The First Ethiopian Book of Maccabees

Text of the EOTC printed Bible

Chapter 1 ወሀሎ፡ ብእሲ፡ ዘስመ፡ ጺሩጻይዳን፡ ፈታዊሃ፡ ለእኪይ፡ ወይትሜካህ፡ በብዝኀ፡ አፍራሲሁ፡ ወበጽንዐ፡ ሖራ፡ ዘታሕተ፡ እዴሁ። ወቦ፡ ብዙኅ፡ አማልክተ፡ ጣዖታት፡ እለ፡ ይሰግድ፡ ሎሙ፡ ወያመልኮሙ፡ ወይሠውዕ፡ ሎሙ፡ መዓልተ፡ ወሌሊተ። ወይመስሎ፡ ለውእቱሰ፡ በዕበደ፡ ልቡ፡ ከመ፡ እሙንቱ፡ ዘይሁብዎ፡ ኀይለ፡ ወጽንንዐ። ወይትሔዘብ፡ በልቡ፡ ከመ፡ እሙንቱ፡ ይሁብዎ፡ ሥልጣነ፡ ዲበ፡ ኵሉ፡ መንግሥቱ። ወዓዲ፡ ይመስሎ፡ ከመ፡ እሙንቱ፡ ይሁብዎ፡ ሥልጣነ፡ በውስተ፡ ፀብዕኒ፡ ወኀበ፡ ኵሎ፡ ዘተመነየ። ወይሠውዕ፡ ለሊሁ፡ መዓልተ፡ ወሌሊተ። ወሤመ፡ ላሌሆሙ፡ ገነውተ፡ አማልክት። ወእሙንቱሰ፡ ያመስሉ፡ ወይነግርዎ፡ ከመ፡ ዘይበልዑ፡ አማልክቲሁ፡ መዓልተ፡ ወሌሊተ፡ ወይበልዑ፡ ለሊሆሙ፡ እምይእቲ፡ መሥዋዕተ፡ ርኩሰት። ወዓዲ፡ ያጌብሩ፡ ከመ፡ ይሥዑ፡ ወይብልዑ፡ ካልዓን፡ ከመሆሙ፡ ወካዕበ፡ ዓዲ፡ ይሠውዑ፡ ለሊሆሙ፡ ወያጊብሩ፡ ካልዓን፡ ከመ፡ ይሡዑ፡ ካልዓነ፡ ከማሁ። ውእቱሰ፡ ይትአመን፡ በጣዖቱ፡ ዘአልቦ፡ ባቍዕ። ወይመስሎ፡ ከመ፡ እሙንቱ፡ ዘፈጠርዎ፡ በከመ፡ እሙንቱ፡ ይሲስይዎ፡ ወያነግሥዎ፡ በዑረተ፡ ልቡ፡ ወበውኅዳተ፡ አእምሮቱ፡ እስመ፡ ለልቡ፡ አዖሮ፡ ሰይጣን፡ ከመ፡ ኢያእምር፡ አምላከ፡ ዘፈጠሮ፡ ወገብሮ፡ ወሣረሮ፡ እምኀበ፡ ኢሀለዎ፡ ኢውእቱ፡ ወኢእሊአሁ፡ ከመ፡ ይሑር፡ ምስሌሁ፡ ውስተ፡ ኵነኔ፡ ወይትኰከኑ፡ ምስሌሁ፡ ለዝሉፉ፡ ወምስለ፡ እለ፡ ሰመዮሙ፡ አማልክተ፡ እንዘ፡ ኢኮኑ፡ አማልክተ። ወመፍትው፡ ይሰምይዎሙ፡ ምዉታነእስመ፡ ወእማእዚ፡ ኢኮኑ፡ ሕያዋነ። ወበእንተሰ፡ እለ፡ ይትአመንዎሙ፡ እለ፡ ሐመድ፡ ልኖሙ፡ ደቂቀ፡ እጓለ፡ እመሕያው፡ እስመ፡ ይበውዕ፡ መንፈሰ፡ ሰይጣን፡ ዘያስሕቶሙ፡ ውስተ፡ ውእቱ፡ ምስለ፡ ጣዖቶሙ፡ ወይትናኣገሮሙ፡ በከመ፡ ፍትወተ፡ ልቦሙ፡ ወያስተርአዮሙ፡ በከመ፡ ፈቀዱ። ወሶበ፡ ርእዩ፡ ከመ፡ ፈጸመ፡ ሎሙ፡ ዘሀለዩ፡ ያነክሩ፡ ወይገብሩ፡ እሙንቱኒ፡ ፈቃዶ፡ እስከ፡ ይዘብሑ፡ ደቂቆሙ፡ ወአዋልዲኦሙ፡ ዘወጽኡ፡ እምከርሦሙ፡ ወይክዕዉ፡ ደመ፡ ንጹሐ፡ ደመ፡ ደቂቆሙ፡ ወአዋልዲሆሙ። ወኢያደነግፅዎሙ፡ እስመ፡ ሰይጣን፡ አስተጠአመ፡ ሎሙ፡ በከመ፡ ፈቃዶሙ፡ ለአከይ፡ ከመ፡ ያውርዶሙ፡ ምስሌሁ፡ ውስተ፡ ኵነኒ፡ ዚአሁ፡ ረአይ፡ ገሃነም፡ እንተ፡ አልባቲ፡ ሙፃዕ፡ እስከ፡ ለዓለመ፡ ዓለም። ውእቱሰ፡ ጺሩጻይዳን፡ ዕቡይ፡ ውእቱ፡ ወቦቱ፡ አማልክት፡ %፡ በአምሳሌተ፡ ባዕተ፡ ወ2በአምሳለ፡ አንስት። ወይትሜካህ፡ በእሙንቱ፡ አማልክቲሁ፡ በዘአልቦሙ፡ ባቍዕ፡ ወፈድፋደ፡ ያከብሮሙ፡ ወይሠውዕ፡ ሎሙ፡ ሠርክ፡ ወነግሃ። ወለሰብእኒ፡ ያጌብሮሙ፡ ይሡዑ፡ ወለሊሆኒ፡ ይበልዕ፡ እምይእቲ፡ መሥዋዕት፡ ርኩሰት፡ ወለባዕዳን፡ ያጌብሮሙ፡ ከመ፡ ይብልዑ፡ ወፈድፋደ፡ ይትኴነኖ፡ ለእኪት። ወገብረ፡ ሎሙ፡ ለአማልክቲሁ5ቤተ፡ ሰብኮ፡ ዘብርት፡ ወዘሐፂን፡ ወዘአረር። ወዓአርገዎሙ፡ በወርክ፡ ወበ፡ ብሩር፡ ወገብረ፡ መንጦላእተ፡ ወደባትረ፡ በዓውደ፡ ገደገደ፡ ቤቱ። ወሤመ፡ ህየ፡ ዓቀብተ፡ ወይሠውዕ፡ ሎሙ፡ ለለጸብሐት ዘይገብር፡ መሥዋዕተ፡ ዘልፈ፡ ለአማልክቲሁ። ወለ፡ ውእቱሰ፡ ይመስሎ፡ ከመ፡ ዘይበልዑ፡ አማልክቲሁ፡ ወሞፃሕተ፡ ወይንሂ፡ %ወ%፡ ፃሕለ፡ ብሩር፡ ዘግቡር፡ በቅብዕ፡ ሰንዳሊ። ወይቤሎሙ፡ ለገነውቱ፡ ንጽኡ፡ ሀብዎሙ፡ ይብልዑ፡ አማልክትየ፡ እምነ፡ ዝቡሕየ፡ ወይሰትዩ፡ እምኵሉ፡ ሞፃሕትየ፡ ወእመ፡ ኢአከሎሙ፡ አወሴክ፡ አነ፡ ሎሙ። ወእምአይቲ፡ መሥዋዕት፡ ርኩሰት፡ ያጌብር፡ ኵሎ፡ ከመ፡ ይብልዑ፡ ወይስተዩ። ወውእቱሰ፡ በእከየ፡ ትምይንቱ፡ ፈነወ፡ ሐራሁ፡ እለ፡ ያስተሐይጹ፡ ውስተ፡ ኵሉ፡ መንግሥቱከመ፡ ይፍልጡ፡ ወያእምሩ፡ እመቦ፡ ዘኢይሠውእ፡ ወዘኢይሰግድ፡ ሎሙ፡ ያምጽዕዎ፡ ወይኰንንዎ፡ ቅድሜሁ፡ በመጥባሕት፡ ወበእሳት፡ ወይበርብርዎ፡ ንዋዮ፡ ወያውዕይዎ፡ ቤቶ፡ በእሳት፡ ወኵሎ፡ ዘቦ፡ ከመ፡ ይንሥዕዎ። ሎቱኒ፡ አነ፡ አርእዮ፡ ስቃየ፡ ወኵነኔለእመ፡ ዓበየ፡ አምልኮ፡ ወሠዊዓ፡ ለአማልክትየ፡ እስመ፡ ዓበይተ፡ ወኂራን፡ እሙንቱ፡ ወበኂሩቶሙ፡ ገብሩ፡ ኪያነ። ወፈጠሩ፡ ሰማየ፡ ወምድረ፡ ወባሕረ፡ ዓቢየ፡ ወፀሐየ፡ ወወርኃ፡ ወከዋክብተ፡ ወነፋሳተ፡ ወዝናማተ፡ ወኵሎ፡ ዘይትሐወስ፡ ለሲሲተ፡ ዚአነ፡ ወለጽጋብነ። ወእለሰ፡ ኢያመልክዎሙ፡ ይትኴነኑ፡ በፃዕረ፡ ወበምንዳቤ፡ ወኢይምሕርዎሙ።

Chapter 2 ወሀሎ፡ ብእሲ፡ እምሕዝበ፡ ብንያም፡ ዘስሙ፡ መቃብዮስ። ወቦቱ ወረከብዎሙ፡ ወይቤሎሙ፡ ኢትስግድኑ፡ ወኢትሠውዑኑ፡ ለአማልክተ፡ ጺሩጻይዳን፡ ንጉሥ፡ በከመ፡ አዘዞ። ወእመሰ፡ ዓበይክሙ፡ ንእኅዘክሙ፡ ወንወሰደክሙ፡ ኀበ፡ ንጉሥ፡ ወናጠፍዕ፡ ኵሉ፡ ንዋየክሙ፡ በከመ፡ አዘዘ፡ ንጉሥ። ወአውሥኡ፡ ወይቤልዎ፡ እሉ፡ ሠናያን፡ ወራዙተ፡ ንሕነሰ፡ ሀሎ፡ ዘንሰግድ፡ ሎቱ፡ አምላከ፡ አበዊነ፡ ፈጣሬ፡ ሰማያት፡ ወምድር፡ ወባሕር፡ ወኵሎ፡ ዘውስቴታ፡ ፈጣራ፡ ፀሐይ፡ ወወርህ፡ ወከዋክብት፡ ወደመናት፡ ውእቲኪ፡ አምላክ፡ ዘበአማን፡ ዘንሕነ፡ ናመልኮ፡ ወነአምን፡ ቦቱ። ወእሉሰ፡ ወዓልያኒሁ፡ ለንጉሥ፡ አርባዕቱ፡ መሳፍንት፡ ወበበ%፡ ሐራሆሙ፡ እለ፡ ይፀውሩ፡ ንዋየ፡ ሐቅሎሙ። ወሶበ፡ ፈቃዱ፡ የአኀዝዎሙ፡ ለእሉ፡ ቅዱሳን፡ አምሠጡ፡ እምእዴሆሙ፡ ወአልቦ፡ ዘነከዮሙ፡ ወሖሩ፡ እንዘ፡ ይፀውሩ፡ ንዋየ፡ ሐቅሎሙ፡ እስመ፡ እሙንቱ፡ ወራዙተ፡ ጽኑዓን፡ ወኀያላን፡ ፈድፋደ። ወቦ፡ እምኔሆሙ፡ ዘይቀትል፡ እንዘ፡ የሐንቅ፡ ድበ፡ ወየሐነቆ፡ ከመ፡ እንተ፡ ዶርሆ፡ ሶቤሂ። ወቦ፡ እምኔሆሙ፡ ዘይቀትል፡ አንበሳ፡ በአሐቲ፡ ዝብጠተ፡ ዕብነ፡ አው፡ በውግረተ፡ ዕፅ፡ በአሐቲ፡ ጊዜ። ወቦ፡ እምኔሆሙ፡ በውስተ፡ ቀትል፡ ዘይቀትል፡ ምእተ፡ በአሐቲ፡ ጊዜ፡ በአሐዱ፡ ሰይፍ፡ ወከመዝ፡ ሰሞሙ፡ ወንዒዎሙኒ፡ ዝኩር፡ በኵሉ፡ ምድረ፡ ሞዓብ፡ ወለከለዳውያን። ወጽኑዓን፡ እሙንቱ፡ በኀይል፡ ወቦሙ፡ ሰን፡ ወሞገሰ፡ ወቃል። ወኅዲ፡ መንክር፡ ስነ፡ ላህዮሙ፡ ወእምኵሉሰ፡ ዘይኂይለ፡ ስነ፡ ልቦሙ፡ በእንተ፡ ዘአምላ፡ ክዎ፡ ለእግዚአብሔር፡ ወኢፈርህዎ፡ ለሞት። ወሶበ፡ አፍርህዎሙ፡ ለሐራ፡ አልቦ፡ ዘክህለ፡ የአኀዞሙ፡ እሙንቱሰ፡ ጽኑዓን፡ አምሠጡ፡ ውስተ፡ እዙዝ፡ ደብር። ወእሙንቱሰ፡ ሐራ፡ ገብኡ፡ ውስተ፡ ሀገረ፡ ወዓደዉ፡ አናቅጸ፡ ሀገር፡ ወገረምዎሙ፡ ለሕ፡ ዝብ፡ እንዘ፡ ይብሉ፡ ለእመ፡ እያምጻእክምዎ፡ ለእሉ፡ ዕደዉ፡ መቃብያን፡ ንሕነ፡ ናውዕያ፡ ለሀገርክሙ፡ በእሳት፡ ወንልዕክ፡ ኀበ፡ ንጉሥ፡ ወናጠፍዓ፡ ለሀገርክሙ። ወውእተ፡ ጊዜ፡ ወፅኡ፡ ሰብአ፡ ሀገር፡ ነዳያን፡ ወብዑላን፡ እድ፡ ወአንስተ፡ ዕቢራተ፡ ወእጓለ፡ ማውታ፡ ወኵሎሙ፡ ጸርሑ፡ ኅቡረ፡ ወአንሥኡ፡ አዕይንቲሆሙ፡ ውስተ፡ ደብር፡ ወጸርሑ፡ ኀቤሆሙ፡ እንዘ፡ ይብሉ፡ ኢታጥፍዑ፡ ኪያነ፡ ወሀገረነ። ወሶቤሃ፡ በከቱ፡ ኅቡረ፡ ወረርሁ፡ እምእግዚአብሔር። ወዓረዩ፡ ገጾሙ፡ መንገለ፡ ምሥራቅ፡ ወጸለዩ፡ ኀበ፡ እግዚአብሔር፡ ሰፊሆሙ፡ ኅቡረ፡ እደዊሆሙ፡ ወይቤሉ፡ ንዕበዮሙነ፡ እግዚኦ፡ ለእሉ፡ ዓላውያነ፡ ሕግከ፡ ወትእዛዘከ። ንሕነሰ፡ ኢንፈቅድ፡ ንስማዕ፡ ቃሎ፡ ለውእቱ፡ ዕልዉ፡ ዘኢተአምኖ፡ ለሕግከ፡ አላ፡ በወ፡ ርቅ፡ ወበብሩር፡ በዕፅ፡ ወበዕብን፡ ግብረ፡ ዕደ፡ ሰብእ። ወይረሲ፡ ርእሶ፡ ከመ፡ እሉ፡ ዘፈጠርዎ፡ እንዘ፡ ሀሎከ፡ አንተ፡ ፈጣሪሁ፡ ዘትቀትል፡ ወተ፡ ሐዩ፡ ውእቱሰ፡ ከዓዌ፡ ደም፡ ሰብእ፡ ወበላዒ፡ ሥጋ፡ ሰብእ። ወንሕነሰ፡ ኢንፈቅድ፡ ንርአይ፡ ገጾ፡ ለውእቱ፡ ዕልው፡ ወንሰምዓ፡ ለቃሉ። ወባሕቱ፡ ለእመ፡ አዘዝከነ፡ አንተ፡ ኀቤሁ፡ ነሐውር፡ ውንሚጡ፡ ነፍስነ፡ ለሞት፡ በእንቲ፡ አከ፡ ወኢንሰምዕ፡ ቃሎ፡ ለውእቱ፡ ዕልው፡ ሶበ፡ ይብል፡ ሡዑ፡ ለአማልክትየ። ወንሕነሰ፡ እግዚኦ፡ በኵሉ፡ ልብነ፡ ኪያከ፡ ተወከልነ፡ አምላኮሙ፡ ለአበዊነ፡ እለ፡ ይገብሩ፡ ፈቃደከ፡ ወሖሩ፡ በሕገከ፡ አምላከ፡ አብርሃም፡ ይስሐቅ፡ ወያዕቆብ፡ ዘትፈትን፡ ልበ፡ ወኵልያተ። ወትጢይቆ፡ ለጻድቅ፡ ወለኃጥእ፡ ወተሐትት፡ ዘውስተ፡ ልበ፡ ሰብእ፡ ወአልቦ፡ ዘይሤወረከ፡ ኅቡዕኒ፡ ክሠት፡ በኀቤከ። ወንሕነሰ፡ አልብነ፡ ባዕድ፡ አምላክ፡ ዘእንበሌከ። ወባሕቱ፡ ኩነነ፡ ኀይለ፡ ወጽንዓ፡ ወፀውነ፡ ውስተ፡ ዝንተ፡ ግብር፡ ዘንትቀነይ፡ ለከ፡ ከመ፡ ንመጡ፡ ነፍስነ፡ እሞት፡ በእንተ፡ ስምከ፡ ቅዱስ። ወአመ፡ በዓቶሙ፡ ለእስራኤል፡ ብሔረ፡ ግብፅ፡ ሰማዕከ፡ ጸሎቶ፡ ለያዕቆብ፡ ወይእዜኒ፡ ንስአለከ፡ አምላክ፡ ቅዱስ። ወሶበ፡ አስተርአይዎሙ ወፈድፋደ፡ ስነ፡ ላ፡ ሳህዮሙ፡ ወበርሁ፡ እምፀሐይ፡ ወሠነዩ፡ እምዘቀዳሚ።

Chapter 3 ወመጽአ፡ ቃል፡ እምሰማይ፡ ዘይብል፡ አብያ፡ ወሲላ፡ ወፈንቶስ፡ አግብርተ፡ እግዚአብሔር፡ ልዑል፡ በከመ፡ ርኢክሙ፡ እሉ፡ እለ፡ ሞቱ፡ ወተንሥኡ፡ በክድሜክሙ፡ ከማሁ፡ ሀለወክሙ፡ ትትነሥኡ፡ እምድኅረ፡ ሞትክሙ፡ ወይበርህ፡ ገጽክሙ፡ በመንግሥተ፡ ሰማያት። ወሖሩ፡ ምስሌሆሙ፡ ለእሙንቱ፡ ዕደው፡ ወኮኑ፡ ሰማዕተ፡ በህየ። ወሶቤሃ፡ ጸለዩ፡ ወአዕኰቱ፡ ወሰገዱ፡ ለእግዚአብሔር፡ ወኢያፍርሆሙ፡ ሞት፡ ወኵነኔሁ፡ ለንጉሥ። ወሖሩ፡ ኀቤሆሙ፡ ለእሙንቱ፡ ወዓልያን፡ ወኢያፍርህዎሙ፡ አላ፡ ኮኑ፡ ከመ፡ በግዕ፡ ዘእንበለ፡ እከይ፡ ወሶበ፡ በጽሑ፡ ኀቤሆሙ፡ አኃዝዎሙ፡ ወዘበጥዎሙ፡ ወዓሠርዎሙ፡ ወቀሠፍዎሙ፡ ወአብጽሕዎሙ፡ ኀበ፡ ንጉሥ፡ ወዓቅምዎሙ፡ ቅድሜሁ። ወአውሥአ፡ ንጉሥ፡ ወይቤሎሙ፡ አንትሙ፡ ዓላውያን፡ እፎኑ፡ ኢትሠውዑ፡ ወኢት፡ ሰግዱ፡ ለአማልክትየ። ወአውሥእዎ፡ እሙንቱ፡ ቅዱሳን፡ ወቡሩካን፡ ወኅሩያን፡ ወፍሡሐን፡ አሐው፡ አብያ፡ ወሲላ፡ ወፈንቶስ፡ ክቡራን፡ ከመ፡ ዕንቈ፡ ባሕርይ፡ ዘዕፁብ፡ ሢጡ፡ ከመ፡ ዘቦ፡ አሐዱ፡ አፍ። ወይቤልዎ፡ ለውእቱ፡ ብድብድ፡ ንጉሥ፡ ንሕነሰ፡ ኢንሠውዕ፡ ወኢንሰግድ፡ ለአማላክት፡ ርኩሳን፡ እለ፡ አልቦሙ፡ ልብ፡ ወአእምሮ። ወዓዲ፡ ወርቅ፡ ወብሩር፡ ዕፅ፡ ወዕብን፡ ግብረ፡ እደ፡ ዕጓለ፡ እመሕያው፡ ወግብረ፡ እደ፡ ሰብእ፡ እለ፡ አልቦሙ፡ ነፍስ፡ ወልቡና፡ ወአእምሮ፡ ወኢያሤንዩ፡ ዘአሠነየ፡ ሎሙ፡ ወኢያኅሥሙ፡ ዘአሕሠመ፡ ሎሙ። ወአውሥኦሙ፡ ንጉሥ፡ ወይቤሎሙ፡ ለምንት፡ ከመዝ፡ ትገብሩ፡ ወትጸርፉ፡ ላዕለ፡ አማልክትየ፡ ክቡራን፡ እስመ፡ እሙንቱኒ፡ የአምሩ፡ ዘይገፍዖሙ፡ ወይጸርፍ፡ ሎሙ። ወአውሥኡ፡ ወይቤልዎ፡ ንሕነሰ፡ ንጸርፎሙ፡ ወኢናከብሮሙ፡ እስመ፡ ወኢከመ፡ ምንትኒ፡ እሙንቱ፡ በኀቤነ። ወአውሥአ፡ ንጉሥ፡ ወይቤሎሙ፡ በከመ፡ እከየ፡ ምግባሪክሙ፡ እኴንነክሙ፡ ወአኃጕል፡ ስነ፡ ላህይክሙ፡ በዓቢይ፡ ምንዳቤ፡ ወበመቅሠፍቱ፡ ወበእሳት። ወይእዜኒ፡ ንግሩኒ፡ እመ፡ ተሠውዑ፡ ለአማልክትየ፡ አው፡ አልቦ፡ ወሚመ፡ አንሥአ፡ ላዕሌክሙ፡ መቅሠፍተ፡ ጥብጣቢ፡ ሐብል፡ ወሰይፈ። ወአውሥኡ፡ ወይቤልዎ፡ ንሕነሰ፡ ኢንስግድ፡ ወኢንሠውዕ፡ ለአማልክት፡ ርኩሳን፡ ወአዘዘ፡ ንጉሥ፡ ይዝብጥዎሙ፡ በገዚፋን፡ አብትር፡ ወድኅሬሁ፡ በጥብጣቢ፡ ወእምድኅሬሁ፡ ይሰትርዎሙ፡ እስከ፡ ይትረአይ፡ ንዋየ፡ ውስጦሙ። ወእምዝ፡ ዓሠርዎሙ፡ ወአውአልዎሙ፡ ውስተ፡ ቢተ፡ ሞቅሕ፡ ዘውስተ፡ ቢተ፡ ሐፍስ፡ እስከ፡ ይመክር፡ በዘቀትሎሙ፡ ወይኴንኖሙ። ወወሰድዎሙ፡ ውስተ፡ ቢተ፡ ሞቅሕ፡ ወዓሠርዎሙ፡ ክቡደ፡ ዕሥረተ፡ ዘእንበለ፡ ምሕረት፡ ወእሙንቱሰ፡ ነበሩ፡ ውስተ፡ ቤተ፡ ሞቅሕ፡ ሠሉሰ፡ ዕለተ፡ ወሠሉሰ፡ ለያልየ። ወእምድኅረ፡ ሠሉስ፡ ዕለት፡ አዘዘ፡ ንጉሥ፡ ይዑድ፡ ዓዋዲ፡ ከመ፡ ይትጋብዑ፡ መኳንንት፡ ወመማክርት፡ ወመገብት፡ ወዓበይተ፡ ሀገር። ወነቢሮ፡ ዓውደ፡ ንጉሥ፡ ጺሩጻይዳን፡ አዘዘ፡ ያምጽእዎሙ፡ ለእሙንቱ፡ ቡሩካን፡ አብያ፡ ወሲላ፡ ወፊንቶስ፡ ወኦሙ፡ ቅድሜሁ፡ እንዘ፡ ዕሡራን፡ ወቍሱላን። ወይቤሎሙ፡ ንጉሥ፡ ቦኑ፡ ዘኂረውክሙ፡ እንዘ፡ ትነብሩ፡ ዘንተ፡ ሠሉሰ፡ ዕለት፡ ወሚመ፡ ከመ፡ ዘቀዳሚኑ፡ እከይክሙ፡ ሀለውውክሙ፡ አንትሙ። ወአውሥኡ፡ ቡሩካን፡ ሐራሁ፡ ለእግዚአብሔር፡ ወይቤልዎ፡ ንሕነሰ፡ ጥቡዓን፡ ወኢንብል፡ ኦሆ፡ ለዘአንተ፡ ትነበብ፡ ጽርፈተ፡ ዘምሉዕ፡ እከየ፡ ወርኩሰ። ወተምዕዓ፡ ውእቱ፡ መምዕላይ፡ ወአዘዘ፡ ይሰቅልዎሙ፡ ወየሐድሱ፡ ቍስሎሙ፡ ወውኅዘ፡ ደሞሙ፡ ዲበ፡ ምድር። ወካዕበ፡ አዘዘ፡ ያውዕይዎሙ፡ ቦ፡ ማሕተወ፡ ጹግ፡ ወይኅርር፡ ሥጋሆሙ፡ ወገብሩ፡ ከማሁ፡ ወይቤልዎ፡ ቡሩካን፡ በል፡ አረሲስ፡ በአምጣነ፡ ታበዝኅ፡ ኰንኖተነ፡ ይበዝኅ፡ ዕሤትነ። ወካዕበ፡ አዘዘ፡ ያምጽኡ፡ አራዊተ፡ ጸዋጋነ፡ ነምረ፡ ወድበ፡ ወአንበሰ፡ ከመ፡ ይሰድዱ፡ ላዕሌሆሙ፡ እንዘ፡ ኢይበልዑ፡ ሲሳዮሙ፡ ከመ፡ ይፈጽምዎሙ፡ ሶቤሃ፡ ምስለ፡ አዕፅምቲሆሙ። ወአዘዞሙ፡ ለዓቀብተ፡ አራዊት፡ ከመ፡ ይሰድድዎሙ፡ ዲቤሆሙ፡ ወገብሩ፡ እሙንቱ፡ በከመ፡ አዘዝዎሙ፡ ወዓሠርዎሙ፡ ለቅዱሳን፡ ሰማዕት፡ ድኅሪተ፡ ወካዕበ፡ አሠርዎሙ፡ በመታክል፡ ዘገብሩ፡ በተኪንዎ። ወእሙንቱሰ፡ አራዊት፡ ሠረሩ፡ ዲቤሆሙእንዘ፡ ይጥኅሩ፡ ወሶበ፡ በጽሑ፡ ኀቤሆሙ፡ ለሰማዕት፡ ሰገዱ፡ ሎሙ፡ ወተአምኅዎሙ። ወገብኡ፡ ኀበ፡ ኖሎቶሙ፡ እንዘ፡ ይጥኅሩ፡ ወአፍርህዎሙ፡ ለዓቅብት፡ ወወሰድዎሙ፡ እስከ፡ አብጽሕዎሙ፡ ቅድመ፡ ገጹ፡ ለንጉሥ። ወበህየ፡ ቀተሉ፡ እምትዕይንተ፡ ዕልዋን፡ ወ፭፡ ነፍስ። ወብዙኃን፡ ተሰበሩ፡ እንዘ፡ ይጸአቁ፡ በፍርሃት፡ 1ላዕለ፡ ካልኡ፡ እስከ፡ ለሊሁ፡ ንጉሥ፡ ኀደገ፡ መንበሮ፡ ወጐየ፡ ወበዕፁብ፡ አኃዝዎሙ፡ ለአራዊት፡ ወወሰድዎሙ፡ ኀበ፡ ማኅደሪሆሙ። ወመጽኡ ወአውሥኡ፡ ሰማዕት፡ ወይቤልዎሙ፡ ለአኃዊሆሙ፡ አኮ፡ መፍትው፡ ለነ፡ ከመ፡ ንጕየይ፡ እምድኅረ፡ ቆምነ፡ ለስምዕ፡ ወለእመ፡ ፈራህክሙ፡ ሑሩ፡ ወጐየዩ፡ ለሊክሙ። ወይቤሉ፡ እሙንቱ፡ ንዑሳን፡ አኃዊሆሙ፡ ንሕነኒ፡ ንቀውም፡ ምስሌክሙ፡ ኀበብ፡ ንጉሥ፡ ወለእመ፡ ሞትክሙ፡ ንመውት፡ ምስሌክሙ፡ ንሕነኒ። ወእምዝ፡ ርእየ፡ ንጉሥ፡ ውስተ፡ ናሕሰ፡ ዘጽርሐ፡ መንግሥቱ፡ ከመ፡ ተፈትሑ፡ እሙንቱ፡ ቡሩካን፡ ወይከውሙ ወአዘዘ፡ ንጉሥ፡ ከመ፡ የአኃዝዎሙ፡ ለ5አኃው፡ ወይጸይዎሙ፡ ውስተ፡ ቤተ፡ ሞቅሕ፡ እስከ፡ ይመክር፡ በዘይኴንኖሙ፡ ወወጻይዎሙ፡ ውስተ፡ ቤተ፡ ሞቅሕ፡ ወዓሠርዎሙ፡ ክቡደ፡ ዕሥርተ፡ ውስተ፡ ኅርወተ፡ ጕንድ፡ ዘእንበለ፡ ምሕረት። ወይቤ፡ ንጉሥ፡ ጺሩጻይዳን፡ አውክዑኒ፡ እሉ፡ መስሕታን፡ ወራዙት፡ ሚመጠነ፡ ይጸንዕ፡ አልባቢሆሙ፡ ለእሉ፡ ዕደው፡ በከመ፡ ጽንዓ፡ ኃይሎሙ፡ ከማሁ፡ እከየ፡ ምግባሮሙ፡ ወሶበ፡ እብል፡ ይኄርው፡ ያዕክዩ፡ አልባቢሆሙ። ወአነ፡ እፈድዮሙ፡ በከመ፡ እከየ፡ ምግባሮሙ፡ ወአውዒ፡ በእሳት፡ ሥጋሆሙ፡ ከመ፡ ይኩን፡ ሐመደ፡ ወይኅርር፡ በህየ፡ እዘሩ፡ ዋዕየ፡ ሥጋሆሙ፡ ከመ፡ ፀበል፡ ላዕለ፡ ደብር፡ ዓቢይ፡ ከመ፡ ይንሥኦሙ፡ ነፋስ። ወእምድኅረ፡ ይቤ፡ ዘንተ፡ ነበረ፡ ሠሉሰ፡ መዋዕለ፡ ወአዘዘ፡ ያምጽእዎሙ፡ ለቅዱሳን፡ ወቀሪቦሙ፡ እሉ፡ ቅዱሳን፡ አዘዘ፡ ያንድዱ፡ እሳተ፡ ውስት፡ ዕቶን፡ ወውስተ፡ ግብ፡ ዓቢይ፡ ወይደዩ፡ ውስቴቱ፡ መናግንተ፡ ጽሕርት፡ ወመፋልሐተ፡ እሳት፡ ፒሳ፡ ወፓፒራ፡ ወስብሐ፡ ወመዓረ፡ ግራ፡ ወአፍላጢስ፡ ወክብሪት። ወሶበ፡ ፈልሐ፡ ዕቶን፡ ሖሩ፡ ኀበ፡ ንጉሥ፡ ላዕካኒሁ፡ እንዘ፡ ይብሉ፡ ገበርነ፡ ዘአዘዝከነ፡ ፈኑ፡ ሰብአ፡ ዘይትወደይ። ወአዘዘ፡ ይቀበልዎሙ፡ ወይፀውርዎሙውስተ፡ ዕቶን፡ እሳት፡ ወገብሩ፡ በከመ፡ አዘዞሙ፡ ንጉሥ፡ ወበዊዖሙ፡ ውስቴቱ፡ ቡሩካን፡ መጠው፡ ነፍሶሙ፡ ለእግዚአብሔር። ወተቀበልዎሙ፡ መላእክት፡ እንዘ፡ ይረእይዎሙ፡ እለ፡ ወረውዎሙ፡ ወወሰዱ፡ ነፍሳቲ፡ ሆሙ፡ ውስተ፡ ሕፅነ፡ አብርሃም፡ ይስሐቅ፡ ወያቆብ፡ ውስተ፡ ገነተ፡ ትፍሥሕት።

