መጽሐፈ፡ ኩፋሌ፡

9-64 10-94 849-864 11-95 849-864

transcription of Vanderkam's edition by Ran HaCohen

ዝንቱ ፡ ነገረ ፡ ኩፋሌ ፡ መዋዕላተ ፡ ሕግ ፡ ወለስምዕ ፡ ለግብረ ፡ ዓመታት ፡ ለተሳብዖቶሙ ፡ ለኢዮቤልውሳቲሆሙ ፡ ውስተ ፡ ኵሉ ፡ ዓመታተ ፡ ዓለም ፡ በከመ ፡ ተናገሮ ፡ ለሙሴ ፡ በደብረ ፡ ሲና ፡ አመ ፡ ዐርገ ፡ ይንሣእ ፡ ጽላተ ፡ እብን ፡ ሕግ ፡ ወትእዛዝ ፡ በቃለ ፡ እግዚአብሔር ፡ በከመ ፡ ይቤሎ ፡ ይዕርግ ፡ ውስተ ፡ ርእሰ ፡ ደብር ።

Chapter 1 ወኮነ ፡ በቀዳሚ ፡ ዓመት ፡ በፀአቶሙ ፡ ለደቂቀ ፡ እስራኤል ፡ እምነ ፡ ግብጽ ፡ በወርኅ ፡ ሣልስ ፡ አመ ፡ ዐሡሩ ፡ ወሰዱሱ ፡ ለውእቱ ፡ ወርኅ ፡ ተናገሮ ፡ እግዚአብሔር ፡ ለሙሴ ፡ እንዘ ፡ ይብል ፡ ዕርግ ፡ ኀቤየ ፡ ውስተ ፡ ደብር ፡ ወእሁበከ ፡ ክልኤ ፡ ጽላተ ፡ እብን ፡ ዘሕግ ፡ ወዘትእዛዝ ፡ ዘመጠነ ፡ ጸሐፍኩ ፡ ታለብዎሙ ። ወዐርገ ፡ ሙሴ ፡ ውስተ ፡ ደብረ ፡ እግዚአብሔር ፡ ወኀደረ ፡ ስብሐተ ፡ እግዚአብሔር ፡ ውስተ ፡ ደብረ ፡ ሲና ፡ ወጸለሎ ፡ ደመና ፡ ሰዱሰ ፡ ዕለተ ። ወጸውዖ ፡ ለሙሴ ፡ በዕለተ ፡ ሳብዕት ፡ በማእከለ ፡ ደመና ፡ ወርእየ ፡ ስብሐተ ፡ እግዚአብሔር ፡ ከመ ፡ እሳት ፡ ዘይነድድ ፡ ውስተ ፡ ርእሰ ፡ ደብር ። ወሀሎ ፡ ሙሴ ፡ ውስተ ፡ ደብር ፡ አርብዓ ፡ ዕለተ ፡ ወአርብዓ ፡ ሌሊተ ። ወይቤሎ ፡ አንብር ፡ ልበከ ፡ ውስተ ፡ ኵሉ ፡ ነገር ፡ ዘአነ ፡ እነግረከ ፡ በዝንቱ ፡ ደብር ፡ ወጸሐፍ ፡ ውስተ ፡ መጽሐፍ ፡ ከመ ፡ ይርአዩ ፡ ትውልዶሙ ፡ ከመ ፡ ኢኀደግዎሙ ፡ በእንተ ፡ ኵሉ ፡ እኩይ ፡ ዘገብሩ ፡ ለአስሕቶ ፡ ሥርዓት ፡ ዘአነ ፡ እሠርዕ ፡ ማእከሌየ ፡ ወማእከሌከ ፡ ዮም ፡ ለትውልዶሙ ፡ በደብረ ፡ ሲና ። ወይከውን ፡ ከመዝ ፡ አመ ፡ ይመጽእ ፡ ኵሉ ፡ ዝነገር ፡ ላዕሌሆሙ ፡ ወያአምሩ ፡ ከመ ፡ ጸደቁ ፡ እምኔሆሙ ፡ በኵሉ ፡ ፍትሖሙ ፡ ወበኵሉ ፡ ምግባሮሙ ፡ ወያአምሩ ፡ ከመ ፡ ህልወ ፡ ኮንኩ ፡ ምስሌሆሙ ። ወአንተኒ ፡ ጸሐፍ ፡ ለከ ፡ ኵሎ ፡ ዘቃለ ፡ ዘአነ ፡ አየድዐከ ፡ ዮም ፡ እስመ ፡ አአምር ፡ ምረቶሙ ፡ ወክሳዶሙ ፡ ይቡሰ ፡ ዘእንበለ ፡ አብኦሙ ፡ ውስተ ፡ ምድር ፡ እንተ ፡ መሐልኩ ፡ ለአብርሃም ፡ ወለይስሐቅ ፡ ወለያዕቆብ ፡ እንዘ ፡ እብል ፡ ለዘርእክሙ ፡ እሁብ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ። ወይትመየጡ ፡ ኀበ ፡ አምላክ ፡ ነኪር ፡ ኀበ ፡ እለ ፡ ኢያድኅንዎሙ ፡ እምኵሉ ፡ ምንዳቤሆሙ ። እስመ ፡ ይረስዑ ፡ ኵሎ ፡ ትእዛዝየ ፡ ኵሎ ፡ ዘአነ ፡ እኤዝዞሙ ፡ ወየሐውሩ ፡ ድኅረ ፡ አሕዛብ ፡ ወድኅረ ፡ ርኵሶሙ ፡ ወድኅረ ፡ ኀሳሮሙ ፡ ወይትቀነዩ ፡ ለአማልክቲሆሙ ፡ ወይከውንዎሙ ፡ ማዕቀፈ ፡ ወለምንዳቤ ፡ ወለፃዕር ፡ ወለመሥገርት ፡ 10 ወይትሐጐሉ ፡ ብዙኃን ፡ ወይትአኀዙ ፡ ወይወድቁ ፡ ውስተ ፡ እደ ፡ ፀር ፡ እስመ ፡ ኀደጉ ፡ ሥርዓትየ ፡ ወትእዛዝየ ፡ ወበዓላተ ፡ ኪዳንየ ፡ ወሰንበታትየ ፡ ወቅድሳትየ ፡ ዘቀደስኩ ፡ ሊተ ፡ በማእከሎሙ ። ወገብሩ ፡ ሎሙ ፡ ፍሥሐታተ ፡ ወኦመ ፡ ወግልፎ ፡ ወሰገዱ ፡ ዘዘ ፡ ዚአሆሙ ፡ ለስሒት ፡ ወይዘብሑ ፡ ውሉዶሙ ፡ ለአጋንንት ፡ ወለኵሉ ፡ ግብረ ፡ ስሕተተ ፡ ልቦሙ ። ወእፌኑ ፡ ኀቤሆሙ ፡ ሰማዕተ ፡ ከመ ፡ አስምዕ ፡ ሎሙ ፡ ወኢይሰምዑ ፡ ወሰማዕተኒ ፡ ይቀትሉ ፡ ወለእለሂ ፡ የኀሥሡ ፡ ሕገ ፡ ይሰደድዎሙ ፡ ወኵሎ ፡ ያፀርዑ ፡ ወይዌጥኑ ፡ ለገቢረ ፡ እኩይ ፡ በቅድመ ፡ አዕይንትየ ፡ 13 ወአኀብእ ፡ ገጽየ ፡ እምኔሆሙ ፡ ወእሜጥዎሙ ፡ ውስተ ፡ እደ ፡ አሕዛብ ፡ ለፂዋዌ ፡ ወለሕብል ፡ ወለተበልዖ ። ወይረስዑ ፡ ኵሎ ፡ ሕግየ ፡ ወኵሎ ፡ ትእዛዝየ ፡ ወኵሎ ፡ ፍትሕየ ፡ ወይስሕቱ ፡ ሠርቀ ፡ ወሰንበተ ፡ ወበዓለ ፡ ወኢዮቤለ ፡ ወሥርዓተ ። ወእምዝ ፡ ይትመየጡ ፡ ኀቤየ ፡ እማእከለ ፡ አሕዛብ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወበኵሉ ፡ ኀይሎሙ ፡ ወአስተጋብኦሙ ፡ እማእከለ ፡ ኵሉ ፡ አሕዛብ ፡ ወየኀሥሡኒ ፡ ከመ ፡ እትራከቦሙ ፡ ሶበ ፡ ኀሠሡኒ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወእከሥት ፡ ሎሙ ፡ ብዙኀ ፡ ሰላመ ፡ በጽድቅ ፡ 16 ወአፈልሶሙ ፡ ተክለ ፡ ርትዕ ፡ በኵሉ ፡ ልብየ ፡ ወበኵሉ ፡ ነፍስየ ፡ ወይከውኑ ፡ ለበረከት ፡ ወአኮ ፡ ለመርገም ፡ ወይከውኑ ፡ ርእሰ ፡ ወአኮ ፡ ዘነበ ። ወአሐንጽ ፡ መቅደስየ ፡ ማእከሎሙ ፡ ወአኀድር ፡ ምስሌሆሙ ፡ ወእከውኖሙ ፡ አምላከ ፡ ወእሙንቱኒ ፡ ይከውኑኒ ፡ ሕዝብየ ፡ ዘበአማን ፡ ወዘበጽድቅ ፡ 18 ወኢየኀድጎሙ ፡ ወኢይትናከሮሙ ፡ እስመ ፡ አነ ፡ እግዚአብሔር ፡ አምላኮሙ ። ወወድቀ ፡ ሙሴ ፡ በገጹ ፡ ወጸለየ ፡ ወይቤ ፡ እግዚኦ ፡ አምላኪየ ፡ ኢትኅድግ ፡ ሕዝበከ ፡ ወርስተከ ፡ ለሐዊር ፡ በስሕተተ ፡ ልቦሙ ፡ ወኢትመጥዎሙ ፡ ውስተ ፡ እደ ፡ አሕዛብ ፡ ከመ ፡ ይኰንንዎሙ ፡ ወከመ ፡ ኢይግበርዎሙ ፡ ከመ ፡ ይኅጥኡ ፡ ለከ ። ይትለዐል ፡ እግዚኦ ፡ ምሕረትከ ፡ ላዕለ ፡ ሕዝብከ ፡ ወፍጥር ፡ ሎሙ ፡ መንፈሰ ፡ ርቱዐ ፡ ወኢይኰንኖሙ ፡ መንፈሰ ፡ ቤልሖር ፡ ለአስተዋድዮቶሙ ፡ ቅድሜከ ፡ ወለአዕቅጾቶሙ ፡ እምኵሉ ፡ ፍኖተ ፡ ጽድቅ ፡ ከመ ፡ ይትሐጐሉ ፡ እምቅድመ ፡ ገጽከ ። ወእሙንቱ ፡ ሕዝብከ ፡ ወርስትከ ፡ ዘባላሕከ ፡ በኀይልከ ፡ ዐቢይ ፡ እምእደ ፡ ግብጽ ። ወይቤሎ ፡ እግዚአብሔር ፡ ለሙሴ ፡ አነ ፡ አአምር ፡ ተዋሥኦቶሙ ፡ ወኅሊናሆሙ ፡ ወይቡሰ ፡ ክሳዶሙ ፡ ወኢይሰምዑ ፡ እስከ ፡ ሶበ ፡ ያአምሩ ፡ ኃጢአቶሙ ፡ ወኃጣውአ ፡ አበዊሆሙ ። ወእምድኅረ ፡ ዝንቱ ፡ ይትመየጡ ፡ ኀቤየ ፡ በኵሉ ፡ ርትዕ ፡ ወበኵሉ ፡ ልብ ፡ ወበኵሉ ፡ ነፍስ ። ወትተሉ ፡ ነፍሶሙ ፡ ኀቤየ ፡ ወበኵሉ ፡ ትእዛዝየ ፡ ወይገብሩ ፡ ሎሙ ፡ ትእዛዛትየ ፡ ወእከውኖሙ ፡ አበ ፡ ወእሙንቱ ፡ ይከውኑኒ ፡ ውሉደ ። ወይሰመዩ ፡ ኵሎሙ ፡ ውሉደ ፡ አምላክ ፡ ሕያው ፡ ወየአምሮሙ ፡ ኵሉ ፡ መልአክ ፡ ወኵሉ ፡ መንፈስ ፡ ወያአምርዎሙ ፡ ከመ ፡ እሙንቱ ፡ ውሉድየ ፡ ወአነ ፡ አቡሆሙ ፡ በርትዕ ፡ ወበጽድቅ ፡ ወአፈቅሮሙ ። ወአንተ ፡ ጸሐፍ ፡ ለከ ፡ ኵሎ ፡ ዘንተ ፡ ነገረ ፡ ዘአነ ፡ አየድዐከ ፡ በዝንቱ ፡ ደብር ፡ ዘቀዳሚ ፡ ወዘደኃሪ ፡ ወዘይመጽእ ፡ ሀሎ ፡ በኵሉ ፡ ኩፋሌ ፡ መዋዕል ፡ ዘበሕግ ፡ ወዘበስምዕ ፡ ወበሱባዔሆሙ ፡ ለኢዮቤልዎን ፡ እስከ ፡ ለዓለም ። ወይቤሎ ፡ ለመልአከ ፡ ገጽ ፡ ጸሐፍ ፡ ለሙሴ ፡ እምቀዳሚ ፡ ፍጥረት ፡ እስከ ፡ አመ ፡ ይትሐነጽ ፡ መቅደስየ ፡ በማእከሎሙ ፡ ለዓለመ ፡ ዓለማት ። ወያስተርኢ ፡ እግዚአብሔር ፡ ለዐይነ ፡ ኵሉ ፡ ወያአምር ፡ ኵሉ ፡ ከመ ፡ አነ ፡ አምላከ ፡ እስራኤል ፡ ወአብ ፡ ለኵሎሙ ፡ ደቂቀ ፡ ያዕቆብ ፡ ወንጉሥ ፡ በደብረ ፡ ጽዮን ፡ ለዓለመ ፡ ዓለም ፡ ወትከውን ፡ ጽዮን ፡ ወኢየሩሳሌም ፡ ቅድስት ። ወነሥአ ፡ መልአከ ፡ ገጽ ፡ ዘየሐውር ፡ ቅድመ ፡ ተዓይኒሆሙ ፡ ለእስራኤል ፡ ጽላተ ፡ ዘኩፋሌ ፡ ዓመታት ፡ እምአመ ፡ ፍጥረተ ፡ ሕግ ፡ ወለስምዕ ፡ ለሱባዔሁ ፡ ለኢዮቤልዎን ፡ በበ ፡ ዓመት ፡ በኵሉ ፡ ኆልቆሙ ፡ ወኢዮቤልዎን ፡ እምዕለተ ፡ ፍጥረት ፡ ሐዳስ ፡ አመ ፡ ይትሐደስ ፡ ሰማያት ፡ ወምድር ፡ ወኵሉ ፡ ፍጥረቶሙ ፡ በከመ ፡ ኀይላቲሆሙ ፡ ለሰማይ ፡ ወበከመ ፡ ኵሉ ፡ ፍጥረተ ፡ ምድር ፡ እስከ ፡ አመ ፡ ይትፈጠር ፡ መቅደሰ ፡ እግዚአብሔር ፡ በኢየሩሳሌም ፡ በደብረ ፡ ጽዮን ።

Chapter 2 ወይቤ ፡ መልአከ ፡ ገጽ ፡ ለሙሴ ፡ በቃለ ፡ እግዚአብሔር ፡ እንዘ ፡ ይብል ፡ ጸሐፍ ፡ ኵሎ ፡ ነገረ ፡ ፍጥረት ፡ ከመ ፡ በሰዱስ ፡ ዕለት ፡ ፈጸመ ፡ እግዚአብሔር ፡ አምላክ ፡ ኵሎ ፡ ግብሮ ፡ ወኵሎ ፡ ዘፈጠረ ፡ ወአሰንበተ ፡ በዕለተ ፡ ሳብዕት ፡ ወቀደሳ ፡ ለኵሉ ፡ ዓለማት ፡ ወአንበራ ፡ ትእምርተ ፡ ለኵሉ ፡ ግብሩ ። እስመ ፡ በዕለት ፡ ቀዳሚት ፡ ፈጠረ ፡ ሰማያተ ፡ እለ ፡ መልዕልት ፡ ወምድረ ፡ ወማያተ ፡ ወኵሉ ፡ መንፈስ ፡ ዘይትለአክ ፡ ቅድሜሁ ፡ ወመላእክተ ፡ ገጽኒ ፡ ወመላእክተ ፡ ቅዳሴ ፡ ወመላእክተ ፡ መንፈሰ ፡ እሳት ፡ ወመላእክተ ፡ መንፈሰ ፡ እስትንፋስ ፡ ወመላእክተ ፡ መንፈሰ ፡ ደመናት ፡ ለጽልመት ፡ ወለኵሉ ፡ ወለበረድ ፡ ወለአስሐትያ ፡ ወመላእክተ ፡ ቃላት ፡ ወነጐድጓዳት ፡ ወለመባርቅት ፡ ወመላእክተ ፡ መናፍስት ፡ ለቍር ፡ ወለመርቄ ፡ ወለክረምት ፡ ወለመጸው ፡ ወለማእረር ፡ ወለሐጋይ ፡ ወለኵሉ ፡ መናፍስተ ፡ ተግባሩ ፡ ዘበሰማያት ፡ ወዘበምድር ፡ ወዘበኵሉ ፡ ቀላያት ፡ ወጽልመት ፡ ወብርሃን ፡ ወጎሕ ፡ ወምሴት ፡ ዘአስተዳለወ ፡ በአእምሮ ፡ ልቡ ። ወአሜሃ ፡ ርኢነ ፡ ምግባሮ ፡ ወባረክናሁ ፡ ወሰባሕነ ፡ ቅድሜሁ ፡ በእንተ ፡ ኵሉ ፡ ምግባሩ ፡ እስመ ፡ ሰብዓተ ፡ ግብረ ፡ ዐበይተ ፡ ገብረ ፡ በቀዳሚት ፡ ዕለት ። ወበዕለተ ፡ ሳኒታ ፡ ገብረ ፡ ምጽናዓተ ፡ ማእከለ ፡ ማይ ፡ ወተከፍለ ፡ ማያት ፡ በይእቲ ፡ ዕለት ፡ መንፈቆሙ ፡ ዐርጉ ፡ ላዕለ ፡ ወመንፈቆሙ ፡ ወረዱ ፡ መትሕተ ፡ ምጽናዓት ፡ ማእከለ ፡ ዲበ ፡ ገጻ ፡ ለኵላ ፡ ምድር ፡ ወዘንተ ፡ ባሕቲቶ ፡ ግብረ ፡ ገብረ ፡ በሳኒታ ፡ ዕለት ። ወበሣልስት ፡ ዕለት ፡ ገብረ ፡ በከመ ፡ ይቤ ፡ ለማያት ፡ ይኅልፉ ፡ እምቅድመ ፡ ገጻ ፡ ለኵላ ፡ ምድር ፡ ውስተ ፡ መካን ፡ አሐዱ ፡ ወያስተርኢ ፡ የብስ ። ወገብሩ ፡ ከማሁ ፡ ማያት ፡ በከመ ፡ ይቤሎሙ ፡ ወተግሕሡ ፡ እምዲበ ፡ ገጻ ፡ ለምድር ፡ ውስተ ፡ መካን ፡ አሐዱ ፡ አፍአ ፡ እምጽናዓተዝ ፡ ወአስተርአየት ፡ የብስ ። ወበይእቲ ፡ ዕለት ፡ ፈጠረ ፡ ላቲ ፡ ኵሎ ፡ አብሕርተ ፡ በበ ፡ ምጉባኢሆሙ ፡ ወኵሎሙ ፡ አፍላግ ፡ ወምጉባኢሆሙ ፡ ለማያት ፡ ውስተ ፡ አድባር ፡ ወውስተ ፡ ኵሉ ፡ ምድር ። ወበዕለተ ፡ ራብዕት ፡ ገብረ ፡ እግዚአብሔር ፡ ፀሐየ ፡ ወወርኀ ፡ ወከዋክብተ ፡ ወአንበሮሙ ፡ ውስተ ፡ ምጽናዓተ ፡ ሰማይ ፡ ከመ ፡ ያብርሁ ፡ ውስተ ፡ ኵሉ ፡ ምድር ። ወወሀበ ፡ እግዚአብሔር ፡ ፀሐየ ፡ ለትእምርት ፡ ዐቢይ ፡ ዲበ ፡ ምድር ፡ ለመዋዕል ፡ ወለሰንበት ፡ ወለአውራኅ ፡ ወለበዓላት ፡ ወለዓመታት ፡ ወለሰንበታተ ፡ ዓመታት ፡ ወለኢዮቤልዉሳት ፡ ወለኵሉ ፡ ጊዜ ፡ ለዓመታት ። ወይፈልጥ ፡ ማእከለ ፡ ብርሃን ፡ ወማእከለ ፡ ጽልመት ፡ ወለጥዕዮ ፡ ከመ ፡ ይጥዒ ፡ ኵሉ ፡ ዘይሠርፅ ፡ ወይልህቅ ፡ ዲበ ፡ ምድር ። ወበዕለተ ፡ ኃምስት ፡ ፈጠረ ፡ ዐናብርተ ፡ ዐበይተ ፡ ማእከለ ፡ ቀላያተ ፡ ማያት ፡ እስመ ፡ ዝንቱ ፡ ተገብረ ፡ ቀዳሚ ፡ በእደዊሁ ፡ ዘሥጋ ፡ ወኵሉ ፡ ዘይትሐወስ ፡ ውስተ ፡ ማያት ፡ ዓሣት ፡ ወኵሉ ፡ ዘይሰርር ፡ አዕዋፈ ፡ ወኵሎ ፡ ዘመዶሙ ፡ 12 ወሠረቀ ፡ ፀሐይ ፡ ላዕሌሆሙ ፡ ለጥዒና ፡ ወላዕለ ፡ ኵሉ ፡ ዘሀሎ ፡ ውስተ ፡ ምድር ። ወበዕለተ ፡ ሳድስት ፡ ገብረ ፡ ኵሎ ፡ አራዊተ ፡ ምድር ፡ ወኵሎ ፡ እንስሳ ፡ ወኵሎ ፡ ዘይትሐወስ ፡ ዲበ ፡ ምድር ። ወእምድኅረ ፡ ዝኵሉ ፡ ገብረ ፡ ሰብአ ፡ አሐደ ፡ ብእሴ ፡ ወብእሲተ ፡ ገብሮሙ ፡ ወአስለጦ ፡ ለኵሉ ፡ ዘዲበ ፡ ምድር ፡ ወዘውስተ ፡ አብሕርት ፡ ወዲበ ፡ ዘይሰርር ፡ ወዲበ ፡ አራዊት ፡ ወዲበ ፡ እንስሳ ፡ ወዲበ ፡ ኵሉ ፡ ዘይትሐወስ ፡ ዲበ ፡ ምድር ፡ ወላዕለ ፡ ኵሉ ፡ ምድር ፡ ወዲበ ፡ ዝኵሉ ፡ አስለጦ ። ወኮነ ፡ ኵሉ ፡ ዕሥራ ፡ ወክልኤቱ ፡ ዘመድ ። ወፈጸመ ፡ ኵሎ ፡ ግብሮ ፡ በዕለተ ፡ ሳድስት ፡ ኵሎ ፡ ዘበሰማይ ፡ ወዘበምድር ፡ ወውስተ ፡ አብሕርት ፡ ወውስተ ፡ ቀላያት ፡ ወውስተ ፡ ብርሃን ፡ ወውስተ ፡ ጽልመት ፡ ወውስተ ፡ ኵሉ ። ወወሀበነ ፡ ትእምርተ ፡ ዐቢየ ፡ ዕለተ ፡ ሰንበታት ፡ ከመ ፡ ንኩን ፡ እንዘ ፡ ንገብር ፡ ሰዱሰ ፡ ዕለተ ፡ ግብረ ፡ ወናሰንብት ፡ አመ ፡ ዕለተ ፡ ሳብዕት ፡ እምኵሉ ፡ ግብር ። ኵሎሙ ፡ መላእክተ ፡ ገጽ ፡ ወኵሎሙ ፡ መላእክተ ፡ ቅድሳት ፡ ክልኤተ ፡ ዘመደ ፡ ዐበይተ ፡ ዘንተ ፡ ይቤለነ ፡ ናሰንብት ፡ ምስሌሁ ፡ በሰማይ ፡ ወበምድር ። ወይቤለነ ፡ ናሁ ፡ አነ ፡ እፈልጥ ፡ ሊተ ፡ ሕዝበ ፡ እማእከለ ፡ አሕዛብየ ፡ ወያሰነብቱ ፡ እሙንቱኒ ፡ ወእቄድሶ ፡ ሊተ ፡ ለሕዝብ ፡ ወእባርኮ ፡ በከመ ፡ ቀደስክዋ ፡ ለዕለተ ፡ ሰንበት ፡ ወእቄድሶ ፡ ሊተ ፡ ወከመዝ ፡ እባርኮ ፡ ወይከውኑኒ ፡ ሕዝብየ ፡ ወአነ ፡ እከውኖሙ ፡ አምላከ ። ወኀረይኩ ፡ በዘርአ ፡ ያዕቆብ ፡ በኵሉ ፡ እምዘርኢኩ ፡ ወጸሐፍክዎ ፡ ሊተ ፡ ወልደ ፡ በኵረ ፡ ወቀደስክዎ ፡ ሊተ ፡ ለዓለመ ፡ ዓለም ። ወግብረ ፡ ቦቱ ፡ ትእምርተ ፡ ከማሁ ፡ በዘ ፡ ያሰነብቱ ፡ እሙንቱኒ ፡ ምስሌነ ፡ በዕለተ ፡ ሳብዕት ፡ ለበሊዕ ፡ ወለሰቲይ ፡ ወለባርኮ ፡ ዘፈጠረ ፡ ኵሎ ፡ በከመ ፡ ባረኮ ፡ ወቀደሶ ፡ ሎቱ ፡ ሕዝበ ፡ ዘያስተርኢ ፡ እምኵሉ ፡ አሕዛብ ፡ ወከመ ፡ ያሰንብቱ ፡ ኅቡረ ፡ ምስሌነ ። ወገብረ ፡ ፈቃዳቲሁ ፡ ይዕርግ ፡ መዓዛ ፡ ሠናይ ፡ ዘይትወከፍ ፡ ቅድሜሁ ፡ ኵሎ ፡ መዋዕለ ። ዕሥራ ፡ ወክልኤ ፡ አርእስተ ፡ ሰብእ ፡ እምአዳም ፡ እስከኔሁ ። ወተውህበ ፡ ለዝንቱ ፡ ከመ ፡ ይኩኑ ፡ ኵሎ ፡ መዋዕለ ፡ ቡሩካነ ፡ ወቅዱሳነ ። ፈጠረ ፡ ሰማየ ፡ ወምድረ ፡ ወኵሎ ፡ ዘተፈጥረ ፡ በሰዱስ ፡ ዕለት ። ወአንተ ፡ አዝዝ ፡ ለደቂቀ ፡ እስራኤል ፡ ወይዕቀቡ ፡ ዕለተ ፡ ዛቲ ፡ ይቀድስዋ ፡ ወከመ ፡ ኢይግበሩ ፡ ባቲ ፡ ኵሎ ፡ ግብረ ፡ ወከመ ፡ ኢያርኵስዋ ፡ እስመ ፡ ቅድስት ፡ ይእቲ ፡ እምኵሉ ፡ መዋዕል ። ኵሉ ፡ ዘያጌምና ፡ ሞተ ፡ ይሙት ፡ ወኵሉ ፡ ዘይገብር ፡ ባቲ ፡ ኵሎ ፡ ግብረ ፡ ሞተ ፡ ይሙት ፡ ለዓለም ። ወኵሉ ፡ ሰብእ ፡ ዘየዐቅብ ፡ ወያሰነብት ፡ ባቲ ፡ እምኵሉ ፡ ግብሩ ፡ ቅዱሰ ፡ ወቡሩከ ፡ ይከውን ፡ በኵሉ ፡ መዋዕል ፡ ከማነ ። አይድዕ ፡ ወንግር ፡ ለደቂቀ ፡ እስራኤል ፡ ኵነኔሃ ፡ ለዛቲ ፡ ዕለት ፡ ወያሰንብቱ ፡ ባቲ ፡ ወኢይኅድግዋ ፡ በስሕተተ ፡ ልቦሙ ፡ ከመ ፡ ኢይኩኑ ፡ ለገቢረ ፡ ግብር ፡ ባቲ ፡ ዘኢይከውን ፡ ዘያስተርኢ ፡ ለገቢረ ፡ ባቲ ፡ ፈቃዶሙ ። ወኢያውፅኡ ፡ ወኢያብኡ ፡ እምቤት ፡ ቤተ ፡ በዛቲ ፡ ዕለት ፡ እስመ ፡ ቅድስት ፡ ይእቲ ፡ ወቡርክት ፡ ይእቲ ፡ እምኵሉ ፡ ዕለተ ፡ ኢዮቤል ፡ ዘኢዮቤልዉሳት ፡ ባቲ ፡ አሰንበትነ ፡ በሰማያት ፡ ዘእንበለ ፡ ይትአመር ፡ ለኵሉ ፡ ዘሥጋ ፡ ለአሰንብቶ ፡ ባቲ ፡ በምድር ፡ 31 ወባረከ ፡ ፈጣሬ ፡ ኵሉ ፡ ወኢቀደሰ ፡ ኵሎ ፡ ሕዝበ ፡ ወአሕዛበ ፡ ለአሰንብቶ ፡ ባቲ ፡ ዘእንበለ ፡ እስራኤልሃ ፡ ባሕቲቶ ፡ ሎቱ ፡ ለባሕቲቱ ፡ ወሀቦ ፡ ይብልዑ ፡ ወይስተዩ ፡ ወለአሰንብቶ ፡ ባቲ ፡ ዲበ ፡ ምድር ። ወባረካ ፡ ፈጣሬ ፡ ኵሉ ፡ ዘፈጠረ ፡ ዛተ ፡ ዕለተ ፡ ለበረከት ፡ ወለቅድሳት ፡ ወለስብሐት ፡ እምኵሉ ፡ መዋዕል ። ዝንቱ ፡ ሕግ ፡ ወስምዕ ፡ ተውህበ ፡ ለደቂቀ ፡ እስራኤል ፡ ሕግ ፡ ዘለዓለም ፡ ለትውልዶሙ ።

Chapter 3 ወበሰዱስ ፡ መዋዕል ፡ ዘሰንበት ፡ ካልእ ፡ አምጻእነ ፡ በቃለ ፡ እግዚአብሔር ፡ ኀበ ፡ አዳም ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ አዕዋፈ ፡ ወኵሎ ፡ ዘይትሐወስ ፡ ውስተ ፡ ምድር ። ወሰመዮሙ ፡ አዳም ፡ ለኵሎሙ ፡ በበ ፡ አስማቲሆሙ ፡ ወበከመ ፡ ጸውዖሙ ፡ ከማሁ ፡ ኮነ ፡ ስሞሙ ። ወበኃምስ ፡ እላ ፡ መዋዕል ፡ ሀለወ ፡ አዳም ፡ እንዘ ፡ ይሬኢ ፡ ዘንተ ፡ ኵሎ ፡ ተባዕተ ፡ ወአንስተ ፡ በኵሉ ፡ ዘመድ ፡ ዘበምድር ፡ ወውእቱሰ ፡ ሀሎ ፡ ባሕቲቱ ፡ ወአልቦ ፡ ዘረከበ ፡ ሎቱ ፡ ዘይረድኦ ፡ ዘከማሁ ። ወይቤለነ ፡ እግዚአብሔር ፡ ለነ ፡ አኮ ፡ ሠናይ ፡ የሀሉ ፡ ብእሲ ፡ ባሕቲቱ ፡ ንግበር ፡ ሎቱ ፡ መርድአ ፡ ዘከማሁ ፡ 5 ወወደየ ፡ እግዚአብሔር ፡ አምላክነ ፡ ሕድመተ ፡ ላዕሌሁ ፡ ወኖመ ። ወአንቅሆ ፡ ለአዳም ፡ እምንዋሙ ። በእንተዝ ፡ ይኩን ፡ ብእሲ ፡ ወብእሲት ፡ አሐደ ፡ ወበእንተዝ ፡ የኀድግ ፡ አባሁ ፡ ወእሞ ፡ ወይፃመር ፡ ምስለ ፡ ብእሲቱ ፡ ወይከውኑ ፡ ሥጋ ፡ አሐደ ። በሳብዕት ፡ ቀዳሚት ፡ አዳም ፡ ወገቦ ፡ ብእሲቱ ፡ ወበሳብዕት ፡ ካልእት ፡ አርአዮ ፡ ኪያሃ ፡ ሎቱ ። ወእምድኅረ ፡ ተፈጸመ ፡ ለአዳም ፡ አርብዓ ፡ መዋዕል ፡ በምድር ፡ ኀበ ፡ ተፈጥረ ፡ አባእናሁ ፡ ውስተ ፡ ገነተ ፡ ኤዶም ፡ ከመ ፡ ይትቀነይ ፡ ወይዕቀባ ። በእንተ ፡ ዝንቱ ፡ ተጽሕፈ ፡ ትእዛዝ ፡ ውስተ ፡ ጽላተ ፡ ሰማይ ፡ ለእንተ ፡ ትወልድ ፡ ለእመ ፡ ተባዕተ ፡ ወለደት ፡ ሰቡዐ ፡ መዋዕለ ፡ ትንበር ፡ ውስተ ፡ ርኵሳ ፡ በከመ ፡ ሰቡዕ ፡ መዋዕል ፡ ቀዳሚት ፡ ወሠላሳ ፡ መዋዕለ ፡ ወሠሉሰ ፡ ዕለተ ፡ ትንበር ፡ ውስተ ፡ ደመ ፡ ንጽሕ ፡ ወኵሎ ፡ ቅዱሰ ፡ ኢትግሥሥ ፡ ወውስተ ፡ መቅደስ ፡ ኢትባእ ፡ እስከ ፡ አመ ፡ ትፌጽም ፡ ዘንተ ፡ መዋዕለ ፡ ዘበተባዕት ። ወዘበአንስት ፡ ክልኤ ፡ ሰቡዓተ ፡ መዋዕለ ፡ በከመ ፡ ክልኤ ፡ ሰቡዓት ፡ ቀዳሚያት ፡ በርኵሳ ፡ ወስሳ ፡ መዋዕለ ፡ ወሰዱሰ ፡ ዕለተ ፡ ትንበር ፡ በደመ ፡ ንጽሕ ፡ ወይከውና ፡ ኵሎን ፡ ሰማንያ ፡ መዋዕለ ። ወፈጺማ ፡ እላንተ ፡ ሰማንያ ፡ መዋዕለ ፡ አባእናሃ ፡ ውስተ ፡ ገነተ ፡ ኤዶም ፡ እስመ ፡ ቅድስት ፡ ይእቲ ፡ ውስተ ፡ ኵሉ ፡ ምድር ፡ ወኵሉ ፡ ዕፅ ፡ ዘትኩል ፡ ውስቴታ ፡ ቅዱስ ። በእንተዝ ፡ ተሠርዐ ፡ ለእንተ ፡ ትወልድ ፡ ለተባዕት ፡ ወለእንስት ፡ ፍትሖን ፡ ለእላንቱ ፡ መዋዕል ፡ ኵሎ ፡ ቅዱሰ ፡ ኢትልክፍ ፡ ወውስተ ፡ መቅደስ ፡ ኢትባእ ፡ እስከ ፡ አመ ፡ ይትፌጸማ ፡ እላንቱ ፡ መዋዕል ፡ ለተባዕት ፡ ወለእንስት ። ዝንቱ ፡ ሕግ ፡ ወሰምዕ ፡ ዘተጽሕፈ ፡ ለእስራኤል ፡ ይዕቀቡ ፡ ኵሎ ፡ መዋዕለ ። ወበሱባዔ ፡ ቀዳማዊ ፡ ዘኢዮቤልዉ ፡ ቀዳሚ ፡ ወለወ ፡ አዳም ፡ ወብእሲቱ ፡ ሰብዓተ ፡ ዓመተ ፡ ውስተ ፡ ገነተ ፡ ኤዶም ፡ እንዘ ፡ ይትቀነይ ፡ ወየዐቅባ ፡ ወምግባረ ፡ ወሀብናሁ ፡ ወሀሎነ ፡ እንዘ ፡ ንሜህሮ ፡ ገቢሮቶ ፡ ኵሎ ፡ ዘያስተርኢ ፡ ለቅኔ ። ወሀሎ ፡ እንዘ ፡ ይትቀነይ ፡ ወውእቱሰ ፡ ዕራቁ ፡ ወኢያአምር ፡ ወኢየኀፍር ፡ ወየዐቅብ ፡ ገነተ ፡ እምአዕዋፍ ፡ ወእምአራዊት ፡ ወእምእንስሳ ፡ ወያስተጋብእ ፡ ፍሬሁ ፡ ወይበልዕ ፡ ወያነብር ፡ ትራፎ ፡ ሎቱ ፡ ወለብእሲቱ ፡ ወያነብር ፡ ዘይትዐቀብ ። ወኀሊቆ ፡ ፍጻሜሁ ፡ ለሰብዓቱ ፡ ዓመት ፡ እለ ፡ ፈጸመ ፡ በህየ ፡ ሰብዓተ ፡ ዓመተ ፡ ጥንቁቀ ። ወትቤሎ ፡ እምኵሉ ፡ ፍሬ ፡ ዕፅ ፡ ዘውስተ ፡ ገነት ፡ ይቤለነ ፡ እግዚአብሔር ፡ ብልዑ ። ወይቤላ ፡ አርዌ ፡ ምድር ፡ ለብእሲት ፡ አኮ ፡ ሞተ ፡ ዘትመውቱ ፡ እስመ ፡ ያአምር ፡ እግዚአብሔር ፡ አመ ፡ ዕለተ ፡ ትበልዑ ፡ ይትረኀው ፡ አዕይንቲክሙ ፡ ወትከውኑ ፡ ከመ ፡ አማልክት ፡ ወታአምሩ ፡ ሠናየ ፡ ወእኩየ ። ወርእየት ፡ ብእሲት ፡ ዕፀ ፡ ከመ ፡ አዳም ፡ ውእቱ ፡ ወያሠምር ፡ ለዐይን ፡ ወሠናይ ፡ ፍሬሁ ፡ ለበሊዕ ። ወከደነት ፡ ኀፍረታ ፡ በቈጽለ ፡ በለስ ፡ ዘቀዳሚ ። ወነሥአ ፡ ቈጽለ ፡ በለስ ፡ ወጠቀበ ፡ ወገብረ ፡ ሎቱ ፡ ሞራአ ፡ ወከደነ ፡ ኀፍረቶ ። ወረገሞ ፡ እግዚአብሔር ፡ ለአርዌ ፡ ምድር ፡ ወተምዕዎ ፡ ለዓለም ። አብዝኆ ፡ አበዝኅ ፡ ሐዘንኪ ፡ ወፀዕርኪ ፡ በሐዘን ፡ ለዲ ፡ ውሉደ ፡ ወኀበ ፡ ምትኪ ፡ ምግባኢኪ ፡ ወውእቱ ፡ ይኴንነኪ ። ወለአዳምሂ ፡ ይቤሎ ፡ እስመ ፡ ሰማዕከ ፡ ለብእሲትከ ፡ ወበላዕከ ፡ እምውስተ ፡ ውእቱ ፡ ዕፅ ፡ ዘአዘዝኩከ ፡ ከመ ፡ ኢትብላዕ ፡ እምኔሁ ። ወገብረ ፡ ሎሙ ፡ አልባሰ ፡ ዘማእስ ፡ ወአልቦሶሙ ፡ ወፈነዎሙ ፡ እምገነተ ፡ ኤዶም ። ወበይእቲ ፡ ዕለት ፡ እንዘ ፡ ይወፅእ ፡ እምገነተ ፡ ኤዶም ፡ ዐጠነ ፡ ለመዓዛ ፡ ሠናይ ፡ ዕጣነ ፡ ስሒነ ፡ ወቅንአተ ፡ ወማየ ፡ ልብን ፡ ወሰንበልተ ፡ በጽባሕ ፡ ምስለ ፡ ትንሣኤ ፡ ፀሐይ ፡ አመ ፡ ከደነ ፡ ኃፍረቶ ፡ 28 ወበይእቲ ፡ ዕለት ፡ ተፈጸመ ፡ አፈ ፡ ኵሉ ፡ አራዊተ ፡ ወዘእንስሳ ፡ ወዘአዕዋፍ ፡ ወዘያንሶሱ ፡ ወዘይትሐወስ ፡ እምነቢብ ፡ እስመ ፡ ኵሎሙ ፡ ይትናገሩ ፡ ዝንቱ ፡ ምስለ ፡ ዝንቱ ፡ ከንፈረ ፡ አሐደ ፡ ወልሳነ ፡ አሐደ ። ወፈነወ ፡ እምገነተ ፡ ኤዶም ፡ ኵሎ ፡ ዘሥጋ ፡ ዘሀሎ ፡ ውስተ ፡ ነገተ ፡ ኤዶም ፡ ወተዘርዉ ፡ ኵሉ ፡ ዘሥጋ ፡ በበ ፡ ዘመዶሙ ፡ ወበበ ፡ ፍጥረቶሙ ፡ ውስተ ፡ መካን ፡ ዘተፈጥረ ፡ ሎሙ ። ወለአዳም ፡ ባሕቲቱ ፡ ወሀቦ ፡ ይክድን ፡ ኃፍረቶ ፡ እምኵሉ ፡ አራዊት ፡ ወእንስሳ ። በእንተዝ ፡ ተአዘዘ ፡ ውስተ ፡ ጽላት ፡ ላዕለ ፡ ኵሎሙ ፡ እለ ፡ ያአምሩ ፡ ፍትሐ ፡ ሕግ ፡ ይክድኑ ፡ ኀፍረቶሙ ፡ ወኢይትከሠቱ ፡ ከመ ፡ አሕዛብ ፡ ይትከሠቱ ። ወአመ ፡ ሠርቀ ፡ ወርኅ ፡ ራብዕ ፡ ወፅኡ ፡ አዳም ፡ ወብእሲቱ ፡ እምገነተ ፡ ኤዶም ፡ ወኀደሩ ፡ ውስተ ፡ ምድረ ፡ ኤልዳ ፡ ውስተ ፡ ምድረ ፡ ፍጥረቶሙ ፡ 33 ወሰመየ ፡ አዳም ፡ ስመ ፡ ብእሲቱ ፡ ሔዋ ፡ 34 ወኢኮኑ ፡ ምስለ ፡ ወልድ ፡ እስከ ፡ ቀዳሚ ፡ ኢዮቤልዉ ። ወውእቱሰ ፡ ይትጌበራ ፡ ለምድር ፡ በከመ ፡ ተምህረ ፡ በገነተ ፡ ኤዶም ።

Chapter 4 ወበሣልስ ፡ ሱባዔ ፡ በካልእ ፡ ኢዮቤልዉ ፡ ወለደቶ ፡ ለቃየን ፡ ወበራብዕ ፡ ወለደቶ ፡ ለአቤል ። ወበቀዳሚሁ ፡ ለኢዮቤልዉ ፡ ሣልስ ፡ ቀተሎ ፡ ቃየን ፡ ወልደ ፡ በታስዕ ፡ ኢዮቤልዉ ፡ በሱባዔ ፡ ቀዳሚ ፡ በሣልስ ፡ ዓመት ፡ በሱባዔሁ ፡ ለዝ ፡ ወጸውዐ ፡ ስሞ ፡ መላልኤል ። ወቀተሎ ፡ በገዳም ፡ ወጸርኀ ፡ ደሙ ፡ እምድር ፡ ውስተ ፡ ሰማይ ፡ እንዘ ፡ ይበኪ ፡ በአንተ ፡ ዘተቀትለ ። ወዘለፎ ፡ እግዚአብሔር ፡ ለቃየን ፡ በእንተ ፡ አቤል ፡ በእንተ ፡ ዘቀተሎ ፡ ወገብረ ፡ ሎቱ ፡ ኑኅ ፡ ዲበ ፡ ምድር ፡ በእንተ ፡ ደመ ፡ እፓኑሁ ፡ ወረገሞ ፡ በዲበ ፡ ምድር ። በእንተ ፡ ዝንቱ ፡ ተጽሕፈ ፡ ውስተ ፡ ጽሳተ ፡ ሰማይ ፡ ርጉም ፡ ዘይዘብጥ ፡ ካልኦ ፡ በእከይ ፡ ወይቤሉ ፡ ኵሎሙ ፡ እለ ፡ ርእዩ ፡ ይኩን ፡ ወሰብእ ፡ ዘርእየ ፡ ወኢነ ፡ ገረ ፡ ይኩን ፡ ርጉመ ፡ ከማሁ ። በእንተዝ ፡ ንሕነ ፡ ናየድዕ ፡ መጺአነ ፡ ቅድመ ፡ እግዚአብሔር ፡ አምሳክነ ፡ ዙሎ ፡ ኃጢአተ ፡ ዘይከውን ፡ ውስተ ፡ ሰማይ ፡ ወምድር ፡ ወዘበብርሃን ፡ ወዘበጽልመት ፡ ወዘበዙሉ ። ወሀለዉ ፡ አዳም ፡ ወብእሲቱ ፡ እንዘ ፡ ይሳሕዉ ፡ በእንተ ፡ አቤል ፡ አርባዕተ ፡ ሱባዔ ፡ ዓመት ። በሱባዔ ፡ ሳድስ ፡ ወለዳ ፡ ለአዙራ ፡ ወለቱ ። ወነሥአ ፡ ቃየን ፡ ለአዋን ፡ እኅቱ ፡ ሎቱ ፡ ብእሲተ ፡ ወወለደት ፡ ሎቱ ፡ ኡኖኅሃ ፡ በፍጸሚ ፡ ራብዕ ፡ ኢዮቤልዉ ። ወአዳም ፡ አእመራ ፡ ለሔዋ ፡ ብእሲቱ ፡ ወወለደት ፡ ዓዲ ፡ ተስዓተ ፡ ደቂቀ ። ወበሱባዔ ፡ ኃምስ ፡ ዘኃምስ ፡ ኢዮቤልዉ ፡ ነሠአ ፡ ሴት ፡ ለአዙራ ፡ እኅቱ ፡ ሎቱ ፡ ብእሲተ ፡ ወበራብዑ ፡ ሎቱ ፡ ወለደት ፡ ሎቱ ፡ ሄኖስሃ ፡ 12 ውእቱ ፡ ቀዳሚ ፡ ጸውዖ ፡ ስመ ፡ እግዚአብሔር ፡ በዲበ ፡ ምድር ። ወበሳብዕ ፡ ኢዮቤልዉ ፡ በሱባዔ ፡ ሣልስ ፡ ነሥአ ፡ ኡኖስ ፡ ኖአምሃ ፡ እኅቶ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በሣልስ ፡ ዓመት ፡ ዘኃምስ ፡ ሱባዔ ፡ ወሰመዮ ፡ ስሞ ፡ ቃይ ፡ ናን ። ወበፍጸሜ ፡ ሳምን ፡ ኢዮቤልዉ ፡ ነሥአ ፡ ሎቱ ፡ ቃይናን ፡ ብእሲተ ፡ ሙአሌሊትሃ ፡ እኅቶ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በታስዕ ፡ ኢዮቤልዉ ፡ በሱባዔ ፡ ቀዳሚ ፡ በሣልስ ፡ ዓመት ፡ በሱባዔሁ ፡ ለዝ ፡ ወጸውዐ ፡ ስሞ ፡ መሳልኡል ። ወበካልእ ፡ ሱባዔ ፡ ዘዓሥር ፡ ኢዮቤልዉ ፡ ነሥአ ፡ ሎቱ ፡ መላልኤል ፡ ብእሲተ ፡ ዲናሃ ፡ ወለተ ፡ በራክኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ። ወበዓሥር ፡ ወአሐዱ ፡ ኢዮቤልዉ ፡ ነሥአ ፡ ሎቱ ፡ ያሬድ ፡ ብእሲተ ፡ ወስማ ፡ ባረከ ፡ ወለተ ፡ ራሱእያል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ በሱባዔ ፡ ራብዕ ፡ ዘኢዮቤልዉ ፡ ዝንቱ ። ውእቱ ፡ ቀዳሚ ፡ ተምህረ ፡ መጽሐፈ ፡ ወትምህርተ ፡ ወጥበበ ፡ እምእጓለ ፡ እመሕያው ፡ እምእለ ፡ ተወልዱ ፡ ዲበ ፡ ምድር ። ውእቱ ፡ ቀዳሚ ፡ ጸሐፈ ፡ እምዐ ፡ ወአስምዐ ፡ ለደቂቀ ፡ እጓለ ፡ እመሕያው ፡ ውስተ ፡ ትዝምደ ፡ ምድር ፡ ወሱባዔሆሙ ፡ ለኢዮቤልዉሳት ፡ ነገረ ፡ ወመዋዕለ ፡ ዓመታት ፡ አይድዐ ፡ ወአውራኃተ ፡ ሠርዐ ፡ ወሰንበታተ ፡ ዓመታት ፡ ነገረ ፡ በከመ ፡ አይዳዕናሁ ፡ 19 ወዘኮነ ፡ ወዘይከውን ፡ ርእየ ፡ በራእየ ፡ ንዋሙ ፡ ዘከመ ፡ ይከውን ፡ ዲበ ፡ ደቂቀ ፡ እጓለ ፡ እመሕያው ፡ በትውልዶሙ ፡ እስከ ፡ አመ ፡ ዕለተ ፡ ደይን ፡ ኵሎ ፡ ርእየ ፡ ወአእመረ ። ወበዐሠርቱ ፡ ወክልኤቱ ፡ ኢዮበቤልዉ ፡ በሳብዕ ፡ ሱባዔሁ ፡ ሎቱ ፡ ነሥአ ፡ ሎቱ ፡ ብእኢተ ፡ ወስማ ፡ እድኒ ፡ ወለተ ፡ ዳንኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ። ወሀሎ ፡ እንከ ፡ ምስለ ፡ መላእክተ ፡ አምላክ ፡ ስድስተ ፡ ዘኢዮቤልዉሳት ፡ ዓመታተ ። ወአስምዐ ፡ ለትጉሃን ፡ ለእለ ፡ አበሱ ፡ ምስለ ፡ አዋልደ ፡ ሰብእ ። ወተንሥአ ፡ እማእከለ ፡ ደቂቀ ፡ እጓለ ፡ እመሕያው ፡ ወወሰድናሁ ፡ ውስተ ፡ ገነተ ፡ ኤዶም ፡ ለዕበይ ፡ ወለክብር ። ወበእንቲአሁ ፡ ኢመጽአ ፡ ማየ ፡ አይኅ ፡ ዲበ ፡ ኵሉ ፡ ምድረ ፡ ኤዶም ፡ እስመ ፡ ህየ ፡ ተውህበ ፡ ውእቱ ፡ ለትእምርት ፡ ወከመ ፡ ያስምዕ ፡ ላዕለ ፡ ኵሉ ፡ ደቂቀ ፡ ሰብእ ፡ ከመ ፡ ይንግር ፡ ኵሎ ፡ ግብረ ፡ ትውልድ ፡ እስከ ፡ አመ ፡ ዕለተ ፡ ደይን ፡ 25 ወውእቱ ፡ ዐጠነ ፡ ዕጣነ ፡ ምሴተ ፡ መቅደስ ፡ ዘይሰጠው ፡ ቅድመ ፡ እግዚአብሔር ፡ በደብረ ፡ ቀትር ። እስመ ፡ አርባዕቱ ፡ መካን ፡ በዲበ ፡ ምድር ፡ ለእግዚአብሔር ፡ ገነተ ፡ ኤዶም ፡ ወደብረ ፡ ጽባሕ ፡ ወዝደብር ፡ ዘሀሎከ ፡ አንተ ፡ ውስቴቱ ፡ ደብረ ፡ ሲና ፡ ዮም ፡ ወደብረ ፡ ጽዮን ፡ ይትቄደስ ፡ በፍጥረት ፡ ሐዳስ ፡ ለቅዳሴ ፡ ምድር ፡ በእንተዝ ፡ ትትቄደስ ፡ ምድር ፡ እምኵሉ ፡ አበሳ ፡ ወእምርኵሳ ፡ በትውልደ ፡ ዓለም ። ወበኢዮቤልዉ ፡ ዘውእቱ ፡ ዓሥር ፡ ወራብዕ ፡ ኢዮቤልዉ ፡ ነሥአ ፡ ማቱሳላ ፡ እድናሃ ፡ ብእሲቶ ፡ ወለተ ፡ እዝራኤል ፡ ወለተ ፡ እኅተ ፡ አቡሁ ፡ ብእሲተ ፡ ሎቱ ፡ በሱባዔ ፡ ሣልስ ፡ በዓመት ፡ አሐዱ ፡ ዘውእቱ ፡ ዓመት ፡ ወወለደ ፡ ወልደ ፡ ወጸውዐ ፡ ስሞ ፡ ላሜክ ፡ 28 ወበዓሥር ፡ ወኃምስ ፡ ኢዮቤልዉ ፡ በሱባዔ ፡ ሣልስ ፡ ነሥአ ፡ ላሜክ ፡ ብእሲተ ፡ ወስማ ፡ ቤተኖስ ፡ ወለተ ፡ በራክኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ ወበዝ ፡ ሱባዔ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ኖኅ ፡ እንዘ ፡ ይብል ፡ ዘይናዝዘኒ ፡ እምሐዘንየ ፡ ወእምኵሉ ፡ ግብርየ ፡ ወእምድር ፡ እንተ ፡ ረገማ ፡ እግዚአብሔር ። ወበፍጻሜሁ ፡ ለዓሥር ፡ ወታስዕ ፡ ኢዮቤልዉ ፡ በሱባዔ ፡ ሳብዕ ፡ በሳድስ ፡ ዓመቱ ፡ ሎቱ ፡ ሞተ ፡ አዳም ፡ ወቀበርዎ ፡ ኵሎሙ ፡ ደቂቁ ፡ ወስተ ፡ ምድረ ፡ ፍጥረቱ ። ወሰብዓ ፡ ዓመተ ፡ አሕጸጸ ፡ እምዐሠርቱ ፡ ምእት ፡ ዓም ፡ እስመ ፡ ዐሠርቱ ፡ ምእት ፡ ዓመት ፡ አሐቲ ፡ ዕለተ ፡ ውስተ ፡ ስምዐ ፡ ሰማያት ። በተፍጻሜቱ ፡ ለዝንቱ ፡ ኢዮቤልዉ ፡ ተቀትለ ፡ ቃየን ፡ እምድኅሬሁ ፡ በአሐዱ ፡ ዓም ፡ ወወድቀ ፡ ቤቱ ፡ ላዕሌሁ ፡ ወሞተ ፡ በማእከለ ፡ ቤቱ ፡ ወተቀትለ ፡ በእበኒሃ ። በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ በንዋይ ፡ ዘቀተለ ፡ ብእሲ ፡ ቢጾ ፡ ቦቱ ፡ ይትቀትል ፡ በከመ ፡ አቍሰሎ ፡ ከማሁ ፡ ይግበሩ ፡ ሎቱ ። ወበዕሥራ ፡ ወኃምስ ፡ ኢዮቤልዉ ፡ ነሥአ ፡ ሎቱ ፡ ኖኅ ፡ ብእሲተ ፡ ወስማ ፡ ዕምዛራ ፡ ወለተ ፡ ራኪኤል ፡ ወለተ ፡ እኅቱ ፡ ሎቱ ፡ ብእሲተ ።

Chapter 5 ወኮነ ፡ አመ ፡ ወጠኑ ፡ ደቂቀ ፡ እጓለ ፡ እመሕያው ፡ ይብዝኁ ፡ ዲበ ፡ ገጸ ፡ ኵላ ፡ ምድር ፡ ወአዋልድ ፡ ተወልዳ ፡ ሎሙ ። ወልህቀት ፡ ዐመፃ ፡ ዲበ ፡ ምድር ፡ ወኵሉ ፡ ዘሥጋ ፡ አማሰነት ፡ ፍኖታ ፡ እምሰብእ ፡ እስከ ፡ እንስሳ ፡ ወእስከ ፡ አራዊት ፡ ወእስከ ፡ አዕዋፍ ፡ ወእስከ ፡ ኵሉ ፡ ዘያንሶሱ ፡ ውስተ ፡ ምድር ፡ ኵሎሙ ፡ አማሰኑ ፡ ፍኖቶሙ ፡ ወሥርዓቶሙ ። ወርእያ ፡ እግዚአብሔር ፡ ለምድር ፡ ወናሁ ፡ ማሰነት ፡ ወአማሰነት ፡ ኵላ ፡ ዘሥጋ ፡ ሥርዓታ ፡ ወአእከዩ ፡ ኵሎሙ ፡ ቅድመ ፡ አዕይንቲሁ ፡ ኩሉ ፡ ዘሀሎ ፡ ውስተ ፡ ምድር ። ወይቤ ፡ ይደመስሶ ፡ ለሰብእ ፡ ወኵሉ ፡ ዘሥጋ ፡ ዘመልዕልተ ፡ ገጸ ፡ ምድር ፡ ዘፈጠረ ። ወኖኅ ፡ ባሕቲቱ ፡ ረከበ ፡ ሞገሰ ፡ በቅድመ ፡ አዕይንቲሁ ። ወዲበ ፡ መላእክቲሁ ፡ እለ ፡ ፈነወ ፡ ውስተ ፡ ምድር ፡ ተምዐ ፡ ፈድፋደ ፡ ይሠርዎሙ ፡ እምኵሉ ፡ ሥልጣኖሙ ። ወዲበ ፡ ውሉዶሙ ፡ ወፅአ ፡ ቃል ፡ እምቅድመ ፡ ገጹ ፡ ከመ ፡ ይምሐፆሙ ፡ በሰይፍ ፡ ወያሰስሎሙ ፡ እምታሕተ ፡ ሰማይ ፡ 8 ወይቤ ፡ ኢይነብር ፡ መንፈስየ ፡ ዲበ ፡ ሰብእ ፡ ለዓለም ፡ እስመ ፡ እሙንቱ ፡ ሥጋ ፡ ወይኩን ፡ መዋዕሊሆሙ ፡ ምእት ፡ ወዕሥራ ፡ ዓመት ። ወፈነወ ፡ ሰይፎ ፡ ማእከሎሙ ፡ ከመ ፡ ይቅትሉ ፡ አሐዱ ፡ ቢጾሙ ። ወአበዊሆሙሰ ፡ ይኔጽሩ ፡ ወእምድኅረዝ ፡ ተአስሩ ፡ ውስተ ፡ መዓምቅቲሃ ፡ ለምድር ፡ እስከ ፡ ዕለተ ፡ ደይን ፡ ዐባይ ፡ ለከዊነ ፡ ኵነኔ ፡ ዲበ ፡ ኵሎሙ ፡ እለ ፡ አማሰኑ ፡ ፍናዊሆሙ ፡ ወምግባሪሆሙ ፡ ቅድመ ፡ እግዚአብሔር ። ወደምሰሰ ፡ ኵሎ ፡ እመካኖሙ ፡ ወኢተርፈ ፡ አሐዱ ፡ እምኔሆሙ ፡ ዘኢኰነነ ፡ በኵሉ ፡ እከዮሙ ፡ ወገብረ ፡ ለኵሉ ፡ ግብሩ ፡ ፍጥረተ ፡ ሐዳሰ ፡ ወጻድቅተ ፡ ከመ ፡ ኢየአብሱ ፡ በኵሉ ፡ ፍጥረቶሙ ፡ እስከ ፡ ለዓለም ። ወኵነኔ ፡ ኵሎሙ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ወአልቦ ፡ ዐመፃ ። ወአልቦ ፡ ምንተኒ ፡ ዘበሰማይ ፡ ወዘበምድር ፡ ወውስተ ፡ ብርሃን ፡ ወውስተ ፡ ጽልመት ፡ ወበሲኦል ፡ ወውስተ ፡ ቀላይ ። በእንተ ፡ ኵሉ ፡ ለዐቢይ ፡ በከመ ፡ ዕበዩ ፡ ወለንኡስሂ ፡ በከመ ፡ ንእሱ ፡ ወለለ ፡ አሐዱ ፡ በከመ ፡ ፍኖቱ ፡ ይኴንኖ ። ወኢኮነ ፡ ውእቱ ፡ ዘይነሥእ ፡ ገጸ ፡ ወኢኮነ ፡ ውእቱ ፡ ዘይነሥእ ፡ ሕልያነ ፡ እመ ፡ ይቤ ፡ ይግበር ፡ ኵነኔ ፡ ለለ ፡ አሐዱ ፡ ወአሐዱ ፡ እመ ፡ ወሀበ ፡ ኵሎ ፡ ዘውስተ ፡ ምድር ፡ ኢይነሥእ ፡ ገጸ ፡ ወኢይትሜጠው ፡ እምኔሁ ፡ እስመ ፡ መኰንነ ፡ ጽድቅ ፡ ውእቱ ። ወዲበ ፡ ደቂቀ ፡ እስራኤል ፡ ተጽሕፈ ፡ ወተሠርዐ ፡ እመ ፡ ተመይጡ ፡ ኀቤሁ ፡ በጽድቅ ፡ የኀድግ ፡ ኵሎ ፡ አበሳሆሙ ፡ ወይሰሪ ፡ ኵሎ ፡ ኀጢአቶሙ ፡ 18 ተጽሕፈ ፡ ወተሠርዐ ፡ ይትመሐር ፡ ለኵሉ ፡ እለ ፡ ይትመየጡ ፡ እምኵሉ ፡ ጌጋዮሙ ። ወዲበ ፡ ኵሎሙ ፡ እለ ፡ አማሰኑ ፡ ፍናዊሆሙ ፡ ወምክሮሙ ፡ እምቅድመ ፡ አይኅ ፡ ኢተንሥአ ፡ ገጾሙ ፡ ዘእንበለ ፡ ለኖኅ ፡ ባሕቲቱ ፡ እስመ ፡ ተንሥአ ፡ ሎቱ ፡ ገጹ ፡ በእንተ ፡ ውሉዱ ፡ እለ ፡ አድኀኖሙ ፡ እምነ ፡ ማየ ፡ አይኅ ፡ በእንቲአሁ ፡ እስመ ፡ ጻድቅት ፡ ይእቲ ፡ ልቡ ፡ በኵሉ ፡ ፍናዊሁ ። ወይቤ ፡ እግዚአብሔር ፡ ይደመስስ ፡ ኵሉ ፡ ዘዲበ ፡ የብስ ፡ እምሰብእ ፡ እስከ ፡ እንስሳ ፡ እስከ ፡ አራዊት ፡ ወእስከ ፡ አዕዋፍ ፡ ወእስከ ፡ ዘይትሐወስ ፡ ዲበ ፡ ምድር ። ወአዘዞ ፡ ለኖኅ ፡ ይግበር ፡ ሎቱ ፡ ታቦተ ፡ ከመ ፡ ያድኅኖ ፡ እምነ ፡ ማየ ፡ አይኅ ። ወገብረ ፡ ኖኅ ፡ ታቦተ ፡ በኵሉ ፡ በከመ ፡ አዘዞ ፡ በክልኤቱ ፡ ኢዮቤልዉ ፡ ዓመታት ፡ በኃምስ ፡ ሱባዔ ፡ በኃምስ ፡ ዓመቱ ። ወቦአ ፡ በሳድስ ፡ ሎቱ ፡ በካልእ ፡ ወርኅ ፡ በሠርቁ ፡ ለካልእ ፡ ወርኅ ፡ እስከ ፡ አመ ፡ ዐሡሩ ፡ ወሰዱሱ ፡ ቦአ ፡ ውእቱ ፡ ወኵሉ ፡ ዘአባእነ ፡ ሎቱ ፡ ወስተ ፡ ታቦት ። ወአርኀወ ፡ እግዚአብሔር ፡ ሰብዓተ ፡ መንበሕባሕተ ፡ ሰማይ ፡ ወአፈወ ፡ አንቅዕተ ፡ ቀላይ ፡ ዐቢይ ፡ በሰብዑ ፡ አፈው ፡ በኆልቍ ። ወአኀዙ ፡ መንበሕባሕት ፡ ያውርዱ ፡ ማየ ፡ እምሰማይ ፡ አርብዓ ፡ መዋዕለ ፡ ወአርብዓ ፡ ለያልየ ። ወልህቅ ፡ ማያት ፡ ዲበ ፡ ምድር ፡ ዐሠርተ ፡ ወኃምስተ ፡ በእመት ፡ ተለዐለ ፡ ማያት ፡ ዲበ ፡ ኵሉ ፡ ደብር ፡ ነዋኅ ፡ ወተለዐለት ፡ ታቦት ፡ እምዲበ ፡ ምድር ፡ ወታንሶሱ ፡ ዲበ ፡ ገጸ ፡ ማያት ። ወሀሎ ፡ ማያት ። ወሀሎ ፡ ማያት ፡ ይቀውም ፡ ዲበ ፡ ገጸ ፡ ምድር ፡ ኃምስተ ፡ አውራኀ ፡ ምእተ ፡ ወኃምሳ ፡ ዕለተ ፡ ወሖረት ፡ ታቦት ፡ ወአዕረፈት ፡ ዲበ ፡ ርእሰ ፡ ሉባር ፡ አሐዱ ፡ እምአድባር ፡ አራራት ። ወበወርኅ ፡ ራብዕ ፡ ተፈጸመ ፡ አንቅዕተ ፡ ቀላይ ፡ ዐቢይ ፡ ወመንበሕባሕተ ፡ ሰማይኒ ፡ ተእኅዘ ። ወበሠርቀ ፡ ወርኅ ፡ ዓሥር ፡ አስተርአየ ፡ አርእስተ ፡ አድባር ። ወነጸፈ ፡ ማያት ፡ እመልዕልተ ፡ ምድር ። ወአመ ፡ ዕሥራ ፡ ወሰቡዑ ፡ ሎቱ ፡ አርኀዋ ፡ ለታቦት ፡ ወፈነወ ፡ እምውስቴታ ፡ አራዊተ ፡ ወአዕዋፈ ፡ ወዘይትሐወስ ።

Chapter 6 ወአመ ፡ ሠርቁ ፡ ለወርኅ ፡ ሣልስ ፡ ወፅእ ፡ እምነ ፡ ታቦት ። ወአስተርአየ ፡ ዲበ ፡ ምድር ፡ ወነሥአ ፡ ማሕስአ ፡ ጠሊ ፡ ወአስተስረየ ፡ በደሙ ፡ በእንተ ፡ ኵሉ ፡ አበሳ ፡ ምድር ፡ እስመ ፡ ተደምሰሰ ፡ ኵሉ ፡ ዘሀሎ ፡ ውስቴታ ፡ ዘእንበለ ፡ እለ ፡ ሀለዉ ፡ ውስተ ፡ ታቦት ፡ ምስለ ፡ ኖኅ ። ወአዕረገ ፡ ስብሐ ፡ ዲበ ፡ ምሥዋአ ፡ ወነሥአ ፡ ላህመ ፡ ወበሐኰ ፡ ወበግዐ ፡ ወአጣሌ ፡ ወፄወ ፡ ወመንጤጠ ፡ ወእጓለ ፡ ርግብ ። ወአጼነወ ፡ እግዚአብሔር ፡ መዓዛ ፡ ሠናየ ፡ ወተካየደ ፡ ምስሌሁ ፡ ኪዳነ ፡ ከመ ፡ ኢይኩን ፡ ማየ ፡ አይኅ ፡ ዘያማስን ፡ ምድረ ፡ ኵሎ ፡ መዋዕለ ፡ ምድር ፡ ዘርእ ፡ ወማእረር ፡ ኢይትነተግ ፡ ደደክ ፡ ወመርቄ ፡ ሐጋይ ፡ ወክረምት ፡ ወመዓልት ፡ ወሌሊት ፡ ኢይወልጡ ፡ ሥርዓቶሙ ፡ ወኢይንተጉ ፡ ለዓለም ። ወአንትሙኒ ፡ ለሀቁ ፡ ወተባዝኁ ፡ ውስተ ፡ ምድር ፡ ወብዝኁ ፡ ላዕሌሃ ፡ ወኩኑ ፡ ለበረከት ፡ ማእከለ ፡ ፍርሃትክሙ ፡ ወረዓድክሙ ። ወናሁ ፡ ወሀብኩክሙ ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ ዘይሰርር ፡ ወኵሎ ፡ ዘይትሐወስ ፡ ውስተ ፡ ምድር ፡ ወውስተ ፡ ማያት ፡ ዓሣተ ፡ ወኵሎ ፡ ለሲሲት ፡ ከመ ፡ ሐምለ ፡ ሣዕር ፡ ወሀብኩክሙ ፡ ኵሎ ፡ ትብልዑ ። ወባሕቱ ፡ ሥጋ ፡ ዘምስለ ፡ መንፈሱ ፡ ምስለ ፡ ደም ፡ ኢትብልዑ ፡ እስመ ፡ ነፍሰ ፡ ኵሉ ፡ ዘሥጋ ፡ ውስተ ፡ ደም ፡ ውእቱ ፡ ከመ ፡ ኢይትኃሠሥ ፡ ደምክሙ ፡ ውስተ ፡ ነፍሳቲክሙ ፡ እምውስተ ፡ እደ ፡ ኵሉ ፡ ሰብእ ፡ እምእደ ፡ ኵሉ ፡ አኀሥሦ ፡ ለደመ ፡ ሰብእ ። ዘይክዑ ፡ ደመ ፡ ሰብእ ፡ በሰብእ ፡ ደሙ ፡ ይትከዐው ፡ እስመ ፡ በመልክዐ ፡ እግዚአብሔር ፡ ገብሮ ፡ ለአዳም ፡ 9 ወአንትሙሂ ፡ ለሀቁ ፡ ወብዝኁ ፡ ዲበ ፡ ምድር ። ወመሐሉ ፡ ኖኅ ፡ ወደቂቁ ፡ ከመ ፡ ኢይብልዑ ፡ ኵሎ ፡ ደመ ፡ ዘበኵሉ ፡ ሥጋ ። በእንተ ፡ ዝንቱ ፡ ተናገረከ ፡ ትትካየድ ፡ ኪዳነ ፡ አንተኒ ፡ ምስለ ፡ ደቂቀ ፡ እስራኤል ፡ በዝ ፡ ወርኅ ፡ በዲበ ፡ ደብር ፡ ምስለ ፡ መሐላ ። ወጽሕፍት ፡ ዛቲ ፡ ስምዕ ፡ ላዕሌክሙ ፡ ከመ ፡ ትዕቀብዋ ፡ ኵሎ ፡ መዋዕለ ፡ ከመ ፡ ኢትብልዑ ፡ በኵሉ ፡ መዋዕል ፡ ኵሎ ፡ ደመ ፡ አራዊት ፡ ወአዕዋፍ ፡ ኵሎ ፡ መዋዕለ ፡ ምድር ። ወአንተ ፡ አዝዞሙ ፡ ለደቂቀ ፡ እስራኤል ፡ ኢይብልዑ ፡ ኵሎ ፡ ደመ ፡ ከመ ፡ የሀሉ ፡ ስሞሙ ፡ ወዘርኦሙ ፡ ቅድመ ፡ እግዚአብሔር ፡ አምላክነ ፡ መዋዕለ ። ወአልቦ ፡ ለዝሕግ ፡ ዐቅመ ፡ መዋዕል ፡ እስመ ፡ ለዓለም ፡ ውእቱ ፡ ይዕቀብዎ ፡ ለትውልድ ፡ ከመ ፡ ይኩኑ ፡ እንዘ ፡ ይትመሀለሉ ፡ በእንቲአሆሙ ፡ በደም ፡ በቅድመ ፡ ምሥዋዕ ፡ በኵሉ ፡ ዕለት ፡ ወዕለተ ፡ ነግህ ፡ ወሰርክ ፡ ያስተስርዩ ፡ በእንቲአሆሙ ፡ ወትረ ፡ ቅድመ ፡ እግዚአብሔር ፡ ከመ ፡ ይዕቀብዎ ፡ ወኢይሠረዉ ። ወወሀቦ ፡ ለኖኅ ፡ ወለደቂቁ ፡ ትእምርተ ፡ ከመ ፡ ኢይኩን ፡ ዳግመ ፡ አይኅ ፡ ዲበ ፡ ምድር ፡ 16 ቀስቶ ፡ ወሀበ ፡ ውስተ ፡ ደመና ፡ ለትእምርተ ፡ ኪዳን ፡ ዘለዓለም ። በእንተዝ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ከመ ፡ ይኩኑ ፡ ገበርተ ፡ በዓል ፡ ዘሱባዔ ፡ በዝ ፡ ወርኅ ፡ ምዕረ ፡ ለዓመት ፡ ለሐዲስ ፡ ኪዳን ፡ በኵሉ ፡ ዓም ፡ ወዓመት ። ወኮነት ፡ ኵላ ፡ ዛቲ ፡ በዓል ፡ እንዘ ፡ ትትገበር ፡ በሰማይ ፡ እምዕለተ ፡ ፍጥረት ፡ እስከ ፡ መዋዕለ ፡ ኖኅ ፡ ዕሥራ ፡ ወስድስቱ ፡ ኢዮቤልዉ ፡ ወሱባዔ ፡ ዓመት ፡ ኃምስተ ፡ ወዐቀብዋ ፡ ኖኅ ፡ ወደቂቁ ፡ ሰብዓተ ፡ ኢዮቤልዉ ፡ ወሱባዔ ፡ ዓመታት ፡ አሐተ ፡ እስከ ፡ አመሞቱ ፡ ለኖኅ ፡ ወእምዕለተ ፡ ሞቱ ፡ ለኖኅ ፡ አማስኑ ፡ ውሉዱ ፡ እሰከ ፡ አመ ፡ መዋዕለ ፡ አብርሃም ፡ ወይበልዑ ፡ ደመ ። ወአብርሃም ፡ ባሕቲቱ ፡ ዐቀበ ፡ ወይስሐቅ ፡ ወያዕቆብ ፡ ውሉዱ ፡ ዐቀብዋ ፡ እስከ ፡ መዋዕሊከ ። ወአንተሂ ፡ አዝዞሙ ፡ ለውሉደ ፡ እስራኤል ፡ ወይዕቀብዋ ፡ ለዛቲ ፡ በዓል ፡ በኵሉ ፡ ትዝምዶሙ ፡ ለትእዛዝ ፡ ሎሙ ፡ ዕለተ ፡ አሐተ ፡ በዓመት ፡ በዝ ፡ ይግበሩ ፡ በዓለ ፡ ባቲ ፡ 21 እስመ ፡ በዓለ ፡ ሱባዔያት ፡ ይእቲ ፡ ወበዓለ ፡ ቀዳሜ ፡ ፍሬ ፡ ይእቲ ፡ ክልኤ ፡ ዕፅፈት ፡ ይእቲ ፡ ወለክልኤ ፡ ዘመድ ፡ ዛቲ ፡ በዓል ፡ በከመ ፡ ጽሑፍ ፡ ወቍሩጽ ፡ በእንቲአሃ ፡ ግብራ ፡ 22 እስመ ፡ ጸሐፍኩ ፡ ውስተ ፡ መጽሐፈ ፡ ሕግ ፡ ዘቀዳሚ ፡ ውስተ ፡ ዘጸሐፍኩ ፡ ለከ ፡ ትግበራ ፡ በበ ፡ ጊዜሃ ፡ ዕለተ ፡ አሐተ ፡ ለዓመት ። ወበሠርቀ ፡ ወርኅ ፡ ቀዳሚ ፡ ወበሠርቀ ፡ ወርኀ ፡ ራብዕ ፡ ወበሠርቀ ፡ ወርኅ ፡ ዓሥር ፡ ዕለታተ ፡ ተዝካር ፡ እማንቱ ፡ ወዕለታተ ፡ ጊዜ ፡ እማንቱ ። ወኖኅ ፡ ሠርዖን ፡ ሎቱ ፡ ለበዓላት ፡ ለትውልድ ፡ ዘለዓለም ፡ እስከ ፡ አመ ፡ ኮነ ፡ ሎቱ ፡ ቦቶን ፡ ተዝካረ ። በሠርቀ ፡ ወርኅ ፡ ቀዳሚ ፡ ተብህለ ፡ ሎቱ ፡ ይግበር ፡ ታቦተ ፡ ወባቲ ፡ የብሰት ፡ ምድር ፡ ወአርኀወ ፡ ወርእየ ፡ ምድረ ፡ 26 ወበሠርቀ ፡ ወርኅ ፡ ራብዕ ፡ ተፈጸመ ፡ አፈ ፡ መዓምቅቲሃ ፡ ለቀላይ ፡ ታሕቲት ፡ ወበሠርቀ ፡ ወርኅ ፡ ሳብዕ ፡ ተርኅወ ፡ ኵሉ ፡ አፈወ ፡ መዓምቅተ ፡ ምድር ፡ ወአኀዘ ፡ ማያት ፡ ይረድ ፡ ውስቴቱ ። ወበሠርቀ ፡ ወርኀ ፡ ዓሥር ፡ አስተርአየ ፡ አርእስተ ፡ አድባር ፡ ወተፈሥሐ ፡ ኖኅ ። በእንተዝ ፡ ሠርዖን ፡ ኪያሆን ፡ ሎቱ ፡ ለበዓላት ፡ ለተዝካር ፡ እስከ ፡ ለዓለም ። ወያዐርግዎን ፡ ውስተ ፡ ጽላተ ፡ ሰማይ ። ወይከውና ፡ ኵሎን ፡ መዋዕል ፡ ዘትእዛዛት ፡ ኀምሳ ፡ ወክልኤ ፡ ሰንበታተ ፡ መዋዕል ። ከመዝ ፡ ተቈርዐ ፡ ወተሠርዐ ፡ ውስተ ፡ ጽላተ ፡ ሰማይ ። ወአንተኒ ፡ አዝዞሙ ፡ ለደቂቀ ፡ እስራኤል ፡ ወይዕቀቡ ፡ ዓመታተ ፡ በዝ ፡ ኆልቍ ፡ ሠለስተ ፡ ምእተ ፡ ወስሳ ፡ ወረቡዐ ፡ መዋዕለ ፡ ወይከውን ፡ ፍጹመ ፡ ዓመት ። ወለእመ ፡ ተዐደዉ ፡ ወኢገብርዎን ፡ በከመ ፡ ትእዛዙ ፡ ሎቱ ፡ አሜሃ ፡ ኵሎሙ ፡ ያማስኑ ፡ ጊዜያቲሆሙ ፡ ወዓመታትኒ ፡ ይትሐወሱ ፡ ዘእምውስተዝ ፡ ወጊዜያትሂ ፡ ያማስኑ ፡ ወዓመታትሂ ፡ ይትሐወሱ ፡ ወይትዐደዉ ፡ ሥርዓቶሙ ። ወኵሎሙ ፡ ውሉደ ፡ እስራኤል ፡ ይረስዑ ፡ ወኢይረክቡ ፡ ፍኖተ ፡ ዓመታት ። አአምር ፡ አነ ። ወይከውኑ ፡ እለ ፡ ያስተሐይጹ ፡ ወርኀ ፡ በሑያጼ ፡ ወርኅ ። በእንተዝ ፡ ይመጽእ ፡ ዓመታት ፡ ሎሙ ፡ እንዘ ፡ ያማስኑ ፡ ወይገብሩ ፡ ዕለተ ፡ ስምዕ ፡ ምንንተ ። በእንተዝ ፡ አነ ፡ እኤዝዘከ ፡ ወአሰምዕ ፡ ለከ ፡ ከመ ፡ ታስምዕ ፡ ሎሙ ፡ እስመ ፡ እምድኅረ ፡ ሞትከ ፡ ያማስኑ ፡ ውሉድከ ፡ ከመ ፡ ኢይግበሩ ፡ ዓመተ ፡ ሠለስተ ፡ ምእተ ፡ ወስሳ ፡ ወረቡዐ ፡ ባሕቲቶን ።

Chapter 7 ወበሱባዔ ፡ ሳብዕ ፡ በቀዳሚ ፡ ዓመቱ ፡ ሎቱ ፡ በዝ ፡ ኢዮቤልዉ ፡ ተከለ ፡ ኖኅ ፡ ወይነ ፡ ኀበ ፡ ደብር ፡ እንተ ፡ ዲቤሁ ፡ አዕረፈት ፡ ታቦት ፡ ዘስሙ ፡ ሉባር ፡ እምአድባረ ፡ አራራት ፡ ወገብረ ፡ ፍሬ ፡ በራብዕ ፡ ዓመት ፡ ወዐቀበ ፡ ፍሬሁ ፡ ወቀሰሞ ፡ በውእቱ ፡ ዓመት ፡ በወርኅ ፡ ሳብዕ ፡ 2 ወገብረ ፡ እምውስቴቱ ፡ ወይነ ፡ ወወደዩ ፡ ውስተ ፡ ንዋይ ፡ ወዐቀቦ ፡ እስከ ፡ ዓመት ፡ ኃምስቱ ፡ እስከ ፡ ዕለት ፡ ቀዳሚት ፡ በሠርቀ ፡ ወርኅ ፡ ቀዳሚት ፡ 3 ወገብረ ፡ ዕለተ ፡ ዛቲ ፡ በዓል ፡ በፍሥሐ ። ወገብረ ፡ ማሕስአ ፡ ቅድመ ፡ ወአንበረ ፡ እምነ ፡ ደሙ ፡ ዲበ ፡ ሥጋ ፡ ዘምሥዋዕ ፡ ዘገብረ ፡ ወኵሎ ፡ ስብሐ ፡ አዕረገ ፡ ውስተ ፡ ምሥዋዕ ፡ ዘኀበ ፡ ገብረ ፡ ጽንሐሐ ፡ ወላህመ ፡ ወበሐኰ ፡ ወአባግዐ ። ወአንበረ ፡ ኵሎ ፡ መሥዋዕቶሙ ፡ ልዉሰ ፡ በቅብእ ፡ ላዕሌሁ ፡ ወእምዝ ፡ ነዝኀ ፡ ወይነ ፡ ውስተ ፡ እሳት ፡ ዘዲበ ፡ ምሥዋዕ ፡ አቅደመ ፡ ወአንበረ ፡ ስሒነ ፡ ዲበ ፡ ምሥዋዕ ፡ ወአዕረገ ፡ መዓዛ ፡ ሠናየ ፡ ዘይሠምር ፡ ቅድመ ፡ እግዚአብሔር ፡ አምላኩ ። ወተፈሥሐ ፡ ወሰትየ ፡ እምዝ ፡ ወይን ፡ ውእቱ ፡ ወውሉዱ ፡ በፍሥሓ ። ወኮነ ፡ ምሴተ ፡ ወቦአ ፡ ውስተ ፡ ሰቀላሁ ፡ ወሰከበ ፡ ስኩሩ ፡ ወኖመ ፡ ወተከሥተ ፡ በውስተ ፡ ሰቀላሁ ፡ እንዘ ፡ ይነውም ። ወርእዮ ፡ ካም ፡ ለኖኅ ፡ አቡሁ ፡ ዕራቆ ። ወነሥአ ፡ ሴም ፡ ልብሰ ፡ ወተንሥአ ፡ ውእቱ ፡ ወያፌት ፡ ወአንበሩ ፡ ልብሰ ፡ ዲበ ፡ መታክፍቲሆሙ ፡ ወገጾሙ ፡ ድኅሪተ ፡ ወከደኑ ፡ ኃፍረተ ፡ አቡሆሙ ፡ ወገጾሙ ፡ ድኅሪተ ። ወነቅሀ ፡ ኖኅ ፡ እምንዋሙ ፡ ወአእመረ ፡ ኵሎ ፡ ዘገብረ ፡ ላዕሌሁ ፡ ወልዱ ፡ ዘይንእስ ፡ ወረገሞ ፡ ለወልዱ ፡ ወይቤ ፡ ርጉም ፡ ከናአን ፡ ቅኑየ ፡ ገብረ ፡ ይኩን ፡ ለአኃዊሁ ። ወባረኮ ፡ ለሴም ፡ ወይቤ ፡ ይትባረክ ፡ እግዚአብሔር ፡ አምላኩ ፡ ለሴም ። ያስፍሕ ፡ እግዚአብሔር ፡ ለያፌት ፡ ወይኅድር ፡ እግዚአብሔር ፡ ውስተ ፡ ማኅደረ ፡ ሴም ፡ ወይኩን ፡ ከናአን ፡ ገብሮሙ ። ወአእመረ ፡ ካም ፡ ከመ ፡ ረገሞ ፡ አቡሁ ፡ ለወልዱ ፡ ዘይንእስ ፡ ወሕሡም ፡ ሎቱ ፡ እስመ ፡ ረገሞ ፡ ለወልዱ ። ወሐነጸ ፡ ሎቱ ፡ ውእቱሂ ፡ ሀገረ ፡ ወጸውዐ ፡ ስማ ፡ በስመ ፡ ብእሲቱ ፡ ኔኤላተማኡክ ። ወርእየ ፡ ያፌት ፡ ወቀንአ ፡ ለእኁሁ ። ወሴምሰ ፡ ነበረ ፡ ምስለ ፡ አቡሁ ፡ ኖኅ ፡ ወሐነጸ ፡ ሀገረ ፡ በእደ ፡ አቡሁ ፡ ኀበ ፡ ደብር ፡ ወጸውዐ ፡ ስማ ፡ ውእቱሂ ፡ በስመ ፡ ብእሲቱ ፡ ሴዴቃቴልባብ ፡ 17 ናሁ ፡ አህጉር ፡ እላንቱ ፡ ሠላስ ፡ ቅሩበ ፡ ሉባር ፡ ደብር ፡ ሴዴቃቴልባብ ፡ ቅድመ ፡ ገጸ ፡ ደብር ፡ በጽባሒሁ ፡ ወናኤልታ ፡ ማኡክ ፡ ገጸ ፡ ሰሜኑ ፡ አዳተኔሴስ ፡ መንገለ ፡ ባሕር ። ወእሉ ፡ ውሉደ ፡ ሴም ፡ ኤላም ፡ ወአሱር ፡ ወአርፋክስድ ። ውሉደ ፡ ያፌት ፡ ጎሜር ፡ ወማጉግ ፡ ወማዳይ ፡ ወኢዩአያቶቤል ፡ ምስክ ፡ ወቲራስ ፡ እሉ ፡ ውሉደ ፡ ኖኅ ። ወበዕሥራ ፡ ወሰማኒቱ ፡ ኢዮቤልዉሳት ፡ አኀዘ ፡ ኖኅ ፡ የአዝዝ ፡ ለውሉደ ፡ ውሉዱ ፡ ሥርዓተ ፡ ወትእዛዛተ ፡ ኵሎ ፡ ዘያአምር ፡ ፍትሐ ፡ ወአስምዐ ፡ ላዕለ ፡ ውሉዱ ፡ ከመ ፡ ይግበሩ ፡ ጽድቀ ፡ ወከመ ፡ ይክድኑ ፡ ኃፍረተ ፡ ሥጋሆሙ ፡ ወከመ ፡ ይባርክዎ ፡ ለዘ ፡ ፈጠሮሙ ፡ ወያክብሩ ፡ አበ ፡ ወእመ ፡ ወያፍቅሩ ፡ አሐዱ ፡ አሐዱ ፡ ቢጾ ፡ ወይዕቀቡ ፡ ነፍሶሙ ፡ እምዝሙት ፡ ወትኵስ ፡ ወእምኵሉ ፡ ዐመፃ ። እስመ ፡ በእንተ ፡ ዝንቱ ፡ ሠለስቱ ፡ ኮነ ፡ አይኅ ፡ ላዕለ ፡ ምድር ፡ እስመ ፡ በእንተ ፡ ዝሙት ፡ ዘዘመዉ ፡ ትጉሃን ፡ እምትእዛዘ ፡ ኵነኔሆሙ ፡ በድኅረ ፡ አዋልደ ፡ ሰብእ ፡ ወነሥኡ ፡ ሎሙ ፡ አንስተ ፡ እምኵሉ ፡ እለ ፡ ኀረዩ ፡ ገብሩ ፡ መቅድመ ፡ ርኵስ ፡ 22 ወወለዱ ፡ ውሉደ ፡ ናፊዲም ፡ ወኵሎሙ ፡ ኢይትማሰሉ ። ወኵሉ ፡ ተሠይጠ ፡ ይግበር ፡ ዐመፃ ፡ ወከመ ፡ ይክዐው ፡ ደመ ፡ ንጹሐ ፡ ወመልአት ፡ ምድር ፡ ዐመፃ ። ወእምድኅረ ፡ እሉ ፡ ኵሎሙ ፡ አራዊት ፡ ወአዕዋፍ ፡ ወዘይትሐወስ ፡ ወዘያንሶሱ ፡ ዲበ ፡ ምድር ። ወደምሰሰ ፡ እግዚአብሔር ፡ ኵሎ ፡ እምገጸ ፡ ምድር ፡ በእንተ ፡ ምግባሮሙ ፡ ወበእንተ ፡ ደም ፡ ማእከለ ፡ ምድር ። ወተረፍነ ፡ አነ ፡ ወአንትሙ ፡ ደቂቅየ ፡ ወኵሉ ፡ ዘቦአ ፡ ምስሌነ ፡ ውስተ ፡ ታቦት ። እስመ ፡ እሬኢ ፡ አነ ፡ ወናሁ ፡ አጋንንት ፡ አስሕቶ ፡ ወጠኑ ፡ ላዕሌክሙ ፡ ወላዕለ ፡ ውሉድክሙ ። እስመ ፡ ኵሉ ፡ ዘይክዑ ፡ ደመ ፡ ሰብእ ፡ ወኵሉ ፡ ዘይበልዕ ፡ ደመ ፡ ዘኵሉ ፡ ዘሥጋ ፡ ይደመሰሱ ፡ ኵሎሙ ፡ እምድር ። ወኢይተርፍ ፡ ኵሉ ፡ ሰብእ ፡ ዘይበልዕ ፡ ደመ ፡ ወዘይክዑ ፡ ደመ ፡ ዲበ ፡ ምድር ። ኵሉ ፡ ደም ፡ ኢያስተርኢ ፡ እምኵሉ ፡ ደም ፡ ላዕሌክሙ ፡ ዘውእቱ ፡ በኵሉ ፡ መዋዕል ፡ ዘጠባሕክሙ ፡ ኵሎ ፡ አርዌ ፡ ወእንስሳ ፡ ወዘይሰርር ፡ ዲበ ፡ ምድር ፡ ወግበሩ ፡ ምጽዋተ ፡ ላዕለ ፡ ነፍስክሙ ፡ በደፊኖቱ ፡ ዘይትከዐው ፡ ዲበ ፡ ገጸ ፡ ምድር ፡ 31 ወኢትኩኑ ፡ ዘይበልዕ ፡ ምስለ ፡ ደም ። ወኢትብልዕዋ ፡ ለነፍስ ፡ ምስለ ፡ ሥጋ ፡ ከመ ፡ ኢይኩኑ ፡ ዘይትኀሠሡ ፡ ደምክሙ ፡ ዘነፍስክሙ ፡ እምእደ ፡ ኵሉ ፡ ዘሥጋ ፡ ዘይክዕው ፡ ዲበ ፡ ምድር ፡ 33 እስመ ፡ ምድር ፡ ኢትነጽሕ ፡ እምነ ፡ ደም ፡ እምዘ ፡ ተክዕወ ፡ ላዕሌሃ ፡ እስመ ፡ በደመ ፡ ዘከዐዎ ፡ ትነጽሕ ፡ ምድር ፡ በኵሉ ፡ ትዝምዳ ። ወይእዜሂ ፡ ውሉድየ ፡ ስምዑ ፡ ግበሩ ፡ ፍትሐ ፡ ወጽድቀ ፡ ከመ ፡ ትተከሉ ፡ በጽድቅ ፡ ውስተ ፡ ገጸ ፡ ኵሉ ፡ ምድር ፡ ወይትሌዐል ፡ ክብርክሙ ፡ በቅድመ ፡ አምላኪየ ፡ ዘአድኀነኒ ፡ እምነ ፡ ማየ ፡ አይኅ ፡ ወናሁ ፡ አንትሙ ፡ ተሐውሩ ፡ ወተሐንጹ ፡ ለክሙ ፡ አህጉረ ፡ ወትተክሉ ፡ ውስቴቶን ፡ ኵሎ ፡ ተክለ ፡ ዘዲበ ፡ ምድር ። ሠለስተ ፡ ዓመተ ፡ ይከውን ፡ ፍሬሁ ፡ ዘኢይትቀሠም ፡ እምኵሉ ፡ ለበሊዖቱ ፡ ወበዓመት ፡ ራብዕ ፡ ይትቄደስ ፡ ፍሬሁ ፡ ወያዐርጉ ፡ ቀዳሜ ፡ ፍሬ ፡ ዘይሠጠው ፡ ቅድመ ፡ እግዚአብሔር ፡ ልዑል ፡ ፈጣሬ ፡ ሰማይ ፡ ወምድር ። ወበዓመት ፡ ኃምስ ፡ ግበሩ ፡ ኅድገቶ ፡ ከመ ፡ ትሕድግዎ ፡ አንትሙ ፡ በጽድቅ ፡ ወበርትዕ ፡ ወትጸድቁ ፡ ወይረትዕ ፡ ኵሉ ፡ ተክልክሙ ፡ 38 እስመ ፡ ከመዝ ፡ አዘዘ ፡ ሄኖክ ፡ አቡሁ ፡ ለአቡክሙ ፡ ለማቱሳላ ፡ ወልዱ ፡ ወማቱሳላ ፡ ለላሜክ ፡ ወልዱ ፡ ወላሜክ ፡ አዘዘኒ ፡ ኵሎ ፡ ዘአዘዝዎ ፡ አበዊሁ ። ወአነሂ ፡ እኤዝዘክሙ ፡ ውሉድየ ፡ በከመ ፡ አዘዞ ፡ ሄኖክ ፡ ለወልዱ ፡ በቀዳሚ ፡ ኢዮቤልዉሳት ፡ እንዘ ፡ ሕያው ፡ ውእቱ ፡ ውስተ ፡ ትዝምዱ ፡ ሳብዕ ፡ አዘዘ ፡ ወአስምዐ ፡ ለውሉዱ ፡ ወለውሉደ ፡ ውሉዱ ፡ እስከ ፡ አመ ፡ ዕለተ ፡ ሞቱ ።

Chapter 8 ወበዕሥራ ፡ ወተስዐቱ ፡ ኢዮቤልዉ ፡ በሱባዐዔ ፡ ቀዳሚ ፡ በቀዳሚሁ ፡ ነሥአ ፡ ሎቱ ፡ አርፋክስድ ፡ ብእሲተ ፡ ወስማ ፡ ራሱእያ ፡ ወለተ ፡ ሱሰን ፡ ወለተ ፡ ኤላም ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በዓመት ፡ ሣልስ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ቃይናም ። ወልህቀ ፡ ወልድ ፡ ወመሀሮ ፡ አቡሁ ፡ መጽሐፈ ፡ ወሖረ ፡ ይኅሥሥ ፡ ሎቱ ፡ መካነ ፡ ኀበ ፡ ይእኅዝ ፡ ሎቱ ፡ ሀገረ ። ወረከበ ፡ መጽሐፈ ፡ ዘቈረፁ ፡ ቀደምት ፡ ውስተ ፡ ኰኩሕ ፡ ወአንበበ ፡ ዘውስቴታ ፡ ወአዕለዋ ፡ ወረስዐ ፡ እምውስቴታ ፡ ከመ ፡ ሀሎ ፡ ውስቴታ ፡ ትምህርት ፡ ዘትጉሃን ፡ በዘ ፡ ይሬእዩ ፡ ሰገለ ፡ ፀሓይ ፡ ወወርኅ ፡ ወከዋክብት ፡ ወውስተ ፡ ኵሉ ፡ ተአምረ ፡ ሰማይ ። ወጸሐፈ ፡ ወኢነገረ ፡ በእንቲአሃ ፡ እስመ ፡ ይፈርሆ ፡ ለኖኅ ፡ ነጊረ ፡ በእንቲአሃ ፡ ከመ ፡ ኢይትመዓዕ ፡ ላዕሌሁ ፡ በእንቲአሃ ። ወአመ ፡ ሠላሳ ፡ ኢዮቤልዉ ፡ በሱባዔ ፡ ካልእ ፡ በቀዳሚ ፡ ዓመቱ ፡ ነሥአ ፡ ሎቱ ፡ ብእሲተ ፡ ወስማ ፡ ሜልካ ፡ ወለተ ፡ አበዳይ ፡ ወልደ ፡ ያፌት ። ወበዓመት ፡ ራብዕ ፡ ተወልደ ፡ ወልህቀ ፡ ሳላ ፡ ወነሥአ ፡ ሎቱ ፡ ብእሲተ ፡ ወስማ ፡ ሙአክ ፡ ወለተ ፡ ኬሴድ ፡ እኅወ ፡ አቡሁ ፡ ሎቱ ፡ ብእሲተ ። ወለደት ፡ ሎቱ ፡ ወልደ ፡ በኃምስ ፡ ዓመቱ ፡ ወጸውዐ ፡ ስሞ ፡ ኤቤር ። ወበሳድስ ፡ ዓመት ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ፋሌክ ። ወተካፈሉ ፡ በእኩይ ፡ በበይናቲሆሙ ፡ ወነገርዎ ፡ ለኖኅ ፡ ወኮነ ፡ በቀዳሚሁ ፡ ለሠላሳ ፡ ወሠለስቱ ፡ ኢዮቤልዉ ፡ ወከፈልዋ ፡ ለምድር ፡ ሠለስተ ፡ መክፈልተ ፡ ለሴም ፡ ወለካም ፡ ወለያፌት ፡ በበ ፡ ርስቱ ። ወጸውዐ ፡ ደቂቆ ፡ ወቀርቡ ፡ ኀቤሁ ፡ እሙንቱ ፡ ወውሉዶሙ ፡ ወከፈለ ፡ ምድረ ፡ በዑፃዌ ፡ ዘይእኅዙ ፡ ሠለስቲሆሙ ፡ ውሉዱ ። ወወፅአ ፡ በመጽሐፍ ፡ ዕፃሁ ፡ ለሴም ፡ ማእከለ ፡ ምድር ፡ ዘይእኅዝ ፡ ለርስቱ ፡ ወለውሉዱ ፡ ለትውልድ ፡ ዘለዓለም ። ወየሐውር ፡ እስከ ፡ ሶበ ፡ ይቀርብ ፡ ካራስ ፡ ዝውእቱ ፡ ውስተ ፡ ሕፅነ ፡ ልሳን ፡ እንተ ፡ ትኔጽር ፡ መንገለ ፡ ሰሜን ፡ ወየሐውር ፡ መክፈልቱ ፡ እንተ ፡ መንገለ ፡ ባሕር ፡ ዐቢይ ፡ ወየሐውር ፡ ርቱዐ ፡ እስከ ፡ ይቀርብ ፡ መንገለ ፡ ዐረቢሃ ፡ ለልሳን ፡ እንተ ፡ ትኔጽር ፡ መንገለ ፡ ሰሜን ። ወትገምጽ ፡ እምህየ ፡ መንገለ ፡ ሰሜን ፡ መንገለ ፡ አፉሃ ፡ ለባሕር ፡ ዐቢይ ፡ ውስተ ፡ ከናፍረ ፡ ማያት ። ወተሐውር ፡ መንገለ ፡ ጽባሕ ፡ እስከ ፡ ሶበ ፡ ይቀርብ ፡ ኀበ ፡ ገነተ ፡ ኤዶም ፡ መንገለ ፡ ሰሜኑ ፡ ለሰሜን ። ዛቲ ፡ መክፈልት ፡ ወፅአት ፡ በዕፁ ፡ ለሴም ፡ ወለውሉዱ ፡ ለእኂዞታ ፡ ለዓለም ፡ ለትውልዱ ፡ እስከ ፡ ለዓለም ። ወተፈሥሐ ፡ ኖኅ ፡ እስመ ፡ ወፅአ ፡ ዝንቱ ፡ መክፈልት ፡ ለሴም ፡ ወለውሉዱ ። ወአእመረ ፡ ከመ ፡ ገነተ ፡ ኤዶም ፡ ቅድስተ ፡ ቅዱሳን ፡ ወማኅደሩ ፡ ለእግዚአብሔር ፡ ውእቱ ፡ ወደብረ ፡ ሲና ፡ ማእከላ ፡ ለገዳም ፡ ወደብረ ፡ ጽዮን ፡ ማእከለ ፡ ሕንብርታ ፡ ለምድር ። ወባረኮ ፡ ለአምላከ ፡ አማልክት ፡ ዘወደየ ፡ ውስተ ፡ አፉሁ ፡ ንባበ ፡ እግዚአብሔር ፡ ወእግዚአብሔር ፡ እስከ ፡ ለዓለም ። ወአእመረ ፡ ከመ ፡ መክፈልተ ፡ በረከት ፡ ወቡሩክ ፡ በጽሐ ፡ ለሴም ፡ ወለውሉዱ ፡ ለትውልድ ፡ ዘለዓለም ፡ ኵላ ፡ ምድረ ፡ ኤዶም ፡ ወኵላ ፡ ምድረ ፡ ባሕረ ፡ ኤርትራ ፡ ወኵላ ፡ ምድረ ፡ ጽባሕ ፡ ወእንደኬ ፡ ወበኤርትራ ፡ ወአድባሪሁ ፡ ወኵላ ፡ ምድረ ፡ ባሳ ፡ ወኵላ ፡ ምድረ ፡ ሊባኖስ ፡ ወደሰያተ ፡ ክብቱር ። ወለካም ፡ ወፅአ ፡ መክፈልት ፡ ዘዳግም ፡ መንገለ ፡ ማዕዶተ ፡ ግዮን ፡ መንገለ ፡ ሰሜን ፡ በየማነ ፡ ገነት ፡ ወየሐውር ፡ መንገለ ፡ ሰሜን ፡ ወየሐውር ፡ ኵሎ ፡ አድባረ ፡ እሳት ። ወይመጽእ ፡ ውስተ ፡ ደቡብ ፡ ውስተ ፡ ጽንፈ ፡ ጋዲር ፡ ወይመጽእ ፡ ውስተ ፡ ከንፈረ ፡ ማየ ፡ ባሕር ፡ ውስተ ፡ ማያተ ፡ ባሕር ፡ ዐቢይ ፡ እስከ ፡ ሶበ ፡ ይቀርብ ፡ ፈለገ ፡ ግዮን ፡ ወየሐውር ፡ ግዮን ፡ ፈለግ ፡ እስከ ፡ ሶበ ፡ ይቀርብ ፡ በየማነ ፡ ገነተ ፡ ኤዶም ። ወዛቲ ፡ ምድር ፡ እንተ ፡ ወፅአት ፡ ለካም ፡ በመክፈልት ፡ ዘይእኅዝ ፡ ለዓለም ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ። ወለያፌት ፡ ወፅአ ፡ መክፈልት ፡ ሣልስ ፡ ማዕዶተ ፡ ጢና ፡ ፈለግ ፡ መንገለ ፡ ደቡባቲሁ ፡ ለሙፃአ ፡ ማያቲሁ ፡ ወየሐውር ፡ መንገለ ፡ ጽባሕ ፡ ደቡብ ፡ ኵሎ ፡ ደወለ ፡ ጎግ ፡ ወኵሎ ፡ ጽባሓቲሆሙ ፡ 26 ወየሐውር ፡ መንገለ ፡ ደቡብ ፡ ለደቡብ ፡ ወየሐውር ፡ መንገለ ፡ አድባረ ፡ ቄልጥ ፡ መንገለ ፡ ደቡብ ፡ ወመንገለ ፡ ባሕረ ፡ ማኡቅ ፡ ወይመጽእ ፡ መንገለ ፡ ጽባሑ ፡ ለጋዲር ፡ እስከ ፡ መንገለ ፡ እደ ፡ ማየ ፡ ባሕር ፡ ወየሐውር ፡ እስከ ፡ ሶበ ፡ ይቀርብ ፡ መንገለ ፡ ዐረበ ፡ ፋራ ። ወየሐውር ፡ መንገለ ፡ እደ ፡ ጢና ፡ ፈለግ ፡ መንገለ ፡ ጽባሐ ፡ ደቡብ ፡ እስከ ፡ ሶበ ፡ ይቀርብ ፡ እስከ ፡ ጽንፈ ፡ ማያቲሁ ፡ መንገለ ፡ ደብረ ፡ ራፋ ፡ ወየአውዳ ፡ ለደቡብ ። ዛቲ ፡ ምድር ፡ እንተ ፡ ወፅአት ፡ ለያፌት ፡ ወለውሉዱ ፡ በመክፈልተ ፡ ርስቱ ፡ ዘይእኅዝ ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ። ወባሕቱ ፡ ቍሩር ፡ ይእቲ ፡ ወምድረ ፡ ካም ፡ መርቄ ፡ ይእቲ ፡ ወምድረ ፡ ሴምሰ ፡ ኢመርቄ ፡ ወኢደደክ ፡ እስመ ፡ ቱስሕት ፡ ይእቲ ፡ በቍር ፡ ወበሞቅ ።

Chapter 9 ወከፈለ ፡ ካም ፡ ማእከለ ፡ ውሉዱ ፡ ወወፅአ ፡ ቀዳሚ ፡ መክፈልት ፡ ለኵስ ፡ መንገለ ፡ ጽባሕ ፡ ወዐረቢሁ ፡ ለሜጽሬም ፡ ወዐረቢሁ ፡ ሎቱ ፡ ለፉድ ። ወሴምኒ ፡ ከፈለ ፡ ውእቱሂ ፡ ማእከለ ፡ ውሉዱ ፡ ወወፅአ ፡ መክፈልት ፡ ቀዳሚ ፡ ለኤላም ፡ ወለውሉዱ ፡ መንገለ ፡ ጽባሑ ፡ ለጢግሪስ ፡ ፈለግ ፡ እስከ ፡ ሶበ ፡ ይቀርብ ፡ መንገለ ፡ ጽባሐ ፡ ኵላ ፡ ምድረ ፡ እንደኬ ፡ ወበኤርትራ ፡ በእዴሁ ፡ ወማያተ ፡ ዴዳን ፡ ወኵሉ ፡ አድባር ፡ ዘምብሪ ፡ ወኤላ ፡ ወኵሉ ፡ ምድረ ፡ ሱሳን ፡ ወኵሉ ፡ ዘበእደ ፡ ፈርናክ ፡ እስከ ፡ ባሕረ ፡ ኤርትራ ፡ ወእስከ ፡ ጢና ፡ ፈለግ ፡ ወለአሱርኒ ፡ ወፅአ ፡ መክፈልት ፡ ካልእ ፡ ኵላ ፡ ምድረ ፡ አሱር ፡ ወነነዌ ፡ ወሲናአር ፡ ወሰክ ፡ እስከ ፡ ቅሩበ ፡ እንደኬ ፡ ወየዐርግ ፡ ወደፋ ፡ ፈለግ ፡ ወለአርፋክስድ ፡ ወፅአ ፡ መክፈልት ፡ ሣልስ ፡ ኵላ ፡ ምድረ ፡ ዘደወለ ፡ ከላዴዎን ፡ መንገለ ፡ ጽባሑ ፡ ለኤውፍራጢስ ፡ ዘቅሩብ ፡ ለባሕረ ፡ ኤርትራ ፡ ወኵሉ ፡ ማያተ ፡ ገዳም ፡ እስከ ፡ ቅሩብ ፡ ውስተ ፡ ልሳነ ፡ ባሕር ፡ እንተ ፡ ትኔጽር ፡ መንገለ ፡ ግብጽ ፡ ኵላ ፡ ምድረ ፡ ሊባኖስ ፡ ወሳኒር ፡ ወአማና ፡ እስከ ፡ ቅሩበ ፡ ኤውፍራጢስ ። ወለአራም ፡ ወፅአ ፡ መክፈልት ፡ ራብዕ ፡ ኵላ ፡ ምድረ ፡ ሜስጴጦምያ ፡ ማእከለ ፡ ጢግሮስ ፡ ወኤፍራጢስ ፡ መንገለ ፡ ደቡበ ፡ ከለዳውያን ፡ እስከ ፡ ቅሩበ ፡ ደብረ ፡ አሱር ፡ ወምድረ ፡ አራራ ። ወለሉድ ፡ ውፅአ ፡ መክፈልት ፡ ኃምስ ፡ ደብረ ፡ አሱር ፡ ወኵሉ ፡ ዘዚአሁ ፡ እስከ ፡ ይቀርብ ፡ ባሕረ ፡ ዐቢየ ፡ ወይቀርብ ፡ መንገለ ፡ ጽባሕ ፡ አሱር ፡ እኁሁ ። ወያፌት ፡ ውእቱሂ ፡ ከፈለ ፡ ምድረ ፡ ለርስት ፡ ማእከለ ፡ ውሉዱ ፡ 8 ወወፅአ ፡ መክፈልት ፡ ቀዳሚ ፡ ለጎሜር ፡ መንገለ ፡ ጽባሕ ፡ እምገጸ ፡ ደቡብ ፡ እስከ ፡ ጢና ፡ ፈለግ ። ወለማዳይ ፡ ወፅአ ፡ መክፈልት ፡ ከመ ፡ የአኃዝ ፡ እምዐረብ ፡ ለክልኤሆሙ ፡ አኃዊሁ ፡ እስከ ፡ ደሰያት ፡ ወእስከ ፡ ጽነፊሆን ፡ ለደሰያት ፡ 10 ወለኢዮእዋን ፡ ወፅአ ፡ መክፈልት ፡ ራብዕ ፡ ኵሉ ፡ ደሴት ፡ ወደሰያት ፡ ዘመንገለ ፡ እደ ፡ ሉድ ። ወለቶቤልሂ ፡ ወፅአ ፡ መክፈልት ፡ ኃምስ ፡ ማእከለ ፡ ልሳን ፡ እንተ ፡ ትቀርብ ፡ መንገለ ፡ እደ ፡ መክፈልተ ፡ ሉድ ፡ እስከ ፡ ልሳን ፡ ካልእት ፡ ወማዕዶታ ፡ ለልሳን ፡ ካልእት ፡ ውስተ ፡ ልሳን ፡ ሣልስት ። ወለስምክ ፡ ወፅአ ፡ መክፈልት ፡ ሳድስ ፡ ወኵሉ ፡ ማዕዶተ ፡ ልሳን ፡ ዘሣልስት ፡ እስከ ፡ ይቀርብ ፡ ጽባሒሁ ፡ ለጋዲር ። ወለቲራስ ፡ ወፅአ ፡ መክፈልት ፡ ሳብዕ ፡ አርባዕቱ ፡ ደሰያት ፡ ዐበይት ፡ በማእከለ ፡ ባሕር ፡ እለ ፡ ይቀርባ ፡ ለመክፈልተ ፡ ካም ። ወከመዝ ፡ ከፈሉ ፡ ውሉደ ፡ ኖኅ ፡ ለደቂቆሙ ፡ በቅድመ ፡ ኖኅ ፡ አቡሆሙ ። ወይቤሉ ፡ ኵሎሙ ፡ ለይኩን ፡ ወለይኩን ፡ ሎሙ ፡ ወለውሉዶሙ ፡ እስከ ፡ ለዓለም ፡ በትዝምዶሙ ፡ እስከ ፡ አመ ፡ ዕለተ ፡ ደይን ፡ በዘ ፡ ይኴንኖሙ ፡ እግዚአብሔር ፡ አምላክ ፡ በሰይፍ ፡ ወበእሳት ፡ በእንተ ፡ ኵሉ ፡ እከይ ፡ ዘርኵስ ፡ ዘጌጋዮሙ ፡ ዘመልእዋ ፡ ለምድር ፡ አበሳ ፡ ወርኵሰ ፡ ወዝሙተ ፡ ወኃጢአተ ።

Chapter 10 ወበሱባዔ ፡ ሣልስ ፡ ዘኢዮቤልዉ ፡ ዝንቱ ፡ አኀዙ ፡ አጋንንት ፡ ርኩሳን ፡ ያስሕትዎሙ ፡ ለደቂቀ ፡ ውሉደ ፡ ኖኅ ፡ ወያዕብድዎሙ ፡ ወያሕጕልዎሙ ። ወመጽኡ ፡ ውሉደ ፡ ኖኅ ፡ ኀበ ፡ ኖኅ ፡ አቡሆሙ ፡ ወነገርዎ ፡ በእንተ ፡ አጋንንት ፡ እለ ፡ ያስሕቱ ፡ ወይጼልሉ ፡ ወይቀትሉ ፡ ውሉደ ፡ ውሉዱ ። ወጸለየ ፡ ቅድመ ፡ እግዚአብሔር ፡ አምላኩ ፡ ወይቤ ፡ አምላከ ፡ መናፍስት ፡ ዘውስተ ፡ ኵሉ ፡ ዘሥጋ ፡ ዘገበርከ ፡ ምስሌየ ፡ ምሕረተ ፡ ወአድኀንከኒ ፡ ወውሉድየሂ ፡ እምነ ፡ ማየ ፡ አይኅ ፡ ወኢገበርከኒ ፡ ከመ ፡ እኅለቅ ፡ ከመ ፡ ገበርከ ፡ ለውሉደ ፡ ሐጉል ፡ እስመ ፡ ዐቢይ ፡ ሣህልከ ፡ ላዕሌየ ፡ ወዐብየት ፡ ምሕረትከ ፡ ላዕለ ፡ ነፍስየ ። ወአንተ ፡ ባርከኒ ፡ ኪያየ ፡ ወውሉድየ ፡ ንልሀቅ ፡ ወንብዛኅ ፡ ወንምልኣ ፡ ለምድር ። ወአንተ ፡ ታአምር ፡ ዘከመ ፡ ገብሩ ፡ ትጉሃኒከ ፡ አበዊሆሙ ፡ ለእሉ ፡ መንፈስ ፡ በመዋዕልየ ። ወኢይመብሉ ፡ በመንፈሰ ፡ ሕያዋን ፡ እስመ ፡ አንተ ፡ ባሕቲትከ ፡ ታአምር ፡ ኵነኔሆሙ ፡ ወኢይትባውሑ ፡ ላዕለ ፡ ውሉደ ፡ ጻድቃን ፡ እምይእዜ ፡ ወእስከ ፡ ለዓለም ። ወይቤለነ ፡ አምላክነ ፡ ከመ ፡ ንእስር ፡ ኵሎ ። ወመጽአ ፡ መልአከ ፡ መናፍስት ፡ መስቴማ ፡ ወይቤ ፡ እግዚአኦ ፡ ፈጣሪ ፡ አትርፍ ፡ እምኔሆሙ ፡ ቅድሜየ ፡ ወይስምዑ ፡ ቃልየ ፡ ወይግበሩ ፡ ኵሎ ፡ ዘእቤሎሙ ፡ እስመ ፡ እመ ፡ ኢተርፉ ፡ ሊተ ፡ እምውስቴቶሙ ፡ ኢይክል ፡ ገቢረ ፡ ስልጣነ ፡ ፈቃድየ ፡ ውስተ ፡ ውሉደ ፡ ሰብእ ። ወይቤ ፡ ይትረፉ ፡ ቅድሜሁ ፡ ዐሥራቶሙ ፡ ወተስዓተ ፡ መክፈልተ ፡ ያውርድ ፡ ውስተ ፡ መካነ ፡ ደይን ፡ 10 ወለአሐዱ ፡ እምኔነ ፡ ይቤ ፡ ከመ ፡ ንምሀሮ ፡ ለኖኅ ፡ ኵሎ ፡ ፈውሶሙ ፡ እስመ ፡ ያአምር ፡ ከመ ፡ አኮ ፡ በርትዕ ፡ ዘየሐውሩ ፡ ወአኮ ፡ በጽድቅ ፡ ዘይትባአሱ ። ወገበርነ ፡ በከመ ፡ ኵሉ ፡ ቃሉ ፡ ወኵሎ ፡ እኩያነ ፡ እለ ፡ ይጸውጉ ፡ አሰርነ ፡ ውስተ ፡ መካነ ፡ ደይን ፡ ወዐሥራቶሙ ፡ አትረፍነ ፡ ከመ ፡ ይኰንኑ ፡ ቅድመ ፡ ሰይጣን ፡ ዲበ ፡ ምድር ። ወፈውሰ ፡ ደዌሆሙ ፡ ኵሎ ፡ ነገርናሁ ፡ ለኖኅ ፡ ምስለ ፡ አስሕቶቶሙ ፡ ከመ ፡ ይፈውስ ፡ በዕፀ ፡ ምድር ። ወጸሐፈ ፡ ኖኅ ፡ ኵሎ ፡ ዘከመ ፡ መሀርናሁ ፡ በመጽሐፍ ፡ በኵሉ ፡ ትዝምደ ፡ ፈውስ ፡ ወተዐፅዉ ፡ መናፍስት ፡ እኩያን ፡ እምድኅሬሆሙ ፡ ለውሉደ ፡ ኖኅ ፡ 14 ወወሀበ ፡ ኵሎ ፡ መጻሕፍተ ፡ ዘጸሐፈ ፡ ለሴም ፡ ወልዱ ፡ ዘይልህቅ ፡ እስመ ፡ ኪያሁ ፡ ያፈቅር ፡ ፈድፋደ ፡ እምኵሉ ፡ ውሉዱ ። ወኖመ ፡ ኖኅ ፡ ምስለ ፡ አበዊሁ ፡ ወተቀብረ ፡ ውስተ ፡ ሉባር ፡ ደብር ፡ በምድረ ፡ አራራት ፡ ተስዓተ ፡ ምእተ ፡ ወኀምሳ ፡ ዓመተ ፡ ፈጸመ ፡ በሕይወቱ ፡ ዐሠርተ ፡ ወተስዓተ ፡ ኢዮቤልዉ ፡ ወክልኤ ፡ ሱባዔ ። ዘአፈድፈደ ፡ ሐዪወ ፡ ዲበ ፡ ምድር ፡ እምውሉደ ፡ ሰብእ ፡ በእንተ ፡ ጽድቁ ፡ ዘባቲ ፡ ፍጹም ፡ በጽድቁ ፡ ዘእንበለ ፡ ኤኖክ ። ወበሠላሳ ፡ ወሠለስቱ ፡ ኢዮቤልዉ ፡ በዓመት ፡ አሐዱ ፡ በዝ ፡ ካልእ ፡ ሱባዔ ፡ ነሥአ ፡ ሎቱ ፡ ፋሌክ ፡ ብእሲተ ፡ እንተ ፡ ስማ ፡ ሎምና ፡ ወለተ ፡ ሲናኦር ፡ ወወለደት ፡ ሎቱ ፡ ወልደ ፡ በዓመት ፡ ራብዕ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ራግው ፡ እስመ ፡ ይቤ ፡ ናሁ ፡ ውሉደ ፡ ሰብእ ፡ ኮኑ ፡ እኩያነ ፡ ለምክረ ፡ ፁግ ፡ ከመ ፡ ይሕንጹ ፡ ሎሙ ፡ ሀገረ ፡ ወማኅፈደ ፡ ውስተ ፡ ምድረ ፡ ሰኖኦር ፡ እስመ ፡ ፈለሱ ፡ እምድረ ፡ አራራት ፡ መንገለ ፡ ጽባሕ ፡ ውስተ ፡ ሰናኦር ፡ እስመ ፡ በመዋዕሊሁ ፡ ሐነጽዎ ፡ ለሀገር ፡ ወለማኅፈድ ፡ እንዘ ፡ ይብሉ ፡ ንዕርግ ፡ ቦቱ ፡ ውስተ ፡ ሰማይ ፡ ወአኀዙ ፡ ይሕንጹ ፡ ወበሱባዔ ፡ ራብዕ ፡ ወፈጡ ፡ በእሳት ፡ ወኮኖሙ ፡ ግንፋል ፡ ከመ ፡ እብን ፡ ወፅቡር ፡ በዘ ፡ ይመርዩ ፡ ቦቱ ፡ አስፋሊጦስ ፡ ዘይወፅእ ፡ እምነ ፡ ባሕር ፡ ወእምአንቅዕተ ፡ ማያት ፡ በምድረ ፡ ሰናኦር ፡ ወሐነጽዎ ፡ አርብዓ ፡ ዓመተ ፡ ወሠለስተ ፡ ዓመተ ፡ ሀለዉ ፡ የሐንጽዎ ፡ ግንፋለ ፡ ፍጹመ ፡ ሠለስተ ፡ ወዐሠርተ ፡ ውስቴቱ ፡ ወሣልስተ ፡ አሐቲ ፡ ለኑኁ ፡ ኀምሳ ፡ ምእት ፡ ወአርባዕቱ ፡ ምእት ፡ ወሠላሳ ፡ ወሠላስ ፡ በእመት ፡ ዐርገ ፡ ኑኁ ። ወይቤለነ ፡ እግዚአብሔር ፡ አምላክነ ፡ ለነ ፡ ናሁ ፡ ሕዝብ ፡ አሐዱ ፡ ወወጠነ ፡ ይግበር ፡ ወይእዜኒ ፡ ኢየሐልቅ ፡ እምኔሆሙ ። ወወረደ ፡ እግዚአብሔር ፡ ወወረድነ ፡ ምስሌሁ ፡ ንርአይ ፡ ሀገረ ፡ ወማኅፈደ ፡ ዘሐነጹ ፡ ውሉደ ፡ ሰብእ ። ወሦጠ ፡ ኵሎ ፡ ቃለ ፡ ልሳናቲሆሙ ፡ ወኢሰምዐ ፡ እንከ ፡ አሐዱ ፡ ቃለ ፡ ካልኡ ፡ ወአንተጉ ፡ እንከ ፡ ሐኒጸ ፡ ሀገር ፡ ወማኅፈድ ። በእንተዝ ፡ ተሰምየት ፡ ኵላ ፡ ምድረ ፡ ሰናኦር ፡ ባቤል ፡ እስመ ፡ በህየ ፡ ሦጠ ፡ አምላክ ፡ ኵሎ ፡ ልሳናቲሆሙ ፡ ለውሉደ ፡ ሰብእ ። ወፈነወ ፡ እግዚአብሔር ፡ ነፋሰ ፡ ውስተ ፡ ማኅፈደ ፡ ወገፍትኦ ፡ ውስተ ፡ ምድር ። በሱባዔ ፡ ራብዕ ፡ በአሐዱ ፡ ዓመት ፡ በቅድመ ፡ ዚአሁ ፡ ዘሠላሳ ፡ ወአርባዕቱ ፡ ኢዮቤልዉ ፡ ተዘርዉ ፡ እምድረ ፡ ሰናኦር ። ወሖሩ ፡ ካም ፡ ወውሉዱ ፡ ውስተ ፡ ምድር ፡ እንተ ፡ እኅዝት ፡ ሎቱ ፡ ዘረከበ ፡ በመክፈልቱ ፡ ውስተ ፡ ምድረ ፡ ደቡብ ፡ ወርእየ ፡ ከናአን ፡ ምድረ ፡ ሊባኖስ ፡ እስከ ፡ ሙሐዘ ፡ ግብጽ ፡ ከመ ፡ ሠናይት ፡ ይእቲ ፡ ጥቀ ። ወይቤሎ ፡ ካም ፡ አቡሁ ፡ ወኵስ ፡ ወመጽሬም ፡ አኃዊሁ ፡ እስመ ፡ ኀደርከ ፡ ውስተ ፡ ምድር ፡ እንተ ፡ ኢኮነት ፡ እንቲአከ ፡ ወኢወፅአ ፡ ለነ ፡ በዕፀው ፡ ኢትግበር ፡ ከመዝ ። ኢትኅድር ፡ ውስተ ፡ ማኅደረ ፡ ሴም ። ርጉም ፡ አንተ ፡ ወርጉመ ፡ ትከውን ፡ እምኵሎሙ ፡ ውሉደ ፡ ኖኅ ፡ በመርገም ፡ እንተ ፡ ተሠራዕነ ፡ በመሐላ ፡ በቅድሜሁ ፡ ለመኰንን ፡ ቅዱስ ፡ ወበቅድመ ፡ ኖኅ ፡ አቡነ ። ወኢሰምዖሙ ፡ ወኀደረ ፡ ምድረ ፡ ሊባኖስ ፡ እምኤማት ፡ እስከ ፡ ምብዋአ ፡ ግብጽ ፡ ውእቱ ፡ ወውሉዱ ፡ እስከ ፡ ዛቲ ፡ ዕለት ፡ 34 ወበእንተዝ ፡ ተሰምየት ፡ ይእቲ ፡ ምድር ፡ ምድረ ፡ ከናአን ። ወያፌትሰ ፡ ወውሉዱ ፡ ሖሩ ፡ መንገለ ፡ ባሕር ፡ ወኀደሩ ፡ ውስተ ፡ ምድረ ፡ መክፈልቶሙ ፡ ወርእየ ፡ ማዳይ ፡ ምድረ ፡ ባሕር ፡ ወኢአደመቶ ፡ በቅድሜሁ ፡ ወአስተብቍዐ ፡ እምኀበ ፡ ኤላም ፡ ወአሱር ፡ ወአርፋክስድ ፡ እምኀበ ፡ እኀወ ፡ ብእሲቱ ፡ ወኀደረ ፡ ውስተ ፡ ምድረ ፡ ሜድቂን ፡ ቅሩበ ፡ ኀበ ፡ እኅወ ፡ ብእሲቱ ፡ እስከ ፡ ዛቲ ፡ ዕለት ፡ ወሰመየ ፡ ምንባሪሁ ፡ ወምንባረ ፡ ውሉደ ፡ ሜዲቂን ፡ በስመ ፡ ማዳይ ፡ አቡሆሙ ።

