Canons of S. Simon the Canaanite 2nd recension

[a] በስመ፡ አብ፡ ወወልድ፡ ወመንፈስ፡ ቅዱስ፡ አሐዱ፡ አምላክ። ዝንቱ፡ ሴኖዶስ፡ ዘአበው፡ ሐዋርያት፡ ንጹሓን፡ ወቅዱሳን

ቀዳሜ፡ ሥርዐተ፡ ክህነት፡ ዘስምዖን፡ ቀነናዊ፡ በእንተ፡ ሥርዐተ፡ ቤተ፡ ክርስቲያን

[1] ሊቀ፡ ጳጳሳት፡ ይባርክ፡ ወኢይትባረክ፡ ወከማሁ፡ ጳጳስ፡ ይባርክ፡ ወኢይትባረክ፡ ዘእንበለ፡ እምሊቀ፡ ጳጳሳት። ወኤጲስ፡ ቆጶስ፡ ይባርክ፡ ወይትባረክ፡ እምጳጳስ፡ ወዓዲ፡ ውእቱ፡ ዘይባርኮሙ፡ ለኤጲስ፡ ቆጶሳት፡ ወዘይቴሐቶሙ። ወእሙንቱ፡ ያነብሩ፡ እደዊሆሙ፡ ላዕለ፡ ርእሰ፡ ሕዝብ። ወኢያንብር፡ መኑሂ፡ እዴሁ፡ ላዕለ፡ አርእስት፡ ዘእንበለ፡ ሊቀ፡ ጳጳሳት፡ ወውእቱ፡ ዘይገብር፡ ሢመተ፡ ለኵሎሙ፡ ወዘይትወከፍ፡ ሢመተ፡ በኀቤሁ፡ ይትወከፍ፡ በረከተ

ቀሲስ፡ ወኢይግበር፡ ሢመተ፡ ወኢይደልዎ፡ ዝንቱ። ኢይኩኑ፡ ቀሳውስት፡ ወመነኮሳት፡ በሢመታተ፡ ምኔታት። ዕደው፡ ወአንስት፡ ኅቡረ፡ ለእመ፡ መንኰሱ፡ በበምኔታቲሆሙ፡ ወይሖሩ፡ ወኵሉ፡ ዘተወክፎሙ፡ ወመጽአ፡ ኀቤሆሙ፡ ኀበ፡ ምንኵስና፡ እስመ፡ ከማሁ፡ ብውሕ፡ ሎሙ

ሊቀ፡ ጳጳሳት፡ ውእቱ፡ ዘይስዕር፡ ለዘይደልዎ፡ ተስዕሮ፡ እምጳጳሳት፡ ወኤጲስ፡ ቆጶሳት፡ ወቀሳውስት፡ ወዲያቆናት፡ ወኵሎሙ፡ ካህናት፡ ወእምሕዝባዊያን። ለእመ፡ ወፅኡ፡ እምሥርዐተ፡ ጽድቅ፡ ወፀረፉ፡ ላዕለ፡ ክርስቶስ፡ ወተለዉ፡ ዕልወተ፡ ወወለጡ፡ ሕገ፡ ቤተ፡ ክርስቲያን፡ ወገብሩ፡ ሎሙ፡ ሕገ፡ ዘኢሠራዕነ፡ ሎሙ፡ ንሕነ፡ ንስዕሮሙ፡ አላ፡ ለእመ፡ ኮነ፡ ሊቀ፡ ጳጳሳት፡ ዘከማሁ፡ ኢይደልዎ፡ ይስዐሮ፡ ወኢይትከሀሎ፡ ዘእንበለ፡ በሀልዎ፡ ኤጲስ፡ ቆጶሳት፡ እለ፡ ከማሁ፡ ወማኅበረ፡ ኤጲስ፡ ቆጶሳት

ቀሲስ፡ ይባርክ፡ ወያንብር፡ እዴሁ፡ ላዕለ፡ ዲያቆናት፡ ወዘይቴሐቶሙ፡ እምሕዝብ፡ ወኢይባርኮ፡ ዘይቴሐቶ፡ እምኔሁ፡ ወውእቱ፡ ይትወከፍ፡ ቡራኬ፡ እምዘይበርኮ፡ ዘከመ፡ ኤጲስ፡ ቆጶስ፡ ወጳጳስ፡ ወሊቀ፡ ጳጳሳት፡ ወእምቀሲስ፡ ዘከማሁ፡ በእዴሁ፡ ወአኮ፡ በርእሱ። ወብውሕ፡ ሎቱ፡ ያንብር፡ እዴሁ፡ ላዕለ፡ ርእሰ፡ ሕዝብ፡ ለዕድ፡ ወለአንስት፡ ወኢይደልዎ፡ የሀብ፡ ሢመተ፡ ወኢይደልዎ፡ ይስድድ፡ መነሂ፡ ወኢይደልዎ፡ ይስዐር፡ መነሂ፡ እምሢመቱ፡ እምእለ፡ ይቴሐትዎ፡ ሶበ፡ ይደልዎሙ፡ ተስዕሮ

ዲያቆን፡ ኢይባርክ፡ ወኢየሀብ፡ ቡራኬ፡ ወባሕቱ፡ ይንሣእ፡ ቡራኬ፡ እምኤጲስ፡ ቆጶስ፡ ወቀሲስ፡ ወኢይከውኖ፡ ያጥምቅ፡ ወያቅርብ፡ መነሂ፡ እምእለ፡ ይትሌዐልዎ፡ በመዓርግ። ወሶበ፡ ይቄርብ፡ ኤጲስ፡ ቆጶስ፡ ወቀሲስ፡ ይቅረብ፡ ውእቱኒ፡ ወያቅርብ፡ ሕዝበ፡ በጽዋዕ፡ ወኢያቅርብ፡ ዲያቆን፡ ከመዘ፡ ይቄርብ፡ እምእደ፡ ቀሲስ፡ አኮ፡ ከመ፡ ኤጲስ፡ ቆጶስ፡ ወቀሲስ፡ አላ፡ ከመ፡ ላእከ፡ ካህናት፡ በዕርፈ፡ መስቀል። ወኢይደይ፡ እዴሁ፡ ውስተ፡ ጽዋዕ፡ ዘቍርባን፡ እስከ፡ ይቄድሶ፡ ሎቱ፡ ቀሲስ፡ አው፡ ኤጲስ፡ ቆጶስ፡ ይቄድሶ። ወዘይቴሐት፡ እምዲያቆናት፡ ኢይደልዎ፡ ይግበር፡ ግብረ፡ ዲያቆናት፡ ወዲያቆናት፡ ኢይባርኩ፡ መነሂ፡ ወኢይግበሩ፡ ምንተኒ፡ ዘይገብሩ፡ ቀሳውስት፡ ወይዕቀቡ፡ አናቅጸ፡ በጊዜ፡ ቍርባን፡ ወጥምቀት። ወዲያቆናት፡ ይኤዝዙ፡ ለእለ፡ መትሕቴሆሙ፡ ለመልእክተ፡ ቤተ፡ ክርስቲያን፡ ወኢይኤዝዝ፡ ዘይትሌዐል፡ እምኔሁ፡ በመዓርግ። ወኢመፍትው፡ ለቀሲስ፡ ይግበር፡ ጸሎተ፡ በባሕቲቱ፡ ዘእንበለ፡ ዲያቆን፡ ወኢይኩን፡ ውእቱ፡ በእበድ፡ ወኢይኤዝዝ፡ በቤተ፡ ክርስቲያን፡ ዘእንበለ፡ ቀሲስ፡ አላ፡ ይኩን፡ ቀሲስ፡ እምድኅረ፡ ኤጲስ፡ ቆጶስ፡ ዘይኤዝዝ፡ ወይጌሥጽ፡ በእንተ፡ እግዚአብሔር፡ ለእመ፡ ኢሀሎ፡ ሊቀ፡ ካህናት

[2] ፪። ዘአዘዙ፡ ሐዋርያት፡ ቅዱሳን፡ ማቴዎስ፡ ወስምዖን፡ በእንተ፡ ዓሥራት፡ ወበኵር

ይቤሉ፡ ሐዋርያት፡ ቅዱሳን፡ ኵሉ፡ በኵር፡ ዘይበፅዑ፡ ለእግዚአብሔር፡ እምእንስሳ፡ ወአልህምት፡ ወወይን፡ ወቀዳሜ፡ ፍሬያት፡ ወዘይመስሎ፡ ወያምጽኡ፡ ኀበ፡ ኤጲስ፡ ቆጶስ፡ ወኀበ፡ ቀሲስ፡ ወኀበ፡ ዲያቆንሂ፡ ለእመ፡ ኢሀሎ፡ ቀሲስ። ወይኩን፡ ውእቱ፡ ለሲሳዮሙ፡ ወመልእክቶሙ፡ ወዘይፈቅዱ፡ ለአንስቲያሆሙ፡ ወዘኮነ፡ እምዓሥራት፡ ያስተዋፅኡ፡ ለሲሳየ፡ እለ፡ ተርፉ፡ ወለነዳያን። ወበኵርሰ፡ እምእንስሳ፡ ለካህናት፡ ለባሕቲቶሙ፡ ወለእለ፡ ይትለአክዎሙ፡ ወከማሁ፡ ይግበሩ፡ በዘተረፈ፡ ቍርባንኒ፡ በፈቃደ፡ ኤጲስ፡ ቆጶስ፡ ወቀሲስ። ይክፍልዎ፡ ዲያቆናት። ወለኤጲስ፡ ቆጶስ፡ እምኵሉ፡ ዘኮነ፡ አርባዕቱ፡ ክፍል። ወለቀሲስ፡ ሠለስቱ፡ ክፍል። ወለዲያቆን፡ ክልኤቱ፡ ክፍል። ለእለ፡ ተርፉ፡ በበአሐዱ። እስመ፡ ዝንቱ፡ ውእቱ፡ ሠናይ፡ በቅድመ፡ እግዚአብሔር፡ ከመ፡ ታክብሩ፡ ኵሎ፡ ብእሴ፡ በአምጣነ፡ ሢመቱ፡ ወኢያልህቅ፡ ቀዳሚ፡ እምካህናት፡ ወእምካልኡ፡ ምንተኒ፡ ለርእሱ፡ አላ፡ ይኩን፡ ዕሩየ፡ ክልኤሆሙ፡ በአሐዱ፡ ነፍስ። እስመ፡ ሕገ፡ እግዚአብሔር፡ ወቤተ፡ ክርስቲያን፡ ኢኮነ፡ ዘእንበለ፡ ሥርዐት፡ አላ፡ ይእቲ፡ ሠናይ፡ ሥርዐታ፡ ወዕውቅ፡ በበመዓርጊሃ፡ በአምጣነ፡ መኃድሪሆሙ፡ እስመ፡ ከማሁ፡ ማኅደረ፡ ሢመታት፡ ሰማያዊያት፡ ወከመዝ፡ ካዕበ፡ አርአየነ፡ ወጠየቅነ፡ እመንፈስ፡ ቅዱስ፡ ጳራቅሊጦስ፡ እግዚእ፡ ማሕየዊ፡ ዘኀደረ፡ ላዕሌነ