Chapter 4 ወውእቱ፡ መምዕለይ፡ ሶበ፡ ርእየ፡ ከመ፡ ሞቱ፡ አዘዘ፡ ከመ፡ ያውዕዩ፡ ሥጋሆሙ፡ በእሳት፡ እስከ፡ ይከውን፡ ከመ፡ ጸበል፡ ወይዝርውዎ፡ በነፋስ፡ ወኢተክህሎ፡ ያውዒ፡ ስእርተ፡ ርእሶሙ፡ እምአብድንቲሆሙ፡ ወአውጽእዎሙ፡ እምግብ። ወካዕበ፡ አንደዱ፡ እሳት፡ ዲቤሆሙ፡ እምነግህ፡ እስከ፡ ሠርክ፡ ወኢለከፎሙ፡ ወካዕበ፡ ይቤሎ፡ ሀቡ፡ ንዑ፡ ንውሩ፡ ሥጋሆሙ፡ ውስተ፡ ባሕር። ወገብሩ፡ በከመ፡ አዘዞሙ፡ ንጉሥ፡ ወወረውዎሙ፡ ውስተ፡ ባሕር፡ ወአልቦ፡ ዘውኅጦሙ፡ ባሕር፡ እመሂ፡ ገቢሮሙ፡ ላዕሌሆሙ፡ ክቡዳተ፡ ሕጻውንተ፡ ወአዕባነ፡ ዓበይተ፡ ወማኅረፀ፡ ዓድግ፡ ወኢተሰጥሙ፡ ውስተ፡ ባሕር፡ አላ፡ ጸለሉ፡ መልእልተ፡ ቀላይ፡ እስመ፡ መንፈሰ፡ እግዚአብሔር፡ ሀሎ፡ ላዕሌሆሙ፡ ወሰእኖሙ፡ በኵሉ፡ ዘመንገነ፡ በኪኑ። ወይቤ፡ እስመ፡ አንጠየኒ፡ ሥጋሆሙ፡ ዝንቱ፡ እምነፍሳቲሆሙ፡ ምንተ፡ እራሱ፡ አግድፍ፡ ሥጋሆሙ፡ ለአራዊት፡ ከመ፡ ይብልዕዎሙ። ወገብሩ፡ ከማሁ፡ ወኢለከፉ፡ ወራዊት፡ ወአዕዋፍ፡ ሥጋሆሙ፡ ወነበረ፡ ሥጋሆሙ መዋዕለ፡ እንዘ፡ ይጼልልዎሙ፡ በክነፊሆሙ፡ አንስርት፡ ወአዕዋፍ፡ እምሐሩረ፡ ፀሐይ፡ ወአብጽንቲሆሙ፡ ለ ወሶበ፡ ርእይዎሙ፡ በርቀ፡ ሥጋሆሙ፡ ከመ፡ እግረ፡ ፀሐይ፡ ወከመ፡ ደብተራ፡ ብርሃን፡ ዖድዎ፡ መላእክት፡ ለሥጋሆሙ። ወመከረ፡ ወኃጥአ፡ ዘይገብር፡ ወእምዝ፡ ከረየ፡ ምድረ፡ ወደፈነ፡ ሥጋሆሙ፡ ለኃምስቱ፡ ሰማዕት። ወአስተርአይዎሙ፡ በሌሊተ፡ ለውእቱ፡ ንጉሥ፡ ረሲዕ ወሶበ፡ ነቅሐ፡ ፈርሃ፡ ወፈቀደ፡ ያጕይየ፡ እማእዘንት፡ ለማእዘንተ፡ ቢት፡ እስመ፡ መሰሎ፡ ማዕሊተ፡ ዘቦኡ፡ ውስተ፡ ቤቱ፡ ወተማዕለዩ፡ ሎቱ፡ ወርዕደ፡ ብረኪሁ፡ ወፈርሃ፡ እስመ፡ መሰሎ፡ ዘይቀትልዎ። ወበእንተ፡ ዝንቱ፡ ይቤ፡ ምንተ፡ ትፈቅዱ፡ አጋእዝትየ፡ ወምንት፡ እግበር፡ ለክሙ። ወአውሥእዎ፡ ወይቤልዎ፡ አኮኑ፡ ንሕነ፡ እሙንቱ፡ ዘቀትልከነ፡ ወአወዓይከነ፡ ወአዘዝከነ፡ ከመ፡ ይግድፉ፡ ኪዳነ፡ ውስተ፡ ባሕር፡ ወሰእንከ፡ እስመ፡ ዓቀበ፡ እግዚአብሔር፡ ሥጋነ፡ እስመ፡ ተወከልነ፡ ቦቱ፡ አኰቴት፡ ለእግዚአብሔር፡ እስመ፡ ዘተወከለ፡ ቦቱ፡ ኢይወፍዕ፡ ወንሕነኒ፡ ዘተወከልነ፡ ቦቱ፡ ኢተኀፈርነ። ወይቤሎሙ፡ ምንተ፡ እሁበክሙ፡ ዓሰበ፡ ህየንተ፡ ዘገበርኩ፡ ላዕሌክሙ፡ እኩየ፡ እስመ፡ ኢያእመርኩ፡ ከመ፡ ከመዝ፡ ይረክበኒ፡ ዝንቱ፡ ኵነኔ። ወይእዜኒ፡ ፍልጡ፡ ሊተ፡ መጠነ፡ እሁበክሙ፡ አሰበ፡ ከመ፡ ኢትንሥኡ፡ ነፍስየ፡ በሞት፡ ወኢታወርዱኒ፡ ውስተ፡ ሲኦል፡ ሕያውየ። እስመ፡ ዓመፅኩኩ፡ አነ፡ ኅድጉ፡ ዘንተ፡ አበሳየ፡ እስመ፡ ሕገ፡ አቡክሙ፡ ምሕረት። ወአውሥእዎ፡ ቡሩካን፡ ሰማዕት፡ ወይቤልዎ፡ ንሕነሰ፡ ኢንፈድየኩ፡ እኩየ፡ ህየንተ፡ ዘገ፡ በርኩ፡ ላዕሌነ፡ ሀሎ፡ እግዚአብሔር፡ አምላክነ፡ ዘይፈድየከ፡ እስመ፡ ፍዳሰ፡ ዚእግዚአብ፡ ሔር፡ ውእቱ። ወባሕቱ፡ አስተርአይናከ፡ ከመ፡ ሕያዋን፡ ንሕነ፡ በእንተ፡ ኡረተ፡ ልብከ፡ ወሕፀፀ፡ አእ፡ ምሮትከ፡ ወኪያነሰ፡ እንዘ፡ ታመስል፡ ከመ፡ ዘከትልከነ፡ አስተዳሎከ፡ ለነ፡ ሕይወተ። ወአንተሰ፡ ወአማልክቲከ፡ ትወርዱ፡ ውስተ፡ ኵነኔ፡ ነደ፡ እሳት፡ ኀበ፡ አልቦ፡ ሙፃዕ፡ እስከ፡ ለዓለም። አሊለክሙ፡ አንተ፡ ወአማልክቲከ፡ እለ፡ ታመልኮሙ፡ ወትሰግዱ፡ ሎሙ፡ ኃዲገክሙ፡ ሰጊደ፡ ለእግዚአብሔር፡ ዘፈጠርክሙ፡ እንዘ፡ ምራቅ፡ አንትሙ፡ ወኢተአምሩ፡ እምኀበ፡ አምጻእክሙ፡ አኮኑ፡ ጢስ፡ አንትሙ፡ ኃላፍያን፡ እለ፡ ይእዜ፡ ታስተርእዩ፡ ወጊሠመ፡ ተኃልፉ። ወአውሥአ፡ ንጉሥ፡ ወይቤሎሙ፡ ምንት፡ ትኢዝዙኒ፡ ከመ፡ አግበር፡ በኵሉ፡ ዘፈቀድክሙ። ወይቤልዎ፡ አኮ፡ በእንተ፡ ርእስነ፡ ዘንሜህረከ፡ አላ፡ በእንተ፡ ርእሰከ፡ ከመ፡ ኢትባዕ፡ ውስተ፡ ኵነኔ፡ ነደ፡ እሳት። እስመ፡ እሙንቱ፡ አማልክቲክሙ፡ ወርቅ፡ ወብሩር፡ ዕፀ፡ ወዕብን፡ ግብረ፡ ዕደ፡ ሰብእ፡ እለ፡ አልቦሙ፡ ነፍሰ፡ ወልቡና፡ ወአእምሮ። እስመ፡ እሙንቱ፡ ሰፈ፡ ይቀትሉ፡ ወኢየሐይወ፡ ኢያሤንዩ፡ ወኢየሐስሙ፡ ኢየኃሥሩ፡ ወኢያከብሩ፡ ኢያነድዩ፡ ወኢያብዕሉ፡ ኢይምሕዉ፡ ወኢይተክሉ፡ አላ፡ ያስሕቱ፡ ኪያክሙ፡ በመንፈሰ፡ አጋንንት፡ እለ፡ ኢይፈቅዱ፡ ከመ፡ ይድኃን፡ አሐዱ፡ እምሰብእ። ወፈድፋድሰ፡ እለ፡ ከማክሙ፡ ለዕውራን፡ አልባብ፡ እለ፡ ይመስልክሙ፡ ከመ፡ እሙንቱ፡ ዘፈጠሩክሙ፡ እስመ፡ ለሊክሙ፡ ዘፈጠርክምዎሙ። እስመ፡ ይትጋብኡ፡ መንፈሰ፡ አጋንንት፡ ወሰይጣናት፡ ያውሥኡክሙ፡ ዘከመ፡ ፈቀድ፡ ክሙ፡ ከመ፡ ያሰጥሙክሙ፡ ውስተ፡ ባሕረ፡ እሳት። ወአንተሰ፡ ኅድግ፡ ዘንተ፡ ሰሕተተ፡ ወአምልኮ፡ ለእግዚአብሔር፡ አምላክነ፡ ወዝንቱ፡ ይኩነነ፡ ህየንተ፡ ሞትነ፡ ዓሰበ፡ ከመ፡ ንርብሐ፡ ለነፍስነ። ወውእቱሰ፡ ይደነግፅ፡ ወይደመም፡ ወያነክር፡ ወይፈርህ፡ እስመ፡ ምሉሐን፡ አስይፍ፡ ቲሆሙ፡ ለ ወይቤ፡ ይእዚ፡ አእመርኩ፡ ከመ፡ አማን፡ ይትነሥኡ፡ ሙታን፡ እለ፡ ኮኑ፡ ሐመደ፡ ወአንሰ፡ ሕቀ፡ ክመ፡ ዘእምተረፍኩ፡ እምቀቲል። ወእምዝ፡ ተሠወሩ፡ እምአዕይንቲሁ፡ ለውእቱ፡ ንጉሥ፡ ወእምይእቲ፡ ዕለት፡ ኃደገ፡ አው፡ ዕዮተ፡ ሥጋሆሙ፡ ውእቱ፡ ጺሩጻይዳን፡ ዕቡይ፡ ወዝሁር፡ ውእቱ። ወይትፌሣሕ፡ በስሕተተ፡ ልቡ፡ ወበአማልክቲሁ፡ እስመ፡ አሰሐትዎ፡ ብዙኃ፡ መዋዕለ፡ ወአኮ፡ ለሊሁ፡ ባሕቲቱ፡ ዘስሕተ፡ አላ፡ እለ፡ ከማሁ፡ አሰሐተ፡ ብዙኃነ፡ እስከ፡ ኃደጉ፡ ተሊዎቶ፡ ለዘፈጠሮሙ። ወዘብሑ፡ ደቂቆሙ፡ ወአዋልዲሆሙ፡ ለአጋንንት፡ ወይገብሩ፡ ፈቃደ፡ ልቦሙ፡ ዝሙተ፡ ወምርዓት፡ ዘመሐሮሙ፡ አቡሆሙ፡ ሰይጣን፡ ከመ፡ ይግበር፡ ሁከተ፡ ወምርዓተ፡ ዘኢይሠምር፡ እግዚአብሔር። ወያወስቡ፡ እሞሙ፡ ወያረኵሱ፡ አሐቲሆሙ፡ ወአዝማዲሆሙ፡ ወኵሉ፡ ዘይመስሎ፡ ለዝ፡ ንቱ፡ ምግባር፡ ርሱሕ፡ ወያረኩሱ፡ ነፍሳቲሆሙ፡ ወዓበዩ፡ ተመይጦ፡ እስመ፡ ሰይጣን፡ አጽንዓ፡ አልባቢሆሙ፡ ለእሙንቱ፡ ጠዋያን። ወውእቱሰ፡ ጺርጻይዳን፡ ዕቡይ፡ ወዝኁር፡ ውእቱ፡ ዘኢየአምር፡ ፈጣሪሁ፡ ወይትሜካህ፡ በአማልክቲሁ። እፎኑ፡ ይሁብ፡ እግዚአብሔር፡ መንግሥተ፡ ለእለ፡ ኢየአምርዎ፡ ወይቤ፡ እስመ፡ ይፈ፡ ትኖሙ፡ እመ፡ ይትመየጡ፡ ወይገብኡ፡ ኀቤሁ። ወእመሰ፡ ተመይጡ፡ ወገብኡ፡ ኀቤሁ፡ ያፈቅሮሙ፡ ወየዐቅብ፡ መንግሥቶሙ፡ ወእመሰ፡ ዓበዩ፡ ይኴንኖሙ፡ በረዓደ፡ ገሃነም፡ ዘለዓለም። ንጉሥሰ፡ በከመ፡ ዕበየ፡ መንግሥቱ፡ ይፈርሆ፡ ለእግዚአብሔር፡ አምላክ፡ ወመኰንንሂ፡ በከመ፡ ዕበየ፡ ምኩናኑ፡ ይትኴነን፡ በሠናይ፡ ለፈጣሪሁ። ወሊቃውንትኒ፡ ወዓበይት፡ ወሀበይት፡ ወመገብት፡ በከመ፡ ዕበየ፡ ክብሮሙ፡ ይትኤዘዙ፡ ለፈጣሪሆሙ። እስመ፡ ፈጠረ፡ ኵሉ፡ ፍጥረት፡ ውእቱ፡ እግዚአ፡ ሰማያት፡ ወምድር፡ ዘያነዲ፡ ወዘያብዕል፡ ዘየኀሥር፡ ወያከብር፡ እስመ፡ አልቦ፡ ባዕድ፡ አምላከ፡ ዘእንበሌሁ፡ በሰማይ፡ በላዕሉ፡ ወበምድር፡ በታሕቱ።

Chapter 5 ተዓበየ፡ ረዓይታዊ፡ ወበአሐቲ፡ ፈጸንተ፡ ረስየ፡ እግዚአብሔር፡ ከመ፡ ይምላዕ፡ ከርሦ፡ እምእግሩ፡ እስከ፡ ርእሱወበይእቲ፡ ንሰቲት፡ ፈጸንተ፡ ሞተ። ወካዕበ፡ ተዓበየ፡ ናምሩድ፡ ዘአግበረ፡ ዓራተ፡ ዘሐፂን፡ እምብዙኃ፡ ጽንዑ፡ ለውእቱኒ፡ ከበቶ፡ እግዚአብሔር። ወካዕበ፡ ተዓበየ፡ ናቡከደነፆር፡ ወይቤ፡ አልቦ፡ ካልዕ፡ ንጉሥ፡ ዘእንቢሌየ፡ ወአነ፡ ውእቱ፡ ዘዓሠርቅ፡ ፀሐየ፡ በዲበ፡ ምድር፡ ወእምብዝኃ፡ ትዕቢተ፡ ይቤ፡ ከመዝ። ወሰደድ፡ እግዚአብሔር፡ እምሰብእ ዓመተ፡ ወረሰየ፡ እግዚአብሔር፡ መክፈልቶ፡ ምስለ፡ አራዊት፡ ወአዕዋፈ፡ ሰማይ፡ እስከ፡ የአምር፡ ከመ፡ እግዚአብሔር፡ ዘፈጠሮ። ወሶበ፡ አእመሮ፡ ካዕበ፡ አግብኦ፡ ውስተ፡ መንግሥቱ፡ መኑ፡ ዘተዓጸዎ፡ ወተዓበየ፡ ላዕለ፡ እግዚአብሔር፡ ፈጣሪሁ፡ ዘኢኮነ፡ መሬተ። ወመኑ፡ ዘተዓደዎ፡ ለሕጉ፡ ወሥርዓቱ፡ ወለመኑ፡ ዘኢውኅጠቶ፡ ምድር። ወአንተኒ፡ ጺሩጻይዳን፡ ትፈቅድ፡ ትትዓበይ፡ ወላዕለ፡ ፈጣሪከ፡ ወካዕበ፡ ሀለወከ፡ ለከኒ፡ ከማሆሙ፡ ከመ፡ ይሥዓርከ፡ እምትዕቢትከ፡ ወያውርድከ፡ ውስተ፡ መሬተ፡ ሞት። ወዓዲ፡ ውስተ፡ ሲኦል፡ ጸናፌ፡ ጽልት፡ ኀበ፡ ብካይ፡ ወሐቀየ፡ ሰነን፡ መትሕተ፡ ታሕቲተ፡ ውስተ፡ ግብ፡ ዓቢይ፡ ወሙቅ፡ ኀበ፡ ሰልቦቱ፡ ሙፃዕ፡ እስከ፡ ለዓለም። አንተኪ፡ ሰብእ፡ ወመሬት፡ አንተ፡ ዘጌሠመ፡ ትመውት፡ ከመ፡ እለ፡ ከማከ፡ ዕቡያን፡ ነገሥት፡ እለ፡ ኀደጉ፡ ንብረተ፡ ዝ፡ ዓለም። ንሕነሰኪ፡ ንብል፡ አንተኪ፡ ሰብእ፡ ወአኮ፡ እግዚአብሔር፡ እስመ፡ እግዚአብሔር፡ ፈጣሬ፡ ሰማያት፡ ወምድር፡ ወፈጣሬ፡ ዚአከ። ወውእቱ፡ ያቲሕቶሙ፡ ለዕቡያን፡ ወያሌዕሎሙ፡ ለትሑታን፡ ወውእቱ፡ ይሁብ፡ ጽንዓ፡ ለድኩማን፡ ወውእቱ፡ ይሁብ፡ ድካመ፡ ለጽኑዓን። ወውእቱ፡ ይሁብ፡ ሞተ፡ ለሕያዋን፡ ወውእቱ፡ ያነሥኦሙ፡ ለምውታን፡ እለ፡ ሰከቡ፡ ውስተ፡ መቃብር፡ ወኮኑ፡ ሐመደ። ወያግዕዞሙ፡ ለአግብርት፡ ውስተ፡ ሕይወት፡ እምግብርናት፡ ዘኃጢአት። ኦ፡ ንጉሥ፡ ጺሩጻይዳን፡ ለምንት፡ ትትሜካህ፡ በአማልክቲከ፡ ርኩሳን፡ ዘአልቦሙ፡ ባቁዕ። እግዚአብሔር፡ ሰማያተ፡ ገብረ፡ ወምድረ፡ ሣረረ፡ ወባሕረ፡ ዓቢየ፡ ፈጠረ፡ ፀሐየ፡ ወወርኃ፡ አቀመ፡ አዝማነ፡ ወዓመታተ፡ ሠርዓ። ወይወፍር፡ ሰብእ፡ ውስተ፡ ተግባሩ፡ ይውዕል፡ ወይትቀነይ፡ እስከ፡ ይመሲ፡ ወከዋክብተ፡ ሰማያትኒ፡ ትኩሳን፡ በቃሎ። ወይኋልቆሙ፡ ለኵሎሙ፡ በበአስማቲሆሙ፡ ወአልቦ፡ ዘይከውን፡ ዘኢያእመረ፡ እግዚአብሔር። ወመላእክተ፡ ሰማይኒ፡ ውእቱ፡ ዘዘ፡ ከመ፡ ይትለአክዎ፡ ወይሰብሑ፡ ለስሙ፡ ቅዱስ፡ ወይትፌነው፡ ኀበ፡ ኵሉ፡ መላእክት፡ በእንተ፡ እለ፡ ይወርሱ፡ ሕይወተ። ሩፋኤል፡ መልአክ፡ ተፈነወ፡ ኀበ፡ ጦቢት፡ ወአድኃኖ፡ ለጦብያ፡ በብሔረ፡ ራጉኤል። ወመልአክ፡ ተፈነወ፡ ኀበ፡ ጌዴዎን፡ ከመ፡ ያለብዎ፡ በዘያጠፍዖሙ፡ ለኢሎፍሊ፡ ወተፈነወ፡ መልአክ፡ እምኀበ፡ ሙሴ፡ መቢይ፡ አመ፡ ያዓድዎሙ፡ ለእስራኤል፡ ባሕረ፡ ኤርትራ። እስመ፡ ይቤ፡ እግዚአብሔር፡ ባሕቲቱ፡ መርሖሙ፡ ወአልቦ፡ ምስኢሆሙ፡ አምላከ፡ ነኪር። ወአዕረጎሙ፡ ዲበ፡ ኀይለ፡ ምድር። ወሲሰዮሙ፡ እከ፡ ገራውህ፡ ወሐፀኖሙ፡ በመዓር፡ እምኰኵሕ፡ እስመ፡ አፍቀሮሙ፡ ፈድ፡ ፋደ። ወለከኒ፡ አንገሠከ፡ ዲበ፡ ሕዝቡ፡ ወወሀበከ፡ ሥልጣን፡ ዲበ፡ አርባዕቱ፡ መንግሥት፡ ከመ፡ ትዕቀብ፡ ሕዝበ፡ ወትርዓይ፡ በርትዕ፡ ወትግበር፡ ፈቃደ፡ ለዘፈጠርከ። ወአንገሠከ፡ ፈድፋደ፡ ከመታፍቅሮ፡ ለእግዚአብሔር፡ አምላክከ፡ እሰመ፡ እምኵሉ፡ አል፡ አለከ፡ ወአንገሠከ ወአንተኒ፡ ርቱዕ፡ ፈድፋደ፡ ታፍቅሮ፡ ለእግዚአብሔር፡ አምላክከ፡ በከመ፡ አፍቀርከ፡ ወተአመንከ፡ ዲበ፡ ኵሉ፡ መርዒቱ፡ ወአንተ፡ ግበር፡ ፈቃደ፡ ለእግዚአብሔር፡ ከመ፡ ይኑኅ፡ መዋዕሊከ፡ ዲበ፡ ምድር፡ ወየሃሉ፡ ምስሌከ። ወይከም፡ ለከ፡ ላዕለ፡ ኵሉ፡ ፀርከ፡ ወያንብርከ፡ ዲበ፡ ኵሉ፡ መንበርከ፡ ወይጸልል፡ ክነፊሁ፡ ዲበ፡ ርእስከ። ለእመ፡ አእመርከሰ፡ ኃረየ፡ ኪያከ፡ እግዚአብሔር፡ በከመ፡ ኃረዮ፡ ለሳኦል፡ እምውሉደ፡ እስራኤል፡ ወአንገሥ፡ ላዕለ፡ እስራኤል፡ ሕዝቡ፡ እንዘ፡ ይርኢ፡ አዕዱገ፡ አቡሁ፡ ወነበረ፡ ዲበ፡ አትራኖስ፡ ምስለ፡ ሳሙኤል፡ ነቢይ። ወወሀቦ፡ ክፍለ፡ ዓቢየ፡ እምአኃዊሁ፡ ወይቤሎ፡ ናሁ፡ እምይእዜሰ፡ አንገሠከ፡ እግዚአ፡ ብሔር፡ ዲበ፡ ሕዝቡ፡ ዐብ፡ ሕዝቦ። ወረአዮሙ፡ ለእለ፡ ይገብሩ፡ ሠናየ፡ በሠናይ፡ ወለእለ፡ ይገብሩ፡ እኪተ፡ በእኩይ፡ እስመ፡ እግዚአብሔር፡ አመገበከ፡ ዲቤሆሙ፡ ከመ፡ ትትቀትል፡ ወታሕዩ። ወለእለ፡ ይገብሩ፡ ሠናየ፡ ከመ፡ ትፈድዮሙ፡ ሠናየ፡ ወለእለ፡ ይገብሩ፡ እኩየ፡ ከመ፡ ትፈ፡ ድዮሙ፡ እኪተ፡ እስመ፡ ለከ፡ አመገበከ፡ እግዚአብሔር፡ ላዕለ፡ ኵሉ፡ ዘፈቀድከ፡ ከመ፡ ትግበር፡ ፈቃዶ፡ እመሂ፡ እንዘ፡ ትቅሥፍ፡ ወእመሂ፡ እንዘ፡ ተሐዩ። ወአንተኒ፡ ግበር፡ ፈቃዶ፡ ለአግዚአብሔር፡ በኵሉ፡ ጊዜ፡ ወበኵሉ፡ ሰዓት፡ ከመ፡ ይግበረ፡ ፈቃደከ፡ በኵሉ፡ ዘሐለየከ፡ ወበኵሉ፡ ዘሰአልከ፡ እንዘ፡ ትትጋነይ፡ ቅድሜሁ፡ እስመ፡ አንተሂ፡ ገብሩ፡ አንተ፡ ለዘይመልክ፡ ኵሎ፡ ለዘሀሎ፡ መልዕልተ። ወለዘአልቦ፡ ዘይኴንኖ፡ ውእቱሰ፡ ይኴንን፡ ኵሎ። ለዘአልቦ፡ ዘይሠይሞ፡ ውእቱሰ፡ ይሠይም፡ ኵሉ። ለዘአልቦ፡ ዘይሥዕሮ፡ ውእቱሰ፡ ይሥዕር፡ ኵሉ። ለዘአልቦ፡ ዘይግዕዞ፡ ውእቱ፡ ይግዕዝ፡ ኵሉ። ለዘአልቦ፡ ዘያጌብሮ፡ ውእቱሰ፡ ያገኤብር፡ ኵሎ፡ ወአልቦ፡ ዘያመሥጥ፡ እምእዴሁ፡ እስመ፡ ኵነኔ፡ ሰማይ፡ ወምድር፡ ሀሎ፡ ኀቤሁ። ወአልቦ፡ ሥውር፡ ቅድመ፡ አዕይንቲሁ፡ አላ፡ ክሡተ፡ በኀቤሁ። ወይሬኢ፡ ኵሎ፡ ወሎቱሰ፡ አልቦ፡ ዘይሬእዮ፡ ይሰምዕ፡ ጸሎቶ፡ ለዘጸለየ፡ ኀቤሁ፡ ወይት፡ ዌከፍ፡ ጸሎቶ፡ እስመ፡ ውእቱ፡ ፈጠሮ፡ በአርአያሁ፡ ለሰብእ፡ ወበአምሳሊሁ። ወይሴሲ፡ ኵሉ፡ እመዝገቡ፡ ዘኢይቀብል፡ እስመ፡ ንጉሥ፡ ውእቱ፡ ይነብር፡ ለዓለም።

Chapter 6 ወጸሐፉ፡ ነገሥት፡ በእንቲዓሁ፡ ርትዓ፡ ርትዓ፡ እስመ፡ በጽድቅ፡ ያነግሦሙ፡ ለነገሥት፡ እለ፡ ይገብሩ፡ ፈቃዶ። ወያበርህ፡ ማኅደሮሙበብርሃን፡ ዘኢይተረጐም፡ ኀበ፡ ሀለዉ፡ አብርሃም፡ ይስሐቅ፡ ወያዕቆብ፡ ወዳዊት፡ ወሰሎሞን፡ ወሕዝቅኤል፡ ወለኵሎሙ፡ ነገሥት፡ ሠናያንእለ፡ ማሕደሮሙ፡ ብርህት፡ እስመ፡ ገብሩ፡ ፈቃዶ፡ ለእግዚአብሔር፡ ወአኮ፡ ከመ፡ ዘበምድር፡ ታዕካ፡ አላ፡ ታዕካዘበሰማይ፡ ፍሩህ፡ ፈድፋደ፡ ወንጹሕ፡ ጸፍጸፍ፡ ዘኅብረ፡ ወርቅ፡ ወብሩር፡ ወያክንት። ዘዕድው፡ እምሕሊና፡ ሰብእ፡ ዘብሩህ፡ አርአያሁ፡ ፈድፋደ፡ ታዕካ፡ መንግሥተ፡ ሰማያት፡ ብሩህ፡ በጳዝዮን፡ ወበመረግድ፡ ወጠልማ፡ ወወራውረ። ወበኵሉ፡ ዕንቍ፡ ክብር፡ ዘዕድው፡ እምሕሊና፡ ሰብእ፡ ታዕካ፡ መንግሥት፡ ብሩህ፡ ፈድፋደ፡ ዘገብረ፡ ለሊሁ፡ ኬንያ፡ በከመ፡ የአምር፡ ታዕካ፡ መንግሥተ፡ ሰማያት፡ ወንጹሕ፡ ጸፍጸፉ፡ ዘኅብረ፡ ወርቅ፡ ወብሩር፡ ወያክንት፡ ወአህደር፡ ወአስፋር፡ ወኅብረ፡ ያክንት፡ ወሜላት። ወከመዝ፡ ሥኑይ፡ ወአዳም፡ ፈድፋደ፡ ወንጹሕ፡ ወብሩህ። ወጥፉር፡ በጽድቅ፡ ወበርትዕ፡ ወግቡር፡ በሣህለ፡ ወበምሕረት። ወቦ፡ ዘይውኅዝ፡ ማየ፡ ሕይወት፡ ወፈድፋደ፡ ንጹሕ፡ ከመ፡ ፀሐይ፡ ወደብተረ፡ ዘብርሃን፡ ወክሉል፡ በአክዋል፡ ዘኤርሞን። ወበዓውደ፡ ቤቱ፡ ትኩል፡ በፍሬያተ፡ ገነት፡ ጥዑማት፡ ዘዘዚአሁ፡ አርአያሁ፡ ወመዓዛሁ፡ ወዓፀደ፡ ወይን፡ ወዘይት፡ ወቅብዕ፡ ወጥቀ፡ ሠናይ፡ ወጥዑም፡ መዓዛ፡ ፍሬሁ። ወሶበ፡ ቦአ፡ ኅቤሁ፡ ዘሥጋ፡ እምጣዕመ፡ መዓዛ፡ ፍሬሁ፡ እምወጽአት፡ ነፍስ፡ እምብዝኃ፡ ትፍሥሕት፡ ዘላዕሌሁ። ወይትፌሥሑ፡ በህየ፡ ነገሥት፡ ሠናያንእለ፡ ገብሩ፡ ፈቃደ፡ ለእግዚአብሔር፡ ምግባ፡ ሪሆሙ፡ ወምቅውሞሙኒ፡ ዕውቅ፡ ውእቱ፡ ኀበ፡ ምቅዋመ፡ ሕይወት፡ ለዘለዓለም፡ ውስተ፡ መንግሥተ፡ ሰማያት። ወአርአየ፡ በከመ፡ ሰማይ፡ ከማሁ፡ በምድርኒ፡ በከመ፡ ዕበየ፡ መንግሥቶሙ፡ ዘበምድር፡ ወበከመ፡ ያከብርዎሙ፡ ወይሰግዱ፡ ሎሙ፡ ከማሁ፡ በሰማይኒ፡ ይከብሩ፡ ወይትሊዓሉ፡ ወይትፌሥሑ፡ ወለእመ፡ ገብሩ፡ ሠናየ፡ በሕይወቶሙ፡ ዲበ፡ ምድር። ወአለሰ፡ ጸዋጋን፡ በመንግሥቶሙ፡ ወበምኵናኖሙ፡ ዘወሀቦሙ፡ እግዚአብሔር፡ ወኢይፍትሑ፡ በጽድቅ፡ ወበርትዕ፡ ወኢያድኅኑ፡ ግፉዓ፡ ወግዩረ፡ ወእጓለ፡ ማውታ፡ እስመ፡ ተሐየዩ፡ ቃለ፡ ነዳያን፡ ወምስኪናን። ወኢያድሕንዎሙ፡ ለነዳያን፡ ወለምስኪናን፡ እምዕደ፡ ዘይትዔገሎሙ፡ ወኢያጸግቡ፡ ለርሁባን፡ እምሲሳዮሙ፡ ወኢያስትኡ፡ ለጽሙዓን፡ እምሰቲሆሙ፡ ወኢሜጡ፡ አዝኖሙኀበ፡ ጽርሐ፡ እጓለ፡ እመሕያው። ለውእቶሙኒ፡ ይወስድዎሙ፡ ውስተ፡ ማኅደረ፡ ሲኦል፡ ጸናፌ፡ ጽልመት፡ ወከመ፡ ዕበየ፡ ክብሮሙ፡ ከመሁ፡ ይፈደፍድ፡ ኃሣሮሙ፡ ወንዴቶሙ፡ አመ፡ በጽሐቶሙ፡ ይእቲ፡ አባይ፡ ዕለት፡ ዘገብረ፡ እግዚአብሔር፡ ወመዓተ፡ ዚአሁ። በከመ፡ ይቤ፡ ዳዊት፡ በዝሙር፡ እግዚኦ፡ በመዓትከ፡ ኢትቅሥፈኒ፡ ወበመቅሠፍትከ፡ ኢትገሥጸኒ። ወለእለሰ፡ እዓቀብዎ፡ ለሕግከ፡ እንዘ፡ ነገሥት፡ ወመኳንንት፡ ወእንዘ፡ አኃዝያነ፡ ዓለም፡ እሙንቱ፡ በዲበ፡ ምድር። ወበሰማይሰ፡ ሀሎ፡ አኃዚ፡ ኵሉ፡ ወነፍሳት፡ ኵሉ፡ ውስተ፡ እዴሁ፡ ወሕይወተ፡ ኵሉ፡ ውስተ፡ አፉሁ፡ ዘይሁቦሙ፡ ክብረ፡ ለእለ፡ ያከብርዎ፡ ወያፈክሮሙ፡ ለእለ፡ ያፈቅርዎ፡ እስመ፡ ኵሉ፡ ይመልክ፡ ወኵሎ፡ ይኴንን። ወይፈርን፡ ልበ፡ ወኵልያት፡ እስመ፡ ውእቱ፡ ንጉሠ፡ ሰማይ፡ ወምድር፡ ዘይሁቦ፡ ጸሎቶ፡ ለዘጸለየ፡ ኀቤሁ፡ በንጹሕ፡ ልብ። ወይሥዕር፡ ትዕቢቶሙ፡ ለዕሃያላን፡ እለ፡ የብአክዩ፡ ለአቢራት፡ ወለዕጓለ፡ ማውታ። አኮ፡ በኀይልከ፡ ዘነሣአካሁ፡ ለዝንቱ፡ መንግሥት፡ ወአኮ፡ በክሂሎትከ፡ ዘነበርከ፡ ዲበ፡ ዝንቱ፡ መንበር፡ አላ፡ ለሊሁ፡ ፈቂዶ፡ አንበርክ፡ ውስተ፡ መንበረ፡ መንግሥት፡ ይፍትንከ፡ እመትክል፡ ትኰንን፡ ሕዝቦ፡ በከመ፡ ሳኦል፡ በውእቱ፡ መዋዕል፡ ዘኮነነ፡ ሕዝቦ፡ ወተዓውሮ፡ ለቃለ፡ እግዚአብሔር፡ ወለቃለ፡ ሳሙኤል፡ ነቢይ፡ ወኢቀተለ፡ ንጉሠ፡ አማሌቅ፡ ወሰብኦሙ። እስመ፡ ይቤሎ፡ እግዚአብሔር፡ ለሳሙኤል፡ ነቢይ፡ ሑር፡ በሎ፡ ለሳኦል፡ ሑር፡ ወጽባዕ፡ ብሔረ፡ አማሌቅ፡ ወቅትል፡ ኵሎ፡ ነገሥቶሙ፡ ወነባሪሆሙ፡ እምሰብእ፡ እስከ፡ እንስሳ፡ እስመ፡ አምዕዑኒ፡ በአሊወ፡ ሕግ፡ ወበአምልኮ፡ አማልክት፡ ወሰጊድ፡ ለጣዖት፡ ወበምሕራማቲሆሙ፡ ወበኵሉ፡ ምግባር፡ ርሱሕ፡ ዘአልቦ፡ ባቍዕ። ወበእንተዝ፡ ሶበ፡ አምዕዕዎ፡ ለእግዚአብሔር፡ ፈነወ፡ ከመ፡ ይቀትሎሙ። ወእቱሰ፡ አድኀኖ፡ ለንጉሦሙ፡ ወለእንስሳሂ፡ ብዙኅ፡ ወአንስት፡ ወደናግል፡ ወመሠ፡ ንዮሙ፡ ለወራዙት፡ ወበእንተዝ፡ ይቤሎ፡ እግዚአብሔር፡ ለሳሙኤል፡ ነቢይ፡ እስመ፡ ዓለወ፡ ቃልየ፡ ወኢሰምዓ፡ ትእዛዝየ፡ ሑር፡ ሥጥጣ፡ ለመንግሥቱ። ወቀብዖ፡ ለዳዊት፡ ወልደ፡ እሴይ፡ ከመ፡ ይንግሥ፡ ህየንቲሁ፡ ላዕለ፡ እስራኤል። ወሉተሰ፡ አብሕ፡ ቦቱ፡ ጋኒነ፡ ዘየሐንቆ። እስመ፡ ወሀብክዎ፡ መንግሥተ፡ ከመ፡ ይግበር፡ ፈቃድየ፡ ወሶበ፡ ዓበየኒ፡ ገቢረ፡ ፈቃድየ፡ ሠዓርክዎ፡ እምንጹሑ፡ ወአንተሰ፡ ሑር፡ ንግር፡ ወበሎ፡ ከመዝኑ፡ ትትዒየሮ፡ ለእግዚአብሔር፡ ዘአንገሠከ፡ ላዕል፡ ሕዝቡ፡ እስራኤል፡ ወአንበረከ፡ ዲበ፡ መንበረ፡ መንግሥቱ። ወአንተሰ፡ ኢያእመርከ፡ ዘመጠነ፡ ዝ፡ ወሀበከ፡ ክብረ፡ ዓቢየ፡ ወዕበየ። ወሖረ፡ ሳሙኤል፡ ነቢይ፡ ኀበ፡ ሳኦል፡ ንጉሥ፡ ወቦዓ፡ ኀቤሁ፡ እንዘ፡ ሀሎ፡ ይቀውም፡ ውስተ፡ ማዕድ፡ ወአጋግ፡ ንጉሥ፡ አማሌቅ፡ በጸጋሙ። ወይቤሎ፡ ለምንት፡ ተዓውር፡ ተዓውርኮ፡ ለእግዚአብሔር፡ ዘአዘዘከ፡ ከመ፡ ትቅል፡ ሰብአ፡ ወእንስሳ። ወሶቤሃ፡ ፈርሃ፡ ወተንሥአ፡ ንጉሥ፡ እመንበሩ፡ ወአኃዘ፡ ልብሶ፡ ለሳሙኤል፡ ወዕበየ፡ ተመይጦ፡ ሳሙኤል፡ ወተሠጠ፡ ልብሱ፡ ለሳሙኤል። ወይቤሎ፡ ሳሙኤል፡ ለሳሶል፡ ሰጠጣ፡ እግዚአብሔር፡ ለመንግሥትከ። ወካዕበ፡ ይቤሎ፡ ሳኦል፡ ለሳሙኤል፡ ሰብሐኒ፡ በቅድመ፡ ሕዝብ፡ ወአስተሥሪ፡ ሊተ፡ በቅድመ፡ እግዚአብሔር፡ ከመ፡ ይሃረኒ፡ ወዓበየ፡ ሳሙኤል፡ ተመይጦታ፡ ለቃሎ፡ እስመ፡ ፈርሃ፡ ቃለ፡ እግዚአብሔር፡ ፈጣሪሁ፡ ወኢፈርሆ፡ ለንጉሥ፡ መዋቲ። ወበእንተዝ፡ ወግዖ፡ ለአጋግ፡ ንጉሠ፡ አማሌቅ፡ እንዘ፡ ሀሎ፡ መብልዕ፡ ውስት፡ አፉሁ። ወለውእቱ፡ ረሲእ፡ ዘዓለወ፡ ቃለ፡ እግዚአብሔር፡ አኃዞ፡ መንፈስ፡ ርጁር፡ ወዘበጦ፡ ርእሶ፡ እስመ፡ ኢየኃፍሮ፡ እግዚአብሔር፡ ለንጉሥ፡ ዘገበ፡ ዓመፃ፡ እስመ፡ ውእቱ፡ ንጉሠ፡ ነገሥት፡ ዘኢይዝዝ፡ ኵሎ። ወሎቱሰ፡ አልቦ፡ ዘይኤዝዞ፡ እስመ፡ ውእቱ፡ እግዚአ፡ ክውሎ፡ ፍጥረት፡ ዘይሥዕር፡ ኵሎ፡ ሥልጣኖሙ፡ ለነገሥት፡ ወለመኳንንት፡ እለ፡ ኢይፈርህዎ። ወለሳኦልኒ፡ አዕተተ፡ እምላዕሌሁ፡ ወእምላዕለ፡ ወልዱ፡ መንግሥተ፡ በከመ፡ ይቤ፡ ቤተ፡ ዳዊትሰ፡ ኀበ፡ ይትሊዓል፡ የሐውር፡ ወቤተ፡ ሳኦልሰ፡ ኀበ፡ ይቲሐት፡ የሐውር። ወተበቀለ፡ እግዚአብሔር፡ ዘርዐ፡ ቤተ፡ ሳኦል፡ በእንተ፡ ዘአምዕዖ፡ ወኢያጥፍዓ፡ ዓላውያን፡ ዚአሁ፡ እለ፡ አምዕዕዎ፡ በእከየ፡ ምግባሮሙ፡ እስመ፡ ዘኢይትበከል፡ ጸላኢሁ፡ ለእግዚአብሔር፡ ለለኢሁ፡ ጽላኢሁ፡ ለእግዚአብሔር። ወዘኢይትቤቀሎ፡ ለኃጥእ፡ እንዘ፡ ይክል፡ ተበቅሎ፡ ወቦቱ፡ ሥልጣን፡ ለሊሁ፡ ውእቱኪ፡ በአማን፡ ጽላዒሁ፡ ለእግዚአብሔር፡ ዘኢይትቤከል፡ ሕገ፡ እግዚአብሔር፡ ዘአልቦ።

