ⲡ ⲟⲩⲟⲉⲓⲛ ⲡⲉ ⲉⲧ ϯ ϭⲟⲙ ⲛ̅ ⲛ ⲉⲧ ⲡⲓⲥⲧⲉⲩⲉ ⲉⲣⲟ ϥ · ⲁⲩⲱ ⲡ ⲣⲁⲛ ⲙ̅ ⲡⲉϥ ⲙⲩⲥⲧⲏ ⲣⲓⲟⲛ ⲡⲁ ⲛ ⲉⲧ ⲛⲁϩⲧⲉ ⲉⲣⲟ ϥ ⲡⲉ · ⲁⲩⲱ ϥ ⲛⲁ ⲧⲁⲙⲟ ⲟⲩ ⲉ ⲡ ⲧⲟⲡⲟⲥ ⲛ̅ ⲧⲉ ⲕⲗⲏⲣⲟⲛⲟⲙⲓⲁ ⲉ ⲧ ϩⲙ̅ ⲡⲉ ⲑⲏ ⲥⲁⲩⲣⲟⲥ ⲙ̅ ⲡ ⲟⲩⲟⲉⲓⲛ ·

ⲁⲛⲟⲕ ⲇⲉ ⲁ ⲓ̈ ⲡⲓⲥⲧⲉⲩⲉ ⲉ ⲡ ⲟⲩ ⲟⲉⲓⲛ ⲛ̅ ⲟⲩⲟⲉⲓϣ ⲛⲓⲙ ϫⲉ ⲛ̅ⲧⲟϥ ⲡⲉ ⲉⲧ ⲛⲁ ⲛⲟⲩϩⲙ̅ ⲛ̅ ⲛⲁ ⲟⲩⲉⲣⲏⲧⲉ ⲉⲃⲟⲗ ϩⲛ̅ ⲙ̅ ⲙⲣ̅ⲣⲉ ⲙ̅ ⲡ ⲕⲁⲕⲉ · ϯ ϩⲧⲏ ⲕ ⲉⲣⲟ ⲓ̈ ⲡ ⲟⲩⲟⲓ̈ⲛ ⲁⲩⲱ ⲛ̅ ⲅ̅ ⲛⲟⲩϩⲙ̅ ⲙ̅ⲙⲟ ⲓ̈ . ϫⲉ ⲁⲛⲟⲕ ⲅⲁⲣ ⲁ ⲩ ϥⲓ ⲡⲁ ⲣⲁⲛ ⲛ̅ ϩⲏⲧ ϩⲙ̅ ⲡⲉ ⲭⲁⲟⲥ · ⲡⲁⲣⲁ ⲛⲉ ⲡⲣⲟⲃⲟⲗⲟⲟⲩⲉ ⲧⲏⲣ ⲟⲩ ⲁ ⲩ ⲁϣⲁⲓ̈ ⲉⲙⲁⲧⲉ ⲛ̅ϭⲓ ⲛⲁ ⲑⲗⲓⲯⲓⲥ ⲙⲛ̅ ⲡⲁ ϩⲱϫ · ⲛⲁϩⲙⲉ ⲧ ⲉⲃⲟⲗ ϩⲛ̅ ⲧⲁ ⲡⲁⲣⲁⲃⲁⲥⲓⲥ . ⲁⲩⲱ ⲙⲛ̅ ⲡⲉⲓ̈ ⲕⲁⲕⲉ ⲁⲩⲱ ⲁ ⲛⲁⲩ ⲉ ⲫ ⲓⲥⲉ ⲙ̅ ⲡⲁ ϩⲱϫ . ⲛ̅ ⲅ ⲕⲱ ⲉⲃⲟⲗ ⲛ̅ ⲧⲁ ⲡⲁⲣⲁⲃⲁⲥⲓⲥ · ϯ ϩⲧⲏ ⲕ ⲉ ⲛ ⲁⲣⲭⲱⲛ ⲙ̅ ⲡ ⲙ̅ⲛ̅ⲧ̅ ⲥⲛⲟⲟⲩⲥ ⲛ̅ ⲁⲓⲱⲛ · ⲛⲁⲓ̈ ⲉⲛⲧ ⲁ ⲩ ⲙⲉⲥⲧⲱ ⲓ̈ ϩⲛ̅ ⲟⲩ ⲕⲱϩ ·

ⲣⲟⲓ̈ⲥ ⲉ ⲧⲁ ϭⲟⲙ ⲁⲩⲱ ⲛ̅ ⲅ̅ ⲛⲟⲩϩⲙ̅ ⲙ̅ⲙⲟ ⲓ̈ . ⲁⲩⲱ ⲙ̅ⲡⲣ̅ ⲧⲣⲁ ϭⲱ ϩⲙ̅ ⲡⲉⲓ̈ ⲕⲁⲕⲉ . ϫⲉ ⲁ ⲓ̈ ⲡⲓⲥⲧⲉⲩⲉ ⲉⲣⲟ ⲕ ⲁⲩⲱ ⲁ ⲩ ⲁⲁⲧ ⲛ̅ ⲥⲟϭ ⲉⲙⲁⲧⲉ ϫⲉ ⲁ ⲓ̈ ⲡⲓⲥⲧⲉⲩⲉ ⲉⲣⲟ ⲕ ⲡ ⲟⲩⲟⲉⲓⲛ · ⲧⲉ ⲛⲟⲩ ϭⲉ ⲡ ⲟⲩⲟⲓ̈ⲛ ⲛⲟⲩϩⲙ̅ ⲛ̅ ⲛⲁ ϭⲟⲙ ϩⲣⲁⲓ̈ ϩⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ ⲛⲁⲓ̈ ⲉ ϯ ϩⲏϫ ⲛ̅ϩⲏ ⲧ ⲟⲩ ·

ⲧⲉⲛⲟⲩ ϭⲉ ⲡ ⲉⲧ ⲛⲏⲫⲉⲙⲁⲣⲉϥⲛⲏⲫⲉ ·

ⲛⲁⲓ̈ ϭⲉ ⲛ̅ⲧⲉⲣⲉ ⲓ̅ⲥ̅ ϫⲟⲟ ⲩ ⲉ ⲛⲉϥ ⲙⲁⲑⲏⲧⲏⲥ ·

ⲁ ϥ ⲉⲓ̅ ⲉ ⲑ ⲏ ⲛ̅ϭⲓ ⲑⲱⲙⲁⲥ ⲡⲉϫⲁ ϥ ϫⲉ ⲡⲁ ϫⲟⲉⲓⲥ · ϯ ⲛⲏⲫⲉ ϯ ⲣ̅ ϩⲟⲩⲉ ⲛⲏⲫⲉ ⲁⲩⲱ ⲡⲁ ⲡⲛ̅ⲁ̅ ⲣⲟⲟⲩⲧ ϩⲣⲁⲓ̈ ⲛ̅ ϩⲏⲧ · ⲁⲩⲱ ϯ ⲧⲉⲗⲏⲗ ⲉⲙⲁϣⲟ ϫⲉ ⲁ ⲕ ϭⲱⲗⲡ̅ ⲛⲁ ⲛ ⲉⲃⲟⲗ ⲛ̅ ⲛⲉⲓ̈ ϣⲁϫⲉ ·

ⲡⲗⲏⲛ ϭⲉ ⲉ ⲓ̈ ⲁⲛⲉⲭⲉ ⲛ̅ ⲛⲁ ⲥⲛⲏⲩ ϣⲁ ⲧⲉ ⲛⲟⲩ ϫⲉ ⲛ̅ⲛ ⲁ ϯϭⲱⲛⲧ̅ ⲛⲁ ⲩ · ⲁⲗⲗⲁ ϯ ⲁⲛⲉⲭⲉ ⲙ̅ ⲡ ⲟⲩⲁ ⲡ ⲟⲩⲁ ⲙ̅ⲙⲟ ⲟⲩ ⲉ ϥ ⲛⲏⲩ ⲉ ⲑ ⲏ ⲙ̅ⲙⲟ ⲕ · ⲉ ⲩ ϫⲱ ⲙ̅ ⲡ ⲃⲱⲗ ⲛ̅ ⲧ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ · ⲧⲉⲛⲟⲩ ϭⲉ ⲡⲁ ϫⲟⲉⲓⲥ ⲉⲧⲃⲉ ⲡ ⲃⲱⲗ ⲛ̅ ⲧ ⲙⲉϩ ⲥⲁϣϥⲉ ⲙ̅ ⲙⲉ ⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ⲁ ⲧⲉⲕ ϭⲟⲙ ⲛ̅ ⲟⲩⲟⲓ̈ⲛ ⲡⲣⲟ ⲫⲏⲧⲉⲩⲉ ϩⲁⲣⲟ ⲥ ϩⲓⲧⲛ̅ ⲇⲁⲩⲉⲓⲇ · ⲡⲉ ⲡⲣⲟⲫⲏⲧⲏⲥ ⲉ ⲥ ϫⲱ ⲙ̅ⲙⲟ ⲥ ⲛ̅ ⲧⲉⲓ̈ ϩⲉ ϩⲙ̅ ⲡ ⲙⲉϩ ϫⲟⲩⲧⲁϥⲧⲉ ⲙ̅ ⲯⲁⲗⲙⲟⲥ ϫⲉ ⲡ ϫⲟⲉⲓⲥ ⲁ ⲓ̈ ϥⲓ ⲛ̅ ⲧⲁ ⲯⲩⲭⲏ ⲉϩⲣⲁⲓ̈ ⲉ ⲣⲟ ⲕ ⲡⲁ ⲛⲟⲩⲧⲉ ·

ⲁ ⲓ̈ ⲕⲁϩⲧⲏ ⲓ̈ ⲉⲣⲟ ⲕ . ⲙ̅ⲡⲣ̅ⲧⲣ ⲁ ϫⲓ ϣⲓⲡⲉ · ⲟⲩⲇⲉ ⲙ̅ⲡⲣ̅ⲧⲣⲉ ⲛⲁ ϫⲁϫⲉ ⲥⲱⲃⲉ ⲛ̅ⲥⲱ ⲓ̈ ·

ⲕⲁⲓ ⲅⲁⲣ ⲟⲩⲟⲛ ⲛⲓⲙ ⲉⲧ ϩⲩⲡⲟⲙⲓⲛⲉ ⲉⲣⲟ ⲕ ⲛ̅ ⲥⲉ ⲛⲁ ϫⲓ ϣⲓⲡⲉ ⲁⲛ · ⲉⲩⲉ ϫⲓ ϣⲓⲡⲉ ⲛ̅ϭⲓ ⲛ ⲉⲧ ⲁⲛⲟⲙⲓ ⲉ ⲡ ϫⲓⲛϫⲏ ·

ⲡ ϫⲟⲉⲓⲥ ⲙⲁ ⲧⲁⲙⲟ ⲓ̈ ⲉ ⲛⲉⲕ ϩⲓⲟⲟⲩⲉ ⲁⲩⲱ ⲧⲥⲁⲃⲟ ⲓ̈ ⲉ ⲛⲉⲕ ⲙⲁ ⲙ̅ ⲙⲟⲟϣⲉ · ϫⲓⲙⲟⲉⲓⲧ ϩⲏⲧ . ϩⲓ ⲧⲉ ϩⲓⲏ ⲛ̅ ⲧⲉⲕ ⲙⲉ · ⲁⲩⲱ ⲛ ⲅ̅ ⲧ̅ⲥⲁⲃⲟ ⲓ̈ ϫⲉ ⲛ̅ⲧⲟⲕ ⲡⲁ ⲛⲟⲩⲧⲉ ⲡⲁ ⲥⲱⲧⲏⲣ . ϯ ⲛⲁ ϩⲩⲡⲟⲙⲓⲛⲉ ⲉⲣⲟ ⲕ ⲙ̅ ⲡⲉ ϩⲟⲟⲩ ⲧⲏⲣ ϥ̅ :

ⲁⲣⲓ ⲡ ⲙⲉⲉⲩⲉ ⲛ̅ ⲛⲉⲕ ⲙ̅ⲛ̅ⲧ̅ ϣⲁ ⲛ ϩⲧⲏ ϥ ⲡ ϫⲟⲉⲓⲥ · ⲁⲩⲱ ⲛⲉ ⲕ ⲛⲁ̅ ϫⲉ ⲥⲉ ϣⲟⲟⲡ ϫⲓⲛ ⲉⲛⲉϩ · ⲛ̅ ⲛⲟⲃⲉ ⲛ̅ ⲧⲁ ⲙ̅ⲛ̅ⲧ̅ ⲕⲟⲩⲓ̈ ⲙⲛ̅ ⲛⲁ ⲧⲁ ⲙ̅ⲛ̅ⲧ̅ ⲁⲧ ⲥⲟⲟⲩⲛ̅ ⲙ̅ⲡⲣ̅ ⲣ̅ ⲡⲉⲩ ⲙⲉⲉⲩⲉ · ⲁⲣⲓ ⲡⲁ ⲙⲉⲉⲩⲉ ⲛ̅ⲧⲟϥ ⲕⲁⲧⲁ ⲡ ⲁϣⲁⲓ̈ ⲙ̅ ⲡⲉⲕ ⲛⲁ̅ · ⲉⲧⲃⲉ ⲧⲉⲕ ⲙ̅ⲛ̅ⲧ̅ ⲭ̅ⲣ̅ⲥ̅ ⲡ ϫⲟⲉⲓⲥ · ⲟⲩ ⲭ̅ⲣ̅ⲥ̅ ⲁⲩⲱ ⲉ ϥ ⲥⲟⲩⲧⲱⲛ ⲡⲉ ⲡ ϫⲟⲉⲓⲥ ⲉⲧⲃⲉ ⲡⲁⲓ̈ ϥ ⲛⲁ ϯ ⲥⲃⲱ ⲛ̅ ⲛ ⲉⲧ ⲣ̅ ⲛⲟⲃⲉ ϩⲓ ⲧⲉ ϩⲓⲏ · ϥ ⲛⲁ ϫⲓ ⲙⲟⲉⲓⲧ ϩⲏⲧ ⲟⲩ ⲛ̅ ⲛ̅ ⲣⲙ̅ ⲣⲁϣ ϩⲛ̅ ⲟⲩ ϩⲁⲡ · ϥ ⲛⲁ ⲧⲥⲁⲃⲉ ⲛ̅ ⲣⲙ̅ ⲣⲁϣ ⲉ ⲛⲉϥ ϩⲓⲟⲟⲩⲉ · ⲛⲉ ϩⲓⲟⲟⲩⲉ ⲧⲏⲣ ⲟⲩ ⲙ̅ ⲡ ϫⲟⲉⲓⲥ ϩⲉⲛ ⲛⲁ̅ⲛⲉ ϩⲓ ⲙⲉ ·

