Epistle to the Hebrews

Introduction

Epistle Text of the EOTC printed Bible

ምዕራፍ 1 በእንተ፡ ምሥጢረ፡ ሥጋዌ በብዙኅ፡ ነገር፡ ወበብዙኅ፡ መክፈልት፡ አይድዐ፡ እግዚአብሔር፡ ለአበዊነ፡ በነቢያቲሁ፡ እምትካት። ወበደኃሪሰ፡ መዋዕል፡ ነገረነ፡ በወልዱ፡ ዘረሰዮ፡ ወራሴ፡ ለኵሉ። ወቦቱ፡ ፈጠሮ፡ ለኵሉ። ዘውእቱ፡ ብርሃነ፡ ስብሐቲሁ፡ ወአምሳለ፡ አርአያሁ፡ ዘይእኅዝ፡ ኵሎ፡ በኀይለ፡ ቃሉ። ወውእቱ፡ በህላዌሁ፡ ገብረ፡ በዘያነጽሕ፡ ኀጢአተነ። ወነበረ፡ በየማነ፡ ዕበዩ፡ በሰማያት። ወተለዐለ፡ እመላእክት፡ በዘመጠነ፡ ዝ፡ ኀየሰ። ወወረሰ፡ ስመ፡ ዘየዐቢ፡ እምአስማቲሆሙ፡ ወይከብር። ለመኑ፡ እመላእክቲሁ፡ ይቤሎ፡ እመአመ፡ ኮነ፡ ወልድየ፡ አንተ። ወአነ፡ ዮም፡ ወለድኩከ፡ ወካዕበ፡ ይቤ። አነ፡ እከውኖ፡ አባሁ፡ ወውእቱኒ፡ ይከውነኒ፡ ወልድየ። ወአመ፡ ቦአ፡ በኵር፡ ውስተ፡ ዓለም፡ ይቤ፡ ይሰግዱ፡ ሎቱ፡ ኵሎሙ፡ መላእክተ፡ እግዚአብሔር። ወበእንተ፡ መላእክቲሁ፡ ይቤ፡ ዘይሬስዮሙ፡ ለመላእክቲሁ፡ መንፈሰ። ወለእለ፡ ይትለአክዎ፡ ነደ፡ እሳት። ወበእንተ፡ ወልዱሰ፡ ይቤ፡ መንበርከ፡ እግዚኦ፡ ለዓለመ፡ ዓለም፡ በትረ፡ ጽድቅ፡ ወበትረ፡ መንግሥትከ። አፍቀርከ፡ ጽድቀ፡ ወዐመፃ፡ ጸላእከ። ወበእንተ፡ ዝ፡ ቀብዐከ፡ እግዚአብሔር፡ አምላክከ። ቅብዐ፡ ትፍሥሕት፡ ዘይኄይስ፡ እምእለ፡ ከማከ። ወካዕበ፡ ይቤ፡ አንተ፡ እግዚኦ፡ አቅደምከ፡ ሣርሮታ፡ ለምድር። ወግብረ፡ እደዊከ፡ እማንቱ፡ ሰማያት። እማንቱሰ፡ ይትሀጐላ፡ ወአንተሰ፡ ትሄሉ፡ ወኵሉ፡ ከመ፡ ልብስ፡ ይበሊ። ወከመ፡ ሞጣሕት፡ ትጠውሞሙ፡ ወይትዌለጡ። ወአንተሰ፡ አንተ፡ ክመ፡ ወዓመቲክኒ፡ ዘኢየኀልቅ። ለመኑ፡ እመላእክቲሁ፡ ይቤሎ፡ እምአመ፡ ኮነ፡ ንበር፡ በየማንየ። እስከ፡ አገብኦሙ፡ ለጸላእትከ፡ ታሕተ፡ መከየደ፡ እገሪከ። አኮኑ፡ ኵሎሙ፡ መላእክት፡ መንፈስ፡ እሙንቱ። ወይትፌነዉ፡ ለመልእክት፡ በእንተ፡ እለ፡ ሀለዎሙ፡ ይረሱ፡ ሕይወተ፡ ዘለዓለም።

ምዕራፍ 2 በእንተ፡ ተዐቅቦ፡ እምወዲቅ ወበእንተ፡ ዝንቱ፡ ርቱዕ፡ ንትዐቀብ፡ ፈድፋደ፡ እለ፡ ሰማዕነ። ወኢንትሀየይ፡ ከመ፡ ኢንደቅ። ወሶበኒ፡ ኮነ፡ ቃል፡ ዘይቤ፡ በእንተ፡ መላእክት፡ እምጸንዐ፡ ወእምተጠየቀ። ወኵሉ፡ ዘሰምዐ፡ ወዘዐለወ፡ ወአበየ፡ እምተኰነነ፡ በርቱዕ። እፎ፡ እንከ፡ ናመስጥ፡ ንሕነ፡ ዘመጠነ፡ ዝ፡ ሕይወተ፡ አስቲተነ። እንተ፡ ቀደመት፡ ተነግሮ፡ በኀበ፡ እግዚእነ። ወተጠየቀት፡ በኀቤነ፡ እምኀበ፡ እለ፡ ሰምዑ፡ እምኔሁ። እንዘ፡ እግዚአብሔር፡ ያርኢ፡ ስምዖ፡ ሎሙ። ወያጸድቅ፡ ነገሮሙ፡ በትእምርት፡ ወበመንክር፡ ወዘዘ፡ ዚኣሁ፡ ኀይል፡ ብዙኀ፡ ላዕለ፡ እደዊሆሙ። ዘከመ፡ ከፈሎሙ፡ መንፈስ፡ ቅዱስ፡ በዘውእቱ፡ ፈቀደ። ወአኮ፡ ለመላእክት፡ ዘአግረረ፡ ዓለመ፡ ዘይመጽእ፡ ዘበእንቲኣሁ፡ ንነግር። በእንተ፡ ክርስቶስ፡ ወሕማማቲሁ ወባሕቱ፡ በከመ፡ ስምዐ፡ ኮነ፡ መጽሐፍ። ወይቤ፡ ምንትኑ፡ ውእቱ፡ ሰብእ፡ ከመ፡ ትዝክሮ። ወምንትኑ፡ ዕጓለ፡ እመሕያው፡ ከመ፡ ተሐውጾ። ሕቀ፡ አሕጸጽኮ፡ እመላእክቲከ፡ ክብረ፡ ወስብሐተ፡ ከለልኮ። ወሤምኮ፡ ውስተ፡ ኵሉ፡ ግብረ፡ እደዊከ። ወኵሎ፡ አግረርከ፡ ሎቱ፡ ታሕተ፡ እገሪሁ። ወብሂለ፡ ቃሉሰ፡ አግረረ፡ ሎቱ፡ ኵሎ። እስመ፡ አልቦ፡ ዘኀደገ፡ ዘኢያግረረ፡ ሎቱ። ወይእዜሰ፡ ኢንሬኢ፡ ከመ፡ ኵሎ፡ አግረረ፡ ሎቱ። ወዘአሕጸጾሰ፡ ሕቀ፡ እመላእክቲሁ፡ ናሁ፡ ንሬኢ፡ ከመ፡ ኢየሱስ፡ ውእቱ፡ በእንተ፡ ሕማመ፡ ሞቱ። ክብረ፡ ወስብሐተ፡ ዘተከለለ፡ እስመ፡ በጸጋ፡ እግዚአብሔር። በእንተ፡ ኵሉ፡ ይጥዕሞ፡ ለሞት። ወይደልዎ፡ ለውእቱ፡ ዘበእዴሁ፡ ኵሉ፡ ወዘእምኔሁ፡ ኵሉ። ወብዙኃነ፡ ውሉደ፡ አብአ፡ ውስተ፡ ስብሐት፡ መልአከ፡ ሕይወቶሙ፡ ከመ፡ ይፈጽም፡ በሕማማት። እስመ፡ ውእቱ፡ ዘቀደሶሙ፡ ለእሙንቱ፡ ወእለሂ፡ ተቀደሱ፡ ኅቡረ፡ እምአሐዱ። ወበእንተ፡ ዝ፡ ኢየኀፍር፡ አኀውየ፡ ብሂሎቶሙ። ወይቤ፡ አየድዖሙ፡ ስመከ፡ ለአኀውየ፡ ወበማእከለ፡ ማኅበር፡ እሴብሐከ። ወካዕበ፡ ይቤ፡ ነየ፡ አነ፡ ወደቂቅ፡ ዘወሀበኒ፡ እግዚአብሔር። ወካዕበ፡ ይቤ፡ አንሰ፡ እትዌከል፡ ቦቱ፡ እስመ፡ ደቂቅ፡ ተሳተፉ፡ በሥጋ፡ ወደም። ውእቱኒ፡ ተሳተፈ፡ በዝንቱ፡ ወከመ፡ ቢጾሙ፡ ኮነ፡ ሎሙ። ከመ፡ በሞቱ፡ ይስዐሮ፡ ለመልአከ፡ ሞት፡ ዘውእቱ፡ ሰይጣን። ወያዕርፎሙ፡ ለኵሎሙ፡ እለ፡ በፍርሀተ፡ ሞት፡ ተኰነኑ፡ በኵሉ፡ መዋዕለ፡ ሕይወቶሙ። ወተቀንዩ፡ ለግብርናት። እስመ፡ አኮ፡ እመላእክት፡ ዘነሥኦ፡ ለዘነሥኦ፡ ዘእንበለ፡ ዳእሙ፡ እምዘርዐ፡ አብርሃም። ወእንበይነ፡ ዝንቱ፡ ርቱዕ፡ ይትመሰሎሙ፡ ለአኀዊሁ፡ በኵሉ፡ ከመ፡ ይኩኖሙ፡ መሓሬ። ወሊቀ፡ ካህናት፡ ምእመነ፡ ዘመንገለ፡ እግዚአብሔር፡ ከመ፡ ይሥረይ፡ ኀጢአተ፡ ሕዝብ። እስመ፡ በዘአመከርዎ፡ ወአሕመምዎ፡ ክህለ፡ ረዲኦቶሙ፡ ለሕሙማን።

