መልእክተ፡ ጳውሎስ፡ ዳግማዊ፡ ኀበ፡ ሰብአ፡ ቆሮንቶስ።

Introduction to the epistle

Epistle Text of the EOTC printed Bible

ምዕራፍ 1 በእንተ፡ ጥብዐት፡ ወተወክሎ፡ በክርስቶስ እምጳውሎስ፡ ሐዋርያሁ፡ ለኢየሱስ፡ ክርስቶስ፡ በፈቃደ፡ እግዚአብሔር፡ ወጢሞቴዎስ፡ እኁነ። ለቤተ፡ ክርስቲያን፡ ዘማኅበረ፡ እግዚአብሔር፡ ዘሀገረ፡ ቆሮንቶስ። ወለኵሎሙ፡ ቅዱሳን፡ እለ፡ ሀገረ፡ አካይያ። ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ። ይትባረክ፡ እግዚአብሔር፡ አቡሁ፡ ለእግዚእነ፡ ኢየሱስ፡ ክርስቶስ። አቡሃ፡ ለምሕረት፡ ወአምላከ፡ ለኵላ፡ ትፍሥሕት። ዘአስተፍሥሐነ፡ እምኵሉ፡ ሕማምነ። ከመ፡ ንክሀል፡ አስተፍሥሖቶሙ፡ ለኵሎሙ፡ ሕሙማን። በውእቱ፡ ፍሥሓነ፡ ዘአስተፍሥሐነ፡ እግዚአብሔር። ወበከመ፡ በዝኀ፡ ሕማሙ፡ ለክርስቶስ፡ ላዕሌነ። ከማሁ፡ ይፈደፍድ፡ ፍሥሓነ፡ በክርስቶስ። ወእመኒ፡ ሐመምነ፡ ከመ፡ አንትሙ፡ ትድኀኑ፡ ወትትፈሥሑ። ወእመኒ፡ ተፈሣሕነ፡ ንሕነ፡ ከመ፡ አንትሙ፡ ትትፈሥሑ። ወትጽንዑ፡ በትዕግሥቱ፡ ለውእቱ፡ ሕማም፡ ዘቦቱ፡ ነሐምም፡ ንሕነሂ። ወትውክልትነሂ፡ ጽኑዕ፡ ዘበእንቲኣክሙ። ወበከመ፡ ዐረይክሙ፡ ሕማመነ፡ ከማሁ፡ ተኀብሩ፡ በፍሥሓነሂ። ወእፈቅድ፡ ታእምሩ፡ አኀዊነ፡ ዘከመ፡ ሐመምነ፡ በእስያ። እስመ፡ ፈድፋደ፡ እምአምጣነ፡ ኀይልነ፡ አመንደቡነ፡ እስከ፡ ቀበጽናሃ፡ ለሕይወትነ። ወአጥባዕነ፡ ለመዊት፡ ከመ፡ ኢንትአመን፡ በርእስነ። ዘእንበለ፡ በእግዚአብሔር፡ ዘያሐይዎሙ፡ ለምዉታን፡ ዘአድኀነነ፡ እመጠነ፡ ዝ፡ ሞት። ወዓዲ፡ ኪያሁ፡ ንትአመን፡ ከመ፡ ያድኅነነ፡ እንዘ፡ ትረድኡነ፡ አንትሙኒ፡ በጸሎትክሙ። ከመ፡ ንርከብ፡ ሞገሰ፡ በጸሎተ፡ ብዙኃን። ወአንትሙሂ፡ ትትአኰቱ፡ በኀበ፡ ኵሉ። እስመ፡ ዛቲ፡ ይእቲ፡ ትምክሕትነ፡ ወስምዐ፡ ግእዛንነ፡ በምሕረቱ፡ ወበተመይጦቱ። ወበጸጋ፡ እግዚአብሔር፡ አንሶሰውነ፡ ውስተ፡ ዓለም። ወኢኮነ፡ በትምህርተ፡ ወፈድፋደሰ፡ ኀቤክሙ። እስመ፡ አልቦ፡ ዘንጽሕፍ፡ ኀቤክሙ፡ ዘእንበለ፡ ዘታነብቡ፡ ወዘተአምሩ፡ ወዘይትዐወቀክሙ። ወእትአመን፡ ከመ፡ ለዝሉፉ፡ ታእምርዎ፡ ለዝንቱ፡ በከመ፡ አእመርክሙነ፡ እምአሐዱ፡ ገጽ። ከመ፡ ንሕነ፡ ምክሕክሙ፡ ወከማሁ፡ አንትሙሂ፡ ምክሕነ፡ በዕለተ፡ እግዚእነ፡ ኢየሱስ፡ ክርስቶስ። ወበዝንቱ፡ ፍሥሓ፡ ተአሚንየ፡ መከርኩ፡ እምጻእ፡ ኀቤክሙ፡ በቀዳሚ። ከመ፡ ትርከቡ፡ ጸጋ፡ ምክዕቢተ። ወእሑር፡ መቄዶንያ፡ ወእምህየ፡ እሠወጥ፡ ኀቤክሙ። ወአንትሙ፡ ትፈንዉኒ፡ ለምድረ፡ ይሁዳ። ዘንተ፡ እንከ፡ ዘመከርኩ፡ ቦኑ፡ እንጋ፡ ከመ፡ አብድ፡ ዘገበርኩ። ወቦኑ፡ ዘእመክር፡ ሕገ፡ ሰብእ፡ እመክር። እስመ፡ ይደሉ፡ ይኩን፡ ነገርክሙ፡ እመኒ፡ እወ፡ እወ፡ ወእመኒ፡ አልቦ፡ አልቦ። ጻድቅ፡ እግዚአብሔር፡ ወኢኮነ፡ ሐሰተ፡ ቃልነ። ወኢተቶስሐ፡ እወ፡ ወአልቦ። እስመ፡ ወልደ፡ እግዚአብሔር፡ ኢየሱስ፡ ክርስቶስ፡ ዘንሕነ፡ ሰበክነ፡ ለክሙ። አነ፡ ጳውሎስ፡ ወስልዋኖስ፡ ወጢሞቴዎስ። ኢኮነ፡ እወ፡ ወአልቦ፡ ዳእሙ፡ እወ፡ ኮነ፡ በእንቲኣሁ። እስመ፡ ኵሉ፡ ዘአሰፈወ፡ እግዚአብሔር፡ ኮነ፡ እሙነ፡ በክርስቶስ። ወበእንተ፡ ዝ፡ ቦቱ፡ ወበእንቲኣሁ፡ አሚነ፡ ስብሐት፡ ለእግዚአብሔር፡ ንሁብ። ወእግዚአብሔር፡ ውእቱ፡ ዘያጸንዐነ፡ ምስሌክሙ፡ በአሚን፡ በክርስቶስ። ዘቦቱ፡ ቀብዐነ፡ ወዐተበነ፡ ወወሀበነ፡ ዐረቦነ፡ መንፈስ፡ ቅዱስ፡ ውስተ፡ ልብነ። ወአነ፡ አስምዖ፡ ለእግዚአብሔር፡ በእንተ፡ ነፍስየ። ከመ፡ በምሒከ፡ ዚኣክሙ፡ ኢመጻእኩ፡ ቆሮንቶስ። ወአኮሰ፡ ዘናጌብረክሙ፡ ትእመኑ፡ ዳእሙ፡ ንረድአክሙ፡ ለገቢረ፡ ፍሥሓክሙ። እስመ፡ በአሚን፡ ቆምክሙ፡ ወአጥባዕክሙ፡ በሃይማኖት።

ምዕራፍ 2 በእንተ፡ ተናግሮተ፡ ጽድቅ ወዘንተ፡ እንከ፡ መከርኩ፡ በነፍስየ፡ ኢይምጻእ፡ ትኩዝየ፡ ኀቤክሙ። ወእመሰ፡ አነ፡ አተከዝኩክሙ፡ መኑ፡ ያስተፌሥሐኒ። ዘእንበለ፡ ዘአነ፡ አተከዝክዎ። ወዘኒ፡ ዘጸሐፍኩ፡ ለክሙ፡ ከመ፡ መጺእየ፡ ኢይርከበኒ፡ ሐዘን፡ በዘሀለውኒ። እትፈሣሕ፡ ተአሚንየ፡ በኵልክሙ፡ ከመ፡ ፍሥሓ፡ ዚኣየ፡ ዘኵልክሙ፡ ውእቱ። እስመ፡ እምነ፡ ብዙኅ፡ ሕማም፡ ወሐዘነ፡ ልብ፡ ጸሐፍኩ፡ ለክሙ፡ ዘንተ፡ በብዙኅ፡ አንብዕ። ወአኮሰ፡ ከመ፡ ትተክዙ፡ ዳእሙ፡ ከመ፡ ታእምሩ፡ አፍቅሮትየ፡ ከመ፡ ፈድፋደ፡ አፈቅረክሙ። ወዘኒ፡ አተከዘኒ፡ አኮ፡ ኪያየ፡ ባሕቲቶ፡ ዘያቴክዝ። ዳእሙ፡ ኵልክሙ፡ ዘእንበለ፡ አሐዱ፡ ኅብር፡ እምኔክሙ። ወይእዜኒ፡ ኢያክብድ፡ ቃልየ፡ ላዕሌክሙ። ተአክሎ፡ ለዘከመ፡ ዝ፡ ዛቲ፡ ተግሣጽ፡ እንተ፡ ረከበቶ፡ እምብዙኃን። ወዓዲ፡ ይደሉ፡ ከመ፡ ትሥረዩ፡ ሎቱ፡ ወታስተፍሥሕዎ። ከመ፡ ኢይሠጠም፡ እምብዝኀ፡ ሐዘን፡ ዘከመ፡ ዝ። ወበእንተ፡ ዝ፡ አስተበቊዐክሙ፡ አጽንዑ፡ ተፋቅሮ፡ ምስሌሁ። ወበእንተ፡ ዝ፡ ጸሐፍኩ፡ ለክሙ፡ ከመ፡ ኣእምር፡ ግዕዘክሙ። ለእመሁ፡ በኵሉ፡ ትትኤዘዙኒ፡ አው፡ አልቦ። ወእመ፡ ቦ፡ ዘሠረይክሙ፡ ሎቱ፡ አነሂ፡ ሠረይኩ፡ ምስሌክሙ። ወእመሂ፡ ቦ፡ ዘኀደግሙ፡ ሎቱ፡ ኀደጉ፡ ለልየ፡ በእንቲኣክሙ፡ በገጹ፡ ለክርስቶስ። ከመ፡ ኢይትዐገለነ፡ ሰይጣን፡ አኮ፡ ዘንስሕቶ፡ ኅሊናሁ። ወበጺሕየ፡ ጢሮአዳ፡ ውስተ፡ ትምህርቱ፡ ለክርስቶስ፡ ተከሥተ፡ ሊተ፡ ፍኖተ፡ እግዚአብሔር። ወኢረከብኩ፡ ዕረፍተ፡ ለነፍስየ፡ እስመ፡ ኢረከብክዎ፡ ለቲቶ፡ እኁየ። ወተፈለጥኩ፡ እምኔሁ፡ ወሖርኩ፡ መቄዶንያ። እኩት፡ እግዚአብሔር፡ ዘዘልፈ፡ የዐቅበነ፡ በእግዚእነ፡ ክርስቶስ። ወተዐውቀ፡ በላዕሌነ፡ መዓዛ፡ አእምሮቱ፡ በኵሉ፡ በሓውርት። እስመ፡ መዓዛሁ፡ ለክርስቶስ፡ ንሕነ፡ በኀበ፡ እግዚአብሔር። በእንተ፡ እለ፡ ይድኅኑ፡ ወእለሂ፡ ይትሀጐሉ። እስመ፡ ቦ፡ እለ፡ ይደልዎሙ፡ መዓዛ፡ ሞት፡ ለሞት። ወእለ፡ ይደልዎሙ፡ መዓዛ፡ ሕይወት፡ ለሕይወት። ወመኑ፡ ዘይደልዎ፡ ዝንቱ፡ እስመ፡ ኢኮነ፡ ከመ፡ ብዙኃን። እለ፡ ይትሜየንዎ፡ ለቃለ፡ እግዚአብሔር፡ በካልእ፡ ዳእሙ፡ በንጽሕ። ወከመ፡ ዘመጽአ፡ እምእግዚአብሔር፡ ንነግር፡ በቅድመ፡ እግዚአብሔር፡ በእንተ፡ ክርስቶስ።

