ⲛ̅ⲧ ⲁ ϥ ⲓ ⲡ ⲟⲩⲟⲉⲓⲛ ⲉⲧ ⲙ̅ⲙⲁⲩ · ⲁⲩⲱ ⲁ ⲓ̈ ⲃⲱⲕ ⲁ ⲓ̈ ϣⲱⲡⲉ ϩⲙ̅ ⲡ ⲕⲁⲕⲉ · ⲉ ⲧ ϩⲙ̅ ⲡⲉ ⲭⲁⲟⲥ ⲙ̅ ⲡ ⲉⲥⲏⲧ · ⲁⲩⲱ ⲙ̅ ⲡ ⲓ ⲉϣ ϭⲙ̅ϭⲟⲙ ⲉ ϩⲱⲗ ⲉⲃⲟⲗ · ⲉ ⲃⲱⲕ ⲉ ⲡⲁ ⲧⲟⲡⲟⲥ ⲉⲃⲟⲗ ϫⲉ ⲁ ⲓ̈ ϩⲱϫ ϩⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲧⲏⲣ ⲟⲩ ⲙ̅ ⲡⲓ ⲁⲩⲑⲁⲇⲏⲥ · ⲁⲩⲱ ϯ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲁ ⲥ ϥⲓ ⲡⲁ ⲟⲩⲟⲉⲓⲛ ⲉⲧ ⲛ̅ϩⲏⲧ ·

ⲁⲩⲱ ⲁ ⲓ̈ ⲱϣ ⲉⲃⲟⲗ ⲉ ⲩ ⲃⲟⲏ ⲑⲓⲁ · ⲁⲩⲱ ⲙ̅ⲡⲉ ⲡⲁ ϩⲣⲟⲟⲩ ⲉⲓ̅ ⲉϩⲣⲁⲓ̈ ϩⲙ̅ ⲡ ⲕⲁⲕⲉ · ⲁⲩⲱ ⲁ ⲓ̈ ϭⲱϣⲧ̅ ⲉ ⲡ ϫⲓⲥⲉ · ϫⲉ ⲉϥⲉ ⲃⲟⲏⲑⲓ ⲉⲣⲟ ⲓ̈ ⲛ̅ϭⲓ ⲡ ⲟⲩⲟⲉⲓⲛ ⲉ̅ⲧ ⲁ ⲓ̈ ⲛⲁϩⲧⲉ ⲉⲣⲟ ϥ · ⲁⲩⲱ ⲛ̅ⲧⲉⲣ ⲓ ϭⲱϣⲧ̅ ⲉ ⲡ ϫⲓⲥⲉ ⲁ ⲓ̈ ⲛⲁⲩ ⲉ ⲛ ⲁⲣⲭⲱⲛ ⲧⲏⲣ ⲟⲩ ⲛ̅ ⲛ ⲁⲓⲱⲛ ⲉ ⲛⲁϣⲱ ⲟⲩ · ⲁⲩⲱ ⲉ ⲩ ϭⲱϣⲧ̅ ⲉϩⲣⲁⲓ̈ ⲉϫⲱ ⲓ̈ ⲉ ⲩ ⲣⲁ ϣⲉ ⲙ̅ⲙⲟ ⲓ̈ ⲉ ⲙ̅ⲡ ⲓ ⲣ̅ ⲗⲁⲁⲩ ⲛⲁ ⲩ ⲉ ⲡ ⲉⲑ ⲟⲟⲩ · ⲁⲗⲗⲁ ⲛⲉ ⲩ ⲙⲟⲥⲧⲉ ⲙ̅ⲙⲟ ⲓ̈ ⲡⲉ ⲉ ⲡ ϫⲓⲛϫⲏ · ⲁⲩⲱ ⲛ̅ⲧⲉⲣ ⲟⲩ ⲛⲁⲩ ⲉ ⲛ ⲁⲣⲭⲱⲛ ⲛ̅ ⲛ ⲁⲓⲱⲛ ⲉ ⲩ ⲣⲁϣⲉ ⲙ̅ⲙⲟ ⲓ̈ . ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ . ⲁ ⲩ ⲉⲓⲙⲉ ϫⲉ ⲛ̅ ⲥⲉ ⲛⲁ ⲃⲟⲏⲑⲓ ⲉⲣⲟ ⲓ̈ ⲁⲛ ⲛ̅ϭⲓ ⲛ̅ ⲁⲣⲭⲱⲛ ⲛ̅ ⲁⲓⲱⲛ ⲁⲩⲱ ⲁ ⲩ ⲧⲱⲕ ⲛ̅ ϩⲏⲧ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲉⲧ ⲙ̅ⲙⲁⲩ · ⲛⲁⲓ̈ ⲉ ⲛⲉⲩ ϩⲱϫ ⲙ̅ⲙⲟ ⲓ̈ ϩⲛ̅ ⲟⲩ ϫⲓ ⲛ ϭⲟⲛⲥ̅ · ⲁⲩⲱ ⲡ ⲟⲩⲟⲉⲓⲛ ⲉⲧⲉ ⲙ̅ⲡ ⲓ ϥⲓⲧ ϥ̅ ⲁⲛⲟⲕ ⲛ̅ⲧⲟⲟⲧ ⲟⲩ .

ⲁ ⲩ ϥⲓⲧ ϥ̅ ⲛ̅ⲧⲟⲟⲧ · ⲧⲉⲛⲟⲩ ϭⲉ ⲡ ⲟⲩⲟⲉⲓⲛ ⲛ̅ ⲧ ⲁⲗⲏⲑⲓⲁ ⲕ ⲥⲟⲟⲩⲛ̅ ϫⲉ ⲛ̅ⲧ ⲁ ⲓ̈ ⲣ̅ ⲛⲁ ⲓ̈ ϩⲛ̅ ⲧⲁ ⲙ̅ⲛ̅ⲧ̅ ⲃⲁⲗ ϩⲏⲧ . ⲉ ⲓ̈ ⲙⲉⲉⲩⲉ ϫⲉ ⲉ ϥ ⲏⲡ ⲉ ⲣⲟ ⲕ ⲛ̅ϭⲓ ⲡ ⲟⲩⲟⲉⲓⲛ ⲛ̅ ϩⲟ ⲙ̅ ⲙⲟⲩⲓ̈ ⲁⲩⲱ ⲡ ⲛⲟⲃⲉ ⲉⲛⲧ ⲁ ⲓ̈ ⲁⲁ ϥ ϥ ⲟⲩⲟⲛϩ̅ ⲙ̅ ⲡⲉⲕ ⲙ̅ⲧⲟ ⲉⲃⲟⲗ · ⲙ̅ⲡⲣ̅ⲧⲣ ⲁ ϣⲱⲱⲧ ϭⲉ ⲡ ϫⲟⲉⲓⲥ · ϫⲉ ⲛ̅ⲧ ⲁ ⲓ̈ ⲛⲁϩⲧⲉ ⲉ ⲡⲉⲕ ⲟⲩⲟⲉⲓⲛ ϫⲓⲛ ⲛ̅ ϣⲟⲣⲡ̅ · ⲡ ϫⲟⲉⲓⲥ ⲡ ⲟⲩⲟⲉⲓⲛ ⲛ̅ ⲧⲉⲛ ϭⲟⲙ · ⲙ̅ⲡⲣ̅ ⲧⲣ ⲁ ϣⲱⲱⲧ ϭⲉ ⲙ̅ ⲡⲁ ⲟⲩⲟⲉⲓⲛ · ϫⲉ ⲉⲧⲃⲉ ⲧⲉⲕ ⲁⲫⲟⲣⲙⲏ ⲙⲛ̅ ⲡⲉⲕ ⲟⲩⲟⲉⲓⲛ ⲛ̅ⲧ ⲁ ⲓ̈ ϣⲱⲡⲉ ϩⲙ̅ ⲡⲉⲓ̈ ϩⲱϫ · ⲁⲩⲱ ⲁ ⲩ ϣⲓⲡⲉ ϩⲱⲃⲥ̅ ⲉⲃⲟⲗ ⲉϫⲱ ⲓ̈ . ⲁⲩⲱ ⲉⲧⲃⲉ ⲧ ⲗⲟⲉⲓϭⲉ ⲙ̅ ⲡⲉⲕ ⲟⲩⲟⲉⲓⲛ . ⲁ ⲓ̈ ⲣ̅ϣⲙ̅ⲙⲟ ⲉ ⲛⲁ ⲥⲛⲏⲩ ⲛⲓ ⲁϩⲟⲣⲁ ⲧⲟⲥ . ⲁⲩⲱ ⲙ ⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲛⲟϭ ⲛ̅ ⲧⲉⲧ̅ⲃ̅ⲁ̅ⲣ̅ⲃ̅ⲏ̅ⲗ̅ⲱ̅ · ⲛ̅ⲧⲁ ⲛⲁ ⲓ̈ ϣⲱⲡⲉ ⲙ̅ⲙⲟ ⲓ̈ ⲱ̅ ⲡ ⲟⲩⲟⲉⲓⲛ ϫⲉ ⲁ ⲓ̈ ⲕⲱϩ ⲉ ⲡⲉⲕ ⲙⲁ ⲛ̅ ϣⲱⲡⲉ · ⲁⲩⲱ ⲁ ϥ ⲉⲓ̅ ⲉϩⲣⲁⲓ̈ ⲉϫⲱ ⲓ̈ ⲛ̅ϭⲓ ⲡ ϭⲱⲛⲧ̅ ⲙ̅ ⲡ ⲁⲩⲑⲁⲇⲏⲥ ⲡⲁⲓ̈ ⲉⲧⲉ ⲙ̅ⲡ ϥ̅ ⲥⲱⲧⲙ̅ ⲛ̅ⲥⲁ ⲧⲉⲕ ⲕⲉⲗⲉⲩⲥⲓⲥ ⲉ ⲧⲣⲉ ϥ ⲡⲣⲟⲃⲁⲗⲉ ⲉⲃⲟⲗ ϩⲛ̅ ⲧⲉ ⲡⲣⲟ ⲃⲟⲗⲏ ⲛ̅ ⲧⲉϥ ϭⲟⲙ ⲉⲃⲟⲗ ϫⲉ ⲁ ⲓ̈ ϣⲱⲡⲉ ϩⲙ̅ ⲡⲉϥ ⲁⲓⲱⲛ ⲉ ⲛ ϯ ⲉⲓⲣⲉ ⲁⲛ ⲙ̅ ⲡⲉϥ ⲙⲩⲥⲧⲏⲣⲓⲟⲛ · ⲁⲩⲱ ⲛⲉ ⲩ ⲕⲱⲙϣ̅ ⲙ̅ⲙⲟ ⲓ̈ ⲡⲉ :

ⲛ̅ϭⲓ ⲛ̅ ⲁⲣⲭⲱⲛ ⲧⲏⲣ ⲟⲩ ⲛ̅ ⲁⲓⲱⲛ · ⲁⲩⲱ ⲁ ⲓ̈ ϣⲱⲡⲉ ϩⲙ̅ ⲡ ⲧⲟⲡⲟⲥ ⲉⲧ ⲙ̅ⲙⲁⲩ ⲉ ⲓ̈ ⲣ̅ ϩⲏⲃⲉ ⲉ ⲓ̈ ϣⲓⲛⲉ ⲛ̅ⲥⲁ ⲡ ⲟⲩⲟⲉⲓⲛ ⲉⲛⲧ ⲁ ⲓ̈ ⲛⲁⲩ ⲉⲣⲟ ϥ ϩⲙ̅ ⲡ ϫⲓⲥⲉ ⲁⲩⲱ ⲛⲉ ⲩ ϣⲓⲛⲉ ⲛ̅ⲥⲱ ⲓ̈ ⲡⲉ ⲛ̅ϭⲓ ⲛⲉ ⲫⲩⲗⲁⲝ ⲛ̅ ⲙ̅ ⲡⲩⲗⲏ ⲛ̅ ⲛ ⲁⲓⲱⲛ ⲁⲩⲱ ⲛⲉ ⲩ ⲥⲕⲱⲡⲧⲉ ⲙ̅ⲙⲟ ⲓ̈ ⲧⲏⲣ ⲟⲩ ⲡⲉ ⲛ̅ϭⲓ ⲛ ⲉⲧ ⲧⲁϩⲉ ϩⲙ̅ ⲡⲉⲩ ⲙⲩⲥⲧⲏⲣⲓⲟⲛ ·

ⲁⲛⲟⲕ ⲇⲉ ⲛⲉ ⲓ̈ ϭⲱϣⲧ̅ ⲉϩⲣⲁⲓ̈ ⲉ ⲡ ϫⲓⲥⲉ · ⲉϩⲣⲁⲓ̈ ⲉⲣⲟ ⲕ ⲡ ⲟⲩ ⲟⲓ̈ⲛ . ⲁⲩⲱ ⲁ ⲓ̈ ⲛⲁϩⲧⲉ ⲉⲣⲟ ⲕ ⲧⲉⲛⲟⲩ ϭⲉ ⲡ ⲟⲩⲟⲓ̈ⲛ ⲛ̅ⲧⲉ ⲛⲓ ⲟⲩⲟⲉⲓⲛ ϯ ϩⲏϫ ϩⲣⲁⲓ̈ ϩⲙ̅ ⲡ ⲕⲁⲕⲉ ⲛ̅ⲧⲉ ⲛⲉ ⲭⲁⲟⲥ ⲉϣϫⲉ ⲕ ⲟⲩⲱϣ ϭⲉ ⲉ ⲉⲓ̅ ⲛⲁ ϩⲙⲉⲧ .

