ኢዮብ፡

Chapter 1 ወሀሎ፡ አሐዱ፡ ብእሲ፡ በብሔር፡ አውስጢድ፡ ዘስሙ፡ ኢዮብ፡ ወውእቱ፡ ብእሲ፡ ራትዕ፡ ወንጹሕ፡ ወጻድቅ፡ ወፈራሄ፡ እግዚአብሔር፡ ወይትገኃሥ፡ ምስለ፡ ልቡ፡ እምኵሉ፡ ምግባር፡ እኩይ። ወቦቱ፡ ሰብዓቱ፡ ደቂቅ፡ ወሠላስ፡ አዋልድ፡፡ ወእንስሳሁኒ፡ ሰብዓ፡ ምእት፡ ወአባግዒሁኒ፡ ሠላሳ፡ ምእት፡ ወአግማሊሁኒ፡ ኃምስቱ፡ ምእት፡ ጽምደ፡ አልሕምቲሁኒ፡ ኃምስቱ፡ ምእት፡ ወአእዱጊሁኒ፡ አእኑስ፡ ኃምስቱ፡ ምእት። ውብዙኃን፡ አግብርቲሁ፡ ጥቀ፡ ወዓቢይ፡ ተግባሩ፡ በዲበ፡ ምድር፡ ወውእቱሰ፡ ብእሲ፡ ኄር፡ በብሔረ፡ ጽባሕ፡ በምሥራቀ፡ ፀሐይ። ወየሐውሩ፡ ደቂቁ፡ ወይትጋብኡ፡ ኅቡረ፡ ወይገበሩ፡ ምሳሐ፡ ኵሎ፡ አሚረ፡ ወይነሥኡ፡ ሠላሰ፡ አኃቲሆሙ፡ ወይበልዓ፡ ወይሰትያ፡ ምስሌሆሙ። ወተፈጺሞ፡ መዋዕለ፡ ግዝኦሙ፡ ይፌንዎሙ፡ ኢዮብ፡ ቅድመ፡ እግዚአብሔር፡ ወያስተሠሪ፡ ሎሙ፡ ወይገይሥ፡ በጽባሕ፡ ወያበውእ፡ መሥዋዕተ፡ በእንቲአሆሙ፡ በኍልቆሙ። ወአሐይ፡ ላሕመ፡ በእንተ፡ ኃጢአተ፡ ነፍሱ። ወይብል፡ ኢዮብ፡ ለእመቦ፡ ዘይሔልዩ፡ ደቂቅየ፡ እኩየ፡ ላዕለ፡ እግዚአብሔር፡ ወከመዝ፡ ይገብር፡ ኢዮብ፡ በኵሉ፡ መዋዕለ፡ ሕይወቱ። ወእምድኅረ፡ ይእቲ፡ ዕለት፡ መጽኡ፡ መላእክተ፡ እግዚአብሔር፡ ወመጽአ፡ ሰይጣንኒ፡ ምስሌሆሙ፡ ወቆመ፡ በመካኑ፡፡ 10፡ ወይቤሎ፡ እግዚአብሔር፡ ለሰይጣን፡ እምአይቴ፡ መጻእከ፡ ወተሰጥዎ፡ ሰይጣን፡ ለእግዚአብሔር፡ ወይቤሎ፡ ዖድክዋ፡ ለኵላ፡ ምድር፡ ወአንሶሰውኩ፡ ታሕተ፡ ሰማይ፡ ወመጻእኩ። ወይቤሎ፡ እግዚአብሔር፡ ለሰይጣን፡ ዑቅኬ፡ አልቦ፡ ዘትሔሊ፡ ላዕለ፡ ልዔየ፡ ኢዮብ፡ እስመ፡ አልቦ፡ ዘከማሁ፡ በዲበ፡ ምድር፡ ብእሲ፡ ንጹሕ፡ ወጻድቅ፡ ወፈራሄ፡ እግዚአብሄር፡ ወይትገኅሥ፡ ምስለ፡ ልቡ፡ እምኵሉ፡ ምግባር፡ እኩይ፡፡ ወተሰጥወ፡ ሰይጣን፡ ቅድመ፡ እግዚአብሔር፡ ወይቤ፡ ቦኑ፡ በከንቱ፡ ያመልኮ፡ ኢዮስ፡ ለእግዚአብሔር፡ ወኵሉ፡ ዘዓውዱሂ፡ ወባረከ፡ ተግባረ፡ አደዊሁ፡ ወአብዛኅከ፡ እንስሳሁ፡ በዲበ፡ ምድር፡ አከኑ፡ አንተ፡ መላእከ፡ ሎቱ፡ እምውስጡ፡ ወእምአፍአሁ፡ ቤቶ። ወባሕቱ፡ ፈኑ፡ እዴከ፡ ወግሥሥ፡ ኵሉ፡ ዘቦ፡ ዳእሙ፡ እመውስተ፡ ገጽከ፡ ኢባረከከ፡፡ ወእምዝ፡ ይቤሎ፡ እግዚአብሔር፡ ለሰይጣን፡ ናሁኬ፡ ኵሎ፡ ዘቦ፡ ወጠውኰክ፡ ውስተ፡ እዴከ፡ ዳእሙ፡ ኪያሁ፡ ኢትግሥሥ፡ ወወፅአ፡ ሰይጣን፡ እምኅበ፡ እግዚአብሔር፡ እንዘ፡ ይትፌሣሕ። ወሀለዉ፡ እስከ፡ ይእቲ፡ ዕለት፡ ደቂቁ፡ ወአዋልዲሁ፡ ለኢዮብ፡ ይበልዑ፡ ወይሰትዩ፡ በቤተ፡ እኁሆሙ፡ ዘይልህቅ። ወመጽአ፡ ዘይዜንዎ፡ ለኢዮብ፡ ወይቤሎ፡ ጽምደ፡ አልሕምቲክ፡ እንዘ፡ የሐርሱ፡ ወአእዱጊከኒ፡ አእኑስ፡ እንዘ፡ ይትረዐያ፡ ጥቃሆሙ፡፡ መጽኡ፡ እለ፡ ይፄውዉ፡ ወማህረክዎሙ፡ ወቀተሉ፡ ደቀክ፡ በመጥባሕት፡ ወአነ፡ ባሕቲትየ፡ ድኅንኩ፡ ወመጻእኩ፡ አዜኑከ። ወእንዘ፡ ዘንተ፡ ይዜንዎ፡ ውእቱ፡ ለኢዮብ፡ መጽአ፡ ከልእ፡ ዘይዜንዎ፡ ወይቤሎ፡ ለኢዮብ፡ እሳት፡ ወድቀት፡ እምሰማይ፡ ወአውዓየት፡ አባግዒከ፡ ወበልዓቶሙ፡ ለኖሎትከሂ፡ ኅቡረ፡ ወአነ፡ ባሕቲትየ፡ ድኅንኰ፡ ወመጻእኩ፡ እዜኑከ። ወአንዘ፡ ዘንተ፡ ይዜንዎ፡ ለኢዮብ፡ ውእቱ፡ መጽአ፡ ሣልስ፡ ዘይዜንዎ፡ ለኢዮብ፡ ወይቤሎ፡ መስተፅዕናነ፡ አፍራስ፡ ወሠላስቱ፡ ሠራዊት፡ ብዙኃን፡ ዓገቱ፡ ወማሀረኩ፡ አግማሊክ፡ ወአል፡ ሕምቲክ፡ ወቀተሉ፡ ደቀከ፡ በመጥባሕት፡ ወአነ፡ ባሕቲትየ፡ ድኅንኩ፡ ወመጻእኩ፡ እዜኑከ። ወእንዘ፡ ዘንተ፡ ይነግሮ፡ መጽአ፡ ራብዕ፡ ዘይዜንዎ፡ ወይቤሎ፡ ለኢዮብ፡ ደቂቅከሰ፡ ወአዋልዲከ፡ እንዘ፡ ይበልሁ፡ ወይሰትዩ፡ በቤተ፡ እኁሆሙ፡ ዘይልሀቅ፡ ግብተ፡ መጽአ፡ ዓቢይ፡ ነፋስ፡ እምገዳም፡ ወጐድኦ፡ ለቤት፡ እንተ፡ አርባዕቱ፡ መዓዛኒሁ፡፡ ወወድቀ፡ ቤት፡ ዲበ፡ ደቂቅከ፡ ወአዋልዲከ፡ ወሞቱ፡ ወአነ፡ ባሕቲትየ፡ ድኅንኰ፡ ወመጻእኩ፡ እዜኑከ። ወእምዝ፡ ሶበ፡ ሰምዐ፡ ኢዮብ፡ ዘንተ፡ ነገረ፡ ተንሥአ፡ ኢዮብ፡ ወሰጠጠ፡ አልባሲሁ፡ ወላጸየ፡ ሥዕርተ፡ ርእሱ፡ ወወድቀ፡ ዲበ፡ ምድር፡ ወሰገደ፡፡ 23፡ ወይቤሎ፡ ዕራቅየ፡ ወፃእኩ፡ እምከርሠ፡ እምየ፡ ወዕራቅየ፡ አገበእ፡ ውስተ፡ ምድር፡ እግዚአብሔር፡ ወሀበ፡ ወእግዚአብሔር፡ ነሥአ፡ ወኮነ፡ ከመ፡ እግዚአብሔር፡ ፈቀደ፡ ወባሕቱ፡ ይኰን፡ ቡሩከ፡ ስሙ፡ ለእግዚአብሔር።

Chapter 2 ወእምዝ፡ እምድኅረ፡ ይእቲ፡ ዕለት፡ መጽኡ፡ መላእክተ፡ እግዚአብሔር፡ ወቆሙ፡ ቅድመ፡ እግዚአብሔር፡ ወመጽአ፡ ሰይጣንኒ፡ ምስሌሆሙ፡ ወቆመ፡ ቅድሜሁ። ወይቤሎ፡ እግዚአብሔር፡ ለሰይጣን፡ አምአይቴ፡ መጻእክ፡ አንተ፡ ወይቤ፡ ሰይጣን፡ ሶቤሃ፡ ቅድመ፡ እግዚአብሔር፡ ሖርኩ፡ መትሕተ፡ ሰማይ፡ ወአንሶሰውኰ፡ ኵለሄ፡ ወመጻእኩ፡፡ ወይቤሎ፡ እግዚአብሔር፡ ለሰይጣን፡ ዑቅኬ፡ ከመዝ፡ ኢተሐሊ፡ ላዕለ፡ ቍልዔየ፡ ኢዮብ፡ እስመ፡ አልቦ፡ ዘከማሁ፡ በዲበ፡ ምድር፡ ብእሲ፡ የዋህ፡ ወጻድቅ፡ ወኄር፡ ወንጹሕ፡ ወፈራሄ፡ እግዚአብሔር፡ ወይትገኅሥ፡ ምስለ፡ ልቡ፡ እምኵሎ፡ ምግባር፡ ሕሱም፡ ወዓዲ፡ የዋህ፡ ወአንተስትቤ፡ ታኅጐሎ፡ ንዋዮ፡ በከንቱ። ወተሰጥዎ፡ ሰይጣን፡ ለእግዚአብሔር፡ ወይቤ፡ ማእስ፡ ቤዛ፡ ማእስ፡ ኵሎ፡ ዘአጥረየ፡ ይሁብ፡ ሰብእ፡ ቤዛ፡ ነፍሱ። ወባሕቱ፡ ፈኑ፡ እዴከ፡ ወግሥሥ፡ አፅዕምቲሁ፡ ወሥጋሁ፡ ዳእሙ፡ እመ፡ ውስተ፡ ገጽከ፡ ኢባረከከ፡፡ 6፡ ወይቤሎ፡ እግዚአብሔር፡ ለሰይጣን፡ ናሁ፡ መጠውኰከ፡ ውስተ፡ እዴከ፡ ሥጋሁ፡ ወአፅዕምቲሁ፡ ወዳእሙ፡ ነፍሶ፡ ዑቅ፡፡ 7፡ ወወፅአ፡ ሰይጣን፡ እምቅድመ፡ እግዚአብሔር፡ እንዘ፡ ይትፌሣሕ፡ ወአኅዞ፡ ለኢዮብ፡ ዝልጋሴ፡ እኩይ፡ እምእግሩ፡ እስከ፡ ርእሱ። ወነሥአ፡ ገልዐ፡ ወአኅዘ፡ ይሕክከ፡ ቍስሎ፡ ወነበረ፡ አፍኣ፡ እምሀገር፡ ወሰከበ፡ ውስተ፡ መሬት፡ ወሐመድ፡፡ 9፡ ወኃሊፎ፡ ብዙኅ፡ መዋዕል፡ ትቤሎ፡ ብእሲቱ፡ ለኢዮብ፡ እስከ፡ ማእዜኑ፡ ትትዔገሥ፡ በየውሃት፡ ባርኮ፡ ለእግዚአብሔር፡ ወሙት፡ ትብልኑ፡ ዓዲ፡ እጸንሖ፡ ለእግዚአብሔር፡ ኅዳጠ፡ መዋዕለ፡ ወዓዲ፡ አትዔገሥ፡ ወእሴፎ፡ ሕይወትየ፡ ዘትካት። ወናሁ፡ ማሰነ፡ ዝክርከ፡ አምድር፡ ደቂቅየኒ፡ ወአዋልድየኒ፡ ሞቱ፡ ከርሠ፡ ዚአየ፡ ሐመ፡ በሕማመ፡ ማሕምም፡ ሠራኅኩ፡ ወፃመውኩ፡ በከንቱ። ወአንተሂ፡ ትነብር፡ ውስተ፡ መግል፡ ወዕፄያት፡ ወኵሎ፡ ሌሊተ፡ ታንዖርር፡ ወአነሂ፡ አዓውድ፡ ወእተሃል፡ ወአሐውር፡ አምንሔር፡ ብሔር፡ ወእምቤት፡ ቤተ፡ ወእጸንሕ፡ እምነግህ፡ እስከ፡ የዓርብ፡ ፀሐይ፡ ከመ፡ አዕርፍ፡ አምፃማየ፡ ወእምሕማም፡ የዘላዕሌየ፡ ወባሕቱ፡ ይእዜ፡ ንብብ፡ ቃለ፡ ላዕለ፡ እግዚአብሔር፡ ወሙት፡፡ 12፡ ወነጸራ፡ ኢዮብ፡ ወይቤላ፡ ከመ፡ አሐቲኑ፡ አምዓብዳት፡ አንስት፡ ተናገርኪ፡ ሠናይተ፡ ነሣእነ፡ እምእደ፡ እግዚአብሔር፡ ወእኪተሰ፡ ኢንትዔገሥኑ፡ እንከ፡ ወበዝ፡ ኵሉ፡ ዘረከቦ፡ አልቦ፡ ዘአበሰ፡ ኢዮብ፡ ላዕለ፡ እግዙአብሔር።

Chapter 3 ወእምድኅረዝ፡ ከሠተ፡ ኢዮብ፡ አፉሁ፡ ወረገማ፡ ለዕለት፡ እንተ፡ ባቲ፡ ተወልደ። ወይቤ፡ ለትጥፋእ፡ ይእቲ፡ ዕለት፡ እንተ፡ ባቲ፡ ተወልኩ፡ ወሌሊታኒ፡ እንተ፡ ባቲ፡ ይቤሉ፡ ተባዕት፡ ውእቱ። ለትጽልም፡ ይእቲ፡ ዕለት፡ ወኢይትኃሠሣ፡ እግዚአብሔር፡ በላዕሉ፡ ወኢይምጻእ፡ ብርሃን፡ ውስቴታ። ወይርከባ፡ ጽልመት፡ ወይድፍና፡ ጽላሎተ፡ ሞት፡ ወይም፡ ጽኣ፡ ቆባር፡ ርግምተ፡ ለትኩን፡ ይእቲ፡ ዕለት። ወይምጽኣ፡ ጽልመት፡ ለይእቲ፡ ሌሊት፡ ወኢተሀሉ፡ ውስተ፡ መዋዕለ፡ ዓመት፡ ወኢትትኈለቊ፡ ውስተ፡ መዋዕለ፡ አውራኅ። ወለይእቲ፡ ዕለት፡ ፃዕር፡ ለይርከባ፡ ወኢይምጻእ፡ ውስቴታ፡ ፍሥሓ፡ ወኃሤት። ዳእሙ፡ ይርግማ፡ ዘረገማ፡ ለይእቲ፡ ዕለት፡ ዘሀለዎ፡ ይምትሮ፡ ለዓቢይ፡ አንበሪ። ለይጽልሙ፡ ከዋክብቲሃ፡ ለይእቲ፡ ሌሊት፡ ወይንበሩ፡ ኀበ፡ ኢይሬእዩ፡ ብርሃነ። እሰመ፡ ኢዓፀዉ፡ አንቀጸ፡ ከርሣ፡ ለእምየ፡ ወኢይርእዩ፡ ቤዘ፡ እንዘ፡ ይሠርቅ፡ ዘኢያእተቱ፡ ሕማመ፡ እምአዕይንትየ። ለምንት፡ በውስተ፡ ከርሥ፡ ኢሞትኩ፡ ወወፂእየኒ፡ እምከርሥ፡ ዘኢተኃጐልኩ፡ ሶቤሃ። ለምንት፡ ጸንዐ፡ ብረክየ፡ ወለምንት፡ ተሐፀንኩ፡ በጥብ። ሶበ፡ ሰከብኩ፡ አሜሃ፡ ይእዜ፡ እምአርመምኩ፡ ወሶበሂ፡ ኖምኩ፡ አሜሃ፡ እምአዕረፍኩ፡ ይእዜ። ምስለ፡ ነገሥት፡ እለ፡ መከሩ፡ እኩየ፡ በዲበ፡ ምድር፡ ወኰነኑ፡ በመጥባሕት። አው፡ ምስለ፡ መላእክት፡ ወአብዕልት፡ እለ፡ አብዝኅዎ፡ ለወርቅ፡ ወመልኡ፡ አብያቲሆሙ፡ ብሩረ። ወሶበኒ፡ ኮንኩ፡ ከመ፡ ፃዕፃፅ፡ ዘአድሐጾቶ፡ ማኅፀነ፡ እሙ። ህየ፡ ኃጥአን፡ የኃድጉ፡ ድንጋፄ፡ ወይውዕዩ፡ በመቅሠፍተ፡ መዓቱ። ወህየ፡ የዓርፉ፡ እለሂ፡ ተዕፅሩ፡ በሥጋሆሙ፡ ኅቡረ፡ እምፍ፡ ጥረተ፡ ዓለም። ህየ፡ ሀለዉ፡ ንኡሳን፡ ወዓቢያን፡ ሕፃናትሂ፡ እለ፡ ኢርእዩ፡ ብርሃነ፡ ወኢሰምዑ፡ ድምፀ፡ ዘያንሶሱ፡ ህየ፡ ሀለዉ፡ ገብርሂ፡ ዘአድለወ፡ ለእግዚኡ፡ ህየ፡ ሀለወ። ለምንት፡ ወሀብኮሙ፡ ብርሃነ፡ ለምሩራን፡ ወሕይወተ፡ ለዕዑራነ፡ ነፍስ። እለ፡ ይትሜነይዎ፡ ለሞት፡ ወኢይረክብዎ፡ ወይፈርህዎ፡ ከመ፡ መድፍን፡ ወይትፌሥሑ፡ ለእመ፡ አድንዕዎ፡ ዕረፍቱ፡ ለሰብእ፡ ሞት፡ ወዓዐዎ፡ እግዚአብሔር፡ እምአፍሁ። ወአምድኅረ፡ ማእረርየ፡ ረከበተኒ፡ መቅሠፍትየ። እበኪ፡ በእንተ፡ ግሩም፡ ዘረከበኒ፡ ወፍርሃት፡ እንተ፡ ኢተሐዘብኩ፡ ረከበተኒ፡ ወእንተ፡ ኢሐለይኩ፡ ተዳደቀተኒ። ኢያርመምኩ፡ ወኢያዕረፍኩ፡ ወኢድኅንኩ፡ ወበጽሐኒ፡ መቅሠፍት፡ ወመንሱት።

Chapter 4 ወእደ፡ ተናገረ፡ ኤልፋዝ፡ ቴሜናዊ፡ ተሠጥወ። ወይቤ፡ ኢታብዝኅ፡ ነቢበ፡ እንዘ፡ አንተ፡ በፃማ፡ አብዝኆ፡ ነገር፡ ምንት፡ ይበቊዓከ። አንተ፡ ዘእምገሠዕኮሙ፡ ለብዙኀን፡ ወእምናዘዝከ፡ እደወ፡ ድኩማነ። ወእምአንሣእኮሙ፡ በነገርከ፡ ለድውያን፡ ወእምአጽናዕከ፡ ብርከ፡ ስኡናን። ወይእዜሰ፡ እስመ፡ መጽአከ፡ ሕማም፡ ወገሠሠከ፡ ለከ፡ ለሊከ፡ ተአንብዝ፡ ገባእከ፡ እንከ፡፡ ቀዳሚሁ፡ አኮኑ፡ ዕበድ፡ ውእቱ፡ ፍርሃትከ፡ ወተስፋከ፡ ወእኩይ፡ ፍኖትከ። ተዘከር፡ ከመ፡ አልቦ፡ ንጽሕ፡ ዘተኃጕለወኢይጠፍኡ፡ ጻድቃን፡ ወኢይሤረዉ። ወበከመሰ፡ ርኢነ፡ እለ፡ የሐርስዎ፡ ለኃጢአት፡ ወይዘርእዎ፡ ጠአርሩ፡ መቅሠፍት፡ ሎሙ። ወይትኀጐ፡ በትእዛዘ፡ እግዚአብሔር፡ ወይማስኑ፡ በመቅሠፍተ፡ መዓቱ። ጣኅረ፡ አንበሳ፡ ወንቃወ፡ አንበሳዊት፡ ወግርማ፡ አክይስት፡ ጠፍአ። ወስኳእትኒ፡ ኃልቀ፡ ኃጢኦ፡ ዘይበልዕ፡ ወእጕለ፡ አናብስት፡ ተኃለቁ፡ በበይናቲሆሙ፡፡ 12፡ ሶበሰ፡ አሐተ፡ ጽድቀ፡ ገበርከ፡ አንተ፡ ዝ፡ ኵሉ፡ እምኢረ፡ ከበከ፡ በኀቤየ፡ ነገር፡ ይትነሣእ፡ ወትሰምዕ፡ ዕዝንየ፡ ቃለ፡ እምኔሁ፡ ቀዳሚሁኒ፡ ኢየአምኖ፡ ለዘነገረኒ። ግርማ፡ ሌሊት፡ ወመጽዓሞ፡ ይመጽኦ፡ ለሰብእ፡ ግብተ። ፍርሃት፡ ደፈነኒ፡ ድንጋፄ፡ ወረዓድ፡ አኀዘኒ፡ ወበሕቁ፡ አንተ፡ ልቀላ፡ አዕፅምትየ። ወኃለፈት፡ ነፍስየ፡ እምገጽየ፡ ወአንሶጠጠኒ፡ ሥዕርተ፡ ርእስየ፡ ወሥጋየ። ተንሣእኩ፡ ወኢያእመርኩከ፡ ነጸርኩከ፡ ወኢጠየቁከ፡ ወአልብከ፡ ራዕይ፡ ቅድመ፡ አዕይንትየ፡ ዳእሙ፡ ጽላሎተከ፡ እሬኢ፡ ወቃለከ፡ እሰምዕ። ወባሕቱ፡ አይኑ፡ ውስተ፡ መዋቲ፡ ዘይነጽሕ፡ በቅድመ፡ እግዚብሔር፡ ወአይኑ፡ ሰብእ፡ ዘይጸድቅ፡ በምግባሩ። ለላእካኒሁ፡ ጥቀ፡ ኢይትአመኖሙ፡ ወለመላእክቲሁኒ፡ ፅዑበ፡ ይትሔዘቦሙ። ወለእለ፡ ይነብሩ፡ ውስተ፡ አብያተ፡ መሬት፡ ወንሕነኒ፡ እም፡ ውስተ፡ አሐዱ፡ ዕቡር፡ ወይረክቦሙ፡ ብልዓተ፡ ዕፄ፡ ወኢይሔልዩ፡ እምነግህ፡ እሰከ፡ ሠርክ። ወኢይሄልዉ፡ እምነግህ፡ እስከ፡ ሠርክ፡ እስመ፡ ስእኑ፡ አድኅኖ፡ ወረዲአ፡ ርእሶሙ፡ ተኃጕሉ። ወነፍሖሙ፡ ነፋስ፡ ወየብሱ፡ ወይትኃጐሉ፡ እስመ፡ አልቦሙ፡ ጥበብ።

Chapter 5 ጸውዕ፡ እስኩ፡ እመቦ፡ ዘያወሥአከ፡ ወእመቦ፡ እመላእክቲሁ፡ ቅዱሳን፡ ዘትሬኢ። እስመ፡ ለዕቡድ፡ ይቀትሎ፡ መዓት፡ ወዕቡድኒ፡ ይመውት፡ በቅንአት። አንሰ፡ ርኢኩ፡ ብቁለ፡ ሥርዎሙ፡ ለዓብዳን፡ ወበጊዜሃ፡ ጠፍአት፡ ንብረቶሙ፡ ወወፅኡ፡ እምሕይወቶሙ። ለውሉዶሙኒ፡ ይኰርዕዎሙ፡ በውስተ፡ አናቅጽ፡ ወያመነዝዝዎሙ፡ ወአልቦ፡ ዘያድኅኖሙ። ዘእሙንቱ፡ ዘገቡ፡ ጻድቃን፡ ይበልዑ፡ ሎሙሰ፡ ትፀብዖሙ፡ እኪት፡ ወይትመሰው፡ ኃይሎሙ። እስመ፡ አኮ፡ እምድር፡ ዘይወፅአ፡ ፃማ፡ ወአኮ፡ እምውስተ፡ አድባር፡ ዘይበቊል፡ ሕማም። ሰብእሰ፡ ይትወለድ፡ ለሥራሕ፡ ወእጕለ፡ አዕዋፍ፡ ያሌዕሉ፡ ዖፈ። ወባሕቱ፡ ለእግኢአብሔር፡ እስእሎ፡ ወእፄውዖ፡ ለእግዚአ፡ ኵሉ፡ ዘገብረ፡ ዓቢያተ፡ ዘአልቦ፡ ኍልቊ፡ ክቡራተ፡ ወመንክራተ፡ ዘአልቦ፡ አሠር። ወገብረ፡ መንክራተ፡ ዘአልቦ፡ ኍልቊ። ዘይሁብ፡ ዝናመ፡ ላዕለ፡ ምድር፡ ወይፌኑ፡ ማየ፡ መትሕተ፡ ሰማይ። ዘያሌሎሙ፡ ለትሑታን፡ ወያነሥኦሙ፡ ለግዱፋን። ወይመይጥ፡ ምክሮሙ፡ ለእለ፡ በጉሕሉት፡ ወኢይገብሩ፡ ርትዐ፡ እደዊሆሙ። ዘይእኅዞሙ፡ በምክሮሙ፡ ለጠቢባን፡ ወያጠፍአ፡ ሕሊና፡ ሆሙ፡ ለእለ፡ ይጸፍርዋ፡ ለምክር። መዓልተ፡ ይትራክቦሙ፡ ጽልመት፡ ወያረመስሱ፡ ቀትረ፡ ከመ፡ ዕውር፡ ወከመ፡ ሌሊት፡ ወይትሐጐሉ፡ ውስተ፡ ቀትል። ወያመስጥ፡ ድኩም፡ እምእደ፡ እስመ፡ ኃያል፡ ለፅቡስሂቦ፡ ተስፋ፡ ወይትፈፀም፡ አፉሁ፡ ለዓማፂ። ወባሕቱ፡ ብፁዕ፡ ብእሲ፡ ዘእግዚአብሔር፡ ገሠዖ፡ ወኢታ፡ ስተጽሕብ፡ ተግሣዐ፡ እግዚአብሔር። እስመ፡ ውእቱ፡ ይቈስል፡ ወካዕበ፡ ይፌውስ፡ ይቀሥፍሂ፡ ወይሣሃል፡ እዴሁ። ስድሰ፡ ያድኅነከ፡ እመንሱት፡ ወበሳብፅሰ፡ ኢትገሥሠከ፡ እኪት። እምነ፡ ረኃብ፡ ያድኅነከ፡ እሞት፡ ወበውስተ፡ ጸብዕኒ፡ እምእደ፡ ኲናት፡ ያነግፈከ። ወይሤውረከ፡ እመቅሠፍተ፡ ልሳን፡ ወኢትፈርህ፡ እምእኪት፡ እንተ፡ ትመጽእ። ወትስሕቆሙ፡ ለኃጥአን፡ ወለዐማዕን፡ ወኢትፈርህ፡ እምአራዊተ፡ ኅለት፡ ወይሰነዓዉከ፡ አራዊተ፡ ገዳም። ወሶቤሃ፡ ተአምር፡ ከመ፡ ዳኅን፡ ቤትከ፡ ወአልቦ፡ ዘይትነከይ፡ እምንብረትከ። ወትጤቅ፡ ከመ፡ ብዙኅ፡ ዘርእከ፡ ወደቂቀከኒ፡ ከመ፡ ሣዕረ፡ ፂዖት፡ ሥሙር። ወተአቱ፡ ውስተ፡ መቃብሪከ፡ ከመ፡ እክለ፡ ማእረር፡ ሥሙር፡ ወከመ፡ ክምር፡ ዘኵሎ፡ ጊዜ፡ ይነሥኡ፡ እምኔሁ። ናሁ፡ ዝ፡ አሠር፡ ዘአቅፃዕነ፡ ወዝንቱ፡ ዘሰማዕነ፡ ወአንተ፡ ባሕቱ፡ አእምር፡ ዘገበርከ።