ምዕራፍ 3 በእንተ፡ ጽሒፈ፡ መልእክተ፡ ክርስቶስ፡ ለምእመናን አኀዊነ፡ ነአኀዝኑ፡ ካዕበ፡ ይእዜ፡ ንንግርክሙ፡ ንወድስ፡ ርእሰነ። ወቦኑ፡ ዘንፈቅድ፡ ከመ፡ እልክቱ፡ ካልኣን፡ እስከ፡ ንጽሕፍ፡ ኀቤክሙ፡ በእንቲኣነ፡ መጽሐፈ። አው፡ ከመ፡ ትጽሐፉ፡ አንትሙ። ወለነሰ፡ መጽሐፍነ፡ አንትሙ፡ ይእቲ፡ ወጽሕፍት፡ ውስተ፡ ልብነ። ወትትዐወቅ፡ ወያነብባ፡ ኵሉ፡ ሰብእ። ወየአምሩክሙ፡ ከመ፡ መልእክተ፡ ክርስቶስ፡ አንትሙ፡ እንተ፡ ተልእክናሃ፡ ንሕነ። ወጽሕፍት፡ ይእቲ፡ ወአኮ፡ በማየ፡ ሕመት፡ ዘእንበለ፡ በመንፈስ፡ እግዚአብሔር፡ ሕያው። ወኢኮነ፡ ጽሌ፡ ዘእብን፡ ዘእንበለ፡ ጽሌ፡ ልብ፡ ዘሥጋ። ወብነ፡ ባሕቱ፡ ከመ፡ ዝ፡ ተስፋ፡ በኀበ፡ እግዚአብሔር፡ በእንተ፡ ክርስቶስ። ወኢይደልወነ፡ ነኀሊ፡ ለሊነ፡ ለርእስነ፡ ወኢ፡ ምንተኒ። እስመ፡ እምኀበ፡ እግዚአብሔር፡ ኀይልነ፡ ዘረሰየነ፡ ላእካነ፡ ለሐዲስ፡ ሕግ። ወአኮ፡ በሕገ፡ መጽሐፍ፡ አላ፡ በሕገ፡ መንፈስ። እስመ፡ መጽሐፍ፡ ይቀትል፡ ወመንፈስ፡ ያሐዩ። በእንተ፡ ክብረ፡ መልእክታት ወሶበ፡ ለእንታክቲ፡ መልእክተ፡ ሞት፡ እንተ፡ ተጽሕፈት፡ በእብን። ተገብረ፡ ላቲ፡ ስብሐት። እስከ፡ ኢይክሉ፡ ደቂቀ፡ እስራኤል፡ ነጽሮተ፡ ገጹ፡ ለሙሴ፡ በእንተ፡ ስብሐተ፡ ገጹ፡ ኀላፊ። እፎ፡ እንከ፡ ይትገበር፡ ፈድፋደ፡ ስብሐት፡ ለመልእክተ፡ መንፈስ፡ ቅዱስ። ሶበ፡ ለመልእክት፡ እንተ፡ ታኴንን፡ ወታሐስብ፡ ተገብረ፡ ላቲ፡ ስብሐት፡ ብዙኀ። ሚ፡ መጠን፡ ፈድፋደ፡ መልእክተ፡ ጽድቅ፡ ትሴባሕ፡ ወትከብር። እስከ፡ ትከውን፡ እንተ፡ ተሰብሐት፡ ከመ፡ ዘኢተሰብሐት። ሶበ፡ ያስተዔርይዋ፡ በዝንቱ፡ ስብሐት፡ ዐቢይ። ወሶበ፡ ኀላፊ፡ ዘይሰዐር፡ ረከበ፡ ስብሐተ። እፎ፡ ፈድፋደ፡ ይረክብ፡ ቀዋሚ፡ ስብሐተ። ወእንዘ፡ ብነ፡ መጠነ፡ ዝ፡ ተስፋ፡ ርቱዕ፡ ንቅረብ፡ በገጽ፡ ገሃደ። ወአኮ፡ ከመ፡ ሙሴ፡ ዘይገለብብ፡ ገጾ፡ ከመ፡ ኢይርአይዎ፡ ደቂቀ፡ እስራኤል። ወባሕቱ፡ ተጸለለ፡ ልቦሙ፡ እስከ፡ ይእዜ። እስመ፡ ውእቱ፡ ግላ፡ ነበረ፡ ውስተ፡ ሕግ፡ ብሉይ፡ አምጣነ፡ ተነበ። ወኢተከሥተ፡ እስከ፡ አፅርዖ፡ ክርስቶስ። ወእስከ፡ ዮም፡ ሶበ፡ ያነብቡ፡ ኦሪተ፡ ሙሴ፡ ይገልዎሙ፡ ልቦሙ። ወእምከመ፡ ተመይጡ፡ ኀበ፡ እግዚአብሔር፡ የአትት፡ ውእቱ፡ ግላ፡ እምኔሆሙ። እስመ፡ እግዚአብሔር፡ መንፈስ፡ ውእቱ። ወኀበ፡ ሀሎ፡ መንፈሰ፡ እግዚአብሔር፡ ህየ፡ ሀሎ፡ ግዕዛን። ወንሕነሰ፡ ኵልነ፡ ከሢተነ፡ ገጸነ፡ ንነጽር፡ ስብሐተ፡ እግዚአብሔር፡ ከመ፡ ዘበመጽሔት። ወንትመሰል፡ በአርአያ፡ ዚኣሁ፡ ከመ፡ ንባእ፡ እምክብር፡ ውስተ፡ ክብር። በከመ፡ ይሁበነ፡ እግዚአብሔር፡ መንፈሰ።