Chapter 11 ወበሠላሳ ፡ ወኃምስቱ ፡ ኢዮቤልዉ ፡ በሱባዔ ፡ ሣልስ ፡ በአሐዱ ፡ ዓመቱ ፡ ሎቱ ፡ ነሥአ ፡ ሎቱ ፡ ራግው ፡ ብእሲተ ፡ ወስማ ፡ አራ ፡ ወለተ ፡ ኡር ፡ ወልደ ፡ ኬሴድ ፡ ወወለደት ፡ ሎቱ ፡ ወልደ ፡ ወጸውዐ ፡ ስሞ ፡ ሴሩግ ፡ በሳብዕ ፡ ሱባዔሁ ፡ ለዝ ፡ ሱባዔ ። ወበዝ ፡ ኢዮቤልዉ ፡ ወጠኑ ፡ ውሉደ ፡ ኖኅ ፡ ይትቃተሉ ፡ ለፄውዎ ፡ ወለቀቲል ፡ አሐዱ ፡ አሐዱ ፡ እኅዋሁ ፡ ወለክዒወ ፡ ደመ ፡ ሰብእ ፡ ዲበ ፡ ምድር ፡ ወለበሊዐ ፡ ደም ፡ ወለሐኒጸ ፡ አህጉር ፡ ጽኑዓት ፡ ወጥቅም ፡ ወማኅፈድ ፡ ወለተልዕሎ ፡ ብእሲ ፡ ላዕለ ፡ ሕዝብ ፡ ወለሰዪመ ፡ መቅድመ ፡ መንግሥት ። ወሐነጸ ፡ ኡድ ፡ ወልደ ፡ ኬሴድ ፡ ሀገረ ፡ አራሃ ፡ እንተ ፡ ከልዴዎን ፡ ወሰመየ ፡ ስማ ፡ በስመ ፡ ዚአሁ ፡ ወበስመ ፡ አቡሁ ፡ 4 ወገብሩ ፡ ሎሙ ፡ ስብከዋተ ፡ ወይሰግድ ፡ አሐዱ ፡ ለጣዖት ፡ ዘገብረ ፡ ለርእሱ ፡ ስብኮ ። ወመኰንን ፡ ወስቴማ ፡ ይኄይል ፡ ለግብረ ፡ ዝንቱ ፡ ኵሉ ፡ ወይፌኑ ፡ በእደ ፡ መናፍስት ፡ ለእለ ፡ ተውህቡ ፡ ታሕተ ፡ እዴሁ ፡ ለገቢረ ፡ ኵሉ ፡ ጌጋይ ፡ ወኃጢአት ፡ ወኵሉ ፡ አበሳ ፡ ለአማስኖ ፡ ወለአሕጕሎ ፡ ወለክዒወ ፡ ደም ፡ ዲበ ፡ ምድር ። በእንተዝ ፡ ተጸውዐ ፡ ስሙ ፡ ለሴሩክ ፡ ሴሩክ ፡ እስመ ፡ ተመይጠ ፡ ኵሉ ፡ ለገቢረ ፡ ኵሉ ፡ ኃጢአት ። ወልህቀ ፡ ወኀደረ ፡ ውስተ ፡ ኡር ፡ ዘከላዴዎን ፡ ቅሩበ ፡ አበ ፡ እመ ፡ ብእሲቱ ፡ ወኮነ ፡ ያመልክ ፡ ጣዖተ ። ወወለደት ፡ ሎቱ ፡ ናኮርሃ ፡ በዓመት ፡ ቀዳሚሁ ፡ ለዝ ፡ ሱባዔ ፡ ወልህቀ ፡ ወኀደረ ፡ ውስተ ፡ ኡር ፡ ውስተ ፡ ዘእለ ፡ ኡር ፡ ከለዳዊያን ፡ ወመሀሮ ፡ አቡሁ ፡ ኁሣሤሆሙ ፡ ለከለዳዊያን ፡ ለተማርዮ ፡ ወለተሰግሎ ፡ በተአምረ ፡ ሰማይ ። ወበሠላሳ ፡ ወሰብዓቱ ፡ ኢዮቤልዉ ፡ በሱባዔ ፡ ሳድስ ፡ በአሐዱ ፡ ዓመቱ ፡ ሎቱ ፡ ነሥአ ፡ ብእሲተ ፡ ወስማ ፡ ኢያስካ ፡ ወለተ ፡ ኔስታግ ፡ ዘከለዳዊያን ፡ 10 ወወለደት ፡ ሎቱ ፡ ታራሃ ፡ በዓመት ፡ ሳብዕ ፡ ለዝ ፡ ሱባዔ ። ወፈነወ ፡ መኰንን ፡ መስቴማ ፡ ቋዓተ ፡ ወአዕዋፈ ፡ ከመ ፡ ይብልዑ ፡ ዘርአ ፡ ዘይዘራእ ፡ ውስተ ፡ ምድር ፡ ወለአማስኖ ፡ ምድር ። በእንተዝ ፡ ጽውዐ ፡ ስሞ ፡ ታራ ። ወአኀዙ ፡ ዓመታት ፡ ይዕበሩ ፡ እምቅድመ ፡ ገጾሙ ፡ ለአዕዋፍ ፡ ወኵሎ ፡ ፍሬ ፡ ዕፅ ፡ ይበልዑ ፡ እምአእዋም ፡ በኃይል ፡ ዐቢይ ፡ እመ ፡ ክህሉ ፡ አድኅኖ ፡ ኅዳጠ ፡ እምኵሉ ፡ ፍሬ ፡ ምድር ፡ በመዋዕሊሆሙ ። ወበዝ ፡ ሠላሳ ፡ ወተስዓቱ ፡ ኢዮቤልዉ ፡ በሱባዔ ፡ ካልእ ፡ በቀዳሚ ፡ ዓመት ። ወበዓመት ፡ ሳብዕ ፡ ለዝ ፡ ሱባዔ ፡ ወለደት ፡ ሎቱ ፡ ወልደ ። ወአኀዘ ፡ ሕፃን ፡ ያእምር ፡ ስሕተተ ፡ ምድር ፡ ከመ ፡ ኵሉ ፡ ይስሕት ፡ በድኅሬሆሙ ፡ ለግልፎ ፡ ወድኅረ ፡ ርኵስ ። ወአኀዝ ፡ ይጸሊ ፡ ኀበ ፡ ፈጣሬ ፡ ኵሉ ፡ ከመ ፡ ያድኅኖ ፡ እምስሕተተ ፡ ውሉደ ፡ ሰብእ ። ወበጽሐ ፡ ጊዜ ፡ ዘርእ ፡ ለዘሪእ ፡ ውስተ ፡ ምድር ። ወደመና ፡ ቋዓት ፡ መጽኡ ፡ ከመ ፡ ይብልዑ ፡ ዘርአ ፡ ወአብራም ፡ ይረውጽ ፡ አንፃሪሆሙ ፡ ዘእንበለ ፡ ይንበሩ ፡ ውስተ ፡ ምድር ፡ ወይኬልሕ ፡ ላዕሌሆሙ ፡ ዘእንበለ ፡ ይንበሩ ፡ ዲበ ፡ ምድር ፡ ለበሊዐ ፡ ዘርእ ፡ ወይብል ፡ ኢትረዱ ፡ ግብኡ ፡ ውስተ ፡ መካን ፡ ኀበ ፡ ወፃእክሙ ፡ ወተመይጡ ፡ 20 ወገብረ ፡ በይእቲ ፡ ዕለት ፡ ለደመና ፡ ቋዓት ፡ ሰብዓ ፡ ወኢነበረ ፡ እምኵሉ ፡ ቋዓት ፡ ውስተ ፡ ኵሉ ፡ ገራውህ ፡ ኀበ ፡ ሀሎ ፡ አብራም ፡ ህየ ፡ ወኢአሐዱ ። ወይሬእይዎ ፡ ኵሎሙ ፡ እለ ፡ ምስሌሁ ፡ ውስተ ፡ ኵሉ ፡ ገራውህ ፡ እንዘ ፡ ይኬልሕ ፡ ወኵሉ ፡ ቋዓት ፡ ተመይጡ ። ወመጽኡ ፡ ኀቤሁ ፡ በዓመት ፡ ዝንቱ ፡ ኵሎሙ ፡ እለ ፡ ይዘርኡ ፡ ወሀሎ ፡ የሐውር ፡ ምስሌሆሙ ፡ እስከ ፡ አመ ፡ የሐልቅ ፡ ጊዜ ፡ ዘርእ ፡ ወዘርኡ ፡ ምድሮሙ ። ወበዓመት ፡ አሐዱ ፡ ዘሱባዔ ፡ ኃምስ ፡ መሀረ ፡ አብራም ፡ ለእለ ፡ ይገብሩ ፡ ንዋየ ፡ አልህምት ፡ ለኬነተ ፡ ዕፅ ፡ ወገብሩ ፡ ንዋየ ፡ በመልዕልተ ፡ ምድር ፡ በአንጻረ ፡ ድጕር ፡ ዕርፍ ፡ ከመ ፡ ያንብር ፡ ላዕሌሁ ፡ ዘርአ ፡ ወይወርድ ፡ እምውስቴቱ ፡ ዘርእ ፡ ውስተ ፡ ከተማ ፡ ዕርፍ ፡ ወይትኀባእ ፡ ውስተ ፡ ምድር ፡ ወኢይፈርሁ ፡ እንከ ፡ እምገጸ ፡ ቋዓት ፡ 24 ወገብሩ ፡ ከመዝ ፡ ላዕለ ፡ ኵሉ ፡ ድጕረ ፡ ዕርፍ ፡ መልዕልተ ፡ ምድር ፡ ወዘርኡ ፡ ወገብሩ ፡ ኵሉ ፡ ምድር ፡ ዘከመ ፡ አዘዞሙ ፡ አብራም ፡ ወኢይፈርሁ ፡ እንከ ፡ እምአዕዋፍ ።

Chapter 12 ወኮነ ፡ በኡባዔ ፡ ሳድስ ፡ ዓመቱ ፡ ሎቱ ፡ ይቤ ፡ አብራም ፡ ለታራ ፡ አቡሁ ፡ እንዘ ፡ ይብል ፡ አባ ፡ ወይቤ ፡ ነየ ፡ አነ ፡ ወልድየ ። ወይቤ ፡ ምንተ ፡ ረድኤተ ፡ ወተድላ ፡ ለነ ፡ እምእሉ ፡ ጣዖት ፡ ዘአንተ ፡ ታመልክ ፡ ወትሰግድ ፡ ቅድሜሆሙ ፡ እስመ ፡ አልቦ ፡ ላዕሌሆሙ ፡ ምንተኒ ፡ መንፈሰ ፡ እስመ ፡ ስግመት ፡ እሙንቱ ፡ ወስሕተተ ፡ ልብ ፡ እሙንቱ ፡ ኢታምልክዎሙ ። አምልኩ ፡ አምላከ ፡ ሰማይ ፡ ዘያወርድ ፡ ዝናመ ። ለምንት ፡ አንትሙ ፡ ታመልኩ ፡ እለ ፡ አልቦሙ ፡ መንፈሰ ፡ ላዕሌሆሙ ፡ እስመ ፡ ግብረ ፡ እደው ፡ እሙንቱ ፡ ወዲበ ፡ መታክፍቲክሙ ፡ አንትሙ ፡ ትጸውርዎሙ ፡ ወአልቦ ፡ እምኔሆሙ ፡ ለክሙ ፡ ረጽኤተ ፡ ዘእንበለ ፡ ኀሳር ፡ ዐቢይ ፡ ለእለ ፡ ይገብርዎሙ ፡ ወስሕተተ ፡ ልብ ፡ ለእለ ፡ ያመልክዎሙ ፡ ኢታምልክዎሙ ፡ 6 ወይቤሎ ፡ አነሂ ፡ አአምር ፡ ወልድየ ፡ ምንተ ፡ እሬሲ ፡ ለሕዝብ ፡ እለ ፡ አዘዙኒ ፡ እትለአክ ፡ ቅድሜሆሙ ፡ 7 ወእመ ፡ ነገርክዎሙ ፡ ጽድቀ ፡ ይቀትሉኒ ፡ እስመ ፡ ተለወት ፡ ነፍሶሙ ፡ ኀቤሆሙ ፡ ከመ ፡ ያምልክዎሙ ፡ ወይሰብሕዎሙ ። ወነገረ ፡ ዘንተ ፡ ነገረ ፡ ለክልኤ ፡ አኃዊሁ ፡ ወተምዕዑ ፡ ላዕሌሁ ፡ ወአርመመ ። ወበአርብዓ ፡ ኢዮቤልዉ ፡ በሱባዔ ፡ ካልእ ፡ በሳብዕ ፡ ዓመቱ ፡ ሎቱ ፡ ነሥአ ፡ ሎቱ ፡ አብራም ፡ ብእሲተ ፡ ወስማ ፡ ሶራ ፡ ወለተ ፡ አቡሁ ፡ ወኮነቶ ፡ ሎቱ ፡ ብእሲተ ። ወአራን ፡ እኁሁ ፡ ነሥአ ፡ ሎቱ ፡ በዓመት ፡ ሣልስ ፡ ዘሱባዔ ፡ ሣልስ ፡ ወወለደት ፡ ሎቱ ፡ ወልደ ፡ በዓመት ፡ ሳብዕ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ሎጥ ። ወናኮርኒ ፡ እኁሁ ፡ ነሥአ ፡ ሎቱ ፡ ብእሲተ ። ወበዓመት ፡ ዘስሳ ፡ ዘሕይወተ ፡ አብራም ፡ ውእቱ ፡ ሱባዔ ፡ ራብዕ ። ወተንሥኡ ፡ ሌሊተ ፡ ወፈቀዱ ፡ ያድኅኑ ፡ አማልክቲሆሙ ፡ እማእከለ ፡ እሳት ፡ ወሰረረ ፡ አራን ፡ ከመ ፡ ያድኅኖሙ ፡ ወነደደ ፡ እሳት ፡ ላዕሌሁ ፡ ወውዕየ ፡ በእሳት ፡ ወሞተ ፡ በኤኑር ፡ ዘከላዴዎን ፡ በቅድመ ፡ ታራ ፡ አቡሁ ፡ ወቀበርዎ ፡ በኤኑር ፡ ዘከላዴዎን ። ወወፅአ ፡ ታራ ፡ እምነ ፡ ኡር ፡ ዘከለዳዊያን ፡ ውእቱ ፡ ወውሉዱ ፡ ከመ ፡ ይምጽኡ ፡ ውስተ ፡ ምድረ ፡ ሊባኖስ ፡ ወውስተ ፡ ምድረ ፡ ከናአን ፡ ወኀደረ ፡ ውስተ ፡ ካራን ። ወበሳድስ ፡ ሱባዔ ፡ በዓመት ፡ ኃምሱ ፡ ሎቱ ፡ ነበረ ፡ አብራም ፡ በሌሊት ፡ በሠርቀ ፡ ወርኅ ፡ ሳብዕ ፡ ከመ ፡ ያበይን ፡ ከዋክብተ ፡ እምሰርክ ፡ እስከ ፡ ነግህ ፡ ከመ ፡ ይርአይ ፡ ምንተ ፡ ግብረ ፡ ዓመት ፡ በዝናማት ፡ ወሀሎ ፡ ውእቱ ፡ ባሕቲቱ ፡ ይነብር ፡ ወያቤይን ፡ 17 ወመጽአ ፡ ውስተ ፡ ልቡ ፡ ቃል ፡ ወይቤ ፡ ኵሉ ፡ ተአምረ ፡ ከዋክብት ፡ ወተአምሪሃ ፡ ለወርኅ ፡ ወለፀሐይ ፡ ኵሉ ፡ በእደ ፡ እግዚአብሔር ። ለእመ ፡ ፈቀደ ፡ ያዘንም ፡ ነግህ ፡ ወሰርክ ፡ ወእመ ፡ ፈቀደ ፡ ኢያወርድ ፡ ወኵሉ ፡ ውስተ ፡ እዴሁ ። ወጸለየ ፡ በዛቲ ፡ ሌሊት ፡ ወይቤ ፡ አምላኪየ ፡ አምላኪየ ፡ አምላክ ፡ ልዑል ፡ አንተ ፡ ባሕቲትከ ፡ ሊተ ፡ አምላክ ፡ ወአንተ ፡ ኵሎ ፡ ፈጠርከ ፡ ወግብረ ፡ እደዊከ ፡ ኵሉ ፡ ኮነ ፡ ወሀለወ ፡ ወኪያከ ፡ ወመለኮትከ ፡ ኀረይኩ ። አድኅነኒ ፡ እምእደ ፡ መናፍስት ፡ እኩያን ፡ እለ ፡ ይሴለጡ ፡ ውስተ ፡ ኅሊና ፡ ልበ ፡ ሰብእ ፡ ወኢያስሕቱኑ ፡ እምድኅሬከ ፡ አምላኪየ ፡ ወትረስየኒ ፡ ኪያየ ፡ ወዘርእየ ፡ አንተ ፡ ለዓለም ። ወይቤ ፡ እመ ፡ እገብእሁ ፡ ውስተ ፡ ኡር ፡ ዘከለዳዊያን ፡ እለ ፡ እሙንቱ ፡ የኀሥሡ ፡ ገጽየ ፡ ከመ ፡ እግባእ ፡ ኀቤሆሙ ፡ ወሚመ ፡ እንበር ፡ ዝየ ፡ በዝ ፡ መካን ፡ ፍኖተ ፡ ርቱዐ ፡ ቅድሜከ ፡ ኪያሃ ፡ ሰርሕ ፡ በእደ ፡ ገብርከ ፡ ይግበር ፡ ወኢይሖር ፡ በስሕተተ ፡ ልብየ ፡ አምላኪየ ። ወውእቱ ፡ ሶበ ፡ ፈጸመ ፡ ተናግሮ ፡ ወጸዕዮ ። ወእባርከከ ፡ ወአዐቢ ፡ ስመከ ፡ ወትከውን ፡ ቡሩከ ፡ ውስተ ፡ ምድር ። ወእከውነከ ፡ ለከ ፡ ወለወልድከ ፡ ወለወልደ ፡ ወልድከ ፡ ወለኵሉ ፡ ዘርእከ ፡ አምላከ ፡ ኢትፍራህ ፡ እምይእዜ ፡ ወእስከ ፡ ኵሉ ፡ ትዝምደ ፡ ምድር ፡ አነ ፡ አምላክከ ። ወይቤለኒ ፡ እግዚአብሔር ፡ አምላክ ፡ ፍታሕ ፡ አፉሁ ፡ ወእዘኒሁ ፡ ይስማዕ ፡ ወይንብብ ፡ በልሳኑ ፡ በልሳን ፡ እንተ ፡ ታስተርኢ ፡ እስመ ፡ አዕረፈ ፡ እምአፈ ፡ ኵሉ ፡ ውሉደ ፡ ሰብእ ፡ እምዕለተ ፡ ድቀት ፡ 26 ወፈታሕኩ ፡ አፉሁ ፡ ወእዘኒሁ ፡ ወከናፍሪሁ ፡ ወአኀዝኩ ፡ እትናገር ፡ ምስሌሁ ፡ ዕብራይስጥ ፡ በልሳነ ፡ ፍጥረት ። ወነሥአ ፡ መጻሕፍተ ፡ አበዊሁ ፡ ወጽሑፋት ፡ እማንቱ ፡ ዕብራይስጥ ፡ ወደገሞን ፡ ወአኀዘ ፡ ይትመሀሮን ፡ እምአሜሃ ፡ ወአነ ፡ አየድዖ ፡ ኵሎ ፡ ዘይሰአኖ ። በዓመት ፡ ሳብዕ ፡ ዘሱባዔ ፡ ሳድስ ፡ ወተናገረ ፡ ምስለ ፡ አቡሁ ፡ ወአይድዖ ፡ ከመ ፡ የሐውር ፡ ውእቱ ፡ እምካራን ፡ ለሐዊረ ፡ ምድረ ፡ ከናአን ፡ ይርአያ ፡ ወይግባእ ፡ ኀቤሁ ፡ ወይቤሎ ፡ ታራ ፡ አቡሁ ፡ ሖር ፡ በሰላም ፡ አምላከ ፡ ዓለም ፡ ያርትዕ ፡ ፍኖተከ ፡ ወእግዚአብሔር ፡ ምስሌከ ፡ ወይትማኅፀንከ ፡ እምኩሉ ፡ እኩይ ። ወእመ ፡ ርኢከ ፡ ምድረ ፡ አዳም ፡ ለአዕይንቲከ ፡ ለኀዲር ፡ ውስቴታ ፡ ነዓ ፡ ወንሥአኒ ፡ ኀቤከ ፡ ወንሥኦ ፡ ለሎጥ ፡ ምስሌከ ፡ ወልደ ፡ አራን ፡ እኁከ ፡ ለከ ፡ ለወልድ ፡ እግዚአብሔር ፡ ምስሌከ ፡ 31 ወናኮርሃ ፡ እኅዋከ ፡ ኅድግ ፡ ኀቤየ ፡ እስከ ፡ ትገብእ ፡ በሰላም ፡ ወነሐውር ፡ ኵልነ ፡ ኅቡረ ፡ ምስሌከ ።

Chapter 13 ወሖረ ፡ አብራም ፡ እምካራን ፡ ወነሥአ ፡ ሶራይሃ ፡ ብእሲቶ ። ወርእየ ፡ ወናሁ ፡ ምድር ፡ አዳም ፡ ጥቀ ፡ እምብዋአ ፡ ኤማት ፡ እስከ ፡ ኀበ ፡ ድርስ ፡ ነዋኅ ። ወይቤሎ ፡ እግዚአብሔር ፡ ለከ ፡ ወለዘርእከ ፡ እሁብ ፡ ዛተ ፡ ምድረ ፡ 4 ወሐነጸ ፡ በህየ ፡ ምሥዋዐ ፡ ወአዕረገ ፡ ዲቤሁ ፡ ጽንሐሐ ፡ ለእግዚአብሔር ፡ ዘአስተርአዮ ። ወአንሥአ ፡ እምህየ ፡ ውስተ ፡ ደብረ ፡ ቤቴል ፡ ዘመንገለ ፡ ባሕር ፡ ወአጌ ፡ መንገለ ፡ ጽባሕ ፡ ወተከለ ፡ ደብተራሁ ፡ ህየ ። ወርእየ ፡ ወናሁ ፡ ምድር ፡ ጽፍሕት ፡ ወኄርት ፡ ጥቀ ፡ ወኵሉ ፡ ይሠርፅ ፡ ላዕሌሃ ፡ አውያን ፡ ወበለስ ፡ ወሮማን ፡ ዕፅ ፡ ባላን ፡ ወድርስ ፡ ወጤሬቤንቶስ ፡ ወዕፀወ ፡ ዘይት ፡ ወቄድሮስ ፡ ወቄጲሪሶስ ፡ ወሊባኖስ ፡ ወኵሉ ፡ ዕፀወ ፡ ገዳም ፡ ወማይ ፡ ዲበ ፡ አድባር ። ወባረኮ ፡ ለእግዚአብሔር ፡ ዘአውፅኦ ፡ እምነ ፡ ኡር ፡ ዘከለዳዊያን ፡ ወአምጽኦ ፡ ውስተዝ ፡ ደብር ። ወኮነ ፡ በአሐዱ ፡ ዓመት ፡ በሱባዔ ፡ ሳብዕ ፡ በሠርቀ ፡ ወርኅ ፡ በዘ ፡ ቀዳሚ ፡ ሐነጸ ፡ ምሥዋዐ ፡ በዝ ፡ ደብር ፡ ወጸውዖ ፡ በስመ ፡ እግዚአብሔር ፡ አንተ ፡ አምላኪየ ፡ አምላከ ፡ ዘለዓለም ። ወአዕረገ ፡ ዲበ ፡ ምሥዋዕ ፡ ጽንሐሐ ፡ ለእግዚአብሔር ፡ ከመ ፡ የሀሉ ፡ ምስሌሁ ፡ ወኢይኅድጎ ፡ ኵሎ ፡ መዋዕለ ፡ ሕይወቱ ። ወአንሥአ ፡ እምህየ ፡ ወሖረ ፡ መንገለ ፡ ደቡብ ፡ ወበጽሐ ፡ እስከ ፡ ኬብሮን ፡ ወኬብሮን ፡ አሜሃ ፡ ተሐንጸት ፡ ወነበረ ፡ ህየ ፡ ዓመተ ፡ ክልኤተ ፡ ወሖረ ፡ ውስተ ፡ ምድረ ፡ ደቡብ ፡ እስከ ፡ ቦአ ፡ ሎጥ ። ወሖረ ፡ አብራም ፡ ግብጽ ፡ በሣልስ ፡ ዓመት ፡ ዘሱባዔ ፡ ወኀደረ ፡ ውስተ ፡ ግብጽ ፡ ኀምስተ ፡ ዓመተ ፡ ዘእንበለ ፡ ትትሀየድ ፡ ብእሲቱ ። ወጠናይስ ፡ ዘግብጽ ፡ አሜሃ ፡ ተሐብጸት ፡ በሰብዓቱ ፡ ክረምት ፡ እምድኅረ ፡ ኬብሮን ። ወኮነ ፡ አመ ፡ ሄዶ ፡ ፈርዖን ፡ ሶራይ ፡ ብእሲቶ ፡ ለአብራም ፡ ቀሠፈ ፡ እግዚአብሔር ፡ ፈርዖንሃ ፡ ወቤቶ ፡ በመቅሠፍት ፡ ዐቢይ ፡ በእንተ ፡ ሶራይ ፡ ብእሲቱ ፡ ለአብራም ። ወአብራም ፡ ክቡር ፡ በጥሪት ፡ ጥቀ ፡ በአባግዕ ፡ ወበአልህምት ፡ ወበአእዱግ ፡ ወበአፍራስ ፡ ወበአግማል ፡ ወበአግብርት ፡ ወበአእማት ፡ ወበብሩር ፡ ወበወርቅ ፡ ፈድፋደ ። ወአግብአ ፡ ፈርዖን ፡ ሶራይሃ ፡ ብእሲተ ፡ አብራም ፡ ወአፍለሶ ፡ እምድረ ፡ ግብጽ ፡ ወሖረ ፡ ውስተ ፡ መካን ፡ ኀበ ፡ ተከለ ፡ ደብተራሁ ፡ እንተ ፡ ቀዲሙ ፡ ውስተ ፡ መካነ ፡ ምሥዋዐ ፡ አጌ ፡ እምጽባሐ ፡ ቤቴል ፡ ወባሕር ፡ ወባሪኮ ፡ ለእግዚአብሔር ፡ አምላኩ ፡ ዘሜጦ ፡ በሰላም ። ወኮነ ፡ በዝ ፡ አርብዓ ፡ ወአሐዱ ፡ ኢዮቤልዎን ፡ በሣልስ ፡ ዓም ፡ ዘሱባዔ ፡ ቀዳሚ ፡ ገብአ ፡ ውስተ ፡ ዝመካን ፡ ወአዕረገ ፡ በዲቤሁ ፡ ጽንሐሐ ፡ ወጸውዐ ፡ በስመ ፡ እግዚአብሔር ፡ አምላክ ፡ ልዑል ፡ አምላኪየ ፡ ለዓለመ ፡ ዓለም ። ወበራብዕ ፡ ዓመት ፡ ዘዝ ፡ ሱባዔ ፡ ተፈልጠ ፡ ሎጥ ፡ እምኔሁ ፡ ወኀደረ ፡ ሎጥ ፡ ውስተ ፡ ሰዶም ፡ ወሰብአ ፡ ሰዶም ፡ ኃጥኣን ፡ ጥቀ ። ወአከዮ ፡ በልቡ ፡ እስመ ፡ ተፈልጠ ፡ ወልደ ፡ እኁሁ ፡ እምኔሁ ፡ እስመ ፡ አልቦ ፡ ውሉደ ፡ 19 በውእቱ ፡ ዓመት ፡ አመ ፡ ተፄወወ ፡ ሎጥ ። እስመ ፡ ኵላ ፡ ምድረ ፡ እንተ ፡ ትሬኢ ፡ ለከ ፡ ወለዘርእከ ፡ እመሁባ ፡ እስከ ፡ ለዓለም ። ተንሥእ ፡ ወአንሶሱ ፡ ውስተ ፡ ኑኃ ፡ ወርሕባ ፡ ወርኢ ፡ ኵሎ ፡ እስመ ፡ ለዘርእከ ፡ እሁባ ። ወበዝ ፡ ዓመት ፡ መጽአ ፡ ከደለጎሞር ፡ ንጉሠ ፡ ኤላም ፡ አመርፋል ፡ ንጉሠ ፡ ሲናአር ፡ ወአሪአክ ፡ ንጉሠ ፡ ሴለሳር ፡ ወቴርጋል ፡ ንጉሠ ፡ አሕዛብ ፡ ወቀተልዎ ፡ ለንጉሠ ፡ ጎሞር ፡ ወጐየ ፡ ንጉሠ ፡ ሰዶም ። ወፄወዉ ፡ ሰዶምሃ ፡ ወአዳማሃ ፡ ወሴቦኤም ፡ ወፄወውዎ ፡ ለሎጥኒ ፡ ወልደ ፡ እኁሁ ፡ ለአብራም ፡ ሰኵሎ ፡ ጥሪቶ ፡ ወሖረ ፡ እስከ ፡ ዳን ። ወመጽአ ፡ ዘድኅነ ፡ ወነገሮ ፡ ለአብራም ፡ ከመ ፡ ተፄወወ ፡ ወልደ ፡ እኁሁ ። ወአስተረሰየ ፡ ልደ ፡ ቤቱ ፡ [ወሖረ ፡ አብራም ፡ ወቀተሎ ፡ ለከደለጎሞር ፡ ወየመይጠ ፡ ወዐሠረ ፡ ዐሥራተ ፡ እምኵሉ ፡ ወወሀቦ ፡ ለመልከ ፡ ጼዴቅ ። ወአልቦ ፡ ለዝ ፡ ሕግ ፡ ወሰነ ፡ መዋዕል ፡ እስመ ፡ ትውልድ ፡ ዘለዓለም ፡ ሠርዖ ፡ ከመ ፡ የሀቡ ፡ ዓሥራተ ፡ እምኵሉ ፡ ለእግዚአብሔር ፡ እምዘርእ ፡ ወእምወይን ፡ ወእምቅብእ ፡ ወእምአልህምት ፡ ወእምአባግዕ ፡ 27 ወውእቱ ፡ ወሀበ ፡ ለካህናቲሁ ፡ ለበሊዕ ፡ ወለሰቲይ ፡ በፍሥሓ ፡ በቅድሜሁ ። ወበጽሐ ፡ ኀቤሁ ፡ ንጉሠ ፡ ሰዶም ፡ ወሰገደ ፡ ቅድሜሁ ፡ ወይቤ ፡ እግዚእነ ፡ አብራም ፡ ጸግወነ ፡ ነፍሰ ፡ እለ ፡ ባለሕከ ፡ ወምህርካሁሰ ፡ ይኩንከ ። ወይቤሎ ፡ አብራም ፡ ሎቱ ፡ አነሥእ ፡ እደዊየ ፡ ኀበ ፡ አምላክ ፡ ልዑል ፡ እምፈትል ፡ እስከ ፡ ቶታነ ፡ አሣእን ፡ እመ ፡ እነሥእ ፡ እምኵሉ ፡ ዘዚአከ ፡ ከመ ፡ ኢትኩን ፡ በሃሌ ፡ አነ ፡ አብዐልክዎ ፡ ለአብራም ።

Chapter 14 ወእምድኅረ ፡ ዝነገር ፡ በራብዕ ፡ ዓመት ፡ ዘዝ ፡ ሱባዔ ፡ በሠርቀ ፡ ሣልስ ፡ ወርኅ ፡ ኮነ ፡ ቃለ ፡ እግዚአብሔር ፡ ኀበ ፡ አብራም ፡ በሕልም ፡ እንዘ ፡ ይብል ፡ ኢትፍራህ ፡ አብራም ፡ አነ ፡ ውእቱ ፡ ቃውምከ ፡ ወዐስብከ ፡ ይፈደፍድ ፡ ጥቀ ። ወይቤ ፡ እግዚኦ ፡ እግዚኦ ፡ ምንተ ፡ ትሁበኒ ፡ ወአንሰ ፡ አሐውር ፡ ዘእንበለ ፡ ውሉድ ፡ ወወልደ ፡ ማሴቅ ፡ አመትየ ፡ ውእቱ ፡ ደማስቆስ ፡ ኤሌኤዜር ፡ ውእቱ ፡ ይወርሰኒ ፡ ወሊተ ፡ ኢወሀብከኒ ፡ ዘርአ ፡ ሀበኒ ፡ ዘርአ ። 2 ወይቤሎ ፡ ኢይወርሰከዝ ፡ ዘእንበለ ፡ ዘይወፅእ ፡ እምከርሥከ ፡ ውእቱ ፡ ይወርሰከ ። ወአውፅኦ ፡ አፍአ ፡ ወይቤሎ ፡ ነጽር ፡ ውስተ ፡ ሰማይ ፡ ወኆልቍ ፡ ከዋክብተ ፡ እመ ፡ ትክል ፡ ኆልቆቶሙ ፡ 5 ወነጸረ ፡ ሰማየ ፡ ወርእየ ፡ ከዋክብተ ፡ ወይቤሎ ፡ ከመዝ ፡ ይከውን ፡ ዘርእከ ፡ 6 ወአምኖ ፡ ለእግዚአብሔር ፡ ወተኆለቆ ፡ ጽድቀ ። ወይቤሎ ፡ አነ ፡ እግዚአብሔር ፡ ዘአውፃእኩከ ፡ እምነ ፡ ኡር ፡ ዘከለዳዊያን ፡ ከመ ፡ አሀብከ ፡ ምድረ ፡ ከነናዊያን ፡ ለእኂዝ ፡ ለዓለም ፡ ወለከዊነ ፡ ለከ ፡ አምላከ ፡ ወለዘርእከ ፡ እምድኅሬከ ፡ 8 ወይቤ ፡ እግዚኦ ፡ እግዚኦ ፡ በምንት ፡ አአምር ፡ ከመ ፡ እወርስ ። ወይቤሎ ፡ ንሣእ ፡ ሊተ ፡ ጠዕዋ ፡ ዘሠለስቱ ፡ ዓመት ፡ ወጠሌ ፡ ዘሠለስቱ ፡ ዓመት ፡ ወበግዐ ፡ ዘሠለስቱ ፡ ዓመት ፡ ወመንጤተ ፡ ወርግበ ። ወነሥአ ፡ ዘንተ ፡ ኵሎ ፡ በመንፈቀ ፡ ወርኅ ፡ ወውእቱ ፡ ይነብር ፡ ኀበ ፡ ድራይ ፡ ዘማምሪ ፡ እንተ ፡ ይእቲ ፡ ቅሩበ ፡ ኬብሮን ፡ ወሐነጸ ፡ ምሥዋዐ ፡ ህየ ፡ ወዘብሐ ፡ ዘንተ ፡ ኵሎ ፡ ወከዐወ ፡ ደሞሙ ፡ ውስተ ፡ ምሥዋዕ ፡ ወነፈቆሙ ፡ እማእከል ፡ ወአንበሮሙ ፡ አንጸራቲሆሙ ፡ በበ ፡ ገጾሙ ፡ ወአዕዋፍሰ ፡ ኢነተፈ ፡ ወይወርዱ ፡ አዕዋፍ ፡ ዲበ ፡ ስፍሕ ፡ ወይከልኦሙ ፡ አብራም ፡ ወኢየኀድግ ፡ አዕዋፍ ፡ ይልክፍዎን ። ወኮነ ፡ ሶበ ፡ ዕርበተ ፡ ፀሐይ ፡ ድንጋፄ ፡ ወድቀ ፡ ላዕለ ፡ አብራም ፡ ወናሁ ፡ ግርማ ፡ ዐቢይ ፡ ጽልመት ፡ ወድቀ ፡ ላዕሌሁ ፡ ወተብህለ ፡ ለአብራም ፡ አእምሮ ፡ አእምር ፡ ከመ ፡ ፈላሴ ፡ ይከውን ፡ ዘርእከ ፡ ውስተ ፡ ምድረ ፡ ነኪር ፡ ወይቀንይዎሙ ፡ ወያሐምምዎሙ ፡ አርባዕተ ፡ ምእተ ፡ ዓመተ ፡ ወለሕዝብኒ ፡ እለ ፡ ይትቀነዩ ፡ አነ ፡ እፈትሕ ፡ ሎሙ ። ወአንተ ፡ ተሐውር ፡ ኀበ ፡ አበዊከ ፡ በሰላም ፡ ወትትቀበር ፡ በርስእ ፡ ሠናይ ። ወበትውልድ ፡ ራብዕ ፡ ይትመየጡ ፡ ዝየ ፡ እስመ ፡ ኢተፈጸመ ፡ ኃጢአቶሙ ፡ ለአሞሬዎን ፡ እስከ ፡ ይእዜ ። ወነቅህ ፡ እምንዋም ፡ ወተንሥአ ፡ ወፀሐይ ፡ ዐረበ ፡ ወነድ ፡ ኮነ ፡ ወናሁ ፡ እቶን ፡ ይጠይስ ፡ ወነበልባለ ፡ እሳት ፡ ኀለፈ ፡ ማእከለ ፡ ስፋሔ ። ወበይእቲ ፡ ዕለት ፡ ተካየደ ፡ ኪዳነ ፡ እግዚአብሔር ፡ ምስለ ፡ አብራም ፡ እንዘ ፡ ይብል ፡ ለዘርእከ ፡ እሁብ ፡ ዛተ ፡ ምድረ ፡ እምፈለገ ፡ ግብጽ ፡ እስከ ፡ ፈለገ ፡ ዐቢይ ፡ ፈለገ ፡ ኤውፍራጢስ ፡ ለቄኔውስ ፡ ወለቄኔዜውስ ፡ ወለቅድሞኔውስ ፡ ወለፌሬዜውስ ፡ ወለረፌእያን ፡ ወለፈከሬውስ ፡ ወለኤዌውስ ። ወኀለፈ ፡ ወአዕረገ ። ወበዛቲ ፡ ሌሊት ፡ ተካየድነ ፡ ኪዳነ ፡ ምስለ ፡ አብራም ፡ በከመ ፡ ኪዳን ፡ ዘተካየድነ ፡ በዛቲ ፡ ወርኅ ፡ ምስለ ፡ ኖኅ ። ወተፈሥሐ ፡ አብራም ፡ ወአይድዐ ፡ ዘንተ ፡ ኵሎ ፡ ለሰራይ ፡ ብእሲቱ ። ወአምከረቶ ፡ ሰራይ ፡ ለአብራም ፡ ምታ ፡ ወትቤሎ ፡ ባእ ፡ ኀበ ፡ አጋር ፡ ልእክትየ ፡ ግብጻዊት ፡ እመቦ ፡ ከመ ፡ አሐንጽ ፡ ለከ ፡ እምኔሃ ፡ ዘርአ ፡ ወስምዐ ፡ አብራም ፡ ቃለ ፡ ሰራይ ፡ ብእሲቱ ፡ ወይቤላ ፡ ግበሪ ። ወቦአ ፡ ኀቤሃ ፡ ወፀንሰት ፡ ወወለደት ፡ ወልደ ።

Chapter 15 ወበዓመት ፡ ኃምስ ፡ ዘሱባዔ ፡ ዘራብዑ ፡ ለኢዮቤልውን ፡ ዝንቱ ፡ በወርኅ ፡ ሣልስ ፡ በመንፈቀ ፡ ወርኅ ፡ ገብረ ፡ አብራም ፡ በዓለ ፡ ቀዳሜ ፡ ማእረረ ፡ ዘዘርአ ፡ ሥርናይ ፡ ወአዕረገ ፡ መሥዋዕተ ፡ ሐዲስ ፡ ዲበ ፡ ምሥዋዕ ፡ ቀዳሜ ፡ እክል ፡ ለእግዚአብሔር ። ወአስተርአዮ ፡ እግዚአብሔር ፡ ወይቤሎ ፡ እግዚአብሔር ፡ ለአብራም ፡ አነ ፡ አምላከ ፡ ሰዳይ ፡ ወአሥምር ፡ በቅድሜየ ፡ ወኩን ፡ ፍጹመ ፡ ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወአልህቀከ ፡ ጥቀ ፡ ወወድቀ ፡ አብራም ፡ በገጹ ፡ ወተናገሮ ፡ እግዚአብሔር ፡ ወይቤ ፡ ናሁ ፡ ሥርዓትየ ፡ ምስሌከ ፡ ወእሬስየከ ፡ አበ ፡ ለብዙኃን ፡ አሕዛብ ። ወኢይጼዋዕ ፡ እንከ ፡ ስምከ ፡ አብራም ፡ ወይኩን ፡ ስምከ ፡ እምይእዜ ፡ ወእስከ ፡ ለዓለም ፡ አብርሃም ፡ እስመ ፡ አበ ፡ ብዙኃን ፡ አሕዛብ ፡ ሤምኩከ ፡ ወአዐብየከ ፡ ጥቀ ። ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወማእከለ ፡ ዘርእከ ፡ እምድኅሬከ ፡ በትዝምዶሙ ፡ ወለሥርዓት ፡ ዘለዓለም ፡ ከመ ፡ እኩንከ ፡ አምላከ ፡ ወለዘርእከ ፡ እምድኅሬከ ፡ 10 [ወእሁብ ፡ ለከ ፡ ወለዘርእከ ፡ እምድኅሬከ] ፡ ምድረ ፡ ኀበ ፡ ፈለስከ ፡ ምድረ ፡ ከናአን ፡ ዘትኴንን ፡ ለዓለም ፡ ወእከውኖሙ ፡ አምላከ ። ወይቤሎ ፡ እግዚአብሔር ፡ ለአብርሃም ፡ ወአንተኒ ፡ ኪዳንየ ፡ ዕቀብ ፡ አንተ ፡ ወዘርእከ ፡ እምድኅሬከ ፡ ተከሰቡ ፡ ኵሎ ፡ ሮስክሙ ፡ ወተከሰቡ ፡ ቍልፈተክሙ ፡ ወይከውን ፡ ትእምርተ ፡ ሥርዓትየ ፡ ዘለዓለም ፡ ማእከሌየ ፡ ወማእከሌክሙ ፡ 12 ወለወልድ ፡ አመ ፡ ሳምንት ፡ ዕለት ፡ ትከስብዎ ፡ ኵሎ ፡ ሮሰ ፡ በትዝምድክሙ ፡ ወልደ ፡ ቤት ። ክስበተ ፡ ይትከሰብ ፡ ልደ ፡ ቤትከ ፡ ወዘበወርቅ ፡ ተሣየጥከ ፡ ይትከሰቡ ። ወዘኢኮነ ፡ ክሱበ ፡ ሮስ ፡ ዘኢተከስበ ፡ ሥጋ ፡ ቍልፈቱ ፡ በዕለተ ፡ ሳምንት ፡ ትሤሮ ፡ ይእቲ ፡ ነፍስ ፡ እምዘመዳ ፡ እስመ ፡ ኪዳንየ ፡ ነሠተ ። ወይቤሎ ፡ እግዚአብሔር ፡ ለአብርሃም ፡ ሶራ ፡ ብእሲትከ ፡ ኢትጸዋዕ ፡ እንከ ፡ ስማ ፡ ሶራ ፡ እስመ ፡ ሳራ ፡ ስማ ። ወእባርካ ፡ ወእሁበከ ፡ እምኔሃ ፡ ወልደ ፡ ወእባርኮ ፡ ወይከውን ፡ ሕዝበ ፡ ወነገሥተ ፡ አሕዛብ ፡ እምኔሁ ፡ ይከውኑ ። ወወድቀ ፡ አብርሃም ፡ በገጹ ፡ ወተፈሥሐ ፡ ወይቤ ፡ በልቡ ፡ እመ ፡ ለዘ ፡ ምእትኑ ፡ ዓመቱ ፡ ይትወለድ ፡ ወልድ ፡ ወሳራሂ ፡ እንተ ፡ ተስዓ ፡ ዓመታ ፡ ትወልድ ። ወይቤሎ ፡ አብርሃም ፡ ለእግዚአብሔር ፡ መፍትው ፡ ይሕየው ፡ ይስማዔል ፡ ቅድሜከ ። ወይቤ ፡ እግዚአብሔር ፡ ኦሆ ። ወበእንተ ፡ ይስማዔልሂ ፡ ሰማዕኩከ ፡ ወናሁ ፡ እባርኮ ፡ ወአልህቆ ፡ ወአበዝኆ ፡ ጥቀ ። ወኪዳንየ ፡ አቀውም ፡ ምስለ ፡ ይስሐቅ ፡ ዘትውልድ ፡ ለከ ፡ ሳራ ፡ በዝ ፡ መዋዕል ፡ በዓመት ፡ ካልእ ። ወፈጺሞ ፡ እንዘ ፡ ይትናገር ፡ ምስሌሁ ፡ ወዐርገ ፡ እግዚአብሔር ፡ እመልዕልተ ፡ አብርሃም ። ወገብረ ፡ አብርሃም ፡ በከመ ፡ ይቤሎ ፡ እግዚአብሔር ፡ ወነሥአ ፡ ይስማዔልሃ ፡ ወልዶ ፡ ወኵሎ ፡ ልደ ፡ ቤቱ ፡ ወዘሂ ፡ በወርቅ ፡ ተሣየጠ ፡ ኵሎ ፡ ሮሰ ፡ ዘውስተ ፡ ቤቱ ፡ ወከሰበ ፡ ሥጋ ፡ ምክሳቦሙ ። ወበጊዜ ፡ ዛቲ ፡ ዕለት ፡ ተከስበ ፡ አብርሃም ፡ [ወልደ ፡ ቤቱ] ፡ ወሰብአ ፡ ቤቱ ፡ ወኵሎሙ ፡ እለ ፡ በወርቅ ፡ ተሣየጠ ፡ ወእምውሉደ ፡ ነኪራንኒ ፡ ተከስቡ ፡ ምስሌሁ ። ወዝሕግ ፡ ለኵሉ ፡ ትውልድ ፡ ዘለዓለም ፡ ወአልቦ ፡ ክስበተ ፡ መዋዕል ። ወኵሉ ፡ ዘትውልደ ፡ ዘኢተከስበ ፡ ሥጋ ፡ ነፍስቱ ፡ እስከ ፡ ሰሙን ፡ ዕለት ፡ ኢኮነ ፡ እምውሉደ ፡ ሥርዓት ፡ ዘትካየደ ፡ እግዚአብሔር ፡ ለአብርሃም ፡ እስመ ፡ እምነ ፡ ውሉደ ፡ ሙስና ። እስመ ፡ ኵሎሙ ፡ መላእክተ ፡ ገጽ ። ወአንተኒ ፡ አዝዝ ፡ ለውሉደ ፡ እስራኤል ፡ ወይዕቀቡ ፡ ትእምርተዝ ፡ ኪዳን ፡ ለትውልዶሙ ፡ ለሥርዓት ፡ ዘለዓለም ፡ ወኢይሠረው ፡ እምነ ፡ ምድር ፡ እስመ ፡ ትእዛዝ ፡ ተሠርዐ ፡ ለኪዳን ፡ ከመ ፡ ይዕቀብዎ ፡ ለዓለም ። እስመ ፡ ይስማዔልሃ ፡ ወውሉዶ ፡ ወአኃዊሁ ፡ ወዔሳውሃ ፡ ኢያቅረቦ ፡ ኀቤሁ ፡ እግዚአብሔር ፡ ወኢኀረየ ፡ ቦሙ ፡ እስመ ፡ እምውሉደ ፡ አብርሃም ፡ እሙንቱ ፡ እስመ ፡ አእመሮሙ ፡ ወእስራኤልሃ ፡ ኀረየ ፡ ይኩንዎ ፡ ሕዝበ ፡ 31 ወቀደሶ ፡ ወአስተጋብአ ፡ እምኵሉ ፡ ውሉደ ፡ ሰብእ ። ወዲበ ፡ እስራኤልሰ ፡ ኢያስለጠ ፡ ወኢመነሂ ፡ መልአከ ፡ ወመንፈሰ ። ወይእዜኒ ፡ አነ ፡ እዜንወከ ፡ ከመ ፡ በዛቲ ፡ ሥርዓት ፡ ይሔስዉ ፡ ውሉደ ፡ እስራኤል ፡ ወኢይከስቡ ፡ ውሉዶሙ ፡ በከመ ፡ ኵሉ ፡ ዝሕግ ፡ እስመ ፡ እምሥጋ ፡ ክስበቶሙ ፡ ይከውኑ ፡ መትርፋነ ፡ ውስተ ፡ ክስበተ ፡ ውሉዶሙ ፡ ወኵሎሙ ፡ ውሉደ ፡ ቤልአር ፡ የኀድጉ ፡ ውሉዶሙ ፡ ዘእንበለ ፡ ክስበት ፡ በከመ ፡ ተወልዱ ። ወትከውን ፡ መዓት ፡ ላዕለ ፡ ውሉደ ፡ እስራኤል ፡ ዐባይ ፡ እምኀበ ፡ እግዚአብሔር ፡ እስመ ፡ ኀደጉ ፡ ኪዳኖ ፡ ወእምቃሉ ፡ ተግኅሡ ፡ ወወሐኩ ፡ ወፀረፉ ፡ በከመ ፡ ኢገብሩ ፡ ሥርዓቶ ፡ ለዝ ፡ ትእምርተ ።

Chapter 16 ወበሠርቀ ፡ ወርኅ ፡ ራብዕ ፡ አስተርአይናሁ ፡ ለአብርሃም ፡ በኀበ ፡ ድርስ ፡ ዘማምሪም ፡ ወተናገርነ ፡ ምስሌሁ ፡ ወንሕነ ፡ አይዳዕናሁ ፡ ከመ ፡ ይትወሀቦ ፡ ወልድ ፡ እምሳራ ፡ ብእሲቱ ። ወሰሐቀት ፡ ሳራ ፡ እስመ ፡ ሰምዐት ፡ ከመ ፡ ተናገርነ ፡ ዘንተ ፡ ቃለ ፡ ምስለ ፡ አብርሃም ። ወነገርናሃ ፡ ስሞ ፡ ለወልዳ ፡ በከመ ፡ ሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ፡ ይስሐቅ ። ወአመ ፡ ገባእነ ፡ ኀቤሃ ፡ በጊዜ ፡ ሰዓት ፡ ወይእቲኒ ፡ ፀንሰት ፡ ወልደ ። ወበዝ ፡ ወርኅ ፡ ገብረ ፡ እግዚአብሔር ፡ ኵነኔሆሙ ፡ ለሰዶም ፡ ወለገሞራ ፡ ወሶቦኤም ፡ ወለኵሉ ፡ አድያመ ፡ ዮርዳኖስ ፡ ወአውዓዮሙ ፡ በእሳት ፡ ወበተይ ፡ ወአጥፍኦሙ ፡ እስከ ፡ ዛቲ ፡ ዕለት ። ወከማሁ ፡ ይገብር ፡ እግዚአብሔር ፡ ኵነኔ ፡ በመካናት ፡ በውእደ ፡ ይገብሩ ፡ በከመ ፡ ይኵሶሙ ፡ ለሰዶም ፡ ከመ ፡ ኵነኔሃ ፡ ለሰዶም ። ወለሎጥ ፡ ናድኅኖ ፡ እስመ ፡ ተዘከሮ ፡ እግዚአብሔር ፡ ለአብርሃም ፡ ወአውፅኦ ፡ እማእከለ ፡ ግፍታኤ ። ወገብረ ፡ ውእቱኒ ፡ ወአዋልዲሁኒ ፡ ኀጢአተ ፡ በዲበ ፡ ምድር ፡ ዘኢኮነ ፡ ዲበ ፡ ምድር ፡ እመዋዕለ ፡ አዳም ፡ እስከ ፡ አሜሁ ፡ እስመ ፡ ሰከበ ፡ ብእሲ ፡ ምስለ ፡ ወለቱ ፡ 9 ወናሁ ፡ ተአዘዘ ፡ ወተቈርፀ ፡ ላዕለ ፡ ኵሉ ፡ ዘርኡ ፡ ውስተ ፡ ጽላተ ፡ ሰማይ ፡ ከመ ፡ ያእትቶሙ ፡ ወከመ ፡ ይሠርዎሙ ፡ ወከመ ፡ ይግበር ፡ ኵነኔሆሙ ፡ በከመ ፡ ኵነኔ ፡ ሰዶም ፡ ወከመ ፡ ኢያትርፍ ፡ ሎቱ ፡ ኵሎ ፡ ዘርአ ፡ ውስተ ፡ ምድር ፡ ዘሰብእ ፡ በዕለተ ፡ ደይን ። ወአዝንቱ ፡ ወርኅ ፡ ግዕዘ ፡ አብርሃም ፡ እምነ ፡ ኬብሮን ፡ ወሖረ ፡ ወኀደረ ፡ ማእከለ ፡ ቃዴስ ፡ ወሱር ፡ ውስተ ፡ አድባረ ፡ ጌራሮን ፡ 11 ወበመንፈቀ ፡ ወርኅ ፡ ኃምስ ፡ ግዕዘ ፡ እምህየ ፡ ወኀደረ ፡ ኀበ ፡ ዐዘቅተ ፡ መሐላ ። ወበመንፈቀ ፡ ወርኅ ፡ ሳድስ ፡ ሐወጸ ፡ እግዚአብሔር ፡ ለሳራ ፡ ወገብረ ፡ ላቲ ፡ በከመ ፡ ይቤ ፡ 13 ወፀንሰት ፡ ወወለደት ፡ ወልደ ፡ በወርኅ ፡ ሣልስ ፡ ወበመንፈቀ ፡ ወርኅ ፡ በመዋዕል ፡ ዘይቤሎ ፡ እግዚአብሔር ፡ ለአብርሃም ፡ በበዓለ ፡ ቀዳሚ ፡ ማእረር ፡ ተወልደ ፡ ይስሐቅ ፡ 14 ወከሰቦ ፡ አብርሃም ፡ ወልደ ፡ መዋዕል ፡ ሰሙን ፡ ውእቱ ፡ ቀዳሚ ፡ ተከስበ ፡ በከመ ፡ ኪዳን ፡ እንተ ፡ ተሠርዐት ፡ ለዓለም ። ወበዓመት ፡ ሳድስ ፡ ዘሱባዔ ፡ ራብዕ ፡ መጻእነ ፡ ኀበ ፡ አብርሃም ፡ ኀበ ፡ ዐዘቅተ ፡ መሐላ ፡ ወአስተርአይናሁ ፡ በከመ ፡ ንቤላ ፡ ለሳራ ፡ ከመ ፡ ንግባእ ፡ ኀቤሃ ፡ ወይእቲሂ ፡ ፀንሰት ፡ ወልደ ፡ 16 ወተመየጥነ ፡ በወርኅ ፡ ሳብዕ ፡ ወረከብናሃ ፡ ለሳራ ፡ ፅንስተ ፡ ቅድሜነ ፡ ወባረክናሃ ፡ ወዜነውናሃ ፡ ኵሎ ፡ ዘተአዘዘ ፡ ሎቱ ፡ ከመ ፡ ኢይመውት ፡ ዓዲ ፡ እስከ ፡ ይወልድ ፡ ስድስተ ፡ ውሉደ ፡ ወይሬኢ ፡ ዘእንበለ ፡ ይሙት ። ወኵሉ ፡ ዘርአ ፡ ውሉዱ ፡ አሕዛበ ፡ ይከውኑ ፡ ወምስለ ፡ አሕዛብ ፡ ይትኌለቁ ። እስመ ፡ ለመክፈልተ ፡ ልዑል ፡ ይከውን ፡ ወውስተ ፡ ዘይመልክ ፡ አምላክ ፡ ወረደ ፡ ኵሉ ፡ ዘርኡ ፡ ከመ ፡ ይኩን ፡ ለእግዚአብሔር ፡ ሕዝበ ፡ ትርሲት ፡ እምኵሉ ፡ ሕዝብ ፡ ወከመ ፡ ይኩን ፡ መንግሥተ ፡ ወክህነተ ፡ ወሕዝበ ፡ ቅዱሰ ። ወሖርነ ፡ ፍኖተነ ፡ ወዜነውናሃ ፡ ለሳራ ፡ ኵሎ ፡ ዘነገርናሁ ፡ ወተፈሥሑ ፡ ክልኤሆሙ ፡ ፍሥሐ ፡ ዐቢየ ፡ ጥቀ ። ወሐነጸ ፡ ህየ ፡ ምሥዋዐ ፡ ለእግዚአብሔር ፡ ዘባልሖ ፡ ወለዘያስተፈሥሖ ፡ በምድረ ፡ ፍልሰቱ ። ወሐነጸ ፡ ምጽላላተ ፡ ሎቱ ፡ ወለአግብርቲሁ ፡ በዛቲ ፡ በዓል ፡ ወውእቱ ፡ መቅድመ ፡ ገብረ ፡ በዓለ ፡ መጸላት ፡ በዲበ ፡ ምድር ፡ 22 ወበዝ ፡ ሰቡዕ ፡ መዋዕል ፡ ሀሎ ፡ ይቄርብ ፡ ኵሎ ፡ ዕለተ ፡ በበ ፡ ዕለት ፡ ውስተ ፡ ምሥዋዕ ፡ ጽንሐሐ ፡ ለእግዚአብሔር ፡ አልህምተ ፡ ክልኤተ ፡ ወአብሐኰ ፡ ክልኤተ ፡ አባግዐ ፡ ሰብዓተ ፡ መሐስአ ፡ ጠሊ ፡ አሐደ ፡ በእንተ ፡ ኃጢአት ፡ ከመ ፡ ያስተስሪ ፡ ቦቱ ፡ በእንቲአሁ ፡ ወበእንተ ፡ ዘርኡ ፡ 23 ወለመሥዋዕተ ፡ መድኃኒት ፡ አብሐኰ ፡ ሰብዓተ ፡ ወመሐስአ ፡ ሰብዓተ ፡ ወአባግዐ ፡ ሰብዓተ ፡ ወደቤላተ ፡ ሰብዓተ ፡ ወመሥዋዕቶሙሂ ፡ ወሞጻሕቶሙሂ ፡ ላዕለ ፡ ኵሉ ፡ ሥብሖሙ ፡ የዐጥን ። ወበጽባሕ ፡ ወሰርክሂ ፡ የዐጥን ፡ አፈወ ፡ ስኂን ፡ ወቅንአተ ፡ ወማየ ፡ ልብን ፡ ወናርዶስ ፡ ወከርቤ ፡ ወሰንብልተ ፡ ወቍስጠ ፡ ሰብዓቲሆሙ ፡ ዘንተ ፡ ኵሎ ፡ ይቄርብ ፡ ወጉአ ፡ ዕሩየ ፡ ተዐርዮ ፡ ድሙረ ፡ ንጹሐ ። ወገብረ ፡ ዘንተ ፡ በዓለ ፡ ሰቡዐ ፡ መዋዕለ ፡ እንዘ ፡ ይትፌሠሕ ፡ በኵሉ ፡ ልቡ ፡ ወበኵሉ ፡ ነፍሱ ፡ ውእቱ ፡ ወኵሎሙ ፡ እለ ፡ ቤቱ ፡ ወአልቦ ፡ መነሂ ፡ ነኪረ ፡ ምስሌሁ ፡ ወኵሉ ፡ ዘኢኮነ ፡ ክሱበ ። ወባረኮ ፡ ለፈጣሪሁ ፡ ዘፈጠሮ ፡ በትዝምዱ ፡ እስመ ፡ ለሥምረቱ ፡ ፈጠሮ ፡ እስመ ፡ አእመረ ፡ ወጠየቀ ፡ ከመ ፡ እምኔሁ ፡ ይከውን ፡ ተክለ ፡ ጽድቅ ፡ ለትውልድ ፡ ዘለዓለም ፡ ወእምኔሁ ፡ ዘርእ ፡ ቅዱስ ፡ ከመ ፡ ይኩን ፡ ከማሁ ፡ ለዘ ፡ ገብረ ፡ ኵሎ ። ወባረከ ፡ ወተፈሥሐ ፡ ወጸውዐ ፡ ስማ ፡ ለዛቲ ፡ በዓል ፡ በዓለ ፡ እግዚአብሔር ፡ ፍሥሓ ፡ ስጥወተ ፡ ለአምላክ ፡ ልዑል ። ወባረክናሁ ፡ ለዓለም ፡ ወኵሎ ፡ ዘርአ ፡ ዘእምድኅሬሁ ፡ በኵሉ ፡ ትውልደ ፡ ምድር ፡ እስወ ፡ ገብረ ፡ ዘንተ ፡ በዓለ ፡ በጊዜሃ ፡ በከመ ፡ ስምዐ ፡ ጽላተ ፡ ሰማይ ። በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ ላዕለ ፡ እስራኤል ፡ ከመ ፡ ይኩኑ ፡ ገባርያነ ፡ በዓለ ፡ መጸለት ፡ ሰቡዐ ፡ መዋዕለ ፡ በፍሥሓ ፡ በወርኅ ፡ ሳብዕ ፡ ዘይትወከፍ ፡ በቅድመ ፡ እግዚአብሔር ፡ ሕገ ፡ ዘለዓለም ፡ በትውልዶሙ ፡ በኵሉ ፡ ዓመት ፡ ወዓመታት ። ወአልቦ ፡ ለዝንቱ ፡ ወሰነ ፡ መዋዕል ፡ እስመ ፡ ለዓለም ፡ ውእቱ ፡ ሥሩዕ ፡ ላዕለ ፡ እስራኤል ፡ ከመ ፡ ይግበርዋ ፡ ወይንበሩ ፡ ወስተ ፡ ምጽላል ፡ ወከመ ፡ ያንብሩ ፡ አክሊላተ ፡ ዲበ ፡ ርእሶሙ ፡ ወከመ ፡ ይንሥኡ ፡ ዐጽቀ ፡ ቈጽል ፡ ወኲሐ ፡ እሙሐዝ ። ወነሥአ ፡ አብርሃም ፡ ልበ ፡ ፀበርት ፡ ወፍሬ ፡ ዕፅ ፡ ሠናይ ፡ ወበኵሉ ፡ ዕለት ፡ እምዕለት ፡ ሀሎ ፡ እንዘ ፡ የአውድ ፡ ምሥዋዐ ፡ በአዕፁቅ ፡ ስብዕ ፡ ለዕለት ፡ በጽባሕ ፡ ይጼብሕ ፡ ወይገኒ ፡ ለአምላኩ ፡ ኵሎ ፡ ዘበፍሥሓ ።

Chapter 17 ወበአሐዱ ፡ ዓመት ፡ ዘሱባዔ ፡ ኃምስ ፡ ኀደገ ፡ ጥበ ፡ ይስሐቅ ፡ በዝንቱ ፡ ኢዮቤልዉ ፡ ወገብረ ፡ አብርሃም ፡ ግዝአ ፡ ዐቢየ ፡ በወርኅ ፡ ሣልስ ፡ በዕለተ ፡ ኀድገ ፡ ጥበ ፡ ወልዱ ፡ ደስሐቅ ። ወይስማዔል ፡ ወልዳ ፡ ለአጋር ፡ ግብጻዊት ፡ በቅድመ ፡ ገጹ ፡ ለአብርሃም ፡ አቡሁ ፡ በመካኑ ፡ ወተፈሥሐ ፡ አብርሃም ፡ ወባረኮ ፡ ለእግዚአብሔር ፡ እስመ ፡ ርእየ ፡ ሎቱ ፡ ውሉዶ ፡ ወኢሞተ ፡ ዘእንበለ ፡ ውሉድ ፡ 3 ወተዘከረ ፡ ቃሎ ፡ ዘተናገሮ ፡ በዕለተ ፡ ተፈልጠ ፡ ሎጥ ፡ እምኔሁ ። ወርእየቶ ፡ ለይስማዔል ፡ ሳራ ፡ እንዘ ፡ ይትዋነይ ፡ ወይዘፍን ፡ ወአብርሃምኒ ፡ እንዘ ፡ ይትፌሣሕ ፡ ፍሥሓ ፡ ዐቢየ ፡ ወቀንአት ፡ ለይስማዔል ። ወማሕዝን ፡ ቃሉ ፡ በቅድመ ፡ አዕይንተ ፡ አብርሃም ፡ በእንተ ፡ አመቱ ፡ ወበእንተ ፡ ወልዱ ፡ ከመ ፡ ይስድዶሙ ፡ እምኀቤሁ ። ወይቤሎ ፡ እግዚአብሔር ፡ ለአብርሃም ፡ ኢይኩን ፡ ሐዘን ፡ በቅድመ ፡ አዕይንቲከ ፡ በእንተ ፡ ሕፃን ፡ ወበእንተ ፡ ወለት ፡ ኵሎ ፡ ዘትቤለከ ፡ ሳራ ፡ ስማዕ ፡ ንባባ ፡ ወግበር ፡ እስመ ፡ በይስሐቅ ፡ ይጼዋዕ ፡ ለከ ፡ ስም ፡ ወዘርእ ። ወበእንተ ፡ ወልዳስ ፡ ለዛ ፡ ወለት ፡ ውስተ ፡ ዐቢይ ፡ ሕዝብ ፡ እሬስዮ ፡ እስመ ፡ እምዘርእከ ፡ ውእቱ ። ወጌሠ ፡ አብርሃም ፡ በነግህ ፡ ወነሥአ ፡ ሐባውዘ ፡ ወዝቀ ፡ ማይ ፡ ወአስከማ ፡ ለአጋር ፡ ወለሕፃን ፡ ወፈነዋ ፡ 9 ወሖረት ፡ ወታንጌጊ ፡ በገዳመ ፡ ቤርሳቦ ፡ ወተፈጸመ ፡ ማይ ፡ እምዝቅ ፡ ወጸምአ ፡ ሕፃን ፡ ወስእነ ፡ ሐዊረ ፡ ወወድቀ ። ወነሥአቶ ፡ እሙ ፡ ወሐዊራ ፡ ገደፈቶ ፡ ታሕተ ፡ አሐቲ ፡ ኤልያስ ፡ ወሖረት ፡ ወነበረት ፡ አንጻሮ ፡ መጠነ ፡ አሐቲ ፡ ምንዳፍ ፡ እስመ ፡ ትቤ ፡ ኢይርአይ ፡ ሞቶ ፡ ለሕፃንየ ፡ ወነቢራ ፡ በከየት ። ወይቤላ ፡ መልአክ ፡ አምላክ ፡ አሐዱ ፡ እምቅዱሳን ፡ ምንተ ፡ ትበክዪ ፡ አንቲ ፡ አጋር ፡ ተንሢአኪ ፡ ንሥእዮ ፡ ለሕፃን ፡ ወአኀዝዮ ፡ በእዴኪ ፡ እስመ ፡ ሰምዐ ፡ እግዚአብሔር ፡ ቃለኪ ፡ ወርእዮ ፡ ለሕፃን ። ወከሠተት ፡ አዕይንቲሃ ፡ ወርእየት ፡ ዐዘቅተ ፡ ማይ ፡ ወሖረት ፡ ወመልአት ፡ ዝቃ ፡ ማየ ፡ ወአስተየት ፡ ሕፃና ። ወልህቀ ፡ ሕፃን ፡ ወኮነ ፡ ነዳፌ ፡ ወሀሎ ፡ እግዚአብሔር ፡ ምስሌሁ ፡ ወነሥአት ፡ ሎሙ ፡ እሙ ፡ ብእሲተ ፡ እምአዋልደ ፡ ግብጽ ፡ 14 ወወለደት ፡ ሎቱ ፡ ወልደ ፡ ወጸውዐ ፡ ስሞ ፡ ናቤዎት ፡ እስመ ፡ ትቤ ፡ ቅሩብ ፡ እግዚአብሔር ፡ ሊተ ፡ ሶበ ፡ ጸዋዕክዎ ። ወኮነ ፡ በሱባዔ ፡ ሳብዕ ፡ በቀዳሚ ፡ ዓመት ፡ በወርኅ ፡ ቀዳሚ ፡ በዝ ፡ ኢዮቤልዉ ፡ አመ ፡ ዐሡሩ ፡ ወሰኑዩ ፡ ለዝ ፡ ወርኅ ፡ ኮነ ፡ ቃላት ፡ በሰማያት ፡ በእንተ ፡ አብርሃም ። ወመጽአ ፡ መኰንን ፡ መስቴማ ፡ ወይቤ ፡ ቅድሜሁ ፡ ለአምላክ ፡ ናሁ ፡ አብርሃም ፡ ያፈቅሮ ፡ ለይስሐቅ ፡ ወልዱ ፡ ወያስተአድሞ ፡ ኪያሁ ፡ እምኵሉ ። ወእግዚአብሔር ፡ ያአምር ፡ ከመ ፡ መሃይምን ፡ አብርሃም ፡ በኵሉ ፡ ምንዳቤ ፡ ዘይቤሎ ፡ እስመ ፡ አመክሮ ፡ በምድሩ ፡ ወበዐባር ፡ ወአመከሮ ፡ በብዕለ ፡ ነገሥት ። ወበኵሉ ፡ በዘአመከሮ ፡ ተረክበ ፡ ምእመነ ፡ ወኢተአንተለ ፡ ነፍሱ ፡ ወኢጐንደየ ፡ ገቢሮቶ ፡ እስመ ፡ ምእመን ፡ ወመፍቀሬ ፡ እግዚአብሔር ።

Chapter 18 ወይቤሎ ፡ እግዚአብሔር ፡ አብርሃም ፡ አብርሃም ፡ ወይቤ ፡ ነየ ፡ አነ ፡ 2 ወይቤሎ ፡ ንሥእ ፡ ወልደከ ፡ ፍቁረከ ፡ ዘታፈቅር ፡ ይስሐቅሃ ፡ ወሖር ፡ ውስተ ፡ ምደር ፡ ልዕልት ፡ ወአዕርጎ ፡ ውስተ ፡ አሐዱ ፡ እምአድባር ፡ ዘአነ ፡ አየድዐከ ፡ 3 ወአሌለየ ፡ በነገህ ፡ ወጸዐነ ፡ አድግቶ ፡ ወክልኤተ ፡ ደቆ ፡ ነሥአ ፡ ምስሌሁ ፡ ወይስሐቅሃ ፡ ወልዶ ፡ ወዕፀወ ፡ መሥዋዕት ፡ ሠፀረ ፡ ወሖረ ፡ ወስተ ፡ መካን ፡ በሠሉስ ፡ ዕለት ። ወበጽሐ ፡ እስከ ፡ ዐዘቅተ ፡ ማይ ፡ ወይቤ ፡ ለደቁ ፡ ንበሩ ፡ ዝየ ፡ ምስለ ፡ አድግት ፡ ወአነ ፡ ወሕፃን ፡ ነሐውር ፡ ወሰጊደነ ፡ ንገብእ ፡ ኀቤክሙ ። ወነሥአ ፡ ዕፀ ፡ መሥዋዕት ፡ ወአስከሞ ፡ ለይስሐቅ ፡ ወልዱ ፡ ወነሥአ ፡ በእዴሁ ፡ እሳተ ፡ ወመጥባሕተ ። ወይቤ ፡ ይስሐቅ ፡ ለአቡሁ ፡ አባ ። ወይቤ ፡ እግዚአብሔር ፡ ያሬኢ ፡ ሎቱ ፡ በግዐ ፡ ለጽንሓሕ ፡ ወልድየ ። ወሐነጸ ፡ ምሥዋዐ ፡ ወአንበረ ፡ ዕፀወ ፡ ዲበ ፡ መሥዋዕት ፡ ወአሰረ ፡ ይስሐቅሃ ፡ ወልዶ ፡ ወአንበሮ ፡ ዲበ ፡ ዕፀው ፡ ዘመልዕልተ ፡ ምሥዋዕ ፡ ወሰፍሐ ፡ እዴሁ ፡ ይንሥእ ፡ መጥባሕተ ፡ ከመ ፡ ይዝብሖ ፡ ለይስሐቅ ፡ ወልዱ ። ወአነ ፡ ቆምኩ ፡ ቅድሜሁ ፡ ወቅድመ ፡ መኰንነ ፡ መስቴማ ፡ ወይቤ ፡ እግዚአብሔር ፡ በሎ ፡ ኢያውርድ ፡ እዴሁ ፡ ላዕለ ፡ ሕፃን ፡ ወኢይግበር ፡ ምንተኒ ፡ ላዕሌሁ ፡ እስመ ፡ አእመርኩ ፡ ከመ ፡ ፈራሄ ፡ እግዚአብሔር ፡ ውእቱ ። ጸዋዕክዎ ፡ እምሰማይ ፡ ወእቤሎ ፡ አብርሃም ፡ ወደንገፀ ፡ ወይቤ ፡ ነየ ፡ አነ ። ወእቤሎ ፡ ኢትፈኑ ፡ እዴከ ፡ ዲበ ፡ ሕፃን ፡ ወኢትግበረ ፡ ምንተኒ ፡ ዲቤሁ ፡ እስመ ፡ ይእዜ ፡ አእመርኩ ፡ ከመ ፡ ፈራሄ ፡ እግዚአብሔር ፡ አንተ ፡ ወኢመሐከ ፡ ወልደከ ፡ በኵረከ ፡ እምኔየ ፡ 12 ወተኀፍረ ፡ መኰንነ ፡ መስቴማ ፡ ወአንሥአ ፡ አብርሃም ፡ አዕይንቲሁ ፡ ወርእየ ፡ ወናሁ ፡ አሐዱ ፡ በሐኵ ፡ እኁዝ ፡ ወይመጽእ ፡ በአቅርንቲሁ ፡ ወሖረ ፡ አብርሃም ፡ ወነሥኦ ፡ ለበሐኵ ፡ ወአዕረጎ ፡ ለጽንሓሕ ፡ ህየንተ ፡ ወልዱ ። ወጸውዖ ፡ አብርሃም ፡ ለውእቱ ፡ መካን ፡ እግዚአብሔር ፡ ርእየ ፡ ከመ ፡ ይትበሀል ፡ እግዚአብሔር ፡ ርእየ ፡ ውእቱ ፡ ደብሩ ፡ ለጽዮን ። ወጸውዖ ፡ እግዚአብሔር ፡ ለአብርሃም ፡ በስሙ ፡ ዳግመ ፡ እምሰማይ ፡ በከመ ፡ አስተርአይነ ፡ ከመ ፡ ንትናገሮ ፡ በስመ ፡ እግዚአብሔር ፡ 15 ወይቤ ፡ በርእስየ ፡ መሐልኩ ፡ ይቤ ፡ እግዚአብሔር ፡ እስመ ፡ ገበርከ ፡ ዘንተ ፡ ቃለ ፡ ወኢመሐከ ፡ ወልደከ ፡ በኵረከ ፡ እምኔየ ፡ ዘአፍቀርከ ። ወይትባረኩ ፡ በዘርእከ ፡ ኵሎሙ ፡ አሕዛበ ፡ ምድር ፡ ህየንተ ፡ ዘሰማዕከ ፡ ቃለ ፡ ዚአየ ። ወሖረ ፡ አብርሃም ፡ ኀበ ፡ ደቁ ፡ ወተንሥኡ ፡ ወሖሩ ፡ ቤርሳቤ ፡ ኅቡረ ። ወይገብር ፡ ዛተ ፡ በዓለ ፡ በኵሉ ፡ ዓመታት ፡ ሰቡዐ ፡ ዕለተ ፡ በፍሥሓ ፡ ወሰመያ ፡ በዓለ ፡ እግዚአብሔር ፡ በከመ ፡ ሰቡዕ ፡ ዕለት ፡ እለ ፡ ሖረ ፡ ወተመይጠ ፡ በሰላም ። ወከመዝ ፡ ሥሩዕ ፡ ውእቱ ፡ ወጽሑፍ ፡ ውስተ ፡ ጽላተ ፡ ሰማይ ፡ በእንተ ፡ እስራኤል ፡ ወዲበ ፡ ዘርኡ ፡ ለገቢረ ፡ ዛቲ ፡ በዓል ፡ ሰቡዐ ፡ ዕለተ ፡ በፍሥሓ ፡ በዓል ።

Chapter 19 ወበዓመት ፡ አሐዱ ፡ ዘሱባዔ ፡ ቀዳሚ ፡ በዘ ፡ አርብዓ ፡ ወክልኤቱ ፡ ኢዮቤልዉ ፡ ተመይጠ ፡ አብርሃም ፡ ወኀደረ ፡ አንጸረ ፡ ኬብሮን ፡ ዛቲ ፡ ይእቲ ፡ ቀሪያታርባቅ ፡ ክልኤ ፡ ሱባዔ ፡ ዓመት ። ወበዓመት ፡ ቀዳሚ ፡ ዘሱባዔ ፡ ሣልስ ፡ ዘዝ ፡ ኢዮቤልዉ ፡ ተፈጸመ ፡ መዋዕለ ፡ ሕይወተ ፡ ሳራ ፡ ወሞተት ፡ በኬብሮን ። ወሖረ ፡ አብርሃም ፡ ከመ ፡ ይብኪያ ፡ ወይቅብራ ። እስመ ፡ በትዕግሥተ ፡ መንፈስ ፡ ተናገረ ፡ ምስለ ፡ ውሉደ ፡ ኬጥ ፡ ከመ ፡ የሀብዎ ፡ መካነ ፡ ከመ ፡ ይቅበር ፡ በድኖ ፡ ውስቴቱ ። ወእግዚአብሔር ፡ ወሀቦ ፡ ሞገሰ ፡ ሎቱ ፡ በቅድመ ፡ ኵሎሙ ፡ እለ ፡ ይሬእይዎ ። ወእሙንቱሂ ፡ ያስተበቍዕዎ ፡ እንዘ ፡ ይብሉ ፡ ነሀብከ ፡ በከ ፡ ወኢነሥአ ፡ እምእዴሆሙ ፡ በከ ፡ እስመ ፡ ወሀበ ፡ ሤጦ ፡ ለመካን ፡ ብሩረ ፡ ፍጹመ ። ወኮነ ፡ ኵሉ ፡ መዋዕለ ፡ ሕይወታ ፡ ለሳራ ፡ ምእት ፡ ወዕሥራ ፡ ወሰብዐቱ ፡ እሉ ፡ ዝክልኤ ፡ ኢዮቤልዉ ፡ ወአርባዕቱ ፡ ሱባዔ ፡ ወዓመት ፡ አሐዱ ፡ ዝንቱ ፡ መዋዕለ ፡ ዓመታተ ፡ ሕይወታ ፡ ለሳራ ። ወዝመከራ ፡ ዓሥር ፡ በዘ ፡ ተመከረ ፡ ቦቱ ፡ አብርሃም ፡ ወተረክበ ፡ ምእመነ ፡ ዕጉሠ ፡ መንፈስ ፡ 9 ወኢይቤ ፡ ቃለ ፡ በእንተ ፡ ንባብ ፡ ዘምድር ፡ ዘይቤ ፡ እግዚአብሔር ፡ የሀባ ፡ ኪያሃ ፡ ሎቱ ፡ ወለዘርኡ ፡ እምድኅሬሁ ። ወበዓመት ፡ ራብዕ ፡ ሎቱ ፡ ነሥአ ፡ ለይስሐቅ ፡ ወልዱ ፡ ብእሲተ ፡ ወስማ ፡ ርብቃ ፡ ወለተ ፡ ባቱኤል ፡ ወልደ ፡ ናኮር ፡ እኅወ ፡ አብርሃም ፡ እኅተ ፡ ላባ ፡ ወባቱኤል ፡ ወለዶሙ ፡ ለባቱኤላዊያን ፡ ወልደ ፡ ሜልከ ፡ ዘብእሲተ ፡ ናኮር ፡ እኅወ ፡ አብርሃም ። ወአብርሃም ፡ ነሥአ ፡ ሎቱ ፡ ሣልስተ ፡ ብእሲተ ፡ ወስማ ፡ ኬጡራ ፡ እምነ ፡ ውሉደ ፡ ልደ ፡ ቤቱ ፡ አመ ፡ ሞተት ፡ አጋር ፡ እምቅድመ ፡ ሳራ ፡ 12 ወወለደት ፡ ሎቱ ፡ ውሉደ ፡ ስድስተ ፡ ዘንበሪሃ ፡ ወያክስንሃ ፡ ወማዳይሃ ፡ ወማዳንሃ ፡ ወኢያዝቦቅሃ ፡ ወሴሂያሃ ፡ በክልኤ ፡ ሱባዔ ፡ ዓመት ። ወበሱባዔ ፡ ሳድስ ፡ በካልእ ፡ ዓመቱ ፡ ወለደት ፡ ርብቃ ፡ ለይስሐቅ ፡ ክልኤ ፡ ደቂቀ ፡ ያዕቆብሃ ፡ ወዔሳውሃ ፡ ወያዕቆብሰ ፡ ፍጹም ፡ ወራትዕ ፡ ወዔሳው ፡ ውእቱ ፡ ብእሲ ፡ ድሩክ ፡ ወሐቃላዊ ፡ ወጸጓር ፡ ወያዕቆብ ፡ የኀድር ፡ ውስተ ፡ ምጽላላት ፡ 14 ወልህቁ ፡ ወራዙት ፡ ወተምህረ ፡ ያዕቆብ ፡ መጽሐፈ ፡ ወዔሳውሰ ፡ ኢተምህረ ፡ እስመ ፡ ብእሲ ፡ ሐቃላዊ ፡ ውእቱ ፡ ወነዓዊ ፡ ወተምህረ ፡ ፀብአ ፡ ወኵሉ ፡ ግብሩ ፡ ድሩክ ። ወያፈቅር ፡ ያዕቆብሃ ፡ አብርሃም ፡ ወይስሐቅ ፡ ዔሳውሃ ። ወርእየ ፡ አብርሃም ፡ ግብሮ ፡ ለዔሳው ፡ ወአእመረ ፡ ከመ ፡ በያዕቆብ ፡ ይጼዋዕ ፡ ሎቱ ፡ ስም ፡ ወዘርእ ። ወይቤላ ፡ ወለትየ ፡ ዕቀቢ ፡ ወልድየ ፡ ያዕቆብሃ ፡ እስመ ፡ ውእቱ ፡ ይከውን ፡ ህየንቴየ ፡ ዲበ ፡ ምድር ፡ ወለበረከት ፡ በማእከለ ፡ ውሉደ ፡ ሰብእ ፡ ወለኵሉ ፡ ዘርአ ፡ ሴም ፡ ለትምክሕት ፡ 18 እስመ ፡ አአምር ፡ ከመ ፡ ኪያሁ ፡ የኀሪ ፡ እግዚአብሔር ፡ ሎቱ ፡ ለሕዝብ ፡ ቃውም ፡ እምኵሎሙ ፡ እለ ፡ ዲበ ፡ ገጸ ፡ ምድር ። ወናሁ ፡ ይስሐቅ ፡ ወልድየ ፡ ያፈቅሮ ፡ ለዔሳው ፡ እምነ ፡ ያዕቆብ ፡ ወአነ ፡ እሬእየኪ ፡ መፍቀሪተ ፡ ጽድቅ ፡ ያዕቆብሃ ፡ 20 ወስኪ ፡ ዓዲ ፡ አሠንዮ ፡ ላዕሌሁ ፡ ወይኩና ፡ አዕይንቲኪ ፡ ላዕሌሁ ፡ ለፍቁር ። ይጽንዓ ፡ እደዊኪ ፡ ወትትፈሣሕ ፡ ልብኪ ፡ በወልድኪ ፡ ያዕቆብ ። እመ ፡ ይክል ፡ ሰብእ ፡ ኆልቆ ፡ ኆፃ ፡ ምድር ፡ ከማሁ ፡ ይትኌለቁ ፡ ዘርኡሂ ፡ 23 ወኵሎን ፡ በረከት ፡ እለ ፡ ባረከኒ ፡ እግዚአብሔር ፡ ኪያየ ፡ ወዘርእየ ፡ ለያዕቆብ ፡ ወለዘርኡ ፡ ይኩን ፡ ኵሎ ፡ መዋዕለ ፡ 24 ወበዘርኡ ፡ ይትባረክ ፡ ስምየ ፡ ወስመ ፡ አበዊየ ፡ ሴም ፡ ወኖኅ ፡ ወሄኖክ ፡ ወመላልኤል ፡ ወሄኖስ ፡ ወሴት ፡ ወአዳም ፡ 25 ወእሙንቱ ፡ ይኩኑ ፡ ለሣርሮ ፡ ሰማይ ፡ ወለአጽንዖ ፡ ምድር ፡ ወለሐድሶ ፡ ኵሉ ፡ ብርሃናት ፡ ዘዲበ ፡ ምጽናዓት ። ወጸውዖ ፡ ለያዕቆብ ፡ በቅድመ ፡ አዕይንቲሃ ፡ ለርብቃ ፡ እሙ ፡ ወሰዐሞ ፡ ወባረኮ ፡ ወይቤ ፡ 27 ወልድየ ፡ ያዕቆብ ፡ ፍቁር ፡ ዘአፍቀረት ፡ ነፍስየ ፡ ይባርከ ፡ አምላክ ፡ እመልዕልተ ፡ ምጽናዓት ፡ ወየሀብከ ፡ ኵሎን ፡ በረከታተ ፡ እለ ፡ ባረኮ ፡ ለአዳም ፡ ወሄኖክሃ ፡ ወኖኅሃ ፡ ወሴምሃ ፡ ወኵሎ ፡ ዘመጠነ ፡ ተናገረኒ ። ወኢይመብሉ ፡ ላዕሌከ ፡ ወላዕለ ፡ ዘርእከ ፡ መናፍስተ ፡ መስቴማ ፡ ከመ ፡ ያርኅቁከ ፡ እምድኅረ ፡ እግዚአብሔር ፡ ዘውእቱ ፡ አምላክከ ፡ እምይእዜ ፡ ወእስከ ፡ ለዓለም ። ወይኩንከ ፡ እግዚአብሔር ፡ አምላክ ፡ አበ ፡ ወአንተሂ ፡ ወልደ ፡ በኵረ ፡ ወለሕዝብ ፡ ኵሎ ፡ መዋዕለ ። ወወፅኡ ፡ ክልኤሆሙ ፡ ኅቡረ ፡ እምኀበ ፡ አብርሃም ፡ 31 ወአፍቀረቶ ፡ ርብቃ ፡ ለያዕቆብ ፡ በኵሉ ፡ ልባ ፡ ወበኵሉ ፡ መንፈሳ ፡ ብዙኀ ፡ ፈድፋደ ፡ እምነ ፡ ዔሳው ፡ ወይስሐቅ ፡ ያፈቅሮ ፡ ለዔሳው ፡ ፈድፋደ ፡ እምያዕቆብ ።

Chapter 20 ወበአርብዓ ፡ ወክልኤቱ ፡ ኢዮቤልዉ ፡ በዓመት ፡ ቀዳሚ ፡ ዘሱባዔ ፡ ሳብዕ ፡ ጸውዐ ፡ አብርሃም ፡ ይስማዔልሃ ፡ ወዐሠርተ ፡ ወክልኤተ ፡ ደቂቆ ፡ ወይስሐቅሃ ፡ ወክልኤሆሙ ፡ ደቂቆ ፡ ወስድስተ ፡ ደቂቀ ፡ ኬጡራ ፡ ወውሉዶሙ ፡ 2 ወአዘዞሙ ፡ ከመ ፡ ይዕቀቡ ፡ ፍኖተ ፡ እግዚአብሔር ፡ ከመ ፡ ይግበሩ ፡ ጽድቀ ፡ ወያፍቅር ፡ አሐዱ ፡ አሐዱ ፡ ቢጾ ፡ ወከመ ፡ ይኩኑ ፡ ከማሁ ፡ በውስተ ፡ ኵሉ ፡ ፀብእ ፡ ከመ ፡ ይሖሩ ፡ ዲበ ፡ አሐዱ ፡ ላዕሌሆሙ ፡ ወለገቢረ ፡ ፍትሕ ፡ ወጽድቅ ፡ በዲበ ፡ ምድር ፡ 3 ከመ ፡ ይክስቡ ፡ ውሉዶሙ ፡ በኪዳን ፡ እንተ ፡ ተካየደ ፡ ምስሌሆሙ ፡ ወከመ ፡ ኢይትዐደዉ ፡ የማነ ፡ ወፀጋመ ፡ እምኵሎን ፡ ፍናዌ ፡ ዘአዘዘነ ፡ እግዚአብሔር ፡ ወከመ ፡ ንትዐቀብ ፡ እምኵሉ ፡ ዝሙት ፡ ወርኵስ ፡ ወከመ ፡ ንኅድግ ፡ እማእከሌነ ፡ ኵሎ ፡ ርኵሰ ፡ ወዝሙተ ። ወእመ ፡ ዘመወት ፡ ለክሙ ፡ ኵላ ፡ ብእሲት ፡ ወእመኒ ፡ ወለት ፡ አውዕይዋ ፡ በእሳት ፡ ወኢይዘምዋ ፡ ድኅረ ፡ አዕይንቲሆን ፡ ወልቦንሂ ፡ ከመ ፡ ይንሥኡ ፡ ሎሙ ፡ ብእሲተ ፡ እምነ ፡ አዋልደ ፡ ከናአን ፡ እስመ ፡ ይሤሮ ፡ ዘርአ ፡ ከናአን ፡ እምድር ። ወነገሮሙ ፡ ኵነኔሆሙ ፡ ለረዐይት ፡ ወኵነኔ ፡ ሰዶም ፡ ከመ ፡ ተኰነኑ ፡ በእንተ ፡ እከዮሙ ፡ በእንተ ፡ ዝሙት ፡ ወርኵስ ፡ ወሙስና ፡ በበይናቲሆሙ ፡ በዝሙት ፡ ሞቱ ። ወአንትሙኒ ፡ ተዐቀቡ ፡ እምኵሉ ፡ ዝሙት ፡ ወርኵስ ፡ ወእምኵሉ ፡ ግማኔ ፡ ኀጢአት ፡ ከመ ፡ ኢተሀቡ ፡ ስመነ ፡ ለመርገም ፡ ወኵሎ ፡ ሕይወተክሙ ፡ ለትምክሕት ፡ ወኵሎ ፡ ውሉደክሙ ፡ ለሙስና ፡ በሰይፍ ፡ ወትከውኑ ፡ ርጉማነ ፡ ከመ ፡ ሰዶም ፡ ወኵሉ ፡ ተረፍክሙ ፡ ከመ ፡ ውሉደ ፡ ገሞራ ። አነ ፡ አሰምዕ ፡ ለክሙ ፡ ውሉድየ ፡ አፍቅርዎ ፡ ለአምላከ ፡ ሰማይ ፡ ወተፀመዱ ፡ ኵሎ ፡ ትእዛዞ ፡ ወኢትሖሩ ፡ ድኅረ ፡ ጣዖቶሙ ፡ ወድኅረ ፡ ርኵሶሙ ። ወአማልክተ ፡ ስብኮ ፡ ኢትግበሩ ፡ ለክሙ ፡ ወግልፈዋተ ፡ እስመ ፡ ከንቱ ፡ ውእቱ ። አላ ፡ አምልኩ ፡ አምላከ ፡ ልዑለ ፡ ወስግዱ ፡ ሎቱ ፡ ወትረ ፡ ወተሰፈዉ ፡ ገጸ ፡ ዚአሁ ፡ በኵሉ ፡ ጊዜ ፡ ወግብሩ ፡ ጽድቀ ፡ ወርትዐ ፡ በቅድሜሁ ፡ ከመ ፡ ይፍተው ፡ ላዕሌክሙ ፡ ወየሀብክሙ ፡ ምሕረቶ ፡ ወያውርድ ፡ ለክሙ ፡ ዝናመ ፡ ነግህ ፡ ወሰርክ ። ወትከውን ፡ ለበረከት ፡ በዲበ ፡ ምድር ፡ ወይፈትዉክሙ ፡ ኵሎሙ ፡ አሕዛበ ፡ ምድር ። ወወሀቦ ፡ ለይስማዔል ፡ ወለውሉዱ ፡ ወለውሉደ ፡ ኬጡራ ፡ ሀብተ ፡ ወፈነዎሙ ፡ እምይስሐቅ ፡ ወልዱ ፡ ወኵሎ ፡ ወሀቦ ፡ ለይስሐቅ ፡ ወልዱ ፡ 12 ወሖረ ፡ ይስማዔል ፡ ወውሉዱ ፡ ወውሉደ ፡ ኬጡራ ፡ ወውሉዶሙ ፡ ኅቡረ ፡ ወኀደሩ ፡ እምፋርሞን ፡ እስከ ፡ ምብዋአ ፡ ባቢሎን ፡ ውስተ ፡ ኵሉ ፡ ምድር ፡ እንተ ፡ ገጸ ፡ ጽባሕ ፡ አንጻረ ፡ ገዳም ። ወተደመሩ ፡ እሉ ፡ ምስለ ፡ እሉ ፡ ወተጸውዐ ፡ ስሞሙ ፡ ዐረብ ፡ ወእስማዔላዊያን ።

Chapter 21 ወበሳድስ ፡ ዓመት ፡ ዘሳብዕ ፡ ሱባዔ ፡ ዘዝንቱ ፡ ኢዮቤልዉ ፡ ጸውዐ ፡ አብርሃም ፡ ይስሐቅሃ ፡ ወልዶ ፡ ወአዘዞ ፡ እንዘ ፡ ይብል ፡ አነ ፡ ረሳእኩ ፡ ወኢያአምር ፡ ዕለተ ፡ ሞትየ ፡ እስመ ፡ ጸገብኩ ፡ መዋዕልየ ። ወናሁ ፡ አነ ፡ ወልደ ፡ ምእት ፡ ወሰብዓ ፡ ወኀምስቱ ፡ ዓመት ፡ ወበኵሉ ፡ መዋዕለ ፡ ሕይወትየ ፡ ሀሎኩ ፡ እንዘ ፡ እዜከሮ ፡ ለእግዚአብሔር ፡ ወእንዘ ፡ አኀሥሥ ፡ በኵሉ ፡ ልብየ ፡ ከመ ፡ እግበር ፡ ፈቃዳቲሁ ፡ ወከመ ፡ አርትዕ ፡ ሐዊረ ፡ በኵሉ ፡ ፍናዊሁ ፡ 3 ጣዖተ ፡ ጸልአት ፡ ነፍስየ ፡ ከመ ፡ እትዓቀብ ፡ ለገቢረ ፡ ፈቃዱ ፡ ለዘ ፡ ፈጠረኒ ፡ 4 እስመ ፡ አምላክ ፡ ሕያው ፡ ውእቱ ፡ ወቅዱስ ፡ ውእቱ ፡ ወምእመን ፡ ወጻድቅ ፡ ውእቱ ፡ እምኵሉ ፡ ወአልቦ ፡ በኀቤሁ ፡ ነሢአ ፡ ገጽ ፡ ወነሢአ ፡ ሕልያን ፡ እስመ ፡ አምላክ ፡ ጻድቅ ፡ ውስቱ ፡ ወገባሬ ፡ ኵነኔ ፡ ውእቱ ፡ እምኵሎሙ ፡ እለ ፡ ይትዐደዉ ፡ ትእዛዞ ፡ ወለእለ ፡ ይሜንኑ ፡ ኪዳኖ ። ወአንተኒ ፡ ወልድየ ፡ ዕቀብ ፡ ትእዛዞ ፡ ወሥርዓቶ ፡ ወኵነኔሁ ፡ ወኢትሖር ፡ ድኅሬሆሙ ፡ ለርኩሳን ፡ ወድኅሬሆሙ ፡ ለግልፎ ፡ ወድኅሬሆሙ ፡ ለስብኮ ፡ 6 ወኢትብላዕ ፡ ምንተኒ ፡ ደመ ፡ ዘአርዌ ፡ ወእንስሳ ፡ ወዘኵሉ ፡ ዖፍ ፡ ዘይሰርር ፡ ውስተ ፡ ሰማይ ፡ 7 ወለእመ ፡ ኀረድከ ፡ ኅርድ ፡ ለጽንሐሐ ፡ ሰላም ፡ ዘይሰጠው ፡ ኅርድዎ ፡ ወደሞሙ ፡ ትክዕዉ ፡ ውስተ ፡ ምሥዋዕ ፡ ወኵሎ ፡ ስብሐ ፡ ጽንሐሕ ፡ ታዐርግ ፡ ውስተ ፡ ምሥዋዕ ፡ ምስለ ፡ ስንዳሌ ፡ ወመሥዋዕተ ፡ ልዉስ ፡ በቅብእ ፡ ምስለ ፡ ሞጻሕቱ ፡ ታዐርጎ ፡ ኵሎ ፡ ኅቡረ ፡ ዲበ ፡ ምሥዋዕ ፡ ጽንሐሐ ፡ መዓዛ ፡ ሠናይ ፡ ቅድመ ፡ እግዚአብሔር ፡ 8 በከመ ፡ ስብሐ ፡ መሥዋዕተ ፡ መድኃኒት ፡ ታነብር ፡ ዲበ ፡ እሳት ፡ ዘዲበ ፡ መሥዋዕት ፡ በከመ ፡ ስብሕ ፡ ዘዲበ ፡ ከርሥ ፡ ወኵሎ ፡ ስብሐ ፡ ዘዲበ ፡ ንዋየ ፡ ውስጥ ፡ ወክልኤ ፡ ኵልያተ ፡ ወኵሎ ፡ ስብሐ ፡ ዘዲቤሆሙ ፡ ወዘዲበ ፡ መናቅዕ ፡ ወከብድ ፡ ምስለ ፡ ኵልያት ፡ ጥብሉለ ፡ 9 ወታዐርግ ፡ ዘንተ ፡ ኵሎ ፡ ለመዓዛ ፡ ሠናይ ፡ ዘይሰጠው ፡ ቅድመ ፡ እግዚአብሔር ፡ ምስለ ፡ መሥዋዕቱ ፡ ወምስለ ፡ ሞጻሕቱ ፡ ከመዓዛ ፡ ሠናይ ፡ ኅብስተ ፡ ጽንሐሕ ፡ ለእግዚአብሔር ። ወሥጋሁ ፡ ብላዕ ፡ በይእቲ ፡ ዕለት ፡ ወበሳኒታ ፡ ወኢይዕረብ ፡ ላዕሌሁ ፡ ፀሐይ ፡ ዘአመ ፡ ሳኒታ ፡ እስከ ፡ ሶበ ፡ ይትበላዕ ፡ ወኢይትርፍ ፡ ለዕለት ፡ ሣልስት ፡ እስመ ፡ ኢይሠጠዎ ፡ እስመ ፡ ኢኮነ ፡ ኅሩየ ፡ ወኢይትበሀል ፡ እንከ ። ውስተ ፡ ኵሉ ፡ ምሥዋዓቲከ ፡ ትደይ ፡ ፄወ ፡ ወኢይጸራዕ ፡ ኪዳነ ፡ ፄው ፡ ውስተ ፡ ኵሉ ፡ ምስዋዓቲከ ፡ ቅድመ ፡ እግዚአብሔር ። ወተዐቀብ ፡ በዕፀወ ፡ መሥዋዕት ፡ ከመ ፡ ኢታብእ ፡ ዕፀወ ፡ ዲበ ፡ ምሥዋዕ ፡ ዘንተ ፡ ክመ ፡ ቄጳርሶን ፡ ወዴፍራን ፡ ወሶጋድ ፡ ወሰጠሮቢሎን ፡ ወጲጢን ፡ ወቄድሮን ፡ ወቡራቲ ፡ ወታናክ ፡ ወዕፀ ፡ ዘይት ፡ ምርስኔ ፡ ወድፍን ፡ ወቄዳር ፡ ዘስሙ ፡ አርባት ፡ ወቤስም ፡ 13 ወእምእሉ ፡ ዕፀው ፡ አንብር ፡ መትሕተ ፡ ጽንሐሕ ፡ ዲበ ፡ ምሥዋዕ ፡ ምኩረ ፡ ርእዮሙ ፡ ወኢታንብር ፡ ኵሎ ፡ ዕፀ ፡ ንቁዐ ፡ ወሬዋ ፡ ዕፀወ ፡ ጽኑዓነ ፡ ወጽኑዐ ፡ ዘአልቦ ፡ ምንተኒ ፡ ነውረ ፡ ፍጹመ ፡ ወሐደስተ ፡ ተክለ ፡ ወኢታንብር ፡ ዕፀ ፡ ብሉየ ፡ እስመ ፡ ወፅአ ፡ መዓዛሁ ፡ እስመ ፡ እንከ ፡ አልቦ ፡ መዓዛ ፡ ላዕሌሁ ፡ ከመ ፡ ቀዳማዊ ፡ 14 ዘእንበለ ፡ እሉ ፡ ዕፀው ፡ አልቦ ፡ ዘታነብር ፡ ባዕደ ። ዑቅ ፡ ዛትእዛዘ ፡ ወግበራ ፡ ወልድየ ፡ ከመ ፡ ታርትዕ ፡ በኵሉ ፡ ግብርከ ። ወበኵሉ ፡ ጊዜ ፡ ኩን ፡ ንጹሐ ፡ በሥጋከ ፡ ወኅዕብ ፡ በማይ ፡ ዘእንበለ ፡ ትሖር ፡ ለአዕርጎ ፡ ውስተ ፡ ምሥዋዕ ፡ ወኅፅብ ፡ እዴከ ፡ ወእግረከ ፡ ዘእንበለ ፡ ትቅረብ ፡ ውስተ ፡ መሥዋዕት ፡ ሶበ ፡ ፈጸምከ ፡ አዕርጎ ፡ ግባእ ፡ ወተኀፀብ ፡ እደዊከ ፡ ወእገሪከ ፡ 17 ወኢያስተርኢ ፡ በዲቤክሙ ፡ ኵሉ ፡ ደም ፡ ወውስተ ፡ አልባሲክሙ ፡ ተዐቀብ ፡ ወልድየ ፡ በደም ፡ ተዐቀብ ፡ ጥቀ ፡ ድፍኖ ፡ ምድረ ፡ 18 ወኢትብልዑ ፡ እንከ ፡ ደመ ፡ እስመ ፡ ደም ፡ ነፍስ ፡ ይእቲ ፡ ወኢትብላዕ ፡ ምንተኒ ፡ ደመ ። ወኢትንሣእ ፡ ሕልያነ ፡ ዲበ ፡ ኵሉ ፡ ደመ ፡ ሰብእ ፡ ከመ ፡ ኢይትከዐው ፡ በከ ፡ ዘእንበለ ፡ ኵነኔ ፡ እስመ ፡ ደም ፡ ውእቱ ፡ ዘይትከዐው ፡ ያኀጥኣ ፡ ለምድር ፡ ወደም ፡ ኢትክል ፡ ነጺሐ ፡ እምደመ ፡ ሰብእ ፡ ዘእንበለ ፡ በደመ ፡ ዘከዐዎ ። ወኢትንሣእ ፡ ሕልያነ ፡ ወአምኃ ፡ በደመ ፡ ሰብእ ፡ ደመ ፡ በደም ፡ ወይሠጠው ፡ ቅድመ ፡ አምላክ ፡ ልዑል ። እሬኢ ፡ አነ ፡ ወልድየ ፡ ኵሎ ፡ ግብረ ፡ እጓለ ፡ እመሕያው ፡ ከመ ፡ ኃጢአት ፡ ወእከይ ፡ ወኵሉ ፡ ግብሮሙ ፡ ርኵስ ፡ ወምናኔ ፡ ወግማኔ ። ተዐቀብ ፡ ኢትሖር ፡ ውስተ ፡ ፍኖቶሙ ፡ ወለከይደ ፡ አሰሮሙ ፡ ወኢትስሐት ፡ ስሕተተ ፡ ለሞት ፡ ቅድመ ፡ አምላክ ፡ ልዑል ። ረገሐሥ ፡ እምኵሉ ፡ ምግባሪሆሙ ፡ ወእምኵሉ ፡ ርኵሶሙ ፡ ወተዐቀብ ፡ ዑቃቤ ፡ ዘአምላክ ፡ ልዑል ፡ ወግበር ፡ ፈቃዳቲሁ ፡ ወታረትዕ ፡ በኵሉ ። ወይባርከከ ፡ በኵሉ ፡ ምግባሪከ ፡ ወያነሥእ ፡ እምኔከ ፡ ተክለ ፡ ጽድቅ ፡ በኵሉ ፡ ምድር ፡ በኵሉ ፡ ትውልደ ፡ ምድር ፡ ወኢይትረመም ፡ ስምየ ፡ ወስምከ ፡ በመትሕተ ፡ ሰማይ ፡ በኵሉ ፡ መዋዕል ። ሖር ፡ ወልድየ ፡ በሰላም ፡ ያጽንዕከ ፡ አምላክ ፡ ልዑል ፡ አምላኪየ ፡ ወአምላክከ ፡ ለገቢረ ፡ ፈቃዳቲሁ ፡ ወይባርክ ፡ ኵሎ ፡ ዘርእከ ፡ ተርፈ ፡ ዘርእከ ፡ ለትውልድ ፡ ዘለዓለም ፡ በኵሉ ፡ በረከተ ፡ ጽድቅ ፡ ከመ ፡ ትኩን ፡ በረከተ ፡ በኵሉ ፡ ምድር ። ወወፅአ ፡ እምኀቤሁ ፡ እንዘ ፡ ይትፌሣሕ ።

Chapter 22 ወኮነ ፡ በሱባዔ ፡ ቀዳሚ ፡ በዘ ፡ አርብዓ ፡ ወአርባዕ ፡ ኢዮቤልዉ ፡ በካልእ ፡ ዓመት ፡ በዘ ፡ ሞተ ፡ አብርሃም ፡ መጽኡ ፡ ይስሐቅ ፡ ወይስማዔል ፡ እምዐዘቅተ ፡ መሐላ ፡ ከመ ፡ ይግበሩ ፡ በዓለ ፡ ሱባዔያት ፡ ዛቲ ፡ በዓል ፡ ዘቀዳሚ ፡ ማእረር ፡ ኀበ ፡ አብርሃም ፡ አቡሆሙ ፡ ወተፈሥሐ ፡ አብርሃም ፡ እስመ ፡ ክልኤሆሙ ፡ ደቂቁ ፡ መጽኡ ፡ 2 እስመ ፡ ብዙኅ ፡ ጥሪቱ ፡ ለይስሐቅ ፡ በቤርሳቤ ፡ ወየሐውር ፡ ይስሐቅ ፡ ወይዋሒ ፡ ጥሪቶ ፡ ወይገብእ ፡ ኀበ ፡ አቡሁ ፡ 3 ወበዝ ፡ መዋዕል ፡ መጽአ ፡ ይስማዔል ፡ ይርአይ ፡ አባሁ ፡ ወመጽኡ ፡ ኵሎሙ ፡ ኅቡረ ፡ ወጠብሐ ፡ ይስሐቅ ፡ መሥዋዕተ ፡ ለጽንሐሕ ፡ ወአዕረገ ፡ ዲበ ፡ ምሥዋዐ ፡ አቡሁ ፡ ዘገብረ ፡ በኬብሮን ። ወሦዐ ፡ መድኃኒተ ፡ ወገብረ ፡ ግዝአ ፡ ግሥሓ ፡ በቅድመ ፡ ይስማዔል ፡ እኁሁ ። ወይስሐቅኒ ፡ ውእቱ ፡ ፈነወ ፡ በእደ ፡ ያዕቆብ ፡ ዘይሤኒ ፡ መሥዋዕተ ፡ ዘመድኃኒት ፡ አብርሃም ፡ ይብላዕ ፡ ወይስተይ ። ወበልዐ ፡ ወሰትየ ፡ ወባረኮ ፡ ለአምላክ ፡ ልዑል ፡ ዘፈጠረ ፡ ሰማየ ፡ ወምድረ ፡ ዘገብረ ፡ ኵሎ ፡ ስብሐ ፡ ምድር ፡ ወወሀቦሙ ፡ ለውሉደ ፡ ሰብእ ፡ ይብልዑ ፡ ወይስተዩ ፡ ወይባርኩ ፡ ፈጣሪሆሙ ። ወይእዜኒ ፡ እትጋነይ ፡ ለከ ፡ አምላኪየ ፡ እስመ ፡ አርአይከኒ ፡ ዛተ ፡ ዕለተ ፡ ናሁ ፡ አነ ፡ ወልደ ፡ ምእት ፡ ወሰብዓ ፡ ወኃምስ ፡ ክረምት ፡ ልሂቅ ፡ ወፍጹመ ፡ መዋዕል ፡ ወኵሎን ፡ መዋዕልየ ፡ ኮናኒ ፡ ሰላመ ፡ 8 ሰይፈ ፡ ጸላኢ ፡ ኢሞአኒ ። ትኩን ፡ ሣልስከ ፡ ወሰላምከ ፡ ላዕለ ፡ ገብርከ ፡ ወላዕለ ፡ ዘርአ ፡ ውሉዱ ፡ ከመ ፡ ይኩንከ ፡ ሕዝበ ፡ ኅሩየ ፡ ወርስተ ፡ እምኵሉ ፡ አሕዛበ ፡ ምድር ፡ እምይእዜ ፡ ወእስከ ፡ ኵሉ ፡ መዋዕል ፡ ዘትውልደ ፡ ምድር ፡ ለኵሉ ፡ ዓለማት ። ወጸውዖ ፡ ለያዕቆብ ፡ ወይቤሎ ፡ ወልድየ ፡ ያዕቆብ ፡ ይባርክ ፡ አምላከ ፡ ኵሉ ፡ ወያኀይልከ ፡ ለገቢረ ፡ ጽድቅ ፡ ወፈቃዱ ፡ በቅድመ ፡ ዚአሁ ፡ ወይኅረይ ፡ ብከ ፡ ወበዘርእከ ፡ ከመ ፡ ትኩንዎ ፡ ሕዝበ ፡ ለርስቱ ፡ በከመ ፡ ፈቃዱ ፡ በኵሉ ፡ መዋዕል ። ወቀርበ ፡ ወሰዐሞ ። ኩን ፡ ኀያለ ፡ በቅድመ ፡ ሰብእ ፡ ወእንዘ ፡ ትሜብል ፡ ውስተ ፡ ኵሉ ፡ ዘርአ ፡ ሴት ፡ አሜሃ ፡ ይጸድቃ ፡ ፍናዊከ ፡ ወፍናወ ፡ ውሉድከ ፡ ለከዊነ ፡ ሕዝብ ፡ ቅዱስ ፡ 13 የሀብከ ፡ አምላክ ፡ ልዑል ፡ ኵሎን ፡ በረከታተ ፡ እለ ፡ ባረከኒ ፡ ወእለ ፡ ባረኮ ፡ ለኖኅ ፡ ወአዳምሃ ፡ ያዕርፍ ፡ ዲበ ፡ ድማኀ ፡ ቅዳሴ ፡ ዘርእከ ፡ ለኵሉ ፡ ትውልደ ፡ ትውልድ ፡ ወእስከ ፡ ለዓለም ። ወያንጽሕከ ፡ እምኵሉ ፡ ርስሐተ ፡ ርኵስ ፡ ከመ ፡ ታስተስሪ ፡ እምኵሉ ፡ አበሳ ፡ ዘበ ፡ ኢያእምሮ ፡ ጌጋይከ ። ወየሐድስ ፡ ኪዳኖ ፡ መስሌከ ፡ ከመ ፡ ትኩኖ ፡ ሕዝበ ፡ ለርስቱ ፡ በኵሉ ፡ ዓለማት ። ወአንተኒ ፡ ወልድየ ፡ ያዕቆብ ፡ ተዘከር ፡ ቃልየ ፡ ወዕቀብ ፡ ትእዛዛተ ፡ አብርሃም ፡ አቡከ ። መሥዋዕቶሙ ፡ ለአብድንት ፡ ይዘብሑ ፡ ወለአጋንንት ፡ ይሰግዱ ። ወአልቦሙ ፡ ልበ ፡ ለኀልዮ ፡ ወኢኮነ ፡ አዕይንቲሆሙ ፡ ዘይሬኢ ። ወአንተኒ ፡ ወልድየ ፡ ያዕቆብ ፡ አምላክ ፡ ልዑል ፡ ይርዳእከ ፡ ወአምላከ ፡ ሰማይ ፡ ይባርከ ፡ ወያግኅሥከ ፡ እምነ ፡ ርኵሶሙ ፡ ወእምኵሉ ፡ ስሕተቶሙ ፡ 20 ተዐቀብ ፡ ወልድየ ፡ ያዕቆብ ፡ ከመ ፡ ኢትንሣእ ፡ ብእሲተ ፡ እምነ ፡ ኵሉ ፡ ዘርአ ፡ አዋልደ ፡ ከናአን ። እስመ ፡ በአበሳ ፡ ካም ፡ ስሕተ ፡ ከናአን ፡ ወኵሉ ፡ ዘርኡ ፡ ይደምሰስ ፡ እምድር ፡ ወኵሉ ፡ ተርፉ ፡ ወዘይድኅን ፡ አልቦ ፡ እምኔሁ ፡ አመ ፡ ዕለተ ፡ ደይን ፡ 22 ወለኵሎሙ ፡ እለ ፡ ያመልኩ ፡ ጣዖተ ፡ ወለጽሉኣን ፡ አልቦሙ ፡ ምንተኒ ፡ ተስፋ ፡ በምድረ ፡ ሕያዋን ፡ እስመ ፡ ውስተ ፡ ሲኦል ፡ ይወርዱ ፡ ወውስተ ፡ መካነ ፡ ደይን ፡ የሐውሩ ። ኢትፍራህ ፡ ወልድየ ፡ ያዕቆብ ፡ ወኢትደንግፅ ፡ ወልደ ፡ አብርሃም ፡ አምላክ ፡ ልዑል ፡ ይዕቀብከ ፡ እምነ ፡ ሙስና ፡ ወእምኵሉ ፡ ፍኖተ ፡ ስሕተት ፡ ውእቱ ፡ ይባልሕከ ። ዘንተ ፡ ቤተ ፡ ሐነጽኩ ፡ ሊተ ፡ ከመ ፡ አንብር ፡ ስምየ ፡ ላዕሌሁ ፡ በዲበ ፡ ምድር ፡ ተውህበት ፡ ለከ ፡ ወለዘርእከ ፡ ለዓለም ፡ ወትሰመይ ፡ ቤተ ፡ አብርሃም ፡ ተውህበት ፡ ለከ ፡ ወለዘርእከ ፡ ለዓለም ፡ እስመ ፡ አንተ ፡ ተሐንጽ ፡ ቤትየ ፡ ወታቀውም ፡ ስምየ ፡ ቅድመ ፡ አምላክ ፡ እስከ ፡ ለዓለም ፡ ዘርእከ ፡ ወስምከ ፡ ይቀውም ፡ ውስተ ፡ ኵሉ ፡ ትውልደ ፡ ምድር ። ፡ ወአኅለቀ ፡ እንዘ ፡ ይኤዝዞ ፡ ወይባርኮ ፡ 26 ወሰከቡ ፡ ክልኤሆሙ ፡ ኅቡረ ፡ ውስተ ፡ ዐራት ፡ አሐቲ ፡ ወኖመ ፡ ያዕቆብ ፡ ውስተ ፡ ሕፅነ ፡ አብርሃም ፡ አበ ፡ አቡሁ ፡ ወሰዐሞ ፡ ስብዐ ፡ ወተፈሥሐ ፡ ምሕረቱ ፡ ወልቡ ፡ ላዕሌሁ ፡ 27 ወባረኮ ፡ በኵሉ ፡ ልቡ ፡ ወይቤ ፡ አምላክ ፡ ልዑል ፡ አምላከ ፡ ኵሉ ፡ ወፈጣሬ ፡ ኵሉ ፡ ዘአውፅአኒ ፡ እምነ ፡ ኡር ፡ ዘከለዳዊያን ፡ ከመ ፡ የሀበኒ ፡ ዛተ ፡ ምድረ ፡ እረሳ ፡ ለዓለም ፡ ወከመ ፡ አቅም ፡ ዘርአ ፡ ቅዱሰ ፡ ከመ ፡ ይትባረክ ፡ ለዓለም ። ወባረኮ ፡ ለያዕቆብ ፡ ወልድየ ፡ ዘበኵሉ ፡ ልብየ ፡ ወዘበምሕረትየ ፡ በእለ ፡ እትፌሣሕ ፡ ቦቱ ፡ ወይኩን ፡ ሣህልከ ፡ ወምሕረትከ ፡ ነዋኀ ፡ ላዕሌሁ ፡ ወላዕለ ፡ ዘርኡ ፡ ኵሎ ፡ መዋዕለ ፡ 29 ወኢትኅድጎ ፡ ወኢትትሀየዮ ፡ እምይእዜ ፡ ወእስከ ፡ መዋዕል ፡ ዘለዓለም ። ወባርኮ ፡ በኵሉ ፡ በረከታቲከ ፡ እምይእዜ ፡ ወእስከ ፡ ኵሎን ፡ መዋዕል ፡ ዘለዓለም ።

