Canons of Clement, which he received in a letter from S. Peter

ዝንቱ፡ ሴኖዶስ፡ ዘቀሌምንጦስ፡ ዘጸሐፈ፡ ጴጥሮስ፡ ረድእ፡ ርእሰ፡ ሐዋርያት፡ ዘነገረ፡ በእንተ፡ እግዚእነ፡ ኢየሱስ፡ ክርስቶስ

ይቤ፡ ቀሌምንጦስ፡ ዘእምጴጥሮስ፡ ርእሰ፡ ሐዋርያት፡ ረድኡ፡ ለእግዚእነ፡ ክርስቶስ

ይቤለኒ፡ ወልድየ፡ ቀሌምንጦስ፡ ኢታጥምቅ፡ መነሂ፡ በሕልያን፡ ወኢበሤጥ፡ ምቱር፡ ላዕለ፡ ጥምቀት

ወዘነሥአ፡ ላዕለ፡ ጥምቀት፡ ሕሊያነ፡ በሤጥ፡ ምቱር፡ ውጉዝ፡ ውእቱ፡ ወርጉም፡ እምአፉየ፡ አነ፡ ጴጥሮስ፡ ንኡሰ፡ ሐዋርያት፡ ወመክፈልቱ፡ ይኩን፡ ምስለ፡ ሢሞን፡ መሠርይ፡ ወይሁዳ፡ ረሲዕ

ወኢትሢጥ፡ ወልድየ፡ ሀብተ፡ ክህነት፡ ወጸጋ፡ መንፈስ፡ ቅዱስ፡ በሤጥ፡ ወኢትሣየጥ፡ ላዕለ፡ ክህነት፡ ወኢትንሣእ፡ ላቲ፡ ዐስበ፡ እምቅድመ፡ ትባርክ፡ ወኢእምድኅሬሁ፡ ዘእንበለ፡ በገጸ፡ በረከት

ወዘወሀበ፡ ወዘነሥአ፡ በክህነት፡ ሕልያነ፡ አልቦቱ፡ ክህነተ፡ ወውጉዝ፡ በኀቤየ፡ አነ፡ ጴጥሮስ፡ በግዘት፡ ዘአውገዝክዎ፡ ለሢሞን፡ መሠርይ፡ ወመክፈልቱ፡ ይኩን፡ ምስለ፡ ይሁዳ፡ ዕልው፡ ወነፍሱ፡ ርሕቅት፡ እምጥቃ፡ እግዚአብሔር፡ ከመ፡ ዲያብሎስ፡ እመዓርጊሁ

ወልድየ፡ ስረይ፡ ለዘአበሰ፡ ለከ፡ ሰብዓ፡ ጊዜ፡ በበሰብዐቱ፡ በከመ፡ አዘዘ፡ እግዚእነ፡ በወንጌል፡ ቅዱስ

ወተወከፎ፡ ለዘይኔስሕ፡ እምኀጢአቱ፡ ወመሐሮ፡ ለዘአበሰ፡ ወአንሥኦ፡ በእዴሁ፡ ወገሥጾ። ወሐውጽ፡ ድውያነ፡ ወሖር፡ ኀበ፡ ሙቁሓን፡ ወአብልዕ፡ ርኁባነ፡ ወአርዊ፡ ጽሙኣነ፡ ወአልብስ፡ ዕሩቃነ

ወአጥብዕ፡ በሀይማኖት፡ ወተጋደል፡ በእንቲአሃ፡ በርትዕ፡ ዘይደሉ፡ ወስማዕ፡ እመጻሕፍተ፡ እግዚአብሔር፡ ቅዱሳት፡ እስመ፡ እለ፡ ያጠብዑ፡ ኪያሃ፡ ወይትጋደሉ፡ በእንቲአሃ፡ ይወርሱ፡ መንግሥተ፡ ሰማያት

ወልድየ፡ ስረይ፡ ከመ፡ ይስረይ፡ ለከ፡ ወኢትኰንን፡ ከመ፡ ኢትትኰነን። ወለእመ፡ ተአመንከ፡ ላዕለ፡ ሢመተ፡ እግዚአብሔር፡ ወኰነንከ፡ ሰብአ፡ ኰንን፡ በፍትሕ፡ ወርትዕ፡ ዘከመ፡ ነበበ፡ ሕግነ። ወተቃተል፡ በሰይፍ፡ ዘኀጺን፡ ከሓዲያነ፡ ወዕልዋነ፡ እለ፡ ኢይአምኑ፡ በክርስቶስ፡ ወምላኅ፡ ሰይፈከ፡ በላዕለ፡ ሀይማኖት፡ ፍጽምት። ወኢታድሉ፡ ለገጽ፡ ወኢትንሣእ፡ ሕሊያነ፡ በፍትሕ፡ ወይኩን፡ ባዕል፡ ወነዳይ፡ በኀቤከ፡ ከመ፡ አሐዱ

