Acts of the Apostles

Introductory texts to the Acts of the Apostles The following incipits of the introductory texts to the Acts are taken from according to the catalogue description in 543-544.

Preface to the Acts of the Apostles

በስመ፡ አብ፡ ንቀድም፡ በረድኤተ፡ እግዚአብሔር፡ ወስንዓ፡ ሀብቱ፡ ተርጕሞ፡ ግብራተ፡ ሐዋርያት፡ ዘይሰመይ፡ በጽርዕ፡ እብረክሲስ፨ ወንጽሕፍ፡ ቅድመ፡ ምክንያተ፡ ጽሒፎተ፡ ሉቃስ፡ ወንጌላዊ፡ ለንዝቱ፡ መጽሐፍ፨ ወንስእል፡ መርሐ፡ እግዚአብሔር፡ በእንተ፡ ዘከመ፡ ጸሐፈ፡ ክቡር፡ ሉቃስ፡ ውስተ፡ ወንጌል፡ ሥርዓተ፡ ግብሩ፡ ለእግዚእነ፡ ኢየሱስ፡ ክርስቶስ፡ በሥጋ፡ ወእንሶስዎቶ፡ በምድር፨ ወዘከመ፡ አዘዘ፡ ለአርድእት፡ እምድኅረ፡ ተንሥአ፡ እሙታን፡ ከመ፡ ይጸውዑ፡ ኵሎ፡ ሰብአ፡ ኀበ፡ አሚን፡ ቦቱ፨

ወዜነዎሙ፡ ለአሕዛብ፡ እለ፡ ህየ፡ ስብከተ፡ ዘበክርስቲያን፡ ወረሰየ፡ ዜና፡ ግብሩ፡ ለጳውሎስ፡ ውስተ፡ ብዙኅ፡ ክፍላት፡ እስከ፡ ፈጸመ፡ መጽሐፈ፡ ወረሰየ፡ ርእሰ፡ መጽሐፉ፡ ከመዝ፡ ወስብሐት፡ ለእግዚአብሔር፡ ለዝሉፉ፡ አሜን፡ ወአሜን፨

Tituli of the Acts of the Apostles

አርእስት፡ ምንባቦት፡ ዘልዑካን፡ አርድእት። ፩ቀዳሚሁ፡ ለነገር፡ ፪ወውእተ፡ አሚረ፡ ተንሥአ፡ ጴጥሮስ፨ ፫ወመጽአ፡ ግብተ፡ እምሰማይ፨

፷፮፡ ወእምድኅረ፡ ብዙኅ፡ መዋዕል፨ ፷፯፡ ወአመ፡ አሡር፡ ወረቡዕ፡ ሰኰይነ፤ ፷፰፡ ወእምድኅረ፡ ፫ዕለት፡ ለአከ፡ ጳውሎስ፨

Note on Luke

ወዝንቱ፡ ሉቃስ፡ ኮነ፡ ሀገሩ፡ አንጾኪያ፡ ወይእቲ፡ እምድረ፡ ሶርያ፡ እምርት፡ እምካልአኒሃ፨ ወበጽሒፈ፡ ብስራተ፡ ወንጌልሂ፡ ተበፅዓ፡ እስመ፡ ውእቱ፡ ኮነ፡ ዐቢይ፡ ዓቃቤ፡ ሥራይ፡ በውስተ፡ አንጾኪያ፨

ነአምር፡ ርቱዓ፡ ከመ፡ ይኩን፡ መድኃኒተ፡ ነፍስ፡ በቃላቲሁ፡ እምአሜ፡ ልደቱ፡ በ፹ዓም፡ አዕረፈ፨

Acts of the Apostles Text of the EOTC printed Bible

ምዕራፍ 1 በእንተ፡ አስተጋብአ፡ ዜና፡ ሐዋርያት ቀዳሚ፡ ጸሐፍኩ፡ ለከ፡ መጽሐፈ፡ ኦ፡ ታኦፊላ። በኵሉ፡ ግብር፡ ዘአኀዘ፡ እግዚእነ፡ ኢየሱስ፡ ክርስቶስ፡ ይግበር፡ ወይምሀር። እስከ፡ ዕለት፡ እንተ፡ ባቲ፡ ዐርገ፡ አዚዞ፡ ለሐዋርያቲሁ። ለእለ፡ ኀረዮሙ፡ በመንፈስ፡ ቅዱስ። እሉ፡ እሙንቱ፡ እለ፡ አርአዮሙ፡ ወከሠተ፡ ሎሙ፡ ርእሶ፡ ሕያወ። እምድኅረ፡ ሞተ፡ በተኣምር፡ ብዙኅ፡ በአርባዕ፡ ዕለት። እንዘ፡ ያስተርእዮሙ፡ ወይዜንዎሙ። ወይነግሮሙ፡ በእንተ፡ መንግሥተ፡ እግዚአብሔር። በእንተ፡ ጥምቀት፡ ዘመንፈስ፡ ቅዱስ ወእንዘ፡ ይመስሕ፡ ምስሌሆሙ፡ አዘዞሙ፡ ኢይፃኡ፡ እምኢየሩሳሌም። አላ፡ ይጽንሑ፡ ተስፋሁ፡ ለአብ። ወይቤሎሙ፡ ዮሐንስ፡ አጥመቀ፡ በማይ። አንትሙሰ፡ ታጠምቁ፡ በመንፈስ፡ ቅዱስ፡ እስከ፡ መዋዕል፡ ዘኢኮነ፡ ርሑቀ። ተስእሎ፡ በእንተ፡ መንግሥተ፡ እስራኤል ወእንዘ፡ ጉቡኣን፡ አንትሙ። ተስእልዎ፡ ወይቤልዎ። እግዚኦ፡ በዝኑ፡ መዋዕል፡ ታገብእ፡ መንግሥተ፡ ለደቂቀ፡ እስራኤል። ወአውሥኦሙ፡ ወይቤሎሙ፡ ኢኮነ፡ ለክሙ፡ ታእምሩ፡ መዋዕለ፡ ወአዝማነ። ዘሠርዐ፡ አብ፡ በምኵናኑ፡ ባሕቲቱ። አላ፡ ሶበ፡ ይወርድ፡ ላዕሌክሙ፡ መንፈስ፡ ቅዱስ። ትነሥኡ፡ ኀይለ፡ ወትከውኑኒ፡ ሰማዕትየ፡ በኢየሩሳሌም። ወበኵሉ፡ ይሁዳ፡ ወሰማርያ፡ ወእስከ፡ አጽናፈ፡ ምድር። በእንተ፡ ዕርገት ወዘንተ፡ እንዘ፡ ይብሎሙ፡ ተለዐለ፡ ወነሥአቶ፡ ደመና። ወዐርገ፡ ሰማየ፡ እንዘ፡ እሙንቱ፡ ይኔጽሩ፡ ኀቤሁ። ወተሰወረ፡ እምአዕይንቲሆሙ። ወአስተርአይዎሙ፡ ክልኤቱ፡ ዕደው። ወቆሙ፡ ኀቤሆሙ፡ ወይለብሱ፡ ጸዐዳ። ወይቤልዎሙ፡ አንትሙ፡ ሰብአ፡ ገሊላ፡ ምንትኑ፡ ቆምክሙ፡ ትርአዩ፡ ሰማየ። ዝ፡ ውእቱ፡ ኢየሱስ፡ ዘዐርገ፡ እምኀቤክሙ፡ ውስተ፡ ሰማይ። ወከማሁ፡ ካዕበ፡ ይመጽእ፡ በከመ፡ ርኢክምዎ፡ የዐርግ፡ ሰማየ። ወእምዝ፡ ተሠውጡ፡ ኢየሩሳሌም፡ እምደብረዘይት። ዘእቱት፡ እምኢየሩሳሌም፡ መጠነ፡ ምርዋጸ፡ ብእሲ። እንተ፡ ይእቲ፡ መንገደ፡ ቀዳም። በእንተ፡ ጸሎተ፡ ማኅበር ወበጺሖሙ፡ ማኅደሮሙ፡ ኀበ፡ ይነብሩ፡ ጽርሐ። ዐርጉ፡ ጴጥሮስ፡ ወዮሐንስ፡ ወያዕቆብ፡ ወእንድርያስ፡ ወፊልጶስ፡ ወቶማስ፡ ወማቴዎስ። ወበርተሎሜዎስ፡ ወያዕቆብ፡ ወልደ፡ እልፍዮስ፡ ወስምዖን፡ ቀናኢ፡ ወይሁዳ፡ ወልደ፡ ዮሴፍ። እሉ፡ ኵሎሙ፡ ይፀመዱ፡ ጸሎተ፡ ኅቡረ፡ ምስለ፡ አንስት። ወማርያም፡ እሙ፡ ለኢየሱስ፡ ወአኀዊሁኒ። በእንተ፡ ኅርየተ፡ ሐዋርያት ወውእተ፡ አሚረ፡ ተንሥአ፡ ጴጥሮስ፡ ወቆመ፡ ማእከለ፡ አኀዊሁ። ወይቤሎሙ፡ እንዘ፡ ሀለዉ፡ ህየ፡ ሰብእ፡ ወየአክሉ፡ ምእተ፡ ወዕሥራ። ስምዑ፡ ኦ፡ አኀዊነ፡ አማን፡ ሀለዎ፡ ይብጻሕ፡ ቃለ፡ መጽሐፍ፡ ዘይቤ። መንፈስ፡ ቅዱስ፡ በአፈ፡ ዳዊት፡ በእንተ፡ ይሁዳ። ዘውእቱ፡ ኮኖሙ፡ መርሐ፡ ለእለ፡ አኀዝዎ፡ ለእግዚእ፡ ኢየሱስ። እንዘ፡ ኊሉቊ፡ ውእቱ፡ ምስሌነ፡ ወከፈሎ፡ ዘንተ፡ መልእክተ። ወእምዝ፡ ተሣየጠ፡ ዐጸደ፡ በዐስበ፡ ዐመፃሁ። ወተነፅኀ፡ ላዕለ፡ ምድር፡ በገጹ። ወተሠጥቀ፡ ገቦሁ፡ ወተክዕወ፡ ኵሉ፡ አማዑቲሁ። ወተሰምዐ፡ ነገሩ፡ በኀበ፡ ኵሎሙ፡ እለ፡ ይነብሩ፡ በኢየሩሳሌም። ወተሰምየ፡ ዐጸዱ፡ ዘተሣየጠ፡ በዐስቡ። ሰመይዎ፡ በነገሮሙ፡ ሐቅለ፡ ድማኅ፡ ገራህተ፡ ደም፡ ብሂል። በከመ፡ ይቤ፡ መጽሐፈ፡ መዝሙር። ለትኩን፡ ሀገሩ፡ በድወ፡ ወአልቦ፡ ዘይነብር፡ ውስቴታ፡ ወሢመቶሂ፡ ይንሣእ፡ ባዕድ። ወይደሉ፡ ለአሐዱ፡ እምእሉ፡ ዕደው። እለ፡ ነበሩ፡ ምስሌነ፡ ዘንተ፡ ኵሎ፡ መዋዕለ። ዘቦአ፡ ወወፅአ፡ በኀቤነ፡ እግዚእነ፡ ኢየሱስ፡ ክርስቶስ። እኂዞ፡ እምጥምቀተ፡ ዮሐንስ፡ እስከ፡ አመ፡ ዐርገ፡ እምኀቤነ። ከመ፡ ይኩን፡ ውእቱ፡ ምስሌነ፡ ስምዐ፡ ተንሥኦቱ። ወአቀሙ፡ ክልኤተ፡ ዮሴፍሃ፡ ዘተሰምየ፡ በርናባስ፡ ዘይብልዎ፡ ኢዩስጦስ፡ ወማትያስሃ። ወጸለዩ፡ ወይቤሉ፡ አንተ፡ እግዚኦ፡ ማእምረ፡ ኵሉ፡ ልብ። አርኢ፡ አሐደ፡ እምእሉ፡ ክልኤቱ፡ ዘኀረይከ። ዘይነሥኣ፡ ለመልእክተ፡ ዛቲ፡ ሢመተ፡ ሐዋርያት። ዘኀደጋ፡ ይሁዳ፡ ይሑር፡ ብሔሮ። ወአስተዓፀውዎሙ፡ ወበጽሐ፡ ዕፃ፡ ዲበ፡ ማትያስ። ወተኈለቈ፡ ምስለ፡ ዐሠርቱ፡ ወአሐዱ፡ ሐዋርያት።

ምዕራፍ 2 በእንተ፡ ርደተ፡ መንፈስ፡ ቅዱስ ወአመ፡ ተፈጸመ፡ መዋዕለ፡ ጰንጠቈስጤ። እንዘ፡ ሀለዉ፡ ኵሎሙ፡ ኅቡረ፡ አሐተኔ። መጽአ፡ ግብተ፡ እምሰማይ፡ ድምፅ፡ ከመ፡ ድምፀ፡ ነፋሰ፡ ዐውሎ። ወመልአ፡ ኵሎ፡ ቤተ፡ ኀበ፡ ሀለዉ፡ ይነብሩ። ወአስተርአይዎሙ፡ ልሳናተ፡ እሳት፡ ክፉላት፡ ከመ፡ እሳት፡ ዘይትከፈል። ወነበረ፡ ዲበ፡ ኵሎሙ፡ ወተመልኡ፡ ኵሎሙ፡ መንፈሰ፡ ኀይል። ወአኀዙ፡ ይንብቡ፡ ዘዘ፡ ዚኣሆሙ፡ በነገረ፡ ኵሉ፡ በሓውርት። በከመ፡ ወሀቦሙ፡ መንፈስ፡ ቅዱስ፡ ይንብቡ። በእንተ፡ አሕዛብ፡ እለ፡ መጽኡ፡ ለበዓል ወሀለዉ፡ በኢየሩሳሌም፡ ሰብእ፡ ኄራን፡ አይሁድ። ይነብሩ፡ እምኵሉ፡ አሕዛብ፡ ዘመትሕተ፡ ሰማይ። ወሰሚዖሙ፡ ዘንተ፡ ቃለ፡ ተጋብኡ፡ ኵሎሙ፡ ድንጉፃኒሆሙ። እስመ፡ ሰምዕዎሙ፡ ይነብቡ፡ ኵሎሙ፡ በነገረ፡ በሓውርቲሆሙ። ወደንገፁ፡ ወአንከሩ፡ ወይቤሉ፡ አኮኑ፡ ሰብአ፡ ገሊላ፡ እሉ፡ ኵሎሙ። እፎኑ፡ እንከ፡ ንስምዖሙ፡ ይነብቡ፡ በነገረ፡ ኵሉ፡ በሓውርቲነ። እንዘ፡ ፍጥረትነ፡ ጳርቴ፡ ወሜድ፡ ወኢላሜጤ። ወእለኒ፡ ይነብሩ፡ ማእከለ፡ አፍላግ። አይሁድ፡ ወቀጰዶቅያ፡ ወፋንጦስ፡ ወእስያ። ወፍርግያ፡ ወጵንፍልያ፡ ወግብጽ፡ ወደወለ፡ ልብያ። ወእለሂ፡ እምቀርኔን፡ ወእለሂ፡ መጽኡ፡ እምሮሜ፡ አይሁድ፡ ወፈላስያን። ወእለሂ፡ እምቀርጤስ፡ ወዓረብ። ወናሁ፡ ንሰምዖሙ፡ ይነብቡ፡ በነገረ፡ በሓውርቲነ፡ ዕበያቲሁ፡ ለእግዚአብሔር። ወደንገፁ፡ ኵሎሙ፡ ወኀጥኡ፡ ዘይብሉ፡ ወዘይነብቡ። ወተባሀሉ፡ በበይናቲሆሙ፡ ምንትኑ፡ እንጋ፡ ዝ። ወመንፈቆሙሰ፡ ሠሐቅዎሙ፡ ወይቤሉ። እሉሰ፡ ፃዕፈ፡ ጸግቡ፡ ወሰክሩ። በእንተ፡ ስብከተ፡ ጴጥሮስ፡ ቀዳሚት ወቆመ፡ ጴጥሮስ፡ ምስለ፡ ዐሠርቱ፡ ወአሐዱ፡ ወከልሐ፡ በቃሉ፡ ወይቤ። አንትሙ፡ ሰብአ፡ ይሁዳ፡ ወእለሂ፡ ትነብሩ፡ ኢየሩሳሌም። ኵልክሙ፡ አእምሩ፡ ዘንተ፡ ወስምዑኒ፡ ቃልየ። አኮ፡ ከመ፡ ትትሐዘብዎሙ፡ አንትሙ። ስኩራን፡ እሙንቱ፡ እንዘ፡ ትብሉ። እስመ፡ ነግሀ፡ ብሔር፡ ወሶቤሁ፡ ሠለስቱ፡ ሰዓት። አላ፡ ዝ፡ ውእቱ፡ ዘይቤ፡ ኢዮኤል፡ ነቢይ። ወይከውን፡ እምድኅረ፡ ዝ፡ መዋዕል፡ ይቤ፡ እግዚአብሔር። እሠውጥ፡ እምነ፡ መንፈስየ፡ ዲበ፡ ኵሉ፡ ዘሥጋ። ወይትኔበዩ፡ ደቂቅክሙ፡ ወአዋልዲክሙ። ወወራዙቲክሙ፡ ራእየ፡ ይሬእዩ። ወሊቃውንቲክሙ፡ ሕልመ፡ የሐልሙ። ወላዕለ፡ አግብርትየ፡ ወአእማትየ፡ እክዑ፡ እምነ፡ መንፈስየ። ወይእተ፡ አሚረ፡ ይትኔበዩ። ወእሁብ፡ ትእምርተ፡ በሰማይ፡ በላዕሉ። ወመንክረ፡ በምድር፡ በታሕቱ። ደመ፡ ወእሳተ፡ ወጢሰ። ፀሓይኒ፡ ይጸልም፡ ወወርኅኒ፡ ደመ፡ ይከውን። ዘእንበለ፡ ትብጻሕ፡ ዕለተ፡ እግዚአብሔር፡ ዐባይ፡ ወግርምት። ወኵሉ፡ ዘጸውዐ፡ ስመ፡ እግዚአብሔር፡ ይድኅን። በእንተ፡ ብእሲ፡ ዘአርአየ፡ እግዚአብሔር፡ ለሕዝቡ ስምዑ፡ ሰብአ፡ እስራኤል፡ ዘንተ፡ ነገረ፡ ኢየሱስ፡ ናዝራዊ። ብእሲ፡ ዘአርአየክሙ፡ እግዚአብሔር፡ በኀይል፡ ወበተኣምር፡ ወበመንክር። ዘገብረ፡ እግዚአብሔር፡ በእደዊሁ፡ በማእከሌክሙ፡ ዘከመ፡ ርኢክምዎ። በሥርዐተ፡ ምክሩ፡ ወበአእምሮቱ፡ ለእግዚአብሔር። ወመጠውክምዎ፡ ውስተ፡ እደ፡ ኃጥኣን፡ ወሰቀልክምዎ፡ ወቀተልክምዎ። ወእግዚአብሔር፡ አንሥኦ፡ እምዉታን፡ ፈቲሖ፡ ማእሰሪሁ፡ ለሞት። እስመ፡ ኢይክል፡ እኂዞቶ፡ ሞት። ወዳዊትኒ፡ ይቤ፡ በእንቲኣሁ። ዘልፈ፡ እሬእዮ፡ ለእግዚአብሔር። ቅድሜየ፡ ውእቱ፡ በኵሉ፡ ጊዜ። እስመ፡ በየማንየ፡ ውእቱ፡ ከመ፡ ኢይትሀወክ። ወበእንተዝ፡ ተፈሥሐ፡ ልብየ፡ ወተሐሥየ፡ ልሳንየ። ወዓዲ፡ በተስፋሁ፡ ኀደረ፡ ሥጋየ። እስመ፡ ኢተኀድጋ፡ ውስተ፡ ሲኦል፡ ለነፍስየ። ወኢትሁቦ፡ ለጻድቅከ፡ ይርአይ፡ ሙስና። ወመራሕከኒ፡ ፍኖተ፡ ሕይወት። ወአጽገብከኒ፡ ሐሤተ፡ ምስለ፡ ገጽከ። ወትፍሥሕት፡ ውስተ፡ የማንከ፡ ለዝሉፉ። በእንተ፡ ዳዊት፡ ርእሰ፡ አበው ታበውሑኒሁ፡ እንከ፡ ኦ፡ ሰብእ። እንግርክሙ፡ ክሡተ፡ በእንተ፡ ዳዊት፡ ርእሰ፡ አበው። ከመሂ፡ ሞተ፡ ወተቀብረ፡ ወኀቤነ፡ ሀሎ፡ መቃብሪሁ፡ እስከ፡ ዮም። እስመ፡ ነቢይ፡ ውእቱ፡ ወአእመረ፡ ከመ፡ በመሐላ፡ መሐለ፡ ሎቱ፡ እግዚአብሔር። ከመ፡ እምፍሬ፡ ከርሡ፡ ያነብር፡ ዲበ፡ መንበሩ። አቅዲሞ፡ አእሚሮ፡ ነገረ፡ ከመ፡ ይትነሣእ፡ ክርስቶስ፡ እምዉታን። ወከመ፡ ኢትትኀደግ፡ ውስተ፡ ሲኦል፡ ነፍስቱ። ወከመሂ፡ ኢይሬእያ፡ ለሙስና። ሎቱ፡ ለኢየሱስ፡ አንሥኦ፡ እግዚአብሔር። ወንሕነ፡ ኵልነ፡ ሰማዕቱ። ወይእዜሰ፡ ከመ፡ በየማነ፡ እግዚአብሔር፡ ተለዐለ። ነሢኦ፡ እምኀበ፡ አቡሁ፡ ዘአሰፈዎ፡ መንፈሰ፡ ቅዱሰ። ሦጦ፡ ለዝ፡ ዘትሬእዩ፡ ወዘትሰምዑ። ቦኑ፡ ዳዊት፡ ዐርገ፡ ሰማየ። ኢይቤኑ፡ ለሊሁ፡ ዳዊት፡ በመንፈስ፡ ቅዱስ። ይቤሎ፡ እግዚእ፡ ለእግዚእየ፡ ንበር፡ በየማንየ። እስከ፡ አገብኦሙ፡ ለጸላእትከ፡ ታሕተ፡ መከየደ፡ እገሪከ። ጥዩቀ፡ እንከ፡ ያእምሩ፡ ኵሉ፡ ቤተ፡ እስራኤል። ከመ፡ እግዚአኒ፡ ወመሲሐኒ፡ ረሰዮ፡ እግዚአብሔር። ለውእቱ፡ ኢየሱስ፡ ክርስቶስ፡ ዘአንትሙ፡ ሰቀልክምዎ። ወሰሚዖሙ፡ ተከሥተ፡ ልቦሙ። ወይቤልዎሙ፡ ለጴጥሮስ፡ ወለቢጹ፡ ሐዋርያት። ምንተ፡ ንግበር፡ አኀዊነ። ወይቤሎሙ፡ ጴጥሮስ፡ ነስሑ፡ ወተጠመቁ፡ ኵልክሙ፡ በስሙ፡ ለኢየሱስ፡ ክርስቶስ። ወይትኀደግ፡ ለክሙ፡ ኀጢአትክሙ። ወትነሥኡ፡ ጸጋሁ፡ ለመንፈስ፡ ቅዱስ። እስመ፡ ለክሙ፡ ውእቱ፡ ተስፋሁ፡ ወለውሉድክሙ። ወለኵሎሙ፡ እለ፡ ርሑቃን፡ እለ፡ ጸውዖሙ፡ እግዚአብሔር፡ አምላክነ። ወባዕደኒ፡ ብዙኀ፡ ነገረ፡ ነገሮሙ፡ ወገሠጾሙ፡ ወይቤሎሙ። አድኅኑ፡ ነፍሰክሙ፡ እምዝ፡ ዓለም፡ እኩይ። በእንተ፡ ጥንተ፡ ማኅበረ፡ ክርስቲያን ወተወክፉ፡ ቃሎ፡ ወተጠምቁ። ወተወሰኩ፡ በይእቲ፡ ዕለት፡ መጠነ፡ ሠላሳ፡ ምእት፡ ነፍስ። ወነበሩ፡ ይፀመዱ፡ ትምህርተ፡ ሐዋርያት። ወኅቡረ፡ ይባርኩ፡ ማእደ፡ በውስተ፡ ጸሎት። ወፈርሆሙ፡ ኵሉ፡ ዘነፍስ። ወብዙኅ፡ ተኣምር፡ ወመንክር፡ ይከውን፡ በእደዊሆሙ፡ ለሐዋርያት። ወኵሎሙ፡ እለ፡ አምኑ፡ ኅቡረ፡ ይነብሩ። ወድሙር፡ ኵሉ፡ ንዋዮሙ። ወጥሪቶሙ፡ ይሠይጡ፡ ወይሁቡ፡ ለነዳያን፡ በከመ፡ መፍቅዱ፡ ለለ፡ አሐዱ። ወኵሎ፡ አሚረ፡ ይፀመዱ፡ በአሐዱ፡ ነፍስ፡ ወበአሐዱ፡ ኅሊና፡ ውስተ፡ ቤተ፡ መቅደስ። ወይፌትቱ፡ ኅብስተ፡ በውስተ፡ አብያት። ወይሴሰዩ፡ ሲሳዮሙ፡ በትፍሥሕት፡ ወበየውሀተ፡ ልብ። ወየአኵቱ፡ እግዚአብሔርሃ። ወቦሙ፡ ሞገስ፡ በኀበ፡ ኵሉ፡ ሕዝብ። ወእንተ፡ ጸብሐት፡ ይዌስክ፡ እግዚአብሔር፡ ዲቤሆሙ፡ ለእለ፡ የሐይዉ።

ምዕራፍ 3 በእንተ፡ ተአምር፡ ቀዳሚት፡ ዘኮነት፡ በእደ፡ ሐዋርያት ወዐርጉ፡ ምኵራበ፡ ጴጥሮስ፡ ወዮሐንስ፡ ጊዜ፡ ተሱዓት፡ ለጸሎት። ወሀሎ፡ አሐዱ፡ ብእሲ፡ ዘፅዉስ፡ እገሪሁ። ተወልደ፡ ከማሁ፡ እምከርሠ፡ እሙ። ወይጸውርዎ፡ ኵሎ፡ ዕለተ። ወያነብርዎ፡ በኆኅተ፡ ምኵራብ፡ እንተ፡ ስማ፡ ኦርያ። ከመ፡ ይስአል፡ ምጽዋተ፡ እምኀበ፡ እለ፡ ይበውኡ፡ ምኵራበ። ወርእዮሙ፡ ለጴጥሮስ፡ ወለዮሐንስ፡ ይበውኡ፡ ምኵራበ። ወሰአሎሙ፡ የሀብዎ፡ ምጽዋተ። ወተመይጥዎ፡ ጴጥሮስ፡ ወዮሐንስ፡ ኀቤሁ፡ ወይቤልዎ። ተመየጥ፡ መንገሌነ፡ ወነጸረ፡ ኀቤሆሙ። ወተሰፈወ፡ የሀብዎ፡ ምጽዋተ። ወይቤሎ፡ ጴጥሮስ፡ ወርቅሰ፡ ወብሩር፡ አልብየ። ወእምዘብየሰ፡ እሁበከ። ናሁ፡ በስሙ፡ ለኢየሱስ፡ ክርስቶስ፡ ናዝራዊ፡ ተንሥእ፡ ወሑር። ወአኀዞ፡ በእዴሁ፡ ዘየማን፡ ወአንሥኦ። ወተንሥአ፡ ሶቤሃ፡ ወጸንዐ፡ እገሪሁ፡ ወሐቌሁ። ወሖረ፡ ምስሌሆሙ፡ እንዘ፡ ይሠግር። ወቦአ፡ ምኵራበ፡ ወአእኰተ፡ እግዚአብሔርሃ። ወርእይዎ፡ ኵሎሙ፡ ሕዝብ፡ እንዘ፡ የሐውር፡ ወየአኵት፡ እግዚአብሔርሃ። ወአእመርዎ፡ ከመ፡ ውእቱ፡ ዘይነብር፡ በኆኅተ፡ ምኵራብ፡ እንተ፡ ስማ፡ ኦርያ፡ ወይስእል። ወደንገፁ፡ ወአንከሩ፡ በእንተ፡ ተኣምር፡ ዘኮነ፡ ላዕሌሁ። ወእንዘ፡ ይእኅዝዎ፡ ጴጥሮስ፡ ወዮሐንስ፡ ይበውኡ፡ ምኵራበ። ሮጹ፡ ኵሉ፡ ሕዝብ፡ ኀቤሆሙ። ኀበ፡ ሕዋረ፡ ሰሎሞን፡ ድንጉፃኒሆሙ። በእንተ፡ ዘተናገረ፡ ጴጥሮስ፡ ለአሕዛብ ወሶበ፡ ርእዮሙ፡ ጴጥሮስ፡ ለሕዝብ፡ ይቤሎሙ። አንትሙ፡ ሰብአ፡ እስራኤል፡ ምንተኑ፡ ታነክሩነ፡ ወምንተኑ፡ ትኔጽሩነ። ከመ፡ ዘበኀይልነ፡ ገበርናሁ፡ ወከመ፡ ዘበሥልጣንነ፡ ረሰይናሁ። አው፡ እምኀበ፡ ነፍሳቲነኑ፡ አሕየውናሁ፡ ለዝንቱ። ከመ፡ ይሑር፡ በእገሪሁ፡ አልቦኬ። አላ፡ አምላከ፡ አብርሃም፡ ወአምላከ፡ ይስሐቅ፡ ወአምላከ፡ ያዕቆብ። አምላከ፡ አበዊነ፡ ሰብሖ፡ ለወልዱ፡ ኢየሱስ፡ ክርስቶስ። ዘአንትሙ፡ ዐለውክምዎ፡ ወክሕድክምዎ፡ በቅድመ፡ ገጸ፡ ጲላጦስ። ፈቂዶ፡ ውእቱ፡ ያሕይዎ፡ ለክሙ። ወአንትሙሰ፡ ክሕድክምዎ፡ ለቅዱስ፡ ወለጻድቅ። ወሰአልክሙ፡ ብእሴ፡ ቀታሌ፡ ነፍስ፡ ያሕዩ፡ ለክሙ። ወለመልአከ፡ ሕይወትሰ፡ ቀተልክምዎ። ወእግዚአብሔር፡ አንሥኦ፡ እምዉታን። ወንሕነ፡ ኵልነ፡ ሰማዕቱ። ከመ፡ በሃይማኖተ፡ ስሙ፡ ለዝ፡ ዘትሬእዩ፡ ወተአምሩ፡ አጽንዖ። ወበሃይማኖተ፡ ዚኣሁ፡ ወሀቦ፡ ዘንተ፡ ሕይወተ፡ በቅድሜክሙ። ወይእዜኒ፡ አኀውየ፡ አእምሩ፡ ከመ፡ በኢያእምሮ፡ ገበርክምዎ፡ ለዝ። ከመ፡ ገብሩ፡ መላእክቲክሙ። ወእግዚአብሔርሰ፡ በከመ፡ አቅደመ፡ ነጊረ፡ በአፈ፡ ኵሎሙ፡ ነቢያት። ከመ፡ ይትቀተል፡ ክርስቶስ፡ አብጽሐ፡ ከማሁ። ወይእዜኒ፡ ነስሑ፡ ወተጠመቁ፡ ወይደመሰስ፡ ለክሙ፡ ኀጢአትክሙ። ወይመጽእ፡ ለክሙ፡ መዋዕለ፡ ሣህል፡ እምቅድመ፡ ገጹ፡ ለእግዚአብሔር። ወይፌንዎ፡ ለክሙ፡ ለኢየሱስ፡ ክርስቶስ፡ ዘአቅደመ፡ ቀቢዐ። ዘኪያሁ፡ ይሴፈዉ፡ ሰማያት፡ ወምድር፡ እስከ፡ አመ፡ ያስተራትዕ፡ ኵሎ። በከመ፡ ነበበ፡ እግዚአብሔር፡ በአፈ፡ ነቢያቲሁ፡ ቅዱሳን፡ እለ፡ እምዓለም። ሙሴሂ፡ ይቤሎሙ፡ ለአበዊነ። ነቢየ፡ ያነሥእ፡ ለክሙ፡ እግዚአብሔር፡ አምላክነ፡ እምአኀዊክሙ፡ ዘከማየ። ወሎቱ፡ ስምዕዎ፡ ኵሎ፡ ዘይቤለክሙ። ወኵላ፡ ነፍስ፡ እንተ፡ ኢትሰምዖ፡ ለውእቱ፡ ነቢይ፡ ለትሠረው፡ እምሕዝባ። ወኵሎሙ፡ ነቢያት፡ እለ፡ እምአመ፡ ሳሙኤል፡ ነቢይ፡ ወእለሂ፡ እምድኅሬሁ። ነገሩ፡ ወአይድዑ፡ በእንተ፡ እላንቱ፡ መዋዕል። ወአንትሙ፡ ውሉዶሙ፡ ለነቢያት። ወውሉደ፡ ሥርዐት፡ ዘሠርዖ፡ እግዚአብሔር፡ ለአበዊነ። እስመ፡ ይቤሎ፡ ለአብርሃም፡ በዘርዕከ፡ ይትባረኩ፡ ኵሎሙ፡ አሕዛበ፡ ምድር። ወለክሙ፡ አቅደመ፡ አንሥኦቶ፡ እግዚአብሔር፡ ለወልዱ። ወፈነዎ፡ ይባርክሙ፡ ከመ፡ ትነስሑ፡ ኵልክሙ፡ እምእከይክሙ።

ምዕራፍ 4 በእንተ፡ ቅንአቶሙ፡ ለሊቃነ፡ ካህናት፡ ወመገብተ፡ ምኵራብ ወእንዘ፡ ይነግሮሙ፡ ለሕዝብ፡ መጽኡ፡ ሊቃነ፡ ካህናት፡ ወመገብተ፡ ምኵራብ፡ ወሰዱቃውያን። ወቀንኡ፡ ላዕሌሆሙ፡ እስመ፡ ይሜህርዎሙ፡ ለሕዝብ። ወይነግርዎሙ፡ በእንተ፡ ክርስቶስ፡ ከመ፡ ሐይወ፡ እምዉታን። ወአኀዝዎሙ፡ ወአውዐልዎሙ፡ ሙዓለ፡ እስከ፡ ጌሠም፡ እስመ፡ ወድአ፡ መስየ። ወብዙኃን፡ ሰብእ፡ እለ፡ ሰምዕዎ፡ ለዝ፡ ነገር፡ ወአምኑ። ወኮነ፡ ኊልቆሙ፡ ለዕደው፡ እለ፡ አምኑ፡ መጠነ፡ ኀምሳ፡ ምእት። ወእምዝ፡ በሳኒታ፡ ተጋብኡ፡ መላእክት፡ ወረበናት፡ ወጸሐፍት፡ በኢየሩሳሌም። ወሐና፡ ሊቀ፡ ካህናት፡ ወቀያፋ፡ ወዮሐንስ፡ ወእለ፡ እስክንድሮስ። ወኵሎሙ፡ ዘመደ፡ ካህናት። ወአቀምዎሙ፡ ማእከለ፡ ዐውድ፡ ወሐተትዎሙ፡ ወይቤልዎሙ። በኀይለ፡ መኑ፡ ወበስመ፡ መኑ፡ ገበርክሙ፡ ዘንተ፡ አንትሙ። በእንተ፡ አውሥኦተ፡ ጴጥሮስ ወመልአ፡ መንፈስ፡ ቅዱስ፡ ሶቤሃ፡ ላዕለ፡ ጴጥሮስ፡ ወይቤሎሙ። ስምዑ፡ መላእክተ፡ ሕዝብ፡ ወረበናት። ለእመሁ፡ ንሕነ፡ ንትኴነን፡ ኀቤክሙ፡ በእንተ፡ ረድኤተ፡ ሕሙም፡ ዘኮነ፡ ዮም። በምንትኑ፡ እንከ፡ ሐይወ፡ ዝንቱ። አእምሩ፡ እንከ፡ ጥዩቀ፡ ኵልክሙ፡ ወኵሉ፡ ቤተ፡ እስራኤል። ከመ፡ በስሙ፡ ለኢየሱስ፡ ክርስቶስ፡ ናዝራዊ። ዘአንትሙ፡ ቀተልክምዎ፡ ወእግዚአብሔር፡ አንሥኦ፡ እምዉታን። ወቦቱ፡ ሐይወ፡ ዝንቱ፡ ወቆመ፡ በቅድሜክሙ። እስመ፡ ውእቱ፡ እብን፡ ዘመነንክምዎ፡ አንትሙ፡ ነደቅት። ወውእቱ፡ ኮነ፡ ውስተ፡ ርእሰ፡ ማዕዘንት። ወአልቦ፡ ካልእ፡ ሕይወት፡ በዘየሐይዉ። ወአልቦ፡ ካልእ፡ ስም፡ በታሕተ፡ ሰማይ፡ ዘይትወሀብ፡ ለዕጓለ፡ እመሕያው። በእንተ፡ ከሊአ፡ ትምህርት ወሶበ፡ ርእይዎሙ፡ ለጴጥሮስ፡ ወለዮሐንስ፡ ከመ፡ ገሃደ፡ ይነግርዎሙ፡ አእመርዎሙ፡ ከመ፡ ሰብእ፡ የዋሃን፡ እሙንቱ፡ ወኢያአምሩ፡ መጽሐፈ። ወአንከርዎሙ፡ እስመ፡ የአምርዎሙ፡ ዘልፈ፡ ከመ፡ ምስለ፡ ኢየሱስ፡ ሀለዉ። ወይሬእይዎ፡ ለዝኩሂ፡ ብእሲ፡ ዘሐይወ፡ ይቀውም፡ ምስሌሆሙ። ወኀጥኡ፡ ዘይብሉ፡ ወዘይነብቡ። ወአኀዙ፡ ያእትትዎሙ፡ ሕቀ፡ እምዐውድ፡ ወተናገሩ፡ በበይናቲሆሙ። ወይቤሉ፡ ምንተ፡ ንሬስዮሙ፡ ለእሉ፡ ሰብእ። ናሁ፡ ተዐውቀ፡ ትምህርቶሙ፡ በኀበ፡ ኵሎሙ፡ እለ፡ ይነብሩ፡ ኢየሩሳሌም። ወገሃደ፡ ኮነ፡ ወኢንክል፡ ከቢቶቶ። ዳእሙ፡ ከመ፡ ፈድፋደ፡ ኢይብዛኅ፡ በላዕለ፡ ሕዝብ። ንገሥጾሙ፡ ከመ፡ ዳግመ፡ ኢይንግሩ፡ በስሙ፡ ለኢየሱስ፡ ለሰብእ። ወጸውዕዎሙ፡ ወይቤልዎሙ፡ ግሙራ፡ ኢትንግሩ፡ ወኢትምሀሩ፡ በስሙ፡ ለኢየሱስ። በእንተ፡ አውሥኦተ፡ ሐዋርያት ወተሠጥውዎሙ፡ ጴጥሮስ፡ ወዮሐንስ፡ ወይቤልዎሙ። ይረትዕኑ፡ በቅድመ፡ እግዚአብሔር፡ ኪያክሙ፡ ንስማዕ። ወአኮ፡ ለእግዚአብሔር፡ ፍትሑ፡ እስኩ፡ ለሊክሙ። ንሕነሰኬ፡ ኢንክል፡ ከቢቶቶ፡ ለዝንቱ፡ ነገር። ወእምዝ፡ ገሠጽዎሙ፡ ወኀደግዎሙ፡ ሶበ፡ ኀጥኡ፡ በዘይኴንንዎሙ። እስመ፡ ኵሉ፡ ሕዝብ፡ የአኵቱ፡ እግዚአብሔርሃ፡ በእንተ፡ ውእቱ፡ ተኣምር፡ ዘኮነ። እስመ፡ ፈድፈዶ፡ እምአርብዓ፡ ዓመት፡ ለውእቱ፡ ብእሲ። ዘበላዕሌሁ፡ ኮነ፡ ዝ፡ ተኣምረ፡ ሕይወት። ወተፈቲሖሙ፡ ሖሩ፡ ኀበ፡ ሰብኦሙ። ወነገርዎሙ፡ ኵሎሙ፡ ዘይቤልዎ፡ ሊቃነ፡ ካህናት፡ ወረበናት። በእንተ፡ አእኲቶቶሙ፡ እግዚአብሔርሃ ወሰሚዖሙ፡ ዘንተ፡ አንሥኡ፡ ቃሎሙ፡ ኅቡረ፡ ኀበ፡ እግዚአብሔር፡ ወይቤሉ። አንተ፡ እግዚአብሔር፡ አምላክ፡ ዘገበርከ፡ ሰማየ፡ ወምድረ፡ ወባሕረ፡ ወኵሎ፡ ዘውስቴቶሙ። ዘለሊከ፡ ነበብከ፡ በመንፈስ፡ ቅዱስ፡ በአፈ፡ ዳዊት፡ ገብርከ፡ አቡነ፡ ወትቤ። ለምንት፡ አንገለጉ፡ አሕዛብ። ወሕዝብኒ፡ ነበቡ፡ ከንቶ። ወተንሥኡ፡ ነገሥተ፡ ምድር። ወመላእክትኒ፡ ተጋብኡ፡ ምስሌሆሙ፡ ኅቡረ። ላዕለ፡ እግዚአብሔር፡ ወላዕለ፡ መሲሑ። አማን፡ አንገለጉ፡ በዛቲ፡ ሀገር፡ ላዕለ፡ ቅዱስ፡ ወልድከ፡ ኢየሱስ፡ ዘቀባዕካሁ። ሄሮድስ፡ ወጲላጦስ፡ ጰንጤናዊ፡ ምስለ፡ ሕዝቢሆሙ፡ ወሕዝበ፡ እስራኤል። ከመ፡ ይግበሩ፡ በከመ፡ ሥርዐተ፡ እዴከ፡ ወምክርከ፡ ከመ፡ ይኩን። ወይእዜኒ፡ እግዚኦ፡ ርኢ፡ ትምክሕቶሙ። ወሀቦሙ፡ ለአግብርቲከ፡ ገሃደ፡ ይንግሩ፡ ቃለከ። ወትሰፋሕ፡ እዴከ፡ ወትግበር፡ ትእምርተ፡ ወመንክረ። በስመ፡ ወልድከ፡ ኢየሱስ፡ ክርስቶስ፡ ንጹሕ። ወእንዘ፡ ይጼልዩ፡ አድለቅለቀ፡ ውእቱ፡ መካን። ኀበ፡ ሀለዉ፡ ይነብሩ፡ ኅቡረ፡ ጉቡኣን። ወመልአ፡ መንፈስ፡ ቅዱስ፡ ዲበ፡ ኵሎሙ። ወነገሩ፡ ቃለ፡ እግዚአብሔር፡ ገሃደ። በእንተ፡ ማኅበር ወኵሎሙ፡ እለ፡ አምኑ፡ በአሐዱ፡ ልብ፡ ወበአሐቲ፡ ነፍስ። ወአልቦ፡ እምውስቴቶሙ፡ ዘይብል፡ ዝሰ፡ ዚኣየ፡ ንዋይ። አላ፡ ዘኵሎሙ፡ ኅቡረ። ወዐቢየ፡ ኀይለ፡ ይገብሩ፡ ሐዋርያት፡ ስምዐ፡ ተንሥኦቱ፡ ለእግዚእ፡ ኢየሱስ። ወዐቢይ፡ ሞገስ፡ ቦሙ፡ በኀበ፡ ኵሉ። ወአልቦ፡ እምውስቴቶሙ፡ ጽኑስ። ወኵሉ፡ ዘቦ፡ ቤት፡ ወዐጸድ፡ ይሠይጡ፡ ወያመጽኡ፡ ሤጦ። ወያነብሩ፡ ታሕተ፡ እገሪሆሙ፡ ለሐዋርያት። ወእሙንቱ፡ ይከፍሉ፡ ለጽኑሳን፡ ለለ፡ አሐዱ፡ በከመ፡ መፍቅዱ። ወሀሎ፡ አሐዱ፡ ብእሲ፡ ዘስሙ፡ ዮሴፍ። ዘይብልዎ፡ በርናባስ፡ እምውስተ፡ ሐዋርያት። ወበትርጓሜሁ፡ ይብልዎ፡ ወልደ፡ ፍሥሓ፡ ሌዋዊ፡ ዘምድረ፡ ቆጵሮስ። ወቦ፡ ገራህት፡ ወሤጠ፡ ወአምጽአ፡ ሤጦ። ወአንበረ፡ ታሕተ፡ እግረ፡ ሐዋርያት።