ⲟⲩ ⲛⲟϭ ⲡⲉ ⲡⲉⲕ ⲛⲁ̅ ⲥⲱⲧⲙ̅ ⲉⲣⲟ ⲓ̈ ϩⲛ̅ ⲟⲩ ⲙⲉ . ⲁⲩⲱ ⲛ ⲅ̅ ⲛⲟⲩϩⲙ̅ ⲙ̅ⲙⲟ ⲓ̈ · ⲛⲁϩⲙⲉ ⲧ ⲉⲃⲟⲗ ϩⲛ̅ ⲑ ⲩⲗⲏ ⲙ̅ ⲡⲉⲓ̈ ⲕⲁⲕⲉ ϫⲉ ⲛ̅ⲛ ⲁ ⲱⲙⲥ̅ ⲛ̅ϩⲏⲧ ϥ̅ ϫⲉⲕⲁⲥ ⲉⲓ̈ⲉ ⲛⲟⲩϩⲙ̅ ⲉ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ ⲛ̅ ⲛⲟⲩⲧⲉ · ⲛⲁⲓ̈ ⲉⲧ ϩⲱϫ ⲙ̅ⲙⲟ ⲓ̈ · ⲁⲩⲱ ⲉⲃⲟⲗ ϩⲛ̅ ⲛⲉⲩ ⲡ ⲉⲑ ⲟⲟⲩ . ⲙ̅ⲡⲣ̅ⲧⲣⲉ ⲡⲉⲓ̈ ⲕⲁⲕⲉ ⲟⲙⲉⲥ ⲧ̅ · ⲁⲩⲱ ⲧⲉⲓ̈ ϭⲟⲙ ⲛ̅ ϩⲁ ⲙ̅ ⲙⲟⲩⲓ̈ . ⲙ̅ⲡⲣ̅ⲧⲣⲉ ⲥⲱⲙⲕ̅ ⲛ̅ ⲧⲁ ϭⲟⲙ ⲧⲏⲣ ⲥ̅ ϣⲁⲃⲟⲗ · ⲁⲩⲱ ⲙ̅ⲡⲣ̅ⲧⲣⲉ ⲡⲉⲓ̈ ⲭⲁⲟⲥ ϩⲱⲃⲥ̅ ⲉⲃⲟⲗ ⲉϫⲛ̅ ⲧⲁ ϭⲟⲙ ·

ⲥⲱⲧⲙ̅ ⲉⲣⲟ ⲓ̈ ⲡ ⲟⲩⲟⲉⲓⲛ ϫⲉ ⲛ ⲁⲛ ⲟⲩ ⲡⲉⲕ ⲛⲁ̅ ⲁⲩⲱ ϭⲱϣⲧ̅ ⲉϩⲣⲁⲓ̈ ⲉϫⲱ ⲓ̈ ⲕⲁⲧⲁ ⲡ ⲁϣⲁⲓ̈ ⲛ̅ ⲙⲛ̅ⲧ ⲛⲁⲏⲧ ⲙ̅ ⲡⲉⲕ ⲟⲩⲟⲓ̈ⲛ · ⲙ̅ⲡⲣ̅ ⲕⲱⲧⲉ ⲙ̅ ⲡⲉⲕ ϩⲟ ⲥⲁⲃⲟⲗ ⲙ̅ⲙⲟ ⲓ̈ ϫⲉ ϯ ϩⲏϣ ⲉⲙⲁⲧⲉ · ϭⲉⲡⲏ ⲥⲱⲧⲙ̅ ⲉⲣⲟ ⲓ̈ . ⲁⲩⲱ ⲛ̅ ⲅ ⲛⲟⲩϩⲙ̅ ⲛ̅ ⲧⲁ ϭⲟⲙ · ⲛⲁϩⲙⲉ ⲧ ⲉⲧⲃⲉ ⲛ̅ ⲁⲣⲭⲱⲛ ⲉⲧ ⲙⲟⲥⲧⲉ ⲙ̅ⲙⲟ ⲓ̈ ϫⲉ ⲛ̅ⲧⲟⲕ ⲡ ⲉⲧ ⲥⲟⲟⲩⲛ̅ ⲙ̅ ⲡⲁϩⲱϫ · ⲙⲛ̅ ⲡⲁ ϩⲱϣ ⲙ̅ⲛ ⲫⲱϣ ⲛ̅ ⲧⲁ ϭⲟⲙ · ⲉⲛⲧ ⲁ ⲩ ϥⲓⲧ ⲥ̅ ⲛ̅ ⲧⲟⲟⲧ̅ · ⲥⲉ ϣⲟⲟⲡ ⲙ̅ ⲡⲉⲕ ⲙ̅ⲧⲟ ⲉⲃⲟⲗ · ⲛ̅ϭⲓ ⲛ ⲉⲛⲧ ⲁ ⲩ ϫⲟⲓ̈ ϩⲛ̅ ⲛⲉⲓ̈ ⲡ ⲉⲑ ⲟⲟⲩ ⲧⲏⲣ ⲟⲩ · ⲭⲣⲱ ⲛⲁ ⲩ ⲕⲁⲧⲁ ⲡ ⲉⲧⲉϩⲛⲁ ⲕ ·

ⲁ ⲧⲁ ϭⲟⲙ ϭⲱϣⲧ̅ ⲉⲃⲟⲗ ϩⲛ̅ ⲧ ⲙⲏⲧⲉ ⲛ̅ ⲛⲉ ⲭⲁⲟⲥ · ⲁⲩⲱ ϩⲛ̅ ⲧ ⲙⲏⲧⲉ ⲛ̅ ⲛ ⲕⲁⲕⲉ · ⲁ ⲓ̈ ϭⲱϣⲧ̅ ⲉⲃⲟⲗ ϩⲏⲧ ϥ̅ ⲙ̅ ⲡⲁ ⲥⲩⲛⲍⲩⲅⲟⲥ . ϫⲉ ⲉ ϥ ⲛⲏⲩ ⲛ̅ ϥ ⲙⲓϣⲉ ⲉϫⲱ ⲓ̈ . ⲁⲩⲱ ⲙ̅ⲡ ϥ̅ ⲉⲓ̅ · ⲁⲩⲱ ⲛⲉ ⲁ ⲓ̈ ϭⲱϣⲧ̅ ⲡⲉ ϫⲉ ⲉ ϥ ⲛⲏⲩ ⲛ̅ ϥ̅ ϯ ϭⲟⲙ ⲛⲁ ⲓ̈ · ⲁⲩⲱ ⲙ̅ ⲡⲓ ϩⲉ ⲉⲣⲟ ϥ · ⲁⲩⲱ ⲛ̅ⲧⲉⲣ ⲓ ϣⲓⲛⲉ ⲛ̅ⲥⲁ ⲡ ⲟⲩⲟⲉⲓⲛ . ⲁ ⲩ ϯ ⲛⲁ ⲓ̈ ⲛ̅ ⲟⲩⲉ ⲛ ⲧⲁ ⲕⲁⲕⲉ · ⲁⲩⲱ ⲛ̅ⲧⲉⲣ ⲓ ϣⲓⲛⲉ ⲛ̅ⲥⲁ ⲧⲁ ϭⲟⲙ . ⲁ ⲩ ϯ ⲛⲁ ⲓ̈ ⲛ̅ ⲟⲩ ϩⲩⲗⲏ · ⲧⲉⲛⲟⲩ ϭⲉ ⲡ ⲟⲩⲟⲉⲓⲛ ⲛ̅ ⲧⲉ ⲛⲓ ⲟⲩⲟⲓ̈ⲛ . ⲡ ⲕⲁ ⲕⲉ . ⲙⲛ̅ ⲑ ⲩⲗⲏ · ⲉⲛⲧ ⲁ ⲩ ⲛ̅ⲧ ⲟⲩ ⲉϫⲱ ⲓ̈ ⲛ̅ϭⲓ ⲛⲉ ⲡⲣⲟ ⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲧⲏⲥ ·

ⲙⲁⲣ ⲟⲩ ϣⲱⲡⲉ ⲛⲁ ⲩ ⲉ ⲩ ϭⲟⲣϭⲥ̅ ⲁⲩⲱ ⲙⲁⲣ ⲟⲩ ϭⲗⲟⲙⲗⲙ̅ ⲉϩⲟⲩⲛ ⲉⲣⲟ ⲟⲩ ⲁⲩⲱ ⲛ̅ ⲅ̅ ⲧⲟⲩⲉⲓⲟ ⲛⲁ ⲩ ⲁⲩⲱ ⲛ̅ ⲥⲉ ⲥⲕⲁⲛⲇⲁⲗⲓⲍⲉ ⲛ̅ ⲥⲉ ⲧⲙ̅ ⲃⲱⲕ ⲉ ⲡ ⲧⲟⲡⲟⲥ ⲙ̅ ⲡⲉⲩ ⲁⲩⲑⲁⲧⲏⲥ ·

ⲙⲁⲣ ⲟⲩ ϭⲱ ϩⲙ̅ ⲡ ⲕⲁⲕⲉ ⲛ̅ ⲥⲉ ⲧⲙ̅ ⲛⲁⲩ ⲉⲃⲟⲗ ⲉ ⲡ ⲟⲩⲟⲉⲓⲛ · ⲙⲁⲣ ⲟⲩ ϭⲱϣⲧ̅ ⲉ ⲡⲉ ⲭⲁⲟⲥ ⲛ̅ ⲛⲁⲩ ⲛⲓⲙ · ⲁⲩⲱ ⲙ̅ⲡⲣ̅ⲧⲣⲉ ⲩ ϭⲱϣⲧ̅ ⲉ ⲡ ϫⲓⲥⲉ · ⲁ ⲛⲓⲛⲉ ⲉϩⲣⲁⲓ̈ ⲉϫⲱ ⲟⲩ ⲙ̅ ⲡⲉⲩ ϫⲓ ⲕⲃⲁ · ⲁⲩⲱ ⲙⲁⲣⲉ ϥ ⲧⲁϩⲟ ⲟⲩ ⲛ̅ϭⲓ ⲡⲉⲕ ϩⲁⲡ · ⲙ̅ⲡⲣ̅ⲧⲣⲉ ⲩ ⲃⲱⲕ ⲉ ⲡⲉⲩ ⲧⲟⲡⲟⲥ ϫⲓⲛ ⲙ̅ ⲡⲉⲓ̈ ⲛⲁ ⲩ · ϩⲁⲧⲙ̅ ⲡⲉⲩ ⲁⲩⲑⲁⲇⲏⲥ ⲛ̅ ⲛⲟⲩⲧⲉ · ⲁⲩⲱ ⲙ̅ⲡⲣ̅ⲧⲣⲉ ⲛⲉϥ ⲡⲣⲟⲃⲟⲗⲟⲟⲩⲉ ⲃⲱⲕ ⲉ ⲛⲉⲩ ⲧⲟⲡⲟⲥ ϫⲓⲛ ⲙ̅ ⲡⲉⲓ̈ ⲛⲁ ⲩ · ϫⲉ ⲟⲩ ⲁⲥⲉⲃⲏⲥ ⲡⲉ · ⲁⲩⲱ ⲟⲩ ⲁⲩⲑⲁⲧⲏⲥ ⲡⲉ ⲡⲉⲩ ⲛⲟⲩⲧⲉ ⲁⲩⲱ ⲛⲉ ϥ ⲙⲉⲉⲩⲉ ⲡⲉ ϫⲉ ⲛ̅ⲧ ⲁ ϥ ⲣ̅ ⲛⲉⲓ̈ ⲡ ⲉⲑ ⲟⲟⲩ ⲉⲃⲟⲗ ϩⲓⲧⲟⲟⲧ ϥ̅ ⲉ ⲛ ϥ̅ ⲥⲟⲟⲩⲛ̅ ⲣⲱ ⲁⲛ ϫⲉ ⲛ̅ⲥⲁⲃⲏⲗ ϫⲉ ⲁ ⲩ ⲑⲃ̅ⲃⲓⲟ ⲓ̈ ⲕⲁⲧⲁ ⲡⲉⲕ ⲧⲱϣ ⲛ̅ ⲛ ⲉϥ ⲛⲁ ϣϭⲙ̅ϭⲟⲙ ⲉⲣⲟ ⲓ̈ ⲁⲛ ⲡⲉ · ⲁⲗⲗⲁ ⲛ̅ⲧⲉⲣⲉ ⲕ ⲑⲃ̅ⲃⲓⲟ ⲓ̈ ϩⲓⲧⲙ̅ ⲡⲉⲕ ⲧⲱϣ . ⲁ ⲩ ⲇⲓⲱⲕⲉ ⲙ̅ⲙⲟ ⲓ̈ ⲛ̅ ϩⲟⲩⲟ · ⲁⲩⲱ ⲁ ⲛⲉⲩ ⲡⲣⲟⲃⲟⲗⲟⲟⲩⲉ ⲟⲩⲉϩ ϩⲓ ⲥⲉ ⲉϫⲙ̅ ⲡⲁ ⲑⲃ̅ⲃⲓⲟ · ⲁⲩⲱ ⲁ ⲩ ϥⲓ ⲛ̅ ⲟⲩ ϭⲟⲙ ⲛ̅ ⲟⲩⲟⲉⲓⲛ ⲛ̅ ϩⲏⲧ · ⲁⲩⲱ ⲟⲛ ⲁ ⲩ ϩⲓ ⲧⲟⲟⲧ ⲟⲩ ⲛ̅ ⲟⲩⲱϩⲙ̅ · ⲁ ⲩ ϩⲱϫ ⲙ̅ⲙⲟ ⲓ̈ ⲉⲙⲁϣⲟ ⲉ ⲧⲣⲉ ⲩ ϥⲓ ⲙ̅ ⲡ ⲟⲩⲟⲉⲓⲛ ⲧⲏⲣ ϥ̅ ⲉⲧ ⲛ̅ ϩⲏⲧ ⲉⲧⲃⲉ ⲛ ⲉⲛⲧ ⲁ ⲩ ϫⲟ ⲓ̈ ⲛ̅ϩⲏⲧ ⲟⲩ ·