Chapter 23 ወአንበረ ፡ ክልኤሆን ፡ አጻብዐ ፡ ያዕቆብ ፡ ዲበ ፡ አዕይንቲሁ ፡ ወባረኮ ፡ ለአምላከ ፡ አማልክት ፡ ወከደነ ፡ ገጾ ፡ ወሰፍሐ ፡ እገሪሁ ፡ ወኖመ ፡ ንዋመ ፡ ዘለዓለም ። ወበዝ ፡ ኵሉ ፡ ሀሎ ፡ ያዕቆብ ፡ ይሰክብ ፡ ውስተ ፡ ሕፅኑ ፡ ወኢያእመረ ፡ ከመ ፡ ሞተ ፡ አብርሃም ፡ አበ ፡ አቡሁ ። ወነቅሀ ፡ ያዕቆብ ፡ እምንዋሙ ። ወተንሥአ ፡ እምሕፅኑ ፡ ወሮጸ ፡ ወነገራ ፡ ለርብቃ ፡ እሙ ። ወወድቀ ፡ ይስሐቅ ፡ ውስተ ፡ ገጸ ፡ አቡሁ ፡ ወበከየ ፡ ወሰዐሞ ። ወቃል ፡ ተሰምዐ ፡ በቤተ ፡ አብርሃም ። ወቀበርዎ ፡ ውስተ ፡ በዐት ፡ ካዕበት ፡ ቅሩበ ፡ ሳራ ፡ ብእሲቱ ፡ ወውሉዱ ፡ ይስሐቅ ፡ ወይስማዔል ። ሠለስተ ፡ ኢዮቤልዉ ፡ ሐይወ ፡ ወአርባዕተ ፡ ሱባዔ ፡ ዓመተ ፡ ምእተ ፡ ወሰብዓ ፡ ወኀምስተ ፡ ዓመተ ፡ ወፈጸመ ፡ መዋዕለ ፡ ሕይወቱ ፡ ልህቀ ፡ ወፍጹመ ፡ መዋዕል ፡ 9 እስመ ፡ መዋዕለ ፡ ቀደምት ፡ እማንቱ ፡ ለሕይወቶሙ ፡ ዐሠርቱ ፡ ወተስዐቱ ፡ ኢዮቤልውሳት ። እስመ ፡ አብርሃምሰ ፡ ፍጹም ፡ በኵሉ ፡ ምግባሪሁ ፡ ምስለ ፡ እግዚአብሔር ። ወኵሉ ፡ ትውልድ ፡ ዘይትነሣእ ፡ እምይእዜ ፡ ወእስከ ፡ ዕለተ ፡ ደይን ፡ ዐባይ ፡ ይረስኡ ፡ ፍጡነ ፡ ዘእንበለ ፡ ይፈጽሙ ፡ ክልኤ ፡ ኢዮቤልዉ ። ወበውእቱ ፡ መዋዕል ፡ እመ ፡ ሐይወ ፡ ብእሲ ፡ ኢዮቤልዉ ፡ ወመንፈቀ ፡ ዓመታት ፡ ይብሉ ፡ በእንቲአሁ ፡ አብዝኀ ፡ ሐይወ ፡ ወመብዝኅተ ፡ መዋዕሊሁ ፡ ሕማም ፡ ወስራሕ ፡ ወምንዳቤ ፡ ወአልቦ ፡ ሰላመ ፡ 13 እስመ ፡ መቅሠፍት ፡ ዲበ ፡ መቅሠፍት ፡ ወጽልዓን ፡ ዲበ ፡ ጽልዓን ፡ ወምንዳቤ ፡ ዲበ ፡ ምንዳቤ ፡ ወስምዓተ ፡ እኩይ ፡ ዲበ ፡ ስምዓተ ፡ እኩይ ፡ ወደዌ ፡ ዲበ ፡ ደዌ ፡ ወኵሉ ፡ ኵነኔ ፡ እኩይ ፡ ዘከማሁ ፡ ዝንቱ ፡ ምስለ ፡ ዝንቱ ፡ ደዌ ፡ ወገበጥባጥ ፡ ወአስሐትያ ፡ ወበረድ ፡ ወሐመዳ ፡ ወነበርጻው ፡ ወሰከሕካሕ ፡ ወሰዖዛዝ ፡ ወዐባር ፡ ወሞት ፡ ወመጥባሕት ፡ ወፂዋዌ ። ወኵሉ ፡ ዝንቱ ፡ ይመጽእ ፡ በትውልድ ፡ እኪት ፡ እንተ ፡ ታኤብስ ፡ ምድረ ፡ በርኵሰ ፡ ዝሙት ፡ ወበግማኔ ፡ ወበሰቆራር ፡ ግብሮሙ ። አሜሃ ፡ ይብሉ ፡ ለቀደምት ፡ መዋዕሌሆሙ ፡ ብዙኅ ፡ እስከ ፡ ዐሠርቱ ፡ ምእት ፡ ዓመት ፡ ወሠናይ ። ወበይእቲ ፡ ትውልድ ፡ ይከውኑ ፡ ደቂቅ ፡ እንዘ ፡ ይዛለፉ ፡ አበዊሆሙ ፡ ወአዕሩጊሆሙ ፡ በእንተ ፡ ኀጢአት ፡ ወበእንተ ፡ ዐመፃ ፡ ወበእንተ ፡ ንባበ ፡ አፉሆሙ ፡ ወበእንተ ፡ እከያት ፡ ዐበይት ፡ ዘእሙንቱ ፡ ይገብሩ ። እስመ ፡ ኵሎሙ ፡ አእከዩ ፡ ወኵሉ ፡ አፍ ፡ ይትናገር ፡ አበሳ ። ናሁ ፡ ምድር ፡ ትትሐጐል ፡ በእንተ ፡ ኵሉ ፡ ምግባሮሙ ፡ ወአልቦ ፡ ዘርአ ፡ ወይን ፡ ወአልቦ ፡ ቅብአ ፡ እስመ ፡ ኵሉ ፡ ካሕድ ፡ ምግባሪሆሙ ፡ ወኵሎሙ ፡ ይትሐጐሉ ፡ ኅቡረ ፡ አራዊት ፡ ወእንስሳ ፡ ወአዕዋፍ ። ወይትባአሱ ፡ እሉ ፡ ምስለ ፡ እሉ ፡ ወራዙት ፡ ምስለ ፡ ሊቃናት ፡ ወሊቃናት ፡ ምስለ ፡ ወራዙት ፡ ነዳይ ፡ ምስለ ፡ ባዕል ፡ ትሑት ፡ ምስለ ፡ ዐቢይ ፡ ወምስኪን ፡ ምስለ ፡ መኰንን ፡ በእንተ ፡ ሕግ ፡ ወበእንተ ፡ ኪዳን ፡ እስመ ፡ ረስዑ ፡ ትእዛዘ ፡ ወኪዳነ ፡ ወበዓለ ፡ ወወርኀ ፡ ወሰንበተ ፡ ወኢዮቤሌው ፡ ወኵሎ ፡ ኵነኔ ። ወይቀውሙ ፡ በአስይፍት ፡ ወበቀትል ፡ ከመ ፡ ይሚጥዎሙ ፡ ውስተ ፡ ፍኖት ፡ ወኢይትመየጡ ፡ እስከ ፡ ይትከዐው ፡ ደም ፡ ብዙኅ ፡ ዲበ ፡ ምድር ፡ እሉ ፡ በእሉ ፡ 21 ወእለ ፡ ድኅኑ ፡ በፍኖተ ፡ ጽድቅ ፡ ኢይትመየጡ ፡ እምነ ፡ እከዮሙ ፡ እስመ ፡ ኵሎሙ ፡ ለትእግልት ፡ ወውስተ ፡ ብዕል ፡ ይትነሥኡ ፡ ከመ ፡ ይንሣእ ፡ አሐዱ ፡ ኵሎ ፡ ዘቢጹ ፡ ወስመ ፡ ዐቢየ ፡ ይሰመዩ ፡ ወአኮ ፡ በህልው ፡ ወአኮ ፡ በጽድቅ ፡ ወቅድሳተ ፡ ቅዱስ ፡ ያረኵሱ ፡ በርኵሰ ፡ ሙስና ፡ ግማኔሆሙ ። ወይከውን ፡ መቅሠፍት ፡ ዐቢይ ፡ ዲበ ፡ ግብረ ፡ ይእቲ ፡ ትውልድ ፡ እምኀበ ፡ እግዚአብሔር ፡ ወይሁቦሙ ፡ ለመጥባሕት ፡ ወለኵነኔ ፡ ወለፂዋዌ ፡ ወለሀይድ ፡ ወለብልዐት ። ወያነቅህ ፡ ላዕሌሆሙ ፡ ኃጢኣኒሆሙ ፡ ለአሕዛብ ፡ እለ ፡ አልቦሙ ፡ ላዕሌሆሙ ፡ ምሕረተ ፡ ወሣህለ ፡ ወለገጸ ፡ መኑሂ ፡ ኢያደልው ፡ ኢለልሂቅ ፡ ወኢለወሬዛ ፡ ወኢለመኑሂ ፡ እስመ ፡ እኩያን ፡ ወኀያላን ፡ ከመ ፡ ይእከዩ ፡ እምኵሉ ፡ ውሉደ ፡ ሰብእ ፡ ወይገብሩ ፡ ውስተ ፡ እስራኤል ፡ ሀከከ ፡ ወዲበ ፡ ያዕቆብ ፡ አበሳ ፡ ወይትከዐው ፡ ደም ፡ ብዙኅ ፡ ዲበ ፡ ምድር ፡ ወአልቦ ፡ ዘያስተጋብእ ፡ ወአልቦ ፡ ዘይቀብር ። በውእቱ ፡ መዋዕል ፡ ይጸርኁ ፡ ወይጼውዑ ፡ ወይጼልዩ ፡ ከመ ፡ ይድኀኑ ፡ እምእደ ፡ ኃጥኣን ፡ አሕዛብ ፡ ወአልቦ ፡ ዘያድኅን ፡ 25 ወይጸዐዱ ፡ አርእስተ ፡ ደቂቅ ፡ በሲበት ፡ ወያስተርኢ ፡ ሕፃን ፡ ወልደ ፡ ሠለስቱ ፡ ሱባዔ ፡ ልሂቀ ፡ ከመ ፡ ዘምእት ፡ ዓመቱ ፡ ወይትሐጐል ፡ ቁመቶሙ ፡ በምንዳቤ ፡ ወበጻዕር ። ወበውእቶን ፡ መዋዕል ፡ ይእኅዙ ፡ ደቂቅ ፡ ይትኀሠሡ ፡ ሕገገ ፡ ወለኃሢሠ ፡ ትእዛዝ ፡ ወለተመይጦ ፡ ውስተ ፡ ፍኖተ ፡ ጽድቅ ። ወይእኅዛ ፡ መዋዕል ፡ ይብዝኃ ፡ ወይልሀቃ ፡ ወውሉደ ፡ ሰብእ ፡ ትውልድ ፡ እምትውልድ ፡ ወዕለት ፡ እመዋዕል ፡ እስከ ፡ ሶበ ፡ ይቀርብ ፡ መዋዕሊሆሙ ፡ ለዐሠርቱ ፡ ምእት ፡ ዓመት ፡ ወለብዙኅ ፡ ዓመታት ፡ እምነ ፡ ብዙኅ ፡ መዋዕል ፡ 28 ወአልቦ ፡ ልሂቀ ፡ ወአልቦ ፡ ዘይጸግብ ፡ መዋዕለ ፡ እስመ ፡ ኵሎሙ ፡ ሕፃናተ ፡ ወደቂቀ ፡ ይከውኑ ፡ 29 ወኵሎን ፡ መዋዕሊሆሙ ፡ በሰላም ፡ ወበፍሥሓ ፡ ይፌጽሙ ፡ ወይሐይዉ ፡ ወአልቦ ፡ መነሂ ፡ ሰይጣነ ፡ ወአልቦ ፡ መነሂ ፡ እኩየ ፡ ዘያማስን ፡ እስመ ፡ ኵሎን ፡ መዋዕሊሆሙ ፡ መዋዕለ ፡ በረከት ፡ ወፈውስ ፡ ይከውና ። አሜሃ ፡ ይፌውስ ፡ እግዚአብሔር ፡ አግብርቲሁ ፡ ወይትነሥኡ ፡ ወይሬእዩ ፡ ሰላመ ፡ ዐቢየ ፡ ወይሰድድ ፡ ጸላእቶ ፡ ወይሬእዩ ፡ ጻድቃን ፡ ወያአኵቱ ፡ ወይትፌሥሑ ፡ እስከ ፡ ለዓለመ ፡ ዓለም ፡ በፍሥሓ ። ወያዐርፍ ፡ አዕፅምቲሆሙ ፡ ውስተ ፡ ምድር ። ወአንተኒ ፡ ሙሴ ፡ ጸሐፍ ፡ ዘንተ ፡ ቃላተ ፡ እስመ ፡ ከመዝ ፡ ጽሑፍ ፡ ውእቱ ፡ ወየዐርጉ ፡ ውስተ ፡ ስምዐ ፡ ጽላተ ፡ ሰማይ ፡ ለትውልድ ፡ ዘለዓለም ።

Chapter 24 ወኮነ ፡ እምድኅረ ፡ ሞተ ፡ አብርሃም ፡ ባረኮ ፡ እግዚአብሔር ፡ ለይስሐቅ ፡ ወልዱ ፡ ወተንሥአ ፡ እምኬብሮን ፡ ወሖረ ፡ ወኀደረ ፡ ኀበ ፡ ዐዘቅተ ፡ ራእይ ፡ በዓመት ፡ አሐዱ ፡ ዘሣልስ ፡ ሱባዔ ፡ ዘዝ ፡ ኢዩቤሌዉ ፡ ሰብዐተ ፡ ዓመተ ፡ 2 ወበዓመት ፡ ዘሱባዔ ፡ ራብዕ ፡ አኀዘ ፡ ዐባር ፡ ውስተ ፡ ምድር ፡ ዘእንበለ ፡ ቀዳማዊ ፡ ዐባር ፡ ዘኮነ ፡ በመዋዕለ ፡ አብርሃም ። ወአብሰለ ፡ ያዕቆብ ፡ ተብሲለ ፡ ብርስን ፡ ወመጽአ ፡ ዔሳው ፡ እምሐቅል ፡ ርኁብ ፡ ወይቤሎ ፡ ለያዕቆብ ፡ እኁሁ ፡ ሀበኒ ፡ እምዝ ፡ ተብሲል ፡ ዘስርናይ ። ወይቤ ፡ ዔሳው ፡ በልቡ ፡ አነ ፡ እመውት ፡ ለምንትዝ ፡ ቀዲመ ፡ ተወልዶ ፡ ወይቤሎ ፡ ለያዕቆብ ፡ ወሀብኩከ ። ወይቤሎ ፡ ያዕቆብ ፡ መሐል ፡ ሊተ ፡ ዮም ፡ ወመሐላ ፡ ሎቱ ። ወወሀቦ ፡ ያዕቆብ ፡ ለእኁሁ ፡ ዔሳው ፡ ኅብስተ ፡ ወተብሲለ ፡ ወበልዐ ፡ እስከ ፡ ይጸግብ ፡ ወመነነ ፡ ዔሳው ፡ ቀዲመ ፡ ተወልዶ ፡ በእንተዝ ፡ ተሰምየ ፡ ስሙ ፡ ዔሳው ፡ ወኤዶም ፡ በእንተ ፡ ተብሲለ ፡ ስርናይ ፡ ዘወሀቦ ፡ ያዕቆብ ፡ ለቅድመ ፡ ልደቱ ። ወልህቀ ፡ ያዕቆብ ፡ ወዔሳውሰ ፡ ተትሕተ ፡ እምዕበዩ ። ወኮነ ፡ ዐባር ፡ ዲበ ፡ ምድር ፡ ወመጽአ ፡ ይስሐቅ ፡ ይረድ ፡ ግብጽ ፡ በካልእ ፡ ዓመት ፡ ዘዝ ፡ ሱባዔ ፡ ወሖረ ፡ ኀበ ፡ ንጉሠ ፡ ፍልስጥኤም ፡ ጌራሮሃ ፡ ኀበ ፡ አቤሜሌክ ። ወአስተርአዮ ፡ እግዚአብሔር ፡ ወይቤሎ ፡ ኢትረድ ፡ ግብጽ ፡ ንበር ፡ ውስተ ፡ ምድር ፡ እንተ ፡ አነ ፡ እብለከ ፡ ወፍልስ ፡ ውስተ ፡ ይእቲ ፡ ምድር ፡ ወእሄሉ ፡ ምስሌከ ፡ ወእባርከከ ። እስመ ፡ ለከ ፡ ወለዘርእከ ፡ እሁብ ፡ ዛተ ፡ ምድረ ፡ ኵላ ፡ ወአቀውም ፡ መሐላየ ፡ ዘመሐልኩ ፡ ለአብርሃም ፡ አቡከ ፡ ወአበዝኅ ፡ ዘርአከ ፡ ከመ ፡ ከዋክብተ ፡ ሰማይ ። ወይትባረኩ ፡ በዘርእከ ፡ ኵሎሙ ፡ አሕዛበ ፡ ምድር ፡ ህየንተ ፡ ሰምዐ ፡ አቡከ ፡ ቃለ ፡ ዚአየ ፡ ወዐቀበ ፡ ዑቃቤየ ፡ ወትእዛዛትየ ፡ ወሕገጊየ ፡ ወሥርዓትየ ፡ ወኪዳንየ ። ወኀደረ ፡ ጌራሮሃ ፡ ሠለስተ ፡ ሱባዔ ፡ ዓመት ፡ 13 ወአዘዘ ፡ አቤሜሌክ ፡ በእንቲአሁ ፡ ወበእንተ ፡ ኵሉ ፡ ዘዚአሁ ፡ እንዘ ፡ ይብል ፡ ኵሉ ፡ ሰብእ ፡ ዘይለክፎ ፡ ወለኵሉ ፡ ዘዚአሁ ፡ ሞተ ፡ ይሙት ። ወልህቀ ፡ ይስሐቅ ፡ በፍልስጥኤም ፡ ወኮነ ፡ ሎቱ ፡ ጥሪት ፡ ብዙኅ ፡ አልህምት ፡ ወአባግዕ ፡ ወአግማል ፡ ወአእዱግ ፡ ወጥሪት ፡ ብዙኅ ፡ 15 ወዘርኡ ፡ በምድረ ፡ ፍልስጥኤም ። ወኵሎ ፡ ዐዘቃተ ፡ ዘከረዩ ፡ ደቀ ፡ አብርሃም ፡ በሕይወተ ፡ አብርሃም ፡ ይፈንዎ ፡ ፍልስጥኤም ፡ እምድኅረ ፡ ሞተ ፡ አብርሃም ፡ ወመልእዎ ፡ መሬተ ። ወይቤሎ ፡ አቤሜሌክ ፡ ለይስሐቅ ፡ ሖር ፡ እምኀቤነ ፡ እስመ ፡ ዐበይከ ፡ ፈድፋደ ፡ እምኔነ ። ወተመዪጦሙ ፡ ከረዩ ፡ ዐዘቃተ ፡ ዘማያት ፡ ዘከረዩ ፡ ደቀ ፡ አብርሃም ፡ አቡሁ ። ወከረዩ ፡ ደቀ ፡ ይስሐቅ ፡ ዐዘቃተ ፡ በፍራንጋ ፡ ወረከቡ ፡ ማየ ፡ ሕያወ ፡ ወተጋአዙ ፡ ኖሎተ ፡ ጌራሮን ፡ ምስለ ፡ ኖሎተ ፡ ይስሐቅ ፡ እንዘ ፡ ይብሉ ፡ ዘዚአነ ፡ ዝማይ ። ወከረዩ ፡ ዐዘቅተ ፡ ካልአ ፡ ወተበአሱ ፡ በእንቲአሁኒ ፡ ወጸውዐ ፡ ስሞ ፡ ጸባብ ፡ ወአንሥአ ፡ ወከረዩ ፡ ዐዘቅተ ፡ ካልአ ፡ ወኢተጋአዙ ፡ ወጸውዐ ፡ ስሞ ፡ ስፉሕ ፡ ወይቤ ፡ ይስሐቅ ፡ ይእዜ ፡ አስፍሐ ፡ ለነ ፡ እግዚአብሔር ፡ ወልህቅነ ፡ ዲበ ፡ ምድር ። ወዐርገ ፡ እምህየ ፡ ውስተ ፡ ዐዘቅተ ፡ መሐላ ፡ በቀዳሚ ፡ ዓመት ፡ ዘሱባዔ ፡ ቀዳሚ ፡ በራብዕ ፡ ወአርብዓ ፡ ኢዮቤለው ፡ 22 ወአስተርአዮ ፡ እግዚአብሔር ፡ በይእቲ ፡ ሌሊት ፡ በሠርቀ ፡ ቀዳሚ ፡ ወርኅ ፡ ወይቤሎ ፡ አነ ፡ ውእቱ ፡ አምላከ ፡ አብርሃም ፡ አቡከ ፡ ኢትፍራህ ፡ እስመ ፡ አነ ፡ ምስሌከ ፡ ሀለውኩ ፡ ወእባርከከ ፡ ወአብዝኆ ፡ አበዝኅ ፡ ዘርአከ ፡ ከመ ፡ ኆፃ ፡ ምድር ፡ በእንተ ፡ አብርሃም ፡ ቍልዔየ ። ወሐነጸ ፡ ህየ ፡ ምሥዋዕ ፡ ዘቀዳሚ ፡ ዘሐነጸ ፡ አብርሃም ፡ አቡሁ ። ወከረዩ ፡ ዐዘቅተ ፡ ወረከቡ ፡ ማየ ፡ ሕያወ ፡ 25 ወደቀ ፡ ይስሐቅኒ ፡ ከረዩ ፡ ዐዘቅተ ፡ ካልአ ፡ ወኢረከቡ ፡ ማየ ። ወጸውዐ ፡ ስሞ ፡ ለውእቱ ፡ መካን ፡ ዐዘቅተ ፡ መሐላ ፡ እስመ ፡ በህየ ፡ መሐለ ፡ ለአቤሜሌክ ፡ ወለአኮዘት ፡ ካልኡ ፡ ሎቱ ፡ ወለፊኮል ፡ ዐቃቢሁ ፡ 27 ወአእመረ ፡ ይስሐቅ ፡ በይእቲ ፡ ዕለት ፡ ከመ ፡ በግፉዕ ፡ መሐለ ፡ ሎሙ ፡ ለገቢር ፡ ምስሌሆሙ ፡ ሰላመ ። ወረገሞሙ ፡ ይስሐቅ ፡ በይእቲ ፡ ዕለት ፡ ለፍልስጥኤም ፡ ወይቤ ፡ ርጉም ፡ ፍልስጥኤም ፡ ለዕለተ ፡ መዓት ፡ ወቍጥዓ ፡ እማእከለ ፡ ኵሉ ፡ አሕዛብ ። ወዘአምሠጠ ፡ እምሰይፈ ፡ ፀር ፡ ወእምነ ፡ ኬጥኤም ፡ ይሠርዎሙ ፡ ሕዝብ ፡ ጻድቅ ፡ በኵነኔ ፡ እምታሕተ ፡ ሰማይ ፡ እስመ ፡ ፀረ ፡ ወጸላእተ ፡ ይከውኑ ፡ ለውሉድየ ፡ በመዋዕሊሆሙ ፡ በዲበ ፡ ምድር ፡ 30 ወአልቦ ፡ ተኀድጎ ፡ ሎሙ ፡ ተረፈ ፡ ወዘይድኅን ፡ አመ ፡ ዕለተ ፡ መዓተ ፡ ኵነኔ ። እስመ ፡ እመኒ ፡ እስከ ፡ ሰማይ ፡ ዐርገ ፡ እምህየ ፡ ይወርድ ፡ ወእመኒ ፡ ጸንዐ ፡ ውስተ ፡ ምድር ፡ እምህየ ፡ ይትመላሕ ፡ ወእመኒ ፡ ተኀብአ ፡ ማእከለ ፡ አሕዛብ ፡ እምህየ ፡ ይሤሮ ፡ ወእመኒ ፡ ወረደ ፡ ውስተ ፡ ሲኦል ፡ በህየ ፡ ይበዝኅ ፡ ኵነኔሁ ። ወእመኒ ፡ ሖረ ፡ ውስተ ፡ ፂዋዌ ፡ በእደ ፡ እለ ፡ የኀሥሥዋ ፡ ለነፍሱ ፡ በማእከለ ፡ ፍኖት ፡ ይቀትልዎ ፡ ወአልቦ ፡ አትርፎ ፡ ሎቱ ፡ ስመ ፡ ወዘርአ ፡ ውስተ ፡ ኵሉ ፡ ምድር ። ወከመዝ ፡ ተጽሕፈ ፡ ወተቈርዐ ፡ በእንቲአሁ ፡ ውስተ ፡ ጽላተ ፡ ሰማይ ፡ ለገቢር ፡ ሎቱ ፡ በዕለተ ፡ ኵነኔ ፡ ከመ ፡ ይሠሮ ፡ እምድር ።

Chapter 25 ወበካልእ ፡ ዓመት ፡ ዘዝ ፡ ሱባዔ ፡ ዘበዝ ፡ ኢዮቤሌው ፡ ጸውዐት ፡ ርብቃ ፡ ያዕቆብሃ ፡ ወልዳ ፡ ወተናገረቶ ፡ እንዘ ፡ ትብል ፡ ወልድየ ፡ ኢትንሣእ ፡ ለከ ፡ ብእሲተ ፡ እምነ ፡ አዋልደ ፡ ከናአን ፡ ከመ ፡ ዔሳው ፡ እኁከ ፡ ዘነሥአ ፡ ሎቱ ፡ ክልኤተ ፡ አንስቲያ ፡ እምዘርአ ፡ ከናአን ፡ ወአምረርዋ ፡ ለነፍስየ ፡ በኵሉ ፡ ምግባሮሙ ፡ ርኵስ ፡ እስመ ፡ ኵሉ ፡ ምግባሮሙ ፡ ዝሙት ፡ ወምርዓት ፡ ወአልቦ ፡ ምንተኒ ፡ ጽድቀ ፡ ምስሌሆሙ ፡ እስመ ፡ እኵይ ፡ ውእቱ ፡ 2 ወአነ ፡ ወልድየ ፡ አፈቅረከ ፡ ጥቀ ፡ ፈድፋደ ፡ ወልብየ ፡ ወምሕረትየ ፡ ይባርከከ ፡ በኵሉ ፡ ጊዜ ፡ ዕለት ፡ ወዑቃቤ ፡ ለያልይ ። ወይእዜኒ ፡ ወልድየ ፡ ስማዕ ፡ ቃልየ ፡ ወግበር ፡ ፈቃዳ ፡ ለእምከ ፡ ወኢትንሣእ ፡ ለከ ፡ ብእሲተ ፡ እምአዋልደ ፡ ዝምድር ፡ ዘእንበለ ፡ እምቤተ ፡ አቡየ ፡ ወዘእንበለ ፡ እምዘመደ ፡ አቡየ ፡ ትንሣእ ፡ ለከ ፡ ብእሲተ ፡ እምነ ፡ ቤተ ፡ አቡየ ፡ ወይባርከከ ፡ አምላክ ፡ ልዑል ፡ ወይከውን ፡ ትውልድከ ፡ ትውልደ ፡ ጽድቅ ፡ ወዘርእከ ፡ ቅዱስ ። ወእምዝ ፡ ተናገረ ፡ ያዕቆብ ፡ ምስለ ፡ ርብቃ ፡ እሙ ፡ ወይቤላ ፡ ናሁ ፡ አነ ፡ እሞ ፡ ወልደ ፡ ተስዐቱ ፡ ሱባዔ ፡ ዓመት ፡ ወምንተኒ ፡ አንስተ ፡ ኢየአምር ፡ ወኢገሰስኩ ፡ ወኢፈኀርኩ ፡ ወኢይኄሊሂ ፡ እንሣእ ፡ ብእሲተ ፡ እምኵሉ ፡ ዘርአ ፡ አዋልደ ፡ ከናአን ፡ ሊተ ፡ 5 እስመ ፡ እዜከር ፡ አነ ፡ እሙ ፡ ነገረ ፡ አብርሃም ፡ አቡነ ፡ ምንተ ፡ አዘዘኒ ፡ ከመ ፡ ኢይንሣእ ፡ ብእሲተ ፡ እምኵሉ ፡ ዘርአ ፡ ቤተ ፡ ከናአን ፡ እስመ ፡ እምዘርአ ፡ ቤተ ፡ አቡየ ፡ እነሥእ ፡ ሊተ ፡ ብእሲተ ፡ ወእምትዝምድየ ፡ 6 ሰማዕኩ ፡ እሙ ፡ ቀዲሙ ፡ ከመ ፡ ተወልዳ ፡ አዋልድ ፡ ለላባ ፡ እኁኪ ፡ ወላዕሌሆን ፡ አንበርኩ ፡ ልብየ ፡ ከመ ፡ እንሣእ ፡ እምኔሆን ፡ ብእሲተ ። ወበእንተዝ ፡ አነ ፡ ተዐቀብኩ ፡ በመንፈስየ ፡ ከመ ፡ ኢየአብስ ፡ ወኢይማስን ፡ በኵሉ ፡ ፍናው ፡ ኵሎ ፡ መዋዕለ ፡ ሕይወትየ ፡ እስመ ፡ በእንተ ፡ ምርዓት ፡ ወዝሙት ፡ አብዝኀ ፡ አብ ፡ አብርሃም ፡ አዝዞትየ ፡ 8 ምስለ ፡ ኵሉ ፡ ዘአዘዘኒ ፡ ዘንተ ፡ ዕሥራ ፡ ወክልኤተ ፡ ዓመተ ፡ እኁየ ፡ ይትጋአዘኒ ፡ ወያበዝኅ ፡ እንዘ ፡ ይትናገረኒ ፡ ወይብል ፡ ንሣእ ፡ እኁየ ፡ ብእሲተ ፡ አሐተ ፡ እኅቶን ፡ ለአንስቲያየ ፡ ክልኤቲ ፡ ወአነኒ ፡ ኢይፈቅድ ፡ እግበር ፡ ከመ ፡ ገብረ ። እምሕል ፡ አነ ፡ እሙ ፡ ቅድሜኪ ፡ ኵሎ ፡ መዋዕለ ፡ ሕይወትየ ፡ ከመ ፡ ኢይንሣእ ፡ ሊተ ፡ ብእሲተ ፡ እምኵሉ ፡ ዘርአ ፡ አዋልደ ፡ ከናአን ፡ ወኢየአኪ ፡ ገቢረ ፡ በከመ ፡ ገብረ ፡ እኁየ ፡ 10 ኢትፍርሂ ፡ እሙ ፡ ተአመኒ ፡ ከመ ፡ እገብር ፡ ፈቃደኪ ፡ ወበርቱዕ ፡ አሐውር ፡ ወኢያማስን ፡ ፍናውየ ፡ ለዓለም ። ወእምዝ ፡ አንሥአት ፡ ገጻ ፡ ውስተ ፡ ሰማይ ፡ ወጸፍሐት ፡ አጸብዐ ፡ እደዊሃ ፡ ወከሠተት ፡ አፉሃ ፡ ወባረከቶ ፡ ለአምላክ ፡ ልዑል ፡ ዘፈጠረ ፡ ሰማየ ፡ ወምድረ ፡ ወወሀበት ፡ ሎቱ ፡ አኰቴተ ፡ ወስባሔ ፡ 12 ወትቤ ፡ ይትባረክ ፡ እግዚአብሔር ፡ አምላክ ፡ ወይትባረክ ፡ ስሙ ፡ ለዓለመ ፡ ዓለም ። ባርኮ ፡ እግዚኦ ፡ ወአንብር ፡ ውስተ ፡ አፉየ ፡ በረከተ ፡ ጽድቅ ፡ ከመ ፡ እባርኮ ፡ 14 ወውእቱ ፡ ጊዜ ፡ ወረደ ፡ መንፈሰ ፡ ጽድቅ ፡ ውስተ ፡ አፉሃ ፡ ወአንበረት ፡ ውስተ ፡ ርእሰ ፡ ያዕቆብ ፡ ክልኤሆን ፡ እደዊሃ ፡ ወትቤ ። ቡሩክ ፡ አንተ ፡ እግዚኦ ፡ ጻድቅ ፡ አምላኮሙ ፡ ለዓለማት ፡ ወኪያከ ፡ ይባርክ ፡ እምኵሉ ፡ ትውልደ ፡ ሰብእ ፡ የሀብከ ፡ ወልድየ ፡ ፍኖተ ፡ ጽድቅ ፡ ወለዘርእከ ፡ ይክሥት ፡ ጽድቀ ፡ 16 ወያብዝኅ ፡ ውሉደከ ፡ በሕይወትከ ፡ ወይቁሙ ፡ ለኆልቍ ፡ ለአውራኀ ፡ ዓመት ፡ ወውሉዶሙ ፡ ይብዝኁ ፡ ወይዕበዩ ፡ እምነ ፡ ከዋክብተ ፡ ሰማይ ፡ ወእምነ ፡ ኆፃ ፡ ባሕር ፡ ይብዛኅ ፡ ኆልቆሙ ፡ 17 የሀቦሙ ፡ ዛተ ፡ ምድረ ፡ ሥምርተ ፡ በከመ ፡ ነበበ ፡ የሀባ ፡ ለአብርሃም ፡ ወለዘርኡ ፡ እምድኅሬሁ ፡ በኵሉ ፡ መዋዕል ፡ ወየአኀዝዋ ፡ እኂዘ ፡ ዘለዓለም ፡ 18 ወእርአይ ፡ ለከ ፡ ወልድየ ፡ ውሉደ ፡ ቡሩከ ፡ በሕይወትየ ፡ ወዘርአ ፡ ቡሩክ ፡ ወቅዱሰ ፡ ይኩን ፡ ኵሉ ፡ ዘርእከ ። ወበከመ ፡ አዕረፍከ ፡ መንፈሰ ፡ እምከ ፡ በሕይመታ ፡ ሕምሣ ፡ ለወላዲትከ ፡ ከመዝ ፡ ትባርከ ፡ ምሕረትየ ፡ ወአጥባትየ ፡ ኪያከ ፡ ይባርክ ፡ ወአፉየ ፡ ወልሳንየ ፡ ኪያከ ፡ ያአኵቱ ፡ ብዛኅ ፡ 20 ወለሀቅ ፡ ወተከዐው ፡ ውስተ ፡ ምድር ፡ ወዘርእከ ፡ ይኩን ፡ ፍጹመ ፡ ውስተ ፡ ኵሉ ፡ ዓለም ፡ በፍሥሓ ፡ ሰማይ ፡ ወምድር ። ስምከ ፡ ወዘርእከ ፡ እስከ ፡ ኵሉ ፡ ዓለማት ፡ ይቁም ። ዘይባርከከ ፡ ቡሩክ ፡ ወኵሉ ፡ ሥጋ ፡ እንተ ፡ ትረግመከ ፡ በሐሰት ፡ ትኩን ፡ ርግምተ ። ወሰዐመቶ ፡ ወትቤሎ ፡ ያፍቅር ፡ ብከ ፡ እግዚአ ፡ ዓለም ፡ በከመ ፡ ልበ ፡ እምከ ፡ ወምሕረታ ፡ ይትሐሠይ ፡ ብከ ፡ ወይባርከከ ፡ ወአርመመት ፡ እንከ ፡ እምባርኮ ።

Chapter 26 1 ወበዓመት ፡ ሳብዕ ፡ ዘዝ ፡ ሱባዔ ፡ ጸውዐ ፡ ይስሐቅ ፡ ዔሳውሃ ፡ ወልዶ ፡ ዘይልህቅ ፡ ወይቤሎ ፡ ወልድየ ፡ አነ ፡ ረሣእኩ ፡ ወናሁ ፡ አዕይንትየ ፡ ከፍአ ፡ ለርእይ ፡ ወኢያአምር ፡ ዕለተ ፡ ሞትየ ። ወይእዜኒ ፡ ንሣእ ፡ ንዋየ ፡ ነዓዌከ ፡ ምጕንጳከ ፡ ወቀስተከ ፡ ወፃእ ፡ ሐቅለ ፡ ወነዐው ፡ ሊተ ፡ ወአኀዝ ፡ ሊተ ፡ ወልድየ ፡ ወግበር ፡ ሊተ ፡ መብልዐ ፡ ከመ ፡ ዘታፈቅር ፡ ነፍስየ ፡ ወአምጽእ ፡ ሊተ ፡ ከመ ፡ እብላዕ ፡ ወትባርከ ፡ ነፍስየ ፡ ዘእንበለ ፡ እሙት ። ወርብቃሰ ፡ ትሰምዕ ፡ እንዘ ፡ ይነግሮ ፡ ለዔሳው ፡ ይስሐቅ ። ወጌሰ ፡ ዔሳው ፡ ገዳመ ፡ ከመ ፡ ያሥግር ፡ ወየአኀዝ ፡ ወያምጽእ ፡ ለአቡሁ ። ወጸውዐት ፡ ርብቃ ፡ ያዕቆብሃ ፡ ወልዳ ፡ ወትቤሎ ፡ ናሁ ፡ ሰማዕክዎ ፡ ለይስሐቅ ፡ አቡከ ፡ እንዘ ፡ ይትናገር ፡ ምስለ ፡ ዔሳው ፡ እኁከ ፡ እንዘ ፡ ይብል ፡ አስግር ፡ ሊተ ፡ ወግበር ፡ ሊተ ፡ መብልዐ ፡ ወአብእ ፡ ሊተ ፡ ወእብላዕ ፡ ወእባርከከ ፡ በቅድመ ፡ እግዚአብሔር ፡ ዘእንበለ ፡ እሙት ። ወይእዜኒኬ ፡ ስማዕ ፡ ወልድየ ፡ ቃልየ ፡ ዘአነ ፡ እኤዝዘከ ፡ ሖር ፡ ውስተ ፡ መርዔትከ ፡ ወንሣእ ፡ ሊተ ፡ ክልኤተ ፡ መሓስአ ፡ ጠሊ ፡ ሠናያነ ፡ ወእግበሮሙ ፡ መብልዐ ፡ ለአቡከ ፡ ዘከመ ፡ ያፈቅር ፡ ወታብእ ፡ ለአቡከ ፡ ወይብላዕ ፡ ከመ ፡ ይባርክ ፡ ቅድመ ፡ እግዚአብሔር ፡ ዘእንበለ ፡ ይሙት ። ወይቤላ ፡ ያዕቆብ ፡ ለርብቃ ፡ እሙ ፡ እሞ ፡ ኢይምሕክ ፡ በእንተ ፡ ኵሉ ፡ ዘይበልዕ ፡ አቡየ ፡ ወያሠምሮ ፡ ወባሕቱ ፡ እፈርህ ፡ አነ ፡ እሞ ፡ ከመ ፡ ኢይለቡ ፡ ቃልየ ፡ ወኢይፍቅድ ፡ ይግሥሠኒ ። ወአንቲ ፡ ታአምሪ ፡ ከመ ፡ አነ ፡ ልሙጽ ፡ ወዔሳው ፡ እኁየ ፡ ጸጓር ፡ ወእከውን ፡ ቅድመ ፡ አዕይንቲሁ ፡ ከመ ፡ ዘያስተአኪ ፡ ወእገብር ፡ ግብረ ፡ ዘኢአዘዘኒ ፡ ወይትመዐዐኒ ፡ ወአመጽእ ፡ ላዕሌየ ፡ መርገመ ፡ ወአኮ ፡ በረከተ ። ወትቤሎ ፡ ርብቃ ፡ እሙ ፡ ላዕሌየ ፡ መርገምከ ፡ ኦወልድየ ፡ ዳእሙ ፡ ስማዕ ፡ ቃልየ ። ወሰምዐ ፡ ያዕቆብ ፡ ቃለ ፡ ርብቃ ፡ እሙ ። ወነሥአት ፡ ርብቃ ፡ አልባሰ ፡ ወልዳ ፡ ዔሳው ፡ ዘይልህቅ ፡ ዘይትፈተው ፡ ዘሀሎ ፡ ኀቤሃ ፡ ውስተ ፡ ቤታ ፡ ወአልበሰቶ ፡ ለያዕቆብ ፡ ወልዳ ፡ ዘይንእስ ። ወወሀበቶ ፡ ተብሲለ ፡ ወኅብስተ ፡ ዘገብረት ፡ ውስተ ፡ እደ ፡ ያዕቆብ ፡ ወልዳ ። ወቦአ ፡ ኀበ ፡ አቡሁ ፡ ወይቤ ፡ አነ ፡ ወልድከ ፡ ገበርኩ ፡ በከመ ፡ ትቤለኒ ፡ ተንሥእ ፡ ወንበር ፡ ወብልዕ ፡ እምዘ ፡ አሥገርኩ ፡ አባ ፡ ከመ ፡ ትባርከኒ ፡ ነፍስከ ። ወይቤሎ ፡ ይስሐቅ ፡ ለወልዱ ፡ ምንተ ፡ ከመዝ ፡ ዘአፍጠንከ ፡ ረኪበ ፡ ወልድየ ። ወይቤ ፡ ያዕቆብ ፡ ዘአርከበኒ ፡ አምላክከ ፡ ቅድሜየ ። ወይቤሎ ፡ ይስሐቅ ፡ ቅረብ ፡ ወእግሥሥከ ፡ ወልድየ ፡ እመ ፡ አንተ ፡ ወልድየ ፡ ዔሳው ፡ ወእመ ፡ ኢኮነሁ ። ወቀርበ ፡ ያዕቆብ ፡ ኀበ ፡ ይስሐቅ ፡ አቡሁ ፡ ወገሰሶ ፡ ወይቤ ፡ 18 ቃል ፡ ቃለ ፡ ያዕቆብ ፡ ወእደው ፡ እደወ ፡ ዔሳው ፡ ወኢያእመሮ ፡ እስመ ፡ ሚጠት ፡ ውእቱ ፡ እምሰማይ ፡ ለአኅልፎ ፡ መንፈሱ ፡ ወኢያእመረ ፡ ይስሐቅ ፡ እስመ ፡ እደዊሁ ፡ ከመ ፡ እደወ ፡ ዔሳው ፡ ጸጓር ፡ ከመ ፡ ይባርኮ ። ወይቤ ፡ አንተሁ ፡ ወልድየ ፡ ዔሳው ፡ ወይቤ ፡ አነ ፡ ወልድከ ፡ ወይቤ ፡ አቅርብ ፡ ሊተ ፡ ወእብላዕ ፡ እምዘ ፡ አሥግርከ ፡ ወልድየ ፡ ከመ ፡ ትባርከ ፡ ነፍስየ ፡ 20 ወአቅረበ ፡ ሎቱ ፡ ወበልዐ ፡ ሎቱ ፡ ወይነ ፡ ወሰትየ ። ወይቤሎ ፡ ይስሐቅ ፡ አቡሁ ፡ ቅረብ ፡ ወሰዐመኒ ፡ ወልድየ ። ወአጼነወ ፡ ጼና ፡ ወዐዛ ፡ አልባሲሁ ፡ ወባረኮ ፡ ወይቤ ፡ ናሁ ፡ ጼና ፡ ወልድየ ፡ ከመ ፡ ጼና ፡ ገዳም ፡ ዘባረኮ ፡ እግዚአብሔር ። ወየሀብከ ፡ እግዚአብሔር ፡ ወያብዝኅከ ፡ እምጠለ ፡ ሰማይ ፡ ወእምጠለ ፡ ምድር ፡ ወብዝኀ ፡ ስርናይ ፡ ወቅብእ ፡ ያብዝኅ ፡ ለከ ። ኩን ፡ እግዚአ ፡ ለአኀዊከ ፡ ወይስግዱ ፡ ለከ ፡ ውሉደ ፡ እምከ ፡ ወኵሎን ፡ በረከት ፡ ዘባረከኒ ፡ እግዚአብሔር ፡ ወባረኮ ፡ ለአብርሃም ፡ አቡየ ፡ ይኩና ፡ ለከ ፡ ወለዘርእከ ፡ እስከ ፡ ለዓለም ፡ ዘይረግመከ ፡ ርጉም ፡ ወዘይባርከከ ፡ ቡሩክ ። ወኮነ ፡ እምድኅረ ፡ አኅለቀ ፡ እንዘ ፡ ይባርኮ ፡ ይስሐቅ ፡ ለወልዱ ፡ ያዕቆብ ፡ ወኮነ ፡ እምድኅረ ፡ ወፅአ ፡ ወፂኦ ፡ ያዕቆብ ፡ እምይስሐቅ ፡ አቡሁ ፡ ተኀብአ ። ወገብረ ፡ ውእቱሂ ፡ መብልዐ ፡ ወአብአ ፡ ለአቡሁ ። ወይቤሎ ፡ ይስሐቅ ፡ አቡሁ ፡ መኑ ፡ አንተ ፡ ወይቤሎ ፡ አነ ፡ በኵርከ ፡ ዔሳው ፡ ወልድከ ፡ ገበርኩ ፡ በከመ ፡ አዘዝከኒ ። ወተደመ ፡ ይስሐቅ ፡ ድማመ ፡ ዐቢየ ፡ ጥቀ ፡ ወይቤ ፡ መኑ ፡ ውእቱ ፡ ዝንቱ ፡ ዘነዐወ ፡ ወአሥገረ ፡ ሊተ ፡ ወአምጽአ ፡ ወበለዕኩ ፡ እምኵሉ ፡ እንበለ ፡ ትምጻእ ፡ ወባረክዎ ፡ ቡሩከ ፡ ይኩን ፡ ወኵሉ ፡ ዘርኡ ፡ እስከ ፡ ለዓለም ። ወኮነ ፡ ሶበ ፡ ሰምዐ ፡ ዔሳው ፡ ነገረ ፡ አቡሁ ፡ ይስሐቅ ፡ ጸርኀ ፡ በቃል ፡ ዐቢይ ፡ ወመራር ፡ ጥቀ ፡ ወይቤሎ ፡ ለአቡሁ ፡ ባርከኒ ፡ ኪያየኒ ፡ አባ ። ወይቤሎ ፡ መጽአ ፡ እኁከ ፡ በሕብል ፡ ወነሥአ ፡ በረከታቲከ ። ወይቤ ፡ ኢያትረፍከኑ ፡ ሊተ ፡ በረከተ ፡ አባ ። ወይቤ ፡ ዔሳው ፡ ለይስሐቅ ፡ አቡሁ ፡ አሐቲኑ ፡ ክመ ፡ በረከትከ ፡ እንቲአከሰ ፡ አባ ፡ ባርከኒ ፡ ኪያየኒ ፡ አባ ፡ ወአንሥአ ፡ ዔሳው ፡ ቃሎ ፡ ወበክየ ። ወበመጥባሕትከ ፡ ተሐዩ ፡ ወለእኁከ ፡ ትትቀነይ ። ወይትሜአከ ፡ ዔሳው ፡ ያዕቆብሃ ፡ በእንተ ፡ በረከት ፡ እንተ ፡ ባረኮ ፡ አቡሁ ፡ ወይቤ ፡ በልቡ ፡ ይእዜኒ ፡ ይበጽሕ ፡ መዋዕለ ፡ ላሐ ፡ አቡየ ፡ ወእቀትሎ ፡ ለያዕቆብ ፡ እኁየ ።

Chapter 27 1 ወተናግራ ፡ ለርብቃ ፡ በሕልም ፡ ነገሮ ፡ ለዔሳው ፡ ወልዳ ፡ ዘይልህቅ ። ናሁ ፡ ዔሳው ፡ እኁከ ፡ ይትቄየመከ ፡ ከመ ፡ ይቅትልከ ። ወይእዜኒ ፡ ወልድየ ፡ ስማዕ ፡ ቃልየ ፡ ተንሥእ ፡ ወጕየይ ፡ ኀበ ፡ ላባ ፡ እኁየ ፡ ከራንሃ ፡ ወንበር ፡ ምስሌሁ ፡ ኀዳጠ ፡ መዋዕለ ፡ እስከ ፡ ይትመየጥ ፡ መዐተ ፡ እኁከ ፡ ወየኀድግ ፡ መዐቶ ፡ እምኔከ ፡ ወይረስዕ ፡ ኵሎ ፡ ዘመጠነ ፡ ረሰይኮ ፡ ወፈኒውየ ፡ እትቄበለከ ፡ እምህየ ። ወይቤ ፡ ያዕቆብ ፡ ኢይፈርህ ፡ እመ ፡ ፈቀደ ፡ ይቅትለኒ ፡ እቀትሎ ፡ 5 ወትቤሎ ፡ ከመ ፡ ኢይምክን ፡ እምክልኤቱ ፡ ውሉድየ ፡ በአሐቲ ፡ ዕለት ። ወይቤላ ፡ ያዕቆብ ፡ ለርብቃ ፡ እሙ ፡ ናሁ ፡ ታአምሪ ፡ ከመ ፡ ረስአ ፡ አቡየ ፡ ወእሬኢ ፡ እስመ ፡ ከብዳ ፡ አዕይንቲሁ ፡ ወእመኒ ፡ ኀደግዎ ፡ እኩይ ፡ ውእቱ ፡ በቅድመ ፡ አዕይንቲሁ ፡ እስመ ፡ አኀድጎ ፡ ወአሐውር ፡ እምኔክሙ ። ወትቤሎ ፡ ርብቃ ፡ ለያዕቆብ ፡ አነ ፡ እበውእ ፡ ወእነግሮ ፡ ወይፌንወከ ። ወቦአት ፡ ርብቃ ፡ ወትቤሎ ፡ ለይስሐቅ ፡ ግእዝኩ ፡ ሕይወትየ ፡ እምክልኤሆን ፡ አዋልደ ፡ ኬጥ ፡ እለ ፡ ነሥአ ፡ ዔሳው ፡ ሎቱ ፡ አንስትያ ። ወጸውዐ ፡ ይስሐቅ ፡ ያዕቆብሃ ፡ ወልዶ ፡ ወባረኮ ፡ ወገሠጾ ፡ ወይቤሎ ፡ 10 ኢትንሣእ ፡ ለከ ፡ ብእሲተ ፡ እምኵሉ ፡ አዋልደ ፡ ከናአን ፡ ተንሥእ ፡ ሖር ፡ መስጴጦምያ ፡ ቤቶ ፡ ለባቱኤል ፡ አቡሃ ፡ ለእምከ ፡ ወንሣእ ፡ ለከ ፡ እምህየ ፡ ብእሲተ ፡ እምአዋልደ ፡ ላባ ፡ እኁሃ ፡ ለእምከ ። ወአምላከ ፡ ሰዳይ ፡ ይባርከ ፡ ያልህቀ ፡ ወያብዝኅከ ፡ ወኩን ፡ መክብበ ፡ አሕዛብ ፡ ወየሀብከ ፡ በረከታቲሁ ፡ ለአቡየ ፡ አብርሃም ፡ ለከ ፡ ወለዘርእከ ፡ እምድኅሬከ ፡ ከመ ፡ ትረስ ፡ ምድረ ፡ ፍልሰትከ ፡ ወኵላ ፡ ምድረ ፡ እንተ ፡ ወሀቦ ፡ እግዚአብሔር ፡ ለአብርሃም ፡ ሖር ፡ ወልድየ ፡ በሰላም ። ወፈነዎ ፡ ይስሐቅ ፡ ለያዕቆብ ፡ ወሖረ ፡ መስጴጦምያ ፡ ኀበ ፡ ላባ ፡ ኀበ ፡ ወልደ ፡ ባቱኤል ፡ ሶርያዊ ፡ እኁሃ ፡ ለርብቃ ፡ እሙ ፡ ለያዕቆብ ። ወኮነ ፡ እምድኅረ ፡ ተንሥአ ፡ ያዕቆብ ፡ ለሐዊረ ፡ መስጴጦምያ ፡ ወሐዘነ ፡ መንፈሳ ፡ ለርብቃ ፡ ድኅረ ፡ ወልዳ ፡ ወትበኪ ። ወይቤላ ፡ ይስሐቅ ፡ ለርብቃ ፡ እኅትየ ፡ ኢትብኪዪ ፡ በእንተ ፡ ወልድየ ፡ እስመ ፡ በሰላም ፡ የሐውር ፡ ወበሰላም ፡ ይትመየጥ ፡ 15 አምላክ ፡ ልዑል ፡ የዐቅቦ ፡ እምኵሉ ፡ እኩይ ፡ ወይሄሉ ፡ ምስሌሁ ። እስመ ፡ እጤይቅ ፡ ከመ ፡ ይሤራሕ ፡ ፍናዊሁ ፡ በኵሉ ፡ ኀበ ፡ ሖረ ፡ እስከ ፡ አመ ፡ ይገብእ ፡ በሰላም ፡ ኀቤነ ፡ ወንሬእዮ ፡ በሰላም ። ኢትፍርሂ ፡ በእንቲአሁ ፡ እኅትየ ፡ እስመ ፡ ራትዕ ፡ በፍኖቱ ፡ ውእቱ ፡ ወፍጹም ፡ ውእቱ ፡ ብእሲ ፡ ምእመን ፡ ውእቱ ፡ ወኢይትገደፍ ፡ ኢትብክዪ ። ወይናዝዛ ፡ ይስሐቅ ፡ ለርብቃ ፡ በእንተ ፡ ያዕቆብ ፡ ወልዳ ፡ ወባረኮ ። ወወፅአ ፡ ያዕቆብ ፡ እምዐዘቅተ ፡ መሐላ ፡ ከመ ፡ ይሖር ፡ ካራንሃ ፡ በዓመት ፡ ቀዳሚ ፡ ዘሱባዔ ፡ ካልእ ፡ ዘአርብዓ ፡ ወአርባዕቱ ፡ ኢዮቤሌዉ ፡ ወበጽሐ ፡ ወስተ ፡ ሉዛ ፡ እንተ ፡ ውስተ ፡ ደብር ፡ እንተ ፡ ይእቲ ፡ ቤቴል ፡ በሠርቀ ፡ ወርኅ ፡ ዘቀዳሚ ፡ ዘዝ ፡ ሱባዔ ፡ ወበጽሐ ፡ መካነ ፡ መሲዮ ፡ ወተግሕሠ ፡ እምፍኖተ ፡ ዐረቢሃ ፡ ለመንገድ ፡ በዛቲ ፡ ሌሊት ፡ ወኖመ ፡ ህየ ፡ እስመ ፡ ዐረበ ፡ ፀሐይ ። ወነሥአ ፡ እምአእባነ ፡ ውእቱ ፡ መካን ፡ ወአንበሮ ፡ ታሕተ ፡ ውእቱ ፡ ዕፅ ፡ ወውእቱ ፡ ባሕቲቱ ፡ የሐውር ። ወሐለመ ፡ በይእቲ ፡ ሌሊት ፡ ወናሁ ፡ መዓርግ ፡ ትክልት ፡ ውስተ ፡ ምድር ፡ ወርእሳ ፡ ትለክፍ ፡ ውስተ ፡ ሰማይ ። ወተናገረ ፡ ምስለ ፡ ያዕቆብ ፡ ወይቤ ፡ አነ ፡ ውእቱ ፡ አምላከ ፡ አብርሃም ፡ አቡከ ፡ ወአምላከ ፡ ይስሐቅ ፡ ምድር ፡ እንተ ፡ ዲቤሃ ፡ ትነውም ፡ አንተ ፡ ለከ ፡ እሁባ ፡ ወለዘርእከ ፡ እምድኅሬከ ። ወይከውን ፡ ዘርእከ ፡ ከመ ፡ ኆጻ ፡ ምድር ፡ ወትበዝኅ ፡ ውስተ ፡ ባሕር ፡ ወጽባሕ ፡ ወሰሜን ፡ ወደቡብ ። ወነየ ፡ አነ ፡ እሄሉ ፡ ምስሌከ ፡ ወአዐቅበከ ፡ በኵለሄ ፡ ወእደ ፡ ሖርከ ፡ ወአገብአከ ፡ ውስተ ፡ ዛምድር ፡ በሰላም ፡ እስመ ፡ ኢየኀድገከ ፡ እስከ ፡ ሶበ ፡ እገብር ፡ ኵሎ ፡ ዘእቤለከ ። ወኖመ ፡ ያዕቆብ ፡ ንዋመ ፡ ወይቤ ፡ አማን ፡ ቤቱ ፡ ለእግዚአብሔር ፡ ዝመካን ፡ ወአነ ፡ ኢያእመርኩ ፡ ወፈርሀ ፡ ወይቤ ፡ ግሩም ፡ ዝንቱ ፡ መካን ፡ ዘኢኮነ ፡ ምንተኒ ፡ ዘእንበለ ፡ ቤተ ፡ እግዚአብሔር ፡ ወዛቲ ፡ አንቀጸ ፡ ሰማይ ። ወገዪሶ ፡ ያዕቆብ ፡ ነግሀ ፡ ነሥአ ፡ እብነ ፡ ዘአንበረ ፡ ዲበ ፡ ርእሱ ፡ ወአቀሞ ፡ ሐውልተ ፡ ለትእምርት ፡ ወከዐወ ፡ ቅብአ ፡ ዲበ ፡ ርእሱ ፡ ወሰመየ ፡ ስሞ ፡ ለውእቱ ፡ መካን ፡ ቤቴል ፡ ወቀዲሙሰ ፡ ባሕቱ ፡ ሉዛ ፡ ስመ ፡ ብሔሩ ። ወጸለየ ፡ ያዕቆብ ፡ ጸሎተ ፡ ለእግዚአብሔር ፡ እንዘ ፡ ይብል ፡ እመ ፡ ሀሎ ፡ እግዚአብሔር ፡ ምስሌየ ፡ ወዐቀበኒ ፡ በዛቲ ፡ ፍኖት ፡ እንተ ፡ ባቲ ፡ አሐውር ፡ አነ ፡ ወወሀበኒ ፡ ኅብስተ ፡ እብላዕ ፡ ወልብሰ ፡ እልብስ ፡ ወእትመየጥ ፡ ቤተ ፡ አቡየ ፡ በሰላም ፡ ወይከውነኒ ፡ እግዚአብሔር ፡ አምላክ ።

Chapter 28 1 ወአንሥአ ፡ እገሪሁ ፡ ወሖረ ፡ ምድረ ፡ ጽባሕ ፡ ኀበ ፡ ላባ ፡ እኅወ ፡ ርብቃ ፡ ወሀሎ ፡ ምስሌሁ ፡ ወተቀንየ ፡ ሎቱ ፡ ህየንተ ፡ ራሔል ፡ ወለቱ ፡ ሱባዔ ፡ አሐደ ። ወበዓመት ፡ ቀዳሚ ፡ በሣልስ ፡ ሱባዔ ፡ ይቤሎ ፡ ሀበኒ ፡ ብእሲትየ ፡ ዘበእንቲአሃ ፡ ተቀነይኩ ፡ ለከ ፡ ሰብዐተ ፡ ዓመተ ፡ ወይቤሎ ፡ ላባ ፡ ለያዕቆብ ፡ አነ ፡ እሁበከ ፡ ብእሲተከ ። ወገብረ ፡ ላባ ፡ ግዝአ ፡ ወነሥአ ፡ ልያሃ ፡ ወለቶ ፡ እንተ ፡ ትልህቅ ፡ ወወሀቦ ፡ ለያዕቆብ ፡ ብእሲተ ፡ ወወሀባ ፡ ዘለፋሃ ፡ አመቶ ፡ ለአኪተ ፡ ወያዕቆብሰ ፡ ኢያእመረ ፡ እስመ ፡ አምሰላ ፡ ያዕቆብ ፡ ዘራሔል ፡ ይእቲ ። ወቦአ ፡ ኀቤሃ ፡ ወናሁ ፡ ይእቲሰ ፡ ልያ ። እስመ ፡ ያፈቅር ፡ ያዕቆብ ፡ ራሔልሃ ፡ እምነ ፡ ልያ ፡ እስመ ፡ አዕይንቲሃ ፡ ለልያ ፡ ድኩም ፡ ወባሕቱ ፡ ላሕይ ፡ ራእያ ፡ ጥቀ ፡ ወራሔል ፡ ሠናይ ፡ አዕይንቲሃ ፡ ወሠናይ ፡ ራእያ ፡ ወላሕይት ፡ ጥቀ ። ወይቤሎ ፡ ላባ ፡ ለያዕቆብ ፡ ኢኮነ ፡ ከመዝ ፡ በምድርነ ፡ ውሂበ ፡ እንተ ፡ ትንእስ ፡ እምእንተ ፡ ትልህቅ ። ወአንተኒ ፡ አዝዝ ፡ ለደቂቀ ፡ እስራኤል ። ወይቤ ፡ ላባ ፡ ለያዕቆብ ፡ ይኅልፍ ፡ ሰቡዐ ፡ መዋዕለ ፡ ግዝእ ፡ ለዛ ፡ ወእሁበከ ፡ ራሔልሃ ፡ ከመ ፡ ትትቀነይ ፡ ሊተ ፡ ካልኣነ ፡ ዓመተ ፡ ሰብዐተ ፡ ከመ ፡ ትርዐይ ፡ አባግዕየ ፡ በከመ ፡ ገበርከ ፡ በሱባዔ ፡ ቀዳሚ ። ወበመዋዕል ፡ አመ ፡ ኀለፈ ፡ ሰቡዕ ፡ ዕለት ፡ ዘግዝእ ፡ ዘልያ ፡ ወወሀቦ ፡ ላባ ፡ ራሔልሃ ፡ ለያዕቆብ ፡ ከመ ፡ ይትቀነይ ፡ ሎቱ ፡ ካልአተ ፡ ዓመተ ፡ ሰብዐተ ፡ ወወሀባ ፡ ባላንሃ ፡ እኅታ ፡ ለዘለፋ ፡ ላእኪተ ። ወተቀንየ ፡ ሰብዐተ ፡ ዓመተ ፡ ዳግመ ፡ በእንተ ፡ ራሔል ፡ እስመ ፡ ልያ ፡ ተውህበቶ ፡ በከ ። ወአርኀወ ፡ እግዚአብሔር ፡ ማሕፀነ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ወጸውዐ ፡ ስሞ ፡ ሮቤል ። ወማሕፀናሰ ፡ ለራሔል ፡ ተጸፍቀ ፡ እስመ ፡ ርእየ ፡ እግዚአብሔር ፡ ከመ ፡ ትጸላእ ፡ ልያ ፡ ወራሔልሰ ፡ ትትፈቀር ። ወደገመ ፡ ያዕቆብ ፡ ቦአ ፡ ኀበ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ካልአ ፡ ወጸውዐ ፡ ስሞ ፡ ስምዖን ። ወደገመ ፡ ያዕቆብ ፡ ወቦአ ፡ ኀበ ፡ ልያ ፡ ወፀንሰት ፡ ወወለደት ፡ ሎቱ ፡ ወልደ ፡ ሣልሰ ፡ ወጸውዐ ፡ ስሞ ፡ ሌዊ ። ወደገመ ፡ ካዕበ ፡ ወቦአ ፡ ኀቤሃ ፡ ወወለደት ፡ ወልደ ፡ ራብዐ ። ወበዝ ፡ ኵሉ ፡ ራሔል ፡ ትቀንእ ፡ በልያ ፡ እስመ ፡ ይእቲ ፡ ኢትወልድ ። ወሶበ ፡ ርእየት ፡ ራሔል ፡ ከመ ፡ ወለደት ፡ ልያ ፡ ደቀ ፡ አርባዕተ ፡ ለያዕቆብ ፡ ሮቤልሃ ፡ ወስምዖንሃ ፡ ወሌዊሃ ፡ ወይሁዳሃ ። ወቦአ ፡ ወፀንሰት ፡ ወወለደት ፡ ሎቱ ፡ ወልደ ። ወደገመ ፡ ያዕቆብ ፡ ካዕበ ፡ ወቦአ ፡ ኀበ ፡ ባላ ፡ ወፀንሰት ፡ ወወለደት ፡ ወልደ ፡ ዳግመ ፡ ለያዕቆብ ፡ ወጸውዐት ፡ ስሞ ፡ ራሔል ፡ ንፍታሌም ፡ በኀሙሱ ፡ ለወርኅ ፡ ሳብዕ ፡ በካልእ ፡ ዓም ፡ ዘሱባዔ ፡ ራብዕ ። ወሶበ ፡ ርእየት ፡ ልያ ፡ ከመ ፡ መከነት ፡ ወኢትወልድ ፡ ቀንአት ፡ ይእቲኒ ፡ ለራሔል ፡ ወወሀበት ፡ ይእቲኒ ፡ ዘለፋሃ ፡ ላእኪታ ፡ ለያዕቆብ ፡ ብእሲተ ፡ ወፀንሰት ፡ ወወለደት ፡ ወልደ ፡ ወጸውዐት ፡ ስሞ ፡ ልያ ፡ ጋድ ፡ አመ ፡ ዐሡሩ ፡ ወሰኑዩ ፡ ለወርኅ ፡ ሳምን ፡ በሣልስ ፡ ዓመት ፡ ዘሱባዔ ፡ ራብዕ ። ወደገመ ፡ ቦአ ፡ ኀቤሃ ፡ ወፀንሰት ፡ ወወለደት ፡ ሎቱ ፡ ወልደ ፡ ካልአ ፡ ወጸውዐት ፡ ስሞ ፡ ልያ ፡ አሴር ፡ በሰኑዩ ፡ ለወርኅ ፡ ዘዐሠርቱ ፡ ወአሐዱ ፡ በዓመት ፡ ኃምስ ፡ ዘሱባዔ ፡ ራብዕ ። ወቦአ ፡ ያዕቆብ ፡ ኀበ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ወጸውዐ ፡ ስሞ ፡ ይሳኮር ፡ በረቡዑ ፡ ለኃምስ ፡ ወርኅ ፡ በዓመት ፡ ራብዕ ፡ ዘሱባዔ ፡ ራብዕ ። ወቦአ ፡ ያዕቆብ ፡ ዳግመ ፡ ኀቤሃ ፡ ወፀንሰት ፡ ወወለደት ፡ ክልኤተ ፡ ወልደ ፡ ወወለተ ፡ ወጸውዐት ፡ ስሞ ፡ ለወልድ ፡ ዛብሎን ፡ ወለወለት ፡ ዲና ፡ ስማ ። ወተሣሀላ ፡ እግዚአብሔር ፡ ለራሔል ፡ ወአርኀወ ፡ ማሕፀና ። ወበመዋዕለ ፡ ተወልደ ፡ ዮሴፍ ፡ ይቤ ፡ ያዕቆብ ፡ ለላባ ፡ ሀበኒ ፡ አንስትያየ ፡ ወውሉድየ ፡ ወእሖር ፡ ኀበ ፡ አቡየ ፡ ይስሐቅ ፡ ወእግበር ፡ ሊተ ፡ ቤተ ፡ እስመ ፡ ፈጸምኩ ፡ ዓመታተ ፡ ዘተቀነይኩ ፡ ለከ ፡ ህየንተ ፡ ክልኤቲ ፡ አዋልዲከ ፡ ወአሐውር ፡ ቤተ ፡ አቡየ ። ወይቤሎ ፡ ላባ ፡ ለያዕቆብ ፡ ንበር ፡ ኀቤየ ፡ በዐስብከ ፡ ወረዐይ ፡ ሊተ ፡ ካዕበ ፡ መርዔትየ ፡ ወንሣእ ፡ ዐስበከ ። ወተካሀሉ ፡ በበይናቲሆሙ ፡ ከመ ፡ የሀቦ ፡ ዐስቦ ፡ ኵሎ ፡ በግዐ ፡ እመሓስእ ፡ ወእምጠሊ ፡ ሐመደ ፡ ከቦ ፡ ወጋስ ፡ በጸዐዳ ፡ ዘተወልደ ፡ ይኩኖ ፡ ዐስቦ ። ወይወልድ ፡ ኵሉ ፡ አባግዕ ፡ ጋስ ፡ ኵሎ ፡ ዘትእምርተ ፡ ኰሳኵሰ ፡ ዘቦ ፡ ኵሉ ፡ ወሐመደ ፡ ክቦ ፡ ኰሳኵሰ ፡ ወይደግማ ፡ አባግዕ ፡ ይወልዳ ፡ ዘበአርአያሆን ፡ ወኵሉ ፡ ዘትእምርተ ፡ ለያዕቆብ ፡ ወዘአልቦ ፡ ትእምርት ፡ ለላባ ። ወበዝኀ ፡ ጥሪቱ ፡ ለያዕቆብ ፡ ጥቀ ፡ ወአጥረየ ፡ አልህምተ ፡ ወአባግዐ ፡ ወአእዱገ ፡ ወአግማለ ፡ ወደቀ ፡ ወአዋልደ ። ወቀንአ ፡ ላባ ፡ ወውሉዱ ፡ ላዕለ ፡ ያዕቆብ ፡ ወአስተጋብአ ፡ ላባ ፡ አባግዒሁ ፡ እምኔሁ ፡ ወያስተሐይጾ ፡ ለእኩይ ።

Chapter 29 1 ወኮነ ፡ እምዘ ፡ ወለደት ፡ ራሔል ፡ ዮሴፍሃ ፡ ወሖረ ፡ ላባ ፡ ይቅርጽ ፡ አባግዒሁ ፡ እስመ ፡ ርሑቅ ፡ ሀለዋ ፡ እምኀቤሁ ፡ ምሕዋረ ፡ ሠሉስ ፡ ዕለት ። ወርእየ ፡ ያዕቆብ ፡ ከመ ፡ የሐውር ፡ ላባ ፡ ይቅርጽ ፡ አባግዒሁ ። እስመ ፡ ነገሮን ፡ ዘከመ ፡ ርእየ ፡ ኵሎ ፡ በሕልም ፡ ወኵሎ ፡ ዘተናገረ ፡ ሎቱ ፡ ከመ ፡ ይግባእ ፡ ቤተ ፡ አቡሁ ። ወባረከ ፡ ያዕቆብ ፡ አምላከ ፡ አቡሁ ፡ ይስሐቅ ፡ ወአምላከ ፡ አብርሃም ፡ አቡሁ ፡ ለአቡሁ ። ወበሳብዕ ፡ ዓም ፡ ዘሱባዔ ፡ ራብዕ ፡ ተመይጠ ፡ ያዕቆብ ፡ ገለአድ ፡ በቀዳሚ ፡ ወርኅ ፡ አመ ፡ ዕሥራሁ ፡ ወአሚሩ ፡ ወዴገኖ ፡ ላባ ፡ ድኅሬሁ ፡ ወረከቦ ፡ ለያዕቆብ ፡ በደብረ ፡ ገለአድ ፡ በወርኅ ፡ ሣልስ ፡ አመ ፡ ዐሡሩ ፡ ወሠሉሱ ። ወኢኀደጎ ፡ እግዚአብሔር ፡ ከመ ፡ ያሕሥም ፡ ላዕለ ፡ ያዕቆብ ፡ እስመ ፡ አስተርአዮ ፡ በሕልም ፡ ሌሊተ ፡ ወነገሮ ፡ ላባ ፡ ለያዕቆብ ። ወአመ ፡ ዐሡሩ ፡ ወሐሙሱ ፡ ለውእቱ ፡ መዋዕል ፡ ገብረ ፡ ያዕቆብ ፡ ግዝአ ፡ ለላባ ፡ ወለኵሎሙ ፡ እለ ፡ መጽኡ ፡ ምስሌሁ ፡ ወመሐለ ፡ ያዕቆብ ፡ ለላባ ፡ በዛቲ ፡ ዕለት ፡ ወላባሂ ፡ ለያዕቆብ ፡ ከመ ፡ ኢይትዐደው ፡ አሐዱ ፡ ካልኦ ፡ በእከይ ፡ በደብረ ፡ ገለአድ ። ወገብረ ፡ ህየ ፡ ፍሥሐተ ፡ ለስምዕ ፡ በእንተዝ ፡ ተጸውዐ ፡ ስሙ ፡ ለውእቱ ፡ መካን ፡ ፍሥሐተ ፡ ስምዕ ፡ ከመዝ ፡ ፍሥሐት ። ወቀዲሙሰ ፡ ይጼውዕዎ ፡ ለምድረ ፡ ገለአድ ፡ ምድረ ፡ ራፋኤል ፡ እስመ ፡ ምድረ ፡ ራፋኤም ፡ ይእቲ ። ወመኃድሪሆሙ ፡ እምነ ፡ ምድረ ፡ ውሉደ ፡ አሞን ፡ እስከ ፡ ደብረ ፡ ኤርሞን ፡ ወቤተ ፡ መንግሥቶሙ ፡ ቀራናኤም ፡ ወአስጠሮስ ፡ ወአድራኦ ፡ ወሚሱር ፡ ወቤዎን ። ወአሕጐሎሙ ፡ እግዚአብሔር ፡ እምእከየ ፡ ምግባሮሙ ፡ እስመ ፡ ፀዋጋን ፡ ጥቀ ፡ እሙንቱ ። ወፈነወ ፡ ያዕቆብ ፡ ላባሃ ፡ ወሖረ ፡ ውስተ ፡ መስጴጦምያ ፡ ምድረ ፡ ጽባሕ ። ወተዐደወ ፡ ኢያቦክሃ ፡ በታስዕ ፡ ወርኅ ፡ አመ ፡ ዐሡሩ ፡ ወአሚሩ ። ወበዓመት ፡ ቀዳሚ ፡ ዘኃምስ ፡ ሱባዔ ፡ በዝኢዮቤልውስ ፡ ዐደወ ፡ ዮርዳኖስ ፡ ወኀደረ ፡ ማዕዶተ ፡ ዮርዳኖስ ፡ ወይሬዒ ፡ አባግዒሁ ፡ እምባሕረ ፡ ፈሐሐት ፡ እስከ ፡ ቤተ ፡ ሳን ፡ ወእስከ ፡ ዶታኢም ፡ ወእስከ ፡ አመ ፡ አቅራቢት ። ወይፌኑ ፡ ለአቡሁ ፡ ለይስሐቅ ፡ እምኵሉ ፡ ጥሪቱ ፡ ልብሰ ፡ ወሲሲተ ፡ ወሥጋ ፡ ወስቴ ፡ ወሐሊበ ፡ ወቅብአ ፡ ወኀብስተ ፡ ሐሊብ ፡ ወእምነ ፡ ተመርተ ፡ ቈላ ። ወለእሙሂ ፡ ለርብቃ ፡ ርብዕ ፡ ለዓመት ፡ ማእከለ ፡ ጊዜያቲሆሙ ፡ ለአውራኅ ፡ ወማእከለ ፡ ሐሪስ ፡ ወለዐፂድ ፡ ወማእከለ ፡ ጸዳይ ፡ ወዝናም ፡ ወማእከለ ፡ ክረምት ፡ ወሐጋይ ፡ ውስተ ፡ ማኅፈዱ ፡ ለአብርሃም ። እስመ ፡ ተመይጠ ፡ ይስሐቅ ፡ እምዐዘቅተ ፡ መሐላ ፡ ወዐርገ ፡ ውስተ ፡ ማኅፈደ ፡ አቡሁ ፡ አብርሃም ፡ ወኀደረ ፡ ህየ ፡ እምዔሳው ፡ ወልዱ ። እስመ ፡ በመዋዕለ ፡ ሖረ ፡ ያዕቆብ ፡ መስጴጦምያ ፡ ነሥአ ፡ ለርእሱ ፡ ዔሳው ፡ ብእሲተ ፡ መኤሌትሃ ፡ ወለተ ፡ ይስማዔል ፡ ወአስተጋብአ ፡ ኵሎ ፡ መርዔተ ፡ አቡሁ ፡ ወአንስቲያሁ ፡ ወዐርገ ፡ ወኀደረ ፡ ውስተ ፡ ደብረ ፡ ሲር ። ወዐርገ ፡ ይስሐቅ ፡ እምዐዘቅተ ፡ መሐላ ፡ ወኀደረ ፡ ማኅፈደ ፡ አብርሃም ፡ አቡሁ ፡ ውስተ ፡ ደብረ ፡ ኬብሮን ። ወእምህየ ፡ ይፌኑ ፡ ያዕቆብ ፡ ኵሎ ፡ ዘይፌኑ ፡ ለአቡሁ ፡ ወለእሙ ፡ እምጊዜ ፡ በበ ፡ ጊዜ ፡ ኵሎ ፡ ትካዞሙ ።

Chapter 30 1 ወበቀዳሚ ፡ ዓመት ፡ ዘሱባዔ ፡ ሳድስ ፡ ዐርገ ፡ ሳሌምሃ ፡ ዘመንገለ ፡ ጽባሒሁ ፡ ለሰዊማ ፡ በሰላም ፡ በራብዕ ፡ ወርኅ ። ወበህየ ፡ መሠጥዋ ፡ ለዲና ፡ ለወለተ ፡ ያዕቆብ ፡ ውስተ ፡ ቤተ ፡ ሴኬም ፡ ወልደ ፡ ኤሞር ፡ ኤዋዊ ፡ መኰንነ ፡ ምድር ፡ ወሰከበ ፡ ምስሌሃ ፡ ወአርኰሳ ። ወአስተብቍዐ ፡ እምኀበ ፡ አቡሃ ፡ ትትወሀብ ፡ ሎቱ ፡ ብእሲተ ፡ ወእምኀበ ፡ አኃዊሃ ፡ ብእሲተ ፡ ሎቱ ። ወቦኡ ፡ ስምዖን ፡ ወሌዊ ፡ ሰዊማሃ ፡ ግብተ ፡ ወገብሩ ፡ ኵነኔ ፡ ላዕለ ፡ ኵሎሙ ፡ ዕደወ ፡ ሰቂሞን ፡ ወቀተሉ ፡ ኵሎ ፡ ብእሴ ፡ ዘረከቡ ፡ ውስቴታ ፡ ወኢያትረፉ ፡ ውስቴታ ፡ ወኢአሐደ ፡ ኵሎ ፡ ቀተሉ ፡ በጻዕር ፡ እስመ ፡ ገመኑ ፡ ዲናሃ ፡ እኅቶሙ ። ወከመዝ ፡ እንከ ፡ ኢይትገበር ፡ እምይእዜ ፡ ለአርኵሶ ፡ ወለተ ፡ እስራኤል ፡ እስመ ፡ በሰማይ ፡ ተሠርዐ ፡ ላዕሌሆሙ ፡ ኵነኔ ፡ ከመ ፡ ያጥፍእዎሙ ፡ በሰይፍ ፡ ለኵሎሙ ፡ ዕደወ ፡ ሰቂማ ፡ እስመ ፡ ገብሩ ፡ ኀፍረተ ፡ ውስተ ፡ እስራኤለ ፡ 6 ወመጠዎሙ ፡ እግዚአብሔር ፡ ውስተ ፡ እደ ፡ ውሉደ ፡ ያዕቆብ ፡ ከመ ፡ ይሠርውዎሙ ፡ በሰይፍ ፡ ወከመ ፡ ይግበሩ ፡ ላዕሌሆሙ ፡ ኵነኔ ። ወብእሲ ፡ እመቦ ፡ ዘፈቀደ ፡ በውስተ ፡ እስራኤል ፡ የሀብ ፡ ወለቶ ፡ ወእመኒ ፡ እኅቶ ፡ ለኵሉ ፡ ብእሲ ፡ ዘእምዘርአ ፡ አሕዛብ ፡ ሞተ ፡ ይሙት ፡ ወበእብን ፡ ይውግርዎ ፡ እስመ ፡ ገብረ ፡ ኀፍረተ ፡ በውስተ ፡ እስራኤል ። ወኢይትረከብ ፡ ዘማ ፡ ወርኩስ ፡ በውስተ ፡ እስራኤል ፡ ኵሎ ፡ መዋዕለ ፡ ትውልደ ፡ ምድር ፡ እስመ ፡ ቅዱስ ፡ እስራኤል ፡ ለእግዚአብሔር ። እስመ ፡ ከመዝ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ በእንተ ፡ ኵሉ ፡ ዘርአ ፡ እስራኤል ፡ ዘያረኵስ ፡ ሞተ ፡ ለይሙት ፡ ወበእብን ፡ ይውግርዎ ። ወአልቦ ፡ ለዝ ፡ ሕግ ፡ ዐቅመ ፡ መዋዕል ፡ ወአልቦ ፡ ኅድገተ ፡ ወኵሎ ፡ ስርየተ ፡ ዘእንበለ ፡ ዳእሙ ፡ ይሠረው ፡ ብእሲ ፡ ዘአርኰሰ ፡ ወለቶ ፡ በማእከለ ፡ ኵሉ ፡ እስራኤል ፡ እስመ ፡ እምውስተ ፡ ዘርኡ ፡ ወሀቦ ፡ ለሞሎክ ፡ ወአበሰ ፡ ለአርኵሶቱ ። ወአንተኒ ፡ ሙሴ ፡ አዝዞሙ ፡ ለደቂቀ ፡ እስራኤል ፡ ወአስምዕ ፡ ላዕሌሆሙ ፡ ከመ ፡ ኢየሀቡ ፡ እምነ ፡ አዋልዲሆሙ ፡ ለአሕዛብ ፡ ወከመ ፡ ኢይንሥኡ ፡ እምአዋልደ ፡ አሕዛብ ፡ እስመ ፡ ምኑን ፡ ውእቱ ፡ በቅድመ ፡ እግዚአብሔር ። በእንተዝ ፡ ጸሐፍኩ ፡ ለከ ፡ ውስተ ፡ ቃለ ፡ ሕግ ፡ ኵሎ ፡ ግብሮሙ ፡ ለሰቂማ ፡ ዘገብሩ ፡ ላዕለ ፡ ዲና ፡ ወዘከመ ፡ ተናገሩ ፡ ደቁ ፡ ለያዕቆብ ፡ እንዘ ፡ ይብሉ ፡ ኢንሁብ ፡ ወለተነ ፡ ለሰብእ ፡ ዘቦ ፡ ቍልፈተ ፡ እስመ ፡ ጽዕለት ፡ ውእቱ ፡ ለነ ፡ 13 ወጽዕለት ፡ ውእቱ ፡ ለእስራኤል ፡ ለእለ ፡ ይሁቡ ፡ ወለእለ ፡ ይነሥኡ ፡ እምነ ፡ አዋልደ ፡ አሕዛብ ፡ እስመ ፡ ርኩስ ፡ ውእቱ ፡ ወምኑን ፡ ውእቱ ፡ እምእስራኤል ። ወኢይነጽሕ ፡ እስራኤል ፡ እምዝ ፡ ርኵስ ፡ ዘቦ ፡ ብእሲተ ፡ እምነ ፡ አዋልደ ፡ አሕዛብ ። እስመ ፡ መቅሠፍት ፡ ላዕለ ፡ መቅሠፍት ፡ ውእቱ ፡ ወመርገም ፡ ላዕለ ፡ መርገም ፡ ወኵሉ ፡ ኵነኔ ፡ ወመቅሠፍት ፡ ወመርገም ፡ ይመጽእ ። ወአልቦ ፡ ነሢአ ፡ ገጽ ፡ ወአልቦ ፡ አድልዎ ፡ ለገጽ ፡ ወአልቦ ፡ ነሢአ ፡ እምእዴሁ ፡ ፍሬ ፡ ወመሥዋዕተ ፡ ወጽንሐሐ ፡ ወስብሐ ፡ ወተምዕዞ ፡ መዓዛ ፡ ሠናይ ፡ ከመ ፡ ይትወከፎ ። በእንተዝ ፡ አዘዝኩከ ፡ እንዘ ፡ እብል ፡ አስምዕ ፡ ዛተ ፡ ስምዐ ፡ ላዕለ ፡ እስራኤል ። ወተኀርየ ፡ ዘርአ ፡ ሌዊ ፡ ለክህነት ፡ ወለሌዋዊያን ፡ ከመ ፡ ይትለአኩ ፡ ቅድመ ፡ እግዚአብሔር ፡ ከመ ፡ ንሕነ ፡ በኵሉ ፡ መዋዕል ። ወከመዝ ፡ ያዐርጉ ፡ ሎቱ ፡ በስምዕ ፡ ውስተ ፡ ጽላተ ፡ ሰማይ ፡ በረከተ ፡ ወጽድቀ ፡ ቅድሜሁ ፡ ለአምላከ ፡ ኵሉ ። ወንዜክር ፡ ንሕነ ፡ ጽድቀ ፡ ዘገብረ ፡ ሰብእ ፡ በሕይወቱ ፡ በኵሉ ፡ ጊዜያት ፡ ዘዓመት ፡ እስከ ፡ ዐሠርቱ ፡ ምእት ፡ ትውልድ ፡ ያዐርጉ ፡ ወይመጽእ ፡ ሎቱ ፡ ወለትውልዱ ፡ እምድኅሬሁ ፡ ወተጽሕፈ ፡ ዐርከ ፡ ወጻድቀ ፡ ውስተ ፡ ጽላተ ፡ ሰማይ ። ኵሎ ፡ ዘንተ ፡ ነገረ ፡ ጸሐፍኩ ፡ ለከ ፡ ወአዘዝኩከ ፡ ከመ ፡ ትንግር ፡ ለውሉደ ፡ እስራኤል ፡ ከመ ፡ ኢይግበሩ ፡ አበሳ ፡ ወኢይትዐደዉ ፡ ሥርዐተ ፡ ወኢይንሥቱ ፡ ኪዳነ ፡ እንተ ፡ ተሠርዐት ፡ ሎሙ ፡ ከመ ፡ ይግበርዋ ፡ ወይጸሐፉ ፡ አዕርክተ ፡ 22 ወእመሰ ፡ ተዐደዉ ፡ ወገብሩ ፡ እምኵሉ ፡ ፍናዊሃ ፡ ለርኵስ ፡ ይጸሐፉ ፡ ውስተ ፡ ጽላተ ፡ ሰማይ ፡ ጸላእተ ፡ ወይደመሰሱ ፡ እመጽሐፈ ፡ ሕያዋን ፡ ወይጸሐፉ ፡ ውስተ ፡ መጽሐፈ ፡ እለ ፡ ይትሐጐሉ ፡ ወምስለ ፡ እለ ፡ ይሤረዉ ፡ እምውስተ ፡ ምድር ። ወበዕለተ ፡ ቀተሉ ፡ ውሉደ ፡ ያዕቆብ ፡ ሰቂማሃ ፡ ዐርገ ፡ ሎሙ ፡ መጽሐፍ ፡ ውስተ ፡ ሰማይ ፡ ከመ ፡ ገብሩ ፡ ጽድቀ ፡ ወርትዐ ፡ ወበቀለ ፡ ላዕለ ፡ ኃጥኣን ፡ ወተጽሕፈ ፡ ለበረከት ። ወአውፅኡ ፡ ዲናሃ ፡ እኅቶሙ ፡ እምነ ፡ ቤተ ፡ ሴኬም ፡ ወፄወዉ ፡ ኵሎ ፡ ዘሀሎ ፡ ውስተ ፡ ሰቂሞን ፡ አባግዒሆሙ ፡ ወአልህምቲሆሙ ፡ ወአእዱጊሆሙ ፡ ወኵሎ ፡ ንዋዮሙ ፡ ወኵሎ ፡ መራዕዮሙ ፡ ወአምጽኡ ፡ ኵሎ ፡ ኀበ ፡ ያዕቆብ ፡ አቡሆሙ ። ወተናገረ ፡ ምስሌሆሙ ፡ በእንተ ፡ ዘቀተሉ ፡ ሀገረ ፡ እስመ ፡ ፈርሀ ፡ እምእለ ፡ ይነብሩ ፡ ምድረ ፡ እምእለ ፡ ከነናዊያን ፡ ወፈሪዛዊያን ። ወኮነ ፡ ግርማ ፡ እግዚአብሔር ፡ ውስተ ፡ ኵሎን ፡ አህጉር ፡ ዘአውዳ ፡ ለሰቂሞን ፡ ወኢተንሥኡ ፡ ለሰዲደ ፡ ውሉዶ ፡ ለያዕቆብ ፡ እስመ ፡ ድንጋፄ ፡ ወድቀ ፡ ላዕሌሆሙ ።

Chapter 31 ወበሠርቀ ፡ ወርኅ ፡ ነገረ ፡ ያዕቆብ ፡ ለኵሉ ፡ ሰብአ ፡ ቤቱ ፡ እንዘ ፡ ይብል ፡ ንጹሑ ፡ ወወልጡ ፡ አልባሲክሙ ፡ ወተንሢአነ ፡ ንዕርግ ፡ ቤቴል ፡ በኀበ ፡ ጸለይኩ ፡ ሎቱ ፡ ጸሎተ ፡ አመ ፡ ዕለተ ፡ ጐየይኩ ፡ እምገጸ ፡ ዔሳው ፡ እኁየ ፡ ዘውእቱ ፡ ምስሌየ ፡ ወሜጠኒ ፡ ውስተ ፡ ዛቲ ፡ ምድር ፡ በሰላም ፡ ወአሰስሉ ፡ አማልክተ ፡ ነኪር ፡ እለ ፡ ማእከሌክሙ ። ወመሰውዎሙ ፡ ለአማልክተ ፡ ነኪር ፡ ወዘውስተ ፡ እዘኒሆሙ ፡ ወዘውስተ ፡ ክሳውዲሆሙ ፡ ወጣዖተ ፡ ዘሰረቀት ፡ ራሔል ፡ እምኀበ ፡ ላባ ፡ አቡሃ ፡ ወወሀበት ፡ ኵሎ ፡ ለያዕቆብ ፡ ወአውዐዮ ፡ ወጸተሞ ፡ ወአማስኖ ፡ ወኀብኦ ፡ ታሕተ ፡ ድርዮስ ፡ ዘሀሎ ፡ ውስተ ፡ ምድረ ፡ ሰቂሞን ። ወዐርገ ፡ አመ ፡ ሠርቀ ፡ ወርኅ ፡ ሳብዕ ፡ ውስተ ፡ ቤቴሌ ፡ ወሐነጸ ፡ ምሥዋዐ ፡ ውስተ ፡ መካን ፡ ኀበ ፡ ኖመ ፡ ህየ ፡ ወአቀመ ፡ ህየ ፡ ሐውልተ ። ወይቤ ፡ ይስሐቅ ፡ ይምጻእ ፡ ወልድየ ፡ ያዕቆብ ፡ ወእርአዮ ፡ ዘእንበለ ፡ እሙት ። ወሖረ ፡ ያዕቆብ ፡ ኀበ ፡ አቡሁ ፡ ይስሐቅ ፡ ወኀበ ፡ እሙ ፡ ርብቃ ፡ ውስተ ፡ ቤቱ ፡ ለአቡሁ ፡ አብርሃም ፡ ወክልኤተ ፡ እምውሉዱ ፡ ነሥአ ፡ ምስሌሁ ፡ ሌዊሃ ፡ ወይሁዳሃ ፡ ወመጽአ ፡ ኀበ ፡ አቡሁ ፡ ይስሐቅ ፡ ወኀበ ፡ እሙ ፡ ርብቃ ። ወወፅአት ፡ ርብቃ ፡ እማኅፈድ ፡ ውስተ ፡ አንቀጸ ፡ ማኅፈድ ፡ ከመ ፡ ትስዐሞ ፡ ለያዕቆብ ፡ ወትሕቅፎ ። ወርእየት ፡ ክልኤሆሙ ፡ ውሉዶ ። ወቦአ ፡ ያዕቆብ ፡ ኀበ ፡ ይስሐቅ ፡ አቡሁ ፡ ውስተ ፡ ጽርሑ ፡ ኀበ ፡ ይሰክብ ፡ ህየ ። ወጽላሌ ፡ ኀለፈ ፡ እምአዕይንተ ፡ ይስሐቅ ፡ ወርእየ ፡ ክልኤሆሙ ፡ ውሉዶ ፡ ለያዕቆብ ፡ ሌዊሃ ፡ ወይሁዳሃ ። ወነገሮ ፡ ከመ ፡ በአማን ፡ ውሉዱ ፡ እሙንቱ ፡ ወአማን ፡ ርኢከ ፡ ከመ ፡ በአማን ፡ ውሉድየ ፡ እሙንቱ ። ወቀርቡ ፡ ኀቤሁ ፡ ወተመይጠ ፡ ወሰዐሞሙ ፡ ወሐቀፎሙ ፡ ለኵሎሙ ፡ ኅቡረ ። ወመንፈሰ ፡ ትንቢት ፡ ወረደ ፡ ውስተ ፡ አፉሁ ፡ ወአኀዞ ፡ ለሌዊ ፡ በየማናዊ ፡ እዴሁ ፡ ወይሁዳሃ ፡ በፀጋማዊ ፡ እዴሁ ። ወተመይጠ ፡ ኀበ ፡ ሌዊ ፡ ቅድመ ፡ ወአኀዘ ፡ ይባርኮ ፡ መቅድመ ፡ ወይቤሎ ፡ ይባርከ ፡ እግዚአ ፡ ኵሉ ፡ ውእቱ ፡ እግዚአ ፡ ኵሉ ፡ ዓለማት ። ወየሀብከ ፡ እግዚአብሔር ፡ ለከ ፡ ወለዘርእከ ፡ ዕበየ ፡ ዐባየ ፡ ለክብር ፡ ወኪያከ ፡ ወዘርእከ ፡ ያቅርብ ፡ ኀቤሁ ፡ እምኵሉ ፡ ዘሥጋ ፡ ከመ ፡ ይትለአክ ፡ ውስተ ፡ መቅደሱ ፡ ከመ ፡ መላእክተ ፡ ገጽ ፡ ወከመ ፡ ቅዱሳን ። ወመኳንንተ ፡ ወመሳፍንተ ፡ ወመላእክተ ፡ ይከውኑ ፡ ለኵሉ ፡ ዘርአ ፡ ውሉደ ፡ ያዕቆብ ፡ ቃሎ ፡ ለእግዚአብሔር ፡ በጽድቅ ፡ ይነግሩ ፡ ወኵሎ ፡ ኵነኔሁ ፡ በጽድቅ ፡ ይኴንኑ ። ኪያከ ፡ ጸውዐት ፡ እምከ ፡ ስመከ ፡ ሌዊሃ ፡ ወበአማን ፡ ጸውዐት ፡ ስመከ ፡ ልጹቆ ፡ ለእግዚአብሔር ፡ ትከውን ፡ ወሱታፌ ፡ ኵሎሙ ፡ ውሉደ ፡ ያዕቆብ ። ወኵሎሙ ፡ እለ ፡ ይጸልኡከ ፡ ቅድሜከ ፡ ይደቁ ፡ ወኵሎሙ ፡ ፀርከ ፡ ይሠረዉ ፡ ወይትሐጐሉ ፡ ዘይባርከከ ፡ ቡሩክ ፡ ወኵሉ ፡ ሕዝብ ፡ ዘይረግሙከ ፡ ይኩኑ ፡ ርጉማነ ። ወለይሁዳሂ ፡ ይቤሎ ፡ የሀብከ ፡ እግዚአብሔር ፡ ኀይለ ፡ ወጽንዐ ፡ ከመ ፡ ትኪዶሙ ፡ ለኵሎሙ ፡ እለ ፡ ይጸልኡከ ፡ መኰንነ ፡ ኩን ፡ አንተ ፡ ወአሐዱ ፡ እምነ ፡ ውሉድከ ፡ ለውሉደ ፡ ያዕቆብ ፡ ስምከ ፡ ወስመ ፡ ውሉድከ ፡ ይኩን ፡ ዘየሐውር ፡ ወዘያንሶሱ ፡ ውስተ ፡ ኵላ ፡ ምድር ፡ ወአህጉር ። ብከ ፡ ይኩን ፡ ረድኤቱ ፡ ለያዕቆብ ፡ ወብከ ፡ ትትረከብ ፡ መድኀኒተ ፡ እስራኤል ፡ ወአመ ፡ ዕለተ ፡ ትነብር ፡ ውስተ ፡ መንበረ ፡ ክብረ ፡ ጽድቅከ ፡ ትከውን ፡ ዐባይ ፡ ሰላም ፡ ለኵሉ ፡ ዘርአ ፡ ውሉዱ ፡ ለፍቁር ። ወተመይጠ ፡ ወሰዐሞ ፡ ዳግመ ፡ ወሐቀፎ ፡ ወተፈሥሐ ፡ ዐቢየ ፡ እስመ ፡ ርእየ ፡ ውሉዶ ፡ ለያዕቆብ ፡ ወልዱ ፡ ዘበጽድቅ ። ወወፅአ ፡ እማእከለ ፡ እገሪሁ ፡ ወወድቀ ፡ ወሰገደ ፡ ሎቱ ፡ ወባረኮሙ ። ወአኖሙ ፡ ክልኤሆሙ ፡ ውሉዶ ፡ ለያዕቆብ ፡ አሐደ ፡ በይምኑ ፡ ወአሐደ ፡ በፅግሙ ፡ ወተኆለቆ ፡ ሎቱ ፡ ጽድቀ ። ወነገረ ፡ ያዕቆብ ፡ ኵሎ ፡ ለአቡሁ ፡ በሌሊት ፡ ዘከመ ፡ ገብረ ፡ እግዚአብሔር ፡ ምስሌሁ ፡ ሣህለ ፡ ዐቢይ ። ወባረከ ፡ ይስሐቅ ፡ አምላከ ፡ አቡሁ ፡ አብርሃም ፡ ዘኢኀደገ ፡ ምሕረቶ ፡ ወጽድቆ ፡ እምወልደ ፡ ገብሩ ፡ ይስሐቅ ። ወበነግህ ፡ ነገረ ፡ ያዕቆብ ፡ ለአቡሁ ፡ ይስሐቅ ፡ ጸሎተ ፡ ዘጸለየ ፡ ለእግዚአብሔር ፡ ወራእየ ፡ ዘርእየ ፡ ወከመ ፡ ሐነጸ ፡ ምሥዋዐ ፡ ወኵሉ ፡ ድልው ፡ ለመሥዋዕት ፡ ለገቢር ፡ ቅድመ ፡ እግዚአብሔር ፡ በከመ ፡ ጸለየ ፡ ወከመ ፡ መጽአ ፡ ይጽዐኖ ፡ ዲበ ፡ አድግ ። ወይቤ ፡ ይስሐቅ ፡ ለያዕቆብ ፡ ወልዱ ፡ ኢይክል ፡ መጺአ ፡ ምስሌከ ፡ እስመ ፡ ረሣእኩ ፡ ወኢይክል ፡ ተዐግሦ ፡ በፍኖት ፡ ሖር ፡ ወልድየ ፡ በሰላም ፡ እስመ ፡ ወልደ ፡ ምእት ፡ ወስሳ ፡ ወኀምስቱ ፡ ዓመት ፡ አነ ። ወአአምር ፡ አነ ፡ ወልድየ ፡ ከመሰ ፡ በእንቲአየ ፡ መጻእከ ። ወተሰራሕ ፡ ወግበር ፡ ጸሎተ ፡ እንተ ፡ ጸለይከ ፡ ወኢታጐንዲ ፡ ጸሎተከ ፡ እስመ ፡ ትትኃሠሥ ፡ ጸሎተ ። ወይቤላ ፡ ለርብቃ ፡ ሖሪ ፡ ምስለ ፡ ያዕቆብ ፡ ወልድኪ ። ወሖረት ፡ ርብቃ ፡ ምስለ ፡ ያዕቆብ ፡ ወልዳ ፡ ወዲቦራ ፡ ምስሌሃ ፡ ወበጽሑ ፡ ውስተ ፡ ቤቴል ። ወተዘከረ ፡ ያዕቆብ ፡ ጸሎተ ፡ እንተ ፡ ባረኮ ፡ አቡሁ ፡ ወክልኤተ ፡ ውሉዶ ፡ ሌዊሃ ፡ ወይሁዳሃ ፡ ወተፈሥሐ ፡ ወባረኮ ፡ ለአምላከ ፡ አበዊሁ ፡ አብርሃም ፡ ወይስሐቅ ። ወይቤ ፡ ይእዜ ፡ አእመርኩ ፡ ከመ ፡ ብየ ፡ ተስፋ ፡ ዘለዓለም ፡ ወለውሉድየሂ ፡ በቅድመ ፡ አምላከ ፡ ኵሉ ፡ ወከመዝ ፡ ሥሩዕ ፡ በእንተ ፡ ክልኤሆሙ ፡ ወያዐርጉ ፡ ሎሙ ፡ በስምዕ ፡ ዘለዓለም ፡ ውስተ ፡ ጽላተ ፡ ሰማይ ፡ በከመ ፡ ባረኮሙ ፡ ይስሐቅ ።

Chapter 32 ወኀደረ ፡ በይእቲ ፡ ሌሊት ፡ ውስተ ፡ ቤቴል ፡ ወሐለመ ፡ ሌዊ ፡ ከመ ፡ ሤምዎ ፡ ወረሰይዎ ፡ ለክህነት ፡ ለአምላክ ፡ ልዑል ፡ ኪያሁ ፡ ወውሉዶ ፡ እስከ ፡ ለዓለም ። ወጌሰ ፡ ያዕቆብ ፡ በነግህ ፡ አመ ፡ ዐሡሩ ፡ ወረቡዑ ፡ ለዝ ፡ ወርኅ ። ወበውእቶን ፡ መዋዕል ፡ ፀንሰት ፡ ይእቲ ፡ ራሔል ፡ ብንያምሃ ፡ ወልዳ ፡ ወኆለቈ ፡ እምኔሁ ፡ ያዕቆብ ፡ ወልዶ ። ወአመ ፡ ወሡሩ ፡ ወኀሙሱ ፡ ለዝ ፡ ወርኅ ፡ አብአ ፡ ውስተ ፡ ምሥዋዕ ፡ አስዋረ ፡ እምአልህምት ፡ ዐሠርተ ፡ ወአርባዕተ ፡ ወአብሐኰ ፡ ዕሥራ ፡ ወሰማኒተ ፡ ወአባግዐ ፡ አርብዓ ፡ ወተስዐተ ፡ ወመሓስአ ፡ ስሳ ፡ ወመሓስአ ፡ ጠሊ ፡ ዕሥራ ፡ ወተስዐተ ፡ ጽንሐሐ ፡ ውስተ ፡ ምሥዋዕ ፡ ወቍርባነ ፡ ሥሙረ ፡ ለመዓዛ ፡ ሠናይ ፡ ቅድመ ፡ አምላክ ። ዝውእቱ ፡ መባኡ ፡ እምጸሎት ፡ እንተ ፡ ጸለየ ፡ ከመ ፡ የዐሥር ፡ ምስለ ፡ መሥዋዕቶሙ ፡ ወለሞጻሕቶሙ ። ወሶበ ፡ በልዖ ፡ እሳት ፡ የዐጥን ፡ ስኂነ ፡ ዲቤሁ ፡ ለእሳት ፡ መልዕልቶ ። ወሀሎ ፡ እንዘ ፡ ይበልዕ ፡ ውእቱ ፡ ወኵሎሙ ፡ ውሉዱ ፡ ወሰብኡ ፡ በፍሥሓ ፡ በህየ ፡ ሰቡዐ ፡ መዋዕለ ፡ ወይባርኮ ፡ ወያአኵቶ ፡ ለእግዚአብሔር ፡ ለዘ ፡ ባልሖ ፡ እምኵሉ ፡ ምንዳቤሁ ፡ ወለዘ ፡ ወሀቦ ፡ ጸሎቶ ። ወዐሠረ ፡ ኵሎ ፡ እንስሳ ፡ ንጹሐ ፡ ወገብሮ ፡ ጽንሐሐ ፡ ወእንስሳ ፡ ርኩሰ ፡ ወሀቦ ፡ ለሌዊ ፡ ወልዱ ፡ ወነፍሳተ ፡ ሰብእ ፡ ኵሎ ፡ ወሀቦ ። ወተክህነ ፡ ሌዊ ፡ በቤቴል ፡ ቅድመ ፡ ያዕቆብ ፡ አቡሁ ፡ እምዐሠርቱ ፡ አኃዊሁ ፡ ወሀሎ ፡ ህየ ፡ ካህነ ። ወበእንተዝ ፡ ሥሩዕ ፡ ውስተ ፡ ጽላተ ፡ ሰማይ ፡ ሕግ ፡ ለዐሥሮ ፡ ዓሥራት ፡ ካዕበ ፡ ለበሊዖቱ ፡ በቅድመ ፡ እግዚአብሔር ፡ በመካን ፡ በኀበ ፡ ተኀርየ ፡ ይኅድር ፡ ስሙ ፡ ላዕሌሁ ፡ ዓም ፡ እምዓም ። ውእቱ ፡ ሥርዐት ፡ ጽሑፍ ፡ ለገቢሮቱ ፡ ዓመት ፡ እምዓመት ፡ ለበሊዐ ፡ ዓሥራት ፡ ዳግመ ፡ ቅድመ ፡ እግዚአብሔር ፡ በመካን ፡ በኀበ ፡ ተኀርየ ። እስመ ፡ በዓመቲሁ ፡ ይትበላዕ ፡ ዘርእ ፡ እስከ ፡ አመ ፡ መዋዕለ ፡ ሐሪፍ ፡ ዘርአ ፡ ዓመት ፡ ወወይን ፡ እስከ ፡ አመ ፡ መዋዕለ ፡ ወይን ፡ ወለዘይት ፡ እስከ ፡ አመ ፡ መዋዕለ ፡ ጊዜ ፡ መዋዕሊሁ ። ኵሉ ፡ ዘይተርፍ ፡ እምኔሁ ፡ ወዘይበሊ ፡ ይኩን ፡ ስኡበ ፡ በእሳት ፡ የዐይ ፡ እስመ ፡ ኮነ ፡ ርኩሰ ፡ ወከማሁ ፡ ይብልዕዎ ፡ ኅቡረ ፡ በቤት ፡ ቅዱስ ፡ ወኢያብልይዎ ፡ ወኵሉ ፡ ዓሥራተ ፡ ላህም ፡ ወአባግዕ ፡ ቅዱስ ፡ ለእግዚአብሔር ፡ ወለካህናቲሁ ፡ ይኩን ፡ ዘይበልዑ ፡ በቅድሜሁ ፡ ዓመት ፡ እምዓመት ። ወበሌሊት ፡ ካልእት ፡ አመ ፡ ዕሥራ ፡ ወሰኑዩ ፡ ለመዋዕለ ፡ ዝወርኅ ፡ መከረ ፡ ያዕቆብ ፡ ከመ ፡ ይሕንጽ ፡ ውእተ ፡ መካነ ፡ ወከመ ፡ ይጥቅም ፡ ዐጸደ ፡ ወይቀድሶ ፡ ወከመ ፡ ይግበሮ ፡ ቅዱሰ ፡ ዘለዓለም ፡ ሎቱ ፡ ወለውሉዱ ፡ እስከ ፡ ለዓለም ፡ እምድኅሬሁ ። ወአስተርአዮ ፡ እግዚአብሔር ፡ በሌሊት ፡ ወባረኮ ፡ ወይቤሎ ፡ ኢይጸዋዕ ፡ ስምከ ፡ ያዕቆብሃ ፡ ባሕቲቶ ፡ አላ ፡ እስራኤልሃ ፡ ይሰምዩ ፡ ስምከ ። ወይቤሎ ፡ ካዕበ ፡ አነ ፡ ውእቱ ፡ እግዚአብሔር ፡ ዘፈጠርኩ ፡ ሰማየ ፡ ወምድረ ፡ ወአልህቀከ ፡ ወአበዝኀከ ፡ ፈድፋደ ፡ ጥቀ ፡ ወነገሥት ፡ እምኔከ ፡ ይከውኑ ፡ ወይኴንኑ ፡ በኵለሄ ፡ ወእደ ፡ ኬደ ፡ አሰረ ፡ ውሉደ ፡ ሰብእ ። ወእሁብ ፡ ለዘርእከ ፡ ኵላ ፡ ምድረ ፡ ዘመትሕተ ፡ ሰማይ ፡ ወይኴንኑ ፡ ውስተ ፡ ኵሉ ፡ አሕዛብ ፡ በከመ ፡ ፈቀዱ ፡ ወእምድኅረዝ ፡ ያስተጋብኡ ፡ ኵላ ፡ ምድረ ፡ ወይወርስዋ ፡ ለዓለም ፡ 20 ወፈጸመ ፡ ተናገሮ ፡ ምስሌሁ ፡ ወዐርገ ፡ እምኀቤሁ ፡ ወይሬኢ ፡ ያዕቆብ ፡ እስከ ፡ ሶበ ፡ ዐርገ ፡ ውስተ ፡ ሰማይ ። ወርእየ ፡ በራእየ ፡ ሌሊት ፡ ወናሁ ፡ መልአክ ፡ ይወርድ ፡ እምሰማይ ፡ ወሰብዑ ፡ ሰሌዳት ፡ ውስተ ፡ እደዊሁ ፡ ወወሀቦ ፡ ለያዕቆብ ፡ ወአንበቦን ፡ ወአንበበ ፡ ኵሎ ፡ ዘጽሑፍ ፡ ውስቴቶን ፡ ዘይከውን ፡ ሎቱ ፡ ወለውሉዱ ፡ በኩሉ ፡ ዓለማት ። ወአርአዮ ፡ ኵሎ ፡ ዘጽሑፍ ፡ ውስተ ፡ ሰሌዳት ፡ ወይቤሎ ፡ ኢትሕንጽ ፡ ዘንተ ፡ መካነ ፡ ወኢትግበሮ ፡ መቅደሰ ፡ ዘለዓለም ፡ ወኢትኅድር ፡ ዝየ ፡ እስመ ፡ አኮ ፡ ዝመካን ። እስመ ፡ በግብጽ ፡ ትመውት ፡ በሰላም ፡ ወበዛ ፡ ምድር ፡ ትትቀበር ፡ በክብር ፡ ውስተ ፡ መቃብረ ፡ አበዊከ ፡ ምስለ ፡ አብርሃም ፡ ወይስሐቅ ። ኢትፍራህ ፡ እስመ ፡ በከመ ፡ ርኢከ ፡ ወአንበብከ ፡ ከማሁ ፡ ይከውን ፡ ኵሉ ፡ ወአንተሂ ፡ ጸሐፍ ፡ ኵሎ ፡ ዘከመ ፡ ርኢከ ፡ ወአንበብከ ፡ ወይቤ ፡ ያዕቆብ ፡ እግዚኦ ፡ እፎ ፡ እዜከር ፡ ዘከመ ፡ አንበብኩ ፡ ወርኢኩ ፡ ኵሎ ። ወዐርገ ፡ እምኀቤሁ ። ወገብረ ፡ በህየ ፡ ዓዲ ፡ ዕለተ ፡ አሐተ ፡ ወሦዐ ፡ ባቲ ፡ በከመ ፡ ኵሉ ፡ ዘይሠውዕ ፡ በመዋዕለ ፡ ቀዳሚያት ፡ ወጸውዐ ፡ ስማ ፡ ቶሳከ ፡ እስመ ፡ ተወሰከት ፡ ይእቲ ፡ ዕለት ፡ ወለቀዳሚያት ፡ ጸውዖን ፡ በዓለ ። ወከመዝ ፡ ያስተርኢ ፡ ውእቱ ፡ ከመ ፡ ትኩን ፡ ወጽሑፍ ፡ ውስተ ፡ ጽላተ ፡ ሰማይ ። ወተጸውዐ ፡ ስማ ፡ ቶሳከ ፡ እስመ ፡ እንተ ፡ ያዐርጉ ፡ ይእቲ ፡ በስምዐ ፡ መዋዕለ ፡ በዓል ፡ በከመ ፡ ኆልቈ ፡ መዋዕል ፡ ዘዓመት ። ወበሌሊት ፡ አመ ፡ ዕሥራ ፡ ወሠሉሱ ፡ ለዝ ፡ ወርኅ ፡ ሞተት ፡ ዲቦራ ፡ ሐፃኒተ ፡ ርብቃ ፡ ወቀበርዋ ፡ መትሕተ ፡ ሀገር ፡ ታሕተ ፡ ባላን ፡ ዘፈለግ ፡ ወጸውዐ ፡ ስሞ ፡ ለውእቱ ፡ መካን ፡ ፈለገ ፡ ዲቦራ ፡ ወበላኖንሃ ፡ በላኖን ፡ ለሐ ፡ ዲቦራ ። ወሖረት ፡ ርብቃ ፡ ወገብአት ፡ ውስተ ፡ ቤት ፡ ኀበ ፡ አቡሁ ፡ ይስሐቅ ። ወሖረ ፡ እምድኅሬሃ ፡ ለእሙ ፡ እስከ ፡ ቀርበ ፡ ምድረ ፡ ከብራታን ፡ ወኀደረ ፡ ህየ ። ወወለደት ፡ ራሔል ፡ በሌሊት ፡ ወልደ ፡ ወጸውዐት ፡ ስሞ ፡ ወልደ ፡ ሕማምየ ፡ እስመ ፡ ዐጸበት ፡ ሶበ ፡ ትወልዶ ፡ ወአቡሁሰ ፡ ጸውዐ ፡ ስሞ ፡ ብንያምሃ ። ወሞተት ፡ በህየ ፡ ራሔል ፡ ወተቀብረት ፡ ውስተ ፡ ምድረ ፡ ኤፍራታ ፡ እንተ ፡ ይእቲ ፡ ቤተ ፡ ልሔም ።