ⲛ ⲉⲧ ϣⲓⲛⲉ ⲛ̅ⲥⲁ ⲧⲉϥ ⲇⲓⲕⲁⲓⲟⲥⲩⲛⲏ ⲁⲩⲱ ⲛⲉ ϥ ⲙ̅ⲛ̅ ⲧ̅ ⲙⲛ̅ ⲧⲣⲉ · ⲉⲧⲃⲉ ⲡⲉⲕ ⲣⲁⲛ ⲡ ϫⲟⲉⲓⲥ ⲕⲁ ⲡⲁ ⲛⲟⲃⲉ ⲛⲁ ⲓ̈ ⲉⲃⲟⲗ ⲉ ϥ ⲟϣ ⲉⲙⲁⲧⲉ ⲛⲓⲙ ⲡⲉ ⲡ ⲣⲱⲙⲉ ⲉⲧ ⲣ̅ ϩⲟⲧⲉ ϩⲏⲧ ϥ̅ ⲙ̅ ⲡ ϫⲟⲉⲓⲥ · ϥ ⲛⲁ ⲥⲙ̅ⲛ̅ ⲛⲟⲙⲟⲥ ⲛⲁ ϥ ϩⲓ ⲧⲉ ϩⲓⲏ ⲉⲛⲧ ⲁ ϥ ⲟⲩ ⲁϣ ⲥ̅ ·

ⲧⲉϥ ⲯⲩⲭⲏ ⲛⲁ ϣⲱⲡⲉ ϩⲛ̅ ϩⲉⲛ ⲁⲅⲁⲑⲟⲛ · ⲁⲩⲱ ⲡⲉϥ ⲥⲡⲉⲣⲙⲁ ⲛⲁ ⲕⲗⲏⲣⲟⲛⲟⲙⲓ ⲙ̅ ⲡ ⲕⲁϩ ·

ⲡ ϫⲟⲉⲓⲥ ⲡⲉ ⲡ ⲧⲁϫⲣⲟ ⲛ̅ ⲛ ⲉⲧ ⲣ̅ ϩⲟⲧⲉ ϩⲏⲧ ϥ̅ ⲁⲩⲱ ⲡ ⲣⲁⲛ ⲙ̅ ⲡ ϫⲟ ⲓ̈ⲥ ⲡⲁ ⲛ ⲉⲧ ⲣ̅ ϩⲟⲧⲉ ϩⲏⲧ ϥ̅ ⲡⲉ · ⲉ ⲧⲁⲙⲟ ⲟⲩ ⲉ ⲧⲉϥ ⲇⲓⲁⲑⲏⲕⲏ · ⲉⲣⲉ ⲛⲁ ⲃⲁⲗ ⲉ ⲓⲟⲣⲙ̅ ⲉ ⲡ ϫⲟⲉⲓⲥ ⲛ̅ ⲟⲩⲟⲉⲓϣ ⲛⲓⲙ ϫⲉ ⲛ̅ⲧⲟϥ ⲡ ⲉⲧ ⲛⲁ ⲧⲉⲕⲙ̅ ⲛⲁ ⲟⲩⲉⲣⲏⲧⲉ ⲉⲃⲟⲗ ϩⲙ̅ ⲡ̅ ⲡⲁϣ · ϭⲱϣⲧ̅ ⲉϩⲣⲁⲓ̈ ⲉϫⲱ ⲓ̈ ⲛ̅ ⲅ ⲛⲁ ⲛⲁ ⲓ̈ · ϫⲉ ⲁⲛⲅ̅ ⲟⲩ ϣⲏⲣⲉ ⲛ̅ ⲟⲩⲱⲧ .

ⲁⲛⲅ̅ ⲟⲩ ϩⲏⲕⲉ ⲁⲛⲟⲕ · ⲁ ⲛⲉ ⲑⲗⲓⲯⲓⲥ ⲙ̅ ⲡⲁ ϩⲏⲧ ⲟⲩⲱϣ ⲥ̅ ⲉⲃⲟⲗ ·

ⲁⲛⲓⲧ ⲉⲃⲟⲗ ϩⲛ̅ ⲛⲁ ⲁⲛⲁⲅⲕⲏ ⲁ ⲛⲁⲩ ⲉ ⲡⲁ ⲑⲃ̅ⲃⲓⲟ ⲙⲛ̅ ⲡⲁ ϩⲓⲥⲉ ·

ⲛ̅ ⲅ ⲕⲱ ⲉⲃⲟⲗ ⲛ̅ ⲛⲁ ⲛⲟⲃⲉ ⲧⲏⲣ ⲟⲩ ⲁ ⲛⲁⲩ ⲉ ⲛⲁ ϫⲁϫⲉ ϫⲉ ⲁ ⲩ ⲟⲩⲱϣⲥ̅ ⲉⲃⲟⲗ . ⲁⲩⲱ ⲁ ⲩ ⲙⲉⲥⲧⲱ ⲓ̈ ϩⲛ̅ ⲟⲩ ⲙⲟⲥⲧⲉ ⲛ̅ ϫⲓ ⲛ ϭⲟⲛⲥ̅ · ϩⲁⲣⲉϩ ⲉ ⲧⲁ ⲯⲩⲭⲏ ⲛ̅ ⲅ ⲧⲟⲩϫⲟ ⲓ̈ · ⲙ̅ⲡⲣ̅ ⲧⲣ ⲁ ϫⲓ ϣⲓⲡⲉ ϫⲉ ⲁ ⲓ̈ ϩⲉⲗⲡⲓⲍⲉ ⲉⲣⲟ ⲕ · ⲃ̅ ⲃⲁⲗ ϩⲏⲧ ⲙⲛ̅ ⲛ ⲉⲧ ⲥⲟⲩⲧⲱⲛ ⲛⲁ ⲩ ⲧⲟϭ ⲟⲩ ⲉⲣⲟ ⲓ̈ · ϫⲉ ⲁ ⲓ̈ ϩⲩⲡⲟ ⲙⲓⲛⲉ ⲉⲣⲟ ⲕ ⲡ ϫⲟⲉⲓⲥ · ⲡ ⲛⲟⲩⲧⲉ ⲥⲱⲧⲙ̅ⲡⲓⲥⲗ̅ ⲉⲃⲟⲗ ϩⲛ̅ ⲛⲉϥ ⲑⲗⲓⲯⲓⲥ ⲧⲏⲣ ⲟⲩ ·

Ⲍ ⲛ̅ⲧⲉⲣⲉ ⲓ̅ⲥ̅ ⲇⲉ ⲥⲱⲧⲙ̅ ⲉ ⲛ ϣⲁϫⲉ ⲛ̅ ⲑⲱⲙⲁⲥ · ⲡⲉϫⲁ ϥ ⲛⲁ ϥ ϫⲉ ⲉ ⲩⲅⲉ ⲑⲱⲙⲁⲥ · ⲁⲩⲱ ⲕⲁⲗⲱⲥ ·

ⲡⲁⲓ̈ ⲡⲉ ⲡ ⲃⲱⲗ ⲛ̅ ⲧ ⲙⲉϩ ⲥⲁϣϥⲉ ⲙ̅ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ·

ϩⲁⲙⲏⲛ ϩⲁⲙⲏⲛ ϯ ϫⲱ ⲙ̅ⲙⲟ ⲥ ⲛⲏ ⲧⲛ̅ ϫⲉ ⲥⲉ ⲛⲁ ⲙⲁⲕⲁⲣⲓⲍⲉ ⲙ̅ⲙⲱ ⲧⲛ̅ ϩⲓϫⲙ̅ ⲡ ⲕⲁϩ ⲛ̅ϭⲓ ⲛ̅ ⲅⲉⲛⲉⲁ ⲧⲏⲣ ⲟⲩ ⲙ̅ ⲡ ⲕⲟⲥⲙⲟⲥ ϫⲉ ⲁ ⲓ̈ ϭⲗ̅ⲡ̅ ⲛⲁ ⲓ̈ ⲛⲏ ⲧⲛ̅ ⲉⲃⲟⲗ · ⲁⲩⲱ ⲁ ⲧⲉⲧⲛ̅ ϫⲓ ⲉⲃⲟⲗ ϩⲙ̅ ⲡⲁ ⲡ̅ⲛ̅ⲁ̅ · ⲁⲩⲱ ⲁ ⲧⲉⲧⲛ̅ ϣⲱ ⲡⲉ ⲛ̅ ⲛⲟⲉⲣⲟⲥ ⲁⲩⲱ ⲙ̅ ⲡⲛ̅ⲁ̅ⲧⲓⲕⲟⲥ ⲉ ⲧⲉⲧⲛ̅ ⲛⲟⲓ̈ ⲉⲛⲉ ϯ ϫⲱ ⲙ̅ⲙⲟ ⲟⲩ · ⲁⲩⲱ ⲙⲛ̅ⲛ̅ⲥⲁ ⲛⲁⲓ̈ ϯ ⲛⲁ ⲙⲉϩ ⲧⲏⲩⲧⲛ̅ ⲉⲃⲟⲗ ϩⲙ̅ ⲡ ⲟⲩⲟⲉⲓⲛ ⲧⲏⲣ ϥ̅ ⲁⲩⲱ ⲙⲛ̅ ⲧ ϭⲟⲙ ⲧⲏⲣ ⲥ̅ ⲛ̅ⲧⲉ ⲡⲉ ⲡⲛ̅ⲁ̅ · ϫⲉⲕⲁⲥ ⲉ ⲉ ⲧⲉ ⲛ̅ ⲛⲟⲓ̈ ϫⲓⲛ ⲙ̅ ⲡⲉⲓ̈ ⲛⲁ ⲩ ⲛ̅ ⲛ ⲉⲧ ⲟⲩ ⲛⲁ ϫⲟⲟⲩ ⲉⲣⲱ ⲧⲛ̅ ⲧⲏⲣ ⲟⲩ ⲁⲩⲱ ⲙⲛ̅ ⲛ ⲉⲧ ⲛⲁ ⲛⲁⲩ ⲉⲣⲟ ⲟⲩ · ⲉⲧ ⲓ ⲕⲉ ⲕⲟⲩⲓ̈ ⲛ̅ ⲟⲩⲟⲉⲓϣ ⲡⲉ · ϯ ⲛⲁ ϣⲁϫⲉ ⲛⲙ̅ⲙⲏ ⲧⲛ̅ ⲉ ⲛⲁ ⲡ ϫⲓⲥⲉ ⲧⲏⲣ ⲟⲩ ϫⲓⲛ ⲛ̅ ⲃⲟⲗ · ϣⲁϩⲟⲩⲛ · ⲁ ⲩ ϣϫⲓⲛ ⲛ̅ϩⲟⲩⲛ ϣⲁⲃⲟⲗ ·

Ⲍ ⲁ ϥ ⲟⲩⲱϩ ⲟⲛ ⲉⲧⲟⲟⲧ ϥ̅ ⲛ̅ϭⲓ ⲓ̅ⲥ̅ ϩⲙ̅ ⲡ ϣⲁϫⲉ ⲡⲉϫⲁ ϥ ⲛ̅ ⲙ̅ ⲙⲁⲑⲏⲧⲏⲥ · ϫⲉ ⲁ ⲥ ϣⲱⲡⲉ ϭⲉ ⲛ̅ⲧⲉⲣⲉ ⲥ ϫⲱ ⲛ̅ ⲧⲉⲥ ⲙⲉϩ ⲥⲁϣϥⲉ ⲙ̅ ⲙⲉⲧⲁⲛⲟⲓⲁ ϩⲙ̅ ⲡⲉ ⲭⲁⲟⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

ⲁⲩⲱ ⲛⲉ ⲙ̅ⲡⲁⲧⲉ ⲧ ⲕⲉⲗⲉⲩⲥⲓⲥ ⲉⲓ̅ ⲛⲁ ⲓ̈ ⲉⲃⲟⲗ ⲡⲉ ϩⲓⲧⲙ̅ ⲡ ϣⲟⲣⲡ̅ ⲙ̅ ⲙⲩⲥⲧⲏⲣⲓⲟⲛ ⲉ ⲧⲣ ⲁ ⲛⲟⲩϩⲙ̅ ⲙ̅ⲙⲟ ⲥ · ⲛ̅ ⲧ ⲁ ⲛ̅ⲧ ⲥ̅ ⲉϩⲣⲁⲓ̈ ϩⲙ̅ ⲡⲉ ⲭⲁⲟⲥ ·

ⲁⲗⲗⲁ ⲁⲛⲟⲕ ⲉⲃⲟⲗ ϩⲓ ⲧⲟⲟⲧ ⲙ̅ⲙⲓⲛ ⲙ̅ⲙⲟ ⲓ̈ ϩⲛ̅ ⲟⲩ ⲙ̅ⲛ̅ⲧ̅ ⲛⲁⲏⲧ ⲁϫⲛ̅ ⲕⲉⲗⲉⲩⲥⲓⲥ ⲁ ⲓ̈ ⲛ̅ⲧⲥ̅ ⲉ ⲩ ⲧⲟⲡⲟⲥ ⲉ ϥ ⲟⲩ ⲱϣⲥ̅ ⲉⲃⲟⲗ ⲛ̅ ⲟⲩ ϣⲏⲙ ϩⲙ̅ ⲡⲉ ⲭⲁⲟⲥ ·