Chapter 6 ወእደ፡ ተናገረ፡ ኦየፐብ፡ ተሠጥወ፡ ከመዝ፡ ወይቤ። ሶበ፡ አሐዱ፡ እምኔክሙ፡ ይደልዋ፡ ለመቅሠፍትየ፡ ወይነሥኣ፡ ኅቡረ፡ በመዳልው፡ ለሕማምየ፡ እስመ፡ ይከብድ፡ እምኆፃ፡ ባሕር። ወባሕቱ፡ ሐሰተ፡ ይመሰል፡ ነገርየ፡ ዘእሙን፡ ወናሁ፡ አሕፃሁ፡ ለእግዚአብሔር፡ ላዕለ፡ ሥጋየ፡ ወኅምዙ፡ ይሰርበኒ፡ ደምየ፡ ወሶበ፡ አእኅዝ፡ እንብብ፡ ይደጕጸኒ፡ ሥጋየ። ቦኑ፡ ለከንቱ፡ ይነቁ፡ ሐለስትዮ፡ በውስተ፡ ሐመልማል፡ እኮኑየኃሥሥ፡ ዘይበልዕ፡ ወይነቁኑ፡ ላሕም፡ እንዘ፡ ይበልዕ፡ ውስተ፡ ኀል፡ ወይቀምሕ። አው፡ ይትበላዕኑ፡ እክል፡ ዘአንበለ፡ ፄው፡ ወቦኑ፡ ጣዕም፡ ለሐረፈ፡ ሐምል፡ ዘይሰመይ፡ ህጥሜ፡ ወቦኑ፡ ጣዕም፡ ለነገረ፡ ከንቱ። ኢይክል፡ አዕርፎ፡ ነፍስየ፡ ወእሬኢ፡ ንሰሐተ፡ ሥጋየ፡ ከመ፡ ብኍባኄ፡ አንበሳ፡፡ 7፡ ሶበ፡ ይመጽአኒ፡ ጸሎት፡ ወይሁበኒ፡ እግዚአብሔር፡ ተስፋየ። ወአኀዘ፡ እግዚአብሔር፡ ወፈጸመ፡ ወቀተለኒ፡ ለዝሉፉ። ሶበ፡ ተሐንዐ፡ ዝኅርየ፡ ወአትመያየጥ፡ ውስተ፡ አረፋቲሁ፡ ወኢይምሕክ፡ እስመ፡ ኢሐሰውኩ፡ ቃለ፡ አምላኪየ፡ ቅዱስ። ምንትኑ፡ ኃይልየ፡ ከመ፡ አትዓገሥ፡ ወምንትኑ፡ መዋዕ፡ ልየ፡ ከመ፡ ታስተአዝዝ፡ ነፍስየ። ወቦኑ፡ ዘብርት፡ ሥጋየ፡ ወሚመ፡ ኃይለ፡ እብንኑ፡ ኃይልየ። አኮኑ፡ ቦቱ፡ ተወከልኩ፡ ወለምንት፡ ርኅቀ፡ እምኔየ፡ ረድኤቱ። ወተኀየየኒ፡ ሣህሉ፡ ወኢነጸረኒ፡ እግዚአብሔር፡ ወኢሐወጸኒ፡ በሣህሉ። አዝማድየኒ፡ ኢያአመሩኒ፡ ከመ፡ ውኂዝ፡ ዘነጽፈ፡ ወከመ፡ ማዕበል፡ ዘኃለፈ፡ እልክቱ፡ እለ፡ ይፈርሁኒ፡ እሙንቱ፡ ይሰሕቁኒ። ከመ፡ በረድ፡ ወከመ፡ አስሐትያ፡ ዘጠግአ፡ ወእምዝ፡ ተመስወ፡ መዊቆ፡ ወኢተዓውቀ፡ ኀበ፡ ነበረ። ከማሁ፡ አነሂ፡ ወፃእኩ፡ እምኵሉ፡ ወተኃጐልኩ፡ ወወፃእኩ፡ እምቤትየ። ተአምሩ፡ ግዕዞሙ፡ ለቴሜኖን፡ ወእከዮሙ፡ ለሳባን፡ ወተዓውሮቶሙ። ወርቱዕሰ፡ ይትኀፈሩ፡ እለ፡ ይትዌከሉ፡ በንዋዮሙ፡ ወበአብያቲሆሙ። ከመ፡ አንትሙ፡ መጻአክሙ፡ ዘእንበለ፡ ምሕረት፡ ወርእ፡ የክሙ፡ ቊስልየ፡ ኢፈራህክሙ፡ በእንተ፡ ምንት። ቦኑ፡ ዘሰአልኩክሙ፡ ወሚመ፡ ኃይለ፡ ዚአክሙ፡ ተመነይኩ፡ ከመ፡ ታድኅኑኒ፡ እምፀርየ፡ ወታንግፉኒ፡ እምእደ፡ ዘይትኄየለኒ። መሀሩኒ፡ መሀሩኒ፡ ወአነ፡ አጸአክሙ፡ ወእመቦሰ፡ ዘስሕትኩ፡ አጠይቁኒ፡ እስመ፡ ሐሰተ፡ ይመስል፡ ነገርየ፡ ዘእሙን። ወአኮ፡ በኀቤክሙ፡ ዘእስእል፡ ኃይለ፡ ወኑዛዜ፡ ነገርክሙኒ፡ ኢያስተሕተኒ፡ ወኢይሔውዘኒ፡ ሣዕሣዐ፡ ቃልቅከሙ፡ እስመ፡ ስሕቅሙ፡ ላዕለ፡ ዐርክክሙ፡ ወተሣለቅክሙ፡ ላዕለ፡ እጓለ፡ ማውታ። ይእዜኒ፡ ነጺርየ፡ ገጸክኑ፡ እንዘ፡ ኢይሔስወክሙ፡ ንበሩ፡ ዳአሙ፡ ኢተዐምፁ፡ ወበጽድቅ፡ ካፅበ፡ ተናገሩ። እስመ፡ አልቦ፡ ቃለ፡ ዓመፃ፡ ውስተ፡ ልሳንየ፡ ወጥበበ፡ ይነብብ፡ ጕርዔየ።

Chapter 7 ቀዳሚሁ፡ አኮኑ፡ ጽላሎት፡ ውእቱ፡ ሕይወት፡ ለእጓለ፡ እመ፡ ሕያው፡ በዲበ፡ ምድር፡ ወንብረቱ፡ ከመ፡ ሀሳብ፡ ዘለለዕለቱ። ወእመ፡ አኮ፡ ከመ፡ ገብር፡ ዘያደሉ፡ ለእግዚኡ፡ ወያጸምእ፡ ጸሎቶ፡ አው፡ ከመ፡ ገባኢ፡ ዘይሴፎ፡ ዓስቦ። ከማሁ፡ አነሂ፡ ተዓገሥኩ፡ አውራኀ፡ ከንቱ፡ ወሌሊተኒ፡ ተውህበኒ፡ ሊተ፡ ፃዕር። እመ፡ ኖምኩ፡ እብል፡ ማእዜ፡ ይጸብሕ፡ ሊተ፡ እንጋ፡ ወእመ፡ ነቃሕኩ፡ ካዕበ፡ እብል፡ ማእዜ፡ ይመሲ። ጸገብኩ፡ ሕማመ፡ እምነግህ፡ እስከ፡ ሠርክ፡ ወባኍበኈ፡ ሥጋየ፡ በፅሄያት፡ ወመግል፡ ወኃለቁ፡ እንዘ፡ አሐክክ፡ ጸውበ፡ ወእንጳንጴ፡ ወሐመደ፡ ኮንኩ። ወቀላለ፡ ኮነት፡ ሕይወትየ፡ ከመ፡ ነገረ፡ ዘየአንም፡ ወተኃጐልኩ፡ በተሰፍዎ፡ ከንቱ። ተዘከር፡ ከመ፡ ነፍስ፡ ውእቱ፡ ሕይትየ፡ ወኢትገብእ፡ እንከ፡ ትርአይ፡ ዓይንየ፡ ሠናይተ፡፡ 8፡ ወኢይሬኢ፡ ዓይነ፡ ዘይሬአየኒ፡ ወእመኒ፡ ነጸረኒ፡ ኢይሄሎ፡ እንከ። ከመ፡ ደመና፡ ዘተነጽሐ፡ እምሰማይ፡ እስመ፡ እምከመ፡ ወረደ፡ ሰብአ፡ ውስተ፡ መቃብር፡ ኢየዓርግ፡ እንከ። ወኢይገብእ፡ ውስተ፡ ቤት፡ ወኢየአምር፡ እንከ፡ ብሔሮ። ወበእንተ፡ ዝንቱ፡ አነሂ፡ ኢይምህከ፡ አፉየ፡ ወእነብብ፡ ፃዕረ፡ መንፈስየ፡ ወአከሥት፡ ምረረ፡ ነፍስየ፡ ዘላዕሌየ፡ ከመ፡ ወባሕር፡ ኮነ፡ አንብዕየ። ባሕርኑ፡ አው፡ ቀላይ፡ እስመ፡ አዘዝከ፡ ዓቃቤ፡ ላዕሌየ። ወእቤ፡ ዓራትየኑ፡ እንጋ፡ ይናዝዘኒ፡ ወያልህየኒሁ፡ እንጋ፡ ምስካብየ። ወትጌርመኒ፡ በሕልም፡ ወታደነግዐኒ፡ በራእይ። ወኮነ፡ ሥሉጠ፡ በነፍስየ፡ ወበመንፈስየ፡ ወአሞቶን፡ ለአዕይንትየ፡ ቦኑ፡ ለዓለም፡ አሐዩ፡ ከመ፡ እትዓገሥ፡ ርኅቀ፡ እምኔየ፡ ወከንቱ፡ ውእቱ፡ ሕይወትየ። ምንት፡ ውእቱ፡ ሰብአ፡ ከመ፡ ታዕብዮ፡ ወከመ፡ ተሐውጽ፡ ልቦ። አው፡ ከመ፡ ትፍትኖ፡ እስከ፡ ይበጽሕ፡ ኀቤከ፡ አው፡ ከመ፡ ትኰንኖ፡ በውስተ፡ ዓራቱ። እስከ፡ ማእዜኑ፡ ኢታስሕተኒ፡ እስከ፡ እውኅጥ፡ ምራቅየ፡ እንዘ፡ የሐንቀኒ። ወእነሂ፡ አበስኩ፡ አነ፡ ምንተ፡ እንከ፡ እክል፡ ገቢረ፡ ለከ፡ ኦ፡ ዘተአምር፡ ልበ፡ እጓለ፡ እመሕያው፡ ለምንት፡ ረፅይከኒ፡ ለመቅሠፍት፡ ለከ፡ ወለምንት፡ ፈጠርከኒ፡ በአምሳሊከ፡ አነሁ፡ ዳአሙ፡ ከበድኩከ። ወለምንት፡ ኢገበርከ፡ በዘይትረሳዕ፡ ኃጢአትየ፡ ወበዘይነጽሕ፡ ጌጋይየ፡ ወይአዜሰ፡ እወርድ፡ ውስተ፡ ምድር፡ ኀበ፡ ኢይነቅሕ፡ እንከ።

Chapter 8 ወእደ፡ ተናገረ፡ በልዳዶስ፡ አውኬናዊ፡ ተሰጥወ፡ ወይቤ። እስከ፡ ማእዜኑ፡ ትነብብ፡ ከመዝ፡ መንፈሰ፡ ነቢብኑ፡ ውስተ፡ አፉከ። ቦኑ፡ እግዚአብሔር፡ ይኴንን፡ በዓመፃ፡ ወፈጣሬ፡ ኵሉ፡ የሀውኮኑ፡ ለጻድቅ። እመሰኬ፡ አበሱ፡ ደቂቅከ፡ ቅድሜሁ፡ ፈነወ፡ በእንተ፡ ኃጢእቶሙ:: ወአንተሰ፡ ጊሥ፡ ኀበ፡ እግዚአብሔር፡ ወጸሊ። ለእመ፡ ጻድቅ፡ አንተ፡ ወንጹሕ፡ ይሰምዓከ፡ ፍጡነ፡ ስእለ፡ ተከ፡ ወየዓሥየከ፡ ፍዳ፡ ጽድቅከ። ወእመ፡ ውኁድ፡ ቀዳሚትከ፡ አልቦ፡ ኊልቊ፡ ለደኃሪትከ። ከመዝ፡ ይብል፡ ኢዮብ፡ ይትከሃለኒኑ፡ እዕርግ፡ ሰማየ፡ ወእስርቅ፡ መዛግብቲሁ፡ ወእመቀ፡ ምድር፡ ከማሁ፡ ተሰአሎሙ፡ ለቀደምተ፡ ዓለም፡ ወሕትቶሙ፡ ለአበው፡ በበሕዘዚቢሆሙ። ሣሬት፡ ንሕነ፡ ወኢነአምር፡ ወጽላሎት፡ ውእቱ፡ ሕይወትነ፡ ዲበ፡ ምድር። ወእሙንቱ፡ ይሜህሩከ፡ ወይነግሩከ፡ ወያወጽኡ፡ ለከ፡ ነገረ፡ እምልቦሙ። ይበቊልኑ፡ ሣዕር፡ ዘእንበለ፡ ማይ፡ ወይልህቅኑ፡ ሐመልማል፡ ዘእንበለ፡ ይስቅይዎ፡፡ 12፡ ወኵሉ፡ ሣዕር፡ ዘኢይሰቲ፡ ማየ፡ ይየብሰ፡ ዘእንበለ፡ ይግምድዎ። ከማሁ፡ ደኃሪቶሙ፡ ለኵሎሙ፡ እለ፡ ይረስዕዎ፡ ለእግዚአብሔር፡ ወትጠፍእ፡ ተስፋሆሙ፡ ለኃጥአን። ወምዝቡር፡ ውእቱ፡ ወሣሬት፡ ይከውን፡ ማኅደሮ። ወእመሂ፡ አጽንዖ፡ ለቤቱ፡ ኢይቀውም፡ ዘወጠነሂ፡ ኢይፌጽም። ወስሕቡብ፡ ውእቱ፡ ቤቱ፡ በታሕተ፡ ፀሐይ፡ ወውስተ፡ ገነቱ፡ ልምላሜሁ፡ ይየብሰ። ወበእከዩሂ፡ የኀልቅ፡ ኃይሉ፡ ወማእከለ፡ ጾላእት፡ ይበይት፡ ወውስተ፡ ሐዝሐዝ፡ የሐዩ። ወእመሰ፡ ውኅጦ፡ ምድር፡ ወሐሰዎ፡ ኢርኢኩ፡ ዘከመዝ፡ እስመ፡ ከማሁ፡ ይትገፈትዑ፡ ረሲዓን። ወካልእ፡ ይበቊል፡ እምድር። እግዚአብሔርሰ፡ ኢይገድፎ፡ ለየዋህ፡ ወኢያጸንዕ፡ እደ፡ እኩያን፡ ወኢይትሜጦ፡ መባእ፡ ኃጥአን። አፈ፡ ራትዓን፡ ይመልእ፡ ሰሐቀ፡ ወየአምና፡ ከናፍሪሆሙ። ወጻላእቶሙኒ፡ ይለብሱ፡ ኃፍረተ፡ ወይጠፍእ፡ ቤተ፡ ኃጥአን።

Chapter 9 ወእደ፡ ተናገረ፡ ኢዮብ፡ ተሰጥወ፡ ወይቤ። አማን፡ አአምር፡ ከመ፡ ከመዝ፡ ውእቱ፡ ወእፎ፡ ይከውን፡ ጻድቅ፡ ንጹሐ፡ በቅድመ፡ እግዚአብሔር። ወእመሂ፡ ፈቀደ፡ ይትዋሣእ፡ ኢይሠጠዎ፡ አሐተ፡ ቃለ፡ እምእልፍ። ጠቢበ፡ ምክር፡ ውእቱ፡ ወዓቢየ፡ ኃይል፡ መኑ፡ ውእቱ፡ እኩየ፡ ከዊኖ፡ ዘቆመ፡ ቅድሜሁ። ዘያንቀለቅሎሙ፡ ለአድባር፡ ወኢይሬእይዎ፡ ወይገፈትዖሙ፡ በመዓቱ። ወያድለቀልቃ፡ ለምድር፡ እመሠረታቲሃ። ወለሰማይ፡ የሀውኮን፡ ለአዕማዲሃ፡ ወያጸልሞሙ፡ ለከዋ፡ ክብቲሃ። ዘየሐውር፡ መልዕልተ፡ ባሕር፡ ከመ፡ ዲበ፡ ምድር፡ ወሰፍሖ፡ ለሰማይ፡ ባሕቲቱ። ዘይብላ፡ ለወርኅ፡ ኢትሥርቂ፡ ወገጸ፡ ከዋክብት፡ የኃትም፡ ዘገብሮ፡ ለትርያ፡ ወአስጋብኦ፡ ወለደብርንሂ፡ ወይኌል፡ ቆሙ፡ ለከዋክብተ፡ ጽባሕ። ዘይገብር፡ ብዙኀ፡ ወያስተጋብእ፡ ወይሬኢ፡ ወይኌልቆሙ፡ ለአሕዛብ፡ ዘገብረ፡ ዓቢያተ፡ ዘአልቦ፡ ኍልቁ። እመኒ፡ ተዓደወኒ፡ ኢይሬእዮ፡ እመኒ፡ ኃለፈ፡ ኢየአምሮ። ወእመኒ፡ አእተተ፡ ውእቱ፡ መኑ፡ ያገብእ፡ ወመኑ፡ ዘይብሎ፡ ምንተ፡ ገበርከ። ወውእቱ፡ እግዚአብሔር፡ ኢተመይጠ፡ እመቅሠፍትየ፡ ወእምኔሁ፡ ተቀጽዑ፡ አናብርት፡ ዘመትሕተ፡ ሰማይ። ወእፎኬ፡ ይሰምዓኒ፡ ቃልየ፡ ወይፌከሮ። ወእመኒ፡ ጸዋዕኩ፡ በጽድቅ፡ ወኢሰምዓኒ፡ እስእል፡ ፍትሐ፡ ዚአሁ። እመኒ፡ ጸዋዕኩ፡ በጽድቅ፡ ወአውሥአኒ፡ ኢየአምን፡ ከመ፡ ሰምዓኒ። ዓውሎሁ፡ ይቀጠቅጠኒ፡ ውብዙኅ፡ አቊሰለኒ፡ በከንቱ። ወኢኀደገኒ፡ ከመ፡ አዕርፍ፡ ወአጽገበኒ፡ ኅምዘ። እስመ፡ ጽኑዐ፡ ይእኅዝ፡ ወመኑ፡ ይትቃወሞ፡ ለኵነኔሁ፡ እመኒ፡ አፉየ፡ ዓመፀ፡ እምጽድቅ፡ ወእመሂ፡ አሕዐፀፅኩ፡ እምጽድቅ፡ ዕፁብ፡ ይርከበኒ። ወንጹሕ፡ አነ፡ ወኢየአምር፡ ነፍስየ፡ ወዳዕሙ፡ ጠፍአት፡ ሕይወትየ። ወባሕቱ፡ እቤ፡ ዓቢይ፡ ወኃያል፡ ይፌኑ፡ መቅሠፍተ፡ እስመ፡ አኩይ፡ ሞቶሙ፡ ለኃጥአን፡ ወይስሕቅዎሙ፡ ለጻድቃን፡ ወይገብኡ፡ ውስተ፡ እደ፡ ኃጥአን፡ ወይከድንዋ፡ ገጸ፡ መደልዋን፡ ወአነ፡ ምንተኑ፡ አነ። ወሕይወትየኒ፡ ትቀልል፡ እምረዊዐ፡ እለ፡ እምሰጡ፡ ወኢይረክቦሙ፡ እንከ። ወእመኒቦ፡ ሐመር፡ አሠረ፡ ፍኖቱ፡ ኢይትአመር፡ አው፡ ንስር፡ ዘይሠርር፡ ወየኃሥሥ፡ ዘይበልዕ። እመሂ፡ ነበብኩ፡ አልቦ፡ ዘይበቊዕ፡ ወወድቀ፡ ገጽየ፡ በገዓር፡ ወአንቀልቀለ፡ ኵሉ፡ መለያልይየ፡ አእመርኩ፡ እንከሰ፡ ከመ፡ ኢየኃድገኒ፡ ከመዝ። እመሰኬ፡ ኃጥአ፡ አነ፡ ለምንት፡ ኢሞትኩ። ወእመኒ፡ ተሐፀብኩ፡ ወነጻሕኩ፡ ከመ፡ በረድ፡ ወአንጻሕኩ፡ እደውየ፡ በሕቁ። ትጠምዓኒ፡ ውስተ፡ ርስሕት፡ ወታስቈርረኒ፡ ልብስየ። ሶቦሁ፡ ሰብአ፡ ውእቱ፡ ዘይትዋቀሠኒ፡ እምሖርነ፡ ኅቡረ፡ ውስተ፡ ዓውደ። ወዕበሁ፡ ቦ፡ ኅሩይ፡ ዘይፈትሕ፡ ለነ፡ ወያጸምእ፡ ማእከለ፡ ክልኤነ፡ እምተአተተ፡ ዝንቱ፡ በትር፡ እምኔየ። ወእምኢፀብዓኒ፡ ግርማሁ፡ እትናገሮ፡ ወኢይሬእዮ። ወእነግር፡ እንከሰ፡ ወኢይፈርህ።

Chapter 10 ወአልቦ፡ ዘአአምር፡ በዘትፄዓር፡ ነፍስየ፡ እምዕዑብ፡ አወሥአ፡ ቃልየ፡ ወእነብብ፡ እንዘ፡ ትጠወቅ፡ ነፍስየ፡ መረረ። ወእብሎ፡ ለእግዚአብሔር፡ ኢትምሕርኑ፡ ኃጥአ፡ ወለምንት፡ ከመዝ፡ ኰነንከኒ። ይሤንየከኑ፡ እመ፡ አበስኩ፡ እስመ፡ ተኃየይከ፡ ተግባረ፡ እደዊከ፡ ወነጸርከ፡ ምክረ፡ ረሲዓን። ቦኑ፡ ዓይነ፡ ሰብእ፡ ለከ፡ ወበከመ፡ መዋቲኑ፡ ትኔጽር፡ ወትሬኢ። ወመዋዕሊከኒ፡ ከመ፡ ዘሰብእኑ፡ ውእቱ፡ ወዓመቲከኒ፡ ከመ፡ ዘእጓለ፡ እመሕያውኑ፡ ከመ፡ ትኅሥሣ፡ ለኃጢአት፡ ወትሕትት፡ ጌጋይየ። ተአምር፡ ከመ፡ ዘኢአበስኩከ፡ ወባሕቱ፡ መኑ፡ ውእቱ፡ ዘያመስጥ፡ እምዴከ። እደዊከ፡ ፈጠራኒ፡ ወገብራኒ፡ ወእምዝ፡ አፍለስከኒ፡ ወነጻሕከኒ። ተዘከር፡ ከመ፡ እምፅቡር፡ ፈጠርከኒ፡ ወታገብአኒ፡ ካዕበ፡ ውስተ፡ መሬት። ወከመ፡ ሐሊብ፡ ሐለብከኒ፡ ወከመ፡ ግብነት፡ አርጋእከኒ። ወአልበስከኒ፡ ሥጋ፡ ወማእሰ፡ ወአሰርከ፡ አዕፅምትየ፡ በአሥራው። ወወሀብከኒ፡ ሣህለ፡ ወምሕረተ፡ ወሕይወተ፡ ወሐውጾትከ፡ ዓቀበኒ፡ መንፈስየ። ወዝንቱ፡ ኵሉ፡ በኀቤከ፡ ሀሎ፡ አአምር፡ ከመ፡ ትከል፡ ኵሎ፡ ወአልቦ፡ ዘይሰአነከ፡ ምንተኒ። ወሶበሁ፡ አበስኩ፡ እምዓቀብከኒ፡ ወእምአንጻሕከኒ፡ እም፡ ኃጢአትየ። ወአመኒ፡ አበስኩ፡ አሌ፡ ኢተ፡ ወአመኒ፡ ጸደቁ፡ ስእንኩ፡ አንቃዕድዎ፡ ወጸገብክዋ፡ ለኃሣር። ከመ፡ አንበሳ፡ ዘተሠግረ፡ ወተቀትለ፡ ዘኢይትነከር፡ ከማሁ፡ ኮንኩ፡ ወካዕበ፡ ታአትተኒ፡ በሞት፡ ወበሕቁ፡ ትጤስየኒ። ወእምጥንቁ፡ ካዕበ፡ ተሐትተኒ፡ ወአምጻእከ፡ ላዕሌየ፡ ዓቢየ፡ መቅሠፍተ፡ ወፈነውከ፡ ዲቤየ፡ መንሱተ። ወለምንት፡ ኢሞትኩ፡ እንከ፡ ሶበ፡ ታወጽአኒ፡ እምከርሠ፡ እምየ፡ ወኢትርአየኒ፡ ዓይን፡ ወእኩን፡ ከመ፡ ዘኢተፈጠርኩ። ወለምንት፡ ተፈጢርየ፡ ዘኢወርድኩ፡ ውስተ፡ መቃብር፡ ወወጺእየ፡ እምከርሥ፡ ዘኢተኃጐልኩ፡ ሶቤሃ። ወለምንት፡ ውስተ፡ መቃብር፡ ኢያዕረፍኩ፡ አኮኑ፡ ውኁድ፡ መዋዕለ፡ ሕይወትየ፡ ወኁልቈ፡ አውራኅየ። ኅድገኒ፡ ከመ፡ አዕርፍ፡ ሕቀ፡ ዘእንበለ፡ እሑር፡ ኀበ፡ ኢይ፡ ገብአ፡ ብሔር፡ ጽልመት፡ ወቆባር፡ ብሔር፡ ጽልመት፡ ዘለዓለም፡ ኀበ፡ አልቦ፡ ብርሃን፡ ወኢይሬኢ፡ ብርሃነ፡ ወሕይወተ፡ መዋቲ።