Chapter 7 ወእመሂ፡ ንጉሥ፡ አንተ፡ ወእመሂ፡ መኰንን፡ አንተ፡ ምንትኑ፡ አንተ፡ አኮኑ፡ እግዚአብሔር፡ ዘፈጠርከ። ወአምጽአከ፡ እምኀበ፡ ኢሀሎከ፡ ከመ፡ ትገብር፡ ፈቃዶ፡ ወትሑር፡ በትእዛዙ፡ ወትፍራህ፡ ኵነኒሁ፡ በከመ፡ አንተ፡ ትትመዓዖሙ፡ ለአግብርቲከ፡ ወሥሉጥ፡ እንተ፡ ዲቤሆሙ፡ ከማሁ፡ ለከኒ፡ ሀሎ፡ ዘይትመዓዓከ፡ ወሥሉጥ፡ ዲቤከ። በከመ፡ አንተ፡ ትዘብጥ፡ ዘችንገለ፡ ምሕረት፡ ለእለ፡ ይገብሩ፡ አበሳ፡ ከመሁ፡ ለከኒ፡ ሀሎ፡ እግዚአብሔር፡ ዘይዘብጠከ፡ ወይወድየከ፡ ውስተ፡ ኵነኒ፡ ኀበ፡ አልቦቱ፡ ሙፃዕ፡ እስከ፡ ለዓለም። ወበከመ፡ አንተ፡ ትቀሥሮ፡ ለዘኢተጋነየ፡ ለከ፡ ወኢያብአ፡ አምኃ፡ ለከ፤ ወአንተ፡ ለምንት፡ አምኃ፡ ኢታበውዕ፡ ለእግዚአብሔር። ወበከመ፡ አንተ፡ ትፈቅድ፡ ይፍርሁከ፡ ለምንት፡ ኢትፈርሆ፡ ለእግዚአብሔር፡ አምላክከ፡ እስመ፡ ውእቱ፡ ዘፈጠርከ፡ ወአንገሠከ፡ ዲበ፡ ኵሉ፡ ተግባሩ፡ ከመ፡ ትርአይ፡ ሕዝቦ፡ ወመርዒቶ፡ በጻድቅ። ወኢታድሉ፡ ለገጸ፡ ዓቢይ፡ ወንዑሰ፡ አላ፡ ኰንን፡ በጽድቅ፡ ወበርትዕ፡ በከመ፡ አመገበከ፡ እግዚአብሔር፡ መነ፡ ትፈርህ፡ ዘእንበሌሁ፡ ዕቀብ፡ ፍናዊሁ፡ ወትእዛዘ። ወእትትገኃሥ፡ ኢለየማን፡ ወአለ፡ ፀጋም፡ በከመ፡ አዘዙሙ፡ ሙሴ፡ ለደቂቀ፡ እስራኤል፡ ወይቤሎሙ፡ አቅረብኩ፡ ለከ፡ እሳተ፡ ወማየ፡ ደይ፡ እዴከ፡ ኀበ፡ ዘፈቀድከ። ወሰማዕ፡ ቃለ፡ ዘአቀውም፡ ለከ፡ ከመ፡ ትሰማዕ፡ ቃሎ፡ ወትገብር፡ ትእዛዞ፡ ወበከመ፡ ኢትበል፡ ሀሎ፡ ማዕደተ፡ ፈለግ፡ መኑ፡ ያመጽ፡ ሊተ፡ ከመ፡ አርአይ፡ ወእሰማዕ፡ ቃሎ፡ ወአግበር፡ ትእዛዞ፡ ለእግዚአብሔር። ወእመ፡ ትቤ፡ ካዕበ፡ መኑ፡ የዓርግ፡ ሊተ፡ ውስተ፡ ሰማይ፡ ወያወርዳ፡ ሊተ፡ ለይእቲ፡ ቃል፡ አ፡ እግዚአብሔር፡ ከመ፡ እሰማዓ፡ ወእግበራ፤ ወይቤ፡ ነዋ፡ ቅሩብ፡ ለከ፡ ቃል፡ ውስተ፡ አፉከ፡ ወነዋ፡ ውስተ፡ እዴከ። ወለእመ፡ ኢሰማዕኮ፡ ለመጽሐፍ፡ ኢሰማዕኮ፡ ለእግዚአብሔር፡ አምላክከ፤ ወለእመ፡ ኢዓ፡ ቀብከ፡ ቃሊ፡ ኢያፈቅረከ፡ ኪያሁ፡ ወእገብረከ፡ ትእዛዞ። ወአንተ፡ ሀለወከ፡ ትባዕ፡ ውስተ፡ ኵነኔ፡ ዘለዓለም፡ በከመ፡ ኢያፈቅርከ፡ ትእዛዞ፡ ወኢገበርከ፡ ፈቃዶ፡ ለዘአዕበየከ፡ ወአክበርከ፡ እምነ፡ ኵሉ፡ ሕዝብከ፡ ከመ፡ ትትርዓዮሙ፡ በጽድቅከ። ወረሰየከ፡ መልዕልተ፡ ወርእሰ፡ ዲበ፡ ኵሉ፡ ሕዝቡ፡ እንዘ፡ ትዜከር፡ ስመ፡ አምላክከ፡ ዘፈጠርከ፡ ወወሀበከ፡ ከመ፡ ትኰንንሕዝበ፡ በጽድቅ፡ ወበርትዕ። ወእምእለ፡ አበሱ፡ ለከ፡ በዘትጌሥፅ፡ ወበዘትሜህር፡ እንዘ፡ ትዜከር፡ ፍኖተ፡ እግዚአብሔር፡ ወእንዘ፡ ታሤኒ፡ ሕሊናከ፡ ወትፈትሕ፡ በርትዕ። ወሶበ፡ ይትዋቀሱ፡ በቅድሜከ፡ ወኢታድሉ፡ ለገጽ፡ ወኢትንሣእ፡ ሕልያነ፡ እምብእሲ፡ ከመ፡ ትመሐሮ፡ ወለብእሲ፡ ንጹሕ፡ ከመ፡ ትዒምፆ፡ እስመ፡ ዚአከ፡ ይእቲ፡ ምድር፡ ኵለንታሃ። ወለእመ፡ ገበርከ፡ ፈቃዶ፡ ያነውኀ፡ መዋዕሊከ። ትዝከር፡ ከመ፡ ትትነሣዕ፡ እምውታምወትቀውም፡ ቅድመ፡ ገጹ፡ ወትትሐተት፡ በኵሉ፡ ዘገብርከ፡ እመኒ፡ እኩየ፡ ወእመኒ፡ ሠናየ። ወለእመ፡ ገበርከ፡ ሠናየ፡ ውስተ፡ ማኅደረ፡ ሠናያነ፡ ነገሥት፡ ተኃድር፡ ውስተ፡ አብያተ፡ ብርሃን፡ ወእመሰ፡ ገበርከ፡ እኩየ፡ ተኃድር፡ ውስተ፡ ማኅደረ፡ ነገሥት፡ እኩያን፡ ወኢየኃፍር፡ እግዚአብሔር፡ አዘዘ፡ ክብርከ። ወአንተሰ፡ ሶበ፡ ትሬኢ፡ ዕበየ፡ ግርማከ፡ ወትርሢተ፡ ጸባዒትከ፡ ወንዋየ፡ ሐቅልከ፡ ሰቁኢለ፡ ወትኔጽር፡ አፍራሲከ፡ ወሐራ፡ ዘታሕተ፡ እዴከ፡ ወእለ፡ ይነፍሑ፡ ቀርነ፡ ወይትዋነዩ፡ በእንዚራ፡ ቅድሜከ። ወአንተሰ፡ ሶበ፡ ትርኢ፡ ዘንተ፡ ኵሉ፡ ታሌዕል፡ ሕሊናከ፡ ወታገዝፍ፡ ክሣደከ፡ ወኢትዜከሮ፡ ለዘወሀበከ፡ ዘንተ፡ ኵሎ፡ ክብረ፡ አኮነ፡ ሶበ፡ ይብለከ፡ ኅድግ፡ ወተኃድግ፡ አንተሂ። ወይሁድ፡ ለባዕድ፡ ክብረከ፡ እስመ፡ ተዓውሮ፡ ተዓውርከ፡ ላዕለ፡ ምግብ፡ ዘአመገበከ። ወበህየኒ፡ ይትኃሠሠከ፡ ወይትሐሰበከ፡ ወይኴንነከ፡ እስመ፡ ግብተ፡ ይመጽአከ፡ ሞተ፡ ወበትንሣኤ፡ ይከውን፡ ፍትሕ፡ ወይትሐተት፡ ምግባረ፡ ሰብእ። ወለነገሥተ፡ ምድር፡ አልቦ፡ ዘያከብሮሙ፡ ወለመኳንንተ፡ ምድርኒ፡ ይወድቅ፡ አክሊለ፡ ምክሆሙ፡ እስመ፡ ባዕል፡ ወነዳይ፡ ይቀውሙ፡ ኅቡረ፡ ውስተ፡ ኵነኔ፡ ወፍትሕ፡ እስመ፡ መኰንነ፡ ርትዕ፡ ውእቱ። በኵነኔ፡ ድልወ፡ ወነፍስ፡ ትርዕድ፡ ወመጻሕፍት፡ ይትከሠታ፡ ወምግባረ፡ ሰብእ፡ ያስተርኢ፡ ወአልቦ፡ ዘይትከደን። አመ፡ ትንሣኤ፡ ሙታን፡ እስመ፡ ምድር፡ ታገብዓ፡ ማኅፀንታ፡ ዘተሠይመ፡ ላዕሌሃ፡ በከመ፡ ብእሲት፡ ኢትክል፡ ዓፂወ፡ ማኅፀና፡ እምከመ፡ በጽሐት፡ ለወሊድ፡ ወአልጸቀ፡ ለወጺእ፡ ዘውስተ፡ ከርሣ። ወሚመ፡ ደመናት፡ ይክሉኑ፡ ዓቍረ፡ ዝናም፡ ከመ፡ ኢይሰዱ፡ ኀበ፡ አዘዞሙ፡ እግዚአብሔር፡ ከመ፡ ኢይወርዱ፡ ከማሁኪ፡ ኢይትከሃል፡ ከመ፡ ኢይትነሥኡ፡ ሙታን፡ እም፡ ከመ፡ በጽሐ፡ ጊዜሁ፡ ለትንሣኤ፡ እስመ፡ ቃለ፡ እግዚአብሔር፡ አምጽአ፡ ለኵሉ፡ እምኅበ፡ አልቦ፡ ወቃለ፡ እግዚአብሔር፡ አብአ፡ ለኵሉ፡ ውስተ፡ መትሕት። ወካዕበ፡ ያወጽአ፡ ቃለ፡ እግዚአብሔር፡ ለኵሉ፡ እመትሕት፡ በከመ፡ ይቤ፡ ሙሴ፡ አኮ፡ በኅብስተ፡ ክመ፡ ዘየሐዩ፡ ሰብእ፡ አላ፡ በኵሉ፡ ቃል፡ ዘይወጽእ፡ እምአፉሁ፡ ለእግዚአብሔር። ናሁኪ፡ ተዓውቀ፡ ከመ፡ በቃለ፡ እግዚአብሔር፡ የሐይው፡ ምውታን። ወካዕበ፡ ይቤ፡ በውስተ፡ ዳግም፡ ሕግ፡ በእንተ፡ እለ፡ ይከውኑ፡ ነገሥት፡ ወመኳንንት፡ ወእለ፡ ይገብሩ፡ ፈቃደ፡ በዕከተ፡ ኵነኔ፡ እትቤቀሎሙ፡ ወበጊዜ፡ ይድኅፅ፡ እግሮሙ፡ እስመ፡ ቀርበ፡ ዕለት፡ ኊልቈሙ። ወካዕበ፡ ይቤሎሙ፡ እግዚአብሔር፡ ለእለ፡ ኢየአምርሩ፡ ኵነኔሁ፡ ለእግዚአብሔር፡ አእምሩ፡ አእምሩ፡ ከመ፡ አመ፡ ውእቱ፡ እግዚአብሔር፡ አነ፡ አቀትል፡ ወአሐዩ። እቀሥፍሂ፡ ወእሣሐል፡ አወርድሂ፡ ውስተ፡ ሲኦል፡ ወካዕበ፡ ዓዓርግ፡ ውስተ፡ ሰማይ፡ ወአልቦ፡ ዘያመስጥ፡ እምእዴየ። ከመዝ፡ ይቤ፡ እግዚአብሔር፡ በእንተ፡ ነገሥት፡ ወመካንት፡ እለ፡ ኢዓቀቡ፡ ትእዛዞ፡ ዕቀቡ፡ ሕግየ፡ ወሥርዓትየ፡ ከመ፡ ትባዑ፡ ውስተ፡ መንግሥትየ፡ ዘለዓለም፡ እስመ፡ መንግሥትሰ፡ ዘበምድር፡ ኃላፊ፡ ውእቱ፡ ወይፈልስ፡ እምነግህ፡ እስከ፡ ሠርክ። እስመ፡ ጽዋሁ፡ ለእግዚአብሔር፡ ውእቱ፡ ለክብር፡ ወለኃሣር፡ ዘንተ፡ የኃሥር፡ ወዘንተ፡ ያከብር። ለዘኢገብር፡ ፈቃደ፡ ይሥዕሮ፡ ወለዘገብረ፡ ፈቅደ፡ ይሠይሞ።

Chapter 8 ወወእንተ፡ ትንሣኤ፡ ሙታንሂ፡ ስማዕ፡ እንግርከ፡ ይተክሉ፡ ዕፀወ፡ ወይገብሩ፡ አዕጹቀ፡ ወአሕራገ፡ ወይን፡ ወይገብሩ፡ እምኔሁ፡ እስመ፡ እምኀበ፡ አልቦ፡ ያመጽአ፡ እግዚአብሔር፡ ለፍሬ። ርኢኪ፡ ንሰቲት፡ ይእቲ፡ ዕፅ፡ ዘተከልካ፡ ወትወጽእ፡ ምስለ፡ አዕጹቅ፡ ወቈጽል፡ ወፍሬ። ወያጠብዎ፡ እግዚአብሔር፡ ለሥረዊሃ፡ እም አጥባት፡ እማይ፡ ወእመሬት። ወለዘውሰ፡ ይሴስዮሙ፡ እምነፋሰ፡ ወእምፀሐይ፡ ሥርው፡ ትሁብ፡ ማየ፡ ለቈፅል፡ ወመሬትኒ፡ ትሁብ፡ ጽንዓ፡ ለዕፀው። ወመንፈሰ፡ እግዚአብሔር፡ ይሁብ፡ ፍሬ፡ በማዕከሎሙ፤ ከማሁኪ፡ ትንሣኤሆሙ፡ ለም፡ ውታን። ወይቤ፡ እም ነፋስት፡ አስተጋብኦ፡ ነፍሳተ፡ እማይ፡ ወእመሬት፡ ወእምፀሐይ፡ ወእምነፋስ፡ እስመ፡ ዘዚአሁ፡ ሖረ፡ እምከመ፡ ወጽአት፡ እምሥጋ። መሬት፡ ነበረት፡ ውስተ፡ ዘዚአሀ፡ ወኮነት፡ ሐማደ፡ ወማይኒ፡ ነበረት፡ ኀበ፡ ዘዚአሃ፡ ወኮነት፡ ጠለ። ወነፋስኒነበረት፡ ኀበ፡ ዘዚአሃ፡ ወኮነት፡ ነፋስ፡ ወእሳትኒ፡ ነበረት፡ ኀበ፡ ዘዚአሃ። ወኮነት፡ ምውቀ፡ ፀሐየ። ወመንፈሰ፡ እግዚአብሔር፡ ገብዓት፡ ውስተ፡ እደ፡ ፈጣሪሀ፡ ወያነብራ፡ ውስት፡ ዘፈቀደ፡ እስመ፡ ከመ፡ ያገብአ፡ ጊዜ፡ ፈቀደ። ወያጸንዖን፡ ውስተ፡ አብያተ፡ ብርሃን፡ ለነፍሳተ፡ ጻድቃን፡ ወለነፍሳተ፡ ኃጥአንሰ፡ ያዓፅዎን፡ ውስተ፡ አብያተ፡ ጽልመት፡ እስከ፡ ጊዜ፡ ፈቀደ፡ ያወጽኦን። ወይቤሎ፡ ለሕዝቅኤል፡ ነቢይ፡ ጸውዕ፡ እም4ነፍሳት፡ ከመ፡ ይትጋብኡ፡ ወይከውኑ1መንፈስ። ወሶበ፡ ነበበ፡ ከመዝ፡ በአሐዱ፡ ቃል፡ ተጋብኡ፡ እም4ነፋሳት። ወአምጽአ፡ ማይ፡ ጠላ፡ ወካዕበ፡ አምጽአ፡ ፀሐይ፡ ሙቀተ። ወካዕበ፡ አምጽአ፡ መሬት፡ ሐመደ፡ ወነፋስኒ፡ አምጽአ፡ እስትንፋስ። ወእግዚአብሔርኒ፡ አምጽአ፡ ነፍሰ፡ እምኀበ፡ ማኅደራ፡ እምኀበ፡ ዓፀዋ፡ ወበ1ቃል፡ ተጋብኡ፡ ወኮነ፡ ትንሣኤ። ወካዕበ፡ አርእየከ፡ ዘሀሎ፡ አምሳለ፡ ኀቤከ፡ ይከውን፡ ምሤተ፡ ወትነውም፡ ወይከውን፡ ጽባሕ፡ ወትትነሣእ፡ አንተሰ፡ ሶበ፡ ትነውም፡ ምውት፡ አንተ። ወሶበ፡ ትነቅሐ፡ አምሳለ፡ ትንሣኤ፡ ወሌሊትሰ፡ አምሳለ፡ ዝንቱ፡ ዓለም፡ ዘጽልመት፡ ኵለንታሁ፡ ወኵሉ፡ ዓለም፡ ይነውም፡ ቦቱ፡ እስመ፡ ጽልመተ፡ ሌሊት፡ ደፈኖሙ። ወጎሐ፡ ጽባሕኒ፡ አምሳለ፡ ትንሣኤ፡ ምውታን፡ ውእቱ፡ በዘቦቱ፡ ይትዓተት፡ ጽልመተ፡ ወይከውን፡ ብርሃን፡ ውስተ፡ ኵሉ፡ ዓለም፡ ወይትነሣእ፡ ሰብእ፡ ወይወፍር፡ ውስት፡ ተግባሩ። ወከመዝኪ፡ ይዝቲ፡ ዛቲ፡ ሐደሶ፡ ዓለም፡ ወትንሣኤ፡ ሙታን፡ እስመ፡ ዝንቱ፡ ዓለም፡ ኃላፊ፡ አምሳለ፡ ዝንቱ፡ ሌሊት። ወሶበ፡ ይመጽእ፡ ፀሐይ፡ ወይበርህ፡ አምሳለ፡ ዝንቱ፡ ዓለም፡ በከመ፡ ይቤ፡ ዳዊት፡ ወውስተ፡ ፀሐይ፡ ሢመ፡ ጽላሎት። ወሶበ፡ መጽአ፡ በሐዲስ፡ ዓለም፡ ከመ፡ ዘይእዜ፡ ያበርህ፡ ፀሐይ፡ አመ፡ ይመጽእ፡ ለሊሁ፡ እግዚአብሔር፡ ላዕሌሃ፡ ያበርህ፡ በዓለም፡ ሐዳስ፡ እስመ፡ ይቤ፡ ፀሐይ፡ ዘኢየዓርብ፡ ወማሕቶተ፡ ዘኢይጠፍዕ፡ ለሊሁ፡ እግዚአብሔር፡ ብርሃና። ወካዕበ፡ ያነሥኦሙ፡ ለምውታን፡ ከመ፡ ቅጽበተ፡ ዓይን፤ ወካእበ፡ አመጽእ፡ ለከ፡ አሐተ፡ አምሳለ፡ እምሰሲትከ፡ ዘትዘርዕ፡ ወተሐዩ፡ ቦቱ፡ እንተ፡ እመሂ፡ ኅጠተ፡ ሥርናይ፡ ወእመሂ፡ ኅጠተ፡ ሰገም፡ ወእመሂ፡ ኅጠተ፡ ብርሰን፡ ወኵሉ፡ ተግባረ፡ ሰብእ፡ ዘይዘርዕ፡ ውስተ፡ ኵሉ፡ ምድር፡ ለእመ፡ ኢሞተት፡ አልቦ፡ ዘየሐዩ። ወሶበ፡ ይመውት፡ ይትባላዕ፡ ሥጋሁ፡ በሐመድ፡ ምስለ፡ አነጻሁ፡ በከመ፡ ሥጋ፡ ሰብእ፡ ዘትሬኢ። ወተበሊዖ፡ ሥጋሁ፡ በመሬት፡ ይነቁዕ፡ መጠነ ርኢኪ፡ ይእቲኒ፡ ለእመ፡ ኢሞተት፡ ኢትክል፡ ሐይወ፡ ወሶበ፡ በቈለት፡ ታወጽእ፡ ሰብለ፡ ብዝኃ። ወይወሀብ፡ እምኀበ፡ እግዚአብሔር፡ ፍሬ፡ ውስተ፡ ውእቱ፡ ሰብል፡ ዘልህቀ፡ ወያለብሶ፡ ሥጋ፡ ማዕስ፡ ገልቡ። ወቈፅልዕ፡ ወብርዕ፡ ወኃሠር፡ ወቅርንብ፡ ኢይትኋለቍ፡ ለከ፡ አላ፡ ርኢ፡ መጠነ፡ ይበዝኅ፡ ኅጠቱ፡ ለዘዘራዕከ። ኢትኩን፡ አብደ፡ ወርኢ፡ ዘርዓከ፡ መጠነ፡ በዝኃ፡ ፤ ከማሁኪ፡ ሐሊ፡ ትንሣኤ፡ ሙታን፡ ወዘከመ፡ ይትፈደዩ፡ በከመ፡ ምግባሮሙ። ወካዕበ፡ ሰማዕ፡ እንግርከ፡ በከመ፡ ኢይትዌለጥ፡ ዘርዕ፡ ኀበ፡ ካልዕ፡ ዘርአ፡ ለእመ፡ ዘራዕኮ፡ ሥርናየ፡ የዓርርኑ። ሰገመ፡ ወለእመ፡ ዘራእከ፡ ከሙነ፡ ተዓርርኑ፡ ተላቢ፡ ፤ ወእምውስተ፡ ዕፀውኒ፡ ለእመ፡ ተክልከ፡ በለሰ፡ ቦኑ፡ ይበቍልኑ፡ ለውዘ፡ ወለእመ፡ ተከልከ፡ ገውዘ፡ ይበቍልኑ፡ ለከ፡ ወይነ። ወለእመ፡ ተከልከ፡ ጥዑመ፡ ፍሬ፡ ይበቍልኑ፡ መሪረ፡ ወለእመ፡ ተከልከ፡ ዕፀ፡ መረረ፡ ይክልኑ፡ ከዊነ፡ ጥዑመ። ከማሁኪ፡ ለእመ፡ ሞተ፡ ኃጥእ፡ ይክልኑ፡ ከዊነ፡ ጻድቀ፡ አመ፡ ትንሣኤ፡ ወእመኒ፡ ሞተ፡ ጻድቅ፡ ይክልኑ፡ ከዊነ፡ ኃጥእ፡ አመ፡ ትንሣኤ፡ አላ፡ ኵሉ፡ በከመ፡ ምግባሩ፡ ይትፈደይ፡ ወበከመ፡ ፍሬ፡ ግብሩ፡ ወበከመ፡ ግብረ፡ እደዊሁ፡ ይትፈደይ፡ ወአልቦ፡ ዘይትኴነን፡ በኃጢአተ፡ ካልኡ። ዓርዘ፡ ሊባኖስ፡ ይተከል፡ ወይገብር፡ አዕፁቀ፡ ነዋኃት፡ ወዓበይተ፡ ወለእመ፡ ኢዘንመ፡ ላዕሌሁ፡ ጠለ፡ አርሞንዔም፡ ኢይሤኒ፡ ቍጸሊሁ፡ አላ፡ ይየብስ፡ ወይትነገፍ። ወዘግባኒ፡ ይትመላህ፡ እምሥርው፡ እመ፡ ኢወረዶ፡ ላዕሌሁ፡ ዝናመ፡ ክረምት። ወከማሁ፡ እመ፡ ኢወረደ፡ ላዕሌሆሙ፡ ወለሕይወት፡ እምኀበ፡ እግዚአብሔር፡ ኢይት፡ ነሥኡ፡ ምውታን

Chapter 9 ቈላተ፡ ጊላቡሂ፡ ወአድባረ፡ ሊባኖስ፡ ሶበ፡ ኢወርድ፡ ላዕሌሆሙ፡ ዝናመ፡ ምሕረት፡ እምኀበ፡ እግዚአብሔር፡ ኢያብቍሉ፡ ሣዕረ፡ ለእንስሳ፡ ወለአራዊት። ወአድባረ፡ ገልዓድኒ፡ ወቈላተ፡ ኢለምኒ፡ ኢይሁብ፡ ሐመልማለ፡ ለዓጣሌ፡ ወለአባሕኵ፡ እለ፡ ይትረእዩ፡ ወለእንስሳ፡ ገዳምኒ፡ ወይጠል፡ ወቶራት፡ ወኀያላት። ወከማሁ፡ ዕልዋን፡ ወመናፍቃን፡ እለ፡ ቀዲሙ፡ አጥረዋይ፡ ለዕልወት፡ ወለስሕተት፡ ለእመ፡ ኢወረደ፡ ላዕሌሆሙ፡ ጠለ፡ ምሕረት፡ እምኀበ፡ እግዚአብሔር፡ ኢትይነሥኡ፡ ሙታን፡ ወመሠርያን፡ ወምጠዓውያን፡ ቆጵሮሰ፡ ወዲማሶ፡ መስተዋድያን። ወእለ፡ ይነብሩ፡ ሰገለ፡ ወሥራየ፡ ወመስተቃትላነ። ወእለ፡ ይዜምው፡ ዘእንበለ፡ ሕግ፡ ወአትናውያን፡ ወሜዶን፡ እለ፡ ይትአመኑ፡ በጣዖቶሙ፡ ወየሐልዩ፡ ሎሙ፡ ወይትወነዩ፡ ሎሙ፡ በከበሮ፡ ወበመሰንቆ፡ ወበእንዚራ። ወየዓብዱ፡ ምስለ፡ ጣዖቶሙ፡ ወይዜምዉ፡ በግብረ፡ እደዊሆሙ፡ እለ፡ ኢያድኅኑ፡ ርእሶሙ፡ እለ፡ እሙንቱ፡ ይትኰነኑ፡ በዕለተ፡ ዳይን፡ አመ፡ ትንሣኤ። አአብድ፡ ወአእዩየ፡ ሕሊና፡ ይመስለከኑ፡ ዘኢይትነሥኡ፡ ምውታን። ኢተሐሊኪ፡ ከመዝ፡ እስመ፡ ኢትነውም፡ ህየ፡ ሶበ፡ ይትነፋሕ፡ ቀርን፡ በትንሣኤ፡ ሙታን፡ በአፈ፡ ሚካኤል፡ ሊቀ፡ መላእክት። አድባር፡ ወአውግር፡ ይቴሐቱ፡ አፍላግ፡ ወማዕምቅ፡ ይኤርዩ፡ ወይከውኑ፡ መጽያሕቶ፡ ርቱዓ። ወይከውን፡ ትንሣኤ፡ ለኵሉ፡ ዘሥጋ።

Chapter 10 ወእመሰ፡ ኢኮነ፡ ከመዝ፡ ለምንት፡ አበው፡ ቀደምት፡ እምአዳም፡ ወአቤል፡ ወሴት፡ ወኖኅ፡ ወሴም፡ ወአብርሃም፡ ወይስሐቅ፡ ወያዕቆብ፡ ወዮሴፍ፡ ወሙሴ፡ ወአሮን፡ እለ፡ ኢይፈቅዱ፡ ይትቀበሩ፡ ዘእንበለ፡ ኀበ፡ መቃብረ፡ አበዊሆሙ። አኮኑ፡ ኅቡረ፡ ከመ፡ ይትነሥኡ፡ አመ፡ ትንሣኤ፡ ምስለ፡ አዝማዲሆሙ፡ ወኢይትኋለቍ፡ አዕዕምቲሆሙ፡ ምስለ፡ አዕዕምተ፡ እኩያን፡ ወመጠዓውያን፡ ወአረማውያን። ወእንተኒኢተስሕት፡ ሕሊናከ፡ እንዘ፡ ትብል፡ በአይቲ፡ ይትነሥኡ፡ ምውታን፡ እምድኅረ፡ ሞቱ፡ እለ፡ ይትወደዩ፡ በበ))፡ ውስተ መቃብር፡ ወበልየ፡ አዕፅምቲሆሙ። ወሶበ፡ ትሬኢ፡ ውስተ፡ መቃብር፡ ኢይትረከብ፡ ምልዓ፡ እድ፡ ሐመድ፡ ወበአይቲ፡ ይትነሥኡ፡ አዕፅምቲሆሙ፡ ለምውታን፡ ትብል፡ ዘንተ፡ በዕበደ፡ ልብኩ። አምተ፡ ዘዘራዕከ፡ ኢይበቍልኑ፡ ትብል፡ ይበቍልኬ፡ አንተ፡ ዘዘራዕከ። ወከማሁኪ፡ እግዚአብሔርኒ፡ ዘዘርዓ፡ ነፍሳተ፡ ይትነሥኡ፡ ፍጡነ፡ ወኢያጐነዲ፡ አንሥኦቶሙ፡ በቃሉ፡ ማኅየዊት፡ እስመ፡ ውእቱ፡ አምጽአ፡ ለሰብእ፡ እምኀበ፡ ኢሀሎ፡ ውስተ፡ ሀለዎ፡ ዘበአማን። ወካበ፡ አምውስተ፡ ሀለዎ፡ አግብዖ፡ ውስተ፡ ሞት፡ ወካዕበ፡ እም፡ ውስተ፡ ሞት፡ አግብኦ፡ ውስተ፡ ሀለዎ። ይክልኪ፡ አግዚአብሔር፡ አሕይዎ፡ ወአንሥኦ።

Chapter 11 አርሞን፡ ወአረፋቲሃ፡ ወድቃ፡ ወእለ፡ ያመልኩ፡ ጣዖተ፡ ውስት፡ ዛብሎን፡ ወኤዶምያስ፡ ይቲሐታ፡ አሜሃ፡ እስመ፡ ፈደዮን፡ እግዚአብሔር፡ በከመ፡ እከዮን፡ ወበከመ፡ ግብረ፡ እደዊሆን፡ ይበክያ፡ ጢሮስ፡ ወሲዶና፡ እስመ፡ ቀርበ፡ ዘይትቤቀሎን፡ በእንተ፡ አከዮን፡ ወጣዖቶን፡ ዘገብረ፡ በንዕሶን፡ ወኢኀደጋ፡ እስከ፡ አመ፡ ርስአን። ወበእንተዝ፡ ይትቤቀሎን፡ እግዚአብሔር፡ በእንተ፡ ዘገብራ፡ ምርኣተ፡ ወርኩሰ፡ ወዝሙተ፡ ወጣዖተ፡ ወአዋልደ፡ ይሁዳኒ፡ የኃሥራ፡ እስመ፡ ኢቆማ፡ በትእዛዘ፡ እግዚአብሔር፡ ፈጣሪሆን። ከማሃኪ፡ አመ፡ ትንሣኤ፡ ሙታን፡ ይትከሠት፡ ኃሠራ፡ ለኢየሩሳልውም፡ እስመ፡ ኢሖረት፡ በሕጉ፡ ወበኵነኔኑ፡ ለእግዚአብሔር፡ ወሖረት፡ በፍግዓ፡ ወበቀቲለ፡ ጻድቃን። ይእተ፡ አሚረ፡ ይትኃሠሣ፡ እግዚአብሔር፡ በማሕቶተ፡ ጥበቡ፡ ወይትቤቀላ፡ በኵሉ፡ ዘገብረት፡ እከያ፡ በመዋዕለ፡ ንዕሳ፡ ወኢኃደገት፡ በመዋዕለ፡ ወርዙታ፡ እስከ፡ ርስአታ። ወቦዓተ፡ ውስተ፡ መቃብር፡ ወኮነት፡ ሐመደ፡ ከመ፡ ቀደምት፡ አበዊሃ፡ እለ፡ ሖሩ፡ በግዕዞሙ፡ ወአበዩ፡ ትእዛዘ፡ እግዚአብሔር፡ ከመ፡ ትንሣኤ፡ ይትቤቀሎሙ። እስመ፡ ይቤ፡ ሙሴ፡ በእንቲአሆሙ፡ እስመ፡ ከመ፡ ዓፀደ፡ ወይነ፡ ሰዶም፡ ዓፀደ፡ ወይኖም። ወሐረጎሙኒ፡ እምነ፡ ገሞራ፡ ወአስካሎሙኒ፡ አስካለ፡ ሐሞት፡ ወቀምሖሙኒ፡ መሪር። ኅምዛ፡ አርዌ፡ ምድር፡ ወይኖሙ፡ ኅምዛ፡ አፍዖት፡ ዘይቀትል።

