Song of Songs

Text of the EOTC printed Bible

1 ይስዕመኒ፡ በስዕመተ፡ አፉሁ። አዳም፡ አጥባትኪ፡ እምወይን። ወመዐዛ፡ ዕፍረትኪ፡ እምኵሉ፡ አፈው። ዕፍረት፡ ዘተሰውጠ፡ ስምከ። ወበእንተዝ፡ ደናግል፡ አፍቀራከ። ወሰሐባከ፡ ድኅሬከ። በመዐዛ፡ ዕፍረትከ፡ ንረውጽ። አብአኒ፡ ንጉሥ፡ ውስተ፡ ጽርሑ። ንትፈሣሕ፡ ወንትሐሠይ፡ ብኪ። ናፍቅር፡ አጥባተኪ፡ እምወይን። ወርቱዕ፡ አፍቅሮትኪ። ጸላም፡ አነ፡ ወሠናይት፡ እምአዋልደ፡ ኢየሩሳሌም። ከመ፡ ምጽላላተ፡ ቄዳር፡ ወኀይመታተ፡ ሰሎሞን። ኢትርአያኒ፡ እስመ፡ አነ፡ ጸላም። እስመ፡ ኢርእየኒ፡ ፀሓይ። ደቂቀ፡ እምየ፡ ተባአሱ፡ በእንቲኣየ። አንበሩኒ፡ ዐቃቢተ፡ ዐጸደ፡ ወይን። ዐጸደ፡ ወይን፡ ዘዚኣየ፡ ኢዐቀብኩ። ንግረኒ፡ ዘአፍቀረት፡ ነፍስየ። አይቴ፡ ትሬዒ፡ ወአይቴ፡ ትሰክብ፡ ጊዜ፡ ቀትር። ከመ፡ ኢይኩን፡ እንዘ፡ ኣንጌጊ፡ ውስተ፡ መራዕየ፡ ካልኣኒከ። እመ፡ ኢያእመርኪ፡ ርእሰኪ፡ ሠናይት፡ እምአንስት። ፃኢ፡ አንቲ፡ ውስተ፡ ሰኰናሆሙ፡ ለመርዔት። ወረዐዪ፡ መሓስዐ፡ አጣሊኪ። ውስተ፡ አዕጻዳቲሆሙ፡ ለኖሎት። ለፈረስየ፡ ወለሠረገላተ፡ ፈርዖን። አስተማሰልኩኪ፡ እንተ፡ ኀቤየ። ጥቀ፡ አዳም፡ መላትሕኪ፡ ከመ፡ ማዕነቅ። ወክሣድኪ፡ ከመ፡ አርማስቆስ። አምሳለ፡ ወርቅ፡ ይግበሩ፡ ለኪ፡ ኰሰኰሰ፡ ዘብሩር። እስከ፡ ሶበ፡ ንጉሥ፡ ያሰምክ፡ ቦቱ። ናርዶስ፡ ወሀበ፡ መዐዛሁ። ዕቊረ፡ ማየ፡ ልብን፡ ዘወልድ፡ እኍየ፡ ሊተ። ማእከለ፡ አጥባትየ፡ የዐርፍ። አስካል፡ ዘጸገየ፡ ዘወልድ፡ እኍየ፡ ሊተ። ውስተ፡ ዐጸደ፡ ወይን፡ ዘበጋዲ። ነያ፡ ሠናይት፡ እንተ፡ ኀቤየ፡ ነያ፡ ሠናይት። አዕይንትኪ፡ ዘርግብ። ናሁ፡ ሠናይ፡ አንተ፡ ወልድ፡ እኁየ። አዳም፡ በውስተ፡ ምስካቢነ፡ ዘበሕቊ። ወመዋጽሕት፡ ቤትነ፡ ዘአርዝ። ወመሥዕርቲነ፡ ዘሕቊ።

2 አነ፡ ጽጌ፡ ገዳም። ጽጌ፡ ደንጐላት፡ ዘውስተ፡ ቈላት። ወከመ፡ ጽጌ፡ ደንጐላት፡ በማእከለ፡ አሥዋክ። ከማሁ፡ አንቲኒ፡ እንተ፡ ኀቤየ፡ በማእከለ፡ አዋልድ። ወከመ፡ ኮል፡ ዘውስተ፡ ዕፀወ፡ ገዳም። ከማሁ፡ ዘኣፈቅር፡ በማእከለ፡ አኀው። ታሕተ፡ ጽላሎቱ፡ ፈተውኩ፡ ወነበርኩ። ወፍሬሁኒ፡ ጥዑም፡ ለጕርዔየ። አብኡኒ፡ ቤተ፡ ወይን። ገብሩ፡ ላዕሌየ፡ ፍቅረ። አጽንዑኒ፡ በዕፍረት። ሰደቁኒ፡ በአክዋል። እስመ፡ ተነደፍኩ፡ በፍቅሩ። የማኑ፡ ተሐቅፈኒ፡ ወፀጋሙ፡ ታሕተ፡ ርእስየ። አመሐልኩክን፡ አዋልደ፡ ኢየሩሳሌም። በኀይሉ፡ ወበጽንዑ፡ ለገዳም። አመ፡ ተንሥአ፡ ወአንሥአ፡ ኵሎ፡ ሙታነ። አፈቅሮ፡ እስከ፡ አመ፡ ፈቀደ። ቃል፡ ወልድ፡ እኁየ፡ ናሁ፡ ውእቱ፡ መጽአ። እንዘ፡ ይቀንጽ፡ ማዕከለ፡ አድባር። ወያንበሰብስ፡ ዲበ፡ አውግር። ይመስል፡ ወልድ፡ እኁየ፡ ከመ፡ ወይጠል። ወከመ፡ ወሬዛ፡ ሀየል፡ ውስተ፡ አድባረ፡ ቤቴል። ናሁ፡ ውእቱ፡ ይቀውም፡ ድኅረ፡ አረፍት። ወይሔውጽ፡ እንተ፡ መሳክው። ወይደንን፡ እንተ፡ ተድባብ። ያወሥእ፡ ወልድ፡ እኁየ፡ ወይብለኒ። ተንሥኢ፡ ወንዒ፡ ቅርብትየ፡ እንቲኣየ፡ ሠናይት፡ ርግብየ። እስመ፡ ናሁ፡ ክረምት፡ ኀለፈ። ወዝናም፡ ገብአ፡ ለሊሁ። ጽጌ፡ አስተርአየ፡ በውስተ፡ ምድርነ። ጊዜ፡ ገሚድ፡ በጽሐ። ቃለ፡ ማዕነቅ፡ ተሰምዐ፡ በምድርነ። በለስ፡ አውፅአ፡ ሠርጸ። አውያን፡ ጸገዩ፡ ወወሀቡ፡ መዐዛ። ተንሥኢ፡ ወንዒ፡ ቅርብትየ። እንቲኣየ፡ ሠናይት፡ ርግብየ። ውስተ፡ ጽላሎተ፡ ኰኵሕ፡ ቅሩበ፡ ጥቅም። አርእየኒ፡ ገጸከ፡ ወአስምዐኒ፡ ቃለከ። እስመ፡ ቃልከ፡ አዳም፡ ወገጽከ፡ ላህይ። አሥግሩ፡ ለነ፡ ቈናጽለ፡ ንኡሳነ፡ እለ፡ ያማስኑ፡ ዐጸደ፡ ወይንነ። ዐጸደ፡ ወይንነ፡ ይጽጊ። ወልድ፡ እኁየ፡ ሊተ፡ ወአነ፡ ሎቱ። መኑ፡ ይትዓደዎ፡ ለወልድ፡ እኁየ። እስመ፡ ልዑል፡ መዝራዕተ፡ የማኑ። ዘይትረዐይ፡ ውስተ፡ ጽጌያት። እስከ፡ ሶበ፡ ያስተነፍስ፡ ዕለት፡ ወያንቀለቅል፡ ጽላሎት። ተመየጥ፡ አንተ፡ ወልድ፡ እኁየ፡ ወተመሰላ፡ ለወይጠል። ወይርአያከ፡ አዋልደ፡ ኢየሩሳሌም። ወንበር፡ ዲበ፡ ሳሬል። ወዲበ፡ አርባዕቱ፡ አርባብ።

3 ወከመ፡ ወሬዛ፡ ሀየል፡ ውስተ፡ አድባር፡ ድኁኃን። ቅንጽ፡ አንተ፡ ወልድ፡ እኁየ፡ ከመ፡ ወይጠል። በዐራትየ፡ ወበለያልይየ። አኀሥሥ፡ ዘአፍቀረት፡ ነፍስየ። ኀሠሥክዎ፡ ወኢረከብክዎ። ጸዋዕክዎ፡ ወኢተሰጥወኒ። እትነሣእ፡ ወአዐውድ፡ ሀገረ። ውስተ፡ ምሥያጣት፡ ወውስተ፡ መራሕብት። እኅሥሥ፡ ዘአፍቀረት፡ ነፍስየ። ኀሠሥክዎ፡ ወኢረከብክዎ። ጸዋዕክዎ፡ ወኢተሰጥወኒ። ረከቡኒ፡ መዓቅብት፡ እለ፡ የዐቅቡ፡ ሀገረ። ርኢክሙኑ፡ ዘአፍቀረት፡ ነፍስየ። ንስቲተ፡ ኀሊፍየ፡ እምኔሆሙ። ይእተ፡ ጊዜ፡ ረከብኩ፡ ዘአፍቀረት፡ ነፍስየ። አኀዝክዎ፡ ወኢየኀድጎ። እስከ፡ ሶበ፡ አባእክዎ፡ ውስተ፡ ቤተ፡ እምየ። ወውስተ፡ ውሳጥያቲሃ፡ ለእንተ፡ ሐፀነተኒ። አምሐልኩክን፡ አዋልደ፡ ኢየሩሳሌም። በኀይሉ፡ ወበጽንዑ፡ ለገዳም። አመ፡ ተንሥአ፡ ወአንሥአ፡ ኵሎ፡ ሙታነ። ኣፈቅሮ፡ እስከ፡ አመ፡ ፈቀደ። መኑ፡ ይእቲ፡ ዛቲ፡ እንተ፡ ተዐርግ፡ እምገዳም። ከመ፡ ሠርጸ፡ ጢስ፡ ዕጥነታ። ወከመ፡ ደመና፡ ዘጠፈረ፡ ሰማይ። ክልኤ፡ አጥባትኪ፡ ያውኅዛ፡ ሐሊበ። ከርቤ፡ ወስኂን፡ እምኵሉ፡ ጸበለ፡ አፌኔዎስ። ናሁ፡ ዐራቱ፡ ለሰሎሞን። ስሳ፡ ኀያላን፡ ዐውዳ፡ እምኀያላነ፡ እስራኤል። ኵሎሙ፡ እኁዛነ፡ አስይፍት፡ ወምሁራነ፡ ቀትል። ብእሲ፡ ብእሲ፡ ሰይፉ፡ ዲበ፡ መንቅዕቱ። በድንጋፄ፡ ሌሊት። መጾረ፡ ገብረ፡ ለርእሱ፡ ንጉሥ፡ ሰሎሞን፡ እምዕፀወ፡ ሊባኖስ። አዕማዲሁ፡ ገብረ፡ ዘብሩር። ሰርዲኖስ፡ ምስለ፡ ተርሴስ። ኢዮጶሎግዮስ፡ ዘምስለ፡ ሶፎር። ምስማኩ፡ ዘወርቅ። መንበሩ፡ ዘሜላት። አቊላፊሁ፡ ወአቊላፊሁ፡ ኢያሴምር። ኅንብርቱ፡ ዘቢረሌ፡ ዘምስለ፡ ኢያሰጲድ፡ በባሕርይ፡ ክዱን። ውስጡ፡ ንጡፍ፡ በእብነ፡ ሰንፔር። ኣፈቅሮ፡ ፈድፋደ፡ እምአዋልደ፡ ኢየሩሳሌም። ፃኣ፡ ትርአያ፡ አዋልደ፡ ጽዮን። ለንጉሥ፡ ሰሎሞን። በአክሊል፡ ዘአስተቀጸለቶ፡ እሙ። አመ፡ ዕለተ፡ ሕማሙ፡ ወአመ፡ ዕለተ፡ ስቅለቱ። ወአመ፡ ዕለተ፡ መርዓሁ፡ ወአመ፡ ዕለተ፡ ፍሥሓ፡ ልቡ።

4 ነያ፡ ሠናይት፡ እንተ፡ ኀቤየ፡ ነያ፡ ሠናይት። አዕይንትኪ፡ ዘርግብ። ሥዕርትኪ፡ ከመ፡ መርዔተ፡ አጣሊ። እለ፡ ተከሥታ፡ እምአድባረ፡ ገለዓድ። ስነንኪ፡ ከመ፡ መራዕይ፡ እለ፡ ተቀርፃ። ወእለ፡ ወፅኣ፡ እምኅፃብ። ኵሎን፡ እለ፡ ይመነትዋ። ሰብዓ፡ ወሰብዐቱ፡ እለ፡ ይወልዳ። ወአልቦ፡ እምኔሆን፡ መካን። ከመ፡ ፍሕሶ፡ ቀይሕ፡ ከናፍርኪ። ንባብኪ፡ አዳም። ከመ፡ ቅርፍተ፡ ሮማን፡ መላትሕኪ፡ እንበለ፡ አርምሞትኪ። ወከመ፡ ማኅፈደ፡ ዳዊት፡ ክሣድኪ። እለ፡ ተሐንጻ፡ ዲበ፡ ተልፍዮስ። ዐሠርቱ፡ ምእት፡ ንዋየ፡ ሐቅል፡ ስቁል፡ ውስቴቱ። ኀበ፡ ኢይሬእዮ፡ ሰብእ፡ ወኢይበጽሖ፡ ፀሓይ። ወኵሉ፡ መዋፅፍተ፡ ቤቱ፡ ኀያላን። እለ፡ የአቅብዎ፡ ሠለስቱ፡ ዕደው። ክልኤ፡ አጥባትኪ፡ ከመ፡ ክልኤ፡ ዕጕለ፡ መንታ፡ ዘወይጠል። ዘይትረዐይ፡ ውስተ፡ ጽጌያት። እስከ፡ ሶበ፡ ያስተነፍስ፡ ዕለት፡ ወይትሐወስ፡ ጽላሎት። አሐውር፡ ለልየ፡ ኀበ፡ ደብረ፡ ከርቤ፡ ወውስተ፡ አውግረ፡ ስኂን። ወይትቀባዕ፡ እመዓዛሁ፡ አውልዐ፡ ገዳም። ወይበልዓሁ፡ አዕዋፈ፡ ቈላት፡ ወኢይመውታ። እስመ፡ ይሔድሳ፡ ውርዙቶን። ኵለንታኪ፡ ሠናይት፡ እንተ፡ ኀቤየ። አልብኪ፡ ነውር፡ ወኢምንትኒ፡ ላዕሌኪ። ንዒ፡ እምሊባኖስ፡ መርዓት፡ ንዒ፡ እምሊባኖስ። ንዒ፡ ወትወፅኢ፡ እምቅድመ፡ ሃይማኖት። ወታስተርእዪ፡ ውስተ፡ አድባረ፡ ጽባሕ። እምርእሰ፡ ሳኔር፡ ወኤርሞን። እንዘ፡ ትሰቀዪ፡ ጠለ። እምግበበ፡ አናብስት፡ ወእምአድባረ፡ አናምርት። አራኅራኅክኒ፡ እኅትየ፡ መርዓት። አራኅራኅክኒ፡ ምዕረ፡ በአዕይንትኪ። በአሐቲ፡ ንብረተ፡ ክሣድኪ። ሚ፡ አዳም፡ አጥባትኪ፡ እኅትየ፡ መርዓት። ሚ፡ አዳም፡ አጥባትኪ፡ እምወይን። ወመዐዛ፡ ዕፍረትኪ፡ እምኵሉ፡ አፈው። ጸቃውዕ፡ ይውሕዝ፡ እምከናፍርኪ። ሐሊብ፡ ወመዓር፡ እምታሕተ፡ ልሳንኪ። ወጼና፡ አልባስኪ፡ ከመ፡ ጼና፡ ስኂን። ገነት፡ ዕጹት፡ እኅትየ፡ መርዓት። ገነት፡ ዕጹት፡ ዐዘቅት፡ ኅትምት። ፍናወ፡ ዚኣኪ፡ ኀበ፡ ኢይሬእዮ፡ ኬንያ፡ ወኢይከርዮ፡ ሰራቂ። ገነት፡ ምስለ፡ ፍሬ፡ አቅማሕ። ሰንድሮስ፡ ዘምስለ፡ ጵርስቅላ። ቆዕ፡ ምስለ፡ ናርዶስ። ናርዶስ፡ ዘምስለ፡ መጽርይ። ቀጺመታት፡ ወቀናንሞስ። ምስለ፡ ኵሉ፡ ዕፀወ፡ ሊባኖስ። ከርቤ፡ ወዐልው፡ ምስለ፡ ኵሉ፡ መቅድመ፡ ዕፍረታት። ነቅዐ፡ ገነት፡ ዐዘቅተ፡ ማይ፡ ሕይወት፡ ዘይውሕዝ፡ እምሊባኖስ።

5 ተንሥእ፡ ሰሜን፡ ወነዐ፡ ደቡብ። ንፋኅ፡ ገነትየ። ለየሐዝ፡ አፈዋተ፡ ዚኣየ። ለይረድ፡ ወልድ፡ እኁየ፡ ውስተ፡ ገነቱ። ወይብላዕ፡ እምፍሬ፡ አቅማሒሁ። ቦእኩ፡ ውስተ፡ ገነትየ፡ እኅትየ፡ መርዓት። አረርኩ፡ ከርቤ፡ ምስለ፡ አፈዋትየ። በላዕኩ፡ ኅብስትየ፡ ምስለ፡ መዓርየ። ሰተይኩ፡ ወይንየ፡ ምስለ፡ ሐሊብየ። በልዑ፡ ካልኣንየ፡ ወጸግቡ። ሰትዩ፡ ወሉደ፡ አኀውየ፡ ወሰክሩ። እስመ፡ እንቡዛን፡ እሙንቱ። ወትእኅዞሙ፡ ቅንዓት፡ ከመ፡ ሰልብልያኖስ። ሐረገ፡ ወይን፡ ኮነ፡ መድኃኒትየ። ዘእምኀሢሦን፡ ይትገዘም፡ ወበጎልጎታ፡ ይተከል። አነ፡ ንዉም፡ ወልብየ፡ ንቅህት። ቃል፡ ወልድ፡ እኁየ፡ ይጐደጕድ፡ ኆኅተ። አርኅውኒ፡ እኅትየ፡ ካልእትየ፡ ርግብየ፡ ፍጽምት። ከመ፡ ፋፃ፡ ቀጢን፡ ወከመ፡ መሰንቆ፡ ሐዋዝ። ያስተፌሥሐኒ፡ በሰሚዖቱ። እስመ፡ ርእስየኒ፡ ምሉእ፡ ጠለ። ወድምድማየኒ፡ ነፍኒፈ፡ ሌሊት። አውፃእኩ፡ ልብስየ፡ እፎኑ፡ እለብሶ። ኀፀብኩ፡ እገርየ፡ እፎኑ፡ እጌምኖን። እስመ፡ ተሐፀብኩ፡ አነ፡ በስኂን፡ ወበአቅራኅዮን። ወልድ፡ እኁየ፡ ፈነወ፡ እዴሁ፡ እንተ፡ ስቊረት። እስመ፡ በሊሕ፡ ልቡ፡ እምኵናት። ከርሥየ፡ ደንገፀት፡ ቦቱ። ተንሣእኩ፡ አነ፡ አርኅዎ፡ ለወልድ፡ እኁየ። እደውየ፡ ያውሕዛ፡ ከርቤ፡ ወአጻብዕየ፡ ከርቤ፡ ምሉኣት። ውስተ፡ እደ፡ መንሠግ፡ ተንሣእኩ፡ አነ፡ ኣርኀዎ፡ ለወልድ፡ እኁየ። ወልድ፡ እኁየ፡ ኀለፈ። ነፍስየ፡ ደንገፀት፡ እምቃሉ። ኀሠሥክዎ፡ ወኢረከብክዎ። ጸዋዕክዎ፡ ወኢተሰጥወኒ። ረከቡኒ፡ መዓቅብት፡ እለ፡ የዐቅቡ፡ ሀገረ። ዘበጡኒ፡ ወፈቅዑኒ። ነሥኡ፡ ግልባቤየ፡ እምላዕለ፡ ርእስየ፡ እለ፡ የዐቅቡ፡ ቅጽረ። አመሐልኩክን፡ አዋልደ፡ ኢየሩሳሌም። በኀይሉ፡ ወበጽንዑ፡ ለገዳም። እመ፡ ረከብካሁ፡ ለወልድ፡ እኁየ፡ ከመ፡ ታይድዓሁ። እስመ፡ ንድፍት፡ አነ፡ በፍቅሩ። ምንት፡ ውእቱ፡ ወልድ፡ እኁኪ፡ እምውሉደ፡ አኃው፡ ሠናይት፡ እምአንስት። ወምንት፡ ውእቱ፡ ወልድ፡ እኁኪ፡ እምውሉደ፡ አኀው። ዘከመዝ፡ መሐላ፡ አምሐልክነ። በፀሐይኑ፡ ወበያሮስ፡ ወበከማንዮስ። እኁየ፡ ጸዐዳ፡ ወቀይሕ። ወየዐውድዎ፡ እልፍ፡ ወትእልፊተ፡ አእላፋት። ውሉድ፡ እምአእላፍ። ርእሱ፡ ወርቀ፡ ቄፋዝ። ድምድማሁ፡ ድሉል፡ ወጸሊም፡ ከመ፡ ቋዕ። አዕይንቲሁ፡ ከመ፡ ርግብ፡ ውስተ፡ ምሉእ፡ ምዕቃለ፡ ማያት። ስነኒሁ፡ ኅፁባት፡ በሐሊብ፡ እለ፡ ይነብራ፡ ውስተ፡ ምዕቃለ፡ ማያት፡ ምሉእ። መላትሒሁ፡ ከመ፡ ርሔ፡ አፈወ፡ እለ፡ ይፈርያ፡ አፈዋተ። አዕይንቲሁ፡ ከመ፡ ኮከበ፡ ጽባሕ፡ ጽዳሌሁ፡ ጽዳሌ፡ ይጼድል። ከናፍሪሁ፡ ጽጌ፡ እለ፡ ያውሕዛ፡ ከርቤ፡ ፍጹመ። ወልድ፡ እኁየ፡ ይፄኑ፡ ዘርቤነ፡ ምዑዘ። አልባሲሁ፡ ዘዕብን፡ ከመ፡ ሰብአ፡ ተርሴስ። እደዊሁ፡ ፍሑቃት፡ እለ፡ ወርቅ፡ ስርግዋተ፡ ተርሴስ። ከርሡ፡ ሰሌዳ፡ ከመ፡ ቀርነ፡ ነጌ፡ ዲበ፡ እብነ፡ ሰንፔር። አዕኑገ፡ ክብር፡ ወውጽቦ፡ ዘኢያውጸቦ፡ እደ፡ ኬንያ። ቊየጺሁ፡ አዕማደ፡ ባላቅ፡ ሥሩራት፡ ዲበ፡ መንበረ፡ ወርቅ። ርእሱ፡ ከመ፡ ስኂን። ወኅሩይ፡ ከመ፡ ቄድሮስ። ጕርዔሁ፡ መዐርዒር፡ ወኵሉ፡ ፍትው። ወልድ፡ እኁየ፡ ውእቱ፡ ፍቁርየ።