Chapter 11 ወእደ፡ ተናገረ፡ ሳፍር፡ አሞናዊ፡ ተሰጥወ፡ ወይቤ። በከመ፡ ብዙኅ፡ ትነብበ፡ ከማሁ፡ ትሰምፅ፡ በብዝኅ፡ ነቢብ፡ ከኑ፡ ዘትጻጽቅ፡ ይመስለከ። ቡሩክ፡ ዘይትወለድ፡ እም፡ አንስት፡ ዘኅዳጥ፡ መዋዕሊሁ፡ ኢታብዝኅ፡ ነቢባ። ወኢትትበል፡ ንጹሕ፡ ኦነ፡ በምግባርየ፡ ወጻድቅ፡ ኦነ፡ በቅድሜሁ። ወአወፎኑመ፡ ይትናግረክ፡ እግዚአብሔር፡ ወይከሥት፡ ከናፋሪሁ፡ ምስሌክ፡ ወይነግረክ፡ ኃይላ፡ ለጥበብ፡ እስመ፡ ዕዑብ፡ ውእቱ፡ ዘላዕለክ፡፡ 7፡ ሶበሁ፡ ተአምር፡ ከመ፡ ረከበከ፡ አጥደልወከ፡ እምኅበ፡ እግዚአብሔር፡ በኃጢአትከ፡ ወአሦሮሂ፡ ለእግዚአብሔር፡ ትረክብኑ፡ ሀሎክኑ፡ ቀዲሙ፡ ቀዳሙ፡ አመ፡ ይፈጥር፡ ኵሎ፡ ዓለም፡ ወልዑለ፡ ሰማየ። ምንተ፡ ትሬሲ፡ ወምንተ፡ ተአምር፡ ፅመቃ፡ ለቀላይ። ወኑኃ፡ ለሰማይ፡ ወስፍሖ፡ ለምድር፡ አው፡ ራኅበ፡ ለባሕር። ወእመ፡ ገፍትኦ፡ ለኵሉ፡ መኑ፡ ይብሎ፡ ምንተ፡ ገበርከ፡፡ 11፡ ወለሊሁ፡ የአምር፡ ግብረ፡ ኃጥእን፡ ወአለመ፡ ርእየ፡ ዓመሃ፡ ኢያረምም፡ ወብእሊ፡ ወብእሲ፡ ለባዊ፡ ይሌብዎ። ለብእሰ፡ ኃሣሤ፡ ንቢብ፡ ውእቱ፡ ወመዋቲ፡ ዘይትወለድ፡ እምአንስት፡ ከመ፡ አድግ፡ ይመስለኒ፡፡ 13፡ እንተሰ፡ ትብል፡ ንጽሕ፡ ልብየ፡ ወታዓቢ፡ እዴክ፡ ኅቤ። ሶበሰ፡ ዓመሃ፡ ኢሀሎ፡ ውስተ፡ እዴከ፡ ወእመ፡ ኢያንበርከ፡ ጽልሑት፡ ውስተ፡ ልብከ፡ አሜሃ፡ ይበርሀ፡ ገጽከ፡ ከመ፡ ዘተሐዕበ፡ በማይ፡ ንጽሕ። ወትከውን፡ ስቁየ፡ አመይ፡ ወአእትት፡ ርስሐት፡ ወኢትፍ፡ ራኅ፡ እንከ። ወትተስዓ፡ ለሕማምከ፡ ከመ፡ ሞገድ፡ እንተ፡ ኃለፈት፡ ወኢትደምዕ፡ እንከ፡ ወጸሎትከሂ፡ ከመ፡ ኮከብ፡ ጽባሕ፡ ወትሠርቅ፡ ሕይወትከ፡ ከመ፡ ብርሃነ፡ መዓልት፡፡ 17፡ ወትትአመን፡ ከመ፡ ትረክብ፡ ተስዳከ፡ ወትነብር፡ ሰዳኅነዘእንበለ፡ ኃዘን፡ ወትካዝ። ወተዓርፍ፡ እንከ፡ ወአልቦ፡ ዘይጸብዓከ፡ ወይመጽኡ፡ ብዙኃን፡ ወይገንዩ፡ ለከ። ወተኃልቅ፡ መድኃኒቶሙ፡ ለኃጥአን፡ ወያሃጕሉ፡ ተስፋ፡ ሆሙ፡ ወይትለሰጥ፡ አዕይንተ፡ ረሲዓን።

Chapter 12 ወእደ፡ ተናገረ፡ ኢዮብ፡ ተሠጥወ፡ ወይቤ። አንትሙኒ፡ ሰብእ፡ አንትሙ፡ ወበኀቤክሙኑ፡ ዳዕሙ፡ ጠሠልጠት፡ ጥበብ። ወአነሂ፡ ብየ፡ ልብ፡ ከማክሙ፡ እስመ፡ አልቦ፡ ከመ፡ እግዚአብሔር፡ ሰሐቀ፡ ለቢጹ፡ ይከውን፡ ወሰሐቀ፡ ጻድቅ፡ ንጹሕ። ወብእሲ፡ ጻድቅ፡ ወንጹሕ፡ ስላቀ፡ ኮነ፡ በዕድሜ፡ መዋዕሊሁ። ወአጽንሕዎ፡ ያርስሕዎ፡ ባዕዳን፡ ወከመ፡ ያውድቁ፡ ቤተ፡ ኃጥአን። ወባሕቱ፡ እኩያን፡ እለ፡ ያምፅዕዎ፡ ለእግዚአብሔር፡ ይብሉ፡ ኄራን፡ ንሕነ፡ አኮኑ፡ ውእቱ፡ ዘየሐትቶሙ። ተሰአሎሙ፡ ለእንስሳሂ፡ ለእመ፡ ይነግሩከ፡ ወለዕዋፈ፡ ሰማይኒ፡ ለእመ፡ ያየድሁከ። ወተናገራ፡ ለምድር፡ ለአመ፡ ትፌክር፡ ለከ፡ ወለእመ፡ ይነግሩከ፡ ዓሣተ፡ ባሕር። መኑ፡ የአምር፡ ዘንተ፡ ኵሉ፡ እደ፡ እግዚአብሔር፡ ገብረ። እስመ፡ ውስተ፡ እዴሁ፡ ነፍሰ፡ ኵሉ፡ ሕያው፡ ወመንፈሰ፡ ኵሉ፡ ሰብእ። እኮኑ፡ ዕዝን፡ ይፈልጥ፡ ነገረ፡ ወጕርዔሂ፡ ይጥዕም፡ እክለ። በብዝኀ፡ ዓመታትኑ፡ ትትረከብ፡ ጥበብ፡ ወበብዝኀ፡ ንብ፡ ረትኑ፡ ትምህርት። ወባሕቱ፡ እምኀበ፡ እግዚአብሔር፡ ኵሉ፡ ጥበብ፡ ወኃይል፡ ወሎቱ፡ ምክር፡ ወአእምሮ። ወለእመ፡ ውእቱ፡ ነሠተ፡ መኑ፡ የሐንጽ፡ ወለእመ፡ ዓፀወ፡ ላዕለ፡ ሰብእ፡ መኑ፡ ያርኁ፡፡ 15፡ እመ፡ ከልአ፡ እምሰማይ፡ ዝናመ፡ ያየብሳ፡ ለምድር፡ ወለእመ፡ ኃደጋ፡ ትማስን፡ ወትትገፈታዕ። እስመ፡ እማኀቤ፡ ኃይል፡ ወጽንዕ፡ ወዘዚአሁ፡ ጥበብ፡ ወምክር። ወይሬስዮሙ፡ ለመካርያን፡ ወይፄወዉ፡ ወይወስድዎሙ፡ ለመኳንንተ፡ ምድር። ወያነብሮሙ፡ ለነገሥት፡ ዲበ፡ መናብርት፡ ወያቀንቶሙ፡ ቅናተ፡ ዘኃይል፡ ውስተ፡ ሐቌሆሙ። ወይፌንዎሙ፡ ለማርያን፡ ይሄወዉ፡ ወይገፈትዖሙ፡ ለኃያላነ፡ ምድር። ወይመይጥ፡ ከናፍሪሆሙ፡ ለመሃይምናን፡ ወየአምር፡ ምክሮሙ፡ ለሊቃውንት። ወያመጽአ፡ ሎሙ፡ ኃሣረ፡ ለመላእክት፡ ወይሣሃሎሙ፡ ለትሑታን። ወይከሥት፡ ዕሙቃተ፡ እምጽልመት፡ ወያወዕኦሙ፡ ውስተ፡ ብርሃነ፡ እምጽልመት፡ ወጽላሎተ፡ ሞት። ወየሀውኮሙ፡ ለአሕዛብ፡ ወይትኀጐሉ፡ ወይሠርዖሙ፡ ለአሕዛብ፡ ወይመርሖሙ። ወይመይጥ፡ ምክሮሙ፡ ለመላእክተ፡ ምድር፡ ወያዔይ፡ ሎሙ፡ ፍኖተ፡ እንተ፡ ኢያእመሩ።

Chapter 13 ናሁ፡ ዝ፡ ዘርእየት፡ ዓይንየ፡ ወዘሰምዐት፡ ዕዝንየ። ወኣአምር፡ ዘከመ፡ ተአምሩ፡ እንትሙ፡ ወእምኔክሙሂ፡ ኢየዓብድ። ወባሕቱ፡ አንሳ፡ ኀበ፡ እግዚአብሔር፡ እነግር፡ ወእትዋቅሥ፡ ቅድሜሁ፡ ለእመ፡ ፈቀደ፡፡ 4፡ አንተስ፡ ዓቀብተ፡ ሥራይ፡ ዘዓመፃ፡ ወመናዝዛን፡ ለእኪት፡ ኵልክሙ። ኢይረትዓኒ፡ አጽምአክሙ፡ እስመ፡ ጠፍአት፡ ጥበብ፡ እምኔክሙ። ስምዑኒ፡ ቅስተ፡ አፉየ፡ ወአጽምኡኒ፡ ፍትሐ፡ ከናፍርየ። ወይእዜኒ፡ አኮኑ፡ ቅድመ፡ እግዚአብሔር፡ ትነብሩ፡ ወታየድሁ፡ ጕኅኩተ፡ በቅድሜሁ፡ ወትትገኃሡ፡ እምኔሁ፡ እስኩ፡ ለሊክሙ፡ ፍትሑ። ሠናይኑ፡ እመ፡ የሐትቱክሙ፡ እንዘ፡ ትገብሩ፡ ኵሎ፡ ኪያሁ፡ ተኃሥሡ። በምንትኑ፡ ታስማስልዎ፡ ከመትትዋቀሱ፡ ሎቱ፡ ለገጽለሰ፡ ታደልዉ፡ ወለፌ፡ ተኀብኡ፡ እምቅሜሁ። ቀዳሜሁ፡ አኮኑ፡ ኃይሉ፡ ያፈርሀክሙ፡ ወይመጽአክሙ፡ ግሩም፡ እምኀቤሁ። ዘለፋክሙኒ፡ ኃላፊ፡ ከመ፡ ሐመድ፡ ወሥጋክሙኒ፡ መሬት። ተጸመሙኒ፡ እንብብ፡ ወእስኀት፡ እምኅምዝ። ወአስተጋብኣ፡ ለሥጋየ፡ በስነንየ፡ ወአጠውቃ፡ ለነፍስየ፡ በእዴየ። ወእምዕዑብ፡ አትሜጠዋ፡ ለልብስየ፡ ወአመሰ፡ ኢተመጠውክዋ፡ በኃይል፡ እመ፡ እምኢተንሠአት፡ ወእመ፡ አኮሰ፡ እነግር፡ ወእትዋቀሥ፡ ቅድሜሁ። ወዝንቱኒ፡ ይከውነኒ፡ መድኀኒተ፡ እስመ፡ ኢይበውእ፡ ቅድሜሁ፡ ትምይንት። ስንዑኒ፡ ቃልየ፡ ወአነ፡ እነግረክሙ፡ እንዘ፡ ታጸምኡኒ። ናሁ፡ አነ፡ ቀረብኩ፡ ኀበፍትሕየ፡ ወአእምር፡ አነ፡ ከመ፡ ታስተርኢ፡ ጽድቅየ። ወመኑ፡ ውእቱ፡ ዘተዕፅረ፡ ከመ፡ እጸመም፡ ይእዜ፡ ወአረምም፡ እከውን፡ ከመ፡ ዓብድ፡ ወአትኃባእኑ፡ እምገጽከ። ወአእትት፡ እምኔየ፡ እዴክ፡ ወአያጥቀኒ፡ ግርማክ፡፡ 20፡ ትጼውዓኒ፡ ወአነ፡ አሰጠወከ፡ ወእመሂ፡ ተናገርከኒ፡ አነሂ፡ አወሥአከ። ወሚመጠን፡ እማንቱ፡ ኃጣውእየ፡ ወአበሳየ፡ እርአየኒኬ፡ ምንት፡ እማንቱ። ወለምት፡ ትሤውር፡ እምኔየ፡ ወትሬስየኒ፡ ጸላኢክ። ወከመ፡ ቈጽል፡ ዘይትነገፍ፡ እምነፋስ፡ ተሐፍሰኒ፡ ወከመ፡ ሣዕር፡ ዘይነሥአ፡ ነፋስ፡ ታሠርረኒ፡ ሣዕረኑ፡ ወብርሀ፡ ዘይየብስ፡ ትዴግን። እስመ፡ ጸሐፍከ፡ አከይየ፡ ሰዘላዕሌየ፡ ወዓቀብከ፡ ሊተ፡ ኃጢኤትየ፡ ዘንአስየ፡ ወዐቅነትከኒ፡ ወአቀምኮን፡ ውስተ፡ ዳኅዕ፡ ለአገርየ። ወሤምከ፡ ሊኰ፡ ምግባርየ፡ ወሶበ፡ ቆመት፡ እግርየ፡ ኅደገኒ።

Chapter 14 መዋቲ፡ ዘይትለወድ፡ አምእንስት፡ ዘኅዳጥ፡ መዋዕሊሁ፡ ወምሉአ፡ መቅሠፍተ፡ መዓቱ። ወይፈሬ፡ ከመ፡ ጽጌ፡ ወይወድቅ፡ ወየኃልፍ፡ ከመ፡ ጽላሎች፡ ወኢይሄሉ፡ እንከ። ለዝኒ፡ አንተ፡ ሐተትኮ፡ ወሎቱ፡ አባእኮ፡ ድቅሜክ፡ ይትዋቀሥ። ወመኑ፡ ይነጽሕ፡ እምርስሐት፡ ወኢመኑሂ፡ ወዘአሐተ፡ ሰዓተ፡ ሐይወ፡ በዲበ፡ ምድር፡፡ 5፡ እስመ፡ ኁሉቊ፡ አውራኂሁ፡ በኅቤከ፡ ወትሁቦ፡ ዕድሜሁ፡ ወኢየኃልፍ፡ አምኔሁ። ረኃቅ፡ እምኔሁ፡ ከመ፡ ያፅርፍ፡ ወይትዓቀባ፡ ለሕይወቱ፡ ከመ፡ ዓሳብ። ለፅዕኒ፡ ቦቱ፡ ተስፋ፡ ተገዚሞ፡ ዳግመ፡ ይፈሪ፡ ወይሠርዕ፡ ወኃይሉሂ፡ ኢየኃልቅ። ወእመሂ፡ ረስቦ፡ በውስተ፡ ምድር፡ ሥርው፡ ወእመኒ፡ ሞተ፡ በውስተ፡ ኰኵሕ፡ አዕዑቂሁ፡ እመአዛ፡ ማይ፡ ይሠርዕ፡ ወይፈሪ፡ ከመ፡ ተክል፡ ሐዲስ። ሰብእሰ፡ እምከመ፡ ሞተ፡ ይጸይፅ፡ ወእምከመ፡ ሞተ፡ መዋቲ፡ ኢይሄሎ፡ እንከ፡፡ 10፡ ለባሕርኒ፡ ቦ፡ ተስፋ፡ ሶበ፡ ይቀብል፡ ወፈለግኒ፡ ይነጽፍ፡ ወይየብስ። ሰብእሰ፡ አምከመ፡ ኖመ፡ ኢይነቅሕ፡ እንከ፡ እስከ፡ አመ፡ የኃልፍ፡ ሰማይ፡ ወይነቅሑ፡ እምንዋሞሙ። እምኅየሰኒ፡ ሶበ፡ ውስተ፡ መቃብር፡ ዓቀብከኒ፡ ወእምኃባ፡ አከኒ፡ እስከ፡ ወእምኃባ፡ አከኒ፡ ይቈርር፡ መዓትከ፡ ወእምቀብከኒ፡ አስከ፡ አመትዜከረኒ። ሶበሁ፡ የሐዩ፡ ሰብእ፡ እምከመ፡ ሞተ፡ ፈጺሞ፡ መዋፅለ፡ ሕይወቱ፡ እምተዓገሥኩ፡ እስከ፡ አመ፡ እትወለድ፡ ዳግመ። ወእምአውሣእኩስ፡ ጊዜ፡ ጸዋፅከኒ፡ ወኢትመንነኒ፡ ግብረ፡ እደዊከ፡፡ 15፡ ኈለቈኑ፡ ኃጣውእየ፡ ወአበሳየ፡ አሐተኔ፡ ወአልቦ፡ ዘረሳዕክ፡ ሊተ፡ ኃጢአትየ፡ ወአበሳየ። ወኅተምከ፡ ውስተ፡ ቊናማቲክ፡ ጌጋይየ፡ ወኵሎ፡ ዘአበስኩ፡ በላዕሌከ። ከመ፡ ደብር፡ ዘንሀለ፡ ወዉድቀ፡ ወኰኵሕኒ፡ ይበሊ፡ በውስተ፡ ምንባሩ። ወእብንኒ፡ ይለምጽ፡ እማይ፡ ወማይሂ፡ ይደፈን፡ በማእከለ፡ ምድር፡ ልዑል፡ ወአኅጐልከ፡ ትዕግሥቶ፡ ለሰብእ፡፡ 19፡ ወታአትቶ፡ ለዝሉፋ፡ ወይማን፡ ወሜጥከ፡ ገጻከ፡ ኅቤሁ፡ ወመሠጥኮ። ወእመሄ፡ በዝኑ፡ ይቂቁ፡ ኢይሬእዮሙ፡ ወእመኒ፡ ኅዳጣን፡ ኢየእምሮሙ። ዳእሙ፡ ሥጋሁ፡ ይማስን፡ ወነፍሱስ፡ ለሕይወት።

Chapter 15 ወእደ፡ ተናገረ፡ ኤልፋዝ፡ ተሰጥወ፡ ወይቤ። ቀዳሚሁ፡ ጥበብ፡ ያወሥእ፡ ዘይሔሊ፡ መንፈስ፡ ወአጽገብካ፡ የዕረ፡ ለነፍስነ፡ ወለሥጋነ። ወትወቅስ፡ ነገር፡ ከንቶ፡ ወትነብብ፡ ዘኢይበቊዕ፡፡ 4፡ አኮኑ፡ ለሊክ፡ ኢፈራህካሁ፡ ከመ፡ ትንብብ፡ ዘከመዝ፡ ነገር፡ ቅድመ፡ እግዚአብሔር። መጠንከ፡ አኮ፡ እምቃለ፡ አፉከ፡ ወኢፈለጥከ፡ ነገረ፡ ዓበይት። ወይዛለፈከ፡ ቃለ፡ አፍከ፡ ወአኮ፡ አ፡ ወከናፍሪክ፡ ማሕተትከ። ቦኑ፡ እምሰብእክ፡ ቀደምክ፡ ተፈጥሮ፡ አው፡ ከመ፡ አስሐትያኑ፡ ጠጋአከ። ወትእዛዘ፡ እግዚአብሔር፡ ሰማዕክ፡ ወበኅቤክኑ፡ ተዘግበት፡ ጥበብ፡፡ 9፡ ወምንተ፡ ተአምር፡ ዘኢነአምር፡ ንሕነ፡ ወምንተ፡ ትሌሁ፡ ዘኢንሌሁ፡ ንሕነ። ወሬዛኒ፡ ወልሂቅኒ፡ በኅቤነ፡ ሀለው፡ ወዘይረስዕ፡ እምአቡክ፡ በምዋዕሊሁ። እመሂ፡ ኅዳጠ፡ አበስከ፡ ተቀሠፍከ፡ ወኢኮነዝ፡ ነገር፡ ዘነበብከ፡ በአምጣንከ። እፎኑ፡ እንከ፡ ተሀበለ፡ ልብከ፡ ከመ፡ ትትዋሣእ፡ በመዓት፡ ቅድመ፡ እግዚአብሔር፡ ወዘከመዝ፡ ነገረ፡ ታወዕእ፡ እምአፉከወምንተ፡ ርአያ፡ አዕይንቲከ። መኑ፡ መዋቲ፡ ዘይነጽሕ፡ እምኃጢአት፡ ወመኑ፡ ጻድቅ፡ ዘይትወለድ፡ እምአንስት። ኅድግስ፡ ሰብአ፡ ርኩስ፡ ወርሱሕ፡ ዘይሠርባ፡ ለኃጢአት፡ ለቅዱሳን፡ ጥቀ፡ ኢይትአመኖሙ፡ ሰማይኒ፡ ኢኮነ፡ ንጹሐ፡ በቅድሜሁ፡፡ 15፡ ስምዓኒ፡ አንግርከ፡ ወአይጽዕከ፡ ዘርኢኩ፡ ወዘነገሩ፡ ጠቢባን፡ ወኢኃብኡ፡ ለውሉዶሙ፡ አበዊሆሙ፡ እስመ፡ ለባሕቲቶሙ፡ ተውህበት፡ ምድር፡ ወኢኅለፈ፡ ካልእ፡ ሕዝብ፡ እምኔሆሙ። ኵሉ፡ መዋዕሊሁ፡ ለኃጥአ፡ ይትሔዘብ፡ ወመዋዕሊሁኒ፡ ወዓመታቲሁኒ፡ በኁልቊ፡ ይትወሀቦ። ለኃይል፡ ትግርምቱ፡ ያወድቆ፡ አመ፡ ተሰፈወ፡ ዳኅነ፡ ይንበር፡ ይትገፈታፅ፡፡ 18፡ ወአልቦ፡ ተስፋ፡ ወጺአ፡ እምጽልመት፡ ወድአ፡ ተአዘዘ፡ ውስተ፡ አደ፡ ሐሂን። ወተውሀበ፡ መብልህ፡ ለአንስርት፡ ወኢየአምር፡ ለሊሁ፡ ከመ፡ ድቀት፡ ይጸንሖ፡ መቅሰፍት፡ ወድልመት። ወያጸድፎ፡ እምቤቱ፡ ሕማም፡ ወምንዳቤ፡ ከመ፡ መልእክ፡ ዘይቀድም፡ ተሠይሞ፡ ወየኃሥር፡ እስመ፡ አፅበየ፡ እዴሁ፡ ቅድመ፡ እግዚአብሔር፡ ወአግዘፈ፡ ክሳዶ፡ ቅድመ፡ እግዚአብሔር፡ ዘኵሎ፡ ይመልክ፡፡ 21፡ ወትረውዕ፡ ኃሣሩ፡ ቅድሜሁ፡ ወውስተ፡ ራኅበ፡ ዘበኑ፡ ኅይሉ። ወይከድኖ፡ ሞት፡ በኃሊፎቱ፡ ወይጠብቆ፡ ውስተ፡ ሐቌሁ፡ ወይነብር፡ ውስተ፡ አህጉረ፡ ሐቅል፡ ወይበይት፡ ውስተ፡ ቤት፡ ምዝቡር፡ ወዘውእቱ፡ አስረዳለወ፡ ባዕድ፡ ይበልፆ፡፡ 23፡ ይብዕልሂ፡ ወኢይጐነዲ፡ ብዕሉ፡ ወኢይገቡር፡ ጽላሎተ፡ በዲበ፡ ምድር። ወኢያመሥጥ፡ አምጽልመት፡ ለሥርውሂ፡ ያየብሶ፡ ነፋስ፡ ወይወድቅ፡ ፍሬሁ። ወኢይሴፎ፡ ሐይወ፡ ወዘተሰፈዎሂ፡ ያኃሥሮ፡ ወይወድቅ፡፡ 26፡ ወይትበላዕ፡ ቆሁ፡ ለምዕር፡ ወይወድቅ፡ ከመ፡ ፍሬ፡ ዘይት። ማሕተቶሙ፡ ለኃጥአን፡ ሞት፡ አሳት፡ ያውዒ፡ ቤተ፡ እለይነሥእ፡ ሕልያነ፡ በዓመፃ፡፡ 28፡ በከርሦሙ፡ ይጸንሱ፡ ፃፅረ፡ ወትመልስ፡ ከርሦሙ፡ ጒኅሉተ።

