ዘሆሴዕ፡ ነቢይ።

Text of the EOTC printed Bible

Chapter 1 ቃለ፡ እግዚአብሔር፡ ዘኮነ፡ ኀበ፡ ሆሴዕ፡ ወልደ፡ ብኤርም፡ በመዋዕለ፡ ኦዝያን፡ ወኢዮአታም፡ ወአካዝ፡ ወሕዝቅያስ፡ ነገሥተ፡ ይሁዳ፡ ወበመዋዕለ፡ ኢዮርብዓም፡ ወልደ፡ ዮአስ፡ ንጉሠ፡ እስራኤል። ቀዳሜ፡ ቃሉ፡ ለእግዚአብሔር፡ ዘኮነ፡ ኀበ፡ ሆሴዕ፡ ወይቤሎ፡ እግዚአብሔር፡ ለሆሴዕ፡ ሑር፡ አውስብ፡ ብእሲተ፡ ዘማ፡ ወአዋልደ፡ ዘማ፡ እስመ፡ ዘምዎ፡ ትዜሙ፡ ምድር፡ እምድኅረ፡ እግዚአብሔር። ወሖረ፡ ወአውሰበ፡ ጎሜርሃ፡ ወለተ፡ ቤዴልይም፡ ወፀንሰት፡ ወወለደት፡ ሎቱ፡ ወልደ። ወይቤሎ፡ እግዚአብሔር፡ ስምዮ፡ ስሞ፡ ኢይዝራኤል፡ እስመ፡ ዓዲ፡ ኅዳጠ፡ እትቤቀል፡ ደሞ፡ ለኢይዝራኤል፡ ወእስዕር፡ መንግሥተ፡ እምቤተ፡ እስራኤል። ወይከውን፡ ይእተ፡ አሚረ፡ እቀጠቅጥ፡ ቀስተ፡ እስራኤል፡ በቆላተ፡ ኢይዝራኤል። ወፀንሰት፡ ካዕበ፡ ወወለደት፡ ወለተ። ወይቤሎ፡ እግዚአብሔር፡ ስምያ፡ ስማ፡ ኢሥህልት፡ እስመ፡ ኢይደግም፡ እንከ፡ ተሣህሎቶሙ፡ ለቤተ፡ እስራኤል፡ ዳእሙ፡ ተናክሮ፡ እትናከሮሙ። ወእሣሃሎሙ፡ ለደቂቀ፡ ይሁዳ፡ ወአድኅኖሙ፡ አነ፡ እግዚአብሔር፡ አምላኮሙ፡ ወኢያድኅኖሙ፡ በቀስት፡ ወበኵናት፡ ወኢ፡ በሠረገላት፡ ወኢ፡ በጸባኢት፡ ወኢ፡ በአፍራስ፡ ወኢ፡ በመስተፅዕናን። ወአኅደግዋ፡ ጥበ፡ ለኢሥህልት፡ ወፀንሰት፡ ዳግመ፡ ወወለደት፡ ወልደ። ወይቤሎ፡ እግዚአብሔር፡ ስምዮ፡ ስሞ፡ ኢ፡ ሕዝብየ፡ እስመ፡ አንትሙ፡ ኢኮንክሙ፡ ሕዝብየ፡ ወአነሂ፡ ኢኮንኩ፡ አምላክክሙ። ወይከውን፡ ኍልቆሙ፡ ለደቂቀ፡ እስራኤል፡ ከም፡ ኆፃ፡ ባሕር፡ ዘኢይሰፈር፡ ወዘኢይትኌለቊ፡ ወይከውኑ፡ በውእቱ፡ ብሔር፡ በኀበ፡ ይቤሎሙ፡ ኢኮንክሙ፡ ሕዝብየ፡ አንትሙ፡ እስመ፡ እሙንቱ፡ ይሰመዩ፡ ውሉደ፡ እግዚአብሔር፡ ሕያው። ወእም፡ ዝ፡ ይትጋብኡ፡ ደቂቀ፡ ይሁዳ፡ ወደቂቀ፡ እስራኤል፡ ኅቡረ፡ ወይሠይሙ፡ አሐደ፡ መልአከ፡ ወያዐርጎሙ፡ እምድር፡ እስመ፡ ዐባይ፡ ዕለቱ፡ ለእስራኤል።

