[edition urn:cts:greekLit:tlg0085.tlg006.perseus-grc2] [episode] |1 Ἑρμῆ χθόνιε, πατρῷʼ ἐποπτεύων κράτη, |2 σωτὴρ γενοῦ μοι ξύμμαχός τʼ αἰτουμένῳ· |3 ἥκω γὰρ ἐς γῆν τήνδε καὶ κατέρχομαι. |4 τύμβου δʼ ἐπʼ ὄχθῳ τῷδε κηρύσσω πατρὶ |5 κλύειν, ἀκοῦσαι |6 πλόκαμον Ἰνάχῳ θρεπτήριον. |7 τὸν δεύτερον δὲ τόνδε πενθητήριον |8 οὐ γὰρ παρὼν ᾤμωξα σόν, πάτερ, μόρον |9 οὐδʼ ἐξέτεινα χεῖρʼ ἐπʼ ἐκφορᾷ νεκροῦ. |10 τί χρῆμα λεύσσω; τίς ποθʼ ἥδʼ ὁμήγυρις |11 στείχει γυναικῶν φάρεσιν μελαγχίμοις |12 πρέπουσα; ποίᾳ ξυμφορᾷ προσεικάσω; |13 πότερα δόμοισι πῆμα προσκυρεῖ νέον; |14 ἢ πατρὶ τὠμῷ τάσδʼ ἐπεικάσας τύχω |15 χοὰς φερούσας νερτέροις μειλίγματα; |16 οὐδέν ποτʼ ἄλλο· καὶ γὰρ Ἠλέκτραν δοκῶ |17 στείχειν ἀδελφὴν τὴν ἐμὴν πένθει λυγρῷ |18 πρέπουσαν. ὦ Ζεῦ, δός με τείσασθαι μόρον |19 πατρός, γενοῦ δὲ σύμμαχος θέλων ἐμοί. |20 Πυλάδη, σταθῶμεν ἐκποδών, ὡς ἂν σαφῶς |21 μάθω γυναικῶν ἥτις ἥδε προστροπή. [choral] [strophe 1] |22 ἰαλτὸς ἐκ δόμων ἔβαν |23 χοὰς προπομπὸς ὀξύχειρι σὺν κτύπῳ. |24 πρέπει παρηὶς φοινίοις ἀμυγμοῖς |25 ὄνυχος ἄλοκι νεοτόμῳ· |26 διʼ αἰῶνος δʼ ἰυγμοῖσι βόσκεται κέαρ. |27 λινοφθόροι δʼ ὑφασμάτων |28 λακίδες ἔφλαδον ὑπʼ ἄλγεσιν, |29 προστέρνῳ στολμῷ |30 πέπλων ἀγελάστοις |31 ξυμφοραῖς πεπληγμένων. [antistrophe 1] |32 τορὸς δὲ Φοῖβος ὀρθόθριξ |33 δόμων ὀνειρόμαντις, ἐξ ὕπνου κότον |34 πνέων, ἀωρόνυκτον ἀμβόαμα |35 μυχόθεν ἔλακε περὶ φόβῳ, |36 γυναικείοισιν ἐν δώμασιν βαρὺς πίτνων. |37 κριταί τε τῶνδʼ ὀνειράτων |38 θεόθεν ἔλακον ὑπέγγυοι |39 μέμφεσθαι τοὺς γᾶς |40 νέρθεν περιθύμως |41 τοῖς κτανοῦσί τʼ ἐγκοτεῖν. [strophe 2] |42 τοιάνδε χάριν ἀχάριτον ἀπότροπον κακῶν, |43 ἰὼ γαῖα μαῖα, |45 μωμένα μʼ ἰάλλει |46 δύσθεος γυνά. φοβοῦ- |47 μαι δʼ ἔπος τόδʼ ἐκβαλεῖν. |48 τί γὰρ λύτρον πεσόντος αἵματος πέδοι; |49 ἰὼ πάνοιζυς ἑστία, |50 ἰὼ κατασκαφαὶ δόμων. |51 ἀνήλιοι βροτοστυγεῖς |52 δνόφοι καλύπτουσι δόμους |53 δεσποτῶν θανάτοισι. [antistrophe 2] |55 σέβας δʼ ἄμαχον ἀδάματον ἀπόλεμον τὸ πρὶν |56 διʼ ὤτων φρενός τε |57 δαμίας περαῖνον |58 νῦν ἀφίσταται. φοβεῖ- |59 ται δέ τις. τὸ δʼ εὐτυχεῖν, |60 τόδʼ ἐν βροτοῖς θεός τε καὶ θεοῦ πλέον. |61 ῥοπὴ δʼ ἐπισκοπεῖ δίκας |62 ταχεῖα τοὺς μὲν ἐν φάει, |63 τὰ δʼ ἐν μεταιχμίῳ σκότου |64 μένει χρονίζοντας ἄχη βρύει, |65 τοὺς δʼ ἄκραντος ἔχει νύξ. [strophe 3] |66 διʼ αἵματʼ ἐκποθένθʼ ὑπὸ χθονὸς τροφοῦ |67 τίτας φόνος πέπηγεν οὐ διαρρύδαν. |68 διαλγὴς δʼ ἄτα διαφέρει |70 τὸν αἴτιον παναρκέτας νόσου βρύειν. [antistrophe 3] |71 θιγόντι δʼ οὔτι νυμφικῶν ἑδωλίων |72 ἄκος, πόροι τε πάντες ἐκ μιᾶς ὁδοῦ |73 προβαίνοντες τὸν χερομυσῆ |74 φόνον καθαίροντες ἴθυσαν μάταν. [epode] |75 ἐμοὶ δʼ —ἀνάγκαν γὰρ ἀμφίπτολιν |76 θεοὶ προσήνεγκαν· (ἐκ γὰρ οἴκων |77 πατρῴων δούλιόν μʼ ἐσᾶγον αἶσαν)— |78 δίκαια καὶ μὴ δίκαια ἀρχὰς πρέπον |80 βίᾳ φρενῶν αἰνέσαι |81 πικρὸν στύγος κρατούσῃ. |82 δακρύω δʼ ὑφʼ εἱμάτων |83 ματαίοισι δεσποτᾶν |83b τύχαις, κρυφαίοις πένθεσιν παχνουμένη. [episode] |84 δμωαὶ γυναῖκες, δωμάτων εὐθήμονες, |85 ἐπεὶ πάρεστε τῆσδε προστροπῆς ἐμοὶ |86 πομποί, γένεσθε τῶνδε σύμβουλοι πέρι· |87 τί φῶ χέουσα τάσδε κηδείους χοάς; |88 πῶς εὔφρονʼ εἴπω, πῶς κατεύξομαι πατρί; |89 πότερα λέγουσα παρὰ φίλης φίλῳ φέρειν |90 γυναικὸς ἀνδρί, τῆς ἐμῆς μητρὸς πάρα; |91 τῶνδʼ οὐ πάρεστι θάρσος, οὐδʼ ἔχω τί φῶ, |92 χέουσα τόνδε πέλανον ἐν τύμβῳ πατρός. |93 ἢ τοῦτο φάσκω τοὔπος, ὡς νόμος βροτοῖς, |94 ἔσθλʼ ἀντιδοῦναι τοῖσι πέμπουσιν τάδε |95 στέφη, δόσιν γε τῶν κακῶν ἐπαξίαν; |96 ἢ σῖγʼ ἀτίμως, ὥσπερ οὖν ἀπώλετο |97 πατήρ, τάδʼ ἐκχέασα, γάποτον χύσιν, |98 στείχω καθάρμαθʼ ὥς τις ἐκπέμψας πάλιν |99 δικοῦσα τεῦχος ἀστρόφοισιν ὄμμασιν; |100 τῆσδʼ ἐστὲ βουλῆς, ὦ φίλαι, μεταίτιαι· |101 κοινὸν γὰρ ἔχθος ἐν δόμοις νομίζομεν. |102 μὴ κεύθετʼ ἔνδον καρδίας φόβῳ τινός. |103 τὸ μόρσιμον γὰρ τόν τʼ ἐλεύθερον μένει |104 καὶ τὸν πρὸς ἄλλης δεσποτούμενον χερός. |105 λέγοις ἄν, εἴ τι τῶνδʼ ἔχοις ὑπέρτερον. |106 αἰδουμένη σοι βωμὸν ὣς τύμβον πατρὸς |107 λέξω, κελεύεις γάρ, τὸν ἐκ φρενὸς λόγον. |108 λέγοις ἄν, ὥσπερ ᾐδέσω τάφον πατρός. |109 φθέγγου χέουσα κεδνὰ τοῖσιν εὔφροσιν. |110 τίνας δὲ τούτους τῶν φίλων προσεννέπω; |111 πρῶτον μὲν αὑτὴν χὤστις Αἴγισθον στυγεῖ. |112 ἐμοί τε καὶ σοί τἄρʼ ἐπεύξομαι τάδε; |113 αὐτὴ σὺ ταῦτα μανθάνουσʼ ἤδη φράσαι. |114 τίνʼ οὖν ἔτʼ ἄλλον τῇδε προστιθῶ στάσει; |115 μέμνησʼ Ὀρέστου, κεἰ θυραῖός ἐσθʼ ὅμως. |116 εὖ τοῦτο, κἀφρένωσας οὐχ ἥκιστά με. |117 τοῖς αἰτίοις νῦν τοῦ φόνου μεμνημένη— |118 τί φῶ; δίδασκʼ ἄπειρον ἐξηγουμένη. |119 ἐλθεῖν τινʼ αὐτοῖς δαίμονʼ ἢ βροτῶν τινα— |120 πότερα δικαστὴν ἢ δικηφόρον λέγεις; |121 ἅπλῶς τι φράζουσʼ, ὅστις ἀνταποκτενεῖ. |122 καὶ ταῦτά μοὐστὶν εὐσεβῆ θεῶν πάρα; |123 πῶς δʼ οὐ τὸν ἐχθρὸν ἀνταμείβεσθαι κακοῖς; |124 κῆρυξ μέγιστε τῶν ἄνω τε καὶ κάτω, |124a ἄρηξον, Ἑρμῆ χθόνιε, κηρύξας ἐμοὶ |125 τοὺς γῆς ἔνερθε δαίμονας κλύειν ἐμὰς |126 εὐχάς, πατρῴων δωμάτων ἐπισκόπους, |127 καὶ Γαῖαν αὐτήν, ἣ τὰ πάντα τίκτεται, |128 θρέψασά τʼ αὖθις τῶνδε κῦμα λαμβάνει· |129 κἀγὼ χέουσα τάσδε χέρνιβας βροτοῖς |130 λέγω καλοῦσα πατέρʼ, ἐποίκτιρόν τʼ ἐμὲ |131 φίλον τʼ Ὀρέστην· πῶς ἀνάξομεν δόμοις; |132 πεπραμένοι γὰρ νῦν γέ πως ἀλώμεθα |133 πρὸς τῆς τεκούσης, ἄνδρα δʼ ἀντηλλάξατο |134 Αἴγισθον, ὅσπερ σοῦ φόνου μεταίτιος. |135 κἀγὼ μὲν ἀντίδουλος· ἐκ δὲ χρημάτων |136 φεύγων Ὀρέστης ἐστίν, οἱ δʼ ὑπερκόπως |137 ἐν τοῖσι σοῖς πόνοισι χλίουσιν μέγα. |138 ἐλθεῖν δʼ Ὀρέστην δεῦρο σὺν τύχῃ τινὶ |139 κατεύχομαί σοι, καὶ σὺ κλῦθί μου, πάτερ· |140 αὐτῇ τέ μοι δὸς σωφρονεστέραν πολὺ |141 μητρὸς γενέσθαι χεῖρά τʼ εὐσεβεστέραν. |142 ἡμῖν μὲν εὐχὰς τάσδε, τοῖς δʼ ἐναντίοις |143 λέγω φανῆναί σου, πάτερ, τιμάορον, |144 καὶ τοὺς κτανόντας ἀντικατθανεῖν δίκῃ. |145 ταῦτʼ ἐν μέσῳ τίθημι τῆς καλῆς ἀρᾶς, |146 κείνοις λέγουσα τήνδε τὴν κακὴν ἀράν· |147 ἡμῖν δὲ πομπὸς ἴσθι τῶν ἐσθλῶν ἄνω, |148 σὺν θεοῖσι καὶ γῇ καὶ δίκῃ νικηφόρῳ. |149 τοιαῖσδʼ ἐπʼ εὐχαῖς τάσδʼ ἐπισπένδω χοάς. |150 ὑμᾶς δὲ κωκυτοῖς ἐπανθίζειν νόμος, |151 παιᾶνα τοῦ θανόντος ἐξαυδωμένας. |152 ἵετε δάκρυ καναχὲς ὀλόμενον |153 ὀλομένῳ δεσπότᾳ |154 πρὸς ἔρυμα τόδε κακῶν, κεδνῶν τʼ |155 ἀπότροπον ἄγος ἀπεύχετον |156 κεχυμένων χοᾶν. κλύε δέ μοι, κλύε, σέ- |157 βας ὦ δέσποτʼ, ἐξ ἀμαυρᾶς φρενός. |158 ὀτοτοτοτοτοτοτοῖ, |159 ἴτω τις δορυ- |160 σθενὴς ἀνήρ, ἀναλυτὴρ δόμων, |161 Σκυθικά τʼ ἐν χεροῖν παλίντονʼ |162 ἐν ἔργῳ βέλη ʼπιπάλλων Ἄρης |163 σχέδιά τʼ αὐτόκωπα νωμῶν ξίφη. |164 ἔχει μὲν ἤδη γαπότους χοὰς πατήρ· |165 νέου δὲ μύθου τοῦδε κοινωνήσατε. |166 λέγοις ἄν· ὀρχεῖται δὲ καρδία φόβῳ. |167 ὁρῶ τομαῖον τόνδε βόστρυχον τάφῳ. |168 τίνος ποτʼ ἀνδρός, ἢ βαθυζώνου κόρης; |170 εὐξύμβολον τόδʼ ἐστὶ παντὶ δοξάσαι. |171 πῶς οὖν; παλαιὰ παρὰ νεωτέρας μάθω. |172 οὐκ ἔστιν ὅστις πλὴν ἐμοῦ κείραιτό νιν. |173 ἐχθροὶ γὰρ οἷς προσῆκε πενθῆσαι τριχί. |174 καὶ μὴν ὅδʼ ἐστὶ κάρτʼ ἰδεῖν ὁμόπτερος— |175 ποίαις ἐθείραις; τοῦτο γὰρ θέλω μαθεῖν. |176 αὐτοῖσιν ἡμῖν κάρτα προσφερὴς ἰδεῖν. |177 μῶν οὖν Ὀρέστου κρύβδα δῶρον ἦν τόδε; |178 μάλιστʼ ἐκείνου βοστρύχοις προσείδεται. |179 καὶ πῶς ἐκεῖνος δεῦρʼ ἐτόλμησεν μολεῖν; |180 ἔπεμψε χαίτην κουρίμην χάριν πατρός. |181 οὐχ ἧσσον εὐδάκρυτά μοι λέγεις τάδε, |182 εἰ τῆσδε χώρας μήποτε ψαύσει ποδί. |183 κἀμοὶ προσέστη καρδίας κλυδώνιον |184 χολῆς, ἐπαίσθην δʼ ὡς διανταίῳ βέλει· |185 ἐξ ὀμμάτων δὲ δίψιοι πίπτουσί μοι |186 σταγόνες ἄφρακτοι δυσχίμου πλημμυρίδος, |187 πλόκαμον ἰδούσῃ τόνδε· πῶς γὰρ ἐλπίσω |188 ἀστῶν τινʼ ἄλλον τῆσδε δεσπόζειν φόβης; |189 ἀλλʼ οὐδὲ μήν νιν ἡ κτανοῦσʼ ἐκείρατο, |190 ἐμὴ δὲ μήτηρ, οὐδαμῶς ἐπώνυμον |191 φρόνημα παισὶ δύσθεον πεπαμένη. |192 ἐγὼ δʼ ὅπως μὲν ἄντικρυς τάδʼ αἰνέσω, |193 εἶναι τόδʼ ἀγλάισμά μοι τοῦ φιλτάτου |194 βροτῶν Ὀρέστου—σαίνομαι δʼ ὑπʼ ἐλπίδος. |195 φεῦ. |195b εἴθʼ εἶχε φωνὴν εὔφρονʼ ἀγγέλου δίκην, |196 ὅπως δίφροντις οὖσα μὴ ʼκινυσσόμην, |197 ἀλλʼ εὖ ʼσαφήνει τόνδʼ ἀποπτύσαι πλόκον, |198 εἴπερ γʼ ἀπʼ ἐχθροῦ κρατὸς ἦν τετμημένος, |199 ἢ ξυγγενὴς ὢν εἶχε συμπενθεῖν ἐμοὶ |200 ἄγαλμα τύμβου τοῦδε καὶ τιμὴν πατρός. |201 ἀλλʼ εἰδότας μὲν τοὺς θεοὺς καλούμεθα, |202 οἵοισιν ἐν χειμῶσι ναυτίλων δίκην |203 στροβούμεθʼ· εἰ δὲ χρὴ τυχεῖν σωτηρίας, |204 σμικροῦ γένοιτʼ ἂν σπέρματος μέγας πυθμήν. |205 καὶ μὴν στίβοι γε, δεύτερον τεκμήριον, |206 ποδῶν ὅμοιοι τοῖς τʼ ἐμοῖσιν ἐμφερεῖς— |207 καὶ γὰρ δύʼ ἐστὸν τώδε περιγραφὰ ποδοῖν, |208 αὐτοῦ τʼ ἐκείνου καὶ συνεμπόρου τινός. |209 πτέρναι τενόντων θʼ ὑπογραφαὶ μετρούμεναι |210 εἰς ταὐτὸ συμβαίνουσι τοῖς ἐμοῖς στίβοις. |211 πάρεστι δʼ ὠδὶς καὶ φρενῶν καταφθορά. |212 εὔχου τὰ λοιπά, τοῖς θεοῖς τελεσφόρους |213 εὐχὰς ἐπαγγέλλουσα, τυγχάνειν καλῶς. |214 ἐπεὶ τί νῦν ἕκατι δαιμόνων κυρῶ; |215 εἰς ὄψιν ἥκεις ὧνπερ ἐξηύχου πάλαι. |216 καὶ τίνα σύνοισθά μοι καλουμένῃ βροτῶν; |217 σύνοιδʼ Ὀρέστην πολλά σʼ ἐκπαγλουμένην. |218 καὶ πρὸς τί δῆτα τυγχάνω κατευγμάτων; |219 ὅδʼ εἰμί· μὴ μάτευʼ ἐμοῦ μᾶλλον φίλον. |220 ἀλλʼ ἦ δόλον τινʼ, ὦ ξένʼ, ἀμφί μοι πλέκεις; |221 αὐτὸς καθʼ αὑτοῦ τἄρα μηχανορραφῶ. |222 ἀλλʼ ἐν κακοῖσι τοῖς ἐμοῖς γελᾶν θέλεις. |223 κἀν τοῖς ἐμοῖς ἄρʼ, εἴπερ ἔν γε τοῖσι σοῖς |224 ὡς ὄντʼ Ὀρέστην τάδε σʼ ἐγὼ προσεννέπω; |225 αὐτὸν μὲν οὖν ὁρῶσα δυσμαθεῖς ἐμέ· |226 κουρὰν δʼ ἰδοῦσα τήνδε κηδείου τριχὸς |228 ἰχνοσκοποῦσά τʼ ἐν στίβοισι τοῖς ἐμοῖς |227 ἀνεπτερώθης κἀδόκεις ὁρᾶν ἐμέ. |230 σκέψαι τομῇ προσθεῖσα βόστρυχον τριχὸς |229 σαυτῆς ἀδελφοῦ σύμμετρον τὠμῷ κάρᾳ. |231 ἰδοῦ δʼ ὕφασμα τοῦτο, σῆς ἔργον χερός, |232 σπάθης τε πληγὰς ἠδὲ θήρειον γραφήν. |233 ἔνδον γενοῦ, χαρᾷ δὲ μὴ ʼκπλαγῇς φρένας· |234 τοὺς φιλτάτους γὰρ οἶδα νῷν ὄντας πικρούς. |235 ὦ φίλτατον μέλημα δώμασιν πατρός, |236 δακρυτὸς ἐλπὶς σπέρματος σωτηρίου, |237 ἀλκῇ πεποιθὼς δῶμʼ ἀνακτήσῃ πατρός. |238 ὦ τερπνὸν ὄμμα τέσσαρας μοίρας ἔχον |239 ἐμοί· προσαυδᾶν δʼ ἔστʼ ἀναγκαίως ἔχον |240 πατέρα τε, καὶ τὸ μητρὸς ἐς σέ μοι ῥέπει |241 στέργηθρον· ἡ δὲ πανδίκως ἐχθαίρεται· |242 καὶ τῆς τυθείσης νηλεῶς ὁμοσπόρου· |243 πιστὸς δʼ ἀδελφὸς ἦσθʼ, ἐμοὶ σέβας φέρων |244 μόνος· Κράτος τε καὶ Δίκη σὺν τῷ τρίτῳ |245 πάντων μεγίστῳ Ζηνὶ συγγένοιτό σοι. |246 Ζεῦ Ζεῦ, θεωρὸς τῶνδε πραγμάτων γενοῦ· |247 ἰδοῦ δὲ γένναν εὖνιν αἰετοῦ πατρός, |248 θανόντος ἐν πλεκταῖσι καὶ σπειράμασιν |249 δεινῆς ἐχίδνης. τοὺς δʼ ἀπωρφανισμένους |250 νῆστις πιέζει λιμός· οὐ γὰρ ἐντελεῖς |251 θήραν πατρῴαν προσφέρειν σκηνήμασιν. |252 οὕτω δὲ κἀμὲ τήνδε τʼ, Ἠλέκτραν λέγω, |253 ἰδεῖν πάρεστί σοι, πατροστερῆ γόνον, |254 ἄμφω φυγὴν ἔχοντε τὴν αὐτὴν δόμων. |255 καὶ τοῦ θυτῆρος καί σε τιμῶντος μέγα |256 πατρὸς νεοσσοὺς τούσδʼ ἀποφθείρας πόθεν |257 ἕξεις ὁμοίας χειρὸς εὔθοινον γέρας; |258 οὔτʼ αἰετοῦ γένεθλʼ ἀποφθείρας, πάλιν |259 πέμπειν ἔχοις ἂν σήματʼ εὐπιθῆ βροτοῖς· |260 οὔτʼ ἀρχικός σοι πᾶς ὅδʼ αὐανθεὶς πυθμὴν |261 βωμοῖς ἀρήξει βουθύτοις ἐν ἤμασιν. |262 κόμιζʼ, ἀπὸ σμικροῦ δʼ ἂν ἄρειας μέγαν |263 δόμον, δοκοῦντα κάρτα νῦν πεπτωκέναι. |264 ὦ παῖδες, ὦ σωτῆρες ἑστίας πατρός, |265 σιγᾶθʼ, ὅπως μὴ πεύσεταί τις, ὦ τέκνα, |266 γλώσσης χάριν δὲ πάντʼ ἀπαγγείλῃ τάδε |267 πρὸς τοὺς κρατοῦντας· οὓς ἴδοιμʼ ἐγώ ποτε |268 θανόντας ἐν κηκῖδι πισσήρει φλογός. |269 οὔτοι προδώσει Λοξίου μεγασθενὴς |270 χρησμὸς κελεύων τόνδε κίνδυνον περᾶν, |271 κἀξορθιάζων πολλὰ καὶ δυσχειμέρους |272 ἄτας ὑφʼ ἧπαρ θερμὸν ἐξαυδώμενος, |273 εἰ μὴ μέτειμι τοῦ πατρὸς τοὺς αἰτίους· |274 τρόπον τὸν αὐτὸν ἀνταποκτεῖναι λέγων, |275 ἀποχρημάτοισι ζημίαις ταυρούμενον· |276 αὐτὸν δʼ ἔφασκε τῇ φίλῃ ψυχῇ τάδε |277 τείσειν μʼ ἔχοντα πολλὰ δυστερπῆ κακά. |278 τὰ μὲν γὰρ ἐκ γῆς δυσφρόνων μηνίματα |279 βροτοῖς πιφαύσκων εἶπε, τὰς δʼ αἰνῶν νόσους, |280 σαρκῶν ἐπαμβατῆρας ἀγρίαις γνάθοις |281 λειχῆνας ἐξέσθοντας ἀρχαίαν φύσιν· |282 λευκὰς δὲ κόρσας τῇδʼ ἐπαντέλλειν νόσῳ· |283 ἄλλας τʼ ἐφώνει προσβολὰς Ἐρινύων |284 ἐκ τῶν πατρῴων αἱμάτων τελουμένας· |285 τὸ γὰρ σκοτεινὸν τῶν ἐνερτέρων βέλος |286 ἐκ προστροπαίων ἐν γένει πεπτωκότων, |287 καὶ λύσσα καὶ μάταιος ἐκ νυκτῶν φόβος |288 ὁρῶντα λαμπρὸν ἐν σκότῳ νωμῶντʼ ὀφρὺν |289 κινεῖ, ταράσσει, καὶ διώκεσθαι πόλεως |290 χαλκηλάτῳ πλάστιγγι λυμανθὲν δέμας. |291 καὶ τοῖς τοιούτοις οὔτε κρατῆρος μέρος |292 εἶναι μετασχεῖν, οὐ φιλοσπόνδου λιβός, |293 βωμῶν τʼ ἀπείργειν οὐχ ὁρωμένην πατρὸς |294 μῆνιν· δέχεσθαι δʼ οὔτε συλλύειν τινά. |295 πάντων δʼ ἄτιμον κἄφιλον θνῄσκειν χρόνῳ |296 κακῶς ταριχευθέντα παμφθάρτῳ μόρῳ. |297 τοιοῖσδε χρησμοῖς ἆρα χρὴ πεποιθέναι; |298 κεἰ μὴ πέποιθα, τοὔργον ἔστʼ ἐργαστέον. |299 πολλοὶ γὰρ εἰς ἓν συμπίτνουσιν ἵμεροι, |300 θεοῦ τʼ ἐφετμαὶ καὶ πατρὸς πένθος μέγα, |301 καὶ πρὸς πιέζει χρημάτων ἀχηνία, |302 τὸ μὴ πολίτας εὐκλεεστάτους βροτῶν, |303 Τροίας ἀναστατῆρας εὐδόξῳ φρενί, |304 δυοῖν γυναικοῖν ὧδʼ ὑπηκόους πέλειν. |305 θήλεια γὰρ φρήν· εἰ δὲ μή, τάχʼ εἴσεται. [anapests] |306 ἀλλʼ ὦ μεγάλαι Μοῖραι, Διόθεν |307 τῇδε τελευτᾶν, |308 ᾗ τὸ δίκαιον μεταβαίνει. |309 ἀντὶ μὲν ἐχθρᾶς γλώσσης ἐχθρὰ |310 γλῶσσα τελείσθω· τοὐφειλόμενον |311 πράσσουσα Δίκη μέγʼ ἀυτεῖ· |312 ἀντὶ δὲ πληγῆς φονίας φονίαν |313 πληγὴν τινέτω. δράσαντι παθεῖν, |314 τριγέρων μῦθος τάδε φωνεῖ. [choral] [strophe 1] |315 ὦ πάτερ αἰνόπατερ, τί σοι |316 φάμενος ἢ τί ῥέξας |317 τύχοιμʼ ἂν ἕκαθεν οὐρίσας, |318 ἔνθα σʼ ἔχουσιν εὐναί, |319 σκότῳ φάος ἀντίμοι- |320 ρον; χάριτες δʼ ὁμοίως |321 κέκληνται γόος εὐκλεὴς |322 προσθοδόμοις Ἀτρείδαις. [strophe 2] |323 τέκνον, φρόνημα τοῦ |324 θανόντος οὐ δαμάζει |325 πυρὸς ἡ μαλερὰ γνάθος, |326 φαίνει δʼ ὕστερον ὀργάς· |327 ὀτοτύζεται δʼ ὁ θνῄσκων, |328 ἀναφαίνεται δʼ ὁ βλάπτων. |329 πατέρων τε καὶ τεκόντων |330 γόος ἔνδικος ματεύει |331 τὸ πᾶν ἀμφιλαφὴς ταραχθείς. [antistrophe 1] |332 κλῦθί νυν, ὦ πάτερ, ἐν μέρει |333 πολυδάκρυτα πένθη. |334 δίπαις τοί σʼ ἐπιτύμβιος |335 θρῆνος ἀναστενάζει. |336 τάφος δʼ ἱκέτας δέδεκται |337 φυγάδας θʼ ὁμοίως. |338 τί τῶνδʼ εὖ, τί δʼ ἄτερ κακῶν; |339 οὐκ ἀτρίακτος ἄτα; [anapests] |340 ἀλλʼ ἔτʼ ἂν ἐκ τῶνδε θεὸς χρῄζων |341 θείη κελάδους εὐφθογγοτέρους· |342 ἀντὶ δὲ θρήνων ἐπιτυμβιδίων |343 παιὰν μελάθροις ἐν βασιλείοις |344 νεοκρᾶτα φίλον κομίσειεν. [strophe 3] |345 εἰ γὰρ ὑπʼ Ἰλίῳ |346 πρός τινος Λυκίων, πάτερ, |347 δορίτμητος κατηναρίσθης· |348 λιπὼν ἂν εὔκλειαν ἐν δόμοισι |349 τέκνων τʼ ἐν κελεύθοις |350 ἐπιστρεπτὸν αἰῶ |351 κτίσας πολύχωστον ἂν εἶχες |352 τάφον διαποντίου γᾶς |353 δώμασιν εὐφόρητον, [antistrophe 2] |354 φίλος φίλοισι τοῖς |355 ἐκεῖ καλῶς θανοῦσιν |356 κατὰ χθονὸς ἐμπρέπων |357 σεμνότιμος ἀνάκτωρ, |358 πρόπολός τε τῶν μεγίστων |359 χθονίων ἐκεῖ τυράννων· |360 βασιλεὺς γὰρ ἦσθʼ, ὄφρʼ ἔζης, |361 μόριμον λάχος πιπλάντων |362 χεροῖν πεισίβροτόν τε βάκτρον. [antistrophe 3] |363 μηδʼ ὑπὸ Τρωίας |364 τείχεσι φθίμενος, πάτερ, |365 μετʼ ἄλλῳ δουρικμῆτι λαῷ |366 παρὰ Σκαμάνδρου πόρον τεθάφθαι. |367 πάρος δʼ οἱ κτανόντες |368 νιν οὕτως δαμῆναι |369 φίλοις, θανατηφόρον αἶσαν |370 πρόσω τινὰ πυνθάνεσθαι |371 τῶνδε πόνων ἄπειρον. [anapests] |372 ταῦτα μέν, ὦ παῖ, κρείσσονα χρυσοῦ, |373 μεγάλης δὲ τύχης καὶ ὑπερβορέου |374 μείζονα φωνεῖς· δύνασαι γάρ. |375 ἀλλὰ διπλῆς γὰρ τῆσδε μαράγνης |376 δοῦπος ἱκνεῖται· τῶν μὲν ἀρωγοὶ |377 κατὰ γῆς ἤδη, τῶν δὲ κρατούντων |378 χέρες οὐχ ὅσιαι στυγερῶν τούτων· |379 παισὶ δὲ μᾶλλον γεγένηται. [strophe 4] |380 τοῦτο διαμπερὲς οὖς |381 ἵκεθʼ ἅπερ τι βέλος. |382 Ζεῦ Ζεῦ, κάτωθεν ἀμπέμπων |383 ὑστερόποινον ἄταν |384 βροτῶν τλάμονι καὶ πανούργῳ |385 χειρί—τοκεῦσι δʼ ὅμως τελεῖται. [strophe 5] |386 ἐφυμνῆσαι γένοιτό μοι πυκά- |387 εντʼ ὀλολυγμὸν ἀνδρὸς |388 θεινομένου, γυναικός τʼ |389 ὀλλυμένας· τί γὰρ κεύθω φρενὸς οἷον ἔμπας |390 ποτᾶται; πάροιθεν δὲ πρῴρας |391 δριμὺς ἄηται κραδίας |392 θυμὸς ἔγκοτον στύγος. [antistrophe 4] |394 καὶ πότʼ ἂν ἀμφιθαλὴς |395 Ζεὺς ἐπὶ χεῖρα βάλοι, |396 φεῦ φεῦ, κάρανα δαΐξας; |397 πιστὰ γένοιτο χώρᾳ. |398 δίκαν δʼ ἐξ ἀδίκων ἀπαιτῶ. |399 κλῦτε δὲ Γᾶ χθονίων τε τιμαί. [anapests] |400 ἀλλὰ νόμος μὲν φονίας σταγόνας |401 χυμένας ἐς πέδον ἄλλο προσαιτεῖν |402 αἷμα. βοᾷ γὰρ λοιγὸς Ἐρινὺν |403 παρὰ τῶν πρότερον φθιμένων ἄτην |404 ἑτέραν ἐπάγουσαν ἐπʼ ἄτῃ. [strophe 6] |405 πόποι δὴ νερτέρων τυραννίδες, |406 ἴδετε πολυκρατεῖς Ἀραὶ φθινομένων, |407 ἴδεσθʼ Ἀτρειδᾶν τὰ λοίπʼ ἀμηχάνως |408 ἔχοντα καὶ δωμάτων |409 ἄτιμα. πᾷ τις τράποιτʼ ἄν, ὦ Ζεῦ; [antistrophe 5] |410 πέπαλται δαὖτέ μοι φίλον κέαρ |411 τόνδε κλύουσαν οἶκτον |412 καὶ τότε μὲν δύσελπις, |413 