ምዕራፍ 3 በእንተ፡ ቤት፡ ወበዐለ፡ ቤት ወይእዜኒ፡ አኀዊነ፡ ቅዱሳን፡ ወጽዉዓን፡ እምሰማይ፡ በጽዋዔ። ከማነ፡ ርእይዎ፡ ለዝንቱ፡ ሐዋርያክሙ፡ ሊቀ፡ ካህናት። ዘኪያሁ፡ ትትአመኑ፡ ኢየሱስ፡ ክርስቶስ። ጻድቅ፡ ወምእመን፡ ለዘፈነዎ፡ በከመ፡ ሙሴ፡ ውእቱሂ፡ ላዕለ፡ ኵሉ፡ ቤቱ። ወባሕቱ፡ የዐቢ፡ ክብሩ፡ እምዘሙሴ፡ ፈድፋደ። በከመ፡ የዐቢ፡ ክብሩ፡ ለበዐለ፡ ቤት፡ እምነ፡ ቤቱ። እስመ፡ ለኵሉ፡ ቤት፡ ሰብእ፡ ይገብሮ፡ ወለኵሉሰ፡ እግዚአብሔር፡ ገባሪሁ። ወሙሴኒ፡ ምእመን፡ በኵሉ፡ ቤቱ፡ ከመ፡ መጋቢሁ። ከመ፡ ይኩኖ፡ ስምዖ፡ በኵሉ፡ ዘነበበ፡ ግብር፡ ዘሀለወ፡ ይዘከር፡ በእዴሁ። ወክርስቶስሰ፡ ከመ፡ ወልድ፡ ውስተ፡ ቤቱ፡ ወንሕነ፡ ውእቱ፡ ቤቱ፡ እለ፡ አመነ። ለእመ፡ ዐቀብነ፡ ሞገሰነ፡ ወምክሐነ፡ ጽኑሕ፡ ተስፋነ፡ ለዝሉፉ። በእንተ፡ ዕረፍት፡ ዘሕዝበ፡ እግዚአብሔር እስመ፡ ከመ፡ ዝ፡ ይቤ፡ መንፈስ፡ ቅዱስ፡ ዮም። ለእመ፡ ሰማዕክሙ፡ ቃሎ፡ ኢታጽንዑ፡ ልበክሙ። ከመ፡ አመ፡ አምረርዎ፡ በዕለተ፡ አመከርዎ፡ በገዳም። ዘአመከሩኒ፡ አበዊክሙ፡ ፈተኑኒ፡ ወርእዩ፡ ምግባርየ፡ አርብዓ፡ ዓመተ። በእንተ፡ ዝንቱ፡ ተቈጣዕክዎሙ፡ ለይእቲ፡ ትውልድ። ወእቤ፡ ዘልፈ፡ ይስሕት፡ ልቦሙ፡ ወእሙንቱሰ፡ ኢያእመሩ፡ ፍናውየ። በከመ፡ መሐልኩ፡ በመዓትየ፡ ከመ፡ ኢይበውኡ፡ ውስተ፡ ዕረፍትየ። ዑቁ፡ እንከ፡ አኀዊነ፡ ኢይትረከብ፡ በላዕለ፡ አሐዱ፡ እምኔክሙ፡ ልብ፡ እኩይ። ሕጹጸ፡ ሃይማኖት፡ ወኑፉቅ፡ ዘያርሕቀክሙ፡ እምእግዚአብሔር፡ ሕያው። አላ፡ ሕቱ፡ ነፍሰክሙ፡ ኵሎ፡ አሚረ፡ አምጣነ፡ ሀሎ፡ ዕለት፡ ዘይትበሀል፡ ዮም። ከመ፡ ኢይጽናዕ፡ መኑሂ፡ እምኔክሙ፡ ውስተ፡ ስሒት፡ ዘኀጢአት። እስመ፡ ምስለ፡ ክርስቶስ፡ ኮነ። ለእመ፡ አዝለፍነ፡ ዐቂበ፡ ዘቀዲሙ፡ ሥርዐተነ፡ እስከ፡ ፍጻሜ፡ በዛቲ፡ ጽድቅ። እስመ፡ ይቤ፡ ዮም፡ ለእመ፡ ሰማዕክሙ፡ ቃሎ፡ ኢታጽንዑ፡ ልበክሙ፡ ለአምርሮቱ። ወእለ፡ መኑ፡ እለ፡ ሰምዑ፡ ወአምረርዎ። አኮኑ፡ ኵሎሙ፡ እለ፡ ወፅኡ፡ በእደ፡ ሙሴ፡ እምግብጽ። ወመኑ፡ እሙንቱ፡ እለ፡ ተቈጥዖሙ፡ አርብዓ፡ ዓመተ። አኮኑ፡ እለ፡ አበሱ፡ ወወድቀ፡ አብድንቲሆሙ፡ ውስተ፡ ገዳም። ወላዕለ፡ መኑ፡ መሐለ፡ ከመ፡ ኢይበውኡ፡ ውስተ፡ ዕረፍቱ፡ ዘእንበለ፡ ለዐላውያን። ወናሁ፡ ንሬኢ፡ ከመ፡ ኢክህሉ፡ በዊአ፡ እስመ፡ ኢአምኑ።

ምዕራፍ 4 በእንተ፡ ሰንበት ንፍራህ፡ እንከ፡ እምእለ፡ ሰምዑ፡ ወኢንኅድግ፡ ትእዛዞ። ከመ፡ ንባእ፡ ውስተ፡ ዕረፍቱ። ወለእመ፡ ቦ፡ እንጋ፡ ዘይትረከብ፡ እምኔክሙ፡ ውስተ፡ ስሒት፡ ዘልማድ፡ ወይጸንዕ። ኢይምሰሎ፡ ዘየኀድግዎ፡ ከመ፡ ይባእ፡ ውስተ፡ ዕረፍቱ። እስመ፡ ስሙዓን፡ ንሕነ፡ ከመ፡ ሰምዑ፡ እልክቱ። ወባሕቱ፡ ለእልክቱሰ፡ ኢበቊዖሙ፡ ቃል፡ ዘሰምዑ። እስመ፡ ኢተቶስሐ፡ ልቦሙ፡ በሃይማኖት፡ ምስለ፡ እለ፡ ሰምዑ። ንበውእ፡ ንሕነሰ፡ ውስተ፡ ዕረፍቱ፡ እስመ፡ አመነ። ወእፎ፡ እንከ፡ ይቤ፡ በከመ፡ መሐልኩ፡ በመዓትየ። ከመ፡ ኢይበውኡ፡ ውስተ፡ ዕረፍትየ። ወናሁ፡ ዝንቱ፡ ውእቱ፡ ምግባሩ፡ ለእግዚአብሔር፡ ዘእምፍጥረተ፡ ዓለም፡ ዘኮነ። በከመ፡ ይቤ፡ በእንተ፡ ሰንበት፡ ወአዕረፈ፡ እግዚአብሔር፡ በዕለተ፡ ሰንበት፡ እምኵሉ፡ ግብሩ። ወካዕበ፡ ይቤ፡ ኢይበውኡ፡ ውስተ፡ ዕረፍትየ። እስመ፡ ቦ፡ ሰብእ፡ እለ፡ ቦሙ፡ ፍኖት፡ ከመ፡ ይባኡ፡ ህየ። ወቀደምትሰ፡ ሰሚዖሙ፡ ኢቦኡ፡ እስመ፡ ክሕዱ። ወእንበይነ፡ መኑ፡ ይብል፡ ከማሁ፡ ካልአ፡ ዕለተ፡ እምድኅረ፡ ጕንዱይ፡ መዋዕል። በከመ፡ ተጽሕፈ፡ ዘቀዳሚ፡ እስመ፡ ይቤ፡ ዳዊት። ዮም፡ ለእመ፡ ሰማዕክሙ፡ ቃሎ፡ ኢታጽንዑ፡ ልበክሙ። ሶበሰ፡ ሎሙ፡ አዕረፎሙ፡ ኢያሱ። እምኢይቤ፡ በእንተ፡ ካልእ፡ እምድኅረ፡ እማንቱ፡ መዋዕል። ተዐውቀኬ፡ ከመ፡ ሀሎ፡ ዕረፍት፡ ኀበ፡ ይበውኡ፡ ሕዝበ፡ እግዚአብሔር። ቀዋሚ፡ ዘይነብር፡ እስመ፡ ዘቦአ፡ ውስተ፡ ዕረፍት። ናሁኬ፡ አዕረፈ፡ ውእቱ፡ እምኵሉ፡ ግብሩ፡ በከመ፡ አዕረፈ፡ እግዚአብሔር፡ እምኵሉ፡ ግብሩ። ናስተፋጥን፡ እንከ፡ ንባእ፡ ውስተ፡ ዕረፍቱ። ከመ፡ ኢንደቅ፡ ከማሆሙ፡ ለእሙንቱ፡ እለ፡ ሀለዉ። እስመ፡ ሕያው፡ ቃለ፡ እግዚአብሔር፡ ወጽኑዕ። ወይበልሕ፡ እምኵሉ፡ ሰይፍ፡ ዘክልኤ፡ አፉሁ። ወይፈልጥ፡ ነፍሰ፡ እመንፈስ፡ ወይሌሊ፡ ሥርወ፡ እመሌሊት። ወየኀሥሥ፡ ኅሊና፡ ወፍትወተ፡ ወምክረ፡ ልብ። ወአልቦ፡ ዘተፈጥረ፡ ዘኢኮነ፡ ክሡተ፡ በቅድሜሁ። ወኵሉ፡ ክሡት፡ ወስጡሕ፡ በቅድመ፡ አዕይንቲሁ። ወሎቱ፡ ናወሥእ፡ በእንተ፡ ኵሉ፡ ዘገበርነ። በእንተ፡ ሊቀ፡ ካህናት፡ ዘእምሰማያት ወብነ፡ ሊቀ፡ ካህናት፡ ዐቢይ፡ ኢየሱስ፡ ክርስቶስ፡ ወልደ፡ እግዚአብሔር፡ ዘተለዐለ፡ እምሰማያት። ናጽንዕ፡ እንከ፡ አሚነ፡ ቦቱ። እስመ፡ ኢኮነ፡ ሊቀ፡ ካህናቲነ፡ ዘኢይክል፡ ሐሚመ፡ ለድካምነ። ዳእሙ፡ ምኩር፡ በኵሉ፡ አምሳሊነ፡ ዘእንበለ፡ ኀጢአት፡ ባሕቲታ። ንቅረብ፡ እንከ፡ በሞገስ፡ ኀበ፡ መንበረ፡ ጸጋሁ፡ ከመ፡ ንንሣእ፡ ሣህሎ። ወንርከብ፡ ጸጋሁ፡ ይኩነነ፡ ረድኤተ፡ ለጊዜ፡ ምንዳቤነ።