[3] ፫፡ ትእዛዝ፡ ዘጳውሎስ፡ ለኵሉ፡ መሀይምን፡ ወመሀይምንት፡ በእንተ፡ ጸሎት። ኵሉ፡ መሀይምን፡ ወመሀይምንት፡ ሶበ፡ ይከውን፡ ጽባሕ፡ ኢይግበሩ፡ ግብረ፡ ዘእንበለ፡ ይትኀፀቡ፡ እደዊሆሙ፡ በማይ፡ ወያንጽሑ፡ ወይጸልዩ፡ ለእግዚአብሔር፡ ፈጣሪሆሙ፡ በተጋንዮ፡ ወበትሕትና፡ በቅድመ፡ እግዚአብሔር። ወለእመቦ፡ ነገረ፡ ተዋቅሦ፡ ያቅድሙ፡ ነገረ፡ ሠናይ፡ እምኵሉ፡ ግብር፡ ወይትመየጡ፡ መሀይምናን፡ ኀበ፡ ግብሮሙ፡ በፍቅር፡ ወበየውሀት፡ በከመ፡ አዘዝነ፡ ወመሀርነ፡ በመልእክትነ፡ ወነገርነ፡ ኪያሁ፡ ለፈሪሀ፡ እግዚአብሔር

[4] ፬። ትእዛዝ፡ ዘጴጥሮስ፡ ወጳውሎስ፡ ሊቃነ፡ ሐዋርያት፡ በእንተ፡ ዕረፍት፡ ዘይደሉ፡ በዕለተ፡ በዓላት

ንሕነ፡ ንኤዝዘክሙ፡ ኦመሀይምናን፡ በክርስቶስ፡ ከመ፡ ታዕርፉ፡ በበዓላት፡ ዘመፍትው፡ ወያዕርፉ፡ አግብርት፡ በበሰሙን፡ ክልኤ፡ ዕለት፡ ዝውእቱ፡ ሰንበት፡ ወእሑድ፡ ክልኤሆን፡ ኅቡረ፡ ወአዕርፉ፡ ባቲ፡ በእንተ፡ ቤተ፡ ክርስቲያን፡ ቅድስት፡ ወሰሚዐ፡ መጻሕፍት፡ ወትእዛዛት። አነ፡ ጴጥሮስ፡ ወአነ፡ ጳውሎስ፡ ላእካኒሁ፡ ለኢየሱስ፡ ክርስቶስ፡ አዘዝነ፡ ከመ፡ ይትቀነዩ፡ አግብርት፡ ኀሙሰ፡ መዋዕለ፡ እምሰሙን፡ ወያዕርፉ፡ በሰንበት፡ ወበእሑድ፡ ወይሖሩ፡ ኀበ፡ ቤተ፡ ክርስቲያን፡ ለስኢለ፡ እግዚአብሔር፡ ወለፈሪሆቱ

ወዕረፍትሰ፡ በዕለተ፡ ሰንበት፡ ታእምሩ፡ ከመ፡ እግዚአብሔር፡ ፈጸመ፡ ኵሎ፡ ግብሮ፡ ወፈጢሮቶ፡ ወበይእቲ፡ ዕለት፡ አዕረፈ፡ ባቲ፡ ወአዘዘ፡ ከመ፡ ኢይግበሩ፡ ባቲ፡ ግብረ። ወይቤ፡ ዕቀቡ፡ ዕለታተ፡ ሰንበታት፡ እስመ፡ ይእቲ፡ ትእምርተ፡ ሕግ፡ ወትእምርት፡ በማእከሌየ፡ ወማእከሌክሙ፡ ለትውልደ፡ ትውልድክሙ፡ ወታእምሩ፡ ከመ፡ አነ፡ እግዚአብሔር፡ አምላክክሙ፡ ዘእቄድሰክሙ። ወዕቀቡ፡ ሰንበተ፡ ወአንጽሕዎ፡ ለክሙ፡ ወዘሰ፡ ሰዐሮ፡ ወአብደረ፡ ገቢረ፡ ቦቱ፡ ግብረ፡ ለይሙት፡ ወዘገብረ፡ ቦቱ፡ ግብረ፡ ለይትሀጐል፡ ውእቱ፡ ብእሲ፡ እምሕዝቡ። ግበሩ፡ ግብረክሙ፡ ኀሙሰ፡ መዋዕለ፡ ወክልኤ፡ ዕለተ፡ እሉ፡ እሙንቱ፡ ሰንበት፡ ወእሑድ፡ እለ፡ ቀደሰ፡ እግዚአብሔር፡ ወገብሮን፡ ኪዳነ፡ ለዝሉፉ፡ እስከ፡ ለዓለም፡ ወትእምርት፡ ዘለዓለም። ለሰንበትሰ፡ ገብራ፡ ተፍጻሜተ፡ ለመዋዕል፡ ወለፍጥረተ፡ ዓለም፡ ወእሑድሰ፡ ቀዳሚት፡ እመዋዕል። ከመዝ፡ ይቤ፡ እግዚአብሔር፡ ለመሀይምናን፡ እለ፡ የዐቅቡ፡ ሰንበታትየ፡ ወያበድሩ፡ ሥምረትየ፡ ወይጸንዑ፡ በኪዳንየ፡ እሁቦሙ፡ በቤትየ፡ ወመካነ፡ በኀበ፡ ማኅፈድየ፡ ወስመ፡ ዘይኄይሶሙ፡ እምውሉድ፡ ወአዋልድ፡ ወእሁቦሙ፡ ስመ፡ ዘይሄሉ፡ ለዓለም። ወውሉደ፡ ነኪር፡ እለ፡ ይመጽኡ፡ ኀበ፡ እግዚአብሔር፡ ወይትቀነዩ፡ ሎቱ፡ ወያፈቅሩ፡ ስመ፡ እግዚአብሔር፡ ይከውኑ፡ ሎቱ፡ አግብርተ፡ ወኵሎሙ፡ እለ፡ የዐቅቡ፡ ሰንበታትየ፡ ወኢያረኵሱ፡ አበውኦሙ፡ ውስተ፡ ደብረ፡ መቅደስየ፡ ወአስተፈሥሖሙ፡ በቤተ፡ ጸሎትየ፡ ወይከውን፡ ቍርባኖሙ፡ ወመሥዋዕቶሙ፡ ኅሩየ፡ ለሥምረትየ፡ በላዕለ፡ ምሥዋዕየ፡ እስመ፡ ቤትየ፡ ቤተ፡ ጸሎት፡ ይሰመይ፡ ለኵሉ፡ ሕዝብ። ከመዝ፡ ይቤ፡ እግዚአብሔር፡ አምላክክሙ፡ ዕቀቡ፡ ርትዐ፡ በውስተ፡ ፍትሕ፡ ወስምዑ፡ ጽድቀ፡ እስመ፡ ቅሩብ፡ ምጽአተ፡ መድኀኒትየ፡ ወፍጡነ፡ አስተርእዮተ፡ ጽድቅየ። ብፁዕ፡ ብእሲ፡ ዘይገብር፡ ዘንተ፡ ግብረ፡ ወይጸንዕ፡ ባቲ፡ ወየዐቅብ፡ ሰንበተ፡ ወኢይስዕር፡ ወየዐቅብ፡ እዴሁ፡ እምግብረ፡ ሰብእ። ወእመሰ፡ ሜጥከ፡ እግረከ፡ እምሰንበት፡ ወኢትገብር፡ ሥምረትየ፡ በቅድስት፡ ዕለትየ፡ ወባሕቱ፡ ትብላ፡ ሰንበት፡ ትጌጊ፡ እስመ፡ ቅድስት፡ ዕለት፡ ለእግዚአብሔር፡ አምላክከ፡ ወአክብራ፡ ወኢትሖር፡ ባቲ፡ ፍኖተከ፡ ወኢትግበር፡ ባቲ፡ ዘኢይደልወከ፡ ወኢትሖር፡ ኀበ፡ ከንቱ። ተወከል፡ በእግዚአብሔር፡ እስመ፡ እግዚአብሔር፡ ነበበ፡ በዝንቱ፡ አእምሩ፡ ከመ፡ እዴሁ፡ ለእግዚአብሔር፡ ኢይደክማ፡ ወኢይከብዳ፡ እዘኒሁ፡ እምሰሚዕ፡ ወባሕቱ፡ ፈለጠ፡ ማእከሌክሙ፡ ወማእከለ፡ ፍትሐ፡ ኀጣውኢክሙ፡ ወበእንተ፡ ኀጢአትክሙ፡ ሜጠ፡ ገጸ፡ እምኔክሙ፡ ከመ፡ ኢይስማዕክሙ። ወአዘዘ፡ ከመ፡ ኢይግበሩ፡ ባቲ፡ ወረሰያ፡ ተፍጻሜተ፡ ዕለታት፡ ወከማሁ፡ እምግብረ፡ ዓለም