Chapter 16 ወእደ፡ ተናገረ፡ ኢዮብ፡ ተሰጥወ፡ ወይቤ። ብዙኅ፡ ሰማዕኩ፡ ዘከመዝ፡ ወመናዝዛን፡ ለእኪት፡ ኵልክሙ፡፡ 3፡ ኵሎ፡ ዘመጽአክሙ፡ ትነብቡ፡ ዘእንበለ፡ ዐቅም፡ ምንተ፡ አጽሐብኩክሙ፡ ከመ፡ ትትዋሥኢኒ። ወእነሂ፡ ዘከመ፡ ትብሉ፡ እወሥአክሙሰ፡ በነፍስክሙኑ፡ ትቤ፡ ዝውዋ፡ ለነፍስየ። ወእነግረክሙ፡ ነገረ፡ ወአሐውስ፡ ርእስየ፡ ለክሙ። ወሶበሁ፡ ብየ፡ ኃይል፡ ውስተ፡ አፉየ፡ እምኢምህኩ፡ ከናፍርየ፡ ወእም፡ ዘኄስኩ፡ ዘእነብብ። እመሂ፡ ነበብኩ፡ ኢይጥዒ፡ ቊስልየ፡ ወእመሂ፡ አርመምኩ፡ ይብእሲ፡ ሕማምየ። ይእዜሰ፡ ግማዳተ፡ ዐብድ፡ ወቅንጣበተ፡ ረሰይከኒ። ወኮነ፡ ስምዐ፡ እኂዞትከ፡ ወተንሥአት፡ ሐሰትየ፡ ላዕሌየ፡ ወተዋቀሠተኒ፡ ቅድመ፡ ገጽየ። ወተምዒዖ፡ በመዓቱ፡ ነጽሐኒ፡ ወሐቀየ፡ ስነኒ፡ ላዕሌየ፡ ወአሕፃሁኒ፡ ዲቤየ፡ አመከረ፡፡ 11፡ ወለከዋኒ፡ አዕይንትየ፡ ወበሕቱ፡ አጽደፈኒ፡ በብረክየ፡ ወኅቡረ፡ ሮዱኒ። መጠወኒ፡ ውስተ፡ እደ፡ ዘይትሔዘበኒ፡ ወገደፈኒ፡ እግዚአብሔር፡ ለጸዋጋን። ወእንዘ፡ ዳህነ፡ እነብር፡ ገደፈኒ፡ ወመሐኒ፡ በሥዕርተ፡ ድማኅየ፡ ወአቀመኒ፡ ከመ፡ መጠራ፡ ወከመ፡ ቃፍ፡ ወአስተሐየጸኒ፡ ከመ፡ ሰብእ፡ ዓይን። እስመ፡ በኵያንው፡ ወግኡኒ፡ ወረገዙኒ፡ ኵልያትየ፡ ወኢመሐሩኒ፡ ወተክዕወት፡ ውስተ፡ ምድር፡ ሐሞትየ። ወበጽሐኒ፡ ድቀት፡ በዲበ፡ ድቀት፡ ወሮፁ፡ ላዕሌየ፡ ኃያላን። ሠቀ፡ አስተጣበቁ፡ ላዕለ፡ ማእስየ፡ ወተሰልጠት፡ ሕማምየ፡ ውስተ፡ መሬት። ትነድድ፡ ከርሥየ፡ በብካይ፡ ወውስተ፡ ቀራንብትየ፡ ጽላሎተ፡ ሞት፡ እሬኢ። ወአልቦ፡ ዓመፃ፡ ውስተ፡ እደውየ፡ ወንጹሕ፡ ጸሎትየ። መሬትኑ፡ ይከድነኒ፡ ሥጋየ፡ ወይትከዓው፡ ደምየ፡ ወኢይረክብኑ፡ ብሔረ፡ ኀበ፡ አእወዩ። ወይእዜኒ፡ ናሁ፡ ሰማዕትየ፡ ውስተ፡ ሰማይ፡ ወየአምር፡ ሊተ፡ ዘውስተ፡ አርያም። ኃለፈት፡ ጸሎትየ፡ ኀበ፡ እግዚአብሔር፡ ወታንጸፈጽፍ፡ ዓይንየ፡ ቅድሜሁ። ወሶበሁ፡ ያስተዋቅሥዎ፡ ለሰብእ፡ ምስለ፡ እግዚአብሔር፡ ከመ፡ እጓለ፡ እመሕያው፡ ምስለ፡ ቢጹ፡ ይመጽኣኒ፡ ዓመታት፡ ኍሉዋት። ወአሐውር፡ ፍኖተ፡ ኀበ፡ ኢይገብእ።

Chapter 17 ይፄዕረኒ፡ ዘያወዕኣ፡ ለነፍስየ፡ እትሜነዮሂ፡ ለመቃብር፡ ወኢያደምዖ። እንዘ፡ እልሕሰ፡ ሠራሕኩ፡ ወምንተ፡ እሬሲ፡ ይዕርቁኒ፡ ነኪራን፡ ንዋይየ። ወመኑ፡ ውእቱ፡ ዘይመይጣ፡ ለእዴየ። እስመ፡ ኀብእዎ፡ ሰልቦሙ፡ እምሠናይ፡ ወበእንተዝ፡ ኢያሌዕሎሙ። ወይምህርዎ፡ እከየ፡ ለልቦሙ፡ ወተመስዋ፡ አዕይንትየ፡ በእንተ፡ ደቂቅየ። ወረሰይከኒ፡ ነገረ፡ ለአሕዛብ፡ ወኮንክዎሙ፡ ሰሐቀ፡ ወሥላቀ። ወዖራኒ፡ አዕይንትየ፡ እምአንብዕ፡ ወፈድፋደ፡ አስቈረሩኒ፡ ኵሎሙ። ወተአመንክዋ፡ ለዛቲ፡ ወቀብጽተኒ፡ ወርቱዕሰ፡ ትግባእ፡ ላዕለ፡ ኃጥአን። ወባሕቱ፡ እትአመን፡ ከመ፡ እገብእ፡ በፍኖትየ፡ እስመ፡ ንጹሐት፡ እደውየ፡ እረክባ፡ ለፍሥሕትየ። ወሀለወክሙ፡ ትርአዩኒ፡ ኵልክሙ፡ ወትምጽኡ፡ ዝየ፡ እስመ፡ አልቦ፡ ርትዕ፡ ዘእረክብ፡ በኀቤክሙ። ወኀልቃ፡ መዋዕልየ፡ እንዘ፡ ጽዩአት፡ ወተበትከ፡ ሥርወ፡ ልብየ። መዓልት፡ ሌሊተ፡ ኮነኒ፡ ወጽልመት፡ ውስተ፡ ገጽ፡ ብርሃን፡ ገብአኒ። ወእመሂ፡ ጐንደይኩ፡ ዳእሙ፡ ውስተ፡ መቃብር፡ ቤትየ፡ ወውስተ፡ ጽልመት፡ ተነጽፈ፡ ምስካብየ። ወለሞትኒ፡ አቡየ፡ እብሎ፡ ወእምየሂ፡ ወአኃውየ፡ ዕፄያት፡ እሙንቱ። አይቴ፡ ውእቱ፡ እንከ፡ ተስፋየ፡ ወእሬእያኑ፡ ለሠናይት። ወትወርድኑ፡ ውስተ፡ መቃብር፡ ምስሌየ፡ ወንደፈንን፡ ኅቡረ፡ ውስተ፡ መሬት።

Chapter 18 ወእደ፡ ተናገረ፡ በልዳዶስ፡ ወተሰጥወ፡፡ 2፡ ወይቤ፡ እስከ፡ ማዕዜኑ፡ ኢታረምም፡ ተዓገሥ፡ እንከ፡ ንን፡ ግርከ፡ ንሕነሂ። ለምንት፡ ከመ፡ አንስሳ፡ አርመምነ፡ ቅድሜከ። ይደልዋ፡ ለመቅሠፍትከ፡ ወምንትኑ፡ አንተ፡ ለአመ፡ ሞትከ፡ አልቦኑ፡ ዘይኄይስ፡ እምታሕተ፡ ሰማይ፡ ወይወድቁ፡ አድባር፡ እመሠረቶሙ። ወይጠፍአ፡ ብርሃን፡ ኃጥአን፡ ወኢይትከበት፡ አከዩሙ። ወብርሃኖሙ፡ ጽልመት፡ ይከውኖሙ፡ ይጌግዑ፡ ወማኅቶ፡ ቶሙ፡ ትጠፍአ። ወይነሥኢ፡ ትሑታን፡ ንዋዮ፡ ወትድኅፅ፡ ምክሩ። ወትወርድ፡ እግሩ፡ ውስተ፡ መሥገርት፡ ወትትአሠር፡ በመሥገርት። ወይመጽአ፡ መቅሠፍት፡ ላዕሌሁ፡ መይመጽኡ፡ ጽኑዓን፡ ላዕሌሁ። ወኅቡእ፡ ውስተ፡ ምድር፡ ሐብሉ፡ ወይስሕብዎ፡ እምፍኖቱ። ወያጠፍኦ፡ ሕማም፡ አምዓውዱ፡ ወመጽኡ፡ ብዙኃን፡ ታሕተ፡ አገሪሁ፡ በዓቢይ፡ ረኅብ። ወጽኑሕ፡ ሎቱ፡ ኃሣር፡ ፅዑብ። ወይበኈብኁ፡ አቊያጸ፡ አገሪሁ፡ ወይበልፆ፡ ሞት፡ መሠንዮ። ወይነቅኡ፡ ፅሄያት፡ እምሥጋሁ፡ ወትዐንፅ፡ ምንዳቤሁ፡ ወይትቤቀሎ፡ እግዚአብሔር። ወይትዓፆ፡ ውስተ፡ ቤቱ፡ በሌሊት፡ ወይዘርዎ፡ መሠንዮ፡ ፈጣሪሁ። ወይብስ፡ ሥረዊሁ፡ በታሕቴሁ፡ ወይወድቅ፡ ፍሬሁ፡ እምላዕሌሁ። ወይጠፍአ፡ እምድር፡ ዝክሩ፡ ወይርኅቅ፡ ስሙ፡ ነዋኅ። ወያፈልስዎ፡ እምብርሃን፡ ውስተ፡ ጽልመት፡ ወአልቦ፡ ዘይምሕሮ፡ እምሕዝቡ። ወኢይድኅን፡ ቤቱ፡ በታሕተ፡ ሰማይ፡ ወባዕድ፡ ይዴሎ፡ በንዋየ፡ ዚአሁ። መገዓረ፡ ነዳይ፡ በአንቲአሁ፡ ወዓበይትሂ፡ አንከርዎ። ከመዝ፡ ለእለ፡ ኢየአምርዎ፡ ለእግዚአብሔር።

Chapter 19 ወእደ፡ ተናገረ፡ ኢዮብ፡ ወተሰጥወ። ወይቤ፡ እስከ፡ ምንትኑ፡ ታሄፅርዋ፡ ለነፍስየ፡ ወትተትሉኒ፡ በነገርኩ። አእምሩ፡ ዳዕሙ፡ ከመ፡ እግዚአብሔር፡ ዘንተ፡ ረሰየኒ፡ ዐሥረ፡ ጊዜያተ፡ ትትናገሩኒ፡ ወኢተኃፍሩ፡ ትቁሙ፡ ላፅለ፡ ነፍስየ። ወኦሆ፡ አማን፡ እንከ፡ አበለኩ፡ አነ፡ ወኅቤየ፡ ኃደረት፡ ፅበድ፡ ወነበብኩ፡ ዘኢየአምር፡ ቃለ፡ ወነገርየኒ፡ ዕበድ፡ ወአኮለ፡ ዘአዘለፍ። አሌ፡ ሊተ፡ በላዕሌየ፡ ዳዕሙ፡ ታአብዩ፡ አፉከሙ፡ ዘሆከኒ፡ ወትትቈናደዩ፡ ብየ፡ ወትዘረከዩኒ። አእምሩ፡ ዳዕሙ፡ ከመ፡ እግዚአብሔር፡ ዘሆከኒ፡ ወአንኅ፡ መዓቶ፡ ላዕሌየ። ናሁ፡ እሠርኅ፡ በኂስ፡ ወአነግር፡ ወአወዩ፡ ወአልቦ፡ ዘይፈትሕ፡ ሊተ። ወተሐዕረ፡ ዓውድየ፡ ወአልብየ፡ ምኅላፍ፡ ወአንጦልህ፡ ውስተ፡ ገጽየ፡ ጽልመት። ወሰለበኒ፡ ትርሢትየ፡ ወአልብየ፡ አክልየ፡ አምላዕለ፡ ርእስየ። ወመሐወኒ፡ እንተ፡ ኵለሄ፡ አሐውር፡ ወአልሕስ፡ ወገዘማ፡ ከመ፡ ዕፅ፡ ለሕይወትየ። ወረሰየኒ፡ ለኃይል፡ መቅሠፍት፡ ወረሰየኒ፡ ከመ፡ ፀር። ወኅቡረ፡ መጽአ፡ ላዕሌየ፡ መዓቱ፡ ወሀገቱኒ፡ ወስተ፡ ፍናውየ፡ እለ፡ ይጸንሑኒ። ወአኃውየኒ፡ ተናከሩኒ፡ ወአብደሩ፡ ነኪር፡ እምኔየ፡ አፅርክትየኒ፡ ኢመሐሩኒ። ወአዝማድየኒ፡ ኢያንከሩስ፡ አለሂ፡ የአምሩ፡ ስምየ፡ ረስሁኒ። ወእለሂ፡ ቅሩባንየ፡ ኢይፈቅዱ፡ ይርአዩኒ፡ ወከመ፡ ዘአምከልአ፡ ሕዝብ፡ ይመስሉኒ። ለነበርየኒ፡ አጼውፆሙ፡ ወይጸመሙኒ። ወለብአሲትየኒ፡ አትጋነይ፡ ላቲ፡ ወእዮውሃ፡ ወትትቃፀበኒ፡ ወአስተበቊፆሙ፡ ለደቂቀ፡ ገዛአየ፡ ወአስተምሕር፡ ሎሙ። ወቀብዑኒ፡ ለዓለም፡ ወሶበሂ፡ እትነሣአ፡ የሐምዩኒ። ወእለሂ፡ የአምሩኒ፡ ያስቈርሩኒ፡ እለሂ፡ አፈቅሮሙ፡ እሙንቱ፡ ተንሥኡ፡ ላዕለ፡ ነፍስየ፡፡ 20፡ ወይትቤጸል፡ ማእፀየ፡ ምስለ፡ ሥጋየ፡ ወየሐቅየኒ፡ አዕፅ፡ ምትየ። መሐሩኒ፡ መሐሩኒ፡ አዕርክትየ፡ እስመ፡ እደ፡ እግዚአብሔር፡ ውእሩ፡ ዘገሠሠኒ። ወለምንት፡ እንትሙ፡ ታሠርሑኒ፡ ከመ፡ እግዚአብሔር፡ ወኢትጸግቡኑ፡ እምሥጋየ። መኑ፡ እምጸሐፎኑ፡ ለነገርየ፡ ወይልክዖ፡ ውስተ፡ መጽሐፍ፡ ዘለዓለም። ውስተ፡ ምጽሐለ፡ ሐፂን፡ ወአረር፡ ወእመ፡ እኮ፡ ይግልፍዎ፡ ውስተ፡ ኰኵሕ። አእምር፡ ባሕቱ፡ ከመ፡ ኢያገምሮ፡ ቤት፡ ለዠለህዎ፡ ይፈውሰኒ፡ ሕያው፡ ዘይቀውም፡ ድኅረ፡ ውስተ፡ ምድር። ወእንዘ፡ ሀሎኩ፡ ዓዲ፡ ዲበ፡ ምድር፡ ዝኒ፡ እምኀበ፡ እግዚአብሔር፡ መጽአኒ። ወይትዌላጥ፡ ማአስየ፡ ዘለልየ፡ አእምር፡ ዘዓይንየ፡ ርእየት፡ ወአኮ፡ ባዕድ፡ ሠለጡኒ፡ ኵሎ፡ ውስተ፡ ሕፅንየ። እመሳ፡ ትብሉ፡ ምንተ፡ ንነግር፡ ቅድሜሁ፡ ወንረከብ፡ ሥርወ፡ ነገር፡ ሎቱ፡ ፍርህዋ፡ ለኃሣር፡ እንትሙኒ። እስ፡ መቅሠፍት፡ ትመጽኦሙ፡ ለኃጥአን፡ ወአሜሃ፡ የአምሩ፡ ኵሎ፡ እከዮሙ፡ እምአይቴ፡ ዘበጽሖሙ።

Chapter 20 ወእደ፡ ተናገረ፡ ሳፍር፡ አሜናዊ፡ ተሠጥወ። ወይቤ፡ ኢሐዘብኩከ፡ ትንብብ፡ ዘከመዝ፡ ወአልቦ፡ ዘትኄይስ፡ እምኔየ፡ አእምሮ። ስምዓኒ፡ እንግርከ፡ ጥበበ፡ ትምህርትየ፡ ወጣወሥአኒ፡ መንፈሰ፡ ሕሊናየ። ቦኑ፡ ዘተአምር፡ ዘከመዝ፡ እምቅድሜሁ፡ ወእምእሜከ፡ ወእምድኅሬከ፡ ወእምእመ፡ ተፈጥረ፡ ዓለም። ፍሥሓሆሙ፡ ለኃጥአን፡ ቀትል፡ ዓቢይ፡ ወኃሤቶሙ፡ ለረሲዓን፡ ኅጕል። እመኒ፡ ዓርገ፡ ሰማየ፡ ቊርባኑ፡ ወበጽሐ፡ እስከ፡ ደመና፡ መሥዋዕቱ። ወአመ፡ ይቤ፡ ወዳእኩ፡ ጻናዕኩ፡ እሜሃ፡ ይትሐጐል፡ ለዝሉፉ፡ ወይብሉ፡ እለ፡ የአምርዎ፡ አይቴ፡ ሀሎ። ወሠረረ፡ ከመ፡ ሐልዎ፡ ወኢትረከብ፡ ወያስተርኢ፡ ከመ፡ ሕልመ፡ ሌሊተ፡ ዘኢይትዓወቅ፡ ወይመስል፡ ጽባሐ። ወርእዮቶ፡ ዓይን፡ ኢትጸግብ፡ እንከ፡ ወዚየአምር፡ እንከ፡ መካኖ። ወታጠፍእዎሙ፡ ለውሉዱ፡ ትሑታን፡ ወእደዊሁኒ፡ እሳተ፡ ይነፍሓ። ወይመልእ፡ ፃዕር፡ ውስተ፡ አዕፅምቲሁ፡ ወጥሰክብ፡ ሕማሙ፡ ውስተ፡ መሬት። እስመ፡ ጥዕመቶ፡ አኪት፡ ውስተ፡ አፍሁ፡ ወየኃብኣ፡ ታሕተ፡ ልሳኑ። ወሊሳዩ፡ ውስተ፡ ከርሡ፡ ትትገፈታዕ፡ ወያስተጋብእ፡ ማዕከለ፡ ጕርዔሁ። ወኢትክል፡ ትርድኦ፡ ወሕምዘ፡ አርዌ፡ ምድር፡ ታሕተ፡ ከናፍሪሁ። ብዕል፡ ዘይዘገብ፡ በዓመፃ፡ ይደመሰስ፡ ወያቴክሎ፡ መልአክ፡ ሞት፡ እምቤቱ። ወጠወሥኦ፡ ኅምዘ፡ አርዌ፡ ምድር፡ ወይቀትሎ፡ ልሳነ፡ አፍዖት። ወኢይሬኢ፡ እጕለ፡ መራዕይሁ፡ ወኢይውኅዝ፡ መዓር፡ ወቅብዕ፡ ወኢይፀምድ፡ ምዕረ፡ ወካዕበ። በከንቱ፡ ወበበክ፡ ሠርኀ፡ ብዕሎ፡ ዘኢይጥዕም፡ እምኔሁ፡ ከመ፡ ጽኑዕ፡ ዘኢይትሔየከ፡ ወኢይትወሐጥ። እስመ፡ አንሐለ፡ አብያተ፡ ድኩማን፡ ብዙኀ፡ ወበርበረ፡ ማኅፈደ፡ ወኢያግብኦ። ወአልቦ፡ ዘይሣሃሎ፡ እምንዋዩ፡ ወኢያደምዕ፡ ፍትወቶ። ወአልቦ፡ ተረፍ፡ ለብዕሉ፡ ወበእንተዝ፡ ኢትሠምር፡ ሠናይቱ። አመ፡ ይቤ፡ ሠለጥኩ፡ አሜሃ፡ ይትመነደብ፡ ወይመጽኦ፡ ኵሉ፡ ሕማም፡ ዘያጸግባ፡ ለከርሡ። ወይትዌሰክ፡ መቅሠፍተ፡ መዓቱ፡ ወጥተግህ፡ ላዕሌሁ፡ ዘያሐምሞ። ወኢያመስጥ፡ እምእደ፡ ኲናት፡ ወይበረብሮ፡ ቀስተ፡ ብርት። ወየኃልፍ፡ ሐፅ፡ ውስተ፡ ሥጋሁ፡ ወያንሶሱ፡ እኩይ፡ ውስተ፡ ነፍስቱ፡ ወላዕሌሁ፡ ዘያደነግዖ። ወይጸንሖ፡ ኵሉ፡ ጽልመት፡ ወይበልዖ፡ እሳት፡ ዘእንደደ፡ ወይትጋየዖ፡ ጎረ፡ ቤቱ። ወከሠተ፡ ሰማይ፡ ጌጋዮ፡ ወምድርኒ፡ ኢትነሥኦ። ወሞት፡ ይስሕባ፡ ለቤቱ፡ ለዝሉፉ፡ ወትመጽኦ፡ ዕለተ፡ መንሱት። ዝውእቱ፡ መክፈልቱ፡ ለብእሲ፡ ኃጥእ፡ እምኀበ፡ እግዚአብሔር፡ ወንዋዩሂ፡ ዘአጥረየ፡ እምኀበ፡ ፈጣሪሁ።

Chapter 21 ወእደ፡ ተናገር፡ ኢዮብ፡ ወተሰጥወ፡ ወይቤ። ስምዑኒ፡ ወአጽምኡኒ፡ ነገርየ፡ ከመ፡ ኢትበሉ፡ ሊተ፡ ንሕነ፡ ንናዝዞ። አርምሙ፡ እንግርክሙ፡ እመቦ፡ ዘትስሕቁኒ፡ አኮ፡ ሰብእ፡ ዘይዘልፈኒ፡ ወእፎ፡ ዘኢይትመዓዕ። ትኔጽሩኒ፡ ወታነክሩኒ፡ ወትትመላትሑ፡ በእደዊክሙ። እመሂ፡ ተዘከርኩ፡ ተዝለፍኩ፡ ወኅዱር፡ ውስተ፡ ሥጋየ፡ ፃዕር። ለምንት፡ ኃጥአን፡ የሐይዉ፡ ወይረስዑ፡ ውስተ፡ ብዕሎሙ። እመኒ፡ ዘርኡ፡ ይሠምር፡ በቅድሜሆሙ፡ ወውሉዶሙኒ፡ ይመልኡ፡ ዓይነ፡ በቅድሜሆሙ። ወአብያቲሆሙ፡ ምሉእ፡ ወአልቦ፡ ዘያደነግዖሙ፡ ወኢይመጽኦሙ፡ መቅሠፍት፡ እምኀበ፡ እግዚአብሔር። አልሕምቲሆሙኒ፡ ኢይመክና፡ ወዕኑሳቲሆሙ፡ ኢያድህፃ፡ ወይድኅና፡ በሕርሶን። ወይዜወሩ፡ ከመ፡ አባግዕ፡ ዘለዓለም፡ ወደቂቆሙኒ፡ ይትዋነዩ፡ ወየአነዝሩ፡ ወይሰነቅዉ። ወይትፌሥሑ፡ ወላድያኒሆሙ፡ በቃለ፡ ማኅሌቶሙ። ወፈጺሞሙ፡ ወዋዕሊሆሙ፡ እንዘ፡ ይትፌግዑ፡ ውስተ፡ ምስካበ፡ ሲኦል፡ ይነውሙ፡፡ 13፡ ወይቤልዎ፡ ለእግዚአብሔር፡ ረኃቅ፡ እምኔነ፡ ወኢንፈቅድ፡ ንርአይ፡ ፍኖተከ። ወምንተ፡ ይክል፡ ከመ፡ ንትቀነይ፡ ሎቱ፡ ወምንት፡ ይበቊዓነ፡ ከመ፡ ንሑር፡ በኀቤሁ፡፡ 15፡ ወውስተ፡ እደዊሆሙ፡ ሀለወት፡ ሠናይቶሙ፡ ወኢይኔጽር፡ ምግባሮሙ፡ ለኃጥአን፡፡ 16፡ ወባሕቱ፡ ትጠፍአ፡ ማኅበሮሙ፡ ረሲዓን፡ ወትበጽሖሙ፡ ዕልወቶሙ፡ ወይበጽሖሙ፡ ምንዳቤ፡ ወመቅሠፍት። ወይከውኑ፡ ከመ፡ ኃሠር፡ ዘቅድመ፡ ገጸ፡ ነፋስ፡ ወከመ፡ ፀበል፡ ዘይነሥኦ፡ ነፋሰ፡ ዓውሎ። ወኢረክቡ፡ ንዋዮሂ፡ ደቂቁ፡ ወይትቤቀሎሙ፡ ወየአምር፡ ሶቤሃ፡፡ 19፡ ወኢይሬእያ፡ አፅይንቲሁ፡ እንዘ፡ ይረግዝዎሙ፡ ለደቂቁ፡ ወእግዚአብሔርኒ፡ ኢያድኅኖሙ፡ እስመ፡ እንተ፡ ፈቀደ፡ ይገብር። ወይቀብላ፡ እምኊልቊ፡ አውራኂሁ። ቀዳሚሁ፡ አኮኑ፡ ውእቱ፡ እግዚአብሔር፡ ዘይሜህር፡ ምክረ፡ ወጥበበ፡ ወውእቱ፡ ይትቤቀሎ፡ ለቀታሊ። ወዘሂ፡ ይመውት፡ በብኀዝ፡ የዋሃቱ፡ እንዘ፡ በኵሉ፡ ይትፌሣሕ፡ ወይዴሎ፡ ወበውስጡሂ፡ ምሉእ፡ ሥብሕ፡ ወይትከዓው፡ እንጕዑ። ወይመውት፡ በምረረ፡ ነፍሱ፡ እንዘ፡ ኢይበልዕ፡ ሠናየ፡ ወኢምንተኒ። ወኵሎሙ፡ ኅቡረ፡ ይነውሙ፡ ውስተ፡ ምድር፡ ወይደፍንዎሙ፡ ዕፄያት። ወይእዜኒ፡ ሰአእመርኩክሙ፡ ከመ፡ ተሀቢለክሙ፡ ትቀውሙ፡ ላዕለ፡ ነፍስየ። ወለእመ፡ ትብሉ፡ አይቲ፡ ውእቱ፡ ቤተ፡ መልአክ፡ ወአይቴ፡ ውእቱ፡ ማኅደሮሙ፡ ለአብድንተ፡ ኃጥአን። ተሰአልዎሙ፡ ለኃላፍያነ፡ ፍኖት፡ ወአምሮቶሙ፡ ኢይረክቡ። እስመ፡ ዕለት፡ እኪት፡ ትጸንሖሙ፡ ለኃጥአን፡ ወይወሰድዎ፡ በዕለት፡ እኪት፡ ወመንሱት። መኑ፡ ጥዜንዎ፡ ቅድሜሁ፡ ፍኖቶ፡ ወመኑ፡ ይፈድዮ፡ ዘለሊሁ፡ ገብረ። ወይወስድዎ፡ ውስተ፡ መቃብር፡ ወውስተ፡ ነፍቁ፡ ይተግህ። ወያሰጥሞ፡ ሐዝሐዘ፡ ፈለግ፡ ወይወዕኡ፡ ኵሎሙ፡ ሰብእ፡ ድኅሬኡ፡ ወቅድሜሁ፡ ዘአልቦ፡ ኍልቊ። ለምንትኑ፡ በከ፡ ትጌሥዐኒ፡ በከንቱ፡ ወበኀቤክሙሰ፡ አልብየ፡ ዕረፍት።