መሐሮ፡ ለእጓለ፡ ማውታ፡ ወሱቃ፡ ለመበለት፡ ወዕቀብ፡ ደናግለ፡ ወአጽንዖን፡ ወኢትግበር፡ ለሰይጣን፡ ፍኖተ፡ ላዕሌከ፡ ወግፋዕ፡ ሥልጣኖ፡ ርጉመ፡ በጾም፡ ወበጸሎት፡ ወትጋሀ፡ ሌሊት። ወምጽዋትሰ፡ ይኩን፡ ትእምርትከ፡ ወቤትከ፡ ወማኅደርከ፡ ወዕቀብ፡ ደቂቀ፡ ጥምቀት፡ ወሀይማኖተ

ወኢትትወከፍ፡ ሀይማኖተ፡ ብእሲ፡ ዘኢተጠምቀ

ወለእመ፡ ርኢከ፡ ካህነ፡ ነዳየ፡ ርድኦ፡ እምተመጽውቶ፡ ወኢትኅድጎ፡ ይጸነስ፡ ኀበ፡ አብዳን፡ ሕዝብ፡ ወከማሁ፡ ግበር፡ ለኵሉ፡ ላእካነ፡ እግዚአብሔር፡ ወለእመ፡ ብከ፡ በረከተ፡ ሀብ፡ ለውሉደ፡ ጥምቀት

ወአጽህቅ፡ ነፍስከ፡ ለሕንጸተ፡ አብያተ፡ ክርስቲያን፡ ወአድባራት፡ ወምኔታት፡ እንተ፡ ይእቲ፡ ማኅደር፡ ለግፉዓነ፡ ዓለም፡ ወለነዳያን። ሕንጽ፡ አብያተ፡ እግዚአብሔር፡ በመኃትው፡ ብሩሃት፡ ከመ፡ ሠምዕ፡ ወልኵንት። ወዘገብረ፡ ዘንተ፡ እግዚአብሔር፡ ያጸድቅ፡ ሎቱ፡ ምግባሮ፡ ወደኃሪቶ

ጹም፡ ረቡዐ፡ ወዐርበ፡ ኵሎ፡ መዋዕለ፡ ሕይወትከ

ወዕለተ፡ እሑድሰ፡ ይኩን፡ በዓለ፡ ኢይግበሩ፡ ቦቱ፡ ግብረ፡ ዘእንበለ፡ አንብቦ፡ መጻሕፍተ፡ ለመለኮት። ወዘዐለወ፡ ዘንተ፡ ውጉዝ፡ ውእቱ፡ ወርጉም፡ እምሠለስቱ፡ አስማተ፡ እግዚአብሔር፡ ዝውእቱ፡ አብ፡ ወወልድ፡ ወመንፈስ፡ ቅዱስ

ኢትስድዶ፡ ለነዳይ፡ እምአንቀጸ፡ ማኅደርከ፡ ወኢትትሀየዮ፡ ወኢትመንኖ፡ ወኢታስተሐቅሮ፡ አላ፡ ይኩን፡ ዕበየ፡ ኅሊናከ፡ ከመ፡ ትናዝዞ፡ ወታስተፈሥሖ፡ ከመ፡ ያስተፈሥሕከ፡ እግዚአብሔር፡ ወአንብሮ፡ ዲበ፡ ማእድከ፡ ምስሌከ፡ ወበጽዋዕ፡ ዘትሰቲ፡ አስቲዮ፡ ወኢትዜኀር፡ ላዕሌሁ፡ እስመ፡ ናቡክድናጾር፡ ንጉሥ፡ ተዘኀረ፡ ወተሀጕለ፡ ወረከቦ፡ መዐተ፡ እግዚአብሔር

ወኢትትዐበይ፡ በቅድመ፡ ንጉሥ፡ ወኢትግበር፡ ለአርአያ፡ በቤቱ፡ ወኢታመክኒ፡ ላዕሌሁ፡ በሠናይ፡ ምግባርከ፡ አላ፡ ሶበ፡ ትገብር፡ ኵሎ፡ ምግባረ፡ ሠናይ፡ ወትፌጽም፡ ኵሎ፡ ትእዛዘ፡ በል፡ አነ፡ ገብር፡ ጽሩዕ፡ በከመ፡ ይቤ፡ እግዚእነ፡ በመጽሐፈ፡ ሕይወት፡ እስመ፡ ኢትድኅን፡ በብዝኀ፡ ምግባርከ፡ እኩይ

