Cat 1.1	Cui dono lepidum novum libellum
Cat 1.2	arido modo pumice expolitum?
Cat 1.3	Corneli, tibi; namque tu solebas
Cat 1.4	meas esse aliquid putare nugas,
Cat 1.5	iam tum cum ausus es unus Italorum
Cat 1.6	omne aevum tribus explicare chartis,
Cat 1.7	doctis, Iuppiter, et laboriosis!
Cat 1.8	quare habe tibi quidquid hoc libelli
Cat 1.9	qualecumque, quod, o patrona virgo,
Cat 1.10	plus uno maneat perenne saeclo.
Cat 2.1	Passer, deliciae meae puellae,
Cat 2.2	quicum ludere, quem in sinu tenere,
Cat 2.3	cui primum digitum dare adpetenti
Cat 2.4	et acris solet incitare morsus,
Cat 2.5	cum desiderio meo nitenti
Cat 2.6	carum nescio quid libet iocari
Cat 2.7	(et solaciolum sui doloris,
Cat 2.8	credo, ut tum gravis adquiescat ardor),
Cat 2.9	tecum ludere sicut ipsa possem
Cat 2.10	et tristis animi levare curas!
Cat 2.11	Tam gratum est mihi quam ferunt puellae
Cat 2.12	pernici aureolum fuisse malum,
Cat 2.13	quod zonam solvit diu ligatam.
Cat 3.1	Lugete, o Veneres Cupidinesque
Cat 3.2	et quantum est hominum venustiorum!
Cat 3.3	passer mortuus est meae puellae,
Cat 3.4	passer, deliciae meae puellae,
Cat 3.5	quem plus illa oculis suis amabat;
Cat 3.6	nam mellitus erat, suamque norat
Cat 3.7	ipsa tam bene quam puella matrem,
Cat 3.8	nec sese a gremio illius movebat,
Cat 3.9	sed circumsiliens modo huc modo illuc
Cat 3.10	ad solam dominam usque pipiabat.
Cat 3.11	qui nunc it per iter tenebricosum
Cat 3.12	illuc unde negant redire quemquam.
Cat 3.13	at vobis male sit, malae tenebrae
Cat 3.14	Orci, quae omnia bella devoratis;
Cat 3.15	tam bellum mihi passerem abstulistis.
Cat 3.16	o factum male! o miselle passer!
Cat 3.17	tua nunc opera meae puellae
Cat 3.18	flendo turgiduli rubent ocelli.
Cat 4.1	Phasellus ille, quem videtis, hospites,
Cat 4.2	ait fuisse navium celerrimus,
Cat 4.3	neque ullius natantis impetum trabis
Cat 4.4	nequisse praeterire, sive palmulis
Cat 4.5	opus foret volare sive linteo.
Cat 4.6	et hoc negat minacis Hadriatici
Cat 4.7	negare litus insulasve Cycladas
Cat 4.8	Rhodumque nobilem horridamque Thraciam
Cat 4.9	Propontida trucemve Ponticum sinum,
Cat 4.10	ubi iste post phasellus antea fuit
Cat 4.11	comata silva: nam Cytorio in iugo
Cat 4.12	loquente saepe sibilum edidit coma.
Cat 4.13	Amastri Pontica et Cytore buxifer,
Cat 4.14	tibi haec fuisse et esse cognitissima
Cat 4.15	ait phasellus; ultima ex origine
Cat 4.16	tuo stetisse dicit in cacumine,
Cat 4.17	tuo imbuisse palmulas in aequore,
Cat 4.18	et inde tot per impotentia freta
Cat 4.19	erum tulisse, laeva sive dextera
Cat 4.20	vocaret aura, sive utrumque Iuppiter
Cat 4.21	simul secundus incidisset in pedem;
Cat 4.22	neque ulla vota litoralibus diis
Cat 4.23	sibi esse facta, cum veniret a mari
Cat 4.24	novissimo hunc ad usque limpidum lacum.
Cat 4.25	sed haec prius fuere: nunc recondita
Cat 4.26	senet quiete seque dedicat tibi,
Cat 4.27	gemelle Castor et gemelle Castoris.
Cat 5.1	Vivamus, mea Lesbia, atque amemus,
Cat 5.2	rumoresque senum severiorum
Cat 5.3	omnes unius aestimemus assis.
Cat 5.4	soles occidere et redire possunt:
Cat 5.5	nobis, cum semel occidit brevis lux,
Cat 5.6	nox est perpetua una dormienda.
Cat 5.7	da mi basia mille, deinde centum,
Cat 5.8	dein mille altera, dein secunda centum,
Cat 5.9	deinde usque altera mille, deinde centum,
Cat 5.10	dein, cum milia multa fecerimus,
Cat 5.11	conturbabimus illa, ne sciamus,
Cat 5.12	aut ne quis malus invidere possit,
Cat 5.13	cum tantum sciat esse basiorum.
Cat 6.1	Flavi, delicias tuas Catullo,
Cat 6.2	ni sint inlepidae atque inelegantes,
Cat 6.3	velles dicere, nec tacere posses.
Cat 6.4	verum nescio quid febriculosi
Cat 6.5	scorti diligis: hoc pudet fateri.
Cat 6.6	nam te non viduas iacere noctes
Cat 6.7	nequiquam tacitum cubile clamat
Cat 6.8	sertis ac Syrio fragrans olivo,
Cat 6.9	pulvinusque peraeque et hic et ille
Cat 6.10	attritus, tremulique quassa lecti
Cat 6.11	argutatio inambulatioque.
Cat 6.12	nam nil stupra valet, nihil, tacere.
Cat 6.13	cur? non tam latera ecfututa pandas,
Cat 6.14	ni tu quid facias ineptiarum.
Cat 6.15	quare, quidquid habes boni malique,
Cat 6.16	dic nobis: volo te ac tuos amores
Cat 6.17	ad caelum lepido vocare versu.
Cat 7.1	Quaeris quot mihi basiationes
Cat 7.2	tuae, Lesbia, sint satis superque.
Cat 7.3	quam magnus numerus Libyssae harenae
Cat 7.4	laserpiciferis iacet Cyrenis,
Cat 7.5	oraclum Iovis inter aestuosi
Cat 7.6	et Batti veteris sacrum sepulcrum,
Cat 7.7	aut quam sidera multa, cum tacet nox,
Cat 7.8	furtivos hominum vident amores,
Cat 7.9	tam te basia multa basiare
Cat 7.10	vesano satis et super Catullo est,
Cat 7.11	quae nec pernumerare curiosi
Cat 7.12	possint nec mala fascinare lingua.
Cat 8.1	Miser Catulle, desinas ineptire,
Cat 8.2	et quod vides perisse perditum ducas.
Cat 8.3	fulsere quondam candidi tibi soles,
Cat 8.4	cum ventitabas quo puella ducebat
Cat 8.5	amata nobis quantum amabitur nulla.
Cat 8.6	ibi illa multa tum iocosa fiebant,
Cat 8.7	quae tu volebas nec puella nolebat.
Cat 8.8	fulsere vere candidi tibi soles.
Cat 8.9	nunc iam illa non vult: tu quoque, impotens, noli,
Cat 8.10	nec quae fugit sectare, nec miser vive,
Cat 8.11	sed obstinata mente perfer, obdura.
Cat 8.12	vale, puella! iam Catullus obdurat,
Cat 8.13	nec te requiret nec rogabit invitam:
Cat 8.14	at tu dolebis, cum rogaberis nulla.
Cat 8.15	scelesta, vae te! quae tibi manet vita!
Cat 8.16	quis nunc te adibit? cui videberis bella?
Cat 8.17	quem nunc amabis? cuius esse diceris?
Cat 8.18	quem basiabis? cui labella mordebis?
Cat 8.19	at tu, Catulle, destinatus obdura.
Cat 9.1	Verani, omnibus e meis amicis
Cat 9.2	antistans mihi milibus trecentis,
Cat 9.3	venistine domum ad tuos penates
Cat 9.4	fratresque unanimos anumque matrem?
Cat 9.5	venisti! o mihi nuntii beati!
Cat 9.6	visam te incolumem audiamque Hiberum
Cat 9.7	narrantem loca, facta, nationes,
Cat 9.8	ut mos est tuus, applicansque collum
Cat 9.9	iucundum os oculosque saviabor.
Cat 9.10	o, quantum est hominum beatiorum,
Cat 9.11	quid me laetius est beatiusve?
Cat 10.1	Varus me meus ad suos amores
Cat 10.2	visum duxerat e foro otiosum,
Cat 10.3	scortillum, ut mihi tunc repente visum est,
Cat 10.4	non sane inlepidum neque invenustum.
Cat 10.5	huc ut venimus, incidere nobis
Cat 10.6	sermones varii, in quibus, quid esset
Cat 10.7	iam Bithynia, quo modo se haberet,
Cat 10.8	ecquonam mihi profuisset aere.
Cat 10.9	respondi id quod erat, nihil neque ipsis
Cat 10.10	nec praetoribus esse nec cohorti,
Cat 10.11	cur quisquam caput unctius referret,
Cat 10.12	praesertim quibus esset irrumator
Cat 10.13	praetor nec faceret pili cohortem.
Cat 10.14	at certe tamen, inquiunt, quod illic
Cat 10.15	natum dicitur esse comparasti,
Cat 10.16	ad lecticam homines. ego, ut puellae
Cat 10.17	unum me facerem beatiorem,
Cat 10.18	non, inquam, mihi tam fuit maligne,
Cat 10.19	ut, provincia quod mala incidisset,
Cat 10.20	non possem octo homines parare rectos.
Cat 10.21	at mi nullus erat neque hic neque illic
Cat 10.22	fractum qui veteris pedem grabati
Cat 10.23	in collo sibi conlocare posset.
Cat 10.24	hic illa, ut decuit cinaediorem,
Cat 10.25	quaeso, inquit, mihi, mi Catulle, paulum
Cat 10.26	istos commoda: nam volo ad Sarapim
Cat 10.27	deferri. Mane, inquii puellae,
Cat 10.28	istud quod modo dixeram, me habere,
Cat 10.29	fugit me ratio: meus sodalis
Cat 10.30	Cinna est Gaius; is sibi paravit.
Cat 10.31	verum, utrum illius an mei, quid ad me?
Cat 10.32	utor tam bene quam mihi pararim.
Cat 10.33	sed tu insulsa male et molesta vivis,
Cat 10.34	per quam non licet esse neglegentem.
Cat 11.1	Furi et Aureli, comites Catulli,
Cat 11.2	sive in extremos penetrabit Indos,
Cat 11.3	litus ut longe resonante Eoa
Cat 11.4	tunditur unda,
Cat 11.5	sive in Hyrcanos Arabasve molles,
Cat 11.6	seu Sacas sagittiferosve Parthos,
Cat 11.7	sive quae septemgeminus colorat
Cat 11.8	aequora Nilus,
Cat 11.9	sive trans altas gradietur Alpes
Cat 11.10	Caesaris visens monimenta magni,
Cat 11.11	Gallicum Rhenum, horribile aequor, ulti-
Cat 11.12	mosque Britannos,
Cat 11.13	omnia haec, quaecumque feret voluntas
Cat 11.14	caelitum, temptare simul parati,
Cat 11.15	pauca nuntiate meae puellae
Cat 11.16	non bona dicta.
Cat 11.17	cum suis vivat valeatque moechis,
Cat 11.18	quos simul complexa tenet trecentos,
Cat 11.19	nullum amans vere, sed identidem omnium
Cat 11.20	ilia rumpens;
Cat 11.21	nec meum respectet, ut ante, amorem,
Cat 11.22	qui illius culpa cecidit velut prati
Cat 11.23	ultimi flos, praetereunte postquam
Cat 11.24	tactus aratro est.
Cat 12.1	Marrucine Asini, manu sinistra
Cat 12.2	non belle uteris in ioco atque vino:
Cat 12.3	tollis lintea neglegentiorum.
Cat 12.4	hoc salsum esse putas? fugit te, inepte!
Cat 12.5	quamvis sordida res et invenusta est
Cat 12.6	non credis mihi?crede Pollioni
Cat 12.7	fratri, qui tua furta vel talento
Cat 12.8	mutari velit; est enim leporum
Cat 12.9	disertus puer ac facetiarum.
Cat 12.10	quare aut hendecasyllabos trecentos
Cat 12.11	exspecta, aut mihi linteum remitte,
Cat 12.12	quod me non movet aestimatione,
Cat 12.13	verum est mnemosynum mei sodalis.
Cat 12.14	nam sudaria Saetaba ex Hiberis
Cat 12.15	miserunt mihi muneri Fabullus
Cat 12.16	et Veranius: haec amem necesse est
Cat 12.17	et Veraniolum meum et Fabullum.
Cat 13.1	Cenabis bene, mi Fabulle, apud me
Cat 13.2	paucis, si tibi di favent, diebus,
Cat 13.3	si tecum attuleris bonam atque magnam
Cat 13.4	cenam, non sine candida puella
Cat 13.5	et vino et sale et omnibus cachinnis.
Cat 13.6	haec si, inquam, attuleris, venuste noster
Cat 13.7	cenabis bene; nam tui Catulli
Cat 13.8	plenus sacculus est aranearum.
Cat 13.9	sed contra accipies meros amores
Cat 13.10	seu quid suavius elegantiusve est:
Cat 13.11	nam unguentum dabo, quod meae puellae
Cat 13.12	donarunt Veneres Cupidinesque,
Cat 13.13	quod tu cum olfacies, deos rogabis
Cat 13.14	totum ut te faciant, Fabulle, nasum.
Cat 14.1	Ni te plus oculis meis amarem,
Cat 14.2	iucundissime Calve, munere isto
Cat 14.3	odissem te odio Vatiniano:
Cat 14.4	nam quid feci ego quidve sum locutus,
Cat 14.5	cur me tot male perderes poetis?
Cat 14.6	isti di mala multa dent clienti
Cat 14.7	qui tantum tibi misit impiorum.
Cat 14.8	quod si, ut suspicor, hoc novum ac repertum
Cat 14.9	munus dat tibi Sulla litterator,
Cat 14.10	non est mi male, sed bene ac beate,
Cat 14.11	quod non dispereunt tui labores.
Cat 14.12	di magni, horribilem et sacrum libellum,
Cat 14.13	quem tu scilicet ad tuum Catullum
Cat 14.14	misti, continuo ut die periret,
Cat 14.15	Saturnalibus, optimo dierum!
Cat 14.16	non, non hoc tibi, false, sic abibit:
Cat 14.17	nam, si luxerit, ad librariorum
Cat 14.18	curram scrinia, Caesios, Aquinos,
Cat 14.19	Suffenum, omnia colligam venena,
Cat 14.20	ac te his suppliciis remunerabor.
Cat 14.21	vos hinc interea valete, abite
Cat 14.22	illuc unde malum pedem attulistis,
Cat 14.23	saecli incommoda, pessimi poetae.
Cat 14a.0	Labeled 14b in the print.
Cat 14a.1	Si qui forte mearum ineptiarum
Cat 14a.2	lectores eritis manusque vestras
Cat 14a.3	non horrebitis admovere nobis,
Cat 15.1	Commendo tibi me ac meos amores,
Cat 15.2	Aureli. Veniam peto pudentem,
Cat 15.3	ut, si quicquam animo tuo cupisti
Cat 15.4	quod castum expeteres et integellum,
Cat 15.5	conserves puerum mihi pudice,
Cat 15.6	non dico a populo: nihil veremur
Cat 15.7	istos qui in platea modo huc modo illuc
Cat 15.8	in re praetereunt sua occupati;
Cat 15.9	verum a te metuo tuoque pene
Cat 15.10	infesto pueris bonis malisque.
Cat 15.11	quem tu qua libet, ut libet moveto
Cat 15.12	quantum vis, ubi erit foris paratum:
Cat 15.13	hunc unum excipio, ut puto, pudenter.
Cat 15.14	quod si te mala mens furorque vecors
Cat 15.15	in tantam impulerit, sceleste, culpam,
Cat 15.16	ut nostrum insidiis caput lacessas,
Cat 15.17	ah tum te miserum malique fati,
Cat 15.18	quem attractis pedibus patente porta
Cat 15.19	percurrent raphanique mugilesque.
Cat 16.1	Pedicabo ego vos et irrumabo,
Cat 16.2	Aureli pathice et cinaede Furi,
Cat 16.3	qui me ex versiculis meis putastis,
Cat 16.4	quod sunt molliculi, parum pudicum.
Cat 16.5	nam castum esse decet pium poetam
Cat 16.6	ipsum, versiculos nihil necesse est,
Cat 16.7	qui tum denique habent salem ac leporem,
Cat 16.8	si sunt molliculi ac parum pudici
Cat 16.9	et quod pruriat incitare possunt,
Cat 16.10	non dico pueris, sed his pilosis,
Cat 16.11	qui duros nequeunt movere lumbos.
Cat 16.12	vos quod milia multa basiorum
Cat 16.13	legistis, male me marem putatis?
Cat 16.14	pedicabo ego vos et irrumabo.
Cat 17.1	O Colonia, quae cupis ponte ludere longo,
Cat 17.2	et salire paratum habes, sed vereris inepta
Cat 17.3	crura ponticuli assulis stantis in redivivis,
Cat 17.4	ne supinus eat cavaque in palude recumbat,
Cat 17.5	sic tibi bonus ex tua pons libidine fiat,
Cat 17.6	in quo vel Salisubsili sacra suscipiantur,
Cat 17.7	munus hoc mihi maximi da, Colonia, risus.
Cat 17.8	quendam municipem meum de tuo volo ponte
Cat 17.9	ire praecipitem in lutum per caputque pedesque,
Cat 17.10	verum totius ut lacus putidaeque paludis
Cat 17.11	lividissima maximeque est profunda vorago.
