Epistle to the Philippians

Introduction to the epistle

Epistle Text of the EOTC printed Bible

ምዕራፍ 1 ዘከመ፡ ጸለየ፡ ለሰብአ፡ ፊልጵስዩስ እምጳውሎስ፡ ወጢሞቴዎስ፡ አግብርተ፡ ኢየሱስ፡ ክርስቶስ። ለኵሎሙ፡ ቅዱሳን፡ እለ፡ ተቀደሱ፡ በኢየሱስ፡ ክርስቶስ። እለ፡ ሀለዉ፡ ፊልጵስዩስ፡ ምስለ፡ ቀሳውስት፡ ወዲያቆናት። ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ። አአኵቶ፡ ለእግዚአብሔር፡ ዘልፈ፡ በኵሉ፡ ተዝካርክሙ፡ ኪያየ። ወእጼሊ፡ በኵሉ፡ ጊዜ፡ በእንቲኣክሙ። ወእገብር፡ ጸሎተ፡ ፍሥሓ። በእንተ፡ ተሳትፎትክሙ፡ ኪያየ፡ በትምህርተ፡ ወንጌል። እምቀዳሚት፡ ዕለት፡ እስከ፡ ይእዜ። እስመ፡ እትአመን፡ ከመ፡ ውእቱ፡ ዘወጠነ፡ ለክሙ፡ ግብረ፡ ሠናየ። ውእቱ፡ ይፌጽም፡ ለክሙ፡ እስከ፡ ዕለተ፡ ኢየሱስ፡ ክርስቶስ። እስመ፡ ርቱዕ፡ ሊተ፡ ዘንተ፡ አኀሊ፡ በእንቲኣክሙ። እስመ፡ ሀሎክሙ፡ ውስተ፡ ልብየ፡ በመዋቅሕትየ፡ ወበቅስትየ፡ ወበትምህርተ፡ ጽድቅ። እስመ፡ ኀበርክሙ፡ ምስሌየ፡ በጸጋ። ወእግዚአብሔር፡ ሰማዕትየ፡ ከመ፡ አፈቅረክሙ፡ በፍቅረ፡ ክርስቶስ። ወእጼሊ፡ በእንተ፡ ዝንቱ። ከመ፡ ይብዛኅ፡ ወይፈድፍድ፡ ተፋቅሮትክሙ፡ በአእምሮ፡ ወበኵሉ፡ ጥበበ፡ መንፈስ። ከመ፡ ትፍትኑ፡ ወታመክሩ፡ ዘይኄይስ፡ ወዘይሤኒ፡ ግብረ። ከመ፡ ትኩኑ፡ ቅዱሳነ፡ ዘእንበለ፡ ዕቅፍት፡ በዕለተ፡ ክርስቶስ። እንዘ፡ ምሉኣን፡ አንትሙ፡ ፍሬ፡ ጽድቅ። በኢየሱስ፡ ክርስቶስ፡ በስብሐተ፡ እግዚአብሔር፡ ወአኰቴቱ። በእንተ፡ ተሞቅሖቱ፡ ለጳውሎስ ወእፈቅድ፡ አኀዊነ፡ ታእምሩ፡ ዜናየ። ከመ፡ ፈድፋደ፡ ተለዐለ፡ ውስተ፡ ትምህርተ፡ ወንጌሉ፡ ለክርስቶስ። ወተዐውቀ፡ መዋቅሕትየ፡ በክርስቶስ፡ በኀበ፡ ኵሉ፡ ምኵናን፡ ወበኀበ፡ ኵሉ፡ ሰብእ። ወከመ፡ ብዙኃን፡ እምአኀዊነ፡ ምእመናን፡ በእግዚእነ፡ ተዐገሡ፡ በመዋቅሕትየ። ወፈድፋደ፡ ተኀበሉ፡ ይንግሩ፡ አጥቢዖሙ፡ ቃለ፡ እግዚአብሔር፡ ዘእንበለ፡ ፍርሀት። ወቦ፡ እለ፡ በቅንአቶሙ፡ ወቦ፡ እለ፡ በተቃሕዎቶሙ። ወቦ፡ እለ፡ ፈቀዱ፡ ይስብኩ፡ በፍቅር፡ ሠናይ፡ ወይምሀሩ፡ በእንተ፡ ክርስቶስ። እስመ፡ የአምሩ፡ ከመ፡ ለምህሮ፡ ወንጌል፡ ተሠየምኩ፡ ዓዲ። ወእለሰ፡ በትዝኅርቶሙ፡ ይነግሩ፡ በእንተ፡ ክርስቶስ፡ አኮ፡ በንጽሕ። ዳእሙ፡ ይትሐዘቡ፡ ከመ፡ ገቢሮሙ፡ ኪያሁ፡ ይወስኩ፡ ሊተ፡ ሕማመ፡ በመዋቅሕትየ። ወናሁ፡ ተፈሣሕኩ፡ በዝንቱ፡ ወእትፌሣሕኒ፡ ቦቱ፡ በኵሉ፡ ምክንያት። ይንግሩ፡ በእንተ፡ ክርስቶስ፡ እመኒ፡ በአድልዎ፡ ወእመኒ፡ በአማን። ወይጸውዑ፡ ኀቤሁ፡ ኵሎ፡ ሰብእ። ወአነ፡ አአምር፡ ከመ፡ ዛቲ፡ ግብር፡ ታበጽሐኒ፡ ኀበ፡ ሕይወት። በጸሎትክሙ፡ ወበሀብተ፡ መንፈሱ፡ ለኢየሱስ፡ ክርስቶስ። ሕይወት፡ በእንተ፡ ክርስቶስ በከመ፡ ተሰፈውኩ፡ ወተወከልኩ፡ ከመ፡ ኢይትኀፈር፡ ወኢ፡ በምንትኒ። ዳእሙ፡ ገሃደ፡ በፍሥሓ፡ መንፈስ፡ ከመ፡ ዘልፍ። ወይእዜኒ፡ ዕበዩ፡ ለክርስቶስ፡ በሥጋየ። እመኒ፡ በሕይወትየ፡ ወእመኒ፡ በሞትየ። አንሰ፡ እመኒ፡ ሐየውኩ፡ ለክርስቶስ፡ ወእመኒ፡ ሞትኩ፡ ርቡኅ፡ ሊተ። ወለእመኒ፡ ሐየውኩ፡ በሥጋየ፡ ከመ፡ እፍረይ፡ በግብርየ። ወኀጣእኩ፡ ዘአኀሪ፡ ለነፍስየ፡ እምእሉ፡ ክልኤቱ፡ ዘያጽሕቀኒ፡ ፈቂዶቶሙ። እፈቱሰ፡ እፍልስ፡ ወእትፈለጥ፡ እምዓለም፡ ከመ፡ አሀሉ፡ ኀበ፡ ክርስቶስ። ወፈድፋደ፡ ይኄይስ፡ ወይደሉ፡ ሊተ፡ ዝንቱ። ወከመ፡ አሀሉ፡ ዓዲ፡ በሕይወተ፡ ሥጋየ፡ ርቱዕ፡ በእንቲኣክሙ። ወእትአመን፡ አእሚርየ፡ ዘንተ፡ ከመ፡ እነብር፡ ወእሄሉ፡ ለፍሥሓክሙ፡ ወለተልዕሎ፡ ሃይማኖትክሙ። ከመ፡ አመ፡ መጻእኩ፡ ካዕበ፡ ኀቤክሙ፡ ይዕበይ፡ ክብርክሙ፡ በላዕሌየ፡ በኢየሱስ፡ ክርስቶስ። ወበዘይደሉ፡ ለትምህርተ፡ ክርስቶስ፡ ይኩን፡ ዳእሙ፡ ግብርክሙ። ወለእመ፡ መጻእኩ፡ ኀቤክሙ፡ እሬኢ፡ ዘንተ። ወእመኒ፡ እንዘ፡ ኢሀሎኩ፡ እሰምዕ፡ በላዕሌክሙ። ከመ፡ ትቀውሙ፡ በአሐዱ፡ መንፈስ፡ ወበአሐዱ፡ ነፍስ። እንዘ፡ ትትጋደሉ፡ በጻማ፡ ሃይማኖተ፡ ወንጌል። ወእንዘ፡ ኢያንቀለቅሉክሙ፡ በምንትኒ፡ እለ፡ ይትቃወሙነ። ከመ፡ ይትዐወቅ፡ ሕርትምናሆሙ፡ ወለክሙሰ፡ ሕይወት። ወዘንተኒ፡ ጸጋ፡ እግዚአብሔር፡ ዘጸገወክሙ፡ አኮ፡ ዳእሙ፡ ከመ፡ ትእመኑ፡ ቦቱ። አላ፡ ዓዲ፡ ከመሂ፡ ትሕምሙ፡ በእንቲኣሁ። ወከማሁ፡ ክመ፡ ትትጋደሉ፡ ዘከመ፡ ርኢክሙኒ፡ ኪያየ፡ ወሰማዕክሙ፡ በእንቲኣየ።

ምዕራፍ 2 ዘከመ፡ ኢይደሉ፡ ተቃሕዎ ወእምከመ፡ ሀለወ፡ ኀቤክሙ፡ ይእዜ፡ ፍሥሓ፡ በክርስቶስ። አው፡ ዘይናዝዝ፡ ልበ፡ በተፋቅሮ። አው፡ ዘይሳተፍ፡ በመንፈስ፡ አው፡ በምሒር፡ ወተሣህሎ። ፍጽሙ፡ ሊተ፡ ፍሥሓየ፡ ከመ፡ ተኀልዩ፡ ኪያሁ። ወተሀልዉ፡ በተፋቅሮ፡ በአሐዱ፡ ነፍስ፡ ወበአሐዱ፡ ምክር። ወኢትግበሩ፡ በተቃኅዎ። ወኢ፡ በአፍቅሮ፡ ክብረ፡ ከንቱ፡ ኢትዘኀሩ፡ ወኢትትዐበዩ። አላ፡ በትሑት፡ ልብ፡ አክብሩ፡ ቢጸክሙ፡ እምርእስክሙ። ወኢትጽሐቁ፡ ለባሕቲትክሙ፡ ዘእንበለ፡ ለቢጽክሙ። በእንተ፡ ተዘክሮተ፡ መስቀል ኵልክሙ፡ ፍጹማን፡ ዘንተ፡ ኀልዩ፡ ለነሂ፡ ዘከመ፡ ገብረ፡ ለነ፡ ኢየሱስ፡ ክርስቶስ። ዘውእቱ፡ አርአያሁ፡ ለእግዚአብሔር፡ አኮ፡ ሀይዶ፡ ዘኮነ፡ እግዚአብሔር። አላ፡ አትሒቶ፡ ርእሶ፡ ነሥአ፡ አርአያ፡ ገብር፡ ወተመሰለ፡ ከመ፡ ብእሲ። ወኮነ፡ ከመ፡ ሰብእ፡ ወሰምዐ፡ ወተአዘዘ፡ እስከ፡ በጽሐ፡ ለሞት። ወሞቱሂ፡ ዘበመስቀል። ወበእንተዝ፡ አዕበዮ፡ እግዚአብሔር፡ ጥቀ። ወጸገዎ፡ ስመ፡ ዘየዐቢ፡ እምኵሉ፡ ስም። ከመ፡ ለስሙ፡ ለኢየሱስ፡ ክርስቶስ፡ ይስግድ፡ ኵሉ፡ ብርክ። ዘበሰማያት፡ ወዘበምድር፡ ወበቀላያት፡ ወእለ፡ ታሕተ፡ ምድር። ወኵሉ፡ ልሳን፡ ይግነይ፡ ከመ፡ ኢየሱስ፡ ክርስቶስ። ውእቱ፡ እግዚእ፡ በስብሐተ፡ እግዚአብሔር፡ አብ። ወይእዜኒ፡ አኀውየ፡ በከመ፡ ዘልፈ፡ ትሰምዑኒ፡ ወአኮ፡ በሀልዎትየ፡ ዳእሙ። ወዓዲ፡ ፈድፋደ፡ እንዘ፡ ኢሀሎኩ፡ በፍርሀት፡ ወበረዓድ፡ ተገበሩ፡ ለሕይወትክሙ። ወእግዚአብሔር፡ ውእቱ፡ ዘይረድአክሙ፡ ለፈቃዱ፡ ወይፈጽም፡ ለክሙ፡ ሣህሎ። በእንተ፡ ግብር፡ ዘእንበለ፡ ኑፋቄ፡ ወነጐርጓር ወግበሩ፡ ኵሎ፡ ዘትገብሩ፡ በተሰናዕዎ። ወበሥምረት፡ ዘእንበለ፡ ነጐርጓር፡ ወዘእንበለ፡ ኑፋቄ። ከመ፡ ትኩኑ፡ ንጹሓነ፡ ወየዋሃነ፡ ከመ፡ ውሉደ፡ እግዚአብሔር። እንዘ፡ አልብክሙ፡ ነውር፡ በማእከለ፡ ውሉደ፡ ዐላውያን፡ ወግፍቱዓን። ወታስተርእዩ፡ ከመ፡ ብርሃናት፡ ውስተ፡ ዓለም። እንዘ፡ ትሜህሩ፡ ቃለ፡ ሕይወተ፡ በዘእትሜካሕ፡ አነ፡ በዕለተ፡ ክርስቶስ። እስመ፡ አኮ፡ ለከንቱ፡ ዘሮጽኩ፡ ወአኮ፡ ለከንቱ፡ ዘጻመውኩ። ወአወጽሕ፡ በእንተ፡ መሥዋዕተ፡ አምልኮ፡ ለሃይማኖትክሙ። ወናሁ፡ እትፌሣሕ፡ ወእትሐሠይ፡ ለክሙ። ወአንትሙኒ፡ ተፈሥሑ፡ ወተሐሠዩ፡ ሊተ። በከመ፡ ንዕዶ፡ ጳውሎስ፡ ለጢሞቴዎስ ወእትአመን፡ በእግዚእነ፡ ኢየሱስ፡ ክርስቶስ፡ ከመ፡ እፌንዎ፡ ለክሙ፡ ለጢሞቴዎስ። ከመ፡ እትፌሣሕ፡ አነሂ፡ ሰሚዕየ፡ ዜናክሙ። እስመ፡ አልብየ፡ ዘከመ፡ ግእዝየ፡ ዘእንበሌሁ፡ ዘይጸውር፡ ትካዘክሙ፡ በአእምሮ። እስመ፡ ኵሉ፡ ትካዘ፡ ርእሱ፡ ይኄሊ፡ ወአኮ፡ ዘክርስቶስ። ወተአምርዎ፡ ግእዞ፡ ለዝንቱ፡ ብእሲ። ዘከመ፡ ተቀንየ፡ ሊተ፡ ከመ፡ ወልድ፡ ለወላዲሁ፡ ለትምህርተ፡ ወንጌል። ኪያሁ፡ እሴፎ፡ እፈንዎ፡ ፍጡነ፡ አእሚርየ፡ ዘከመ፡ ሀሎኩ፡ እፌንዎ፡ ሶቤሃ። ወእትአመን፡ በእግዚእነ፡ ከመ፡ አነሂ፡ ፍጡነ፡ እመጽእ። ወይእዜሰ፡ ፈድፋደ፡ ጽሕቁ፡ በእንተ፡ አፍሮዲጡ፡ እኁነ። ዘየኀብር፡ ግብረ፡ ምስሌየ፡ ወዓሊ፡ ዘክርስቶስ። ወለክሙሰ፡ ሐዋርያክሙ፡ ወላእክየ፡ ለትካዝየ፡ እፌንዎ፡ ኀቤክሙ። እስመ፡ ይጽሕቅ፡ ይርአይክሙ፡ አእሚሮ፡ ዘሰማዕክሙ፡ ከመ፡ ደወየ፡ ወበጽሐ፡ ለሞት። ወባሕቱ፡ እግዚአብሔር፡ ምሕሮ። ወአኮ፡ ሎቱ፡ ለባሕቲቱ፡ ዓዲ፡ ሊተኒ፡ ከመ፡ ትካዝ፡ በዲበ፡ ትካዝ፡ ኢይትወሰከኒ። ወፈነውክዎ፡ ፍጡነ፡ ከመ፡ ትርአይዎ፡ ወትትፈሥሑ፡ ወአነሂ፡ ከመ፡ እትፈሣሕ። ወተወከፍክዎ፡ በእግዚእነ፡ በኵሉ፡ ፍሥሓ። ወአክብርዎሙ፡ ለእለ፡ ከመ፡ ዝ። እስመ፡ በእንተ፡ ግብረ፡ እግዚአብሔር፡ በጽሐ፡ እስከ፡ ለሞት። ወመጠወ፡ ነፍሶ፡ ከመ፡ ይፈጽም፡ ዘአሕጸጽክሙ፡ አንትሙ፡ እመልእክተ፡ ዚኣየ።