Chapter 33 ወሖረ ፡ ያዕቆብ ፡ ወኀደረ ፡ መንገለ ፡ ደቡበ ፡ መግደለድራኤፍ ፡ ወሖረ ፡ ኀበ ፡ አቡሁ ፡ ይስሐቅ ፡ ውእቱ ፡ ወልያ ፡ ብእሲቱ ፡ አመ ፡ ሠርቁ ፡ ለወርኅ ፡ ዓሥር ። ወርእዮ ፡ ሮቤል ፡ ባላንሃ ፡ ለአኪተ ፡ ራሔል ፡ ዕቅብተ ፡ አቡሁ ፡ እንዘ ፡ ትትሐፀብ ፡ በማይ ፡ በኅቡእ ፡ አፍቀራ ፡ 3 ወተኀብአ ፡ በሌሊት ፡ ወቦአ ፡ ቤተ ፡ ባላን ፡ ሌሊተ ፡ ወረከባ ፡ እንዘ ፡ ትሰክብ ፡ ውስተ ፡ ዐራታ ፡ ባሕቲታ ፡ ወትነውም ፡ ውስተ ፡ ቤታ ፡ 4 ወሰከበ ፡ ምስሌሃ ፡ ወነቅሀት ፡ ወርእየት ፡ ወናሁ ፡ ሮቤል ፡ ይሰክብ ፡ ምስሌሃ ፡ ውስተ ፡ ምስካብ ። ወተኀፈረት ፡ እምኔሁ ፡ ወኀደገት ፡ እዴሃ ፡ እምላዕሌሁ ፡ ወጐየ ። ወትላሑ ፡ በእንተዝ ፡ ነገር ፡ ፈድፋደ ፡ ወኢነገረት ፡ ወኢለመኑሂ ፡ ሰብእ ። ወሶበ ፡ መጽአ ፡ ያዕቆብ ፡ ወኀሠሣ ፡ ትቤሎ ፡ ኢኮንኩ ፡ ንጽሕተ ፡ ለከ ፡ እስመ ፡ ተገመንኩ ፡ እምኔከ ፡ እስመ ፡ አርኰሰኒ ፡ ሮቤል ፡ ወሰከበ ፡ ምስሌየ ፡ ሌሊተ ፡ ወአንሰ ፡ እነውም ፡ ወኢያእመርኩ ፡ እስከ ፡ ሶበ ፡ ከሠተ ፡ ክነፍየ ፡ ወሰከበ ፡ ምስሌየ ። ወተምዐ ፡ ያዕቆብ ፡ ጥቀ ፡ ላዕለ ፡ ሮቤል ፡ እስመ ፡ ሰከበ ፡ ምስለ ፡ ባላን ፡ እስመ ፡ ከሠተ ፡ ክድነተ ፡ አቡሁ ፡ ወኢቀርባ ፡ እንከ ፡ ያዕቆብ ፡ እስመ ፡ አርኰሳ ፡ ሮቤል ። ወኵሉ ፡ ሰብእ ፡ ዘከሠተ ፡ ክድነተ ፡ አቡሁ ፡ እስመ ፡ እኩይ ፡ ነገሩ ፡ ጥቀ ፡ ወእስመ ፡ ምኑን ፡ ውእቱ ፡ በቅድመ ፡ እግዚአብሔር ። በእንተዝ ፡ ጽሑፍ ፡ ወሥሩዕ ፡ ውስተ ፡ ጽላተ ፡ ሰማይ ፡ ከመ ፡ ኢይስክብ ፡ ብእሲ ፡ ምስለ ፡ ብእሲተ ፡ አቡሁ ፡ ወከመ ፡ ኢይክሥት ፡ ክድነተ ፡ አቡሁ ፡ እስመ ፡ ርኩሰ ፡ ውእቱ ፡ ሞተ ፡ ይሙት ፡ ኅቡረ ፡ ብእሲ ፡ ዘይሰክብ ፡ ምስለ ፡ ብእሲተ ፡ አቡሁ ፡ ወብእሲትኒ ፡ እስመ ፡ ርኩሰ ፡ ነገሩ ፡ ውስተ ፡ ምድር ፡ ወኢይኩን ፡ ርኵሰ ፡ ቅድመ ፡ አምላክነ ፡ በውስተ ፡ ሕዝብ ፡ ዘኀረየ ፡ ሎቱ ፡ ለምልካን ። ወካዕበ ፡ ጽሑፍ ፡ ዳግመ ፡ ርጉመ ፡ ይከን ፡ ዘይሰክብ ፡ ምስለ ፡ ብእሲተ ፡ አቡሁ ፡ እስመ ፡ ከሠተ ፡ ኀፍረተ ፡ አቡሁ ፡ ወይቤሉ ፡ ኵሎሙ ፡ ቅዱሳኒሁ ፡ ለእግዚአብሔር ፡ ለይኩን ፡ ለይኩን ። ወአንተኒ ፡ ሙሴ ፡ አዝዞሙ ፡ ለውሉደ ፡ እስራኤል ፡ ይዕቀቡ ፡ ዘንተ ፡ ቃለ ፡ እስመ ፡ ኵነኔ ፡ ሞት ፡ ውእቱ ፡ ወርኵስ ፡ ውእቱ ፡ ወአልቦ ፡ ስርየተ ፡ ለአስተስርዮ ፡ በእንተ ፡ ብእሲ ፡ ዘገብረ ፡ ዘንተ ፡ ለዓለም ፡ ዘእንበለ ፡ ለአምቶቱ ፡ ወለቀቲሎቱ ፡ ወለተወግሮቱ ፡ በእብን ፡ ወለተሠርዎቱ ፡ እማእከለ ፡ ሕዝበ ፡ አምላክነ ፡ እስመ ፡ ኢይከውኖ ፡ ሐይወ ፡ አሐተ ፡ ዕለተ ፡ ውስተ ፡ ምድር ፡ ኵሉ ፡ ሰብእ ፡ ዘይገብሮ ፡ በውስተ ፡ እስራኤል ፡ እስመ ፡ ምኑን ፡ ወርኩስ ፡ ውእቱ ። ወኢይበሉ ፡ ለሮቤል ፡ ኮነ ፡ ሐዩው ፡ ወስርየተ ፡ እምዘ ፡ ሰከበ ፡ ምስለ ፡ ዕቅብተ ፡ ብእሲተ ፡ አቡሁ ፡ ወይእቲኒ ፡ እንዘ ፡ ባቲ ፡ ምተ ፡ ወእንዘ ፡ ምታ ፡ ሕያው ፡ ያዕቆብ ፡ አቡሁ ። እስመ ፡ ኢተከሥተ ፡ ሥርዓት ፡ ወኵነኔ ፡ ወሕግ ፡ እስከ ፡ አሜሃ ፡ ፍጹመ ፡ ለኵሉ ። ወአልቦ ፡ ለዝ ፡ ሕግ ፡ ተውዳአ ፡ መዋዕል ፡ ወምንተኒ ፡ ስርየተ ፡ ሎቱ ፡ ዘእንበለ ፡ ከመ ፡ ይሠረዉ ፡ ክልኤሆሙ ፡ በማእከለ ፡ ሕዝብ ፡ በዕለት ፡ እንተ ፡ ባቲ ፡ ገብርዋ ፡ ይቅትልዎሙ ። ወአነተኒ ፡ ሙሴ ፡ ጸሐፍ ፡ ለእስራኤል ፡ ወይዕቀብዋ ፡ ወኢይግበሩ ፡ ዘከመ ፡ ዝንቱ ፡ ነገር ፡ ወኢይስሐቱ ፡ ለአበሳ ፡ ሞት ፡ እስመ ፡ መኵንን ፡ እግዚአብሔር ፡ አምላክነ ፡ ዘውእቱ ፡ ኢይነሥእ ፡ ገጸ ፡ ወኢይነሥእ ፡ ሕልያነ ። ወንግሮሙ ፡ ዘንተ ፡ ነገረ ፡ ሥርዓት ፡ ሎሙ ፡ ይስምዑ ፡ ወይትዐቀቡ ፡ ወይትናጸሩ ፡ እምኔሆሙ ፡ ወኢይትሐጐሉ ፡ ወኢይሠረዉ ፡ እምድር ። ወአልቦ ፡ ኀጢአተ ፡ ዐባየ ፡ እምዝሙና ፡ ዘይዜምዉ ፡ ዲበ ፡ ምድር ፡ እስመ ፡ ሕዝብ ፡ ቅዱስ ፡ እስራኤል ፡ ለእግዚአብሔር ፡ አምላኩ ። ወበሣልስ ፡ ዓመት ፡ ዘሱባዔ ፡ ሳድስ ፡ ሀሎ ፡ እንዘ ፡ የሐውር ፡ ያዕቆብ ፡ ወኵሉ ፡ ውሉዱ ፡ ወኀደሩ ፡ ቤተ ፡ አብርሃም ፡ ቅሩበ ፡ ይስሐቅ ፡ አቡሁ ፡ ወእሙ ፡ ርብቃ ። ወዝንቱ ፡ አስማቲሆሙ ፡ ለውሉደ ፡ ያዕቆብ ፡ በኵሩ ፡ ሮቤል ። ወሐዊሮሙ ፡ ሰገዱ ፡ ለይስሐቅ ፡ ወለርብቃ ።

Chapter 34 ወበሳድስ ፡ ዓመቱ ፡ ለዝ ፡ ሱባዔ ፡ እምዝንቱ ፡ ዘአርብዓ ፡ ወአርባዕቱ ፡ ኢዮቤልዉ ። ወተጋብኡ ፡ ላዕሌሆሙ ፡ ሰብዐቲሆሙ ፡ ነገሥተ ፡ አሞሬዎን ፡ ከመ ፡ ይቅትልዎሙ ፡ ተኀቢኦሙ ፡ ታሕተ ፡ ኦም ፡ ወከመ ፡ ይማህርኩ ፡ እንስሳሆሙ ። ወያዕቆብ ፡ ወሌዊ ፡ ወይሁዳ ፡ ወዮሴፍ ፡ ሀለዉ ፡ ውስተ ፡ ቤት ፡ ኀበ ፡ ይስሐቅ ፡ አቡሆሙ ፡ እስመ ፡ የሐዝኖ ፡ መንፈሱ ፡ ወስእኑ ፡ ኀዲጎቶ ፡ ወብንያም ፡ ውእቱ ፡ ዘይንእስ ፡ ወበእንተዝ ፡ ነበረ ፡ ኀቤሁ ። ወመጽኡ ፡ ነገሥተ ፡ ታፉ ፡ ወነገሥተ ፡ አሬስ ፡ ወነገሥተ ፡ ሴራጋን ፡ ወነገሥተ ፡ ሴሎ ፡ ወንጉሥ ፡ ጋአዝ ፡ ወንጉሠ ፡ ቤቶሮን ፡ ወንጉሠ ፡ ማአኒሳኪር ፡ ወኵሎሙ ፡ እለ ፡ ይነብሩ ፡ ውስተዝ ፡ ደብር ፡ እለ ፡ ይነብሩ ፡ ውስተ ፡ ኦመ ፡ ምድረ ፡ ከናአን ። ወዜነውዎ ፡ ለያዕቆብ ፡ እንዘ ፡ ይብሉ ፡ ከመ ፡ ናሁ ፡ ነገሥቶ ፡ አሞሬዎን ፡ ዐገትዎሙ ፡ ለውሉድከ ፡ ወመራዕዮሙሂ ፡ ተማሠጡ ። ወተንሥአ ፡ እምነ ፡ ቤቱ ፡ ውእቱ ፡ ወሠለስቲሆሙ ፡ ውሉዱ ፡ ወኵሎሙ ፡ ደቀ ፡ አቡሁ ፡ ወደቁ ፡ ወሖረ ፡ ላዕሌሆሙ ፡ በስሳ ፡ ምእት ፡ ዕድ ፡ እለ ፡ ይጸውሩ ፡ አስይፍተ ፡ 7 ወቀተሎሙ ፡ በውስተ ፡ ጺኦት ፡ ዘሰቂሞን ፡ ወዴገኑ ፡ እለ ፡ ጐዩ ፡ ወቀተሎሙ ፡ በአፈ ፡ ሰይፍ ። ወአስተጋብአ ፡ መራዕዪሁ ። ወተመይጠ ፡ በሰላም ። ወበሳብዕ ፡ ዓመት ፡ ዘዝ ፡ ሱባዔ ፡ ፈነወ ፡ ዮሴፍሃ ። ወሐብለይዎ ፡ ወገብሩ ፡ ላዕሌሁ ፡ ምክረ ፡ ከመ ፡ ይቅትልዎ ። ወውሉደ ፡ ያዕቆብ ፡ ዘብሑ ፡ ደቤላ ፡ ጠሊ ፡ ወጸንቀቁ ፡ ልብሶ ፡ ለዮሴፍ ፡ በደሙ ፡ ወፈነዉ ፡ ኀበ ፡ ያዕቆብ ፡ አቡሆሙ ፡ አመ ፡ ዐሡሩ ፡ ለወርኅ ፡ ሳብዕ ። ወለሐወ ፡ ኵላ ፡ ይእተ ፡ ሌሊተ ፡ እስመ ፡ ሰርከ ፡ አምጽኡ ፡ ሎቱ ፡ ኪያሁ ፡ ወፈፀነ ፡ በላሐ ፡ ሞቱ ፡ ወይቤ ፡ ከመ ፡ አርዌ ፡ ፀዋግ ፡ በልዖ ፡ ለዮሴፍ ፡ ወላሐዉ ፡ ምስሌሁ ፡ ኵሉ ፡ ሰብአ ፡ ቤቱ ፡ በዛቲ ፡ ዕለት ፡ ወሀለዉ ፡ እንዘ ፡ የሐምሙ ፡ ወይላሕዉ ፡ ምስሌሁ ፡ ኵላ ፡ ይእተ ፡ ዕለተ ። ወተንሥኡ ፡ ውሉዱ ፡ ወወለቱ ፡ ከመ ፡ ይናዝዝዎ ፡ ወኢተናዘዘ ፡ በእንተ ፡ ወልዱ ። ወበውእቱ ፡ ዕለት ፡ ሰምዐት ፡ ባላን ፡ ከመ ፡ ተሐጕለ ፡ ዮሴፍ ፡ ወእንዘ ፡ ትላሕዎ ፡ ሞተት ፡ ወይእቲ ፡ ሀለወት ፡ ትነብር ፡ ውስተ ፡ ቀፍራቴፋ ፡ ወዲናኒ ፡ ወለቱ ፡ ሞተት ፡ እምድኅረ ፡ ተሐጕለ ፡ ዮሴፍ ፡ ወበጽሖሙ ፡ ለእስራኤል ፡ ዝንቱ ፡ ሠለስቱ ፡ ላሕ ፡ በወርኅ ፡ አሐዱ ፡ 16 ወቀበርዋ ፡ ለባላን ፡ አንጸረ ፡ መቃብራ ፡ ለራሔል ፡ ወዲናሃኒ ፡ ወለቶ ፡ ቀበሩ ፡ ህየ ። ወሀሎ ፡ እንዘ ፡ ይላሑ ፡ ድኅሬሁ ፡ ለዮሴፍ ፡ ዓመተ ፡ አሐደ ፡ ወኢነገፈ ፡ እስመ ፡ ይቤ ፡ እረድ ፡ ውስተ ፡ መቃብር ፡ እንዘ ፡ እላሑ ፡ በእንተ ፡ ወልድየ ። በእንተዝ ፡ ተሠርዐ ፡ ዲበ ፡ ውሉደ ፡ እስራኤል ፡ ከመ ፡ ይሕመሙ ፡ በዐሡር ፡ ወርኅ ፡ በሳብዕ ፡ አመ ፡ ዕለተ ፡ በጽሐ ፡ ዘያበኪ ፡ ዮሴፍሃ ፡ ኀበ ፡ ያዕቆብ ፡ አቡሁ ፡ ከመ ፡ ያስተስሪ ፡ ባቲ ፡ ሎቱ ፡ በእጕለ ፡ አጣሊ ። ወተሠርዐት ፡ ዛቲ ፡ ዕለት ፡ ከመ ፡ ይሕዘኑ ፡ ባቲ ፡ በእንተ ፡ ኀጢአቶሙ ፡ ወበእንተ ፡ ኵሉ ፡ አበሳሆሙ ፡ ወበእንተ ፡ ኵሉ ፡ ስሕተቶሙ ፡ ከመ ፡ ያንጽሑ ፡ ርእሶሙ ፡ በዛቲ ፡ ዕለት ፡ ምዕረ ፡ ለዓመት ። ወእምድኅረ ፡ ተሐጕለ ፡ ዮሴፍ ፡ ነሥኡ ፡ ለርእሶሙ ፡ ውሉደ ፡ ያዕቆብ ፡ አንስቲያ ። ወተመይጦ ፡ ስምዖን ፡ ነሥአ ፡ ብእሲተ ፡ እምነ ፡ መስጴጦምያ ፡ ካልእተ ፡ ከመ ፡ አኀዊሁ ።

Chapter 35 ወበቀዳሚ ፡ ዓመት ፡ ዘሱባዔ ፡ ቀዳሚ ፡ በዘ ፡ አርብዓ ፡ ወኃምስቱ ፡ ኢዮቤልዉ ፡ ጸውዐቶ ፡ ርብቃ ፡ ለያዕቆብ ፡ ወልዳ ፡ ወአዘዘቶ ፡ በእንተ ፡ አቡሁ ፡ ወበእንተ ፡ እኁሁ ፡ ከመ ፡ ያክብሮሙ ፡ ኵሎ ፡ መዋዕለ ፡ ሕይወቱ ፡ ለያዕቆብ ። ወይቤ ፡ ያዕቆብ ፡ አነ ፡ እገብር ፡ ኵሎ ፡ ዘከመ ፡ አዘዝክኒ ፡ እስመ ፡ ክብር ፡ ወዕበይ ፡ ሊተ ፡ ዝንቱ ፡ ነገር ፡ ወጽድቅ ፡ ሊተ ፡ በቅድመ ፡ እግዚአብሔር ፡ ከመ ፡ አክብሮሙ ። ወአንቲኒ ፡ እሞ ፡ ታአሞሪ ፡ እምዕለተ ፡ ተወለድኩ ፡ እስከ ፡ ዛቲ ፡ ዕለት ፡ ኵሎ ፡ ምግባርየ ፡ ወኵሎ ፡ ዘውስተ ፡ ልብየ ፡ ከመ ፡ ኵሎ ፡ መዋዕለ ፡ እኄሊ ፡ ሠናየ ፡ ለኵሉ ። ወእፎ ፡ ኢይግብር ፡ ነገረ ፡ ዘአዘዝክኒ ፡ ከመ ፡ አክብር ፡ አባየ ፡ ወእኅዋየ ፡ 5 ንግርኒ ፡ እሞ ፡ ምንተ ፡ ርኢኪ ፡ በላዕሌየ ፡ ጥውየተ ፡ ወተግሕሦ ፡ እትገሐሥ ፡ እምኔሁ ፡ ወይከውን ፡ ላዕሌየ ፡ ሣህል ። ወትቤሎ ፡ ወልድየ ፡ ኵሎን ፡ መዋዕልየ ፡ አልቦ ፡ ዘርኢኩ ፡ በላዕሌከ ፡ ምንተኒ ፡ ግብረ ፡ ጠዋየ ፡ አላ ፡ ርቱዐ ፡ ወባሕቱ ፡ ጽድቀ ፡ እነግረከ ፡ ወልድየ ፡ አነ ፡ በዛቲ ፡ ዓመት ፡ እመውት ፡ ወኢይትዐደው ፡ ዛተ ፡ ዓመተ ፡ በሕይወት ። ወሠሐቀ ፡ ያዕቆብ ፡ በእንተ ፡ ነገረ ፡ እሙ ፡ እስመ ፡ ትቤሎ ፡ እሙ ፡ ከመ ፡ ትመውት ፡ ወይእቲሰ ፡ ትነብር ፡ አንጻሪሁ ፡ ወኀይላ ፡ ላዕሌሃ ፡ ወኢደክመት ፡ እምኀይላ ፡ እስመ ፡ ትበውእ ፡ ወትወፅእ ፡ ወትሬኢ ፡ ወአስናኒሃኒ ፡ ጽኑዕ ፡ ወምንተኒ ፡ ሕማም ፡ ኢለከፋ ፡ ኵሎ ፡ መዋዕለ ፡ ሕይወታ ። ወይቤላ ፡ ያዕቆብ ፡ ብፁዕ ፡ አነ ፡ እሞ ፡ እመ ፡ ቀርበ ፡ መዋዕልየ ፡ ለመዋዕለ ፡ ሕይወትኪ ፡ ወይሄሉ ፡ ኀይልየ ፡ ላዕሌየ ፡ ከመዝ ፡ በከመ ፡ ኀይልኪ ፡ ወኢትመውቲ ፡ እስመ ፡ በከ ፡ በጸው ፡ ትትናገሪ ፡ ምስሌየ ፡ በእንተ ፡ ሞትኪ ። ወቦአት ፡ ኀበ ፡ ይስሐቅ ፡ ወትቤሎ ፡ አሐተ ፡ ስእለተ ፡ አስተበቍዕ ፡ በኀቤከ ፡ እምሕሎ ፡ ለዔሳው ፡ ከመ ፡ ኢያሕስም ፡ ላዕለ ፡ ያዕቆብ ፡ ወኢይስድዶ ፡ በጸልእ ። ወአንተ ፡ ታአምር ፡ መጠነ ፡ ገብረ ፡ ኵሎ ፡ እምአመ ፡ ዕለተ ፡ ሖረ ፡ ያዕቆብ ፡ እኁሁ ፡ ውስተ ፡ ካራን ፡ እስከ ፡ ዛቲ ፡ ዕለት ፡ ከመ ፡ በኵሉ ፡ ልቡ ፡ ኀደገነ ። ወእንዘ ፡ ናስተበቍዕ ፡ ንስእሎ ፡ ዘእምዚአነ ፡ ወውእቱ ፡ ይሬሲ ፡ ከመ ፡ ዘብእሲ ፡ ዘይምሕረነ ። ወያመርር ፡ ላዕሌከ ፡ በእንተ ፡ ዘባረከ ፡ ያዕቆብሃ ፡ ወልደከ ፡ ፍጹማዊ ፡ ወራትዐ ፡ እስመ ፡ አልቦ ፡ እከየ ፡ ዘእንበለ ፡ ኂሩት ። ወይቤላ ፡ ይስሐቅ ፡ አነኒ ፡ አአምር ፡ ወእሬኢ ፡ ግብረ ፡ ያዕቆብ ፡ ዘምስሌነ ፡ ከመ ፡ በኵሉ ፡ ልቡ ፡ ውእቱ ፡ ያከብረነ ። ወይእዜኒ ፡ ልብየ ፡ ይትሀወክ ፡ በእንተ ፡ ምግባራቲሁ ፡ ወኢኮነ ፡ ውእቱ ፡ ወዘርኡ ፡ ለድኂን ፡ እስመ ፡ እለ ፡ ይትሐጐሉ ፡ እሙንቱ ፡ እምነ ፡ ምድር ፡ ወእለ ፡ ይሤረዉ ፡ እሙንቱ ፡ እምታሕተ ፡ ሰማይ ። ወአንቲኒ ፡ ትብልኒ ፡ ከመ ፡ አምሕሎ ፡ ከመ ፡ ኢይቅትል ፡ እኅዋሁ ፡ ያዕቆብሃ ። ወእመኒ ፡ ፈቀደ ፡ ይቅትል ፡ ያዕቆብሃ ፡ እኅዋሁ ፡ ውስተ ፡ እደ ፡ ያዕቆብ ፡ ይትወሀብ ፡ ወኢያመሥጥ ፡ እምእዴሁ ፡ እስመ ፡ ውስተ ፡ እዴሁ ፡ ይወርድ ። ወአንተኒ ፡ ኢትፍርሂ ፡ በእንተ ፡ ያዕቆብ ፡ እስመ ፡ ዐቃቢሁ ፡ ለያዕቆብ ፡ ዐቢይ ፡ ወኀያል ፡ ወክቡር ፡ ወእኩት ፡ እምዐቃቢሁ ፡ ለዔሳው ። ወለአክት ፡ ርብቃ ፡ ወጸውዐቶ ፡ ለዔሳው ፡ ወመጽአ ፡ ኀቤሃ ፡ ወትቤሎ ፡ ስእለተ ፡ ብየ ፡ ወልድየ ፡ እንተ ፡ እስእል ፡ እምኀቤከ ፡ ወበል ፡ ከመ ፡ ትግበራ ፡ ወልድየ ፡ 19 ወይቤ ፡ አነ ፡ እገብር ፡ ኵሎ ፡ ዘትቤልኒ ፡ ወኢየአቢ ፡ ስእለተኪ ። ወትቤሎ ፡ አነ ፡ እስእል ፡ እምኀቤከ ፡ በዕለተ ፡ አመ ፡ ሞትኩ ፡ ከመ ፡ ታብአኒ ፡ ወትቅብረኒ ፡ ቅሩበ ፡ ሳራ ፡ እመ ፡ አቡከ ፡ ወከመ ፡ ትትፋቀሩ ፡ አንተ ፡ ወያዕቆብ ፡ በበይናቲክሙ ፡ ወኢይኅሥሥ ፡ እኩየ ፡ አሐዱ ፡ ለእኁሁ ፡ ዘእንበለ ፡ ተፋቅሮ ፡ ክመ ፡ ወትሴርሑ ፡ ውሉድየ ፡ ወትከብሩ ፡ በማእከለ ፡ ምድር ፡ ወኢይትፌሣሕ ፡ ላእሌክሙ ፡ ጸላኢ ፡ ወትከውኑ ፡ ለበረከት ፡ ወለምሕረት ፡ በቅድመ ፡ አዕይንቲሆሙ ፡ ለኵሎሙ ፡ እለ ፡ ያፈቅሩክሙ ። ወይቤ ፡ አነ ፡ እገብር ፡ ኵሎ ፡ ዘትቤልኒ ፡ ወእቀብረኪ ፡ አመ ፡ ዕለተ ፡ ሞትኪ ፡ ቅሩበ ፡ ሳራ ፡ እሙ ፡ ለአቡየ ፡ በከመ ፡ አፍቀርኪ ፡ አዕጽምቲሃ ፡ ከመ ፡ የሀሉ ፡ ቅሩበ ፡ አዕጽምቲኪ ። ወያዕቆብሃኒ ፡ እኅዋየ ፡ አነ ፡ አፈቅር ፡ እምኵሉ ፡ ዘሥጋ ፡ ወአልቦ ፡ ሊተ ፡ እኅወ ፡ በውስተ ፡ ኵሉ ፡ ምድር ፡ ዘእንበለ ፡ ውእቱ ፡ ባሕቲቱ ። ወአነ ፡ ክመ ፡ አስተበቍዐኪ ፡ ከመ ፡ ትገሥጽዮ ፡ ለያዕቆብ ፡ በእንቲአየ ፡ ወበእንተ ፡ ውሉድየ ፡ እስመ ፡ አአምር ፡ ከመ ፡ ነጊሠ ፡ ይነግሥ ፡ ላዕሌየ ፡ ወላዕለ ፡ ውሉድየ ። ወአነ ፡ እምሕል ፡ ለኪ ፡ ከመ ፡ አፈቅሮ ፡ ወከመ ፡ ኢይትኀሠሥ ፡ ሎቱ ፡ እኩየ ፡ ኵሎ ፡ መዋዕል ፡ ሕይወትየ ፡ ዘእንበለ ፡ ሠናይ ፡ ክመ ። ወጸውዐቶ ፡ ለያዕቆብ ፡ በቅድመ ፡ አዕይንቲሁ ፡ ለዔሳው ፡ ወአዘዘቶ ፡ በከመ ፡ ነገር ፡ ዘተናገረት ፡ ምስለ ፡ ዔሳው ። ወይቤ ፡ አነ ፡ እገብር ፡ ሥምረተኪ ፡ ተሐበይኒ ፡ ከመ ፡ ኢይወፅእ ፡ እምኔየ ፡ ወእምነ ፡ ውሉድየ ፡ እኩይ ፡ ላዕለ ፡ ዔሳው ፡ ኢይቀድም ፡ ዘእንበለ ፡ ተፋቅሮ ፡ ክመ ። ወበልዑ ፡ ወሰትዩ ፡ ይእቲ ፡ ወውሉዳ ፡ በይእቲ ፡ ሌሊት ።

Chapter 36 ወበሳድስ ፡ ዓመት ፡ ዘዝ ፡ ሱበዔ ፡ ጸውዐ ፡ ይስሐቅ ፡ ክልዔሆሙ ፡ ውሉዶ ፡ ዔሳውሃ ፡ ወያዕቆብሃ ፡ ወመጽኡ ፡ ኀቤሁ ፡ ወይቤሎሙ ፡ አነ ፡ ደቂቅየ ፡ አሐውር ፡ ውስተ ፡ ፍኖተ ፡ አበዊየ ፡ ውስተ ፡ ቤት ፡ ዘለዓለም ፡ ኀበ ፡ ሀለዉ ፡ ህየ ፡ አበዊየ ። ወቅብሩኒ ፡ ቅሩበ ፡ አብርሃም ፡ አቡየ ፡ ውስተ ፡ በአት ፡ ዘካዕበት ፡ ውስተ ፡ ገራህተ ፡ ኤፍሮን ፡ ኬጣዊ ፡ ዘአጥረየ ፡ አብርሃም ፡ ለዝኅረ ፡ መቃብር ፡ ህየ ፡ ውስተ ፡ መቃብር ፡ ዘከረይኩ ፡ ለርእስየ ፡ ህየ ፡ ቅብሩኒ ። ወዘንተ ፡ እኤዝዘክሙ ፡ ውሉድየ ፡ ከመ ፡ ትግበሩ ፡ ጽድቀ ፡ ወርትዐ ፡ በዲበ ፡ ምድር ፡ ከመ ፡ ያምጽእ ፡ እግዚአብሔር ፡ ላዕሌክሙ ፡ ኵሎ ፡ ዘመጠነ ፡ ነገሮ ፡ እግዚአብሔር ፡ ይግበር ፡ ለአብርሃም ፡ ወለዘርኡ ። ወኩኑ ፡ ውሉድየ ፡ በበይናቲክሙ ፡ እንዘ ፡ ታፈቅሩ ፡ አኀዊክሙ ፡ ከመ ፡ ብእሲ ፡ ዘያፈቅር ፡ ነፍሶ ፡ ወእንዘ ፡ የኀሥሥ ፡ ብእሲ ፡ ለእኁሁ ፡ በዘያሤኒ ፡ ሎቱ ፡ ወበገቢር ፡ ኅቡረ ፡ በዲበ ፡ ምድር ፡ ወይትፋቀሩ ፡ በበይናቲሆሙ ፡ ከመ ፡ ነፍሶሙ ። ወበእንተ ፡ ነገረ ፡ ጣዖት ፡ አነ ፡ እጌሥጸክሙ ፡ ከመ ፡ ትመንንዎሙ ፡ ወትፃረርዎሙ ፡ ወከመ ፡ ኢታፍቅርዎሙ ፡ እስመ ፡ ስሕተት ፡ ምሉኣን ፡ እሙንቱ ፡ ለእለ ፡ ያመልክዎሙ ፡ ወለእለ ፡ ይሰግዱ ፡ ሎሙ ። ተዘከርዎ ፡ ውሉድየ ፡ ለእግዚአብሔር ፡ ለአምላከ ፡ አብርሃም ፡ አቡክሙ ፡ ወእምዝ ፡ አነኒ ፡ አምለክዎ ፡ ወተቀነይኩ ፡ ሎቱ ፡ ዘበ ፡ ጽድቅ ፡ ወበስፉሕ ፡ ከመ ፡ ያብዝኅክሙ ፡ ወያልህቅ ፡ ዘርእክሙ ፡ ከመ ፡ ከዋክብተ ፡ ሰማይ ፡ ለብዝኅ ፡ ወይትክልክሙ ፡ ውስተ ፡ ምድር ፡ ተክለ ፡ ጽድቅ ፡ ዘኢይሤረው ፡ ለኵሉ ፡ ትውልድ ፡ ዘለዓለም ። ወይእዜኒ ፡ አነ ፡ አምሕለክሙ ፡ በመሐላ ፡ ዐቢይ ፡ እስመ ፡ አልቦ ፡ መሐላ ፡ ዘእምኔሁ ፡ የዐቢ ፡ በስም ፡ ስቡሕ ፡ ወክቡር ፡ ወዐቢይ ፡ ስሩሕ ፡ ወመንክር ፡ ወኀያል ፡ ወዐቢይ ፡ ዘገብረ ፡ ሰማያተ ፡ ወምድረ ፡ ወኵሎ ፡ ኅቡረ ። ወእንዘ ፡ ያፈቅር ፡ አሐዱ ፡ አሐዱ ፡ እኅዋሁ ፡ በምሕረት ፡ ወበጽድቅ ፡ ወኢይፍቅድ ፡ ብእሲ ፡ እኩየ ፡ ለእኁሁ ፡ እምይእዜ ፡ ወእስከ ፡ ለዓለም ፡ ኵሎ ፡ መዋዕለ ፡ ሕይወትክሙ ፡ ከመ ፡ ትስርሑ ፡ በኵሉ ፡ ምግባሪክሙ ፡ ወኢትትሐጐሉ ። ወእመቦ ፡ ዘኀሠሠ ፡ እምኔክሙ ፡ እኩየ ፡ ለእኁሁ ፡ አእምሩ ፡ እምይእዜ ፡ ከመ ፡ ኵሉ ፡ ዘየኀሥሥ ፡ እኩየ ፡ ለእኁሁ ፡ ውስተ ፡ እዴሁ ፡ ይወድቅ ፡ ወይሤሮ ፡ እምድረ ፡ ሕያዋን ፡ ወዘርኡሂ ፡ ይትሐጐል ፡ እምታሕተ ፡ ሰማይ ። ወአመ ፡ ዕለተ ፡ ሀከክ ፡ ወመርገም ፡ ወመዓት ፡ ወቍጥዓ ፡ ወበእሳት ፡ በላዒ ፡ በከመ ፡ አውዐየ ፡ ሰዶምሃ ፡ ከማሁ ፡ ያውዒ ፡ ምድሮ ፡ ወሀገሮ ፡ ወኵሎ ፡ ዘይከውን ፡ ዚአሁ ። አነ ፡ እነግር ፡ ወአሰምዕ ፡ ላዕሌክሙ ፡ ውሉድየ ፡ በከመ ፡ ኵነኔ ፡ ዘይመጽእ ፡ ዲበ ፡ ብእሲ ፡ ዘይፈቅድ ፡ ይግበር ፡ ሕሡመ ፡ ላዕለ ፡ እኁሁ ። ወከፈለ ፡ ኵሎ ፡ ዘቦ ፡ ጥሪቶ ፡ ለክልኤሆሙ ፡ በይእቲ ፡ ዕለት ፡ ወወሀበ ፡ ዕበየ ፡ ለብእሲ ፡ ዘውእቱ ፡ ቀደመ ፡ ተወልዶ ፡ ወማኅፈደ ፡ ኵሎ ፡ ዘአውዳ ። ወይቤ ፡ ዛተ ፡ አዐቢ ፡ ዕበየ ፡ ለብእሲ ፡ ዘውእቱ ፡ ቀደመ ፡ ተወልዶ ። ወይቤ ፡ ዔሳው ፡ ሤጥኩ ፡ ሎቱ ፡ ለያዕቆብ ፡ ወወሀብኩ ፡ ልህቃንየ ፡ ለያዕቆብ ፡ ይትወሀብ ፡ ሎቱ ፡ ወአልብየ ፡ ዘእብል ፡ በእንቲአሃ ፡ ምንተኒ ፡ ቃለ ፡ እስመ ፡ ኀቤሁ ፡ ሀለወት ። ወይቤ ፡ ይስሐቅ ፡ ታዕርፍ ፡ ዲቤክሙ ፡ ውሉድየ ፡ በረከት ፡ ወላዕለ ፡ ዘርእክሙ ፡ በዛቲ ፡ ዕለት ፡ እስመ ፡ አዕረፍክሙኒ ፡ ወኢሐዘነ ፡ ልብየ ፡ በእንተ ፡ ልህቃን ፡ ከመ ፡ ኢትግበር ፡ በእንቲአሃ ፡ ፁገ ፡ 16 ይባርኮ ፡ እግዚአብሔር ፡ ልዑል ፡ ለብእሲ ፡ ዘይገብር ፡ ጽድቀ ፡ ኪያሁ ፡ ወዘርኡ ፡ እስከ ፡ ለዓለም ። ወፈጸመ ፡ እንዘ ፡ ይኤዝዞሙ ፡ ወእንዘ ፡ ይባርኮሙ ፡ ወበልዑ ፡ ወሰትዩ ፡ በቅድሜሁ ፡ ኅቡረ ፡ ወተፈሥሐ ፡ እስመ ፡ ኮነ ፡ ዐርዮ ፡ በማእከሎሙ ፡ ወወፅኡ ፡ እምኀቤሁ ፡ ወአዕረፉ ፡ ይእተ ፡ ዕለተ ፡ ወኖሙ ። ወኖመ ፡ ይስሐቅ ፡ ውስተ ፡ ዐራቱ ፡ በዛቲ ፡ ዕለት ፡ እንዘ ፡ ይትፌሣሕ ፡ ወኖመ ፡ ንዋመ ፡ ዘለዓለም ። ወሖረ ፡ ዔሳው ፡ ውስተ ፡ ምድረ ፡ ኤዶም ፡ ውስተ ፡ ደብረ ፡ ሲር ፡ ወነበረ ፡ ህየ ። ወያዕቆብ ፡ ኀደረ ፡ ውስተ ፡ ደብረ ፡ ኬብሮን ፡ ውስተ ፡ ማኅፈድ ፡ ዘምድረ ፡ ፍልሰተ ፡ አቡሁ ፡ አብርሃም ። ወሞተት ፡ ልያ ፡ ብእሲቱ ፡ በዓመት ፡ ራብዕ ፡ ዘሱባዔ ፡ ካልእ ፡ ዘአርብዓ ፡ ወኃምስ ፡ ኢዮቤልዉ ፡ ወቀበራ ፡ ውስተ ፡ በአት ፡ ዘእንተ ፡ ክልኤ ፡ ቅሩበ ፡ ርብቃ ፡ እሙ ፡ በፀጋሙ ፡ ለመቃብረ ፡ ሳራ ፡ እመ ፡ አቡሁ ፡ 22 ወመጽኡ ፡ ኵሎሙ ፡ ውሉዳ ፡ ወውሉዱ ፡ ከመ ፡ ይብክይዋ ፡ ልያሃ ፡ ብእሲቶ ፡ ምስሌሁ ፡ ወከመ ፡ ይናዝዝዎ ፡ በእንቲአሃ ፡ እስመ ፡ ሀሎ ፡ ይላሕዋ ፡ 23 እስመ ፡ ያፈቅራ ፡ ፈድፋደ ፡ ጥቀ ፡ እምአመ ፡ ሞተት ፡ ራሔል ፡ እኅታ ፡ እስመ ፡ ፍጽምት ፡ ወራትዕት ፡ ይእቲ ፡ በኵሉ ፡ ፍናዊሃ ፡ ወታከብሮ ፡ ለያዕቆብ ። ወይዜከር ፡ ኵሎ ፡ ምግባራቲሃ ፡ ዘገብረት ፡ በሕይወታ ፡ ወይላሕዋ ፡ ጥቀ ፡ እስመ ፡ ያፈቅራ ፡ በኵሉ ፡ ልቡ ፡ ወበኵሉ ፡ ነፍሱ ።

Chapter 37 ወበዕለተ ፡ ሞተ ፡ ይስሐቅ ፡ አቡሁ ፡ ለያዕቆብ ፡ ወለዔሳው ፡ ሰምዑ ፡ ውሉደ ፡ ዔሳው ፡ ከመ ፡ ወሀቦ ፡ ይስሐቅ ፡ ልህቃነ ፡ ለያዕቆብ ፡ ወልዱ ፡ ዘይንእስ ። ወተጋአዙ ፡ ምስለ ፡ አቡሆሙ ፡ እንዘ ፡ ይብሉ ፡ በእንተ ፡ ምንት ፡ እንዘ ፡ ሀሎከ ፡ አንተ ፡ ዘትልህቅ ፡ ወእንዘ ፡ ይንእስ ፡ ለያዕቆብ ፡ ወሀቦ ፡ አቡከ ፡ ልህቃነ ፡ ወኪያከ ፡ ኀደገ ። ወይቤሎሙ ፡ እስመ ፡ አነ ፡ ሤጥኩ ፡ ቅድመተ ፡ ልደትየ ፡ ለያዕቆብ ፡ በኅዳጥ ፡ ጸብሐ ፡ ብርስን ። ወይእዜኒ ፡ አምሐለነ ፡ አቡነ ፡ ኪያየ ፡ ወኪያሁ ፡ ከመ ፡ ኢንትኃሠሥ ፡ በእከይ ፡ አሐዱ ፡ ላዕለ ፡ እኁሁ ፡ ወከመ ፡ ነሀሉ ፡ በተፋቅሮ ፡ ወበሰላም ፡ ብእሲ ፡ ምስለ ፡ እኁሁ ፡ ወኢናማስን ፡ ፍናዊነ ፡ 5 ወይቤልዎ ፡ ኢንሰምዐከ ፡ ለገቢር ፡ ምስሌሁ ፡ ሰላመ ፡ እስመ ፡ ኀይለ ፡ ዚአነ ፡ ይጸንዕ ፡ እምኀይሉ ፡ ወንሕነ ፡ ንጸንዕ ፡ እምኔሁ ፡ ነሐውር ፡ ላዕሌሁ ፡ ወንቀትሎ ፡ ወናሐጕል ፡ ውሉዶ ፡ ወለእመ ፡ ኢተሐውር ፡ ምስሌነ ፡ ለከሂ ፡ ናሐስም ። ወይእዜኒ ፡ ስምዐነ ፡ ወንፈኑ ፡ ውስተ ፡ አራም ፡ ወውስተ ፡ ፍልስጥኤም ፡ ወውስተ ፡ ሞአብ ፡ ወውስተ ፡ አሞን ፡ ወንኅረይ ፡ ለርእስነ ፡ ኅሩያነ ፡ ሰብአ ፡ እለ ፡ ይዳለጉ ፡ ውስተ ፡ ቀትል ፡ ወንሖር ፡ ላዕሌሁ ፡ ወንትቃተል ፡ ምስሌሁ ፡ ወንሠርዎ ፡ እምድር ፡ እንበለ ፡ የአኀዝ ፡ ኀይለ ። ወይቤሎሙ ፡ አቡሆሙ ፡ ኢትሖሩ ፡ ወኢትግበሩ ፡ ምስሌሁ ፡ ፀብአ ፡ ከመ ፡ ኢትደቁ ፡ ቅድሜሁ ። ወይቤልዎ ፡ ዝኑ ፡ ክመ ፡ ግብርከ ፡ ዘእምውርዙትከ ፡ እስከ ፡ ዛቲ ፡ ዕለት ፡ ወአንተ ፡ ታበውእ ፡ ክሳደከ ፡ ታሕተ ፡ አርዑቱ ፡ ኢንሰምዕ ፡ ንሕነሰ ፡ ዘንተ ፡ ነገረ ። ወፈነዉ ፡ ውስተ ፡ አራም ፡ ወኀበ ፡ አዱራም ፡ ኀበ ፡ ዐርከ ፡ አቡሆሙ ፡ ወተዓሰቡ ፡ ምስሌሆሙ ፡ ዐሠርተ ፡ ምእተ ፡ መስተባእሳነ ፡ ዕደወ ፡ ወስተቃትላነ ፡ ኅሩያነ ። ወመጽኡ ፡ ኀቤሆሙ ፡ እምነ ፡ ሞአብ ፡ ወእምኀበ ፡ ውሉደ ፡ አሞን ፡ እለ ፡ ተዓሰቡ ፡ ዐሠርቱ ፡ ምእት ፡ ኅሩያን ። ወይቤልዎ ፡ ለአቡሆሙ ፡ ፃእ ፡ ምርሖሙ ፡ ወእመአኮ ፡ ንቀትለከ ። ወመልአ ፡ መዓተ ፡ ወቍጥዓ ፡ በጊዜ ፡ ርእየ ፡ ውሉዶ ፡ ከመ ፡ ይትኤገልዎ ፡ ከመ ፡ ይሖር ፡ ቅድመ ፡ ይምርሖሙ ፡ ኀበ ፡ ያዕቆብ ፡ እኀሁ ። ወእምዝ ፡ ተዘከረ ፡ ኵሎ ፡ እከየ ፡ እንተ ፡ ሀሎት ፡ ውስተ ፡ ልቡ ፡ ኅብእት ፡ ላዕለ ፡ ያዕቆብ ፡ እኁሁ ፡ ወኢተዘከረ ፡ መሐላ ፡ ዘመሐለ ፡ ለአቡሁ ፡ ወለእሙ ፡ ከመ ፡ ኢይትኃሠሥ ፡ ኵሎ ፡ እከየ ፡ ኵሎ ፡ መዋዕሊሁ ፡ ላዕለ ፡ ያዕቆብ ፡ እኁሁ ። ወበዝ ፡ ኵሉ ፡ ኢያእመረ ፡ ያዕቆብ ፡ ከመ ፡ እሙንቱ ፡ ይመጽኡ ፡ ኀቤሁ ፡ ለቀትል ። ወለአኩ ፡ ኀቤሁ ፡ ሰብአ ፡ ኬብሮን ፡ እንዘ ፡ ይብሉ ፡ ናሁአ ፡ እኁከአ ፡ መጽአአ ፡ ላዕሌከአ ፡ ይትቃተል ፡ ከአ ፡ በአርብዓ ፡ ምእት ፡ ብእሲ ፡ ቅኑታነ ፡ ሰይፍ ፡ ወይጸውሩ ፡ ወልታ ፡ ወንዋየ ፡ ሐቅል ፡ እስመ ፡ ያፈቅርዎ ፡ ለያዕቆብ ፡ እምዔሳው ፡ ነገርዎ ፡ እስመ ፡ ያዕቆብ ፡ ብእሲ ፡ ጸጋዊ ፡ ወመሓሪ ፡ ውእቱ ፡ እምነ ፡ ዔሳው ። ወኢአምነ ፡ ያዕቆብ ፡ እስከ ፡ ሶበ ፡ ቀርቡ ፡ ጥቃ ፡ ማኅፈድ ፡ 17 ወዐጸወ ፡ አናቅጸ ፡ ማኅፈድ ። ወውእቱ ፡ ጊዜ ፡ አውሥአ ፡ ዔሳው ፡ ወይቤሎ ፡ አልቦ ፡ ለውሉደ ፡ ሰብእ ፡ ወለአራዊተ ፡ ምድር ፡ መሐላ ፡ ጽድቅ ፡ ዘመሐሉ ፡ ምሒሎሙ ፡ እስከ ፡ ለዓለም ። ወትጸልአኒ ፡ አንተ ፡ ኪያየ ፡ ወውሉድየ ፡ እስከ ፡ ለዓለም ፡ ወአልቦ ፡ ገቢረ ፡ ምስሌከ ፡ ታእኃ ። ስማዕ ፡ ዘንተ ፡ ነገርየ ፡ ዘአነ ፡ እነግረከ ፡ እመ ፡ ይዌልጥ ፡ ሐራውያ ፡ ማእሶ ፡ ወጸጕሮሂ ፡ ከመ ፡ ፀምር ፡ ለእመ ፡ አድከመ ፡ ወእመ ፡ ወፅአ ፡ ዲበ ፡ ርእሱ ፡ አቅርንት ፡ ከመ ፡ አቅርንተ ፡ ሀየል ፡ ወአባግዕ ፡ አሜሃ ፡ እገብር ፡ ምስሌከ ፡ ታእኃ ። ወእመ ፡ ገብሩ ፡ ተኵላት ፡ ሰላመ ፡ ምስለ ፡ መሐስዕ ፡ ከመ ፡ ኢይብልዕዎሙ ። ወለእመ ፡ ኮነ ፡ አንበሳ ፡ ማኅፈሮ ፡ ለላህም ። ወእመ ፡ ጻዕደወ ፡ ቋዓት ፡ ከመ ፡ ራዛ ፡ አሜሃ ፡ አእምር ፡ ከመ ፡ አፍቀርኩከ ፡ ወእገብር ፡ ምስሌከ ፡ ሰላመ ። ወነጊዜ ፡ ርእየ ፡ ያዕቆብ ፡ ከመ ፡ አእከየ ፡ እምልቡ ፡ ላዕሌሁ ፡ ወእምኵሉ ፡ ነፍሱ ፡ ከመ ፡ ይቅትሎ ። ውእተ ፡ ጊዜ ፡ ይቤ ፡ ለእሊአሁ ፡ ወለአግብርቲሁ ፡ ከመ ፡ ይሩድዎ ፡ ወለኵሎሙ ፡ ካልአኒሁ ።

Chapter 38 ወእምዝ ፡ ተናገሮ ፡ ይሁዳ ፡ ለያዕቆብ ፡ አቡሁ ፡ ወይቤሎ ፡ ምስክ ፡ አባ ፡ ቀሥተከ ፡ ወፈኑ ፡ ሐጸከ ፡ ወንድፍ ፡ ጸላኤ ፡ ወቅትል ፡ ፀራዌ ፡ ወይኩን ፡ ለከ ፡ ኀይል ፡ እስመ ፡ ኢንቀትል ፡ እኅዋከ ፡ ወኀቤከ ፡ ውእቱ ፡ ወመምስልከ ፡ ውእቱ ፡ በኀቤነ ፡ ለክብር ። ይእተ ፡ ሶቤ ፡ ወሰቀ ፡ ያዕቆብ ፡ ቀሥቶ ፡ ወፈነወ ፡ ሐጸ ፡ ወነደፎ ፡ ለዔሳው ፡ እኁሁ ፡ ወገደሎ ፡ 3 ወደገመ ፡ ፈነወ ፡ ሐጸ ፡ ወሄጶ ፡ አዱራንሃ ፡ አራማዌ ፡ ጥቦ ፡ ፀጋማዌ ፡ ወቀተሎ ። ወእምዝ ፡ ወፅኡ ፡ ውሉደ ፡ ያዕቆብ ፡ እሙንቱ ፡ ወአግብርቲሆሙ ፡ ተናፊቆሙ ፡ ውስተ ፡ መርብዕተ ፡ ማኅፈድ ። ወወፅአ ፡ ይሁዳ ፡ ፍጽመ ፡ ወንፍታሌም ፡ ወጋድ ፡ ምስሌሁ ፡ ወኀምሳ ፡ ደቅ ፡ ምስሌሁ ፡ እንተ ፡ ገጸ ፡ ደቡብ ፡ ለማኅፈድ ፡ ወቀተሉ ፡ ኵሎ ፡ ዘረከቡ ፡ በቅድሜሆሙ ፡ ወአልቦ ፡ ዘአምሠጠ ፡ እምኔሆሙ ፡ ወኢአሐዱ ። ወሌዊ ፡ ወዳን ፡ ወአሴር ፡ ወፅኡ ፡ እንተ ፡ ገጸ ፡ ጽባሑ ፡ ለማኅፈድ ፡ ወኀምሳ ፡ ምስሌሆሙ ፡ ወቀተሉ ፡ መስተቃትላኒሆሙ ፡ ለሞአብ ፡ ወለአሞን ። ወወፅኡ ፡ ሮቤል ፡ ወርሳኮር ፡ ወዛብሎን ፡ እንተ ፡ ገጸ ፡ ሰሜኑ ፡ ለማኅፈድ ፡ ወኀምሳ ፡ ምስሌሆሙ ፡ ወቀተሉ ፡ መስተባእሳኒሆሙ ፡ ለፍልስጥኤም ። ወወፅኡ ፡ ስምዖን ፡ ወብንያም ፡ ወኤኖክ ፡ ወልደ ፡ ሮቤል ፡ እንተ ፡ ገጸ ፡ ዐረቢሁ ፡ ለማኅፈድ ፡ ወኀምሳ ፡ ምስሌሆሙ ፡ ወቀተሉ ፡ እምነ ፡ ኤዶም ፡ ወእምነ ፡ ኮሬዎን ፡ አርባዕተ ፡ ምእተ ፡ ዕደ ፡ ጽኑዓነ ፡ መስተቃትላነ ፡ ወስድስቱ ፡ ምእት ፡ ጐዩ ። ወሰደድዎሙ ፡ ውሉደ ፡ ያዕቆብ ፡ ድኅሬሆሙ ፡ እስከ ፡ ደብረ ፡ ሲኢር ። ወአመንደብዎሙ ፡ ውሉደ ፡ ያዕቆብ ፡ ለደቂቀ ፡ ዔሳው ፡ በደብረ ፡ ሰኢር ፡ ወአትሐቱ ፡ ክሳዶሙ ፡ ከመ ፡ ይከኩኑ ፡ አግብርተ ፡ ለደቂቀ ፡ ያዕቆብ ። ወለአኩ ፡ ኀበ ፡ አቡሆሙ ፡ እመ ፡ ይገብሩ ፡ ሰላም ፡ ምስሌሆሙ ፡ ወለእመ ፡ ይቀትልዎሙ ። ወለአከ ፡ ያዕቆብ ፡ ኀበ ፡ ውሉዱ ፡ ከመ ፡ ይግበሩ ፡ ሰላመ ፡ ወገብሩ ፡ ምስሌሆሙ ፡ ሰላመ ፡ ወአንበሩ ፡ አርዑተ ፡ ቅኔ ፡ ላዕሌሆሙ ፡ ከመ ፡ ይጸብሑ ፡ ለያዕቆብ ፡ ወለውሉዱ ፡ ኵሎ ፡ 13 ወነበሩ ፡ እንዘ ፡ ይጼብሑ ፡ ለያዕቆብ ፡ እስከ ፡ አመ ፡ ዕለተ ፡ ወረደ ፡ ያዕቆብ ፡ ውስተ ፡ ግብጽ ። ወኢነተጉ ፡ ውሉዱ ፡ ኤዶም ፡ እምአርዑተ ፡ ቅኔ ፡ ዘዐሠርቱ ፡ ወክልኤቱ ፡ ውሉደ ፡ ያዕቆብ ፡ ላዕሌሆሙ ፡ እስከ ፡ ዛቲ ፡ ዕለት ። ወእሉ ፡ ነገሥት ፡ እለ ፡ ነግሡ ፡ በኤዶም ፡ ዘእንበለ ፡ ይንግሥ ፡ ንጉሥ ፡ ለውሉደ ፡ እስራኤል ፡ እስከ ፡ ዛቲ ፡ ዕለት ፡ በምድረ ፡ ኤዶም ። ወነግሠ ፡ በኤዶም ፡ ባላቅ ፡ ወልደ ፡ ቦኤር ፡ ወስመ ፡ ሀገሩ ፡ ደናባ ። ወሞተ ፡ ባላቅ ፡ ወነግሠ ፡ ህየንቴሁ ፡ ዮባብ ፡ ወልደ ፡ ዛራ ፡ ዘእምነ ፡ ቦሲር ። ወሞተ ፡ ዮባብ ፡ ወነግሠ ፡ ህየንቴሁ ፡ አሳም ፡ ዘእምነ ፡ ደብረ ፡ ቴማን ። ወሞተ ፡ አሳም ፡ ወነግሠ ፡ ህየንቴሁ ፡ አዳት ፡ ወልደ ፡ ባርድ ፡ ዘቀተለ ፡ መዕድያምሃ ፡ በሐቅለ ፡ ሞአብ ፡ ወስመ ፡ ሀገሩ ፡ አውኡቱ ። ወሞተ ፡ አዳት ፡ ወነግሠ ፡ ህየንቴሁ ፡ ሰሎማን ፡ ዘእምነ ፡ እማሴቃ ። ወሞተ ፡ ሰሎማን ፡ ወነገሠ ፡ ህየንቴሁ ፡ ሳኡል ፡ ዘእምነ ፡ ራአቦት ፡ ፈለግ ፡ 22 ወሞተ ፡ ሳኡል ፡ ወነግሠ ፡ ህየንቴሁ ፡ ብኤሉናን ፡ ወልደ ፡ አክቡር ፡ 23 ወሞተ ፡ በኤሉናን ፡ ወልደ ፡ አክቡር ፡ ወነግሠ ፡ ህየንቴሁ ፡ አዳት ፡ ወስመ ፡ ብእሲቱ ፡ መይጠቢት ፡ ወለተ ፡ መጥሪት ፡ ወለተ ፡ ሜተቤድዛአብ ። እሉ ፡ ነገሥት ፡ እለ ፡ ነግሡ ፡ በምድረ ፡ ኤዶም ።

Chapter 39 ወኀደረ ፡ ያዕቆብ ፡ በምድረ ፡ ፍልሰተ ፡ አቡሁ ፡ ምድረ ፡ ከናአን ፡ 2 እለ ፡ ትዝምደ ፡ ያዕቆብ ። ወሤሞ ፡ ለዮሴፍ ፡ ዲበ ፡ ኵሉ ፡ ቤቱ ። ወኀደገ ፡ ግብጻዊ ፡ ኵሎ ፡ ቅድሜሁ ፡ ለዮሴፍ ፡ እስመ ፡ ርእየ ፡ ከመ ፡ እግዚአብሔር ፡ ምስሌሁ ፡ ወኵሎ ፡ ዘገብረ ፡ እግዚአብሔር ፡ ይሴርሖ ። ወዮሴፍሰ ፡ ሠናይ ፡ ራእዩ ፡ ወላሕይ ፡ ጥቀ ፡ ራእዩ ። ወኢመጠወ ፡ ነፍሶ ። ወተዘከረ ፡ ዮሴፍ ፡ ዘንተ ፡ ንባበ ፡ ወኢፈቀደ ፡ ይስክብ ፡ ምስሌሃ ፡ 8 ወአስተብቍዐቶ ፡ ዓመተ ፡ አሐተ ፡ ወካልአ ፡ ወአበያ ፡ ሰሚዐ ፡ 9 ወለጠቀቶ ፡ ወአኀዘቶ ፡ በቤት ፡ ከመ ፡ ትትባአሶ ፡ ይስክብ ፡ ምስሌሃ ። ወርእየት ፡ ይእቲ ፡ ብእሲት ፡ ከመ ፡ ኢይሰክብ ፡ ምስሌሃ ፡ ወጠቀለቶ ፡ ቅድመ ፡ እግዚኡ ፡ እንዘ ፡ ትብል ፡ ኪያየ ፡ ፈቀደ ፡ ገብርከ ፡ ዕብራዊ ፡ ዘታፈቅር ፡ ይትዐገለኒ ፡ ከመ ፡ ይስክብ ፡ ምስሌየ ። ወርእየ ፡ ግብጻዊ ፡ ልብሰ ፡ ዮሴፍ ፡ ወማዕፆ ፡ ስቡረ ። ወሀሎ ፡ ህየ ፡ ውስተ ፡ ሞቅሕ ። ወኀደገ ፡ ኵሎ ፡ ቅድሜሁ ፡ ወአልቦ ፡ ሊቀ ፡ ዐቀብተ ፡ ሞቅሕ ፡ ዘያአምር ፡ ምስሌሁ ፡ ምንተኒ ፡ እስመ ፡ ዮሴፍ ፡ ኵሎ ፡ ይገብር ፡ ወእግዚአብሔር ፡ ይፌጽም ፡ ወነበረ ፡ ህየ ፡ ክልኤተ ፡ ዓመተ ። ወበውእቱ ፡ መዋዕል ፡ ተምዕዐ ፡ ፈርዖን ፡ ንጉሠ ፡ ግብጽ ፡ ላዕለ ፡ ክልኤቱ ፡ ኅጽዋኒሁ ፡ ላዕለ ፡ ሊቀ ፡ መዘርት ፡ ወላዕለ ፡ ሊቀ ፡ ኀበዝት ፡ ወወደዮሙ ፡ ውስተ ፡ ሞቅሕ ፡ ውስተ ፡ ቤቱ ፡ ለሊቀ ፡ መበስላን ፡ ውስተ ፡ ሞቅሕ ፡ ኀበ ፡ ሀሎ ፡ ዮሴፍ ፡ እኁዝ ፡ ህየ ። ወሠርዖ ፡ ለዮሴፍ ፡ ሊቀ ፡ ዐቀብተ ፡ ሞቅሕ ፡ ከመ ፡ ይትለአኮሙ ፡ ወይትለአክ ፡ በቅድሜሁ ፡ 16 ወሐለሙ ፡ ክልኤሆሙ ፡ ሕልመ ፡ ሊቀ ፡ መዘርት ፡ ወሊቀ ፡ ሐበዝት ፡ ወነገርዎ ፡ ለዮሴፍ ፡ 17 ወበከመ ፡ ፈከረ ፡ ሎሙ ፡ ከማሁ ፡ ኮኖሙ ። ወረስዖ ፡ ሊቀ ፡ መዘርት ፡ ለዮሴፍ ፡ በቤተ ፡ ሞቅሕ ፡ እስመ ፡ አይድዖ ፡ ዘይከውኖ ፡ ወኢተዘከረ ፡ ከመ ፡ ያይድዕ ፡ ለፈርዖን ፡ ዘከመ ፡ ነገሮ ፡ ዮሴፍ ፡ እስመ ፡ ረስዐ ።

Chapter 40 ወበውእቱ ፡ መዋዕል ፡ ሐለመ ፡ ፈርዖን ፡ ሕልመ ፡ ክልኤተ ፡ በአሐቲ ፡ ሌሊት ፡ በእንተ ፡ ነገረ ፡ ዐባር ፡ ዘይከውን ፡ ዲበ ፡ ኵሉ ፡ ምድር ፡ ወነቅሀ ፡ እምንዋሙ ፡ ወጸውዖሙ ፡ ለኵሎሙ ፡ መፈክራነ ፡ ሕልም ፡ እለ ፡ ውስተ ፡ ግብጽ ፡ ወረቀይት ፡ ወነገሮሙ ፡ ክልኤሆሙ ፡ ሕልሞ ፡ ወኢክህሉ ፡ አእምሮ ። ወእምዝ ፡ ተዘከሮ ፡ ለዮሴፍ ፡ ሊቀ ፡ መዘርት ፡ ወነገረ ፡ በእንቲአሁ ፡ ለንጉሥ ፡ ወአውፅእዎ ፡ እምነ ፡ ቤተ ፡ ሞቅሕ ፡ ወነገረ ፡ በቅድሜሁ ፡ ክልኤሆሙ ፡ ሕለሚሁ ። ወይቤ ፡ በቅድሜሁ ፡ ለፈርዖን ፡ ከመ ፡ ክልኤሆሙ ፡ ሕለሚሁ ፡ አሐዱ ፡ እሙንቱ ። ወይእዜኒ ፡ ይሥራዕ ፡ ፈርዖን ፡ ውስተ ፡ ኵሉ ፡ ምድረ ፡ ግብጽ ፡ ከያደ ፡ ወይዝግቡ ፡ ሲሲተ ፡ ለሀገር ፡ ውስተ ፡ ሀገር ፡ በመዋዕለ ፡ ዓመታት ፡ ዘጽጋብ ፡ ወይከውን ፡ ሲሲተ ፡ ለሰብዐቱ ፡ ዓመታተ ፡ ዐባር ፡ ወኢትትሐጐል ፡ ምድር ፡ እምቅድመ ፡ ገጸ ፡ ዐባር ፡ እስመ ፡ ኀያል ፡ ይከውን ፡ ጥቀ ። ወወሀቦ ፡ እግዚአብሔር ፡ ለዮሴፍ ፡ ሞገሰ ፡ ወምሕረተ ፡ በቅድመ ፡ አዕይንቲሁ ፡ ለፈርዖን ፡ ወይቤ ፡ ፈርዖን ፡ ለላእካኒሁ ፡ ኢንረክብ ፡ ብእሴ ፡ ጠቢበ ፡ ወማእምረ ፡ ዘከመዝ ፡ ብእሲ ፡ እስመ ፡ መንፈሰ ፡ እግዚአብሔር ፡ ምስሌሁ ። ወሤሞ ፡ ዳግመ ፡ ውስተ ፡ ኵሉ ፡ መንግሥቱ ፡ ወአኰነኖ ፡ ውስተ ፡ ኵሉ ፡ ግብጽ ፡ ወአጽዐኖ ፡ ዲበ ፡ ሰረገላሁ ፡ ካዕብ ፡ ዘፈርዖን ፡ ወአልበሶ ፡ ልብሰ ፡ ቢሶስ ፡ ወአዕነቆ ፡ ባዝግና ፡ ወርቅ ፡ ውስተ ፡ ክሳዱ ። ወመበለ ፡ ዮሴፍ ፡ ውስተ ፡ ኵሉ ፡ ምድረ ፡ ግብጽ ፡ ወአፍቅርዎ ፡ ኵሎሙ ፡ መኳንንቲሁ ፡ ለፈርዖን ፡ ወኵሎሙ ፡ ላእካኒሁ ፡ ወኵሎሙ ፡ እለ ፡ ይገብሩ ፡ ግብረ ፡ ንጉሥ ። ወተሰናአወት ፡ ምድረ ፡ ግብድ ፡ በቅድሜሁ ፡ ለፈርዖን ፡ በእንተ ፡ ዮሴፍ ፡ እስመ ፡ እግዚአብሔር ፡ ምስሌሁ ፡ ወወሀቦ ፡ ሞገሰ ፡ ወምሕረተ ፡ ላዕለ ፡ ኵሎሙ ፡ ዘመዱ ፡ በቅድመ ፡ ኵሎሙ ፡ እለ ፡ ያአምርዎ ፡ ወለእለ ፡ ይሰምዑ ፡ ስምዐ ፡ ምስሌሁ ፡ ወረትዐት ፡ መንግሥተ ፡ ፈርዖን ፡ ወአልቦ ፡ ሰይጣነ ፡ ወአልቦ ፡ እኩየ ፡ ወጸውዐ ፡ ንጉሥ ፡ ስሞ ፡ ለዮሴፍ ፡ ስፋንጢፋንስ ። ወበዕለተ ፡ ቆመ ፡ ዮሴፍ ፡ ኀበ ፡ ፈርዖን ፡ ወልደ ፡ ሠላሳ ፡ ክረምት ፡ አመ ፡ ቆመ ፡ ቅድመ ፡ ፈርዖን ። ወበውእቱ ፡ ዓመት ፡ ሞተ ፡ ይስሐቅ ፡ ወበጽሐ ፡ በከመ ፡ ነገረ ፡ ዮሴፍ ፡ በእንተ ፡ ፍካሬ ፡ ክልኤቱ ፡ ሕልሙ ፡ ዘከመ ፡ ነገሮ ፡ ወኮነ ፡ ሰብዐቱ ፡ ክረምት ፡ ዘጽጋብ ፡ ውስተ ፡ ኵሉ ፡ ምድረ ፡ ግብጽ ፡ ወፈርየት ፡ ምድረ ፡ ብዙኀ ፡ አሐቲ ፡ መስፈርት ፡ ዐሠርተ ፡ ወሰማኒተ ፡ ምእተ ፡ መሳፍረ ። ወአስተጋብአ ፡ ዮሴፍ ፡ ሲሲተ ፡ ለሀገር ፡ ውስተ ፡ ሀገር ፡ እስከ ፡ መልአ ፡ ሥርናይ ፡ እስከ ፡ ሶበ ፡ ይስእኑ ፡ ኆልቆቶ ፡ ወሰፊረ ፡ እምነ ፡ ብዝኁ ።

Chapter 41 ወበአርብ ፡ ወኀምስቱ ፡ ኢዮቤልዉ ፡ ወዳግም ፡ ሱባዔ ፡ በዓመት ፡ ካልእ ፡ ነሥአ ፡ ይሁዳ ፡ ለዔር ፡ በኵሩ ፡ ብእሲተ ፡ እምነ ፡ አዋልደ ፡ አራም ፡ ወስማ ፡ ትዕማር ። ወጸልአ ፡ ወኢሰከበ ፡ ምስሌሃ ፡ እስመ ፡ እምአዋልደ ፡ ከናአን ፡ እሙ ፡ ወፈቀደ ፡ ይንሣእ ፡ ሎቱ ፡ ብእሲተ ፡ እምነገደ ፡ እሙ ፡ ወኢአብሖ ፡ ይሁዳ ፡ አቡሁ ። ወውእቱ ፡ ዔር ፡ በኵሩ ፡ ለይሁዳ ፡ እኩይ ፡ ወቀተሎ ፡ እግዚአብሔር ። ወይቤ ፡ ይሁዳ ፡ ለአውናን ፡ እኁሁ ፡ ባእ ፡ ኀበ ፡ ብእሲተ ፡ እኁሁ ፡ ወረስያ ፡ ኑዕልተ ፡ ወአንሥእ ፡ ዘርአ ፡ ለእኁከ ። ወአእመረ ፡ አውናን ፡ ከመ ፡ ኢኮነ ፡ ዘዚአሁ ፡ ዘርእ ፡ ክመ ፡ ዘእኁሁ ። ወይቤ ፡ ይሁዳ ፡ ለትዕማር ፡ መርዓቱ ፡ ንበሪ ፡ ቤተ ፡ አቡኪ ፡ እንዘ ፡ ትመዐስቢ ፡ እስከ ፡ አመ ፡ ይልህቅ ፡ ሴሎም ፡ ወልድየ ፡ ወእሁበኪ ፡ ሎቱ ፡ ብእሲተ ። ወልህቀ ፡ ወኢኀደገት ፡ ቤድሱኤል ፡ ብእሲተ ፡ ይሁዳ ፡ ሴሎምሃ ፡ ወልዳ ፡ ከመ ፡ ያውስብ ። ወበሳድስ ፡ ዓመቱ ፡ ዐርገ ፡ ይሁዳ ፡ ይቅርጽ ፡ አባግዒሁ ፡ በቴምናታ ። ወአንበረት ፡ አልባሰ ፡ ምዕስብናሃ ፡ ወለብሰት ፡ ግልባቤ ፡ ወተሠነየት ፡ ወነበረት ፡ ውስተ ፡ አንቀጽ ፡ እንተ ፡ መንገለ ፡ ፍኖተ ፡ ቴምናታ ። ወእንዘ ፡ የሐውር ፡ ይሁዳ ፡ ረከባ ፡ ወተሐዘባ ፡ ከመ ፡ ዘማዊት ፡ ወይቤላ ፡ እባእ ፡ ኀቤኪ ፡ ወትቤሎ ፡ ባእ ፡ ወቦአ ። ወትቤሎ ፡ ሀበኒ ፡ ደነስየ ፡ ወይቤላ ፡ አልብየ ፡ ውስተ ፡ እዴየ ፡ ዘእንበለ ፡ ሕልቀት ፡ ዘአጽባዕትየ ፡ ወድጕልማየ ፡ ወበትርየ ፡ ዘውስተ ፡ እዴየ ፡ ወትቤሎ ፡ ሀበኒ ፡ ኪያሆሙ ፡ እስከ ፡ ሶበ ፡ ትፌኑ ፡ ሊተ ፡ ደነስየ ። ወሖረ ፡ ይሁዳ ፡ ውስተ ፡ አባግዒሁ ፡ ወይእቲኒ ፡ ሖረት ፡ ቤተ ፡ አቡሃ ። ወፈነወ ፡ ይሁዳ ፡ መሕስአ ፡ በእደ ፡ ኖላዊሁ ፡ አዶላማዊ ፡ ወኀጥአ ፡ ወተስእሎሙ ፡ ለሰብአ ፡ ብሔር ፡ እንዘ ፡ ይብል ፡ አይቴ ፡ ሀለወት ፡ ዘማዊት ፡ እንተ ፡ ዝየ ፡ ወይቤልዎ ፡ አልቦ ፡ ዝየስ ፡ ዘማዊት ፡ ወአልብነ ፡ ኀቤነ ፡ ዘማዊተ ፡ 15 ወገብአ ፡ ወአይድዖ ፡ ከመ ፡ ኀጥአ ፡ ወይቤሎ ፡ ተስእልኩ ፡ ሰብአ ፡ ብሔርኒ ፡ ወይቤሉኒ ፡ አልቦ ፡ ዝየስ ፡ ዘማዊተ ። ወእንዘ ፡ አእከለት ፡ ሠለስተ ፡ አውራኀ ፡ ተዐውቀት ፡ ከመ ፡ ፀንሰት ፡ ይእቲ ። ወሖረ ፡ ይሁዳ ፡ ቤተ ፡ አቡሃ ፡ ወይቤሎሙ ፡ ለአቡሃ ፡ ወለአኀዊሃ ፡ አውፅእዋ ፡ ወያውዕይዋ ፡ እስመ ፡ ገብረት ፡ ርኵሰ ፡ በውስተ ፡ እስራኤል ። ወኮነ ፡ ሶበ ፡ አውፅእዋ ፡ ከመ ፡ ያውዕይዋ ፡ ፈነወት ፡ ለሐሙሃ ፡ ሕልቀተ ፡ ወድጕልማ ፡ ወበትረ ፡ ወትቤ ፡ አእምርአ ፡ ዘመኑአ ፡ ዝንቱአ ፡ እስመአ ፡ ሎቱአ ፡ ፀነስኩአ ። ወአእመረ ፡ ይሁዳ ፡ ወይቤ ፡ ጸድቀት ፡ ትዕማር ፡ እምኔየ ፡ ወኢያውዕይዋ ፡ እንከ ፡ ወበእንተዝ ፡ ኢተውህበት ፡ ለሴሎም ፡ ወኢደገመ ፡ እንከ ፡ ቀሪቦታ ። ወእምዝ ፡ ፀንሰት ፡ ወወለደት ፡ ክልኤተ ፡ ደቀ ፡ ፋሬስሃ ፡ ወዛራሃ ፡ በዓመት ፡ ሳብዕ ፡ ዘዝንቱ ፡ ሱባዔ ፡ ዘዳግም ፡ ወእምዝ ፡ ተፈጸመ ፡ ሰብዐቱ ፡ ዓመት ፡ ዘሰምር ፡ ዘይቤሎ ፡ ዮሴፍ ፡ ለፈርዖን ። ወአእመረ ፡ ይሁዳ ፡ ከመ ፡ እኩይ ፡ ግብር ፡ ዘገብረ ፡ እስመ ፡ ሰከበ ፡ ምስለ ፡ መርዓቱ ፡ ወአስተሐሠመ ፡ በቅድመ ፡ አዕይንቲሁ ፡ ወአእመረ ፡ ከመ ፡ አበሰ ፡ ወስሕተ ፡ እስመ ፡ ከሠተ ፡ ክድነተ ፡ ወልዱ ፡ ወአኀዘ ፡ ይላሑ ፡ ወይትመሐለል ፡ ቅድመ ፡ እግዚአብሔር ፡ በእንተ ፡ አበሳሁ ። ወነገርናሁ ፡ በሕልም ፡ ከመ ፡ ይሰረይ ፡ ሎቱ ፡ እስመ ፡ ተማሕለለ ፡ ጥቀ ፡ ወእስመ ፡ ላሐወ ፡ ወኢገብረ ፡ እንከ ፡ ወኮነ ፡ ሎቱ ፡ ስርየት ፡ እስመ ፡ ተመይጠ ፡ እምኀጢአቱ ፡ ወእምኢያእምሮቱ ፡ እስመ ፡ ዐቢይ ፡ አበሳ ፡ አምላክነ ። ወአንተኒ ፡ አዝዞሙ ፡ ለውሉደ ፡ እስራኤል ፡ ወኢይኩን ፡ ርኵስ ፡ በማእከሎሙ ፡ እስመ ፡ ኵሉ ፡ ዘይሰክብ ፡ ምስለ ፡ መርዓቱ ፡ ወምስለ ፡ ሐማቱ ፡ ርኵሰ ፡ ገብረ ፡ በእሳት ፡ ያውዕዩ ፡ ብእሴ ፡ ዘሰከበ ፡ ምስሌሃ ፡ ወብእሲተኒ ፡ ወየኀድግ ፡ መዓተ ፡ ወመቅሠፍተ ፡ እምእስራኤል ። ወለይሁዳኒ ፡ ነገርናሁ ፡ ከመ ፡ ኢሰከቡ ፡ ምስሌሃ ፡ ክልኤሆሙ ፡ ደቂቁ ። እስመ ፡ በየውሀተ ፡ አዕይንቲሁ ፡ ሖረ ፡ ወኀሠሠ ፡ ኵነኔ ፡ እስመ ፡ እምፍትሐ ፡ አብርሃም ፡ ዘአዘዞሙ ፡ ለውሉዱ ፡ ፈቀደ ፡ ይሁዳ ፡ ያውዕያ ፡ በእሳት ።

Chapter 42 ወበቀዳሚ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወኀምስቱ ፡ ኢዮቤልው ፡ አኀዘ ፡ ዐባር ፡ ይምጻእ ፡ ውስተ ፡ ምድር ፡ ወአበየ ፡ ዝናም ፡ ተውህቦ ፡ ለምድር ፡ እስመ ፡ አልቦ ፡ ምንተኒ ፡ ዘይወርድ ፡ 2 ወዐብረት ፡ ምድር ። ወመጽኡ ፡ ግብጽ ፡ ኀበ ፡ ዮሴፍ ፡ ከመ ፡ የሀቦሙ ፡ ሲሲተ ፡ ወከሠተ ፡ መዛግብተ ፡ ኀበ ፡ ሀሎ ፡ ሥርናይ ፡ ዘቀዳሚ ፡ ዓመት ፡ ወሤጠ ፡ ለአሕዛበ ፡ ምድር ፡ በወርቅ ። ወሰምዐ ፡ ያዕቆብ ፡ ከመ ፡ ቦቱ ፡ ሲሲተ ፡ ውስተ ፡ ግብጽ ፡ ወፈነወ ፡ ዐሠርተ ፡ ደቆ ፡ ከመ ፡ ይንሥኡ ፡ ሎቱ ፡ ሲሲተ ፡ በግብጽ ፡ ወብንያምሃሰ ፡ ኢፈነወ ። ወአእመሮ ፡ ዮሴፍ ፡ ወእሙንቱሰ ፡ ኢያእመርዎ ። ወእምዝ ፡ ፈትሖሙ ፡ ወአቀመ ፡ ስምዖንሃ ፡ ባሕቲቶ ፡ ወተስዐተ ፡ አኀዊሁ ፡ ፈነወ ፡ 7 ወመልአ ፡ አሕስሊሆሙ ፡ ሥርናየ ፡ ወወርቆሙሂ ፡ ወደየ ፡ ሎሙ ፡ ውስተ ፡ አሕስሊሆሙ ፡ ወኢያእመሩ ። ወአዘዞሙ ፡ ከመ ፡ ያምጽኡ ፡ እኅዋሆሙ ፡ ዘይንእስ ፡ እስመ ፡ ነገርዎ ፡ ከመ ፡ ሀሎ ፡ አቡሆሙ ፡ ሕያው ፡ ወእኁሆሙ ፡ ዘይንእስ ። ወዐርጉ ፡ እምድረ ፡ ግብጽ ፡ ወበጽሑ ፡ ምድረ ፡ ከናአን ፡ ወነገሩ ፡ ለአቡሆሙ ፡ ኵሎ ፡ ዘከመ ፡ ረከቦሙ ፡ ወእፎ ፡ ተናገረ ፡ ምስሌሆሙ ፡ መኰንነ ፡ ብሔር ፡ ዐጸብጺበ ፡ ወአኀዞ ፡ ለስምዖን ፡ እስከ ፡ ሶበ ፡ ያመጽእዎ ፡ ለብንያም ። ወይቤ ፡ ያዕቆብ ፡ አምከንክሙኒኬ ፡ ወዮሴፍኒ ፡ ኢሀሎ ፡ ወስምዖንሂ ፡ ኢሀሎ ፡ ወብንያምሃኒ ፡ ትነሥእዎ ፡ ላዕሌየኬ ፡ ኮነ ፡ እከይክሙ ። ወይቤ ፡ ኢየሐውር ፡ ወልድየ ፡ ምስሌክሙ ፡ እመቦ ፡ ከመ ፡ ደወየ ። እስመ ፡ ርእየ ፡ ከመ ፡ ገብአ ፡ ወርቆሙ ፡ ኵሉ ፡ በዕቈሪሁ ፡ ወበዝ ፡ ፈርሀ ፡ ፈንዎቶ ። ወዐባርኒ ፡ በዝኀ ፡ ወኀየለ ፡ በምድረ ፡ ከናአን ፡ ወበኵሉ ፡ ምድር ፡ ዘእንበለ ፡ ምድረ ፡ ግብጽ ። ወተሴሰይዎ ፡ ሰብአ ፡ ግብጽ ፡ በቀዳሚ ፡ ዓመት ፡ ዘዐባር ። ወሶበ ፡ ርእየ ፡ እስራኤል ፡ ከመ ፡ ኀየለ ፡ ጥቀ ፡ ዐባር ፡ ውስተ ፡ ምድር ፡ ወአልቦ ፡ ድኂነ ፡ ወይቤ ፡ ለውሉዱ ፡ ሖሩ ፡ ግብኡ ፡ ወንሥኡ ፡ ለነ ፡ ሲሲተ ፡ ኢንሙት ፡ 16 ወይቤሉ ፡ ኢነሐውር ፡ እመ ፡ ኢመጽአ ፡ እኁነ ፡ ዘይንእስ ፡ ምስሌነ ፡ ኢነሐውር ፡ 17 ወርእየ ፡ እስራኤል ፡ ከመ ፡ እመ ፡ ኢፈነዎ ፡ ምስሌሆሙ ፡ ይትሐጐሉ ፡ ኵሎሙ ፡ እምቅድመ ፡ ዐባር ። ወይቤ ፡ ሮቤል ፡ ሀበንዮ ፡ ውስተ ፡ እዴየ ፡ ወለእመ ፡ ኢያግባእክዎ ፡ ለከ ፡ ቅትል ፡ ክልኤተ ፡ ውሉድየ ፡ ህየንተ ፡ ነፍሰ ፡ ዚአሁ ። ወቀርበ ፡ ይሁዳ ፡ ወይቤ ፡ ፈንዎ ፡ ምስሌነ ፡ ወለእመ ፡ ኢያግባእክዎ ፡ ለከ ፡ እቡሰ ፡ እኩን ፡ በቅድሜከ ፡ ኵሎ ፡ መዋዕለ ፡ ሕይወትየ ። ወፈነዎ ፡ ምስሌሆሙ ፡ በካልእ ፡ ዓመት ፡ ዘዝ ፡ ሱባዔ ፡ በሠርቀ ፡ ወርኅ ፡ ወበጽሑ ፡ ብሔረ ፡ ግብጽ ፡ ምስለ ፡ ኵሎሙ ፡ እለ ፡ የሐውሩ ፡ ወአምኃሆሙ ፡ ውስተ ፡ እደዊሆሙ ፡ ማየ ፡ ልብን ፡ ወከርካዕ ፡ ወጤሬቤንቶስ ፡ ወጸቃውዐ ፡ መዓር ። ወበጽሑ ፡ ወቆሙ ፡ ቅድመ ፡ ዮሴፍ ፡ ወርእየ ፡ ብንያምሃ ፡ እኅዋሁ ፡ ወአእመሮ ፡ ወይቤሎሙ ፡ ዝኑ ፡ እኁክሙ ፡ ዘይንእስ ፡ ወይቤልዎ ፡ ውእቱ ። ወፈነዎ ፡ ውስተ ፡ ቤቱ ፡ ወስምዖንሃኒ ፡ አውጽአ ፡ ሎሙ ። ወበልዑ ፡ በቅድሜሁ ፡ ወወሀቦሙ ፡ ክፍለ ፡ ለኵሎሙ ፡ ወበዝኀ ፡ መክፈልተ ፡ ብንያም ፡ እመክፈልተ ፡ ኵሎሙ ፡ ትስብዕተ ። ወበልዑ ፡ ወሰትዩ ፡ ወተንሥኡ ፡ ወኀደሩ ፡ ኀበ ፡ አእዱጊሆሙ ። ወኀለየ ፡ ዮሴፍ ፡ ኅሊና ፡ በዘ ፡ ያአምር ፡ ኅሊናሆሙ ፡ እመቦ ፡ ኅሊና ፡ ሰላም ፡ በበይናቲሆሙ ።

Chapter 43 ወገብረ ፡ በከመ ፡ ይቤሎ ፡ ዮሴፍ ፡ ወመልአ ፡ ሎሙ ፡ አሕስሊሆሙ ፡ ኵሎ ፡ ሲሲተ ፡ ወወርቆሙኒ ፡ ወደየ ፡ ውስተ ፡ አሕስሊሆሙ ፡ ወኮራ ፡ ወደየ ፡ ውስተ ፡ ሐስለ ፡ ብንያም ። ወነግሀ ፡ በጽባሕ ፡ ሖሩ ፡ ወኮነ ፡ ሶበ ፡ ወፅኡ ፡ እምህየ ፡ ይቤሎ ፡ ዮሴፍ ፡ ለብእሴ ፡ ቤቱ ፡ ዴግኖሙ ፡ ሩጽ ፡ ወተጋአዞሙ ፡ እንዘ ፡ ትብል ፡ ህየንተ ፡ ሠናይት ፡ ዐሰይክሙኒ ፡ እኩየ ፡ ሰረቅሙኒ ፡ ጽዋዐ ፡ ብሩር ፡ በዘይሰቲ ፡ እግዚእየ ፡ ወአግብኦ ፡ ሊተ ፡ ለእኁሆሙ ፡ ዘይንእስ ፡ ወፍጡነ ፡ አምጽኦ ፡ ዘእንበለ ፡ እፃእ ፡ ውስተ ፡ ምኵናንየ ፡ ወሮጸ ፡ ድኅሬሆሙ ። ወይቤልዎ ፡ ሐሰ ፡ ሎሙ ፡ ለአግብርቲከ ፡ ኢይገብሩ ፡ ዘንተሰ ፡ ነገረ ፡ ወኢይሰርቁ ፡ እምቤተ ፡ እግዚእከ ፡ ምንተኒ ፡ ንዋየ ። እፎ ፡ እንከ ፡ ንሰርቅ ፡ ምንተኒ ፡ ንዋየ ። ወይቤሎሙ ፡ አኮ ፡ ከማሁ ፡ በኀበ ፡ ብእሲ ፡ ዘረከብክዎ ፡ ባሕቲቶ ፡ እነሥእ ፡ ገብረ ፡ ወአንትሙሰ ፡ ተአትዉ ፡ በሰላም ፡ ቤተክሙ ፡ ወእንዘ ፡ ይፈትን ፡ ውስተ ፡ ንዋዮሙ ፡ እምዘ ፡ ይልህቅ ፡ ቀደመ ፡ ወፈጸመ ፡ በኀበ ፡ ዘይንእስ ፡ ወተረክበ ፡ ውስተ ፡ ሐስለ ፡ ብንያም ፡ 8 ወሠጠጡ ፡ አልባሲሆሙ ፡ ወጸዐኑ ፡ ዲበ ፡ አእዱጊሆሙ ፡ ወተመይጡ ፡ ሀገረ ፡ ወበጽሑ ፡ ቤቶ ፡ ለዮሴፍ ፡ ወሰገዱ ፡ ሎቱ ፡ ኵሎሙ ፡ በገጾሙ ፡ ውስተ ፡ ምድር ። ወይቤሎሙ ፡ ዮሴፍ ፡ እኩየ ፡ ገበርክሙ ፡ ወይቤሉ ፡ ምንተ ፡ ንበል ፡ ወምንተ ፡ ንትዋቀሥ ፡ እግዚእነ ፡ ረከበ ፡ አበሳሆሙ ፡ ለአግብርቲሁ ፡ ነየነ ፡ ንሕነ ፡ አግብርቱ ፡ ለእግዚእነ ፡ ወአእዱጊነሂ ። ወይቤሎሙ ፡ ዮሴፍ ፡ እግዚአብሔር ፡ አንሰ ፡ እፈርህ ፡ አንትሙሰ ፡ ሖሩ ፡ አብያቲክሙ ፡ ወእኁክሙ ፡ ከመ ፡ ይኩን ፡ ቅኑየ ፡ እስመ ፡ እኩየ ፡ ገበርክሙ ፡ ኢታአምሩኑ ፡ ከመ ፡ ያስተአድም ፡ ብእሲ ፡ ጽዋዖ ፡ በከመ ፡ አነ ፡ በዝ ፡ ጽዋዕ ፡ ወኪያሁ ፡ ሰረቅሙኒ ። ወይቤ ፡ ይሁዳ ፡ ላዕሌየ ፡ እግዚኦ ፡ እትናገር ፡ ገብርከ ፡ ቃለ ፡ ውስተ ፡ እዝነ ፡ እግዚእየ ። ወይከውን ፡ እምከመ ፡ ሖርነ ፡ ኀበ ፡ ገብርከ ፡ አቡነ ፡ ወእምከመ ፡ ኢሀሎ ፡ ምስሌነ ፡ ወሬዛ ፡ ይመውት ፡ ወንቀጽዕ ፡ አባነ ፡ በሐዘን ፡ እስከ ፡ ለመዊት ፡ ወእገብር ፡ አነ ፡ ባሕቱ ፡ ገብርከ ፡ ህየንቴሁ ፡ ለሕፃን ፡ ገብረ ፡ ለእግዚእየ ። ወርእየ ፡ ዮሴፍ ፡ ከመ ፡ ልበ ፡ ኵሎሙ ፡ ዕሩይ ፡ ብእሲ ፡ ምስለ ፡ ካልኡ ፡ ለሠናይ ፡ ወስእነ ፡ ተዐግሦ ፡ ወነገሮሙ ፡ ከመ ፡ ውእቱ ፡ ዮሴፍ ፡ ወተናገረ ፡ ምስሌሆሙ ፡ በከመ ፡ ልሳነ ፡ ዕብራይስጥ ። ወይቤሎሙ ፡ ኢትብክዩ ፡ ላዕሌየ ፡ አፍጥኑ ፡ ወአምጽእዎ ፡ ለአቡየ ፡ ኀቤየ ፡ ወእርአዮ ፡ ዘእንበለ ፡ እሙት ፡ ወአዕይንቲሁኒ ፡ ለእኁየ ፡ ብንያም ፡ እንዘ ፡ ይሬእያ ። እስመ ፡ ናሁ ፡ ዝንቱ ፡ ካልእ ፡ ዓም ፡ ዘዐባር ፡ ወዓዲ ፡ ኀምስቱ ፡ ዓመት ፡ ሀሎ ፡ ወአልቦ ፡ ማእረረ ፡ ወአልቦ ፡ ፍሬ ፡ ዕፅ ፡ ወአልቦ ፡ ሐሪሰ ፡ ፍጡነ ፡ ረዱ ፡ አንትሙ ፡ ወአብያቲክሙ ፡ ወኢትትሐጐሉ ፡ በዐባር ፡ ወኢትተክዙ ፡ በእንተ ፡ ጥሪትክሙ ፡ እስመ ፡ ለሠሪዕ ፡ አቅደመ ፡ ፈንዎትየ ፡ እግዚአብሔር ፡ ቅድሜክሙ ፡ ከመ ፡ ይሕየዉ ፡ ሕዝብ ፡ ብዙኃን ። ወዜንውዎ ፡ ለአቡየ ፡ ከመ ፡ ዓዲ ፡ ሕያው ፡ አነ ፡ ወአንትሙኒ ፡ ናሁ ፡ ትሬእዩ ፡ ከመ ፡ ሠርዐኒ ፡ እግዚአብሔር ፡ ከመ ፡ እንተ ፡ አቡሁ ፡ ለፈርዖን ፡ ወከመ ፡ እመብል ፡ ውስተ ፡ ቤቱ ፡ ወዲበ ፡ ኵሉ ፡ ምድረ ፡ ግብጽ ፡ ወዜንውዎ ፡ ለአቡየ ፡ ኵሎ ፡ ክብርየ ፡ ወኵሎ ፡ ዘመጠነ ፡ ወሀበኒ ፡ እግዚአብሔር ፡ ብዕለ ፡ ወክብረ ። ወወሀቦሙ ፡ በቃለ ፡ አፈ ፡ ፈርዖን ፡ ሰረገላተ ፡ ወሥንቀ ፡ ለፍኖት ፡ ወወሀቦሙ ፡ ለኵሎሙ ፡ አልባሰ ፡ ሕብር ፡ ወብሩረ ። ወለአቡሆሙኒ ፡ ፈነወ ፡ አልባሰ ፡ ወብሩረ ፡ ወዐሠርተ ፡ አእዱገ ፡ ዘይወስዱ ፡ ስርናየ ፡ ወፈነዎሙ ፡ ወዐርጉ ፡ ወዜነዉ ፡ ለአቡሆሙ ። ወኢአምነ ፡ አቡሆሙ ፡ እስመ ፡ ደንገፀ ፡ በኅሊናሁ ።

Chapter 44 ወተንሥአ ፡ እስራኤል ፡ እምካራን ፡ እምቤቱ ፡ በሠርቀ ፡ ሣልስ ፡ ወርኅ ፡ ወሖረ ፡ እንተ ፡ ፍኖተ ፡ ዐዘቅተ ፡ መሐላ ፡ ወሦዐ ፡ መሥዋዕተ ፡ ለአምላከ ፡ አቡሁ ፡ ይስሐቅ ፡ አመ ፡ ሰቡዑ ፡ ለዝ ፡ ወርኅ ። ወተዘከረ ፡ ያዕቆብ ፡ ሕልመ ፡ ዘርእየ ፡ በቤቴል ፡ ወፈርሀ ፡ ወሪደ ፡ ውስተ ፡ ግብጽ ፡ 3 ወእንዘ ፡ ይኄሊ ፡ ይልአክ ፡ ለዮሴፍ ፡ ከመ ፡ ይምጻእ ፡ ኀቤሁ ፡ ወኢይረድ ፡ ውእቱ ። ወገብረ ፡ በዓለ ፡ ማእረር ፡ ቀዳሜ ፡ ፍሬ ፡ ስርናይ ፡ እምስርናይ ፡ ብሉይ ፡ እስመ ፡ አልቦ ፡ ውስተ ፡ ኵሉ ፡ ምድረ ፡ ከናአን ፡ ምልአ ፡ እድ ፡ ምንተሂ ፡ ዘርአ ፡ ውስተ ፡ ምድር ፡ እስመ ፡ ዐባር ፡ ውእቱ ፡ ኮነ ፡ ለኵሉ ፡ አራዊት ፡ ወለእንስሳ ፡ ወለአዕዋፍ ፡ ወለሰብእኒ ። ወአመ ፡ ዐሡሩ ፡ ወሰዱሱ ፡ አስተርአዮ ፡ እግዚአብሔር ፡ ወይቤሎ ፡ ያዕቆብ ፡ ያዕቆብ ፡ ወይቤ ፡ ነየ ፡ አነ ። አነ ፡ እወርድ ፡ ምስሌከ ፡ ወአነ ፡ እወስደከ ፡ ወበዛቲ ፡ ምድር ፡ ትትቀበር ፡ ወዮሴፍ ፡ ያነብር ፡ እዴሁ ፡ ዲበ ፡ አዕይንቲከ ፡ ኢትፍራህ ፡ ረድ ፡ ውስተ ፡ ግብጽ ። ወተንሥኡ ፡ ውሉዱ ፡ ወውሉደ ፡ ውሉዱ ፡ ወአጽዐኑ ፡ አባሆሙ ፡ ወንዋዮሙ ፡ ዲበ ፡ ሰረገላት ፡ 8 ወተንሥአ ፡ እስራኤል ፡ እምዐዘቅተ ፡ መሐላ ፡ አመ ፡ ዐሡር ፡ ወሰዱስ ፡ ዕለት ፡ ዘዝ ፡ ወርኅ ፡ ሣልስ ፡ ወሖረ ፡ ብሔረ ፡ ግብጽ ። ወፈነወ ፡ እስራኤል ፡ ቅድሜሁ ፡ ኀበ ፡ ዮሴፍ ፡ ወልዶ ፡ ይሁዳሃ ፡ ከመ ፡ ያስተሐይጽ ፡ ምድረ ፡ ጌሤም ፡ እስመ ፡ ህየ ፡ ይቤሎሙ ፡ ዮሴፍ ፡ ለአኀዊሁ ፡ ይምጽኡ ፡ ከመ ፡ ይኅድሩ ፡ ህየ ፡ ከመ ፡ ይኩኑ ፡ ቅሩባነ ፡ ዚአሁ ። ወይእቲኒ ፡ ሠናይት ፡ በምድረ ፡ ግብጽ ፡ ወቅርብት ፡ ኀቤሁ ፡ ለኵሉ ፡ ወለእለሂ ፡ እንስሳ ። ወዝ ፡ አስማቲሆሙ ፡ ለውሉደ ፡ ያዕቆብ ፡ እለ ፡ ሖሩ ፡ ውስተ ፡ ግብጽ ፡ ምስለ ፡ ያዕቆብ ፡ አቡሆሙ ፡ 12 ሮቤል ፡ በኵሩ ፡ ለእስራኤል ፡ ወዝ ፡ አስማቲሆሙ ፡ ለውሉዱ ፡ ኤኖክ ፡ ወፋሉስ ፡ ወኤስሮም ፡ ወከራሚ ፡ ኀምስቱ ። ስምዖን ፡ ወውሉዱ ፡ ወዝ ፡ አስማቲሆሙ ፡ ለውሉዱ ፡ ኢያሙኤል ፡ ወኢያሚን ፡ ወአዎት ፡ ወኢያኪም ፡ ወሳአር ፡ ወሳውል ፡ ወልዳ ፡ ለፍኒሰወት ፡ ሰብዓቱ ። ሌዊ ፡ ወውሉዱ ፡ ወዝ ፡ አስማቲሆሙ ፡ ለውሉዱ ፡ ጌድሶን ፡ ወቃዓድ ፡ ወሚራሪ ፡ አርባዕቱ ። ይሁዳ ፡ ወውሉዱ ፡ ወዝ ፡ አስማቲሆሙ ፡ ለውሉዱ ፡ ሴሎም ፡ ወፋሬስ ፡ ወዛራ ፡ አርባዕቱ ። ይሳኮር ፡ ወውሉዱ ፡ ወዝ ፡ አስማቲሆሙ ፡ ለውሉዱ ፡ ቶላ ፡ ወፉአ ፡ ወኢያሱብ ፡ ወሳምሮም ፡ ኀምስቱ ። ዛብሎን ፡ ወውሉዱ ፡ ወዝ ፡ አስማቲሆሙ ፡ ለውሉዱ ፡ ሳአር ፡ ወኤሎን ፡ ወኢያሊኤል ፡ አርባዕቱ ። ወእሉ ፡ ውሉደ ፡ ያዕቆብ ፡ ወውሉዶሙ ፡ እለ ፡ ወለደት ፡ ልያ ፡ ለያዕቆብ ፡ በመስጴጦምያ ፡ ስድስቱ ፡ ወአሐቲ ፡ ዲና ፡ እኅቶሙ ። ወውሉደ ፡ ዘለፋ ፡ ለአኪታ ፡ ለልያ ፡ ብእሲተ ፡ ያዕቆብ ፡ ዘወለደት ፡ ለያዕቆብ ፡ ጋድሃ ፡ ወአሴርሃ ። ወዝ ፡ አስማተ ፡ ውሉዶሙ ፡ እለ ፡ ቦኡ ፡ ምስሌሁ ፡ ውስተ ፡ ግብጽ ፡ ውሉደ ፡ ጋድ ፡ ሴፍዮን ፡ ወአጋቲ ፡ ወሱኒ ፡ ወአሲቦን ፡ [ወዔዲስ] ፡ ወአሪሊ ፡ ወአሩዲ ፡ ሰማኒቱ ። ወውሉደ ፡ አሴር ፡ ኢዮምና ፡ ወይሱአ ፡ [ወይኡኤል] ፡ ወቤርያ ፡ ወሳራ ፡ እኅቶሙ ፡ አሐቲ ፡ ኀምስቱ ። ኵሉ ፡ ነፍስ ፡ ዐሠርቱ ፡ ወአርባዕቱ ፡ ወኮነ ፡ ኵሉ ፡ ዘልያ ፡ አርባዓ ፡ ወአርባዕቱ ። ወውሉደ ፡ ራሔል ፡ ዘብእሲተ ፡ ያዕቆብ ፡ ዮሴፍ ፡ ወብንያም ። ወተወልዱ ፡ ለዮሴፍ ፡ በግብጽ ፡ ዘእንበለ ፡ ይባእ ፡ አቡሁ ፡ ውስተ ፡ ግብጽ ፡ ዘወለደት ፡ ሎቱ ፡ አስኔት ፡ ወለተ ፡ ፉጢራዕ ፡ ሣውዕ ፡ ዘኢሊዮጳሊስ ፡ ምነሴሃ ፡ ወኤፍሬምሃ ። ወውሉደ ፡ ብንያም ፡ ባላ ፡ ወባኮር ፡ ወአስቢል ፡ ጉአድ ፡ ወንኤማን ፡ ወአብዮድ ፡ ወራኤ ፡ ወሰናኒም ፡ ወአፊም ፡ ወጋአም ፡ ዐሠርቱ ፡ ወአሐዱ ። ወኮነ ፡ ኵሉ ፡ ነፍስ ፡ ዘራሔል ፡ ዐሠርቱ ፡ ወአርባዕቱ ። ወውሉደ ፡ ባላ ፡ ለአኪታ ፡ ለራሔል ፡ ብእሲቱ ፡ ለያዕቆብ ፡ ዘወለደት ፡ ለያዕቆብ ፡ ዳንሃ ፡ ወንፍታሌም ። ወዝ ፡ አስማተ ፡ ውሉዶሙ ፡ እለ ፡ ቦኡ ፡ ምስሌሆሙ ፡ ውስተ ፡ ግብጽ ፡ ውሉደ ፡ ዳን ፡ ኩሲም ፡ ወሳሞን ፡ ወአሱዲ ፡ ወኢያከ ፡ ወሰሎሞን ፡ ስድስቱ ፡ ወሞቱ ፡ በግብጽ ፡ በዓመተ ፡ ቦኡ ፡ ወተረፎ ፡ ለዳን ፡ ኩሲም ፡ ባሕቲቱ ። ወዝ ፡ አስማቲሆሙ ፡ ለውሉደ ፡ ንፍታሌም ፡ ኢያሲኤል ፡ ወጋሂኒ ፡ ወአሰአር ፡ ወሰሉም ፡ ወኤው ፡ ወሞተ ፡ ኤው ፡ በግብጽ ፡ ዘተወልደ ፡ እምድኅረ ፡ ዓመተ ፡ ዐባር ፡ ወኮኑ ፡ ኵሎሙ ፡ ዘራሔል ፡ ዕሥራ ፡ ወስድስቱ ። ወኵሉ ፡ መንፈስ ፡ ዘያዕቆብ ፡ ዘቦአ ፡ ውስተ ፡ ግብጽ ፡ ሰብዓ ፡ መንፈስ ። ወበምድረ ፡ ከናአን ፡ ሞትዎ ፡ ለይሁዳ ፡ ክልኤቱ ፡ ደቁ ፡ ኤር ፡ ወኣውናን ፡ ወአልቦሙ ፡ ውሉደ ፡ ወቀበርዎሙ ፡ ደቂቀ ፡ እስራኤል ፡ ለእለ ፡ ተሐጕሉ ፡ ወተሠይሙ ፡ ውስተ ፡ ሰብዓ ፡ ሕዝብ ።

Chapter 45 ወቦአ ፡ እስራኤል ፡ ውስተ ፡ ብሔረ ፡ ግብጽ ፡ ውስተ ፡ ምድረ ፡ ጌሤም ፡ አመ ፡ ሠርቀ ፡ ወርኅ ፡ ራብዕ ፡ በካልእ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወኀምስቱ ፡ ኢዮቤልው ። ወመጽአ ፡ ዮሴፍ ፡ ይትቀበል ፡ አባሁ ፡ ያዕቆብሃ ፡ ውስተ ፡ ምድረ ፡ ጌሤም ፡ ወሐቀፈ ፡ ክሳደ ፡ አቡሁ ፡ ወበከየ ። ወይቤሎ ፡ እስራኤል ፡ ለዮሴፍ ፡ እሙት ፡ ይእዜሰ ፡ እምዘ ፡ ርኢኩከ ፡ ወይእዜኒ ፡ ይትባረክ ፡ እግዚአብሔር ፡ አምላከ ፡ እስራኤል ፡ ወአምላከ ፡ አብርሃም ፡ ወአምላከ ፡ ይስሐቅ ፡ ዘኢከልአ ፡ ምሕረቶ ፡ ወሣህሎ ፡ እምገብሩ ፡ ያዕቆብ ። ዐቢይ ፡ ሊተ ፡ ዘርኢኩ ፡ ገጸከ ፡ እንዘ ፡ ሕያው ፡ አነ ፡ እስመ ፡ አማን ፡ ህልው ፡ ራእይ ፡ ዘርኢኩ ፡ በቤቴል ፡ ይትባረክ ፡ እግዚአብሔር ፡ አምላኪየ ፡ ለዓለመ ፡ ዓለም ፡ ወቡሩክ ፡ ስሙ ። ወበልዑ ፡ ዮሴፍ ፡ ወአኀዊሁ ፡ በቅድመ ፡ አቡሆሙ ፡ ኅብስተ ፡ ወሰትዩ ፡ ወይነ ፡ ወተፈሥሐ ፡ ያዕቆብ ፡ ፍሥሓ ፡ ዐቢየ ፡ ጥቀ ። ወወሀቦ ፡ ዮሴፍ ፡ ለአቡሁ ፡ ወለአኀዊሁ ፡ ሀብተ ፡ ከመ ፡ ይኅድሩ ፡ ምድረ ፡ ጌሤም ፡ ወውስተ ፡ ራሜሲኖ ፡ ወኵሎ ፡ አድያሚሃ ፡ ሎሙ ፡ ዘይኴንኑ ፡ በቅድሜሁ ፡ ለፈርዖን ። ወሴሰዮሙ ፡ ዮሴፍ ፡ ለአቡሁ ፡ ወለአኀዊሁ ፡ ወጥሪቶሙሂ ፡ ኀባውዘ ፡ በከመ ፡ የአክሎሙ ፡ ለሰብዐቱ ፡ ዓመታተ ፡ ዐባር ። ወሐመት ፡ ምድረ ፡ ግብጽ ፡ እምቅድመ ፡ ገጸ ፡ ዐባር ። ወተፈጸመ ፡ ዓመታተ ፡ ዐባር ። እስመ ፡ በሰብዓቱ ፡ ዓመታተ ፡ ዐባር ። ወውእቱ ፡ ዓመት ፡ ቀዳሚ ፡ ዘሱባዔ ፡ ራብዕ ፡ ዘአርብዓ ፡ ወኀምስቱ ፡ ኢዮቤሌው ። ወነሥአ ፡ ዮሴፍ ፡ እምእክል ፡ ዘዘርኡ ፡ ኀምስቶ ፡ ለንጉሥ ፡ ወራብዕተ ፡ እደ ፡ ኀደገ ፡ ሎሙ ፡ ለሲሲት ፡ ወለዘርእ ፡ ወረሰዮ ፡ ዮሴፍ ፡ ሥርዐተ ፡ ለምድረ ፡ ግብጽ ፡ እስከ ፡ ዛቲ ፡ ዕለት ። ወሐይወ ፡ እስራኤል ፡ በምድረ ፡ ግብጽ ፡ ዐሠርተ ፡ ወሰብዓተ ፡ ዓመተ ። ወባረኮሙ ፡ እስራኤል ፡ ለውሉዱ ፡ ዘእንበለ ፡ ይሙት ፡ ወነገሮሙ ፡ ኵሎ ፡ ዘኮነ ፡ ይረክቦሙ ፡ በምድረ ፡ ግብጽ ፡ ወበደኃሪ ፡ መዋዕል ፡ ዘከመ ፡ ይመጽእ ፡ ላዕሌሆሙ ፡ አይድዖሙ ፡ ወባረኮሙ ። ወኖመ ፡ ምስለ ፡ አበዊሁ ፡ ወተቀብረ ፡ ውስተ ፡ በአት ፡ ዘካዕበት ፡ በምድረ ፡ ከናአን ፡ ቅሩበ ፡ አብርሃም ፡ አቡሁ ፡ ውስተ ፡ መቃብር ፡ ዘከረየ ፡ ለርእሱ ፡ ውስተ ፡ በአተ ፡ ካዕበት ፡ በምድረ ፡ ኬብሮን ። ወወሀቦ ፡ ኵሎ ፡ መጻሕፍቲሁ ፡ ወመጻሕፍተ ፡ አበዊሁ ፡ ለሌዊ ፡ ወልዱ ፡ ከመ ፡ ይዕቀቦን ፡ ወከመ ፡ የሐድሶን ፡ ለውሉዱ ፡ እስከ ፡ ዛቲ ፡ ዕለት ።

Chapter 46 ወኮነ ፡ እምድኅረ ፡ ሞተ ፡ ያዕቆብ ፡ በዝኁ ፡ ውሉደ ፡ እስራኤል ፡ በምድረ ፡ ግብጽ ፡ ወኮኑ ፡ ሕዝበ ፡ ብዙኀ ፡ ወኮኑ ፡ ኵሎሙ ፡ ዕሩያነ ፡ በልቦሙ ፡ ከመ ፡ ያፍቅር ፡ እኅው ፡ እኅዋሁ ፡ ወከመ ፡ ይትራዳእ ፡ ብእሲ ፡ ምስለ ፡ እኁሁ ፡ ወበዝኁ ፡ ወፈድፋዱ ፡ ጥቀ ። ወአልቦ ፡ ሰይጣነ ፡ ወአልቦ ፡ ምንተኒ ፡ እኩየ ፡ ኵሎ ፡ መዋዕለ ፡ ሕይወቱ ፡ ለዮሴፍ ፡ እለ ፡ ሐይወ ፡ እምድኅረ ፡ አቡሁ ፡ ያዕቆብ ። ወሞተ ፡ ዮሴፍ ፡ ወልደ ፡ ምእት ፡ ወዐሠርቱ ፡ ዓመት ፡ ወዐሠርተ ፡ ወሰብዐተ ፡ ዓመተ ፡ ነበረ ፡ ምድረ ፡ ከናአን ፡ ወዐሠርተ ፡ ዓመተ ፡ ነበረ ፡ እንዘ ፡ ይትቀነይ ። ወሞተ ፡ ወኵሎሙ ፡ አኀዊሁ ፡ ወኵላ ፡ ይእቲ ፡ ትውልድ ፡ 5 ወአዘዞሙ ፡ ለውሉደ ፡ እስራኤል ፡ ዘእንበለ ፡ ይሙት ፡ ከመ ፡ ይሰዱ ፡ አዕጽምቲሁ ፡ በመዋዕል ፡ አመ ፡ ይወፅኡ ፡ እምድረ ፡ ግብጽ ። ወአምሐሎሙ ፡ በእንተ ፡ አዕጽምቲሁ ፡ እስመ ፡ አእመረ ፡ ከመ ፡ ኢይደግሙ ፡ ግብጽ ፡ አውፅኦቶ ፡ ወቀቢሮቶ ፡ በዕለት ፡ በምድረ ፡ ከናአን ። ወስእነ ፡ በዊአ ፡ እስመ ፡ ነግሠ ፡ ካልእ ፡ ሐዲስ ፡ ንጉሥ ፡ ለግብጽ ፡ ወኀየለ ፡ እምኔሁ ፡ ወገብአ ፡ ምድረ ፡ ከናአን ፡ ወተዐጽወ ፡ አናቅጸ ፡ ግብጽ ፡ ወአልቦ ፡ ዘይወፅእ ፡ ወአልቦ ፡ ዘይበውእ ፡ ውስተ ፡ ግብጽ ። ወሞተ ፡ ዮሴፍ ፡ በዘ ፡ አርብዓ ፡ ወስድስቱ ፡ ኢዮቤልዉ ፡ በሱባዔ ፡ ሳድስ ፡ በካልእ ፡ ዓመቱ ፡ ወቀበርዎ ፡ ውስተ ፡ ምድረ ፡ ግብጽ ፡ ወሞቱ ፡ ኵሎሙ ፡ አኀዊሁ ፡ እምድኅሬሁ ። ወወፅአ ፡ ንጉሠ ፡ ግብጽ ፡ ከመ ፡ ይትቃተል ፡ ምስለ ፡ ንጉሠ ፡ ከናአን ፡ በዘ ፡ አርብዓ ፡ ወሰብዐቱ ፡ ኢዮቤልዉ ፡ በዳግም ፡ ሱባዔ ፡ በካልእ ፡ ዓመቱ ። ወገብኡ ፡ ብዙኃን ፡ ውስተ ፡ ግብጽ ፡ ወኅዳጣን ፡ ተርፉ ፡ እምኔሆሙ ፡ ውስተ ፡ ደብረ ፡ ኬብሮን ፡ ወተረፈ ፡ አብራም ፡ አቡከ ፡ ምስሌሆሙ ። ወሞአ ፡ ንጉሠ ፡ ከናአን ፡ ለንጉሠ ፡ ግብጽ ፡ ወዐጸወ ፡ አናቅጸ ፡ ግብጽ ፡ ወኀለየ ፡ ኅሊና ፡ እኩየ ፡ ላዕለ ፡ ውሉደ ፡ እስራኤል ፡ ከመ ፡ ያሕምሞሙ ፡ ወይቤሎሙ ፡ ለሰብአ ፡ ግብጽ ፡ ናሁ ፡ ሕዝበ ፡ ውሉደ ፡ እስራኤል ፡ ልህቁ ፡ ወበዝኁ ፡ እምኔነ ፡ ንዑ ፡ ንጠበብ ፡ ላዕሌሆሙ ፡ ዘእንበለ ፡ ይብዝኁ ፡ ወናሕምሞሙ ፡ በቅኔ ፡ ዘእንበለ ፡ ይምጽአነ ፡ ቀትል ፡ ወእሙንቱኒ ፡ ዘእንበለ ፡ ይፅብኡነ ፡ ወእመ ፡ አኮሰ ፡ እሙንቱኒ ፡ ይዴመሩ ፡ ምስለ ፡ ፀር ፡ ወይወፅኡ ፡ እምድርነ ፡ እስመ ፡ ልቦሙ ፡ ወገጾሙ ፡ ውስተ ፡ ምድረ ፡ ከናአን ፡ ወሠርዐ ፡ ላዕሌሆሙ ፡ ሊቃነ ፡ ገባር ፡ ከመ ፡ ያሕምምዎሙ ፡ በቅኔ ። ወይቀንይዎሙ ፡ ግፉዐ ፡ ወመጠነ ፡ ያሐስሙ ፡ ላዕሌሆሙ ፡ ከማሁ ፡ ይበዝኁ ፡ ወከማሁ ፡ ይፈደፍዱ ፡ ወያስተራኵስዎሙ ፡ ሰብአ ፡ ግብጽ ፡ ለውሉደ ፡ እስራኤል ።

Chapter 47 ወበሱባዔ ፡ ሳብዕ ፡ በሳብዕ ፡ ዓመት ፡ በዘ ፡ አርብዓ ፡ ወሰብዓቱ ፡ ኢዩቤልዉ ፡ መጽአ ፡ አቡከ ፡ እምድረ ፡ ከናአን ፡ ወተወለድከ ፡ በራብዕ ፡ ሱባዔ ፡ በሳድስ ፡ ዓመቱ ፡ በዘ ፡ አርብዓ ፡ ወሰማኒቱ ፡ ኢዮቤሌዎን ፡ ዘውእቱ ፡ መዋዕለ ፡ ምንዳቤ ፡ ላዕለ ፡ ውሉደ ፡ እስራኤል ። ወአዘዘ ፡ ንጉሠ ፡ ግብጽ ፡ ፈርዖን ፡ ትእዛዘ ፡ ላዕሌሆሙ ፡ ከመ ፡ ይግድፉ ፡ ውሉዶሙ ፡ ኵሎ ፡ ሮሰ ፡ ዘተወልደ ፡ ውስተ ፡ ፈለግ ፡ ወነበሩ ፡ እንዘ ፡ ይገድፉ ፡ ሰብዐተ ፡ ወርኀ ፡ እስከ ፡ አመ ፡ ዕለተ ፡ ተወለድከ ። ወገብረት ፡ ለከ ፡ ነፍቀ ፡ ወለበጠታ ፡ ፒሳ ፡ ወአስፋሊጦ ፡ ወአንበረቶ ፡ ውስተ ፡ ሣዕር ፡ ኀበ ፡ ድንጋገ ፡ ፈለግ ፡ ወአንበረተከ ፡ ውስቴታ ፡ ሰቡዐ ፡ መዋዕለ ። ወበውእቱ ፡ መዋዕል ፡ ወፅአት ፡ ተርሙት ፡ ወለተ ፡ ፈርዖን ፡ ከመ ፡ ትትኀፀብ ፡ በውስተ ፡ ፈለግ ፡ ወሰምዐት ፡ ቃለከ ፡ እንዘ ፡ ትበኪ ፡ ወትቤ ፡ ለዕብራዊያቲሃ ፡ ከመ ፡ ያምጽአከ ፡ ወአምጽአከ ፡ ኀቤሃ ፡ 6 ወአውፅአተከ ፡ እምነፍቅ ፡ ወምሕረተከ ። ወትቤላ ፡ እኅርከ ፡ እሖርኑ ፡ ወእጸውዕ ፡ ለኪ ፡ አሐተ ፡ እምዕብራዊያት ፡ እንተ ፡ ተሐፅኖ ፡ ወታጠብዎ ፡ ለኪ ፡ ለዝ ፡ ሕፃን ። ወሖረት ፡ ወጸውዐታ ፡ ለእምከ ፡ ለኢዮክቤት ፡ ወወሀበታ ፡ ዐስበ ፡ ወሐፀነተከ ። ወእምዝ ፡ ልሂቀከ ፡ ወሰዱከ ፡ ቤተ ፡ ፈርዖን ፡ ወኮንከ ፡ ውሉዳ ፡ ወመሀረከ ፡ ዕብራን ፡ አቡከ ፡ መጽሐፈ ፡ ወእምዘ ፡ ፈጸምከ ፡ ሠለስተ ፡ ሱባዔ ፡ አብአከ ፡ ውስተ ፡ ዐጸደ ፡ መንግሥት ። ወሀለውከ ፡ ውስተ ፡ ዐጸድ ፡ ሠለስተ ፡ ሱባዔ ፡ ዓመት ፡ እስከ ፡ መዋዕል ፡ አመ ፡ ወፃእከ ፡ እምዐጸደ ፡ መንግሥት ። ወበሳኒታ ፡ ዕለት ፡ ረከብከ ፡ ክልኤተ ፡ እንዘ ፡ ይትባአሱ ፡ እምውሉደ ፡ እስራኤል ፡ ወትቤሎ ፡ ለዘይትዔገል ፡ ለምንት ፡ ትዘብጥ ፡ እኅዋከ ፡ 12 ወተምዕዐ ፡ ወተቈጥዐ ፡ ወይቤ ፡ መኑ ፡ ሤመከ ፡ ላዕሌነ ፡ መልአከ ፡ ወመኰንነ ፡ ትቅትለኒኑ ፡ ትፈቅድ ፡ በከመ ፡ ቀተልኮ ፡ ለግብጻዊ ፡ ወፈራህከ ፡ ወጐየይከ ፡ እምቅድመ ፡ ዝንቱ ፡ ነገር ።