ⲁⲩⲱ ⲛ̅ⲧⲉ ⲣ ⲟⲩ ⲉⲓⲙⲉ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲛ̅ ϩⲩⲗⲓⲕⲟⲛ ⲛ̅ⲧⲉ ⲡ ⲁⲩⲑⲁⲇⲏⲥ . ϫⲉ ⲁ ⲩ ⲛ̅ⲧ ⲥ̅ ⲉ ⲩ ⲧⲟⲡⲟⲥ ⲉ ϥ ⲟⲩⲟϣⲥ̅ ⲉⲃⲟⲗ ⲛ̅ ⲟⲩ ϣⲏⲙ ϩⲙ̅ ⲡⲉ ⲭⲁⲟⲥ . ⲁ ⲩ ⲗⲟ ⲉ ⲩ ϩⲱϫ ⲙ̅ⲙⲟ ⲥ ⲛ̅ ⲟⲩ ϣⲏⲙ · ⲉ ⲩ ⲙⲉⲉⲩⲉ ϫⲉ ⲉ ⲩ ⲛⲁⲛ̅ⲧ ⲥ̅ ⲉϩⲣⲁⲓ̈ ϩⲙ̅ ⲡⲉ ⲭⲁⲟⲥ ⲉ ⲡ ⲧⲏⲣ ϥ̅ ⲛⲁ ⲓ̈ ϭⲉ ⲛ̅ⲧⲉⲣ ⲟⲩ ϣⲱⲡⲉ ⲛⲉ ⲥ ⲥⲟ ⲟⲩⲛ̅ ⲁⲛ ⲡⲉ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ · ϫⲉ ⲁⲛⲟⲕ ⲡⲉ ⲉ ⲧ ⲃⲟⲏⲑⲓ ⲉⲣⲟ ⲥ · ⲟⲩⲇⲉ ⲛⲉ ⲥ ⲥⲟⲟⲩⲛ̅ ⲙ̅ⲙⲟ ⲓ̈ ⲁⲛ ⲉ ⲡ ⲧⲏⲣ ϥ̅ · ⲁⲗⲗⲁ ⲛⲉ ϣⲁ ⲥ ϭⲱ ⲉ ⲥ ϩⲩⲙⲛⲉⲩⲉ ⲉ ⲡ ⲟⲩⲟⲉⲓⲛ ⲙ̅ ⲡⲉ ⲑⲏ ⲥⲁⲩⲣⲟⲥ ⲡⲁⲓ̈ ⲉⲛⲧ ⲁ ⲥ ⲛⲁⲩ ⲉⲣⲟ ϥ ⲙ̅ ⲡⲓ ⲟⲩⲟⲉⲓϣ · ⲁⲩⲱ ⲡⲁⲓ̈ ⲉⲛⲧ ⲁ ⲥ ⲡⲓⲥⲧⲉⲩⲉ ⲉⲣⲟ ϥ ⲁⲩⲱ ⲛⲉ ⲥ ⲙⲉⲉⲩⲉ ϫⲉ ⲛ̅ⲧⲟϥ ⲟⲛ ⲡⲉ ⲉ ⲧ ⲃⲟⲏⲑⲓ ⲉⲣⲟ ⲥ · ⲁⲩⲱ ⲛ̅ⲧⲟϥ ⲡⲉ ⲉ ⲛⲉⲥ ϩⲩⲙⲛ ⲉⲩⲉ ⲉⲣⲟ ϥ · ⲉ ⲥ ⲙⲉⲉⲩⲉ ϫⲉ ⲛ̅ⲧⲟϥ ⲡⲉ ⲡ ⲟⲩ ⲟⲉⲓⲛ ⲛ̅ ⲧ ⲁⲗⲏⲑⲓⲁ · ⲁⲗⲗⲁ ⲉⲡⲉⲓⲇⲏ ⲁ ⲥ ⲡⲓⲥⲧⲉⲩⲉ ⲉ ⲡ ⲟⲩ ⲟⲉⲓⲛ ⲡⲁⲓ̈ ⲉⲧ ⲏⲡ ⲉ ⲧ ⲁⲗⲏⲑⲓⲁ ⲙ̅ ⲡⲉ ⲑⲏⲥⲁⲩⲣⲟⲥ ·

ⲉⲧⲃⲉ ⲡⲁⲓ̈ ⲥⲉ ⲛⲁⲛ̅ⲧ ⲥ̅ ⲉϩⲣⲁⲓ̈ ϩⲙ̅ ⲡⲉ ⲭⲁⲟⲥ ⲁⲩⲱ ⲛ̅ ⲥⲉ ϫⲓ ⲧⲉⲥ ⲙⲉⲧⲁⲛⲟⲓⲁ ⲛ̅ⲧⲟⲟⲧ ⲥ̅ · ⲁⲗⲗⲁ ⲉⲧⲉ ⲙ̅ⲡⲁⲧ ϥ̅ ϫⲱⲕ ⲉⲃⲟⲗ ⲛ̅ϭⲓ ⲡ ⲧⲱϣ ⲙ̅ ⲡ ϣⲟⲣⲡ̅ ⲙ̅ ⲙⲩⲥⲧⲏⲣⲓⲟⲛ ⲉ ⲧⲣⲉ ⲩ ϫⲓ ⲛ̅ ⲧⲉⲥ ⲙⲉⲧⲁⲛⲟⲓⲁ ⲛ̅ⲧⲟⲟⲧ ⲥ̅ · ⲡⲗⲏⲛ ϭⲉ ⲥⲱⲧⲙ̅ ⲧⲁ ϫⲱ ⲉⲣⲱ ⲧⲛ̅ ⲛ̅ ⲛ̅ ϣⲁϫⲉ ⲧⲏⲣ ⲟⲩ ⲉⲛⲧ ⲁ ⲩ ϣⲱⲡⲉ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ·

ⲁ ⲥ ϣⲱⲡⲉ ⲛ̅ⲧⲉⲣ ⲓⲛ̅ⲧⲥ̅ ⲉ ⲩ ⲧⲟⲡⲟⲥ ⲉ ϥ ⲟϣⲥ̅ ⲉⲃⲟⲗ ⲛ̅ ⲟⲩ ϣⲏⲙ ϩⲙ̅ ⲡⲉ ⲭⲁⲟⲥ ·

ⲁ ⲩ ⲗⲟ ⲉ ⲩ ϩⲱϫ ⲙ̅ⲙⲟ ⲥ ⲧⲟⲛⲱ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ ⲉ ⲩ ⲙⲉⲉⲩⲉ ϫⲉ ⲉ ⲩ ⲛⲁⲛ̅ⲧ ⲥ̅ ⲉϩⲣⲁⲓ̈ ϩⲙ̅ ⲡⲉ ⲭⲁⲟⲥ ⲉ ⲡ ⲧⲏⲣ ϥ̅ · ⲁ ⲥ ϣⲱⲡⲉ ϭⲉ ⲛ̅ⲧⲉⲣ ⲟⲩ ⲉⲓⲙⲉ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ · ϫⲉ ⲙ̅ⲡ ⲟⲩⲛ̅ ⲧ ⲡⲓⲥ ⲧⲓⲥ ⲥⲟⲫⲓⲁ ϩⲣⲁⲓ̈ ϩⲙ̅ ⲡⲉ ⲭⲁⲟⲥ .

ⲁ ⲩ ⲕⲟⲧ ⲟⲩ ⲟⲛ ϩⲓ ⲟⲩ ⲥⲟⲡ ⲉ ⲩ ϩⲱϫ ⲙ̅ⲙⲟ ⲥ ⲉⲙⲁϣⲟ · ⲉⲧⲃⲉ ⲡⲁⲓ̈ ϭⲉ ⲁ ⲥ ϫⲱ ⲛ̅ ⲧ ⲙⲉϩ ϣⲙⲟⲩⲛⲉ ⲙ̅ ⲙⲉⲧⲁⲛⲟⲓⲁ · ϫⲉ ⲛⲉ ⲁ ⲩ ⲗⲟ ⲉ ⲩ ϩⲱϫ ⲙ̅ⲙⲟ ⲥ ⲡⲉ ⲁⲩⲱ ⲟⲛ ⲁ ⲩ ⲕⲟⲧ ⲟⲩ ⲁ ⲩ ϩⲱϫ ⲙ̅ ⲙⲟ ⲥ ⲉ ⲫ ⲁⲉ ·

ⲁ ⲥ ϫⲱ ⲛ̅ ⲧⲉⲓ̈ ⲙⲉⲧⲁⲛⲟⲓⲁ ⲉ ⲥ ϫⲱ ⲙ̅ⲙⲟ ⲥ ⲛ̅ ⲧⲉⲓ̈ ϩⲉ ϫⲉ ⲁ ⲓ̈ ⲕⲁϩⲧⲏ ⲓ̈ ⲉⲣⲟ ⲕ ⲡ ⲟⲩⲟⲉⲓⲛ ⲙ̅ⲡⲣ̅ ⲕⲁ ⲁ ⲧ ϩⲙ̅ ⲡⲉ ⲭⲁⲟⲥ ⲥⲱⲧⲉ ⲙ̅ⲙⲟ ⲓ̈ ⲁⲩⲱ ⲛ̅ ⲅ̅ ⲛⲁϩⲙⲉ ⲧ ϩⲙ̅ ⲡⲉⲕ ⲥⲟⲟⲩⲛ̅ ·

ϯ ϩⲧⲏ ⲕ ⲉⲣⲟ ⲓ̈ ⲁⲩⲱ ⲛ̅ ⲅ̅ ⲛⲁϩⲙⲉ ⲧ ϣⲱⲡⲉ ⲛⲁ ⲓ̈ ⲛ̅ ⲣⲉϥ ⲛⲟⲩϩⲙ̅ ⲱ̅ ⲡ ⲟⲩⲟⲓ̈ⲛ ⲁⲩⲱ ⲛ̅ ⲅ̅ ⲛⲁϩⲙⲉ ⲧ ⲛ̅ ⲅ̅ ⲛ̅ⲧ ⲉⲣⲁⲧ ϥ̅ ⲙ̅ ⲡⲉⲕ ⲟⲩⲟⲉⲓⲛ · ϫⲉ ⲛ̅ⲧⲟⲕ ⲡⲉ ⲡⲁ ⲥⲱⲧⲏⲣ ⲁⲩⲱ ⲕ ⲛⲁⲛ̅ⲧ ⲉⲣⲁⲧ ⲕ̅ · ⲁⲩⲱ ⲉⲧⲃⲉ ⲡ ⲙⲩⲥⲧⲏⲣⲓⲟⲛ ⲙ̅ ⲡⲉⲕ ⲣⲁⲛ ϫⲓⲙⲟⲉⲓⲧ ϩⲏⲧ · ⲁⲩⲱ ⲛ̅ ⲅ̅ ϯ ⲛⲁ ⲓ̈ ⲙ̅ ⲡⲉⲕ ⲙⲩⲥⲧⲏⲣⲓⲟⲛ · ⲁⲩⲱ ⲕ ⲛⲁ ⲛⲁϩⲙⲉ ⲧ ⲉ ⲧⲉⲓ̈ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲉⲛⲧ ⲁ ⲩ ϭⲟⲣϭ̅ⲥ ⲉⲣⲟ ⲓ̈ ϫⲉ ⲛ̅ⲧⲟⲕ ⲡⲉ ⲡⲁ ⲥⲱⲧⲏⲣ · ⲁⲩⲱ ϯ ⲛⲁ ϯ ⲡ ⲥⲱⲧ ϥ̅ ⲙ̅ ⲡⲁ ⲟⲩⲟⲉⲓⲛ ⲉ ⲛⲉⲕ ϭⲓϫ · ⲁ ⲕ ⲛⲁϩⲙⲉ ⲧ ⲡ ⲟⲩⲟⲓ̈ⲛ ϩⲙ̅ ⲡⲉⲕ ⲥⲟⲟⲩⲛ ⲁ ⲕ ϭⲱⲛⲧ̅ ⲉ ⲛ ⲉⲧⲣⲟⲓ̈ⲥ ⲉⲣⲟ ⲓ̈ ⲛⲁⲓ̈ ⲉⲧⲉ ⲛ̅ ⲥⲉ ⲛⲁ ϣ ⲁⲙⲁϩⲧⲉ ⲙ̅ ⲙⲟ ⲓ̈ ⲁⲛ ϣⲁⲃⲟⲗ ·

ⲁⲛⲟⲕ ⲇⲉ ⲁ ⲓ̈ ⲛⲁϩⲧⲉ ⲉ ⲡ ⲟⲩⲟⲓ̈ⲛ ϯ ⲛⲁ ⲣⲁϣⲉ ⲧⲁ ϩⲩⲙⲛⲉⲩⲉ ϫⲉ ⲁ ⲕ ϣⲛ̅ ϩⲧⲏ ⲕ ϩⲁⲣⲟ ⲓ̈ · ⲁⲩⲱ ⲁ ⲕ ϯ ϩⲧⲏ ⲕ ⲉⲫⲱϣ ⲉ ϯ ϣⲟ ⲟⲡ ⲛ̅ϩⲏⲧ ϥ̅ · ⲁⲩⲱ ⲁ ⲕ ⲛⲁϩⲙⲉ ⲧ · ⲁⲩⲱ ⲟⲛ ⲕ ⲛⲁ ⲧⲟⲩϫⲉ ⲧⲁ ϭⲟⲙ ⲉⲃⲟⲗ ϩⲙ̅ ⲡⲉ ⲭⲁⲟⲥ · ⲁⲩⲱ ⲙ̅ⲡ ⲕ̅ ⲕⲁⲁ ⲧ ⲛ̅ⲧⲟⲟⲧ ⲥ̅ ⲛ̅ ⲧ ϭⲟⲙ ⲛ̅ ϩⲁ ⲙ̅ ⲙⲟⲩⲓ̈ · ⲁⲗⲗⲁ ⲁ ⲕ ⲛ̅ⲧⲉⲩ ⲧⲟⲡⲟⲥ ⲉ ⲛ ϥ̅ ϩⲏϫ ⲁⲛ ·

Ⲍ ⲛⲁ ⲓ̈ ϭⲉ ⲛ̅ⲧⲉⲣⲉ ⲓ̅ⲥ̅ ϫⲟⲟ ⲩ ⲉ ⲛⲉϥ ⲙⲁⲑⲏⲧⲏⲥ ⲁ ϥ ⲟⲩⲱϣⲃ̅ ⲟⲛ ⲡⲉϫⲁ ϥ ⲛⲁ ⲩ ϫⲉ ⲁ ⲥ ϣⲱⲡⲉ ϭⲉ ⲛ̅ⲧⲉ ⲣⲉ ⲥ ⲉⲓⲙⲉ ⲛ̅ϭⲓ ϯ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ϫⲉ ⲙ̅ⲡ ⲟⲩⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ⲉϩⲣⲁⲓ̈ ϩⲙ̅ ⲡⲉ ⲭⲁⲟⲥ ⲉ ⲡ ⲧⲏⲣ ϥ̅ ·

ⲁ ⲥ ⲉⲓ̅ ⲟⲛ ⲙⲛ̅ ⲛ̅ ⲕⲉ ⲡⲣⲟⲃⲟⲗⲟⲟⲩⲉ ⲧⲏⲣ ⲟⲩ ⲛ̅ ϩⲩⲗⲓ ⲕⲟⲛ ⲙ̅ ⲡ ⲁⲩⲑⲁⲇⲏⲥ ⲁ ⲩ ϩⲱϫ ⲟⲛ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ·

ⲁ ⲥ ϣⲱⲡⲉ ϭⲉ ⲛ̅ⲧⲉⲣ ⲟⲩ ϩⲱϫ ⲙ̅ⲙⲟ ⲥ . ⲁ ⲥ ⲱϣ ⲉⲃⲟⲗ ϩⲛ̅ ⲧⲉⲓ̈ ⲙⲉⲧⲁⲛⲟⲓⲁ ⲛ̅ ⲟⲩⲱⲧ · ⲉ ⲥ ϫⲱ ⲙ̅ⲙⲟ ⲥ ϫⲉ ϣⲛ̅ ϩⲧⲏ ⲕ ϩⲁⲣⲟ ⲓ̈ ⲡ ⲟⲩⲟⲓ̈ⲛ ϫⲉ ⲁ ⲩ ϩⲱϫ ⲟⲛ ⲙ̅ⲙⲟ ⲓ̈ ·