ⲙ̅ⲡⲣ̅ⲧⲣⲉ ⲩ ⲃⲱⲕ ⲉ ϩⲣⲁⲓ̈ ⲉ ⲡ ⲙⲉϩ ⲙ̅ⲛ̅ⲧ̅ ϣⲟⲙⲧⲉ ⲛ̅ ⲁⲓⲱⲛ ⲡ ⲧⲟⲡⲟⲥ ⲛ̅ ⲧ ⲇⲓ ⲕⲁⲓⲟⲥⲩⲛⲏ · ⲁⲩⲱ ⲙ̅ⲡⲣ̅ⲧⲣⲉ ⲩ ⲱⲡ ⲉϩⲟⲩⲛ ⲉ ⲡⲉ ⲕⲗⲏⲣⲟⲥ ⲛ̅ ⲛ ⲉⲧ ⲟⲩ ⲥⲱⲧ ϥ̅ ⲙ̅ⲙⲟ ⲟⲩ · ⲙⲛ̅ ⲡⲉⲩ ⲟⲩⲟⲓ̈ⲛ · ⲁⲩⲱ ⲙ̅ⲡⲣ̅ⲧⲣⲉ ⲩ ⲱⲡ ⲉϩⲟⲩⲛ ⲉ ⲛ ⲉⲧ ⲛⲁ ⲙⲉⲧⲁⲛⲟⲓ̈ ϩⲛ̅ ⲟⲩ ϭⲉⲡⲏ · ⲉ ⲧⲣⲉ ⲩ ϫⲓⲙⲩⲥⲧⲏⲣⲓⲟⲛ ϩⲛ̅ ⲟⲩ ϭⲉ ⲡⲏ ϩⲙ̅ ⲡ ⲟⲩⲟⲉⲓⲛ · ⲉⲃⲟⲗ ϫⲉ ⲁ ⲩ ϥⲓ ⲡⲁ ⲟⲩⲟⲉⲓⲛ ⲁⲛⲟⲕ ⲛ̅ ϩⲏⲧ · ⲁⲩⲱ ⲁ ⲧⲁ ϭⲟⲙ ⲁⲣ ϫⲉ ⲓ ⲛ̅ ⲱϫⲛ̅ ϩⲣⲁⲓ̈ ⲛ̅ ϩⲏⲧ · ⲁⲩⲱ ⲁ ⲓ̈ ϣⲱⲱⲧ ⲙ̅ ⲡⲁ ⲟⲩⲟⲉⲓⲛ · ⲧⲉⲛⲟⲩ ϭⲉ ⲡ ⲟⲩ ⲟⲉⲓⲛ ⲉⲧ ⲛ̅ϩⲏⲧⲕ̅ ⲡ ⲉⲧ ϣⲟⲟⲡ ⲛⲙ̅ⲙⲁ ⲓ̈ ϯ ϩⲩⲙⲛⲉⲩⲉ ⲉ ⲡⲉⲕ ⲣⲁⲛ ⲡ ⲟⲩⲟⲓ̈ⲛ ϩⲛ̅ ⲟⲩ ⲉⲟⲟⲩ · ⲁⲩⲱ ⲡⲁ ϩⲩⲙⲛⲟⲥ ⲡ ⲟⲩⲟⲉⲓⲛ ⲙⲁⲣⲉ ϥ ⲣ ⲁⲛⲁ ⲕ ⲛ̅ ⲑ ⲉ ⲛ̅ ⲟⲩ ⲙⲩⲥⲧⲏⲣⲓⲟⲛ ⲉ ϥ ⲟⲩⲟⲧⲃ̅ ·

ⲡⲁⲓ̈ ⲉⲧ ϫⲓ ⲉϩⲟⲩⲛ ⲉ ⲙ ⲡⲩⲗⲏ ⲙ̅ ⲡ ⲟⲩ ⲟⲉⲓⲛ ⲡⲁⲓ̈ ⲉⲧ ⲟⲩ ⲛⲁ ϫⲟⲟ ϥ ⲛ̅ϭⲓ ⲛ ⲉⲧ ⲛⲁ ⲙⲉⲧⲁⲛⲟⲉⲓ · ⲁⲩⲱ ⲛ̅ ⲥⲉ ⲥⲱⲧϥ̅ ⲙ̅ ⲡⲉϥ ⲟⲩⲟⲉⲓⲛ · ⲧⲉⲛⲟⲩ ϭⲉ ⲙⲁⲣⲉ ⲛ̅ ϩⲩⲗⲏ ⲧⲏⲣ ⲟⲩ ⲣⲁϣⲉ · ϣⲓⲛⲉ ⲧⲏⲣ ⲧⲛ̅ ⲛ̅ⲥⲁ ⲡ ⲟⲩ ⲟⲓ̈ⲛ ⲧⲁⲣⲉ ⲥ ⲱⲛϩ̅ ⲛ̅ϭⲓ ⲧ ϭⲟⲙ ⲛ̅ⲧⲉ ⲧⲙ̅ ⲯⲩⲭⲏ ⲉⲧ ⲛ̇̅ ϩⲛ̅ ⲧⲏⲩⲧⲛ̅ · ϫⲉ ⲁ ⲡ ⲟⲩⲟⲉⲓⲛ ⲥⲱⲧⲙ̅ ⲉ ⲛ ϩⲩⲗⲏ · ⲁⲩⲱ ⲛ ϥ̅ ⲛⲁ ⲕⲁ ⲗⲁⲁⲩ ⲁⲛ ⲛ̅ ϩⲩⲗⲏ ⲉ ⲙ̅ⲡ ϥ̅ ⲥⲟⲧϥ ⲟⲩ · ⲙⲁⲣⲉ ⲛⲉ ⲯⲩⲭⲟⲟⲩⲉ ⲙⲛ̅ ⲛ̅ ϩⲩⲗⲏ .

ⲥⲙⲟⲩ ⲉ ⲡ ϫⲟⲉⲓⲥ ⲛ̅ ⲁⲓⲱⲛ ⲧⲏⲣ ⲟⲩ · ⲙⲛ̅ ⲛ̅ ϩⲩⲗⲏ . ⲙⲛ̅ ⲛ ⲉⲧ ⲛ̅ϩⲏⲧ ⲟⲩ ⲧⲏ ⲣ ⲟⲩ · ϫⲉ ⲡ ⲛⲟⲩⲧⲉ ⲛⲁ ⲛⲟⲩϩⲙ̅ ⲛ̅ ⲧⲉⲩ ⲯⲩⲭⲏ ⲉⲃⲟⲗ ϩⲛ̅ ϩⲩⲗⲏ ⲛⲓⲙ · ⲁⲩⲱ ⲥⲉ ⲛⲁ ⲥⲟⲃⲧⲉ ⲛ̅ ⲟⲩ ⲡⲟⲗⲓⲥ ϩⲣⲁⲓ̈ ϩⲙ̅ ⲡ ⲟⲩⲟⲉⲓⲛ · ⲁⲩⲱ ⲛⲉ ⲯⲩⲭⲟⲟⲩⲉ ⲧⲏⲣ ⲟⲩ ⲉⲧ ⲛⲁ ⲛⲟⲩϩⲙ̅ · ⲥⲉ ⲛⲁ ⲟⲩⲱϩ ϩⲛ̅ ⲧ ⲡⲟⲗⲓⲥ ⲉⲧ ⲙ̅ⲙⲁⲩ . ⲛ̅ ⲥⲉ ⲕⲗⲏ ⲣⲟⲛⲟⲙⲓ ⲙ̅ⲙⲟ ⲥ ⲁⲩⲱ ⲧⲉ ⲯⲩⲭⲏ ⲛ̅ ⲛ ⲉⲧ ⲛⲁ ϫⲓ ⲙⲩⲥ ⲧⲏⲣⲓⲟⲛ ⲥ ⲛⲁ ϣⲱⲡⲉ ϩⲙ̅ ⲡ ⲧⲟⲡⲟⲥ ⲉⲧ ⲙ̅ⲙⲁⲩ · ⲁⲩⲱ ⲛ ⲉⲛⲧ ⲁ ⲩ ϫⲓ ⲙⲩⲥⲧⲏⲣⲓⲟⲛ ϩⲙ̅ ⲛⲉϥ ⲣⲁⲛ ⲥⲉ ⲛⲁ ϣⲱⲡⲉ ⲛ̅ ϩⲏⲧ ⲥ̅ :

Ⲍ ⲁ ⲥ ϣⲱⲡⲉ ϭⲉ ⲉⲣⲉ ⲓ̅ⲥ̅ ϫⲱ ⲛ̅ ⲛⲉⲓ̈ ϣⲁϫⲉ ⲉ ⲛⲉϥ ⲙⲁⲑⲏⲧⲏⲥ ⲡⲉϫⲁ ϥ ⲛⲁ ⲩ ϫⲉ ⲡⲁⲓ̈ ⲡⲉ ⲫ ⲩⲙⲛⲟⲥ ⲉⲛⲧ ⲁ ⲥ ϫⲟⲟ ϥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ · ϩⲛ̅ ⲧⲉⲥ ϣⲟⲣⲡ̅ ⲙ̅ ⲙⲉⲧⲁⲛⲟⲓⲁ · ⲉ ⲥ ⲙⲉⲧⲁⲛⲟⲓ̈ ⲉⲧⲃⲉ ⲡⲉⲥ ⲛⲟⲃⲉ · ⲁⲩⲱ ⲉ ⲥ ϫⲱ ⲛ̅ ϩⲱⲃ ⲛⲓⲙ ⲉⲛⲧ ⲁ ⲩ ϣⲱⲡⲉ ⲙ̅ⲙⲟ ⲥ · ⲧⲉⲛⲟⲩ ϭⲉ ⲡ ⲉⲧⲉ ⲟⲩⲛ̅ ⲙⲁ ⲁϫⲉ ⲙ̅ⲙⲟ ϥ ⲉ ⲥⲱⲧⲙ̅ ⲙⲁⲣⲉ ϥ ⲥⲱⲧⲙ̅ :

Ⲍ ⲁ ⲥ ⲉⲓ̅ ⲟⲛ ⲉ ⲑ ⲏ ⲛ̅ϭⲓ ⲙⲁⲣⲓⲁ ⲡⲉϫⲁ ⲥ ϫⲉ ⲡⲁ ϫⲟⲉⲓⲥ ⲟⲩⲛ̅ ⲙⲁⲁϫⲉ ⲙ̅ ⲡⲁ ⲣⲙ̅ ⲛ̅ ⲟⲩⲟⲓ̈ⲛ ⲁⲩⲱ ϯ ⲥⲱⲧⲙ̅ ϩⲛ̅ ⲧⲁ ϭⲟⲙ ⲛ̅ ⲟⲩⲟⲓ̈ⲛ · ⲁⲩⲱ ⲁ ϥ ⲛⲏⲫⲉ ⲙ̅ⲙⲟ ⲓ̈ ⲛ̅ϭⲓ ⲡⲉⲕ ⲡⲛ̅ⲁ̅ ⲉⲧⲛ ⲙ̅ ⲙⲁⲓ̈ ⲥⲱⲧⲙ̅ ϭⲉ ⲧⲁ ϣⲁϫⲉ ⲉⲧⲃⲉ ⲧ ⲙⲉⲧⲁ ⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ϥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ⲉ ⲥ ϫⲱ ⲙ̅ ⲡⲉⲥ ⲛⲟⲃⲉ ⲙⲛ̅ ⲛ ⲉⲛⲧ ⲁ ⲩ ϣⲱⲡⲉ ⲙ̅ⲙⲟ ⲥ ⲧⲏⲣ ⲟⲩ ⲛ̅ⲧ ⲁ ⲧⲉⲕ ϭⲟⲙ ⲛ̅ ⲟⲩⲟⲉⲓⲛ ⲡⲣⲟⲫⲏⲧⲉⲩⲉ ϩⲁⲣⲟ ⲥ ⲙ̅ ⲡⲓ ⲟⲩ ⲟⲉⲓϣ ϩⲓⲧⲛ̅ ⲇⲁⲩⲉⲓⲇ ⲡⲉ ⲡⲣⲟⲫⲏⲧⲏⲥ ϩⲙ̅ ⲡ ⲙⲉϩⲥⲉ ϣⲙⲏⲛ ⲙ̅ ⲯⲁⲗⲙⲟⲥ · ϫⲉ ⲡ ⲛⲟⲩⲧⲉ ⲙⲁⲧⲟⲩϫⲟ ⲓ̈ ϫⲉ ⲁ ϩⲉⲛ ⲙⲟⲟⲩ ⲉⲓ̅ ⲉϩⲟⲩⲛ ϣⲁ ⲧⲁ ⲯⲩⲭⲏ ·