ምዕራፍ 5 እስመ፡ ኵሉ፡ ሊቀ፡ ካህናት፡ እምሰብእ፡ ይትነሣእ። ወበእንተ፡ ሰብእ፡ ይሠየም፡ ለኀበ፡ እግዚአብሔር። ከመ፡ ያብእ፡ ቊርባነ፡ ወመሥዋዕተ፡ ዘእንበለ፡ ኀጢአት። ወየሐምም፡ ሕቀ፡ ወይክል፡ ሐሚመ፡ ምስለ፡ እለ፡ ስሕቱ፡ በእበዶሙ። ወበእንተ፡ ዘኮነ፡ ለሊሁ፡ ድኩመ። ወእንበይነ፡ ዝ፡ ርቱዕ፡ ከመ፡ በእንተ፡ ሕዝብ። ከማሁ፡ ለርእሱኒ፡ ያብእ፡ ዘበእንተ፡ ኀጢአት። ወአልቦ፡ ዘይነሥእ፡ ለርእሱ፡ ክብረ፡ ዘእንበለ፡ ዘጸውዖ፡ እግዚአብሔር፡ ዳእሙ፡ በከመ፡ አሮን። ከማሁ፡ ክርስቶስኒ፡ አኮ፡ ርእሶ፡ ዘንእደ፡ ከመ፡ ይኩን፡ ሊቀ፡ ካህናት። ዳእሙ፡ ለሊሁ፡ ዘይቤሎ፡ ወልድየ፡ አንተ፡ ወአነ፡ ዮም፡ ወለድኩከ። ወካዕበ፡ ይቤ፡ አንተ፡ ካህኑ፡ ለዓለም፡ በከመ፡ ሢመቱ፡ ለመልከጼዴቅ። በእንተ፡ ጸሎት፡ ወስኢል ወአመ፡ ሀሎ፡ በመዋዕለ፡ ሥጋሁ፡ ጸሎተ፡ ወስኢለ። አብአ፡ በዐቢይ፡ ገዓር፡ ወአንብዕ፡ ኀበ፡ ዘይክል፡ አድኅኖቶ፡ እሞት፡ ወሰምዖ፡ ጽድቆ። ወከዊኖ፡ ወልደ፡ አእመረ፡ በእንተ፡ ዘሐመ፡ ተአዚዞ። ወፈጺሞ፡ ውእቱ፡ ኮነ፡ ዐሳዬ፡ ሕይወት፡ ለኵሎሙ። እለ፡ ይትኤዘዙ፡ ሎቱ፡ ወመድኅነ፡ ዘለዓለም። ወሰመዮ፡ እግዚአብሔር፡ ሊቀ፡ ካህናት፡ ዘለዓለም፡ በከመ፡ ሢመቱ፡ ለመልከጼዴቅ። እስመ፡ ለዝንቱሰ፡ ዕጹብ፡ ነገሩ፡ ወኢይትከሀል፡ ይፈክርዎ። እስመ፡ ድንዙዛነ፡ ኮንክሙ፡ እዘኒክሙ፡ እምሰሚዕ። እንዘ፡ ርቱዕ፡ ለክሙ፡ ትኩኑ፡ መምህራነ፡ በእንተ፡ ዘጐንደይክሙ። እምአመ፡ አመንክሙ፡ ውስተ፡ ትምህርት። ወዓዲክሙ፡ እስከ፡ ይእዜ፡ ትፈቅዱ፡ ይምሀሩክሙ፡ ቀዳሜ፡ መጽሐፍ፡ መቅድመ፡ ቃሉ፡ ለእግዚአብሔር። ወትፈቅዱ፡ ሐሊበ፡ ይውግዑክሙ፡ ወአኮ፡ መብልዐ፡ ጽኑዐ። እስመ፡ ኵሉ፡ ዘይትወጋዕ፡ ሐሊበ፡ ሕፃን፡ ውእቱ። ወኢየኀሥሥ፡ ያእምር፡ ቃለ፡ ጽድቅ፡ ወመብልዕሰ፡ ጽኑዕ፡ ለልሂቅ፡ ውእቱ። ዘይለምድ፡ ተኀሥሦ፡ በዘይፈልጥ፡ ሠናየ፡ ወእኩየ።

ምዕራፍ 6 በእንተ፡ ንስሓ ወበእንተ፡ ዝንቱ፡ ኀዲገነ፡ ጥንተ፡ ነገሩ፡ ለክርስቶስ፡ ንብጻሕ፡ ኀበ፡ ፍጻሜሁ። ዑቁ፡ እንከ፡ ዳግመ፡ መሠረተ፡ ካልአ፡ ኢትኅሥሡ። በዘትኔስሑ፡ እምግብር፡ ምዉት፡ ውስተ፡ ሐዲስ፡ ሃይማኖት፡ ዘእግዚአብሔር። ወትምህርተ፡ ጥምቀት፡ ወሢመተ፡ እድ፡ ወትንሣኤ፡ ምዉታን፡ ወኵነኔ፡ ዘለዓለም። ወዘንተኒ፡ እምገበርነ፡ ሶበ፡ ያበውሕ፡ እግዚአብሔር። ወባሕቱ፡ ኢይትከሀል፡ እምድኅረ፡ ነሥኡ፡ ጥምቀተ። ወጥዕሙ፡ ጸጋሁ፡ ዘእምሰማያት፡ ወተሳተፉ፡ በመንፈስ፡ ቅዱስ። ወጥዕሙ፡ ቃለ፡ እግዚአብሔር፡ ሠናየ፡ ወኀይለ፡ ዓለም፡ ዘይመጽእ። ለእመ፡ ይደቁ፡ የሐድስዋ፡ ካዕበ፡ ለንስሓሆሙ። ወይስቅልዎ፡ ሎሙ፡ ለወልደ፡ እግዚአብሔር፡ ወይመንንዎ። ምድርኒ፡ ለእመ፡ ሰትየት፡ ዝናመ፡ ዘይመጽእ፡ ላዕሌሃ፡ ትወልድ፡ ሣዕረ፡ ሠናየ። ሶቤሃ፡ ዘበእንቲኣሁ፡ ሐረስዋ፡ ወትነሥእ፡ በረከተ፡ እምኀበ፡ እግዚአብሔር። ወእመሰ፡ አውፅአት፡ ሦከ፡ ወአሜከላ፡ ዘቅርብት፡ ለመርገም፡ ወደኃሪታ፡ ለአንድዶ። ንትአመነክሙ፡ አኀዊነ፡ ኅሩያን፡ ከመ፡ ትቅረቡ፡ ውስተ፡ እንተ፡ ባቲ፡ ሕይወት። እመኒ፡ ከመ፡ ዝ፡ ንቤለክሙ። ዘአኮ፡ ይዔምፅ፡ እግዚአብሔር፡ ከመ፡ ይርሳዕ፡ ምግባሪክሙ፡ ወተፋቅሮተክሙ፡ ዘአርአይክሙ፡ በስሙ። ወተልእክምዎሙ፡ ለቅዱሳን፡ ወትትለአኩሂ። ወንፈቱሰ፡ ኵልክሙ፡ ከማሁ፡ ታርእዩ፡ ጻሕቀክሙ፡ በዛቲ፡ ተስፋክሙ፡ እስከ፡ ለዝሉፉ። ከመ፡ ኢትተክዙ፡ ወኢትኩኑ፡ ድንዙዛነ። ወተመሰልዎሙ፡ ለእለ፡ በአሚን፡ ወበትዕግሥት፡ ወረሱ፡ ተስፋሆሙ። በእንተ፡ ተስፋ፡ ወመሐላ እግዚአብሔርኒ፡ አመ፡ አሰፈዎ፡ ለአብርሃም፡ ወአልቦ፡ ባዕድ፡ ዘየዐቢ፡ እምኔሁ። ከመ፡ ይምሐል፡ ቦቱ፡ መሐለ፡ በርእሱ። ወይቤ፡ ከመ፡ ባርኮ፡ እባርከከ፡ ወአስተባዝኆ፡ አስተባዝኀከ። ወእምዝ፡ ተዐጊሦ፡ አድምዐ፡ ተስፋሁ። ወሰብእሰ፡ ይምሕል፡ በዘየዐቢ፡ እምኔሁ። ወሙፃኡ፡ ለቅሥት፡ የኀልቅ፡ በመሐላ። ወበእንተ፡ ዝ፡ ፈቀደ፡ እግዚአብሔር፡ ያርኢ፡ ጽድቆ፡ ለእለ፡ ይወርሱ፡ ተስፋሁ። ከመ፡ ኢይሚጥ፡ ምክሮ፡ ወአጽንዖ፡ በመሐላ፡ ከመ፡ ኢይትመየጥ። ወኢይትከሀል፡ ይትሐሰው፡ ቃለ፡ እግዚአብሔር፡ ዐቢይ፡ ፍሥሓ፡ ብነ። እለ፡ ተማሕፀነ፡ ወአጽናዕነ፡ ተወክሎ፡ በተስፋነ፡ ዘጽኑሕ፡ ለነ። እንተ፡ ታጸንዓ፡ ከመ፡ መርሶ፡ ለነፍስነ፡ ከመ፡ ኢታንቀልቅል። ወታበውእ፡ ውስተ፡ ውሳጤ፡ መንጦላዕት፡ ኀበ፡ ቦአ፡ ኢየሱስ፡ ሐዋርያነ። እምቅድሜነ፡ ሊቀ፡ ካህናት፡ በከመ፡ ሢመቱ፡ ለመልከጼዴቅ፡ ከዊኖ፡ ዘለዓለም።

