Epistle to the Colossians

Introduction

Epistle Text of the EOTC printed Bible

ምዕራፍ 1 ዘከመ፡ ይደሉ፡ ጸልዮ፡ በእንተ፡ ቢጽ እምጳውሎስ፡ ሐዋርያሁ፡ ለእግዚእነ፡ ኢየሱስ፡ ክርስቶስ፡ በፈቃደ፡ እግዚአብሔር፡ ወጢሞቴዎስ፡ እኁነ። ለቅዱሳን፡ እለ፡ ውስተ፡ ቈላስይስ፡ ወምእመናን፡ አኀዊነ፡ በክርስቶስ። ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ። ነአኵቶ፡ ለእግዚአብሔር፡ አቡሁ፡ ለእግዚእነ፡ ኢየሱስ፡ ክርስቶስ፡ ዘልፈ፡ በእንቲኣክሙ፡ ወንጼሊ። እምአመ፡ ሰማዕነ፡ ሃይማኖትክሙ፡ በኢየሱስ፡ ክርስቶስ። ወዘከመ፡ ታፈቅርዎሙ፡ ለኵሎሙ፡ ቅዱሳን። በእንተ፡ ተስፋክሙ፡ ዘሥዩም፡ ለክሙ፡ በሰማያት። ዘአቅደምክሙ፡ ሰሚዐ፡ በቃለ፡ ጽድቅ፡ ትምህርተ፡ ወንጌል። ዘበጽሐ፡ ኀቤክሙ፡ ከመ፡ በኵሉ፡ ዓለም፡ ይፍረይ፡ ወይሥመር፡ በላዕሌክሙ። እምአመ፡ ሰማዕክሙ፡ ወርኢክሙ፡ ጸጋ፡ እግዚአብሔር፡ በጽድቅ። ዘተመሀርክሙ፡ በኀበ፡ ኤጳፍራስ፡ እኁነ። ላእከ፡ ዚኣነ፡ ምእመን፡ በክርስቶስ፡ ዘይትለአክ፡ በእንቲኣክሙ። ወውእቱ፡ ነገረነ፡ ተፋቅሮተክሙ፡ በመንፈስ። ወበእንተ፡ ዝ፡ ንሕነሂ፡ እምአመ፡ ሰማዕነ፡ ዜናክሙ፡ ኢኀደግነ፡ ጸልዮ፡ በእንቲኣክሙ። ወስኢለ፡ ከመ፡ ትፈጽሙ፡ አእምሮ፡ ፈቃዱ፡ ለእግዚአብሔር። በኵሉ፡ ጥበብ፡ ወበኵሉ፡ ምክረ፡ መንፈስ። ከመ፡ ትሑሩ፡ በዘይደልወክሙ፡ ለኀበ፡ እግዚአብሔር። ወበኵሉ፡ ታድልዉ፡ ሎቱ፡ በምግባረ፡ ሠናይ። እንዘ፡ ትፈርዩ፡ ወትሠምሩ፡ በጥበበ፡ አእምሮ፡ እግዚአብሔር። እንዘ፡ ትጸንዑ፡ በኵሉ፡ ኀይል። በበ፡ ጽንዐ፡ ስብሐቲሁ፡ በኵሉ፡ ትዕግሥት፡ ወበተስፋ፡ ወበፍሥሓ። በእንተ፡ አኰቴት አእኵትዎ፡ ለእግዚአብሔር፡ አብ፡ ዘረሰየነ፡ ድልዋነ። ለመክፈልተ፡ ርስቶሙ፡ ለቅዱሳን፡ በብርሃን። ወአድኀነነ፡ እምኵነኔ፡ ጽልመት። ወአግብአነ፡ ውስተ፡ መንግሥተ፡ ወልዱ፡ ፍቁሩ። ዘቦቱ፡ ረከብነ፡ መድኀኒተ፡ ወተኀድገ፡ ለነ፡ ኀጢአትነ። ዘውእቱ፡ አምሳሊሁ፡ ለእግዚአብሔር፡ ዘኢያስተርኢ፡ በኵሩ፡ ዘላዕለ፡ ኵሉ፡ ተግባሩ። እስመ፡ ቦቱ፡ ኵሎ፡ ፈጠረ፡ ዘበሰማይኒ፡ ወዘበምድርኒ፡ ዘያስተርኢ፡ ወዘኢያስተርኢ። እመኒ፡ መናብርት፡ ወእመኒ፡ አጋእዝት፡ ወእመኒ፡ መኳንንት፡ ወእመኒ፡ ቀደምት። ኵሉ፡ ዘኮነ፡ በእዴሁ፡ ወኵሉ፡ ቦቱ፡ ተፈጥረ። ወውእቱ፡ ህልው፡ እምቅድመ፡ ኵሉ፡ ወኵሉ፡ ቦቱ፡ ቆመ። በእንተ፡ ሰላም ወውእቱ፡ ርእሳ፡ ለቤተ፡ ክርስቲያን። እስመ፡ ውእቱ፡ በኵር፡ ቀደመ፡ እምኵሎሙ፡ ምዉታን፡ ተንሥኦ። ከመ፡ ይኩን፡ ውእቱ፡ ርእሰ፡ ለኵሉ። እስመ፡ ሠምረ፡ ቦቱ፡ ፍጹመ፡ ኵሉ፡ ይኅድር፡ ላዕሌሁ። ወቦቱ፡ ይሣሀል፡ ለኵሉ። ወገብረ፡ ሰላመ፡ በደመ፡ መስቀሉ፡ ለዘበሰማይ፡ ወለዘበምድር። ወአንትሙሂ፡ ትካት፡ ፀሩ፡ ወነኪሩ፡ በልብክሙ፡ ወበእከየ፡ ምግባሪክሙ። ወይእዜሰ፡ ተሣሀለክሙ፡ በነፍስተ፡ ሥጋሁ፡ ወበሞቱ። ከመ፡ ይረሲክሙ፡ ቅዱሳነ፡ ወንጹሓነ፡ ወኅሩያነ፡ ለቅድሜሁ። በእንተ፡ መልእክት፡ ሐዋርያዊት ለእመ፡ ጸናዕክሙ፡ እንከ፡ በሃይማኖት፡ እንዘ፡ ታጠብዑ። ወኢያንቀለቅል፡ ድደ፡ መሠረትክሙ፡ እምተስፋ፡ ትምህርተ፡ ወንጌል፡ ዘሰማዕክሙ። ከመ፡ ተሰብከ፡ በኵሉ፡ ዓለም፡ ዘመትሕተ፡ ሰማይ። ዘሎቱ፡ ተሠየምኩ፡ አነ፡ ጳውሎስ፡ ዐዋዴ፡ ወላእክሂ። ወይእዜኒ፡ እትፌሣሕ፡ በሕማምየ። ወእፌጽም፡ ታሕጻጸ፡ ሕማሙ፡ ለክርስቶስ፡ በሥጋየ። በእንተ፡ ሥጋሁ፡ እንተ፡ ይእቲ፡ ቤተ፡ ክርስቲያኑ። እንተ፡ ላቲ፡ ተሠየምኩ፡ አነ፡ ላእከ፡ በሥርዐተ፡ እግዚአብሔር። ዘወሀበኒ፡ በእንቲኣክሙ፡ ከመ፡ እፈጽም፡ ቃለ፡ እግዚአብሔር። ወምክሮ፡ ዘኅቡእ፡ እምቅድመ፡ ዓለም፡ ወዘእንበለ፡ ይትፈጠር፡ ሰብእ። ወይእዜሰ፡ አስተርአዮሙ፡ ለቅዱሳኒሁ። ለእለ፡ ፈቀደ፡ እግዚአብሔር፡ ይክሥት፡ ሎሙ፡ ብዕለ፡ ስብሐቲሁ፡ ለዝንቱ፡ ምክሩ፡ በላዕለ፡ አሕዛብ። እስመ፡ ውእቱ፡ ክርስቶስ፡ ዘየኀድር፡ ላዕሌክሙ፡ ተስፋ፡ ስብሐቲነ። ዘንሜህር፡ ንሕነ፡ ወንጼውዕ፡ ኀቤሁ፡ ወንጌሥጽ፡ ኵሎ፡ ሰብአ። ወንነግሮ፡ ግብሮ፡ በኵሉ፡ ጥበብ። ከመ፡ ይቁም፡ ኵሉ፡ ሰብእ፡ ፍጹመ፡ በሃይማኖተ፡ ኢየሱስ፡ ክርስቶስ። ዘበእንቲኣሁ፡ እሠርሕ፡ ወእትጋደል፡ በከመ፡ ረድኤቱ፡ ዘይረድአኒ፡ በኀይሉ።