Chapter 22 ወአደ፡ ተናገር፡ ኤልፋዝ፡ ቱሜናዊ፡ ተሰጥወ፡ ወይቤ። ቀዳሚሁ፡ አኮኑ፡ እግዚአብሔር፡ ውእቱ፡ ዘይሜህር፡ ምክረ፡ ወጥበበ። ወምንት፡ ያጽሕቆ፡ ለእግዚአብሔር፡ ለአመ፡ አንተ፡ አንጻሕክ፡ ምግባሪከ፡ ወምንተ፡ ይረብኆ፡ ለአመ፡ አንተ፡ አርታዕከ፡ ፍናዊከ። ይትሓሰበከኑ፡ ወይትዋቀሰከ፡ ወየሐውርኑ፡ ይሳነን፡ ምስሌከ። ቀዳሚሁ፡ አኮኑ፡ ብዙኅ፡ ውእቱ፡ እከይከ፡ ወአልቦ፡ ኍልቊ፡ ለኃጣውኢከ። ወአኀዝኮ፡ ለከንቱ፡ ወሰለብከ፡ ልብሶ፡ ለዕሩቅ። ማየ፡ ጥቀ፡ ኢያስተይኮ፡ ለጽሙአ፡ ወሄድከ፡ አፍእሞቶ፡ ለርኁብ፡ ወብእሲ፡ ዘይዘርእ፡ ሎቱ፡ ምድረ፡ ገጸ፡ መዳልው፡ ይነብር፡ ውስቴታ። ወቦ፡ እለሂ፡ እንከርከ፡ ገጾሙ፡ ወጸላእከ፡ ነዳያነ፡ በዓመፃ፡ በዲበ፡ ምድር። ወአውፃእኮን፡ ለዕቤራት፡ ዕራቆን፡ ወአፅዐርኮ፡ ለእጓለ፡ ማውታ። በእንተ፡ ምንትኑ፡ ዓገተከ፡ መሥገርት፡ ወሮደከ፡ ጻባኢት፡ ኃያል። ወብርሃንከሂ፡ ጽልመተ፡ ኮነከ፡ ወደፈነከ፡ ማይ፡ እንዘ፡ ትነውም። ወኢኮነሁ፡ ብውሐ፡ ልዑል፡ ይግበር፡ ዘፈቀደ፡ ወያኃሥሮሙ፡ ለጸአልያን። ወትቤ፡ ምንተ፡ የአምር፡ ኃያል፡ ወበላዕለ፡ ጽልመትኑ፡ ይኴንን። ወደመና፡ ይሤውሮ፡ ወኢሬኢ፡ ዓውደ፡ ሰማይኑ፡ የሐውር። ፍኖቶሂ፡ ዘለዓለም፡ ተዓቅብ፡ እንተ፡ ኬድዋ፡ እደው፡ ጻድቃን፡ እለ፡ ዓርጉ፡ ዘእንበለ፡ ይትዓወቅ፡ ከመ፡ ፈለግ፡ ዘይውኅዥ፡ መሠረታቲሆሙ። ወእለ፡ ይብሉ፡ ምንተ፡ ይሬስየነ፡ እግዚአብሔር፡ ወምንተ፡ ይመጽአ፡ ላዕሌነ፡ ዘኵሎ፡ ይመልክ፡ ወመልአ፡ ሎሙ፡ አብያቲሆሙ፡ በረከተ። ወምክረ፡ ኃጥአንሰ፡ ርኍቅ፡ እምኔሆሙ። ወርእዮሙ፡ ጻድቃን፡ ሰሐቱ፡ ወተሳለቁ፡ ላዕሌሆሙ፡ ንጹሐን። ወጠፍአት፡ ንዋዮሙ፡ ወተረፎሙሂ፡ በልዓት፡ እሳት። እስኩ፡ ኩን፡ እኩየ፡ እመትጸንዕ፡ ወአመ፡ ይሤኒ፡ ፍሬከ። ሕትቶ፡ ለነገረ፡ አፉከ፡ ወደይ፡ ቃሎ፡ ውስተ፡ ልብከ። እመሰ፡ ነሳሕከ፡ ወአሕመምከ፡ ርእሰከ፡ ቅድመ፡ እግዚአብሔር፡ ወአርኃቀ፡ እምልብከ፡ ዓመፃ። ይተክለክ፡ ዲበ፡ ኰኵሕ፡ ወከመ፡ እብነ፡ ፈለግ፡ ይሰፍፍ። ወይረድእከ፡ እምፀርከ፡ ዘኵሎ፡ ይመልክ፡ ወያገብአ፡ ለከ፡ ንጽሐከ፡ ከመ፡ ብሩር፡ ጽሩይ። ወትረክብ፡ ሞገስ፡ በቅድመ፡ እግዚአብሔር፡ ወትኔጽር፡ ሰማየ፡ ተፈሢሐከ። ወዘጸለይከ፡ ኀቤሁ፡ ይሰምዐከ፡ ወይሁበከ። ወየዓሥየከ፡ ፍዳ፡ ጽድቅከ፡ ወያበርህ፡ ውስተ፡ ፍናዊከ። እስመ፡ አሕመመከ፡ ትብል፡ ተዓበየ፡ ለዘያቴሕት፡ ርእሶ። ወይባልሖ፡ ለንጹሕ፡ ወትድኀን፡ በንጽሐ፡ እደዊከ።

Chapter 23 ወደእደ፡ ተናገረ፡ ኢዮብ፡ ወተሰጥወ፡ ወይቤ። አእመርኩ፡ ከመ፡ እምእዴየ፡ ውእቱ፡ ዘለፋየ፡ ወአክበደ፡ እዴሁ፡ ላዕሌየ፡ ወአግዐረኒ። ምንት፡ ውእቱ፡ ዘኢየአምር፡ ከመ፡ እርከብ፡ ወእብጻሕ፡ እስከ፡ ለዝሉፉ። ወይንግረኒ፡ እመቦ፡ ዘገበርኩ፡ ወኢያረምም፡ አፉየ፡ እንዘ፡ እወቅስ። ወአምር፡ ሊተሂ፡ ከመ፡ ይሁበኒ፡ ፈውሰ፡ ወለበውኩ፡ ዘይሁበኒ። ወእመሂ፡ በብዙኅ፡ ኃይል፡ ይመጽሕ፡ ኢይገብር፡ እንከ፡ በመዓቱ፡ ላዕሌየ፡ እስመ፡ ሣህል፡ ወጻድቅ፡ ኀቤሁ። ወያዐርፈኒ፡ ለዝሉፉ፡ እምኵነኔየ፡ እስመ፡ ኀበ፡ ቀዲሙ። ወኢይሄሉ፡ እንከ፡ ወኢየአምር፡ እንከ፡ ደኃሪታ። እገብእ፡ እንከ፡ መንገለ፡ ጸጋም፡ ወእትመየጥ፡ መንገለ፡ የማን፡ ወአልቦ፡ ዘእሬኢ። ወእደ፡ አእምር፡ ፍኖትየ፡ ወፈተነኒ፡ ከመ፡ ወርቅ። ወኢይወጽእ፡ እምተግሣዑ፡ ወዓቀብኩ፡ ፍናዊሁ፡ ወኢተግኅሥኩ። ወኢኀለፍኩ፡ እምትእዛዙ፡ ወኀባእኩ፡ ነገሮ፡ ውስተ፡ ሕፅንየ። ወመኑ፡ ውእቱ፡ ዘይትዋቀሶ፡ በእንተ፡ ኵነኔ፡ እስመ፡ ውእቱ፡ ዘይፈቀደ፡ ይገብር። ወበእንተዝ፡ አነሂ፡ ጐጓእኩ፡ በእንቲአሁ፡ ወተገሢዕየ፡ ሐለይክዎ። ወበእንተዝ፡ ደንገፅኩ፡ እምቅድመ፡ ገጹ፡ እሔልዮሂ፡ ወይጌርመኒ። ወእግዚአብሔር፡ መሰዎ፡ ለልብየ፡ ወዘኵሎ፡ ይመልከ፡ አጐጕዓኒ። በእይቴ፡ አእመርኩ፡ ከመ፡ ትመጽአኒ፡ ጽልመት፡ ወደፈነኒ፡ ቆባር፡ ውስተ፡ ገጽየ።

Chapter 24 ለምንት፡ ይረስዖን፡ እግዚአብሔር፡ ለሰዓታትየ። ወተዓደዉ፡ ኃጥአን፡ እም፡ ወሰኖሙ፡ ወመሰጡ፡ ኖላዌ፡ ምስለ፡ መርዔቱ። ወሄዱ፡ አድገ፡ እጓለ፡ ማውታ፡ ወአኀዙ፡ ላሕመ፡ ፅቤር። ወሜጥዎሙ፡ ለድኩማን፡ እምፍኖተ፡ ጽድቅ፡ ወተጋብኡ፡ ኅቡረ፡ የዋሃነ፡ ምድር። ወኮኑ፡ ከመ፡ አእዱግ፡ ውስተ፡ ገዳም፡ በእንቱአየ፡ ወዕኡ፡ ወኃደጉ፡ ተግባሮሙ፡ ወጥዕሞሙ፡ እክል፡ እምንእሶሙ። አኮኑ፡ ገራህተ፡ ዘኢኮነ፡ ዚአሆሙ፡ አረሩ፡ እምቅድመ፡ ሰዓቱ፡ ወቀነይዎሙ፡ ለባሕታውያን፡ ዓፀደ፡ ወይኖሙ፡ ዘእንበለ፡ ዓስብ፡ ወዘእንበለ፡ ሲሳይ፡ ተዓገልዎሙ፡ ኃጥአን። ወለብዙኃን፡ ዕሩዋን፡ አቤትዎሙ፡ ዘእንበለ፡ ልብስ፡ ወሰለብዎሙ፡ አራዘ፡ ነፍሶሙ። ወያርሕሶሙ፡ ነፍኒፍ፡ ወጠለ፡ ገዳም፡ እስመ፡ አልቦሙ፡ ክዳን፡ ወተከድኑ፡ ጾላእተ። ወመሰጡ፡ እጓለ፡ ማውታ፡ እምውስተ፡ ጥቡ፡ ወአሕመምዎን፡ ለፅኑሳት። ወገፍዕዎሙ፡ ለፅኑሳን፡ ወነጽሕዎሙ፡ ወሄድዎሙ፡ ለርኁባን፡ አፍእሞቶሙ። ወአሥርኅዎሙ፡ ለምንዱባን፡ ወተዓገልዎሙ፡ ወኢያእመርዋ፡ ጽድቅ። ወሰደድዎሙ፡ እምአብያቲሆሙ፡ ወእምአህጉሪሆሙ፡ ወአግዓሩ፡ ነፍሰ፡ ሕፃናት፡ ፈድፋደ። ለምንት፡ ውእቱ፡ ኢገሠዖሙ፡ ለእሉ፡ አምጣነ፡ ሀለዉ፡ ዲበ፡ ምድር፡ ወኢያእመርዋ፡ ወኢርእይዋ፡ ለፍኖተ፡ ርትዕ፡ ወኢሖሩ፡ ውስተ፡ መርኅባ። ወአእሚሮ፡ ምግባሮሙ፡ መጠዎሙ፡ ውስተ፡ እደ፡ ጽልመት፡ ወተረሣዮሙ፡ ሌሊተ፡ ከመ፡ ሰራቂ። ዓይነ፡ ዘማዊ፡ ይጸንሕ፡ ጽልመተ፡ ወይብል፡ አልቦ፡ ዘይሬእየኒ፡ ወይሤወር፡ እምገጽ፡፡ 16፡ ወይከሪ፡ አብያተ፡ በጽልመት፡ መዓልታይትኃብኡ፡ ወኢጥሬእዩ፡ ብርሃነ። ወእምከመ፡ ጸብሐ፡ ይመስሎሙ፡ ለኵሎሙ፡ ጽላሎተ፡ ሞት፡ እስመ፡ የአምሩ፡ ሀከከ፡ ዘይከውን፡ ወይትሔዘቡ፡ መዊተ። ወይጼለል፡ ዲበ፡ ገጸ፡ ማይ፡ ርጉም፡ መክፈልቶሙ፡ ዲበ፡ ምድር። ወይሬእዩ፡ እንዘ፡ ይየብስ፡ ተክሎሙ፡ በዲበ፡ ምድር፡ ወበርበርዎሙ፡ ለእጓለ፡ ማውታ፡ እለ፡ ቦ። ወእምዝ፡ ይዜከራ፡ ሎቱ፡ ለኃጥአቱ፡ ወይጠፍእ፡ ከመ፡ ጊሜ፡ ወጠል፡ ወይትፈደይ፡ በከመ፡ ገብረ፡ ወይትቀጠቀጥ፡ ከመ፡ ዕፅ፡ ብኍቡኍ፡ ኵሉ፡ ዓማፂ፡፡ 21፡ ለመካንሂ፡ ኢያሠነየ፡ ወለእንተ፡ ትወልድሂ፡ ኢመሐረ። ወአንሐሎሙ፡ በመዓቱ፡ ለፅኑሳን፡ ወተንሢኦ፡ ኢይትአመና፡ ለሕይወቱ። ወለእመ፡ ደወየ፡ ኢይሴፎ፡ ሐይወ፡ ዳዕሙ፡ ይወድቅ፡ ውእቱ፡ በሕማም። ወለብዙኃን፡ አመንደቦሙ፡ በሢመቱ፡ ወይጸመሂ፡ ከመ፡ መሎኬ፡ በውስተ፡ ሐሩር፡ ወከመ፡ ሰዊት፡ ዘይወድቅ፡ ለሊሁ፡ እምቀሪሙ። ወአመ፡ አኮ፡ መኑ፡ ውእቱ፡ ዘይብለኒ፡ ሐሳዊ፡ እንተ፡ ወይሬስዮ፡ ከመ፡ ወኢምንት፡ ለነገርየ።

Chapter 25 ወእደ፡ ተናገረ፡ በልዳዶስ፡ አውኬናዊ፡ ወተሰጥወ፡ ወይቤ። ቀዳሚሁ፡ አኮኑ፡ በኀቤሁ፡ ውእቱ፡ ግርማ፡ ወዘገብረ፡ ኵሎ፡ ዘውስተ፡ አርያም። ወአልቦ፡ ዘይመስል፡ ከመቦ፡ ዘይስሕት፡ በኅበ፡ ሰራቂ፡ ወለመኑ፡ ዘኢበጽሐቶ፡ እኪቱ። ወእፎ፡ ይከውን፡ ጻድቅ፡ ንጹሐ፡ በቅድመ፡ እግዚአብሔር፡ ወመኑ፡ ዘያነጽሕ፡ ርእሶ፡ ዘተወልደ፡ እምአንስት። ወርኅኒ፡ ይትኀባእኑ፡ ወኢያበርህኑ፡ ወከዋክብትኒ፡ ኢኮኑ፡ ንጹሐነ፡ በቅድሜሁ፡ ኅድግሰ፡ ሰብአ፡ መዋቴ፡ ወዕፄያተ፡ ወእጓለ፡ እመሕያው፡ በድን።

Chapter 26 ኀበ፡ ተናገረ፡ ኢዮብ፡ አውሥአ፡ ወይቤ። መነ፡ ትሠውቅ፡ ወመነ፡ ትፈቅድ፡ ትርዳእ፡ ቅድሜሁ፡ አኮኑ፡ ዘብዙኅ፡ ኃይሉ፡ ወብዙኅ፡ መዝታዕቱ። ወለመኑ፡ ትመክር፡ እኮኑ፡ ዘሎቱ፡ ጥበብ፡ ወለመኑ፡ ትትኃሠሥ፡ አኮኑ፡ ዘጽኑዕ፡ ኃይሉ። ወለመኑ፡ ታየድዕ፡ ነገረ፡ መንፈስ፡ ወመኑ፡ መንፈስ፡ ዘይወፅእ፡ እምኔከ። እለ፡ ያርብኅኑ፡ ገፍዑኒ፡ ማይ፡ ዘመተሕቱ፡ ወዘውስቴቱ፡ እኮኑ፡ እግዚአብሔር። ክሡት፡ ሲኦል፡ በቅድሜሁ፡ ወአልቦ፡ ምንትኒ፡ ዘይሤወሮ። ዘሰፍሖ፡ ለሰማይ፡ ዲበ፡ ወኢምንት፡ ወሰቀላ፡ ለምድር፡ ዲበ፡ ዕራቁ። ወየጫቊሮ፡ ለማይ፡ ዲበ፡ ደመና፡ ወኢይሠጠጥ፡ ደመናሁ፡ በታግቴሁ። ዘውእቱ፡ ብውሕ፡ ሎቱ፡ ይብበር፡ ዲበ፡ መንበሩ፡ ወይሠይም፡ ላዕሌሁ፡ ግብተ፡ ለለሰዓቱ። ወሐፀሮ፡ ሰማይ፡ በትእዛዙ፡ ወእስከ፡ አመ፡ የኃልቅ፡ ይትባረይ፡ ብርሃን፡ ምስለ፡ ሰድልመት። ወሣረረ፡ አዕማደ፡ ሰማይ፡ ወኢድኅፀ፡ እምተእዛዙ፡ ወይገነግፁ፡ እምተግሣፁ። ወበኃይሉ፡ እኅድአ፡ ለባሕር፡ ወነጽሖ፡ ለአንበሪ፡ በተግሣፁ። መዓፀውተ፡ ሲኦልኒ፡ አድረዉ፡ ሎቱ፡ ወቀተሎ፡ ለከይሲ፡ ዓላዊ፡ በተግሣፁ። ናሁ፡ ዝ፡ መክፈልተ፡ ፍኖቱ፡ ወናጸምእ፡ ነገራቶሂ፡ እለ፡ ተርፉ፡ ወድምፀ፡ ፀዓዑ፡ መኑ፡ የአምር፡ ጊዜ፡ ይገብር።

Chapter 27 ወዓዲ፡ ደገነመ፡ ኢዮብ፡ ወይቤ። ሕያው፡ እግዚአብሔር፡ ዘኰነነኒ፡ ከመዝ፡ ወዘኵሎ፡ ይመልክ፡ ዘአምረራ፡ ለነፍስየ። ሶበሁ፡ ሀለወት፡ ነፍስየ፡ ወዓዲ፡ መንፈሰ፡ እግዚአብሔር፡ ዘያስተናግረኒ፡ ከመ፡ ኢይንብብ፡ አፉየ፡ ዓመፃ፡ ወኢትትመሀር፡ ነፍስየ፡ ኃጢአተ። እትሐዘብሰ፡ እምአርአይኩክሙ፡ ጽድቀ፡ ዘእንበለ፡ እሙት፡ እስመ፡ ኢየኃድጋ፡ ለሕይወትየ። እንዘሰ፡ ጽድቀ፡ እገብር፡ ኢይትሐጐል፡ እስመ፡ ኢይትዓወቀኒ፡ ዘገበርኩ፡ እኩይ። ወባሕቱ፡ ሶበ፡ ኮኑ፡ ጸላእትየከመ፡ ድቀተ፡ ኃጥአን፡ ወአለሂ፡ ይትነሥኡ፡ ላዕሌየ፡ ከመ፡ ሞተ፡ ዓማፅያን። ወለምንት፡ ይጸንሕ፡ ኃጥአ፡ ከመ፡ ይሴፎ፡ ሐይወ፡ ወዘኢተወከለ፡ በእግዚአብሔር፡ ይድኅንኑ፡ እንጋ። ወይሰምዖኑ፡ ጸሎቶ፡ ወእመሂ፡ መጽአ፡ ምንዳቤ፡ ይረክብኑ፡ እንጋ፡ ገጸ፡ በኀቤሁ። ወእመሂ፡ ጸውዖ፡ ይሠጠዎኑ፡ ወያወሥኦኑ። ወባሕቱ፡ እነግረክሙ፡ ምንት፡ ውእቱ፡ ዘውስተ፡ እደ፡ እግዚአብሔር፡ ወኢይሔሱ፡ ዘሀሎ፡ በኅበ፡ ዘኵሎ፡ ይመልክ። ተአምሩ፡ ኵልክሙ፡ ከመ፡ እኪት፡ ለእኩያን፡ ትመጽኦሙ። ዝ፡ ውእቱ፡ መክፈልቱ፡ ለብእሲ፡ ኃጥእ፡ እምኀበ፡ እግዚአብሔር፡ ወይበጽሖ፡ ንዋየ፡ ዓበይት፡ ኀቤሁ፡ እምኀበ፡ ዘኵሎ፡ ይመልክ። ወእመሂ፡ በዝኁ፡ ደቂቁ፡ ይከውኑ፡ ለሙስና፡ ወእመሂ፡ ጸንዑ፡ ያስተፍእሙ። ወአልቦ፡ ዘይእምሮን፡ ለዕቤራቲሆሙ። ወእመሂ፡ አስተጋብኦ፡ ከመ፡ መሬት፡ ለብሩር፡ ወከመ፡ ዕቡር፡ ዘገበ፡ ወርቀ። ዘኵሎ፡ ጻድቃን፡ ይበሥአዎ፡ ወይረክብዎ፡ ለንዋዩ፡ ራትዓን። ወይከውን፡ ቤቱ፡ ከመ፡ መሬት፡ ወከመ፡ ብላዐ፡ ቊንቊኔ። ኖመ፡ ባዕል፡ ወአልቦ፡ ዘያነቅሖወይከሥት፡ አዕይንቲሁ፡ ወያነክር። ወይጠብቆ፡ ሕማም፡ ከመ፡ ማይ፡ ወይነሥኦ፡ ዓውሎ። ወይመስጦ፡ ሐሩር፡ ወየኃልፍ፡ ወይልሕሶ፡ እምነ፡ ምንባሩ። ወይመጽእ፡ ላዕሌሁ፡ ዘኢየአምር፡ ወኢይምሕኮ፡ ወኢያመሥጥ፡ እምዴሁ፡ ወየኃልፍ። ወይጠፍሕ፡ እዴሁ፡ በላዕሌ፡ ወይልሕሶ፡ እምነ፡ ቤቱ።

Chapter 28 ቦ፡ ብሔር፡ እምኀበ፡ ይወፅአ፡ ብሩር፡ ለወርቅኒ፡ ቦ፡ ብሔር፡ እምኀበ፡ የአርርዎ። ሐፂንሂ፡ እምውስተ፡ ምድር፡ ይትገበር፡ ለብርትኒ፡ ከመ፡ እብን፡ ይፈጽሕዎ። ለጽልመትኒ፡ አዘዘ፡ ዕድሜሁ፡ ወለኵሉ፡ ውእቱ፡ የሐትቶ፡ እብነ፡ ጽልመት፡ ወጽላሎተ፡ ሞት። ከመ፡ ስጥቀተ፡ ፈለግ፡ ውስተ፡ መሬት፡ እለ፡ ይረስዕዋ፡ ለፍኖተ፡ ጽድቅ፡ ደክሙ፡ በኃጢአቶሙ። ለምድርኒ፡ ይወፅእ፡ እምኔሃ፡ እክል፡ በመትሕቴሃኒ፡ ጠብለላ፡ በእሳት። ቦ፡ ብሔር፡ ዘአብነ፡ ሰንፔር፡ ወወርቃኒ፡ ከመ፡ መሬት። ፍኖት፡ ዘኢርአያ፡ ዖፍ፡ ወዘኢነጸራ፡ ዓይን፡ ንስር። ወኢኬድዋ፡ ደቂቀ፡ ዝኁራን፡ በእግር፡ ወኢኃለፈ፡ አንበሳ፡ ውስቴታ። ወአንሥአ፡ እዴሁ፡ በእዝኅ፡ ወአጥፍኦሙ፡ ለአድባር፡ እመሠረቶሙ፡ ወእምሥርዎሙ። ወሰጠቀ፡ አንቅዕተ፡ አፍላግ፡ ወርእየ፡ ዓይንየ፡ ኵሎ፡ ክቡራተ። ወሰጠቀ፡ ቀላያተ፡ ዘአፍላግ፡ ወአርአየኃይሎ፡ በውስተ፡ ብርሃን። ወእምአይቴ፡ ተረክበት፡ ጥበብ፡ ወአይቴ፡ ብሔር፡ ለጥበብ። ወኢየአምራ፡ መዋቲ፡ ለፍኖታ፡ ወኢሀለወት፡ ኀበ፡ እጓለ፡ እመሕያው። ቀላይኒ፡ ትቤ፡ ኢህለወት፡ ኀቤየሰ፡ ወባሕርኒ፡ ትቤ፡ ኢነበረት፡ ምስሌየሰ። ወአልቦ፡ ዘተረክበ፡ ዘክማሓ፡ ወኢይደልዋ፡ ብሩር፡ ተውላጣ። ወኢትሠየጥ፡ በወርቀ፡ አፌር፡ ወኢ፡ በባላቅ፡ ቅድው፡ ወበ፡ ሰንፔር። ወኢትማሰላ፡ ወርቅ፡ ወማኅው፡ ወቤዛሃኒ፡ ንዋየ፡ ወርቅ። ዝሉፍ፡ ወእንቡዝ፡ ኢይዜክርዋ፡ ወሰሐባ፡ ለጥበብ፡ እምአፅናቊ፡ በአምጣነ፡ ኃይልከ፡፡ 19፡ ወኢይርዔረያ፡ ተንከራ፡ ዘኢትዮጲያ፡ ወኢትሠየጥ፡ በወርቅ፡ ጽሩይ። ወጥበብ፡ በአይቴ፡ ተረክበት፡ ወአይቴ፡ ውእቱ፡ ብሔር፡ ለምክር። እስመ፡ ተረስዓት፡ እምኵሉ፡ ሰብእ፡ ወተኃብአት፡ ዓዲ፡ እምአዕዋፈ፡ ሰማይ። ሞትሂ፡ ወሲኦል፡ ይቤሉ፡ ሰማዕነ፡ ድምፃ። ወእግዚአብሔር፡ አሠነየ፡ ፍታ፡ ወውእቱ፡ ለሊሁ፡ የአምር፡ ብሔራ። ወውእቱ፡ ይሬኢ፡ ኵሎ፡ ዘውስተ፡ ሰማይ፡ ወየአምር፡ ኵሎ፡ ዘውስተ፡ ምድር። ዘለሊሁ፡ ገብረ፡ ነፋሳተ፡ በመዳልው፡ ወማየሂ፡ በመስፈርት። አመ፡ ፈጠረ፡ ከመዝ፡ አእሚሮ፡ ኈለቃ፡ አመ፡ ገብረ፡ ለዝናም፡ ሥርዓተ፡ ወበፍኖት፡ ያሜክርዎ፡ ለቃል። ወርአያ፡ አሜሁ፡ ወኈለቃ፡ ወአስተዳለዋ፡ ወአክበራ፡ ወሰሐባ። ወይቤሎ፡ ለእጓለ፡ እመሕያው፡ ናሁ፡ ፈሪሃ፡ እግዚአብሔር፡ ውእቱ፡ ጥበብ፡ ወተግኅሦ፡ እምኵሉ፡ እኩይ፡ አእምሮ፡ ውእቱ።