Chapter 12 ዝንቱኪ፡ ኃሣርኪ፡ ወለተ፡ ኢየሩሳሌም፡ ዘተጽሕፈ፡ በነቢይ፡ እስመ፡ ዘከመ፡ ምግባሮሙ፡ ወአበሳሆሙ፡ ለሰብአ፡ ሰዶም፡ ወገሞራ፡ ከማሁኪ፡ ምግባርኪ፡ ወአበሳኪ፡ ወለተ፡ ኢየሩሳሌም። ወበከመ፡ ሰዶም፡ ወገሞራ፡ ከማሁ፡ ኃሣርኪ፡ ተተክለ፡ ዓፀደ፡ ወይኖሙ፡ በዝሙት፡ ወበትዕቢት። ወኢዘንመ፡ ላዕሌሆሙ፡ ዝናመ፡ ትሕትና፡ ወምሕረት፡ ዘእንበለ፡ ዝናመ፡ ትዕቢት፡ ወዝሙት፡ በዘይሠርፅ፡ ዓፀደ፡ ወይኖሙ፡ ዘእንበለ፡ ዓመፃ፡ ወጹግ፡ ወትዕግልት፡ ወክዒወ፡ ወም፡ ወረሲአ፡ ስመ፡ እግዚአብሔር፡ አምላኮሙ። ወኢያእመርዎ፡ ለፈጣሪሆሙ፡ ዘእንበለ፡ ጣዖቶም፡ ወእክዩም፡ ግባሮሙ፡ ወተፈግዑ፡ በግብረ፡ እደዊሆሙ፡ ወይገብሩ፡ ምርዓተ፡ ምስለ፡ እንስሰ፡ ወተባዕት። ወኢያእምርዎ፡ ለእግዚአብሔር፡ በምግባሮሙእስመ፡ ዖሩ፡ አዕይንቲሆሙ፡ ከመ፡ ኢይርአዩ፡ ወጻመ፡ እዘኒሆሙ፡ ከመ፡ ኢይሰምዑ፡ ወኢይግበሩ፡ ፈቃደ፡ ለእግዚአብሔር፡ ወዘያሠምር፡ ዓፀደ፡ ወይነ፡ ሰዶም፡ እሙንቱ፡ ሐረገ፡ ወይን፡ ገሞራ፡ እሙንት፡ እለ፡ ኢይፈርዩ፡ አስካለ፡ ጥዑመ። ወሶበኒ፡ ዓፀርዎ፡ ለወይኖሙ፡ ይከውን፡ ሕምዘ፡ ዘይቀትል፡ እስመ፡ እምፍጥረቱ፡ ተተክለ፡ በመርገው፡ ወፀዓቱ፡ ኮነ፡ በዘመነ፡ መንሱት። ወበኵሉ፡ ጊዜ፡ አልቦ፡ ሠናይ፡ ለሐረገ፡ ወይኖሙ፡ እስመ፡ በጠለ፡ ሲኦል፡ ተሰቅየ፡ ዓፀደ፡ ወይኖሙ፡ በነፋሰ፡ ሐሩር፡ ፀንዓ፡ ኃረጎሙ። ወሶበኒ፡ ፈረየ፡ ወተዐፀረ፡ ኮነ፡ ለሙስና፡ ወለመቅሠፍት፡ ወለእለ፡ ይሰትይዎ፡ ያገዝፍ፡ አልባቢሆሙ፡ ወይረስዮሙ፡ ለቍራረ፡ ውርሑቃነ፡ እምእግዚአብሔር። ወማኅደረ፡ ለዲያብሎስ፡ እስመ፡ በምግባረ፡ ዚአሁ፡ እኩይ፡ የሐውሩ፡ ወሐረገ፡ ሰዶምኒ፡ ትእኅዝ፡ በሊዓ፡ ወተዓርግ፡ ውስተ፡ አድባር፡ ወውስተ፡ አዕዋም። ወትኬልሎ፡ ለበዓለ፡ ዘበዓውደ፡ ያመልኩ፡ ወትሠውዕ፡ ደቂቃ፡ ወአዋልዲሃ፡ ለአጋንንት፡ እለ፡ ኢየአምርዎ፡ ለእኩይ፡ ወለሠናይ። ወይክዕው፡ ደመ፡ ንጹሐ፡ ወውስተ፡ ግልፍዋት፡ ያወጽሑ፡ እም፡ አስካሊሃ፡ ለዓፀደ፡ ወይነ፡ ሰዶም። ወደጎነሂ፡ ዘኢሎፍሊ፡ ታመልክ፡ ወታከብር፡ ወትሠውዕ፡ ሎቱ፡ እምስቡሐኒሃ፡ ወእመራዕይሃ፡ ከመ፡ ትትፈጋዕ፡ በሞፃሕቶሙ፡ ወበዕበዶሙ፡ ዘመሐርዋ፡ አጋንንት፡ ከመ፡ ትሡዕ፡ ሎሙ፡ ወትገብር፡ ፈቃዶሙ። ወከመ፡ ኢታእምር፡ ፈጣሪሃ፡ እግዚአብሔርሃ፡ በኩሉ፡ ጊዜ፡ ዘይሴስያ፡ ወየሐንፃ፡ እምንዕሳ፡ እስከ፡ መዋዕለ፡ ውርዙታ፡ ወዓዲ፡ እስከ፡ መዋዕለ፡ ርስዓታ፡ ወእስከ፡ ዕለተ፡ ሞታ። ወዓዲ፡ እትቤቀል፡ አመ፡ ትንሣኤ፡ ወይከውን፡ ጊዜሃ፡ እስከ፡ ለዓለም፡ እስመ፡ ኢተመይጠት፡ ውስተ፡ ሕግየ፡ ወኢሖረት፡ በትእዛዝየ። ይትነሥኡኪ፡ አማልክቲሃ፡ ለእመ፡ ኮኑ፡ አማልክተ፡ ዕሙነ፡ ይሩፁምስሌሃ፡ ውስተ፡ ገሃነም፡ ወያድኅንዋ፡ አመ፡ ተማዕኩ፡ አነ፡ ላዕሌሃ፡ በመዓትየ፡ ወአሰሰልኩ፡ ኵሎሙ፡ መመሐዛኒሃ፡ እለ፡ ይዜምው፡ ምስሌሃ። ወረሰይክዋ፡ ኅሥርተ፡ በኵሉ፡ ዘከመ፡ ገብረት፡ ጽዕልተ፡ ወኃሣረ፡ በላዕለ፡ ቤትየ፡ ወቅዱሳትየ። ወአምጽአት፡ ስምየ፡ ዘተሰምየ፡ በላዕሌሃ፡ እንዘ፡ ይብልዋ፡ ዝየ፡ ሕዝበ፡ እግዚአብሔር፡ ወቤተ፡ እግዚአብሔር፡ ዘእስራኤል፡ ወማኅደረ፡ ስሙ፡ ለልዑል፡ ኢየሩሳሌም፡ ቅድስተ፡ ቅዱሳን፡ ሀገሩ፡ ለንጉሥ፡ ዓቢይ። ወትትሜካህ፡ ብየ፡ ከመ፡ ይእቲ፡ ዓመትየ፡ ወአነኒ፡ እግዚኦ፡ ወአኮ፡ ዘትፈርሃኒ፡ ወትገብር፡ ፈቃድየ፡ ከመ፡ እግዚኦ፡ አላ፡ ትትቃጸበኒ፡ ከመ፡ ዓላዊ። ወትትቀነይ፡ ለባዕዳን፡ አማላክት፡ እለ፡ ኢይሴስይዋ፡ ወኢያልህቅዋ፡ ወኢየዓርዝዋ፡ አላ፡ ጻዕሙ፡ ኮንዋ፡ ዕቅፍተ፡ ለአስሕቶ፡ ከመ፡ ያርኅቅዋ፡ እምኔየ። ወተሠውዕ፡ ሎሙ፡ ወትበልዕ፡ መሥዋዕቶሙ፡ ወታወጽሕ፡ ሎሙ፡ ወትሰቲ፡ ወይነ፡ ሞፃሕቶሙ፡ ወተዓጥን፡ ሎሙ፡ ወታፂኑ፡ መዓዛ፡ ዕጣኖሙ፡ ወይኤዝዝዋ፡ ወትትኤዘዝ፡ ሎሙ። ወዓዲ፡ ትሠውእ፡ ደቂቃ፡ ወአዋልዲሃ፡ ወትትጌሣሕ፡ በግብረ፡ እደዊሃ፡ ወበፃማ፡ ከናፍሪሃ፡ እስመ፡ ትዌውዕ፡ ሎሙ፡ በእንተ፡ ፍቅሮሙ። አሌሳ፡ በዕለተ፡ ደይን፡ ላቲኒ፡ ወለአማልክቲሃ፡ እለ፡ ታፈቅሮሙ፡ ወተሐቀፎሙ፡ ወምስሌሆሙ፡ ትወርድ፡ ውስተ፡ ሲኦል፡ መትሕተ፡ ታሕቲት፡ ኀበ፡ ዕፄሁ፡ ዝኢይነውም፡ ውእስቱ፡ ዘኢይጠፍዕ። እሌለኪ፡ ወለተ፡ ኢየሩሳሌም፡ ኅሥርተ፡ እስመ፡ ኀደጊ፡ ኪያየ፡ ዘፈጠርኩኪ፡ ወአምለኪባዕዳነ፡ አማልክተ። ወአነሂ፡ በከመ፡ ምግባርኪ፡ እፈድየኪ፡ ወእትቤከለኪ፡ በከመ፡ ትዕይርትኪ፡ እስመ፡ አምዑዕክኒ፡ ወተሐየይኪዮ፡ ለታልየ፡ ወኢያሠነይኪ፡ ምግባረኪ። ወአነሂ፡ እትሄየየኪ፡ ወኢያፈጥን፡ አድኅኖተኪ፡ እስመ፡ አንቲ፡ እምአዕኪዮ፡ ለቃልየ፡ ወኢተዓገሥኪ፡ በምክርየ፡ ዘተካየድኪ፡ ምስሌየ፡ ከመ፡ ትዕቀቢ፡ ትእዛዝየ፡ ወአነሂ፡ አሀሉ፡ ምስሌኪ፡ ወአድኅነኪ፡ እምኵሎሙ፡ እለ፡ ይፃረሩኪ፡ ወአንቲ፡ ከመ፡ ትዕቀቢ፡ ትእዛዝየ፡ ዘአዘዝኩኪ፡ ወሥርዓትየ። ወዘንተ፡ ኵሎ፡ ኢዓአቀብኪ፡ ወአነሂ፡ ተሐየይኩኪ፡ ወአመ፡ ኵነኒ፡ እትቤቀለኪ፡ አኮኑ፡ አነ፡ ፈጠርኩኪ፡ ወኢዓቀብኪ፡ ቃልየ፡ ወትእዛዝየ፡ ወባረኩኪ፡ ከመ፡ ትኩኒ፡ እንቲአየ። ወአንቲሰ፡ ተበዓድኪ፡ እምኔየ፡ በከመ፡ ተበዓዱ፡ ሰዶም፡ ወገሞራ። ወአነሂ፡ ጠሰይክዎሙበመዓትየ፡ እስመ፡ እምሥረዊሆሙ፡ አንቲ፡ ለሰዶም፡ ወገሞራ፡ እለ፡ አነ፡ ሠረውክዎሙ፡ ወአጥፋዕኩ፡ እምድር፡ ዝክሮሙ፡ ከመ፡ ኢየሐልዉ፡ በፍግዓሆሙ፡ እስመ፡ አምዕዑ፡ ኪያየ፡ ዘፈጠርክዎሙ፡ በሐዊረ፡ ብእሲተ፡ ብእሲ፡ ወዘምዎ፡ ዘእንበለ፡ ሕግ፡ ምስለ፡ ተባዕት፡ ወእንስሳ፡ ከመ፡ ዘምስለ፡ አንስት። ወአልቦ፡ ፍርሃተ፡ እግዚአብሔር፡ ቅድመ፡ አዕይንቲሆሙ፡ እምንዑሶሙ፡ እስከ፡ ዓቢዮሙ። ወአልቦ፡ ዘይጌሥፆ፡ 1ለካልኡ፡ ከመ፡ ይኅድር፡ ኪያሃ፡ ገቢረ፡ እለ፡ ይረድዕዎሙ፡ ውስተ፡ ኵሉ፡ ምግባረ፡ እኩይ፡ ወጽጉባነ፡ ክውሉ፡ ዓመፃ፡ ወጹግ፡ እስመ፡ እኩይ፡ ምግባሮሙ። ወሥዩም፡ ውስተ፡ ኅሊናሆሙ፡ ኵሉ፡ ምግባረ፡ እኩይ፡ ወትዕቢት፡ ወትዕግልት፡ ወስስ፡ ዕት። ወበእንተዝ፡ ተሐየዮሙ፡ እግዚአብሔር፡ ውገፍትዖን፡ ለአህጉሪሆሙ፡ ወቦ፡ እለ፡ አውዓዮን፡ በእሰት፡ እስከ፡ መሠረታቲሆን፡ ወኢተርፈ፡ 1እምውስቲቶን፡ እለ፡ ሐልቃ፡ ወተሠረዋ፡ እስከ፡ ለዓለም። ወይጸንሕ፡ እስከ፡ ዕለተ፡ ኵነኔ፡ እስከ፡ ለዓለም፡ ወዕለተ፡ ደይን፡ ዓባኡ፡ እስመ፡ ተዓሥራ፡ በኃጢአት፡ ወኢይምህሮን፡ ወኢይሠሃሎን፡ እስመ፡ አምዓዓኒ፡ በእከየ፡ ምግባሮን። ወአነሂ፡ ተሐየይክዎሙ፡ ወከማሁ፡ አንቲኒ፡ ወለተ፡ ኢየሩሳሌም፡ ኅሥርት፡ ከመሁ፡ ትትዓሠሪ፡ በዕለተ፡ ኵነኔ፡ እስመ፡ ኢትረክቢ፡ ዘታመክንዩ፡ አመ፡ አኀዝኩኪ፡ በመዓትየ፡ እስመ፡ ኵሉ፡ ምግባርኪ፡ ዱግ፡ ወትዕግልት፡ ወስስዕት፡ ወዝሙት፡ ወነቢበ፡ ሐሰት፡ ወኵሉ፡ ፍኖት፡ ዘስሕተታት፡ ወደኅፅ፡ ዘኢይሠምሮ፡ አነ። ወአነሰ፡ ረሰይኩኪ፡ ለክብር፡ ወአንቲሰ፡ ረሰይኪ፡ ርእስኪ፡ ለሐሣር። እንሰ፡ እብለኪ፡ ሊተ፡ ወአንቲሰ፡ ተረሰይኪ፡ ለባዕድ። ወአንሰ፡ ፈኃርኩኪ፡ ለቅድሳት፡ ወአንቲሰ፡ ኮንኪ፡ ለዲያብሎስ፡ ወአነደ፡ ኢትቤቀልኪ፡ በከመ፡ እስከየ፡ ምግባሪኪ። ወአነውኅ፡ እኩየ፡ በቀለ፡ ላዕሌኪ፡ በእንተ፡ ኵሉ፡ ዘኢሰማዕኪ፡ ቃልየ፡ ወኢቀብኪ፡ ትእዛዝየ፡ ዘአዘዝኩኪ፡ አመ፡ ዕለት፡ አፍቀርኩኪ፡ እስመ፡ አነ፡ እግዚአብሔር፡ ዘፈጠርኩኪ፡ ወእትመዓዕ፡ ላዕለ፡ ኵሎሙ፡ ኃጥአን፡ እለ፡ ከማኪ፡ ወእፈድዮሙ፡ በከመ፡ እኩዮሙ፡ በእለተ፡ ኵነኔ። ወለኪኒ፡ አኳንነኪ፡ ምስሌሆሙ፡ እስመ፡ ኢአቀብኪ፡ ቃልየ፡ ወተሐየይኪ፡ ፍትሐየ። ኦ፡ ሰዶም፡ ወገሞራ፡ እለ፡ አልብክንፈርሃ፡ እግዚአብሔር፡ ውስተ፡ ልብክን። ከማሁ፡ ወከተ፡ ኢየሩሳሌም፡ አንትኪ፡ አንተ፡ ኅቡረ፡ ትትኳነን፡ ምስሌኪ፡ በረዓይ፡ ገሃነም፡ ወኵሎሙ፡ እለ፡ ገብሩ፡ ምግባረ፡ ዚአከ፡ እስመ፡ ኅብረ፡ ትውርዱ፡ ኀበ፡ ዘተደለወ፡ ገሃነም፡ ኀበ፡ አልባቲ፡ ሙፃዕ፡ እስከ፡ ለዓለመ፡ ዓለም። ወአንቲኒ፡ ወይእቲኒ፡ እለ፡ ኢየዓቀብክን፡ ቃልየ፡ ወትዕዛዝየ፡ ወእለሰ፡ ኅቡረ፡ ትወርዱ፡ ውስተ፡ ሲኦል፡ በዕለተ፡ ኵነኔ፡ እስመ፡ ኢዓቀብክን፡ ቃልየ፡ ወትእዛዝየ። ወእለሰ፡ ዓቀቡ፡ ቃልየ፡ ወትእዛዝየ፡ ዘዘገቡ፡ ኃጥአን፡ ይበልዑ፡ ጻድቃን፡ ወዘአጥረዩ፡ እኩያን፡ ይትካፈሉ፡ ምህርካ፡ ሄራን፡ በከመ፡ አዘዘ፡ እግዚአብሔር፡ ጻድቃን፡ ወኄራን፡ ይትፌሥሑ፡ ወይትኃሠዩ። ወኃጥአንሰ፡ ወዓማጽያን፡ ይበክዩ፡ ወየኀዝኑ፡ በእንተ፡ ኵሉ፡ ጌጋዮሙ፡ ዘስሕቱ፡ እምትእዛዝየ። ወዘሰ፡ የዓቅብ፡ ቃልየ፡ ወየሐውር፡ በትእዛዝየ፡ ውእቱኪ፡ ዘይበልዓ፡ ለበረከት፡ ወይከብር፡ በኀቤየ። ወኵሉ፡ ዘየዓክብ፡ ቃልየ፡ ወይገብር፡ ትእዛዝየ፡ በረከተ፡ ምድር፡ ይበልዕ፡ ወኀበ፡ ሙባዓ፡ ነገሥት፡ ኂራን፡ ወራትዓን፡ ይበውዕ፡ ወየኀድር።

Chapter 13 ጢሮስ፡ ወሲዶና፡ ወኵሉ፡ አድያሚሃ፡ ለብሔረ፡ ይሑዳ፡ እለ፡ ያዓብያ፡ ርእሶን፡ ይእዜ፡ አሌ፡ ሎን፡ አመ፡ አኃዝክዎን፡ በመዓትየ፡ እስመ፡ የኃሥራ፡ ወይትቀሥፋ። ይቤ፡ እግዚአብሔር፡ እስመ፡ ይወፅእ፡ እምኔሆን፡ ዕቡይ፡ ወዝኁር፡ ወልደ፡ ኃጕል፡ ፀራ፡ ለጽድቅ፡ ዘያገዝፍ፡ ክሣይ፡ ወይትሜካህ፡ ወኢየአምር፡ ፈጣሪሁ፡ እስመ፡ አርአያ፡ ረሰይክዎ፡ ለመዓትየ፡ ከመ፡ አርኢ፡ ኃይልየ፡ በላዕሌሁ፡ ይቤ፡ እግዚአብሔር፡ ዘኵሎ፡ ይመልክ። ዛቲ፡ ቅፍርናሆሙ፡ ወሰማርያ፡ ወገሊላ፡ ወሶርያ፡ ወደማስቆ፡ ወቆጵሮስ፡ ወአክይያ፡ ወኵሉ፡ ደወለ፡ ዮርዳኖስ፡ አሕዛብ፡ ግዙፍነ፡ ክሣድ፡ እለ፡ በግዕዞሙ፡ የሐውሩ፡ እለ፡ ደፈኖሙ፡ ጽልመት፡ ወጽላሎተ፡ ሞተ። ወኢይትመየጡ፡ ውስተ፡ ፈሪሃ፡ እግዚአብሔር፡ እለ፡ ደፈኖሙ፡ ልቦሙ፡ ሰብላንዮስ፡ ወኢትእዘዝዎ፡ ለውእቱ፡ ዕቡይ። አሌ፡ ሎሙ፡ አሜሃ፡ ለእለ፡ ይትኤዘዝዎሙ፡ ለርኩሳን፡ ወይገብሩ፡ መሥዋዕተ፡ በስሞሙ፡ እስመ፡ የዓልውዎ፡ ለእግዚአብሔር፡ ዘፈጠሮሙ፡ ወይትሜሰሉ፡ ከመ፡ እንስሳ፡ ዘአልቦ፡ ልብ፡ እስመ፡ ያቀውም፡ አምሳሊሁ፡ ውእቱ፡ ረሲዕ፡ ወልደ፡ ኃጕል፡ ውስተ፡ ኵሉ፡ መካን፡ ወይትፌሣሕ፡ በግብረ፡ እደዊሁ፡ ወበፍትወተ፡ ነፍሱ፡ ወበኵሉ፡ ጹግ፡ ወትዕግልት፡ ወዓመፃ፡ ወኅብል፡ ወኵሉ፡ ዘይገብር፡ ዝሙት፡ ወትዕግልት፡ ወሐሰት። እስመ፡ በመዋዕሊሁ፡ ዕውቅ፡ ከመ፡ ይገብር፡ ከመዝ፡ እስመ፡ እምኀበ፡ እግዚአብሔር፡ ኊልቍ፡ ከመ፡ ይግበሮ፡ ለዝንቱ። ፀሐይኒ፡ ተፀልም፡ ወወርኀኒ፡ ደመ፡ ትከውን፡ ወከዋክብትኒ፡ ይወድቁ፡ እምሰማይ፡ ወኵሉ፡ ግብር፡ ይማስን፡ በተአምር፡ ዘይመጽእ፡ በድኃሪ፡ መዋዕል፡ ከመ፡ ይኰንና፡ ለምድር፡ ወኵሉ፡ ዘውስቴታ፡ በከመ፡ ግብረ፡ እደዊሆሙ፡ ለእለ፡ ይነብሩ፡ ውስቴታ። ወለደኃሪኒ፡ ጸላዒ፡ ይሥዕሮ፡ ሞት፡ እስመ፡ ተዓበየ፡ ላዕለ፡ ፍጥረተ፡ እግዚአብሔር፡ ወገብረ፡ በከመ፡ ፈቀደ፡ አሐተ፡ ሰዓተ። ወእምድኅሬሁ፡ አልቦ፡ መባሕት፡ እስመ፡ አነ፡ እትቤቀል፡ ይቤ፡ እግዚአብሔር፡ ዘኵሉ፡ ይመልክ። ወውእቱኒ፡ ይወርድ፡ ውስተ፡ መቅሠፍት፡ ወኵኔኒ፡ ዘጽኑሕ፡ ሎቱ፡ እመ፡ ዕለተ፡ ይትአኃዝ፡ በመዓትየ፡ እስመ፡ ይስሕብ፡ ኵሉ፡ እለ፡ ምስሌሁ፡ ውስተ፡ ኃጕል፡ ወውስተ፡ መቅሠፍት፡ ወሙስና፡ እስመ፡ አነ፡ ዘአውፅእ፡ ወአበውዕ፡ ውስተ፡ ኵነኔ፡ ገሃነም። ወኢይትመካህ፡ ኃያል፡ በኃይሉ፡ እስመ፡ ውእቱ፡ ይሁቦሙ፡ ኃይለ፡ ወጽንዓ፡ ለድኩማን፡ ወካዕበ፡ ይሁብ፡ ድካመ፡ ለጽኑዓን፡ ወኃያላን። ወትትፈደይ፡ በቀለ፡ ዕቤራት፡ ወዕጓለ፡ ማውታ፡ እስመ፡ ውእቱ፡ አኃዚ፡ ወተበቃሊ፡ ለዕለ፡ ይትገፍዑ፡ እምዕደ፡ ገፋዕያኒሆሙ። እሌ፡ ለኪ፡ እንተ፡ ትትሜክሂ፡ ወታገዝፈ፡ ክሣደኪ፡ ወይመስለኪ፡ ዘኢይእኅዘኪ፡ ወኢይትበቀልኪ፡ በመዓትየ፡ በከመ፡ ይቤ፡ ለምንት፡ ወጽድቅ፡ ኮከበ፡ ጽባሕ፡ እምሰማይ፡ ዘይሠርቅ፡ በጊዜ፡ ጽባሕ። እስመ፡ ይቤ፡ በትዕቢቱ፡ ወበትምክህቱ፡ አነብር፡ መንበርየ፡ መልዕልተ፡ ሰማያት፡ ወከዋክብት፡ ወእከውን፡ ከመ፡ ልዑል። ዘንተኪ፡ ደፈርከ፡ በትዕቢትከ፡ ወኢተዘከርከ፡ እግዚአብሔርሃ፡ ዘፈጠረከ፡ ወገብረከ፡ በእደዊሁ፡ ለምንትኪ፡ አዕበይከ፡ ርእሰከ፡ አንተ፡ ከመ፡ ትረድ፡ መትሕተ፡ ታሕቲት፡ በግዝፈተ፡ ልብከ። ወበትዕቢትከ፡ ተትሕትከ፡ እምኵሎሙ፡ መላእክተ፡ እለ፡ ከማከ፡ እስመ፡ እሙንቱ፡ ይሴብሕዎ፡ በትሕትና፡ መንፈሰ፡ ለፈጣሪሆሙ፡ ወኢይትዓተቱ፡ እምትእዛዙ፡ እስመ፡ አእመሩ፡ ከመ፡ ውእቱ፡ ዘገብሮሙ፡ ወፈጠሮሙ፡ ወዓቀቡ፡ ሕሊናሆሙ፡ ከመ፡ ኢይኃልፉ፡ ወኢይትዓደዉ፡ እምትእዛዙ። ወአንተሰ፡ ገበርከ፡ በትዕቢተ፡ ልብከ፡ እኩየ፡ ወኮንከ፡ ኀሡረ፡ እምካልዓኒከ፡ እስመ፡ አቃቤሁ፡ አንተ፡ ለኵሉ፡ ዓመፃ፡ ወጹግ፡ ወጽልሑት፡ ወትዕግልት፡ እለ፡ የሐውርዋ፡ ኃጥአን፡ እለ፡ ከማከ፡ ወረሢዓን፡ እለ፡ ኮኑ፡ እምፍጥረተ፡ ዚአከ፤ ወየዓልዉ፡ ከማከ። ወየሐውሩ፡ በኵሉ፡ ፈቃድከ፡ ወትእዛዝከ፡ ዘትሜሕሮሙ፡ ጹገ። አሌለለ፡ አንተ፡ ወእለ፡ አስሐትከ፡ በትምይንተሰ፡ ትወርዱ፡ ኅቡረ፡ ውስተ፡ ሙስና። ወደቂቀ፡ እግዚአብሔር፡ እለ፡ ስሕትክሙ፡ በውእቱ፡ መምዕላይ፡ ዘይስሕት፡ አሊ፡ ለክሙ፡ ኅቡረ፡ ትወርዱ፡ ውስተ፡ መቅሠፍት፡ ለዘለዓለም፡ እስመ፡ ከማሁ፡ ስሕትክሙ፡ በዘመሐርክሙ፡ ወእቱ፡ ወአጋንንቲሁ። ወለቀዳሚኒ፡ እንዘ፡ ሀሎ፡ ሙሴ፡ ገብረ፡ እግዚአብሔር፡ ወአምዓዕክምዎ፡ በኮረብ፡ ወበኀበ፡ ማየ፡ ትሰት፡ ወበደብረሲና፡ ወበአማሌቅ። ወዓዲ፡ አመ፡ ፈነውክሙ፡ ሰብዓ፡ ዓይን፡ ውስተ፡ ምድረ፡ ርስት፡ ወሶበ፡ ይቤለክሙ፡ ርኁቅ፡ ፍኖቱ፡ ወፅኑዕ፡ ቅጽሮሙ፡ ዘይበጽሕ፡ እስከ፡ ሰማይ፡ ወለዕፃዳቲሆሙ፡ ኑዕ፡ ወእለ፡ ያርብህኒህየ፡ የኃድሩ፡ ወይነብሩ፡ ወዘንተ፡ ሶበ፡ ይቤሉክሙ፡ ዮምበዕክሙ፡ ወለውክሙ፡ ቃለ፡ እግዚአብሔር፡ ከመ፡ ትግብዑ፡ ብሔረ፡ ግብፅ፡ ውስተ፡ ቅኔክሙ፡ ዕፁብ። ወኢታዘከርክዎ፡ ለእግዚአብሔር፡ ዘአድኃነክሙ፡ እምንዳቤክሙ፡ ዘገብረ፡ ዓቢያተ፡ በግብፅ፡ ወመርሐክሙ፡ በእደ፡ መልአኩ፡ ለመ፡ ኢያውዒክሙ፡ ፀሐይ፡ ይጼልለክሙ፡ ደመና፡ መዓልተ፡ ወከመ፡ ኢይትዓቀፍ፡ እገሪክሙ፡ በጽልመት፡ ያበርህ፡ ለክሙ፡ ለሊተ፡ በዓምደ፡ እሳት። ወሶበ፡ አፍርሁክሙ፡ ፈርዖን፡ ወሠራዊቱ፡ አውየውክሙ፡ ወጾራኅክሙ፡ ኀበ፡ ሙሴ፡ ወሙሴ፡ ጸርሐ፡ ወአውየወ፡ ኀበ፡ እግዚአብሔር፡ ወበመልአኩ፡ መገበክሙ፡ ከመ፡ ኢትትራከቡ፡ ምስለ፡ ሠራዊቱ፡ ለፈርዖን። ወሎሙሰ፡ አግብዖሙ፡ በሥቃይ፡ እስመ፡ ይቤ፡ እግዚአብሔር፡ ባሕቲቱ፡ መርሆሙ፡ ወአልቦ፡ ምስሌሆሙ፡ አምላክ፡ ነኪር፡ ወለጸላእቶሙሰ፡ ደፈኖሙ፡ ውስተ፡ ባሕር፡ በምዕር። ወኢያትረፈ፡ ነፋፂተ፡ እውስቴቶሙ። ወለእስራኤል፡ አኅለፎ፡ በእግር፡ እንተ፡ ማዕከለ፡ ባሕር፡ ወአልቦ፡ ወኢምንተኒ፡ ዘረከቦሙ፡ እኪት፡ እምግብፃውያን፡ ወአብጽሖሙ፡ ውስተ፡ ደብረ፡ ሲና። ወበህየ፡ ሲሰዮሙ፡ መና፡ 4ዓመተ። ወተሐከዩ፡ አምልኮቶ፡ ለእግዚአብሔር፡ መጠነዝ፡ ገቢሮ፡ ሎሙ፡ ሠናያተ፡ እስመ፡ ወትረ፡ ያምዕዕዎ፡ ለእግዚአብሔር፡ ውስተ፡ መጽሐፈ፡ ልደተ፡ አበው፡ ወይቤ፡ ሐመድ፡ ልቦሙ፡ ለእጓለ፡ እመሕያው፡ ወኵሉ፡ ግብሮሙ፡ ውስተ፡ ትዕግልት፡ ወእኪት፡ ይረውፁ፡ ወአልቦ፡ እምኔሆሙ፡ ዘይፈቅዳ፡ ለርትዕ፡ ዘእንበለ፡ አስተጋብኦ፡ ንዋይ፡ በዓመፃ፡ ወመሐላ፡ በሐሰት፡ ወዓምፆ፡ ቢጽ፡ ወሥርቅ፡ ወትዕግልት። ወኀበ፡ ዝንቱ፡ እኪት፡ ይረውፁ፡ ኵሎሙ፡ መዋዕለ፡ ሕይወቶሙ። ወፈድፋደ፡ አምዕዕዎ፡ ለእግዚአብሔር፡ ደቂቀ፡ እስራኤል፡ አላውያን፡ ትእዛዛቲሁ፡ ለእግዚአብሔር፡ እምቀዳሚ፡ እስከ፡ ደኃሪ።

Chapter 14 ወለእመኒ፡ ቀሠፎሙ፡ እግዚአብሔር፡ ለቀዳሚ፡ ሕዝብ፡ በማየ፡ አይኅ፡ በእንተ፡ አባሳሆሙ፡ ለደቂቀ፡ ቀየን፡ አጥመቃ፡ ለምድር፡ በማየ፡ አይኅ፡ ወሐፀባ፡ እምኵሉ፡ ርስሐት፡ ጊጋዮሙ፡ ለደቂቀ፡ ቃየን። ወአጥፍዓ፡ ኵሎ፡ ዓማፅያነ፡ እስመ፡ ይቤ፡ ነሳሕኩ፡ በእንተ፡ ዘገበርክዎ፡ ለእጓለ፡ እመሕያው፡ ወአጥፍአ፡ ኵሉ፡ ወኢያትረፈ፡ ዘእንበለ ነፍዳት፡ ወእምድኅሬሁሰ፡ አስተባዝኀ፡ ኪያሆሙ፡ ወመልዕዋ፡ ለምድር፡ ወተካፈሉ፡ ርስተ፡ አቡሆሙ፡ አዳም። ወኖኅሰ፡ ተካየደ፡ ስለ፡ እግዚአብሔር፡ ኪዳነ፡ ከመ፡ ኢያማስና፡ ለምድር፡ ደግመ፡ በማየ፡ አይኅ፡ ወደቂቀ፡ ኖኅኒ፡ ከመ፡ ኢይብልዑ፡ ማውታ፡ ወብትከ፡ ወከመ፡ ኢያምልኩ፡ ባዕዳነ፡ አማልክተ፡ ዘእንበለ፡ እግዚአብሔር፡ ፈጣሪሆሙ፡ ውእቱኒ፡ ከመ፡ ይኩኖሙ፡ አምላኮሙ፡ ወከመ፡ ኢያጥፍዖሙ፡ በምዕር፡ በከንቱ፡ ወከመ፡ ኢይክልዖሙ፡ ዝናመ፡ ፀደይ፡ ወመፀው፡ ወከመ፡ የሀቦሙ፡ ሲሲተ፡ በበእገዋሊሁ፡ ለሰብእ፡ ወለእኀስሳ፡ ፍሬያተ፡ ወሣዕረ፡ ወአትክልተ፡ ወውእቶሙ፡ ከመ፡ ያሠንዩ፡ ግእዞሙ፡ በኵሉ፡ ዘፈቅሮ፡ እግዚአብሔር። ወዘንተ፡ ሥርዓተ፡ እምድኅረ፡ ወሀቦሙ፡ አምዕዕዎ፡ ለእግዚአብሔር፡ ደቂቀ፡ እስራኤል፡ በእከዮሙ። ወኢሖሩ፡ በከመ፡ አበዊሆሙ፡ አብርሃም፡ ይስሐቅ፡ ወያዕቆብ፡ እለ፡ ኢተዓደዉ፡ እምትእዛዙ፡ ለአግዚአብሔር፡ ፈጣሪሆሙ። ወእሙንቱሰ፡ ለደቂቀ፡ እስራኤል፡ ጠዋያን፡ በግብሮሙ፡ እምንዑሶሙ፡ እስከ፡ ዓቢዮሙ፡ እለ፡ ኢዓቀቡ፡ ትእዛዘ፡ እግዚአብሔር። እመሂ፡ ሌዋውያኒሆሙ፡ ወመላእክቲ፡ ወጸሐፍቲሆሙ፡ ኵሎሙ፡ ይትዓደዉ፡ ትእዛዘ፡ እግዚአብሔር። ወኢይቀውም፡ በሕጉ፡ ወበሥርዓቱ፡ ለእግዚአብሔር፡ ዘአዘዞሙ፡ ሙሴ፡ በመጽሐፈ፡ ሕግ፡ እንዘ፡ ይብል፡ አፍቅር፡ ለእግዚአብሔር፡ አምላክከ፡ በኵሉ፡ ልብከ፡ ወበኵሉ፡ ነፍስከ። ወአፍቅር፡ ቢጸከ፡ ከመ፡ ነፍስከ፡ ወኢታምል፡ ባዕዳነ፡ አማልክተ፡ ወኢትሑር፡ ብእሲተ፡ ብእሲ፡ ወኢትቅትል፡ ነፍስ፡ ወኢትሥርቅ። ወአትኩን፡ ስምዓ፡ በሐሰት፡ ወኢትፍቱ፡ ንዋየ፡ ካልዕከ፡ ወኵሉ፡ ዘአጠረየ፡ እኁከ፡ እመሂ፡ አድጎ፡ ወእመሂ፡ ብዕራዮ። ወዘንተ፡ ሶበ፡ ይኤዝዞ፡ ደቂቀ፡ እስራኤል፡ ጸዋጋን፡ ይትመየጡ፡ ኀበ፡ ጹግ፡ ወጽልሁት፡ ወዓመፃ፡ ወትዕግልት፡ ወሐዊረ፡ ብእሲተ፡ ብእሲ፡ ወሥርቅ፡ ወሐሰት፡ ወአምልኮ፡ አማልክት። ወበኮሬብሂ፡ አምዕዕዎ፡ ለእግዚአብሔር፡ ደቂቀ፡ እስራኤል፡ በገቢረ፡ ላህም፡ ዘይትረዓይ፡ ሣዕረ፡ ወሰገዱ፡ ወይቤሉ፡ ነዋ፡ አማልክቲነ፡ እለ፡ አውፅኡነ፡ እምድረ፡ ግብፅ። ወተፈሥሑ፡ በግብረ፡ እደዊሆሙ፡ ወበልዑ፡ ወሰትዩ፡ ወፀግቡ፡ ወተንሥኡ፡ ይዝፍኑ። ወበእንተዝ፡ ተምዕዓ፡ ሙሴ፡ ወወረደ፡ እምደብረሲና፡ እስመ፡ ይቤሉ፡ እግዚአብሔር፡ አበሱ፡ ወስሕቱ፡ ሕዝብከ፡ ዘአውፃዕከ፡ እምድኅረ፡ ግብፅ፡ እምቤተ፡ ክኔ፡ ወግብሩ፡ ሰብኮ፡ ላህም፡ ወሰገዱ፡ ለፍልፎ። ወወረደ፡ ሙሴ፡ ምስለ፡ ኢያሱ፡ ቍልዒሁ፡ እንዘ፡ ይትመዓዖሙ፡ ለሕዝቡ፡ ወሶበ፡ ሰምዓ፡ ኢያሱ፡ ይቤ፡ ንሁ፡ እሰምዕ፡ ድምፀ፡ ፀባዒት፡ በውስተ፡ ትዕይንተ፡ እስራኤል። ወይቤሎ፡ ሙሴ፡ ለኢያሱ፡ አኩ፡ ድምፀ፡ ድሞፀ፡ ፀባዒት፡ አላ፡ ድምፀ፡ ፋህሉ፡ ለወይን፡ ወወረደ፡ ወቀጥቀጠ፡ ምስሎሙ፡ ወአድቀቆ፡ በሕቁ፡ እስከ፡ ይከውን፡ ከመ፡ ፀበል፡ ወወዶዮ፡ ውስተ፡ ነቅዕ፡ ዘይሰትዩ፡ ደቂቀ፡ እስራኤል፡ ውስተ፡ ሕፅነ፡ ደብር። ወእምዝ፡ አዘዞሙ፡ ለሌዋውያን፡ ይትቃተሉ፡ በበይናቲሆሙ፡ በእንተ፡ ዘገብሩ፡ ቅድመ፡ እግዚአብሔር፡ እኪተ። ወገብሩ፡ በከመ፡ አዘዞሙ፡ አእሚሮሙ፡ ከመ፡ የዓቢ፡ ትዕይርቱ፡ ለእግዚአብሔር፡ እምቀትለ፡ ርእሶሙ፡ ወእምቀትለ፡ አዝማዲሆሙ፡ ወአበዊሆሙ። ወበእንተዝ፡ ይቤሎሙ፡ ሙሴ፡ እንፈስክምዎ፡ ለእግዚአብሔር፡ ዘሴሰየክሙ፡ ወሐፀ፡ ነክሙ፡ ወአውፅዓክሙ፡ እምቤተ፡ ቅኔ፡ ወአውረሰክሙ፡ ርስተ፡ ዘመሐለ፡ ለአበ፡ ዊክሙ፡ ከመ፡ የሀቦሙ፡ ሎሙ፡ ወለዘርዖሙ፡ እምድኅሬሆሙ። ወበህየኒ፡ ኢኃደጉ፡ እምዕዖቶ፡ ለእግዚአብሔር፡ እስመ፡ ውስተ፡ ክውሉ፡ እከይ፡ ወጹግ፡ ይረውፁ። ወአኮ፡ ከመ፡ አበዊሆሙ፡ አብርሃም፡ ይስሐቅ፡ ወያዕቆብ፡ እለ፡ አሥመርዎ፡ ለእግዚ፡ አብሔር፡ በስነ፡ ግዕዞሙ፡ እምንዕሶሙ፡ እስከ፡ መዋዕለ፡ ውርዙቶሙ፡ ወርሥዕናሆም፡ ከመ፡ የሀቦሙ፡ ዘበምድርኒ፡ ወዘበሰማይኒ፡ ዘአስተዳለወ፡ ለእለ፡ ያፈቅርዎ፡ በዝየኒ፡ ምድረ፡ ርስተ፡ እንተ፡ ትውኅዝ፡ ሀሊበ፡ ወመዓረ፡ ወበህየኒ፡ ገነተ፡ ትፍሥሕት፡ እንተ፡ ጽሉት፡ ለጻድቃን፡ ዘዓይን፡ ኢርእየ፡ ወዕዝን፡ ኢሰምዓ፡ ውስተ፡ ልበ፡ ሰብእ፡ ዘኢትሐለየ፡ ዘአስተዳለወ፡ እግዚአብሔር፡ ለእለ፡ ይፈቅርዎ፡ ለአብርሃም፡ ወለይስሐቅ፡ ወለያዕቆብ፡ እለ፡ አሥመርዎ፡ ለእግዚአብሔር፡ በሕይወቶሙ። ወደቂቆሙሰ፡ ለእሙንቱ፡ ከሃድያን፡ ወእኩያን፡ እለ፡ የሐውሩ፡ በፍትወተ፡ ልቦሙ፡ ወኢሰምዑ፡ ቃለ፡ እግዚአብሔር፡ ዘሴሰዮሙ፡ ወሐፀኖሙ፡ ወዓቀቦሙ፡ እምንዕሶሙ። ወኢተዘከርዎ፡ ለእግዚአብሔር፡ ዘአውፅኦ፡ እምድረ፡ ግብፅ፡ ወአድኅኖሙ፡ እምግብረ፡ ግንፋል፡ ወእምግብረ፡ ቅኔ፡ መሪር። ወእሙንቱሰ፡ ፈድፋደ፡ አምዕዕዎ፡ ውእቱኒ፡ ያነሥእ፡ ሎሙ፡ እለ፡ ዓውዶሙ፡ ነኪራነ፡ ወይትነሥኡ፡ ላዕሌሆሙ፡ ወያጌብርዎሙ፡ በከመ፡ ፈቃዱ።