ወዕረፍትሰ፡ በዕለተ፡ እሑድ፡ ናአምር፡ ከመ፡ እግዚአብሔር፡ አቅደመ፡ ቦቱ፡ ገቢረ፡ ወፈጠረ፡ ኵሎ፡ ፍጥረተ፡ ወአዕበያ፡ በክሂሎቱ። ወረሰያ፡ ቀዳሚተ፡ ወጥንተ፡ በከመ፡ ይቤ፡ መጽሐፍ፡ ዘኮነ፡ እግዚእነ፡ ክርስቶስ፡ ፍጻሜሃ፡ ወፈጸማ። ወውእቱ፡ ካዕበ፡ ጥንቱ፡ ለወንጌል፡ መንፈሳዊ፡ ሐዲስ፡ ለሐዲስ፡ ሕዝብ። ወኀረያ፡ ወአቅደማ፡ ወረሰያ፡ ዕለተ፡ ብርሃን፡ ወጸዳል፡ ለሥልጣነ፡ ቃሉ፡ ወዕለተ፡ ሕይወት፡ ለፍጥረት፡ ሐዲስ፡ ወሕይወተ፡ ዓለም፡ በትንሣኤሁ። ወውእቱ፡ ካዕበ፡ ቀዳሚት፡ ዕለት፡ እምዕለት፡ ደኃሪት፡ በከመ፡ ኮነት፡ ቀዳሚት፡ ዕለት፡ እምዕለተ፡ ፍጥረት፡ ወቀዳሚት፡ ዕለት፡ እምሐዲስ፡ ሥርዐት፡ በዘ፡ ባቲ፡ ይከውን፡ ዕሴት። ወሤማ፡ ለዕለተ፡ ሰንበት፡ ህየንተ፡ ጽልመት፡ እንተ፡ ፈጠረ፡ ቀዲሙ፡ ወአቅደማ፡ ወረሰያ፡ ሌሊተ፡ ወገብራ፡ ዕረፍተ፡ ለሕያዋን፡ ወለምውታን። ወሤማ፡ ለዕለተ፡ እሑድ፡ ህየንተ፡ ብርሃን፡ ለሕያዋን፡ ወይእቲ፡ ዕለት፡ እንተ፡ ባቲ፡ ተንሥአ፡ እግዚእነ፡ ክርስቶስ፡ እምውታን፡ ወአርአየ፡ ብርሃኖ፡ ላዕለ፡ ምድር፡ ወተዐውቀ፡ ብርሃነ፡ እምብርሃን፡ ለአሕዛብ፡ ወገብረ፡ ብርሃነ፡ ወሕገ

ወአዘዝነ፡ ካዕበ፡ ያዕርፉ፡ አግብርት፡ ወመሀይምናን፡ በሰሙነ፡ ፋሲካ፡ እስመ፡ ሰሙነ፡ ሐዘን፡ ይእቲ፡ ወያዕርፉ፡ ካዕበ፡ በሰሙን፡ ድኅሬሃ፡ እስመ፡ ሰሙነ፡ ፍስሓ፡ ወትንሣኤሁ፡ ለክርስቶስ፡ ወመድኀኒተ፡ ዓለም፡ እምብድብድ፡ እስመ፡ ይፈቅዱ፡ ይምሀርዎሙ፡ ወያእምሩ፡ እፎ፡ ኮነ፡ ትንሣኤ፡ ወአስተርኢዮ፡ ወይለብዉ፡ ዜናሁ፡ ለዘተሰቅለ፡ ወሐመ፡ ወተቀብረ፡ ወተንሥአ፡ በሣልስት፡ ዕለት፡ ወተፈጸመ፡ ላዕሌሁ፡ ትንቢተ፡ ነቢያት

ወያዕርፉ፡ ካዕበ፡ በሰላም፡ ዝውእቱ፡ በዓለ፡ ፵፡ በእንተ፡ ዘኮነ፡ ትእዛዞ፡ ለክርስቶስ፡ ወዕርገቶ፡ ውስተ፡ ሰማያት

ወካዕበ፡ ያዕርፉ፡ በዕለተ፡ እሑድ፡ ዝውእቱ፡ ተፍጻሜተ፡ ፶፡ ዕለት፡ በእንተ፡ ርደተ፡ መንፈስ፡ ቅዱስ፡ ጰራቅሊጦስ፡ ዘተውህበ፡ ለእለ፡ የአምኑ፡ በክርስቶስ

ወካዕበ፡ ያዕርፉ፡ በዕለተ፡ ዜነዋ፡ በእንተ፡ መድኀኒት፡ ዘአሰፈወ፡ ለአዳም፡ ወለውሉዱ፡ እማርያም፡ ድንግል

ወካዕበ፡ ያዕርፉ፡ በዕለተ፡ ልደት፡ እስመ፡ ጸጋ፡ እግዚአብሔር፡ በይእቲ፡ ዕለት፡ ዘተውህበ፡ ለሰብእ፡ እንተ፡ ሀለዉ፡ ይሴፈውዎ፡ እምቀዳሚ፡ ፍጥረት፡ ወባቲ፡ አስተርአየ፡ ቃሉ፡ ዘእምትካት፡ ተሠጊዎ፡ በዲበ፡ ምድር፡ ለመድኀኒተ፡ ዓለም፡ ውእቱ፡ ኢየሱስ፡ ክርስቶስ፡ ዘተወልደ፡ እማርያም፡ ድንግል፡ ዘንጽሕት፡ እምትሕዝብት፡ ወርኵስ

ወካዕበ፡ ያዕርፉ፡ በዕለተ፡ ኤጰፋንያ፡ ዘውእቱ፡ ኅፅበት፡ ዘቦቱ፡ አስተርአየ፡ እግዚእ፡ ወመድኅን፡ ኢየሱስ፡ ክርስቶስ፡ ለኵሉ፡ ሰብእ፡ በፈለገ፡ ዮርዳኖስ፡ በብርሃነ፡ መለኮቱ፡ ወባቲ፡ ተሠጥቀ፡ ሰማይ፡ ወስምዐ፡ ኮነ፡ አብ፡ ለወልዱ፡ በይእቲ፡ ዕለት፡ እንዘ፡ ይብል፡ ዝንቱ፡ ውእቱ፡ ወልድየ፡ ዘኣፈቅር፡ ዘኪያሁ፡ ሠመርኩ፡ ወሎቱ፡ ስምዕዎ፡ ወተአዘዝዎ፡ ወወረደ፡ ላዕሌሁ፡ መንፈስ፡ ቅዱስ፡ ጳራቅሊጦስ፡ በአምሳለ፡ ርግብ፡ ወሰማዕት፡ ወኵሉ፡ ሰብእ፡ እንዘ፡ ይሬኢዩ፡ ወይሰምዑ፡ ዘንተ፡ ኵሎ

ወካዕበ፡ ያዕርፉ፡ በበዓለ፡ ስምዖን፡ ዘውእቱ፡ በዓለ፡ ማኅቶት፡ እስመ፡ በይእቲ፡ ዕለት፡ ተወክፎ፡ ስምዖን፡ ካህን፡ ዲበ፡ እደዊሁ፡ ወዓዲ፡ እንዘ፡ ክቡዳን፡ አዕይንቲሁ፡ እምርስኣን፡ እስመ፡ ተብህለ፡ ሎቱ፡ እስመ፡ ኢትጥዕማ፡ ለሞት፡ እስከ፡ ይሬኢያ፡ አዕይንቲከ፡ መሲሐ፡ መድኅነ

ወያዕርፉ፡ በዕለተ፡ ተወለጠ፡ ራእዩ፡ እስመ፡ በደብረ፡ ታቦር፡ አስተርአየ፡ እግዚእነ፡ ክርስቶስ፡ ወአርአየነ፡ ስብሐተ፡ መለኮቱ፡ ወርኢናሁ፡ ንሕነ፡ ሐዋርያት፡ ምስለ፡ ሙሴ፡ ወኤልያስ

ወካዕበ፡ ያዕርፉ፡ በዕለተ፡ ተዝካሮሙ፡ ለሐዋርያት፡ እስመ፡ እሙንቱ፡ መምህራኒክሙ፡ ትእዛዘ፡ ክርስቶስ፡ ወመለብዋኒክሙ፡ ሀብተ፡ መንፈስ፡ ቅዱስ። ወካዕበ፡ ያዕርፉ፡ በበዓለ፡ እስጢፋኖስ፡ ሊቀ፡ ሰማዕት፡ ወዲያቆናት፡ ወቀዳሚሆሙ፡ ወለኵሎሙ፡ ሰማዕት፡ ከማሁ፡ እስመ፡ ለሰማዕት፡ ወለቅዱሳን፡ ይደሉ፡ ያክብርዎሙ፡ በእንተ፡ ክርስቶስ፡ እለ፡ አብደሩ፡ ፍቅሮ፡ እምሕይወቶሙ

[5] ፭። ትእዛዝ፡ ዘሐዋርያት፡ በእንተ፡ ዐቂበ፡ ጊዜያተ፡ ጸሎት፡ ወሰዐታት

ቁሙ፡ ለጸሎት፡ እምቅድመ፡ ጽባሕ፡ እንዘ፡ ሠለስቱ፡ ሰዐት፡ በሌሊት፡ ወጸሎተ፡ ነግህ፡ በጽባሕ፡ ወጸሎተ፡ ሠለስቱ፡ ሰዐት፡ ወጸሎተ፡ ስድስቱ፡ ሰዐት፡ ወጸሎተ፡ ተስዐቱ፡ ሰዐት፡ ወጸሎተ፡ ሰርክ፡ በምሴት፡ ወጸሎት፡ ካልእ፡ እምድኅረ፡ ምሴት፡ በሠለስቱ፡ ሰዐት፡ ወመንፈቀ፡ ሌሊት

ጸሎትሰ፡ እምቅድመ፡ ጽባሕ፡ እንዘ፡ ሠለስቱ፡ ሰዐት፡ ከመ፡ በእንተ፡ በይእቲ፡ ሰዐት፡ ንሴፎ፡ ምጽአቶ፡ ለእግዚእነ፡ ኢየሱስ፡ ክርስቶስ፡ ለኰንኖ፡ ወበይእቲ፡ ሰዐት፡ ዮጊ፡ ያአምርዎ፡ ውሉደ፡ ብርሃን፡ ለዝንቱ፡ ምግባረ፡ ሠናይ

ወጸሎትሰ፡ በጽባሕ፡ እንዘ፡ ታአኵትዎ፡ ለእግዚአብሔር፡ በእንተ፡ ዘአምጽአ፡ ብርሃነ፡ ወጸዳለ፡ ላህየ፡ ወአእተተ፡ ፍርሀተ፡ ሌሊት፡ ወጽልመት

