Apostolic Canons after Ascension

ዝንቱ፡ መጽሐፍ፡ ዜናሆሙ፡ ለሐዋርያት፡ እምድኅረ፡ ዐርገ፡ እግዚእነ፡ ወአምላክነ፡ ክርስቶስ፡ ዘአዘዙ፡ ሴኖዶስ፡ ዘጸሐፈ፡ ቀሌምንጦስ፡ በእንተ፡ ሐዋርያት፡ ዘከመ፡ ሠርዑ፡ ለቤተ፡ ክርስቲያን፡ ቅድስት፡ እንተ፡ ተሣየጣ፡ በደሙ፡ ክቡር።

ወወሀቡ፡ ለዘ፡ ተለዎሙ፡ ወቦአ፡ ውስተ፡ ጽዋዔሆሙ፡ ወአምነ፡ በእግዚአብሔር፡ በእደዊሆሙ፡ እምኵሉ፡ አሕዛብ፡ ወአይሁድኒ። ወአዘዙ፡ መትልዎሙ፡ እምድኅሬሆሙ፡ ኤጲስ፡ ቆጶሳት፡ እምቅድመ፡ ጉባኤ፡ ዘኒቂያ፡ ዘሠርዑ፡ ሕገ፡ እግዚአብሔር፡ ወሞእዎሙ፡ ለዕልዋን፡ እለ፡ ይትቃረንዋ፡ ለጽድቅ፡ ወወሀቡ፡ ትእዛዘ፡ እምወንጌል፡ ወእምባዕዳን፡ መጻሕፍተ፡ እግዚአብሔር። ወአርአየ፡ እግዚአብሔር፡ ጽድቀ፡ በኵሉ፡ መዋዕል፡ በመዊእ፡ ወበቃል፡ ገሃደ፡ ወአስተኃፈሮሙ፡ ለዕልዋን፡ በመርገም፡ ዘለዓለም

ወአርዳኢሁሰ፡ እምድኅረ፡ ተንሥአ፡ እምውታን፡ ሀለዉ፡ ዝርዋን፡ በምድረ፡ ገሊላ፡ ወሀገረ፡ ናዝሬት፡ ኀበ፡ አዘዞሙ። ወበአርብዓ፡ ዕለት፡ እምድኅረ፡ ትንሣኤሁ፡ ተጋብኡ፡ ኀበ፡ ደብረ፡ ዘይት፡ በኢየሩሳሌም፡ ወክርስቶስ፡ ምስሌሆሙ፡ እንዘ፡ ኢያአምርዎ፡ በማእከሌሆሙ። ወአስተርአዮሙ፡ በይእቲ፡ ዕለት፡ ወአንበረ፡ እዴሁ፡ ዲበ፡ ርእሶሙ፡ ለለ፡ አሐዱ፡ አሐዱ፡ እምኔሆሙ፡ ለዐሠርቱ፡ ወአሐዱ፡ አርዳኢሁ፡ ወባረኮሙ፡ ወረሰዮሙ፡ ካህናተ፡ ህየንተ፡ ካህናተ፡ ደቂቀ፡ እስራኤል፡ ምኑናን።

እስመ፡ ከመዝ፡ ይቤ፡ እግዚአብሔር፡ በአፈ፡ ሚኪያስ፡ ነቢይ፡ ዘይቤ፡ ኦደቂቀ፡ አሮን፡ ናሁ፡ መነንኩ፡ ክህነተ፡ ሌዊ፡ አቡክሙ፡ ወኢይዜክሩ፡ እንከ፡ ክህነቶ፡ ለአሮን፡ እስመ፡ ካህን፡ መልአከ፡ እግዚአብሔር፡ ወይቤ፡ በወንጌል፡ ናሁ፡ አነ፡ እፌኑ፡ መልአክየ፡ ቅድመ፡ ገጽከ፡ ዘይጸይሕ፡ ፍኖተከ።

ወእምዝ፡ ጾሮ፡ ደመና፡ ብሩህ፡ ወአልዐሎ፡ እማእከሎሙ፡ እንዘ፡ ይሬኢይዎ፡ እስከ፡ ተላዐለ፡ እስከ፡ ሰማይ፡ እንዘ፡ ያንቀዐድዉ፡ በአዕይንቲሆሙ። ወሰገዱ፡ ለእግዚአብሔር፡ እስመ፡ ርእይዎ፡ እንዘ፡ የዐርግ፡ ሰማየ፡ በከመ፡ ነገሮሙ፡ ወተፈሥሑ፡ ዐቢየ፡ ፍሥሓ፡ እስመ፡ አንበረ፡ እዴሁ፡ ዲቤሆሙ፡ ወሤሞሙ፡ ካህናተ

ወሶበ፡ ተሰወሮሙ፡ ገብኡ፡ ውስተ፡ ጽርሕ፡ ኀበ፡ በልዑ፡ ምስሌሁ፡ ፍሥሐ፡ ወነበሩ፡ ውስቴታ፡ እንዘ፡ ይጼልዩ፡ ወይጸውሙ፡ ዐሡረ፡ መዋዕለ፡ ወሐለዩ፡ ኀበ፡ የሐውሩ፡ ከመ፡ ይጸውዑ፡ ሰብአ፡ ውስተ፡ አሚን።

ወኢያአምሩ፡ ልሳናቲሆሙ፡ ወኢይሌብዉ፡ ቃሎሙ። ወይቤሎሙ፡ ጴጥሮስ፡ ዘውእቱ፡ ርእስ፡ በኀበ፡ ክርስቶስ፡ ላዕለ፡ ኵሎሙ፡ ሐዋርያት፡ ዘሰመዮ፡ ስምዖን፡ ጴጥሮስ፡ ኢኮነ፡ ዝንቱ፡ ግብር፡ ኀቤነ፡ አላ፡ እግዚእነ፡ ዘአሰፈወነ፡ ከመ፡ ይፈኑ፡ ለነ፡ ጰራቅሊጦስ፡ ዘውእቱ፡ መንፈስ፡ ቅዱስ፡ ወውእቱ፡ ያሌብወነ፡ ኵሎ፡ ዘይደልወነ፡ ናስምዕ፡ ወንግበር

ወእንዘ፡ ይነግሮሙ፡ ጴጥሮስ፡ ዘንተ፡ ወናሁ፡ ሰምዑ፡ ድምፀ፡ ከመ፡ ድምፀ፡ ነፋስ፡ ዐውሎ፡ ወአጼነዉ፡ ጼና፡ ጥዑመ፡ ዘኢያአምሩ፡ ከማሁ፡ በውስተ፡ ዓለም። ወአስተርአየ፡ ማእከሎሙ፡ ልሳናተ፡ እሳት፡ ዘይወርድ፡ ላዕለ፡ አሐዱ፡ አሐዱ፡ እምኔሆሙ።