Chapter 29 ወደገመ፡ ኢዮብ፡ ወይቤ። መኑ፡ እምአግብአኒ፡ ውስተ፡ መዋዕለ፡ አውራኅየ፡ ዘትካት፡ ከመ፡ አመ፡ ዓቀበኒ፡ እግዚአብሔር። ወከመ፡ ይበርህ፡ ማኅቶት፡ በትርአስየ፡ ወአመ፡ አሐውር፡ በብርሃኑ፡ ውስተ፡ ጽልመት። ወአመ፡ ሀሎኩ፡ ውስተ፡ ኵሉ፡ በረከት፡ ወአመ፡ እግዚአብሔር፡ ይሄውጽ፡ ቤትየ። ወአመ፡ ጽፉቅ፡ ንዋይየ፡ ወበዓውድየ፡ አግብርትየ። ወአመ፡ ይውኅዝ፡ ቅብዕ፡ ውስተ፡ ፍናውየ፡ ወአመ፡ ይትከዓው፡ ሐሊብ፡ ውስተ፡ አድባርየ። ወአመ፡ እገይሥ፡ በግርማ፡ ሀገርየ፡ ወአነብር፡ መንበርየ፡ ውሰተ፡ መርኅብ። ይሬዩኒ፡ ወራዙት፡ ወይትኀብኡኒ፡ ወይጸንሑኒ፡ ኵሎሙ፡ ሊዋውንት። ወኃያልንሂ፡ ይትፈፀሙ፡ ወኢይነብቡ፡ ወያጠውቁ፡ አፉ፡ ሆሙ፡ በእደዊሆሙ። ወያስተበፅዑኒ፡ እለ፡ ሰንዑኒ፡ ወይጠግዕ፡ ልሳኖሙ፡ በጕርዔሆሙ። ወዕዝን፡ እንተ፡ ሰማዓተኒ፡ ታስተበፅዓኒ፡ ወዓይን፡ እንተ፡ ርእየተኒ፡ ትትሬሠየኒ። እስመ፡ ቸድኃንኩ፡ ነዳየ፡ እምእደ፡ ዘይትዔገሎ፡ ወረዳእኩ፡ እጓለ፡ ማውታ፡ ዘአልቦ፡ ረዳኢ። ወደኃረኒ፡ ይመውት፡ ወባረከኒ፡ አፈ፡ ዕቤራት። ወለበስክዋ፡ ለጽድቅ፡ ወተረሠይኩ፡ ርትዐ፡ ከመ፡ ዓጽፍ፡ ወተቀጸልክዋ፡ ለፍትሕ። ወኮንክዎሙ፡ ዓይነ፡ ለዕውራን፡ ወእግረ፡ ለስቡራን። አነ፡ ውእቱ፡ አበ፡ ምስኪናን፡ ወተኃሠሥኩ፡ ለዘኢየአምር፡ ቅስተ። ወሰበርኩ፡ ስነኒሆሙ፡ ለዓማዕያን፡ ወአንገፍክዎሙ፡ እማእከለ፡ ጥረሲሆሙ፡ ዘመሰጡ። ወተሐዘብኩሰ፡ እልኃቅ፡ ወእርሳዕ፡ ወእሕየው፡ ጕንዱየ፡ ዓመታተ፡ ከመ፡ ነዋኅ፡ በቀልተ፡ ተመርት፡ ወከመ፡ ኆፃ፡ አበዝኅ፡ መዋዕለ። ወይትከዓው፡ ማይለሥርውየ፡ ወይወርድ፡ ጠል፡ ውስተ፡ ማአረርየ። ወክብርየ፡ ሐዲስ፡ ምስሌየ፡ ወአሐውር፡ እንዘ፡ ቀስትየ፡ ውስተ፡ እዴየ። ኪያየ፡ ያረምኡኒ፡ ወይሰምዑኒ፡ ወያረምሙ፡ በምክረ፡ ዚአየ። ወኢይደግሙ፡ ነገረ፡ በዲበ፡ ነገርየ፡ ወይትኃሠዩ፡ ሶበ፡ እትናገሮሙ። ከመ፡ ምድር፡ ጽምአት፡ እንተ፡ ትሴፎ፡ ዝናመ፡ ከማሁ፡ እሙንቱሂ፡ ለነገር። ወኢይትአመኑ፡ አመ፡ ሰሐቁ፡ ምስሌሆሙ፡ ወኢወድቀ፡ ብርሃነ፡ ገጽየ። ኃሢሥየ፡ ፍኖቶሙ፡ ነበርኩ፡ እንዘ፡ እኴንኖሙ፡ ወነበርኩ፡ ከመ፡ ንጉሥ፡ ባሕቲትየ፡ ወሶበ፡ ይላህዉ፡ ይትናዘዙ፡ ብየ።

Chapter 30 ወይእዜሰ፡ ትሑታን፡ ይስሕቁኒ፡ ዮምሰ፡ ባሕቲቶሙ፡ ይምዕዱኒ፡ እለ፡ መነንክዎሙ፡ ለአበዎሆሙ፡ ወእለ፡ ኢሐሰብክዎሙ፡ ወኢከመ፡ ከለባተ፡ መራዕይየ። ወለምንት፡ ሊተ፡ ኀይለ፡ እዴሆሙ፡ ወይምጻእ፡ ሞት፡ ላዕሌሆሙ። ወያስተፍእሙ፡ እምረኃብ፡ እንዘ፡ ይልሕሱ፡ እለ፡ ያመስጡ፡ እምእደ፡ በድው፡ ትማልማ፡ በሥራኅ፡ ወበኃሣር። እለ፡ ይዋሕዩ፡ ወይሰእሉ፡ ወያስተፍእሙ፡ እለ፡ በተታሕሎ፡ የሐይዉ፡ ኅሡራን፡ ወዓማፅያን፡ ወዕኑሳን፡ እምኵሉ፡ ሠናያት፡ እለ፡ ሥርወ፡ ዕፅ፡ ይሜዕሩ፡ እምዐቢይ፡ ረኃብ። ተንሥኡ፡ ላዕሌየ፡ ሰረቅት፡ እለ፡ አብያቲሆሙ፡ ውስተ፡ ግበበ፡ ኰኵሕ። ወይዌውዑ፡ ማእከለ፡ መጽአሞ፡ ወይትኃኡ፡ ውስተ፡ ሣዕረ፡ ገዳም። ዓብድ፡ ውሉድ፡ ወአልቦ፡ ስም፡ እስመ፡ ጥፉአን፡ እምድር፡ ወጥበብ፡ እንተ፡ ጠፍአት፡ እምድር። ወይእዜሰ፡ መሰንቆ፡ ኮንክዎሙ፡ ወአነ፡ መኃድምቶሙ። ወያስቈርሩኒ፡ ወይርኅቁ፡ እምኔየ፡ ወኢይትሀከዩ፡ ወሪቀምራቅ፡ ውሰተ፡ ገጽየ። ወከሠተ፡ ምጕንጳሁ፡ ወቀተለኒ፡ ወፈነወልጓመ፡ ውስተ፡ ገጽየ፡ ኃያል። ወተንሥአ፡ ላዕሌየ፡ በየማነ፡ ኃይል፡ ወሰፍሐ፡ እገሩሁ፡ ላዕሌየ፡ ወገብረ፡ ፍኖተ፡ ሞት፡ ላዕሌየ። ወደምሰሰ፡ አሠርየ፡ ወሰለበኒ፡ አልባስየ፡ ወደጐፀኒ፡ በአሕፃሁ። ወረሰየኒ፡ ዘከመ፡ ፈቀደ፡ ወአአይስ፡ በሕማም። ውቱረ፡ ይዋህየኒ፡ ነጾራር፡ ወትፍሕቅ፡ ነፍስየ፡ በላዕሌየ፡ ወትልሕስ፡ ወኃለፈት፡ ሕይወትየ፡ ከመ፡ ደመና፡ ዘትነጽሕ። ወይእዜሰ፡ ተክዕወት፡ ነፍስየ፡ በላዕሌየ፡ ወመልአ፡ በላዕሌየ፡ ፃዕር። ወኵሎ፡ ሌሊተ፡ ይነድዱ፡ አፅዕምትየ፡ ወይትመሰዉ፡ አሥራውየ። እምዓቢይ፡ ኃይል፡ አትሜጠዎ፡ ለልብስየ፡ ወሐነቀኒ፡ አፈ፡ መልበስየ፡ ወኅባኔኒ፡ ፀፈረ፡ ውስተ፡ ክሣድየ። ወኬዱኒ፡ ከመ፡ ፅቡር፡ መሬት፡ ወሐመድ፡ ኮኑ፡ መክፈልትየ። ገዓርኩ፡ ኀቤከ፡ ወኢሰማዕከኒ፡ ወቀዊምየ፡ ኢጠየቀኒ፡ ደበዩኒ፡ እለ፡ አልቦሙ፡ ምሕረት፡ ወጸንዓተረ፡ እድ፡ እንተ፡ ቀሠፈተኒ። ኃደገኒ፡ ውስተ፡ ናእክ፡ ወአርኃቀኒ፡ እምሕይወትየ። አእምር፡ ከሰመ፡ ሞት፡ ይቀጠቅጠኒ፡ ወማኅደሩሰ፡ ለኵሉ፡ ዘሞተ፡ ምድር። እምፈተውኩ፡ ለልየ፡ እትጐረአይ፡ ወእመ፡ አኮ፡ አስተበቊዕ፡ ባዕድ፡ ይግበር፡ ሊተ፡ ከማሁ። አንሰ፡ በእንተ፡ ኵሉ፡ ምንዱብ፡ እበኪ፡ ወአነብፅእመ፡ ርኢኩ፡ ሰብእ፡ ሕሙመ። አንሰ፡ አጽናዕክዋ፡ ለሠናይት፡ ናሁ፡ ተራከባኒ፡ መዋዕል፡ እኩያት፡ ወተሰፎኩ፡ ብርሃነ፡ ወመጽአኒ፡ ጽልመት። ትፈልሕ፡ ከርሥየ፡ ወኢታረምም፡ ወበጽሐኒ፡ መዋዕለ፡ ተፅናሰ። ወበእኩ፡ ውስተ፡ መጽብብ፡ ወአልቦ፡ ዘያስተግኅሦ፡ ሊተ፡ ኃጣእኩ፡ ወቆምኩ፡ ማእከለ፡ ብዙኃን፡ ወአወዩ። ወኮንኩ፡ እኅዋሆሙ፡ ለጽግነት፡ ወቢጾን፡ ለአዕዋፍ። ወያዝኀዝኀኒ፡ በሕቁ፡ ማእስየ፡ ተቀሎኩ፡ ወተሐርፃ፡ አዕፅምትየ። ወመሰንቆ፡ ኮነኒ፡ ሕማምየ፡ ወኮነኒ፡ መዝሙረ፡ አንብዕየ።

Chapter 31 ሥርዓተ፡ ገበርኩ፡ ለአዕይንትየ፡ ወኢነጸርክዋ፡ ለድንግል። ወዓዲ፡ ክፍለ፡ እግዚአብሔር፡ ኢበላዕኩ፡ ወርስቶሂ፡ ለኃያል፡ እምአርያም። አሌ፡ ሎ፡ ለሞተ፡ ዓመፂ፡ ወተናክሮቶሙ፡ ለእለ፡ ይገብርዋ፡ ለኃጢአት። አኮኑ፡ ውእቱ፡ ይርእያ፡ ለፍኖትየ፡ ወኈለቈ፡ ኵሎ፡ ሥግረትየ። ሶበዑ፡ ሖርኩ፡ ምስለ፡ መስተሣልቃን፡ ወሶበሁ፡ ተግኅሠት፡ እግርየ፡ እምፍኖቱ። ወቆምኩ፡ በዳልወ፡ ጽድቅ፡ ወየአምር፡ እግዚአብሔር፡ የዋሃትየ። ተግኅሠት፡ እግርየ፡ እምፍኖቱ፡ ወለእመሂ፡ ተለወ፡ ልብየ፡ ድኅረ፡ ዓይንየ፡ ወእመሂ፡ ተመጠውኩ፡ ሕልያነ፡ በእዴየ፡ ዘዘራእኩ፡ ባዕድ፡ ይብልዎ። ወዘእንበለ፡ ሥርው፡ ለእኩን፡ በዲበ፡ ምድር፡ ወእመሂ፡ ተለወ፡ ልብየ፡ ብእሲተ፡ ብእሲ፡ ወእመሂ፡ ወሐይኩ፡ ኆኅተ፡ ቤታ። ብእሲትየ፡ ትአድሞ፡ ለካልእ፡ ብእሲ፡ ወደቂቅየ፡ ለይኅሠሩ፡ በመቅሠፍተ፡ መዓቱ፡ ዘይእኅዝ። እስመ፡ አርኵሶ፡ ብእሲተ፡ ብእሲ፡ እሳተ፡ ውእቱ፡ ዘይነድድ፡ ውስተ፡ ኵሉ፡ መለያልይ፡ ሃበ፡ ቦአ፡ ይሤሩ፡ እምሥርው። ወለእመ፡ አመዕኩ፡ ፍትሐ፡ ገብርየ፡ ወአመትየ፡ ሶበ፡ ይትዋቀሡ፡ በኀቤየ። ወምንተ፡ እሬሲ፡ እግዚአብሔር፡ እመ፡ ገብረ፡ ሐተታየ፡ ወእመኒቦ፡ ዘሐወጸኒ፡ እትዋሣእኑ፡ ቅድሜሁ። አኮኑ፡ በከመ፡ ተፈጠርኩ፡ አነ፡ በውስተ፡ ከርሠ፡ እምየ፡ እሙንቱሂ፡ ከማሁ፡ ኮኑ፡ ወነበርነ፡ ውስተ፡ ይእቲ፡ ከርሥ። ወትካትሰ፡ ግብረ፡ አደምዕ፡ ዘፈቀድኩ፡ ወኢመሰውኩ፡ ዓይነ፡ ፅቤር። ሶበሁ፡ ባሕቲትየ፡ በላዕኩ፡ እክልየ፡ ወኢወሀብኩ፡ ለእጓለ፡ ማውታ፡ እምኔሁ። ወአሐፅኖ፡ እምንእሱ፡ ከመ፡ አቡሁ፡ ወአልኅቆ፡ እምከርሠ፡ እሙ፡ እምአመ፡ ተወልደ። ወእመሂ፡ ርኢኩ፡ ዕሩቀ፡ ወኢያልበስኩ፡ እንዘ፡ ይመውት፡ በቊር። ወይድኅሩኒ፡ ስኡናን፡ ወእምጸምረ፡ አባዕግየ፡ ሞቀ፡ ዘባና፡ ቲሆሙ። አመ፡ አንሣእኩ፡ እዴየ፡ ዲበ፡ እጓለ፡ ማውታ፡ ተአሚንየ፡ ከመ፡ ብዙኅ፡ ረድኤት፡ ብየ፡ ይትመተር፡ መዝራዕትየ፡ እመታ፡ ክፍትየ፡ ወይትቀጥቀጥ፡ እዴየ፡ እምኵርባዕየ። እስመ፡ ግርማ፡ እግዚአብሔር፡ አኃዘኒ፡ ወኢያመስጥ፡ እምኢኂዞቱ። ወእመሂ፡ ደፈንኩ፡ ወርቅየ፡ ውስተ፡ መሬት፡ ወአመ፡ ተአመንኩ፡ በዕንቊ፡ ዘብዙኅ፡ ሤጡ። ወእመ፡ ተፈሣሕኩ፡ በብዙኅ፡ ብዕልየ፡ ወእመ፡ ወደይኩ፡ እዴየ፡ ዲበ፡ ዘአልቦ፡ ኍልቁ። ወኢይሬእይኑ፡ ፀሐየ፡ ዘያበርህ፡ ወይጠፍእ፡ ወወርኅኒ፡ ትበኪ፡ እስመ፡ ኢትኴንን፡ ርእሳ። ወአልቦ፡ ዘአስሐቶ፡ ለልብየ፡ በጽሚት፡ ወእመ፡ ወደይኩ፡ እዴየ፡ ዲበ፡ አፉየ፡ ወእመ፡ ሰሚዐ፡ ሰማዕኩ፡ ወተጸመምኩ። ወዝኒ፡ ይኩነኒ፡ ዓቢየ፡ ኃጢአተ፡ እመ፡ ሐሰውኩ፡ ቅድመ፡ እግዚአብሔር፡ ልዑል። ወእመ፡ ተፈሣሕኩ፡ በድቀተ፡ ጸላእትየ፡ ወእመ፡ እቤ፡ በልብየ፡ እንቋዕ። ለትስማዕ፡ ዕዝንየ፡ እኩየ፡ ወይጻእሊተ፡ ስም፡ እኩይ፡ በውስተ፡ ሕዝብየ። ወይቤሉ፡ ነባርየ፡ መኑ፡ እምወህበነ፡ ሥጋሁ፡ ንብላዕ፡ እንዘ፡ ጥቀ፡ እምሕሮሙ። ወበአፍእ፡ ኢኃደረ፡ ነግድ፡ ወለኵሉ፡ ዘነጽአ፡ ርኅው፡ ቤትየ፡ ወእመ፡ አበስኩ፡ ወከባትኩ፡ ይኩነኒ፡ ዓቢየ፡ ጌጋየ። ወኃፈርኩ፡ እምብዙኅ፡ ሰብእ፡ ተናሕዮ፡ በኀቤሆሙ፡ ወለእመ፡ ምስኪን፡ ይወፅእ፡ እምኆኅትየ፡ እንዘ፡ ዕራቁ። መኑ፡ እምወሀበኒ፡ ዘያጸምእኒ፡ ወእመ፡ ኢፈራህኩ፡ እደ፡ እግዚአብሔር፡ ወእመ፡ ብየ፡ መጽሐሰ፡ ዕዳ፡ ዘይፈድየኒ፡ እፀውር፡ ዲበ፡ መታክፍትየ፡ ወእነብባ፡ በኀበ፡ ብዙኀን። ወእሰጥጣ፡ ወእገብእ፡ እንዘ፡ አልቦ፡ ዘእነሥእ፡ እምኀበ፡ ዘይፈድየኒ። ወለእመ፡ አግዓርክዋ፡ ለምድር፡ ወእመ፡ በከየ፡ ትለሚሃ። ወእመ፡ በላዕኩ፡ እክልየ፡ ናሕቲትየ፡ ዘእንበለ፡ ሤጥ፡ ወእመ፡ ሰደድክዎ፡ ለበዓለ፡ ምድር፡ ወአሕመምኩ፡ ነፍሶ። ህየንተ፡ ሥርናይ፡ ክርዳድ፡ ይብቊለኒ፡ ወህየንተ፡ ሰገምሕንጽዋል፡ ይብቊለኒ፡ ወኃደገ፡ ኢዮብ፡ ነገረ።

Chapter 32 ወአርመሙ፡ እሉ፡ ሠለስቱ፡ አዕርክቲሁ፡ ወኢያውሥእዎ፡ ለኢዮብ፡ እንከ፡ እስመ፡ ይጼደቅ፡ ኢዮብ፡ በቅድሜሁ። ወተምዐ፡ ኤልዩስ፡ ወልደ፡ ብርክያል፡ ዘቡዝ፡ ዘሕዝበ፡ አራም፡ ዘብሔረ፡ አውስጢድ፡ ወተምዖ፡ ለኢዮብ፡ በሕቁ፡ እስመ፡ ይጼደቅ፡ ቅድመ፡ እግዚአብሔር። ወተምዖሙ፡ ጥቀ፡ ለሠለስቱ፡ አዕርክቲሁ፡ እስመ፡ ስእኑ፡ አውሥኦቶ፡ ለኢዮብ፡ ዘይትማሰላ፡ ለቃሉ፡ ለእንተ፡ ነበበ፡ ወረሰይዎ፡ ከመ፡ ዘኃጥእ። ወጸንሖሙ፡ ኤልዩስ፡ ያውሥእዎ፡ ለኢዮብ፡ እስመ፡ ይልህቅዎ፡ በዋዕሊሆሙ። ወርእዮ፡ ኤልዩስ፡ ከመ፡ አልቦ፡ ነገር፡ ውስተ፡ አፈ፡ ሠለስቲቲሆሙ፡ እደው፡ ወተምዖሙ፡ በመዓቱ። ወተሰጥወ፡ ኤልዩስ፡ ወልደ፡ ብርክያል፡ ዘቡዝ፡ ወይቤ፡ ንኡስ፡ አነ፡ በመዋዕልየ፡ ወአንትሙሰ፡ ልሂቃን፡ ወሊቃውንት፡ ወበእንተዝ፡ አርመምኩ፡ ፈሪህየ፡ ከመ፡ እንግርክሙ፡ ዘእሔሊ። ወእቤ፡ ባሕቱ፡ አኮ፡ ዓመታት፡ ዘያስተባግራ፡ ዘብዝኀሂ፡ ክራማተ፡ ኢየአምራ፡ ለጥበብ፡፡ 8፡ ዳዕሙ፡ መንፈስ፡ ውእቱ፡ ዘላዕለ፡ መዋቲ፡ ወመንፈስ፡ ዘኵሎ፡ ይመልክ፡ ውእቱ፡ ይምህር። አኮ፡ እለ፡ አብዝኁክራማተ፡ ጠቢባን፡ ሊቃውንትኒ፡ ኢየአምርዋ፡ ለፍትሕ። ወባሕቱ፡ ስምዑኒ፡ እንግርክሙ፡ ዘአአምር፡ ወአጽምኡኒ፡ ነገርየ። ወለክሙ፡ አየድዓክሙ፡ እንዘ፡ ትሰምዑኒ፡ እስከ፡ ትረክቡ፡ ዘትነግሩ። ወናሁ፡ ተኃጥአ፡ ዘይጌሥዖ፡ ለኢዮብ፡ ወዘያወሥኦ፡ ቃከ፡ መእንተ፡ ነበበ፡ እምኔክሙ፡ ከመ፡ ኢትበሉ፡ ረከብነ፡ ጥበበ፡ እም፡ እግዚአብሔር፡ ወአፈድፈድነ። ወአባሕክምዎ፡ ለሰብእ፡ ይንብብ፡ ዘከመዝ፡ ነገረ። ወፈራህክሙ፡ ወኢያውሣእክሙ፡ ወበልየ፡ ነገር፡ እምአፉክሙ። ጸናሕኪክሙ፡ ወኢነበብክሙ፡ እስመ፡ አርመምክሙ፡ ወኢያውሣክሙ። ኀበ፡ ተናገረ፡ ኤልዩስ፡ አውሥአ፡ ወይቤ፡ ስማዕ፡ ዘአነግረከ፡ ካዕበ። ምሉእ፡ ነገር፡ ኀቤጠ፡ ወይቀትለኒ፡ መንፈሰ፡ ከሥርየ። ወተአሥረት፡ ከርሥየ፡ ከመ፡ ዝቀ፡ ወይን፡ ወትልሕው፡ ዑየ፡ ወከመ፡ ምብኳሐ፡ ነሀቢ፡ ስጡቅ። አነብብ፡ ከመ፡ አፅናፍ፡ ወእከሥት፡ ከናፍርየ። አስመ፡ ኢየኀፍር፡ እምእጓለ፡ እመሕያው፡ ወኢይጌግፅ፡ እመዋቲ። ወኢየአምር፡ አድልዎ፡ ለገጽ፡ ወእመሂ፡ ቦ፡ ዘየኀፍር፡ እምሰብእ።

Chapter 33 ወባሕቱ፡ ስምዐኒ፡ ኢዮብ፡ ቃልየ፡ ወአጽምአኒ፡ ነገርየ። ወናሁ፡ አፉየ፡ ከሠትኩ፡ ወነበበ፡ ልሳንየ። ወንጹሐ፡ ይሔሊ፡ ልብየ፡ ወጥበበ፡ ከናፍርየ፡ ወንጹሐ፡ ይመክር። እግዚአብሔር፡ ፈጠርኒ፡ ወመንፈስ፡ ዘኵሎ፡ ይመልክ፡ ይሜህረኒ። እመ፡ ትክል፡ ታውሥአኒ፡ በዝ፡ ነገር፡ ተዓገሠኒ፡ አነኒ፡ እነግረከ፡ አንተሂ፡ አውሥአኒ። እምጽቡር፡ ብኅባኄከ፡ ከማየ፡ ወእምኔሁ፡ ቅሣሜነ። ወኢያኅዝንከ፡ ወኢትትሐዘበኒ፡ ወእዴየ፡ ኢያከብድ፡ ላዕሌከ። ወባሕቱ፡ እነግረከ፡ ግፍዓከ፡ ወሰማዕኩ፡ ነገረከ፡ ወግፍዓከኒ። ስምዓኒ፡ ቃለ፡ ነገርየ፡ እስመ፡ ትቤ፡ ንጹሕ፡ አነ፡ ወኢአበስኩ፡ ወጻድቅ፡ አነ፡ ወኢገበርኩ፡ ኃጠአተ። ወረሰይኩ፡ ሎቱ፡ ዘይነግር፡ ወረሰየኒ፡ ከመ፡ ጸላኢ። ወአቀሞ፡ ዲበ፡ ዳህዕ፡ ለአገርየ፡ ወአቀመ፡ ኵሎ፡ ፍናውየ። እፎ፡ ትብል፡ ጻድቅ፡ አነ፡ ወኢይሰምዓኒ፡ ቃልየ፡ ዘለዓለም፡ ውእቱ፡ ዘላዕለ፡ መዋቲ። እፎ፡ ትብል፡ ኢይሰምዓኒ፡ ኵሎ፡ ጽድቅየ። እምከመ፡ ምዕረ፡ ነገረ፡ እግዚአብሔር፡ በነቢያት፡ ወዳህመ፡ በሕልም፡ ወአመ፡ አኮ፡ በነገረ፡ ሌሊት። ወያመጽአ፡ ዓቢየ፡ ድንጋፄላዕለ፡ ሰብእ፡ እንዘ፡ ይሰጅብ፡ ዲበ፡ ምስካቡ። ወሶቤሃ፡ ይከሥት፡ ልቦ፡ ለሰብእ፡ ከመ፡ ይርአይ፡ ግርማ፡ ወይፍራህ። ወረመይጦ፡ ለሰብእ፡ እምኃጢአቱ፡ ወያድኅኖ፡ ለሥጋሁ፡ እምድቀቱ። ይምህክ፡ ነፍሶ፡ እሞት፡ ከመ፡ ኢይደቅ፡ ውስተ፡ ቀትል። ወካዕበ፡ ይጌሥዖ፡ በደዌ፡ በውስተ፡ ምስካቡ፡ ወይቌቊዑ፡ ኵሎሙ፡ አዕፅምቱሁ። ወኢይክል፡ ጥዒመ፡ ኵሎ፡ መብልዐ፡ እክል፡ ወትፈቱ፡ ነፍሱ፡ ትብላዕ፡ እክለ። እስከ፡ የኃልቅ፡ ሥጋሁ፡ ወያስተርኢ፡ አዕፅምቲሁ፡ ዕራቆ። ወአልጻቀት፡ ነፍሱ፡ ለመዊት፡ ወሕይወቱሂ፡ ለሲኦል። ለእመ፡ ኮኑ፡ ዓሠርቱ፡ ምእት፡ መላእክተ፡ ሞት፡ አሐዱ፡ እምኔሆሙ፡ ኢይቀትሎ፡ ለእመ፡ ሐለየ፡ በልቡ፡ ይትመየጥ፡ ኀበ፡ እግዚአብሔር፡ ከመ፡ ይብግሮ፡ ለሰብእ፡ ኃጢአቶ፡ ወያርእዮ፡ ጌጋዮ፡ ወይትዓቀብ፡ ከመ፡ ኢይደቅ፡ ውስተ፡ ሞት። ይሔድሳ፡ ለነፍሱ፡ ከመ፡ ምርገ፡ አረፍት፡ ዘአዕፅምቱሁ፡ ይመልኡ፡ አንጕዐ። ወያደክሞ፡ ለሥጋሁ፡ ከመ፡ ሥጋ፡ ሕፃን፡ ወይሬስዮ፡ ጽኑዐ፡ እምሰብእ። ወዘጸለየሂ፡ ኀበ፡ እግዚአብሔር፡ ይትዌከፎ፡ ወይባውአ፡ በንጹሕ፡ ገጹ፡ እንዘ፡ ይነግር፡ ወይፈድዮ፡ ለሰብእ፡ ጽድቆ። ወሶቤሃ፡ የኀይስ፡ ሰብእ፡ ርእሶ፡ ወለሊሁ፡ ይብል፡ ምንተ፡ ገበርኩ፡ ወኢመጠንየ፡ ዘረከበኒ፡ በጌጋይየ። ወአድኅና፡ ለነፍስየ፡ ከመ፡ ኢትሑር፡ ውስተ፡ ሙስና፡ ወትርአይ፡ ብርሃነ፡ ሕይወትየ። ዘኵሎ፡ ይገብር፡ ናሁ፡ ኃያል፡ ወሠለስቱ፡ ፍናዊሁ፡ ለሰብእ። ወባሕቱ፡ አድኅና፡ ለነፍስየ፡ እሞት፡ ከመ፡ ትሰባሕ፡ ሕይወትየ፡ በውስተ፡ ብርሃን። ወአጽምአኒ፡ ቦ፡ ዘትብል፡ በል፡ ንግር፡ ወእፈቅድ፡ ህየ፡ ከመ፡ ትጽደቅ። ወእመሰ፡ ቦ፡ ዘትብል፡ በል፡ ንግር፡ ወእፈቅድ፡ ህየ፡ ከመ፡ ትጽደቅ። ወእመ፡ እኮሰ፡ አንተ፡ ትሰምዓኒ፡ ወአርምም፡ እምሀርከ፡ ጥበበ።