Cat 17.12	insulsissimus est homo, nec sapit pueri instar
Cat 17.13	bimuli tremula patris dormientis in ulna:
Cat 17.14	cui cum sit viridissimo nupta flore puella
Cat 17.15	(et puella tenellulo delicatior haedo,
Cat 17.16	adservanda nigerrimis diligentius uvis),
Cat 17.17	ludere hanc sinit ut libet, nec pili facit uni,
Cat 17.18	nec se sublevat ex sua parte, sed velut alnus
Cat 17.19	in fossa Liguri iacet suppernata securi,
Cat 17.20	tantundem omnia sentiens quam si nulla sit usquam
Cat 17.21	talis iste meus stupor nil videt, nihil audit,
Cat 17.22	ipse qui sit, utrum sit an non sit, id quoque nescit.
Cat 17.23	nunc eum volo de tuo ponte mittere pronum,
Cat 17.24	si pote stolidum repente excitare veternum
Cat 17.25	et supinum animum in gravi derelinquere caeno,
Cat 17.26	ferream ut soleam tenaci in voragine mula.
Cat 21.0	Desunt cetera 18-20.
Cat 21.1	Aureli, pater esuritionum,
Cat 21.2	non harum modo, sed quot aut fuerunt
Cat 21.3	aut sunt aut aliis erunt in annis,
Cat 21.4	pedicare cupis meos amores.
Cat 21.5	nec clam: nam simul es, iocaris una,
Cat 21.6	haerens ad latus omnia experiris.
Cat 21.7	frustra: nam insidias mihi instruentem
Cat 21.8	tangam te prior irrumatione.
Cat 21.9	atque id si faceres satur, tacerem:
Cat 21.10	nunc ipsum id doleo, quod esurire,
Cat 21.11	ah me me, puer et sitire discet.
Cat 21.12	quare desine, dum licet pudico,
Cat 21.13	ne finem facias, sed irrumatus.
Cat 22.1	Suffenus iste, Vare, quem probe nosti,
Cat 22.2	homo est venustus et dicax et urbanus,
Cat 22.3	idemque longe plurimos facit versus.
Cat 22.4	puto esse ego illi milia aut decem aut plura
Cat 22.5	perscripta, nec sic, ut fit, in palimpsesto
Cat 22.6	relata: chartae regiae, novi libri,
Cat 22.7	novi umbilici, lora, rubra membrana,
Cat 22.8	derecta plumbo et pumice omnia aequata.
Cat 22.9	haec cum legas tu, bellus ille et urbanus
Cat 22.10	Suffenus unus caprimulgus aut fossor
Cat 22.11	rursus videtur: tantum abhorret ac mutat.
Cat 22.12	hoc quid putemus esse? Qui modo scurra
Cat 22.13	aut si quid hac re tritius videbatur,
Cat 22.14	idem infaceto est infacetior rure
Cat 22.15	simul poemata attigit, neque idem unquam
Cat 22.16	aeque est beatus ac poema cum scribit:
Cat 22.17	tam gaudet in se tamque se ipse miratur.
Cat 22.18	nimirum idem omnes fallimur, neque est quisquam
Cat 22.19	quem non in aliqua re videre Suffenum
Cat 22.20	possis. Suus cuique attributus est error,
Cat 22.21	sed non videmus manticae quod in tergo est.
Cat 23.1	Furi, cui neque servus est neque arca
Cat 23.2	nec cimex neque araneus neque ignis,
Cat 23.3	verum est et pater et noverca, quorum
Cat 23.4	dentes vel silicem comesse possunt,
Cat 23.5	est pulchre tibi cum tuo parente
Cat 23.6	et cum coniuge lignea parentis.
Cat 23.7	nec mirum: bene nam valetis omnes,
Cat 23.8	pulchre concoquitis, nihil timetis,
Cat 23.9	non incendia, non graves ruinas,
Cat 23.10	non furta impia, non dolos veneni,
Cat 23.11	non casus alios periculorum.
Cat 23.12	atqui corpora sicciora cornu
Cat 23.13	aut si quid magis aridum est habetis
Cat 23.14	sole et frigore et esuritione.
Cat 23.15	quare non tibi sit bene ac beate?
Cat 23.16	a te sudor abest, abest saliva,
Cat 23.17	mucusque et mala pituita nasi.
Cat 23.18	hanc ad munditiem adde mundiorem,
Cat 23.19	quod culus tibi purior salillo est,
Cat 23.20	nec toto decies cacas in anno;
Cat 23.21	atque id durius est faba et lapillis,
Cat 23.22	quod tu si manibus teras fricesque,
Cat 23.23	non unquam digitum inquinare possis.
Cat 23.24	haec tu commoda tam beata, Furi,
Cat 23.25	noli spernere nec putare parvi,
Cat 23.26	et sestertia quae soles precari
Cat 23.27	centum desine: nam satis beatu's.
Cat 24.1	O qui flosculus es Iuventiorum,
Cat 24.2	non horum modo, sed quot aut fuerunt
Cat 24.3	aut posthac aliis erunt in annis,
Cat 24.4	mallem divitias Midae dedisses
Cat 24.5	isti cui neque servus est neque arca,
Cat 24.6	quam sic te sineres ab illo amari.
Cat 24.7	quid? Non est homo bellus? inquies. est:
Cat 24.8	sed bello huic neque servus est neque arca.
Cat 24.9	hoc tu quam libet abice elevaque:
Cat 24.10	nec servum tamen ille habet neque arcam.
Cat 25.1	Cinaede Thalle, mollior cuniculi capillo
Cat 25.2	vel anseris medullula vel imula auricilla
Cat 25.3	vel pene languido senis situque araneoso,
Cat 25.4	idemque Thalle turbida rapacior procella,
Cat 25.5	cum † diva mulier aries ostendit oscitantes,
Cat 25.6	remitte pallium mihi meum quod involasti
Cat 25.7	sudariumque Saetabum catagraphosque Thynos,
Cat 25.8	inepte, quae palam soles habere tanquam avita.
Cat 25.9	quae nunc tuis ab unguibus reglutina et remitte,
Cat 25.10	ne laneum latusculum manusque mollicellas
Cat 25.11	inusta turpiter tibi flagella conscribillent,
Cat 25.12	et insolenter aestues velut minuta magno
Cat 25.13	deprensa navis in mari vesaniente vento.
Cat 26.1	Furi, villula vestra non ad Austri
Cat 26.2	flatus opposita est neque ad Favoni
Cat 26.3	nec saevi Boreae aut Apeliotae,
Cat 26.4	verum ad milia quindecim et ducentos.
Cat 26.5	o ventum horribilem atque pestilentem!
Cat 27.1	Minister vetuli puer Falerni
Cat 27.2	inger mi calices amariores,
Cat 27.3	ut lex Postumiae iubet magistrae,
Cat 27.4	ebrioso acino ebriosioris.
Cat 27.5	at vos quo libet hinc abite, lymphae,
Cat 27.6	vini pernicies, et ad severos
Cat 27.7	migrate: hic merus est Thyonianus.
Cat 28.1	Pisonis comites, cohors inanis
Cat 28.2	aptis sarcinulis et expeditis,
Cat 28.3	Verani optime tuque mi Fabulle,
Cat 28.4	quid rerum geritis? Satisne cum isto
Cat 28.5	vappa frigoraque et famem tulistis?
Cat 28.6	ecquidnam in tabulis patet lucelli
Cat 28.7	expensum, ut mihi, qui meum secutus
Cat 28.8	praetorem refero datum lucello,
Cat 28.9	o Memmi, bene me ac diu supinum
Cat 28.10	tota ista trabe lentus irrumasti.
Cat 28.11	sed, quantum video, pari fuistis
Cat 28.12	casu: nam nihilo minore verpa
Cat 28.13	farti estis. pete nobiles amicos.
Cat 28.14	at vobis mala multa di deaeque
Cat 28.15	dent, opprobria Romuli Remique.
Cat 29.1	Quis hoc potest videre, quis potest pati,
Cat 29.2	nisi impudicus et vorax et aleo,
Cat 29.3	Mamurram habere quod comata Gallia
Cat 29.4	habebat ante et ultima Britannia?
Cat 29.5	Cinaede Romule, haec videbis et feres?
Cat 29.6	et ille nunc superbus et superfluens
Cat 29.7	perambulabit omnium cubilia
Cat 29.8	ut albulus columbus aut Adoneus?
Cat 29.9	cinaede Romule, haec videbis et feres?
Cat 29.10	es impudicus et vorax et aleo.
Cat 29.11	eone nomine, imperator unice,
Cat 29.12	fuisti in ultima occidentis insula,
Cat 29.13	ut ista vestra diffututa mentula
Cat 29.14	ducenties comesset aut trecenties?
Cat 29.15	quid est alid sinistra liberalitas?
Cat 29.16	parum expatravit an parum elluatus est?
Cat 29.17	paterna prima lancinata sunt bona;
Cat 29.18	secunda praeda Pontica; inde tertia
Cat 29.19	Hibera, quam scit amnis aurifer Tagus.
Cat 29.20	nunc Galliae timetur et Britanniae.
Cat 29.21	quid hunc malum fovetis? aut quid hic potest
Cat 29.22	nisi uncta devorare patrimonia?
Cat 29.23	eone nomine † urbis opulentissime
Cat 29.24	socer generque, perdidistis omnia?
Cat 30.1	Alfene immemor atque unanimis false sodalibus,
Cat 30.2	iam te nil miseret, dure, tui dulcis amiculi?
Cat 30.3	iam me prodere, iam non dubitas fallere, perfide?
Cat 30.4	nec facta impia fallacum hominum caelicolis placent;
Cat 30.5	quae tu neglegis, ac me miserum deseris in malis.
Cat 30.6	eheu, quid faciant, dic, homines, cuive habeant fidem?
Cat 30.7	certe tute iubebas animam tradere, inique, me
Cat 30.8	inducens in amorem, quasi tuta omnia mi forent.
Cat 30.9	idem nunc retrahis te ac tua dicta omnia factaque
Cat 30.10	ventos irrita ferre ac nebulas aerias sinis.
Cat 30.11	si tu oblitus es, at di meminerunt, meminit Fides,
Cat 30.12	quae te ut paeniteat postmodo facti faciet tui.
Cat 31.1	Paene insularum, Sirmio, insularumque
Cat 31.2	ocelle, quascumque in liquentibus stagnis
Cat 31.3	marique vasto fert uterque Neptunus,
Cat 31.4	quam te libenter quamque laetus inviso,
Cat 31.5	vix mi ipse credens Thyniam atque Bithynos
Cat 31.6	liquisse campos et videre te in tuto!
Cat 31.7	o quid solutis est beatius curis,
Cat 31.8	cum mens onus reponit, ac peregrino
Cat 31.9	labore fessi venimus larem ad nostrum
Cat 31.10	desideratoque adquiescimus lecto?
Cat 31.11	hoc est quod unum est pro laboribus tantis.
Cat 31.12	salve, o venusta Sirmio, atque ero gaude;
Cat 31.13	gaudete vosque, o Lydiae lacus undae;
Cat 31.14	ridete, quidquid est domi cachinnorum.
Cat 32.1	Amabo, mea dulcis Ipsithilla,
Cat 32.2	meae deliciae, mei lepores,
Cat 32.3	iube ad te veniam meridiatum.
Cat 32.4	et si iusseris illud, adiuvato,
Cat 32.5	ne quis liminis obseret tabellam,
Cat 32.6	neu tibi libeat foras abire;
Cat 32.7	sed domi maneas paresque nobis
Cat 32.8	novem continuas fututiones.
Cat 32.9	verum, si quid ages, statim iubeto:
Cat 32.10	nam pransus iaceo et satur supinus
Cat 32.11	pertundo tunicamque palliumque.
Cat 33.1	O furum optime balneariorum
Cat 33.2	Vibenni pater, et cinaede fili,
Cat 33.3	(nam dextra pater inquinatiore,
Cat 33.4	culo filius est voraciore)
Cat 33.5	cur non exsilium malasque in oras
Cat 33.6	itis, quandoquidem patris rapinae
Cat 33.7	notae sunt populo, et natis pilosas,
Cat 33.8	fili, non potes asse venditare?
Cat 34.1	Dianae sumus in fide
Cat 34.2	puellae et pueri integri;
Cat 34.3	Dianam pueri integri
Cat 34.4	puellaeque canamus.
Cat 34.5	O Latonia, maximi
Cat 34.6	magna progenies Iovis,
Cat 34.7	quam mater prope Deliam
Cat 34.8	deposivit olivam,
Cat 34.9	montium domina ut fores
Cat 34.10	silvarumque virentium
Cat 34.11	saltuumque reconditorum
Cat 34.12	amniumque sonantum;
Cat 34.13	tu Lucina dolentibus
Cat 34.14	Iuno dicta puerperis,
Cat 34.15	tu potens Trivia et notho es
Cat 34.16	dicta lumine Luna.
Cat 34.17	tu cursu, dea, menstruo
Cat 34.18	metiens iter annuum
Cat 34.19	rustica agricolae bonis
Cat 34.20	tecta frugibus exples.
Cat 34.21	sis quocumque tibi placet
Cat 34.22	sancta nomine, Romulique,
Cat 34.23	antique ut solita es, bona
Cat 34.24	sospites ope gentem.
Cat 35.1	Poetae tenero, meo sodali
Cat 35.2	velim Caecilio, papyre, dicas,
Cat 35.3	Veronam veniat, Novi relinquens
Cat 35.4	Comi moenia Lariumque litus:
Cat 35.5	nam quasdam volo cogitationes
Cat 35.6	amici accipiat sui meique.
Cat 35.7	quare, si sapiet, viam vorabit,
Cat 35.8	quamvis candida milies puella
Cat 35.9	euntem revocet manusque collo
Cat 35.10	ambas iniciens roget morari,
Cat 35.11	quae nunc, si mihi vera nuntiantur,
Cat 35.12	illum deperit impotente amore:
Cat 35.13	nam quo tempore legit incohatam
Cat 35.14	Dindymi dominam, ex eo misellae
Cat 35.15	ignes interiorem edunt medullam.
Cat 35.16	ignosco tibi, Sapphica puella
Cat 35.17	Musa doctior: est enim venuste
Cat 35.18	Magna Caecilio incohata Mater.
Cat 36.1	Annales Volusi, cacata charta,
Cat 36.2	votum solvite pro mea puella:
Cat 36.3	nam sanctae Veneri Cupidinique
Cat 36.4	vovit, si sibi restitutus essem
Cat 36.5	desissemque truces vibrare iambos,
Cat 36.6	electissima pessimi poetae
Cat 36.7	scripta tardipedi deo daturam
Cat 36.8	infelicibus ustilanda lignis.
Cat 36.9	et hoc pessima se puella vidit
Cat 36.10	iocose lepide vovere divis.
Cat 36.11	nunc, o caeruleo creata ponto,
Cat 36.12	quae sanctum Idalium Uriosque apertos,
Cat 36.13	quaeque Ancona Cnidumque harundinosam
Cat 36.14	colis, quaeque Amathunta, quaeque Golgos,
Cat 36.15	quaeque Durrachium Hadriae tabernam,
Cat 36.16	acceptum face redditumque votum,
Cat 36.17	si non inlepidum neque invenustum est.
Cat 36.18	at vos interea venite in ignem,
Cat 36.19	pleni ruris et inficetiarum
Cat 36.20	Annales Volusi, cacata charta.
Cat 37.1	Salax taberna vosque contubernales,
Cat 37.2	a pilleatis nona fratribus pila,
Cat 37.3	solis putatis esse mentulas vobis,
Cat 37.4	solis licere quidquid est puellarum
Cat 37.5	confutuere et putare ceteros hircos?
Cat 37.6	an, continenter quod sedetis insulsi
Cat 37.7	centum an ducenti, non putatis ausurum
Cat 37.8	me una ducentos irrumare sessores?
Cat 37.9	atqui putate: namque totius vobis
Cat 37.10	frontem tabernae sopionibus scribam.
Cat 37.11	puella nam mi, quae meo sinu fugit,
Cat 37.12	amata tantum quantum amabitur nulla,
Cat 37.13	pro qua mihi sunt magna bella pugnata,
Cat 37.14	consedit istic. hanc boni beatique
Cat 37.15	omnes amatis, et quidem, quod indignum est,
Cat 37.16	omnes pusilli et semitarii moechi:
Cat 37.17	tu praeter omnes une de capillatis,
Cat 37.18	cuniculosae Celtiberiae fili,
Cat 37.19	Egnati, opaca quem bonum facit barba
Cat 37.20	et dens Hibera defricatus urina.
Cat 38.1	Male est, Cornifici, tuo Catullo,
Cat 38.2	male est me hercule ei et laboriose,
Cat 38.3	et magis magis in dies et horas.
Cat 38.4	quem tu, quod minimum facillimumque est,
Cat 38.5	qua solatus es adlocutione?
Cat 38.6	irascor tibi.sic meos amores?
Cat 38.7	paulum quid libet adlocutionis,
Cat 38.8	maestius lacrimis Simonideis.
Cat 39.1	Egnatius, quod candidos habet dentes,
Cat 39.2	renidet usque quaque.si ad rei ventum est
Cat 39.3	subsellium, cum orator excitat fletum,
Cat 39.4	renidet ille. si ad pii rogum fili
Cat 39.5	lugetur, orba cum flet unicum mater,
Cat 39.6	renidet ille.quidquid est, ubicumque est,
Cat 39.7	quodcumque agit, renidet.hunc habet morbum
Cat 39.8	neque elegantem, ut arbitror, neque urbanum.
Cat 39.9	quare monendum est te mihi, bone Egnati.
Cat 39.10	si urbanus esses aut Sabinus aut Tiburs
Cat 39.11	aut parcus Umber aut obesus Etruscus
Cat 39.12	aut Lanuvinus ater atque dentatus
Cat 39.13	aut Transpadanus, ut meos quoque attingam,
Cat 39.14	aut qui libet qui puriter lavit dentes,
Cat 39.15	tamen renidere usque quaque te nollem;
Cat 39.16	nam risu inepto res ineptior nulla est.