ወኢታስተጋብእ፡ ወርቀ፡ ወብሩረ፡ ዘእንበለ፡ ዘታስተዋፅእ፡ ለበቍዔተ፡ መሀይምናን

አብዝኅ፡ ሰላመ፡ ለውሉደ፡ መሀይምናን፡ ወግነይ፡ ለካህን፡ ራትዕ፡ ዘያአምሮ፡ ለእግዚአብሔር፡ ወይገብር፡ በሕጉ፡ ወተዐቀብ፡ አስሕቶ፡ ሰይጣን፡ እስመ፡ አስሐቶ፡ ለሢሞን፡ መሠርይ፡ እምድኅረ፡ ኮነ፡ ረድኦ፡ ለእኁየ፡ ፊሊጶስ፡ ወእምድኅረ፡ አስተርአየ፡ በእዴሁ፡ ብዙኀ፡ ተኣምረ፡ ዘመለኮት፡ ወኮነ፡ ምክንያተ፡ ስሕተቱ፡ እስመ፡ ኀሠሠ፡ እምኔየ፡ ሢመተ፡ ክህነት፡ ወሀብተ፡ መንፈስ፡ ቅዱስ፡ በሕልያን፡ ወነገረኒ፡ እግዚእነ፡ ከመ፡ ጽልሕው፡ ወጕሕላዊ፡ ውእቱ፡ ወሰደድክዎ፡ እምኔየ፡ ወኮነ፡ ውእቱ፡ መርሐ፡ ለተሀጕሎቱ

ወልድየ፡ አክብሮሙ፡ ለአእሩግ፡ ወአዕቢዮሙ፡ ወስምዖሙ፡ ነገሮሙ፡ ወኢትሳለቅ፡ ሰብአ፡ በእንተ፡ ኀጢአቱ፡ አላ፡ ገሥጾ፡ ወንግሮ፡ ወሚጦ፡ በየውሀት፡ ኀበ፡ ፈሪሀ፡ እግዚአብሔር

አዝዞሙ፡ ለነገሥት፡ በርትዕ፡ ወተዛለፎሙ፡ በእንተ፡ እከየ፡ ምግባሮሙ። ኢታስትት፡ ቅድሳተ፡ እግዚአብሔር፡ በኵሉ፡ ዕለት፡ እስመ፡ ቀሪበ፡ ቍርባን፡ ይከልእ፡ መንሱተ

ተዘከሮሙ፡ ለምውታን፡ አመ፡ ሣልስት፡ ዕለት፡ ወበሳብዕት፡ ወበዐሠርቱ፡ ወክልኤቱ፡ ወበሠለሳ፡ ወበአርብዓ፡ ወበስሳ። ወአእምር፡ ወልድየ፡ ከመ፡ በአርብዓ፡ ዕለት፡ አመ፡ ዕረፍቱ፡ ለዘ፡ ሞተ፡ ትቀውም፡ ነፍሱ፡ ለዘተጠምቀ፡ ኃጥእ፡ ቅድመ፡ ክርስቶስ፡ ወይትፈደይ፡ በከመ፡ ምግባሩ፡ ወይጌሥጽዎ፡ በመጠኔ፡ ገብረ

ወቅብኦ፡ በቅብአ፡ ትፍሥሕት፡ ለዘይፈቅድ፡ ጥምቀተ፡ እምቅድመ፡ ታጥምቆ፡ በማይ፡ ወእምድኅረ፡ ጥምቀት፡ ኅትሞ፡ በቅብአ፡ መለኮት፡ ዘወሀብኩከ፡ ዝውእቱ፡ ቅብአ፡ ሜሮን፡ ዘቦቱ፡ ተፍጻሜተ፡ ኵሉ፡ ወይቁሙ፡ መሀይምናን፡ በእገሪሆሙ፡ ለሰሚዐ፡ መጻሕፍት፡ ቅዱሳት፡ ዘመለኮት

ኢትንሣእ፡ ቅድሳተ፡ ዘእንበለ፡ ነጺሐከ፡ ወጸዊመከ

ወጸሊ፡ በጽባሕ፡ ወበጊዜ፡ ሠለስቱ፡ ሰዐት፡ እመዐልት፡ ወበምሴት፡ እስመ፡ እሉ፡ ሠለስቱ፡ ጸሎት፡ መፍትው፡ ላዕለ፡ ኵሉ፡ ካህናት፡ ወሕዝባዊያንሰ፡ ይጸልዩ፡ ነግሀ፡ ወሰርከ