ምዕራፍ 7 በእንተ፡ መልከጼዴቅ ወመልከጼዴቅሰ፡ ንጉሠ፡ ሳሌም፡ ካህኑ፡ ለእግዚአብሔር፡ ልዑል፡ ውእቱ። ዘመጽአ፡ ወተራከቦ፡ ለአብርሃም፡ አመ፡ ተመይጠ፡ እምኀበ፡ ተቃተሎሙ፡ ለነገሥት፡ ወባረኮሂ። ወከፈሎ፡ አብርሃም፡ ዐሥራተ፡ እምኵሉ፡ ቀዳሚ፡ ትርጓሜ፡ ስሙ፡ ንጉሠ፡ ጽድቅ። ወእምዝ፡ ንጉሠ፡ ሳሌም፡ ንጉሠ፡ ሰላም፡ ብሂል። አልቦ፡ ዘዘከረ፡ ሎቱ፡ አበ፡ ወኢ፡ እመ፡ ወአልቦ፡ ጥንተ፡ ለመዋዕሊሁ፡ ወኢ፡ ማኅለቅት፡ ለሕይወቱ። በአምሳሊሁ፡ ለወልደ፡ እግዚአብሔር፡ ይነብር፡ ክህነቱ፡ ለዝሉፉ። ትሬእዩኑ፡ ዕበዮ፡ ለዝንቱ፡ ዘወሀቦ፡ አብርሃም፡ ዐሥራተ፡ እምኵሉ፡ ዘይኄይስ። ወርእሶሙ፡ ለአበው፡ ውእቱ። ወደቂቀ፡ ሌዊሰ፡ ሶበ፡ ይነሥኡ፡ ክህነተ፡ ቦሙ፡ ሥርዐተ፡ ትእዛዝ። ከመ፡ ይንሥኡ፡ ዐሥራተ፡ እምሕዝብ፡ በከመ፡ ሥርዐተ፡ ሕጎሙ። እምላዕለ፡ አኀዊሆሙ፡ እለ፡ ወፅኡ፡ እምሐቌሁ፡ ለአብርሃም። ወለዘኢኮነሰ፡ እምዘመዶሙ፡ ወሀቦ፡ አብርሃም፡ ዐሥራተ፡ ወባረኮ፡ ለአብርሃም፡ ዘሎቱ፡ ተስፋ። ወይትዐወቅ፡ ባሕቱ፡ ዘእንበለ፡ ካሕድ፡ ከመ፡ ዘየዐቢ፡ ይባርኮ፡ ለዘይንእስ። ወበዝየሰ፡ ሰብእ፡ መዋቲ፡ ይነሥእ፡ ዐሥራተ። ወበከሃሰ፡ ለሊሁ፡ ይነሥእ፡ ዘሰማዕቱ፡ መጽሐፍ፡ ከመ፡ ሕያው፡ ውእቱ። ወተብህለ፡ በእንተ፡ አብርሃም፡ ከመ፡ ወሀቦ፡ ዐሥራተ። ወሌዊ፡ ዘይነሥእ፡ ዐሥራተ፡ ውእቱ፡ ዐሠረነ። እስመ፡ ዓዲሁ፡ ሀሎ፡ ውስተ፡ ሐቌሁ፡ አብርሃም፡ አቡሁ፡ አመ፡ ተራከቦ፡ መልከጼዴቅ። ወእመሰ፡ ይትፌጸም፡ በክህነቶሙ፡ ለሌዋውያን፡ ዘይገብሩ፡ ለሕዝብ፡ በከመ፡ ተሠርዐ። ለምንት፡ እንከ፡ ይትፈቀድ፡ ይሠየም፡ ካልእ፡ ካህን፡ ዘከመ፡ መልከጼዴቅ፡ ሢመቱ። ዳእሙ፡ ዘእምይቤ፡ ከመ፡ ሢመተ፡ አሮን። እስመ፡ ሀለቃ፡ ትፍልስ፡ ክህነቶሙ፡ ወእምከመሰ፡ ፈለሰት፡ ክህነቶሙ፡ ትፈልስ፡ ኦሪቶሙ። በእንተ፡ ፀአት፡ እግዚእነ፡ እምይሁዳ ወዘተብህለ፡ በእንቲኣሁ፡ ከመ፡ ዝ፡ ተወልደ፡ እምካልእ፡ ሕዝብ። ዘኢዐቀበ፡ ምሥዋዐ፡ ግሙራ፡ አሐዱሂ፡ እምኔሁ። ወኢይትዐወቅ፡ ዝንቱ፡ ክሡተ፡ ከመ፡ እምይሁዳ፡ ወፅአ፡ እግዚእነ፡ ሕዝብ። ዘኢነገረ፡ በእንቲኣሁ፡ ሙሴ፡ ሢመተ፡ ክህነት። ወዓዲ፡ ፈድፋደ፡ ያዔውቅ፡ ዝንቱ። እስመ፡ ይቤ፡ ይትነሣእ፡ ካህን፡ በአምሳለ፡ ክህነቱ፡ ለመልከጼዴቅ። ዘኢኮነ፡ በሕገ፡ ሥርዐት፡ ዘሥጋ፡ ወደም፡ አላ፡ በኀይለ፡ ሕይወት፡ ዘኢየኀልቅ። ውእቱ፡ ሰማዕቱ፡ ዘይቤ፡ አንተ፡ ውእቱ፡ ካህን፡ ከመ፡ ሢመቱ፡ ለመልከጼዴቅ። እስመ፡ ኮነ፡ ተዋልጦ፡ በቀዳሚ፡ ሕግ፡ በእንተ፡ ድካማ፡ እስመ፡ አልባቲ፡ ባቊዕ። ወኢያሥለጠት፡ ወኢ፡ ምንተኒ፡ ኦሪት፡ ወባሕቱ፡ ቦአ፡ ተስፋ፡ ህየንቴሃ፡ ዘይኄይስ፡ እምኔሃ። ወቦቱ፡ ንቀርቦ፡ ለእግዚአብሔር። እስመ፡ ኢኮነ፡ ዘእንበለ፡ መሐላ። እስመ፡ ቦ፡ እለ፡ ተሠይሙ፡ ዘእንበለ፡ መሐላ። ወለዘሰ፡ በመሐላ፡ ሤሞ፡ ይቤሎ፡ መሐለ፡ እግዚአብሔር። ወኢይኔስሕ፡ ከመ፡ አንተ፡ ካህኑ፡ ለዓለም፡ ከመ፡ ሢመቱ፡ ለመልከጼዴቅ። ወመጠነ፡ ዝ፡ ተሠይመ፡ ኢየሱስ፡ ውስተ፡ እንተ፡ ትኄይስ፡ ወተዐቢ፡ ሢመት። ወለእልክቱሰ፡ ካህናት፡ ብዙኃን፡ እስመ፡ ይስዕሮሙ፡ ሞት፡ ወኢያበውሖሙ፡ ይንበሩ። ወውእቱሰ፡ ይነብር፡ ለዓለም፡ እስመ፡ ኢይሰዐር፡ ክህነቱ። ወይክል፡ አድኅኖቶሙ፡ ለዝሉፉ፡ ለእለ፡ ይቀርቡ፡ ኀበ፡ እግዚአብሔር፡ እንተ፡ መንገሌሁ። እስመ፡ ለግሙራ፡ ሕያው፡ ውእቱ፡ ወይተነብል፡ ሎሙ። ዘከመ፡ ዝኬ፡ ሊቀ፡ ካህናት፡ ይደልወነ፡ ጻድቅ፡ ወየዋህ፡ ዘንጹሕ። ወርሑቅ፡ እምኵሉ፡ ኀጢአት፡ ወልዑል፡ ውእቱ፡ እምሰማያት። ወአልቦ፡ ግብር፡ ኵሎ፡ አሚረ፡ ከመ፡ ሊቀ፡ ካህናት። እለ፡ ያቀርቡ፡ መሥዋዕተ፡ ቀዲሙ፡ በእንተ፡ ኀጢአቶሙ፡ ወድኅረ፡ በእንተ፡ ሕዝብ። ወውእቱሰ፡ ከመ፡ ዝ፡ ገብረ፡ በምዕር፡ ሦዐ፡ ርእሶ። ኦሪትሰ፡ ሰብአ፡ ትሠይም፡ ሊቀ፡ ካህናት፡ መዋቴ። ወቃለ፡ መሐላሁሰ፡ ዘመጽአ፡ እምድኅረ፡ ኦሪት፡ ሤመ፡ ለነ፡ ወልደ፡ ፍጹመ፡ ዘለዓለም።

ምዕራፍ 8 በእንተ፡ ደብተራ፡ ጽድቅ እስመ፡ ቀዳሚሁሰ፡ ለዝንቱ፡ ኵሉ፡ ሊቀ፡ ካህናቲነ፡ ዘነበረ፡ በየማነ፡ መንበረ፡ ኀይል፡ በሰማያት። እንዘ፡ ይቀውም፡ ሎሙ፡ ለቅዱሳን፡ በደብተራ፡ ጽድቅ። እንተ፡ እግዚአብሔር፡ ተከላ፡ ወአኮ፡ ሰብእ። ወኵሉ፡ ሊቀ፡ ካህናት፡ ይሠየም፡ ከመ፡ ያብእ፡ መሥዋዕተ፡ ወቊርባነ። እስመ፡ ግብሩ፡ ውእቱ፡ ከመ፡ ያብእ፡ ከመ፡ ዝ። ሶበሁ፡ በምድር፡ ውእቱ፡ እምኢኮነ፡ ሊቀ፡ ካህናት። እስመ፡ ሀለዉ፡ ውስቴታ፡ ካህናት፡ እለ፡ ያበውኡ፡ መሥዋዕተ፡ በሕገ፡ ኦሪት። እሙንቱ፡ እለ፡ ይፀመዱ፡ ጽላሎታ፡ ወአርአያሃ፡ ለእንተ፡ በሰማያት። በከመ፡ አርአዮ፡ ለሙሴ፡ ዘከመ፡ ይገብራ፡ ለይእቲ፡ ደብተራ። ወይቤሎ፡ ዑቅ፡ እንከ፡ ከመ፡ ትግበር፡ ኵሎ፡ ዘከመ፡ ርኢከ፡ በውስተ፡ ደብር፡ አርአያሃ። ወይእዜሰ፡ እንተ፡ ትኄይስ፡ መልእክተ፡ አድምዐ፡ ወለእንተ፡ ተዐቢ፡ ሥርዐት፡ ኅሩየ፡ ኮነ፡ ኢየሱስ፡ ክርስቶስ። ወሠርዐ፡ ተስፋ፡ እንተ፡ ትኄይስ። ሶቤሁ፡ ንጽሕተ፡ ኮነት፡ ቀዳሚት፡ እምኢፈቀደ፡ ካልእተ። በእንተ፡ ሐዲስ፡ ሕግ ወባሕቱ፡ ሐይሶ፡ ኪያሆሙ፡ ይቤ፡ ናሁ፡ ይመጽእ፡ መዋዕል፡ ይቤ፡ እግዚአብሔር። ወእሠርዕ፡ ለቤተ፡ እስራኤል፡ ወለቤተ፡ ይሁዳ፡ ሕገ፡ ሐዲሰ። ወአኮ፡ ከመ፡ ዝንቱ፡ ሕግ፡ ዘሠራዕኩ፡ ለአበዊሆሙ፡ አመ፡ አውፃእክዎሙ፡ እምድረ፡ ግብጽ። እስመ፡ እሙንቱኒ፡ ኢነበሩ፡ በሥርዐትየ፡ ወአነኒ፡ ተሀየይክዎሙ፡ ይቤ፡ እግዚአብሔር። እስመ፡ ዛቲ፡ ይእቲ፡ ሥርዐት፡ እንተ፡ እሠርዕ፡ ለቤተ፡ እስራኤል፡ እምድኅረ፡ እማንቱ፡ መዋዕል። ይቤ፡ እግዚአብሔር፡ እወዲ፡ ሕግየ፡ ውስተ፡ ኅሊናሆሙ። ወእጽሕፎ፡ ውስተ፡ ልቦሙ፡ ወእከውኖሙ፡ አምላኮሙ፡ ወእሙንቱኒ፡ ይከወኑኒ፡ ሕዝብየ። ወኢይሜህር፡ እንከ፡ እኁ፡ እኅዋሁ፡ እንዘ፡ ይብል። አአምርዎ፡ ለእግዚአብሔር፡ እስመ፡ ኵሎሙ፡ የአምሩኒ፡ ንኡሶሙ፡ ወዐቢዮሙ። ከመ፡ እሣሀሎሙ፡ ወእሥረይ፡ ሎሙ፡ ኀጢአቶሙ፡ ወኢይዜከር፡ ሎሙ፡ አበሳሆሙ። ወብሂለ፡ በእንተ፡ ሐዲስ፡ ትእዛዝ፡ ፈጺሞ። እስመ፡ ቀዳሚት፡ በልየት፡ ወዘሰ፡ ይበሊ፡ ወይረስዕ፡ ቅሩብ፡ ውእቱ፡ ለሙስና።