Chapter 2 ወበልዎ፡ ለእኁክሙ፡ ሕዝብየ፡ ወለእኅትክሙ፡ ሥህልት። ተዋቀሥዋ፡ ለእምክሙ፡ እስመ፡ ይእቲኒ፡ ኢኮነት፡ ብእሲትየ። ወአነሂ፡ ኢኮንኩ፡ ምታ። ወናሁ፡ ይእዜ፡ እስዕር፡ ዝሙታ፡ እምቅድመ፡ ገጻ፡ ወመሐዛኒሃ፡ እማእከለ፡ አጥባቲሃ። ወእቀፍጻ፡ ዕራቃ፡ ወእሬስያ፡ ከመ፡ አመ፡ መዋዕለ፡ ንእሳ፡ ወከመ፡ ዕለት፡ ቀዳሚት፡ እንተ፡ ባቲ፡ ተወልደት። ወእገብራ፡ ከመ፡ ምድር፡ ወእሬስያ፡ ከመ፡ በድው፡ ዘአልቦ፡ ማይ፡ ወእቀትላ፡ በጽምእ። ወኢይሠሃሎሙ፡ እንከ፡ ለደቂቃ፡ እስመ፡ ትውልደ፡ ዘማ፡ እሙንቱ። እስመ፡ ዘመወት፡ እሞሙ፡ ወአስተኀፈረቶሙ፡ ወላዲቶሙ። እስመ፡ ትቤ፡ በልባ፡ ኣሐውር፡ እትልዎሙ፡ ለመሐዛንየ፡ እለ፡ ይሁቡኒ፡ ስቴየ፡ ወመብልዕየ፡ ወይኤርዙኑ፡ አልባሰየ፡ ወመዋጥሕየ፡ ወይሁቡኒ፡ ቅብዕየ፡ ወኵሎ፡ ዘይደሉ፡ ያመጽኡ፡ ሊተ። በእንተ፡ ዝንቱ፡ ናሁ፡ አነ፡ ኣሐጽር፡ ፍኖታ፡ በሦክ፡ ወእፌጽም፡ መንገዳ፡ ወተኀጥእ፡ እንከ፡ ምኅላፊ። ወትዴግኖሙ፡ እንከ፡ ለመሐዛኒሃ፡ ወኢትእኅዞሙ፡ ተኀሥሦሙ፡ ወኢትረክቦሙ፡ ወትብል፡ ኣሐውር፡ እንከሰ፡ ኀበ፡ ምትየ፡ ዘትካት፡ እስመ፡ ይኄይሰኒ፡ ዘቀዲሙ፡ እምይእዜ። ወይእቲሰ፡ ኢያእመረት፡ ከመ፡ አነ፡ ወሀብክዋ፡ እክለ፡ ወወይነ፡ ወቅብዐ፡ ወአብዛኅኩ፡ ላቲ፡ ወርቀ፡ ወብሩረ፡ ወይእቲሰ፡ ገብረት፡ ለበዓል። ወበእንተ፡ ዝንቱ፡ እትመየጥ፡ ወአስተጋብእ፡ እክልየ፡ ዘበበ፡ ጊዜሁ፡ ወወይንየ፡ ዘለለ፡ ዕለቱ፡ ወእሰልባ፡ አልባሲሃ፡ ወመዋጥሒሃ፡ ከመ፡ ኢትክድን፡ ኀፍረታ። ወናሁ፡ ይእዜ፡ እከሥት፡ ኀፍረታ፡ በቅድመ፡ መሐዛኒሃ፡ ወአልቦ፡ ዘያድኅና፡ እምእዴየ። ወእመይጥ፡ ኵሎ፡ በዓላቲሃ፡ ወፍስሓሃ፡ ወአውራኂሃ፡ ወአሥርኅሃ፡ ወኵሎ፡ ሕገጊሃ። ወአጠፍእ፡ ወይና፡ ወበለሳ፡ ወኵሎ፡ ዘትቤ፡ ደነስየ፡ ውእቱ፡ ዘወሀቡኒ፡ መሐዛንየ። ወእሬስያ፡ በድው፡ ወአነብሮ፡ ስምዐ፡ ይኩና፡ ወይበልዕዋ፡ አራዊተ፡ ገዳም፡ ወአዕዋፈ፡ ሰማይ፡ ወአራዊተ፡ ምድር። ወእትቤቀላ፡ ከመ፡ አመ፡ መዋዕለ፡ በዓሊም፡ ዘሦዐት፡ ሎሙ፡ ወተሠርገወት፡ አእኑጊሃ፡ ወባዝግናሃ፡ ወሖረት፡ ወተለወቶሙ፡ ለመሐዛኒሃ። ሊተሰ፡ ረስዐተኒ፡ ይቤ፡ እግዚአብሔር። በእንተ፡ ዝንቱ፡ ናሁ፡ አንጎግዋ፡ ወአሐውራ፡ በድወ፡ ወአዘነግዕ፡ ልባ። ወእሁባ፡ ጥሪታ፡ ዘእምህየ፡ ወእከሥት፡ ምክረ፡ በቆላተ፡ አካን፡ ወተኀሥር፡ በህየ፡ ከመ፡ አመ፡ መዋዕለ፡ ንእሳ፡ ወከመ፡ ዕለተ፡ ልደታ፡ እምከርሠ፡ እም፡ ወከመ፡ አመ፡ ተዐርግ፡ እምግብጽ። ወይከውን፡ ይእተ፡ አሚረ፡ ይቤ፡ እግዚአብሔር፡ ትብለኒ፡ ምትየ፡ ወኢትብል፡ እንከ፡ በዓሊም። ወእስዕር፡ አስማቲሆሙ፡ ለበዓሊም፡ እምአፉሃ፡ ወኢትዜከሮሙ፡ እንከ፡ አስማቲሆሙ። ወይእተ፡ አሚረ፡ እትካየድ፡ ኪዳነ፡ ምስለ፡ ኵሉ፡ አራዊተ፡ ገዳም፡ ወምስለ፡ አዕዋፈ፡ ሰማይ፡ ወምስለ፡ ዘይትሐወስ፡ ውስተ፡ ምድር፡ ወእስዕር፡ ቀስተ፡ ወኲናተ፡ ወጸብአ፡ እምድር፡ ወኣነብረኪ፡ ተአሚነኪ። ወእፍኀረኪ፡ ሊተ፡ ብእሲተ፡ ለዓለም፡ በጽድቅ፡ ወበርትዕ፡ በሣህል፡ ወበምሕረት። ወእፍኅረኪ፡ ሊተ፡ በሃይማኖት፡ ወተአምርኒ፡ እንከ፡ ይቤ፡ እግዚአብሔር። ወይከውን፡ ይእተ፡ ዕለተ፡ ይቤ፡ እግዚአብሔር፡ እሰጠዎ፡ ለሰማይ፡ ወሰማይኒ፡ ይሰጠዋ፡ ለምድር። ወምድርኒ፡ ትሰጠዎሙ፡ ለእክል፡ ወለወይን፡ ወለቅብዕ፡ ወእሙንቱሂ፡ ይሰጠውዎሙ፡ ለእስራኤል። ወእዘርዕ፡ ላቲ፡ ሰላመ፡ ውስተ፡ ምድር፡ ወእሣሃላ፡ ለእንተ፡ ኢኮነት፡ ሥህልተ፡ ወአፈቅራ፡ ለእንተ፡ ኢኮነት፡ ፍቅርተ። ወእብሎ፡ ሕዝብየ፡ ለዘኢኮነ፡ ሕዝብየ፡ ወውእቱኒ፡ ይብለኒ፡ እግዚእየ፡ ወአምላኪየ፡ አንተ።

Chapter 3 ወይቤለኒ፡ እግዚአብሔር፡ አፍቅር፡ ብእሲተ፡ አንተ፡ እክይ፡ ወዝሙት፡ ባቲ፡ በከመ፡ አፍቀሮሙ፡ እግዚአብሔር፡ ለደቂቀ፡ እስራኤል። ወእሙንቱሰ፡ ይኔጽሩ፡ ኀበ፡ አምላክ፡ ነኪር፡ ወያፈቅሩ፡ ዘይነሥእ፡ ሐፍሰ፡ ወይነ፡ ዘቢብ። ወተዐሰብኩ፡ ሊተ፡ በዐሠርቱ፡ ወኀምስቱ፡ ጠፋልሐ፡ ብሩር፡ ወበመስፈርተ፡ ቆሮስ፡ ሰገመ፡ ወበመስፈርተ፡ ኔባል፡ ወይነ። ወእቤላ፡ ንበሪ፡ ምስሌየ፡ ብዙኀ፡ መዋዕለ፡ ወኢትዘምዊ፡ ወኢታብኢ፡ ካልአ፡ ብእሴ፡ ወአነ፡ እሄሉ፡ ምስሌኪ። እስመ፡ ብዙኀ፡ መዋዕለ፡ ይነብሩ፡ ደቂቀ፡ እስራኤል፡ ዘእንበለ፡ ንጉሥ፡ ወዘእንበለ፡ መልአክ፡ ወዘእንበለ፡ መሥዋዕት፡ ወዘእንበለ፡ ካህናት፡ ወዘእንበለ፡ ራእይ፡ ወአልቦ፡ ኤፉድ፡ ወአልቦ፡ ሱራፌን። ወእም፡ ዝ፡ ይትመየጡ፡ ደቂቀ፡ እስራኤል፡ ወየኀሥሥዎ፡ ለእግዚአብሔር፡ አምላኮሙ፡ ወለዳዊት፡ ንጉሦሙ፡ ወይዜክርዎ፡ ለእግዚአብሔር፡ ወለሠናይቱ፡ በደኃሪ፡ መዋዕል።