Chapter 48 ወበሳድስ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወተስዐቱ ፡ ኢዮቤልዉሳት ፡ ሖርከ ፡ ወነበርከ ፡ ህየ ፡ ኀምስተ ፡ ሱባዔ ፡ ወዓመተ ፡ አሐደ ፡ ወገባእከ ፡ ውስተ ፡ ግብጽ ፡ በሱባዔ ፡ ዳግም ፡ በዓመት ፡ ካልእ ፡ በውእቱ ፡ ኀምሳ ፡ ኢዮቤልው ። ወአንተ ፡ ተአምር ፡ ዘተናገረ ፡ ለከ ፡ በደብረ ፡ ሲና ፡ ወምንተ ፡ ፈቀደ ፡ ይግበር ፡ ምስሌከ ፡ መኰንነ ፡ መስቴማ ፡ አመ ፡ ትገብእ ፡ ግብጽ ፡ በፍኖት ፡ በአላቴ ፡ ምጽላል ፡ አኮሁ ፡ በኵሉ ፡ ኀይሉ ፡ ፈቀደ ፡ ይቅትልከ ፡ ወያድኅኖሙ ፡ ለግብጻዊያን ፡ እምእዴከ ፡ እስመ ፡ ርእየከ ፡ ከመ ፡ ተፈነውከ ፡ ትግበር ፡ ኵነኔ ፡ ወበቀለ ፡ ላዕለ ፡ ግብጻዊያን ፡ ወባላሕኩከ ፡ እምእዴሁ ። ወገብረ ፡ እግዚአብሔር ፡ ላዕሌሆሙ ፡ በቀለ ፡ ዐቢየ ፡ በእንተ ፡ እስራኤል ፡ ወመሐጾሙ ፡ ወቀተሎሙ ፡ በደም ፡ ወበቈርነነዓት ፡ ወበትንንያ ፡ ወበጽንጽያ ፡ ከልብ ፡ ወበእኩይ ፡ ቍስል ፡ ዘውእቱ ፡ ይፈልሕ ፡ ዕንጰዕንጴ ፡ ወእንስሳሆሙ ፡ በሞት ፡ ወበአእባነ ፡ በረድ ። ወኵሉ ፡ ተፈነወ ፡ ወእዴከ ፡ ከመ ፡ ትግበር ፡ ዘእንበለ ፡ ይትገበር ፡ ወሀለውከ ፡ ትትናገሮ ፡ ለንጉሠ ፡ ግብጽ ፡ ወበቅድመ ፡ ኵሎሙ ፡ ላእካኒሁ ፡ ወበቅድመ ፡ ሕዝቡ ፡ ወኵሉ ፡ ኮነ ፡ በቃልከ ፡ ዐሥሩ ፡ ኵነኔ ፡ ዐቢያት ፡ ወፀዋጋት ፡ መጽአ ፡ ውስተ ፡ ምድረ ፡ ግብድ ፡ ከመ ፡ ትግበር ፡ ቦቱ ፡ በቀለ ፡ እስራኤል ። ወኵሎ ፡ ገብረ ፡ እግዚአብሔር ፡ በእንተ ፡ እስራኤል ። ወመኰንነ ፡ መስቴማ ፡ ይትቀወመከ ፡ ቅድሜከ ፡ ወይፈቅድ ፡ ያውድቀ ፡ ውስተ ፡ እደ ፡ ፈርዖን ፡ ወይረድእ ፡ ሥራያቲሆሙ ፡ ለግብጽ ፡ ወይትቃወሙ ፡ ወይገብሩ ፡ በቅድሜከ ። እከየሰኬ ፡ ኀደግናሆሙ ፡ ይግበሩ ፡ ወፈውሰ ፡ ኢናበውሖሙ ፡ ከመ ፡ ይትገበር ፡ በእደዊሆሙ ። መሐጾሙ ፡ እግዚአብሔር ፡ በቍስል ፡ እኩይ ፡ ወስእኑ ፡ ተቃውሞ ፡ እስመ ፡ አሕጐልናሆሙ ፡ እምገቢረ ፡ ምንተሂ ፡ አሐደ ፡ ትእምርተ ። ወበኵሉ ፡ ተአምር ፡ ወመንክር ፡ ኢኀፈረ ፡ መኰንነ ፡ መስቴማ ፡ እስከ ፡ ሶበ ፡ ኀየለ ፡ ወጸርኀ ፡ ሎሙ ፡ ለግብጽ ፡ ከመ ፡ ይዴግኑ ፡ ድኅሬከ ፡ በኵሉ ፡ ኀይሎሙ ፡ ለግብጽ ፡ በሰረገላቲሆሙ ፡ ወአፍራሲሆሙ ፡ ወበኵሉ ፡ ብዝኆሙ ፡ ለአሕዛበ ፡ ግብጽ ። ወቆምኩ ፡ ማእከሌከ ፡ ወማእከሎሙ ፡ ለግብጽ ፡ ወማእከሎሙ ፡ ለእስራኤል ፡ ወባላሕናሆሙ ፡ ለእስራኤል ፡ እምእዴሁ ፡ ወእምእደ ፡ ሕዝብ ። ወኵሎሙ ፡ ሕዝብ ፡ ዘአውፅአ ፡ ይዴግኑ ፡ ድኅሬሆሙ ፡ ለእስራኤል ፡ ወወረዎሙ ፡ እግዚአብሔር ፡ አምላክነ ፡ ማእከለ ፡ ባሕር ፡ ውስተ ፡ መዓምቅቲሃ ፡ ለቀላይ ፡ በታሕቴሆሙ ፡ ለውሉደ ፡ እስራኤል ፡ በከመ ፡ ወረዉ ፡ ውሉዶሙ ፡ ሰብአ ፡ ግብጽ ፡ ውስተ ፡ ፈለግ ፡ ምእተ ፡ እልፈ ፡ ተበቀሎሙ ። ወአመ ፡ ዐሡር ፡ ወረቡዕ ፡ ዕለት ፡ ወአመ ፡ ዐሡር ፡ ወኀሙስ ፡ ወአመ ፡ ዐሡር ፡ ወሰዱስ ፡ ወአመ ፡ ዐሡር ፡ ወሰቡዕ ፡ ወአመ ፡ ዐሡር ፡ ወሰሙን ፡ ሀሎ ፡ መኰንነ ፡ መስቴማ ፡ እሱር ፡ ወዕፅው ፡ እምድኅሬሆሙ ፡ ለውሉደ ፡ እስራኤል ፡ ከመ ፡ ኢያስተዋድዮሙ ። ወአመ ፡ ዕለተ ፡ ዐሡር ፡ ወተሱዕ ፡ ፈታሕናሆሙ ፡ ከመ ፡ ይርድእዎሙ ፡ ለግብጽ ፡ ወከመ ፡ ይዴግኑ ፡ ድኅሬሆሙ ፡ ለውሉደ ፡ እስራኤል ፡ ወአጽንዐ ፡ አልባሲሆሙ ፡ ወአኀየሎሙ ፡ ወተኀየሉ ፡ እምኀበ ፡ እግዚአብሔር ፡ አምላክነ ፡ ከመ ፡ ይምሐጾሙ ፡ ለግብጽ ፡ ወይወርዎሙ ፡ ማእከለ ፡ ባሕር ። ወአመ ፡ ዐሡር ፡ ወረቡዕ ፡ ዕለት ፡ አሰርናሁ ፡ ከመ ፡ ኢያስተዋድዮሙ ፡ ለደቂቀ ፡ እስራኤል ፡ በዕለት ፡ አመ ፡ ሀለዉ ፡ ይስእሉ ፡ ንዋየ ፡ ወአልባሰ ፡ እምኀበ ፡ ሰብአ ፡ ግብጽ ፡ ንዋየ ፡ ብሩር ፡ ወንዋየ ፡ ወርቅ ፡ ወንዋየ ፡ ብርት ፡ ወከመ ፡ ይማህርክዎሙ ፡ ለግብጽ ፡ ህየንተ ፡ ተቀንዩ ፡ እንተ ፡ ቀነይዎሙ ፡ በግፍዕ ። ወኢያውፃእናሆሙ ፡ ለውሉደ ፡ እስራኤል ፡ እምግብጽ ፡ ዕራቆሙ ።

Chapter 49 ተዘከር ፡ ትእዛዘ ፡ ዘአዘዘከ ፡ እግዚአብሔር ፡ በእንተ ፡ ፋሲካ ፡ ከመ ፡ ትግበር ፡ በጊዜሁ ፡ አመ ፡ ዐሡር ፡ ወረቡዑ ፡ ለወርኅ ፡ ቀዳማዊ ፡ ከመ ፡ ትጥብሖ ፡ ዘእንበለ ፡ ይምሰይ ፡ ወከመ ፡ ይብልዕዎ ፡ በሌሊት ፡ አመ ፡ ምሴት ፡ ዘዐሡር ፡ ወኀሙስ ፡ እምጊዜ ፡ ዕርበተ ፡ ፀሐይ ፡ 2 እስመ ፡ በዛቲ ፡ ሌሊት ፡ ቀዳሜ ፡ በዓል ፡ ይእቲ ፡ ወቀዳሜ ፡ ፍሥሐ ፡ ይእቲ ፡ አንትሙ ፡ ትነብሩ ፡ ትብልዑ ፡ ጳስካ ፡ በግብጽ ። ወዛቲ ፡ ዘወሀበ ፡ እግዚአብሔር ፡ ሎሙ ፡ ውስተ ፡ ኵሉ ፡ ቤት ፡ ዘርእዩ ፡ ውስተ ፡ አንቀጹ ፡ ደመ ፡ በግዕ ፡ ዘዓመት ፡ ኢይባኡ ፡ ውስተ ፡ ቤቱ ፡ ለቀቲል ፡ አላ ፡ ይትዓደዉ ፡ ከመ ፡ ይድኀኑ ፡ ኵሎሙ ፡ እለ ፡ ውስተ ፡ ቤት ፡ እስመ ፡ ትእምርተ ፡ ደም ፡ ውስተ ፡ አንቀጹ ፡ ወገብሩ ፡ ኀይላቲሁ ፡ ለእግዚአብሔር ፡ ኵሎ ፡ ዘመጠነ ፡ አዘዞሙ ፡ እግዚአብሔር ፡ ወተዐደዉ ፡ እምኵሉ ፡ ደቂቀ ፡ እስራኤል ፡ ወኢቦአ ፡ ላዕሌሆሙ ፡ መቅሠፍት ፡ ለአማስኖ ፡ እምኔሆሙ ፡ ኵሎ ፡ ነፍሰ ፡ እምእንስሳ ፡ እስከ ፡ ሰብእ ፡ ወእስከ ፡ ከልብ ። ወኮነ ፡ መቅሠፍት ፡ በግብጽ ፡ ጥቀ ፡ ዐቢይ ፡ ወአልቦ ፡ ቤተ ፡ በግብጽ ፡ ዘአልቦ ፡ በድነ ፡ ውስቴታ ፡ ወብካየ ፡ ወዐውያተ ፡ 6 ወኵሉ ፡ እስራኤል ፡ ይነብር ፡ እንዘ ፡ ይበልዕ ፡ ሥጋ ፡ ጳስካ ፡ ወእንዘ ፡ ይሰቲ ፡ ወይነ ፡ ወይሴብሕ ፡ ወይባርክ ፡ ወያአኵት ፡ እግዚአብሔር ፡ አምላከ ፡ አበዊሁ ፡ ወድልወ ፡ ይከውን ፡ ለወፂእ ፡ እምአርዑተ ፡ ግብጽ ፡ ወእምቅኔ ፡ እኪት ። ወአንተኒ ፡ ተዘከር ፡ ዛተ ፡ ዕለተ ፡ ኵሎ ፡ መዋዕለ ፡ ሕይወትከ ፡ ወግበራ ፡ እምዓም ፡ ለዓም ፡ ኵሎ ፡ መዋዕለ ፡ ሕይወትከ ፡ ምዕረ ፡ ለዓመት ፡ በዕለቱ ፡ በከመ ፡ ኵሉ ፡ ሕጉ ፡ ወኢታስተኃልፍ ፡ ዕለተ ፡ እምዕለት ፡ ወእምወርኅ ፡ ለወርኅ ፡ 8 እስመ ፡ ሥርዐት ፡ ዘለዓለም ፡ ውእቱ ፡ ወቍሩጽ ፡ ውስተ ፡ ጽላተ ፡ ሰማይ ፡ ላዕለ ፡ ውሉደ ፡ እስራኤል ፡ ከመ ፡ ይግበርዎ ፡ በኵሉ ፡ ዓመት ፡ ወዓመት ፡ በዕለቱ ፡ ምዕረ ፡ በዓመት ፡ ውስተ ፡ ኵሉ ፡ ትውልዶሙ ፡ ወአልቦ ፡ ወሰነ ፡ መዋዕል ፡ እስመ ፡ ለዓለም ፡ ውእቱ ፡ ሥሩዕ ፡ ወብእሲ ፡ እንዘ ፡ ንጹሕ ፡ ውእቱ ፡ ወኢመጽአ ፡ ይግበሮ ፡ በጊዜ ፡ ዕለቱ ፡ ለአብኦ ፡ ቍርባን ፡ ዘይሠምር ፡ ቅድመ ፡ እግዚአብሔር ፡ ወለበሊዕ ፡ ወለሰቲይ ፡ በቅድመ ፡ እግዚአብሔር ፡ በዕለተ ፡ በዓሉ ፡ ወይሠረዉ ፡ ውእቱ ፡ ብእሲ ፡ ዘንጹሕ ፡ ወቅሩብ ፡ እስመ ፡ ቍርባነ ፡ እግዚአብሔር ፡ ኢያብአ ፡ በጊዜሁ ፡ ወኀጢአተ ፡ ይነሥእ ፡ ውእቱ ፡ ብእሲ ፡ ለርእሱ ፡ ከመ ፡ ይኩኑ ፡ ውሉደ ፡ እስራኤል ፡ እለ ፡ ይመጽኡ ፡ ወይገብሩ ፡ ጰስከ ፡ በዕለተ ፡ ጊዜሁ ፡ አመ ፡ ዐሡሩ ፡ ወረቡዑ ፡ ለወርኅ ፡ ቀዳማዊ ፡ በማእከለ ፡ ምስያታት ፡ እምሣልስታ ፡ ለዕለት ፡ እስከ ፡ ሣልስታ ፡ ለሌሊት ፡ እስመ ፡ ክልኤ ፡ መክፈልታ ፡ ለዕለት ፡ ተውህበ ፡ ለብርሃን ፡ ወሣልስታ ፡ ለምሴት ፡ ዝውእቱ ፡ ዘአዘዘከ ፡ እግዚአብሔር ፡ ከመ ፡ ትግበሮ ፡ በማእከለ ፡ ምሴታት ። ወኢይከውን ፡ ጠቢሖቱ ፡ በኵሉ ፡ ጊዜ ፡ ብርሃን ፡ ዘእንበለ ፡ ጊዜ ፡ ወሰነ ፡ ምሴት ፡ ወይበልዕዎ ፡ በጊዜ ፡ ምሴት ፡ እስከ ፡ ሣልስተ ፡ ሌሊት ፡ ወዘተርፈ ፡ እምኵሉ ፡ ሥጋሁ ፡ እምሣልስተ ፡ ሌሊት ፡ ወከሐ ፡ በእሳት ፡ ያውዕይዎ ። ወኢይከውን ፡ ያብስልዎ ፡ በማይ ፡ ወኢይብልዕዎ ፡ ጥራየ ፡ አላ ፡ ጥቡሰ ፡ በእሳት ፡ ብሱለ ፡ በእሳት ፡ በአስተሐምሞ ፡ ርእስ ፡ ምስለ ፡ ንዋየ ፡ ውስጡ ፡ ወምስለ ፡ እገሪሁ ። በእንተዝ ፡ አዘዞሙ ፡ እግዚአብሔር ፡ ለውሉደ ፡ እስራኤል ፡ ከመ ፡ ይግበሩ ፡ ጳስካ ፡ በዕለተ ፡ ጊዜሁ ። ወአንተሂ ፡ አዝዞሙ ፡ ለውሉደ ፡ እስራኤል ፡ ከመ ፡ ይግበሩ ፡ ጳስካ ፡ በመዋዕሊሆሙ ፡ በኵሉ ፡ ዓመት ፡ ምዕረ ፡ ለዓመት ፡ በዕለተ ፡ ጊዜሁ ፡ ወይመጽእ ፡ ተዝካር ፡ እምቅድመ ፡ እግዚአብሔር ፡ ዘይሠምር ፡ ወኢይመጽኦሙ ፡ መቅሠፍት ፡ ለቀቲል ፡ ወለማኅፀት ፡ በውእቱ ፡ ዓመት ፡ አመ ፡ ገብሩ ፡ ጳስካ ፡ በጊዜሁ ፡ በኵሉ ፡ በከመ ፡ ተአዘዘ ። ወኢይከውን ፡ እንከ ፡ ለበሊዖቱ ፡ በአፍአ ፡ እምቤተ ፡ መቅደሱ ፡ ለእግዚአብሔር ፡ ወበአንጸረ ፡ ቤተ ፡ መቅደሱ ፡ ለእግዚአብሔር ፡ ወኵሉ ፡ ሕዝበ ፡ ማኅበሮሙ ፡ ለእስራኤል ፡ ይግበርዎ ፡ በጊዜሁ ። ኵሉ ፡ ሰብእ ፡ ዘመጽአ ፡ በዕለቱ ፡ ይብልዖ ፡ በቤተ ፡ መቅደሱ ፡ ለአምላክክሙ ፡ በቅድመ ፡ እግዚአብሔር ፡ ዘእምዕሥራ ፡ ዓመት ፡ ወላዕለ ፡ እስመ ፡ ከመዝ ፡ ተጽሕፈ ፡ ወተሠርዐ ፡ ከመ ፡ ይብልዕዎ ፡ በቤተ ፡ መቅደሱ ፡ ለእግዚአብሔር ። ወእምከመ ፡ ቦኡ ፡ ውሉደ ፡ እስራኤል ፡ ውስተ ፡ ምድር ፡ እንተ ፡ ይእኅዙ ፡ ውስተ ፡ ምድረ ፡ ከናአን ፡ ወይተክሉ ፡ ደብተራ ፡ እግዚአብሔር ፡ ማእከለ ፡ ምድር ፡ ውስተ ፡ አሐዱ ፡ እምነ ፡ ሠራዊቶሙ ፡ እስከ ፡ አመ ፡ ይትሐነጽ ፡ መቅደሱ ፡ ለእግዚአብሔር ፡ በዲበ ፡ ምድር ። ወበመዋዕል ፡ አመ ፡ ተሐንጸ ፡ ቤት ፡ በስመ ፡ እግዚአብሔር ፡ በምድረ ፡ ርስቶሙ ፡ ህየ ፡ ይሖሩ ፡ ወይጥብሑ ፡ ጳስካ ፡ ምሴተ ፡ እንዘ ፡ የዐርብ ፡ ፀሐይ ፡ በትሥልስታ ፡ ለዕለት ፡ ወያዐርጉ ፡ ደሞ ፡ ውስተ ፡ ምክያዳ ፡ ለምሥዋዕ ፡ ወሥብሐ ፡ ያንብሩ ፡ ዲበ ፡ እሳት ፡ ዘላዕለ ፡ ምሥዋዕ ፡ ወሥጋሁ ፡ ይብልዑ ፡ ጥቡሰ ፡ በእሳት ፡ በውስተ ፡ ዐጸደ ፡ ቤተ ፡ መቅደስ ፡ በስመ ፡ እግዚአብሔር ። ወኢይክሉ ፡ ገቢረ ፡ ጳስካ ፡ በአህጉሪሆሙ ፡ ወበኵሉ ፡ በሓውርት ፡ ዘእንበለ ፡ በቅድመ ፡ ደብተራ ፡ እግዚአብሔር ፡ ወእመ ፡ አኮ ፡ በቅድመ ፡ ቤት ፡ ኀበ ፡ ኀደረ ፡ ስመ ፡ ዚአሁ ፡ ወስቴቱ ፡ ወኢይስሕቱ ፡ ድኅረ ፡ እግዚአብሔር ። ወአንተኒ ፡ ሙሴ ፡ አዝዞሙ ፡ ለውሉደ ፡ እስራኤል ፡ ወይዕቀቡ ፡ ሥርዐተ ፡ ጳስካ ፡ በከመ ፡ ተአዘዘ ፡ ለከ ፡ ከመ ፡ ትንግሮሙ ፡ ዓመቶ ፡ ለለ ፡ ዓመት ፡ ወዕለቶ ፡ ለዕለታት ፡ ወበዓለ ፡ ናእት ፡ ከመ ፡ ይብልዑ ፡ ናእተ ፡ ሰቡዐ ፡ ዕለተ ፡ ከመ ፡ ይግበሩ ፡ በዓሎ ፡ ከመ ፡ ያብኡ ፡ ቍርባኖ ፡ ዕለተ ፡ እምዕለት ፡ በእላ ፡ ሰቡዕ ፡ መዋዕለ ፡ ፍሥሐ ፡ ቅድመ ፡ እግዚአብሔር ፡ ዲበ ፡ ምሥዋዐ ፡ አምላክክሙ ፡ 23 እስመ ፡ ዛተ ፡ በዓለ ፡ በውልዋሌ ፡ ገበርክምዋ ፡ አመ ፡ ትወፅኡ ፡ እምግብጽ ፡ እስከ ፡ አመ ፡ ተዐድዉ ፡ ባሕረ ፡ ውስተ ፡ ገዳመ ፡ ሱር ፡ እስመ ፡ በኀበ ፡ ድንጋገ ፡ ባሕር ፡ ሰለጥክምዋ ።

Chapter 50 ወእምድኅረዝ ፡ ሕግ ፡ አይዳዕኩከ ፡ መዋዕለ ፡ ሰንበታት ፡ በገዳመ ፡ ሲና ፡ እንተ ፡ ይእቲ ፡ ማእከለ ፡ ኤሊም ፡ ወሲና ፡ ወሰንበታተ ፡ ምድርኒ ፡ ነገርኩከ ፡ በደብረ ፡ ሲና ፡ ወዓመታተ ፡ ኢዮቤሌዎኒ ፡ ውስተ ፡ ሰንበታተ ፡ ዓመታት ፡ ወዓመቶሰ ፡ ኢነገርናከ ፡ እስከ ፡ አመ ፡ ትበውኡ ፡ ውስተ ፡ ምድር ፡ እንተ ፡ ትእኅዙ ፡ ወታሰነብት ፡ ምድርኒ ፡ ሰንበታቲሃ ፡ በነቢሮቶሙ ፡ ዲቤሃ ፡ ወዓመቶ ፡ ለኢዮቤል ፡ ያእምሩ ። በእንተዝ ፡ ሠራዕኩ ፡ ለከ ፡ ሱባዔ ፡ ዓመታት ፡ ወኢዮቤሌዎታተ ፡ አርብዓ ፡ ወተስዐቱ ፡ ኢዮቤሌዎታት ፡ እምነ ፡ መዋዕሊሁ ፡ ለአዳም ፡ እስከ ፡ ዛቲ ፡ ዕለት ፡ ወሱባዔ ፡ አሐዱ ፡ ወክልኤ ፡ ዓመታት ፡ ወዓዲ ፡ አርብዓ ፡ ዓመት ፡ ርሑቅ ፡ ለአእምሮ ፡ ትእዛዛተ ፡ እግዚአብሔር ፡ እስከ ፡ አመ ፡ ያዐድው ፡ ማዕዶተ ፡ ምድረ ፡ ከናአን ፡ ዐዲዎሙ ፡ ዮርዳኖስ ፡ ገጸ ፡ ዐረቢሁ ፡ ወኢዮቤሌዎታት ፡ የኀልፉ ፡ እስከ ፡ አመ ፡ ይነጽሕ ፡ እስራኤል ፡ እምኵሉ ፡ አበሳ ፡ ዝሙት ፡ ወርኵስ ፡ ወግማኔ ፡ ወኀጢአት ፡ ወጌጋይ ፡ ወየኀድር ፡ ውስተ ፡ ኵሉ ፡ ምድር ፡ እንዘ ፡ ይትአመን ፡ ወአልቦ ፡ እንከ ፡ ሎቱ ፡ መነሂ ፡ ሰይጣነ ፡ ወአልቦ ፡ መነሂ ፡ እኩየ ፡ ወትነጽሕ ፡ ምድር ፡ እምውእቱ ፡ ጊዜ ፡ እስከ ፡ ኵሉ ፡ መዋዕል ። ወናሁ ፡ ትእዛዘ ፡ ሰንበታትኒ ፡ ጸሐፍኩ ፡ ለከ ፡ ወኵሉ ፡ ፍትሐተ ፡ ሕገጊሁ ፡ ሰዱሰ ፡ ዕለተ ፡ ትገብር ፡ ግብረ ፡ ወአመ ፡ ሳብዕት ፡ ዕለት ፡ ሰንበት ፡ ዘእግዚአብሔር ፡ አምላክክሙ ፡ ኢትግበሩ ፡ ባቲ ፡ ኵሎ ፡ ግብረ ፡ አንትሙ ፡ ወውሉድክሙ ፡ ወአግብርቲክሙ ፡ ወአእማቲክሙ ፡ ወኵሉ ፡ እንስሳክሙ ፡ ወነኪርኒ ፡ ዘኀቤክሙ ። ወሰብእ ፡ ዘይገብር ፡ ምንተሂ ፡ ግብረ ፡ ባቲ ፡ ይሙት ፡ ኵሉ ፡ ብእሲ ፡ ዘይጌምና ፡ ለዛ ፡ ዕለት ፡ ዘይሰክብ ፡ ምስለ ፡ ብእሲት ፡ ወዘሂ ፡ ይትናገር ፡ ነገረ ፡ ምግባር ፡ ባቲ ፡ ከመ ፡ ይግበር ፡ ባቲ ፡ ገዪሶ ፡ ወበእንተኒ ፡ ኵሉ ፡ ሠዪጥ ፡ ወተሣይጦ ፡ ወዘሂ ፡ ማየ ፡ ይቀድሕ ፡ ባቲ ፡ ዘኢያስተዳለወ ፡ ሎቱ ፡ በዕለተ ፡ ሳድስት ፡ ወዘኒ ፡ አንሥአ ፡ ዘይጸውር ፡ ኵሎ ፡ ከመ ፡ ያውፅእ ፡ እምደብተራሁ ፡ ወእመኒ ፡ እምቤቱ ፡ ይሙት ። ኢትግበሩ ፡ ሰንበት ፡ ምንተሂ ፡ ግብረ ፡ ዘኢያስተዳለውክምዎ ፡ ለክሙ ፡ በዕለተ ፡ ሳድስት ፡ ለበሊዕ ፡ ወለሰቲይ ፡ ወለአዕርፎ ፡ ወለአሰንብቶ ፡ እምኵሉ ፡ ግብር ፡ በዛቲ ፡ ዕለት ፡ ወለባርኮ ፡ እግዚአብሔር ፡ አምላክክሙ ። እስመ ፡ ዐባይ ፡ ክብር ፡ እንተ ፡ ወሀበ ፡ እግዚአብሔር ፡ ለእስራኤል ፡ ለበሊዕ ፡ ወለሰቲይ ፡ ወለጸጊብ ፡ በዛቲ ፡ ዕለተ ፡ በዓል ፡ ወለአዕርፎ ፡ ባቲ ፡ እምኵሉ ፡ ግብር ፡ ዘእምግብረ ፡ እጓለ ፡ እመሕያው ፡ ዘእንበለ ፡ ዐጢነ ፡ ዕጣን ፡ ወለአብኦ ፡ ቍርባን ፡ ወመሥዋዕት ፡ ቅድመ ፡ እግዚአብሔር ፡ ለመዋዕል ፡ ወለሰንበታት ፡ ዝግብር ፡ ባሕቲቱ ፡ ይትገበር ፡ በመዋዕለ ፡ ሰንበታት ፡ በቤተ ፡ መቅደሱ ፡ ለእግዚአብሔር ፡ አምላክክሙ ፡ ከመ ፡ ያስተስርዩ ፡ ዲበ ፡ እስራኤል ፡ መባአ ፡ ወትረ ፡ ዕለተ ፡ እምዕለት ፡ ለተዝካር ፡ ዘይሠጠው ፡ ቅድመ ፡ እግዚአብሔር ፡ ወይትወከፎሙ ፡ ለዓለም ፡ ዕለተ ፡ እምዕለት ፡ በከመ ፡ ተአዘዝከ ። ወኵሉ ፡ ሰብእ ፡ ዘይገብር ፡ ግብረ ፡ ወዘሂ ፡ የሐውር ፡ መንገደ ፡ ወዘሂ ፡ ይትቀነይ ፡ ወፍረ ፡ ወእመሂ ፡ በቤቱ ፡ ወእመሂ ፡ በኵሉ ፡ መካን ። ወሰብእ ፡ ዘይገብር ፡ ኵሎ ፡ ዘእምዝ ፡ በዕለተ ፡ ሰንበት ፡ ይሙት ። ተፈጸመ ፡ በዝየ ፡ ነገር ፡ ዘኩፋሌ ፡ መዋዕል ።

standard printed EOTC Bible edition

Introduction ዝንቱ፡ ነገረ፡ ኩፋሌ፡ ዘመዋዕላተ፡ ሕግ፡ ወስምዕ፡ ለግብረተ፡ ዓመታት፡ ለተሰብኦቶሙ፡ ለኢዮቤላውስቲሆሙ፡ ውስተ፡ ኵሉ፡ ዓመታተ፡ ዓለም። በከመ፡ ተናገሮ፡ ለሙሴ፡ በደብረ፡ ሲና፡ አመ፡ ዐርገ፡ ይንሣእ፡ ጽላተ፡ እብን፡ ዘሕግ፡ ወትእዛዝ፡ በቃለ፡ እግዚአብሔር፡ በከመ፡ ይቤሎ፡ ዕርግ፡ ውስተ፡ ርእሰ፡ ደብር።

Chapter 1 ወኮነ፡ በቀዳሚ፡ ዓመት፡ ዘፀአቶሙ፡ ለደቂቀ፡ እስራኤል፡ እምነ፡ ግብጽ፡ በወርኀ፡ ሣልስ፡ አመ፡ ዐሡር፡ ወሰዱሱ፡ ለውእቱ፡ ወርኅ፡ ተናገሮ፡ እግዚአብሔር፡ ለሙሴ፡ እንዘ፡ ይብል፡ ዕርግ፡ ኀቤየ፡ ዝየ፡ ውስተ፡ ደብር፡ ወእሁበከ፡ ክልኤተ፡ ጽላተ፡ እብን፡ ዘሕግ፡ ወዘትእዛዝ፡ ዘመጠነ፡ ጸሐፍከ፡ ከመ፡ ታለብዎሙ። ወዐርገ፡ ሙሴ፡ ውስተ፡ ደብረ፡ እግዚአብሔር፡ ወኀደረ፡ ስብሐተ፡ እግዚአብሔር፡ ውስተ፡ ደብረ፡ ሲና፡ ወጸለሎ፡ ደመና፡ ሰዱሰ፡ ዕለተ። ወጸውዖ፡ ለሙሴ፡ በዕለት፡ ሳብዕት፡ በማእከለ፡ ደመና፡ ወርእየ፡ ስብሐተ፡ እግዚአብሔር፡ ከመ፡ እሳት፡ ዘይነድድ፡ ውስተ፡ ርእሰ፡ ደብር። ወሀሎ፡ ሙሴ፡ ውስተ፡ ደብር፡ አርብዐ፡ መዓልተ፡ ወአርብዐ፡ ሌሊተ፡ ወአመሮ፡ እግዚአብሔር፡ ዘቀዳሚ፡ ወዘኒ፡ ይመጽእ፡ ነገረ፡ ኩፋሌ፡ ኵሉ፡ መዋዕለ፡ ሕግ፡ ወስምዕ። ወይቤሎ፡ አንብር፡ ልበከ፡ ውስተ፡ ኵሉ፡ ነገር፡ ዘአነ፡ እነግረከ፡ በዝንቱ፡ ደብር፡ ወጸሐፎ፡ ውስተ፡ መጽሐፍ፡ ከመ፡ ይርአዩ፡ ትውልዶሙ፡ ከመ፡ ኀደግዎሙ፡ በእንተ፡ ኵሉ፡ እከይ፡ ዘገብሩ፡ ለአስሕቶ፡ ሥርዐት፡ ዘአነ፡ እሠርዕ፡ ማእከሌየ፡ ወማእከሌከ፡ ዮም፡ ለትውልዶሙ፡ በደብረ፡ ሲና፡ ዘይከውን። ወይዜኑ፡ ከመ፡ ዝ፡ አመ፡ ይመጽእ፡ ኵሉ፡ ዝ፡ ነገር፡ ላዕሌሆሙ፡ ወየአምሩ፡ ከመ፡ ጸደቁ፡ አነ፡ እምኔሆሙ፡ በኵሉ፡ ፍትሖሙ፡ ወበኵሉ፡ ምግባሮሙ፡ ወየአምሩ፡ ከመ፡ ህልወ፡ ኮንኩ፡ ምስሌሆሙ። ወአንተኒ፡ ጸሐፍ፡ ለከ፡ ኵሎ፡ ዘቃለ፡ ዘአነ፡ አየድዐከ፡ ዮም፡ እስመ፡ አነ፡ ኣአምር፡ ምረቶሙ፡ ወክሳዶሙ፡ ይቡሰ፡ ዘእንበለ፡ አብኦሙ፡ ውስተ፡ ምድር፡ እንተ፡ መሐልኩ፡ ለአብርሃም፡ ወለይስሐቅ፡ ወለያዕቆብ፡ እንዘ፡ እብል፡ ለዘርዕክሙ፡ እሁብ፡ ምድረ፡ እንተ፡ ትውሕዝ፡ ሐሊበ፡ ወመዓረ፡ ወይበልዑ፡ ወይጸግቡ፡ ወይትመየጡ፡ ኀበ፡ አምላክ፡ ነኪር፡ ኀበ፡ እለ፡ ኢያድኅንዎሙ፡ እምኵሉ፡ ምንዳቤሆሙ። ወትሰማዕ፡ ዛቲ፡ ስምዕ፡ ለስምዕ፡ ሎሙ፡ እስመ፡ ይረስዑ፡ ኵሎ፡ ትእዛዝየ፡ ዘአነ፡ እኤዝዞሙ፡ ወየሐውሩ፡ ድኅረ፡ አሕዛብ፡ ወድኅረ፡ ርኵሶሙ፡ ወድኅረ፡ ኀሳሮሙ፡ ወይትቀነዩ፡ ለአማልክቲሆሙ፡ ወይከውንዎሙ፡ ማዕቅፈ፡ ለምንዳቤ፡ ወለጻዕር፡ ወለመሥገርት። ወይትሀጐሉ፡ ብዙኃን፡ ወይትአኀዙ፡ ወይወድቁ፡ ውስተ፡ እደ፡ ፀር፡ እስመ፡ ኀደጉ፡ ሥርዐትየ፡ ወትእዛዝየ፡ ወበዓላተ፡ ኪዳንየ፡ ወሰንበታትየ፡ ወቅድሳትየ፡ ዘቀደስኩ፡ ሊተ፡ በማእከሎሙ፡ ወደብተራየ፡ ወመቅደስየ፡ ዘቀደስኩ፡ ሊተ፡ በማእከለ፡ ምድር፡ ከመ፡ እሢም፡ ስምየ፡ ላዕሌሁ፡ ወይኅድር። ወይገብሩ፡ ሎሙ፡ ፍሥሓታተ፡ ወዖመ፡ ወግልፎ፡ ወይሰግዱ፡ ዘዘ፡ ዚኣሆሙ፡ ለስሒት፡ ወይዘብሑ፡ ውሉዶሙ፡ ለአጋንንት፡ ወለኵሉ፡ ግብረ፡ ስሕተተ፡ ልቦሙ፡ ወእፌኑ፡ ላዕሌሆሙ፡ ሰማዕተ፡ ከመ፡ ኣስምዕ፡ ሎሙ፡ ወኢይሰምዑ፡ ወሰማዕተኒ፡ ይቀትሉ። ወለእለሂ፡ የኀሥሡ፡ ሕገ፡ ይቀትልዎሙ፡ ወይሰድድዎሙ፡ ወኵሎ፡ ያጸርዑ፡ ወይዌጥኑ፡ ለገቢረ፡ እኩይ፡ በቅድመ፡ አዕይንትየ። ወአኀብእ፡ ገጽየ፡ እምኔሆሙ፡ ወእሜጥዎሙ፡ ውስተ፡ እደ፡ አሕዛብ፡ ለፂዋዌ፡ ወለሕብልያ፡ ወለተበልዖ፡ ወአሴስሎሙ፡ እማእከለ፡ ምድር፡ ወእዘርዎሙ፡ ማእከለ፡ አሕዛብ። ወይረስዑ፡ ኵሎ፡ ሕግየ፡ ወኵሎ፡ ትእዛዝየ፡ ወኵሎ፡ ፍትሕየ፡ ወይስዕሩ፡ ሠርቀ፡ ወሰንበተ፡ ወበዓለ፡ ወኢዮቤለ፡ ወሥርዓተ። ወእምዝ፡ ይትመየጡ፡ ኀቤየ፡ እማእከለ፡ አሕዛብ፡ በኵሉ፡ ልቦሙ፡ ወበኵሉ፡ ነፍሶሙ፡ ወበኵሉ፡ ኀይሎሙ፡ ወአስተጋብኦሙ፡ እማእከለ፡ ኵሉ፡ አሕዛብ። ወየኀሥሡኒ፡ ከመ፡ እትራከቦሙ፡ ወሶበ፡ የኀሥሡኒ፡ በኵሉ፡ ልቦሙ፡ ወበኵሉ፡ ነፍሶሙ፡ አነ፡ እከሥት፡ ሎሙ፡ ብዙኀ፡ ሰላመ፡ በጽድቅ፡ ወአፈልሶሙ፡ ተክለ፡ ርትዕ፡ በኵሉ፡ ልብየ፡ ወበኵሉ፡ ነፍስየ። ወይከውኑ፡ ለበረከት፡ ወአኮ፡ ለመርገም፡ ወይከውኑ፡ ርእሰ፡ ወአኮ፡ ዘነበ፡ ወአሐንጽ፡ መቅደስየ፡ ማእከሎሙ፡ ወአኀድር፡ ምስሌሆሙ፡ ወእከውኖሙ፡ አምላኮሙ፡ ወእሙንቱኒ፡ ይከውኑኒ፡ ሕዝብየ፡ ዘበአማን፡ ወዘበጽድቅ፡ ወኢየኀድጎሙ፡ ወኢይትናከሮሙ፡ እስመ፡ አነ፡ እግዚአብሔር፡ አምላኮሙ። ወወድቀ፡ ሙሴ፡ በገጹ፡ ወጸለየ፡ ወይቤ፡ እግዚኦ፡ አምላኪየ፡ ኢትኅድግ፡ ሕዝበከ፡ ወርስተከ፡ ለሐዊር፡ በስሕተተ፡ ልቦሙ፡ ወኢትመጥዎሙ፡ ውስተ፡ እደ፡ አሕዛብ፡ ከመ፡ ይኰንንዎሙ፡ ወከመ፡ ኢይግበርዎሙ፡ ከመ፡ ይኅጥኡ፡ ለከ። ይትለዐል፡ እግዚኦ፡ ምሕረትከ፡ ላዕለ፡ ሕዝብከ፡ ወፍጥር፡ ሎሙ፡ መንፈሰ፡ ርቱዐ፡ ወኢይኰንኖሙ፡ መንፈሰ፡ ቤልሖር፡ ለአስተዋድዮቶሙ፡ ቅድሜከ፡ ወለአዕቅጾቶሙ፡ እምኵሉ፡ ፍኖተ፡ ጽድቅ፡ ከመ፡ ይትሐጐሉ፡ እምቅድመ፡ ገጽከ። ወእሙንቱ፡ ሕዝብከ፡ ወርስትከ፡ ዘባላሕከ፡ በኀይልከ፡ ዐቢይ፡ እምእደ፡ ግብጽ። ወይቤሎ፡ እግዚአብሔር፡ ለሙሴ፡ አነ፡ አአምር፡ ተዋሥኦቶሙ፡ ወኅሊናሆሙ፡ ወይቡሰ፡ ክሳዶሙ፡ ወኢይሰምዑ፡ እስከ፡ ሶበ፡ ያአምሩ፡ ኃጢአቶሙ፡ ወኃጣውአ፡ አበዊሆሙ። ወእምድኅረ፡ ዝንቱ፡ ይትመየጡ፡ ኀቤየ፡ በኵሉ፡ ርትዕ፡ ወበኵሉ፡ ልብ፡ ወበኵሉ፡ ነፍስ። ወትተሉ፡ ነፍሶሙ፡ ኀቤየ፡ ወበኵሉ፡ ትእዛዝየ፡ ወይገብሩ፡ ሎሙ፡ ትእዛዛትየ፡ ወእከውኖሙ፡ አበ፡ ወእሙንቱ፡ ይከውኑኒ፡ ውሉደ። ወይሰመዩ፡ ኵሎሙ፡ ውሉደ፡ አምላክ፡ ሕያው፡ ወየአምሮሙ፡ ኵሉ፡ መልአክ፡ ወኵሉ፡ መንፈስ፡ ወያአምርዎሙ፡ ከመ፡ እሙንቱ፡ ውሉድየ፡ ወአነ፡ አቡሆሙ፡ በርትዕ፡ ወበጽድቅ፡ ወአፈቅሮሙ። ወአንተ፡ ጸሐፍ፡ ለከ፡ ኵሎ፡ ዘንተ፡ ነገረ፡ ዘአነ፡ አየድዐከ፡ በዝንቱ፡ ደብር፡ ዘቀዳሚ፡ ወዘደኃሪ፡ ወዘይመጽእ፡ ሀሎ፡ በኵሉ፡ ኩፋሌ፡ መዋዕል፡ ዘበሕግ፡ ወዘበስምዕ፡ ወበሱባዔሆሙ፡ ለኢዮቤልዎን፡ እስከ፡ ለዓለም። ወይቤሎ፡ ለመልአከ፡ ገጽ፡ ጸሐፍ፡ ለሙሴ፡ እምቀዳሚ፡ ፍጥረት፡ እስከ፡ አመ፡ ይትሐነጽ፡ መቅደስየ፡ በማእከሎሙ፡ ለዓለመ፡ ዓለማት። ወያስተርኢ፡ እግዚአብሔር፡ ለዐይነ፡ ኵሉ፡ ወያአምር፡ ኵሉ፡ ከመ፡ አነ፡ አምላከ፡ እስራኤል፡ ወአብ፡ ለኵሎሙ፡ ደቂቀ፡ ያዕቆብ፡ ወንጉሥ፡ በደብረ፡ ጽዮን፡ ለዓለመ፡ ዓለም፡ ወትከውን፡ ጽዮን፡ ወኢየሩሳሌም፡ ቅድስት። ወነሥአ፡ መልአከ፡ ገጽ፡ ዘየሐውር፡ ቅድመ፡ ተዓይኒሆሙ፡ ለእስራኤል፡ ጽላተ፡ ዘኩፋሌ፡ ዓመታት፡ እምአመ፡ ፍጥረተ፡ ሕግ፡ ወለስምዕ፡ ለሱባዔሁ፡ ለኢዮቤልዎን፡ በበ፡ ዓመት፡ በኵሉ፡ ኆልቆሙ፡ ወኢዮቤልዎን፡ እምዕለተ፡ ፍጥረት፡ ሐዳስ፡ አመ፡ ይትሐደስ፡ ሰማያት፡ ወምድር፡ ወኵሉ፡ ፍጥረቶሙ፡ በከመ፡ ኀይላቲሆሙ፡ ለሰማይ፡ ወበከመ፡ ኵሉ፡ ፍጥረተ፡ ምድር፡ እስከ፡ አመ፡ ይትፈጠር፡ መቅደሰ፡ እግዚአብሔር፡ በኢየሩሳሌም፡ በደብረ፡ ጽዮን።

Chapter 2 ወይቤ፡ መልአከ፡ ገጽ፡ ለሙሴ፡ በቃለ፡ እግዚአብሔር፡ እንዘ፡ ይብል፡ ጸሐፍ፡ ኵሎ፡ ነገረ፡ ፍጥረት፡ ከመ፡ በሰዱስ፡ ዕለት፡ ፈጸመ፡ እግዚአብሔር፡ አምላክ፡ ኵሎ፡ ግብሮ፡ ወኵሎ፡ ዘፈጠረ፡ ወአሰንበተ፡ በዕለተ፡ ሳብዕት፡ ወቀደሳ፡ ለኵሉ፡ ዓለማት፡ ወአንበራ፡ ትእምርተ፡ ለኵሉ፡ ግብሩ። እስመ፡ በዕለት፡ ቀዳሚት፡ ፈጠረ፡ ሰማያተ፡ እለ፡ መልዕልት፡ ወምድረ፡ ወማያተ፡ ወኵሉ፡ መንፈስ፡ ዘይትለአክ፡ ቅድሜሁ፡ ወመላእክተ፡ ገጽኒ፡ ወመላእክተ፡ ቅዳሴ፡ ወመላእክተ፡ መንፈሰ፡ እሳት፡ ወመላእክተ፡ መንፈሰ፡ እስትንፋስ፡ ወመላእክተ፡ መንፈሰ፡ ደመናት፡ ለጽልመት፡ ወለኵሉ፡ ወለበረድ፡ ወለአስሐትያ፡ ወመላእክተ፡ ቃላት፡ ወነጐድጓዳት፡ ወለመባርቅት፡ ወመላእክተ፡ መናፍስት፡ ለቍር፡ ወለመርቄ፡ ወለክረምት፡ ወለመጸው፡ ወለማእረር፡ ወለሐጋይ፡ ወለኵሉ፡ መናፍስተ፡ ተግባሩ፡ ዘበሰማያት፡ ወዘበምድር፡ ወዘበኵሉ፡ ቀላያት፡ ወጽልመት፡ ወብርሃን፡ ወጎሕ፡ ወምሴት፡ ዘአስተዳለወ፡ በአእምሮ፡ ልቡ። ወአሜሃ፡ ርኢነ፡ ምግባሮ፡ ወባረክናሁ፡ ወሰባሕነ፡ ቅድሜሁ፡ በእንተ፡ ኵሉ፡ ምግባሩ፡ እስመ፡ ሰብዓተ፡ ግብረ፡ ዐበይተ፡ ገብረ፡ በቀዳሚት፡ ዕለት። ወበዕለተ፡ ሳኒታ፡ ገብረ፡ ምጽናዓተ፡ ማእከለ፡ ማይ፡ ወተከፍለ፡ ማያት፡ በይእቲ፡ ዕለት፡ መንፈቆሙ፡ ዐርጉ፡ ላዕለ፡ ወመንፈቆሙ፡ ወረዱ፡ መትሕተ፡ ምጽናዓት፡ ማእከለ፡ ዲበ፡ ገጻ፡ ለኵላ፡ ምድር፡ ወዘንተ፡ ባሕቲቶ፡ ግብረ፡ ገብረ፡ በሳኒታ፡ ዕለት። ወበሣልስት፡ ዕለት፡ ገብረ፡ በከመ፡ ይቤ፡ ለማያት፡ ይኅልፉ፡ እምቅድመ፡ ገጻ፡ ለኵላ፡ ምድር፡ ውስተ፡ መካን፡ አሐዱ፡ ወያስተርኢ፡ የብስ። ወገብሩ፡ ከማሁ፡ ማያት፡ በከመ፡ ይቤሎሙ፡ ወተግሕሡ፡ እምዲበ፡ ገጻ፡ ለምድር፡ ውስተ፡ መካን፡ አሐዱ፡ አፍአ፡ እምጽናዓተዝ፡ ወአስተርአየት፡ የብስ። ወበይእቲ፡ ዕለት፡ ፈጠረ፡ ላቲ፡ ኵሎ፡ አብሕርተ፡ በበ፡ ምጉባኢሆሙ፡ ወኵሎሙ፡ አፍላግ፡ ወምጉባኢሆሙ፡ ለማያት፡ ውስተ፡ አድባር፡ ወውስተ፡ ኵሉ፡ ምድር። ወበዕለተ፡ ራብዕት፡ ገብረ፡ እግዚአብሔር፡ ፀሐየ፡ ወወርኀ፡ ወከዋክብተ፡ ወአንበሮሙ፡ ውስተ፡ ምጽናዓተ፡ ሰማይ፡ ከመ፡ ያብርሁ፡ ውስተ፡ ኵሉ፡ ምድር። ወወሀበ፡ እግዚአብሔር፡ ፀሐየ፡ ለትእምርት፡ ዐቢይ፡ ዲበ፡ ምድር፡ ለመዋዕል፡ ወለሰንበት፡ ወለአውራኅ፡ ወለበዓላት፡ ወለዓመታት፡ ወለሰንበታተ፡ ዓመታት፡ ወለኢዮቤልዉሳት፡ ወለኵሉ፡ ጊዜ፡ ለዓመታት። ወይፈልጥ፡ ማእከለ፡ ብርሃን፡ ወማእከለ፡ ጽልመት፡ ወለጥዕዮ፡ ከመ፡ ይጥዒ፡ ኵሉ፡ ዘይሠርፅ፡ ወይልህቅ፡ ዲበ፡ ምድር። ወበዕለተ፡ ኃምስት፡ ፈጠረ፡ ዐናብርተ፡ ዐበይተ፡ ማእከለ፡ ቀላያተ፡ ማያት፡ እስመ፡ ዝንቱ፡ ተገብረ፡ ቀዳሚ፡ በእደዊሁ፡ ዘሥጋ፡ ወኵሉ፡ ዘይትሐወስ፡ ውስተ፡ ማያት፡ ዓሣት፡ ወኵሉ፡ ዘይሰርር፡ አዕዋፈ፡ ወኵሎ፡ ዘመዶሙ። ወሠረቀ፡ ፀሐይ፡ ላዕሌሆሙ፡ ለጥዒና፡ ወላዕለ፡ ኵሉ፡ ዘሀሎ፡ ውስተ፡ ምድር። ወበዕለተ፡ ሳድስት፡ ገብረ፡ ኵሎ፡ አራዊተ፡ ምድር፡ ወኵሎ፡ እንስሳ፡ ወኵሎ፡ ዘይትሐወስ፡ ዲበ፡ ምድር። ወእምድኅረ፡ ዝኵሉ፡ ገብረ፡ ሰብአ፡ አሐደ፡ ብእሴ፡ ወብእሲተ፡ ገብሮሙ፡ ወአስለጦ፡ ለኵሉ፡ ዘዲበ፡ ምድር፡ ወዘውስተ፡ አብሕርት፡ ወዲበ፡ ዘይሰርር፡ ወዲበ፡ አራዊት፡ ወዲበ፡ እንስሳ፡ ወዲበ፡ ኵሉ፡ ዘይትሐወስ፡ ዲበ፡ ምድር፡ ወላዕለ፡ ኵሉ፡ ምድር፡ ወዲበ፡ ዝኵሉ፡ አስለጦ። ወኮነ፡ ኵሉ፡ ዕሥራ፡ ወክልኤቱ፡ ዘመድ። ወፈጸመ፡ ኵሎ፡ ግብሮ፡ በዕለተ፡ ሳድስት፡ ኵሎ፡ ዘበሰማይ፡ ወዘበምድር፡ ወውስተ፡ አብሕርት፡ ወውስተ፡ ቀላያት፡ ወውስተ፡ ብርሃን፡ ወውስተ፡ ጽልመት፡ ወውስተ፡ ኵሉ። ወወሀበነ፡ ትእምርተ፡ ዐቢየ፡ ዕለተ፡ ሰንበታት፡ ከመ፡ ንኩን፡ እንዘ፡ ንገብር፡ ሰዱሰ፡ ዕለተ፡ ግብረ፡ ወናሰንብት፡ አመ፡ ዕለተ፡ ሳብዕት፡ እምኵሉ፡ ግብር። ኵሎሙ፡ መላእክተ፡ ገጽ፡ ወኵሎሙ፡ መላእክተ፡ ቅድሳት፡ ክልኤተ፡ ዘመደ፡ ዐበይተ፡ ዘንተ፡ ይቤለነ፡ ናሰንብት፡ ምስሌሁ፡ በሰማይ፡ ወበምድር። ወይቤለነ፡ ናሁ፡ አነ፡ እፈልጥ፡ ሊተ፡ ሕዝበ፡ እማእከለ፡ አሕዛብየ፡ ወያሰነብቱ፡ እሙንቱኒ፡ ወእቄድሶ፡ ሊተ፡ ለሕዝብ፡ ወእባርኮ፡ በከመ፡ ቀደስክዋ፡ ለዕለተ፡ ሰንበት፡ ወእቄድሶ፡ ሊተ፡ ወከመዝ፡ እባርኮ፡ ወይከውኑኒ፡ ሕዝብየ፡ ወአነ፡ እከውኖሙ፡ አምላከ። ወኀረይኩ፡ በዘርአ፡ ያዕቆብ፡ በኵሉ፡ እምዘርኢኩ፡ ወጸሐፍክዎ፡ ሊተ፡ ወልደ፡ በኵረ፡ ወቀደስክዎ፡ ሊተ፡ ለዓለመ፡ ዓለም። ወግብረ፡ ቦቱ፡ ትእምርተ፡ ከማሁ፡ በዘ፡ ያሰነብቱ፡ እሙንቱኒ፡ ምስሌነ፡ በዕለተ፡ ሳብዕት፡ ለበሊዕ፡ ወለሰቲይ፡ ወለባርኮ፡ ዘፈጠረ፡ ኵሎ፡ በከመ፡ ባረኮ፡ ወቀደሶ፡ ሎቱ፡ ሕዝበ፡ ዘያስተርኢ፡ እምኵሉ፡ አሕዛብ፡ ወከመ፡ ያሰንብቱ፡ ኅቡረ፡ ምስሌነ። ወገብረ፡ ፈቃዳቲሁ፡ ይዕርግ፡ መዓዛ፡ ሠናይ፡ ዘይትወከፍ፡ ቅድሜሁ፡ ኵሎ፡ መዋዕለ። ዕሥራ፡ ወክልኤ፡ አርእስተ፡ ሰብእ፡ እምአዳም፡ እስከኔሁ። ወተውህበ፡ ለዝንቱ፡ ከመ፡ ይኩኑ፡ ኵሎ፡ መዋዕለ፡ ቡሩካነ፡ ወቅዱሳነ። ፈጠረ፡ ሰማየ፡ ወምድረ፡ ወኵሎ፡ ዘተፈጥረ፡ በሰዱስ፡ ዕለት። ወአንተ፡ አዝዝ፡ ለደቂቀ፡ እስራኤል፡ ወይዕቀቡ፡ ዕለተ፡ ዛቲ፡ ይቀድስዋ፡ ወከመ፡ ኢይግበሩ፡ ባቲ፡ ኵሎ፡ ግብረ፡ ወከመ፡ ኢያርኵስዋ፡ እስመ፡ ቅድስት፡ ይእቲ፡ እምኵሉ፡ መዋዕል። ኵሉ፡ ዘያጌምና፡ ሞተ፡ ይሙት፡ ወኵሉ፡ ዘይገብር፡ ባቲ፡ ኵሎ፡ ግብረ፡ ሞተ፡ ይሙት፡ ለዓለም። ወኵሉ፡ ሰብእ፡ ዘየዐቅብ፡ ወያሰነብት፡ ባቲ፡ እምኵሉ፡ ግብሩ፡ ቅዱሰ፡ ወቡሩከ፡ ይከውን፡ በኵሉ፡ መዋዕል፡ ከማነ። አይድዕ፡ ወንግር፡ ለደቂቀ፡ እስራኤል፡ ኵነኔሃ፡ ለዛቲ፡ ዕለት፡ ወያሰንብቱ፡ ባቲ፡ ወኢይኅድግዋ፡ በስሕተተ፡ ልቦሙ፡ ከመ፡ ኢይኩኑ፡ ለገቢረ፡ ግብር፡ ባቲ፡ ዘኢይከውን፡ ዘያስተርኢ፡ ለገቢረ፡ ባቲ፡ ፈቃዶሙ። ወኢያውፅኡ፡ ወኢያብኡ፡ እምቤት፡ ቤተ፡ በዛቲ፡ ዕለት፡ እስመ፡ ቅድስት፡ ይእቲ፡ ወቡርክት፡ ይእቲ፡ እምኵሉ፡ ዕለተ፡ ኢዮቤል፡ ዘኢዮቤልዉሳት፡ ባቲ፡ አሰንበትነ፡ በሰማያት፡ ዘእንበለ፡ ይትአመር፡ ለኵሉ፡ ዘሥጋ፡ ለአሰንብቶ፡ ባቲ፡ በምድር። ወባረከ፡ ፈጣሬ፡ ኵሉ፡ ወኢቀደሰ፡ ኵሎ፡ ሕዝበ፡ ወአሕዛበ፡ ለአሰንብቶ፡ ባቲ፡ ዘእንበለ፡ እስራኤልሃ፡ ባሕቲቶ፡ ሎቱ፡ ለባሕቲቱ፡ ወሀቦ፡ ይብልዑ፡ ወይስተዩ፡ ወለአሰንብቶ፡ ባቲ፡ ዲበ፡ ምድር። ወባረካ፡ ፈጣሬ፡ ኵሉ፡ ዘፈጠረ፡ ዛተ፡ ዕለተ፡ ለበረከት፡ ወለቅድሳት፡ ወለስብሐት፡ እምኵሉ፡ መዋዕል። ዝንቱ፡ ሕግ፡ ወስምዕ፡ ተውህበ፡ ለደቂቀ፡ እስራኤል፡ ሕግ፡ ዘለዓለም፡ ለትውልዶሙ።

Chapter 3 ወበሰዱስ፡ መዋዕል፡ ዘሰንበት፡ ካልእ፡ አምጻእነ፡ በቃለ፡ እግዚአብሔር፡ ኀበ፡ አዳም፡ ኵሎ፡ አራዊተ፡ ወኵሎ፡ እንስሳ፡ ወኵሎ፡ አዕዋፈ፡ ወኵሎ፡ ዘይትሐወስ፡ ውስተ፡ ምድር። ወሰመዮሙ፡ አዳም፡ ለኵሎሙ፡ በበ፡ አስማቲሆሙ፡ ወበከመ፡ ጸውዖሙ፡ ከማሁ፡ ኮነ፡ ስሞሙ። ወበኃምስ፡ እላ፡ መዋዕል፡ ሀለወ፡ አዳም፡ እንዘ፡ ይሬኢ፡ ዘንተ፡ ኵሎ፡ ተባዕተ፡ ወአንስተ፡ በኵሉ፡ ዘመድ፡ ዘበምድር፡ ወውእቱሰ፡ ሀሎ፡ ባሕቲቱ፡ ወአልቦ፡ ዘረከበ፡ ሎቱ፡ ዘይረድኦ፡ ዘከማሁ። ወይቤለነ፡ እግዚአብሔር፡ ለነ፡ አኮ፡ ሠናይ፡ የሀሉ፡ ብእሲ፡ ባሕቲቱ፡ ንግበር፡ ሎቱ፡ መርድአ፡ ዘከማሁ። ወወደየ፡ እግዚአብሔር፡ አምላክነ፡ ሕድመተ፡ ላዕሌሁ፡ ወኖመ። ወአንቅሆ፡ ለአዳም፡ እምንዋሙ። በእንተዝ፡ ይኩን፡ ብእሲ፡ ወብእሲት፡ አሐደ፡ ወበእንተዝ፡ የኀድግ፡ አባሁ፡ ወእሞ፡ ወይፃመር፡ ምስለ፡ ብእሲቱ፡ ወይከውኑ፡ ሥጋ፡ አሐደ። በሳብዕት፡ ቀዳሚት፡ አዳም፡ ወገቦ፡ ብእሲቱ፡ ወበሳብዕት፡ ካልእት፡ አርአዮ፡ ኪያሃ፡ ሎቱ። ወእምድኅረ፡ ተፈጸመ፡ ለአዳም፡ አርብዓ፡ መዋዕል፡ በምድር፡ ኀበ፡ ተፈጥረ፡ አባእናሁ፡ ውስተ፡ ገነተ፡ ኤዶም፡ ከመ፡ ይትቀነይ፡ ወይዕቀባ። በእንተ፡ ዝንቱ፡ ተጽሕፈ፡ ትእዛዝ፡ ውስተ፡ ጽላተ፡ ሰማይ፡ ለእንተ፡ ትወልድ፡ ለእመ፡ ተባዕተ፡ ወለደት፡ ሰቡዐ፡ መዋዕለ፡ ትንበር፡ ውስተ፡ ርኵሳ፡ በከመ፡ ሰቡዕ፡ መዋዕል፡ ቀዳሚት፡ ወሠላሳ፡ መዋዕለ፡ ወሠሉሰ፡ ዕለተ፡ ትንበር፡ ውስተ፡ ደመ፡ ንጽሕ፡ ወኵሎ፡ ቅዱሰ፡ ኢትግሥሥ፡ ወውስተ፡ መቅደስ፡ ኢትባእ፡ እስከ፡ አመ፡ ትፌጽም፡ ዘንተ፡ መዋዕለ፡ ዘበተባዕት። ወዘበአንስት፡ ክልኤ፡ ሰቡዓተ፡ መዋዕለ፡ በከመ፡ ክልኤ፡ ሰቡዓት፡ ቀዳሚያት፡ በርኵሳ፡ ወስሳ፡ መዋዕለ፡ ወሰዱሰ፡ ዕለተ፡ ትንበር፡ በደመ፡ ንጽሕ፡ ወይከውና፡ ኵሎን፡ ሰማንያ፡ መዋዕለ። ወፈጺማ፡ እላንተ፡ ሰማንያ፡ መዋዕለ፡ አባእናሃ፡ ውስተ፡ ገነተ፡ ኤዶም፡ እስመ፡ ቅድስት፡ ይእቲ፡ ውለተ፡ ኵሉ፡ ምድር፡ ወኵሉ፡ ዕፅ፡ ዘትኩል፡ ውስቴታ፡ ቅዱስ። በእንተዝ፡ ተሠርዐ፡ ለእንተ፡ ትወልድ፡ ለተባዕት፡ ወለእንስት፡ ፍትሖን፡ ለእላንቱ፡ መዋዕል፡ ኵሎ፡ ቅዱሰ፡ ኢትልክፍ፡ ወውስተ፡ መቅደስ፡ ኢትባእ፡ እስከ፡ አመ፡ ይትፌጸማ፡ እላንቱ፡ መዋዕል፡ ለተባዕት፡ ወለእንስት። ዝንቱ፡ ሕግ፡ ወሰምዕ፡ ዘተጽሕፈ፡ ለእስራኤል፡ ይዕቀቡ፡ ኵሎ፡ መዋዕለ። ወበሱባዔ፡ ቀዳማዊ፡ ዘኢዮቤልዉ፡ ቀዳሚ፡ ወለወ፡ አዳም፡ ወብእሲቱ፡ ሰብዓተ፡ ዓመተ፡ ውስተ፡ ገነተ፡ ኤዶም፡ እንዘ፡ ይትቀነይ፡ ወየዐቅባ፡ ወምግባረ፡ ወሀብናሁ፡ ወሀሎነ፡ እንዘ፡ ንሜህሮ፡ ገቢሮቶ፡ ኵሎ፡ ዘያስተርኢ፡ ለቅኔ። ወሀሎ፡ እንዘ፡ ይትቀነይ፡ ወውእቱሰ፡ ዕራቁ፡ ወኢያአምር፡ ወኢየኀፍር፡ ወየዐቅብ፡ ገነተ፡ እምአዕዋፍ፡ ወእምአራዊት፡ ወእምእንስሳ፡ ወያስተጋብእ፡ ፍሬሁ፡ ወይበልዕ፡ ወያነብር፡ ትራፎ፡ ሎቱ፡ ወለብእሲቱ፡ ወያነብር፡ ዘይትዐቀብ። ወኀሊቆ፡ ፍጻሜሁ፡ ለሰብዓቱ፡ ዓመት፡ እለ፡ ፈጸመ፡ በህየ፡ ሰብዓተ፡ ዓመተ፡ ጥንቁቀ። ወትቤሎ፡ እምኵሉ፡ ፍሬ፡ ዕፅ፡ ዘውስተ፡ ገነት፡ ይቤለነ፡ እግዚአብሔር፡ ብልዑ። ወይቤላ፡ አርዌ፡ ምድር፡ ለብእሲት፡ አኮ፡ ሞተ፡ ዘትመውቱ፡ እስመ፡ ያአምር፡ እግዚአብሔር፡ አመ፡ ዕለተ፡ ትበልዑ፡ ይትረኀው፡ አዕይንቲክሙ፡ ወትከውኑ፡ ከመ፡ አማልክት፡ ወታአምሩ፡ ሠናየ፡ ወእኩየ። ወርእየት፡ ብእሲት፡ ዕፀ፡ ከመ፡ አዳም፡ ውእቱ፡ ወያሠምር፡ ለዐይን፡ ወሠናይ፡ ፍሬሁ፡ ለበሊይ። ወከደነት፡ ኀፍረታ፡ በቈጽለ፡ በለስ፡ ዘቀዳሚ። ወነሥአ፡ ቈጽለ፡ በለስ፡ ወጠቀበ፡ ወገብረ፡ ሎቱ፡ ሞራአ፡ ወከደነ፡ ኀፍረቶ። ወረገሞ፡ እግዚአብሔር፡ ለአርዌ፡ ምድር፡ ወተምዕዎ፡ ለዓለም። አብዝኆ፡ አበዝኅ፡ ሐዘንኪ፡ ወፀዕርኪ፡ በሐዘን፡ ለዲ፡ ውሉደ፡ ወኀበ፡ ምትኪ፡ ምግባኢኪ፡ ወውእቱ፡ ይኴንነኪ። ወለአዳምሂ፡ ይቤሎ፡ እስመ፡ ሰማዕከ፡ ለብእሲትከ፡ ወበላዕከ፡ እምውስተ፡ ውእቱ፡ ዕፅ፡ ዘአዘዝኩከ፡ ከመ፡ ኢትብላዕ፡ እምኔሁ። ወገብረ፡ ሎሙ፡ አልባሰ፡ ዘማእስ፡ ወአልቦሶሙ፡ ወፈነዎሙ፡ እምገነተ፡ ኤዶም። ወበይእቲ፡ ዕለት፡ እንዘ፡ ይወፅእ፡ እምገነተ፡ ኤዶም፡ ዐጠነ፡ ለመዓዛ፡ ሠናይ፡ ዕጣነ፡ ስሒነ፡ ወቅንአተ፡ ወማየ፡ ልብን፡ ወሰንበልተ፡ በጽባሕ፡ ምስለ፡ ትንሣኤ፡ ፀሐይ፡ አመ፡ ከደነ፡ ኃፍረቶ። ወበይእቲ፡ ዕለት፡ ተፈጸመ፡ አፈ፡ ኵሉ፡ አራዊተ፡ ወዘእንስሳ፡ ወዘአዕዋፍ፡ ወዘያንሶሱ፡ ወዘይትሐወስ፡ እምነቢብ፡ እስመ፡ ኵሎሙ፡ ይትናገሩ፡ ዝንቱ፡ ምስለ፡ ዝንቱ፡ ከንፈረ፡ አሐደ፡ ወልሳነ፡ አሐደ። ወፈነወ፡ እምገነተ፡ ኤዶም፡ ኵሎ፡ ዘሥጋ፡ ዘሀሎ፡ ውስተ፡ ነገተ፡ ኤዶም፡ ወተዘርዉ፡ ኵሉ፡ ዘሥጋ፡ በበ፡ ዘመዶሙ፡ ወበበ፡ ፍጥረቶሙ፡ ውስተ፡ መካን፡ ዘተፈጥረ፡ ሎሙ። ወለአዳም፡ ባሕቲቱ፡ ወሀቦ፡ ይክድን፡ ኃፍረቶ፡ እምኵሉ፡ አራዊት፡ ወእንስሳ። በእንተዝ፡ ተአዘዘ፡ ውስተ፡ ጽላት፡ ላዕለ፡ ኵሎሙ፡ እለ፡ ያአምሩ፡ ፍትሐ፡ ሕግ፡ ይክድኑ፡ ኀፍረቶሙ፡ ወኢይትከሠቱ፡ ከመ፡ አሕዛብ፡ ይትከሠቱ። ወአመ፡ ሠርቀ፡ ወርኅ፡ ራብዕ፡ ወፅኡ፡ አዳም፡ ወብእሲቱ፡ እምገነተ፡ ኤዶም፡ ወኀደሩ፡ ውስተ፡ ምድረ፡ ኤልዳ፡ ውስተ፡ ምድረ፡ ፍጥረቶሙ። ወሰመየ፡ አዳም፡ ስመ፡ ብእሲቱ፡ ሔዋ። ወኢኮኑ፡ ምስለ፡ ወልድ፡ እስከ፡ ቀዳሚ፡ ኢዮቤልዉ። ወውእቱሰ፡ ይትጌበራ፡ ለምድር፡ በከመ፡ ተምህረ፡ በገነተ፡ ኤዶም።

Chapter 4 ወበሣልስ፡ ሱባዔ፡ በካልእ፡ ኢዮቤልዉ፡ ወለደቶ፡ ለቃየን፡ ወበራብዕ፡ ወለደቶ፡ ለአቤል። ወበቀዳሚሁ፡ ለኢዮቤልዉ፡ ሣልስ፡ ቀተሎ፡ ቃየን፡ ወልደ፡ በታስዕ፡ ኢዮቤልዉ፡ በሱባዔ፡ ቀዳሚ፡ በሣልስ፡ ዓመት፡ በሱባዔሁ፡ ለዝ፡ ወጸውዐ፡ ስሞ፡ መላልኤል። ወበካልእ፡ ሱባዔ፡ ዘዓሥር፡ ኢዮቤልዉ፡ ነሥአ፡ ሎቱ፡ መላልኤል፡ ብእሲተ፡ ዲናሃ፡ ወለተ፡ በራክኤል፡ ወለተ፡ እኅተ፡ አቡሁ፡ ሎቱ፡ ብእሲተ። ወበዓሥር፡ ወአሐዱ፡ ኢዮቤልዉ፡ ነሥአ፡ ሎቱ፡ ያሬድ፡ ብእሲተ፡ ወስማ፡ ባረከ፡ ወለተ፡ ራሱእያል፡ ወለተ፡ እኅተ፡ አቡሁ፡ ሎቱ፡ ብእሲተ፡ በሱባዔ፡ ራብዕ፡ ዘኢዮቤልዉ፡ ዝንቱ። ውእቱ፡ ቀዳሚ፡ ተምህረ፡ መጽሐፈ፡ ወትምህርተ፡ ወጥበበ፡ እምእጓለ፡ እመሕያው፡ እምእለ፡ ተወልዱ፡ ዲበ፡ ምድር። ውእቱ፡ ቀዳሚ፡ ጸሐፈ፡ እምዐ፡ ወአስምዐ፡ ለደቂቀ፡ እጓለ፡ እመሕያው፡ ውስተ፡ ትዝምደ፡ ምድር፡ ወሱባዔሆሙ፡ ለኢዮቤልዉሳት፡ ነገረ፡ ወመዋዕለ፡ ዓመታት፡ አይድዐ፡ ወአውራኃተ፡ ሠርዐ፡ ወሰንበታተ፡ ዓመታት፡ ነገረ፡ በከመ፡ አይዳዕናሁ። ወዘኮነ፡ ወዘይከውን፡ ርእየ፡ በራእየ፡ ንዋሙ፡ ዘከመ፡ ይከውን፡ ዲበ፡ ደቂቀ፡ እጓለ፡ እመሕያው፡ በትውልዶሙ፡ እስከ፡ አመ፡ ዕለተ፡ ደይን፡ ኵሎ፡ ርእየ፡ ወአእመረ። ወበዐሠርቱ፡ ወክልኤቱ፡ ኢዮበቤልዉ፡ በሳብዕ፡ ሱባዔሁ፡ ሎቱ፡ ነሥአ፡ ሎቱ፡ ብእኢተ፡ ወስማ፡ እድኒ፡ ወለተ፡ ዳንኤል፡ ወለተ፡ እኅተ፡ አቡሁ፡ ሎቱ፡ ብእሲተ። ወሀሎ፡ እንከ፡ ምስለ፡ መላእክተ፡ አምላክ፡ ስድስተ፡ ዘኢዮቤልዉሳት፡ ዓመታተ። ወአስምዐ፡ ለትጉሃን፡ ለእለ፡ አበሱ፡ ምስለ፡ አዋልደ፡ ሰብእ። ወተንሥአ፡ እማእከለ፡ ደቂቀ፡ እጓለ፡ እመሕያው፡ ወወሰድናሁ፡ ውስተ፡ ገነተ፡ ኤዶም፡ ለዕበይ፡ ወለክብር። ወበእንቲአሁ፡ ኢመጽአ፡ ማየ፡ አይኅ፡ ዲበ፡ ኵሉ፡ ምድረ፡ ኤዶም፡ እስመ፡ ህየ፡ ተውህበ፡ ውእቱ፡ ለትእምርት፡ ወከመ፡ ያስምዕ፡ ላዕለ፡ ኵሉ፡ ደቂቀ፡ ሰብእ፡ ከመ፡ ይንግር፡ ኵሎ፡ ግብረ፡ ትውልድ፡ እስከ፡ አመ፡ ዕለተ፡ ደይን። ወውእቱ፡ ዐጠነ፡ ዕጣነ፡ ምሴተ፡ መቅደስ፡ ዘይሰጠው፡ ቅድመ፡ እግዚአብሔር፡ በደብረ፡ ቀትር። እስመ፡ አርባዕቱ፡ መካን፡ በዲበ፡ ምድር፡ ለእግዚአብሔር፡ ገነተ፡ ኤዶም፡ ወደብረ፡ ጽባሕ፡ ወዝደብር፡ ዘሀሎከ፡ አንተ፡ ውስቴቱ፡ ደብረ፡ ሲና፡ ዮም፡ ወደብረ፡ ጽዮን፡ ይትቄደስ፡ በፍጥረት፡ ሐዳስ፡ ለቅዳሴ፡ ምድር፡ በእንተዝ፡ ትትቄደስ፡ ምድር፡ እምኵሉ፡ አበሳ፡ ወእምርኵሳ፡ በትውልደ፡ ዓለም። ወበኢዮቤልዉ፡ ዘውእቱ፡ ዓሥር፡ ወራብዕ፡ ኢዮቤልዉ፡ ነሥአ፡ ማቱሳላ፡ እድናሃ፡ ብእሲቶ፡ ወለተ፡ እዝራኤል፡ ወለተ፡ እኅተ፡ አቡሁ፡ ብእሲተ፡ ሎቱ፡ በሱባዔ፡ ሣልስ፡ በዓመት፡ አሐዱ፡ ዘውእቱ፡ ዓመት፡ ወወለደ፡ ወልደ፡ ወጸውዐ፡ ስሞ፡ ላሜክ። ወበዓሥር፡ ወኃምስ፡ ኢዮቤልዉ፡ በሱባዔ፡ ሣልስ፡ ነሥአ፡ ላሜክ፡ ብእሲተ፡ ወስማ፡ ቤተኖስ፡ ወለተ፡ በራክኤል፡ ወለተ፡ እኅተ፡ አቡሁ፡ ሎቱ፡ ብእሲተ፡ ወበዝ፡ ሱባዔ፡ ወለደት፡ ሎቱ፡ ወልደ፡ ወጸውዐ፡ ስሞ፡ ኖኅ፡ እንዘ፡ ይብል፡ ዘይናዝዘኒ፡ እምሐዘንየ፡ ወእምኵሉ፡ ግብርየ፡ ወእምድር፡ እንተ፡ ረገማ፡ እግዚአብሔር። ወበፍጻሜሁ፡ ለዓሥር፡ ወታስዕ፡ ኢዮቤልዉ፡ በሱባዔ፡ ሳብዕ፡ በሳድስ፡ ዓመቱ፡ ሎቱ፡ ሞተ፡ አዳም፡ ወቀበርቃ፡ ኵሎሙ፡ ደቂቁ፡ ወስተ፡ ምድረ፡ ፍጥረቱ። ወሰብዓ፡ ዓመተ፡ አሕጸጸ፡ እምዐሠርቱ፡ ምእት፡ ዓም፡ እስመ፡ ዐሠርቱ፡ ምእት፡ ዓመት፡ አሐቲ፡ ዕለተ፡ ውስተ፡ ስምዐ፡ ሰማያት። በተፍጻሜቱ፡ ለዝንቱ፡ ኢዮቤልዉ፡ ተቀትለ፡ ቃየን፡ እምድኅሬሁ፡ በአሐዱ፡ ዓም፡ ወወድቀ፡ ቤቱ፡ ላዕሌሁ፡ ወሞተ፡ በማእከለ፡ ቤቱ፡ ወተቀትለ፡ በእበኒሃ። በእንተዝ፡ ተሠርዐ፡ ውስተ፡ ጽላተ፡ ሰማይ፡ በንዋይ፡ ዘቀተለ፡ ብእሲ፡ ቢጾ፡ ቦቱ፡ ይትቀትል፡ በከመ፡ አቍሰሎ፡ ከማሁ፡ ይግበሩ፡ ሎቱ። ወበዕሥራ፡ ወኃምስ፡ ኢዮቤልዉ፡ ነሥአ፡ ሎቱ፡ ኖኅ፡ ብእሲተ፡ ወስማ፡ ዕምዛራ፡ ወለተ፡ ራኪኤል፡ ወለተ፡ እኅቱ፡ ሎቱ፡ ብእሲተ።

Chapter 5 ወኮነ፡ አመ፡ ወጠኑ፡ ደቂቀ፡ እጓለ፡ እመሕያው፡ ይብዝኁ፡ ዲበ፡ ገጸ፡ ኵላ፡ ምድር፡ ወአዋልድ፡ ተወልዳ፡ ሎሙ። ወልህቀት፡ ዐመፃ፡ ዲበ፡ ምድር፡ ወኵሉ፡ ዘሥጋ፡ አማሰነት፡ ፍኖታ፡ እምሰብእ፡ እስከ፡ እንስሳ፡ ወእስከ፡ አራዊት፡ ወእስከ፡ አዕዋፍ፡ ወእስከ፡ ኵሉ፡ ዘያንሶሱ፡ ውስተ፡ ምድር፡ ኵሎሙ፡ አማሰኑ፡ ፍኖቶሙ፡ ወሥርዓቶሙ። ወርእያ፡ እግዚአብሔር፡ ለምድር፡ ወናሁ፡ ማሰነት፡ ወአማሰነት፡ ኵላ፡ ዘሥጋ፡ ሥርዓታ፡ ወአእከዩ፡ ኵሎሙ፡ ቅድመ፡ አዕይንቲሁ፡ ኩሉ፡ ዘሀሎ፡ ውስተ፡ ምድር። ወይቤ፡ ይደመስሶ፡ ለሰብእ፡ ወኵሉ፡ ዘሥጋ፡ ዘመልዕልተ፡ ገጸ፡ ምድር፡ ዘፈጠረ። ወኖኅ፡ ባሕቲቱ፡ ረከበ፡ ሞገሰ፡ በቅድመ፡ አዕይንቲሁ። ወዲበ፡ መላእክቲሁ፡ እለ፡ ፈነወ፡ ውስተ፡ ምድር፡ ተምዐ፡ ፈድፋደ፡ ይሠርዎሙ፡ እምኵሉ፡ ሥልጣኖሙ። ወዲበ፡ ውሉዶሙ፡ ወፅአ፡ ቃል፡ እምቅድመ፡ ገጹ፡ ከመ፡ ይምሐፆሙ፡ በሰይፍ፡ ወያሰስሎሙ፡ እምታሕተ፡ ሰማይ። ወይቤ፡ ኢይነብር፡ መንፈስየ፡ ዲበ፡ ሰብእ፡ ለዓለም፡ እስመ፡ እሙንቱ፡ ሥጋ፡ ወይኩን፡ መዋዕሊሆሙ፡ ምእት፡ ወዕሥራ፡ ዓመት። ወፈነወ፡ ሰይፎ፡ ማእከሎሙ፡ ከመ፡ ይቅትሉ፡ አሐዱ፡ ቢጾሙ። ወአበዊሆሙሰ፡ ይኔጽሩ፡ ወእምድኅረዝ፡ ተአስሩ፡ ውስተ፡ መዓምቅቲሃ፡ ለምድር፡ እስከ፡ ዕለተ፡ ደይን፡ ዐባይ፡ ለከዊነ፡ ኵነኔ፡ ዲበ፡ ኵሎሙ፡ እለ፡ አማሰኑ፡ ፍናዊሆሙ፡ ወምግባሪሆሙ፡ ቅድመ፡ እግዚአብሔር። ወደምሰሰ፡ ኵሎ፡ እመካኖሙ፡ ወኢተርፈ፡ አሐዱ፡ እምኔሆሙ፡ ዘኢኰነነ፡ በኵሉ፡ እከዮሙ። ወገብረ፡ ለኵሉ፡ ግብሩ፡ ፍጥረተ፡ ሐዳሰ፡ ወጻድቅተ፡ ከመ፡ ኢየአብሱ፡ በኵሉ፡ ፍጥረቶሙ፡ እስከ፡ ለዓለም። ወኵነኔ፡ ኵሎሙ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ ወአልቦ፡ ዐመፃ። ወአልቦ፡ ምንተኒ፡ ዘበሰማይ፡ ወዘበምድር፡ ወውስተ፡ ብርሃን፡ ወውስተ፡ ጽልመት፡ ወበሲኦል፡ ወውስተ፡ ቀላይ። በእንተ፡ ኵሉ፡ ለዐቢይ፡ በከመ፡ ዕበዩ፡ ወለንኡስሂ፡ በከመ፡ ንእሱ፡ ወለለ፡ አሐዱ፡ በከመ፡ ፍኖቱ፡ ይኴንኖ። ወኢኮነ፡ ውእቱ፡ ዘይነሥእ፡ ገጸ፡ ወኢኮነ፡ ውእቱ፡ ዘይነሥእ፡ ሕልያነ፡ እመ፡ ይቤ፡ ይግበር፡ ኵነኔ፡ ለለ፡ አሐዱ፡ ወአሐዱ፡ እመ፡ ወሀበ፡ ኵሎ፡ ዘውስተ፡ ምድር፡ ኢይነሥእ፡ ገጸ፡ ወኢይትሜጠው፡ እምኔሁ፡ እስመ፡ መኰንነ፡ ጽድቅ፡ ውእቱ። ወዲበ፡ ደቂቀ፡ እስራኤል፡ ተጽሕፈ፡ ወተሠርዐ፡ እመ፡ ተመይጡ፡ ኀቤሁ፡ በጽድቅ፡ የኀድግ፡ ኵሎ፡ አበሳሆሙ፡ ወይሰሪ፡ ኵሎ፡ ኀጢአቶሙ። ተጽሕፈ፡ ወተሠርዐ፡ ይትመሐር፡ ለኵሉ፡ እለ፡ ይትመየጡ፡ እምኵሉ፡ ጌጋዮሙ። ወዲበ፡ ኵሎሙ፡ እለ፡ አማሰኑ፡ ፍናዊሆሙ፡ ወምክሮሙ፡ እምቅድመ፡ አይኅ፡ ኢተንሥአ፡ ገጾሙ፡ ዘእንበለ፡ ለኖኅ፡ ባሕቲቱ፡ እስመ፡ ተንሥአ፡ ሎቱ፡ ገጹ፡ በእንተ፡ ውሉዱ፡ እለ፡ አድኀኖሙ፡ እምነ፡ ማየ፡ አይኅ፡ በእንቲአሁ፡ እስመ፡ ጻድቅት፡ ይእቲ፡ ልቡ፡ በኵሉ፡ ፍናዊሁ። ወይቤ፡ እግዚአብሔር፡ ይደመስስ፡ ኵሉ፡ ዘዲበ፡ የብስ፡ እምሰብእ፡ እስከ፡ እንስሳ፡ እስከ፡ አራዊት፡ ወእስከ፡ አዕዋፍ፡ ወእስከ፡ ዘይትሐወስ፡ ዲበ፡ ምድር። ወአዘዞ፡ ለኖኅ፡ ይግበር፡ ሎቱ፡ ታቦተ፡ ከመ፡ ያድኅኖ፡ እምነ፡ ማየ፡ አይኅ። ወገብረ፡ ኖኅ፡ ታቦተ፡ በኵሉ፡ በከመ፡ አዘዞ፡ በክልኤቱ፡ ኢዮቤልዉ፡ ዓመታት፡ በኃምስ፡ ሱባዔ፡ በኃምስ፡ ዓመቱ። ወቦአ፡ በሳድስ፡ ሎቱ፡ በካልእ፡ ወርኅ፡ በሠርቁ፡ ለካልእ፡ ወርኅ፡ እስከ፡ አመ፡ ዐሡሩ፡ ወሰዱሱ፡ ቦአ፡ ውእቱ፡ ወኵሉ፡ ዘአባእነ፡ ሎቱ፡ ወስተ፡ ታቦት። ወአርኀወ፡ እግዚአብሔር፡ ሰብዓተ፡ መንበሕባሕተ፡ ሰማይ፡ ወአፈወ፡ አንቅዕተ፡ ቀላይ፡ ዐቢይ፡ በሰብዑ፡ አፈው፡ በኆልቍ። ወአኀዙ፡ መንበሕባሕት፡ ያውርዱ፡ ማየ፡ እምሰማይ፡ አርብዓ፡ መዋዕለ፡ ወአርብዓ፡ ለያልየ። ወልህቅ፡ ማያት፡ ዲበ፡ ምድር፡ ዐሠርተ፡ ወኃምስተ፡ በእመት፡ ተለዐለ፡ ማያት፡ ዲበ፡ ኵሉ፡ ደብር፡ ነዋኅ፡ ወተለዐለት፡ ታቦት፡ እምዲበ፡ ምድር፡ ወታንሶሱ፡ ዲበ፡ ገጸ፡ ማያት። ወሀሎ፡ ማያት፡ ይቀውም፡ ዲበ፡ ገጸ፡ ምድር፡ ኃምስተ፡ አውራኀ፡ ምእተ፡ ወኃምሳ፡ ዕለተ። ወሖረት፡ ታቦት፡ ወአዕረፈት፡ ዲበ፡ ርእሰ፡ ሉባር፡ አሐዱ፡ እምአድባር፡ አራራት። ወበወርኅ፡ ራብዕ፡ ተፈጸመ፡ አንቅዕተ፡ ቀላይ፡ ዐቢይ፡ ወመንበሕባሕተ፡ ሰማይኒ፡ ተእኅዘ። ወበሠርቀ፡ ወርኅ፡ ዓሥር፡ አስተርአየ፡ አርእስተ፡ አድባር። ወነጸፈ፡ ማያት፡ እመልዕልተ፡ ምድር። ወአመ፡ ዕሥራ፡ ወሰቡዑ፡ ሎቱ፡ አርኀዋ፡ ለታቦት፡ ወፈነወ፡ እምውስቴታ፡ አራዊተ፡ ወአዕዋፈ፡ ወዘይትሐወስ።

Chapter 6 ወአመ፡ ሠርቁ፡ ለወርኅ፡ ሣልስ፡ ወፅእ፡ እምነ፡ ታቦት። ወአስተርአየ፡ ዲበ፡ ምድር፡ ወነሥአ፡ ማሕስአ፡ ጠሊ፡ ወአስተስረየ፡ በደሙ፡ በእንተ፡ ኵሉ፡ አበሳ፡ ምድር፡ እስመ፡ ተደምሰሰ፡ ኵሉ፡ ዘሀሎ፡ ውስቴታ፡ ዘእንበለ፡ እለ፡ ሀለዉ፡ ውስተ፡ ታቦት፡ ምስለ፡ ኖኅ። ወአዕረገ፡ ስብሐ፡ ዲበ፡ ምሥዋአ፡ ወነሥአ፡ ላህመ፡ ወበሐኰ፡ ወበግዐ፡ ወአጣሌ፡ ወፄወ፡ ወመንጤጠ፡ ወእጓለ፡ ርግብ። ወአጼነወ፡ እግዚአብሔር፡ መዓዛ፡ ሠናየ፡ ወተካየደ፡ ምስሌሁ፡ ኪዳነ፡ ከመ፡ ኢይኩን፡ ማየ፡ አይኅ፡ ዘያማስን፡ ምድረ፡ ኵሎ፡ መዋዕለ፡ ምድር፡ ዘርእ፡ ወማእረር፡ ኢይትነተግ፡ ደደክ፡ ወመርቄ፡ ሐጋይ፡ ወክረምት፡ ወመዓልት፡ ወሌሊት፡ ኢይወልጡ፡ ሥርዓቶሙ፡ ወኢይንተጉ፡ ለዓለም። ወአንትሙኒ፡ ለሀቁ፡ ወተባዝኁ፡ ውስተ፡ ምድር፡ ወብዝኁ፡ ላዕሌሃ፡ ወኩኑ፡ ለበረከት፡ ማእከለ፡ ፍርሃትክሙ፡ ወረዓድክሙ። ወናሁ፡ ወሀብኩክሙ፡ ኵሎ፡ አራዊተ፡ ወኵሎ፡ እንስሳ፡ ወኵሎ፡ ዘይሰርር፡ ወኵሎ፡ ዘይትሐወስ፡ ውስተ፡ ምድር፡ ወውስተ፡ ማያት፡ ዓሣተ፡ ወኵሎ፡ ለሲሲት፡ ከመ፡ ሐምለ፡ ሣዕር፡ ወሀብኩክሙ፡ ኵሎ፡ ትብልዑ። ወባሕቱ፡ ሥጋ፡ ዘምስለ፡ መንፈሱ፡ ምስለ፡ ደም፡ ኢትብልዑ፡ እስመ፡ ነፍሰ፡ ኵሉ፡ ዘሥጋ፡ ውስተ፡ ደም፡ ውእቱ፡ ከመ፡ ኢይትኃሠሥ፡ ደምክሙ፡ ውስተ፡ ነፍሳቲክሙ፡ እምውስተ፡ እደ፡ ኵሉ፡ ሰብእ፡ እምእደ፡ ኵሉ፡ አኀሥሦ፡ ለደመ፡ ሰብእ። ዘይክዑ፡ ደመ፡ ሰብእ፡ በሰብእ፡ ደሙ፡ ይትከዐው፡ እስመ፡ በመልክዐ፡ እግዚአብሔር፡ ገብሮ፡ ለአዳም። ወአንትሙሂ፡ ለሀቁ፡ ወብዝኁ፡ ዲበ፡ ምድር። ወመሐሉ፡ ኖኅ፡ ወደቂቁ፡ ከመ፡ ኢይብልዑ፡ ኵሎ፡ ደመ፡ ዘበኵሉ፡ ሥጋ። በእንተ፡ ዝንቱ፡ ተናገረከ፡ ትትካየድ፡ ኪዳነ፡ አንተኒ፡ ምስለ፡ ደቂቀ፡ እስራኤል፡ በዝ፡ ወርኅ፡ በዲበ፡ ደብር፡ ምስለ፡ መሐላ። ወጽሕፍት፡ ዛቲ፡ ስምዕ፡ ላዕሌክሙ፡ ከመ፡ ትዕቀብዋ፡ ኵሎ፡ መዋዕለ፡ ከመ፡ ኢትብልዑ፡ በኵሉ፡ መዋዕል፡ ኵሎ፡ ደመ፡ አራዊት፡ ወአዕዋፍ፡ ኵሎ፡ መዋዕለ፡ ምድር። ወአንተ፡ አዝዞሙ፡ ለደቂቀ፡ እስራኤል፡ ኢይብልዑ፡ ኵሎ፡ ደመ፡ ከመ፡ የሀሉ፡ ስሞሙ፡ ወዘርኦሙ፡ ቅድመ፡ እግዚአብሔር፡ አምላክነ፡ መዋዕለ። ወአልቦ፡ ለዝሕግ፡ ዐቅመ፡ መዋዕል፡ እስመ፡ ለዓለም፡ ውእቱ፡ ይዕቀብዎ፡ ለትውልድ፡ ከመ፡ ይኩኑ፡ እንዘ፡ ይትመሀለሉ፡ በእንቲአሆሙ፡ በደም፡ በቅድመ፡ ምሥዋዕ፡ በኵሉ፡ ዕለት፡ ወዕለተ፡ ነግህ፡ ወሰርክ፡ ያስተስርዩ፡ በእንቲአሆሙ፡ ወትረ፡ ቅድመ፡ እግዚአብሔር፡ ከመ፡ ይዕቀብዎ፡ ወኢይሠረዉ። ወወሀቦ፡ ለኖኅ፡ ወለደቂቁ፡ ትእምርተ፡ ከመ፡ ኢይኩን፡ ዳግመ፡ አይኅ፡ ዲበ፡ ምድር። ቀስቶ፡ ወሀበ፡ ውስተ፡ ደመና፡ ለትእምርተ፡ ኪዳን፡ ዘለዓለም። በእንተዝ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ ከመ፡ ይኩኑ፡ ገበርተ፡ በዓል፡ ዘሱባዔ፡ በዝ፡ ወርኅ፡ ምዕረ፡ ለዓመት፡ ለሐዲስ፡ ኪዳን፡ በኵሉ፡ ዓም፡ ወዓመት። ወኮነት፡ ኵላ፡ ዛቲ፡ በዓል፡ እንዘ፡ ትትገበር፡ በሰማይ፡ እምዕለተ፡ ፍጥረት፡ እስከ፡ መዋዕለ፡ ኖኅ፡ ዕሥራ፡ ወስድስቱ፡ ኢዮቤልዉ፡ ወሱባዔ፡ ዓመት፡ ኃምስተ፡ ወዐቀብዋ፡ ኖኅ፡ ወደቂቁ፡ ሰብዓተ፡ ኢዮቤልዉ፡ ወሱባዔ፡ ዓመታት፡ አሐተ፡ እስከ፡ አመሞቱ፡ ለኖኅ፡ ወእምዕለተ፡ ሞቱ፡ ለኖኅ፡ አማስኑ፡ ውሉዱ፡ እሰከ፡ አመ፡ መዋዕለ፡ አብርሃም፡ ወይበልዑ፡ ደመ። ወአብርሃም፡ ባሕቲቱ፡ ዐቀበ፡ ወይስሐቅ፡ ወያዕቆብ፡ ውሉዱ፡ ዐቀብዋ፡ እስከ፡ መዋዕሊከ። ወአንተሂ፡ አዝዞሙ፡ ለውሉደ፡ እስራኤል፡ ወይዕቀብዋ፡ ለዛቲ፡ በዓል፡ በኵሉ፡ ትዝምዶሙ፡ ለትእዛዝ፡ ሎሙ፡ ዕለተ፡ አሐተ፡ በዓመት፡ በዝ፡ ይግበሩ፡ በዓለ፡ ባቲ። እስመ፡ በዓለ፡ ሱባዔያት፡ ይእቲ፡ ወበዓለ፡ ቀዳሜ፡ ፍሬ፡ ይእቲ፡ ክልኤ፡ ዕፅፈት፡ ይእቲ፡ ወለክልኤ፡ ዘመድ፡ ዛቲ፡ በዓል፡ በከመ፡ ጽሑፍ፡ ወቍሩጽ፡ በእንቲአሃ፡ ግብራ። እስመ፡ ጸሐፍኩ፡ ውስተ፡ መጽሐፈ፡ ሕግ፡ ዘቀዳሚ፡ ውስተ፡ ዘጸሐፍኩ፡ ለከ፡ ትግበራ፡ በበ፡ ጊዜሃ፡ ዕለተ፡ አሐተ፡ ለዓመት። ወበሠርቀ፡ ወርኅ፡ ቀዳሚ፡ ወበሠርቀ፡ ወርኀ፡ ራብዕ፡ ወበሠርቀ፡ ወርኅ፡ ዓሥር፡ ዕለታተ፡ ተዝካር፡ እማንቱ፡ ወዕለታተ፡ ጊዜ፡ እማንቱ። ወኖኅ፡ ሠርዖን፡ ሎቱ፡ ለበዓላት፡ ለትውልድ፡ ዘለዓለም፡ እስከ፡ አመ፡ ኮነ፡ ሎቱ፡ ቦቶን፡ ተዝካረ። በሠርቀ፡ ወርኅ፡ ቀዳሚ፡ ተብህለ፡ ሎቱ፡ ይግበር፡ ታቦተ፡ ወባቲ፡ የብሰት፡ ምድር፡ ወአርኀወ፡ ወርእየ፡ ምድረ። ወበሠርቀ፡ ወርኅ፡ ራብዕ፡ ተፈጸመ፡ አፈ፡ መዓምቅቲሃ፡ ለቀላይ፡ ታሕቲት፡ ወበሠርቀ፡ ወርኅ፡ ሳብዕ፡ ተርኅወ፡ ኵሉ፡ አፈወ፡ መዓምቅተ፡ ምድር፡ ወአኀዘ፡ ማያት፡ ይረድ፡ ውስቴቱ። ወበሠርቀ፡ ወርኀ፡ ዓሥር፡ አስተርአየ፡ አርእስተ፡ አድባር፡ ወተፈሥሐ፡ ኖኅ። በእንተዝ፡ ሠርዖን፡ ኪያሆን፡ ሎቱ፡ ለበዓላት፡ ለተዝካር፡ እስከ፡ ለዓለም። ወያዐርግዎን፡ ውስተ፡ ጽላተ፡ ሰማይ። ወይከውና፡ ኵሎን፡ መዋዕል፡ ዘትእዛዛት፡ ኀምሳ፡ ወክልኤ፡ ሰንበታተ፡ መዋዕል። ከመዝ፡ ተቈርዐ፡ ወተሠርዐ፡ ውስተ፡ ጽላተ፡ ሰማይ። ወአንተኒ፡ አዝዞሙ፡ ለደቂቀ፡ እስራኤል፡ ወይዕቀቡ፡ ዓመታተ፡ በዝ፡ ኆልቍ፡ ሠለስተ፡ ምእተ፡ ወስሳ፡ ወረቡዐ፡ መዋዕለ፡ ወይከውን፡ ፍጹመ፡ ዓመት። ወለእመ፡ ተዐደዉ፡ ወኢገብርዎን፡ በከመ፡ ትእዛዙ፡ ሎቱ፡ አሜሃ፡ ኵሎሙ፡ ያማስኑ፡ ጊዜያቲሆሙ፡ ወዓመታትኒ፡ ይትሐወሱ፡ ዘእምውስተዝ፡ ወጊዜያትሂ፡ ያማስኑ፡ ወዓመታትሂ፡ ይትሐወሱ፡ ወይትዐደዉ፡ ሥርዓቶሙ። ወኵሎሙ፡ ውሉደ፡ እስራኤል፡ ይረስዑ፡ ወኢይረክቡ፡ ፍኖተ፡ ዓመታት። አአምር፡ አነ። ወይከውኑ፡ እለ፡ ያስተሐይጹ፡ ወርኀ፡ በሑያጼ፡ ወርኅ። በእንተዝ፡ ይመጽእ፡ ዓመታት፡ ሎሙ፡ እንዘ፡ ያማስኑ፡ ወይገብሩ፡ ዕለተ፡ ስምዕ፡ ምንንተ። በእንተዝ፡ አነ፡ እኤዝዘከ፡ ወአሰምዕ፡ ለከ፡ ከመ፡ ታስምዕ፡ ሎሙ፡ እስመ፡ እምድኅረ፡ ሞትከ፡ ያማስኑ፡ ውሉድከ፡ ከመ፡ ኢይግበሩ፡ ዓመተ፡ ሠለስተ፡ ምእተ፡ ወስሳ፡ ወረቡዐ፡ ባሕቲቶን።

Chapter 7 ወበሱባዔ፡ ሳብዕ፡ በቀዳሚ፡ ዓመቱ፡ ሎቱ፡ በዝ፡ ኢዮቤልዉ፡ ተከለ፡ ኖኅ፡ ወይነ፡ ኀበ፡ ደብር፡ እንተ፡ ዲቤሁ፡ አዕረፈት፡ ታቦት፡ ዘስሙ፡ ሉባር፡ እምአድባረ፡ አራራት፡ ወገብረ፡ ፍሬ፡ በራብዕ፡ ዓመት፡ ወዐቀበ፡ ፍሬሁ፡ ወቀሰሞ፡ በውእቱ፡ ዓመት፡ በወርኅ፡ ሳብዕ። ወገብረ፡ እምውስቴቱ፡ ወይነ፡ ወወደዩ፡ ውስተ፡ ንዋይ፡ ወዐቀቦ፡ እስከ፡ ዓመት፡ ኃምስቱ፡ እስከ፡ ዕለት፡ ቀዳሚት፡ በሠርቀ፡ ወርኅ፡ ቀዳሚት። ወገብረ፡ ዕለተ፡ ዛቲ፡ በዓል፡ በፍሥሐ። ወገብረ፡ ማሕስአ፡ ቅድመ፡ ወአንበረ፡ እምነ፡ ደሙ፡ ዲበ፡ ሥጋ፡ ዘምሥዋዕ፡ ዘገብረ፡ ወኵሎ፡ ስብሐ፡ አዕረገ፡ ውስተ፡ ምሥዋዕ፡ ዘኀበ፡ ገብረ፡ ጽንሐሐ፡ ወላህመ፡ ወበሐኰ፡ ወአባግዐ። ወአንበረ፡ ኵሎ፡ መሥዋዕቶሙ፡ ልዉሰ፡ በቅብእ፡ ላዕሌሁ፡ ወእምዝ፡ ነዝኀ፡ ወይነ፡ ውስተ፡ እሳት፡ ዘዲበ፡ ምሥዋዕ፡ አቅደመ፡ ወአንበረ፡ ስሒነ፡ ዲበ፡ ምሥዋዕ፡ ወአዕረገ፡ መዓዛ፡ ሠናየ፡ ዘይሠምር፡ ቅድመ፡ እግዚአብሔር፡ አምላኩ። ወተፈሥሐ፡ ወሰትየ፡ እምዝ፡ ወይን፡ ውእቱ፡ ወውሉዱ፡ በፍሥሓ። ወኮነ፡ ምሴተ፡ ወቦአ፡ ውስተ፡ ሰቀላሁ፡ ወሰከበ፡ ስኩሩ፡ ወኖመ፡ ወተከሥተ፡ በውስተ፡ ሰቀላሁ፡ እንዘ፡ ይነውም። ወርእዮ፡ ካም፡ ለኖኅ፡ አቡሁ፡ ዕራቆ። ወነሥአ፡ ሴም፡ ልብሰ፡ ወተንሥአ፡ ውእቱ፡ ወያፌት፡ ወአንበሩ፡ ልብሰ፡ ዲበ፡ መታክፍቲሆሙ፡ ወገጾሙ፡ ድኅሪተ፡ ወከደኑ፡ ኃፍረተ፡ አቡሆሙ፡ ወገጾሙ፡ ድኅሪተ። ወነቅሀ፡ ኖኅ፡ እምንዋሙ፡ ወአእመረ፡ ኵሎ፡ ዘገብረ፡ ላዕሌሁ፡ ወልዱ፡ ዘይንእስ፡ ወረገሞ፡ ለወልዱ፡ ወይቤ፡ ርጉም፡ ከናአን፡ ቅኑየ፡ ገብረ፡ ይኩን፡ ለአኃዊሁ። ወባረኮ፡ ለሴም፡ ወይቤ፡ ይትባረክ፡ እግዚአብሔር፡ አምላኩ፡ ለሴም። ያስፍሕ፡ እግዚአብሔር፡ ለያፌት፡ ወይኅድር፡ እግዚአብሔር፡ ውስተ፡ ማኅደረ፡ ሴም፡ ወይኩን፡ ከናአን፡ ገብሮሙ። ወአእመረ፡ ካም፡ ከመ፡ ረገሞ፡ አቡሁ፡ ለወልዱ፡ ዘይንእስ፡ ወሕሡም፡ ሎቱ፡ እስመ፡ ረገሞ፡ ለወልዱ። ወሐነጸ፡ ሎቱ፡ ውእቱሂ፡ ሀገረ፡ ወጸውዐ፡ ስማ፡ በስመ፡ ብእሲቱ፡ ኔኤላተማኡክ። ወርእየ፡ ያፌት፡ ወቀንአ፡ ለእኁሁ። ወሴምሰ፡ ነበረ፡ ምስለ፡ አቡሁ፡ ኖኅ፡ ወሐነጸ፡ ሀገረ፡ በእደ፡ አቡሁ፡ ኀበ፡ ደብር፡ ወጸውዐ፡ ስማ፡ ውእቱሂ፡ በስመ፡ ብእሲቱ፡ ሴዴቃቴልባብ። ናሁ፡ አህጉር፡ እላንቱ፡ ሠላስ፡ ቅሩበ፡ ሉባር፡ ደብር፡ ሴዴቃቴልባብ፡ ቅድመ፡ ገጸ፡ ደብር፡ በጽባሒሁ፡ ወናኤልታ፡ ማኡክ፡ ገጸ፡ ሰሜኑ፡ አዳተኔሴስ፡ መንገለ፡ ባሕር። ወእሉ፡ ውሉደ፡ ሴም፡ ኤላም፡ ወአሱር፡ ወአርፋክስድ። ውሉደ፡ ያፌት፡ ጎሜር፡ ወማጉግ፡ ወማዳይ፡ ወኢዩአያቶቤል፡ ምስክ፡ ወቲራስ፡ እሉ፡ ውሉደ፡ ኖኅ። ወበዕሥራ፡ ወሰማኒቱ፡ ኢዮቤልዉሳት፡ አኀዘ፡ ኖኅ፡ የአዝዝ፡ ለውሉደ፡ ውሉዱ፡ ሥርዓተ፡ ወትእዛዛተ፡ ኵሎ፡ ዘያአምር፡ ፍትሐ፡ ወአስምዐ፡ ላዕለ፡ ውሉዱ፡ ከመ፡ ይግበሩ፡ ጽድቀ፡ ወከመ፡ ይክድኑ፡ ኃፍረተ፡ ሥጋሆሙ፡ ወከመ፡ ይባርክዎ፡ ለዘ፡ ፈጠሮሙ፡ ወያክብሩ፡ አበ፡ ወእመ፡ ወያፍቅሩ፡ አሐዱ፡ አሐዱ፡ ቢጾ፡ ወይዕቀቡ፡ ነፍሶሙ፡ እምዝሙት፡ ወትኵስ፡ ወእምኵሉ፡ ዐመፃ። እስመ፡ በእንተ፡ ዝንቱ፡ ሠለስቱ፡ ኮነ፡ አይኅ፡ ላዕለ፡ ምድር፡ እስመ፡ በእንተ፡ ዝሙት፡ ዘዘመዉ፡ ትጉሃን፡ እምትእዛዘ፡ ኵነኔሆሙ፡ በድኅረ፡ አዋልደ፡ ሰብእ፡ ወነሥኡ፡ ሎሙ፡ አንስተ፡ እምኵሉ፡ እለ፡ ኀረዩ፡ ገብሩ፡ መቅድመ፡ ርኵስ። ወወለዱ፡ ውሉደ፡ ናፊዲም፡ ወኵሎሙ፡ ኢይትማሰሉ። ወኵሉ፡ ተሠይጠ፡ ይግበር፡ ዐመፃ፡ ወከመ፡ ይክዐው፡ ደመ፡ ንጹሐ፡ ወመልአት፡ ምድር፡ ዐመፃ። ወእምድኅረ፡ እሉ፡ ኵሎሙ፡ አራዊት፡ ወአዕዋፍ፡ ወዘይትሐወስ፡ ወዘያንሶሱ፡ ዲበ፡ ምድር። ወደምሰሰ፡ እግዚአብሔር፡ ኵሎ፡ እምገጸ፡ ምድር፡ በእንተ፡ ምግባሮሙ፡ ወበእንተ፡ ደም፡ ማእከለ፡ ምድር። ወተረፍነ፡ አነ፡ ወአንትሙ፡ ደቂቅየ፡ ወኵሉ፡ ዘቦአ፡ ምስሌነ፡ ውስተ፡ ታቦት። እስመ፡ እሬኢ፡ አነ፡ ወናሁ፡ አጋንንት፡ አስሕቶ፡ ወጠኑ፡ ላዕሌክሙ፡ ወላዕለ፡ ውሉድክሙ። እስመ፡ ኵሉ፡ ዘይክዑ፡ ደመ፡ ሰብእ፡ ወኵሉ፡ ዘይበልዕ፡ ደመ፡ ዘኵሉ፡ ዘሥጋ፡ ይደመሰሱ፡ ኵሎሙ፡ እምድር። ወኢይተርፍ፡ ኵሉ፡ ሰብእ፡ ዘይበልዕ፡ ደመ፡ ወዘይክዑ፡ ደመ፡ ዲበ፡ ምድር። ኵሉ፡ ደም፡ ኢያስተርኢ፡ እምኵሉ፡ ደም፡ ላዕሌክሙ፡ ዘውእቱ፡ በኵሉ፡ መዋዕል፡ ዘጠባሕክሙ፡ ኵሎ፡ አርዌ፡ ወእንስሳ፡ ወዘይሰርር፡ ዲበ፡ ምድር፡ ወግበሩ፡ ምጽዋተ፡ ላዕለ፡ ነፍስክሙ፡ በደፊኖቱ፡ ዘይትከዐው፡ ዲበ፡ ገጸ፡ ምድር። ወኢትኩኑ፡ ዘይበልዕ፡ ምስለ፡ ደም። ወኢትብልዕዋ፡ ለነፍስ፡ ምስለ፡ ሥጋ፡ ከመ፡ ኢይኩኑ፡ ዘይትኀሠሡ፡ ደምክሙ፡ ዘነፍስክሙ፡ እምእደ፡ ኵሉ፡ ዘሥጋ፡ ዘይክዕው፡ ዲበ፡ ምድር። እስመ፡ ምድር፡ ኢትነጽሕ፡ እምነ፡ ደም፡ እምዘ፡ ተክዕወ፡ ላዕሌሃ፡ እስመ፡ በደመ፡ ዘከዐዎ፡ ትነጽሕ፡ ምድር፡ በኵሉ፡ ትዝምዳ። ወይእዜሂ፡ ውሉድየ፡ ስምዑ፡ ግበሩ፡ ፍትሐ፡ ወጽድቀ፡ ከመ፡ ትተከሉ፡ በጽድቅ፡ ውስተ፡ ገጸ፡ ኵሉ፡ ምድር፡ ወይትሌዐል፡ ክብርክሙ፡ በቅድመ፡ አምላኪየ፡ ዘአድኀነኒ፡ እምነ፡ ማየ፡ አይኅ። ወናሁ፡ አንትሙ፡ ተሐውሩ፡ ወተሐንጹ፡ ለክሙ፡ አህጉረ፡ ወትተክሉ፡ ውስቴቶን፡ ኵሎ፡ ተክለ፡ ዘዲበ፡ ምድር። ሠለስተ፡ ዓመተ፡ ይከውን፡ ፍሬሁ፡ ዘኢይትቀሠም፡ እምኵሉ፡ ለበሊዖቱ፡ ወበዓመት፡ ራብዕ፡ ይትቄደስ፡ ፍሬሁ፡ ወያዐርጉ፡ ቀዳሜ፡ ፍሬ፡ ዘይሠጠው፡ ቅድመ፡ እግዚአብሔር፡ ልዑል፡ ፈጣሬ፡ ሰማይ፡ ወምድር። ወበዓመት፡ ኃምስ፡ ግበሩ፡ ኅድገቶ፡ ከመ፡ ትሕድግዎ፡ አንትሙ፡ በጽድቅ፡ ወበርትዕ፡ ወትጸድቁ፡ ወይረትዕ፡ ኵሉ፡ ተክልክሙ። እስመ፡ ከመዝ፡ አዘዘ፡ ሄኖክ፡ አቡሁ፡ ለአቡክሙ፡ ለማቱሳላ፡ ወልዱ፡ ወማቱሳላ፡ ለላሜክ፡ ወልዱ፡ ወላሜክ፡ አዘዘኒ፡ ኵሎ፡ ዘአዘዝዎ፡ አበዊሁ። ወአነሂ፡ እኤዝዘክሙ፡ ውሉድየ፡ በከመ፡ አዘዞ፡ ሄኖክ፡ ለወልዱ፡ በቀዳሚ፡ ኢዮቤልዉሳት፡ እንዘ፡ ሕያው፡ ውእቱ፡ ውስተ፡ ትዝምዱ፡ ሳብዕ፡ አዘዘ፡ ወአስምዐ፡ ለውሉዱ፡ ወለውሉደ፡ ውሉዱ፡ እስከ፡ አመ፡ ዕለተ፡ ሞቱ።

Chapter 8 ወበዕሥራ፡ ወተስዐቱ፡ ኢዮቤልዉ፡ በሱባዐዔ፡ ቀዳሚ፡ በቀዳሚሁ፡ ነሥአ፡ ሎቱ፡ አርፋክስድ፡ ብእሲተ፡ ወስማ፡ ራሱእያ፡ ወለተ፡ ሱሰን፡ ወለተ፡ ኤላም፡ ሎቱ፡ ብእሲተ፡ ወወለደት፡ ሎቱ፡ ወልደ፡ በዓመት፡ ሣልስ፡ ዘሱባዔ፡ ዝንቱ፡ ወጸውዐ፡ ስሞ፡ ቃይናም። ወልህቀ፡ ወልድ፡ ወመሀሮ፡ አቡሁ፡ መጽሐፈ፡ ወሖረ፡ ይኅሥሥ፡ ሎቱ፡ መካነ፡ ኀበ፡ ይእኅዝ፡ ሎቱ፡ ሀገረ። ወረከበ፡ መጽሐፈ፡ ዘቈረፁ፡ ቀደምት፡ ውስተ፡ ኰኩሕ፡ ወአንበበ፡ ዘውስቴታ፡ ወአዕለዋ፡ ወረስዐ፡ እምውስቴታ፡ ከመ፡ ሀሎ፡ ውስቴታ፡ ትምህርት፡ ዘትጉሃን፡ በዘ፡ ይሬእዩ፡ ሰገለ፡ ፀሓይ፡ ወወርኅ፡ ወከዋክብት፡ ወውስተ፡ ኵሉ፡ ተአምረ፡ ሰማይ። ወጸሐፈ፡ ወኢነገረ፡ በእንቲአሃ፡ እስመ፡ ይፈርሆ፡ ለኖኅ፡ ነጊረ፡ በእንቲአሃ፡ ከመ፡ ኢይትመዓዕ፡ ላዕሌሁ፡ በእንቲአሃ። ወአመ፡ ሠላሳ፡ ኢዮቤልዉ፡ በሱባዔ፡ ካልእ፡ በቀዳሚ፡ ዓመቱ፡ ነሥአ፡ ሎቱ፡ ብእሲተ፡ ወስማ፡ ሜልካ፡ ወለተ፡ አበዳይ፡ ወልደ፡ ያፌት። ወበዓመት፡ ራብዕ፡ ተወልደ፡ ወልህቀ፡ ሳላ፡ ወነሥአ፡ ሎቱ፡ ብእሲተ፡ ወስማ፡ ሙአክ፡ ወለተ፡ ኬሴድ፡ እኅወ፡ አቡሁ፡ ሎቱ፡ ብእሲተ። ወለደት፡ ሎቱ፡ ወልደ፡ በኃምስ፡ ዓመቱ፡ ወጸውዐ፡ ስሞ፡ ኤቤር። ወበሳድስ፡ ዓመት፡ ወለደት፡ ሎቱ፡ ወልደ፡ ወጸውዐ፡ ስሞ፡ ፋሌክ። ወተካፈሉ፡ በእኩይ፡ በበይናቲሆሙ፡ ወነገርዎ፡ ለኖኅ። ወኮነ፡ በቀዳሚሁ፡ ለሠላሳ፡ ወሠለስቱ፡ ኢዮቤልዉ፡ ወከፈልዋ፡ ለምድር፡ ሠለስተ፡ መክፈልተ፡ ለሴም፡ ወለካም፡ ወለያፌት፡ በበ፡ ርስቱ። ወጸውዐ፡ ደቂቆ፡ ወቀርቡ፡ ኀቤሁ፡ እሙንቱ፡ ወውሉዶሙ፡ ወከፈለ፡ ምድረ፡ በዑፃዌ፡ ዘይእኅዙ፡ ሠለስቲሆሙ፡ ውሉዱ። ወወፅአ፡ በመጽሐፍ፡ ዕፃሁ፡ ለሴም፡ ማእከለ፡ ምድር፡ ዘይእኅዝ፡ ለርስቱ፡ ወለውሉዱ፡ ለትውልድ፡ ዘለዓለም። ወየሐውር፡ እስከ፡ ሶበ፡ ይቀርብ፡ ካራስ፡ ዝውእቱ፡ ውስተ፡ ሕፅነ፡ ልሳን፡ እንተ፡ ትኔጽር፡ መንገለ፡ ሰሜን። ወየሐውር፡ መክፈልቱ፡ እንተ፡ መንገለ፡ ባሕር፡ ዐቢይ፡ ወየሐውር፡ ርቱዐ፡ እስከ፡ ይቀርብ፡ መንገለ፡ ዐረቢሃ፡ ለልሳን፡ እንተ፡ ትኔጽር፡ መንገለ፡ ሰሜን። ወትገምጽ፡ እምህየ፡ መንገለ፡ ሰሜን፡ መንገለ፡ አፉሃ፡ ለባሕር፡ ዐቢይ፡ ውስተ፡ ከናፍረ፡ ማያት። ወተሐውር፡ መንገለ፡ ጽባሕ፡ እስከ፡ ሶበ፡ ይቀርብ፡ ኀበ፡ ገነተ፡ ኤዶም፡ መንገለ፡ ሰሜኑ፡ ለሰሜን። ዛቲ፡ መክፈልት፡ ወፅአት፡ በዕፁ፡ ለሴም፡ ወለውሉዱ፡ ለእኂዞታ፡ ለዓለም፡ ለትውልዱ፡ እስከ፡ ለዓለም። ወተፈሥሐ፡ ኖኅ፡ እስመ፡ ወፅአ፡ ዝንቱ፡ መክፈልት፡ ለሴም፡ ወለውሉዱ። ወአእመረ፡ ከመ፡ ገነተ፡ ኤዶም፡ ቅድስተ፡ ቅዱሳን፡ ወማኅደሩ፡ ለእግዚአብሔር፡ ውእቱ፡ ወደብረ፡ ሲና፡ ማእከላ፡ ለገዳም፡ ወደብረ፡ ጽዮን፡ ማእከለ፡ ሕንብርታ፡ ለምድር። ወባረኮ፡ ለአምላከ፡ አማልክት፡ ዘወደየ፡ ውስተ፡ አፉሁ፡ ንባበ፡ እግዚአብሔር፡ ወእግዚአብሔር፡ እስከ፡ ለዓለም። ወአእመረ፡ ከመ፡ መክፈልተ፡ በረከት፡ ወቡሩክ፡ በጽሐ፡ ለሴም፡ ወለውሉዱ፡ ለትውልድ፡ ዘለዓለም፡ ኵላ፡ ምድረ፡ ኤዶም፡ ወኵላ፡ ምድረ፡ ባሕረ፡ ኤርትራ፡ ወኵላ፡ ምድረ፡ ጽባሕ፡ ወእንደኬ፡ ወበኤርትራ፡ ወአድባሪሁ፡ ወኵላ፡ ምድረ፡ ባሳ፡ ወኵላ፡ ምድረ፡ ሊባኖስ፡ ወደሰያተ፡ ክብቱር። ወለካም፡ ወፅአ፡ መክፈልት፡ ዘዳግም፡ መንገለ፡ ማዕዶተ፡ ግዮን፡ መንገለ፡ ሰሜን፡ በየማነ፡ ገነት፡ ወየሐውር፡ መንገለ፡ ሰሜን፡ ወየሐውር፡ ኵሎ፡ አድባረ፡ እሳት። ወይመጽእ፡ ውስተ፡ ደቡብ፡ ውስተ፡ ጽንፈ፡ ጋዲር፡ ወይመጽእ፡ ውስተ፡ ከንፈረ፡ ማየ፡ ባሕር፡ ውስተ፡ ማያተ፡ ባሕር፡ ዐቢይ፡ እስከ፡ ሶበ፡ ይቀርብ፡ ፈለገ፡ ግዮን፡ ወየሐውር፡ ግዮን፡ ፈለግ፡ እስከ፡ ሶበ፡ ይቀርብ፡ በየማነ፡ ገነተ፡ ኤዶም። ወዛቲ፡ ምድር፡ እንተ፡ ወፅአት፡ ለካም፡ በመክፈልት፡ ዘይእኅዝ፡ ለዓለም፡ ሎቱ፡ ወለውሉዱ፡ ለትዝምዶሙ፡ እስከ፡ ለዓለም። ወለያፌት፡ ወፅአ፡ መክፈልት፡ ሣልስ፡ ማዕዶተ፡ ጢና፡ ፈለግ፡ መንገለ፡ ደቡባቲሁ፡ ለሙፃአ፡ ማያቲሁ፡ ወየሐውር፡ መንገለ፡ ጽባሕ፡ ደቡብ፡ ኵሎ፡ ደወለ፡ ጎግ፡ ወኵሎ፡ ጽባሓቲሆሙ። ወየሐውር፡ መንገለ፡ ደቡብ፡ ለደቡብ፡ ወየሐውር፡ መንገለ፡ አድባረ፡ ቄልጥ፡ መንገለ፡ ደቡብ፡ ወመንገለ፡ ባሕረ፡ ማኡቅ፡ ወይመጽእ፡ መንገለ፡ ጽባሑ፡ ለጋዲር፡ እስከ፡ መንገለ፡ እደ፡ ማየ፡ ባሕር። ወየሐውር፡ እስከ፡ ሶበ፡ ይቀርብ፡ መንገለ፡ ዐረበ፡ ፋራ። ወየሐውር፡ መንገለ፡ እደ፡ ጢና፡ ፈለግ፡ መንገለ፡ ጽባሐ፡ ደቡብ፡ እስከ፡ ሶበ፡ ይቀርብ፡ እስከ፡ ጽንፈ፡ ማያቲሁ፡ መንገለ፡ ደብረ፡ ራፋ፡ ወየአውዳ፡ ለደቡብ። ዛቲ፡ ምድር፡ እንተ፡ ወፅአት፡ ለያፌት፡ ወለውሉዱ፡ በመክፈልተ፡ ርስቱ፡ ዘይእኅዝ፡ ሎቱ፡ ወለውሉዱ፡ ለትዝምዶሙ፡ እስከ፡ ለዓለም። ወባሕቱ፡ ቍሩር፡ ይእቲ፡ ወምድረ፡ ካም፡ መርቄ፡ ይእቲ፡ ወምድረ፡ ሴምሰ፡ ኢመርቄ፡ ወኢደደክ፡ እስመ፡ ቱስሕት፡ ይእቲ፡ በቍር፡ ወበሞቅ።