ወአኀዙ፡ ይትናገሩ፡ በልሳን፡ ሐዲስ፡ ኀበ፡ የሐውሩ፡ ለጽዋዔ፡ ሰብእ፡ ውስተ፡ አሚን፡ ወለአለብዎቶሙ፡ ዘይደልዎሙ፡ ይግበሩ፡ ወከመ፡ ይምሀሩ፡ ለሰብእ፡ ጸሎተ፡ ወተቀንዮ፡ ወሕገ፡ ወሥርዐተ። ወአእኰትዎ፡ ለእግዚአብሔር፡ በእንተ፡ ዘአለበዎሙ፡ ወጾሙ፡ አርብዓ፡ ዕለተ፡ ለአኰቴተ፡ ዚአሁ። እምዝ፡ ተዘርዉ፡ ውስተ፡ ርሑቅ፡ በሓውርት፡ ከመ፡ ይጸውዑ፡ ሰብአ፡ ውስተ፡ አሚን፡ በከመ፡ አዘዞሙ፡ ክርስቶስ

ወኮነ፡ ሰባኬ፡ ወመጥምቀ፡ ወሠያሜ፡ ካህናት፡ ዘቀደመ፡ ክህነተ፡ ወዘአእመነ፡ ኵሎ፡ አይሁደ፡ ወሰብአ፡ እለ፡ ይነብሩ፡ ኢየሩሳሌም፡ ወበምድረ፡ ፍልስጤም፡ ወአድያሚሃ፡ ወኵሉ፡ አህጉር፡ ኀምስ፡ ወቂሳርያ፡ ወሳምር፡ ወምድረ፡ ዐረብ፡ ያዕቆብ፡ እኁሁ፡ ለእግዚእነ፡ ወውእቱ፡ ሥሉጥ፡ ላዕለ፡ ቤተ፡ ክርስቲያነ፡ ሐዋርያት፡ እንተ፡ ይእቲ፡ ጽዮን

ወማርቆስ፡ ወንጌላዊ፡ በእልስክንድርያ፡ ወግብጽ፡ ወኖባ፡ ወምድረ፡ ኢትዮጵያ፡ እስከ፡ ጽንፋ

ወህንዳኬ፡ ወስንድ፡ ወዘየዐውዳ፡ እስከ፡ ባሕረ፡ ኢርትራ፡ ቶማስ፡ ሐዋርያ

ወሶርያ፡ ወአንጾኪያ፡ ወገላቲያ፡ እስከ፡ ቀሬጤስ፡ ፎኖጥስ፡ ስምዖን፡ ኬፋ፡ ዘውእቱ፡ ጴጥሮስ።

ወእንዘ፡ ይትለአክ፡ በጽሐ፡ ኀቤሁ፡ ዜና፡ ሴሞን፡ መሠርይ፡ እንዘ፡ ሀሎ፡ በሀገረ፡ ሮሜ፡ ወአስሐቶሙ፡ ለሰብኣ፡ በሥራዩ፡ ወበዕልወቱ። ወሖረ፡ ኀቤሃ፡ ወአምኑ፡ ኵሎሙ፡ ሰብኣ፡ በእዴሁ፡ ወአጥመቆሙ፡ ለኵሎሙ፡ ወዓዲ፡ ሰብአ፡ አንጾኪያ፡ ወአስጰንያ፡ ወዘየዐውዶሙ፡ አህጉር፡ ወኵሎ፡ ሮሜ።

ወአጥፍኦ፡ እግዚአብሔር፡ ለሲሞን፡ መሠርይ፡ በስእለቱ፡ ወጸሎቱ፡ ለቅዱስ፡ ወአስተርአየ፡ ሀይማኖት፡ ውስተ፡ ኵላ፡ ይእቲ፡ ምድር፡ በቅድስናሁ፡ ወንጽሑ፡ ወትዕግሥቱ

ወዮሐንስ፡ ወንጌላዊ፡ በኤፌሶን፡ ወተስሎንቄ፡ ወአስያ፡ ወጢሮስ፡ ወአካይያ፡ ወኵሎ፡ ምድረ፡ ፊሪቅያ

እንድርያስ፡ እኁሁ፡ ለስምዖን፡ በኒቂያ፡ ወበኒቂድያ፡ ወኵሎ፡ ምድረ፡ ዲኑንያ፡ ወአድያሚሃ፡ እምወሰና

ሉቃስ፡ ጸሓፌ፡ ወንጌል፡ በዘንጢያ፡ ወበርቂያ፡ ወፍርቂያ፡ ወዘየዐውዳ፡ እስከ፡ አድያመ፡ ምዕራብ፡ እስከ፡ ባሕር፡ ዘየዐቢ

ወመርማሪ፡ ዘእምሰብዓ፡ አርድእት፡ በደሴት፡ ወፋርስ፡ ወምድረ፡ ባቢሎን፡ ወኵሎሙ፡ ጸለምት፡ ወዘየዐውዶሙ፡ ወምድረ፡ ቴማን፡ ወደሰያት፡ ወምድረ፡ ዐረብ፡ እለ፡ ይነብሩ፡ በሐይመታት፡ እስከ፡ ባሕረ፡ የም

ወአካይ፡ ረድኡ፡ ለመርማሪ፡ በምድረ፡ አድባር፡ ወአሕዋዝ፡ ወተርሴስ፡ እስከ፡ ምድረ፡ ስንድ፡ ወእስከ፡ ጎግ፡ ወማጎግ

ወባዕዳንሰ፡ ሐዋርያት፡ ተፈነዉ፡ ኀበ፡ አባግዕ፡ እለ፡ ተገድፉ፡ ወጸውዑ፡ ሰብአ፡ ውስተ፡ አሚን፡ ወአጥመቅዎሙ፡ በከመ፡ አዘዞሙ፡ እግዚእነ፡ ክርስቶስ፡ በስመ፡ አብ፡ ወወልድ፡ ወመንፈስ፡ ቅዱስ፡ እስከ፡ ተፈልጡ፡ እምዓለም፡ ወሖሩ፡ ውስተ፡ ዕረፍት፡ ወፍሥሓ፡ ዘለዓለም

ወእምቅድመ፡ ይትፈለጡ፡ ውስተ፡ አህጉር፡ ገብሩ፡ ሥርዐተ፡ ወቀኖና፡ ወአዘዝዎሙ፡ ለእለ፡ አምኑ፡ ወመሀርዎሙ፡ ኪያሃ፡ ወአጽንዕዎሙ፡ ባቲ፡ አመ፡ ሀለዉ፡ ጉቡኣን፡ በጽዮን። ወእምዝ፡ ተፈልጡ፡ ወመሀሩ፡ በኵልሄ፡ ለእለ፡ አምኑ፡ በእደዊሆሙ፡ እምኵሉ፡ በሓውርት፡ ኀበ፡ ሖሩ

[1] ፩፡ ትእዛዝ። ከመ፡ ይኩን፡ ጸሎቶሙ፡ መንገለ፡ ምሥራቅ፡ እስመ፡ ይቤ፡ እግዚእነ፡ ኢየሱስ፡ ክርስቶስ፡ ከመ፡ ይመጽእ፡ ለሊሁ፡ እግዚአብሔር፡ እምሰማይ፡ በደኃሪ፡ መዋዕል፡ ከመ፡ መብረቅ፡ ዘይወፅእ፡ እምሥራቅ፡ ወያስተሬኢ፡ እስከ፡ ምዕራብ፡ ወበእንተዝ፡ አእመርነ፡ ከመ፡ ምጽአቱ፡ ይከውን፡ እምሥራቅ

