Book of Ezra

Text of the EOTC printed Bible

Chapter 1

Chapter 2 አመ፡ ፴፡ ዓመት፡ እንዘ፡ ውድቅት፡ ሀገርነ፡ ወሀለውኩ፡ ውስተ፡ ባቢሎን፡ አነ፡ ሱቱኤል፡ ዘተሰመይኩ፡ ዕዝራ፡ ወሀለውኩ፡ ድንጉጽየ፡ አነ፡ በውስተ፡ ምስካብየ፡ ወክሡተ፡ ገጽየ፡ ወኅሊናየ፡ የዐርግ፡ ውስተ፡ ልብየ። እስመ፡ ርኢኩ፡ ሙስናሃ፡ ለጽዮን፡ ወትፍሥሕቶሙ፡ ለእለ፡ ይነብሩ፡ ውስተ፡ ባቢሎን። ወተሀውከኒ፡ መንፈስየ፡ ጥቀ፡ ወአኀዝኩ፡ እትናገር፡ ምስለ፡ ልዑል፡ ነገረ፡ ግሩመ። ወእቤ፡ እንዘ፡ እብል፡ እግዚኦ፡ እግዚአብሔር፡ አኮኑ፡ አንተ፡ ትቤ፡ ቀዲሙ፡ አመ፡ ፈጠርካ፡ ለምድር፡ ወዘንተ፡ ባሕቲተከ፡ ወአዘዝካሃ፡ ለመሬት። ወአውፅአቶ፡ ለአዳም፡ በሥጋ፡ መዋቲ፡ ወውእቱኒ፡ ግብረ፡ እደዊከ፡ ውእቱ፡ ወነፋኅከ፡ ላዕሌሁ፡ መንፈሰ፡ ሕይወት፡ ወኮነ፡ ሕያወ፡ በቅድሜከ። ወአባእካሁ፡ ውስተ፡ ገነት፡ እንተ፡ ተከለት፡ የማንከ፡ እንበለ፡ ትቁም፡ ምድር። ወአዘዝካሁ፡ ሎቱ፡ ትእዛዘ፡ ጽድቅ፡ ወዐለወ፡ ወእምዝ፡ ፈጠርከ፡ ላዕሌሁ፡ ሞተ፡ ወላዕለ፡ ትውልዱ፡ ወተወልዱ፡ እምኔሁ፡ አሕዛብ፡ ወሕዝብ፡ ወነገድ፡ ወበሓውርት፡ ዘአልቦ፡ ማኅለቅት። ወሖሩ፡ ኵሎሙ፡ አሕዛብ፡ ለግዕዞሙ፡ ወአበሱ፡ በቅድሜከ፡ ወአንተሰ፡ ኢከላእኮሙ። ወካዕበ፡ በዘመኑ፡ አምጻእከ፡ አይኀ፡ ላዕለ፡ ምድር፡ ወላዕለ፡ እለ፡ ይነብሩ፡ ውስተ፡ ዓለም፡ ወአጥፋእኮሙ። ወኮነ፡ ዕሩየ፡ ኵነኔሆሙ፡ በከመ፡ አምጻእከ፡ ሞተ፡ ላዕለ፡ አዳም፡ ከማሁ፡ አምጻእከ፡ አይኀ፡ ላዕለ፡ እሉሂ። ወአትረፍከ፡ አሐደ፡ እምውስቴቶሙ፡ ዘስሙ፡ ኖኅ፡ ምስለ፡ ቤቱ፡ ወእምኔሁ፡ ኵሉ፡ ጻድቃን። ወእምዝ፡ ሶበ፡ አኀዙ፡ ይትባዝኁ፡ ወይምልኡ፡ እለ፡ ይነብሩ፡ ዲበ፡ ምድር፡ ወበዝኁ፡ ውሉዶሙ፡ ወተዋለዱ፡ እምኔሆሙ፡ አሕዛብ፡ ወሕዝብኒ፡ ብዙኅ፡ ወአኀዙ፡ ካዕበ፡ የአብሱ፡ ፈድፋደ፡ እምዘ፡ ቀዲሙ። ወእምዝ፡ ሶበ፡ አበሱ፡ በቅድሜከ፡ ኀረይከ፡ ለከ፡ እምኔሆሙ፡ አሐደ፡ ዘስሙ፡ አብርሃም። ወአፍቀርካሁ፡ ወአርአይኮ፡ ለባሕቲቱ፡ ማኅቅተ፡ ዘመን፡ በባሕቲትክሙ፡ ሌሊተ። ወአቀምከ፡ ሎቱ፡ ኪዳነ፡ ዘለዓለም፡ ከመ፡ ለግሙራ፡ ኢትግድፎሙ፡ ለዘርኡ፡ ..፡ ። ..፡ ። ..፡ እለ፡ ወፅኡ፡ እምግብጽ፡ ወወሰድኮሙ፡ ውስተ፡ ደብረ፡ ሲና። ወአጽነንከ፡ ሰማያተ፡ ወአድለቅለቃ፡ ለምድር፡ ወሆካ፡ ለዓለም፡ ወአርዐድካ፡ ለቀላይ፡ ወአኮስካ፡ ለባሕር። ወኀለፈ አናቅጸ፡ ስብሐቲከ፡ ዘእሳትኒ፡ ወዘድልቅልቅኒ፡ ወዘመንፈስኒ፡ ወዘበረድኒ፡ ከመ፡ ተሀቦሙ፡ ለዘርአ፡ ያዕቆብ፡ ሕገ፡ ወለዘመደ፡ እስራኤል፡ ትእዛዘ። ወኢያሰሰልከ፡ በላዕሌሆሙ፡ ልበ፡ እኩየ፡ ከመ፡ ይግበር፡ ፍሬ፡ ሕግከ፡ በላዕሌሆሙ። እስመ፡ ልበ፡ እኩየ፡ ለብሰ፡ አዳም፡ ቀዳማይ፡ ወተመውአ፡ ወአኮ፡ ውእቱ፡ ባሕቲቱ፡ አላ፡ ኵሎሙ፡ እለ፡ ተወልዱ፡ እምኔሁ። ወእምዝ፡ ነበረት፡ ይእቲ፡ ደዌ፡ ምስለ፡ ሕግከ፡ ውስተ፡ ልበ፡ ሕዝብ፡ ምስለ፡ ሥርው፡ እኩይ፡ ወጠፍኤ፡ ሠናይት፡ ወተረፈት፡ እኪት። ወኀለፈ፡ መዋዕል፡ ተፈጸመ፡ ዓመት፡ ወአቀምከ፡ ለከ፡ ገብረከ፡ ዘስሙ፡ ዳዊት። ወትቤ፡ ይሕንጽ፡ ሀገረ፡ ለስምከ፡ ወያብእ፡ በውስቴታ፡ እምነ፡ መባእከ። ወኮነ፡ ብዙኀ፡ መዋዕለ፡ ወዓመታተ፡ ወአበሱ፡ እለ፡ ይነብሩ፡ ውስተ፡ ምድር። እንዘ፡ አልቦ፡ ምንተኒ፡ ዘያሤንዩ፡ በከመ፡ ገብረ፡ አዳም፡ ወኵሉ፡ ትውልዱ፡ እስመ፡ እሙንቱሂ፡ ለብስዎ፡ ለእኩይ፡ ልብ። ወመጠውከ፡ ሀገረከ፡ ውስተ፡ እደ፡ ጸላእትከ። ወእቤ፡ አነ፡ በልብየ፡ ይእተ፡ አሚረ፡ ቦኑ፡ ዘይኄይሱነ፡ ገቢረ፡ እለ፡ ይነብሩ፡ ባቢሎን፡ ከመ፡ ይንሥእዋ፡ ለሀገረ፡ ጽዮን። ወእምዝ፡ ሶበ፡ በጻሕኩ፡ ዝየ፡ ርኢኩ፡ ኀጢአተ፡ ዘአልቦ፡ ኍልቊ፡ ወብዙኃነ፡ ከሓድያነ፡ ርእየት፡ ነፍስየ፡ ናሁ፡ ፴፡ ዓመተ፡ በዝንቱ፡ አንከረት፡ ልብየ። እፎ፡ ትትዔገሦሙ፡ ለኃጥኣን፡ ርኢይየ፡ ወከመ፡ ትምህኮሙ፡ ለረሲዓን፡ ወገደፍከ፡ ሕዝበከ፡ ወዐቀብከ፡ ጸላእትከ። ወኢነገርከ፡ ወኢለመኑሂ፡ እፎ፡ ደኃሪታ፡ ለዛቲ፡ ፍኖት፡ ቦኑ፡ ዘይትኄይሳ፡ ባቢሎን፡ ለጽዮን፡ ገቢረ። አው፡ ካልእኑ፡ ሕዝብ፡ አእመረከ፡ እምእስራኤል፡ አው፡ አይ፡ ሕዝብ፡ አምነ፡ ከመ፡ ያዕቆብ፡ በሕግከ። ዘኢያስተርአየ፡ ዕሴቱ፡ ወኢፈረየ፡ ጻማሁ፡ ሖርኩ፡ ውስተ፡ አሕዛብ፡ ወረከብክዎሙ፡ ፍሡሓኒሆሙ፡ እንዘ፡ ኢይዜከሩ፡ ሕገከ፡ ወትእዛዘከ። ወይእዜኒ፡ ድሉ፡ በመዳልው፡ ኀጣውኒመ፡ ወዘእለ፡ ይነብሩ፡ ውስተ፡ ዓለም፡ ዘበኀቤሁ፡ ይትረከብ፡ ሕቀ፡ መጠነ፡ እንተ፡ ታገብእ፡ ዐይነ፡ መዳልው። ወማእዜኑ፡ ኢአበሱ፡ በቅድሜከ፡ እለ፡ ይነብሩ፡ ውስተ፡ ዓለም፡ አው፡ አይ፡ ሕዝብ፡ ዘከመዝ፡ ዐቀበ፡ ትእዛዘከ። ..፡ ወሕዝብሰ፡ ዘፍጹም፡ ኢይትረከብ።

Chapter 3 ወአውሥአኒ፡ ዝኩ፡ መልአክ፡ ዘተፈነወ፡ ኀቤየ፡ ዘስሙ፡ ኡርኤል። ወይቤለኒ፡ አንክሮኑ፡ አንከረ፡ ልብከ፡ ከመ፡ ትርከብ፡ ምክረ፡ ስብሐቲሁ፡ ለልዑል። ወእቤሎ፡ እወ፡ እግዚእየ፡ ወአውሥአኒ፡ ወይቤለኒ፡ ሠላሰ፡ ፍኖተ፡ ተፈኖኩ፡ ኣርኢከ፡ ወሠላሰ፡ አምሳለ፡ እሢም፡ ቅድሜከ። ወእመ፡ ነገርከኒ፡ አሐተ፡ እምኔሆን፡ እነግረከ፡ አነሂ፡ ዘንተ፡ ፍኖተ፡ እንተ፡ ትፈቱ፡ ታእምር፡ ወእሜህረከ፡ እንበይነ፡ ምንት፡ ዝንቱ፡ ልብ፡ እኩይ። ወእቤሎ፡ በል፡ እግዚኦ፡ ወይቤለኒ፡ ሖር፡ ድሉ፡ እሳት፡ በአሐዱ፡ መዳልው፡ ወስፍር፡ ነፋሰ፡ በመስፈርት፡ ወአው፡ ጸውዓ፡ ሊተ፡ ለዕለት፡ እንተ፡ ኀለፈት። ወአውሣእክዎ፡ ወእቤሎ፡ መኑ፡ ዘተወልደ፡ ወይክሎ፡ ለዝንቱ፡ ገቢረ፡ ከመ፡ ኪያየ፡ ትሰአለኒ፡ በበይነ፡ ዝንቱ። ወይቤለኒ፡ ሶበሰ፡ ተስእልኩከ፡ ወእቤለከ፡ ሚመጠን፡ አብያት፡ ሀለዋ፡ ውስተ፡ ልበ፡ ባሕር፡ አው፡ ሚመጠን፡ አንቅዕት፡ ውስተ፡ ገጸ፡ ቀላይ፡ አው፡ ሚመጠን፡ ፍኖት፡ ውስተ፡ መልዕልተ፡ ሰማይ፡ አው፡ አይ፡ ይእቲ፡ ፍኖተ፡ ሲኦል፡ አው፡ አይ፡ ይእቲ፡ ፍኖተ፡ ገነት። እመ፡ ትቤለኒ፡ ውስተ፡ ቀላይኒ፡ ኢወረድኩ፡ ወውስተ፡ ሲኦልኒ፡ ግሙራ፡ ኢወረድኩ፡ ወውስተ፡ ሰማይኒ፡ ግሙራ፡ ኢዐረጉ። ወይእዜሰ፡ ኢተስእልኩከ፡ ዘእንበለ፡ በእንተ፡ እሳት፡ ወነፋስ፡ ወዕለት፡ እንተ፡ ኀለፈት፡ ወናሁ፡ ኢትክል፡ አእምሮቶ፡ ወአልቦ፡ ዘአውሣእከኒ፡ በእንተ፡ እሉ። ወይቤለኒ፡ ሶበ፡ አንተ፡ ለዘኀቤከ፡ ኢትክል፡ አእምሮቶ። እፎ፡ ትክል፡ አእምሮ፡ ሥርዐተ፡ ፍኖቱ፡ ለልዑል፡ እስመ፡ በዘ፡ አልቦ፡ ማኅለቅት፡ ተፈጥረ፡ ፍኖቱ፡ ለልዑል፡ ወኢትክል፡ አንተ፡ ዘትማስን፡ አእምሮ፡ ፍኖቱ፡ ለዘኢይማስን። ወሶበ፡ ሰማዕኩ፡ ዘንተ፡ ወደቁ፡ በገጽየ፡ ወእቤሎ፡ እምኀየሰነ፡ ሶበ፡ ኢተፈጠርነ፡ እምንትፈጠር፡ ወንሕየው፡ በኀጣውእ፡ ወንሕመም፡ ወኢናእምር፡ በበይነ፡ ምንት፡ ነሐምም። ወአውሥአኒ፡ ወይቤለኒ፡ ሖሩአ፡ ዖመ፡ ዕፀወ፡ ገዳም፡ ወተማከሩ፡ ምክረ። ወይቤሉ፡ ንዑ፡ ንሖር፡ ወንፅብኣ፡ ለባሕር፡ ከመ፡ ናእትታ፡ እምቅድሜነ፡ ወንግበር፡ ለነ፡ ካልአ፡ ብሔረ፡ ለዖም። ወከማሁ፡ ማዕበለ፡ ባሕርኒ፡ ተማከሩ፡ ምክረ፡ ወይቤሉ፡ ንዑ፡ ንዕርግ፡ ወንፅብኦ፡ ለዖም፡ ዘውስተ፡ ገዳም፡ ከመ፡ ህየ፡ ንረሲ፡ ለነ፡ ካልአ፡ ብሔረ። ወኮነ፡ ከንቶ፡ ምክሩ፡ ለዖም፡ እስመ፡ መጽአት፡ እሳት፡ ወበልዐቶ። ወከማሁ፡ ምክሩ፡ ለማዕበለ፡ ባሕርኒ፡ እስመ፡ ኆጻ፡ አቀሞ፡ ወከልኦ። ወእመሰ፡ ታአምር፡ ፍትሐ፡ መነ፡ እምእሉ፡ ታጸድቅ፡ ወመነ፡ ታሔሱ። ወአውሣእክዎ፡ ወእቤሎ፡ ክልኤሆሙ፡ ከንቶ፡ ኀለዩ፡ እስመ፡ ምድርኒ፡ ተውህበት፡ ለዖም፡ ወባሕርኒ፡ ከመ፡ ትጾር፡ ማዕበላ። ወአውሥአኒ፡ ወይቤለኒ፡ ሠናየ፡ ፈታሕከ፡ ወለምንት፡ ኢትፈትሕ፡ ለርእስከ። ወበከመ፡ ተውህበት፡ ምድር፡ ለዖም፡ ወባሕርኒ፡ ለማዕበላ፡ ከማሁ፡ እለ፡ ውስተ፡ ምድር፡ ይነብሩ፡ ዘውስተ፡ ምድር፡ ዳእሙ፡ ይክሉ፡ አእምሮ፡ ወአኮ፡ ዘበ፡ ሰማያት፡ ወዘበመልዕልተ፡ ሰማያት። ወአውሣእክዎ፡ ወእቤሎ፡ እግዚኦ፡ እሴአለከ፡ ለምንት፡ እንከ፡ ተውህበ፡ ለነ፡ ልብ፡ በዘ፡ ንኄሊ። ወአንሰ፡ ኢፈቀድኩ፡ እስአል፡ በእንተ፡ ዘላዕሉ፡ ፍኖት፡ አላ፡ በእንተ፡ ዘየኀልፍ፡ ላዕሌነ፡ ኵሎ፡ አሚረ፡ እስመ፡ ተውህበ፡ እስራኤል፡ ለአሕዛብ፡ ወሕዝብኒ፡ ዘአፍቀርከ፡ ለሕዝብ፡ ኃጥኣን፡ ወተገድፈት፡ ኦሪቶሙ፡ ለአበዊነ፡ ወኢሀሎ፡ ኪዳን፡ ዘተጽሕፈ። ወነኀልፍ፡ እምዓለም፡ ከመ፡ አምበጣ፡ ወሕይወትነሂ፡ ከመ፡ ጢስ፡ ወኢይደልወነ፡ ይምሐሩነ። ወባሕቱ፡ ምንተ፡ ይሬሲ፡ ለስሙ፡ ቅዱስ፡ ዘተሰምየ፡ ላዕሌነ፡ በእንተ፡ ዝንቱ፡ ተስእልኩከ። ወአውሥአኒ፡ ወይቤለኒ፡ እመሰ፡ ሀለውከ፡ ትሬኢ፡ ወእመኒ፡ ሐየውከ፡ ታአምሮ፡ በበጊዜሁ፡ እስመ፡ ይጔጕእ፡ ዓለም፡ ይኅልፍ። እስመ፡ ኢይክል፡ ጸዊረ፡ ተስፋሆሙ፡ ለጻድቃን፡ እስመ፡ ምሉእ፡ ውእቱ፡ ጻዕረ፡ ዝንቱ፡ ዓለም፡ ወምሉእ፡ ውእቱ፡ ደዌ። እስመ፡ ተዘርአት፡ እኪት፡ ዘበእንቲአሁ፡ ተስእልከኒ፡ ወኢበጽሐ፡ ማእረራ። ወእመ፡ ኢተዐጽደ፡ ዘተዘርአ፡ ወኢተግሕሠ፡ መካኑ፡ ኀበ፡ ተዘርአት፡ እኪት፡ ..