ⲁ ⲓ̈ ⲧⲱⲗⲥ̅ ⲏ̀ ⲁ ⲓ̈ ⲱⲙⲥ̅ ⲉ ⲧ ⲗⲟⲓ̈ϩⲉ ⲙ̅ ⲡ ⲛⲟⲩⲛ ⲁⲩⲱ ⲛⲉ ⲙⲛ̅ ϣ ϭⲟⲙ ⲡⲉ ·

ⲁ ⲓ̈ ⲉⲓ̅ ⲉ ⲛⲉ ϫⲏⲕ ⲛ̅ ⲑ ⲁⲗⲁⲥⲥⲁ · ⲟⲩ ϩⲁ ⲧⲏⲩ ⲧⲉ ⲛ̅ⲧ ⲁ ⲥⲟⲙⲉⲥⲧ̅ · ⲁ ⲓ̈ ϩⲓⲥⲉ ⲉ ⲓ̈ ϫⲓ ϣⲕⲁⲕ ⲉⲃⲟⲗ · ⲧⲁ ϣⲟⲩⲱⲃⲉ ⲧⲉ ⲉⲛⲧ ⲁ ⲥ ϩⲱⲗ · ⲁ ⲛⲁⲃⲁⲗ ⲱϫⲛ̅ ⲉ ⲓ̈ ⲕⲱ ⲛ̅ ϩⲧⲏⲓ̈ ⲉ ⲡ ⲛⲟⲩⲧⲉ ·

ⲁ ⲩ ⲁϣⲁⲓ̈ ⲉϩⲟⲩⲉ ⲛ̅ ϥ ⲱ ⲛ̅ ⲧⲁ ⲁⲡⲉ ⲛ̅ϭⲓ ⲛ ⲉⲧ ⲙⲟⲥⲧⲉ ⲙ̅ⲙⲟ ⲓ̈ ⲉ ⲡ ϫⲓⲛϫⲏ ·

ⲁ ⲩ ϭⲙ̅ϭⲟⲙ ⲛ̅ϭⲓ ⲛⲁ ϫⲁϫⲉ · ⲛ ⲉⲧ ⲇⲓⲱⲕⲉ ⲙ̅ⲙⲟ ⲓ̈ ϩⲛ̅ ⲟⲩ ϫⲓ ⲛ ϭⲟⲛⲥ̅ · ⲛ ⲉⲧⲉ ⲙ̅ⲡⲓⲧⲟⲣⲡ ⲟⲩ · ⲁ ⲩ ϣⲁⲧ ⲧ̅ ⲙ̅ⲙⲟ ⲟⲩ · ⲡ ⲛⲟⲩⲧⲉ ⲛ̅ⲧⲟⲕ ⲉⲛⲧ ⲁ ⲕ ⲉⲓⲙⲉ ⲉ ⲧⲁ ⲙ̅ⲛ̅ⲧ̅ ⲁⲑ ⲏⲧ · ⲁⲩⲱ ⲛⲁ ⲛⲟⲃⲉ ⲙ̅ ⲡⲟⲩ ϩⲱⲡ ⲉⲣⲟ ⲕ · ⲙ̅ⲡⲣ̅ⲧⲣⲉ ⲩ ϫⲓ ϣⲓⲡⲉ ⲉⲧⲃⲏⲏⲧ ⲛ̅ϭⲓ ⲛ ⲉⲧ ϩⲩⲡⲟⲙⲓⲛⲉ ⲉⲣⲟ ⲕ ⲡ ϫⲟⲉⲓⲥ ·

ⲡ ϫⲟⲉⲓⲥ ⲛ̅ ⲛ̅ ϭⲟⲙ ⲙ̅ⲡⲣ̅ ⲧⲣⲉ ⲩ ⲟⲩⲱⲗⲥ̅ ⲉⲧⲃⲏⲏⲧ ⲛ̅ϭⲓ ⲛ ⲉⲧ ϣⲓⲛⲉ ⲛ̅ⲥⲱ ⲕ ⲡ ϫⲟⲓ̈ⲥ̅ ⲡ ⲛⲟⲩⲧⲉ ⲙ̅ ⲡ̅ ⲓ̅ⲏ̅ⲗ̅ ·

ⲡ ⲛⲟⲩⲧⲉ ⲛ̅ ⲛ̅ ϭⲟⲙ ϫⲉ ⲉⲧⲃⲏⲏⲧ ⲕ̅ ⲁ ⲓ̈ ϥⲓ ⲉⲣⲟ ⲓ̈ ⲛ̅ ⲟⲩ ⲛⲟϭⲛⲉϭ · ⲁ ⲡ ϣⲓⲡⲉ ϩⲱⲃⲥ̅ ⲉϫⲙ̅ ⲡ ⲁϩⲟ · ⲁ ⲓ̈ ⲣ̅ϣⲙ̅ⲙⲟ ⲉ ⲛⲁ ⲥⲛⲏⲩ ϣⲙ̅ⲙⲟ ⲉ ⲛ ϣⲏⲣⲉ ⲛ̅ ⲧⲁ ⲙⲁⲁⲩ · ϫⲉ ⲡ ⲕⲱϩ ⲙ̅ ⲡⲉⲕ ⲏⲓ̈ ⲡⲉ ⲛ̅ⲧ ⲁ ϥ ⲟⲩⲟⲙⲧ̅ ⲛ̅ ⲛⲟϭⲛⲉϭ ⲛ̅ ⲛ ⲉⲧ ⲛⲟϭⲛⲉϭ ⲙ̅ⲙⲟ ⲕ · ⲁ ⲩ ϩⲉ ⲉϩⲣⲁⲓ̈ ⲉ ϫⲱ ⲓ̈ · ⲁ ⲓ̈ ⲕⲱⲗϫ̅ ⲛ̅ ⲧⲁ ⲯⲩⲭⲏ ϩⲛ̅ ⲟⲩ ⲛⲏⲥⲧⲓⲁ · ⲁ ⲥ ϣⲱⲡⲉ ⲛⲁ ⲓ̈ ⲉ ⲩ ⲛⲟϭⲛⲉϭ · ⲁ ⲓ̈ ϯ ⲛ̅ ⲟⲩ ϭⲟⲟⲩⲛⲉ ϩⲓⲱⲱⲧ ⲁ ⲓ̈ ϣⲱⲡⲉ ⲛⲁ ⲩ ⲙ̅ ⲡⲁⲣⲁⲃⲟⲗⲏ · ⲛⲉ ⲩ ϫⲓ ⲛ̅ ϩⲣⲁⲩ ϩⲓ ⲱⲱⲧ ⲡⲉ ⲛ̅ϭⲓ ⲛ ⲉⲧ ϩⲙⲟⲟⲥ ϩⲛ̅ ⲙ̅ ⲡⲩⲗⲏ · ⲁⲩⲱ ⲛⲉ ⲩ ⲯⲁⲗⲗⲉ ⲉⲣⲟ ⲓ̈ ⲡⲉ ⲛ̅ϭⲓ ⲛ ⲉⲧ ⲥⲱ ⲙ̅ ⲡ ⲏⲣⲡ̅ ·

ⲁⲛⲟⲕ ⲇⲉ ⲛⲉ ⲉ ⲓ ϣⲗⲏⲗ ⲡⲉ ϩⲛ̅ ⲧⲁ ⲯⲩⲭⲏ ⲉϩⲣⲁⲓ̈ ⲉⲣⲟ ⲕ ⲡ ϫⲟⲉⲓⲥ ·

ⲡⲉ ⲟⲩⲟⲉⲓϣ ⲙ̅ⲡⲉ ⲧⲉ ϩⲛⲁⲕ ⲡⲉ ⲡ ⲛⲟⲩⲧⲉ . ϩⲙ̅ ⲡ ⲁϣⲁⲓ̈ ⲙ̅ ⲡⲉⲕ ⲛⲁ̅ ⲥⲱⲧⲙ̅ ⲉ ⲡⲁ ⲟⲩϫⲁⲓ̈ ϩⲛ̅ ⲟⲩ ⲙⲉ · ⲙⲁⲧⲟⲩϫⲟ ⲓ̈ ⲉ ⲧⲉⲓ̈ ⲟⲙⲉ . ϫⲉ ⲛ̅ⲛ ⲁ ⲧⲱⲗⲥ̅ ⲛ̅ ϩⲏⲧ ⲥ̅ · ⲉⲓ̈ⲉ ⲟⲩϫⲁⲓ̈ ⲉⲃⲟⲗ ϩⲛ̅ ⲛ ⲉⲧ ⲙⲟⲥⲧⲉ ⲙ̅ⲙⲟ ⲓ̈ . ⲁⲩⲱ ⲉⲃⲟⲗ ϩⲙ̅ ⲡ ϣⲓⲕ ⲛ̅ ⲙ̅ ⲙⲟⲟⲩ · ⲙ̅ⲡⲣ̅ⲧⲣⲉ ⲟⲩ ⲃⲉⲣⲱ ⲙ̅ⲙⲟ ⲟⲩ ⲟⲙⲉⲥⲧ̅ · ⲙ̅ⲡⲣ̅ⲧⲣⲉ ⲡ ⲛⲟⲩⲛ ⲟⲙⲉⲕⲧ̅ · ⲙ̅ⲡⲣ̅ ⲧⲣⲉ ⲟⲩ ϣⲱⲧⲉ ⲁⲙⲁϩⲧⲉ ⲛ̅ ⲣⲱⲥ ⲉϫⲱ ⲓ̈ ·

ⲥⲱⲧⲙ̅ ⲉ ⲣⲟ ⲓ̈ ⲡ ϫⲟⲉⲓⲥ ϫⲉ ⲟⲩ ⲭⲣⲏⲥⲧⲟⲥ ⲡⲉ ⲡⲉⲕ ⲛⲁ̅ · ⲕⲁⲧⲁ ⲡ ⲁϣⲁⲓ̈ ⲛ̅ ⲧⲉⲕ ⲙ̅ⲛ̅ⲧ̅ ϣⲁⲛ ϩⲧⲏ ϥ ϭⲱϣⲧ̅ ⲉϩⲣⲁⲓ̈ ⲉ ϫⲱ ⲓ̈ · ⲙ̅ⲡⲣ̅ⲧⲣⲉ ⲡⲉⲕ ϩⲟ ⲛ̅ⲥⲁ ⲃⲟⲗ ⲙ̅ ⲡⲉⲕ ϩⲙ̅ϩⲁⲗ ϫⲉ ϯ ⲑⲗⲓⲃⲉ ·

ⲥⲱⲧⲙ̅ ⲉⲣⲟ ⲓ̈ ϩⲛ̅ ⲟⲩ ϭⲉⲡⲏ · ϯ ϩⲧⲏ ⲕ ⲉ ⲧⲁ ⲯⲩⲭⲏ ⲛ̅ ⲅ ⲥⲟⲧ ⲥ̅ · ⲛⲁϩⲙⲉ ⲧ ⲉⲧⲃⲉ ⲛⲁ ϫⲁϫⲉ ·

ⲛ̅ ⲧⲟⲕ ⲅⲁⲣ ⲉ ⲧⲉⲓ ⲙⲉ ⲉ ⲡⲁ ⲛⲟϭⲛⲉϭ ⲙⲛ̅ ⲡⲁ ϣⲓⲡⲉ · ⲁⲩⲱ ⲡⲁ ⲟⲩⲱⲗⲥ̅ · ⲛ ⲉⲧ ⲑⲗⲓⲃⲉ ⲙ̅ⲙⲟ ⲓ̈ ⲧⲏⲣ ⲟⲩ ⲙ̅ ⲡⲉⲕ ⲙ̅ⲧⲟ ⲉⲃⲟⲗ · ⲁ ⲡⲁ ϩⲏⲧ ϭⲱϣⲧ̅ ⲉⲃⲟⲗ ϩⲏⲧ ϥ̅ ⲛ̅ ⲟⲩ ⲛⲟϭ ⲛⲉϭ ⲙⲛ̅ ⲟⲩ ⲧⲁⲗⲁⲓⲡⲱⲣⲓⲁ ·

ⲁ ⲓ̈ ϭⲱϣⲧ̅ ⲉⲃⲟⲗ ϩⲏⲧ ϥ̅ ⲙ̅ ⲡ ⲉⲧ ⲛⲁⲗⲩⲡⲓ ⲛⲙ̅ⲙⲁ ⲓ̈ ⲙ̅ⲡ ⲓ ϭⲛ̅ⲧ ϥ̅ ⲁⲩⲱ ⲡⲉⲧ ⲛⲁ ⲥⲗ̅ ⲥⲱⲗ ⲧ̅ ⲙ̅ ⲡⲓ ϩⲉ ⲉⲣⲟ ϥ · ⲁ ⲩ ϯ ⲛ̅ ⲟⲩ ⲥⲓϣⲉ ⲉ ⲧ ⲁϩⲣⲉ · ⲁ ⲩ ⲧⲥⲉ ⲓ̈ ⲟⲩ ϩⲙ̅ϫ ϩⲙ̅ ⲡⲁ ⲉⲓⲃⲉ · ⲙⲁⲣⲉ ⲧⲉⲩ ⲧⲣⲁⲡⲉⲍⲁ ϣⲱⲡⲉ ⲙ̅ ⲡⲉⲩ ⲙ̅ⲧⲟ ⲉⲃⲟⲗ ⲉ ⲩ ϭⲟⲣϭ̅ⲥ̅ · ⲙⲛ̅ ⲟⲩ ⲡⲁϣ · ⲁⲩⲱ ⲟⲩ ⲧⲱⲱⲃⲉ · ⲙⲛ̅ ⲟⲩ ⲥⲕⲁⲛⲇⲁⲗⲟⲛ · ⲛ̅ ⲅ ⲕⲗ̅ϫ̅ ⲧⲉⲩ ϫⲓⲥⲉ ⲛ̅ ⲥⲏⲩ ⲛⲓⲙ ·

ⲡⲱϩⲧ̅ ⲉϩⲣⲁⲓ̈ ⲉϫⲱ ⲟⲩ ⲛ̅ ⲧⲉⲕ ⲟⲣⲅⲏ · ⲁⲩⲱ ⲡ ϭⲱⲛⲧ̅ ⲛ̅ ⲧⲉⲕ ⲟⲣⲅⲏ ⲙⲁⲣⲉ ϥ ⲧⲁ ϩⲟ ⲟⲩ ·

ⲙⲁⲣⲉ ⲡⲉⲩ ⲙⲁ ⲛ̅ ϣⲱⲡⲉ ⲣ̅ ϫⲁⲓ̈ⲉ · ⲛ ϥ̅ ⲧⲙ̅ ϣⲱⲡⲉ ⲛ̅ϭⲓ ⲡ ⲉⲧ ⲟⲩⲏϩ ϩⲛ̅ ⲛⲉⲩ ⲙⲁ ⲛ̅ ϣⲱⲡⲉ · ϫⲉ ⲡ ⲉⲛⲧ ⲁ ⲕ ⲡⲁⲧⲁⲥⲥⲉ ⲙ̅ⲙⲟ ϥ .