σπλάγχνα δέ μοι κελαινοῦ- |414 ται πρὸς ἔπος κλυούσᾳ. |415 ὅταν δʼ αὖτʼ ἐπʼ ἀλκῆς ἐπάρῃ μʼ |416 ἐλπίς, ἀπέστασεν ἄχος |417 προσφανεῖσά μοι καλῶς. [antistrophe 6] |418 τί δʼ ἂν φάντες τύχοιμεν ἢ τά περ |419 πάθομεν ἄχεα πρός γε τῶν τεκομένων; |420 πάρεστι σαίνειν, τὰ δʼ οὔτι θέλγεται. |421 λύκος γὰρ ὥστʼ ὠμόφρων |422 ἄσαντος ἐκ ματρός ἐστι θυμός. [strophe 7] |423 ἔκοψα κομμὸν Ἄριον ἔν τε Κισσίας |424 νόμοις ἰηλεμιστρίας, |425 ἀπριγδόπληκτα πολυπλάνητα δʼ ἦν ἰδεῖν |426 ἐπασσυτεροτριβῆ τὰ χερὸς ὀρέγματα |427 ἄνωθεν ἀνέκαθεν, κτύπῳ δʼ ἐπερρόθει |428 κροτητὸν ἀμὸν καὶ πανάθλιον κάρα. [strophe 8] |429 ἰὼ ἰὼ δαΐα |430 πάντολμε μᾶτερ, δαΐαις ἐν ἐκφοραῖς |431 ἄνευ πολιτᾶν ἄνακτʼ, |432 ἄνευ δὲ πενθημάτων |433 ἔτλας ἀνοίμωκτον ἄνδρα θάψαι. [strophe 9] |434 τὸ πᾶν ἀτίμως ἔλεξας, οἴμοι. |435 πατρὸς δʼ ἀτίμωσιν ἆρα τείσει |436 ἕκατι μὲν δαιμόνων, |437 ἕκατι δʼ ἀμᾶν χερῶν; |438 ἔπειτʼ ἐγὼ νοσφίσας ὀλοίμαν. [antistrophe 9] |439 ἐμασχαλίσθη δέ γʼ, ὡς τόδʼ εἰδῇς· |440 ἔπρασσε δʼ, ᾇπέρ νιν ὧδε θάπτει, |441 μόρον κτίσαι μωμένα |442 ἄφερτον αἰῶνι σῷ. |443 κλύεις πατρῴους δύας ἀτίμους. [antistrophe 7] |445 λέγεις πατρῷον μόρον· ἐγὼ δʼ ἀπεστάτουν |446 ἄτιμος, οὐδὲν ἀξία· |447 μυχῷ δʼ ἄφερκτος πολυσινοῦς κυνὸς δίκαν |448 ἑτοιμότερα γέλωτος ἀνέφερον λίβη, |449 χέουσα πολύδακρυν γόον κεκρυμμένα. |450 τοιαῦτʼ ἀκούων ἐν φρεσὶν γράφου ˘ ¯. [antistrophe 8] |451 διʼ ὤτων δὲ συν- |452 τέτραινε μῦθον ἡσύχῳ φρενῶν βάσει. |453 τὰ μὲν γὰρ οὕτως ἔχει, |454 τὰ δʼ αὐτὸς ὄργα μαθεῖν. |455 πρέπει δʼ ἀκάμπτῳ μένει καθήκειν. [strophe 10] |456 σέ τοι λέγω, ξυγγενοῦ, πάτερ, φίλοις. |457 ἐγὼ δʼ ἐπιφθέγγομαι κεκλαυμένα. |458 στάσις δὲ πάγκοινος ἅδʼ ἐπιρροθεῖ· |459 ἄκουσον ἐς φάος μολών, |460 ξὺν δὲ γενοῦ πρὸς ἐχθρούς. [antistrophe 10] |461 Ἄρης Ἄρει ξυμβαλεῖ, Δίκᾳ Δίκα. |462 ἰὼ θεοί, κραίνετʼ ἐνδίκως δίκας. |463 τρόμος μʼ ὑφέρπει κλύουσαν εὐγμάτων. |464 τὸ μόρσιμον μένει πάλαι, |465 εὐχομένοις δʼ ἂν ἔλθοι. [strophe 11] |466 ὦ πόνος ἐγγενὴς |467 καὶ παράμουσος Ἄτας |468 αἱματόεσσα πλαγά. |469 ἰὼ δύστονʼ ἄφερτα κήδη· |470 ἰὼ δυσκατάπαυστον ἄλγος. [antistrophe 11] |471 δώμασιν ἔμμοτον |472 τῶνδʼ ἄκος, οὐδʼ ἀπʼ ἄλλων |473 ἔκτοθεν, ἀλλʼ ἀπʼ αὐτῶν, |474 διʼ ὠμὰν ἔριν αἱματηράν. |475 θεῶν τῶν κατὰ γᾶς ὅδʼ ὕμνος. [anapests] |476 ἀλλὰ κλύοντες, μάκαρες χθόνιοι, |477 τῆσδε κατευχῆς πέμπετʼ ἀρωγὴν |478 παισὶν προφρόνως ἐπὶ νίκῃ. [episode] |479 πάτερ, τρόποισιν οὐ τυραννικοῖς θανών, |480 αἰτουμένῳ μοι δὸς κράτος τῶν σῶν δόμων. |481 κἀγώ, πάτερ, τοιάνδε σου χρείαν ἔχω, |482 φυγεῖν μέγαν προσθεῖσαν Αἰγίσθῳ φθόρον. |483 οὕτω γὰρ ἄν σοι δαῖτες ἔννομοι βροτῶν |484 κτιζοίατʼ· εἰ δὲ μή, παρʼ εὐδείπνοις ἔσῃ |485 ἄτιμος ἐμπύροισι κνισωτοῖς χθονός. |486 κἀγὼ χοάς σοι τῆς ἐμῆς παγκληρίας |487 οἴσω πατρῴων ἐκ δόμων γαμηλίους· |488 πάντων δὲ πρῶτον τόνδε πρεσβεύσω τάφον. |489 ὦ Γαῖʼ, ἄνες μοι πατέρʼ ἐποπτεῦσαι μάχην. |490 ὦ Περσέφασσα, δὸς δʼ ἔτʼ εὔμορφον κράτος. |491 μέμνησο λουτρῶν οἷς ἐνοσφίσθης, πάτερ. |492 μέμνησο δʼ ἀμφίβληστρον ὡς ἐκαίνισαν. |493 πέδαις δʼ ἀχαλκεύτοις ἐθηρεύθης, πάτερ. |494 αἰσχρῶς τε βουλευτοῖσιν ἐν καλύμμασιν. |495 ἆρʼ ἐξεγείρῃ τοῖσδʼ ὀνείδεσιν, πάτερ; |496 ἆρʼ ὀρθὸν αἴρεις φίλτατον τὸ σὸν κάρα; |497 ἤτοι δίκην ἴαλλε σύμμαχον φίλοις, |498 ἢ τὰς ὁμοίας ἀντίδος λαβὰς λαβεῖν, |499 εἴπερ κρατηθείς γʼ ἀντινικῆσαι θέλεις. |500 καὶ τῆσδʼ ἄκουσον λοισθίου βοῆς, πάτερ, |501 ἰδὼν νεοσσοὺς τούσδʼ ἐφημένους τάφῳ· |502 οἴκτιρε θῆλυν ἄρσενός θʼ ὁμοῦ γόνον, |503 καὶ μὴ ʼξαλείψῃς σπέρμα Πελοπιδῶν τόδε· |504 οὕτω γὰρ οὐ τέθνηκας οὐδέ περ θανών· |505 παῖδες γὰρ ἀνδρὶ κληδόνες σωτήριοι |506 θανόντι· φελλοὶ δʼ ὣς ἄγουσι δίκτυον, |507 τὸν ἐκ βυθοῦ κλωστῆρα σῴζοντες λίνου. |508 ἄκουʼ, ὑπὲρ σοῦ τοιάδʼ ἔστʼ ὀδύρματα. |509 αὐτὸς δὲ σῴζῃ τόνδε τιμήσας λόγον. |510 καὶ μὴν ἀμεμφῆ τόνδʼ ἐτείνατον λόγον, |511 τίμημα τύμβου τῆς ἀνοιμώκτου τύχης. |512 τὰ δʼ ἄλλʼ, ἐπειδὴ δρᾶν κατώρθωσαι φρενί, |513 ἔρδοις ἂν ἤδη δαίμονος πειρώμενος. |514 ἔσται· πυθέσθαι δʼ οὐδέν ἐστʼ ἔξω δρόμου, |515 πόθεν χοὰς ἔπεμψεν, ἐκ τίνος λόγου |516 μεθύστερον τιμῶσʼ ἀνήκεστον πάθος; |517 θανόντι δʼ οὐ φρονοῦντι δειλαία χάρις |518 ἐπέμπετʼ· οὐκ ἔχοιμʼ ἂν εἰκάσαι τόδε. |519 τὰ δῶρα μείω δʼ ἐστὶ τῆς ἁμαρτίας. |520 τὰ πάντα γάρ τις ἐκχέας ἀνθʼ αἵματος |521 ἑνός, μάτην ὁ μόχθος· ὧδʼ ἔχει λόγος. |522 θέλοντι δʼ, εἴπερ οἶσθʼ, ἐμοὶ φράσον τάδε. |523 οἶδʼ, ὦ τέκνον, παρῆ γάρ· ἔκ τʼ ὀνειράτων |524 καὶ νυκτιπλάγκτων δειμάτων πεπαλμένη |525 χοὰς ἔπεμψε τάσδε δύσθεος γυνή. |526 ἦ καὶ πέπυσθε τοὔναρ, ὥστʼ ὀρθῶς φράσαι; |527 τεκεῖν δράκοντʼ ἔδοξεν, ὡς αὐτὴ λέγει. |528 καὶ ποῖ τελευτᾷ καὶ καρανοῦται λόγος; |529 ἐν σπαργάνοισι παιδὸς ὁρμίσαι δίκην. |530 τίνος βορᾶς χρῄζοντα, νεογενὲς δάκος; |531 αὐτὴ προσέσχε μαζὸν ἐν τὠνείρατι. |532 καὶ πῶς ἄτρωτον οὖθαρ ἦν ὑπὸ στύγους; |533 ὥστʼ ἐν γάλακτι θρόμβον αἵματος σπάσαι. |534 οὔτοι μάταιον· ἀνδρὸς ὄψανον πέλει. |535 ἡ δʼ ἐξ ὕπνου κέκλαγγεν ἐπτοημένη. |536 πολλοὶ δʼ ἀνῇθον, ἐκτυφλωθέντες σκότῳ, |537 λαμπτῆρες ἐν δόμοισι δεσποίνης χάριν· |538 πέμπει τʼ ἔπειτα τάσδε κηδείους χοάς, |539 ἄκος τομαῖον ἐλπίσασα πημάτων. |540 ἀλλʼ εὔχομαι γῇ τῇδε καὶ πατρὸς τάφῳ |541 τοὔνειρον εἶναι τοῦτʼ ἐμοὶ τελεσφόρον. |542 κρίνω δέ τοί νιν ὥστε συγκόλλως ἔχειν. |543 εἰ γὰρ τὸν αὐτὸν χῶρον ἐκλιπὼν ἐμοὶ |544 οὕφις ἐμοῖσι σπαργάνοις ὡπλίζετο, |545 καὶ μαστὸν ἀμφέχασκʼ ἐμὸν θρεπτήριον, |546 θρόμβῳ δʼ ἔμειξεν