ወእለሰ፡ ያስተረክቡ፡ ወይኀሥሡ፡ አፈድፍዶ፡ ጸጋ፡ ዘመለኮት፡ ይጸልዩ፡ በከመ፡ ሠራዕነ፡ በመጽሐፈ፡ ሥርዐት፡ እስመ፡ አምላኪየ፡ ክርስቶስ፡ መሀረኒ፡ ወአነ፡ እነግረከ፡ ኦወልድየ፡ ቀሌምንጦስ፡ እስመ፡ ጸሎት፡ ይደልዎሙ፡ በቀዳሚ፡ ሰዐተ፡ መዐልት፡ ወበሠለስቱ፡ ሰዐት፡ ወበስድስቱ፡ ሰዐት፡ ወበትስዐቱ፡ ሰዐት፡ ወበምሴት፡ ወበጊዜ፡ ንዋም፡ ወበጊዜ፡ መንፈቀ፡ ሌሊት

ወአነ፡ ጴጥሮስ፡ እኤዝዞሙ፡ ለመሀይምናን፡ ያዕርፉ፡ እምግብሮሙ፡ ወተግባሮሙ፡ በመዋዕለ፡ በዓላተ፡ ሰማዕት

ወእጌሥጾሙ፡ እምስካር፡ እኩይ፡ ወነቢረ፡ ምስለ፡ ተውኔት፡ ወምስለ፡ ማዕሌት፡ በፍኖት፡ ወኢይብልዑ፡ ዘሐረደ፡ ዘኢተጠምቀ፡ እስመ፡ እግዚአብሔር፡ ሰዐረ፡ መሥዋዕቶሙ፡ ለአይሁድ፡ ወባዕዳን፡ አሕዛብ

ወንኤዝዝ፡ ኢይብልዑ፡ ናእተ፡ አይሁድ፡ ወኢምንተኒ፡ እመሥዋዕቶሙ፡ ወኢያስተዋስብዎሙ፡ ወኢያውስቡ፡ እምኔሆሙ። ወዘአምነ፡ እምኔሆሙ፡ ወተጠምቀ፡ ይቁም፡ ኀበ፡ አንቀጸ፡ ቤተ፡ ክርስቲያን፡ አርብዓ፡ ዕለተ፡ ወኢይብላዕ፡ ዘእንበለ፡ ኅብስተ፡ ይቡስ፡ ባሕቱ

ወለእመ፡ ገብረ፡ ዘንተ፡ ይቅረብ፡ ኀበ፡ መቅደሰ፡ እግዚአብሔር፡ እምድኅረ፡ አመከሩ፡ ሀይማኖቶ፡ ወይስቈሩ፡ እዝኖ። ወያብልዕዎ፡ መሥዋዕተ፡ መሀይምናን፡ ወፈድፋደሰ፡ ሥጋ፡ እንስሳ፡ ቅዱስ፡ ዘአስተርአየኒ፡ በልብስ፡ ብሩህ፡ ዘወረደ፡ ላዕሌየ፡ በሀገረ፡ ኢዮጴ፡ እስመ፡ ቅዱስ፡ ውእቱ፡ እማእከለ፡ ኵሉ፡ እንስሳ

ወሶበ፡ ትፈቅድ፡ ኦመሀይምን፡ ትኑም፡ ተዐተብ፡ ገጸከ፡ ወኵሎ፡ ሥጋከ፡ ወለእመ፡ ፈቀድከ፡ ትሖር፡ ፍኖተ፡ ተባረክ፡ እምአዕፅምተ፡ ሰማዕት፡ እምቅድመ፡ ትሖር

ኦካህን፡ ኢታቅርብ፡ ላዕለ፡ ምሥዋዕ፡ ሥብሐ፡ ወሥጋ፡ ወኢታዕርግ፡ ዲበ፡ ምሥዋዕ፡ ዘእንበለ፡ ኅብስተ፡ ስንዳሌ፡ ንጹሐ፡ ዘይቤ፡ ሥጋየ፡ ውእቱ፡ እስመ፡ እግዚአብሔር፡ ሰመዮ፡ ኅብስተ፡ ሰማያዌ፡ ወኢእምአምያስ፡ ዘእንበለ፡ ማየ፡ አስካል፡ እስመ፡ እግዚአብሔር፡ ሰመዮ፡ ማየ፡ ሕይወት፡ ወሠዊተ፡ እምሰብል፡ ስርናይ፡ አመ፡ ይበጽሕ፡ ወባዕድሰ፡ ኢብዉሕ፡ ለክሙ፡ ታብኡ፡ ቍርባነ። ወኢያቅርብ፡ ካህን፡ ወይነ፡ ዲበ፡ ምሥዋዕ፡ ዘእንበለ፡ ይቶስሕ፡ በማይ፡ እስመ፡ እግዚእነ፡ ክርስቶስ፡ ይቤ፡ አነ፡ ውእቱ፡ ማየ፡ ሕይወት