6 ወትቤ፡ መርዓት፡ አይቴ፡ ሖረ፡ ወልድ፡ እኁየ፡ አዋልደ፡ ኢየሩሳሌም። ወትቤ፡ አግሲጦስ፡ አይቴ፡ ኀለፈ፡ ወልድ፡ እኁኪ፡ ወንኅሥሦ፡ ምስሌኪ። ወልድ፡ እኁየ፡ ወረደ፡ ውስተ፡ ገነቱ። ውስተ፡ አብያተ፡ አፈው። ይርአይ፡ ገነተ፡ ወያስተጋብእ፡ ጽጌያት። ናሁ፡ አንቲኒ፡ እንተ፡ ኀቤየ፡ ከመ፡ ሥምረት። አዳም፡ ከመ፡ ኢየሩሳሌም። መደንግፅት፡ ከመ፡ ሥርዐት። ሚጢ፡ አዕይንተኪ፡ እምአንጻርየ። እስመ፡ እማንቱ፡ አስረራኒ፡ ውስተ፡ አየር። ሥዕርትኪ፡ ከመ፡ መርዔተ፡ አጣሊ። እለ፡ አስተርአያ፡ እምአድባረ፡ ገለዓድ። ስነንኪ፡ ከመ፡ መራዕይ፡ እለ፡ ተቀርፃ። እለ፡ ዐርጋ፡ እምኅፃብ። ኵሎን፡ እለ፡ ይመነትዋ። ወአልቦ፡ እምኔሆን፡ መካን። ከመ፡ ፍሕሶ፡ ቀይሕ፡ ከናፍርኪ። ንባብኪ፡ አዳም። ከመ፡ ቅርፍተ፡ ሮማን፡ መላትሕኪ፡ እንበለ፡ አርምሞትኪ። ስሳ፡ እማንቱ፡ ንግሥታት፡ ወሰማኒያ፡ ዕቁባት። አዋልድ፡ እለ፡ አልቦን፡ ኍልቊ። አሐቲ፡ ይእቲ፡ ርግብየ፡ ፍጽምት። ክነፊሃ፡ ክንፈ፡ ብሩር። ወገበዋቲሃኒ፡ በሐመልማለ፡ ወርቅ። አሐቲ፡ ይእቲ፡ ለእማ። ወኅሪት፡ ይእቲ፡ ለእንተ፡ ወለደታ። ርእያሃ፡ አዋልድ፡ ወአስተብፅዓሃ። ንግሥታት፡ ወዕቁባት፡ ወደሳሃ። መኑ፡ ይእቲ፡ ዛቲ፡ እንተ፡ እንተ፡ ትሔውጽ፡ ከመ፡ ጎሕ። ሠናይት፡ ከመ፡ ወርኀ። ወብርህት፡ ከመ፡ ፀሓይ። ወሑረታቲሃ፡ በምሥጢር። ድንጋፄ፡ ከመ፡ ሥርዐት። ውስተ፡ ገነት፡ ከርካዕ፡ ወረደ፡ ወልድ፡ እኁየ፡ ውስተ፡ ዘርዐ፡ ሙሓዝ። ኀበ፡ ፈረየ፡ አከያሞስ። ይርአይ፡ ለእመ፡ ጸገየ፡ ወይን። ወለእመ፡ ፈረየ፡ ሮማን። በህየ፡ እውህበከ፡ አጥባትየ፡ ለከ። ነፍስየ፡ ኢያእመረት። ረስየኒ፡ ሠረገላተ፡ ዐሚናዳብ። ወይቤላ፡ ተመየጢ፡ ተመየጢ፡ ሱላማጢስ። ተመየጢ፡ ወንርአይ፡ ብኪ፡ ሰላመ።