αἵματος φίλον γάλα, |547 ἡ δʼ ἀμφὶ τάρβει τῷδʼ ἐπῴμωξεν πάθει, |548 δεῖ τοί νιν, ὡς ἔθρεψεν ἔκπαγλον τέρας, |549 θανεῖν βιαίως· ἐκδρακοντωθεὶς δʼ ἐγὼ |550 κτείνω νιν, ὡς τοὔνειρον ἐννέπει τόδε. |551 τερασκόπον δὴ τῶνδέ σʼ αἱροῦμαι πέρι. |552 γένοιτο δʼ οὕτως. τἄλλα δʼ ἐξηγοῦ φίλοις, |553 τοὺς μέν τι ποιεῖν, τοὺς δὲ μή τι δρᾶν λέγων. |554 ἁπλοῦς ὁ μῦθος· τήνδε μὲν στείχειν ἔσω, |555 αἰνῶ δὲ κρύπτειν τάσδε συνθήκας ἐμάς, |556 ὡς ἂν δόλῳ κτείναντες ἄνδρα τίμιον |557 δόλοισι καὶ ληφθῶσιν ἐν ταὐτῷ βρόχῳ |558 θανόντες, ᾗ καὶ Λοξίας ἐφήμισεν, |559 ἄναξ Ἀπόλλων, μάντις ἀψευδὴς τὸ πρίν. |560 ξένῳ γὰρ εἰκώς, παντελῆ σαγὴν ἔχων, |561 ἥξω σὺν ἀνδρὶ τῷδʼ ἐφʼ ἑρκείους πύλας |562 Πυλάδῃ, ξένος τε καὶ δορύξενος δόμων. |563 ἄμφω δὲ φωνὴν ἥσομεν Παρνησσίδα, |564 γλώσσης ἀυτὴν Φωκίδος μιμουμένω. |565 καὶ δὴ θυρωρῶν οὔτις ἂν φαιδρᾷ φρενὶ |566 δέξαιτʼ, ἐπειδὴ δαιμονᾷ δόμος κακοῖς· |567 μενοῦμεν οὕτως ὥστʼ ἐπεικάζειν τινὰ |568 δόμους παραστείχοντα καὶ τάδʼ ἐννέπειν· |569 τί δὴ πύλαισι τὸν ἱκέτην ἀπείργεται |570 Αἴγισθος, εἴπερ οἶδεν ἔνδημος παρών; |571 εἰ δʼ οὖν ἀμείψω βαλὸν ἑρκείων πυλῶν |572 κἀκεῖνον ἐν θρόνοισιν εὑρήσω πατρός, |573 ἢ καὶ μολὼν ἔπειτά μοι κατὰ στόμα |574 ἀρεῖ, σάφʼ ἴσθι, καὶ κατʼ ὀφθαλμοὺς βαλεῖ, |575 πρὶν αὐτὸν εἰπεῖν ποδαπὸς ὁ ξένος; νεκρὸν |576 θήσω, ποδώκει περιβαλὼν χαλκεύματι. |577 φόνου δʼ Ἐρινὺς οὐχ ὑπεσπανισμένη |578 ἄκρατον αἷμα πίεται τρίτην πόσιν. |579 νῦν οὖν σὺ μὲν φύλασσε τἀν οἴκῳ καλῶς, |580 ὅπως ἂν ἀρτίκολλα συμβαίνῃ τάδε· |581 ὑμῖν δʼ ἐπαινῶ γλῶσσαν εὔφημον φέρειν, |582 σιγᾶν θʼ ὅπου δεῖ καὶ λέγειν τὰ καίρια. |583 τὰ δʼ ἄλλα τούτῳ δεῦρʼ ἐποπτεῦσαι λέγω, |584 ξιφηφόρους ἀγῶνας ὀρθώσαντί μοι. [choral] [strophe 1] |585 πολλὰ μὲν γᾶ τρέφει |586 δεινὰ καὶ δειμάτων ἄχη, |587 πόντιαί τʼ ἀγκάλαι κνωδάλων |588 ἀνταίων βρύουσι· |589 πλάθουσι βλαστοῦσι καὶ πεδαίχμιοι |590 λαμπάδες πεδάοροι, |591 πτανά τε καὶ πεδοβά- |592 μονα κἀνεμοέντʼ ἂν |593 αἰγίδων φράσαι κότον. [antistrophe 1] |594 ἀλλʼ ὑπέρτολμον ἀν- |595 δρὸς φρόνημα τίς λέγοι |596 καὶ γυναικῶν φρεσὶν τλαμόνων καὶ |597 παντόλμους ἔρωτας |598 ἄταισι συννόμους βροτῶν; |599 ξυζύγους δʼ ὁμαυλίας |599b θηλυκρατὴς ἀπέρω- |600 τος ἔρως παρανικᾷ |601 κνωδάλων τε καὶ βροτῶν. [strophe 2] |602 ἴστω δʼ, ὅστις οὐχ ὑπόπτερος |603 φροντίσιν, δαεὶς |604 τὰν ἁ παιδολυ- |605 μὰς τάλαινα Θεστιὰς μήσατο |606 πυρδαῆτιν πρόνοιαν, |607 καταίθουσα παιδὸς δαφοινὸν |608 δαλὸν ἥλικʼ, ἐπεὶ μολὼν |609 ματρόθεν κελάδησε, |610 ξύμμετρόν τε διαὶ βίου |611 μοιρόκραντον ἐς ἆμαρ. [antistrophe 2] |612 ἄλλαν δεῖ τινʼ ἐν λόγοις στυγεῖν |613 φοινίαν κόραν, |615 ἅτʼ ἐχθρῶν ὑπαὶ |616 φῶτʼ ἀπώλεσεν φίλον Κρητικοῖς |617 χρυσοκμήτοισιν ὅρμοις |618 πιθήσασα δώροισι Μίνω, |619 Νῖσον ἀθανάτας τριχὸς |620 νοσφίσασʼ ἀπροβούλως |621 πνέονθʼ ἁ κυνόφρων ὕπνῳ. |622 κιγχάνει δέ μιν Ἑρμῆς. [strophe 3] |623 ἐπεὶ δʼ ἐπεμνασάμαν ἀμειλίχων |624 πόνων, ὁ καιρὸς δὲ δυσφιλὲς γαμή- |625 λευμʼ ἀπεύχετον δόμοις |626 γυναικοβούλους τε μήτιδας φρενῶν |627 ἐπʼ ἀνδρὶ τευχεσφόρῳ, |628 ἐπʼ ἀνδρὶ δᾴοις ἐπεικότως σέβαι. |629 τίω δʼ ἀθέρμαντον ἑστίαν δόμων |630 γυναικείαν τʼ ἄτολμον αἰχμάν. [antistrophe 3] |631 κακῶν δὲ πρεσβεύεται τὸ Λήμνιον |632 λόγῳ· γοᾶται δὲ δὴ πάθος κατά- |633 πτυστον· ᾔκασεν δέ τις |634 τὸ δεινὸν αὖ Λημνίοισι πήμασιν. |635 θεοστυγήτῳ δʼ ἄχει |636 βροτῶν ἀτιμωθὲν οἴχεται γένος. |637 σέβει γὰρ οὔτις τὸ δυσφιλὲς θεοῖς. |638 τί τῶνδʼ οὐκ ἐνδίκως ἀγείρω; [strophe 4] |639 τὸ δʼ ἄγχι πλευμόνων ξίφος |640 διανταίαν ὀξυπευκὲς οὐτᾷ |641 διαὶ Δίκας. τὸ μὴ θέμις γὰρ οὖν |642 λὰξ πέδοι πατούμενον, τὸ πᾶν Διὸς |645 σέβας παρεκβάντος οὐ θεμιστῶς. [antistrophe 4] |646 Δίκας δʼ ἐρείδεται πυθμήν· |647 προχαλκεύει δʼ Αἶσα φασγανουργός· |648 τέκνον δʼ ἐπεισφέρει δόμοισιν |650 αἱμάτων παλαιτέρων τίνειν μύσος |651 χρόνῳ κλυτὰ βυσσόφρων Ἐρινύς. [episode] |653 παῖ παῖ, θύρας ἄκουσον ἑρκείας κτύπον. |654 τίς ἔνδον, ὦ παῖ, παῖ, μάλʼ αὖθις, ἐν δόμοις; |655 τρίτον τόδʼ ἐκπέραμα δωμάτων καλῶ, |656 εἴπερ φιλόξενʼ ἐστὶν Αἰγίσθου διαί. |657 εἶεν, ἀκούω· ποδαπὸς ὁ ξένος; πόθεν; |658 ἄγγελλε τοῖσι κυρίοισι δωμάτων, |659 πρὸς οὕσπερ ἥκω καὶ φέρω καινοὺς λόγους. |660 τάχυνε δʼ, ὡς καὶ νυκτὸς ἅρμʼ ἐπείγεται |661 σκοτεινόν, ὥρα δʼ ἐμπόρους καθιέναι |662 ἄγκυραν ἐν δόμοισι πανδόκοις ξένων. |663 ἐξελθέτω τις δωμάτων τελεσφόρος |664 γυνὴ τόπαρχος, ἄνδρα δʼ εὐπρεπέστερον· |665 αἰδὼς γὰρ ἐν λεχθεῖσιν οὐκ ἐπαργέμους |666 λόγους τίθησιν· εἶπε θαρσήσας ἀνὴρ |667 πρὸς ἄνδρα κἀσήμηνεν ἐμφανὲς τέκμαρ. |668 ξένοι, λέγοιτʼ ἂν εἴ τι δεῖ· πάρεστι γὰρ |669 ὁποῖά περ δόμοισι τοῖσδʼ ἐπεικότα, |670 καὶ θερμὰ λουτρὰ καὶ πόνων θελκτηρία |671 στρωμνή, δικαίων τʼ ὀμμάτων παρουσία. |672 εἰ δʼ ἄλλο πρᾶξαι δεῖ τι βουλιώτερον, |673 ἀνδρῶν τόδʼ ἐστὶν ἔργον, οἷς κοινώσομεν. |674 ξένος μέν εἰμι Δαυλιεὺς ἐκ Φωκέων· |675 στείχοντα δʼ αὐτόφορτον οἰκείᾳ σαγῇ |676 εἰς Ἄργος, ὥσπερ δεῦρʼ ἀπεζύγην πόδα, |677 ἀγνὼς πρὸς ἀγνῶτʼ εἶπε συμβαλὼν ἀνήρ, |678 ἐξιστορήσας καὶ σαφηνίσας ὁδόν, |679 Στρόφιος ὁ Φωκεύς· πεύθομαι γὰρ ἐν λόγῳ· |680 ἐπείπερ ἄλλως, ὦ ξένʼ, εἰς Ἄργος κίεις, |681 πρὸς τοὺς τεκόντας πανδίκως μεμνημένος |682 τεθνεῶτʼ Ὀρέστην εἰπέ, μηδαμῶς λάθῃ. |683 εἴτʼ οὖν κομίζειν δόξα νικήσει φίλων, |684 εἴτʼ οὖν μέτοικον, εἰς τὸ πᾶν ἀεὶ ξένον, |685 θάπτειν, ἐφετμὰς τάσδε πόρθμευσον πάλιν. |686 νῦν γὰρ λέβητος χαλκέου πλευρώματα |687 σποδὸν κέκευθεν ἀνδρὸς εὖ κεκλαυμένου. |688 