[2] ፪፡ ትእዛዝ። በእንተ፡ ሰንበተ፡ ክርስቲያን። ከመ፡ ይትጋብኡ፡ በበእሑድ፡ በሠለስቱ፡ ሰዐት፡ ለጸሎት፡ ወአንብቦ፡ መጻሕፍት፡ ዘትካት፡ ወዘሐዲስ፡ ወአቅርቦ፡ ቍርባን፡ እስመ፡ ባቲ፡ ዜናዋ፡ መልአክ፡ ለማርያም፡ ከመ፡ ትፀንስ፡ ክርስቶስሃ፡ ወባቲ፡ ተንሥአ፡ እምውታን፡ ወባቲ፡ ይወርድ፡ እምሰማይ፡ በዕለተ፡ ትንሣኤ፡ ምስለ፡ መላእክቲሁ፡ በዐቢይ፡ ስብሐት፡ ወይነብር፡ ምስለ፡ አርዳኢሁ፡ ቅዱሳን፡ ወይኴንን፡ ሕያዋነ፡ ወምውታነ

[3] ፫፡ ትእዛዝ። በእንተ፡ ዕለተ፡ ረቡዕ። ከመ፡ ይግበሩ፡ ጸሎተ፡ ተጋቢኦሙ፡ በዕለተ፡ ረቡዕ፡ እስመ፡ ባቲ፡ ነገሮሙ፡ ኢየሱስ፡ ከመ፡ ይነሥእዎ፡ ወይሰቅልዎ፡ ወይመውት፡ ወይትነሣእ፡ በሣልስት፡ ዕለት፡ ወሐዘኑ፡ ወተከዙ፡ በእንቲአሁ

[4] ፬፡ ትእዛዝ። በእንተ፡ ዐርብ። ከመ፡ ይግበሩ፡ ጸሎተ፡ በዕለተ፡ ዐርብ፡ በ፱፡ ሰዐት፡ እስመ፡ በጽሐ፡ ዘነገሮሙ፡ ክርስቶስ፡ በረቡዕ፡ በእንተ፡ ሕማሙ፡ ወስቅለቱ፡ በዕለተ፡ ዐርብ። ወተጠየቀ፡ ውእቱ፡ አመ፡ አድለቅለቀት፡ ምድር፡ ወጸልመ፡ ፀሐይ፡ በይእቲ፡ ዕለት

[5] ፭፡ ትእዛዝ። በእንተ፡ ሊቃውንት። ከመ፡ ይሢሙ፡ ሎሙ፡ መሀይምናን፡ ሊቃውንተ፡ ሊቃነ፡ ጳጳሳት፡ ወጳጳሳተ፡ ወኤጲስ፡ ቆጶሳተ፡ ከመ፡ ይኩኑ፡ በአርአያ፡ ሙሴ፡ ወአሮን፡ ሊቃነ፡ ካህናት፡ ወይአዝዙ፡ ለኵሉ፡ ሕዝብ

[6] ፮፡ ትእዛዝ። ከመ፡ ይሢሙ፡ ቀሳውስተ፡ ከመ፡ ይኩኑ፡ በአርአያ፡ ካህናተ፡ ደቂቀ፡ እስራኤል

[7] ፯፡ ትእዛዝ። ከመ፡ ይሢሙ፡ ዲያቆናተ፡ ወንፍቀ፡ ዲያቆናተ፡ ወአናጕንስጢሰ፡ ከመ፡ ይኩኑ፡ ለመልእክት፡ ከመ፡ ደቂቀ፡ ሌዊ፡ ወይጸውሩ፡ ንዋየ፡ ቍርባን፡ ወንዋየ፡ ቤተ፡ መቅደስ፡ ወንዋየ፡ መሥዋዕት

[8] ፰፡ ትእዛዝ። በእንተ፡ ልደት። ወይግበሩ፡ በዓለ፡ ልደቱ፡ ለእግዚእነ፡ በበዐመት፡ በዕለተ፡ ተወልደ፡ አመ፡ ፳ወ፱፡ ለወርኀ፡ ታኅሣሥ፡ እስመ፡ ውእቱ፡ ርእሰ፡ ኵሉ፡ በዓላት

[9] ፱፡ ትእዛዝ። በእንተ፡ ጥምቀት። ወይግበሩ፡ በዓለ፡ ጥምቀቱ፡ ለእግዚእነ፡ እስመ፡ ዕለተ፡ ቅዳሴ፡ ይእቲ፡ አመ፡ ተጠምቀ፡ እምዮሐንስ፡ መጥምቅ፡ ዘውእቱ፡ ፲ወ፩፡ ለጥር

[10] ፲፡ ትእዛዝ። በእንተ፡ ጾመ፡ ፋሲካ። ወይጹሙ፡ በበዐመት፡ ፵፡ ዕለተ፡ በከመ፡ ጾሙ፡ ሙሴ፡ ወኤልያስ፡ ወነቢያት፡ በቀዳሚ፡ ወአኀዘ፡ እግዚእነ፡ ኢየሱስ፡ ክርስቶስ፡ ከማሁ፡ በሥጋሁ፡ ወአዖቀ፡ ከመ፡ ይግበርዎ፡ እምቅድመ፡ ሕማማቲሁ፡ ወይዘከሩ፡ ሕማሞ፡ ለክርስቶስ፡ ወስቅለቶ፡ ወሞቶ፡ ወርደቶ፡ ውስተ፡ መቃብር። ወበዕለተ፡ ትንሣኤሁ፡ ይግበሩ፡ ፋሲካ፡ ወይግበሩ፡ በዓለ፡ በተፍጻሜተ፡ ጾም፡ ዘእንበለ፡ ሰናብት፡ ወእሑድ፡ ጸዊሞሙ፡ ፵፡ ዕለተ፡ ወዕለተ፡ ዐርብ፡ ወቀዳሚት፡ ሰንበት፡ ክልኤሆን፡ በዕለተ፡ ተሰቅለ፡ ወተቀብረ፡ ወዕለተ፡ እሑድ፡ ትንሣኤሁ፡ ወአልቦ፡ እምድኅረ፡ እሉ፡ መዋዕል፡ ጾመ፡ እስከ፡ ተፍጻሜተ፡ ፶፡ ዕለት

[11] ፲፩፡ ትእዛዝ። በእንተ፡ በዓለ፡ ፵። ወይግበሩ፡ በዓለ፡ ዕርገቱ፡ ለእግዚእነ፡ ውስተ፡ ሰማይ፡ እምድኅረ፡ ትንሣኤሁ፡ በ፵፡ ዕለት