Cat 39.17	nunc Celtiber es: Celtiberia in terra,
Cat 39.18	quod quisque minxit, hoc sibi solet mane
Cat 39.19	dentem atque russam defricare gingivam,
Cat 39.20	ut quo iste vester expolitior dens est,
Cat 39.21	hoc te amplius bibisse praedicet loti.
Cat 40.1	Quaenam te mala mens, miselle Ravide,
Cat 40.2	agit praecipitem in meos iambos?
Cat 40.3	quis deus tibi non bene advocatus
Cat 40.4	vecordem parat excitare rixam?
Cat 40.5	an ut pervenias in ora vulgi?
Cat 40.6	quid vis? qua libet esse notus optas?
Cat 40.7	eris, quandoquidem meos amores
Cat 40.8	cum longa voluisti amare poena.
Cat 41.1	Ameana puella defututa
Cat 41.2	tota milia me decem poposcit,
Cat 41.3	ista turpiculo puella naso,
Cat 41.4	decoctoris amica Formiani.
Cat 41.5	propinqui, quibus est puella curae,
Cat 41.6	amicos medicosque convocate:
Cat 41.7	non est sana puella, nec rogare
Cat 41.8	qualis sit solet aes imaginosum.
Cat 42.1	Adeste, hendecasyllabi, quot estis
Cat 42.2	omnes undique, quotquot estis omnes.
Cat 42.3	iocum me putat esse moecha turpis
Cat 42.4	et negat mihi vestra reddituram
Cat 42.5	pugillaria, si pati potestis.
Cat 42.6	persequamur eam, et reflagitemus.
Cat 42.7	quae sit quaeritis? illa quam videtis
Cat 42.8	turpe incedere, mimice ac moleste
Cat 42.9	ridentem catuli ore Gallicani.
Cat 42.10	circumsistite eam, et reflagitate:
Cat 42.11	moecha putida, redde codicillos,
Cat 42.12	redde, putida moecha, codicillos.
Cat 42.13	non assis facis? o lutum, lupanar,
Cat 42.14	aut si perditius potes quid esse.
Cat 42.15	sed non est tamen hoc satis putandum.
Cat 42.16	quod si non aliud potest, ruborem
Cat 42.17	ferreo canis exprimamus ore.
Cat 42.18	conclamate iterum altiore voce
Cat 42.19	moecha putida, redde codicillos,
Cat 42.20	redde, putida moecha, codicillos.
Cat 42.21	sed nil proficimus, nihil movetur.
Cat 42.22	mutanda est ratio modusque nobis,
Cat 42.23	si quid proficere amplius potestis,
Cat 42.24	pudica et proba, redde codicillos.
Cat 43.1	Salve, nec minimo puella naso
Cat 43.2	nec bello pede nec nigris ocellis
Cat 43.3	nec longis digitis nec ore sicco
Cat 43.4	nec sane nimis elegante lingua,
Cat 43.5	decoctoris amica Formiani.
Cat 43.6	ten provincia narrat esse bellam?
Cat 43.7	tecum Lesbia nostra comparatur?
Cat 43.8	o saeclum insapiens et infacetum!
Cat 44.1	O funde noster seu Sabine seu Tiburs
Cat 44.2	(nam te esse Tiburtem autumant quibus non est
Cat 44.3	cordi Catullum laedere: at quibus cordi est
Cat 44.4	quovis Sabinum pignore esse contendunt),
Cat 44.5	sed seu Sabine sive verius Tiburs,
Cat 44.6	fui libenter in tua suburbana
Cat 44.7	villa malamque pectore expuli tussim,
Cat 44.8	non immerenti quam mihi meus venter,
Cat 44.9	dum sumptuosas adpeto, dedit, cenas.
Cat 44.10	nam, Sestianus dum volo esse conviva,
Cat 44.11	orationem in Antium petitorem
Cat 44.12	plenam veneni et pestilentiae legi.
Cat 44.13	hic me gravido frigida et frequens tussis
Cat 44.14	quassavit usque dum in tuum sinum fugi
Cat 44.15	et me recuravi otioque et urtica.
Cat 44.16	quare refectus maximas tibi grates
Cat 44.17	ago, meum quod non es ulta peccatum.
Cat 44.18	nec deprecor iam, si nefaria scripta
Cat 44.19	Sesti recepso, quin gravedinem et tussim
Cat 44.20	non mi, sed ipsi Sestio ferat frigus,
Cat 44.21	qui tunc vocat me cum malum librum legi.
Cat 45.1	Acmen Septimius suos amores
Cat 45.2	tenens in gremio mea, inquit, Acme,
Cat 45.3	ni te perdite amo atque amare porro
Cat 45.4	omnes sum adsidue paratus annos
Cat 45.5	quantum qui pote plurimum perire,
Cat 45.6	solus in Libya Indiaque tosta
Cat 45.7	caesio veniam obvius leoni.
Cat 45.8	hoc ut dixit, Amor, sinistra ut ante,
Cat 45.9	dextra sternuit adprobationem.
Cat 45.10	at Acme leviter caput reflectens
Cat 45.11	et dulcis pueri ebrios ocellos
Cat 45.12	illo purpureo ore saviata
Cat 45.13	sic, inquit, mea vita, Septimille,
Cat 45.14	huic uni domino usque serviamus,
Cat 45.15	ut multo mihi maior acriorque
Cat 45.16	ignis mollibus ardet in medullis.
Cat 45.17	hoc ut dixit, Arnor, sinistra ut ante,
Cat 45.18	dextra sternuit adprobationem.
Cat 45.19	nunc ab auspicio bono profecti
Cat 45.20	mutuis animis amant amantur.
Cat 45.21	unam Septimius misellus Acmen
Cat 45.22	mavult quam Syrias Britanniasque:
Cat 45.23	uno in Septimio fidelis Acme
Cat 45.24	facit delicias libidinesque.
Cat 45.25	quis ullos homines beatiores
Cat 45.26	vidit, quis Venerem auspicatiorem?
Cat 46.1	Iam ver egelidos refert tepores,
Cat 46.2	iam caeli furor aequinoctialis
Cat 46.3	iucundis Zephyri silescit auris.
Cat 46.4	linquantur Phrygii, Catulle, campi
Cat 46.5	Nicaeaeque ager uber aestuosae:
Cat 46.6	ad claras Asiae volemus urbes.
Cat 46.7	iam mens praetrepidans avet vagari,
Cat 46.8	iam laeti studio pedes vigescunt.
Cat 46.9	o dulces comitum valete coetus,
Cat 46.10	longe quos simul a domo profectos
Cat 46.11	diversae variae viae reportant.
Cat 47.1	Porci et Socration, duae sinistrae
Cat 47.2	Pisonis, scabies famesque mundi,
Cat 47.3	vos Veraniolo meo et Fabullo
Cat 47.4	verpus praeposuit Priapus ille?
Cat 47.5	vos convivia lauta sumptuose
Cat 47.6	de die facitis? mei sodales
Cat 47.7	quaerunt in trivio vocationes?
Cat 48.1	Mellitos oculos tuos, Iuventi,
Cat 48.2	siquis me sinat usque basiare,
Cat 48.3	usque ad milia basiem trecenta,
Cat 48.4	nec unquam videar satur futurus,
Cat 48.5	non si densior aridis aristis
Cat 48.6	sit nostrae seges osculationis.
Cat 49.1	Disertissime Romuli nepotum,
Cat 49.2	quot sunt quotque fuere, Marce Tulli,
Cat 49.3	quotque post aliis erunt in annis,
Cat 49.4	gratias tibi maximas Catullus
Cat 49.5	agit pessimus omnium poeta,
Cat 49.6	tanto pessimus omnium poeta
Cat 49.7	quanto tu optimus omnium patronus.
Cat 50.1	Hesterno, Licini, die otiosi
Cat 50.2	multum lusimus in meis tabellis,
Cat 50.3	ut convenerat esse delicatos.
Cat 50.4	scribens versiculos uterque nostrum
Cat 50.5	ludebat numero modo hoc modo illoc,
Cat 50.6	reddens mutua per iocum atque vinum.
Cat 50.7	atque illinc abii tuo lepore
Cat 50.8	incensus, Licini, facetiisque,
Cat 50.9	ut nec me miserum cibus iuvaret,
Cat 50.10	nec somnus tegeret quiete ocellos,
Cat 50.11	sed toto indomitus furore lecto
Cat 50.12	versarer cupiens videre lucem,
Cat 50.13	ut tecum loquerer simulque ut essem.
Cat 50.14	at defessa labore membra postquam
Cat 50.15	semimortua lectulo iacebant,
Cat 50.16	hoc, iucunde, tibi poema feci,
Cat 50.17	ex quo perspiceres meum dolorem.
Cat 50.18	nunc audax cave sis, precesque nostras,
Cat 50.19	oramus, cave despuas, ocelle,
Cat 50.20	ne poenas Nemesis reposcat a te.
Cat 50.21	est vehemens dea: laedere hanc caveto.
Cat 51.1	Ille mi par esse deo videtur,
Cat 51.2	ille, si fas est, superare divos
Cat 51.3	qui sedens adversus identidem te
Cat 51.4	spectat et audit
Cat 51.5	dulce ridentem, misero quod omnis
Cat 51.6	eripit sensus mihi: nam simul te,
Cat 51.7	Lesbia, adspexi, nihil est super mi
Cat 51.9	lingua sed torpet, tenuis sub artus
Cat 51.10	flamma demanat, sonitu suopte
Cat 51.11	tintinant aures, gemina teguntur
Cat 51.12	lumina nocte.
Cat 51.13	otium, Catulle, tibi molestum est: Lines 13-16 are labeled as poem 51a or 51b in some editions. Merrill does not make that distinction.
Cat 51.14	otio exsultas nimiumque gestis.
Cat 51.15	otium et reges prius et beatas
Cat 51.16	perdidit urbes.
Cat 52.1	Quid est, Catulle? quid moraris emori?
Cat 52.2	sella in curuli struma Nonius sedet,
Cat 52.3	per consulatum perierat Vatinius:
Cat 52.4	quid est, Catulle? quid moraris emori?
Cat 53.1	Risi nescio quem modo e corona,
Cat 53.2	qui, cum mirifice Vatiniana
Cat 53.3	meus crimina Calvus explicasset,
Cat 53.4	admirans ait haec manusque tollens
Cat 53.5	di magni, salaputium disertum!
Cat 54.1	Othonis caput oppido est pusillum,
Cat 54.2	Lacunam proposuit Merrill; MSS have 50.16-17
Cat 54.2	et eri rustica semilauta crura,
Cat 54.3	subtile et leve peditum Libonis,
Cat 54.4	si non omnia, displicere vellem
Cat 54.5	tibi et Fuficio, seni recocto
Cat 54.6	irascere iterum meis iambis Lines 6-7 (with or without a gap preceding) are labeled as 54a or 54b in some editions.
Cat 54.7	immerentibus, unice imperator.
Cat 55.1	Oramus, si forte non molestum est,
Cat 55.2	demonstres ubi sint tuae tenebrae.
Cat 55.3	te campo quaesivimus minore,
Cat 55.4	te in circo, te in omnibus libellis,
Cat 55.5	te in templo summi Iovis sacrato.
Cat 55.6	in Magni simul ambulatione
Cat 55.7	femellas omnes, amice, prendi,
Cat 55.8	quas vultu vidi tamen serenas.
Cat 55.9	† A velte sic ipse flagitabam:
Cat 55.10	camerium mihi, pessimae puellae!
Cat 55.11	quaedam inquit nudum † reduc †
Cat 55.12	en hic in roseis latet papillis.
Cat 55.13	sed te iam ferre Herculi labos est:
Cat 55.23	Non custos si fingar ille Cretum, Lines 23-32 are labeled as 58b in the print edition but are presented as part of poem 55 here.
Cat 55.24	non si Pegaseo ferar volatu,
Cat 55.25	non Ladas ego pinnipesve Perseus,
Cat 55.26	non Rhesi niveae citaeque bigae:
Cat 55.27	adde huc plumipedes volatilesque,
Cat 55.28	ventorumque simul require cursum,
Cat 55.29	quos vinctos, Cameri, mihi dicares:
Cat 55.30	defessus tamen omnibus medullis
Cat 55.31	et multis langoribus peresus
Cat 55.32	essem te mihi, amice, quaeritando.
Cat 55.14	tanto ten fastu negas, amice?
Cat 55.15	dic nobis ubi sis futurus, ede
Cat 55.16	audacter, committe, crede luci.
Cat 55.17	nunc te lacteolae tenent puellae?
Cat 55.18	si linguam clauso tenes in ore,
Cat 55.19	fructus proicies amoris omnes:
Cat 55.20	verbosa gaudet Venus loquella.
Cat 55.21	vel vi vis, licet obseres palatum,
Cat 55.22	dum veri sis particeps amoris.
Cat 56.1	O rem ridiculam, Cato, et iocosam
Cat 56.2	dignamque auribus et tuo cachinno.
Cat 56.3	ride, quidquid amas, Cato, Catullum:
Cat 56.4	res est ridicula et nimis iocosa.
Cat 56.5	deprendi modo pupulum puellae
Cat 56.6	trusantem: hunc ego, si placet Dionae,
Cat 56.7	pro telo rigida mea cecidi.
Cat 57.1	Pulchre convenit improbis cinaedis,
Cat 57.2	Mamurrae pathicoque Caesarique.
Cat 57.3	nec mirum: maculae pares utrisque,
Cat 57.4	urbana altera et illa Formiana,
Cat 57.5	impressae resident nec eluentur:
Cat 57.6	morbosi pariter gemelli utrique,
Cat 57.7	uno in lecticulo erudituli ambo,
Cat 57.8	non hic quam ille magis vorax adulter,
Cat 57.9	rivales socii puellularum:
Cat 57.10	pulchre convenit improbis cinaedis.
Cat 58.1	Caeli, Lesbia nostra, Lesbia illa,
Cat 58.2	illa Lesbia, quam Catullus unam
Cat 58.3	plus quam se atque suos amavit omnes,
Cat 58.4	nunc in quadriviis et angiportis
Cat 58.5	glubit magnanimi Remi nepotes.
Cat 58b.1	Non custos si fingar ille Cretum,
Cat 58b.2	non si Pegaseo ferar volatu,
Cat 58b.3	non Ladas ego pinnipesve Perseus,
Cat 58b.4	non Rhesi niveae citaeque bigae:
Cat 58b.5	adde huc plumipedes volatilesque,
Cat 58b.6	ventorumque simul require cursum,
Cat 58b.7	quos vinctos, Cameri, mihi dicares:
Cat 58b.8	defessus tamen omnibus medullis
Cat 58b.9	et multis langoribus peresus
Cat 58b.10	essem te mihi, amice, quaeritando. -->
Cat 59.1	Bononiensis Rufa Rufulum fellat,
Cat 59.2	uxor Meneni, saepe quam in sepulcretis
Cat 59.3	vidistis ipso rapere de rogo cenam,
Cat 59.4	cum devolutum ex igne prosequens panem
Cat 59.5	ab semiraso tunderetur ustore.
Cat 60.1	Num te leaena montibus Libystinis
Cat 60.2	aut Scylla latrans infima inguinum parte
Cat 60.3	tam mente dura procreavit ac taetra,
Cat 60.4	ut supplicis vocem in novissimo casu
Cat 60.5	contemptam haberes, ah nimis fero corde?
Cat 61.1	Collis o Heliconii
Cat 61.2	cultor, Uraniae genus,
Cat 61.3	qui rapis teneram ad virum
Cat 61.4	virginem, o Hymenaee Hymen,
Cat 61.5	o Hymen Hymenaee,
Cat 61.6	cinge tempora floribus
Cat 61.7	suave olentis amaraci,
Cat 61.8	flammeum cape, laetus huc,
Cat 61.9	huc veni niveo gerens
Cat 61.10	luteum pede soccum,
Cat 61.11	excitusque hilari die
Cat 61.12	nuptialia concinens
Cat 61.13	voce carmina tinnula
Cat 61.14	pelle humum pedibus, manu
Cat 61.15	pineam quate taedam.
Cat 61.16	namque Vinia Manilo,
Cat 61.17	qualis Idalium colens
Cat 61.18	venit ad Phrygium Venus
Cat 61.19	iudicem, bona cum bona
Cat 61.20	nubet alite virgo,
Cat 61.21	floridis velut enitens
Cat 61.22	myrtus Asia ramulis,
Cat 61.23	quos hamadryades deae
Cat 61.24	ludicrum sibi rosido
Cat 61.25	nutriunt umore.
Cat 61.26	quare age huc aditum ferens
Cat 61.27	perge linquere Thespiae
Cat 61.28	rupis Aonios specus,
Cat 61.29	nympha quos super irrigat
Cat 61.30	frigerans Aganippe,
Cat 61.31	ac domum dominam voca
Cat 61.32	coniugis cupidam novi,
Cat 61.33	mentem amore revinciens
Cat 61.34	ut tenax hedera huc et huc
Cat 61.35	arborem implicat errans.
Cat 61.36	vosque item simul, integrae
Cat 61.37	virgines, quibus advenit
Cat 61.38	par dies, agite in modum
Cat 61.39	dicite, o Hymenaee Hymen,
Cat 61.40	o Hymen Hymenaee.
Cat 61.41	ut libentius, audiens
Cat 61.42	se citarier ad suum
Cat 61.43	munus, huc aditum ferat
Cat 61.44	dux bonae Veneris, boni
Cat 61.45	coniugator amoris.
Cat 61.46	quis deus magis anxiis
Cat 61.47	est petendus amantibus?
Cat 61.48	quem colent homines magis
Cat 61.49	caelitum? o Hymenaee Hymen,
Cat 61.50	o Hymen Hymenaee.
Cat 61.51	te suis tremulus parens
Cat 61.52	invocat, tibi virgines
Cat 61.53	zonula solvunt sinus,
Cat 61.54	te timens cupida novus
Cat 61.55	captat aure maritus.
Cat 61.56	tu fero iuveni in manus
Cat 61.57	floridam ipse puellulam
Cat 61.58	dedis a gremio suae
Cat 61.59	matris, o Hymenaee Hymen,
Cat 61.60	o Hymen Hymenaee.