ወጸሎትሰ፡ በሠለስቱ፡ ሰዐት፡ እስመ፡ ለክርስቶስ፡ በይእቲ፡ ሰዐት፡ ኰነንዎ፡ በሞት፡ ወውእቱ፡ ኮነ፡ መርሐ፡ ለመድኀኒተ፡ አዳም፡ ወለውሉዱ

ወጸሎትሰ፡ በስድስቱ፡ ሰዐት፡ በእንተ፡ ከመ፡ በይእቲ፡ ሰዐት፡ ተሰቅለ፡ ክርስቶስ፡ ዲበ፡ መስቀል፡ ወሰፍሐ፡ እደዊሁ፡ ወደምሰሰ፡ ኀጢአተ

ወጸሎትሰ፡ በተስዐቱ፡ ሰዐት፡ በእንተ፡ ከመ፡ በይእቲ፡ ሰዐት፡ ክርስቶስ፡ አግብአ፡ መንፈሶ፡ ወአድለቅለቀት፡ ምድር፡ ወተሠጠ፡ መንጦላዕተ፡ ምኵራብ፡ ወተሐምገ፡ ፀሓይ፡ ወጸልመ፡ ኵሉ፡ ዓለም

ወጸሎትሰ፡ በምሴት፡ አኰቴት፡ እምኀቤክሙ፡ ለእግዚአብሔር፡ በእንተ፡ ዘአምጽአ፡ ለክሙ፡ ዕረፍተ፡ ሌሊት፡ ወአስተርክቦ፡ ወአእተተ፡ እምኔክሙ፡ ጻማ፡ ወሥራሐ፡ ዘመዓልት

ወጸሎትሰ፡ ዘሌሊት፡ ከመ፡ ትስአልዎ፡ ለእግዚአብሔር፡ ከመ፡ ይዕቀብክሙ፡ እምእከዮሙ፡ ለውሉደ፡ ጽልመት፡ ወያድኅንክሙ፡ እመሥገርተ፡ ጸላኢ፡ ማህጕል፡ ወእምኅሊና፡ እኩይ፡ እስመ፡ በይእቲ፡ ሰዐት፡ ይትባሐቱ፡ አጋንንት፡ ምስለ፡ ሰብእ፡ ወይወድዩ፡ ውስተ፡ ልቦሙ፡ ኅሊና፡ እኩይ

ወለእመ፡ ኢክህልክሙ፡ ትሖሩ፡ ኀበ፡ ቤተ፡ ክርስቲያን፡ እምፍርሀተ፡ አረሚ፡ ጸልዩ፡ ዘንተ፡ ጸሎታተ፡ በውስተ፡ መኃድሪክሙ፡ ወኢትባኡ፡ ውስተ፡ አብያተ፡ ክርስቲያናት፡ ዘእኩያን፡ እለ፡ ኢኮኑ፡ ርቱዓነ፡ እስመ፡ ከመዝ፡ ይቤ፡ በእንቲአሆሙ፡ ዳዊት፡ ነቢይ፡ ዘበትርጓሜሁ፡ ጸላእኩ፡ ማኅበረ፡ እኩያን፡ ወኢይነብር፡ ምስለ፡ ጽልሕዋን፡ እስመ፡ መካን፡ አኮ፡ ዘይቄድሶ፡ ለሰብእ፡ አላ፡ ሰብእ፡ ይቄድሶ፡ ለመካን። ወለእመ፡ ኮነ፡ መካነ፡ አረሚ፡ ብሔሩ፡ ፍልሱ፡ እምኔሁ፡ እስመ፡ ርኩስ፡ ውእቱ፡ ወበከመ፡ ካህናት፡ ንጹሓን፡ ይቄድስዎሙ፡ ለመሀይምናን፡ በክርስቶስ፡ እለ፡ ርቱዓነ፡ ልብ፡ ወከማሁ፡ ረሲዓን፡ ያረኵሱ፡ መካናተ፡ ቅዱሳተ። ወለእመ፡ ኢተክህለክሙ፡ ትትጋብኡ፡ በቤተ፡ ክርስቲያን፡ ወኢበማኅደረ፡ ኤጲስ፡ ቆጶስ፡ ለይጸሊ፡ ኵሉ፡ ለለአሐዱ፡ እምኔክሙ፡ በውስተ፡ ማኅደሩ፡ አው፡ ምስለ፡ ክልኤቱ፡ ወሠለስቱ፡ እስመ፡ ተብህለ፡ ኀበ፡ ሀለዉ፡ ክልኤቱ፡ ወሠለስቱ፡ ጉቡኣን፡ በስምየ፡ ህየ፡ ሀለውኩ፡ አነ፡ ምስሌሆሙ። ወኢመፍትው፡ ይጸልዩ፡ መሀይምናን፡ ምስለ፡ ዕልዋን፡ በአሐዱ፡ ቤት፡ እስመ፡ ኢይደሉ፡ ይጸሊ፡ ዘይሳተፍ፡ ምስለ፡ ዘኢይሳተፍ፡ ወኢመሀይምናን፡ ይደመሩ፡ ምስለ፡ ዕልዋን፡ ወኢይጸልዩ፡ ምስሌሆሙ። መኑ፡ ዘደመሮ፡ ለብርሃን፡ ምስለ፡ ጽልመት፡ ወአይ፡ ሱታፌ፡ ለአግዓዚ፡ ምስለ፡ ገብር

[6] ፮። ትእዛዝ፡ ዘጳውሎስ፡ ወያዕቆብ፡ ሐዋርያት፡ በእንተ፡ እለ፡ ኖሙ። ተዝካረ፡ ምውታን፡ ወዘከመ፡ ይትገበር፡ በእንቲአሆሙ፡ ትእዛዝ

ይትገበር፡ በሣልስት፡ ዕለት፡ ለእለ፡ ኖሙ፡ ተዝካረ፡ ምውታን፡ ንነግረክሙ፡ ኦመሀይምናን፡ ምስለ፡ ጸሎት፡ በእንተ፡ ዘሞተ፡ ክርስቶስ፡ ወተንሥአ፡ በሣልስት፡ ዕለት። ወይትገበር፡ ካዕበ፡ በሳብዕት፡ ዕለት፡ ለተዝካረ፡ ሕያዋን፡ ወምውታን። ወይትገበር፡ ካዕበ፡ በዕለተ፡ ሠላሳ፡ ዝውእቱ፡ ተፍጻሜተ፡ ወርኅ፡ ሥርዐት፡ ዘትካት፡ እስመ፡ ደቂቀ፡ እስራኤል፡ ላሐዉ፡ ላዕለ፡ ሙሴ፡ ነቢይ፡ ሠላሳ፡ ዕለተ። ወካዕበ፡ ይግበሩ፡ በተፍጻሜተ፡ ዐመት፡ ወየሀቡ፡ እምንዋዮሙ፡ ለነዳያን፡ ወለምስኪናን፡ በእንተ፡ ነፍሶሙ

ወኢንኤዝዝ፡ ከመ፡ ይግበሩ፡ ዘንተ፡ ለዕልዋን፡ ወመናፍቃን፡ አላ፡ ንኤዝዝ፡ በዝንቱ፡ ሰብአ፡ የውሀት፡ ወኂሩት፡ ወሀይማኖት። ወበእንተሰ፡ ከሓዲያነ፡ መሲሑ፡ ለእግዚአብሔር፡ ሶበ፡ መጽወቱ፡ በምልአ፡ ምድር፡ ወበኵሉ፡ ዘውስተ፡ ዓለም፡ እመ፡ ኢበቍዖሙ፡ ውእቱ፡ ምንተኒ። ዘኮነ፡ በሕይወቱ፡ ጸላኤ፡ እግዚአብሔር፡ ወከማሁ፡ ውእቱ፡ በሞቱሂ፡ እስመ፡ አልቦ፡ አድልዎ፡ በኀበ፡ እግዚአብሔር፡ ወውእቱ፡ ራትዕ፡ ወያፈቅር፡ ጽድቀ፡ ወኢይዔምፅ፡ በፍትሕ፡ ወይፈድዮ፡ ለኵሉ፡ ሰብእ፡ በከመ፡ ምግባሩ

[7] ፯። ትእዛዝ፡ በእንተ፡ እለ፡ ተጸውዑ፡ ውስተ፡ ምሳሕ፡ ዘይትገበር፡ በዕለተ፡ ተዝካሮሙ፡ ለእለ፡ ኖሙ፡ መሀይምናን

ሶበ፡ ተጸዋዕክሙ፡ ኦካህናት፡ ኀበ፡ ተዝካረ፡ ምውታን፡ ዘይትገበር፡ መብልዕ፡ ወመስቴ፡ ሖሩ፡ ኀቤሆሙ፡ እንዘ፡ ትፈርህዎ፡ ለእግዚአብሔር፡ ፈድፋደ፡ በፍቅር፡ ወግርማ፡ ወየውሀት፡ በከመ፡ ይደሉ፡ ለዘአምሳሊክሙ። ወብልዑ፡ በከመ፡ ግብሮሙ፡ ለእለ፡ ይፈቅዱ፡ ይስአልዎ፡ ለእግዚአብሔር፡ ህየንተ፡ ውእቱ፡ ዘተገብረ፡ መብልዕ፡ በእንቲአሁ፡ እስመ፡ ኮንክሙ፡ ቀሳውስት፡ ወዲያቆናት፡ ውስተ፡ ቤተ፡ ክርስቲያኑ፡ ለክርስቶስ፡ ወይደልወክሙ፡ ትኩኑ፡ ንቁሃነ፡ በገሥጾ፡ ርእሰክሙ፡ ወለካልኣን፡ እስመ፡ ከመዝ፡ ይቤ፡ መጽሐፍ፡ እስመ፡ ለጽኑዓን፡ በእንቲአሆሙ፡ መዐት፡ ወበእንተዝ፡ ኢይደልዎሙ፡ ይስተዩ፡ ወይነ፡ ከመ፡ ኢይርስዕዋ፡ ለጥበብ፡ ወያርትዑ፡ በውስተ፡ ፍትሕ፡ ወያቅሙ፡ በዝንቱ

