Second Epistle to Timothy

Introduction

Epistle Text of the EOTC printed Bible

ምዕራፍ 1 በእንተ፡ ጢሞቴዎስ፡ ወሃይማኖቱ እምጳውሎስ፡ ሐዋርያሁ፡ ለኢየሱስ፡ ክርስቶስ፡ በፈቃደ፡ እግዚአብሔር። ወበተስፋ፡ ሕይወት፡ እንተ፡ በኢየሱስ፡ ክርስቶስ። ለጢሞቴዎስ፡ ወልድየ፡ ዘአፈቅር፡ ሰላም፡ ለከ። ወሣህል፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ። አአኵቶ፡ ለእግዚአብሔር፡ ዘኪያሁ፡ አመልክ፡ በልብ፡ ንጹሕ፡ እምፍጥረትየ። ወዘልፈ፡ እዜከረከ፡ በጸሎትየ፡ መዓልተ፡ ወሌሊተ። ወእፈቱ፡ እርአይከ፡ ወእዜከር፡ አንብዐከ። ወእትፌሣሕ፡ ተዘኪርየ፡ ሃይማኖተከ፡ ዘአልቦ፡ ኑፋቄ። እንተ፡ ኀደረት፡ ላዕለ፡ እምከ፡ ኤውንቄ፡ ወእምሔውትከ፡ ሎይድ። ወእፌጽም፡ ፍሥሓየ፡ ወእትአመን፡ ከመ፡ ላዕሌከኒ። ወበእንተ፡ ዝ፡ እዜከረከ፡ ከመ፡ ይትሐደስ፡ ጸጋሁ፡ ለእግዚአብሔር። ዘረከብከ፡ በሢመተ፡ እዴየ፡ ላዕሌከ። በእንተ፡ ዘኢይደሉ፡ ኀፍረት፡ በሃይማኖት እስመ፡ አኮ፡ መንፈሰ፡ ፍርሀት፡ ዘወሀበነ፡ እግዚአብሔር። ዘእንበለ፡ መንፈሰ፡ ኀይል፡ ወንጽሕ፡ ወተፋቅሮ፡ ወጥበብ። ወኢትኅፈር፡ እንከ፡ በእንተ፡ ስምዑ፡ ለእግዚእነ፡ ወኢታስተኀፍረኒ፡ ኪያየ፡ ሙቁሖ። ዳእሙ፡ ጻሙ፡ ለምህሮ፡ በኀይለ፡ እግዚአብሔር፡ ዘአድኀነነ፡ ወጸውዐነ፡ በጽዋዔሁ፡ ቅዱስ። ወአኮ፡ በከመ፡ ምግባሪነ፡ ዳእሙ፡ በከመ፡ ፈቃዱ፡ ወጸጋሁ። ዘተውህበ፡ ለነ፡ በኢየሱስ፡ ክርስቶስ፡ እምቅድመ፡ ዓለም። ወአስተርአየ፡ ይእዜ፡ በምጽአቱ፡ ለእግዚእነ፡ ኢየሱስ፡ ክርስቶስ፡ መድኀኒነ። ዘሰዐሮ፡ ለሞት፡ ወአብርሃ፡ ለሕይወት፡ ወአሰሰለ፡ ሙስና፡ በትምህርተ፡ ወንጌሉ። በእንተ፡ ስምዕ፡ ወማሕፀንት ዘሎቱ፡ ተሠየምኩ፡ ሐዋርያ፡ ወዐዋዴ፡ ወመምህረ፡ ለአሕዛብ። ወበእንቲኣሁ፡ አሐምም፡ ወኢይትኀፈር፡ እምዘአነ፡ ቦቱ። እስመ፡ አአምር፡ ዘተአመንኩ፡ ወእትአመንሂ። ከመ፡ ይክል፡ ዐቂበ፡ ሊተ፡ ዘአማሕፀነኒ፡ እስከ፡ ይእቲ፡ ዕለት። ወይኩን፡ ለከ፡ አርአያ፡ ውእቱ፡ ቃለ፡ ሕይወት። ዘሰማዕከ፡ በኀቤየ፡ በሃይማኖት፡ ወበፍቅረ፡ ኢየሱስ፡ ክርስቶስ። ዕቀብ፡ ማሕፀንተከ፡ ሠናየ፡ በመንፈስ፡ ቅዱስ፡ ዘኅዱር፡ ላዕሌከ። ወዘንተኒ፡ ተአምር፡ ከመ፡ ዐለዉኒ፡ ኵሎሙ፡ እለ፡ በእስያ፡ እለ፡ ፊሎጎስ፡ ወኤርዋኔጌስ። በእንተ፡ ጸሎት፡ ወበረከት ወየሀቦ፡ እግዚአብሔር፡ ሣህለ፡ ለቤተ፡ ሄኔሴፎሩ። እስመ፡ ብዙኀ፡ አዕረፈ፡ ወኢኀፈረ፡ በእንተ፡ መዋቅሕትየ። ወበጺሖ፡ ኀበ፡ ሮሜ፡ ፍጡነ፡ ኀሠሠኒ፡ ወረከበኒ፡ ሙቁሕየ። የሀቦ፡ እግዚአብሔር፡ ይርከብ፡ ሣህለ፡ በኀበ፡ እግዚእነ፡ በይእቲ፡ ዕለት። ወመጠነ፡ ተልእከኒ፡ ሠናየ፡ በኤፌሶን፡ ለሊከ፡ ተአምር።

ምዕራፍ 2 በእንተ፡ ምክር፡ ወትእዛዝ ወአንተኒ፡ ወልድየ፡ ጽናዕ፡ በጸጋሁ፡ ለእግዚእነ፡ ኢየሱስ፡ ክርስቶስ። ወዘሰማዕከ፡ በላዕሌየ፡ በኀበ፡ ብዙኃን፡ ሰማዕት፡ ኪያሁ፡ መሀሮሙ፡ ለመሃይምናን፡ ሰብእ። እለ፡ ይደልዎሙ፡ ከመ፡ ይምሀሩ፡ ለባዕዳን። ወጻሙ፡ ከመ፡ ኄር፡ መስተጋድል፡ ላእከ፡ ኢየሱስ፡ ክርስቶስ። እስመ፡ አልቦ፡ ዘይትቃተል፡ ወይኄሊ፡ ንብረተ፡ ዝ፡ ዓለም። ዘእንበለ፡ ከመ፡ ያድሉ፡ ለዘሤሞ። መስተጋድልኒ፡ ኢይከውኖ፡ ምዝጋና፡ ለእመ፡ በሕጉ፡ ኢተጋደለ። ወዘኒ፡ ይጻሙ፡ ሐረሳዊ፡ ግብረ፡ ይቀድም፡ ለረኪበ፡ ፍሬሁ። ወለቡ፡ ዘእቤለከ፡ የሀብከ፡ እግዚአብሔር፡ ጥበበ፡ በኵሉ። ተዘከሮ፡ ለኢየሱስ፡ ክርስቶስ፡ ዘተንሥአ፡ እምዉታን፡ ዘእምዘርዐ፡ ዳዊት፡ ዘመሀርኩ፡ በስሙ። በእንተ፡ ሙቃሔ፡ ወትዕግሥት ዘበእንቲኣሁ፡ እሠርሕ፡ ወእትሞቃሕ፡ ከመ፡ ጕሕልያ። ወባሕቱ፡ ቃለ፡ እግዚአብሔርሰ፡ ኢይትአሰር። በእንተ፡ ዝ፡ እትዔገሥ፡ በኵሉ፡ በእንተ፡ ኅሩያኒሁ። ከመ፡ እሙንቱሂ፡ ይርከቡ፡ ሕይወተ፡ ዘበኢየሱስ፡ ክርስቶስ። ወስብሐተ፡ ዘለዓለም፡ ዘበሰማያት። እሙን፡ ነገር፡ እምከመ፡ ዐረይነ፡ መዊተ፡ ንዔሪ፡ ሕይወተ። ወእምከመ፡ ዐረይነ፡ ትዕግሥተ፡ ንዔሪ፡ ነጊሠ። ወእመሰ፡ ክሕድናሁ፡ ውእቱኒ፡ ይክሕደነ። ወእመኒ፡ ኢአመናሁ፡ ውእቱሰ፡ ምእመነ፡ ይነብር፡ ወኢይክል፡ ክሒደ፡ ርእሶ። በእንተ፡ አስምዖ፡ ወአዕቅቦ ከመ፡ ዝ፡ ዘክሮሙ፡ ወአስምዕ፡ ቅድመ፡ እግዚአብሔር፡ ኢትትላኰይ፡ በግብር። ዘኢይበቊዕ፡ በዘይትገፈትዑ፡ እለ፡ ይሰምዑ። አስተፋጥን፡ ከመ፡ ትረሲ፡ ርእሰከ፡ ኅሩየ፡ ለኀበ፡ እግዚአብሔር። ከመ፡ ገባራዊ፡ ዘኢይትኀፈር፡ ዘርቱዐ፡ ይመትር፡ ቃለ፡ እግዚአብሔር፡ በጽድቅ። ወለነገረ፡ ርኩሳንሰ፡ ዘአልቦ፡ ባቊዕ፡ እበዮ። እስመ፡ ያዐብይዋ፡ ለኀጢአቶሙ። ወነገሮሙኒ፡ ከንቱ፡ ከመ፡ ዘይትረዐይ፡ ወይልህቅ፡ በብዙኃን፡ እለ፡ ሄሜኔዎስ፡ ወፊሎጦስ። እለ፡ አውከኩ፡ እምጽድቅ፡ ወይብሉ፡ ወድአ፡ ኮነ፡ ትንሣኤ፡ ምዉታን። ወይገፈትዑ፡ ሃይማኖቶሙ፡ ለብዙኃን። ወዘሰ፡ ጽኑዕ፡ በመሠረተ፡ እግዚአብሔር፡ ይቀውም፡ እንዘ፡ ቦ፡ ዘንተ፡ ማዕተበ። ወየአምሮሙ፡ እግዚአብሔር፡ ለእሊኣሁ፡ ወይርሕቅ፡ እምዐመፃ፡ ኵሉ፡ ዘይሰሚ፡ ስመ፡ እግዚአብሔር። ውስተ፡ ቤትኒ፡ ዐቢይ፡ አኮ፡ ባሕቲቱ፡ ንዋየ፡ ወርቅ፡ ወብሩር። ዓዲ፡ ቦ፡ ዘዕፅኒ፡ ወዘልሕኵትኒ፡ ቦ፡ ዘለክብርኒ፡ ወቦ፡ ዘለኀሳርኒ። ወእመ፡ ቦ፡ ዘአንጽሐ፡ ርእሶ፡ እምዝ፡ እኩይ፡ ይከውን፡ ንዋየ፡ ክብር፡ ቅዱሰ። ወባቊዐ፡ ለመልእክተ፡ እግዚኡ፡ ወድልወ፡ ለኵሉ፡ ምግባረ፡ ሠናይ። በእንተ፡ ርኂቅ፡ እምኃጣውእ ጕየያ፡ ለፍትወተ፡ ውርዙት፡ ወዴግና፡ ለጽድቅ፡ ወለሃይማኖት። ተፋቅሮ፡ ወሰላም፡ ምስለ፡ ኵሎሙ፡ እለ፡ ይጼውዕዎ፡ ለእግዚአብሔር፡ በልብ፡ ንጹሕ። እበዮ፡ ለነገረ፡ እበድ፡ ወሥላቅ፡ ወተኃሥሦ፡ ከንቱ። ተኣምር፡ ከመ፡ መንሱተ፡ ያመጽእ። ወገብረ፡ እግዚአብሔርሰ፡ ኢይትገአዝ፡ አላ፡ ከመ፡ ሕፃን፡ የዋሀ፡ ይከውን፡ ምስለ፡ ኵሉ። ወመምህረ፡ ወመስተዓግሠ፡ እምኵሉ፡ ወይጌሥጽ፡ በየውሀት፡ ለእለ፡ ይትቃረኑ። እመ፡ ቦ፡ ከመ፡ የሀቦሙ፡ እግዚአብሔር፡ ይነስሑ፡ ወያእምርዋ፡ ለጽድቅ። ወያንቅሑ፡ ነፍሶሙ፡ እመሥገርተ፡ ሰይጣን፡ እስመ፡ ወድአ፡ አሥገሮሙ፡ ለተሊወ፡ ፈቃዱ።

ምዕራፍ 3 በእንተ፡ ደኃሪ፡ መዋዕል ወዘንተ፡ ባሕቱ፡ አእምር፡ ከመ፡ በደኃሪ፡ መዋዕል፡ ይመጽእ፡ ዓመታት፡ እኩያት። ወይከውኑ፡ ሰብእ፡ መፍቀርያነ፡ ርእሶሙ፡ ወመፍቀርያነ፡ ፈጊዕ፡ ወንዋይ። ነባብያን፡ ዐላውያን፡ ዝኁራን፡ ፅሩፋን፡ ዐላውያነ፡ አዝማዲሆሙ። እለ፡ አልቦሙ፡ አኰቴት፡ ውፁኣን፡ እምጽድቅ። እለ፡ አልቦሙ፡ ምሕረት፡ ሥሑጻን፡ ጸላእያነ፡ ሠናይ። ዝሉፋን፡ ጽሉኣን፡ እለ፡ ያበድሩ፡ ሐውዘ፡ እምፍቅረ፡ እግዚአብሔር። ይትሜሰሉ፡ ጻድቃነ፡ ወይክሕድዎ፡ ለኀይለ፡ ጽድቅ። ወለእለ፡ ከመ፡ ዝ፡ ተገሐሦሙ። እስመ፡ እሙንቱ፡ እለ፡ ይትባውኡ፡ አብያተ፡ ሰብእ። ወይፄውውዎን፡ ለአንስት፡ እለ፡ ፅፉራት፡ በኀጢአት፡ ወያወርዳ፡ ውስተ፡ ብዙኀ፡ ፍትወት። ወዘልፈ፡ ይትጌሠጹ፡ ወኢየአምርዋ፡ ግሙራ፡ ለጽድቅ። ከመ፡ ኢያኔስ፡ ወኢያንበሬስ፡ እለ፡ ተቃወምዎ፡ ለሙሴ። ከማሁ፡ እሉሂ፡ ተቃወምዋ፡ ለጽድቅ። ሰብእ፡ ሙሱናነ፡ ልብ፡ ወንፉቃነ፡ ሃይማኖት፡ ወኢይትሌዐሉ። እስመ፡ ፈድፈደት፡ እበዶሙ፡ ወተዐውቀት፡ ለኵሉ፡ ከመ፡ እበዶሙ፡ ለእልክቱ፡ ዓዲ። በእንተ፡ ተሊዎተ፡ መምህራን ወአንተሰ፡ ተለውከ፡ ትምህርትየ፡ ወተመሰል፡ በግዕዝየ። በዘመሀርኩከ፡ በሃይማኖት፡ ወበተፋቅሮ፡ ወበትዕግሥት፡ ወበኅድአት፡ ወበተሰዶ፡ ወበሕማም። ተኣምር፡ መጠነ፡ ረከበኒ፡ በአንጾኪያ፡ ወበኢቆንያ፡ ወበልስጥራን። መጠነ፡ ተዐገሥኩ፡ ተሰዶ። ወእምኵሉ፡ አድኀነኒ፡ እግዚአብሔር። ወኵሎሙ፡ እለ፡ ይፈቅዱ፡ ይሕየዉ፡ በጽድቀ፡ ኢየሱስ፡ ክርስቶስ፡ የሐምሙ። ወሰብእሰ፡ እኩያን፡ ይትሌዐሉ፡ ውስተ፡ እንተ፡ ተአኪ፡ ወይስሕቱ፡ ወያስሕቱ። ወአንተሰ፡ ሀሉ፡ በዘተምህርከ፡ ወተአመንከ። በእንተ፡ መጽሐፍ፡ ቅዱስ ተኣምር፡ በኀበ፡ መኑ፡ ተምህርከ። እምን፡ እስከ፡ መጽሐፈ፡ ቅዱሰ። ዘይክል፡ አሕይዎተከ፡ በሃይማኖተ፡ ኢየሱስ፡ ክርስቶስ። ወኵሉ፡ መጽሐፍ፡ ዘበመንፈሰ፡ እግዚአብሔር፡ ተጽሕፈ። ይበቊዕ፡ ለኵሉ፡ ትምህርት፡ ወተግሣጽ፡ ወአርትዖ፡ ወጥበብ፡ ወጽድቅ። ከመ፡ ይትገሠጽ፡ ብእሴ፡ እግዚአብሔር፡ ውስተ፡ ኵሉ፡ ምግባረ፡ ሠናይ።

ምዕራፍ 4 በእንተ፡ ትእዛዝ፡ ወትንቢት ወእኤዝዘከ፡ በቅድመ፡ እግዚአብሔር፡ ወእግዚእነ፡ ኢየሱስ፡ ክርስቶስ። ዘሀለዎ፡ ይኰንን፡ ሕያዋነ፡ ወምዉታነ፡ አመ፡ ይመጽእ፡ በመንግሥቱ። ከመ፡ ትስብክ፡ ቃሎ፡ ቀዊመከ፡ በድቡት፡ በጊዜሁ፡ ወዘእንበለ፡ ጊዜሁ። ገሥጽ፡ ወተዛለፍ፡ ናዝዝ፡ ወየውህ፡ እንዘ፡ ትትዔገሥ፡ በኵሉ፡ ወትሜህር። እስመ፡ ይበጽሕ፡ ጊዜሁ፡ አመ፡ የአብይዋ፡ ለትምህርተ፡ ሕይወት። ወየሐውሩ፡ በፍትወቶሙ፡ ወያመጽኡ፡ መምህራነ፡ ለርእሶሙ፡ በሁከተ፡ እዘኒሆሙ። ወይመይጡ፡ እዘኒሆሙ፡ እምጽድቅ፡ ወያመጽኡ፡ ካልአ፡ ትምህርተ። ወይትመየጡ፡ ኀበ፡ መሐድምት። ወአንተሰ፡ ንቃሕ፡ ወጥበብ፡ በኵሉ፡ ወጻሙ፡ ወግበር፡ ምግባረ፡ ወንጌላዌ። ወኩን፡ ወፈጽም፡ መልእክተከ። በእንተ፡ ፍጻሜ፡ ስምዑ፡ ለጳውሎስ ወአንሰ፡ ወዳእኩ፡ ወሠለጥኩ፡ ወበጽሐኒ፡ ዕድሜየ፡ ለአዕርፎ። ሠናየ፡ ገድለ፡ ተጋደልኩ፡ በድርየኒ፡ ፈጸምኩ፡ ወሃይማኖትየኒ፡ ዐቀብኩ። እንከሰ፡ ጽኑሕ፡ ሊተ፡ አክሊለ፡ ጽድቅ። ዘየዐስየኒ፡ እግዚአብሔር፡ ይእተ፡ ዕለተ፡ መኰንነ፡ ጽድቅ። ወአኮ፡ ለባሕቲትየ፡ አላ፡ ለኵሎሙ፡ እለ፡ ያፈቅሩ፡ ምጽአተ፡ ዚኣሁ። አስተፋጥን፡ ትምጻእ፡ ኀቤየ፡ ፍጡነ። ዴማስ፡ ኀደገኒ፡ ወአፍቀሮ፡ ለዝንቱ፡ ዓለም፡ ዘይእዜ፡ ወሖረ፡ ተሰሎንቄ። ወቆሬቄስኒ፡ ገላትያ፡ ወቲቶ፡ ድልማጥያ፡ ሉቃስ፡ ባሕቲቱ፡ ምስሌየ። ወአምጽኦ፡ ምስሌከ፡ ለማርቆስ፡ እስመ፡ ይበቊዐኒ፡ ለመልእክት። ወፈነውክዎ፡ ለጢኪቆስ፡ ኤፌሶን። ወፌሎነኒ፡ ዘመጽሐፍ፡ ዘኀደጉ፡ በጢሮአስ፡ ኀበ፡ አክርጳ። ተማላእ፡ ምስሌከ፡ ወዓዲ፡ መጻሕፍተ፡ ወረቀ። ተግሣጽ፡ ወሥርየት እለ፡ እስክንድሮስ፡ ነሃቢ፡ ብዙኀ፡ ሣቀየኒ። ይፍድዮ፡ እግዚአብሔር፡ በከመ፡ ምግባሩ። ወአንተኒ፡ ወልድየ፡ ተዐቀቦ፡ እስመ፡ ፈድፋደ፡ ተቃወሞ፡ ለነገርነ። ወበቀዳሚ፡ ነገርየ፡ አልቦ፡ ዘኀብረ፡ ምስሌየ። ዳእሙ፡ ኵሎሙ፡ ኀደጉኒ፡ ወይሥረይ፡ ሎሙ፡ ዘንተ። እስመ፡ እግዚአብሔር፡ ቆመ፡ ሊተ፡ ወአጽንዐኒ፡ ከመ፡ ይእመኑ፡ በስብከተ፡ ዚኣየ። ወይስምዑ፡ ኵሎሙ፡ አሕዛብ፡ ከመ፡ ድኅንኩ፡ እምአፈ፡ አንበሳ። ወያድኅነኒ፡ እግዚአብሔር፡ እምኵሉ፡ ግብር፡ እኩይ። ወያሐይወኒ፡ ውስተ፡ መንግሥቱ፡ ዘበሰማያት፡ ውእቱ። ዘሎቱ፡ ስብሐት፡ ለዓለመ፡ ዓለም፡ አሜን። ማኅተመ፡ መልእክት አምኀ፡ ጵርስቅላ፡ ወአቂላ፡ ወቤተ፡ ሄኔሴፎሩ። ኤርስጦስ፡ ነበረ፡ ቆሮንቶስ፡ ወለጥሮፊሞስ፡ ኀደግዎ፡ በሀገረ፡ መሊጡ፡ ይደዊ። አስተፋጥን፡ ትምጻእ፡ ኀቤየ፡ እምቅድመ፡ ክረምት። ይኤምኁከ፡ ኤውግሎስ፡ ወጱዴስ፡ ወሊኖስ፡ ወቀላውድያ፡ ወኵሎሙ፡ አኀዊነ። ወእግዚእነ፡ ኢየሱስ፡ ክርስቶስ፡ የሀሉ፡ ምስለ፡ መንፈስከ፡ ወጸጋሁ፡ ምስሌክሙ፡ አሜን።