ምዕራፍ 9 በእንተ፡ ቀዳሚት፡ ደብተራ ወለቀዳሚትኒ፡ ደብተራ፡ ሥርዐተ፡ ምሥዋዕ፡ ባቲ፡ ወመቅደስ። ወለቀዳሚትኒ፡ ደብተራ፡ እንተ፡ ተሠርዐ፡ ትርሲታ፡ ባቲ፡ ተቅዋመ፡ መራናት፡ ወማእድ፡ ወኅብስት፡ ዘይሠርዑ። ወይብልዋ፡ ቅድስት፡ ወለውሳጢትሰ፡ ደብተራ። እንተ፡ እምድኅረ፡ ካልእ፡ መንጦላዕት፡ ይብልዋ፡ ቅድስተ፡ ቅዱሳን። ወውስቴታ፡ ማዕጠንት፡ ዘወርቅ፡ ወታቦትኒ፡ እንተ፡ ውስቴታ፡ ኦሪት። እንተ፡ ይከድንዋ፡ በወርቅ፡ ውቱረ፡ ወውስቴታ፡ መሶበ፡ ወርቅ፡ ዘመና። ወበትረ፡ አሮን፡ እንተ፡ ሠረጸት። ወጽላትኒ፡ ዘኦሪት፡ ወመልዕልታ፡ ኪሩቤል፡ ዘስብሐት፡ ይጼልሉ፡ ዲበ፡ ምሥሀል። ወኢኮነ፡ ይእዜ፡ ጊዜሁ፡ ከመ፡ ንንግር፡ በበ፡ ገጹ። ወዘከመ፡ ዝ፡ ሥርዐቱ፡ ወትርሲቱ፡ ወውስተ፡ ጸናፊትሰ፡ ደብተራ። ዘልፈ፡ ይበውኡ፡ ካህናት፡ ይግበሩ፡ ምሥዋዒሆሙ፡ ኵሎ፡ ጊዜ። ወውስተ፡ ውሳጢትሰ፡ ምዕረ፡ በበ፡ ዓመት፡ ይበውእ፡ ሊቀ፡ ካህናት፡ ባሕቲቱ። ምስለ፡ ደም፡ ዘያበውእ፡ በእንተ፡ ርእሱ፡ ወበእንተ፡ ሕዝቡ፡ በበይነ፡ ኀጢአቶሙ። ወከመ፡ ዝ፡ አዘዘ፡ መንፈስ፡ ቅዱስ፡ እስመ፡ ዓዲሃ፡ ኢተዐውቀት፡ ፍኖቶሙ፡ ለቅዱሳን፡ በቀዳሚት፡ ደብተራ። ወባሕቱ፡ አምሳለ፡ ኮነ፡ ዝክቱ፡ ለዝንቱ፡ መዋዕል። ዘቦቱ፡ ያበውኡ፡ ቊርባነ፡ ወመሥዋዕተ፡ ዘኢይክል፡ ፈጽሞ፡ ለዘያቀርቦ። ወስእኑ፡ ዘእንበለ፡ በመባልዕት፡ ወበዘይሰትዩ፡ ወጥምቀታት፡ ዘዘ፡ ዚኣሁ። እንተ፡ ይእቲ፡ ሕግ፡ ዘሥጋ፡ እስከ፡ አመ፡ ይትራታዕ፡ ዘተሠርዐ። በእንተ፡ ዘትመጽእ፡ ሠናይት ወክርስቶስሰ፡ ከዊኖ፡ ሊቀ፡ ካህናት፡ ለእንተ፡ ትመጽእ፡ ሠናይት፡ በውስተ፡ እንተ፡ ተዐቢ፡ ወትኄይስ፡ ደብተራ። እንተ፡ ኢገብራ፡ እደ፡ ሰብእ፡ ወኢኮነት፡ በውስተ፡ ዝ፡ ዓለም። ወአኮ፡ በደመ፡ ላሕም፡ ወጠሊ፡ አላ፡ በደመ፡ ዚኣሁ። ቦአ፡ በምዕር፡ ውስተ፡ ቅድስት፡ ዘለዓለም፡ ወረከበ፡ መድኀኒተ። ሶበ፡ ደመ፡ ላሕም፡ ወጠሊ፡ ወካዕሴ፡ ዕጐልት፡ ያነጽሕ፡ እምኀጢአት። ወይቄድሶሙ፡ ሥጋሆሙ፡ ለእለ፡ ረኵሱ። እፎ፡ እንከ፡ ፈድፋደ፡ ደሙ፡ ለክርስቶስ። ዘሦዐ፡ ርእሶ፡ በመንፈስ፡ ዘለዓለም፡ ለእግዚአብሔር፡ ዘአልቦ፡ ነውር። ያነጽሕ፡ ኅሊናክሙ፡ እምግብር፡ ምዉት፡ ከመ፡ ናምልኮ፡ ለእግዚአብሔር፡ ሕያው። ወበእንተ፡ ዝ፡ ለሐዳስ፡ ሥርዐት፡ ኢየሱስ፡ ኅሩየ፡ ኮነ። ከመ፡ ጥዒሞ፡ ሞተ፡ ያድኅኖሙ፡ ለእለ፡ ስሕቱ፡ በቀዳሚ፡ ሥርዐት። እለ፡ ሎሙ፡ አሰፈወ፡ ወጸውዖሙ፡ ውስተ፡ ርስቱ፡ ዘለዓለም። ኀበ፡ ሀሎ፡ ሥርዐት፡ ግብር፡ ይመጽእ፡ ሞት፡ ላዕለ፡ ዘሠርዐ። ሥርዐቱሰ፡ ለዘይመውት፡ ጽንዕት፡ ይእቲ፡ እስመ፡ ኢትበቊዕ፡ አመ፡ ሕያው፡ ውእቱ፡ ዘሠርዐ። ከማሁ፡ ቀዳሚትኒ፡ ዘእንበለ፡ ደምሰ፡ ኢተሐደስት፡ ሥርዐት። ወነጊሮ፡ ሙሴ፡ ኵሎ፡ ትእዛዘ፡ ኦሪት፡ ለኵሉ፡ ሕዝብ። ይነሥእ፡ ደመ፡ ላሕም፡ ወጠሊ፡ ምስለ፡ ማይ፡ ወፐፒረለይ፡ ወቈጽለ፡ ሁስጱ። ወይነዝኅ፡ መጽሐፈ፡ ኦሪትኒ፡ ወኵሎ፡ ሕዝበ። ወይቤሎሙ፡ ዝ፡ ውእቱ፡ ደመ፡ ሕግ፡ ዘአዘዘክሙ፡ እግዚአብሔር። ወይነዝኅ፡ ደብተራሂ፡ ወኵሎ፡ ንዋየ፡ ግብሪሆሙ። ወዓዲ፡ ይሬሲ፡ ከመ፡ ዝ፡ በቅሩብ፡ ወበደም፡ ይነጽሕ፡ ኵሉ፡ በሕገ፡ ኦሪት። ወዘእንበለ፡ ይትነዛኅሰ፡ ደም፡ ኢይሰረይ። ወእመሰ፡ ዝኩ፡ ግብር፡ ዘበአምሳለ፡ ሰማያት፡ በዝንቱ፡ ደም፡ ይነጽሕ። ውእቱሰ፡ ዘበሰማያት፡ መሥዋዕት፡ ይኄይስ፡ ወየዐቢ፡ እምዝ። ወአኮ፡ ውስተ፡ ግብረ፡ እደ፡ ሰብእ፡ ዘቦአ፡ ኢየሱስ፡ ኀበ፡ ቅድስት። እንተ፡ ተገብረት፡ በአርአያ፡ ጽድቅ፡ ዘእንበለ፡ ውስተ፡ ሰማይ። ከመ፡ ያስተርኢ፡ ቅድመ፡ ገጹ፡ ለእግዚአብሔር፡ በእንቲኣነ። ወአኮ፡ ዘልፈ፡ ዘይሠውዕ፡ ርእሶ፡ ከመ፡ ዘይገብር፡ ሊቀ፡ ካህናት። ወይበውእ፡ ውስተ፡ ቅድስተ፡ ቅዱሳን፡ በበ፡ ዓመት፡ በደመ፡ ባዕድ። ወእመ፡ አኮሰ፡ ብዙኅ፡ እምተቀትለ፡ እምፍጥረተ፡ ዓለም። አላ፡ ይእዜ፡ ምዕረ፡ በኅልቀተ፡ ዓለም፡ ሦዐ፡ ርእሶ። ከመ፡ ይስዐራ፡ ለኀጢአት፡ በመሥዋዕቱ። ወበከመ፡ ጽኑሕ፡ ለሰብእ፡ ምዕረ፡ መዊት፡ ወእምድኅሬሁ፡ ደይን። ከማሁ፡ ክርስቶስኒ፡ ምዕረ፡ ሦዐ፡ ርእሶ፡ ከመ፡ ይኅድግ፡ ኀጢአቶሙ፡ ለብዙኃን። ወዳግመሰ፡ ዘእንበለ፡ ኀጢአት፡ ያስተርእዮሙ፡ ለእለ፡ ይሴፈውዎ፡ ያሕይዎሙ።