፡ ። እስመ፡ ኅጠተ፡ ዘርእ፡ እኩይ፡ ተዘርአ፡ ቀዳሚሁ፡ ውስተ፡ ልቡ፡ ለአዳም፡ ወተወልደ፡ ፍሬ፡ ኀጢአት፡ ወበዝኀ፡ እስከ፡ ይእዜ፡ ወይትወለድሂ፡ እስከ፡ ይበጽሕ፡ ምእረሩ። ኀልዩ፡ እስኩ፡ ለሊከ፡ ሶበ፡ ኅጠተ፡ ዘርእ፡ እኩይ፡ መጠኔዝ፡ ፍሬ፡ ኀጢአት፡ ወለደት። ሶበ፡ ተዘርአት፡ ኅጠተ፡ ዘርእ፡ ሠናይ፡ እፎ፡ ብዙኀ፡ እምገብረት፡ ፍሬ፡ ዘአልቦ፡ ማኅለቅተ። ወአውሣእክዎ፡ ወእቤሎ፡ እስመ፡ ማእዜኑ፡ እንከ፡ ወማእዜ፡ ይከውን፡ ውእቱ፡ እስመ፡ ውሑድ፡ ወእኩይ፡ ውእቱ፡ መዋዕሊነ። ወአውሥአኒ፡ ወይቤለኒ፡ አኮ፡ አንተ፡ ዘትጔጕእ፡ እምልዑል፡ ፈድፋደ፡ ወአንተሰ፡ በእንተ፡ ርእስከ፡ ትጔጕእ፡ ወልዑልሰ፡ በእንተ፡ ብዙኃን። ወበእንተዝ፡ ተስእላ፡ ነፍሳቲሆሙ፡ ለጻድቃን፡ በውስተ፡ አብያቲሆን፡ ወይቤላ፡ እስከ፡ ማእዜኑ፡ ንሄሉ፡ ዝየ፡ ወማእዜ፡ ይበጽሕ፡ ማእረረ፡ ዕሴትነ። ወአውሥኦን፡ ኢየሩሚያል፡ መልአክ፡ ወይቤሎን፡ አመ፡ ተፈጸመ፡ ኈልቆሙ፡ ለእለ፡ ከማክሙ። እስመ፡ በመዳልው፡ ተደልወ፡ ዓለም፡ ወበመስፈርት፡ ሰፈሮ፡ ለባሕር፡ ወኢያረምምሂ፡ ወኢይነቅህ፡ እስከ፡ ይትፌጸም፡ መስፈርት፡ ዘተውህበ፡ ሎቱ። ወአውሣእክዎ፡ ወእቤሎ፡ እግዚኦ፡ እግዚእየ፡ ናሁኬ፡ ምሉኣን፡ ንሕነ፡ ኀጢአተ፡ ኵልነ። ዮጊ፡ በእንቲአነ፡ እንከ፡ ይትከላእ፡ ማእረሮሙ፡ ለጻድቃን፡ በእንተ፡ ኀጢአቶሙ፡ ለእለ፡ ይነብሩ፡ ውስተ፡ ዓለም። ወአውሥአኒ፡ ወይቤለኒ፡ ሑር፡ ተሰአላ፡ ለፅንስት፡ እምከመ፡ ተፈጸመ አውራኃ፡ ከመ፡ ትክል፡ ማሕፀና፡ አጽንዖ፡ ዘተፈጥረ፡ ውስቴታ። ወእቤሎ፡ ኢትክል፡ እግዚኦ፡ ወይቤለኒ፡ ሲኦልኒ፡ ወአብያተ፡ መንፈሶሙ፡ ለጻድቃን፡ ከመ፡ ማሕፀን፡ እሙንቱ። ወበከመ፡ ትጔጕእ፡ ማሕፀን፡ ለወሊድ፡ በሕማም፡ ከማሁ፡ ትጔጕእ፡ ምድርኒ፡ ታወፊ፡ ማሕፀንታ፡ እለ፡ እምፍጥረተ፡ ዓለም፡ ውስቴታ። ወውእተ፡ አሚረ፡ ይነግሩከ፡ በእንተ፡ ዘትፈቱ፡ ታእምር። ወአውሣእክዎ፡ ወእቤሎ፡ እመሰ፡ ረከብኩ፡ ሞገስ፡ በቅድመ፡ አዕይንቲከ፡ ወእሚ፡ ረሰይከ፡ ሊተ፡ ከመ፡ ይትከሀለኒ። ንግረኒ፡ ዘንተኒ፡ በአምጣነ፡ ዘኀለፈኑ፡ መዋዕል፡ ዘሀለዎ፡ ይምጻእ፡ ውስተ፡ ዓለም፡ አው፡ ይበዝኅኑ፡ ዘኀለፈ። እስመ፡ ዘኀለፈሰ፡ ኣአምር፡ ወዘመይመጽእሰ፡ ኢያአምር። ወይቤለኒ፡ ቁም፡ መንገለ፡ የማን፡ አሐደ፡ ኅብረ፡ ወኣርእየከ፡ ፍካሬ፡ አምሳል። ወቆምኩ፡ ወርኢኩ፡ ወናሁ፡ እቶን፡ ይነድድ፡ ኀለፈ፡ እንተ፡ ቅድሜየ፡ ወእምዝ፡ ሶበ፡ ኀለፈ፡ ነዱ፡ ወናሁ፡ ተረፈ፡ ጢሱ። ወእምድኅሬሁ፡ ኀለፈት፡ ደመና፡ ምልእተ፡ ማይ፡ እንተ፡ ቅድሜየ፡ ወትዘንም፡ ዐበይተ፡ ዝናም፡ ወብዙኀ፡ ኀሊፎ፡ ውእቱ፡ ዝናም፡ ዐቢይ፡ ወተረፈ፡ ንፍንፍቨ ወይቤለኒ፡ ኀልዮ፡ እንከሰ፡ ለሊከ፡ በከመ፡ ይበዝኅ፡ ዝናም፡ እምንፍንፍ፡ ወእምጢሰ፡ እሳት፡ ከማሁ፡ ይበዝኅ፡ ዘኀለፈ፡ መስፈርቱ፡ ወተረፈ፡ ንፍንፍ፡ ወጢስ። ወአስተብቋዕክዎ፡ ወእቤሎ፡ አሐዩኑ፡ እንጋ፡ እስከ፡ እማንቱ፡ መዋዕል፡ ወምንት፡ ይከውን፡ በእማንቱ፡ መዋዕል። ወአውሥአኒ፡ ወይቤለኒ፡ በእንተሰ፡ ትእምርት፡ ዘተስእልከኒ፡ እምአሐዱ፡ ገጽ፡ እክል፡ ነጊሮተከ፡ ወበእንተሰ፡ ሕይወትከ፡ ኢተፈኖኩ፡ እንግርከ፡ ወኢሂ፡ ኣአምር።

Chapter 4 ወተኣምሪሁሰ፡ ናሁ፡ መዋዕል፡ ይመጽእ፡ ወይእኅዞሙ፡ ድንጋጼ፡ ዓቢይ፡ ለእለ፡ ይነብሩ፡ ውስተ፡ ምድር፡ ወይትኀባእ፡ ደወለ፡ ጽድቅ፡ ወትመክን፡ ብሔረ፡ ሃይማኖት። ወትበዝኅ፡ ዐመፃ፡ እምዘ፡ ርኢከ፡ አንተ፡ ወዘሰማዕከ። ወይነግሥ፡ ብሔር፡ ዘትሬኢ፡ ይእዜ፡ ሙሱነ፡ ወመዝብረ፡ ወትከውን፡ ምድርኒ፡ በድወ። ወእመሰ፡ ወሀበከ፡ ልዑል፡ ሕይወተ፡ ትሬእያ፡ ለምድር፡ እምድኅረ ወርኅ፡ እንዘ፡ ትትወሀክ፡ ወትበርህ፡ ፀሐይ፡ ግብተ፡ በሌሊት፡ ወወርኅኒ፡ በመዓልት። ወያንጸፈጽፍ፡ ደም፡ እምዕፀው፡ ወእብንኒ፡ ትኔቁ፡ ወሕዝብኒ፡ ይትሀወኩ፡ ወከዋክት፡ ይሠጠጡ። ወይነግሥ፡ ዘተሐዘብዎ፡ ..፡ ። ..፡ ብዙኃን፡ ወኵሉ፡ ይሰምዕ፡ ቃሎ። ወይከውን፡ ድምፅ፡ በውስተ፡ ብዙኅ፡ በሐውርት፡ ወእሳትኒ፡ ጽፉቀ፡ ይትፌነው፡ ወአራዊተ፡ ገዳም፡ ይፈልሱ፡ እምብሔሮሙ፡ ወይትወለድ፡ ትእምርት፡ እምአንስት። ወማይኒ፡ ዘጥዑም፡ መሪረ፡ ይትረከብ፡ ወአዕርክትኒ፡ ግብተ፡ ይትቃተሉ፡ በበይናቲሆሙ፡ ወትትኀባእ፡ ይእተ፡ አሚረ፡ ጥበብ፡ ወምክርኒ፡ ትገብእ፡ ቤታ። ወየኀሥሥዋ፡ ኀበ፡ ብዙኃን፡ ወኢይረክብዋ፡ ወትበዝኅ፡ ዓመፃ፡ ወእበድ፡ ውስተ፡ ምድር። ወትስእላ፡ ሀገር፡ ለእንተ፡ ቅሩባ፡ ወትብላ፡ ቦኑ፡ ዘኀለፈ፡ እንተ፡ ኀቤኪ፡ ጽድቅ፡ አው፡ ዘይገብራ፡ ለጽድቅ፡ ወትብል፡ አልቦ። ወበእማንቱ፡ መዋዕል፡ ይሴፎ፡ ሰብእ፡ ወኢይረክብ፡ ወያወስብሂ፡ ወኢይትፌሣሕ፡ ወይጻሙሂ፡ ወይትጌበር፡ ወይሤራሕ፡ ፍኖቱ። ዘንተ፡ ተኣምረ፡ ተፈኖኩ፡ እንግርከ፡ ወእመሰ፡ ካዕበ፡ ጸለይከ፡ ወበከይከ፡ በከመ፡ ይእዜ፡ ወጾምከ፡ ሰቡዐ፡ መዋዕለ፡ ትሰምዕ፡ ካዕበ፡ ዘየዐቢ። ወነቃህኩ፡ ካዕቡ፡ ወአንሦጠጠኒ፡ ሥጋየ፡ ጥቀ፡ ወነፍስየኒ፡ ሰርሐት፡ እስከ፡ ትደክም። ወአኀዘኒ፡ ውእቱ፡ መልአክ፡ ዘመጽአ፡ ወተናገረኒ፡ ወአቀመኒ፡ በእገርየ፡ ወአጽንዐኒ። ወእምዝ፡ በካልእት፡ ሌሊት፡ መጽአ፡ ኀቤየ፡ ፍልጥያል፡ ሊቀ፡ መላእክቲሆሙ፡ ለሕዝብ፡ ወይቤለኒ፡ እምአይቴ፡ አንተ፡ ወበእንተ፡ ምንት፡ ተከዘ፡ ገጽከ። ኢታአምርኑ፡ ከመ፡ ተአመንከ፡ በእንተ፡ እስራኤል፡ በብሔር፡ ኀበ፡ አፍለሶሙ። ተንሥእ፡ እንከሰ፡ ወጠዐም፡ እክለ፡ ዘኮነ፡ ከመ፡ ኢትግድፈነ፡ ከመ፡ ኖላዊ፡ ዘኀደገ፡ መርዔቶ፡ ውስተ፡ እደ፡ ተኵላት፡ እኩያን። ወእቤሎ፡ ሖር፡ እምኀቤየ፡ ወኢትምጻእ፡ ኀቤየ፡ እስከ፡ ሰቡዕ፡ መዋዕል፡ ወእምዝ፡ ነዓ፡ ኀቤየ፡ ወእንግረከ፡ ነገረ፡ ወሖረ፡ እምኀቤየ። ወአነሂ፡ ጾምኩ፡ ሰቡዐ፡ ዕለተ፡ ትኩዝየ፡ እንዘ፡ እበኪ፡ በከመ፡ አዘዘኒ፡ ኡርያል፡ መልአክ። ወእምዝ፡ እምድኅረ፡ ሰቡዕ፡ መዋዕል፡ አርስሐኒ፡ ካዕለ፡ ኅሊና፡ ልብየ፡ ጥቀ። ወነሥአታ፡ ለነፍስየ፡ መንፈሰ፡ ጥበብ፡ ወአኀዝኩ፡ ካዕበ፡ እንብብ፡ ቅድመ፡ ልዑል። ወእቤ፡ እግዚኦ፡ እግዚእየ፡ እምኵሉ፡ ዖማ፡ ለምድር፡ ወዕፀዊሃ፡ ኀረይከ፡ ለከ፡ አሐደ፡ ምድረ፡ ..፡ ። ወእምኵሉ፡ ቀላያተ፡ ባሕር፡ መላእከ፡ ለከ፡ አሐደ፡ ፈለገ፡ ወእምኵሉ፡ ዘተሐንጸ፡ አህጉር፡ ቀደስከ፡ ለከ፡ ጽዮንሃ። ወእምኵሉ፡ ዘተፈጥረ፡ አዕዋፍ፡ ቀደስከ፡ ለከ፡ አሐደ፡ ርግበ፡ ወእምኵሉ፡ ዘተፈጥረ፡ መራዕይ፡ ኀረይከ፡ ለከ፡ አሐደ፡ በግዐ። ወእምኵሉ፡ ብዙኀ፡ አሕዛብ፡ ኀረይከ፡ ለከ፡ አሐደ፡ ሕዝበ፡ ወዘእምኵሉ፡ አመከርከ፡ ሕገ፡ ወሀብካሁ፡ ለሕዝብ፡ ዘእምኵሉ፡ አፍቀርከ። ወይእዜኒ፡ እግዚኦ፡ ለምንት፡ መጠውካሁ፡ ለዝኩ፡ አሐዱ፡ ለብዙኃን፡ ወአኅሰርካሁ፡ ለአሐዱ፡ ሥርው፡ እምባዕድ፡ ሥርው፡ ወዘረውኮ፡ ለዋሕድከ፡ ለብዙኃን። ወኬድዎሙ፡ ለእለ፡ ተአመኑ፡ በሕግከ፡ ዕድዋኒሁ፡ ለሥርዐትከ። ወእመሰ፡ ጸላእኮሙ፡ ለሕዝብከ፡ ይኄይስ፡ ትቅሥፎሙ፡ በእዴከ። ወዘንተ፡ ቃለ፡ ብሂልየ፡ ተፈነወ፡ ኀቤየ፡ ዝኩ፡ መልአክ፡ ዘመጽአ፡ ኀቤየ፡ በእንታክቲ፡ ሌሊት፡ እንተ፡ ኀለፈት። ወይቤለኒ፡ ስምዐኒ፡ ወእነግረከ፡ ወአፅምአኒ፡ ወእደግም፡ ቅድሜከ። ወእቤሎ፡ በል፡ እግዚኦ፡ ወይቤለኒ፡ ጥቀኑ፡ ነኪር፡ ለእስራኤል፡ ዝንቱ፡ አው፡ ፈድፋደኑ፡ አፍቀርካሁ፡ እምፈጣሪሁ። ወእቤሎ፡ አልቦ፡ እግዚኦ፡ ዳእሙ፡ በእንተ፡ ዘአጽሀቀኒ፡ ነበብኩ፡ ወአስርሐኒ፡ ኵልያቲየ፡ በኵሉ፡ ጊዜ፡ እንዘ፡ እትኀሠሥ፡ እርከብ፡ ፍኖቶ፡ ለልዑል፡ ወአእምር፡ አሠረ፡ ፍትሑ። ወይቤለኒ፡ ኢትክል፡ ወእቤሎ፡ በእንተ፡ ምንት፡ እግዚኦ፡ ወለምንት፡ ተወለድኩ፡ ወለምንት፡ ኢኮነኒ፡ መቃብረ፡ ማሕፀና፡ ለእምየ፡ ከመ፡ ኢይርአይ፡ ሕማሞ፡ ለያዕቆብ፡ ወስራሖሙ፡ ለዘመደ፡ እስራኤል። ወይቤለኒ፡ ኈልቊ፡ መዋዕለ፡ ዘዓዲ፡ ኢመጽአ፡ ወአስተጋብእ፡ ሊተ፡ ጽጌ፡ ዘተዘርወ፡ ወአሕመልምል፡ ሊተ፡ ሣዕረ፡ ዘየብሰ። ወአርኁ፡ ሊተ፡ አብያተ፡ ዘዕጽዋን፡ ወአምጽ፡ ሊተ፡ ነፍሳተ፡ ዘዕጽዋት፡ ውስቴቶን፡ ወአርእየኒ፡ ገጾሙ፡ ለእለ፡ ግሙራ፡ ኢርኢከ፡ ወአስምዐኒ፡ ቃሎሙ፡ ወውእተ፡ ጊዜ፡ እነግረከ፡ በእንተ፡ ሕማም፡ ዘበርቱዕ፡ ረከቦሙ። ወእቤሎ፡ እግዚኦ፡ እግዚእየ፡ መኑ፡ ውእቱ፡ ዘይክሎ፡ ለዝንቱ፡ አእምሮ፡ ዘእንበለ፡ ዘኢኮነ፡ ምስለ፡ ሰብእ፡ ንብረቱ። ወአንሰ፡ አብድ፡ ወትሑት፡ ወእፎ፡ እክል፡ ነጊሮተከ፡ ዘንተ፡ ዘትሴአለኒ። ወይቤለኒ፡ በከመ፡ ኢትክል፡ ገቢረ፡ አሐደ፡ እምእሉ፡ እለ፡ እቤለከ፡ ከማሁ፡ ኢትክል፡ ረኪቦቶ፡ ለፍትሕየ፡ ወለማኅለቅተ፡ ፍቅርየ፡ እንተ፡ እትዔገሥ፡ በእንተ፡ ሕዝብየ። ወእቤሎ፡ እግዚኦ፡ ናሁኬ፡ አንተ፡ ተዐገሥከ፡ በእንቲአሆሙ፡ ወምንተ፡ እንከ፡ ይሬስዩ፡ እለ፡ እምቅድሜነ፡ ወንሕነኒ፡ ወእለሂ፡ እምድኅሬነ። ወይቤለኒ፡ ከመ፡ ሕልቀተ፡ ረሰይክዎ፡ ለኵነኔየ፡ ከመ፡ እለሂ፡ ተድኅሩ፡ ኢይጐንድዩ፡ ወእለሂ፡ ቀደሙ፡ ኢያፍጥኑ። ወእቤሎ፡ ቦኑ፡ እመ፡ ኢክህልከ፡ ፈጢሮቶሙ፡ በምዕር፡ ኅቡረ፡ ለእለሂ፡ ቀደሙ፡ ወለእለሂ፡ ተድኅሩ፡ ወለእለሂ፡ ሀለዉ፡ ከመ፡ ፍጡነ፡ ታርኢ፡ ኵነኔከ። ወይቤለኒ፡ አኮ፡ ግብር፡ ዘይጔጕእ፡ እምገባሪሁ፡ ፈድፋደ፡ ወዓለምኒ፡ እምኢጾረቶሙ፡ ለእለ፡ ተፈጥሩ፡ ውስቴታ። ወእቤሎ፡ እፎኬ፡ እግዚኦ፡ ትቤሎ፡ ለገብርከ፡ ከመ፡ አሕይዎ፡ ታሐይዎሙ፡ ለእለ፡ ፈጠርከ፡ በምዕር፡ ኅቡረ፡ ወእለሰ፡ ታሐይዎሙ፡ በምዕር፡ ኅቡረ፡ ወእለሰ፡ ታሐይዎሙ፡ በምዕር፡ ኅቡረ፡ ወእለሰ፡ ታሐይዎሙ፡ በምዕር፡ ይጠወቅ፡ ዓለምኒ፡ ወእመ፡ አኮሰ፡ ይእዜኒ፡ እምክህለ፡ ጸዊሮቶሙ፡ በምዕር፡ ምስለ፡ እለ፡ ሀለዉ። ወይቤለኒ፡ እስኩ፡ ኦሆ፡ አብህላ፡ ለማሕፀነ፡ ብእሲት፡ ወበላ፡ እንዘ፡ ዐሠርቱ፡ ትወልዲ፡ ለምንት፡ በበዓመት፡ ትወልዲ፡ ሰአላ፡ እንከ፡ ከመ፡ ተሀብ፡ ዐርቲሆሙ፡ በምዕር። አኮኑ፡ ኢትክል፡ ዘእንነለ፡ በበዓመት። ..፡ ። ወበከመ፡ ሕፃን፡ ኢትክል፡ ግሙራ፡ ወእንተሂ፡ ልህቀት፡ ከማሁ፡ አነሂ፡ ሠራዕክዎ፡ በበጊዜሁ፡ ለዓለም፡ ዘፈጠርኩ። ወተስእልክዎ፡ ወእቤሎ፡ እስመ፡ ወሀብከኒ፡ ፍኖተ፡ በዘ፡ እነብብ፡ ቅድሜከ፡ ናሁ፡ አማን፡ አንተ፡ ትቤለኒ፡ ነኣስ፡ ይእቲ፡ እምክሙ፡ ወወድአት፡ ርሥአታ። ወአውሥአኒ፡ ወይቤለኒ፡ ተሰአላ፡ ለእንተ፡ ወለደት፡ ወትነግረከ። ወበላ፡ ለምንት፡ እለ፡ ይእዜ፡ ወለድኪ፡ ኢኮኑ፡ ከመ፡ እለ፡ ቀዲሙ፡ አላ፡ የሐጹ፡ ኀይለ። ወትብለከ፡ ይእቲ፡ ካልእ፡ ዘበኀይለ፡ ንእስ፡ ተወልደ፡ ወካልእ፡ ዘተወልደ፡ በማሕፀነ፡ ርሥእ። ወለሊከ፡ ባሕቱ፡ ታአምር፡ ከመ፡ ታውኅዱ፡ ኀይለ፡ አንትሙ፡ እምቀደምትክሙ። ወእለሂ፡ እምድኅሬክሙ፡ ያውኅዱ፡ እምኔክሙ፡ ከማሁኬ፡ ዘተፈጥረ፡ ወሀለወ፡ እምከመ፡ ኀለፈ፡ ኀይለ፡ ውርዙቱ፡ ወእቤሎ፡ ብቊዐኒ፡ እግዚእየ፡ እመ፡ ረከብኩ፡ ሞገሰ፡ ቅድመ፡ አዕይንቲከ፡ ንግሮ፡ ለገብርከ፡ በመኑ፡ ትሔውጽ፡ ዓለመከ።