[12] ፲፪፡ ትእዛዝ። በእንተ፡ አንብቦ፡ መጻሕፍት፡ ወያንብቡ፡ መጻሕፍተ፡ በዲበ፡ መንበር፡ ልዑል፡ በቤተ፡ ክርስቲያን፡ እምኦሪት፡ ወመጻሕፍተ፡ ኵሉ፡ ነቢያት፡ ወዘሐዋርያት፡ ዜናሆሙ። ወእምድኅሬሁ፡ ያንብቡ፡ እምወንጌል፡ እስመ፡ ውእቱ፡ ተፍጻሜተ፡ ኵሉ፡ መጻሕፍት፡ ወይስምዑ፡ ኵሉ፡ ሕዝብ፡ ቀዊሞሙ፡ በእገሪሆሙ፡ እስመ፡ ዜና፡ ሕይወት፡ ወመድኀኒት፡ ውእቱ፡ ወጸጋ፡ ለኵሉ፡ ሰብእ፡ ወይደሉ፡ ያዕቢይዎ፡ እምኵሉ፡ መጻሕፍት፡ ወይስአሉ፡ ሰብእ፡ ኀበ፡ እግዚአብሔር፡ እንዘ፡ ይትነበብ

[13] ፲፫፡ ትእዛዝ። በእንተ፡ ሥርዐተ፡ ሢመት። ወኢይሠየም፡ ላዕለ፡ ክርስቲያን፡ ወኢይአዝዞሙ፡ ዘኢያአምር፡ ሕገ፡ ወሥርዐተ፡ አላ፡ ዘይገብር፡ ባቲ፡ ወይከውን፡ ኄረ፡ በግዕዙ፡ ወተዐጋሲ፡ በትሕትና፡ ወሠናይ፡ በፍናዊሁ። ወእመሰ፡ ወለጠ፡ ዘንተ፡ ወኢገብረ፡ ኵሎ፡ ዘነገርነ፡ ይስዐር፡ እምሢመቱ፡ በኀይል፡ ወኢይትወከፍዎ፡ ቃሎ፡ ወትእዛዞ፡ እስመ፡ ኢኮነ፡ መእመነ፡ በሠሪዖቱ

[14] ፲፬፡ ትእዛዝ። ካዕበ፡ በእንተ፡ ሢመት። ወይክልእዎ፡ ሢመተ፡ ወመልእክተ፡ ቤተ፡ ክርስቲያን፡ ወኰንኖ፡ ማእከለ፡ ሰብእ፡ ለኵሉ፡ ዘይደፍር፡ መሐላ፡ ሐሰት፡ ወስምዐ፡ ሐሰት፡ ወተዐቅፎ፡ ላዕለ፡ ሰብእ፡ ወዘየሐሚዮሙ፡ በዘኢገብሩ

[15] ፲፭፡ ትእዛዝ። ወይእተት፡ እምሢመት፡ ኵሉ፡ ዘይትአመን፡ በሐሳበ፡ ከዋክብት፡ ወየአምን፡ በነገረ፡ ማርያን፡ ወሰብአ፡ ሥራይ፡ ወረአይተ፡ ኮከብ፡ ወሐሳበ፡ ልደት፡ ወይሴአሎሙ፡ በእንተ፡ ዘኢይደልዎ፡ ወይትወከፍ፡ ቃሎሙ፡ ወያሰትት፡ ትእዛዘ፡ እግዚአብሔር፡ ወሥርዐቶ፡ ወኵነኔሁ፡ ወይዔርዮሙ፡ ለክርስቲያን፡ ምስለ፡ እለ፡ ኢያአምርዎ፡ ለእግዚአብሔር፡ ለይደቅ፡ እምሢመተ፡ ክህነት፡ እስመ፡ ገብረ፡ ከመ፡ አይሁድ፡ መጠዓዊያን

[16] ፲፮፡ ትእዛዝ። ወለእመ፡ ሀለወ፡ ውስተ፡ መልእክተ፡ ቤተ፡ ክርስቲያን፡ ዘይናፍቅ፡ በመልእክቱ፡ ወኢይትአመን፡ ባቲ፡ ወኢይአምንዎ፡ ዲቤሃ፡ ይክልእዎ፡ እምሢመቱ፡ እስመ፡ ኢኮነ፡ መእመነ፡ ወኢሠናየ፡ በመልእክቱ፡ ወባሕቱ፡ ያአብድ፡ ሰብአ፡ ወርእሶሂ፡ እስመ፡ እግዚአብሔር፡ ኢይፈቅድ፡ ጽልሑተ

[17] ፲፯፡ ትእዛዝ። ወይስዐር፡ እምሢመቱ፡ ኵሉ፡ ቀሲስ፡ ወዲያቆን፡ ዘይትዐወቅ፡ በዝሙት፡ ወሥሥዕት፡ ወይኀሥሥ፡ በዝንቱ፡ ዓለም

[18] ፲፰፡ ትእዛዝ። ወኢይሀሉ፡ ውስተ፡ ሢመት፡ ወመልእክተ፡ ቤተ፡ ክርስቲያን፡ ወኢይደመር፡ ምስለ፡ ካህናት፡ ዘያፈቅሮሙ፡ ለአይሁድ፡ ወዘይከውን፡ ዐርኮሙ፡ ከመ፡ አስቆሮታዊ፡ ወኢመፍቀሬ፡ መሰግላን፡ እለ፡ ያመልኩ፡ ጣዖተ። ወዘከመዝ፡ ግዕዙ፡ ያውፅእዎ፡ እምኔሆሙ፡ ወኢይኅድግዎ፡ ማእከሎሙ፡ ወኢይትለአክ፡ ምስሌሆሙ፡ ወኢይሳተፎሙ

[19] ፲፱፡ ትእዛዝ። ወይትወከፍዎ፡ ለኵሉ፡ ዘይመጽእ፡ ውስተ፡ አሚን፡ ወይደምርዎ፡ ምስሌሆሙ፡ ወኢይክልእዎ፡ ሐዊረ፡ ኀበ፡ ሰብኡ፡ እምአይሁድ፡ ወመምለኪያነ፡ ጣዖት፡ ወለእመ፡ ገብአ፡ ኀበ፡ ዘትካት፡ ግብሩ፡ እምድኅረ፡ ትድምርት፡ ወእምዝ፡ ተመይጠ፡ ኀበ፡ እለ፡ ኢየአምኑ፡ ኢይትወከፍዎ፡ ዘእንበለ፡ ከመ፡ መምለኪያነ፡ ጣዖት

[20] ፳፡ ትእዛዝ። ወኢይግበሩ፡ ሊቀ፡ ዘይኤዝዝ፡ ለቤተ፡ ክርስቲያነ፡ እግዚአብሔር፡ ዘይገብር፡ ግብረ፡ ዝንቱ፡ ዓለም። ወኢይደመር፡ ውስተ፡ ነገረ፡ ሕዝብ፡ ዘእንበለ፡ በምክረ፡ ቢጹ፡ እለ፡ ቀደምዎ፡ እለ፡ ያቀውሙ፡ ጸሎተ፡ ከማሁ። ወኢይደሉ፡ ዘእንበለ፡ በምክሩ፡ ወምክሮሙ፡ ኅቡረ፡ በዘያሠምሮ፡ ለእግዚአብሔር፡ ወዘይደልዎሙ፡ ለሕዝብ፡ ወርቱዕ፡ ኵነኔሁ። ወኢይኩን፡ በፍትሑ፡ ዘያሐሥም፡ ለመንፈቆሙ፡ ወኢጋእዘ፡ በተዐድዎ፡ ርትዕ። ወዘከመዝ፡ ግዕዙ፡ ይትፈለጥ። ወኢይኅድግ፡ ቀሲስ፡ ወዲያቆን፡ ጸሎቱ፡ ዘአኀዘ፡ ወኢይፃእ፡ ኀበ፡ ነገረ፡ ባዕድ። ወዘገብረ፡ ከመዝ፡ ኢይከውኖ፡ ይግባእ፡ ኀበ፡ መካኑ፡ ዘቀዲሙ