Cat 61.61	nil potest sine te Venus
Cat 61.62	fama quod bona comprobet
Cat 61.63	commodi capere: at potest
Cat 61.64	te volente.quis huic deo
Cat 61.65	compararier ausit?
Cat 61.66	nulla quit sine te domus
Cat 61.67	liberos dare, nec parens
Cat 61.68	stirpe nitier: at potest
Cat 61.69	te volente.quis huic deo
Cat 61.70	compararier ausit?
Cat 61.71	quae tuis careat sacris
Cat 61.72	non queat dare praesides
Cat 61.73	terra finibus: at queat
Cat 61.74	te volente.quis huic deo
Cat 61.75	compararier ausit?
Cat 61.76	claustra pandite ianuae,
Cat 61.77	virgo adest. viden ut faces
Cat 61.78	splendidas quatiunt comas?
Cat 61.83	tardet ingenuus pudor:
Cat 61.84	quem tamen magis audiens
Cat 61.85	flet quod ire necesse est.
Cat 61.86	flere desine. Non tibi, Au-
Cat 61.87	runculeia, periculum est
Cat 61.88	ne qua femina pulchrior
Cat 61.89	clarum ab Oceano diem
Cat 61.90	viderit venientem.
Cat 61.91	talis in vario solet
Cat 61.92	divitis domini hortulo
Cat 61.93	stare flos hyacinthinus.
Cat 61.94	sed moraris, abit dies:
Cat 61.95	prodeas, nova nupta.
Cat 61.96	prodeas, nova nupta, si
Cat 61.97	iam videtur, et audias
Cat 61.98	nostra verba.vide ut faces
Cat 61.99	aureas quatiunt comas:
Cat 61.100	prodeas, nova nupta.
Cat 61.101	non tuus levis in mala
Cat 61.102	deditus vir adultera
Cat 61.103	probra turpia persequens
Cat 61.104	a tuis teneris volet
Cat 61.105	secubare papillis,
Cat 61.106	lenta quin velut adsitas
Cat 61.107	vitis implicat arbores,
Cat 61.108	implicabitur in tuum
Cat 61.109	complexum.Sed abit dies:
Cat 61.110	prodeas, nova nupta.
Cat 61.111	o cubile quod omnibus
Cat 61.115	candido pede lecti,
Cat 61.116	quae tuo veniunt ero,
Cat 61.117	quanta gaudia, quac vaga
Cat 61.118	nocte, quae medio die
Cat 61.119	gaudeat! sed abit dies:
Cat 61.120	Prodeas, nova nupta.
Cat 61.121	tollite, o pueri, faces:
Cat 61.122	flammeum video venire.
Cat 61.123	ite, concinite in modum
Cat 61.124	o Hymen Hymenaee io,
Cat 61.125	o Hymen Hymenaee.
Cat 61.126	ne diu taceat procax
Cat 61.127	fescennina iocatio,
Cat 61.128	nec nuces pueris neget
Cat 61.129	desertum domini audiens
Cat 61.130	concubinus amorem.
Cat 61.131	da nuces pueris, iners
Cat 61.132	concubine: satis diu
Cat 61.133	lusisti nucibus: libet
Cat 61.134	iam servire Talasio.
Cat 61.135	concubine, nuces da.
Cat 61.136	sordebant tibi vilicae,
Cat 61.137	concubine, hodie atque heri:
Cat 61.138	nunc tuum cinerarius
Cat 61.139	tondet os. miser ah miser
Cat 61.140	concubine, nuces da.
Cat 61.141	diceris male te a tuis
Cat 61.142	unguentate glabris marite
Cat 61.143	abstinere: sed abstine.
Cat 61.144	o Hymen Hymenaee io,
Cat 61.145	o Hymen Hymenaee.
Cat 61.146	scimus haec tibi quae licent
Cat 61.147	sola cognita: sed marito
Cat 61.148	ista non eadem licent.
Cat 61.149	o Hymen Hymenaee io,
Cat 61.150	o Hymen Hymenaee.
Cat 61.151	nupta, tu quoque quae tuus
Cat 61.152	vir petet cave ne neges,
Cat 61.153	ne petitum aliunde eat.
Cat 61.154	o Hymen Hymenaee io,
Cat 61.155	o Hymen Hymenaee.
Cat 61.156	en tibi domus ut potens
Cat 61.157	et beata viri tui:
Cat 61.158	quae tibi sine serviat
Cat 61.159	(o Hymen Hymenaee io,
Cat 61.160	o Hymen Hymenaee).
Cat 61.161	usque dum tremulum movens
Cat 61.162	cana tempus anilitas
Cat 61.163	omnia omnibus adnuit.
Cat 61.164	o Hymen Hymenaee io,
Cat 61.165	o Hymen Hymenaee.
Cat 61.166	transfer omine cum bono
Cat 61.167	limen aureolos pedes,
Cat 61.168	rasilemque subi forem.
Cat 61.169	o Hymen Hymenaee io,
Cat 61.170	o Hymen Hymenaee.
Cat 61.171	adspice unus ut accubans
Cat 61.172	vir tuus Tyrio in toro
Cat 61.173	totus immineat tibi.
Cat 61.174	o Hymen Hymenaee io,
Cat 61.175	o Hymen Hymenaee.
Cat 61.176	illi non minus ac tibi
Cat 61.177	pectore uritur intimo
Cat 61.178	flamma, sed penite magis
Cat 61.179	o Hymen Hymenaee io,
Cat 61.180	o Hymen Hymenaee.
Cat 61.181	mitte bracchiolum teres,
Cat 61.182	praetextate, puellulae:
Cat 61.183	iam cubile adeat viri.
Cat 61.184	o Hymen Hymenaee io,
Cat 61.185	o Hymen Hymenaee.
Cat 61.186	o bonae senibus viris
Cat 61.187	cognitae bene feminae,
Cat 61.188	conlocate puellulam.
Cat 61.189	o Hymen Hymenaee io,
Cat 61.190	o Hymen Hymenaee.
Cat 61.191	iam licet venias, marite:
Cat 61.192	uxor in thalamo tibi est
Cat 61.193	ore floridulo nitens
Cat 61.194	alba parthenice velut
Cat 61.195	luteumve papaver.
Cat 61.196	at, marite, (ita me iuvent
Cat 61.197	caelites) nihilo minus
Cat 61.198	pulcher es, neque te Venus
Cat 61.199	neglegit. sed abit dies:
Cat 61.200	perge, ne remorare.
Cat 61.201	non diu remoratus es,
Cat 61.202	iam venis. bona te Venus
Cat 61.203	iuverit, quoniam palam
Cat 61.204	quod cupis cupis et bonum
Cat 61.205	non abscondis amorem.
Cat 61.206	ille pulveris Africi
Cat 61.207	siderumque micantium
Cat 61.208	subducat numerum prius,
Cat 61.209	qui vestri numerare vult
Cat 61.210	multa milia ludi.
Cat 61.211	ludite ut libet, et brevi
Cat 61.212	liberos date. non decet
Cat 61.213	tam vetus sine liberis
Cat 61.214	nomen esse, sed indidem
Cat 61.215	semper ingenerari.
Cat 61.216	Torquatus volo parvulus
Cat 61.217	matris e gremio suae
Cat 61.218	porrigens teneras manus
Cat 61.219	dulce rideat ad patrem
Cat 61.220	semihiante labello.
Cat 61.221	sit suo similis patri
Cat 61.222	Manlio et facile insciis
Cat 61.223	noscitetur ab omnibus
Cat 61.224	et pudicitiam suae
Cat 61.225	matris indicet ore.
Cat 61.226	talis illius a bona
Cat 61.227	matre laus genus adprobet
Cat 61.228	qualis unica ab optima
Cat 61.229	matre Telemacho manet
Cat 61.230	fama Penelopeo.
Cat 61.231	claudite ostia, virgines:
Cat 61.232	lusimus satis. at, boni
Cat 61.233	coniuges, bene vivite et
Cat 61.234	munere adsiduo valentem
Cat 61.235	exercete iuventam.
Cat 62.1	Youths
Cat 62.1	Vesper adest: iuvenes, consurgite: vesper Olympo
Cat 62.2	exspectata diu vix tandem lumina tollit.
Cat 62.3	surgere iam tempus, iam pinguis linquere mensas;
Cat 62.4	iam veniet virgo, iam dicetur hymenaeus.
Cat 62.5	Hymen O Hymenaee, Hymen ades O Hymenaee.
Cat 62.6	Maidens
Cat 62.6	cernitis, innuptae, iuvenes? consurgite contra:
Cat 62.7	nimirum Oetaeos ostendit Noctifer ignes.
Cat 62.8	sic certe est: viden ut perniciter exsiluere?
Cat 62.9	non temere exsiluere; canent quod vincere par est.
Cat 62.10	Hymen O Hymenaee, Hymen ades O Hymenaee.
Cat 62.11	Youths
Cat 62.11	non facilis nobis, aequales, palma parata est:
Cat 62.12	adspicite, innuptae secum ut meditata requirunt.
Cat 62.13	non frustra meditantur; habent memorabile quod sit.
Cat 62.14	nec mirum, penitus quae tota mente laborant.
Cat 62.15	nos alio mentes, alio divisimus aures:
Cat 62.16	iure igitur vincemur; amat victoria curam.
Cat 62.17	quare nunc animos saltem convertite vestros:
Cat 62.18	dicere iam incipient, iam respondere decebit.
Cat 62.19	Hymen o Hymenaee, Hymen ades o Hymenaee.
Cat 62.20	Maidens
Cat 62.20	Hespere, qui caelo fertur crudelior ignis?
Cat 62.21	qui natam possis complexu avellere matris,
Cat 62.22	complexu matris retinentem avellere natam
Cat 62.23	et iuveni ardenti castam donare puellam.
Cat 62.24	quid faciunt hostes capta crudelius urbe?
Cat 62.25	Hymen o Hymenaee, Hymen ades o Hymenaee.
Cat 62.26	Youths
Cat 62.26	Hespere, qui caelo lucet iucundior ignis?
Cat 62.27	qui desponsa tua firmes conubia flammma,
Cat 62.28	quae pepigere viri, pepigerunt ante parentes,
Cat 62.29	nec iunxere prius quam se tuus extulit ardor.
Cat 62.30	quid datur a divis felici optatius hora?
Cat 62.31	Hymen o Hymenaee, Hymen ades o Hymenaee.
Cat 62.32	Maidens
Cat 62.32	Hesperus e nobis, aequales, abstulit unam
Cat 62.34	Youths
Cat 62.33	namque tuo adventu vigilat custodia semper.
Cat 62.34	nocte latent fures, quos idem saepe revertens,
Cat 62.35	Hespere, mutato comprendis nomine eosdem.
Cat 62.36	at libet innuptis ficto te carpere questu.
Cat 62.37	quid tum, si carpunt tacita quem mente requirunt?
Cat 62.38	Hymen o Hymenaee, Hymen ades o Hymenaee.
Cat 62.39	Maidens
Cat 62.39	ut flos in saeptis secretus nascitur hortis,
Cat 62.40	ignotus pecori, nullo convulsus aratro,
Cat 62.41	quem mulcent aurae, firmat sol, educat imber,
Cat 62.42	multi illum pueri, multae optavere puellae;
Cat 62.43	idem cum tenui carptus defloruit ungui,
Cat 62.44	nulli illum pueri, nullae optavere puellae:
Cat 62.45	sic virgo, dum intacta manet, dum cara suis est;
Cat 62.46	cum castum amisit polluto corpore florem,
Cat 62.47	nec pueris iucunda manet nec cara puellis.
Cat 62.48	Hymen o Hymenaee, Hymen ades o Hymenaee.
Cat 62.49	Youths
Cat 62.49	ut vidua in nudo vitis quae nascitur arvo
Cat 62.50	nunquam se extollit, nunquam mitem educat uvam,
Cat 62.51	sed tenerum prono deflectens pondere corpus
Cat 62.52	iam iam contingit summum radice flagellum,
Cat 62.53	hanc nulli agricolae, nulli accoluere iuvenci;
Cat 62.54	at si forte eadem est ulmo coniuncta marito,
Cat 62.55	multi illam agricolae, multi accoluere iuvenci:
Cat 62.56	sic virgo, dum intacta manet, dum inculta senescit;
Cat 62.57	cum par conubium maturo tempore adepta est,
Cat 62.58	cara viro magis et minus est invisa parenti.
Cat 62.59	Youths and Maidens
Cat 62.59	et tu ne pugna cum tali coniuge, virgo.
Cat 62.60	non aequum est pugnare, pater cui tradidit ipse,
Cat 62.61	ipse pater cum matre, quibus parere necesse est.
Cat 62.62	virginitas non tota tua est, ex parte parentum est:
Cat 62.63	tertia pars patri, pars est data tertia matri,
Cat 62.64	tertia sola tua est.noli pugnare duobus,
Cat 62.65	qui genero sua iura simul cum dote dederunt.
Cat 62.66	Hymen o Hymenaee, Hymen ades o Hymenaee.
Cat 63.1	Super alta vectus Attis celeri rate maria
Cat 63.2	Phrygium ut nemus citato cupide pede tetigit
Cat 63.3	adiitque opaca silvis redimita loca deae,
Cat 63.4	stimulatus ibi furenti rabie, vagus animis
Cat 63.5	devolvit ili acuto sibi pondera silice.
Cat 63.6	itaque ut relicta sensit sibi membra sine viro,
Cat 63.7	etiam recente terrae sola sanguine maculans
Cat 63.8	niveis citata cepit manibus leve typanum,
Cat 63.9	typanum, tubam Cybelles, tua, mater, initia,
Cat 63.10	quatiensque terga tauri teneris cava digitis
Cat 63.11	canere haec suis adorta est tremebunda comitibus
Cat 63.12	agite ite ad alta, Gallae, Cybeles nemora simul,
Cat 63.13	simul ite, Dindymenae dominae vaga pecora,
Cat 63.14	aliena quae petentes velut exsules loca
Cat 63.15	sectam meam exsecutae duce me mihi comites
Cat 63.16	rapidum salum tulistis truculentaque pelagi
Cat 63.17	et corpus evirastis Veneris nimio odio,
Cat 63.18	hilarate erae citatis erroribus animum.
Cat 63.19	mora tarda mente cedat; simul ite, sequimini
Cat 63.20	Phrygiam ad domum Cybelles, Phrygia ad nemora deae,
Cat 63.21	ubi cymbalum sonat vox, ubi tympana reboant,
Cat 63.22	tibicen ubi canit Phryx curvo grave calamo,
Cat 63.23	ubi capita maenades vi iaciunt hederigerae,
Cat 63.24	ubi sacra sancta acutis ululatibus agitant,
Cat 63.25	ubi suevit illa divae volitare vaga cohors,
Cat 63.26	quo nos decet citatis celerare tripudiis.
Cat 63.27	simul haec comitibus Attis cecinit notha mulier,
Cat 63.28	thiasus repente linguis trepidantibus ululat,
Cat 63.29	leve tympanum remugit, cava cymbala recrepant,
Cat 63.30	viridem citus adit Idam properante pede chorus.
Cat 63.31	furibunda simul anhelans vaga vadit animam agens
Cat 63.32	comitata tympano Attis per opaca nemora dux,
Cat 63.33	veluti iuvenca vitans onus indomita iugi:
Cat 63.34	rapidae ducem secuntur Gallae properipedem.
Cat 63.35	itaque, ut domum Cybelles tetigere lassulae,
Cat 63.36	nimio e labore somnum capiunt sine Cerere.
Cat 63.37	piger his labante langore oculos sopor operit:
Cat 63.38	abit in quiete molli rabidus furor animi.
Cat 63.39	sed ubi oris aurei Sol radiantibus oculis
Cat 63.40	lustravit aethera album, sola dura, mare ferum,
Cat 63.41	pepulitque noctis umbras vegetis sonipedibus,
Cat 63.42	ibi Somnus excitam Attin fugiens citus abiit:
Cat 63.43	trepidante eum recepit dea Pasithea sinu.
Cat 63.44	ita de quiete molli rapida sine rabie
Cat 63.45	simul ipsa pectore Attis sua facta recoluit,
Cat 63.46	liquidaque mente vidit sine quis ubique foret,
Cat 63.47	animo aestuante rusum reditum ad vada tetulit.
Cat 63.48	ibi maria vasta visens lacrimantibus oculis
Cat 63.49	patriam adlocuta maesta est ita voce miseriter:
Cat 63.50	patria o mei creatrix, patria o mea genetrix,
Cat 63.51	ego quam miser relinquens, dominos ut erifugae
Cat 63.52	famuli solent, ad Idae tetuli nemora pedem,
Cat 63.53	ut apud nivem et ferarum gelida stabula forem
Cat 63.54	et earum omnia adirem furibunda latibula,
Cat 63.55	ubinam aut quibus locis te positam, patria, reor?
Cat 63.56	cupit ipsa pupula ad te sibi derigere aciem,
Cat 63.57	rabie fera carens dum breve tempus animus est.
Cat 63.58	egone a mea remota haec ferar in nemora domo?
Cat 63.59	patria, bonis, amicis, genitoribus abero?
Cat 63.60	abero foro, palaestra, stadio, et gymnasiis?
Cat 63.61	miser ah miser, querendum est etiam atque etiam, anime.
Cat 63.62	quod enim genus figurae est ego non quod obierim?
Cat 63.63	ego mulier, ego adulescens, ego ephebus, ego puer,
Cat 63.64	ego gymnasi fui flos, ego eram decus olei:
Cat 63.65	mihi ianuae frequentes, mihi limina tepida,
Cat 63.66	mihi floridis corollis redimita domus erat,
Cat 63.67	linquendum ubi esset orto mihi sole cubiculum.
Cat 63.68	ego nunc deum ministra et Cybeles famula ferar?
Cat 63.69	ego maenas, ego mei pars, ego vir sterilis ero?
Cat 63.70	ego viridis algida Idae nive amicta loca colam?