ⲁ ⲩ ⲇⲓⲱⲕⲉ ⲛ̅ⲥⲱ ϥ · ⲁ ⲩ ⲟⲩⲱϩ ⲉϩⲣⲁⲓ̈ ⲉϫⲙ̅ ⲡⲉ ⲙ̅ⲕⲁϩ ⲙ̅ ⲡⲉⲩ ⲥⲁϣ · ⲁ ⲩ ⲟⲩⲉϩ ⲁⲛⲟⲙⲓⲁ · ⲉϫⲛ̅ ⲛⲉⲩ ⲁⲛⲟⲙⲓⲁ · ⲁⲩⲱ ⲙ̅ⲡⲣ̅ⲧⲣⲉ ⲩ ⲉⲓ̅ ⲉ ϩⲟⲩⲛ̅ ϩⲛ̅ ⲧⲉⲕ ⲇⲓⲕⲁⲓⲟⲥⲩⲛⲏ ⲙⲁⲣ ⲟⲩ ϥⲟⲧ ⲟⲩ ⲉⲃⲟⲗ ϩⲙ̅ ⲡ ϫⲱⲱⲙⲉ ⲛ̅ ⲛ ⲉⲧ ⲟⲛϩ̅ · ⲁⲩⲱ ⲙ̅ⲡⲣ̅ⲧⲣⲉ ⲩ ⲥϩⲁⲓ̈ⲥⲟⲩ ⲙⲛ̅ ⲛ̅ ⲇⲓⲕⲁⲓⲟⲥ ·

ⲁⲛⲅ̅ ⲟⲩ ⲏ ⲕⲉ ⲉ ϥ ⲣ̅ⲡ‐ ⲕⲉ‐ⲙⲟⲕϩ̅ ⲡ ⲟⲩ ϫⲁⲓ̈ ⲙ̅ ⲡⲉⲕ ϩⲟ ⲡ ⲛⲟⲩⲧⲉ ⲡⲉ ⲛ̅ⲧ ⲁ ϥ ϣⲟⲡ ⲧ̅ ⲉⲣⲟ ϥ · ϯ ⲛⲁ ⲥⲙⲟⲩ ⲉ ⲡ ⲣⲁⲛ ⲉ ⲡ ⲛⲟⲩⲧⲉ ϩⲛ̅ ⲟⲩ ϩⲱⲇⲏ . ⲁⲩⲱ ϯ ⲛⲁ ϫⲓⲥⲉ ⲙ̅ⲙⲟ ϥ ϩⲛ̅ ⲟⲩ ⲥⲙⲟⲩ · ϥ ⲛⲁ ⲣ̅ ⲁⲛⲁ ϥ ⲙ̅ ⲡ ⲛⲟⲩⲧⲉ ⲉϩⲟⲩⲉ ⲟⲩ ⲙⲁⲥⲉ ⲛ̅ ⲃ̅ⲣⲣⲉ · ⲉ ϥ ⲛⲉϫ ⲧⲁⲡ ⲉⲃⲟⲗ ϩⲓⲓ̈ⲉⲓⲃ · ⲙⲁⲣⲉ ⲛ̅ ϩⲏⲕⲉ ⲛⲁ ⲩ ⲛ̅ ⲥⲉ ⲉⲩⲫⲣⲁⲛⲉ · ϣⲓⲛⲉ ⲛ̅ⲥⲁ ⲡ ⲛⲟⲩⲧⲉ ⲧⲁⲣⲉ ⲛ ⲉⲧⲙ̅ ⲯⲩⲭⲟⲟⲩⲉ ⲱⲛϩ̅ · ϫⲉ ⲁ ⲡ ϫⲟⲉⲓⲥ ⲥⲱⲧⲙ̅ ⲉ ⲛ ϩⲏⲕⲉ · ⲁⲩⲱ ⲙ̅ⲡ ϥ̅ ⲥⲉϣϥ̅ ⲛ ⲉⲧ ⲧⲟ ⲙ̅ ⲡⲓⲛⲉ ⲛ̅ ϩⲟⲙ̅ⲧ̅ ⲙⲁⲣⲉ ⲙ̅ ⲡⲏⲩⲉ ⲙⲛ̅ ⲡ ⲕⲁϩ ⲥⲙⲟⲩ ⲉ ⲡ ϫⲟⲓ̈ⲥ ⲑ ⲁⲗⲁⲥⲥⲁ ⲙⲛ̅ ⲡⲉⲧⲛ̅ ϩⲏⲧⲥ̅ ⲧⲏⲣ ⲟⲩ · ϫⲉ ⲡ ⲛⲟⲩⲧⲉ ⲛⲁ ⲛⲟⲩϩⲙ̅ ϩⲛ̅ ⲥⲓⲱⲛ · ⲁⲩⲱ ⲥⲉ ⲛⲁ ⲕⲱⲧ ⲛ̅ ⲙ̅ ⲡⲟⲗⲉⲓⲥ ⲛ̅ ϯ ⲟⲩⲇⲁⲓⲁ ⲛ ⲥⲉ ⲟⲩⲱϩ ⲙ̅ⲙⲁⲩ ⲛ̅ ⲥⲉ ⲕⲗⲏⲣⲟ ⲛⲟⲙⲓ ⲙ̅ⲙⲟ ⲥ · ⲡⲉ ⲥⲡⲉⲣⲙⲁ ⲛ̅ ⲛⲉϥ ϩⲙ̅ϩⲁⲗ ⲛⲁ ⲁⲙⲁϩⲧⲉ ⲙ̅ⲙⲟ ⲥ · ⲁⲩⲱ ⲛ ⲉⲧ ⲙⲉ ⲙ̅ ⲡⲉϥ ⲣⲁⲛ ⲛⲁ ⲟⲩⲱϩ ⲛ̅ϩⲏⲧ ⲥ̅ ·

Ⲍ ⲁ ⲥ ϣⲱⲡⲉ ϭⲉ ⲛ̅ⲧⲉⲣⲉ ⲙⲁⲣⲓϩⲁⲙ ⲟⲩⲱ ⲉ ⲥ ϫⲱ ⲛ̅ ⲛⲉⲓ̈ ϣⲁϫⲉ ⲉⲓ̅ⲥ̅ ϩⲛ̅ ⲧ ⲙⲏⲧⲉ ⲛ̅ ⲙ̅ ⲙⲁⲑⲏⲧⲏⲥ . ⲡⲉ ϫⲁ ⲥ ⲛⲁ ϥ ϫⲉ ⲡⲁ ϫⲟⲉⲓⲥ · ⲡⲁⲓ̈ ⲡⲉ ⲡ ⲃⲱ ⲻ ⲙⲩⲥⲧⲏⲣⲓⲟⲛ ⲛ̅ ⲧ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲧⲓⲥ ⲥⲟⲫⲓⲁ ·

Ⲍ ⲁ ⲥ ϣⲱⲡⲉ ϭⲉ ⲛ̅ⲧⲉⲣⲉ ⲓ̅ⲥ̅ ⲥⲱⲧⲙ̅ ⲉ ⲙⲁⲣⲓϩⲁⲙ ⲉ ⲥ ϫⲱ ⲛ̅ ⲛⲉⲓ̈ ϣⲁϫⲉ ⲡⲉϫⲁ ϥ ⲛⲁ ⲥ ϫⲉ ⲉⲩⲅⲉ ⲙⲁⲣⲓ ϩⲁⲙ ⲧ ⲙⲁⲕⲁⲣⲓⲁ · ⲧⲉ ⲡⲗⲏⲣⲱⲙⲁ ⲏ̀ ⲧ ⲡⲁⲛ ⲙⲁⲕⲁⲣⲓⲟⲥ ⲙ̅ ⲡⲗⲏⲣⲱⲙⲁ · ⲧⲁⲓ̈ ⲉⲧ ⲟⲩ ⲛⲁ ⲙⲁⲕⲁⲣⲓⲍⲉ ⲙ̅ⲙⲟ ⲥ ϩⲛ̅ ⲅⲉⲛⲉⲁ ⲛⲓⲙ ·

Ⲍ ⲁ ϥ ⲟⲩⲱϩ ⲟⲛ ⲉⲧⲟⲟⲧ ϥ̅ ⲛ̅ϭⲓ ⲓ̅ⲥ̅ ϩⲙ̅ ⲡ ϣⲁϫⲉ . ⲡⲉϫⲁ ϥ · ϫⲉ ⲁ ⲥ ⲟⲩⲱϩ ⲟⲛ ⲉⲧⲟⲟⲧ ⲥ̅ ⲛ̅ϭⲓ ⲧ ⲡⲓⲥⲧⲓⲥ ⲥⲟ ⲫⲓⲁ ·

ⲁ ⲥ ϩⲩⲙⲛⲉⲩⲉ ⲛ̅ ⲕⲉ ⲙⲉϩ ⲥⲛ̅ⲧⲉ ⲙ̅ ⲙⲉⲧⲁⲛⲟⲓⲁ ⲉ ⲥ ϫⲱ ⲙ̅ⲙⲟ ⲥ ⲛ̅ ⲧⲉⲓ̈ ϩⲉ ϫⲉ ⲡ ⲟⲩⲟⲉⲓⲛ ⲛ̅ ⲛ̅ ⲟⲩⲟⲓ̈ⲛ ⲛ̅ⲧ ⲁ ⲓ̈ ⲡⲓⲥⲧⲉⲩⲉ ⲉⲣⲟ ⲕ .