τοσαῦτʼ ἀκούσας εἶπον. εἰ δὲ τυγχάνω |689 τοῖς κυρίοισι καὶ προσήκουσιν λέγων |690 οὐκ οἶδα, τὸν τεκόντα δʼ εἰκὸς εἰδέναι. |691 οἲ ʼγώ, κατʼ ἄκρας εἶπας ὡς πορθούμεθα. |692 ὦ δυσπάλαιστε τῶνδε δωμάτων Ἀρά, |693 ὡς πόλλʼ ἐπωπᾷς, κἀκποδὼν εὖ κείμενα |694 τόξοις πρόσωθεν εὐσκόποις χειρουμένη, |695 φίλων ἀποψιλοῖς με τὴν παναθλίαν. |696 καὶ νῦν Ὀρέστης—ἦν γὰρ εὐβούλως ἔχων, |697 ἔξω κομίζων ὀλεθρίου πηλοῦ πόδα,— |698 νῦν δʼ ἥπερ ἐν δόμοισι βακχείας καλῆς |699 ἰατρὸς ἐλπὶς ἦν, προδοῦσαν ἔγγραφε. |700 ἐγὼ μὲν οὖν ξένοισιν ὧδʼ εὐδαίμοσιν |701 κεδνῶν ἕκατι πραγμάτων ἂν ἤθελον |702 γνωστὸς γενέσθαι καὶ ξενωθῆναι· τί γὰρ |703 ξένου ξένοισίν ἐστιν εὐμενέστερον; |704 πρὸς δυσσεβείας δʼ ἦν ἐμοὶ τόδʼ ἐν φρεσίν, |705 τοιόνδε πρᾶγμα μὴ καρανῶσαι φίλοις, |706 καταινέσαντα καὶ κατεξενωμένον. |707 οὔτοι κυρήσεις μεῖον ἀξίως σέθεν, |708 οὐδʼ ἧσσον ἂν γένοιο δώμασιν φίλος. |709 ἄλλος δʼ ὁμοίως ἦλθεν ἂν τάδʼ ἀγγελῶν. |710 ἀλλʼ ἔσθʼ ὁ καιρὸς ἡμερεύοντας ξένους |711 μακρᾶς κελεύθου τυγχάνειν τὰ πρόσφορα. |712 ἄγʼ αὐτὸν εἰς ἀνδρῶνας εὐξένους δόμων, |713 ὀπισθόπους τε τούσδε καὶ ξυνέμπορον· |714 κἀκεῖ κυρούντων δώμασιν τὰ πρόσφορα. |715 αἰνῶ δὲ πράσσειν ὡς ὑπευθύνῳ τάδε. |716 ἡμεῖς δὲ ταῦτα τοῖς κρατοῦσι δωμάτων |717 κοινώσομέν τε κοὐ σπανίζοντες φίλων |718 βουλευσόμεσθα τῆσδε συμφορᾶς πέρι. [anapests] |719 εἶεν, φίλιαι δμωίδες οἴκων, |720 πότε δὴ στομάτων |721 δείξομεν ἰσχὺν ἐπʼ Ὀρέστῃ; |722 ὦ πότνια χθὼν καὶ πότνιʼ ἀκτὴ |723 χώματος, ἣ νῦν ἐπὶ ναυάρχῳ |724 σώματι κεῖσαι τῷ βασιλείῳ, |725 νῦν ἐπάκουσον, νῦν ἐπάρηξον· |726 νῦν γὰρ ἀκμάζει Πειθὼ δολίαν |727 ξυγκαταβῆναι, χθόνιον δʼ Ἑρμῆν |728 καὶ τὸν νύχιον τοῖσδʼ ἐφοδεῦσαι |729 ξιφοδηλήτοισιν ἀγῶσιν. |730 ἔοικεν ἁνὴρ ὁ ξένος τεύχειν κακόν· |731 τροφὸν δʼ Ὀρέστου τήνδʼ ὁρῶ κεκλαυμένην. |732 ποῖ δὴ πατεῖς, Κίλισσα, δωμάτων πύλας, |733 λύπη δʼ ἄμισθός ἐστί σοι ξυνέμπορος; |734 Αἴγισθον ἡ κρατοῦσα τοῖς ξένοις καλεῖν |735 ὅπως τάχιστʼ ἄνωγεν, ὡς σαφέστερον |736 ἀνὴρ ἀπʼ ἀνδρὸς τὴν νεάγγελτον φάτιν |737 ἐλθὼν πύθηται τήνδε, πρὸς μὲν οἰκέτας |738 θετοσκυθρωπῶν ἐντὸς ὀμμάτων γέλων |739 κεύθουσʼ ἐπʼ ἔργοις διαπεπραγμένοις καλῶς |740 κείνῃ, δόμοις δὲ τοῖσδε παγκάκως ἔχειν, |741 φήμης ὕφʼ ἧς ἤγγειλαν οἱ ξένοι τορῶς. |742 ἦ δὴ κλύων ἐκεῖνος εὐφρανεῖ νόον, |743 εὖτʼ ἂν πύθηται μῦθον. ὦ τάλαινʼ ἐγώ· |744 ὥς μοι τὰ μὲν παλαιὰ συγκεκραμένα |745 ἄλγη δύσοιστα τοῖσδʼ ἐν Ἀτρέως δόμοις |746 τυχόντʼ ἐμὴν ἤλγυνεν ἐν στέρνοις φρένα. |747 ἀλλʼ οὔτι πω τοιόνδε πῆμʼ ἀνεσχόμην· |748 τὰ μὲν γὰρ ἄλλα τλημόνως ἤντλουν κακά· |749 φίλον δʼ Ὀρέστην, τῆς ἐμῆς ψυχῆς τριβήν, |750 ὃν ἐξέθρεψα μητρόθεν δεδεγμένη,— |751 κἀκ νυκτιπλάγκτων ὀρθίων κελευμάτων |752 καὶ πολλὰ καὶ μοχθήρʼ ἀνωφέλητʼ ἐμοὶ |753 τλάσῃ·—τὸ μὴ φρονοῦν γὰρ ὡσπερεὶ βοτὸν |754 τρέφειν ἀνάγκη, πῶς γὰρ οὔ; τρόπῳ φρενός· |755 οὐ γάρ τι φωνεῖ παῖς ἔτʼ ὢν ἐν σπαργάνοις, |756 εἰ λιμός, ἢ δίψη τις, ἢ λιψουρία |757 ἔχει· νέα δὲ νηδὺς αὐτάρκης τέκνων. |758 τούτων πρόμαντις οὖσα, πολλὰ δʼ, οἴομαι, |759 ψευσθεῖσα παιδὸς σπαργάνων φαιδρύντρια, |760 γναφεὺς τροφεύς τε ταὐτὸν εἰχέτην τέλος. |761 ἐγὼ διπλᾶς δὲ τάσδε χειρωναξίας |762 ἔχουσʼ Ὀρέστην ἐξεδεξάμην πατρί· |763 τεθνηκότος δὲ νῦν τάλαινα πεύθομαι. |764 στείχω δʼ ἐπʼ ἄνδρα τῶνδε λυμαντήριον |765 οἴκων, θέλων δὲ τόνδε πεύσεται λόγον. |766 πῶς οὖν κελεύει νιν μολεῖν ἐσταλμένον; |767 ἦ πῶς; λέγʼ αὖθις, ὡς μάθω σαφέστερον. |768 εἰ ξὺν λοχίταις εἴτε καὶ μονοστιβῆ. |769 ἄγειν κελεύει δορυφόρους ὀπάονας. |770 μή νυν σὺ ταῦτʼ ἄγγελλε δεσπότου στύγει· |771 ἀλλʼ αὐτὸν ἐλθεῖν, ὡς ἀδειμάντως κλύῃ, |772 ἄνωχθʼ ὅσον τάχιστα γηθούσῃ φρενί. |773 ἐν ἀγγέλῳ γὰρ κυπτὸς ὀρθοῦται λόγος. |774 ἀλλʼ ἦ φρονεῖς εὖ τοῖσι νῦν ἠγγελμένοις; |775 ἀλλʼ εἰ τροπαίαν Ζεὺς κακῶν θήσει ποτέ. |776 καὶ πῶς; Ὀρέστης ἐλπὶς οἴχεται δόμων. |777 οὔπω· κακός γε μάντις ἂν γνοίη τάδε. |778 τί φής; ἔχεις τι τῶν λελεγμένων δίχα; |779 ἄγγελλʼ ἰοῦσα, πρᾶσσε τἀπεσταλμένα. |780 μέλει θεοῖσιν ὧνπερ ἂν μέλῃ πέρι. |781 ἀλλʼ εἶμι καὶ σοῖς ταῦτα πείσομαι λόγοις. |782 γένοιτο δʼ ὡς ἄριστα σὺν θεῶν δόσει. [choral] [strophe 1] |783 νῦν παραιτουμένᾳ μοι, πάτερ |784 Ζεῦ θεῶν Ὀλυμπίων, |785 δὸς τύχας τυχεῖν δόμου κυρίως |786 τὰ σώφρονʼ εὖ μαιομένοις ἰδεῖν. |787 διὰ δίκας πᾶν ἔπος |788 ἔλακον· ὦ Ζεῦ, σύ νιν φυλάσσοις. [ephymn 1] |789 ἓ ἕ, πρὸ δὲ δὴ ʼχθρῶν |790 τὸν ἔσωθεν μελάθρων, Ζεῦ, |791 θές, ἐπεί νιν μέγαν ἄρας, |792 δίδυμα καὶ τριπλᾶ |793 παλίμποινα θέλων ἀμείψει. [antistrophe 1] |794 ἴσθι δʼ ἀνδρὸς φίλου πῶλον εὖ- |795 νιν ζυγέντʼ ἐν ἅρμασιν |796 πημάτων. σὺ δʼ ἐν δρόμῳ προστιθεὶς |797 μέτρον κτίσον σῳζόμενον ῥυθμὸν |798 τοῦτʼ ἰδεῖν διὰ πέδον |799 ἀνομένων βημάτων ὄρεγμα; [strophe 2] |800 οἵ τʼ ἔσω δωμάτων |801 πλουτογαθῆ μυχὸν νομίζετε, |802 κλῦτε, σύμφρονες θεοί· |803 ἄγετε τῶν πάλαι πεπραγμένων |804 λύσασθʼ αἷμα προσφάτοις δίκαις. |805 γέρων φόνος μηκέτʼ ἐν δόμοις τέκοι. [ephymn 2] |806 τὸ δὲ καλῶς κτίμενον ὦ μέγα ναίων |807 στόμιον, εὖ δὸς ἀνιδεῖν δόμον ἀνδρός, |808 καί νιν ἐλευθερίας φῶς |809 λαμπρὸν ἰδεῖν φιλίοις |810 ὄμμασιν ἐκ δνοφερᾶς καλύπτρας. [antistrophe 2] |811 ξυλλάβοι δʼ ἐνδίκως |812 παῖς ὁ Μαίας, ἐπεὶ φορώτατος |813 πρᾶξιν οὐρίαν θέλων· |815 πολλὰ δʼ ἄλλα φανεῖ χρηίζων κρυπτά. |816 ἄσκοπον δʼ ἔπος λέγων |817 νύκτα πρό τʼ ὀμμάτων σκότον φέρει, |818 καθʼ ἡμέραν δʼ οὐδὲν ἐμφανέστερος. [strophe 3] |819 καὶ τότʼ ἤδη κλυτὸν |820 δωμάτων λυτήριον, |821 θῆλυν