Chapter 5 ወይቤለኒ፡ ቀዳሚሁሰ፡ በወልደ፡ እጓለ፡ እመሕያው፡ ወድኅሬሁሰ፡ ለሌየ፡ እስመ፡ ዘእንበለ፡ ትትፈጠር፡ ምድር፡ ወበሓውርት፡ ወእንበለ፡ ይቁም፡ ፍናዊሁ፡ ለዓለም፡ ወእንበለ፡ ይንፍኁ፡ መናፍስተ፡ ነፋሳት። ወእንበለ፡ ይድምፅ፡ ድምፀ፡ ነጐድጓድ፡ ወእንበለ፡ ይብራህ፡ ብርሃነ፡ መብረቅ፡ ወእንበለ፡ ይሣረር፡ ምድረ፡ ገነት። ወእንበለ፡ ያስተርኢ፡ ሥነ፡ ጽጌያት፡ ወእንበለ፡ ይጽናዕ፡ ኀይለ፡ ድልቅልቅ፡ ወእንበለ፡ ይትኈለቊ፡ ኀይለ፡ መላእክት። ወእንበለ፡ ያስተርኢ፡ ኑኀ፡ አርያም፡ ወእንበለ፡ ይሰመይ፡ መስፈርተ፡ ሰማያት፡ ..፡ ። ወእንበለ፡ ይትአመር፡ አሠረ፡ ዓመት፡ ዘይመጽእ፡ ..፡ ወእንበለ፡ ይትኀተሙ፡ እለ፡ ይዘግብዋ፡ ለሃይማኖት። ውእተ፡ አሚረ፡ ኀለይኩ፡ ከመ፡ አነ፡ ለልየ፡ ወአኮ፡ ባዕድ። ወአውሣእክዎ፡ ወእቤሎ፡ ምንት፡ ትእምርቱ፡ ለዕድሜሁ፡ ወማእዜ፡ ማኅለቅቱ፡ ለቀዳሚ፡ ወማእዜ፡ ቀዳሚሁ፡ ለካልእ፡ ዓለም። ወይቤለኒ፡ እምአብርሃም፡ እስከ፡ ይስሐቅ፡ እስመ፡ እምላዕሌሁ፡ ተወልዱ፡ ያዕቆብ፡ ወዓሳው፡ ..፡ ። እስመ፡ ..፡ ቀዳሚሁ፡ ለካልእ፡ ዓለም፡ ያዕቆብ። እስመ፡ ጽንፉ፡ ሰኰናሁ፡ ለሰብእ፡ እዴሁ፡ ወባሕቱ፡ ኢትኅሥሥ፡ ዕዝራ። ወአውሣእክዎ፡ ወእቤሎ፡ እግዚኦ፡ እግዚእየ፡ ለእመ፡ ረከብኩ፡ ሞገሰ፡ በቅድመ፡ አዕይንቲከ። ንግሮ፡ ለገብርከ፡ ማኅለቅቶ፡ ለዝንቱ፡ ተኣምር፡ ዘነገርከኒ፡ ቀዲሙ፡ እምአሐዱ፡ ገጽ፡ በሌሊት፡ እንተ፡ ኀለፈት። ወአውሥአኒ፡ ወይቤለኒ፡ ተንሥእ፡ ወቁም፡ በእገሪከ፡ ወእነግረከ፡ ቃለ፡ ዘምሉእ፡ ድምፀ። ወለእመ፡ አድለቅለቀ፡ ድልቅልቀ፡ መካን፡ ኀበ፡ ትቀውም፡ ውስቴቱ። ሶበ፡ ነገርኩከ፡ ኢትደንግጽ፡ እስመ፡ በእንተ፡ ማኅለቅተ፡ ነገሩ፡ ውእቱ፡ ወያእምራ፡ መሠረታተ፡ ምድር፡ ነገረ። እስመ፡ በእንቲአሆን፡ ነገሩ፡ ወይርዕዳ፡ ወያድለቀልቃ፡ እምሰ፡ ቦቱ፡ ሀለዎን፡ ይእትታ፡ ማኅለቅቶን። ወእምዝ፡ ሶበ፡ ሰማዕከኩ፡ ተንሣእኩ፡ ወቆምኩ፡ በእገሪየ፡ ወናሁ፡ ቃል፡ ዘይነብብ፡ ወድምፁ፡ ከመ፡ ድምፀ፡ ማያት፡ ብዙኀ። ወይብል፡ ናሁ፡ መዋዕል፡ ይመጽእ፡ አመ፡ ያለጽቅ፡ የሐውጾሙ፡ ለኵሎሙ፡ እለ፡ ይነብሩ፡ ውስተ፡ ምድር። ወአመ፡ ሀለወኒ፡ እትኀሠሦሙ፡ ዐመፃሆሙ፡ ለእለ፡ አመፁ፡ አመ፡ ተፈጸመት፡ ጽዮን። ወአመ፡ ተኀትመ፡ ዓለም፡ ዘሀለዎ፡ ይምጻእ፡ ዝንቱ፡ ውእቱ፡ ተኣምር፡ ዘእገብር፡ መጻሕፍት፡ ይትከሠት፡ ውስተ፡ ገጸ፡ ሰማይ፡ ወኵሉ፡ ይሬእየኒ። ወሕፃናት፡ ዘዓመት፡ ይነቡ፡ ወይትናገሩ፡ ወፅኑሳት፡ ይወልዳ፡ ሕፃናተ፡ ዘ ወርኅ፡ ወዘ ወርኅ፡ ወየሐይዉ፡ ወይትነሥኡ። ወምድርኒ፡ እንተ፡ ኢታስተርኢ፡ ታስተርኢ፡ ይእቲኒ፡ ዝርእታ፡ ወአብያትኒ፡ ዘምሉእ፡ ይትረከብ፡ ዕራቆ። ወይደምፅ፡ መጥቅዕ፡ ወኵሉ፡ ዘሰምዐ፡ ይደነግፅ። ወበእማንቱ፡ መዋዕል፡ ይትቃተሉ፡ አዕርክት፡ ምስለ፡ አዕርክቲሆሙ፡ ከመ፡ ፀር፡ ወታደነግጾሙ፡ ምድረ፡ ለእለ፡ ይነብርዋ፡ ወአንቅዕተ፡ ማያትኒ፡ ይቀውም፡ ወኢይውሕዝ፡ እስከ ሰዓት። ወኵሉ፡ ዘተርፈ፡ እምኵሉ፡ ዘእቤለከ፡ ውእቱ፡ ዘየሐዩ፡ ወይሬኢ፡ አድኅኖትየ፡ ወማኅለቅተ፡ ዓለምየ። ውእተ፡ አሚረ፡ ይሬእይዎሙ፡ ለእልክቱ፡ ዕደው፡ እለ፡ ዐርጉ፡ ወኢጥዕምዎ፡ ለሞት፡ እምአመ፡ ተወልዱ፡ ወይትዌለጥ፡ ልቦሙ፡ ለእለ፡ ይነብሩ፡ ውስተ፡ ዓለም፡ ወይትወሀቦሙ፡ ካልእ፡ ልብ። እስመ፡ ትደመሰስ፡ እኪት፡ ወትጠፍእ፡ ጕሕሉት። ወትሠርጽ፡ ሃይማኖት፡ ወይትመዋዕ፡ መዋቲ፡ ወታስተርኢ፡ ጽድቅ፡ እንተ፡ ነበረት፡ ዘእንበለ፡ ፍሬ፡ መጠነ፡ ዝንቱ፡ መዋዕል። ወሶበ፡ ይነግረኒ፡ በበ፡ ሕቅ፡ ያድለቅልቅ፡ መካን፡ ኀበ፡ እቀውም። ወይቤለኒ፡ ዘንተ፡ መጻእኩ፡ እንግርከ፡ ከመ፡ በእንተ፡ ኀለፈት፡ ሌሊት። ወእመኒ፡ ካዕበ፡ ጸለይከ፡ ወካዕበ፡ ጾምከ፡ ሰቡዐ፡ መዋዕለ፡ ካዕበ፡ እነግረከ፡ ዘየዐቢ፡ እምዝንቱ። እስመ፡ ተሰምዖ፡ ተሰምዐ፡ ቃልከ፡ በኀበ፡ ልዑል፡ ወርእየ፡ ኀይለ፡ ጽድቅከ፡ እንተ፡ እምንእስከ። ወበእንተ፡ ዝንቱ፡ ፈነወኒ፡ ልዑል፡ እንግርከ፡ ዘንተ፡ ኵሎ፡ ወቤለኒ፡ ተአመን፡ ወኢትፍራህ። ወኢትጐጕእ፡ በእንተ፡ ዘቀዲሙ፡ ኅሊናከ፡ እኩይ፡ ከመ፡ ኢትትወላወል፡ በደኃሪ፡ መዋዕል። ወእምዝ፡ እምድኅረ፡ ዝንቱ፡ በከይኩ፡ ካዕበ፡ ከማሁ፡ ሰቡዐ፡ መዋዕለ፡ ወጾምኩ፡ ከመ፡ እፈጽም ሰንበተ፡ ዘይቤለኒ። በይእቲ፡ ሌሊት፡ ተሀውከ፡ ካዕበ፡ ልብየ፡ ወአኀዝኩ፡ እንብብ፡ ቅድመ፡ ልዑል። እስመ፡ ትነድድ፡ መንፈስየ፡ ጥቀ፡ ወነፍስየኒ፡ ትትከወስ። ወእቤ፡ እግዚኦ፡ እግዚእየ፡ ብሂለ፡ ትቤ፡ አመ፡ ቀዳሚ፡ ኵነኔከ፡ በቀዳሚት፡ ዕለት፡ ይኩን፡ ሰማይ፡ ወምድር፡ ወቃልከኒ፡ ግብረ፡ ትገብር። ወመንፈስ፡ እንተ፡ ትጼልል፡ ወጽልመት፡ ምሉእ፡ ወጸጥ፡ ይብል፡ እስመ፡ አልቦ፡ ድምፀ፡ ወቃለ፡ እጓለ፡ እመሕያው፡ አልቦ፡ ዓዲ። ወትቤ፡ ውእተ፡ ጊዜ፡ ከመ፡ ይምጻእ፡ ብርሃን፡ እምጽርሕከ፡ ወያስተርኢ፡ ግብርከ። ወበሳኒታ፡ ዕለት፡ ካዕበ፡ ፈጠርከ፡ መንፈሰ፡ ዘሰማያት፡ ወአዘዝካሁ፡ ይፍልጥ፡ ማእከለ፡ ማያት፡ ከመ፡ ይሰስል፡ ላዕለ፡ መንፈቁ፡ ወመንፈቁ፡ ይንበር፡ ታሕተ። ወካዕበ፡ አመ፡ ሣልስት፡ ዕለት፡ አዘዝኮ፡ ለማያት፡ ይትጋባእ፡ ውስተ፡ ሳብዕተ፡ እዴሃ፡ ለምድር፡ ወ እዴሃ፡ ለምድር፡ ይትርፍ፡ የብሰ፡ ከመ፡ ውስቴቶን፡ ይሕርሱ፡ ወይዝርኡ፡ ወይሕየዉ፡ ቅድሜከ። ወቃልከሰ፡ እምከመ፡ ወጽአ፡ ይትገበር፡ ግብረ። ወበቈለ፡ ይእተ፡ አሚረ፡ ብዙኅ፡ ፍሬ፡ ዘአልቦ፡ ማኅለቅተ፡ ወዝንቱ፡ ከመዝ፡ ኮነ፡ አመ፡ ሣልስት፡ ዕለት፡ ወዘዘ፡ ዚአሁ፡ ጣዕሙ፡ ለኵሉ፡ ወዘዘ፡ ዚአሁ፡ ሕብረ፡ ጽጌሁ፡ ወዘዘ፡ ዚአሁ፡ ርእየተ፡ ዕፁ፡ ወዘዘ፡ ዚአሁ፡ መዐዛሁ። ወአመ፡ ራብዕት፡ ዕለት፡ አዘዝከ፡ ይኩን፡ ብርሃነ፡ ፀሓይ፡ ወወርኅኒ፡ ከመ፡ ያብርሁ፡ ወሥርዐተ፡ ከዋክብትኒ። ወአዘዝካሆሙ፡ ከመ፡ ይትለአክዎ፡ ለዘ፡ ሀሎ፡ ይትፈጠር፡ እጓለ፡ እመሕያው። ወአመ፡ ኀሙስ፡ ትቤሎ፡ ለዝኩ፡ ሳብዕተ፡ እድ፡ ኀበ፡ ሀሎ፡ ማየ፡ ናጌብ፡ ከመ፡ ያውጽእ፡ አዕዋፈ፡ ዘሕያው፡ ወዓሣተ። ወዝኩ፡ ማይ፡ ዘኢይነብብ፡ ወዘአልቦ፡ ነፍሰ፡ ገብረ፡ ዘነፍስ፡ ከመ፡ በእንተ፡ ዝንቱ፡ ይትናገሩ፡ በስብሐቲከ፡ ትውልድ። ወዐቀብከ፡ ይእተ፡ አሚረ እንስሳ፡ ዘፈጠርከ፡ ወሰመይካሁ፡ ለአሐዱ፡ ብሔሞት፡ ስሞ፡ ወሰመይካሁ፡ ለካልእ፡ ስሞ፡ ሌዎያታን። ወፈለጥኮሙ፡ በበይናቲሆሙ፡ እስመ፡ ኢይክል፡ ዝኩ፡ ሳብዕተ፡ እድ፡ ኀበ፡ ሀሎ፡ ማየ፡ ናጌብ፡ ጸዊሮቶሙ። ወወሀብካሁ፡ ለብሔሞት፡ አሐደ፡ እደ፡ ዘየብሰ፡ አመ፡ ሣልስት፡ ዕለት፡ ከመ፡ ይንበር፡ ውስቴቱ፡ ኀበ አድባር፡ ሀለዉ። ወወሀብካሁ፡ ለሌዊያታን፡ ሳብዕተ፡ እዴሁ፡ ለርጡብ፡ ወዐቀብካሆሙ፡ ከመ፡ ይኩን፡ ሲሳየ፡ ለእለ፡ ትፈቅድ። ወአመ፡ ሳድስት፡ ዕለት፡ አዘዝካሃ፡ ለምድር፡ ከመ፡ ታውጽእ፡ ቅድሜከ፡ እንስሳ፡ ወአራዊተ፡ ገዳም፡ ወአዕዋፈ። ወላዕለ፡ ዝንቱ፡ ኵሉ፡ ሤምካሁ፡ ለአዳም፡ መስፍነ፡ ላዕለ፡ ኵሉ፡ ዘአቅደምከ፡ ፈጢረ፡ ግብርከ፡ ወበእንቲአሁ፡ ንሠጠም፡ ንሕነ፡ ሕዝብከ፡ ዘኀረይከ። ዘንተ፡ ኵሎ፡ እቤ፡ ቅድሜሆከ፡ እግዚኦ፡ እስመ፡ ትቤ፡ በእንቲአክሙ፡ ፈጠርክዎ፡ ለዓለም። ወባዕድሰ፡ አሕዛብ፡ እለ፡ እምአዳም፡ ተወልዱ፡ ከመ፡ ወኢምንት፡ እሙንቱ፡ ወከመ፡ ምራቅ፡ ይመስሉ፡ ወከመ፡ ነጠብጣበ፡ ማሕየብ፡ እሙንቱ፡ ወትፍሥሕቶሙኒ። ወይእዜኒ፡ እግዚኦ፡ ናሁ፡ እልክቱ፡ አሕዛብ፡ እለ፡ ከመ፡ ወኢምንትኒ፡ እሙንቱ፡ ናሁ፡ ተበውሑ፡ ላዕሌነ፡ ወኬዱነ። ወንሕነሰ፡ ሕዝብከ፡ እለ፡ ትቤለነ፡ በኵርየ፡ አንትሙ፡ ዋሕድየ፡ ወልደ፡ ዚአየ፡ ዘአፈቅር፡ ገባእነ፡ ውስተ፡ እዴሆሙ። ወእመሰ፡ በእንቲአነ፡ ፈጠርካሁ፡ ለዓለም፡ ለምንትኬ፡ ኢወረስነ፡ ዓለመነ፡ ወእስከ፡ ማእዜኑ፡ እንከ፡ ዝንቱ።

Chapter 6 ወእምዝ፡ ሶበ፡ አኅለቁ፡ ነቢበ፡ ዘንተ፡ ቃለ፡ ተፈነወ፡ ኀቤየ፡ ዝኩ፡ መልአክ፡ ዘመጽአ፡ ኀቤየ፡ ቀዲሙ፡ በእንታክቲ፡ ሌሊት። ወይቤለኒ፡ ተንሥእ፡ ዕዝራ፡ ወስማዕ፡ ቃለ፡ ዘመጻእኩ፡ እንግርከ። ወእቤሎ፡ በል፡ እግዚኦ፡ ወይቤለኒ፡ ባሕር፡ እንተ፡ ውስተ፡ ርሒብ፡ መካን፡ ሀለወት፡ ወመርሕብ፡ ይእቲ፡ ወስፍሕት፡ ይእቲ። ወባቲ፡ ፍኖተ፡ ምብዋኢሃ፡ ጸባብ፡ ወትከውን፡ መጠነ፡ ፈለግ። ወእመቦ፡ ዘፈቀደ፡ ይባእ፡ ውስተ፡ ይእቲ፡ ባሕር፡ ይርአያ፡ ወይርከባ፡ እመ፡ ኢኀለፈ፡ እንተ፡ ዝኩ፡ መጽብብ፡ ምብዋኢሃ፡ እፎ፡ ይክል፡ ውስተ፡ መርሕብ። አው፡ ካልእት፡ ሀገር፡ እንተ፡ ሀለወት፡ ሕንጽታ፡ ውስተ፡ ገዳም፡ ወምልእት፡ ይእቲ፡ እምኵሉ፡ በረከት። ወፍኖተ፡ ምብዋኢሃ፡ ጸባብ፡ ወውስተ፡ ጸድፍ፡ ይእቲ፡ ወእምየ፡ ማናኒ፡ እሳት፡ ወእምፀጋማኒ፡ ቀላይ። ወአሐቲ፡ ፍኖታ፡ ማእከለ፡ እሳት፡ ወቀላይ፡ ወኢታገምር፡ ፍኖታ፡ ዘእንበለ፡ አሐቲ፡ ኪደተ፡ እግረ፡ ብእሲ። ወእመቦ፡ እንከ፡ ለዘ፡ ተውህበት፡ ይእቲ፡ ሀገር፡ ለብእሲ፡ ዘይወርስ፡ እመ፡ ኢኀለፈ፡ እንተ፡ ዝኩ፡ መብእስ፡ እፎ፡ ይረክብ፡ ርስቶ። ወእቤሎ፡ ከማሁ፡ እግዚኦ፡ ወይቤለኒ፡ ከማሁኬ፡ ምድረ፡ እስራኤልኒ፡ ወመክፈልቶሙኒ። እስመ፡ በእንቲአሆሙ፡ ፈጠርክዎ፡ ለዓለም፡ ወአመ፡ ክሕደ፡ አዳም፡ ትእዛዝየ። ኮነ፡ ፍናዊሁ፡ ለዝ፡ ዓለም፡ መብእሰ፡ ወመጽብበ፡ ወውኁደ፡ ወእኩየ፡ ወብዙኀ፡ ሕማም፡ ወምሉአ፡ ጻማ፡ ወስራሕ። ወዝክቱሰ፡ ዓለም፡ ዓቢይ፡ ፍናዊሁ፡ ርሒብ፡ ወብሩህ፡ ወይገብር፡ ፍሬ፡ ዘሕይወት፡ እንተ፡ አልባቲ፡ ሞተ። ወእመ፡ ኢዐደውክምዎ፡ አንትሙሂ፡ እለ፡ ሕያዋን፡ ለውእቱ፡ መብእስ፡ ወለውእቱ፡ ኀጢአት፡ ኢትክሉ፡ ረኪበ፡ ዘሥዩም፡ ለክሙ። ወይእዜኒ፡ ምንተ፡ ትትሀወክ፡ አንተ፡ መሬት፡ ወምንተ፡ ታንጠዐጥዕ፡ አንተ፡ መዋቲ። ወለምንት፡ ኢኀለይከ፡ በልብከ፡ ዘይመጽእ፡ አላ፡ ዘሀሎ። ወአውሣእክዎ፡ ወእቤሎ፡ እግዚኦ፡ ናሁኬ፡ ትቤ፡ በውስተ፡ ሕግከ፡ ከመ፡ ጻድቃን፡ ይወርስዎ፡ ለዝንቱ፡ ወኃጥኣንሰ፡ ይትሀጐሉ። እስመ፡ ጻድቃን፡ ሠናይ፡ ይትዔገሥዎ፡ ለመጽብብ፡ እንዘ፡ ይሴፈውዎ፡ ለመርሕብ፡ ወኃጥንሰ፡ ተአመንዎ፡ ለመጽብብ፡ ወኢይሬእይዎ፡ ለመርሕብ። ወይቤለኒ፡ አኮ፡ አንተ፡ ዘትኄይስ፡ ፍትሐ፡ እምአሐዱ፡ ወአኮ፡ ዘትጠብብ፡ እምልዑል። ለይትሀጐሉ፡ እልክቱ፡ ብዙኃን፡ እለ፡ አስተቱ፡ ሕጎ፡ ለእግዚአብሔር፡ ዘሠርዐ። እስመ፡ አዘዞሙ፡ እግዚአብሔር፡ ለእለ፡ ሀለዉ፡ ዘይገብሩ፡ ወየሐይዉ፡ ወዘ፡ እመ፡ ዐቀቡ፡ ኢይትኴነኑ። ወክሕድዎ፡ ወኀደግዎ፡ ወሠርዑ፡ ሎሙ፡ እኩየ፡ ኅሊና። ወረሰዩ፡ ሎሙ፡ ጒሕሉተ፡ ወዐመፃ፡ ወምስለ፡ ኵሉ፡ ዝንቱ፡ ይቤሉ፡ አልቦ፡ እግዚአብሔር፡ ወኀደጉ፡ ፍናዊሁ። ወክሕዱ፡ ሕጎ፡ ወተዐወሩ፡ ኪዳኖ፡ ወኢአምኑ፡ በሥርዐቱ፡ ወአስተቱ፡ ግብሮ። ወበእንተ፡ ዝንቱ፡ ዘዕራቁ፡ ለእለ፡ ዕራቆሙ፡ ወዘምሉእ፡ ለእለ፡ ምሉኣን። እስመ፡ ናሁ፡ ይመጽእ፡ መዋዕል፡ አመ፡ ያስተርኢ፡ ተኣምር፡ ዘእቤለከ፡ ወትትኀባእ፡ ሀገር፡ እንተ፡ ይእዜ፡ ታስተርኢ፡ ወያስተርኢ፡ ምድር፡ ዘይእዜ፡ ኅቡእ። ወኵሉ፡ ዘድኅነ፡ እምዘ፡ እቤለከ፡ እኩይ፡ ውእቱ፡ ዘይሬኢ፡ ስብሐትየ። እስመ፡ ያስተርኢ፡ መሲሕየ፡ ምስለ፡ እለ፡ ምስሌሁ፡ ወያስተፌሥሖሙ፡ ለእለ፡ ተንሥኡ። ወእምድኅረ፡ ዝንቱ፡ ይፌጽም፡ ቍልዔየ፡ መሲሕየ፡ ወኵሉ፡ ሰብእ፡ ዘቦ፡ መንፈስ። ወይገብእ፡ ዓለም፡ ውስተ፡ ምንባሪሁ፡ ዘቀዳሚ፡ ኀበ፡ ያረምም፡ ሰቡዐ፡ መዋዕለ፡ በከመ፡ ቀዳሚ፡ ወአልቦ፡ ዘይተርፍ። ወእምድኅረ፡ ሰቡዕ፡ መዋዕል፡ ይነቅሀ፡ ወይሴስል፡ ዓለም፡ ዘመዋቲ። ወምድርኒ፡ ታገብእ፡ እለ፡ ሰከቡ፡ ውስቴታ፡ ወመሬትኒ፡ ያገብእ፡ እለ፡ አዕረፉ፡ ውስቴታ፡ ወእምእኅረ፡ ዝንቱ፡ አብያትኒ፡ ያገብኡ፡ ዘተሠይመ፡ ውስቴቶሙ፡ ነፍሰ። ወውእተ፡ አሚረ፡ ያስተርኢ፡ ልዑል፡ ዲበ፡ መንበሩ፡ ዘፈጠረ፡ ወትመጽእ፡ ምሕረቱ፡ ወትገብእ፡ ሣህሉ፡ ወትትጋባእ፡ ትዕግሥቱ። ወይተርፍ፡ ባሕቲቱ፡ ደይን፡ ወትቀውም፡ ጽድቁ፡ ወትበቍል፡ ሃይማኖቱ። ወይተሉ፡ ግብሩ፡ ወያስተርኢ፡ ዕሴቱ፡ ወትነቅህ፡ ርትዑ፡ ወኢትነውም፡ እንከ፡ ኀጢአት። ፩፡ ወይትከሠት፡ ዐዘቅተ፡ ደይን፡ በቅድመ፡ መካነ፡ ዕረፍት፡ ወያስተርኢ፡ እቶነ፡ ገሃነም፡ በቅድመ፡ ገነተ፡ ትፍሥሕት። ፪፡ ወይቤሎሙ፡ ውእተ፡ አሚረ፡ ልዑል፡ ለሕዝብ፡ እለ፡ ነቅሁ፡ ናሁ፡ ርእ፡ ወአእምሩ፡ ለመኑ፡ ውእቱ፡ ዘክሕድክምዎ፡ ወለመኑ፡ ኢተቀነይክሙ፡ ወትእዛዘ፡ መኑ፡ መነንክሙ። ፫፡ ናሁ፡ ርእዩ፡ ቅድሜክሙ፡ እምለፌኒ፡ ትፍሕሥት፡ ወዕረፍት፡ ወእምለፌኒ፡ ደይን፡ ወእሳት። ወከመዝ፡ ይብሎሙ፡ በዕለተ፡ ደይን። ፬፡ ወዕለተ፡ ደይንሰ፡ ከመዝ፡ ይእቲ፡ አልቦ፡ ፀሓየ፡ ወኢወርኀ፡ ወኢከዋክብተ። ፭፡ ወኢደመና፡ ወኢመብረቀ፡ ወኢነጐድጓደ፡ ወኢነፋሰ፡ ወኢማየ፡ ወኢሰማየ፡ ወኢጽልመተ፡ ወኢሌሊተ፡ ወኢመዓልተ። ፮፡ ወኢክረምተ፡ ወኢሐጋየ፡ ወኢማእረረ፡ ወኢቍረ፡ ወኢሃፈ፡ ወኢአውለ፡ ወኢበረደ፡ ወኢአስሐትያ፡ ወኢጊሜ፡ ወኢዝናመ፡ ወኢጠለ። ፯፡ ወኢሰርከ፡ ወኢነግሀ፡ ወኢበርሀ፡ ወኢጸዳለ፡ ወኢዋካ፡ ወኢማኅቶተ፡ ዘእንበለ፡ ባሕቲቱ፡ መብረቀ፡ ስብሐቲሁ፡ ለእግዚአብሔር፡ ከመ፡ ቦቱ፡ ይርአይ፡ ኵሉ፡ ዘጽኑሕ፡ ሎቱ። ፰፡ ወይከውን፡ ኑኃ፡ ለይእቲ፡ ዕለት፡ ከመ፡ ሰብዐቱ፡ ዓመት። ፱፡ ወዝንቱ፡ ደይኑ፡ ወኵነኔሁ፡ ለከ፡ ለባሕቲትከ፡ ነገርኩከ። ፲፡ ወአውሣእክዎ፡ ወእቤሎ፡ እግዚኦ፡ ይእዜኒ፡ እብል፡ ብጹዓን፡ እለ፡ ሀለዉ፡ ወየዐቅቡ፡ ትእዛዘከ። ፲፩፡ ወባሕቱ፡ በእንተ፡ ዘተስእልኩከ፡ መኑ፡ ውእቱ፡ እምእለ፡ ሀለዉ፡ ወኢይኤብሱ፡ ወመኑ፡ ውእቱ፡ ዘተወልደ፡ ወኢኀደገ፡ ሥርዐተከ። ፲፪፡ ወይእዜሰ፡ እሬኢ፡ ከመ፡ ውኁዳን፡ እሙንቱ፡ እለ፡ ሀለወከ፡ ታስተፈሥሖሙ፡ በዓለም፡ ዘይመጽእ፡ ወብዙኃን፡ እለ፡ ይትኴነኑ። ፲፫፡ እስመ፡ በቈለ፡ ላዕሌነ፡ ልብ፡ እኩይ፡ ዘአስሐተነ፡ እምዝንቱ፡ ወመርሐነ፡ ውስተ፡ ሕርትምና፡ ወወሰደነ፡ ውስተ፡ ፍኖተ፡ ሞት፡ ወውስተ፡ ፍኖተ፡ ሙስና፡ ወአርሐቃ፡ እምኔነ፡ ለሕይወት፡ አላ፡ ላዕለ፡ ኵሉ፡ እለ፡ ተወልዱ። ፲፬፡ ወአውሥአኒ፡ ወይቤለኒ፡ ስምዐኒ፡ ወእነግረከ፡ ወዳግመ፡ እሜህረከ። ፲፭፡ በእንተ፡ ዝንቱ፡ ኢገብረ፡ ልዑል፡ አሐደ፡ ዓለመ፡ አላ፡ ክልኤተ። ወአውሣእክዎ፡ ወእቤሎ፡ እፎኬ፡ ረከብነ፡ ይእዜ፡ ከመ፡ ሰአለ፡ አብርሃም፡ ቀዳሚ፡ በእንተ፡ ሰዶም፡ ወሙሴ፡ በእንተ፡ አበዊነ፡ አመ፡ አበሱ፡ በገዳም። ወዮሴዕ፡ በእንተእስራኤል፡ በመዋዕለ፡ አካን፡ ወሳሙኤል፡ በመዋዕለ፡ ሳኦል። ወዳዊትኒ፡ በእንተ፡ ብድብድ፡ ወሰሎሞንሂ፡ በእንተ፡ መቅደስ። ወኤልያስ፡ በእንተ፡ ዝናም፡ ወበእንተ፡ ምውት፡ ከመ፡ ይሕየው። ወሕዝቅያስሂ፡ በእንተ፡ ሕዝብ፡ በመዋዕለ፡ ሰናክሬም፡ ወብዙኃን፡ በእንተ፡ ብዙኃን። ሶበ፡ እንከ፡ ይእዜ፡ እንዘ፡ መዋቲ፡ ይበቊል፡ ወዐመፃ፡ ትበዝኅ፡ ሰአሉ፡ ጻድቃን፡ በእንተ፡ ኃጥኣን፡ በእፎ፡ እንከ፡ ኢኮነ፡ ከማሁ፡ ይእተ፡ አሚረ። ወአውሥአኒ፡ ወይቤለኒ፡ እስመ፡ ኢኮነ፡ ዓዲ፡ ማኅለቅቱ፡ ለዝንቱ፡ ዓለም፡ ዘይእዜ፡ ወስብሐተ፡ እግዚአብሔር፡ አልቦ፡ ውስቴቱ፡ ክሡተ፡ ዘይነብር፡ ለዝላፉ፡ ወበእንተ፡ ዝንቱ፡ ሰአሉ፡ ጽኑዓን፡ በእንተ፡ ድኩማን። ወዕለተ፡ ደይንሰ፡ ማኅለቅቱ፡ ለዝንቱ፡ ዓለም፡ ወቀዳሚሁ፡ ውእቱ፡ ለዓለም፡ ዘይመጽእ፡ በዘ፡ የኀልቅ፡ መዋቲ፡ ወይቀውም፡ ዘኢይመውት። ወእምዝ፡ ተስዕረ፡ ድካም፡ ወየኀልቅ፡ ተስናን፡ ወትበቊል፡ ጽድቅ፡ ወትጸንዕ፡ ርትዕ። ወይእተ፡ አሚረ፡ አልቦ፡ ዘይክል፡ ምሒሮቶ፡ ለዘተመውአ፡ በደይን፡ ወአልቦ፡ ዘይክል፡ አሕምሞቶ፡ ለዘ፡ ሞአ። ወአውሣእክዎ፡ ወእቤሎ፡ ውእቱ፡ ክመ፡ ቃልየ፡ ዘቀዳሚኒ፡ ወይእዜኒ፡ እስመ፡ እምኀየሰነ፡ ሶበ፡ ኢያውፅአቶ፡ ምድር፡ ለአዳም፡ እምታውፅኦ፡ ወትምሀሮ፡ በዘ፡ ይኤብስ። ወምንተ፡ ይበቊዐነ፡ ዘነሐዩ፡ ኵልነ፡ በሐዘን፡ ወመዊተነኒ፡ ዓዲ፡ ጽኑሕ፡ ለነ፡ ደይን። ኦ፡ አዳም፡ ምንተ፡ ገበርከ፡ ሶበ፡ አኮ፡ አንተ፡ ዘአበስከ፡ እመ፡ ኢኮነት፡ ላዕሌነ፡ ዛቲ፡ እኪት። ወምንተ፡ ይበቊዐነ፡ ዘአሰፈውከነ፡ ዓለመ፡ ዘአልቦ፡ ሞተ፡ ወንሕነሰ፡ ግብሩ፡ መዋቲ፡ ገበርነ። ወዘነገሩነ፡ ተስፋ፡ ሠናየ፡ ወንሕነሰ፡ እኪተ፡ ተለውነ። ወዘሥዩም፡ ለነ፡ አብያት፡ ኀበ፡ አልቦ፡ ደዌ፡ ወአልቦ፡ ሐዘነ፡ ወንሕነሰ፡ ኃጢአተ፡ ገበርነ። ወእስመ፡ ሀለዎሙ፡ ስብሐቲሁ፡ ለልዑል፡ በእንተ፡ ጻድቃን፡ ዘሐሙ፡ ያጽንዖሙ፡ ወንሕነሰ፡ በጌጋይነ፡ ሖርነ። ወእስመ፡ ያስተርኢ፡ ገነት፡ ዘኢይጸመሂ፡ ፍሬሁ፡ ዘውስቴቱ፡ ትፍሥሕት፡ ወሕይወት። ወንሕነሰ፡ ኢንበውእ፡ እስመ፡ በዘ፡ ኢንትአኰት፡ ግብረ፡ ገበርነ። ወእስመ፡ ይበርህ፡ ገጾሙ፡ ለእለ፡ አጽንዕዋ፡ ለትዕግሥት፡ ወለነሰ፡ እምጽልመት፡ ይጸልም፡ ገጽነ። ወናሁ፡ ነሐዩ፡ እንዘ፡ ኢናአምር፡ ምንት፡ ሀሎ፡ ለነ፡ እምድኅረ፡ ሞትነ። ወአውሥአኒ፡ ወይቤለኒ፡ ዝንቱ፡ ኅሊናሁ፡ ለዝንቱ፡ ዓለም፡ ዘይትጋደል፡ ሰብእ፡ ዘተወልደ፡ ውስተ፡ ምድር። ከመ፡ ለእመ፡ ተመውአ፡ ይረክብ፡ ዘትቤ፡ ወለእመ፡ ሞአ፡ ይረክብ፡ ዘእቤ። እስመ፡ ዛቲ፡ ይእቲ፡ ፍኖት፡ እንተ፡ ይቤሎሙ፡ ሙሴ፡ ለሕዝብ፡ ኅረይዋ፡ ለክሙ፡ ለሕይወት፡ ከመ፡ ትሕየዉ። ወክሕድዎ፡ ወለእለሂ፡ እምድኅሬሁ፡ ነቢያት። ወሊተኒ፡ ለዘ፡ ተናገርክዎሙ፡ ወአልቦ፡ ሐዘነ፡ በእንተ፡ ተሀጒሎቶሙ፡ በከመ….፡ በእንተ፡ ሕይወቶሙ፡ ለእለ፡ የአምኑ። ወአውሣእክዎ፡ ወእቤሎ፡ ኣአምር፡ እግዚኦ፡ ከመ፡ ይእዜ፡ ይሰመይ፡ ልዑል፡ ወሓሬ፡ ሶበ፡ መሐሮሙ፡ ለእለ፡ ዘልፈ፡ ከመ፡ ወኢምንት፡ ኮኑ። ወመስተሣህል፡ ሶበ፡ ተሣሀሎሙ፡ ለእለ፡ ተመይጡ፡ ውስተ፡ ሕጉ። ወመስተዐግሥ፡ እስመ፡ ይትዔገሦሙ፡ ለእለ፡ አበሱ፡ ከመ፡ ውሉዱ። ወጸጋዊ፡ እስመ፡ ይጼግዎሙ፡ ለእለ፡ እቤለከ፡ ዘከመ፡ ይደልዎሙ፡ በእንተ፡ ምግባሮሙ። ወብዙኀ፡ ምሕረት፡ እስመ፡ ያበዝኅ፡ ምሕረቶ፡ ፈድፋደ፡ ላዕለ፡ እለ፡ ሀለዉ፡ ወላዕለ፡ እለ፡ ይትኤዘዙ፡ ወላዕለ፡ እለኒ፡ ሀለዎሙ፡ ይትአኰቱ። እስመ፡ እመ፡ ኢያብዝኀ፡ ምሕረቶ፡ ኢየሐዩ፡ ዓለም፡ ወእለሂ፡ ይነብሩ፡ ውስቴቱ። ወጸጋዊ፡ እስመ፡ እመ፡ ኢጸገወ፡ እምሠናይቱ፡ ከመ፡ ይትቀለሉ፡ ኃጥኣን፡ እምኀጢአቶሙ፡ እመ፡ ኢሐይዉ፡ ኵሉ፡ ዘመደ፡ እጓለ፡ እመሕያው። ወመኰንን፡ እስመ፡ እመ፡ ኢዐቀበ፡ ተግባሮ፡ ዘገብረ፡ ይደመስሶሙ፡ ብዝኆሙ፡ ለከሓድያን፡ ወኢይተርፍ፡ እምነ፡ ብዝኀ፡ ኊልቆሙ፡ እመ፡ አኮ፡ ኅዳጥ፡ ጥቀ።

Chapter 7 ወአውሥአኒ፡ ወይቤለኒ፡ ለዝንቱሰ፡ ዓለም፡ በእንተ፡ ብዙኃን፡ ገብሮ፡ ልዑል፡ ወዘሰ፡ ይመጽእ፡ ባሕቱ፡ በእንተ፡ ውኁዳን። ወናሁ፡ እፌክር፡ ለከ፡ አማሳለ፡ በቅድሜከ፡ ዕዝራ፡ ተሰአላ፡ ለምድር፡ ወትነግረከ፡ እስመ፡ ትሁብ፡ መሬተ፡ ዘእምውስቴቱ፡ ይከውን፡ ልሕኵት፡ ወመሬትኒ፡ ዘይከውን፡ ወርቀ፡ ወይበዝኅ፡ ዘልሕኵት፡ ፈድፋደ፡ እምነ፡ ወርቅ፡ ከማሁኬ፡ ግብሩኒ፡ ለዝንቱ፡ ዓለም። እስመ፡ ብዙኃን፡ እለ፡ ተፈጥሩ፡ ውስቴቱ፡ ወውኁዳን፡ እለ፡ የሐይዉ። ወአውሣእክዎ፡ ወእቤሎ፡ ለትፈሣሕ፡ ነፍስ፡ እምልብ፡ ወትስተይ፡ እዝን፡ እምጥበብ። እስመ፡ መጽአ፡ እዝን፡ ለሰሚዕ፡ ወየሐውር፡ በዘ፡ ኢይፈቅድ፡ እንዘ፡ ኢይትወሀብ፡ ሎቱ፡ እንበለ፡ ኅዳጥ፡ ሕይወት። እግዚኦ፡ እመሰ፡ አባሕኮ፡ ለገብርከ፡ ሶበ፡ ወሀብከነ፡ ልበ፡ ወኅሊና፡ በዘ፡ ንዘርእ፡ ወኀበሂ፡ ነሐርስ፡ ወንዘርእ፡ ከመ፡ ይፍረይ፡ ለነ፡ ወይክሀሉ፡ ሐዪወ፡ ኵሎሙ፡ ንውታብ፡ በዘ፡ ይጸውሮ፡ ዓለም፡ ለእጓለ፡ እመሕያው። እስመ፡ ኵልነ፡ ዕሩያን፡ ንሕነ፡ ግብረ፡ እደዊከ፡ በከመ፡ ትቤ። እስመ፡ ትፈጥሮ፡ ይእዜ፡ ውስተ፡ ማሕፀን፡ ወትገብር፡ ሎቱ፡ ሥጋሁ፡ ወመለያልዮ፡ ወትሁቦ፡ ልበ፡ ወተዐቅቦ፡ በእሳት፡ ወማይ፡ ወ፱፡ አውራኅ፡ ትጸውሮ፡ ለዝኩ፡ ዘፈጠርከ፡ ወይትዐቀብ፡ በቃለ፡ ዚአከ። ወሶበሂ፡ ካዕበ፡ ትወልዶ፡ እሙ፡ ወእምዝ፡ ተወሊዶ፡ ወተፈጢሮ። ትኤዝዝ፡ እምውስተ፡ መለያልይ፡ የሐዝ፡ ሐሊብ፡ እንተ፡ አጥባቲሃ፡ ፍሬ፡ ጥብ። ከመ፡ ይትሐፀን፡ ዝኩ፡ ግብርከ፡ እስከ፡ ጊዜ፡ መዋዕሊሁ፡ ወታልህቆ፡ በምሕረትከ። ወትሴስዮ፡ በጽድቅከ፡ ወትሜህሮ፡ በሕግከ፡ ወትጌሥጾ፡ በጥበብከ። ወእምዝ፡ ትቀትሎ፡ ለዝኩ፡ ዘፈጠርከ፡ ወአሕየውከ፡ ግብረከ። ወእመሰ፡ አማስኖ፡ ታማስኖ፡ ለዝኩ፡ ዘመጠነዝ፡ መዋዕል፡ ፈጠርከ፡ ወገበርከ፡ ወለምንት፡ እንከ፡ ፈጠርካሁ። ወይእዜኒ፡ አማን፡ ነገርኩ፡ ወለሊከ፡ ታአምር፡ በእን፡ ኵሉ፡ ወባሕቱ፡ ሊተሰ፡ በእንተ፡ ሕዝብከ፡ አጽሀቀኒ። ወበእንተ፡ ርስትከ፡ ዘንተ፡ ዘአሐዝን። ወዘንተ፡ ዘአኀዝኩ፡ ኣስተብቊዕ፡ በቅድሜከ፡ በእንቲአየኒ፡ ወበእንቲአሆሙሂ፡ እስመ፡ እሬኢ፡ መድኅፀነ፡ ለነ፡ ለእለ፡ ንነብር፡ ውስተ፡ ዓለም። ወአንሰ፡ እሰምዕ፡ ሕጎ፡ ለዓለም፡ ዘይመጽእ። ወበእንተ፡ ዝንቱ፡ ስማዕ፡ ቃልየ፡ ወአፅምአኒ፡ ስእለትየ፡ ወእንግር፡ ቅድሜከ። ቀዳሜ፡ ቃለ፡ ጸሎቱ፡ ለዕዥራ፡ ዘእንበለ፡ ይንሥእዎ። ወይቤ፡ እግዚኦ፡ ዘትነብር፡ ለዓለም፡ ዘትሬኢ፡ በአርያም፡ ልዑል፡ ዘሀሎከ፡ በሰማይ። ዘኢይትመዋእ፡ መንበርከ፡ ወኢየኀልቅ፡ ስብሐቲከ፡ ወይቀውሙ፡ በፍርሀት፡ መላእክቲከ። ወበትእዛዝከ፡ ይከውን፡ ነፋስ፡ ወእሳት፡ ወቃልከኒ፡ ጽኑዕ፡ ወይነብር፡ ነቢብከ። ወኀያል፡ ሥርዐትከ፡ ወግሩም፡ ትእዛዝከ፡ ወይመስዎሙ፡ ለአድባር፡ መዐትከ፡ ወጽድቅ፡ ስምዕከ። ስማዕ፡ ቃሎ፡ ለገብርከ፡ ወአፅምእ፡ ስእለተ፡ ተግባርከ፡ ወአፅምእ፡ ነቢብየ። አምጣነሰ፡ ሕያው፡ አነ፡ እነግረከ፡ ወአምጣነ፡ ሀሎ፡ ልብየ፡ ኣወሥአከ። ኢትነጽር፡ አበሳሆሙ፡ ለሕዝብከ፡ ዳእሙ፡ ጽድቆሙ፡ ለእለ፡ ተቀንዩ፡ ለከ። ወኢትርአይ፡ ግብሮሙ፡ ለኃጥኣን፡ ዳእሙ፡ ሕማሞሙ፡ ለእለ፡ ዐቀቡ፡ ሥርዐተከ። ወኢትትመዓዕ፡ በእንተ፡ እለ፡ ገብሩ፡ እኪተ፡ በቅድሜከ፡ ዳእሙ፡ ተዘከሮሙ፡ ለእለ፡ በኵሉ፡ ልቦሙ፡ ተአመኑ፡ በሕግከ። ወኢትፍቅድ፡ ታህጒሎሙ፡ ለእለ፡ ከመ፡ እንስሳ፡ ኮኑ፡ በምግባሮሙ፡ ዳእሙ፡ ነጽሮሙ፡ ለእለ፡ በብሩህ፡ አጽንዕዋ፡ ለሥርዐትከ። ወኢትትመዐዖሙ፡ ለእለ፡ አከዩ፡ እምአራዊት፡ ዳእሙ፡ አፍቅሮሙ፡ ለእለ፡ ለዝሉፉ፡ ተወከሉ፡ በስብሐቲከ። ወባሕቱ፡ ንሕነኒ፡ ወእለኒ፡ እምቅድሜነ፡ ግብረ፡ መዋቲ፡ ገበርነ፡ ወአንተሰ፡ በእንቲአነኒ፡ ወበእንተኒ፡ እለ፡ አበሱ፡ ኩን፡ መሓሬ። እሰመ፡ ለነ፡ ለእለ፡ አልብነ፡ ምግባረ፡ ሠናይ፡ ለእመ፡ መሐርከነ፡ ውእተ፡ አሚረ፡ ትሰመይ፡ መሓሬ። ወለጻድቃንሰ፡ እለ፡ ቦሙ፡ ምግባረ፡ ሠናይ፡ ዘሥዩም፡ ሎሙ፡ በኀቤከ፡ እምግባሮሙ፡ ትምሕሮሙ። ወምንት፡ ውእቱ፡ እጓለ፡ እመሕያው፡ ከመ፡ ትትመዐዖ፡ ወምንት፡ ውእቱ፡ ዘመደ፡ መዋቲ፡ ከመ፡ ትምርር፡ በእንቲአሁ። አማን፡ እብል፡ ከመ፡ አልቦ፡ እምዘተወልደ፡ ዘኢይኤብስ። ወባሕቱ፡ በዝንቱ፡ ጥቀ፡ ይትአመር፡ ኂሩትከ፡ ሶበ፡ መሐርኮሙ፡ ለእለ፡ አልቦሙ፡ ምግባረ፡ ሠናይ። ወአውሥአኒ፡ ወይቤለኒ፡ አማን፡ በኀቤየ፡ ጽድቀ፡ ተናገርከ፡ ወከማሁ፡ ውእቱ። ወአማን፡ ኢይፈቅድ፡ ሎሙ፡ ለእለ፡ ይኤብሱ፡ ሞተ፡ ወኢደይነ፡ ወኢሕርትምና። ወባሕቱ፡ እትፌሣሕ፡ በእንተ፡ ጻድቃን፡ እስመ፡ እሙንቱ፡ እለ፡ የሐይዉ፡ ወይረክቡ፡ ዕሴቶሙ። ወበከመ፡ ትቤ፡ ከማሁ፡ ውእቱ። በከመ፡ ይዘርእ፡ ሐረሳዊ፡ ብዙኀ፡ ዘርአ፡ ወይተክል፡ ብዙኀ፡ ተክለ፡ ወእመሰ፡ ጊዜሁ፡ አኮ፡ ኵሉ፡ ዘርእ፡ ዘየሐዩ፡ ወአኮ፡ ኵሉ፡ ተክል፡ ዘይወዲ፡ ሥርወ፡ ወከማሁ፡ እለኒ፡ ውስተ፡ ዝንቱ፡ ዓለም፡ አኮ፡ ኵሉ፡ ዘየሐዩ። ወአውሣእክዎ፡ ወእቤሎ፡ እመ፡ ረከብኩ፡ ሞገሰ፡ በቅድሜከ፡ እነግረከ። ዘርአ፡ ሐረሳዊሰ፡ እመ፡ ኢልህቀ፡ ይብል፡ ዮጊ፡ ዝናም፡ ኢረከቦ፡ ወበእንተ፡ ዝንቱ፡ ይማስን። ወባሕቱ፡ ሰብእ፡ ዘበእዴከ፡ ገበርከ፡ ወበአምሳለ፡ ዚአከ፡ አስተማሰልከ፡ ወእመሰ፡ አምሳለ፡ ዚአከ፡ ውእቱ፡ ወኵሎ፡ በእንቲአሁ፡ ገበርከ፡ ለምንት፡ እንከ፡ ታስተማስሎ፡ ወትሬስዮ፡ ከመ፡ ዘርአ፡ ሐረሳዊ። ሐሰ፡ ለከ፡ እግዚኦ፡ ዳእሙ፡ መሀክ፡ ሕዝበከ፡ ወመሐር፡ ርስተከ፡ እስመ፡ ተግባረከ፡ ትምሕር። ወአውሥአኒ፡ ወይቤለኒ፡ ዘውስተ፡ ዝንቱ፡ ዓለም፡ ለእለ፡ ውስተ፡ ዝንቱ፡ ዓለም፡ አምሳሊሆሙ፡ ውእቱ፡ ወዘዝክቱሰ፡ ዓለም፡ ለእለ፡ ውስተ፡ ዝክቱ፡ ዓለም። ወባሕቱ፡ ብዙኀ፡ ሕጹጽ፡ አንተ፡ ከመ፡ ታፈድፍድ፡ አፍቅሮቶ፡ ለተግባርየ፡ እምኔየ፡ ወአንተሰ፡ ዘመብዝኅቶ፡ ትትሜሰል፡ ከመ፡ ኃጥኣን፡ እንዘ፡ ኢኮንከ፡ ኃጥአ። ወባሕቱ፡ በእንተ፡ ዝንቱ፡ ትትአኰት፡ በኀበ፡ ልዑል። እስመ፡ አትሐትከ፡ ርእሰከ፡ በከመ፡ ይደልወከ፡ ወኢረሰይከ፡ ርእሰከ፡ ከመ፡ ጻድቃን፡ ከመ፡ ፈድፋደ፡ ትትአኰት። ወይእዜኒ፡ ሕርቱማን፡ ብዙኀ፡ የሐሙ፡ እለ፡ ይነብሩ፡ ውስተ፡ ዓለም፡ በደኃሪ፡ መዋዕል፡ እሰመ፡ በብዙኅ፡ ትዕቢት፡ ሖሩ። ወአንተሰ፡ ለርእስከ፡ አእምር፡ ወለእለኒ፡ ከማከ፡ ኅሥሥ፡ ክብሮሙ። እስመ፡ ለክሙ፡ ተርኅወ፡ ገነት፡ ወተተክለ፡ ዕፀ፡ ሕይወት፡ ወተደለወ፡ ዓለም፡ ዘይመጽእ፡ ወተሠርዐ፡ ወተሐንጸ፡ ትፍሥሕት፡ ወተነጽፈት፡ ዕረፍት፡ ወቆመት፡ በረከት፡ ወሠናይት፡ ወተቀሥመ፡ ሥርዋ፡ ለጥበብ። ተኀትመ፡ እንከ፡ ደዌ፡ ወጠፍአ፡ ሞት፡ ወተኀብአት፡ ሲኦል፡ ወጠፍአት፡ ሙስና። ወተረስዐ፡ ሕማም፡ ወአስተርአየ፡ መዝገበ፡ ሕይወት። ወኢትድግም፡ እንከ፡ ተኀሥሦ፡ በእንተ፡ ብዝኆሙ፡ ለእለ፡ ይትሀጐሉ። እስመ፡ እሙንቱኒ፡ ረኪቦሙ፡ ግዕዛነ፡ መነንዎ፡ ለልዑል፡ ወአስተቱ፡ ሕጎ፡ ወኀደጉ፡ ፍኖቶ። ወተካየድዎሙ፡ ለጻድቃኒሁ። ወይቤሉ፡ በልቦሙ፡ ኢንፈቅዶ፡ ለእግዚአብሔር፡ እንዘ፡ ያአምሩ፡ ከመ፡ ይመውቱ። ወበእንተ፡ ዝንቱ፡ በከመ፡ ለክሙ፡ ዝንቱ፡ ሠናይ፡ ከማሁኬ፡ ሎሙኒ፡ ዝኩ፡ ሙስና። እስመ፡ እሙንቱ፡ ተፈጢሮሙ፡ ገመንዎ፡ ለስመ፡ ፈጣሪሆሙ፡ ወኢያእኰትዎ፡ ለዘ፡ አስተዳለዎሙ። ይእዜኒ፡ ይበጽሖሙ፡ ደይኖሙ። ዘኢነገርክዎሙ፡ ለብዙኃን፡ ዘእንበለ፡ ለከ፡ ወለውኁዳን፡ እለ፡ ከማከ። ወአውሣእክዎ፡ ወእቤሎ፡ ናሁ፡ እግዚኦ፡ ነገርከኒ፡ ይእዜ፡ ብዙኀ፡ ተኣምረ፡ ዘሀለወከ፡ ትግበር፡ በደኃሪ፡ መዋዕል፡ ወኢነገርከኒ፡ ባሕቱ፡ ማእዜ፡ ዕድሜሁ።

Chapter 8 ወአውሥአኒ፡ ወይቤለኒ፡ ሐሲበከ፡ ሕስብ፡ ለሊከ፡ ወእምከመ፡ ርኢከ፡ ቦቱ፡ ዘኀለፈ፡ እምተኣምር፡ ዘእቤለከ። ውእተ፡ አሚረ፡ አእምር፡ ከመ፡ በጽሐ፡ ዕድሜሁ፡ ዘቦቱ፡ ሀለዎ፡ ለልዑል፡ የሐውጽ፡ ዓለመ፡ ዘፈጠረ። አመ፡ አስተርአየ፡ ውስተ፡ ዓለም፡ ድልቅልቅ፡ በበ፡ ብሔሩ፡ ወይትሀወሉ፡ አሕዛብ፡ ወይትሐበቀቁ፡ ሕዝብ፡ ወይትቃተሉ፡ መላእክት፡ ወይደነግጹ፡ መሳፍንት። ውእተ፡ አሚረ፡ አእምር፡ ከመ፡ እንበይነ፡ ዝንቱ፡ ይቤ፡ ልዑል፡ እምቅድመ፡ ዕድሜሁ። በከመ፡ ኵሉ፡ ዘኮነ፡ ውስተ፡ ዓለም፡ ዘቀዳሚ፡ በቃል፡ ወደኃሪ፡ በአስተርእዮ። ከማሁ፡ ዓለሙኒ፡ ለልዑል፡ ዘቀዳሚ፡ በነገር፡ ወበተኣምር፡ ወበኀይል፡ ወደኃሪሰ፡ በምግባር፡ ወበመንክር። ወዘድኅነ፡ ወክህለ፡ አምሥጦ፡ በምግባሩ፡ ወበሃይማኖቱ፡ እንተ፡ ባቲ፡ ተአምነ። ውእቱ፡ ዘይድኅን፡ እምዘ፡ እቤለከ፡ ሥቃይ፡ ወይሬእያ፡ ለሕይወት፡ በምድርየ፡ ወበደወልየ፡ ዘቀደስኩ፡ ሊተ፡ እምዝንቱ፡ ዓለም። ወይእተ፡ አሚረ፡ ይትመነደቡ፡ እለ፡ ይእዜ፡ ተዐወሩ፡ ትእዛዝየ፡ ወይጼዐሩ፡ ውስተ፡ ደይን፡ እለ፡ ኀደጉ፡ ሥርዐትየ፡ ወአስተሐቀሩኒ። ወኵሎሙ፡ እለ፡ ኢያእመሩኒ፡ በሕይወቶሙ፡ እንዘ፡ እረድኦሙ። ወኵሎሙ፡ እለ፡ ተዐበዩ፡ ላዕለ፡ ሕግየ፡ እንዘ፡ ግዑዛን፡ እሙንቱ። ወእንዘ፡ ርኅው፡ ሎሙ፡ መካነ፡ ትዕግሥትየ፡ ወኢለበዉኒ፡ አላ፡ አስተቱኒ፡ ሀለዎሙ፡ ባሕቱ፡ ያእምሩኒ፡ እምድኅረ፡ ሞቱ። ወአንተሰ፡ ኢትኅሥሥ፡ እንከ፡ እፎ፡ ይትኴነኑ፡ ኃጥኣን፡ ዳእሙ፡ ኅሥሥ፡ እፎ፡ የሐይዉ፡ ጻድቃን፡ በዓለሞሙ፡ እስመ፡ በእንቲአሆሙ፡ ውእቱ፡ ዓለም። ወአውሣእክዎ፡ ወእቤሎ። ቀዳሚኒ፡ እቤ፡ ወይእዜኒ፡ እብል፡ ከመ፡ ይበዝኁ፡ እለ፡ ይትሀጐሉ፡ እደኃርያን፡ እምእለ፡ የሐይዉ። ከመ፡ ትበዝኅ፡ ሞገድ፡ እምነጠብጣብ። ወአውሥአኒ፡ ወይቤለኒ። በአምጣነ፡ ብሔሩ፡ ዘርኡ፡ ወበከመ፡ ምግባሩ፡ ኵነኔሁ፡ ወበሐሳበ፡ ሐረሳዊሁ፡ ዐጸዱ፡ እስመ፡ በመዋዕሊሁ፡ ውእቱ፡ ዓለም። ዘአስተዳለውኩ፡ ይእዜ፡ እንበለ፡ ይኩን፡ ዓለሞሙ፡ ዘውስቴቱ፡ ይነብሩ፡ ወአልቦ፡ ዘይትዋሥአኒ፡ ይእተ፡ አሚረ፡ እስመ፡ አልቦ፡ ዘሀለወ፡ ወኢመኑሂ። ወይእዜኒ፡ ተፈጢሮሙ፡ ውስተ፡ ዓለም፡ ድልው፡ ወውስተ፡ ማእድ፡ እንተ፡ ለዝላፉ፡ በሕግ፡ ዘአልቦ፡ አሠረ፡ ሞት፡ በምግባሪሆሙ። ሶበ፡ ርኢክዎ፡ ለዓለም፡ ወናሁ፡ ህጉል፡ ውእቱ፡ ወዓለምየኒ፡ ወናሁ፡ ይጼዐሩ፡ በእንተ፡ ምግባሮሙ፡ ዘተዘርአ፡ ውስተ፡ ምድር። ወሖርኩ፡ ወመሀኩ፡ ኅዳጠ፡ ጥቀ፡ ወአድኀንኩ፡ ሊተ፡ ሕንባባተ፡ እምውስተ፡ አስካል፡ ወአሐተ፡ ተክለ፡ እምብዙኅ፡ ዖም። ወይትሀጐል፡ ብዝኆሙ፡ ለእለ፡ ከንቶ፡ ተፈጥሩ፡ ወትትዐቀብ፡ ሕንባባትየ፡ ወተክልየ፡ እንተ፡ በብዙኅ፡ ስራሕ፡ ጸንዐት። ወአንተሰ፡ ለእመ፡ ካዕበ፡ ጸለይከ፡ ወጾምከ፡ ሰቡዐ፡ መዋዕለ። ወሖርከ፡ ውስተ፡ ገዳም፡ ኀበ፡ ኢተሐንጸ፡ ንድቅ፡ ወበላዕከ፡ እምፍሬ፡ ገዳም፡ ባሕቲቶ፡ ወሥጋኒ፡ ኢበላዕከ፡ ወወይነሂ፡ ኢሰተይከ፡ ዘእንበለ፡ ፍሬ፡ ዕፅ፡ ባሕቲቶ። ወጸሊ፡ ኀበ፡ ልዑል፡ በኵሉ፡ ጊዜ፡ ወእመጽእ፡ ወእነግረከ። ወእምዝ፡ ሖርኩ፡ ውስተ፡ ገዳም፡ ዘስሙ፡ አርፋድ፡ በከመ፡ አዘዘኒ፡ ወነበርኩ፡ ውስተ፡ ሣዕር፡ ወተሴሰይኩ፡ እምፍሬ፡ ገዳም፡ ወዘኒ፡ በላዕኩ፡ ያጸግበኒ። ወእምዝ፡ እምድኅረ፡ ሰቡዕ፡ መዋዕል፡ እንዘ፡ ሀለውኩ፡ እሰክብ፡ ውስተ፡ ሣዕር፡ ወልብኒ፡ ተሀውከኒ፡ ከመ፡ ቀዲሙ። ወከሠትኩ፡ አፉየ፡ ወአኀዝኩ፡ እንብብ፡ ቅድመ፡ ልዑል፡ ወእቤ። እግዚኦ፡ እግዚእ፡ አስተርእ፡ አስተርአይከ፡ ለአበዊነ፡ በገዳም፡ በምድረ፡ በድው፡ ኀበ፡ አልቦ፡ ዖመ፡ ወሣዕረ። ወትቤ፡ አንተ፡ እስራኤል፡ ስምዐኒ፡ ወአፅምአኒ፡ ቃልየ። እስመ፡ ናሁ፡ አነ፡ እዘርእ፡ በውስቴትክሙ፡ ሕግየ፡ ወይገብር፡ ፍሬ፡ በላዕሌክሙ፡ ወትከብሩ፡ ቦቱ፡ ለዓለም። ወነሢኦሙ፡ ሕገከ፡ አበዊነ፡ ኢዐቀቡ፡ ወበሥርዐትከኒ፡ ኢቆሙ፡ ወእምዝ፡ ፍሬሁሰ፡ ለለሕግከ፡ ኢተሀጒለ፡ እስመ፡ ኢይትከሀል፡ ከመ፡ ይትሀጐል፡ እስመ፡ ዘዚአከ፡ ውእቱ። እስመ፡ እለሰ፡ ተመጠውዎ፡ ተሀጒሉ፡ እስመ፡ ኢዐቀቡ፡ ዘተዘርአ፡ ውስቴቶሙ። እስመ፡ ሕግ፡ ይእቲ፡ ምድርኒ፡ እምከመ፡ ነሥአት፡ ዘርአ፡ ወባሕርኒ፡ እምከመ፡ ቦአት፡ ውስቴታ፡ ሐመር፡ ወንዋይኒ፡ እምከመ፡ ወዴ፡ ውስቴታ፡ መብልዐ። ውእቱ፡ እምከመ፡ ኮነ፡ ጊዜሁ፡ እመኒ፡ ለውእቱ፡ ዘርእ፡ ወእመኒ፡ ለውእቱ፡ ዘተወድየ፡ ውስቴቱ፡ ከመ፡ ይማስን…..። ወሶበ፡ ነጸርኩ፡ በአዕይንቲየ፡ ወናሁ፡ እሬኢ፡ ብእሲተ፡ እመንገለ፡ የማን፡ ትበኪ፡ ወትጸርኅ፡ በዓቢይ፡ ቃል፡ ወሕምምት፡ ነፍሳ፡ ጥቀ፡ ወአልባሳኒ፡ ሥጡጥ፡ ወሐመድ፡ ውስተ፡ ርእሳ። ወኀደገኒ፡ ዝኩ፡ ኅሊና፡ ዘእኄሊ፡ ወተመየጥኩ፡ ኀቤሃ፡ ወእቤላ፡ ምንተ፡ ያበክየኪ፡ ወለምንት፡ ተሐሚ፡ ነፍሰኪ። ። ወትቤለኒ፡ ኅድገኒ፡ ኅድገኒ፡ እብኪ፡ እግዚእ፡ ላዕለ፡ ርእስየ፡ ወእወስክ፡ ሕማምየ፡ እስመ፡ ጥቀ፡ ሕዝንት፡ አነ፡ ወሕምምት፡ ነፍስየ። ወእቤላ፡ ምንተ፡ ኮንኪ፡ ንግርኒ። ወትቤለኒ፡ መካን፡ አነ፡ እምትካት፡ እንዘ፡ ሀሎኩ፡ ምስለ፡ ብእሲየ፡ ፴፡ ዓመተ። ወአንሰ፡ ኵሎ፡ አሚረ፡ ወኵሎ፡ ዕለተ፡ በዝንቱ፡ ፴ዓም፡ እጼሊ፡ ኀበ፡ ልዑል፡ መዓልተ፡ ወሌሊተ። ወእምዝ፡ እምድኅረ፡ ፴፡ ዓም፡ ሰምዓ፡ እግዚአብሔር፡ ለአመቱ፡ ወርእየኒ፡ ሕማምየ፡ ወነጸረኒ፡ ሥቃይየ፡ ወስራሕየ፡ ወወሀበኒ፡ አሐደ፡ ወልደ፡ ወተፈሣሕኩ፡ ቦቱ፡ ጥቀ፡ አነኒ፡ ወብእሲየኒ፡ ወኵሉ፡ ሰብአ፡ ሀገርየ፡ ወአእኰትናሁ፡ ለእግዚአብሔር። ወሐፀንክዎ፡ በብዙኅ፡ ስራሕ። ወእምዝ፡ ሶበ፡ ልህቀ፡ ነሣእኩ፡ ሎቱ፡ ብእሲተ፡ ወገበርኩ፡ በዓለ።