[21] ፳፩፡ ትእዛዝ። በእንተ፡ ተዝካር። ወይግበሩ፡ ለኵሉ፡ ሰማዕት፡ መሀይምናን፡ እለ፡ ተክዕወ፡ ደሞሙ፡ በእንተ፡ ክርስቶስ፡ እግዚእነ፡ በተአምኖ፡ ተዝካሮሙ፡ በዕለተ፡ ተከለሉ

[22] ፳፪፡ ትእዛዝ። በእንተ፡ ሥርዐተ፡ ጸሎት። ወያብዝኁ፡ ጸሎተ፡ በሌሊት፡ ወመዓልት፡ በመዝሙረ፡ ዳዊት፡ ወይኀልዩ፡ ጸሎተ፡ ባቲ፡ እስመ፡ ይቤ፡ እባርኮ፡ ለእግዚአብሔር፡ በኵሉ፡ ጊዜ፡ ወዘልፈ፡ ስብሐቲሁ፡ ውስተ፡ አፉየ። ወካዕበ፡ ይቤ፡ ጥዑም፡ ለጕርዔየ፡ ነቢብከ፡ እመዓር፡ ወሶካር፡ ጥዕመኒ፡ ለአፉየ። ወበእንተዝ፡ ይደሉ፡ አንብቦ፡ በዜማ፡ ጥዑም፡ በእንተ፡ አዕቢዮ፡ እግዚአብሔር፡ ወስባሔሁ፡ ወአእኵቶ፡ ጸጋሁ፡ ወስኢል፡ ኀቤሁ፡ ወአሠንዮ፡ በኵሉ፡ በእንተ፡ ስሙ፡ ግሩም፡ ወቅዱስ። ወካዕበ፡ ይነግር፡ በእንተ፡ ተፀምዶ፡ ወስባሔ፡ ወተጋንዮ፡ ወተአምኖ፡ ኀጣውእ፡ ወስእለታት፡ ዘይደልዎሙ፡ ለመሀይምናን። ይጸልዩ፡ ባቲ፡ ሶበ፡ ይረክቦሙ፡ ምንዳቤ፡ ወሐዘን፡ ወተጽናስ፡ ወያመሥጡ፡ እመንሱት

[23] ፳፫፡ ትእዛዝ። በእንተ፡ ኈልቈ፡ ካህናት። ወይኩኑ፡ ላእካን፡ ሰብዐቱ፡ እለ፡ ተኀርዩ፡ እምሕዝብ፡ ለመልእክተ፡ ቤተ፡ መቅደስ፡ ኄራን፡ ወሠናያን፡ ወልብዋነ፡ ጥበብ፡ ወአእምሮ፡ ወፈራህያነ፡ እግዚአብሔር፡ እለ፡ ያአምሩ፡ ሥርዐቶ፡ እስመ፡ እሙንቱ፡ እለ፡ ይነግሩ፡ በእንተ፡ ጸሎት። ወይቀድሱ፡ ቍርባነ፡ ወይዕርቁ፡ ሕዝበ፡ በዳኅን፡ ወሰላም፡ እስመ፡ እሙንቱ፡ ውሉደ፡ እግዚአብሔር፡ በአማን፡ በከመ፡ ተብህለ፡ በወንጌል፡ ቅዱስ። ወላእካነ፡ ትንቢት፡ ወይኩኑ፡ እስትርኩባነ፡ ኢይትሀወኩ፡ በግብረ፡ ዓለም፡ አላ፡ ይኩን፡ ግብሮሙ፡ መልእክቶ፡ ለአእምሮ፡ ሕጉ

[24] ፳፬፡ ትእዛዝ። ወይኩን፡ ሊቅ፡ ዘይኤዝዞሙ፡ ለሕዝብ፡ ወይጌሥጾሙ፡ በመስቀል፡ እስመ፡ ንኤዝዝ፡ ወአኮ፡ ዘነአስር፡ ዘእንበለ፡ ርትዕ። ወእመሰ፡ ተዐገሎሙ፡ ካህን፡ እንዘ፡ ንጹሓን፡ እሙንቱ፡ ይሢሙ፡ ዲቤሁ፡ ካህናተ፡ በርትዕ፡ ወለእመ፡ ተስእኖሙ፡ ይሰድዎ፡ ኀበ፡ ጳጳስ፡ አው፡ ኀበ፡ ሊቀ፡ ጳጳሳት፡ ወያቅምዎ፡ በርትዕ፡ ወኢይኅድግዎ፡ ይትዐደው፡ ላዕለ፡ አባግዐ፡ ክርስቶስ፡ እለ፡ ተሣየጦሙ፡ በደሙ፡ ክቡር። ወኢያምዕዕዎሙ፡ ከመ፡ ኢይፃኡ፡ ውስተ፡ ፅርፈት፡ ላዕለ፡ እግዚአብሔር፡ ወክሒድ፡ ለስሙ፡ ቅዱስ። ወይኩኑ፡ መሀይምናን፡ ኄራነ፡ ዘይትዔገሡ፡ ግፍዐ፡ በከመ፡ ይደሉ፡ ከመ፡ ይትበቀል፡ እግዚአብሔር፡ በእንቲአሆሙ። ወኢያድሉ፡ ሢዩም፡ በፍትሕ፡ ማእከለ፡ ሕዝብ፡ ወይሥልጥ፡ ኵነኔሁ። ወዘሰ፡ ያጸድቆ፡ ለዐማጺ፡ በእንተ፡ ዘይሁቦ፡ ወይዔምፆ፡ ለንጹሕ፡ በእንተ፡ ድካሙ፡ ወንዴቱ፡ ውእቱ፡ ይከውን፡ ውጉዘ፡ ወርጉመ፡ ወኢይረስይዎ፡ ዘእንበለ፡ ከመ፡ መምለኬ፡ ጣዖት። ወይክልእዎ፡ ሢመቶ፡ ለዘ፡ ይገብር፡ ከመዝ፡ ወይዘልፍዎ፡ በእንተ፡ ዐመፃሁ፡ ወኢያፍርህከ፡ ጵጵስናሁ