በእንተ፡ አክብሮ፡ በዓላት። ግበሩ፡ በዓለ፡ በመዋዕለ፡ ሕማማቲሁ፡ ለክርስቶስ፡ ወሐዘኑ፡ ወስቅለቱ፡ ወደምሩ፡ በይእቲ፡ መዋዕል፡ ሐዘነ፡ ወፍሥሓ፡ ኅቡረ። ሐዘንሰ፡ ይከውን፡ በእንተ፡ ትዕግሥቱ፡ በምንዳቤ፡ ወፍሥሓሰ፡ እስመ፡ መድኀኒትክሙ፡ በሕማመ፡ ክርስቶስ

ወበዓለ፡ ፋሲካሰ፡ ይዐቢ፡ ወይከብር፡ እምኵሉ፡ በዓላት፡ ወኢይኩን፡ ቦቱ፡ ሐዘን፡ ዘእንበለ፡ ፍሥሓ

ወተዘከሩ፡ ምውታኒክሙ፡ በቅዳሴ፡ በኵሉ፡ ጊዜ፡ እስመ፡ ይበቍዖሙ፡ ፈድፋደ፡ ወያቀርቦሙ፡ ኀበ፡ እግዚእነ፡ ክርስቶሰ

ወግበሩ፡ በዓለ፡ ፋሲካ፡ በተፍጻሜቱ፡ በዕለተ፡ እሑድ፡ ዘይከውን፡ እምድኅረ፡ ፍሥሕ፡ ወውእቱ፡ ዕለት፡ ትንሣኤሁ፡ ለእግዚእነ፡ ክርስቶስ፡ እመቃብር

ወግበሩ፡ በዓለ፡ እምትንሣኤሁ፡ በሰሙን፡ መዋዕል፡ ዘውእቱ፡ እሑድ፡ ሐዲስ፡ እስመ፡ ቦቱ፡ ቦአ፡ ኀቤነ፡ ማኅበረ፡ ዐሠርቱ፡ ወክልኤቱ፡ እምድኅረ፡ ትንሣኤሁ፡ እምውታን፡ እንዘ፡ ጉቡኣን፡ ንሕነ፡ በጽርሕ፡ በጽዮን፡ እንዘ፡ ዕጽው፡ ኆኅት፡ እስመ፡ በይእቲ፡ ዕለት፡ ረከቦ፡ ቶማስ፡ ይግስስ፡ በእዴሁ፡ መካነ፡ ኵናት፡ እምገቦሁ፡ ለእግዚእነ፡ ክርስቶስ፡ ወመካነ፡ ቅንዋት፡ እስከ፡ ውዕየ፡ አጽናፈ፡ አጻብዒሁ፡ ወሐደሶን፡ አምላክነ፡ ወአሕየዎን፡ ወይቤሎ፡ ኢትናፍቅ፡ ቶማስ፡ ወኩን፡ መሀይምነ

ወግበሩ፡ በዓለ፡ ዕርገቱ፡ ውስተ፡ ሰማይ፡ ወበዓለ፡ ርደተ፡ መንፈስ፡ ቅዱስ፡ ላዕሌነ፡ ሐዋርያት፡ እስመ፡ ወረደ፡ ላዕለ፡ አፉነ፡ እምሰማይ፡ ከመ፡ ልሳናተ፡ እሳት፡ ወመሀረነ፡ ነገረ፡ ዘኢናአምር፡ ወኢሰማዕነ፡ ቅድመ፡ አሚሃ፡ ወኢያእመርነ፡ ወውእቱ፡ እምድኅረ፡ ዕርገቱ፡ ለክርስቶስ፡ ውስተ፡ ሰማይ፡ ዘኢአተተ፡ እምኔሃ፡ በሰረገላ፡ ብርሃን፡ እምደብረ፡ ዘይት፡ ዘውእቱ፡ እምድኅረ፡ ትንሣኤሁ፡ በአርብዓ፡ ዕለት

ወግበሩ፡ በዓለ፡ አመ፡ ዜነዋ፡ እስመ፡ አሕዛብ፡ ገብርዎ፡ በዓለ፡ ቅድሜክሙ፡ ለአማልክቲሆሙ፡ ወረስይዎ፡ አንትሙ፡ ለእመ፡ ብርሃን፡ በከመ፡ አዘዘ፡ ብእሴ፡ እግዚአብሔር፡ ጳውሎስ፡ ኅሩይ