Chapter 34 ወደገመ፡ ኤልዩስ፡ ወይቤ። ስምዑኒ፡ ጠቢባን፡ ወአጽምኡኒ፡ ሠናየ፡ ማእምራን። እስመ፡ ዕዝን፡ ነገረ፡ ይፈልጥ፡ ወጕርዔኒ፡ አክለ፡ ይጥዕም። ደይነ፡ ንነሥእ፡ ለርእስነ፡ ወነአምር፡ ምንተ፡ ይኄይስ፡ በማእከሌነ። እስመ፡ ይቤ፡ ኢዮብ፡ ጻድቅ፡ አነ፡ ወሠለጠ፡ ሊተ፡ ኵነኔ፡ ፍትሕየ፡ ወአሐምም፡ በግፍዕ፡ ዘአልብየ፡ አበሳ። መኑ፡ ሰብእ፡ ከመ፡ ኢዮብ፡ ዘይሰትያ፡ ለትዕግሥት፡ ከመ፡ ማይ። ኢአበሰ፡ ወኢጌገየ፡ ግሙራ፡ ወኢተሳተፈ፡ ምስለ፡ ገበርተ፡ ዓመፃ፡ ወኢሖረ፡ ምስለ፡ ኃጥአን። ወይቤ፡ ኢይዋህይዎ፡ ለሰብእ፡ በሩዐቱ፡ ቅድመ፡ እግዚአብሔር። ወይእዜኒ፡ ስምዑኒ፡ ጠቢባነልብ፡ ወኢትፍቅዱ፡ ተአብሱ፡ ቅድመ፡ እግዚአብሄር፡ ወኢትሁክዎ፡ ለጻድቅ፡ በቅድመ፡ ዘኵሎ፡ ይመልክ። ወይፈድዮ፡ ለኵሉ፡ ሰብእ፡ በከመ፡ ምግባሩ፡ ወይረክቦ፡ ለሰብእ፡ በከመ፡ ፍኖቱ። ትሬስዮኑ፡ ለእግዚአብሔር፡ ከመ፡ ይገፍዕ፡ ወዘኵሎ፡ ይመልክ፡ ከመ፡ ይዌልጥ፡ ፍትሐ፡ ዘውእቱ፡ ፈጠራ፡ ለምድር። መኑ፡ ውእቱ፡ ዘገብረ፡ ዘታሕተ፡ ሰማይ፡ ወኵሎ፡ ዘውስቴታ። ወለእመ፡ ውእቱ፡ ፈቀደ፡ ያጸንዕ፡ ወይእኅዝ፡ መንፈሰ፡ ዘኀቤሁ። ወይመውት፡ ኵሊ፡ ዘሥጋ፡ ኅቡረ፡ ኵሉ፡ መዋቲ፡ ወውስተ፡ መሬት፡ ይገብእ፡ እምኀበ፡ ተፈጥረ። ወእመአኮሰ፡ ተገሠዕ፡ ወስማዕ፡ ዘንተ፡ ነገረ፡ ወአጽእ፡ ቃለ፡ በገርየ፡ አንተ። ዝኩ፡ ዘይጸልእ፡ ዓመፃ፡ ወዘያጠፍኦሙ፡ ለእኩያን፡ ዘለዓለም፡ ጻድቅ። ጽሩፍ፡ ዘይብሎ፡ ለንጉሥ፡ አበስከ፡ ወእኩይ፡ ብሂል፡ ለመላእክተ። ዘኢየኃፍር፡ ገጸ፡ ክቡር፡ ወዘኢየአምር፡ አክብሮ፡ ዓቢይ፡ ወዘኢይጌግፅ፡ እምገጾሙ። ከንቱ፡ ይረክቦ፡ ለዘይጽርሕ፡ ወኢያጸምኦ፡ ለሰብእ፡ ወገብረ፡ እኩየ፡ ዲበ፡ ምስኪናን። ወለሊሁ፡ ይሬኢ፡ ምግባሮ፡ ለሰብእ፡ ወአልቦ፡ ምንትኒ፡ ዘይትኃባእ፡ እምኔሁ። አልቦ፡ ብሔር፡ ኀበ፡ ይትኃብእዎ፡ ገበርተ፡ ዓመፃ፡ እስመ፡ ኢያምሠጡ፡ እንከ፡ እምእግዚአብሔር፡ ዘኵሎ፡ ይሬኢ። ወዘየአምር፡ ዘአልቦ፡ አሠር፡ ክቡራተ፡ ወመንክራተ፡ ዘአልቦ፡ ኍልቊ። ወዘየአምር፡ ምግባሮሙ፡ ወያገብእ፡ ሌሊተ፡ ወየሐም፡ ሞሙ። ወያጠፍኦሙ፡ ለኃጥአን፡ ጻድቃንሰ፡ ቅድሙሁ፡ እሙንቱ። ወእለሰ፡ ተግኅሡ፡ እምሕግ፡ እግዚአብሔር፡ ኢየአምሩ፡ ኵነኔሁ፡ ከመ፡ ያግብእ፡ ላዕሌሆሙ፡ አውጣተ፡ ነዳያን፡ ወይሰምዕ፡ ገዓረ፡ ምስኪናን። ወውእቱ፡ ይሁቦሙ፡ ዕረፍተ፡ ወመኑ፡ ውእቱ፡ ዘይኴንን፡ ወየሀብእ፡ ገጾ፡ ወአልቦ፡ ዘይሬእዮ፡ ለለሕዝቡ፡ ወለለሰብኡ፡ ኅቡረ። ወያነግሥ፡ እግዚአብሔር፡ ብእሴ፡ መደልወ፡ በእንተ፡ እከየ፡ ሕዝብ፡ ዘይብሎ፡ ለኃያል፡ ነሣእኩ፡ ወአልብየ፡ አኅዝ። አነሂ፡ ለልየ፡ እሬኢ፡ ወእንተኒ፡ አርእየኒ፡ እመ፡ ዐመፃ፡ ገብርኩ፡ ወእመ፡ ተናገርኩ፡ ሐሰተ፡ ከመ፡ ኢይድግም፡ ተናገሮ። ቦኑ፡ እምኀቤከ፡ ነሣእክዋ፡ ከመ፡ ትርኀቀኒ፡ አንተ፡ እስመ፡ አንተ፡ ተኃሪ፡ ወአኮ፡ አነ። ወእመቦ፡ ዘተአምር፡ ንግር፡ እስመ፡ ጠቢባነ፡ ልብ፡ ከመዝ፡ ይብሉ፡ ወብእሲ፡ ጠቢብ፡ ይሰምዓኒ፡ ቃልየ። ወኢዮብሰ፡ አኮ፡ ከመ፡ ጠቢብ፡ ዘይትናገር፡ ወነገሩኒ፡ ኢኮነ፡ ከመ፡ ምሁር። ወባሕቱ፡ ተመሀር፡ ኢዮብ፡ ወኢተዘውሥእ፡ እንከ፡ ከመ፡ ዓብዳን። ከመ፡ ኢትወስክ፡ ዕበደ፡ በዲበ፡ ኃጣውኢከ፡ ወይከውነከ፡ ጌጋየ፡ ነቢበ፡ ብዙኅ፡ ነገር፡ ቅድመ፡ እግዚአብሔር።

Chapter 35 ወአውሥአ፡ ኤልዩስ፡ ወጥቤ። ምንተ፡ ትብል፡ ተዋቂሠከ፡ አንተ፡ ወምንትኑ፡ አንተ፡ ከመ፡ ትበል፡ ጻድቅ፡ አነ፡ በቅድመ፡ እግዚአብሔር። ወትብል፡ ምንተ፡ እሬሲ፡ እመ፡ አበስኩ፡ አነ። አወሥአከ፡ ለከ፡ ወለሠለስቱ፡ አዕርክቲከ። ነጽር፡ ሰማየ፡ ወርኢ፡ ወአእምር፡ ሚመጠን፡ ርኁቅ፡ እምኔከ፡ ደመና። አመሂ፡ አበስከ፡ ምንተ፡ ትሬሲ፡ ላዕሌሁ፡ ወእመሂ፡ ጌገይከ፡ ብዙኅ፡ ምንተ፡ ትክል፡ ገቢረ። እመ፡ ጻድቅ፡ አንተ፡ ምንተ፡ ወሀብኮ፡ ወምንተ፡ ነሥአ፡ እምኀቤከ። ለሰብእ፡ ዘከማከ፡ ኃጢአትከ፡ ወለእጓለ፡ እመሕያው፡ ጽድቅከ። እምብዝኆሙ፡ ለመስተዓግላን፡ የአወይዉ፡ ወይግዕሩ፡ እመዝራዕተ፡ ብዙኃን። ወኢይቤ፡ አይቴ፡ ውእቱ፡ እግዚአብሔር፡ ዘፈጠረኒ፡ ወኢይኤዝዝ፡ ንዋመ፡ ሌሊተ፡ ዘያኄይሰኒ፡ እምእንስሳ፡ ምድር፡ ወእምአዕዋፈ፡ ሰማይ። በህየ፡ ይጸርሑ፡ ወኢይሰምዖሙ፡ እምድእለተ፡ እኩያን። እስመ፡ ኢይፈቅድ፡ እግዚአብሔር፡ ይርአይ፡ እኩየ፡ እስመ፡ ውእቱ፡ ዘኵሎ፡ ይመልክ፡ ማእምር፡ ውእቱ። ወኢይሰምዖሙ፡ ለገበርተ፡ ዐመፃ፡ ተዋቀሥ፡ እስኩ፡ አንተ፡ በቅድሜሁ፡ እመ፡ ትክል፡ ሰብሖቶ፡ ከመ፡ ውእቱ። ወይእዜኒ፡ እስመ፡ አልቦ፡ ዘየአምር፡ ጊዜ፡ መዓቱ፡ ወኢይትሔዘባ፡ ለኃጢአቱ፡ ዓባይ፡፡ 15፡ ወኢዮብሰ፡ በከንቱ፡ ይነብብ፡ ወይከሥት፡ አፉሁ፡ ወበኢያእምሮ፡ ያከብድ፡ ነገሮ።

Chapter 36 ኀበ፡ ተናገረ፡ ኤልዩ፡ አውሥአ፡ ወይቤ። ተዓገሠኒ፡ ዓዲ፡ ኅዳጠ፡ ወእሜህረከ፡ ዓዲ፡ ብየ፡ ነገር፡ ኀቤየ። እትሜጠዋ፡ ለነገርየ፡ እምኁቅ፡ ምግባርየሰ፡ ጻድቅ፡ እበል። እሙን፡ ነገርየ፡ ዘኢኮነ፡ ሐሰተ፡ ወዓመፃ፡ ኢይሰምዕ፡ እግዚአብሔር። አእምር፡ ባሕቱ፡ ከመ፡ ኢይገድፎ፡ እግዚአብሔር፡ ለየዋህ፡ ኃያል፡ ወጽኑዕ፡ ውእቱ። ወኢያሐይዎ፡ ለልበ፡ ኃጥእ፡ ወይሁብ፡ ፍትሐ፡ ለነዳያን። ወኢያአትት፡ አዕይንቲሁ፡ እምጻድቅ፡ ወየሐትቶ፡ ለጻድቅወይነብሮ፡ ውስተ፡ መናብርት፡ ምስለ፡ ነገሥት፡ ወያነብሮሙ፡ በዕልገቶሙ፡ መልዕልተ፡ ወይከብሩ። ወእለሂ፡ ሙቁሐን፡ እደዊሆሙ፡ በሰናስል፡ ይትአኀዙ፡ በሐብለ፡ ንዴት። ወይነግሮሙ፡ ምግባሮሙ፡ ወጌጋዮሙሂ፡ እስመ፡ ብዙኅ፡ ውእቱ። ወዳእሙ፡ ለጻድቃን፡ ይሰምዖሙ፡ ወይቤ፡ ይትመየጡ፡ እምኃጢአቶሙ። ለእመ፡ ሰምዑ፡ ወይትቀመዩ፡ ወይፌጽሙ፡ መዋዕሊሆሙ፡ በሠናይ፡ ወዓመታቲሆሙ፡ በተድላ። ወለኃጥአንሰ፡ ኢይሰምዖሙ፡ ወኢያድኅኖሙ፡ እስመ፡ ኢይፈቅዱ፡ ይርአይዎ፡ ለእግዚአብሔር፡ ወእንዘ፡ ይጌሥዖሙ፡ ኢይሰምዑ። ወደልዋን፡ ይኤድምዎ፡ ለልቦሙ፡ ለመዓት፡ ወየአወይዉ፡ አመ፡ አኅሠሮሙ። ወትትመሰው፡ ነፍሶሙ፡ በንእሶሙ፡ ወያሴርኅዋ፡ ለሕይወቶሙ፡ መላእክት። እስመ፡ አመንደቡ፡ ነዳየ፡ ወምስኪነ፡ ወሜጡ፡ ህትሐ፡ የዋሃን። ወተሣለቁ፡ ላዕሌከ፡ በአፈ፡ ጸላእትከ፡ ቀላይ፡ ይትከዓው፡ በታሕቴከ፡ ወትወርድ፡ ማእድከ፡ እንዘ፡ ምሉእ፡ ወጥሉል። ወመዓቱ፡ ላዕለ፡ ተሣዓን፡ ትመጽእ፡ ዘነሥኡ፡ ሕልያነ፡ ከመ፡ የዓምዑ፡ ወኢይትረሣእከ፡ ዘቀዳሚ፡ ጌጋይከ። ኢያስሕትከ፡ ሥላቅ፡ ወስላተ፡ ስኡናን፡ በምንዳቤሆሙ። ባሕቱ፡ ተዓቀብ፡ ወግበር፡ ሠናየ፡ ወኢትግበር፡ እኩየ፡ ወበእንተዝ፡ ትድኅን፡ እምንዴት። ናሁ፡ ጋያል፡ ያጸንዕ፡ በኃይሉ፡ ወመኑ፡ ዘይክል፡ ምስሌሁ፡ ተኃይሎ። ወመኑ፡ ዘየሐትት፡ ምግባሮ፡ ወመኑ፡ ዘይብሎ፡ ምንተ፡ ገበርከ። ወተዘከር፡ ከመ፡ ዓቢይ፡ ግብሩ። እደው፡ እለ፡ ኰነኑ፡ ወእለ፡ ተኰነኑ፡ ኵሉ፡ ሰብእ፡ ይሄሊ፡ ለሊሁ፡ ከመ፡ ምውታን፡ እሙንቱ፡ ኃጥአን። ናሁ፡ ኃያል፡ ወዓቢይ፡ ወኢይትረአይ፡ ኍልቈ፡ ፍናዊሁ፡ ወኢይትአወቅ። ወኢትኌለቊ፡ ነጠብጣበ፡ ዝንማ፡ ዘይትከዓው፡ እም፡ ውስተ፡ ደመና። ወያሠርዕ፡ ዘበልየ፡ ወይከድን፡ ደመና፡ ዲበ፡ መዋቲ፡ ወይትከዓው፡ ዝናም፡ ዘአልቦ፡ ኍልቊ። ወየአምር፡ ራኅበ፡ ደመናት፡ በአምጣነ፡ ጽላሎቱ። ናሁ፡ ይሰፍሕ፡ አእምሮ፡ ላዕሌሁ፡ ወይደፍኖ፡ ለማዕበለ፡ ባሕር። እስመ፡ ቦሙ፡ ይኴንን፡ አሕዛበ፡ ወይሁቦ፡ ሲሳዮ፡ ለጽኑስ። ወለእንተ፡ ትንእስ፡ ይከድና፡ ብርሃነ፡ ወአዘዘ፡ ላቲ፡ ዘይዳደቃ። ወይነግር፡ በእንቲአሁ፡ ዐርኩ፡ እንተ፡ ረከበቶ፡ በዓመጻሁ።

Chapter 37 ወበእንተዝ፡ ደንገፀተኒ፡ ልብየ፡ ወወድቀት፡ እመካና። ስማዕኬ፡ ድምፀ፡ መቅሠፍት፡ መዓቱ፡ ለእግዚአብሔር፡ ወዘይወጽእ፡ ነገረ፡ እምአፉሁ። ይዌርዎ፡ ታሕተ፡ ኵሉ፡ ሰማያት፡ ወብርሃኑ፡ ዲበ፡ ከንፈረ፡ ምድር። ወበድኅሬሁ፡ ቃለ፡ ይቀጽእ፡ ወያንጐደጕድ፡ በቃለ፡ መዓቱ፡ ወይሣሃሎሙ፡ እንዘ፡ ይሰምዕ፡ ቃሎሙ። ወያንጐደጕድ፡ በፀዓዕ፡ መደንግፅ፡ ወይሬሲ፡ ለእንስሳ፡ በበጊዜሁ፡ ወየአምር፡ ጊዜ፡ ይሰክቡ፡ ወበዝ፡ ኵሉ፡ ኢይደንግፅከ፡ ልብከ፡ ወኢይትወለጥ፡ ልብከ፡ እምነ፡ ሥጋሁ፡ ወገብረ፡ ዓቢያተ፡ ዘኢነአምር። ወይኤዝዝ፡ በረደ፡ ይረድ፡ ዲበ፡ ምድር፡ ወዝናመ፡ ክረምት፡ በኃይሉ። ወየዓቅብ፡ እደ፡ ኵሉ፡ ሰብእ፡ ከመ፡ ያእምር፡ ኵሉ፡ እጓለ፡ እመሕያው፡ ድካሞ። ወቦኡ፡ አራዊት፡ ታሕተ፡ ጠፈር፡ ወአዕረፉ፡ ውስተ፡ ምስካቦሙ። ወእምረኀብ፡ ይመጽኦሙ፡ ሕማም፡ ወባማኅደሪሆሙ፡ ይቈርሩ። ወእምነፋሰ፡ ኃያል፡ ይመጽእ፡ አስሐትያ፡ ወይከፍሎ፡ ለማይ፡ ዘከመ፡ ፈቀደ። ወይሤውር፡ ኅሩያነ፡ በደመና፡ ወይዘርዎ፡ ለደመና፡ በብርሃኑ፡ ወውእቱ፡ ይመይጦ፡ በዓውዱ፡ አሐዱ፡ ምክሩ፡ በምግባሩ፡ በኵሉ፡ ዘአዘዞሙ፡ ከመዝ፡ ሥርዓት፡ ዘእምኀቤሁ፡ በዲበ፡ ምድር። እመሂ፡ ለዘውስተ፡ ገዳም፡ ወለዘሂ፡ ውስተ፡ ምድር፡ ወለዘሂ፡ በሠናይ፡ ይረክቦ። አጽምእ፡ ኢዮብ፡ ዘንተ፡ ወተገሠፅ፡ ወቁም፡ በኃይለ፡ እግዚአብሔር። ነአምር፡ ከመ፡ ሠርዐ፡ እግዚአብሔር፡ ተግባሮ፡ ወገብረ፡ ብርሃነ፡ እምጽልመት። ቦኑ፡ ተአምር፡ ፈሊጦቶ፡ ለደመና፡ ግሩም፡ ድቀቶሙ፡ ለኃጥአን። ወለከሰ፡ ምውቅ፡ አልባሲከ፡ ወአርምም፡ እንከ፡ በዲበ፡ ምድር። ወእምአዜብኑ፡ ታጸንዕ፡ ተጋድሎ፡ ምስሌሁ፡ ግሩም፡ ራእዩ፡ በዲበ፡ ብዙኃን። በእንተ፡ ምንት፡ ንግረኒ፡ ወምንተ፡ ንብሎ፡ ወናርምም፡ እነከ፡ ወእንተኒ፡ ኢትንብብ፡ ብዙኀ። ቦኑ፡ መጽሐፍ፡ ወጸሐፊ፡ ሎቱ፡ ከመ፡ አርምም፡ እንዘ፡ ይቀውም፡ ብእሲ፡ ኀቤየ። ወአኮ፡ ለኵሉ፡ ዘይትአወቆ፡ ብርሃን፡ ወብርሃን፡ ውእቱ፡ ውስተ፡ ዘይበሊ፡ ከመ፡ ዘእምኀቤሁ፡ ዘውስተ፡ ደመና፡ ነስዕብሩህ። ቦኑ፡ ዘከመዝ፡ ዓቢይ፡ ስብሐት፡ ወክብር፡ በኀበ፡ ዘኵሎ፡ ይመልክ። ኢንረክ፡ ዘከመ፡ ኃይሊ፡ ካልእ፡ ዘጽድቀ፡ ይኴንን፡ ወኢይፈቅድ፡ ይስምዖ። ወባሕቱ፡ ይፈርሆ፡ እጓለ፡ እመሕያው፡ ወይፈርህዎ፡ ጠቢባነ፡ ልብሂ። ወእምድኅሬሁሰ፡ ኀደገ፡ በገረ፡ ኤልዩስ።

Chapter 38 ወእምዝ፡ ተሰአሎ፡ እግዚአብሔር፡ ለኢዮብ፡ በደመና፡ ወበዓውሎ። ወይቤ፡ መኑ፡ ሰብእ፡ ዘየኀብእ፡ ምክረ፡ እምኔየ፡ ወይከብት፡ ነገረ፡ ውስተ፡ ልቡ፡ እምኔየሁ፡ ይሤወር። ቅንት፡ ሐቌከ፡ ከመ፡ ብእሲ፡ ወእሴአለከ፡ ወእንተኒ፡ አውሥአኒ። አይቴ፡ ሀሎከ፡ አመ፡ ሣረርክዋ፡ ለምድር፡ ንግረኒ፡ እመ፡ ጠቢብ፡ አንተ። መኑ፡ ሠርዐ፡ አምጣኒሃ፡ እመ፡ ተአምር፡ ወመኑ፡ አዖደ፡ አኀባለ፡ ዲቤሃ። ወዲበ፡ ምንት፡ ስቁል፡ ሕላቃቲሃ፡ ወመኑ፡ ዘአስተኀደረ፡ መዓዝኒሃ። እመ፡ ተፈጥሩ፡ ከዋክብት፡ ሰብሑኒ፡ ኵሎሙ፡ መላእክትየ፡ በዓቢይ፡ ቃል። ወሐፀርክዋ፡ ለባሕር፡ በአናቅጽአመ፡ ወጽአት፡ እምከርሠ፡ እማ። ወረሰይኩ፡ ላቲ፡ ደመና፡ ልብሳ፡ ወበጊሜ፡ ጠብለልክዋ። ወገዘርኩ፡ ላቲ፡ ወሰነ፡ ወሤምኩ፡ ውስቴታ፡ መዓዑተ፡ ወመናሥግተ። ወእቤላ፡ እስከ፡ ዝየ፡ ብጽሒ፡ ወኢትትዓደዊ፡ እምወሰንኪ፡ ዳዕሙ፡ በማእከሌኪ፡ ይትከወስ፡ ማዕበልኪ። ወበላዕሌከኑ፡ ተሠርዐ፡ ጎሐ፡ ጽባሕ፡ ወኮከበ፡ ጽባሕኒ፡ አእመረ፡ ትእዛዘ። ወይትመየት፡ በክንፈ፡ ምድር፡ ከመ፡ ይንጽሖሙ፡ ለኃጥአን፡ እምኔሃ። አንተኑ፡ ነሣእከ፡ ፅቡረ፡ እምድር፡ ወፈጠርከ፡ ዘሕያው፡ ወረሰይኮ፡ ከመ፡ ይትናገር፡ በዲበ፡ ምድር። አእተትከሁ፡ ብርሃኖሙ፡ ለኃጥአን፡ ወቀጥቀጥከሁ፡ መዝራዕቶሙ፡ ለዕቡያን። ወበጻሕከኑ፡ ውስተ፡ ምድረ፡ ባሕር፡ ወአንሶሰውከኑ፡ ውስተ፡ አሠረ፡ ቀላይ። ወይትረኀውኑ፡ ለከ፡ አንቀጻ፡ ሞት፡ እምግርማከ፡ ወዓፀውተ፡ ሲኦልኒ፡ ይደነግፁኑ፡ እምከመ፡ ርእዩከ። ወተአምርኑ፡ ራኅበ፡ ዘታሕተ፡ ሰማይ፡ ንግረኒ፡ እስኩሚ፡ መጠኝ፡ ውእቱ። ወአይቴ፡ ማኅደሩ፡ ለብርሃን፡ ወአይቴ፡ ውእቱ፡ መካኑ፡ ለጽልመት። ሰደኒ፡ እስኩ፡ ውስተ፡ ደወሎሙ። ወለእመ፡ ተአምር፡ ፍኖቶሙ፡ ተአምር፡ እንከሰ፡ ከመ፡ አሜሁ፡ ተወለድከ፡ ወብዙኅ፡ ኍልቈ፡ ኣመታቲከ። በጻሕከኑ፡ ኀበ፡ መዝገበ፡ በረድ፡ ወርኢከኑ፡ ምሥያመ፡ አስሐትያ። ወይትዐቀብኑ፡ ለከ፡ ለጊዜ፡ ፀርከ፡ በዕለተ፡ ጸብእ፡ ወቀትል። እምአይቴ፡ ይመጽእ፡ ሐመዳ፡ ወይትመየጥ፡ አዜብ፡ ዘታሕተ፡ ሰማይ። መኑ፡ ውእቱ፡ ዘያጸንዖ፡ ለኃያል፡ ዝናም፡ በውስተ፡ ፍኖተ፡ በድው። ከመ፡ ይዝንም፡ ብሔረ፡ በድው፡ ኀበ፡ አልቦ፡ ሰብእ፡ ወኀበ፡ ኢይነብር፡ እጓለ፡ እመሕያው። ወከመ፡ ያጽግብ፡ ኀበ፡ አልቦ፡ ዕፅ፡ ወአልቦ፡ ዘይነብር፡ ከመ፡ ያብቊል፡ ሣዕረ፡ በውስተ፡ ገዳም። መኑ፡ አቡሁ፡ ለዝናም፡ ወመኑ፡ ይወልዶ፡ ለሕንባባተ፡ ነጠብጣብ። ወእምከርሠ፡ መኑ፡ ይወጽእ፡ በረድ፡ ወመኑ፡ ይወልዶ፡ ለሐመዳ፡ በሰማይ፡ ወይወርድ። ወውስተ፡ አእባን፡ ይትኃብኡ፡ ማያት፡ ወከመ፡ ማይ፡ ይውኅዝ፡ ወመኑ፡ አኅሠረ፡ ገሮ፡ ለኃጥአን። ወተአምርሁ፡ ማዕሠሮሙ፡ ለብዙኃን፡ ወዐቀብከኑ፡ ሙኀዘማይ፡ ወታርኁ፡ ክረምት፡ በበዓመት፡ ወታመጽኦኑ፡ ለሐጋይ፡ ድኅረ፡ በዕድሜሁ። ተአምርሁ፡ ግእዞ፡ ለሰማይ፡ ወእመ፡ አኮ፡ ዘይከውን፡ በመትሕተ፡ ሰማይ፡ ኅቡረ። ትክልኑ፡ ተአኃዛ፡ ለትርያ፡ ከመ፡ ኢትሑር፡ ወርኢከኑ፡ ፍኖቶ፡ ለደብራን፡ ወሙፃኦ፡፡ 34፡ ተአምርኑ፡ ጊዜሃ፡ ለብልአተናሽ፡ ወሕዋፄሃ። ትጼውዖኑ፡ ለደመና፡ በቃልከ፡ ወያውሥአከኑ፡ ማይ፡ ብዙኅ፡ እንዘ፡ ይርዕድ። ወትፌኑሁ፡ ፀዓዐ፡ ወየሐውር፡ ወይብለከ፡ ምንት፡ ውስቱ። ወመኑ፡ ወሀቦን፡ ለእንስሳት፡ ጥበበ፡ ከመ፡ ይእንማ፡ ወአአኢ፡ አሁ፡ ትምህርተ። መኑ፡ ኈለቆ፡ ለደመና፡ በጥበቡ፡ ወአጽነኖ፡ ለሰማይ፡ ዲበ፡ ምድር። ወተክዕወ፡ ላዕለ፡ ምድር፡ ወአስተጣበቅዎ፡ ከመ፡ እብነ፡ ኰኵሕ። ወነዐውከኑ፡ አናብስተ፡ መስዕ፡ ወታጸምምኑ፡ ነፍሰ፡ አክይስት። ወቦኡ፡ ውስተ፡ ግበቢሆሙ፡ ወይነብሩ፡ ውስተ፡ ኦም፡ ወያስተሐይጹ። ወመኑ፡ ዘያስተዳሉ፡ ሲሳየ፡ ለቋዓት፡ ወየአወይዉ፡ ኀበ፡ እግዚአብሐየር፡ እጐሊሆሙ፡ ወየኃሥሡ፡ ዘይበልዑ።