ⲙ̅ⲡⲣ̅ ⲕⲁⲁ ⲧ ϩⲙ̅ ⲡ ⲕⲁⲕⲉ ϣⲁ ⲡ ϫⲱⲕ ⲙ̅ ⲡⲁ ⲟⲩⲟⲉⲓϣ ·

ⲃⲟⲏⲑⲓ ⲉⲣⲟ ⲓ̈ ⲁⲩⲱ ⲛ ⲅ̅ ⲛⲁϩ ⲙⲉ ⲧ ϩⲛ̅ ⲛⲉⲕ ⲙⲩⲥⲧⲏⲣⲓⲟⲛ · ⲣⲓⲕⲉ ⲙ̅ ⲡⲉⲕ ⲙⲁⲁϫⲉ ⲉⲣⲟ ⲓ̈ ⲁⲩⲱ ⲛ ⲅ̅ ⲛⲟⲩϩⲙ̅ ⲙ̅ⲙⲟ ⲓ̈ · ⲙⲁⲣⲉ ⲧ ϭⲟⲙ ⲙ̅ ⲡⲉⲕ ⲟⲩⲟⲉⲓⲛ ⲛⲁ ϩⲙⲉⲧ · ⲁⲩⲱ ⲛ̅ ⲅ̅ ϥⲓ ⲧ · ⲉ ⲛ ⲁⲓⲱⲛ ⲉⲧ ϫⲟⲥⲉ . ϫⲉ ⲛ̅ⲧⲟⲕ ⲡ ⲉⲧ ⲛⲁ ⲛⲁϩⲙⲉ ⲧ ⲁⲩⲱ ⲛ ⲅ̅ ϫⲓⲧ ⲉ ⲡ ϫⲓⲥⲉ ⲛ̅ⲧⲉ ⲛⲉⲕ ⲁⲓⲱⲛ · ⲛⲁϩⲙⲉ ⲧ ⲡ ⲟⲩⲟⲉⲓⲛ ⲛ̅ⲧⲟⲟⲧ ⲥ̅ ⲛ̅ ⲧⲉⲓ̈ ϭⲟⲙ ⲛ̅ ϩⲟ ⲙ̅ ⲙⲟⲩⲓ̈ ⲁⲩⲱ ⲛ̅ⲧⲟⲟⲧ ⲟⲩ ⲛ̅ ⲛⲉ ⲡⲣⲟⲃⲟⲗⲟⲟⲩⲉ ⲙ̅ ⲡ ⲁⲩⲑⲁⲇⲏⲥ ⲛ̅ ⲛ̅ ⲛⲟⲩⲧⲉ · ϫⲉ ⲛ̅ⲧⲟⲕ ⲡ ⲟⲩⲟⲉⲓⲛ ⲡⲉ ⲛ̅ⲧ ⲁ ⲓ̈ ⲡⲓⲥⲧⲉⲩⲉ ⲉ ⲡⲉⲕ ⲟⲩⲟⲓ̈ⲛ ⲁⲩⲱ ⲛ̅ⲧ ⲁ ⲓ̈ ⲛⲁϩⲧⲉ ⲣⲱ ⲉ ⲡⲉⲕ ⲟⲩⲟⲓ̈ⲛ ϫⲓⲛ ⲛ̅ ϣⲟⲣⲡ̅ · ⲁⲩⲱ ⲁ ⲓ̈ ⲡⲓⲥⲧⲉⲩⲉ ⲉⲣⲟ ϥ ϫⲓⲛ ⲧ ⲉⲩⲛⲟⲩ ⲉⲛⲧ ⲁ ϥ ⲡⲣⲟⲃⲁⲗⲉ ⲙ̅ⲙⲟ ⲓ̈ ⲉⲃⲟⲗ · ⲁⲩⲱ ⲛ̅ⲧⲟⲕ ⲣⲱ ⲡ ⲉⲛ̅ⲧ ⲁ ⲕⲧⲣⲉⲩ ⲡⲣⲟⲃⲁⲗⲉ ⲙ̅ⲙⲟ ⲓ̈ ⲉⲃⲟⲗ · ⲁⲩⲱ ⲁⲛⲟⲕ ϩⲱ ⲁ ⲓ̈ ⲡⲓⲥⲧⲉⲩⲉ ⲉ ⲡⲉⲕ ⲟⲩⲟⲓ̈ⲛ ϫⲓⲛ ⲛ̅ ϣⲟⲣⲡ̅ · ⲁⲩⲱ ⲛ̅ ⲧⲉ ⲡⲓⲥⲧⲉⲩⲉ ⲉⲣⲟ ⲕ · ⲛ̅ ⲛⲉⲩ ⲥⲱⲃⲉ ⲙ̅ⲙⲟ ⲓ̈ ⲡⲉ ⲛ̅ϭⲓ ⲛ ⲁⲣⲭⲱⲛ ⲛ̅ ⲛ ⲁⲓⲱⲛ · ⲁ ⲩ ϫⲱ ⲙ̅ⲙⲟ ⲥ ϫⲉ ⲁ ⲥ ⲗⲟ ϩⲙ̅ ⲡⲉⲥ ⲙⲩⲥⲧⲏⲣⲓⲟⲛ · ⲛ̅ⲧⲟⲕ ⲡ ⲉⲧ ⲛⲁ ⲛⲁϩ ⲙⲉ ⲧ . ⲁⲩⲱ ⲛ̅ⲧⲟⲕ ⲡⲉ ⲡⲁ ⲥⲱⲧⲏⲣ · ⲁⲩⲱ ⲛ̅ⲧⲟⲕ ⲡⲉ ⲡⲁ ⲙⲩⲥⲧⲏⲣⲓⲟⲛ ⲡ ⲟⲩⲟⲉⲓⲛ · ⲁ ⲣⲱ ⲓ̈ ⲙⲟⲩϩ ⲛ̅ ⲉⲟⲟⲩ . ϫⲉⲕⲁⲥ ⲁ ⲓ̈ ⲉϫⲱ ⲙ̅ ⲡ ⲙⲩⲥⲧⲏⲣⲓⲟⲛ ⲛ̅ ⲧⲉⲕ ⲙ̅ⲛ̅ⲧ̅ ⲛⲟϭ ⲛ̅ ⲟⲩⲟⲓ̈ϣ ⲛⲓⲙ . ⲧⲉ ⲛⲟⲩ ϭⲉ ⲡ ⲟⲩⲟⲉⲓⲛ ⲙ̅ⲡⲣ̅ ⲕⲁⲁ ⲧ ϩⲙ̅ ⲡⲉ ⲭⲁⲟⲥ ⲙ̅ ⲡ ϫⲱⲕ ⲉⲃⲟⲗ ⲙ̅ ⲡⲁ ⲟⲩⲟⲉⲓϣ . ⲧⲏⲣ ϥ̅ · ⲙ̅ⲡⲣ̅ ⲕⲁⲁ ⲧ ⲛ̅ⲥⲱ ⲕ ⲡ ⲟⲩⲟⲉⲓⲛ · ϫⲉ ⲁ ⲩ ϥⲓ ⲧⲁ ϭⲟⲙ ⲧⲏⲣ ⲥ̅ ⲛ̅ ⲟⲩⲟⲉⲓⲛ ⲛ̅ ϩⲏⲧ · ⲁⲩⲱ ⲁ ⲩ ⲕⲱⲧⲉ ⲉⲣⲟ ⲓ̈ ⲛ̅ϭⲓ ⲛⲉ ⲡⲣⲟⲃⲟⲗⲟⲟⲩⲉ ⲧⲏⲣ ⲟⲩ ⲙ̅ ⲡ ⲁⲩⲑⲁⲇⲏⲥ · ⲁ ⲩ ⲟⲩⲉϣ ϥⲓ ⲡⲁ ⲟⲩⲟⲓ̈ⲛ ⲧⲏⲣ ϥ̅ ϩⲣⲁⲓ̈ ⲛ̅ ϩⲏⲧ . ϣⲁⲃⲟⲗ . ⲁⲩⲱ ⲁ ⲩ ⲣⲟⲓ̈ⲥ ⲉ ⲧⲁ ϭⲟⲙ ⲉ ⲩ ϫⲱ ⲙ̅ⲙⲟ ⲥ ⲛ̅ ⲛⲉⲩ ⲉⲣⲏⲩ ϩⲓ ⲟⲩ ⲥⲟⲡ ϫⲉ ⲁ ⲡ ⲟⲩⲟⲉⲓⲛ ⲕⲁⲁ ⲧ ⲛ̅ⲥⲱ ϥ · ⲁⲙⲁϩⲧⲉ ⲙ̅ⲙⲟ ⲥ ⲛ̅ ⲧⲛ̅ ϥⲓ ⲡ ⲟⲩⲟⲉⲓⲛ ⲧⲏⲣ ϥ̅ ⲉⲧ ⲛ̅ϩⲏⲧ ⲥ̅ ·

ⲉⲧⲃⲉ ⲡⲁⲓ̈ ϭⲉ ⲡ ⲟⲩⲟⲉⲓⲛ ⲙ̅ⲡⲣ̅ ⲗⲟ ϩⲁⲣⲟ ⲓ̈ ⲕⲟⲧ ⲕ̅ ⲡ ⲟⲩⲟⲉⲓⲛ ⲛ̅ ⲅ ⲛⲁϩ ⲙⲉ ⲧ ⲛ̅ⲧⲟⲟⲧ ⲟⲩ ⲛ̅ ⲛⲓ ⲁⲧ ⲛⲁ̅ ·

ⲙⲁⲣ ⲟⲩ ϩⲉ · ⲁⲩⲱ ⲛ̅ ⲥⲉ ⲣ̅ ⲁⲧ ϭⲟⲙ ⲛ̅ϭⲓ ⲛⲁⲓ̈ ⲉⲧ ⲟⲩⲉϣ ϥⲓ ⲧⲁ ϭⲟⲙ · ⲙⲁⲣ ⲟⲩ ϭⲟⲟⲗ ⲟⲩ ϩⲙ̅ ⲡ ⲕⲁⲕⲉ ⲁⲩⲱ ⲛ̅ ⲥⲉ ϣⲱⲡⲉ ϩⲛ̅ ⲟⲩ ⲙ̅ⲛ̅ⲧ̅ ⲁⲧ ϭⲟⲙ ⲛ̅ϭⲓ ⲛⲁⲓ̈ ⲉ ⲧ ⲟⲩⲉϣ ϥⲓ ⲧⲁ ϭⲟⲙ ⲛ̅ ⲟⲩⲟⲓ̈ⲛ ⲛ̅ ϩⲏⲧ ·

ⲧⲁⲓ̈ ϭⲉ ⲧⲉ ⲧ ⲙⲉϩ ⲥⲛ̅ⲧⲉ ⲙ̅ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ⲉ ⲩ ϩⲩⲙⲛⲉⲩⲉ ⲉϩⲣⲁⲓ̈ ⲉ ⲡ ⲟⲩⲟⲉⲓⲛ ·

Ⲍ ⲁ ⲥ ϣⲱⲡⲉ ϭⲉ ⲛ̅ⲧⲉⲣⲉ ⲓ̅ⲥ̅ ⲟⲩⲱ ⲉ ϥ ϫⲱ ⲛ̅ ⲛⲉⲓ̈ ϣⲁϫⲉ ⲉ ⲛⲉϥ ⲙⲁⲑⲏⲧⲏⲥ ·

ⲡⲉϫⲁ ϥ . ϫⲉ ⲧⲉⲧⲛ̅ ⲛⲟⲉⲓ ϫⲉ ⲉ ⲓ̈ ϣⲁϫⲉ ⲛⲙ̅ⲙⲏ ⲧⲛ̅ ⲛ̅ ⲁϣ ⲛ̅ ϩⲉ .

ⲁ ϥ ϥⲟϭ ϥ̅ ⲉⲃⲟⲗ ⲛ̅ϭⲓ ⲡⲉⲧⲣⲟⲥ ⲡⲉϫⲁ ϥ ⲛ̅ ⲓ̅ⲥ̅ ϫⲉ ⲡⲁ ϫⲟⲉⲓⲥ .

ⲧⲛ̅ ⲛⲁϣ ⲁⲛⲉⲭⲉ ⲁⲛ ⲛ̅ ⲧⲉⲓ̈ ⲥϩⲓⲙⲉ . ⲉ ⲥ ϫⲓ ⲙ̅ ⲡ ⲙⲁ ⲛ̅ⲧⲟⲟⲧ ⲛ̅ · ⲁⲩⲱ ⲙ̅ⲡ ⲥ̅ ⲕⲁ ⲟⲩⲟⲛ ⲙ̅ⲙⲟ ⲛ ⲉ ϣⲁϫⲉ · ⲁⲗⲗⲁ ⲉ ⲥ ϣⲁ ϫⲉ ⲛ̅ ϩⲁϩ ⲛ̅ ⲥⲟⲡ ·

ⲁ ϥ ⲟⲩⲱϣⲃ̅ ⲛ̅ϭⲓ ⲓ̅ⲥ̅ ⲡⲉϫⲁ ϥ ⲛ̅ ⲛⲉϥ ⲙⲁⲑⲏⲧⲏⲥ ϫⲉ ⲡ ⲉⲧⲉⲣⲉ ⲧ ϭⲟⲙ ⲙ̅ ⲡⲉϥ ⲡ ⲛ̅ⲁ̅ ⲛⲁ ⲃⲣ̅ⲃⲣ̅ ϩⲣⲁⲓ̈ ⲛ̅ϩⲏⲧ ϥ̅ . ⲉ ⲧⲣⲉ ϥ ⲛⲟⲉⲓ ⲙ̅ ⲡ ⲉ ϯϫⲱ ⲙ̅ ⲙⲟ ϥ .

ⲙⲁⲣⲉ ϥ ⲉⲓ̅ ⲉ ⲑ ⲏ · ⲛ ϥ̅ ϣⲁϫⲉ ·

ⲡⲗⲏⲛ ϭⲉ ⲛ̅ⲧⲟⲕ ⲡⲉⲧⲣⲟⲥ ϯ ⲛⲁⲩ ⲉ ⲧⲉⲕ ϭⲟⲙ ϩⲣⲁⲓ̈ ⲛ̅ϩⲏⲧ ⲕ̅ ⲉ ⲥ ⲛⲟⲓ̈ ⲙ̅ ⲡ ⲃⲱⲗ ⲙ̅ ⲡ ⲙⲩⲥⲧⲏⲣⲓⲟⲛ ⲛ̅ ⲧ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ · ⲧⲉⲛⲟⲩ ϭⲉ ⲛ̅ⲧⲟⲕ ⲡⲉⲧⲣⲟⲥ ϫⲱ ⲙ̅ ⲡ ⲛⲟⲏⲙⲁ ⲛ̅ ⲧⲉⲥ ⲙⲉⲧⲁⲛⲟⲓⲁ ⲛ̅ ⲧ ⲙⲏⲧⲉ ⲛ̅ ⲛⲉⲕ ⲥⲛⲏⲩ ·

ⲁ ϥ ⲟⲩⲱϣⲃ̅ ⲇⲉ ⲛ̅ϭⲓ ⲡⲉⲧⲣⲟⲥ ⲡⲉϫⲁ ϥ ⲛ̅ ⲓ̅ⲥ̅ ϫⲉ ⲡ ϫⲟ ⲉⲓⲥ .

ⲥⲱⲧⲙ̅ ⲧⲁ ϫⲱ ⲙ̅ ⲡ ⲛⲟⲏⲙⲁ ⲛ̅ ⲧⲉⲥ ⲙⲉⲧⲁⲛⲟⲓⲁ ⲛ̅ⲧ ⲁ ⲥ ⲡⲣⲟⲫⲏⲧⲉⲩⲉ ϩⲁⲣⲟ ⲥ ⲛ̅ϭⲓ ⲧⲉⲕ ϭⲟⲙ ⲙ̅ ⲡⲓ ⲟⲩⲟⲉⲓϣ ϩⲓⲧⲛ̅ ⲇⲁⲩⲉⲓⲇ ⲡⲉ ⲡⲣⲟⲫⲏⲧⲏⲥ ⲉ ⲥ ϫⲱ ⲛ̅ ⲧⲉⲥ ⲙⲉⲧⲁ ⲛⲟⲓⲁ · ϩⲙ̅ ⲡ ⲙⲉϩ ϣϥⲉ ⲙ̅ ⲯⲁⲗⲙⲟⲥ · ϫⲉ ⲡ ⲛⲟⲩⲧⲉ ⲡⲁ ⲛⲟⲩⲧⲉ ⲁ ⲓ̈ ⲛⲁϩⲧⲉ ⲉⲣⲟ ⲕ .

ⲙ̅ⲡⲣ̅ⲧⲣ ⲁ ϫⲓ ϣⲓⲡⲉ ⲛ̅ ϣⲁ ⲉⲛⲉϩ ·

ⲙⲁⲧⲟⲩϫⲟ ⲓ̈ ϩⲛ̅ ⲧⲉⲕ ⲇⲓⲕⲁⲓⲟⲥⲩⲛⲏ · ⲁⲩⲱ ⲛ̅ ⲅ ⲛⲁϩⲙⲉ ⲧ .