Chapter 9 ወከፈለ፡ ካም፡ ማእከለ፡ ውሉዱ፡ ወወፅአ፡ ቀዳሚ፡ መክፈልት፡ ለኵስ፡ መንገለ፡ ጽባሕ፡ ወዐረቢሁ፡ ለሜጽሬም፡ ወዐረቢሁ፡ ሎቱ፡ ለፉድ። ወሴምኒ፡ ከፈለ፡ ውእቱሂ፡ ማእከለ፡ ውሉዱ፡ ወወፅአ፡ መክፈልት፡ ቀዳሚ፡ ለኤላም፡ ወለውሉዱ፡ መንገለ፡ ጽባሑ፡ ለጢግሪስ፡ ፈለግ፡ እስከ፡ ሶበ፡ ይቀርብ፡ መንገለ፡ ጽባሐ፡ ኵላ፡ ምድረ፡ እንደኬ፡ ወበኤርትራ፡ በእዴሁ፡ ወማያተ፡ ዴዳን፡ ወኵሉ፡ አድባር፡ ዘምብሪ፡ ወኤላ፡ ወኵሉ፡ ምድረ፡ ሱሳን፡ ወኵሉ፡ ዘበእደ፡ ፈርናክ፡ እስከ፡ ባሕረ፡ ኤርትራ፡ ወእስከ፡ ጢና፡ ፈለግ። ወለአሱርኒ፡ ወፅአ፡ መክፈልት፡ ካልእ፡ ኵላ፡ ምድረ፡ አሱር፡ ወነነዌ፡ ወሲናአር፡ ወሰክ፡ እስከ፡ ቅሩበ፡ እንደኬ፡ ወየዐርግ፡ ወደፋ፡ ፈለግ። ወለአርፋክስድ፡ ወፅአ፡ መክፈልት፡ ሣልስ፡ ኵላ፡ ምድረ፡ ዘደወለ፡ ከላዴዎን፡ መንገለ፡ ጽባሑ፡ ለኤውፍራጢስ፡ ዘቅሩብ፡ ለባሕረ፡ ኤርትራ፡ ወኵሉ፡ ማያተ፡ ገዳም፡ እስከ፡ ቅሩብ፡ ውስተ፡ ልሳነ፡ ባሕር፡ እንተ፡ ትኔጽር፡ መንገለ፡ ግብጽ፡ ኵላ፡ ምድረ፡ ሊባኖስ፡ ወሳኒር፡ ወአማና፡ እስከ፡ ቅሩበ፡ ኤውፍራጢስ። ወለአራም፡ ወፅአ፡ መክፈልት፡ ራብዕ፡ ኵላ፡ ምድረ፡ ሜስጴጦምያ፡ ማእከለ፡ ጢግሮስ፡ ወኤፍራጢስ፡ መንገለ፡ ደቡበ፡ ከለዳውያን፡ እስከ፡ ቅሩበ፡ ደብረ፡ አሱር፡ ወምድረ፡ አራራ። ወለሉድ፡ ውፅአ፡ መክፈልት፡ ኃምስ፡ ደብረ፡ አሱር፡ ወኵሉ፡ ዘዚአሁ፡ እስከ፡ ይቀርብ፡ ባሕረ፡ ዐቢየ፡ ወይቀርብ፡ መንገለ፡ ጽባሕ፡ አሱር፡ እኁሁ። ወያፌት፡ ውእቱሂ፡ ከፈለ፡ ምድረ፡ ለርስት፡ ማእከለ፡ ውሉዱ። ወወፅአ፡ መክፈልት፡ ቀዳሚ፡ ለጎሜር፡ መንገለ፡ ጽባሕ፡ እምገጸ፡ ደቡብ፡ እስከ፡ ጢና፡ ፈለግ። ወለማዳይ፡ ወፅአ፡ መክፈልት፡ ከመ፡ የአኃዝ፡ እምዐረብ፡ ለክልኤሆሙ፡ አኃዊሁ፡ እስከ፡ ደሰያት፡ ወእስከ፡ ጽነፊሆን፡ ለደሰያት። ወለኢዮእዋን፡ ወፅአ፡ መክፈልት፡ ራብዕ፡ ኵሉ፡ ደሴት፡ ወደሰያት፡ ዘመንገለ፡ እደ፡ ሉድ። ወለቶቤልሂ፡ ወፅአ፡ መክፈልት፡ ኃምስ፡ ማእከለ፡ ልሳን፡ እንተ፡ ትቀርብ፡ መንገለ፡ እደ፡ መክፈልተ፡ ሉድ፡ እስከ፡ ልሳን፡ ካልእት፡ ወማዕዶታ፡ ለልሳን፡ ካልእት፡ ውስተ፡ ልሳን፡ ሣልስት። ወለስምክ፡ ወፅአ፡ መክፈልት፡ ሳድስ፡ ወኵሉ፡ ማዕዶተ፡ ልሳን፡ ዘሣልስት፡ እስከ፡ ይቀርብ፡ ጽባሒሁ፡ ለጋዲር። ወለቲራስ፡ ወፅአ፡ መክፈልት፡ ሳብዕ፡ አርባዕቱ፡ ደሰያት፡ ዐበይት፡ በማእከለ፡ ባሕር፡ እለ፡ ይቀርባ፡ ለመክፈልተ፡ ካም። ወከመዝ፡ ከፈሉ፡ ውሉደ፡ ኖኅ፡ ለደቂቆሙ፡ በቅድመ፡ ኖኅ፡ አቡሆሙ። ወይቤሉ፡ ኵሎሙ፡ ለይኩን፡ ወለይኩን፡ ሎሙ፡ ወለውሉዶሙ፡ እስከ፡ ለዓለም፡ በትዝምዶሙ፡ እስከ፡ አመ፡ ዕለተ፡ ደይን፡ በዘ፡ ይኴንኖሙ፡ እግዚአብሔር፡ አምላክ፡ በሰይፍ፡ ወበእሳት፡ በእንተ፡ ኵሉ፡ እከይ፡ ዘርኵስ፡ ዘጌጋዮሙ፡ ዘመልእዋ፡ ለምድር፡ አበሳ፡ ወርኵሰ፡ ወዝሙተ፡ ወኃጢአተ።

Chapter 10 ወበሱባዔ፡ ሣልስ፡ ዘኢዮቤልዉ፡ ዝንቱ፡ አኀዙ፡ አጋንንት፡ ርኩሳን፡ ያስሕትዎሙ፡ ለደቂቀ፡ ውሉደ፡ ኖኅ፡ ወያዕብድዎሙ፡ ወያሕጕልዎሙ። ወመጽኡ፡ ውሉደ፡ ኖኅ፡ ኀበ፡ ኖኅ፡ አቡሆሙ፡ ወነገርዎ፡ በእንተ፡ አጋንንት፡ እለ፡ ያስሕቱ፡ ወይጼልሉ፡ ወይቀትሉ፡ ውሉደ፡ ውሉዱ። ወጸለየ፡ ቅድመ፡ እግዚአብሔር፡ አምላኩ፡ ወይቤ፡ አምላከ፡ መናፍስት፡ ዘውስተ፡ ኵሉ፡ ዘሥጋ፡ ዘገበርከ፡ ምስሌየ፡ ምሕረተ፡ ወአድኀንከኒ፡ ወውሉድየሂ፡ እምነ፡ ማየ፡ አይኅ፡ ወኢገበርከኒ፡ ከመ፡ እኅለቅ፡ ከመ፡ ገበርከ፡ ለውሉደ፡ ሐጉል፡ እስመ፡ ዐቢይ፡ ሣህልከ፡ ላዕሌየ፡ ወዐብየት፡ ምሕረትከ፡ ላዕለ፡ ነፍስየ። ወአንተ፡ ባርከኒ፡ ኪያየ፡ ወውሉድየ፡ ንልሀቅ፡ ወንብዛኅ፡ ወንምልኣ፡ ለምድር። ወአንተ፡ ታአምር፡ ዘከመ፡ ገብሩ፡ ትጉሃኒከ፡ አበዊሆሙ፡ ለእሉ፡ መንፈስ፡ በመዋዕልየ። ወኢይመብሉ፡ በመንፈሰ፡ ሕያዋን፡ እስመ፡ አንተ፡ ባሕቲትከ፡ ታአምር፡ ኵነኔሆሙ፡ ወኢይትባውሑ፡ ላዕለ፡ ውሉደ፡ ጻድቃን፡ እምይእዜ፡ ወእስከ፡ ለዓለም። ወይቤለነ፡ አምላክነ፡ ከመ፡ ንእስር፡ ኵሎ። ወመጽአ፡ መልአከ፡ መናፍስት፡ መስቴማ፡ ወይቤ፡ እግዚአኦ፡ ፈጣሪ፡ አትርፍ፡ እምኔሆሙ፡ ቅድሜየ፡ ወይስምዑ፡ ቃልየ፡ ወይግበሩ፡ ኵሎ፡ ዘእቤሎሙ፡ እስመ፡ እመ፡ ኢተርፉ፡ ሊተ፡ እምውስቴቶሙ፡ ኢይክል፡ ገቢረ፡ ስልጣነ፡ ፈቃድየ፡ ውስተ፡ ውሉደ፡ ሰብእ። ወይቤ፡ ይትረፉ፡ ቅድሜሁ፡ ዐሥራቶሙ፡ ወተስዓተ፡ መክፈልተ፡ ያውርድ፡ ውስተ፡ መካነ፡ ደይን። ወለአሐዱ፡ እምኔነ፡ ይቤ፡ ከመ፡ ንምሀሮ፡ ለኖኅ፡ ኵሎ፡ ፈውሶሙ፡ እስመ፡ ያአምር፡ ከመ፡ አኮ፡ በርትዕ፡ ዘየሐውሩ፡ ወአኮ፡ በጽድቅ፡ ዘይትባአሱ። ወገበርነ፡ በከመ፡ ኵሉ፡ ቃሉ፡ ወኵሎ፡ እኩያነ፡ እለ፡ ይጸውጉ፡ አሰርነ፡ ውስተ፡ መካነ፡ ደይን፡ ወዐሥራቶሙ፡ አትረፍነ፡ ከመ፡ ይኰንኑ፡ ቅድመ፡ ሰይጣን፡ ዲበ፡ ምድር። ወፈውሰ፡ ደዌሆሙ፡ ኵሎ፡ ነገርናሁ፡ ለኖኅ፡ ምስለ፡ አስሕቶቶሙ፡ ከመ፡ ይፈውስ፡ በዕፀ፡ ምድር። ወጸሐፈ፡ ኖኅ፡ ኵሎ፡ ዘከመ፡ መሀርናሁ፡ በመጽሐፍ፡ በኵሉ፡ ትዝምደ፡ ፈውስ፡ ወተዐፅዉ፡ መናፍስት፡ እኩያን፡ እምድኅሬሆሙ፡ ለውሉደ፡ ኖኅ። ወወሀበ፡ ኵሎ፡ መጻሕፍተ፡ ዘጸሐፈ፡ ለሴም፡ ወልዱ፡ ዘይልህቅ፡ እስመ፡ ኪያሁ፡ ያፈቅር፡ ፈድፋደ፡ እምኵሉ፡ ውሉዱ። ወኖመ፡ ኖኅ፡ ምስለ፡ አበዊሁ፡ ወተቀብረ፡ ውስተ፡ ሉባር፡ ደብር፡ በምድረ፡ አራራት። ተስዓተ፡ ምእተ፡ ወኀምሳ፡ ዓመተ፡ ፈጸመ፡ በሕይወቱ፡ ዐሠርተ፡ ወተስዓተ፡ ኢዮቤልዉ፡ ወክልኤ፡ ሱባዔ። ዘአፈድፈደ፡ ሐዪወ፡ ዲበ፡ ምድር፡ እምውሉደ፡ ሰብእ፡ በእንተ፡ ጽድቁ፡ ዘባቲ፡ ፍጹም፡ በጽድቁ፡ ዘእንበለ፡ ኤኖክ። ወበሠላሳ፡ ወሠለስቱ፡ ኢዮቤልዉ፡ በዓመት፡ አሐዱ፡ በዝ፡ ካልእ፡ ሱባዔ፡ ነሥአ፡ ሎቱ፡ ፋሌክ፡ ብእሲተ፡ እንተ፡ ስማ፡ ሎምና፡ ወለተ፡ ሲናኦር፡ ወወለደት፡ ሎቱ፡ ወልደ፡ በዓመት፡ ራብዕ፡ ዘሱባዔ፡ ዝንቱ፡ ወጸውዐ፡ ስሞ፡ ራግው፡ እስመ፡ ይቤ፡ ናሁ፡ ውሉደ፡ ሰብእ፡ ኮኑ፡ እኩያነ፡ ለምክረ፡ ፁግ፡ ከመ፡ ይሕንጹ፡ ሎሙ፡ ሀገረ፡ ወማኅፈደ፡ ውስተ፡ ምድረ፡ ሰኖኦር። እስመ፡ ፈለሱ፡ እምድረ፡ አራራት፡ መንገለ፡ ጽባሕ፡ ውስተ፡ ሰናኦር፡ እስመ፡ በመዋዕሊሁ፡ ሐነጽዎ፡ ለሀገር፡ ወለማኅፈድ፡ እንዘ፡ ይብሉ፡ ንዕርግ፡ ቦቱ፡ ውስተ፡ ሰማይ። ወአኀዙ፡ ይሕንጹ፡ ወበሱባዔ፡ ራብዕ፡ ወፈጡ፡ በእሳት፡ ወኮኖሙ፡ ግንፋል፡ ከመ፡ እብን፡ ወፅቡር፡ በዘ፡ ይመርዩ፡ ቦቱ፡ አስፋሊጦስ፡ ዘይወፅእ፡ እምነ፡ ባሕር፡ ወእምአንቅዕተ፡ ማያት፡ በምድረ፡ ሰናኦር። ወሐነጽዎ፡ አርብዓ፡ ዓመተ፡ ወሠለስተ፡ ዓመተ፡ ሀለዉ፡ የሐንጽዎ፡ ግንፋለ፡ ፍጹመ፡ ሠለስተ፡ ወዐሠርተ፡ ውስቴቱ፡ ወሣልስተ፡ አሐቲ፡ ለኑኁ፡ ኀምሳ፡ ምእት፡ ወአርባዕቱ፡ ምእት፡ ወሠላሳ፡ ወሠላስ፡ በእመት፡ ዐርገ፡ ኑኁ። ወይቤለነ፡ እግዚአብሔር፡ አምላክነ፡ ለነ፡ ናሁ፡ ሕዝብ፡ አሐዱ፡ ወወጠነ፡ ይግበር፡ ወይእዜኒ፡ ኢየሐልቅ፡ እምኔሆሙ። ወወረደ፡ እግዚአብሔር፡ ወወረድነ፡ ምስሌሁ፡ ንርአይ፡ ሀገረ፡ ወማኅፈደ፡ ዘሐነጹ፡ ውሉደ፡ ሰብእ። ወሦጠ፡ ኵሎ፡ ቃለ፡ ልሳናቲሆሙ፡ ወኢሰምዐ፡ እንከ፡ አሐዱ፡ ቃለ፡ ካልኡ፡ ወአንተጉ፡ እንከ፡ ሐኒጸ፡ ሀገር፡ ወማኅፈድ። በእንተዝ፡ ተሰምየት፡ ኵላ፡ ምድረ፡ ሰናኦር፡ ባቤል፡ እስመ፡ በህየ፡ ሦጠ፡ አምላክ፡ ኵሎ፡ ልሳናቲሆሙ፡ ለውሉደ፡ ሰብእ። ወፈነወ፡ እግዚአብሔር፡ ነፋሰ፡ ውስተ፡ ማኅፈደ፡ ወገፍትኦ፡ ውስተ፡ ምድር። በሱባዔ፡ ራብዕ፡ በአሐዱ፡ ዓመት፡ በቅድመ፡ ዚአሁ፡ ዘሠላሳ፡ ወአርባዕቱ፡ ኢዮቤልዉ፡ ተዘርዉ፡ እምድረ፡ ሰናኦር። ወሖሩ፡ ካም፡ ወውሉዱ፡ ውስተ፡ ምድር፡ እንተ፡ እኅዝት፡ ሎቱ፡ ዘረከበ፡ በመክፈልቱ፡ ውስተ፡ ምድረ፡ ደቡብ። ወርእየ፡ ከናአን፡ ምድረ፡ ሊባኖስ፡ እስከ፡ ሙሐዘ፡ ግብጽ፡ ከመ፡ ሠናይት፡ ይእቲ፡ ጥቀ። ወይቤሎ፡ ካም፡ አቡሁ፡ ወኵስ፡ ወመጽሬም፡ አኃዊሁ፡ እስመ፡ ኀደርከ፡ ውስተ፡ ምድር፡ እንተ፡ ኢኮነት፡ እንቲአከ፡ ወኢወፅአ፡ ለነ፡ በዕፀው፡ ኢትግበር፡ ከመዝ። ኢትኅድር፡ ውስተ፡ ማኅደረ፡ ሴም። ርጉም፡ አንተ፡ ወርጉመ፡ ትከውን፡ እምኵሎሙ፡ ውሉደ፡ ኖኅ፡ በመርገም፡ እንተ፡ ተሠራዕነ፡ በመሐላ፡ በቅድሜሁ፡ ለመኰንን፡ ቅዱስ፡ ወበቅድመ፡ ኖኅ፡ አቡነ። ወኢሰምዖሙ፡ ወኀደረ፡ ምድረ፡ ሊባኖስ፡ እምኤማት፡ እስከ፡ ምብዋአ፡ ግብጽ፡ ውእቱ፡ ወውሉዱ፡ እስከ፡ ዛቲ፡ ዕለት። ወበእንተዝ፡ ተሰምየት፡ ይእቲ፡ ምድር፡ ምድረ፡ ከናአን። ወያፌትሰ፡ ወውሉዱ፡ ሖሩ፡ መንገለ፡ ባሕር፡ ወኀደሩ፡ ውስተ፡ ምድረ፡ መክፈልቶሙ፡ ወርእየ፡ ማዳይ፡ ምድረ፡ ባሕር፡ ወኢአደመቶ፡ በቅድሜሁ፡ ወአስተብቍዐ፡ እምኀበ፡ ኤላም፡ ወአሱር፡ ወአርፋክስድ፡ እምኀበ፡ እኀወ፡ ብእሲቱ፡ ወኀደረ፡ ውስተ፡ ምድረ፡ ሜድቂን፡ ቅሩበ፡ ኀበ፡ እኅወ፡ ብእሲቱ፡ እስከ፡ ዛቲ፡ ዕለት። ወሰመየ፡ ምንባሪሁ፡ ወምንባረ፡ ውሉደ፡ ሜዲቂን፡ በስመ፡ ማዳይ፡ አቡሆሙ።

Chapter 11 ወበሠላሳ፡ ወኃምስቱ፡ ኢዮቤልዉ፡ በሱባዔ፡ ሣልስ፡ በአሐዱ፡ ዓመቱ፡ ሎቱ፡ ነሥአ፡ ሎቱ፡ ራግው፡ ብእሲተ፡ ወስማ፡ አራ፡ ወለተ፡ ኡር፡ ወልደ፡ ኬሴድ፡ ወወለደት፡ ሎቱ፡ ወልደ፡ ወጸውዐ፡ ስሞ፡ ሴሩግ፡ በሳብዕ፡ ሱባዔሁ፡ ለዝ፡ ሱባዔ። ወበዝ፡ ኢዮቤልዉ፡ ወጠኑ፡ ውሉደ፡ ኖኅ፡ ይትቃተሉ፡ ለፄውዎ፡ ወለቀቲል፡ አሐዱ፡ አሐዱ፡ እኅዋሁ፡ ወለክዒወ፡ ደመ፡ ሰብእ፡ ዲበ፡ ምድር፡ ወለበሊዐ፡ ደም፡ ወለሐኒጸ፡ አህጉር፡ ጽኑዓት፡ ወጥቅም፡ ወማኅፈድ፡ ወለተልዕሎ፡ ብእሲ፡ ላዕለ፡ ሕዝብ፡ ወለሰዪመ፡ መቅድመ፡ መንግሥት። ወሐነጸ፡ ኡድ፡ ወልደ፡ ኬሴድ፡ ሀገረ፡ አራሃ፡ እንተ፡ ከልዴዎን፡ ወሰመየ፡ ስማ፡ በስመ፡ ዚአሁ፡ ወበስመ፡ አቡሁ። ወገብሩ፡ ሎሙ፡ ስብከዋተ፡ ወይሰግድ፡ አሐዱ፡ ለጣዖት፡ ዘገብረ፡ ለርእሱ፡ ስብኮ። ወመኰንን፡ ወስቴማ፡ ይኄይል፡ ለግብረ፡ ዝንቱ፡ ኵሉ፡ ወይፌኑ፡ በእደ፡ መናፍስት፡ ለእለ፡ ተውህቡ፡ ታሕተ፡ እዴሁ፡ ለገቢረ፡ ኵሉ፡ ጌጋይ፡ ወኃጢአት፡ ወኵሉ፡ አበሳ፡ ለአማስኖ፡ ወለአሕጕሎ፡ ወለክዒወ፡ ደም፡ ዲበ፡ ምድር። በእንተዝ፡ ተጸውዐ፡ ስሙ፡ ለሴሩክ፡ ሴሩክ፡ እስመ፡ ተመይጠ፡ ኵሉ፡ ለገቢረ፡ ኵሉ፡ ኃጢአት። ወልህቀ፡ ወኀደረ፡ ውስተ፡ ኡር፡ ዘከላዴዎን፡ ቅሩበ፡ አበ፡ እመ፡ ብእሲቱ፡ ወኮነ፡ ያመልክ፡ ጣዖተ። ወወለደት፡ ሎቱ፡ ናኮርሃ፡ በዓመት፡ ቀዳሚሁ፡ ለዝ፡ ሱባዔ፡ ወልህቀ፡ ወኀደረ፡ ውስተ፡ ኡር፡ ውስተ፡ ዘእለ፡ ኡር፡ ከለዳዊያን፡ ወመሀሮ፡ አቡሁ፡ ኁሣሤሆሙ፡ ለከለዳዊያን፡ ለተማርዮ፡ ወለተሰግሎ፡ በተአምረ፡ ሰማይ። ወበሠላሳ፡ ወሰብዓቱ፡ ኢዮቤልዉ፡ በሱባዔ፡ ሳድስ፡ በአሐዱ፡ ዓመቱ፡ ሎቱ፡ ነሥአ፡ ብእሲተ፡ ወስማ፡ ኢያስካ፡ ወለተ፡ ኔስታግ፡ ዘከለዳዊያን። ወወለደት፡ ሎቱ፡ ታራሃ፡ በዓመት፡ ሳብዕ፡ ለዝ፡ ሱባዔ። ወፈነወ፡ መኰንን፡ መስቴማ፡ ቋዓተ፡ ወአዕዋፈ፡ ከመ፡ ይብልዑ፡ ዘርአ፡ ዘይዘራእ፡ ውስተ፡ ምድር፡ ወለአማስኖ፡ ምድር። በእንተዝ፡ ጽውዐ፡ ስሞ፡ ታራ። ወአኀዙ፡ ዓመታት፡ ይዕበሩ፡ እምቅድመ፡ ገጾሙ፡ ለአዕዋፍ፡ ወኵሎ፡ ፍሬ፡ ዕፅ፡ ይበልዑ፡ እምአእዋም፡ በኃይል፡ ዐቢይ፡ እመ፡ ክህሉ፡ አድኅኖ፡ ኅዳጠ፡ እምኵሉ፡ ፍሬ፡ ምድር፡ በመዋዕሊሆሙ። ወበዝ፡ ሠላሳ፡ ወተስዓቱ፡ ኢዮቤልዉ፡ በሱባዔ፡ ካልእ፡ በቀዳሚ፡ ዓመት። ወበዓመት፡ ሳብዕ፡ ለዝ፡ ሱባዔ፡ ወለደት፡ ሎቱ፡ ወልደ። ወአኀዘ፡ ሕፃን፡ ያእምር፡ ስሕተተ፡ ምድር፡ ከመ፡ ኵሉ፡ ይስሕት፡ በድኅሬሆሙ፡ ለግልፎ፡ ወድኅረ፡ ርኵስ። ወአኀዝ፡ ይጸሊ፡ ኀበ፡ ፈጣሬ፡ ኵሉ፡ ከመ፡ ያድኅኖ፡ እምስሕተተ፡ ውሉደ፡ ሰብእ። ወበጽሐ፡ ጊዜ፡ ዘርእ፡ ለዘሪእ፡ ውስተ፡ ምድር። ወደመና፡ ቋዓት፡ መጽኡ፡ ከመ፡ ይብልዑ፡ ዘርአ፡ ወአብራም፡ ይረውጽ፡ አንፃሪሆሙ፡ ዘእንበለ፡ ይንበሩ፡ ውስተ፡ ምድር፡ ወይኬልሕ፡ ላዕሌሆሙ፡ ዘእንበለ፡ ይንበሩ፡ ዲበ፡ ምድር፡ ለበሊዐ፡ ዘርእ፡ ወይብል፡ ኢትረዱ፡ ግብኡ፡ ውስተ፡ መካን፡ ኀበ፡ ወፃእክሙ፡ ወተመይጡ። ወገብረ፡ በይእቲ፡ ዕለት፡ ለደመና፡ ቋዓት፡ ሰብዓ፡ ወኢነበረ፡ እምኵሉ፡ ቋዓት፡ ውስተ፡ ኵሉ፡ ገራውህ፡ ኀበ፡ ሀሎ፡ አብራም፡ ህየ፡ ወኢአሐዱ። ወይሬእይዎ፡ ኵሎሙ፡ እለ፡ ምስሌሁ፡ ውስተ፡ ኵሉ፡ ገራውህ፡ እንዘ፡ ይኬልሕ፡ ወኵሉ፡ ቋዓት፡ ተመይጡ። ወመጽኡ፡ ኀቤሁ፡ በዓመት፡ ዝንቱ፡ ኵሎሙ፡ እለ፡ ይዘርኡ፡ ወሀሎ፡ የሐውር፡ ምስሌሆሙ፡ እስከ፡ አመ፡ የሐልቅ፡ ጊዜ፡ ዘርእ፡ ወዘርኡ፡ ምድሮሙ። ወበዓመት፡ አሐዱ፡ ዘሱባዔ፡ ኃምስ፡ መሀረ፡ አብራም፡ ለእለ፡ ይገብሩ፡ ንዋየ፡ አልህምት፡ ለኬነተ፡ ዕፅ፡ ወገብሩ፡ ንዋየ፡ በመልዕልተ፡ ምድር፡ በአንጻረ፡ ድጕር፡ ዕርፍ፡ ከመ፡ ያንብር፡ ላዕሌሁ፡ ዘርአ፡ ወይወርድ፡ እምውስቴቱ፡ ዘርእ፡ ውስተ፡ ከተማ፡ ዕርፍ፡ ወይትኀባእ፡ ውስተ፡ ምድር፡ ወኢይፈርሁ፡ እንከ፡ እምገጸ፡ ቋዓት። ወገብሩ፡ ከመዝ፡ ላዕለ፡ ኵሉ፡ ድጕረ፡ ዕርፍ፡ መልዕልተ፡ ምድር፡ ወዘርኡ፡ ወገብሩ፡ ኵሉ፡ ምድር፡ ዘከመ፡ አዘዞሙ፡ አብራም፡ ወኢይፈርሁ፡ እንከ፡ እምአዕዋፍ።

Chapter 12 ወኮነ፡ በሱባዔ፡ ሳድስ፡ ዓመቱ፡ ሎቱ፡ ይቤ፡ አብራም፡ ለታራ፡ አቡሁ፡ እንዘ፡ ይብል፡ አባ፡ ወይቤ፡ ነየ፡ አነ፡ ወልድየ። ወይቤ፡ ምንተ፡ ረድኤተ፡ ወተድላ፡ ለነ፡ እምእሉ፡ ጣዖት፡ ዘአንተ፡ ታመልክ፡ ወትሰግድ፡ ቅድሜሆሙ። እስመ፡ አልቦ፡ ላዕሌሆሙ፡ ምንተኒ፡ መንፈሰ፡ እስመ፡ ስግመት፡ እሙንቱ፡ ወስሕተተ፡ ልብ፡ እሙንቱ፡ ኢታምልክዎሙ። አምልኩ፡ አምላከ፡ ሰማይ፡ ዘያወርድ፡ ዝናመ። ለምንት፡ አንትሙ፡ ታመልኩ፡ እለ፡ አልቦሙ፡ መንፈሰ፡ ላዕሌሆሙ፡ እስመ፡ ግብረ፡ እደው፡ እሙንቱ፡ ወዲበ፡ መታክፍቲክሙ፡ አንትሙ፡ ትጸውርዎሙ፡ ወአልቦ፡ እምኔሆሙ፡ ለክሙ፡ ረጽኤተ፡ ዘእንበለ፡ ኀሳር፡ ዐቢይ፡ ለእለ፡ ይገብርዎሙ፡ ወስሕተተ፡ ልብ፡ ለእለ፡ ያመልክዎሙ፡ ኢታምልክዎሙ። ወይቤሎ፡ አነሂ፡ አአምር፡ ወልድየ፡ ምንተ፡ እሬሲ፡ ለሕዝብ፡ እለ፡ አዘዙኒ፡ እትለአክ፡ ቅድሜሆሙ። ወእመ፡ ነገርክዎሙ፡ ጽድቀ፡ ይቀትሉኒ፡ እስመ፡ ተለወት፡ ነፍሶሙ፡ ኀቤሆሙ፡ ከመ፡ ያምልክዎሙ፡ ወይሰብሕዎሙ። ወነገረ፡ ዘንተ፡ ነገረ፡ ለክልኤ፡ አኃዊሁ፡ ወተምዕዑ፡ ላዕሌሁ፡ ወአርመመ። ወበአርብዓ፡ ኢዮቤልዉ፡ በሱባዔ፡ ካልእ፡ በሳብዕ፡ ዓመቱ፡ ሎቱ፡ ነሥአ፡ ሎቱ፡ አብራም፡ ብእሲተ፡ ወስማ፡ ሶራ፡ ወለተ፡ አቡሁ፡ ወኮነቶ፡ ሎቱ፡ ብእሲተ። ወአራን፡ እኁሁ፡ ነሥአ፡ ሎቱ፡ በዓመት፡ ሣልስ፡ ዘሱባዔ፡ ሣልስ፡ ወወለደት፡ ሎቱ፡ ወልደ፡ በዓመት፡ ሳብዕ፡ ዘሱባዔ፡ ዝንቱ፡ ወጸውዐ፡ ስሞ፡ ሎጥ። ወናኮርኒ፡ እኁሁ፡ ነሥአ፡ ሎቱ፡ ብእሲተ። ወበዓመት፡ ዘስሳ፡ ዘሕይወተ፡ አብራም፡ ውእቱ፡ ሱባዔ፡ ራብዕ። ወተንሥኡ፡ ሌሊተ፡ ወፈቀዱ፡ ያድኅኑ፡ አማልክቲሆሙ፡ እማእከለ፡ እሳት። ወሰረረ፡ አራን፡ ከመ፡ ያድኅኖሙ፡ ወነደደ፡ እሳት፡ ላዕሌሁ፡ ወውዕየ፡ በእሳት፡ ወሞተ፡ በኤኑር፡ ዘከላዴዎን፡ በቅድመ፡ ታራ፡ አቡሁ፡ ወቀበርዎ፡ በኤኑር፡ ዘከላዴዎን። ወወፅአ፡ ታራ፡ እምነ፡ ኡር፡ ዘከለዳዊያን፡ ውእቱ፡ ወውሉዱ፡ ከመ፡ ይምጽኡ፡ ውስተ፡ ምድረ፡ ሊባኖስ፡ ወውስተ፡ ምድረ፡ ከናአን፡ ወኀደረ፡ ውስተ፡ ካራን። ወበሳድስ፡ ሱባዔ፡ በዓመት፡ ኃምሱ፡ ሎቱ፡ ነበረ፡ አብራም፡ በሌሊት፡ በሠርቀ፡ ወርኅ፡ ሳብዕ፡ ከመ፡ ያበይን፡ ከዋክብተ፡ እምሰርክ፡ እስከ፡ ነግህ፡ ከመ፡ ይርአይ፡ ምንተ፡ ግብረ፡ ዓመት፡ በዝናማት፡ ወሀሎ፡ ውእቱ፡ ባሕቲቱ፡ ይነብር፡ ወያቤይን። ወመጽአ፡ ውስተ፡ ልቡ፡ ቃል፡ ወይቤ፡ ኵሉ፡ ተአምረ፡ ከዋክብት፡ ወተአምሪሃ፡ ለወርኅ፡ ወለፀሐይ፡ ኵሉ፡ በእደ፡ እግዚአብሔር። ለእመ፡ ፈቀደ፡ ያዘንም፡ ነግህ፡ ወሰርክ፡ ወእመ፡ ፈቀደ፡ ኢያወርድ፡ ወኵሉ፡ ውስተ፡ እዴሁ። ወጸለየ፡ በዛቲ፡ ሌሊት፡ ወይቤ፡ አምላኪየ፡ አምላኪየ፡ አምላክ፡ ልዑል፡ አንተ፡ ባሕቲትከ፡ ሊተ፡ አምላክ፡ ወአንተ፡ ኵሎ፡ ፈጠርከ፡ ወግብረ፡ እደዊከ፡ ኵሉ፡ ኮነ፡ ወሀለወ፡ ወኪያከ፡ ወመለኮትከ፡ ኀረይኩ። አድኅነኒ፡ እምእደ፡ መናፍስት፡ እኩያን፡ እለ፡ ይሴለጡ፡ ውስተ፡ ኅሊና፡ ልበ፡ ሰብእ፡ ወኢያስሕቱኑ፡ እምድኅሬከ፡ አምላኪየ፡ ወትረስየኒ፡ ኪያየ፡ ወዘርእየ፡ አንተ፡ ለዓለም። ወይቤ፡ እመ፡ እገብእሁ፡ ውስተ፡ ኡር፡ ዘከለዳዊያን፡ እለ፡ እሙንቱ፡ የኀሥሡ፡ ገጽየ፡ ከመ፡ እግባእ፡ ኀቤሆሙ፡ ወሚመ፡ እንበር፡ ዝየ፡ በዝ፡ መካን፡ ፍኖተ፡ ርቱዐ፡ ቅድሜከ፡ ኪያሃ፡ ሰርሕ፡ በእደ፡ ገብርከ፡ ይግበር፡ ወኢይሖር፡ በስሕተተ፡ ልብየ፡ አምላኪየ። ወውእቱ፡ ሶበ፡ ፈጸመ፡ ተናግሮ፡ ወጸዕዮ። ወእባርከከ፡ ወአዐቢ፡ ስመከ፡ ወትከውን፡ ቡሩከ፡ ውስተ፡ ምድር። ወእከውነከ፡ ለከ፡ ወለወልድከ፡ ወለወልደ፡ ወልድከ፡ ወለኵሉ፡ ዘርእከ፡ አምላከ፡ ኢትፍራህ፡ እምይእዜ፡ ወእስከ፡ ኵሉ፡ ትዝምደ፡ ምድር፡ አነ፡ አምላክከ። ወይቤለኒ፡ እግዚአብሔር፡ አምላክ፡ ፍታሕ፡ አፉሁ፡ ወእዘኒሁ፡ ይስማዕ፡ ወይንብብ፡ በልሳኑ፡ በልሳን፡ እንተ፡ ታስተርኢ፡ እስመ፡ አዕረፈ፡ እምአፈ፡ ኵሉ፡ ውሉደ፡ ሰብእ፡ እምዕለተ፡ ድቀት። ወፈታሕኩ፡ አፉሁ፡ ወእዘኒሁ፡ ወከናፍሪሁ፡ ወአኀዝኩ፡ እትናገር፡ ምስሌሁ፡ ዕብራይስጥ፡ በልሳነ፡ ፍጥረት። ወነሥአ፡ መጻሕፍተ፡ አበዊሁ፡ ወጽሑፋት፡ እማንቱ፡ ዕብራይስጥ፡ ወደገሞን፡ ወአኀዘ፡ ይትመሀሮን፡ እምአሜሃ፡ ወአነ፡ አየድዖ፡ ኵሎ፡ ዘይሰአኖ። በዓመት፡ ሳብዕ፡ ዘሱባዔ፡ ሳድስ፡ ወተናገረ፡ ምስለ፡ አቡሁ፡ ወአይድዖ፡ ከመ፡ የሐውር፡ ውእቱ፡ እምካራን፡ ለሐዊረ፡ ምድረ፡ ከናአን፡ ይርአያ፡ ወይግባእ፡ ኀቤሁ። ወይቤሎ፡ ታራ፡ አቡሁ፡ ሖር፡ በሰላም፡ አምላከ፡ ዓለም፡ ያርትዕ፡ ፍኖተከ፡ ወእግዚአብሔር፡ ምስሌከ፡ ወይትማኅፀንከ፡ እምኩሉ፡ እኩይ። ወእመ፡ ርኢከ፡ ምድረ፡ አዳም፡ ለአዕይንቲከ፡ ለኀዲር፡ ውስቴታ፡ ነዓ፡ ወንሥአኒ፡ ኀቤከ፡ ወንሥኦ፡ ለሎጥ፡ ምስሌከ፡ ወልደ፡ አራን፡ እኁከ፡ ለከ፡ ለወልድ፡ እግዚአብሔር፡ ምስሌከ። ወናኮርሃ፡ እኅዋከ፡ ኅድግ፡ ኀቤየ፡ እስከ፡ ትገብእ፡ በሰላም፡ ወነሐውር፡ ኵልነ፡ ኅቡረ፡ ምስሌከ።

Chapter 13 ወሖረ፡ አብራም፡ እምካራን፡ ወነሥአ፡ ሶራይሃ፡ ብእሲቶ። ወርእየ፡ ወናሁ፡ ምድር፡ አዳም፡ ጥቀ፡ እምብዋአ፡ ኤማት፡ እስከ፡ ኀበ፡ ድርስ፡ ነዋኅ። ወይቤሎ፡ እግዚአብሔር፡ ለከ፡ ወለዘርእከ፡ እሁብ፡ ዛተ፡ ምድረ። ወሐነጸ፡ በህየ፡ ምሥዋዐ፡ ወአዕረገ፡ ዲቤሁ፡ ጽንሐሐ፡ ለእግዚአብሔር፡ ዘአስተርአዮ። ወአንሥአ፡ እምህየ፡ ውስተ፡ ደብረ፡ ቤቴል፡ ዘመንገለ፡ ባሕር፡ ወአጌ፡ መንገለ፡ ጽባሕ፡ ወተከለ፡ ደብተራሁ፡ ህየ። ወርእየ፡ ወናሁ፡ ምድር፡ ጽፍሕት፡ ወኄርት፡ ጥቀ፡ ወኵሉ፡ ይሠርፅ፡ ላዕሌሃ፡ አውያን፡ ወበለስ፡ ወሮማን፡ ዕፅ፡ ባላን፡ ወድርስ፡ ወጤሬቤንቶስ፡ ወዕፀወ፡ ዘይት፡ ወቄድሮስ፡ ወቄጲሪሶስ፡ ወሊባኖስ፡ ወኵሉ፡ ዕፀወ፡ ገዳም፡ ወማይ፡ ዲበ፡ አድባር። ወባረኮ፡ ለእግዚአብሔር፡ ዘአውፅኦ፡ እምነ፡ ኡር፡ ዘከለዳዊያን፡ ወአምጽኦ፡ ውስተዝ፡ ደብር። ወኮነ፡ በአሐዱ፡ ዓመት፡ በሱባዔ፡ ሳብዕ፡ በሠርቀ፡ ወርኅ፡ በዘ፡ ቀዳሚ፡ ሐነጸ፡ ምሥዋዐ፡ በዝ፡ ደብር፡ ወጸውዖ፡ በስመ፡ እግዚአብሔር፡ አንተ፡ አምላኪየ፡ አምላከ፡ ዘለዓለም። ወአዕረገ፡ ዲበ፡ ምሥዋዕ፡ ጽንሐሐ፡ ለእግዚአብሔር፡ ከመ፡ የሀሉ፡ ምስሌሁ፡ ወኢይኅድጎ፡ ኵሎ፡ መዋዕለ፡ ሕይወቱ። ወአንሥአ፡ እምህየ፡ ወሖረ፡ መንገለ፡ ደቡብ፡ ወበጽሐ፡ እስከ፡ ኬብሮን፡ ወኬብሮን፡ አሜሃ፡ ተሐንጸት፡ ወነበረ፡ ህየ፡ ዓመተ፡ ክልኤተ፡ ወሖረ፡ ውስተ፡ ምድረ፡ ደቡብ፡ እስከ፡ ቦአ፡ ሎጥ። ወሖረ፡ አብራም፡ ግብጽ፡ በሣልስ፡ ዓመት፡ ዘሱባዔ፡ ወኀደረ፡ ውስተ፡ ግብጽ፡ ኀምስተ፡ ዓመተ፡ ዘእንበለ፡ ትትሀየድ፡ ብእሲቱ። ወጠናይስ፡ ዘግብጽ፡ አሜሃ፡ ተሐብጸት፡ በሰብዓቱ፡ ክረምት፡ እምድኅረ፡ ኬብሮን። ወኮነ፡ አመ፡ ሄዶ፡ ፈርዖን፡ ሶራይ፡ ብእሲቶ፡ ለአብራም፡ ቀሠፈ፡ እግዚአብሔር፡ ፈርዖንሃ፡ ወቤቶ፡ በመቅሠፍት፡ ዐቢይ፡ በእንተ፡ ሶራይ፡ ብእሲቱ፡ ለአብራም። ወአብራም፡ ክቡር፡ በጥሪት፡ ጥቀ፡ በአባግዕ፡ ወበአልህምት፡ ወበአእዱግ፡ ወበአፍራስ፡ ወበአግማል፡ ወበአግብርት፡ ወበአእማት፡ ወበብሩር፡ ወበወርቅ፡ ፈድፋደ። ወአግብአ፡ ፈርዖን፡ ሶራይሃ፡ ብእሲተ፡ አብራም፡ ወአፍለሶ፡ እምድረ፡ ግብጽ፡ ወሖረ፡ ውስተ፡ መካን፡ ኀበ፡ ተከለ፡ ደብተራሁ፡ እንተ፡ ቀዲሙ፡ ውስተ፡ መካነ፡ ምሥዋዐ፡ አጌ፡ እምጽባሐ፡ ቤቴል፡ ወባሕር፡ ወባሪኮ፡ ለእግዚአብሔር፡ አምላኩ፡ ዘሜጦ፡ በሰላም። ወኮነ፡ በዝ፡ አርብዓ፡ ወአሐዱ፡ ኢዮቤልዎን፡ በሣልስ፡ ዓም፡ ዘሱባዔ፡ ቀዳሚ፡ ገብአ፡ ውስተ፡ ዝመካን፡ ወአዕረገ፡ በዲቤሁ፡ ጽንሐሐ፡ ወጸውዐ፡ በስመ፡ እግዚአብሔር፡ አምላክ፡ ልዑል፡ አምላኪየ፡ ለዓለመ፡ ዓለም። ወበራብዕ፡ ዓመት፡ ዘዝ፡ ሱባዔ፡ ተፈልጠ፡ ሎጥ፡ እምኔሁ፡ ወኀደረ፡ ሎጥ፡ ውስተ፡ ሰዶም፡ ወሰብአ፡ ሰዶም፡ ኃጥኣን፡ ጥቀ። ወአከዮ፡ በልቡ፡ እስመ፡ ተፈልጠ፡ ወልደ፡ እኁሁ፡ እምኔሁ፡ እስመ፡ አልቦ፡ ውሉደ። በውእቱ፡ ዓመት፡ አመ፡ ተፄወወ፡ ሎጥ። እስመ፡ ኵላ፡ ምድረ፡ እንተ፡ ትሬኢ፡ ለከ፡ ወለዘርእከ፡ እመሁባ፡ እስከ፡ ለዓለም። ተንሥእ፡ ወአንሶሱ፡ ውስተ፡ ኑኃ፡ ወርሕባ፡ ወርኢ፡ ኵሎ፡ እስመ፡ ለዘርእከ፡ እሁባ። ወበዝ፡ ዓመት፡ መጽአ፡ ከደለጎሞር፡ ንጉሠ፡ ኤላም፡ አመርፋል፡ ንጉሠ፡ ሲናአር፡ ወአሪአክ፡ ንጉሠ፡ ሴለሳር፡ ወቴርጋል፡ ንጉሠ፡ አሕዛብ፡ ወቀተልዎ፡ ለንጉሠ፡ ጎሞር፡ ወጐየ፡ ንጉሠ፡ ሰዶም። ወፄወዉ፡ ሰዶምሃ፡ ወአዳማሃ፡ ወሴቦኤም፡ ወፄወውዎ፡ ለሎጥኒ፡ ወልደ፡ እኁሁ፡ ለአብራም፡ ሰኵሎ፡ ጥሪቶ፡ ወሖረ፡ እስከ፡ ዳን። ወመጽአ፡ ዘድኅነ፡ ወነገሮ፡ ለአብራም፡ ከመ፡ ተፄወወ፡ ወልደ፡ እኁሁ። ወአስተረሰየ፡ ልደ፡ ቤቱ፡ [ወሖረ፡ አብራም፡ ወቀተሎ፡ ለከደለጎሞር፡ ወየመይጠ፡ ወዐሠረ፡ ዐሥራተ፡ እምኵሉ፡ ወወሀቦ፡ ለመልከ፡ ጼዴቅ። ወአልቦ፡ ለዝ፡ ሕግ፡ ወሰነ፡ መዋዕል፡ እስመ፡ ትውልድ፡ ዘለዓለም፡ ሠርዖ፡ ከመ፡ የሀቡ፡ ዓሥራተ፡ እምኵሉ፡ ለእግዚአብሔር፡ እምዘርእ፡ ወእምወይን፡ ወእምቅብእ፡ ወእምአልህምት፡ ወእምአባግዕ። ወውእቱ፡ ወሀበ፡ ለካህናቲሁ፡ ለበሊዕ፡ ወለሰቲይ፡ በፍሥሓ፡ በቅድሜሁ። ወበጽሐ፡ ኀቤሁ፡ ንጉሠ፡ ሰዶም፡ ወሰገደ፡ ቅድሜሁ፡ ወይቤ፡ እግዚእነ፡ አብራም፡ ጸግወነ፡ ነፍሰ፡ እለ፡ ባለሕከ፡ ወምህርካሁሰ፡ ይኩንከ። ወይቤሎ፡ አብራም፡ ሎቱ፡ አነሥእ፡ እደዊየ፡ ኀበ፡ አምላክ፡ ልዑል፡ እምፈትል፡ እስከ፡ ቶታነ፡ አሣእን፡ እመ፡ እነሥእ፡ እምኵሉ፡ ዘዚአከ፡ ከመ፡ ኢትኩን፡ በሃሌ፡ አነ፡ አብዐልክዎ፡ ለአብራም።

Chapter 14 ወእምድኅረ፡ ዝነገር፡ በራብዕ፡ ዓመት፡ ዘዝ፡ ሱባዔ፡ በሠርቀ፡ ሣልስ፡ ወርኅ፡ ኮነ፡ ቃለ፡ እግዚአብሔር፡ ኀበ፡ አብራም፡ በሕልም፡ እንዘ፡ ይብል፡ ኢትፍራህ፡ አብራም፡ አነ፡ ውእቱ፡ ቃውምከ፡ ወዐስብከ፡ ይፈደፍድ፡ ጥቀ። ወይቤ፡ እግዚኦ፡ እግዚኦ፡ ምንተ፡ ትሁበኒ፡ ወአንሰ፡ አሐውር፡ ዘእንበለ፡ ውሉድ፡ ወወልደ፡ ማሴቅ፡ አመትየ፡ ውእቱ፡ ደማስቆስ፡ ኤሌኤዜር፡ ውእቱ፡ ይወርሰኒ፡ ወሊተ፡ ኢወሀብከኒ፡ ዘርአ፡ ሀበኒ፡ ዘርአ። ወይቤሎ፡ ኢይወርሰከዝ፡ ዘእንበለ፡ ዘይወፅእ፡ እምከርሥከ፡ ውእቱ፡ ይወርሰከ። ወአውፅኦ፡ አፍአ፡ ወይቤሎ፡ ነጽር፡ ውስተ፡ ሰማይ፡ ወኆልቍ፡ ከዋክብተ፡ እመ፡ ትክል፡ ኆልቆቶሙ። ወነጸረ፡ ሰማየ፡ ወርእየ፡ ከዋክብተ፡ ወይቤሎ፡ ከመዝ፡ ይከውን፡ ዘርእከ። ወአምኖ፡ ለእግዚአብሔር፡ ወተኆለቆ፡ ጽድቀ። ወይቤሎ፡ አነ፡ እግዚአብሔር፡ ዘአውፃእኩከ፡ እምነ፡ ኡር፡ ዘከለዳዊያን፡ ከመ፡ አሀብከ፡ ምድረ፡ ከነናዊያን፡ ለእኂዝ፡ ለዓለም፡ ወለከዊነ፡ ለከ፡ አምላከ፡ ወለዘርእከ፡ እምድኅሬከ። ወይቤ፡ እግዚኦ፡ እግዚኦ፡ በምንት፡ አአምር፡ ከመ፡ እወርስ። ወይቤሎ፡ ንሣእ፡ ሊተ፡ ጠዕዋ፡ ዘሠለስቱ፡ ዓመት፡ ወጠሌ፡ ዘሠለስቱ፡ ዓመት፡ ወበግዐ፡ ዘሠለስቱ፡ ዓመት፡ ወመንጤተ፡ ወርግበ። ወነሥአ፡ ዘንተ፡ ኵሎ፡ በመንፈቀ፡ ወርኅ፡ ወውእቱ፡ ይነብር፡ ኀበ፡ ድራይ፡ ዘማምሪ፡ እንተ፡ ይእቲ፡ ቅሩበ፡ ኬብሮን። ወሐነጸ፡ ምሥዋዐ፡ ህየ፡ ወዘብሐ፡ ዘንተ፡ ኵሎ፡ ወከዐወ፡ ደሞሙ፡ ውስተ፡ ምሥዋዕ፡ ወነፈቆሙ፡ እማእከል፡ ወአንበሮሙ፡ አንጸራቲሆሙ፡ በበ፡ ገጾሙ፡ ወአዕዋፍሰ፡ ኢነተፈ። ወይወርዱ፡ አዕዋፍ፡ ዲበ፡ ስፍሕ፡ ወይከልኦሙ፡ አብራም፡ ወኢየኀድግ፡ አዕዋፍ፡ ይልክፍዎን። ወኮነ፡ ሶበ፡ ዕርበተ፡ ፀሐይ፡ ድንጋፄ፡ ወድቀ፡ ላዕለ፡ አብራም፡ ወናሁ፡ ግርማ፡ ዐቢይ፡ ጽልመት፡ ወድቀ፡ ላዕሌሁ፡ ወተብህለ፡ ለአብራም፡ አእምሮ፡ አእምር፡ ከመ፡ ፈላሴ፡ ይከውን፡ ዘርእከ፡ ውስተ፡ ምድረ፡ ነኪር፡ ወይቀንይዎሙ፡ ወያሐምምዎሙ፡ አርባዕተ፡ ምእተ፡ ዓመተ። ወለሕዝብኒ፡ እለ፡ ይትቀነዩ፡ አነ፡ እፈትሕ፡ ሎሙ። ወአንተ፡ ተሐውር፡ ኀበ፡ አበዊከ፡ በሰላም፡ ወትትቀበር፡ በርስእ፡ ሠናይ። ወበትውልድ፡ ራብዕ፡ ይትመየጡ፡ ዝየ፡ እስመ፡ ኢተፈጸመ፡ ኃጢአቶሙ፡ ለአሞሬዎን፡ እስከ፡ ይእዜ። ወነቅህ፡ እምንዋም፡ ወተንሥአ፡ ወፀሐይ፡ ዐረበ፡ ወነድ፡ ኮነ፡ ወናሁ፡ እቶን፡ ይጠይስ፡ ወነበልባለ፡ እሳት፡ ኀለፈ፡ ማእከለ፡ ስፋሔ። ወበይእቲ፡ ዕለት፡ ተካየደ፡ ኪዳነ፡ እግዚአብሔር፡ ምስለ፡ አብራም፡ እንዘ፡ ይብል፡ ለዘርእከ፡ እሁብ፡ ዛተ፡ ምድረ፡ እምፈለገ፡ ግብጽ፡ እስከ፡ ፈለገ፡ ዐቢይ፡ ፈለገ፡ ኤውፍራጢስ፡ ለቄኔውስ፡ ወለቄኔዜውስ፡ ወለቅድሞኔውስ፡ ወለፌሬዜውስ፡ ወለረፌእያን፡ ወለፈከሬውስ፡ ወለኤዌውስ። ወኀለፈ፡ ወአዕረገ። ወበዛቲ፡ ሌሊት፡ ተካየድነ፡ ኪዳነ፡ ምስለ፡ አብራም፡ በከመ፡ ኪዳን፡ ዘተካየድነ፡ በዛቲ፡ ወርኅ፡ ምስለ፡ ኖኅ። ወተፈሥሐ፡ አብራም፡ ወአይድዐ፡ ዘንተ፡ ኵሎ፡ ለሰራይ፡ ብእሲቱ። ወአምከረቶ፡ ሰራይ፡ ለአብራም፡ ምታ፡ ወትቤሎ፡ ባእ፡ ኀበ፡ አጋር፡ ልእክትየ፡ ግብጻዊት፡ እመቦ፡ ከመ፡ አሐንጽ፡ ለከ፡ እምኔሃ፡ ዘርአ። ወስምዐ፡ አብራም፡ ቃለ፡ ሰራይ፡ ብእሲቱ፡ ወይቤላ፡ ግበሪ። ወቦአ፡ ኀቤሃ፡ ወፀንሰት፡ ወወለደት፡ ወልደ።

Chapter 15 ወበዓመት፡ ኃምስ፡ ዘሱባዔ፡ ዘራብዑ፡ ለኢዮቤልውን፡ ዝንቱ፡ በወርኅ፡ ሣልስ፡ በመንፈቀ፡ ወርኅ፡ ገብረ፡ አብራም፡ በዓለ፡ ቀዳሜ፡ ማእረረ፡ ዘዘርአ፡ ሥርናይ። ወአዕረገ፡ መሥዋዕተ፡ ሐዲስ፡ ዲበ፡ ምሥዋዕ፡ ቀዳሜ፡ እክል፡ ለእግዚአብሔር። ወአስተርአዮ፡ እግዚአብሔር፡ ወይቤሎ፡ እግዚአብሔር፡ ለአብራም፡ አነ፡ አምላከ፡ ሰዳይ፡ ወአሥምር፡ በቅድሜየ፡ ወኩን፡ ፍጹመ። ወእሁብ፡ ኪዳንየ፡ ማእከሌየ፡ ወማእከሌከ፡ ወአልህቀከ፡ ጥቀ። ወወድቀ፡ አብራም፡ በገጹ፡ ወተናገሮ፡ እግዚአብሔር፡ ወይቤ። ናሁ፡ ሥርዓትየ፡ ምስሌከ፡ ወእሬስየከ፡ አበ፡ ለብዙኃን፡ አሕዛብ። ወኢይጼዋዕ፡ እንከ፡ ስምከ፡ አብራም፡ ወይኩን፡ ስምከ፡ እምይእዜ፡ ወእስከ፡ ለዓለም፡ አብርሃም፡ እስመ፡ አበ፡ ብዙኃን፡ አሕዛብ፡ ሤምኩከ። ወአዐብየከ፡ ጥቀ። ወእሁብ፡ ኪዳንየ፡ ማእከሌየ፡ ወማእከሌከ፡ ወማእከለ፡ ዘርእከ፡ እምድኅሬከ፡ በትዝምዶሙ፡ ወለሥርዓት፡ ዘለዓለም፡ ከመ፡ እኩንከ፡ አምላከ፡ ወለዘርእከ፡ እምድኅሬከ። [ወእሁብ፡ ለከ፡ ወለዘርእከ፡ እምድኅሬከ]፡ ምድረ፡ ኀበ፡ ፈለስከ፡ ምድረ፡ ከናአን፡ ዘትኴንን፡ ለዓለም፡ ወእከውኖሙ፡ አምላከ። ወይቤሎ፡ እግዚአብሔር፡ ለአብርሃም፡ ወአንተኒ፡ ኪዳንየ፡ ዕቀብ፡ አንተ፡ ወዘርእከ፡ እምድኅሬከ፡ ተከሰቡ፡ ኵሎ፡ ሮስክሙ፡ ወተከሰቡ፡ ቍልፈተክሙ፡ ወይከውን፡ ትእምርተ፡ ሥርዓትየ፡ ዘለዓለም፡ ማእከሌየ፡ ወማእከሌክሙ። ወለወልድ፡ አመ፡ ሳምንት፡ ዕለት፡ ትከስብዎ፡ ኵሎ፡ ሮሰ፡ በትዝምድክሙ፡ ወልደ፡ ቤት። ክስበተ፡ ይትከሰብ፡ ልደ፡ ቤትከ፡ ወዘበወርቅ፡ ተሣየጥከ፡ ይትከሰቡ። ወዘኢኮነ፡ ክሱበ፡ ሮስ፡ ዘኢተከስበ፡ ሥጋ፡ ቍልፈቱ፡ በዕለተ፡ ሳምንት፡ ትሤሮ፡ ይእቲ፡ ነፍስ፡ እምዘመዳ፡ እስመ፡ ኪዳንየ፡ ነሠተ። ወይቤሎ፡ እግዚአብሔር፡ ለአብርሃም፡ ሶራ፡ ብእሲትከ፡ ኢትጸዋዕ፡ እንከ፡ ስማ፡ ሶራ፡ እስመ፡ ሳራ፡ ስማ። ወእባርካ፡ ወእሁበከ፡ እምኔሃ፡ ወልደ፡ ወእባርኮ፡ ወይከውን፡ ሕዝበ፡ ወነገሥተ፡ አሕዛብ፡ እምኔሁ፡ ይከውኑ። ወወድቀ፡ አብርሃም፡ በገጹ፡ ወተፈሥሐ፡ ወይቤ፡ በልቡ፡ እመ፡ ለዘ፡ ምእትኑ፡ ዓመቱ፡ ይትወለድ፡ ወልድ፡ ወሳራሂ፡ እንተ፡ ተስዓ፡ ዓመታ፡ ትወልድ። ወይቤሎ፡ አብርሃም፡ ለእግዚአብሔር፡ መፍትው፡ ይሕየው፡ ይስማዔል፡ ቅድሜከ። ወይቤ፡ እግዚአብሔር፡ ኦሆ። ወበእንተ፡ ይስማዔልሂ፡ ሰማዕኩከ፡ ወናሁ፡ እባርኮ፡ ወአልህቆ፡ ወአበዝኆ፡ ጥቀ። ወኪዳንየ፡ አቀውም፡ ምስለ፡ ይስሐቅ፡ ዘትውልድ፡ ለከ፡ ሳራ፡ በዝ፡ መዋዕል፡ በዓመት፡ ካልእ። ወፈጺሞ፡ እንዘ፡ ይትናገር፡ ምስሌሁ፡ ወዐርገ፡ እግዚአብሔር፡ እመልዕልተ፡ አብርሃም። ወገብረ፡ አብርሃም፡ በከመ፡ ይቤሎ፡ እግዚአብሔር፡ ወነሥአ፡ ይስማዔልሃ፡ ወልዶ፡ ወኵሎ፡ ልደ፡ ቤቱ፡ ወዘሂ፡ በወርቅ፡ ተሣየጠ፡ ኵሎ፡ ሮሰ፡ ዘውስተ፡ ቤቱ፡ ወከሰበ፡ ሥጋ፡ ምክሳቦሙ። ወበጊዜ፡ ዛቲ፡ ዕለት፡ ተከስበ፡ አብርሃም፡ [ወልደ፡ ቤቱ]፡ ወሰብአ፡ ቤቱ፡ ወኵሎሙ፡ እለ፡ በወርቅ፡ ተሣየጠ፡ ወእምውሉደ፡ ነኪራንኒ፡ ተከስቡ፡ ምስሌሁ። ወዝሕግ፡ ለኵሉ፡ ትውልድ፡ ዘለዓለም፡ ወአልቦ፡ ክስበተ፡ መዋዕል። ወኵሉ፡ ዘትውልደ፡ ዘኢተከስበ፡ ሥጋ፡ ነፍስቱ፡ እስከ፡ ሰሙን፡ ዕለት፡ ኢኮነ፡ እምውሉደ፡ ሥርዓት፡ ዘትካየደ፡ እግዚአብሔር፡ ለአብርሃም፡ እስመ፡ እምነ፡ ውሉደ፡ ሙስና። እስመ፡ ኵሎሙ፡ መላእክተ፡ ገጽ። ወአንተኒ፡ አዝዝ፡ ለውሉደ፡ እስራኤል፡ ወይዕቀቡ፡ ትእምርተዝ፡ ኪዳን፡ ለትውልዶሙ፡ ለሥርዓት፡ ዘለዓለም፡ ወኢይሠረው፡ እምነ፡ ምድር። እስመ፡ ትእዛዝ፡ ተሠርዐ፡ ለኪዳን፡ ከመ፡ ይዕቀብዎ፡ ለዓለም። እስመ፡ ይስማዔልሃ፡ ወውሉዶ፡ ወአኃዊሁ፡ ወዔሳውሃ፡ ኢያቅረቦ፡ ኀቤሁ፡ እግዚአብሔር፡ ወኢኀረየ፡ ቦሙ፡ እስመ፡ እምውሉደ፡ አብርሃም፡ እሙንቱ፡ እስመ፡ አእመሮሙ፡ ወእስራኤልሃ፡ ኀረየ፡ ይኩንዎ፡ ሕዝበ። ወቀደሶ፡ ወአስተጋብአ፡ እምኵሉ፡ ውሉደ፡ ሰብእ። ወዲበ፡ እስራኤልሰ፡ ኢያስለጠ፡ ወኢመነሂ፡ መልአከ፡ ወመንፈሰ። ወይእዜኒ፡ አነ፡ እዜንወከ፡ ከመ፡ በዛቲ፡ ሥርዓት፡ ይሔስዉ፡ ውሉደ፡ እስራኤል፡ ወኢይከስቡ፡ ውሉዶሙ፡ በከመ፡ ኵሉ፡ ዝሕግ፡ እስመ፡ እምሥጋ፡ ክስበቶሙ፡ ይከውኑ፡ መትርፋነ፡ ውስተ፡ ክስበተ፡ ውሉዶሙ፡ ወኵሎሙ፡ ውሉደ፡ ቤልአር፡ የኀድጉ፡ ውሉዶሙ፡ ዘእንበለ፡ ክስበት፡ በከመ፡ ተወልዱ። ወትከውን፡ መዓት፡ ላዕለ፡ ውሉደ፡ እስራኤል፡ ዐባይ፡ እምኀበ፡ እግዚአብሔር፡ እስመ፡ ኀደጉ፡ ኪዳኖ፡ ወእምቃሉ፡ ተግኅሡ፡ ወወሐኩ፡ ወፀረፉ፡ በከመ፡ ኢገብሩ፡ ሥርዓቶ፡ ለዝ፡ ትእምርተ።

Chapter 16 ወበሠርቀ፡ ወርኅ፡ ራብዕ፡ አስተርአይናሁ፡ ለአብርሃም፡ በኀበ፡ ድርስ፡ ዘማምሪም፡ ወተናገርነ፡ ምስሌሁ፡ ወንሕነ፡ አይዳዕናሁ፡ ከመ፡ ይትወሀቦ፡ ወልድ፡ እምሳራ፡ ብእሲቱ። ወሰሐቀት፡ ሳራ፡ እስመ፡ ሰምዐት፡ ከመ፡ ተናገርነ፡ ዘንተ፡ ቃለ፡ ምስለ፡ አብርሃም። ወነገርናሃ፡ ስሞ፡ ለወልዳ፡ በከመ፡ ሥሩዕ፡ ወጽሑፍ፡ ውስተ፡ ጽላተ፡ ሰማይ፡ ይስሐቅ። ወአመ፡ ገባእነ፡ ኀቤሃ፡ በጊዜ፡ ሰዓት፡ ወይእቲኒ፡ ፀንሰት፡ ወልደ። ወበዝ፡ ወርኅ፡ ገብረ፡ እግዚአብሔር፡ ኵነኔሆሙ፡ ለሰዶም፡ ወለገሞራ፡ ወሶቦኤም፡ ወለኵሉ፡ አድያመ፡ ዮርዳኖስ፡ ወአውዓዮሙ፡ በእሳት፡ ወበተይ፡ ወአጥፍኦሙ፡ እስከ፡ ዛቲ፡ ዕለት። ወከማሁ፡ ይገብር፡ እግዚአብሔር፡ ኵነኔ፡ በመካናት፡ በውእደ፡ ይገብሩ፡ በከመ፡ ይኵሶሙ፡ ለሰዶም፡ ከመ፡ ኵነኔሃ፡ ለሰዶም። ወለሎጥ፡ ናድኅኖ፡ እስመ፡ ተዘከሮ፡ እግዚአብሔር፡ ለአብርሃም፡ ወአውፅኦ፡ እማእከለ፡ ግፍታኤ። ወገብረ፡ ውእቱኒ፡ ወአዋልዲሁኒ፡ ኀጢአተ፡ በዲበ፡ ምድር፡ ዘኢኮነ፡ ዲበ፡ ምድር፡ እመዋዕለ፡ አዳም፡ እስከ፡ አሜሁ፡ እስመ፡ ሰከበ፡ ብእሲ፡ ምስለ፡ ወለቱ። ወናሁ፡ ተአዘዘ፡ ወተቈርፀ፡ ላዕለ፡ ኵሉ፡ ዘርኡ፡ ውስተ፡ ጽላተ፡ ሰማይ፡ ከመ፡ ያእትቶሙ፡ ወከመ፡ ይሠርዎሙ፡ ወከመ፡ ይግበር፡ ኵነኔሆሙ፡ በከመ፡ ኵነኔ፡ ሰዶም፡ ወከመ፡ ኢያትርፍ፡ ሎቱ፡ ኵሎ፡ ዘርአ፡ ውስተ፡ ምድር፡ ዘሰብእ፡ በዕለተ፡ ደይን። ወአዝንቱ፡ ወርኅ፡ ግዕዘ፡ አብርሃም፡ እምነ፡ ኬብሮን፡ ወሖረ፡ ወኀደረ፡ ማእከለ፡ ቃዴስ፡ ወሱር፡ ውስተ፡ አድባረ፡ ጌራሮን። ወበመንፈቀ፡ ወርኅ፡ ኃምስ፡ ግዕዘ፡ እምህየ፡ ወኀደረ፡ ኀበ፡ ዐዘቅተ፡ መሐላ። ወበመንፈቀ፡ ወርኅ፡ ሳድስ፡ ሐወጸ፡ እግዚአብሔር፡ ለሳራ፡ ወገብረ፡ ላቲ፡ በከመ፡ ይቤ። ወፀንሰት፡ ወወለደት፡ ወልደ፡ በወርኅ፡ ሣልስ፡ ወበመንፈቀ፡ ወርኅ፡ በመዋዕል፡ ዘይቤሎ፡ እግዚአብሔር፡ ለአብርሃም፡ በበዓለ፡ ቀዳሚ፡ ማእረር፡ ተወልደ፡ ይስሐቅ። ወከሰቦ፡ አብርሃም፡ ወልደ፡ መዋዕል፡ ሰሙን፡ ውእቱ፡ ቀዳሚ፡ ተከስበ፡ በከመ፡ ኪዳን፡ እንተ፡ ተሠርዐት፡ ለዓለም። ወበዓመት፡ ሳድስ፡ ዘሱባዔ፡ ራብዕ፡ መጻእነ፡ ኀበ፡ አብርሃም፡ ኀበ፡ ዐዘቅተ፡ መሐላ፡ ወአስተርአይናሁ፡ በከመ፡ ንቤላ፡ ለሳራ፡ ከመ፡ ንግባእ፡ ኀቤሃ፡ ወይእቲሂ፡ ፀንሰት፡ ወልደ። ወተመየጥነ፡ በወርኅ፡ ሳብዕ፡ ወረከብናሃ፡ ለሳራ፡ ፅንስተ፡ ቅድሜነ፡ ወባረክናሃ፡ ወዜነውናሃ፡ ኵሎ፡ ዘተአዘዘ፡ ሎቱ፡ ከመ፡ ኢይመውት፡ ዓዲ፡ እስከ፡ ይወልድ፡ ስድስተ፡ ውሉደ፡ ወይሬኢ፡ ዘእንበለ፡ ይሙት። ወኵሉ፡ ዘርአ፡ ውሉዱ፡ አሕዛበ፡ ይከውኑ፡ ወምስለ፡ አሕዛብ፡ ይትኌለቁ። እስመ፡ ለመክፈልተ፡ ልዑል፡ ይከውን፡ ወውስተ፡ ዘይመልክ፡ አምላክ፡ ወረደ፡ ኵሉ፡ ዘርኡ፡ ከመ፡ ይኩን፡ ለእግዚአብሔር፡ ሕዝበ፡ ትርሲት፡ እምኵሉ፡ ሕዝብ፡ ወከመ፡ ይኩን፡ መንግሥተ፡ ወክህነተ፡ ወሕዝበ፡ ቅዱሰ። ወሖርነ፡ ፍኖተነ፡ ወዜነውናሃ፡ ለሳራ፡ ኵሎ፡ ዘነገርናሁ፡ ወተፈሥሑ፡ ክልኤሆሙ፡ ፍሥሐ፡ ዐቢየ፡ ጥቀ። ወሐነጸ፡ ህየ፡ ምሥዋዐ፡ ለእግዚአብሔር፡ ዘባልሖ፡ ወለዘያስተፈሥሖ፡ በምድረ፡ ፍልሰቱ። ወሐነጸ፡ ምጽላላተ፡ ሎቱ፡ ወለአግብርቲሁ፡ በዛቲ፡ በዓል፡ ወውእቱ፡ መቅድመ፡ ገብረ፡ በዓለ፡ መጸላት፡ በዲበ፡ ምድር። ወበዝ፡ ሰቡዕ፡ መዋዕል፡ ሀሎ፡ ይቄርብ፡ ኵሎ፡ ዕለተ፡ በበ፡ ዕለት፡ ውስተ፡ ምሥዋዕ፡ ጽንሐሐ፡ ለእግዚአብሔር፡ አልህምተ፡ ክልኤተ፡ ወአብሐኰ፡ ክልኤተ፡ አባግዐ፡ ሰብዓተ፡ መሐስአ፡ ጠሊ፡ አሐደ፡ በእንተ፡ ኃጢአት፡ ከመ፡ ያስተስሪ፡ ቦቱ፡ በእንቲአሁ፡ ወበእንተ፡ ዘርኡ። ወለመሥዋዕተ፡ መድኃኒት፡ አብሐኰ፡ ሰብዓተ፡ ወመሐስአ፡ ሰብዓተ፡ ወአባግዐ፡ ሰብዓተ፡ ወደቤላተ፡ ሰብዓተ፡ ወመሥዋዕቶሙሂ፡ ወሞጻሕቶሙሂ፡ ላዕለ፡ ኵሉ፡ ሥብሖሙ፡ የዐጥን። ወበጽባሕ፡ ወሰርክሂ፡ የዐጥን፡ አፈወ፡ ስኂን፡ ወቅንአተ፡ ወማየ፡ ልብን፡ ወናርዶስ፡ ወከርቤ፡ ወሰንብልተ፡ ወቍስጠ፡ ሰብዓቲሆሙ፡ ዘንተ፡ ኵሎ፡ ይቄርብ፡ ወጉአ፡ ዕሩየ፡ ተዐርዮ፡ ድሙረ፡ ንጹሐ። ወገብረ፡ ዘንተ፡ በዓለ፡ ሰቡዐ፡ መዋዕለ፡ እንዘ፡ ይትፌሠሕ፡ በኵሉ፡ ልቡ፡ ወበኵሉ፡ ነፍሱ፡ ውእቱ፡ ወኵሎሙ፡ እለ፡ ቤቱ፡ ወአልቦ፡ መነሂ፡ ነኪረ፡ ምስሌሁ፡ ወኵሉ፡ ዘኢኮነ፡ ክሱበ። ወባረኮ፡ ለፈጣሪሁ፡ ዘፈጠሮ፡ በትዝምዱ፡ እስመ፡ ለሥምረቱ፡ ፈጠሮ፡ እስመ፡ አእመረ፡ ወጠየቀ፡ ከመ፡ እምኔሁ፡ ይከውን፡ ተክለ፡ ጽድቅ፡ ለትውልድ፡ ዘለዓለም፡ ወእምኔሁ፡ ዘርእ፡ ቅዱስ፡ ከመ፡ ይኩን፡ ከማሁ፡ ለዘ፡ ገብረ፡ ኵሎ። ወባረከ፡ ወተፈሥሐ፡ ወጸውዐ፡ ስማ፡ ለዛቲ፡ በዓል፡ በዓለ፡ እግዚአብሔር፡ ፍሥሓ፡ ስጥወተ፡ ለአምላክ፡ ልዑል። ወባረክናሁ፡ ለዓለም፡ ወኵሎ፡ ዘርአ፡ ዘእምድኅሬሁ፡ በኵሉ፡ ትውልደ፡ ምድር፡ እስወ፡ ገብረ፡ ዘንተ፡ በዓለ፡ በጊዜሃ፡ በከመ፡ ስምዐ፡ ጽላተ፡ ሰማይ። በእንተዝ፡ ተሠርዐ፡ ውስተ፡ ጽላተ፡ ሰማይ፡ ላዕለ፡ እስራኤል፡ ከመ፡ ይኩኑ፡ ገባርያነ፡ በዓለ፡ መጸለት፡ ሰቡዐ፡ መዋዕለ፡ በፍሥሓ፡ በወርኅ፡ ሳብዕ፡ ዘይትወከፍ፡ በቅድመ፡ እግዚአብሔር፡ ሕገ፡ ዘለዓለም፡ በትውልዶሙ፡ በኵሉ፡ ዓመት፡ ወዓመታት። ወአልቦ፡ ለዝንቱ፡ ወሰነ፡ መዋዕል፡ እስመ፡ ለዓለም፡ ውእቱ፡ ሥሩዕ፡ ላዕለ፡ እስራኤል፡ ከመ፡ ይግበርዋ፡ ወይንበሩ፡ ወስተ፡ ምጽላል፡ ወከመ፡ ያንብሩ፡ አክሊላተ፡ ዲበ፡ ርእሶሙ፡ ወከመ፡ ይንሥኡ፡ ዐጽቀ፡ ቈጽል፡ ወኲሐ፡ እሙሐዝ። ወነሥአ፡ አብርሃም፡ ልበ፡ ፀበርት፡ ወፍሬ፡ ዕፅ፡ ሠናይ፡ ወበኵሉ፡ ዕለት፡ እምዕለት፡ ሀሎ፡ እንዘ፡ የአውድ፡ ምሥዋዐ፡ በአዕፁቅ፡ ስብዕ፡ ለዕለት፡ በጽባሕ፡ ይጼብሕ፡ ወይገኒ፡ ለአምላኩ፡ ኵሎ፡ ዘበፍሥሓ።

Chapter 17 ወበአሐዱ፡ ዓመት፡ ዘሱባዔ፡ ኃምስ፡ ኀደገ፡ ጥበ፡ ይስሐቅ፡ በዝንቱ፡ ኢዮቤልዉ፡ ወገብረ፡ አብርሃም፡ ግዝአ፡ ዐቢየ፡ በወርኅ፡ ሣልስ፡ በዕለተ፡ ኀድገ፡ ጥበ፡ ወልዱ፡ ደስሐቅ። ወይስማዔል፡ ወልዳ፡ ለአጋር፡ ግብጻዊት፡ በቅድመ፡ ገጹ፡ ለአብርሃም፡ አቡሁ፡ በመካኑ፡ ወተፈሥሐ፡ አብርሃም፡ ወባረኮ፡ ለእግዚአብሔር፡ እስመ፡ ርእየ፡ ሎቱ፡ ውሉዶ፡ ወኢሞተ፡ ዘእንበለ፡ ውሉድ። ወተዘከረ፡ ቃሎ፡ ዘተናገሮ፡ በዕለተ፡ ተፈልጠ፡ ሎጥ፡ እምኔሁ። ወርእየቶ፡ ለይስማዔል፡ ሳራ፡ እንዘ፡ ይትዋነይ፡ ወይዘፍን፡ ወአብርሃምኒ፡ እንዘ፡ ይትፌሣሕ፡ ፍሥሓ፡ ዐቢየ፡ ወቀንአት፡ ለይስማዔል። ወማሕዝን፡ ቃሉ፡ በቅድመ፡ አዕይንተ፡ አብርሃም፡ በእንተ፡ አመቱ፡ ወበእንተ፡ ወልዱ፡ ከመ፡ ይስድዶሙ፡ እምኀቤሁ። ወይቤሎ፡ እግዚአብሔር፡ ለአብርሃም፡ ኢይኩን፡ ሐዘን፡ በቅድመ፡ አዕይንቲከ፡ በእንተ፡ ሕፃን፡ ወበእንተ፡ ወለት፡ ኵሎ፡ ዘትቤለከ፡ ሳራ፡ ስማዕ፡ ንባባ፡ ወግበር፡ እስመ፡ በይስሐቅ፡ ይጼዋዕ፡ ለከ፡ ስም፡ ወዘርእ። ወበእንተ፡ ወልዳስ፡ ለዛ፡ ወለት፡ ውስተ፡ ዐቢይ፡ ሕዝብ፡ እሬስዮ፡ እስመ፡ እምዘርእከ፡ ውእቱ። ወጌሠ፡ አብርሃም፡ በነግህ፡ ወነሥአ፡ ሐባውዘ፡ ወዝቀ፡ ማይ፡ ወአስከማ፡ ለአጋር፡ ወለሕፃን፡ ወፈነዋ። ወሖረት፡ ወታንጌጊ፡ በገዳመ፡ ቤርሳቦ፡ ወተፈጸመ፡ ማይ፡ እምዝቅ፡ ወጸምአ፡ ሕፃን፡ ወስእነ፡ ሐዊረ፡ ወወድቀ። ወነሥአቶ፡ እሙ፡ ወሐዊራ፡ ገደፈቶ፡ ታሕተ፡ አሐቲ፡ ኤልያስ፡ ወሖረት፡ ወነበረት፡ አንጻሮ፡ መጠነ፡ አሐቲ፡ ምንዳፍ፡ እስመ፡ ትቤ፡ ኢይርአይ፡ ሞቶ፡ ለሕፃንየ፡ ወነቢራ፡ በከየት። ወይቤላ፡ መልአክ፡ አምላክ፡ አሐዱ፡ እምቅዱሳን፡ ምንተ፡ ትበክዪ፡ አንቲ፡ አጋር፡ ተንሢአኪ፡ ንሥእዮ፡ ለሕፃን፡ ወአኀዝዮ፡ በእዴኪ፡ እስመ፡ ሰምዐ፡ እግዚአብሔር፡ ቃለኪ፡ ወርእዮ፡ ለሕፃን። ወከሠተት፡ አዕይንቲሃ፡ ወርእየት፡ ዐዘቅተ፡ ማይ፡ ወሖረት፡ ወመልአት፡ ዝቃ፡ ማየ፡ ወአስተየት፡ ሕፃና። ወልህቀ፡ ሕፃን፡ ወኮነ፡ ነዳፌ፡ ወሀሎ፡ እግዚአብሔር፡ ምስሌሁ፡ ወነሥአት፡ ሎሙ፡ እሙ፡ ብእሲተ፡ እምአዋልደ፡ ግብጽ። ወወለደት፡ ሎቱ፡ ወልደ፡ ወጸውዐ፡ ስሞ፡ ናቤዎት፡ እስመ፡ ትቤ፡ ቅሩብ፡ እግዚአብሔር፡ ሊተ፡ ሶበ፡ ጸዋዕክዎ። ወኮነ፡ በሱባዔ፡ ሳብዕ፡ በቀዳሚ፡ ዓመት፡ በወርኅ፡ ቀዳሚ፡ በዝ፡ ኢዮቤልዉ፡ አመ፡ ዐሡሩ፡ ወሰኑዩ፡ ለዝ፡ ወርኅ፡ ኮነ፡ ቃላት፡ በሰማያት፡ በእንተ፡ አብርሃም። ወመጽአ፡ መኰንን፡ መስቴማ፡ ወይቤ፡ ቅድሜሁ፡ ለአምላክ፡ ናሁ፡ አብርሃም፡ ያፈቅሮ፡ ለይስሐቅ፡ ወልዱ፡ ወያስተአድሞ፡ ኪያሁ፡ እምኵሉ። ወእግዚአብሔር፡ ያአምር፡ ከመ፡ መሃይምን፡ አብርሃም፡ በኵሉ፡ ምንዳቤ፡ ዘይቤሎ፡ እስመ፡ አመክሮ፡ በምድሩ፡ ወበዐባር፡ ወአመከሮ፡ በብዕለ፡ ነገሥት። ወበኵሉ፡ በዘአመከሮ፡ ተረክበ፡ ምእመነ፡ ወኢተአንተለ፡ ነፍሱ፡ ወኢጐንደየ፡ ገቢሮቶ፡ እስመ፡ ምእመን፡ ወመፍቀሬ፡ እግዚአብሔር።

Chapter 18 ወይቤሎ፡ እግዚአብሔር፡ አብርሃም፡ አብርሃም፡ ወይቤ፡ ነየ፡ አነ። ወይቤሎ፡ ንሥእ፡ ወልደከ፡ ፍቁረከ፡ ዘታፈቅር፡ ይስሐቅሃ፡ ወሖር፡ ውስተ፡ ምደር፡ ልዕልት፡ ወአዕርጎ፡ ውስተ፡ አሐዱ፡ እምአድባር፡ ዘአነ፡ አየድዐከ። ወአሌለየ፡ በነገህ፡ ወጸዐነ፡ አድግቶ፡ ወክልኤተ፡ ደቆ፡ ነሥአ፡ ምስሌሁ፡ ወይስሐቅሃ፡ ወልዶ፡ ወዕፀወ፡ መሥዋዕት፡ ሠፀረ፡ ወሖረ፡ ወስተ፡ መካን፡ በሠሉስ፡ ዕለት። ወበጽሐ፡ እስከ፡ ዐዘቅተ፡ ማይ፡ ወይቤ፡ ለደቁ፡ ንበሩ፡ ዝየ፡ ምስለ፡ አድግት፡ ወአነ፡ ወሕፃን፡ ነሐውር፡ ወሰጊደነ፡ ንገብእ፡ ኀቤክሙ። ወነሥአ፡ ዕፀ፡ መሥዋዕት፡ ወአስከሞ፡ ለይስሐቅ፡ ወልዱ፡ ወነሥአ፡ በእዴሁ፡ እሳተ፡ ወመጥባሕተ። ወይቤ፡ ይስሐቅ፡ ለአቡሁ፡ አባ። ወይቤ፡ እግዚአብሔር፡ ያሬኢ፡ ሎቱ፡ በግዐ፡ ለጽንሓሕ፡ ወልድየ። ወሐነጸ፡ ምሥዋዐ፡ ወአንበረ፡ ዕፀወ፡ ዲበ፡ መሥዋዕት፡ ወአሰረ፡ ይስሐቅሃ፡ ወልዶ፡ ወአንበሮ፡ ዲበ፡ ዕፀው፡ ዘመልዕልተ፡ ምሥዋዕ፡ ወሰፍሐ፡ እዴሁ፡ ይንሥእ፡ መጥባሕተ፡ ከመ፡ ይዝብሖ፡ ለይስሐቅ፡ ወልዱ። ወአነ፡ ቆምኩ፡ ቅድሜሁ፡ ወቅድመ፡ መኰንነ፡ መስቴማ፡ ወይቤ፡ እግዚአብሔር፡ በሎ፡ ኢያውርድ፡ እዴሁ፡ ላዕለ፡ ሕፃን፡ ወኢይግበር፡ ምንተኒ፡ ላዕሌሁ፡ እስመ፡ አእመርኩ፡ ከመ፡ ፈራሄ፡ እግዚአብሔር፡ ውእቱ። ጸዋዕክዎ፡ እምሰማይ፡ ወእቤሎ፡ አብርሃም፡ ወደንገፀ፡ ወይቤ፡ ነየ፡ አነ። ወእቤሎ፡ ኢትፈኑ፡ እዴከ፡ ዲበ፡ ሕፃን፡ ወኢትግበረ፡ ምንተኒ፡ ዲቤሁ፡ እስመ፡ ይእዜ፡ አእመርኩ፡ ከመ፡ ፈራሄ፡ እግዚአብሔር፡ አንተ፡ ወኢመሐከ፡ ወልደከ፡ በኵረከ፡ እምኔየ። ወተኀፍረ፡ መኰንነ፡ መስቴማ፡ ወአንሥአ፡ አብርሃም፡ አዕይንቲሁ፡ ወርእየ፡ ወናሁ፡ አሐዱ፡ በሐኵ፡ እኁዝ፡ ወይመጽእ፡ በአቅርንቲሁ፡ ወሖረ፡ አብርሃም፡ ወነሥኦ፡ ለበሐኵ፡ ወአዕረጎ፡ ለጽንሓሕ፡ ህየንተ፡ ወልዱ። ወጸውዖ፡ አብርሃም፡ ለውእቱ፡ መካን፡ እግዚአብሔር፡ ርእየ፡ ከመ፡ ይትበሀል፡ እግዚአብሔር፡ ርእየ፡ ውእቱ፡ ደብሩ፡ ለጽዮን። ወጸውዖ፡ እግዚአብሔር፡ ለአብርሃም፡ በስሙ፡ ዳግመ፡ እምሰማይ፡ በከመ፡ አስተርአይነ፡ ከመ፡ ንትናገሮ፡ በስመ፡ እግዚአብሔር። ወይቤ፡ በርእስየ፡ መሐልኩ፡ ይቤ፡ እግዚአብሔር፡ እስመ፡ ገበርከ፡ ዘንተ፡ ቃለ፡ ወኢመሐከ፡ ወልደከ፡ በኵረከ፡ እምኔየ፡ ዘአፍቀርከ። ወይትባረኩ፡ በዘርእከ፡ ኵሎሙ፡ አሕዛበ፡ ምድር፡ ህየንተ፡ ዘሰማዕከ፡ ቃለ፡ ዚአየ። ወሖረ፡ አብርሃም፡ ኀበ፡ ደቁ፡ ወተንሥኡ፡ ወሖሩ፡ ቤርሳቤ፡ ኅቡረ። ወይገብር፡ ዛተ፡ በዓለ፡ በኵሉ፡ ዓመታት፡ ሰቡዐ፡ ዕለተ፡ በፍሥሓ፡ ወሰመያ፡ በዓለ፡ እግዚአብሔር፡ በከመ፡ ሰቡዕ፡ ዕለት፡ እለ፡ ሖረ፡ ወተመይጠ፡ በሰላም። ወከመዝ፡ ሥሩዕ፡ ውእቱ፡ ወጽሑፍ፡ ውስተ፡ ጽላተ፡ ሰማይ፡ በእንተ፡ እስራኤል፡ ወዲበ፡ ዘርኡ፡ ለገቢረ፡ ዛቲ፡ በዓል፡ ሰቡዐ፡ ዕለተ፡ በፍሥሓ፡ በዓል።

Chapter 19 ወበዓመት፡ አሐዱ፡ ዘሱባዔ፡ ቀዳሚ፡ በዘ፡ አርብዓ፡ ወክልኤቱ፡ ኢዮቤልዉ፡ ተመይጠ፡ አብርሃም፡ ወኀደረ፡ አንጸረ፡ ኬብሮን፡ ዛቲ፡ ይእቲ፡ ቀሪያታርባቅ፡ ክልኤ፡ ሱባዔ፡ ዓመት። ወበዓመት፡ ቀዳሚ፡ ዘሱባዔ፡ ሣልስ፡ ዘዝ፡ ኢዮቤልዉ፡ ተፈጸመ፡ መዋዕለ፡ ሕይወተ፡ ሳራ፡ ወሞተት፡ በኬብሮን። ወሖረ፡ አብርሃም፡ ከመ፡ ይብኪያ፡ ወይቅብራ። እስመ፡ በትዕግሥተ፡ መንፈስ፡ ተናገረ፡ ምስለ፡ ውሉደ፡ ኬጥ፡ ከመ፡ የሀብዎ፡ መካነ፡ ከመ፡ ይቅበር፡ በድኖ፡ ውስቴቱ። ወእግዚአብሔር፡ ወሀቦ፡ ሞገሰ፡ ሎቱ፡ በቅድመ፡ ኵሎሙ፡ እለ፡ ይሬእይዎ። ወእሙንቱሂ፡ ያስተበቍዕዎ፡ እንዘ፡ ይብሉ፡ ነሀብከ፡ በከ፡ ወኢነሥአ፡ እምእዴሆሙ፡ በከ፡ እስመ፡ ወሀበ፡ ሤጦ፡ ለመካን፡ ብሩረ፡ ፍጹመ። ወኮነ፡ ኵሉ፡ መዋዕለ፡ ሕይወታ፡ ለሳራ፡ ምእት፡ ወዕሥራ፡ ወሰብዐቱ፡ እሉ፡ ዝክልኤ፡ ኢዮቤልዉ፡ ወአርባዕቱ፡ ሱባዔ፡ ወዓመት፡ አሐዱ፡ ዝንቱ፡ መዋዕለ፡ ዓመታተ፡ ሕይወታ፡ ለሳራ። ወዝመከራ፡ ዓሥር፡ በዘ፡ ተመከረ፡ ቦቱ፡ አብርሃም፡ ወተረክበ፡ ምእመነ፡ ዕጉሠ፡ መንፈስ። ወኢይቤ፡ ቃለ፡ በእንተ፡ ንባብ፡ ዘምድር፡ ዘይቤ፡ እግዚአብሔር፡ የሀባ፡ ኪያሃ፡ ሎቱ፡ ወለዘርኡ፡ እምድኅሬሁ። ወበዓመት፡ ራብዕ፡ ሎቱ፡ ነሥአ፡ ለይስሐቅ፡ ወልዱ፡ ብእሲተ፡ ወስማ፡ ርብቃ፡ ወለተ፡ ባቱኤል፡ ወልደ፡ ናኮር፡ እኅወ፡ አብርሃም፡ እኅተ፡ ላባ፡ ወባቱኤል፡ ወለዶሙ፡ ለባቱኤላዊያን፡ ወልደ፡ ሜልከ፡ ዘብእሲተ፡ ናኮር፡ እኅወ፡ አብርሃም። ወአብርሃም፡ ነሥአ፡ ሎቱ፡ ሣልስተ፡ ብእሲተ፡ ወስማ፡ ኬጡራ፡ እምነ፡ ውሉደ፡ ልደ፡ ቤቱ፡ አመ፡ ሞተት፡ አጋር፡ እምቅድመ፡ ሳራ። ወወለደት፡ ሎቱ፡ ውሉደ፡ ስድስተ፡ ዘንበሪሃ፡ ወያክስንሃ፡ ወማዳይሃ፡ ወማዳንሃ፡ ወኢያዝቦቅሃ፡ ወሴሂያሃ፡ በክልኤ፡ ሱባዔ፡ ዓመት። ወበሱባዔ፡ ሳድስ፡ በካልእ፡ ዓመቱ፡ ወለደት፡ ርብቃ፡ ለይስሐቅ፡ ክልኤ፡ ደቂቀ፡ ያዕቆብሃ፡ ወዔሳውሃ፡ ወያዕቆብሰ፡ ፍጹም፡ ወራትዕ፡ ወዔሳው፡ ውእቱ፡ ብእሲ፡ ድሩክ፡ ወሐቃላዊ፡ ወጸጓር፡ ወያዕቆብ፡ የኀድር፡ ውስተ፡ ምጽላላት። ወልህቁ፡ ወራዙት፡ ወተምህረ፡ ያዕቆብ፡ መጽሐፈ፡ ወዔሳውሰ፡ ኢተምህረ፡ እስመ፡ ብእሲ፡ ሐቃላዊ፡ ውእቱ፡ ወነዓዊ፡ ወተምህረ፡ ፀብአ፡ ወኵሉ፡ ግብሩ፡ ድሩክ። ወያፈቅር፡ ያዕቆብሃ፡ አብርሃም፡ ወይስሐቅ፡ ዔሳውሃ። ወርእየ፡ አብርሃም፡ ግብሮ፡ ለዔሳው፡ ወአእመረ፡ ከመ፡ በያዕቆብ፡ ይጼዋዕ፡ ሎቱ፡ ስም፡ ወዘርእ። ወይቤላ፡ ወለትየ፡ ዕቀቢ፡ ወልድየ፡ ያዕቆብሃ፡ እስመ፡ ውእቱ፡ ይከውን፡ ህየንቴየ፡ ዲበ፡ ምድር፡ ወለበረከት፡ በማእከለ፡ ውሉደ፡ ሰብእ፡ ወለኵሉ፡ ዘርአ፡ ሴም፡ ለትምክሕት። እስመ፡ አአምር፡ ከመ፡ ኪያሁ፡ የኀሪ፡ እግዚአብሔር፡ ሎቱ፡ ለሕዝብ፡ ቃውም፡ እምኵሎሙ፡ እለ፡ ዲበ፡ ገጸ፡ ምድር። ወናሁ፡ ይስሐቅ፡ ወልድየ፡ ያፈቅሮ፡ ለዔሳው፡ እምነ፡ ያዕቆብ፡ ወአነ፡ እሬእየኪ፡ መፍቀሪተ፡ ጽድቅ፡ ያዕቆብሃ። ወስኪ፡ ዓዲ፡ አሠንዮ፡ ላዕሌሁ፡ ወይኩና፡ አዕይንቲኪ፡ ላዕሌሁ፡ ለፍቁር። ይጽንዓ፡ እደዊኪ፡ ወትትፈሣሕ፡ ልብኪ፡ በወልድኪ፡ ያዕቆብ። እመ፡ ይክል፡ ሰብእ፡ ኆልቆ፡ ኆፃ፡ ምድር፡ ከማሁ፡ ይትኌለቁ፡ ዘርኡሂ። ወኵሎን፡ በረከት፡ እለ፡ ባረከኒ፡ እግዚአብሔር፡ ኪያየ፡ ወዘርእየ፡ ለያዕቆብ፡ ወለዘርኡ፡ ይኩን፡ ኵሎ፡ መዋዕለ። ወበዘርኡ፡ ይትባረክ፡ ስምየ፡ ወስመ፡ አበዊየ፡ ሴም፡ ወኖኅ፡ ወሄኖክ፡ ወመላልኤል፡ ወሄኖስ፡ ወሴት፡ ወአዳም። ወእሙንቱ፡ ይኩኑ፡ ለሣርሮ፡ ሰማይ፡ ወለአጽንዖ፡ ምድር፡ ወለሐድሶ፡ ኵሉ፡ ብርሃናት፡ ዘዲበ፡ ምጽናዓት። ወጸውዖ፡ ለያዕቆብ፡ በቅድመ፡ አዕይንቲሃ፡ ለርብቃ፡ እሙ፡ ወሰዐሞ፡ ወባረኮ፡ ወይቤ። ወልድየ፡ ያዕቆብ፡ ፍቁር፡ ዘአፍቀረት፡ ነፍስየ፡ ይባርከ፡ አምላክ፡ እመልዕልተ፡ ምጽናዓት፡ ወየሀብከ፡ ኵሎን፡ በረከታተ፡ እለ፡ ባረኮ፡ ለአዳም፡ ወሄኖክሃ፡ ወኖኅሃ፡ ወሴምሃ፡ ወኵሎ፡ ዘመጠነ፡ ተናገረኒ። ወኢይመብሉ፡ ላዕሌከ፡ ወላዕለ፡ ዘርእከ፡ መናፍስተ፡ መስቴማ፡ ከመ፡ ያርኅቁከ፡ እምድኅረ፡ እግዚአብሔር፡ ዘውእቱ፡ አምላክከ፡ እምይእዜ፡ ወእስከ፡ ለዓለም። ወይኩንከ፡ እግዚአብሔር፡ አምላክ፡ አበ፡ ወአንተሂ፡ ወልደ፡ በኵረ፡ ወለሕዝብ፡ ኵሎ፡ መዋዕለ። ወወፅኡ፡ ክልኤሆሙ፡ ኅቡረ፡ እምኀበ፡ አብርሃም። ወአፍቀረቶ፡ ርብቃ፡ ለያዕቆብ፡ በኵሉ፡ ልባ፡ ወበኵሉ፡ መንፈሳ፡ ብዙኀ፡ ፈድፋደ፡ እምነ፡ ዔሳው፡ ወይስሐቅ፡ ያፈቅሮ፡ ለዔሳው፡ ፈድፋደ፡ እምያዕቆብ።

Chapter 20 ወበአርብዓ፡ ወክልኤቱ፡ ኢዮቤልዉ፡ በዓመት፡ ቀዳሚ፡ ዘሱባዔ፡ ሳብዕ፡ ጸውዐ፡ አብርሃም፡ ይስማዔልሃ፡ ወዐሠርተ፡ ወክልኤተ፡ ደቂቆ፡ ወይስሐቅሃ፡ ወክልኤሆሙ፡ ደቂቆ፡ ወስድስተ፡ ደቂቀ፡ ኬጡራ፡ ወውሉዶሙ። ወአዘዞሙ፡ ከመ፡ ይዕቀቡ፡ ፍኖተ፡ እግዚአብሔር፡ ከመ፡ ይግበሩ፡ ጽድቀ፡ ወያፍቅር፡ አሐዱ፡ አሐዱ፡ ቢጾ፡ ወከመ፡ ይኩኑ፡ ከማሁ፡ በውስተ፡ ኵሉ፡ ፀብእ፡ ከመ፡ ይሖሩ፡ ዲበ፡ አሐዱ፡ ላዕሌሆሙ፡ ወለገቢረ፡ ፍትሕ፡ ወጽድቅ፡ በዲበ፡ ምድር። ከመ፡ ይክስቡ፡ ውሉዶሙ፡ በኪዳን፡ እንተ፡ ተካየደ፡ ምስሌሆሙ፡ ወከመ፡ ኢይትዐደዉ፡ የማነ፡ ወፀጋመ፡ እምኵሎን፡ ፍናዌ፡ ዘአዘዘነ፡ እግዚአብሔር፡ ወከመ፡ ንትዐቀብ፡ እምኵሉ፡ ዝሙት፡ ወርኵስ፡ ወከመ፡ ንኅድግ፡ እማእከሌነ፡ ኵሎ፡ ርኵሰ፡ ወዝሙተ። ወእመ፡ ዘመወት፡ ለክሙ፡ ኵላ፡ ብእሲት፡ ወእመኒ፡ ወለት፡ አውዕይዋ፡ በእሳት፡ ወኢይዘምዋ፡ ድኅረ፡ አዕይንቲሆን፡ ወልቦንሂ፡ ከመ፡ ይንሥኡ፡ ሎሙ፡ ብእሲተ፡ እምነ፡ አዋልደ፡ ከናአን፡ እስመ፡ ይሤሮ፡ ዘርአ፡ ከናአን፡ እምድር። ወነገሮሙ፡ ኵነኔሆሙ፡ ለረዐይት፡ ወኵነኔ፡ ሰዶም፡ ከመ፡ ተኰነኑ፡ በእንተ፡ እከዮሙ፡ በእንተ፡ ዝሙት፡ ወርኵስ፡ ወሙስና፡ በበይናቲሆሙ፡ በዝሙት፡ ሞቱ። ወአንትሙኒ፡ ተዐቀቡ፡ እምኵሉ፡ ዝሙት፡ ወርኵስ፡ ወእምኵሉ፡ ግማኔ፡ ኀጢአት፡ ከመ፡ ኢተሀቡ፡ ስመነ፡ ለመርገም፡ ወኵሎ፡ ሕይወተክሙ፡ ለትምክሕት፡ ወኵሎ፡ ውሉደክሙ፡ ለሙስና፡ በሰይፍ፡ ወትከውኑ፡ ርጉማነ፡ ከመ፡ ሰዶም፡ ወኵሉ፡ ተረፍክሙ፡ ከመ፡ ውሉደ፡ ገሞራ። አነ፡ አሰምዕ፡ ለክሙ፡ ውሉድየ፡ አፍቅርዎ፡ ለአምላከ፡ ሰማይ፡ ወተፀመዱ፡ ኵሎ፡ ትእዛዞ፡ ወኢትሖሩ፡ ድኅረ፡ ጣዖቶሙ፡ ወድኅረ፡ ርኵሶሙ። ወአማልክተ፡ ስብኮ፡ ኢትግበሩ፡ ለክሙ፡ ወግልፈዋተ፡ እስመ፡ ከንቱ፡ ውእቱ። አላ፡ አምልኩ፡ አምላከ፡ ልዑለ፡ ወስግዱ፡ ሎቱ፡ ወትረ፡ ወተሰፈዉ፡ ገጸ፡ ዚአሁ፡ በኵሉ፡ ጊዜ፡ ወግብሩ፡ ጽድቀ፡ ወርትዐ፡ በቅድሜሁ፡ ከመ፡ ይፍተው፡ ላዕሌክሙ፡ ወየሀብክሙ፡ ምሕረቶ፡ ወያውርድ፡ ለክሙ፡ ዝናመ፡ ነግህ፡ ወሰርክ። ወትከውን፡ ለበረከት፡ በዲበ፡ ምድር፡ ወይፈትዉክሙ፡ ኵሎሙ፡ አሕዛበ፡ ምድር። ወወሀቦ፡ ለይስማዔል፡ ወለውሉዱ፡ ወለውሉደ፡ ኬጡራ፡ ሀብተ፡ ወፈነዎሙ፡ እምይስሐቅ፡ ወልዱ፡ ወኵሎ፡ ወሀቦ፡ ለይስሐቅ፡ ወልዱ። ወሖረ፡ ይስማዔል፡ ወውሉዱ፡ ወውሉደ፡ ኬጡራ፡ ወውሉዶሙ፡ ኅቡረ፡ ወኀደሩ፡ እምፋርሞን፡ እስከ፡ ምብዋአ፡ ባቢሎን፡ ውስተ፡ ኵሉ፡ ምድር፡ እንተ፡ ገጸ፡ ጽባሕ፡ አንጻረ፡ ገዳም። ወተደመሩ፡ እሉ፡ ምስለ፡ እሉ፡ ወተጸውዐ፡ ስሞሙ፡ ዐረብ፡ ወእስማዔላዊያን።

Chapter 21 ወበሳድስ፡ ዓመት፡ ዘሳብዕ፡ ሱባዔ፡ ዘዝንቱ፡ ኢዮቤልዉ፡ ጸውዐ፡ አብርሃም፡ ይስሐቅሃ፡ ወልዶ፡ ወአዘዞ፡ እንዘ፡ ይብል፡ አነ፡ ረሳእኩ፡ ወኢያአምር፡ ዕለተ፡ ሞትየ፡ እስመ፡ ጸገብኩ፡ መዋዕልየ። ወናሁ፡ አነ፡ ወልደ፡ ምእት፡ ወሰብዓ፡ ወኀምስቱ፡ ዓመት፡ ወበኵሉ፡ መዋዕለ፡ ሕይወትየ፡ ሀሎኩ፡ እንዘ፡ እዜከሮ፡ ለእግዚአብሔር፡ ወእንዘ፡ አኀሥሥ፡ በኵሉ፡ ልብየ፡ ከመ፡ እግበር፡ ፈቃዳቲሁ፡ ወከመ፡ አርትዕ፡ ሐዊረ፡ በኵሉ፡ ፍናዊሁ። ጣዖተ፡ ጸልአት፡ ነፍስየ፡ ከመ፡ እትዓቀብ፡ ለገቢረ፡ ፈቃዱ፡ ለዘ፡ ፈጠረኒ። እስመ፡ አምላክ፡ ሕያው፡ ውእቱ፡ ወቅዱስ፡ ውእቱ፡ ወምእመን፡ ወጻድቅ፡ ውእቱ፡ እምኵሉ፡ ወአልቦ፡ በኀቤሁ፡ ነሢአ፡ ገጽ፡ ወነሢአ፡ ሕልያን፡ እስመ፡ አምላክ፡ ጻድቅ፡ ውስቱ፡ ወገባሬ፡ ኵነኔ፡ ውእቱ፡ እምኵሎሙ፡ እለ፡ ይትዐደዉ፡ ትእዛዞ፡ ወለእለ፡ ይሜንኑ፡ ኪዳኖ። ወአንተኒ፡ ወልድየ፡ ዕቀብ፡ ትእዛዞ፡ ወሥርዓቶ፡ ወኵነኔሁ፡ ወኢትሖር፡ ድኅሬሆሙ፡ ለርኩሳን፡ ወድኅሬሆሙ፡ ለግልፎ፡ ወድኅሬሆሙ፡ ለስብኮ። ወኢትብላዕ፡ ምንተኒ፡ ደመ፡ ዘአርዌ፡ ወእንስሳ፡ ወዘኵሉ፡ ዖፍ፡ ዘይሰርር፡ ውስተ፡ ሰማይ። ወለእመ፡ ኀረድከ፡ ኅርድ፡ ለጽንሐሐ፡ ሰላም፡ ዘይሰጠው፡ ኅርድዎ፡ ወደሞሙ፡ ትክዕዉ፡ ውስተ፡ ምሥዋዕ፡ ወኵሎ፡ ስብሐ፡ ጽንሐሕ፡ ታዐርግ፡ ውስተ፡ ምሥዋዕ፡ ምስለ፡ ስንዳሌ፡ ወመሥዋዕተ፡ ልዉስ፡ በቅብእ፡ ምስለ፡ ሞጻሕቱ፡ ታዐርጎ፡ ኵሎ፡ ኅቡረ፡ ዲበ፡ ምሥዋዕ፡ ጽንሐሐ፡ መዓዛ፡ ሠናይ፡ ቅድመ፡ እግዚአብሔር። በከመ፡ ስብሐ፡ መሥዋዕተ፡ መድኃኒት፡ ታነብር፡ ዲበ፡ እሳት፡ ዘዲበ፡ መሥዋዕት፡ በከመ፡ ስብሕ፡ ዘዲበ፡ ከርሥ፡ ወኵሎ፡ ስብሐ፡ ዘዲበ፡ ንዋየ፡ ውስጥ፡ ወክልኤ፡ ኵልያተ፡ ወኵሎ፡ ስብሐ፡ ዘዲቤሆሙ፡ ወዘዲበ፡ መናቅዕ፡ ወከብድ፡ ምስለ፡ ኵልያት፡ ጥብሉለ። ወታዐርግ፡ ዘንተ፡ ኵሎ፡ ለመዓዛ፡ ሠናይ፡ ዘይሰጠው፡ ቅድመ፡ እግዚአብሔር፡ ምስለ፡ መሥዋዕቱ፡ ወምስለ፡ ሞጻሕቱ፡ ከመዓዛ፡ ሠናይ፡ ኅብስተ፡ ጽንሐሕ፡ ለእግዚአብሔር። ወሥጋሁ፡ ብላዕ፡ በይእቲ፡ ዕለት፡ ወበሳኒታ፡ ወኢይዕረብ፡ ላዕሌሁ፡ ፀሐይ፡ ዘአመ፡ ሳኒታ፡ እስከ፡ ሶበ፡ ይትበላዕ፡ ወኢይትርፍ፡ ለዕለት፡ ሣልስት፡ እስመ፡ ኢይሠጠዎ፡ እስመ፡ ኢኮነ፡ ኅሩየ፡ ወኢይትበሀል፡ እንከ። ውስተ፡ ኵሉ፡ ምሥዋዓቲከ፡ ትደይ፡ ፄወ፡ ወኢይጸራዕ፡ ኪዳነ፡ ፄው፡ ውስተ፡ ኵሉ፡ ምስዋዓቲከ፡ ቅድመ፡ እግዚአብሔር። ወተዐቀብ፡ በዕፀወ፡ መሥዋዕት፡ ከመ፡ ኢታብእ፡ ዕፀወ፡ ዲበ፡ ምሥዋዕ፡ ዘንተ፡ ክመ፡ ቄጳርሶን፡ ወዴፍራን፡ ወሶጋድ፡ ወሰጠሮቢሎን፡ ወጲጢን፡ ወቄድሮን፡ ወቡራቲ፡ ወታናክ፡ ወዕፀ፡ ዘይት፡ ምርስኔ፡ ወድፍን፡ ወቄዳር፡ ዘስሙ፡ አርባት፡ ወቤስም። ወእምእሉ፡ ዕፀው፡ አንብር፡ መትሕተ፡ ጽንሐሕ፡ ዲበ፡ ምሥዋዕ፡ ምኩረ፡ ርእዮሙ፡ ወኢታንብር፡ ኵሎ፡ ዕፀ፡ ንቁዐ፡ ወሬዋ፡ ዕፀወ፡ ጽኑዓነ፡ ወጽኑዐ፡ ዘአልቦ፡ ምንተኒ፡ ነውረ፡ ፍጹመ፡ ወሐደስተ፡ ተክለ፡ ወኢታንብር፡ ዕፀ፡ ብሉየ፡ እስመ፡ ወፅአ፡ መዓዛሁ፡ እስመ፡ እንከ፡ አልቦ፡ መዓዛ፡ ላዕሌሁ፡ ከመ፡ ቀዳማዊ። ዘእንበለ፡ እሉ፡ ዕፀው፡ አልቦ፡ ዘታነብር፡ ባዕደ። ዑቅ፡ ዛትእዛዘ፡ ወግበራ፡ ወልድየ፡ ከመ፡ ታርትዕ፡ በኵሉ፡ ግብርከ። ወበኵሉ፡ ጊዜ፡ ኩን፡ ንጹሐ፡ በሥጋከ፡ ወኅዕብ፡ በማይ፡ ዘእንበለ፡ ትሖር፡ ለአዕርጎ፡ ውስተ፡ ምሥዋዕ፡ ወኅፅብ፡ እዴከ፡ ወእግረከ፡ ዘእንበለ፡ ትቅረብ፡ ውስተ፡ መሥዋዕት፡ ሶበ፡ ፈጸምከ፡ አዕርጎ፡ ግባእ፡ ወተኀፀብ፡ እደዊከ፡ ወእገሪከ። ወኢያስተርኢ፡ በዲቤክሙ፡ ኵሉ፡ ደም፡ ወውስተ፡ አልባሲክሙ፡ ተዐቀብ፡ ወልድየ፡ በደም፡ ተዐቀብ፡ ጥቀ፡ ድፍኖ፡ ምድረ። ወኢትብልዑ፡ እንከ፡ ደመ፡ እስመ፡ ደም፡ ነፍስ፡ ይእቲ፡ ወኢትብላዕ፡ ምንተኒ፡ ደመ። ወኢትንሣእ፡ ሕልያነ፡ ዲበ፡ ኵሉ፡ ደመ፡ ሰብእ፡ ከመ፡ ኢይትከዐው፡ በከ፡ ዘእንበለ፡ ኵነኔ፡ እስመ፡ ደም፡ ውእቱ፡ ዘይትከዐው፡ ያኀጥኣ፡ ለምድር፡ ወደም፡ ኢትክል፡ ነጺሐ፡ እምደመ፡ ሰብእ፡ ዘእንበለ፡ በደመ፡ ዘከዐዎ። ወኢትንሣእ፡ ሕልያነ፡ ወአምኃ፡ በደመ፡ ሰብእ፡ ደመ፡ በደም፡ ወይሠጠው፡ ቅድመ፡ አምላክ፡ ልዑል። እሬኢ፡ አነ፡ ወልድየ፡ ኵሎ፡ ግብረ፡ እጓለ፡ እመሕያው፡ ከመ፡ ኃጢአት፡ ወእከይ፡ ወኵሉ፡ ግብሮሙ፡ ርኵስ፡ ወምናኔ፡ ወግማኔ። ተዐቀብ፡ ኢትሖር፡ ውስተ፡ ፍኖቶሙ፡ ወለከይደ፡ አሰሮሙ፡ ወኢትስሐት፡ ስሕተተ፡ ለሞት፡ ቅድመ፡ አምላክ፡ ልዑል። ረገሐሥ፡ እምኵሉ፡ ምግባሪሆሙ፡ ወእምኵሉ፡ ርኵሶሙ፡ ወተዐቀብ፡ ዑቃቤ፡ ዘአምላክ፡ ልዑል፡ ወግበር፡ ፈቃዳቲሁ፡ ወታረትዕ፡ በኵሉ። ወይባርከከ፡ በኵሉ፡ ምግባሪከ፡ ወያነሥእ፡ እምኔከ፡ ተክለ፡ ጽድቅ፡ በኵሉ፡ ምድር፡ በኵሉ፡ ትውልደ፡ ምድር፡ ወኢይትረመም፡ ስምየ፡ ወስምከ፡ በመትሕተ፡ ሰማይ፡ በኵሉ፡ መዋዕል። ሖር፡ ወልድየ፡ በሰላም፡ ያጽንዕከ፡ አምላክ፡ ልዑል፡ አምላኪየ፡ ወአምላክከ፡ ለገቢረ፡ ፈቃዳቲሁ፡ ወይባርክ፡ ኵሎ፡ ዘርእከ፡ ተርፈ፡ ዘርእከ፡ ለትውልድ፡ ዘለዓለም፡ በኵሉ፡ በረከተ፡ ጽድቅ፡ ከመ፡ ትኩን፡ በረከተ፡ በኵሉ፡ ምድር። ወወፅአ፡ እምኀቤሁ፡ እንዘ፡ ይትፌሣሕ።

Chapter 22 ወኮነ፡ በሱባዔ፡ ቀዳሚ፡ በዘ፡ አርብዓ፡ ወአርባዕ፡ ኢዮቤልዉ፡ በካልእ፡ ዓመት፡ በዘ፡ ሞተ፡ አብርሃም፡ መጽኡ፡ ይስሐቅ፡ ወይስማዔል፡ እምዐዘቅተ፡ መሐላ፡ ከመ፡ ይግበሩ፡ በዓለ፡ ሱባዔያት፡ ዛቲ፡ በዓል፡ ዘቀዳሚ፡ ማእረር፡ ኀበ፡ አብርሃም፡ አቡሆሙ፡ ወተፈሥሐ፡ አብርሃም፡ እስመ፡ ክልኤሆሙ፡ ደቂቁ፡ መጽኡ። እስመ፡ ብዙኅ፡ ጥሪቱ፡ ለይስሐቅ፡ በቤርሳቤ፡ ወየሐውር፡ ይስሐቅ፡ ወይዋሒ፡ ጥሪቶ፡ ወይገብእ፡ ኀበ፡ አቡሁ። ወበዝ፡ መዋዕል፡ መጽአ፡ ይስማዔል፡ ይርአይ፡ አባሁ፡ ወመጽኡ፡ ኵሎሙ፡ ኅቡረ፡ ወጠብሐ፡ ይስሐቅ፡ መሥዋዕተ፡ ለጽንሐሕ፡ ወአዕረገ፡ ዲበ፡ ምሥዋዐ፡ አቡሁ፡ ዘገብረ፡ በኬብሮን። ወሦዐ፡ መድኃኒተ፡ ወገብረ፡ ግዝአ፡ ግሥሓ፡ በቅድመ፡ ይስማዔል፡ እኁሁ። ወይስሐቅኒ፡ ውእቱ፡ ፈነወ፡ በእደ፡ ያዕቆብ፡ ዘይሤኒ፡ መሥዋዕተ፡ ዘመድኃኒት፡ አብርሃም፡ ይብላዕ፡ ወይስተይ። ወበልዐ፡ ወሰትየ፡ ወባረኮ፡ ለአምላክ፡ ልዑል፡ ዘፈጠረ፡ ሰማየ፡ ወምድረ፡ ዘገብረ፡ ኵሎ፡ ስብሐ፡ ምድር፡ ወወሀቦሙ፡ ለውሉደ፡ ሰብእ፡ ይብልዑ፡ ወይስተዩ፡ ወይባርኩ፡ ፈጣሪሆሙ። ወይእዜኒ፡ እትጋነይ፡ ለከ፡ አምላኪየ፡ እስመ፡ አርአይከኒ፡ ዛተ፡ ዕለተ፡ ናሁ፡ አነ፡ ወልደ፡ ምእት፡ ወሰብዓ፡ ወኃምስ፡ ክረምት፡ ልሂቅ፡ ወፍጹመ፡ መዋዕል፡ ወኵሎን፡ መዋዕልየ፡ ኮናኒ፡ ሰላመ። ሰይፈ፡ ጸላኢ፡ ኢሞአኒ። ትኩን፡ ሣልስከ፡ ወሰላምከ፡ ላዕለ፡ ገብርከ፡ ወላዕለ፡ ዘርአ፡ ውሉዱ፡ ከመ፡ ይኩንከ፡ ሕዝበ፡ ኅሩየ፡ ወርስተ፡ እምኵሉ፡ አሕዛበ፡ ምድር፡ እምይእዜ፡ ወእስከ፡ ኵሉ፡ መዋዕል፡ ዘትውልደ፡ ምድር፡ ለኵሉ፡ ዓለማት። ወጸውዖ፡ ለያዕቆብ፡ ወይቤሎ፡ ወልድየ፡ ያዕቆብ፡ ይባርክ፡ አምላከ፡ ኵሉ፡ ወያኀይልከ፡ ለገቢረ፡ ጽድቅ፡ ወፈቃዱ፡ በቅድመ፡ ዚአሁ፡ ወይኅረይ፡ ብከ፡ ወበዘርእከ፡ ከመ፡ ትኩንዎ፡ ሕዝበ፡ ለርስቱ፡ በከመ፡ ፈቃዱ፡ በኵሉ፡ መዋዕል። ወቀርበ፡ ወሰዐሞ። ኩን፡ ኀያለ፡ በቅድመ፡ ሰብእ፡ ወእንዘ፡ ትሜብል፡ ውስተ፡ ኵሉ፡ ዘርአ፡ ሴት፡ አሜሃ፡ ይጸድቃ፡ ፍናዊከ፡ ወፍናወ፡ ውሉድከ፡ ለከዊነ፡ ሕዝብ፡ ቅዱስ። የሀብከ፡ አምላክ፡ ልዑል፡ ኵሎን፡ በረከታተ፡ እለ፡ ባረከኒ፡ ወእለ፡ ባረኮ፡ ለኖኅ፡ ወአዳምሃ፡ ያዕርፍ፡ ዲበ፡ ድማኀ፡ ቅዳሴ፡ ዘርእከ፡ ለኵሉ፡ ትውልደ፡ ትውልድ፡ ወእስከ፡ ለዓለም። ወያንጽሕከ፡ እምኵሉ፡ ርስሐተ፡ ርኵስ፡ ከመ፡ ታስተስሪ፡ እምኵሉ፡ አበሳ፡ ዘበ፡ ኢያእምሮ፡ ጌጋይከ። ወየሐድስ፡ ኪዳኖ፡ መስሌከ፡ ከመ፡ ትኩኖ፡ ሕዝበ፡ ለርስቱ፡ በኵሉ፡ ዓለማት። ወአንተኒ፡ ወልድየ፡ ያዕቆብ፡ ተዘከር፡ ቃልየ፡ ወዕቀብ፡ ትእዛዛተ፡ አብርሃም፡ አቡከ። መሥዋዕቶሙ፡ ለአብድንት፡ ይዘብሑ፡ ወለአጋንንት፡ ይሰግዱ። ወአልቦሙ፡ ልበ፡ ለኀልዮ፡ ወኢኮነ፡ አዕይንቲሆሙ፡ ዘይሬኢ። ወአንተኒ፡ ወልድየ፡ ያዕቆብ፡ አምላክ፡ ልዑል፡ ይርዳእከ፡ ወአምላከ፡ ሰማይ፡ ይባርከ፡ ወያግኅሥከ፡ እምነ፡ ርኵሶሙ፡ ወእምኵሉ፡ ስሕተቶሙ። ተዐቀብ፡ ወልድየ፡ ያዕቆብ፡ ከመ፡ ኢትንሣእ፡ ብእሲተ፡ እምነ፡ ኵሉ፡ ዘርአ፡ አዋልደ፡ ከናአን። እስመ፡ በአበሳ፡ ካም፡ ስሕተ፡ ከናአን፡ ወኵሉ፡ ዘርኡ፡ ይደምሰስ፡ እምድር፡ ወኵሉ፡ ተርፉ፡ ወዘይድኅን፡ አልቦ፡ እምኔሁ፡ አመ፡ ዕለተ፡ ደይን። ወለኵሎሙ፡ እለ፡ ያመልኩ፡ ጣዖተ፡ ወለጽሉኣን፡ አልቦሙ፡ ምንተኒ፡ ተስፋ፡ በምድረ፡ ሕያዋን፡ እስመ፡ ውስተ፡ ሲኦል፡ ይወርዱ፡ ወውስተ፡ መካነ፡ ደይን፡ የሐውሩ። ኢትፍራህ፡ ወልድየ፡ ያዕቆብ፡ ወኢትደንግፅ፡ ወልደ፡ አብርሃም፡ አምላክ፡ ልዑል፡ ይዕቀብከ፡ እምነ፡ ሙስና፡ ወእምኵሉ፡ ፍኖተ፡ ስሕተት፡ ውእቱ፡ ይባልሕከ። ዘንተ፡ ቤተ፡ ሐነጽኩ፡ ሊተ፡ ከመ፡ አንብር፡ ስምየ፡ ላዕሌሁ፡ በዲበ፡ ምድር፡ ተውህበት፡ ለከ፡ ወለዘርእከ፡ ለዓለም፡ ወትሰመይ፡ ቤተ፡ አብርሃም፡ ተውህበት፡ ለከ፡ ወለዘርእከ፡ ለዓለም፡ እስመ፡ አንተ፡ ተሐንጽ፡ ቤትየ፡ ወታቀውም፡ ስምየ፡ ቅድመ፡ አምላክ፡ እስከ፡ ለዓለም፡ ዘርእከ፡ ወስምከ፡ ይቀውም፡ ውስተ፡ ኵሉ፡ ትውልደ፡ ምድር። ወአኅለቀ፡ እንዘ፡ ይኤዝዞ፡ ወይባርኮ። ወሰከቡ፡ ክልኤሆሙ፡ ኅቡረ፡ ውስተ፡ ዐራት፡ አሐቲ፡ ወኖመ፡ ያዕቆብ፡ ውስተ፡ ሕፅነ፡ አብርሃም፡ አበ፡ አቡሁ፡ ወሰዐሞ፡ ስብዐ፡ ወተፈሥሐ፡ ምሕረቱ፡ ወልቡ፡ ላዕሌሁ። ወባረኮ፡ በኵሉ፡ ልቡ፡ ወይቤ፡ አምላክ፡ ልዑል፡ አምላከ፡ ኵሉ፡ ወፈጣሬ፡ ኵሉ፡ ዘአውፅአኒ፡ እምነ፡ ኡር፡ ዘከለዳዊያን፡ ከመ፡ የሀበኒ፡ ዛተ፡ ምድረ፡ እረሳ፡ ለዓለም፡ ወከመ፡ አቅም፡ ዘርአ፡ ቅዱሰ፡ ከመ፡ ይትባረክ፡ ለዓለም። ወባረኮ፡ ለያዕቆብ፡ ወልድየ፡ ዘበኵሉ፡ ልብየ፡ ወዘበምሕረትየ፡ በእለ፡ እትፌሣሕ፡ ቦቱ፡ ወይኩን፡ ሣህልከ፡ ወምሕረትከ፡ ነዋኀ፡ ላዕሌሁ፡ ወላዕለ፡ ዘርኡ፡ ኵሎ፡ መዋዕለ። ወኢትኅድጎ፡ ወኢትትሀየዮ፡ እምይእዜ፡ ወእስከ፡ መዋዕል፡ ዘለዓለም። ወባርኮ፡ በኵሉ፡ በረከታቲከ፡ እምይእዜ፡ ወእስከ፡ ኵሎን፡ መዋዕል፡ ዘለዓለም።