Chapter 39 ተአምርሁ፡ ጊዜ፡ ይትወለድ፡ ኃየል፡ ወዐቀብኮኑ፡ በውስተ፡ ማሕምም። ወኈለቈኑ፡ አውራኂሁ፡ ማእዜ፡ ይትወለድ፡ ወፈታሕ፡ ኮኑ፡ እምሕማም። ወሰሰይኮሙኑ፡ ለደቂቁ፡ ዘእንበለ፡ ፍርሃት፡ ወታአትትኑ፡ ሕማሞሙ። ወያመሥጡ፡ እጐሊሆሙ፡ ወትዝኁ፡ ወይትዋለዱ፡ ወይወጽኡ፡ ወኢይገብኡ፡ ኀቤሆሙ። ወመኑ፡ ዘአግአዞ፡ ለሐልስትዮ፡ ወመኑ፡ ፈትሐ፡ ማእሠሮ። ወረሰየ፡ ሎቱ፡ ገዳመ፡ ንብረቶ፡ ወማኅደሮሂ፡ ውስተ፡ ፄው። ወይስሕቆሙ፡ ለበረዙኀን፡ አሕዛብ፡ ወኢይሰምዕ፡ ድምፀ፡ ዘይጌርሞ። ወየዓይል፡ ውስተ፡ ገዳም፡ ይትረዐይ፡ ወኀበ፡ ሐመልማል፡ ይዴግን። ወይፈቅድኑ፡ ይትቀነይ፡ ለከ፡ አርዌ፡ ሐሪስ፡ ወይበይት፡ ውስተ፡ ቤትከ። ወተአዕሮኑ፡ በመዕመድ፡ ወትወዲ፡ አርዑተ፡ ውስተ፡ ክሣዱ፡ ወጠሐርስ፡ ለከ፡ ትልመ፡ ገራውሂከ። ወትተፊ፡ ከላዕሌሁ፡ እስመ፡ ብዙኅ፡ ኃይሉ፡ ወተኀድግ፡ ዲቤሁ፡ ተግባረከ። ወትትአመኖ፡ ከመ፡ ያእቱ፡ ለከ፡ ተግባረ፡ ማእረርከ፡ ወያመጽእ፡ ለከ፡ እክለከ። ሰገኖ፡ ዘታዘልፍ፡ ወትነብር፡ ወእምከመ፡ ፀንሰት፡ ትፈቅድ፡ ትብላዕ፡ ወታፀምእ፡ ውስተ፡ ምድር፡ ዕዘኒሃ። ወተኀዕን፡ ውስተ፡ መሬት፡ እጐሊሃ፡ ወታኀድጎሙ፡ ኀበ፡ ወለደት፡ ወትከይድ፡ አራዊት። ወታልህቅ፡ ደቂቃ፡ ወተኃድህ፡ ህየ፡ ወበከንቱ፡ ትፃሙ፡ ወተሐምም፡ ወአልባቲ፡ ፍርሀት። እስመ፡ ወሀባ፡ ላቲ፡ እግዚአብሔር፡ ጥበበ፡ ወከፈላ፡ ምክረ፡ ወጥበበ። ወበዓመቱ፡ ታቸውኅ፡ ወታልኅቅ፡ ወትስሕቅ፡ ዲበ፡ ፈረስ፡ ወዘይፄዓኖ። ወአንተኑ፡ ወሀብኮ፡ ኃይለለፈረስ፡ ወአልቦስኮ፡ ግርማ፡ ዲበ፡ ክሳዱ። ወአስተረደይኮኑ፡ ለቀትል፡ በንዋየ፡ ሐቅል። ወበግርማ፡ እንግድዓሁ፡ እንዘ፡ ይረውጽ፡ ያዐምቅ፡ ምድረ፡ በእግሩ፡ ወይመጽአ፡ ገዳመ፡ በኃይሉ። ወይስሕቆ፡ ለሐዕ፡ ዘይትቤቀሎ፡ ወኢይትመየጥ፡ እም፡ ሐፅ፡፡ 22፡ ወበላዕሌሁ፡ ይጸንዕ፡ ቀስተ፡ ወመጥባሕት፡ ወኲናት። ወበመዓቱ፡ ያማስን፡ ምድረ፡ ወኢይትአመን፡ እንከ፡ እስከ፡ ሶበ፡ ይትነፋሕ፡ ቀርን። ወእምከመ፡ ተነፍሐ፡ ቀርን፡ ይብል፡ እንቋፅእምርኁቅ፡ ወያፄንዎ፡ ለቀትል። ወበጥበበከኑ፡ ይቀውም፡ ሆባይ፡ ሰፊሖ፡ ከነፊሁ፡ ወኢይትሐወስ፡ ተመይጦ፡ መንገለ፡ ደም። ወባትእዛዝከኑ፡ ይትሌዓል፡ ንስር፡ ወአውስትኒ፡ ሐቂፎ፡ እጐሉሁ፡ ይበይት። ወውስተ፡ በዓታተ፡ ኰኵሕ፡ የኀድር፡ ወየኃብእ፡ ህየ፡ እጐሊሁ። ወአንቢሮ፡ ይረውጹ፡ ኀበ፡ ደም፡ ወኀበ፡ ቦ፡ በድን፡ ይባጽሑ፡ ሶቤሃ።

Chapter 40 ወተሰጥዎ፡ እግዚአብሔር፡ ለኢዮብ፡ ወይቤሎ። ምስለ፡ ቢጽከኑ፡ ዘትትዋቀሥ፡ አንተ፡ ከመ፡ ትትዋሣእ፡ እንዘ፡ እግዚአብሔር፡ ይዘልፈከ። ወተሰጥዎ፡ ኢዮብ፡ ለእግዚአብሔር፡ ወይቤሎ። ምንት፡ ብየ፡ ዘአወሥእ፡ እንዘ፡ ትሜህረኒ፡ ወምንትኑ፡ አነ፡ ከመ፡ እትዋቀሥ፡ ምስለ፡ እግዚአብሔር፡ እነዘ፡ ዘንተ፡ አሰምዕ፡ ወምንትኑ፡ ዘአወሥአ፡ አነ፡ ዘእንበለ፡ ዘእወዲ፡ እዴየ፡ ዲበ፡ አፉየ። ምዕረ፡ ነበብኩ፡ ወኢይደግም፡ እንከ። ወዓዲ፡ ተሠጥዎ፡ እግዚአብሔር፡ ለኢዮብ፡ እምደመና፡ ወይቤሎ። ዳዕሙ፡ ቅንት፡ ሐቌከ፡ ከመ፡ ብእሲ፡ ወእሴአለከ፡ ወአንተ፡ አውሥአኒ። ወአመ፡ አኮ፡ ኅደግ፡ ፍትሕየ፡ ይመስለከኑ፡ ካልእ፡ ዘይኴንነከ፡ ዳዕሙ፡ ከመ፡ ታስተርኢ፡ ጽድቀከ። መዝራፅትከኑ፡ ከመ፡ እግዚአብሔር፡ ወቃልከኑ፡ ከመ፡ ነጐድጓድ። ልበስ፡ እስኩ፡ ኃይለ፡ ዘእምአርያም፡ ወተረሠይ፡ በክብር፡ ወበስብሐት። ወፈኑ፡ መላእክተ፡ ሞት፡ ወአኅሥሮ፡ ለጸላኢከ። ወአጥፍኦሙ፡ ለዕቡያን፡ ወበጊዜሃ፡ ድፍኖሙ፡ ለረሲዓን፡ ወአብልዮሙ፡ ኅቡረ፡ ውስተ፡ ምድር፡ በአፍኣ። ወምላእ፡ ውስተ፡ ገጾሙ፡ ኀሣረ፡ ወኅብኦሙ፡ ውስተ፡ ምድር፡ በአፍኣ። ወአነሂ፡ አአምነከ፡ ከመ፡ ትክል፡ የማንከ፡ አድኅኖ። ወናሁ፡ አራዊትኒ፡ በኀቤከ፡ ከመ፡ እንስሳ፡ ይትረዐይ፡ ሣዕረ። ወናሁ፡ ኃይሉ፡ ውስተ፡ ሐቌሁ፡ ወጽንዑ፡ ውስተ፡ ኅንብርተ፡ ከርሡ። ወአቀመ፡ ዘባኖ፡ (ዘነቦ)፡ ከመ፡ ዕፀቄጵርስስ፡ ወሥረዊሁኒ፡ ጽፉር። ወአፅዕምተ፡ ገበዋቲሁኒ፡ ዘብርት፡ ወአፅዕምተ፡ ዘባኑሂ፡ ዘሐፂን፡ ስብኮ። ዝ፡ ውእቱ፡ ቀዳሜ፡ ተግባሩ፡ ለእግዚአብሔር፡ ወተገቢሮሂ፡ ሰሐቅዎ፡ መላእክቲሁ። ወሖረ፡ ውስተ፡ ደብር፡ ነዋኅ፡ ወገበወረ፡ ብሔረ፡ ለእንስሳሁ፡ በውስተ፡ ቊር። ወይሰክብ፡ ታሕተ፡ ኵሉ፡ ዕፅ፡ ውስተ፡ ሰት፡ ወሰማዝ፡ ወብርዕ። ወይጼልሎ፡ አመ፡ ዳዕሮ፡ ወአብትረ፡ ልብኔ። ወእመሂ፡ መጽአ፡ ማይ፡ ብዙኅ፡ ኢያነክሮ፡ ወይትአመን፡ ከመ፡ ይትሜጠዎ፡ ለዮርዳኖስ፡ በአፉሁ። ወይትዌከፎ፡ በዓይኑ፡ ወይትየመጥ፡ ወየዓቅብ፡ አንፎ። ወታመጽኦኑ፡ ለከይሲ፡ በመሥገርት፡ ወትወዲ፡ ሎቱ፡ ዝማማተ፡ ውስተ፡ አንፉ። ወተአስር፡ ሎቱ፡ ኀልቀተ፡ ውስተ፡ ሕልበቱ፡ ወትሰቊር፡ አንፎ፡ በኅርወት። ወያመሥአከ፡ ለከ፡ እንዘ፡ ይትጋነይ፡ ወይዬውሃከ። ወይትካየድኑ፡ ምስሌከ፡ ኪዳነ፡ ወትነሥኦ፡ ለከ፡ ምስሌከ፡ ይኩንከ፡ ገብረ፡ ዘለዓለም። ወተአስሮኑ፡ ከመ፡ ዖፈ፡ ደቂቀ፡ ወትትዋነዮ፡ ከመ፡ ዖፍ። ወአሕዛብኒ፡ ይትጋነዩ፡ ሎቱ፡ ወይትዌከፍዎ፡ ሕዝበ፡ ፊንቆን። ወአመ፡ ኵሉ፡ አዕዋፍ፡ ተጋብኡ፡ ኢያመጽኡ፡ አሐተ፡ እማእሰ፡ ዘባኑ፡ ወኢመሠግራን፡ በአሕማር፡ ርእሶ። ወትወዲ፡ እዴከ፡ ሎቱ፡ ለገሢሦቱ፡ ተዘከር፡ ዘፀብዓከ፡ በሥጋከ፡ ወኢትድግም፡ እንከ፡፡ 33፡ ወርኢከሂ፡ ነገሮ፡ ወኢፈራህከ፡ ወኢያንከርከ፡ እስመ፡ ሊተ፡ አስተዳለውከ።

Chapter 41 መኑ፡ ውእቱ፡ ዘጥትቃወመኒ። ወመኑ፡ ውእቱ፡ ዘይትዋሥአኒ፡ ወየሐዩ፡ ወኵሉ፡ ዘታሕተ፡ ሰማይ፡ ዚአየ፡ ውእቱ። ወኢያረምም፡ በእንቲአሁ፡ ወቃለ፡ ኃይል፡ ይሣሃሎ፡ ለዘከማሁ። ወመኑ፡ ዘይቀፍጽ፡ ግልባቤ፡ ገጹ፡ ወመኑ፡ ይበእው፡ ውስተ፡ ማኅበርተ፡ እብግድዓሁ። ወመኑ፡ ያርኁ፡ መዓፁተ፡ ዘቅድመ፡ ገጹ፡ ወዖዶ፡ ለሥነኒሁ፡ ግርማ። ወአማዑቲሂኒ፡ አራዊት፡ ዘብርት፡ ወቊጽረቱኒ፡ ከመ፡ እብነ፡ ኰኵሕ። ወአሐዱ፡ ምስለ፡ ካልኡ፡ ተጣበቀ፡ ወመንፈስሂ፡ ኢይበርሮ። ወያስተላክዕ፡ ብእሴ፡ ምስለ፡ እኁሁ፡ ይጣበቁ፡ ወኢይትፋትሑ። ወበዕጠሱ፡ ይበርቅ፡ ብርሃነ፡ ወአዕይንቲሁ፡ ከመ፡ ኮከበ፡ ጽባሕ። ወእምአፉሁ፡ ይወጽአ፡ መኃትው፡ ዘይነድድ፡ ወይዌሩ፡ አፍሐመ። ወእምአንፉ፡ ይወጽእ፡ ጢስ፡ ከመ፡ እቶን፡ ዘይነድድ፡ በአፍሐመ፡ እሳት። ነፍሱሂ፡ ፍሕም፡ ይእቲ፡ ወነበልባል፡ ይወጽእ፡ እምአፉሁ፡፡ 13፡ ወውስተ፡ ክሳዱ፡ ኃደረ፡ ኃይል፡ ወወዓለ፡ ሞት፡ ቅድሜሁ፡ ለዘይሬእዮ። ሥጋ፡ ነፍስቱ፡ ጥቡቅ፡ ወእመሂ፡ ሦጡ፡ እብነ፡ ላዕሌሁ፡ ኢይትሐወስ። ወልቡሂ፡ ጽኑዕ፡ እብነ፡ ጾላዕ፡ ወይቀውም፡ ከመ፡ ወሬዛ፡ ንኡስ። ወእመሂ፡ ተመይጠ፡ ይሜምዑ፡ ኵሊ፡ አራዊተ፡ ገዳም፡ ወእንስሳ፡ ወዘይትሐወስ፡ ዲበ፡ ምድር። ወእመሂ፡ ጠበቆ፡ ኵያንው፡ አልቦ፡ ዘይሬስዮ። ረምሕ፡ ወልብሰ፡ ሐፂም፡ ከመ፡ ኃሠር፡ እሙንቱ፡ በቅድሜሁ፡ ወብርትኒ፡ ከመ፡ ዕፅ፡ ብኍቡኍ። ወኢይሰቊሮ፡ ቀስተ፡ ብርት፡ ወእብንኒ፡ ከመ፡ ኃሠር፡ ወይመስሎ፡ ብርዐ፡ መፍጽሕ፡ ወይሰብክ፡ ላዕለ፡ እብን፡ ዓቢይ። ወምስካቡሂ፡ ሐውልት፡ ዓቢይ፡ ወኵሉ፡ ወርቀ፡ ባሕር፡ በኀቤሁ፡ ከመ፡ ጽቡር፡ ዘአልቦ፡ ኍልቊ። ወያንሰአስኣ፡ ለሲኦል፡ ከመ፡ ጽሕርት፡ ወባሕርኒ፡ በድወ፡ ይመስሎ። ወቊረ፡ ሲኦልኒ፡ ከመ፡ ፄው፡ ወረሰያ፡ ለሲኦል፡ ከመ፡ ኀበ፡ ያንሶሱ። ወአልቦ፡ በዲበ፡ ምድር፡ ወኢምንትኒ፡ ዘከማሁ፡ ወተፈጢሮ፡ ሰሐቁ፡ ላዕሌሁ፡ መላእክቲሁ። ወይሬኢ፡ ኵሎ፡ ነዋኀ፡ ወውእቱ፡ ምጉሦሙ፡ ለኵሉ፡ ዘውስተ፡ ሰማይ።

Chapter 42 ወተሠጥዎ፡ ኢዮብ፡ ለእግዚአብሔር፡ ወይቤ። አእምሮ፡ አአምር፡ ከመ፡ ኵሎ፡ ትክል፡ ወኵሉ፡ ይትከሀለከ፡ ወአልቦ፡ ዘይሰአነከ። መኑ፡ ውእቱ፡ ዘየህብአከ፡ ምክረ፡ ወዘይምህከ፡ ነገር፡ ውስተ፡ ልቡ፡ ወእምኔጀኑ፡ ዘይሤውር፡ ይመስሎ፡ ወመኑ፡ ይነግረኒ፡ ዘኢየአምር፡ ዓቢያተ፡ መንክራት፡ ዘኢርኢኩ። ስምዐኒ፡ እንግርከ፡ እግዚእየ፡ አነ፡ እሴእለከ፡ ወአንተ፡ መሀረኒ። ሰሚዐሰ፡ ሰማዕኩ፡ ቅድመ፡ በዕዝንየ፡ ወይእዜሰ፡ ርኢኩከ፡ በአዕይንትየ። ወባሕቱ፡ በዘተዛለፍኩ፡ ተመሰውኩ፡ አአምር፡ አነ፡ ከመ፡ መሬት፡ ወሐመድ፡ ርእስየ። ወእምድኅረ፡ ተናገሮ፡ እግዚአብሔር፡ ለኢዮብ፡ ዘንተ፡ ነገረ፡ ይቤሎ፡ እግዚአብሔር፡ ለኤልፋዝ፡ ቴሜናዊ፡ አበስክሙ፡ አንተ፡ ወክልኤቱ፡ አዕርክቲከ፡ እስመ፡ ኢተናገርክሙ፡ ጽድቀ፡ በቅድሜየ፡ ከመ፡ ቊልዔየ፡ ኢዮብ፡ ወኢአሐተኒ። ወይእዜኒ፡ ንሥኡ፡ ሰብዓተ፡ አልሕምተ፡ ወሰብዓተ፡ አባግዐ፡ ወሑሩ፡ ኀበ፡ ቊልዔየ፡ ኢዮብ፡ ወይግበር፡ መሥዋዕተ፡ ወኢዮብ፡ ቊልዔየ፡ ይጸሊ፡ በእንቲአክሙ፡ እምገጸዚአሁ፡ እነሥአ፡ ወሶበ፡ አኮ፡ በእንቲአሁ፡ እምቀተልኩክሙ፡ እስመ፡ ኢነበብክሙ፡ ርትዐ፡ ላዕለ፡ ቊልዔየ፡ ኢዮብ። ወሖሩ፡ ኤልፋዝ፡ ቴሜናዊ፡ ወበልዳዶስ፡ አውኬናዊ፡ ወሳፍር፡ አሜናዊ፡ ወገብሩ፡ በከመ፡ አዘዞሙ፡ እግዚአብሔር፡ ወሠረየ፡ ሎሙ፡ እግዚአብሔር፡ ኃጢአቶሙ፡ በእንተ፡ ኢዮብ። ወአሕየዎ፡ እግዚአብሔር፡ ለኢዮብ፡ ወጸለየ፡ በእንተ፡ አዕርክቲሁ፡ ወኀደግ፡ ሎሙ፡ ኃጢአቶሙ፡ ወወሀቦ፡ ኵሎ፡ ንዋዮ፡ እግዚአብሔር፡ ለኢዮብ፡ ካዕበተ፡ ኵሉ፡ ንዋዩ፡ እምዘቀዲሙ፡ ወአመክዓበ፡ ሎቱ። ወሰምዑ፡ ኵሎሙ፡ አኀዊሁ፡ ወአኃቲሁ፡ ዘረከቦ፡ ወመጽኡ፡ ኀቤሁ፡ ኵሎሙ፡ እለ፡ የአምርዎ፡ ቀዲሙ፡ ወበልዑ፡ ወሰትዩ፡ ምስሌሁ፡ ወአስተፈሥሕዎ፡ ወአንከሩ፡ በእንተ፡ ኵኩ፡ ዘአምጽአ፡ እግዚአብሔር፡ ላዕሌሁ፡ ወወህቦሙ፡ ለለአሐዱ፡ ጽምደ፡ አልሕምት፡ ወርቀ፡ ወብሩረ፡ በመድሎት፡ ዘዲድርክሜ፡ አርባዕተ። ወባረከ፡ እግዚአብሔር፡ ለኢዮብ፡ ደኀሪቶ፡ እምቀዲሙ፡ ወእንስሳሁኒ፡ እልፍ፡ ወአርባዓ፡ ምእት፡ ወአባግዒሁኒ፡ ስሳምእት፡ ጽምደ፡ አልሕምቱሁኒ፡ ዓሠርቱ፡ ምእት፡ ወአእዱ፡ ጊሁኒ፡ አእኑስ፡ ዓሠርቱ፡ ምእት፡ ወአግማሊሁኒ፡ ዓሠርቱ፡ ምእት። ወተወልዱ፡ ሎቱ፡ ሰባዓቱ፡ ደቂቀ፡ ወሠላስ፡ አዋልድ። ወሰመያ፡ ለቀዳሚት፡ ዕለት፡ (ፀሐይ)፡ ወለካልእታ፡ ቃስያስ፡ ወለሣልስታ፡ አሜልትያስቂራስ። ወኢተረክባ፡ ሠናያተ፡ በታሕተ፡ ሰማይ፡ ከመ፡ አዋልደ፡ ኢዮብ፡ ወወሀቦን፡ አቦሖን፡ ርስቶን፡ ምስለ፡ አኃዊሆን። ወሐይወ፡ ኢዮብ፡ እምድኅረ፡ ቅሥፈቱ፡ ምእተ፡ ወሰብዐ፡ ክረምተ፡ ወኵሉ፡ ዘሐይወ፡ ክልኤቱ፡ ምእት፡ አርባዓ፡ ወሰመንቱ፡ ዓመት፡ ወርእየ፡ ደቆቆ፡ ወደቂቁ፡ ደቂቁ፡ እስከ፡ ራብዕ፡ ትውልድ። ወሞተ፡ ኢዮብ፡ ልሂቆ፡ ወፈጺሞ፡ መዋዕሊሁ። ወጽሐፍ፡ ከመ፡ ይትነሣእ፡ ካዕበ፡ ምስለ፡ እለ፡ ያነሥኦሙ፡ እግዚአብሔር። ወከመዝ፡ ትርጓሜሁ፡ መጽሐፈ፡ ሶርያ፡ ወብሔሩሰ፡ ኀበ፡ ይነብር፡ አውስጢድ፡ ዘደወለ፡ ኤዶምያስ፡ ዘዓረብ። ወሰመይዎ፡ ሰሞ፡ ኢዮባብ፡ ወአውሰበ፡ ብእሲ፡ ዓረባዊተ፡ ወወለደት፡ ሎቱ፡ ወልደ፡ ዘስሙ፡ ኄኖን፡ ወውእቱ፡ ኢዮብ፡ አቡሁ፡ ዛራ፡ ወእሙ፡ ባሱራስ፡ ወኃምስ፡ ውእቱ፡ እምአብሃም። ወእሉ፡ እሙንቱ፡ ነገሥታት፡ እለ፡ ነግሡ፡ በኤዶም። ወውእቱ፡ ጐነነ፡ በሐውርተ፡ ቃዳሚ፡ ባላቅ፡ ወልደ፡ ቢዖር፡ ወስመ፡ ሀገሩ፡ ዲናብ። ወእድኅረ፡ ባላቅ፡ ኢዮባብ፡ ዘስሙ፡ ኢዮብ፡ ወእምድኅሬሁ፡ አሦም፡ ዘነግሠ፡ ለብሔረ፡ ቴማን፡ 24፡ ወእምድኅሬሁ፡ አዳድ፡ ወልዳ፡ በራድ፡ ዘቀተሎሙ፡ ለምድያም፡ በሕቅለ፡ ሞዓብ፡ ወስመ፡ ሀገሩ፡ ጌቴም። ወእለሂ፡ መጽኡ፡ ኀቤሁ፡ አዕርክቲሁ፡ ኤልፋዝ፡ ዘእምደቂቀ፡ ኤሳው፡ ንጉሠ፡ ቴሜኖን፡ ወበልዳዶስ፡ መስፍነ፡ አውኬኔዎን፡ ወሳፍር፡ ንጉሠ፡ አሜኔዎን።