ወግበሩ፡ ኵሎ፡ በዓላተ፡ ዘአዘዝናክሙ፡ በመጽሐፈ፡ ሥርዐት

ወአእምር፡ ወልድየ፡ ከመ፡ ዕጣን፡ በስኂን፡ እስመ፡ ስኂን፡ ዐቢይ፡ ዕጣን፡ ዘይዐጥኑ፡ በቅድመ፡ እግዚአብሔር፡ እስመ፡ እግዚእትነ፡ እመ፡ ብርሃን፡ ነገረተኒ፡ ወወሀበተኒ፡ እምኔሁ፡ ወውእቱ፡ ዘአምጽኡ፡ ሰብአ፡ ሰገል፡ አምኃ። ወከርቤሰ፡ ይኩን፡ ለግንዘተ፡ ሥጋሆሙ፡ ለካህናት፡ ከመ፡ ኢይማስን፡ ወኢይድፍንዎሙ፡ ውስተ፡ ምድር፡ አላ፡ በንፍቀ፡ መልዕልተ፡ ምድር

ወልድየ፡ ዕቀብ፡ ትእዛዝየ፡ በከመ፡ ዐቀበ፡ ኢያሱ፡ ወልደ፡ ነዌ፡ ትእዛዘ፡ እኁየ፡ ሙሴ

በእንተ፡ ቅዳሴ፡ ታቦት። ወቀድስ፡ ኵሎ፡ ታቦተ፡ ሕግ፡ ወኅትሞ፡ በማኅተመ፡ እግዚአብሔር፡ ዘውእቱ፡ ሜሮን፡ ቅብአ፡ ትፍሥሕት፡ ወይኩኑ፡ ምስሌከ፡ በጊዜ፡ ትቄድሶ፡ ሰብዐቱ፡ ቀሳውስት፡ እስመ፡ እሙንቱ፡ መትልው፡ ድኅሬነ። ወኅትም፡ ታቦታተ፡ ወመሥዋዓተ፡ በማኅተመ፡ እግዚአብሔር፡ ከመ፡ ይርከብ፡ በዘ፡ ይቄድሱ፡ ላዕሌሁ፡ ምክሐ፡ እግዚአብሔር። ወኅትም፡ በዝንቱ፡ ቅብአ፡ ቅዱስ፡ ኵሎ፡ ዘይጠመቅ፡ ወይርከቡ፡ ቦቱ፡ ክህነተ፡ ወመንግሥተ፡ ወይብዛኅ፡ ትንቢት፡ በቅብአ፡ ሜሮን፡ ወበክብሩ

ወእመቦ፡ ብእሲ፡ ዘኀተመ፡ ነፍሶ፡ በዝንቱ፡ ቅብአ፡ ቅዱስ፡ ዘአነ፡ ጴጥሮስ፡ ንኡሰ፡ ሐዋርያት፡ እሁበክዮ፡ ዘእንበለ፡ ይኅትሞ፡ ካህን፡ ዘብዉሕ፡ ሎቱ፡ ይእኀዞ፡ አባሕኩ፡ ይቅትልዎ።

ወለእመ፡ ብእሲ፡ ሰትየ፡ እምኔሁ፡ በእንተ፡ ፈውሶ፡ ይሰደድ፡ ኀበ፡ ኢይገብእ፡ ወዘደፈረ፡ ጸዊሮቶ፡ እምሕዝብ፡ ዘእንበለ፡ አእምሮ፡ ይሰደድ፡ እምቤተ፡ ክርስቲያኑ፡ ለእግዚአብሔር፡ ሰብዐተ፡ ዐመተ።

ወለእመ፡ ጾረ፡ በአእምሮ፡ ይዝብጥዎ፡ ምእተ፡ ወኃምሳ፡ ወሠለስተ፡ ጥብጣቤ፡ ወይቁም፡ አፍአ፡ ቤተ፡ ክርስቲያን፡ ዐሠርተ፡ ዐመተ።

ወእመቦ፡ ቀሲስ፡ ዘቀብአ፡ በዝንቱ፡ ቅብእ፡ ዘኢተጠምቀ፡ ይስዐር፡ እምሢመቱ።

ወእመቦ፡ ካህን፡ ዘወሰደ፡ ዘንተ፡ ቅብአ፡ ኀበ፡ ዘኢካህን፡ ይስዐር፡ እምሢመቱ።

ወእመቦ፡ ካህን፡ ዘጾረ፡ ዘንተ፡ ቅብአ፡ ያንብብ፡ መዝሙረ፡ ዳዊት፡ ነቢይ፡ ዘተነበየ፡ ላዕለ፡ ዝንቱ፡ ቅብእ፡ እስከ፡ ያነብሮ፡ እምእዴሁ።