Chapter 4 ስምዑ፡ ቃለ፡ እግዚአብሔር፡ ደቂቀ፡ እስራኤል፡ እስመ፡ ይትዋቀሦሙ፡ እግዚአብሔር፡ ለእለ፡ ይነብሩ፡ ውስተ፡ ምድር። እስመ፡ አልቦ፡ ጽድቅ፡ ወአልቦ፡ ምሕረት፡ ወአልቦ፡ አእምሮ፡ እግዚአብሔር፡ ውስተ፡ ምድር፡ ዘእንበለ፡ ሐሰት፡ ወቀትል፡ ወስርቅ፡ ወዝሙት፡ መልአ፡ ምድረ፡ ወይዴምሩ፡ ደመ፡ ምስለ፡ ደም። በእንተ፡ ዝንቱ፡ ትላሑ፡ ምድር፡ ወትውሕድ፡ ምስለ፡ ኲሎሙ፡ እለ፡ ይነብሩ፡ ውስቴታ፡ ወምስለ፡ አራዊተ፡ ገዳም፡ ወምስለ፡ አዕዋፈ፡ ሰማይ፡ ወአራዊተ፡ ምድር፡ ወየኀልቁ፡ ዓሣተ፡ ባሕር። ወአልቦ፡ እንከ፡ መኑሂ፡ ዘይትዋቀሥ፡ ወአልቦ፡ ዘይዛለፍ፡ ወኢመኑሂ፡ ወሕዝብየስ፡ ካህናት፡ እለ፡ ይትዋሥኡ፡ ኮኑ፡ ከመ፡ ዘኢይትዋሥኡ። ወይደክሙ፡ በፍኖት፡ ካህን፡ ወነቢይ፡ ወሕዝብ፡ ኅቡረ፡ ወትመስል፡ እምክሙ፡ ሌሊተ። ወይመስሉ፡ ሕዝብየ፡ ከመ፡ ዘአልቦ፡ ልብ፡ እስመ፡ ለከሂ፡ ኀደገከ፡ ልብከ፡ ወአነሂ፡ ኀደጉከ፡ ኢትሡዕ፡ ሊተ፡ እስመ፡ ረሳዕከ፡ ሕገ፡ አምላክከ፡ ወአነሂ፡ እረስዖሙ፡ ለደቂቅከ። በከመ፡ ብዝኆሙ፡ ከማሁ፡ አበሱ፡ ሊተ፡ ወእሬስዮ፡ ኀሳረ፡ ለክብሮሙ። ወትበልዖሙ፡ ኀጢአቶሙ፡ ለሕዝብየ፡ ወይነሥእዋ፡ ለነፍሶሙ፡ በጌጋዩሙ። ወይከውን፡ በከመ፡ ዝንቱ፡ ሕዝብ፡ ከማሁ፡ ካህን፡ ወእትቤቀሎሙ፡ በፍኖቶሙ፡ ወእትፈደዮሙ፡ በከመ፡ ምግባሮሙ። ይበልዑ፡ ወኢይጸግቡ፡ ይዜምዉ፡ ወኢይፈደፍዱ፡ እስመ፡ ኀደግዎ፡ ለእግዚአብሔር፡ አምላኮሙ፡ ይዕቀቡ፡ ዝሙተ፡ ወስታየ፡ ወስካረ። እስመ፡ አፍቀረ፡ ልቦሙ፡ ለሕዝብየ፡ ሰገለ፡ ይስአል፡ ወበትሩ፡ ይሰጠዎ፡ ወበመንፈሰ፡ ዝሙት፡ ስሕቱ፡ ወዘመዉ፡ እምአምላኮሙ። ወይሠውዑ፡ ውስተ፡ አድባር፡ ወውስተ፡ አውግር፡ ወይዘብሑ፡ ታሕተ፡ ባሉጥ፡ ወቡጥም፡ ወገውዝ፡ ወለውዝ፡ ወታሕተ፡ ዕፅ፡ ዘሠናይ፡ ጽላሎቱ፡ በእንተ፡ ዝንቱ፡ ይዜምዋ፡ አዋልዲክሙ፡ ወይትመሐዛ፡ መራዕዊክሙ። ወኢገሠጽክዎን፡ ለአዋልዲክሙ፡ ሶበ፡ ዘመዋ፡ ወኢ፡ ለመራዕዊክሙ፡ ሶበ፡ ተመሐዘዋ። እስመ፡ ተደመሩ፡ ምስለ፡ ዘማውያን፡ ወሦዑ፡ ምስለ፡ ሕጉላን፡ ሕዝብ፡ ወሕዝብ፡ ዘይሌቡ፡ ተደመረ፡ ምስለ፡ ዘኢይሌቡ። ወአንተኒ፡ እስራኤል፡ ኢትእበድ፡ ወአንተኒ፡ ይሁዳ፡ ኢትሑር፡ ገልገላ። ወኢትዕርግ፡ ቤተ፡ አዎን፡ ወኢትምሐል፡ በሐሰት፡ በስመ፡ እግዚአብሔር፡ ሕያው። እስመ፡ ከመ፡ እጐልት፡ እንተ፡ ተሀረብድ፡ ከማሁ፡ ሀርበደ፡ ኤፍሬም፡ ወናሁ፡ ይእዜ፡ ይሬዕዮሙ፡ እግዚአብሔር፡ ከመ፡ አባግዕ፡ ውስተ፡ ፂኦት። ከማሁ፡ ኤፍሬም፡ አፍቀረ፡ ጣዖተ፡ ወሤመ፡ ሎቱ፡ ዕቅፍተ። ወአብደሮሙ፡ ለከናኔዎን፡ ዘምዎ፡ ዘመዉ፡ ወአብደሩ፡ ኀሳረ፡ በእከዮሙ። ወበዕልወተ፡ ነፍሶሙ፡ እንተ፡ ይእቲ፡ መንፈሰ፡ ዝሙት፡ ወይትኀፈሩ፡ በምሥዋዓቲሆሙ።

Chapter 5 ስምዑ፡ ዝንተ፡ ካህናት። ወአጽምእዎ፡ ቤተ፡ እስራኤል፡ ወይስምዕዎ፡ ቤተ፡ ነጋሢ፡ እስመ፡ በእንቲኣክሙ፡ ውእቱ፡ ዝንቱ፡ ኵሉ፡ ኵነኔ፡ እስመ፡ መሥገርተ፡ ኮንክምዎ፡ ለዘያስተሐይጽ፡ ወከመ፡ መሥገርት፡ እንተ፡ ሰፍሑ፡ ያሥግሩ፡ ባቲ፡ እለ፡ ይንዕዉ፡ ነዐውት፡ ተከልዎ። ወአንሰ፡ ነቢይ፡ መገሥጽክሙ። ወአነ፡ አእመርክዎ፡ ለኤፍሬም፡ ወእስራኤልኒ፡ ኢርኅቀ፡ እምኔየ፡ እስመ፡ ይእዜ፡ ዘመወ፡ ኤፍሬም፡ ወረኵሰ፡ እስራኤል። ወኢሜጡ፡ ልቦሙ፡ ከመ፡ ይግብኡ፡ ኀበ፡ አምላኮሙ፡ እስመ፡ መንፈሰ፡ ዝሙት፡ ላዕሌሆሙ፡ ውእቱ፡ እሙንቱሰ፡ ኢያእመርዎ፡ ለእግዚአብሔር። ወኀሣሩ፡ ለእስራኤል፡ ወጽዕለቱ፡ ቅድመ፡ ገጹ፡ ወይደክሙ፡ እስራኤል፡ ወኤፍሬም፡ በጌጋዮሙ፡ ወይደዊ፡ ይሁዳኒ፡ ምስሌሆሙ። ምስለ፡ አልሕምት፡ ወአባግዕ፡ ኅቡረ፡ ወየሐውሩ፡ ይኅሥሥዎ፡ ለእግዚአብሔር፡ ወኢይረክብዎ፡ እስመ፡ ኀደጎሙ። እስመ፡ ዐለውዎ፡ ለእግዚአብሔር፡ ወተናከርዎ፡ ወከመ፡ ውሉደ፡ ነኪር፡ ኮንዎ፡ ወናሁ፡ ይእዜ፡ ይበልዖ፡ አናኵዕ፡ ለርስቶሙ። ንፍኁ፡ ቀርነ፡ ውስተ፡ አድባር፡ ወአንሥኡ፡ ከበሮ፡ ውስተ፡ አውግር፡ ወወውዑ፡ ውስተ፡ ቤተ፡ አዎን። በኀበ፡ ኀስረ፡ ብንያም፡ ኤፍሬምኒ፡ ኮነ፡ ለሙስና፡ በመዋዕለ፡ ይዘልፍዎሙ፡ ለሕዝብየ፡ እስራኤል፡ ወበህየ፡ ርኢኩ፡ ዝሙተ፡ ኤፍሬም፡ ወርኵሶሙ፡ ለእስራኤል። ወኮኑ፡ መላእክተ፡ ይሁዳ፡ ከመ፡ ዘይትዐዶ፡ ወሰነ፡ ወእክዑ፡ መዐትየ፡ ላዕሌሆሙ፡ ከመ፡ ማይ። ወኮነ፡ ኤፍሬም፡ ተዐጋሌ፡ ወኬዳ፡ ለፍትሕ፡ እስመ፡ አኀዙ፡ ይትልዉ፡ ፃሕወ። ወአነ፡ እከውኖ፡ ከመ፡ ነቀዝ፡ ለኤፍሬም፡ ወከመ፡ ቊንቊኔ፡ ለቤተ፡ ይሁዳ። ወርእያ፡ ኤፍሬም፡ ለደዌሁ፡ ወለፃዕሩ፡ ይሁዳ፡ ርእያ። ወሖረ፡ ኤፍሬም፡ ኀበ፡ ፋርስ፡ ወፈነዉ፡ ተናብልተ፡ ኀበ፡ ንጉሥ፡ ኢያሬም። ወውእቱኒ፡ ኢክህለ፡ ፈውሶተክሙ፡ እስከ፡ ኀልቀ፡ ሕማም፡ በላዕሌክሙ። እስመ፡ አነ፡ እከውኖሙ፡ ከመ፡ ነምር፡ ለኤፍሬም፡ ወከመ፡ አንበሳ፡ ለቤተ፡ ይሁዳ። ወአነ፡ እመሥጦሙ፡ ወእነሥኦሙ፡ ወአልቦ፡ ዘያድኅኖሙ። ወእሰወጥ፡ ወአሐውር፡ ቤትየ፡ እስከ፡ አመ፡ ይጠፍኡ፡ ወየኀሥሡ፡ ገጽየ፡ በዕለተ፡ ምንዳቤሆሙ።