Chapter 15 ወውእተ፡ አሚረ፡ ተንሥኡ፡ ላዕሌሆሙ፡ ሰብአ፡ ምድያም፡ ወአንሥኡ፡ ሠራዊቶሙ፡ ከመ፡ ይፅብዕዎሙ፡ ለእስራኤል፡ ወስሙ፡ ለንጉሦሙ፡ አክራንድስ፡ ወአስተጋብአ፡ በነግህ፡ ብዙኃ፡ ሠራዊት፡ ዘሰርያ፡ ወኪልቅያ፡ ወደማስቆ። ወተዓየነ፡ በማዕይተ፡ ዮርዳኖስ፡ ወለዓከ፡ ሐዋርያተ፡ ኀበ፡ እስራኤል፡ እንዘ፡ ይብል፡ ህቡኒ፡ ጸባሕተ፡ ዲናር፡ ወእመአኮሰ፡ መጻእኩ፡ ከመ፡ እኰንክሙ፡ ወእማህረከ፡ ንዋየክሙ፡ ወእንሣእ፡ ኵሉ፡ ጥሪተክሙ፡ ወእፄውዉ፡ ደቂቀክሙ። ወአፈልስክሙ፡ ውስተ፡ ብሔር፡ ዘኢተአምሩ፡ ወበህየ፡ እሬስየክሙ፡ ሐጣብያነ፡ ፅፅ፡ ወቀደሕያነ፡ ማይ። ወኢትትመክሑ፡ እንዘ፡ ትብሉ፡ ንሕነ፡ ሕዝበ፡ እግዚአብሔር፡ ወአቦ፡ ዘይክለነ፡ አኮኑ፡ እግዚአብሔር፡ ዘፈነወኒ፡ ከመ፡ አጥፍዕክሙ፡ ወእማኅርክ፡ ንዋየክሙ፡ ወኵሎ፡ ዘዚእክሙ፡ ከመ፡ አስተጋብእ፡ ፈነወኒ። ቦኑ፡ እለ፡ አድኃንዎሙ፡ አማልክቲሆሙ፡ ለባዕዳን፡ ሕዝበ፡ እለ፡ አነ፡ ኰነንክዎሙ፡ ወማኅረኩ፡ ንዋዮሙ፡ ወጥሪቶሙ፡ ወቀተልኩ፡ ኪያሆሙ፡ ወጸወውኩ፡ ውሉዶሙ፡ ወደቂቆሙ። ከማሁ፡ ለክሙኒ፡ እሬስይክሙ፡ ለእመ፡ ኢጸባሕክሙ፡ ሊተ፡ ጸባሕተ፡ በከመ፡ አዘዝኩክሙ፡ ወዓደወ፡ ዮርዳኖስ፡ ከመ፡ ይማህርክ፡ ንዋዮሙ፡ ወእንስሳሆሙ፡ ወይፄውው፡ ብእሲቶ። ወእምዝ፡ በከዩ፡ ደቂቀ፡ እስራኤል፡ ኀበ፡ እግዚአብሔር፡ ብካየ፡ መሪረ፡ ወጾርሑ፡ ወአውየው፡ ወኃጥኡ፡ ዘይረድኦሙ። ወበእንተዝ፡ ወሀቦሙ፡ እግዚአብሔር፡ ጽንዓ፡ ለ3አኃው፡ ወአስማቲሆሙ፡ ከመዝ፡ መብክዩስ፡ ወመቃብዮስ፡ ወይሁዳ፡ እለ፡ ሠናይ፡ ላህዮሙ፡ ወጽኑዓን፡ በኵሉ፡ ኃይሎሙ። ወሶበ፡ ሰምዑ፡ እንዘ፡ ይበክዩ፡ ወያሰቅቅዉ፡ ደቂቀ፡ እስራኤል፡ አህመሞሙ፡ ልቦሙ፡ እምገብረ፡ ኵሎሙ፡ ደቂቀ፡ እስራኤል፡ እቤራተ፡ ወእጓለ፡ ማውታ፡ ወካህናቲሆሙ፡ ወመሳፍንቲሆሙ፡ ወኵሉ፡ ዘመደ፡ እስራኤል፡ ዕደ፡ ወአንስተ፡ ወሕፃናት፡ ውኵሎሙ፡ ይበክዩ፡ ወይወድዩ፡ ሐመደ፡ ዲበ፡ አርእስቲሆሙ፡ ወይለብሱ፡ ሠቀ፡ ክቡራኒሆሙ። ወእሙንቱሰ፡ አኃው፡ ሠናያን፡ ወላህያን፡ ተሰነኣዉ፡ ከመ፡ ይሑሩ፡ ወከመ፡ ያድኅንዎሙ፡ ወተማከሩ፡ ወተበሀሉ፡ ንሑር፡ ወንመጡ፡ ነፍስነ፡ ለሞት፡ በእንተ፡ እሉ። ወሖሩ፡ ተታቢዖሙ፡ እንዘ፡ ውስተ፡ ሐቋሆሙ፡ አሰይፍቲሆሙ፡ ወአርማሂሆሙ፡ ውስተ፡ እደዊሆሙ፡ ወሖሩ፡ ተደሊዎሙ፡ ከመ፡ ይትማዕአይዎ፡ ለረአታይ። ወበፅሑ፡ እንዘ፡ ሀሎ፡ ውስተ፡ ምሳሕ፡ ወረገዞ፡ መብክዩስ፡ ለረአይታዊ፡ ወአውከዮ፡ ክሣደ፡ በአሐቲ፡ ዝብጠት፡ እንዘ፡ መብልዕ፡ ውስተ፡ አፉሁ፡ ወይሁዳ፡ ወመቃብዮስ፡ ዘበጥዎሙ፡ በሰይፍ፡ ለእለ፡ እምየማኑ፡ ወእምፀጋሙ፡ ለንጉሦሙ። ወሶበ፡ ወድቀ፡ ንጉሦሙ፡ ነትዑ፡ ወጐዩ፡ ኵሉሙ፡ ወቦአ፡ ኵይንዊሆሙ፡ ውስተ፡ ልበ፡ ቢጾሙ፡ ወተቀጥቀጠ፡ አቅስስቲሆሙ፡ ወለሊሆሙ፡ ተሰብሩ። ወእሙንቱሰ፡ አኃው፡ ሠናያን፡ ወላሕያን፡ ድኅኑ፡ ወአልቦ፡ ዘረከቦሙ፡ ወኢምንትኒ፡ እኩት፡ ወእሙቱሰ፡ እኩያን፡ ተቀጥቀጡ፡ በበይናቲሆሙ፡ እስመ፡ እግዚአብሔርር፡ አግብአ፡ መቅሠፍተ፡ ላዕሌሆሙ። ወወድቁ፡ ወሞቱ፡ ወኵሎ፡ ዘዚአሆሙ፡ ገደፉ፡ እስከ፡ ይዓድዉ፡ ዮርዳኖስ፡ ወኵሉ፡ ዘዘዚአሆሙ፡ ተርፈ። ወሶበ፡ ርእዩ፡ ደቂቀ፡ እስራኤል፡ ከመ፡ ነትዑ፡ ወሖሩ፡ ምስለ፡ ትዕይንቶሙ፡ በርበረ፡ ዚአሆሙ፡ ነሥኡ፡ ለርእሰሙ። ወከመዝ፡ አድኃኖሙ፡ እፍዚአብሔር፡ ለደቂቀ፡ እስራኤል፡ በዕደ፡ መብክዩስ፡ ወአኃዊሁ። ወነበሩ፡ ኅዳጠ፡ መዋዕለ፡ እንዘ፡ ያሠምርዎ፡ ለእግዚአብሔር፡ ደቂቀ፡ እስራኤል። ወእምድሬሁሰ፡ ገብዑ፡ ካዕበ፡ ኀበ፡ እክዮሙ፡ ወተሐከዩ፡ አምኮቶ፡ ለእግዚአብሔር፡ ደቂቀ፡ እስራኤል፡ በንጹሕ፡ ወውእቱሰ፡ ካዕበ፡ አምዕዖሙ፡ በሕዝብ፡ እለ፡ ፈየአምሩ፡ እለ፡ የዓርሩ፡ ፍራ፡ ገራዊሆሙ፡ ወእለ፡ ያማስኑ፡ ዓፀደ፡ ወይኖሙ፡ ወይነሥኡ፡ መራዕይሆሙ፡ ወይጠብኡ፡ አልህምቲሆሙ፡ በቅድሜሆሙ፡ ወኢይክሉ፡ አድኅኖቶሙ፡ እስመ፡ ሕዝብ፡ ዓላውያነ፡ ሕግ፡ እሙንቱ፡ እስመ፡ ዘልፈ፡ ያምዕዕዎ፡ ለእግዚአብሔር፡ በኵሉን፡ ጊዜ።

Chapter 16 ሕዝበ፡ ጢሮስ፡ ወሲዶና፡ ወእለ፡ ይነብሩ፡ ውስተ፡ ሐይቀ፡ ባሕር፡ ወማዕደተ፡ ፈለገ፡ ዮርዳኖስ፡ ወገለዓድ፡ ወካራን፡ ወከናኔዎን፡ ወኢያቡሴዎን፡ ውጌርጌሴዎን፡ ወኤዶም፡ ወሕዝበ፡ አማሌቅ። ወኵሎሙ፡ አሕዛብ፡ በሀገሮሙ፡ ወበበነገዶሙ፡ ወበበሥርዓቶሙ፡ ወበበአድዋሌሆሙ፡ ወበበተስናነ፡ ብሔሮሙ። ወኵሎሙ፡ በከመ፡ ሠርዖሙ፡ እግዚአብሔር፡ ይሄልዉ። ወቦእምኒሆሙ፡ እለ፡ ሠናይ፡ ግዕዞሙ፡ ወየአምርዎ፡ ለእግዚአብሔር። ወቦእምኒሆሙ፡ እለ፡ እኩይ፡ ምግባሮሙ፡ ወኢየአምርዎ፡ ለእግዚአብሔር፡ ዘፈጠሮሙ፡ ወቀነዮሙ፡ በከመ፡ ገብሩ፡ በእደ፡ አሜኔሴር፡ ንጉሠ፡ ሶርያ። እስመ፡ ይነሥእ፡ ኃይለ፡ ደማስቆ፡ ወይትካፈል፡ ምህርካ፡ ዘሰማርያ፡ በቅድመ፡ ንጉሠ፡ ግብፅ። አድባረ፡ ገለዓድ፡ ወቈላተ፡ ጌላቡሔ፡ ውኵሉ፡ ሰማርያ፡ ወጳጦስ፡ ዘምድረ፡ ይሁዳ፡ ወእለ፡ ይነብሩ፡ ውስተ፡ አድባረ፡ ዓረብ፡ ወሜድ፡ ወጰርቱስ፡ ወሲውሲግያ፡ ወቀጰዶቅያ። ወእከ፡ ይነብሩ፡ ውስተ፡ አድዋሊሆሙ፡ ሕዝብ፡ ግዙፋነ፡ ክሣፍ፡ ወእለ፡ ኢየአምርዎ፡ ለእግዚአብሔር፡ ወኢዓአቀቡ፡ ትእዛዞ። ውእቱኒ፡ ይፈድዮሙ፡ በከመ፡ እከየ፡ ምግባሮሙ፡ ወብነከመ፡ ግብረ፡ እደዊሆሙ። እስመ፡ ደወለ፡ ቂሳርያ፡ ወሕዝበ፡ ገለዓድ፡ ወአማሌቅ፡ የኀብሩ፡ ከመ፡ ይትማዕለይዎ፡ ለሀገረ፡ እግዚአብሔር፡ አንተ፡ ምልዕት፡ ጽድቀ፡ እንተ፡ ውስቴታ፡ ይሴባሕ፡ ቅዱስ፡ እስራኤል፡ አምላከ፡ እስራኤል፡ ፀባዖተ፡ ዘመልዕልተ፡ ሠረገላ፡ ኪሩቤል፡ ይነብር፡ ወዕልፍ፡ አዕላፈ፡ አዕላፋት፡ ይቀውም፡ ቅድሜሁ፡ ወተዕልፈተ፡ አዕላፋት፡ ወይትለዓክዎ፡ በፍርሃት፡ ወበረዓድ።

Chapter 17 ወተዓነይ፡ ኤዶምያስ፡ ወአማሌቅ፡ ኢይመልክዎ፡ እግዚአብሔር፡ ዘኵነኔ፡ ሰማይ፡ ወምድር፡ ውስተ፡ እዴሁ፡ ከይደ፡ ቤተ፡ መቅደሱ፡ እስመ፡ ሕዝብ፡ ዓላውያን፡ እሙንቱ፡ እለ፡ ኢየሐውሩ፡ በጽድቅ። ወአልቦ፡ ፍርሃተ፡ እግዚአብሔር፡ ቅድመ፡ አዕይንቲሆሙ፡ ዘእንበለ፡ ዝሙት፡ ወክዕወተ፡ ደም፡ ወበሊዓ፡ ዝቡሕ፡ ወብትክ፡ ወማውታ፡ ወኵሉ፡ ዘይመስሎ፡ ለዝንቱ፡ ምኑናን፡ ወግሙናን። አልቦሙ፡ ሃይማኖት፡ ወኢምልሕ፡ እስመ፡ ፀላዕያአ፡ ሠናይ፡ እሙንቱ፡ ወኢየአምርዎ፡ ለእግዚአብሔር፡ ወበፍኖተ፡ ሰላም፡ ዘንችበለ፡ ግ፡ ወትዕግልት፡ ወኵሉ፡ ምግባር፡ ርኩስ፡ ወሁከት፡ ወዘፈን፡ ወተውኔት፡ በከመ፡ መሀሮሙ፡ አቡሆሙ፡ ሰብልያኖስ። እስመ፡ ውእቱ፡ ቀነዮሙ፡ ምስለ፡ አጋንንቲሁ፡ ወይሜህሮሙ፡ ኵሎ፡ ምግባረ፡ እኩይ፡ ዘዘዚአሁ፡ ወጹግ፡ ወትዕግልት፡ ወሀይደ፡ ንዋይ፡ ባዕደ፡ በዓመፃ፡ ወሥርቅ፡ ወበሊዓ፡ ማውታ፡ ወብትክ፡ ወዝሙት። ወኵሉ፡ ዘይመስሎ፡ ለዝንቱ፡ ሐዊረ፡ ብእሲተ፡ ብእሲ፡ ወክዕወተ፡ ደም፡ ወበሊዓ፡ ማውታ፡ ወዝቡሕ፡ ለጣዖት፡ ወቀቲለ፡ ነፍሰ፡ ሰብእ፡ በዓመፃ፡ ወተቃጽቦ፡ ወተሐምሞ፡ ወስስዕት፡ ወኵሉ፡ ምግባረ፡ እከይ፡ ዘኢይሠምር፡ እግዚአብሔር፡ ወዘንተ፡ ትምህርተ፡ ያመጽእ፡ ሎሙ፡ ዝውእቱ፡ ፀሮሙሰብላንዮስ፡ ከመ፡ ያእትቶሙ፡ እምፍኖተ፡ እግዚአብሔር፡ አኀዜ፡ ኵሉ፡ ዓለም። ውእቱሰ፡ ለእግዚአብሔር፡ ትሕትና፡ ወየውሃት፡ ወአፍቀሮ፡ ቢጽ፡ ወአምዕዖ፡ እኁ፡ ወተፋቅሮ፡ ወሰላም፡ ምስለ፡ ኵሉ፡ ሕዝብ። ወኢትኩኑ፡ መደልዋነ፡ ለገጾ፡ ሰብእ፡ ወሀያድያነ፡ ወዓማፅያነ፡ ወተዓጋልያነ፡ ወሐዋርያነ፡ ብእሲተ፡ ብእሲ፡ ወገባርያነ፡ እከይ፡ ወግፍዕ፡ ዲበ፡ ቢጾሙ፡ ወተጓህላውያን፡ በዓመፃ፡ እለ፡ የዓምፁ፡ ቢጾሙ። ወይትቃፀቡ፡ ወየሐውሱ፡ ርእሶሙ፡ ወይትሜየኑ፡ ለእከይ፡ ወይጤየሩ፡ ለአስሕቶ፡ ከመ፡ ያውርድዎሙ፡ ለሰብእ፡ ውስተ፡ ኵነኔ፡ ደይን፡ ለዘለዓለም።

Chapter 18 ተዘከር፡ ከመ፡ ኀበ፡ እግዚአብሔር፡ ተሐውር፡ ወሀሎ፡ ኵሉ፡ ውስተ፡ እዴሁ፡ ወትቀውም፡ አንተ፡ በዘገብርከ፡ ምግባር፡ ከመ፡ ትትኩነን፡ ቀዳሜሁ። እስመ፡ ከማሁ፡ ትካትኒ፡ ደቂቀ፡ ረዓይት፡ እኩያን፡ ወእቡያን፡ ወአልቦ፡ ዘየዓቢ፡ ወዘይኄይል፡ እምኔሆሙ፡ ወቆሞሙ፡ ወዕበየ፡ መዝራዕቶሙ፡ ወኢረስይዎ፡ ለእግዚአብሔር፡ ቅድሜሆሙ፡ ወኢየአምርዎ፡ ከመ፡ ውእቱ፡ ፈጣሪሆሙ፡ ዘአምጽኦሙ፡ እምኀበ፡ ኢሀሉ። ወአበዊሆሙሰ፡ እንዘ፡ መላእክት፡ እሙንቱ፡ ይሴብሑ፡ ምስለ፡ መላእክት፡ በሰማያት፡ ወሶበ፡ አስሐቶሙ፡ ፍትወቶሙ፡ ወወረዱ፡ ውስተ፡ ኵነኔ፡ ደይን፡ ዘለዓለም። ወነሥኡ፡ አንስትያ፡ እምደቂቀ፡ እጓለ፡ እመሕያው፡ እስመ፡ ፈጠረ፡ ሎሙ፡ እግዚአብሔር፡ ሥጋ፡ እጓክለ፡ እመሕያው፡ ከመ፡ ያስተዓብዶሙ፡ በእንተ፡ ትዕቢተ፡ ልቦሙ፡ ወያመክሮሙ፡ እመ፡ የዓቅቡ፡ ትእዛዞ፡ ወሕጎ። እሙንቱሰ፡ ኢየዓቀቡ፡ ትእዛዘ፡ ወአውረዶሙ፡ ውስተ፡ ኵነኔ፡ ነደ፡ እሳት፡ ምስለ፡ ዲያብሎስ፡ አቡሆሙ፡ ወበእንቲአሆሙ፡ ሐፀ፡ መዋዕል፡ እምሰብእ፡ እስመ፡ ተምዖሙ፡ እግዚአብሔር፡ ለመላእክተ፡ እለ፡ አበሱ፡ ከመ፡ ሰብእ። ወተማልዕዎሙ፡ ለደቂቀ፡ እጓለ፡ እመሕያው፡ ምስሌሆሙ፡ ወአውረድዎሙ፡ ውስተ፡ ሲኦል፡ በኵነኔ፡ ዚአሆሙ። ቀዳሚሁሰ፡ መዋዕሊሁ፡ ለሰብእ፡ እንዘ፡ ()፡ ገብኡ፡ ውስተ፡ )ወ2ዓመታት፡ እስመ፡ ሐፀ፡ መዋዕሊሁ፡ ለሰብዕ፡ በእንተ፡ ዘስሕቱ፡ መላእክት፡ ምስለ፡ አዋልደ፡ ቃየል። ወይቤ፡ እግዚአብሔር፡ ኢይነብር፡ መንፈስየ፡ ኀቤሆሙ፡ እስመ፡ ዘሥጋ፡ ወደም፡ እሙንቱ። ወበእንተ፡ ዝኪ፡ ሐፀ፡ መዋዕሊነ፡ ወዓዲ፡ ቦሙ፡ እለ፡ ይመውቱ፡ እንዘ፡ ሕፃናት፡ እሙንቱ፡ እስመ፡ ሐዐ፡ መዋዕሊነ፡ እምቀደምት፡ አበዊነ፡ በእንተ፡ አበሳነ፡ ወኃጢአትነ። ወለአበዊነሰ፡ ኖኃ፡ መዋዕሊሆሙ፡ እስመ፡ ዓቀቡ፡ ትእዛዞ፡ ወኢያምዕዕዎ፡ ለእግዚአብሔር። ወገሠፁ፡ አዋልዲሆሙ፡ ከመ፡ ይምሀርዎሙ፡ ወገሠጹ፡ ተባዕቶሙ፡ ከመ፡ ኢይትዓደዉ፡ ትእዛዘ፡ እግዚአብሔር። ወበእንተዝ፡ ኖኃ፡ መዋዕሊሆሙ፡ በጽድቅ፡ በእንተ፡ ዘኢትዓደዉ፡ ትእዛዘ፡ እግዚአ፡ ብሔር፡ ምስለ፡ ደቂቆሙ፡ ወአዋልዲሆሙ።

Chapter 19 ወሶበ፡ በዝኁ፡ ደቂቀ፡ ቃየን፡ ገብሩ፡ ዕንዚራ፡ ወከበሮ፡ ወመሰንቅ፡ ወብዕዛ፡ ወኵሉ፡ ተውኔተ፡ ወዘፈነ። ወዓዲ፡ ተወልደ፡ አዋልድ፡ ለቃየን፡ ሠናያት፡ ወላህያት፡ እምብእሲተ፡ አቤል፡ ጻድቅ፡ ዘቀተሎ፡ በእንቲአሃ፡ እስመ፡ ላህይት፡ ይእቲ፡ ወእምድኅረ፡ ቀተሎ፡ ለአኁሁ፡ ነሥአ፡ ኪያሃ፡ ወእንታክትኒ፡ እንቲአሁ። ወተግኀሠ፡ እምአቡሁ፡ ነሢኦ፡ ኪያሆን፡ ውስተ፡ ቈላአ፡ ቄፋዝ፡ መንገለ፡ ዓረብ፡ ወደቂቃ፡ ለይእቲ፡ ላህይት፡ እለ፡ ኮና፡ ልሁያተ፡ ከመ፡ አሞን። ወበእተዝኪ፡ ወረዱ፡ መላእክት፡ ኀበ፡ ደቂቀ፡ ቃየን፡ ወኢቆሙ፡ አሐተ፡ ሰዓተ፡ ወነሥኡ፡ አንስትያ፡ ለርእሶሙ፡ ዘኃረዩ። ወበእንተዝ፡ ተዓምነ፡ እግዚአብሔር፡ ለነሂ፡ ወሎሙሂ፡ እስመ፡ ኅቡረ፡ ተማልዑነ፡ ውስተ፡ ስሒት፡ ምስሌሆሙ፡ በእንተ፡ ስሕተቶሙ። ወዲያብሎስሂ፡ ተማልዖሙ፡ ለአቡነ፡ አዳም፡ ወለእምነ፡ ሔዋን፡ ውስተ፡ ስሕተተ፡ ዚአሁ፡ እንዘ፡ ይየውሆሙ፡ ወይቤሎሙ፡ ትከውኑ፡ አማልክተ፡ ከመ፡ እግዚአብሔር፡ ፈጣሪክሙ። ወእሙንቱሰ፡ በዕበደሙ፡ መሰሎሙ፡ አማነ፡ ወተዓደዉ፡ ትእዛዘ፡ ፈጣሪሆሙ፡ ዘአም፡ ጽኦሙ፡ እምኀበ፡ አልቦ፡ ውስተ፡ ሀለዎ፡ ከመ፡ ይሰግዱ፡ ወይሰብሑ፡ ለስሙ፡ ቅዱስ። ወለእሙንቱሰ፡ እለ፡ ረሰዩ፡ ሀብተ፡ እግዚአብሔር፡ ለርእሶሙ፡ ውእቶሙ፡ እግዚኦሙ፡ አኅሠሮሙ፡ ወለውእቱኒ፡ ዕቡይ። በከመ፡ ይቤ፡ ዳዊት፡ በትዕቢቱ፡ ለኃጥእ፡ ይውዒ፡ ነዳይ፡ እስመ፡ በትዕቢቱ፡ ለዲያብሎስ፡ ተኰነነ፡ አዳም፡ በኵነኔ፡ ጽድቅ፡ በኀበ፡ እግዚአብሔር፡ አምላኩ። ወከማሁ፡ መላእክትኒ፡ እለ፡ ስሕቱ፡ ኀበ፡ አዋልደ፡ ቃየል፡ ተማልዑነ፡ ውስተ፡ ስሕተቶሙ፡ ወበእንተዝ፡ ሐፀ፡ መዋዕሊነ፡ እመዋዕለ፡ አበዊነ፡ ዘወሀበነ፡ እግዚአብሔር። ወእሙንቱሰ፡ ገብሩ፡ ሠናየ፡ ወአልቦ፡ እንተ፡ ኀበ፡ ይቀርቦሙ፡ እኩይ፡ እስመ፡ አፅንዑ፡ ልቦሙ፡ ኀበ፡ እግዚአብሔር፡ ወይሜህሩ፡ ውሉዶሙ፡ ወአዋልዲሆሙ፡ ከመ፡ ኢይት፡ ገሃሡ፡ እምትእዛዘ፡ እግዚአብሔር፡ ዘመሐርዎሙ። ወለሊሆሙሰ፡ ለእመ፡ ገብሩ፡ ወኢነግሩ፡ ለደቂቆሙ፡ ወኢመሐርዎሙ፡ ወአልቦ፡ ዘይበቍዖሙ። በከመ፡ ይቤ፡ ዳዊይ፡ ወኢኃብኡ፡ እምደቂቆሙ፡ ለካልዕ፡ ትውልድ፡ ወነገሩ፡ ስብሐቲሁ፡ ለእግዚአብሔር፡ ኃይሎሂ፡ ወመንክሮሂ፡ ዘገብረ፡ በከመ፡ ለበዉ፡ እሙንቱ፡ ከመ፡ ይምሀሩ፡ ለደቂቆሙ፡ ከመ፡ ይለብዉ፡ ወይግበሩ፡ ወያማኅፅንዎሙ፡ ኩነኔሁ፡ ለእግዚአብሔር፡ ወከመ፡ ይዕቅቡ፡ ትእዛዞ፡ ከመ፡ አበዊሆሙ፡ እለ፡ አሥመርዎ፡ ለእግዚአብሔር፡ በሥነ፡ ምግባሮሙ። ወኢኃደጉ፡ ትእዛዞ፡ ዘአመኅፀንዎሙ፡ አበዊሆሙ፡ አመ፡ ንዕሶሙ፡ ፈሪሃ፡ እግዚአብሔር፡ ወኵነኔሁ፡ በከመ፡ እሙንቱ፡ ተምህሩ፡ በኀበ፡ አበዊሆሙ። ወውሉዶሙኒ፡ ተምህሩ፡ በኀበ፡ አበዊሆሙ፡ ከመ፡ ያሠንዩ፡ ግዕዞሙ፡ ወየሐዑ፡ ስብሐት፡ ለፈጣሪሆሙ፡ እስመ፡ ዓቀቡ፡ ትእዛዞ፡ ወአፍቀርዎ። ውእቱኒ፡ ይሰምዖሙ፡ ጸሎቶሙ፡ ወኢይትሔየይ፡ ለእለቶሙ፡ ወውእቱሰ፡ መሐሪ፡ ውእቱ። በያበዝኅ፡ መይጠ፡ መዓቱ፡ ወኢያነድድ፡ በኵሉ፡ መቅሠፍቱ።

Chapter 20 ተዘከሩ፡ አኃዊነ፡ ወኢትርሥኡ፡ ዘነገሩክሙ፡ ቀዳሚ፡ ከመ፡ እግዚአብሔር፡ የዓቅብ፡ ጽድቆሙ፡ ለእለ፡ ይገብሩ፡ ሠናየ። ወይበዝኅ፡ ፍሬሆሙ፡ በዲበ፡ ምድር፡ ወዝክሮሙኒ፡ እስከ፡ ለዓለም፡ ይከውን፡ ለሠናይ፡ ወዘርዖሙኒ፡ ኢይፄነሰ፡ እክለ፡ በዲበ፡ ምድር። ወያድኅኖሙ፡ እምእደ፡ ኵሉ፡ ሙጸሮሙ፡ ወጻላእቶሙ፡ እለ፡ ይደልዎሙ፡ እስመ፡ በእንቲአሆሙ፡ ይትዋቅስ፡ ሉሙ፡ ወኢየኀደጎሙ፡ ውስተ፡ ዕደ፡ ጸሮሙ። ወይከውኖሙ፡ ረዳኢ፡ አመ፡ ምንዳቤሆሙ፡ ለእለ፡ ያፈቅሩ፡ ስሞ፡ ወይትመሐፀኖሙ፡ ወይሠሪ፡ ሎሙ፡ ኵሉ፡ ኃጢአቶሙ።