ምዕራፍ 4 በእንተ፡ ትምህርተ፡ ክርስቶስ ወበእንተ፡ ዝንቱ፡ እስመ፡ ብነ፡ ዝንቱ፡ መልእክት። በከመ፡ ምሕረቱ፡ ዘጸገወነ፡ ኢንትሀከይ፡ ወኢንትቈጣዕ። አላ፡ ንኅድጎ፡ ለምግባረ፡ ኀፍረት፡ ዘኅቡእ፡ ወኢንሑር፡ በትምይንት። ወኢንትመየኖ፡ ለቃለ፡ እግዚአብሔር፡ ወናቅም፡ ርእሰነ፡ በጽድቅ፡ ገሃደ። እንበይነ፡ ግእዘ፡ ኵሉ፡ ሰብእ፡ በቅድመ፡ እግዚአብሔር። ወእመኒ፡ ክዱን፡ ትምህርትነ፡ ክዱን፡ ውእቱ፡ ለሕርቱማን፡ ወለንፉቃን፡ በዝንቱ፡ ዓለም። እለ፡ ጸለሎሙ፡ ልቦሙ፡ እግዚአብሔር፡ አምላክ፡ ዘለዓለም። ከመ፡ ኢይርአዩ፡ ብርሃነ፡ ትምህርተ፡ ስብሐተ፡ ክርስቶስ። ዘውእቱ፡ አርአያሁ፡ ለእግዚአብሔር። ወአኮ፡ ለርእስነ፡ ዘንሰብክ፡ ዘእንበለ፡ ለእግዚአብሔር፡ በእንተ፡ ኢየሱስ፡ ክርስቶስ፡ እግዚእነ። ወለክሙሰ፡ አቅነይነ፡ ርእሰነ፡ በእንተ፡ ኢየሱስ፡ ክርስቶስ። እስመ፡ እግዚአብሔር፡ ዘይቤ፡ ይሥርቅ፡ ብርሃን፡ ውስተ፡ ጽልመት። ውእቱ፡ አብርሀ፡ ውስተ፡ ልብነ፡ ብርሃነ፡ አእምሮ፡ ስብሐቲሁ፡ በገጹ፡ ለኢየሱስ፡ ክርስቶስ። በእንተ፡ ትንሣኤ፡ ምዉታን ወብነ፡ ዝንቱ፡ መዝገብ፡ ውስተ፡ ንዋየ፡ ልሕኵት። ከመ፡ ይኩን፡ ዕበየ፡ ኀይል፡ ዘእምኀበ፡ እግዚአብሔር፡ ወአኮ፡ ዘእምኀቤነ። እንዘ፡ በኵሉ፡ ነሐምም፡ ኢንትመነደብ፡ ንትሜነንሂ፡ ወኢነኀስር። ንሰደድሂ፡ ወኢንትገደፍ፡ ንጼዐርሂ፡ ወኢንትሀጐል። ወዘልፈ፡ ንጸውር፡ ሞቶ፡ ለክርስቶስ፡ በሥጋነ። ከመ፡ ይትዐወቅ፡ ሕይወቱ፡ ለክርስቶስ፡ በላዕለ፡ ዝንቱ፡ ነፍስትነ፡ መዋቲ። እስመ፡ ንሕነ፡ ዘነሐዩ፡ ወትረ፡ ንትሜጦ፡ ለሞት፡ በእንተ፡ ኢየሱስ። ከመ፡ ሕይወቱኒ፡ ለኢየሱስ፡ ይትዐወቅ፡ በላዕለ፡ ነፍስትነ፡ መዋቲ። ወይእዜሰ፡ ጸንዐ፡ በላዕሌነ፡ ሞት፡ እንዘ፡ ሕይወት፡ ኀቤነ። ወብነ፡ አሐዱ፡ መንፈስ፡ ዘሃይማኖት። በከመ፡ ይቤ፡ መጽሐፍ፡ አመንኩ፡ በዘነበብኩ፡ ወንሕነኒ፡ አመነ፡ በዘነበብነ። ወነአምር፡ ከመ፡ ዘአንሥኦ፡ ለኢየሱስ፡ እግዚእነ፡ ያነሥአነ፡ ኪያነሂ፡ ምስሌሁ። ወያቀውመነ፡ ምስሌክሙ፡ ኀቤሁ። እስመ፡ ኵሉ፡ በእንቲኣክሙ፡ ከመ፡ ትፈደፍድ፡ ጸጋሁ፡ በላዕለ፡ ብዙኃን። ወይብዛኅ፡ አኰቴቱ፡ ለስብሐተ፡ እግዚአብሔር። ወበእንተ፡ ዝ፡ ኢንትቈጣዕ፡ እስመ፡ ዘእንተ፡ አፍኣነ፡ ብእሲ፡ በላዪ። ወዘእንተ፡ ውስጥነሰ፡ ይትሔደስ፡ ኵሎ፡ አሚረ። እስመ፡ ሕማምነ፡ ዘለሰዓት፡ ቀሊል፡ ክብረ፡ ወስብሐተ፡ አፈድፊዶ፡ ይገብር፡ ለነ። እስመ፡ ኢንሴፎ፡ ዘያስተርኢ፡ አላ፡ ዘኢያስተርኢ። እስመ፡ ዘያስተርኢ፡ ዓለም፡ ኀላፊ፡ ውእቱ። ወዘሰ፡ ኢያስተርኢ፡ ቀዋሚ፡ እስከ፡ ለዓለም፡ ውእቱ።

ምዕራፍ 5 በእንተ፡ ዘብነ፡ ተስፋ፡ ሕይወት፡ በሰማያት ወነአምር፡ ከመ፡ ለእመሂ፡ ተነሥተ፡ ቤተ፡ ማኅደርነ፡ ዘበምድር፡ ዘውእቱ፡ ሥጋ። ብነ፡ ሕንጻ፡ በኀበ፡ እግዚአብሔር፡ በሰማያት፡ ዘኢገብሮ፡ እደ፡ ሰብእ። ወኪያሁ፡ ንሴፎ፡ ንልበስ፡ ቤተነ፡ ዘውስተ፡ ሰማያት፡ ዘበእንቲኣሁ፡ ንሠርሕ። ወእምከመ፡ ለበስናሁ፡ ኢኮነ፡ ዘንትረከብ፡ ዕራቃቲነ። እስመ፡ እንዘሂ፡ ሀለውነ፡ ውስተ፡ ዝንቱ፡ ቤት፡ ነሐዝን፡ ፈድፋደ፡ እምክበደ፡ ዚኣሁ። ወኢንፈቅድ፡ ንሰለብ፡ ዘእንበለ፡ ከመ፡ ንልበስ፡ ካልአ፡ መልዕልቴሁ። ከመ፡ ይሰጠም፡ መዋቲ፡ በሕይወት። ወውእቱ፡ እግዚአብሔር፡ ይረድአነ፡ በዝንቱ፡ ዘወሀበነ፡ ዐረቦነ፡ መንፈስ፡ ቅዱስ፡ ውስተ፡ ልብነ። ተአመኑ፡ እንከ፡ ወአጥብዑ፡ በኵሉ፡ ጊዜ። ወተአምሩ፡ እንከ፡ ከመ፡ እንግዳ፡ አንትሙ፡ ውስተ፡ ዝንቱ፡ ሥጋ። ወትነግዱ፡ እምነፍስትክሙ፡ ወተሐውሩ፡ ኀበ፡ እግዚእነ። እስመ፡ በአሚን፡ ነሐውር፡ ወአኮ፡ በአድልዎ። ወፈድፋደ፡ ንትአመን፡ ወንትፌሣሕ። እስመ፡ ወፂአነ፡ እምነፍስትነ፡ ነሐውር፡ ኀቤሁ፡ ወናሠምሮ፡ ለእግዚእነ። ወይእዜኒ፡ ናእኵቶ፡ እመኒ፡ ነገድነ፡ ወእመኒ፡ ሀሎነ፡ ሎቱ፡ ዳእሙ፡ ናድሉ። እስመ፡ ሀለወነ፡ ኵልነ፡ ንቁም፡ ቅድመ፡ መንበረ፡ ምኵናኑ፡ ለክርስቶስ። ከመ፡ ንትፈደይ፡ በከመ፡ ገበርነ፡ በሥጋነ፡ እመኒ፡ ሠናየ፡ ወእመኒ፡ እኩየ። በእንተ፡ ዘከመ፡ ተሐደሰ፡ ኵሉ፡ በክርስቶስ ወእንበይነ፡ ዘነአምር፡ ጽድቅ፡ እግዚአብሔር፡ ወፈሪሆቶ፡ ነአምን፡ ሰብአ። ለእግዚአብሔርሰ፡ ንሕነ፡ ክሡታን፡ ሎቱ። ወንትአመን፡ ከመሂ፡ ንትከሠት፡ በልብክሙ። ወአኮ፡ ዘንዌድስ፡ ካዕበ፡ ርእሰነ፡ በዝንቱ፡ በኀቤክሙ። ወዳእሙ፡ ንሁበክሙ፡ ምክንያተ፡ በዘትትሜክሑ፡ ብነ፡ አንትሙኒ፡ ከማነ። ከመ፡ ይኩንክሙ፡ ለኀበ፡ እለ፡ ይትሜክሑ፡ ለገጽ፡ ወአኮ፡ ለልብ። እስመ፡ ንሕነሰ፡ ለእመኒ፡ ኮነ፡ አብዳነ፡ እበድነ፡ ለእግዚአብሔር። ወእመኒ፡ ኮነ፡ ጠቢባነ፡ ጠበብነ፡ ለክሙ። እስመ፡ ፍቅረ፡ ክርስቶስ፡ ያጌብረነ፡ ናጥብዕ፡ ውስተ፡ ዝንቱ፡ ኅሊና። እስመ፡ አሐዱ፡ ሞተ፡ ቤዛ፡ ኵሉ፡ በዘወድአ፡ ሞተ፡ ኵሉ። ውእቱ፡ ሞተ፡ በእንተ፡ ኵሉ፡ ከመ፡ እለሂ፡ የሐይዉ። አኮ፡ ለርእሶሙ፡ ዘየሐይዉ፡ ዘእንበለ፡ ለዝኩ፡ ዘበእንቲኣሆሙ፡ ሞተሂ፡ ወሐይወሂ። ወይእዜሰ፡ አልቦ፡ ዘነአምሮ፡ በሥጋ። ወእመኒ፡ አእመርናሁ፡ ለክርስቶስ፡ በሥጋ፡ እምይእዜሰ፡ አልቦ፡ ዘነአምሮ፡ እንከ። ወይእዜሰ፡ በክርስቶስ፡ ተሐደሰ፡ ኵሉ፡ ዘኮነ፡ ወኀለፈ፡ ዘትካት። ወናሁ፡ ኮነ፡ ኵሉ፡ ሐዲሰ፡ እምኀበ፡ እግዚአብሔር፡ ዘአቅረበነ፡ ኀቤሁ፡ በክርስቶስ። ወወሀበነ፡ መልእክተ፡ ሥምረቱ። እስመ፡ ተዋለጠ፡ እግዚአብሔር፡ ዓለመ፡ በክርስቶስ፡ አናሕሲዮ፡ ኀጢአቶሙ፡ ወኢነጺሮ። ወረሰየ፡ ላዕሌነ፡ ቃለ፡ ሥምረቱ፡ ወወሀበነ፡ መልእክተ፡ ሣህሉ። ወንሕነሰ፡ ንተነብል፡ በአምሳለ፡ ክርስቶስ። ወይሁበክሙ፡ እግዚአብሔር፡ ፍሥሓ፡ በላዕሌነ። ወንስእለክሙ፡ በክርስቶስ፡ ከመ፡ ትሥምርዎ፡ ለእግዚአብሔር። እስመ፡ ዘኢየአምር፡ ኀጢአት፡ ረሰየ፡ ርእሶ፡ ኀጥአ፡ በእንቲኣነ። ከመ፡ ኪያነ፡ ያጽድቀነ፡ ለእግዚአብሔር።