ⲁ ϥ ϣⲧⲟⲣⲧⲣ̅ ⲉⲧⲃⲉ ⲡⲉⲕ ⲧⲱϣ ⲛ̅ϭⲓ ⲡ ⲟⲩⲟⲓ̈ⲛ ⲉⲧ ⲛ̅ϩⲏⲧ · ⲁⲩⲱ ⲙⲛ̅ ⲧⲁ ϭⲟⲙ · ⲙⲛ̅ ⲡⲁ ⲛⲟⲩⲥ ⲁ ⲧⲁ ϭⲟⲙ ⲁⲣ ϫⲓ ⲛ̅ ⲱϫⲛ̅ⲉⲓ̈ ϣⲟⲟⲡ ϩⲛ̅ ⲛⲉⲓ̈ ϩⲱϫ · ⲁⲩⲱ ⲧ ⲏⲡⲉ ⲙ̅ ⲡⲁ ⲟⲩⲟⲉⲓϣ ⲉ ⲥ ϣⲟⲟⲡ ϩⲙ̅ ⲡⲉ ⲭⲁⲟⲥ · ⲁ ⲡⲁ ⲟⲩⲟⲉⲓⲛ ⲥⲃⲟ ⲕ ϫⲉ ⲁ ⲩ ϥⲓ ⲧⲁ ϭⲟⲙ ⲛ̅ ϩⲏⲧ · ⲁⲩⲱ ⲁ ⲩ ⲥⲁⲗⲉⲩⲉ ⲛ̅ϭⲓ ⲛ̅ ϭⲟⲙ ⲧⲏ ⲣ ⲟⲩ ⲉⲧ ⲛ̅ϩⲏⲧ · ⲁ ⲓ̈ ⲣ̅ ⲁⲧ ϭⲟⲙ ⲡⲁⲣⲁ ⲛ̅ ⲁⲣⲭⲱⲛ ⲧⲏ ⲣ ⲟⲩ ⲛ̅ ⲛ ⲁⲓⲱⲛ · ⲛⲁⲓ̈ ⲉⲧ ⲙⲟⲥⲧⲉ ⲙ̅ⲙⲟ ⲓ̈ · ⲁⲩⲱ ⲡⲁⲣⲁ ⲧ ϫⲟⲩⲧⲁϥⲧⲉ ⲙ̅ ⲡⲣⲟⲃⲟⲗⲏ · ⲛⲁⲓ̈ ⲉ ⲛ ⲉⲓ̈ ϣⲟⲟⲡ ϩⲙ̅ ⲡⲉⲩ ⲧⲟⲡⲟⲥ · ⲁⲩⲱ ⲁ ϥ ⲣ̅ ϩⲟⲧⲉ ⲉ ⲃⲟⲏⲑⲓ ⲉⲣⲟ ⲓ̈ ⲛ̅ϭⲓ ⲡⲁ ⲥⲟⲛ · ⲡⲁ ⲥⲩⲛⲍⲩⲅⲟⲥ ⲉⲧⲃⲉ ⲛ ⲉⲛⲧ ⲁ ⲩ ϫⲟ ⲓ̈ ⲛ̅ϩⲏⲧ ⲟⲩ · ⲁⲩⲱ ⲛ̅ ⲁⲣⲭⲱⲛ ⲧⲏⲣ ⲟⲩ ⲙ̅ ⲡ ϫⲓⲥⲉ · ⲁ ⲩ ⲟⲡⲧ̅ ⲉⲧⲟⲟ ⲧ ⲟⲩ ⲛ̅ ⲑ ⲉ ⲛ̅ ⲟⲩ ϩⲩⲗⲏ ⲉ ⲙⲛ̅ ⲟⲩⲟⲉⲓⲛ ⲛ̅ϩⲏⲧ ⲥ̅ · ⲁ ⲓ̈ ϣⲱⲡⲉ ⲛ̅ ⲑ ⲉ ⲛ̅ ⲟⲩ ϭⲟⲙ ⲛ̅ ϩⲩⲗⲓⲕⲟⲛ · ⲉ ⲁ ⲥ ϩⲉ ⲉⲃⲟⲗ ϩⲛ̅ ⲛ̅ ⲁⲣⲭⲱⲛ ⲁⲩⲱ ⲁ ⲩ ϫⲟⲟ ⲥ ⲛ̅ϭⲓ ⲛ ⲉⲧ ϣⲟⲟⲡ ⲧⲏⲣ ⲟⲩ ϩⲛ̅ ⲛ ⲁⲓⲱⲛ ϫⲉ ⲁ ⲥ ⲣ̅ⲭⲁⲟⲥ · ⲁⲩⲱ ⲙⲛ̅ⲛ̅ⲥⲁ ⲛⲁⲓ̈ ⲁ ⲩ ⲕⲱⲧⲉ ⲉⲣⲟ ⲓ̈ ϩⲓ ⲟⲩ ⲥⲟⲡ ⲛ̅ϭⲓ ⲛ̅ ϭⲟⲙ ⲛ̅ ⲁⲧ ⲛⲁ̅ · ⲁⲩⲱ ⲁ ⲩ ϫⲟⲟ ⲥ ⲉ ϥ ⲓ ⲡⲁ ⲟⲩⲟⲉⲓⲛ ⲧⲏⲣ ϥ̅ ⲉⲧ ⲛ̅ϩⲏⲧ ·

ⲁⲛⲟⲕ ⲇⲉ ⲁ ⲓ̈ ⲛⲁϩⲧⲉ ⲉⲣⲟ ⲕ ⲡ ⲟⲩⲟⲓ̈ⲛ · ⲁⲩⲱ ⲁ ⲓ̈ ϫⲟⲟ ⲥ ϫⲉ ⲛ̅ⲧⲟⲕ ⲡⲉ ⲡⲁ ⲥⲱⲧⲏⲣ · ⲁⲩⲱ ⲉⲣⲉ ⲡ ⲁⲧⲱϣ ⲉⲛⲧ ⲁ ⲕ ⲧⲟϣ ϥ̅ ⲉⲣⲟ ⲓ̈ ⲉ ϥ ϣⲟⲟⲡ ϩⲛ̅ ⲛⲉⲕ ϭⲓϫ ·

ⲛⲁϩⲙⲉ ⲧ ⲉ ⲧⲟⲟⲧ ⲟⲩ ⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡⲁⲩⲑⲁⲧⲏⲥ ⲛⲁⲓ̈ ⲉⲧ ϩⲱϫ ⲙ̅ⲙⲟ ⲓ̈ ⲁⲩⲱ ⲉⲧ ⲡⲏⲧ ⲛ̅ⲥⲱ ⲓ̈ · ⲧⲁⲩⲉ ⲡⲉⲕ ⲟⲩⲟⲉⲓⲛ ⲉϩⲣⲁⲓ̈ ⲉϫⲱ ⲓ̈ ϫⲉ ⲁⲛⲅ̅ ⲟⲩ ⲗⲁⲁⲩ ⲛ̅ⲛⲁϩⲣⲁ ⲕ · ⲁⲩⲱ ⲛⲁϩⲙⲉ ⲧ ϩⲛ̅ ⲧⲉⲕ ⲙ̅ⲛ̅ⲧ̅ ϣⲁⲛ ϩⲧⲏ ϥ ⲙ̅ⲡⲣ̅ⲧⲣ ⲁ ϫⲓ ⲥⲱϣ ϫⲉ ⲛ̅ⲧⲟⲕ ⲡⲉ ⲛ̅ⲧ ⲁ ⲓ̈ ϩⲩⲙⲛⲉⲩⲉ ⲉⲣⲟ ⲕ ⲡ ⲟⲩⲟⲉⲓⲛ ⲉⲣⲉ ⲡⲉ ⲭⲁⲟⲥ ϩⲱⲃⲥ̅ ⲉⲃⲟⲗ ⲉϫⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲧⲏⲥ . ⲁⲩⲱ ⲛ̅ ⲥⲉ ϫⲓⲧ ⲟⲩ ⲉ ⲡ ⲉⲥⲏⲧ ⲉ ⲡ ⲕⲁⲕⲉ ⲙⲁⲣⲉ ⲥ ϣⲧⲁⲙ ⲛ̅ϭⲓ ⲧ ⲧⲁⲡⲣⲟ ⲛ̅ ⲛ ⲉⲧ ⲟⲩⲉϣⲟⲙ̅ⲕ̅ⲧ̅ ϩⲛ̅ ⲟⲩ ⲕⲣⲟϥ · ⲛⲁⲓ̈ ⲉⲧ ϫⲱ ⲙ̅ⲙⲟ ⲥ ϫⲉ ⲙⲁⲣⲉⲛ ϥⲓ ⲡ ⲟⲩ ⲟⲓ̈ⲛ ⲧⲏⲣ ϥ̅ ⲉⲧ ⲛ̅ϩⲏⲧ ⲥ̅ ⲉ ⲙ̅ⲡⲓ ⲣ̅ ⲗⲁⲁⲩ ⲛⲁ ⲩ ⲙ̅ ⲡ ⲉ ⲑ ⲟⲟⲩ ·

ⲛⲁⲓ̈ ⲇⲉ ⲛ̅ⲧⲉⲣⲉ ϥ ϫⲟⲟ ⲩ ⲛ̅ϭⲓ ⲓ̅ⲥ̅ .

ⲁ ϥ ⲉⲓ̅ ⲉ ⲑ ⲏ ⲛ̅ϭⲓ ⲙⲁⲑⲁⲓⲟⲥ ⲡⲉϫⲁ ϥ ϫⲉ ⲡⲁ ϫⲟⲉⲓⲥ . ⲁ ⲡⲉⲕ ⲡ̅ⲛ̅ⲁ̅ ⲕⲓⲙ ⲉⲣⲟ ⲓ̈ · ⲁⲩⲱ ϥ ⲛⲏⲫⲉ ⲙ̅ⲙⲟ ⲓ̈ ⲛ̅ϭⲓ ⲡⲉⲕ ⲟⲩⲟⲉⲓⲛ ⲉ ⲧⲣⲁ ⲧⲁⲩⲉⲧ ⲙⲉϩ ϣⲙⲟⲩⲛⲉ ⲙ̅ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ · ⲁ ⲧⲉⲕ ϭⲟⲙ ⲅⲁⲣ ⲡⲣⲟⲫⲏⲧⲉⲩⲉ ϩⲁⲣⲟ ⲥ ⲙ̅ ⲡⲓ ⲟⲩⲟⲉⲓϣ ϩⲓⲧⲛ̅ ⲇⲁⲩⲉⲓⲇ ϩⲙ̅ ⲡ ⲙⲉϩ ⲙⲁⲁⲃ ⲙ̅ ⲯⲁⲗⲙⲟⲥ ⲉ ⲥ ϫⲱ ⲙ̅ⲙⲟ ⲥ · ϫⲉ ⲁ ⲓ̈ ⲕⲁϩⲧⲏ ⲓ̈ ⲉⲣⲟ ⲕ ⲡ ϫⲟⲉⲓⲥ · ⲙ̅ⲡⲣ̅ ⲧⲣ ⲁ ϫⲓ ϣⲓⲡⲉ ⲛ̅ ϣⲁ ⲉⲛⲉϩ · ⲙⲁⲧⲟⲩϫⲟ ⲓ̈ ϩⲛ̅ ⲧⲉⲕ ⲇⲓⲕⲁⲓⲟⲥⲩⲛⲏ ⲣⲓⲕⲉ ⲙ̅ ⲡⲉⲕ ⲙⲁⲁϫⲉ ⲉⲣⲟ ⲓ̈ · ϭⲉⲡⲏ ⲛ̅ ⲅ ⲧⲟⲩϫⲟ ⲓ̈ · ϣⲱⲡⲉ ⲛⲁ ⲓ̈ ⲉ ⲩ ⲛⲟⲩⲧⲉ ⲛ̅ ⲛⲁϣⲧⲉ . ⲁⲩⲱ ⲟⲩ ⲏⲓ̈ ⲙ̅ ⲙⲁ ⲙ̅ ⲡⲱⲧ ⲉ ⲧⲟⲩ ϫⲟⲓ̈ ϫⲉ ⲛ̅ⲧⲟⲕ ⲡⲉ ⲡ ⲁ ⲧⲁϫⲣⲟ · ⲁⲩⲱ ⲡⲁ ⲙⲁ ⲙ̅ ⲡⲱⲧ · ⲉⲧⲃⲉ ⲡⲉⲕ ⲣⲁⲛ ⲕ ⲛⲁ ϫⲓ ⲙⲟⲉⲓⲧ ϩⲏⲧ · ⲁⲩⲱ ⲛ̅ ⲅ ⲥⲁⲛⲟⲩϣⲧ̅ ⲁⲩⲱ ⲕ ⲛⲁⲛ̅ⲧ ⲉⲃⲟⲗ ϩⲙ̅ ⲡⲉⲓ̈ ⲡⲁϣ · ⲡⲁⲓ̈ ⲉⲛⲧ ⲁ ⲩ ϩⲟⲡ ϥ̅ ⲉⲣⲟ ⲓ̈ · ϫⲉ ⲛ̅ⲧⲟⲕ ⲡⲉ ⲧⲁ ⲛⲁϣⲧⲉ · ϯ ⲛⲁ ϭⲟⲓ̈ⲗⲉ ⲉ ⲡⲁ ⲡⲛ̅ⲁ̅ ⲉ ⲛⲉⲕ ϭⲓϫ · ⲁ ⲕ ⲥⲟⲧⲧ̅ ⲡ ϫⲟⲉⲓⲥ ⲡ ⲛⲟⲩⲧⲉ ⲛ̅ ⲧ ⲙⲉ · ⲁ ⲕ ⲙⲉⲥⲧⲉ ⲛ ⲉⲧ ϩⲁⲣⲉϩ ⲉ ⲙⲡ ⲉⲧ ϣ ⲟⲩ ⲓ̈ⲧ ⲉ ⲡ ϫⲓⲛϫⲏ · ⲁⲛⲟⲕ ⲇⲉ ⲁ ⲓ̈ ⲛⲁϩⲧⲉ · ⲁⲩⲱ ϯ ⲛⲁ ⲧⲉⲗⲏⲗ ⲉϫⲙ̅ ⲡ ϫⲟⲉⲓⲥ ⲁⲩⲱ ϯ ⲛⲁ ⲉⲩⲫⲣⲁⲛⲉ ⲉϫⲙ̅ ⲡⲉⲕ ⲛⲁ̅ · ϫⲉ ⲁ ⲕ ϭⲱϣⲧ̅ ⲉϫⲙ̅ ⲡⲁ ⲑⲃ̅ⲃⲓⲟ ⲁⲩⲱ ⲁ ⲕ ⲧⲟⲩ ϫⲉ ⲧⲁ ⲯⲩⲭⲏ ⲉⲃⲟⲗ ϩⲛ̅ ⲛⲁ ⲁⲛⲁⲅⲕⲏ · ⲁⲩⲱ ⲙ̅ⲡ ⲕ̅ ϣⲧⲁⲙ ⲉⲣⲱ ⲓ̈ ϩⲛ̅ ⲛ̅ ϭⲓϫ ⲙ̅ ⲡ ϫⲁϫⲉ · ⲁ ⲕ ⲧⲁϩⲉ ⲛⲁ ⲟⲩⲉⲣⲏⲧⲉ ⲉⲣⲁⲧ ⲟⲩ ϩⲛ̅ ⲟⲩ ⲟⲩⲟⲥⲧⲛ̅ · ⲛⲁ ⲛⲁⲓ̈ ⲡ ϫⲟ ⲉⲓⲥ ϫⲉ ϯ ⲑⲗⲓⲃⲉ · ⲁ ⲡⲁ ⲃⲁⲗ ϣⲧⲟⲣⲧⲣ̅ ϩⲙ̅ ⲡ ϭⲱⲛⲧ̅ · ⲁⲩⲱ ⲧⲁ ⲯⲩⲭⲏ ⲙⲛ̅ ϩⲏⲧ · ϫⲉ ⲁ ⲛⲁⲣ ⲙ̅ⲡⲟⲟⲩⲉ ⲱϫⲛ̅ ϩⲛ̅ ⲟⲩ ⲙ̅ⲕⲁϩ ⲛ̅ ϩⲏⲧ · ⲁⲩⲱ ⲁ ⲡⲁ ⲱⲛϩ̅ ⲱϫⲛ̅ ϩⲛ̅ ϩⲉⲛ ⲁϣ ⲁϩⲟⲙ · ⲁ ⲧⲁ ϭⲟⲙ ϭⲃ̅ⲃⲉ ϩⲛ̅ ⲟⲩ ⲙ̅ⲛ̅ⲧ̅ ϩⲏⲕⲉ · ⲁⲩⲱ ⲁ ⲩ ϣⲧⲟⲣⲧⲣ̅ ⲛ̅ϭⲓ ⲛⲁ ⲕⲉⲉⲥ · ⲁ ⲓ̈ ϣⲱⲡⲉ ⲛ̅ ⲛⲟϭ ⲛⲉϭ ⲛ̅ ⲛⲁ ϫⲁϫⲉ ⲧⲏⲣ ⲟⲩ · ⲁⲩⲱ ⲛ̅ ⲛ ⲉⲧ ϩⲏⲛ ⲉⲣⲟ ⲓ̈ · ⲁ ⲓ̈ ϣⲱⲡⲉ ⲛ̅ ϩⲟⲧⲉ ⲛ̅ ⲛ ⲉⲧ ⲥⲟⲟⲩⲛ ⲙ̅ⲙⲟ ⲓ̈ · ⲁⲩⲱ ⲛ ⲉⲧ ⲛⲁⲩ ⲉⲣⲟ ⲓ̈ ⲁ ⲩ ⲡⲱⲧ ⲛ̅ⲥⲁ ‐ⲃⲟⲗ ⲙ̅ⲙⲟ ⲓ̈ · ⲁ ⲩ ⲣ̅ ⲡⲁ ⲱⲃϣ̅ ⲛ̅ ⲑ ⲉ ⲛ̅ ⲟⲩ ⲕⲱⲱⲥ ϩⲙ̅ ⲡⲉⲩ ϩⲏⲧ · ⲁⲩⲱ ⲁ ⲓ̈ ⲣ̅ ⲑ ⲉ ⲛ̅ ⲟⲩ ⲥⲕⲉⲩⲟⲥ ⲉ ⲁ ϥ ⲥⲱⲣⲙ̅ · ϫⲉ ⲁ ⲓ̈ ⲥⲱⲧⲙ̅ ⲉ ⲡ ⲥⲱϣ ⲛ̅ ϩⲉⲛ ⲙⲏⲏϣⲉ ⲉ ⲩ ⲕⲱⲧⲉ ⲉⲣⲟ ⲓ̈ ⲙ̅ ⲡⲁ ⲕⲱⲧⲉ · ϩⲙ̅ ⲡ ⲧⲣⲉⲩ ⲥⲱⲟⲩϩ ⲉϩⲣⲁⲓ̈ ⲉϫⲱ ⲓ̈ ϩⲓ ⲟⲩ ⲥⲟⲡ · ⲁ ⲩ ϣⲟϫⲛⲉ ⲉ ϥ ⲓ ⲧⲁ ⲯⲩⲭⲏ ⲛ̅ⲧⲟⲟⲧ ·