ምዕራፍ 5 በእንተ፡ ሐናንያ፡ ወብእሲቱ ወሀሎ፡ አሐዱ፡ ብእሲ፡ ዘስሙ፡ ሐናንያ፡ ወስመ፡ ብእሲቱ፡ ሰጲራ። ወሤጡ፡ ዐጸዶሙ። ወቀሠጡ፡ መንፈቀ፡ ሤጡ፡ ተማኪሮሙ፡ ምስለ፡ ብእሲቱ። ወአምጽኡ፡ መንፈቀ፡ ሤጡ፡ ወአንበሩ፡ ታሕተ፡ እግረ፡ ሐዋርያት። ወይቤሎ፡ ጴጥሮስ፡ ኦ፡ ሐናንያ፡ እፎ፡ መልአ፡ ሰይጣን፡ ውስተ፡ ልብከ። ከመ፡ ተሐስዎ፡ ለመንፈስ፡ ቅዱስ፡ ወትቅሥጥ፡ እምሤጠ፡ ዐጸድከ። አኮኑ፡ ለከ፡ ነበረ፡ እምቅድመ፡ ትሢጦ። ወሶበሂ፡ ሤጥኮ፡ በፈቃድከ። ለምንትኬ፡ ኀለይከ፡ በልብከ፡ ትግበር፡ ከመ፡ ዝ። ለእግዚአብሔርኬ፡ ሐሰውኮ፡ ወአኮ፡ ለሰብእ። ወሰሚዖ፡ ዘንተ፡ ነገረ፡ ሐናንያ፡ ተነፅኀ፡ ወሞተ። ወኮነ፡ ዐቢይ፡ ግርማ፡ ወፈርሁ፡ ኵሎሙ፡ እለ፡ ሰምዑ። ወተንሥኡ፡ መሐዛት፡ እምኔሆሙ። ወጾርዎ፡ ወገነዝዎ፡ ወአውፅእዎ፡ ወቀበርዎ። ወእምዝ፡ እምድኅረ፡ ሠለስቱ፡ ሰዓት፡ መጽአት፡ ብእሲቱ። ወኢያእመረት፡ ዘኮነ፡ ምታ፡ ወቦአት። ወይቤላ፡ ጴጥሮስ፡ ንግርኒ፡ እስኩ፡ በመጠነ፡ ዝኑ፡ ሤጥክሙ፡ ዐጸደክሙ። ወትቤ፡ እወ፡ ከማሁ። ወይቤላ፡ ጴጥሮስ፡ በእፎ፡ እንከ፡ ኀበርክሙ፡ ታመክርዎ፡ ለመንፈስ፡ ቅዱስ። ናሁኬ፡ እገሪሆሙ፡ ለእለ፡ ቀበርዎ፡ ለምትኪ፡ ኀበ፡ ኆኅት። ወእሙንቱ፡ ይወስዱኪ፡ ኪያኪኒ። ወተነፅኀት፡ ሶቤሃ፡ ታሕተ፡ እገሪሁ፡ ወሞተት። ወቦኡ፡ ወራዙት፡ ወረከብዋ፡ በድና። ወወሰድዋ፡ ወቀበርዋ፡ ኀበ፡ ምታ። ወኮነ፡ ዐቢይ፡ ግርማ፡ ወፈርሁ፡ ኵሎሙ፡ አብያተ፡ ክርስቲያናት። ወእለ፡ ሰምዕዎ፡ ለዝ፡ ነገር። ወበእደዊሆሙ፡ ለሐዋርያት፡ ይትገበር፡ ተኣምር። ወመንክር፡ ብዙኅ፡ በውስተ፡ ሕዝብ። ወሀለዉ፡ ኅቡረ፡ በቤተ፡ መቅደስ፡ ውስተ፡ ሕዋረ፡ ሰሎሞን። ወእምዝ፡ እንከ፡ አልቦ፡ ዘተኀበለ፡ ይስሐጦሙ። ዳእሙ፡ አክበርዎሙ፡ ሕዝብ፡ ወአዕበይዎሙ። ወብዙኃን፡ ይትዌሰኩ፡ እለ፡ የአምኑ፡ በእግዚእነ። ወብዙኃን፡ ዕደው፡ ወአንስት። በእንተ፡ ፈውሶቶሙ፡ ለድዉያን ወያመጽኡ፡ ድዉያነ፡ በዐራታት። ወያነብርዎሙ፡ ከመ፡ ይብጽሖሙ፡ ጽላሎቱ፡ ለጴጥሮስ፡ ሶበ፡ የኀልፍ። ወይትፌወሱ፡ እምደዌሆሙ። ወይመጽኡ፡ ብዙኃን፡ እምአህጉረ፡ አድያም፡ ዘኢየሩሳሌም። ወያመጽኡ፡ ድዉያነ፡ ወእለ፡ አጋንንት፡ እኩያን። ወየሐይዉ፡ ኵሎሙ። በእንተ፡ ቅንአት፡ ዘሊቃነ፡ ካህናት ወተንሥኡ፡ ሊቀ፡ ካህናት፡ ወእለ፡ ምስሌሁ፡ ወሕዝበ፡ ሰዱቃውያን። ወቀንኡ፡ ዲቤሆሙ። ወአኀዝዎሙ፡ ለሐዋርያት፡ ወአውዐልዎሙ፡ ሙዓለ፡ ውስተ፡ ቤተ፡ ሞቅሕ። ወመልአከ፡ እግዚአብሔር፡ አርኀወ፡ አናቅጸ፡ ቤተ፡ ሞቅሕ፡ በሌሊት፡ ወአውፅኦሙ። ወይብሎሙ፡ ሑሩ፡ ባኡ፡ ምኵራበ። ወመሀርዎሙ፡ ለሕዝብ፡ ዘንተ፡ ነገረ፡ ሕይወት። ወሰሚዖሙ፡ ዘንተ፡ ጌሡ፡ ነግሀ፡ በጽባሕ፡ ወቦኡ፡ ምኵራበ፡ ወመሀሩ። ወሊቃነ፡ ካህናትሰ፡ ወእለ፡ ምስሌሆሙ፡ አስተጋብኡ፡ ዐውዶሙ። ወኵሎ፡ ሊቃነ፡ ቤተ፡ እስራኤል። ወለአኩ፡ ቤተ፡ ሞቅሕ፡ ያምጽእዎሙ፡ ለሐዋርያት። ወበጽሑ፡ ወዓልያኒሆሙ፡ ወኀጥእዎሙ፡ ወተሰውጡ፡ ወነገርዎሙ። ወይቤልዎሙ፡ ረከብነ፡ ቤተ፡ ሞቅሕ፡ ንሡገ፡ ወቅቱረ። ወዝጉሐ፡ እንተ፡ ኵለሄ፡ ወሠገራት፡ የዐቅቡ፡ አናቅጺሁ። ወአርኂወነ፡ አልቦ፡ ዘረከብነ፡ በውስጥ። ወሰሚዖሙ፡ ዘንተ፡ ነገረ፡ ሊቃነ፡ ካህናት፡ ወመገብተ፡ ምኵራብ፡ ኀጥኡ፡ ዘይገብሩ። ወይቤሉ፡ ምንትኑ፡ እንጋ፡ ዝ፡ ነገር። ወመጽአ፡ አሐዱ፡ ወይቤሎሙ። ነዮሙ፡ እሙንቱ፡ ዕደው፡ እለ፡ ሞቃሕክምዎሙ። ውስተ፡ ምኵራብ፡ ይቀውሙ፡ ወይሜህሩ፡ ለሕዝብ። ወእምዝ፡ ሖረ፡ መጋቤ፡ ምኵራብ፡ ምስለ፡ ወዓልያኒሁ፡ ያምጽእዎሙ፡ እንዘ፡ ይዬውህዎሙ። እስመ፡ ይፈርህዎሙ፡ ለሕዝብ፡ ኢይውግርዎሙ። ወአምጽእዎሙ፡ ወአቀምዎሙ፡ ማእከለ፡ ዐውድ። ወሐተትዎሙ፡ ሊቃነ፡ ካህናት። ወይቤልዎሙ፡ አኮኑ፡ ከላእናክሙ፡ ከመ፡ ኢትምሀሩ፡ በስሙ፡ ለኢየሱስ፡ ወኢ፡ ለመኑሂ። ወናሁ፡ መላእክምዋ፡ ትምህርተክሙ፡ ለኢየሩሳሌም። ወትፈቅዱኑ፡ ታግብኡ፡ ላዕሌነ፡ ደሞ፡ ለዝ፡ ብእሲ። ወተሠጥዎሙ፡ ጴጥሮስ፡ ምስለ፡ ሐዋርያት፡ ወይቤሎሙ። ይኄይሰነ፡ ናድሉ፡ ለእግዚአብሔር፡ እምነ፡ አድልዎ፡ ለሰብእ። አምላከ፡ አበዊነ፡ አንሥኦ፡ ለኢየሱስ፡ ዘአንትሙ፡ ዐለውክምዎ። ወሰቀልክምዎ፡ ዲበ፡ ዕፅ፡ ወቀተልክምዎ። ኪያሁ፡ ረሰዮ፡ እግዚአብሔር፡ መልአከ፡ ሕይወት፡ ወአልዐሎ፡ በየማኑ። ወወሀቦሙ፡ ለእስራኤል፡ ንስሓ፡ ከመ፡ ይትኀደግ፡ ሎሙ፡ ኀጢአቶሙ። ወንሕነሰ፡ ሰማዕቱ፡ ለዝንቱ፡ ነገር። ወመንፈስ፡ ቅዱስ፡ ዘወሀቦሙ፡ እግዚአብሔር፡ ለእለ፡ የአምኑ፡ ቦቱ። ወሰሚዖሙ፡ ዘንተ፡ ተምዕዑ። ወሐቀዩ፡ ስነኒሆሙ፡ ወፈቀዱ፡ ይቅትልዎሙ። ወተንሥአ፡ አሐዱ፡ እምውስተ፡ ዐውድ። እምሕዝበ፡ ፈሪሳውያን፡ ዘስሙ፡ ገማልያል፡ መምህረ፡ ኦሪት። ወክቡር፡ ውእቱ፡ በኀበ፡ ኵሉ፡ ሕዝብ። ወአዘዘ፡ ያእትትዎሙ፡ ለሐዋርያት፡ ሕቀ፡ እምውስተ፡ ዐውድ። ወይቤሎሙ፡ አንትሙ፡ ሰብአ፡ እስራኤል፡ አድኅኑ፡ ርእሰክሙ። ወዑቁ፡ በእንተ፡ እሉ፡ ሰብእ፡ ዘከመ፡ ትገብሩ። ቀዲሙኒ፡ እምቅድመ፡ ዝ፡ መዋዕል፡ ተንሥአ፡ ቴዎዳስ፡ ዘግብጽ። ወአዕበየ፡ ርእሶ፡ ወተለውዎ፡ አርባዕቱ፡ ምእት፡ ሰብእ። ወጠፍአ፡ ውእቱኒ፡ ወኵሎሙ፡ እለ፡ አምኑ፡ ቦቱ፡ ተዘርዉ። ወኮኑ፡ ከመ፡ ዘኢተፈጥሩ። ወእምድኅሬሁ፡ ተንሥአ፡ ይሁዳ፡ ዘገሊላ። በመዋዕል፡ ዘተጽሕፉ፡ ሰብእ፡ በእንተ፡ ጸባሕት። ወተለውዎ፡ ብዙኃን፡ ሕዝብ፡ ወሞተ፡ ውእቱሂ። ወእለ፡ ተለውዎሂ፡ ተዘርዉ፡ ኵሎሙ። ወይእዜኒ፡ እብለክሙ፡ ኅድግዎሙ፡ ለእሉ፡ ሰብእ፡ ወኢትስሐጥዎሙ። ለእመሁ፡ ዘእምኀበ፡ ሰብእ፡ ዝ፡ ምክሮሙ፡ ወዝ፡ ግብሮሙ፡ የኀልፍ፡ ወይሰዐር። ወለእመ፡ እምኀበ፡ እግዚአብሔር፡ ኮነ፡ ኢትክሉ፡ አኅድጎቶሙ። ወከመ፡ ዘምስለ፡ እግዚአብሔር፡ ይትበአስ፡ ኢትኩኑ። ወኦሆ፡ አበሎሙ፡ ወጸውዕዎሙ፡ ለሐዋርያት። ወቀሠፍዎሙ፡ ወገሠጽዎሙ፡ ኢይንግሩ፡ እንከ፡ በስሙ፡ ለኢየሱስ፡ ወኀደግዎሙ። ወወፅኡ፡ እምዐውድ፡ እንዘ፡ ይትፌሥሑ። እስመ፡ ከፈሎሙ፡ መንፈስ፡ ቅዱስ፡ ከመ፡ ያኀስርዎሙ፡ በእንተ፡ ስሙ። ወኵሎ፡ አሚረ፡ ይፀመዱ፡ ትምህርተ፡ በቤተ፡ መቅደስ። ወውስተ፡ ቤትኒ፡ ኢኀደጉ፡ ነጊረ፡ በእንተ፡ እግዚእነ፡ ኢየሱስ፡ ክርስቶስ።

ምዕራፍ 6 በእንተ፡ ሢመተ፡ ዲያቆናት ወውእተ፡ አሚረ፡ በዝኁ፡ ሕዝብ። ወግእዝዎሙ፡ ለእለ፡ እምአረሚ፡ አርድእት፡ ለአይሁድ። እስመ፡ ይሬእይዎን፡ ለመበለታቲሆን፡ እንዘ፡ ኢይፀመዳ፡ ኵሎ፡ አሚረ፡ ወያሰትታ፡ ተልእኮቶን። ወጸውዕዎሙ፡ ዐሠርቱ፡ ወክልኤቱ፡ ለኵሉ፡ ሕዝብ፡ ወይቤልዎሙ። ኢይደልወነ፡ ከመ፡ ንኅድግ፡ ቃለ፡ እግዚአብሔር፡ ወንፀመድ፡ ማእዳተ። ኅረዩ፡ እምውስቴትክሙ፡ ሰብዐተ፡ ዕደወ፡ እለ፡ ምሉኣነ፡ መንፈሰ፡ ቅዱሰ፡ ወጥበበ። እለ፡ ንሠይም፡ ዲበ፡ ዝ፡ ግብር። ወንሕነሰ፡ ንፀመድ፡ ጸሎተ፡ ወመልእክተ፡ ቃሉ። ወኀብሩ፡ ኵሎሙ፡ ሕዝብ። ወሠናየ፡ ኮነ፡ ዝ፡ ነገር፡ በኀቤሆሙ። ወኀረዩ፡ እስጢፋኖስሃ፡ ብእሴ፡ ዘምሉእ፡ ሃይማኖተ፡ ወመንፈሰ፡ ቅዱሰ። ወፊልጶስ፡ ወጰርኮሮን፡ ወኒቃሮና፡ ወጢሞና፡ ወጳርሜና። ወኒቆላዎስ፡ ፈላሴ፡ ዘሀገረ፡ አንጾኪያ። ወአቀምዎሙ፡ ቅድመ፡ ሐዋርያት። ወጸለዩ፡ ወወደዩ፡ እደዊሆሙ፡ ላዕሌሆሙ። ወዐብየ፡ ቃለ፡ እግዚአብሔር፡ ወበዝኁ፡ ሕዝብ፡ በኢየሩሳሌም፡ ፈድፋደ። ወብዙኃን፡ እምውስተ፡ ካህናት፡ እለ፡ አምኑ። ዘከመ፡ ተቃወምዎ፡ አይሁድ፡ ለእስጢፋኖስ ወእስጢፋኖስ፡ ምሉአ፡ ጸጋ፡ እግዚአብሔር፡ ወኀይል። ወይገብር፡ ዐቢየ፡ ተኣምረ፡ ወመንክረ፡ በውስተ፡ ሕዝብ። ወቦ፡ እለ፡ ተንሥኡ፡ እምኵራብ። እንተ፡ ስማ፡ ሊቤርጢኖን፡ ወቀርኔዎን፡ ወእለክስንደሬዎን። ወእለሂ፡ እምቂልቅያ፡ ወእስያ። ወተኀሠሥዎ፡ ለእስጢፋኖስ፡ ወስእኑ፡ ተቃውሞቶ። እስመ፡ በጥበብ፡ ወበመንፈስ፡ ይትናገሮሙ። ወእምዝ፡ አቅጸሩ፡ ሎቱ፡ ዕደወ፡ ሰማዕተ፡ ሐሰት። ወመሀርዎሙ፡ ከመ፡ ይበሉ፡ ሰማዕናሁ፡ ለዝ፡ ብእሲ። እንዘ፡ ይነብብ፡ ነገረ፡ ፅርፈት፡ ላዕለ፡ ሙሴ፡ ወላዕለ፡ እግዚአብሔር። ወሆክዎሙ፡ ለሕዝብ፡ ወለረበናት፡ ወለጸሐፍት። ወሮድዎ፡ ወሰሐብዎ፡ ወተባጽሕዎ፡ ኀበ፡ ዐውድ። ወአቀሙ፡ ሎቱ፡ ሰማዕተ፡ ሐሰት፡ ወይቤሉ። ዝ፡ ብእሲ፡ አበየ፡ ያርምም። እንዘ፡ ይነብብ፡ ፅርፈተ፡ ዲበ፡ ቤተ፡ መቅደስ፡ ወዲበ፡ ኦሪት። ወሰማዕናሁ፡ እንዘ፡ ይብል፡ ኢየሱስ፡ ናዝራዊ፡ ይነሥቶ፡ ለቤተ፡ መቅደስ። ወይስዕር፡ ኦሪተክሙ፡ ዘወሀበክሙ፡ ሙሴ። ወነጸርዎ፡ ኵሎሙ፡ እለ፡ ይነብሩ፡ ዐውደ። ወርእዩ፡ ገጾ፡ ከመ፡ ገጸ፡ መልአከ፡ እግዚአብሔር።

ምዕራፍ 7 ነገር፡ ዘተናገረ፡ እስጢፋኖስ ወይቤሎ፡ ሊቀ፡ ካህናት፡ አማንኑ፡ ከመ፡ ዝ፡ ትቤ። ወይቤ፡ ስምዑ፡ አኀዊነ፡ ወአበዊነ። አምላከ፡ ስብሐት፡ አስተርአዮ፡ ለአቡነ፡ አብርሃም። እንዘ፡ ሀሎ፡ በማእከለ፡ አፍላግ፡ ዘሶርያ፡ ዘእንበለ፡ ይፍልስ፡ ካራን። ወይቤሎ፡ ፃእ፡ እምብሔርከ፡ ወተፈለጥ፡ እምአዝማዲከ። ወነዐ፡ ውስተ፡ ብሔር፡ ዘአነ፡ አርእየከ። ወእምዝ፡ ወፂኦ፡ እምከላውዴዎን፡ ነበረ፡ ውስተ፡ ካራን። ወእምዝ፡ መዊቶ፡ አቡሁ፡ አፍለሶ፡ ውስተ፡ ዛ፡ ምድር። ኀበ፡ ሀለውክሙ፡ አንትሙ፡ ይእዜ፡ ትነብሩ። ወኢወሀቦ፡ በውስቴታ፡ ርስቶ። ወኢ፡ መጠነ፡ ምክያደ፡ እግር፡ ወኢ፡ ምሥጋረ፡ እግር። ወባሕቱ፡ አሰፈዎ፡ ከመ፡ ይኰንና፡ ውእቱ፡ ወዘርዑ፡ እምድኅሬሁ። እንዘ፡ አልቦ፡ ውሉድ፡ ይእተ፡ አሚረ። ወከመ፡ ዝ፡ ይቤሎ፡ እግዚአብሔር። ሀለዉ፡ ደቂቅከ፡ ይነብሩ፡ ፈላስያነ፡ ብሔረ፡ ነኪር። ወይቀንይዎሙ፡ ግብጽ፡ ወያሐምምዎሙ፡ አርባዕተ፡ ምእተ፡ ዓመተ። ወለሕዝብሰ፡ እለ፡ ይቀንይዎሙ፡ አነ፡ እኴንኖሙ፡ ይቤ፡ እግዚአብሔር። ወእምዝ፡ ይወፅኡ፡ ዝየ፡ ወያመልኩኒ፡ በዝ፡ ብሔር። ወወሀቦ፡ ሥርዐተ፡ ግዝረት። ወእምዝ፡ ወለዶ፡ ለይስሐቅ፡ ወገዘሮ፡ አመ፡ ሳምንት፡ ዕለት። ወከማሁ፡ ይስሐቅኒ፡ ለያዕቆብ፡ ወያዕቆብኒ፡ ለዐሠርቱ፡ ወክልኤቱ፡ አበው፡ ቀደምት። በእንተ፡ ዮሴፍ ወአበዊነሂ፡ ቀደምት፡ ቀንኡ፡ ላዕለ፡ ዮሴፍ። ወሤጥዎ፡ ለብሔረ፡ ግብጽ። ወሀሎ፡ እግዚአብሔር፡ ምስሌሁ፡ ወአድኀኖ፡ እምኵሉ፡ ምንዳቤሁ። ወወሀቦ፡ ሞገሰ፡ ወጥበበ፡ በቅድመ፡ ፈርዖን፡ ንጉሠ፡ ግብጽ። ወሤሞ፡ ላዕለ፡ ኵሉ፡ ግብጽ፡ ወአመገቦ፡ ላዕለ፡ ኵሉ፡ ቤቱ። ወመጽአ፡ ረኃብ፡ ለብሔረ፡ ግብጽ፡ ወበከነዓን፡ ዐቢይ፡ ሕማም። ወኀጥኡ፡ ዘይሴሰዩ፡ አበዊነ። ወሰምዐ፡ ያዕቆብ፡ ከመ፡ ቦ፡ እክል፡ በብሔረ፡ ግብጽ። ወፈነዎሙ፡ ለአበዊነ፡ ቅድመ። ወሶበ፡ ገብኡ፡ ዳግመ፡ ለግብጽ፡ አፍለጦሙ፡ በነፍስቱ፡ ዮሴፍ፡ ለአኀዊሁ። ወአእመሮሙ፡ ፈርዖንሂ፡ ለአዝማደ፡ ዮሴፍ። ወለአከ፡ ዮሴፍ፡ ወጸውዖሙ፡ ለአቡሁ፡ ወለኵሎሙ፡ አዝማዲሁ። ወኮነ፡ ፍቅዶሙ፡ ሰብዓ፡ ወኀምስቱ፡ ነፍስ። በእንተ፡ ርደተ፡ ያዕቆብ፡ ውስተ፡ ግብጽ ወወረደ፡ ያዕቆብ፡ ብሔረ፡ ግብጽ፡ ወሞተ፡ ውእቱ፡ ወአበዊነሂ። ወአፍለስዎ፡ ኀበ፡ ሴኬም፡ ወተቀብረ፡ ውስተ፡ መቃብር። ዘተሣየጦ፡ አብርሃም፡ በወርቁ፡ እምኀበ፡ ደቂቀ፡ ኤሞር፡ በሴኬም። ወአመ፡ በጽሐ፡ ዕድሜሁ፡ ዘአሰፈዎ፡ እግዚአብሔር፡ ለአብርሃም፡ በመሐላ። በዝኁ፡ ሕዝብ፡ ወመልኡ፡ ብሔረ፡ ግብጽ። እስከ፡ አመ፡ ነግሠ፡ ካልእ፡ ንጉሥ፡ ለብሔረ፡ ግብጽ፡ ዘኢየአምሮ፡ ለዮሴፍ። ወውእቱ፡ ተጠቢቦ፡ አሕመሞሙ፡ ለአበዊነ። ወአዘዘ፡ ይቅትሉ፡ ኵሎ፡ ዕጓለ፡ ተባዕተ። በእንተ፡ ሙሴ ወውእተ፡ አሚረ፡ ተወልደ፡ ሙሴ፡ ወኮነ፡ ሠናየ፡ በቅድመ፡ እግዚአብሔር። ወሐፀንዎ፡ ሠለስተ፡ አውራኀ፡ በቤተ፡ አቡሁ። ወእምዝ፡ ገደፍዎ፡ ውስተ፡ ባሕር። ወአንሥአቶ፡ ወለተ፡ ፈርዖን፡ ወሐፀነቶ፡ ወረሰየቶ፡ ወልደ። ወተምህረ፡ ሙሴ፡ ተግሣጸ፡ ወኵሎ፡ ጥበበ፡ ግብጽ። ወኮነ፡ ጽኑዐ፡ በቃሉ፡ ወበምግባሩ። በእንተ፡ ዘከመ፡ ሐወጾሙ፡ ሙሴ፡ ለአኀዊሁ ወአመ፡ ተፈጸመ፡ አርብዓ፡ ዓመት። ኀለየ፡ በልቡ፡ የሐውጾሙ፡ ለአኀዊሁ፡ ደቂቀ፡ እስራኤል። ወረከበ፡ አሐደ፡ እምውስቴቶሙ፡ እንዘ፡ ይገፍዖ፡ ለካልኡ። ወተበቀለ፡ ሎቱ፡ ለውእቱ፡ ዘተገፍዐ። ወመሰሎ፡ ዘየአምሩ፡ አኀዊሁ። ከመ፡ በእዴሁ፡ ይሁቦሙ፡ እግዚአብሔር፡ መድኀኒተ። ወእሙንቱሰ፡ ኢለበዉ። ወበሳኒታ፡ ረከበ፡ ክልኤተ፡ እምውስቴቶሙ፡ እንዘ፡ ይትበአሱ። ወፈቀደ፡ ይዕርቆሙ፡ ወይቤሎሙ። ናሁ፡ አንትሙሰ፡ አኀው፡ አንትሙ፡ ለምንት፡ ትትዔመፁ፡ በበይናቲክሙ። ወይቤሎ፡ ዝኩ፡ ዘይዔምፆ፡ ለካልኡ። መኑ፡ ሤመከ፡ መልአከ፡ ወመኰንነ፡ ላዕሌነ። ወሚመ፡ ትፈቅድኑ፡ ትቅትለኒ፡ ኪያየኒ። በከመ፡ ቀተልኮ፡ ትማልም፡ ለግብጻዊ። ወበእንተዝ፡ ነገር፡ ተኀጥአ፡ ሙሴ። ወነበረ፡ ፈላሴ፡ ብሔረ፡ ምድያም። ወወለደ፡ በህየ፡ ክልኤተ፡ ደቂቀ። በእንተ፡ ነጽሮተ፡ ሙሴ፡ መልአከ፡ እግዚአብሔር ወተፈጺሞ፡ አርብዓ፡ ዓመት። አስተርአዮ፡ በገዳም፡ በደብረ፡ ሲና፡ መልአከ፡ እግዚአብሔር፡ በነደ፡ እሳት። ወርእዮ፡ ሙሴ፡ አንከረ፡ ግርማሁ፡ ወቀርበ፡ ይጠይቆ። ወነበቦ፡ እግዚአብሔር፡ ወይቤሎ። አነ፡ ውእቱ፡ እግዚአብሔር፡ አምላከ፡ አበዊከ። አምላከ፡ አብርሃም፡ ወአምላከ፡ ይስሐቅ፡ ወአምላከ፡ ያዕቆብ። ወርዕደ፡ ሙሴ፡ ወስእነ፡ ጠይቆ። ወይቤሎ፡ እግዚአብሔር፡ ፍታሕ፡ አሣእኒከ፡ እምእገሪከ። እስመ፡ ምድር፡ ኀበ፡ ትከይድ፡ ቅድስት፡ ይእቲ። ርእየ፡ ርኢኩ፡ ሕማሞሙ፡ ለሕዝብየ። ወሰማዕኩ፡ ገዓሮሙ፡ ወወረድኩ፡ አድኅኖሙ። ወይእዜኒ፡ ነዐ፡ እፈኑከ፡ ብሔረ፡ ግብጽ። በእንተ፡ ተፈንዎተ፡ ሙሴ፡ ኀበ፡ ግብጽ ለውእቱ፡ ሙሴ፡ ዘክሕድዎ፡ ወይቤልዎ። መኑ፡ ሤመከ፡ መልአከ፡ ወመኰንነ፡ ላዕሌነ። ኪያሁ፡ ፈነወ፡ እግዚአብሔር፡ መልአከ፡ ወመድኅነ። በእደ፡ መልአኩ፡ ዘአስተርአዮ፡ በኀበ፡ ዕፀ፡ ጳጦስ። ወውእቱ፡ አውፅኦሙ፡ እንዘ፡ ይገብር፡ ተኣምረ፡ ወመንክረ። በምድረ፡ ግብጽ፡ ወበባሕረ፡ ኤርትራ፡ ወበገዳም፡ አርብዓ፡ ዓመተ። ወውእቱ፡ ሙሴ፡ ይቤሎሙ፡ ለደቂቀ፡ እስራኤል። ነቢየ፡ ያነሥእ፡ ለክሙ፡ እግዚአብሔር፡ እምአኀዊክሙ፡ ዘከማየ። ወሎቱ፡ ስምዕዎ። ውእቱኬ፡ ዘዐቀበ፡ ተዐይኒሆሙ፡ በገዳም። ምስለ፡ ውእቱ፡ መልአክ፡ ዘተናገሮ፡ በደብረ፡ ሲና፡ ወዘተናገሮሙ፡ ለአበዊነ። ወውእቱ፡ ዘተመጠወ፡ ቃለ፡ ሕይወት፡ ከመ፡ የሀበነ። ወአበዩ፡ አበዊነ፡ ተአዝዞ፡ ሎቱ። ወዐለዉ፡ ወሜጡ፡ ልቦሙ፡ ብሔረ፡ ግብጽ። ወይቤልዎ፡ ለአሮን፡ ግበር፡ ለነ፡ አማልክተ። እለ፡ የሐውሩ፡ ቅድሜነ፡ ወዘይጸብአ፡ ፀረነ። እስመ፡ ዝኩ፡ ሙሴ፡ ዘአውፅአነ፡ እምድረ፡ ግብጽ፡ ኢነአምር፡ ምንተ፡ ኮነ። ወገብሩ፡ ላሕመ፡ ውእተ፡ አሚረ። ወአዕረጉ፡ መሥዋዕተ፡ ለጣዖት። ወተፈሥሑ፡ በግብረ፡ እደዊሆሙ። ወተመይጠ፡ እግዚአብሔር፡ ወኀደጎሙ፡ ያምልኩ፡ ኮከበ፡ ሰማይ። በከመ፡ ይብል፡ መጽሐፈ፡ ነቢያት። ቦኑ፡ መሥዋዕተ፡ ወቊርባነ። ዘአባእክሙ፡ ሊተ፡ አርብዓ፡ ዓመተ፡ በገዳም፡ ኦ፡ ቤተ፡ እስራኤል። አላ፡ ነሣእክሙ፡ ደብተራ፡ ሞሎክ። ወኮከበ፡ አምለክሙ፡ ዘስሙ፡ ሬፋን። ወገበርክሙ፡ አምሳሊሁ፡ ከመ፡ ትስግዱ፡ ሎቱ። ወአፍለሰክሙ፡ ውስተ፡ ባቢሎን። በእንተ፡ ደበተራ፡ ስምዕ ወደብተራ፡ ስምዕ፡ እንተ፡ ነበረት፡ በገዳም። በከመ፡ አዘዞ፡ ለሙሴ፡ ዘተናገሮ፡ ይግበራ፡ በአርአያ፡ ዘአርአዮ። ወአብእዋ፡ ምስሌሆሙ። ሶበ፡ ተመጠውዋ፡ አበዊነ፡ ወኢያሱ፡ ውስተ፡ በሓውርተ፡ አሕዛብ። እለ፡ አውፅኦሙ፡ እግዚአብሔር፡ እምቅድመ፡ ገጾሙ፡ ለአበዊነ። እስከ፡ አመ፡ መዋዕለ፡ ዳዊት። ዘረከበ፡ ሞገሰ፡ በቅድመ፡ እግዚአብሔር። ወሰአለ፡ ይርከብ፡ ማኅደሮ፡ ለአምላከ፡ ያዕቆብ። ወዳእሙ፡ ሰሎሞን፡ ሐነጸ፡ ሎቱ፡ ቤተ። ወአኮሰ፡ ዘየኀድር፡ ልዑል፡ ውስተ፡ ግብረ፡ እደ፡ ሰብእ። እስመ፡ ከመ፡ ዝ፡ ይቤ፡ ነቢይ። ሰማይኒ፡ መንበርየ፡ ወምድርኒ፡ መከየደ፡ እገርየ። አየኑ፡ ቤተ፡ ተሐንጹ፡ ሊተ፡ ይቤ፡ እግዚአብሔር። ወአይኑ፡ መካን፡ ውእቱ፡ መካነ፡ ምዕራፍየ። አኮኑ፡ እደውየ፡ ገብራ፡ ዘ፡ ኵሎ። በእንተ፡ ፍጻሜ፡ ነገሩ፡ ለእስጢፋኖስ፡ ወበእንተ፡ ቅትለቱ ኦ፡ ጽኑዓነ፡ ክሳድ፡ ወጽሉላነ፡ ልብ፡ ወጽሙማነ፡ እዝን። እለ፡ ዘልፈ፡ ታምዕዕዎ፡ መንፈስ፡ ቅዱስ፡ ከመ፡ አበዊክሙ፡ አንትሙሂ። መኑ፡ እምነቢያት፡ ዘኢሰደድዎ፡ ወኢቀተልዎ፡ አበዊክሙ። ወቀተልዎሙ፡ ለእለ፡ አቅደሙ። ወዜነውዎሙ፡ በእንተ፡ ምጽአቱ፡ ለጻድቅ። ዘአንትሙ፡ ዐለውክምዎ፡ ወቀተልክምዎ። ወነሢአክሙ፡ ኦሪት፡ በሥርዐተ፡ መላእክት፡ ኢዐቀብክሙ። ወዘንተ፡ ሰሚዖሙ፡ ተምዕዑ፡ ወአብደ፡ ልቦሙ። ወሐቀዩ፡ ስነኒሆሙ፡ ላዕሌሁ። ወመልአ፡ መንፈስ፡ ቅዱስ፡ ላዕለ፡ እስጢፋኖስ። ወነጸረ፡ ሰማየ፡ ርኅወ፡ ወርእየ፡ ስብሐተ፡ እግዚአብሔር። ወኢየሱስ፡ ይቀውም፡ በየማነ፡ እግዚአብሔር። ወይቤ፡ ናሁ፡ እሬኢ፡ ተርኅወ፡ ሰማይ። ወወልደ፡ ዕጓለ፡ እመሕያው፡ ይቀውም፡ በየማነ፡ እግዚአብሔር። ወከልሑ፡ በዐቢይ፡ ቃል፡ ወከደኑ፡ እዘኒሆሙ። ወሮድዎ፡ ኅቡረ፡ ወሰሐብዎ። ወአውፅእዎ፡ አፍኣ፡ እምሀገር፡ ወወገርዎ። ወእለሰ፡ ቀተልዎ፡ አዕቀቡ፡ አልባሲሆሙ። ወአንበሩ፡ ኀበ፡ እገሪሁ፡ ለወሬዛ፡ ወልድ፡ ዘስሙ፡ ሳውል። ወወገርዎ፡ ለእስጢፋኖስ፡ እንዘ፡ ይጼሊ፡ ወይብል። ኦ፡ እግዚእየ፡ ኢየሱስ፡ ተመጠዋ፡ ለነፍስየ። ወሶበ፡ ሰገደ፡ ከልሐ፡ በዐቢይ፡ ቃል፡ ወይቤ። እግዚኦ፡ ስረይ፡ ሎሙ፡ ዘንተ፡ ኀጢአቶሙ። ወኢትረሲ፡ ቦሙ፡ ጌጋየ። ወዘንተ፡ ብሂሎ፡ ኖመ። ወሳውልኒ፡ ኮነ፡ ኅቡረ፡ ውእቱ፡ ውስተ፡ ቀቲለ፡ ዚኣሁ።