ናሁኬ፡ ተዐውቀ፡ ከመ፡ ኤጲስ፡ ቆጶሳት፡ ወቀሳውስት፡ ወዲያቆናት፡ እሙንቱ፡ ድኅረ፡ እግዚአብሔር፡ አብ፡ ወወልዱ፡ ዘያፈቅር፡ ጽኑዓን፡ በቤተ፡ ክርስቲያኑ፡ ለእግዚአብሔር። ወዘንተ፡ ዘንቤ፡ አኮ፡ ከመ፡ ኢይስተዩ፡ ወይነ፡ ለዝሉፉ፡ እስመ፡ ውእቱ፡ ነውር፡ ለፍጥረተ፡ እግዚአብሔር፡ ወባሕቱ፡ ንቤ፡ ከመ፡ ኢይስከሩ፡ ወይነ፡ ፈድፋደ፡ እስመ፡ መጽሐፍ፡ ኢአዘዞሙ፡ ለአበው፡ ቀደምት፡ ከመ፡ ኢይስተዩ፡ ወይነ፡ ለዝሉፉ፡ አላ፡ ይቤ፡ ኢትስተዩ፡ ወይነ፡ ለስካር

ወካዕበ፡ ይቤ፡ በመጽሐፍ፡ ለመኑ፡ አሌሎቱ፡ ወለመኑ፡ ተደምሮ፡ ወለመኑ፡ ተዐቅቦ፡ ወለመኑ፡ ድካም፡ ወእበድ፡ ወለመኑ፡ ይከውን፡ አዕይንቲሁ፡ በአምሳለ፡ ጥንፍሕ፡ ወለመኑ፡ ዘአልቦቱ፡ ምክንያተ፡ አኮኑ፡ ዝንቱ፡ ኵሉ፡ ለዘያበዝኅ፡ ሰቲየ፡ ወይን፡ ወይጐነዲ፡ ነቢረ፡ በሰቲዮታ፡ ረሐቁኬ፡ እምዝንቱ፡ ወተዐቀቡ፡ እምትሕዝብት፡ ወኢትግበሩ፡ ዘይሐሥመክሙ

[8] ፰። ትእዛዝ፡ በእንተ፡ እለ፡ ይሰደዱ፡ በእንተ፡ ሀይማኖቶሙ፡ ወይጐዩ፡ እምፍርሀተ፡ እለ፡ ይሰድድዎሙ

አይ፡ ፍሥሓ፡ ይከውን፡ ሎሙ፡ ኵሎሙ፡ እለ፡ ይሰደዱ፡ በእንተ፡ ሀይማኖቶሙ፡ ወይጐዩ፡ እምሀገር፡ ውስተ፡ ሀገር፡ ወይዜከሩ፡ ቃለ፡ ክርስቶስ፡ ዘይቤ፡ ሶበ፡ ይሰድዱክሙ፡ እምሀገር፡ ጕዩ፡ ውስተ፡ ካልእታ፡ እስመ፡ ትድኅኑ፡ እስመ፡ ነፍሶሙ፡ ኮነ፡ ጥቡዐ፡ በሀይማኖት፡ ወኮነ፡ ካዕበ፡ ሥጋሆሙ፡ ድኩመ፡ እምተዐግሦ፡ ለኵነኔ፡ ወጐዩ፡ ወተዐውቀ፡ ንጽሐ፡ ኅሊናሆሙ፡ እስመ፡ ተዐገሡ፡ አህጕሎ፡ ንዋዮሙ፡ ወተበርብሮ፡ አብያቲሆሙ፡ ከመ፡ ኢይትሀጐል፡ ሀይማኖቶሙ፡ በክርስቶስ፡ ወመፍትው፡ ይርድእዎሙ፡ ለዘ፡ ከመ፡ እሉ፡ ከመ፡ ይፈጽሙ፡ ትእዛዘ፡ እግዚእነ፡ ወያጽንዑ፡ ቦቱ

[9] ፱። ነገረ፡ ሐዋርያት፡ ቅዱሳን፡ በእንተ፡ ዐቂበ፡ ሥርዐተ፡ መዓርገ፡ ክህነት

ንሕነ፡ ንኤዝዘክሙ፡ ኦካህናት፡ እለ፡ ተአመንክሙ፡ ግብረ፡ ሰማያዊ፡ ዘመላእክት፡ ግሙራ፡ ኢታስትቱ፡ መኃድሪክሙ፡ ወጸጋ፡ ዘተተከልክሙ፡ ላቲ፡ ወይኩን፡ ኵሉ፡ ለለ፡ አሐዱ፡ እምኔክሙ፡ ውስተ፡ ግብር፡ ዘኀረዮ፡ እግዚአብሔር፡ ላቲ። ወዛቲ፡ ይእቲ፡ ትእዛዘ፡ እግዚአብሔር፡ ዘይቤ፡ ኵሉ፡ ሀብት፡ ሠናይ፡ ወጸጋ፡ መንፈሳዊት፡ እምላዕሉ፡ ይእቲ፡ እምአበ፡ ብርሃን፡ ይከውን። ወይቤለነ፡ እግዚእነ፡ ክርስቶስ፡ ዘኪያክሙ፡ ሰምዐ፡ ኪያየ፡ ሰምዐ፡ ወዘኪያየ፡ ሰምዐ፡ ሰምዖ፡ ለዘፈነወኒ፡ ወዘዐመፀክሙ፡ ኪያየ፡ ዐመፀ

ወእመሰ፡ እለ፡ አልቦሙ፡ ኅሊና፡ ወልበ፡ የዐቅቡ፡ ግብሮሙ፡ ወሥርዐቶሙ፡ በዘተአዘዙ፡ ናሁ፡ ሌሊት፡ ትዴግኖ፡ ለመዐልት፡ ዐቂባ፡ ትእዛዘ፡ ወግብራ፡ ወፀሓይ፡ ይዴግኖ፡ ለወርኅ፡ በከመ፡ ተአዘዘ፡ ወከዋክብት፡ ወአዝማናት፡ ወማእዝንት፡ ወፍልጠታት፡ ወአውራኅ፡ ወሱባዕያት፡ ወዕለታት፡ ወሰዐታት፡ ወይነብሩ፡ በበኆልቆሙ፡ አላ፡ በከመ፡ ተብህለ፡ በመጽሐፍ፡ እግዚአብሔር፡ ወሀቦሙ፡ ትእዛዘ፡ ወኢኀለፉ። ወካዕበ፡ ይቤ፡ በእንተ፡ ባሕር፡ እግዚአብሔር፡ ወሀባ፡ ትእዛዘ፡ ወቀጸራ፡ በአረፍት፡ ወአናቅጽ፡ ወይቤላ፡ ብጽሒ፡ ዝየ፡ ባሕቱ፡ ወኢትኅልፊ፡ ሚመጠንኪ፡ ይደልወክሙ፡ ኢትትቈጥዑ፡ ወኢትዘኀሩ፡ በምንትኒ፡ እምዘ፡ ሠርዑ፡ ለክሙ፡ ወአዘዘክሙ፡ እግዚአብሔር፡ ቦቱ

ወባሕቱ፡ በእንተ፡ ብዙኃን፡ እለ፡ ያሰትቱ፡ ዘንተ፡ ሥርዐተ፡ ወይዌልጥዎ፡ ወይትዔበዩ፡ ወይመትሩ፡ መኣስረ፡ ክህነት፡ ወይነሥኡ፡ መዓርገ፡ ዘኢይከውኖሙ፡ በጽድቅ፡ ወኢእግዚአብሔር፡ ወሀቦሙ፡ ውእቱ፡ ወኮኑ፡ ዐላዊያነ፡ እግዚአብሔር፡ ከመ፡ ሰብአ፡ ቆሬ፡ በዕልወቶሙ፡ እለ፡ ተዐደዉ፡ ትእዛዘ፡ ኦሪት፡ ወከመ፡ ዖዝያን፡ ንጉሥ፡ ዘሠርዐ፡ ዘእንበለ፡ መባሕት፡ ወኢሀብት፡ እምኀበ፡ እግዚአብሔር፡ ወረሰየ፡ ርእሶ፡ ካህነ፡ ወደቂቀ፡ ቆሬሰ፡ ውዕዩ፡ በእሳት፡ ወለዖዝያንሰ፡ አልበሶ፡ ልብሰ፡ ለምጽ

ወኵሉ፡ ዘገብረ፡ ከማሆሙ፡ ውእቱ፡ ያምዕዖ፡ ለክርስቶስ፡ ዘአዘዘ፡ ሠናየ፡ ግብረ፡ ወከማሁ፡ መንፈስ፡ ቅዱስ፡ እስመ፡ የኀሥሡ፡ ስምዐ፡ ላዕለ፡ ርእሶሙ፡ ወከማሁ፡ ይነሥኡ፡ ኵነኔ፡ በርቱዕ፡ ወይከውን፡ ላዕሌሆሙ፡ መርገም፡ እምኀበ፡ እግዚአብሔር፡ እስመ፡ ይሬኢዩ፡ ዘይከውን፡ እንከ፡ በእንተ፡ አስትቶ፡ በቍርባን፡ ዘያቀርቡ፡ ለዘ፡ ኢይደልዎ፡ ወይመስሎሙ፡ ክህነት፡ ከመ፡ ተውኔት፡ ወኢያአምሩ፡ ከመ፡ ይእቲ፡ አምሳለ፡ ክህነቱ፡ ለክርስቶስ፡ አምላክነ። ወእምይእዜሰ፡ ለዘኮነ፡ ከመ፡ ዘነገርናክሙ፡ በተዐድዎ፡ ላዕለ፡ ዝንቱ፡ ኢይረክብ፡ ክፍለ፡ እስመ፡ ኢጽህቀ፡ ይዕቀብ፡ ክህነተ፡ ወይንግር፡ ለሰብእ፡ ከመ፡ ዘሀለዉ፡ ይግብኡ፡ ውስተ፡ ምክሩ፡ ለአህጕሎቱ

ሙሴኒ፡ ገብሩ፡ ለእግዚአብሔር፡ ዘየዐቢ፡ እምነቢያት፡ ዘተናገሮ፡ እግዚአብሔር፡ ገጸ፡ በገጽ፡ ከመ፡ ዘይትናገር፡ ብእሲ፡ ለካልኡ፡ ወይቤሎ፡ ናሁ፡ እሬኢየከ፡ ዕዉቅ፡ በማእከለ፡ ሰብእ። ወኢያስተርአዮ፡ በለሖሳስ፡ ወኢበሕልም፡ ወኢበትሕዝብት፡ ወኢበመልእክተ፡ መላእክት፡ አላ፡ በጸጋሁ፡ ላዕለ፡ ገብሩ፡ ወከመዝ፡ ሠርዐ፡ ሕገ፡ ዘነሥአ፡ እምኀበ፡ እግዚአብሔር