[25] ፳፭፡ ትእዛዝ። ወኢይሀሉ፡ ውስተ፡ ሢመት፡ ወኢይቅረብ፡ ዘይትዔበይ፡ በነፍሱ፡ ወይዜሀር፡ ላዕለ፡ ሰብእ፡ ወይሬኢ፡ ነፍሶ፡ ከመ፡ ዘይዐቢ፡ እምሰብእ፡ ወይከብር፡ ወይኄይስ፡ ወይሬኢዮሙ፡ ለሕዝበ፡ እግዚአብሔር፡ በዐይነ፡ መንኖ። አላ፡ ውእቱ፡ ምኑን፡ በኀበ፡ እግዚአብሔር፡ ወኅሱር፡ ዘአልቦ፡ ሠናየ፡ ዝክረ፡ በሕይወቱ፡ ወኢምሕረተ፡ በኀበ፡ እግዚአብሔር፡ በሞቱ፡ ወስዑር፡ እምክህነቱ። ዘበእንቲአሁ፡ ይቤ፡ እግዚአብሔር፡ በመጽሐፍ፡ እመይጣ፡ ለጸጋ፡ ኀበ፡ ካልእ፡ እምእለ፡ ይትዔበዩ

[26] ፳፮፡ ትእዛዝ። ወይሢሙ፡ ሊቀ፡ ካህናተ፡ ላዕለ፡ ቀሳውስተ፡ በሓውርት፡ ዘየዐውድ፡ ማእከሎሙ፡ ወይዋሒዮሙ፡ ወይአዝዞሙ፡ ወይገሥጾሙ፡ ወያእምሩ፡ ከመ፡ ሥሉጥ፡ ውእቱ፡ ላዕሌሆሙ፡ ወያእምር፡ ግብሮሙ፡ ወይደልዎሙ፡ ይግበሩ፡ ትእዛዞ፡ በከመ፡ ሳሙኤል፡ ነቢይ፡ ዘዖደ፡ በአድያመ፡ ኢየሩሳሌም፡ ወአዘዞሙ፡ ወገሠጾሙ

[27] ፳፯፡ ትእዛዝ። በእንተ፡ ንጉሥ። ወይኩን፡ ምቅዋሙ፡ ለንጉሥ፡ ምስለ፡ መሀይምናን፡ በጊዜ፡ ጸሎት፡ ቅድመ፡ ኵሎሙ፡ ሰብእ፡ ወይቁም፡ ምስለ፡ ሊቃውንት፡ ወሢዩማን፡ ካህናት፡ ወይባእ፡ ምስሌሆሙ፡ ውስተ፡ ምሥዋዕ፡ ወይኩን፡ ምቅዋሙ፡ በህየ፡ እስመ፡ ዳዊት፡ ንጉሥ፡ ወእለ፡ ይትማሰልዎ፡ ነገሥት፡ ይቀድምዎሙ፡ ለኵሉ፡ ሰብእ፡ በውስተ፡ ጸሎት፡ ወይበውኡ፡ ቤተ፡ መቅደስ፡ ወቦሙ፡ ምቅዋመ፡ በውስጥ

[28] ፳፰፡ ትእዛዝ። ኢይትኀበል፡ ንጉሥ፡ ገቢረ፡ በቤተ፡ መቅደስ፡ በፈቃደ፡ ርእሱ፡ አላ፡ በፈሪሀ፡ እግዚአብሔር፡ ወበኂሩት፡ ከመ፡ ይሡቅ፡ እግዚአብሔር፡ መንበሮ፡ በጽድቅ፡ ወያኑኅ፡ መዋዕሊሁ፡ ወያውርሶ፡ ጸጋ፡ ዘለዓለም፡ መንፈሳዌ፡ ወኢይክልኦ፡ ውሉደ፡ እለ፡ ይነብሩ፡ ዲበ፡ መንበሩ፡ እስከ፡ ለዓለም

[29] ፳፱፡ ትእዛዝ። ካህናት። ወኢይትሐበሉ፡ ካህናት፡ ወሢዩማን፡ እምግብር፡ ዘተአዘዙ፡ ወኢይትዐደዉ፡ ትእዛዘ፡ እምዘ፡ አብሕዎሙ፡ ከመ፡ ይአዝዙ፡ ወይገሥጹ። ወሤምዎሙ፡ በዘ፡ ይደሉ፡ ወይረትዕ፡ ወአኮ፡ በዘ፡ ይረክብ፡ ኀጢአተ፡ ወቅሥተ፡ ወይከውን፡ በላዕሌሁ፡ ጋእዘ

[30] ፴፡ ትእዛዝ። በእንተ፡ ቍርባን። ወያዕርጉ፡ ኅብስተ፡ ዘይትገበር፡ ለቍርባን፡ ዲበ፡ ምሥዋዕ፡ በዕለተ፡ ተገብረ፡ ወኢያስተዳኅርዎ፡ ለጌሠም፡ ወይሜጥዉ፡ በዕለቱ፡ ወኢያትርፉ፡ ለካልእ፡ ዕለት፡ እስመ፡ ኢይደሉ። ወከመዝ፡ አዘዝናክሙ፡ ከመ፡ ትግበሩ፡ በከመ፡ አርአየክሙ፡ እግዚአብሔር፡ እምድኅሬነ

ወዘንተ፡ ሠርዑ፡ ሐዋርያት፡ እንዘ፡ ጉቡኣን፡ እሙንቱ፡ ውስተ፡ ጽርሕ፡ በኢየሩሳሌም፡ ለእለ፡ ሰምዕዎሙ፡ ወተለውዎሙ፡ ወአምኑ፡ በእግዚአብሔር፡ በእደዊሆሙ፡ እምአይሁድ፡ ወእምኵሉ፡ አሕዛብ፡ ወሠርዕዎ፡ ለኵሉ፡ ዓለም፡ እስመ፡ መንፈስ፡ ቅዱስ፡ ዘወረደ፡ ላዕሌሆሙ፡ በመልዕልተ፡ ጽዮን፡ በበዓለ፡ ኀምሳ፡ ኮኖሙ፡ ጥበበ፡ ወአለበዎሙ፡ ኵሎ፡ ዘይትፈቀድ፡ በከመ፡ አሰፈዎሙ፡ እግዚእነ፡ ክርስቶስ፡ በኵሉ፡ ግብሮሙ።

ወአልቦሙ፡ ጻማ፡ በእንቲአሁ፡ እስመ፡ ረድኤተ፡ ቦሙ፡ በዘ፡ ተውህበ፡ ሥልጣነ፡ ወለበዉ፡ አእምሮ፡ እግዚአብሔር፡ ወገብርዎ፡ እስመ፡ ይፈርሁ፡ ላዕለ፡ እለ፡ ተለውዎሙ፡ ወአምኑ፡ በእደዊሆሙ፡ እምተኵላት፡ መደልዋን፡ ከመ፡ ኢይምጽኡ፡ ወኢይምሥጥዎሙ፡ እምድኅሬሆሙ፡ እስመቦ፡ ሰብአ፡ እለ፡ ይትሜሰልዎሙ፡ ለሐዋርያት፡ ወይመጽኡ፡ በአርአያ፡ አባግዕ፡ ወእሙንቱሰ፡ ተኵላት፡ መሠጥ