Cat 63.71	ego vitam agam sub altis Phrygiae columinibus,
Cat 63.72	ubi cerva silvicultrix, ubi aper nemorivagus?
Cat 63.73	iam iam dolet quod egi, iam iamque paenitet.
Cat 63.74	roseis ut huic labellis sonitus citus abiit
Cat 63.75	geminas deorum ad aures nova nuntia referens,
Cat 63.76	ibi iuncta iuga resoluens Cybele leonibus
Cat 63.77	laevumque pecoris hostem stimulans ita loquitur.
Cat 63.78	Agedum, inquit, age ferox i, fac ut hunc furor agitet,
Cat 63.79	fac uti furoris ictu reditum in nemora ferat,
Cat 63.80	mea libere nimis qui fugere imperia cupit.
Cat 63.81	age caede terga cauda, tua verbera patere,
Cat 63.82	fac cuncta mugienti fremitu loca retonent,
Cat 63.83	rutilam ferox torosa cervice quate iubam.
Cat 63.84	ait haec minax Cybelle religatque iuga manu.
Cat 63.85	ferus ipse sese adhortans rabidum incitat animo,
Cat 63.86	vadit, fremit, refringit virgulta pede vago.
Cat 63.87	at ubi umida albicantis loca litoris adiit
Cat 63.88	tenerumque vidit Attin prope marmora pelagi,
Cat 63.89	facit impetum: ille demens fugit in nemora fera:
Cat 63.90	ibi semper omne vitae spatium famula fuit.
Cat 63.91	dea magna, dea Cybelle, dea domina Dindymi,
Cat 63.92	procul a mea tuus sit furor omnis, era, domo:
Cat 63.93	alios age incitatos, alios age rabidos.
Cat 64.1	Peliaco quondam prognatae vertice pinus
Cat 64.2	dicuntur liquidas Neptuni nasse per undas
Cat 64.3	Phasidos ad fluctus et fines Aeeteos,
Cat 64.4	cum lecti iuvenes, Argivae robora pubis,
Cat 64.5	auratam optantes Colchis avertere pellem
Cat 64.6	ausi sunt vada salsa cita decurrere puppi,
Cat 64.7	caerula verrentes abiegnis aequora palmis.
Cat 64.8	diva quibus retinens in summis urbibus arces
Cat 64.9	ipsa levi fecit volitantem flamine currum,
Cat 64.10	pinea coniungens inflexae texta carinae.
Cat 64.11	illa rudem cursu prima imbuit Amphitriten.
Cat 64.12	quae simul ac rostro ventosum proscidit aequor
Cat 64.13	tortaque remigio spumis incanduit unda,
Cat 64.14	emersere freti candenti e gurgite vultus
Cat 64.15	aequoreae monstrum Nereides admirantes.
Cat 64.16	illa, siqua alia, viderunt luce marinas
Cat 64.17	mortales oculis nudato corpore nymphas
Cat 64.18	nutricum tenus exstantes e gurgite cano.
Cat 64.19	tum Thetidis Peleus incensus fertur amore,
Cat 64.20	tum Thetis humanos non despexit hymenaeos,
Cat 64.21	tum Thetidi pater ipse iugandum Pelea sensit.
Cat 64.22	o nimis optato saeclorum tempore nati
Cat 64.23	heroes, salvete, deum genus, o bona matrum
Cat 64.24	progenies, salvete iterum
Cat 64.24	vos ego saepe meo, vos carmine compellabo,
Cat 64.25	teque adeo eximie taedis felicibus aucte
Cat 64.26	Thessaliae columen Peleu, cui Iuppiter ipse,
Cat 64.27	ipse suos divum genitor concessit amores.
Cat 64.28	tene Thetis tenuit pulcherrirma Nereine?
Cat 64.29	tene suam Tethys concessit ducere neptem
Cat 64.30	Oceanusque, mari totum qui amplectitur orbem?
Cat 64.31	quae simul optatae finito tempore luces
Cat 64.32	advenere, domum conventu tota frequentat
Cat 64.33	Thessalia, oppletur laetanti regia coetu:
Cat 64.34	dona ferunt prae se, declarant gaudia vultu.
Cat 64.35	deseritur Cieros, linquunt Phthiotica Tempe
Cat 64.36	Crannonisque domos ac moenia Larisaea,
Cat 64.37	Pharsalum coeunt, Pharsalia tecta frequentant.
Cat 64.38	rura colit nemo, mollescunt colla iuvencis,
Cat 64.39	non humilis curvis purgatur vinea rastris,
Cat 64.40	non glaebam prono convellit vomere taurus,
Cat 64.41	non falx attenuat frondatorum arboris umbram,
Cat 64.42	squalida desertis robigo infertur aratris.
Cat 64.43	ipsius at sedes, quacumque opulenta recessit
Cat 64.44	regia, fulgenti splendent auro atque argento.
Cat 64.45	candet ebur soliis, conlucent pocula mensae,
Cat 64.46	tota domus gaudet regali splendida gaza.
Cat 64.47	pulvinar vero divae geniale locatur
Cat 64.48	sedibus in mediis, Indo quod dente politum
Cat 64.49	tincta tegit roseo conchyli purpura fuco.
Cat 64.50	haec vestis priscis hominum variata figuris
Cat 64.51	heroum mira virtutes indicat arte.
Cat 64.52	namque fluentisono prospectans litore Diae
Cat 64.53	Thesea cedentem celeri cum classe tuetur
Cat 64.54	indomitos in corde gerens Ariadna furores,
Cat 64.55	necdum etiam sese quae visit visere credit,
Cat 64.56	ut pote fallaci quae tunc primum excita somno
Cat 64.57	desertam in sola miseram se cernat harena.
Cat 64.58	immemor at iuvenis fugiens pellit vada remis,
Cat 64.59	irrita ventosae linquens promissa procellae.
Cat 64.60	quem procul ex alga maestis Minois ocellis
Cat 64.61	saxea ut effigies bacchantis prospicit, eheu,
Cat 64.62	prospicit et magnis curarum fluctuat undis,
Cat 64.63	non flavo retinens subtilem vertice mitram,
Cat 64.64	non contecta levi velatum pectus amictu,
Cat 64.65	non tereti strophio lactentis vincta papillas,
Cat 64.66	omnia quae toto delapsa e corpore passim
Cat 64.67	ipsius ante pedes fluctus salis adludebant.
Cat 64.68	sic neque tum mitrae neque tum fluitantis amictus
Cat 64.69	illa vicem curans toto ex te pectore, Theseu,
Cat 64.70	toto animo, tota pendebat perdita mente.
Cat 64.71	ah misera, adsiduis quam luctibus exsternavit
Cat 64.72	spinosas Erycina serens in pectore curas
Cat 64.73	illa tempestate, ferox quo ex tempore Theseus
Cat 64.74	egressus curvis e litoribus Piraei
Cat 64.75	attigit iniusti regis Gortynia tecta.
Cat 64.76	nam perhibent olim crudeli peste coactam
Cat 64.77	Androgeoneae poenas exsolvere caedis
Cat 64.78	electos iuvenes simul et decus innuptarum
Cat 64.79	Cecropiam solitam esse dapem dare Minotauro.
Cat 64.80	quis angusta malis cum moenia vexarentur,
Cat 64.81	ipse suum Theseus pro caris corpus Athenis
Cat 64.82	proicere optavit potius quam talia Cretam
Cat 64.83	funera Cecropiae nec funera portarentur.
Cat 64.84	atque ita nave levi nitens ac lenibus auris
Cat 64.85	magnanimum ad Minoa venit sedesque superbas.
Cat 64.86	hunc simul ac cupido conspexit lumine virgo
Cat 64.87	regia, quam suavis exspirans castus odores
Cat 64.88	lectulus in molli complexu matris alebat,
Cat 64.89	quales Eurotae progignunt flumina myrtos
Cat 64.90	aurave distinctos educit verna colores,
Cat 64.91	non prius ex illo flagrantia declinavit
Cat 64.92	lumina quam cuncto concepit corpore flammam
Cat 64.93	funditus atque imis exarsit tota medullis.
Cat 64.94	heu misere exagitans immiti corde furores,
Cat 64.95	sancte puer, curis hominum qui gaudia misces,
Cat 64.96	quaeque regis Golgos quaeque Idalium frondosum,
Cat 64.97	qualibus incensam iactastis mente puellam
Cat 64.98	fluctibus in flavo saepe hospite suspirantem!
Cat 64.99	quantos illa tulit languenti corde timores,
Cat 64.100	quanto saepe magis fulgore expalluit auri,
Cat 64.101	cum saevum cupiens contra contendere monstrum
Cat 64.102	aut mortem appeteret Theseus aut praemia laudis.
Cat 64.103	non ingrata tamen frustra munuscula divis
Cat 64.104	promittens tacito succendit vota labello.
Cat 64.105	nam velut in summo quatientem bracchia Tauro
Cat 64.106	quercum aut conigeram sudanti cortice pinum
Cat 64.107	indomitus turbo contorquens flamine robur
Cat 64.108	eruit (illa procul radicitus exturbata
Cat 64.109	prona cadit, † lateque cum eius obvia frangens),
Cat 64.110	sic domito saevum prostravit corpore Theseus
Cat 64.111	nequiquam vanis iactantem cornua ventis.
Cat 64.112	inde pedem sospes multa cum laude reflexit
Cat 64.113	errabunda regens tenui vestigia filo,
Cat 64.114	ne labyrintheis e flexibus egredientem
Cat 64.115	tecti frustraretur inobservabilis error.
Cat 64.116	sed quid ego a primo digressus carmine plura
Cat 64.117	commemorem, ut linquens genitoris filia vultum,
Cat 64.118	ut consanguineae complexum, ut denique matris,
Cat 64.119	quae misera in gnata deperdita laetabatur,
Cat 64.120	omnibus his Thesei dulcem praeoptarit amorem,
Cat 64.121	aut ut vecta rati spumosa ad litora Diae
Cat 64.122	venerit, aut ut eam devinctam lumina somno
Cat 64.123	liquerit immemori discedens pectore coniunx?
Cat 64.124	saepe illam perhibent ardenti corde furentem
Cat 64.125	clarisonas imo fudisse ex pectore voces,
Cat 64.126	ac tum praeruptos tristem conscendere montes
Cat 64.127	unde aciem in pelagi vastos protenderet aestus,
Cat 64.128	tum tremuli salis adversas procurrere in undas
Cat 64.129	mollia nudatae tollentem tegmina surae,
Cat 64.130	atque haec extremis maestam dixisse querelis,
Cat 64.131	frigidulos udo singultus ore cientem:
Cat 64.132	sicine me patriis avectam, perfide, ab aris,
Cat 64.133	perfide, deserto liquisti in litore, Theseu?
Cat 64.134	sicine discedens neglecto numine divum
Cat 64.135	immernor ah devota domum periuria portas?
Cat 64.136	nullane res potuit crudelis flectere mentis
Cat 64.137	consilium? tibi nulla fuit clementia praesto
Cat 64.138	immite ut nostri vellet miserescere pectus?
Cat 64.139	at non haec quondam blanda promissa dedisti
Cat 64.140	voce mihi, non haec miserae sperare iubebas,
Cat 64.141	sed conubia laeta, sed optatos hymenaeos:
Cat 64.142	quae cuncta aerii discerpunt irrita venti.
Cat 64.143	nunc iam nulla viro iuranti femina credat,
Cat 64.144	nulla viri speret sermones esse fideles:
Cat 64.145	quis dum aliquid cupiens animus praegestit apisci,
Cat 64.146	nil metuunt iurare, nihil promittere parcunt:
Cat 64.147	sed simul ac cupidae mentis satiata libido est,
Cat 64.148	dicta nihil meminere, nihil periuria curant.
Cat 64.149	certe ego te in medio versantem turbine leti
Cat 64.150	eripui et potius germanum amittere crevi
Cat 64.151	quam tibi fallaci supremo in tempore deessem:
Cat 64.152	pro quo dilaceranda feris dabor alitibusque
Cat 64.153	praeda neque iniecta tumulabor mortua terra.
Cat 64.154	quaenam te genuit sola sub rupe leaena,
Cat 64.155	quod mare conceptum spumantibus exspuit undis.
Cat 64.156	quae Syrtis, quae Scylla rapax, quae vasta Charybdis,
Cat 64.157	talia qui reddis pro dulci praemia vita?
Cat 64.158	si tibi non cordi fuerant conubia nostra,
Cat 64.159	saeva quod horrebas prisci praecepta parentis,
Cat 64.160	at tamen in vestras potuisti ducere sedes
Cat 64.161	quae tibi iucundo famularer serva labore
Cat 64.162	candida permulcens liquidis vestigia lymphis
Cat 64.163	purpureave tuum constemens veste cubile.
Cat 64.164	sed quid ego ignaris nequiquam conqueror auris
Cat 64.165	exsternata malo, quae nullis sensibus auctae
Cat 64.166	nec missas audire queunt nec reddere voces?
Cat 64.167	ille autem prope iam mediis versatur in undis,
Cat 64.168	nec quisquam adparet vacua mortalis in alga.
Cat 64.169	sic nimis insultans extremo tempore saeva
Cat 64.170	fors etiam nostris invidit questibus auris.
Cat 64.171	Iuppiter omnipotens, utinam ne tempore primo
Cat 64.172	Gnosia Cecropiae tetigissent litora puppes,
Cat 64.173	indomito nec dira ferens stipendia tauro
Cat 64.174	perfidus in Creta religasset navita funem,
Cat 64.175	nec malus hic celans dulci crudelia forma
Cat 64.176	consilia in nostris requiesset sedibus hospes!
Cat 64.177	nam quo me referam? quali spe perdita nitor?
Cat 64.178	Idaeosne petam montes? ah, gurgite lato
Cat 64.179	discernens ponti truculentum ubi dividit aequor?
Cat 64.180	an patris auxilium sperem, quemne ipsa reliqui
Cat 64.181	respersum iuvenem fraterna caede secuta?
Cat 64.182	coniugis an fido consoler memet amore,
Cat 64.183	quine fugit lentos incurvans gurgite remos?
Cat 64.184	praeterea nullo litus, sola insula, tecto,
Cat 64.185	nec patet egressus pelagi cingentibus undis:
Cat 64.186	nulla fugae ratio, nulla spes: omnia muta,
Cat 64.187	omnia sunt deserta, ostentant omnia letum.
Cat 64.188	non tamen ante mihi languescent lumina morte,
Cat 64.189	nec prius a fesso secedent corpore sensus
Cat 64.190	quam iustam a divis exposcam prodita multam
Cat 64.191	caelestumque fidem postrema comprecer hora.
Cat 64.192	quare, facta virum multantes vindice poena
Cat 64.193	Eumenides, quibus anguino redimita capillo
Cat 64.194	frons exspirantis praeportat pectoris iras,
Cat 64.195	huc huc adventate, meas audite querelas,
Cat 64.196	quas ego, vae miserae, extremis proferre medullis
Cat 64.197	cogor inops, ardens, amenti caeca furore.
Cat 64.198	quae quoniam verae nascuntur pectore ab imo,
Cat 64.199	vos nolite pati nostrum vanescere luctum,
Cat 64.200	sed quali solam Theseus me mente reliquit,
Cat 64.201	tali mente, deae, funestet seque suosque.
Cat 64.202	has postquam maesto profudit pectore voces
Cat 64.203	supplicium saevis exposcens anxia factis,
Cat 64.204	adnuit invicto caelestum numine rector,
Cat 64.205	quo nutu tellus atque horrida contremuerunt
Cat 64.206	aequora concussitque micantia sidera mundus.
Cat 64.207	ipse autem caeca mentem caligine Theseus
Cat 64.208	consitus oblito dimisit pectore cuncta
Cat 64.209	quae mandata prius constanti mente tenebat,
Cat 64.210	dulcia nec maesto sustollens signa parenti
Cat 64.211	sospitem Erechtheum se ostendit visere portum
Cat 64.212	namque ferunt olim, classi cum moenia divae
Cat 64.213	linquentem gnatum ventis concrederet Aegeus,
Cat 64.214	talia complexum iuveni mandata dedisse:
Cat 64.215	gnate mihi longe iucundior unice vita,
Cat 64.216	gnate, ego quem in dubios cogor dimittere casus
Cat 64.217	reddite in extrema nuper mihi fine senectae,
Cat 64.218	quandoquidem fortuna mea ac tua fervida virtus
Cat 64.219	eripit invito mihi te, cui languida nondum
Cat 64.220	lumina sunt gnati cara saturata figura,
Cat 64.221	non ego te gaudens laetanti pectore mittam,
Cat 64.222	nec te ferre sinam fortunae signa secundae,
Cat 64.223	sed primum multas expromam mente querelas
Cat 64.224	canitiem terra atque infuso pulvere foedans,
Cat 64.225	inde infecta vago suspendam lintea malo,
Cat 64.226	nostros ut luctus nostraeque incendia mentis
Cat 64.227	carbasus obscurata decet ferrugine Hibera.
Cat 64.228	quod tibi si sancti concesserit incola Itoni,
Cat 64.229	quae nostrum genus ac sedes defendere Erechthei
Cat 64.230	adnuit, ut tauri respergas sanguine dextram,
Cat 64.231	tum vero facito ut memori tibi condita corde
Cat 64.232	haec vigeant mandata, nec ulla oblitteret aetas,
Cat 64.233	ut simul ac nostros invisent lumina collis,
Cat 64.234	funestam antennae deponant undique vestem
Cat 64.235	candidaque intorti sustollant vela rudentes,
Cat 64.236	quam primum cernens ut laeta gaudia mente
Cat 64.237	agnoscam, cum te reducem aetas prospera sistet.
Cat 64.238	haec mandata prius constanti mente tenentem
Cat 64.239	Thesea ceu pulsae ventorum flamine nubes
Cat 64.240	aerium nivei montis liquere cacumen.
Cat 64.241	at pater, ut summa prospectum ex arce petebat
Cat 64.242	anxia in adsiduos absumens lumina fletus,
Cat 64.243	cum primum inflati conspexit lintea veli,
Cat 64.244	praecipitem sese scopulorum e vertice iecit
Cat 64.245	amissum credens immiti Thesea fato.