ምዕራፍ 2 ዘከመ፡ ይደሉ፡ ተጋድሎ፡ በእንተ፡ አኀው ወእፈቅድ፡ ታእምሩ፡ መጠነ፡ እትጋደል፡ በእንቲኣክሙ፡ ወበእንተ፡ እለ፡ በሎዶቅያ። ወበእንተ፡ ኵሎሙ፡ እለ፡ ኢርእዩኒ፡ ገጽየ፡ በሥጋየ። ከመ፡ ይትፈሥሖሙ፡ ልቦሙ። ወይጽናዕ፡ ትምህርቶሙ፡ በተፋቅሮ፡ ወበኵሉ፡ ብዕለ፡ ፍጻሜ፡ በጥበብ፡ ወበሃይማኖት። ወበአእምሮ፡ ምክሩ፡ ለእግዚአብሔር፡ ዘበእንተ፡ ክርስቶስ። ዘኀቤሁ፡ ሀሎ፡ ኵሉ፡ መዝገበ፡ ጥበብ፡ ወምክር፡ ኅቡእ። ወዘኒ፡ ዘእብለክሙ፡ ከመ፡ አልቦ፡ ዘያስሕተክሙ፡ በኂጣነ፡ ነገር። አንሰ፡ ለእመ፡ ኢሀሎኩ፡ በሥጋየ፡ ኀቤክሙ፡ በመንፈስየ፡ ምስሌክሙ፡ አነ። ወናሁ፡ እትፌሣሕ፡ በዘእሬኢ፡ ግዕዘክሙ፡ ወሥርዐተክሙ፡ ወጽንዐ፡ ሃይማኖትክሙ፡ ዘበክርስቶስ። በእንተ፡ ጽንዐ፡ ሃይማኖት ወበከመ፡ ተወከፍክምዎ፡ ለክርስቶስ፡ እግዚእነ፡ ቦቱ፡ ሑሩ። ወተሣረሩ፡ ወተሐነጹ፡ ቦቱ። ወጽንዑ፡ በሃይማኖት፡ ዘተመሀርክሙ፡ ከመ፡ ትብዝኁ፡ በአኰቴቱ። ዑቁ፡ ኢይኂጡክሙ፡ በጥበበ፡ ነገር፡ ዘይዬውሁ፡ ለከንቱ። በሥርዐተ፡ ትምህርተ፡ ሰብእ፡ ለስሒተ፡ ዝንቱ፡ ዓለም። ወአኮ፡ በሕገ፡ ክርስቶስ፡ ዘላዕሌሁ፡ ኀደረ፡ ኵሉ፡ መለኮቱ፡ በሥጋ፡ ሰብእ። ወአንትሙሂ፡ ኩኑ፡ ፍጹማነ፡ ቦቱ። እስመ፡ ውእቱ፡ ርእሱ፡ ለኵሉ፡ መኰንን፡ ወለኵሉ፡ መንግሥት። ዘቦቱ፡ ተገዘርክሙ፡ ግዝረተ፡ ዘኢኮነ፡ ግብረ፡ እደ፡ ሰብእ። በስልበተ፡ ሥጋ፡ ነፍስተ፡ ኀጢአት፡ በግዝረተ፡ ክርስቶስ። ወተቀበርክሙ፡ ምስሌሁ፡ በጥምቀት፡ ወባቲ፡ ተንሣእክሙ፡ ምስሌሁ፡ በሃይማኖት። በረድኤተ፡ እግዚአብሔር፡ ዘአንሥኦ፡ እምዉታን። በእንተ፡ ድምሳሴ፡ መጽሐፈ፡ ዕዳ ወአንትሙሂ፡ እለ፡ ነበርክሙ፡ ምዉታነ፡ በኀጢአትክሙ፡ ወበቊልፈተ፡ ነፍስትክሙ። አሕየወክሙ፡ ምስሌሁ፡ ወጸገወክሙ፡ ኵሎ፡ ኀጢአተክሙ። ወደምሰሰ፡ ለነ፡ መጽሐፈ፡ ዕዳነ፡ በሥርዐቱ፡ እምእደውነ። ወአእተቶ፡ እማእከሌነ፡ ወቀነዎ፡ በመስቀሉ። ወበሰሊቦቱ፡ አስተኀፈሮሙ፡ ለቀደምት፡ ወለመኳንንት። ወአስተኀፈሮሙ፡ በተከሥቶ፡ ህላዌሁ። በእንተ፡ መብልዕ፡ ወመስቴ፡ ወካልኣን፡ ሕርመታት ዑቁ፡ እንከ፡ አልቦ፡ ዘይግእዘክሙ፡ ኢ፡ በመብልዕ፡ ወኢ፡ በመስቴ። ወኢ፡ በመክፈልተ፡ በዓላት፡ ወኢ፡ በአሥኅርት፡ ወኢ፡ በሰናብት። እስመ፡ ዝንቱ፡ ውእቱ፡ ጽላሎቱ፡ ለዘሀለዎ፡ ይምጻእ። ወአልቦ፡ ዘያስተአብድክሙ፡ በእንተ፡ ሥጋሁ፡ ለክርስቶስ። ፈቂዶ፡ በተየውሆ፡ ወበተናሕስዮ፡ ርእስ። ከመ፡ ትትአዘዙ፡ ለሕርመተ፡ መላእክት፡ በዘኢርእየ። ወይትሜካሕ፡ በከንቱ፡ በምክረ፡ ሥጋሁ። ወኢይጸንዕ፡ በርእስ፡ ዘቦቱ፡ የኀድር፡ ኵሉ፡ ሥጋ። ወይትዋደድ፡ በአሥራወ፡ ወመሌሊት። ወይልህቅ፡ ወይጸንዕ፡ ወይበዝኅ፡ ወይመልእ፡ በእግዚአብሔር። ወእመ፡ ሞትክሙ፡ ምስለ፡ ክርስቶስ፡ እምንብረተ፡ ዝ፡ ዓለም። በእፎ፡ ካዕበ፡ ከመ፡ ዘሕያዋን፡ ውስተ፡ ዓለም፡ ትገብሩ። ወይቤሉክሙ፡ ኢትግስስ፡ ወኢትልክፍ፡ ወኢትጥዐም፡ ዘንተ። እስመ፡ ዝንቱ፡ ኵሉ፡ ለሙስና፡ በከመ፡ ትእዛዘ፡ ሰብእ። ዘያመስልዎ፡ ጥበበ፡ በእንተ፡ ትሕትና፡ ልብ፡ ወፍርሀተ፡ እግዚአብሔር። ወኢ፡ ምሂከ፡ ሥጋ፡ አልቦቱ፡ ክብር፡ ምንተኒ። አላ፡ ውእቱ፡ ዘመልዕልተ፡ ሥጋ።

ምዕራፍ 3 በእንተ፡ ትንሣኤ፡ ልቡና ወእመሰ፡ ተንሣእክሙ፡ ምስለ፡ ክርስቶስ፡ ዘላዕለ። ኅሡ፡ ኀበ፡ ሀሎ፡ ክርስቶስ፡ በየማነ፡ እግዚአብሔር፡ ይነብር። ዘላዕሉ፡ ኀልዩ፡ ወአኮ፡ ዘበምድር። እስመ፡ ወዳእክሙ፡ ሞትክሙ። ወኅብእት፡ ሕይወትክሙ፡ ምስለ፡ ክርስቶስ፡ በኀበ፡ እግዚአብሔር። ወአመ፡ ይመጽእ፡ ክርስቶስ፡ ይትዐወቅ፡ ሕይወትክሙ። ይእተ፡ አሚረ፡ ታስተርእዩ፡ ምስሌሁ፡ በስብሐት፡ ዐቢይ። በእንተ፡ መዊት፡ እምኀጢአት አሙትዎ፡ ለነፍስትክሙ፡ ዘዲበ፡ ምድር፡ እምዝሙት፡ ወርኩስ፡ ወመንሱት። ወፍትወት፡ እኪት፡ ወትዕግልት፡ ዘውእቱ፡ አምልኮ፡ ጣዖት። ዘበእንቲኣሁ፡ ይመጽእ፡ መቅሠፍተ፡ እግዚአብሔር፡ ላዕለ፡ ውሉደ፡ ዐላውያን። ዘቦቱ፡ ሖርክሙ፡ አንትሙሂ፡ ትካት፡ አመ፡ ሐየውክሙ፡ በዝንቱ፡ ግብር። ወይእዜሰ፡ ኅድግዋ፡ ለመዓት፡ ወለቊጥዓ፡ ወለእከይ፡ ወለፅርፈት፡ ወለነገረ፡ ኀፍረት። ወነገረ፡ ከንቱ፡ ኢይፃእ፡ እምአፉክሙ። ወኢተሐስዉ፡ ቢጸክሙ፡ ዳእሙ፡ ኅድግዎ፡ ለብሉይ፡ ብእሲ፡ ምስለ፡ እኩይ፡ ምግባሩ። በእንተ፡ ሐዲስ፡ ብእሲ ወልበስዎ፡ ለሐዲስ፡ ብእሲ፡ ዘይትሔደስ፡ በአእምሮ፡ አምሳለ፡ ፈጣሪሁ። ዘአልቦ፡ በኀቤሁ፡ አይሁዳዊ፡ ወኢ፡ አረማዊ። ኢ፡ ግዙር፡ ወኢ፡ ቈላፍ፡ ኢ፡ ሐቃል፡ ወሀገሪት። ኢ፡ ነባሪ፡ ወኢ፡ አግዓዚ፡ ዘእንበለ፡ በኵሉ፡ ወበኀበ፡ ኵሉ፡ ክርስቶስ። ልበስዎ፡ እንከ፡ ከመ፡ ኅሩያነ፡ እግዚአብሔር፡ ቅዱሳን። ወፍቁራን፡ በምሕረት፡ ወበተሣህሎ፡ ወበኂሩት፡ ወትሑት፡ ልብ፡ በየውሀት፡ ወበትዕግሥት። ጹርዎሙ፡ ለቢጽክሙ፡ ወተጻገዉ፡ በበይናቲክሙ። ኅድጉ፡ ለቢጽክሙ፡ ዘተኀየስክምዎሙ፡ ከመ፡ ክርስቶስ፡ ጸገወክሙ። ከማሁ፡ አንትሙሂ፡ ግበሩ። በእንተ፡ ተፋቅሮ ወምስለ፡ ዝንቱ፡ ኵሉ፡ ተፋቀሩ፡ ዘልፈ። እስመ፡ ማእሰረ፡ ተፍጻሜቱ፡ ውእቱ። ወሰላሙ፡ ለክርስቶስ፡ ይጽናዕ፡ በልብክሙ። ዘሎቱ፡ ተጸዋዕክሙ፡ በአሐዱ፡ ሥጋ። ወሀልዉ፡ በአኰቴተ፡ ክርስቶስ፡ ወአንብቡ፡ መዝሙረ፡ ወስብሐተ፡ ወማሕሌተ፡ ቅድሳት። ወቃለ፡ እግዚአብሔር፡ ይጽናዕ፡ በኀቤክሙ፡ ከመ፡ ትብዐሉ፡ በኵሉ፡ ጥበብ። ወመሀሩ፡ ነፍሰክሙ፡ ወገሥጹ፡ በመንፈስ። ዘምሩ፡ ለእግዚአብሔር፡ በልብክሙ። ወኵሎ፡ ዘትገብሩ፡ በስመ፡ እግዚእነ፡ ኢየሱስ፡ ክርስቶስ፡ ግበርዎ። ወአእኵትዎ፡ ለእግዚአብሔር፡ አብ፡ በእንቲኣሁ። በእንተ፡ ሠሪዐ፡ ቤት ወአንስትኒ፡ ተአዘዛ፡ ለአምታቲክን፡ ከመ፡ ዘለእግዚአብሔር። ዕደውኒ፡ አፍቅሩ፡ አንስቲያክሙ፡ ወኢትግእዝዎን። ውሉድኒ፡ ተአዘዙ፡ ለአዝማዲክሙ፡ በኵሉ። እስመ፡ ከማሁ፡ ርቱዕ፡ ወይሠምር፡ እግዚአብሔር። አበውኒ፡ ኢታስተቈጥዑ፡ ውሉደክሙ፡ ከመ፡ ኢይሕዝኑ። ነባሪኒ፡ ተአዘዙ፡ ለአጋእዝቲክሙ፡ በስፉሕ፡ ልብ። ወአኮ፡ በአድልዎ፡ ለገጸ፡ ሰብእ፡ አላ፡ በፍርሀተ፡ እግዚአብሔር። ተአምሩ፡ ከመ፡ እምኀበ፡ እግዚአብሔር፡ ትትዐሰዩ፡ እስመ፡ ለክርስቶስ፡ ትትቀነዩ። ወዘሰ፡ ዐመፀ፡ ይረክብ፡ ፍዳሁ፡ ወኢያደሉ፡ ሎቱ።

