ይክሥቱ፡ መጻሕፍተ፡ ኖብያቲሆሙ፡ ዘመዛግብት፡ ዘውስተ፡ ባቢሎን። ወረከቡ፡ ውስተ፡ ሀገረ፡ ባሪ፡ አሐተ፡ መጽሐፍ፡ ወጽሑፍ፡ ውስቴታ፡ ተዝካር፡ ወይብል። አመ፡ ቀዳሚት፡ ዓመተ፡ መንግሥቱ፡ አዘዘ፡ ቂሮስ፡ ንጉሥ፡ በእንተ፡ ቤተ፡ መቅደስ፡ ዘእግዚአብሔር፡ ዘበኢየሩሳሌም፡ ከመ፡ ይትሐነፅ፡ ቤት፡ ወበእንተ፡ መካነ፡ ምሥዋዕ፡ ኀበ፡ ይሠውዑ፡ ወአዘዘ፡ አምጣነ፡ ቆሙ፡ ስሳ፡ በእመት፡ ወራኅቡ፡ ስሳ፡ በእመት። ወይእግልዎ፡ እንተ፡ ሠለስቱ፡ አግለ፡ እብን፡ ወእንተ፡ አሐቲ፡ አግለ፡ ዕፅ፡ ወይሁብዎሙ፡ እምቤተ፡ ንጉሥ፡ ለፃዕፃኦሙ። ወንዋየ፡ ቤተ፡ እግዚአብሔር፡ ዘወርቅ፡ ወዘብሩር፡ ዘአውፅአ፡ ናቡከደነፆር፡ እምውእቱ፡ ቤት፡ ዘኢየሩሳሌም፡ ወወሰዶ፡ ውስተ፡ ባቢሎን፡ ከመ፡ የሀብዎሙ፡ ወአንበሮሙ፡ ውስተ፡ ቤተ፡ መቅደስ፡ ዘኢየሩሳሌም፡ ውስተ፡ መካን፡ ኀበ፡ ነበሩ፡ በቤተ፡ እግዚአብሔር። ወአዘዞሙ፡ ለመሳፍንተ፡ ማዕዶተ፡ ፈለግ፡ ታንትናይ፡ ወአስተርቡዝና፡ ወለአግብርተ፡ እጋእዝቲሆሙ፡ አፈርስካውያን፡ እለ፡ ማዕዶተ፡ ፈለግ፡ እንዘ፡ ይብል። ኅድጉ፡ ይትገበር፡ ቤተ፡ እግዚአብሔር፡ ወሊቃናተ፡ ይሁዳ፡ ይግበሩ፡ ግብረ፡ ዘቤተ፡ እግዚአብሔር፡ ወይሕንፅዎ፡ ውስተ፡ መካኑ። ወአነ፡ አዘዝኩ፡ ዑቁ፡ ምንተኒ፡ ኢትረስይዎሙ፡ ለሊቃናተ፡ ይሁዳ፡ ወኢትክልእዎሙ፡ ሐኒፀ፡ ቤተ፡ እግዚአብሔር፡ እምውስተ፡ ቤተ፡ ንጉሥ፡ እምነ፡ ጸባሕት፡ ዘማዕዶተ፡ ፈለግ፡ ወሀብዎሙ፡ ለእሙንቱ፡ እደው፡ ፃዕፃዓ፡ ወኢታዕርዕዎሙ። ዑቁ፡ ወኢታስትቱ፡ ወእጒለ፡ አልሕምት፡ ወአባግዕ፡ ወአጣሊኒ፡ ለመሥዋዕት፡ ለአምላከ፡ ሰማይ፡ ወሥርናየኒ፡ ወፄወኒ፡ ወወይነኒ፡ ወቅብዐኒ፡ በአምጣነ፡ ዘይቤለክሙ፡ ካህናት፡ እለ፡ በኢየሩሳሌም፡ ሀብዎሙ፡ ኵሎ፡ አሚረ፡ ዘሰአሉክሙ። ከመ፡ ይግበሩ፡ ቊርባነ፡ ወመሥዋዕተ፡ ለአምላከ፡ ሰማይ፡ ወከመ፡ ይጻልዩ፡ በእንተ፡ ሕይወቱ፡ ለንጉሥ፡ ወበእንተ፡ ሕይወተ፡ ውሉዱ። ወአነ፡ አዘዝኩ፡ ኵሎ፡ ሰብአ፡ ዘዓለወ፡ ዘንተ፡ ቃልየ፡ ይንሥኡ፡ ዕፀ፡ እምውስተ፡ ቤቱ፡ ወይሰቅልዎ፡ ቦቱ፡ ወይቅትልዎ፡ ወቤቶኒ፡ ከማሁ፡ ይረስዩ፡ አዘዝኩ። ወውእቱ፡ እግዚአብሔር፡ ዘኀደረ፡ ስሙ፡ ህየ፡ ይገፈትዖሙ፡ ለኵሎሙ፡ ነገሥት፡ ወአሕዛብ፡ እለ፡ የዓልዉ፡ ዘንተ፡ ቃልየ፡ ወእለ፡ ያነሥኡ፡ እደዊሆሙ፡ ከመ፡ ይወልጡ፡ ወያማስኑ፡ ቤተ፡ እግዚአብሔር፡ ዘኢየሩሳሌም፡ ወአነ፡ ዳርዮስ፡ አዘዝኩ፡ ከመዝ፡ ይግበሩ፡ ወያስተሐምሙ። ወእምዝ፡ ታንትናይ፡ መልአከ፡ ማዕዶተ፡ ፈለግ፡ ወአስተርቡዝና፡ ወአግብርተ፡ አጋእዝቲሆሙ፡ እለ፡ ኀቤሆሙ፡ በከመ፡ ለአከ፡ ዳርዮስ፡ ንጉሥ፡ ገብሩ፡ ከማሁ፡ ወኢያስተቱ። ወሊቃናቲሆሙ፡ ለአይሁድ፡ የሐንፁ፡ ወሌዋውያን፡ እንዘ፡ ይትኔበዩ፡ ሎሙ፡ ሐጌ፡ ነቢይ፡ ወዘካርያስ፡ ወልደ፡ ሐዶ፡ ወሐነፁ፡ ወአቀሙ፡ በትእዛዘ፡ አምላከ፡ እስራኤል፡ ወበትእዛዘ፡ ቂሮስ፡ ወዳርዮስ፡ ወአርተሰስታ፡ ንጉሠ፡ ፋርስ። ወፈጸምዎ፡ ለውእቱ፡ ቤት፡ አመ፡ ሠሉሱ፡ ለሠርቀ፡ ወርኀ፡ አዳር፡ በሳድስ፡ ዓመተ፡ መንግሥቱ፡ ለዳርዮስ። ወገብሩ፡ ደቂቀ፡ እስራኤል፡ ወካህናት፡ ወሌዋውያን፡ ወእለ፡ ተርፉ፡ ደቂቀ፡ ፈላስያን፡ መድቅሐ፡ ቤተ፡ እግዚአብሔር፡ በተፍሥሕት። ወአብኡ፡ ለመድቅሐ፡ ቤተ፡ እግዚአብሔር፡ ምእተ፡ አልሕምተ፡ ወክልኤተ፡ ምእተ፡ አባሕኰ፡ አባግዕ፡ ወአርባዕተ፡ ምእተ፡ ማሐስአ፡ አጣሊ፡ ወዓሠርተ፡ ወክልኤተ፡ ሐራጊተ፡ አጣሊ፡ ዘበእንተ፡ ኃጢአት፡ በበይነ፡ ኵሉ፡ እስራኤል፡ በከመ፡ ኊልቆሙ፡ ለሕዝበ፡ እስራኤል። ወአቀሞሙ፡ ለካህናት፡ በከመ፡ ሕጎሙ፡ ወሌዋውያን፡ በኀበ፡ ቢጾሙ፡ ከመ፡ ይትቀነዩ፡ ለእግዚአብሔር፡ በኢየሩሳሌም፡ በከመ፡ ጽሑፍ፡ ውስተ፡ መጽሐፈ፡ ሙሴ። ወገብሩ፡ ፋሲካ፡ ደቂቀ፡ ፈላስያን፡ አመ፡ ዓሡሩ፡ ወረቡዑ፡ ለሠርቀ፡ ቀዳሚ፡ ወርኅ። ወአንጽሑ፡ ርእሶሙ፡ ካህናት፡ ወሌዋውያን፡ ወኵሎሙ፡ ነጽሑ፡ ወጠብሑ፡ ፋሲካ፡ ለኵሎሙ፡ ደቂቀ፡ ፈላስያን፡ ወለአኃዊሆሙኒ፡ ካህናት፡ ወለርእሶሙኒ። ወበልዑ፡ ደቂቀ፡ እስራኤል፡ ፍሥሐ፡ እለ፡ አተዉ፡ ፈላስያን፡ ወኵሎሙ፡ እለ፡ ገብኡ፡ ኀቤሆሙ፡ እምውስተ፡ ርኵሶሙ፡ ለአሕዛብ፡ ምድር፡ ከመ፡ ይኅሥሥዎ፡ ለእግዚአብሔር፡ አምላከ፡ እስራኤል። ወገብሩ፡ በዓለ፡ ናእት፡ ሰቡዐ፡ መዋዕለ፡ በትፍሥሕት፡ እስመ፡ አስተፍሥሖሙ፡ እግዚአብሔር፡ ወሜጠ፡ ልቦ፡ ለንጉሠ፡ አሦር፡ ኀቤሆሙ፡ ወጸንዖሙ፡ እደዊሆሙ፡ ለግብረ፡ ቤተ፡ አምላከ፡ እስራኤል።

Chapter 7 ወእምድኅረ፡ ዝንቱ፡ ነገር፡ በመንግሥተ፡ አርተሰስታ፡ ንጉሠ፡ ፋርስ፡ ዓገር፡ እዝራ፡ ወልደ፡ ሶርዩ፡ ወልደ፡ አዛርያ፡ ወልደ፡ ሐቃልያ። ወልደ፡ ሰሉም፡ ወልደ፡ ሳዶቅ፡ ወልደ፡ አኪጦብ። ወልደ፡ አማርያ፡ ወልደ፡ አዛርያ፡ ወልደ፡ ማራዮት። ወልደ፡ ዘርሕያ፡ ወልደ፡ ኡዚ፡ ወልደ፡ ቡቂ። ወልደ፡ አቢሱአ፡ ወልደ፡ ፊንሐስ፡ ወልደ፡ አልአዛር፡ ወልደ፡ አሮን፡ ካህን፡ እምኄወ፡ ቀደምቶሙ። ወውእቱ፡ ዓርገ፡ እምነ፡ ባቢሎን፡ ውስተ፡ ኢየሩሳሌም፡ ወእዝራ፡ ማእምር፡ ውእቱ፡ ኦሪተ፡ ሙሴ፡ ዘወሀቦ፡ እግዚአብሔር፡ አምላከ፡ እስራኤል፡ ወወሀቦ፡ ንጉሥ፡ ኵሎ፡ ዘፈቀደ፡ እስመ፡ እደ፡ እግዚአብሔር፡ አምላኩ፡ ሀለወት፡ ምስሌሁ። ወዓርጉ፡ እምውስተ፡ ደቂቀ፡ እስራኤል፡ ወእምነ፡ ካህናትኒ፡ ወእምነ፡ ሌዋውያን፡ ወመዘምራን፡ ወዓፀውት፡ ወናታናውያን፡ ውስተ፡ ኢየሩሳሌም፡ አመ፡ ሳብዕ፡ ዓመተ፡ መንግሥቱ፡ ለአርተሰስታ፡ ንጉሥ። ወበጽሑ፡ ውስተ፡ ኢየሩሳሌም፡ በሐምስ፡ ወርኅ፡ ወይእቲ፡ ሳብዒት፡ ዓመት፡ እመንግሥተ፡ ንጉሥ። ወበቀዳሚት፡ ወርኅ፡ አኀዙ፡ ይዕርጉ፡ እምባቢሎን፡ ወአመ፡ ሠርቀ፡ ሐምስ፡ ወርኅ፡ በጽሑ፡ ኢየሩሳሌም፡ እስመ፡ እደ፡ እግዚአብሔር፡ አምላኩ፡ በሠናይ፡ ላዕሌሁ። እስመ፡ አግብአ፡ ልበ፡ እዝራ፡ ከመ፡ ይኅሥሥ፡ ሕገ፡ ኦሪት፡ ይግበር፡ ወይምሀሮሙ፡ ለእስራኤል፡ ፍትሐ፡ ወኵነኔ። ወከመዝ፡ ውእቱ፡ ትእዛዘ፡ መጽሐፍ፡ ዘወሀቦ፡ አርተሰስታ፡ ለእዝራ፡ ካህን፡ ጸሐፌ፡ መጽሐፈ፡ ትእዛዘ፡ ቃሉ፡ ለእግዚአብሔር፡ ወኵነኔሁ፡ ዘወሀቦሙ፡ ለእስራኤል። ወይቤ፡ አነ፡ አርተሰስታ፡ ንጉሠ፡ ነገሥት፡ ዘፈነኩ፡ ለእዝራ፡ ጸሐፌ፡ ሕጉ፡ ለእግዚአብሔር፡ አምላከ፡ ሰማይ። ትእዛዘ፡ አዘዝኩ፡ ኵሎሙ፡ እለ፡ ይፈቅዱ፡ እምውስተ፡ ደቂቀ፡ እስራኤል፡ ወካህናትኒ፡ ወሌዋውያንኒ፡ ይሑሩ፡ ኢየሩሳሌም፡ ምስሌከ፡ ይሑሩ። አዘዘ፡ ንጉሥ፡ ወሰብዓቱ፡ መማክርቲሁ፡ ወፈነዎሙ፡ ይርአዩ፡ በይሁዳ፡ ወበኢየሩሳሌም፡ ሕገ፡ አምላኮሙ፡ ዘውስተ፡ እዴከ። ወርቀ፡ ወብሩረ፡ ፈነወ፡ ንጉሥ፡ ወመማክርቲሁ፡ ለቤተ፡ እግዚአብሔር፡ አምላከ፡ እስራኤል፡ ዘየኃድር፡ ውስተ፡ ኢየሩሳሌም። ወባዕደኒ፡ ኵሎ፡ ዘወርቅ፡ ወዘብሩር፡ ዘተረክበ፡ በኵሉ፡ ደወለ፡ ባቢሎን፡ ወዘኒ፡ መባኦሙ፡ ለሕዝብ፡ ወዘካህናትኒ፡ ዘአብኡ፡ ለቤተ፡ እግዚአብሔር፡ ዘኢየሩሳሌም። ወኵሎ፡ ዘንተ፡ ትእዛዘ፡ አዘዝኩ፡ ውስተ፡ ዛቲ፡ መጽሐፍ፡ ወለመሥዋዕትኒ፡ ወለሞፃሕት፡ ዘይትገበር፡ ውስተ፡ ምሥዋዕ፡ ዘቤተ፡ አምላኮሙ፡ ዘኢየሩሳሌም፡ አልሕምተ፡ ወአባግዐ፡ ወማሐስአ፡ አባግዕ። ወበዘተርፈ፡ ወርቅ፡ ወብሩር፡ አስተፍሥሕ፡ ሕዝበከ፡ ወግበር፡ በዘታሠምርዎ፡ ለአምላክክሙ፡ ወዘተርፈ፡ ግበሩ። ወንዋየ፡ ዘመጠውኩ፡ ለግብረ፡ ቤተ፡ እግዚአብሔር፡ አብእ፡ በቅድመ፡ እግዚአብሔር፡ ዘኢየሩሳሌም። ወባዕደኒ፡ እመቦ፡ ዘትፈቅድ፡ ለትካዘ፡ ቤተ፡ እግዚአብሔር፡ ዘትሁብ፡ እምነ፡ ቤተ፡ መንግሥጥየ፡ ዘጋዛ። ወአነ፡ አርተሰስታ፡ ንጉሥ፡ አዘዝኩ፡ ትእዛዘ፡ ለኵሉ፡ ጋዛ፡ ዘማዕዶተ፡ ፈለግ፡ ኵሎ፡ ዘሰአለክሙ፡ እዝራ፡ ካህን፡ ወጸሐፌ፡ ሕጉ፡ ለአምላከ፡ ሰማይ፡ አስተዳልዉ፡ ሎቱ። መጠነ፡ ምእት፡ መክሊተ፡ ብሩር፡ ወመጠነ፡ ምእት፡ መስፈርተ፡ ቆሮስ፡ ሥርናየ፡ ወምእተ፡ መዛግብተ፡ ወይን፡ ወምእተ፡ መዛግብተ፡ ቅብዕ፡ ወፄወኒ፡ ዘአልቦ፡ ኊልቊ። ለኵሉ፡ በሕጉ፡ ለአምላከ፡ ሰማይ፡ ይኩኖ፡ ወዑቁ፡ ኢታጽርዑ፡ ቤተ፡ አማላከ፡ ሰማይ፡ ከመ፡ ኢይኩን፡ መንሱት፡ ላዕለ፡ መንግሥቱ፡ ለንጉሥ፡ ወላዕለ፡ ውሉዱ። ወአንትሙኒ፡ ካህናት፡ ወሌዋውያን፡ ኵልክሙ፡ ዘምሩ፡ ወናታናውያን፡ ወዓፀውትኒ፡ ወእለኒ፡ ይገብሩ፡ ቤተ፡ እግዚአብሔር፡ ወጸባሕተኒ፡ ኢትንሥኡ፡ ወአልቦ፡ ዘትቀንይዎሙ። ወአንተኒ፡ እዝራ፡ በከመ፡ ጥበቢሁ፡ ለእግዚአብሔር፡ ዘላዕሌከ፡ ሢም፡ ጸሐፍተ፡ ወመኳምምጸ፡ ከመ፡ ይኰንንዎሙ፡ ለኵሎሙ፡ ሕዝብ፡ እለ፡ ማዕዶተ፡ ፈለግ፡ ወለኵሎሙ፡ እለ፡ የአምሩ፡ ሕጎ፡ ለእግዚአብሔር፡ ወለእለሰ፡ እለ፡ ኢየአምሩ፡ ምህርዎሙ። ወለኵሉ፡ ዘኢገብረ፡ ሕገ፡ እግዚአብሔር፡ ወሕገ፡ ንጉሥ፡ በጊዜሃ፡ ይትኰነን፡ ወዘኒ፡ ለሞት፡ ወዘኒ፡ ለተበርብሮ፡ ወዘኒ፡ ለመቅሠፍት፡ ወዘኒ፡ ለግብርናት። ወይቤ፡ እዝራ፡ ይትባረክ፡ እግዚአብሔር፡ አምላኮሙ፡ ለአበዊነ፡ ዘወደየ፡ ውስተ፡ ልቡ፡ ለንጉሥ፡ ከመ፡ ያከብር፡ ቤቶ፡ ዘበኢየሩሳሌም። ወፈነወ፡ ምሕረቶ፡ ላዕሌየ፡ በቅድመ፡ ንጉሥ፡ ወመማክርቲሁ፡ ወኵሎሙ፡ መላእክተ፡ ንጉሥ፡ ዓበይት፡ ወጸናዕኩ፡ አነ፡ በእደ፡ እግዚአብሔር፡ ቡርክት፡ እንተ፡ ሀለወት፡ ላዕሌየ፡ ወአስተጋባእኩ፡ እምነ፡ እስራኤል፡ መላእክቲሆሙ፡ ይዕርጉ፡ ምስሌየ።