ምዕራፍ 6 ዘከመ፡ ይደሉ፡ ተጋድሎ፡ በእንተ፡ ስመ፡ ክርስቶስ ወናስተበቊዕሂ፡ ኀቤክሙ፡ ወንረድእሂ፡ ተወከፉ፡ ለነ። ወኢተረስይዋ፡ ለከንቱ፡ ለጸጋ፡ እግዚአብሔር፡ እንተ፡ ነሣእክሙ። እስመ፡ ከመ፡ ዝ፡ ይቤ፡ በዕለት፡ ኅሪት፡ እሰምዐከ፡ ወበዕለተ፡ መድኀኒት፡ እረድአከ። ወናሁ፡ ይእዜ፡ ዕለት፡ ኅሪት፡ ወናሁ፡ ዮም፡ ዕለተ፡ አድኅኖት። ዑቁ፡ እንከ፡ ወኢተሀቡ፡ ለመኑሂ፡ ዕቅፍተ፡ ከመ፡ ኢታልስሑ፡ መልእክተክሙ፡ ወኢታንውርዋ። ወበኵሉ፡ አርትዑ፡ ርእሰክሙ፡ ወኩኑ፡ ላእካነ፡ ለእግዚአብሔር። በብዙኅ፡ ትዕግሥት፡ በኵሉ፡ ሕማም፡ ወጻዕር፡ ወበምንዳቤ፡ ወበተቀሥፎ። ወበተሞቅሖ፡ ወበሥራሕ፡ ወበተሀውኮ፡ በትጋህ፡ ወበንጽሕ። ወበጾም፡ ወበአእምሮ፡ በምክር፡ ወበተዐግሦ፡ በምሒር። ወበመንፈስ፡ ቅዱስ፡ በፍቅር፡ ዘእንበለ፡ አድልዎ፡ በነገረ፡ ጽድቅ፡ በኀይለ፡ እግዚአብሔር። ወወልታ፡ ጽድቅ፡ ዘእምየማን፡ ወዘእምፀጋም። በክብር፡ ወበኀሳር፡ በምድኃር፡ ወበመርገም፡ ከመ፡ ኃጥኣን፡ ወጻድቃን። ከመ፡ እለ፡ ኢየአምርዎሙ፡ ወዕዉቃን፡ ከመ፡ አብዳን፡ ወጠቢባን፡ ከመ፡ ምዉታን። ወንሕነኒ፡ ሕያዋን፡ ከመ፡ ምንስዋን፡ ወኢ፡ ቅቱላን፡ ከመ፡ ትኩዛን። ወዘልፈ፡ ንትፌሣሕ፡ ከመ፡ ነዳያን። ወለብዙኃን፡ ታብዕሉ፡ ከመ፡ ዘአልብክሙ፡ ወኢ፡ ምንተኒ። ወኵሉ፡ ውስተ፡ እዴክሙ። አፉነ፡ ክሡት፡ ለክሙ፡ ኦ፡ ሰብአ፡ ቆሮንቶስ፡ ወርኂብ፡ ልብነ። ወአልብነ፡ ንሂክ፡ እምኔክሙ፡ ወኢ፡ ላዕሌክሙ፡ እምኔነ። አላ፡ ንህክሙ፡ ወተመንደብክሙ፡ ምሕረትክሙ። እብለክሙ፡ ከመ፡ ዘለደቂቅየ፡ በእንተ፡ ውእቱ፡ ፍድዩ፡ ዘይደሉ፡ ሊተ፡ ላዕሌክሙ። አርኅቡ፡ ሊተ፡ አፍቅሮተክሙ፡ አንትሙኒ። ወኢትኩኑ፡ ኑፉቃነ፡ ወኢትሑሩ፡ ውስተ፡ አርዑተ። እለ፡ ኢየአምኑ፡ መኑ፡ ዘያስተዔርያ፡ ለጽድቅ፡ ምስለ፡ ኀጢአት። ወመኑ፡ ዘይዴምሮ፡ ለብርሃን፡ ምስለ፡ ጽልመት። ወመኑ፡ ዘየኀብሮ፡ ለክርስቶስ፡ ምስለ፡ ቤልሆር። ወመኑ፡ ዘይከፍሎሙ፡ ለመሃይምናን፡ ምስለ፡ ኑፉቃን። ወመኑ፡ ዘይዴምሮ፡ ታቦተ፡ እግዚአብሔር፡ ውስተ፡ ቤተ፡ ጣዖት። አኮኑ፡ ንሕነ፡ ውእቱ፡ ቤቱ፡ ለእግዚአብሔር፡ ሕያው። በከመ፡ ይቤ፡ እግዚአብሔር፡ አነ፡ አኀድር፡ ኀቤሆሙ፡ ወአንሶሱ፡ ማእከሎሙ። ወእከውኖሙ፡ አምላኮሙ፡ ወእሙንቱኒ፡ ይከውኑኒ፡ ሕዝብየ። ወበእንተ፡ ዝንቱ፡ ፃኡ፡ እማእከሎሙ፡ ወተፋለጡ። ይቤ፡ እግዚአብሔር፡ ወኢትቅረቡ፡ ኀበ፡ ርኩሳን፡ ወአነ፡ እትዌከፈክሙ። ወእከውነክሙ፡ አባክሙ፡ ወአንትሙኒ፡ ትከውኑኒ፡ ደቂቅየ፡ ወአዋልድየ። ይቤ፡ እግዚአብሔር፡ ዘኵሎ፡ ይመልክ።

ምዕራፍ 7 በእንተ፡ ዘከመ፡ ይደሉ፡ ተወክፎ፡ አርዳእ ወበእንተ፡ ዘብነ፡ ዝንቱ፡ ተስፋ፡ አኀዊነ፡ ናንጽሕ፡ ርእሰነ፡ ወኢናግምን፡ ነፍስተነ። ወንግበር፡ በዘንትቄደስ፡ በፈሪሀ፡ እግዚአብሔር። ወይእዜኒ፡ ተአምሩ፡ አኀዊነ፡ ከመ፡ አልቦ፡ ዘአበስነ፡ ወአልቦ፡ ዘገፋዕነ። ወአልቦ፡ ዘአማሰነ፡ ወአልቦ፡ ዘተዐገልነ። ወአኮ፡ ለአድልዎ፡ ዘእብል፡ እስመ፡ ወዳእኩሂ፡ እቤ። ከመ፡ ምሉኣን፡ አንትሙ፡ ውስተ፡ ልብነ፡ ለመዊትኒ፡ ወለሕይወትኒ። ወከመ፡ ዝ፡ ብየ፡ ብዙኅ፡ ሞገስ፡ በኀቤክሙ፡ ወብዙኅ፡ ትምክሕትየ፡ በእንቲኣክሙ። ወፈጸምኩ፡ ፍሥሓየ፡ ወፈድፈደኒ፡ ሐሤትየኒ፡ እምኵሉ፡ ሕማምየ። ወበጺሐነ፡ መቄዶንያ፡ ኢረከብነ፡ ወኢ፡ አሐተኒ፡ ዕረፍተ፡ ለነፍስነ። ወበኵሉ፡ አሕመሙነ፡ በአፍኣኒ፡ ቀትል፡ ወመንሱት፡ ወበውስጥኒ፡ ፍርሀት። ወባሕቱ፡ ውእቱ፡ እግዚአብሔር፡ ዘያስተፌሥሖሙ፡ ለሕሙማን፡ አስተፍሥሐነ፡ በምጽአቱ፡ ለቲቶ። ወአኮ፡ በምጽአቱ፡ ባሕቲቱ፡ ዓዲ፡ በፍሥሓ፡ ዘአስተፍሣሕክምዎ። ወዜነወነ፡ አፍቅሮተክሙ፡ ዘከመ፡ ትጽሕቁ፡ ለነ፡ ወትትቃሐዉ። ወሰሚዕየ፡ ዘንተ፡ ጸንዐ፡ ፍሥሓየ፡ ብክሙ። በእንተ፡ ትካዝ፡ መፍትው ወእመኒ፡ አተከዝኩክሙ፡ ቀዳሚ፡ በመጽሐፍ፡ ዘጸሐፍኩ፡ ለክሙ፡ ኢያኔስሐኒ። ወእመኒ፡ ነሳሕኩ፡ ናሁ፡ እሬእያ፡ ለይእቲ፡ መልእክት፡ እመሂ፡ ለአሐቲ፡ ሰዓት፡ አተከዝኩክሙ። ናሁ፡ ይእዜ፡ እትፌሣሕ፡ በእንቲኣሃ፡ ብዙኀ። ወአኮሰ፡ ውእቱ፡ እስመ፡ ተከዝክሙ፡ ዳእሙ፡ እስመ፡ ተከዝክሙ፡ ከመ፡ ትነስሑ። እስመ፡ እንበይነ፡ እግዚአብሔር፡ ተከዝክሙ፡ ከመ፡ ኢይትሀጐል፡ አሐዱሂ፡ እምኔክሙ። እስመ፡ ዘበእንተ፡ እግዚአብሔር፡ ሐዘን፡ ንስሓሁ፡ ለሕይወት፡ ዘለዓለም፡ ይከውን። ወትካዝሰ፡ ዘበእንተ፡ ዓለም፡ ሞተ፡ ያመጽእ። ወናሁ፡ ውእቱ፡ ትካዝ፡ ዘበእንተ፡ እግዚአብሔር፡ ጻሕቀ፡ ወቅስተ። ወፍርሀተ፡ ወግርማ፡ ወተፋቅሮ፡ ወተቃኅዎ፡ ፍዳ፡ ገብረ፡ ለክሙ። እስከ፡ አቀምክሙ፡ ርእሰክሙ፡ በንጽሕ፡ ወበምግባር፡ ከመ፡ ዘኢተአምሩ፡ ወኢ፡ ምንተኒ። ወዘኒ፡ ዘጸሐፍኩ፡ ለክሙ፡ አኮ፡ በእንተ፡ ዘገፍዐ፡ ወዘተገፍዐ። ዳእሙ፡ ከመ፡ ይትዐወቅ፡ ከመ፡ ጽሕቅሙ፡ በእንቲኣነ፡ በቅድመ፡ እግዚአብሔር። ወበእንተ፡ ዝ፡ ተፈሣሕነ፡ ወዓዲ፡ ዲበ፡ ፍሥሓነ፡ ተፈሣሕነ። ወፈድፋደሰ፡ በፍሥሓ፡ ቲቶ፡ እስመ፡ አዕረፍክምዋ፡ ለነፍሱ፡ በኀበ፡ ኵልክሙ። እስመ፡ ኢያስተኃፈርክሙኒ፡ በኵሉ፡ ዘተመካሕኩ፡ ሎቱ፡ በእንቲኣክሙ። አማነ፡ ረሰይክሙ፡ ለነ፡ ዘነገርናሁ፡ ከማሁ፡ እሙነ፡ ኮነ። ወፈድፋደ፡ የአኵተክሙ፡ ወይዜክረክሙ፡ ዘከመ፡ ትትኤዘዙ፡ ሎቱ፡ ወትትዌከፍዎ፡ በፍርሀት፡ ወበረዓድ። ወእትፌሣሕ፡ ባሕቱ፡ እስመ፡ በኵሉ፡ እትአመነክሙ።