ምዕራፍ 8 በእንተ፡ ምንዳቤ፡ ወሁከት፡ ዘበጽሐ፡ በቤተ፡ ክርስቲያን ወውእተ፡ አሚረ፡ ኮነ፡ ዐቢይ፡ ምንዳቤ፡ ወሁከት፡ በቤተ፡ ክርስቲያን፡ ዘኢየሩሳሌም። ወተዘርዉ፡ ኵሎሙ፡ ውስተ፡ ኵሉ፡ በሓውርተ፡ ይሁዳ፡ ወሰማርያ፡ ወገሊላ። ዘእንበለ፡ ሐዋርያት፡ ባሕቲቶሙ፡ ዘነበሩ፡ በኢየሩሳሌም። ወለእስጢፋኖስሰ፡ ነሥእዎ፡ ዕደው፡ ጻድቃን። ወቀበርዎ፡ ወለሐውዎ፡ ዐቢየ፡ ላሐ። በእንተ፡ ሳውል ወሳውልሰ፡ ዓዲሁ፡ ይትቄየም፡ አብያተ፡ ክርስቲያናት። ወይደቢ፡ አብያተ፡ ሰብእ። ወይስሕብ፡ ዕደወ፡ ወአንስተ፡ ወይሞቅሕ። ወእለ፡ ተዘርዉ፡ አንሶሰዉ። ወመሀሩ፡ ወሰበኩ፡ ቃለ፡ እግዚአብሔር። በእንተ፡ ፊልጶስ ወወረደ፡ ፊልጶስ፡ ሀገረ፡ ሰማርያ። ወሰበከ፡ ሎሙ፡ በእንተ፡ ክርስቶስ። ወአጽምዕዎ፡ ሕዝብ፡ ዘይነግሮሙ፡ ፊልጶስ። ወሰምዕዎ፡ ኅቡረ፡ ወያነክሩ፡ ወይሬእዩ፡ ተኣምረ፡ ወመንክረ፡ ዘይገብር። ወብዙኃን፡ አጋንንት፡ እኩያን፡ ይኬልሑ፡ በዐቢይ፡ ቃል። ወይወፅኡ፡ ወብዙኃን፡ ፅዉሳን፡ ወሐንካሳን፡ የሐይዉ። ወኮነ፡ ዐቢይ፡ ፍሥሓ፡ በይእቲ፡ ሀገር። በእንተ፡ ሲሞን፡ መሠርይ ወሀሎ፡ አሐዱ፡ ብእሲ፡ በይእቲ፡ ሀገር፡ ዘስሙ፡ ሲሞን። ወያስሕቶሙ፡ ለሕዝበ፡ ሰማርያ፡ ዘሥራይ፡ ብእሲሁ። ወይሬሲ፡ ርእሶ፡ ዐቢየ። ወይትአመንዎ፡ ንኡሶሙ፡ ወዐቢዮሙ፡ ወይብሉ። ዝ፡ ውእቱ፡ ኀይለ፡ እግዚአብሔር፡ ዐቢይ። ወያጸምእዎ፡ እስመ፡ ጕንዱይ፡ መዋዕል። እምዘአስሐቶሙ፡ በሥራዩ። ወሶበ፡ አምንዎ፡ ለፊልጶስ፡ ዘሰበከ፡ ሎሙ። በእንተ፡ መንግሥተ፡ እግዚአብሔር፡ ወበስመ፡ ኢየሱስ፡ ክርስቶስ። ዕድ፡ ወአንስት፡ ተጠምቁ። ወሲሞንሂ፡ አምነ፡ ወተጠምቀ፡ ወነበረ፡ ይፀመዶ፡ ለፊልጶስ። እስመ፡ ይሬኢ፡ ተኣምረ፡ ወመንክረ፡ ዘይከውን፡ በእደዊሁ። ወያነክር፡ ወይዴመም። በእንተ፡ ተፈንዎተ፡ ጴጥሮስ፡ ወዮሐንስ፡ ኀበ፡ ሰማርያ ወሶበ፡ ሰምዑ፡ ሐዋርያት፡ እለ፡ ሀለዉ፡ ኢየሩሳሌም። ከመ፡ ተወክፉ፡ ሰብአ፡ ሰማርያ፡ ቃለ፡ እግዚአብሔር። ፈነዉ፡ ኀቤሆሙ፡ ጴጥሮስሃ፡ ወዮሐንስሃ። ወወረዱ፡ ወጸለዩ፡ ላዕሌሆሙ፡ ከመ፡ ይንሥኡ፡ መንፈሰ፡ ቅዱሰ። እስመ፡ ዓዲሁ፡ ኢወረደ፡ ወኢ፡ ዲበ፡ አሐዱሂ፡ እምውስቴቶሙ። ዳእሙ፡ ተጠምቁ፡ በስሙ፡ ለእግዚእ፡ ኢየሱስ። ወእምዝ፡ ወደዩ፡ እደዊሆሙ፡ ላዕሌሆሙ። ወነሥኡ፡ መንፈሰ፡ ቅዱሰ። ወሶበ፡ ርእየ፡ ሲሞን፡ ከመ፡ ኀበ፡ ወደዩ፡ እደዊሆሙ፡ ሐዋርያት። ይወርድ፡ መንፈስ፡ ቅዱስ፡ አምጽአ፡ ሎሙ፡ ንዋየ። ወይብሎሙ፡ አብሑኒ፡ ሊተኒ፡ ወሀቡኒ። ከመ፡ ኀበ፡ ወደይኩ፡ እዴየ፡ ይረድ፡ መንፈስ፡ ቅዱስ። ወይቤሎ፡ ጴጥሮስ፡ ወርቅከሰ፡ ወብሩርከ፡ ምስሌከ፡ ለይኩንከ፡ ለሕርትምና። ይመስለከኑ፡ ዘበወርቅ፡ ትሣየጦ፡ ለጸጋ፡ እግዚአብሔር። አልብከ፡ መክፈልት፡ ወርስት፡ ውስተ፡ ዝ፡ ነገር። እስመ፡ ኢኮነ፡ ርቱዐ፡ ልብከ፡ በቅድመ፡ እግዚአብሔር። ነስሕ፡ ይእዜኒ፡ እምእከይከ፡ ወተጋነይ፡ ለእግዚአብሔር። ለእመ፡ የኀድግ፡ ለከ፡ እከየ፡ ልብከ። እስመ፡ ከመ፡ ሕምዝ፡ መሪር፡ እሬእየከ። ወውስተ፡ ማእሰረ፡ ዐመፃ፡ ሀሎከ። ወተሰጥዎሙ፡ ሲሞን፡ ወይቤሎሙ። ሰአሉ፡ ሊተ፡ አንትሙ፡ ኀበ፡ እግዚአብሔር። ከመ፡ ኢይብጽሐኒ፡ ወኢምንትኒ፡ እምዘትቤሉኒ። ወእሙንቱሰ፡ ሶበ፡ ነገሩ፡ ወአስምዑ፡ ቃለ፡ እግዚአብሔር፡ ተሰውጡ፡ ኢየሩሳሌም። ወመሀሩ፡ ቃለ፡ እግዚአብሔር፡ ውስተ፡ ብዙኃት፡ አህጉረ፡ ሰማርያ። በእንተ፡ ፊልጶስ፡ ወብእሲ፡ ኢትዮጵያዊ ወነበቦ፡ መልአከ፡ እግዚአብሔር፡ ለፊልጶስ፡ ወይቤሎ። ተንሥእ፡ ወሑር፡ ጊዜ፡ ቀትር፡ ፍኖተ፡ በድወ፡ ዘያወርድ፡ እምኢየሩሳሌም፡ ለጋዛ። ወተንሥአ፡ ወሖረ፡ ወረከበ፡ ብእሴ፡ እምሰብአ፡ ኢትዮጵያ። ኅጽዋ፡ ለህንደኬ፡ ንግሥተ፡ ኢትዮጵያ። ወመጋቢሃ፡ ውእቱ፡ ላዕለ፡ ኵሉ፡ መዛግብቲሃ። ወሖረ፡ ኢየሩሳሌም፡ ይስግድ። ወእንዘ፡ ይገብእ፡ ነበረ፡ ዲበ፡ ሠረገላሁ። ወያነብብ፡ መጽሐፈ፡ ኢሳይያስ፡ ነቢይ። ወይቤሎ፡ መንፈስ፡ ቅዱስ፡ ለፊልጶስ። ሑር፡ ትልዎ፡ ለዝ፡ ሠረገላ። ወሮጸ፡ ፊልጶስ፡ ወበጽሐ። ወሰምዖ፡ ያነብብ፡ መጽሐፈ፡ ኢሳይያስ፡ ነቢይ። ወይቤሎ፡ ፊልጶስ፡ ተአምሩኑ፡ እንከ፡ ዘታነብብ። ወይቤሎ፡ ኅጽው፡ በአይቴ፡ አአምር፡ ለእመ፡ አልቦ፡ ዘመሀረኒ። ወአስተብቊዖ፡ ለፊልጶስ፡ ከመ፡ ይዕርግ፡ ወይንበር፡ ኅቡረ፡ ምስሌሁ። ወነገረ፡ መጽሐፍሰ፡ ኀበ፡ ያነብብ፡ ከመ፡ ዝ፡ ይብል። መጽአ፡ ከመ፡ በግዕ፡ ይጠባሕ። ወከመ፡ በግዕ፡ ዘኢይነብብ፡ በቅድመ፡ ዘይቀርፆ። ከማሁ፡ ኢከሠተ፡ አፉሁ፡ በሕማሙ። ወተንሥአ፡ እምኵነኔ፡ ወእምነ፡ ሞቅሕ። ወመኑ፡ ይነግር፡ ልደቶ፡ እስመ፡ ተአተተ፡ እምድር፡ ሕይወቱ። ወተመይጠ፡ ኀበ፡ ፊልጶስ፡ ውእቱ፡ ኅጽው፡ ወይቤሎ። ብቊዐኒ፡ ወንግረኒ፡ በእንተ፡ መኑ፡ ይብል፡ ነቢይ፡ ከመ፡ ዝ። በእንተ፡ ርእሱኑ፡ ወሚመ፡ በእንተ፡ ካልእ። ወከሠተ፡ አፉሁ፡ ፊልጶስ፡ ወአኀዘ፡ ይምሀሮ፡ በእንተ፡ ኢየሱስ። ወይፈክር፡ ሎቱ፡ በውእቱ፡ መጽሐፍ። ወእንዘ፡ የሐውሩ፡ በጽሑ፡ ኀበ፡ ማይ። ወይቤሎ፡ ውእቱ፡ ኅጽው። ነዋ፡ ማይ፡ ወመኑ፡ ይከልአኒ፡ ተጠምቆ። ወይቤሎ፡ ፊልጶስ፡ ይደልወከ፡ ከመ፡ ትእመን፡ በኵሉ፡ ልቡናከ። ወተመይጠ፡ ወይቤ። አነ፡ አአምን፡ ከመ፡ ኢየሱስ፡ ክርስቶስ፡ ውእቱ፡ ወልዱ፡ ለእግዚአብሔር። ወአዘዘ፡ ያቅሙ፡ ሠረገላሁ። ወአቀሙ፡ ወወረዱ፡ ኅቡረ፡ ኀበ፡ ማይ፡ ፊልጶስ፡ ወውእቱ፡ ኅጽው፡ ወአጥመቆ። ወወፂኦ፡ እማይ፡ መንፈሰ፡ እግዚአብሔር። መሠጦ፡ ለፊልጶስ፡ ወኢርእዮ፡ እንከ፡ ውእቱ፡ ኅጽው። ወአተወ፡ ብሔሮ፡ እንዘ፡ ይትፌሣሕ። ወበጽሐ፡ ፊልጶስ፡ ሀገረ፡ አዛጦን። ወአንሶሰወ፡ ወመሀረ፡ በኵሉ፡ አህጉር፡ እስከ፡ በጽሐ፡ ቂሳርያ።

ምዕራፍ 9 በእንተ፡ መባሕት፡ ዘኮነት፡ ለሳውል ወሳውልሰ፡ ዓዲሁ፡ ይትቄየም፡ አብያተ፡ ክርስቲያናት። ወይቀትሎሙ፡ ለአርዳአ፡ እግዚእነ። ወሖረ፡ ኀበ፡ ሊቀ፡ ካህናት። ወሰአለ፡ በኀቤሁ፡ መጽሐፈ፡ መባሕት፡ ለሀገረ፡ ደማስቆ፡ ወለመኳርብት። ለእመ፡ ቦ፡ ዘይረክብ፡ በፍኖት፡ ዕደወ፡ ወአንስተ። ከመ፡ ያእትዎሙ፡ ኢየሩሳሌም፡ ሙቁሓኒሆሙ። በእንተ፡ ጽዋዔሁ፡ ለሳውል ወእንዘ፡ የሐውር፡ ሶበ፡ አልጸቀ፡ ለሀገረ፡ ደማስቆ፡ ግብተ። በረቀ፡ መብረቅ፡ እምሰማይ፡ ላዕሌሁ። ወወድቀ፡ ውስተ፡ ምድር፡ ወሰምዐ፡ ቃለ፡ ዘይቤሎ። ሳውል፡ ሳውል፡ ለምንት፡ ትሰድደኒ። ይብእሰከ፡ ረጊፅ፡ ውስተ፡ ቀኖት፡ በሊሕ። ወይቤሎ፡ መኑ፡ አንተ፡ እግዚኦ። ወይቤሎ፡ አነ፡ ወእቱ፡ ኢየሱስ፡ ናዝራዊ፡ ዘአንተ፡ ትሰድደኒ። ወይቤሎ፡ እግዚኦ፡ ምንተኑ፡ ትፈቅድ፡ እግበር፡ አነ። ወይቤሎ፡ እግዚእ፡ ተንሥእ፡ ወባእ፡ ሀገረ። ወበህየ፡ ይነግሩከ፡ ዘይደልወከ፡ ትግበር። ወሰብእሰ፡ እለ፡ ምስሌሁ፡ ቆሙ፡ ያጸምኡ፡ ነገሮ። ወአልቦ፡ ዘይሬእዩ። ወተንሥአ፡ ሳውል፡ እምድር። ወእንዘ፡ ክሡታት፡ አዕይንቲሁ፡ አልቦ፡ ዘይሬኢ። ወእንዘ፡ ይመርሕዎ፡ አብእዎ፡ ደማስቆ። ወነበረ፡ ህየ፡ ሠሉሰ፡ ዕለተ፡ እንዘ፡ ኢይሬኢ፡ ወኢይበልዕ፡ ወኢይሰቲ። በእንተ፡ ሐናንያ ወሀሎ፡ አሐዱ፡ ብእሲ፡ በሀገረ፡ ደማስቆ፡ ዘእምውስተ፡ አርድእት፡ ዘስሙ፡ ሐናንያ። ወአስተርአዮ፡ እግዚእነ፡ በራእይ፡ ወይቤሎ፡ ሐናንያ። ወይቤ፡ ነየ፡ እግዚኦ። ወይቤሎ፡ እግዚእነ፡ ተንሥእ፡ ወሑር፡ ሰኰተ፡ እንተ፡ ይብልዋ፡ ርትዕት። ወኅሥሥ፡ በቤተ፡ ይሁዳ፡ ዘስሙ፡ ሳውል፡ ዘሀገረ፡ ጠርሴስ። እስመ፡ ውእቱ፡ ናሁ፡ ይጼሊ። ወእንዘ፡ ይጼሊ፡ ሳውል፡ አስተርአዮ፡ ብእሲ፡ በአምሳለ፡ ሐናንያ። ቦአ፡ ኀቤሁ፡ ወወደየ፡ እዴሁ፡ ዲቤሁ፡ ከመ፡ ይርአይ። ወአውሥአ፡ ሐናንያ፡ ወይቤ። እግዚኦ፡ ሰማዕኩ፡ በእንተ፡ ውእቱ፡ ብእሲ፡ በኀበ፡ ብዙኃን። ኵሎ፡ ዘይገብር፡ እኩየ፡ ዲበ፡ ቅዱሳኒከ፡ በኢየሩሳሌም። ወዝየኒ፡ አስተበዊሖ፡ በኀበ፡ ሊቀ፡ ካህናት። መጽአ፡ ከመ፡ ይሞቅሖሙ፡ ለኵሎሙ፡ እለ፡ ይጼውዑ፡ ስመከ። ወይቤሎ፡ እግዚእነ፡ ተንሥእ፡ ወሑር። እስመ፡ ንዋየ፡ ኅሩየ፡ ረሰይክዎ፡ ሊተ። ከመ፡ ይጹር፡ ስምየ፡ በቅድመ፡ አሕዛብ፡ ወነገሥት፡ ወደቂቀ፡ እስራኤል። ወአነ፡ አርእዮ፡ መጠነ፡ ሀለዎ፡ ይሕምም፡ በእንተ፡ ስምየ። በእንተ፡ ድኅነተ፡ ሳውል፡ ወስብከቱ ወሶቤሃ፡ ሖረ፡ ሐናንያ፡ ወቦአ፡ ቤቶ፡ ወወደየ፡ እዴሁ፡ ዲቤሁ፡ ወይቤሎ። ሳውል፡ እኁየ፡ እግዚእነ፡ ኢየሱስ፡ ክርስቶስ፡ ፈነወኒ፡ ኀቤከ። ዘአስተርአየከ፡ በፍኖት፡ እንዘ፡ ትመጽእ፡ ከመ፡ ትርአይ። ወይምላእ፡ መንፈስ፡ ቅዱስ፡ ላዕሌከ። ወሶቤሃ፡ ተሥዕዐ፡ እምአዕይንቲሁ፡ ከመ፡ ዘሣሬት። ወተከሥታ፡ አዕይንቲሁ፡ ወርእየ፡ ሶቤሃ። ወተንሥአ፡ ወተጠምቀ፡ ወበልዐ፡ እክለ። ወጸንዐ፡ ወነበረ፡ ደማስቆ፡ ኅዳጠ፡ መዋዕለ፡ ምስለ፡ አርድእት። ወሰበከ፡ በጊዜሃ፡ በምኵራባት። ወመሀረ፡ በእንተ፡ ኢየሱስ፡ ክርስቶስ፡ እንዘ፡ ይብል። ውእቱ፡ ወልደ፡ እግዚአብሔር። ወአንከሩ፡ ኵሎሙ፡ እለ፡ ሰምዑ፡ ወይቤሉ፡ አኮኑ፡ ዝንቱ፡ ዘኮነ፡ ይሰድዶሙ፡ ለእለ፡ ይሰምዩ፡ ዘንተ፡ ስመ፡ በኢየሩሳሌም፡ ወዝየኒ፡ በእንተዝ፡ መጽአ፡ ከመ፡ ይሞቅሖሙ፡ ወይሰዶሙ፡ ኀበ፡ ሊቃነ፡ ካህናት። ወሳውልሰ፡ ፈድፋደ፡ ይጸንዖሙ፡ ወይመውኦሙ፡ ለአይሁድ፡ እለ፡ ይነብሩ፡ ደማስቆ፡ ወያበጽሕ፡ ሎሙ፡ ከመ፡ ውእቱ፡ ክርስቶስ። በእንተ፡ ምክረ፡ አይሁድ፡ ላዕለ፡ ሳውል ወእምድኅረ፡ ብዙኅ፡ መዋዕል፡ ተማከሩ፡ አይሁድ፡ ይቅትልዎ፡ ለሳውል። ወአእመሮሙ፡ ሳውል፡ ምክሮሙ፡ ዘይፈቅዱ፡ ይግበሩ፡ ላዕሌሁ፡ ወየዐቅቡ፡ አናቅጸ፡ ሀገር፡ መዓልተ፡ ወሌሊተ፡ ከመ፡ ይቅትልዎ። ወነሥእዎ፡ አርድእት፡ ሌሊተ፡ ወአውረድዎ፡ በአስፈሬድ፡ እንተ፡ ተድባበ፡ ቅጽር። ወበጺሖ፡ ሳውል፡ ኢየሩሳሌም፡ ኀሠሦሙ፡ ለአርድእት፡ ይትራከቦሙ፡ ወፈርህዎ፡ ኵሎሙ፡ ወኢአምንዎ፡ ከመ፡ ገብአ፡ ኀበ፡ አርድእት። ወነሥኦ፡ በርናባስ፡ ወወሰዶ፡ ኀበ፡ ሐዋርያት፡ ወነገሮሙ፡ ጳውሎስ፡ ዘከመ፡ አስተርአዮ፡ እግዚእነ፡ በፍኖት፡ ወዘከመ፡ ተናገሮ፡ ወዘከመ፡ መሀረ፡ በስሙ፡ ለኢየሱሰ፡ በደማስቆ። ወነበረ፡ ይበውእ፡ ወይወፅእ፡ ምስሌሆሙ፡ በኢየሩሳሌም፡ ወይሜህር፡ ክሡተ፡ በስሙ፡ ለእግዚእ፡ ኢየሱስ። ወይትዋቀሦሙ፡ ለአረሚ፡ ወፈቀዱ፡ ካዕበ፡ እሙንቱ፡ ይቅትልዎ። ወአእሚሮሙ፡ ቢጹ፡ አውረድዎ፡ ቂሳርያ፡ ወእምዝ፡ ፈነውዎ፡ ጠርሴስ። ወነበራ፡ ኵሎን፡ አብያተ፡ ክርስቲያናት፡ ዘይሁዳ፡ ወሰማርያ፡ ወገሊላ፡ በሰላም፡ ወተሐንጻ፡ ወሖራ፡ በፍርሀተ፡ እግዚአብሔር፡ ወበዝኁ፡ ሕዝብ፡ በትምህርተ፡ መንፈስ፡ ቅዱስ። በእንተ፡ አንሶስዎተ፡ ጴጥሮስ ወእምዝ፡ አንሶሰወ፡ ጴጥሮስ፡ በኀበ፡ ኵሎሙ፡ ቅዱሳን፡ እለ፡ ይነብሩ፡ ልዳ። ወረከበ፡ በህየ፡ ብእሴ፡ ዘስሙ፡ ኤንያ፡ ወሰመንቱ፡ ዓመቱ፡ እምዘደወየ፡ ወሰከበ፡ ውስተ፡ ዐራት፡ እስመ፡ ውእቱ፡ መፃጕዕ። ወይቤሎ፡ ጴጥሮስ፡ ኤንያ፡ ያሕዩከ፡ ኢየሱስ፡ ክርስቶስ፡ ተንሥእ፡ ወንሣእ፡ ዐራተከ፡ ወተንሥአ፡ ሶቤሃ፡ ወነሥአ፡ ዐራቶ። ወርእይዎ፡ ኵሎሙ፡ እለ፡ ይነብሩ፡ ልዳ፡ ወሲዶና፡ ወተመይጡ፡ ኀበ፡ እግዚእነ። በእንተ፡ አሐቲ፡ ረድእት ወበሀገረ፡ ኢዮጴ፡ ሀለወት፡ አሐቲ፡ ረድእት፡ እንተ፡ ስማ፡ ጣቢታ፡ ዘበትርጓሜሁ፡ ይብልዋ፡ ዶርቃስ፡ ወይጠል፡ ብሂል፡ ወብዙኀ፡ ምግባረ፡ ሠናየ፡ ትገብር፡ ወትሁብ፡ ምጽዋተ። ወውእተ፡ አሚረ፡ ሞተት፡ ደውያ፡ ወኀፀብዋ፡ በድና፡ ወአስከብዋ፡ ውስተ፡ ጽርሕ። ወቅሩብ፡ ሀገረ፡ ልዳ፡ ለኢዮጴ፡ ወሰሚዖሙ፡ አርድእት፡ ከመ፡ ሀሎ፡ ጴጥሮስ፡ ህየ፡ ለአኩ፡ ኀቤሁ፡ ክልኤተ፡ ዕደወ፡ ያስተብቊዕዎ፡ ኢይትሐከይ፡ በጺሖቶሙ። ወተንሥአ፡ ጴጥሮስ፡ ወሖረ፡ ምስሌሆሙ፡ ወበጺሖ፡ አዕረግዎ፡ ጽርሐ፡ ወመጽኣ፡ ኀቤሁ፡ ኵሎን፡ ዕቤራት፡ ወቆማ፡ ቅድሜሁ፡ ወአኀዛ፡ ይበክያሃ፡ ወአርአያሁ፡ አልባሰ፡ ወክዳናተ፡ ዘዐረዘቶን፡ ዶርቃስ፡ እንዘ፡ ሀለወት፡ ውስተ፡ ሕይወት። ወሰደደ፡ ጴጥሮስ፡ ኵሎ፡ ወሰገደ፡ ወጸለየ፡ ወተመይጠ፡ መንገለ፡ በድና፡ ወይቤላ፡ ጣቢታ፡ ተንሥኢ፡ ወከሠተት፡ አዕይንቲሃ፡ ወሶቤሃ፡ ርእየቶ፡ ለጴጥሮስ፡ ወነበረት። ወመጠዋ፡ እዴሁ፡ ወአንሥኣ፡ ወጸውዖሙ፡ ለቅዱሳንሂ፡ ወለዕቤራትሂ፡ ወአወፈያ፡ ኪያሃ፡ ሕያውታ። ወሰምዑ፡ ኵሉ፡ ኢዮጴ፡ ወአምኑ፡ ብዙኃን፡ በእግዚእነ። ወነበረ፡ ጴጥሮስ፡ ብዙኀ፡ መዋዕለ፡ በሀገረ፡ ኢዮጴ፡ ወኀደረ፡ ውስተ፡ ቤተ፡ ስምዖን፡ ሰፋዪ።

ምዕራፍ 10 በእንተ፡ ቆርኔሌዎስ ወሀሎ፡ አሐዱ፡ ብእሲ፡ በሀገረ፡ ቂሳርያ፡ ዘስሙ፡ ቆርኔሌዎስ። ሐቢ፡ ውእቱ፡ ለሕዝበ፡ ሰጲራ፡ እንተ፡ ይብልዋ፡ ኢጣሊቄ። ጻድቅ፡ ወፈራሄ፡ እግዚአብሔር፡ ምስለ፡ ኵሉ፡ ሰብአ፡ ቤቱ። ወይገብር፡ ብዙኀ፡ ምጽዋተ፡ ለሕዝብ። ወይጼሊ፡ ወትረ፡ ኀበ፡ እግዚአብሔር። በእንተ፡ መልአክ፡ ዘአስተርአዮ ወአስተርአዮ፡ መልአከ፡ እግዚአብሔር፡ ክሡተ፡ ጊዜ፡ ተሱዓት፡ ሰዓት፡ ዘመዓልት። ቦአ፡ ኀቤሁ፡ ወይቤሎ፡ ቆርኔሌዎስ። ወነጸረ፡ ኀቤሁ፡ ወፈርሀ፡ ወይቤ፡ ምንተ፡ ትብል፡ እግዚኦ። ወይቤሎ፡ ጸሎትከ፡ ወምጽዋትከ፡ ዐርገ፡ ቅድመ፡ እግዚአብሔር፡ ተዝካረ፡ ሠናየ። ወይእዜኒ፡ ፈኑ፡ ዕደወ፡ ሀገረ፡ ኢዮጴ። ይጸውዕዎ፡ ለከ፡ ለስምዖን፡ ጴጥሮስ። ዘየኀድር፡ ቤተ፡ ስምዖን፡ ሰፋዪ፡ ዘመንገለ፡ ባሕር። ወውእቱ፡ ይነግረከ፡ በዘተሐዩ፡ አንተ፡ ወኵሉ፡ ቤትከ። ወኀሊፎ፡ መልአክ፡ ዘተናገሮ። ጸውዐ፡ ክልኤተ፡ እምወዓልያኒሁ፡ ወአሐደ፡ ሐራ፡ ኄረ፡ እምፀማዱ። ወነገሮሙ፡ ኵሎ፡ ወለአኮሙ፡ ሀገረ፡ ኢዮጴ። በእንተ፡ ራእይ፡ ዘርእየ፡ ጴጥሮስ ወበሳኒታ፡ እንዘ፡ የሐውሩ፡ በጽሑ፡ ኢዮጴ፡ ኀበ፡ አንቀጸ፡ ሀገር። ወጴጥሮስኒ፡ ዐርገ፡ ናሕሰ፡ ይጸሊ፡ ጊዜ፡ ቀትር። እስመ፡ ርኅበ፡ ወፈቀደ፡ ይምሳሕ። ወእንዘ፡ ያስተዳልዉ፡ እሙንቱ፡ መጽአ፡ ድንጋፄ፡ ላዕሌሁ። ወርእየ፡ ሰማየ፡ ርኅወ። ወይወርድ፡ ከመ፡ ዘሞጣሕት፡ ዐቢይ፡ ዲበ፡ ምድር። እኁዝ፡ በአርባዕቱ፡ ጽነፊሁ። ወቦ፡ ውስቴቱ፡ ኵሉ፡ እንስሳ፡ ወአራዊተ፡ ገዳም፡ ወአዕዋፈ፡ ሰማይ። ወነበቦ፡ ቃል፡ ወይቤሎ። ተንሥእ፡ ጴጥሮስ፡ ሕርድ፡ ወብላዕ። ወይቤሎ፡ ጴጥሮስ፡ ሐሰ፡ ሊተ፡ እግዚኦ፡ ግሙራ። ኢቦአ፡ ርኩስ፡ ውስተ፡ አፉየ። ወኢበላዕኩ፡ ዘኢኮነ፡ ንጹሐ። ወነበቦ፡ ዳግመ፡ ወይቤሎ። ዘእግዚአብሔር፡ አንጽሐ፡ አንተ፡ ኢታስተራኵስ። ወከመ፡ ዝ፡ ይቤሎ፡ ሥልሰ። ወኵሉ፡ ተመይጠ፡ ውስተ፡ ሰማይ። ወእንዘ፡ ይኄሊ፡ ጴጥሮስ፡ ምንት፡ ውእቱ፡ ዘአስተርአዮ። በጽሑ፡ ዕደው፡ እለ፡ ተፈነዉ፡ እምኀበ፡ ቆርኔሌዎስ። እንዘ፡ የኀሥሡ፡ ቤቶ፡ ለስምዖን። ወቆሙ፡ ኀበ፡ ዴዴ፡ ወጸርሑ። ወሐተቱ፡ እምህየ፡ ኀበ፡ የኀድር፡ ስምዖን፡ ዘተሰምየ፡ ጴጥሮስ። ወእንዘ፡ ይኄሊ፡ ጴጥሮስ፡ በእንተ፡ ዘአስተርአዮ። ይቤሎ፡ መንፈስ፡ ቅዱስ፡ ናሁ፡ ሠለስቱ፡ ዕደው፡ የኀሥሡከ። ተንሥእ፡ ወረድ፡ ወሑር፡ ምስሌሆሙ፡ እንዘ፡ ኢትናፍቅ። ወኢ፡ ምንትኒ፡ እስመ፡ አነ፡ ፈነውክዎሙ። ወወረደ፡ ጴጥሮስ፡ ኀበ፡ እሙንቱ፡ ዕደው፡ ወይቤሎሙ። ነየ፡ አነ፡ ዘተኀሥሡኒ፡ በእንተ፡ ምንት፡ መጻእክሙ። ወይቤልዎ፡ እሙንቱ፡ ቆርኔሌዎስ፡ ሐቤ፡ ምእት። ብእሲ፡ ጻድቅ፡ ወፈራሄ፡ እግዚአብሔር። ወየአምርዎ፡ ኵሉ፡ ሕዝበ፡ አይሁድ። አስተርአዮ፡ መልአክ፡ ቅዱስ፡ ወይቤሎ፡ ከመ፡ ይጸውዕከ፡ ውስተ፡ ቤቱ። ወይስማዕከ፡ ዘትነግሮ፡ ወውእቱ፡ ፈነወነ፡ ኀቤከ። ወውእቱ፡ ጸውዖሙ፡ ወአኅደሮሙ። ወበሳኒታ፡ ተንሥአ፡ ወሖረ፡ ምስሌሆሙ። ወቦ፡ እምቢጾሙ፡ እምሀገረ፡ ኢዮጴ፡ እለ፡ ሖሩ፡ ምስሌሁ። ወበሳኒታ፡ ቦአ፡ ሀገረ፡ ቂሳርያ። ወሀሎ፡ ቆርኔሌዎስ፡ ይጸንሖሙ። ወጸውዐ፡ አዝማዲሁ፡ ወማኅፈሮ። ወበዊኦ፡ ጴጥሮስ፡ ተቀበሎ፡ ቆርኔሌዎስ። ወሰገደ፡ ሎቱ፡ ታሕተ፡ እገሪሁ። ወአንሥኦ፡ ጴጥሮስ፡ ወይቤሎ፡ ተንሥእ፡ አነሂ፡ ከማከ፡ ሰብእ። ወቦአ፡ እንዘ፡ ይትናገር፡ ምስሌሁ። ወረከበ፡ ብዙኃነ፡ ሰብእ፡ እለ፡ መጽኡ፡ ኀቤሁ። ወይቤሎሙ፡ ጴጥሮስ፡ ተአምሩ፡ ለሊክሙ። ከመ፡ ኢይከውኖ፡ ለብእሲ፡ አይሁዳዊ፡ ከመ፡ ይሑር፡ ወይባእ፡ ኀበ፡ ካልእ፡ ሕዝብ። ወሊተሰ፡ አርአየኒ፡ እግዚአብሔር፡ ከመ፡ ኢያስተራኵሶ፡ ለሰብእ፡ ወኢ፡ ለመኑሂ። ወይእዜኒ፡ ኢናፊቅየ፡ መጻእኩ፡ ኀቤክሙ፡ በዘለአክሙ፡ ሊተ። እስኩ፡ አይድዑኒ፡ ምንትኑ፡ በዘጸዋዕክሙኒ። በእንተ፡ ዘተናገረ፡ ቆርኔሌዎስ ወይቤሎ፡ ቆርኔሌዎስ፡ ረቡዕ፡ ዮም። እንዘ፡ እጼሊ፡ በጊዜ፡ ተሱዓት፡ ሰዓት፡ በቤትየ። አስተርአየኒ፡ ብእሲ፡ ይቀውም፡ ቅድሜየ፡ ወይለብስ፡ ብርሃነ። ወይቤለኒ፡ ቆርኔሌዎስ፡ ተሰምዐ፡ ጸሎትከ። ወምጽዋትከ፡ በቅድመ፡ እግዚአብሔር፡ ተዘከረከ። ወይእዜኒ፡ ለአክ፡ ሀገረ፡ ኢዮጴ፡ ይጸውዕዎ፡ ለከ፡ ለስምዖን፡ ዘተሰምየ፡ ጴጥሮስ። ዘየኀድር፡ ቤተ፡ ስምዖን፡ ሰፋዪ፡ ዘመንገለ፡ ባሕር። ወውእቱ፡ ይነግረከ፡ በዘተሐዩ፡ አንተ፡ ወኵሉ፡ ቤትከ። ወሶቤሃ፡ በእንቲኣሁ፡ ለአኩ፡ ኀቤከ። ወሠናየ፡ ገበርከ፡ ዘመጻእከ። ወይእዜኒ፡ ናሁ፡ ሀሎነ፡ ኵልነ፡ ቅድሜከ። ከመ፡ ንስማዕ፡ ኵሎ፡ ዘአዘዘከ፡ እግዚአብሔር። በእንተ፡ ዘተናገረ፡ ጴጥሮስ ወከሠተ፡ አፉሁ፡ ጴጥሮስ፡ ወይቤ። አማነ፡ ርኢኩ፡ ከመ፡ ኢያደሉ፡ እግዚአብሔር፡ ለገጽ፡ በኵሉ፡ አሕዛብ። አላ፡ በኵሉ፡ አሕዛብ፡ ዘይፈርሆ፡ ወይገብር፡ ጽድቀ፡ ኅሩይ፡ ውእቱ፡ በኀቤሁ። ወፈነወ፡ ቃሎ፡ ለደቂቀ፡ እስራኤል። ወዜነዎሙ፡ ሰላመ፡ በኢየሱስ፡ ክርስቶስ፡ ዘውእቱ፡ እግዚእ፡ ለኵሉ። ተአምሩ፡ ለሊክሙ፡ ኵሎ፡ ነገረ፡ ዘኮነ፡ በይሁዳ፡ እኂዞ፡ እምገሊላ። እምድኅረ፡ ጥምቀት፡ ዘሰበከ፡ ዮሐንስ፡ በእንተ፡ ኢየሱስ፡ ዘእምናዝሬት። ዘቀብዖ፡ እግዚአብሔር፡ መንፈሰ፡ ቅዱሰ፡ ወኀይለ። ወውእቱ፡ መጽአ፡ ወረድኦሙ፡ ለእለ፡ ይትዔገሎሙ፡ ሰይጣን፡ እስመ፡ እግዚአብሔር፡ ምስሌሁ። ወንሕነ፡ ኵልነ፡ ሰማዕቱ፡ በዘገብረ፡ በይሁዳ፡ ወበኢየሩሳሌም። ወቀተልዎ፡ ሰቂሎሙ፡ ዲበ፡ ዕፅ። ወእግዚአብሔር፡ አንሥኦ፡ እምዉታን፡ በሣልስት፡ ዕለት። ወወሀቦ፡ ከመ፡ ያስተርኢ፡ ገሃደ። ወአኮሰ፡ ለኵሉ፡ ሕዝብ፡ አላ፡ ዳእሙ፡ ለእለ፡ ይከውኑ፡ ስምዐ፡ እለ፡ ኀረዮሙ፡ እምትካት። ወንሕነ፡ እሙንቱ፡ እለ፡ በላዕነ፡ ወሰተይነ፡ ምስሌሁ። እምድኅረ፡ ተንሥአ፡ እምዉታን፡ አርብዓ፡ ዕለተ። ወአዘዘነ፡ ከመ፡ ንስብክ፡ ወንንግር፡ ለሕዝብ። ከመ፡ ውእቱ፡ ዘተሠይመ፡ በኀበ፡ እግዚአብሔር፡ መኰንነ፡ ሕያዋን፡ ወምዉታን። ወኵሎሙ፡ ነቢያት፡ ሰማዕቱ፡ ከመ፡ በስመ፡ ዚኣሁ። ይትኀደግ፡ ሎሙ፡ ኀጢአቶሙ፡ ለኵሎሙ፡ እለ፡ የአምኑ፡ ቦቱ። በእንተ፡ ርደተ፡ መንፈስ፡ ቅዱስ፡ ላዕለ፡ ምእመናን ወእንዘ፡ ይነግሮሙ፡ ጴጥሮስ፡ ዘንተ፡ ነገረ። ወረደ፡ መንፈስ፡ ቅዱስ፡ ዲበ፡ ኵሎሙ፡ እለ፡ ሰምዑ፡ ዘንተ፡ ነገረ። ወደንገፁ፡ ኵሎሙ፡ እለ፡ እምውስተ፡ አይሁድ፡ እለ፡ መጽኡ፡ ምስለ፡ ጴጥሮስ። እስመ፡ ዲበ፡ አሕዛብኒ፡ ወረደ፡ ጸጋሁ፡ ለመንፈስ፡ ቅዱስ። ወሰምዕዎሙ፡ ይነብቡ፡ በነገረ፡ በሓውርት፡ ወይሴብሕዎ፡ ለእግዚአብሔር። ወይቤ፡ ጴጥሮስ፡ መኑ፡ እንከ፡ ይክል፡ ይክልኦሙ፡ ማየ፡ ከመ፡ ኢይጠመቁ። እምድኅረ፡ ነሥኡ፡ መንፈሰ፡ ቅዱስ፡ ከማነ። ወአዘዞሙ፡ ይጠመቁ፡ በስሙ፡ ለኢየሱስ፡ ክርስቶስ። ወእምዝ፡ አስተብቊዕዎ፡ ለጴጥሮስ፡ ከመ፡ ይንበር፡ ኀቤሆሙ፡ ኅዳጠ፡ መዋዕለ።