Chapter 6 ወይገይሡ፡ ኀቤየ፡ ወይብሉ፡ ንዑ፡ ንሑር፡ ወንትመየጥ፡ ኀበ፡ እግዚአብሔር፡ አምላክነ። እስመ፡ ውእቱ፡ ቀሠፈነ፡ ወይፌውሰነ፡ ወውእቱ፡ አቊሰለነ፡ ወይሤርየነ። ወያሐይወነ፡ በሰኑይ፡ መዋዕል፡ ወአመ፡ ሣልስት፡ ዕለት፡ ንትነሣእ፡ ወነሐዩ፡ በቅድሜሁ፡ ናእምር። ወንዴግን፡ ከመ፡ ናእምሮ፡ ለእግዚአብሔር፡ ከመ፡ ጎህ፡ ድልወ፡ ንረክቦ፡ ወይመጽእ፡ ከመ፡ ዝናመ፡ ክረምት፡ ዘቀዳሚ፡ ወዘደኃሪ፡ ላዕለ፡ ምድር። ምንተ፡ እግበር፡ ለከ፡ ኤፍሬም፡ ወምንተ፡ እግበር፡ ለከ፡ ቤተ፡ ይሁዳ፡ ናሁ፡ ሣህልክሙሰ፡ ከመ፡ ደመና፡ ነግሀ፡ ወከመ፡ ጠለ፡ ጽባሕ፡ እንተ፡ ተሐውር፡ ፍጡነ። በእንተ፡ ዝንቱ፡ ዐጸድክዎሙ፡ ለነቢያቲክሙ፡ ወቀተልክዎሙ፡ በቃለ፡ አፉየ፡ ወይወፅእ፡ ፍትሕየ፡ ከመ፡ ብርሃን። እስመ፡ ምጽዋተ፡ አበድር፡ እምነ፡ መሥዋዕት፡ ወአእምሮ፡ እግዚአብሔር፡ እምቊርባን። ወእሙንቱሰ፡ ኮኑ፡ ከመ፡ ብእሲ፡ ዘየዐሉ፡ መሐላሁ፡ ወበህየ፡ ክሕዱኒ። ገለአድ፡ ሀገር፡ እንተ፡ ትትጌበር፡ ከንቶ፡ ወትትሐመግ፡ በደም፡ ወኀይላኒ፡ ከመ፡ ብእሲ፡ ግዱድ። ካህናትሰ፡ ኅሉፋነ፡ ፍኖት፡ ከበቱ፡ ፍኖተ፡ እግዚኦሙ፡ አመ፡ ቀተልዋ፡ ለሰቂማ፡ እስመ፡ ዐመፃ፡ ገብሩ፡ በቤተ፡ እስራኤል። ወርኢኩ፡ በህየ፡ ዝሙተ፡ ኤፍሬም፡ ግሩመ፡ ወርኵሰ፡ እስራኤል። ወይሁዳኒ፡ አኀዘ፡ መቅሥሞ፡ ለከ፡ አመ፡ መጠውኩከ፡ ፄዋ፡ ሕዝብየ፡ እስራኤል።

Chapter 7 ወሶበ፡ ሰፋሕክዎ፡ ለእስራኤል፡ ትትከሠት፡ ዐመፃሁ፡ ለኤፍሬም፡ ወእከየ፡ ሰማርያ፡ እስመ፡ ሐሰተ፡ ገብሩ። ወያበውእ፡ ሠርዌ፡ ኀቤሁ፡ ወይትፈየት፡ ወይሰልብ፡ በፍኖት፡ ከመ፡ ይኅበር፡ ማዕሌቶሙ። ወአእመርኩ፡ ዘኀልዩ፡ በልቦሙ፡ ወተዘከርኩ፡ ኵሎ፡ እከዮሙ፡ ይእዜኒ፡ የዐግቶሙ፡ ኲሉ፡ እከዮሙ፡ ወጌጋዮሙ፡ ወበቅድመ፡ ገጽየ፡ ኮኖሙ። ወተፈሥሑ፡ ነገሥት፡ በእከዮሙ፡ ወመላእክትኒ፡ በሐሰቶሙ። እስመ፡ ኲሎሙ፡ የሐውሩ፡ ኀበ፡ ብእሲተ፡ ብእሲ፡ ከመ፡ እቶን፡ ዘአንደዱ፡ ለኀቢዝ፡ ዘያንበለብል፡ ነዱ፡ እምሐሪፅ፡ ዘልውስ፡ እስከ፡ ይትበሐዕ፡ መዋዕለ፡ ነገሥቶሙ። ወአኀዙ፡ መላእክት፡ ይትመዐዑ፡ እምወይን፡ ወሰፍሑ፡ እደዊሆሙ፡ ምስለ፡ ሥሑጻን፡ ኵላ፡ ሌሊተ። ኤፍሬም፡ ጸግበ፡ ወኖመ፡ ኵላ፡ ሌሊተ፡ ወሶበ፡ ይነቅሁ፡ በጽባሕ፡ ነዱ፡ ከመ፡ ነበልባለ፡ እሳት፡ ኵሎሙ። ወወዕየ፡ ከመ፡ እቶን፡ ልቦሙ፡ ወበልዐቶሙ፡ እሳት፡ ለመኳንንቲሆሙ። ወወድቁ፡ ኵሎሙ፡ ነገሥቶሙ፡ ወአልቦ፡ እንከ፡ እምኔሆሙ፡ ዘይጼውዐኒ። ኤፍሬም፡ ተደመረ፡ ምስለ፡ ሕዝቡ፡ ኤፍሬም፡ ኅቡአቲከ፡ ገፍትዐተከ። ወበልዐ፡ ፀር፡ ኀይሎ፡ ወውእቱሰ፡ ኢያእመረ፡ ወበቈለ፡ ሲበቱሂ፡ ውስተ፡ ገጹ፡ ወዓዲ፡ ኢለበወ። ወያኀስርዎ፡ ወይጼዕልዎ፡ ለእስራኤል፡ ቅድመ፡ ገጹ፡ ወኢተመይጡ፡ ኀበ፡ እግዚአብሔር፡ አምላኮሙ፡ ወበዝንቱ፡ ኵሉ፡ ኢኀሠሥዎ፡ ለእግዚአብሔር፡ አምላኮሙ። ወኮነ፡ ኤፍሬም፡ አብደ፡ ከመ፡ ርግብ፡ ዘአልቦ፡ ልብ፡ ለግብጽ፡ ይጼውዕዎሙ፡ ወኀበ፡ ፋርስ፡ የሐውሩ። ወበከመ፡ የሐውሩ፡ ከማሁ፡ እዌሩ፡ ላዕሌሆሙ፡ መሥገርትየ፡ ወከመ፡ አዕዋፈ፡ ሰማይ፡ አወርዶሙ፡ ወእቀሥፎሙ፡ እዘኒሆሙ፡ በምንዳቤሆሙ። አሌ፡ ሎሙ፡ እስመ፡ ነገዱ፡ እምኔየ፡ ድንጉፃኒሆሙ፡ እሙንቱ፡ እስመ፡ አበሱ፡ ላዕሌየ፡ ወአንሰ፡ አድኀንክዎሙ፡ እሙንቱሰ፡ ሐመዩኒ፡ በሐሰት። ወኢጸርሑ፡ ኀቤየ፡ በልቦሙ፡ ዳእሙ፡ ይግዕሩ፡ ውስተ፡ ምስካቦሙ፡ በእንተ፡ እክል፡ ወወይን፡ ወቅብዕ፡ ወተቀትሉ። ወኢተገሠጹ፡ በኀቤየ፡ ወአነ፡ አጽናዕኩ፡ መዝራዕትየ፡ ላዕሌሆሙ፡ ከመ፡ እግበር፡ እኩየ፡ ላዕሌሆሙ። ወተመይጡ፡ ውስተ፡ ከንቱ፡ ወኮኑ፡ ከመ፡ ቀስት፡ ጠዋይ፡ ወይወድቁ፡ በኵናት፡ መላእክቲሆሙ፡ በእንተ፡ እበደ፡ ልቦሙ፡ ወልሳኖሙ። ከማሁ፡ አበሳሆሙ፡ ወዐመፃሆሙ፡ በምድረ፡ ግብጽ፡ ውስተ፡ ሕፅኖሙ፡ ከመ፡ መሬት።