ወፈለጠ፡ ባቲ፡ በዘይደልዎ፡ ለሊቀ፡ ካህናት፡ ወለካህናት፡ በዘይደልዎሙ፡ ይግበሩ፡ ሌዋዊያን፡ ወከፈለ፡ በኵሉ፡ ክፍል፡ እምኔሁ፡ ወዘከመ፡ ይደሉ፡ ለመጋቤ፡ ምኵራብ፡ በመልእክቱ፡ ወቀዊም፡ ቦቱ። ወዘኮነ፡ እምግብረ፡ ሊቃነ፡ ካህናት፡ ኢይቀርብዎ፡ ካህናት፡ ወኢአዘዞሙ፡ በውእቱ፡ ሕግ፡ ወኵሉ፡ ዘኮነ፡ ግብረ፡ ካህናት፡ ኢይቀርብዎ፡ ሌዋዊያን። ዳእሙ፡ ለኵሉ፡ ዘመድ፡ እምኔሆሙ፡ ዐቃቢ፡ ዘየዐቅብ፡ ወለሊሁሰ፡ የዐቅብ፡ በዘተአዘዘ፡ በዐቅም፡ እንዘ፡ ኢይትዐደው። ወኮነ፡ ኵሉ፡ ዘተዐደወ፡ በምንትኒ፡ እምውእቱ፡ ትእዛዝ፡ ይቀትልዎ

ወከማሁ፡ ተዐውቀ፡ እምነገረ፡ ሳኦል፡ ንጉሥ፡ እስመ፡ ሶበ፡ ሦዐ፡ እምአባግዐ፡ ዐማሌቅ፡ ወተዐደወ፡ ትእዛዘ፡ እግዚአብሔር፡ ወሥርዐቶ፡ ወረሰየ፡ ርእሶ፡ ዘያቀርብ፡ ቍርባነ፡ እንዘ፡ ኢሀሎ፡ ምስሌሁ፡ ሳሙኤል፡ ነቢይ፡ ዘኮነ፡ ሊቀ፡ ካህናት፡ ወሤመ፡ ርእሶ፡ ዘእንበለ፡ ሊቀ፡ ካህናት፡ ዘተውህበ፡ ሎቱ፡ ወወረደ፡ ላዕሌሁ፡ ውእቱ፡ ኀጢአት፡ ወመርገም፡ እስመ፡ ኢሰአሎ፡ ለነቢይ፡ ዘቀብኦ፡ መንግሥተ፡ ከመ፡ ያቅርብ፡ ቍርባነ፡ ህየንቴሁ፡ እስመ፡ ውእቱ፡ ኮነ፡ ካህነ፡ እግዚአብሔር፡ በአማን

ወአርአየ፡ እግዚአብሔር፡ ከመ፡ ውእቱ፡ በዖዝያን፡ ንጉሥ፡ በምግባሩ፡ በጊዜሃ፡ እስመ፡ ሶበ፡ ተዐደወ፡ ትእዛዘ፡ ወረደ፡ ላዕሌሁ፡ ኵነኔ፡ ወኮነ፡ ለምጸ፡ ወሶበ፡ ኮነ፡ ደፋሬ፡ ላዕለ፡ ክህነት፡ ዘኢይከውን፡ ሎቱ፡ ተሰልበ፡ መንግሥቱ፡ ዘያስተርኢ፡ ቦቱ፡ ወኮነ፡ ነኪረ፡ እምኔሁ፡ ወስዱድ፡ በኀቤሁ

ወዘኮነ፡ ነቢየ፡ ኢይትኀባእ፡ እምኔክሙ፡ እስመ፡ ታአምሩ፡ ከመ፡ ተሰምዩ፡ ነቢየ፡ ኤጲስ፡ ቆጶሳት፡ ወቀሳውስት፡ ወዲያቆናት፡ እለ፡ ጸለይነ፡ ላዕሌሆሙ፡ ወአንበርነ፡ እደዊነ፡ ላዕለ፡ ርእሶሙ፡ ከመ፡ ያጥርዩ፡ ሰማያዊተ፡ ወይምርሖሙ፡ ላዕለ፡ መዓርጊሆሙ። እስመ፡ አኮ፡ ኵሎ፡ ዕለተ፡ ዘይትገበር፡ ምቱረ፡ ሢመት፡ ወባሕቱ፡ ዘንገብር፡ ከመዝ፡ ለዘጸውዖ፡ እግዚአብሔር፡ ወሤመ፡ ወኮነ፡ ሰብአ፡ በምግባረ፡ ሠናይ፡ ወተኀርየ፡ ከመዝ

ወሶበሰ፡ ኢኮነ፡ ተኀርዮ፡ ወምግባር፡ ኢኮነ፡ ሕገ፡ ወሥርዐተ፡ እምአከለ፡ ይሰመይ፡ መዓርገ፡ ክህነት፡ በአሐዱ፡ ስም። ወባሕቱ፡ በከመ፡ ተመሀርነ፡ እምእግዚእነ፡ ሥርው፡ ለኵሉ፡ ምግባር፡ ወበእንተዝ፡ አዕበይናሁ፡ ለኤጲስ፡ ቆጶስ፡ በሢመተ፡ ክህነት፡ ወለቀሲስ፡ ሰባኬ፡ ወለዲያቆን፡ ይትለአክ፡ ለክልኤሆሙ፡ ከመ፡ ይትፈጸም፡ ግብረ፡ ቤተ፡ ክርስቲያን፡ በንጹሕ

እስመ፡ ኢይደልዎ፡ ለዲያቆን፡ ያቅርብ፡ ቍርባነ፡ በእዴሁ፡ ወኢያጥምቅ፡ ጥምቀተ፡ ወኢይባርክ፡ ለሕዝብ፡ ካዕበ፡ ቡራኬ፡ ዐቢየ፡ ወንኡሰ። ወቀሳውስትሰ፡ ኀቤሆሙ፡ ይትፈጸም፡ ሢመት፡ እስመ፡ ኢይደልዎ፡ ይሚጥ፡ ሥርዐተ፡ ወከማሁ፡ ትእዛዘ፡ እግዚአብሔር፡ ተባረከ፡ ወተላዐለ፡ ስሙ፡ ወኢይከውን፡ ዘእንበለ፡ ሥርዐት፡ አላ፡ በሠናይ፡ ሥርዐት፡ ወበትእዛዝ፡ ከመ፡ ይኩኑ፡ ሐራ፡ መላእክት፡ ትሑታን፡ ወይትመጠዉ፡ ግብረ፡ ሐራ፡ ሰማይ፡ እለ፡ እሙንቱ፡ ይትሌዐሉ፡ እምኔሆሙ፡ ወይከውኑ፡ ሰራዊተ፡ በታሕቱ፡ በአርአያ፡ ሰራዊት፡ ዘበላዕሉ

ኵሉ፡ ዘገብረ፡ ዘኢአዘዝነ፡ ቦቱ፡ ወይነሥእ፡ መዓርገ፡ ዘይትሌዐል፡ እምኔሁ፡ ወገብረ፡ ለርእሱ፡ በፈቃዱ፡ ሕገ፡ ሐዲሰ፡ ወያእምር፡ ከመ፡ ያመክዕብ፡ ላዕለ፡ ነፍሱ፡ ኵነኔ፡ እምኀበ፡ እግዚአብሔር፡ አምላክነ፡ ወነገርነ፡ ኵነኔሆሙ፡ በሳድስ፡ መጽሐፍነ፡ ኀበ፡ ሀሎ፡ ሥርዐተ፡ ኵነኔ፡ እስመ፡ አኮ፡ ለነ፡ ዘይትቃረኑነ፡ ወኢለአሐዱ፡ እምኤጲስ፡ ቆጶሳት፡ ወባሕቱ፡ ይትቃረንዎ፡ ለኤጲስ፡ ቆጶስ፡ ዘየዐቢ፡ ዘውእቱ፡ ዘይሬኢ፡ ኵሎ፡ ወለቤተ፡ ክርስቲያን፡ በኵሉ፡ ጊዜ፡ ዝውእቱ፡ ኢየሱስ፡ ክርስቶስ፡ አምላክነ

ሙሴሂ፡ መፍቀሬ፡ እግዚአብሔር፡ ዘአፍቀሮ፡ ለእግዚአብሔር፡ በጥዩቅ፡ አፍቅሮ፡ ሤሞ፡ ሊቀ፡ ካህናት፡ ወሌዋዊያን፡ ወክርስቶስ፡ መድኀኒነ፡ ሤመነ፡ ለነ፡ ለዐሠርቱ፡ ወክልኤቱ፡ ሐዋርያት፡ አነ፡ ፊልጶስ፡ ወአነ፡ ያዕቆብ፡ ወምስሌነ፡ ካልኣን፡ እለ፡ እሙንቱ፡ እሙራን፡ እምውስቴትነ፡ ሊቃነ፡ ካህናት፡ ሠለስቱ፡ ሰራዊት፡ ወካህናት፡ ወቀሳውስት፡ ሠለስቱ፡ ሰራዊት፡ ወዲያቆናት፡ ሠለስቱ፡ ሰራዊት፡ ምስለ፡ ዲያቆን፡ ወንፍቀ፡ ዲያቆን፡ ወአናጕንስጢስ

ወቀዳሚ፡ እምሰራዊት፡ ሊቀ፡ ካህናት፡ ውእቱ፡ ዋሕድ፡ ክርስቶስ፡ ዘኢመሠጠ፡ ለርእሱ፡ ክህነተ፡ ወባሕቱ፡ አብ፡ ዘሤሞ፡ ካህነ፡ ለዓለም፡ እስመ፡ አመ፡ ኮነ፡ ሰብአ፡ ከማነ፡ ወአቅረበ፡ ነፍሶ፡ ለእግዚአብሔር፡ መሥዋዕተ፡ መንፈሳዊተ፡ ለሊሁ፡ በእዴሁ፡ ወውእቱ፡ ወልድ፡ አዘዘነ፡ ለነ፡ ለባሕቲትነ፡ ከመ፡ ንግበር፡ ከማሁ፡ እንዘ፡ ሀሎ፡ ምስሌነ፡ በዐቢይ፡ ምሥጢር፡ እንዘ፡ ነአምን፡ ቦቱ