Chapter 23 ወአንበረ፡ ክልኤሆን፡ አጻብዐ፡ ያዕቆብ፡ ዲበ፡ አዕይንቲሁ፡ ወባረኮ፡ ለአምላከ፡ አማልክት፡ ወከደነ፡ ገጾ፡ ወሰፍሐ፡ እገሪሁ፡ ወኖመ፡ ንዋመ፡ ዘለዓለም። ወበዝ፡ ኵሉ፡ ሀሎ፡ ያዕቆብ፡ ይሰክብ፡ ውስተ፡ ሕፅኑ፡ ወኢያእመረ፡ ከመ፡ ሞተ፡ አብርሃም፡ አበ፡ አቡሁ። ወነቅሀ፡ ያዕቆብ፡ እምንዋሙ። ወተንሥአ፡ እምሕፅኑ፡ ወሮጸ፡ ወነገራ፡ ለርብቃ፡ እሙ። ወወድቀ፡ ይስሐቅ፡ ውስተ፡ ገጸ፡ አቡሁ፡ ወበከየ፡ ወሰዐሞ። ወቃል፡ ተሰምዐ፡ በቤተ፡ አብርሃም። ወቀበርዎ፡ ውስተ፡ በዐት፡ ካዕበት፡ ቅሩበ፡ ሳራ፡ ብእሲቱ፡ ወውሉዱ፡ ይስሐቅ፡ ወይስማዔል። ሠለስተ፡ ኢዮቤልዉ፡ ሐይወ፡ ወአርባዕተ፡ ሱባዔ፡ ዓመተ፡ ምእተ፡ ወሰብዓ፡ ወኀምስተ፡ ዓመተ፡ ወፈጸመ፡ መዋዕለ፡ ሕይወቱ፡ ልህቀ፡ ወፍጹመ፡ መዋዕል። እስመ፡ መዋዕለ፡ ቀደምት፡ እማንቱ፡ ለሕይወቶሙ፡ ዐሠርቱ፡ ወተስዐቱ፡ ኢዮቤልውሳት። እስመ፡ አብርሃምሰ፡ ፍጹም፡ በኵሉ፡ ምግባሪሁ፡ ምስለ፡ እግዚአብሔር። ወኵሉ፡ ትውልድ፡ ዘይትነሣእ፡ እምይእዜ፡ ወእስከ፡ ዕለተ፡ ደይን፡ ዐባይ፡ ይረስኡ፡ ፍጡነ፡ ዘእንበለ፡ ይፈጽሙ፡ ክልኤ፡ ኢዮቤልዉ። ወበውእቱ፡ መዋዕል፡ እመ፡ ሐይወ፡ ብእሲ፡ ኢዮቤልዉ፡ ወመንፈቀ፡ ዓመታት፡ ይብሉ፡ በእንቲአሁ፡ አብዝኀ፡ ሐይወ፡ ወመብዝኅተ፡ መዋዕሊሁ፡ ሕማም፡ ወስራሕ፡ ወምንዳቤ፡ ወአልቦ፡ ሰላመ። እስመ፡ መቅሠፍት፡ ዲበ፡ መቅሠፍት፡ ወጽልዓን፡ ዲበ፡ ጽልዓን፡ ወምንዳቤ፡ ዲበ፡ ምንዳቤ፡ ወስምዓተ፡ እኩይ፡ ዲበ፡ ስምዓተ፡ እኩይ፡ ወደዌ፡ ዲበ፡ ደዌ፡ ወኵሉ፡ ኵነኔ፡ እኩይ፡ ዘከማሁ፡ ዝንቱ፡ ምስለ፡ ዝንቱ፡ ደዌ፡ ወገበጥባጥ፡ ወአስሐትያ፡ ወበረድ፡ ወሐመዳ፡ ወነበርጻው፡ ወሰከሕካሕ፡ ወሰዖዛዝ፡ ወዐባር፡ ወሞት፡ ወመጥባሕት፡ ወፂዋዌ። ወኵሉ፡ ዝንቱ፡ ይመጽእ፡ በትውልድ፡ እኪት፡ እንተ፡ ታኤብስ፡ ምድረ፡ በርኵሰ፡ ዝሙት፡ ወበግማኔ፡ ወበሰቆራር፡ ግብሮሙ። አሜሃ፡ ይብሉ፡ ለቀደምት፡ መዋዕሌሆሙ፡ ብዙኅ፡ እስከ፡ ዐሠርቱ፡ ምእት፡ ዓመት፡ ወሠናይ። ወበይእቲ፡ ትውልድ፡ ይከውኑ፡ ደቂቅ፡ እንዘ፡ ይዛለፉ፡ አበዊሆሙ፡ ወአዕሩጊሆሙ፡ በእንተ፡ ኀጢአት፡ ወበእንተ፡ ዐመፃ፡ ወበእንተ፡ ንባበ፡ አፉሆሙ፡ ወበእንተ፡ እከያት፡ ዐበይት፡ ዘእሙንቱ፡ ይገብሩ። እስመ፡ ኵሎሙ፡ አእከዩ፡ ወኵሉ፡ አፍ፡ ይትናገር፡ አበሳ። ናሁ፡ ምድር፡ ትትሐጐል፡ በእንተ፡ ኵሉ፡ ምግባሮሙ፡ ወአልቦ፡ ዘርአ፡ ወይን፡ ወአልቦ፡ ቅብአ፡ እስመ፡ ኵሉ፡ ካሕድ፡ ምግባሪሆሙ፡ ወኵሎሙ፡ ይትሐጐሉ፡ ኅቡረ፡ አራዊት፡ ወእንስሳ፡ ወአዕዋፍ። ወይትባአሱ፡ እሉ፡ ምስለ፡ እሉ፡ ወራዙት፡ ምስለ፡ ሊቃናት፡ ወሊቃናት፡ ምስለ፡ ወራዙት፡ ነዳይ፡ ምስለ፡ ባዕል፡ ትሑት፡ ምስለ፡ ዐቢይ፡ ወምስኪን፡ ምስለ፡ መኰንን፡ በእንተ፡ ሕግ፡ ወበእንተ፡ ኪዳን፡ እስመ፡ ረስዑ፡ ትእዛዘ፡ ወኪዳነ፡ ወበዓለ፡ ወወርኀ፡ ወሰንበተ፡ ወኢዮቤሌው፡ ወኵሎ፡ ኵነኔ። ወይቀውሙ፡ በአስይፍት፡ ወበቀትል፡ ከመ፡ ይሚጥዎሙ፡ ውስተ፡ ፍኖት፡ ወኢይትመየጡ፡ እስከ፡ ይትከዐው፡ ደም፡ ብዙኅ፡ ዲበ፡ ምድር፡ እሉ፡ በእሉ። ወእለ፡ ድኅኑ፡ በፍኖተ፡ ጽድቅ፡ ኢይትመየጡ፡ እምነ፡ እከዮሙ፡ እስመ፡ ኵሎሙ፡ ለትእግልት፡ ወውስተ፡ ብዕል፡ ይትነሥኡ፡ ከመ፡ ይንሣእ፡ አሐዱ፡ ኵሎ፡ ዘቢጹ፡ ወስመ፡ ዐቢየ፡ ይሰመዩ፡ ወአኮ፡ በህልው፡ ወአኮ፡ በጽድቅ፡ ወቅድሳተ፡ ቅዱስ፡ ያረኵሱ፡ በርኵሰ፡ ሙስና፡ ግማኔሆሙ። ወይከውን፡ መቅሠፍት፡ ዐቢይ፡ ዲበ፡ ግብረ፡ ይእቲ፡ ትውልድ፡ እምኀበ፡ እግዚአብሔር፡ ወይሁቦሙ፡ ለመጥባሕት፡ ወለኵነኔ፡ ወለፂዋዌ፡ ወለሀይድ፡ ወለብልዐት። ወያነቅህ፡ ላዕሌሆሙ፡ ኃጢኣኒሆሙ፡ ለአሕዛብ፡ እለ፡ አልቦሙ፡ ላዕሌሆሙ፡ ምሕረተ፡ ወሣህለ፡ ወለገጸ፡ መኑሂ፡ ኢያደልው፡ ኢለልሂቅ፡ ወኢለወሬዛ፡ ወኢለመኑሂ፡ እስመ፡ እኩያን፡ ወኀያላን፡ ከመ፡ ይእከዩ፡ እምኵሉ፡ ውሉደ፡ ሰብእ፡ ወይገብሩ፡ ውስተ፡ እስራኤል፡ ሀከከ፡ ወዲበ፡ ያዕቆብ፡ አበሳ፡ ወይትከዐው፡ ደም፡ ብዙኅ፡ ዲበ፡ ምድር፡ ወአልቦ፡ ዘያስተጋብእ፡ ወአልቦ፡ ዘይቀብር። በውእቱ፡ መዋዕል፡ ይጸርኁ፡ ወይጼውዑ፡ ወይጼልዩ፡ ከመ፡ ይድኀኑ፡ እምእደ፡ ኃጥኣን፡ አሕዛብ፡ ወአልቦ፡ ዘያድኅን። ወይጸዐዱ፡ አርእስተ፡ ደቂቅ፡ በሲበት፡ ወያስተርኢ፡ ሕፃን፡ ወልደ፡ ሠለስቱ፡ ሱባዔ፡ ልሂቀ፡ ከመ፡ ዘምእት፡ ዓመቱ፡ ወይትሐጐል፡ ቁመቶሙ፡ በምንዳቤ፡ ወበጻዕር። ወበውእቶን፡ መዋዕል፡ ይእኅዙ፡ ደቂቅ፡ ይትኀሠሡ፡ ሕገገ፡ ወለኃሢሠ፡ ትእዛዝ፡ ወለተመይጦ፡ ውስተ፡ ፍኖተ፡ ጽድቅ። ወይእኅዛ፡ መዋዕል፡ ይብዝኃ፡ ወይልሀቃ፡ ወውሉደ፡ ሰብእ፡ ትውልድ፡ እምትውልድ፡ ወዕለት፡ እመዋዕል፡ እስከ፡ ሶበ፡ ይቀርብ፡ መዋዕሊሆሙ፡ ለዐሠርቱ፡ ምእት፡ ዓመት፡ ወለብዙኅ፡ ዓመታት፡ እምነ፡ ብዙኅ፡ መዋዕል። ወአልቦ፡ ልሂቀ፡ ወአልቦ፡ ዘይጸግብ፡ መዋዕለ፡ እስመ፡ ኵሎሙ፡ ሕፃናተ፡ ወደቂቀ፡ ይከውኑ። ወኵሎን፡ መዋዕሊሆሙ፡ በሰላም፡ ወበፍሥሓ፡ ይፌጽሙ፡ ወይሐይዉ፡ ወአልቦ፡ መነሂ፡ ሰይጣነ፡ ወአልቦ፡ መነሂ፡ እኩየ፡ ዘያማስን፡ እስመ፡ ኵሎን፡ መዋዕሊሆሙ፡ መዋዕለ፡ በረከት፡ ወፈውስ፡ ይከውና። አሜሃ፡ ይፌውስ፡ እግዚአብሔር፡ አግብርቲሁ፡ ወይትነሥኡ፡ ወይሬእዩ፡ ሰላመ፡ ዐቢየ፡ ወይሰድድ፡ ጸላእቶ፡ ወይሬእዩ፡ ጻድቃን፡ ወያአኵቱ፡ ወይትፌሥሑ፡ እስከ፡ ለዓለመ፡ ዓለም፡ በፍሥሓ። ወያዐርፍ፡ አዕፅምቲሆሙ፡ ውስተ፡ ምድር። ወአንተኒ፡ ሙሴ፡ ጸሐፍ፡ ዘንተ፡ ቃላተ፡ እስመ፡ ከመዝ፡ ጽሑፍ፡ ውእቱ፡ ወየዐርጉ፡ ውስተ፡ ስምዐ፡ ጽላተ፡ ሰማይ፡ ለትውልድ፡ ዘለዓለም።

Chapter 24 ወኮነ፡ እምድኅረ፡ ሞተ፡ አብርሃም፡ ባረኮ፡ እግዚአብሔር፡ ለይስሐቅ፡ ወልዱ፡ ወተንሥአ፡ እምኬብሮን፡ ወሖረ፡ ወኀደረ፡ ኀበ፡ ዐዘቅተ፡ ራእይ፡ በዓመት፡ አሐዱ፡ ዘሣልስ፡ ሱባዔ፡ ዘዝ፡ ኢዩቤሌዉ፡ ሰብዐተ፡ ዓመተ። ወበዓመት፡ ዘሱባዔ፡ ራብዕ፡ አኀዘ፡ ዐባር፡ ውስተ፡ ምድር፡ ዘእንበለ፡ ቀዳማዊ፡ ዐባር፡ ዘኮነ፡ በመዋዕለ፡ አብርሃም። ወአብሰለ፡ ያዕቆብ፡ ተብሲለ፡ ብርስን፡ ወመጽአ፡ ዔሳው፡ እምሐቅል፡ ርኁብ፡ ወይቤሎ፡ ለያዕቆብ፡ እኁሁ፡ ሀበኒ፡ እምዝ፡ ተብሲል፡ ዘስርናይ። ወይቤ፡ ዔሳው፡ በልቡ፡ አነ፡ እመውት፡ ለምንትዝ፡ ቀዲመ፡ ተወልዶ፡ ወይቤሎ፡ ለያዕቆብ፡ ወሀብኩከ። ወይቤሎ፡ ያዕቆብ፡ መሐል፡ ሊተ፡ ዮም፡ ወመሐላ፡ ሎቱ። ወወሀቦ፡ ያዕቆብ፡ ለእኁሁ፡ ዔሳው፡ ኅብስተ፡ ወተብሲለ፡ ወበልዐ፡ እስከ፡ ይጸግብ፡ ወመነነ፡ ዔሳው፡ ቀዲመ፡ ተወልዶ፡ በእንተዝ፡ ተሰምየ፡ ስሙ፡ ዔሳው፡ ወኤዶም፡ በእንተ፡ ተብሲለ፡ ስርናይ፡ ዘወሀቦ፡ ያዕቆብ፡ ለቅድመ፡ ልደቱ። ወልህቀ፡ ያዕቆብ፡ ወዔሳውሰ፡ ተትሕተ፡ እምዕበዩ። ወኮነ፡ ዐባር፡ ዲበ፡ ምድር፡ ወመጽአ፡ ይስሐቅ፡ ይረድ፡ ግብጽ፡ በካልእ፡ ዓመት፡ ዘዝ፡ ሱባዔ፡ ወሖረ፡ ኀበ፡ ንጉሠ፡ ፍልስጥኤም፡ ጌራሮሃ፡ ኀበ፡ አቤሜሌክ። ወአስተርአዮ፡ እግዚአብሔር፡ ወይቤሎ፡ ኢትረድ፡ ግብጽ፡ ንበር፡ ውስተ፡ ምድር፡ እንተ፡ አነ፡ እብለከ፡ ወፍልስ፡ ውስተ፡ ይእቲ፡ ምድር፡ ወእሄሉ፡ ምስሌከ፡ ወእባርከከ። እስመ፡ ለከ፡ ወለዘርእከ፡ እሁብ፡ ዛተ፡ ምድረ፡ ኵላ፡ ወአቀውም፡ መሐላየ፡ ዘመሐልኩ፡ ለአብርሃም፡ አቡከ፡ ወአበዝኅ፡ ዘርአከ፡ ከመ፡ ከዋክብተ፡ ሰማይ። ወይትባረኩ፡ በዘርእከ፡ ኵሎሙ፡ አሕዛበ፡ ምድር፡ ህየንተ፡ ሰምዐ፡ አቡከ፡ ቃለ፡ ዚአየ፡ ወዐቀበ፡ ዑቃቤየ፡ ወትእዛዛትየ፡ ወሕገጊየ፡ ወሥርዓትየ፡ ወኪዳንየ። ወኀደረ፡ ጌራሮሃ፡ ሠለስተ፡ ሱባዔ፡ ዓመት። ወአዘዘ፡ አቤሜሌክ፡ በእንቲአሁ፡ ወበእንተ፡ ኵሉ፡ ዘዚአሁ፡ እንዘ፡ ይብል፡ ኵሉ፡ ሰብእ፡ ዘይለክፎ፡ ወለኵሉ፡ ዘዚአሁ፡ ሞተ፡ ይሙት። ወልህቀ፡ ይስሐቅ፡ በፍልስጥኤም፡ ወኮነ፡ ሎቱ፡ ጥሪት፡ ብዙኅ፡ አልህምት፡ ወአባግዕ፡ ወአግማል፡ ወአእዱግ፡ ወጥሪት፡ ብዙኅ። ወዘርኡ፡ በምድረ፡ ፍልስጥኤም። ወኵሎ፡ ዐዘቃተ፡ ዘከረዩ፡ ደቀ፡ አብርሃም፡ በሕይወተ፡ አብርሃም፡ ይፈንዎ፡ ፍልስጥኤም፡ እምድኅረ፡ ሞተ፡ አብርሃም፡ ወመልእዎ፡ መሬተ። ወይቤሎ፡ አቤሜሌክ፡ ለይስሐቅ፡ ሖር፡ እምኀቤነ፡ እስመ፡ ዐበይከ፡ ፈድፋደ፡ እምኔነ። ወተመዪጦሙ፡ ከረዩ፡ ዐዘቃተ፡ ዘማያት፡ ዘከረዩ፡ ደቀ፡ አብርሃም፡ አቡሁ። ወከረዩ፡ ደቀ፡ ይስሐቅ፡ ዐዘቃተ፡ በፍራንጋ፡ ወረከቡ፡ ማየ፡ ሕያወ፡ ወተጋአዙ፡ ኖሎተ፡ ጌራሮን፡ ምስለ፡ ኖሎተ፡ ይስሐቅ፡ እንዘ፡ ይብሉ፡ ዘዚአነ፡ ዝማይ። ወከረዩ፡ ዐዘቅተ፡ ካልአ፡ ወተበአሱ፡ በእንቲአሁኒ፡ ወጸውዐ፡ ስሞ፡ ጸባብ፡ ወአንሥአ፡ ወከረዩ፡ ዐዘቅተ፡ ካልአ፡ ወኢተጋአዙ፡ ወጸውዐ፡ ስሞ፡ ስፉሕ፡ ወይቤ፡ ይስሐቅ፡ ይእዜ፡ አስፍሐ፡ ለነ፡ እግዚአብሔር፡ ወልህቅነ፡ ዲበ፡ ምድር። ወዐርገ፡ እምህየ፡ ውስተ፡ ዐዘቅተ፡ መሐላ፡ በቀዳሚ፡ ዓመት፡ ዘሱባዔ፡ ቀዳሚ፡ በራብዕ፡ ወአርብዓ፡ ኢዮቤለው። ወአስተርአዮ፡ እግዚአብሔር፡ በይእቲ፡ ሌሊት፡ በሠርቀ፡ ቀዳሚ፡ ወርኅ፡ ወይቤሎ፡ አነ፡ ውእቱ፡ አምላከ፡ አብርሃም፡ አቡከ፡ ኢትፍራህ፡ እስመ፡ አነ፡ ምስሌከ፡ ሀለውኩ፡ ወእባርከከ፡ ወአብዝኆ፡ አበዝኅ፡ ዘርአከ፡ ከመ፡ ኆፃ፡ ምድር፡ በእንተ፡ አብርሃም፡ ቍልዔየ። ወሐነጸ፡ ህየ፡ ምሥዋዕ፡ ዘቀዳሚ፡ ዘሐነጸ፡ አብርሃም፡ አቡሁ። ወከረዩ፡ ዐዘቅተ፡ ወረከቡ፡ ማየ፡ ሕያወ። ወደቀ፡ ይስሐቅኒ፡ ከረዩ፡ ዐዘቅተ፡ ካልአ፡ ወኢረከቡ፡ ማየ። ወጸውዐ፡ ስሞ፡ ለውእቱ፡ መካን፡ ዐዘቅተ፡ መሐላ፡ እስመ፡ በህየ፡ መሐለ፡ ለአቤሜሌክ፡ ወለአኮዘት፡ ካልኡ፡ ሎቱ፡ ወለፊኮል፡ ዐቃቢሁ። ወአእመረ፡ ይስሐቅ፡ በይእቲ፡ ዕለት፡ ከመ፡ በግፉዕ፡ መሐለ፡ ሎሙ፡ ለገቢር፡ ምስሌሆሙ፡ ሰላመ። ወረገሞሙ፡ ይስሐቅ፡ በይእቲ፡ ዕለት፡ ለፍልስጥኤም፡ ወይቤ፡ ርጉም፡ ፍልስጥኤም፡ ለዕለተ፡ መዓት፡ ወቍጥዓ፡ እማእከለ፡ ኵሉ፡ አሕዛብ። ወዘአምሠጠ፡ እምሰይፈ፡ ፀር፡ ወእምነ፡ ኬጥኤም፡ ይሠርዎሙ፡ ሕዝብ፡ ጻድቅ፡ በኵነኔ፡ እምታሕተ፡ ሰማይ፡ እስመ፡ ፀረ፡ ወጸላእተ፡ ይከውኑ፡ ለውሉድየ፡ በመዋዕሊሆሙ፡ በዲበ፡ ምድር። ወአልቦ፡ ተኀድጎ፡ ሎሙ፡ ተረፈ፡ ወዘይድኅን፡ አመ፡ ዕለተ፡ መዓተ፡ ኵነኔ። እስመ፡ እመኒ፡ እስከ፡ ሰማይ፡ ዐርገ፡ እምህየ፡ ይወርድ፡ ወእመኒ፡ ጸንዐ፡ ውስተ፡ ምድር፡ እምህየ፡ ይትመላሕ፡ ወእመኒ፡ ተኀብአ፡ ማእከለ፡ አሕዛብ፡ እምህየ፡ ይሤሮ፡ ወእመኒ፡ ወረደ፡ ውስተ፡ ሲኦል፡ በህየ፡ ይበዝኅ፡ ኵነኔሁ። ወእመኒ፡ ሖረ፡ ውስተ፡ ፂዋዌ፡ በእደ፡ እለ፡ የኀሥሥዋ፡ ለነፍሱ፡ በማእከለ፡ ፍኖት፡ ይቀትልዎ፡ ወአልቦ፡ አትርፎ፡ ሎቱ፡ ስመ፡ ወዘርአ፡ ውስተ፡ ኵሉ፡ ምድር። ወከመዝ፡ ተጽሕፈ፡ ወተቈርዐ፡ በእንቲአሁ፡ ውስተ፡ ጽላተ፡ ሰማይ፡ ለገቢር፡ ሎቱ፡ በዕለተ፡ ኵነኔ፡ ከመ፡ ይሠሮ፡ እምድር።

Chapter 25 ወበካልእ፡ ዓመት፡ ዘዝ፡ ሱባዔ፡ ዘበዝ፡ ኢዮቤሌው፡ ጸውዐት፡ ርብቃ፡ ያዕቆብሃ፡ ወልዳ፡ ወተናገረቶ፡ እንዘ፡ ትብል፡ ወልድየ፡ ኢትንሣእ፡ ለከ፡ ብእሲተ፡ እምነ፡ አዋልደ፡ ከናአን፡ ከመ፡ ዔሳው፡ እኁከ፡ ዘነሥአ፡ ሎቱ፡ ክልኤተ፡ አንስቲያ፡ እምዘርአ፡ ከናአን፡ ወአምረርዋ፡ ለነፍስየ፡ በኵሉ፡ ምግባሮሙ፡ ርኵስ፡ እስመ፡ ኵሉ፡ ምግባሮሙ፡ ዝሙት፡ ወምርዓት፡ ወአልቦ፡ ምንተኒ፡ ጽድቀ፡ ምስሌሆሙ፡ እስመ፡ እኵይ፡ ውእቱ። ወአነ፡ ወልድየ፡ አፈቅረከ፡ ጥቀ፡ ፈድፋደ፡ ወልብየ፡ ወምሕረትየ፡ ይባርከከ፡ በኵሉ፡ ጊዜ፡ ዕለት፡ ወዑቃቤ፡ ለያልይ። ወይእዜኒ፡ ወልድየ፡ ስማዕ፡ ቃልየ፡ ወግበር፡ ፈቃዳ፡ ለእምከ፡ ወኢትንሣእ፡ ለከ፡ ብእሲተ፡ እምአዋልደ፡ ዝምድር፡ ዘእንበለ፡ እምቤተ፡ አቡየ፡ ወዘእንበለ፡ እምዘመደ፡ አቡየ፡ ትንሣእ፡ ለከ፡ ብእሲተ፡ እምነ፡ ቤተ፡ አቡየ፡ ወይባርከከ፡ አምላክ፡ ልዑል፡ ወይከውን፡ ትውልድከ፡ ትውልደ፡ ጽድቅ፡ ወዘርእከ፡ ቅዱስ። ወእምዝ፡ ተናገረ፡ ያዕቆብ፡ ምስለ፡ ርብቃ፡ እሙ፡ ወይቤላ፡ ናሁ፡ አነ፡ እሞ፡ ወልደ፡ ተስዐቱ፡ ሱባዔ፡ ዓመት፡ ወምንተኒ፡ አንስተ፡ ኢየአምር፡ ወኢገሰስኩ፡ ወኢፈኀርኩ፡ ወኢይኄሊሂ፡ እንሣእ፡ ብእሲተ፡ እምኵሉ፡ ዘርአ፡ አዋልደ፡ ከናአን፡ ሊተ። እስመ፡ እዜከር፡ አነ፡ እሙ፡ ነገረ፡ አብርሃም፡ አቡነ፡ ምንተ፡ አዘዘኒ፡ ከመ፡ ኢይንሣእ፡ ብእሲተ፡ እምኵሉ፡ ዘርአ፡ ቤተ፡ ከናአን፡ እስመ፡ እምዘርአ፡ ቤተ፡ አቡየ፡ እነሥእ፡ ሊተ፡ ብእሲተ፡ ወእምትዝምድየ። ሰማዕኩ፡ እሙ፡ ቀዲሙ፡ ከመ፡ ተወልዳ፡ አዋልድ፡ ለላባ፡ እኁኪ፡ ወላዕሌሆን፡ አንበርኩ፡ ልብየ፡ ከመ፡ እንሣእ፡ እምኔሆን፡ ብእሲተ። ወበእንተዝ፡ አነ፡ ተዐቀብኩ፡ በመንፈስየ፡ ከመ፡ ኢየአብስ፡ ወኢይማስን፡ በኵሉ፡ ፍናው፡ ኵሎ፡ መዋዕለ፡ ሕይወትየ፡ እስመ፡ በእንተ፡ ምርዓት፡ ወዝሙት፡ አብዝኀ፡ አብ፡ አብርሃም፡ አዝዞትየ። ምስለ፡ ኵሉ፡ ዘአዘዘኒ፡ ዘንተ፡ ዕሥራ፡ ወክልኤተ፡ ዓመተ፡ እኁየ፡ ይትጋአዘኒ፡ ወያበዝኅ፡ እንዘ፡ ይትናገረኒ፡ ወይብል፡ ንሣእ፡ እኁየ፡ ብእሲተ፡ አሐተ፡ እኅቶን፡ ለአንስቲያየ፡ ክልኤቲ፡ ወአነኒ፡ ኢይፈቅድ፡ እግበር፡ ከመ፡ ገብረ። እምሕል፡ አነ፡ እሙ፡ ቅድሜኪ፡ ኵሎ፡ መዋዕለ፡ ሕይወትየ፡ ከመ፡ ኢይንሣእ፡ ሊተ፡ ብእሲተ፡ እምኵሉ፡ ዘርአ፡ አዋልደ፡ ከናአን፡ ወኢየአኪ፡ ገቢረ፡ በከመ፡ ገብረ፡ እኁየ። ኢትፍርሂ፡ እሙ፡ ተአመኒ፡ ከመ፡ እገብር፡ ፈቃደኪ፡ ወበርቱዕ፡ አሐውር፡ ወኢያማስን፡ ፍናውየ፡ ለዓለም። ወእምዝ፡ አንሥአት፡ ገጻ፡ ውስተ፡ ሰማይ፡ ወጸፍሐት፡ አጸብዐ፡ እደዊሃ፡ ወከሠተት፡ አፉሃ፡ ወባረከቶ፡ ለአምላክ፡ ልዑል፡ ዘፈጠረ፡ ሰማየ፡ ወምድረ፡ ወወሀበት፡ ሎቱ፡ አኰቴተ፡ ወስባሔ። ወትቤ፡ ይትባረክ፡ እግዚአብሔር፡ አምላክ፡ ወይትባረክ፡ ስሙ፡ ለዓለመ፡ ዓለም። ባርኮ፡ እግዚኦ፡ ወአንብር፡ ውስተ፡ አፉየ፡ በረከተ፡ ጽድቅ፡ ከመ፡ እባርኮ። ወውእቱ፡ ጊዜ፡ ወረደ፡ መንፈሰ፡ ጽድቅ፡ ውስተ፡ አፉሃ፡ ወአንበረት፡ ውስተ፡ ርእሰ፡ ያዕቆብ፡ ክልኤሆን፡ እደዊሃ፡ ወትቤ። ቡሩክ፡ አንተ፡ እግዚኦ፡ ጻድቅ፡ አምላኮሙ፡ ለዓለማት፡ ወኪያከ፡ ይባርክ፡ እምኵሉ፡ ትውልደ፡ ሰብእ፡ የሀብከ፡ ወልድየ፡ ፍኖተ፡ ጽድቅ፡ ወለዘርእከ፡ ይክሥት፡ ጽድቀ። ወያብዝኅ፡ ውሉደከ፡ በሕይወትከ፡ ወይቁሙ፡ ለኆልቍ፡ ለአውራኀ፡ ዓመት፡ ወውሉዶሙ፡ ይብዝኁ፡ ወይዕበዩ፡ እምነ፡ ከዋክብተ፡ ሰማይ፡ ወእምነ፡ ኆፃ፡ ባሕር፡ ይብዛኅ፡ ኆልቆሙ። የሀቦሙ፡ ዛተ፡ ምድረ፡ ሥምርተ፡ በከመ፡ ነበበ፡ የሀባ፡ ለአብርሃም፡ ወለዘርኡ፡ እምድኅሬሁ፡ በኵሉ፡ መዋዕል፡ ወየአኀዝዋ፡ እኂዘ፡ ዘለዓለም። ወእርአይ፡ ለከ፡ ወልድየ፡ ውሉደ፡ ቡሩከ፡ በሕይወትየ፡ ወዘርአ፡ ቡሩክ፡ ወቅዱሰ፡ ይኩን፡ ኵሉ፡ ዘርእከ። ወበከመ፡ አዕረፍከ፡ መንፈሰ፡ እምከ፡ በሕይመታ፡ ሕምሣ፡ ለወላዲትከ፡ ከመዝ፡ ትባርከ፡ ምሕረትየ፡ ወአጥባትየ፡ ኪያከ፡ ይባርክ፡ ወአፉየ፡ ወልሳንየ፡ ኪያከ፡ ያአኵቱ፡ ብዛኅ። ወለሀቅ፡ ወተከዐው፡ ውስተ፡ ምድር፡ ወዘርእከ፡ ይኩን፡ ፍጹመ፡ ውስተ፡ ኵሉ፡ ዓለም፡ በፍሥሓ፡ ሰማይ፡ ወምድር። ስምከ፡ ወዘርእከ፡ እስከ፡ ኵሉ፡ ዓለማት፡ ይቁም። ዘይባርከከ፡ ቡሩክ፡ ወኵሉ፡ ሥጋ፡ እንተ፡ ትረግመከ፡ በሐሰት፡ ትኩን፡ ርግምተ። ወሰዐመቶ፡ ወትቤሎ፡ ያፍቅር፡ ብከ፡ እግዚአ፡ ዓለም፡ በከመ፡ ልበ፡ እምከ፡ ወምሕረታ፡ ይትሐሠይ፡ ብከ፡ ወይባርከከ፡ ወአርመመት፡ እንከ፡ እምባርኮ።

Chapter 26 ወበዓመት፡ ሳብዕ፡ ዘዝ፡ ሱባዔ፡ ጸውዐ፡ ይስሐቅ፡ ዔሳውሃ፡ ወልዶ፡ ዘይልህቅ፡ ወይቤሎ፡ ወልድየ፡ አነ፡ ረሣእኩ፡ ወናሁ፡ አዕይንትየ፡ ከፍአ፡ ለርእይ፡ ወኢያአምር፡ ዕለተ፡ ሞትየ። ወይእዜኒ፡ ንሣእ፡ ንዋየ፡ ነዓዌከ፡ ምጕንጳከ፡ ወቀስተከ፡ ወፃእ፡ ሐቅለ፡ ወነዐው፡ ሊተ፡ ወአኀዝ፡ ሊተ፡ ወልድየ፡ ወግበር፡ ሊተ፡ መብልዐ፡ ከመ፡ ዘታፈቅር፡ ነፍስየ፡ ወአምጽእ፡ ሊተ፡ ከመ፡ እብላዕ፡ ወትባርከ፡ ነፍስየ፡ ዘእንበለ፡ እሙት። ወርብቃሰ፡ ትሰምዕ፡ እንዘ፡ ይነግሮ፡ ለዔሳው፡ ይስሐቅ። ወጌሰ፡ ዔሳው፡ ገዳመ፡ ከመ፡ ያሥግር፡ ወየአኀዝ፡ ወያምጽእ፡ ለአቡሁ። ወጸውዐት፡ ርብቃ፡ ያዕቆብሃ፡ ወልዳ፡ ወትቤሎ፡ ናሁ፡ ሰማዕክዎ፡ ለይስሐቅ፡ አቡከ፡ እንዘ፡ ይትናገር፡ ምስለ፡ ዔሳው፡ እኁከ፡ እንዘ፡ ይብል፡ አስግር፡ ሊተ፡ ወግበር፡ ሊተ፡ መብልዐ፡ ወአብእ፡ ሊተ፡ ወእብላዕ፡ ወእባርከከ፡ በቅድመ፡ እግዚአብሔር፡ ዘእንበለ፡ እሙት። ወይእዜኒኬ፡ ስማዕ፡ ወልድየ፡ ቃልየ፡ ዘአነ፡ እኤዝዘከ፡ ሖር፡ ውስተ፡ መርዔትከ፡ ወንሣእ፡ ሊተ፡ ክልኤተ፡ መሓስአ፡ ጠሊ፡ ሠናያነ፡ ወእግበሮሙ፡ መብልዐ፡ ለአቡከ፡ ዘከመ፡ ያፈቅር፡ ወታብእ፡ ለአቡከ፡ ወይብላዕ፡ ከመ፡ ይባርክ፡ ቅድመ፡ እግዚአብሔር፡ ዘእንበለ፡ ይሙት። ወይቤላ፡ ያዕቆብ፡ ለርብቃ፡ እሙ፡ እሞ፡ ኢይምሕክ፡ በእንተ፡ ኵሉ፡ ዘይበልዕ፡ አቡየ፡ ወያሠምሮ፡ ወባሕቱ፡ እፈርህ፡ አነ፡ እሞ፡ ከመ፡ ኢይለቡ፡ ቃልየ፡ ወኢይፍቅድ፡ ይግሥሠኒ። ወአንቲ፡ ታአምሪ፡ ከመ፡ አነ፡ ልሙጽ፡ ወዔሳው፡ እኁየ፡ ጸጓር፡ ወእከውን፡ ቅድመ፡ አዕይንቲሁ፡ ከመ፡ ዘያስተአኪ፡ ወእገብር፡ ግብረ፡ ዘኢአዘዘኒ፡ ወይትመዐዐኒ፡ ወአመጽእ፡ ላዕሌየ፡ መርገመ፡ ወአኮ፡ በረከተ። ወትቤሎ፡ ርብቃ፡ እሙ፡ ላዕሌየ፡ መርገምከ፡ ኦወልድየ፡ ዳእሙ፡ ስማዕ፡ ቃልየ። ወሰምዐ፡ ያዕቆብ፡ ቃለ፡ ርብቃ፡ እሙ። ወነሥአት፡ ርብቃ፡ አልባሰ፡ ወልዳ፡ ዔሳው፡ ዘይልህቅ፡ ዘይትፈተው፡ ዘሀሎ፡ ኀቤሃ፡ ውስተ፡ ቤታ፡ ወአልበሰቶ፡ ለያዕቆብ፡ ወልዳ፡ ዘይንእስ። ወወሀበቶ፡ ተብሲለ፡ ወኅብስተ፡ ዘገብረት፡ ውስተ፡ እደ፡ ያዕቆብ፡ ወልዳ። ወቦአ፡ ኀበ፡ አቡሁ፡ ወይቤ፡ አነ፡ ወልድከ፡ ገበርኩ፡ በከመ፡ ትቤለኒ፡ ተንሥእ፡ ወንበር፡ ወብልዕ፡ እምዘ፡ አሥገርኩ፡ አባ፡ ከመ፡ ትባርከኒ፡ ነፍስከ። ወይቤሎ፡ ይስሐቅ፡ ለወልዱ፡ ምንተ፡ ከመዝ፡ ዘአፍጠንከ፡ ረኪበ፡ ወልድየ። ወይቤ፡ ያዕቆብ፡ ዘአርከበኒ፡ አምላክከ፡ ቅድሜየ። ወይቤሎ፡ ይስሐቅ፡ ቅረብ፡ ወእግሥሥከ፡ ወልድየ፡ እመ፡ አንተ፡ ወልድየ፡ ዔሳው፡ ወእመ፡ ኢኮነሁ። ወቀርበ፡ ያዕቆብ፡ ኀበ፡ ይስሐቅ፡ አቡሁ፡ ወገሰሶ፡ ወይቤ። ቃል፡ ቃለ፡ ያዕቆብ፡ ወእደው፡ እደወ፡ ዔሳው፡ ወኢያእመሮ፡ እስመ፡ ሚጠት፡ ውእቱ፡ እምሰማይ፡ ለአኅልፎ፡ መንፈሱ፡ ወኢያእመረ፡ ይስሐቅ፡ እስመ፡ እደዊሁ፡ ከመ፡ እደወ፡ ዔሳው፡ ጸጓር፡ ከመ፡ ይባርኮ። ወይቤ፡ አንተሁ፡ ወልድየ፡ ዔሳው፡ ወይቤ፡ አነ፡ ወልድከ፡ ወይቤ፡ አቅርብ፡ ሊተ፡ ወእብላዕ፡ እምዘ፡ አሥግርከ፡ ወልድየ፡ ከመ፡ ትባርከ፡ ነፍስየ። ወአቅረበ፡ ሎቱ፡ ወበልዐ፡ ሎቱ፡ ወይነ፡ ወሰትየ። ወይቤሎ፡ ይስሐቅ፡ አቡሁ፡ ቅረብ፡ ወሰዐመኒ፡ ወልድየ። ወአጼነወ፡ ጼና፡ ወዐዛ፡ አልባሲሁ፡ ወባረኮ፡ ወይቤ፡ ናሁ፡ ጼና፡ ወልድየ፡ ከመ፡ ጼና፡ ገዳም፡ ዘባረኮ፡ እግዚአብሔር። ወየሀብከ፡ እግዚአብሔር፡ ወያብዝኅከ፡ እምጠለ፡ ሰማይ፡ ወእምጠለ፡ ምድር፡ ወብዝኀ፡ ስርናይ፡ ወቅብእ፡ ያብዝኅ፡ ለከ። ኩን፡ እግዚአ፡ ለአኀዊከ፡ ወይስግዱ፡ ለከ፡ ውሉደ፡ እምከ፡ ወኵሎን፡ በረከት፡ ዘባረከኒ፡ እግዚአብሔር፡ ወባረኮ፡ ለአብርሃም፡ አቡየ፡ ይኩና፡ ለከ፡ ወለዘርእከ፡ እስከ፡ ለዓለም፡ ዘይረግመከ፡ ርጉም፡ ወዘይባርከከ፡ ቡሩክ። ወኮነ፡ እምድኅረ፡ አኅለቀ፡ እንዘ፡ ይባርኮ፡ ይስሐቅ፡ ለወልዱ፡ ያዕቆብ፡ ወኮነ፡ እምድኅረ፡ ወፅአ፡ ወፂኦ፡ ያዕቆብ፡ እምይስሐቅ፡ አቡሁ፡ ተኀብአ። ወገብረ፡ ውእቱሂ፡ መብልዐ፡ ወአብአ፡ ለአቡሁ። ወይቤሎ፡ ይስሐቅ፡ አቡሁ፡ መኑ፡ አንተ፡ ወይቤሎ፡ አነ፡ በኵርከ፡ ዔሳው፡ ወልድከ፡ ገበርኩ፡ በከመ፡ አዘዝከኒ። ወተደመ፡ ይስሐቅ፡ ድማመ፡ ዐቢየ፡ ጥቀ፡ ወይቤ፡ መኑ፡ ውእቱ፡ ዝንቱ፡ ዘነዐወ፡ ወአሥገረ፡ ሊተ፡ ወአምጽአ፡ ወበለዕኩ፡ እምኵሉ፡ እንበለ፡ ትምጻእ፡ ወባረክዎ፡ ቡሩከ፡ ይኩን፡ ወኵሉ፡ ዘርኡ፡ እስከ፡ ለዓለም። ወኮነ፡ ሶበ፡ ሰምዐ፡ ዔሳው፡ ነገረ፡ አቡሁ፡ ይስሐቅ፡ ጸርኀ፡ በቃል፡ ዐቢይ፡ ወመራር፡ ጥቀ፡ ወይቤሎ፡ ለአቡሁ፡ ባርከኒ፡ ኪያየኒ፡ አባ። ወይቤሎ፡ መጽአ፡ እኁከ፡ በሕብል፡ ወነሥአ፡ በረከታቲከ። ወይቤ፡ ኢያትረፍከኑ፡ ሊተ፡ በረከተ፡ አባ። ወይቤ፡ ዔሳው፡ ለይስሐቅ፡ አቡሁ፡ አሐቲኑ፡ ክመ፡ በረከትከ፡ እንቲአከሰ፡ አባ፡ ባርከኒ፡ ኪያየኒ፡ አባ፡ ወአንሥአ፡ ዔሳው፡ ቃሎ፡ ወበክየ። ወበመጥባሕትከ፡ ተሐዩ፡ ወለእኁከ፡ ትትቀነይ። ወይትሜአከ፡ ዔሳው፡ ያዕቆብሃ፡ በእንተ፡ በረከት፡ እንተ፡ ባረኮ፡ አቡሁ፡ ወይቤ፡ በልቡ፡ ይእዜኒ፡ ይበጽሕ፡ መዋዕለ፡ ላሐ፡ አቡየ፡ ወእቀትሎ፡ ለያዕቆብ፡ እኁየ።

Chapter 27 ወተናግራ፡ ለርብቃ፡ በሕልም፡ ነገሮ፡ ለዔሳው፡ ወልዳ፡ ዘይልህቅ። ናሁ፡ ዔሳው፡ እኁከ፡ ይትቄየመከ፡ ከመ፡ ይቅትልከ። ወይእዜኒ፡ ወልድየ፡ ስማዕ፡ ቃልየ፡ ተንሥእ፡ ወጕየይ፡ ኀበ፡ ላባ፡ እኁየ፡ ከራንሃ፡ ወንበር፡ ምስሌሁ፡ ኀዳጠ፡ መዋዕለ፡ እስከ፡ ይትመየጥ፡ መዐተ፡ እኁከ፡ ወየኀድግ፡ መዐቶ፡ እምኔከ፡ ወይረስዕ፡ ኵሎ፡ ዘመጠነ፡ ረሰይኮ፡ ወፈነውየ፡ እትቄበለከ፡ እምህየ። ወይቤ፡ ያዕቆብ፡ ኢይፈርህ፡ እመ፡ ፈቀደ፡ ይቅትለኒ፡ እቀትሎ። ወትቤሎ፡ ከመ፡ ኢይምክን፡ እምክልኤቱ፡ ውሉድየ፡ በአሐቲ፡ ዕለት። ወይቤላ፡ ያዕቆብ፡ ለርብቃ፡ እሙ፡ ናሁ፡ ታአምሪ፡ ከመ፡ ረስአ፡ አቡየ፡ ወእሬኢ፡ እስመ፡ ከብዳ፡ አዕይንቲሁ፡ ወእመኒ፡ ኀደግዎ፡ እኩይ፡ ውእቱ፡ በቅድመ፡ አዕይንቲሁ፡ እስመ፡ አኀድጎ፡ ወአሐውር፡ እምኔክሙ። ወትቤሎ፡ ርብቃ፡ ለያዕቆብ፡ አነ፡ እበውእ፡ ወእነግሮ፡ ወይፌንወከ። ወቦአት፡ ርብቃ፡ ወትቤሎ፡ ለይስሐቅ፡ ግእዝኩ፡ ሕይወትየ፡ እምክልኤሆን፡ አዋልደ፡ ኬጥ፡ እለ፡ ነሥአ፡ ዔሳው፡ ሎቱ፡ አንስትያ። ወጸውዐ፡ ይስሐቅ፡ ያዕቆብሃ፡ ወልዶ፡ ወባረኮ፡ ወገሠጾ፡ ወይቤሎ። ኢትንሣእ፡ ለከ፡ ብእሲተ፡ እምኵሉ፡ አዋልደ፡ ከናአን፡ ተንሥእ፡ ሖር፡ መስጴጦምያ፡ ቤቶ፡ ለባቱኤል፡ አቡሃ፡ ለእምከ፡ ወንሣእ፡ ለከ፡ እምህየ፡ ብእሲተ፡ እምአዋልደ፡ ላባ፡ እኁሃ፡ ለእምከ። ወአምላከ፡ ሰዳይ፡ ይባርከ፡ ያልህቀ፡ ወያብዝኅከ፡ ወኩን፡ መክብበ፡ አሕዛብ፡ ወየሀብከ፡ በረከታቲሁ፡ ለአቡየ፡ አብርሃም፡ ለከ፡ ወለዘርእከ፡ እምድኅሬከ፡ ከመ፡ ትረስ፡ ምድረ፡ ፍልሰትከ፡ ወኵላ፡ ምድረ፡ እንተ፡ ወሀቦ፡ እግዚአብሔር፡ ለአብርሃም፡ ሖር፡ ወልድየ፡ በሰላም። ወፈነዎ፡ ይስሐቅ፡ ለያዕቆብ፡ ወሖረ፡ መስጴጦምያ፡ ኀበ፡ ላባ፡ ኀበ፡ ወልደ፡ ባቱኤል፡ ሶርያዊ፡ እኁሃ፡ ለርብቃ፡ እሙ፡ ለያዕቆብ። ወኮነ፡ እምድኅረ፡ ተንሥአ፡ ያዕቆብ፡ ለሐዊረ፡ መስጴጦምያ፡ ወሐዘነ፡ መንፈሳ፡ ለርብቃ፡ ድኅረ፡ ወልዳ፡ ወትበኪ። ወይቤላ፡ ይስሐቅ፡ ለርብቃ፡ እኅትየ፡ ኢትብኪዪ፡ በእንተ፡ ወልድየ፡ እስመ፡ በሰላም፡ የሐውር፡ ወበሰላም፡ ይትመየጥ። አምላክ፡ ልዑል፡ የዐቅቦ፡ እምኵሉ፡ እኩይ፡ ወይሄሉ፡ ምስሌሁ። እስመ፡ እጤይቅ፡ ከመ፡ ይሤራሕ፡ ፍናዊሁ፡ በኵሉ፡ ኀበ፡ ሖረ፡ እስከ፡ አመ፡ ይገብእ፡ በሰላም፡ ኀቤነ፡ ወንሬእዮ፡ በሰላም። ኢትፍርሂ፡ በእንቲአሁ፡ እኅትየ፡ እስመ፡ ራትዕ፡ በፍኖቱ፡ ውእቱ፡ ወፍጹም፡ ውእቱ፡ ብእሲ፡ ምእመን፡ ውእቱ፡ ወኢይትገደፍ፡ ኢትብክዪ። ወይናዝዛ፡ ይስሐቅ፡ ለርብቃ፡ በእንተ፡ ያዕቆብ፡ ወልዳ፡ ወባረኮ። ወወፅአ፡ ያዕቆብ፡ እምዐዘቅተ፡ መሐላ፡ ከመ፡ ይሖር፡ ካራንሃ፡ በዓመት፡ ቀዳሚ፡ ዘሱባዔ፡ ካልእ፡ ዘአርብዓ፡ ወአርባዕቱ፡ ኢዮቤሌዉ፡ ወበጽሐ፡ ወስተ፡ ሉዛ፡ እንተ፡ ውስተ፡ ደብር፡ እንተ፡ ይእቲ፡ ቤቴል፡ በሠርቀ፡ ወርኅ፡ ዘቀዳሚ፡ ዘዝ፡ ሱባዔ፡ ወበጽሐ፡ መካነ፡ መሲዮ፡ ወተግሕሠ፡ እምፍኖተ፡ ዐረቢሃ፡ ለመንገድ፡ በዛቲ፡ ሌሊት፡ ወኖመ፡ ህየ፡ እስመ፡ ዐረበ፡ ፀሐይ። ወነሥአ፡ እምአእባነ፡ ውእቱ፡ መካን፡ ወአንበሮ፡ ታሕተ፡ ውእቱ፡ ዕፅ፡ ወውእቱ፡ ባሕቲቱ፡ የሐውር። ወሐለመ፡ በይእቲ፡ ሌሊት፡ ወናሁ፡ መዓርግ፡ ትክልት፡ ውስተ፡ ምድር፡ ወርእሳ፡ ትለክፍ፡ ውስተ፡ ሰማይ። ወተናገረ፡ ምስለ፡ ያዕቆብ፡ ወይቤ፡ አነ፡ ውእቱ፡ አምላከ፡ አብርሃም፡ አቡከ፡ ወአምላከ፡ ይስሐቅ፡ ምድር፡ እንተ፡ ዲቤሃ፡ ትነውም፡ አንተ፡ ለከ፡ እሁባ፡ ወለዘርእከ፡ እምድኅሬከ። ወይከውን፡ ዘርእከ፡ ከመ፡ ኆጻ፡ ምድር፡ ወትበዝኅ፡ ውስተ፡ ባሕር፡ ወጽባሕ፡ ወሰሜን፡ ወደቡብ። ወነየ፡ አነ፡ እሄሉ፡ ምስሌከ፡ ወአዐቅበከ፡ በኵለሄ፡ ወእደ፡ ሖርከ፡ ወአገብአከ፡ ውስተ፡ ዛምድር፡ በሰላም፡ እስመ፡ ኢየኀድገከ፡ እስከ፡ ሶበ፡ እገብር፡ ኵሎ፡ ዘእቤለከ። ወኖመ፡ ያዕቆብ፡ ንዋመ፡ ወይቤ፡ አማን፡ ቤቱ፡ ለእግዚአብሔር፡ ዝመካን፡ ወአነ፡ ኢያእመርኩ፡ ወፈርሀ፡ ወይቤ፡ ግሩም፡ ዝንቱ፡ መካን፡ ዘኢኮነ፡ ምንተኒ፡ ዘእንበለ፡ ቤተ፡ እግዚአብሔር፡ ወዛቲ፡ አንቀጸ፡ ሰማይ። ወገዪሶ፡ ያዕቆብ፡ ነግሀ፡ ነሥአ፡ እብነ፡ ዘአንበረ፡ ዲበ፡ ርእሱ፡ ወአቀሞ፡ ሐውልተ፡ ለትእምርት፡ ወከዐወ፡ ቅብአ፡ ዲበ፡ ርእሱ፡ ወሰመየ፡ ስሞ፡ ለውእቱ፡ መካን፡ ቤቴል፡ ወቀዲሙሰ፡ ባሕቱ፡ ሉዛ፡ ስመ፡ ብሔሩ። ወጸለየ፡ ያዕቆብ፡ ጸሎተ፡ ለእግዚአብሔር፡ እንዘ፡ ይብል፡ እመ፡ ሀሎ፡ እግዚአብሔር፡ ምስሌየ፡ ወዐቀበኒ፡ በዛቲ፡ ፍኖት፡ እንተ፡ ባቲ፡ አሐውር፡ አነ፡ ወወሀበኒ፡ ኅብስተ፡ እብላዕ፡ ወልብሰ፡ እልብስ፡ ወእትመየጥ፡ ቤተ፡ አቡየ፡ በሰላም፡ ወይከውነኒ፡ እግዚአብሔር፡ አምላክ።

Chapter 28 ወአንሥአ፡ እገሪሁ፡ ወሖረ፡ ምድረ፡ ጽባሕ፡ ኀበ፡ ላባ፡ እኅወ፡ ርብቃ፡ ወሀሎ፡ ምስሌሁ፡ ወተቀንየ፡ ሎቱ፡ ህየንተ፡ ራሔል፡ ወለቱ፡ ሱባዔ፡ አሐደ። ወበዓመት፡ ቀዳሚ፡ በሣልስ፡ ሱባዔ፡ ይቤሎ፡ ሀበኒ፡ ብእሲትየ፡ ዘበእንቲአሃ፡ ተቀነይኩ፡ ለከ፡ ሰብዐተ፡ ዓመተ፡ ወይቤሎ፡ ላባ፡ ለያዕቆብ፡ አነ፡ እሁበከ፡ ብእሲተከ። ወገብረ፡ ላባ፡ ግዝአ፡ ወነሥአ፡ ልያሃ፡ ወለቶ፡ እንተ፡ ትልህቅ፡ ወወሀቦ፡ ለያዕቆብ፡ ብእሲተ፡ ወወሀባ፡ ዘለፋሃ፡ አመቶ፡ ለአኪተ፡ ወያዕቆብሰ፡ ኢያእመረ፡ እስመ፡ አምሰላ፡ ያዕቆብ፡ ዘራሔል፡ ይእቲ። ወቦአ፡ ኀቤሃ፡ ወናሁ፡ ይእቲሰ፡ ልያ። እስመ፡ ያፈቅር፡ ያዕቆብ፡ ራሔልሃ፡ እምነ፡ ልያ፡ እስመ፡ አዕይንቲሃ፡ ለልያ፡ ድኩም፡ ወባሕቱ፡ ላሕይ፡ ራእያ፡ ጥቀ፡ ወራሔል፡ ሠናይ፡ አዕይንቲሃ፡ ወሠናይ፡ ራእያ፡ ወላሕይት፡ ጥቀ። ወይቤሎ፡ ላባ፡ ለያዕቆብ፡ ኢኮነ፡ ከመዝ፡ በምድርነ፡ ውሂበ፡ እንተ፡ ትንእስ፡ እምእንተ፡ ትልህቅ። ወአንተኒ፡ አዝዝ፡ ለደቂቀ፡ እስራኤል። ወይቤ፡ ላባ፡ ለያዕቆብ፡ ይኅልፍ፡ ሰቡዐ፡ መዋዕለ፡ ግዝእ፡ ለዛ፡ ወእሁበከ፡ ራሔልሃ፡ ከመ፡ ትትቀነይ፡ ሊተ፡ ካልኣነ፡ ዓመተ፡ ሰብዐተ፡ ከመ፡ ትርዐይ፡ አባግዕየ፡ በከመ፡ ገበርከ፡ በሱባዔ፡ ቀዳሚ። ወበመዋዕል፡ አመ፡ ኀለፈ፡ ሰቡዕ፡ ዕለት፡ ዘግዝእ፡ ዘልያ፡ ወወሀቦ፡ ላባ፡ ራሔልሃ፡ ለያዕቆብ፡ ከመ፡ ይትቀነይ፡ ሎቱ፡ ካልአተ፡ ዓመተ፡ ሰብዐተ፡ ወወሀባ፡ ባላንሃ፡ እኅታ፡ ለዘለፋ፡ ላእኪተ። ወተቀንየ፡ ሰብዐተ፡ ዓመተ፡ ዳግመ፡ በእንተ፡ ራሔል፡ እስመ፡ ልያ፡ ተውህበቶ፡ በከ። ወአርኀወ፡ እግዚአብሔር፡ ማሕፀነ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ወጸውዐ፡ ስሞ፡ ሮቤል። ወማሕፀናሰ፡ ለራሔል፡ ተጸፍቀ፡ እስመ፡ ርእየ፡ እግዚአብሔር፡ ከመ፡ ትጸላእ፡ ልያ፡ ወራሔልሰ፡ ትትፈቀር። ወደገመ፡ ያዕቆብ፡ ቦአ፡ ኀበ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ካልአ፡ ወጸውዐ፡ ስሞ፡ ስምዖን። ወደገመ፡ ያዕቆብ፡ ወቦአ፡ ኀበ፡ ልያ፡ ወፀንሰት፡ ወወለደት፡ ሎቱ፡ ወልደ፡ ሣልሰ፡ ወጸውዐ፡ ስሞ፡ ሌዊ። ወደገመ፡ ካዕበ፡ ወቦአ፡ ኀቤሃ፡ ወወለደት፡ ወልደ፡ ራብዐ። ወበዝ፡ ኵሉ፡ ራሔል፡ ትቀንእ፡ በልያ፡ እስመ፡ ይእቲ፡ ኢትወልድ። ወሶበ፡ ርእየት፡ ራሔል፡ ከመ፡ ወለደት፡ ልያ፡ ደቀ፡ አርባዕተ፡ ለያዕቆብ፡ ሮቤልሃ፡ ወስምዖንሃ፡ ወሌዊሃ፡ ወይሁዳሃ። ወቦአ፡ ወፀንሰት፡ ወወለደት፡ ሎቱ፡ ወልደ። ወደገመ፡ ያዕቆብ፡ ካዕበ፡ ወቦአ፡ ኀበ፡ ባላ፡ ወፀንሰት፡ ወወለደት፡ ወልደ፡ ዳግመ፡ ለያዕቆብ፡ ወጸውዐት፡ ስሞ፡ ራሔል፡ ንፍታሌም፡ በኀሙሱ፡ ለወርኅ፡ ሳብዕ፡ በካልእ፡ ዓም፡ ዘሱባዔ፡ ራብዕ። ወሶበ፡ ርእየት፡ ልያ፡ ከመ፡ መከነት፡ ወኢትወልድ፡ ቀንአት፡ ይእቲኒ፡ ለራሔል፡ ወወሀበት፡ ይእቲኒ፡ ዘለፋሃ፡ ላእኪታ፡ ለያዕቆብ፡ ብእሲተ፡ ወፀንሰት፡ ወወለደት፡ ወልደ፡ ወጸውዐት፡ ስሞ፡ ልያ፡ ጋድ፡ አመ፡ ዐሡሩ፡ ወሰኑዩ፡ ለወርኅ፡ ሳምን፡ በሣልስ፡ ዓመት፡ ዘሱባዔ፡ ራብዕ። ወደገመ፡ ቦአ፡ ኀቤሃ፡ ወፀንሰት፡ ወወለደት፡ ሎቱ፡ ወልደ፡ ካልአ፡ ወጸውዐት፡ ስሞ፡ ልያ፡ አሴር፡ በሰኑዩ፡ ለወርኅ፡ ዘዐሠርቱ፡ ወአሐዱ፡ በዓመት፡ ኃምስ፡ ዘሱባዔ፡ ራብዕ። ወቦአ፡ ያዕቆብ፡ ኀበ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ወጸውዐ፡ ስሞ፡ ይሳኮር፡ በረቡዑ፡ ለኃምስ፡ ወርኅ፡ በዓመት፡ ራብዕ፡ ዘሱባዔ፡ ራብዕ። ወቦአ፡ ያዕቆብ፡ ዳግመ፡ ኀቤሃ፡ ወፀንሰት፡ ወወለደት፡ ክልኤተ፡ ወልደ፡ ወወለተ፡ ወጸውዐት፡ ስሞ፡ ለወልድ፡ ዛብሎን፡ ወለወለት፡ ዲና፡ ስማ። ወተሣሀላ፡ እግዚአብሔር፡ ለራሔል፡ ወአርኀወ፡ ማሕፀና። ወበመዋዕለ፡ ተወልደ፡ ዮሴፍ፡ ይቤ፡ ያዕቆብ፡ ለላባ፡ ሀበኒ፡ አንስትያየ፡ ወውሉድየ፡ ወእሖር፡ ኀበ፡ አቡየ፡ ይስሐቅ፡ ወእግበር፡ ሊተ፡ ቤተ፡ እስመ፡ ፈጸምኩ፡ ዓመታተ፡ ዘተቀነይኩ፡ ለከ፡ ህየንተ፡ ክልኤቲ፡ አዋልዲከ፡ ወአሐውር፡ ቤተ፡ አቡየ። ወይቤሎ፡ ላባ፡ ለያዕቆብ፡ ንበር፡ ኀቤየ፡ በዐስብከ፡ ወረዐይ፡ ሊተ፡ ካዕበ፡ መርዔትየ፡ ወንሣእ፡ ዐስበከ። ወተካሀሉ፡ በበይናቲሆሙ፡ ከመ፡ የሀቦ፡ ዐስቦ፡ ኵሎ፡ በግዐ፡ እመሓስእ፡ ወእምጠሊ፡ ሐመደ፡ ከቦ፡ ወጋስ፡ በጸዐዳ፡ ዘተወልደ፡ ይኩኖ፡ ዐስቦ። ወይወልድ፡ ኵሉ፡ አባግዕ፡ ጋስ፡ ኵሎ፡ ዘትእምርተ፡ ኰሳኵሰ፡ ዘቦ፡ ኵሉ፡ ወሐመደ፡ ክቦ፡ ኰሳኵሰ፡ ወይደግማ፡ አባግዕ፡ ይወልዳ፡ ዘበአርአያሆን፡ ወኵሉ፡ ዘትእምርተ፡ ለያዕቆብ፡ ወዘአልቦ፡ ትእምርት፡ ለላባ። ወበዝኀ፡ ጥሪቱ፡ ለያዕቆብ፡ ጥቀ፡ ወአጥረየ፡ አልህምተ፡ ወአባግዐ፡ ወአእዱገ፡ ወአግማለ፡ ወደቀ፡ ወአዋልደ። ወቀንአ፡ ላባ፡ ወውሉዱ፡ ላዕለ፡ ያዕቆብ፡ ወአስተጋብአ፡ ላባ፡ አባግዒሁ፡ እምኔሁ፡ ወያስተሐይጾ፡ ለእኩይ።

Chapter 29 ወኮነ፡ እምዘ፡ ወለደት፡ ራሔል፡ ዮሴፍሃ፡ ወሖረ፡ ላባ፡ ይቅርጽ፡ አባግዒሁ፡ እስመ፡ ርሑቅ፡ ሀለዋ፡ እምኀቤሁ፡ ምሕዋረ፡ ሠሉስ፡ ዕለት። ወርእየ፡ ያዕቆብ፡ ከመ፡ የሐውር፡ ላባ፡ ይቅርጽ፡ አባግዒሁ። እስመ፡ ነገሮን፡ ዘከመ፡ ርእየ፡ ኵሎ፡ በሕልም፡ ወኵሎ፡ ዘተናገረ፡ ሎቱ፡ ከመ፡ ይግባእ፡ ቤተ፡ አቡሁ። ወባረከ፡ ያዕቆብ፡ አምላከ፡ አቡሁ፡ ይስሐቅ፡ ወአምላከ፡ አብርሃም፡ አቡሁ፡ ለአቡሁ። ወበሳብዕ፡ ዓም፡ ዘሱባዔ፡ ራብዕ፡ ተመይጠ፡ ያዕቆብ፡ ገለአድ፡ በቀዳሚ፡ ወርኅ፡ አመ፡ ዕሥራሁ፡ ወአሚሩ፡ ወዴገኖ፡ ላባ፡ ድኅሬሁ፡ ወረከቦ፡ ለያዕቆብ፡ በደብረ፡ ገለአድ፡ በወርኅ፡ ሣልስ፡ አመ፡ ዐሡሩ፡ ወሠሉሱ። ወኢኀደጎ፡ እግዚአብሔር፡ ከመ፡ ያሕሥም፡ ላዕለ፡ ያዕቆብ፡ እስመ፡ አስተርአዮ፡ በሕልም፡ ሌሊተ፡ ወነገሮ፡ ላባ፡ ለያዕቆብ። ወአመ፡ ዐሡሩ፡ ወሐሙሱ፡ ለውእቱ፡ መዋዕል፡ ገብረ፡ ያዕቆብ፡ ግዝአ፡ ለላባ፡ ወለኵሎሙ፡ እለ፡ መጽኡ፡ ምስሌሁ፡ ወመሐለ፡ ያዕቆብ፡ ለላባ፡ በዛቲ፡ ዕለት፡ ወላባሂ፡ ለያዕቆብ፡ ከመ፡ ኢይትዐደው፡ አሐዱ፡ ካልኦ፡ በእከይ፡ በደብረ፡ ገለአድ። ወገብረ፡ ህየ፡ ፍሥሐተ፡ ለስምዕ፡ በእንተዝ፡ ተጸውዐ፡ ስሙ፡ ለውእቱ፡ መካን፡ ፍሥሐተ፡ ስምዕ፡ ከመዝ፡ ፍሥሐት። ወቀዲሙሰ፡ ይጼውዕዎ፡ ለምድረ፡ ገለአድ፡ ምድረ፡ ራፋኤል፡ እስመ፡ ምድረ፡ ራፋኤም፡ ይእቲ። ወመኃድሪሆሙ፡ እምነ፡ ምድረ፡ ውሉደ፡ አሞን፡ እስከ፡ ደብረ፡ ኤርሞን፡ ወቤተ፡ መንግሥቶሙ፡ ቀራናኤም፡ ወአስጠሮስ፡ ወአድራኦ፡ ወሚሱር፡ ወቤዎን። ወአሕጐሎሙ፡ እግዚአብሔር፡ እምእከየ፡ ምግባሮሙ፡ እስመ፡ ፀዋጋን፡ ጥቀ፡ እሙንቱ። ወፈነወ፡ ያዕቆብ፡ ላባሃ፡ ወሖረ፡ ውስተ፡ መስጴጦምያ፡ ምድረ፡ ጽባሕ። ወተዐደወ፡ ኢያቦክሃ፡ በታስዕ፡ ወርኅ፡ አመ፡ ዐሡሩ፡ ወአሚሩ። ወበዓመት፡ ቀዳሚ፡ ዘኃምስ፡ ሱባዔ፡ በዝኢዮቤልውስ፡ ዐደወ፡ ዮርዳኖስ፡ ወኀደረ፡ ማዕዶተ፡ ዮርዳኖስ፡ ወይሬዒ፡ አባግዒሁ፡ እምባሕረ፡ ፈሐሐት፡ እስከ፡ ቤተ፡ ሳን፡ ወእስከ፡ ዶታኢም፡ ወእስከ፡ አመ፡ አቅራቢት። ወይፌኑ፡ ለአቡሁ፡ ለይስሐቅ፡ እምኵሉ፡ ጥሪቱ፡ ልብሰ፡ ወሲሲተ፡ ወሥጋ፡ ወስቴ፡ ወሐሊበ፡ ወቅብአ፡ ወኀብስተ፡ ሐሊብ፡ ወእምነ፡ ተመርተ፡ ቈላ። ወለእሙሂ፡ ለርብቃ፡ ርብዕ፡ ለዓመት፡ ማእከለ፡ ጊዜያቲሆሙ፡ ለአውራኅ፡ ወማእከለ፡ ሐሪስ፡ ወለዐፂድ፡ ወማእከለ፡ ጸዳይ፡ ወዝናም፡ ወማእከለ፡ ክረምት፡ ወሐጋይ፡ ውስተ፡ ማኅፈዱ፡ ለአብርሃም። እስመ፡ ተመይጠ፡ ይስሐቅ፡ እምዐዘቅተ፡ መሐላ፡ ወዐርገ፡ ውስተ፡ ማኅፈደ፡ አቡሁ፡ አብርሃም፡ ወኀደረ፡ ህየ፡ እምዔሳው፡ ወልዱ። እስመ፡ በመዋዕለ፡ ሖረ፡ ያዕቆብ፡ መስጴጦምያ፡ ነሥአ፡ ለርእሱ፡ ዔሳው፡ ብእሲተ፡ መኤሌትሃ፡ ወለተ፡ ይስማዔል፡ ወአስተጋብአ፡ ኵሎ፡ መርዔተ፡ አቡሁ፡ ወአንስቲያሁ፡ ወዐርገ፡ ወኀደረ፡ ውስተ፡ ደብረ፡ ሲር። ወዐርገ፡ ይስሐቅ፡ እምዐዘቅተ፡ መሐላ፡ ወኀደረ፡ ማኅፈደ፡ አብርሃም፡ አቡሁ፡ ውስተ፡ ደብረ፡ ኬብሮን። ወእምህየ፡ ይፌኑ፡ ያዕቆብ፡ ኵሎ፡ ዘይፌኑ፡ ለአቡሁ፡ ወለእሙ፡ እምጊዜ፡ በበ፡ ጊዜ፡ ኵሎ፡ ትካዞሙ።

Chapter 30 ወበቀዳሚ፡ ዓመት፡ ዘሱባዔ፡ ሳድስ፡ ዐርገ፡ ሳሌምሃ፡ ዘመንገለ፡ ጽባሒሁ፡ ለሰዊማ፡ በሰላም፡ በራብዕ፡ ወርኅ። ወበህየ፡ መሠጥዋ፡ ለዲና፡ ለወለተ፡ ያዕቆብ፡ ውስተ፡ ቤተ፡ ሴኬም፡ ወልደ፡ ኤሞር፡ ኤዋዊ፡ መኰንነ፡ ምድር፡ ወሰከበ፡ ምስሌሃ፡ ወአርኰሳ። ወአስተብቍዐ፡ እምኀበ፡ አቡሃ፡ ትትወሀብ፡ ሎቱ፡ ብእሲተ፡ ወእምኀበ፡ አኃዊሃ፡ ብእሲተ፡ ሎቱ። ወቦኡ፡ ስምዖን፡ ወሌዊ፡ ሰዊማሃ፡ ግብተ፡ ወገብሩ፡ ኵነኔ፡ ላዕለ፡ ኵሎሙ፡ ዕደወ፡ ሰቂሞን፡ ወቀተሉ፡ ኵሎ፡ ብእሴ፡ ዘረከቡ፡ ውስቴታ፡ ወኢያትረፉ፡ ውስቴታ፡ ወኢአሐደ፡ ኵሎ፡ ቀተሉ፡ በጻዕር፡ እስመ፡ ገመኑ፡ ዲናሃ፡ እኅቶሙ። ወከመዝ፡ እንከ፡ ኢይትገበር፡ እምይእዜ፡ ለአርኵሶ፡ ወለተ፡ እስራኤል፡ እስመ፡ በሰማይ፡ ተሠርዐ፡ ላዕሌሆሙ፡ ኵነኔ፡ ከመ፡ ያጥፍእዎሙ፡ በሰይፍ፡ ለኵሎሙ፡ ዕደወ፡ ሰቂማ፡ እስመ፡ ገብሩ፡ ኀፍረተ፡ ውስተ፡ እስራኤለ። ወመጠዎሙ፡ እግዚአብሔር፡ ውስተ፡ እደ፡ ውሉደ፡ ያዕቆብ፡ ከመ፡ ይሠርውዎሙ፡ በሰይፍ፡ ወከመ፡ ይግበሩ፡ ላዕሌሆሙ፡ ኵነኔ። ወብእሲ፡ እመቦ፡ ዘፈቀደ፡ በውስተ፡ እስራኤል፡ የሀብ፡ ወለቶ፡ ወእመኒ፡ እኅቶ፡ ለኵሉ፡ ብእሲ፡ ዘእምዘርአ፡ አሕዛብ፡ ሞተ፡ ይሙት፡ ወበእብን፡ ይውግርዎ፡ እስመ፡ ገብረ፡ ኀፍረተ፡ በውስተ፡ እስራኤል። ወኢይትረከብ፡ ዘማ፡ ወርኩስ፡ በውስተ፡ እስራኤል፡ ኵሎ፡ መዋዕለ፡ ትውልደ፡ ምድር፡ እስመ፡ ቅዱስ፡ እስራኤል፡ ለእግዚአብሔር። እስመ፡ ከመዝ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ በእንተ፡ ኵሉ፡ ዘርአ፡ እስራኤል፡ ዘያረኵስ፡ ሞተ፡ ለይሙት፡ ወበእብን፡ ይውግርዎ። ወአልቦ፡ ለዝ፡ ሕግ፡ ዐቅመ፡ መዋዕል፡ ወአልቦ፡ ኅድገተ፡ ወኵሎ፡ ስርየተ፡ ዘእንበለ፡ ዳእሙ፡ ይሠረው፡ ብእሲ፡ ዘአርኰሰ፡ ወለቶ፡ በማእከለ፡ ኵሉ፡ እስራኤል፡ እስመ፡ እምውስተ፡ ዘርኡ፡ ወሀቦ፡ ለሞሎክ፡ ወአበሰ፡ ለአርኵሶቱ። ወአንተኒ፡ ሙሴ፡ አዝዞሙ፡ ለደቂቀ፡ እስራኤል፡ ወአስምዕ፡ ላዕሌሆሙ፡ ከመ፡ ኢየሀቡ፡ እምነ፡ አዋልዲሆሙ፡ ለአሕዛብ፡ ወከመ፡ ኢይንሥኡ፡ እምአዋልደ፡ አሕዛብ፡ እስመ፡ ምኑን፡ ውእቱ፡ በቅድመ፡ እግዚአብሔር። በእንተዝ፡ ጸሐፍኩ፡ ለከ፡ ውስተ፡ ቃለ፡ ሕግ፡ ኵሎ፡ ግብሮሙ፡ ለሰቂማ፡ ዘገብሩ፡ ላዕለ፡ ዲና፡ ወዘከመ፡ ተናገሩ፡ ደቁ፡ ለያዕቆብ፡ እንዘ፡ ይብሉ፡ ኢንሁብ፡ ወለተነ፡ ለሰብእ፡ ዘቦ፡ ቍልፈተ፡ እስመ፡ ጽዕለት፡ ውእቱ፡ ለነ። ወጽዕለት፡ ውእቱ፡ ለእስራኤል፡ ለእለ፡ ይሁቡ፡ ወለእለ፡ ይነሥኡ፡ እምነ፡ አዋልደ፡ አሕዛብ፡ እስመ፡ ርኩስ፡ ውእቱ፡ ወምኑን፡ ውእቱ፡ እምእስራኤል። ወኢይነጽሕ፡ እስራኤል፡ እምዝ፡ ርኵስ፡ ዘቦ፡ ብእሲተ፡ እምነ፡ አዋልደ፡ አሕዛብ። እስመ፡ መቅሠፍት፡ ላዕለ፡ መቅሠፍት፡ ውእቱ፡ ወመርገም፡ ላዕለ፡ መርገም፡ ወኵሉ፡ ኵነኔ፡ ወመቅሠፍት፡ ወመርገም፡ ይመጽእ። ወአልቦ፡ ነሢአ፡ ገጽ፡ ወአልቦ፡ አድልዎ፡ ለገጽ፡ ወአልቦ፡ ነሢአ፡ እምእዴሁ፡ ፍሬ፡ ወመሥዋዕተ፡ ወጽንሐሐ፡ ወስብሐ፡ ወተምዕዞ፡ መዓዛ፡ ሠናይ፡ ከመ፡ ይትወከፎ። በእንተዝ፡ አዘዝኩከ፡ እንዘ፡ እብል፡ አስምዕ፡ ዛተ፡ ስምዐ፡ ላዕለ፡ እስራኤል። ወተኀርየ፡ ዘርአ፡ ሌዊ፡ ለክህነት፡ ወለሌዋዊያን፡ ከመ፡ ይትለአኩ፡ ቅድመ፡ እግዚአብሔር፡ ከመ፡ ንሕነ፡ በኵሉ፡ መዋዕል። ወከመዝ፡ ያዐርጉ፡ ሎቱ፡ በስምዕ፡ ውስተ፡ ጽላተ፡ ሰማይ፡ በረከተ፡ ወጽድቀ፡ ቅድሜሁ፡ ለአምላከ፡ ኵሉ። ወንዜክር፡ ንሕነ፡ ጽድቀ፡ ዘገብረ፡ ሰብእ፡ በሕይወቱ፡ በኵሉ፡ ጊዜያት፡ ዘዓመት፡ እስከ፡ ዐሠርቱ፡ ምእት፡ ትውልድ፡ ያዐርጉ፡ ወይመጽእ፡ ሎቱ፡ ወለትውልዱ፡ እምድኅሬሁ፡ ወተጽሕፈ፡ ዐርከ፡ ወጻድቀ፡ ውስተ፡ ጽላተ፡ ሰማይ። ኵሎ፡ ዘንተ፡ ነገረ፡ ጸሐፍኩ፡ ለከ፡ ወአዘዝኩከ፡ ከመ፡ ትንግር፡ ለውሉደ፡ እስራኤል፡ ከመ፡ ኢይግበሩ፡ አበሳ፡ ወኢይትዐደዉ፡ ሥርዐተ፡ ወኢይንሥቱ፡ ኪዳነ፡ እንተ፡ ተሠርዐት፡ ሎሙ፡ ከመ፡ ይግበርዋ፡ ወይጸሐፉ፡ አዕርክተ። ወእመሰ፡ ተዐደዉ፡ ወገብሩ፡ እምኵሉ፡ ፍናዊሃ፡ ለርኵስ፡ ይጸሐፉ፡ ውስተ፡ ጽላተ፡ ሰማይ፡ ጸላእተ፡ ወይደመሰሱ፡ እመጽሐፈ፡ ሕያዋን፡ ወይጸሐፉ፡ ውስተ፡ መጽሐፈ፡ እለ፡ ይትሐጐሉ፡ ወምስለ፡ እለ፡ ይሤረዉ፡ እምውስተ፡ ምድር። ወበዕለተ፡ ቀተሉ፡ ውሉደ፡ ያዕቆብ፡ ሰቂማሃ፡ ዐርገ፡ ሎሙ፡ መጽሐፍ፡ ውስተ፡ ሰማይ፡ ከመ፡ ገብሩ፡ ጽድቀ፡ ወርትዐ፡ ወበቀለ፡ ላዕለ፡ ኃጥኣን፡ ወተጽሕፈ፡ ለበረከት። ወአውፅኡ፡ ዲናሃ፡ እኅቶሙ፡ እምነ፡ ቤተ፡ ሴኬም፡ ወፄወዉ፡ ኵሎ፡ ዘሀሎ፡ ውስተ፡ ሰቂሞን፡ አባግዒሆሙ፡ ወአልህምቲሆሙ፡ ወአእዱጊሆሙ፡ ወኵሎ፡ ንዋዮሙ፡ ወኵሎ፡ መራዕዮሙ፡ ወአምጽኡ፡ ኵሎ፡ ኀበ፡ ያዕቆብ፡ አቡሆሙ። ወተናገረ፡ ምስሌሆሙ፡ በእንተ፡ ዘቀተሉ፡ ሀገረ፡ እስመ፡ ፈርሀ፡ እምእለ፡ ይነብሩ፡ ምድረ፡ እምእለ፡ ከነናዊያን፡ ወፈሪዛዊያን። ወኮነ፡ ግርማ፡ እግዚአብሔር፡ ውስተ፡ ኵሎን፡ አህጉር፡ ዘአውዳ፡ ለሰቂሞን፡ ወኢተንሥኡ፡ ለሰዲደ፡ ውሉዶ፡ ለያዕቆብ፡ እስመ፡ ድንጋፄ፡ ወድቀ፡ ላዕሌሆሙ።

Chapter 31 ወበሠርቀ፡ ወርኅ፡ ነገረ፡ ያዕቆብ፡ ለኵሉ፡ ሰብአ፡ ቤቱ፡ እንዘ፡ ይብል፡ ንጹሑ፡ ወወልጡ፡ አልባሲክሙ፡ ወተንሢአነ፡ ንዕርግ፡ ቤቴል፡ በኀበ፡ ጸለይኩ፡ ሎቱ፡ ጸሎተ፡ አመ፡ ዕለተ፡ ጐየይኩ፡ እምገጸ፡ ዔሳው፡ እኁየ፡ ዘውእቱ፡ ምስሌየ፡ ወሜጠኒ፡ ውስተ፡ ዛቲ፡ ምድር፡ በሰላም፡ ወአሰስሉ፡ አማልክተ፡ ነኪር፡ እለ፡ ማእከሌክሙ። ወመሰውዎሙ፡ ለአማልክተ፡ ነኪር፡ ወዘውስተ፡ እዘኒሆሙ፡ ወዘውስተ፡ ክሳውዲሆሙ፡ ወጣዖተ፡ ዘሰረቀት፡ ራሔል፡ እምኀበ፡ ላባ፡ አቡሃ፡ ወወሀበት፡ ኵሎ፡ ለያዕቆብ፡ ወአውዐዮ፡ ወጸተሞ፡ ወአማስኖ፡ ወኀብኦ፡ ታሕተ፡ ድርዮስ፡ ዘሀሎ፡ ውስተ፡ ምድረ፡ ሰቂሞን። ወዐርገ፡ አመ፡ ሠርቀ፡ ወርኅ፡ ሳብዕ፡ ውስተ፡ ቤቴሌ፡ ወሐነጸ፡ ምሥዋዐ፡ ውስተ፡ መካን፡ ኀበ፡ ኖመ፡ ህየ፡ ወአቀመ፡ ህየ፡ ሐውልተ። ወይቤ፡ ይስሐቅ፡ ይምጻእ፡ ወልድየ፡ ያዕቆብ፡ ወእርአዮ፡ ዘእንበለ፡ እሙት። ወሖረ፡ ያዕቆብ፡ ኀበ፡ አቡሁ፡ ይስሐቅ፡ ወኀበ፡ እሙ፡ ርብቃ፡ ውስተ፡ ቤቱ፡ ለአቡሁ፡ አብርሃም፡ ወክልኤተ፡ እምውሉዱ፡ ነሥአ፡ ምስሌሁ፡ ሌዊሃ፡ ወይሁዳሃ፡ ወመጽአ፡ ኀበ፡ አቡሁ፡ ይስሐቅ፡ ወኀበ፡ እሙ፡ ርብቃ። ወወፅአት፡ ርብቃ፡ እማኅፈድ፡ ውስተ፡ አንቀጸ፡ ማኅፈድ፡ ከመ፡ ትስዐሞ፡ ለያዕቆብ፡ ወትሕቅፎ። ወርእየት፡ ክልኤሆሙ፡ ውሉዶ። ወቦአ፡ ያዕቆብ፡ ኀበ፡ ይስሐቅ፡ አቡሁ፡ ውስተ፡ ጽርሑ፡ ኀበ፡ ይሰክብ፡ ህየ። ወጽላሌ፡ ኀለፈ፡ እምአዕይንተ፡ ይስሐቅ፡ ወርእየ፡ ክልኤሆሙ፡ ውሉዶ፡ ለያዕቆብ፡ ሌዊሃ፡ ወይሁዳሃ። ወነገሮ፡ ከመ፡ በአማን፡ ውሉዱ፡ እሙንቱ፡ ወአማን፡ ርኢከ፡ ከመ፡ በአማን፡ ውሉድየ፡ እሙንቱ። ወቀርቡ፡ ኀቤሁ፡ ወተመይጠ፡ ወሰዐሞሙ፡ ወሐቀፎሙ፡ ለኵሎሙ፡ ኅቡረ። ወመንፈሰ፡ ትንቢት፡ ወረደ፡ ውስተ፡ አፉሁ፡ ወአኀዞ፡ ለሌዊ፡ በየማናዊ፡ እዴሁ፡ ወይሁዳሃ፡ በፀጋማዊ፡ እዴሁ። ወተመይጠ፡ ኀበ፡ ሌዊ፡ ቅድመ፡ ወአኀዘ፡ ይባርኮ፡ መቅድመ፡ ወይቤሎ፡ ይባርከ፡ እግዚአ፡ ኵሉ፡ ውእቱ፡ እግዚአ፡ ኵሉ፡ ዓለማት። ወየሀብከ፡ እግዚአብሔር፡ ለከ፡ ወለዘርእከ፡ ዕበየ፡ ዐባየ፡ ለክብር፡ ወኪያከ፡ ወዘርእከ፡ ያቅርብ፡ ኀቤሁ፡ እምኵሉ፡ ዘሥጋ፡ ከመ፡ ይትለአክ፡ ውስተ፡ መቅደሱ፡ ከመ፡ መላእክተ፡ ገጽ፡ ወከመ፡ ቅዱሳን። ወመኳንንተ፡ ወመሳፍንተ፡ ወመላእክተ፡ ይከውኑ፡ ለኵሉ፡ ዘርአ፡ ውሉደ፡ ያዕቆብ፡ ቃሎ፡ ለእግዚአብሔር፡ በጽድቅ፡ ይነግሩ፡ ወኵሎ፡ ኵነኔሁ፡ በጽድቅ፡ ይኴንኑ። ኪያከ፡ ጸውዐት፡ እምከ፡ ስመከ፡ ሌዊሃ፡ ወበአማን፡ ጸውዐት፡ ስመከ፡ ልጹቆ፡ ለእግዚአብሔር፡ ትከውን፡ ወሱታፌ፡ ኵሎሙ፡ ውሉደ፡ ያዕቆብ። ወኵሎሙ፡ እለ፡ ይጸልኡከ፡ ቅድሜከ፡ ይደቁ፡ ወኵሎሙ፡ ፀርከ፡ ይሠረዉ፡ ወይትሐጐሉ፡ ዘይባርከከ፡ ቡሩክ፡ ወኵሉ፡ ሕዝብ፡ ዘይረግሙከ፡ ይኩኑ፡ ርጉማነ። ወለይሁዳሂ፡ ይቤሎ፡ የሀብከ፡ እግዚአብሔር፡ ኀይለ፡ ወጽንዐ፡ ከመ፡ ትኪዶሙ፡ ለኵሎሙ፡ እለ፡ ይጸልኡከ፡ መኰንነ፡ ኩን፡ አንተ፡ ወአሐዱ፡ እምነ፡ ውሉድከ፡ ለውሉደ፡ ያዕቆብ፡ ስምከ፡ ወስመ፡ ውሉድከ፡ ይኩን፡ ዘየሐውር፡ ወዘያንሶሱ፡ ውስተ፡ ኵላ፡ ምድር፡ ወአህጉር። ብከ፡ ይኩን፡ ረድኤቱ፡ ለያዕቆብ፡ ወብከ፡ ትትረከብ፡ መድኀኒተ፡ እስራኤል። ወአመ፡ ዕለተ፡ ትነብር፡ ውስተ፡ መንበረ፡ ክብረ፡ ጽድቅከ፡ ትከውን፡ ዐባይ፡ ሰላም፡ ለኵሉ፡ ዘርአ፡ ውሉዱ፡ ለፍቁር። ወተመይጠ፡ ወሰዐሞ፡ ዳግመ፡ ወሐቀፎ፡ ወተፈሥሐ፡ ዐቢየ፡ እስመ፡ ርእየ፡ ውሉዶ፡ ለያዕቆብ፡ ወልዱ፡ ዘበጽድቅ። ወወፅአ፡ እማእከለ፡ እገሪሁ፡ ወወድቀ፡ ወሰገደ፡ ሎቱ፡ ወባረኮሙ። ወአኖሙ፡ ክልኤሆሙ፡ ውሉዶ፡ ለያዕቆብ፡ አሐደ፡ በይምኑ፡ ወአሐደ፡ በፅግሙ፡ ወተኆለቆ፡ ሎቱ፡ ጽድቀ። ወነገረ፡ ያዕቆብ፡ ኵሎ፡ ለአቡሁ፡ በሌሊት፡ ዘከመ፡ ገብረ፡ እግዚአብሔር፡ ምስሌሁ፡ ሣህለ፡ ዐቢይ። ወባረከ፡ ይስሐቅ፡ አምላከ፡ አቡሁ፡ አብርሃም፡ ዘኢኀደገ፡ ምሕረቶ፡ ወጽድቆ፡ እምወልደ፡ ገብሩ፡ ይስሐቅ። ወበነግህ፡ ነገረ፡ ያዕቆብ፡ ለአቡሁ፡ ይስሐቅ፡ ጸሎተ፡ ዘጸለየ፡ ለእግዚአብሔር፡ ወራእየ፡ ዘርእየ፡ ወከመ፡ ሐነጸ፡ ምሥዋዐ፡ ወኵሉ፡ ድልው፡ ለመሥዋዕት፡ ለገቢር፡ ቅድመ፡ እግዚአብሔር፡ በከመ፡ ጸለየ፡ ወከመ፡ መጽአ፡ ይጽዐኖ፡ ዲበ፡ አድግ። ወይቤ፡ ይስሐቅ፡ ለያዕቆብ፡ ወልዱ፡ ኢይክል፡ መጺአ፡ ምስሌከ፡ እስመ፡ ረሣእኩ፡ ወኢይክል፡ ተዐግሦ፡ በፍኖት፡ ሖር፡ ወልድየ፡ በሰላም፡ እስመ፡ ወልደ፡ ምእት፡ ወስሳ፡ ወኀምስቱ፡ ዓመት፡ አነ። ወአአምር፡ አነ፡ ወልድየ፡ ከመሰ፡ በእንቲአየ፡ መጻእከ። ወተሰራሕ፡ ወግበር፡ ጸሎተ፡ እንተ፡ ጸለይከ፡ ወኢታጐንዲ፡ ጸሎተከ፡ እስመ፡ ትትኃሠሥ፡ ጸሎተ። ወይቤላ፡ ለርብቃ፡ ሖሪ፡ ምስለ፡ ያዕቆብ፡ ወልድኪ። ወተዘከረ፡ ያዕቆብ፡ ጸሎተ፡ እንተ፡ ባረኮ፡ አቡሁ፡ ወክልኤተ፡ ውሉዶ፡ ሌዊሃ፡ ወይሁዳሃ፡ ወተፈሥሐ፡ ወባረኮ፡ ለአምላከ፡ አበዊሁ፡ አብርሃም፡ ወይስሐቅ። ወይቤ፡ ይእዜ፡ አእመርኩ፡ ከመ፡ ብየ፡ ተስፋ፡ ዘለዓለም፡ ወለውሉድየሂ፡ በቅድመ፡ አምላከ፡ ኵሉ፡ ወከመዝ፡ ሥሩዕ፡ በእንተ፡ ክልኤሆሙ፡ ወያዐርጉ፡ ሎሙ፡ በስምዕ፡ ዘለዓለም፡ ውስተ፡ ጽላተ፡ ሰማይ፡ በከመ፡ ባረኮሙ፡ ይስሐቅ።

Chapter 32 ወኀደረ፡ በይእቲ፡ ሌሊት፡ ውስተ፡ ቤቴል፡ ወሐለመ፡ ሌዊ፡ ከመ፡ ሤምዎ፡ ወረሰይዎ፡ ለክህነት፡ ለአምላክ፡ ልዑል፡ ኪያሁ፡ ወውሉዶ፡ እስከ፡ ለዓለም። ወጌሰ፡ ያዕቆብ፡ በነግህ፡ አመ፡ ዐሡሩ፡ ወረቡዑ፡ ለዝ፡ ወርኅ። ወበውእቶን፡ መዋዕል፡ ፀንሰት፡ ይእቲ፡ ራሔል፡ ብንያምሃ፡ ወልዳ፡ ወኆለቈ፡ እምኔሁ፡ ያዕቆብ፡ ወልዶ። ወአመ፡ ወሡሩ፡ ወኀሙሱ፡ ለዝ፡ ወርኅ፡ አብአ፡ ውስተ፡ ምሥዋዕ፡ አስዋረ፡ እምአልህምት፡ ዐሠርተ፡ ወአርባዕተ፡ ወአብሐኰ፡ ዕሥራ፡ ወሰማኒተ፡ ወአባግዐ፡ አርብዓ፡ ወተስዐተ፡ ወመሓስአ፡ ስሳ፡ ወመሓስአ፡ ጠሊ፡ ዕሥራ፡ ወተስዐተ፡ ጽንሐሐ፡ ውስተ፡ ምሥዋዕ፡ ወቍርባነ፡ ሥሙረ፡ ለመዓዛ፡ ሠናይ፡ ቅድመ፡ አምላክ። ዝውእቱ፡ መባኡ፡ እምጸሎት፡ እንተ፡ ጸለየ፡ ከመ፡ የዐሥር፡ ምስለ፡ መሥዋዕቶሙ፡ ወለሞጻሕቶሙ። ወሶበ፡ በልዖ፡ እሳት፡ የዐጥን፡ ስኂነ፡ ዲቤሁ፡ ለእሳት፡ መልዕልቶ። ወሀሎ፡ እንዘ፡ ይበልዕ፡ ውእቱ፡ ወኵሎሙ፡ ውሉዱ፡ ወሰብኡ፡ በፍሥሓ፡ በህየ፡ ሰቡዐ፡ መዋዕለ፡ ወይባርኮ፡ ወያአኵቶ፡ ለእግዚአብሔር፡ ለዘ፡ ባልሖ፡ እምኵሉ፡ ምንዳቤሁ፡ ወለዘ፡ ወሀቦ፡ ጸሎቶ። ወዐሠረ፡ ኵሎ፡ እንስሳ፡ ንጹሐ፡ ወገብሮ፡ ጽንሐሐ፡ ወእንስሳ፡ ርኩሰ፡ ወሀቦ፡ ለሌዊ፡ ወልዱ፡ ወነፍሳተ፡ ሰብእ፡ ኵሎ፡ ወሀቦ። ወተክህነ፡ ሌዊ፡ በቤቴል፡ ቅድመ፡ ያዕቆብ፡ አቡሁ፡ እምዐሠርቱ፡ አኃዊሁ፡ ወሀሎ፡ ህየ፡ ካህነ። ወበእንተዝ፡ ሥሩዕ፡ ውስተ፡ ጽላተ፡ ሰማይ፡ ሕግ፡ ለዐሥሮ፡ ዓሥራት፡ ካዕበ፡ ለበሊዖቱ፡ በቅድመ፡ እግዚአብሔር፡ በመካን፡ በኀበ፡ ተኀርየ፡ ይኅድር፡ ስሙ፡ ላዕሌሁ፡ ዓም፡ እምዓም። ውእቱ፡ ሥርዐት፡ ጽሑፍ፡ ለገቢሮቱ፡ ዓመት፡ እምዓመት፡ ለበሊዐ፡ ዓሥራት፡ ዳግመ፡ ቅድመ፡ እግዚአብሔር፡ በመካን፡ በኀበ፡ ተኀርየ። እስመ፡ በዓመቲሁ፡ ይትበላዕ፡ ዘርእ፡ እስከ፡ አመ፡ መዋዕለ፡ ሐሪፍ፡ ዘርአ፡ ዓመት፡ ወወይን፡ እስከ፡ አመ፡ መዋዕለ፡ ወይን፡ ወለዘይት፡ እስከ፡ አመ፡ መዋዕለ፡ ጊዜ፡ መዋዕሊሁ። ኵሉ፡ ዘይተርፍ፡ እምኔሁ፡ ወዘይበሊ፡ ይኩን፡ ስኡበ፡ በእሳት፡ የዐይ፡ እስመ፡ ኮነ፡ ርኩሰ። ወከማሁ፡ ይብልዕዎ፡ ኅቡረ፡ በቤት፡ ቅዱስ፡ ወኢያብልይዎ። ወኵሉ፡ ዓሥራተ፡ ላህም፡ ወአባግዕ፡ ቅዱስ፡ ለእግዚአብሔር፡ ወለካህናቲሁ፡ ይኩን፡ ዘይበልዑ፡ በቅድሜሁ፡ ዓመት፡ እምዓመት። ወበሌሊት፡ ካልእት፡ አመ፡ ዕሥራ፡ ወሰኑዩ፡ ለመዋዕለ፡ ዝወርኅ፡ መከረ፡ ያዕቆብ፡ ከመ፡ ይሕንጽ፡ ውእተ፡ መካነ፡ ወከመ፡ ይጥቅም፡ ዐጸደ፡ ወይቀድሶ፡ ወከመ፡ ይግበሮ፡ ቅዱሰ፡ ዘለዓለም፡ ሎቱ፡ ወለውሉዱ፡ እስከ፡ ለዓለም፡ እምድኅሬሁ። ወአስተርአዮ፡ እግዚአብሔር፡ በሌሊት፡ ወባረኮ፡ ወይቤሎ፡ ኢይጸዋዕ፡ ስምከ፡ ያዕቆብሃ፡ ባሕቲቶ፡ አላ፡ እስራኤልሃ፡ ይሰምዩ፡ ስምከ። ወይቤሎ፡ ካዕበ፡ አነ፡ ውእቱ፡ እግዚአብሔር፡ ዘፈጠርኩ፡ ሰማየ፡ ወምድረ፡ ወአልህቀከ፡ ወአበዝኀከ፡ ፈድፋደ፡ ጥቀ፡ ወነገሥት፡ እምኔከ፡ ይከውኑ፡ ወይኴንኑ፡ በኵለሄ፡ ወእደ፡ ኬደ፡ አሰረ፡ ውሉደ፡ ሰብእ። ወእሁብ፡ ለዘርእከ፡ ኵላ፡ ምድረ፡ ዘመትሕተ፡ ሰማይ፡ ወይኴንኑ፡ ውስተ፡ ኵሉ፡ አሕዛብ፡ በከመ፡ ፈቀዱ፡ ወእምድኅረዝ፡ ያስተጋብኡ፡ ኵላ፡ ምድረ፡ ወይወርስዋ፡ ለዓለም። ወፈጸመ፡ ተናገሮ፡ ምስሌሁ፡ ወዐርገ፡ እምኀቤሁ፡ ወይሬኢ፡ ያዕቆብ፡ እስከ፡ ሶበ፡ ዐርገ፡ ውስተ፡ ሰማይ። ወርእየ፡ በራእየ፡ ሌሊት፡ ወናሁ፡ መልአክ፡ ይወርድ፡ እምሰማይ፡ ወሰብዑ፡ ሰሌዳት፡ ውስተ፡ እደዊሁ፡ ወወሀቦ፡ ለያዕቆብ፡ ወአንበቦን፡ ወአንበበ፡ ኵሎ፡ ዘጽሑፍ፡ ውስቴቶን፡ ዘይከውን፡ ሎቱ፡ ወለውሉዱ፡ በኩሉ፡ ዓለማት። ወአርአዮ፡ ኵሎ፡ ዘጽሑፍ፡ ውስተ፡ ሰሌዳት፡ ወይቤሎ፡ ኢትሕንጽ፡ ዘንተ፡ መካነ፡ ወኢትግበሮ፡ መቅደሰ፡ ዘለዓለም፡ ወኢትኅድር፡ ዝየ፡ እስመ፡ አኮ፡ ዝመካን። እስመ፡ በግብጽ፡ ትመውት፡ በሰላም፡ ወበዛ፡ ምድር፡ ትትቀበር፡ በክብር፡ ውስተ፡ መቃብረ፡ አበዊከ፡ ምስለ፡ አብርሃም፡ ወይስሐቅ። ኢትፍራህ፡ እስመ፡ በከመ፡ ርኢከ፡ ወአንበብከ፡ ከማሁ፡ ይከውን፡ ኵሉ፡ ወአንተሂ፡ ጸሐፍ፡ ኵሎ፡ ዘከመ፡ ርኢከ፡ ወአንበብከ። ወይቤ፡ ያዕቆብ፡ እግዚኦ፡ እፎ፡ እዜከር፡ ዘከመ፡ አንበብኩ፡ ወርኢኩ፡ ኵሎ። ወዐርገ፡ እምኀቤሁ። ወገብረ፡ በህየ፡ ዓዲ፡ ዕለተ፡ አሐተ፡ ወሦዐ፡ ባቲ፡ በከመ፡ ኵሉ፡ ዘይሠውዕ፡ በመዋዕለ፡ ቀዳሚያት፡ ወጸውዐ፡ ስማ፡ ቶሳከ፡ እስመ፡ ተወሰከት፡ ይእቲ፡ ዕለት፡ ወለቀዳሚያት፡ ጸውዖን፡ በዓለ። ወከመዝ፡ ያስተርኢ፡ ውእቱ፡ ከመ፡ ትኩን፡ ወጽሑፍ፡ ውስተ፡ ጽላተ፡ ሰማይ። ወተጸውዐ፡ ስማ፡ ቶሳከ፡ እስመ፡ እንተ፡ ያዐርጉ፡ ይእቲ፡ በስምዐ፡ መዋዕለ፡ በዓል፡ በከመ፡ ኆልቈ፡ መዋዕል፡ ዘዓመት። ወበሌሊት፡ አመ፡ ዕሥራ፡ ወሠሉሱ፡ ለዝ፡ ወርኅ፡ ሞተት፡ ዲቦራ፡ ሐፃኒተ፡ ርብቃ፡ ወቀበርዋ፡ መትሕተ፡ ሀገር፡ ታሕተ፡ ባላን፡ ዘፈለግ፡ ወጸውዐ፡ ስሞ፡ ለውእቱ፡ መካን፡ ፈለገ፡ ዲቦራ፡ ወበላኖንሃ፡ በላኖን፡ ለሐ፡ ዲቦራ። ወሖረት፡ ርብቃ፡ ወገብአት፡ ውስተ፡ ቤት፡ ኀበ፡ አቡሁ፡ ይስሐቅ። ወሖረ፡ እምድኅሬሃ፡ ለእሙ፡ እስከ፡ ቀርበ፡ ምድረ፡ ከብራታን፡ ወኀደረ፡ ህየ። ወወለደት፡ ራሔል፡ በሌሊት፡ ወልደ፡ ወጸውዐት፡ ስሞ፡ ወልደ፡ ሕማምየ፡ እስመ፡ ዐጸበት፡ ሶበ፡ ትወልዶ፡ ወአቡሁሰ፡ ጸውዐ፡ ስሞ፡ ብንያምሃ። ወሞተት፡ በህየ፡ ራሔል፡ ወተቀብረት፡ ውስተ፡ ምድረ፡ ኤፍራታ፡ እንተ፡ ይእቲ፡ ቤተ፡ ልሔም።

Chapter 33 ወሖረ፡ ያዕቆብ፡ ወኀደረ፡ መንገለ፡ ደቡበ፡ መግደለድራኤፍ፡ ወሖረ፡ ኀበ፡ አቡሁ፡ ይስሐቅ፡ ውእቱ፡ ወልያ፡ ብእሲቱ፡ አመ፡ ሠርቁ፡ ለወርኅ፡ ዓሥር። ወርእዮ፡ ሮቤል፡ ባላንሃ፡ ለአኪተ፡ ራሔል፡ ዕቅብተ፡ አቡሁ፡ እንዘ፡ ትትሐፀብ፡ በማይ፡ በኅቡእ፡ አፍቀራ። ወተኀብአ፡ በሌሊት፡ ወቦአ፡ ቤተ፡ ባላን፡ ሌሊተ፡ ወረከባ፡ እንዘ፡ ትሰክብ፡ ውስተ፡ ዐራታ፡ ባሕቲታ፡ ወትነውም፡ ውስተ፡ ቤታ። ወሰከበ፡ ምስሌሃ፡ ወነቅሀት፡ ወርእየት፡ ወናሁ፡ ሮቤል፡ ይሰክብ፡ ምስሌሃ፡ ውስተ፡ ምስካብ። ወተኀፈረት፡ እምኔሁ፡ ወኀደገት፡ እዴሃ፡ እምላዕሌሁ፡ ወጐየ። ወትላሑ፡ በእንተዝ፡ ነገር፡ ፈድፋደ፡ ወኢነገረት፡ ወኢለመኑሂ፡ ሰብእ። ወሶበ፡ መጽአ፡ ያዕቆብ፡ ወኀሠሣ፡ ትቤሎ፡ ኢኮንኩ፡ ንጽሕተ፡ ለከ፡ እስመ፡ ተገመንኩ፡ እምኔከ፡ እስመ፡ አርኰሰኒ፡ ሮቤል፡ ወሰከበ፡ ምስሌየ፡ ሌሊተ፡ ወአንሰ፡ እነውም፡ ወኢያእመርኩ፡ እስከ፡ ሶበ፡ ከሠተ፡ ክነፍየ፡ ወሰከበ፡ ምስሌየ። ወተምዐ፡ ያዕቆብ፡ ጥቀ፡ ላዕለ፡ ሮቤል፡ እስመ፡ ሰከበ፡ ምስለ፡ ባላን፡ እስመ፡ ከሠተ፡ ክድነተ፡ አቡሁ። ወኢቀርባ፡ እንከ፡ ያዕቆብ፡ እስመ፡ አርኰሳ፡ ሮቤል። በእንተዝ፡ ጽሑፍ፡ ወሥሩዕ፡ ውስተ፡ ጽላተ፡ ሰማይ፡ ከመ፡ ኢይስክብ፡ ብእሲ፡ ምስለ፡ ብእሲተ፡ አቡሁ፡ ወከመ፡ ኢይክሥት፡ ክድነተ፡ አቡሁ፡ እስመ፡ ርኩሰ፡ ውእቱ፡ ሞተ፡ ይሙት፡ ኅቡረ፡ ብእሲ፡ ዘይሰክብ፡ ምስለ፡ ብእሲተ፡ አቡሁ፡ ወብእሲትኒ፡ እስመ፡ ርኩሰ፡ ነገሩ፡ ውስተ፡ ምድር። ወኢይኩን፡ ርኵሰ፡ ቅድመ፡ አምላክነ፡ በውስተ፡ ሕዝብ፡ ዘኀረየ፡ ሎቱ፡ ለምልካን። ወካዕበ፡ ጽሑፍ፡ ዳግመ፡ ርጉመ፡ ይከን፡ ዘይሰክብ፡ ምስለ፡ ብእሲተ፡ አቡሁ፡ እስመ፡ ከሠተ፡ ኀፍረተ፡ አቡሁ፡ ወይቤሉ፡ ኵሎሙ፡ ቅዱሳኒሁ፡ ለእግዚአብሔር፡ ለይኩን፡ ለይኩን። ወአንተኒ፡ ሙሴ፡ አዝዞሙ፡ ለውሉደ፡ እስራኤል፡ ይዕቀቡ፡ ዘንተ፡ ቃለ፡ እስመ፡ ኵነኔ፡ ሞት፡ ውእቱ፡ ወርኵስ፡ ውእቱ፡ ወአልቦ፡ ስርየተ፡ ለአስተስርዮ፡ በእንተ፡ ብእሲ፡ ዘገብረ፡ ዘንተ፡ ለዓለም፡ ዘእንበለ፡ ለአምቶቱ፡ ወለቀቲሎቱ፡ ወለተወግሮቱ፡ በእብን፡ ወለተሠርዎቱ፡ እማእከለ፡ ሕዝበ፡ አምላክነ። እስመ፡ ኢይከውኖ፡ ሐይወ፡ አሐተ፡ ዕለተ፡ ውስተ፡ ምድር፡ ኵሉ፡ ሰብእ፡ ዘይገብሮ፡ በውስተ፡ እስራኤል፡ እስመ፡ ምኑን፡ ወርኩስ፡ ውእቱ። ወኢይበሉ፡ ለሮቤል፡ ኮነ፡ ሐዩው፡ ወስርየተ፡ እምዘ፡ ሰከበ፡ ምስለ፡ ዕቅብተ፡ ብእሲተ፡ አቡሁ፡ ወይእቲኒ፡ እንዘ፡ ባቲ፡ ምተ፡ ወእንዘ፡ ምታ፡ ሕያው፡ ያዕቆብ፡ አቡሁ። እስመ፡ ኢተከሥተ፡ ሥርዓት፡ ወኵነኔ፡ ወሕግ፡ እስከ፡ አሜሃ፡ ፍጹመ፡ ለኵሉ። ወአልቦ፡ ለዝ፡ ሕግ፡ ተውዳአ፡ መዋዕል፡ ወምንተኒ፡ ስርየተ፡ ሎቱ፡ ዘእንበለ፡ ከመ፡ ይሠረዉ፡ ክልኤሆሙ፡ በማእከለ፡ ሕዝብ፡ በዕለት፡ እንተ፡ ባቲ፡ ገብርዋ፡ ይቅትልዎሙ። ወአነተኒ፡ ሙሴ፡ ጸሐፍ፡ ለእስራኤል፡ ወይዕቀብዋ፡ ወኢይግበሩ፡ ዘከመ፡ ዝንቱ፡ ነገር፡ ወኢይስሐቱ፡ ለአበሳ፡ ሞት፡ እስመ፡ መኵንን፡ እግዚአብሔር፡ አምላክነ፡ ዘውእቱ፡ ኢይነሥእ፡ ገጸ፡ ወኢይነሥእ፡ ሕልያነ። ወንግሮሙ፡ ዘንተ፡ ነገረ፡ ሥርዓት፡ ሎሙ፡ ይስምዑ፡ ወይትዐቀቡ፡ ወይትናጸሩ፡ እምኔሆሙ፡ ወኢይትሐጐሉ፡ ወኢይሠረዉ፡ እምድር። ወአልቦ፡ ኀጢአተ፡ ዐባየ፡ እምዝሙና፡ ዘይዜምዉ፡ ዲበ፡ ምድር፡ እስመ፡ ሕዝብ፡ ቅዱስ፡ እስራኤል፡ ለእግዚአብሔር፡ አምላኩ። ወበሣልስ፡ ዓመት፡ ዘሱባዔ፡ ሳድስ፡ ሀሎ፡ እንዘ፡ የሐውር፡ ያዕቆብ፡ ወኵሉ፡ ውሉዱ፡ ወኀደሩ፡ ቤተ፡ አብርሃም፡ ቅሩበ፡ ይስሐቅ፡ አቡሁ፡ ወእሙ፡ ርብቃ። ወዝንቱ፡ አስማቲሆሙ፡ ለውሉደ፡ ያዕቆብ፡ በኵሩ፡ ሮቤል። ወሐዊሮሙ፡ ሰገዱ፡ ለይስሐቅ፡ ወለርብቃ።

Chapter 34 ወበሳድስ፡ ዓመቱ፡ ለዝ፡ ሱባዔ፡ እምዝንቱ፡ ዘአርብዓ፡ ወአርባዕቱ፡ ኢዮቤልዉ። ወተጋብኡ፡ ላዕሌሆሙ፡ ሰብዐቲሆሙ፡ ነገሥተ፡ አሞሬዎን፡ ከመ፡ ይቅትልዎሙ፡ ተኀቢኦሙ፡ ታሕተ፡ ኦም፡ ወከመ፡ ይማህርኩ፡ እንስሳሆሙ። ወያዕቆብ፡ ወሌዊ፡ ወይሁዳ፡ ወዮሴፍ፡ ሀለዉ፡ ውስተ፡ ቤት፡ ኀበ፡ ይስሐቅ፡ አቡሆሙ፡ እስመ፡ የሐዝኖ፡ መንፈሱ፡ ወስእኑ፡ ኀዲጎቶ፡ ወብንያም፡ ውእቱ፡ ዘይንእስ፡ ወበእንተዝ፡ ነበረ፡ ኀቤሁ። ወመጽኡ፡ ነገሥተ፡ ታፉ፡ ወነገሥተ፡ አሬስ፡ ወነገሥተ፡ ሴራጋን፡ ወነገሥተ፡ ሴሎ፡ ወንጉሥ፡ ጋአዝ፡ ወንጉሠ፡ ቤቶሮን፡ ወንጉሠ፡ ማአኒሳኪር፡ ወኵሎሙ፡ እለ፡ ይነብሩ፡ ውስተዝ፡ ደብር፡ እለ፡ ይነብሩ፡ ውስተ፡ ኦመ፡ ምድረ፡ ከናአን። ወዜነውዎ፡ ለያዕቆብ፡ እንዘ፡ ይብሉ፡ ከመ፡ ናሁ፡ ነገሥቶ፡ አሞሬዎን፡ ዐገትዎሙ፡ ለውሉድከ፡ ወመራዕዮሙሂ፡ ተማሠጡ። ወተንሥአ፡ እምነ፡ ቤቱ፡ ውእቱ፡ ወሠለስቲሆሙ፡ ውሉዱ፡ ወኵሎሙ፡ ደቀ፡ አቡሁ፡ ወደቁ፡ ወሖረ፡ ላዕሌሆሙ፡ በስሳ፡ ምእት፡ ዕድ፡ እለ፡ ይጸውሩ፡ አስይፍተ። ወቀተሎሙ፡ በውስተ፡ ጺኦት፡ ዘሰቂሞን፡ ወዴገኑ፡ እለ፡ ጐዩ፡ ወቀተሎሙ፡ በአፈ፡ ሰይፍ። ወአስተጋብአ፡ መራዕዪሁ። ወተመይጠ፡ በሰላም። ወበሳብዕ፡ ዓመት፡ ዘዝ፡ ሱባዔ፡ ፈነወ፡ ዮሴፍሃ። ወሐብለይዎ፡ ወገብሩ፡ ላዕሌሁ፡ ምክረ፡ ከመ፡ ይቅትልዎ። ወውሉደ፡ ያዕቆብ፡ ዘብሑ፡ ደቤላ፡ ጠሊ፡ ወጸንቀቁ፡ ልብሶ፡ ለዮሴፍ፡ በደሙ፡ ወፈነዉ፡ ኀበ፡ ያዕቆብ፡ አቡሆሙ፡ አመ፡ ዐሡሩ፡ ለወርኅ፡ ሳብዕ። ወለሐወ፡ ኵላ፡ ይእተ፡ ሌሊተ፡ እስመ፡ ሰርከ፡ አምጽኡ፡ ሎቱ፡ ኪያሁ፡ ወፈፀነ፡ በላሐ፡ ሞቱ፡ ወይቤ፡ ከመ፡ አርዌ፡ ፀዋግ፡ በልዖ፡ ለዮሴፍ፡ ወላሐዉ፡ ምስሌሁ፡ ኵሉ፡ ሰብአ፡ ቤቱ፡ በዛቲ፡ ዕለት፡ ወሀለዉ፡ እንዘ፡ የሐምሙ፡ ወይላሕዉ፡ ምስሌሁ፡ ኵላ፡ ይእተ፡ ዕለተ። ወተንሥኡ፡ ውሉዱ፡ ወወለቱ፡ ከመ፡ ይናዝዝዎ፡ ወኢተናዘዘ፡ በእንተ፡ ወልዱ። ወበውእቱ፡ ዕለት፡ ሰምዐት፡ ባላን፡ ከመ፡ ተሐጕለ፡ ዮሴፍ፡ ወእንዘ፡ ትላሕዎ፡ ሞተት፡ ወይእቲ፡ ሀለወት፡ ትነብር፡ ውስተ፡ ቀፍራቴፋ፡ ወዲናኒ፡ ወለቱ፡ ሞተት፡ እምድኅረ፡ ተሐጕለ፡ ዮሴፍ፡ ወበጽሖሙ፡ ለእስራኤል፡ ዝንቱ፡ ሠለስቱ፡ ላሕ፡ በወርኅ፡ አሐዱ። ወቀበርዋ፡ ለባላን፡ አንጸረ፡ መቃብራ፡ ለራሔል፡ ወዲናሃኒ፡ ወለቶ፡ ቀበሩ፡ ህየ። ወሀሎ፡ እንዘ፡ ይላሑ፡ ድኅሬሁ፡ ለዮሴፍ፡ ዓመተ፡ አሐደ፡ ወኢነገፈ፡ እስመ፡ ይቤ፡ እረድ፡ ውስተ፡ መቃብር፡ እንዘ፡ እላሑ፡ በእንተ፡ ወልድየ። በእንተዝ፡ ተሠርዐ፡ ዲበ፡ ውሉደ፡ እስራኤል፡ ከመ፡ ይሕመሙ፡ በዐሡር፡ ወርኅ፡ በሳብዕ፡ አመ፡ ዕለተ፡ በጽሐ፡ ዘያበኪ፡ ዮሴፍሃ፡ ኀበ፡ ያዕቆብ፡ አቡሁ፡ ከመ፡ ያስተስሪ፡ ባቲ፡ ሎቱ፡ በእጕለ፡ አጣሊ። ወተሠርዐት፡ ዛቲ፡ ዕለት፡ ከመ፡ ይሕዘኑ፡ ባቲ፡ በእንተ፡ ኀጢአቶሙ፡ ወበእንተ፡ ኵሉ፡ አበሳሆሙ፡ ወበእንተ፡ ኵሉ፡ ስሕተቶሙ፡ ከመ፡ ያንጽሑ፡ ርእሶሙ፡ በዛቲ፡ ዕለት፡ ምዕረ፡ ለዓመት። ወእምድኅረ፡ ተሐጕለ፡ ዮሴፍ፡ ነሥኡ፡ ለርእሶሙ፡ ውሉደ፡ ያዕቆብ፡ አንስቲያ። ወተመይጦ፡ ስምዖን፡ ነሥአ፡ ብእሲተ፡ እምነ፡ መስጴጦምያ፡ ካልእተ፡ ከመ፡ አኀዊሁ።