ምዕራፍ 11 ወሰምዑ፡ ሐዋርያት፡ ወቢጾሙሂ፡ እለ፡ ብሔረ፡ ይሁዳ። ከመ፡ ተወክፉ፡ አሕዛብ፡ ቃለ፡ እግዚአብሔር። በእንተ፡ ቢጽ፡ እለ፡ አስተዋቀስዎ፡ ለጴጥሮስ ወአመ፡ ዐርገ፡ ጴጥሮስ፡ ኢየሩሳሌም፡ ተዋቀሥዎ፡ ቢጹ፡ እለ፡ እምአይሁድ። ወይቤልዎ፡ ቦአከ፡ ኀበ፡ ዕደው፡ እለ፡ ኢኮኑ፡ ግዙራነ፡ ወበላዕከ፡ ምስሌሆሙ። በእንተ፡ አውሥኦተ፡ ጴጥሮስ ወአኀዘ፡ ጴጥሮስ፡ ይንግሮሙ፡ እምጥንቱ። ወይቤሎሙ፡ እንዘ፡ ሀለውኩ፡ ሀገረ፡ ኢዮጴ፡ እንዘ፡ እጼሊ፡ ደንገፅኩ። ወርኢኩ፡ ከመ፡ ዘሞጣሕት፡ ዐቢይ፡ ዘይወርድ፡ እምሰማይ። ወእኁዝ፡ በአርባዕቱ፡ ጽነፊሁ፡ ወመጽአ፡ መንገሌየ። ወነጸርኩ፡ ወርኢኩ፡ በውስቴቱ፡ እንስሳ፡ ወአርዌ፡ ገዳም፡ ወአዕዋፈ፡ ሰማይ። ወሰማዕኩ፡ ቃለ፡ ዘይብለኒ፡ ተንሥእ፡ ጴጥሮስ፡ ሕርድ፡ ወብላዕ። ወእቤ፡ ሐሰ፡ እግዚኦ፡ ግሙራ። ኢቦአ፡ ርኩስ፡ ውስተ፡ አፉየ፡ ዘኢኮነ፡ ንጹሐ። ወይቤለኒ፡ ዳግመ፡ ቃል፡ እምሰማይ፡ ዘእግዚአብሔር፡ አንጽሐ፡ አንተ፡ ኢታስተራኵስ። ወከመ፡ ዝ፡ ይቤለኒ፡ ሥልሰ፡ ወተሰውጠ፡ ካዕበ፡ ኵሉ፡ ውስተ፡ ሰማይ። ወበይእቲ፡ ሰዓት፡ በጽሑ፡ ዕደው፡ ሠለስቱ፡ እለ፡ ተፈነዉ፡ ኀቤየ፡ እምቂሳርያ። ወቆሙ፡ ኀበ፡ ኆኅተ፡ ዐጸድ፡ ኀበ፡ ሀለውኩ፡ አነ። ወይቤለኒ፡ መንፈስ፡ ቅዱስ፡ ሑር፡ ምስሌሆሙ፡ እንዘ፡ ኢትናፍቅ። ወመጽኡ፡ ምስሌየ፡ እሉሂ፡ ስድስቱ፡ አኀዊነ፡ ወቦእነ፡ ቤቶ፡ ለውእቱ፡ ብእሲ። ወነገረነ፡ ዘከመ፡ ርእየ፡ መልአከ፡ እግዚአብሔር፡ በቤቱ፡ እንዘ፡ ይቀውም። ወዘከመ፡ ይቤሎ፡ ፈኑ፡ ሀገረ፡ ኢዮጴ፡ ይጸውዕዎ፡ ለከ፡ ለስምዖን፡ ዘተሰምየ፡ ጴጥሮስ። ወውእቱ፡ ይነግረከ፡ በዘተሐዩ፡ አንተ፡ ወኵሉ፡ ቤትከ። ወሶበ፡ አኀዝኩ፡ እንግሮሙ፡ ወረደ፡ መንፈስ፡ ቅዱስ፡ ዲቤሆሙ። ዘከመ፡ ወረደ፡ ቀዲሙ፡ ዲቤነ። ወተዘከርኩ፡ ቃሎ፡ ለእግዚእነ፡ ዘይቤ። ዮሐንስ፡ አጥመቀ፡ በማይ፡ ወአንትሙሰ፡ ትጠመቁ፡ በመንፈስ፡ ቅዱስ። ወሶበ፡ እንከ፡ ዕሩየ፡ ወሀቦሙ፡ እግዚአብሔር፡ ጸጋሁ፡ ከማነ። እስመ፡ አምኑ፡ በእግዚእነ፡ ኢየሱስ፡ ክርስቶስ። መኑ፡ እንከ፡ አነ፡ ዘእክል፡ ከሊኦቶ፡ ለእግዚአብሔር። ወዘንተ፡ ሰሚዖሙ፡ አርመሙ፡ ወአእኰትዎ፡ ለእግዚአብሔር። ወይቤሉ፡ እንዳዒ፡ ለእመ፡ ወሀቦሙ፡ እግዚአብሔር፡ ለአሕዛብ፡ ከመ፡ ይነስሑ፡ ለሕይወት። በእንተ፡ እለ፡ ተዘርዉ፡ በቅትለተ፡ እስጢፋኖስ ወእለሰ፡ ተዘርዉ፡ በእንተ፡ ቅትለተ፡ እስጢፋኖስ። ወሖሩ፡ ወበጽሑ፡ ቆጵሮስ፡ ወፍንቂስ፡ ወአንጾኪያ። እንዘ፡ ኢይነግሩ፡ ቃሎሙ፡ ዘእንበለ፡ ለአይሁድ፡ ለባሕቲቶሙ። ወቦ፡ እምውስቴቶሙ፡ ሰብአ፡ ቆጵሮስ፡ ወቀሬናውያን፡ እለ፡ ሖሩ፡ አንጾኪያ። ወነገርዎሙ፡ ለአረማውያን፡ ወመሀርዎሙ፡ በእንተ፡ እግዚእነ፡ ኢየሱስ፡ ክርስቶስ። ወእደ፡ እግዚአብሔር፡ ምስሌሆሙ። ወበዝኀ፡ ኍልቆሙ፡ ለእለ፡ አምኑ፡ ወተመይጡ፡ ኀበ፡ እግዚአብሔር። በእንተ፡ በርናባስ ወተሰምዐ፡ ዝ፡ ነገር፡ በአብያተ፡ ክርስቲያናት፡ ዘኢየሩሳሌም፡ በእንቲኣሆሙ። ወፈነውዎ፡ ለበርናባስ፡ አንጾኪያ። ወበጺሖ፡ ርእየ፡ ጸጋ፡ እግዚአብሔር፡ ወተፈሥሐ። ወመሀሮሙ፡ ለኵሎሙ፡ ይትመየጡ፡ በኵሉ፡ ልቦሙ፡ ኀበ፡ እግዚአብሔር። እስመ፡ ብእሲ፡ ጻድቅ፡ ውእቱ፡ ወምሉአ፡ መንፈስ፡ ቅዱስ፡ ወሃይማኖት። ወተወሰኩ፡ ብዙኃን፡ አሕዛብ፡ ኀበ፡ እግዚእነ። በእንተ፡ እለ፡ ተሰምዩ፡ ክርስቲያነ ወእምዝ፡ ሖረ፡ በርናባስ፡ ኀበ፡ ጠርሶን፡ ይኅሥሦ፡ ለሳውል። ወረከቦ፡ ወወሰዶ፡ አንጾኪያ። ወነበሩ፡ አሐተ፡ ዓመተ፡ ኅቡረ፡ በቤተ፡ ክርስቲያን። ወመሀሩ፡ ለብዙኃን፡ አሕዛብ፡ ወተሰምዩ፡ አርድእት፡ ክርስቲያነ፡ በአንጾኪያ፡ ቀዲሙ። በእንተ፡ ነቢያት ወውእተ፡ አሚረ፡ ወረዱ፡ ነቢያት፡ እምኢየሩሳሌም፡ ለአንጾኪያ። ወተንሥአ፡ አሐዱ፡ እምውስቴቶሙ፡ ዘስሙ፡ አጋቦስ። ወነገረ፡ በመንፈስ፡ ቅዱስ፡ ከመ፡ ይመጽእ፡ ረኃብ፡ ዐቢይ፡ ውስተ፡ ኵሉ፡ ዓለም። ወዝ፡ ዘኮነ፡ በመዋዕለ፡ ቀላውዴዎስ። ወእምዝ፡ አስተዋፅኡ፡ አርድእት፡ መጠነ፡ ይክሉ። ወፈነዉ፡ ለቢጾሙ፡ እለ፡ ይነብሩ፡ ብሔረ፡ ይሁዳ፡ ምስለ፡ በርናባስ፡ ወሳውል፡ ኀበ፡ ኵሎሙ፡ ቀሲሳን።

ምዕራፍ 12 በእንተ፡ ሥዩማነ፡ ቤተ፡ እግዚአብሔር፡ እለ፡ አኀዞሙ፡ ሄሮድስ ወውእቱ፡ አሚረ፡ አኀዞሙ፡ ሄሮድስ፡ ለሥዩማነ፡ ቤተ፡ እግዚአብሔር፡ ወአሕመሞሙ። ወቀተሎ፡ ለያዕቆብ፡ እኁሁ፡ ለዮሐንስ፡ በሰይፍ። ወርእዮ፡ ከመ፡ ተፈሥሑ፡ አይሁድ፡ አኀዞ፡ ካዕበ፡ ለጴጥሮስ። ወበዓለ፡ ፋሲካ፡ ውእተ፡ አሚረ፡ ወእኂዞ፡ ሞቅሖ። ወወሀቦሙ፡ ለዐሠርቱ፡ ወስድስቱ፡ ሠገራት፡ እለ፡ የዐቅብዎ። ወፈቀደ፡ እምድኅረ፡ ፋሲካ፡ ያቅርቦ፡ ኀበ፡ ሕዝብ። ወየዐቅብዎ፡ ለጴጥሮስ፡ በቤተ፡ ሞቅሕ። ወይጼልዩ፡ ወትረ፡ ኀበ፡ እግዚአብሔር፡ በእንቲኣሁ፡ በቤተ፡ ክርስቲያን። ወበይእቲ፡ ሌሊት፡ እንተ፡ ጸቢሖ፡ ፈቀደ፡ ሄሮድስ፡ ከመ፡ ይመጥዎ፡ ለአይሁድ። ወእንዘ፡ ይነውም፡ ጴጥሮስ፡ ማእከለ፡ ክልኤቱ፡ ሠገራት፡ ወሙቁሓት፡ ክልኤሆን፡ እደዊሁ፡ በሰናስል። ወዐቀብት፡ የዐቅቡ፡ አናቅጸ፡ ቤተ፡ ሞቅሕ። በእንተ፡ መልአክ፡ ዘረድኦ፡ ለጴጥሮስ ወወረደ፡ መልአከ፡ እግዚአብሔር፡ ወቆመ፡ ኀቤሁ። ወአብርሀ፡ ውስተ፡ ውእቱ፡ ቤት፡ ወጐድዖ፡ መልአክ፡ ገቦሁ፡ ለጴጥሮስ። ወአንቅሆ፡ ወይቤሎ፡ ተንሥእ፡ ፍጡነ፡ ወወድቃ፡ መዋቅሕት፡ እምእደዊሁ። ወይቤሎ፡ ውእቱ፡ መልአክ፡ ቅንት፡ ሐቌከ፡ ወተሠአን፡ አሣእኒከ፡ ወገብረ፡ ከማሁ። ወይቤሎ፡ ተዐጸፍኬ፡ ልብሰከ፡ ወነዐ፡ ትልወኒ። ወወፅአ፡ ወተለዎ፡ ወኢያእመረ፡ ጴጥሮስ፡ ከመ፡ እሙነ፡ አስተርአዮ፡ መልአክ። አላ፡ ሕልመ፡ ዘየሐልም፡ ይመስሎ። ወወፂኦሙ፡ ቀዳማዌ፡ ዐጸደ፡ ወካልአ፡ በጽሑ፡ ኀበ፡ ኆኅተ፡ ኀጺን፡ ወተርኅወት፡ ሶቤሃ፡ ለሊሃ። ወወፂኦሙ፡ ሖሩ፡ አሐተ፡ ሰኰተ፡ ወኀደጎ፡ ዝኩ፡ መልአክ፡ ለጴጥሮስ። ወገብአ፡ ልቡ፡ ለጴጥሮስ፡ ሶቤሃ፡ ወይቤ። ይእዜ፡ አእመርኩ፡ ከመ፡ በአማን፡ ፈነወ፡ እግዚአብሔር፡ መልአኮ። ወአድኀነኒ፡ እምእዴሁ፡ ለሄሮድስ፡ ወእምኵሉ፡ ተስፋሆሙ፡ ለሕዝበ፡ አይሁድ። በእንተ፡ ሑረቱ፡ ለጴጥሮስ፡ ውስተ፡ ቤተ፡ ማርያም፡ እሙ፡ ለዮሐንስ ወእምዝ፡ ሖረ፡ ቤተ፡ ማርያም፡ እሙ፡ ለዮሐንስ፡ ዘተሰምየ፡ ማርቆስ። ኀበ፡ ሀለዉ፡ ብዙኃን፡ አኀወ፡ ጉቡኣን፡ ወይጼልዩ። ወጐድጐደ፡ ጴጥሮስ፡ ኆኅተ፡ ወመጽአት፡ ወለት፡ ታርኅዎ፡ እንተ፡ ስማ፡ ሩዴ። ወአእሚራ፡ ቃለ፡ ጴጥሮስ፡ እምትፍሥሕት፡ ኢያርኀወት። ወሮጸት፡ ወነገረቶሙ፡ እንዘ፡ ይቀውም፡ ጴጥሮስ፡ ኀበ፡ ኆኅት። ወይቤልዋ፡ ተአብዲኑ፡ ተዐገሢ፡ ምዕረ። ወጐድጐደ፡ በሕቁ፡ ወይቤሉ፡ መልአክኑ፡ እንጋ፡ ውእቱ። ወጐንደየ፡ ጴጥሮስ፡ እንዘ፡ ይጐድጕድ። ወሶበ፡ አርኀውዎ፡ ወርእይዎ፡ ደንገፁ። ወይቤሎሙ፡ አርምሙ፡ ወነገሮሙ፡ ዘከመ፡ አውፅኦ፡ እግዚአብሔር፡ እምነ፡ ሞቅሕ። ወይቤሎሙ፡ ንግርዎሙ፡ ለያዕቆብ፡ ወለኵሎሙ፡ አኀዊነ፡ ዘንተ። ወወፅአ፡ ወሖረ፡ ካልአ፡ ቤተ። በእንተ፡ ሠገራት፡ እለ፡ ተሀውኩ ወጸቢሖ፡ ተሀውኩ፡ ሠገራት፡ ፈድፋደ፡ ወይቤሉ፡ ምንተ፡ ኮነ፡ እንከ፡ ጴጥሮስ። ወኀሠሦ፡ ሄሮድስ፡ ወኀጢኦ፡ ኰነኖሙ፡ ለሠገራት፡ ወአዘዘ፡ ይቅትልዎሙ። ወእምዝ፡ ወረደ፡ እምይሁዳ፡ ለቂሳርያ፡ እስመ፡ ተምዕዐ፡ ላዕለ፡ ሰብአ፡ ጢሮስ፡ ወሲዶና። ወመጽኡ፡ ኅቡረ፡ ኀቤሁ፡ ወአስተብቊዕዎ፡ ለበላስጦን፡ መጋቤ፡ ንጉሥ፡ ከመ፡ ይዕርቆሙ። እስመ፡ ትእዛዘ፡ ብሔሮሙ፡ ኮነ፡ እምሄሮድስ፡ ንጉሥ። በእንተ፡ ሞተ፡ ሄሮድስ፡ ወበእንተ፡ ዕበየ፡ ቃለ፡ እግዚአብሔር ወእምዝ፡ አሐተ፡ ዕለተ፡ ለብሰ፡ ሄሮድስ፡ ልብሰ፡ መንግሥቱ። ወነበረ፡ ዐውደ፡ ወአኀዘ፡ ይኰንኖሙ። ወዐውየዉ፡ ሕዝብ፡ በቃለ፡ እግዚአብሔር፡ ወአኮ፡ በቃለ፡ ሰብእ። ወቀሠፎ፡ መልአከ፡ እግዚአብሔር፡ ሶቤሃ። እስመ፡ ኢያእኰቶ፡ ለእግዚአብሔር፡ ወዐፂዮ፡ ሞተ። ወቃለ፡ እግዚአብሔር፡ ዐብየ፡ ወበዝኀ። ወገብኡ፡ በርናባስ፡ ወሳውል፡ እምኢየሩሳሌም፡ ፈጺሞሙ፡ መልእክቶሙ። ወነሥእዎ፡ ለዮሐንስ፡ ዘተሰምየ፡ ማርቆስ።

ምዕራፍ 13 በእንተ፡ ኅርየተ፡ በርናባስ፡ ወሳውል ወሀለዉ፡ በቤተ፡ ክርስቲያን፡ ዘአንጾኪያ፡ ነቢያት፡ ወሊቃውንት። በርናባስ፡ ወስምዖን፡ ዘተሰምየ፡ ኔጎር፡ ወሉቅዮስ፡ ቀሬናዊ። ወምናሔ፡ ወልደ፡ ሐፃኒቱ፡ ለሄሮድስ፡ ንጉሥ፡ ወሳውል። ወእንዘ፡ ይገብሩ፡ ግብረ፡ እግዚአብሔር፡ ወይጸውሙ፡ ወይጼልዩ። ይቤሎሙ፡ መንፈስ፡ ቅዱስ፡ ፍልጥዎሙ፡ ሊተ፡ ለበርናባስ፡ ወለሳውል፡ ለግብር፡ ዘፈቀድክዎሙ። በእንተ፡ ተፈንዎተ፡ በርናባስ፡ ወሳውል ወእምዝ፡ ጾሙ፡ ወጸለዩ፡ ወወደዩ፡ እደዊሆሙ፡ ዲቤሆሙ፡ ወፈነውዎሙ። ወተፈኒዎሙ፡ እምኀበ፡ መንፈስ፡ ቅዱስ፡ ወረዱ፡ ሴሌውቅያ። ወእምህየ፡ ነገዱ፡ ቆጵሮስ። ወበዊኦሙ፡ ሀገረ፡ ስልማና፡ ነገሩ፡ ቃለ፡ እግዚአብሔር፡ በምኵራባቲሆሙ፡ ለአይሁድ። ወሀሎ፡ ዮሐንስ፡ ምስሌሆሙ፡ ይትለአኮሙ። በእንተ፡ ተኣምር፡ ዘኮነ፡ ላዕለ፡ በርያሱስ ወሶበ፡ አንሶሰዉ፡ ውስተ፡ ኵሉ፡ ደስያት። በጽሑ፡ ሀገረ፡ እንተ፡ ስማ፡ ጳፉ። ወረከቡ፡ በህየ፡ ብእሴ፡ ዘሥራይ፡ አይሁዳዌ፡ ሐሳዌ፡ ነቢየ፡ ወስሙ፡ በርያሱስ። ዘሀሎ፡ ኀበ፡ መልአክ፡ ሰርግዮስ፡ ጳውሎስ፡ ብእሲ፡ ጠቢብ። ወፈቀደ፡ ይስማዕ፡ ቃለ፡ እግዚአብሔር፡ ወጸውዖሙ፡ ለበርናባስ፡ ወለሳውል። ወይትዋቀሦሙ፡ ውእቱ፡ ዘሥራይ፡ ዘይብልዎ፡ ኤልማስ። እስመ፡ ከመ፡ ዝ፡ ትርጓሜ፡ ስሙ። ወፈቀደ፡ ከመ፡ ይክልኦ፡ ለመልአክ፡ አሚነ። በእንተ፡ ትእምርት፡ ዘገብረ፡ ሳውል ወመልአ፡ መንፈስ፡ ቅዱስ፡ ላዕለ፡ ሳውል፡ ዘውእቱ፡ ጳውሎስ። ወነጸሮ፡ ወይቤሎ፡ ኦ፡ ጽጉበ፡ ኀጢአት፡ ወኵሉ፡ እከይ። ወልዱ፡ ለሰይጣን፡ ፀራ፡ ለኵላ፡ ጽድቅ። አበይከ፡ ትኅድግ፡ እንዘ፡ ተዐሉ፡ ፍኖተ፡ እግዚአብሔር፡ ርቱዐ። ወይእዜኒ፡ ናሁ፡ እደ፡ እግዚአብሔር፡ ላዕሌከ፡ ወተዐውር፡ አዕይንቲከ። ወኢትሬኢ፡ ፀሓየ፡ ወወርኀ፡ እስከ፡ አመ፡ ይበጽሕ፡ ዕድሜከ። ወተጸለለ፡ ሶቤሃ፡ ወጸልመ፡ ወኀሠሠ፡ ዘይመርሖ። ወርእዮ፡ መልአክ፡ ዘኮነ፡ ደንገፀ፡ ወአምነ፡ በእግዚእነ። ወእምዝ፡ ኀለፉ፡ በባሕር፡ እለ፡ ጳውሎስ፡ እምነ፡ ጳፉ፡ ሀገር። ወበጽሑ፡ ጴርጌን፡ ዘጵንፍልያ፡ ወኀደጎሙ፡ ዮሐንስ፡ ወተሠውጠ፡ ኢየሩሳሌም። ወእሙንቱሰ፡ ኀለፉ፡ እምጴርጌን፡ ወበጽሑ፡ አንጾኪያ፡ ዘጲስድያ። ወቦኡ፡ ምኵራበ፡ በዕለተ፡ ሰንበት፡ ወነበሩ። ወእምድኅረ፡ አንበቡ፡ ኦሪተ፡ ወነቢያተ፡ ለአኩ፡ ኀቤሆሙ፡ ሊቃነ፡ ካህናት። ወይቤልዎሙ፡ አንትሙ፡ አኀዊነ፡ ለእመ፡ ቦ፡ እምውስቴትክሙ፡ ዘይክል፡ ሠናየ፡ ነገረ፡ አይድዕዎሙ፡ ለሕዝብ። በእንተ፡ ትምህርት፡ ዘመሀረ፡ ጳውሎስ ወተንሥአ፡ ጳውሎስ፡ ወአዘዘ፡ ያርምሙ፡ ወይቤሎሙ፡ ስምዑ፡ ሰብአ፡ እስራኤል፡ ወእለኒ፡ ትፈርህዎ፡ ለእግዚአብሔር። አምላኮሙ፡ ለሕዝበ፡ እስራኤል፡ ኀረዮሙ፡ ለአበዊነ። ወአዕበዮሙ፡ ለሕዝቡ፡ በኀበ፡ አፍለሶሙ፡ በምድረ፡ ግብጽ። ወበመዝራዕቱ፡ ልዑል፡ አውፅኦሙ፡ እምህየ። ወሴሰዮሙ፡ በገዳም፡ አርብዓ፡ ዓመተ። ወአእተተ፡ ሰብዐተ፡ አሕዛበ፡ ከነዓን፡ ወአውረሶሙ፡ ምድሮሙ። ወእምድኅረዝ፡ ሤመ፡ ሎሙ፡ መሳፍንተ፡ አርባዕተ፡ ምእተ፡ ወኀምሳ፡ ዓመተ፡ እስከ፡ አመ፡ ሳሙኤል፡ ነቢይ። ወእምዝ፡ እንከ፡ ሰአሉ፡ ያንግሥ፡ ሎሙ። ወአንገሠ፡ ሎሙ፡ እግዚአብሔር፡ ሳኦልሃ፡ ወልደ፡ ቂስ። ብእሴ፡ ዘእምሕዝበ፡ ብንያም፡ አርብዓ፡ ዓመተ። ወሰዐሮ፡ ኪያሁኒ፡ ወእምድኅሬሁ፡ አንገሠ፡ ሎሙ፡ ዳዊትሃ። ወሰማዕተ፡ ኮኖ፡ ወይቤ፡ ረከብክዎ፡ ለዳዊት፡ ወልደ፡ ዕሤይ፡ ብእሴ፡ ምእመነ። ዘከመ፡ ልብየ፡ ዘይገብር፡ ኵሎ፡ ፈቃድየ። ወእምዘርዐ፡ ዚኣሁ፡ አምጽአ፡ ሎሙ፡ እግዚአብሔር። መድኀኒተ፡ ለእስራኤል፡ ኢየሱስሃ፡ በከመ፡ አሰፈዎሙ። በእንተ፡ ስብከተ፡ ዮሐንስ ወሰበከ፡ ሎሙ፡ ዮሐንስ፡ ጥምቀተ፡ ለኵሉ፡ ሕዝበ፡ እስራኤል። ከመ፡ ይነስሑ፡ እምቅድመ፡ ምጽአተ፡ ዚኣሁ። ወፈጺሞ፡ ዮሐንስ፡ መልእክቶ፡ ይቤሎሙ። ምንትኑ፡ ትትሐዘቡኒ፡ ኪያየ፡ አንሰ፡ ኢኮንኩ፡ ኪያሁ። ናሁ፡ ይመጽእ፡ እምድኅሬየ፡ ዘኢይደልወኒ፡ እፍታሕ፡ ቶታነ፡ አሣእኒሁ፡ እምእገሪሁ። አንትሙ፡ አኀዊነ፡ ትውልደ፡ ዘመደ፡ አብርሃም፡ ወእለ፡ ትፈርህዎ፡ ለእግዚአብሔር። ለክሙ፡ ተፈነወ፡ ዝ፡ ነገረ፡ ሕይወት። በእንተ፡ እለ፡ ቀተልዎ፡ ለእግዚእነ ወእለሰ፡ ይነብሩ፡ ኢየሩሳሌም፡ ወመላእክቲሆሙ፡ አብዱ። ወኢያእመርዎ፡ ለዝንቱ፡ ወኢለበዉ፡ መጻሕፍተ፡ ነቢያት፡ እንዘ፡ ያነብብዎ፡ በኵሉ፡ ሰናብት። አላ፡ ፈትሑ፡ ላዕሌሁ፡ ወፈጸሙ፡ ኵሎ፡ ዘተጽሕፈ፡ በእንቲኣሁ። ወሶበ፡ ኢረከቡ፡ ሎቱ፡ ጌጋየ። ወኢምንተኒ፡ በዘይቀትልዎ፡ ሰአልዎ፡ ለጲላጦስ፡ ከመ፡ ይቅትሎ። ወሶበ፡ ፈጸሙ፡ ኵሎ፡ ዘተጽሕፈ፡ በእንቲኣሁ፡ አውረድዎ፡ እምዕፅ። ወወደይዎ፡ ውስተ፡ መቃብር። ወእግዚአብሔር፡ አንሥኦ፡ እምዉታን። ወአስተርአዮሙ፡ ብዙኀ፡ መዋዕለ፡ እምድኅረ፡ ተንሥአ። ለእለ፡ ዐርጉ፡ ምስሌሁ፡ እምገሊላ፡ ለኢየሩሳሌም። ወእሙንቱ፡ ኮንዎ፡ ሰማዕተ፡ በኀበ፡ ሕዝብ። ወንሕነኒ፡ ንዜንወክሙ፡ ዘአሰፈዎሙ፡ እግዚአብሔር፡ ለአበዊነ። ወወሀቦሙ፡ ለውሉዶሙ፡ ወአንሥኦ፡ ለኢየሱስ። በከመ፡ ይቤ፡ ውስተ፡ መዝሙር፡ ዘክልኤቱ። ወልድየ፡ አንተ፡ ወአነ፡ ዮም፡ ወለድኩከ። እስመ፡ እግዚአብሔር፡ አንሥኦ፡ እምዉታን፡ ከመ፡ ኢይገብእኒ፡ ውስተ፡ ሙስና። ከመ፡ ዝ፡ ይቤ፡ እሁበክሙ፡ ጽድቆ፡ ለዳዊት፡ ዘእሙን። ወውስተ፡ ካልእኒ፡ ይብል፡ ኢትሁቦ፡ ለጻድቅከ፡ ይርአይ፡ ሙስና። ወዳዊትኒ፡ ተልእከ፡ በመዋዕሊሁ፡ ለትእዛዘ፡ እግዚአብሔር። ወኖመሂ፡ ወተቀብረ፡ ኀበ፡ አበዊሁ፡ ወርእየ፡ ሙስና። ወዘሰ፡ አንሥኦ፡ እግዚአብሔር፡ በከመ፡ ይቤ፡ ኢርእያ፡ ለሙስና። አእምሩ፡ እንከ፡ አኀዊነ። ከመ፡ በእንቲኣሁ፡ ይትኀደግ፡ ለክሙ፡ ኀጢአትክሙ፡ ዘአሰፈወክሙ። እምኵሉ፡ ዘተስእነክሙ፡ ጸዲቅ፡ በሕገ፡ ኦሪተ፡ ሙሴ። ወቦቱሰ፡ ኵሉ፡ ዘአምነ፡ ይጸድቅ። ዑቁ፡ እንከ፡ ኢይርከብክሙ፡ ቃለ፡ ነቢይ፡ ዘይቤ። ናሁ፡ ርእዩ፡ እለ፡ ታስተሐቅሩ፡ ወአንክሩ፡ ወእመ፡ አኮሰ፡ ትማስኑ። እስመ፡ አነ፡ እገብር፡ ግብረ፡ በመዋዕሊክሙ፡ ዘኢተአምርዎ፡ ለእመ፡ ቦ፡ ዘነገረክሙ። ወአስተብቊዕዎሙ፡ ከመ፡ ይንግርዎሙ፡ ዘንተ፡ ነገረ፡ በካልእት፡ ሰንበት። ወወፂኦሙ፡ እምኵራብ፡ ተለውዎሙ፡ ብዙኃን፡ እምአይሁድ። ወኄራቶሙ፡ ለጳውሎስ፡ ወለበርናባስ። ወነገርዎሙ፡ ወአምኑ፡ ወተመይጡ፡ በጸጋ፡ እግዚአብሔር። በእንተ፡ ትምህርት፡ ዘኮነት፡ በካልእት፡ ሰንበት ወበካልእት፡ ሰንበት፡ ተጋብኡ፡ ኵሉ፡ ሀገር፡ ይስምዑ፡ ቃለ፡ እግዚአብሔር። ወርእዮሙ፡ ካህናተ፡ አይሁድ፡ ብዙኀ፡ ጉባኤ፡ ሕዝብ፡ ቀንኡ፡ ላዕሌሆሙ። ወተዋቀሥዎሙ፡ ለጳውሎስ፡ ወለበርናባስ፡ ወፀረፉ። በእንተ፡ ነገር፡ ዘኮነት፡ ለአይሁድ፡ ወአሕዛብ ወነገርዎሙ፡ ጳውሎስ፡ ወበርናባስ፡ ወይቤልዎሙ። ለክሙ፡ ርቱዕ፡ ንቅድም፡ ንንግርክሙ፡ ቃለ፡ እግዚአብሔር። ወእመሰ፡ ትክሕዱ፡ ወኢትረስዩ፡ ርእሰክሙ፡ ለሕይወት፡ ዘለዓለም። ናሁ፡ ንትመየጥ፡ መንገለ፡ አሕዛብ። እስመ፡ ከማሁ፡ ይብል፡ መጽሐፍ፡ ረሰይኩከ፡ ብርሃኖሙ፡ ለአሕዛብ። ከመ፡ ትኩኖሙ፡ ሕይወቶሙ፡ እስከ፡ አጽናፈ፡ ምድር። ወሰሚዖሙ፡ አሕዛብ፡ ዘንተ፡ ተፈሥሑ፡ ወሰብሑ፡ ቃለ፡ እግዚአብሔር። ወአምኑ፡ ኵሎሙ፡ እለ፡ ከፈሎሙ፡ ሕይወተ፡ ዘለዓለም። ወበጽሐ፡ ቃለ፡ እግዚአብሔር፡ ውስተ፡ ኵሉ፡ በሓውርት። በእንተ፡ ሁከት፡ ዘአንሥኡ፡ አይሁድ ወወሀክዎን፡ አይሁድ፡ ለአንስት፡ ወለዐበይተ፡ ሀገር፡ ወለኄራተ፡ ሀገር። ወአንሥኡ፡ መራደ፡ ላዕለ፡ ጳውሎስ፡ ወበርናባስ፡ ወሰደድዎሙ፡ እምብሔሮሙ። ወነገፉ፡ ጸበለ፡ እገሪሆሙ፡ ላዕሌሆሙ፡ ወኀለፉ፡ ኢቆንዮን። ወመልአ፡ መንፈስ፡ ቅዱስ፡ ዲበ፡ ሐዋርያት፡ ወተፈሥሑ።

ምዕራፍ 14 በእንተ፡ ትምህርት፡ ዘመሀሩ፡ በኢቆንዮን ወበሀገረ፡ ኢቆንዮን፡ ቦኡ፡ ምኵራበ፡ አይሁድ፡ ወአረሚ። ወነገሩ፡ ከመ፡ ይንግሩ፡ ዘልፈ፡ እስከ፡ አምኑ፡ ብዙኃን፡ ጥቀ፡ እምአይሁድ፡ ወእምአረሚኒ። ወቢጸ፡ አይሁድ፡ እለ፡ አበዩ፡ ተበአሱ፡ ምስለ፡ አሕዛብ፡ ወምስለ፡ ሐዋርያት። ወአጽዐርዋ፡ ለነፍሶሙ። ወነበሩ፡ ጕንዱየ፡ መዋዕለ፡ እንዘ፡ ይነግሩ፡ በስሙ፡ ለእግዚእነ። እንዘ፡ ውእቱ፡ ያርኢ፡ ሰማዕተ፡ ቃለ፡ ጸጋሁ። ወይገብር፡ ተኣምረ፡ ወመንክረ፡ በእደዊሆሙ። በእንተ፡ ጸብእ፡ ዘኮነ፡ ማእከለ፡ ሕዝብ ወተናፈቁ፡ ኵሉ፡ ሀገር፡ መንፈቆሙ፡ መንገለ፡ አይሁድ። ወቦ፡ እለሂ፡ ኀበ፡ ሐዋርያት። ወተበአሱ፡ አይሁድ፡ ወአረሚ፡ ምስለ፡ መላእክቲሆሙ። ወአኀዙ፡ ይጻዐሉ፡ ወይትዋገሩ። ወርእዮሙ፡ ሐዋርያት፡ ጐዩ፡ ውስተ፡ አህጉረ፡ ሊቃኦንያ። ወልስጥራን፡ ወደርቤን፡ ወውስተ፡ አድያም። ወመሀሩ፡ በህየ። በእንተ፡ ድዉይ፡ ዘሀገረ፡ ልስጥራን ወሀሎ፡ አሐዱ፡ ብእሲ፡ በሀገረ፡ ልስጥራን፡ ዘፅዉስ፡ እገሪሁ፡ እምከርሠ፡ እሙ። ወዳእሙ፡ ይነብር፡ ግሙራ፡ ወእምአመ፡ ኮነ፡ ኢሖረ። ወስምዖ፡ ለጳውሎስ፡ እንዘ፡ ይነግር። ወነጸሮ፡ ጳውሎስ፡ ወርእዮ፡ ከመ፡ ቦ፡ ሃይማኖት፡ ወየሐዩ። ወይቤሎ፡ በዐቢይ፡ ቃል፡ ለከ፡ እብለከ። በስሙ፡ ለኢየሱስ፡ ክርስቶስ፡ ተንሥእ፡ ወቁም፡ በእገሪከ፡ ርቱዐ። ወሶቤሃ፡ ተንሥአ፡ ወሖረ። በእንተ፡ እለ፡ ፈቀዱ፡ ሠዊዐ፡ ለሐዋርያት ወርእዮሙ፡ አሕዛብ፡ ዘገብረ፡ ጳውሎስ፡ ከልሑ፡ በነገረ፡ ሊቃኦንስጦ። ወይቤሉ፡ አማልክት፡ ተመሰሉ፡ ሰብአ፡ ወወረዱ፡ ኀቤነ። ወሰመይዎ፡ ለበርናባስ፡ ድያ፡ ወለጳውሎስ፡ ሄርሜን። እስመ፡ ውእቱ፡ ሊቀ፡ ትምህርቱ። ወአምጽኡ፡ ማሬ፡ ዘድዮስ፡ ዘሀሎ፡ ቅድመ፡ ሀገር፡ ምስለ፡ አልሕምት፡ ወመሣውዕ። ኀበ፡ አንቀጸ፡ ዐጸደ፡ ማኅደሮሙ፡ ምስለ፡ ሕዘቢሆሙ። ወፈቀዱ፡ ከመ፡ ይሡዑ፡ ሎሙ። በእንተ፡ ገሥጾቶም፡ አሕዛብ ወሰሚዖሙ፡ ሐዋርያት፡ በርናባስ፡ ወጳውሎስ፡ ሰጠጡ፡ አልባሲሆሙ። ወሖሩ፡ ኀበ፡ አሕዛብ። ወከልሑ፡ ሎሙ፡ ወይቤልዎሙ፡ አንትሙ፡ ሰብእ፡ ምንትኑ፡ ዝ፡ ነገር። አኮኑ፡ ከማክሙ፡ ሰብእ፡ ንሕነ፡ ዘንመውት። ወንሜህረክሙ፡ ከመ፡ ትኅድጉ፡ ዘንተ፡ ከንቶ። ወትትመየጡ፡ ኀበ፡ እግዚአብሔር፡ ሕያው። ዘገብረ፡ ሰማየ፡ ወምድረ፡ ወባሕረ፡ ወኵሎ፡ ዘውስቴቶሙ። ወኀደጎሙ፡ ለኵሎሙ፡ አሕዛብ፡ ይሑሩ፡ በግዕዞሙ፡ በዘቀዲሙ፡ መዋዕል። እንዘ፡ ኢየኀድግ፡ ርእሶ፡ ዘእንበለ፡ ሰማዕት። ወይገብር፡ ሠናይቶ፡ ወይሁብ፡ እምሰማይ፡ ዝናመ። ወያከርም፡ በበ፡ ዓመት፡ ወያፈሪ፡ ወያሠምር፡ ከመ፡ ያጽግበነ፡ ወያስተፍሥሕ፡ ልበነ። ወዘንተ፡ ብሂሎሙ፡ በዕፁብ፡ አኅደግዎሙ፡ ለአሕዛብ፡ ኢይሡዑ፡ ሎሙ። በእንተ፡ ትምይንተ፡ አይሁድ ወእንዘ፡ እሙንቱ፡ ይምህሩ፡ በህየ፡ መጽኡ፡ አይሁድ፡ እምአንጾኪያ፡ ወኢቆንያ። ወየውህዎሙ፡ ለአሕዛብ፡ ከመ፡ ያሕሥሙ፡ ልቦሙ፡ ላዕሌሆሙ። ወወገርዎ፡ ለጳውሎስ፡ ወሰሐብዎ፡ ወአውፅእዎ፡ አፍኣ፡ እምሀገር፡ ወመሰሎሙ፡ ዘሞተ። ወዖድዎ፡ አርዳኢሁ፡ ወተንሥአ፡ ወቦአ፡ ምስሌሆሙ፡ ሀገረ። ወበሳኒታ፡ ሖረ፡ ምስለ፡ በርናባስ፡ ሀገረ፡ ደርቤን። ወመሀሩ፡ በይእቲ፡ ሀገር፡ ወአብኡ፡ ብዙኃነ። በእንተ፡ ግብአቶሙ፡ ሀገረ፡ ልስጥራን፡ ወሢመተ፡ ቀሲሳን ወገብኡ፡ ሀገረ፡ ልስጥራን፡ ወኢቆንዮን፡ ወአንጾኪያ። ወአጽንዕዎሙ፡ ነፍሶሙ፡ ለሕዝብ። ወመሀርዎሙ፡ ያጥብዑ፡ በሃይማኖት። እስመ፡ በብዙኅ፡ ሕማም፡ ሀለወነ፡ ንባእ፡ ለመንግሥተ፡ እግዚአብሔር። ወሤሙ፡ ቀሲሳነ፡ ላዕለ፡ ቤተ፡ ክርስቲያን። ወጸለዩ፡ ወጾሙ፡ ወአማሕፀንዎሙ፡ ለእግዚአብሔር፡ ዘኪያሁ፡ ተአመኑ። ወኀሊፎሙ፡ እምጲስድያ፡ በጽሑ፡ ጵንፍልያ። ወነገሩ፡ ቃሎሙ፡ በሀገረ፡ ጴርጌን፡ ወወረዱ፡ ኢጣልያ። ወእምህየ፡ ነገዱ፡ አንጾኪያ። በኀበ፡ ተውህበ፡ ሎሙ፡ ጸጋ፡ እግዚአብሔር፡ በእንተ፡ ግብር፡ ዘይገብሩ። ወበጺሖሙ፡ አስተጋብኡ፡ ኵሎ፡ ዘገብረ፡ ሎሙ፡ እግዚአብሔር። ወዘከመ፡ አርኀወ፡ ሎሙ፡ እግዚአብሔር፡ አናቅጸ፡ ሃይማኖት፡ ለአሕዛብ። ወነበሩ፡ ጕንዱየ፡ መዋዕለ፡ ምስለ፡ አርድእት።