ⲁⲛⲟⲕ ⲇⲉ ⲁ ⲓ̈ ⲛⲁϩⲧⲉ ⲉⲣⲟ ⲕ ⲡ ϫⲟⲉⲓⲥ · ⲁ ⲓ̈ ϫⲟⲟ ⲥ ϫⲉ ⲛ̅ⲧⲟⲕ ⲡⲉ ⲡⲁ ⲛⲟⲩⲧⲉ ⲉⲣⲉ ⲛⲁ ⲕⲗⲏⲣⲟⲥ ϩⲛ̅ ⲛⲉⲕ ϭⲓϫ · ⲛⲁϩⲙⲉ ⲧ ⲉ ⲧ ϭⲓϫ ⲛ̅ ⲛⲁ ϫⲁϫⲉ · ⲁⲩⲱ ⲧⲟⲩϫⲟ ⲓ̈ ⲉ ⲛ ⲉⲧ ⲡⲏⲧ ⲛ̅ⲥⲱ ⲓ̈ · ⲟⲩ ⲱⲛϩ̅ ⲡⲉⲕ ϩⲟ ⲉϩⲣⲁⲓ̈ ⲉϫⲙ̅ ⲡⲉⲕ ϩⲙ̅ϩⲁⲗ · ⲁⲩⲱ ⲧⲟⲩϫⲟ ⲓ̈ ϩⲙ̅ ⲡⲉⲕ ⲛⲁ ⲡ ϫⲟⲓ̈ⲥ · ⲙ̅ⲡⲣ̅ⲧⲣ ⲁ ϫⲓ ϣⲓⲡⲉ ϫⲉ ⲁ ⲓ̈ ⲱϣ ⲉ ϩⲣⲁⲓ̈ ⲉⲣⲟ ⲕ · ⲙⲁⲣ ⲟⲩ ϫⲓ ϣⲓⲡⲉ ⲛ̅ϭⲓ ⲛ̅ ⲁⲥⲉⲃⲏⲥ · ⲁⲩⲱ ⲛ̅ ⲥⲉ ⲕⲟⲧ ⲟⲩ ⲉ ⲁⲙⲛ̅ⲧⲉ · ⲙⲁⲣ ⲟⲩ ⲣ̅ ⲙ̅ⲡⲟ ⲛ̅ϭⲓ ⲛⲉ ⲥⲡⲟ ⲧⲟⲩ ⲛ̅ ⲕⲣⲟϥ · ⲛ ⲉⲧ ⲧⲁⲩⲟ ⲛ̅ ⲟⲩ ⲁⲛⲟⲙⲓⲁ ⲛ̅ⲥⲁ ⲡ ⲇⲓ ⲕⲁⲓⲟⲥ ϩⲛ̅ ⲟⲩ ⲙ̅ⲛ̅ⲧ̅ ϫⲁⲥⲓ ϩⲏⲧ . ⲙⲛ̅ ⲟⲩ ⲥⲱϣ ϥ̅ ·

Ⲍ ⲛ̅ⲧⲉⲣⲉ ⲓ̅ⲥ̅ ⲇⲉ ⲥⲱⲧⲙ̅ ⲉ ⲛⲉⲓ̈ ϣⲁϫⲉ . ⲡⲉϫⲁ ϥ ϫⲉ ⲕⲁⲗⲱⲥ ⲙⲁⲑⲁⲓⲟⲥ · ⲧⲉⲛⲟⲩ ϭⲉ ϩⲁⲙⲏⲛ ϯ ϫⲱ ⲙⲟ ⲥ ⲛⲏ ⲧⲛ̅ ϫⲉ ⲉϥϣⲁⲛ ϫⲱⲕ ⲉⲃⲟⲗ ⲛ̅ϭⲓ ⲡ ⲁⲣⲓⲑⲙⲟⲥ ⲛ̅ ⲧⲉⲗⲉⲓⲟⲥ ·

ⲁⲩⲱ ⲛ̅ⲧⲉ ⲡ ⲧⲏⲣ ϥ̅ ⲱⲗ ⲉϩⲣⲁⲓ̈ ϯ ⲛⲁ ϩⲙⲟⲟⲥ ϩⲙ̅ ⲡⲉ ⲑⲏⲥⲁⲩⲣⲟⲥ ⲙ̅ ⲡⲟⲩⲟⲓ̈ⲛ ⲁⲩⲱ ⲛ̅ⲧⲱⲧⲛ̅ ϩⲱⲧ ⲧⲏⲩⲧⲛ̅ ⲧ ⲉⲧ ⲛⲁ ϩⲙⲟⲟⲥ ϩⲓϫⲛ̅ ⲙ̅ⲛ̅ⲧ̅ ⲥⲛⲟⲟⲩⲥ ⲛ̅ ϭⲟⲙ ⲛ̅ ⲟⲩⲟⲉⲓⲛ ϣⲁⲛⲧ ⲛ̅ ⲁⲡⲟⲕⲁⲑⲓⲥⲧⲁ ⲛ̅ ⲛ̅ ⲧⲁⲝⲓⲥ ⲧⲏⲣ ⲟⲩ ⲙ̅ ⲡ̅ ⲙ̅ⲛ̅ⲧ̅ ⲥⲛⲟⲟⲩⲥ ⲛ̅ ⲥⲱⲧⲏⲣ ⲉ ⲡ ⲧⲟⲡⲟⲥ ⲛ̅ ⲛⲉ ⲕⲗⲏ ⲣⲟⲛⲟⲙⲓⲁ ⲙ̅ ⲡ ⲟⲩⲁ ⲡ ⲟⲩⲁ ⲙ̅ⲙⲟ ⲟⲩ :

Ⲍ ⲛⲁⲓ̈ ⲇⲉ ⲛ̅ⲧⲉ ⲣⲉ ϥ ϫⲟⲟ ⲩ ⲡⲉϫⲁ ϥ ϫⲉ ⲧⲉⲧⲛ̅ ⲛⲟⲓ̈ ϫⲉ ⲉ ⲓ̈ ϫⲱ ⲙ̅ⲙⲟ ⲥ ϫⲉ ⲟⲩ . ⲁ ⲥ ⲉⲓ̅ ⲉ ⲑ ⲏ ⲛ̅ϭⲓ ⲙⲁⲣⲓⲁ ⲡⲉϫⲁ ⲥ ϫⲉ ⲡ ϫⲟⲉⲓⲥ ·

ⲉⲧⲃⲉ ⲡⲁⲓ̈ ⲣⲱ ⲁ ⲕ ϫⲟⲟ ⲥ ⲉⲣⲟ ⲛ ⲙ̅ ⲡⲓ ⲟⲩⲟⲉⲓϣ ϩⲛ̅ ⲟⲩ ⲡⲁⲣⲁⲃⲟⲗⲏ · ϫⲉ ⲛ̅ⲧⲱⲧⲛ̅ ⲁ ⲧⲉⲧⲛ̅ ϩⲩⲡⲟⲙⲓⲛⲉ ⲛⲙ̅ⲙⲁ ⲓ̈ ϩⲛ̅ ⲙ̅ ⲡⲓⲣⲁⲥⲙⲟⲥ .

ϯ ⲛⲁ ⲥⲙⲓⲛⲉ ⲛⲙ̅ⲙⲏ ⲧⲛ̅ ⲛ̅ ⲟⲩ ⲙ̅ⲛ̅ⲧ̅ ⲉⲣⲟ ⲕⲁⲧⲁ ⲑ ⲉ ⲉⲛⲧ ⲁ ⲡⲁ ⲓ̈ⲱⲧ ⲥ̅ⲙ̅ⲛ̅ⲧ̅ ⲥ ⲛⲙ̅ⲙⲁ ⲓ̈ · ϫⲉ ⲉⲧⲉⲧⲛⲉ ⲟⲩⲱⲙ · ⲛ̅ ⲧⲉⲧⲛ̅ ⲥⲱ ϩⲓϫⲛ̅ ⲧⲁ ⲧⲣⲁⲡⲉⲍⲁ ϩⲛ̅ ⲧⲁ ⲙ̅ⲛ̅ⲧ̅ ⲉⲣⲟ ·

ⲁⲩⲱ ⲛ̅ⲧⲱⲧⲛ̅ ⲧ ⲉⲧ ⲛⲁ ϩⲙⲟⲟⲥ ϩⲓϫⲛ̅ ⲙ̅ⲛ̅ⲧ̅ ⲥⲛⲟⲟⲩⲥ ⲛ̅ ⲑⲣⲟⲛⲟⲥ ⲛ̅ ⲧⲉⲧⲛ̅ ⲕⲣⲓⲛⲉ ⲛ̅ ⲧ ⲙ̅ⲛ̅ⲧ̅ ⲥⲛⲟⲟⲩⲥ ⲙ̅ ⲫⲩⲗⲏ ⲙ̅ ⲡ ⲥⲗ̅ ·

Ⲍ ⲡⲉϫⲁ ϥ ⲛⲁ ⲥ ϫⲉ ⲉⲩⲅⲉ ⲙⲁⲣⲓⲁ · ⲁ ϥ ⲟⲩⲱϩ ⲟⲛ ⲉⲧⲟⲟⲧ ϥ̅ ⲛ̅ϭⲓ ⲓ̅ⲥ̅ ⲡⲉϫⲁ ϥ ⲛ̅ ⲛⲉϥ ⲙⲁⲑⲏⲧⲏⲥ ϫⲉ ⲁ ⲥ ϣⲱⲡⲉ ϭⲉ ⲟⲛ ⲙⲛ̅ⲛ̅ⲥⲁ ⲛⲁⲓ̈ ⲛ̅ⲧⲉⲣ ⲟⲩ ϩⲱϫ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ϩⲙ̅ ⲡⲉ ⲭⲁⲟⲥ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩ ⲑⲁⲇⲏⲥ ·