ወአኮ፡ ኵሉ፡ ዘአምነ፡ ቦቱ፡ ይሠየም፡ ካህነ፡ በአማን፡ አው፡ ይሠየም፡ ሊቀ፡ ካህናት፡ ወባሕቱ፡ ንሕነ፡ እምድኅረ፡ ዐርገ፡ ውስተ፡ ሰማይ፡ አቅረብነ፡ በከመ፡ አዘዘነ፡ መሥዋዕተ፡ ንጹሐ፡ ዘእንበለ፡ ደም፡ ወሤምነ፡ እምውስቴትነ፡ ኤጲስ፡ ቆጶሳተ፡ ወቀሳውስተ፡ ወዲያቆናተ፡ እለ፡ ኮኑ፡ ሰብዐቱ፡ ዘእምኔሆሙ፡ እስጢፋኖስ፡ ወፊልጶስ፡ ወአኖኮሮን፡ ወኒቃሮና፡ ወጢሞና፡ ወጴርሞና፡ ወኒቃለዎሙ፡ እሉ፡ ሰብዐቱ፡ ዲያቆናት

እስመ፡ ኮነ፡ አሐዱ፡ እምኔነ፡ በፍቅረ፡ እግዚአብሔር፡ ወፈድፋደ፡ አርአየ፡ በፍርሀተ፡ እግዚአብሔር፡ ወፍቅረ፡ እግዚእነ፡ ክርስቶስ፡ እስመ፡ ለሊሁ፡ መጠወ፡ ነፍሶ፡ ወከዐወ፡ ደሞ፡ ወወሀበ፡ ሕይወቶ፡ ለአይሁድ፡ ቀታልያን፡ ወወገርዎ፡ በእብን፡ ወቀተልዎ። ወእምዝ፡ መንክር፡ በኀቤሁ፡ ወእንዘ፡ ሀሎ፡ ከመዝ፡ ወኮነ፡ ሥራኀ፡ በመንፈስ፡ እስከ፡ ጊዜ፡ ወገርዎ፡ ርእየ፡ አናቅጸ፡ ሰማይ፡ ርኅወ፡ ወርእዮ፡ ለክርስቶስ፡ እግዚእነ፡ እንዘ፡ ይነብር፡ በየማነ፡ አብ፡ ወውእቱ፡ ኮነ፡ በኂሩቱ፡ ወየውሀቱ፡ እስከ፡ ርእየ፡ ዘንተ

ወኢተዐደወ፡ እመዓርጊሁ፡ ወኢእመልእክቱ፡ ወኢያቅረበ፡ ቍርባነ፡ ወኢያንበረ፡ እዴሁ፡ ላዕለ፡ መኑሂ፡ ወኢባረከ፡ ብእሴ፡ ወባሕቱ፡ ዐቀበ፡ ግብረ፡ ዲያቆን፡ እስከ፡ አመ፡ ይመውት፡ ወባቲ፡ በጽሐ፡ ኀበ፡ እግዚአብሔር። ወዮጊ፡ ዝንቱ፡ ውእቱ፡ ዘይኄይስ፡ ወይሤኒ፡ ከመ፡ ይኩን፡ ከማሁ፡ ወይዕቀቡ፡ ሠናየ፡ ሥርዐተ

እስመ፡ ተዐውቀ፡ ነገሩ፡ በላዕለ፡ ፊልጶስ፡ ወሐናንያ፡ ወይቤ፡ ከመ፡ ፊልጶስ፡ አጥመቆ፡ ለገብረ፡ ንግሥተ፡ ኢትዮጲያ፡ ወሐናንያ፡ አጥመቆ፡ ለጳውሎስ፡ ወንሕነ፡ ንብል፡ ወአቅደምነ፡ ትእዛዘ፡ ወአዘዝነ፡ ከመ፡ ኢመፍትው፡ ለመኑሂ፡ እምሰብእ፡ ይምሥጥ፡ ሢመተ፡ ክህነት፡ ለርእሱ፡ አላ፡ ለእመ፡ ተውህበ፡ እምእግዚአብሔር። በከመ፡ መልከጼዴቅ፡ ካህን፡ ወያዕቆብ፡ እኁሁ፡ ለእግዚእነ፡ እለ፡ ነሥኡ፡ ክህነተ፡ እምኀበ፡ እግዚአብሔር፡ አው፡ ይነሥእ፡ ዘይነሥእ፡ እምሊቀ፡ ካህናት፡ ከመ፡ አሮን፡ ዘተወክፈ፡ ክህነተ፡ እሙሴ፡ በከመ፡ አዘዞ፡ እግዚአብሔር

ናሁ፡ ተዐውቀ፡ እምነገረ፡ ዝንቱ፡ ከመ፡ ፊልጶስ፡ ወሐናንያ፡ እለ፡ አቅደምነ፡ ነጊረ፡ ኢመሠጡ፡ ለርእሶሙ፡ ወኢምንተኒ፡ ወባሕቱ፡ ተፈነዉ፡ ለአጥምቆ፡ ወተወክፉ፡ ክህነተ፡ እምሊቀ፡ ካህናት፡ ዘውእቱ፡ ኢየሱስ፡ ክርስቶስ፡ ዘአልቦ፡ ዘይመስሎ፡ ወአልቦ፡ ዘይትኀባእ፡ እምኔሁ፡ ወአልቦ፡ ዘይትዐረይ፡ ምስሌሁ፡ ዘሎቱ፡ ስብሐት፡ ወዕበይ፡ ወክብር፡ እስከ፡ ለዓለም፡ አሜን

[10] ፲። ትእዛዝ፡ ዘጳውሎስ፡ በእንተ፡ እለ፡ ይመጽኡ፡ ኀበ፡ ምሥጢርነ። አነ፡ ጳውሎስ፡ ንኡስ፡ እምሐዋርያት፡ እኤዝዘክሙ፡ ዘንተ፡ ሥርዐተ፡ ዐሠርቱ፡ ወኀምስቱ

[10.1] ፩፡ ትእዛዝ። ኵሉ፡ ዘአፍቀረ፡ ይደመር፡ ምስሌነ፡ ወይሳተፍ፡ በነፍሱ፡ ውስተ፡ ምሥጢርነ፡ ይደልዎሙ፡ ያምጽኦሙ፡ ዲያቆን፡ ኀበ፡ ቀሲስ፡ አው፡ ኀበ፡ ኤጲስ፡ ቆጶስ፡ ወይስአሎሙ፡ ኤጲስ፡ ቆጶስ፡ አው፡ ቀሲስ፡ በእንተ፡ ምንት፡ አፍቀሩ፡ በዊአ፡ ውስተ፡ ሕግነ፡ ወይኩን፡ ዲያቆን፡ ዘይጌሥጾሙ፡ ወይሕትት፡ በእንተ፡ ግብሮሙ፡ ወይርአይ፡ ውስተ፡ ምክሮሙ፡ ወይስአል፡ በእንተ፡ ሠናይ፡ ሥርዐቶሙ፡ ወለእመ፡ ኮኑ፡ አግብርተ፡ አው፡ አግዓዝያነ። ወለእመቦ፡ እምኔሆሙ፡ ገብር፡ ለብእሲ፡ መሀይምን፡ ይስአልዎ፡ ለውእቱ፡ መሀይምን፡ በእንቲአሁ፡ ለእመ፡ ኮነ፡ ሠናየ፡ ሥርዐቱ፡ ወለእመ፡ ስምዐ፡ ኮኖ፡ እግዚኡ፡ በኂሩቱ፡ ወበሠናይ፡ ፍናዊሁ፡ ይትወከፍዎ፡ እምድኅረ፡ ይሕትቶ፡ ዲያቆን፡ ወእመአኮ፡ ይቁም። ወለእመ፡ ኮነ፡ ገብረ፡ ለዘኢየአምን፡ በክርስቶስ፡ ይሴአልዎ፡ ለእግዚኡ፡ ወያእምርዎ፡ ለእመ፡ ሠናይ፡ ወኢይግበርዎ፡ ፍጡነ፡ ከመ፡ ኢይኩን፡ ለጋእዝ፡ ወለሙስና፡ አላ፡ ይኩን፡ ለሠናይ፡ ወለኂሩት

[10.2] ፪፡ ትእዛዝ። ወለእመ፡ ኮነ፡ ብእሲ፡ ዘቦ፡ ብእሲተ፡ አው፡ ብእሲተ፡ እንተ፡ ባቲ፡ ምተ፡ ይምሀርዎሙ፡ ከመ፡ ይትዐገሡ፡ በበይናቲሆሙ። ወለእመ፡ ኮኑ፡ ዘኢያውሰቡ፡ ይምሀርዎሙ፡ ወይገሥጽዎሙ፡ ከመ፡ ኢይዘምው፡ አላ፡ ያውስቡ፡ ዘበሕግ፡ በከመ፡ አዘዝነ። ወለእመ፡ ኮነ፡ እግዚኡ፡ መሀይምን፡ ወያአምር፡ ከመ፡ ይዜሙ፡ ወኢያስተዋስቦ፡ አው፡ ቦቱ፡ አመተ፡ መፍቀሪተ፡ ዝሙት፡ ኢያስተዋስቦሙ፡ ወእመአኮ፡ ይስዐር፡ ወይሰደድ

[10.3] ፫፡ ትእዛዝ። ወለእመቦ፡ ብእሲ፡ ዘቦ፡ ጋኔን፡ ወአፍቀረ፡ ይባእ፡ ውስተ፡ ሕግነ፡ ይምሀርዎ፡ ፈሪሀ፡ እግዚአብሔር፡ ቀዲሙ፡ ወይፈውስዎ፡ ወኢይቅረብ፡ ቍርባነ፡ እስከ፡ ይነጽሕ፡ ወይሐውር፡ እምኔሁ፡ ጋኔኑ። ወለእመ፡ ቀርቦ፡ ሞት፡ ይትወከፍዎ፡ ወይስረዩ፡ ሎቱ፡ ወያቅርብዎ