Cat 64.246	sic funesta domus ingressus tecta paterna
Cat 64.247	morte ferox Theseus, qualem Minoidi luctu
Cat 64.248	obtulerat mente immemori, talem ipse recepit.
Cat 64.249	quae tum prospectans cedentem maesta carinam
Cat 64.250	multiplices animo volvebat saucia curas.
Cat 64.251	at parte ex alia florens volitabat Iacchus
Cat 64.252	cum thiaso satyrorum et Nysigenis silenis
Cat 64.253	te quaerens, Ariadna, tuoque incensus arnore.
Cat 64.254	quae tum alacres passim lymphata mente furebant
Cat 64.255	euhoe bacchantes, euhoe capita inflectentes.
Cat 64.256	harum pars tecta quatiebant cuspide thyrsos,
Cat 64.257	pars e divulso iactabant membra iuvenco,
Cat 64.258	pars sese tortis serpentibus incingebant,
Cat 64.259	pars obscura cavis celebrabant orgia cistis,
Cat 64.260	orgia quae frustra cupiunt audire profani,
Cat 64.261	plangebant aliae proceris tympana palmis
Cat 64.262	aut tereti tenuis tinnitus aere ciebant,
Cat 64.263	multis raucisonos efflabant cornua bombos
Cat 64.264	barbaraque horribili stridebat tibia cantu.
Cat 64.265	talibus amplifice vestis decorata figuris
Cat 64.266	pulvinar complexa suo velabat amictu.
Cat 64.267	quae postquam cupide spectando Thessala pubes
Cat 64.268	expleta est, sanctis coepit decedere divis.
Cat 64.269	hic, qualis flatu placidum mare matutino
Cat 64.270	horrificans Zephyrus proclivas incitat undas
Cat 64.271	aurora exoriente vagi sub limina solis,
Cat 64.272	quae tarde primum clementi flamine pulsae
Cat 64.273	procedunt, leviterque sonant plangore cachinni,
Cat 64.274	post vento crescente magis magis increbescunt
Cat 64.275	purpureaque procul nantes ab luce refulgent,
Cat 64.276	sic tum vestibuli linquentes regia tecta
Cat 64.277	ad se quisque vago passim pede discedebant.
Cat 64.278	quorum post abitum princeps e vertice Peli
Cat 64.279	advenit Chiron portans silvestria dona:
Cat 64.280	nam quoscumque ferunt campi, quos Thessala magnis
Cat 64.281	montibus ora creat, quos propter fluminis undas
Cat 64.282	aura parit flores tepidi fecunda Favoni,
Cat 64.283	hos indistinctis plexos tulit ipse corollis,
Cat 64.284	quo permulsa domus iucundo risit odore.
Cat 64.285	confestim Penios adest, viridantia Tempe,
Cat 64.286	Tempe quae silvae cingunt super impendentes,
Cat 64.287	naiasin linquens Doris celebranda choreis,
Cat 64.288	non vacuus: namque ille tulit radicitus altas
Cat 64.289	fagos ac recto proceras stipite laurus,
Cat 64.290	non sine nutanti platano lentaque sorore
Cat 64.291	flammati Phaethontis et aeria cupressu.
Cat 64.292	haec circum sedes late contexta locavit,
Cat 64.293	vestibulum ut molli velatum fronde vireret.
Cat 64.294	post hunc consequitur sollerti corde Prometheus
Cat 64.295	extenuata gerens veteris vestigia poenae
Cat 64.296	quam quondam silici restrictus membra catena
Cat 64.297	persolvit pendens e verticibus praeruptis.
Cat 64.298	inde pater divum sancta cum coniuge natisque
Cat 64.299	advenit, caelo te solum, Phoebe, relinquens
Cat 64.300	unigenamque simul cultricem montibus Idri:
Cat 64.301	Pelea nam tecum pariter soror adspernata est
Cat 64.302	nec Thetidis taedas voluit celebrare iugalis.
Cat 64.303	qui postquam niveis flexerunt sedibus artus,
Cat 64.304	large multiplici constructae sunt dape mensae,
Cat 64.305	cum interea infirmo quatientes corpora motu
Cat 64.306	veridicos Parcae coeperunt edere cantus.
Cat 64.307	his corpus tremulum complectens undique vestis
Cat 64.308	candida purpurea talos incinxerat ora,
Cat 64.309	at roseae niveo residebant vertice vittae,
Cat 64.310	aeternumque manus carpebant rite laborem.
Cat 64.311	laeva colum molli lana retinebat amictum,
Cat 64.312	dextera tum leviter deducens fila supinis
Cat 64.313	formabat digitis, tum prono in pollice torquens
Cat 64.314	libratum tereti versabat turbine fusum,
Cat 64.315	atque ita decerpens aequabat semper opus dens,
Cat 64.316	laneaque aridulis haerebant morsa labellis
Cat 64.317	quae prius in levi fuerant exstantia filo.
Cat 64.318	ante pedes autem candentis mollia lanae
Cat 64.319	vellera virgati custodibant calathisci.
Cat 64.320	haec tum clarisona vellentes vellera voce
Cat 64.321	talia divino fuderunt carmine fata,
Cat 64.322	carmine perfidiae quod post nulla arguet aetas:
Cat 64.323	o decus eximium magnis virtutibus augens,
Cat 64.324	Emathiae tutamen opis, clarissime nato,
Cat 64.325	accipe quod laeta tibi pandunt luce sorores,
Cat 64.326	veridicum oraclum. sed vos, quae fata secuntur,
Cat 64.327	currite ducentes subtegmina, currite, fusi.
Cat 64.328	adveniet tibi iam portans optata maritis
Cat 64.329	Hesperus, adveniet fausto cum sidere coniunx,
Cat 64.330	quae tibi flexanimo mentem perfundat amore
Cat 64.331	languidulosque paret tecum coniungere somnos
Cat 64.332	levia substernens robusto bracchia collo.
Cat 64.333	currite ducentes subtegmina, currite, fusi.
Cat 64.334	nulla domus tales unquam contexit amores,
Cat 64.335	nullus amor tali coniunxit foedere amantes
Cat 64.336	qualis adest Thetidi, qualis concordia Peleo.
Cat 64.337	currite ducentes subtegmina, currite, fusi.
Cat 64.338	nascetur vobis expers terroris Achilles,
Cat 64.339	hostibus haud tergo, sed forti pectore notus,
Cat 64.340	qui persaepe vago victor certamine cursus
Cat 64.341	flammea praevertet celeris vestigia cervae.
Cat 64.342	currite ducentes subtegmina, currite, fusi.
Cat 64.343	non illi quisquam bello se conferet heros,
Cat 64.344	cum Phrygii Teucro manabunt sanguine campi
Cat 64.345	Troicaque obsidens longinquo moenia bello
Cat 64.346	periuri Pelopis vastabit tertius heres.
Cat 64.347	currite ducentes subtegmina, currite, fusi.
Cat 64.348	illius egregias virtutes claraque facta
Cat 64.349	saepe fatebuntur gnatorum in funere matres,
Cat 64.350	cum incultum cano solvent a vertice crinem
Cat 64.351	putridaque infirmis variabunt pectora palmis.
Cat 64.352	currite ducentes subtegmina, currite, fusi.
Cat 64.353	namque velut densas praecerpens messor aristas
Cat 64.354	sole sub ardenti flaventia demetit arva,
Cat 64.355	Troiugenum infesto prosternet corpora ferro.
Cat 64.356	currite ducentes subtegmina, currite, fusi.
Cat 64.357	testis erit magnis virtutibus unda Scamandri,
Cat 64.358	quae passim rapido diffunditur Hellesponto,
Cat 64.359	cuius iter caesis angustans corporum acervis
Cat 64.360	alta tepefaciet permixta flumina caede.
Cat 64.361	currite ducentes subtegmina, currite, fusi.
Cat 64.362	denique testis erit morti quoque reddita praeda
Cat 64.363	cum teres excelso coacervatum aggere bustum
Cat 64.364	excipiet niveos percussae virginis artus.
Cat 64.365	Currite ducentes subtegmina, currite, fusi.
Cat 64.366	nam simul ac fessis dederit fors copiam Achivis
Cat 64.367	urbis Dardaniae Neptunia solvere vincla,
Cat 64.368	alta Polyxenia madefient caede sepulcra,
Cat 64.369	quae, velut ancipiti succumbens victima ferro,
Cat 64.370	proiciet truncum submisso poplite corpus.
Cat 64.371	currite ducentes subtegmina, currite, fusi.
Cat 64.372	quare agite optatos animi coniungite amores.
Cat 64.373	accipiat coniunx felici foedere divam,
Cat 64.374	dedatur cupido iam dudum nupta marito.
Cat 64.375	currite ducentes subtegmina, currite, fusi.
Cat 64.376	non illam nutrix orienti luce revisens
Cat 64.377	hesterno collum poterit circumdare filo
Cat 64.378	(currite ducentes subtegmina, currite, fusi),
Cat 64.379	anxia nec mater discordis maesta puellae
Cat 64.380	secubitu caros mittet sperare nepotes.
Cat 64.381	currite ducentes subtegmina, currite, fusi.
Cat 64.382	talia praefantes quondam felicia Pelei
Cat 64.383	carmina divino cecinerunt pectore Parcae.
Cat 64.384	praesentes namque ante domos invisere castas
Cat 64.385	heroum et sese mortali ostendere coetu
Cat 64.386	caelicolae nondum spreta pietate solebant.
Cat 64.387	saepe pater divum templo in fulgente, revisens
Cat 64.388	annua cum festis venissent sacra diebus,
Cat 64.389	conspexit terra centum procumbere tauros.
Cat 64.390	saepe vagus Liber Parnasi vertice summo
Cat 64.391	Thyiadas effusis euantis crinibus egit,
Cat 64.392	cum Delphi tota certatim ex urbe ruentes
Cat 64.393	acciperent laeti divum fumantibus aris.
Cat 64.394	saepe in letifero belli certamine Mavors
Cat 64.395	aut rapidi Tritonis era aut Rhamnusia virgo
Cat 64.396	armatas hominum est praesens hortata catervas.
Cat 64.397	sed postquam tellus scelere est imbuta nefando,
Cat 64.398	iustitiamque omnes cupida de mente fugarunt,
Cat 64.399	perfudere manus fraterno sanguine fratres,
Cat 64.400	destitit exstinctos natus lugere parentes,
Cat 64.401	optavit genitor primaevi funera nati
Cat 64.402	Liber ut innuptae poteretur flore novercae,
Cat 64.403	ignaro mater substernens se impia nato
Cat 64.404	impia non verita est divos scelerare parentes,
Cat 64.405	omnia fanda nefanda malo permixta furore
Cat 64.406	iustificam nobis mentem avertere deorum.
Cat 64.407	quare nec talis dignantur visere coetus
Cat 64.408	nec se contingi patiuntur lumine claro.
Cat 65.1	Etsi me adsiduo defectum cura dolore
Cat 65.2	sevocat a doctis, Ortale, virginibus,
Cat 65.3	nec potis est dulcis Musarum expromere fetus
Cat 65.4	mens animi: tantis fluctuat ipsa malis,—
Cat 65.5	namque mei nuper Lethaeo gurgite fratris
Cat 65.6	pallidulum manans adluit unda pedem,
Cat 65.7	Troia Rhoeteo quem subter litore tellus
Cat 65.8	Ereptum nostris obterit ex oculis.
Cat 65.10	nunquam ego te vita frater amabilior
Cat 65.11	adspiciam posthac: at certe semper amabo,
Cat 65.12	semper maesta tua carmina morte canam,
Cat 65.13	qualia sub densis ramorum concinit umbris
Cat 65.14	Daulias absumpti fata gemens Ityli,—
Cat 65.15	sed tamen in tantis maeroribus, Ortale, mitto
Cat 65.16	haec expressa tibi carmina Battiadae,
Cat 65.17	ne tua dicta vagis nequiquam credita ventis
Cat 65.18	effluxisse meo forte putes animo,
Cat 65.19	ut missum sponsi furtivo munere malum
Cat 65.20	procurrit casto virginis e gremio,
Cat 65.21	quod miserae oblitae molli sub veste locatum,
Cat 65.22	dum adventu matris prosilit, excutitur;
Cat 65.23	atque illud prono praeceps agitur decursu,
Cat 65.24	huic manat tristi conscius ore rubor.
Cat 66.1	Omnia qui magni dispexit lumina mundi,
Cat 66.2	qui stellarum ortus comperit atque obitus,
Cat 66.3	flammeus ut rapidi solis nitor obscuretur,
Cat 66.4	ut cedant certis sidera temporibus,
Cat 66.5	ut Triviam furtim sub Latmia saxa relegans
Cat 66.6	dulcis amor gyro devocet aerio,
Cat 66.7	idem me ille Conon caelesti in lumine vidit
Cat 66.8	e Bereniceo vertice caesariem
Cat 66.9	fulgentem clare, quam cunctis illa deorum
Cat 66.10	levia protendens bracchia pollicita est,
Cat 66.11	qua rex tempestate novo auctus hymenaeo
Cat 66.12	vastatum finis iuerat Assyrios,
Cat 66.13	dulcia nocturnae portans vestigia rixae
Cat 66.14	quam de virgineis gesserat exuviis.
Cat 66.15	estne novis nuptis odio Venus, atque parentum
Cat 66.16	frustrantur falsis gaudia lacrimulis
Cat 66.17	ubertim thalami quas intra limina fundunt?
Cat 66.18	non, ita me divi vera gemunt, iuerint.
Cat 66.19	id mea me multis docuit regina querelis
Cat 66.20	invisente novo proelia torva viro.
Cat 66.21	at tu non orbum luxti deserta cubile,
Cat 66.22	sed fratris cari flebile discidium?
Cat 66.23	quam penitus maestas exedit cura medullas!
Cat 66.24	ut tibi tunc toto pectore sollicitae
Cat 66.25	sensibus ereptis mens excidit! at te ego certe
Cat 66.26	cognoram a parva virgine magnanimam.
Cat 66.27	anne bonum oblita es facinus, quo regium adepta es
Cat 66.28	coniugium, quod non fortior ausit alis?
Cat 66.29	sed tum maesta virum mittens quae verba locuta es!
Cat 66.30	Iuppiter, ut tristi lumina saepe manu!
Cat 66.31	quis te mutavit tantus deus? an quod amantes
Cat 66.32	non longe a caro corpore abesse volunt?
Cat 66.33	atque ibi me cunctis pro dulci coniuge divis
Cat 66.34	non sine taurino sanguine pollicita es,
Cat 66.35	si reditum tetulisset. is haud in tempore longo
Cat 66.36	captam Asiam Aegypti finibus addiderat.
Cat 66.37	quis ego pro factis caelesti reddita coetu
Cat 66.38	pristina vota novo munere dissolvo.
Cat 66.39	invita, o regina, tuo de vertice cessi,
Cat 66.40	invita: adiuro teque tuumque caput:
Cat 66.41	digna ferat quod si quis inaniter adiurarit:
Cat 66.42	sed qui se ferro postulet esse parem?
Cat 66.43	ille quoque eversus mons est quem maximum in oris
Cat 66.44	progenies Thiae clara supervehitur,
Cat 66.45	cum Medi peperere novum mare, cumque inventus
Cat 66.46	per medium classi barbara navit Athon.
Cat 66.47	quid facient crines, cum ferro talia cedant?
Cat 66.48	Iuppiter, ut Chalybon omne genus pereat,
Cat 66.49	et qui principio sub terra quaerere venas
Cat 66.50	institit ac ferri fingere duritiem!
Cat 66.51	abiunctae paulo ante comae mea fata sorores
Cat 66.52	lugebant, cum se Memnonis Aethiopis
Cat 66.53	unigena impellens nutantibus aera pennis
Cat 66.54	obtulit Arsinoes † elocridicos ales equus,
Cat 66.55	isque per aetherias me tollens avolat umbras
Cat 66.56	et Veneris casto conlocat in gremio.
Cat 66.57	ipsa suum Zephyritis eo famulum legarat,
Cat 66.58	Graia Canopiis incola litoribus,
Cat 66.59	†hi dii ven ibi vario ne solum in lumine caeli
Cat 66.60	ex Ariadneis aurea temporibus
Cat 66.61	fixa corona foret, sed nos quoque fulgeremus
Cat 66.62	devotae flavi verticis exuviae,
Cat 66.63	uvidulam a fletu cedentem ad temple deum me
Cat 66.64	sidus in antiquis diva novum posuit:
Cat 66.65	Virginis et saevi contingens namque Leonis
Cat 66.66	lumina, Callisto iuncta Lycaoniae,
Cat 66.67	vertor in occasum, tardum dux ante Booten,
Cat 66.68	qui vix sero alto mergitur Oceano.
Cat 66.69	sed quamquam me nocte premunt vestigia divum,
Cat 66.70	lux autem canae Tethyi restituit,
Cat 66.71	(pace tua fari hic liceat, Rhamnusia virgo:
Cat 66.72	namque ego non ullo vera timore tegam,
Cat 66.73	nec si me infestis discerpent sidera dictis,
Cat 66.74	condita quin veri pectoris evoluam)
Cat 66.75	non his tam laetor rebus quam me afore semper
Cat 66.76	afore me a dominae vertice discrucior,
Cat 66.77	quicum ego, dum virgo quondam fuit, omnibus expers
Cat 66.78	unguentis, una milia multa bibi.
Cat 66.79	nunc vos optato quom iunxit lumine taeda,
Cat 66.80	non prius unanimis corpora coniugibus
Cat 66.81	tradite nudantes reiecta veste papillas,
Cat 66.82	quam iucunda mihi munera libet onyx,
Cat 66.83	vester onyx, casto colitis quae iura cubili.
Cat 66.84	sed quae se impuro dedit adulterio,
Cat 66.85	illius ah mala dona levis bibat irrita pulvis:
Cat 66.86	namque ego ab indignis praemia nulla peto.