ⲣⲓⲕⲉ ⲙ̅ ⲡⲉⲕ ⲙⲁⲁϫⲉ ⲉⲣⲟ ⲓ̈ ⲛ̅ ⲅ ⲧⲟⲩϫⲟ ⲓ̈ · ϣⲱⲡⲉ ⲛⲁ ⲓ̈ ⲉ ⲩ ⲛⲟⲩⲧⲉ ⲛ̅ ⲛⲁϣⲧⲉ . ⲁⲩⲱ ⲉ ⲩ ⲙⲁ ⲉ ϥ ⲧⲁϫⲣⲏⲩ ⲉ ⲧⲟⲩ ϫⲟⲓ̈ · ϫⲉ ⲛ̅ⲧⲟⲕ ⲡⲉ ⲡ ⲁ ⲧⲁϫⲣⲟ · ⲁⲩⲱ ⲡⲁ ⲙⲁ ⲛ̅ ⲡⲱⲧ · ⲡⲁ ⲛⲟⲩⲧⲉ ⲙⲁⲧⲟⲩϫⲟ ⲓ̈ ⲉ ⲧ ϭⲓϫ ⲙ̅ ⲡ ⲣⲉϥⲣ̅ ⲛⲟⲃⲉ · ⲁⲩⲱ ⲉⲃⲟⲗ ϩⲛ̅ ⲧ ϭⲓϫ ⲙ̅ ⲡ̅ ⲡⲁⲣⲁⲛⲟ ⲙⲟⲥ ⲙⲛ̅ ⲡ ⲁⲥⲉⲃⲏⲥ · ϫⲉ ⲛ̅ⲧⲟⲕ ⲡ ϫⲟⲉⲓⲥ ⲡⲉ ⲧⲁ ϩⲩⲡⲟ ⲙⲟⲛⲏ · ⲡ ϫⲟⲉⲓⲥ ⲛ̅ⲧⲕ̅ ⲧⲁ ϩⲉⲗⲡⲓⲥ ϫⲓⲛ ⲧⲁ ⲙ̅ⲛ̅ⲧ̅ ⲕⲟⲩⲓ̈ ·

ⲁ ⲓ̈ ⲧⲁϫⲣⲟ ⲓ̈ ⲉϫⲱ ⲕ ϫⲓⲛ ⲛ̅ ⲑⲏ ⲛ̅ⲧⲟⲕ ⲁ ⲕⲛ̅ⲧ ⲉⲃⲟⲗ ⲛ̅ ϩⲏⲧ ⲥ̅ ⲛ̅ ⲧⲁ ⲙⲁⲁⲩ · ⲉⲣⲉ ⲡⲁⲣ̅‐ⲡ ⲙⲉⲉⲩⲉ ⲛ̅ϩⲏⲧ ⲕ̅ ⲛ̅ ⲟⲩ ⲟⲉⲓϣ ⲛⲓⲙ · ⲁ ⲓ̈ ϣⲱⲡⲉ ⲛ̅ ⲑ ⲉ ⲛ̅ ⲛⲓ ⲥⲟϭ ⲛ̅ ⲟⲩ ⲙⲏⲏ ϣⲉ ·

ⲛ̅ⲧⲕ̅ ⲡⲁ ⲃⲟⲏⲑⲟⲥ . ⲁⲩⲱ ⲡ ⲁ ⲧⲁϫⲣⲟ · ⲛ̅ⲧⲕ̅ ⲡⲁ ⲥⲱⲧⲏⲣ ⲡ ϫⲟⲉⲓⲥ · ⲁ ⲧⲁ ⲧⲁⲡⲣⲟ ⲙⲟⲩϩ ⲛ̅ ⲥ ⲙⲟⲩ ϫⲉ ⲕⲁⲥ ⲉⲓ̈ⲉ ⲥⲙⲟⲩ ⲉ ⲡ ⲉⲟⲟⲩ ⲛ̅ ⲧⲉⲕ ⲙ̅ⲛ̅ⲧ̅ ⲛⲟϭ ⲙ̅ ⲡⲉ ϩⲟⲟⲩ ⲧⲏⲣ ϥ̅ · ⲙ̅ⲡⲣ̅ ⲛⲟϫ ⲧ̅ ⲉⲃⲟⲗ ⲉ ⲩ ⲟⲩⲟⲓ̈ϣ ⲙ̅ ⲙ̅ⲛ̅ⲧ̅ ϩⲗ̅ⲗⲟ · ϩⲙ̅ ⲡ ⲧⲣⲉ ⲧⲁ ⲯⲩⲭⲏ ⲱϫⲛ̅ ⲙ̅ⲡⲣ̅ ⲕⲁⲁ ⲧ ⲛ̅ⲥⲱ ⲕ · ϫⲉ ⲁ ⲛⲁ ϫⲓϫⲉⲉⲩ ϫⲉ ⲡ ⲉⲑ ⲟⲟⲩ ⲉⲣⲟ ⲓ̈ · ⲁⲩⲱ ⲛ ⲉⲧ ϩⲁⲣⲉϩ ⲉ ⲧⲁ ⲯⲩⲭⲏ · ⲁ ⲩ ϫⲓ ϣⲟϫⲛⲉ ⲉ ⲧⲁ ⲯⲩⲭⲏ · ⲉ ⲩ ϫⲱ ⲙ̅ⲙⲟ ⲥ ϩⲓ ⲟⲩ ⲥⲟⲡ · ϫⲉ ⲁ ⲡ ⲛⲟⲩⲧⲉ ⲕⲁⲁ ϥ ⲛ̅ⲥⲱ ϥ · ⲡⲱⲧⲛ̅ ⲧⲉⲧⲛ̅ ⲧⲁϩⲟ ϥ ϫⲉ ⲙⲛ̅ ⲡ ⲉⲧ ⲛⲁ ⲛⲁϩⲙⲉ ϥ · ⲡ ⲛⲟⲩⲧⲉ ϯ ϩⲧⲏ ⲕ ⲉ ⲧⲁ ⲃⲟⲏⲑⲓⲁ · ⲙⲁⲣ ⲟⲩ ϫⲓ ϣⲓⲡⲉ ⲛ̅ ⲥⲉ ⲱϫⲛ̅ ⲛ̅ϭⲓ ⲛ ⲉⲧ ⲇⲓⲁⲃⲁⲗⲗⲉ ⲛ̅ ⲧⲁ ⲯⲩⲭⲏ ·

ⲙⲁⲣ ⲟⲩ ϭⲟⲟⲗ ⲟⲩ ⲛ̅ ⲟⲩ ϣⲓⲡⲉ ⲙⲛ̅ ⲟⲩ ⲟⲩⲱⲗⲥ̅ ⲛ̅ϭⲓ ⲛ ⲉⲧ ϣⲓⲛⲉ ⲛ̅ⲥⲁ ϩⲉⲛ ⲡ ⲉⲑ ⲟⲟⲩ ⲉⲣⲟ ⲓ̈ ·

ⲡⲁⲓ̈ ϭⲉ ⲡⲉ ⲡ ⲃⲱⲗ ⲛ̅ ⲧ ⲙⲉϩ ⲥⲛ̅ⲧⲉ ⲙ̅ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟ ⲫⲓⲁ :

ⲁ ϥ ⲟⲩⲱϣⲃ̅ ⲛ̅ϭⲓ ⲡ ⲥⲱⲧⲏⲣ ⲡⲉϫⲁ ϥ ⲙ̅ ⲡⲉⲧⲣⲟⲥ · ϫⲉ ⲕⲁⲗⲱⲥ ⲡⲉⲧⲣⲟⲥ ⲡⲁⲓ̈ ⲡⲉ ⲡ ⲃⲱⲗ ⲛ̅ ⲧⲉⲥ ⲙⲉⲧⲁⲛⲟⲓⲁ · ⲛ̅ⲧⲉⲧⲛ̅ ϩⲉⲛ ⲙⲁⲕⲁⲣⲓⲟⲥ ⲛ̅ⲧⲱⲧⲛ̅ ⲡⲁⲣⲁ ⲣⲱⲙⲉ ⲛⲓⲙ · ⲉⲧ ϩⲓϫⲙ̅ ⲡ ⲕⲁϩ · ϫⲉ ⲁ ⲓ̈ ϭⲱⲗⲡ̅ ⲉⲣⲱ ⲧⲛ̅ ⲛ̅ ⲛⲉⲓ̈ ⲙⲩⲥ ⲧⲏⲣⲓⲟⲛ ·

ϩⲁⲙⲏⲛ ϩⲁⲙⲏⲛ ϯ ϫⲱ ⲙ̅ⲙⲟ ⲥ ⲛⲏ ⲧⲛ̅ ϫⲉ ϯ ⲛⲁ ϫⲉⲕ ⲧⲏⲩⲧⲛ̅ ⲉⲃⲟⲗ ⲙ̅ ⲡⲗⲏⲣⲱⲙⲁ ⲛⲓⲙ ϫⲓⲛ ⲙ̅ ⲙⲩⲥⲧⲏⲣⲓⲟⲛ ⲙ̅ ⲡ ⲥⲁ ⲛ ϩⲟⲩⲛ ϩⲉⲱⲥ ϣⲁ ⲙ̅ ⲙⲩⲥⲧⲏ ⲣⲓⲟⲛ ⲙ̅ ⲡ ⲥⲁ ⲃ̅ ⲃⲟⲗ · ⲁⲩⲱ ϯ ⲛⲁ ⲙⲉϩ ⲧⲏⲩⲧⲛ̅ ⲉⲃⲟⲗ ϩⲙ̅ ⲡⲉ ⲡⲛ̅ⲁ̅ · ϫⲉ ⲉⲩⲉ ⲙⲟⲩⲧⲉ ⲉⲣⲱ ⲧⲛ̅ ϫⲉ ⲛⲉ ⲡⲛ̅ⲁ̅ ⲧⲓⲕⲟⲥ ⲉⲧ ϫⲏⲕ ⲉⲃⲟⲗ ⲙ̅ ⲡⲗⲏⲣⲱⲙⲁ ⲛⲓⲙ · ⲁⲩⲱ ϩⲁ ⲙⲏⲛ ϩⲁⲙⲏⲛ ϯ ϫⲱ ⲙ̅ⲙⲟ ⲥ ⲛⲏ ⲧⲛ̅ ϫⲉ ϯ ⲛⲁ ϯ ⲛⲏ ⲧⲛ̅ ⲛ̅ ⲙ̅ ⲙⲩⲥⲧⲏⲣⲓⲟⲛ ⲧⲏⲣ ⲟⲩ ⲛ̅ ⲧⲉⲛ̅ ⲧⲟⲡⲟⲥ ⲧⲏⲣ ⲟⲩ ⲙ̅ ⲡⲁ ⲉⲓⲱⲧ · ⲁⲩⲱ ⲛ̅ ⲧⲉⲛ̅ ⲧⲟⲡⲟⲥ ⲧⲏⲣ ⲟⲩ ⲙ̅ ⲡ ϣⲟⲣⲡ̅ ⲙ̅ ⲙⲩⲥⲧⲏⲣⲓⲟⲛ · ϫⲉⲕⲁⲥ ⲡ ⲉⲧⲉⲧⲛⲁ ϫⲓⲧ ϥ̅ ⲉϩⲟⲩⲛ ϩⲓϫⲙ̅ ⲡ ⲕⲁϩ ⲉⲩⲉ ϫⲓⲧ ϥ̅ ⲉϩⲟⲩⲛ ⲉ ⲡ ⲟⲩⲟⲉⲓⲛ ⲙ̅ ⲡ ϫⲓⲥⲉ . ⲁⲩⲱ ⲡ ⲉⲧⲉⲧⲛⲁ ⲛⲟϫ ϥ̅ ⲉⲃⲟⲗ ϩⲓϫⲙ̅ ⲡ ⲕⲁϩ . ⲥⲉ ⲛⲁ ⲛⲟϫ ϥ̅ ⲉⲃⲟⲗ ϩⲛ̅ ⲧ ⲙ̅ⲛ̅ⲧ̅ ⲉⲣⲟ ⲙ̅ ⲡⲁ ⲓ̈ⲱⲧ ⲉⲧ ϩⲛ̅ ⲙ̅ ⲡ ⲏⲩⲉ · ⲡⲗⲏⲛ ϭⲉ ⲥⲱⲧⲙ̅ ⲁⲩⲱ ⲛ̅ ⲧⲉⲧⲛ̅ ϫⲓ ⲥⲙⲏ ⲉ ⲛ ⲙⲉⲧⲁⲛⲟⲓⲁ ⲧⲏⲣ ⲟⲩ · ⲛⲁⲓ̈ ⲉⲛⲧ ⲁ ⲥ ϫⲟⲟⲩ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

Ⲍ ⲁ ⲥ ⲟⲩⲱϩ ⲟⲛ ⲉ ⲧⲟⲟⲧ ⲥ̅ ⲁ ⲥ ϫⲱ ⲛ̅ ⲧ ⲙⲉϩ ϣⲟⲙⲧⲉ ⲙ̅ ⲙⲉⲧⲁ ⲛⲟⲓⲁ ⲉ ⲥ ϫⲱ ⲙ̅ⲙⲟ ⲥ ϫⲉ ⲡ ⲟⲩⲟⲉⲓⲛ ⲛ̅ ⲛ̅ ϭⲟⲙ ϯ ϩⲧⲏ ⲕ ⲁⲩⲱ ⲛ ⲅ̅ ⲛⲟⲩϩⲙ̅ ⲙ̅ⲙⲟ ⲓ̈ ·