Chapter 21 ተወከለ፡ ዳዊት፡ በእግዚአብሔር፡ ወኮኖ፡ ፀወኖ፡ እስመ፡ ተወከለ፡ ቦቱ፡ ወአድኃኖ፡ እምእደ፡ ሳኦል፡ ንጉሥ። ወዘአመ፡ አቤሴሎም፡ ወልዱ፡ ወዘአመ፡ ኤሎፍላውያን፡ ወዘአመ፡ አማሌቃውያን፡ ወኤዶማውያን፡ ወዘእመ፡ ቀርኔዎን፡ ወእምዝንቱ፡ ኵሉ፡ እለ፡ ተቃወምዎ፡ አድኃኖ፡ እግዚአብሔር፡ ለዳዊት፡ እስመ፡ ተወከለ፡ ቦቱ፡ ወዓቀበ፡ ሕጎ። ወለእለሰ፡ ኢተወከሉ፡ ቦቱ፡ ነገሥት፡ እኩያን፡ ኢያድኅኖሙ፡ እግዚአብሔር፡ እስመ፡ ተመውዑ፡ በእደ፡ ፀሮሙ፡ እስመ፡ ሙዓት፡ እምኀበ፡ እግዚአብሔር፡ ውእቱ። ተወከለ፡ ሕዝቅያስ፡ በእግዚአብሔር፡ ወአድኅኖ፡ እምዕደ፡ ሶርያዊ፡ ዕቡይ። ወምናሴሰ፡ ወልዱ፡ ተመውዓ፡ በእደ፡ ፀሩ፡ እስመ፡ ኢረስየ፡ በእግዚአብሔር፡ ትውክልቶ፡ ወእሙንቱሰ፡ እለ፡ ሞዕዎ፡ ፀሩ፡ ለምናሴ፡ ኢኮኑ፡ ከማሁ፡ አላ፡ ሞቅህዎ፡ ወወሰድዎ፡ ብሔሮሙ፡ እስመ፡ ኢረሰየ፡ ይውክልቶ፡ ላዕለ፡ እግዚአብሔር፡ ወኢፈርሆ፡ ለዘአክበሮ፡ ወአልዓሉ፡ ወአዕበዮ። ወሶቤሃኒ፡ ከልዕ፡ እምሀብት፡ ዘወሀቦ፡ እስመ፡ ኢያሠንየ፡ ፍኖቶ፡ ኀበ፡ እግዚአብሔር፡ አምላኩ፡ ከመ፡ ያኑኅ፡ መዋዕሊሁ፡ ወከመ፡ ይትቃወም፡ ሎቱ፡ ፀሮ፡ ወከመ፡ ይኩኖ፡ ኃይለ፡ ወጽንዓ፡ ወፍጽመ፡ ወከዋለ። እስመ፡ እምብዝኅ፡ ሠራዊት፡ ይሄይስ፡ ተወክሎ፡ በእግዚአብሔር፡ ወእምተወክሎ፡ በአፍራሰ፡ ወወልታ፡ ወቀስት። እስመ፡ ዘተወከለ፡ ቦቱ፡ በእግዚአብሔር፡ የሐዩ፡ ወይከብር፡ ወይትሌዓል፡ ፈድፋደ። ወእለሰ፡ ኢተወከሉ፡ በእግዚአብሔር፡ ወተወከሉ፡ በብዝኃ፡ ብዕሉ፡ ሙኮኑ፡ ውፁዓነ፡ እምጸጋሁ፡ ዘወሀቦሙ፡ እስመ፡ እግዚአብሔር፡ ኢያደሉ፡ ለገጽ። ወእለሰ፡ ተወከሉ፡ ቦቱ፡ የዓቅቦሙ፡ ወለእለሰ፡ ያስተዓብድዎ፡ ያስተዓብዶሙ፡ ወኢያ፡ ፈጥን፡ ረድኤቶሙ፡ አመ፡ ምንዳቤሆሙ፡ አመ፡ ተቃወምዎሙ፡ ፀሮሙ፡ እስመ፡ ኢያጥብዑ፡ ልቦሙ፡ በተሊወ፡ ዚአሁ፡ ለእግዚአብሔር፡ ወዓቂበ፡ ትእዛዛቲሁ፡ ለእግዚአብሔር። ወዘሰ፡ አጥብዓ፡ ውስተ፡ ተሊወ፡ እግዚአብሔር፡ ወውስተ፡ ተሊወ፡ ትእዛዛቲሁ፡ ወዓቂበ፡ ሕጉ፡ ለውእቱኪ፡ ይከውኖ፡ ፀውኖ፡ አመ፡ ምንዳቤሁ። ወያስተፌሥሐ፡ በከቲለ፡ ፀሩ፡ ወበምህርካ፡ አልህምቲሆሙ፡ ለጸላዕቱ፡ ወበፄዋ፡ ዘብሔረ፡ ፀሩ፡ ወበዝናመ፡ ክራማቲሁ፡ ወበፍሬ፡ አብክቋላቲሁ፡ ወበዕትወት፡ አክማሪሁ፡ ወበፍሬ፡ ያተ፡ ገነታቲሁ። ወዘበፀደይ፡ ወመፀዉ፡ ወሣዕረ፡ ወሐመልማለ፡ ወዘበበአግዋሊሁ፡ ከመ፡ ይትፈሥሑ፡ ሕዝብከ፡ እለ፡ እምታሕተ፡ እዴከ። ወይብልዑ፡ ፃማ፡ ባዕድ፡ ወይጽግቡ፡ አንጕዓ፡ ዘእምፀሮሙ፡ ወእንስሳ፡ ወአልህምተ፡ ወአባግዓ፡ ወይብልዑ፡ ፃማ፡ ባዕድ፡ ወይነሥኡ፡ ፄዋ፡ ደቂቀ፡ ፀሮሙ። ዘንተኪ፡ ለዘይፈቅር፡ ይገብር፡ እግዚአብሔር፡ ወለዘሰ፡ ይጸልዖ፡ ይሬስዮ፡ ሕብልያ፡ ለፀሩ። ወየዓሥር፡ እደዊሁ፡ ወእገሪሁ፡ ወይሜጥዎ፡ ውስተ፡ እደ፡ ፀሩ፡ ወይሬስዮ፡ ስላቀ፡ ለጸላእቱ፡ ወኢያስተፌሥሐ፡ በዘርዓ፡ ቤቱ፡ እስመ፡ ኮነ፡ ሐዋኪ፡ ትእዛዘ፡ እግዚአብሔር፡ ወከዓዌ፡ ደም። ወኢይቀውም፡ በፍትሕ፡ ወይዓሥዮሙ፡ ፍሬ፡ ምግባሮሙ፡ ለእለ፡ ይገብሩ፡ እኪተ፡ ለገባርያነ፡ እኪት፡ አመ፡ ይፈዲ፡ እኪተ። ለገባርያነ፡ ሠናይትሰ፡ ከመ፡ ይፍዲ፡ ሠናያተ፡ ተአዘዞ፡ እምእግዚአብሔር፡ በእደ፡ ዚአሁ፡ ከመ፡ ይዕቀቦሙ። ወውእቱኒ፡ ከመ፡ ይዕቀብ፡ ትእዛዘ፡ እስመ፡ ላዕከ፡ ውእቱ፡ ላዕለ፡ ኵሉ፡ ዘፈጠረ፡ ከመ፡ ይግበር፡ ሠናየ፡ ወየሀቦሙ፡ ሕይወተ፡ ዘለዓለም፡ ወይሰብሕዎ፡ ለእግዚአብሔር፡ ዘፈጠሮሙ፡ ወአልቦ፡ ዘይትዓደዉ፡ እምትእዛዙ፡ እምዘፈጠሮሙ፡ ዘእንበለ፡ ባሕቲቱ፡ ሰብእ። ወኵሎሙ፡ የአምርዎ፡ ወይትዓቀቡ፡ በትእዛዙ፡ ወበሥርዓቱ፡ በከመ፡ አዘዞሙ፡ እግዚአ፡ ብሔር፡ ለኵሎሙ፡ እለ፡ ይነብሩ፡ በበሥርዓቶሙ። ወለብአሰ፡ ይትዓደው፡ ላዕለ፡ ዘአንገሦ፡ ላዕለ፡ ኵሉ፡ አራዊት፡ ወእንስሳ፡ ወላዕለ፡ ኵሉ፡ አዕዋፍ፡ ዘፈጠረ፡ እግዚአብሔር። አመሂ፡ ዘውስተ፡ ባሕር፡ ወእመሂ፡ ዘውስተ፡ የብስ፡ ወኵሎ፡ ዘፈጠረ፡ እግዚአብሔር፡ አወፈዮ፡ ለአቡነ፡ አዳም፡ ከመ፡ ይግብር፡ ዘይፈቅዶ፡ ወይብልዖሙ፡ ከመ፡ ሣዕር፡ ዘውስተ፡ ምድር፡ ወይቅንዮሙ፡ ወያገብሮሙ፡ እመሂ፡ አራዊት፡ ወእመሂ፡ እንስሳ፡ ወሀቦሙ፡ እግዚ፡ አብሔር፡ ከመ፡ ይትአዘዙ፡ ለሰብእ። ወሰብእኒ፡ እለ፡ ነገሡ፡ ከመ፡ ይትአዘዙ፡ ለእግዚአብሔር፡ በዘወሀቦሙ፡ ክብረ፡ ወሢሞሙ፡ ላዕለ፡ ኵሉ፡ ዘፈጠረ፡ ያድሉ፡ ሎቱ፡ ወይትአዘዙ፡ ሎቱ። ወእመሰ፡ ተዓደዉእምትእዛዙ፡ ውእቱኒ፡ ይሞቅሶሙ፡ እምሀብት፡ ዘወሀቦሙ፡ ወያገብእ፡ ለዘይገብር፡ ፈቃደ፡ እስመ፡ መላኪ፡ ሰማይ፡ ወምድር። ወለዘፈቀደ፡ ይሰይሞ፡ ወለዘፈቀደ፡ ይስዕሮ፡ ወይቀትል፡ ወየሐዩ፡ ይቀሥፍ፡ ወይሣሃል። ወአልቦ፡ ባዕደ፡ ዘከማሁ፡ ወአልቦ፡ ዘይግዕዞ፡ እስመ፡ እግዚእ፡ ውእቱ፡ ለኵሉ፡ ዘፈጠረ፡ ወአልቦ፡ ባዕድ፡ አምላክ፡ ዘእንበሌሁ፡ በሰማይ፡ በላዕሉ፡ ወበምድር፡ በታሕቱ። ወይሠይም፡ ወይሥዕር፡ ወይቅትል፡ ወየሐዩ፡ ወይቀሥፍ፡ ወይሣሃል፡ ወያነዲ፡ ወያብዕል። ወይትዌከፍ፡ ለእለቶሙ፡ ለእለ፡ ይስእልዎ፡ ወለዘይገብር፡ ፈቃደ፡ በንጹሕ፡ ልብ፡ ውእቱኒ፡ ይሰምዖሙ፡ ጸሎቶሙ፡ ወይገብር፡ ፈቃዶሙ፡ በኵሉ፡ ዘሰአልዎ። ወይኤዝዝ፡ ሎሙ፡ ንዑሰ፡ ወዓቢየ፡ ወኵሉ፡ ዘዚአሆሙ፡ ዘውስተ፡ አድባር፡ ወአውግር፡ ወበዓታት፡ ወአዕዋም፡ ወግበበ፡ ምድር፡ ወባሕር፡ ወየብስ። ወኵሉ፡ ዚአሆሙ፡ ውእቱ፡ ለእለ፡ ይገብሩ፡ ፈቃዶ፡ ለአምላኮሙ፡ ወኢያስቲፂንሶሙ፡ እምበረከቱ፡ ወይሁቦሙ፡ ዓሰበ፡ ስብሐቶሙ። ዘበሰማይኒ፡ ይሁቦሙ፡ ክብረ፡ ዘአስተዳለወ፡ ለአበዊሆሙ፡ ለአብርሃም፡ ወለይስሐቅ፡ ወለያዕቆብ፡ ወለዳዊት፡ ወለሕዝቅያስ፡ ወለሳሙኤል፡ እለ፡ ይትዓደዉ፡ እምትእዛዙ፡ ወእምኵነኔሁ፡ ለእግዚአብሔር። ከመ፡ የሀቦሙ፡ ርስተ፡ ዘመሐለ፡ ለአበዊሆሙ፡ ለአብርሃም፡ ወለይስሐቅ፡ ወለያዕቆብ፡ እለ፡ እምዓለም፡ አሥመርዎ፡ ወከመ፡ ይትፈሥሑበመንግሥቱ።

Chapter 22 ተዘከር፡ እስኩ፡ ሰሞሙ፡ ለእለ፡ ይገብርዋ፡ ለሠናይት፡ ወኢትርሣ፡ እምግባሪሆሙ። ወቅናዕ፡ ከመ፡ ይኩን፡ ስምከ፡ ከመ፡ ስመ፡ ዚአሆሙ፡ ከመ፡ በሰማያት፡ ትትፌሣሕ፡ ምስሌሆሙ፡ በማኅደረ፡ ብርሃን፡ ዘአስተዳለወ፡ ለኄራን፡ ንግሥት፡ ወመኳንንት፡ እለ፡ ገብሩ፡ ፈቃደ፡ ለእግዚአብሔር። ካዕበ፡ አእምር፡ ወጠይቅ፡ ስሞሙ፡ ለእኩያን፡ ነገሥት፡ ወመኳንንት፡ ዘከመ፡ ይትኰነኑ፡ ወይሔምይዎሙ፡ በኀበ፡ ሰብእ፡ እምድኅረ፡ ሞቱ። ዘበሰማያትኒ፡ ይትኰነኑ፡ ምስለ፡ ረሲዓን፡ ወዓላውያን፡ እለ፡ ኢገብሩ፡ ፈቃደ፡ ለእግዚአብሔር፡ እስመ፡ እንዘ፡ ይራእዩ፡ ወይሰምዑ፡ ኢያሠነዩ፡ ፍኖቶሙ። አንተሒ፡ ኢትሑር፡ በፍኖተ፡ ረሲዓን፡ እለ፡ ተምዖሙ፡ እግዚአብሔር፡ በእንተ፡ እከየ፡ ምግባሮሙአላ፡ ኩን፡ ኄረ፡ ወየዋሃ፡ ወራትዓ። ወፍታሕ፡ ለጽድቅ፡ ወአጽድቅ፡ ዕቤረ፡ ወእጓለ፡ ማውታ፡ ወአድኅን፡ እምእደ፡ እለ፡ ይትዔገልዎሙ፡ ኃጥአን። ወቁም፡ ለእጓለ፡ ማውታ፡ ከመ፡ አብ፡ ከመ፡ ታድኅኖ፡ እምእደ፡ ዘይት፡ ዔገሎ፡ ወደንግፅ፡ ሶበ፡ ይትከዓው፡ አምብዓ፡ እጓለ፡ ማውታ፡ በውስቴትከ፡ ከመ፡ ኢትደንግፅ፡ በባሕር፡ እሳት፡ ዘይትኰነኑ፡ ኃጥአን፡ እለ፡ ኢገብሩ፡ ንስሐ። አርትዕ፡ ሰኰናከ፡ ውስተ፡ ፍኖተ፡ ሰላም፡ ወኅሥሣ፡ ለሰላም፡ ወዱግና፡ እስመ፡ አዕይንቲሁ፡ ለእግዚአብሔር፡ ኀበ፡ ጻድቃኑ፡ ወዕዝኑሂ፡ ኀበ፡ ስእለቶሙ። ገዱሰ፡ ለእግዚአብሔር፡ ኀበ፡ እለ፡ ይገብሩ፡ እኩየ፡ ከመ፡ ይሠሩ፡ እምድር፡ ዝክሮሙ፡ ወኢያትርፍ፡ ዘያስተአዝብ፡ ውስተ፡ አድባር፡ ወኢበዓረፍት። ወኢይመይጥ፡ ገጽየ፡ እስከ፡ አጠፍዖሙ፡ ለዘኢየዓቀቡ፡ ቃልየ፡ እስመ፡ ቀናዒ፡ እግዚአብሔር፡ አነ፡ ዘእትቤቀል፡ ለእለ፡ ይጾልዑኒ፡ ወለእለ፡ ኢዓቀበ፡ ቃልየ። ወአከብሮሙ፡ ለእለ፡ ያከብሩኒ፡ ወየዓቅቡ፡ ቃልየ።

Chapter 23 ወኢትሑር፡ በፍኖተ፡ ቃየን፡ ዘቀተለ፡ እኅዋሁ፡ ዘበየዋሃት፡ ተለዎ፡ እንዘ፡ ይመስሎ፡ ዘያፈክሮ፡ እኁሁ። ወውእቱኒ፡ ቀተሎ፡ ለእኁሁ፡ በቅንዓተብእሲት፡ ወከማሁ፡ እለይገብሩ፡ ዓመፃ፡ ወቅን፡ ዓተ፡ ወኅብለ፡ ዲበ፡ ቢጾሙ። ወሖሩ፡ በፍኖተ፡ ቃየን፡ ወአኮ፡ በፍኖተ፡ አቤል፡ የዋህ፡ እስመ፡ አቤሐሰ፡ የዋህ፡ ከመ፡ በግዕ፡ ወደሚኒ፡ ከመ፡ ደመ፡ በግዕ፡ ንጹሕ፡ ዘሦዑ፡ ለእግዚአብሔር፡ በንጹሕ፡ ልብ። ወአለሰ፡ የሐውሩ፡ በፍኖተ፡ አቤል፡ የዋህ፡ እሙንቱ፡ ያፈቅርዎ፡ ለእግዚአብሔር፡ እስመ፡ ኮኑ፡ የዋሃነ፡ ከመ፡ አቤል፡ እስመ፡ ለኵሉ፡ ዘየሐውር፡ በየውሐተ፡ ያፈቅሮ፡ እግዚአብሔር፡ ከመ፡ አቤል፡ ጻድቅ፡ ወየዋህ። ወለእኩያንሰ፡ ይትሔየዮሙ፡ እግዚአብሔር፡ ወጽኑሕ፡ ደይኖሙ፡ ውስተ፡ ክሣውዲሆሙ፡ መጽሑፍ፡ በመታክፍቲሆሙ፡ ወያነብብዋ፡ አመ፡ ኵነኒ፡ በቅድመ፡ መላእክት፡ ወሰብእ፡ ወኵሉ፡ ፍጥረት። አሜሃኪ፡ የኃፍሩ፡ ዓላውያን፡ ወኣማፅያን፡ እለ፡ ኢገብሩ፡ ፈቃዶ፡ ለእግዚአብሔር። ወትትወሀቦሙ፡ ቃለ፡ ወደንግፅ፡ ዘይብል፡ ደይዎሙ፡ ውስተ፡ ኵነኔ፡ ነደ፡ እሳት፡ ኀበ፡ አልቦቱ፡ ሙፃዕ፡ እስከ፡ ለዓለም።

Chapter 24 ጌዴዎንሰ፡ ሶበ፡ ተአመኖ፡ ለእግዚአብሔር፡ በውሁዳን፡ ሠራዊት፡ ሞዓ፡ ))፡ ወአዕላፈ፡ ሠራዊት፡ እለ፡ አልቦሙ፡ ኊልቍ፡ ከመ፡ አንበጣ፡ ወሠራዊተ፡ ቍላፋን። ኢትትአመኑ፡ ባዕዳነ፡ አማልክተ፡ እስመ፡ አልቦ፡ ባዕድ፡ አምላክ፡ ዘእንበሌየ፡ ኦነገሥት፡ ወመኳንንት። እስመ፡ አነ፡ ውእቱ፡ እግዚአብሔር፡ አምላክክሙ፡ ዘአውፃዕኩክሙ፡ እምከርሠ፡ እምክሙ፡ ወአልሐቁክሙ፡ ወሲሰይኩክሙ፡ ወዓረዝኩክሙ፡ ወለምንት፡ ታመክንዩ፡ ወታመልኩ፡ ባዕደ፡ አምላክ፡ ዘእንበሌየ። ወዘንተ፡ ኵሉ፡ ገበርኩ፡ ለክሙ፡ ወምንተ፡ ወሀብክሙኒ፡ ወምንት፡ እፈቅድ፡ እምኔክሙ፡ ዘእንበለ፡ መድኃኒተ፡ ነድስክሙ፡ ከመ፡ ትሑር፡ በሕግየ፡ ወበሥርዓትየ፡ ወበትእዛዝየ፡ ወአነሂ፡ አሀብክሙ፡ መድኃኒተ፡ ነፍስክሙ። ይቤ፡ እግዚአብሔር፡ ዘኵሎ፡ ይመልክ፡ አድኀኑ፡ ርእስክሙ፡ እምጣዖት፡ ወሰገል፡ ወማርያን። እስመ፡ ቦሙ፡ መቅሠፍተ፡ እግዚአብሔር፡ ይመጽእ፡ ላዕለ፡ እለ፡ ይገብሩ፡ ዘንተ፡ ወላዕለ፡ እለ፡ ይሰምዕዎሙ፡ ወላዕለ፡ እለ፡ ይገብሩ፡ ፈቃዶሙ፡ ወላዕለ፡ እለ፡ ይትዓረክዎሙ፡ ወላዕለ፡ እለ፡ የሐውሩ፡ በትእዛዞሙ። እስመ፡ ይትነሥኡ፡ ሕዝብ፡ ላዕሌክሙ፡ እለ፡ ኢየአምሩክሙ፡ ወኢይምሕኩክሙ፡ ወይበልዑ፡ ፍሬ፡ ዖማክሙ፡ ለእመ፡ ኢገበርክሙ፡ ፈቃደ፡ እግዚአብሔር፡ ዘገብረ፡ ለክሙ፡ በከመ፡ ነገሩ፡ ነቢያቲሁ፡ እምሳሙኤል፡ ነቢይ፡ ወዓዲ፡ ነገረ፡ ሕዝቅኤል፡ ወሔኖክ፡ ወነገፈ፡ አሳፍ። ወይቤ፡ ይመጽኡ፡ ዕደው፡ ፀዋጋውብ፡ እንዘ፡ ይዌልጡ፡ ልብሰቶሙ፡ ወአልቦ፡ ባዕድ፡ ሕግ፡ በውስቴቶሙ፡ ዘእንበለ፡ በሊዕ፡ ወሰተይ፡ ወተሠርግዎ፡ ወርቅ፡ ወብሩር፡ ወለኵሉ፡ ምግባረ፡ ፁግ፡ ዘኢይሠምሮ፡ እግዚአብሔር። ወእሙንቱሰ፡ ድልዋን፡ ለረዊጽ፡ ውስተ፡ በሊዕ፡ ወሰቲይ፡ እምከመ፡ ነቅሑ፡ እምንዋሞሙ፡ እምነግህ፡ እስከ፡ ሠርክ፡ ውስተ፡ ምግባረ፡ እኩይ፡ ይረውፁ፡ ወለእገሪሆሙ፡ አልቦ፡ ፍኖተ፡ ሰላም፡ አላ፡ ዳዕሙ፡ ኃሣር፡ ወቅጥቃጤ፡ ውስተ፡ ፍኖቶሙ። ወኢየአምርዋ፡ ለፍኖተ፡ ሰላም፡ ወአልቦ፡ ፍርሃተ፡ እግዚአብሔር፡ ቅድመ፡ አዕይንቲ፡ ሆሙ፡ ሕዝብ፡ ጠዋዕያን፡ ወፀዋጋን፡ እለ፡ አልቦሙ፡ ምልሕ፡ ወኢሃይማኖት፡ ስሱዓን፡ ወበላዕያን፡ ወሰታይያን፡ ወሰካርያን፡ ወዘእንበለ፡ ሕግ፡ አበሰሆሙ፡ ወውስተ፡ ምርዓት፡ ወክዒወ፡ ደም፡ ወሥርክ፡ ወጕሕሉት፡ ወሐይደ፡ ንዋየ፡ ባዕድ፡ በዓመፃ። ወወቃስያን፡ ዘእንበለ፡ ሕግ፡ ወፍትሕ፡ ወአልቦ፡ ፍርሃት፡ ውስተ፡ ገጾሙ፡ እስመ፡ ኢይፈርህዎ፡ ለእግዚአብሔር፡ ዘፈጠሮሙ። ወኢየኃፍሩ፡ ገጸ፡ ሰብእ፡ ዘይሬእዮ፡ ወገጾ፡ ዘሲበት፡ ወገጾ፡ ዘአረጋዊ፡ ወእምከመ፡ ሰምዑ፡ ንዋየ፡ ዓለም፡ ይሬስዩ፡ ዘዚአሆሙ፡ ዘእንበለ፡ ይርዐዩ፡ በአዕይንቲሆሙ፡ ወእምከመ፡ ርእዩ፡ በአዕይንቲሆሙ፡ ይመስሎሙ፡ ዘውኀጥዎ፡ በአፉሆሙ፡ እስመ፡ አልቦ፡ ፍርሃተ፡ እግዚአብሔር፡ ቅድመ፡ አዕይንቲሆሙ። ወመኳንንቲሆሙኒ፡ በላዕያነ፡ ማዕኮት፡ ወዘተናገሩ፡ በነግህ፡ ኢይደግሙ፡ በሠርክ፡ እስመ፡ ከሐድያን፡ እሙንቱ፡ ወአልቦ፡ እንከ፡ ርትዕ፡ ውስተ፡ አፉሆሙ። ወነገሥቶሙኒ፡ ሐዋክያን፡ ለእከይ፡ ይረውፁ፡ እስመ፡ ይትሔየዩ፡ አውያተ፡ ነዳያን፡ ወምስኪናን፡ ወኢያነግፍዎሙ፡ ለግዩራን፡ እምእደ፡ ዘይትዔገልዎሙ። ወበእንተዝ፡ ኢይኩኑ፡ ነገሥት፡ ደንፃውያነ፡ አላ፡ ይባልህዎሙ፡ ለግዩር፡ ወለግፉዕ። ወእሙንቱሰ፡ መጸብሐን፡ ወዓላውያን፡ እለ፡ ይሰትዩ፡ ደመ፡ ወኢይምህሩ፡ ዕጐለተ፡ ምስለ፡ እማ፡ ወዖፈ፡ ምስለ፡ አፍህርቲሃ፡ እስመ፡ ፀዋግ፡ ፍኖቶሙ፡ ኵሎ፡ ዘርእዩ፡ ወዘለምዑ፡ ይሬስዩ፡ ዘዚአሆሙ። ወኢይምህሩ፡ ነዳያነ፡ ወዝልጉሳነ፡ አላ፡ ያፈቅሩ፡ ይስተጋብኡ፡ ለርአሰሙ፡ ወየሐይዱ፡ ንዋየ፡ ባዕድ፡ በዓመፃ፡ ወኵሎ፡ ዘረከቡ፡ ያተጋብዑ፡ ከመ፡ ይዝግቡ፡ ውስተ፡ አብያቲሆሙ፡ ወይትፈሥሑ፡ ቦቱ። አሌላ፡ ለነፍሶሙ፡ አመ፡ ይእኅዞሙ፡ እግዚአብሔር፡ በመዓቱ፡ በእንተ፡ ዘኢያሠነዩ፡ ሥርዓቶሙ፡ በሕይወቶሙ፡ እስመ፡ ይጠፍዑ፡ ፍጡነ፡ ከመ፡ ዘወፅአ፡ እምግቡ፡ ዘኢይትረከብ፡ ዓሠሩ፡ ወኢይገብዕ፡ ውስተ፡ ቤቱ። ወከማሁ፡ ይጠፍዑ፡ በምዕር፡ በ1ገጽ፡ አመ፡ ተሐየዮሙ፡ እግዚአብሔር፡ የሐልቁ፡ በጊዜሁ፡ እስመ፡ ኢያፈጥን፡ እግዚአብሔር፡ ለአጥፍዖ፡ አላ፡ ይትዔገሥ፡ እመ፡ ይገብዑ፡ ውስተ፡ ንስሐ። ወለእመ፡ ኢገብዑ፡ ውስተ፡ ንስሐ፡ ያጠፍዖሙ፡ እግዚአብሔር፡ ከመ፡ ቀደምት፡ እለ፡ እምቅድሜሆሙ፡ እለ፡ ኢአቀቡ፡ ትእዛዘ፡ እግዚአብሔር፡ በንጹሕ። ወበላዕያነ፡ ሥጋ፡ ሰብእ፡ ወሰታይያነ፡ ደም፡ ወአልቦ፡ ፍርሃተ፡ እግዚአብሔር፡ በኵሉ፡ ጊዜ፡ እስመ፡ ግፍዓ፡ የዓጥቁ፡ ለረዊፅ፡ እምከመ፡ ተንሥኡ፡ እምሰከቦሙ፡ ወኢየዓርፉ፡ እምገቢረ፡ ዓመፃ። ለበሊዕ፡ ወሰተይ፡ ወረዊፅ፡ ውስተ፡ እከይ፡ ወኃጕል፡ ከመ፡ ያማስኑ፡ ነፍሰ፡ ብዙኃን፡ በዲበ፡ ምድር።

Chapter 25 አሌ፡ ላ፡ ለነፍሶሙ፡ አመ፡ አኃዝክዋ፡ በመዓትየ፡ ይቤ፡ እግዚአብሔር፡ ዘኵሎ፡ ይመልክ፡ እስመ፡ ጠዋይ፡ ፍኖቶሙ፡ ወኵሉ፡ ዘየሐውሩ፡ በፍኖተ፡ ሰይጣን፡ መስሕት። ወፍኖተ፡ እግዚአብሔር፡ ኢየአምሩ፡ ወአግብዕዎ፡ ድኅረ፡ ዘባኖሙ፡ ወተዓወርዎ፡ ለሕግየ። ወአነሂ፡ እፈድዮሙ፡ ዘከመ፡ እከየ፡ ምግባሮሙ፡ በደኃሪ፡ በዕለተ፡ ኵነኔ፡ እትቤቀሎሙ፡ በከመ፡ ጽሑፍ፡ ኀቤየ፡ እከየ፡ ምግባሮሙ፡ ወኢያመሥጡ፡ ኦምእዴየ፡ እስመ፡ አነ፡ እግዚአብ፡ ሔር፡ ዘእቀትል፡ ወአሐዩ፡ ዘእቀሥፍሂ፡ ወእሠሃል። ወአልቦ፡ ዘይመሥጥ፡ እምእዴየ፡ ኢበመትሕተ፡ ምድር፡ ወኢበመልዕልተ፡ ሰማያት፡ ወባሕር፡ ወቀላያት፡ ማያት፡ እስመ፡ አነ፡ እግዚአብሔር፡ እምጽንፍ፡ እስከ፡ አጽናፈ፡ ዓለም፡ ወነፍስ፡ ኵሉ፡ ውስተ፡ እዴየ። ከይሲ፡ እሲዝዝ፡ በመትሕተ፡ ምድር፡ ወለአበሪ፡ በውስተ፡ ባሕር፡ ወለዓዕዋፍ፡ በውስተ፡ አየር፡ ወለሐለስትዮ፡ ብነውስተ፡ በድው፡ እምጽንፋ፡ ወእስከ፡ ጽንፋ፡ ወእስከ፡ አጽናፈ፡ ዓለም፡ ዚአየ፡ ውእቱ። ወአልቦ፡ ዘያመሥጥ፡ እምእዴየ፡ በሰማይ፡ በላዕሉ፡ ወበምድር፡ በታሕቱ፡ እስመ፡ አነ፡ ዘእገብር፡ ወድምመ፡ ወተአምረ፡ በቅድመ፡ አዕይንትየ፡ ወአልበ፡ ዘይብለኒ፡ አይቴ፡ ተሐውር፡ ወምንተ፡ ትገብር። ወአነ፡ እኢዝዝ፡ በመልዕልተ፡ መላእክት፡ ወሊቃናት፡ ወኵሉ፡ ስም፡ ዘይሰመይ፡ ዚአየ፡ ውእቱ፡ ወኵሉ፡ አዕዋፈ፡ ሰማይ፡ ወአራዊተ፡ ገዳም፡ ወእንስሳ፡ ዚአየ፡ ውእቱ። ወይትነሣዕ፡ ነፋሰ፡ አዜብ፡ ወሐሩረ፡ መስዕ፡ ወባሕረ፡ ኤርትራ፡ ትደምፅ፡ እምዕበየ፡ ግርማሁ፡ ለዘይመጽእ፡ ኀቤሃ፡ በደኃሪ፡ መዋዕል። እስመ፡ ውእቱ፡ ይኰንን፡ ሕያዋነ፡ ወሙታነ፡ ምስለ፡ ኖባ፡ ወሳባ፡ ወኢትዮጵያ፡ ወሕንደኬ፡ ወኵሉ፡ ዘአድያሚሆሙ፡ ወወሰኖሙ። ወኵሎ፡ ይርኢ፡ በየውሃት፡ በበትር፡ እንተ፡ ውስተ፡ እዴሁ፡ ወይርኢ፡ በበትር፡ አባግዒሁ፡ እስመ፡ በትረ፡ ዚአሁ፡ ይትሌዓል፡ እምኵሉ፡ አብትር። ወቀርነ፡ ዚአሁ፡ ይከብድ፡ እምኵሉ፡ አቅርንት፡ ወመንግሥተ፡ ዚአሁ፡ ይትሌዓል፡ እምኵሉ፡ መንግሥት፡ ወሥልጣኑ፡ አኃዜ፡ ኵሉ፡ ዓለም፡ ዘይክል፡ ኵሎ፡ ወአልቦ፡ ዘይሠዓኖ። ይኤዝዝ፡ ደመናተ፡ በላዕሉ፡ ወያሠርፅ፡ ሣዕረ፡ ለአንስሳ፡ በታሕቱ፡ ወይሁብ፡ ፍሬ፡ በዲበ፡ ሰብል። ወይሴሲ፡ ለኵሉ፡ በከመ፡ ፈካደ፡ በበዘመዱ፡ ወበበፍሬሁ፡ ወበበሲሲቱ፡ ለኵሉ፡ ዘፈጠረ፡ ለቃሕም፡ ወለአናኵዕ፡ በመትሕተ፡ ምድር፡ ወለአራዊት፡ ወለእንስሳ፡ በመልዕልተ፡ ምድር፡ ዘይሁብ፡ ጸሎቶ፡ ለዘጸለየ፡ ወኢይትሔየዮሙ፡ ስዕለቶሙ፡ ለዕቤራተ፡ ወለእጓለ፡ ማውታ። ወፈድፋድሰ፡ ይትዌከፍ፡ ጸሎቶሙ፡ ለንጹሐን፡ እለ፡ ይጼልዩ፡ ኀቤሁ፡ በኵሉ፡ ጊዜ፡ እስመ፡ ማዕሌቶሙ፡ ለእኩያን፡ ከመ፡ ነፋሰ፡ ዓውሎ፡ ወጉባዔሆሙ፡ ለዓማፅያን፡ ከመ፡ ሳሕወ፡ ደመና። ወፍሥሐሆሙኒ፡ ከመ፡ ዖፍ፡ ሠራሪት፡ ወስነ፡ ራዕዮሙ፡ ኃላፊ፡ ዘወርቅ፡ ወዘብሩር፡ በዲበ፡ ምድር፡ ወርቆሙኒ፡ ኢይበቍዖሙ፡ አላ፡ ውእቱ፡ ማኅተቶሙ፡ ለረሢዓን፡ ወብዕለ፡ አልባሲሆሙ፡ ይትበላዕ፡ በቍምቍኒ። ወመዛግብተ፡ ዕክልኒ፡ ወሥርያይኒ፡ ሃይትዌዳዕ፡ በፃፄ፡ ወበነቀዝ፡ ወኵሉ፡ የኃልፍ፡ ከመ፡ ዘትማልም፡ ዕለተ፡ አንተ፡ ኃለፈት፡ ወዘከመ፡ ዘሰፅዓ፡ እምአፍ፡ ቃል፡ ኢይገብዕ፡ ከማሁ፡ ብዕሎሙ፡ ለኃጥአን፡ ወከመ፡ ጽላሎት፡ ዘየኃልፍ፡ ከማሁ፡ ስነ፡ ንብረቶሙ፡ ወከመ፡ ልብሶ፡ ኅስት፡ ከማሁ፡ ብዕሎሙ፡ ለኃጥአን፡ በቅድመ፡ እግዚአብሔር። ወጻድቃንሰ፡ ለእመ፡ ብዕሉ፡ ኢይተሔየዮሙ፡ እግዚአብሔር፡ እስመ፡ እንዘ፡ ይምህሩ፡ ነደየ፡ ብዕሉ፡ ወያደምዑ፡ ፍትሐ፡ ዕጓለ፡ ማውታ፡ ወምስኪናን፡ ወእንዘ፡ ያለብሱ፡ እምልብሶሙ፡ ለዕሩቃን፡ ወእንዘ፡ ኢይትሔየዩ፡ እምዘርዓ፡ ቤቶሙ፡ ዘወሀቦሙ፡ እግዚአብሔር፡ ከመ፡ የሀቡ፡ ለግዩር፡ ወለምስኪናን። ወኢይገምፁ፡ ፍትሐ፡ መሃይምናን፡ ወኢያበይቱ፡ ዓሰቦ፡ ለአሳብ፡ ወኢይገብሩ፡ ዓመፃ፡ በውስተ፡ ሐሳበ፡ አውራኂሆሙ፡ ወኢበመሳፍረ፡ ሚዛኖሙ፡ እስመ፡ ጽድቅ፡ ወክቡረ፡ ነገረ፡ እግዚአብሔር፡ ከመ፡ መላዒ፡ ዘ

Chapter 26 ወነዳያንሰ፡ ካዕበ፡ ይሔልዩ፡ ውስተ፡ ምስካቦሙ፡ ወለእመ፡ ኢተወክፍዎሙ፡ አብዕልት፡ ይከውኑ፡ ከመ፡ ዕፅ፡ ይቡስ፡ ዘአልቦ፡ ርጥበት፡ ወሀበ፡ አልቦ፡ ርጥበት፡ ኢይሠርፅ፡ ሥርው፡ ወሶበ፡ አልቦ፡ ሥርው፡ ኢይሠርፅ፡ ቍፅል። ወለእመ፡ ኢሠረፀ፡ ቍፅል፡ ኢይገብር፡ ፍሬ፡ እስመ፡ ቍፅል፡ ይትቀነይ፡ ለሠርጐ፡ ፍሬ፡ ወዘአልቦ፡ ፍሬ፡ አልቦ፡ ምግባረ፡ ሠናይ፡ እስመ፡ ርእሱ፡ ለብእሲ፡ ፍሬ፡ ጽድቅ። ወለእመ፡ ገብረ፡ ጽድቀ፡ ፈረየ፡ ርትዓ፡ ወይትፌሣሕ፡ እግዚአብሔር፡ በብእሲ፡ ዘይገብር፡ ጽድቀ፡ ወርትዓ። ወይሁቦ፡ ጸሎቶ፡ ለዘጸለየ፡ ወፃማ፡ ከናፍሪሁ፡ ወኢይገፍዖ፡ ለጻድቅ፡ በእንተ፡ ጽድቁ፡ ዘገብረ። ወዘያጸድቆ፡ ለኃጥዕ፡ ዘእንበለ፡ ንስሐ፡ በእንተ፡ እከየ፡ ምግባሩ፡ ዘገብረ፡ እስመ፡ ጻድቅ፡ እግዚአብሔር፡ ወጽድቅ፡ አፍቀረ፡ ወኢያደሉ፡ ለገጸ፡ ባዕለ፡ ወኢለነዳይ፡ በውስተ፡ ፍትሕ፡ እስመ፡ መላኪ፡ ሰማይ፡ ወምድር፡ ውእቱ፡ ወነፍሰ፡ ኵሉ፡ ውስተ፡ እዴሁ።