ⲁ ⲥ ϫⲱ ⲛ̅ ⲧ ⲙⲉϩ ⲯⲓⲧⲉ ⲙ̅ ⲙⲉⲧⲁⲛⲟⲓⲁ ⲉ ⲥ ϫⲱ ⲙ̅ⲙⲟ ⲥ · ϫⲉ ⲱ̅ ⲡ ⲟⲩⲟⲉⲓⲛ ⲡⲁⲧⲁⲥⲥⲉ ⲛ̅ ⲛ ⲉⲛⲧ ⲁ ⲩ ϥⲓ ⲧⲁ ϭⲟⲙ ⲛ̅ⲧⲟⲟⲧ · ⲁⲩⲱ ⲛ̅ ⲅ ϥⲓ ⲧ ϭⲟⲙ ⲛ̅ ⲛ ⲉⲛⲧ ⲁ ⲩ ϥⲓ ⲧⲱⲓ̈ ⲛ̅ ϩⲏⲧ · ϫⲉ ⲁⲛⲟⲕ ⲡⲉ ⲧⲉⲕ ϭⲟⲙ · ⲙⲛ̅ ⲡⲉⲕ ⲟⲩⲟⲉⲓⲛ ⲁⲙⲟⲩ ⲛ̅ ⲅ ⲛⲁϩⲙⲉ ⲧ · ⲙⲁⲣⲉ ⲟⲩ ⲛⲟϭ ⲛ̅ ⲕⲁⲕⲉ ϩⲱⲃⲥ̅ ⲉⲃⲟⲗ ⲉϫⲛ̅ ⲛ ⲉⲧ ϩⲱϫ ⲙ̅ⲙⲟ ⲓ̈ ·

ⲁϫⲓ ⲥ ⲛ̅ ⲧⲁ ϭⲟⲙ ϫⲉ ⲁⲛⲟⲕ ⲡ ⲉⲧ ⲛⲁ ⲛⲁϩⲙⲉ ⲙⲁⲣ ⲟⲩ ϣⲱⲱⲧ ⲛ̅ ⲧⲉⲩ ϭⲟⲙ ⲛ̅ϭⲓ ⲛⲁ ⲓ̈ ⲧⲏⲣ ⲟⲩ ⲉ ⲧ ⲟⲩⲉϣ ϥⲓ ⲡⲁ ⲟⲩⲟⲓ̈ⲛ ⲛ̅ ϩⲏⲧ . ⲉ ⲡ ⲧⲏⲣ ϥ̅ · ⲙⲁⲣ ⲟⲩ ⲕⲟⲧ ⲟⲩ ⲉ ⲡⲉ ⲭⲁⲟⲥ · ⲁⲩⲱ ⲛ̅ ⲥⲉ ⲣ̅ ⲁⲧ ϭⲟⲙ ⲛ̅ϭⲓ ⲛ ⲉⲧ ⲟⲩⲉϣ ϥⲓ ⲙ̅ ⲡⲁ ⲟⲩⲟⲓ̈ⲛ ⲛ̅ ϩⲏⲧ ⲉ ⲡ ⲧⲏⲣ ϥ̅ · ⲙⲁⲣⲉ ⲧⲉⲩ ϭⲟⲙ ϣⲱⲡⲉ ⲛ̅ ⲑ ⲉ ⲛ̅ ⲟⲩ ϣⲟⲓ̈ϣ · ⲁⲩⲱ ⲙⲁⲣⲉ ϥ ⲡⲁⲧⲁⲥⲥⲉ ⲙ̅ⲙⲟ ⲟⲩ ⲛ̅ϭⲓ ⲓ̅ⲉ̅ⲟ̅ⲩ̅ ⲡⲉⲕ ⲁⲅ ⲅⲉⲗⲟⲥ · ⲁⲩⲱ ⲉⲩϣⲁⲛ ⲉⲓ̅ ⲉ ⲩ ⲛⲏⲩ ⲉ ⲡ ϫⲓⲥⲉ . ⲙⲁⲣⲉ ⲟⲩ ⲕⲁⲕⲉ ⲧⲁϩⲟ ⲟⲩ · ⲁⲩⲱ ⲛ̅ ⲥⲉ ⲥⲗⲁⲁⲧⲉ ⲛ̅ ⲥⲉ ⲕⲟⲧ ⲟⲩ ⲉ ⲡⲉ ⲭⲁⲟⲥ · ⲁⲩⲱ ⲙⲁⲣⲉ ϥ ⲡⲱⲧ ⲛ̅ⲥⲱ ⲟⲩ ⲛ̅ϭⲓ ⲓ̅ⲉ̅ⲟ̅ⲩ̅ ⲡⲉⲕ ⲁⲅⲅⲉⲗⲟⲥ ⲛ̅ ϥ ϫⲛⲁⲩ ⲉ ⲡ ⲕⲁⲕⲉ ⲙ̅ ⲡ ⲉⲥⲏⲧ · ϫⲉ ⲁ ⲩ ϭⲱⲣϭ̅ ⲉⲣⲟ ⲓ̈ ⲛ̅ ⲟⲩ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲉ ⲙ̅ⲡⲓⲣ̅ ⲡⲉ ⲑ ⲟⲟⲩ ⲛⲁ ⲩ ⲧⲁⲓ̈ ⲉⲧ ⲟⲩ ⲛⲁ ϥⲓ ⲙ̅ ⲡⲉⲩ ⲟⲩⲟⲉⲓⲛ ϩⲣⲁⲓ̈ ⲛ̅ ϩⲏⲧ ⲥ̅ ⲁ ⲩ ϩⲱϫ ⲛ̅ ⲧ ϭⲟⲙ ⲉⲧ ⲛ̅ϩⲏⲧ . ⲧⲁⲓ̈ ⲉⲧⲉ ⲛ̅ ⲥⲉ ⲛⲁ ϣ ϥⲓⲧ ⲥ̅ ⲁⲛ · ⲧⲉⲛⲟⲩ ϭⲉ ⲡ ⲟⲩⲟⲉⲓⲛ ϥⲓ ⲡ ⲥⲱⲧϥ̅ ⲛ̅ ⲧ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲉ ⲙ̅ⲡ ⲥ̅ ⲉⲓⲙⲉ · ⲁⲩⲱ ⲡ ⲙⲉⲉⲩⲉ ⲉⲛⲧ ⲁ ϥ ⲙⲉⲉⲩⲉ ⲉⲣⲟ ϥ ⲛ̅ϭⲓ ⲡ ⲁⲩⲑⲁⲧⲏⲥ ⲉ ϥⲓ ⲡⲁ ⲟⲩ ⲟⲉⲓⲛ . ϥⲓ ⲡⲱϥ ϩⲱⲱ ϥ · ⲁⲩⲱ ⲙⲁⲣ ⲟⲩ ϥⲓ ⲡ ⲟⲩⲟⲓ̈ⲛ ⲛ̅ ⲧ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲧⲁⲓ̈ ⲉⲧ ϭⲱⲣϭ̅ ⲉⲣⲟ ⲓ̈ · ⲧⲁ ϭⲟⲙ ⲛ̅ⲧⲟⲥ ⲛⲁ ⲟⲩⲣⲟⲧ ϩⲙ̅ ⲡ ⲟⲩⲟⲉⲓⲛ · ⲁⲩⲱ ⲥ ⲛⲁ ⲣⲁϣⲉ · ϫⲉ ϥ ⲛⲁ ⲛⲁϩⲙⲉ ⲥ · ⲁⲩⲱ ⲥⲉ ⲛⲁ ϫⲟⲟ ⲥ ⲛ̅ϭⲓ ⲙ̅ ⲙⲉⲣⲟⲥ ⲧⲏ ⲣ ⲟⲩ ⲛ̅ ⲧⲁ ϭⲟⲙ ϫⲉ ⲙⲛ̅ ϭⲉ ⲣⲉϥ ⲛⲟⲩϩⲙ̅ ⲛ̅ⲥⲁⲃⲗ̅ⲗⲁ ⲕ · ϫⲉ ⲛ̅ⲧⲟⲕ ⲡ ⲉⲧ ⲛⲁ ⲛⲁϩⲙⲉ ⲧ ⲛ̅ⲧⲟⲟⲧ ⲥ̅ ⲛ̅ ϯ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲧⲁⲓ̈ ⲉⲛⲧ ⲁ ⲥ ϥⲓ ⲧⲁ ϭⲟⲙ ⲛ̅ ϩⲏⲧ · ⲁⲩⲱ ⲛ̅ⲧⲟⲕ ⲡ ⲉⲧ ⲛⲟⲩϩⲙ̅ ⲙ̅ⲙⲟ ⲓ̈ ⲉⲃⲟⲗ ϩⲓⲧⲟⲟⲧ ⲟⲩ ⲛ̅ ⲛ ⲉⲛⲧ ⲁ ⲩ ϥⲓ ⲧⲁ ϭⲟⲙ ⲛ̅ ϩⲏⲧ ⲙⲛ̅ ⲡⲁ ⲟⲩⲟⲓ̈ⲛ · ϫⲉ ⲁ ⲩ ⲁϩⲉ ⲣⲁⲧ ⲟⲩ ⲉⲣⲟ ⲓ̈ ⲉ ⲩ ϫⲓ ϭⲟⲗ ⲉⲣⲟ ⲓ̈ · ⲁⲩⲱ ⲉ ⲩ ϫⲱ ⲙ̅ⲙⲟ ⲥ ϫⲉ ϯ ⲥⲟⲟⲩⲛ̅ ⲉ ⲡ ⲙⲩⲥⲧⲏⲣⲓⲟⲛ ⲙ̅ ⲡⲟⲩⲟⲓ̈ⲛ ⲉⲧ ϩⲙ̅ ⲡ ϫⲓ ⲥⲉ ⲡⲁⲓ̈ ⲉⲛⲧ ⲁ ⲓ̈ ⲡⲓⲥⲧⲉⲩⲉ ⲉⲣⲟ ϥ · ⲁⲩⲱ ⲁ ⲩ ⲁⲛⲁⲅⲕⲁⲍⲉ ⲙ̅ⲙⲟ ⲓ̈ ϫⲉ ϫⲱ ⲉⲣⲟ ⲛ ⲙ̅ ⲙ̅ ⲙⲩⲥⲧⲏⲣⲓⲟⲛ ⲙ̅ ⲡ ⲟⲩⲟⲉⲓⲛ ⲉⲧ ϩⲙ̅ ⲡ ϫⲓⲥⲉ ·

ⲡⲁⲓ̈ ⲁⲛⲟⲕ ⲉⲧⲉ ⲛ̅ ϯ ⲥⲟⲟⲩⲛ̅ ⲙ̅ⲙⲟ ϥ ⲁⲛ · ⲁⲩⲱ ⲁ ⲩ ⲧⲱⲱⲃⲉ ⲛⲁ ⲓ̈ ⲛ̅ ⲛⲉⲓ̈ ⲡ ⲉⲑ ⲟⲟⲩ ⲧⲏⲣ ⲟⲩ ⲉⲃⲟⲗ ϫⲉ ⲁ ⲓ̈ ⲡⲓⲥⲧⲉⲩⲉ ⲉ ⲡ ⲟⲩⲟⲉⲓⲛ ⲙ̅ ⲡ ϫⲓⲥⲉ · ⲁⲩⲱ ⲁ ⲩ ⲣ̅ ⲧⲁ ϭⲟⲙ ⲛ̅ ⲁⲧⲟⲩⲟⲉⲓⲛ · ⲁⲛⲟⲕ ⲇⲉ ⲛ̅ⲧⲉⲣ ⲟⲩ ⲁⲛⲁⲅ ⲕⲁⲍⲉ ⲙ̅ⲙⲟ ⲓ̈ · ⲁ ⲓ̈ ϩⲙⲟⲟⲥ ⲉϩⲣⲁⲓ̈ ϩⲙ ⲡ ⲕⲁⲕⲉ · ⲉⲣⲉ ⲧⲁ ⲯⲩⲭⲏ ⲑⲃ̅ⲃⲓⲏⲩ ϩⲛ̅ ⲟⲩ ϩⲏⲃⲉ · ⲁⲩⲱ ⲡ ⲟⲩⲟⲓ̈ⲛ ⲉ ϯ ϩⲩⲙⲛⲉⲩⲉ ⲉⲣⲟ ⲕ ⲉⲧⲃⲏⲏⲧ ϥ̅ ϫⲉ ⲛⲟⲩϩⲙ̅ ⲙ̅ⲙⲟ ⲓ̈ . ϯ ⲥⲟⲟⲩⲛ̅ ϫⲉ ⲕ ⲛⲁ ⲛⲁϩⲙⲉ ⲧ ⲉⲃⲟⲗ ϫⲉ ⲛⲉ ⲓ̈ ⲉⲓⲣⲉ ⲡⲉ ⲙ̅ ⲡⲉⲕ ⲟⲩⲱϣ ϫⲓⲛ ⲉⲓ̈ ϣⲟⲟⲡ ⲡⲉ ϩⲙ̅ ⲡⲁ ⲁⲓⲱⲛ .

ⲛⲉ ⲓ̈ ⲉⲓⲣⲉ ⲡⲉ ⲙ̅ ⲡⲉⲕ ⲟⲩⲱϣ ⲛ̅ ⲑ ⲉ ⲛ̅ ⲛⲓ ⲁϩⲟⲣⲁⲧⲟⲥ ⲉⲧ ϣⲟⲟⲡ ϩⲙ̅ ⲡⲁ ⲧⲟⲡⲟⲥ . ⲁⲩⲱ ⲛ̅ ⲑ ⲉ ⲙ̅ ⲡⲁ ⲥⲩⲛⲍⲩⲅⲟⲥ · ⲁⲩⲱ ⲛⲉ ⲓ̈ ⲣ̅ ϩⲏⲃⲉ ⲡⲉ ⲉ ⲓ̈ⲓ̈ⲟⲣⲙ̅ ⲉ ⲓ̈ ϣⲓⲛⲉ ⲛ̅ⲥⲁ ⲡⲉⲕ ⲟⲩⲟⲓ̈ⲛ · ⲧⲉⲛⲟⲩ ϭⲉ ⲁ ⲩ ⲕⲱⲧⲉ ⲉⲣⲟ ⲓ̈ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲧⲏⲣ ⲟⲩ ⲙ̅ ⲡⲁⲩⲑⲁⲧⲏⲥ ·

ⲁⲩⲱ ⲁ ⲩ ⲣⲁϣⲉ ⲉϩⲣⲁⲓ̈ ⲉϫⲱ ⲓ̈ · ⲁⲩⲱ ⲁ ⲩ ϩⲱϫ ⲙ̅ⲙⲟ ⲓ̈ ⲉⲙⲁϣⲟ ⲉ ⲛ ϯ ⲥⲟⲟⲩⲛ̅ ⲁⲛ · ⲁⲩⲱ ⲁ ⲩ ⲡⲱⲧ · ⲁ ⲩ ⲗⲟ ϩⲁⲣⲟ ⲓ̈ · ⲁⲩⲱ ⲙ̅ ⲡⲟⲩ ⲛⲁ̅ ⲛⲁⲓ̈ ⲁ ⲩ ⲕⲟⲧ ⲟⲩ ⲟⲛ ⲁ ⲩ ⲡⲓⲣⲁⲍⲉ ⲙ̅ⲙⲟ ⲓ̈ · ⲁⲩⲱ ⲁ ⲩ ϩⲱϫ ⲙ̅ⲙⲟ ⲓ̈ ϩⲙ̅ ⲡ ⲛⲟϭ ⲛ̅ ϩⲱϫ .