ምዕራፍ 15 በእንተ፡ ቢጽ፡ ሐሳውያን ወቦ፡ እለ፡ ወረዱ፡ እምብሔረ፡ ይሁዳ፡ ወመሀርዎሙ፡ ለሕዝብ። ወይቤልዎሙ፡ እምከመ፡ ኢትትገዘሩ፡ በሕገ፡ ሙሴ፡ ኢትክሉ፡ ሐይወ። ወተሀውኩ፡ ሕዝብ፡ ፈድፋደ፡ ወተዋቀሥዎሙ፡ ለጳውሎስ፡ ወለበርናባስ፡ ወመከሩ፡ ከመ፡ ይፈንውዎሙ፡ ለጳውሎስ፡ ወለበርናባስ፡ ወለቢጾሙኒ። ኀበ፡ ሐዋርያት፡ ወቀሲሳን፡ እለ፡ በኢየሩሳሌም፡ በእንተ፡ ዝ፡ ነገር። ወተፈኒዎሙ፡ እምቤተ፡ ክርስቲያን፡ በጽሑ፡ ፊንቂ፡ ወሰማርያ። ወነገርዎሙ፡ ዘከመ፡ ተመይጡ፡ አሕዛብ፡ ወገብሩ፡ ዐቢየ፡ ፍሥሓ፡ ምስለ፡ ኵሎሙ፡ ቢጾሙ። በእንተ፡ ብጽሐቶሙ፡ ኢየሩሳሌም ወበጺሖሙ፡ ኢየሩሳሌም፡ ተቀበልዎሙ፡ ቤተ፡ ክርስቲያን፡ ወሐዋርያት፡ ወቀሲሳን። ወዜነውዎሙ፡ ኵሎ፡ ዘከመ፡ ገብረ፡ ሎሙ፡ እግዚአብሔር፡ በውስተ፡ አሕዛብ። ወቦ፡ እለ፡ ተንሥኡ፡ እምሕዝበ፡ ፈሪሳውያን፡ ቢጽ፡ እለ፡ አምኑ። ወይቤልዎሙ፡ ርቱዕ፡ ይትገዘሩ፡ ወነአዝዞሙ፡ ይዕቀቡ፡ ሕገ፡ ሙሴ። በእንተ፡ ጉባኤ፡ ሐዋርያት ወአንገለጉ፡ ሐዋርያት፡ ወቀሲሳን፡ ከመ፡ ይርአዩ፡ ዘይገብሩ፡ በእንተዝ፡ ነገር። ወእምድኅረ፡ ተዋቀሥዎሙ፡ ተንሥአ፡ ጴጥሮስ፡ ወይቤሎሙ። ስምዑ፡ አኀዊነ፡ ለሊክሙ፡ ተአምሩ፡ ከመ፡ እምትካት። ኀረየኒ፡ እግዚአብሔር፡ ከመ፡ አስምዖሙ፡ ቃለ፡ አፉየ፡ ለአሕዛብ። ወትምህርተ፡ ወንጌሉ፡ ወይእመኑ። ወእግዚአብሔር፡ ማእምረ፡ ልብ፡ ሰማዕተ፡ ኮኖሙ። ወወሀቦሙ፡ መንፈሰ፡ ቅዱሰ፡ ከማነ። ወኢፈለጦሙ፡ እምኔነ፡ አንጺሖ፡ ልቦሙ፡ በሃይማኖት። ወይእዜኒ፡ ኢታመክርዎ፡ ለእግዚአብሔር። ወኢታስክምዎሙ፡ አርዑተ፡ ዲበ፡ ክሳውዲሆሙ፡ ለአሕዛብ። ዘኢክህልነ፡ ጸዊሮቶ፡ ኢ፡ ንሕነ፡ ወኢ፡ አበዊነ። ዳእሙ፡ ከመ፡ ንሕየው፡ በጸጋ፡ እግዚእነ፡ ኢየሱስ፡ ክርስቶስ፡ ንትአመን፡ ወከማሁ፡ እሙንቱሂ። ወሶቤሃ፡ አርመሙ፡ ኵሉ፡ ሕዝብ። ወአጽምዕዎሙ፡ ለጳውሎስ፡ ወለበርናባስ፡ እንዘ፡ ይነግሩ። ኵሎ፡ ዘገብረ፡ ሎሙ፡ እግዚአብሔር፡ ተኣምረ፡ ወመንክረ፡ በውስተ፡ አሕዛብ። በእንተ፡ ተሠጥዎተ፡ ያዕቆብ ወእምድኅረ፡ አርመሙ፡ ተሰጥወ፡ ያዕቆብ፡ ወይቤ፡ ስምዑ፡ አኀዊነ። ስምዖንሂ፡ ነገረ፡ ዘከመ፡ አቅደመ፡ ተሣህሎ፡ እግዚአብሔር፡ ለአሕዛበ። ወነሥአ፡ ሕዝበ፡ እምውስቴቶሙ፡ ለስሙ። ወየኀብሩ፡ ቃለ፡ ነቢያት፡ በዝንቱ፡ በከመ፡ ይብል፡ መጽሐፍ። እምድኅረዝ፡ ኣገብኣ፡ ወኣሐንጻ፡ ለቤተ፡ ዳዊት፡ ዘወድቀት፡ ወእነድቅ፡ መዝበራ። ከመ፡ ይኅሥሥዎ፡ ለእግዚአብሔር፡ እለ፡ ተርፉ፡ ዕጓለ፡ እመሕያው። ወኵሎሙ፡ አሕዛብ፡ እለ፡ ተሰምየ፡ ዲቤሆሙ፡ ስምየ። ይቤ፡ እግዚአብሔር፡ ዘገብረ፡ ዘንተ፡ ዘኢይትዐወቅ፡ ዘእምፍጥረተ፡ ዓለም። ወይእዜኒ፡ እብለክሙ፡ ኢታክብዱ፡ ላዕለ፡ አሕዛብ፡ እለ፡ ተመይጡ፡ ኀበ፡ እግዚአብሔር። ዳእሙ፡ አዝዝዎሙ፡ ይርሐቁ፡ እምዘይዘብሑ፡ ለአማልክት። ወእማውታ፡ ወደም፡ ወእምዝሙት፡ ወዘይጸልኡ፡ ለርእሶሙ፡ ኢይግበሩ፡ ዲበ፡ ቢጾሙ። ወሙሴሂ፡ ቦ፡ እምቀዲሙ፡ ዘይሰብክ፡ ሎሙ፡ በበ፡ አህጉር። ወያነብብዎ፡ በመኳርብት፡ በኵሉ፡ ሰናብት። በእንተ፡ መልእክተ፡ ሐዋርያት ወእምዝ፡ ኀብሩ፡ ሐዋርያት፡ ወቀሲሳን፡ ወኵሉ፡ ሕዝብ። ከመ፡ ይኅረዩ፡ እምውስቴቶሙ፡ ዕደወ፡ ዘይፌንዉ፡ አንጾኪያ፡ ምስለ፡ ጳውሎስ፡ ወበርናባስ። ወኀረዩ፡ ይሁዳሃ፡ ዘተሰምየ፡ በርስያን፡ ወሲላስሃ፡ ዕደወ፡ ሊቃውንተ፡ በውስተ፡ ቢጾሙ። ወጸሐፉ፡ በእደዊሆሙ፡ መልእክተ፡ እንተ፡ ትብል፡ ከመ፡ ዝ። እምልኡካን፡ ወቀሲሳን፡ ለአኀው፡ ለእለ፡ በአንጾኪያ፡ ወሶርያ፡ ወቂልቅያ። አኀዊነ፡ እለ፡ አምኑ፡ እምውስተ፡ አሕዛብ፡ ሰላም፡ ለክሙ፡ ወትፍሥሕት። እስመ፡ ሰማዕነ፡ ከመ፡ ቦ፡ እለ፡ ወፅኡ፡ እምኔነ። ወሆክዋ፡ ለነፍስክሙ፡ በነገር፡ እንዘ፡ ይብሉክሙ፡ ተገዘሩ፡ ወዕቀቡ፡ ሕገ፡ ኦሪት፡ ዕደወ። እለ፡ ኢ፡ አዘዝናሆሙ፡ ወኢ፡ በአሐቲኒ፡ እምዝንቱ፡ ነገር፡ ዘይቤሉክሙ። ወርኢነ፡ እምድኅረ፡ ተጋባእነ፡ ኵልነ፡ በአሐዱ፡ ምክር። ወኀቢረነ፡ ኀረይነ፡ ዕደወ፡ ዘንፌኑ፡ ኀቤክሙ፡ ምስለ፡ አኀዊነ፡ በርናባስ፡ ወጳውሎስ። ዕደው፡ እለ፡ መጠዉ፡ ነፍሶሙ፡ በእንተ፡ ስሙ፡ ለእግዚእነ፡ ኢየሱስ፡ ክርስቶስ። ወፈነውነ፡ ይሁዳሃ፡ ወሲላስሃ፡ እሙንቱ፡ ያጠይቁክሙ፡ በቃሎሙ፡ ዘንተ። እስመ፡ ኀብረ፡ መንፈስ፡ ቅዱስ፡ ምስሌነ። ከመ፡ ኢናክብድ፡ ወኢንወስክ፡ ባዕደ። ዘእንበለ፡ ዳእሙ፡ ዘንተ፡ ዘተኀድጉ፡ በግብር፡ ዝቡሐ፡ ለአማልክት። ወኢትብልዑ፡ ማውታ፡ ወደመ፡ ወትርሐቁ፡ እምዝሙት። ወዘትጸልኡ፡ ለርእስክሙ፡ ኢትግበሩ፡ ዲበ፡ ቢጽክሙ። ወለእመ፡ ዐቀብክሙ፡ ነፍሰክሙ፡ እምእሉ፡ ምግባራት፡ ትሄልዉ፡ በሰላም። በእንተ፡ እለ፡ ተፈነዉ፡ እምኀበ፡ ሐዋርያት ወተፈኒዎሙ፡ እሙንቱ፡ ወረዱ፡ አንጾኪያ። ወአስተጋብኡ፡ ሕዝበ፡ ወመጠውዎሙ፡ መጽሐፈ፡ መልእክት። ወአንቢቦሙ፡ ተፈሥሑ፡ ዐቢየ፡ ፍሥሓ፡ ወተናዘዙ። ወአጽንዑ፡ አኀወ፡ በነገር፡ ዘተርፈ፡ በቃሎሙ። ወመሀርዎሙ፡ ይሁዳ፡ ወሲላስ፡ እስመ፡ ነቢያት፡ እሙንቱ። ወአጽንዕዎሙ፡ ለቢጾሙ፡ በቃሎሙ። ወጐንድዮሙ፡ ፈነውዎሙ፡ በሰላም፡ ቢጾሙ፡ ኀበ፡ ልኡካን። ወአጥብዐ፡ ሲላስ፡ ይንበር፡ ህየ። ወጳውሎስ፡ ወበርናባስ፡ ጐንደዩ፡ አንጾኪያ። ወመሀሩ፡ ወሰበኩ፡ ቃለ፡ እግዚአብሔር፡ ምስለ፡ ባዕዳን፡ ብዙኃን። በእንተ፡ ሐውጾተ፡ አኀው ወእምድኅረ፡ ኅዳጥ፡ መዋዕል፡ ይቤሎ፡ ጳውሎስ፡ ለበርናባስ። ንሰወጥ፡ እንከሰ፡ ወነሐውጾሙ፡ ለቢጽነ፡ በኵሉ፡ አህጉር፡ እለ፡ መሀርኖሙ፡ ቃለ፡ እግዚአብሔር። ወናአምር፡ ዘከመ፡ ሀለዉ። ወፈቀደ፡ በርናባስ፡ ይንሥኦ፡ ለዮሐንስ፡ ዘተሰምየ፡ ማርቆስ። ወኢፈቀደ፡ ጳውሎስ፡ ይንሥኦ፡ ምስሌሆሙ፡ እስመ፡ ኀደጎሙ፡ እንዘ፡ እሙንቱ፡ በጵንፍልያ። ወሖረ፡ ወኢመጽአ፡ ምስሌሆሙ፡ ውስተ፡ ግብር። ወበእንተዝ፡ ተምዕዑ፡ ወተፋለጡ፡ ዘዘ፡ ዚኣሆሙ። በርናባስ፡ ነሥኦ፡ ለማርቆስ፡ ወነገደ፡ ቆጵሮስ። ጳውሎስ፡ ኀረዮ፡ ለሲላስ፡ ወሖረ፡ ወአማሕፀንዎ፡ ቢጹ፡ በጸጋ፡ እግዚአብሔር። ወዖደ፡ ሶርያ፡ ወቂልቅያ፡ ወአጽንዐ፡ አብያተ፡ ክርስቲያናት።

ምዕራፍ 16 በእንተ፡ ጢሞቴዎስ ወበጽሐ፡ ሀገረ፡ ደርቤን፡ ወልስጥራን። ወረከበ፡ አሐደ፡ ረድአ፡ ዘስሙ፡ ጢሞቴዎስ። ወእሙሰ፡ አይሁዳዊት፡ ወአምነት፡ ወአቡሁሰ፡ አረማዊ። ወይንእድዎ፡ ኵሉ፡ ቢጹ፡ እለ፡ በልስጥራን፡ ወደርቤን፡ ወኢቆንዮን። በእንተ፡ አሰስሎተ፡ ምክንያት ወአፍቀረ፡ ጳውሎስ፡ ይንሥኦ፡ ምስሌሁ፡ ወይሑር። ወነሥኦ፡ ወገዘሮ፡ በእንተ፡ አይሁድ፡ እለ፡ ውስተ፡ ውእቱ፡ ብሔር። እስመ፡ የአምርዎ፡ ኵሎሙ፡ ከመ፡ አረማዊ፡ አቡሁ። ወሖሩ፡ አህጉረ፡ ወመሀርዎሙ፡ ሥርዐተ፡ ሐዋርያት። ዘአዘዙ፡ ኀቢሮሙ፡ በኢየሩሳሌም፡ ምስለ፡ ቀሲሳ። ወጸንዑ፡ አብያተ፡ ክርስቲያናት፡ በሃይማኖት። ወእንተ፡ ጸብሐት፡ ይበዝኁ፡ ሕዝብ። ወሖሩ፡ ብሔረ፡ ፍርግያ፡ ወብሔረ፡ ገላትያ። ወከልኦሙ፡ መንፈስ፡ ቅዱስ፡ ኢይንግሩ፡ ቃለ፡ እግዚአብሔር፡ በእስያ። ወበጺሖሙ፡ ሚስያ፡ ፈቀዱ፡ ይሑሩ፡ ቢታንያ፡ ወኢያብሖሙ፡ መንፈሱ፡ ለኢየሱስ። በእንተ፡ ብእሲ፡ ዘአስተርአዮ፡ ለጳውሎስ ወኀሊፎሙ፡ እምነ፡ ሚስያ፡ ወረዱ፡ ጢሮአዳ። ወአስተርአዮ፡ ለጳውሎስ፡ በሌሊት፡ ብእሲ፡ መቄዶናዊ፡ ይቀውም፡ ወያስተበቊዖ። ወይቤሎ፡ ኅልፍ፡ እንተ፡ መንገሌነ፡ ለመቄዶንያ፡ ወነዐ፡ ርድአነ። ወርእዮ፡ ዘንተ፡ ፈቀድነ፡ ንሑር፡ እንተ፡ መቄዶንያ። እስመ፡ ጸውዐነ፡ እግዚአብሔር፡ ንምሀሮሙ፡ ሃይማኖት። ወወፂአነ፡ እምጢሮአዳ፡ አፍጠነ፡ ወበጻሕነ፡ አሞትራቄ። ወበሳኒታ፡ ሖርነ፡ ሀገረ፡ እንተ፡ ስማ፡ ናጱሌ። ወእምህየ፡ ፊልጵስዮስ፡ እንተ፡ ይእቲ፡ ቀዳሚት፡ ዘመቄዶንያ፡ ወይእቲ፡ ሀገር፡ ቆሎንያ። በእንተ፡ ብእሲት፡ ሠያጢተ፡ አጌ ወነበርነ፡ በይእቲ፡ ሀገር፡ ኅዳጠ፡ መዋዕለ። ወወፃእነ፡ በዕለተ፡ ሰንበት፡ እምአንቀጸ፡ ሀገር፡ መንገለ፡ ድንጋገ፡ ፈለግ። እስመ፡ ቤተ፡ ጸሎት፡ ህየ፡ ሀሎ። ወነበርነ፡ ወአኀዝነ፡ ከመ፡ ንንግር፡ ለአንስት፡ እለ፡ ተጋብኣ፡ ህየ። ወሀለወት፡ ማእከሎን፡ አሐቲ፡ ብእሲት፡ ሠያጢተ፡ አጌ፡ እንተ፡ ሀገረ፡ ትያጥሮን። ፈራሂተ፡ እግዚአብሔር፡ ወታጸምዕ፡ እስመ፡ ከሠተ፡ እግዚአብሔር፡ እዝና፡ ወስማ፡ ልድያ። ወተጠምቀት፡ ምስለ፡ ኵሉ፡ ሰብኣ፡ ወአስተብቊዐተነ፡ ወትቤለነ። ለእመሁ፡ ረሰይክሙኒ፡ መሃይምተ፡ ለእግዚአብሔር፡ ባኡ፡ ቤትየ፡ ወኅድሩ። ወአገበረተነ፡ ብዙኀ። በእንተ፡ ወለት፡ እንተ፡ ይትዋረዳ፡ ጋኔን ወእንዘ፡ ነሐውር፡ ለጸሎት፡ ረከበተነ፡ አሐቲ፡ ወለት፡ እንተ፡ ይትዋረዳ፡ ጋኔን። ወታገብእ፡ ለአጋዕዝቲሃ፡ ብዙኀ፡ ብነተ፡ እምዘትነሥእ፡ ሐፍሣ። ወእምዝ፡ ተለወት፡ ድኅሬሁ፡ ለጳውሎስ፡ ወድኅሬነ፡ እንዘ፡ ትኬልሕ፡ ወትብል። እሉ፡ ዕደው፡ አግብርተ፡ እግዚአብሔር፡ ልዑል፡ እሙንቱ። ወይሜህሩክሙ፡ ፍኖተ፡ ሕይወት። ወከመ፡ ዝ፡ ትገብር፡ ብዙኀ፡ መዋዕለ። ወአጽሐቀቶ፡ ለጳውሎስ፡ ወተመይጠ፡ ወይብሎ፡ ለውእቱ፡ መንፈስ። እኤዝዘከ፡ በስሙ፡ ለእግዚእነ፡ ኢየሱስ፡ ክርስቶስ፡ ከመ፡ ትፃእ። ወኀደጋ፡ በጊዜሃ። በእንተ፡ እለ፡ ሰከይዎሙ፡ ለጳውሎስ፡ ወለሲላስ ወርእዮሙ፡ አጋእዝቲሃ፡ ከመ፡ አልቦ፡ እምኀበ፡ ታገብእ፡ ብነታ። አኀዝዎሙ፡ ለጳውሎስ፡ ወለሲላስ፡ ወሰሐብዎሙ፡ እንተ፡ ምሥያጥ። ወአብጽሕዎሙ፡ ኀበ፡ መኳንንት። ወይቤሉ፡ እሉ፡ ዕደው፡ የሀውኩ፡ ሀገረነ፡ ወአይሁድ፡ እሙንቱ። ወይሜህሩ፡ ለነ፡ ሕገ፡ ዘኢይከውነነ፡ ለገቢር፡ እንዘ፡ ሰብአ፡ ሮማ፡ ንሕነ። በእንተ፡ ተዘብጦቶሙ፡ ወተሞቅሖቶሙ ወተጋብኡ፡ ሕዝብ፡ ወመኳንንት፡ ወአኀዙ፡ ይዝብጥዎሙ፡ በበትር፡ ወሰጠጡ፡ አልባሲሆሙ። ወዘበጥዎሙ፡ ብዙኀ፡ ወሞቅሕዎሙ። ወአዘዝዎ፡ ለዐቃቤ፡ ቤተ፡ ሞቅሕ፡ ያጽንዕ፡ ዐቂቦቶሙ። ወተአዚዞ፡ ሞቅሖሙ፡ ውስተ፡ ውሳጤ፡ ቤተ፡ ሞቅሕ። ወአጽንዐ፡ እገሪሆሙ፡ ውስተ፡ ጕንድ። በእንተ፡ ጸልዮቶሙ፡ ውስተ፡ ቤተ፡ ሞቅሕ ወጊዜ፡ መንፈቀ፡ ሌሊት፡ ጸለዩ፡ ጳውሎስ፡ ወሲላስ፡ ወሰብሕዎ፡ ለእግዚአብሔር። ወሙቁሓን፡ ይሰምዕዎሙ። ወሶቤሃ፡ አድለቅለቀ፡ ዐቢይ፡ ድልቅልቅ፡ ወአንቀልቀለ፡ መሠረታተ፡ ቤተ፡ ሞቅሕ። ወተርኅወ፡ በጊዜሃ፡ ኵሉ፡ አንቀጽ፡ ወተፈትሑ፡ መዋቅሕቲሆሙ፡ ለኵሎሙ። ወሶበ፡ ነቅሀ፡ ዐቃቤ፡ ቤተ፡ ሞቅሕ፡ ርእየ፡ ርኅወ፡ ኵሎ፡ አናቅጸ። ወመልኀ፡ መጥባሕቶ፡ ወፈቀደ፡ ይትረገዝ፡ ለሊሁ፡ እስመ፡ መሰሎ፡ ዘአምሠጡ፡ ሙቁሓን። ወከልሐ፡ ሎቱ፡ ጳውሎስ፡ ወይቤሎ፡ ኢትግበር፡ እኩየ፡ ዲበ፡ ነፍስከ። ሀሎነ፡ ኵልነ፡ ዝየ። ወአምጽአ፡ ማኅቶተ፡ ወሖረ፡ እንዘ፡ ይርዕድ፡ እንተ፡ ውስጥ። ወሰገደ፡ ኀበ፡ ጳውሎስ፡ ወሲላስ። ወአውፅኦሙ፡ አፍኣ፡ ወይቤሎሙ፡ አጋእዝትየ፡ ምንተ፡ እግበር፡ ከመ፡ እድኀን። ወይቤልዎ፡ እመን፡ በእግዚእነ፡ ኢየሱስ፡ ክርስቶስ፡ ወተሐዩ፡ አንተ፡ ወኵሉ፡ ቤትከ። ወነገርዎ፡ ቃለ፡ እግዚአብሔር፡ ወለኵሉ፡ ሰብኡ። ወነሥኦሙ፡ ሶቤሃ፡ በሌሊት፡ ወኀፀቦሙ፡ እምቅሥፈቶሙ። ወተጠምቀ፡ ውእቱኒ፡ ወኵሉ፡ ሰብኡ፡ በጊዜሃ። ወአዕረጎሙ፡ ውስተ፡ ቤቱ፡ ወሠርዐ፡ ማእደ። ወተፈሥሐ፡ ውእቱ፡ ወኵሉ፡ ቤቱ፡ በአሚነ፡ እግዚእነ። በእንተ፡ ፀአቶሙ፡ እምቤተ፡ ሞቅሕ ወጸቢሖ፡ ለአኩ፡ መኳንንት፡ ወዓልያኒሆሙ፡ እንዘ፡ ይብሉ። ፍትሕዎሙ፡ ለእሉ፡ ዕደው፡ ወኅድግዎሙ፡ ይሑሩ። ወሰሚዖ፡ ዐቃቤ፡ ቤተ፡ ሞቅሕ፡ ነገሮሙ፡ ዘነገረ፡ ለጳውሎስ፡ ወለሲላስ። ከመ፡ ለአኩ፡ መኳንንት፡ ይኅድግዎሙ፡ ወይቤሎሙ፡ ይእዜኒ፡ ሑሩ፡ በሰላም። ወይቤልዎ፡ ቀሠፉነ፡ ገሃደ፡ ዘአልብነ፡ አበሳ። እንዘ፡ ሰብአ፡ ሮሜ፡ ንሕነ፡ ወሞቅሑነ። ወይእዜኒ፡ ጽሚተ፡ ያውፅኡነ፡ ይፈቅዱ፡ ጽሚተሰኬ። አበይነ፡ ይምጽኡ፡ ለሊሆሙ፡ ያውፅኡነ። ወሖሩ፡ ወነገርዎሙ፡ ወዓልያኒሆሙ፡ ዘንተ፡ ነገረ፡ ለመኳንንት። ወፈርሁ፡ ሰሚዖሙ፡ ከመ፡ ሰብአ፡ ሮሜ፡ እሙንቱ። ወመጽኡ፡ ወአስተብቊዕዎሙ፡ ከመ፡ ይፃኡ፡ እምብሔሮሙ። ወወፂኦሙ፡ እምቤተ፡ ሞቅሕ፡ ቦኡ፡ ቤተ፡ ልድያ። ወረከቡ፡ ቢጾሙ፡ ወመሀርዎሙ፡ ወወፅኡ።

ምዕራፍ 17 በእንተ፡ ተዋቅሦተ፡ ጳውሎስ፡ ወአይሁድ ወሖሩ፡ አንፊጶል፡ ወአጶሎንያ፡ አህጉረ፡ ወበጽሑ፡ ተሰሎንቄ፡ ኀበ፡ ሀሎ፡ ምኵራበ፡ አይሁድ። ወቦአ፡ ጳውሎስ፡ ኀቤሆሙ፡ በከመ፡ ያለምድ። ወነበረ፡ ይትዋቀሦሙ፡ ሠለስተ፡ ሰናብተ፡ እመጻሕፍት። ወይፌክር፡ ሎሙ፡ ወያበጽሕ፡ ከመሂ፡ ይትቀተል፡ ክርስቶስ። ወከመሂ፡ ይትነሣእ፡ እምዉታን። እንዘ፡ ይብል፡ ውእቱ፡ ክርስቶስ፡ ኢየሱስ፡ ዘአነ፡ ነገርኩክሙ። ወቦ፡ እምውስቴቶሙ፡ እለ፡ አምኑ፡ ወተለውዎሙ፡ ለጳውሎስ፡ ወለሲላስ። ወኄራቶሙ፡ ለአረማውያን፡ ብዙኃን፡ ወአንስትኒ፡ ወዐበይቶሙ፡ ብዙኃን። በእንተ፡ ቅንአቶሙ፡ ለአይሁድ ወቀንኡ፡ አይሁድ፡ ላዕሌሆሙ፡ ወአስተጋብኡ፡ ሰብአ፡ ምሥያጥ፡ ቢጸ፡ እኩያነ። ወበጽሑ፡ ወሆክዋ፡ ለሀገር፡ ለኀሠሥዎሙ። ወደበዩ፡ ቤተ፡ ኢያሶን፡ ወፈቀዱ፡ ያውፅእዎሙ፡ ኀበ፡ ሕዝብ። ወኀጢኦሙ፡ ሰሐብዎ፡ ለኢያሶን፡ ወለቢጹሃ፡ እለ፡ ሀለዉ፡ ህየ። ወወሰድዎሙ፡ ኀበ፡ መኳንንት፡ እንዘ፡ የዐወይዉ፡ ወይብሉ። እሉ፡ እሙንቱ፡ እለ፡ የሀውክዋ፡ ለዓለም፡ ወመጽኡ፡ ዝየኒ። ወተወክፎሙ፡ ዝ፡ ኢያሶን፡ ወእሙንቱ፡ ይገብሩ፡ ማዕሌተ፡ ቄሣር። ወይሜህሩ፡ ካልአ፡ ሕገ፡ ወይቤሉ፡ ኢየሱስ፡ ካልእ፡ ንጉሥ። ወተሀውኩ፡ ሕዝብ፡ ወመኳንንት፡ ዘንተ፡ ሰሚዖሙ። ወብዙኀ፡ ተኀልዮሙ፡ እምኀበ፡ ኢያሶን፡ ወእምኀበ፡ ቢጹ፡ ኀደግዎሙ። ወቢጾሙሰ፡ ፈነውዎሙ፡ በሌሊት፡ ለጳውሎስ፡ ወለሲላስ፡ ውስተ፡ ቤርያ። ወቦኡ፡ ምኵራበ፡ አይሁድ። ወእሙንቱ፡ ይኄይሱ፡ እምእለ፡ በተሰሎንቄ። ወተወክፉ፡ ቃሎሙ፡ በኵሉ፡ ትፍሥሕት። ወኵሎ፡ አሚረ፡ የኀሥሡ፡ በውስተ፡ መጻሕፍት፡ ለእመ፡ ከማሁ፡ ውእቱ። ወብዙኃን፡ እምውስቴቶሙ፡ እለ፡ አምኑ። ወአንስትኒ፡ ብዙኃት፡ አረማውያት፡ ኄራት፡ ወዕደውኒ፡ ብዙኃን። በእንተ፡ አይሁድ፡ እለ፡ በተሰሎንቄ ወአእሚሮሙ፡ አይሁድ፡ እለ፡ በተሰሎንቄ። ከመ፡ መሀረ፡ ጳውሎስ፡ ቃለ፡ እግዚአብሔር፡ በቤርያ። ወመጽኡ፡ ህየኒ፡ ወሆክዎሙ፡ ለሕዝብ። ወፈነውዎ፡ ቢጹ፡ ለጳውሎስ፡ ሶቤሃ፡ ወአብጽሕዎ፡ መንገለ፡ ባሕር። ወነበሩ፡ ሲላስ፡ ወጢሞቴዎስ፡ ህየ። ወእለሰ፡ አስተፋነውዎ፡ ለጳውሎስ፡ መጽኡ፡ ምስሌሁ፡ እስከ፡ ሀገረ፡ አቴና። ወለአኮሙ፡ ኀበ፡ ሲላስ፡ ወጢሞቴዎስ፡ ፍጡነ፡ ይትልውዎ፡ ወሖሩ። በእንተ፡ ተሀውኮቱ፡ ለጳውሎስ ወእንዘ፡ ይጸንሖሙ፡ ጳውሎስ፡ በአቴና። ተምዕዐ፡ መንፈሱ፡ ሶበ፡ ርእየ፡ ያጣዕዉ፡ ኵሉ፡ ሀገር። ወይትዋቀሦሙ፡ ለአይሁድ፡ በምኵራብ፡ ወበምሥያጥ፡ ኵሎ፡ አሚረ፡ ለዘተራከቦሙ። በእንተ፡ እለ፡ ተአኃዝዎ፡ ለጳውሎስ ወቦ፡ እምውስተ፡ ጠቢባን፡ እለ፡ እምትምህርተ፡ ኤፊቆሮስ። ወካልኣን፡ እምእለ፡ ይሰመዩ፡ ረቃይያነ፡ እለ፡ ተኣኀዝዎ። ወመንፈቆሙ፡ ይብሉ፡ ምንተ፡ ይፈቅድ፡ ዝ፡ ዘራዔ፡ ነቢብ። ወካልኣን፡ ይቤሉ፡ ትምህርተ፡ አምላክ፡ ሐዲስ፡ ይሜህር። እስመ፡ ሰበከ፡ ሎሙ፡ በእንተ፡ ኢየሱስ፡ ወትንሣኤሁ፡ እምዉታን። ወወሰድዎ፡ ቤተ፡ ምኵናን፡ ዘይሰመይ፡ አርዮስፋጎስ። ወይቤልዎ፡ እስኩ፡ ንግረነ፡ ምንትኑ፡ ዝ፡ ነገር፡ ዘትሜህር፡ ትምህርተ፡ ሐዲሰ። ንፈቅድ፡ ንጠይቅ፡ ምንት፡ ውእቱ። ወሰብአ፡ አቴናሰ፡ ወእለ፡ ይነግዱ፡ ኵሎሙ፡ ህየ፡ ባዕድ፡ ትካዝ፡ አልቦሙ። ዘእንበለ፡ ዳእሙ፡ ለአጽምዖ፡ ባሕቲቱ፡ ወየሐሥሡ፡ ዘይብሉ፡ ወዘይነብቡ። በእንተ፡ ዘተናገረ፡ ጳውሎስ፡ ውስተ፡ አርዮስፋጎስ ወቆመ፡ ጳውሎስ፡ ውስተ፡ አርዮስፋጎስ፡ ወይቤሎሙ። አንትሙ፡ ሰብአ፡ አቴና፡ እሬእየክሙ፡ ተአብዱ፡ በኵሉ። ወበጺሕየ፡ ዝየ፡ ርኢኩ፡ ጣዖተክሙ፡ ወምሥዋዒክሙ፡ ኀበ፡ ታመልኩ። ወጽሑፍ፡ ውስቴቱ፡ ዘይብል፡ አንጽሑ፡ ርእሰክሙ፡ ለእግዚአብሔር። ናሁኬ፡ ርእዩ፡ ከመ፡ ዘኢተአምሩ፡ ዘታመልኩ። ወአንሰ፡ እሜህረክሙ፡ ታምልክዎ፡ ለእግዚአብሔር። ዘገብረ፡ ዓለመ፡ ወምድረ፡ ወኵሎ፡ ዘውስቴቶሙ። ዘውእቱ፡ እግዚአ፡ ሰማይ፡ ወምድር። ወኢይነብር፡ ውስተ፡ ቤት፡ ዘገብሮ፡ እደ፡ ሰብእ፡ ወኢይትለአኮ፡ እደ፡ ሰብእ። ወውእቱ፡ ይሁብ፡ ለኵሉ፡ ወኢይጽህቅ፡ ምንተኒ። ወውእቱ፡ ይሁብ፡ ለኵሉ፡ ሰብእ፡ ነፍሰ፡ ወሕይወተ። ወገብረ፡ ኵሎ፡ ኅቡረ፡ ወኵሎ፡ አሕዛበ፡ እምአሐዱ፡ ዕጓለ፡ እመሕያው። ከመ፡ ይንበሩ፡ ዲበ፡ ኵሉ፡ ገጸ፡ ምድር። ወሠርዐ፡ ዕድሜሁ፡ ወዐመታቲሁ፡ መጠነ፡ ይነብሩ፡ በዘየኀሥሥዎ፡ ለእግዚአብሔር። እመ፡ ይረክብዎ፡ ወያደምዕዎ፡ ወኢኮነ፡ ርሑቀ፡ እምኵልነ። እስመ፡ ቦቱ፡ ነሐዩሂ፡ ወንትሐወስሂ፡ ወንሄሉሂ። ወሀለዉ፡ ጠቢባን፡ ሰብእ፡ እምውስቴትክሙ፡ እለ፡ ይብሉ፡ ከመ፡ ፍጥረትነ፡ እምኔሁ። ወእንዘ፡ ዘመድነ፡ እንከ፡ እምኔሁ፡ ንሕነ፡ ለእግዚአብሔር። ኢርቱዕ፡ ናስተማስሎ፡ በወርቅ፡ ወበብሩር፡ ወበእብን፡ ዘግሉፍ። በኪነ፡ ዕጓለ፡ እመሕያው፡ ወበአእምሮቱ፡ ኢይደሉኬ፡ ናስተማስል፡ መለኮቶ። ወዘቀዲሙሰ፡ መዋዕለ፡ ኢያእምሮ፡ አሰሰለ፡ እግዚአብሔር። ወይእዜኒ፡ ባሕቱ፡ አዘዘ፡ ለኵሉ፡ ሰብእ፡ ይነስሑ፡ በኵለሄ። እስመ፡ አቀመ፡ ዕለተ፡ እንተ፡ ባቲ፡ ይኴንን፡ ዓለመ፡ በጽድቅ። ላዕለ፡ እደዊሁ፡ ለብእሲ፡ ዘሠርዖ። ወሜጦሙ፡ ኀበ፡ ሃይማኖት፡ ለኵሉ፡ ሰብእ፡ ኪያሁ፡ በአንሥኦ፡ እምዉታን። በእንተ፡ ዘከመ፡ ሰሐቅዎ፡ ወተሣለቅዎ ወሰሚዖሙ፡ ሕይወተ፡ እምዉታን፡ መንፈቆሙ፡ ሠሐቅዎ። ወካልኣን፡ ይቤልዎ፡ ናጸምአከ፡ በእንተዝ፡ ካልአ፡ ጊዜ። ወወፅአ፡ ጳውሎስ፡ እማእከሎሙ። ወቦ፡ ዕደው፡ እለ፡ አምኑ፡ ወተለውዎ። ወአሐዱ፡ እምኔሆሙ፡ ዲዮናስዮስ፡ እመኳንንት፡ ዘአርዮስፋጎስ። ወብእሲት፡ እንተ፡ ስማ፡ ድማርስ፡ ወቦ፡ ባዕዳንሂ፡ እለ፡ ምስሌሆሙ።

ምዕራፍ 18 በእንተ፡ አይሁዳዊ፡ ዘስሙ፡ አቂላ ወእምዝ፡ ወፅአ፡ ጳውሎስ፡ እምአቴና፡ ወሖረ፡ ቆሮንቶስ። ወረከበ፡ አሐደ፡ አይሁዳዌ፡ ዘስሙ፡ አቂላ፡ ወሀገሩ፡ ጳንጦስ። ወበጽሐ፡ ሶቤሃ፡ እምኢጣልያ፡ ወብእሲቱ፡ ጵርስቅላ። እስመ፡ አዘዘ፡ ቀላውዴዎስ፡ ይስድዱ፡ አይሁደ፡ እምሮሜ። ወመጽአ፡ ኀቤሆሙ፡ እስመ፡ የኀብር፡ ግብረ፡ ስራሆሙ። እስመ፡ ገበርተ፡ ሰቀላ፡ እሙንቱ። ወአሐዱ፡ ኪኖሙ፡ ኀቤሆሙ፡ ኅቡረ፡ ወይትጌበሩ፡ ክዳናተ፡ ሰቀላ። በእንተ፡ ትምህርቱ፡ ለጳውሎስ ወጳውሎስ፡ ይትዋቀሦሙ፡ በምኵራብ፡ በኵሉ፡ ሰናብት። ወያአምኖሙ፡ ለአይሁድ፡ ወለአረሚ። ወወረዱ፡ እመቄዶንያ፡ ሲላስ፡ ወጢሞቴዎስ። ወነገሮሙ፡ ጳውሎስ፡ ለአይሁድ፡ ወአስምዖሙ፡ ከመ፡ ኢየሱስ፡ ውእቱ፡ ክርስቶስ። ወተዋቀሥዎ፡ ወፀረፉ፡ ወእምዝ፡ ነገፈ፡ አልባሲሁ፡ ወይቤሎሙ። ደምክሙ፡ ላዕለ፡ ርእስክሙ፡ ንጹሕ፡ አነ፡ እንከ፡ እምደመ፡ ኵልክሙ። እምይእዜሰ፡ አሐውር፡ መንገለ፡ አሕዛብ። በእንተ፡ እለ፡ አምኑ፡ እምሰብአ፡ ቆሮንቶስ ወኀሊፎ፡ እምህየ፡ ቦአ፡ ቤተ፡ ኢዮስጦስ፡ ብእሲ፡ ፈራሄ፡ እግዚአብሔር። ወቤቱ፡ ጎረ፡ ምኵራብ። ወቀርስጶስሃ፡ መጋቤ፡ ምኵራብ፡ አምነ፡ ምስለ፡ ኵሉ፡ ሰብአ፡ ቤቱ፡ በእግዚእነ፡ ኢየሱስ፡ ክርስቶስ። ወብዙኃን፡ እምሰብአ፡ ቆሮንቶስ፡ ሰሚዖሙ፡ አምኑ፡ ወተጠምቁ። በእንተ፡ ራእይ፡ ዘርእየ፡ ጳውሎስ ወይቤሎ፡ እግዚእነ፡ ለጳውሎስ፡ በራእየ፡ ሌሊት፡ ኢትፍራህ፡ ንግር፡ ወኢታርምም። እስመ፡ ሀለውኩ፡ አነ፡ ምስሌከ፡ ወአልቦ፡ ዘያሐምመከ። እስመ፡ ብዙኅ፡ ሕዝብ፡ ብየ፡ ውስተ፡ ዛቲ፡ ሀገር። ወነበረ፡ ጳውሎስ፡ ዓመተ፡ ወስድስተ፡ አውራኀ። እንዘ፡ ይሜህሮሙ፡ ቃለ፡ እግዚአብሔር፡ በቆሮንቶስ። በእንተ፡ እለ፡ ተባጽሕዎ፡ ለጳውሎስ ወተባጽሕዎ፡ አይሁድ፡ ለጳውሎስ፡ ኀበ፡ ጋልዮስ፡ መልአከ፡ አካይያ። ወአምጽእዎ፡ ኀበ፡ ዐውድ። ወይቤልዎ፡ በዘአልቦ፡ ሕግ፡ ይሜህር፡ ለሰብእ፡ ያምልክዎ፡ ለእግዚአብሔር። በእንተ፡ አውሥኦተ፡ ጋልዮስ ወፈቂዶ፡ ጳውሎስ፡ ይክሥት፡ አፉሁ፡ ወይንግሮሙ። አውሥአ፡ መልአክ፡ ጋልዮስ፡ ለአይሁድ፡ ወይቤሎሙ። አንትሙ፡ አይሁድ፡ ለእመ፡ ቦ፡ ዘገፍዐክሙ። ወቦ፡ ጌጋይ፡ እምአስተዋቀሥኩክሙ፡ ወእምአጽማዕኩክሙ። ወእመሰ፡ ትትካሐዱ፡ በእንተ፡ ሕግክሙ፡ ወበእንተ፡ አስማተ፡ ሰብእ። ለሊክሙ፡ አእምሩ፡ አንሰ፡ ኢይፈቅድ፡ እስማዕ፡ ዘከመ፡ ዝ፡ ነገረ። ወሰደድዎሙ፡ እምኀበ፡ ዐውድ። በእንተ፡ እለ፡ ዘበጥዎ፡ ለሶስቴንስ ወአኀዝዎ፡ ኵሎሙ፡ አረማውያን፡ ለሶስቴንስ፡ መጋቤ፡ ምኵራብ። ወዘበጥዎ፡ በኀበ፡ ዐውድ፡ ወኢያሕዘኖ፡ ለጋልዮስ፡ ወኢ፡ ምንተኒ፡ በእንቲኣሁ። ወነበረ፡ ጳውሎስ፡ ዓዲ፡ ኅዳጠ፡ መዋዕለ፡ ኀበ፡ ቢጹ፡ ወፈነውዎ፡ በሰላም። ወነገደ፡ በባሕር፡ ከመ፡ ይሑር፡ ሶርያ፡ ወሀለዉ፡ ምስሌሁ፡ ጵርስቅላ፡ ወአቂላ። ወተላጸየ፡ ርእሶ፡ በውስተ፡ ክንክራኦስ፡ እስመ፡ ብፅዓት፡ ቦ። በእንተ፡ ብጽሐቶሙ፡ ኤፌሶን ወበጽሑ፡ ኤፌሶን፡ ወኀደጎሙ፡ ህየ። ወውእቱሰ፡ ቦአ፡ ምኵራበ፡ ወተዋቀሦሙ፡ ለአይሁድ። ወአስተብቊዕዎ፡ ይንበር፡ ብዙኀ፡ መዋዕለ፡ ወኢፈቀደ። ወእምዝ፡ ሶበ፡ ፈነውዎ፡ ይቤሎሙ፡ እገብእ፡ ካዕበ፡ ለእመ፡ ፈቀደ፡ እግዚአብሔር። ወባሕቱ፡ ይእዜሰ፡ እፈቅድ፡ ከመ፡ እግበር፡ በዓለ፡ ዘይመጽእ፡ በኢየሩሳሌም። ወነገደ፡ በባሕር፡ ወወረደ፡ ቂሳርያ፡ ወዐርገ፡ ቤተ፡ ክርስቲያን፡ ወተአምኆሙ። በእንተ፡ ሑረቱ፡ አንጾኪያ ወሖረ፡ አንጾኪያ፡ ወነበረ፡ ኅዳጠ፡ መዋዕለ። ወወፅአ፡ ወሖረ፡ ወኀለፈ፡ በበ፡ ንስቲት፡ በብሔረ፡ ፍርግያ፡ ወገላትያ። ወአጽንዖሙ፡ ለኵሎሙ፡ አርድእት፡ እለ፡ ሀለዉ፡ ህየ፡ ላዕለ፡ አሚን። በእንተ፡ አጵሎስ ወሀሎ፡ አሐዱ፡ ብእሲ፡ አይሁዳዊ፡ ዘስሙ፡ አጵሎስ፡ ዘእስክንድርያ። ብእሲ፡ ጠቢብ፡ ወየአምር፡ መጽሐፈ። ወበጽሐ፡ ኤፌሶን፡ ወይክል፡ ተናግሮ፡ ወምሁር፡ ፍኖተ፡ እግዚአብሔር። ወጸሐቂ፡ በመንፈሱ፡ ይንግር፡ ወይምሀር፡ በእንተ፡ ኢየሱስ፡ ክርስቶስ። ወዳእሙ፡ በጥምቀተ፡ ዮሐንስ፡ ተጠምቀ። ወውእቱ፡ አኀዘ፡ ይንግር፡ ገሃደ፡ በምኵራብ። ወሰምዕዎ፡ ጵርስቅላ፡ ወአቂላ፡ ወአቅረብዎ፡ ኀበ፡ ማኅደሮሙ። ወአጠየቅዎ፡ ፍኖተ፡ እግዚአብሔር፡ ፍጹመ። ወፈቀደ፡ ይሑር፡ አካይያ፡ ወአብጽሕዎ፡ ቢጹ። ወጸሐፉ፡ ሎቱ፡ ኀበ፡ አርድእት፡ ይትወከፍዎ። ወበጺሖ፡ ኀቤሆሙ፡ ነገሮሙ፡ ብዙኀ፡ ለእለ፡ አምኑ፡ በጸጋ፡ እግዚአብሔር። ወረድኦሙ፡ ለመሃይምናን፡ ዐቢየ፡ ረድኤተ። እስመ፡ ይትጋደሎሙ፡ ለአይሁድ፡ ፈድፋደ፡ በቅድመ፡ ኵሉ፡ ሕዝብ። እንዘ፡ ሀለዉ፡ ጉቡኣን፡ ገሃደ። ወያበጽሕ፡ ሎሙ፡ እምውስተ፡ መጻሕፍት፡ በእንተ፡ ኢየሱስ፡ ከመ፡ ውእቱ፡ ክርስቶስ።