Chapter 27 ወፈጠረ፡ ኵሉ፡ ዓለመ፡ እምኀበ፡ አልቦ፡ ወአስተዳለወ፡ ወአስተናበረ፡ አድባረ፡ ወአውግረ፡ ወአፅንዓ፡ ለምድር፡ ዲበ፡ ማይ፡ ወከመ፡ ኢታንቀልቅል፡ በኆፃ፡ ሐፀራ፡ እስመ፡ ቀዳሚ፡ ካሉ፡ ለእግዚአብሔር፡ ይቤ፡ ለይኩን፡ ብርሃን። ወኮነ፡ ብርሃን፡ እንዘ፡ ጽልመት፡ ዓለም፡ ወገብረ፡ እግዚአብሔር፡ ግብር፡ ወአስተዳለወ፡ ወአፅንዓ፡ ለዓለም፡ በዘይደሉ፡ ወበዘይረትዕ፡ ወይቤ፡ ይኩን፡ ምሴት፡ ወጽልመት። ወካዕበ፡ ይቤ፡ እግዚአብሔር፡ ይኩን፡ ብርሃን፡ ወፀብሐ፡ ወኮነ፡ ብርሃን፡ ወአልዓሎ፡ ለታህታይ፡ ማይ፡ መልዕልተ፡ ሰማይ። ወረበቦ፡ ከመ፡ ሠቅ፡ ወበነፋስ፡ ዓመዶ፡ ወለታሕይ፡ ማይ፡ አኅደሮ፡ መትሕተምዕማቀ፡ ባሕር። ወዓፀዊ፡ በኆፃ፡ መናስግቲሁ፡ ለባሕር፡ ወአጽንዖሙ፡ በመንፈሱ፡ ከመ፡ ኢይሠጠሙ፡ መትሕተ፡ ታሕቲተ፡ ወአኅደሮሙ፡ ለአራዊት፡ ወለእንስሳ፡ በውስቴታ፡ ወለዓበይተ፡ እንስሳ፡ በውስቴታ፡ ዘአልቦ፡ ኍልቍ፡ እለ፡ ያስተርእዩ፡ ወእለ፡ ኢያስተርእዩ። ወበሣልስተ፡ ዕለት፡ ገብረ፡ እግዚአብሔር፡ አትክልተ፡ ዲቤሁ፡ ለየብስ፡ ወኵሎ፡ ሣዕረ፡ ወዕፀወ፡ ዘበበዘመዱ፡ ወፍሬያተ፡ ዘይፈሪ። ወዕጠ፡ ሕይወት፡ ዘሠናይ፡ ለርእይ፡ ወጥዑም፡ ለበሊዕ፡ ወሣዕረ፡ ወኵሎ፡ ሐመልማል፡ ምድር፡ ዘእምውስቴቱ፡ ዘርኡ። ወሠርዓ፡ መብልዓ፡ ለኵሉ፡ እንስሳ፡ ወአራዊት፡ ወለአዕዋፍ፡ ወወሀአ፡ ሲሲተ፡ ለኵሉ፡ ዘፈጠረ። ወኮነ፡ ምሴተ፡ ወጸብሐ፡ ወበራብዕት፡ ይለትይ፡ ይቤ፡ እግዚዚአብሔር፡ ይኩን፡ ብርሃን፡ ውስተ፡ ጠፈረ፡ ሰማይ፡ ወገብረ፡ እግዚአብሔር፡ ፀሐየ፡ ወወርኀ፡ ወከዋክብተ፡ ወሢሞሙ፡ ውስተ፡ ጠፈረ፡ ሰማይ፡ ከመ፡ ያብርሁ፡ በዲበ፡ ምድር፡ ወይኰንንዋ፡ በመዓልት፡ ወበሌሊት። ወእምዝ፡ ተባረዩ፡ ፀሐይ፡ ወወርኃ፡ ወከዋክብት፡ መዓልተ፡ ወሌሊተ። ወበኃምስ፡ ዕለት፡ ፈጠረ፡ እግዚአብሔር፡ ኵሎ፡ አራዊት፡ ወእንስሳ፡ እከ፡ ይነብሩ፡ ውስተ፡ ሰማያት፡ ወኵሎ፡ አዕዋፈ፡ ዘይሠርሩ፡ መልዕልተ፡ አየር፡ ወኵሎ፡ ዘያስተርአ፡ ወዘኢያስተርኢ፡ ዘንተ፡ ኵሎ፡ ፈጠረ፡ እግዚአብሔር። ወበሣድስት፡ ዕለት፡ ፈጠረ፡ ኵሎ፡ አራዊት፡ ወእንስሳ፡ ወዕፂያተ፡ ወኵሉ፡ ፈጢሮ፡ ወአ፡ ስተናቢሮ፡ ፈጠሮ፡ ለአዳም፡ በአርዓያሁ፡ ወበአምሳሌሁ። ወአወፈዮ፡ ኵሎ፡ አራዊተ፡ ወእንስሳ፡ ዘፈጠረ፡ ከመ፡ ይንግሥ፡ ዲቤሆሙ፡ ወአዲ፡ ኵሎ፡ እንስሳ፡ ወአራዊተ፡ ወዓሣተ፡ ወአናብርተ፡ ዘውስተ፡ ባሕር። ወአባግዓኒ፡ ወክውሉ፡ አልኅምተ፡ ዘዲበ፡ ምድር፡ ወእንስሳ፡ ዘያስተርኢ፡ ወዘኢያስተርኢ። ወሢሞ፡ ለእጓለ፡ እመሕያው፡ ዘገብሮ፡ በአርአያሁ፡ ወበአምሳሊሁ፡ ወአዘዘ፡ ከመ፡ ይብላዕ፡ ወይትገበራ፡ ለገነት፡ ወይሰብሖ፡ ለእግዚአብሔር፡ በህየ። ወከመ፡ ኢይትዓደወ፡ ትእዛዘ፡ እግዚአብሔር፡ ወከመ፡ ኢይብላዕ፡ እምዕፀ፡ ዘያሊቡ፡ ሠናየ፡ ወእኩየ፡ ዕፀ፡ ሞት። እስመ፡ ይቤ፡ አመ፡ ዕለተ፡ ትበልዑ፡ እምዝንቱ፡ ዕፅ፡ ሞተ፡ ትመውቱ። ወበአስሕቶቱ፡ ለከይሱ፡ ተሐይጠት፡ እምነ፡ ሔዋን፡ ወበልዓት፡ እምውእቱ፡ ዕፅ፡ ወወሀበቶ፡ ለአቡነ፡ አዳም። ወበልዓ፡ እምውእቱ፡ ዕፅ፡ ወአምጽአ፡ ሞተ፡ ላዕሌሁ፡ ወላዕለ፡ ውሉዱ። ወተምዓ፡ እግዚአብሔር፡ ላዕለ፡ አቡነ፡ አዳም፡ እስመ፡ ተዓደወ፡ ትእዛዞ፡ ወበልዓ፡ እምውእቱ፡ ዕፅ፡ ዘአዘዞ፡ እግዚአብሔር፡ ከመ፡ ኢይብላዕ፡ እምኔሃ፡ ወሰደዶ፡ እምገነት፡ ወወሀቦ፡ ዘንተ፡ ምድረ፡ ሦክ፡ ወአሜከላ፡ እንተ፡ ረገማ፡ በእንቲአሁ፡ አመ፡ የዓሉ፡ ትእዛዞ፡ ከመ፡ ይትገበራ፡ ወይብላዕ፡ ዓስበ፡ ፃማሁ፡ በሐፈ፡ ገጹ። ወሶበ፡ አውፅሶ፡ እግዚአብሔር፡ ውስተ፡ ዛቲ፡ ምድር፡ ወገብዓ፡ አዳም፡ ውስተ፡ ሐዘን፡ ወትካዝ፡ ልብ፡ ወአኀዞ፡ ይትገበራ፡ ለምድር፡ ወይብላዕ፡ በሐፈ፡ ገጹ፡ ወበጉዕትያ፡ ወበፃማ።

Chapter 28 ወእምድኅረ፡ ነበሩ፡ ወበዝኁ፡ ደቂቁ፡ ወእምኔሆሙ፡ እለ፡ ይሴብሕዎ፡ ለእግዚአብሔር፡ ወያከብርዎ፡ ወኢይትዓደው፡ እምትእዛዙ። ወቦ፡ ነቢያትኒ፡ እለ፡ ይትኔበዩ፡ ዘኮነ፡ ወዘይከውን፡ ወቦ፡ እምደቂቀ፡ ኃጥአን፡ እለ፡ ይሔሰዉ፡ ወይዒምፁ፡ ቃየን፡ ቀዳሜ፡ በኵሩ፡ ለአዳም፡ ኮነ፡ ፀዋገ፡ ወቀተሎ፡ ለእኁሁ፡ አቤል። ወተምዕዓ፡ እግዚአብሔር፡ መዓተ፡ ላዕለ፡ ቃያል፡ በእንተ፡ ዘቀተለ፡ እኅዋሁ፡ አቤልሃ፡ ወለምድርኒ፡ በእንተ፡ ዘሰትየተ፡ ደሞ፡ ተምዓ፡ እግዚአብሔር፡ ላዕሌሃ። ወለቀየንኒ፡ ይቤሎ፡ እግዚአብሔር፡ አይቴ፡ ሀሉ፡ እኁከ፡ አቤል፡ ወይቤ፡ ቃየን፡ በትዕቢተ፡ ልቡ፡ አነሁ፡ ዓቃቤሁ፡ ለአቤል፡ እኁየ። ወአቤልሰ፡ ኮነ፡ ጻድቅ፡ ወቃየንስ፡ ኮነ፡ ኃጥኦ፡ በቀቲለ፡ እኁሁ፡ አቤል፡ ጻድቅ። ወካዕበ፡ ተወልደ፡ ሴት፡ ጻድቅ፡ እስመ፡ አዳም፡ ወለደ አንስተ፡ ወ ተባዕተ፡ ወቦ፡ እምኔሆሙ፡ ኄራን፡ ወእኩያን። ወቦ፡ እምኔሆሙ፡ ነቢያት፡ ወጻድቃን፡ ወቦ፡ እምኔሆሙ፡ ኃጥአን፡ ወጽልሕዋነ። ወቦ፡ እምኔሆሙ፡ ኄራን፡ ወቡሩካን፡ እለ፡ ይገብሩ፡ ፈቃደ፡ አቡሆሙ፡ አዳም፡ ወኵሎ፡ ዘነገሮ፡ ለሴት፡ ወልዱ፡ እምአዳም፡ እስከ፡ ኖኅ፡ ጽድቅ፡ ዘዓቀበ፡ ትእዛዘ፡ እግዚአብሔር። ወውእቱኒ፡ አማኅፀኖሙ፡ ወነገሮሙ፡ ለደቂቁ፡ ፈቃደ፡ እግዚአብሔር፡ ወእሙንቱይንግሩ፡ ለደቂቆሙ፡ ወይትመሐፀኑ፡ ፈቃደ፡ እግዚአብሔር፡ በከመ፡ ነገሮሙ፡ አቡሆሙ፡ ኖኅ፡ ከመ፡ ኢያስትቱ፡ ትእዛዘ፡ እግዚአብሔር። ወእሙንቱ፡ ነበሩ፡ እንዘ፡ ይሜህርዎሙ፡ ለእለ፡ እምድኅሬሆሙ፡ ለደቂቆሙ። ወሰይጣንሰ፡ እንዘ፡ ይፀብዖሙ፡ ለእለ፡ ኦሆ፡ ይብልዎ፡ ወይትናገሮሙ፡ በውስተ፡ ጣዖታት፡ መቃብረ፡ አበዊሆሙ፡ ፃዖተ፡ ሥዕል፡ ወይገብሩ፡ ኵሎ፡ ዘአዘዞሙ፡ ውእቱ፡ መምህረ፡ እኪት። ወያመልኩ፡ ጣዖተ፡ በከመ፡ ሥርዓቶሙ፡ እስከ፡ አመ፡ ወፅዓ፡ አብርሃም፡ ጻድቅ፡ ዘገብረ፡ ፈቃደ፡ እግዚአብሔር። ወተካየደ፡ ምድሌሁ፡ ኪዳነ፡ እግዚአብሔር፡ በእሳት፡ ወበዓውሎ፡ እስመ፡ ውእቱ፡ ቀደመ፡ ሐዊረ፡ በፍኖተ፡ ጽድቅ፡ እምአዝማዲሁ። ወመሐለ፡ ሎቱ፡ እግዚአብሔር፡ ከመ፡ የሀቦ፡ ምድረ፡ ርስት፡ ሎቱ፡ ወለዘርኡ፡ እስከ፡ ለዓለም። ወከማሁ፡ ለይስሐቅ፡ ተካየደ፡ ከመ፡ የሃቦ፡ ርስተ፡ አቡሁ፡ አብርሃም፡ ወለያዕቆብኒ፡ ከማሁ፡ ተካየደ፡ ከመ፡ የሃቦ፡ ርስተ፡ ይስሐቅ፡ አቡሁ። ወዘርዖሙኒ፡ እምድኅሬሆሙ፡ ለደቂቀ፡ ያዕቆብ፡ ረስዮሙ፡ ነገሥተ፡ ወካህናተ፡ እም2ዘመደ፡ ሕዝበ፡ እስራኤል፡ ወባረኮሙ፡ ወይቤሎሙ፡ ብዝኁ፡ ወተባዝኁ፡ ፈድፋደ። ወወሀቦሙ፡ ርስተ፡ አበዊሆሙ፡ ወኢኃደጉ፡ አምዕዖተ፡ ለእግዝኢአብሔር፡ እንዘ፡ ይሴ፡ ስዮሙ፡ ወይፈክሮሙ፡ በኵሉ። ወአመ፡ ይቀትሎሙ፡ ውእቱ፡ አሚረ፡ የኃሥሥዎ፡ ወይተመየጡ፡ ወይገይሡ፡ ኀበ፡ እግዚ፡ አብሔር፡ እስመ፡ ያፈቅሮሙ፡ እግዚአብሔር፡ ወይምሕሮሙ። ወአኮ፡ በእንተ፡ ርእሶሙ፡ አላ፡ በእንተ፡ አበዊሆሙ፡ እስመ፡ መሐሪ፡ ወመስተሣሕል፡ ለኵሉ፡ ዘፈጠረ። ወይሰፍሕ፡ የማኖ፡ በበረከተ፡ ከመ፡ ያጽግብ፡ ነፍሰ፡ ርኅብተ፡ ወይከሥት፡ ዓይኖ፡ ለምሕረት፡ ወከመ፡ ያብዝኅ፡ ዕክለ፡ ለሲሳይ። ወይሁብ፡ ሲሳየ፡ ለዕጐለ፡ ቋዓት፡ ወለኵሎሙ፡ እለ፡ ይፄውዕዎ፡ ወለደቂቀ፡ እስራኤልኒ፡ ያድኅኖሙ፡ እምእደ፡ ፀሮሙ፡ ወጸላዕቶሙ፡ ወሶበ፡ አውየዉ፡ ኀቤሁ። ወካዕበ፡ ይገብኡ፡ ከመ፡ ያምዕዕዎ፡ ወይፈኑ፡ ሎሙ፡ አሕዛበ፡ ወፀሮሙ፡ እለ፡ ዓውደሙ፡ ወያጠፍዕዎሙ፡ ወይቀትልዎሙ፡ ወይፄውውዎሙ። ወካዕበ፡ የዓወይዉ፡ ኀበ፡ እግዚአብሔር፡ በገዓር፡ ወበአንብዕ፡ ወይፌኑ፡ ሎሙ፡ ረድኤተ፡ ቦ፡ አመ፡ አድኅኖሙ፡ በእደ፡ ነቢያት። ወዘአመ፡ አድኅኖሙ፡ በእደ፡ መሳፍንት፡ ወሶበ፡ አምዕዕዎ፡ ለእግዚአብሔር፡ አገብር፡ ዎሙ፡ ፀሮሙ፡ ወማኅረክዎሙ፡ ወኢወውዎሙ። ወተንሥአ፡ ዳዊት፡ ወአድኀኖሙ፡ እምእደ፡ ኤሎፍሊ፡ ወካዕበ፡ እምዕዕዎ፡ ለእግዚ፡ አብሔር፡ ወፈነወ፡ ላዕሌሆሙ፡ እለ፡ ያመነድብዎሙ። ወቦአመ፡ አድኅኖሙ፡ ብእደ፡ ዮፍታሔ፡ ወካዕበ፡ ረሥዕዎ፡ ለእግዚአብሔር፡ ዘአድኃ፡ ኖሙ፡ ወይፈኑ፡ ላዕሌሆሙ፡ ፀረ፡ እኩያነ፡ እለ፡ ይሣቅይዎሙ፡ ወይፄውውዎሙ፡ ወይማህርክዎሙ፡ እስመ፡ እግዚአብሔር፡ ፈደዮሙ። ወካዕበ፡ አውየዉ፡ ኀቤሁ፡ ሶበ፡ ተመኀደቡ፡ ወአድኀኖሙ፡ በእደ፡ ጌዴዎን፡ ወካዕበ፡ አም፡ ዕዕዎ፡ ለእግዚአብሔር፡ በግብረ፡ እደዊሆሙ። ወውእቱኒ፡ ፈነወ፡ ሎሙ፡ ካዕበ፡ እለ፡ ይሣቀይዎሙ፡ ወገብዑ፡ ወበከዩ፡ ወአውየዉ፡ ኀበ፡ እግዚአብሔር። ወካዕበ፡ አድኀኖሙ፡ በእደ፡ ሶምሶን፡ ወአዕረፉ፡ ንሰቲት፡ ሕቀ፡ ወተንሥኡ፡ ከመ፡ ያምዕዕዎ፡ ለእግዚአብሔር፡ በእከዮሙ፡ ዘገብሩ፡ ቀዳሚ። ወውእቱኒ፡ ካዕበ፡ ፈነወ፡ ሎሙ፡ ካልዓመ፡ እለ፡ ያመነድብዎሙ፡ ወካዕበ፡ አውየዉ፡ ወበ፡ ከዩ፡ ኀበ፡ እግዚአብሔር፡ ከመ፡ ይፈኑ፡ ሎሙ፡ ወአድኃኖሙ፡ በእደ፡ ዲቦራ፡ ወባርቅ። ወካዕበ፡ ነበሩ፡ ኅዳጠ፡ መዋዕለ፡ እንዘ፡ ያመልክዎ፡ ለእግዚአብሔር፡ ወካዕበ፡ ረስዕዎ፡ ወአምዕዕዎ፡ ለእግዚአብሔር፡ በእንተ፡ አከዮሙ፡ ዘቀዳሜ። ወውእቱኒ፡ ፈነወ፡ ሎሙ፡ ካልዓን፡ እለ፡ ያመነድብዎሙ፡ ወካዕበ፡ አድኀኖሙ፡ በእደ፡ ዮዲት፡ ወካዕበ፡ ነበሩ፡ ንሰቲተ፡ ወተንሥኡ፡ ከመ፡ ያምዕዕዎ፡ ለእግዚአብሔር፡ ከመ፡ ቀዳሚ፡ በእከዮሙ። ወውእቱኒ፡ አንሥኦ፡ ሎሙ፡ እለ፡ ይኳንንዎሙ፡ አሕዛበ፡ ወገዓሩ፡ ወአውየዉ፡ ኀበ፡ እግ፡ ዚአብሔር፡ ወአድኀኖሙ፡ በእደ፡ ማታትዩ፡ ወደቂቁ፡ በላዕለ፡ ማዕዘንተ፡ ቤት። እስመ፡ ሄጰ፡ ርእሰ፡ ለረዓይታዊ፡ አኬሜሌክ፡ ዘመጽአ፡ ከመ፡ ይፅባዕ፡ ብሔረ፡ ይሁዳ፡ ወሶበ፡ ሞተ፡ ውእቱ፡ ረአይታዊ፡ ተዘርዉ፡ ሠራዊቱ፡ ወጐዩ፡ ወቀተልዎሙ፡ ደቂቀ፡ እስራኤል፡ እስከ፡ ኢያቦክ፡ ወኢያትረፉ ወእምዝ፡ አዕረፉ፡ ንሰቲተ፡ ወተንሥኡ፡ ከመ፡ ያምዕዕዎ፡ ለእግዚአብሔር፡ ወፈነወ፡ ሎሙ፡ አሕዛበ፡ እለ፡ ይኳንንዎሙ፡ ወካዕበ፡ አውየዉ፡ ወገዓሩ፡ ኀበ፡ እግዚአብሔር፡ ወተሕየየ፡ ብካየ፡ ወገዓሮሙ፡ እስመ፡ ኵሎ፡ ጊዜ፡ አምዕዕዎ፡ ለእግዚአብሔር፡ ወረሥዑ፡ ትእዛዞ። ወፄወውዎሙ፡ ወወሰድዎሙ፡ ኀበ፡ ብሔረ፡ ከለዳውያን፡ ምስለ፡ ካህናቲሆሙ። ወበህየኒ፡ ኢኀደጉ፡ አምዕዖቶ፡ ለእግዚአብሔር፡ ደቂቀ፡ እስራኤል፡ ጽልሕዋን፡ እንዘ፡ ይገብሩ፡ ርኩሰ፡ ወጣዖተ፡ ወተደመሩ፡ ምስለ፡ አሕዛብ፡ እለ፡ ይፄወውዎሙ። ወተምዕዓ፡ እግዚአብሔር፡ በህየኒ፡ በእከዮሙ፡ ከመ፡ ያጥፍዖሙ፡ በምዕር፡ ወወደየ፡ መዓተ፡ ላዕለ፡ አርጤክስስ፡ ንጉሠ፡ ከለዳውያን፡ ከመ፡ ያብዕ፡ ዕልፈ፡ ዲናረ፡ ለመዛግብተ፡ ንጉሥ፡ ወይኰንኖሙ፡ በዕለተ፡ እንተ፡ ባቲ፡ ተአምረ፡ ከመ፡ ኢይትርፍ፡ ዘርዖሙ፡ በም፡ ድረ፡ ፋርስ፡ እምሕንደኬ፡ እስሰኮ፡ ኢትዮጵያ። ወከመዝ፡ ገብረ፡ መጽሐፈ፡ መልእክተ፡ በመባሕተ፡ ንጉሥ፡ ወወሀቦ፡ ማኅተመ፡ እንተ፡ ውስተ፡ እዴሁ፡ ከመ፡ ይብጻሕ፡ ውስተ፡ ኵሉ፡ ሀገረ፡ ፋርስ። ወይቀትልዎሙ፡ በአሐቲ፡ ዕለት፡ በከመ፡ አዘዞሙ፡ ንጉሥ፡ እንተ፡ ባቲ፡ ፈቀደ፡ ከመ፡ ይሥርዎሙ፡ ወበርበሮሙሰ፡ ወርቀ፡ ወብሩረ፡ አዘዘ፡ ከመ፡ ያግብዑ፡ ለመዛግብተ፡ ንጉሥ። ወውአተ፡ አሚረ፡ ሶበ፡ ሰምዑ፡ ደቂቀ፡ እስራኤል፡ አውየዉ፡ ወበከዩ፡ ወገአሩ፡ ኀበ፡ እግዚአብሔር፡ ወነገርዎ፡ ለመርዶክዮስ፡ ወመርደክዮስኒ፡ ነገራ፡ ለአስቴር። ወአስቴርኒ፡ ትቤ፡ ጹሙኦ፡ ወጸለዮ፡ ወገዓሩ፡ ኀበ፡ እግዚአብሔር፡ አምላከ፡ እስራኤል፡ ኵሉ፡ ማኅበሮሙ፡ ለደቂቀ፡ እስራኤል፡ በሀበ፡ ሀለውክሙ። ወመርደክዮስኒ፡ ለብሰ፡ ሠቀ፡ ወወደየ፡ ሐመደ፡ ዲበ፡ ርእሱ፡ ወጾሙ፡ ወጸለዩ፡ ወነስሑ፡ በኀበ፡ ሀለዉ፡ ደቂቀ፡ እስራኤል። ወአስቴርኒ፡ ለሀወት፡ ፈድፋደ፡ ወእንዘ፡ ንግሥት፡ ይእቲ፡ ለብስት፡ ሠቀ፡ ወነጸፈተ፡ ሐመደ፡ ወላደየት፡ ርእሳ፡ ወኢተቀብዓት፡ መዓዛ፡ በከመ፡ ይገብረ፡ ንግሥታተ፡ ፋርስ፡ ወበከየት፡ ወገዓረተ፡ ኀበ፡ እግዚአብሔር፡ እማዕምቀ፡ ልባ፡ ኀበ፡ አማላከ፡ አበዊሃ። ወበእንተዝ፡ ወሀባ፡ እግዚአብሔር፡ ሞገሰ፡ በቅድመ፡ አርጤክሰስ፡ ንጉሠ፡ ፋርስ፡ ወገብረት፡ ዓቢየ፡ ምስሐ፡ ለአምላከ፡ አበዊሃ። ወቦሱ፡ ንጉሥ፡ ወሐማ፡ ውስተ፡ ምስሕ፡ ዘገብረት፡ አስቴር፡ ወበህየ፡ ፈደዮ፡ እግዚ፡ አብሔር፡ ለሐማ፡ በከመ፡ ፈቀደ፡ ይገብር፡ ላዕለ፡ መርዶክዮስ፡ ወሰቀልዎ፡ ዲበ፡ ዕፅ፡ ነዋኅ። ወተአዘዘ፡ መጽሐፈ፡ ንጉሥ፡ ከመ፡ ይኀድግዎሙ፡ ለአይሁድ፡ በኀበ፡ ሀለዉ፡ ውስተ፡ ኵሉ፡ ፈቃዶሙ፡ ወኢያገብርዎሙ፡ ወኢይሂድዎሙ፡ ወኢየዓምጽዎሙ፡ ወኢይንሥኡ፡ ንዋዮሙ። ወኢያጥፍዑ፡ ሀገሮሙ፡ ወኢይማህርኩ፡ እንስሳሆሙ፡ እለ፡ ያፈቅርዎሙ፡ ወያከብር፡ ዎሙ፡ በኀበ፡ ሀለዉ፡ ውስተ፡ ኵሉ፡ ምድረ፡ ፋርስ፡ እስመ፡ ከመዝ፡ ይምህሮሙ፡ እግዚአብሔር፡ በእስራኤል፡ ሶበ፡ ሰአሉ፡ ወገዓሩ፡ ኀቤሁ፡ በንስሐ። ወሶበ፡ አምዕዕዎ፡ ይፌኑ፡ ኀቤሆሙ፡ አሕዛበ፡ እለ፡ ያመነድብዎሙ፡ ይእተ፡ አሚረ፡ ይበክዩ፡ ወይግዕሩ፡ ወየዓወይዉ፡ ከመ፡ ይፈኑ፡ ሎሙ፡ ረድኤቶሙ፡ ወያድኅኖሙ፡ እምእደ፡ እለ፡ ይሣቅይዎሙ።

Chapter 29 ወእመሂ፡ አመንደብዎሙ፡ ግብፅ፡ ለደቂቀ፡ እስራኤል፡ በፆሕብ፡ ወበግብረ፡ ግንፋል፡ ወበኵሉ፡ ግብር፡ ዘአገብርዎሙ፡ ወበጥብያት፡ ዘእንበለ፡ ኃሠር። ወሤሙ፡ ላዕሌሆሙ፡ ነዳዕተ፡ ገባር፡ ወአግበርዎሙ፡ ወአውየዉ፡ ኀበ፡ እግዚአብሔር፡ ከመ፡ ያድኅኖሙ፡ እምኵሉ፡ ግንፋሎሙ፡ ለግብፅ። ወውእተ፡ አሚረ፡ ፈነወ፡ ሎሙ፡ ረድኤቶሙ፡ ሙሴሃ፡ ወአሮንሃ፡ ወአድኀንዎሙ፡ እምግብረ፡ ግንፋል፡ እስመ፡ እግዚአብሔር፡ ፈነዎሙ፡ ከመ፡ ያውፅዑ፡ ሕዝቦ፡ እምቤተ፡ ቅንየት፡ ዘፈርዖን፡ ንጉሠ፡ ግብፅ፡ እስመ፡ በትዕቢቱ፡ ዓበየ፡ ፈንዎቶሙ፡ ለሕዝብ፡ ከመ፡ ኢይትቀነዩ፡ ወኢይሡዑ፡ መሥዋተ፡ ለእግዚአብሔር፡ በገዳም። እስመ፡ ለእቡያን፡ ይትሔየዮሙ፡ እግዚአብሔር፡ ወበእንተ፡ ትዕቢቱ፡ ለፈርዖን፡ አሥጠሞ፡ እግዚአብሔር፡ ምስለ፡ ሠራዊቱ፡ ውስተ፡ ባሕር፡ ኤርትራ። ወከማሁ፡ እለ፡ ይትሔየዩ፡ ቃለ፡ እግዚአብሔር፡ እንዘ፡ ነገሥት፡ ወመኳንንት፡ ወኢያሠነዩ፡ በኵሉ፡ ዘሢሞሙ፡ ወአንገሦሙ፡ ከመ፡ ይግበሩ፡ ፈቃዶ፡ ወየሀብዎሙ፡ ዓሰቦሙ፡ ለእለ፡ ይትለዓኩ፡ በሠናይ፡ ወያከብሩ፡ ስሞ፡ ዓቢየ። ወእመሰ፡ አርትዑ፡ መንግሥትየ፡ አነሂ፡ አረትዕ፡ መንግሥቶሙ፡ ይቤ፡ እግዚአብሔር፡ ዘኵሎ፡ ይመልክ። ዓሠንዩ፡ ሊተ፡ ወአነሂ፡ ዓሠኒ፡ ለክሙ፡ ዕቅቡ፡ ትእዛዝየ፡ ወአነሂ፡ አዓቅብ፡ ነፍስክሙ፡ ሑሩ፡ በትእዛዝየ፡ ወአነሂ፡ አሐውር፡ በከመ፡ ልብክሙ። አፍቅሩ፡ ኪያየ፡ ወአነሂ፡ አፍቅር፡ ሕይወተክሙ፡ ወተማኅፀኑ፡ ኀቤየ፡ ወአነሂ፡ ወፀንዓ፡ ክሙ። ወተከሉ፡ ብየ፡ ወአነሂ፡ አድኀነክሙ፡ ይቤ፡ እግዚአብሔር፡ ዘኵሎ፡ ይመልክ። ወኢትሑር፡ ግድመ፡ ግድመ፡ ቅረቡኒ፡ ወአቀርበክሙ፡ እስመ፡ ፍናዋተ፡ ርትዓተ፡ አፈቅር፡ ይቤ፡ እግዚአብሔር፡ ዘኵሉ፡ ይመልክ፡ አንጽሑ፡ እደዊክሙ፡ ኃጥአን፡ ወጽልሕዋን፡ ወአዕትቱ፡ እከየ፡ ልብክሙ። ወአነሂ፡ አዓትት፡ መዓትየ፡ እምኔክሙ፡ ወእትመየጠክሙ፡ በሣሕል፡ ወበምሕረት። ወዓርኅቅ፡ እምኔክሙ፡ ፀረ፡ ዓላውያን፡ እለ፡ ይገብሩ፡ ዓመፃ፡ በከመ፡ አድኃንክዎ፡ ለዳ፡ ዊት፡ ገብርየ፡ እም፡ ብዙኅ፡ ትምይንተ፡ ኀሩ፡ እለ፡ ተራከብዎ፡ እምእደ፡ ጎልያድ፡ ረዓይታዊ፡ ወእምዕደ፡ ሳኦል፡ ዘኃሠሠ፡ ከመ፡ ይቅትሎ፡ ወእምእደ፡ አቤሴሎም፡ ወልዱ፡ ዘፈቀደ፡ ከመ፡ ይንሣእ፡ መንግሥቶ። ወከማሁ፡ አድኀኖሙ፡ ለእለ፡ ይገብሩ፡ ፈቃድየ፡ ወየዓቅቡ፡ ትእዛዝየ፡ ወይትዓገሡ፡ በሕግየ፡ ወአውርሶሙ፡ ክብረ፡ ወአነግሦሙ፡ መልዕልተ፡ ኵሉ፡ ከመ፡ ይትፈሥሑ፡ በዝየኒ፡ ዓለም፡ ወበዘይመጽእ፡ ዓለም። ወይከውኑ፡ ሱቱፋነ፡ ምስለ፡ ቡሩካነ፡ ነገሥት፡ እለ፡ አሥመርዎ፡ ለእግዚአብሔር፡ በስነ፡ ሕይወቶሙ፡ በከመ፡ ሳሙኤል፡ እንዘ፡ ለሊሁ፡ ሕፃን፡ ዘኃረዮ፡ እግዚአብሔር፡ እምንዕሱ፡ በስነ፡ ሕይወቱ። ወተናግሮ፡ ከመ፡ ይንግሮ፡ ለኤሊ፡ ካህን፡ አረጋዊ፡ ወሠናይ፡ ምግባሩ፡ ለሳሙኤል፡ ነቢይ፡ እንዘ፡ ይትለዓክ፡ በውስተ፡ ቤተ፡ እግዚአብሔር፡ አምላክ። ወሶበ፡ ልህቀ፡ ውስተ፡ ቤተ፡ እግዚአብሔር፡ እንዘ፡ ይትለዓክ፡ ረስዮክመ፡ ይሢም፡ ሕዝበ፡ ወይቅባዕ፡ ነገሥተ፡ በትእዛዘ፡ እግዚአብሔር። ወአፈዮ፡ ቅብዓ፡ መንግሥት፡ በእዴሁ፡ ሶበ፡ ገብረ፡ ፈቃደ፡ እግዚአብሔር፡ አምላኩ፡ እስመ፡ አሥመሮ፡ ቅድሜሁ፡ ከመ፡ ያንግሥ፡ ሕዝበ፡ ዘኃረየ፡ እግዚአብሔር፡ እምደቂቀ፡ እስራኤል። ወእንዘ፡ ሀሎ፡ ሳኦል፡ በመንግሥት፡ ይቤሎ፡ እግዚአብሔር፡ ለሳሙኤል፡ ነቢይ፡ ሑር፡ ቅብዖ፡ ለዳዊት፡ ወልደ፡ ዕሤይ፡ ዘእምቤተ፡ ይሁዳ፡ እስመ፡ ሠመርክዎ።

Chapter 30 ወጾላዕኪ፡ ቤተ፡ ሳኦል፡ እስመ፡ አምፅዓኒ፡ በእንተ፡ ዘተዓደወ፡ ካልየ። ወዓነሂ፡ ተዓወርክዎ፡ ወኢይደግም፡ አንግሦተ፡ እምቤተ፡ ዚአሁ፡ እስመ፡ ኢዓቀበ፡ ቃልየ። ወከማሁ፡ እለ፡ ኢዓቀቡ፡ ቃልየ፡ ወኢየሐውሩ፡ በሕግየ፡ ወበሥርዓትየ፡ እከልዕ፡ እምኔሆሙ፡ ሀብትየ፡ ወመንግሥትየ፡ እምዘርኦሙ፡ እስከ፡ ለዓለም። ወእኔስሕ፡ ከመ፡ ኢይድግም፡ አዕብዮቶሙ፡ አላ፡ ዘእንበለ፡ ዘአጠፍዖሙ፡ እስመ፡ አመ፡ አዕበይክዎሙ፡ ኢየዓብዩኒ፡ ወእመ፡ አክበርክዎሙ፡ ኢያከብሩኒ። ወአመ፡ ዓሠነይኩ፡ ሎሙ፡ ኢያሤንዩ፡ ሊተ፡ ወአመ፡ መሀርክዎሙ፡ ኢይምህሩኒ። እስመ፡ ረሰይክዎሙ፡ ርእሰ፡ ላዕለ፡ ኵሉ፡ ወኢረስዩኒ፡ ርእሰ፡ ዲቤሆሙ፡ ወሶበ፡ አክበርክዎሙ፡ እምኵሉ፡ ኢያከብሩኒ፡ ወኢዓቀቡ፡ ትእዛዝየ። ወአነሂ፡ ነሣእኩ፡ ሀብተ፡ ዘወሀብክዎሙ፡ ወኢያገብዕ፡ ሎሙ፡ በከመ፡ መሐልኩ፡ በመዓትየ፡ ወለዘአክበረኒ፡ አከብሮ፡ ወለዘአፍቀረኒ፡ አፈክሮ፡ ከመዝ፡ ይቤ፡ እግዚአብሔር፡ ዘኵሎ፡ ይመልክ። ወለእለሰ፡ ኢየከብሩኒ፡ ወኢዓቀቡ፡ ትእዛዝየ፡ እሞቅስሞ፡ እምሀብትየ፡ ዘወሀብክዎሙ። ይቤ፡ እግዚአብሔር፡ ዘኵሎ፡ ይመልክ፡ ለዘአፍቀረኒ፡ አፈቅሮ፡ ወለዘአዕበየኒ፡ አዓብዮ። እስመ፡ አመ፡ እግዚአብሔር፡ ዘእኳንንኵሎ፡ ወአልቦ፡ ዘያመሥጥ፡ እምእዴየ፡ በሰማይ፡ በላዕሉ፡ ወበምድር፡ በታሐቱ፡ እስመ፡ አነ፡ እግዚአብሔር፡ ዘእቀትል፡ ወአሐዩ፡ ዘእቅሥፍ፡ ወእሠሃል። ወዕበይሰ፡ ወክብር፡ ዚአየ፡ ውእቱ፡ ለዘአፍቀርክዎ፡ አከብሮ፡ ወለዘጾላዕኩ፡ አኃሥር ወአነ፡ ዘእሠሀሎሙ፡ ለእለ፡ ያፈቅሩኒ፡ ወይዜከሩ፡ ስምየ፡ በኵሉ፡ ጊዜ፡ ለነዳይ፡ ወለባዕል፡ አነ፡ መጋቤ፡ ሲሳይ። ወአኮ፡ ለሰብእ፡ ባሕቲቱ፡ አላ፡ ለእንስሳኒ፡ ወለአዕዋፍኒ፡ ወለአራዊትኒ፡ ወለዓሣትኒ፡ ዘውስተ፡ ባሕር፡ ወለአክይስትኒ። ወለአናብርትኒ፡ ወለሐርገፃትኒ፡ ወለእንጐታትኒ፡ ወለብሔሞትኒ፡ ወለቈርነነዓት። ወኵሉ፡ ዘይትሐወስ፡ ውስተ፡ ማይ፡ ውኵሉ፡ ዘይሠርር፡ መልዕልተ፡ ነራስ፡ ውእቱኪ፡ ዚአየውእቱ። ወአነ፡ ዘእሴሲ፡ በዘይደሉ፡ ወበዘይትፈቀድ፡ ለኵሎሙ፡ እለ፡ ኃሠሡ፡ ኪያየ።