[10.4] ፬፡ ትእዛዝ። እመቦ፡ ብእሲ፡ ዘይነብር፡ በዝሙት፡ ወገብረ፡ ውእተ፡ ልማዶ፡ ይገሥጽዎ፡ ወይትመየጥ፡ ወይኅድግ፡ ርስሐተ፡ ወኀጢአተ፡ ወይግባእ፡ ወለእመ፡ ኢገብረ፡ ዘንተ፡ ይሰደድ

[10.5] ፭፡ ትእዛዝ። ወከማሁ፡ ኵሉ፡ ብእሲት፡ ዘማዊት፡ እመሂ፡ ትኅድግ፡ ዝሙታ፡ ወትትመየጥ፡ ወእመአኮ፡ ትሰደድ

[10.6] ፮፡ ትእዛዝ። እመቦ፡ ብእሲ፡ ዘይገብር፡ ጣዖተ፡ ወግልፎ፡ ዘእብን፡ አው፡ ዕፅ፡ አው፡ ብርት፡ ካዕበ፡ ወዘኀጺን፡ ወዘወርቅ፡ ወዘብሩር፡ ለእመ፡ ቦአ፡ ምስሌነ፡ ውስተ፡ ሕግነ፡ ይኅድግ፡ ግብሮ፡ ወእመ፡ አኮ፡ ይሰዐር

[10.7] ፯፡ ትእዛዝ። እመቦ፡ ብእሲ፡ አው፡ ብእሲት፡ እምነኪራን፡ ወይፈቅዱ፡ ይባኡ፡ ውስተ፡ ሕግነ፡ ለእመ፡ ኮነ፡ ብእሲ፡ መስተሓምም፡ አው፡ ሠዓሊ፡ አው፡ ሰካሪ፡ አው፡ ተጠያሪ፡ አው፡ ዘይትዋነይ፡ አው፡ ዘይሜህር፡ ማሕሌተ፡ አው፡ ዘይመርሕ፡ ኀበ፡ ዝሙት፡ ለይኅድጉ፡ ግብሮሙ። ወከማሁ፡ ብእሲት፡ ለእመ፡ ኮነት፡ ተጠባቢተ፡ አው፡ መራሒተ፡ ለዝሙት፡ አው፡ ተዋናዪተ፡ አው፡ መዐንዘሪተ፡ አው፡ ዘፋኒተ፡ አው፡ ሐላዪተ፡ አው፡ ዘትሜህር፡ ከማሁ፡ አው፡ ዘይወድዩ፡ ማእከለ፡ ሰብእ፡ እከየ፡ ወጸልአ፡ አው፡ መስተዋዲያነ፡ አው፡ ዘይመስሎ፡ ለዝንቱ፡ እምእሉ፡ ምግባር፡ ይግድፍዎ፡ ወይነስሑ፡ ወይሖሩ፡ ፍኖተ፡ መሀይምናን፡ ወእመአኮ፡ ኢይትወከፍዎሙ

[10.8] ፰፡ ትእዛዝ። እመቦ፡ ብእሲ፡ እምሐራ፡ ወቦአ፡ ውስተ፡ ሕግነ፡ ለይኅድግ፡ ሀዪደ፡ ወትዕግልተ፡ ወአስተዋድዮ፡ ወተዐድዎ፡ ወእበደ። ወይንበር፡ በሲሳዩ፡ ወለእመ፡ ኀደገ፡ ዘንተ፡ ምግባረ፡ ይትወከፍዎ፡ ወእመአኮ፡ ይሰደድ

[10.9] ፱፡ ትእዛዝ። እመቦ፡ ብእሲ፡ ዘአውሰበ፡ ብእሲተ፡ መሀይምንተ፡ ወይገብር፡ እኩየ፡ በሥጋሁ፡ አው፡ ዝሙተ፡ አው፡ ኢኀፋሪ፡ አው፡ መሠሪይ፡ አው፡ ረቃይ፡ አው፡ ያስተጋብእ፡ መናፍስተ፡ አው፡ ረኣየ፡ ኮከብ፡ አው፡ ማሪ፡ በዐይን፡ አው፡ ተማሕፃኒ፡ አው፡ ሰባኪ፡ አው፡ ዘሕሡም፡ ቃል፡ አው፡ ዘይነግር፡ በትእምርት፡ ወገጹ፡ ኀበ፡ አስሕቶ፡ አው፡ ተጠያሪ፡ በዖፍ፡ አው፡ ዘየኀትም፡ ዲበ፡ እደዊሁ፡ ወእገሪሁ፡ በመርፍእ፡ ያቀጥን፡ ወያቀይሕ፡ ወይጽሕፍ፡ ላዕሌሁ፡ ዘውዐ፡ አው፡ በፋል፡ በእንተ፡ ድምፅ፡ ዘሰምዐ፡ አው፡ ነገር፡ አው፡ በዘርእየ፡ አው፡ በትሕዝብት፡ ዘይትአመር። እስመ፡ ዝንቱ፡ ኵሉ፡ ኀበ፡ ዕልዋን፡ ወረሲዓን፡ ወቦሙ፡ መጻሕፍተ፡ በከመ፡ ይመስሎሙ፡ ዘያአምሩ፡ በእንተ፡ ሕይወት፡ ወሞት፡ ወኢይትወከፍዎሙ፡ ውስተ፡ ሕግነ፡ እስከ፡ የሐትትዎሙ፡ ወይፈትንዎሙ፡ ለእመ፡ ነስሑ፡ በእንተ፡ ዘኮነ፡ እምኔሆሙ፡ ወለእመ፡ ኀደጉ፡ ወተመይጡ፡ ይትወከፍዎሙ፡ ወእመአኮ፡ ይሰደዱ

[10.10] ፲፡ ትእዛዝ። እመቦ፡ ዕቅብተ፡ ለብእሲ፡ ዘኢይአምን፡ ለእመ፡ ዐቀበት፡ ርእሳ፡ ሎቱ፡ ለባሕቲቱ፡ ይትወከፍዋ፡ ወለእመ፡ ነሥአት፡ ካልአ፡ ትትመነን

[10.11] ፲፩፡ ትእዛዝ። እመቦ፡ ብእሲ፡ ዘኮነ፡ ከማነ፡ ወቦአ፡ ውስተ፡ ሕግነ፡ ወቦ፡ ዕቅብተ፡ አው፡ አመተ፡ ይትዐገሥ፡ እምኔሃ፡ እስመ፡ ክርስቲያናዊ፡ ውእቱ፡ ወያውስባ፡ ዘበሕግ፡ በከመ፡ አዘዝነ። ለእመ፡ እንከ፡ ያፈቅራ፡ ይጽሐፍ፡ ላቲ፡ መጽሐፈ፡ ግዕዛን፡ ቀዲሙ፡ ወድኅሬሁ፡ ያውስባ። ወለእመ፡ ኮነት፡ አግዓዚተ፡ ያውስባ፡ በሕግ። ወለእመ፡ ኢገብረ፡ ከማሁ፡ ይሰደድ

[10.12] ፲፪፡ ትእዛዝ። እመቦ፡ ብእሲ፡ እምኔነ፡ ወይገብር፡ እኩየ፡ አው፡ የአምን፡ አምሳሎሙ፡ ለአይሁድ፡ ወይገብር፡ ከማሆሙ፡ ለይኅድግ፡ ወይትመየጥ፡ ወእመአኮ፡ ይሰደድ

[10.13] ፲፫፡ ትእዛዝ። ዘይፈቅድ፡ እመሀይምናን፡ በክርስቶስ፡ ይኩን፡ ውስተ፡ ኆልቈ፡ እለ፡ ይገብሩ፡ ሠናየ፡ ወይፀመድ፡ በፅሙና፡ ወበንጽሕ፡ ያመክር፡ ርእሶ፡ ሠለስተ፡ ዐመተ። ወለእመ፡ ኮነ፡ ብእሲ፡ ዘቦቱ፡ ሞገሰ፡ መንፈሳዊ፡ ወኂሩተ፡ ንጹሐ፡ ይትወከፍዎ፡ እስመ፡ ዝንቱ፡ ግብር፡ ኢይከውን፡ በጊዜሃ፡ ፍጡነ፡ አላ፡ ይከውን፡ በሠናይ፡ ኅሊና፡ ወተፀምዶ፡ ወአመክሮ

[10.14] ፲፬፡ ትእዛዝ። እመቦ፡ ብእሲ፡ ዘይመይጦ፡ ፍትወቱ፡ ውስተ፡ ነጽሮ፡ ማሕሌት፡ አው፡ ይትመሀሩ፡ ቀትለ፡ አው፡ ይትጋደሉ፡ አው፡ ያስተዛብጡ፡ አባግዐ፡ ወዶርሆ፡ ምስለ፡ ካልኡ፡ አው፡ ኀበ፡ ይትመሀሩ፡ አፍራስ፡ ወነዲፈ፡ በሐጽ፡ ይኅድጉ፡ ዘንተ፡ ወይትመየጡ፡ እምኔሁ፡ ወይምትሩ፡ ዘንተ፡ ምግባረ፡ እስመ፡ ግብረ፡ አረሚ፡ ይእቲ፡ ወእመአኮ፡ ይሰደድ

[10.15] ፲፭፡ ትእዛዝ። እመቦ፡ ሕዝባዊ፡ ዘይሜህር፡ ሰብአ፡ ለሠናይ፡ ይኩን፡ ፅምወ፡ በቃሉ፡ ወኄረ፡ በሥጋሁ፡ ወኢይዘኀር፡ ወይኩን፡ ራትዐ፡ በልሳኑ፡ ወእምዝ፡ ይምሀር፡ ለሰብእ፡ እምድኅረ፡ ውእቱ፡ እስመ፡ እግዚእነ፡ ይቤ፡ በወንጌል፡ ቅዱስ፡ ቅድመ፡ አውፅእ፡ ሰርዌ፡ ወሐሠረ፡ እምዐይንከ፡ ወእምዝ፡ አውፅእ፡ እምዐይነ፡ እኁከ፡ ወበእንተ፡ ኂሩት፡ ይብል፡ ወይከውኑ፡ ምሁራነ፡ እምኀበ፡ እግዚአብሔር።