ምዕራፍ 8 በእንተ፡ ዘከመ፡ ይደሉ፡ አስተዋፅኦ ወእነግረክሙ፡ አኀዊነ፡ ጸጋ፡ እግዚአብሔር፡ ዘተውህበ፡ ለቤተ፡ ክርስቲያን፡ በመቄዶንያ። እስመ፡ እምብዙኅ፡ መከራ፡ ሕማሞሙ፡ ፈድፈደ፡ ፍሥሓሆሙ። ወምስለ፡ ዕመቀ፡ ንዴቶሙ፡ ፈድፈደት፡ ፍሥሓ፡ ብዕሎሙ። እስመ፡ ለልየ፡ ሰማዕቶሙ፡ ከመ፡ በአምጣነ፡ ኀይሎሙ። ወዘእንበለ፡ ኀይሎሙሂ፡ ጥቡዓን፡ እሙንቱ፡ ለሊሆሙ። ወብዙኀ፡ አስተብቊዑነ፡ በእንተ፡ ሱታፌ፡ መልእክት፡ ለቅዱሳን። ወአኮሂ፡ በከመ፡ ተሐዘብነ፡ እስመ፡ ለሊሆሙ፡ አቅደሙ፡ በፈቃዶሙ። ወመጠዉ፡ ነፍሶሙ፡ ለእግዚአብሔር። ወለነኒ፡ በከመ፡ ፈቀደ፡ እግዚአብሔር፡ አስተፍሥሐነ፡ ቲቶ። ወአስተብቋዕናሁ፡ ከመ፡ ይፈጽም፡ ለክሙ፡ ጸጋሁ፡ በከመ፡ ወጠነ። እስመ፡ ፈድፈድክሙ፡ በኵሉ፡ በሃይማኖት፡ ወበቃል፡ ወበጥበብ፡ ወበጽሒቅ፡ በኵሉ፡ ዘኮነ፡ በኀቤክሙ። ወአፍቅሮትክሙ፡ ኪያነ፡ ከማሁ፡ አፈድፍዱ፡ ካዕበ፡ ውስተ፡ ዛቲ፡ ጸጋ። ወአኮ፡ በግብር፡ ዘእብለክሙ፡ ዳእሙ፡ እስመ፡ ቦ፡ እለ፡ ይጽሕቅዎ፡ ለዝንቱ፡ እምኔክሙ። ወናሁ፡ አእመርኩ፡ ጽንዐ፡ ሃይማኖትክሙ፡ ወአፍቅሮትክሙ። ተአምሩ፡ ጸጋሁ፡ ለእግዚእነ፡ ኢየሱስ፡ ክርስቶስ፡ በእንቲኣክሙ። አንደየ፡ ርእሶ፡ እንዘ፡ ባዕል፡ ውእቱ፡ ከመ፡ አንትሙ፡ ትብዐሉ፡ በንዴተ፡ ዚኣሁ። ወበዝንቱ፡ አምከርኩክሙ፡ ዘይበቊዐክሙ። እስመ፡ ፈቀድክሙ፡ ወአቅደምክሙ፡ ትመጥዉ፡ ነፍሰክሙ፡ እምቀዳሚ፡ ዓም። ወይእዜሰ፡ ግበሩሂ፡ ወፈጽሙሂ፡ እስመ፡ ፈቂድሂ፡ እምፈቲው፡ ወገቢርሂ፡ እምረኪብ። ወእምከመሰ፡ ፈቂድ፡ ሀሎ፡ ይትመዘገን፡ በዘይትከሀሎ፡ ወአኮ፡ በአምጣነ፡ ዘኢይትከሀሎ። ወዘአኮ፡ ከመ፡ ባዕድ፡ ያዕርፍ፡ ኪያክሙ፡ ናጠውቅ። ዳእሙ፡ ተሀልዉ፡ ዕሩየ፡ በዝ፡ መዋዕል። እስመ፡ ተረፈ፡ ዚኣክሙ፡ ውስተ፡ ንትጋ፡ እልክቱ፡ ይከውን። ወተረፈ፡ ዚኣሆሙ፡ ውስተ፡ ንትጋ፡ ዚኣክሙ። ከመ፡ ይኩን፡ ሀልዎትክሙ፡ ዕሩየ፡ በኵሉ። እስመ፡ ከመ፡ ዝ፡ ይቤ፡ መጽሐፍ፡ ዘቦ፡ ብዙኅ፡ ኢያትረፈ፡ ወዘቦ፡ ውኁድ፡ ኢያሕጸጸ። በእንተ፡ አርእዮ፡ ፍቅር፡ ለምእመናን እኩት፡ እግዚአብሔር፡ ዘወሀበነ፡ ለነሂ፡ ንጽሐቅ፡ በእንቲኣክሙ፡ በከመ፡ ይቤ፡ ቲቶ። እስመ፡ የአኵተክሙ፡ ወተወክፈ፡ ለክሙ፡ ሥላጤክሙ። ወአስተፋጠነ፡ ይምጻእ፡ ኀቤክሙ፡ ጥቡዐ። ወፈኖነ፡ ምስሌሁ፡ እኁነ፡ ዘንእድዎ፡ ኵሉ፡ አብያተ፡ ክርስቲያናት፡ በእንተ፡ ትምህርቱ። ዓዲ፡ ሥዩም፡ ውእቱ፡ ለቤተ፡ ክርስቲያን፡ ወኅቡር፡ ምስሌነ፡ በዛቲ፡ ጸጋ። እንተ፡ ተልእክነ፡ ለስብሐተ፡ እግዚአብሔር፡ ከመ፡ ንትፈሣሕ። ወተዐቀብዎ፡ ለዝንቱ፡ ከመ፡ ኢታንውርዋ፡ ለመልእክትክሙ። ወሠናየ፡ ኀልዩ፡ ለቅድመ፡ እግዚአብሔር፡ ወለቅድመ፡ ሰብእ። ወናሁ፡ ፈነውነ፡ ምስሌሆሙ፡ ዓዲ፡ እኁነ፡ ዘአመከርናሁ፡ በብዙኅ። ወረከብናሁ፡ ከመ፡ ጸሐቂ፡ ውእቱ፡ በኵሉ። ወይእዜኒ፡ ፈድፋደ፡ ያስተፋጥን፡ ይምጻእ፡ ኀቤክሙ። ወይጽሕቅ፡ በእንቲኣክሙ፡ እስመ፡ ብዙኀ፡ ያፈቅረክሙ። ወእመኒ፡ በእንተ፡ ቲቶ፡ ሱታፌ፡ ዘነኀብር፡ ምስሌሁ፡ ግብረ። ወበእንተኒ፡ አኀዊነ፡ ሐዋርያት፡ ዘቤተ፡ ክርስቲያን፡ ለስብሐተ፡ እግዚአብሔር። ይእዜሰ፡ አርእዩ፡ ሎሙ፡ ክሡተ፡ ተፋቅሮተክሙ። ዝንቱ፡ ውእቱ፡ ዘቦቱ፡ ንትሜካሕ፡ ብክሙ፡ ንሕነ። ወይእዜኒ፡ አርእዩ፡ ቦሙ፡ በቅድመ፡ ቤተ፡ ክርስቲያን።

ምዕራፍ 9 ዘከመ፡ ይደሉ፡ አስተዋፅኦ፡ በፈቃድ ወበእንተሰ፡ መልእከተ፡ ቅዱሳን፡ ብዙኅ፡ ብየ፡ ዘእጽሕፍ፡ ለክሙ። እስመ፡ አእመርኩ፡ ከመ፡ ትጽሕቁ፡ አንትሙ። ወበእንተ፡ ዝ፡ ንእድኩክሙ፡ በኀበ፡ ሰብአ፡ መቄዶንያ። ወእቤሎሙ፡ እስመ፡ ሰብአ፡ አካይያ፡ አስተዳለዉ፡ እምቀዳሚ፡ ዓም። ወናሁ፡ አጽሐቆሙ፡ ተቃሕዎተ፡ ዚኣክሙ፡ ለብዙኃን፡ ሰብእ። ወፈነውናሆሙ፡ ለአኀው፡ ከመ፡ ኢይኩነነ፡ ሐሰተ፡ በኀቤሆሙ፡ ዘንእድናክሙ፡ በዝንቱ። ወከመ፡ ይርከቡክሙ፡ ድልዋኒክሙ፡ በከመ፡ ንቤሎሙ። ወእመ፡ ቦ፡ ከመ፡ መጽኡ፡ ምስሌየ፡ ሰብአ፡ መቄዶንያ። ወረከቡክሙ፡ ዘእንበለ፡ ታስተዳልዉ፡ ንትኀፈር፡ ንሕነኒ። ወለክሙኒ፡ ከመ፡ ኢይበሉክሙ፡ አስተትክሙ። አስተበቊዐክሙ፡ አኀዊነ፡ ግብረ፡ ረሰይዎ፡ ወአስተዳልዉ፡ ውእተ፡ በረከተክሙ። ወሥርዑ፡ ዘነገርኩክሙ፡ እንተ፡ ላቲ፡ ድልዋን፡ አንትሙ። ወከመ፡ ዝ፡ ረስይዎ፡ ከመ፡ ዘበረከት፡ ወአኮ፡ ከመ፡ ዘበትዕግልት። ወዘሰ፡ ጠዊዖ፡ ይዘርዖ፡ ለዝንቱ፡ ከማሁ፡ ይጠውዖ፡ ሎቱኒ፡ ማእረሩ። ወዘሰ፡ በበረከት፡ ይዘርዖ፡ በበረከት፡ የአርሮ። ወኵሉ፡ በከመ፡ አደሞ፡ ልቡ፡ ይግበር። እስመ፡ ኢኮነ፡ በአገብሮ፡ ዳእሙ፡ በፍሥሓ፡ ለየሀቡ። እስመ፡ ከማሁ፡ ያፈቅር፡ እግዚአብሔር። ወይክል፡ እግዚአብሔር፡ አፈድፍዶ፡ ለክሙ፡ ኵሎ፡ በረከቶ፡ ከመ፡ ያብዝኅ፡ ለዝሉፉ። ወታተርፍዎ፡ ለኵሉ፡ ወታፈደፍዱ፡ በገቢረ፡ ሠናይ። በከመ፡ ይቤ፡ መጽሐፍ፡ ዘረወ፡ ወወሀበ፡ ለነዳይ፡ ወጽድቁኒ፡ ይነብር፡ ለዓለም። ወውእቱ፡ ይሁብ፡ ዘርዐ፡ ለዘራዒ፡ ወእክለ፡ ለሲሳይ፡ ያሠምር። ወያበዝኅ፡ ለክሙ፡ ማእረረ፡ ጽድቅክሙ። ከመ፡ ትብዐሉ፡ በኵሉ፡ ትፍሥሕት፡ እንተ፡ ትገብር፡ ለክሙ፡ አኰቴተ፡ እግዚአብሔር፡ በእንተ፡ ብዙኃን። እስመ፡ ዛቲ፡ መልእክተ፡ ዝንቱ፡ ግብር፡ አኮ፡ ለዝንቱ፡ ባሕቲቱ፡ ዘታሠልጥ። እስመ፡ ትፌጽም፡ ሎሙ፡ ተጽናሶሙ፡ ለቅዱሳን። ዓዲ፡ ታፈደፍድ፡ አኰቴተ፡ እግዚአብሔር፡ በላዕለ፡ ቅዱሳን። ወየአኵትዎ፡ ለእግዚአብሔር፡ በመከራሃ፡ ለዛቲ፡ ሃይማኖትክሙ። እስመ፡ ተአዘዝክሙ፡ ለመልእክተ፡ ክርስቶስ። ወኀበርክሙ፡ ተፈሢሐክሙ፡ ወአስተዋፃእክሙ፡ ኵልክሙ። ወእሙንቱኒ፡ ይጼልዩ፡ በእንቲኣክሙ። ወይፈትዉ፡ ይርአዩክሙ፡ በእንተ፡ ጸጋ፡ እግዚአብሔር፡ ዘላዕሌክሙ። እኩት፡ እግዚአብሔር፡ በእንተ፡ ጸጋሁ፡ እንተ፡ ኢትተረጐም፡ ወትመጽእ፡ አመ፡ ኢተሐዘብዋ።