Cat 66.87	sed magis, o nuptae, semper concordia vestras,
Cat 66.88	semper amor sedes incolat adsiduus.
Cat 66.89	tu vero, regina, tuens cum sidera divam
Cat 66.90	placabis festis luminibus Venerem,
Cat 66.91	unguinis expertem non siris esse tuam me,
Cat 66.92	sed potius largis adfice muneribus.
Cat 66.93	sidera cur retinent? utinam coma regia fiam
Cat 66.94	proximus Hydrochoi fulgeret Oarion.
Cat 67.1	O dulci iucunda viro, iucunda parenti,
Cat 67.2	salve, teque bona Iuppiter auctet ope,
Cat 67.3	Ianua, quam Balbo dicunt servisse benigne
Cat 67.4	olim, cum sedes ipse senex tenuit,
Cat 67.5	quamque ferunt rursus voto servisse maligne,
Cat 67.6	postquam es porrecto facta marita sene,
Cat 67.7	dic agedum nobis quare mutata feraris
Cat 67.8	in dominum veterem deseruisse fidem.
Cat 67.9	non (ita Caecilio placeam, cui tradita nunc sum)
Cat 67.10	culpa mea est, quamquam dicitur esse mea,
Cat 67.11	nec peccatum a me quisquam pote dicere quicquam:
Cat 67.12	†verum istius populi ianua qui te facit!
Cat 67.13	qui, quacumque aliquid reperitur non bene factum,
Cat 67.14	ad me omnes clamant, Ianua, culpa tua est.
Cat 67.15	non istuc satis est uno te dicere verbo,
Cat 67.16	sed facere ut quivis sentiat et videat.
Cat 67.17	qui possum? nemo quaerit nec scire laborat.
Cat 67.18	nos volumus; nobis dicere ne dubita.
Cat 67.19	primum igitur, virgo quod fertur tradita nobis,
Cat 67.20	falsum est. non illam vir prior attigerit,
Cat 67.21	languidior tenera cui pendens sicula beta
Cat 67.22	nunquam se mediam sustulit ad tunicam:
Cat 67.23	sed pater illius gnati violasse cubile
Cat 67.24	dicitur et miseram conscelerasse domum,
Cat 67.25	sive quod impia mens caeco flagrabat amore,
Cat 67.26	seu quod iners sterili semine natus erat
Cat 67.27	et quaerendus is unde foret nervosius illud
Cat 67.28	quod posset zonam solvere virgineam.
Cat 67.29	egregium narras mira pietate parentem,
Cat 67.30	qui ipse sui gnati minxerit in gremium.
Cat 67.31	atqui non solum hoc se dicit cognitum habere
Cat 67.32	Brixia † chinea suppositum specula,
Cat 67.33	flavus quam molli praecurrit flumine Mella,
Cat 67.34	Brixia, Veronae mater amata meae,
Cat 67.35	sed de Postumio et Corneli narrat amore,
Cat 67.36	cum quibus illa malum fecit adulterium.
Cat 67.37	dixerit hic aliquis, quid? tu istaec, Ianua, nosti,
Cat 67.38	cui nunquam domini limine abesse licet,
Cat 67.39	nec populum auscultare, sed hic suffixa tigillo
Cat 67.40	tantum operire soles aut aperire domum?
Cat 67.41	saepe illam audivi furtiva voce loquentem
Cat 67.42	solam cum ancillis haec sua flagitia,
Cat 67.43	nomine dicentem quos diximus, ut pote quae mi
Cat 67.44	speraret nec linguam esse nec auriculam.
Cat 67.45	praeterea addebat quendam, quem dicere nolo
Cat 67.46	nomine ne tollat rubra supercilia.
Cat 67.47	longus homo est, magnas cui lites intulit olim
Cat 67.48	falsum mendaci ventre puerperium.
Cat 68.0	68a in print edition. Renamed 68 here.
Cat 68.1	Quod mihi fortuna casuque oppressus acerbo
Cat 68.2	conscriptum hoc lacrimis mittis epistolium,
Cat 68.3	naufragum ut eiectum spumantibus aequoris undis
Cat 68.4	sublevem et a mortis limine restituam,
Cat 68.5	quem neque sancta Venus molli requiescere somno
Cat 68.6	desertum in lecto caelibe perpetitur,
Cat 68.7	nec veterum dulci scriptorum carmine musae
Cat 68.8	oblectant, cum mens anxia pervigilat,
Cat 68.9	id gratum est mihi, me quoniam tibi dicis amicum
Cat 68.10	muneraque et Musarum hinc petis et Veneris.
Cat 68.11	sed tibi ne mea sint ignota incommoda, Manli,
Cat 68.12	neu me odisse putes hospitis officium,
Cat 68.13	accipe quis merser fortunae fluctibus ipse,
Cat 68.14	ne amplius a misero dona beata petas.
Cat 68.15	tempore quo primum vestis mihi tradita pura est,
Cat 68.16	iucundum cum aetas florida ver ageret,
Cat 68.17	multa satis lusi; non est dea nescia nostri
Cat 68.18	quae dulcem curis miscet amaritiem:
Cat 68.19	sed totum hoc studium luctu fraterna mihi mors
Cat 68.20	abstulit. o misero frater adempte mihi,
Cat 68.21	tu mea tu moriens fregisti commoda, frater,
Cat 68.22	tecum una tota est nostra sepulta domus,
Cat 68.23	omnia tecum una perierunt gaudia nostra,
Cat 68.24	quae tuus in vita dulcis alebat amor.
Cat 68.25	cuius ego interitu tota de mente fugavi
Cat 68.26	haec studia atque omnes delicias animi.
Cat 68.27	quare, quod scribis Veronae turpe Catullo
Cat 68.28	esse quod hic quisquis de meliore nota
Cat 68.29	frigida deserto tepefactet membra cubili,
Cat 68.30	id, Manli, non est turpe, magis miserum est.
Cat 68.31	ignosces igitur, si, quae mihi luctus ademit,
Cat 68.32	haec tibi non tribuo munera, cum nequeo.
Cat 68.33	nam quod scriptorum non magna est copia apud me,
Cat 68.34	hoc fit quod Romae vivimus: illa domus,
Cat 68.35	illa mihi sedes, illic mea carpitur aetas;
Cat 68.36	huc una ex multis capsula me sequitur.
Cat 68.37	quod cum ita sit, nolim statuas nos mente maligna
Cat 68.38	id facere aut animo non satis ingenuo
Cat 68.39	quod tibi non utriusque petenti copia parta est:
Cat 68.40	ultro ego deferrem, copia si qua foret.
Cat 68a.0	68b in print edition. Renamed 68a here.
Cat 68a.1	non possum reticere, deae, qua me Allius in re
Cat 68a.2	iuverit aut quantis iuverit officiis,
Cat 68a.3	ne fugiens saeclis obliviscentibus aetas
Cat 68a.4	illius hoc caeca nocte tegat studium:
Cat 68a.5	sed dicam vobis, vos porro dicite multis
Cat 68a.6	milibus et facite haec charta loquatur anus
Cat 68a.8	notescatque magis mortuus atque magis,
Cat 68a.9	nec tenuem texens sublimis aranea telam
Cat 68a.10	in deserto Alli nomine opus faciat.
Cat 68a.11	nam mihi quam dederit duplex Amathusia curam
Cat 68a.12	scitis, et in quo me corruerit genere,
Cat 68a.13	cum tantum arderem quantum Trinacria rupes
Cat 68a.14	lymphaque in Oetaeis Malia Thermopylis,
Cat 68a.15	maesta neque adsiduo tabescere lumina fletu
Cat 68a.16	cessarent tristique imbre madere genae,
Cat 68a.17	qualis in aerii perlucens vertice montis
Cat 68a.18	rivus muscoso prosilit e lapide,
Cat 68a.19	qui, cum de prone praeceps est valle volutus,
Cat 68a.20	per medium densi transit iter populi,
Cat 68a.21	dulce viatori lasso in sudore levamen
Cat 68a.22	cum gravis exustos aestus hiulcat agros.
Cat 68a.23	hic, velut in nigro iactatis turbine nautis
Cat 68a.24	lenius adspirans aura secunda venit
Cat 68a.25	iam prece Pollucis, iam Castoris implorata,
Cat 68a.26	tale fuit nobis Allius auxilium.
Cat 68a.27	is clausum lato patefecit limite campum,
Cat 68a.28	isque domum nobis isque dedit dominae,
Cat 68a.29	ad quam communes exerceremus amores.
Cat 68a.30	quo mea se molli candida diva pede
Cat 68a.31	intulit et trito fulgentem in limine plantam
Cat 68a.32	innixa arguta constituit solea,
Cat 68a.33	coniugis ut quondam flagrans advenit amore
Cat 68a.34	Protesilaeam Laodamia domum
Cat 68a.35	inceptam frustra, nondum cum sanguine sacro
Cat 68a.36	hostia caelestis pacificasset eros.
Cat 68a.37	nil mihi tam valde placeat, Rhamnusia virgo,
Cat 68a.38	quod temere invitis suscipiatur eris.
Cat 68a.39	quam ieiuna pium desideret ara cruorem
Cat 68a.40	docta est amisso Laodamia viro,
Cat 68a.41	coniugis ante coacta novi dimittere collum
Cat 68a.42	quam veniens una atque altera rursus hiems
Cat 68a.43	noctibus in longis avidum saturasset amorem,
Cat 68a.44	posset ut abrupto vivere coniugio:
Cat 68a.45	quod scibant Parcae non longo tempore abesse,
Cat 68a.46	si miles muros isset ad Iliacos:
Cat 68a.47	nam tum Helenae raptu primores Argivorum
Cat 68a.48	coeperat ad sese Troia ciere viros,
Cat 68a.49	Troia (nefas) commune sepulcrum Asiae Europaeque,
Cat 68a.50	Troia virum et virtutum omnium acerba cinis:
Cat 68a.51	quaene etiam nostro letum miserabile fratri
Cat 68a.52	attulit. Hei misero frater adempte mihi,
Cat 68a.53	hei misero fratri iucundum lumen ademptum,
Cat 68a.54	tecum una tota est nostra sepulta domus,
Cat 68a.55	omnia tecum una perierunt gaudia nostra,
Cat 68a.56	quae tuus in vita dulcis alebat amor.
Cat 68a.57	quem nunc tam longe non inter nota sepulcra
Cat 68a.58	nec prope cognatos compositum cineres,
Cat 68a.59	sed Troia obscena, Troia infelice sepultum
Cat 68a.60	detinet extremo terra aliena solo.
Cat 68a.61	ad quam tum properans fertur simul undique pubes
Cat 68a.62	Graeca penetralis deseruisse focos,
Cat 68a.63	ne Paris abducta gavisus libera moecha
Cat 68a.64	otia pacato degeret in thalamo.
Cat 68a.65	quo tibi tum casu, pulcherrima Laodamia,
Cat 68a.66	ereptum est vita dulcius atque anima
Cat 68a.67	coniugium: tanto te absorbens vertice amoris
Cat 68a.68	aestus in abruptum detulerat barathrum,
Cat 68a.69	quale ferunt Grai Pheneum prope Cylleneum
Cat 68a.70	siccare emulsa pingue palude solum,
Cat 68a.71	quod quondam caesis montis fodisse medullis
Cat 68a.72	audit falsiparens Amphitryoniades,
Cat 68a.73	tempore quo certa Stymphalia monstra sagitta
Cat 68a.74	perculit imperio deterioris eri,
Cat 68a.75	pluribus ut caeli tereretur ianua divis,
Cat 68a.76	Hebe nec longa virginitate foret.
Cat 68a.77	sed tuus altus amor barathro fuit altior illo,
Cat 68a.78	qui tunc indomitam ferre iugum docuit.
Cat 68a.79	nam nec tam carum confecto aetate parenti
Cat 68a.80	una caput seri nata nepotis alit,
Cat 68a.81	qui, cum divitiis vix tandem inventus avitis
Cat 68a.82	nomen testatas intulit in tabulas,
Cat 68a.83	impia derisi gentilis gaudia tollens
Cat 68a.84	suscitat a cano vulturium capiti:
Cat 68a.85	nec tantum niveo gavisa est ulla columbo
Cat 68a.86	compar, quae multo dicitur improbius
Cat 68a.87	oscula mordenti semper decerpere rostro
Cat 68a.88	quam quae praecipue multivola est mulier:
Cat 68a.89	sed tu horum magnos vicisti sola furores,
Cat 68a.90	ut semel es flavo conciliata viro.
Cat 68a.91	aut nihil aut paulo cui tum concedere digna
Cat 68a.92	lux mea se nostrum contulit in gremium,
Cat 68a.93	quam circumcursans hinc illinc saepe Cupido
Cat 68a.94	fulgebat crocina candidus in tunica.
Cat 68a.95	quae tamenetsi uno non est contenta Catullo,
Cat 68a.96	rara verecundae furta feremus erae,
Cat 68a.97	ne nimium simus stultorum more molesti:
Cat 68a.98	saepe etiam Iuno, maxima caelicolum,
Cat 68a.99	coniugis in culpa flagrantem concoquit iram
Cat 68a.100	noscens omnivoli plurima furta Iovis.
Cat 68a.101	atqui nec divis homines componier aequum est
Cat 68a.102	ingratum tremuli tolle parentis onus.
Cat 68a.103	nec tamen illa mihi dextra deducta paterna
Cat 68a.104	fragrantem Assyrio venit odore domum,
Cat 68a.105	sed furtiva dedit mira munuscula nocte
Cat 68a.106	ipsius ex ipso dempta viri gremio.
Cat 68a.107	quare illud satis est, si nobis is datur unis
Cat 68a.108	quem lapide illa diem candidiore notat.
Cat 68a.109	hoc tibi quod potui confectum carmine munus
Cat 68a.110	pro multis, Alli, redditur officiis,
Cat 68a.111	ne vestrum scabra tangat robigine nomen
Cat 68a.112	haec atque illa dies atque alia atque alia.
Cat 68a.113	huc addent divi quam plurima, quae Themis olim
Cat 68a.114	antiquis solita est munera ferre piis:
Cat 68a.115	sitis felices et tu simul et tua vita
Cat 68a.116	et domus, in qua nos lusimus et domina,
Cat 68a.117	et qui principio nobis † terram dedit aufert,
Cat 68a.118	a quo sunt primo omnia nata bona,
Cat 68a.119	et longe ante omnes mihi quae me carior ipso est,
Cat 68a.120	lux mea, qua viva vivere dulce mihi est.
Cat 69.1	Noli admirari quare tibi femina nulla,
Cat 69.2	Rufe, velit tenerum supposuisse femur,
Cat 69.3	non si illam rarae labefactes munere vestis
Cat 69.4	aut perluciduli deliciis lapidis.
Cat 69.5	laedit te quaedam mala fabula, qua tibi fertur
Cat 69.6	valle sub alarum trux habitare caper.
Cat 69.7	hunc metuunt omnes. neque mirum: nam mala valde est
Cat 69.8	bestia, nec quicum bella puella cubet.
Cat 69.9	quare aut crudelem nasorum interfice pestem,
Cat 69.10	aut admirari desine cur fugiunt.
Cat 70.1	Nulli se dicit mulier mea nubere malle
Cat 70.2	quam mihi, non si se Iuppiter ipse petat.
Cat 70.3	dicit: sed mulier cupido quod dicit amanti
Cat 70.4	in vento et rapida scribere oportet aqua.
Cat 71.1	Si cui iure bono sacer alarum obstitit hircus,
Cat 71.2	aut si quem merito tarda podagra secat,
Cat 71.3	Aemulus iste tuus, qui vestrum exercet amorem,
Cat 71.4	mirifice est a te nactus utrumque malum.
Cat 71.5	nam quotiens futuit totiens ulciscitur ambos:
Cat 71.6	illam adfligit odore, ipse perit podagra.
Cat 72.1	Dicebas quondam solum te nosse Catullum,
Cat 72.2	Lesbia, nec prae me velle tenere Iovem.
Cat 72.3	dilexi tum te non tantum ut vulgus amicam,
Cat 72.4	sed pater ut gnatos diligit et generos.
Cat 72.5	nunc te cognovi: quare etsi impensius uror,
Cat 72.6	multo mi tamen es vilior et levior.
Cat 72.7	qui potis est? inquis. quod amantem iniuria talis
Cat 72.8	cogit amare magis, sed bene velle minus.
Cat 73.1	Desine de quoquam quicquam bene velle mereri
Cat 73.2	aut aliquem fieri posse putare pium.
Cat 73.3	omnia sunt ingrata, nihil fecisse benigne:
Cat 73.4	immo etiam taedet, taedet obestque magis:
Cat 73.5	ut mihi, quem nemo gravius nec acerbius urget
Cat 73.6	Quam modo qui me unum atque unicum amicum habuit.
Cat 74.1	Gellius audierat patruum obiurgare solere,
Cat 74.2	si quis delicias diceret aut faceret.
Cat 74.3	hoc ne ipsi accideret, patrui perdepsuit ipsam
Cat 74.4	uxorem et patruum reddidit Harpocratem.
Cat 74.5	quod voluit fecit: nam, quamvis irrumet ipsum
Cat 74.6	nunc patruum, verbum non faciet patruus.
Cat 75.1	Huc est mens deducta tua, mea Lesbia, culpa,
Cat 75.2	atque ita se officio perdidit ipsa suo,
Cat 75.3	ut iam nec bene velle queat tibi, si optuma fias,
Cat 75.4	nec desistere amare, omnia si facias.
Cat 76.1	Si qua recordanti benefacta priora voluptas
Cat 76.2	est homini, cum se cogitat esse pium,
Cat 76.3	nec sanctam violasse fidem, nec foedere in ullo
Cat 76.4	divum ad fallendos numine abusum homines,
Cat 76.5	multa parata manent in longa aetate, Catulle,
Cat 76.6	ex hoc ingrato gaudia amore tibi.