ምዕራፍ 10 በእንተ፡ ጽላሎት እስመ፡ ጽላሎታ፡ ይእቲ፡ ኦሪት፡ ለእንተ፡ ትመጽእ፡ ሠናይት፡ እስመ፡ ኢኮነት፡ ለሊሃ። ወበእንተ፡ ዝንቱ፡ አመ፡ ያበውኡ፡ መሥዋዕተ፡ ዘልፈ። በኵሉ፡ ዓመት፡ ኢይክል፡ ለሊሁ፡ ግሙራ፡ ፈጽሞ፡ ለእለ፡ ያበውእዎ። ወእመ፡ አኮሰ፡ እምአዕረፉ፡ እምዘይሠውዑ። እስመ፡ ይሰሪ፡ ሎሙ፡ ኀጢአቶሙ፡ ለእለ፡ ይሠውዑ፡ ወያነጽሖሙ፡ በምዕር። አላ፡ ዳእሙ፡ ቦሙ፡ ዘይገብሩ፡ ተዝካረ፡ ኀጢአት፡ በበ፡ ዓመት፡ በውእቱ፡ መሥዋዕት። እስመ፡ ኢይክል፡ ደመ፡ ላሕም፡ ወጠሊ፡ ይኅድግ፡ ኀጢአተ። ወበእንተ፡ ዝ፡ አመ፡ ይመጽእ፡ ውስተ፡ ዓለም። ይቤ፡ መሥዋዕተ፡ ወቊርባነ፡ ኢፈቀድከ፡ አላ፡ አልበስከኒ፡ ሥጋ። መሥዋዕተ፡ ዘበእንተ፡ ኀጢአት፡ ኢሠመርከ። ውእተ፡ ጊዜ፡ እቤ፡ ነየ፡ መጻእኩ፡ ውስተ፡ ርእሰ፡ መጽሐፍ፡ ተጽሕፈ፡ በእንቲኣየ። ከመ፡ እግበር፡ ፈቃደከ፡ መከርኩ፡ አምላክየ። መልዕልቶ፡ ይቤ፡ መሥዋዕተ፡ ወቊርባነ፡ ኢፈቀድኩ፡ ዘበእንተ፡ ኀጢአት። ኢሠመርኩ፡ ዘይሠውዑ፡ በሕገ፡ ኦሪት፡ ብሂሎ። በእንተ፡ መሥዋዕት፡ ዘለዓለም ወእምዝ፡ ይቤ፡ ነየ፡ መጻእኩ፡ ከመ፡ እግበር፡ ፈቃደከ፡ አምላክየ። ወዝ፡ ቃል፡ ይነሥት፡ ቀዳማየ፡ ከመ፡ ያቅም፡ ደኃራየ። ከመ፡ ንትቀደስ፡ በሥምረቱ፡ በቊርባነ፡ ሥጋሁ፡ ለኢየሱስ፡ ክርስቶስ፡ ዘኮነ፡ በምዕር። ወኵሉ፡ ሊተ፡ ካህናት፡ ይቀውም፡ ኵሎ፡ አሚረ። ወይሠውዕ፡ ኪያሃ፡ ክመ፡ መሥዋዕተ፡ እንተ፡ ለግሙራ፡ ኢትክል፡ አንጽሖ፡ ኀጢአት። ወውእቱሰ፡ ምዕረ፡ ሦዐ፡ መሥዋዕተ፡ እንተ፡ ለዝሉፉ፡ በእንተ፡ ኀጢአትነ። ወነበረ፡ በየማነ፡ እግዚአብሔር። ወይጸንሕ፡ እንከ፡ እስከ፡ ይገብኡ፡ ጸላእቱ፡ ታሕተ፡ መከየደ፡ እገሪሁ። አሐተ፡ መሥዋዕተ፡ ገብረ፡ እንተ፡ ለግሙራ፡ ለእለ፡ ይትቄደሱ። ወሰማዕትነ፡ መንፈስ፡ ቅዱስ፡ እምድኅረ፡ ይቤ። ዛቲ፡ ሥርዐት፡ እንተ፡ እሠርዕ፡ ሎሙ፡ እምድኅረ፡ እማንቱ፡ መዋዕል። ይቤ፡ እግዚአብሔር፡ እወዲ፡ ሕግየ፡ ውስተ፡ ልቦሙ፡ ወእጽሕፎ፡ ውስተ፡ ኅሊናሆሙ። ወኢይዜከር፡ እንከ፡ ኀጢአቶሙ፡ ወአበሳሆሙ። ወእምከመሰ፡ ይትኀደግ፡ ከመ፡ ዝ፡ አልቦ፡ እንከ፡ መሥዋዕት፡ በእንተ፡ ኀጢአት። በእንተ፡ ካህናተ፡ ወንጌል ብነ፡ አኀዊነ፡ ሞገሰ፡ ውስተ፡ በአትነ፡ ቤተ፡ መቅደስ፡ በደሙ፡ ለኢየሱስ። እስመ፡ ሐደሰ፡ ለነ፡ ፍኖተ፡ ጽድቅ፡ ወሕይወት፡ ግብተ፡ በመንጦላዕተ፡ ሥጋሁ። ካህን፡ ዐቢይ፡ ለቤተ፡ እግዚአብሔር። ንቅረብ፡ እንከ፡ በልበ፡ ጽድቅ፡ ወበሃይማኖት፡ ፍጹም፡ ምእመን። እንዘ፡ ንጹሕ፡ ልብነ፡ ወንጹሓን፡ ንሕነ። እምግባረ፡ እከይ፡ ወኅፁብ፡ ሥጋነ፡ በማይ፡ ንጹሕ። ናጽንዕ፡ እንከ፡ አሚነ፡ ወተስፋነ፡ ዘእንበለ፡ ነውር፡ እስመ፡ ጻድቅ፡ ዘአሰፈወነ። ወንትቀሐው፡ ምስለ፡ ቢጽነ፡ በተፋቅሮ፡ ወበምግባረ፡ ሠናይ። ወኢንኅድግ፡ ማኅበረነ፡ ዘከመ፡ ይለምዱ፡ ካልኣን። ዳእሙ፡ ንትገሠጽ፡ እስመ፡ ንሬኢ፡ ዘከመ፡ ትቀርብ፡ ዕለት። ወለእመ፡ በግብር፡ ንኤብስ፡ እምድኅረ፡ አእመርናሃ፡ ለጽድቅ። አልቦ፡ እንከ፡ መሥዋዕት፡ በእንተ፡ ኀጢአት። አላ፡ ጽኑሕ፡ ግሩም፡ ደይን፡ ወእሳት፡ ዘቅንአት፡ ዘይበልዖሙ፡ ለከሓድያን። ወለእመ፡ ቦ፡ ዘስሕተ፡ እምኦሪተ፡ ሙሴ፡ እምከመ፡ ክልኤቱ። ወእመ፡ አኮ፡ ሠለስቱ፡ ሰማዕት፡ ዘሰፍዎ፡ ይመውት፡ ወኢይምሕርዎ። እፎ፡ እንከ፡ ፈድፋደ፡ ይደልዎ፡ ይትኰነን፡ ዘተካየዶ፡ ለወልደ፡ እግዚአብሔር። ወአርኰሰ፡ ደመ፡ ሥርዐት፡ ዘቦቱ፡ ተቀደሳ፡ ከመ፡ ደመ፡ ኵሉ፡ ሰብእ። ወዘጸአለ፡ መንፈሰ፡ ጸጋሁ። ነአምሮ፡ ለዘይቤ፡ አነ፡ እትቤቀል፡ ወአነ፡ እትፈደይ፡ ይቤ፡ እግዚአብሔር። ወካዕበ፡ ይቤ፡ እስመ፡ ይኴንን፡ እግዚአብሔር፡ ሕዝቦ። ወጥቀ፡ ግሩም፡ ወዲቅ፡ ውስተ፡ እደ፡ እግዚአብሔር፡ ሕያው። ተዘከሩ፡ መዋዕለ፡ ዘቀዲሙ፡ ዘአመ፡ አጥመቁክሙ፡ ዘከመ፡ ተዐገሥክሙ፡ ብዙኀ፡ ሕማመ። ወተጽአልክሙ፡ ወሣቀዩክሙ፡ ወተሣለቁ፡ ላዕሌክሙ። ወቦ፡ ዘተሳተፍክምዎሙ፡ ምስለ፡ እለ፡ ከመ፡ ዝ፡ ኮኑ። ወኀበርክሙ፡ ሕማመ፡ ምስሌየ፡ በመዋቅሕትየ። ወተበርብሮ፡ ንዋይክሙ፡ በትፍሥሕት፡ ዘተወከፍክሙ። እስመ፡ ተአምሩ፡ ከመ፡ ብክሙ፡ ንዋይ፡ ዘይኄይስ፡ ዘይነብር፡ ለዓለም፡ በሰማያት። ኢትግድፉ፡ እንከ፡ ሞገሰክሙ፡ እንተ፡ ባቲ፡ ትረክቡ፡ ብዙኀ፡ ዕሴተክሙ፡ ዐቢየ። ወባሕቱ፡ ትዕግሥተ፡ ትፈቅዱ፡ ከመ፡ ገቢረክሙ፡ ፈቃደ፡ እግዚአብሔር፡ ትረክቡ፡ ተስፋክሙ። እስመ፡ ዓዲ፡ ኅዳጥ፡ መዋዕል፡ ወይበጽሕ፡ ዘይመጽእ፡ ወኢይጐነዲ። ወጻድቅሰ፡ በአሚን፡ የሐዩ፡ ወእመሰ፡ ተመይጠ፡ ኢትሠምሮ፡ ነፍስየ። ንሕነሰ፡ ኢይደልወነ፡ ንትመየጥ፡ ድኅሬነ፡ ለሕርትምና። ዘእንበለ፡ ለሃይማኖት፡ እንተ፡ ይእቲ፡ ሕይወተ፡ ነፍስነ።