Chapter 8 ወከመ፡ ንስር፡ ውስተ፡ ቤተ፡ እግዚአብሔር፡ እስመ፡ ዐለዉ፡ ኪዳንየ፡ ወአበሱ፡ ላዕለ፡ ሕግየ። ይኬልሑ፡ ኀቤየ፡ ወይብሉኒ፡ አእመርናከ፡ እግዚኦ፡ እስመ፡ እስራኤል፡ አግብአ፡ ሠናይቶ። ወዴገኑ፡ ፀሮሙ፡ ወነግሡ፡ ለርእሶሙ። ወአኮ፡ በእንቲኣየ፡ ዘወጠኑ፡ ወኢያእመሩኒ፡ ወገብሩ፡ ሎሙ፡ አማልክተ፡ ወርቆሙ፡ ወብሩሮሙ፡ ከመ፡ ይሠረዉ፡ ቦሙ። ሚጢ፡ ላሕመኪ፡ ሰማርያ፡ ወተሀውከት፡ መዓትየ፡ ላዕሌሆሙ። እስከ፡ ማእዜኑ፡ ኢይክሉ፡ ነጺሐ፡ እስራኤል። ወውእቱኒ፡ ጸራቢ፡ ገብሮ፡ ወኢኮነ፡ አምላከ፡ እስመ፡ ሳኰየ፡ ላሕምኪ፡ ሰማርያ። እስመ፡ ዘርዑ፡ ነፋሰ፡ ወአረሩ፡ አውሎ፡ ወአልቦ፡ ኀይል፡ ለከላስስቲሆሙ፡ ወኢይወፅእ፡ ሐሪፅ፡ እምውስቴቱ፡ ወእመኒ፡ ወፅአ፡ ፀር፡ ይበልዖ። ተሰጥመ፡ እስራኤል፡ ወኮነ፡ ከመ፡ ዐራት፡ በውስተ፡ አሕዛብ፡ እስመ፡ እሙንቱ፡ ዐርጉ፡ ውስተ፡ ፋርስ። ሠረጸ፡ ኤፍሬም፡ ወኮነ፡ ከመ፡ አድገ፡ ገዳም፡ ወአፍቀረ፡ ሎቱ፡ አምኃ። በእንተ፡ ዝንቱ፡ ይትሜጠውዎሙ፡ አሕዛብ፡ ይእዜኒ፡ እሜጥዎሙ፡ ወይሴኵሱ፡ ሕቀ፡ ከመ፡ ይቅብዑ፡ ንጉሠ፡ ወመልአከ። እስመ፡ አብዝኀ፡ ኤፍሬም፡ መሥዋዕቲሁ፡ ለኀጢአት፡ ወገብረ፡ ሎቱ፡ መሥዋዕተ፡ ፍቅር። ወጸሐፈ፡ ላዕሌሁ፡ ፍቅረ፡ እስመ፡ ለነኪር፡ ኮነ፡ መሥዋዕተ፡ ፍቁር። እመሂ፡ ሦዑ፡ መሥዋዕተ፡ ወበልዑ፡ ሥጋ፡ ኢይትዌከፎሙ፡ ይቤ፡ እግዚአብሔር። ይእዜኒ፡ እዜከር፡ ሎሙ፡ ኀጢአቶሙ፡ ወእትቤቀሎሙ፡ በጌጋዮሙ። እሙንቱሰ፡ ተመይጡ፡ ውስተ፡ ግብጽ፡ ወይበልዑ፡ ኵስሐ፡ በፋርስ። ወረስዖ፡ እስራኤል፡ ለፈጣሪሁ፡ ሐነጸ፡ ለጤሜን፡ ወይሁዳኒ፡ አብዝኀ፡ አህጉረ፡ ጥቅም፡ ወእፌኑ፡ እሳተ፡ ውስተ፡ አህጉሪሆሙ፡ ወትበልዕ፡ መሠረታቲሆን።