ወእመቦ፡ ብእሲ፡ ዘመሠጠ፡ ክህነተ፡ ዘእንበለ፡ ይንሣእ፡ እምሊቀ፡ ካህናት፡ ይሰደድ፡ እምቤተ፡ ክርስቲያኑ፡ ለእግዚአብሔር

በእንተ፡ ሥርዐተ፡ ምሥዋዕ። ወይቀድሱ፡ ቍርባነ፡ ዲበ፡ ምሥዋዕ፡ ዘኅቱም፡ በሜሮን፡ በቀዳሚ፡ ጊዜ፡ ኀበ፡ ተጋብኡ፡ ሊቃነ፡ ካህናት፡ ወቀሳውስት፡ ኅቡረ፡ ወኵሉ፡ ዲያቆናት፡ ከመ፡ ይኩን፡ ክብረ፡ ወፍሥሓ። ወከማሁ፡ በሰናብት፡ ወበበዓላት፡ ወያንብቡ፡ ዲበ፡ ምሥዋዕ፡ ወንጌለ፡ ዮሐንስ፡ እስመ፡ ውእቱ፡ ነባቢ፡ ዘመለኮት።

ወይኩን፡ ውስተ፡ ኵሉ፡ ቤተ፡ መቅደስ፡ ክልኤቱ፡ ምሥዋዕ፡ አሐደ፡ ዘይጸውርዎ፡ እመካን፡ ውስተ፡ መካን፡ ከመ፡ እብነ፡ ደቂቀ፡ እስራኤል፡ ዘኮነ፡ በገዳም፡ ይጸውርዎ፡ እመካን፡ ውስተ፡ መካን፡ ወካልኦ፡ ዘኢይጸውርዎ፡ እመካኑ።

ወለእመ፡ ተሰብረ፡ ምሥዋዕ፡ ዘኢይጸውርዎ፡ አው፡ አንቀልቀሎ፡ ሰብእ፡ እመካኑ፡ ዘተቀደሰ፡ አእምር፡ ከመ፡ አተተ፡ ቅድስናሁ፡ እምኔሁ፡ በከመ፡ አተተ፡ ቅድስና፡ ደቂቀ፡ እስራኤል፡ እምውሉዱ፡ ወይደሉ፡ ይቀድስዎ፡ ዳግመ

ወለእመ፡ ብእሲ፡ እምሀይምናን፡ ወድቀ፡ ላዕሌሁ፡ ፂዋዌ፡ አው፡ ቦአ፡ ወተደመረ፡ ምስለ፡ አሕዛብ፡ ወበልዐ፡ መብልዖሙ፡ ወቀርቦሙ፡ ወቀርብዎ፡ ወረኵሰ፡ ቦሙ፡ ወገብአ፡ ውስተ፡ ብሔሩ፡ እምፂዋዌሁ፡ ይደሉ፡ ያጥምቅዎ፡ ዳግመ

ወእመቦ፡ ሕዝባዊ፡ ዘቦአ፡ ምሥዋዐ፡ እግዚአብሔር፡ ቅዱስ፡ በጊዜ፡ ይቄድሱ፡ ኀሢሦ፡ ክብረ፡ እምቢጹ፡ ያውግዝዎ፡ ወይቁም፡ አፍአ፡ ቤተ፡ ክርስቲያን፡ ሰብዐተ፡ ዐመተ፡ ወያርኢ፡ ለሰብእ፡ ንስሓሁ

ወእመቦ፡ ሕዝባዊ፡ ዘጸዐለ፡ ካህነ፡ አው፡ ረገሞ፡ ይሰደድ፡ እምአህጉረ፡ እግዚአብሔር፡ ወአብያተ፡ ክርስቲያኑ፡ ኀበ፡ ምድረ፡ ዕልዋን። ወለእመ፡ ተማሕፀነ፡ በምሥዋዐ፡ እግዚአብሔር፡ ወአኀዘ፡ አልባሰ፡ የአዝዞ፡ ካህን፡ ጾመ፡ ዐሠርቱ፡ ወክልኤቱ፡ ዐመት፡ ወይግበር፡ ላዕሌሁ፡ ካህን፡ ቅብአተ፡ ስርየተ፡ ኀጢአት

ወእመቦ፡ ብእሲ፡ ወብእሲት፡ እምሀይምናን፡ ዘበልዐ፡ እምዘ፡ ያቄርቡ፡ ይሰደድ፡ እምቤተ፡ ክርስቲያነ፡ እግዚአብሔር፡ እስከ፡ ሞቱ፡ ለእመ፡ ገብረ፡ በአቅልሎ። ወለእመ፡ ገብረ፡ ዘእንበለ፡ አእምሮ፡ ይጹም፡ ዐሠርተ፡ ወክልኤተ፡ ዐመተ፡ ፍጹመ፡ ወይሀቡ፡ ለቤተ፡ ክርስቲያን፡ ክልኤ፡ እደ፡ ንዋዩ፡ እንዘ፡ ኢይኤዝዝ፡ አላ፡ ያጌብርዎ