Chapter 9 ወእምዝ፡ ሶበ፡ ባአ፡ ውስተ፡ ጽርሑ፡ ወድቀ፡ ወሞተ። ወእምዝ፡ አጥፋእነ፡ ማኅቶተነ፡ ወነበርነ፡ እንዘ፡ ንበኪ፡ ወተንሥኡ፡ ኵሉ፡ ሰብአ፡ ሀገርየ፡ ወአኀዙ፡ ይንብቡኒ፡ ወእምዝ፡ አርመምኩ፡ እስከ፡ ሌሊት፡ ዘበሳኒታ፡ ዕለት። ወእምዝ፡ ሶበ፡ ኵሉ፡ አርመሙ፡ ወኀደጉኒ፡ ኪያየ፡ ገሥጾትየ፡ ወጐየይኩ፡ ተንሢእየ፡ ሌሊተ፡ ወመጻእኩ፡ ዝየ፡ ውስተ፡ ዝንቱ፡ ገዳም። ወአጥባዕኩ፡ እንከ፡ ኢይግባእ፡ ውስተ፡ ሀገር፡ ዳእሙ፡ ዝየ፡ እነብር፡ ወኢይበልዕ፡ ወኢይሰቲ፡ ዳእሙ፡ ለዝሉፉ፡ እጸውም፡ ወእላሑ፡ እስከ፡ እመውት። ወኀደገኒ፡ ዝኩ፡ ኅሊና፡ ዘእኄሊ፡ ወአውሣእክዋ፡ ወእቤላ። ኦ፡ አብድ፡ አንቲ፡ እምኵሉ፡ አንስት፡ ኢትሬእዪኑ፡ ላሐ፡ ዚአነ፡ ወእንተ፡ ረከበተነ። በእንተ፡ ጽዮን፡ እመ፡ ኵልነ፡ በሐዘን፡ ሀሎነ፡ ኵልነ፡ ወበሕማም፡ ሐመምነ፡ ንሕነ፡ ጥቀ። ወይእዜኒ፡ አማን፡ ኮነ፡ ለኪ፡ ትሕዝኒ፡ ወትላሕዊ፡ እስመ፡ ንሕነኒ፡ ኵልነ፡ ልሕዋን፡ ንሕነ፡ ወአንቲሰ፡ በእንተ፡ አሐዱ፡ ወልድ፡ ተሐዝኒ። ተሰአልያ፡ ለምድር፡ ወትነግረኪ፡ በርቱዕሰ፡ ላቲ፡ ይደልዋ፡ ትሕዝን፡ እንተ፡ መጠነዝ፡ እለ፡ በላዕሌሃ፡ ተወልዱ። ኵሎሙ፡ እለ፡ እምትካት፡ ተፈጥሩ፡ በዲቤሃ፡ ወናሁ፡ ካልኣን፡ መጽኡ፡ ወመሥእዎሙ፡ ለኵሎሙ፡ ለሙስና፡ ወለተሀጒሎ፡ በምልኦሙ። መኑ፡ እንከ፡ ርቱዕ፡ ይላሑ፡ ፈድፋደ፡ ዘመጠነዝኑ፡ ብዙኀ፡ ሀጒለ፡ አው፡ አንቲኑ፡ በእንተ፡ አሐዱ፡ ትቴክዚ። ወሚመ፡ ትብሊኑ፡ ኢኮነ፡ ከመ፡ ላሐ፡ ዚአየ፡ ላሐ፡ ምድር፡ እስመ፡ አነ፡ ፍሬ፡ ከርሥየ፡ ሀጐልኩ፡ ዘበጻዕር፡ ወበሕማም፡ ወለድኩ። ወምድርሰ፡ በከመ፡ መጽኡ፡ ብዙኃን፡ ላዕሌሃ፡ ከማሁ፡ ሖሩ። ወባሕቱ፡ እብለኪ፡ አነ፡ በከመ፡ አንቲ፡ በሕማም፡ ወለድኪ፡ ከማሁ፡ ምድርኒ፡ ወሀበቶሙ፡ ፍሬሃ፡ ለእጓለ፡ እመሕያው፡ እምትካት፡ በእንተ፡ ፍሬሃ፡ ዘወሀባ፡ ፈጣሪሃ። ወይእዜኒ፡ አሰስሊ፡ እምላዕሌኪ፡ ዘንተ፡ ሐዘነኪ፡ ወኩኒ፡ መስተዐግሥተ፡ ለእንተ፡ ረከበተኪ፡ ሕማምኪ፡ ወኵነኔኪ። እስመ፡ ለእመ፡ አጽደቅዮ፡ ለእግዚአብሔር፡ ዘይሬእየኪ፡ ትረክብዮ፡ ለወልድኪ፡ በጊዜሁ፡ ወትሰመዪ፡ ውስተ፡ አንስት፡ መስተዐግሥተ። ወይእዜኒ፡ ባኢ፡ ውስተ፡ ሀገር፡ ወሖሪ፡ ኀበ፡ ምትኪ። ወትቤለኒ፡ ኢይገብር፡ ከመዝ፡ ወኢይበውእ፡ ውስተ፡ ሀገር፡ ዳእሙ፡ በዝየ፡ እመውት። ወደገምኩ፡ ተናግሮታ፡ ወእቤላ። ኢትግበሪ፡ ዘንተ፡ ነገረ፡ ኦሆ፡ በሊ፡ ወረስዪ፡ ርእሰኪ፡ ከመ፡ ኵነኔ፡ ጽዮን፡ ወተናዘዚ፡ በእንተ፡ ሀገረ፡ ኢየሩሳሌም። ኢትሬእዪኑ፡ ከመ፡ ተነሥተ፡ መቅደስነ። ወተስዕረ፡ መዝሙርነ፡ ወአርመመ፡ ስብሐቲነ፡ ወወድቀ፡ ምክሕነ፡ ወጠፍአ፡ ማሕቶትነ፡ ወብርሃንነ፡ ወተበርበረት፡ ታቦተ፡ ሕግነ፡ ወተገመነ፡ ቅድሳቲነ፡ ወረኵሰ፡ ስምነ፡ ወኀስሩ፡ አግዓዝያኒነ፡ ወውዕዩ፡ ካህናቲነ፡ ወተፄወዉ፡ ሌዋውያኒነ፡ ወተቀትላ፡ ደናግሊነ፡ ወተዐገልዎን፡ ለአንስቲያነ፡ ወተስሕቡ፡ ጻድቃኒነ፡ ወተቀን፡ ወራዙቲነ፡ ወተሀይዱ፡ ደቂቅነ፡ ወደክሙ፡ ጽኑዓኒነ። ወእምኵሉ፡ ዘየዐቢ፡ ተኀትመት፡ ጽዮን፡ ወወፅአ፡ አምኔሃ፡ ክብራ፡ ወገባእነ፡ ውስተ፡ እደ፡ ጸላእትነ። ወአንቲኒ፡ ግድፊ፡ እምላዕሌኪ፡ ብዙኀ፡ ሐዘንኪ፡ ወአሰስሊ፡ እምኔኪ፡ ዘንተ፡ ባዙኀ፡ ሕማመኪ፡ ከመ፡ ይሣሀልኪ፡ ልዑል፡ ኀያል፡ ወያዕርፍኪ፡ እግዚአብር፡ ዕረፍተ፡ ስራሕኪ። ወእምዝ፡ እንዘ፡ እትናገራ፡ ግብተ፡ በርሀ፡ ገጻ፡ ጥቀ፡ ወከመ፡ ርእየተ፡ መብረቅ፡ ኮነ፡ ርእየታ፡ ወፈራህኩ፡ ጥቀ፡ ቀሪቦታ፡ ወልብኒ፡ ደንገጸኒ። ወእንዘ፡ እኄሊ፡ ምንት፡ ውእቱ፡ ዝንቱ። ጸርኀት፡ ግብተ፡ በዓቢይ፡ ቃል፡ ወዓቢይ፡ ወግሩም፡ ድምፁ፡ እስከ፡ ያድለቀልቅ፡ ምድር፡ እምቃላ። ወሶበ፡ ርኢክዋ፡ ወናሁ፡ ኢኮነት፡ ብእሲት፡ አላ፡ ሀገር፡ ሕንጽት፡ ወርኢኩ፡ መካነ፡ ወሠረታቲሃ፡ ዓቢይ፡ ወፈራህኩ፡ ወጸራኅኩ፡ በዓቢይ፡ ቃል። ወእቤ፡ አይቴኑ፡ ኡራኤል፡ መልአክ፡ ዘመጽአ፡ ኀቤየ፡ ቀዲሙ፡ ለምንት፡ ከመዝ፡ ረሰይከኒ፡ ከመ፡ እባእ፡ ውስተ፡ ዝንቱ፡ ብዙኅ፡ ተኀሥሦ፡ ወከመ፡ ትኩን፡ ደኃሪትየ፡ ለሕርትምና፡ ወጸሎትየኒ፡ ለትዕይርት። ወእንዘ፡ አነ፡ ከመዝ፡ እብል፡ ወናሁ፡ መጽአ፡ ውእቱ፡ መልአክ፡ ዘመጽአ፡ ቀዲሙ፡ ኀቤየ። ወረከበኒ፡ እሰክብ፡ ከመ፡ በድን፡ ወልብየኒ፡ ኢሀሎ፡ ምስሌየ፡ ወአኀዘኒ፡ በየማንየ፡ ወአጽንዐኒ፡ ወአቀመኒ፡ በእገርየ፡ ርቱዐ። ወአውሥአኒ፡ ወይቤለኒ፡ ምንተ፡ ኮንከ፡ ወምንት፡ ያደነግጸከ፡ ወበእንተ፡ ምንት፡ ኢሀለወ፡ ልብከ፡ ምስሌከ። ወእቤሎ፡ እስመ፡ ገደፍከኒ፡ ወኀደገኒ፡ ወአንሰ፡ በከመ፡ ትቤለኒ፡ ወፃእኩ፡ ውስተ፡ ገዳም፡ ወናሁ፡ ርኢኩ፡ ዘኢይክል፡ አእምሮ። ወይቤለኒ፡ ዙም፡ ወአንከሰ፡ እነግረከ፡ ከመ፡ ብእሲ። ወእቤሎ፡ በል፡ እግዚኦ፡ ወዳእሙ፡ ኢትኅድገኒ፡ እንከ፡ ከመ፡ ግብተ፡ ኢይሙት። እስመ፡ ርኢኩ፡ ዘኢርኢኩ፡ ወሰማዕኩ፡ ዘኢየአምር። ወባሕቱ፡ ዮጊ፡ ዘንግዐኒ፡ ልብየ፡ ወተሐልም፡ ነፍስየ። ወይእዜኒ፡ ብቍዐኒ፡ እግዚኦ፡ ንግሮ፡ ለገብርከ፡ ፍካሬሁ፡ ለዝንቱ። ወአውሥአኒ፡ ወይቤለኒ፡ ስምዐኒ፡ ወእምህረከ፡ በእንተ፡ ዘትፈርህ፡ እስመ፡ ከሠተ፡ ለከ፡ እግዚአብሔር፡ ልዑል፡ እስመ፡ ምስጢር፡ ኀቡእ፡ ውእቱ። ሶበ፡ ርእየ፡ ጽድቀከ፡ እስመ፡ ብዙኀ፡ ተሐዝን፡ በእንተ፡ ሕዝብከ፡ ወጥቀ፡ ትቴክዝ፡ በእንተ፡ ጽዮን። ዝንቱሰ፡ ነገሩ፡ ዛቲሰ፡ ብእሲት፡ እንተ፡ ርኢከ፡ ቀዳሚ። ከመዝ፡ ሉሑት፡ ይእቲ፡ ወአኀዝከ፡ ትናዝዛ። ወይእዜሰ፡ ኢኮነት፡ ብእሲት፡ እንዘ፡ ትሬእያ፡ ዳእሙ፡ ሀገር፡ ሕጽንት፡ ትከውነከ። እስመ፡ ነገረተከ፡ በእንተ፡ ሕማመ፡ ወልዳ። ይእቲ፡ ብእሲት፡ እንተ፡ ርኢከ፡ ጽዮን፡ ይእቲ፡ እንተ፡ ይእዜ፡ ትሬእያ፡ ከመ፡ ሀገር፡ ሕጽንት። ወዘኒ፡ ዘትቤለከ፡ መካነ፡ ኮንኩ፡ ፴፡ ዓመተ፡ እስመ፡ ፴፻፡ ዓመተ፡ ነበረ፡ ዓለም፡ እንዘ፡ አልቦ፡ ዘያበውእ፡ ቍርባነ። ወእምድኅረ፡ ፴፻፡ ዓመት፡ ሐነጸ፡ ሰሎሞን፡ ሀገረ፡ ወአብአ፡ ቍርባነ፡ ውእተ፡ አሚረ፡ ውእቱ፡ ዘወለደት፡ ይእቲ፡ መካን፡ ወልደ። ወዘንተኒ፡ በብዙኅ፡ ስራሕ፡ ሐፀንክዎ፡ ዘትቤ፡ ዘከመ፡ ነበረት፡ ኢየሩሳሌም፡ ውእቱ። ወዝንቱኒ፡ ዘትቤለከ፡ አመ፡ ዕለተ፡ ቦአ፡ ወልድየ፡ ውስተ፡ ጽርሑ፡ ሞተ፡ ወረከበኒ፡ ዝንቱ፡ ሕማም፡ ድቀታ፡ ይእቲ፡ ለኢየሩሳሌም። ወናሁ፡ ርኢከ፡ ዘከመ፡ ሀለወት፡ እፎ፡ ትላሕዎሙ፡ ለደቂቃ፡ ወአንተሰ፡ አኀዝከ፡ ትናዝዛ፡ እምሕማማ። ወይእዜኒ፡ ሶበ፡ ርእየከ፡ እግዚአብሔር፡ ልዑል፡ ከመ፡ በኵሉ፡ ነፍስከ፡ ተሐዝን፡ ወበኵሉ፡ ልብ፡ ተሐምም፡ በእንቲአሃ፡ ወአርአየከ፡ ብርሃነ፡ ስብሐቲሃ፡ ወሥነ፡ ተድላሃ። ወበእንተ፡ ዝንቱ፡ እቤለከ፡ ትንበር፡ ውስተ፡ ገዳም፡ ኀበ፡ ኢተሐንጸ፡ ቤተ። እስመ፡ አእመርኩ፡ ኵሎ፡ ዘሀሎ፡ ያርኢከ፡ እግዚአብሔር። ወበእንተ፡ ዝንቱ፡ እቤለከ፡ ትምጻእ፡ ዝየ፡ ኀበ፡ አልቦ፡ መሠረተ፡ ንድቅ። እስመ፡ ኢይትከሀል፡ ንድቅ፡ ግብረ፡ እጓለ፡ እመሕያው፡ የሀሉ፡ ውስተ፡ መካኑ፡ ኀበ፡ ሀለወ፡ ያርኢ፡ ልዑል። ወአንተሰ፡ ኢትፍራህ፡ እንከ፡ ወኢይደንግጽከ፡ ልብከ፡ ዳእሙ፡ ባእ፡ ወርኢ፡ ብርሃና፡ ወጽንዐ፡ ንድቃ። ወአምጣነ፡ ትክል፡ ሰሚዐ፡ ስማዕ፡ በእዝንከ። እስመ፡ አንተ፡ አብፃዕከ፡ እምብዙኃን፡ ወተሰመይከ፡ በኀበ፡ ልዑል፡ ከመ፡ ውኁዳን። ወቢት፡ ዝየ፡ ጌሠመ፡ ሌሊተ። ወያርእየከ፡ እግዚአብሔር፡ ልዑል፡ ራእየ፡ በሕልም፡ ዘይገብር፡ በበ፡ ዕድሜሁ፡ ላዕለ፡ እለ፡ ይነብሩ፡ ውስተ፡ ዓለም። ወቤትኩ፡ በይእቲ፡ ሌሊት፡ በሳኒታኒ፡ በከመ፡ አዘዘኒ።

Chapter 10 ወእምዝ፡ አመ፡ ሳኒታ፡ ሌሊት፡ ርኢኩ፡ በሕልም፡ ንስር፡ የዐርግ፡ እምባሕር፡ ወ፲ወ፪፡ ክነፊሁ፡ ወ፫፡ አርእስቲሁ። ወይሰርር፡ በክነፊሁ፡ ውስተ፡ ኵሉ፡ ምድር፡ ወኵሉ፡ ነፋሳተ፡ ሰማይ፡ ይነፍኁ፡ ላዕሌሁ፡ ወደመናት፡ ይትጋብኡ፡ ላዕሌሁ። ወእምውስተ፡ ዝኩ፡ ክነፊሁ፡ ይበቍል፡ አርእስት፡ ወውእቱ፡ አርእስት፡ ይከውን፡ ክነፈ፡ ደቃቀ፡ ወቀጠንተ። ወአርእስቲሁ፡ ያረምም፡ ወማእከላዊ፡ ርእስ፡ የዐቢ፡ እም፪አርእስቲሁ፡ ወባሕቱ፡ ውእቱሰ፡ ያረምም፡ ምስሌሆሙ። ወዝክቱ፡ ንስር፡ ይሰርር፡ ክነፊሁ፡ ከመ፡ ይኰንና፡ ለምድር፡ ወእለሂ፡ ይነብሩ፡ ውስተ፡ ምድር። ከመ፡ ይግርር፡ ሎቱ፡ ኵሉ፡ ዘመትሕተ፡ ሰማይ፡ ወአልቦ፡ ዘይትዋሥኦ፡ ወኢመኑሂ፡ እምዘ፡ ተፈጥረ፡ ውስተ፡ ምድር። ወእምዝ፡ ተንሥአ፡ ውእቱ፡ ንስር፡ ወቆመ፡ በጽፈሪሁ፡ ወጸርኀ፡ በዐቢይ፡ ቃል፡ ወይቤሎሙ፡ ለክነፊሁ። ኵልክሙ፡ ኢትትግሁ፡ ኅቡረ፡ በበ፩፡ እምኔክሙ፡ ኑሙ፡ በውስተ፡ መካኑ፡ ወበበ፡ ጊዜሁ፡ ትነቅሁ። ወርእሱ፡ ደኃሪታ፡ ተዐቢ። ወሶበ፡ እሬኢ፡ አኮ፡ እምውስተ፡ ርእሱ፡ ዘይወጽእ፡ ቃሉ፡ አላ፡ እማእከለ፡ ሥጋሁ። ወኈለቁ፡ እልክቱ፡ አርእስተ፡ ሰማኒ፡ እሙንቱ። ወእምዝ፡ ወጽአ፡ ክንፍ፡ እመንገለ፡ የማኑ፡ ወኰነነ፡ ኵላ፡ ምድረ። ወሶበ፡ በጽሐ፡ ዕድሜ፡ ማኅለቅቱ፡ ጠፍአ፡ ውእቱሂ፡ እስከ፡ ኢያስተርኢ፡ መካኑ፡ ወወጽአ፡ ካልኡሂ፡ ወኰነነ፡ ውእቱሂ፡ ብዙኀ፡ መዋዕለ፡ ወአጽንዐ። ወእምዝ፡ ሶበ፡ በጽሐ፡ ማኅለቅቱ፡ ጠፍአ፡ ውእቱሂ፡ ከመ፡ ቀዳማዊ። ወመጽአ፡ ሎቱ፡ ቃል፡ ወይቤሎ። ስማዕ፡ አንተ፡ ዘመጠነ፡ ዝንቱ፡ መዋዕል፡ አጽናዕካሃ፡ ለምድር፡ ዘንተ፡ ዘእዜንወከ፡ እምቅድመ፡ ትጥፋእ። አልቦ፡ እምድኅሬከ፡ ዘያጸንዓ፡ ከማከ፡ ወኢመጠነ፡ መንፈቅከ። ወወጽአ፡ ሣልስ፡ ወአጽንዐ፡ ውእቱኒ፡ ወኰነነ፡ ከመ፡ ቀዳማዊ፡ ወእምዝ፡ ጠፍአ፡ ውእቱኒ። ወከመዝ፡ ወጽኡ፡ ኵሎሙ፡ ክነፊሁ፡ ወኰነኑ፡ በበ፡ አሐዱ፡ ወካዕበ፡ ጠፍኡ። ወእምዝ፡ ተንሥኡ፡ ክነፊሁ፡ በበ፡ ጊዜሆሙ፡ እመንገለ፡ የማን፡ ከመ፡ ያጽንዑ፡ ወከመ፡ ይኰንኑ፡ ወባሕቱ፡ ፍጡነ፡ ጠፍኡ። ወቦ፡ እምውስቴቶሙ፡ እለኒ፡ ተንሥኡ፡ ወባሕቱ፡ እሙንቱሰ፡ ኢኰነኑ። ወእምድኅረ፡ ዝንቱ፡ ጠፍኡ፡ እልክቱ፡ ፲ወ፪፡ ክነፊሁ፡ ወክልኤቱኒ፡ አርእስት። ወአልቦ፡ ዘተረፈ፡ ውስተ፡ ሥጋሁ፡ ለውእቱ፡ ንስር፡ ዘእንበለ፡ ፫፡ አርእስቲሁ፡ እለ፡ ያረምሙ፡ ወስድስቱ፡ አርእስቱ። ወእምዝ፡ እምውስተ፡ ዝኩ፡ ፮አርእስት፡ ተግሕሡ፪፡ ወነበሩ፡ ውስተ፡ ርእሱ፡ ዘመንገለ፡ የማን፡ ወተርፉ፡ ፬፡ ውስተ፡ መካኖሙ። ወእሙንቱ፡ ፬፡ አርእስት፡ ተማከሩ፡ ይቁሙ፡ ወይኰንኑ፡ እሙንቱሂ። ወእምዝ፡ ተንሥአ፡ አሐዱ፡ ወቆመ፡ ወፍጡነ፡ ጠፍአ። ወካልኡኒ፡ ከማሁ፡ ወአፍጠነ፡ ውእቱኒ፡ እምቀዳማዊ። ወእምዝ፡ እልክቱሂ፪፡ ከማሁ፡ እለተርፉ፡ ተማከሩ፡ እሙንቱሂ፡ ይቁሙ፡ ወይኰንኑ። ወእንዘ፡ እሙንቱ፡ ይትማከሩ፡ ናሁ፡ ነቅሀ፡ ፩እምውስተ፡ ፫አርእስት፡ እለ፡ ያረሙ፡ ማእከላዊ፡ ወውእቱ፡ የዐቢ፡ እምእልክቱ፡ አርእስት። ወእምዝ፡ ነሥኦሙ፡ ምስሌሁ፡ ለእልክቱ፡ ፪፡ አርእስት። ወተመይጠ፡ ውእቱ፡ ርእስ፡ ምስለ፡ እለ፡ ምስሌሁ፡ ወውኅጦሙ፡ ለእልክቱ፡ ፪አርእስት፡ እለ፡ ተማከሩ፡ ከመ፡ ይኰንኑ፡ እምንቱሂ። ወውእቱ፡ ርእስ፡ አጽንዓ፡ ለኵላ፡ ምድር፡ ወሣቀዮሙ፡ ለእለ፡ ይነብሩ፡ ውስቴታ፡ በብዙኅ፡ ስራሕ፡ ወተዐገለ፡ ዓለመ፡ ፈድፋደ፡ እምኵሎሙ፡ እልክቱ፡ ክነፍ፡ እለ፡ ቆሙ። ወእምድኅረ፡ ዝንቱ፡ ጠፍአ፡ ዝኩ፡ ርእስ፡ ማእከላዊ፡ ከመ፡ እልክቱ፡ ክነፍ። ወተረፉ፡ ፪አርእስት፡ ወእሙንቱሂ፡ ከማሁ፡ ኰነንዋ፡ ለምድር፡ ወለእለ፡ ይነብሩ፡ ውስቴታ። ወእምዝ፡ ውኅጦ፡ ዝኩ፡ ርእስ፡ ዘመንገለ፡ የማን፡ ለዘ፡ መንገለ፡ ፀጋም። ወሰማዕኩ፡ ቃለ፡ ዘይቤለኒ፡ ነጽር፡ ቅድሜከ፡ ወአእምር፡ ዘትሬኢ። ወሶበ፡ ነጸርኩ፡ ናሁ፡ ዐንበሳ፡ ተንሥአ፡ እምገዳም፡ እንዘ፡ ይጥሕር፡ ወሰማዕክዎ፡ እንዘ፡ ይነብብ፡ ከመ፡ ቃለ፡ እጓለ፡ እመሕያው፡ ወይቤሎ፡ ለዝኩ፡ ንስር። ስማዕ፡ አንተ፡ ወእነግረከ፡ ይቤለከ፡ ልዑል። አኮኑአ፡ አንተአ፡ ዘተረፍከ፡ እምእልክቱ፡ አርባዕቱ፡ እንስሳ፡ እለ፡ ገበርኩ፡ ይኰንንዋ፡ ለዓለም፡ ወቦሙ፡ ይብጻሕ፡ ኅልቀተ፡ መዋዕል። ወመጺኦ፡ ራብዕ፡ ይመውኦሙ፡ ለኵሎሙ፡ ለእልክቱ፡ እንስሳ፡ እለ፡ ኀለፉ፡ ወተዐገልዎ፡ ለዓለም፡ በብዙኅ፡ ስራሕ፡ ወሕማም፡ ለእሉ፡ ወነቢሮ፡ ዘመጠነዝ፡ ዓመተ፡ ውስተ፡ ዓለም፡ በጒሕሉት፡ ነቢሮ። ወኢኰነና፡ ለዓለም፡ በጽድቅ። እስመ፡ ተዐገሎሙ፡ ለጻድቃን፡ ወገፍዖሙ፡ ለየዋሃን፡ ወጸልኦሙ፡ ለራትዓን፡ ወአፍቀሮሙ፡ ለሐሳዊያን፡ ወነሠትከ፡ ጸወኖሙ፡ ለጻድቃን፡ ወአእተትከ፡ ቅጽሮሙ፡ ለእለ፡ ኢአበሱ፡ ለከ። ወዐርገት፡ ኀጢአትከ፡ ኀበ፡ ልዑል፡ ወትዕቢትከኒ፡ ኀበ፡ ኀያል። ወነጸሮሙ፡ ልዑል፡ ለሰብአ፡ ዚአሁ፡ ወናሁ፡ ተፈጸመ፡ ዓለም፡ ወኀልቀ። ወበእንተ፡ ዝንቱ፡ ጠፊአ፡ ትጠፍእ፡ አንተ፡ ንስር፡ ወክነፊከኒ፡ ኃጥኣን፡ ወአርእስቲከኒ፡ ረሲዓን፡ ወጽፈሪከኒ፡ እኩያን፡ ወሥጋከኒ፡ ዘዐመፃ። ከመ፡ ታዕርፍ፡ ምድር፡ ወትሥኀት፡ እምኵሉ፡ ሕማም፡ አነፊሳ፡ እምኔከ፡ ወትሴፎ፡ ፍትሖ፡ ወምሕረቶአ፡ ለፈጣሪሃአ።