ምዕራፍ 19 በእንተ፡ ብጽሐቱ፡ ኤፌሶን ወእምዝ፡ እንዘ፡ አጵሎስ፡ ሀሎ፡ ቆሮንቶስ፡ ኀለፈ፡ ጳውሎስ፡ እንተ፡ ላዕላይ፡ ደወል። ወበጽሐ፡ ኤፌሶን፡ ወረከበ፡ በህየ፡ ኅዳጣነ፡ አርድእተ። ወይቤሎሙ፡ ቦኑ፡ ዘነሣእክሙ፡ መንፈሰ፡ ቅዱሰ፡ እምዘአመንክሙ። ወይቤልዎ፡ ኢሰማዕናሁ፡ ጥቀ፡ ከመ፡ ቦ፡ መንፈስ፡ ቅዱስ። ወይቤሎሙ፡ በምንትኑ፡ ተጠመቅሙ፡ ወይቤልዎ፡ በጥምቀተ፡ ዮሐንስ። ወይቤሎሙ፡ ጳውሎስ፡ ዮሐንስ፡ አጥመቀ፡ በጥምቀተ፡ ንስሓ። እንዘ፡ ይሰብክ፡ ከመ፡ ይእመኑ፡ በዘይመጽእ፡ እምድኅሬሁ፡ ዘውእቱ፡ ኢየሱስ፡ ክርስቶስ። ወሰሚዖሙ፡ ተጠምቁ፡ በስሙ፡ ለእግዚእነ፡ ኢየሱስ፡ ክርስቶስ። ወወደየ፡ እዴሁ፡ ጳውሎስ፡ ዲቤሆሙ፡ ወወረደ፡ መንፈስ፡ ቅዱስ፡ ላዕሌሆሙ። ወነበቡ፡ በነገረ፡ ኵሉ፡ በሓውርት፡ ወተነበዩ። ወየአክሉ፡ ኵሎሙ፡ ዐሠርተ፡ ወክልኤተ፡ ዕደወ። በእንተ፡ ትምህርቱ፡ ለጳውሎስ ወቦአ፡ ጳውሎስ፡ ምኵራበ፡ ወነገረ፡ ገሃደ። ወነበረ፡ ሠለስተ፡ አውራኀ፡ ይትዋቀሦሙ። ወያአምኖሙ፡ በእንተ፡ መንግሥተ፡ እግዚአብሔር። ወቦ፡ እለ፡ ክሕዱ። ወተንሥኡ፡ ወአሕሠሙ፡ ዲበ፡ ትምህርት፡ ዘእግዚአብሔር፡ በቅድመ፡ ጉባኤ፡ አሕዛብ። ወኀደጎሙ፡ ጳውሎስ፡ ወነሥኦሙ፡ ለአርድእት። ወኵሎ፡ አሚረ፡ ይነግሮሙ፡ በቤቱ፡ ለመምህር፡ ብእሲ፡ ዘስሙ፡ ጢራኖስ፡ ወበምኵናነ፡ መላእክት። ወጐንደየ፡ ከመ፡ ዝ፡ ክልኤተ፡ ዓመተ። እስከ፡ ሰምዑ፡ ኵሎሙ፡ እለ፡ ይነብሩ፡ እስያ፡ ቃለ፡ እግዚአብሔር፡ አይሁድ፡ ወአረሚ። በእንተ፡ ሀብተ፡ ፈውስ፡ ዘተውህቦ፡ ለጳውሎስ ወዐቢየ፡ ኀይለ፡ ይገብር፡ እግዚአብሔር፡ በእደዊሁ፡ ለጳውሎስ። ወይወስዱ፡ እምጽንፈ፡ ልብሱ። ወሰበኑ፡ መቲሮሙ፡ ወያነብሩ፡ ዲበ፡ ድዉያን። ወየሐይዉ፡ ወአጋንንት፡ እኩያን፡ ይወፅኡ። ወቦ፡ እለ፡ አኀዙ፡ እምአይሁድ፡ ይዑዱ፡ ወይርቅዩ። ወይጼውዑ፡ ሎሙ፡ ለአጋንንት፡ እኩያን፡ በስመ፡ እግዚእነ፡ ኢየሱስ። ወይቤልዎሙ፡ ናምሕለክሙ፡ በስሙ፡ ለኢየሱስ፡ ዘጳውሎስ፡ ይሜህር፡ በስሙ። ወእሉ፡ እለ፡ ከመ፡ ዝ፡ ይገብሩ፡ አይሁድ፡ እሙንቱ። ደቂቀ፡ ሊቀ፡ ካህናት፡ ዘስሙ፡ አስቄዋ፡ ወሰብዐቱ፡ እሙንቱ። ወተሰጥዎሙ፡ ውእቱ፡ ጋኔን፡ እኩይ፡ ወይቤሎሙ። በኢየሱስኒ፡ አአምን፡ ወለጳውሎስኒ፡ አአምሮ። አንትሙ፡ እንከ፡ መኑ፡ አንትሙ። ወአብደ፡ ላዕሌሆሙ፡ ውእቱ፡ ዘጋኔን፡ እኩይ። ወኀየሎሙ፡ ወሞኦሙ፡ ወአቊሰሎሙ፡ ወፈቅኦሙ፡ ወሰደዶሙ፡ እምውእቱ፡ ቤት። ወተሰምዐ፡ ዝ፡ ነገር፡ በኀበ፡ ኵሎሙ፡ አይሁድ፡ ወአረሚ፡ እለ፡ ይነብሩ፡ ኤፌሶን። ወፈርሁ፡ ኵሎሙ፡ ወአዕበዩ፡ ስመ፡ እግዚእነ፡ ኢየሱስ። በእንተ፡ መሠርያን ወኵሎሙ፡ እለ፡ አምኑ፡ ይመጽኡ፡ ወይኔስሑ፡ በእንተ፡ ዘገብሩ። ወብዙኃን፡ መሠርያን፡ ያስተጋብኡ። ወያመጽኡ፡ ወያውዕዩ፡ መጻሕፍቲሆሙ፡ በቅድመ፡ ኵሉ። ወኮነ፡ ሐሳበ፡ ሤጡ፡ ለዘአውዐዩ፡ ኀምስቱ፡ እልፍ፡ ድርህመ፡ ብሩር። ወከመ፡ ዝ፡ ጸንዐ፡ ቃለ፡ እግዚአብሔር፡ ወዐብየ፡ ወኀየለ። በእንተ፡ ሑረቱ፡ ኢየሩሳሌም ወእምዝ፡ ተፈጺሞ፡ ዝንቱ፡ ኀለየ፡ ጳውሎስ፡ በመንፈሱ። ይኅልፍ፡ እንተ፡ መቄዶንያ፡ ወአካይያ፡ ወይሑር፡ ኢየሩሳሌም። ወይቤ፡ በጺሕየ፡ ህየ፡ ይደልወኒ፡ እርአያ፡ ለሮሜ። ወፈነወ፡ ለመቄዶንያ፡ ክልኤተ፡ እለ፡ ይትለአክዎ፡ ጢሞቴዎስሃ፡ ወአርስጦስሃ። ወውእቱ፡ ጳውሎስ፡ ነበረ፡ እስያ፡ ብዙኀ፡ መዋዕለ። ወበውእቱ፡ መዋዕል፡ ዐቢይ፡ ሁከት፡ ኮነ፡ በእንተ፡ ዝ፡ ትምህርት፡ ላዕለ፡ እለ፡ አምኑ፡ በእግዚእነ። በእንተ፡ ድሜጥሮስ፡ ወአብያጺሁ ወሀሎ፡ አሐዱ፡ ብእሲ፡ ህየ፡ ዘስሙ፡ ድሜጥሮስ፡ ነሃቤ፡ ብሩር። ወይገብር፡ ሥዕላተ፡ ብሩር፡ ጣዖተ፡ ለአርጤምስ። ወያስተጌብሮሙ፡ ለኪነት፡ ወይሁቦሙ፡ ብዙኀ፡ ንዋየ፡ ወያረብሖሙ። ወአስተጋብኦሙ፡ ለኵሉ፡ ኪነት፡ ወለእለ፡ ይነብሩ፡ ምስሌሆሙ። ወአንገለጉ፡ ወይቤሎሙ፡ አንትሙ፡ አኀዊነ፡ ለሊክሙ። ተአምሩ፡ ከመ፡ በዝ፡ ተግባርነ፡ ውእቱ፡ ምርካብነ። ወናሁ፡ ዘከመ፡ ትሬእዩ፡ ወዘከመ፡ ትሰምዑ። አኮ፡ ባሕቲቶ፡ ኤፌሶን፡ አላ፡ በኵሉ፡ እስያ፡ አስሐተ፡ ዝ፡ ጳውሎስ፡ ብዙኃነ፡ አሕዛበ። ወይቤሎሙ፡ ኢኮኑ፡ አማልክተ፡ እለ፡ በእደ፡ ሰብእ፡ ይትገበሩ። ወዓዲ፡ አኮ፡ በዝ፡ ባሕቲቱ፡ ዘንትመነሶ። ዓዲ፡ ለምኵራበ፡ አርጤምስኒ፡ ሀለዋ፡ ይሠዐር፡ ክብራ። ወይትነሠት፡ ዕበያ፡ እንተ፡ እስያኒ፡ ወኵሉ፡ ዓለም፡ ያመልካ። በእንተ፡ ሀብተ፡ ሀገር ወሰሚዖሙ፡ ተምዕዑ፡ ወከልሑ፡ በዐቢይ፡ ቃል። ወይቤሉ፡ ሰንበት፡ ዕበያ፡ ለአርጤምስ፡ እንተ፡ ኤፌሶን። ወተሀውኩ፡ ኵሉ፡ ሀገር፡ ወሮጹ፡ ኀበ፡ መካነ፡ ተውኔት፡ ኅቡረ። ወሰሐብዎሙ፡ ለጋይዮስ፡ ወለአርስጥሮኮስ፡ ዕደው፡ መቄዶናውያን፡ አዕርክቱ፡ ለጳውሎስ። ወፈቀደ፡ ጳውሎስ፡ ይባእ፡ ማእከለ፡ አሕዛብ፡ ወከልእዎ፡ አርድእት። ወእለሂ፡ እምእስያ፡ አዕርክቱ፡ ለአኩ፡ ኀቤሁ። ኢይባእ፡ ማእከለ፡ አሕዛብ፡ አስተብቊዕዎ። ወጐንደዩ፡ እንዘ፡ ይኬልሑ፡ ሕዝብ፡ እለ፡ ሀለዉ፡ ህየ፡ መካነ፡ ተውኔት። ወቦ፡ እለ፡ ይኬልሑ፡ በካልእ፡ ነገር። ወእለሰ፡ ይበዝኁ፡ እምኔሆሙ፡ ኢየአምሩ፡ በእንተ፡ ምንት፡ አንገለጉ፡ አሕዛብ። በእንተ፡ ሕዝበ፡ አይሁድ፡ እለ፡ ሀለዉ፡ ህየ ወሕዝበ፡ አይሁድ፡ እለ፡ ሀለዉ፡ ህየ። አንሥኡ፡ እምኔሆሙ፡ ብእሴ፡ አይሁዳዌ፡ ዘስሙ፡ እስክንድሮስ። ወተንሢኦ፡ ቀጸበ፡ በእዴሁ፡ ወፈቀደ፡ ይውቅሥ፡ ለዐውድ። ወአእሚሮሙ፡ ከመ፡ አይሁዳዊ፡ ውእቱ። ከልሑ፡ ኵሎሙ፡ በአሐዱ፡ ቃል፡ መጠነ፡ ክልኤ፡ ሰዓት። እንዘ፡ ይብሉ፡ ሰንበት፡ ዕበያ፡ ለአርጤምስ፡ እንተ፡ ኤፌሶን። በእንተ፡ ዘይቤ፡ ጸሓፌ፡ ሀገር ወእምዝ፡ ተንሥአ፡ ጸሓፌ፡ ሀገር፡ ወአስተጋብኦሙ፡ ለአሕዛብ። ወይቤሎሙ፡ ስምዑ፡ ሰብአ፡ ኤፌሶን፡ መኑ፡ ሰብእ፡ ዘኢየአምራ፡ ለሀገረ፡ ኤፌሶን። ከመ፡ ይእቲ፡ እንተ፡ አርጤምስ፡ ዐባይ፡ ጣዖታ፡ ዘወረደ፡ እምሰማይ። ወበእንተ፡ ዝ፡ ይመስለኒ፡ አልቦ፡ ዘይክል፡ ተቃውሞታ፡ ለዛቲ። ወይእዜኒ፡ ርቱዕ፡ በድቡት፡ ንግበሮ፡ ለዝ፡ ወአኮ፡ በሀከክ፡ ወበትዝልፍት። ናሁ፡ ተባጻሕክምዎሙ፡ ለእሉ፡ ሰብእ፡ ዘኢሰረቁ፡ ቤተ፡ አማልክት። ወኢፀረፉ፡ ዲበ፡ አማልክቲነ። በእንተ፡ ነሢቶተ፡ ዐውድ ወእመሰ፡ ቦ፡ ተስናነ፡ ድሜጥሮስ፡ ምስለ፡ ኪነት፡ ለይትዋቀሡ፡ በበይናቲሆሙ። ናሁ፡ መኰንን፡ ውስተ፡ ሀገር። ወእመሰ፡ ባዕድ፡ ማኅሠሥ፡ ብክሙ፡ በእንተ፡ ሕግክሙ፡ ንነሥት፡ ዐውደ። እስመ፡ ንትመነሶ፡ ዮም፡ በዘአምጻእክሙ፡ ለነ። ሀከከ፡ ዘአልቦ፡ ጌጋይ፡ ወአልብነ፡ ዘንትዋቀሥ፡ በእንተ፡ ዝ፡ ሀከክ። ወዘንተ፡ ብሂሎ፡ ነሠተ፡ ዐውደ።

ምዕራፍ 20 በእንተ፡ ፀአቱ፡ ለጳውሎስ፡ እምነ፡ ኤፌሶን ወእምድኅረ፡ ኀልቀ፡ ሀከክ፡ ጸውዐ፡ ጳውሎስ፡ አርዳኢሁ። ወመሀሮሙ፡ ወሰዐሞሙ፡ ወወፅአ፡ ወሖረ፡ መቄዶንያ። ወኀለፈ፡ እንተ፡ ውእቱ፡ በሓውርት፡ ወብዙኀ፡ መሀሮሙ፡ በቃሉ። ወእምዝ፡ ሖረ፡ ኤልዳ። ወነበረ፡ በህየ፡ ሠለስተ፡ አውራኀ፡ ወተማከሩ፡ አይሁድ፡ ዲቤሁ። ወፈቀደ፡ ይሑር፡ ብሔረ፡ ሶርያ፡ ወመከረ፡ ይሰወጥ፡ መቄዶንያ። ወሖሩ፡ ምስሌሁ፡ ሱሲ፡ ጴጥሮስ፡ ዘሀገረ፡ ቤርያ። ወእምተሰሎንቄ፡ አርስጥሮኮስ፡ ወሲኮንዱስ፡ ወጋይዮስ፡ ደርቤያዊ። ወጢሞቴዎስ፡ ዘእምልስጥራን፡ ወእምእስያ፡ ቲኪቆስ፡ ወጥሮፊሞስ። ወእሙንቱ፡ ሖሩ፡ ቅድሜነ፡ ወጸንሑነ፡ ውስተ፡ ጢሮአዳ። በእንተ፡ ንግደቶሙ፡ እምፊልጵስዩስ ወንሕነሰ፡ ነገድነ፡ እምድኅረ፡ ፋሲካ፡ እምፊልጵስዮስ። ወበጻሕነ፡ ኀቤሆሙ፡ ውስተ፡ ጢሮአዳ፡ በባሕር፡ በኀምስቱ፡ ዕለት። ወነበርነ፡ ህየ፡ ሰቡዐ፡ መዋዕለ። ወበዕለተ፡ እሑድ፡ እንዘ፡ ጉቡኣን፡ ንሕነ፡ ከመ፡ ንባርክ፡ ማእደ። ወይነግሮሙ፡ ጳውሎስ፡ እስመ፡ በሳኒታ፡ ይገይሥ። ወአንኀ፡ ነገረ፡ እስከ፡ መንፈቀ፡ ሌሊት። ወብዙኀ፡ መኀትው፡ ውስተ፡ ውእቱ፡ ጽርሕ፡ ኀበ፡ ሀሎነ፡ ጉቡኣን። በእንተ፡ ወልድ፡ ዘስሙ፡ አውጤክስ ወእንዘ፡ ይነብር፡ አሐዱ፡ ወልድ፡ ወሬዛ፡ ውስተ፡ መስኮት፡ ዘስሙ፡ አውጤክስ። ደቀሰ፡ ወኖመ፡ ዐቢየ፡ ንዋመ፡ ወእንዘ፡ ይነግር፡ ጳውሎስ፡ ብዙኀ፡ ጐንደየ። ወእምኀበ፡ ይነውም፡ ውእቱ፡ ወልድ፡ ጸድፈ፡ እምተሥላስ፡ ታሕተ፡ ወአንሥእዎ፡ በድኖ። ወወረደ፡ ጳውሎስ፡ ወነሥኦ፡ ኀቤሁ፡ ወይቤሎሙ። ኢትደንግፁ፡ ሀለወት፡ ነፍሱ፡ ላዕሌሁ። ወእምዝ፡ ዐርገ፡ ወአዕረጎ፡ ምስሌሁ፡ ወነበረ፡ ወባረከ፡ ማእደ። ወወሀቦ፡ ለወሬዛ፡ እምነ፡ ማእድ። ወብዙኀ፡ ነገሮሙ፡ ወጐንደየ፡ እስከ፡ ጎሕ። ወእምዝ፡ ወፅአ፡ ጌሠመ፡ ወአወፈዮሙ፡ ውእተ፡ ወልደ፡ ሕያዎ፡ ወተፈሥሑ፡ ፈድፋደ። በእንተ፡ እለ፡ ተቀበልዎ፡ ለጳውሎስ ወንሕነሰ፡ ዐረግነ፡ ሐመረ፡ ወሖርነ፡ አሶን። እስመ፡ እምህየ፡ ፈቀድነ፡ ንትቀበሎ፡ ለጳውሎስ። እስመ፡ ከመ፡ ዝ፡ ተናገረነ፡ ከመ፡ ይመጽእ፡ በእግር፡ ወተቀበልናሁ። ወበጻሕነ፡ አሶን፡ ወነሣእናሁ፡ ዲበ፡ ሐመር፡ ወሖርነ፡ ሚልጢኒን። ወእምህየ፡ ነገድነ፡ በሳኒታ፡ ወበጻሕነ፡ አንጢቅክስዩ። ወበሳኒታ፡ ኀለፍነ፡ እንተ፡ ሳሞን። በእንተ፡ በዓለ፡ ጰንጠቆስጤ ወእምድኅረ፡ ውእቱ፡ ዕለት፡ በጻሕነ፡ መሊጡ። እስመ፡ አጥብዐ፡ ጳውሎስ፡ ከመ፡ ይሑር፡ ኤፌሶን፡ ከመ፡ ኢይጐነዲ፡ ውስተ፡ እስያ። ወጐጕአ፡ ለእመ፡ ይትከሀሎ፡ ይብጻሕ፡ ኢየሩሳሌም፡ ለጰንጠቆስጤ። ወእምነ፡ መሊጡ፡ ለአከ፡ ኤፌሶን፡ ይጸውዕዎሙ፡ ለቀሲሳን፡ እለ፡ ቤተ፡ ክርስቲያን። በእንተ፡ ተስናእሎ ወበጺሖሙ፡ ኀቤሁ፡ ይብሎሙ፡ ለሊክሙ፡ ተአምሩ፡ እምአመ፡ መጻእኩ፡ እስያ። ዘከመ፡ ነበርኩ፡ ኀቤክሙ፡ በኵሉ፡ መዋዕል። እንዘ፡ እትቀነይ፡ ለእግዚአብሔር። ወእሰርሕ፡ በኵሉ፡ ሕማም፡ ወአንብዕ፡ ወመንሱትሂ፡ ዘረከበነ፡ እምአይሁድ። ወአልቦ፡ ዘሰወርኩክሙ፡ እምኵሉ፡ ዘይደልወክሙ፡ ዘኢነገርኩክሙ፡ ወዘኢመሀርኩክሙ። እንዘ፡ አሰምዖሙ፡ ለአይሁድ፡ ክሡተ፡ ወለአረሚኒ፡ በአፍኣኒ፡ ወበውስጥኒ። ከመ፡ ይትጋነዩ፡ ወይነስሑ፡ ለእግዚአብሔር። ወይእመኑ፡ በእግዚእነ፡ ኢየሱስ፡ ክርስቶስ። በእንተ፡ አዘክሮተ፡ ሕማም ወይእዜኒ፡ ናሁ፡ ተአሰርኩ፡ በመንፈስየ፡ እሑር፡ ኢየሩሳሌም። ወኢየአምር፡ ዘይረክበኒ፡ በውስቴታ። ወባሕቱ፡ አስምዐ፡ ሊተ፡ መንፈስ፡ ቅዱስ፡ በበ፡ አህጉር። እንዘ፡ ይብል፡ ሕማም፡ ወመዋቅሕት፡ ይጸንሓከ። ወባሕቱ፡ ኢአሐስባ፡ ለነፍስየ፡ ወኢ፡ ምንተኒ። ዳእሙ፡ ከመ፡ እፈጽም፡ መልእክትየ። ወእሠልጥ፡ ግብርየ፡ ዘነሣእኩ፡ እምኀበ፡ እግዚእነ፡ ኢየሱስ፡ ክርስቶስ። ከመ፡ እምሀር፡ ወእስብክ፡ ወንጌለ፡ ጸጋሁ፡ ለእግዚአብሔር። ወይእዜኒ፡ ናሁ፡ አነ፡ አእመርኩ፡ ከመ፡ ኢትሬእዩኒ፡ ገጽየ። እንከ፡ አንትሙ፡ ኵልክሙ፡ እለ፡ ሰበኩ፡ ለክሙ፡ በእንተ፡ መንግሥተ፡ እግዚአብሔር። በእንተ፡ አንቅሖ፡ ኖሎት ወናሁ፡ አሰምዕ፡ ለክሙ፡ ዮም፡ በዛቲ፡ ዕለት። ከመ፡ ንጹሕ፡ አነ፡ እምደመ፡ ኵልክሙ። ወአልቦ፡ ዘኀባእኩክሙ፡ ወዘኢነገርኩክሙ፡ ኵሎ፡ ምክሮ፡ ለእግዚአብሔር። ወይእዜኒ፡ ዕቀቡ፡ ርእሰክሙ፡ ወኵሎ፡ መራዕየ። ዘሎቱ፡ ሤመክሙ፡ መንፈስ፡ ቅዱስ፡ ጳጳሳተ። ከመ፡ ትርዐዩ፡ ቤተ፡ ክርስቲያኑ፡ ለእግዚአብሔር፡ እንተ፡ አጥረያ፡ በደሙ። ወአነ፡ አአምር፡ ከመ፡ ይመጽኡ፡ እምድኅሬየ፡ ተኵላት፡ መሠጥ። እለ፡ ኢይምህክዋ፡ ለመርዔት። ወእምውስቴትክሙ፡ ይትነሥኡ፡ ዕደው፡ እለ፡ ይሜህሩ፡ ጠዋየ፡ ነገረ። ከመ፡ ያግብእዎሙ፡ ለአሕዛብ፡ ኀቤሆሙ። ወይእዜኒ፡ ትግሁ፡ ወተዘከሩ፡ ከመ፡ ሠለስተ፡ ዓመተ፡ ኢነትገ፡ አንብዕየ፡ ሌሊተ፡ ወመዓልተ። እንዘ፡ እሜህረክሙ፡ ለኵልክሙ። ወይእዜኒ፡ አማሕፀንኩክሙ፡ ኀበ፡ እግዚአብሔር፡ ወለቃለ፡ ጸጋሁ። ዘይክል፡ ሐኒጾተክሙ፡ ወየሀብክሙ፡ ርስተ፡ ምስለ፡ ኵሎሙ፡ ቅዱሳን። በእንተ፡ ተዐቅቦ፡ እምፍቅረ፡ ንዋይ ተአምሩ፡ ከመ፡ ኢተሰቆቁ፡ ንዋየክሙ፡ ወኢ፡ ወርቀ፡ ወኢ፡ ብሩረ። ወኢ፡ አልባሰ፡ ኢነሣእኩ፡ ወኢ፡ እምኀበ፡ አሐዱሂ፡ እምኔክሙ። ለሊክሙ፡ ተአምሩ፡ ኢ፡ ለትካዝየ፡ ወኢ፡ ለእለ፡ ምስሌየ፡ ተቀንያ፡ እላንቱ፡ እደውየ። እስመ፡ ከማሁ፡ ይደልወነ፡ ከመ፡ በጻማነ፡ ወበተግባርነ፡ ንትወከፎሙ፡ ለድኩማን። ወዘንተ፡ መሀርኩክሙ፡ ትዘከሩ፡ ቃሎ፡ ለእግዚእነ፡ ዘይቤ። ብፁዕ፡ ዘይሁብ፡ እምዘይነሥእ። በእንተ፡ እንተ፡ እለ፡ አስተፋነውዎ ወዘንተ፡ ብሂሎ፡ ሰገደ፡ ወጸለየ፡ ምስለ፡ ኵሎሙ፡ እለ፡ ሀለዉ፡ ምስሌሁ። ወብዙኀ፡ በከዩ፡ ኵሎሙ፡ ወሐቀፍዎ፡ ክሳዶ፡ ለጳውሎስ። ወሰዐምዎ፡ እንዘ፡ ይቴክዙ፡ ወፈድፋደሰ። እስመ፡ ይቤሎሙ፡ ኢትሬእዩኒ፡ እንከ፡ ገጽየ። ወአስተፋነውዎ፡ ወዐርገ፡ ሐመረ።

ምዕራፍ 21 በእንተ፡ አንሶስዎቶሙ፡ ውስተ፡ በሓውርት ወሖርነ፡ ንሕነሂ፡ ወእሙንቱሂ፡ አተዉ። ወረዊጸነ፡ በጻሕነ፡ ብሔረ፡ ቆስያ። ወበሳኒታ፡ ወረድነ፡ ሩድ፡ ወእምህየ፡ ሖርነ፡ ለጳጥራ። ወረከብነ፡ ሐመረ፡ ዘየሐውር፡ ፊንቂ፡ ወዐረግነ፡ ውስቴታ። ወነገድነ፡ ወርኢናሃ፡ ለቆጵሮስ፡ ወኀደግናሃ፡ በፀጋምነ። ወሖርነ፡ ወነገድነ፡ ለምድረ፡ ሶርያ፡ ወወረድነ፡ ጢሮስ። እስመ፡ ህየ፡ አውረዱ፡ ኵሎ፡ ዘውስተ፡ ሐመር። በእንተ፡ አርድእት፡ እለ፡ ውስተ፡ ጢሮስ ወበህየ፡ ረከብናሆሙ፡ ለአርድእት። ወነበርነ፡ ኀቤሆሙ፡ ሰቡዐ፡ መዋዕለ። ወይቤልዎ፡ እሙንቱ፡ ለጳውሎስ፡ በመንፈስ፡ ቅዱስ፡ ኢይዕርግ፡ ኢየሩሳሌም። ወእምድኅረዝ፡ ወፃእነ፡ ለፍኖት። ወአስተፋነዉነ፡ ኵሉ፡ አንስትኒ፡ ወደቂቅኒ፡ ለአፍኣ፡ ሀገር። ወሰገዱ፡ በብረኪሆሙ፡ ኀበ፡ ጽንፈ፡ ባሕር። ወጸለይነ፡ ወተአማኅነ፡ በበይናቲነ፡ ወተፋነውነ። ወእምዝ፡ ዐረግነ፡ ሐመረ፡ ወእሙንቱሂ፡ አተዉ፡ አብያቲሆሙ። ወንሕነሰ፡ ነገድነ፡ እምጢሮስ፡ ወይእቲ፡ ሱር፡ ወበጻሕነ፡ ሀገረ፡ አካ። ወተአማኅናሆሙ፡ ለአኀዊነ፡ ወነበርነ፡ ኀቤሆሙ፡ አሐተ፡ ዕለተ። በእንተ፡ ፊልጶስ፡ ዲያቆን ወበሳኒታ፡ ወፃእነ፡ ወሖርነ፡ ቂሳርያ። ወቦእነ፡ ቤተ፡ ፊልጶስ፡ ዜናዊ፡ አሐዱ፡ እምሰብዐቱ፡ አኀው፡ ዲያቆናት። ወሀለዋ፡ ኀቤሁ፡ አርባዕ፡ ደናግል፡ አዋልዲሁ፡ ወይትኔበያ። ወነበርነ፡ ብዙኀ፡ መዋዕለ፡ ኀቤሁ። በእንተ፡ ትንቢቱ፡ ለአጋቦስ ወወረደ፡ አሐዱ፡ ነቢይ፡ እምይሁዳ፡ ዘስሙ፡ አጋቦስ። ወመጽአ፡ ኀቤነ፡ ወነሥአ፡ ቅናቶ፡ ለጳውሎስ። ወተአስረ፡ ለሊሁ፡ እደዊሁ፡ ወእገሪሁ። ወይቤ፡ ከመ፡ ዝ፡ ይቤ፡ መንፈስ፡ ቅዱስ፡ ለእግዚአ፡ ዝ፡ ቅናት። ከመ፡ ዝ፡ የአስርዎ፡ አይሁድ፡ በኢየሩሳሌም፡ ወያገብእዎ፡ ለአሕዛብ። በእንተ፡ አስተብቍዖተ፡ አኀው፡ ወአውሥኦቱ፡ ለጳውሎስ ወዘንተ፡ ሰሚዐነ፡ አስተብቋዕናሁ፡ ለጳውሎስ፡ ምስለ፡ ሰብአ፡ ውእቱ፡ ብሔር። ከመ፡ ኢይዕርግ፡ ኢየሩሳሌም። ወተሰጥወ፡ ጳውሎስ፡ ወይቤ፡ ለምንት፡ ከመ፡ ዝ፡ ትገብሩ፡ ወትበክዩ፡ ወትሰብሩኒ፡ ልብየ። አንሰኬ፡ አኮ፡ ባሕቲቶ፡ ማሕሜ፡ ወመዋቅሕተ፡ ዘእሴፎ። ዓዲ፡ ለመዊትኒ፡ ጥቡዕ፡ አነ፡ በኢየሩሳሌም፡ በእንተ፡ ስመ፡ እግዚእነ፡ ኢየሱስ። ወሶበ፡ አበየ፡ አርመምነ፡ ወኀደግናሁ፡ ወንቤ፡ ዘፈቀደ፡ እግዚአብሔር፡ ለይኩን። በእንተ፡ ዐሪግ፡ ኢየሩሳሌም ወእምድኅረ፡ እማንቱ፡ መዋዕል፡ አስተዳሎነ፡ ወዐረግነ፡ ኢየሩሳሌም። ወቦ፡ እምነ፡ አርዳእ፡ እለ፡ መጽኡ፡ ምስሌነ፡ እምቂሳርያ። ወሖርነ፡ ወኀደርነ፡ ኀበ፡ ምናሶን፡ ዘሀገረ፡ ቆጵሮስ፡ ዘእምአርድእት፡ ቀዳማውያን። በእንተ፡ ተራክቦቶሙ፡ ምስለ፡ ሐዋርያት ወበጺሐነ፡ ኢየሩሳሌም፡ ተቀበሉነ፡ አኀዊነ፡ በፍሥሓ። ወበሳኒታ፡ ቦእነ፡ ምስለ፡ ጳውሎስ፡ ኀበ፡ ያዕቆብ። ወኀበ፡ ኵሎሙ፡ ቀሲሳን፡ ወሰላመ፡ ንቤሎሙ። ወተአምኆሙ፡ ጳውሎስ። ወዜነዎሙ፡ ኵሎ፡ ዘገብረ፡ እግዚአብሔር፡ በውስተ፡ አሕዛብ፡ በመልእክተ፡ ዚኣሁ። በእንተ፡ አውሥኦተ፡ ሐዋርያት ወሰሚዖሙ፡ አእኰቱ፡ እግዚአብሔርሃ፡ ወይቤልዎ። ትሬኢኑ፡ ኦ፡ እኁነ፡ ሚመጠን፡ አእላፍ፡ በውስተ፡ አይሁድ፡ እለ፡ አምኑ፡ ወኵሎሙ፡ ምሁራነ፡ ኦሪት። ወዳእሙ፡ ይቤልዎሙ፡ በእንቲኣከ፡ ከመ፡ ዘኢይከውን፡ ትሜህር። ወታኀድጎሙ፡ ሕገ፡ ሙሴ፡ ወትከልኦሙ፡ ለአሕዛብ። ወለኵሎሙ፡ እለ፡ አምኑ፡ እምውስተ፡ አይሁድ፡ ኢይግዝሩ፡ ደቂቆሙ፡ ወኢይግበሩ፡ ሕገ፡ ኦሪት። ወይእዜኒ፡ ሀለዎሙ፡ ይስምዑ፡ ከመ፡ መጻእከ፡ ዝየ፡ ወከመ፡ ዝ፡ ግበር፡ ዘከመ፡ ንብለከ። በእንተ፡ እለ፡ ቦሙ፡ ብፅዓት ሀለዉ፡ ኀቤነ፡ አርባዕቱ፡ ዕደው፡ እለ፡ ቦሙ፡ ብፅዓት፡ ያንጽሑ፡ ርእሶሙ። ንሥኦሙ፡ ወሰዶሙ፡ ወአንጽሕ፡ ርእሰከ፡ ምስሌሆሙ። ወአስተዋፅእ፡ በእንቲኣሆሙ፡ ከመ፡ ይትላጸዩ፡ ርእሶሙ። ወየአምሩ፡ ኵሎሙ፡ ከመ፡ ሐሰት፡ ውእቱ፡ ዘየሐምዩከ። ወከመ፡ ተዐቅብ፡ አንተሂ፡ ሕገ፡ ኦሪት። በእንተ፡ አሕዛብ፡ እለ፡ የአምኑ ወበእንተሰ፡ አሕዛብ፡ እለ፡ የአምኑ፡ ንሕነ፡ አዘዝነ፡ ከመ፡ ይትዐቀቡ፡ ዘይትሔረሙ። እምዘይዘብሑ፡ ለአማልክት፡ ወእምዝሙት፡ ወእማውታ፡ ወደም። ወነሥኦሙ፡ ጳውሎስ፡ ለእሙንቱ፡ ዕደው፡ ወተቀደሰ፡ ምስሌሆሙ። ወቦአ፡ ምኵራበ፡ ወነገሮሙ፡ መዋዕለ፡ ዕድሜ፡ ንጽሖሙ። እስከ፡ ያበውኡ፡ መሥዋዕተ፡ ለለ፡ አሐዱ፡ እምኔሆሙ። በእንተ፡ አይሁድ፡ እለ፡ ሰከይዎ፡ ለጳውሎስ ወአመ፡ ሰቡዕ፡ መዋዕል፡ ርእይዎ፡ አይሁድ፡ እለ፡ መጽኡ፡ እምእስያ፡ ለጳውሎስ፡ በምኵራብ። ወአስተጋብኡ፡ ላዕሌሁ፡ ኵሎ፡ ሕዝበ፡ ወአኀዝዎ። ወዐውየዉ፡ ወይቤሉ፡ አንትሙ፡ ሰብአ፡ እስራኤል፡ ርድኡነ። ነዋ፡ ዝ፡ ብእሲ፡ ዘይገብር፡ ማዕሌተ፡ ወየሀውክ፡ ሕዝበ፡ በኵለሄ። ወየዐሉ፡ ኦሪተ፡ ወምኵራበ፡ ወይሜህር፡ ለኵሉ። ወዓዲ፡ አረሚኒ፡ አብአ፡ ምኵራበ፡ ወአርኰሰ፡ ቤተ፡ መቅደስ። እስመ፡ ርእይዎ፡ ለጥሮፊሞስ፡ ዘሀገረ፡ ኤፌሶን፡ ምስሌሁ፡ ውስተ፡ ሀገር። ወመሰሎሙ፡ ዘአብኦ፡ ጳውሎስ፡ ምኵራበ። ወተሀውከ፡ ኵሉ፡ ሀገር፡ ወሮጹ፡ ኵሉ፡ ሕዝብ፡ ወሰሐብዎ፡ ለጳውሎስ። ወአውፅእዎ፡ እምኵራብ፡ ወዐጸዉ፡ ኆኅተ፡ ወፈቀዱ፡ ይቅትልዎ፡ ወዘበጥዎ፡ ብዙኀ። በእንተ፡ መልእክት፡ ዘበጽሐት፡ ለመልአክ ወበጽሐ፡ መልእክት፡ ኀበ፡ መልአከ፡ ሰጲራ፡ ከመ፡ ተሀውከት፡ ኵላ፡ ኢየሩሳሌም። ወተንሥአ፡ መልአክ፡ ሶቤሃ፡ ወሮጸ፡ ኀቤሆሙ፡ ምስለ፡ ወዓሊሁ። ወሶበ፡ ርእይዎ፡ ለመልአክ፡ ምስለ፡ ወዓልያኒሁ፡ ኀደጉ፡ ዘቢጦቶ፡ ለጳውሎስ። ወእምዘቀርበ፡ መልአክ፡ ወአኀዞ፡ ወአዘዘ፡ ይእስርዎ፡ በክልኤ፡ መአስር። ወሐተተ፡ ምንት፡ ውእቱ፡ ወምንተ፡ ገብረ። ወይኬልሑ፡ ሕዝብ፡ ወስእነ፡ መልአክ፡ አእምሮ፡ ጥዩቀ፡ በእንተ፡ ዘይትሀወክ፡ ሰብእ። በእንተ፡ ዕርገቱ፡ ለጳውሎስ፡ ውስተ፡ ዐውድ ወአዘዘ፡ ያዕርግዎ፡ ውስተ፡ ዐውድ። ወሶበ፡ ዐርገ፡ መዓርገ፡ አዕረግዎ፡ እንዘ፡ ይጸውርዎ፡ ወዓልት፡ እስመ፡ ይጸዐቅ፡ ሰብእ። ወይተልውዎ፡ ብዙኃን፡ ወይኬልሑ፡ ሕዝብ፡ ወይብሉ፡ አእትትዎ። ወሶበ፡ በጽሐ፡ ኀበ፡ ዐውድ፡ ይቤሎ፡ ጳውሎስ፡ ለመልአክ፡ ታበውሐኒኑ፡ እንግርከ። ወይቤሎ፡ መልአክ፡ ትአምርኑ፡ ጽርአ። አንተሁ፡ እንጋ፡ ዝኩ፡ ግብጻዊ፡ ዘቀዲሙ፡ ገበርከ፡ ማዕሌተ። ወአውፃእከ፡ ውስተ፡ ገዳም፡ አርብዓ፡ ምእተ፡ ብእሴ፡ ዘሕዝበ፡ ሲቃርዮን። ወይቤሎ፡ ጳውሎስ፡ አንሰ፡ ብእሲ፡ አይሁዳዊ፡ ዘሀገረ፡ ጠርሴስ፡ ዘቂልቅያ። ሀገር፡ እምርት፡ እንተ፡ ተወለድኩ፡ ባቲ። አስተበቊዕ፡ ኀቤከ፡ ከመ፡ ታብሐኒ፡ እንግሮሙ፡ ለሕዝብ። ወሶበ፡ አብሖ፡ ወቆመ፡ ውስተ፡ መዓርግ፡ ጳውሎስ። ወአንሥአ፡ እዴሁ፡ ኀበ፡ ሕዝብ፡ ወይቤሎሙ፡ አርምሙ። ወእምዝ፡ ሶበ፡ አርመሙ፡ ከልሐ፡ ጳውሎስ፡ በነገረ፡ ዕብራይስጥ።