ወቀዲሙ፡ ነገሮሙ፡ እግዚእነ፡ ዘንተ። ወጳውሎስኒ፡ ላእከ፡ ጽድቅ፡ ወስልዋኖስ፡ ረድኡ፡ አመ፡ ዖዱ፡ ምድረ፡ ሶርያ፡ ወባዕደኒ፡ አዘዝዎሙ፡ ለእለ፡ አምኑ፡ በእደዊሆሙ፡ ወበእደ፡ ኵሎሙ፡ ሐዋርያት።

ወዓዲሆሙ፡ ኢተጋብኡ፡ ወገብሩ፡ ዘንተ፡ ትእዛዘ፡ እንዘ፡ ያነብቡ፡ ፍካሬ፡ መጻሕፍት፡ ቅዱሳት። ወከሠቱ፡ ለሰብእ፡ ዘቦቱ፡ በቍዔተ፡ ለነፍሶሙ፡ ወገብሩ፡ ሕገ፡ ወሥርዐተ፡ ለቤተ፡ ክርስቲያን፡ ቅድስት፡ ወውእቱኒ፡ በትሕትና፡ ወየውሀት፡ ወአውፅኡ፡ ኅቡኣተ፡ ለሰብእ፡ ወአርአዩ፡ ተአምረ፡ ዘከመ፡ ገብረ፡ እግዚኦሙ፡ ወከማሁ፡ ኮነ፡ በእደዊሆሙ።

ወይመጽኡ፡ ኀቤሆሙ፡ ብዙኀ፡ ሰብእ፡ በበዕለቱ፡ ወየአምኑ፡ በክርስቶስ፡ በእደዊሆሙ። ወይመጽኡ፡ ኀቤሆሙ፡ እምርሑቅ፡ ብሔር፡ ወይሰምዑ፡ ቃሎሙ፡ ወይትዌከፉ፡ ትእዛዞሙ፡ ወትምህርቶሙ፡ ጥዩቀ፡ በአማን

ወኒቆዲሞስ፡ ወገማልኤል፡ ሊቃነ፡ ካህናት፡ ወማኅበረ፡ አይሁድ፡ ይመጽኡ፡ በኅቡእ፡ ወይትዌከፉ፡ ትምህርቶሙ፡ ወትእዛዞሙ፡ ርኢዮሙ፡ ዘያወፅኡ፡ ኅቡኣተ። ወአንቆ፡ ወአሌዊ፡ ወቀዳይ፡ ወኔሪ፡ ወሐና፡ ወቀያፋ፡ ወአስክንድሮስ፡ ካህናተ፡ አይሁድ፡ ይመጽኡ፡ በሌሊት፡ ወይአምኑ፡ ወይገንዩ፡ ከመ፡ ውእቱ፡ ክርስቶስ፡ ዘአሐሰውናሁ፡ ውእቱ፡ መሲሐ፡ ጽድቅ፡ ዘተነበዩ፡ ላዕሌሁ፡ ነቢያት፡ ውእቱ፡ ወልደ፡ እግዚአብሔር፡ በአማን፡ ወኢያግሀዱ፡ እምፍርሀተ፡ አይሁድ።

ወተወክፍዎሙ፡ ሐዋርያት፡ ወተፈሥሑ፡ ቦሙ፡ ወይቤልዎሙ፡ ኢይደልወክሙ፡ ትግበሩ፡ ከመዝ፡ ወኢትኅፈሩ፡ እምሰብእ፡ ወኢትፍርህዎሙ። ወታኀልቁ፡ ሕይወተክሙ፡ በጌጋይ፡ ወበከንቱ። ወይደልወክሙሰ፡ ትፍርህዎ፡ ለእግዚአብሔር፡ ዘአልቦ፡ ዘይትኀብኦ፡ ወኢትሙቱ፡ በማእከል፡ ወይትኀሠሡክሙ፡ ምስለ፡ አበዊክሙ፡ በደመ፡ እግዚእነ፡ ክርስቶስ፡ ዘደፈሩ፡ አበዊክሙ፡ ወባሕቱ፡ ይደልወክሙ፡ ለእመ፡ አመንክሙ፡ በክርስቶስ፡ ከመ፡ ታጥብዑ፡ ገሀደ፡ ወትእመኑ፡ በሀይማኖት፡ እንተ፡ ዜነዉ፡ ሐዋርያት፡ ወትትወከፉ፡ ኵሎ፡ ዘንጼውዕ፡ ሰብአ፡ ኀቤሁ።

ወሰሚዖሙ፡ ቃሎሙ፡ ካህናተ፡ አይሁድ፡ ከልሑ፡ በዐቢይ፡ ቃል፡ በማእከለ፡ ኵሎሙ፡ ሐዋርያት፡ ወይቤሉ፡ በአማን፡ ንሕነ፡ ነአምን፡ በክርስቶስ፡ ዘሰቀሉ፡ አይሁድ፡ ወተቀብረ፡ ወተንሥአ፡ በሣልስት፡ ዕለት፡ ወንሕነ፡ ንአምን፡ ከመ፡ ውእቱ፡ አምላክ፡ ቀዳማዊ፡ ዘእምትካት፡ ወይትቤቀሎሙ፡ ለእለ፡ ሰቀልዎ። ወንሕነሰ፡ ውፁኣን፡ እምኔሆሙ።

ወከሠቱ፡ ለሰብእ፡ ኵሎ፡ ኅቡኣተ፡ ወአምኑ፡ ገሀደ፡ ወኢተፈልጡ፡ እምሐዋርያት፡ እስመ፡ ያሌብውዎሙ፡ ኵሎ፡ ዘመሀሩ፡ ለሰብእ፡ እምሐዲስ፡ ሕግ፡ ዘውእቱ፡ ሥርዐት፡ ኅሩይ፡ ዘወፅአ፡ እምጽዮን፡ በከመ፡ ይቤ፡ ጽሑፍ።

ወይሰምዑ፡ ትምህርተ፡ ወይገብርዎ፡ ቅድመ፡ ኵሉ፡ ሰብእ፡ ወለእመ፡ ረከቦሙ፡ ምንዳቤ፡ ለሐዋርያት፡ ይረድእዎሙ፡ ወይትዔገሡ፡ መቅሠፍተ፡ ወመዋቅሕተ፡ ወኵሎ፡ ኀሳረ፡ በእንተ፡ አሚን፡ በክርስቶስ፡ ወይትፌሥሑ፡ በኵሉ፡ ዘረከቦሙ፡ ወያበዝኁ፡ ሐዊረ፡ ኀበ፡ አሚን፡ በእግዚእነ፡ ክርስቶስ።

ወእምድኅረ፡ ወፅኡ፡ ሐዋርያት፡ ውስተ፡ ዓለም፡ ኮኑ፡ ሊቃውንተ፡ ለቤተ፡ ክርስቲያን፡ ቅድስት፡ ወይኤዝዙ፡ ወይሜህሩ፡ ለሰብእ፡ ኵሎ፡ ዘነሥኡ፡ እምሐዋርያት። ወአዘዙ፡ እምቅድመ፡ ሞቶሙ፡ ለእለ፡ እምድኅሬሆሙ፡ አርድእቶሙ