Chapter 8 ወእሉ፡ እሙንቱ፡ መላእክተ፡ አበዊሆሙ፡ እለ፡ ተኈለቁ፡ ይዕርጉ፡ ምስሌየ፡ በመንግሥተ፡ አርተሰስታ፡ ንጉሥ፡ እምነ፡ ባቢሎን። እምደቂቀ፡ ፊንሐስ፡ ጌርሳም፡ ወእምደቂቀ፡ ይታምር፡ ዳንያል፡ ወእምደቂቀ፡ ዳዊት፡ ሐጡስ። እምደቂቀ፡ ሰኬንያ፡ ወእምደቂቀ፡ ፋርኤስ፡ ዘካርያስ፡ ወምስሌሁ፡ እለ፡ ተኈለቁ፡ ምእት፡ ወሐምሳ፡ እደው። እምደቂቀ፡ ፈሐት፡ ሞዓብ፡ እሊሆናይ፡ ወልደ፡ ዘህረያ፡ ወምስሌሁ፡ ክልኤቱ፡ ምእት፡ እደው። ወእምደቂቀ፡ ዛቶኢስ፡ ሰኬንያ፡ ወልደ፡ አዜል፡ ወምስሌሁ፡ ሠለስቱ፡ ምእት፡ እደው። ወእምደቂቀ፡ አዴን፡ ያቤድ፡ ወልደ፡ ዮናታን፡ ወምስሌሁ፡ ሐምሳ፡ እደው። ወእምደቂቀ፡ ኤሌም፡ ኢሳይያስ፡ ወልደ፡ አታልያ፡ ወምስሌሁ፡ ሰብዓ፡ እደው። ወእምደቂቀ፡ ሰፋትያ፡ ዘብድያ፡ ወልደ፡ ሚካኤል፡ ወምስሌሁ፡ ሰማንያ፡ እደው። ወእምደቂቀ፡ ዮአብ፡ አብድያ፡ ወልደ፡ ያህኤል፡ ወምስሌሁ፡ ክልኤቱ፡ ምእት፡ ዐሠርቱ፡ ወሰመንቱ፡ እደው። ወእምደቂቀ፡ በአኒ፡ ሴሎሚት፡ ወልደ፡ ዮሴፍያ፡ ወምስሌሁ፡ ምእት፡ ወስሳ፡ እደው። ወእምደቂቀ፡ ባቢ፡ ዘካርያ፡ ወልደ፡ ባቢ፡ ወምስሌሁ፡ ዕሥራ፡ ወሰመንቱ፡ እደው። ወእምደቂቀ፡ አዛጊድ፡ ዮናን፡ ወልደ፡ አቃጦን፡ ወምስሌሁ፡ ምእት፡ ወዐሠርቱ፡ እደው። ወእምደቂቀ፡ አዶኒቃም፡ ደኃርት፡ ከመዝ፡ አስማቲሆሙ፡ አሊፋልጥ፡ ወይኢኤል፡ ወሰማዕያ፡ ወምሰሌሆሙ፡ ስሳ፡ እደው። ወእምደቂቀ፡ ባጎዊ፡ ሙታይ፡ ወዛቡድ፡ ወምስሌሆሙ፡ ሰብዓ፡ እደው። ወአስተጋባእክዎሙ፡ በኀበ፡ ፈለግ፡ ዘይወርድ፡ ላዕለ፡ አህዋ፡ ወኃደርነ፡ ህየ፡ ሠሉሰ፡ መዋዕለ፡ ወአስተፋቀድክዎሙ፡ ለሕዝብ፡ ወለካህናት፡ ወኢረከብነ፡ ህየ፡ እምደቂቀ፡ ሌዊ። ወለአኩ፡ ኀበ፡ አልአዛር፡ ወልደ፡ አርያል፡ ወሰማዕያ፡ ወሀሎናም፡ ወያሪብ፡ ወሄልናታን፡ ወናታን፡ ወዘካርያ፡ ወመሱላም፡ እደው፡ መላእክት፡ ወለዮያሪብ፡ ወለሄልናታን፡ ማእምራን። ወወሰድክዎሙ፡ ኀበ፡ መልአከ፡ ኤዱ፡ ወወሀብክዎሙ፡ ወርቀ፡ ወወደይኩ፡ ነገረ፡ ውስተ፡ አፉሆሙ፡ ከመ፡ ይትናገሩ፡ ኀበ፡ ኤዱ፡ ወአኃዊሁ፡ ናታኒም፡ በከስፍያ፡ መካን፡ ከመ፡ ያምጽኡ፡ ለነ፡ መዘምራነ፡ ለቤተ፡ አምላክነ። ወአምጽኡ፡ ለነ፡ በእደ፡ አምላክነ፡ ሠናይ፡ ላዕሌነ፡ ብእሴ፡ ጠቢበ፡ እምደቂቀ፡ ሞሐሊ፡ ወልደ፡ ሌዊ፡ ወልደ፡ እስራኤል፡ ወሴርክያ፡ ወደቂቁ፡ ወአኃዊሁ፡ ዐሠርቱ፡ ወሰመንቱ። ወእሴብያስ፡ ወኢሳይያስ፡ እምደቂቀ፡ ሜራሪ፡ አኃዊሁኒ፡ ወደቂቁኒ፡ ዕሥራ፡ እሙንቱ። ወእምነ፡ ናታኒም፡ እለ፡ ወሀቦሙ፡ ዳዊት፡ ወመላእክቲሆሙ፡ ከመ፡ ይትቀነዩ፡ ለሌዋውያን፡ ሰብአ፡ ናታኒም፡ ክልኤቱ፡ ምእት፡ ወዕሥራ፡ ወአስተጋባእክዎሙ፡ ዘዘዚአሆሙ፡ በበአስማቲሆሙ። ወሰበኩ፡ ሎሙ፡ ጾመ፡ በኀበ፡ ፈለገ፡ አህዋ፡ ከመ፡ ናሕምም፡ ርእሰነ፡ ቅድመ፡ አምላክነ፡ ወከመ፡ ይሥራኅ፡ ለነ፡ ፍኖተነ፡ ወለውሉድነ፡ ወለኵሉ፡ ፍጥረት። እስመ፡ ኃፈርኩ፡ ስእለቶ፡ ለንጉሥ፡ ኃይለ፡ ወአፍራሰ፡ እለ፡ ያድኅኑነ፡ እምፀር፡ በውስተ፡ ፍኖት፡ እስመ፡ ንቤሎ፡ ለንጉሥ፡ እዴሁ፡ ለአምላክነ፡ በሠናይ፡ ለኵሉ፡ እለ፡ የኃሥሥዎ፡ ወኃይሉሰ፡ ወመዓቱ፡ ለኵሎሙ፡ እለ፡ የኀድግዎ። ወጾምነ፡ ወሰአልነ፡ ኀበ፡ አምላክነ፡ በበይነ፡ ዝንቱ፡ ወሰምዐነ። ወፈለጥኩ፡ ዐሠርተ፡ ወክልኤተ፡ እምውስተ፡ መላእክቲሆሙ፡ ለካህናት፡ ሠራብያ፡ ወሐሰብያ፡ ወዐሠርቱ፡ ምስሌሆሙ፡ እምነ፡ አኃዊሆሙ። ወደለውኩ፡ ሎሙ፡ ወርቀ፡ ወብሩረ፡ ወንዋየ፡ ቤተ፡ አምላክነ፡ ዘቀዲሙ፡ ዘፈነወ፡ ንጉሥ፡ ወመማክርቲሁ፡ ወመላእክቲሁ፡ ወኵሎሙ፡ እስራኤል፡ እለ፡ ተረክቡ፡ እምህየ። ወደለውኩ፡ ሎሙ፡ ላዕለ፡ እደዊሆሙ፡ ወመጠውክዎሙ፡ ስድስተ፡ ምእተ፡ ወሐምሳ፡ መክሊተ፡ ብሩር፡ ወምእተ፡ መክሊተ፡ ዘወርቅ፡ ወምእተ፡ ንዋየ፡ ብሩር። ወንዋየ፡ ጻሕል፡ ዘወርቅ፡ ዕሥራ፡ ዝ፡ ፍኖተ፡ ከማኒም፡ ዐሠዓተ፡ ምእተ፡ ወንዋየ፡ ብርት፡ ቅድወ፡ ወሠናየ፡ ዘዘዚአሁ፡ ወቅቡዕ፡ ወርቀ። ወእቤሎሙ፡ አንትሙሰ፡ ቅዱሳኑ፡ ለእግዚአብሔር፡ ወዝኒ፡ ንዋይ፡ ቅዱስ፡ ውእቱ፡ ወርቅ፡ ወብሩር፡ መባኡ፡ ለእግዚአብሔር፡ አምላከ፡ አበዊነ። ትግሁ፡ እንከ፡ ወዕቀቡ፡ እስከ፡ ትደልዉ፡ ኀበ፡ መላእክቲሆሙ፡ ወለካህናት፡ ወለሌዋውያን፡ ኀበ፡ መሳፍንተ፡ አበዊሆሙ፡ እለ፡ በኢየሩሳሌም፡ በሕዋረ፡ ቤተ፡ እግዚአብሔር። ወደለውኩ፡ ሎሙ፡ ወመጠውክዎሙ፡ ለካህናት፡ ወለሌዋውያን፡ በኊልቈ፡ ሰቅለ፡ ብሩር፡ ወርቆ፡ ወብሩሮ፡ ወንዋየ፡ ዘይወስዱ፡ ኢየሩሳሌም፡ ለቤተ፡ አምላክነ። ወእምዝ፡ ግዕዝነ፡ እምነ፡ ፈለገ፡ አህዋ፡ አመ፡ ዐሡሩ፡ ወሰኑዩ፡ ለሠርቀ፡ ቀዳሚ፡ ወርኅ፡ ከመ፡ ንሑር፡ ኢየሩሳሌም፡ ወእዴሁ፡ ለአምላክነ፡ ምስሌነ፡ ወአድኃነነ፡ እምእደ፡ ፀርነ፡ እለ፡ ይትቃተሉነ፡ በፍኖት። ወበጻሕነ፡ ኢየሩሳሌም፡ ወነበርነ፡ ህየ፡ ሠሉሰ፡ ዕለተ። ወአመ፡ ራብዕት፡ ዕለት፡ ደለውነ፡ ኵሎ፡ ወርቆ፡ ወብሩሮ፡ ወንዋየ፡ ውስተ፡ ቤተ፡ አምላክነ፡ ወአወፈይናሁ፡ ላዕለ፡ እደሜራሞት፡ ወልደ፡ ኦሪያ፡ ካህን፡ ወምስሌሁ፡ አልአዛር፡ ወልደ፡ ፊንሐስ፡ ወምስሌሆሙ፡ ኢዮዛብድ፡ ወልደ፡ ኢዮስስ፡ ወናሕድያ፡ ወልደ፡ ቤኔዊ፡ ሌዋውያን፡ እሙንቱ። ወኈለቊነ፡ ሎሙ፡ ኵሎ፡ ወደለውነ፡ ወጸሐፍነ፡ ይእተ፡ አሚረ፡ ኵሎ፡ ድልወቶ። ወአብኡ፡ መሥዋዕቶ፡ ለእግዚኣ፡ እስራኤል፡ እለ፡ አተዉ፡ እምኀበ፡ ተፄወዉ፡ ደቂቆሙ፡ ለፈላስያን፡ ዐሠርተ፡ ወክልኤተ፡ አልሕምተ፡ በእንተ፡ ኵሎሙ፡ እስራኤል፡ ወአባግዐ፡ ተስዐ፡ ወስድስተ፡ ወማሕስአ፡ አባግዕ፡ ሰብዐ፡ ወሰብዐተ፡ ወሐራጊተ፡ በእንተ፡ ኃጢአት፡ ዐሠርተ፡ ወክልኤተ፡ ወኵሎ፡ መሥዋዕቶሙ፡ ለእግዚአብሔር። ወወሀብክዎሙ፡ መጽሐፈ፡ ንጉሥ፡ ለመገብተ፡ ንጉሥ፡ ወለመላእክት፡ እለ፡ ማዕዶተ፡ ፈለግ፡ ወአክበርዎሙ፡ ለሕዝብ፡ ወለቤተ፡ እግዚአብሔር።