Chapter 35 ወበቀዳሚ፡ ዓመት፡ ዘሱባዔ፡ ቀዳሚ፡ በዘ፡ አርብዓ፡ ወኃምስቱ፡ ኢዮቤልዉ፡ ጸውዐቶ፡ ርብቃ፡ ለያዕቆብ፡ ወልዳ፡ ወአዘዘቶ፡ በእንተ፡ አቡሁ፡ ወበእንተ፡ እኁሁ፡ ከመ፡ ያክብሮሙ፡ ኵሎ፡ መዋዕለ፡ ሕይወቱ፡ ለያዕቆብ። ወይቤ፡ ያዕቆብ፡ አነ፡ እገብር፡ ኵሎ፡ ዘከመ፡ አዘዝክኒ፡ እስመ፡ ክብር፡ ወዕበይ፡ ሊተ፡ ዝንቱ፡ ነገር፡ ወጽድቅ፡ ሊተ፡ በቅድመ፡ እግዚአብሔር፡ ከመ፡ አክብሮሙ። ወአንቲኒ፡ እሞ፡ ታአሞሪ፡ እምዕለተ፡ ተወለድኩ፡ እስከ፡ ዛቲ፡ ዕለት፡ ኵሎ፡ ምግባርየ፡ ወኵሎ፡ ዘውስተ፡ ልብየ፡ ከመ፡ ኵሎ፡ መዋዕለ፡ እኄሊ፡ ሠናየ፡ ለኵሉ። ወእፎ፡ ኢይግብር፡ ነገረ፡ ዘአዘዝክኒ፡ ከመ፡ አክብር፡ አባየ፡ ወእኅዋየ። ንግርኒ፡ እሞ፡ ምንተ፡ ርኢኪ፡ በላዕሌየ፡ ጥውየተ፡ ወተግሕሦ፡ እትገሐሥ፡ እምኔሁ፡ ወይከውን፡ ላዕሌየ፡ ሣህል። ወትቤሎ፡ ወልድየ፡ ኵሎን፡ መዋዕልየ፡ አልቦ፡ ዘርኢኩ፡ በላዕሌከ፡ ምንተኒ፡ ግብረ፡ ጠዋየ፡ አላ፡ ርቱዐ፡ ወባሕቱ፡ ጽድቀ፡ እነግረከ፡ ወልድየ፡ አነ፡ በዛቲ፡ ዓመት፡ እመውት፡ ወኢይትዐደው፡ ዛተ፡ ዓመተ፡ በሕይወት። ወሠሐቀ፡ ያዕቆብ፡ በእንተ፡ ነገረ፡ እሙ፡ እስመ፡ ትቤሎ፡ እሙ፡ ከመ፡ ትመውት፡ ወይእቲሰ፡ ትነብር፡ አንጻሪሁ፡ ወኀይላ፡ ላዕሌሃ፡ ወኢደክመት፡ እምኀይላ፡ እስመ፡ ትበውእ፡ ወትወፅእ፡ ወትሬኢ፡ ወአስናኒሃኒ፡ ጽኑዕ፡ ወምንተኒ፡ ሕማም፡ ኢለከፋ፡ ኵሎ፡ መዋዕለ፡ ሕይወታ። ወይቤላ፡ ያዕቆብ፡ ብፁዕ፡ አነ፡ እሞ፡ እመ፡ ቀርበ፡ መዋዕልየ፡ ለመዋዕለ፡ ሕይወትኪ፡ ወይሄሉ፡ ኀይልየ፡ ላዕሌየ፡ ከመዝ፡ በከመ፡ ኀይልኪ፡ ወኢትመውቲ፡ እስመ፡ በከ፡ በጸው፡ ትትናገሪ፡ ምስሌየ፡ በእንተ፡ ሞትኪ። ወቦአት፡ ኀበ፡ ይስሐቅ፡ ወትቤሎ፡ አሐተ፡ ስእለተ፡ አስተበቍዕ፡ በኀቤከ፡ እምሕሎ፡ ለዔሳው፡ ከመ፡ ኢያሕስም፡ ላዕለ፡ ያዕቆብ፡ ወኢይስድዶ፡ በጸልእ። ወአንተ፡ ታአምር፡ መጠነ፡ ገብረ፡ ኵሎ፡ እምአመ፡ ዕለተ፡ ሖረ፡ ያዕቆብ፡ እኁሁ፡ ውስተ፡ ካራን፡ እስከ፡ ዛቲ፡ ዕለት፡ ከመ፡ በኵሉ፡ ልቡ፡ ኀደገነ። ወእንዘ፡ ናስተበቍዕ፡ ንስእሎ፡ ዘእምዚአነ፡ ወውእቱ፡ ይሬሲ፡ ከመ፡ ዘብእሲ፡ ዘይምሕረነ። ወያመርር፡ ላዕሌከ፡ በእንተ፡ ዘባረከ፡ ያዕቆብሃ፡ ወልደከ፡ ፍጹማዊ፡ ወራትዐ፡ እስመ፡ አልቦ፡ እከየ፡ ዘእንበለ፡ ኂሩት። ወይቤላ፡ ይስሐቅ፡ አነኒ፡ አአምር፡ ወእሬኢ፡ ግብረ፡ ያዕቆብ፡ ዘምስሌነ፡ ከመ፡ በኵሉ፡ ልቡ፡ ውእቱ፡ ያከብረነ። ወይእዜኒ፡ ልብየ፡ ይትሀወክ፡ በእንተ፡ ምግባራቲሁ፡ ወኢኮነ፡ ውእቱ፡ ወዘርኡ፡ ለድኂን፡ እስመ፡ እለ፡ ይትሐጐሉ፡ እሙንቱ፡ እምነ፡ ምድር፡ ወእለ፡ ይሤረዉ፡ እሙንቱ፡ እምታሕተ፡ ሰማይ። ወአንቲኒ፡ ትብልኒ፡ ከመ፡ አምሕሎ፡ ከመ፡ ኢይቅትል፡ እኅዋሁ፡ ያዕቆብሃ። ወእመኒ፡ ፈቀደ፡ ይቅትል፡ ያዕቆብሃ፡ እኅዋሁ፡ ውስተ፡ እደ፡ ያዕቆብ፡ ይትወሀብ፡ ወኢያመሥጥ፡ እምእዴሁ፡ እስመ፡ ውስተ፡ እዴሁ፡ ይወርድ። ወአንተኒ፡ ኢትፍርሂ፡ በእንተ፡ ያዕቆብ፡ እስመ፡ ዐቃቢሁ፡ ለያዕቆብ፡ ዐቢይ፡ ወኀያል፡ ወክቡር፡ ወእኩት፡ እምዐቃቢሁ፡ ለዔሳው። ወለአክት፡ ርብቃ፡ ወጸውዐቶ፡ ለዔሳው፡ ወመጽአ፡ ኀቤሃ፡ ወትቤሎ፡ ስእለተ፡ ብየ፡ ወልድየ፡ እንተ፡ እስእል፡ እምኀቤከ፡ ወበል፡ ከመ፡ ትግበራ፡ ወልድየ። ወይቤ፡ አነ፡ እገብር፡ ኵሎ፡ ዘትቤልኒ፡ ወኢየአቢ፡ ስእለተኪ። ወትቤሎ፡ አነ፡ እስእል፡ እምኀቤከ፡ በዕለተ፡ አመ፡ ሞትኩ፡ ከመ፡ ታብአኒ፡ ወትቅብረኒ፡ ቅሩበ፡ ሳራ፡ እመ፡ አቡከ፡ ወከመ፡ ትትፋቀሩ፡ አንተ፡ ወያዕቆብ፡ በበይናቲክሙ፡ ወኢይኅሥሥ፡ እኩየ፡ አሐዱ፡ ለእኁሁ፡ ዘእንበለ፡ ተፋቅሮ፡ ክመ፡ ወትሴርሑ፡ ውሉድየ፡ ወትከብሩ፡ በማእከለ፡ ምድር፡ ወኢይትፌሣሕ፡ ላእሌክሙ፡ ጸላኢ፡ ወትከውኑ፡ ለበረከት፡ ወለምሕረት፡ በቅድመ፡ አዕይንቲሆሙ፡ ለኵሎሙ፡ እለ፡ ያፈቅሩክሙ። ወይቤ፡ አነ፡ እገብር፡ ኵሎ፡ ዘትቤልኒ፡ ወእቀብረኪ፡ አመ፡ ዕለተ፡ ሞትኪ፡ ቅሩበ፡ ሳራ፡ እሙ፡ ለአቡየ፡ በከመ፡ አፍቀርኪ፡ አዕጽምቲሃ፡ ከመ፡ የሀሉ፡ ቅሩበ፡ አዕጽምቲኪ። ወያዕቆብሃኒ፡ እኅዋየ፡ አነ፡ አፈቅር፡ እምኵሉ፡ ዘሥጋ፡ ወአልቦ፡ ሊተ፡ እኅወ፡ በውስተ፡ ኵሉ፡ ምድር፡ ዘእንበለ፡ ውእቱ፡ ባሕቲቱ። ወአነ፡ ክመ፡ አስተበቍዐኪ፡ ከመ፡ ትገሥጽዮ፡ ለያዕቆብ፡ በእንቲአየ፡ ወበእንተ፡ ውሉድየ፡ እስመ፡ አአምር፡ ከመ፡ ነጊሠ፡ ይነግሥ፡ ላዕሌየ፡ ወላዕለ፡ ውሉድየ። ወአነ፡ እምሕል፡ ለኪ፡ ከመ፡ አፈቅሮ፡ ወከመ፡ ኢይትኀሠሥ፡ ሎቱ፡ እኩየ፡ ኵሎ፡ መዋዕል፡ ሕይወትየ፡ ዘእንበለ፡ ሠናይ፡ ክመ። ወጸውዐቶ፡ ለያዕቆብ፡ በቅድመ፡ አዕይንቲሁ፡ ለዔሳው፡ ወአዘዘቶ፡ በከመ፡ ነገር፡ ዘተናገረት፡ ምስለ፡ ዔሳው። ወይቤ፡ አነ፡ እገብር፡ ሥምረተኪ፡ ተሐበይኒ፡ ከመ፡ ኢይወፅእ፡ እምኔየ፡ ወእምነ፡ ውሉድየ፡ እኩይ፡ ላዕለ፡ ዔሳው፡ ኢይቀድም፡ ዘእንበለ፡ ተፋቅሮ፡ ክመ። ወበልዑ፡ ወሰትዩ፡ ይእቲ፡ ወውሉዳ፡ በይእቲ፡ ሌሊት።

Chapter 36 ወበሳድስ፡ ዓመት፡ ዘዝ፡ ሱበዔ፡ ጸውዐ፡ ይስሐቅ፡ ክልዔሆሙ፡ ውሉዶ፡ ዔሳውሃ፡ ወያዕቆብሃ፡ ወመጽኡ፡ ኀቤሁ፡ ወይቤሎሙ፡ አነ፡ ደቂቅየ፡ አሐውር፡ ውስተ፡ ፍኖተ፡ አበዊየ፡ ውስተ፡ ቤት፡ ዘለዓለም፡ ኀበ፡ ሀለዉ፡ ህየ፡ አበዊየ። ወቅብሩኒ፡ ቅሩበ፡ አብርሃም፡ አቡየ፡ ውስተ፡ በአት፡ ዘካዕበት፡ ውስተ፡ ገራህተ፡ ኤፍሮን፡ ኬጣዊ፡ ዘአጥረየ፡ አብርሃም፡ ለዝኅረ፡ መቃብር፡ ህየ፡ ውስተ፡ መቃብር፡ ዘከረይኩ፡ ለርእስየ፡ ህየ፡ ቅብሩኒ። ወዘንተ፡ እኤዝዘክሙ፡ ውሉድየ፡ ከመ፡ ትግበሩ፡ ጽድቀ፡ ወርትዐ፡ በዲበ፡ ምድር፡ ከመ፡ ያምጽእ፡ እግዚአብሔር፡ ላዕሌክሙ፡ ኵሎ፡ ዘመጠነ፡ ነገሮ፡ እግዚአብሔር፡ ይግበር፡ ለአብርሃም፡ ወለዘርኡ። ወኩኑ፡ ውሉድየ፡ በበይናቲክሙ፡ እንዘ፡ ታፈቅሩ፡ አኀዊክሙ፡ ከመ፡ ብእሲ፡ ዘያፈቅር፡ ነፍሶ፡ ወእንዘ፡ የኀሥሥ፡ ብእሲ፡ ለእኁሁ፡ በዘያሤኒ፡ ሎቱ፡ ወበገቢር፡ ኅቡረ፡ በዲበ፡ ምድር፡ ወይትፋቀሩ፡ በበይናቲሆሙ፡ ከመ፡ ነፍሶሙ። ወበእንተ፡ ነገረ፡ ጣዖት፡ አነ፡ እጌሥጸክሙ፡ ከመ፡ ትመንንዎሙ፡ ወትፃረርዎሙ፡ ወከመ፡ ኢታፍቅርዎሙ፡ እስመ፡ ስሕተት፡ ምሉኣን፡ እሙንቱ፡ ለእለ፡ ያመልክዎሙ፡ ወለእለ፡ ይሰግዱ፡ ሎሙ። ተዘከርዎ፡ ውሉድየ፡ ለእግዚአብሔር፡ ለአምላከ፡ አብርሃም፡ አቡክሙ፡ ወእምዝ፡ አነኒ፡ አምለክዎ፡ ወተቀነይኩ፡ ሎቱ፡ ዘበ፡ ጽድቅ፡ ወበስፉሕ፡ ከመ፡ ያብዝኅክሙ፡ ወያልህቅ፡ ዘርእክሙ፡ ከመ፡ ከዋክብተ፡ ሰማይ፡ ለብዝኅ፡ ወይትክልክሙ፡ ውስተ፡ ምድር፡ ተክለ፡ ጽድቅ፡ ዘኢይሤረው፡ ለኵሉ፡ ትውልድ፡ ዘለዓለም። ወይእዜኒ፡ አነ፡ አምሕለክሙ፡ በመሐላ፡ ዐቢይ፡ እስመ፡ አልቦ፡ መሐላ፡ ዘእምኔሁ፡ የዐቢ፡ በስም፡ ስቡሕ፡ ወክቡር፡ ወዐቢይ፡ ስሩሕ፡ ወመንክር፡ ወኀያል፡ ወዐቢይ፡ ዘገብረ፡ ሰማያተ፡ ወምድረ፡ ወኵሎ፡ ኅቡረ። ወእንዘ፡ ያፈቅር፡ አሐዱ፡ አሐዱ፡ እኅዋሁ፡ በምሕረት፡ ወበጽድቅ፡ ወኢይፍቅድ፡ ብእሲ፡ እኩየ፡ ለእኁሁ፡ እምይእዜ፡ ወእስከ፡ ለዓለም፡ ኵሎ፡ መዋዕለ፡ ሕይወትክሙ፡ ከመ፡ ትስርሑ፡ በኵሉ፡ ምግባሪክሙ፡ ወኢትትሐጐሉ። ወእመቦ፡ ዘኀሠሠ፡ እምኔክሙ፡ እኩየ፡ ለእኁሁ፡ አእምሩ፡ እምይእዜ፡ ከመ፡ ኵሉ፡ ዘየኀሥሥ፡ እኩየ፡ ለእኁሁ፡ ውስተ፡ እዴሁ፡ ይወድቅ፡ ወይሤሮ፡ እምድረ፡ ሕያዋን፡ ወዘርኡሂ፡ ይትሐጐል፡ እምታሕተ፡ ሰማይ። ወአመ፡ ዕለተ፡ ሀከክ፡ ወመርገም፡ ወመዓት፡ ወቍጥዓ፡ ወበእሳት፡ በላዒ፡ በከመ፡ አውዐየ፡ ሰዶምሃ፡ ከማሁ፡ ያውዒ፡ ምድሮ፡ ወሀገሮ፡ ወኵሎ፡ ዘይከውን፡ ዚአሁ። አነ፡ እነግር፡ ወአሰምዕ፡ ላዕሌክሙ፡ ውሉድየ፡ በከመ፡ ኵነኔ፡ ዘይመጽእ፡ ዲበ፡ ብእሲ፡ ዘይፈቅድ፡ ይግበር፡ ሕሡመ፡ ላዕለ፡ እኁሁ። ወከፈለ፡ ኵሎ፡ ዘቦ፡ ጥሪቶ፡ ለክልኤሆሙ፡ በይእቲ፡ ዕለት፡ ወወሀበ፡ ዕበየ፡ ለብእሲ፡ ዘውእቱ፡ ቀደመ፡ ተወልዶ፡ ወማኅፈደ፡ ኵሎ፡ ዘአውዳ። ወይቤ፡ ዛተ፡ አዐቢ፡ ዕበየ፡ ለብእሲ፡ ዘውእቱ፡ ቀደመ፡ ተወልዶ። ወይቤ፡ ዔሳው፡ ሤጥኩ፡ ሎቱ፡ ለያዕቆብ፡ ወወሀብኩ፡ ልህቃንየ፡ ለያዕቆብ፡ ይትወሀብ፡ ሎቱ፡ ወአልብየ፡ ዘእብል፡ በእንቲአሃ፡ ምንተኒ፡ ቃለ፡ እስመ፡ ኀቤሁ፡ ሀለወት። ወይቤ፡ ይስሐቅ፡ ታዕርፍ፡ ዲቤክሙ፡ ውሉድየ፡ በረከት፡ ወላዕለ፡ ዘርእክሙ፡ በዛቲ፡ ዕለት፡ እስመ፡ አዕረፍክሙኒ፡ ወኢሐዘነ፡ ልብየ፡ በእንተ፡ ልህቃን፡ ከመ፡ ኢትግበር፡ በእንቲአሃ፡ ፁገ። ይባርኮ፡ እግዚአብሔር፡ ልዑል፡ ለብእሲ፡ ዘይገብር፡ ጽድቀ፡ ኪያሁ፡ ወዘርኡ፡ እስከ፡ ለዓለም። ወፈጸመ፡ እንዘ፡ ይኤዝዞሙ፡ ወእንዘ፡ ይባርኮሙ፡ ወበልዑ፡ ወሰትዩ፡ በቅድሜሁ፡ ኅቡረ፡ ወተፈሥሐ፡ እስመ፡ ኮነ፡ ዐርዮ፡ በማእከሎሙ፡ ወወፅኡ፡ እምኀቤሁ፡ ወአዕረፉ፡ ይእተ፡ ዕለተ፡ ወኖሙ። ወኖመ፡ ይስሐቅ፡ ውስተ፡ ዐራቱ፡ በዛቲ፡ ዕለት፡ እንዘ፡ ይትፌሣሕ፡ ወኖመ፡ ንዋመ፡ ዘለዓለም። ወሖረ፡ ዔሳው፡ ውስተ፡ ምድረ፡ ኤዶም፡ ውስተ፡ ደብረ፡ ሲር፡ ወነበረ፡ ህየ። ወያዕቆብ፡ ኀደረ፡ ውስተ፡ ደብረ፡ ኬብሮን፡ ውስተ፡ ማኅፈድ፡ ዘምድረ፡ ፍልሰተ፡ አቡሁ፡ አብርሃም። ወሞተት፡ ልያ፡ ብእሲቱ፡ በዓመት፡ ራብዕ፡ ዘሱባዔ፡ ካልእ፡ ዘአርብዓ፡ ወኃምስ፡ ኢዮቤልዉ፡ ወቀበራ፡ ውስተ፡ በአት፡ ዘእንተ፡ ክልኤ፡ ቅሩበ፡ ርብቃ፡ እሙ፡ በፀጋሙ፡ ለመቃብረ፡ ሳራ፡ እመ፡ አቡሁ። ወመጽኡ፡ ኵሎሙ፡ ውሉዳ፡ ወውሉዱ፡ ከመ፡ ይብክይዋ፡ ልያሃ፡ ብእሲቶ፡ ምስሌሁ፡ ወከመ፡ ይናዝዝዎ፡ በእንቲአሃ፡ እስመ፡ ሀሎ፡ ይላሕዋ። እስመ፡ ያፈቅራ፡ ፈድፋደ፡ ጥቀ፡ እምአመ፡ ሞተት፡ ራሔል፡ እኅታ፡ እስመ፡ ፍጽምት፡ ወራትዕት፡ ይእቲ፡ በኵሉ፡ ፍናዊሃ፡ ወታከብሮ፡ ለያዕቆብ። ወይዜከር፡ ኵሎ፡ ምግባራቲሃ፡ ዘገብረት፡ በሕይወታ፡ ወይላሕዋ፡ ጥቀ፡ እስመ፡ ያፈቅራ፡ በኵሉ፡ ልቡ፡ ወበኵሉ፡ ነፍሱ።

Chapter 37 ወበዕለተ፡ ሞተ፡ ይስሐቅ፡ አቡሁ፡ ለያዕቆብ፡ ወለዔሳው፡ ሰምዑ፡ ውሉደ፡ ዔሳው፡ ከመ፡ ወሀቦ፡ ይስሐቅ፡ ልህቃነ፡ ለያዕቆብ፡ ወልዱ፡ ዘይንእስ። ወተጋአዙ፡ ምስለ፡ አቡሆሙ፡ እንዘ፡ ይብሉ፡ በእንተ፡ ምንት፡ እንዘ፡ ሀሎከ፡ አንተ፡ ዘትልህቅ፡ ወእንዘ፡ ይንእስ፡ ለያዕቆብ፡ ወሀቦ፡ አቡከ፡ ልህቃነ፡ ወኪያከ፡ ኀደገ። ወይቤሎሙ፡ እስመ፡ አነ፡ ሤጥኩ፡ ቅድመተ፡ ልደትየ፡ ለያዕቆብ፡ በኅዳጥ፡ ጸብሐ፡ ብርስን። ወይእዜኒ፡ አምሐለነ፡ አቡነ፡ ኪያየ፡ ወኪያሁ፡ ከመ፡ ኢንትኃሠሥ፡ በእከይ፡ አሐዱ፡ ላዕለ፡ እኁሁ፡ ወከመ፡ ነሀሉ፡ በተፋቅሮ፡ ወበሰላም፡ ብእሲ፡ ምስለ፡ እኁሁ፡ ወኢናማስን፡ ፍናዊነ። ወይቤልዎ፡ ኢንሰምዐከ፡ ለገቢር፡ ምስሌሁ፡ ሰላመ፡ እስመ፡ ኀይለ፡ ዚአነ፡ ይጸንዕ፡ እምኀይሉ፡ ወንሕነ፡ ንጸንዕ፡ እምኔሁ፡ ነሐውር፡ ላዕሌሁ፡ ወንቀትሎ፡ ወናሐጕል፡ ውሉዶ፡ ወለእመ፡ ኢተሐውር፡ ምስሌነ፡ ለከሂ፡ ናሐስም። ወይእዜኒ፡ ስምዐነ፡ ወንፈኑ፡ ውስተ፡ አራም፡ ወውስተ፡ ፍልስጥኤም፡ ወውስተ፡ ሞአብ፡ ወውስተ፡ አሞን፡ ወንኅረይ፡ ለርእስነ፡ ኅሩያነ፡ ሰብአ፡ እለ፡ ይዳለጉ፡ ውስተ፡ ቀትል፡ ወንሖር፡ ላዕሌሁ፡ ወንትቃተል፡ ምስሌሁ፡ ወንሠርዎ፡ እምድር፡ እንበለ፡ የአኀዝ፡ ኀይለ። ወይቤሎሙ፡ አቡሆሙ፡ ኢትሖሩ፡ ወኢትግበሩ፡ ምስሌሁ፡ ፀብአ፡ ከመ፡ ኢትደቁ፡ ቅድሜሁ። ወይቤልዎ፡ ዝኑ፡ ክመ፡ ግብርከ፡ ዘእምውርዙትከ፡ እስከ፡ ዛቲ፡ ዕለት፡ ወአንተ፡ ታበውእ፡ ክሳደከ፡ ታሕተ፡ አርዑቱ፡ ኢንሰምዕ፡ ንሕነሰ፡ ዘንተ፡ ነገረ። ወፈነዉ፡ ውስተ፡ አራም፡ ወኀበ፡ አዱራም፡ ኀበ፡ ዐርከ፡ አቡሆሙ፡ ወተዓሰቡ፡ ምስሌሆሙ፡ ዐሠርተ፡ ምእተ፡ መስተባእሳነ፡ ዕደወ፡ ወስተቃትላነ፡ ኅሩያነ። ወመጽኡ፡ ኀቤሆሙ፡ እምነ፡ ሞአብ፡ ወእምኀበ፡ ውሉደ፡ አሞን፡ እለ፡ ተዓሰቡ፡ ዐሠርቱ፡ ምእት፡ ኅሩያን። ወይቤልዎ፡ ለአቡሆሙ፡ ፃእ፡ ምርሖሙ፡ ወእመአኮ፡ ንቀትለከ። ወመልአ፡ መዓተ፡ ወቍጥዓ፡ በጊዜ፡ ርእየ፡ ውሉዶ፡ ከመ፡ ይትኤገልዎ፡ ከመ፡ ይሖር፡ ቅድመ፡ ይምርሖሙ፡ ኀበ፡ ያዕቆብ፡ እኀሁ። ወእምዝ፡ ተዘከረ፡ ኵሎ፡ እከየ፡ እንተ፡ ሀሎት፡ ውስተ፡ ልቡ፡ ኅብእት፡ ላዕለ፡ ያዕቆብ፡ እኁሁ፡ ወኢተዘከረ፡ መሐላ፡ ዘመሐለ፡ ለአቡሁ፡ ወለእሙ፡ ከመ፡ ኢይትኃሠሥ፡ ኵሎ፡ እከየ፡ ኵሎ፡ መዋዕሊሁ፡ ላዕለ፡ ያዕቆብ፡ እኁሁ። ወበዝ፡ ኵሉ፡ ኢያእመረ፡ ያዕቆብ፡ ከመ፡ እሙንቱ፡ ይመጽኡ፡ ኀቤሁ፡ ለቀትል። ወለአኩ፡ ኀቤሁ፡ ሰብአ፡ ኬብሮን፡ እንዘ፡ ይብሉ፡ ናሁአ፡ እኁከአ፡ መጽአአ፡ ላዕሌከአ፡ ይትቃተል፡ ከአ፡ በአርብዓ፡ ምእት፡ ብእሲ፡ ቅኑታነ፡ ሰይፍ፡ ወይጸውሩ፡ ወልታ፡ ወንዋየ፡ ሐቅል፡ እስመ፡ ያፈቅርዎ፡ ለያዕቆብ፡ እምዔሳው፡ ነገርዎ፡ እስመ፡ ያዕቆብ፡ ብእሲ፡ ጸጋዊ፡ ወመሓሪ፡ ውእቱ፡ እምነ፡ ዔሳው። ወኢአምነ፡ ያዕቆብ፡ እስከ፡ ሶበ፡ ቀርቡ፡ ጥቃ፡ ማኅፈድ። ወዐጸወ፡ አናቅጸ፡ ማኅፈድ። ወውእቱ፡ ጊዜ፡ አውሥአ፡ ዔሳው፡ ወይቤሎ፡ አልቦ፡ ለውሉደ፡ ሰብእ፡ ወለአራዊተ፡ ምድር፡ መሐላ፡ ጽድቅ፡ ዘመሐሉ፡ ምሒሎሙ፡ እስከ፡ ለዓለም። ወትጸልአኒ፡ አንተ፡ ኪያየ፡ ወውሉድየ፡ እስከ፡ ለዓለም፡ ወአልቦ፡ ገቢረ፡ ምስሌከ፡ ታእኃ። ስማዕ፡ ዘንተ፡ ነገርየ፡ ዘአነ፡ እነግረከ፡ እመ፡ ይዌልጥ፡ ሐራውያ፡ ማእሶ፡ ወጸጕሮሂ፡ ከመ፡ ፀምር፡ ለእመ፡ አድከመ፡ ወእመ፡ ወፅአ፡ ዲበ፡ ርእሱ፡ አቅርንት፡ ከመ፡ አቅርንተ፡ ሀየል፡ ወአባግዕ፡ አሜሃ፡ እገብር፡ ምስሌከ፡ ታእኃ። ወእመ፡ ገብሩ፡ ተኵላት፡ ሰላመ፡ ምስለ፡ መሐስዕ፡ ከመ፡ ኢይብልዕዎሙ። ወለእመ፡ ኮነ፡ አንበሳ፡ ማኅፈሮ፡ ለላህም። ወእመ፡ ጻዕደወ፡ ቋዓት፡ ከመ፡ ራዛ፡ አሜሃ፡ አእምር፡ ከመ፡ አፍቀርኩከ፡ ወእገብር፡ ምስሌከ፡ ሰላመ። ወነጊዜ፡ ርእየ፡ ያዕቆብ፡ ከመ፡ አእከየ፡ እምልቡ፡ ላዕሌሁ፡ ወእምኵሉ፡ ነፍሱ፡ ከመ፡ ይቅትሎ። ውእተ፡ ጊዜ፡ ይቤ፡ ለእሊአሁ፡ ወለአግብርቲሁ፡ ከመ፡ ይሩድዎ፡ ወለኵሎሙ፡ ካልአኒሁ።

Chapter 38 ወእምዝ፡ ተናገሮ፡ ይሁዳ፡ ለያዕቆብ፡ አቡሁ፡ ወይቤሎ፡ ምስክ፡ አባ፡ ቀሥተከ፡ ወፈኑ፡ ሐጸከ፡ ወንድፍ፡ ጸላኤ፡ ወቅትል፡ ፀራዌ፡ ወይኩን፡ ለከ፡ ኀይል፡ እስመ፡ ኢንቀትል፡ እኅዋከ፡ ወኀቤከ፡ ውእቱ፡ ወመምስልከ፡ ውእቱ፡ በኀቤነ፡ ለክብር። ይእተ፡ ሶቤ፡ ወሰቀ፡ ያዕቆብ፡ ቀሥቶ፡ ወፈነወ፡ ሐጸ፡ ወነደፎ፡ ለዔሳው፡ እኁሁ፡ ወገደሎ። ወደገመ፡ ፈነወ፡ ሐጸ፡ ወሄጶ፡ አዱራንሃ፡ አራማዌ፡ ጥቦ፡ ፀጋማዌ፡ ወቀተሎ። ወእምዝ፡ ወፅኡ፡ ውሉደ፡ ያዕቆብ፡ እሙንቱ፡ ወአግብርቲሆሙ፡ ተናፊቆሙ፡ ውስተ፡ መርብዕተ፡ ማኅፈድ። ወወፅአ፡ ይሁዳ፡ ፍጽመ፡ ወንፍታሌም፡ ወጋድ፡ ምስሌሁ፡ ወኀምሳ፡ ደቅ፡ ምስሌሁ፡ እንተ፡ ገጸ፡ ደቡብ፡ ለማኅፈድ፡ ወቀተሉ፡ ኵሎ፡ ዘረከቡ፡ በቅድሜሆሙ፡ ወአልቦ፡ ዘአምሠጠ፡ እምኔሆሙ፡ ወኢአሐዱ። ወሌዊ፡ ወዳን፡ ወአሴር፡ ወፅኡ፡ እንተ፡ ገጸ፡ ጽባሑ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ መስተቃትላኒሆሙ፡ ለሞአብ፡ ወለአሞን። ወወፅኡ፡ ሮቤል፡ ወርሳኮር፡ ወዛብሎን፡ እንተ፡ ገጸ፡ ሰሜኑ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ መስተባእሳኒሆሙ፡ ለፍልስጥኤም። ወወፅኡ፡ ስምዖን፡ ወብንያም፡ ወኤኖክ፡ ወልደ፡ ሮቤል፡ እንተ፡ ገጸ፡ ዐረቢሁ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ እምነ፡ ኤዶም፡ ወእምነ፡ ኮሬዎን፡ አርባዕተ፡ ምእተ፡ ዕደ፡ ጽኑዓነ፡ መስተቃትላነ፡ ወስድስቱ፡ ምእት፡ ጐዩ። ወሰደድዎሙ፡ ውሉደ፡ ያዕቆብ፡ ድኅሬሆሙ፡ እስከ፡ ደብረ፡ ሲኢር። ወአመንደብዎሙ፡ ውሉደ፡ ያዕቆብ፡ ለደቂቀ፡ ዔሳው፡ በደብረ፡ ሰኢር፡ ወአትሐቱ፡ ክሳዶሙ፡ ከመ፡ ይከኩኑ፡ አግብርተ፡ ለደቂቀ፡ ያዕቆብ። ወለአኩ፡ ኀበ፡ አቡሆሙ፡ እመ፡ ይገብሩ፡ ሰላም፡ ምስሌሆሙ፡ ወለእመ፡ ይቀትልዎሙ። ወለአከ፡ ያዕቆብ፡ ኀበ፡ ውሉዱ፡ ከመ፡ ይግበሩ፡ ሰላመ፡ ወገብሩ፡ ምስሌሆሙ፡ ሰላመ፡ ወአንበሩ፡ አርዑተ፡ ቅኔ፡ ላዕሌሆሙ፡ ከመ፡ ይጸብሑ፡ ለያዕቆብ፡ ወለውሉዱ፡ ኵሎ። ወነበሩ፡ እንዘ፡ ይጼብሑ፡ ለያዕቆብ፡ እስከ፡ አመ፡ ዕለተ፡ ወረደ፡ ያዕቆብ፡ ውስተ፡ ግብጽ። ወኢነተጉ፡ ውሉዱ፡ ኤዶም፡ እምአርዑተ፡ ቅኔ፡ ዘዐሠርቱ፡ ወክልኤቱ፡ ውሉደ፡ ያዕቆብ፡ ላዕሌሆሙ፡ እስከ፡ ዛቲ፡ ዕለት። ወእሉ፡ ነገሥት፡ እለ፡ ነግሡ፡ በኤዶም፡ ዘእንበለ፡ ይንግሥ፡ ንጉሥ፡ ለውሉደ፡ እስራኤል፡ እስከ፡ ዛቲ፡ ዕለት፡ በምድረ፡ ኤዶም። ወነግሠ፡ በኤዶም፡ ባላቅ፡ ወልደ፡ ቦኤር፡ ወስመ፡ ሀገሩ፡ ደናባ። ወሞተ፡ ባላቅ፡ ወነግሠ፡ ህየንቴሁ፡ ዮባብ፡ ወልደ፡ ዛራ፡ ዘእምነ፡ ቦሲር። ወሞተ፡ ዮባብ፡ ወነግሠ፡ ህየንቴሁ፡ አሳም፡ ዘእምነ፡ ደብረ፡ ቴማን። ወሞተ፡ አሳም፡ ወነግሠ፡ ህየንቴሁ፡ አዳት፡ ወልደ፡ ባርድ፡ ዘቀተለ፡ መዕድያምሃ፡ በሐቅለ፡ ሞአብ፡ ወስመ፡ ሀገሩ፡ አውኡቱ። ወሞተ፡ አዳት፡ ወነግሠ፡ ህየንቴሁ፡ ሰሎማን፡ ዘእምነ፡ እማሴቃ። ወሞተ፡ ሰሎማን፡ ወነገሠ፡ ህየንቴሁ፡ ሳኡል፡ ዘእምነ፡ ራአቦት፡ ፈለግ። ወሞተ፡ ሳኡል፡ ወነግሠ፡ ህየንቴሁ፡ ብኤሉናን፡ ወልደ፡ አክቡር። ወሞተ፡ በኤሉናን፡ ወልደ፡ አክቡር፡ ወነግሠ፡ ህየንቴሁ፡ አዳት፡ ወስመ፡ ብእሲቱ፡ መይጠቢት፡ ወለተ፡ መጥሪት፡ ወለተ፡ ሜተቤድዛአብ። እሉ፡ ነገሥት፡ እለ፡ ነግሡ፡ በምድረ፡ ኤዶም።

Chapter 39 ወኀደረ፡ ያዕቆብ፡ በምድረ፡ ፍልሰተ፡ አቡሁ፡ ምድረ፡ ከናአን። እለ፡ ትዝምደ፡ ያዕቆብ። ወሤሞ፡ ለዮሴፍ፡ ዲበ፡ ኵሉ፡ ቤቱ። ወኀደገ፡ ግብጻዊ፡ ኵሎ፡ ቅድሜሁ፡ ለዮሴፍ፡ እስመ፡ ርእየ፡ ከመ፡ እግዚአብሔር፡ ምስሌሁ፡ ወኵሎ፡ ዘገብረ፡ እግዚአብሔር፡ ይሴርሖ። ወዮሴፍሰ፡ ሠናይ፡ ራእዩ፡ ወላሕይ፡ ጥቀ፡ ራእዩ። ወኢመጠወ፡ ነፍሶ። ወተዘከረ፡ ዮሴፍ፡ ዘንተ፡ ንባበ፡ ወኢፈቀደ፡ ይስክብ፡ ምስሌሃ። ወአስተብቍዐቶ፡ ዓመተ፡ አሐተ፡ ወካልአ፡ ወአበያ፡ ሰሚዐ። ወለጠቀቶ፡ ወአኀዘቶ፡ በቤት፡ ከመ፡ ትትባአሶ፡ ይስክብ፡ ምስሌሃ። ወርእየት፡ ይእቲ፡ ብእሲት፡ ከመ፡ ኢይሰክብ፡ ምስሌሃ፡ ወጠቀለቶ፡ ቅድመ፡ እግዚኡ፡ እንዘ፡ ትብል፡ ኪያየ፡ ፈቀደ፡ ገብርከ፡ ዕብራዊ፡ ዘታፈቅር፡ ይትዐገለኒ፡ ከመ፡ ይስክብ፡ ምስሌየ። ወርእየ፡ ግብጻዊ፡ ልብሰ፡ ዮሴፍ፡ ወማዕፆ፡ ስቡረ። ወሀሎ፡ ህየ፡ ውስተ፡ ሞቅሕ። ወኀደገ፡ ኵሎ፡ ቅድሜሁ፡ ወአልቦ፡ ሊቀ፡ ዐቀብተ፡ ሞቅሕ፡ ዘያአምር፡ ምስሌሁ፡ ምንተኒ፡ እስመ፡ ዮሴፍ፡ ኵሎ፡ ይገብር፡ ወእግዚአብሔር፡ ይፌጽም፡ ወነበረ፡ ህየ፡ ክልኤተ፡ ዓመተ። ወበውእቱ፡ መዋዕል፡ ተምዕዐ፡ ፈርዖን፡ ንጉሠ፡ ግብጽ፡ ላዕለ፡ ክልኤቱ፡ ኅጽዋኒሁ፡ ላዕለ፡ ሊቀ፡ መዘርት፡ ወላዕለ፡ ሊቀ፡ ኀበዝት፡ ወወደዮሙ፡ ውስተ፡ ሞቅሕ፡ ውስተ፡ ቤቱ፡ ለሊቀ፡ መበስላን፡ ውስተ፡ ሞቅሕ፡ ኀበ፡ ሀሎ፡ ዮሴፍ፡ እኁዝ፡ ህየ። ወሠርዖ፡ ለዮሴፍ፡ ሊቀ፡ ዐቀብተ፡ ሞቅሕ፡ ከመ፡ ይትለአኮሙ፡ ወይትለአክ፡ በቅድሜሁ። ወሐለሙ፡ ክልኤሆሙ፡ ሕልመ፡ ሊቀ፡ መዘርት፡ ወሊቀ፡ ሐበዝት፡ ወነገርዎ፡ ለዮሴፍ። ወበከመ፡ ፈከረ፡ ሎሙ፡ ከማሁ፡ ኮኖሙ። ወረስዖ፡ ሊቀ፡ መዘርት፡ ለዮሴፍ፡ በቤተ፡ ሞቅሕ፡ እስመ፡ አይድዖ፡ ዘይከውኖ፡ ወኢተዘከረ፡ ከመ፡ ያይድዕ፡ ለፈርዖን፡ ዘከመ፡ ነገሮ፡ ዮሴፍ፡ እስመ፡ ረስዐ።

Chapter 40 ወበውእቱ፡ መዋዕል፡ ሐለመ፡ ፈርዖን፡ ሕልመ፡ ክልኤተ፡ በአሐቲ፡ ሌሊት፡ በእንተ፡ ነገረ፡ ዐባር፡ ዘይከውን፡ ዲበ፡ ኵሉ፡ ምድር፡ ወነቅሀ፡ እምንዋሙ፡ ወጸውዖሙ፡ ለኵሎሙ፡ መፈክራነ፡ ሕልም፡ እለ፡ ውስተ፡ ግብጽ፡ ወረቀይት፡ ወነገሮሙ፡ ክልኤሆሙ፡ ሕልሞ፡ ወኢክህሉ፡ አእምሮ። ወእምዝ፡ ተዘከሮ፡ ለዮሴፍ፡ ሊቀ፡ መዘርት፡ ወነገረ፡ በእንቲአሁ፡ ለንጉሥ፡ ወአውፅእዎ፡ እምነ፡ ቤተ፡ ሞቅሕ፡ ወነገረ፡ በቅድሜሁ፡ ክልኤሆሙ፡ ሕለሚሁ። ወይቤ፡ በቅድሜሁ፡ ለፈርዖን፡ ከመ፡ ክልኤሆሙ፡ ሕለሚሁ፡ አሐዱ፡ እሙንቱ። ወይእዜኒ፡ ይሥራዕ፡ ፈርዖን፡ ውስተ፡ ኵሉ፡ ምድረ፡ ግብጽ፡ ከያደ፡ ወይዝግቡ፡ ሲሲተ፡ ለሀገር፡ ውስተ፡ ሀገር፡ በመዋዕለ፡ ዓመታት፡ ዘጽጋብ፡ ወይከውን፡ ሲሲተ፡ ለሰብዐቱ፡ ዓመታተ፡ ዐባር፡ ወኢትትሐጐል፡ ምድር፡ እምቅድመ፡ ገጸ፡ ዐባር፡ እስመ፡ ኀያል፡ ይከውን፡ ጥቀ። ወወሀቦ፡ እግዚአብሔር፡ ለዮሴፍ፡ ሞገሰ፡ ወምሕረተ፡ በቅድመ፡ አዕይንቲሁ፡ ለፈርዖን፡ ወይቤ፡ ፈርዖን፡ ለላእካኒሁ፡ ኢንረክብ፡ ብእሴ፡ ጠቢበ፡ ወማእምረ፡ ዘከመዝ፡ ብእሲ፡ እስመ፡ መንፈሰ፡ እግዚአብሔር፡ ምስሌሁ። ወሤሞ፡ ዳግመ፡ ውስተ፡ ኵሉ፡ መንግሥቱ፡ ወአኰነኖ፡ ውስተ፡ ኵሉ፡ ግብጽ፡ ወአጽዐኖ፡ ዲበ፡ ሰረገላሁ፡ ካዕብ፡ ዘፈርዖን። ወአልበሶ፡ ልብሰ፡ ቢሶስ፡ ወአዕነቆ፡ ባዝግና፡ ወርቅ፡ ውስተ፡ ክሳዱ። ወመበለ፡ ዮሴፍ፡ ውስተ፡ ኵሉ፡ ምድረ፡ ግብጽ፡ ወአፍቅርዎ፡ ኵሎሙ፡ መኳንንቲሁ፡ ለፈርዖን፡ ወኵሎሙ፡ ላእካኒሁ፡ ወኵሎሙ፡ እለ፡ ይገብሩ፡ ግብረ፡ ንጉሥ። ወተሰናአወት፡ ምድረ፡ ግብድ፡ በቅድሜሁ፡ ለፈርዖን፡ በእንተ፡ ዮሴፍ፡ እስመ፡ እግዚአብሔር፡ ምስሌሁ፡ ወወሀቦ፡ ሞገሰ፡ ወምሕረተ፡ ላዕለ፡ ኵሎሙ፡ ዘመዱ፡ በቅድመ፡ ኵሎሙ፡ እለ፡ ያአምርዎ፡ ወለእለ፡ ይሰምዑ፡ ስምዐ፡ ምስሌሁ፡ ወረትዐት፡ መንግሥተ፡ ፈርዖን፡ ወአልቦ፡ ሰይጣነ፡ ወአልቦ፡ እኩየ። ወጸውዐ፡ ንጉሥ፡ ስሞ፡ ለዮሴፍ፡ ስፋንጢፋንስ። ወበዕለተ፡ ቆመ፡ ዮሴፍ፡ ኀበ፡ ፈርዖን፡ ወልደ፡ ሠላሳ፡ ክረምት፡ አመ፡ ቆመ፡ ቅድመ፡ ፈርዖን። ወበውእቱ፡ ዓመት፡ ሞተ፡ ይስሐቅ፡ ወበጽሐ፡ በከመ፡ ነገረ፡ ዮሴፍ፡ በእንተ፡ ፍካሬ፡ ክልኤቱ፡ ሕልሙ፡ ዘከመ፡ ነገሮ፡ ወኮነ፡ ሰብዐቱ፡ ክረምት፡ ዘጽጋብ፡ ውስተ፡ ኵሉ፡ ምድረ፡ ግብጽ፡ ወፈርየት፡ ምድረ፡ ብዙኀ፡ አሐቲ፡ መስፈርት፡ ዐሠርተ፡ ወሰማኒተ፡ ምእተ፡ መሳፍረ። ወአስተጋብአ፡ ዮሴፍ፡ ሲሲተ፡ ለሀገር፡ ውስተ፡ ሀገር፡ እስከ፡ መልአ፡ ሥርናይ፡ እስከ፡ ሶበ፡ ይስእኑ፡ ኆልቆቶ፡ ወሰፊረ፡ እምነ፡ ብዝኁ።

Chapter 41 ወበአርብ፡ ወኀምስቱ፡ ኢዮቤልዉ፡ ወዳግም፡ ሱባዔ፡ በዓመት፡ ካልእ፡ ነሥአ፡ ይሁዳ፡ ለዔር፡ በኵሩ፡ ብእሲተ፡ እምነ፡ አዋልደ፡ አራም፡ ወስማ፡ ትዕማር። ወጸልአ፡ ወኢሰከበ፡ ምስሌሃ፡ እስመ፡ እምአዋልደ፡ ከናአን፡ እሙ፡ ወፈቀደ፡ ይንሣእ፡ ሎቱ፡ ብእሲተ፡ እምነገደ፡ እሙ፡ ወኢአብሖ፡ ይሁዳ፡ አቡሁ። ወውእቱ፡ ዔር፡ በኵሩ፡ ለይሁዳ፡ እኩይ፡ ወቀተሎ፡ እግዚአብሔር። ወይቤ፡ ይሁዳ፡ ለአውናን፡ እኁሁ፡ ባእ፡ ኀበ፡ ብእሲተ፡ እኁሁ፡ ወረስያ፡ ኑዕልተ፡ ወአንሥእ፡ ዘርአ፡ ለእኁከ። ወአእመረ፡ አውናን፡ ከመ፡ ኢኮነ፡ ዘዚአሁ፡ ዘርእ፡ ክመ፡ ዘእኁሁ። ወይቤ፡ ይሁዳ፡ ለትዕማር፡ መርዓቱ፡ ንበሪ፡ ቤተ፡ አቡኪ፡ እንዘ፡ ትመዐስቢ፡ እስከ፡ አመ፡ ይልህቅ፡ ሴሎም፡ ወልድየ፡ ወእሁበኪ፡ ሎቱ፡ ብእሲተ። ወልህቀ፡ ወኢኀደገት፡ ቤድሱኤል፡ ብእሲተ፡ ይሁዳ፡ ሴሎምሃ፡ ወልዳ፡ ከመ፡ ያውስብ። ወበሳድስ፡ ዓመቱ፡ ዐርገ፡ ይሁዳ፡ ይቅርጽ፡ አባግዒሁ፡ በቴምናታ። ወአንበረት፡ አልባሰ፡ ምዕስብናሃ፡ ወለብሰት፡ ግልባቤ፡ ወተሠነየት፡ ወነበረት፡ ውስተ፡ አንቀጽ፡ እንተ፡ መንገለ፡ ፍኖተ፡ ቴምናታ። ወእንዘ፡ የሐውር፡ ይሁዳ፡ ረከባ፡ ወተሐዘባ፡ ከመ፡ ዘማዊት፡ ወይቤላ፡ እባእ፡ ኀቤኪ፡ ወትቤሎ፡ ባእ፡ ወቦአ። ወትቤሎ፡ ሀበኒ፡ ደነስየ፡ ወይቤላ፡ አልብየ፡ ውስተ፡ እዴየ፡ ዘእንበለ፡ ሕልቀት፡ ዘአጽባዕትየ፡ ወድጕልማየ፡ ወበትርየ፡ ዘውስተ፡ እዴየ። ወትቤሎ፡ ሀበኒ፡ ኪያሆሙ፡ እስከ፡ ሶበ፡ ትፌኑ፡ ሊተ፡ ደነስየ። ወሖረ፡ ይሁዳ፡ ውስተ፡ አባግዒሁ፡ ወይእቲኒ፡ ሖረት፡ ቤተ፡ አቡሃ። ወፈነወ፡ ይሁዳ፡ መሕስአ፡ በእደ፡ ኖላዊሁ፡ አዶላማዊ፡ ወኀጥአ፡ ወተስእሎሙ፡ ለሰብአ፡ ብሔር፡ እንዘ፡ ይብል፡ አይቴ፡ ሀለወት፡ ዘማዊት፡ እንተ፡ ዝየ፡ ወይቤልዎ፡ አልቦ፡ ዝየስ፡ ዘማዊት፡ ወአልብነ፡ ኀቤነ፡ ዘማዊተ። ወገብአ፡ ወአይድዖ፡ ከመ፡ ኀጥአ፡ ወይቤሎ፡ ተስእልኩ፡ ሰብአ፡ ብሔርኒ፡ ወይቤሉኒ፡ አልቦ፡ ዝየስ፡ ዘማዊተ። ወእንዘ፡ አእከለት፡ ሠለስተ፡ አውራኀ፡ ተዐውቀት፡ ከመ፡ ፀንሰት፡ ይእቲ። ወሖረ፡ ይሁዳ፡ ቤተ፡ አቡሃ፡ ወይቤሎሙ፡ ለአቡሃ፡ ወለአኀዊሃ፡ አውፅእዋ፡ ወያውዕይዋ፡ እስመ፡ ገብረት፡ ርኵሰ፡ በውስተ፡ እስራኤል። ወኮነ፡ ሶበ፡ አውፅእዋ፡ ከመ፡ ያውዕይዋ፡ ፈነወት፡ ለሐሙሃ፡ ሕልቀተ፡ ወድጕልማ፡ ወበትረ፡ ወትቤ፡ አእምርአ፡ ዘመኑአ፡ ዝንቱአ፡ እስመአ፡ ሎቱአ፡ ፀነስኩአ። ወአእመረ፡ ይሁዳ፡ ወይቤ፡ ጸድቀት፡ ትዕማር፡ እምኔየ፡ ወኢያውዕይዋ፡ እንከ። ወበእንተዝ፡ ኢተውህበት፡ ለሴሎም፡ ወኢደገመ፡ እንከ፡ ቀሪቦታ። ወእምዝ፡ ፀንሰት፡ ወወለደት፡ ክልኤተ፡ ደቀ፡ ፋሬስሃ፡ ወዛራሃ፡ በዓመት፡ ሳብዕ፡ ዘዝንቱ፡ ሱባዔ፡ ዘዳግም። ወእምዝ፡ ተፈጸመ፡ ሰብዐቱ፡ ዓመት፡ ዘሰምር፡ ዘይቤሎ፡ ዮሴፍ፡ ለፈርዖን። ወአእመረ፡ ይሁዳ፡ ከመ፡ እኩይ፡ ግብር፡ ዘገብረ፡ እስመ፡ ሰከበ፡ ምስለ፡ መርዓቱ፡ ወአስተሐሠመ፡ በቅድመ፡ አዕይንቲሁ፡ ወአእመረ፡ ከመ፡ አበሰ፡ ወስሕተ፡ እስመ፡ ከሠተ፡ ክድነተ፡ ወልዱ፡ ወአኀዘ፡ ይላሑ፡ ወይትመሐለል፡ ቅድመ፡ እግዚአብሔር፡ በእንተ፡ አበሳሁ። ወነገርናሁ፡ በሕልም፡ ከመ፡ ይሰረይ፡ ሎቱ፡ እስመ፡ ተማሕለለ፡ ጥቀ፡ ወእስመ፡ ላሐወ፡ ወኢገብረ፡ እንከ። ወኮነ፡ ሎቱ፡ ስርየት፡ እስመ፡ ተመይጠ፡ እምኀጢአቱ፡ ወእምኢያእምሮቱ፡ እስመ፡ ዐቢይ፡ አበሳ፡ አምላክነ። ወአንተኒ፡ አዝዞሙ፡ ለውሉደ፡ እስራኤል፡ ወኢይኩን፡ ርኵስ፡ በማእከሎሙ፡ እስመ፡ ኵሉ፡ ዘይሰክብ፡ ምስለ፡ መርዓቱ፡ ወምስለ፡ ሐማቱ፡ ርኵሰ፡ ገብረ፡ በእሳት፡ ያውዕዩ፡ ብእሴ፡ ዘሰከበ፡ ምስሌሃ፡ ወብእሲተኒ፡ ወየኀድግ፡ መዓተ፡ ወመቅሠፍተ፡ እምእስራኤል። ወለይሁዳኒ፡ ነገርናሁ፡ ከመ፡ ኢሰከቡ፡ ምስሌሃ፡ ክልኤሆሙ፡ ደቂቁ። እስመ፡ በየውሀተ፡ አዕይንቲሁ፡ ሖረ፡ ወኀሠሠ፡ ኵነኔ፡ እስመ፡ እምፍትሐ፡ አብርሃም፡ ዘአዘዞሙ፡ ለውሉዱ፡ ፈቀደ፡ ይሁዳ፡ ያውዕያ፡ በእሳት።

Chapter 42 ወበቀዳሚ፡ ዓመት፡ ዘሱባዔ፡ ሣልስ፡ ዘአርብዓ፡ ወኀምስቱ፡ ኢዮቤልው፡ አኀዘ፡ ዐባር፡ ይምጻእ፡ ውስተ፡ ምድር፡ ወአበየ፡ ዝናም፡ ተውህቦ፡ ለምድር፡ እስመ፡ አልቦ፡ ምንተኒ፡ ዘይወርድ። ወዐብረት፡ ምድር። ወመጽኡ፡ ግብጽ፡ ኀበ፡ ዮሴፍ፡ ከመ፡ የሀቦሙ፡ ሲሲተ፡ ወከሠተ፡ መዛግብተ፡ ኀበ፡ ሀሎ፡ ሥርናይ፡ ዘቀዳሚ፡ ዓመት፡ ወሤጠ፡ ለአሕዛበ፡ ምድር፡ በወርቅ። ወሰምዐ፡ ያዕቆብ፡ ከመ፡ ቦቱ፡ ሲሲተ፡ ውስተ፡ ግብጽ፡ ወፈነወ፡ ዐሠርተ፡ ደቆ፡ ከመ፡ ይንሥኡ፡ ሎቱ፡ ሲሲተ፡ በግብጽ፡ ወብንያምሃሰ፡ ኢፈነወ። ወአእመሮ፡ ዮሴፍ፡ ወእሙንቱሰ፡ ኢያእመርዎ። ወእምዝ፡ ፈትሖሙ፡ ወአቀመ፡ ስምዖንሃ፡ ባሕቲቶ፡ ወተስዐተ፡ አኀዊሁ፡ ፈነወ። ወመልአ፡ አሕስሊሆሙ፡ ሥርናየ፡ ወወርቆሙሂ፡ ወደየ፡ ሎሙ፡ ውስተ፡ አሕስሊሆሙ፡ ወኢያእመሩ። ወአዘዞሙ፡ ከመ፡ ያምጽኡ፡ እኅዋሆሙ፡ ዘይንእስ፡ እስመ፡ ነገርዎ፡ ከመ፡ ሀሎ፡ አቡሆሙ፡ ሕያው፡ ወእኁሆሙ፡ ዘይንእስ። ወዐርጉ፡ እምድረ፡ ግብጽ፡ ወበጽሑ፡ ምድረ፡ ከናአን፡ ወነገሩ፡ ለአቡሆሙ፡ ኵሎ፡ ዘከመ፡ ረከቦሙ፡ ወእፎ፡ ተናገረ፡ ምስሌሆሙ፡ መኰንነ፡ ብሔር፡ ዐጸብጺበ፡ ወአኀዞ፡ ለስምዖን፡ እስከ፡ ሶበ፡ ያመጽእዎ፡ ለብንያም። ወይቤ፡ ያዕቆብ፡ አምከንክሙኒኬ፡ ወዮሴፍኒ፡ ኢሀሎ፡ ወስምዖንሂ፡ ኢሀሎ፡ ወብንያምሃኒ፡ ትነሥእዎ፡ ላዕሌየኬ፡ ኮነ፡ እከይክሙ። ወይቤ፡ ኢየሐውር፡ ወልድየ፡ ምስሌክሙ፡ እመቦ፡ ከመ፡ ደወየ። እስመ፡ ርእየ፡ ከመ፡ ገብአ፡ ወርቆሙ፡ ኵሉ፡ በዕቈሪሁ፡ ወበዝ፡ ፈርሀ፡ ፈንዎቶ። ወዐባርኒ፡ በዝኀ፡ ወኀየለ፡ በምድረ፡ ከናአን፡ ወበኵሉ፡ ምድር፡ ዘእንበለ፡ ምድረ፡ ግብጽ። ወተሴሰይዎ፡ ሰብአ፡ ግብጽ፡ በቀዳሚ፡ ዓመት፡ ዘዐባር። ወሶበ፡ ርእየ፡ እስራኤል፡ ከመ፡ ኀየለ፡ ጥቀ፡ ዐባር፡ ውስተ፡ ምድር፡ ወአልቦ፡ ድኂነ፡ ወይቤ፡ ለውሉዱ፡ ሖሩ፡ ግብኡ፡ ወንሥኡ፡ ለነ፡ ሲሲተ፡ ኢንሙት። ወይቤሉ፡ ኢነሐውር፡ እመ፡ ኢመጽአ፡ እኁነ፡ ዘይንእስ፡ ምስሌነ፡ ኢነሐውር። ወርእየ፡ እስራኤል፡ ከመ፡ እመ፡ ኢፈነዎ፡ ምስሌሆሙ፡ ይትሐጐሉ፡ ኵሎሙ፡ እምቅድመ፡ ዐባር። ወይቤ፡ ሮቤል፡ ሀበንዮ፡ ውስተ፡ እዴየ፡ ወለእመ፡ ኢያግባእክዎ፡ ለከ፡ ቅትል፡ ክልኤተ፡ ውሉድየ፡ ህየንተ፡ ነፍሰ፡ ዚአሁ። ወቀርበ፡ ይሁዳ፡ ወይቤ፡ ፈንዎ፡ ምስሌነ፡ ወለእመ፡ ኢያግባእክዎ፡ ለከ፡ እቡሰ፡ እኩን፡ በቅድሜከ፡ ኵሎ፡ መዋዕለ፡ ሕይወትየ። ወፈነዎ፡ ምስሌሆሙ፡ በካልእ፡ ዓመት፡ ዘዝ፡ ሱባዔ፡ በሠርቀ፡ ወርኅ፡ ወበጽሑ፡ ብሔረ፡ ግብጽ፡ ምስለ፡ ኵሎሙ፡ እለ፡ የሐውሩ፡ ወአምኃሆሙ፡ ውስተ፡ እደዊሆሙ፡ ማየ፡ ልብን፡ ወከርካዕ፡ ወጤሬቤንቶስ፡ ወጸቃውዐ፡ መዓር። ወበጽሑ፡ ወቆሙ፡ ቅድመ፡ ዮሴፍ፡ ወርእየ፡ ብንያምሃ፡ እኅዋሁ፡ ወአእመሮ፡ ወይቤሎሙ፡ ዝኑ፡ እኁክሙ፡ ዘይንእስ፡ ወይቤልዎ፡ ውእቱ። ወፈነዎ፡ ውስተ፡ ቤቱ፡ ወስምዖንሃኒ፡ አውጽአ፡ ሎሙ። ወበልዑ፡ በቅድሜሁ፡ ወወሀቦሙ፡ ክፍለ፡ ለኵሎሙ፡ ወበዝኀ፡ መክፈልተ፡ ብንያም፡ እመክፈልተ፡ ኵሎሙ፡ ትስብዕተ። ወበልዑ፡ ወሰትዩ፡ ወተንሥኡ፡ ወኀደሩ፡ ኀበ፡ አእዱጊሆሙ። ወኀለየ፡ ዮሴፍ፡ ኅሊና፡ በዘ፡ ያአምር፡ ኅሊናሆሙ፡ እመቦ፡ ኅሊና፡ ሰላም፡ በበይናቲሆሙ።

Chapter 43 ወገብረ፡ በከመ፡ ይቤሎ፡ ዮሴፍ፡ ወመልአ፡ ሎሙ፡ አሕስሊሆሙ፡ ኵሎ፡ ሲሲተ፡ ወወርቆሙኒ፡ ወደየ፡ ውስተ፡ አሕስሊሆሙ፡ ወኮራ፡ ወደየ፡ ውስተ፡ ሐስለ፡ ብንያም። ወነግሀ፡ በጽባሕ፡ ሖሩ፡ ወኮነ፡ ሶበ፡ ወፅኡ፡ እምህየ፡ ይቤሎ፡ ዮሴፍ፡ ለብእሴ፡ ቤቱ፡ ዴግኖሙ፡ ሩጽ፡ ወተጋአዞሙ፡ እንዘ፡ ትብል፡ ህየንተ፡ ሠናይት፡ ዐሰይክሙኒ፡ እኩየ፡ ሰረቅሙኒ፡ ጽዋዐ፡ ብሩር፡ በዘይሰቲ፡ እግዚእየ፡ ወአግብኦ፡ ሊተ፡ ለእኁሆሙ፡ ዘይንእስ፡ ወፍጡነ፡ አምጽኦ፡ ዘእንበለ፡ እፃእ፡ ውስተ፡ ምኵናንየ። ወሮጸ፡ ድኅሬሆሙ። ወይቤልዎ፡ ሐሰ፡ ሎሙ፡ ለአግብርቲከ፡ ኢይገብሩ፡ ዘንተሰ፡ ነገረ፡ ወኢይሰርቁ፡ እምቤተ፡ እግዚእከ፡ ምንተኒ፡ ንዋየ። እፎ፡ እንከ፡ ንሰርቅ፡ ምንተኒ፡ ንዋየ። ወይቤሎሙ፡ አኮ፡ ከማሁ፡ በኀበ፡ ብእሲ፡ ዘረከብክዎ፡ ባሕቲቶ፡ እነሥእ፡ ገብረ፡ ወአንትሙሰ፡ ተአትዉ፡ በሰላም፡ ቤተክሙ። ወእንዘ፡ ይፈትን፡ ውስተ፡ ንዋዮሙ፡ እምዘ፡ ይልህቅ፡ ቀደመ፡ ወፈጸመ፡ በኀበ፡ ዘይንእስ፡ ወተረክበ፡ ውስተ፡ ሐስለ፡ ብንያም። ወሠጠጡ፡ አልባሲሆሙ፡ ወጸዐኑ፡ ዲበ፡ አእዱጊሆሙ፡ ወተመይጡ፡ ሀገረ፡ ወበጽሑ፡ ቤቶ፡ ለዮሴፍ፡ ወሰገዱ፡ ሎቱ፡ ኵሎሙ፡ በገጾሙ፡ ውስተ፡ ምድር። ወይቤሎሙ፡ ዮሴፍ፡ እኩየ፡ ገበርክሙ፡ ወይቤሉ፡ ምንተ፡ ንበል፡ ወምንተ፡ ንትዋቀሥ፡ እግዚእነ፡ ረከበ፡ አበሳሆሙ፡ ለአግብርቲሁ፡ ነየነ፡ ንሕነ፡ አግብርቱ፡ ለእግዚእነ፡ ወአእዱጊነሂ። ወይቤሎሙ፡ ዮሴፍ፡ እግዚአብሔር፡ አንሰ፡ እፈርህ፡ አንትሙሰ፡ ሖሩ፡ አብያቲክሙ፡ ወእኁክሙ፡ ከመ፡ ይኩን፡ ቅኑየ፡ እስመ፡ እኩየ፡ ገበርክሙ፡ ኢታአምሩኑ፡ ከመ፡ ያስተአድም፡ ብእሲ፡ ጽዋዖ፡ በከመ፡ አነ፡ በዝ፡ ጽዋዕ፡ ወኪያሁ፡ ሰረቅሙኒ። ወይቤ፡ ይሁዳ፡ ላዕሌየ፡ እግዚኦ፡ እትናገር፡ ገብርከ፡ ቃለ፡ ውስተ፡ እዝነ፡ እግዚእየ። ወይከውን፡ እምከመ፡ ሖርነ፡ ኀበ፡ ገብርከ፡ አቡነ፡ ወእምከመ፡ ኢሀሎ፡ ምስሌነ፡ ወሬዛ፡ ይመውት፡ ወንቀጽዕ፡ አባነ፡ በሐዘን፡ እስከ፡ ለመዊት። ወእገብር፡ አነ፡ ባሕቱ፡ ገብርከ፡ ህየንቴሁ፡ ለሕፃን፡ ገብረ፡ ለእግዚእየ። ወርእየ፡ ዮሴፍ፡ ከመ፡ ልበ፡ ኵሎሙ፡ ዕሩይ፡ ብእሲ፡ ምስለ፡ ካልኡ፡ ለሠናይ፡ ወስእነ፡ ተዐግሦ፡ ወነገሮሙ፡ ከመ፡ ውእቱ፡ ዮሴፍ። ወተናገረ፡ ምስሌሆሙ፡ በከመ፡ ልሳነ፡ ዕብራይስጥ። ወይቤሎሙ፡ ኢትብክዩ፡ ላዕሌየ፡ አፍጥኑ፡ ወአምጽእዎ፡ ለአቡየ፡ ኀቤየ፡ ወእርአዮ፡ ዘእንበለ፡ እሙት፡ ወአዕይንቲሁኒ፡ ለእኁየ፡ ብንያም፡ እንዘ፡ ይሬእያ። እስመ፡ ናሁ፡ ዝንቱ፡ ካልእ፡ ዓም፡ ዘዐባር፡ ወዓዲ፡ ኀምስቱ፡ ዓመት፡ ሀሎ፡ ወአልቦ፡ ማእረረ፡ ወአልቦ፡ ፍሬ፡ ዕፅ፡ ወአልቦ፡ ሐሪሰ። ፍጡነ፡ ረዱ፡ አንትሙ፡ ወአብያቲክሙ፡ ወኢትትሐጐሉ፡ በዐባር፡ ወኢትተክዙ፡ በእንተ፡ ጥሪትክሙ፡ እስመ፡ ለሠሪዕ፡ አቅደመ፡ ፈንዎትየ፡ እግዚአብሔር፡ ቅድሜክሙ፡ ከመ፡ ይሕየዉ፡ ሕዝብ፡ ብዙኃን። ወዜንውዎ፡ ለአቡየ፡ ከመ፡ ዓዲ፡ ሕያው፡ አነ፡ ወአንትሙኒ፡ ናሁ፡ ትሬእዩ፡ ከመ፡ ሠርዐኒ፡ እግዚአብሔር፡ ከመ፡ እንተ፡ አቡሁ፡ ለፈርዖን፡ ወከመ፡ እመብል፡ ውስተ፡ ቤቱ፡ ወዲበ፡ ኵሉ፡ ምድረ፡ ግብጽ። ወዜንውዎ፡ ለአቡየ፡ ኵሎ፡ ክብርየ፡ ወኵሎ፡ ዘመጠነ፡ ወሀበኒ፡ እግዚአብሔር፡ ብዕለ፡ ወክብረ። ወወሀቦሙ፡ በቃለ፡ አፈ፡ ፈርዖን፡ ሰረገላተ፡ ወሥንቀ፡ ለፍኖት፡ ወወሀቦሙ፡ ለኵሎሙ፡ አልባሰ፡ ሕብር፡ ወብሩረ። ወለአቡሆሙኒ፡ ፈነወ፡ አልባሰ፡ ወብሩረ፡ ወዐሠርተ፡ አእዱገ፡ ዘይወስዱ፡ ስርናየ፡ ወፈነዎሙ። ወዐርጉ፡ ወዜነዉ፡ ለአቡሆሙ። ወኢአምነ፡ አቡሆሙ፡ እስመ፡ ደንገፀ፡ በኅሊናሁ።

Chapter 44 ወተንሥአ፡ እስራኤል፡ እምካራን፡ እምቤቱ፡ በሠርቀ፡ ሣልስ፡ ወርኅ፡ ወሖረ፡ እንተ፡ ፍኖተ፡ ዐዘቅተ፡ መሐላ፡ ወሦዐ፡ መሥዋዕተ፡ ለአምላከ፡ አቡሁ፡ ይስሐቅ፡ አመ፡ ሰቡዑ፡ ለዝ፡ ወርኅ። ወተዘከረ፡ ያዕቆብ፡ ሕልመ፡ ዘርእየ፡ በቤቴል፡ ወፈርሀ፡ ወሪደ፡ ውስተ፡ ግብጽ። ወእንዘ፡ ይኄሊ፡ ይልአክ፡ ለዮሴፍ፡ ከመ፡ ይምጻእ፡ ኀቤሁ፡ ወኢይረድ፡ ውእቱ። ወገብረ፡ በዓለ፡ ማእረር፡ ቀዳሜ፡ ፍሬ፡ ስርናይ፡ እምስርናይ፡ ብሉይ፡ እስመ፡ አልቦ፡ ውስተ፡ ኵሉ፡ ምድረ፡ ከናአን፡ ምልአ፡ እድ፡ ምንተሂ፡ ዘርአ፡ ውስተ፡ ምድር፡ እስመ፡ ዐባር፡ ውእቱ፡ ኮነ፡ ለኵሉ፡ አራዊት፡ ወለእንስሳ፡ ወለአዕዋፍ፡ ወለሰብእኒ። ወአመ፡ ዐሡሩ፡ ወሰዱሱ፡ አስተርአዮ፡ እግዚአብሔር፡ ወይቤሎ፡ ያዕቆብ፡ ያዕቆብ፡ ወይቤ፡ ነየ፡ አነ። አነ፡ እወርድ፡ ምስሌከ፡ ወአነ፡ እወስደከ፡ ወበዛቲ፡ ምድር፡ ትትቀበር፡ ወዮሴፍ፡ ያነብር፡ እዴሁ፡ ዲበ፡ አዕይንቲከ፡ ኢትፍራህ፡ ረድ፡ ውስተ፡ ግብጽ። ወተንሥኡ፡ ውሉዱ፡ ወውሉደ፡ ውሉዱ፡ ወአጽዐኑ፡ አባሆሙ፡ ወንዋዮሙ፡ ዲበ፡ ሰረገላት። ወተንሥአ፡ እስራኤል፡ እምዐዘቅተ፡ መሐላ፡ አመ፡ ዐሡር፡ ወሰዱስ፡ ዕለት፡ ዘዝ፡ ወርኅ፡ ሣልስ፡ ወሖረ፡ ብሔረ፡ ግብጽ። ወፈነወ፡ እስራኤል፡ ቅድሜሁ፡ ኀበ፡ ዮሴፍ፡ ወልዶ፡ ይሁዳሃ፡ ከመ፡ ያስተሐይጽ፡ ምድረ፡ ጌሤም፡ እስመ፡ ህየ፡ ይቤሎሙ፡ ዮሴፍ፡ ለአኀዊሁ፡ ይምጽኡ፡ ከመ፡ ይኅድሩ፡ ህየ፡ ከመ፡ ይኩኑ፡ ቅሩባነ፡ ዚአሁ። ወይእቲኒ፡ ሠናይት፡ በምድረ፡ ግብጽ፡ ወቅርብት፡ ኀቤሁ፡ ለኵሉ፡ ወለእለሂ፡ እንስሳ። ወዝ፡ አስማቲሆሙ፡ ለውሉደ፡ ያዕቆብ፡ እለ፡ ሖሩ፡ ውስተ፡ ግብጽ፡ ምስለ፡ ያዕቆብ፡ አቡሆሙ። ሮቤል፡ በኵሩ፡ ለእስራኤል፡ ወዝ፡ አስማቲሆሙ፡ ለውሉዱ፡ ኤኖክ፡ ወፋሉስ፡ ወኤስሮም፡ ወከራሚ፡ ኀምስቱ። ስምዖን፡ ወውሉዱ፡ ወዝ፡ አስማቲሆሙ፡ ለውሉዱ፡ ኢያሙኤል፡ ወኢያሚን፡ ወአዎት፡ ወኢያኪም፡ ወሳአር፡ ወሳውል፡ ወልዳ፡ ለፍኒሰወት፡ ሰብዓቱ። ሌዊ፡ ወውሉዱ፡ ወዝ፡ አስማቲሆሙ፡ ለውሉዱ፡ ጌድሶን፡ ወቃዓድ፡ ወሚራሪ፡ አርባዕቱ። ይሁዳ፡ ወውሉዱ፡ ወዝ፡ አስማቲሆሙ፡ ለውሉዱ፡ ሴሎም፡ ወፋሬስ፡ ወዛራ፡ አርባዕቱ። ይሳኮር፡ ወውሉዱ፡ ወዝ፡ አስማቲሆሙ፡ ለውሉዱ፡ ቶላ፡ ወፉአ፡ ወኢያሱብ፡ ወሳምሮም፡ ኀምስቱ። ዛብሎን፡ ወውሉዱ፡ ወዝ፡ አስማቲሆሙ፡ ለውሉዱ፡ ሳአር፡ ወኤሎን፡ ወኢያሊኤል፡ አርባዕቱ። ወእሉ፡ ውሉደ፡ ያዕቆብ፡ ወውሉዶሙ፡ እለ፡ ወለደት፡ ልያ፡ ለያዕቆብ፡ በመስጴጦምያ፡ ስድስቱ፡ ወአሐቲ፡ ዲና፡ እኅቶሙ። ወውሉደ፡ ዘለፋ፡ ለአኪታ፡ ለልያ፡ ብእሲተ፡ ያዕቆብ፡ ዘወለደት፡ ለያዕቆብ፡ ጋድሃ፡ ወአሴርሃ። ወዝ፡ አስማተ፡ ውሉዶሙ፡ እለ፡ ቦኡ፡ ምስሌሁ፡ ውስተ፡ ግብጽ፡ ውሉደ፡ ጋድ፡ ሴፍዮን፡ ወአጋቲ፡ ወሱኒ፡ ወአሲቦን፡ [ወዔዲስ]፡ ወአሪሊ፡ ወአሩዲ፡ ሰማኒቱ። ወውሉደ፡ አሴር፡ ኢዮምና፡ ወይሱአ፡ [ወይኡኤል]፡ ወቤርያ፡ ወሳራ፡ እኅቶሙ፡ አሐቲ፡ ኀምስቱ። ኵሉ፡ ነፍስ፡ ዐሠርቱ፡ ወአርባዕቱ፡ ወኮነ፡ ኵሉ፡ ዘልያ፡ አርባዓ፡ ወአርባዕቱ። ወውሉደ፡ ራሔል፡ ዘብእሲተ፡ ያዕቆብ፡ ዮሴፍ፡ ወብንያም። ወተወልዱ፡ ለዮሴፍ፡ በግብጽ፡ ዘእንበለ፡ ይባእ፡ አቡሁ፡ ውስተ፡ ግብጽ፡ ዘወለደት፡ ሎቱ፡ አስኔት፡ ወለተ፡ ፉጢራዕ፡ ሣውዕ፡ ዘኢሊዮጳሊስ፡ ምነሴሃ፡ ወኤፍሬምሃ። ወውሉደ፡ ብንያም፡ ባላ፡ ወባኮር፡ ወአስቢል፡ ጉአድ፡ ወንኤማን፡ ወአብዮድ፡ ወራኤ፡ ወሰናኒም፡ ወአፊም፡ ወጋአም፡ ዐሠርቱ፡ ወአሐዱ። ወኮነ፡ ኵሉ፡ ነፍስ፡ ዘራሔል፡ ዐሠርቱ፡ ወአርባዕቱ። ወውሉደ፡ ባላ፡ ለአኪታ፡ ለራሔል፡ ብእሲቱ፡ ለያዕቆብ፡ ዘወለደት፡ ለያዕቆብ፡ ዳንሃ፡ ወንፍታሌም። ወዝ፡ አስማተ፡ ውሉዶሙ፡ እለ፡ ቦኡ፡ ምስሌሆሙ፡ ውስተ፡ ግብጽ፡ ውሉደ፡ ዳን፡ ኩሲም፡ ወሳሞን፡ ወአሱዲ፡ ወኢያከ፡ ወሰሎሞን፡ ስድስቱ። ወሞቱ፡ በግብጽ፡ በዓመተ፡ ቦኡ፡ ወተረፎ፡ ለዳን፡ ኩሲም፡ ባሕቲቱ። ወዝ፡ አስማቲሆሙ፡ ለውሉደ፡ ንፍታሌም፡ ኢያሲኤል፡ ወጋሂኒ፡ ወአሰአር፡ ወሰሉም፡ ወኤው። ወሞተ፡ ኤው፡ በግብጽ፡ ዘተወልደ፡ እምድኅረ፡ ዓመተ፡ ዐባር። ወኮኑ፡ ኵሎሙ፡ ዘራሔል፡ ዕሥራ፡ ወስድስቱ። ወኵሉ፡ መንፈስ፡ ዘያዕቆብ፡ ዘቦአ፡ ውስተ፡ ግብጽ፡ ሰብዓ፡ መንፈስ። ወበምድረ፡ ከናአን፡ ሞትዎ፡ ለይሁዳ፡ ክልኤቱ፡ ደቁ፡ ኤር፡ ወኣውናን፡ ወአልቦሙ፡ ውሉደ፡ ወቀበርዎሙ፡ ደቂቀ፡ እስራኤል፡ ለእለ፡ ተሐጕሉ፡ ወተሠይሙ፡ ውስተ፡ ሰብዓ፡ ሕዝብ።

Chapter 45 ወቦአ፡ እስራኤል፡ ውስተ፡ ብሔረ፡ ግብጽ፡ ውስተ፡ ምድረ፡ ጌሤም፡ አመ፡ ሠርቀ፡ ወርኅ፡ ራብዕ፡ በካልእ፡ ዓመት፡ ዘሱባዔ፡ ሣልስ፡ ዘአርብዓ፡ ወኀምስቱ፡ ኢዮቤልው። ወመጽአ፡ ዮሴፍ፡ ይትቀበል፡ አባሁ፡ ያዕቆብሃ፡ ውስተ፡ ምድረ፡ ጌሤም፡ ወሐቀፈ፡ ክሳደ፡ አቡሁ፡ ወበከየ። ወይቤሎ፡ እስራኤል፡ ለዮሴፍ፡ እሙት፡ ይእዜሰ፡ እምዘ፡ ርኢኩከ፡ ወይእዜኒ፡ ይትባረክ፡ እግዚአብሔር፡ አምላከ፡ እስራኤል፡ ወአምላከ፡ አብርሃም፡ ወአምላከ፡ ይስሐቅ፡ ዘኢከልአ፡ ምሕረቶ፡ ወሣህሎ፡ እምገብሩ፡ ያዕቆብ። ዐቢይ፡ ሊተ፡ ዘርኢኩ፡ ገጸከ፡ እንዘ፡ ሕያው፡ አነ፡ እስመ፡ አማን፡ ህልው፡ ራእይ፡ ዘርኢኩ፡ በቤቴል፡ ይትባረክ፡ እግዚአብሔር፡ አምላኪየ፡ ለዓለመ፡ ዓለም፡ ወቡሩክ፡ ስሙ። ወበልዑ፡ ዮሴፍ፡ ወአኀዊሁ፡ በቅድመ፡ አቡሆሙ፡ ኅብስተ፡ ወሰትዩ፡ ወይነ፡ ወተፈሥሐ፡ ያዕቆብ፡ ፍሥሓ፡ ዐቢየ፡ ጥቀ። ወወሀቦ፡ ዮሴፍ፡ ለአቡሁ፡ ወለአኀዊሁ፡ ሀብተ፡ ከመ፡ ይኅድሩ፡ ምድረ፡ ጌሤም፡ ወውስተ፡ ራሜሲኖ፡ ወኵሎ፡ አድያሚሃ፡ ሎሙ፡ ዘይኴንኑ፡ በቅድሜሁ፡ ለፈርዖን። ወሴሰዮሙ፡ ዮሴፍ፡ ለአቡሁ፡ ወለአኀዊሁ፡ ወጥሪቶሙሂ፡ ኀባውዘ፡ በከመ፡ የአክሎሙ፡ ለሰብዐቱ፡ ዓመታተ፡ ዐባር። ወሐመት፡ ምድረ፡ ግብጽ፡ እምቅድመ፡ ገጸ፡ ዐባር። ወተፈጸመ፡ ዓመታተ፡ ዐባር። እስመ፡ በሰብዓቱ፡ ዓመታተ፡ ዐባር። ወውእቱ፡ ዓመት፡ ቀዳሚ፡ ዘሱባዔ፡ ራብዕ፡ ዘአርብዓ፡ ወኀምስቱ፡ ኢዮቤሌው። ወነሥአ፡ ዮሴፍ፡ እምእክል፡ ዘዘርኡ፡ ኀምስቶ፡ ለንጉሥ፡ ወራብዕተ፡ እደ፡ ኀደገ፡ ሎሙ፡ ለሲሲት፡ ወለዘርእ፡ ወረሰዮ፡ ዮሴፍ፡ ሥርዐተ፡ ለምድረ፡ ግብጽ፡ እስከ፡ ዛቲ፡ ዕለት። ወሐይወ፡ እስራኤል፡ በምድረ፡ ግብጽ፡ ዐሠርተ፡ ወሰብዓተ፡ ዓመተ። ወባረኮሙ፡ እስራኤል፡ ለውሉዱ፡ ዘእንበለ፡ ይሙት፡ ወነገሮሙ፡ ኵሎ፡ ዘኮነ፡ ይረክቦሙ፡ በምድረ፡ ግብጽ፡ ወበደኃሪ፡ መዋዕል፡ ዘከመ፡ ይመጽእ፡ ላዕሌሆሙ፡ አይድዖሙ፡ ወባረኮሙ። ወኖመ፡ ምስለ፡ አበዊሁ፡ ወተቀብረ፡ ውስተ፡ በአት፡ ዘካዕበት፡ በምድረ፡ ከናአን፡ ቅሩበ፡ አብርሃም፡ አቡሁ፡ ውስተ፡ መቃብር፡ ዘከረየ፡ ለርእሱ፡ ውስተ፡ በአተ፡ ካዕበት፡ በምድረ፡ ኬብሮን። ወወሀቦ፡ ኵሎ፡ መጻሕፍቲሁ፡ ወመጻሕፍተ፡ አበዊሁ፡ ለሌዊ፡ ወልዱ፡ ከመ፡ ይዕቀቦን፡ ወከመ፡ የሐድሶን፡ ለውሉዱ፡ እስከ፡ ዛቲ፡ ዕለት።

Chapter 46 ወኮነ፡ እምድኅረ፡ ሞተ፡ ያዕቆብ፡ በዝኁ፡ ውሉደ፡ እስራኤል፡ በምድረ፡ ግብጽ፡ ወኮኑ፡ ሕዝበ፡ ብዙኀ፡ ወኮኑ፡ ኵሎሙ፡ ዕሩያነ፡ በልቦሙ፡ ከመ፡ ያፍቅር፡ እኅው፡ እኅዋሁ፡ ወከመ፡ ይትራዳእ፡ ብእሲ፡ ምስለ፡ እኁሁ፡ ወበዝኁ፡ ወፈድፋዱ፡ ጥቀ። ወአልቦ፡ ሰይጣነ፡ ወአልቦ፡ ምንተኒ፡ እኩየ፡ ኵሎ፡ መዋዕለ፡ ሕይወቱ፡ ለዮሴፍ፡ እለ፡ ሐይወ፡ እምድኅረ፡ አቡሁ፡ ያዕቆብ። ወሞተ፡ ዮሴፍ፡ ወልደ፡ ምእት፡ ወዐሠርቱ፡ ዓመት፡ ወዐሠርተ፡ ወሰብዐተ፡ ዓመተ፡ ነበረ፡ ምድረ፡ ከናአን፡ ወዐሠርተ፡ ዓመተ፡ ነበረ፡ እንዘ፡ ይትቀነይ። ወሞተ፡ ወኵሎሙ፡ አኀዊሁ፡ ወኵላ፡ ይእቲ፡ ትውልድ። ወአዘዞሙ፡ ለውሉደ፡ እስራኤል፡ ዘእንበለ፡ ይሙት፡ ከመ፡ ይሰዱ፡ አዕጽምቲሁ፡ በመዋዕል፡ አመ፡ ይወፅኡ፡ እምድረ፡ ግብጽ። ወአምሐሎሙ፡ በእንተ፡ አዕጽምቲሁ፡ እስመ፡ አእመረ፡ ከመ፡ ኢይደግሙ፡ ግብጽ፡ አውፅኦቶ፡ ወቀቢሮቶ፡ በዕለት፡ በምድረ፡ ከናአን። ወስእነ፡ በዊአ፡ እስመ፡ ነግሠ፡ ካልእ፡ ሐዲስ፡ ንጉሥ፡ ለግብጽ፡ ወኀየለ፡ እምኔሁ፡ ወገብአ፡ ምድረ፡ ከናአን፡ ወተዐጽወ፡ አናቅጸ፡ ግብጽ፡ ወአልቦ፡ ዘይወፅእ፡ ወአልቦ፡ ዘይበውእ፡ ውስተ፡ ግብጽ። ወሞተ፡ ዮሴፍ፡ በዘ፡ አርብዓ፡ ወስድስቱ፡ ኢዮቤልዉ፡ በሱባዔ፡ ሳድስ፡ በካልእ፡ ዓመቱ፡ ወቀበርዎ፡ ውስተ፡ ምድረ፡ ግብጽ፡ ወሞቱ፡ ኵሎሙ፡ አኀዊሁ፡ እምድኅሬሁ። ወወፅአ፡ ንጉሠ፡ ግብጽ፡ ከመ፡ ይትቃተል፡ ምስለ፡ ንጉሠ፡ ከናአን፡ በዘ፡ አርብዓ፡ ወሰብዐቱ፡ ኢዮቤልዉ፡ በዳግም፡ ሱባዔ፡ በካልእ፡ ዓመቱ። ወገብኡ፡ ብዙኃን፡ ውስተ፡ ግብጽ፡ ወኅዳጣን፡ ተርፉ፡ እምኔሆሙ፡ ውስተ፡ ደብረ፡ ኬብሮን፡ ወተረፈ፡ አብራም፡ አቡከ፡ ምስሌሆሙ። ወሞአ፡ ንጉሠ፡ ከናአን፡ ለንጉሠ፡ ግብጽ፡ ወዐጸወ፡ አናቅጸ፡ ግብጽ። ወኀለየ፡ ኅሊና፡ እኩየ፡ ላዕለ፡ ውሉደ፡ እስራኤል፡ ከመ፡ ያሕምሞሙ፡ ወይቤሎሙ፡ ለሰብአ፡ ግብጽ። ናሁ፡ ሕዝበ፡ ውሉደ፡ እስራኤል፡ ልህቁ፡ ወበዝኁ፡ እምኔነ፡ ንዑ፡ ንጠበብ፡ ላዕሌሆሙ፡ ዘእንበለ፡ ይብዝኁ፡ ወናሕምሞሙ፡ በቅኔ፡ ዘእንበለ፡ ይምጽአነ፡ ቀትል፡ ወእሙንቱኒ፡ ዘእንበለ፡ ይፅብኡነ፡ ወእመ፡ አኮሰ፡ እሙንቱኒ፡ ይዴመሩ፡ ምስለ፡ ፀር፡ ወይወፅኡ፡ እምድርነ፡ እስመ፡ ልቦሙ፡ ወገጾሙ፡ ውስተ፡ ምድረ፡ ከናአን። ወሠርዐ፡ ላዕሌሆሙ፡ ሊቃነ፡ ገባር፡ ከመ፡ ያሕምምዎሙ፡ በቅኔ። ወይቀንይዎሙ፡ ግፉዐ፡ ወመጠነ፡ ያሐስሙ፡ ላዕሌሆሙ፡ ከማሁ፡ ይበዝኁ፡ ወከማሁ፡ ይፈደፍዱ። ወያስተራኵስዎሙ፡ ሰብአ፡ ግብጽ፡ ለውሉደ፡ እስራኤል።

Chapter 47 ወበሱባዔ፡ ሳብዕ፡ በሳብዕ፡ ዓመት፡ በዘ፡ አርብዓ፡ ወሰብዓቱ፡ ኢዩቤልዉ፡ መጽአ፡ አቡከ፡ እምድረ፡ ከናአን፡ ወተወለድከ፡ በራብዕ፡ ሱባዔ፡ በሳድስ፡ ዓመቱ፡ በዘ፡ አርብዓ፡ ወሰማኒቱ፡ ኢዮቤሌዎን፡ ዘውእቱ፡ መዋዕለ፡ ምንዳቤ፡ ላዕለ፡ ውሉደ፡ እስራኤል። ወአዘዘ፡ ንጉሠ፡ ግብጽ፡ ፈርዖን፡ ትእዛዘ፡ ላዕሌሆሙ፡ ከመ፡ ይግድፉ፡ ውሉዶሙ፡ ኵሎ፡ ሮሰ፡ ዘተወልደ፡ ውስተ፡ ፈለግ። ወነበሩ፡ እንዘ፡ ይገድፉ፡ ሰብዐተ፡ ወርኀ፡ እስከ፡ አመ፡ ዕለተ፡ ተወለድከ። ወገብረት፡ ለከ፡ ነፍቀ፡ ወለበጠታ፡ ፒሳ፡ ወአስፋሊጦ፡ ወአንበረቶ፡ ውስተ፡ ሣዕር፡ ኀበ፡ ድንጋገ፡ ፈለግ፡ ወአንበረተከ፡ ውስቴታ፡ ሰቡዐ፡ መዋዕለ። ወበውእቱ፡ መዋዕል፡ ወፅአት፡ ተርሙት፡ ወለተ፡ ፈርዖን፡ ከመ፡ ትትኀፀብ፡ በውስተ፡ ፈለግ፡ ወሰምዐት፡ ቃለከ፡ እንዘ፡ ትበኪ፡ ወትቤ፡ ለዕብራዊያቲሃ፡ ከመ፡ ያምጽአከ፡ ወአምጽአከ፡ ኀቤሃ። ወአውፅአተከ፡ እምነፍቅ፡ ወምሕረተከ። ወትቤላ፡ እኅርከ፡ እሖርኑ፡ ወእጸውዕ፡ ለኪ፡ አሐተ፡ እምዕብራዊያት፡ እንተ፡ ተሐፅኖ፡ ወታጠብዎ፡ ለኪ፡ ለዝ፡ ሕፃን። ወሖረት፡ ወጸውዐታ፡ ለእምከ፡ ለኢዮክቤት፡ ወወሀበታ፡ ዐስበ፡ ወሐፀነተከ። ወእምዝ፡ ልሂቀከ፡ ወሰዱከ፡ ቤተ፡ ፈርዖን፡ ወኮንከ፡ ውሉዳ፡ ወመሀረከ፡ ዕብራን፡ አቡከ፡ መጽሐፈ፡ ወእምዘ፡ ፈጸምከ፡ ሠለስተ፡ ሱባዔ፡ አብአከ፡ ውስተ፡ ዐጸደ፡ መንግሥት። ወሀለውከ፡ ውስተ፡ ዐጸድ፡ ሠለስተ፡ ሱባዔ፡ ዓመት፡ እስከ፡ መዋዕል፡ አመ፡ ወፃእከ፡ እምዐጸደ፡ መንግሥት። ወበሳኒታ፡ ዕለት፡ ረከብከ፡ ክልኤተ፡ እንዘ፡ ይትባአሱ፡ እምውሉደ፡ እስራኤል፡ ወትቤሎ፡ ለዘይትዔገል፡ ለምንት፡ ትዘብጥ፡ እኅዋከ። ወተምዕዐ፡ ወተቈጥዐ፡ ወይቤ፡ መኑ፡ ሤመከ፡ ላዕሌነ፡ መልአከ፡ ወመኰንነ፡ ትቅትለኒኑ፡ ትፈቅድ፡ በከመ፡ ቀተልኮ፡ ለግብጻዊ፡ ወፈራህከ፡ ወጐየይከ፡ እምቅድመ፡ ዝንቱ፡ ነገር።

Chapter 48 ወበሳድስ፡ ዓመት፡ ዘሱባዔ፡ ሣልስ፡ ዘአርብዓ፡ ወተስዐቱ፡ ኢዮቤልዉሳት፡ ሖርከ፡ ወነበርከ፡ ህየ፡ ኀምስተ፡ ሱባዔ፡ ወዓመተ፡ አሐደ፡ ወገባእከ፡ ውስተ፡ ግብጽ፡ በሱባዔ፡ ዳግም፡ በዓመት፡ ካልእ፡ በውእቱ፡ ኀምሳ፡ ኢዮቤልው። ወአንተ፡ ተአምር፡ ዘተናገረ፡ ለከ፡ በደብረ፡ ሲና፡ ወምንተ፡ ፈቀደ፡ ይግበር፡ ምስሌከ፡ መኰንነ፡ መስቴማ፡ አመ፡ ትገብእ፡ ግብጽ፡ በፍኖት፡ በአላቴ፡ ምጽላል። አኮሁ፡ በኵሉ፡ ኀይሉ፡ ፈቀደ፡ ይቅትልከ፡ ወያድኅኖሙ፡ ለግብጻዊያን፡ እምእዴከ፡ እስመ፡ ርእየከ፡ ከመ፡ ተፈነውከ፡ ትግበር፡ ኵነኔ፡ ወበቀለ፡ ላዕለ፡ ግብጻዊያን። ወባላሕኩከ፡ እምእዴሁ። ወገብረ፡ እግዚአብሔር፡ ላዕሌሆሙ፡ በቀለ፡ ዐቢየ፡ በእንተ፡ እስራኤል፡ ወመሐጾሙ፡ ወቀተሎሙ፡ በደም፡ ወበቈርነነዓት፡ ወበትንንያ፡ ወበጽንጽያ፡ ከልብ፡ ወበእኩይ፡ ቍስል፡ ዘውእቱ፡ ይፈልሕ፡ ዕንጰዕንጴ፡ ወእንስሳሆሙ፡ በሞት፡ ወበአእባነ፡ በረድ። ወኵሉ፡ ተፈነወ፡ ወእዴከ፡ ከመ፡ ትግበር፡ ዘእንበለ፡ ይትገበር፡ ወሀለውከ፡ ትትናገሮ፡ ለንጉሠ፡ ግብጽ፡ ወበቅድመ፡ ኵሎሙ፡ ላእካኒሁ፡ ወበቅድመ፡ ሕዝቡ። ወኵሉ፡ ኮነ፡ በቃልከ፡ ዐሥሩ፡ ኵነኔ፡ ዐቢያት፡ ወፀዋጋት፡ መጽአ፡ ውስተ፡ ምድረ፡ ግብድ፡ ከመ፡ ትግበር፡ ቦቱ፡ በቀለ፡ እስራኤል። ወኵሎ፡ ገብረ፡ እግዚአብሔር፡ በእንተ፡ እስራኤል። ወመኰንነ፡ መስቴማ፡ ይትቀወመከ፡ ቅድሜከ፡ ወይፈቅድ፡ ያውድቀ፡ ውስተ፡ እደ፡ ፈርዖን፡ ወይረድእ፡ ሥራያቲሆሙ፡ ለግብጽ፡ ወይትቃወሙ፡ ወይገብሩ፡ በቅድሜከ። እከየሰኬ፡ ኀደግናሆሙ፡ ይግበሩ፡ ወፈውሰ፡ ኢናበውሖሙ፡ ከመ፡ ይትገበር፡ በእደዊሆሙ። መሐጾሙ፡ እግዚአብሔር፡ በቍስል፡ እኩይ፡ ወስእኑ፡ ተቃውሞ፡ እስመ፡ አሕጐልናሆሙ፡ እምገቢረ፡ ምንተሂ፡ አሐደ፡ ትእምርተ። ወበኵሉ፡ ተአምር፡ ወመንክር፡ ኢኀፈረ፡ መኰንነ፡ መስቴማ፡ እስከ፡ ሶበ፡ ኀየለ፡ ወጸርኀ፡ ሎሙ፡ ለግብጽ፡ ከመ፡ ይዴግኑ፡ ድኅሬከ፡ በኵሉ፡ ኀይሎሙ፡ ለግብጽ፡ በሰረገላቲሆሙ፡ ወአፍራሲሆሙ፡ ወበኵሉ፡ ብዝኆሙ፡ ለአሕዛበ፡ ግብጽ። ወቆምኩ፡ ማእከሌከ፡ ወማእከሎሙ፡ ለግብጽ፡ ወማእከሎሙ፡ ለእስራኤል፡ ወባላሕናሆሙ፡ ለእስራኤል፡ እምእዴሁ፡ ወእምእደ፡ ሕዝብ። ወኵሎሙ፡ ሕዝብ፡ ዘአውፅአ፡ ይዴግኑ፡ ድኅሬሆሙ፡ ለእስራኤል፡ ወወረዎሙ፡ እግዚአብሔር፡ አምላክነ፡ ማእከለ፡ ባሕር፡ ውስተ፡ መዓምቅቲሃ፡ ለቀላይ፡ በታሕቴሆሙ፡ ለውሉደ፡ እስራኤል፡ በከመ፡ ወረዉ፡ ውሉዶሙ፡ ሰብአ፡ ግብጽ፡ ውስተ፡ ፈለግ፡ ምእተ፡ እልፈ፡ ተበቀሎሙ። ወአመ፡ ዐሡር፡ ወረቡዕ፡ ዕለት፡ ወአመ፡ ዐሡር፡ ወኀሙስ፡ ወአመ፡ ዐሡር፡ ወሰዱስ፡ ወአመ፡ ዐሡር፡ ወሰቡዕ፡ ወአመ፡ ዐሡር፡ ወሰሙን፡ ሀሎ፡ መኰንነ፡ መስቴማ፡ እሱር፡ ወዕፅው፡ እምድኅሬሆሙ፡ ለውሉደ፡ እስራኤል፡ ከመ፡ ኢያስተዋድዮሙ። ወአመ፡ ዕለተ፡ ዐሡር፡ ወተሱዕ፡ ፈታሕናሆሙ፡ ከመ፡ ይርድእዎሙ፡ ለግብጽ፡ ወከመ፡ ይዴግኑ፡ ድኅሬሆሙ፡ ለውሉደ፡ እስራኤል። ወአጽንዐ፡ አልባሲሆሙ፡ ወአኀየሎሙ፡ ወተኀየሉ፡ እምኀበ፡ እግዚአብሔር፡ አምላክነ፡ ከመ፡ ይምሐጾሙ፡ ለግብጽ፡ ወይወርዎሙ፡ ማእከለ፡ ባሕር። ወአመ፡ ዐሡር፡ ወረቡዕ፡ ዕለት፡ አሰርናሁ፡ ከመ፡ ኢያስተዋድዮሙ፡ ለደቂቀ፡ እስራኤል፡ በዕለት፡ አመ፡ ሀለዉ፡ ይስእሉ፡ ንዋየ፡ ወአልባሰ፡ እምኀበ፡ ሰብአ፡ ግብጽ፡ ንዋየ፡ ብሩር፡ ወንዋየ፡ ወርቅ፡ ወንዋየ፡ ብርት፡ ወከመ፡ ይማህርክዎሙ፡ ለግብጽ፡ ህየንተ፡ ተቀንዩ፡ እንተ፡ ቀነይዎሙ፡ በግፍዕ። ወኢያውፃእናሆሙ፡ ለውሉደ፡ እስራኤል፡ እምግብጽ፡ ዕራቆሙ።

Chapter 49 ተዘከር፡ ትእዛዘ፡ ዘአዘዘከ፡ እግዚአብሔር፡ በእንተ፡ ፋሲካ፡ ከመ፡ ትግበር፡ በጊዜሁ፡ አመ፡ ዐሡር፡ ወረቡዑ፡ ለወርኅ፡ ቀዳማዊ፡ ከመ፡ ትጥብሖ፡ ዘእንበለ፡ ይምሰይ፡ ወከመ፡ ይብልዕዎ፡ በሌሊት፡ አመ፡ ምሴት፡ ዘዐሡር፡ ወኀሙስ፡ እምጊዜ፡ ዕርበተ፡ ፀሐይ። እስመ፡ በዛቲ፡ ሌሊት፡ ቀዳሜ፡ በዓል፡ ይእቲ፡ ወቀዳሜ፡ ፍሥሐ፡ ይእቲ፡ አንትሙ፡ ትነብሩ፡ ትብልዑ፡ ጳስካ፡ በግብጽ። ወዛቲ፡ ዘወሀበ፡ እግዚአብሔር፡ ሎሙ፡ ውስተ፡ ኵሉ፡ ቤት፡ ዘርእዩ፡ ውስተ፡ አንቀጹ፡ ደመ፡ በግዕ፡ ዘዓመት፡ ኢይባኡ፡ ውስተ፡ ቤቱ፡ ለቀቲል፡ አላ፡ ይትዓደዉ፡ ከመ፡ ይድኀኑ፡ ኵሎሙ፡ እለ፡ ውስተ፡ ቤት፡ እስመ፡ ትእምርተ፡ ደም፡ ውስተ፡ አንቀጹ። ወገብሩ፡ ኀይላቲሁ፡ ለእግዚአብሔር፡ ኵሎ፡ ዘመጠነ፡ አዘዞሙ፡ እግዚአብሔር፡ ወተዐደዉ፡ እምኵሉ፡ ደቂቀ፡ እስራኤል፡ ወኢቦአ፡ ላዕሌሆሙ፡ መቅሠፍት፡ ለአማስኖ፡ እምኔሆሙ፡ ኵሎ፡ ነፍሰ፡ እምእንስሳ፡ እስከ፡ ሰብእ፡ ወእስከ፡ ከልብ። ወኮነ፡ መቅሠፍት፡ በግብጽ፡ ጥቀ፡ ዐቢይ፡ ወአልቦ፡ ቤተ፡ በግብጽ፡ ዘአልቦ፡ በድነ፡ ውስቴታ፡ ወብካየ፡ ወዐውያተ። ወኵሉ፡ እስራኤል፡ ይነብር፡ እንዘ፡ ይበልዕ፡ ሥጋ፡ ጳስካ፡ ወእንዘ፡ ይሰቲ፡ ወይነ፡ ወይሴብሕ፡ ወይባርክ፡ ወያአኵት፡ እግዚአብሔር፡ አምላከ፡ አበዊሁ፡ ወድልወ፡ ይከውን፡ ለወፂእ፡ እምአርዑተ፡ ግብጽ፡ ወእምቅኔ፡ እኪት። ወአንተኒ፡ ተዘከር፡ ዛተ፡ ዕለተ፡ ኵሎ፡ መዋዕለ፡ ሕይወትከ፡ ወግበራ፡ እምዓም፡ ለዓም፡ ኵሎ፡ መዋዕለ፡ ሕይወትከ፡ ምዕረ፡ ለዓመት፡ በዕለቱ፡ በከመ፡ ኵሉ፡ ሕጉ፡ ወኢታስተኃልፍ፡ ዕለተ፡ እምዕለት፡ ወእምወርኅ፡ ለወርኅ። እስመ፡ ሥርዐት፡ ዘለዓለም፡ ውእቱ፡ ወቍሩጽ፡ ውስተ፡ ጽላተ፡ ሰማይ፡ ላዕለ፡ ውሉደ፡ እስራኤል፡ ከመ፡ ይግበርዎ፡ በኵሉ፡ ዓመት፡ ወዓመት፡ በዕለቱ፡ ምዕረ፡ በዓመት፡ ውስተ፡ ኵሉ፡ ትውልዶሙ፡ ወአልቦ፡ ወሰነ፡ መዋዕል፡ እስመ፡ ለዓለም፡ ውእቱ፡ ሥሩዕ። ወብእሲ፡ እንዘ፡ ንጹሕ፡ ውእቱ፡ ወኢመጽአ፡ ይግበሮ፡ በጊዜ፡ ዕለቱ፡ ለአብኦ፡ ቍርባን፡ ዘይሠምር፡ ቅድመ፡ እግዚአብሔር፡ ወለበሊዕ፡ ወለሰቲይ፡ በቅድመ፡ እግዚአብሔር፡ በዕለተ፡ በዓሉ፡ ወይሠረዉ፡ ውእቱ፡ ብእሲ፡ ዘንጹሕ፡ ወቅሩብ፡ እስመ፡ ቍርባነ፡ እግዚአብሔር፡ ኢያብአ፡ በጊዜሁ፡ ወኀጢአተ፡ ይነሥእ፡ ውእቱ፡ ብእሲ፡ ለርእሱ። ከመ፡ ይኩኑ፡ ውሉደ፡ እስራኤል፡ እለ፡ ይመጽኡ፡ ወይገብሩ፡ ጰስከ፡ በዕለተ፡ ጊዜሁ፡ አመ፡ ዐሡሩ፡ ወረቡዑ፡ ለወርኅ፡ ቀዳማዊ፡ በማእከለ፡ ምስያታት፡ እምሣልስታ፡ ለዕለት፡ እስከ፡ ሣልስታ፡ ለሌሊት፡ እስመ፡ ክልኤ፡ መክፈልታ፡ ለዕለት፡ ተውህበ፡ ለብርሃን፡ ወሣልስታ፡ ለምሴት። ዝውእቱ፡ ዘአዘዘከ፡ እግዚአብሔር፡ ከመ፡ ትግበሮ፡ በማእከለ፡ ምሴታት። ወኢይከውን፡ ጠቢሖቱ፡ በኵሉ፡ ጊዜ፡ ብርሃን፡ ዘእንበለ፡ ጊዜ፡ ወሰነ፡ ምሴት፡ ወይበልዕዎ፡ በጊዜ፡ ምሴት፡ እስከ፡ ሣልስተ፡ ሌሊት፡ ወዘተርፈ፡ እምኵሉ፡ ሥጋሁ፡ እምሣልስተ፡ ሌሊት፡ ወከሐ፡ በእሳት፡ ያውዕይዎ። ወኢይከውን፡ ያብስልዎ፡ በማይ፡ ወኢይብልዕዎ፡ ጥራየ፡ አላ፡ ጥቡሰ፡ በእሳት፡ ብሱለ፡ በእሳት፡ በአስተሐምሞ፡ ርእስ፡ ምስለ፡ ንዋየ፡ ውስጡ፡ ወምስለ፡ እገሪሁ። በእንተዝ፡ አዘዞሙ፡ እግዚአብሔር፡ ለውሉደ፡ እስራኤል፡ ከመ፡ ይግበሩ፡ ጳስካ፡ በዕለተ፡ ጊዜሁ። ወአንተሂ፡ አዝዞሙ፡ ለውሉደ፡ እስራኤል፡ ከመ፡ ይግበሩ፡ ጳስካ፡ በመዋዕሊሆሙ፡ በኵሉ፡ ዓመት፡ ምዕረ፡ ለዓመት፡ በዕለተ፡ ጊዜሁ፡ ወይመጽእ፡ ተዝካር፡ እምቅድመ፡ እግዚአብሔር፡ ዘይሠምር፡ ወኢይመጽኦሙ፡ መቅሠፍት፡ ለቀቲል፡ ወለማኅፀት፡ በውእቱ፡ ዓመት፡ አመ፡ ገብሩ፡ ጳስካ፡ በጊዜሁ፡ በኵሉ፡ በከመ፡ ተአዘዘ። ወኢይከውን፡ እንከ፡ ለበሊዖቱ፡ በአፍአ፡ እምቤተ፡ መቅደሱ፡ ለእግዚአብሔር፡ ወበአንጸረ፡ ቤተ፡ መቅደሱ፡ ለእግዚአብሔር፡ ወኵሉ፡ ሕዝበ፡ ማኅበሮሙ፡ ለእስራኤል፡ ይግበርዎ፡ በጊዜሁ። ኵሉ፡ ሰብእ፡ ዘመጽአ፡ በዕለቱ፡ ይብልዖ፡ በቤተ፡ መቅደሱ፡ ለአምላክክሙ፡ በቅድመ፡ እግዚአብሔር፡ ዘእምዕሥራ፡ ዓመት፡ ወላዕለ፡ እስመ፡ ከመዝ፡ ተጽሕፈ፡ ወተሠርዐ፡ ከመ፡ ይብልዕዎ፡ በቤተ፡ መቅደሱ፡ ለእግዚአብሔር። ወእምከመ፡ ቦኡ፡ ውሉደ፡ እስራኤል፡ ውስተ፡ ምድር፡ እንተ፡ ይእኅዙ፡ ውስተ፡ ምድረ፡ ከናአን፡ ወይተክሉ፡ ደብተራ፡ እግዚአብሔር፡ ማእከለ፡ ምድር፡ ውስተ፡ አሐዱ፡ እምነ፡ ሠራዊቶሙ፡ እስከ፡ አመ፡ ይትሐነጽ፡ መቅደሱ፡ ለእግዚአብሔር፡ በዲበ፡ ምድር። ወበመዋዕል፡ አመ፡ ተሐንጸ፡ ቤት፡ በስመ፡ እግዚአብሔር፡ በምድረ፡ ርስቶሙ፡ ህየ፡ ይሖሩ፡ ወይጥብሑ፡ ጳስካ፡ ምሴተ፡ እንዘ፡ የዐርብ፡ ፀሐይ፡ በትሥልስታ፡ ለዕለት። ወያዐርጉ፡ ደሞ፡ ውስተ፡ ምክያዳ፡ ለምሥዋዕ፡ ወሥብሐ፡ ያንብሩ፡ ዲበ፡ እሳት፡ ዘላዕለ፡ ምሥዋዕ፡ ወሥጋሁ፡ ይብልዑ፡ ጥቡሰ፡ በእሳት፡ በውስተ፡ ዐጸደ፡ ቤተ፡ መቅደስ፡ በስመ፡ እግዚአብሔር። ወኢይክሉ፡ ገቢረ፡ ጳስካ፡ በአህጉሪሆሙ፡ ወበኵሉ፡ በሓውርት፡ ዘእንበለ፡ በቅድመ፡ ደብተራ፡ እግዚአብሔር፡ ወእመ፡ አኮ፡ በቅድመ፡ ቤት፡ ኀበ፡ ኀደረ፡ ስመ፡ ዚአሁ፡ ወስቴቱ፡ ወኢይስሕቱ፡ ድኅረ፡ እግዚአብሔር። ወአንተኒ፡ ሙሴ፡ አዝዞሙ፡ ለውሉደ፡ እስራኤል፡ ወይዕቀቡ፡ ሥርዐተ፡ ጳስካ፡ በከመ፡ ተአዘዘ፡ ለከ፡ ከመ፡ ትንግሮሙ፡ ዓመቶ፡ ለለ፡ ዓመት፡ ወዕለቶ፡ ለዕለታት፡ ወበዓለ፡ ናእት፡ ከመ፡ ይብልዑ፡ ናእተ፡ ሰቡዐ፡ ዕለተ፡ ከመ፡ ይግበሩ፡ በዓሎ፡ ከመ፡ ያብኡ፡ ቍርባኖ፡ ዕለተ፡ እምዕለት፡ በእላ፡ ሰቡዕ፡ መዋዕለ፡ ፍሥሐ፡ ቅድመ፡ እግዚአብሔር፡ ዲበ፡ ምሥዋዐ፡ አምላክክሙ። እስመ፡ ዛተ፡ በዓለ፡ በውልዋሌ፡ ገበርክምዋ፡ አመ፡ ትወፅኡ፡ እምግብጽ፡ እስከ፡ አመ፡ ተዐድዉ፡ ባሕረ፡ ውስተ፡ ገዳመ፡ ሱር፡ እስመ፡ በኀበ፡ ድንጋገ፡ ባሕር፡ ሰለጥክምዋ።

Chapter 50 ወእምድኅረዝ፡ ሕግ፡ አይዳዕኩከ፡ መዋዕለ፡ ሰንበታት፡ በገዳመ፡ ሲና፡ እንተ፡ ይእቲ፡ ማእከለ፡ ኤሊም፡ ወሲና። ወሰንበታተ፡ ምድርኒ፡ ነገርኩከ፡ በደብረ፡ ሲና፡ ወዓመታተ፡ ኢዮቤሌዎኒ፡ ውስተ፡ ሰንበታተ፡ ዓመታት፡ ወዓመቶሰ፡ ኢነገርናከ፡ እስከ፡ አመ፡ ትበውኡ፡ ውስተ፡ ምድር፡ እንተ፡ ትእኅዙ። ወታሰነብት፡ ምድርኒ፡ ሰንበታቲሃ፡ በነቢሮቶሙ፡ ዲቤሃ፡ ወዓመቶ፡ ለኢዮቤል፡ ያእምሩ። በእንተዝ፡ ሠራዕኩ፡ ለከ፡ ሱባዔ፡ ዓመታት፡ ወኢዮቤሌዎታተ፡ አርብዓ፡ ወተስዐቱ፡ ኢዮቤሌዎታት፡ እምነ፡ መዋዕሊሁ፡ ለአዳም፡ እስከ፡ ዛቲ፡ ዕለት፡ ወሱባዔ፡ አሐዱ፡ ወክልኤ፡ ዓመታት፡ ወዓዲ፡ አርብዓ፡ ዓመት፡ ርሑቅ፡ ለአእምሮ፡ ትእዛዛተ፡ እግዚአብሔር፡ እስከ፡ አመ፡ ያዐድው፡ ማዕዶተ፡ ምድረ፡ ከናአን፡ ዐዲዎሙ፡ ዮርዳኖስ፡ ገጸ፡ ዐረቢሁ። ወኢዮቤሌዎታት፡ የኀልፉ፡ እስከ፡ አመ፡ ይነጽሕ፡ እስራኤል፡ እምኵሉ፡ አበሳ፡ ዝሙት፡ ወርኵስ፡ ወግማኔ፡ ወኀጢአት፡ ወጌጋይ፡ ወየኀድር፡ ውስተ፡ ኵሉ፡ ምድር፡ እንዘ፡ ይትአመን፡ ወአልቦ፡ እንከ፡ ሎቱ፡ መነሂ፡ ሰይጣነ፡ ወአልቦ፡ መነሂ፡ እኩየ፡ ወትነጽሕ፡ ምድር፡ እምውእቱ፡ ጊዜ፡ እስከ፡ ኵሉ፡ መዋዕል። ወናሁ፡ ትእዛዘ፡ ሰንበታትኒ፡ ጸሐፍኩ፡ ለከ፡ ወኵሉ፡ ፍትሐተ፡ ሕገጊሁ። ሰዱሰ፡ ዕለተ፡ ትገብር፡ ግብረ፡ ወአመ፡ ሳብዕት፡ ዕለት፡ ሰንበት፡ ዘእግዚአብሔር፡ አምላክክሙ፡ ኢትግበሩ፡ ባቲ፡ ኵሎ፡ ግብረ፡ አንትሙ፡ ወውሉድክሙ፡ ወአግብርቲክሙ፡ ወአእማቲክሙ፡ ወኵሉ፡ እንስሳክሙ፡ ወነኪርኒ፡ ዘኀቤክሙ። ወሰብእ፡ ዘይገብር፡ ምንተሂ፡ ግብረ፡ ባቲ፡ ይሙት፡ ኵሉ፡ ብእሲ፡ ዘይጌምና፡ ለዛ፡ ዕለት፡ ዘይሰክብ፡ ምስለ፡ ብእሲት፡ ወዘሂ፡ ይትናገር፡ ነገረ፡ ምግባር፡ ባቲ፡ ከመ፡ ይግበር፡ ባቲ፡ ገዪሶ፡ ወበእንተኒ፡ ኵሉ፡ ሠዪጥ፡ ወተሣይጦ፡ ወዘሂ፡ ማየ፡ ይቀድሕ፡ ባቲ፡ ዘኢያስተዳለወ፡ ሎቱ፡ በዕለተ፡ ሳድስት፡ ወዘኒ፡ አንሥአ፡ ዘይጸውር፡ ኵሎ፡ ከመ፡ ያውፅእ፡ እምደብተራሁ፡ ወእመኒ፡ እምቤቱ፡ ይሙት። ኢትግበሩ፡ ሰንበት፡ ምንተሂ፡ ግብረ፡ ዘኢያስተዳለውክምዎ፡ ለክሙ፡ በዕለተ፡ ሳድስት፡ ለበሊዕ፡ ወለሰቲይ፡ ወለአዕርፎ፡ ወለአሰንብቶ፡ እምኵሉ፡ ግብር፡ በዛቲ፡ ዕለት፡ ወለባርኮ፡ እግዚአብሔር፡ አምላክክሙ። እስመ፡ ዐባይ፡ ክብር፡ እንተ፡ ወሀበ፡ እግዚአብሔር፡ ለእስራኤል፡ ለበሊዕ፡ ወለሰቲይ፡ ወለጸጊብ፡ በዛቲ፡ ዕለተ፡ በዓል፡ ወለአዕርፎ፡ ባቲ፡ እምኵሉ፡ ግብር፡ ዘእምግብረ፡ እጓለ፡ እመሕያው፡ ዘእንበለ፡ ዐጢነ፡ ዕጣን፡ ወለአብኦ፡ ቍርባን፡ ወመሥዋዕት፡ ቅድመ፡ እግዚአብሔር፡ ለመዋዕል፡ ወለሰንበታት። ዝግብር፡ ባሕቲቱ፡ ይትገበር፡ በመዋዕለ፡ ሰንበታት፡ በቤተ፡ መቅደሱ፡ ለእግዚአብሔር፡ አምላክክሙ፡ ከመ፡ ያስተስርዩ፡ ዲበ፡ እስራኤል፡ መባአ፡ ወትረ፡ ዕለተ፡ እምዕለት፡ ለተዝካር፡ ዘይሠጠው፡ ቅድመ፡ እግዚአብሔር፡ ወይትወከፎሙ፡ ለዓለም፡ ዕለተ፡ እምዕለት፡ በከመ፡ ተአዘዝከ። ወኵሉ፡ ሰብእ፡ ዘይገብር፡ ግብረ፡ ወዘሂ፡ የሐውር፡ መንገደ፡ ወዘሂ፡ ይትቀነይ፡ ወፍረ፡ ወእመሂ፡ በቤቱ፡ ወእመሂ፡ በኵሉ፡ መካን። ወሰብእ፡ ዘይገብር፡ ኵሎ፡ ዘእምዝ፡ በዕለተ፡ ሰንበት፡ ይሙት።