ወዜነወ፡ አስቅጢ፡ ጳውሎስ፡ ወጸሐፈ፡ ያዕቆብ፡ በኢየሩሰሌም፡ ወስምዖን፡ ጴጥሮስ፡ በሀገረ፡ ሮሜ፡ ወዮሐንስ፡ በኤፌሶን፡ ወማርቆስ፡ በአልስክንድርያ፡ ወእንድርያስ፡ በአፍርጋ፡ ወሉቃስ፡ በመቄዶንያ፡ ወይሁዳ፡ ወቶማስ፡ እምድረ፡ ህንደኬ፡ ኀበ፡ ሊቃውንት፡ ወመሀይምናን፡ ውስተ፡ ኵሎ፡ ዓለም፡ ከመ፡ ይትወከፉ፡ መጻሕፍቲሁ፡ ወመልእክቶ፡ ወያንብብዎ፡ ውስተ፡ ኵሉ፡ አብያተ፡ ክርስቲያናት፡ ዘእግዚአብሔር፡ በከመ፡ ይትነበብ፡ ነገረ፡ ሐዋርያት፡ ዘጸሐፈ፡ ሉቃስ፡ ከመ፡ ያእምሩ፡ እስመ፡ ሐዋርያት፡ ወነቢያት፡ ወመጻሕፍት፡ ዘቀዳሚ፡ ወዘሐዲስ፡ የኀብሩ፡ በበይናቲሆሙ።

ወጸውዑ፡ ኀበ፡ አሐዱ፡ ጽድቅ፡ ወአሐዱ፡ ቃል፡ ኵሎሙ፡ አሐዱ፡ መንፈስ፡ ዘውእቱ፡ መንፈስ፡ ቅዱስ፡ እምአሐዱ፡ እግዚአብሔር፡ ዘሎቱ፡ ንሰግድ፡ ኵልነ። ወተፈነዉ፡ ሐዋርያት፡ ወሰበኩ፡ ቦቱ፡ ወጸውዑ፡ ኀቤሁ፡ ኵሎ፡ በሓውርተ፡ ዘርሑቅ፡ እምኔሆሙ።

ወኵሎ፡ ዘነሥኡ፡ ሐዋርያት፡ በኀበ፡ እግዚእነ፡ ኢየሱስ፡ ክርስቶስ፡ ወመሀሩ፡ ሐዋርያት፡ ወተወክፍዎሙ፡ ወአምኑ፡ ቦቱ፡ በኵሉ፡ አህጉር፡ ወብሔር፡ ወእስከ፡ አጽናፈ፡ ኵሉ፡ ዓለም፡ እንዘ፡ ይረድኦሙ፡ ኀይሉ፡ ለእግዚአብሔር፡ ወጽንዑ፡ ወኢሐሰወ፡ ቃሎ፡ ዘይቤ፡ አነ፡ እሄሉ፡ ምስሌክሙ፡ እስከ፡ ኅልቀተ፡ ዓለም

ወምስለ፡ ዝንቱ፡ ይጽህቁ፡ ተጋድሎ፡ ምስለ፡ አይሁድ፡ በመጻሕፍተ፡ ነቢያት፡ ወይትጋደሉ፡ ምስለ፡ መሰግላን፡ በተኣምር፡ ግሩም፡ ዘይገብሩ፡ በስመ፡ እግዚእነ፡ ኢየሱስ፡ ክርስቶስ። ወኵሉ፡ አሕዛብ፡ እለ፡ ባዕዳን፡ አህጉር፡ ተወክፉ፡ ኀበ፡ ተጸውዑ፡ ውስተ፡ አሚን፡ በክርስቶስ፡ ዘእንበለ፡ ጋእዝ።

ወሶበ፡ ይረክቦሙ፡ ምንዳቤ፡ በእንቲአሁ፡ ይብሉ፡ ዛቲ፡ ምንዳቤ፡ እንተ፡ ረከበተነ፡ ትተነብል፡ ለነ፡ እስመ፡ ንሕነሂ፡ አስተቈጣዕናሁ፡ ለዘ፡ ፈጠረነ።

ወቦ፡ እምኀቤሆሙ፡ ዘሰቀልዎ፡ ወቦ፡ ዘተቀትለ፡ በሰይፍ፡ ተዐጊሦ፡ ወቦ፡ ዘተበርበረ፡ ንዋዮ፡ በትዕግልት፡ ብዙኀ፡ ጊዜ፡ ወቦ፡ ዘርሕቀ፡ እምንዋዩ፡ ወውሉዱ፡ ወቤቱ፡ ወእንዘ፡ ሀለዉ፡ ውስተ፡ ኵነኔ፡ ወይሣቂይዎሙ፡ ወይትዔገሡ፡ በሥምረቶሙ፡ እስከ፡ ይመውቱ፡ በእንተ፡ አሚን፡ በክርስቶስ።

ወይበዝኁ፡ ወይትወሰኩ፡ ወኢሐጸጸ፡ ስብከቶሙ፡ ወጸውዖቶሙ፡ እስከ፡ ስፍሐ፡ ውስተ፡ አርባዕቱ፡ መአዝነ፡ ዓለም።

ወኢሠርዑ፡ ሐዋርያት፡ ዘንተ፡ ኵሎ፡ አመ፡ ወጠኑ፡ ይዜንዉ፡ ወይጸውዑ፡ ውስተ፡ አሚን፡ አላ፡ ጸሀቁ፡ ከመ፡ ይትወከፉ፡ ኵሎ፡ እምጌጋይ፡ ወዕልወት፡ ወአምልኮ፡ ጣዖት፡ ውስተ፡ ርትዕ፡ ወአሚን፡ ወይኤዝዝዎሙ፡ እምበሊዐ፡ ዝቡሕ፡ ለአማልክት፡ ወማውታ፡ ወደም፡ ወዘበፅዑ፡ ለአምላከ፡ ባዕድ።

ወአመ፡ በዝኁ፡ እለ፡ የአምኑ፡ በክርስቶስ፡ ወኮኑ፡ እምኔሆሙ፡ ሰባኪያነ፡ ወዜናዊያነ፡ ወተፈቅደ፡ ይግበሩ፡ ትእዛዘ፡ ወሥርዐተ፡ ለአርትዖ፡ ሕግ፡ ወተፍጻሜተ፡ ግብር፡ ወወሀብዎሙ፡ ሐዋርያት፡ ሶቤሃ፡ ዘንተ፡ ቀኖና፡ ዘይሰመይ፡ በነገረ፡ ጽርእ፡ በጥልሳት፡ በዘኀብሩ፡ ቦቱ፡ ሐዋርያቲሁ፡ ለክርስቶስ፡ ኄራን፡ ወጻድቃን፡ ወንጹሓን፡ መራሕያን፡ ወአዘዙ፡ ባቲ፡ ከመ፡ ይግበርዋ። ወይደልዎ፡ ለዘ፡ ተዐደዋ፡ ኵነኔ፡ ወንሕነሂ፡ ንተሉ፡ አሰረ፡ ዚአሆሙ።