ወእመቦ፡ ብእሲ፡ እምሀይምናን፡ ዘቦአ፡ ውስተ፡ መንጦላዕተ፡ ምሥዋዕ፡ ወሰፍሐ፡ እዴሁ፡ ላዕለ፡ ካህን፡ ወዘበጦ፡ ይምትሩ፡ እዴሁ፡ በድፍረቱ፡ ላዕለ፡ ክህነተ፡ እግዚአብሔር

ወእመቦ፡ ብእሲ፡ እምሀይምናን፡ ዘበዝኀ፡ ኀጢአቱ፡ ወፈቀደ፡ ይትከላእ፡ እምኔሁ፡ ይክሥታ፡ ለካህናት፡ ወለማእምራነ፡ መጻሕፍተ፡ እግዚአብሔር

ወኢይትለአክ፡ ለምሥዋዐ፡ እግዚአብሔር፡ ዘለምጽ፡ አኮ፡ ርኩሰ፡ ከዊኖ፡ እስመ፡ አልቦ፡ ርኩሰ፡ እምድኅረ፡ ነሥአ፡ ጥምቀተ፡ አላ፡ ከመ፡ ኢይምራዕ፡ ክህነተ፡ እግዚአብሔር፡ ወከማሁ፡ ነገሩ፡ ለዝልጉስ፡ እስመ፡ ኢያጠአጥእ፡ መልእክተ፡ ቤተ፡ እግዚአብሔር

በእንተ፡ አልባሰ፡ ክህነት። ወይኩን፡ አልባሰ፡ ክህነት፡ ካልእ፡ እምአልባሰ፡ ሕዝባዊያን። ወይደሉ፡ ይኩን፡ መልበሱ፡ ርሒበ፡ ዘእንበለ፡ ኅባኔ፡ ወሞጣሕቱ፡ ስፉሐ፡ እንተ፡ ታሕቱ። ወይኩን፡ መልበሱ፡ ከማሁ፡ ወእንተ፡ ላዕሉ፡ ክቡበ፡ እስመ፡ ዝንቱ፡ አርአያ፡ ለማእሰረ፡ እገሪሁ፡ ለእግዚእነ፡ ክርስቶስ፡ ወይክሥት፡ እደዊሁ፡ በሐብል።

ወይልበስ፡ ካህን፡ ሰበነ፡ ከመ፡ ማዕተብ፡ ዲበ፡ መትከፍቱ፡ እስመ፡ ውእቱ፡ አርአያ፡ ለሐብል፡ ዘወደዩ፡ ውስተ፡ ክሳዱ፡ ለእግዚእነ፡ ክርስቶስ፡ ወሰሐብዎ፡ ኀበ፡ ዐውደ፡ ጲላጦስ። ወይኩን፡ ቅናቱ፡ ዘአዲም፡ ስፉሐ

ወያንብብ፡ ካህን፡ መዐልተ፡ መዝሙረ፡ ዳዊት፡ ወበሌሊት፡ ስብሐተ፡ ነቢያት፡ እስመ፡ ይከውኑ፡ በዝንቱ፡ ቅኑታነ፡ ክልኤ፡ ሰይፍ

እብለከ፡ ወልድየ፡ ቀሌምንጦስ፡ ወለእለ፡ ከማከ፡ በመዓርግ፡ ከመ፡ ትፍታሕ፡ ማእከለ፡ መሀይምናን፡ ወተአዝዞሙ፡ በዘይደሉ፡ በዘ፡ አርአየከ፡ መንፈስ፡ ቅዱስ፡ ዘይፈጽም፡ ንትገተ። ወዘዐለወ፡ ወአስተተ፡ ኮነ፡ ርጉመ፡ እስከ፡ ዕለተ፡ ደይን፡ ዘይቀውም፡ ቅድመ፡ ክርስቶስ

ወአእምር፡ ወልድየ፡ ከመ፡ ኵሉ፡ ዘአዘዝኩከ፡ በትእዛዘ፡ እግዚአብሔር፡ አዘዝኩከ

ወበእዴሁ፡ ጸሐፈ፡ ሊተ፡ ዘንተ፡ ትእዛዘ፡ ወወሀበኒዮ፡ በደብረ፡ ዘይት፡ በዕለተ፡ ዕርገቱ፡ ውስተ፡ ስብሐቱ፡ አሜን።