ምዕራፍ 10 በእንተ፡ ንዋየ፡ ሐቅል፡ መንፈሳዊ አስተበቊዐክሙ፡ አኀዊነ፡ አነ፡ ጳውሎስ፡ በየውሀት፡ ወበምሕረተ፡ ክርስቶስ። እስመ፡ ሶበ፡ እሄሉ፡ ኀቤክሙ፡ መጠነ፡ አነ፡ በገጽ። ወበኀበሰ፡ ኢሀሎኩ፡ እተፊ፡ ላዕሌክሙ፡ ብቊዑኒ። እስመ፡ እንዘ፡ ኢሀሎኩ፡ እትአመን፡ በተፋቀሮትክሙ። ከመ፡ ኢይሥራሕ፡ አመ፡ መጻእኩ፡ ኀቤክሙ፡ ወእትኀበል፡ አጥብዕ። እስመ፡ ቦ፡ እለ፡ ይትሔዘቡነ፡ ከመ፡ በሕገ፡ ሥጋ፡ ነሐውር። በሥጋነሰ፡ ነሐውር፡ ወአኮ፡ በሕገ፡ ዚኣሁ፡ ዘነሐወር፡ ወዘንጸብእ። እስመ፡ ንዋየ፡ ሐቅሉ፡ ለጸብእነ፡ ኢኮነ፡ በሕገ፡ ሥጋ። አላ፡ በኀይለ፡ እግዚአብሔር፡ ውእቱ፡ ዘይነሥት፡ አጽዋናተ፡ ጽኑዓነ። ወያንህል፡ ኵሎ፡ ዘይትዔበይ፡ ወይትሌዓል፡ ላዕለ፡ ክርስቶስ። ከመ፡ ይፄወው፡ ኵሉ፡ ልብ፡ ወኅሊና፡ ይግነይ፡ ለክርስቶስ። ወድልዋን፡ ንሕነ፡ ንትበቀሎ፡ ለዘኢይገርር፡ ወኢይሰምዕ። ወአመ፡ ፈጸምክሙ፡ አንትሙ፡ ትእዛዘ፡ ዘመንገለ፡ ገጽ፡ ርእዩ፡ ቅድሜክሙ። ወዘሂ፡ ተአመነ፡ በክርስቶስ፡ ከመ፡ ዝ፡ ለየኀሊ፡ ለሊሁ። እስመ፡ በከመ፡ ክርስቶስ፡ ከማሁ፡ ንሕነኒ። ወእመኒ፡ ቦ፡ ዘተመካሕኩ፡ ፈቂድየ፡ በሢመትክሙ። እንተ፡ ወሀበኒ፡ እግዚአብሔር፡ ለተሐንጾትክሙ፡ ወአኮ፡ ለተነሥቶ፡ ኢይትኀፈር። ወባሕቱ፡ እምህክ፡ ዘንተ፡ ከመ፡ ኢይምሰሎ፡ ለዘይትሔዘብ፡ ከመ፡ ዘእጌርመክሙ፡ በመጻሕፍትየ። እስመ፡ ቦ፡ እምሰብእ፡ ዘይብል፡ እስመ፡ መጻሕፍቲሁሰ፡ ክቡዳት፡ ወዕጹባት። ወሀልዎቱሰ፡ በሥጋ፡ ድኩም፡ ውእቱ፡ ወነገሩሂ፡ ሕጹር። ወባሕቱ፡ ዘንተ፡ ያእምር፡ ዘይብል፡ ዘንተ፡ ነገረ። ከመ፡ በቃልነ፡ በውስተ፡ መጻሕፍት፡ አመ፡ ኢሀለውነ፡ ከማሁ፡ በምግባሪነሂ፡ አመ፡ ሀለውነ። ወኢንትኀበል፡ ናጥብዕ፡ ነኀሊ፡ ርእሰነ፡ ለሊነ፡ ከመ፡ እለ፡ ይንእዱ፡ ርእሶሙ፡ በዘአመከሩ። ወአየኑ፡ ለሊሆሙ፡ ወኢየአምሩ፡ ፍካሬሁ፡ ዘለሊሆሙ፡ ይነብቡ። ወንሕነሰ፡ ኢንትሜካሕ፡ ፈድፋደ፡ እምዐቅምነ። ዘእንበለ፡ በመስፈርት፡ ወሕግ፡ ዘዐቀመ፡ ለነ፡ እግዚአብሔር፡ እስከ፡ ንበጽሕ፡ ኀቤክሙ። እስመ፡ አኮ፡ ዘንዌድስ፡ ርእሰነ፡ ከመ፡ ዘኢበጻሕነ፡ ኀቤክሙ። ዳእሙ፡ በጻሕነ፡ ውስተ፡ ትምህርተ፡ ክርስቶስ። ወንሕነሰ፡ ኢንትሜካሕ፡ በዘኢይበቊዕ፡ በጻማ፡ ነኪር። ወባሕቱ፡ እሴፎ፡ ትብዛኅ፡ ሃይማኖትክሙ፡ ወትዕበይ፡ በላዕሌክሙ፡ በሕገ፡ ሥርዐትክሙ። ወፈድፋደ፡ ንሜህረክሙ፡ ወአሜሃ፡ የዐቢ፡ ምስሌሁ፡ አምጣንነ። ወንሕነሰ፡ ኢንትሜካሕ፡ በዘኢይረትዕ፡ ወበዘኢይደሉ። ወዘሰ፡ ይትሜካሕ፡ በእግዚአብሔር፡ ለይትመካሕ። ወአኮ፡ ዳእሙ፡ ዘርእሶ፡ ንእደ፡ ኅሩየ፡ ይከውን። አኮኑ፡ ዘእግዚአብሔር፡ ንእዶ፡ ክመ።