οὐριοστάταν οὐδʼ |822 ὀξύκρεκτον γοα- |823 τᾶν νόμον θήσομεν· πλεῖ τάδʼ εὖ· |825 ἐμὸν ἐμὸν κέρδος αὔξεται τόδʼ· ἄ- |826 τα δʼ ἀποστατεῖ φίλων. [ephymn 3] |827 σὺ δὲ θαρσῶν, ὅταν ἥκῃ μέρος ἔργων, |828 ἐπαΰσας Πατρὸς αὐδὰν |829 θροούσᾳ πρὸς σὲ τέκνον πατρὸς αὐδὰν |830 καὶ πέραινʼ ἀνεπίμομφον ἄταν. [antistrophe 3] |831 Περσέως τʼ ἐν φρεσὶν |832 καρδίαν ἀνασχεθών, |833 τοῖς θʼ ὑπὸ χθονὸς φίλοισιν, |834 τοῖς τʼ ἄνωθεν πρόπρασ- |835 σε χάριν ὀργᾶς λυγρᾶς, ἔνδοθεν |836 φόνιον ἄταν τιθείς, τὸν αἴτιον δʼ |837 ἐξαπολλύων μόρου. [episode] |838 ἥκω μὲν οὐκ ἄκλητος, ἀλλʼ ὑπάγγελος· |839 νέαν φάτιν δὲ πεύθομαι λέγειν τινὰς |840 ξένους μολόντας οὐδαμῶς ἐφίμερον, |841 μόρον δʼ Ὀρέστου. καὶ τόδʼ ἀμφέρειν δόμοις |842 γένοιτʼ ἂν ἄχθος δειματοσταγὲς φόνῳ |843 τῷ πρόσθεν ἑλκαίνουσι καὶ δεδηγμένοις. |844 πῶς ταῦτʼ ἀληθῆ καὶ βλέποντα δοξάσω; |845 ἢ πρὸς γυναικῶν δειματούμενοι λόγοι |846 πεδάρσιοι θρῴσκουσι, θνῄσκοντες μάτην; |847 τί τῶνδʼ ἂν εἴποις ὥστε δηλῶσαι φρενί; |848 ἠκούσαμεν μέν, πυνθάνου δὲ τῶν ξένων |849 ἔσω παρελθών. οὐδὲν ἀγγέλων σθένος |850 ὡς αὐτὸν αὐτῶν ἄνδρα πεύθεσθαι πάρα. |851 ἰδεῖν ἐλέγξαι τʼ αὖ θέλω τὸν ἄγγελον, |852 εἴτʼ αὐτὸς ἦν θνῄσκοντος ἐγγύθεν παρών, |853 εἴτʼ ἐξ ἀμαυρᾶς κληδόνος λέγει μαθών. |854 οὔτοι φρένʼ ἂν κλέψειεν ὠμματωμένην. [anapests] |855 Ζεῦ Ζεῦ, τί λέγω, πόθεν ἄρξωμαι |856 τάδʼ ἐπευχομένη κἀπιθεάζουσʼ, |857 ὑπὸ δʼ εὐνοίας |858 πῶς ἴσον εἰποῦσʼ ἀνύσωμαι; |859 νῦν γὰρ μέλλουσι μιανθεῖσαι |860 πειραὶ κοπάνων ἀνδροδαΐκτων |861 ἢ πάνυ θήσειν Ἀγαμεμνονίων |862 οἴκων ὄλεθρον διὰ παντός, |863 ἢ πῦρ καὶ φῶς ἐπʼ ἐλευθερίᾳ |864 δαίων ἀρχάς τε πολισσονόμους |865 πατέρων θʼ ἕξει μέγαν ὄλβον. |866 τοιάνδε πάλην μόνος ὢν ἔφεδρος |867 δισσοῖς μέλλει θεῖος Ὀρέστης |868 ἅψειν. εἴη δʼ ἐπὶ νίκῃ. |869 ἒ ἔ, ὀτοτοτοῖ. |870 ἔα ἔα μάλα· |871 πῶς ἔχει; πῶς κέκρανται δόμοις; |872 ἀποσταθῶμεν πράγματος τελουμένου, |873 ὅπως δοκῶμεν τῶνδʼ ἀναίτιαι κακῶν |874 εἶναι· μάχης γὰρ δὴ κεκύρωται τέλος. |875 οἴμοι, πανοίμοι δεσπότου πεπληγμένου· |876 οἴμοι μάλʼ αὖθις ἐν τρίτοις προσφθέγμασιν. |877 Αἴγισθος οὐκέτʼ ἔστιν. ἀλλʼ ἀνοίξατε |878 ὅπως τάχιστα, καὶ γυναικείους πύλας |879 μοχλοῖς χαλᾶτε· καὶ μάλʼ ἡβῶντος δὲ δεῖ, |880 οὐχ ὡς δʼ ἀρῆξαι διαπεπραγμένῳ· τί γάρ; |881 ἰοὺ ἰού. |882 κωφοῖς ἀυτῶ καὶ καθεύδουσιν μάτην |883 ἄκραντα βάζω; ποῖ Κλυταιμήστρα; τί δρᾷ; |884 ἔοικε νῦν αὐτῆς ἐπὶ ξυροῦ πέλας |884b αὐχὴν πεσεῖσθαι πρὸς δίκην πεπληγμένος. |885 τί δʼ ἐστὶ χρῆμα; τίνα βοὴν ἵστης δόμοις; |886 τὸν ζῶντα καίνειν τοὺς τεθνηκότας λέγω. |887 οἲ ʼγώ. ξυνῆκα τοὔπος ἐξ αἰνιγμάτων. |888 δόλοις ὀλούμεθʼ, ὥσπερ οὖν ἐκτείναμεν. |889 δοίη τις ἀνδροκμῆτα πέλεκυν ὡς τάχος· |890 εἰδῶμεν εἰ νικῶμεν, ἢ νικώμεθα· |891 ἐνταῦθα γὰρ δὴ τοῦδʼ ἀφικόμην κακοῦ. |892 σὲ καὶ ματεύω· τῷδε δʼ ἀρκούντως ἔχει. |893 οἲ ʼγώ. τέθνηκας, φίλτατʼ Αἰγίσθου βία. |894 φιλεῖς τὸν ἄνδρα; τοιγὰρ ἐν ταὐτῷ τάφῳ |895 κείσῃ· θανόντα δʼ οὔτι μὴ προδῷς ποτε. |896 ἐπίσχες, ὦ παῖ, τόνδε δʼ αἴδεσαι, τέκνον, |897 μαστόν, πρὸς ᾧ σὺ πολλὰ δὴ βρίζων ἅμα |898 οὔλοισιν ἐξήμελξας εὐτραφὲς γάλα. |899 Πυλάδη, τί δράσω; μητέρʼ αἰδεσθῶ κτανεῖν; |900 ποῦ δὴ τὰ λοιπὰ Λοξίου μαντεύματα |901 τὰ πυθόχρηστα, πιστὰ δʼ εὐορκώματα; |902 ἅπαντας ἐχθροὺς τῶν θεῶν ἡγοῦ πλέον. |903 κρίνω σὲ νικᾶν, καὶ παραινεῖς μοι καλῶς. |904 ἕπου, πρὸς αὐτὸν τόνδε σὲ σφάξαι θέλω. |905 καὶ ζῶντα γάρ νιν κρείσσονʼ ἡγήσω πατρός· |906 τούτῳ θανοῦσα ξυγκάθευδʼ, ἐπεὶ φιλεῖς |907 τὸν ἄνδρα τοῦτον, ὃν δʼ ἐχρῆν φιλεῖν στυγεῖς. |908 ἐγώ σʼ ἔθρεψα, σὺν δὲ γηράναι θέλω. |909 πατροκτονοῦσα γὰρ ξυνοικήσεις ἐμοί; |910 ἡ Μοῖρα τούτων, ὦ τέκνον, παραιτία. |911 καὶ τόνδε τοίνυν Μοῖρʼ ἐπόρσυνεν μόρον. |912 οὐδὲν σεβίζῃ γενεθλίους ἀράς, τέκνον; |913 τεκοῦσα γάρ μʼ ἔρριψας ἐς τὸ δυστυχές. |914 οὔτοι σʼ ἀπέρριψʼ εἰς δόμους δορυξένους. |915 αἰκῶς ἐπράθην ὢν ἐλευθέρου πατρός. |916 ποῦ δῆθʼ ὁ τῖμος, ὅντινʼ ἀντεδεξάμην; |917 αἰσχύνομαί σοι τοῦτʼ ὀνειδίσαι σαφῶς. |918 μὴ ἀλλʼ εἴφʼ ὁμοίως καὶ πατρὸς τοῦ σοῦ μάτας. |919 μὴ ʼλεγχε τὸν πονοῦντʼ ἔσω καθημένη. |920 ἄλγος γυναιξὶν ἀνδρὸς εἴργεσθαι, τέκνον. |921 τρέφει δέ γʼ ἀνδρὸς μόχθος ἡμένας ἔσω. |922 κτενεῖν ἔοικας, ὦ τέκνον, τὴν μητέρα. |923 σύ τοι σεαυτήν, οὐκ ἐγώ, κατακτενεῖς. |924 ὅρα, φύλαξαι μητρὸς ἐγκότους κύνας. |925 τὰς τοῦ πατρὸς δὲ πῶς φύγω, παρεὶς τάδε; |926 ἔοικα θρηνεῖν ζῶσα πρὸς τύμβον μάτην. |927 πατρὸς γὰρ αἶσα τόνδε σοὐρίζει μόρον. |928 οἲ ʼγὼ τεκοῦσα τόνδʼ ὄφιν ἐθρεψάμην. |929 ἦ κάρτα μάντις οὑξ ὀνειράτων φόβος. |930 ἔκανες ὃν οὐ χρῆν, καὶ τὸ μὴ χρεὼν πάθε. |931 στένω μὲν οὖν καὶ τῶνδε συμφορὰν διπλῆν. |932 ἐπεὶ δὲ πολλῶν αἱμάτων ἐπήκρισε |933 τλήμων Ὀρέστης, τοῦθʼ ὅμως αἱρούμεθα, |934 ὀφθαλμὸν οἴκων μὴ πανώλεθρον πεσεῖν. [choral] [strophe 1] |935 ἔμολε μὲν δίκα Πριαμίδαις χρόνῳ, |936 βαρύδικος ποινά· |937 ἔμολε δʼ ἐς δόμον τὸν Ἀγαμέμνονος |938 διπλοῦς λέων, διπλοῦς Ἄρης. |939 ἔλασε δʼ ἐς τὸ πᾶν |940 ὁ πυθόχρηστος φυγὰς |941 θεόθεν εὖ φραδαῖσιν ὡρμημένος. [ephymn 1] |942 ἐπολολύξατʼ ὦ δεσποσύνων δόμων |943 ἀναφυγᾶς κακῶν καὶ κτεάνων τριβᾶς |944 ὑπαὶ δυοῖν μιαστόροιν, |945 δυσοίμου τύχας. [antistrophe 1] |946 ἔμολε δʼ ᾧ μέλει κρυπταδίου μάχας |947 δολιόφρων ποινά· |948 ἔθιγε δʼ ἐν μάχᾳ χερὸς ἐτήτυμος |949 Διὸς κόρα—Δίκαν δέ νιν |950 προσαγορεύομεν βροτοὶ τυχόντες καλῶς— |951 ὀλέθριον πνέουσʼ ἐν ἐχθροῖς κότον. [ephymn 1] |942a ἐπολολύξατʼ ὦ δεσποσύνων δόμων |943a ἀναφυγᾶς κακῶν καὶ κτεάνων