Chapter 9 ኢትትፌሣሕ፡ ወኢትትሐሠይ፡ እስራኤል፡ ከመ፡ አሕዛብ፡ እስመ፡ ዘመውከ፡ እምአምላክከ፡ ወአፍቀርከ፡ ሀብተ፡ ዘእምኵሉ፡ ዐውደ፡ እክል፡ ወምክያደ፡ ወይን። ወበእንተ፡ ዝንቱ፡ እክልኒ፡ ኢያእመሮሙ፡ ወወይንኒ፡ ሐሰዎሙ፡ ኀበ፡ ነበሩ፡ ምድረ፡ እግዚአብሔር። ወነበረ፡ ኤፍሬም፡ ግብጸ፡ እንዘ፡ ይበልዕ፡ ኵስሐ፡ በፋርስ። ወኢያወፅሑ፡ ለእግዚአብሔር፡ ወይነ፡ ወጼተሎ፡ ወኢያሠነዩ፡ ሎቱ፡ ኅብስቶሙ፡ ከመ፡ ኅብስተ፡ ልሔሞሙ፡ ወኲሉ፡ ዘበልዖ፡ ይረኵስ፡ ለነፍሶሙ፡ ወኢይበውእ፡ ቤተ፡ እግዚአብሔር። ምንተ፡ ይገብሩ፡ በዕለተ፡ ሕጎሙ፡ ወእመ፡ ዕለተ፡ በዓለ፡ እግዚአብሔር። በእንተ፡ ዝንቱ፡ ናሁ፡ የሐውሩ፡ ከመ፡ ኀሳሮሙ፡ ዘግብጽ፡ ወይትሜጠውዎሙ፡ ሜምፎስ፡ ወይቀብርዎሙ፡ በምክማስ፡ ወርቆሙኒ፡ በድበደ፡ ወይወርሶ፡ ሦክ፡ ውስተ፡ አብያቲሆሙ። በጽሐ፡ መዋዕለ፡ በቀል፡ ወፍዳ፡ ወይደዊ፡ እስራኤል፡ ምስለ፡ ነቢይ፡ ዘይለብስ፡ መንፈሰ፡ ጋኔን፡ በብዝኀ፡ ጌጋይከ፡ አብዛኅከ፡ ቊጣዐከ። ኤፍሬም፡ ሰብአ፡ ዐይን፡ ምስለ፡ ነቢየ፡ እግዚአብሔር፡ ወመሥገርት፡ እኪት፡ ምስለ፡ ኵሉ፡ ፍናዊሁ፡ ወርኵሶሙ፡ አንበሩ፡ ውስተ፡ ቤተ፡ እግዚአብሔር። ወኀስሩ፡ ከመ፡ አመ፡ መዋዕለ፡ በዐሊም፡ ወናሁ፡ ይዜክር፡ ሎሙ፡ ኃጢከያቶሙ፡ ወይትቤቀሎሙ፡ በጌጋዩሙ። ከመ፡ አስካል፡ በገዳም፡ ረከብክዎ፡ ለእስራኤል፡ ወከመ፡ በኲረ፡ በለስ፡ በገዳም፡ ክረምተ፡ ርኢክዎሙ፡ ለአበዊሆሙ።ወእሙንቱሰ፡ ቦኡ፡ ቤተ፡ ብዓል፡ ፌጎር፡ ወተናከሩ፡ ለኃሣሮሙ፡ ወኮኑ፡ ሰቀፐራረ፡ ፍቁራን። ኤፍሬም፡ ክም፡ ዖፍ፡ ሰረረ። ክብሮሙ፡ እምፀኒስ፡ ወእምወሊድ፡ ወማህምም። ወእመኒ፡ አልሀቁ፡ ውሎዶሙ፡ ያጠፍኦሙ፡ እምሰብእ፡ ወዓዲ፡ አሌሎሙ፡ ስጋየ፡ ወእቱ፡ ዘእምውስቴቶሙ። ኤፍሬም፡ በከመ፡ ርኢኩ፡ ውስተ፡ መስገርተ፡ መዕገት፡ አስተጋብኤ፡ ውሉዶሙ፡ ወኤፍሬምኒ፡ አውፅአደቂቆ፡ ይርገዞሙ። ሀቦሙ፡ እግዚኦ፡ ምንተ፡ ትሁቦሙ፡ ሀቦሙ፤ማህፀነ፡ መካነ፡ ወአጥባተ፡ ይቡሳተ። ኲሉ፡ እከዩመ፡ በገልገላ፡ እስመ፡ በህየ፡ ጸላእክዎሙ፡ በእንተ፡ እከየ፡ ምጋባሮ። እሰድዶሙ፡ እምአብያቲሆሙ፡ ወኢይደግም፡ እንከ፡ አፍቅሮቱሙ፡ እስመ፡ ኲሎሙ፡ መላእክቲሆሙ፡ ዓላውያ። ደወይ፡ ኤፍሬም፡ ወየብሰ፡ ስረዊሁ፡ ወኢይፈሪ፡ እከ፡ ወአመኒ፡ ወለዱ፡ እቀትል፡ ውሉደ፡ ደርሦሙ፡ መፍትወ። ገደፎሙ፡ እግዚአብሔር፡ እስመ፡ አበቱ፡ ሰሚዖቶ፡ ወይከውኒ፡ መታሕላነ፡ ውስተ፡ አህዛብ።

Chapter 10 ዐጸደ፡ ወይን፡ ዘሠረፀ፡ እስራኤል፡ ወሠምረ፡ ፍሬሁ፡ ወበከመ፡ በዝኀ፡ አብዝኀ፡ መስዋዕተ፡ ወበአምጣነ፡ ስነ፡ ምድሩ፡ ሐነጹ፡ ሐውልተ። ወተናፈቀ፡ ልቦሙ፡ ይእዜ፡ ይጠፍኡ፡ ለሊሁ፡ ይነስት፡ ምስዋዓቲሆሙ፡ ወየኀስሩ፡ ምስሎሙ። ወናሁ፡ ይእዜ፡ ብሉ፡ አልብነ፡ ንጉሠ፡ እስመ፡ ኢፈራህናሁ፡ ለእግዚአብሔር፡ ወንጉሥኒ፡ ምተ፡ ይሬስየነ። ዘይትናገር፡ ቃለ፡ ምክንያ፡ ሐሰት፡ ወይትዳየድ፡ ኪዳነ፡ በቊል፡ ፍትሕ፡ ከመ፡ ሣዕር፡ ውስተ፡ ገራህት፡ በገዳም። ኀበ፡ ላህመ፡ ቤተ፡ አዎን፡ ኀበ፡ ነብሩ፡ ሰብአ፡ ሰማረያ፡ እስመ፡ ላሐውዎ፡ ህዝብ። ወበከመ፡ ምረርዎ፡ ከማሁ፡ ይስህቁ፡ ዲበ፡ ብሩ፤እስመ፡ ፈለሰ፡ እምኔሁ። ወኪያሁኒ፡ ሐመይዎ፡ ወወሰድዎ፡ ብሔር፡ ፋርስ፡ አምኃሁ፡ ለኢሪያ፡ ንጉስ፡ ጸዎ፡ ወመጠዎ፡ ለኤፍሬም፡ ወተኀፍረ፡ እስራኤል፡ በምክሩ። ገደፈቶ፡ ሰማሪያ፡ ለንጉሣ፡ ከመ፡ ሐሰር፡ ውስተ፡ ገጸ፡ ማይ። ወይትነሠት፡ ወግረ፡ ጣዓቱ፡ ለእስራኤል፡ ሦክ፡ ወአሜከላ፡ ይበቊል፡ ውስተ፡ ምስዋዓቲሆሙ፡ ወይብልዎሙ፡ ለአድባርለደቁ፡ ላዕሌነ፡ ወለአውግርኒ፡ ድፈፍኑነ። አምአመ፡ አውግር፡ አበሰ፡ እስራኤል፡ ህየ፡ ቆሙ፡ ኢይርከቦሙ፡ ቀትል፡ በውስተ፡ እር፡ ለደቂቀ፡ አመፃ። ወመጽአሂ፡ ወቀሠፎሙ፡ ወይትጋብኡ፡ ላዕሌሆሙ፡ አህዛብ፡ ሶበ፡ ይጌሥጽዎሙ፡ በክልኤሙ፡ ጌፋዩሙ። ኤፍሬም፡ እጒልት፡ ኮነ፡ መፍቀሪተ፡ መዊዕ፡ ወአንሰ፡ እጸዓን፡ ዲበ፡ መሠንየ፡ ክሳዱ፡ እጼዐኖ፡ ለኤፍሬም፡ ወእፌፅሞ፡ ለይሁዳ፡ ወያዕቆብሰ፡ ለርእሱ። ዝርኡ፡ ለክሙ፡ ጽድቀ፡ ወእሩሩ፡ ፍሬ፡ ሕይወት፡ አኀትዉ፡ ለክሙ፡ ማኀቶተ፡ ጥበብ፡ ኀስዎ፡ ለእግዚአብሔር፡ እስከ፡ ይበጽሕ፡ ማእረረ፡ ጽድቅክሙ። ለምንጽኑ፡ ጽከብጹ፡ አመፃ፡ ወቀሠምክሙ፡ ኃጢአት፡ ወበላዕክሙ፡ ፍሬ፡ ሞት፡ እስመ፡ ተወከልከ፡ በሠረጋላከ፡ ወበብዝኀ፡ ሠራዊትከ። ወይትነሣእ፡ ሞት፡ ላዕለ፡ ህዝብከ፡ ወይወድቅ፡ ኲሉ፡ አረፋከ፡ ከመ፡ መለስአከ፡ ሰሎሞን፡ በቤተ፡ ኢዩርብዓም፡ በመዋዕለ፡ ቀትል፡ ወነፅኁ፡ እመ፡ ላዕለ፡ ውሉዳ። ከማሁ፡ እገብረክሙ፡ ቤተ፡ እስራኤል፡ እምቅድመ፡ ገጸ፡ ኃጢአትክሙ።