ⲁ ⲩ ϩⲣⲟϫⲣⲉϫ ⲛ̅ ⲛⲉⲩ ⲟⲃϩⲉ ⲉϩⲟⲩⲛ ⲉⲣⲟ ⲓ̈ ⲉ ⲩ ⲟⲩⲉϣ ϥⲓ ⲡⲁ ⲟⲩⲟⲓ̈ⲛ ⲛ̅ ϩⲏⲧ ⲉ ⲡ ⲧⲏⲣ ϥ̅ · ϣⲁ ⲧ ⲛⲁⲩ ϭⲉ ⲡ ⲟⲩⲟⲉⲓⲛ ⲉ ⲕ ⲁⲛⲉⲭⲉ ⲙ̅ⲙⲟ ⲟⲩ ⲉ ⲩ ϩⲱϫ ⲙ̅ⲙⲟ ⲓ̈ ·

ⲛⲟⲩϩⲙ̅ ⲛ̅ ⲧⲁ ϭⲟⲙ ⲉⲃⲟⲗ ϩⲛ̅ ⲛⲉⲩ ⲙⲉⲉⲩⲉ ⲉⲑ ⲟⲟⲩ ⲁⲩⲱ ⲛ̅ ⲅ ⲛⲁϩⲙⲉ ⲧ ⲛ̅ⲧⲟⲟⲧ ⲥ̅ ⲛ̅ ϯ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ · ϫⲉ ⲁⲛⲟⲕ ⲙⲁⲩⲁⲁ ⲧ ϩⲛ̅ ⲛ ⲁϩⲟⲣⲁⲧⲟⲥ ⲡ ⲉⲧ ϣⲟⲟⲡ ϩⲙ̅ ⲡⲉⲓ̈ ⲧⲟⲡⲟⲥ · ϯ ⲛⲁ ϩⲩⲙⲛⲉⲩⲉ ⲉⲣⲟ ⲕ ⲡ ⲟⲩⲟⲓ̈ⲛ ⲉⲓ̈ ϩⲛ̅ ⲧ ⲙⲏⲧⲉ ⲛ̅ ⲛ ⲉⲧ ⲥⲟⲟⲩϩ ⲧⲏⲣ ⲟⲩ ⲉⲣⲟ ⲓ̈ · ⲁⲩⲱ ϯ ⲛⲁ ⲱϣ ⲉϩⲣⲁⲓ̈ ⲟⲩⲏⲕ ϩⲛ̅ ⲧ ⲙⲏⲧⲉ ⲛ̅ ⲛ ⲉⲧ ϩⲱϫ ⲙ̅ⲙⲟ ⲓ̈ ⲧⲏ ⲣ ⲟⲩ ·

ⲧⲉⲛⲟⲩ ϭⲉ ⲡ ⲟⲩⲟⲓ̈ⲛ ⲙ̅ⲡⲣ̅ⲧⲣⲉ ⲩ ⲣⲁϣⲉ ⲙ̅ⲙⲟ ⲓ̈ ⲛ̅ϭⲓ ⲛ ⲉⲧ ⲙⲟⲥⲧⲉ ⲙ̅ⲙⲟ ⲓ̈ · ⲁⲩⲱ ⲉ ⲩ ⲟⲩⲉϣ ϥⲓ ⲧⲁ ϭⲟⲙ ⲛ̅ ϩⲏⲧ . ⲛⲁⲓ̈ ⲉⲧ ⲙⲟⲥⲧⲉ ⲙ̅ⲙⲟ ⲓ̈ ⲉⲧ ⲕⲓⲙ ⲛ̅ ⲛⲉⲩ ⲃⲁⲗ ⲉϩⲟⲩⲛ ⲉⲣⲟ ⲓ̈ · ⲉ ⲙⲡ ⲓ ⲣ̅ ⲗⲁⲁⲩ ⲛⲁ ⲩ ϫⲉ ⲛⲉ ⲩ ⲕⲱⲣϣ̅ ⲙⲉⲛ ⲉⲣⲟ ⲓ̈ ⲡⲉ ϩⲛ̅ ϩⲉⲛ ϣⲁϫⲉ ⲉ ⲩ ⲛⲟⲧⲙ̅ ⲉ ⲩ ϣⲓⲛⲉ ⲙ̅ ⲙⲟ ⲓ̈ ⲉ ⲙ̅ ⲙⲩⲥⲧⲏⲣⲓⲟⲛ ⲙ̅ ⲡ ⲟⲩⲟⲓ̈ⲛ ⲛⲁⲓ̈ ⲉⲧⲉ ⲛ̅ ϯ ⲥⲟ ⲟⲩⲛ̅ ⲙ̅ⲙⲟ ⲟⲩ ⲁⲛ · ⲉ ⲩ ϫⲱ ⲙ̅ⲙⲟ ⲥ ⲉⲣⲟ ⲓ̈ ⲉ ⲩ ⲟ ⲛ̅ ⲕⲣⲟϥ ⲉⲣⲟ ⲓ̈ · ⲁⲩⲱ ⲉ ⲩ ϭⲟⲛⲧ̅ ⲉⲣⲟ ⲓ̈ ϫⲉ ⲁ ⲓ̈ ⲡⲓⲥⲧⲉⲩⲉ ⲉ ⲡ ⲟⲩ ⲟⲉⲓⲛ ⲉⲧ ϩⲙ̅ ⲡ ϫⲓⲥⲉ ·

ⲁ ⲩ ⲟⲩⲱⲛ ⲛ̅ ⲣⲱⲟⲩ ⲉϩⲟⲩⲛ ⲉ ⲣⲟ ⲓ̈ ·

ⲡⲉϫⲁ ⲩ ϫⲉ ⲥⲉ ⲧⲛ̅ ⲛⲁ ϥⲓ ⲡⲉⲥ ⲟⲩⲟⲓ̈ⲛ · ⲧⲉⲛⲟⲩ ϭⲉ ⲡ ⲟⲩⲟⲉⲓⲛ ⲁ ⲕ ⲉⲓⲙⲉ ⲉ ⲡⲉⲩ ⲕⲣⲟϥ ⲙ̅ⲡⲣ ⲁⲛⲉⲭⲉ ⲙ̅ⲙⲟ ⲟⲩ · ⲁⲩⲱ ⲙ̅ⲡⲣ̅ⲧⲣⲉ ⲧⲉⲕ ⲃⲟⲏⲑⲓⲁ ⲟⲩⲉ ⲛ̅ⲥⲁ ⲃⲟⲗ ⲙ̅ⲙⲟ ⲓ̈ · ϭⲉⲡⲏ ⲡ ⲟⲩⲟⲉⲓⲛ · ⲁⲣ ⲓ ⲡⲁ ϩⲁⲡ . ⲙⲛ̅ ⲡⲁ ⲕⲃⲁ · ⲁⲩⲱ ϯ ϩⲁⲡ ⲉⲣⲟ ⲓ̈ ϩⲛ̅ ⲧⲉⲕ ⲙ̅ⲛ̅ⲧ̅ ⲁⲅⲁⲑⲟⲥ · ⲧⲉⲛⲟⲩ ϭⲉ ⲡ ⲟⲩ ⲟⲓ̈ⲛ ⲛ̅ ⲛ̅ ⲟⲩⲟⲓ̈ⲛ ⲙ̅ⲡⲣ̅ⲧⲣⲉ ⲩ ϥⲓ ⲡⲁ ⲟⲩⲟⲉⲓⲛ ⲛ̅ⲧⲟⲟⲧ · ⲁⲩⲱ ⲙ̅ⲡⲣ̅ ⲧⲣⲉ ⲩ ϫⲟⲟ ⲥ ϩⲣⲁⲓ̈ ⲛ̅ϩⲏⲧ ⲟⲩ · ϫⲉ ⲁ ⲧⲉⲛ ϭⲟⲙ ⲥ ⲉⲓ̅ ⲙ̅ ⲡⲉⲥ ⲟⲩⲟⲓ̈ⲛ ⲁⲩⲱ ⲙ̅ⲡⲣ̅ ⲧⲣⲉ ⲩ ϫⲟⲟ ⲥ ϫⲉ ⲁ ⲛ ⲱⲙ ⲕ̅ ⲛ̅ ⲧⲉⲥ ϭⲟⲙ ⲁⲗⲗⲁ ⲙⲁⲣⲉ ⲟⲩ ⲕⲁⲕⲉ ⲛ̅ⲧⲟϥ ⲉⲓ̅ ⲉϩⲣⲁⲓ̈ ⲉϫⲱ ⲟⲩ · ⲁⲩⲱ ⲙⲁⲣ ⲟⲩ ⲣ̅ ⲁⲧ ϭⲟⲙ ⲛ̅ϭⲓ ⲛ ⲉⲧ ⲟⲩⲉϣ ϥⲓ ⲡⲁ ⲟⲩⲟⲓ̈ⲛ ⲛ̅ⲧⲟⲟⲧ · ⲁⲩⲱ ⲙⲁⲣ ⲟⲩ ϯ ϩⲓⲱ ⲟⲩ ⲛ̅ ⲟⲩ ⲭⲁⲟⲥ ⲙⲛ̅ ⲟⲩ ⲕⲁⲕⲉ · ⲛ̅ϭⲓ ⲛ ⲉⲧ ϫⲱ ⲙ̅ⲙⲟ ⲥ ϫⲉ ⲧⲛ̅ ⲛⲁ ϥⲓ ⲙ̅ ⲡⲉⲥ ⲟⲩⲟⲉⲓⲛ ⲙⲛ̅ ⲧⲉⲥ ϭⲟⲙ · ⲧⲉ ⲛⲟⲩ ϭⲉ ⲛⲁϩⲙⲉ ⲧ ⲧⲁⲣ ⲓ ⲣⲁϣⲉ ϫⲉ ϯ ⲟⲩⲉϣ ⲡ ⲙⲉϩ ⲙ̅ⲛ̅ⲧ̅ ϣⲟⲙⲧⲉ ⲛ̅ ⲁⲓⲱⲛ ⲡ ⲧⲟⲡⲟⲥ ⲛ̅ ⲧ ⲇⲓⲕⲁⲓⲟⲥⲩⲛⲏ · ⲁⲩⲱ ϯ ⲛⲁ ϫⲟⲟ ⲥ ⲛ̅ ⲟⲩⲟⲉⲓϣ ⲛⲓⲙ ϫⲉ ⲉϥⲉⲣ̅ϩⲟⲩⲉ ⲟⲩⲟⲓ̈ⲛ ⲛ̅ϭⲓ ⲡ ⲟⲩⲟⲓ̈ⲛ ⲛ̅ ⲓ̅ⲉ̅ⲟ̅ⲩ̅ ⲡⲉⲕ ⲁⲅⲅⲉⲗⲟⲥ ⲁⲩⲱ ⲡⲁ ⲗⲁⲥ ⲛⲁ ϩⲩⲙⲛⲉⲩⲉ ⲉⲣⲟ ⲕ ϩⲙ̅ ⲡⲉⲕ ⲥⲟⲟⲩⲛ ⲙ̅ ⲡⲁ ⲟⲩⲟⲉⲓϣ ⲧⲏⲣ ϥ̅ ϩⲙ̅ ⲡ ⲙⲉϩ ⲙ̅ⲛ̅ⲧ̅ ϣⲟⲙⲧⲉ ⲛ̅ ⲁⲓⲱⲛ :

Ⲍ ⲁ ⲥ ϣⲱⲡⲉ ⲛ̅ⲧⲉⲣⲉ ⲓ̅ⲥ̅ ⲟⲩⲱ ⲉ ϥ ϫⲱ ⲛ̅ ⲛⲉⲓ̈ ϣⲁ ϫⲉ ⲉ ⲛⲉϥ ⲙⲁⲑⲏⲧⲏⲥ . ⲡⲉϫⲁ ϥ ⲛⲁ ⲩ ϫⲉ ⲡ ⲉⲧ ⲛⲏⲫⲉ ϩⲛ̅ ⲧⲏⲩⲧⲛ̅ . ⲙⲁⲣⲉ ϥ ⲧⲁⲩⲉ ⲡⲉⲩ ⲃⲱⲗ ·

ⲁ ϥ ⲉⲓ̅ ⲉ ⲑ ⲏ ⲛ̅ϭⲓ ⲓⲁⲕⲱⲃⲟⲥ · ⲁ ϥ ϯ ⲡⲓ ⲉ ⲣⲛ̅ ⲧⲙⲉⲥⲧ̅ⲛ̅ ϩⲏⲧ ⲛ̅ ⲓ̅ⲥ̅ ⲡⲉϫⲁ ϥ ϫⲉ ⲡⲁ ϫⲟⲉⲓⲥ · ⲁ ϥ ⲛⲏⲫⲉ ⲙ̅ⲙⲟ ⲓ̈ ⲛ̅ϭⲓ ⲡⲉⲕ ⲡⲛ̅ⲁ̅ · ⲁⲩⲱ ϯ ⲣⲟⲟⲩⲧ ⲉ ⲧⲁⲩⲉ ⲡⲉⲩ ⲃⲱⲗ · ⲉⲧⲃⲉ ⲡⲁⲓ̈ ⲣⲱ ⲁ ⲧⲉⲕ ϭⲟⲙ ⲡⲣⲟⲫⲏⲧⲉⲩⲉ ⲙ̅ ⲡⲓ ⲟⲩⲟⲓ̈ϣ ϩⲓⲧⲛ̅ ⲇⲁⲩⲉⲓⲇ ϩⲙ̅ ⲡ ⲙⲉϩ ⲙⲁⲃ ⲧⲁϥⲧⲉ ⲙ̅ ⲯⲁⲗⲙⲟⲥ ⲉ ϥ ϫⲱ ⲙ̅ⲙⲟ ⲥ ⲛ̅ ⲧⲉⲓ̈ ϩⲉ ⲉⲧⲃⲉ ⲧ ⲙⲉϩ ⲯⲓⲧⲉ ⲙ̅ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ · ϫⲉ ϯ ϩⲁⲡ ⲡ ϫⲟⲉ̅ⲓⲥ ⲉ ⲛ ⲉⲧ ϫⲓ ⲙ̅ⲙⲟ ⲓ̈ ⲛ̅ ϭⲟⲛⲥ̅ · ⲙⲓϣⲉ ⲙⲛ̅ ⲛ ⲉⲧ ⲙⲓϣⲉ ⲛⲙ̅ⲙⲁ ⲓ̈ · ⲁⲙⲁϩⲧⲉ ⲛ̅ ⲟⲩ ϩⲟⲡⲗⲟⲛ ⲙⲛ̅ ⲟⲩ ⲑⲩⲣⲱⲛ ⲛ̅ ⲅ ⲧⲱⲟⲩⲛ ⲉ ⲃⲟⲏⲑⲓ ⲉⲣⲟ ⲓ̈ · ⲡⲱϩⲧ̅ ⲉⲃⲟⲗ ⲛ̅ ⲟⲩ ⲥⲏϥⲉ · ⲁⲩⲱ ⲛ̅ ⲅ ϩⲟϫ̅ⲡ̅ⲥ̅ ⲙ̅ ⲡⲉ ⲙⲧⲟ ⲉⲃⲟⲗ ⲛ̅ ⲛ ⲉⲧ ⲑⲗⲓⲃⲉ ⲙ̅ⲙⲟ ⲓ̈ ·