ⲙⲁⲣ ⲟⲩ ϣⲱⲱⲧ ⲁⲩⲱ ⲛ̅ ⲥⲉ ϣⲱⲡⲉ ϩⲙ̅ ⲡ ⲕⲁⲕⲉ ⲛ̅ϭⲓ ⲛⲁⲓ̈ ⲉⲧ ⲟⲩⲉϣ ϥⲓ ⲙ̅ ⲡⲁ ⲟⲩ ⲟⲉⲓⲛ ⲛ̅ ϩⲏⲧ · ⲙⲁⲣ ⲟⲩ ⲕⲟⲧ ⲟⲩ ⲉ ⲡⲉ ⲭⲁⲟⲥ · ⲁⲩⲱ ⲛ̅ ⲥⲉ ϫⲓ ϣⲓⲡⲉ ⲛ̅ϭⲓ ⲛ ⲉⲧ ⲟⲩⲉϣ ϥⲓ ⲛ̅ ⲧⲁ ϭⲟⲙ ·

ⲙⲁⲣ ⲟⲩ ⲕⲟⲧ ⲟⲩ ⲉ ⲡ ⲕⲁⲕⲉ ϩⲛ̅ ⲟⲩ ϭⲉⲡⲏ ⲛ̅ϭⲓ ⲛⲁⲓ̈ ⲉⲧ ϩⲱϫ ⲙ̅ⲙⲟ ⲓ̈ ⲉⲧ ϫⲱ ⲙ̅ⲙⲟ ⲥ ϫⲉ ⲁ ⲛ ⲣ̅ ϫⲟⲉⲓⲥ ⲉϩⲣⲁⲓ̈ ⲉϫⲱ ⲥ ·

ⲙⲁⲣ ⲟⲩ ⲣⲁϣⲉ ⲛ̅ⲧⲟϥ ⲁⲩⲱ ⲛ̅ ⲥⲉ ⲟⲩⲣⲟⲧ ⲛ̅ϭⲓ ⲟⲩⲟⲛ ⲛⲓⲙ ⲉⲧ ϣⲓⲛⲉ ⲛ̅ⲥⲁ ⲡ ⲟⲩⲟⲉⲓⲛ · ⲁⲩⲱ ⲙⲁⲣ ⲟⲩ ϫⲟⲟ ⲥ ⲛ̅ ⲟⲩⲟⲉⲓϣ ⲛⲓⲙ · ϫⲉ ⲙⲁⲣⲉ ϥ ϫⲓⲥⲉ ⲛ̅ϭⲓ ⲡ ⲙⲩⲥⲧⲏ ⲣⲓⲟⲛ ⲛ̅ϭⲓ ⲛ ⲉⲧ ⲟⲩⲉϣ ⲡⲉⲕ ⲙⲩⲥⲧⲏⲣⲓⲟⲛ ·

ⲁⲛⲟⲕ ϭⲉ ⲧⲉ ⲛ ⲟⲩ ⲡ ⲟⲩⲟⲓ̈ⲛ ⲛⲟⲩϩⲙ̅ ⲙ̅ⲙⲟ ⲓ̈ · ϫⲉ ⲁ ⲓ̈ ϣⲱⲱⲧ ⲙ̅ ⲡⲁ ⲟⲩⲟⲉⲓⲛ ⲛ̅ⲧ ⲁ ⲩ ϥⲓⲧ ϥ̅ · ⲁⲩⲱ ϯ ⲣ̅ ⲭⲣⲓⲁ ⲛ̅ ⲧⲁ ϭⲟⲙ ⲉⲛⲧ ⲁ ⲩ ϥⲓⲧ ⲥ̅ ⲛ̅ⲧⲟⲟⲧ ·

ⲛ̅ⲧⲟⲕ ϭⲉ ⲡ ⲟⲩⲟⲉⲓⲛ ⲛ̅ⲧⲟⲕ ⲡⲉ ⲡⲁ ⲣⲉϥ ⲛⲟⲩϩⲙ̅ ⲡ ⲟⲩⲟⲓ̈ⲛ · ϭⲉⲡⲏ ⲛ ⲅ̅ ⲛⲁϩⲙⲉ ⲧ ⲉⲃⲟⲗ ϩⲙ̅ ⲡⲉⲓ̈ ⲭⲁⲟⲥ .

Ⲍ ⲁ ⲥ ϣⲱⲡⲉ ⲇⲉ ⲛ̅ⲧⲉⲣⲉ ⲓ̅ⲥ̅ ⲟⲩⲱ ⲉ ϥ ϫⲱ ⲛ̅ ⲛⲉⲓ̈ ϣⲁϫⲉ ⲉ ⲛⲉϥ ⲙⲁⲑⲏⲧⲏⲥ ⲉ ϥ ϫⲱ ⲙ̅ⲙⲟ ⲥ ϫⲉ ⲧⲁⲓ̈ ⲧⲉ ⲧ ⲙⲉϩ ϣⲟⲙ ⲧⲉ ⲙ̅ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

ⲡⲉϫⲁ ϥ ⲛⲁ ⲩ ϫⲉ ⲡ ⲉⲛⲧ ⲁ ϥ ϫⲓⲥⲉ ⲛ̅ϩⲏⲧ ϥ̅ ⲛ̅ϭⲓ ⲡⲉ ⲡⲛ̅ⲁ̅ ⲛ̅ⲁⲓⲥⲑⲏⲧⲓⲕⲟ̅ . ⲙⲁⲣⲉ ϥ ⲉⲓ̅ ⲉ ⲑ ⲏ ⲛ ϥ̅ ϫⲱ ⲙ̅ ⲡ ⲛⲟⲏⲙⲁ ⲛ̅ ⲧ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ϥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

Ⲍ ⲁ ⲥ ϣⲱⲡⲉ ϭⲉ ⲉ ⲙⲡⲁⲧ ϥ̅ ⲟⲩⲱ ⲉ ϥ ϣⲁϫⲉ ⲛ̅ϭⲓ ⲓ̅ⲥ̅ · ⲁ ⲥ ⲉⲓ̅ ⲉ ⲑ ⲏ ⲛ̅ϭⲓ ⲙⲁⲣⲑⲁ ⲁ ⲥ ⲡⲁϩⲧ ⲥ̅ ⲉϫⲛ̅ ⲛⲉϥ ⲟⲩⲉⲣⲏⲧⲉ ⲁ ⲥ ϯ ⲡⲓ ⲉⲣⲟ ⲟⲩ · ⲁ ⲥ ⲱϣ ⲉⲃⲟⲗ ⲁ ⲥ ⲣⲓⲙⲉ ϩⲛ̅ ⲟⲩ ⲁϣ ⲕⲁⲕ . ⲁⲩⲱ ϩⲛ̅ ⲟⲩ ⲑⲃ̅ⲃⲓⲟ · ⲉ ⲥ ϫⲱ ⲙ̅ⲙⲟ ⲥ ϫⲉ ⲡⲁ ϫⲟⲓ̈ⲥ ⲛⲁ̅ ⲛⲁⲓ̈ · ⲁⲩⲱ ⲛ̅ ⲅ ϣⲛ̅ ϩⲧⲏ ⲕ ϩⲁⲣⲟ ⲓ̈ · ⲁⲩⲱ ⲛ ⲅ ⲕⲁⲁⲧ ⲧⲁ ϫⲱ ⲙ̅ ⲡ ⲃⲱⲗ ⲛ̅ ⲧ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

Ⲍ ⲁⲩⲱ ⲁ ⲓ̅ⲥ̅ ϯ ⲧⲟⲟⲧ ⲥ̅ ⲙ̅ ⲙⲁⲣⲑⲁ ⲡⲉϫⲁ ϥ ⲛⲁ ⲥ · ϫⲉ ⲟⲩ ⲙⲁⲕⲁⲣⲓⲟⲥ ⲡⲉ ⲣⲱⲙⲉ ⲛⲓⲙ ⲉ ϣⲁ ϥ ⲑⲃ̅ⲃⲓⲟ ϥ . ϫⲉ ⲛ̅ⲧⲟϥ ⲡⲉ ⲉⲧ ⲟⲩ ⲛⲁ ⲛⲁ̅ ⲛⲁ ϥ · ⲧⲉⲛⲟⲩ ϭⲉ ⲙⲁⲣⲑⲁ ⲛ̅ⲧⲉ ⲟⲩ ⲙⲁⲕⲁⲣⲓⲟⲥ · ⲡⲗⲏⲛ ϭⲉ ⲧⲁⲩⲉ ⲡ ⲃⲱⲗ ⲙ̅ ⲡ ⲛⲟⲏⲙⲁ ⲛ̅ ⲧ ⲙⲉⲧⲁⲛⲟⲓⲁ ⲛ̅ ⲧ ⲡⲓⲥⲡⲓⲥ ⲥⲟⲫⲓⲁ ·

ⲁ ⲥ ⲟⲩ ⲱϣⲃ̅ ⲇⲉ ⲛ̅ϭⲓ ⲙⲁⲣⲑⲁ ⲡⲉϫⲁ ⲥ ⲛ̅ ⲓ̅ⲥ̅ ϩⲛ̅ ⲧ ⲙⲏⲧⲉ ⲛ̅ ⲙ̅ ⲙⲁⲑⲏⲧⲏⲥ ϫⲉ ⲉⲧⲃⲉ ⲧ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲱ̅ ⲡⲁ ϫⲟⲉⲓⲥ ⲓ̅ⲥ̅ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ·

ⲛ̅ⲧ ⲁ ⲥ ⲡⲣⲟⲫⲏⲧⲉⲩⲉ ϩⲁⲣⲟ ⲥ ⲙ̅ ⲡⲓ ⲟⲩⲟⲉⲓϣ ⲛ̅ϭⲓ ⲧⲉⲕ ϭⲟⲙ ⲛ̅ ⲟⲩⲟⲉⲓⲛ ⲉⲧ ϩⲛ̅ⲇⲁⲩⲓ̈ⲇ ϩⲙ̅ ⲡ ⲙⲉϩⲥⲉⲯⲓⲥ ⲛ̅ ⲯⲁⲗⲙⲟⲥ · ⲉ ϥ ϫⲱ ⲙ̅ⲙⲟ ⲥ ϫⲉ ⲡ ϫⲟⲉⲓⲥ ⲡ ⲛⲟⲩⲧⲉ ϯ ϩⲧⲏ ⲕ ⲉ ⲧⲁ ⲃⲟⲏⲑⲓⲁ · ⲙⲁⲣ ⲟⲩ ϫⲓ ϣⲓⲡⲉ ⲛ̅ ⲥⲉ ⲟⲩⲱⲗⲥ̅ ⲛ̅ϭⲓ ⲛ ⲉⲧ ϣⲓⲛⲉ ⲛ̅ⲥⲁ ⲧⲁ ⲯⲩⲭⲏ ·

ⲙⲁⲣ ⲟⲩ ⲕⲟⲧ ⲟⲩ ⲛ̅ ⲧⲉ ⲩⲛⲟⲩ ⲛ̅ ⲥⲉ ϫⲓ ϣⲓⲡⲉ ⲛ̅ϭⲓ ⲛ ⲉⲧ ϫⲱ ⲙ̅ⲙⲟ ⲥ ⲛⲁ ⲓ̈ ϫⲉ ⲉⲩⲅⲉ ⲉⲩⲅⲉ ·

ⲥⲉ ⲟⲩⲛⲟϥ ⲉϫⲱ ⲕ ⲛ̅ϭⲓ ⲟⲩⲟⲛ ⲛⲓⲙ ⲉⲧ ϣⲓⲛⲉ ⲛ̅ⲥⲱ ⲕ · ⲛ̅ ⲥⲉ ϫⲟⲟ ⲥ ⲛ̅ ⲟⲩⲟⲉⲓϣ ⲛⲓⲙ ϫⲉ ⲙⲁⲣⲉ ⲡ ⲛⲟⲩⲧⲉ ϫⲓⲥⲉ ⲛ̅ϭⲓ ⲛ ⲉⲧ ⲙⲉ ⲙ̅ ⲡⲉⲕ ⲟⲩϫⲁⲓ̈ ·

ⲁⲛⲟⲕ ⲇⲉ ⲁⲛⲅ̅ ⲟⲩ ϩⲏⲕⲉ ⲁⲛⲅ̅ ⲟⲩ ⲉⲃⲓⲏⲛ ⲡ ϫⲟⲉⲓⲥ ⲃⲟⲏⲑⲓ ⲉⲣⲟ ⲓ̈ · ⲛ̅ⲧⲕ̅ ⲡⲁ ⲃⲟⲏⲑⲟⲥ · ⲁⲩⲱ ⲧⲁ ⲛⲁϣⲧⲉ ⲡ ϫⲟⲓ̈ⲥ ⲙ̅ⲡⲣ̅ ⲱⲥⲕ̅ ·

ⲡⲁⲓ̈ ϭⲉ ⲡⲉ ⲡ ⲃⲱⲗ ⲛ̅ ⲧ ⲙⲉϩ ϣⲟⲙⲧⲉ ⲙ̅ ⲙⲉⲧⲁⲛⲟⲓⲁ ⲉⲛⲧ ⲁ ⲥ ϫⲟⲟ ⲥ ⲛ̅ϭⲓ ⲧ ⲡⲓⲥⲧⲓⲥ ⲥⲟⲫⲓⲁ ⲉ ⲥ ϩⲩⲙⲛⲉⲩⲉ ⲉ ⲡ ϫⲓⲥⲉ ·