Chapter 11 ወእምዝ፡ ሶበ፡ ነበቦ፡ መሓሪ፡ ለውእቱ፡ ንስር፡ ዘንተ፡ ቃለ። ጠፍአ፡ ዝኩሂ፡ ርእስ፡ ዘተረፈ፡ ወተንሥኡ፡ እልክቱ፡ ክነፍ፡ እለ፡ ፈለሱ፡ ኀቤሁ፡ ወቆሙ፡ እሙንቱሂ፡ ከመ፡ ይኰንኑ፡ ወይትሀወክ፡ ጽፈሪሆሙ። ወእምዝ፡ ጠፍኡ፡ እሙንቱሂ፡ ወውዕየ፡ ኵሉ፡ ሥጋሆሙ፡ ወደንገጸት፡ ምድር፡ ጥቀ፡ ወአነኒ፡ ደንገጽኩ፡ በአብዝኆ፡ ተኀሥሦት፡ ወነቃህኩ፡ በዐቢይ፡ ፍርሀት። ወእቤላ፡ ለነፍስየ፡ አንቲ፡ ረሰይክኒ፡ ኵሎ፡ ዘንተ፡ እንዘ፡ ተኀሥሢ፡ ፍናዊሁ፡ ለልዑል። ወደክመት፡ ነፍስየ፡ ወሐመት፡ መንፈስየ፡ ጥቀ፡ ወአልብየ፡ ሐይለ፡ ወኢምንተኒ፡ በብዙኅ፡ ፍርሀት፡ ዘደንገጽኩ፡ በዛቲ፡ ሌሊት። ወይእዜኒ፡ እጼሊ፡ ኀበ፡ ልዑል፡ ከመ፡ ያጽንዐኒ፡ ለዝሉፉ። ወእቤ፡ እግዚኦ፡ እግዚእየ፡ ለእመ፡ ረከብኩ፡ ሞገሰ፡ ቅድመ፡ አዕይንቲከ፡ ወእመኒ፡ ብዙኀ፡ አብጻዕኩ፡ በኀቤከ፡ ወለእመኒ፡ ዐርገት፡ ጸሎትየ፡ ቅድመ፡ ገጽከ። አድኅነኒ፡ ወአጽንዐኒ፡ ወንግሮ፡ ለገበርከ፡ ፍካሬሁ፡ ለዝንቱ፡ ሕልም፡ ግሩም፡ ከመ፡ ፍጹመ፡ ትፈሣሕ፡ ነፍስየ። እስመ፡ ብጹዐ፡ ረሰይከኒ፡ ዘአርአይከኒ፡ ዘደኃሪ፡ መዋዕል፡ ወበእንተኒ፡ ኅልቀተ፡ መዋዕለ፡ ዓለም። ወይቤለኒ፡ ከመዝ፡ ውእቱ፡ ፍካሬሁ፡ ለዝክቱ፡ ሕልምከ፡ ዘርኢከ። ንስር፡ የዐርግ፡ እምባሕር፡ ራብዕት፡ መንግሥት፡ ይእቲ፡ እንተ፡ አስተርአየት፡ ለዳንኤል፡ እኁከ፡ በሕልም። ወኢፈከርክዋ፡ ባሕቱ፡ ሎቱ፡ ከመ፡ አነ፡ ይእዜ፡ እፌክር፡ ለከ። ናሁ፡ ይመጽእ፡ መዋዕል፡ ወትቀውም፡ ውስተ፡ ምድር፡ መንግሥት፡ እንተ፡ ትገርም፡ እምኵሉ፡ መንግሥት፡ እለ፡ ኮኑ፡ እምቅድሜሃ። ወይነግሡ፡ ፲ወ፪፡ ነገሥት፡ ባቲ። ወዘይነግሥ፡ ዳግመ፡ ውእቱ፡ ዘይጸንዕ፡ ወዋዕሊሁ፡ ፈድፋደ፡ እምነ፡ ፲ወ፪። ወዝንቱ፡ ውእቱ፡ ፍካሬሁ፡ ለእልክቱ፡ ፲ወ፪፡ ክነፊሁ፡ ዘርኢከ። ወዝንቱ፡ ዘርኢከ፡ ይነብብ፡ ቃለ፡ ወአኮ፡ እምርእሱ፡ ዘይወፅእ፡ አላ፡ እምሥጋሁ፡ እምእከሉ። ከመዝ፡ ውእቱ፡ ነገሩ፡ እምእከለ፡ ሥጋሁ፡ ለውእቱ፡ መንግሥት፡ ይትፈጠር፡ ሁከት፡ ብዙኅ፡ ወትተነትን፡ ለወዲቅ፡ ወባሕቱ፡ ኢትወድቅ፡ ይእተ፡ አሚረ፡ አላ፡ ትቀውም፡ ውስተ፡ ምኵናን። ወዝክቱኒ፡ ዘርኢከ፡ እምክነፊሁ፡ ወፅአ፡ አርእስት። ከመዝ፡ ውእቱ፡ ነገሩ፡ ይቀውሙ፡ ሰመንቱ፡ ነገሥት፡ ባቲ፡ ወእኩይ፡ ክረማቲሆሙ፡ ወኅጹ፡ መዋዕሊሆሙ፡ ወ፪እምውስቴቶሙ፡ ፍጡነ፡ ይትሀጐሉ፡ በማእከለ፡ ዕድሜሆሙ። ወ፬ባሕቱ፡ መንግሥት፡ ይትዐቀቡ፡ ለአመ፡ ይበጽሕ፡ ጊዜሆሙ፡ ለኅልቀቱ፡ ወ፪፡ ይትዐቀቡ፡ ለጒንዱይ። ወዝንቱ፡ ዘርኢከ፡ ፫አርእስቲሁ፡ ያረምም። ከመዝ፡ ውእቱ፡ ነገሩ፡ በደኃሪ፡ መዋዕል፡ ያቀውም፡ ልዑል፡ ፫ነገሥተ፡ ወብዙኀ፡ ይሔድሱ፡ ውስቴታ፡ ወይሣቅይዋ፡ ለምድር። ወለእለ፡ ይነብሩ፡ ውስቴታ፡ በዐቢይ፡ ፍርሀት፡ ወፈድፋደ፡ እምኵሎሙ፡ እለ፡ ኮኑ፡ እምቅድሜሆሙ፡ ወበእንተ፡ ዝንቱ፡ ተሰምዩ፡ አርእስተ፡ ንስር። እስመ፡ እሙንቱ፡ አርእስተ፡ መንግሥት፡ እሙንቱ፡ ማኅለቅቱ፡ ለመንግሥት። ወዝንቱኒ፡ ዘርኢከ፡ አሐዱ፡ ርእሱ፡ ዘየዐቢ፡ ጠፍአ፡ እስመ፡ አሐዱ፡ እምኔሆሙ፡ ውእቱ፡ ባሕቲቱ፡ ዘይመውት፡ በውስተ፡ ምስካቡ፡ ወባሕቱ፡ ተጽዒሮ። ወእልክቱሰ፡ እለ፡ ተርፉ፡ ፪በኵናት፡ ይመውቱ። ወአሐዱኒ፡ ….፡ ደኃሪ፡ ውእቱኒ፡ በኵናት፡ ይመውት። ወዝንቱ፡ ዘርኢኩ፡ ፪አርእስት፡ እለ፡ ፈለሱ፡ ውስተ፡ ርእሱ፡ ዘመንገለ፡ የማን። ከመዝ፡ ውእቱ፡ ነገሩ፡ እሉ፡ እለ፡ ዐቀቦሙ፡ ልዑል፡ ለደኃሪት፡ እለ፡ ቦሙ፡ ይከውን፡ ቀዳሜ፡ ማሕለቅት፡ ወብዙኅ፡ ሀውክ፡ ይከውን፡ በከመ፡ ርኢከ። ወዝንቱ፡ ዐንበሳ፡ ዘርኢከ፡ ተንሥአ፡ እምገዳም፡ እንዘ፡ ይጥሕር፡ ወይትናገሮ፡ ለውእቱ፡ ንስር፡ ወይዛለፎ፡ ኀጣውኢሁ፡ ኵሎ፡ ዝንቱ፡ ነገር፡ ዘሰማዕከ። ወውእቱ፡ ዝንቱ፡ ዘዐቀበ፡ ልዑል፡ ለደኃሪ፡ መዋዕል፡ እምነ፡ ዘርአ፡ ዳዊት፡ ወውእቱ፡ ዘይወፅእ፡ ወይመጽእ፡ ወይነግሮሙ፡ ኀጢአቶሙ፡ ወይዛለፎሙ፡ እንተ፡ ዐመፃሆሙ፡ ወይዌጥሕ፡ ሎሙ፡ ፍዳሆሙ፡ ቅድሜሆሙ። ወይቀድም፡ አቅሞቶሙ፡ ውስተ፡ ደይን፡ ሕያዋኒሆሙ፡ ወእምዝ፡ ሶበ፡ ተዛለፎሙ፡ ይእተ፡ ጊዜ፡ ያማስኖሙ። ወለእለሰ፡ ተረፉ፡ ሕዝብ፡ ይቤዝዎሙ፡ በምሕረት፡ ለእለ፡ ድኅኑ፡ በውስተ፡ ደወልየ፡ ወያስተፌሥሖሙ፡ እስከ፡ ትበጽሕ፡ ዕለተ፡ ደይን፡ እንተ፡ ነገርኩከ፡ ቀዲሙ። ወከመዝ፡ ውእቱ፡ ዝንቱ፡ ሕልም፡ ዘርኢከ፡ ወከመዝ፡ ውእቱ፡ ፍካሬሁኒ። ወለከ፡ ለባሕቲትከ፡ ረሰየ፡ ልዑል፡ ከመ፡ ታእምሮ፡ ለዝንቱ፡ ምስጢር። ወባሕቱ፡ ጸሐፎ፡ ውስተ፡ መጽሐፍ፡ ኵሎ፡ ዘንተ፡ ዘርኢከ፡ ወሢም፡ ውስተ፡ መካን፡ ኅቡእ። ወመሀሮሙ፡ ለጠቢባን፡ ሕዝብ፡ ለእለ፡ ታአምር፡ ከመ፡ ይክህልዎ፡ ዐቂቦቶ፡ ውስተ፡ ልቦሙ፡ ለዝንቱ፡ ምስጢር። ወአንተሰ፡ ንበር፡ ዝየ፡ ዓዲ፡ ሰቡዐ፡ መዋዕለ፡ ከመ፡ ትርአይ፡ ዘይፈቅድ፡ ልዑል፡ ያርኢከ። ወእምዝ፡ ሖረ፡ እምኀቤየ። ወሶበ፡ ሰምዑ፡ ኵሉ፡ ሕዝብ፡ ከመ፡ ኀለፉ፡ እሎንቱ፡ ስቡዕ፡ መዋዕል፡ ወአነኒ፡ ኢቦእኩ፡ ውስተ፡ ሀገር፡ ተጋብኡ፡ ኵሎሙ፡ አሕዛብ፡ ንኡሶሙ፡ ወዐቢዮሙ፡ ወመጽኡ፡ ኀቤየ፡ ወይቤሉኒ። ምንተ፡ አበስነ፡ ለከ፡ ወምንት፡ ገፉዕናከ፡ ከመ፡ ትኅድግነ፡ ወትንበር፡ ውስተ፡ ዝንቱ፡ መካን። እስመ፡ አንተ፡ ባሕቲትከ፡ ተረፍከ፡ ለነ፡ እምነ፡ ኵሎሙ፡ ነቢያት፡ ከመ፡ አሐዱ፡ አስካል፡ እምነ፡ ኵሉ፡ ዘይቀሥሙ፡ ወከመ፡ ማኅቶት፡ ውስተ፡ መካነ፡ ጽልመት፡ ወከመ፡ መርሶዘሐመር፡ እምነ፡ ልጐት። አው፡ ኢአከለተነኑ፡ እኪት፡ እንተ፡ ረከበተነ። ወእመሰ፡ ኀደገኒ፡ አንተሂ፡ ይኄይሰነ፡ ሶበ፡ ነበርነ፡ ውስተ፡ ውዕየታ፡ ለጽዮን። እስመ፡ አኮ፡ ዘንኄይሶሙ፡ ንሕነ፡ ለእለ፡ ሞቱ፡ በህየ። ወበከዩ፡ በዐቢይ፡ ቃል። ወአውሣእክዎሙ፡ ወእቤሎሙ፡ ተአመኑ፡ ወኢትሕዝኑ፡ ቤተ፡ ያዕቆብ። እስመ፡ ሀሎ፡ ዝክርነ፡ ቅድሜሁ፡ ለልዑል፡ ወውእቱ፡ ዘኢረስዐነ፡ ጽኑዕ። ወአንሰ፡ ኢየኀድገክሙ፡ ወኢይርሕቅ፡ እምኔክሙ፡ ወባሕቱ፡ መጻእኩ፡ ዘንተ፡ መካነ፡ ከመ፡ እስአል፡ በእንተ፡ ሙስናሃ፡ ለጽዮን፡ ወከመእኅሥሥ፡ ሣህለ፡ ለሕማመ፡ ትፍሥሕትነ። ወይእዜኒ፡ እትዉ፡ ኵልክሙ፡ ውስተ፡ አብያቲክሙ፡ ወለልየ፡ እመጽእ፡ ኀቤክሙ፡ እምድኅረ፡ እማንቱ፡ መዋዕል። ወአተዉ፡ ሕዝብ፡ ውስተ፡ አብያቲሆሙ፡ በከመ፡ እቤሎሙ። ወአንሰ፡ ነበርኩ፡ ውስተ፡ ውእቱ፡ መካን፡ ውስተ፡ ገዳም፡ ሰቡዐ፡ መዋዕለ፡ በከመ፡ አዘዘኒ፡ ወተሴሰይኩ፡ እምፍሬ፡ ገዳም፡ ባሕቲቶ፡ ወእምነ፡ ሐምለ፡ ገዳም፡ በላዕኩ፡ በእማንቱ፡ መዋዕል።

Chapter 12 ወእምዝ፡ እምድኅረ፡ ሰቡዕ፡ መዋዕል፡ ሐለምኩ፡ ሕልመ፡ በሌሊት። ወናሁ፡ እሬኢ፡ ነፋስ፡ ዐቢይ፡ ይወፅእ፡ እምባሕር፡ ወተሀውከ፡ ኵሉ፡ መዋግዲሃ። ወእሬኢ፡ ይወፅእ፡ ውእቱ፡ ነፋስ፡ እምባሕር፡ ከመ፡ አምሳለ፡ ብእሲ፡ ወእምዝ፡ ሰረረ፡ ውእቱ፡ ብእሲ፡ ምስለ፡ ደመናተ፡ ሰማይ፡ ወኀበ፡ ሜጠ፡ ገጾ፡ ወነጸረ፡ በጊዜሁ፡ ይገብእ፡ ኵሉ፡ ቅድሜሁ። ወላዕለ፡ ዘወፅአ፡ ቃሉ፡ ይትመሰዉ፡ ኵሎሙ፡ እለ፡ ይሰምዕዎ፡ ለቃሉ፡ ከመ፡ ይትመሰው፡ መዓረ፡ ግራ፡ ሶበ፡ ይቀርብ፡ ኀበ፡ እሳት። ወእምዝ፡ እሬኢ፡ ሰብእ፡ ብዙኅ፡ ይትጋብኡ፡ ዘአልቦ፡ ኈልቍ፡ እምነ፡ ፬ነፋሳተ፡ ሰማይ፡ ከመ፡ ይጽብእዎ፡ ለብእሲ፡ ዘወፅአ፡ እምባሕር። ወእምዝ፡ ሐነጸ፡ ሎቱ፡ ደብረ፡ ዐቢየ፡ ወሰረረ፡ ላዕሌሁ። ወኀሠሥኩ፡ ኣእምር፡ እምኀበ፡ ተሐንጸ፡ ውእቱ፡ ደብር፡ ወስእንኩ። ወእምዝ፡ ኵሎሙ፡ እልክቱ፡ እለ፡ ተጋብኡ፡ ላዕሌሁ፡ ይጽብእዎ፡ ፈርህዎ፡ ጥቀ፡ ወባሕቱ፡ ይትኀበሉ፡ ይጽብእዎ። ወእምዝ፡ ሶበ፡ ሮድዎ፡ ወመጽኡ፡ ላዕሌሁ፡ ኢያንሥአ፡ እዴሁ፡ ወኢያልዐለ፡ ኵናተ፡ ወኢምንተኒ፡ ንዋየ፡ ሐቅል። ዘእንበለ፡ ዳእሙ፡ እምነ፡ አፉሁ፡ መዋግደ፡ እሳት፡ አውፅአ፡ ወእምነ፡ ከናፍሪሁ፡ ነደ፡ እሳት፡ ወእምነ፡ ልሳኑ፡ አፍሓመ፡ እሳት፡ ከመ፡ ዐውሎ፡ አውፅአ፡ ወኵሉ፡ ተደመረ፡ ዝክቱ፡ መዋግደ፡ እሳት፡ ወዝኩኒ፡ ነደ፡ እሳት፡ ወዝክቱኒ፡ አፍሓመ፡ እሳት፡ ወኮነ፡ ከመ፡ ዐውሎ። ወወረደ፡ ላዕለ፡ እልክቱ፡ ብዙኃን፡ እለ፡ ሮድዎ፡ ከመ፡ ይቅትልዎ፡ ወአውዐዮሙ፡ ለኵሎሙ፡ እስከ፡ አልቦ፡ ዘአትረፈ፡ እምኔሆሙ፡ እንበለ፡ ጸበለ፡ ሐመዶሙ፡ ወጢሰ፡ ዋዕዮሙ፡ ወእምዝ፡ ነቃህኩ። ወእምድኅረ፡ ዝንቱ፡ ርኢክዎለውእቱ፡ ብእሲ፡ ወረደ፡ እምነ፡ ዝክቱ፡ ደብር፡ ወጸውዐ፡ ኀቤሁ፡ ባዕዳነ፡ ብዙኃነ፡ ስንኣሁ። ወመጽኡ፡ ኀቤሁ፡ ብዙኃን፡ ሰብእ፡ ወቦ፡ እምውስቴቶሙ፡ ፍሡሓን፡ ወቦ፡ እምውስቴቶሙ፡ ሕዙናን፡ ወቦ፡ እምውስቴቶሙ፡ ሙቁሓን። ወእምዝ፡ ሶበ፡ በዝኀኒ፡ ደንገጽኩ፡ ወነቃህኩ፡ ወጸለይኩ፡ ኀበ፡ ልዑል፡ ወእቤ። ቀዲሙኒ፡ አንተ፡ አርአይኮ፡ ለገብርከ፡ ዘንተ፡ ስብሐቲከ፡ ወረሰይከ፡ ሊተ፡ ከመ፡ ትስማዕ፡ ጸሎትየ። ወይእዜኒ፡ ንግረኒ፡ ዓዲ፡ ፍካሬሁ፡ ለዝንቱ፡ ሕልም። ወባሕቱ፡ ከመሰ፡ እትሐዘብ፡ አሌ፡ ሎሙ፡ ለእለ፡ ሀለዉ፡ በእማንቱ፡ መዋዕል፡ ወፈድፋደሰ፡ ለእለ፡ ኢሀለዉ። እስመ፡ የሐዝኑ፡ በኢያእምሮ፡ ዘጽኑሕ፡ ሎሙ፡ በደኃሪ፡ መዋዕል፡ ዘዓዲ፡ ኢበጽሖሙ። ወለእለሰ፡ ሀለዉ፡ እስመ፡ ወድኡ፡ አእመርዎ። ወበበይነ፡ ዝንቱ፡ አሌ፡ ሎሙ፡ እስመ፡ ይሬእዩ፡ ዐቢየ፡ ጻዕረ፡ ወብዙኀ፡ ሥቃየ፡ በከመ፡ ርኢኩ፡ በውስተ፡ ዝንቱ፡ ሕልም። ወባሕቱ፡ ይኄይስ፡ ሐሚም፡ ወይበጽሕዎ፡ ለዝንቱ፡ እምነ፡ ይኅልፉ፡ እምውስተ፡ ዓለም፡ ከመ፡ ደመና፡ ወኢያእምሩ፡ እንተ፡ ትረክቦሙ፡ በደኃሪቶሙ። ወአውሥአኒ፡ ወይቤለኒ፡ እነግረከ፡ ፍካሬሁ፡ ለዝንቱ፡ ሕልምከ፡ ወዘኒ፡ ዘትቤለኒ፡ እፌክር፡ ለከ። እስመ፡ ትቤ፡ በእንተ፡ እለ፡ ይተርፉ፡ ወይሄልዉ፡ ከመዝ፡ ነገሩ። እሙንቱ፡ እለ፡ ይሬእይዎ፡ ለውእቱ፡ ሕማም፡ በእሙንቱ፡ መዋዕል፡ ወለሊሁ፡ የዐቅቦሙ፡ ለእለ፡ ቦሙ፡ ውእቱ፡ ሕማም፡ ለእለ፡ ቦሙ፡ ምግባረ፡ ሠናይ፡ ወሃይማኖት፡ በኀበ፡ ልዑል፡ ወጽኑዕ። ወአእምር፡ ባሕቱ፡ ከመፈድፋደ፡ ብጹዓን፡ እለ፡ ሕያዋን፡ እምነ፡ ምውታን። ወፍካሬሁሰ፡ ለሕልምከ፡ ከመዝ፡ ውእቱ፡ ዝንቱ፡ ዘርኢከ፡ ብእሴ፡ ይወፅእ፡ እማእከለ፡ ባሕር። ውእቱ፡ ዝንቱ፡ ዘዐቀቦ፡ ልዑል፡ ለብዙኅ፡ መዋዕል፡ ከመ፡ ይቤዙ፡ ቦቱ፡ ዓለመ፡ ወውእቱ፡ ይሠርዖሙ፡ ለእለ፡ ተርፉ። ወዝንቱ፡ ዘርኢከ፡ ይወፅእ፡ እምነ፡ አፉሁ፡ እሳት፡ ወነድ፡ ወአፍሓም፡ ዘከመ፡ ዐውሎ። ወዝንቱ፡ ዘኢያንሥአ፡ ኵናተ፡ ወኢንዋየ፡ ሐቅል፡ ወቀተሎሙ፡ ለእልክቱ፡ ብዙኃን፡ እለ፡ ሮድዎ፡ ወመጽኡ፡ ከመ፡ ይቅትልዎ፡ ከመዝ፡ ውእቱ፡ ነገሩ። ይመጽእ፡ መዋዕል፡ አመ፡ ሀለዎ፡ ልዑል፡ ይቤዝዎሙ፡ ለእለ፡ ይነብሩ፡ ውስተ፡ ምድር። ወውእተ፡ አሚረ፡ ይኄልዩ። በበይናቲሆሙ፡ ይትቃተሉ፡ ሀገር፡ ምስለ፡ ሀገር፡ ወብሔር፡ ምስለ፡ ብሔር፡ ወሕዝብኒ፡ ምስለ፡ ሕዝብ፡ ወመንግሥትኒ፡ ምስለ፡ መንግሥት። ወአመ፡ ኮነ፡ ዝንቱ፡ ወበጽሐ፡ ተኣምሪሁ፡ ዘአርአይኩከ፡ ቀዲሙ፡ ውእቱ፡ ብእሲ፡ ዘርኢከ፡ ይወፅእ፡ እምነ፡ ባሕር። ወሶበ፡ ሰምዑ፡ ቃሎ፡ ኵሎሙ፡ ሕዝብ፡ የሐድጉ፡ በበ፡ በሓውርቲሆሙ፡ አጽባእቲሆሙ፡ ዘይጻብኡ፡ በበይናቲሆሙ። ወይትጋብኡ፡ ኅቡረ፡ ይበዝኁ፡ ዘአልቦ፡ ኍልቍ፡ በከመ፡ ርኢከ፡ ፈቀዱ፡ ይምጽኡ፡ ወይቅትልዎ። ወውእቱሰ፡ ይቀውም፡ ውስተ፡ ርእሰ፡ ደብረ፡ ጽዮን። ወትመጽእ፡ ጽዮን፡ ወታስተሬኢ፡ ድልውተ፡ ለኵሉ፡ ወሕጽንተ፡ በከመ፡ ርኢከ፡ ደብር፡ ወፅአ፡ ለሊሁ፡ ወተፈጥረ፡ ዘኢኮነ፡ በእደ፡ እጓለ፡ እመሕያው። ወውእቱኬ፡ ወልድ፡ ውእቱ፡ ዘይዛለፎሙ፡ ለአሕዛብ፡ ኀጣውኢሆሙ፡ ለእለ፡ ኮኑ፡ ከመ፡ ዐውሎ፡ ወይዌጥሕ፡ ሎሙ፡ በቅድሜሆሙ፡ እከየ፡ ምግባሮሙ፡ ወደይኖሙ፡ በዐቢይ፡ ዘይዴየኑ። እለ፡ ኮኑ፡ ከመ፡ ነደ፡ እሳት፡ ወያጠፍኦሙ፡ ምስለ፡ ኀጢአቶሙ፡ ዘእንበለ፡ ጻማ፡ ለእለ፡ ኮኑ፡ ከመ፡ አፍሓመ፡ እሳት። ወዝንቱኒ፡ ዘርኢከ፡ ከመ፡ ተጋብኡ፡ ኀቤሁ፡ ብዙኃን፡ ስንዓሁ። እሉ፡ እሙንቱ፡ ፱፡ አሕዛብ፡ እለ፡ ተፄወው፡ እምነ፡ ብሔሮሙ፡ በመዋዕሊሁ፡ ለሰልምናሶር፡ ንጉሠ፡ ፋርስ፡ እለ፡ ፄወወ፡ በመንግሥቱ፡ ወአንበሮሙ፡ ማዕዶተ፡ ተከዚ፡ ወተመይጡ፡ ወካልአ፡ ኮኑ። እሙንቱ፡ ለሊሆሙ፡ አውፅእዋ፡ ለዛቲ፡ ምክር፡ ከመ፡ ይኅድጉ፡ ነገደ፡ ሕዝቦሙ፡ ወይሖሩ፡ ውስተ፡ ብሔር፡ ኀበ፡ ኢነበረ፡ ዝየ፡ ዘመደ፡ እጓለ፡ እመሕያው። ከመ፡ ይዕቀቡ፡ ሕጎሙ፡ ዘኢዐቀብዎ፡ በብሔሮሙ። ወእንተ፡ መጽብብ፡ ሙባኡ፡ ለኤፍረጢስ፡ ቦኡ። ወገብረ፡ ሎሙ፡ ይእተ፡ አሚረ፡ ልዑል፡ ተኣምረ፡ ወአቀመ፡ አዕይንቲሁ፡ ለተከዚ፡ እስመ፡ የኀልፉ። ወብሔሩሰ፡ ምሕዋረ፡ ዓመት፡ ወመንፈቀ፡ ዓመት፡ ወስመ፡ ብሔሩ፡ አዛፍ። ወነበሩ፡ ህየ፡ እስከ፡ ደኃሪ፡ መዋዕል። ወእምዝ፡ ካዕበ፡ አመ፡ ሀለዎሙ፡ ይግብኡ። ያቀውም፡ ካዕበ፡ ልዑል፡ አዕይንቲሁ፡ ለተከዚ፡ ከመ፡ ይክሀሉ፡ ኀሊፈ። ወበበይነ፡ ዝንቱ፡ ዘርኢከ፡ መብዝኅቶሙ፡ ለሕዝብ፡ ነሥእዎሙ፡ ወተረክቡ፡ ውስተ፡ ደወልየ፡ ቡሩክ። ወአመ፡ አጥፍኦሙ፡ ለእልክቱ፡ ሕዝብ፡ ብዙኃን፡ እለ፡ ተጋብኡ፡ ላዕሌሁ፡ ውእተ፡ አሚረ፡ ያጸንዖሙ፡ ለእለ፡ ተርፉ፡ ሕዝብ። ውእተ፡ አሚረ፡ ያርእዮሙ፡ ተኣምሪሁ። ወእቤሎ፡ አነ፡ እግዚኦ፡ እግዚእየ፡ ንግረኒ፡ ዘንተኒ፡ በበይነ፡ ምንት፡ አነ፡ ዘርኢኩ፡ ይወፅእ፡ ብእሲ፡ እማእከለ፡ ባሕር። ወይቤለኒ፡ በከመ፡ ኢይክል፡ ወኢመኑሂ፡ ዘውስተ፡ ልጐተ፡ ባሕር፡ አእምሮ፡ ከማሁ፡ አልቦ፡ ዘይክል፡ አእምሮቶ፡ ለወልድ፡ እምእለ፡ ሀለዉ፡ ውስተ፡ ምድር፡ ወኢመኑሂ፡ ወለእለሂ፡ ምስሌሁ፡ ዘእንበለ፡ አመ፡ በጽሀ፡ ጊዜሁ፡ ወዕለቱ። ወዝንቱ፡ ውእቱ፡ ፍካሬሁ፡ ለሕልምከ፡ ዘርኢከ፡ ወበበይነ፡ ዝንቱ፡ አርአይኩከ፡ ለባሕቲትከ። እስመ፡ ኀደገ፡ ትካዘከ፡ ወትዳዘ፡ ዚአየ፡ ተለውከ፡ ወሕግየ፡ ኀሠሥከ። ወሕይወተከኒ፡ ለአእምሮ፡ ሠራዕከ፡ ወለጥበብኒ፡ እመከ፡ ረሰይካ። ወበበይነ፡ ዝንቱ፡ አርአይኩከ፡ ከመዝ፡ እስመ፡ ሀለወ፡ ኀበ፡ ልዑል፡ ዕሴትከ፡ ወነዓ፡ እንከ፡ እምድኅረ፡ ኅዳጥ፡ መዋዕል፡ እስመቦ፡ ባዕደ፡ ዘእነግረከ፡ ወእፌክር፡ ለከ፡ መድምመ። ወሖርኩ፡ ወኀለፍኩ፡ እንተ፡ ገዳም፡ እንዘ፡ እሴብሖ፡ ወኣአኵቶ፡ ለእግዚአብሔር፡ በእንተ፡ ስብሐቲሁ፡ ዘይገብር፡ በበ፡ መዋዕሊሁ። ወዘከመ፡ ይሠርዎሙ፡ ለዓመታቲሁ፡ ወዘሂ፡ ይከውን፡ በበዓመቱ። ወነበርኩ፡ ህየ፡ ሠሉሰ፡ መዋዕለ።

Chapter 13 ወአመ፡ ሣልስት፡ ዕለት፡ እንዘ፡ እንብር፡ ታሕተ፡ ዕፅ። መጽአ፡ ቃል፡ እምንጸረ፡ ይእቲ፡ ዕፅ፡ ወይቤ፡ ዕዝራ፡ ዕዝራ። ወእቤ፡ አነ፡ ነየ። ወተንሣእኩ፡ ወቆምኩ። ወይቤለኒ፡ አስተርእ፡ አስተርአይክዎ፡ ለሙሴ፡ ወተናገርክዎ፡ በኀበ፡ ዕፀ፡ ጳጦስ፡ አመ፡ ተቀንዩ፡ ሕዝብየ፡ ለግብጽ። ወለአክዎ፡ ወአውፃእክዎሙ፡ ለሕዝብየ፡ እምነ፡ ግብጽ፡ ወወሰድክዎሙ፡ ውስተ፡ ደብረ፡ ሲና፡ ወአንበርክዎ፡ ኀቤየ፡ ብዙኀ፡ መዋዕለ። ወነገርክዎ፡ ብዙኀ፡ መድምመ፡ ወአይዳዕክዎ፡ ምስጢረ፡ መዋዕል፡ ወአይዳዕክዎ፡ ደኃሬ፡ ዘመነ። ወአዘዝክዎ፡ ወእቤሎ፡ ዘንተ፡ ነገረ፡ ንግር፡ ወዘንተ፡ ነገረ፡ ኅባእ። ወይእዜኒ፡ እብለከ፡ ለከ። ተኣምር፡ ዘነገርኩከ፡ ወሕልምከኒ፡ ዘርኢከ፡ ወፍካሬሁኒ፡ ዘሰማዕከ፡ ዕቀቦን፡ በልብከ። እስመ፡ ይነሥኡከ፡ እምነ፡ እጓለ፡ እመሕያው፡ ወትነብር፡ እንከ፡ ምስለ፡ ወልድየ፡ ኀበ፡ ሀለዉ፡ እለ፡ ከማከ፡ እስከ፡ አመ፡ የኀልቅ፡ ዓለም። እስመ፡ ዓለምሰ፡ ኀለፈ፡ ውርዙቱ፡ ወረሥአ፡ መዋዕሊሁ። እስመ፡ ለዐሠርቱ፡ ክፍል፡ ተሠርዐ፡ ዓለም፡ ወበጽሐ፡ ውስተ፡ ዓሥር። ወተረፈ፡ መንፈቀ፡ ዓሥር። ወይእዜሰ፡ እንከ፡ ሥራዕ፡ ቤተከ፡ ወአስተፍሥሖሙ፡ ለሕዙናኒሆሙ፡ ወአለብዎሙ፡ ለጠቢባኒሆሙ፡ ወተናገፋ፡ እንከ፡ ለመዋቲት፡ ሕይወት። ወኅድጎ፡ እንከ፡ ለኅሊና፡ መዋቲ፡ ወግድፍ፡ እንከ፡ እምላዕሌከ፡ ክበደ፡ እጓለ፡ እመሕያው፡ ወልበስ፡ ዘኢይመውት፡ ወኅድጎ፡ ለኅሊና፡ ሐዘን፡ ወአስተፋጥን፡ እንከ፡ ከመ፡ ትዕደው፡ እምዝንቱ፡ ዓለም። እስመ፡ ዝንቱ፡ ዘርኢከ፡ በጽሐት፡ እኪት፡ ይእዜ፡ እንተ፡ ተአኪ፡ አምኔሃ፡ ትከውን፡ ካዕበ። እስመ፡ አምጣነ፡ ይረሥእ፡ ዓለም፡ ወይደክም፡ ከማሁ፡ ትበዝኅ፡ እኪቶሙ፡ ለእለ፡ ይነብሩ፡ ውስቴቱ። እስመ፡ ትጠፍእ፡ ጽድቅ፡ ወትቀውም፡ ሐሰት፡ እስመ፡ ዝንቱ፡ ንስር፡ ዘርኢከ፡ ይጔጒእ፡ ይብጻሕ። ወአውሣእክዎ፡ ወእቤሎ፡ እነግር፡ እንከሰ፡ ቅድሜከ። እስመ፡ አሐውር፡ አንሰ፡ እግዚኦ፡ ወበከመ፡ አዘዝከኒ፡ እሜህሮሙ፡ ለሕዝብ፡ ለእለ፡ ሀለዉ፡ ይእዜ፡ መኑ፡ እንከ፡ ይሜህሮሙ፡ ለእለ፡ ይትወለዱ፡ ካዕበ። እስመ፡ ውስተ፡ ጽልመት፡ ሀሎ፡ ዓለም፡ ወእለኒ፡ ይነብሩ፡ ውስቴታ፡ አልቦሙ፡ ብርሃነ። እስመ፡ ውዕየ፡ ኦሪትከ፡ ወአልቦ፡ ዘያአምር፡ ዘገበርከ፡ ወዘኒ፡ ዘሀለወከ፡ ትግበር። ወእመሰ፡ ረከብኩ፡ ሞገሰ፡ ቅድሜከ፡ ፈኑ፡ ላዕሌየ፡ መንፈሰ፡ ቅዱሰ፡ ወእጽሕፍ፡ ኵሎ፡ ዘከመ፡ ኮነ፡ ውስተ፡ ዓለም፡ እምጥንቱ፡ ወኵሎ፡ ዘከመ፡ ሀለወ፡ ውስተ፡ ኦሪትከ፡ ጽሑፍ፡ ከመ፡ ይክሀሉ፡ ሰብእ፡ ረኪበ፡ ፍኖተ፡ ሕይወት፡ እለ፡ ይፈቅዱ፡ ይሕየዉ። ወአውሥአኒ፡ ወይቤለኒ፡ ሖር፡ አስተጋብኦሙ፡ ለሕዝብከ፡ ወበሎሙ፡ ከመ፡ ኢይኅሥሡከ፡ እስከ፡ ፵፡ ዕለት። ወአንተሰ፡ አስተደሉ፡ ለከ፡ ብዙኀ፡ ሰሌዳተ፡ ወንሥኦሙ፡ ምስሌክ፡ ለሶርያ፡ ወለደብርያ፡ ወለሰላምያ፡ ወለኤቃናን፡ ወለአሳልሔልለእሉ፡ ፭ዕደው፡ እስመ፡ ጠቢባን፡ እሙንቱ፡ ውስተ፡ ጽሒፍ። ወትመጽእ፡ ዝየ፡ ወአነ፡ ኣኀቱ፡ ማኅቶተ፡ ጥበብ፡ ውስተ፡ ልብከ፡ ወኢትጠፍእ፡ እስከ፡ ትፌጽም፡ ኵሎ፡ ዘሀለወከ፡ ትጽሐፍ። ወሶበ፡ ፈጸምከ፡ ቦዘ፡ ገሃደ፡ ትሬሲ፡ ወቦዘ፡ ተኀብእ፡ ወትሁቦሙ፡ ለጠቢባን፡ ወጌሠመ፡ በዛቲ፡ ሠዓት፡ ትእኅዝ፡ ትጽሐፍ። ወሖርኩ፡ በከመ፡ አዘዘኒ፡ ወአስተጋባእኩ፡ ኵሎ፡ ሕዝበ። ወእቤሎሙ፡ ስምዑ፡ እስራኤል፡ ዘንተ፡ ነገረ። ነቢረ፡ ነበሩ፡ አበዊክሙ፡ ትካት፡ ውስተ፡ ምድረ፡ ግብጽ፡ ወቤዘዎሙ፡ እምህየ። ወነሥኡ፡ ሕገ፡ ሕይወት፡ ወኢዐቀቡ፡ ወአንትሙሂ፡ እለ፡ እምድኅሬሆሙ፡ ክሕድክምዎ። ወወሀበነ፡ ምድረ፡ ወአውረሰነ፡ ምድራኒ፡ ለጽዮን፡ ወአንትሙኒ፡ ወአበዊክሙኒ፡ አበስክሙ፡ ወኢዐቀብክሙ፡ ፍናዊሁ፡ ለልዑል፡ ዘአዘዘክሙ። ወእስመ፡ መኰንነ፡ ጽድቅ፡ ውእቱ፡ ሄደክሙ፡ ዘወሀበክሙ፡ በጊዜሁ። ወይእዜኒ፡ አንትሙሰ፡ ዝየ፡ ሀለውክሙ፡ ወአኀዊክሙ፡ ባሕቱ፡ ውስጠ፡ እምኔክሙ። ወእምከመ፡ አግረርክምዎ፡ ለልብክሙ፡ ወገሠጽክምዎ፡ ለኅሊናክሙ፡ ወዐቀብክሙ፡ ሕይወተክሙ፡ ኢትመውቱ። እስመ፡ ደይን፡ እምድኅረ፡ ሞት፡ ይመጽእ፡ ወኢያሐይወነ፡ ወይእተ፡ አሚረ፡ ያስተርኢ፡ አስማቲሆሙ፡ ለጻድቃን፡ ወትከሠት፡ ምግባሮሙ፡ ለኃጥኣን። ወአልቦ፡ ዘይመጽእ፡ ኀቤየ፡ እምኔክሙ፡ ወኢትኅሥሡኒ፡ እስከ፡ ፵፡ ዕለት። ወነሣእክዎሙ፡ ለእልክቱ፡ ፭፡ ዕደው፡ በከመ፡ አዘዘኒ፡ ወሖርነ፡ ውስተ፡ ገዳም፡ ወነበርነ፡ ህየ። ወበሳኒታ፡ መጽአ፡ ቃል፡ ወጸውዐኒ፡ ወይቤለኒ፡ ዕዝራ፡ ፍታሕ፡ አፉከ፡ ወስተይ፡ ዘኣሰትየከ። ወፈታሕኩ፡ አፉየ፡ ወመጠወኒ፡ ጽዋዐ፡ ዘምሉእ፡ ማየ፡ ወሕብሩ፡ እሳተ፡ ይመስል። ወነሣእኩ፡ ወሰተይኩ፡ ወጐሥዐ፡ ልብየ፡ ጥቀ፡ ጥበበ፡ ወከብደ፡ ውስተ፡ እንግድዓየ፡ ልቡና፡ ወመንፈስየኒ፡ ተዐቅብ፡ ወትዜከር። ወተከሥተ፡ አፉየ፡ ወኢተጋብአ፡ እንከ። ወወሀቦሙ፡ ልዑል፡ ጥበበ፡ ለእልክቱ፡ ዕደው፡ ፭፡ ወጸሐፉ፡ ዘንተ፡ ኵሎ፡ ትእምርተ፡ ዘኢየአምሩ፡ በበ፡ መትልው። ወነበሩ፡ ህየ፡ ፵፡ ዕለተ፡ ወእሙንቱሰ፡ መዓልተ፡ ይጽሕፉ። ወሰርከ፡ ይበልዑ፡ እክለ፡ ወአንሰ፡ መዓልተኒ፡ እነብብ፡ ወሌሊተኒ፡ ኢያረምም። ወተጽሕፈ፡ በእማንቱ፡ ፵፡ መዋዕል፡ መጻሕፍት፡ ፺ወ፬። ወእምዝ፡ ሶበ፡ ተፈጸመ፡ እላንቱ፡ ፵፡ መዋዕል፡ ነበበኒ፡ ልዑል፡ ወይቤለኒ፡ ዝንቱ፡ ዘቀደምክሙ፡ ጽሒፈ፡ ገሃደ፡ ረሲ፡ ወያንብቦ፡ ኵሉ፡ ዘይደልዎ፡ ወዘኢይደልዎ። ወዘንተ፡ ዕቀቦ፡ ከመ፡ ተሀቦሙ፡ ለጠቢባነ፡ ሕዝብ። እስመ፡ ቦሙ፡ ማኅቶተ፡ ብርሃን፡ ወነቅዐ፡ ጥበብ፡ ወአእምሮ፡ ከመ፡ ውሒዝ። ወገበርኩ፡ ከማሁ፡ አመ፡ ራብዕ፡ ዓመት፡ እምነ፡ ሰንበታተ፡ ዓመታት፡ እምድኅረ፡ ዓመተ፡ ኵነኔ፡ በ፶፻፡ አመ፡ ዐሡሩ፡ ለጽልመት፡ በሣልስ፡ ወርኅ፡ ወመዋዕሊሁ፡ ፺ወ፪፡ ሎቱ። ወውእተ፡ አሚረ፡ ነሥእዎ፡ ለዕዥራ፡ ወወሰድዎ፡ ብሔረ፡ እለ፡ ከማሁ፡ ጽሒፎ፡ ኵሎ፡ ዘንተ፡ ወውእቱ፡ ተሰምየ፡ ጸሓፌ፡ ጥበቢሁ፡ ለልዑል፡ እስከ፡ ለዓለመ፡ ዓለም።