ምዕራፍ 11 በእንተ፡ ኢ፡ ተወክፎ፡ ትምህርተ፡ ባዕድ ወርቱዕሰ፡ ትትዐገሡኒ፡ ኅዳጠ፡ ከመ፡ እንብብ፡ በእበድየ፡ እንዘ፡ ትትዔገሡኒ። እስመ፡ እቀንእ፡ ለክሙ፡ ቅንአተ፡ እግዚአብሔር። እስመ፡ ፈኀርኩክሙ፡ ለአሐዱ፡ ምት፡ ድንግል፡ ወንጹሕ፡ ክርስቶስ፡ ከመ፡ አቅርብክሙ፡ ኀቤሁ። ወባሕቱ፡ እፈርህ፡ ዮጊ፡ ከመ፡ አርዌ፡ ምድር፡ አስሐታ፡ ለሔዋን፡ በጕሕሉት። እንዳዒ፡ ለእመ፡ ይማስን፡ ልብክሙ፡ እምየውሀቱ፡ ወንጽሑ፡ ለክርስቶስ። ሶበሁ፡ ኮነ፡ ዘይመጽእ፡ ኀቤክሙ፡ ጸውዐክሙ፡ ኀበ፡ ካልእ፡ ኢየሱስ፡ ዘኢሰበክነ፡ ለክሙ። ወእመ፡ ቦ፡ ካልእ፡ መንፈሰ፡ ዘትነሥኡ፡ ዘኢነሣእክሙ። ወእመኒ፡ ካልእ፡ ትምህርት፡ ዘኢተመሀርክሙ፡ ርቱዕ፡ ትጽንሑነ። ወባሕቱ፡ እትሔዘብ፡ አልቦ፡ ዘአሕጸጽኩክሙ፡ እምዘባዕዳን፡ ሐዋርያት። በእንተ፡ ምህሮ፡ ወንጌል፡ ዘእንበለ፡ ዐስብ ወእመኒ፡ አብድ፡ አነ፡ በቃልየ፡ አኮኬ፡ በልብየ። ወባሕቱ፡ እከሥት፡ ለክሙ፡ ኵሎ፡ ውስተ፡ ኵሉ። ወሚመ፡ አበስኩኑ፡ እንጋ፡ ዘአሕመምኩ፡ ርእስየ፡ በኵሉ፡ ከመ፡ አንትሙ፡ ትትለዐሉ። እስመ፡ በከንቱ፡ መሀርኩክሙ፡ ትምህርተ፡ እግዚአብሔር። ወባዕደሰ፡ ቤተ፡ ክርስቲያን፡ ቀሠጥኩ፡ ወነሣእኩ፡ ለሲሳይየ፡ ከመ፡ እትለአክሙ። ወአመሂ፡ ሀለውኩ፡ ኀቤክሙ፡ ኢተሰቈቁ፡ ንዋየክሙ፡ እስመ፡ እጼነስ። ወኀበሂ፡ ኢያእከልኩ፡ ሠለጡ፡ ሊተ፡ አኀዊነ፡ በጺሖሙ፡ እመቄዶንያ። ወበኵሉ፡ ተዐቀብኩ፡ ከመ፡ ኢያክብድ፡ ላዕሌክሙ፡ ወእትዐቀብሂ። እስመ፡ ጽድቁ፡ ለክርስቶስ፡ ይሄሉ፡ ምስሌየ። ወኢተዐጽወተኒ፡ ዛቲ፡ ፍሥሓየ፡ በደወለ፡ አካይያ፡ በእንተ፡ ምንት። እስመሁ፡ እንጋ፡ ኢያፈቅረክሙኑ፡ እንከሰ፡ እግዚአብሔር፡ የአምር፡ ዘንተ። ወባሕቱ፡ ዘሂ፡ ገበርኩ፡ ወዘሂ፡ እገብር፡ ከመ፡ እክልኦሙ፡ ምክንያተ፡ ለእለ፡ ይፈቅዱ፡ ምክንያተ። ከመ፡ ኢይርከቡ፡ እሙንቱሂ፡ በዘይትሜክሑ፡ ከማነ። እስመ፡ ሀለዉ፡ ሐሳውያን፡ ገበርተ፡ ዐመፃ፡ እለ፡ ይትሜየኑ፡ ወይትሜሰሉ፡ ሐዋርያተ፡ ክርስቶስ። ወዝኒ፡ አኮ፡ ለአንክሮ፡ እስመ፡ ለሊሁ፡ ሰይጣን፡ ይትሜሰል፡ ከመ፡ መልአከ፡ ብርሃን። ወዝኒ፡ ኢኮነ፡ ዐቢየ፡ ለእመ፡ ይትሜሰሉ፡ መላእክቲሁኒ፡ ከመ፡ መላእክተ፡ ጽድቅ። ወደኃሪቶሙሰ፡ በከመ፡ ምግባሮሙ። በእንተ፡ ዘኢ፡ ርቱዕ፡ ተመክሖ ወካዕበ፡ እብል፡ አልቦ፡ ዘይሬስየኒ፡ ከመ፡ አብድ። ወእመ፡ አኮሰ፡ ከመ፡ አብድኒ፡ ተወከፉኒ፡ ከመ፡ እትመካሕ፡ አነሂ፡ ኅዳጠ። ወዝኒ፡ አኮ፡ ዘመንገለ፡ እግዚአብሔር፡ ዘእነግር። ዳእሙ፡ ከመ፡ አብድ፡ እዘነግዕ፡ በእንተ፡ ዛቲ፡ ትምክሕትየ። እስመ፡ ብዙኃን፡ እለ፡ ይትሜክሑ፡ በሕግ፡ ዘሥጋ፡ አነሂ፡ እትሜካሕ። እመሰ፡ ይኤድመክሙ፡ አጽምኦቶሙ፡ ለአብዳን፡ እንዘ፡ ጠቢባን፡ ወነባብያን፡ አንትሙ። እስመ፡ ትትዔገሥዎሙ፡ ለእለ፡ ይትዔገሉክሙ፡ ወለእለሂ፡ የኀይዱክሙ። ወለእለሂ፡ ይትቤልዑክሙ፡ ወለእለሂ፡ ይተዔበዩ፡ ላዕሌክሙ፡ ወለዘሂ፡ ይጸፍዐክሙ፡ ገጸክሙ። እብል፡ ዘንተ፡ ከመ፡ ዘያስተሐቅር፡ ከመ፡ ሕሙማን፡ ንሕነ፡ ለክሙ፡ እብል። አነሂ፡ በእበድየ፡ አልቦ፡ ዘይትኀበል፡ ላዕሌየ፡ ዘእንበለ፡ ዳእሙ፡ ዘአነ፡ እትኀበል፡ ላዕሌሁ። እመኒ፡ ዕብራውያን፡ እሙንቱ፡ አነሂ፡ ከማሆሙ። ወእመኒ፡ እስራኤላውያን፡ እሙንቱ፡ አነሂ፡ ከማሆሙ፡ ወእመሂ፡ ዘርዐ፡ አብርሃም፡ እሙንቱ፡ አነሂ፡ ከማሆሙ። እመኒ፡ ላእኩ፡ ለክርስቶስ፡ እሙንቱ፡ አኮሁ፡ እዘነግዕ፡ ለርእስየ፡ በጻማሂ፡ አፈድፈድኩ፡ ወበተቀሥፎሂ፡ አፈድፈድኩ። ወበተሞቅሖሂ፡ አብዛኅኩ፡ ወለሞትኒ፡ ብዙኀ፡ ተደለውኩ። ኅምሰ፡ ቀሠፉኒ፡ አይሁድ፡ በበ፡ አርብዓ፡ ዘእንበለ፡ አሐቲ፡ ሥልሰ፡ ዘበጡኒ፡ በአብትር። ምዕረ፡ ወገሩኒ፡ በአእባን፡ ሥልሰ፡ ሰኰየት፡ ሐመርየ። ቤትኩ፡ ወወዐልኩ፡ እንዘ፡ እጸብት፡ ውስተ፡ ዕመቀ፡ ባሕር። ወመንገድሂ፡ ዘልፈ፡ እትመነደብ፡ በተከዚኒ፡ አመንደቡኒ፡ ፈያት። አመንደቡኒ፡ አዝማድየ፡ አመንደቡኒ፡ አሕዛብ። ተመንደብኩ፡ በሀገር፡ ወተመንደብኩ፡ በሐቅል፡ ተመንደብኩ፡ በባሕር፡ አመንደቡኒ፡ ቢጽ፡ ሐሳውያን። በጻማ፡ ወበሥራሕ፡ ወበትጋህ፡ ብዙኅ። በረኃብ፡ ወበጽምእ፡ በጾም፡ ብዙኅ፡ በቊር፡ ወበዕርቃን። ወዘእንበለ፡ ዝ፡ ብዙኅ፡ ባዕድ፡ ዘረከበኒ፡ ኵሎ፡ አሚረ፡ እንዘ፡ እኄሊ፡ ቤተ፡ ክርስቲያናት። መኑ፡ ዘይደዊ፡ ወኢየሐምም፡ አነ፡ ወመኑ፡ ዘይስሕት፡ ወኢይደነግፅ። ወእመሰ፡ ይደሉ፡ ተመክሖ፡ አነኒ፡ እትሜካሕ፡ በሕማምየ። የአምር፡ እግዚአብሔር፡ አቡሁ፡ ለእግዚእነ፡ ኢየሱስ፡ ክርስቶስ። ዘውእቱ፡ አምላክ፡ ቡሩክ፡ ለዓለመ፡ ዓለም፡ ከመ፡ ኢይሔሱ። በሀገረ፡ ደማስቆ፡ መልአከ፡ አሕዛብ፡ ዘውእቱ፡ አርስጣስዮስ፡ ንጉሥ፡ ዐቃቤ፡ ሀገር፡ ደማስቆናዊ፡ ፈቀደ፡ የአኀዘኒ። ወአውረዱኒ፡ በሰብሳብ፡ እንተ፡ መስኮት፡ እምዐረፍት፡ ወአምሰጥኩ፡ እምእዴሁ።