Cat 76.7	nam quaecumque homines bene cuiquam aut dicere possunt
Cat 76.8	aut facere, haec a te dictaque factaque sunt:
Cat 76.9	omnia quae ingratae perierunt credita menti.
Cat 76.10	quare cur tu te iam amplius excrucies?
Cat 76.11	quin tu animo offirmas atque istinc teque reducis
Cat 76.12	et dis invitis desinis esse miser?
Cat 76.13	difficile est longum subito deponere amorem;
Cat 76.14	difficile est, verum hoc qua libet efficias.
Cat 76.15	una salus haec est, hoc est tibi pervincendum;
Cat 76.16	hoc facias, sive id non pote sive pote.
Cat 76.17	o di, si vestrum est misereri, aut si quibus unquam
Cat 76.18	extremam iam ipsa in morte tulistis opem,
Cat 76.19	me miserum adspicite et, si vitam puriter egi,
Cat 76.20	eripite hanc pestem perniciemque mihi!
Cat 76.21	hei mihi subrepens imos ut torpor in artus
Cat 76.22	expulit ex omni pectore laetitias.
Cat 76.23	non iam illud quaero, contra ut me diligat illa,
Cat 76.24	aut, quod non potis est, esse pudica velit:
Cat 76.25	ipse valere opto et taetrum hunc deponere morbum.
Cat 76.26	o di, reddite mi hoc pro pietate mea.
Cat 77.1	Rufe mihi frustra ac nequiquam credite amice
Cat 77.2	(frustra? immo magno cum pretio atque malo),
Cat 77.3	sicine subrepsti mi atque intestina perurens
Cat 77.4	hei misero eripuisti omnia nostra bona?
Cat 77.5	eripuisti, eheu nostrae crudele venenum
Cat 77.6	vitae, eheu nostrae pestis amicitiae. Lines 7 ff are presented as part of poem 77 in the print edition. They are appended to poem 78 here.
Cat 78.1	Gallus habet fratres, quorum est lepidissima coniunx
Cat 78.2	alterius, lepidus filius alterius.
Cat 78.3	Gallus homo est bellus: nam dulces iungit amores,
Cat 78.4	cum puero ut bello bella puella cubet.
Cat 78.5	Gallus homo est stultus nec se videt esse maritum,
Cat 78.6	qui patruus patrui monstret adulterium.
Cat 78.7	Sed nunc id doleo quod purae pura puellae
Cat 78.8	savia comminxit spurca saliva tua.
Cat 78.9	verum id non impune feres: nam te omnia saecla
Cat 78.10	noscent et qui sis fama loquetur anus.
Cat 79.1	Lesbius est pulcher: quid ni? quem Lesbia malit
Cat 79.2	quam te cum tota gente, Catulle, tua.
Cat 79.3	sed tamen hic pulcher vendat cum gente Catullum,
Cat 79.4	si tria notorum savia reppererit.
Cat 80.1	Quid dicam, Gelli, quare rosea ista labella
Cat 80.2	Hiberna fiant candidiora nive,
Cat 80.3	mane domo cum exis et cum te octava quiete
Cat 80.4	e molli longo suscitat hora die?
Cat 80.5	nescio quid certe est: an vere fama susurrat
Cat 80.6	grandia te medii tenta vorare viri?
Cat 80.7	sic certe est: clamant Victoris rupta miselli
Cat 80.8	ilia, et emulso labra notata sero.
Cat 81.1	Nemone in tanto potuit populo esse, Iuventi,
Cat 81.2	bellus homo quem tu diligere inciperes
Cat 81.3	praeterquam iste tuus moribunda ab sede Pisauri
Cat 81.4	hospes inaurata pallidior statua?
Cat 81.5	qui tibi nunc cordi est, quem tu praeponere nobis
Cat 81.6	audes et nescis quod facinus facias.
Cat 82.1	Quinti, si tibi vis oculos debere Catullum
Cat 82.2	aut aliud si quid carius est oculis,
Cat 82.3	eripere ei noli multo quod carius illi
Cat 82.4	est oculis seu quid carius est oculis.
Cat 83.1	Lesbia mi praesente viro mala plurima dicit:
Cat 83.2	haec illi fatuo maxima laetitia est.
Cat 83.3	mule, nihil sentis. si nostri oblita taceret,
Cat 83.4	sana esset: nunc quod gannit et obloquitur,
Cat 83.5	non solum meminit, sed, quae multo acrior est res,
Cat 83.6	irata est: hoc est, uritur et loquitur.
Cat 84.1	Chommoda dicebat, si quando commode vellet
Cat 84.2	dicere, et insidias Arrius hinsidias,
Cat 84.3	et tum mirifice sperabat se esse locutum
Cat 84.4	cum quantum poterat dixerat hinsidias.
Cat 84.5	credo, sic mater, sic liber avunculus eius,
Cat 84.6	sic maternus avus dixerat atque avia
Cat 84.7	hoc misso in Syriam requierant omnibus aures:
Cat 84.8	audibant eadem haec leniter et leviter,
Cat 84.9	nec sibi postilla metuebant talia verba,
Cat 84.10	cum subito adfertur nuntius horribilis
Cat 84.11	Ionios fluctus, postquam illuc Arrius isset,
Cat 84.12	iam non Ionios esse, sed Hionios.
Cat 85.1	Odi et amo. quare id faciam fortasse requiris
Cat 85.2	nescio, sed fieri sentio et excrucior.
Cat 86.1	Quintia formosa est multis, mihi candida, longa,
Cat 86.2	recta est. haec ego sic singula confiteor,
Cat 86.3	totum illud formosa nego: nam nulla venustas,
Cat 86.4	nulla in tam magno est corpore mica salis.
Cat 86.5	Lesbia formosa est, quae cum pulcherrima tota est,
Cat 86.6	tum omnibus una omnis subripuit Veneres.
Cat 87.1	Nulla potest mulier tantum se dicere amatam
Cat 87.2	vere, quantum a me Lesbia amata mea es
Cat 87.3	nulla fides ullo fuit unquam in foedere tanta
Cat 87.4	quanta in amore tuo ex parte reperta mea est.
Cat 88.1	Quid facit is, Gelli, qui cum matre atque sorore
Cat 88.2	prurit et abiectis pervigilat tunicis?
Cat 88.3	quid facit is patruum qui non sinit esse maritum?
Cat 88.4	ecquid scis quantum suscipiat sceleris?
Cat 88.5	suscipit, o Gelli, quantum non ultima Tethys
Cat 88.6	nec genitor nympharum abluit Oceanus:
Cat 88.7	nam nihil est quicquam sceleris quo prodeat ultra,
Cat 88.8	non si demisso se ipse voret capite.
Cat 89.1	Gellius est tenuis: quid ni? cui tam bona mater
Cat 89.2	tamque valens vivat tamque venusta soror
Cat 89.3	tamque bonus patruus tamque omnia plena puellis
Cat 89.4	cognatis, quare is desinat esse macer?
Cat 89.5	qui ut nihil attingat, nisi quod fas tangere non est,
Cat 89.6	quantumvis quare sit macer invenies.
Cat 90.1	Nascatur magus ex Gelli matrisque nefando
Cat 90.2	coniugio et discat Persicum haruspicium:
Cat 90.3	nam magus ex matre et gnato gignatur oportet,
Cat 90.4	si vera est Persarum impia religio,
Cat 90.5	gratus ut accepto veneretur carmine divos
Cat 90.6	omentum in flamma pingue liquefaciens.
Cat 91.1	Non ideo, Gelli, sperabam te mihi fidum
Cat 91.2	in misero hoc nostro, hoc perdito amore fore
Cat 91.3	quod te cognossem bene constantemve putarem
Cat 91.4	aut posse a turpi mentem inhibere probro,
Cat 91.5	sed neque quod matrem nec germanam esse videbam
Cat 91.6	hanc tibi cuius me magnus edebat amor;
Cat 91.7	et quamvis tecum multo coniungerer usu,
Cat 91.8	non satis id causae credideram esse tibi.
Cat 91.9	tu satis id duxti: tantum tibi gaudium in omni
Cat 91.10	culpa est in quacumque est aliquid sceleris.
Cat 92.1	Lesbia mi dicit semper male nec tacet unquam
Cat 92.2	de me: Lesbia me dispeream nisi amat.
Cat 92.3	quo signo? quia sunt totidem mea: deprecor illam
Cat 92.4	adsidue, verum dispeream nisi amo.
Cat 93.1	Nil nimium studeo, Caesar, tibi velle placere,
Cat 93.2	nec scire utrum sis albus an ater homo.
Cat 94.1	Mentula moechatur. moechatur mentula certe.
Cat 94.2	hoc est quod dicunt, ipsa olera olla legit.
Cat 95.1	Zmyrna mei Cinnae nonam post denique messem
Cat 95.2	quam coepta est nonamque edita post hiemem,
Cat 95.3	milia cum interea quingenta Hortensius uno
Cat 95.5	Zmyrna cavas Satrachi penitus mittetur ad undas,
Cat 95.6	Zmyrnam cana diu saecula pervolvent.
Cat 95.7	at Volusi annales Paduam morientur ad ipsam
Cat 95.8	et laxas scombris saepe dabunt tunicas.
Cat 95.9	parva mei mihi sint cordi monumenta sodalis:
Cat 95.10	at populus tumido gaudeat Antimacho.
Cat 96.1	Si quicquam mutis gratum acceptumve sepulcris
Cat 96.2	accidere a nostro, Calve, dolore potest,
Cat 96.3	quo desiderio veteres renovamus amores
Cat 96.4	atque olim missas flemus amicitias,
Cat 96.5	certe non tanto mors immatura dolori est
Cat 96.6	Quintiliae, quantum gaudet amore tuo.
Cat 97.1	Non (ita me di ament) quicquam referre putavi
Cat 97.2	utrumne os an culum olfacerem Aemilio.
Cat 97.3	nilo mundius hoc, nihiloque immundius illud,
Cat 97.4	verum etiam culus mundior et melior:
Cat 97.5	nam sine dentibus est. hoc dentis sesquipedalis,
Cat 97.6	gingivas vero ploxeni habet veteris,
Cat 97.7	praeterea rictum qualem diffissus in aestu
Cat 97.8	meientis mulae cunnus habere solet.
Cat 97.9	hic futuit multas et se facit esse venustum,
Cat 97.10	et non pistrino traditur atque asino?
Cat 97.11	quem si qua attingit, non illam posse putemus
Cat 97.12	aegroti culum lingere carnificis?
Cat 98.1	In te, si in quemquam, dici pose, putide Victi,
Cat 98.2	id quod verbosis dicitur et fatuis:
Cat 98.3	ista cum lingua, si usus veniat tibi, possis
Cat 98.4	culos et crepidas lingere carpatinas.
Cat 98.5	si nos omnino vis omnes perdere, Victi,
Cat 98.6	hiscas: omnino quod cupis efficies.
Cat 99.1	Subripui tibi, dum ludis, mellite Iuventi,
Cat 99.2	saviolum dulci dulcius ambrosia.
Cat 99.3	verum id non impune tuli: namque amplius horam
Cat 99.4	suffixum in summa me memini esse cruce,
Cat 99.5	dum tibi me purgo nec possum fletibus ullis
Cat 99.6	tantillum vestrae demere saevitiae.
Cat 99.7	nam simul id factum est, multis diluta labella
Cat 99.8	guttis abstersisti omnibus articulis,
Cat 99.9	ne quicquam nostro contractum ex ore maneret,
Cat 99.10	tanquam commictae spurca saliva lupae.
Cat 99.11	praeterea infesto miserum me tradere Amori
Cat 99.12	non cessasti omnique excruciare modo,
Cat 99.13	ut mi ex ambrosia mutatum iam fores illud
Cat 99.14	saviolum tristi tristius elleboro.
Cat 99.15	quam quoniam poenam misero proponis amori,
Cat 99.16	nunquam iam posthac basia subripiam.
Cat 100.1	Caelius Aufilenum et Quintius Aufilenam
Cat 100.2	flos Veronensum depereunt iuvenum,
Cat 100.3	hic fratrem, ille sororem. hoc est quod dicitur illud
Cat 100.4	fraternum vere dulce sodalicium.
Cat 100.5	cui faveam potius? Caeli, tibi: nam tua nobis
Cat 100.6	per facta exhibita est unica amicitia
Cat 100.7	cum vesana meas torreret flamma medullas.
Cat 100.8	sis felix, Caeli, sis in amore potens.
Cat 101.1	Multas per gentes et multa per aequora vectus
Cat 101.2	advenio has miseras, frater, ad inferias,
Cat 101.3	ut te postremo donarem munere mortis
Cat 101.4	et mutam nequiquam adloquerer cinerem,
Cat 101.5	quandoquidem fortuna mihi tete abstulit ipsum,
Cat 101.6	heu miser indigne frater adempte mihi.
Cat 101.7	nunc tamen interea haec, prisco quae more parentum
Cat 101.8	tradita sunt tristi munere ad inferias,
Cat 101.9	accipe fraterno multum manantia fletu
Cat 101.10	atque in perpetuum, frater, ave atque vale.
Cat 102.1	Si quicquam tacito commissum est fido ab amico
Cat 102.2	cuius sit penitus nota fides animi,
Cat 102.3	meque esse invenies illorum iure sacratum,
Cat 102.4	Corneli, et factum me esse puta Harpocratem.
Cat 103.1	Aut sodes mihi redde decem sestertia, Silo,
Cat 103.2	deinde esto quamvis saevus et indomitus:
Cat 103.3	aut, si te nummi deIectant, desine quaeso
Cat 103.4	Leno esse atque idem saevus et indomitus.
Cat 104.1	Credis me potuisse meae maledicere vitae,
Cat 104.2	ambobus mihi quae carior est oculis?
Cat 104.3	non potui, nec, si possem, tam perdite amarem:
Cat 104.4	sed tu cum Tappone omnia monstra facis.
Cat 105.1	Mentula conatur Pipleum scandere montem:
Cat 105.2	Musae furcillis praecipitem eiciunt.
Cat 106.1	Cum puero bello praeconem qui videt esse,
Cat 106.2	quid credat, nisi se vendere discupere?
Cat 107.1	Si cui quid cupido optantique obtigit unquam
Cat 107.2	insperanti, hoc est gratum animo proprie.
Cat 107.3	quare hoc est gratum nobis quoque, carius auro,
Cat 107.4	quod te restituis, Lesbia, mi cupido:
Cat 107.5	restituis cupido atque insperanti, ipsa refers te
Cat 107.6	nobis. o lucem candidiore nota!
Cat 107.7	quis me uno vivit felicior, aut magis hac res
Cat 107.8	optandas vita dicere quis poterit?
Cat 108.1	Si, Comini, populi arbitrio tua cana senectus
Cat 108.2	spurcata impuris moribus intereat,
Cat 108.3	non equidem dubito quin primum inimica bonorum
Cat 108.4	lingua exsecta avido sit data vulturio,
Cat 108.5	effossos oculos voret atro gutture corvus,
Cat 108.6	intestina canes, cetera membra lupi.
Cat 109.1	Iucundum, mea vita, mihi proponis amorem
Cat 109.2	hunc nostrum inter nos perpetuumque fore.
Cat 109.3	di magni, facite ut vere promittere possit
Cat 109.4	atque id sincere dicat et ex animo,
Cat 109.5	ut liceat nobis tota perducere vita
Cat 109.6	aeternum hoc sanctae foedus amicitiae.
Cat 110.1	Aufilena, bonae semper laudantur amicae:
Cat 110.2	accipiunt pretium quod facere instituunt.
Cat 110.3	tu, quod promisti mihi, quod mentita, inimica es;
Cat 110.4	quod nec das et fers saepe, facts facinus.
Cat 110.5	aut facere ingenuae est, aut non promisse pudicae,
Cat 110.6	Aufilena, fuit: sed data corripere
Cat 110.7	fraudando † efficit plus quam meretricis avarae,
Cat 110.8	quae sese toto corpore prostituit.
Cat 111.1	Aufilena, viro contentam vivere solo
Cat 111.2	nuptarum laus e laudibus eximiis:
Cat 111.3	sed cuivis quamvis potius succumbere par est
Cat 111.4	quam matrem fratres ex patruo parere.
Cat 112.1	Multus homo est, Naso, neque tecum multus homo est qui
Cat 112.2	descendit: Naso, multus es et pathicus.
Cat 113.1	Consule Pompeio primum duo, Cinna, solebant
Cat 113.2	Maeciliam: facto consule nunc iterum
Cat 113.3	manserunt duo, sed creverunt milia in unum
Cat 113.4	singula. fecundum semen adulterio.
Cat 114.1	Firmanus saltu non falso Mentula dives
Cat 114.2	fertur, qui tot res in se habet egregias,
Cat 114.3	aucupium omne genus, piscis, prata, arva, ferasque.
Cat 114.4	nequiquam: fructus sumptibus exsuperat.
Cat 114.5	quare concedo sit dives, dum omnia desint;
Cat 114.6	saltum laudemus, dum domo ipse egeat.
Cat 115.1	Mentula habet iuxta triginta iugera prati,
Cat 115.2	quadraginta arvi: cetera sunt maria.
Cat 115.3	cur non divitiis Croesum superare potis sit
Cat 115.4	uno qui in saltu tot bona possideat,
Cat 115.5	prata, arva, ingentis silvas saltusque paludesque
Cat 115.6	usque ad Hyperboreos et mare ad Oceanum?
Cat 115.7	omnia magna haec sunt, tamen ipse est maximus ultro,
Cat 115.8	non homo, sed vero mentula magna minax.
Cat 116.1	Saepe tibi studioso animo venante requirens
Cat 116.2	carmina uti possem mittere Battiadae
Cat 116.3	qui te lenirem nobis, neu conarere
Cat 116.4	tela infesta mihi mittere in usque caput,
Cat 116.5	hunc video mihi nunc frustra sumptum esse laborem,
Cat 116.6	Gelli, nec nostras hic valuisse preces.
Cat 116.7	contra nos tela ista tua evitamus amictu:
Cat 116.8	at fixus nostris tu dabis supplicium.