ⲁϫⲓ ⲥ ⲛ̅ ⲧⲁ ⲯⲩⲭⲏ ϫⲉ ⲁⲛⲟⲕ ⲡⲉ ⲡⲟⲩ ⲟⲩϫⲁⲓ̈ ⲙⲁⲣ ⲟⲩ ϫⲓ ϣⲓⲡⲉ ⲛ̅ ⲥⲉ ⲟⲩⲱⲗⲥ̅ ⲛ̅ϭⲓ ⲛ ⲉⲧ ϣⲓⲛⲉ ⲛ̅ⲥⲁ ⲧⲁ ⲯⲩⲭⲏ ·

ⲙⲁ ⲣ ⲟⲩ ⲕⲟⲧ ⲟⲩ ⲉ ⲡⲁϩⲟⲩ ⲛ̅ ⲥⲉ ϫⲓ ϣⲓⲡⲉ ⲛ̅ϭⲓ ⲛ ⲉⲧ ⲙⲉⲉⲩⲉ ⲉⲣⲟ ⲓ̈ ⲉ ϩⲉⲛ ⲡ ⲉⲑ ⲟⲟⲩ · ⲙⲁⲣ ⲟⲩ ⲣ̅ ⲑ ⲉ ⲛ̅ ⲟⲩ ϣⲟⲉⲓϣ ⲙ̅ ⲡⲉ ⲙ̅ⲧⲟ ⲉⲃⲟⲗ ⲛ̅ ⲟⲩ ⲧⲏⲩ · ⲁⲩⲱ ⲉⲣⲉ ⲡ ⲁⲅⲅⲉⲗⲟⲥ ⲙ̅ ⲡ ϫⲟⲉⲓⲥ ⲡⲏⲧ ⲛ̅ⲥⲱ ⲟⲩ · ⲙⲁⲣⲉ ⲧⲉⲩ ϩⲓⲏ ϣϣⲡⲉ ⲛ̅ ⲕⲁⲕⲉ · ⲁⲩⲱ ⲛ̅ ⲥ ⲥⲗⲁⲁⲧⲉ · ⲁⲩⲱ ⲉⲣⲉ ⲡ ⲁⲅⲅⲉⲗⲟⲥ ⲙ̅ ⲡ ϫⲟⲉⲓⲥ ⲑⲗⲓⲃⲉ ⲙ̅ⲙⲟ ⲟⲩ · ϫⲉ ⲁ ⲩ ϩⲱⲡ ⲉⲣⲟ ⲓ̈ ⲛ̅ ⲟⲩ ⲡⲁϣ ⲙ̅ ⲡ ϫⲓⲛϫⲏ · ⲉ ⲡⲉⲩ ⲧⲁⲕⲟ ⲙⲁⲩⲁⲁ ⲩ . ⲁⲩⲱ ⲁ ⲩ ⲛⲉϭⲛⲉϭ ⲧⲁ ⲯⲩⲭⲏ ⲉ ⲡ ⲡⲉⲧϣⲟⲩⲉⲓⲧ ·

ⲙⲁⲣⲉ ϥ ⲉⲓ̅ ⲛⲁ ⲩ ⲛ̅ϭⲓ ⲡ̅ ⲡⲁϣ ⲉⲧⲉ ⲛ̅ ⲥⲉ ⲥⲟⲟⲩⲛ̅ ⲙ̅ⲙⲟ ϥ ⲁⲛ · ⲁⲩⲱ ⲙⲁⲣⲉ ⲥ ϭⲟⲡ ⲟⲩ ⲛ̅ϭⲓ ⲧϭⲟⲣⲥ̅ ⲉⲛⲧ ⲁ ⲩ ϩⲟⲡ ⲥ̅ ⲉⲣⲟ ⲓ̈ · ⲁⲩⲱ ⲥⲉ ⲛⲁ ϩⲉ ⲉϩⲣⲁⲓ̈ ⲉ ⲡⲉⲓ̈ ⲡⲁϣ · ⲧⲁ ⲯⲩⲭⲏ ⲇⲉ ⲛⲁ ⲧⲉⲗⲏⲗ ⲉϫⲙ̅ ⲡ ϫⲟⲉⲓⲥ · ⲁⲩⲱ ⲥ ⲛⲁ ⲟⲩⲣⲟⲧ ⲉϫⲙ̅ ⲡⲉⲥ ⲟⲩϫⲁⲓ̈ ·

ⲛⲁ ⲕⲉⲉⲥ ⲧⲏⲣ ⲟⲩ ⲛⲁ ϫⲟⲟ ⲥ ϫⲉ ⲡ ϫⲟⲉⲓⲥ ⲛⲓⲙ ⲡⲉ ⲉⲧ ⲛⲁ ϣ ⲉⲓⲛⲉ ⲙ̅ⲙⲟ ⲕ · ⲉ ⲕ ⲧⲟⲩϫⲟ ⲙ̅ ⲫ ⲏⲕⲉ ⲉ ⲧ ϭⲓϫ ⲙ̅ ⲡ ⲉⲧ ϫⲟⲟⲣ ⲉⲣⲟ ϥ · ⲁⲩⲱ ⲉ ⲕ ⲛⲟⲩϩⲙ̅ ⲛ̅ ⲟⲩ ϩⲏⲕⲉ ⲙⲛ̅ ⲟⲩ ⲉⲃⲓⲏⲛ ⲛ̅ⲧⲟⲟⲧ ⲟⲩ ⲛ̅ ⲛ ⲉⲧ ⲧⲱⲣⲡ̅ ⲙ̅ⲙⲟ ϥ · ⲁ ⲩ ⲧⲱⲟⲩⲛ̅ ⲛ̅ϭⲓ ϩⲉⲛ ⲙⲛ̅ⲧⲣⲉ ⲛ̅ ϫⲓ ⲛ ϭⲟⲛⲥ̅ ⲁ ⲩ ϣⲛ̅ⲧ ⲉ ⲛ ⲉⲧⲉ ⲛ̅ ϯ ⲥⲟⲟⲩⲛ ⲙ̅ⲙⲟ ⲟⲩ ⲁⲛ · ⲁ ⲩ ⲧⲱⲱⲃⲉ ⲛⲁ ⲓ̈ ⲛ̅ ϩⲉⲛ ⲡ ⲉⲑ ⲟⲟⲩ · ⲉ ⲡ ⲙⲁ ⲛ̅ ϩⲉⲛ ⲡ ⲉⲧ ⲛⲁⲛⲟⲩ ⲟⲩ · ⲁⲩⲱ ⲟⲩ ⲙ̅ⲛ̅ⲧ̅ ⲁⲧ ϣⲏⲣⲉ ⲛ̅ ⲧⲁ ⲯⲩⲭⲏ ·

ⲁⲛⲟⲕ ⲇⲉ ⲛ̅ⲧⲉⲣ ⲟⲩⲉⲛⲱⲭ ⲗⲓ ⲛⲁ ⲓ̈ . ⲁ ⲓ̈ ϯ ϩⲓⲱⲱ ⲧ ⲛ̅ ⲟⲩ ϭⲟⲟⲩⲛⲉ · ⲁⲩⲱ ⲁ ⲓ̈ ⲑⲃ̅ ⲃⲓⲉ ⲧⲁ ⲯⲩⲭⲏ ϩⲛ̅ ⲟⲩ ⲛⲏⲥⲧⲓⲁ · ⲉⲣⲉ ⲡⲁ ϣⲗⲏⲗ ⲛⲁ ⲕⲟⲧ ϥ̅ ⲉϩⲣⲁⲓ̈ ⲉ ⲕ ⲟⲩ ⲟⲩⲛⲧ̅ · ⲁ ⲓ̈ ⲣ̅ ⲁⲛⲁ ⲕ ⲛ̅ ⲑ ⲉ ⲙ̅ⲡⲉⲧ ϩⲓⲧⲟⲩⲱⲓ̈ · ⲁⲩⲱ ⲛ̅ ⲑ ⲉ ⲙ̅ ⲡⲁ ⲥⲟⲛ · ⲁⲩⲱ ⲁ ⲓ̈ ⲑⲃ̅ⲃⲓⲟ ⲓ̈ ⲛ̅ ⲑ ⲉ ⲙ̅ ⲡ ⲉⲧ ⲣ̅ ϩⲏⲃⲉ · ⲁⲩⲱ ⲛ̅ ⲑ ⲉ ⲙ̅ ⲡ ⲉⲧ ⲟⲕⲙ̅ · ⲁ ⲩ ⲉⲩⲫⲣⲁⲛⲉ ⲉϩⲣⲁⲓ̈ ⲉϫⲱ ⲓ̈ · ⲁⲩⲱ ⲁ ⲩ ϫⲓ ϣⲓⲡⲉ · ⲁ ϩⲉⲛ ⲙⲁⲥⲥⲧⲓⲅⲝ̅ ⲥⲱⲟⲩϩ ⲉϩⲣⲁⲓ̈ ⲉϫⲱ ⲓ̈ . ⲁⲩⲱ ⲙ̅ⲡ ⲓ ⲉⲓⲙⲉ ⲁ ⲩ ⲡⲱⲣϫ̅ ⲁⲩⲱ ⲙ̅ ⲡⲟⲩ ⲙ̅ⲕⲁϩ ⲛ̅ ϩⲏⲧ :

ⲁ ⲩ ⲡⲓⲣⲁⲍⲉ ⲙ̅ⲙⲟ ⲓ̈ · ⲁⲩⲱ ⲁ ⲩ ⲕⲱⲙϣ̅ ⲛ̅ⲥⲱ ⲓ̈ ϩⲛ̅ ⲟⲩ ⲕⲱⲙϣ̅ ·

ⲁ ⲩ ϩⲣⲟϫⲣⲉϫ ⲛ̅ ⲛⲉⲩ ⲟⲃϩⲉ ⲉϩⲣⲁⲓ̈ ⲉϫⲱ ⲓ̈ · ⲡ ϫⲟⲉⲓⲥ ⲉ ⲕ ⲛⲁ ϭⲱϣⲧ̅ ⲉϩⲣⲁⲓ̈ ⲉϫⲱ ⲓ̈ ⲧ ⲛⲁⲩ · ⲧⲁ ϩⲉ ⲧⲁ ⲯⲩⲭⲏ ⲉⲣⲁⲧ ⲥ̅ ⲉⲃⲟⲗ ϩⲛ̅ ⲛⲉⲩ ϩⲃⲏⲩⲉ ⲉⲑ ⲟⲟⲩ · ⲁⲩⲱ ⲛⲁϩⲙ̅ ⲧⲁ ⲙ̅ⲛ̅ⲧ̅ ϣⲏⲣⲉ ⲟⲩⲱⲧ · ⲉⲧⲟⲟⲧ ⲟⲩ ⲛ̅ ⲙ̅ ⲙⲟⲩⲓ̈ · ϯ ⲛⲁ ⲟⲩⲱⲛϩ̅ ⲛⲁ ⲕ ⲉⲃⲟⲗ ⲡ ϫⲟⲉⲓⲥ ϩⲛ̅ ⲟⲩ ⲉⲕⲕⲗⲏⲥⲓⲁ ⲉ ⲛⲁ ϣⲱⲥ · ⲁⲩⲱ ϯ ⲛⲁ ⲥⲙⲟⲩ ⲉⲣⲟ ⲕ ϩⲛ̅ ⲟⲩ ⲗⲁⲟⲥ ⲉ ⲙⲛ̅ ⲧ ϥ̅ ⲏⲡⲉ ⲙ̅ⲙⲁⲩ ·

ⲙ̅ⲡⲣ̅ⲧⲣⲉ ⲩ ⲣⲁϣⲉ ⲙ̅ⲙⲟ ⲓ̈ ⲛ̅ϭⲓ ⲛ ⲉⲧ ⲟ ⲛ̅ ϫⲁϫⲉ ⲉⲣⲟ ⲓ̈ ϩⲛ̅ ⲟⲩ ϫⲓ ⲛ ϭⲟⲛⲥ̅ ·

ⲛ ⲉⲧ ⲙⲟⲥⲧⲉ ⲙ̅ⲙⲟ ⲓ̈ ⲉ ϫⲓ ⲛ ϫⲏ . ⲁⲩⲱ ⲉ ⲩ ϫⲱⲣⲙ̅ ⲛ̅ ⲛⲉⲩ ⲃⲁⲗ · ϫⲉ ⲁⲛⲟⲕ ⲙⲉⲛ ϣⲁ ⲩ ϣⲁϫⲉ ⲛⲙ̅ⲙⲁ ⲓ̈ ϩⲛ̅ ϩⲉⲛ ϣⲁϫⲉ ⲛ̅ ⲉⲓⲣⲏⲛⲓⲕⲟⲛ · ⲁⲩⲱ ϣⲁ ⲩ ⲙⲟⲕⲙⲉⲕ ⲉ ⲩ ⲟⲣⲅⲏ ϩⲛ̅ ϩⲉⲛ ⲕⲣⲟϥ ·

ⲁ ⲩ ⲟⲩⲱϣ ⲉⲃⲟⲗ ⲛ̅ ⲧⲉⲩ ⲧⲁⲡⲣⲟ ⲉ ⲣϩⲁⲓ̈ ⲉ ϫⲱ ⲓ̈ · ⲁⲩⲱ ⲁ ⲩ ϫⲟⲟ ⲥ ϫⲉ ⲉⲩⲅⲉ ⲁ ⲛⲉⲛ ⲃⲁⲗ · ⲙⲉϩ ⲉⲓ ⲁⲧ ⲛ̅ ⲙ̅ⲙⲟ ϥ · ⲁ ⲕ ⲛⲁⲩ ⲡ ϫⲟⲉⲓⲥ ⲙ̅ⲡⲣ̅ ⲕⲁ ⲣⲱ ⲕ ⲡ ϫⲟⲉⲓⲥ ⲙ̅ⲡⲣ̅ ⲥⲁϩⲱ ⲕ ⲥⲁⲃⲟⲗ ⲙ̅ⲙⲟ ⲓ̈ · ⲧⲱⲟⲩⲛ̅ ⲡ ϫⲟⲉⲓⲥ