ምዕራፍ 3 በከመ፡ ይደሉ፡ ተዐቅቦ፡ እምእኩያን ወይእዜኒ፡ አኀውየ፡ ተፈሥሑ፡ በእግዚእነ። ወዘሂ፡ ዘእጽሕፍ፡ ለክሙ፡ ኢይትሀከይ፡ አንሰ፡ እስመ፡ ያጸንዐክሙ። ተዐቀቡ፡ አንትሙሂ፡ ወዑቅዎሙ፡ ለከለባት። ወዑቅዎሙ፡ ለገበርተ፡ እኪት፡ ወዑቅዎሙ፡ ለምቱራን፡ በግዝረት። ግዙራንሰ፡ ንሕነ፡ እለ፡ ንትለአክ፡ ለእግዚአብሔር፡ በመንፈስ። ወናመልክ፡ ወንትሜካሕ፡ በኢየሱስ፡ ክርስቶስ። ወአኮ፡ በሥጋነ፡ ዘንትዌከል። እንዘ፡ ብየኒ፡ ግዝረት፡ እመሰ፡ አነ፡ እትዌከል፡ በግዝረት። ወእመሰ፡ ቦ፡ ዘይኄሊ፡ ትውክልተ፡ በግዝረት። አነ፡ እኄይሶ፡ በዝንቱ፡ ግዙር፡ ዘበሳምንት፡ እምሕዝበ፡ እስራኤል፡ እምነገደ፡ ብንያም። ዕብራዊ፡ ዘእምዕብራውያን፡ ወበሕገ፡ ኦሪት፡ ፈሪሳዊ። ወበቅንአት፡ ሰደድኩ፡ ቤተ፡ ክርስቲያን፡ በጽድቀ፡ ኦሪት፡ ንጹሐ፡ ከዊንየ። ወባሕቱ፡ ዝኰ፡ ረባሕየ፡ አብደርኩ፡ አህጐሎ፡ በእንተ፡ ክርስቶስ። ወረሰይኩ፡ ኵሎ፡ ኀሳረ፡ በእንተ፡ ዕበየ፡ ኀይለ፡ አእምሮቱ፡ ለኢየሱስ፡ ክርስቶስ፡ እግዚእየ። ዘበእንቲኣሁ፡ ገደፍኩ፡ ኵሎ፡ ወረሰይክዎ፡ ከመ፡ እዳው፡ ከመ፡ እርብሖ፡ ለክርስቶስ። ወእኩን፡ ቦቱ፡ እንዘ፡ አልብየ፡ ይእዜ፡ ጽድቀ፡ ኦሪት። ዘእንበለ፡ ጽድቀ፡ ሃይማኖተ፡ ክርስቶስ፡ ዘእምኀበ፡ እግዚአብሔር። ወቦቱ፡ አእምሮ፡ ለኢየሱስ፡ ወለኀይለ፡ ተንሥኦቱ። ወእሳተፎ፡ በሕማሙ፡ ወእትሜሰሎ፡ በሞቱ። ጸኒሐ፡ ዕሴት እመ፡ ቦ፡ ከመ፡ አድምዖ፡ በዝንቱ፡ አመ፡ ይትነሥኡ፡ ምዉታን። ወአኮሰ፡ ዘወዳእኩ፡ ወነሣእኩ፡ ወሠለጥኩ፡ ዘንተ። ዳእሙ፡ እዴግን፡ ለእመ፡ እረክብ፡ ግብረ፡ ዘበእንቲኣሁ፡ ነሥአኒ፡ ኢየሱስ፡ ክርስቶስ። ኦ፡ አኀውየ፡ ሊተሰ፡ ይመስለኒ፡ ዓዲየ፡ ኢነሣእኩ፡ ፍጻሜየ። እስመ፡ ዘድኅሬየ፡ እረስዕ፡ ወዘቅድሜየ፡ እሜልእ። ወእዴግን፡ ወአኀሥሥ፡ ዕሴትየ። ከመ፡ ሰብአ፡ ዐይን፡ ለጽዋዔ፡ ዘእግዚአብሔር፡ ኀበ፡ ላዕሉ፡ በኢየሱስ፡ ክርስቶስ። ኵልክሙ፡ ፍጹማን፡ ዘንተ፡ ኀልዩ። ወእመኒ፡ ቦ፡ ባዕድ፡ ዘትኄልዩ፡ ኪያሁኒ፡ ይክሥት፡ ለክሙ፡ እግዚአብሔር። ወባሕቱ፡ ውስተ፡ ዘበጻሕነ፡ ግብር፡ ናጥብዕ፡ በአሐዱ፡ ኅብረት። ኪያየ፡ ተመሰሉ፡ አኀውየ። ወተዐቀብዎሙ፡ ለእለ፡ ከመ፡ ዝ፡ የሐውሩ፡ ዘአመ፡ ትሬእዩነ። እስመ፡ ብዙኃን፡ እለ፡ የሐውሩ፡ ሑረተ፡ ካልአ፡ ዘከመ፡ እብለክሙ፡ ዘልፈ። ወይእዜኒ፡ ገሃደ፡ እነግረክሙ፡ ከመ፡ እሙንቱ፡ ጸላእቱ፡ ለመስቀለ፡ ክርስቶስ። እለ፡ ደኃሪቶሙ፡ ለሕርትምና፡ እለ፡ ከርሦሙ፡ ያመልኩ። ወክብሮሙ፡ ኀሳሮሙ፡ እለ፡ ይኄልዩ፡ ዘውስተ፡ ምድር። በእንተ፡ ርስት፡ ሰማያዊት ወለነሰ፡ ዘውስተ፡ ሰማያት፡ ሀገርነ። ወእምህየ፡ ንጸንሕ፡ ኪያሁ፡ መድኀኒነ፡ ኢየሱስ፡ ክርስቶስ፡ እግዚእነ። ዘይሔድስ፡ ሥጋነ፡ ትሑተ፡ ወይሬስዮ፡ አምሳለ፡ ሥጋ፡ ስብሐቲሁ። በከመ፡ ረድኤተ፡ ኀይሉ፡ ዘቦቱ፡ ይገኒ፡ ሎቱ፡ ኵሉ።

ምዕራፍ 4 አማሕፅኖተ፡ ግብር፡ ለአርዳእ ወይእዜኒ፡ አኀዊነ፡ ፍቁራን፡ ፍሥሓነ፡ ወአክሊልነ። ከመ፡ ዝ፡ ቁሙ፡ ወጽንዑ፡ በእግዚእነ፡ አኀዊነ። ወአስተበቊዐክሙ፡ ኤዎድያን፡ ወስንጣክን። ከመ፡ ተኀልዩ፡ በተልእኮ፡ እግዚእነ፡ በአሐዱ፡ ልብ። ወአስተበቊዐከ፡ ለከሂ፡ እኁየ፡ ወመፃምርትየ፡ ሰትሪካ፡ ከመ፡ ታርድኦሙ። እስመ፡ ሠርሑ፡ ምስሌየ፡ በትምህርተ፡ ወንጌል፡ ምስለ፡ ቀሌምንጦስ። ወኵሎሙ፡ ቢጽነ፡ እለ፡ አሐዱ፡ ግብሮሙ። እለ፡ ተጽሕፈ፡ አስማቲሆሙ፡ ውስተ፡ መጽሐፈ፡ ሕይወት። ከሢተ፡ ስእለት፡ በጊዜ፡ ጸሎት ተፈሥሑ፡ በእግዚእነ፡ ዘልፈ፡ ወካዕበ፡ እብለክሙ፡ ተፈሥሑ። ወይትዐወቅ፡ ሥላጤክሙ፡ በኀበ፡ ኵሉ፡ ሰብእ፡ እግዚአብሔር፡ ቅሩብ። ኢተሐልዩ፡ ወኢ፡ ምንተኒ፡ ወባሕቱ፡ ጸልዩ፡ በኵሉ፡ ጊዜ፡ ወሰአሉ። ወእንዘ፡ ተአኵቱ፡ ክሥቱ፡ ስእለተክሙ፡ ኀበ፡ እግዚአብሔር። ወሰላመ፡ እግዚአብሔር፡ እንተ፡ ኵሉ፡ ባቲ፡ ወትትሌዐል፡ እምኵሉ፡ ልብ፡ ወእምኵሉ፡ ኅሊና። ታጽንዖ፡ ለልብክሙ፡ ወለኅሊናክሙ፡ በኢየሱስ፡ ክርስቶስ። አኰቴት፡ ወበረከት ወይእዜኒ፡ አኀዊነ፡ ኵሎ፡ ዘርትዕ፡ ወዘንጽሕ፡ ወዘጽድቅ፡ ወዘሠናይ፡ ወዘፍቅር። ወዘምድሐር፡ ወአስተርክቦ፡ ዘይደሉ፡ ወዘይትአኰት፡ ኪያሁ፡ ኀልዩ። ዘተመሀርክሙ፡ ወዘሰማዕክሙ፡ ወዘርኢክሙ፡ በኀቤየ፡ ኪያሁ፡ ግበሩ። ወአምላከ፡ ሰላም፡ የሀሉ፡ ምስለ፡ ኵልክሙ። ተፈሣሕኩ፡ በእግዚእነ፡ ፈድፋደ። እስመ፡ ትኄልዩ፡ ወትጽሕቁ፡ ለትካዝየ፡ እምቀዲሙ። በከመ፡ ትጽሕቁ፡ ሊተ፡ ዓዲ፡ ወለእመ፡ ይሰአነክሙ። ወአኮ፡ ዘእቤ፡ በእንተ፡ ዘኀጣእኩ፡ እስመ፡ አአምር፡ ከመ፡ የአክለኒ፡ ዘብየ። ከሃሊ፡ አንሰ፡ ተጽናሰሂ፡ ወተደልዎሂ፡ በኵሉ፡ ውስተ፡ ኵሉ፡ ለመድኩ። ርኂበሂ፡ ወጸጊበሂ፡ ሐሚመሂ፡ ወተፈሥሖሂ። ኵሎ፡ እክል፡ በዘውእቱ፡ አክሀለኒ፡ ክርስቶስ። ወባሕቱ፡ ሠናየ፡ ገበርክሙ፡ ዘተሳተፍክሙ፡ በሕማምየ። ተአምሩ፡ አንትሙ፡ ሰብአ፡ ፊልጵስዩስ። በቀዳሚ፡ ትምህርት፡ አመ፡ መጻእኩ፡ እመቄዶንያ። ከመ፡ ኢኀብሩ፡ ምስሌየ፡ አሐዱሂ፡ እምቤተ፡ ክርስቲያን። ኢ፡ በውሂብ፡ ወኢ፡ በነሢእ፡ ዘእንበለ፡ ዳእሙ፡ ባሕቲትክሙ። ዓዲ፡ በተሰሎንቄሂ፡ ምዕረ፡ ወካዕበ፡ ፈኖክሙ፡ ሊተ፡ ለትካዝየ። አኮ፡ ሀብተክሙ፡ ፈቂድየ፡ ዘእዜከር፡ ዘንተ። ዳእሙ፡ አኀሥሥ፡ ከመ፡ ይሥመር፡ በላዕሌክሙ፡ ፍሬ፡ ጽድቅ። ወናሁ፡ ተወከፍኩ፡ ኵሎ፡ ዘፈኖክሙ፡ ኀቤየ፡ አከለኒ። ወበዘተርፈ፡ ሠለጥኩ፡ በዘአብጽሐ፡ ሊተ፡ አፍሮዲጡ። ዘእምኀቤክሙ፡ መዓዛ፡ ሠናየ፡ ወመሥዋዕተ፡ ኅሩየ፡ ወሥሙረ፡ በኀበ፡ እግዚአብሔር። ወአምላክየ፡ ይፈጽም፡ ለክሙ፡ ኵሎ፡ መፍቅደክሙ። በከመ፡ ብዕለ፡ ስብሐቲሁ፡ ለኢየሱስ፡ ክርስቶስ፡ ወእግዚአብሔር፡ አቡነ። ዘሎቱ፡ ስብሐት፡ ለዓለመ፡ ዓለም፡ አሜን። አምኁ፡ ኵሎ፡ ቅዱሳነ፡ በኢየሱስ፡ ክርስቶስ። አምኁክሙ፡ አኀዊነ፡ እለ፡ ኀቤየ። ወይኤምኁክሙ፡ ኵሎሙ፡ ቅዱሳን። ወፈድፋደሰ፡ እለ፡ እምሰብአ፡ ቄሣር፡ ቤተ፡ ንጉሥ። ጸጋሁ፡ ለእግዚእነ፡ ኢየሱስ፡ ክርስቶስ፡ ምስለ፡ መንፈስክሙ፡ አሜን።