ምዕራፍ 11 በእንተ፡ እምነቶሙ፡ ለአበው ሃይማኖትሰ፡ ጥይቅተ፡ ይእቲ፡ ለዘይሴፈዋ። ሀለዉ፡ እለ፡ ተአመኑ፡ ተሰፊዎሙ፡ ንዋየ፡ ዘኢያስተርኢ። ዘበእንቲኣሁ፡ ሰማዕተ፡ ኮኑ፡ ሊቃውንት፡ በሃይማኖት። አአምር፡ ከመ፡ ተፈጥረ፡ ዓለም፡ በቃለ፡ እግዚአብሔር። ወአስተርአየ፡ ዘኢያስተርአየ፡ ምንትኒ፡ ዘኮነ፡ እምኀበ፡ ኢሀሎ። በተአምኖ፡ ኀየሰ፡ መሥዋዕተ፡ አቤል፡ እምዘቃየል፡ ዘአብአ፡ ለእግዚአብሔር። ወበእንቲኣሁ፡ ሰማዕተ፡ ኮኖ፡ ከመ፡ ጻድቅ፡ ውእቱ። ወሰማዕቱ፡ እግዚአብሔር፡ በተወክፎ፡ መሥዋዕቱ፡ ወበእንቲኣሁ፡ መዊቶ፡ ዓዲ፡ ተናገረ። በተአምኖ፡ ፈለሰ፡ ሄኖክ፡ ከመ፡ ኢይርአዮ፡ ለሞተ። ወኢተረክበ፡ እስመ፡ ከበቶ፡ እግዚአብሔር። ወዘእንበለ፡ ያፍልሶ፡ ሰማዕተ፡ ኮነ፡ ከመ፡ አሥመሮ፡ ለእግዚአብሔር። ወዘእንበለ፡ ተአምኖሰ፡ ኢይትከሀል፡ ያሥምርዎ፡ ለእግዚአብሔር። ወርቱዕሰ፡ ይተአመን፡ ይቅድም፡ ዘይበውእ፡ ኀበ፡ እግዚአብሔር። ወያእምር፡ ከመ፡ ሀሎ፡ ወየዔስዮሙ፡ ለእለ፡ የኀሥሥዎ። በተአምኖ፡ አመ፡ ነገርዎ፡ ለኖኅ፡ በእንተ፡ ዘኢያስተርኢ፡ ግብር፡ ዘኅቡእ፡ ፈርሀ። ወገብረ፡ ንፍቀ፡ ታቦት፡ በዘያድኅን፡ ቤቶ፡ አመ፡ ተኰነነ፡ ዓለም። ወኮነ፡ ወራሲሃ፡ ለጽድቀ፡ ሃይማኖት። በተአምኖ፡ ስምዐ፡ ዘተሰምየ፡ አብርሃም። ወተአዘዘ፡ ይሑር፡ ብሔረ፡ ኀበ፡ ሀለዎ፡ ይንሣእ፡ ርስቶ። ወሖረ፡ እንዘ፡ ኢየአምር፡ ኀበ፡ ይበጽሕ። በተአምኖ፡ ፈለሰ፡ ወነበረ፡ ብሔረ፡ ዘአሰፈዎ፡ ከመ፡ ነኪር፡ በሐይመታት፡ ምስለ፡ ይስሐቅ፡ ወያዕቆብ። እለ፡ እሙንቱ፡ ይወርስዋ፡ ለተስፋሁ። እስመ፡ ኮኑ፡ ይጸንሑ፡ ሀገረ፡ እንተ፡ ባቲ፡ መሠሪት። እንተ፡ ኬንያሃ፡ ወገባሪሃ፡ እግዚአብሔር። በተአምኖ፡ ይእቲኒ፡ ሳራ፡ ረከበት፡ ኀይለ፡ ታውፅእ፡ ዘርዐ። እንዘ፡ መካን፡ ይእቲ፡ በዘረስዐት፡ እስመ፡ ተአመነቶ፡ ከመ፡ ጻድቀ፡ ዘአሰፈዋ። እንዘ፡ ክልኤሆሙ፡ ከመ፡ በድን፡ ነፍስቶሙ። ከመ፡ ይኩን፡ ብዝኆሙ፡ ከመ፡ ኮከበ፡ ሰማይ፡ ወከመ፡ ኆጻ፡ ባሕር፡ ዘኢይትኌለቊ። እለ፡ ኵሎሙ፡ እንዘ፡ ይትአመኑ፡ ሞቱ፡ ወኢረከቡ፡ ተስፋሆሙ። ወባሕቱ፡ እምርሑቅሰ፡ ርእይዋ፡ ወተአምኅዋ። ወአእመሩ፡ ከመ፡ ነግድ፡ ወፈላሲ፡ እሙንቱ፡ ዲበ፡ ምድር። ወእለ፡ ከመ፡ ዝ፡ ይብሉ፡ በእንቲኣሁ፡ ያሬእዩ፡ ነገረ፡ ከመ፡ ሀገሮሙ፡ የኀሥሡ። ወሶበሰ፡ ይፈቅዱ፡ ሀገረ፡ እንተ፡ እምኔሃ፡ ወፅኡ፡ እምተክሀሎሙ፡ ይግብኡ፡ ኀቤሃ። ወይእዜሰ፡ ተዐውቀ፡ ከመ፡ እንተ፡ ትኄይስ፡ ሀገረ፡ እንተ፡ በሰማያት፡ ኮኑ፡ ይሴፈዉ። ወበእንተ፡ ዝ፡ ኢየኀፍር፡ እግዚአብሔር፡ ከመ፡ ይትበሀል፡ አምላኮሙ። እስመ፡ አስተዳለወ፡ ሎሙ፡ ሀገረ፡ እንተ፡ ተሰፈዉ። በተአምኖ፡ ወሰዶ፡ አብርሃም፡ ለይስሐቅ፡ ወልዱ። ከመ፡ ይሡዖ፡ አመ፡ አመከሮ፡ ወአብአ፡ ዘአሐዱ፡ ሎቱ። ዘበእንቲኣሁ፡ አሰፈዎ፡ ወይቤሎ፡ እምይስሐቅ፡ ይሰመይ፡ ለከ፡ ዘርዕ። ተአሚኖ፡ ከመ፡ ይክል፡ እግዚአብሔር፡ አንሥኦቶ፡ እምዉታን። ወበእንተ፡ ዝ፡ ኮነ፡ ሎቱ፡ ተዝካረ፡ ውእቱ፡ ዘተውህበ። በተአምኖ፡ በዘይከውን፡ ባረኮሙ፡ ይስሐቅ፡ ለያዕቆብ፡ ወለዔሳው፡ በእንተ፡ ዘሀለዎሙ፡ ይርከቡ። በተአምኖ፡ አመ፡ ይመውት፡ ያዕቆብ፡ ባረኮሙ፡ ለደቂቀ፡ ዮሴፍ፡ ለለ፡ አሐዱ። ወሰገደ፡ ውስተ፡ ከተማ፡ በትሩ። በተአምኖ፡ አመ፡ ይመውት፡ ዮሴፍ፡ ተዘከረ፡ በእንተ፡ ፀአቶሙ፡ ለደቂቀ፡ እስራኤል፡ እምድረ፡ ግብጽ። ወአዘዘ፡ በእንተ፡ አዕፅምቲሁ። በተአምኖ፡ ተወሊዶ፡ ሙሴ፡ ኀብእዎ፡ ሠለስተ፡ አውራኀ፡ በቤተ፡ አበዊሁ። እስመ፡ ርእይዎ፡ ከመ፡ ሠናይ፡ ውእቱ፡ ሕፃን፡ ወኢፈርሁ፡ ትእዛዘ፡ ንጉሥ። በተአምኖ፡ ልሂቆ፡ ሙሴ፡ ክሕደ፡ ከመ፡ ኢይበልዎ፡ ወልደ፡ ወለተ፡ ፈርዖን። ወአብደረ፡ ይሕምም፡ ምስለ፡ ሕዝበ፡ እግዚአብሔር፡ እምይደለው፡ ለሰዓት፡ ወይኩኖ፡ ኀጢአተ። እስመ፡ አእመረ፡ ከመ፡ የዐቢ፡ ትዕይርተ፡ መስቀሉ፡ ለክርስቶስ፡ እምኵሉ፡ መዛግብቲሆሙ፡ ለግብጽ። በተአምኖ፡ ኀደረ፡ ብሔረ፡ ግብጽ፡ ኢፈሪሆ፡ መዓተ፡ ንጉሥ። እስመ፡ አብደረ፡ ይፍርሆ፡ ለዘኢያስተርኢ፡ እምዘይሬኢ፡ ጸኒሖ፡ ዕሴቶ። በተአምኖ፡ ገብረ፡ ፍሥሓ፡ ወነዝኀ፡ ደመ። ከመ፡ ኢያጥፍእ፡ ሎሙ፡ በኵሮሙ፡ ብድብድ። በተአምኖ፡ ዐደውዋ፡ ለባሕረ፡ ኤርትራ፡ ከመ፡ ዘውስተ፡ ምድር፡ ይቡስ። ወኮነቶሙ፡ መከራ፡ ለግብጽ፡ ተሰጢሞሙ። በተአምኖ፡ ወድቀ፡ ዐረፋቲሃ፡ ለኢያሪሆ፡ አመ፡ የዐውድዋ፡ ሰቡዐ፡ ዕለተ። በተአምኖ፡ ረአብኒ፡ ዘማ፡ ኢተሀጕለት፡ ምስለ፡ ዐላውያን። እስመ፡ ተወክፈቶሙ፡ ለሰብአ፡ ዐይን፡ ወኀብአቶሙ፡ በሰላም። በእንተ፡ ኵሎሙ፡ መስተጋድላን ወምንት፡ እንከ፡ እብል፡ እስመ፡ ኅጹር፡ ዕለትየ። ከመ፡ እዜኑክሙ፡ በእንተ፡ እለ፡ ጌዴዎን፡ ወባርቅ፡ ወዮፍታሔ፡ ወሶምሶን። ወዳዊት፡ ወሳሙኤል፡ ወባዕዳንሂ፡ ነቢያት። እለ፡ በተአምኖ፡ ተጋደሉ፡ ወሞኡ፡ ነገሥተ። ወአድምዑ፡ ፍናዊሆሙ፡ ተገበሩ፡ ጽድቀ፡ ወረከቡ፡ ተስፋሆሙ። ወፈፀሙ፡ አፈ፡ አናብስት፡ ወአጥፍኡ፡ ኀይለ፡ እሳት፡ ወድኅኑ፡ እምአፈ፡ ኵናት። ወጸንዑ፡ በሕማሞሙ፡ ወኀየሉ፡ በውስተ፡ ጸብእ፡ ወሰደዱ፡ ተዓይነ፡ ፀር። ወነሥአ፡ አንስት፡ ምዉታኒሆን፡ አሕይዎሙ፡ ከመ፡ ዘትንሣኤ። ወቦ፡ እለ፡ ሞቱሃ፡ ተኰኒኖሙ። እስመ፡ ኢፈቀዱ፡ ድኂነ፡ ከመ፡ ይርከቡ፡ ሕይወተ፡ እንተ፡ ትኄይስ። ወቦ፡ እለሂ፡ ቀሠፍዎሙ፡ ወተሣለቁ፡ ላዕሌሆሙ፡ ወሐመይዎሙ፡ ወሞቅሕዎሙ። ወቦ፡ እለ፡ ወሠርዎሙ፡ በሞሠርት፡ ወወገርዎሙ፡ ወቀተልዎሙ፡ በአፈ፡ መጥባሕት። ወዔሉ፡ በሠቅ፡ ወበሐሜላት፡ ወበዘብድወ፡ ጠሊ፡ ተጸነሱ፡ ተመንደቡ፡ ሐሙ። እሉ፡ እሙንቱ፡ ዘኢይደልዎሙ፡ ዓለም፡ ወዔሉ፡ ውስተ፡ ገዳም። ወውስተ፡ አድባር፡ ወበአታት፡ ወግበበ፡ ምድር። ወኵሎሙ፡ ሰማዕተ፡ ኮኑ፡ በሃይማኖት፡ ወኢያድምዑ፡ ዘአሰፈዎሙ። እስመ፡ አቅደመ፡ እግዚአብሔር፡ ርእየ፡ በእንቲኣነ። እንተ፡ ትኄይስ፡ ከመ፡ ኢይሠለጡ፡ ዘእንበሌነ።

ምዕራፍ 12 በእንተ፡ ተሊዎተ፡ እግዚእ ወበእንተ፡ ዝንቱ፡ ንሕነኒ፡ እለ፡ ብነ፡ እሙንቱ፡ ሰማዕት፡ ኵሎሙ፡ ዘየዐውዱነ። ከመ፡ ደመና፡ ንግድፍ፡ እምላዕሌነ፡ ኵሎ፡ ክበደ፡ ወሁከተ፡ ኀጢአት። ወንሩጽ፡ በትዕግሥት፡ ኀበ፡ ዘጽኑሕ፡ ለነ፡ ተስፋነ፡ ዘሃይማኖት። ወንትልዎ፡ ለፍጹም፡ መልአክነ፡ ኢየሱስ፡ ክርስቶስ፡ ዘተዐገሠ፡ ኀፍረተ፡ መስቀል። አናኅሲዮ፡ በእንተ፡ ፍሥሓሁ፡ ዘጽኑሕ፡ ሎቱ፡ ወመነና፡ ለኀፍረት። ወነበረ፡ በየማነ፡ መንበረ፡ እግዚአብሔር። ኀልይዎ፡ እስኩ፡ ለዘከመ፡ ዝ፡ ተዐገሠ፡ እምኃጥኣን። ወተናገርዎ፡ በበይናቲክሙ፡ ከመ፡ ኢትሥራሕ፡ ነፍስክሙ፡ ወኢትድክም። እስመ፡ ዓዲክሙ፡ ኢጸናዕክሙ፡ እስከ፡ ለደም፡ ትበጽሑ። ተጋደልዋ፡ ለኀጢአት፡ ወእበይዋ፡ ወአብድርዋ፡ ለትምህርተ፡ ተስፋክሙ። እስመ፡ ከመ፡ ውሉድ፡ ይብለክሙ፡ ወልድየ፡ ኢታስተጽሕብ፡ ተግሣጸ፡ እግዚአብሔር። ወኢትትገሐሥ፡ እምኔሁ፡ ሶበ፡ ይዘልፈከ፡ አመ፡ ገሠጽከ። እስመ፡ ለዘአፍቀረ፡ እግዚአብሔር፡ ይጌሥጽ። ወይቀሥፍዎ፡ ለኵሉ፡ ውሉድ፡ ዘይትፈቀድ። ለተግሣጽክሙ፡ ተዐገሡ፡ እስመ፡ ከመ፡ ውሉዱ፡ ያፈቅረክሙ፡ እግዚአብሔር። መኑ፡ ውሉድ፡ ዘኢይጌሥጾ፡ አቡሁ። ወእመሰ፡ ኢገሠጹክሙ፡ አንደበራ፡ አንትሙ፡ ወኢኮንክሙ፡ ውሉደ፡ ወዐረይክሙ፡ ኵልክሙ። ወእመሰ፡ አበዊነ፡ እለ፡ ወለዱነ፡ በሥጋ፡ ይጌሥጹነ፡ ወነኀፍሮሙ። እፎ፡ እንከ፡ ፈድፋደ፡ ንግነይ፡ ወንትአዘዝ፡ ለአበ፡ መንፈስነ፡ ይደልወነ፡ ወንሕየው። ወእሙንቱሰ፡ ለሥላጤ፡ ለኅዳጥ፡ መዋዕል፡ ይጌሥጹነ፡ በከመ፡ ፈቀዱ። ወውእቱሰ፡ ለእንተ፡ ትኄይስ፡ ለነ፡ ከመ፡ ንርከብ፡ ቅድሳቲሁ። ኵሉ፡ ተግሣጽ፡ ኢይመስል፡ ትፍሥሕተ፡ በጊዜሁ፡ ዳእሙ፡ ሐዘን፡ ውእቱ። ወድኅረሰ፡ ትፈሪ፡ ሰላመ፡ ለእለ፡ ተገሠጹ፡ ወተዐስዮሙ፡ ጽድቀ። ወበእንተ፡ ዝ፡ አረትዑ፡ እደ፡ ፅዉስተ፡ ወእግረ፡ ፅቡሳተ። ወግበሩ፡ መንኰራኵረ፡ ርቱዐ፡ ለእገሪክሙ። ከመ፡ ይሕየው፡ ሕንካሴ፡ ልብክሙ፡ ወኢትትዐቀፉ። ወሩጹ፡ ኀበ፡ ሰላም፡ ምስለ፡ ኵሉ፡ ወኢትኅድጉ፡ ቅድሳቲክሙ። ወዘእንበሌሁሰ፡ አልቦ፡ ዘይርእዮ፡ ለእግዚአብሔር። በእንተ፡ ኢያስትቶ፡ ጸጋ፡ እግዚአብሔር አስተሐይጹ፡ አልቦ፡ ዘያስትት፡ ጸጋ፡ እግዚአብሔር። ወአልቦ፡ ዘይትረከብ፡ ሥርው፡ መሪር። እንተ፡ ታሠርጽ፡ ሕማመ፡ እንተ፡ ታስሕቶሙ፡ ወታረኵሶሙ፡ ለብዙኃን። አልቦ፡ ዘይከውን፡ ዘማዌ፡ ወርኩሰ። ከመ፡ ዔሳው፡ ዘሤጠ፡ ብኵርናሁ፡ ለአሐዱ፡ መብልዕ። ተአምሩ፡ ከመ፡ ድኅሬሃ፡ ፈቀደ፡ ይረስ፡ በረከተ። ወአውፅእዎ፡ እስመ፡ ተስእኖ፡ ወኀጥአ፡ ፍኖተ፡ በዘይኔስሕ፡ ወኀሠሣ፡ እንዘ፡ ይበኪ። እስመ፡ ኢመጻእክሙ፡ ኀበ፡ እሳት፡ ዘያስተርኢ፡ ዘይነድድ። ወጽልመት፡ ግፍትዕት፡ ወቆባር፡ ወዐውሎ፡ ወጣቃ። ወድምፀ፡ መጥቅዕ፡ ወቃለ፡ ነገር፡ ዘሰምዑ፡ እሙንቱ። ወኢፈቀዱ፡ ዳግመ፡ ይትናገሮሙ። እስመ፡ ስእንዎ፡ አጽምኦቶ፡ ለዘተናገሮሙ። ወእመኒ፡ እንስሳ፡ ቀርቦ፡ ለውእቱ፡ ደብር፡ ይዌግርዎ። ወዝንቱ፡ ኵሉ፡ በእንተ፡ ውእቱ፡ ግሩም፡ ውእቱ፡ ዘአስተርአዮሙ። ወሙሴኒ፡ ይቤ፡ ርዑድ፡ ወድንጉፅ፡ አነ። ወአንትሙሰ፡ በጻሕክሙ፡ ኀበ፡ ጽዮን፡ ሀገረ፡ እግዚአብሔር። ሕያው፡ ኢየሩሳሌም፡ እንተ፡ በሰማያት፡ ወኀበ፡ አእላፍ፡ መላእክት፡ ፍሡሓን። ለማኅበረ፡ በኵር፡ እለ፡ ጽሑፍ፡ አስማቲሆሙ፡ በሰማያት። ወኀበ፡ እግዚአብሔር፡ መኰንነ፡ ኵሉ፡ ወኀበ፡ መንፈሰ፡ ጻድቃን፡ ፍጹማን። ወኀበ፡ ኢየሱስ፡ ኅሩይ፡ ወመርሕ፡ ለሐዳስ፡ ሥርዐት፡ ወለንዝኀተ፡ ደም፡ ነባቢ። ዘይኄይስ፡ ተናግሮ፡ እምዘአቤል። ዑቁ፡ እንከ፡ ኢትእበይዎ፡ ለዘተናገረክሙ፡ እምሰማይ። ሶበ፡ እሙንቱ፡ ኢድኅኑ፡ እስመ፡ አበይዎ፡ ለዘአስተርአዮሙ፡ በደብር። እፎ፡ እንከ፡ ፈድፋደ፡ ንሕነ፡ ለእመ፡ ሜጥነ፡ ገጸነ፡ እምኔሁ፡ ለዘመጽአ፡ እምሰማያት። ወአድለቅለቃ፡ ለምድር፡ ቃሉ፡ ይእተ፡ አሚረ። ወይእዜኒ፡ ነገረ፡ ወይቤ፡ ዓዲ፡ ምዕረ፡ አነ፡ አድለቀልቃ፡ ለምድር። ወአኮ፡ ለምድር፡ ባሕቲታ፡ ዓዲ፡ ለሰማይኒ። ወዘይቤ፡ ዓዲ፡ ምዕረ፡ ያሬኢ፡ ከመ፡ ያፈልሶ፡ ወያኀልፎ፡ ለዘያንቀለቅል። እስመ፡ ፍጡራን፡ እሙንቱ፡ ከመ፡ ይንበር፡ ዘኢያንቀለቅል። ወበእንተ፡ ዝ፡ ንነሥእ፡ ንሕነ፡ መንግሥተ፡ ዘኢያንቀለቅል፡ ወብነ፡ ጸጋሁ። እንተ፡ በእንቲኣሁ፡ ንሠውዕ፡ ለእግዚአብሔር። ወናሠምሮ፡ በጸሎት፡ ወበስኢል፡ ወበፍርሀት፡ ወበረዓድ። እስመ፡ አምላክነ፡ እሳት፡ በላዒ፡ ውእቱ።