Chapter 11 በጸባሕ፡ ተነፅኁ፡ ይነፅኀዎ፡ ለንጉሠ፡ እስራኤል፡ እስመ፡ ሕፃን፡ ውእቱ፡ እስራኤል፡ ወአነ፡ አፍቀርክዎ፡ ወአምግብጽ፡ ጸዋዕክዎ፡ ለወልድየ። ወበከመ፡ ጸዋዕክዎሙ፡ ከማሁ፡ ርኀቁ፡ እምገጽየ፡ እሙንቱሰ፡ ለበዓሊምዎዑ፡ ወለግልፎ፡ ዐጠኑ። ወአነ፡ አዕቀፅክዎ፡ ለኤፍሬም፡ ወተመጠውክ፡ ዲበ፡ መዝራዕትየ፡ ወኢያእመሩ፡ ከመ፡ አነ፡ ፈወስድመሙ። ወውስተ፡ ሙስና፡ ስብእ፡ ሰፋህክዎሙ፡ በማእሰረ፡ ፍቅርየ፡ ወኮነክዎሙ፡ ከመ፡ ዜጸፍዕዎ፡ ለብእሲ፡ ውስተ፡ መልታህቱ፡ ወእኔጽር፡ መንገሌሁ፡ ወእክሎ። ነበረ፡ ኤፍሬም፡ ውስተ፡ ግብጽ፡ ወአሶር፡ ውእቱ፡ ንጉሱ፡ እስመ፡ አበየ፡ ተመይጦ። ወደክመት፡ ኲናት፡ በሀገሩ፡ ወሠዐራ፡ እምእደዊሁ፡ ወይበልዑ፡ እምውዴቶሙ። ወህዝብየኒ፡ ስቁ፡ እምነ፡ ምንባሪሁ፡ ወይትመዐዕ፡ እዚአብሔር፡ ላዕለ፡ ክብሩ፡ ወኢያዐብዩ። እፎኑ፡ እንከ፡ ኤፍሬም፡ እስውቀከ፡ እፎኒ፡ እሬስየከ፡ እስራኤል፡ ከመ፡ አዳማኒ፡ ወሚመ፡ ከመ፡ ሳበማ፡ ልብየ፡ ተሀውከት፡ ወአስተርአየት፡ ምህረትየ። ወኢይገብር፡ እንከሰ፡ በመቅሠፍተ፡ መዐትየ፡ ወኢየኀድግ፡ ጥፍአዎ፡ ለኤፍሬም፡ እስመ፡ እግዚአብሔር፡ አነ፡ ወአኮ፡ ሰብእ። ወቅዱስ፡ በላዕሌከ፡ ወእብል፡ ኢይበውእ፡ ሀገር። አሐውር፡ አትልዎ፡ ለእግዚአብሔር፡ እግዚእ፡ እስመ፡ ያድኀነነ። ከመ፡ አንበሳ፡ ይጥሕር፡ ወይደነግፁ፡ ውለዶ፡ ማይ። ወያንክር፡ ከመ፡ ዖፈ፡ ግብጽ፡ ወከመ፡ ርግብ፡ እንተ፡ ብሔረ፡ ፋርስ፡ ወአገብኦሙ፡ ውስተ፡ አብያቲሆሙ፡ ቤተ፡ እግዚአብሔር። ሐፀሩኒ፡ በሐሰተ፡ ኤፍሬም፡ ወቤተ፡ እስራኤል፡ ወይሁዳ፡ በዓመፃ፡ ይእዜ፡ አእመርክዎሙ፡ እግዚኦ፡ ወህዝበ፡ ቅዱስ፡ ተሰምየ፡ ለእግዚአብሔር።

Chapter 12 ኤፍሬምሰ፡ እኩይ፡ ጋኔን፡ ዜዴግነ፡ ክብረ፡ ወኲሎ፡ ከንቶ፡ ወሐሰተ፡ አብዝኀ፡ ወተካየደ፡ ላኪዳ፡ ስምለ፡ ፋርስ፡ ወያሐውሩ፡ ቅብአ፡ ግብፅ፡ ከመ፡ ይምሐርዎ። ወይትዋቀስ፡ እግዚአብሔር፡ ምስለ፡ ይሁዳ፡ ወይትቤቀሎ፡ ለያዕቆብ፡ ወይፈድዩ፡ በከመ፡ ፍናዊሁ፡ ወበከመ፡ ምግባሩ። በውስተ፡ ከርስ፡ አዕቀጾ፡ ለእዕቀጾ፡ ለአኁሁ፡ ወበፃማሁ፡ ክህለ፡ ምስለ፡ እግዚአብሔር። ወጸምዐ፡ ወክህለ፡ ምስለ፡ መልአክ። በከዩ፡ ወተጋነዩ፡ ሊተ፡ በውስተ፡ ቤተ፡ አዎን፡ ኀበ፡ ረከቡኒ፡ ወበሕየ፡ ተናገሩኒ። እግዚአብሔር፡ አምላክ፡ ዘኲሎ፡ ይለልክ፡ ተዝካሩ። ወአንተሂ፡ ተመየጥ፡ ኀበ፡ አምላክከ፡ ጽድቅ፡ ወምጽዋ፡ ዕቀብ፡ ወቅረብ፡ ኀበ፡ አምላክከ፡ ኲሎ፡ ጊዜ። ውስተ፡ እዴሁ፡ ለከነአን፡ መዳወ፡ ዓመፃ፡ ወአፍቀረ፡ ትዕግልተ። ወይቤ፡ ኤፍሬም፡ ወዳእኩ፡ ብዕልኩ፡ ወረከብኩ፡ ዕረፍት፡ ለነፍስየ። ወእምኲሉ፡ ተግባሩ፡ ኢተረክበ፡ ሎቱ፡ በእነተ፡ ኃጢአት፡ ዘአበሰ። ወአነ፡ እግዚአብሔር፡ አምላክለ፡ ዘአውፃእኩከ፡ እምድረ፡ ግብጽ፡ ወዓዲ፡ እነ፡ አንብረከ፡ ውስተ፡ ተዐይን፡ ከመ፡ አመ፡ መዋዕለ፡ በዐል። ወእትናገሮሙ፡ ለነቢያ፡ ወአነ፡ አብዛኀኩ፡ ራዕየ፡ ወተመሰልኩ፡ በእደ፡ ነቢያት። ሶበ፡ አኮጰ፡ ውሰተ፡ ገለአድ፡ ውእቱ። ወባሕቱ፡ ይስሕቱ፡ መላእክትኒ፡ እለ፡ ይሠውዑ፡ መስዋቲሆሙ፡ መከ፡ ማዕነቅ፡ ውሰተ፡ ሳዕረ፡ ገዳም። ወሖረ፡ ያዕቆብ፡ ውስተ፡ ገዳመ፡ ሶረያ፡ ዋታቃንየ፡ ያዕቆብ፡ በእንተ፡ ብዕሲቱ። ወዐቀባ፡ ለብእሲቱ። ወበነቢይ፡ አውፅሶ፡ እግዚአብሔር፡ ለእስራዔል፡ እምድረ፡ ግብፅ፡ ወበነቢይ፡ ተዐቀበ። ተምዕዐ፡ ኤፍሬም፡ ወተቆጥዐ፡ ወደሙሒ፡ ላዕሌሁ፡ ተክዕወ፡ ወኃሳረ፡ ይፈድዩ፡ እግዚአብሔር።