ምዕራፍ 12 በእንተ፡ ራእይ፡ ዘርእየ፡ ጳውሎስ ወናሁ፡ ይረትዕ፡ ሊተ፡ ተመክሖ። ወባሕቱ፡ ኢኮነ፡ ሠናየ፡ ንግባእ፡ ካዕበ፡ ወንዘክር፡ ራእየ፡ ዘከሠተ፡ እግዚአብሔር። አአምር፡ ብእሴ፡ ምእመነ፡ በክርስቶስ፡ እምቅድመ፡ ዐሠርቱ፡ ወአርባዕቱ፡ ዓመት። እመሂ፡ በሥጋሁ፡ ወእመሂ፡ ዘእንበለ፡ ሥጋሁ፡ እንዳዒ፡ እግዚአብሔር፡ የአምር። ወመሠጥዎ፡ ለውእቱ፡ ብእሲ፡ እስከ፡ ሣልስ፡ ሰማይ። ወአአምሮ፡ ለውእቱ፡ ብእሲ፡ እመሂ፡ በሥጋሁ፡ ወእመሂ፡ ዘእንበለ፡ ሥጋሁ። እንዳዒ፡ እግዚአብሔር፡ የአምር። ወመሠጥዎ፡ ውስተ፡ ገነት። ወሰምዐ፡ በህየ፡ ነገረ፡ ዘኢይተረጐም፡ ዘኢይከውኖ፡ ለዕጓለ፡ እመሕያው፡ ይንብብ። በእንተ፡ ዝንቱኬ፡ በዘከመ፡ ዝ፡ እትሜካሕ፡ በርእስየ። ኢይትሜካሕ፡ ዘእንበለ፡ በሕማምየ። ወእመኒ፡ ፈቀድኩ፡ እትመካሕ፡ ኢኮንኩ፡ አብደ፡ እስመ፡ ጽድቀ፡ እነግር። ወባሕቱ፡ እምህክ፡ ከመ፡ ኢይትሐዘቡኒ፡ በዘርእዩኒ፡ ወበዘሰምዑኒ፡ ፈድፋደ። በእንተ፡ ሕማሙ፡ ዘወትር ወበእንተ፡ ዝ፡ ከመሰ፡ ኢይትዐበይ፡ በብዙኅ፡ ራእይ፡ ተውህበኒ፡ መልአከ፡ ሰይጣን። ዘይደጕጸኒ፡ ሥጋየ፡ ወይኰርዐኒ፡ ርእስየ። ወአስተብቋዕክዎ፡ ለእግዚእየ፡ ሥልሰ፡ በእንቲኣሁ፡ ከመ፡ ያእትቶ፡ እምኔየ። ወይቤለኒ፡ የአክለከ፡ ጸጋየ፡ ወኀይልሰ፡ በደዌ፡ የኀልቅ። ወሠመርኩ፡ በሕማምየ፡ ከመ፡ ይኅድር፡ ኀይለ፡ ክርስቶስ፡ ላዕሌየ። ወበእንተ፡ ዝንቱ፡ ሠመርኩ፡ እትመካሕ፡ በሕማምየ፡ በተጽዕሎሂ፡ ወበምንዳቤሂ፡ ወበተሰዶሂ፡ ወበተጽናስሂ። በእንተ፡ ክርስቶስ፡ እስመ፡ ሶበ፡ አሐምም፡ ሶቤሃ፡ እጸንዕ። ወናሁ፡ ኮንኩ፡ አብደ፡ በተመክሖትየ፡ በዘአንትሙ፡ አገበርክሙኒ። ወሊተሰ፡ ርቱዕ፡ እክበር፡ በኀቤክሙ፡ ወትኩኑኒ፡ ሰማዕትየ። እስመ፡ አልቦ፡ ዘአሕጸጽኩክሙ፡ እምዘኵሉ፡ ሐዋርያት፡ ወእመኒ፡ ከመ፡ ወኢ፡ ምንት፡ አነ። ትምህርተ፡ ሐዋርያትሰ፡ ተገብረ፡ ለክሙ፡ በኵሉ፡ ትዕግሥት፡ ወበተኣምራት፡ ወመንክራት፡ ወኀይላት። ወምንትኑ፡ ዘአሕጸጽኩክሙ፡ ወዘአኅጣእኩክሙ፡ እምኵሉ፡ ቤተ፡ ክርስቲያናት። ዘእንበለ፡ ዛቲ፡ እንተ፡ ኢመጻእኩ፡ ኀቤክሙ፡ አሥርሕክሙ፡ ጸግውንያ፡ ለዛቲ፡ አበሳየ። ናሁ፡ ሣልስየ፡ ዝንቱ፡ እንዘ፡ አስተዳሉ፡ እምጻእ፡ ኀቤክሙ፡ ወኢተፋጠነኒ። እስመ፡ ኪያክሙ፡ እፈቅድ፡ ወአኮ፡ ንዋየክሙ። እስመ፡ ርቱዕ፡ አበው፡ ይዝግቡ፡ ለውሉዶሙ፡ ወአኮ፡ ውሉድ፡ ለአዝማዲሆሙ። ወአንሰ፡ ምክዕቢተ፡ አስተዋፃእኩ፡ ወእሜጡ፡ ሥጋየ፡ በእንተ፡ ነፍስክሙ። ወእመኒ፡ ፈድፋደ፡ አፍቀርኩክሙ፡ ርእስየ፡ አፍቀርኩ። ወአንሰ፡ ኢያክበድኩ፡ ላዕሌክሙ። ወባሕቱ፡ መስተመይነ፡ ከዊንየ፡ ነሣእኩክሙ፡ በጕሕሉት። ቦኑ፡ እንጋ፡ ዘፈነውኩ፡ ኀቤክሙ፡ ወቦኑ፡ ዘተዐገልኩክሙ። ናሁ፡ አስተብቋዕክዎ፡ ለቲቶ፡ ወፈነውክዎ፡ ለካልእ፡ እኁነ፡ ምስሌሁ። ቦኑ፡ ዘገፍዐክሙ፡ ቲቶ፡ አኮኑ፡ በውእቱ፡ መንፈስ፡ ዘይረውጽ፡ በላዕሌሁ። ቦቱ፡ ሖርነ፡ ወበአሠረ፡ ዚኣሁ፡ ተለውነ። ትትሔዘቡነሁ፡ ከመ፡ ንሕነ፡ ንትዋቀሠክሙ፡ ዘሂ፡ ንነግር፡ በቅድመ፡ እግዚአብሔር። በእንተ፡ ክርስቶስ፡ ንነግር፡ ወኵሉሰ፡ አኀዊነ፡ ከመ፡ ትትሐነጹ። ወባሕቱ፡ እፈርህ፡ ለእመ፡ ቦ፡ ከመ፡ መጻእኩ፡ ወኢረከብኩክሙ፡ በከመ፡ እፈቅድ። ወአነሂ፡ እከውነክሙ፡ ከመ፡ ዘኢትፈቅዱ። ወዮጊ፡ ይከውን፡ ውስቴትክሙ፡ ተዝኅሮ፡ ወተቃንኦ፡ ወተምዕዖ፡ ወተሣልቆ። አው፡ ተሐምዮ፡ ወተሀውኮ፡ ወአዕብዮ፡ ልብ። ዮጊ፡ ካዕበ፡ መጺእየ፡ ኀቤክሙ፡ ያሐምመኒ፡ እግዚአብሔር፡ በእንቲኣክሙ። ወእላሕዎሙ፡ ለብዙኃን፡ እለ፡ አበሱ፡ ወኢነስሑ፡ በእንተ፡ ኀሳሮሙ፡ ወምርዓቶሙ፡ ወዝሙቶሙ፡ ዘገብሩ።

ምዕራፍ 13 በእንተ፡ ምጽአቱ፡ ሣልሳይ ወናሁ፡ ሣልስየ፡ ዝንቱ፡ እንዘ፡ እመጽእ፡ ኀቤክሙ። አኮኑ፡ በአፈ፡ ክልኤቱ፡ ወሠለስቱ፡ ሰማዕት፡ ይቀውም፡ ኵሉ፡ ነገር። ወአቅደምኩ፡ ነጊረ፡ እምትካት። ወአቀድም፡ ወእነግር፡ ዓዲ፡ በከመ፡ እቤለክሙ፡ እንዘ፡ ሀሎኩ፡ በቀዳሚ። ከማሁ፡ እንዘ፡ ኢሀሎኩ፡ በሣልስ፡ እነግር፡ ለእለ፡ አበሱ፡ ቀዲሙ። ወለባዕዳንሂ፡ ከመ፡ እምከመ፡ መጻእኩ፡ ኢይምህክ፡ እንከ፡ ካዕበ። እስመ፡ ተኀሥሡ፡ መከራሁ፡ ለክርስቶስ፡ ዘይነብብ፡ በላዕሌየ። ውእቱ፡ አልቦ፡ ዘይሰአኖ፡ በኀቤክሙ፡ ዘእንበለ፡ ዳእሙ፡ ኵሉ፡ ይተከሀሎ። እስመ፡ ዘሐመ፡ ወተሰቅለ፡ በድካም፡ ሕያው፡ ውእቱ፡ በኀይለ፡ እግዚአብሔር። ወንሕነኒ፡ ንደክም፡ ምስሌሁ፡ ወነሐዩሂ፡ ምስሌሁ፡ በኀይለ፡ እግዚአብሔር፡ በእንቲኣክሙ። ወርእሰክሙ፡ አመክሩ፡ ለእመ፡ ሀለውክሙ፡ በሃይማኖት። ወርእሰክሙ፡ ሕቱ፡ ለእመ፡ ቦ፡ ዘኢተአምሩ፡ ለሊክሙ። ወኢትጤይቁ፡ ከመ፡ ሀሎ፡ ክርስቶስ፡ ምስሌክሙ። ወለእመሰ፡ ኢኮነ፡ ከመ፡ ዝ፡ ምኑናን፡ አንትሙ። ወእትአመን፡ አንሰ፡ ታእምሩ፡ ከመ፡ ኢኮነ፡ ምኑናነ፡ ንሕነኒ። ጸሎተ፡ መምህራን ወንጼሊ፡ ኀበ፡ እግዚአብሔር፡ ከመ፡ ኢይግበር፡ እኩየ፡ ላዕሌክሙ፡ ወኢ፡ ምንተኒ። ወአኮሰ፡ ከመ፡ ንሕነ፡ ኅሩያነ፡ ንኩን፡ አላ፡ ዳእሙ፡ ከመ፡ አንትሙ፡ ሠናየ፡ ትግበሩ፡ ወንሕነሰ፡ ከመ፡ ምኑናን። እስመ፡ ኢንክል፡ ወፂአ፡ እምጽድቅ፡ ዘእንበለ፡ ዳእሙ፡ በጽድቅ። አምኃ፡ ወበረከት ወእትፌሣሕ፡ ሶበ፡ ንሕነ፡ ነሐምም፡ ከመ፡ አንትሙ፡ ትጽንዑ፡ ወትትፈሥሑ። ወዝ፡ ውእቱ፡ ጸሎትነ፡ ከመ፡ አንትሙ፡ ታርትዑ፡ ልበክሙ። ወበእንተ፡ ዝ፡ ዘንተ፡ እጽሕፍ፡ ለክሙ፡ እንዘ፡ ኢሀሎኩ፡ ኀቤክሙ። ከመ፡ አመ፡ መጻእኩ፡ ምቱረ፡ ኢይግበር፡ በላዕሌክሙ። ከመ፡ ዘሥልጣን፡ ቦ፡ በዘአኰነነኒ፡ እግዚአብሔር፡ ለሐኒጽ፡ ወአኮ፡ ለነሢት። ተፈሥሑ፡ እንከሰ፡ አኀዊነ፡ አጥብዑ፡ ወተዐገሡ፡ ወተሰናዐዉ። ወአምላከ፡ ሰላም፡ ወፍቅር፡ የሀሉ፡ ምስሌክሙ። ተአምኁ፡ በበይናቲክሙ፡ በአምኃ፡ ቅድሳት፡ አምኁክሙ፡ ኵሎሙ፡ ቅዱሳን። ጸጋሁ፡ ለእግዚእነ፡ ኢየሱስ፡ ክርስቶስ፡ ወፍቅረ፡ እግዚአብሔር። ወሱታፌ፡ መንፈስ፡ ቅዱስ፡ የሀሉ፡ ምስለ፡ ኵልክሙ፡ አሜን።