Epistle of Jude

በእንተ፡ ሃይማኖት፡ ዘለቅዱሳን እምይሁዳ፡ ገብረ፡ እግዚአብሔር፡ ወኢየሱስ፡ ክርስቶስ፡ እኁሁ፡ ለያዕቆብ። ለእለ፡ ያፈቅርዎ፡ ለእግዚአብሔር፡ አብ፡ ስሙያን፡ ወጽዉዓን፡ በኢየሱስ፡ ክርስቶስ። ሰላም፡ ለክሙ፡ ወተፋቅሮ፡ ወሣህል፡ ይብዛኅ፡ ማእከሌክሙ። አኀዊነ፡ በኵሉ፡ አስተፋጠንኩ፡ ከመ፡ እጽሐፍ፡ ለክሙ፡ በእንተ፡ ሕይወተ፡ ኵልነ። እስመ፡ ጥቀ፡ እጽሕፍ፡ ለክሙ፡ ጽሑቀ። ወአስተበቊዐክሙ፡ ከመ፡ ትትቀነይዋ፡ ለእንተ፡ ተውህበት፡ ለቅዱሳን፡ ሃይማኖት። እስመ፡ ተደመሩ፡ ብክሙ፡ ሰብእ፡ ረሲዓን፡ እለ፡ ጽሑፋን፡ ቀዲሙ፡ ለዝንቱ፡ ደይን። እለ፡ ያፈልስዋ፡ ለጸጋ፡ እግዚአብሔር፡ ውስተ፡ ዝሙቶሙ። ወይክሕድዎ፡ ለዘውእቱ፡ ባሕቲቱ፡ ንጉሥ፡ እግዚእነ፡ ኢየሱስ፡ ክርስቶስ። በእንተ፡ አዘክሮተ፡ ቀዳማይ ወተአምሩ፡ ምዕረሰ፡ ከመ፡ ኢየሱስ፡ አድኀነ፡ ሕዝቦ፡ እምድረ፡ ግብጽ። ወበዳግምሰ፡ ለእለ፡ ኢአምኑ፡ አጥፍኦሙ። ወለመላእክቲሁኒ፡ እለ፡ ኢዐቀቡ፡ ፍጥረቶሙ፡ ወኀደግዋ፡ ለሥርዐቶሙ፡ ውስተ፡ ደይን። አንበሮሙ፡ ወተዐሰሩ፡ ለዕለት፡ ዐባይ፡ በዘለሊሆሙ፡ አቅነዩ፡ ርእሶሙ። ወከማሁ፡ ሰዶምኒ፡ ወገሞራ፡ ወአህጉርኒ፡ እለ፡ ምስሌሆን፡ ወበአርአያሆን፡ ዘመዋ። ወተለዋሆን፡ በፍትወተ፡ ዝሙት። ሤሞሙ፡ ውስተ፡ ደይን፡ ዘለዓለም፡ ወተመጠዋ፡ ኵነኔሆን። ወከማሁ፡ እሉኒ፡ እለ፡ በሕልሞሙ፡ ያጌምኑ፡ ሥጋሆሙ። ወይክሕድዎ፡ ለእግዚኦሙ፡ ወይፀርፉ፡ ላዕለ፡ ስብሐቲሁ። በእንተ፡ ተግሣጽ፡ ወምክር፡ ለኃጥኣን ወሚካኤልኒ፡ ሊቀ፡ መላእክት፡ አመ፡ ይትባሀሎ፡ ለሰይጣን፡ በእንተ፡ ሥጋሁ፡ ለሙሴ። ኢተኀበለ፡ ቃለ፡ ፅርፈት፡ ይንብብ፡ አላ፡ ይቤሎ፡ ይሒስከ፡ እግዚአብሔር። ወእሉሰ፡ እለ፡ ይፀርፉ፡ እሙንቱ፡ ይኤብሱ፡ በዘኢየአምሩ። ወኅሊናተሰ፡ ዘሥጋ፡ የአምሩ፡ ከመ፡ እንስሳ፡ ወባቲ፡ ይሤረዉ። አሌ፡ ሎሙ፡ እስመ፡ በፍኖተ፡ ቃየል፡ ሖሩ። ወበዐስበ፡ ጌጋዩ፡ ለበለዓም፡ ውዕዩ፡ ወበካሕዱ፡ ለቆሬ፡ ወእለ፡ ምስሌሁ፡ ተሀጕሉ። እሉ፡ እሙንቱ፡ እለ፡ በፍቅር፡ አፍቀሩክሙ፡ ከመ፡ ያስሕቱክሙ፡ ተባዕያን፡ ለኀጢአቶሙ። ወየሐውሩ፡ በፍትወተ፡ ልቦሙ፡ ወዘእንበለ፡ ፍርሀት፡ ይሬእዩ፡ ርእሶሙ። ወከመ፡ ደመና፡ እሙንቱ፡ እንተ፡ አልባቲ፡ ዝናም፡ እንተ፡ ትትሀወክ፡ እምነፋስ። ወከመ፡ ዕፀዋትኒ፡ ይቡሳት፡ እለ፡ አልቦን፡ ፍሬ፡ እለ፡ ካዕበ፡ ሞታ፡ ወተሠረዋ። ወከመ፡ ሞገዳተ፡ ባሕር፡ እሙንቱ፡ እቡዳት፡ እለ፡ ያፈልሕዋ፡ ለኀሳሮሙ። ወከመ፡ ከዋክብት፡ ጽልሙታን፡ እለ፡ ለፍጻሜ፡ ጽልመቶሙ፡ ደይን፡ ይጸንሖሙ፡ ለዓለመ፡ ዓለም። በከመ፡ ተነበየ፡ ሄኖክ፡ በእንቲኣሆሙ፡ ዘውእቱ፡ ሳብዕ፡ እምአዳም፡ ወይቤ። ናሁ፡ ይመጽእ፡ እግዚአብሔር፡ በአእላፊሁ፡ ቅዱሳን፡ መላእክት፡ ከመ፡ ይግበር፡ ኵነኔ። ወይፈድዮ፡ ለኵሉ፡ በከመ፡ ምግባሩ። ወይዛለፎሙ፡ ለኵሎሙ፡ ኃጥኣን፡ በእንተ፡ ኵሉ፡ ግብረ፡ ኀጣውኢሆሙ፡ ዘአበሱ። ወበእንተ፡ ኵሉ፡ ዘነበቡ፡ ላዕሌሁ፡ ዘኢይከውን፡ ቃለ፡ ኃጥኣን፡ ወጽልሕዋን። እሉ፡ እሙንቱ፡ እለ፡ ያንጐረጕሩ፡ እስመ፡ ቅቡጻን፡ ተስፋሆሙ፡ እለ፡ የሐውሩ፡ በፍትወተ፡ ልቦሙ። ወአፉሆሙኒ፡ ይነብብ፡ ትዕቢተ፡ ወያስተብዕሉ፡ ወያደልዉ፡ ለገጽ። ወዝ፡ ኵሉ፡ ዘይገብሩ፡ ከመ፡ ይርብሖሙ። ወአንትሙሰ፡ አኀዊነ፡ ተዘከሩ። ቃለ፡ ዘነገሩክሙ፡ ቀዲሙ፡ ሐዋርያቲሁ፡ ለእግዚእነ፡ ኢየሱስ፡ ክርስቶስ፡ ወዘይቤሉክሙ። ከመ፡ በደኃሪ፡ መዋዕል፡ ይመጽኡ፡ መስሕታን። እለ፡ ይሜህሩ፡ በፍትወተ፡ ልቦሙ፡ ወያስሕቱ፡ በኀጣውኢሆሙ። እሉ፡ እሙንቱ፡ እለ፡ ይስሕቡ፡ በጌጋዮሙ። ወያስሕቱ፡ በፍትወተ፡ ነፍሶሙ፡ ወመንፈስ፡ ቅዱስ፡ አልቦሙ። ወአንትሙሰ፡ አኀዊነ፡ ሕንጹ፡ ርእሰክሙ፡ በሃይማኖት፡ ቅድስት፡ ወበመንፈስ፡ ቅዱስ፡ ጸልዩ። ወበፍቅሩ፡ ለእግዚአብሔር፡ ተዐቀቡ። ወተሰፈውዋ፡ ለምሕረቱ፡ ለእግዚእነ፡ ኢየሱስ፡ ክርስቶስ፡ እንተ፡ ሕይወት፡ ዘለዓለመ፡ ዓለም። እስመ፡ ቦ፡ ለዘትዘልፍዎ፡ በእንተ፡ ኀጢአቱ፡ ወቦ፡ ለዘትምሕርዎ። ወቦ፡ ለዘታድኅንዎ፡ እምውስተ፡ እሳት፡ ወትባልሕዎ። ወቦ፡ ዘይድኅን፡ ፈሪሆ፡ ወነሲሖ። ወቦ፡ እለ፡ ጸሊኦሙ፡ ዘቀዲሙ፡ ጌጋዮሙ፡ ኀደጉ፡ ዐራዘ፡ ጥልቀተ፡ ዝሙቶሙ። ወይክል፡ እግዚአብሔር፡ መድኀኒነ፡ ዐቂቦተክሙ፡ ዘእንበለ፡ ጌጋይ። ወአቅሞተክሙ፡ ቅድመ፡ ስብሐቲሁ፡ ንጹሓኒክሙ፡ በትፍሥሕት። በእደዊሁ፡ ለእግዚእነ፡ ወመድኀኒነ፡ ኢየሱስ፡ ክርስቶስ። ዘሎቱ፡ ስብሐት፡ ወዕበይ፡ ወኀይል፡ ወሥልጣን፡ እምቅድመ፡ ኵሉ፡ ፍጥረተ፡ ዓለም፡ ይእዜኒ፡ ወዘልፈኒ። ወለኵሉ፡ ዓለማት፡ ዘይመጽእ፡ አሜን።