τριβᾶς |944a ὑπαὶ δυοῖν μιαστόροιν, |945a δυσοίμου τύχας. [strophe 2] |953 τά περ ὁ Λοξίας ὁ Παρνασσίας |954 μέγαν ἔχων μυχὸν χθονὸς ἐπωρθιά- |955 ξεν ἀδόλως δόλοις |956 βλάβαν ἐγχρονισθεῖσαν ἐποίχεται. |957 κρατεῖταί πως τὸ θεῖον παρὰ τὸ μὴ |958 ὑπουργεῖν κακοῖς. |960 ἄξια δʼ οὐρανοῦχον ἀρχὰν σέβειν. [ephymn 2] |961 πάρα τε φῶς ἰδεῖν |962 μέγα τʼ ἀφῃρέθην ψάλιον οἰκέων. |963 ἄναγε μὰν δόμοι· πολὺν ἄγαν χρόνον |964 χαμαιπετεῖς ἔκεισθʼ ἀεί. [antistrophe 2] |965 τάχα δὲ παντελὴς χρόνος ἀμείψεται |966 πρόθυρα δωμάτων, ὅταν ἀφʼ ἑστίας |967 πᾶν ἐλαθῇ μύσος |968 καθαρμοῖσιν ἀτᾶν ἐλατηρίοις. |969 τύχαι δʼ εὐπροσωποκοῖται τὸ πᾶν |970 ἰδεῖν ἀκοῦσαι πρευμενεῖς |971 μετοίκοις δόμων πεσοῦνται πάλιν. [ephymn 2] |972 πάρα τε φῶς ἰδεῖν |962a μέγα τʼ ἀφῃρέθην ψάλιον οἰκέων. |963a ἄναγε μὰν δόμοι· πολὺν ἄγαν χρόνον |964a χαμαιπετεῖς ἔκεισθʼ ἀεί. [episode] |973 ἴδεσθε χώρας τὴν διπλῆν τυραννίδα |974 πατροκτόνους τε δωμάτων πορθήτορας. |975 σεμνοὶ μὲν ἦσαν ἐν θρόνοις τόθʼ ἥμενοι, |976 φίλοι δὲ καὶ νῦν, ὡς ἐπεικάσαι πάθη |977 πάρεστιν, ὅρκος τʼ ἐμμένει πιστώμασι. |978 ξυνώμοσαν μὲν θάνατον ἀθλίῳ πατρὶ |979 καὶ ξυνθανεῖσθαι· καὶ τάδʼ εὐόρκως ἔχει. |980 ἴδεσθε δʼ αὖτε, τῶνδʼ ἐπήκοοι κακῶν, |981 τὸ μηχάνημα, δεσμὸν ἀθλίῳ πατρί, |982 πέδας τε χειροῖν καὶ ποδοῖν ξυνωρίδα. |983 ἐκτείνατʼ αὐτὸ καὶ κύκλῳ παρασταδὸν |984 στέγαστρον ἀνδρὸς δείξαθʼ, ὡς ἴδῃ πατήρ, |985 οὐχ οὑμός, ἀλλʼ ὁ πάντʼ ἐποπτεύων τάδε |986 Ἥλιος, ἄναγνα μητρὸς ἔργα τῆς ἐμῆς, |987 ὡς ἂν παρῇ μοι μάρτυς ἐν δίκῃ ποτέ, |988 ὡς τόνδʼ ἐγὼ μετῆλθον ἐνδίκως μόρον |989 τὸν μητρός· Αἰγίσθου γὰρ οὐ λέγω μόρον· |990 ἔχει γὰρ αἰσχυντῆρος, ὡς νόμος, δίκην· |991 ἥτις δʼ ἐπʼ ἀνδρὶ τοῦτʼ ἐμήσατο στύγος, |992 ἐξ οὗ τέκνων ἤνεγχʼ ὑπὸ ζώνην βάρος, |993 φίλον τέως, νῦν δʼ ἐχθρόν, ὡς φαίνει, κακόν, |994 τί σοι δοκεῖ; μύραινά γʼ εἴτʼ ἔχιδνʼ ἔφυ |995 σήπειν θιγοῦσʼ ἂν ἄλλον οὐ δεδηγμένον |996 τόλμης ἕκατι κἀκδίκου φρονήματος. |997 τί νιν προσείπω, κἂν τύχω μάλʼ εὐστομῶν; |998 ἄγρευμα θηρός, ἢ νεκροῦ ποδένδυτον |999 δροίτης κατασκήνωμα; δίκτυον μὲν οὖν, |1000 ἄρκυν τʼ ἂν εἴποις καὶ ποδιστῆρας πέπλους. |1001 τοιοῦτον ἂν κτήσαιτο φηλήτης ἀνήρ, |1002 ξένων ἀπαιόλημα κἀργυροστερῆ |1003 βίον νομίζων, τῷδέ τʼ ἂν δολώματι |1004 πολλοὺς ἀναιρῶν πολλὰ θερμαίνοι φρένα. |1005 τοιάδʼ ἐμοὶ ξύνοικος ἐν δόμοισι μὴ |1006 γένοιτʼ· ὀλοίμην πρόσθεν ἐκ θεῶν ἄπαις. [anapests] |1007 αἰαῖ αἰαῖ μελέων ἔργων· |1008 στυγερῷ θανάτῳ διεπράχθης. |1008b ἒ ἔ, |1009 μίμνοντι δὲ καὶ πάθος ἀνθεῖ. |1010 ἔδρασεν ἢ οὐκ ἔδρασε; μαρτυρεῖ δέ μοι |1011 φᾶρος τόδʼ, ὡς ἔβαψεν Αἰγίσθου ξίφος. |1012 φόνου δὲ κηκὶς ξὺν χρόνῳ ξυμβάλλεται, |1013 πολλὰς βαφὰς φθείρουσα τοῦ ποικίλματος. |1014 νῦν αὐτὸν αἰνῶ, νῦν ἀποιμώζω παρών, |1015 πατροκτόνον θʼ ὕφασμα προσφωνῶν τόδε. |1016 ἀλγῶ μὲν ἔργα καὶ πάθος γένος τε πᾶν, |1017 ἄζηλα νίκης τῆσδʼ ἔχων μιάσματα. [anapests] |1018 οὔτις μερόπων ἀσινὴς βίοτον |1019 διὰ παντὸς ἀπήμονʼ ἀμείψει. |1020 ἒ ἔ, |1020b μόχθος δʼ ὁ μὲν αὐτίχʼ, ὁ δʼ ἥξει. |1021 ἀλλʼ, ὡς ἂν εἰδῆτʼ, οὐ γὰρ οἶδʼ ὅπη τελεῖ, |1022 ὥσπερ ξὺν ἵπποις ἡνιοστροφῶ δρόμου |1023 ἐξωτέρω· φέρουσι γὰρ νικώμενον |1024 φρένες δύσαρκτοι· πρὸς δὲ καρδίᾳ φόβος |1025 ᾄδειν ἕτοιμος ἠδʼ ὑπορχεῖσθαι κότῳ. |1026 ἕως δʼ ἔτʼ ἔμφρων εἰμί, κηρύσσω φίλοις |1027 κτανεῖν τέ φημι μητέρʼ οὐκ ἄνευ δίκης, |1028 πατροκτόνον μίασμα καὶ θεῶν στύγος. |1029 καὶ φίλτρα τόλμης τῆσδε πλειστηρίζομαι |1030 τὸν πυθόμαντιν Λοξίαν, χρήσαντʼ ἐμοὶ |1031 πράξαντι μὲν ταῦτʼ ἐκτὸς αἰτίας κακῆς |1032 εἶναι, παρέντα δʼ—οὐκ ἐρῶ τὴν ζημίαν· |1033 τόξῳ γὰρ οὔτις πημάτων ἐφίξεται. |1034 καὶ νῦν ὁρᾶτέ μʼ, ὡς παρεσκευασμένος |1035 ξὺν τῷδε θαλλῷ καὶ στέφει προσίξομαι |1036 μεσόμφαλόν θʼ ἵδρυμα, Λοξίου πέδον, |1037 πυρός τε φέγγος ἄφθιτον κεκλημένον, |1038 φεύγων τόδʼ αἷμα κοινόν· οὐδʼ ἐφʼ ἑστίαν |1039 ἄλλην τραπέσθαι Λοξίας ἐφίετο. |1041 καὶ μαρτυρεῖν μὲν ὡς ἐπορσύνθη κακὰ |1040 τάδʼ ἐν χρόνῳ μοι πάντας Ἀργείους λέγω· |1042 ἐγὼ δʼ ἀλήτης τῆσδε γῆς ἀπόξενος, |1043 ζῶν καὶ τεθνηκὼς τάσδε κληδόνας λιπών. |1044 ἀλλʼ εὖ γʼ ἔπραξας, μηδʼ ἐπιζευχθῇς στόμα |1045 φήμῃ πονηρᾷ μηδʼ ἐπιγλωσσῶ κακά, |1046 ἐλευθερώσας πᾶσαν Ἀργείων πόλιν, |1047 δυοῖν δρακόντοιν εὐπετῶς τεμὼν κάρα. |1048 ἆ, ἆ. |1048b δμωαὶ γυναῖκες, αἵδε Γοργόνων δίκην |1049 φαιοχίτωνες καὶ πεπλεκτανημέναι |1050 πυκνοῖς δράκουσιν· οὐκέτʼ ἂν μείναιμʼ ἐγώ. |1051 τίνες σε δόξαι, φίλτατʼ ἀνθρώπων πατρί, |1052 στροβοῦσιν; ἴσχε, μὴ φόβου νικῶ πολύ. |1053 οὐκ εἰσὶ δόξαι τῶνδε πημάτων ἐμοί· |1054 σαφῶς γὰρ αἵδε μητρὸς ἔγκοτοι κύνες. |1055 ποταίνιον γὰρ αἷμά σοι χεροῖν ἔτι· |1056 ἐκ τῶνδέ τοι ταραγμὸς ἐς φρένας πίτνει. |1057 ἄναξ Ἄπολλον, αἵδε πληθύουσι δή, |1058 κἀξ ὀμμάτων στάζουσιν αἷμα δυσφιλές. |1059 εἷς σοὶ καθαρμός· Λοξίας δὲ προσθιγὼν |1060 ἐλεύθερόν σε τῶνδε πημάτων κτίσει. |1061 ὑμεῖς μὲν οὐχ ὁρᾶτε τάσδʼ, ἐγὼ δʼ ὁρῶ· |1062 ἐλαύνομαι δὲ κοὐκέτʼ ἂν μείναιμʼ ἐγώ. |1063 ἀλλʼ εὐτυχοίης, καί σʼ ἐποπτεύων πρόφρων |1064 θεὸς φυλάσσοι καιρίοισι συμφοραῖς. [anapests] |1065 ὅδε τοι μελάθροις τοῖς βασιλείοις |1066 τρίτος αὖ χειμὼν |1067 πνεύσας γονίας ἐτελέσθη. |1068 παιδοβόροι μὲν πρῶτον ὑπῆρξαν |1069 μόχθοι τάλανές τε Θυέστου· |1070 δεύτερον ἀνδρὸς βασίλεια πάθη· |1071 λουτροδάικτος δʼ ὤλετʼ Ἀχαιῶν |1072 πολέμαρχος ἀνήρ· |1073 νῦν δʼ αὖ τρίτος ἦλθέ ποθεν σωτήρ, |1074 ἢ μόρον εἴπω; |1075 ποῖ δῆτα κρανεῖ, ποῖ καταλήξει |1076 μετακοιμισθὲν μένος ἄτης;