Epistle of Jeremiah

This text is taken from the modern standard Ethiopian printed Bible አርአያ፡ መጽሐፍ፡ ዘኤርምያስ፡ ዘፈነወ፡ ኀበ፡ እለ፡ ፄወዎሙ፡ ባቢሎን፡ ንጉሠ፡ ባቢሎን፡ ይንግርዎሙ፡ ዘአዘዘ፡ እግዚአብሔር። በእንተ፡ ኀጢአትክሙ፡ ዘአበስክሙ፡ ለእግዚአብሔር፡ ወሰደክሙ፡ ባቢሎን፡ ፂዉዋነ፡ ናቡከደነፆር፡ ንጉሠ፡ ባቢሎን፡ ትነብሩ፡ ህየ፡ ብዙኀ፡ መዋዕለ፡ እስከ፡ ሳብዕ፡ ትውልድ። ወእምዝ፡ አውፅአክሙ፡ በሰላም። ዑቁ፡ እንከ፡ ኢትኩኑ፡ ከማሆሙ። እመ፡ ርኢክሙ፡ አሕዛበ፡ በቅድሜሆሙ፡ ወበድኅሬሆሙ፡ ይሰግዱ፡ ሎሙ። እመ፡ ቦሙ፡ ልሳነ፡ ዘገብሮ፡ ጸራቢ፡ ውእቱሂ፡ ዘወርቅ፡ ወዘብሩር፡ ሐሰት፡ እሙንቱ፡ ወኢይክሉ፡ ተናግሮ። ወከመ፡ ለድንግል፡ መፍቀሪተ፡ ሥርጋዌ፡ ከማሁ፡ ነሢኦሙ፡ ወርቀ። ገብሩ፡ ሎሙ፡ ቀጸላ፡ ዘወርቀ፡ ወዘብሩር። ወያሠርግውዎሙ፡ ከመ፡ ሰብእ። ወለርእሶሙ፡ ኢያኀድጉ፡ ዛኅሎሙ። ወይከድንዎሙ፡ ሜላተ፡ ወይመዘምዝዎሙ፡ እምጸበለ፡ ቤት። ወይእኅዙ፡ በትረ፡ ከመ፡ ሰብእ፡ ወለዘገፍዖሙኒ፡ ኢይትቤቀልዎ። ወቦ፡ ውስተ፡ እዴሁ፡ ጕድብ፡ ወኢያድኅን፡ ርእሶ፡ እምሰረቅት። ከመ፡ ንዋይ፡ ዘይትቀጠቀጥ፡ ወኢይበቊዕ፡ ከማሁ፡ አማልክቲሆሙ። ወይቄንውዎሙ፡ ውስተ፡ ቤት፡ ወይመልእ፡ ውስተ፡ አዕይንቲሆሙ፡ ጸበል፡ እምእግረ፡ ሰብእ፡ ዘይበውእ። ወዐቅብዎሙ፡ ገነውቶ፡ በመዓጹት፡ ወበመናስግት፡ ከመ፡ ኢይስርቅዎሙ። መኀትወ፡ ያኅትዉ፡ ሎሙ፡ ወአልቦ፡ ዘይሬእዩ። ወእንዘ፡ ይበልዑ፡ ኪያሙ፡ ወልብሶሙ፡ እሙንቱሰ፡ ኢየአምሩ። ወይጸልም፡ ገጾሙ፡ እምጢስ፡ ዘያጠይሱ፡ ውስተ፡ ቤት። ወይነብሩ፡ ውስተ፡ አርእስቲሆሙ፡ ጽግነት፡ ወአዕዋፍ፡ ወድመት። ወበዝንቱ፡ ተአምሩ፡ ከመ፡ ኢኮኑ፡ አማልክተ፡ ኢትፍርህዎሙኬ፡ እንኬ። እስመ፡ ወርቅ፡ እመ፡ አንበርዎ፡ ወኢኀብረትዎ፡ ኢይበርህ፡ ወሶበሂ፡ ይሰበኩ፡ ኢየአምሩ። ወአልቦሙ፡ መንፈስ። ወይጸውርዎሙ፡ ዲበ፡ መትከፍት፡ ከመ፡ ይትዐወቅ፡ ኀሣሮሙ። ወእመሂ፡ ወድቁ፡ ዲበ፡ ምድር፡ ኢይትነሥኡ፡ ለሊሆሙ፡ ወእመሂ፡ አንሥእዎሙ፡ ኢይቀውሙ፡ ለሊሆሙ፡ ከመ፡ ምዉት፡ ያቀርቡ፡ መብልዐ፡ ወመሥዋዕተ። ገነውቶሙኒ፡ ያተሐቅርዎሙ። በዝኬ፡ አእምሩ፡ ከመ፡ ኢኮኑ፡ አማልክተ፡ ወኢትፍርህዎሙ። ይጸርሑ፡ እንዘ፡ የዐወይዉ፡ በላዕለ፡ አማልክቲሆሙ፡ በከመ፡ በድራረ፡ ምዉት። ወለእመ፡ ቦ፡ ዘአሕሠመ፡ ሎሙ፡ አው፡ ዘአሠነየ፡ ሎሙ፡ ኢይትፈደይዎ፡ ኢያነግሡ፡ ወኢይሥዕሩ። ኢያብዕሉ፡ ወኢያነድዩ። ኢይባልሑ፡ ሰብአ፡ እሞት፡ ወኢያድኅንዎ፡ ለድኩም፡ እምእደ፡ ዘይትዔገሎ። ወእመሂ፡ መጽኦሙ፡ ጸባኢት፡ ወመንሱት፡ የኀሥሡ፡ ገነውቶሙ፡ ኀበ፡ ይትኀብኡ፡ ምስሌሆሙ። እፎ፡ እንከ፡ አማልክት፡ እሙንቱ፡ ዘርእሶሙ፡ ኢያድኅኑ፡ እምቀትል፡ ወእመንሱት። ይትዐወቁ፡ ለኵሎሙ፡ አሕዛብ፡ ወነገሥት፡ ከመ፡ ኢኮኑ፡ አማልክተ፡ ወከመ፡ ግብረ፡ እደ፡ ዕጓለ፡ እመሕያው፡ እሙንቱ፡ ወአልቦሙ፡ ግብረ፡ አምላክ። ወእመሂ፡ ውዕየ፡ ቤተ፡ አማልክት፡ ገነውቶሙ፡ ይጕዩ፡ ወያድኅኑ፡ ነፍሶሙ። ወእፎ፡ እንከ፡ አማልክት፡ እሙንቱ። ኢያድኅኑ፡ ርእሶሙ፡ እምሰረቅት፡ ወኢ፡ እምተአጋልያን። አማልክተ፡ ከንቱ። እንስሳ፡ ይኄይስዎሙ። ዘይክሉ፡ ጐይየ። ከመ፡ በድን፡ ዘውስተ፡ ጽልመት። ከማሁ፡ አማልክቲሆሙ። ይኄይስ፡ ብእሲ፡ ጻድቅ፡ ዘአልቦ፡ ጣዖት፡ ወርኅቀ፡ እምጽዕለት።