ምዕራፍ 22 በእንተ፡ ዘተናገረ፡ ጳውሎስ፡ ለሕዝብ ወይቤ፡ ስምዑ፡ አኀዊነ፡ ወአበዊነ፡ ዘእወቅሥ፡ ለክሙ፡ ይእዜ። ወሶበ፡ ሰምዑ፡ ከመ፡ በዕብራይስጥ፡ ይነግሮሙ፡ ፈድፋደ፡ አጽምዕዎ። ወይቤሎሙ፡ ጳውሎስ፡ አንሰ፡ ብእሲ፡ አይሁዳዊ፡ አነ። ወተወለድኩ፡ በሀገረ፡ ጠርሴስ፡ ዘቂልቅያ። ወልህቁ፡ በዛቲ፡ ሀገር፡ በታሕተ፡ እገሪሁ፡ ለገማልያል። ወተምህርኩ፡ በሕገ፡ አበውየ፡ ወኮንኩ፡ ቀናኤ፡ ለእግዚአብሔር፡ ከመ፡ ኵልክሙ፡ አንትሙ፡ ዮም። በእንተ፡ ቀዳማይ፡ ግብሩ ወሰደድክዎሙ፡ ወቀተልክዎሙ፡ እንዘ፡ እሞቅሖሙ፡ ለዕደዊሆሙ፡ ወለአንስቲያሆሙ። ወየአምሩ፡ ሊቃነ፡ ካህናት፡ ወረበናት፡ ኵሎሙ፡ እለ፡ ነሣእኩ፡ እምኀቤሆሙ፡ መጽሐፈ፡ መባሕት። ከመ፡ እሑር፡ ኀበ፡ አኀወ፡ እለ፡ በደማስቆ፡ ከመ፡ አምጽኦሙ፡ ለእለ፡ ሀለዉ፡ ህየ። ወአእትዎሙ፡ ሙቁሓኒሆሙ፡ ኢየሩሳሌም፡ ይትኰነኑ። በእንተ፡ ጽዋዔየሁ ወእምዝ፡ እንዘ፡ አሐውር፡ ደማስቆ፡ አልጺቅየ፡ ኀበ፡ ሀገር። ሶበ፡ ይከውን፡ ቀትረ፡ ግብተ፡ በረቀ፡ መብረቅ፡ ዐቢይ፡ እምሰማይ፡ ላዕሌየ። ወነፅኀኒ፡ ውስተ፡ ምድር፡ ወሰማዕኩ፡ ቃለ፡ ዘይብለኒ። ሳውል፡ ሳውል፡ ለምንት፡ ትሰድደኒ። ወተሰጠውክዎ፡ ወእቤሎ፡ መኑ፡ አንተ፡ እግዚኦ። ወይቤለኒ፡ አነ፡ ውእቱ፡ ኢየሱስ፡ ናዝራዊ፡ ዘአንተ፡ ትሰድደኒ። ወእለ፡ ሀለዉ፡ ምስሌየ፡ ርእዩ፡ መብረቆ፡ ወደንገፁ። ወቃለሰ፡ ዘይትናገረኒ፡ ኢሰምዑ። ወእቤ፡ ምንተ፡ እግበር፡ እግዚእየ። ወይቤለኒ፡ ተንሥእ፡ ወሑር፡ ደማስቆ፡ ወበህየ፡ ይነግሩከ፡ ዘሀለወከ፡ ትግበር። ወእምዝ፡ ተጸለልኩ፡ አዕይንትየ፡ እምግርማ፡ መብረቅ፡ ወአልቦ፡ ዘእሬኢ። ወእንዘ፡ ይመርሑኒ፡ እለ፡ ምስሌየ፡ በጻሕኩ፡ ደማስቆ። በእንተ፡ ሐናንያ ወሀሎ፡ አሐዱ፡ ብእሲ፡ ዘስሙ፡ ሐናንያ፡ ኄር፡ ወፈራሄ፡ እግዚአብሔር፡ በሕግ። ወይንእድዎ፡ ኵሎሙ፡ አይሁድ፡ እለ፡ ይነብሩ፡ ደማስቆ። ወመጽአ፡ ኀቤየ፡ ወቆመ፡ ቅድሜየ፡ ወይብለኒ። ሳውል፡ እኁየ፡ ርኢ፡ ወርኢኩ፡ ሶቤሃ። ወይቤለኒ፡ አምላከ፡ አበዊነ፡ ሤመከ፡ ከመ፡ ታእምር፡ ፈቃዶ። ወትርአዮ፡ ለጻድቅ፡ ወትስማዕ፡ ቃለ፡ እምአፉሁ። ወትኩኖ፡ ሰማዕቶ፡ በኀበ፡ ኵሉ፡ ሕዝብ፡ በዘርኢከ፡ ወበዘሰማዕከ። ወይእዜኒ፡ ዘከመ፡ ትገብር፡ እነግረከ። ተንሥእ፡ ወተጠመቅ፡ ወተኀፀብ፡ እምኀጣውኢከ፡ ወጸውዕ፡ ስሞ። በእንተ፡ ግብአቱ፡ ኢየሩሳሌም ወእምዝ፡ ገቢእየ፡ ኢየሩሳሌም፡ እንዘ፡ እጼሊ፡ ሌሊተ፡ በቤተ፡ መቅደስ፡ ደንገፅኩ። ወርኢክዎ፡ እንዘ፡ ይብለኒ፡ ፃእ፡ ፍጡነ፡ እምኢየሩሳሌም። እስመ፡ ኢይትዌከፉ፡ ስምዐ፡ ዚኣከ፡ በእንቲኣየ። ወእቤ፡ አነ፡ እወ፡ እግዚኦ፡ ለሊሆሙ፡ የአምሩ፡ ከመ፡ አነ፡ ዘእሞቅሖሙ። ወእቀሥፎሙ፡ ለእለ፡ የአምኑ፡ ብከ፡ በምኵራባቲሆሙ። በእንተ፡ እስጢፋኖስ ወአመሂ፡ ቀተልዎ፡ ለእስጢፋኖስ፡ ሰማዕትከ፡ ሀሎኩ፡ ምስሌሆሙ፡ ህየ፡ ኅቡረ። ወአዐቅብ፡ አልባሲሆሙ፡ ለእለ፡ ቀተልዎ። ወይቤለኒ፡ ሑር፡ እስመ፡ እፌንወከ፡ ኀበ፡ አሕዛብ፡ እለ፡ ርሑቃን፡ ትስብክ። ወሰማዕክዎ፡ ከመ፡ ዝ፡ ይቤለኒ። ወሶበ፡ ሰምዑ፡ ዘንተ፡ ነገረ፡ እምጳውሎስ፡ ክልሑ፡ በዐቢይ፡ ቃል። ወይቤሉ፡ አእትትዎ፡ ለዘከመ፡ ዝ፡ እምብሔርነ፡ እስመ፡ ኢይደልዎ፡ ይሕየው። ወእንዘ፡ ይጠርኡ፡ ወይዌርዉ፡ አልባሲሆሙ፡ ወይዘርዉ፡ ጸበለ፡ ውስተ፡ ነፋስ። በእንተ፡ ተኰንኖቱ አዘዘ፡ መልአክ፡ ያብእዎ፡ ውስተ፡ ምኵናን፡ ወይቅሥፍዎ። ወይሕትትዎ፡ ጌጋዮ፡ ከመ፡ ያእምር፡ በእንተ፡ ምንት፡ የዐወይዉ፡ ላዕሌሁ። ወሶበ፡ ሰሐብዎ፡ በእገሪሁ፡ ማእከለ፡ እለ፡ ይቀሥፍዎ። ይቤሎ፡ ጳውሎስ፡ ለሐቢ፡ ዘይቀውም፡ ኀቤሁ። ይከውነክሙሁ፡ ትቅሥፉ፡ ሰብአ፡ ሮሜ፡ ዘእንበለ፡ አበሳ። ወሰሚዖ፡ ሐቢ፡ ሖረ፡ ኀበ፡ መልአክ፡ ወነገሮ፡ ወይቤሎ። አእምር፡ ዘትገብር፡ ዝኩ፡ ብእሲ፡ ሰብአ፡ ሮሜ፡ ውእቱ። በእንተ፡ ተስእሎተ፡ መለአክ ወቀርበ፡ ኀቤሁ፡ መልአክ፡ ወይቤሎ፡ ንግረኒ፡ እስኩ፡ ሰብአ፡ ሮሜኑ፡ አንተ። ወይቤ፡ እወ። ወተሰጥዎ፡ መልአክ፡ ወይብል። አንሰኬ፡ ብዙኀ፡ ንዋየ፡ ውሂብየ፡ ረከብክዋ፡ ለዛቲ፡ ሢመት። ወይቤሎ፡ ጳውሎስ፡ አንሰኬ፡ በህየ፡ ተወለድኩ። ወእምዝ፡ ኀደግዎ፡ እለ፡ ይፈቅዱ፡ ይቅሥፍዎ። ወመልአክኒ፡ ፈርሀ፡ አእሚሮ፡ ከመ፡ ሰብአ፡ ሮሜ፡ ውእቱ። ወበሳኒታ፡ ፈቀደ፡ መልአክ፡ ያእምር፡ ጥዩቀ፡ በእንተ፡ ምንት፡ ያስተዋድይዎ፡ አይሁድ። ወፈትሐ፡ ማእሰሮ፡ ወአዘዘ፡ ይምጽኡ፡ ሊቃነ፡ ካህናት፡ ወኵሉ፡ ዐውድ። ወአምጽኦ፡ ለጳውሎስ፡ ወአቀሞ፡ ማእከሎሙ።

ምዕራፍ 23 በእንተ፡ ነገረ፡ ጳውሎስ፡ ለሕዝብ ወነጺሮ፡ ጳውሎስ፡ ዐውደ፡ ይቤሎሙ። አንሰኬ፡ ኦ፡ አኀውየ፡ በኵሉ፡ ትምህርት፡ ሠናይ፡ ተፀመድክዎ፡ ለእግዚአብሔር፡ እስከ፡ ዛቲ፡ ዕለት። ወአዘዘ፡ ሊቀ፡ ካህናት፡ ሐናንያ፡ ይጽፍዕዎ፡ አፉሁ፡ ለጳውሎስ። ወይቤሎ፡ ጳውሎስ፡ ሀሎ፡ እግዚአብሔር፡ ይጸፍዐከ፡ በመቅሠፍተ፡ መዓቱ። ኦ፡ ነኪር፡ ዘትመስል፡ ዐረፍተ፡ ግብስስተ። አንተሰ፡ ነበርከ፡ ትኰንነኒ፡ በሕጉሂ፡ ወዘእንበለ፡ ሕጉሂ፡ ትኤዝዝ፡ ይዝብጡኒ። በእንተ፡ እለ፡ ገሠጽዎ፡ ለጳውሎስ ወይቤልዎ፡ ለጳውሎስ፡ እለ፡ ይቀውሙ፡ ህየ። በእፎ፡ ትጼዕል፡ ሊቀ፡ ካህናቲሁ፡ ለእግዚአብሔር። ወይብሎሙ፡ ጳውሎስ፡ ኢያእመርኩ፡ አኀውየ፡ ለእመ፡ ሊቀ፡ ካህናት፡ ውእቱ። ወይብል፡ መጽሐፍ፡ ኢታሕሥም፡ ዲበ፡ መኰንነ፡ ሕዝብከ። በእንተ፡ ሰዱቃውያን፡ ወፈሪሳውያን ወርእዮ፡ ጳውሎስ፡ ከመ፡ አሐዱ፡ ገጽ፡ ሰዱቃውያን፡ ወመንፈቆሙ፡ ፈሪሳውያን። ከልሐ፡ በውስተ፡ ዐውድ፡ ወይቤ፡ አንሰ፡ ፈሪሳዊ፡ ወልደ፡ ፈሪሳዊ፡ አነ። በእንተ፡ ተስፋ፡ ሕይወተ፡ ምዉታን፡ እትኴነን። ወሶበ፡ ከመ፡ ዝ፡ ይብል፡ ተበአሱ፡ ፈሪሳውያን፡ ወሰዱቃውያን፡ ወተናፈቁ፡ ሕዝብ። እስመ፡ ሰዱቃውያን፡ ይብሉ፡ ኢየሐይዉ፡ ምዉታን። ወአልቦ፡ መልአክ፡ ወኢ፡ መንፈስ፡ ቅዱስ። ወፈሪሳውያንሰ፡ የአምኑ፡ ከመ፡ ቦ፡ ዝንቱ፡ ኵሉ። ወኮነ፡ ዐቢየ፡ አውያት፡ ወተንሥኡ፡ ጸሐፍት፡ ወፈሪሳውያን። ወአኀዙ፡ ይትበአሱ፡ ወይትላኰዩ፡ ወይቤሉ። አልቦ፡ ዘረከብነ፡ እኩየ፡ ላዕለ፡ ዝ፡ ብእሲ። እንዳዒ፡ ለእመ፡ መንፈስ፡ ቅዱስ፡ ተናገሮ፡ አው፡ መልአክ። ወሶበ፡ ተሀወኩ፡ ፈድፋደ፡ ፈርሀ፡ መልአክ፡ ኢይምሥጥዎ፡ ለጳውሎስ። ወአዘዘ፡ ሠገራተ፡ ይምጽኡ፡ ወይንሥእዎ፡ እማእከሎሙ፡ ወይሰድዎ፡ ኀበ፡ ምኵናን። ወበካልእት፡ ሌሊት፡ አስተርአዮ፡ እግዚእነ፡ ለጳውሎስ፡ ወይቤሎ። ተአመን፡ በከመ፡ ኮንከኒ፡ ሰማዕትየ፡ በኢየሩሳሌም። ከማሁ፡ ሀለወከ፡ ትኩነኒ፡ ሰማዕትየ፡ በሮሜሂ። በእንተ፡ እለ፡ ተመሐሉ ወጸቢሖ፡ ተጋብኡ፡ አይሁድ፡ ወተማሐሉ፡ ወተሰካተዩ። ወሐረሙ፡ ኅብስተ፡ ወማየ፡ ወይቤሉ። ኢንብላዕ፡ ወኢንስተይ፡ እስከ፡ ንቀትሎ፡ ለጳውሎስ። ወእለሰ፡ ከመ፡ ዝ፡ ተማሐሉ፡ ይበዝኁ፡ እምአርብዓ፡ ብእሲ። እሙንቱሰ፡ ሖሩ፡ ኀበ፡ ሊቃነ፡ ካህናት፡ ወረበናት፡ ወይብልዎሙ። ናሁኬ፡ ተማሐልነ፡ ወተሰካተይነ፡ ከመ፡ ኢንብላዕ፡ ወኢንስተይ፡ እስከ፡ ንቀትሎ፡ ለጳውሎስ። ወይእዜኒ፡ ሑሩ፡ ኀበ፡ መልአክ፡ ወበልዎ፡ ከመ፡ ያምጽኦ፡ ለጳውሎስ፡ ኀቤክሙ። ከመ፡ ዘተሐትትዎ፡ ወትጤይቅዎ። ወንሕነሰ፡ ጥቡዓን፡ ንሕነ፡ ንቅትሎ፡ ዘእንበለ፡ ይብጻሕ፡ ኀቤክሙ። በእንተ፡ ወለደ፡ እኅቱ፡ ለጳውሎስ ወሰሚዖ፡ ወልደ፡ እኅቱ፡ ለጳውሎስ፡ ምክሮሙ፡ ሖረ። ወቦአ፡ ቤተ፡ ሞቅሕ፡ ወነገሮ፡ ለጳውሎስ። ወጸውዖ፡ ጳውሎስ፡ ለሐቢ፡ ወይቤሎ። አብጽሖ፡ ሊተ፡ ኀበ፡ መልአክ፡ ለዝ፡ ወልድ። እስመ፡ ቦ፡ ነገር፡ ዘይነግሮ። ወነሥኦ፡ ሐቢ፡ ለወልድ፡ ወወሰዶ፡ ኀበ፡ መልአክ። ወይቤሎ፡ ጳውሎስ፡ ሙቁሕ፡ አስተብቊዐኒ፡ አብጽሖ፡ ኀቤከ፡ ለዝ፡ ወልድ፡ እስመ፡ ቦ፡ ዘይነግረከ። ወአኀዞ፡ መልአክ፡ ለወልድ፡ በእዴሁ፡ ወአግሐሦ፡ በባሕቲቱ፡ ወይቤሎ፡ ምንትኑ፡ ነገሩ፡ ዘታየድዐኒ። ወይቤሎ፡ ከመ፡ ዝ፡ ተማከሩ፡ አይሁድ። ያስተብቊዑከ፡ ታምጽኦ፡ ጌሠመ፡ ለጳውሎስ፡ ውስተ፡ ዐውድ፡ ከመ፡ ትሕትቶ፡ ወትጠይቆ። አንተኬ፡ ኦሆ፡ ኢትበሎሙ፡ እስመ፡ ይጸንሑ፡ ይቅትልዎ። ወይበዝኁ፡ እምአርብዓ፡ ዕደው፡ እለ፡ ከመ፡ ዝ፡ ተማሐሉ፡ ኢይብልዑ፡ ወኢይስተዩ፡ እስከ፡ ይቀትልዎ። ወይእዜኒ፡ ጥቡዓን፡ እሙንቱ፡ ዳእሙ፡ እስከ፡ ትልእክ፡ ሎሙ፡ ይጸንሕዎ። ወእምዝ፡ ፈነዎ፡ መልአክ፡ ለውእቱ፡ ወልድ። ወይቤሎ፡ ከመ፡ ኢይንግር፡ ወኢ፡ ለመኑሂ፡ እምዘነገሮ። በእንተ፡ ዘከመ፡ አዘዘ፡ መልአክ ወጸውዐ፡ ክልኤተ፡ እምወዓልያኒሁ፡ ወይቤሎሙ። ንሥኡ፡ ክልኤተ፡ ምእተ፡ ብእሴ፡ እምውስተ፡ ሐራ። ወሰብዓ፡ ሰብአ፡ አፍራስ፡ ወሰማንያ፡ ሰብአ፡ ቀስተ። ወይሑሩ፡ ቂሳርያ፡ ጊዜ፡ ሠለስቱ፡ ሰዓተ፡ ሌሊት። ወአዘዞሙ፡ ወይቤሎሙ፡ ከመ፡ ይንሥኡ፡ አድገኒ። ወያጽዕንዎ፡ ለጳውሎስ፡ ወያብጽሕዎ፡ ኀበ፡ ፊልክስ፡ መልአከ፡ ቂሳርያ። ወገብሩ፡ ከማሁ። በእንተ፡ መጽሐፍ፡ ዘፈነወ፡ መልአክ ወጸሐፈ፡ ሎቱ፡ መጽሐፈ፡ እንተ፡ ትብል። እምቀላውዴዎስ፡ ሉስዮስ፡ ለጽኑዕ፡ መኰንን፡ ፊልክስ፡ ሰላም፡ ለከ። ለዝአ፡ ብእሲአ፡ አኀዝዎአ፡ አይሁድአ፡ ወፈቀዱአ፡ ይቅትልዎአ። ወቆምኩአ፡ ሎቱአ፡ ምስለአ፡ ወዓልየአ። ወአድኀንክዎአ፡ አእሚርየአ፡ ከመ፡ ሰብአ፡ ሮሜአ፡ ውእቱአ። ወሐተትክዎ፡ አእምር፡ ጌጋዮ፡ አቅሪብየ፡ ውስተ፡ ዐውድ። ሐተትኩ፡ በእንተ፡ ምንት፡ ያስተዋድይዎ። ወኢረከብኩ፡ ሎቱ፡ ጌጋየ። ወአእሚርየ፡ ከመ፡ በከ፡ ያስተዋድይዎ፡ በእንተ፡ ሕገጊሆሙ። ወአልቦ፡ ባዕድ፡ ጌጋይ፡ በዘይመውት፡ ወበዘይትሞቃሕ። ወሶበ፡ ጠየቅኩ፡ ዘይገብሩ፡ አይሁድ፡ ዲበ፡ ዝ፡ ብእሲ። በጸኒሕ፡ ፈነውክዎ፡ ኀቤከ፡ ወአዘዝክዎሙ፡ ለመስተዋድያንሂ፡ ይምጽኡ፡ ኀቤከ። ወይትኳነንዎ፡ በቅድሜከ፡ ዳኅነ፡ ሀሎ። ወገብሩ፡ ሐራ፡ በከመ፡ አዘዞሙ። ወነሥእዎ፡ ለጳውሎስ፡ በሌሊት፡ ወወሰድዎ፡ ውስተ፡ አህጉረ፡ አድያም። ወአውዐሉ፡ አፍራሲሆሙ፡ ወእምዝ፡ በሳኒታ፡ ቦኡ፡ ቂሳርያ። ወበጽሑ፡ ኀበ፡ መኰንን፡ ወመጠውዎ፡ መጽሐፈ፡ መልእክት፡ ለመኰንን። ወአቅረብዎ፡ ለጳውሎስ፡ ኀቤሁ። ወአንቢቦ፡ ሐተቶ፡ ዘምኵናነ፡ መኑ፡ ውእቱ። ወአእሚሮ፡ ከመ፡ ዘሀገረ፡ ቂልቅያ፡ ውእቱ። ይቤ፡ እንከሰ፡ በጺሖሙ፡ መስተዋድያን፡ ንስምዐክሙ። ወአዘዘ፡ ይዕቀብዎ፡ ኀበ፡ ምኵናነ፡ ሄሮድስ።

ምዕራፍ 24 በእንተ፡ ምጽአተ፡ መስተዋድያን ወአመ፡ ኀሙስ፡ ዕለት፡ ወረደ፡ ሐናንያ፡ ሊቀ፡ ካህናት፡ ምስለ፡ ረበናት። ወአሐዱ፡ ዐቃቤ፡ ነቢብ፡ ዘስሙ፡ ጠርጠሉስ። ወአስተዋደይዎ፡ ለጳውሎስ፡ ኀበ፡ መልአክ። ወአቅረበ፡ ሎሙ፡ ወአኀዘ፡ ይንግር፡ ጠርጠሉስ፡ ወይቤ። በእንተ፡ ወድሶተ፡ መኰንን ብዙኀ፡ ሰላመ፡ አድማዕነ፡ በመዋዕሊከ። ወሠናየ፡ ኮነ፡ ንብረቶሙ፡ ለሕዝብ፡ በጥበብከ፡ በኵሉ። ወበኵለሄ፡ ወረከብነ፡ ሥርዐተከ፡ እንዘ፡ ትትአኰት፡ በኀበ፡ ኵሉ፡ ኦ፡ ፊልክስ፡ ክቡር። ወባሕቱ፡ ከመ፡ ኢያጽሕብከ፡ ፈድፋደ። አጽምዐኒ፡ ብቊዐኒ፡ ኅጹረ፡ እንግርከ። በእንተ፡ አስተዋድዮተ፡ ጳውሎስ ረከብናሁ፡ ለዝ፡ ብእሲ፡ ይነብብ፡ ፅርፈተ፡ ወይገብር፡ ማዕሌተ። ወየሀውክ፡ ኵሎ፡ አይሁደ፡ በኵሉ፡ በሓውርት። ወይሜህር፡ ካሕደ፡ ዘሕዝበ፡ ናዝራውያን። ወአርኰሰ፡ ቤተ፡ መቅደስ፡ ወአኀዝናሁ። ወፈቀድነ፡ ኰንኖቶ፡ በከመ፡ ሕግነ። ወመጽአ፡ ሉስዮስ፡ መልአክ። ወአድኀኖ፡ እምእደዊነ፡ በብዙኀ፡ ግብር፡ ወፈነዎ፡ ኀቤከ። ወአዘዞሙ፡ ለእለ፡ ይትዋቀሥዎ፡ ይምጽኡ፡ ኀቤከ። ወዘኒ፡ አስተዋደይናሁ፡ ኵሎ፡ ሀለወከ፡ ታእምር፡ እምኀቤሁ፡ ሐቲተከ። ከመ፡ አማን፡ ውእቱ። ወተሰጥዉ፡ አይሁድ፡ ወይቤሉ፡ አማን፡ ከመ፡ ዝ፡ ውእቱ። በእንተ፡ አውሥኦተ፡ ጳውሎስ ወቀጸቦ፡ መልአክ፡ ለጳውሎስ፡ ከመ፡ ይትናገር። ወይቤ፡ ጳውሎስ፡ አነ፡ አአምር፡ እምብዙኀ፡ ዓመታት፡ መኰንኖሙ፡ አንተ፡ ለዝ፡ ሕዝብ። ወተአምር፡ ግእዞሙ፡ ወተኀሥሦቶሙ። ወይእዜኒ፡ እነግረከ፡ ተፈሢሕየ፡ ቅስትየ፡ ዘሀለወከ። ታእምር፡ ከመ፡ ኢየአክል፡ ዐሡረ፡ ወሰኑየ፡ ዕለተ። እምዘዐረጉ፡ ኢየሩሳሌም፡ እስግድ። ወኢረከቡኒ፡ እንዘ፡ እትዋቀሥ፡ ኢ፡ በምኵራብ፡ ወኢ፡ ምስለ፡ መኑሂ። ወኢ፡ እንዘ፡ አሀውክ፡ ሕዝበ፡ በቤተ፡ መቅደስ፡ ወኢ፡ በሀገር። ወኢይክሉ፡ አብጽሖተ፡ በኵሉ፡ ዘያስተዋድዩኒ፡ በቅድሜከ። በእንተ፡ ሃይማኖት፡ ወትንሣኤ፡ ምዉታን ወባሕቱ፡ አአምነከ፡ እንበይነ፡ ዘይብሉኒ፡ ይሜህር፡ ካሕደ። ወአንሰ፡ አመልኮ፡ ለእግዚአብሔር። እንዘ፡ እትአመን፡ በኵሉ፡ ግብር፡ ዘጽሑፍ፡ ውስተ፡ ኦሪት፡ ወነቢያት። ወእሴፈዎ፡ ለእግዚአብሔር፡ ከመ፡ እሙንቱ፡ ይትአመኑ። ከመ፡ ሀለዎሙ፡ ይትነሥኡ፡ ምዉታን፡ ጻድቃን፡ ወኃጥኣን። ከማሁ፡ አነሂ፡ እትአመኖ፡ ለእግዚአብሔር፡ በጥቡዕ፡ ልብ። በቅድመ፡ እግዚአብሔር፡ ወበቅድመ፡ ሰብእ፡ በኵሉ፡ ጊዜ። በእንተ፡ ፈጽሞተ፡ ሕግ ወእምድኅረ፡ ብዙኀ፡ መዋዕል፡ ወዓመታት፡ መጻእኩ፡ ለኀበ፡ ሕዝብየ። ከመ፡ እግበር፡ ምጽዋተ፡ ወከመ፡ አዕርግ፡ መሥዋዕተ። ወረከቡኒ፡ እሙንቱ፡ በምኵራብ፡ እንዘ፡ አነጽሕ፡ ርእስየ። ወኢረከቡኒ፡ እንዘ፡ እትጋአዝ፡ ወእትላኰይ፡ ወአልቦ፡ ዘሆኩ፡ ሕዝበ። በእንተ፡ ስምዐ፡ አይሁድ ወሀለዉ፡ አይሁድ፡ እለ፡ መጽኡ፡ እምእስያ። ወይእዜኒ፡ ግበር፡ ኀቤከ፡ ይምጽኡ፡ ከመ፡ ያስተዋድዩኒ። ወእመ፡ አኮ፡ ነዮሙ፡ እሉሂ፡ ይንግሩ፡ ጽድቀ። እመ፡ ቦ፡ ዘሰምዑ፡ ዘአበስኩ፡ አነ። ወእመኒ፡ ቦ፡ ዘርእዩ፡ ዘገፍዐኩ፡ በዘአምጽኡኒ፡ ኀበ፡ ምኵናን፡ ዘኀቤከ፡ በዘአልቦ፡ እኩይ። ወኢአሐቲኒ፡ ትምህርት፡ ዘመሀርኩ። ዳእሙ፡ በብሂለ፡ የሐይዉ፡ ምዉታን፡ ዘረከበኒ፡ ተኰንኖ፡ በኀቤከ፡ ዮም። በእንተ፡ አውሥኦተ፡ ፊልክስ ወፊልክስሰ፡ የአምር፡ ከመ፡ እምትካት፡ ይትቃረኑ፡ አይሁድ። ምስለ፡ ሕግ፡ ወትምህርት፡ ዘሕዝበ፡ ክርስቲያን። ወከመ፡ አይሁድ፡ መጻርርቲሃ፡ ለሃይማኖት። ወእምድኅረዝ፡ የውሆሙ፡ ወይቤሎሙ፡ እንከሰኬ፡ ወሪዶ፡ ሉስዮስ፡ መኰንን። ነሐትት፡ ከመ፡ ናእምር፡ ወንጠይቅ፡ ነገረክሙ። ወአዘዞ፡ ለሐቤ፡ ቤተ፡ ሞቅሕ፡ ከመ፡ ኢያጽንዖ፡ ለጳውሎስ። ወያንብሮ፡ ውስተ፡ መርኅብ፡ ወኢያጽብብ፡ ላዕሌሁ። ወኢይክልኦ፡ ለአሐዱሂ፡ እምእለ፡ የአምርዎ፡ ሶበ፡ ይመጽኡ፡ ይትለአክዎ። በእንተ፡ ዘጸውዖ፡ ለጳውሎስ፡ ዳግመ ወእምድኅረ፡ ኅዳጥ፡ መዋዕል፡ ነበረ፡ ፊልክስ፡ ምስለ፡ ዱርሳሌም፡ ብእሲቱ፡ አይሁዳዊት። ወለአከ፡ ወጸውዖ፡ ለጳውሎስ። ወሰምዕዎ፡ ቃላተ፡ ወትምህርታተ፡ በእንተ፡ አሚን፡ በኢየሱስ፡ ክርስቶስ። ወሶበ፡ ነገሮሙ፡ በእንተ፡ ጽድቅ፡ ወሕይወት። ወበእንተ፡ ኵነኔ፡ ዘለዓለም፡ ወደይን፡ ወፍትሕ፡ ወርትዕ፡ ዘይከውን፡ በዕለተ፡ ኵነኔ። ፈርሀ፡ ፊልክስ፡ እምዝንቱ፡ ወይቤሎ፡ ለጳውሎስ። ይእዜሰኬ፡ ሑር፡ ወሶበ፡ ብሕትኩ፡ እልእክ፡ ዘይጼውዐከ። በእንተ፡ ዘኀለየ፡ ፊልክስ ወመሰሎ፡ ለፊልክስ፡ ከመ፡ ይሁቦ፡ ጳውሎስ፡ ወይኄልዮ፡ ንዋየ፡ ይኅድጎ። ወበእንተዝ፡ ወትረ፡ ይጼውዖ፡ ወይትናገሮ። ወሶበ፡ ኀለፈ፡ ክልኤቱ፡ ዓመት፡ ተስዕረ፡ ፊልክስ፡ ወመጽአ፡ መካነ፡ ሢመቱ፡ ካልእ፡ መኰንን፡ ዘስሙ፡ ፊስጦስ። ወፈቀደ፡ ፊልክስ፡ ያድሉ፡ ለአይሁድ፡ ገሃደ። ወበእንተዝ፡ ኀደጎ፡ ለጳውሎስ፡ ውስተ፡ ቤተ፡ ሞቅሕ።

ምዕራፍ 25 በእንተ፡ ምጽአቱ፡ ለፊስጦስ ወበጺሖ፡ ፊስጦስ፡ ቂሳርያ፡ ጐንደየ፡ ሠሉሰ፡ መዋዕለ። ወእምዝ፡ ዐርገ፡ ኢየሩሳሌም። ወዖድዎ፡ ሊቃነ፡ ካህናት፡ ወዐበይተ፡ አይሁድ፡ ወነገርዎ፡ በእንተ፡ ጳውሎስ። በእንተ፡ ስእለቱ፡ ለአይሁድ ወሰአልዎ፡ ከመ፡ ይጸግዎሙ፡ ከመ፡ ይልአክ፡ ያምጽእዎ፡ ለዐውድ፡ ዘኢየሩሳሌም። ወእሙንቱሰ፡ ፈቀዱ፡ ከመ፡ ይሑሩ፡ ህየ፡ ወበፍኖት፡ ይቅትልዎ። ወአውሥኦሙ፡ ከመ፡ የዐቅብዎ፡ ለጳውሎስ፡ በቂሳርያ። ወከመ፡ የሐውር፡ ለሊሁ፡ ፍጡነ፡ ህየ። ወይቤሎሙ፡ ለአይሁድ፡ እለ፡ ትክለሉ፡ እምውስቴትክሙ። ረዱ፡ ትትዋቀሡ፡ ምስለ፡ ውእቱ፡ ብእሲ፡ ዘአስተዋደይክምዎ። በእንተ፡ ግብአቱ፡ ለፊስጦስ ወነቢሮ፡ ኀቤሆሙ፡ ሰሙነ፡ መዋዕለ፡ አው፡ ዐሡረ፡ ወረደ፡ ቂሳርያ። ወበሳኒታ፡ ነበረ፡ ዐውደ፡ ወአዘዘ፡ ያምጽእዎ፡ ለጳውሎስ። ወቀሪቦ፡ ጳውሎስ፡ አስተዋደይዎ፡ አይሁድ፡ እለ፡ ወረዱ፡ እምኢየሩሳሌም። ብዙኀ፡ ጌጋየ፡ ወክቡደ፡ በዘኢይክሉ፡ አብጽሖቶ። ወእንዘ፡ ይወቅሥ፡ ሎሙ፡ ጳውሎስ፡ ወይብል፡ አልቦ፡ ዘአበስኩ፡ ላዕለሂ፡ ኦሪቶሙ፡ ለአይሁድ። ወኢ፡ ዲበ፡ ምኵራቦሙ፡ ወኢ፡ ለነጋሢ። በእንተ፡ ዘይቤ፡ ፊስጦስ ወፈቀደ፡ ፊስጦስ፡ ያእኵትዎ፡ አይሁድ፡ ወይቤሎ፡ ለጳውሎስ። ትፈቅድኑ፡ ትዕርግ፡ ኢየሩሳሌም፡ ወበህየ፡ ትትዋቀሥ፡ አው፡ በኀቤየ። ወአውሥአ፡ ጳውሎስ፡ ወይቤሎ፡ አንሰ፡ እቀውም፡ ቅድመ፡ መንበረ፡ ቄሣር። ወበህየ፡ ይደሉ፡ ሊተ፡ ፍትሕ። ወለሊከ፡ ተአምር፡ እምነ፡ ኵሉ፡ ሰብእ፡ አልብየ፡ ዘአበስኩ፡ ላዕለ፡ አይሁድ። ወእመሰ፡ ቦ፡ ዘዐመፅኩ፡ ወቦ፡ እኩይ፡ ዘገበርኩ፡ በዘእመውት፡ ኢይትሀከይ፡ መዊተ። ወእመሰ፡ በከመ፡ ያስተዋድዩኒ፡ እሉ፡ ዘአልብየ፡ ጌጋይ። ለመኑ፡ ብእሲ፡ ይደልዎ፡ የሀበኒ፡ ሎሙ። አነ፡ በቄሣር፡ ንጉሥ፡ እጠርዕ። በእንተ፡ ምክንያተ፡ ሑረቱ፡ ኀበ፡ ሮሜ ወእምዝ፡ ተናጊሮ፡ ፊስጦስ፡ ምስለ፡ መማክርቲሁ፡ ይቤ። ጠርዐ፡ በቄሣር፡ ነጋሢ፡ ወኀበ፡ ቄሣር፡ የሐውር። ወእምድኅረ፡ ኅዳጥ፡ መዋዕል፡ ወረደ፡ አግሪጳ፡ ንጉሥ፡ ወበርንቄ፡ ወተአምኅዎ፡ ለፊስጦስ። በእንተ፡ ነገረ፡ ፊስጦስ፡ ለአግሪጳ ወነቢሮሙ፡ ብዙኀ፡ መዋዕለ፡ ኀቤሁ፡ ነገሮሙ፡ በእንተ፡ ጳውሎስ፡ ወይቤሎሙ። ሀሎ፡ አሐዱ፡ ብእሲ፡ ሙቁሕ፡ ዘኀደጎ፡ ፊልክስ። ወእንዘ፡ ሀሎኩ፡ ኢየሩሳሌም፡ መጽኡ፡ ኀቤየ፡ ሊቃነ፡ ካህናት፡ ወረበናተ፡ አይሁድ። ወአስተብቊዑኒ፡ ከመ፡ እኰንኖ፡ ሎሙ። ወእቤሎሙ፡ ኢይከውን፡ ወሕግ፡ አልቦ፡ በዘይኴንንዎ፡ ዘኢዘለፍዎ፡ ማሕተት። ወዘኢረከቡ፡ ሎቱ፡ ጌጋየ፡ ሕሩመ። ኢይኴንኑ፡ ሰብአ፡ ሮሜ፡ በከመ፡ ረከቡ። ወእምዝ፡ መጺእየ፡ ዝየ፡ ተጋብኡ፡ ካዕበ። ወበነግህ፡ ነበርኩ፡ ሎሙ፡ ዐውደ። ወአዘዝኩ፡ ያምጽእዎ፡ ለውእቱ፡ ብእሲ። ወአቀምኩ፡ ምስሌሁ፡ እለ፡ ያስተዋድይዎ። ወአልቦ፡ ምንትሂ፡ እኩይ፡ ዘገብረ፡ በዘአብጽሕዎ፡ ሎቱ፡ በከመ፡ ኀለይኩ። ዘእንበለ፡ በእንተ፡ ሕገጊሆሙ፡ ዘይትካሐዱ። ወሀሎ፡ አሐዱ፡ ብእሲ፡ ዘስሙ፡ ኢየሱስ፡ ዘሞተ። ወጳውሎስ፡ ይብል፡ ሕያው፡ ውእቱ። ወኀጢእየ፡ እንከ፡ ዘእገብር፡ ሎሙ፡ ፍትሐ፡ በእንተ፡ ማኅሠሦሙ። እቤሎ፡ ለጳውሎስ፡ ትፈቅድኑ፡ ትሑር፡ ኢየሩሳሌም፡ ወበህየ፡ ትትዋቀሥ። ወአበየ፡ ውእቱሰ፡ ወተዘመረ፡ መድኀኒቶ፡ ኀበ፡ ንጉሥ። ወእምዝ፡ አዘዝኩ፡ ይዕቀብዎ፡ እስከ፡ እፌንዎ፡ ኀበ፡ ቄሣር። በእንተ፡ አውሥኦተ፡ አግሪጳ ወይቤሎ፡ አግሪጳ፡ ለፊስጦስ። አነሂ፡ እፈቱ፡ እስምዖ፡ ለውእቱ፡ ብእሲ። ወይቤሎ፡ ፊስክስ፡ እንከሰኬ፡ ጌሠመ፡ ትሰምዖ። ወበሳኒታ፡ መጽኡ፡ አግሪጳ፡ ወበርንቄ፡ ተረሲዮሙ፡ ምስለ፡ ብዙኅ፡ ግርማ። ወቦኡ፡ ወነበሩ፡ ዐውደ፡ ምስለ፡ መሳፍንት፡ ወዐበይተ፡ ሀገር። ወአዘዘ፡ ፊስጦስ፡ ያምጽእዎ፡ ለጳውሎስ። በእንተ፡ ቁመቱ፡ ለጳውሎስ፡ ቅድመ፡ አግሪጳ ወሶበ፡ በጽሐ፡ ጳውሎስ፡ ይቤ፡ ፊስጦስ። ስምዑ፡ ኵልክሙ፡ እለ፡ ሀለውክሙ፡ ምስሌነ፡ አኀዊነ። ወነዋኬ፡ ውእቱ፡ ብእሲ፡ ዘአስተዋደይዎ፡ አይሁድ፡ በኢየሩሳሌም። ወበዝየነ፡ የዐወይዉ፡ ወይስእሉ፡ ከመ፡ ግሙራ፡ ኢያሕይዎ። አንሰኬ፡ ሐቲትየ፡ ጥዩቀ፡ ከመ፡ አልቦ፡ ጌጋይ። ወአልቦ፡ እኩይ፡ ዘገብረ፡ በዘይመውት። እስመ፡ ውእቱ፡ ፈተወ፡ በጺሐ፡ ኀበ፡ ንጉሥ፡ ፈቀድኩ፡ እንከ፡ እፈንዎ። ወባሕቱሰ፡ ኀጣእኩ፡ ዘእብል፡ አበሳሁ፡ እንዘ፡ እጽሕፍ፡ ለእግዚእየ፡ ንጉሥ። ወይእዜኒ፡ ፈቀድኩ፡ ከመ፡ አምጽኦ፡ ኀቤክሙ። ወፈድፋደሰ፡ እመ፡ ቦ፡ ዘተአምር፡ አንተ፡ አግሪጳ፡ ንጉሥ። ሶበ፡ ትሴአሎ፡ ወትሰምዕ፡ ነገሮ። ወተአምር፡ ምንተ፡ ዘእጽሕፍ፡ በእንቲኣሁ፡ ኀበ፡ ንጉሥ። እስመ፡ ኢይደሉ፡ ንፈንዎ፡ ኀበ፡ ንጉሥ፡ ሙቁሐ። ዘአልብነ፡ ጽሕፈተ፡ አበሳሁ። ወይእዜኒ፡ ናሁ፡ አምጻእክዎ፡ ኀቤክሙ። ሕትቱ፡ እስኩ፡ ለእመ፡ ቦ፡ ዘትረክቡ፡ ጌጋየ፡ ዘንጽሕፍ። እስመ፡ ሊተሰ፡ ዐጸበኒ፡ ነገሩ፡ ወፈንዎቶሂ፡ ሙቁሐ።