Chapter 9 ወምድኅረ፡ ኀልቀ፡ ዝንቱ፡ መጽኡ፡ ኀቤየ፡ መላእክቲሆሙ፡ ለሕዝብ፡ ወይቤሉኒ፡ ኢተፈልጡ፡ ሕዝበ፡ እስራኤል፡ ወካህናት፡ ወሌዋውያን፡ እምሕዝበ፡ ምድር፡ በርኵሶሙ፡ ለከናኔዎን፡ ወለኬጤዎን፡ ወለፌርዜዎን፡ ወለኢያቡሴዎን፡ ወለአማኔዎን፡ ወለሞዓቤዎን፡ ወለግብጽ፡ ወለአሞሬዎን። ወአውሰበ፡ እምውስተ፡ አዋልዲሆሙ፡ ወአስተዋሰቡ፡ ደቂቆሙ፡ ወተደመሩ፡ ዘርእ፡ ቅዱስ፡ ምስለ፡ ሕዝበ፡ ምድር፡ ወመላእክትኒ፡ ቅድመ፡ ኀብሩ፡ ምስሌሆሙ፡ በዛቲ፡ ኃጢአት። ወሶበ፡ ሰማዕኩ፡ ዘንተ፡ ነገረ፡ ሰጠጥኩ፡ ልብስየ፡ ወዓጽፍየ፡ ወኀዘንኩ፡ ወነጸይኩ፡ እምሥዕርተ፡ ርእስየ፡ ወሥዕርተ፡ ጽሕምየ፡ ወእምዝ፡ ነበርኩ፡ ትኩዝየ፡ ወአትሐትኩ፡ ገጽየ። ወመጽኡ፡ ኀቤየ፡ ኵሎሙ፡ እለ፡ ይፈርህዎ፡ ለእግዚአብሔር፡ ይንብቡኒ፡ ቃለ፡ አምላከ፡ እስራኤል፡ በእንተ፡ ውእቱ፡ ጌጋዮሙ፡ ለፈላስያን፡ ወአንሰ፡ ነበርኩ፡ ትኩዝየ፡ እስከ፡ ጊዜ፡ መሥዋዕተ፡ ሠርክ። ወሶበ፡ ኮነ፡ ጊዜ፡ መሥዋዕተ፡ ሠርክ፡ ተንሣእኩ፡ ሕሙምየ፡ እምድኅረ፡ ሰጠጥኩ፡ አልባስየ፡ ወዓጽፍየ፡ ወአስተብረኩ፡ በብረክየ፡ ወአንሣእኩ፡ እደውየ፡ ኀበ፡ እግዚአብሔር፡ አምላኪየ። ወእቤ፡ እግዚእ፡ አኃፍር፡ አንሥኦ፡ ገጽየ፡ ኀቤከ፡ እስመ፡ ብዙኅ፡ ኃጢአትነ፡ ወኖኀ፡ እምሥዕርተ፡ ርእስነ፡ ወዓብየ፡ ጌጋይነ፡ ወበጽሐ፡ እስከ፡ ሰማይ። እምአመ፡ መዋዕሊሆሙ፡ ለአበዊነ፡ በዓቢይ፡ ጌጋይነ፡ ሀሎነ፡ እስከ፡ ዮም፡ ወበኃጢአትነ፡ ተፄወውነ፡ ንሕነ፡ ወነገሥጥነ፡ ወካንናቲነ፡ ወውሉድነ፡ ወገባእነ፡ ውስተ፡ እደዊሆሙ፡ ለነገሥተ፡ አሕዛብ፡ ወበኵናቶሙ፡ ቀተሉነ፡ ወፄወዉነኒ፡ ወበርበሩነኒ፡ ወበኃፍረተ፡ ገጽነ፡ ሀሎነ፡ እስከ፡ ዮም። ወይእዜኒ፡ ኅዳጥ፡ ዕረፍት፡ ኮነት፡ ለነ፡ አመ፡ ተሣሃለነ፡ አምላክነ፡ ወአትረፈነ፡ ወአሕየወነ፡ ወወሀበነ፡ ኃይለ፡ ውስተ፡ ቤተ፡ መቅደሱ፡ ከመ፡ ያብርህ፡ አዕይንተነ፡ አምላክነ፡ ወስሕትነ፡ ሕቀ፡ እምነ፡ ቅኔነ። እስመ፡ አግብርቲሁ፡ ንሕነ፡ ኢኃደገነ፡ አምላክነ፡ ወወሀበነ፡ ሞገሰ፡ በቅድሜሆሙ፡ ለነገሥተ፡ ፋርስ፡ ከመ፡ የሀቡኑ፡ ሲሳየነ፡ ወያክብሩ፡ ቤተ፡ መቅደስነ፡ ወይሕንፅዋ፡ መዝበራ፡ ለጽዮን፡ ወየሀቡነ፡ ኃይለ፡ በይሁዳ፡ ወበኢየሩሳሌም። ወይእዜኒ፡ ምንተ፡ ንብል፡ እግዚኦ፡ እንዘ፡ ትሁቦሙ፡ ዓለዉ፡ ትእዛዘከ። ዘወሀብከ፡ በእደ፡ አግብርቲከ፡ ነቢያት፡ ዘትቤሎሙ፡ ምድርኬ፡ እንተ፡ ትበውኡ፡ ትረስዋ፡ ርኵስት፡ ይእቲ፡ በግማኖሙ፡ ለአሕዛበ፡ ምድር፡ ወበርኵሶሙ፡ መልእዋ። ወይእዜኒ፡ አዋልዲክሙ፡ ኢታስተዋስቡ፡ ለደቂቆሙ፡ ወአዋልዲሆሙኒ፡ ኢታስተዋስቡ፡ ለደቂቅክሙ፡ ወኢትሰነአውዎሙ፡ ወኢታሠንዩ፡ ምስሌሆሙ፡ ለዓለም፡ ከመ፡ ትጽንዑ፡ ወትብልዑ፡ በረከታ፡ ለምድር፡ ወታወርስዎሙ፡ ለውሉድክሙ፡ ለዓለም። ወዝ፡ ኵሉ፡ ዘመጽአ፡ ኀቤነ፡ በእከየ፡ ምግባሪነ፡ ወበዕበየ፡ ኃጢአትነ፡ እስመ፡ አንተ፡ አምላክነ፡ አስሐትከነ፡ አምኃጢአትነ፡ ንትመየጥ፡ ወንዕቀብ፡ ተረፈ፡ ትእዛዝከ። እስመ፡ ተመየጥነ፡ ንዕሉ፡ ትእዛዘከ፡ ወተሐመውነ፡ ምስለ፡ አሕዛብ፡ ኢትትመዓዓነ፡ ለዝሉፉ፡ በዘኢታተርፍ፡ እምኔነ፡ ዘይድኅን። እግዚኦ፡ አምላከ፡ እስራኤል፡ ጻድቅ፡ አንተ፡ ዘአትረፍከነ፡ ወአድኃንከነ፡ ዮም፡ በዛቲ፡ ዕለት፡ እንዘ፡ ሀሎነ፡ ቅድሜከ፡ በኃጢአት፡ እስመ፡ አልቦ፡ ዘይቀውም፡ ቅድሜከ፡ እንበይነ፡ ዝንቱ።