ምዕራፍ 13 በእንተ፡ ፍቅር፡ ወተወክፎተ፡ ነግድ ወሀልዉ፡ በተፋቅሮ፡ ምስለ፡ ቢጽክሙ። ወኢትርስዑ፡ ተቀብሎ፡ ነግድ። እስመ፡ በእንቲኣሁ፡ ቦ፡ እለ፡ ከፈሎሙ፡ ከመ፡ ይትቀበሉ፡ ነግደ፡ መላእክት፡ እንዘ፡ ኢየአምሩ። ተዘከሩ፡ ሙቁሓነ፡ ዘከመ፡ ተሞቃሕክሙ፡ ምስሌሆሙ። ወእለ፡ ተሣቀዩ፡ ከመ፡ ዘሀለውክሙ፡ በሥጋክሙ። ክቡር፡ አውስቦ፡ በኵለሄ፡ ወምስካቦሙኒ፡ አልቦቱ፡ ስእበት፡ ለዘማውያንሰ። ወለእለ፡ ያረኵሱ፡ ሥጋሆሙ፡ ይኴንኖሙ፡ እግዚአብሔር። ወእንዘ፡ ኢታፈቅሩ፡ ንዋየ፡ ሀልዉ። ወባሕቱ፡ የአክለክሙ፡ ዘብክሙ። እስመ፡ ውእቱ፡ ይቤ፡ ኢየኀድገከ፡ ወኢይትሄየየከ። ወይእዜኒ፡ ተአሚነነ፡ ንበል፡ እግዚአብሔር፡ ይረድአኒ። ወኢይፈርህ፡ ዕጓለ፡ እመሕያው፡ ምንተ፡ ይሬስየኒ። ተዘከሩ፡ መኳንንቲክሙ፡ ዘነገሩክሙ፡ ቃለ፡ እግዚአብሔር። እንዘ፡ ትሬእዩ፡ ሠናየ፡ ግእዞሙ፡ ወተመሰሉ፡ በሃይማኖቶሙ። እስመ፡ ኢየሱስ፡ ክርስቶስ፡ ውእቱ፡ ዘትማልም፡ ወዮም። ወከመ፡ ውእቱ፡ እስከ፡ ለዓለም። በእንተ፡ ካልእ፡ ትምህርት ኢታምጽኡ፡ ካልአ፡ ነኪረ፡ ትምህርተ፡ እስመ፡ ይኄይስ፡ ጸጋሁ፡ ያስተፍሥሕ፡ ልበክሙ። ወአኮ፡ በመባልዕት፡ ዘኢይበቊዖሙ፡ ለእለ፡ ያንሶስዉ፡ ቦቱ። ወብነ፡ ምሥዋዕ፡ ዘኢይከውኖሙ፡ ይብልዑ፡ እምኔሁ፡ እለ፡ የሐርምዋ፡ ለደብተራ። እስመ፡ ዘይሠውዑ፡ እንስሳ፡ ደመ፡ ያበውእ፡ ሊቀ፡ ካህናት፡ ውስተ፡ ቅድስተ፡ ቅዱሳን፡ በእንተ፡ ኀጢአት። ወያውዕይዎ፡ ሥጋሁ፡ በአፍኣ፡ እምትዕይንት። ወበእንተ፡ ዝ፡ ኢየሱስኒ፡ ከመ፡ ይቀድሶሙ፡ ለሕዝብ፡ በደሙ፡ በአፍኣ፡ እምትዕይንት፡ ተቀትለ። ወይእዜኒ፡ ንፃእ፡ ኀቤሁ፡ አፍኣ፡ እምትዕይንት፡ እንዘ፡ ንጸውር፡ ትዕይርቶ። ዘአኮ፡ ብነ፡ ዝየ፡ ሀገር፡ ዘይነብር፡ አላ፡ እንተ፡ ትመጽእ፡ ነኀሥሥ። ቦኑ፡ እንከ፡ ኢይከውነነ፡ ናብእ፡ መሥዋዕተ፡ ስብሐት፡ በኵሉ፡ ጊዜ፡ ለእግዚአብሔር፡ ፍሬ፡ ከናፍሪነ፡ ከመ፡ ንእመን፡ በስሙ። ወኢትርስዑ፡ ምሒረ፡ ነዳያን፡ ወተሳትፎቶሙ። እስመ፡ ዘከማሁ፡ መሥዋዕት፡ ይኤድሞ፡ ለእግዚአብሔር። በእንተ፡ አክብሮተ፡ መምህራን ተአዘዙ፡ ለመኳንንቲክሙ፡ ወተኰነነ፡ ሎሙ። እስመ፡ እሙንቱ፡ ይተግሁ፡ በእንተ፡ ነፍስክሙ። ከመ፡ ዘይትሐሰብዎሙ፡ በቅድመ፡ እግዚአብሔር፡ በእንቲኣክሙ። ከመ፡ በፍሥሓ፡ ይግበርዎ፡ ለዝንቱ፡ ወኢይንሀኩ። ወዝንቱ፡ ይደልወክሙ፡ ከመ፡ ትጸልዩ፡ በእንቲኣነ። ወንትአመን፡ ከመ፡ ታፈቅሩ፡ ወትፈቅዱ፡ ሠናየ፡ ለኵሉ። ወፈድፋደ፡ ትግበሩ፡ አስተበቊዐክሙ፡ ዘንተ፡ ከመ፡ ፍጡነ፡ እብጻሕክሙ። ወአምላከ፡ ሰላም፡ ዘአንሥኦ፡ እምዉታን፡ ለሊቀ፡ ኖሎተ፡ አባግዕ። በደመ፡ ሥርዐት፡ ዘለዓለም፡ ለእግዚእነ፡ ኢየሱስ፡ ክርስቶስ። ያጽንዕክሙ፡ ከመ፡ ትግበሩ፡ ፈቃዶ፡ በኵሉ፡ ምግባረ፡ ሠናይ። እንዘ፡ ውእቱ፡ ይገብር፡ ለክሙ፡ ሥምረቶ፡ በኢየሱስ፡ ክርስቶስ። ዘሎቱ፡ ስብሐት፡ ለዓለመ፡ ዓለም፡ አሜን። አስተበቊዐክሙ፡ አኀዊነ፡ ተወከፉ፡ ቃለ፡ ትምህርትክሙ። እስመ፡ በኅጹር፡ አዘዝኩክሙ። ወአእምሩ፡ ከመ፡ ጢሞቴዎስ፡ እኁነ፡ ዘተፈነወ፡ እምኀቤነ፡ ኀቤክሙ። ወእመሰ፡ አፍጠነ፡ መጺአ፡ እሬእየክሙ። አምኁ፡ ኵሎ፡ መኳንንቲክሙ፡ ወኵሎ፡ ቅዱሳነ፡ አምኁክሙ፡ እለ፡ ኢጣልያ። ወጸጋሁ፡ ምስለ፡ ኵልክሙ፡ አሜን።