ምዕራፍ 4 አጋእዝትኒ፡ ዕሩየ፡ ግበሩ፡ ሎሙ፡ ለነባሪክሙ፡ ወፍትሑ፡ ጽድቀ። ተአምሩ፡ ከመ፡ ብክሙ፡ እግዚእ፡ በሰማያት። በእንተ፡ ተፀምዶ፡ ለጸሎት ወተፀመዱ፡ ለጸሎት፡ እንዘ፡ ትተግሁ፡ በአኰቴት። ጸልዩ፡ ወሰአሉ፡ ለነሂ፡ ከመ፡ ያርኁ፡ ለነ፡ እግዚአብሔር፡ አናቅጸ፡ ቃል። ከመ፡ ንንግር፡ ምክረ፡ ዘእምኀበ፡ እግዚአብሔር፡ ዘበእንቲኣሁ፡ ተሞቃሕኩ። ከመ፡ እክሥቶ፡ በከመ፡ ይደልወኒ፡ እንግር። ሑሩ፡ በልቡና፡ በኀበ፡ ባዕዳን፡ እምሃይማኖት። ወይኩን፡ ነገርክሙ፡ በጸጋ፡ ወቅሱመ፡ በጼው። ከመ፡ ታእምሩ፡ ዘትትዋሥኡ፡ ለለ፡ አሐዱ፡ አሐዱ። ዜና፡ መምህር፡ በረድእ ወኵሎ፡ ዜናየ፡ ይዜንወክሙ፡ ጢኪቆስ፡ እኁነ፡ ምእመን፡ ዘነኀብር፡ ተቀንዮ። ዘውእቱ፡ እኁክሙ፡ በእግዚአብሔር። ዘፈነውክዎ፡ ኀቤክሙ፡ በእንተ፡ ዝንቱ፡ ግብር። ከመ፡ ታእምሩ፡ ዜናየ፡ ወያስተፍሥሕክሙ፡ ልበክሙ። ምስለ፡ አናሲሞስ፡ እኁነ፡ ምእመን፡ ዘናፍቅር፡ ዘውእቱ፡ ብእሲ፡ እምኔክሙ። ወእሙንቱ፡ ያጤይቁክሙ፡ ግብረነ፡ ወዘሀሎነ፡ ቦቱ። አምኃ፡ ለአርድእት አምኁክሙ፡ አርስጥሮኮስ፡ ዘተፄወወ፡ ምስሌየ። ወማርቆስ፡ ወልደ፡ እኅወ፡ አቡሁ፡ ለበርናባስ፡ ዘበእንቲኣሁ፡ አዘዝኩክሙ። ከመ፡ አመ፡ መጽአ፡ ኀቤክሙ፡ ትትወከፍዎ። ወኢያሱ፡ ዘተሰምየ፡ ኢዩስጦስ፡ እለ፡ እምሰብአ፡ ግዝረት። ወእሉ፡ ዳእሙ፡ ረድኤትየ፡ በግብረ፡ መንግሥተ፡ እግዚአብሔር፡ ወአስተፍሥሑኒ። አምኀክሙ፡ ኤጳፍራስ፡ ዘእምኀቤክሙ፡ ውእቱ፡ ገብረ፡ ክርስቶስ። ወዘልፈ፡ ይጼሊ፡ በእንቲኣክሙ፡ ወይስእል፡ ከመ፡ ትኩኑ፡ ፍጹማነ፡ ወምሉኣነ፡ በኵሉ፡ ሥምረተ፡ እግዚአብሔር። ወአነ፡ ሰማዕቱ፡ ከመ፡ ፈድፋደ፡ ያፈቅረክሙ፡ ወይቴክዝ፡ በእንቲኣክሙ። ወለእለ፡ በሎዶቅያ፡ ወሀገረ፡ ኢያራ። አምኀክሙ፡ ሉቃስ፡ ዐቃቤ፡ ሥራይ፡ ፍቁርነ፡ ወዴማስ። አምኅዎሙ፡ ለአኀዊነ፡ እለ፡ በሎዶቅያ፡ ወንምፋን። ወእለ፡ ሀለዉ፡ ቤተ፡ ክርስቲያን። ወአንቢበክሙ፡ ዛተ፡ መጽሐፈ፡ ፈንውዋ፡ ሎዶቅያ፡ ያንብብዋ፡ በቤተ፡ ክርስቲያን። ወካዕበ፡ አንብብዋ፡ አንትሙ፡ ለመልእክት፡ እንተ፡ ጸሐፍኩ፡ እምሎዶቅያ። ወበልዎ፡ ለአክርጳ፡ ዑቅአ፡ መልእክተከ፡ ዘተሠየምከ፡ እምኀበ፡ እግዚአብሔር፡ ከመ፡ ትፈጽም። ወአማኅኩክሙ፡ ጽሒፍየ፡ በእዴየ፡ አነ፡ ጳውሎስ። ተዘከሩ፡ መዋቅሕትየ፡ ጸጋ፡ ምስሌክሙ፡ አሜን።