Chapter 13 በከመ፡ ቃሉ፡ ለኤፍሬም፡ ነስአ፡ ስርዓቶ፡ በእስራኤል፡ ወረሰዩ፡ ለበዣል፡ ወሞተ። ወደገሙ፡ ዓዲ፡ አብሶ፡ ወገብሩ፡ ሎሙ፡ ስብኮ፡ እምወርቆሙ፡ ወብሩሮሙ፡ በአምሳለ፡ ዜገብሮ፡ ጸራቢ፡ ወይዘብሑ፡ ሎሙ። ወይብሉ፡ ሡዑ፡ ሰብአ፡ ላህምሰ፡ ኀልቀ። በእንተ፡ ዝናቱ፡ ከውኑ፡ ከመ፡ ደማ፡ ጽባሕ፡ ወከመ፡ ጠለ፡ ጎሕ፡ ዘየሐውር፡ ወከመ፡ ሐሰረ፡ ዐውድ፡ ዘእክል፡ ዘይነፍኖ፡ ነፋስ፡ ወከመ፡ ቲስ፡ እቶን። ወአንሰ፡ እግዚአብሔር፡ አምላክከ፡ ዘአጸንዖ፡ ለሰማይ፡ ወአነ፡ ፈጠርክዋ፡ ለምድር፡ ወእዴየ፡ አቀመ፡ ኲሎ፡ ኃይላተ፡ ሰማይ፡ ወኢያርአይኩከ፡ ኪያሆሙ፡ ከመ፡ ኢትትለወዎሙ። ወአነ፡ አውፃእኩከ፡ እምድረ፡ ግብጽ፡ ወኢታእምር፡ እንከ፡ ለባዕደ፡ አምላከ፡ ዘእንበሌየ፡ ወአልቦ፡ ዘያድኀነከ፡ ዘእንበሌየ። አነ፡ ረዐይኩከ፡ ውስተ፡ በድው፡ ወውስተ፡ ምድር፡ ኀበ፡ ዔልከ። በበመራዕይከ፡ ወጸገብክሙ፡ ዝስከ፡ ያጠልቀክሙ፡ ወአዕበይክሙ፡ ልበክሙ፡ በእንተ፡ ዝንቱ፡ ረስዑኒ። ወእከውኖሙ፡ ከመ፡ አንበሳ፡ ወከመ፡ ነምር። ውስተ፡ ፍኖተ፡ ፋስ፡ ወእትቤቀሎሙ፡ ከመ፡ ድብ፡ ርኁብ፡ ወእመትር፡ ስረወ፡ ልቦሙ፡ ወበህየ፡ ይበልዕዎሙ፡ አናብስተ፡ ገዳም፡ ወአራዊተ፡ ገዳም፡ ትማሠጥዎሙ። ለኃሳርከ፡ እስራኤል፡ መኑ፡ ይረድአከ። አይቴ፡ ውስቱ፡ ዝኩ፡ ነጉስከ፡ ያድኀንከ፡ በኲሉ፡ አህጉርከ፡ ወይትቤቀል፡ ለከ፡ ዝኩ፡ ዘትቤለኒ፡ ሀበኒ፡ ንጉሰ፡ ወመልአከ። ወወሀብኩከ፡ በመዐትየ፡ ወበቊጥዓየ። ወተዐገስክዎ፡ ለማዕሌተ፡ ዐመፃከ፡ ወኃጢያቱ፡ ለኤፍሬም፡ ክቢት። ወይእኀዞ፡ ማሕምም፡ ከመ፡ እንተ፡ ትልድ፡ ዝንቱ፡ ወልድከ፡ ጠቢብ፡ ዘኢይቀውም፡ በተግሳጸ፡ ውልዱ። እምእደ፡ ሞት፡ አድኀኖሙ፡ ወእምሲኦል፡ እቤዘዎሙ። አይቴ፡ ኲነኔከ፡ ሞት፡ ወአይቴ፡ ቀኖትኪ፡ ሲኦል፡ ተኀብአ፡ ፍስሐ፡ እምአዕ፡ ይንትየ። እስመ፡ ውእቱ፡ ይትፈልጥ፡ እማእከለ፡ አኃዊኡ፡ ወያምጽ፡ እግዚአብሔር፡ ሳዕሌሁ፡ እምገዳም፡ ነፋ፡ ሀሩር፡ ወያየብስ፡ ስረዊሑ፡ ወያነፅፍ፡ ዐዘቃቲሁ፡ ወያየብስ፡ ምድራ፡ ወኲሎ፡ ምስናየ፡ አብያቲሃ።

Chapter 14 ወያማስና፡ ለሰማርያ፡ እስመ፡ ዐለወቶ፡ ለአምላካ፡ ወይወድቁ፡ በኲናት፡ ኲሎሙ፡ ወለደቂቆሙ፡ ይነፅኀዎሙ፡ ወያነቅዕዎን፡ ለፅኑሳቲሆሙ። ተመየጥ፡ እስራኤል፡ ኀበ፡ እግዚአብሔር፡ አምላክከ፡ እስመ፡ ደክሙ፡ በዐመፃክሙ። ወንሥኡ፡ ነገረ፡ ወተመየጡ፡ ኀበ፡ እግዚአብሔር፡ አምላክክሙ፡ ወበልዎ፡ ከመ፡ ኢትነሥኡ፡ ዓመፃ። ወይንሥኡ፡ ሠናየተ፡ ዘነዐስዩ፡ ለለእግዚአብሔር፡ ፍሬ፡ ከናፍሪነ። አሶሪሒ፡ ኢያድኀነነ፡ ወአፍራሰነኒ፡ ኢንጼዐን፡ ወኢንብሎሙ፡ እንከ፡ አማክቲነ፡ ለግብረ፡ እደዊነ፡ ዘበእንቲአከ፡ ይሠሀል፡ እጓለ፡ ማውታ። ወእፌውሶሙ፡ ለበሐውርቲሆሙ፡ ወአፈቅሮሙ፡ እሙነ፡ ወናሁ፡ እመይጥ፡ መዐትየ፡ እምኔሆሙ። ወእከውኖሙ፡ ከመ፡ ዝናም፡ ለእስራኤል፡ ወይሥፅ፡ ከመ፡ ጽጌ፡ ወይጸንዕ፡ ስረዊሁ፡ ከመ፡ ሊባኖስ። ወይወፍር፡ አዕጹቂኁ፡ ምክን፡ ከመ፡ ዘይት፡ ስሙር። ወምዕዛሁ፡ ከመ፡ ሊባኖስ። ወይትመዩ፡ ወይነብሩ፡ ታህተ፡ ጽላሎቱ፡ ወየሐይው፡ ወይጸግቡ፡ እምስርናይ፡ ወይሠርፅ፡ ከመ፡ ወይን፡ ዝክሩ፡ ወከመ፡ ዋይነ፡ ሊባኖስ። ለኤፍሬም፡ ለምንት፡ እንከ፡ ሎቱ፡ ጣዖት፡ ናሁ፡ አነ፡ አድከምክዎሂ፡ ወአነ፡ አጽናዕክዎሂ፡ ወአነ፡ አፈርዮ፡ ከመ፡ ጽ፡ ዘስሙር፡ ወይትረከብ፡ ፍሬከ፡ ኀቤየ። መኑ፡ እንከ፡ ጠቢብ፡ ወይሔልዮ፡ ለዝንቱ፡ ወለባዊ፡ ወየአምሮ፡ ለዝንቱ፡ እስ፡ ርቱዓት፡ ፍናዋቲሁ፡ ለእግዚአብሔር፡ ጻድቃን፡ የሐውርዎን፡ ወኃጥኣንሰ፡ ይስእንዎን።