ምዕራፍ 26 በእንተ፡ ነገር፡ ዘተናገረ፡ ጳውሎስ፡ በቅድመ፡ አግሪጳ ወይቤሎ፡ አግሪጳ፡ ለጳውሎስ፡ አባሕናከ፡ ንግር፡ በእንተ፡ ርእስከ። ወእምዝ፡ አንሥአ፡ እዴሁ፡ ጳውሎስ፡ ወአኀዘ፡ ይንግሮሙ። ወይቤ፡ በእንተ፡ ኵሉ፡ ዘይትኀሠሡኒ፡ አይሁድ። ኦ፡ አግሪጳ፡ ንጉሥ፡ ብፁዕ፡ አነ፡ ዮም፡ ዘበኀቤከ፡ እትዋቀሥ። እስመ፡ ተአምር፡ ግዕዞሙ፡ ወተኀሥሦቶሙ፡ ለአይሁድ። ብቊዐኒ፡ ተዐጊሠከ፡ አጽምአኒ። ንብረትየ፡ ዘበንእስየ፡ በውስተ፡ ሕዝብየ፡ ልህቁ፡ በኢየሩሳሌም። ወየአምሩኒ፡ ኵሎሙ፡ አይሁድ፡ እምትካት። ወየአምሩ፡ ከመ፡ በሕገ፡ አበውየ፡ እገብር፡ እንዘ፡ ፈሪሳዊ፡ አነ። ወይእዜኒ፡ በጺሖ፡ ዘአሰፈዎሙ፡ እግዚአብሔር፡ ለአበዊነ። መሀርኩ፡ ለዐሠርቱ፡ ወክልኤቱ፡ ሕዝበ፡ እስራኤል፡ እንዘ፡ እፀመድ፡ መዓልተ፡ ወሌሊተ። በእንተ፡ ውእቱ፡ ተስፋ፡ ዘይትኀሠሡኒ፡ አይሁድ። ኦ፡ ንጉሥ፡ አግሪጳ፡ ምንተ፡ ትፈትሕ። አኮኑ፡ ይደሉ፡ ንእመን፡ ከመ፡ እግዚአብሔር፡ ያሐይዎሙ፡ ለምዉታን። ወአነሂ፡ አጥባዕኩ፡ እግበር፡ እኩየ፡ ዲበ፡ ስሙ፡ ለኢየሱስ፡ ናዝራዊ፡ ብዙኀ። ወገበርኩሂ፡ በኢየሩሳሌም፡ ወሞቃሕክዎሙ፡ ለብዙኃን፡ ጻድቃን። አስተበዊሕየ፡ በኀበ፡ ሊቀ፡ ካህናት፡ ከመ፡ እቅትሎሙ። ወአምጻእኩ፡ መጽሐፈ፡ መባሕት፡ ለኵሉ፡ መኳርብት። ወዘልፈ፡ አሐምሞሙ፡ ከመ፡ በግብር፡ ይፅርፉ። ወፈድፋደሰ፡ አበድኩ፡ ላዕሌሆሙ፡ እንዘ፡ እዴግኖሙ፡ ውስተ፡ አህጉር። ወእንዘ፡ አሐውር፡ ሀገረ፡ ደማስቆ። አስተበዊሕየ፡ በኀበ፡ ሊቀ፡ ካህናት፡ በእንተ፡ ዝንቱ። ሶበ፡ ይከውን፡ ጊዜ፡ ቀትር፡ እንዘ፡ ሀሎኩ፡ ውስተ፡ ፍኖት። ኦ፡ ንጉሥ፡ ርኢኩ፡ እምሰማይ፡ በረቀ፡ መብረቅ፡ ዘይበርህ፡ እምፀሓይ። ወኵሉ፡ ሰብእ፡ ዘየሐውር፡ ምስሌየ። ወለልየኒ፡ ምስሌሆሙ፡ ወደቅነ፡ ውስተ፡ ምድር፡ ኵልነ። ወሰማዕኩ፡ ቃለ፡ ዘይብለኒ፡ በነገረ፡ ዕብራይስጥ። ሳውል፡ ሳውል፡ ለምንት፡ ትሰድደኒ። ይብእሰከ፡ ረጊፅ፡ ውስተ፡ ቀኖት፡ በሊሕ። ወእቤ፡ አነ፡ መኑ፡ አንተ፡ እግዚኦ። ወይቤለኒ፡ አነ፡ ውእቱ፡ ኢየሱስ፡ ዘአንተ፡ ትሰድደኒ። ወባሕቱ፡ ተንሥእ፡ ወቁም፡ በእገሪከ። እስመ፡ በእንተዝ፡ አስተርአይኩከ፡ እሢምከ፡ ላእከ፡ ወሰማዕተ። በዘርኢከኒ፡ ወበዘሀለወከ፡ ትርአየኒ። ወአድኅነከ፡ እምሕዝብ፡ ወአሕዛብ፡ እለ፡ እፌንወከ፡ አነ፡ ኀቤሆሙ። ከመ፡ ትክሥት፡ አዕይንቲሆሙ፡ ወትሚጦሙ፡ እምጽልመት፡ ውስተ፡ ብርሃን። ወእምጣዖተ፡ ሰይጣን፡ ኀበ፡ እግዚአብሔር። ከመ፡ ይትኀደግ፡ ሎሙ፡ ኀጢአቶሙ። ወይርከቡ፡ መክፈልተ፡ ምስለ፡ ቅዱሳን፡ በአሚን፡ በስምየ። በእንተ፡ ነገረ፡ ትምህርቱ ወይእዜኒ፡ ኦ፡ ንጉሥ፡ አግሪጳ፡ ኢክሕድኩ፡ ዘአስተርአየኒ፡ ሊተ፡ እምሰማይ። ወቀደምኩ፡ ወነገርክዎሙ፡ ለእለ፡ በደማስቆ፡ ወለእለ፡ በኢየሩሳሌም። ወለኵሉ፡ በሓውርተ፡ ይሁዳ፡ ወለአሕዛብኒ። ወመሀርክዎሙ፡ ይነስሑ፡ ወይትመየጡ፡ ኀበ፡ እግዚአብሔር። ወይግበሩ፡ ዘይደሉ፡ ለንስሓሆሙ። በእንተዝኬ፡ አኀዙኒ፡ አይሁድ፡ በምኵራብ፡ ወፈቀዱ፡ ይቅትሉኒ። ወአድኀነኒ፡ እግዚአብሔር፡ ወበጻሕኩ፡ እስከ፡ ዮም። ወቆምኩ፡ እንዘ፡ እነግር፡ ለንኡስ፡ ወለዐቢይ። ወአልቦ፡ ባዕድ፡ ዘመሀርኩ፡ ዘእንበለ፡ ዘይብሉ፡ ነቢያት፡ ዘሀለዎ፡ ይኩን፡ ወሙሴሂ፡ ዘይቤ። ከመ፡ ይትቀተል፡ ክርስቶስ፡ ወያቀድም፡ ተንሥኦ፡ እምዉታን። ወያበርህ፡ ለሕዝብ፡ ወለኵሉ፡ አሕዛብ፡ ወበሓውርት። በእንተ፡ አውሥኦተ፡ ፊስጦስ ወዘንተ፡ ብሂሎ፡ ተሠጥወ፡ መኰንን፡ ፊስጦስ። ወጸርሐ፡ በዐቢይ፡ ቃል፡ ወይቤሎ። ተአብድኑ፡ ጳውሎስ፡ አብዝኆ፡ መጻሕፍትኬ፡ ያዘነግዕ፡ ልበ። ወይቤሎ፡ ጳውሎስ፡ እበድሰ፡ አልብየ፡ ኦ፡ ፊስጦስ፡ መኰንን። ዳእሙ፡ እነግር፡ ጽድቀ፡ ወንጽሐ። ወየአምር፡ ሊተ፡ ለሊሁ፡ ንጉሥ፡ አግሪጳ፡ ዘበኀቤሁ፡ ክሡተ፡ እነግር። ወይመስለኒሂ፡ አልቦ፡ ዘይስሕት፡ እምዝንቱ፡ እስመ፡ ኢኮነ፡ ኅቡአ። ናሁ፡ ትትአመን፡ በቃለ፡ ነቢያት፡ ኦ፡ ንጉሥ፡ አግሪጳ። ወኣአምር፡ ከመሰ፡ ተአምን። ወይቤሎ፡ አግሪጳ፡ ለጳውሎስ፡ ተኀይጠኒኑ፡ ታብአኒ፡ ውስተ፡ ዐቢይ፡ ክርስቲያን። ሕቀ፡ ክመ፡ ዘእምአባእከኒ፡ ውስተ፡ ክርስቲያን፡ ይእዜ። ወይቤሎ፡ ጳውሎስ፡ አንሰ፡ እጼሊ፡ ኀበ፡ እግዚአብሔር። እመሂ፡ በኅዳጥ፡ ወእመሂ፡ በብዙኅ፡ አኮ፡ ባሕቲትከ። አላ፡ ዓዲ፡ ኵሎሙ፡ እለ፡ ይሰምዑኒ፡ ዮም። ይኩኑ፡ ከማየ፡ ዘእንበለ፡ ዝ፡ መዋቅሕት። ወእምዝ፡ ተንሥአ፡ ንጉሥ፡ ወመኰንን፡ ወበረንቄ፡ ወዐበይቶሙ። ወተግሒሶሙ፡ በባሕቲቶሙ፡ ወተናገሩ፡ በበይናቲሆሙ። ወይቤሉ፡ አልቦ፡ ዘአበሰ፡ ዝ፡ ብእሲ፡ በዘይመውት፡ ወኢ፡ በዘይትሞቃሕ። ወይብሎ፡ አግሪጳ፡ ለፊስጦስ። መፍትው፡ እመ፡ ፈታሕክሙ፡ ዘንተ፡ ብእሴ፡ ወኀደግምዎ፡ ይሕየው። ወእመ፡ አኮሰ፡ ተማሕፀነ፡ በቄሣር፡ ወኀበ፡ ቄሣር፡ የሐውር።

ምዕራፍ 27 በእንተ፡ ትእዛዘ፡ ፊስጦስ ወእምዝ፡ አዘዘ፡ ፊስጦስ፡ ይሰድዎ፡ ኀበ፡ ቄሣር፡ ኢጣልያ። ወተውህበ፡ ጳውሎስ፡ ወካልኣንኒ፡ ሙቁሓን፡ ምስሌሁ። ለብእሲ፡ እምነ፡ ሐራ፡ ሰብስጥያ፡ ዘስሙ፡ ዩልዮስ፡ ሐቢ። ወሶበ፡ ወፃእነ፡ ከመ፡ ንንግድ፡ ረከብነ፡ ሐመረ፡ እምአሕማረ፡ አድራማጡስ። እንተ፡ ትፈቅድ፡ ሐዊረ፡ ብሔረ፡ እስያ። ወነገደ፡ ምስሌነ፡ አርስጥሮኮስ፡ መቄዶናዊ፡ ዘሀገረ፡ ተሰሎንቄ። ወበሳኒታ፡ በጻሕነ፡ ሳይዳ፡ ወመሐሮ፡ መልአክ፡ ለጳውሎስ። ወአብሖ፡ ይሑር፡ ኀበ፡ ዐርካኒሁ፡ ከመ፡ ያዕርፍ፡ ኀቤሆሙ። ወእምዝ፡ ሖርነ፡ እምህየ፡ ወበጻሕነ፡ አድያመ፡ ቆጵሮስ። እስመ፡ ነፋስ፡ እምገጽነ። ወቦእነ፡ ባሕረ፡ ቂልቅያ፡ ወሖርነ፡ ለሙራ፡ ዘብሔረ፡ ሉቅያ፡ ይእቲ። ወበህየ፡ ረከበ፡ መልአክ፡ ሐመረ፡ እስክንድርያ፡ እንተ፡ ተሐውር፡ ኢጣልያ። ወነበርነ፡ ውስቴታ፡ ወይእቲሰ፡ ሐመር፡ ክብደ፡ ሖረት። ወእምድኅረዝ፡ በብዙኅ፡ መዋዕል፡ በጻሕነ፡ ለገጸ፡ ደሴተ፡ ቀኒዶስ። ወበእንተ፡ ጽንዐ፡ ነፋስ፡ ኢክህልነ፡ ሐዊረ፡ ርቱዐ። ወነገድነ፡ አድያመ፡ አቅራጥስ፡ ለገጸ፡ ሀገረ፡ ስልማና። ወእምዕጹብ፡ እንዘ፡ ነሐውር፡ ንሕነ፡ ጥቃሃ። በጻሕነ፡ ለመካን፡ ዘስማ፡ መርስ። ሠናይት፡ ቅሩብ፡ ለሀገር፡ እንተ፡ ስማ፡ ለአስ። ወጐንደይነ፡ ህየ፡ ብዙኀ፡ መዋዕለ፡ እስከ፡ አመ፡ ቦአ፡ ዕለተ፡ ጾመ፡ አይሁድ። ወበጽሐ፡ መዋዕል፡ ዘኢይክል፡ ሰብእ፡ ነጊደ፡ በባሕር፡ ውእተ፡ ጊዜ። ወእምዝ፡ አምከሮሙ፡ ጳውሎስ፡ ወይቤሎሙ። ስምዑኒ፡ ኦ፡ ወራዙት፡ እስመ፡ እሬኢ፡ ንግደተነ፡ በብዙኅ፡ ምንዳቤ፡ ወሀጕል፡ ዐቢይ። ወዘንተ፡ ዘእብል፡ አኮ፡ በእንተ፡ ጾረ፡ ሐመር፡ ባሕቲቱ። ዓዲ፡ ነፍሰነሂ፡ ታህጕሉነ፡ ኅድጉ፡ እስመ፡ እፈርህ። ወመልአክሰ፡ ለሰብአ፡ ሐመር፡ ወለሐዳፊ፡ ይትኤዘዞሙ፡ ወኢይትወከፍ፡ ቃሎ። ወውእቱሰ፡ መርሶ፡ ኢይደሉ፡ ይክርሙ፡ ውስቴቱ፡ ክረምተ። ወበእንተዝ፡ አፍቀሩ፡ ብዙኃን፡ ከመ፡ ይፃኡ፡ እምህየ። ለእመ፡ ተክህሎሙ፡ ከመ፡ ይብጽሑ፡ ለካልእ፡ መርሶ፡ ዘፊንቂ። ዘመንገለ፡ አቅራጥስ፡ ዘስሙ፡ ኤውንቄ፡ ዘመንገለ፡ የማን። ወነፍኀ፡ ነፋሰ፡ አዜብ፡ ወመሰሎሙ፡ ዘይበጽሑ፡ በከመ፡ ፈቃዶሙ። ወአልዐሉ፡ ሥራዐ፡ ወሖሩ፡ ደወለ፡ አቅራጥስ። በእንተ፡ ጽኑዕ፡ ነፋስ ወእምድኅረ፡ ኅዳጥ፡ መዋዕል፡ መጽአ፡ ላዕሌሆሙ፡ ነፋስ፡ ጽኑዕ፡ ጥፉንቂስ፡ ዘይብልዎ፡ አውራቂስ። ወይእቲ፡ ነፋስ፡ እንተ፡ ስማ፡ ሰልቢባ። ወተለዐለት፡ ሐመርነ፡ ወተዘብጠት። ወኢክህሉ፡ ኖትያት፡ ቀዊመ፡ ቅድመ፡ ገጸ፡ ነፋስ፡ ወኀደግዋ፡ ወሖረት። ወእምዝ፡ ነፍኀ፡ ነፋስ፡ እስከ፡ ቦእነ፡ ደሴተ፡ እንተ፡ ስማ፡ ቄዳ። ወእምዕፁብ፡ ክህልነ፡ ከመ፡ ናርግዝ፡ ሐመርነ። ወእምዝ፡ ተሓጊዝነ፡ አጽናዕናሃ፡ በአሕባል። ወእምዝ፡ ሶበ፡ ፈርሁ፡ ከመ፡ ኢደቁ፡ ውስተ፡ ልጐተ፡ ባሕር። አውረዱ፡ ሥራዐ፡ ወረሰይነ፡ ንሑር፡ ከማሁ። በእንተ፡ እለ፡ ገደፉ፡ ንዋዮሙ፡ ውስተ፡ ባሕር ወበሳኒታ፡ ጸንዐ፡ ላዕሌነ፡ መዋግድ፡ ወገደፍነ፡ አልባሲነ፡ ውስተ፡ ባሕር። ወበሣልስታሂ፡ ገደፍነ፡ ኵሎ፡ ዘውስተ፡ ሐመር፡ ዲበ፡ ባሕር፡ በእደዊነ። ወነበረ፡ ይዘንም፡ ላዕሌነ፡ ጕንዱየ፡ ዕለተ። እንዘ፡ ኢንሬኢ፡ ፀሓየ፡ ወወርኀ፡ ወኢ፡ ከዋክብተ፡ ወቀበጽነ፡ ሐይወ። በእንተ፡ ዘተናገረ፡ ጳውሎስ፡ ለእለ፡ ውስተ፡ ሐመር ወአልቦ፡ ዘበልዐ፡ መብልዐ፡ እምኔነ። ወተንሥአ፡ ጳውሎስ፡ ወቆመ፡ ማእከለ፡ ወይቤሎሙ። ሶበ፡ ሰማዕክሙኒ፡ ቀዲሙ፡ አኀውየ፡ ወኢወፃእክሙ፡ እምአቅራጥስ። እምድኅንክሙ፡ እምዝ፡ ሀጕል፡ ወሕማም። ወይእዜኒ፡ እብለክሙ፡ ኢትፍርሁ። እስመ፡ አልቦ፡ ዘይትሀጐል፡ አሐዱ፡ ነፍስ፡ እምኔነ፡ ዘእንበለ፡ ዳእሙ፡ ሐመርነ። እስመ፡ ቆመ፡ ኀቤየ፡ በዛቲ፡ ሌሊት፡ መልአከ፡ እግዚአብሔር። ዘአነ፡ ሎቱ፡ ወኪያሁ፡ አመልክ። ወይቤለኒ፡ ኢትፍራህ፡ ጳውሎስ፡ ሀለወከ፡ ትቁም፡ ቅድመ፡ ቄሣር። ወናሁ፡ ጸገወከ፡ እግዚአብሔር፡ ኵሎሙ፡ እለ፡ ነገዱ፡ ምስሌከ። ወይእዜኒ፡ ተፈሥሑ፡ አኀውየ፡ እስመ፡ እትአመን፡ በእግዚአብሔር። ከመ፡ ይከውን፡ በከመ፡ ይቤለኒ። ወባሕቱ፡ ንበጽሕ፡ አሐተ፡ ደሴተ። በእንተ፡ እለ፡ መሰሎሙ፡ ዘበጽሑ፡ ምድረ ወአመ፡ ዐሡር፡ ወረቡዕ፡ ጊዜ፡ መንፈቀ፡ ሌሊት። መሰሎሙ፡ ኖትያት፡ ከመ፡ ዘበጽሑ፡ ምድረ። ወአውረዱ፡ ሐብለ፡ ወረከቡ፡ ዕሥራ፡ በቆመ፡ ብእሲ። ወተአተቱ፡ እምህየ፡ ወአውረዱ፡ ካዕበ፡ ወረከቡ፡ ዐሠርተ፡ ወኀምስተ፡ በቆም። ወፈርሁ፡ ከመ፡ ኢይደቁ፡ ውስተ፡ መካን፡ ዘቦቱ፡ ኰኵሕ። ወከመ፡ ኢይትጐዳእ፡ ሐመሮሙ። ወአውረዱ፡ አርባዕተ፡ መልሕቀ፡ ውስተ፡ ባሕር፡ እንተ፡ ድኅረ፡ ሐመር። ወጸለይነ፡ ከመ፡ ፍጡነ፡ ይጽባሕ። ወእምዝ፡ ሶበ፡ ፈቀዱ፡ ይትኃጥኡ፡ ኖትያት፡ እምሐመር። ወአውረዱ፡ እምኔሃ፡ ራግናተ፡ ውስተ፡ ባሕር። ከመ፡ ይደሉ፡ ቦቱ፡ ወያጽንዑ፡ ሐመሮሙ፡ በምድር። በእንተ፡ ዘይቤ፡ ጳውሎስ፡ ለሐቢ ወርእዮ፡ ጳውሎስ፡ ይቤሎሙ፡ ለሐቢ፡ ወለሠገራት። እምከመ፡ ኢነበሩ፡ እሉ፡ ኖትያት፡ ውስተ፡ ሐመር፡ ኢንክል፡ ሐይወ። ወተንሥኡ፡ ሠገራት፡ ወመተሩ፡ ሶቤሃ፡ አሕባለ፡ ራግናት፡ ወኀደግዋ፡ ትደቅ። ወጸቢሖ፡ ብሔር፡ አስተብቊዖሙ፡ ጳውሎስ፡ ለኵሎሙ፡ ይብልዑ፡ እክለ። ወይቤሎሙ፡ ዐሡር፡ ወረቡዕ፡ ዮም፡ እምዘኢበላዕክሙ፡ እክለ። ወዮምኒ፡ ብቊዑኒ፡ ምስሑ፡ ወብልዑ፡ ወርድኡ፡ ነፍሰክሙ። እስመ፡ አልቦ፡ ዘይትሀጐል፡ እምኔክሙ፡ ወኢ፡ ሥዕርተ፡ ርእስክሙ። ወዘንተ፡ ብሂሎ፡ ነሥአ፡ ኅብስተ፡ ወአእኰተ፡ እግዚአብሔርሃ። ወከፈለ፡ ቅድመ፡ ኵሎሙ፡ ወአኀዙ፡ ይብልዑ። ወተናዘዙ፡ ኵሎሙ፡ ወጥዕሙ። ወኮነ፡ ፍቅዶሙ፡ ለእለ፡ ሀለዉ፡ ውስተ፡ ሐመር፡ ክልኤቱ፡ ምእት፡ ሰብዓ፡ ወስድስቱ፡ ነፍስ። ወተሴስዮሙ፡ አቅለሉ፡ ሐመረ። ወነሥኡ፡ ሥርናየ፡ ዘውስተ፡ ሐመር፡ ወወገሩ፡ ውስተ፡ ባሕር። በእንተ፡ ድቀተ፡ ሐመር ወጸቢሖ፡ መዓልት፡ ኢፈለጡ፡ ኖትያት፡ ውእተ፡ ምድረ፡ ወኢያእመሩ፡ ዘየሐውሩ። ወባሕቱ፡ ርእዩ፡ አድባረ፡ ደሴት፡ ዘቅሩብ፡ ለሐይቀ፡ ባሕር። ወፈቀዱ፡ ያብጽሑ፡ ሐመሮሙ፡ ህየ። ወመተሩ፡ መልሕቀ፡ ወኀደጉ፡ ውስተ፡ ባሕር። ወአሠነዩ፡ ምቅዋመ፡ ወሰቀሉ፡ ሥራዐ፡ ዘይንእስ፡ በከመ፡ ንፍኀተ፡ ነፋስ። ወሖርነ፡ መንገለ፡ ሐይቀ፡ ባሕር። ወተለክዐት፡ ሐመር፡ ማእከለ፡ ክልኤቱ፡ አእባን፡ ልዑላን፡ ወባሕሩ፡ ዕሙቅ። ወተእኅዘት፡ ወተሰብረት፡ ወተመትረት፡ ገቦሃ፡ ዘድኅር፡ እሞገድ። ወእምቅድሜሃሰ፡ ኢክህሉ፡ ኖትያት። በእንተ፡ እለ፡ መከሩ፡ ይቅትሉ፡ ሙቁሓነ ወተማከሩ፡ ሠገራት፡ ከመ፡ ይቅትሉ፡ መቁሓነ፡ ከመ፡ ኢይጽብቱ፡ ወኢያምሥጡ። ወከልኦሙ፡ ሐቢ፡ እስመ፡ ፈቀደ፡ ያድኅኖ፡ ለጳውሎስ። ወለእለ፡ የአምሩ፡ ጸቢተ፡ አዘዞሙ፡ ይጽብቱ፡ ወይፃኡ፡ ለሐይቅ። ወእለ፡ ተርፉ፡ ዐደዉ፡ ላዕለ፡ ዕፀ፡ ሐመር፡ ወሰላድው። ወካልኣን፡ ዐደዉ፡ በአሕባለ፡ ሐመር። ወወፅኡ፡ ኵሎሙ፡ ወበጽሑ፡ ምድረ፡ በዘከመ፡ ዝ፡ ግብር።

ምዕራፍ 28 በእንተ፡ አረሚ፡ እለ፡ ይነብሩ፡ መላጥያ ወእምድኅረ፡ ዝ፡ አእመርነ፡ ከመ፡ ይእቲ፡ ደሴት፡ ትሰመይ፡ መላጥያ። ወመሀሩነ፡ አረሚ፡ እለ፡ ይነብሩ፡ ህየ። ወአሠነዩ፡ ላዕሌነ፡ ወአንደዱ፡ እሳተ። ወአስተጋብኡነ፡ ለኵልነ፡ ከመ፡ ንስሐን፡ እምጽንዐተ፡ ቊር፡ ወእምብዝኀተ፡ ዝናም። በእንተ፡ አፍዖት፡ ዘነሰከቶ፡ ለጳውሎስ ወአስተጋብአ፡ ጳውሎስ፡ ብዙኀ፡ ሐሠረ፡ ወወገረ፡ ላዕለ፡ እሳት። ወወፅአት፡ አፍዖት፡ እምላህበ፡ እሳት፡ ወነሰከቶ፡ ለጳውሎስ። ወሶበ፡ ርእዩ፡ አረሚ፡ አፍዖተ፡ ስቅልተ፡ ላዕለ፡ እደ፡ ጳውሎስ። ተባሀሉ፡ በበይናቲሆሙ፡ ዝንቱ፡ ብእሲ፡ ይመስል፡ ቀታሌ፡ ነፍስ፡ ድኂኖ፡ እምባሕር። ኢኀደጎ፡ ፍርደ፡ እግዚአብሔር፡ ከመ፡ ይሕየው። ወነገፈ፡ ጳውሎስ፡ እዴሁ፡ ወነፅኀ፡ ለአፍዖት፡ ውስተ፡ እሳት፡ ወኢረከቦ፡ ሕሠም። ወእሙንቱሰ፡ መሰሎሙ፡ ከመ፡ በጊዜሃ፡ ይመውት። ወቆሙ፡ ጕንዱየ፡ እንዘ፡ ይኔጽርዎ። ወሶበ፡ ርእዩ፡ ከመ፡ አልቦ፡ ዘብእሶ፡ መለሱ፡ ካዕበ፡ ቃሎሙ፡ ወይቤሉ፡ አምላክ፡ ውእቱ። በእንተ፡ ፑፕልዩስ ወሀለወት፡ ውስተ፡ ውእቱ፡ መካን፡ ዐጸዱ፡ ለብእሲ፡ ዘስሙ፡ ፑፕልዩስ። ወሥዩም፡ ውእቱ፡ በይእቲ፡ ደሴት። ወተወክፈነ፡ ኀቤሁ፡ ውስተ፡ ማኅደሩ፡ ሠሉሰ፡ መዋዕለ፡ በትፍሥሕት። ወሀሎ፡ አሐዱ፡ ሕሙም፡ አቡሁ፡ ለፑፕልዩስ፡ ዘቦቱ፡ ሕማመ፡ አማዑት። ወቦአ፡ ኀቤሁ፡ ጳውሎስ፡ ወጸለየ፡ ወአንበረ፡ እዴሁ፡ ላዕሌሁ፡ ወአሕየዎ። ወሶበ፡ ርእዩ፡ ዘንተ፡ ተኣምረ፡ ዘገብረ። አምጽኡ፡ ኀቤሁ፡ ኵሎ፡ ድዉያነ፡ ዘውስተ፡ ውእቱ፡ ደሴት፡ ወአሕየዎሙ። ወአክበሩነ፡ ፈድፋደ፡ ዐቢየ፡ ክብረ። ወሶበ፡ ወፃእነ፡ አስነቁነ፡ በሑረትነ፡ እምኀቤሆሙ። በእንተ፡ ፀአቶሙ፡ እምደሴት እምድኅረ፡ ሠለስቱ፡ አውራኀ። ዐረግነ፡ ዲበ፡ ሐመረ፡ ሰብአ፡ እስክንድርያ፡ ዘክረምት፡ በይእቲ፡ ደሴት። ወባቲ፡ ላዕሌሃ፡ ለይእቲ፡ ሐመር፡ ትእምርተ፡ ዲዮስቆሮስ፡ ዘውእቱ፡ አምላከ፡ ኖትያት። ወነገድነ፡ ወበጻሕነ፡ ሰራፉስ፡ ወነበርነ፡ ህየ፡ ሠሉሰ፡ መዋዕለ። በእንተ፡ ሑረቶሙ፡ ራቅዩን ወነገድነ፡ እምህየ፡ ወበጻሕነ፡ ለሀገረ፡ ራቅዮን፡ ወበሳኒታ፡ ወፃእነ። ወእምድኅረ፡ አሐቲ፡ ዕለት፡ ነፍኀ፡ ነፋስ፡ እምገቦሃ። ወወሰደነ፡ ክልኤተ፡ ዕለተ፡ እስከ፡ አብጽሐነ፡ ቀርጠበሉስ፡ እንተ፡ ሀገረ፡ አንጾኪያ። በእንተ፡ ብጽሐቶሙ፡ ሮሜ ወረከብነ፡ በህየ፡ አኀዊነ፡ ወአእተዉነ። ወነበርነ፡ ኀቤሆሙ፡ ሰቡዐ፡ መዋዕለ። ወእምዝ፡ ሖርነ፡ ወበጻሕነ፡ ሮሜ። ወሶበ፡ ሰምዑ፡ አኀዊነ፡ እለ፡ ሀለዉ፡ ህየ፡ ወፅኡ፡ ወተቀበሉነ። እስከ፡ ምሥያጥ፡ ዘስሙ፡ አፍዩስፋሩስ፡ ወእስከ፡ ሠለስቱ፡ ከዋኒት። ወሶበ፡ ርእዮሙ፡ ጳውሎስ፡ አእኰተ፡ እግዚአብሔርሃ፡ ወተጸናዕነ፡ ወቦእነ፡ ሮሜ። ወአብሖ፡ ሐቢ፡ ለጳውሎስ፡ ከመ፡ ይንበር፡ ኀበ፡ ፈቀደ። ወባሕቱ፡ ዐቃቢሁሰ፡ ምስሌሁ። በእንተ፡ ተናግሮተ፡ ምስለ፡ ሊቃውንተ፡ አይሁድ ወእምድኅረ፡ ሠለስቱ፡ ዕለት፡ ለአከ፡ ጳውሎስ፡ ይጸውዕዎሙ፡ ለሊቃውንተ፡ አይሁድ። ወመጽኡ፡ ኀቤሁ፡ ብዙኃነ፡ ሰብእ። ወሶበ፡ ተጋብኡ፡ ይቤሎሙ፡ አልቦ፡ እኩይ፡ ዘገበርኩ፡ አኀዊነ፡ ዲበ፡ ሕዝብ፡ ወኢ፡ ዲበ፡ ኦሪት። ወበከመ፡ ሞቅሑኒ፡ በኢየሩሳሌም፡ ወመጠዉኒ፡ ለሰብአ፡ ሮሜ። ወሐቲቶሙ፡ ፈቀዱ፡ ያሕይዉኒ፡ እሙንቱ። ሶበ፡ ኢረከቡ፡ ላዕሌየ፡ ጌጋየ፡ በዘይሞቅሑኒ፡ ወበዘይኴንኑኒ። ወሶበ፡ ተንሥኡ፡ አይሁድ፡ ይትቃወሙኒ፡ ተማሕፀንኩ፡ ሎሙ፡ በቄሣር፡ ንጉሥ። ወአኮሰ፡ ከመ፡ አስተዋድዮሙ፡ ለሕዝብየ። ወበእንተዝኬ፡ አስተብቋዕኩክሙ፡ ከመ፡ ትምጽኡ፡ ኀቤየ። ከመ፡ አስምዕክሙ፡ ወእንግርክሙ። እስመ፡ በእንተ፡ ተስፋሆሙ፡ ለእስራኤል፡ ተሞቃሕኩ፡ በዝንቱ፡ ሰናስል። በእንተ፡ አውሥኦተ፡ አይሁድ ወይቤልዎ፡ ረበናተ፡ አይሁድ፡ ለነሰ፡ ኢበጽሐነ፡ መጽሐፈ፡ መልእክት፡ እምድረ፡ ይሁዳ፡ በእንቲኣከ። ወኢ፡ አሐዱ፡ እምአኀወ፡ እለ፡ መጽኡ፡ እምኢየሩሳሌም፡ ኢተናገረ፡ ቅድመ። ወኢዜነወነ፡ በእንቲኣከ፡ በነገር፡ እኩይ። አላ፡ ንሕነ፡ ንፈቱ፡ ንስማዕ፡ እምኔከ፡ አሚኖተከ። ወበእንተ፡ ትምህርተ፡ ሕግ፡ ዘትብል። እስመ፡ ሰማዕነ፡ ከመ፡ በኵለሄ፡ ትትካሐዱ። በእንተ፡ ዕድሜ፡ ዘዐደመ፡ ጳውሎስ ወእምዝ፡ ዐደሞሙ፡ ዕለተ፡ በዘይመጽኡ፡ ኀቤሁ፡ ብዙኃን፡ ኀበ፡ ሀሎ፡ የኀድር። ወነገሮሙ፡ በእንተ፡ መንግሥተ፡ እግዚአብሔር። እንዘ፡ ያሰምዖሙ፡ ወያአምኖሙ፡ በእንተ፡ እግዚእነ፡ ኢየሱስ። እምኦሪተ፡ ሙሴ፡ ወእምነቢያት፡ እምነግህ፡ እስከ፡ ሠርክ። በእንተ፡ ቃለ፡ ኢሳይያስ፡ ዘአስምዐ፡ ጳውሎስ ወቦ፡ እለሂ፡ አምንዎ፡ ወመንፈቆሙሰ፡ አበይዎ። ወእንዘ፡ ኢየኀብሩ፡ ተመይጡ፡ እምኀቤሁ። ወይቤሎሙ፡ ጳውሎስ፡ ሠናየ፡ ይቤ፡ መንፈስ፡ ቅዱስ። በቃለ፡ ኢሳይያስ፡ ነቢይ፡ ለአበዊክሙ፡ እንዘ፡ ይብል። ሑር፡ ኀበ፡ ዝንቱ፡ ሕዝብ፡ ወበሎ። ሰሚዐ፡ ትሰምዑ፡ ወኢትሌብዉ፡ ወርእየ፡ ትሬእዩ፡ ወኢተአምሩ። እስመ፡ ገዝፈ፡ ልቦሙ፡ ለዝ፡ ሕዝብ። ወደንቀወ፡ እዘኒሆሙ፡ ከመ፡ ኢይስምዑ። ወከደኑ፡ አዕይንቲሆሙ፡ ከመ፡ ኢይርአዩ፡ በአዕይንቲሆሙ። ወኢይለብዉ፡ በልቦሙ፡ ወኢይትመየጡ፡ ኀቤየ፡ ወኢይሣሀሎሙ። በእንተ፡ ሕይወተ፡ አሕዛብ አእምሩ፡ እንከ፡ ከመ፡ ለአሕዛብ፡ ትከውን፡ ዛቲ፡ ሕይወት። እንተ፡ እምኀበ፡ እግዚአብሔር። ወእሙንቱ፡ እለ፡ ይሰምዕዎ፡ ወይለብዉ፡ ወይትኤዘዙ፡ ሎቱ። ወዘንተ፡ ሶበ፡ ይቤሎሙ፡ ወፅኡ፡ አይሁድ። ወሖሩ፡ እንዘ፡ ይትጋአዙ፡ በበይናቲሆሙ፡ ፈድፋደ። በእንተ፡ ጽውዖቱ፡ አሕዛበ ወነበረ፡ ጳውሎስ፡ ኀበ፡ መካን፡ ዘተዐሰበ፡ በንዋዩ፡ ክልኤተ፡ ዓመተ። ወይትቄበል፡ ኵሎ፡ ዘአተወ። ወይጼውዖሙ፡ ለመንግሥተ፡ እግዚአብሔር። ወይሰብክ፡ ወይሜህር፡ በእንተ፡ እግዚእነ፡ ኢየሱስ፡ ክርስቶስ። እንዘ፡ ክሡተ፡ ይነግር፡ ወአልቦ፡ ዘይከልኦ። እስመ፡ ውእቱ፡ ቦአ፡ ኀበ፡ ኔሮን፡ በቀዳማይ፡ ጊዜ፡ ወሞአ። ወሖረ፡ በሰላም፡ ወነበረ፡ እምድኅረዝ፡ ኑኀ፡ ክልኤተ፡ ዓመት፡ ወወፅአ። ወእምዝ፡ ተመይጠ፡ ወአጥመቀ፡ አዝማዲሁ፡ ለኔሮን። ወስምዐ፡ ኮነ፡ በሰይፍ፡ ዕጉሠ። እስከ፡ ዝ፡ ነገር፡ አብጽሐ፡ ሉቃስ፡ በዜናሁ፡ ወዘተሰወረ፡ እምኔሁ። እስመ፡ አንተ፡ ትረክብ፡ በቀዳማይ፡ ፍካሬ፡ መልእክቱ፡ ለጳውሎስ፡ ዜና፡ ግብሩ፡ ለጳውሎስ።