7 ምንተኑ፡ ትኔጽሩ፡ በእንተ፡ ሰላመ፡ ሰጣዊት። እንተ፡ ትሔውጽ፡ እምርሑቅ፡ ከመ፡ መድበለ፡ ማኅበር። ጥቀ፡ አዳም፡ ሑረትኪ፡ ዘበሥን፡ ወለተ፡ ዐሚናዳብ። ወንብረተ፡ መናቅዕትኪ፡ ይመስል፡ ከመ፡ አርማስቆስ፡ ግብረ፡ እደ፡ ኬንያ። ሕንብርትኪ፡ ከመ፡ ማዕከክ፡ ፍሑቅ፡ ዘኢየዐርቅ፡ እምቱስሕቱ። ከርሥኪ፡ ስዉጠ፡ ሥርናይ፡ ወሕጹር፡ በጽጌ። ክልኤ፡ አጥባትኪ፡ ከመ፡ ክልኤ፡ ዕጕለ፡ መንታ፡ ዘወይጠል። እለ፡ ይፈለፍላ፡ ሐሊበ፡ መንፈስ። ወክሣድኪ፡ ከመ፡ ማኅፈደ፡ ቀርነ፡ ነጌ። አዕይንትኪ፡ ከመ፡ ምሉእ፡ ምዕቃለ፡ ማያት። በኤሌቦን፡ በአናቅጽ፡ ወለተ፡ ብዙኃን። ንግሥታት፡ ይፈቅዳ፡ ሥነኪ፡ ወአሕዛብኒ፡ የሐውሩ፡ በጸዳልኪ። አንፍኪ፡ ይመስል፡ ከመ፡ ማኅፈደ፡ ሊባኖስ፡ ዘይኔጽር፡ መንገለ፡ ገጸ፡ ደማስቆ። ሥዕርትኪ፡ ዘዲቤኪ፡ ከመ፡ ቀርሜሎስ። ወፅፍሮ፡ ሥዕርትኪ፡ ከመ፡ ሜላት። ማኅፈደ፡ ወርቅ፡ ለሰሎሞን። ወመሠረቱ፡ ዘዕንቈ፡ አድማርስጲስ። አሠረ፡ ንጉሥ፡ ለረዊጽ። ጥቀ፡ ሠነይኪ፡ ወጥቀ፡ አደምኪ። ኣፈቅሮ፡ ለፍግዕኪ። ዘቆምኪ፡ ይመስል፡ በቀልተ። ወአጥባትኪ፡ ከመ፡ ሄላ። ወእቤ፡ እዕርግ፡ ውስተ፡ በቀልት። ወአኀዝ፡ መልዕልቶ። ኑኅ፡ ሉዓሌሁ፡ ለአርያም። ወኮና፡ አጥባትኪ፡ ከመ፡ አስካለ፡ ወይን። ወጕርዔኪኒ፡ ከመ፡ ወይን፡ ሠናይ። እንዘ፡ የሐውር፡ ወልድ፡ እኁየ። ወእንዘ፡ ይዴሎ፡ ለከናፍርየ፡ ወለልሳንየ። ዓዛብ፡ ወሲላስ፡ ወፄናታም፡ የዐውዱ፡ ጸፍጸፈ፡ ቤትየ። ከመ፡ ጽጌረዳ፡ ወከመ፡ ሮማን፡ ወፀባንዮስ፡ ደምዕዘኒ፡ አፉሁ። አነ፡ ለወልድ፡ እኁየ፡ ወኀቤየ፡ ምግባኢሁ። ነዐ፡ ወልድ፡ እኁየ፡ ንፃእ፡ ሐቅለ። ናዕርፍ፡ ውስተ፡ አድያም። ወንጊሥ፡ ውስተ፡ ዐጸደ፡ ወይን። ንርአይ፡ ለእመ፡ ጸገየ፡ ወይን። ወለእመ፡ ጸገየ፡ ቆዕ። ወለእመ፡ ፈረየ፡ ሮማን። ልብነ፡ ወሠግላጠ፡ ይምዕዘኒ፡ አፉሁ። በህየ፡ እውህበከ፡ አጥባትየ፡ ለከ። ወይትፈረው፡ እምካልአን፡ መፍቅድ። ዕንጐታት፡ ወሀቡ፡ መዐዛ። ውስተ፡ አዕጻዲነ፡ ኵሉ፡ አቅማሕ። ሐዲስ፡ ምስለ፡ ብሉይ። ወልድ፡ እኁየ፡ አነ፡ ዐቀብኩ፡ ለከ።

8 መኑ፡ ይውህበከ፡ ወልድ፡ እኁየ፡ ትጠቡ፡ አጥባቲሃ፡ ለእምከ። ረኪብየ፡ በአፍኣ፡ እስዕመከ። ወኢይሜንኑኒ። እነሥአከ፡ ወኣበውአከ፡ ውስተ፡ ቤተ፡ እምየ። ወውስተ፡ ውሳጥያቲሃ፡ ለእንተ፡ ሐፀነተኒ። ኣሰትየከ፡ እምርሔ፡ አፈውየ። ወእምስቴ፡ ሮማንየ። የማኑ፡ ተሐቅፈኒ፡ ወፀጋሙ፡ ታሕተ፡ ርእስየ። አመሐልኩክን፡ አዋልደ፡ ኢየሩሳሌም። በኀይሉ፡ ወበጽንዑ፡ ለገዳም። አመ፡ ተንሥአ፡ ወአንሥአ፡ ኵሎ፡ ሙታነ። አፈቅሮ፡ እስከ፡ አመ፡ ፈቀደ። መኑ፡ ይእቲ፡ ዛቲ፡ እንተ፡ ትሔውጽ፡ ከመ፡ ጎሕ። ጽዕዱት፡ ወብርህት። እንተ፡ ትትመረጐዝ፡ በወልድ፡ እኁሃ። እምኀበ፡ ኮል፡ አንሣእኩከ። ኮልኬ፡ ዘበዕብራይዲ፡ እለ፡ ቅቡዓን፡ በደመ፡ ሐርጌ፡ ዘገለዓድ። በህየ፡ ሐመት፡ ብከ፡ እምከ። ወበህየ፡ ሐመት፡ ብከ፡ እምከ፡ ወላዲትከ። ደቂቀ፡ ይሣኮር፡ ይሣለቁ፡ ብከ። አንብረኒ፡ ከመ፡ ሕልቀት፡ ውስተ፡ ልብከ። ወከመ፡ ማዕተብ፡ በመዝራዕትከ። እስመ፡ ፍቅር፡ ከመ፡ ሞት፡ ጽንዕት። ወርቅ፡ ወዮሣር፡ ኢይከውኑ፡ ሤጣ። ወድርክት፡ ከመ፡ ሲኦል። ቅንዓት፡ ትበልዖሙ፡ ለልበ፡ ብዙኃን፡ በመዓት። እስመ፡ በቅንዓትሰ፡ ኢይትረከብ፡ ጸጋ። ክነፊሃ፡ ክንፈ፡ እሳት፡ ላህባ። ማይ፡ ብዙኅ፡ ኢይክል፡ አጥፍኦታ፡ ለፍቅር። ወአፍላግኒ፡ ኢያንቀለቅልዋ። እመ፡ ወሀበ፡ ብእሲ፡ ኵሎ፡ ንብረቶ፡ ለፍቅር። መንኖ፡ ኢይሜንንዎ። እኅትነ፡ ንስቲት፡ ይእቲ፡ ወአጥባት፡ አልባ። ምንተ፡ ንግበር፡ ለእኅትነ፡ በዕለት፡ አመ፡ ይትናገሩ፡ ባቲ። ለእመ፡ አረፍት፡ ይእቲ፡ ንሕንጽ፡ ዲቤሃ፡ ተድባበ፡ ዘብሩር። ወለእመ፡ ኆኅት፡ ይእቲ፡ ንግበር፡ ላቲ፡ ማዕጾ፡ ዘቄድሮስ። ማኅፈደ፡ ቀይሕ፡ ዘያነክት፡ ለሰሎሞን፡ በኬብሮን። አነ፡ ቅጽር፡ ወአጥባትየ፡ ከመ፡ ማኅፈድ። አነ፡ እንተ፡ በአዕይንቲሁ፡ እረክብ፡ ሰላመ። ዐጸደ፡ ወይን፡ ኮነ፡ ለሰሎሞን፡ በብዔላሞን። ወወሀበ፡ ዐጸደ፡ ወይኑ፡ ለእለ፡ የዐቅቡ፡ ፍሬሁ። ብእሲ፡ ብእሲ፡ ይውህብ፡ ፍሬሁ፡ በበጊዜሁ። ዐሠርተ፡ ወክልኤተ፡ ምእተ፡ ብሩረ። ዐሠርቱ፡ ምእት፡ ለሰሎሞን። ወክልኤቱ፡ ምእት፡ ለእለ፡ የዐቅቡ፡ ፍሬሁ። አእላፍ፡ ፍሬሁ፡ በበጊዜሁ። ዐሠርተ፡ ምእተ፡ ለጽዮን፡ ይሁብ። ዐጸደ፡ ወይን፡ ሊተ፡ አንጻርየ። እንዘ፡ ይነብር፡ ውስተ፡ ገነት፡ ካልኣን፡ ርእይዎ። ጉቡአን፡ ወስንእዋን፡ እንዘ፡ ይነብሩ፡ በሰላም። ወካልአን፡ ርእይዎሙ። ወእንዘ፡ ይትረዐዩ፡ ማዕከላ። ወእንዘ፡ የሐውሩ፡ ውስተ፡ ገነት፡ ካልአን። ቃለከ፡ አስምዐኒ። ጕይ፡ አንተ፡ ወልድ፡ እኁየ፡ ወተመሰላ፡ ለወይጠል። ወከመ፡ ወሬዛ፡ ሀየል፡ ውስተ፡ አድባረ፡ ድኁኃን።