Chapter 10 ወሶበ፡ አኅለቀ፡ እዝራ፡ ጸልዮ፡ ወተጋንዮ፡ እንዘ፡ ይበኪ፡ ወሶበ፡ ይጼሊ፡ በቅድመ፡ ቤተ፡ እግዚአብሔር፡ ተጋብኡ፡ ኀቤሁ፡ ብዙኀን፡ እደው፡ እምውስተ፡ እስራኤል፡ ወኮነ፡ ዓቢይ፡ ማኅበር፡ ምስለ፡ አንስቶሙ፡ ወወራዙቶሙ፡ ወበከዩ፡ ሕዝብ፡ ብዙኀ፡ ብካየ። ወአውሥአ፡ ሰኬንያ፡ ወልደ፡ ኢያሄል፡ እምደቂቀ፡ ኤላም፡ ወይቤሎ፡ ለእዝራ፡ ለሊነ፡ አበስነ፡ ለአምላክነ፡ ዘአውሰብነ፡ አንስተ፡ ነኪራተ፡ እምኀበ፡ ምድር፡ ወይእዜኒ፡ ቦ፡ ተስፋ፡ ለእስራኤል፡ በእንተዝ። ወባሕቱ፡ ንትካየድ፡ ኪዳነ፡ ምስለ፡ አምላክነ፡ ወአደሞሙ፡ ይእዜኒ፡ ለእስራኤል፡ እንበይነ፡ ዝንቱ፡ ከመ፡ ይስድዱ፡ አንስቲያሆሙ፡ ምስለ፡ ውሉዶን፡ ዘወለዳ፡ ሎሙ፡ ወተንሥዕ፡ ወገሥፆሙ፡ ዘከመ፡ ትፈቅድ፡ በትእዛዙ፡ ለአምላክነ፡ ወይግበሩ፡ በከመ፡ ሕግነ። ተንሥእ፡ እስመ፡ ላዕሌከ፡ ውእቱ፡ ዝ፡ ነገር፡ ወንሕነኒ፡ ምስሌከ፡ ጽናዕ፡ ወግበር። ወተንሥአ፡ እዝራ፡ ወአምሐሎሙ፡ ለመላእክት፡ ወለካህናት፡ ወለሌዋውያን፡ ወለኵሎሙ፡ እስራኤል፡ ከመ፡ ይግበሩ፡ ዘከመ፡ አዘዞሙ፡ ወመሐሉ። ወተንሥአ፡ እዝራ፡ እምቅድመ፡ ቤተ፡ እግዚአብሔር፡ ወሖረ፡ መንገለ፡ ኤስኬዴሬ፡ ወዮሐናን፡ ወልደ፡ ኤልሳብ፡ ሖረ፡ ህየ፡ ምስሌሁ፡ ወኢበልዐ፡ እክለ፡ ወኢሰትየ፡ ማየ፡ እስመ፡ ይላሁ፡ በእንተ፡ ኃጢአቶሙ፡ ወማዕሌቶሙ፡ ለፈላስያን። ወሰበከ፡ ሎሙ፡ ማእከሎሙ፡ ለመላእክት፡ ውስተ፡ ኵሉ፡ ይሁዳ፡ ወኢየሩሳሌም፡ እንዘ፡ ይብል፡ ኵሉ፡ ዘኢበጽሐ፡ እስከ፡ ሠሉስ፡ መዋዕል፡ በከመ፡ አዘዙ፡ መላእክት፡ ወረበናት፡ ያጥፍኡ፡ ኵሎ፡ ንዋዮ፡ ወኪያሁኒ፡ ይፍልጥዎ፡ እምነ፡ ማኅበሮሙ፡ ለፈላስያን። ወተጋብኡ፡ ኵሉ፡ ሰብአ፡ ይሁዳ፡ ወብንያም፡ ውስተ፡ ኢየሩሳሌም፡ በእማንቱ፡ ሠላስ፡ መዋዕል፡ አመ፡ ታስዕ፡ ወርኅ፡ በኃመሱ፡ ለጽልመት። ወነበሩ፡ ኵሎሙ፡ ሕዝብ፡ ውስተ፡ መርኅበ፡ ቤተ፡ እግዚአብሔር፡ ወይርዕዱ፡ በእንተ፡ ዝንቱ፡ ነገር፡ ወበእንተ፡ ክረምት፡ እስመ፡ ዝናም፡ ይወርድ። ወተንሥአ፡ እዝራ፡ ካህን፡ ወይቤሎሙ፡ አንትሙሰ፡ አበስክሙ፡ ዘአውሰብክሙ፡ እምውስተ፡ አንስት፡ ነኪራት፡ ወወሰክሙ፡ ኃጢአተ፡ ላዕለ፡ ኃጢአተ፡ እስራኤል። ወይእዜኒ፡ አእኵትዎ፡ ለእግዚአብሔር፡ አምላከ፡ አበዊነ፡ ወግበሩ፡ ሠናይ፡ በቅድሜሁ፡ ወተፈለጡ፡ እምአሕዛበ፡ ምድር፡ ወእምአንስት፡ ነኪራት። ወአውሥኡ፡ ኵሉ፡ ሕዝብ፡ ወይቤሉ፡ ዓቢይ፡ ዝ፡ ነገር፡ ለነ፡ ዘንገብር። ወባሕቱ፡ ብዙኅ፡ ሕዝብ፡ ወክረምት፡ ብሔር፡ ወኢንክል፡ ይእዜ፡ አብጽሖቶሙ፡ እስመ፡ ኢኮነ፡ ግብረ፡ አሐቲ፡ ዕለት፡ ወኢ፡ ግብረ፡ ሰኑይ፡ እስመ፡ አብዛኅነ፡ ኃጢአተ፡ በዝንቱ፡ ነገር። ወባሕቱ፡ ይምጽኡ፡ ኵሎሙ፡ መላእክተ፡ ሕዝብነ፡ ዘኵሉ፡ አህጉሪነ፡ እለ፡ አውሰቡ፡ እምውስተ፡ አንስት፡ ነኪራት፡ ወይትጋብኡ፡ በቅድሜሆሙ፡ ሊቃናተ፡ አህጉሪነ፡ ወመኳንንቲነ፡ ምስሌሆሙ፡ ከመ፡ ይትመየጥ፡ እምኔነ፡ መንሱተ፡ መዓቱ፡ ለአምላክነ፡ ዘረከበነ፡ እንበይነ፡ ዝንቱ፡ ነገር። ወባሕቱ፡ ዮናታን፡ ወልደ፡ አሳሬል፡ ወሐዝያም፡ ወልደ፡ ተቀዋ፡ ምስሌየ፡ የሀልዉ፡ እንበይነ፡ ዝንቱ፡ ወሜሱላም፡ ወሶባቴ፡ ሌዋዊ፡ ይርድእዎሙ። ወገብሩ፡ ከማሁ፡ ደቂቀ፡ ፈላስያን፡ ወፈለጠ፡ እዝራ፡ ካህን፡ እደወ፡ መላእክተ፡ አበዊሆሙ፡ በበአብያቲሆሙ፡ ወኵሎሙ፡ በበአስማቲሆሙ፡ ወነበሩ፡ አመ፡ ሠርቀ፡ ዐሥር፡ ወርኅ፡ ይኅሥሡ፡ ነገረ። ወገጸመ፡ በኵሉ፡ እደው፡ እለ፡ አውስቡ፡ እምአንስት፡ ነኪራት፡ እስከ፡ ሠርቀ፡ ቀዳሚ፡ ወርኅ። ወእለ፡ ተረክቡ፡ እምደቂቀ፡ ካህናት፡ እለ፡ አውሰቡ፡ እምአንስት፡ ነኪራት፡ እምደቂቀ፡ ኢዮአስስ፡ ወልደ፡ ኢዮሴዴቅ፡ ወአኃዊሁኒ፡ ማዓስያ፡ ወአልአዛር፡ ወኦሬም፡ ወገዳልያ። ወወሀቡ፡ እደ፡ ከመ፡ ይስድዱ፡ አንስቲያሆሙ፡ ወያብኡ፡ እንበይነ፡ ጌጋሙ፡ አሕሩገ፡ አባግዕ፡ ወይሡዑ፡ መሥዋዕተ። ወእምነ፡ ደቂቀ፡ ኤሜር፡ አናኒ፡ ወዝብድያ። ወእምነ፡ ደቂቀ፡ ኤርም፡ መሳሄል፡ ወኤልያ፡ ወሴሚያ፡ ወያሔል፡ ወዖዝያ። ወእምደቂቀ፡ ጳስኮር፡ ኤልዮና፡ መሐስአ፡ ወሴሜኤል፡ ወናትናኤል፡ ወኢዮዛብ፡ ወኤልሳ። ወእምውስተ፡ ሌዋውያን፡ ኢዮዛብድ፡ ሳምዒ፡ ወቆልያ፡ ለሊሁ፡ ቆልያጥ፡ ወፈዲሃ፡ ወይሁዳ፡ ወኤልኤዜር። ወእምውስተ፡ መዘምራን፡ ኤልያስብ፡ ወእምነ፡ ዓፀውት፡ ሳሌም፡ ወጤሌም፡ ወኡሪ። ወእምእስራኤል፡ ወእምነ፡ ደቂቀ፡ ፋሮስ፡ ራምያ፡ ወዖዝያ፡ ወሜልክያ፡ ወሚያሚን፡ ወአልአዛር፡ ወመልክያ፡ ወቤንያህ። ወእምነ፡ ደቂቀ፡ ኤላም፡ መታንያ፡ ወዘካርያ፡ ወኢያኤል፡ ወአቤዲ፡ ወያሬሞት፡ ወኤልያ። ወእምደቂቀ፡ ዛቱ፡ ኤሊዔናይ፡ ወኤላሴብ፡ ወማታንያ፡ ወኤርሞት፡ ወዘባዲ፡ ወአዚዛ። ወእምደቂቀ፡ ቤባይ፡ ዮሐናን፡ ወሐናንያ፡ ወዘባይ፡ ወአጥላይ። ወእምደቂቀ፡ ባኒ፡ ማሱላም፡ መሉክ፡ አዳንያ፡ ያሱብ፡ ወሳኤል፡ ወራሞት። ወእምደቂቀ፡ ፈሐትሞአብ፡ አዳናእ፡ ክላል፡ በናያ፡ ወማሲሓ፡ መታንያ፡ ቤሴሌል፡ በነዊ፡ ወምናሴ። ወእምደቂቀ፡ ኤራም፡ ኤልኤዘር፡ ይሲያ፡ ሚልክያ፡ ሰምያ፡ ስምዖን፡ ብንያም፡ ሜሎክ፡ ሰማርያ። ወእምደቂቀ፡ ሐሱም፡ መታንያ፡ ወመታታ፡ ዛባድ፡ ኤሊፋልጥ፡ ይሬማይ፡ ምናሴ፡ ሲመዒ። ወእምደቂቀ፡ ባኒ፡ ማዕደይ፡ አምራም፡ ኡኤል፡ በናያ፡ በደያም፡ ከልቅያም፡ ውንያ፡ ወሬሙት፡ ኤልያሴብ፡ ማታንያ፡ መትናይ፡ የዕሱ። ወደቆቀ፡ ባነይ፡ ወደቂቀ፡ ሴሙይ፡ ስልምያ፡ ወናታን፡ ወሐዳያ፡ ወመልክነደባይ፡ ወሲሳይ፡ ወስራያ። ወአዛርኤል፡ ወሰልሚያ፡ ወሰማርያ፡ ወሰሎም፡ ወአማርያ፡ ወዮሴፍ። ወእምደቂቀ፡ ናቡ፡ ይኢኤል፡ ማታትያ፡ ዛባድ፡ ወዛብንያ፡ ወያብዱ፡ ወኢዮኤል፡ ወባናያ። እሉ፡ ኵሎሙ፡ እለ፡ አውሰቡ፡ እምአንስት፡ ነኪራት፡ ወቦ፡ እምኔሆን፡ አንስትያ፡ እለ፡ ወለዳ፡ ሎሙ፡ ደቂቀ።