Chapter 31 ነገሥትኒ፡ ኢይሠየሙ፡ ዘእንበለ፡ ፈቃድየ፡ ወምስኪናንኒ፡ ኢይነደዩ፡ ዘእንበለ፡ በትእዛዝየ፡ ወኃያላን፡ እይፀንዑ፡ ዘእንበለ፡ በፈቃድየ። ወአነ፡ አሀብክዎ፡ ለዳዊት፡ ሞገሰ፡ ወጥበበ፡ ለሰሎሞን፡ ወአነ፡ ወሰክዎ፡ ዓመታተ፡ ለሕዝቅያስ። ወአነ፡ አሕፀዕኩ፡ መዋዕሊሁ፡ ለጎልያድ፡ ወአነ፡ ወሀብክዎ፡ ኃይለ፡ ለሶምሶን፡ ወካዕበ፡ አድከምኩ፡ ኃይሎ። ወአድኀንክዎ፡ አነ፡ ለዳዊት፡ ገብርየ፡ እምእደ፡ ጎልያድ፡ ረአይታዊ። ወዓዲ፡ እምእደ፡ ሳኦል፡ ንጉሥ፡ ወዓዲ፡ እምእደ፡ ካልዑ፡ ረዓይታዊ፡ ዘይትቃወሞ፡ ወእምእደ፡ ኵሎሙ፡ እለ፡ ይትቃወምዎ፡ ወይትቃረንዎ፡ እስመ፡ ዓቀበ፡ ትእዛዝየ። ወአነሂ፡ አፍቀርኩ፡ ኪያሁ፡ ወለኵሎሙ፡ እለ፡ የዓቅቡ፡ ትእዛዝየ፡ ነገሥት፡ ወመኳንንት፡ አነሂ፡ አፈቅሮሙ፡ ወእሁቦሙ፡ ኃይለ፡ ወመዊዓ፡ በላዕለ፡ ፀሮሙ። እስመ፡ ውእቶሙኒ፡ አስተፍሥሁኒ። ወካዕበ፡ እሁቦሙ፡ ምድረ፡ ርስት፡ እንተ፡ መሐልኩ፡ ለአበዊሆሙ፡ ምድረ፡ ንጽሕተ፡ ወብርህተ፡ ከመ፡ ይትዋረሱ፡ ምድረ፡ አበዊሆሙ።

Chapter 32 ወአንትሙኒ፡ ነገሥት፡ ወመኳንንት፡ ስምዑኒ፡ ቃልየ፡ ወዕቀቡ፡ ትእዛዝየ፡ ይቤ፡ እግዚአብሔር፡ ዘኵሎ፡ ይመልክ፡ በከመ፡ አምዕዑኒ፡ ደቂቀ፡ እስራኤል፡ ወአምለኩ፡ ባዕደኒ፡ አማልክተ፡ እንዘ፡ አነ፡ እግዚአብሔር፡ አምላኮሙ፡ ዘዓቀብክዎሙ፡ ወአድኃንክዎሙ፡ ወአልኀቅዎሙ፡ እምነ፡ አበዊሆሙ፡ ወሴሰይክዎሙ፡ በኵሉ፡ ዘፈቀዱ። ወአዕረግዎሙ፡ ዲበ፡ ኃይለ፡ ምድር፡ ወሴሰይክዎሙ፡ በረከታ፡ ለምድር፡ ወበከመ፡ ይደሉ፡ አዕፃደተ፡ ወይን፡ እለ፡ ኢተከሉ፡ ወለቅብዓ፡ ዘይት፡ ወዘዘቅተ፡ ማይ፡ ጥዑመ፡ ዘኢከረዩ። ወፀቃውዓ፡ መዓር፡ ወሀሊበ፡ በግዕ፡ ምስለ፡ ቂቅሐ፡ ሥርናይ፡ ወአልባሰ፡ ሠርጕ፡ ወኵሉ፡ ዘይትፈከድ፡ ሎሙ። ወአልቦ፡ ዘአኅጣዕክዎሙ፡ እምዘሰአሉኒ።

Chapter 33 ወዓዲ፡ ሲሰይክዎሙ፡ መና፡ በገዳም፡ ኅብስተ፡ በከመ፡ ይቤ፡ ዳዊት፡ ወኅብስተ፡ መላእክቲሁ፡ በልዑ፡ እጓለ፡ እመሕያው። ወዘንተ፡ ኵሎ፡ ረሰይኩ፡ ሎሙ፡ ወከመ፡ ይምልኩኒ፡ በጽድቅ፡ ወበርትዕ። ወእሙንቱሰ፡ ኢያምልኩኒ፡ ወአነሂ፡ ተሐየይክዎሙ፡ ይቤ፡ እግዚአብሔር፡ ዘኵሎ፡ ይመልክ፡ ወአምዕዑኒ፡ ወሖሩ፡ በዘኢኮነ፡ ፍናወ፡ ዚአየ። ወአነሂ፡ በከመ፡ ምግባሮሙ፡ እፈድዮሙ፡ ወበከመ፡ ግብረ፡ እደዊሆሙ፡ ተሐየይክዎሙ፡ እስመ፡ ተሐከዩ፡ አምልኮትየ፡ ወኢተዓገሡ፡ በሥርዓትየ፡ ወበምክርየ፡ ወአውርዶሙ፡ ውስተ፡ ኵነኔ፡ ደይን፡ ዘበሰማያት። ወበምድርኒ፡ አሐፅፅ፡ መዋዕሊሆሙ፡ እስመ፡ ኢዓቀቡ፡ ትእዛዝየ፡ ወአነሂ፡ እትመዓዖሙ። ወአንተኒ፡ ንጉሥ፡ አኮኑ፡ ሰብእ፡ አንተ፡ ዘትመውት፡ ወትማስን፡ ዘጌሠመ፡ ትከውን፡ ዕፄ፡ ወዕፄይያተ፡ ወሐመደ። ወይእዜሰ፡ ትትሜካህ፡ ወትት፡ ዔበይ፡ ከመ፡ ዘኢይመውት፡ ለዓለም። እንተሰኪ፡ ሰብእ፡ ዘይእዜ፡ ታስተርኢ፡ ሕያወ፡ ወጊሠመ፡ መዋቲ፡ ይቤ፡ እግዚአብሔር፡ ዘኵሎይመልክ። ወለእመሰ፡ ዓቀብከ፡ ቃልየ፡ ወትእዛዝየ፡ አውርሰከ፡ ሀገረ፡ ቅድስተ፡ ምስለ፡ እለ፡ ገብሩ፡ ፈቃድየ፡ ክቡራን፡ ነገሥት፡ እለ፡ ብሩህ፡ ማኅደሪሆሙ፡ ወሠናያን፡ አክሊላቲሆሙ፡ ወመናብርቲሆሙ፡ ዘወርቅ፡ ወዘብሩር፡ እለ፡ ርሱያን፡ እለ፡ ይነብሩ፡ ዲቤሆሙ። ወትትፌሥሁ፡ በውስተ፡ ሀገሩ፡ እንተ፡ ቅርብት፡ ማኅደር፡ ለገባርያነ፡ ሠናያት። ወለገባርያነ፡ እኪትሰ፡ ኢይደልዖሙ፡ ይባዑ፡ ውስተ፡ ይእቲ፡ ሀገር፡ እንተ፡ ይበውኡ፡ ክቡራን፡ ነገሥት። እስመ፡ ኢዓቀቡ፡ ቃልየ፡ ወሥርዓትየ፡ ይቤ፡ እግዚአብሔር፡ ዘኵሎ፡ ይመልክ።

Chapter 34 መንግሥተ፡ ሜዶን፡ ትማስን፡ ወመንግሥተ፡ ሮምሰ፡ ትፀንዕ፡ ፈድፋደ፡ ላዕለ፡ መንግሥተ፡ መቄዶንያ፡ ወመንግሥተ፡ ነነዌ፡ ወበላዕለ፡ መንግሥተ፡ ፋርስ። ወመንግሥተ፡ ኢትዮጵያ፡ ላዕለ፡ መንግሥተ፡ እስክንድርያ፡ ውመንግሥተ፡ ሞዓብ፡ ላዕለ፡ አማሌቅ፡ እስመ፡ ይትንሥኡ። ወይትነሣእ፡ እኁ፡ ላዕለ፡ እኁሁ፡ ወይገብር፡ እግዚአብሔር፡ በቀለ፡ በከመ፡ ነበበ፡ ላዕሌሆሙ፡ ከመ፡ ይትኃለቁ። ወይቤ፡ ይትነሣእ፡ መንግሥት፡ ላዕለመንግሥት፡ ወሕዝብ፡ ላዕለ፡ ሕዝብ፡ ወሀገር፡ ላዕለ፡ ሀገር። ወይከውን፡ ሐከክ፡ ወይከውን፡ ቀትል፡ ወረኃብ፡ ወብድብድ፡ ወድልቅልቅ፡ ወቢተተ፡ ክረምት፡ እስመ፡ ተንሥአ፡ ሰላም፡ ወፍቅር፡ ወወረደ፡ መቅሠፍቱ፡ እግዚአብሔር፡ ላዕሌሃ። ወአመ፡ አልፀቀት፡ ዕለተ፡ እግዚአብሔር፡ ግብተ፡ ከመ፡ እንተ፡ መብረቅ፡ ዘያስተርኢ፡ እምጽባሕ፡ እስከ፡ ምዕራብ። ወአሜሃ፡ ይትፈደይ፡ ኬሉ፡ በከመ፡ ምግባሩ፡ ወበከመ፡ ፃማ፡ እደዊሁ፡ ወበከመ፡ ፍሬ፡ ምግባሩ፡ እስመ፡ ለሊሁ፡ ይቤ፡ እግዚአብሔር፡ በዕለተ፡ ኵነኔ፡ ይትቤቀሎሙ፡ ወበጊዜ፡ ይድኀጽ፡ እግሮሙ፡ እስመ፡ ቀርበ፡ ዕለተ፡ ኊልቆሙ። ይእተ፡ አሚረ፡ ያኃልቆሙ፡ እግዚአብሔር፡ ለገባርያነ፡ እኪት፡ እለ፡ ኢሐውሩ፡ በሕጉ፡ ውስተ፡ ኵነኔ፡ ዘለዓለም፡ ሕዝበ፡ ይሁዳ፡ ወቆጵሮስ፡ ወሰማርያ፡ ወደማስቆ፡ ወሕዝበ፡ ባቢሎን። ወእለሂ፡ ይነብሩ፡ ደስያት፡ ዓረብ፡ ወሕንደኬ፡ ወኖባ፡ ወሳባ፡ ወግብፅ፡ ወኢትዮጵያ፡ ወክሎሙ፡ እለ፡ ይነብሩ፡ ዲቤሆን። አሜሃ፡ የአምራኒ፡ ከመ፡ አነ፡ ውእቱ፡ እግዚአብሔር፡ ዘእኳንን፡ ሰማየ፡ ወምድረ፡ ወአነ፡ ውእቱ፡ ዘአሁብ፡ ክብረ፡ ወሞገሰ፡ ወአነ፡ ዘእቀትል፡ ወአሐዩ። ወአነ፡ ዘአሠርቅ፡ ጸሐየ፡ ወእፌንዎ፡ ውስተ፡ ምዕራቢሁ፡ ወአነ፡ ዘአመጽእ፡ ሠናየ፡ ወእኩየ። ወአነ፡ ዘአምጽእ፡ ሕዝበ፡ ዘኢተአምሩ፡ እለ፡ ይበልዑ፡ ፍሬ፡ ፃማክሙ፡ ወመራዕየ፡ አልህምቲክሙ፡ ወአባግዒክሙ። ወይኰልርዕ፡ ደቂቀክሙ፡ በቅድሜክሙ፡ ወይፄውውዎሙ፡ ወኢትክሉ፡ አድኀኖቶሙ፡ ወይበልዑ፡ ራሕፀክሙ፡ ወለምለመክሙ፡ እስመ፡ ኢፈራህክሙ፡ ትእዛዘ፡ እግዚአብሔር፡ ዘሰማዕክሙ፡ እስመ፡ ኢተቶስሐ፡ መንፈሰ፡ እግዚአብሔር፡ ላዕሌክሙ። ወዘሰ፡ ኅዱር፡ መንፈሰ፡ እግዚአብሔር፡ ላዕሌሁ፡ የአምር፡ ኵሎ፡ በከመ፡ ይቤሎ፡ ናቡከደነ፡ ፆር፡ ለዳንኤል፡ ነቢይ፡ እስመ፡ እሬኢ፡ መንፈሰ፡ እግዚአብሔር፡ ላዕሌከ። እስመ፡ ዘቦ፡ መንፈሰ፡ እግዚአብሔር፡ የአምር፡ ኵሎ፡ ኅቡዕኒ፡ ክሡተ፡ ይከውኖ፡ ሎቱ፡ ወአልቦ፡ ዘይትኀባዕ፡ እመንፈሰ፡ እግዚአብሔር፡ አላ፡ የአምር፡ ኵሎ፡ ኅቡዐኒ፡ ወክሡተኒ። እስመ፡ ንሕነሰ፡ ሰብእ፡ ንሕነ፡ ዘጌመ፡ ንመውት፡ ወይትከሠት፡ ምግባራቲነ፡ ዘበኅቡዕ፡ ኬሉ፡ ዘገበርነ። በከመ፡ ይፈትንዎ፡ ለወርቅ፡ ወለብሩር፡ በእሳት፡ ከማሁ፡ ይትፈተኑ፡ ኃጥአን፡ በደኃሪት፡ ዕለት፡ እስመ፡ ኢዓቀቡ፡ ትእዛዘ፡ እግዚአብሔር። አሜሃኪ፡ ይትፈተኑ፡ ምግባራቲሆሙ፡ ለኵሎሙ፡ ደቂቀ፡ እስራኤል፡ ወለኵሎሙ፡ አሕዛብ።

Chapter 35 አሌ፡ ለክሙ፡ ኃያላነ፡ እስራኤል፡ እስመ፡ ላዕሌክሙ፡ ይትመዓዕ፡ እግዚአብሔር፡ በእንተ፡ ዘኢያሠነይክሙ፡ ፍትሐ፡ ለእጓለ፡ ማውታ። አሌ፡ ለክሙ፡ እለ፡ ተሐወሩ፡ ቤተ፡ መያሲ፡ በነግህ፡ ወበሠርክ፡ ወትሠክሩ፡ ወትገምፁ፡ ወኢታጸምዑ፡ ፍትሐ፡ ዕጓለ፡ ማውታ፡ ወዕቤራት፡ ወትነብሩ፡ ውስተ፡ ምርዓት፡ ወጹግ። ከመዝ፡ ይቤሎሙ፡ እግዚአብሔር፡ ለኃያላን፡ እስራኤል፡ አሌ፡ ለክሙ፡ ለእመ፡ ኢሖርክሙ፡ በትእዛዝየ፡ ወኢዓቀብክሙ፡ ቃልየ፡ ወኢያፈቅርክሙ፡ ዘአነ፡ እፈቅድ። ወአነሂ፡ አመጽእ፡ ላዕሌክሙ፡ መቅሠፍተ፡ ወመንሡተ፡ ወሕማመ፡ ወተኃልቁ፡ ከመ፡ ብልዓ፡ ዓፄ፡ ወቍንቍኒ፡ ወአይትረከብ፡ ዓሠርክሙ፡ በውስተ፡ አድዋሌክሙ። ወትከውን፡ በደወ፡ ሀገርክሙ፡ ወኵሎ፡ ዘርእያ፡ ቀዳሜ፡ ይጠፍሕ፡ እደዊሁ፡ ወይትፋፀይ፡ ላዕሌሃ፡ እንዘ፡ ይብል፡ አኮኑ፡ ዛቲ፡ ሀገር፡ እንተ፡ ምልዕተ፡ ላዕሌሃ፡ በረከተ፡ ወኵሎ፡ ሠናያተ፡ ከመዝኑ፡ ረሰይ፡ እግዚአብሔር፡ በእከዮሙ፡ ለእለ፡ ይነብሩ፡ ውስቴታ። አሌ፡ ላቲ፡ ወአዕበየት፡ ልባ፡ ወአልዓለት፡ ርእሳ፡ ወአንኃት፡ ክሣዳ፡ እስከ፡ የኃሥራ፡ እግዚአብሔር፡ ውስተ፡ መሬተ፡ ምድር፡ ወበእንተ፡ ትዕቢቶሙ፡ ለዕለ፡ ይነብሩ፡ ውስቴታ፡ ወኮነት፡ በድወ፡ ወበቍለ፡ ላዕሌሃ፡ ሦክ፡ ወአሜከላ። ወኮነት፡ ብሕውሰ፡ ወምጕሕያ፡ ወኮነት፡ ዐፀ፡ ወበድወ፡ ወአራዊትኒ፡ የኃድሩ፡ በውስቴታ። ወኪነት፡ መፍርህተ፡ ለእለ፡ የኃልፉ፡ ውስቴታ፡ እስመ፡ መዓተ፡ እግዚአብሔር፡ ወድቀ፡ ላዕሌሃ፡ ወሰትየት፡ እምጽዋዓ፡ መዓቱ፡ በእንተ፡ ትዕቢተ፡ ልባ፡ በእከዮሙ፡ ለእለ፡ ይነብርዋ።

Chapter 36 ኢትትመካሁ፡ መቄዶናውያን፡ ወኢታዕበዩ፡ ክሣደክሙ፡ አማሌቃውያን፡ እስመ፡ ሀሎ፡ እግዚአብሔር፡ ዘይትቤቀል፡ ላዕሌክሙ። እስመ፡ ትትሊዓሉ፡ እስከ፡ ሰማይ፡ ወትወርዱ፡ ውስተ፡ ሲኦል። ወአመ፡ ቀዳሜ፡ በዓቶሙ፡ ለእስራኤል፡ ውስተ፡ ምድረ፡ ግብፅ፡ በመንግሥተ፡ ሜዶና፡ ውያን፡ ወሞዓባውያን፡ ይቤ፡ ኢትትመክሁ፡ እስመ፡ ኢይደሉ፡ ትዕይርተ፡ እግዚአብሔር፡ ላዕሌክሙ፡ ከመ፡ ትትዓየርዎ። ወአንተሂ፡ ወልደ፡ ዓመት፡ ይስማኤላዊ፡ ለምንት፡ ታነውህ፡ ክሣደከ፡ ኀበ፡ ዘኢኮነ፡ ዚአከ፡ ኢትዜከርኑ፡ ከመ፡ እግዚአብሔር፡ ይኳንነከ፡ አመ፡ ዕለተ፡ ኵነኔ፡ ከመ፡ አመ፡ ተንሥአ፡ ከመ፡ ይኰንና፡ ለምድር። አሜሃ፡ ትትፈደይ፡ በከመ፡ ግብረ፡ እደዊከ፡ ለምንት፡ ታሌዕል፡ ልበከ፡ ወታነውኅ፡ ክሣደከ፡ ይቤ፡ እግዚአብሔር፡ ዘኵሎይመልክ። ወአነሂ፡ እትዒየረከ፡ በከመ፡ ተዓየርኮሙ፡ ለእለ፡ ኢኮኑ፡ ዚአከ፡ ወኀበሂ፡ ፈነውኩከ፡ እስመ፡ ትከውን፡ ዘፈቀድከ፡ ትግብር፡ እኪተ። ወከማሁ፡ አነኒ፡ ዕገብር፡ ላዕሌከ፡ ይቤ፡ እግዚአብሔር፡ ዘኵሎ፡ ይመልክ፡ ወአንተኒ፡ ለእመ፡ ገብርከ፡ ሠናየ፡ ወአፍቀርከ፡ ዘአነ፡ አፈቅር፡ ወአነሂ፡ እሰምዓከ፡ በኵሉ፡ ዘሰአልከኒ። ወእገብር፡ ፈቃድከ፡ ለእመ፡ ገብርከ፡ ፈቃድየ፡ ወትኢቃወም፡ ለከ፡ ፀረከ፡ ወእባርክ፡ ለከ፡ ተግባረከ፡ ወዘርአከ፡ ወውሉደከ። ወእባርክ፡ መራዕየ፡ አልህምቲከ፡ ወአባግዒከ፡ ወእባርክ፡ ኀበ፡ ኵሉ፡ ዘወደይከ፡ እዴከ፡ ለእመ፡ ሐርከ፡ በትእዛዝየ፡ ወገበርከ፡ ዘአነ፡ አፈቅር፡ ይቤ፡ እግዚአብሔር፡ ዘኵሎ፡ ይመልክ። ወለእመ፡ ኢገበርከ፡ ፈቃድየ፡ ወኢሐርከ፡ በትእዛዝየ፡ ወኵነኒየ፡ ይረክብከ፡ ዝንቱ፡ ኵሉ፡ ኵነኔየ፡ ዘተነግረ፡ ቀዳሚ፡ ወኢትክል፡ አምሥጦ፡ እመዓትየ፡ እንተ፡ ትመጽእ፡ ላዕሌከ፡ በኵሉ፡ ጊዜ፡ እስመ፡ ኢተገሥከ፡ በትእዛዝየ፡ ወኢሐርከ፡ በኵነኔየ። ውኢያብደርከ፡ ዘአነ፡ አበድር፡ ወተሐይከ፡ እምስብሐትየ፡ ወእምአምልኮትየ፡ እንዘ፡ አነ፡ ፈጠርኩከ፡ እምኀበ፡ ኢሀሎከ። ወሀብኩከ፡ ክብረ፡ ወስብሐተ፡ በኀበ፡ ሰብእ፡ እለ፡ ታሕቲከ፡ ከመ፡ ትግበር፡ ኵሎ፡ ዘፈ፡ ቀድከ፡ ትቅትል፡ ወታሁ፡ ትሕንጽ፡ ወትንስት፡ ታክብር፡ ወታኅሥር፡ ታልዕል፡ ወታት፡ ሕት፡ ዚአከ፡ ውእቱ። ለእመ፡ ገብርከ፡ ፈቃደ፡ እግዚአብሔር፡ ወሖርከ፡ በትእዛዛቲሁ፡ ያፈቅረከ፡ ከመ፡ ትትፌሣሕ፡ ምስሌሁ፡ በመንግሥቱ፡ ወትኩን፡ ክፍለ፡ ምስሌሆሙ፡ ለእለ፡ ወረሰዋ፡ ለቅድስት፡ ሀገር። እስመ፡ ይቤ፡ ለእመ፡ ተዓገሡኒ፡ አወርሶሙ፡ ክብረ፡ ወሞገሰ፡ ወአሥተፌሥሆሙ፡ በቤተ፡ ጸሎትየ፡ ወይከውኑ፡ ኅሩያነ፡ ወሥሙራነ፡ ከመ፡ መሥዋዕተ፡ ቍርባን፡ ይቤ፡ እግዚአብሔር፡ ዘኵሎ፡ ይመልክ። ኢትትሐከዩ፡ ገቢረ፡ ሠናይ፡ ወፍኖተ፡ መድኃኒት፡ ከመ፡ ትዕድዉ፡ እሞት፡ ውስተ፡ ሕይወት። ወለእለሰ፡ የዓቅቡ፡ ገቢረ፡ ሠናይ፡ ይተመሐፀኖሙ፡ እግዚአብሔር፡ ውስተ፡ ኵሉ፡ ሠናይ፡ ከመ፡ ይኵንዎ፡ አግብርቲሁ፡ ከመ፡ ኢዮብ፡ ዘዓቀቦ፡ እግዚአብሔር፡ እምኵሉ፡ እኩይ። ወከመ፡ አብርሃም፡ ዘአድኃኖሙ፡ አመ፡ ይቀትሎሙ፡ ለንግሥት፡ ወበከመ፡ አድኀኖ፡ ለሙሴ፡ እምእደ፡ ፈርዖን፡ ወእምእዴሆሙ፡ ለከናኔዎን፡ እለ፡ ነበረ፡ ኀቤሆሙ፡ አብርሃም፡ እንዘ፡ ይህክዋ፡ ለነፍሱ፡ ሠርከ፡ ወነግህ፡ መዓልተ፡ ወሌሊተ፡ ከመ፡ ያወርድዎ፡ ውስተ፡ ጣዖቶሙ። ወውእቱሰ፡ ይትዔገሥ፡ እንዘ፡ የዓብዮሙ፡ ውስተ፡ ዘዚአሆሙ፡ ግልፍዋት፡ እንዘ፡ ይስሕብዎ። ወውእቱኒ፡ እንዘ፡ የአብዮሙ፡ ወይፈርሆ፡ ለእግዚአብሔር፡ ዘፈጠሮ፡ እስመ፡ ምዕመኑ፡ ውእቱ፡ አብርሃም፡ እግዚአብሔር፡ ዘኪያሁ፡ ተአመነ፡ እምንዕሱ። ወኢያሕፀፀ፡ አምልኮቶ፡ ለእግዚአብሔር፡ እስከ፡ ዓመ፡ ሞቱ፡ እስመ፡ ፈድፋደ፡ ያፈቅሮ፡ ለእግዚአብሔር፡ ወኢተዓደወ፡ እምትእዛዙ፡ እስከ፡ ዕለተ፡ ሞቱ፡ ወመሐረ፡ ለደቂቁ፡ ከመ፡ ይዕቀቡ፡ ትእዛዘ፡ እግዚአብሔር። ወእሙንቱኒ፡ ኢተዓደዉ፡ እምትእዛዙ፡ በከመ፡ ገብረ፡ አቡሆሙ፡ ዘርአ፡ አብርሃም፡ አግብርቲሁ፡ ኢተዓደወ፡ እምትእዛዙ፡ ለእግዚአብሔር፡ ይስሐቅ፡ ወያዕቆብ፡ ዘበእንቲአሆሙ፡ ነገረ፡ እግዚአብሔር፡ እንዘ፡ ይብሎሙ፡ ለመላእክቲሁ፡ ብየ፡ አርክ። በዲበ፡ ምድር፡ አብርሃም፡ ፍቁርየ፡ ወይስሐቅ፡ ቍልዒየ፡ ወያዕቆብ፡ ዘሠምረት፡ ነፍስየ፡ ዘእምኔሆሙ፡ ተሰባሕኩ፡ ይቤ፡ እግዚአብሔር፡ ዘኵሎ፡ ይመልክ። ወደደቂቀ፡ እስራኤል፡ ፈድፋደ፡ እንዘ፡ ያምዕዕዎሙ፡ ዘልፈ፡ ወውእቱኒ፡ እንዘ፡ ይት፡ ዔሦሙ፡ ወይሴስዮሙ፡ መና፡ በገዳም። ወአልባሲሆሙኒ፡ ኢበልያ፡ ወኢገርሆሙ፡ ኢነቅዓ፡ እስመ፡ ተሴሰዩ፡ መና፡ ዝውእቱ፡ ኅብስተ፡ አእምሮ። ወልቦሙሰ፡ ዘልፈ፡ ይርኅቅ፡ እምእግዚአብሔር፡ ወአልቦሙ፡ ተስፋ፡ ለድኂን፡ እስመ፡ እምትካት፡ ገባርያነ፡ እኪት። ወኢኮኑ፡ ከመ፡ አበዊሆሙ፡ አብርሃም፡ ይስሐቅ፡ ወያዕቆብ፡ እለ፡ አሥመርዎ፡ ለእግዚአብሔር፡ በስነ፡ ሕይወቶሙ፡ አላ፡ ኮኑ፡ ከመ፡ ቀስተ፡ ጠዋይ፡ ወዘልፈ፡ ያምዕዕዎ፡ በጣዖቶሙ፡ ወበአውግሪሆሙ፡ ወበአድባሪሆሙ፡ ወይበልዑ፡ በውስተ፡ አድባር፡ ወበውስተ፡ አዕዋም፡ ወበውስተ፡ ፆላዕት። ወይጠብሑ፡ ወይሠውዑ፡ ወይቴፈሥሑ፡ በግብረ፡ እደዊሆሙ፡ ወይበልዑ፡ ዝቡሐ፡ ወይሰተዩ፡ ወይነ፡ ሞጻሕቶሙ፡ ወይዘፍኑ፡ ወይትዋነዩ፡ ምስለ፡ አጋንንት። ወያስተጥዕሙ፡ ሎሙ፡ አጋንንት፡ በኵሉ፡ ዘፈኖሙ፡ ወተውኔቶሙ፡ ወበኵሉ፡ ስካ፡ ሮሙ፡ ወዝሙት፡ ዘእንበለ፡ ዓቅም፡ ወስስዕት፡ ወትዕግልት፡ ዘኢይሠምር፡ ቦቱ፡ እግዚአ፡ ብሔር። ወሦዑ፡ ለግልፎ፡ ከነዓን፡ ወለበዓል፡ ወለማርያ፡ ምድያም፡ ወለግልፍዋተ፡ ኤሎፍሊ፡ ዳጎን፡ ወአጵሎን፡ ወለአርጤማዲስ፡ ወለራጽዮን። ወለኵሉ፡ አማልክቲሆሙ፡ ለአሕዛብ፡ እለ፡ ዓውዶሙ፡ ይመልኩ፡ ኵሉ፡ በከመ፡ ገብሩ፡ አሕዛብ፡ በዘርእዩ፡ ወበዘሰምዑ፡ ወኵሉ፡ ተውኔቶሙ፡ ወዘፈኖሙ፡ ወውዋዒሆሙ፡ ዘይገብሩ፡ አሕዛብ። ወከማሁ፡ ይገብሩ፡ ሕዝበ፡ እስራኤል፡ እለ፡ ይብሉ፡ ናመልኮ፡ ለእግዚአብሔር፡ ወኢይገብሩ፡ ሕጎ፡ ወትእዛዞ፡ ዘነገሮሙ፡ ሙሴ፡ በኦሪት፡ ከመ፡ ይዕቀቡ፡ ትእዛዛተ፡ እግዚአ፡ ብሔር፡ ወይትገሃሡ፡ እምአምልኮ፡ ጣዖት። ወኢያመልኩ፡ ባዕዳነ፡ አማልክተ፡ ዘእንበለ፡ አምላከ፡ አበዊሆሙ፡ ዘሴሰዮሙ፡ እክለ፡ ገራውህ፡ ወአዕረጎሙ፡ ዲበ፡ ኃይለ፡ ምድር፡ ወአጽገቦሙ፡ መዓረ፡ እምኰኵሕ፡ ወሴሰዮሙ፡ መና። ወኢያኀጥዖሙ፡ ዘተመነዩ፡ ወዘፈቀዱ፡ እስመ፡ ውእቱ፡ አምላኮሙ፡ ወይሴስዮሙ፡ ዘፈቀዱ። ወውእቶሙሰ፡ ኢየኃድጉ፡ አምዕዖቶ፡ ለእግዚአብሔር፡ ወሶበ፡ ያስተፈሥሆሙ፡ ይረ፡ ስዕዎ፡ ለእግዚአብሔር። ወሶበ፡ ይቀሥፎሙ፡ የዓወይው፡ ኀቤሁ፡ ወያድኅኖሙ፡ እምንዳቤሆሙ፡ ዘረከቦሙ፡ ወካዕበ፡ ይትፌሥሑ፡ ገሃደ፡ ወይነብሩ፡ ነዋሃ፡ መዋዕለ። ወሶቤሃ፡ ይመይጡ፡ ልቦሙ፡ ወይገብዑ፡ ከመ፡ ያምዕዕዎ፡ ለእግዚአብሔር፡ ከመ፡ ትካት፡ ወያነሥእ፡ ቦሙ፡ አሕዛበ፡ እለ፡ ዓውዶሙ፡ ከመ፡ ይቅትልዎሙ፡ ወያገብርዎሙ፡ ወያመነድብዎሙ። ወካዕበ፡ ይትመየጡ፡ ወይገይሱ፡ ወየዓወይዉ፡ ኀበ፡ እግዚአብሔር፡ አምላኮሙ። ወውእቱኒ፡ ይምህሮሙ፡ አኮ፡ በእንተ፡ ርእሶሙ፡ አላ፡ በእንተ፡ አበዊሆሙ፡ ዘመሐለ፡ ወዓቀመ፡ ኪዲኖ፡ ምስለ፡ ወአብርሃም፡ ወይስሐቅ፡ ወያዕቆብ፡ እለ፡ እምዓለም፡ አሠምርዎ፡ ለእግዚአብሔር፡ በስነ፡ ሕይወቶሙ። ወለእለ፡ አፍቀርዎ፡ ወዓቀቡ፡ ትእዛዞ፡ አፍቀሮሙ፡ ከመ፡ ያብዝኅ፡ ዘርኦሙ፡ ከመ፡ ኆፃ፡ ባሕር፡ ወከመ፡ ከዋክብተ፡ ሰማይ። ወከመ፡ ኆፃ፡ ባሕርሰ፡ ዘይቤ፡ ነፍሳት፡ ኃጥአን፡ አመ፡ ትንሣኤ፡ ሙታን፡ እለ፡ ይበውኡ፡ ውስተ፡ ባሕረ፡ እሳት፡ እምደቂቀ፡ እስራኤል። ወነፍሳት፡ ጻድቃንሰ፡ ከመ፡ ከዋክብት፡ ብሩሃት፡ በመልዕልተ፡ ሰማያት፡ እምዘርኦም፡ ለደቂቀ፡ እስራኤል፡ እስመ፡ ይቤሎ፡ እግዚአብሔር፡ ለአብርሃም፡ ነጽር፡ ሰማየ፡ በሌሊተ፡ ወኊልቆሙ፡ ለከዋክብተ፡ ሰማይ፡ እመ፡ ትክል፡ ኊልቆቶሙ። ወከማሁ፡ ዘርእከ፡ ጻድቃን፡ ያበርሁ፡ ከመ፡ ከዋክብት፡ በመንግሥተ፡ ሰማያት። ወካዕበ፡ ይቤሎ፡ ነጽር፡ በውስተ፡ ባሕር፡ ወድንጋጉ፡ ለፈለግ፡ ወርኢ፡ ዘውስተ፡ ኆፃ፡ ወኊልቍ፡ እመ፡ ተክል፡ ኊልቆቶሙ፡ ወከማሁ፡ ዘርአከ፡ እለ፡ ይወርዱ፡ ውስተ፡ ሲኦል፡ አመ፡ ትንሣኤ፡ ሙታን። ወአብርሃምኒ፡ ተአመነ፡ በእግዚአብሔር፡ ወእንበይነዝ፡ ጽድቀ፡ ኮኖ፡ ወረከበቶ፡ ተስፋሁ፡ በዲበ፡ ምድር፡ ወእምድኅረ፡ ረሥዓተ፡ ብእሲቱ፡ ሳራ፡ ረከበት፡ ወልደ፡ ይስሐቅሃ። ወካዕበ፡ በሰማያት፡ ይረክብ፡ መንግሥተ፡ በእንተ፡ አሚናቱ፡ እስመ፡ ተአመነ፡ ከመ፡ ይትነሥኡ፡ ምውታን፡ ወየሐውሩ፡ እለ፡ ሠናየ፡ ገብሩ፡ ውስተ፡ ሕይወት፡ ዘለዓለም። ወለእለ፡ ገብሩ፡ እኩየ፡ ውስተ፡ ኵነኔ፡ ዘለዓለም፡ አመ፡ ትንሣኤ፡ ምውታን፡ ወጻድቃን፡ እለ፡ ሠናየ፡ ገብሩ፡ ይነግሡ፡ ምስሌሁ፡ ለዓለመ፡ ዓለም። ወይትኳነኑ፡ እለ፡ እኩየ፡ ገብሩ፡ ለዓለመ፡ ዓለም፡ አሜን፡ ወአሜን።